\id 2CO    
\h 2 CORINTIOS
\mt Nde nchka tukwa kityi nu mda'an Palyu cha' tsaa se'en ndi'in nten 'in Jesucristo nde kichen Corinto 
\c 1
\p
\v 1 Palyu lkaǎn. Se'en ti ndi'iǐn nde re lo'o Timu ta'a msñian cha' 'in Krixtu. Nda'an ba kityi re cha' tsaa se'en ndi'in ta'a wan nde kichen Corinto kwa, 'wan nu ngi'ni tnun wan 'in Ndiose sa tlyu ti. Kwi' ngwaña'an tsaa kityi re se'en ndi'in nchga nten nu ndi'in cha' 'in lo'o Ndiose ña'aan lo yuu 'in Acaya. Wa mda Ndiose tñan 'ñaǎn cha' tsa'aǎn chkwiǐn' lo'o nten nchga la kichen tijyu' la. Ngwaña'an ngwa ti' Ndiose cha' kunan ne' nchga cha' nu ngwa'u Jesucristo.
\v 2 Nde lka cha' nchka ti' ba cha' ti ku'ni Ndiose Stian cha' su'we lo'o wan, cha' ku'ni Ni cha' tiin ti tyi'in kasiya 'wan chun' nu wa yten wan cha' 'in Jesucristo nu nka X'naan.
\s Ndaya' 'a Ndiose 'ñaan bra nu ndyukwaan  ka'an 'a cha' kuxi
\p
\v 3 Ku'niin tnuan 'in Ndiose nu lka Sti X'naan Jesucristo, cha' nchka t'nan ti' Ni 'ñaan, cha' lye 'a ndaya' Ni 'ñaan bra nu ndyukwaan ya ña'an ti cha' kuxi.
\v 4 Ndaya' 'a Ndiose 'ñaan ni, cha' nu chun' ndi'in la ka 'ñaan tayaan' 'in xka ta nten, bra nu tyukwa ne' cha' kuxi; sa ña'an nu ndaya' Ni 'ñaan, kwi' ngwaña'an ka tayaan' 'in xka ta nten bra kan'.
\v 5 Sa ña'an ngwa bra nu ti'í ti' nten 'in Krixtu ti s'ni, kwi' ngwaña'an lye 'a nda ne' nu ti'í 'ñaan ni, cha' nchkwian' cha' 'in Krixtu; kwi' ngwaña'an, ña'an ti lye 'a ndaya' Krixtu 'ñaan, bra nu ndijian nu ti'í.
\v 6 Ni siya tyijin ba nu ti'í, ni siya ti'í ti' nten 'wa, cha' ka su'we 'wan, kan' cha' ndijian nu ti'í kan'. Kwi' ngwaña'an lye la taya' Ndiose 'wan, lo'o kaja ña'an kulaa Ni wan 'in cha' kuxi bra kan'. Bra nu taya' Ni 'wa, cha' 'wan ku'ni Ni ngwaña'an, cha' kaja ña'an taya' ba 'wan; ya ña'an ti nu ti'í nu nchka 'wa, ti kwi' Ndiose ta Ni jwersa 'wan cha' ka talo wan nu ti'í kan'.
\v 7 Ndyu'wi 'a ti' ba 'wan. Jlyo ti' ba cha' sa ña'an nu nda ne' nu ti'í 'wa, ngwaña'an ta ne' nu ti'í 'wan; sa ña'an nu taya' Ni 'wa, ngwaña'an taya' Ni 'wan.
\p
\v 8 'Wan ta'a msñian cha' 'in Krixtu, nchka ti' ba cha' ka biya' ti' wan sa ña'an ngwa bra nu mdijin ba nu ti'í kichen se'en ndyaa ba lo yuu 'in Asia, cha' tlyu 'a cha' kuxi ndyukwa ba bra kan'. Ja jlyo ti' ba siya' ti sa ña'an tyijin lyo ba cha' kuxi kan'; mske' ti' ba cha' ja tyu'u 'a ba,
\v 9 cha' wa mdiya bra cha' nu kaja ba, mske' ti' ba. Ngwaña'an ngwa cha' su'we la ndyaa ña'an ti' ba 'in ska ti Ndiose, cha' nchka 'in Ni ku'ni Ni cha' tyu'u nten xiya' ni siya wa ngujwi ne'; kan' cha' nchka 'in Ni kulaa Ni 'ñaan. Ja mda'an 'a cha' tiyean cha' ti ykwiin' tian ka kulaan 'ñaan 'in cha' kuxi kan'.
\v 10 Wa ngulaa Ndiose 'wa bra kan', ja ngujwi ba, ni siya kuxi 'a ngwa cha' bra kan'; lo'o ngwaña'an, ti kulaa la Ni 'wa nde loo la. Wa msñi ba cha' 'in Ndiose, kan' cha' ndyaa ña'an ti' ba 'in Ni, cha' ña'an ti kulaa Ni 'wa.
\v 11 Lo'o ngwaña'an, ka taya' wan 'wa bra nu chkwi' wan lo'o Ndiose cha' 'ware. Kunan Ni cha' nu chkwi' wan lo'o Ni, cha' ka'an wan; bra kan' ku'ni Ni cha' ka su'we 'wa. Bra kan' ka'an wan tya wan xu'we 'in Ndiose cha' 'wa, cha' nu wa mdo'o laa ba 'in cha' kuxi.
\s Ja ngwa 'in Palyu tsaa yu kichen Corinto
\p
\v 12 Su'we 'a nka tiye ba cha' tyukwi ti tiye ba ndi'in cha' 'wa lo'o wan, nchkwi' ba xkwi' cha' nu ñi lo'o wan, ti kwi' sa ña'an nu ngi'ni ba lo'o xka ta nten; ngwaña'an nka tiye ba. Nchka 'wa ngi'ni ba ngwaña'an lo'o wan chun' lye 'a nchka t'nan ti' Ndiose 'ñaan xu'we ti; lo'o ja ngi'ni ba ngwaña'an chun' cha' nu ngwi'ya ke ti ba ti ykwi' ti ba.
\v 13-14 Sa kan' ti cha' ngwa'an ba lo kityi nu ngula se'en ndi'in wan ti kulo, ska cha' nu ka chkwi' wan, ska cha' nu ka ka biya' ti' wan. Ni siya ni ti, wa nchka biya' chin' ti' wan cha' kan', lo'o nchka ti' ba cha' ti ka biya' su'we la ti' wan cha' kan'. Lo'o bra nu tiya tsan nu kan X'naan Jesús xiya', bra kan' ka su'we ka tiye wan ña'an wan 'wa; ngwaña'an bare ka su'we ka tiye ba ña'an ba 'wan bra kan'.
\p
\v 15 Ngwaña'an ngwa tiyeěn, kan' cha' ngwa tiǎn' tsa'aǎn se'en ndi'in wan kulo ndukwa la. Ja chan tsa'aǎn na'aǎn 'wan tukwa ya', mda'an cha' tiyeěn nu ngwa xkan', cha' ka su'we kasiya 'wan.
\v 16 Kulo ndukwa la mda'an cha' tiyeěn tyijiǐn se'en ndi'in wan tuwiin se'en tsa'aǎn nde Macedonia. Bra nu wa yi'aǎn Macedonia kan', tyaǎn se'en ndi'in wan xiya', kan' ka taya' wan 'ñaǎn cha' tsa'aǎn tuwiin nde Judea bra kan'.
\v 17 Lo'o ni, ja yi'aǎn se'en ndi'in wan, bra kan' mske ti' wan cha' kuxi ti cha' mda'an tiyeěn. Lo'o ja su'we si chkwi' wan cha' lkaǎn ska nten nu tukwa cha' nchkwi'; cha' bra nu y'niǐn xu'weěn tuwiin 'ñaǎn kulo ndukwa la, ja mñi lyo'oǔn wan bra kan'.
\v 18 Jlyo ti' Ndiose cha' ja siya' nchkwi' ba tukwa cha' lo'o wan, ña'an ti' si nchkwi' ba cha' “ngwaña'an lka ska cha'”, lo'o chun' ndi'in la nchkwi' ba cha' “si'i ngwaña'an lka cha'”. Ja ngi'ni ba ngwaña'an,
\v 19 cha' Jesucristo nu lka ska ti Sñi' Ndiose ni, si'i tukwa cha' nda'an tiye Ni. Wa ykwi' ba cha' 'in Jesús se'en ndi'in wan, lo'oǔn wa ykwiǐn' lo'o wan, lo'o Silvano, lo'o Timu, wa ykwi' ba cha' 'in Ni. Lo'o ja siya' nchkwi' Ni cha' “si'i ngwaña'an lka ska cha'” si wa ykwi' Ni ska ya' cha' “ngwaña'an lka cha' kan'”. Ska ti Krixtu lka nu chañi cha' nchkwi' cha' nu ñi,
\v 20 ska ti Krixtu nu ngi'ni cha' chañi cha' ka nchga cha' nu nchkwi' Ndiose lo'oan; kan' cha' chabiya' 'in Jesucristo ka chkwian': “Amén, ngwaña'an ka sikwa”. Ngwaña'an chkwian' bra nu ku'ni tnuan 'in Ndiose.
\v 21 Ndiose lka nu y'ni lo'o ba cha' msñi su'we ba cha' 'in Krixtu, kwi' ngwaña'an y'ni Ni lo'o wan; wa y'ni Ni cha' lkaan nten 'in Ni.
\v 22 Sa ña'an lka si ykwi' Ni wa mstya Ni ska biya' nu 'in Ni chuan', ngwaña'an lka cha' bra nu nda Ni Tyi'i ykwi' Ni cha' nganun ni' kasiya 'ñaan. Nan wa ndla la nda Ni Tyi'i Ni 'ñaan, cha' ka 'ñaan ka biya' tian' cha' chañi ku'ni Ni lo'oan nchga cha' nu wa ndukwin Ni cha' ku'ni Ni.
\p
\v 23 Ja yi'aǎn kichen tyi wan nu ngwa xkan', cha' ja ngwa tiyeěn cha' kasin' tiǎn' 'wan. Chañi cha' chun' sa kan' ti cha', kan' cha' ja yi'aǎn se'en ndi'in wan bra kan'. Jlyo ti' Ndiose cha' kan'. Kan y'ya Ni kasiya 'ñaǎn si cha' kwiñi nchkwiǐn' re.
\v 24 Su'we la cha' ja ndukwa wan cha' 'in Ndiose chun' cha' nu wa ykwi' bare lo'o wan; ti ykwi' ti wan wa msñi su'we wan cha' 'in Jesús. Sa kan' ti cha', nchka 'a ti' ba taya' ba 'wan cha' ka su'we la ka tiye wan bra nu ngi'ni tnun wan 'in Ndiose. 
\c 2
\p
\v 1 Kan' cha' mske' tiǎn' cha' ja taǎn 'aǎn cha' xi'in ti' wan bra nu tsa'aǎn se'en ndi'in wan xiya'.
\v 2-3 Nde lka cha' kan'. Su'we 'a nka tiyeěn bra nu ña'aǎn sa ña'an nu ngi'ni wan. Xa nu msu'waǎn kityi kan', ngwa xi'in 'a ti' wan bra kan', kan' cha' ja nchka tiǎn' cha' ka xi'in ti' wan xiya'. Ja ngwa tiyeěn tsa'aǎn se'en ndi'in wan nu ngwa xkan'; ja chan ku'ni xi'in wan 'ñaǎn, mske' tiǎn'. Su'we la si kanun su'we la ka tiyeěn, cha' si su'we nka tiyeěn, lo'o 'wan su'we ti kanun tiye wan bra kan', mske' tiǎn'.
\v 4 Bra nu ngwa'aǎn kityi kan', ka'an 'a cha' mda'an tiyeěn bra kan'; ngwa xi'in 'a tiǎn' bra kan', ynaǎn 'aǎn si'ya wan. Lo'o ja ngwa tiǎn' cha' ka xi'in ti' wan lo'o kityi kan'; kwi' ngwa tiyeěn cha' ka biya' ti' wan cha' su'we 'a nka tiyeěn ña'aǎn 'wan, kan' cha' ngwa'aǎn kityi kan'.
\s Ku'ni wan cha' tlyu ti' 'in ne' kuxi kan'
\p
\v 5 Wa ngwa xi'in 'a ti' wan si'ya cha' kuxi nu y'ni yu kan'. Lo'o bra nu y'ni yu ngwaña'an, si'i skaǎn tiǎn nu ngwaǎn xi'in tiǎn' bra kan'; lo'o nchga wan ngwa xi'in chin' ti' wan si'ya cha' kuxi kan'. Lo'o ni, ja ndi'in 'a cha' kuxi kan', kan' cha' ja nka tiyeěn ku'niǐn tláǎn 'wan ni.
\v 6 Ya' la nu ti'í nu wa mda wan 'in yu kan', bra nu ndyo' ti'in wan sa tlyu ti bra kan', cha' katin ki'ya nu ndukwi yu kan',
\v 7 Kan' cha' ni, ku'ni wan cha' tlyu ti' 'in yu kan', ku'ni wan cha' ka tla' kasiya 'in yu, cha' ja kana' kasiya 'in yu kan', cha' xi'in 'a ti' yu.
\v 8 Njñan ba cha' tlyu ti' 'wan ni, cha' taya' wan chin' 'in yu kan', cha' ka biya' ti' yu cha' ña'an ti su'we nka tiye wan ña'an wan 'in yu.
\v 9 Wa ngwa'aǎn kityi kan', cha' tsaa se'en ndi'in wan, cha' ngwa tiǎn' tyija lyo cha' 'ñaǎn si chañi cha' 'wan cha' ku'ni wan sa ña'an nu niǐn 'wan bra kan'; ja jlyo tiǎn' nu ngwa xkan', si xlyaa wan ku'ni wan ngwaña'an.
\v 10 Lo'oǔn, ku'niǐn cha' tlyu ti' 'in yu kan', si wa y'ni wan cha' tlyu ti' 'in yu. Wa y'ni yu cha' kuxi kan' lo'o wan; lo'o na' ni, wa y'niǐn cha' tlyu ti' 'in yu kan' cha' 'wan, ni siya tijyu' ndi'iǐn, ni siya skaǎn tiǎn lo'o Krixtu se'en ndi'iǐn. Kan' cha' nde ña'an cha' tya'an tiye wan ni sikwa,
\v 11 cha' ja ta 'a wan chabiya' tyijin lyo kune' xa'an nu naan Satanás kan' 'ñaan; wa jlyo 'a tian' cha' sa 'a ngi'ni kune' xa'an kan' tñan.
\s Ka'an 'a cha' mda'an tiye Palyu xa nu mdi'in yu kichen Troas
\p
\v 12 Yi'aǎn kichen Troas ti ngwa xkan', yi'aǎn ytsaǎn' cha' 'in Jesús 'in ne' kichen kan'. Lo'o nde ña'an ngwa bra kan', cha' su'we 'a ynan ne' kichen kan' cha' 'in Ndiose, cha' wa nda ykwi' X'naan chabiya' 'ñaǎn cha' ku'niǐn tñan 'in Ni nde kichen kwa.
\v 13 Lo'o ja mdaloǔn se'en mdi'iǐn nde kwa, cha' ka'an 'a cha' mda'an tiyeěn, ni cha' lka ja ya kala Tito ta'a nda'an ba tñan se'en ndi'iǐn; kan' cha' bra ti mslaǎn' lo'o ne' kichen kan'. Bra kan' yi'aǎn tijyu' la se'en lka lo yuu 'in Macedonia.
\s Ka 'ñaan tyijin lyoan 'in nchga cha' kuxi  chun' tñan nu y'ni Krixtu
\p
\v 14-15 Lye 'a tyaan xu'we 'in Ndiose cha' ska ti cha' 'ñaan lo'o Krixtu. Sa ña'an lka si nda'aan lo'o Ndiose tuwiin sa tlyu ti cha' ngi'niin tnuan 'in Jesucristo, cha' wa mdijin lyo yu 'in nu kuxi. Ngwaña'an lo'o 'ñaan ta Ni se'en tya'aan laja nten kan', cha' lo'oan nchkwian' cha' 'in Krixtu se'en ndi'in ne' nchga kichen; ngitsaan' cha' 'in Ndiose se'en ndi'in nten, ni siya nchkwian' lo'o nten nu nchka 'a ti' tyo'o laa 'in cha' kuxi, ni siya nchkwian' lo'o xka ta nten nu ja nchka ti' kunan cha' su'we kan'. Ña'an ti' ska nan nu xi tyi'i nu ndyukwa 'a tyi'i nchga se'en, kwi' ngwaña'an lka tñan nu ngi'nian chabiya' 'in Ndiose. Ndiya 'a ti' Ndiose 'in ran, kwi' ngwaña'an ndiya ti' Ni tñan nu ngi'ni Krixtu lo chalyuu lo'oan.
\v 16 Nten nu chen 'a ña'an ngi'ni ni, ja siya' ndiya ti' ne' cha' nu nchkwian'; ja nchka biya' ti' ne' cha' kan', cha' wa kana' ti chalyuu 'in ne' si'ya cha' kuxi nu ngi'ni ne'. Lo'o nten nu nchka ti' tyo'o laa 'in cha' kuxi ni, xka ña'an ngi'ni ne' kan'; wa ndyaa ña'an ti' ne' kan' cha' nsu'wi xka chalyuu nu su'we la nu kaja 'in ne'. Nsu'wi 'a nten nu ja ka ku'ni tñan re; nu bare ni, ka 'wa ku'ni ba tñan re chabiya' 'in Ndiose.
\v 17 Si'i nan ngi'ni ba kanan lo'o cha' 'in Ndiose, si'i nan nxa'an ba cha' kan' sa ña'an nu ngi'ni xka ta nten; tyukwi ti tiye ba nchkwi' ba lo'o nten, ngi'ni ba ña'an ti' si ndi'in Ndiose se'en ndi'in ba, cha' Ndiose lka nu ngwa'an tñan 'wa cha' ku'ni ba tñan cha' 'in Krixtu. 
\c 3
\s Ska cha' kwi nu tka nchkwi' Ndiose lo'oan
\p
\v 1 Ja nchkwi' ba cha' siye' lo'o wan. Ja nchka ti' ba cha' chkwi' wan cha' tnun 'a nten nka ba. Bra nu nda'an ba se'en ndi'in wan, ja ndi'in cha' kwi'ya ba ska kityi nu nchkwi' cha' su'we ti ngi'ni ba tñan; kwi' ngwaña'an, bra nu tsaa ba xka se'en, ja n'ni cha' jñan ba ska kityi ngwaña'an 'wan.
\v 2 Ja ndi'in cha' kulo ba kityi nu ngwaña'an, chun' ka ña'an nten 'in ykwi' wan. Wa jlyo ti' ne' cha' chun' tñan nu y'ni bare ynan su'we wan cha' 'in Jesús, lo'o jlyo ti' ne' cha' su'we 'a nka tiye ba ña'an ba 'wan.
\v 3 Krixtu y'ni tñan kan' ni' kasiya 'wan, xa nu msu'wa Ni 'wa cha' ndyaa ba se'en ndi'in wan; kan' lka ska tñan nu y'ni Tyi'i ykwi' Ndiose nu nchga bra lu'u, kwi' lka tñan nu wa y'ni Ni ni' kasiya 'wan, nten chalyuu; ja ngwa tñan kan' chabiya' 'in ska cha' nu ngwa'an nten chun' ska kee kwaja' ti.
\p
\v 4 Ka chkwian' ngwaña'an, chun' tnun 'a kasiya 'ñaan cha' wa ndyaa ña'an tian' 'in Ndiose, cha' wa ytean cha' 'in Jesús.
\v 5 Nan ni, ja nchka 'ñaan ku'nian tñan 'in Ndiose siya' ti; kwi' Ndiose ngi'ni lo'oan cha' ka 'ñaan ku'nian nchga lo tñan nu ngi'nian cha' 'in Ni.
\v 6 Wa mdiya ska cha' kwi re nu tka nchkwi' Ndiose lo'oan, ska tñan nu ngi'ni Tyi'i Ndiose lka cha' re. Ja lka ran ña'an ti' ska tñan nu ndatsaa kityi kula kan' 'ñaan cha' ku'nian. Wa mdyii cha' 'ñaan siya' ti si'ya yuwe' nu ndi'in 'ñaan chun' tñan nu ndlo kityi kula kan' 'ñaan, lo'o ni, wa mjwi chalyuu kwi 'ñaan chun' tñan nu ngi'ni Tyi'i Ndiose.
\p
\v 7 Tñan 'in Ndiose nu ngulo Moisés 'in nten s'ni ni, chun' kee kwaja' mdukwa cha' kan'; ngwa'an Ni letra chun' kee kwaja' kan', cha' chkwi' nten lo cha' kan'. Laa 'a mdijin xaa 'in Ndiose nu ngwa s'ni kan', bra nu tka mda ti Ni cha' kula kan'; luwi 'a xaa ña'aan tloo yu kula Moisés, lo'o ja mdalo ta'a ne' Israel ña'an kwi'ya ne' tloo yu kula kan'. Bra ti mdijin cha' kan', sa ndijin ti yu'wi xaa kan' tloo yu bra kan'. Lo'o xaa luwi kan' mdiyan cha' kula kan' sikwa, ni siya ndyiji nten chalyuu si'ya yuwe' nu ndi'in 'in ne' chun' tñan nu ndlo cha' kula kan';
\v 8 lo'o ni, ¡tnun la cha' nchka bra nu chkwian' cha' 'in Jesús lo'o nten, chun' cha' ngi'ni Tyi'i ykwi' Ni tñan ni' kasiya 'in ne'!
\v 9 Tñan nu ndlo cha' kula kan' ni, kan' ngi'ni cha' ka biya' tian' ki'ya nu ndi'in 'ñaan; lo'o ndi'in cha' tyijian nu ti'í bra kan', ni siya luwi 'a xaa nu ngwa se'en ndukwa kiya' cha' kula kan'. Kan' cha' ni, ¡tnun la ti cha' nu 'in ykwi' Jesús, kwi' nu ngi'ni cha' nchka luwi kasiya 'ñaan cha' 'in Ndiose!
\v 10 Tnun la cha' su'we nchka se'en ndi'ian ni, kan' cha' ja su'we ña'an cha' kula kan' cha' 'ñaan, ni siya su'we 'a ña'an ngwa cha' kula kan' ti kulo.
\v 11 Chin' ti bra mdalo cha' kula kan', ni siya tnun 'a xaa ngwa bra nu ti ji tyii cha' kan'. Tyukwi tyempu nu ndijyan nde loo la, ja tyii cha' kwi nu tka mdyisnan ti ni; tnun la ti cha' re.
\p
\v 12 Kan' cha' ni, ja ntsean chkwian' lo'o nten, chun' jlyo tian' cha' su'we 'a lka cha' 'in Jesús nu nchkwian' re.
\v 13 Ja n'ni cha' chkun' ska te' tloan sa ña'an nu y'ni ayman Moisés nu ngwa s'ni, cha' ja ña'an ne' Israel tloo yu xa wa mdijin xaa kan' ngwaña'an ti.
\v 14-15 Wa ngwa tla 'a ke ne' Israel bra kan', cha' ja ngwa biya' ti' ne' cha' 'in Ndiose siya' ti. Ni siya chalyuu ni, kwi' ngwaña'an lka lo'o kityi cha' jo'o nu ngwa'an ayman Moisés, ti kwi' tñan nu ngulo Ndiose 'in nten nu ngwa s'ni lka kan'; xa nu chkwi' ne' judío lo kityi cha' jo'o kan', ja nchka ki'ya cha' kan' ke ne'. Siya' ti ka ki'ya cha' kan' ke ne' bra nu sten ne' cha' 'in Jesús; bra kan' kalaa ke ne' cha' kunan su'we ne' cha' 'in Ni.
\v 16 Bra nu stean cha' 'in ykwi' X'naan, bra kan' tsaa tii cha' nu tla kean.
\v 17 Se'en nu tka nchkwi' ti kityi re cha' 'in “X'naan”, kan' nchka ti' chkwi' cha' Tyi'i Ndiose lka nu kan'. Kwi' ngwaña'an, bra nu ka Tyi'i Ndiose X'naan, ja ka 'a 'in nten kuxi tatsaa la 'ñaan cha' ku'nian tñan nu kuxi bra kan'.
\v 18 Kwi' ngwaña'an lka cha' 'ñaan, ta'aan nu ndi'in cha' 'ñaan lo'o Jesús, chkan' tijyu' cha' wa nda X'naan ska xaa nu xu'wi tloan. Ja n'ni cha' chkun' ska te' tloan, cha' ti kwi' cha' tnun kan' lka nu ti ngi'ni tñan lo'oan, lo'o lye la ngi'ni cha' kan' tñan ni, cha' xa'an tyukwi ña'aan, cha' kaan sa ña'an lka Ndiose X'naan siya' ti. Nde se'en ndi'in ykwi' X'naan nu lka Tyi'i ykwi' Ni, nde kwa ndyo'o cha' tnun kan'. 
\c 4
\p
\v 1 Kan' cha' ja nchka ndaja ti' ba 'in tñan nu ngi'ni ba. Ti kwi' Ndiose lka nu wa nda tñan kan' 'wa, chun' nchka t'nan ti' Ni 'wa.
\v 2 Wa ngulaa ya' ba nchga cha' kuxi nu ngi'ni nten mnan ti, ya ña'an ti cha' nu njyu'u 'a ti' nten ku'ni ne'. Ja nñilyo'o ba 'in nten, kwi' ngwaña'an ja nxa'an ba cha' 'in Ndiose lo'o xka la cha', bra nu nchkwi' ba cha' kan' lo'o nten; su'we ti ndu'u ba nchga cha' nu 'in Jesús 'in ne'. Lo'o chañi 'a cha' kan', cha' ngwaña'an ka biya' ti' nchga nten cha' tyukwi ti tiye ba ngi'ni ba tñan 'in Ni, sa ña'an lka si nduun ba tloo ykwi' Ndiose.
\v 3 Lo'o si ndiya nten nu chkwi' cha' tukwi 'a ndyo'o cha' su'we 'in Jesús nu nchkwi' ba lo'o ne', ñi la ndyo'o cha' kan' cha' ngi'ni nten kan' tñan mna', kan' cha' ja nchka kunan su'we ne' cha' kan'.
\v 4 Ja xlyaa nten nu kuxi kan' xñi cha' kan' si'ya kune' xa'an nu nñi lyo'o 'in nten chalyuu. Ndukun' nu kuxi kan' cha' 'in ne' cha' ja kunan 'a ne' cha' su'we nu 'in Krixtu, kan' cha' ja nchka kanun xaa luwi 'in Krixtu ni' kasiya 'in ne' kan'. Tnun 'a cha' lka cha' nu 'in Krixtu; nchga cha' nu ndi'in 'in Ni, su'wa ndi'in cha' 'in Ni lo'o Ndiose Sti Ni nde se'en ndi'in Ni.
\v 5 Cha' nu nchkwi' ba lo'o nten ni, si'i cha' 'wa ti ykwi' ti ba nchkwi' ba. Nde ndiya cha' nu nchkwi' ba lo'o ne': Jesucristo lka X'nan tyukwi ña'aan nde ni' kwan, kwi' ngwaña'an nka Ni ndloo tyukwi ña'aan lo chalyuu. Kan' cha' nchkwi' ba cha' chabiya' 'in Jesús nu nka X'naan ngi'ni ba tñan cha' 'wan.
\v 6 Ti kwi' Ndiose lka nu msu'wa xaa luwi 'in Ni nu nganun ni' kasiya 'ñaan; kan' cha' ka biya' tian' nchga cha' tnun nu su'we 'a nu nsu'wi se'en ndi'in Ni, ti kwi' ti cha' ndii tian' cha' ngi'ni Ni tñan ni' kasiya 'ñaan bra nu stean cha' 'in Krixtu. Ti kwi' Ndiose lka nu ngulo tñan cha' xu'wi xaa la se'en ngwa chalyuu tla nu ngwa ti s'ni.
\s Nde ña'an tyi'ian lo chalyuu, chun' nu wa ytean cha' 'in Ndiose
\p
\v 7 Ni siya tnun 'a cha' su'we nu nsu'wi ni' kasiya 'ñaan ni nu nda Krixtu 'ñaan, ti lkaan nten chalyuu, si'i nan ngula la ti' kasiya 'ñaan ti ykwiin' tian. Ña'an ti' ska katun' yuu nu xi'i ndalo, ngwaña'an lkaan. Lo'o su'we la ngwaña'an, cha' bra kan' ka ka biya' tian' cha' ska ti Ndiose lka nu nchga tñan nchka 'in Ni; si'i cha' 'ñaan ti ykwiin' tian nu nchka la 'ñaan.
\v 8 Ti ndyuwa ti se'en nda'an ba, tlyu 'a tñan ndyukwa ba, lo'o ja nchka 'a 'in cha' kuxi tyijin lyo 'wa. Nduwe 'a ti' ba ndi'in ba chun' ka'an cha' tukwi nu ndijin ba; ni siya xi'in ti' ba, ja nchka ndaja ti' ba.
\v 9 Nsu'wi 'a nu nxuun lo'o 'wa, ti kwi' ti cha' ja lyiji ta'a su'we nsu'wi ba. Ni siya ndiya nten nu lye 'a ti'í ti' 'wa, ja nchka ku'ni tyii ne' 'wa.
\v 10 Nchga se'en nda'an ba lo chalyuu, ta'a ti ndijin ba nu ti'í; nsu'wi 'a nu ti'í nu ngi'ni nten lo'o ba, sa ña'an nu ti'í nu mdijin Krixtu xa nu yan yu lo chalyuu, bra nu yjwi nten 'in yu. Kan' cha' ni, ka jlyo ti' xka la nten cha' ti lu'u ykwi' Krixtu, xa nu ña'an ne' 'wa cha' ti lu'u ba.
\v 11 Nchga bra nu ndi'in ba lo chalyuu ndi'in 'a cha' kuxi nu ka kujwi 'wa, cha' ka'an 'a cha' tukwi ndyukwa ba nchga se'en nda'an ba lo tñan 'in Jesús. Ngwaña'an ka ña'an nten cha' ti ndi'in Jesús lo'o ba; kan' cha' ti nsu'wi ba chalyuu, ni siya ti'í ti ña'an nda'an ba.
\v 12 Nde ña'an ndi'in ba lo chalyuu, ña'an ti' si wa tyii ti cha' 'wa tyukwi ña'aan ba si'ya nu ti'í nu ndyukwa ba; lo'o 'wan ni, wa mjwi chalyuu nu ja tsaa tii 'a siya' ti 'wan chun' tñan nu ngi'ni bare.
\p
\v 13 Ndiya ska cha' nu ndukwa lo kityi kula se'en ykwi' ska nten cha' re: “Wa ndyaa ña'an tiǎn' cha' chañi lka cha' kan', kan' cha' nchkwiǐn' cha' nu ñi re lo'o xka ta nten” ndukwin ayman kan'. Kwi' ngwaña'an bare, nchkwi' ba cha' 'in Jesús cha' wa yten ba cha' 'in yu, bra nu msñi ba cha' kan'.
\v 14 Lo'o chañi cha' ndyaa ña'an ti' ba cha' ngulo Ndiose 'in Jesús nu nka X'naan nde se'en yu'wi yu mtsi' yu, kwi' ngwaña'an tyaan Ni xiya', kan y'ya Ni 'ñaan, cha' su'wa ti kalaan se'en ndi'in ykwi' Ni.
\v 15 Ndalo ba nchga nu ti'í nu ndyukwa ba cha' 'wan; lo'o ni, wa ndiya ka'an 'a ta'a nten wan nu wa mjwi xu'we nu nda Ndiose 'wan, kan' cha' chun' ndi'in la ka tyituun ka'an la ta'a nten wan nu tya xu'we 'in Ndiose cha' 'wa. Lo'o su'wa 'a ka ku'ni tnuan 'in ykwi' Ni bra kan'.
\p
\v 16 Kan' cha' ja nchka ndaja tian' 'in tñan nu ngi'nian cha' 'in Ndiose, ni siya wa tsaa tii ti ña'aan kunaan' ngwaña'an ti; lo'o ta'a ti ngi'ni Ndiose cha' chka su'we la kasiya 'ñaan.
\v 17 Ja tlyu lye nu ti'í nu ndyukwaan lo chalyuu re ni, lo'o chin' ti bra talo nu ti'í kan'; chun' ndi'in la, tnun 'a cha' su'we ndi'in cha' kaja 'ñaan nde se'en ndi'in Ndiose, lo'o ja tsaa tii 'a cha' su'we kan' siya' ti. Ja su'wa nu ti'í re lo'o cha' su'we nu ndi'in cha' kaja 'ñaan nde loo la.
\v 18 Ja nka tiyean 'in ska nan nu su'we ña'an ti, cha' ja talo siya' ti ya ña'an ti nan nu su'we ña'an kan'; nan nda'an naan ska cha' nu ja chkan' ña'aan bra ni, chun' ndi'in la ka chkan' cha' kan', ña'aan 'in ran bra kan'. Kan' lka cha' nu ja tsaa tii 'a 'ñaan siya' ti. 
\c 5
\p
\v 1 Jlyo tian' cha' ña'an ti' ska na'an kuxi ti, kwi' ngwaña'an nchka kunaan'; bra nu kajaan, tsaa tii kunaan' siya' ti bra kan'. Lo'o wa y'ni xu'we Ndiose xka na'an nu kaja 'ñaan, xka cha' lka kan'; Ndiose xa'an tyukwi ña'aan, lo'o ja tsaa tii 'a cha' 'ñaan siya' ti bra kan'. Nde se'en ndi'in Ndiose lka cha' kan', si'i nten chalyuu nu kwiñan na'an kan'.
\v 2 Ja su'we nka tiyean se'en ndi'ian lo chalyuu, cha' xkwi' ndijian nu ti'í. Chañi cha' nchka 'a tian' tyo'oan lo chalyuu re, cha' tyaan lyaan nde se'en ndi'in Ndiose, cha' ndla la kaja na'an kwi kan' 'ñaan bra kan'.
\v 3 Na'an kan' lka nu tukun' chun' tyukwi ña'aan, cha' kaja se'en tyi'in kasiya 'ñaan, cha' ja tyi'ian ngwaña'an ti.
\v 4 Nchka ndaja 'a tian' se'en ndi'ian lo chalyuu, cha' ndijiin 'aan nu ti'í. Si'i cha' nchka tian' kajaan bra ti, ni siya nchka la tian' cha' ka tiji tyukwi ña'aan; kan' lka tñan nu ku'ni Ndiose bra nu kalaan nde se'en ndi'in ykwi' Ni. Tyii cha' kuxi 'ñaan bra kan', tsaa tii ña'aan kunaan' nu ndi'in cha' kaja, cha' bra kan' ka tyija lyo xka chalyuu nu su'we la 'ñaan, nu ja tsaa tii 'a siya' ti.
\v 5 Wa lka y'ni xu'we Ndiose cha' ngwaña'an ka 'ñaan la bra kan'; wa mda Ni Tyi'i ykwi' Ni cha' kanun ni' kasiya 'ñaan ni. Kan' lka ska cha' nu nda Ni 'ñaan bra, cha' tyu'wi tian' nchga cha' nu ku'ni Ni lo'oan chun' ndi'in la.
\p
\v 6 Kan' cha' nchka ngula la ti' ni' kasiya 'ñaan, cha' x'ni tyi'in taan cha' ku'ni Ni ngwaña'an. Xa nu ti lu'uan lo chalyuu re, jlyo tian' cha' tijyu' 'a na'an tyian nde se'en ndi'in ykwi' X'naan, cha' ti ji kalaan nde kwa.
\v 7 X'ni ndaloan se'en ndi'ian lo chalyuu chun' ndyaa ña'an tian' cha' nu wa ykwi' Ni lo'oan, ni siya ja ya ña'aan sa ña'an ka cha' kan' chun' ndi'in la.
\v 8 Cha' nu ngula ti' ni' kasiya 'ñaan, kan' cha' nchka 'a tian' kulaa ti'ian chalyuu re se'en ndijian nu ti'í, cha' tsaan tyi'ian nde se'en ndi'in ykwi' X'naan;
\v 9 lo'o lye 'a ngi'nian nchga tñan nu nchka ti' X'naan cha' ka lo chalyuu, ni siya ti lu'uan, ni siya wa ngujwian.
\v 10 Ta'aan ndi'in cha' tsaan nde se'en ndukwa Krixtu cha' ku'ni biya' Ni 'ñaan. Lo'o bra kan' kaja cha' 'ñaan kwenta skaan, nchga cha' nu ndi'in cha' kaja 'ñaan chun' tñan nu wa y'nian kwenta skaan lo chalyuu, ni siya cha' nu su'we, ni siya cha' nu kuxi.
\s Sa ña'an ka katin ki'ya 'ñaan lo'o Ndiose
\p
\v 11 Chun' nduwe 'a ti' ba cha' ña'an Ndiose 'wa, kan' cha' nchkwi' 'a ba cha' 'in Jesús lo'o xka ta nten. Su'we 'a nsu'wi lyo Ndiose 'wa, sa ña'an ngi'ni skaa ba. Kwi' ngwaña'an 'wan, nchka ti' ba cha' su'we 'a xu'wi lyo wan 'wa;
\v 12 si'i cha' siye' ti ba lka cha' nchkwi' su'we ba cha' 'wa ti ykwi' ti ba. Nde lka cha' nu nchka ti' ba, cha' kaja ña'an xkwen wan 'in nten cha' 'wa, si su'we lka tiye wan ña'an wan 'wa, cha' ndiya nten la kwa nu ja nduwe ti' sa ña'an ku'ni ne' lo'o ta'a ne', nduwe la ti' ne' kan' sa ña'an ku'ni tnun nten 'in ykwi' ne'.
\v 13 Ja n'ni cha' ni siya nchkwi' ne' kan' cha' mna' cha' tiya ba; ja chan si lka ba ngwaña'an, chun' ngi'ni ba tñan 'in Ndiose. Ni siya ngwaña'an lka ba nxke' ti' ne' kan', tyukwi ti tiye ba ka taya' ba 'wan bra kan'.
\v 14 Wa jlyo tian' cha' ska ti ykwi' Krixtu ngujwi lo wsi si'ya nchga nten chalyuu; ña'an ti' si wa ngujwi nchga nten chalyuu si'ya ki'ya nu ndi'in 'in ne', kwi' ngwaña'an lka cha', bra nu ngujwi yu lo wsi kan'. Lo'o ni, jlyo tian' cha' su'we 'a nka tiye Krixtu ña'an Ni nchga nten chalyuu, kan' cha' ndi'in cha' chkwian' cha' 'in Jesús lo'o xka ta nten.
\v 15 Si'ya nchga nten, kan' cha' mslyaa Krixtu ngujwi lo wsi. Lo'o ni, nchka ti' Ni cha' ja tyi'in 'a nten chalyuu cha' 'in ne', ti ykwi' ti ne'; xkwi' cha' 'in Krixtu tyi'in ne' ni, cha' kan' nu wa ngujwi cha' 'in ne', kan' nu wa ndyu'u xiya' cha' 'in ne'.
\v 16 Kan' cha' ni, ja chkwian' cha' siye' lo'o xka ta nten si ja ndiya tian' sa ña'an ngi'ni ne' kan'. Nu ngwa ti s'ni, ti kwi' ti cha' ja ndiya ti' ba tñan nu y'ni ykwi' Krixtu; si'i nten nu tnun nchka lka yu, mske' ti' ba ti kulo la. Lo'o si'i ngwaña'an nxke' ti' ba cha' 'in Krixtu ni.
\v 17 Nde ña'an lka cha' kan'. Bra nu wa msñi ska nten cha' 'in Krixtu, bra kan' wa mxa'an cha' 'in yu kan'; wa mdyii cha' 'in yu lo'o cha' kuxi nu y'ni yu nu ngwa s'ni la. Wa mjwi xka chalyuu kwi 'in yu ni.
\p
\v 18 Ndiose lka nu y'ni nchga cha' kan', cha' ka su'we cha' 'ñaan lo'o Ni chun' tñan nu y'ni Krixtu. Lo'o ni, wa mda Ni tñan 'ñaan cha' chkwian' lo'o nten sa ña'an ka su'we cha' 'in ne' lo'o Ndiose.
\v 19 Chun' tñan nu y'ni Krixtu wa y'ni Ni cha' katin ki'ya nu ndukwi nten chalyuu tloo Ni, kan' cha' ni, ja chkwi' 'a Ni 'in cha' kuxi nu wa y'ni nten. Bra kan' wa nda Ni tñan 'ñaan, cha' ku'nian tñan kan' chabiya' 'in Ni, cha' chkwian' lo'o nten sa ña'an ka su'we cha' 'in ne' lo'o Ni;
\v 20 kan' cha' nda'an ba se'en ndi'in wan chabiya' 'in Krixtu. Nchkwi' ba lo'o wan ña'an ti' si Ndiose nniin Ni 'wan cha' kunan su'we wan cha' nu nchkwi' Krixtu. Nchkwi' ba lo'o wan chabiya' 'in Krixtu sikwa, cha' ku'ni wan cha' ka su'we cha' 'wan lo'o Ni.
\v 21 Ni siya ja ndukwi Krixtu ki'ya siya' ti, y'ni Ndiose cha' nganun ki'ya nu ndukwian chun' Krixtu. Xa wa nchka su'we cha' 'ñaan lo'o Krixtu, bra kan' ka luwi kasiya 'ñaan sa ña'an nu nchka ti' Ndiose cha' kaan. 
\c 6
\p
\v 1 Ta'a ngi'nian tñan 'in Ndiose lka wan; kan' cha' nchkwi' 'a ba lo'o wan, cha' ja tna' wan cha' su'we 'in Ndiose ngwa ti ña'an, ti kwi' cha' su'we kan' nu wa nda Ni cha' kanun ni' kasiya 'wan. Wa msñi wan cha' kan' ska ya', kan' cha' ti tukwa la wan cha' kan' ni.
\v 2 Nde ña'an nchkwi' ska cha' nu ndukwa lo kityi 'in Ndiose s'ni la:
\q Tukwaǎn cha' nchkwi' wan lo'oǔn ni, cha' su'we 'a bra nu ni cha' ku'niǐn xu'weěn 'in kasiya 'wan, ndukwin Ndiose.
\q Nchka tiǎn' kulaǎn 'wan, kan' cha' ndayaǎn' 'aǎn 'wan ni.
\m Ngwaña'an ndukwin Ndiose. Lo'o ni, wa mdiya bra cha' ku'ni xu'we wan kasiya 'wan, wa mdiya bra nu kulaa Ndiose 'wan 'in nchga cha' kuxi.
\p
\v 3 Ja nchka ti' ba cha' xtyi lyo'o nten 'wa chun' tñan nu ngi'ni ba, cha' lo'o 'in Ndiose xtyi lyo'o ne' bra kan' si ngwaña'an; kan' cha' ja ta ba chabiya' cha' tyo'o tukwa ska cha' kuxi se'en ndi'in ba, kwi' nu ku'ni cha' chkwi' kuxi ne' 'wa.
\v 4 Su'we la ka tiye ba ni siya ka biya' ti' nten cha' nda'an ba lo tñan 'in Ndiose, xa nu ña'an ne' tñan nu ngi'ni ba cha' 'in Ni. Ndalo ba nu ti'í nu ngi'ni nten lo'o ba, ni siya nsu'wi 'a nan nu lyiji 'wa, ni siya nsu'wi 'a cha' tukwi nu nchka 'wa.
\v 5 Wa mji'in ne' 'wa lo'o kwerta chkwan, kwi' ngwaña'an wa msu'wa ne' 'wa ni' ña'an chkwan; wa ndyo' ti'in nten kichen sa tlyu ti se'en ndi'in ba cha' ta ne' nu ti'í 'wa; kwi' ngwaña'an, ndiya bra mdijin 'a ya' ngi'ni ba tñan, ndiya bra ja nchka kaja' ba, ndiya bra lye 'a ngite' ti' ba.
\v 6 Lo'o ka biya' ti' nten cha' tñan 'in Ndiose lka nu nda'an ba xa nu ña'an ne': cha' wa ngwa luwi kasiya 'wa chun' tñan nu y'ni Jesús, cha' nu chañi 'a nchka biya' ti' ba cha' 'in Ndiose, cha' ndalo 'a ba 'in nten, cha' nganun Tyi'i Ndiose ni' kasiya 'wa, cha' chañi cha' su'we 'a nka tiye ba ña'an ba 'in ta'a nten ba,
\v 7 cha' nu ñi 'a cha' 'in Ndiose nu nchkwi' ba lo'o nten, cha' kwi' ngwaña'an tyukwi chabiya' 'in Ndiose ndi'in lo'o ba. Kan' cha' bra nu ña'an ne' sa ña'an nu ngi'ni ba, bra kan' ka biya' ti' ne' cha' tñan 'in Ndiose nda'an ba. Wa ngwa su'we kasiya 'wa ni cha' 'in Ndiose, kan' cha' wa mjwi jwersa 'wa cha' xuun ba lo'o kune' xa'an; kwi' ngwaña'an, ka tyijin lyo ba 'in nu kan', cha' ja ku'ni ñu'un nu kan' 'wa.
\v 8 Ndiya bra nu ngi'ni tnun nten 'wa; xka bra, nchkwi' ne' cha' ti'í 'wa. Nchkwi' ne' cha' su'we 'wa, kwi' ngwaña'an nchkwi' ne' cha' kuxi 'wa. Ndiya bra nchkwi' ne' cha' kwiñi 'a ba; xka bra, nchkwi' ne' cha' chañi 'a cha' nu nchkwi' ba.
\v 9 Ndiya bra ngi'ni ne' cha' nsu'wi lyo ne' 'wa; xka bra ngi'ni ne' cha' ja siya' nsu'wi lyo ne' 'wa. Ndiya bra nda'an ba se'en kuxi, se'en nu wa kaja ti ba, lo'o ti lu'u ba; lye 'a nda ne' nu ti'í 'wa, lo'o ja nchka kujwi ne' 'wa.
\v 10 Ni siya chañi cha' xi'in 'a ti' ba chun' nu ti'í nu ndijin ba, lo'o su'we lka tiye ba se'en ndi'in ba; chañi cha' ti'i 'a ba, lo'o ndyiji jwersa 'wa cha' taya' ba 'in ka'an nten. Ni siya ja ska nan nsu'wi 'wa siya' ti cha' ndi'in ba lo chalyuu; kwi' Ndiose nsu'wa ya' 'wa, nchga nan nsu'wi 'wa bra kan'.
\p
\v 11 'Wan yu Corinto ta'aan, su'we 'a nka tiye ba ña'an ba 'wan, kan' cha' ñi 'a nchkwi' ba lo'o wan, nchga cha' nu nda'an tiye ba.
\v 12 Si'i bare nu ja xlyaa ba taya' ba 'wan, kwi' 'wan nu kee' 'a nxlyaa wan taya' wan 'ware;
\v 13 kan' cha' ni, t'nan 'a nchkwiǐn' lo'o wan. Nde ña'an nka tiyeěn chkwiǐn' lo'o wan, ña'an ti' nchkwi' ska nten lo'o sñi' ne': Ku'ni wan cha' tlyu ti' 'wa, tyukwi ti tiye wan chka su'we ka tiye wan ña'an wan 'ware.
\s Kwi' Ndiose nu lu'u ndiya 'a ti' Ni 'ñaan  chun' nganun Tyi'i Ni ni' kasiya 'ñaan
\p
\v 14 Ja ndi'in 'a cha' su'we xu'wi wan lo'o nten nu ja ndi'in cha' 'in lo'o Ndiose, ja ka 'a ka wan ska ti lo'o ne' kan' siya' ti. Ja ka tyi'in cha' 'wan lo'o ne' kan', chun' nten nu wa ngwa luwi kasiya 'in cha' 'in Ndiose, ja ka 'a sten ne' cha' lo'o nten nu ja ndukwa tñan nu ndlo Ni siya' ti; kwi' ngwaña'an, nten nu nsu'wi xaa 'in Ndiose ni' kasiya 'in, ja ka tya'an ne' kan' lo'o nten nu ndiya la ti' tya'an se'en tla.
\v 15 Siya' ti ja ka su'wa cha' 'in Krixtu lo'o Satanás; kwi' ngwaña'an, nten nu wa msñi cha' 'in Krixtu, ja ka su'wa cha' 'in ne' lo'o nten nu ja xlyaa xñi cha' kan' siya' ti.
\v 16 Ña'an ti' 'wan nu ndiya 'a ti' Ndiose 'wan, ja ka su'wa cha' 'wan lo'o xka ta nten nu msñi cha' 'in ya ña'an ti jo'o; kwi' Ndiose nu lu'u ndiya 'a ti' 'ñaan chun' nganun Tyi'i Ni ni' kasiya 'ñaan. Nde ndiya ska cha' nu ykwi' Ndiose:
\q Tyi'iǐn nde se'en ndi'in nten kan', ndukwin Ni, kwi' ngwaña'an tya'aǎn lo'o nten kan'; kaǎn Ndiose cha' 'in ne' kan',
\q kan' cha' ka ne' kan' nten 'ñaǎn.
\m Ngwaña'an ndukwin Ni.
\v 17 Lo'o ngwaña'an ykwi' X'naan lo'oan lo xka kityi, nan nu wa msñian cha' 'in Ni. Nde ndiya cha' nu ykwi' Ni:
\q Tyo'o tsu' wan se'en ndi'in yu kuxi; ja ka su'wa 'a cha' 'wan lo'o yu kuxi kan', ja sten cha' 'wan lo'o cha' kuxi nu ngi'ni ne' kan'.
\q
\v 18 Bra kan' skaǎn' cha' lo'o wan, cha' kaǎn Sti wan bra kan';
\q kwi' ngwaña'an 'wan, ka wan sñiěn', ni siya nu kuna'an, ni siya yu ki'yu.
\m Ngwaña'an ndukwin Ndiose X'nan wan, nu nchka 'in Ni nchga tñan siya' ti. 
\c 7
\p
\v 1 'Wan ta'aan, nu su'we 'a nka tiyeěn ña'aǎn 'wan, kan' lka ska cha' nu wa mskan' Ndiose lo'oan, cha' ka 'ñaan chun' ndi'in la. Kan' cha' sikwa, ndi'in cha' kulaa yaan' nchga cha' kuxi cha' ja ka ñu'un kasiya 'ñaan, ja ka ñu'un tyukwi ña'aan. Kwi' ngwaña'an, lye 'a ku'nian tñan cha' kaan nten 'in Ndiose; nchga tñan nu ku'nian lo chalyuu, ku'nian 'in ran ña'an ti' si wa nduun Ndiose ña'an kwi'ya Ni 'ñaan.
\s Ngulaa ya' ne' Corinto cha' kuxi nu y'ni ne'
\p
\v 2 ¡Ku'ni xu'we tiye wan ña'an wan 'wa sikwa! Ja ska cha' kuxi y'ni ba lo'o wan, ja y'ni ñu'un ba chalyuu 'in ska wan siya' ti; ni ska yu ta'a wan, ja siya' mñi lyo'o ba 'wan.
\v 3 Ja nchka tiǎn' xtyaǎn ki'ya 'wan. Nde lka cha' nu nchka tiǎn' chkwiǐn' lo'o wan, sa ña'an nu ykwiǐn' lo'o wan nu ngwa xkan', cha' nchga bra su'we 'a nsu'wi tiyeěn ña'aǎn 'wan; ni siya kajaan, ni siya ti x'ni la xu'wian chalyuu.
\v 4 Su'we 'a nka tiyeěn xa nu ndyu'wi tiǎn' 'wan, kwi' ngwaña'an nka tiyeěn bra nu nchkwiǐn' cha' 'wan lo'o xka ta nten. Ña'an ti ngula ti' kasiya 'ñaǎn, ña'an ti su'we nka tiyeěn se'en ndi'iǐn, ni siya ndijin ba nchga nu ti'í kan'.
\p
\v 5 Ti bra nu ngala ba lo yuu 'in Macedonia ni, ja mjwi bra cha' xitña' ba siya' ti, cha' ti ndyuwa se'en tukwi 'a tñan nu ndyukwa ba. Nchga se'en mda'an ba lye 'a msuun ne' lo'o ba, kwi' ngwaña'an ytsen 'a kasiya 'wa.
\v 6 Lo'o Ndiose ni, lye la ndaya' Ni 'in nten nu xi'in ti' ndi'in; kan' cha' xka jwersa mda Ni 'wa cha' ka ngula la ti' kasiya 'wa, chun' ngala Tito nde re.
\v 7 Lo'o ngwaña'an, su'we 'a ykwi' yu lo'o ba cha' 'in tñan nu ngi'ni wan; ndukwin yu cha' nchka 'a ti' wan ña'an tloo wan 'wa xiya', kwi' ndukwin yu cha' njyu'u 'a ti' wan ndi'in wan si'ya cha' kuxi nu y'ni wan ti s'ni kan'; ndukwin yu cha' ja ndiya ti' wan cha' kuxi nu ykwi' ne' 'ñaǎn bra kan'. Chun' nchga cha' kan', su'we la nka tiyeěn se'en ndi'iǐn ni.
\p
\v 8 Chañi cha' nduwe tiǎn' cha' ngwa xi'in ti' wan la chin', chun' kityi nu msu'waǎn ti bra kan', ni siya ja njyu'u 'a tiǎn'; ja tya'an chuǔn' 'in cha' nu ngwa'aǎn bra kan', ni siya ndiya tsan nu njyu'u tiǎn' cha' ngwa'aǎn cha' kan'. Jlyo tiǎn' cha' ngwa xi'in ti' wan bra kan', ni siya xi'i ti mdalo cha' xi'in kan'.
\v 9 Lo'o ni, su'we 'a nka tiyeěn cha' wa mdukwa wan cha' kan', cha' wa ngwa xi'in chin' ti' wan, cha' bra kan' ngulaa ya' wan cha' kuxi nu y'ni wan bra kan'. Chañi cha' ngwa xi'in ti' wan ti xi'i, ni siya Ndiose ngwa ti' cha' ka su'we la cha' 'wan xa wa mdyii cha', kan' cha' ja ngwa ñu'un ji tiye wan ni chun' y'niǐn tláǎn 'wan bra kan'.
\v 10 Xa nu nduwe tian' 'in Ndiose cha' nu xi'in tian' ndi'ian, bra kan' kaja ña'an kulo chuan' cha' kuxi nu ngi'nian; tyo'o laan 'in cha' kuxi kan' bra kan', ja n'ni cha' ti tya'an chuan' laan bra kan'. Nten nu xi'in ti', nu ja nduwe ti' 'in Ndiose ni, ja xlyaa nten kan' chka jyu'u ti' 'in ki'ya nu ndukwi ne'; kana' chalyuu 'in ne' ngwaña'an ti bra kan'.
\v 11 Kuwe chin' ti' wan sa ña'an cha' nchka 'wan ni, ti nu y'niǐn cha' ngwa xi'in ti' wan nu ngwa bra kan': tyukwi ti tiye wan nda'an cha' tiye wan ni, cha' nchka 'a ti' wan tyo'o luwi wan 'in cha' kuxi kan'; sa jlu'we msin' ti' wan, sa jlu'we ytsen wan, kwi' ndyaa yu'wi 'a ti' wan 'ñaǎn bra kan', sa bra nu lye 'a ngwa ti' wan ña'an wan 'ñaǎn ykwiǐn' xiya'; bra ti ngwa ti' wan ta wan nu ti'í 'in yu nu y'ni cha' kuxi kan'. Ngwaña'an nchka biya' ti' ba cha' ja nganun yuwe' 'wan si'ya cha' kuxi kan'.
\v 12 Kan' cha' ngwa'aǎn kityi kan'; ja lye 'a mda'an cha' tiyeěn cha' 'in yu nu y'ni cha' kuxi kan', ti kwi' ti cha' ja lye mda'an cha' tiyeěn si'ya ne' nu ngwa kuxi 'in. Ngwa tiǎn' cha' kuwe su'we ti' wan 'in cha' nu wa ykwi' ba lo'o wan, ña'an ti' si nduun Ndiose ña'an kwi'ya Ni 'ñaan; kan' cha' ngwa'aǎn kityi kan' nu ndyaa se'en ndi'in wan.
\v 13 Lo'o ni, su'we la nka tiye ba cha' 'wan.
\p Su'we ti nka tiye ykwi' ba sikwa; kwi' ngwaña'an, su'we la nka tiye ba ni, cha' wa na'an ba 'in Tito, cha' su'we 'a ngwa tiye yu. Ta'a wan y'ni wan cha' tiin ti mdi'in kasiya 'in yu ngala yu ni.
\v 14 Xa nu ti mdi'in yu se'en ndi'iǐn, wa ytsaǎn' 'in yu cha' su'we 'a msñi wan cha' 'in Jesús, lo'o ngwaña'an chañi 'a cha' kan'. Nchga ya' nu ykwi' ba lo'o wan, chañi 'a ngwa cha' 'in Jesús nu ykwi' ba; kwi' ngwaña'an, chañi ngwa cha' nu ytsaǎn' 'in Tito, cha' su'we nka tiye ykwi' ba ña'an ba 'wan.
\v 15 Lo'o xka cha' nu su'we la ngwa tiye Tito ña'an yu 'wan ni, ska cha' nu ndyu'wi ti' yu 'in ta'a wan, cha' na'an yu cha' nduwe 'a ti' wan nnan wan nchga cha' nu ykwi' yu lo'o wan, lo'o ngwaña'an ja mxkwen 'a wan xka la cha' kuxi 'in yu bra kan'.
\v 16 Kwi' ngwaña'an lo'oǔn, su'we 'a nka tiyeěn ni, cha' ndyu'wi tiǎn' 'wan cha' ngwaña'an ngi'ni wan.  
\c 8
\s Nda ne' tñi cha' ka lomstan 'in Krixtu
\p
\v 1-2 'Wan ta'a msñian cha' 'in Krixtu, ni chkwiǐn' ska cha' lo'o wan cha' 'in ta'aan nu ndi'in cha' 'in Krixtu nu ndi'in lo yuu 'in Macedonia. Su'we 'a ngwa tiye ne' ta'aan nu ndi'in tyun kichen nde kwa; wa tlyu 'a lomstan mxo' ti'in ne' kan', sa ña'an lka si kuliya' 'a ne'. Ni siya lye 'a ngwa cha' 'in ne' kan' chun' mdijin 'a ne' nu ti'í, ti su'we 'a nka tiye ne' kan' bra kan'. Lo'o ngwa 'in ne' ta ne' lomstan kan' chun' ka'an 'a cha' su'we y'ni Ndiose lo'o ne' xu'we ti.
\v 3 Chañi 'a cha' nu chkwiǐn' lo'o wan cha' 'in ne' kan': Chun' cha' su'we ti tiye ne' kan', wa mda ne' nchga cha' su'we nu wa mjwi 'in ne'; kwi' lo'o mdaa ne' ti ka'an la cha' su'we, ni siya ja tyo'o skwa 'a nan nu nganun 'in ne', mske' ti' ba.
\v 4 Lye 'a mjñan ne' chabiya' 'wa cha' ta ne' lomstan kan', cha' taya' ne' 'in xka ta ta'a nten ne' nu wa msñi cha' 'in Jesús xka kichen se'en nu lyiji 'a nan 'in ne'.
\v 5 Lo'o ja mske' ti' ba cha' ta ne' ngwaña'an. Ti kulo tyukwi ti tiye ne' mslyaa ne' y'ni ne' sa ña'an nu nchka ti' Ndiose, lo'o y'ni ne' sa ña'an nu nka tiye ba cha' ku'ni ne' chabiya' 'in Ni.
\v 6 Kan' cha' wa ykwi' ba lo'o Tito kan', cha' ku'ni ji yu cha' xo' ti'in yu lomstan nu nda wan cha' su'we nsu'wi tiye wan, chun' wa s'ni chin' mdyisnan yu nxo' ti'in yu lomstan kan'.
\v 7 'Wan ni, su'we 'a ndyaa ña'an ti' wan 'in Ndiose, su'we 'a nchka 'wan kwa'u wan cha' 'in Ndiose 'in xka ta nten, su'we 'a nchka biya' ti' wan sa ña'an ndyo'o ska cha'; wa nchka 'a ti' wan taya' wan 'in nten, kwi' ngwaña'an su'we 'a nka tiye wan ña'an wan 'wa. Nchga lo tñan, su'we 'a nchka 'wan, nxke' ti' ba; kan' cha' bra ti ku'ni wan cha' xo' ti'in wan lomstan kan'.
\p
\v 8 Si'i nan ndloǔn tñan re 'wan; ni siya bra nu ña'an wan 'in xka ta ta'aan, cha' nchka 'a ti' ne' taya' ne' 'in ta'a nten ne' nu ngi'ni tnun 'in Krixtu, bra kan' ka ña'an biya' wan 'wan, ti ykwi' ti wan, si chañi ka cha' su'we nsu'wi tiye wan ña'an wan 'in ta'a nten wan.
\v 9 Wa jlyo ti' wan sa ña'an y'ni Jesucristo nu nka X'naan, cha' xkwi' su'we 'a y'ni Ni lo'o nten. Nchga nan siya' ti wa nsu'wi 'in Ni, lo'o mslyaa Ni ngwa Ni ska nten ti, ni siya ska nten ti'i, nu ja ska nan nsu'wi 'in siya' ti. Cha' 'wan, kan' cha' y'ni Jesús ngwaña'an, cha' chun' ndi'in la kaja nchga nan nu nsu'wi 'in Ndiose 'wan bra kan'.
\p
\v 10 Nde ña'an nxke' tiǎn' sikwa, cha' su'we la ni siya ku'ni ji lya wan tñan nu ngi'ni wan kan'. Ti yijan nan wa su'we 'a ngi'ni wan tñan kan'. Si'i cha' ngi'ni ti wan 'in ran, ni siya lo'o ndiya 'a ti' wan cha' ngi'ni wan ngwaña'an.
\v 11 Kan' cha' ni, ku'ni ji wan tñan kan', sa ya' nu tyii ran siya' ti. Su'we 'a ngwa tiye wan bra nu mdyisnan wan tñan kan', kwi' ngwaña'an su'we 'a si tyukwi ti tiye wan ku'ni ji wan 'in ran, sa ña'an cha' su'we nu nsu'wi 'in skaa wan ta wan lomstan kan'.
\v 12 Si chañi cha' su'we nka tiye ska nten ta yu ni siya chin' ti nan nu nsu'wi 'in yu, su'we ti xñi Ndiose lomstan kan' 'in yu, sa kwa ti nu nchka 'in yu bra kan'; ja nchka ti' Ni cha' ta yu ska lomstan si ja ska nan nsu'wi 'in yu.
\p
\v 13 Ja nchka tiǎn' cha' lyiji 'a nan 'wan, xa wa nda wan lomstan nu kaja nan nu lyiji 'in ne' ti'i ta'aan.
\v 14 Nde ña'an ndyo'o cha' re. Wa mdiya chin' cha' su'we nu wa mjwi 'wan ni ti, kan' cha' ndiya ña'an nu ka taya' wan 'in xka ta ta'aan nu lyiji 'a cha' 'in ne'. Chun' ndi'in la bra kan', si ndiya nan nu lyiji 'wan cha' tyijin yu'wi 'wan lo chalyuu, ja chan lo'o ne' kan' ka taya' ne' 'wan bra kan', cha' ngwaña'an ka su'wa cha' 'wan lo'o xka ta ta'a msñian cha' 'in Ndiose.
\v 15 Kwi' ngwaña'an ndukwa cha' re lo kityi 'in Ndiose: “Ni siya mdijin biya' mxo' ti'in ne' nan ku ne', ja ynun la nan 'in ne' siya' ti bra kan'; lo'o nten nu mxo' ti'in chin' ti nan kan', ja mliji 'a nan 'in ne' siya' ti xa wa mdyii cha' bra kan'.”
\s Cha' 'in Tito lo'o ta'a nda'an yu
\p
\v 16 Su'we 'a nka tiye ba xa nu nchkwi' ba lo'o Ndiose, cha' Tito, ta'a nda'an ba tñan kan', nchka 'a ti' yu taya' yu 'wan. Su'wa ti nka tiye yu lo'oǔn cha' ndaya' ba 'wan.
\v 17 Su'we 'a nka tiye yu cha' ku'ni yu tñan nu wa mdaǎn 'in yu; lo'o ni, nchka 'a ti' yu taya' yu 'wan, kan' cha' tsaa yu tsaa na'an yu 'wan xiya', cha' 'in ti yu.
\p
\v 18 Lo'o su'wa ba xka yu ta'a ndi'in cha' 'ñaan lo'o Krixtu, cha' kan lo'o Tito 'in yu nde se'en ndi'in wan. Wa lka nsu'wi lyo wan 'in yu kan', cha' su'we 'a nchkwi' ne' ta'aan cha' 'in yu la se'en ndyo' ti'in ne' cha' 'in Krixtu, cha' su'we 'a nchkwi' yu cha' 'in Krixtu lo'o ne'.
\v 19 Kwi' ngwaña'an, nten 'in Krixtu nu ndyo' ti'in nchga kichen wa ngulo suwi ne' 'in yu ta'aan kan', cha' tya'an yu lo'o ba, cha' taya' yu 'wa bra nu ngi'ni ba tñan cha' xo' ti'in ba lomstan nu nda ne'. Ngi'ni ba tñan kan' cha' 'in X'naan, cha' ngwaña'an ka ku'ni tnun ba 'in Ni; kwi' ngwaña'an, nxke' ti' ba cha' bra ti ku'ni wan tñan kan', chun' ndiya ti' wan ngi'ni wan ngwaña'an.
\v 20 Bra kan' ja ka chkwi' nten cha' mxo' ti'in ba tñi nu nda wan xu'we ti kan', cha' 'in ti ba.
\v 21 Nduwe ti' ba 'in ykwi' X'naan, lo'o nduwe ti' ba sa ña'an nu chkwi' nten chalyuu; kan' cha' nchka ti' ba cha' xkwi' luwi ti ku'ni ba nchga tñan.
\p
\v 22 Kwi' ngwaña'an, ti msu'wa ba xka yu ta'a ndi'in cha' 'ñaan lo'o Krixtu cha' su'wa ti kan yu lo'o ta'a tyukwaa yu ta'aan kan'. Ka'an 'a tñan wa y'ni yu cha' 'in X'naan, kan' cha' jlyo ti' ba cha' ndiya ti' yu ku'ni yu tñan lo'oǔn. Ni siya ni, ka biya' su'we ti' wan cha' ndyu'wi 'a ti' yu 'wan.
\v 23 Kan' cha' ni, si kunicha' nten 'wan sa ña'an tñan nda'an Tito, nde ña'an chkwi' wan lo'o ne': Ta'a nda'aǎn tñan lka yu re. Kwi' ngwaña'an xkwen wan 'in ne', cha' su'wa ngi'ni yu tñan lo'o bare cha' 'wan. Ti kwi' ti cha', si ndiya nu kunicha' 'wan, sa ña'an tñan nda'an xka yu ta'a nda'an Tito kan', xkwen wan 'in ne' bra kan': Nda'an ne' kan' cha' 'in nchga nten tyun kichen nu ndyaa ña'an ti' 'in Krixtu, cha' ku'ni tnun ne' 'in Krixtu.
\v 24 Kan' cha' chkwi' su'we wan lo'o ne' kan' sikwa, cha' ka biya' ti' xka ta yu ta'aan cha' chañi cha' su'we nka tiye wan ña'an wan 'in Tito lo'o ta'a nda'an yu. Lo'o ngwaña'an, su'we 'a ka tiye ba bra nu ña'an ba sa ña'an nu ngi'ni wan lo'o ne' kan'. Chun' ndi'in la kanen cha' kan' se'en ndi'in nchga ta nten nu ndi'in cha' 'in Krixtu kan'. 
\c 9
\s Lomstan nu nda wan cha' taya' wan 'in ne' ta'aan
\p
\v 1 Ja n'ni cha' chkwiǐn' laǎn lo'o wan cha' 'in lomstan nu nxo' ti'in wan cha' taya' wan 'in ne' ta'aan nu ndi'in cha' 'in lo'o Krixtu,
\v 2 cha' wa jlyo tiǎn' cha' su'we ti nka tiye wan ña'an wan 'in ne'. Ta'a ti nchkwiǐn' lo'o ne' Macedonia re, cha' su'we 'a ngi'ni wan, 'wan ne' Acaya; nchkwiǐn' lo'o ne' re cha' ndla 'a ti' wan, cha' ti yijan nan lye 'a y'ni wan tñan cha' xo' ti'in wan lomstan kan'. Lo'o ne' Macedonia re, wa ngwa su'we la tiye ne' xa wa na'an ne' cha' ndla 'a ngi'ni wan tñan kan'.
\v 3 Ni siya ngwaña'an, ti su'waǎn laǎn 'in yu ta'aan kan', cha' kan yu se'en ndi'in wan. Bra kan' ka ku'ni wan sa ña'an nu wa ytsaǎn' 'in ne' cha' ngi'ni wan, lo'o si'i cha' kwiñi ti nchkwiǐn' cha' 'wan sikwa. Kan' cha' xo' ti'in lya wan lomstan kan', cha' wa lka mdyii y'ni wan tñan kan' bra nu kalaǎn.
\v 4 Ja jlyo tiǎn' si lo'o chin' yu ta'aan nu lka ne' Macedonia re kaǎn lo'oǔn bra kan'. ¿Ni sa ña'an ku'niǐn bra kan', si ña'an ne' cha' ja ngi'ni ndla wan tñan kan' a? Ka jyu'u 'a ti' ba bra kan', cha' wa ykwi' ba lo'o ne' cha' su'we 'a ngi'ni wan; kwi' ngwaña'an 'wan, ka jyu'u 'a ti' wan bra kan'.
\v 5 Kan' cha' wa ykwiǐn' lo'o yu ta'aan re, cha' tsaa yu kulo ndukwa la; ti chun' ndi'in la chin' kaǎn. Taya' ne' 'wan cha' ku'ni xu'we wan lomstan, sa ña'aan nu ndukwin wan 'ñaǎn cha' ta wan; wa lka mxo' ti'in wan nan kan' bra nu kalaǎn. Kan' lka ska tñan su'we nu ngi'ni wan chun' cha' ndiya ti ti' wan; ja nka ran ska tñan nu mdatsaa 'a ba 'wan cha' ku'ni wan bra kan'.
\p
\v 6 Tyu'wi ti' wan sa ña'an nchka bra nu kataan ska nan kwiñi. Si chin' ti mta nan kwiñi kataan, chin' ti nan tyo'o loo ran bra kan'; si ka'an mta kataan, ka'an la nan tyo'o loo ran bra kan'.
\v 7 Ti kwi' ti cha', bra nu taan tñi xu'we ti 'in nten, ndi'in cha' jñiin tian' sa ña'an nan taan kwenta skaan. Ja su'we si cha' kwiñi ti taan 'in ran, kwi' ja su'we si cha' jwersa ti taan 'in ran; ndiya la ti' Ndiose si cha' su'we nka tiyean taan 'in ran.
\v 8 Lo'o nchka 'a 'in Ndiose taya' Ni 'wan lo'o ka'an la lo nan, cha' kaja nchga nan nu lyiji 'wan; ti kaja la ña'an taya' wan 'in xka ta nten lo'o nchga tñan su'we bra kan'.
\v 9 Nde nchkwi' ska cha' nu ndukwa lo kityi kula:
\q Ska nten nu nnan su'we cha' 'in Ndiose, ka'an 'a cha' su'we nda yu 'in yu ti'i ta'a yu;
\q lo'o nchga bra tyu'wi ti' nten tñan su'we nu wa y'ni yu.
\m
\v 10 Ti kwi' Ndiose nu nda nan kwiñi kataan, ti kwi' Ni nu nda Ni nan kuan, lo'o ti kwi' Ni ta Ni nchga nan nu lyiji 'wan cha' ka ska tñan su'we; lo'o taya' Ni 'wan cha' su'we ti tsaa to'o ska cha' su'we nu ngi'ni wan, cha' ka su'we ka tiye nten.
\v 11 Ngwaña'an kaja nchga nan 'wan, lo'o ti kaja chin' cha' su'we 'wan nu ta wan 'in xka ta nten. Xa wa mdyii cha', bra kan' su'we 'a tya ne' xu'we 'in Ndiose chun' lomstan nu wa nda wan, kwi' nu tsaa lo'o ba nde se'en ndi'in ne' ti'i ta'aan kan'.
\v 12 Xa wa nda wan nan nu taya' 'in ne' ta'aan ni, bra kan' kaja nan nu lyiji cha' tyijin yu'wi 'in ne' kan' chalyuu; kwi' ngwaña'an, su'we 'a ka tiye ne' kan'. Bra nu chkwi' ne' lo'o Ndiose,
\v 13 ku'ni tnun ne' 'in Ni bra kan'. Kwi' ngwaña'an, bra nu ña'an ne' 'wan, lo'o ña'an ne' tñan nu wa y'ni wan cha' ta wan cha' su'we 'in ne', bra kan' ka biya' ti' ne' cha' chañi cha' ndukwa wan cha' su'we nu wa ykwi' Krixtu lo'o wan. Ku'ni tnun ne' 'in Ndiose bra kan', chun' su'we 'a nka tiye wan nda wan lomstan 'in ne' kan', ti kwi' sa ña'an nu nda wan 'in nchga nten.
\v 14 Bra kan' chkwi' ne' lo'o Ndiose cha' 'wan, cha' su'we 'a ka tiye ne' ña'an ne' 'wan; tyu'wi ti' ne' cha' ka'an 'a cha' su'we ngi'ni Ndiose lo'o nten chun' lomstan nu wa nda wan 'in ne' kan'.
\v 15 ¡Tyaan xu'we 'in Ndiose sikwa, cha' tnun 'a cha' su'we nu wa nda Ni 'ñaan, lo'o ja nchka 'a ka biya' tian' cha' kan'! 
\c 10
\s Ndiose nda chabiya' la se'en ngi'ni Palyu tñan
\p
\v 1 Palyu lkaǎn nu nchkwiǐn' lo'o wan ni. Ku'ni wan cha' tlyu ti' 'ñaǎn, ni siya chkwiǐn' ñi lo'o wan. Ndiya nten nu ndukwin cha' ntseěn 'aǎn chkwiǐn' lo'o wan xa nu ndi'iǐn se'en ndi'in wan, lo'o ngi'niǐn tláǎn 'aǎn 'wan xa nu ndi'iǐn tijyu'; ngwaña'an ndukwin ne'. Tyaa yu'wi ti' wan sikwa, cha' xkwi' su'we ti nka tiye Krixtu ña'an Ni 'ñaan.
\v 2 Kan' cha' ni, t'nan nchkwiǐn' lo'o wan, cha' ja ku'ni 'a wan cha' kuxi nu wa y'ni wan, cha' ja ndi'in cha' ku'niǐn tláǎn 'wan xiya' bra nu kalaǎn se'en ndi'in wan. Chañi cha' ka 'ñaǎn ku'niǐn tláǎn 'in nten, kwi' nten nu wa mñi lyo'o 'wan cha' kuxi 'a tñan ngi'ni ba.
\v 3-4 Chañi 'a cha' lkaan nten chalyuu, ni siya ja ngi'nian sa ña'an nu ngi'ni xka ta nten; nxuan lo'o cha' kuxi, ni siya si'i sa ña'an nu nxuun nten chalyuu. Ndiose ni, nchka 'a 'in Ni, kan' lka nu nsu'wa jwersa 'ñaan cha' ka tyijiin lyoan 'in nchga cha' kuxi nu nxuun lo'oan.
\v 5 Ndi'in cha' tyijiin lyoan 'in nchga cha' kwiñi nu nchkwi' nten cha' 'in Krixtu; kwi' ngwaña'an, ndi'in cha' tyijiin lyoan 'in nchga cha' kuxi nu ndiya 'a ti' nten, nu ndatsaa 'a 'in ne' cha' ja xñi ne' cha' 'in Ndiose. Bra nu wa ngulaa ya' ne' 'in nchga cha' kuxi kan', bra kan' ka ku'nian cha' tukwa ne' nchga cha' nu nchkwi' Krixtu.
\v 6 Kan' cha' lo'o 'wan ni, ndi'in cha' tukwa ji wan nchga cha' nu 'in Krixtu, cha' chun' ndi'in la ka kulaa ti'in ba 'in nchga nten nu ja xlyaa tukwa cha' kan' siya' ti.
\p
\v 7 Ndla 'a ti' wan nchkwi' wan cha' 'wa. Su'we la si kuwe chin' ti' wan ti kulo la sa ña'an ndyo'o skaa cha' nu ñi; nchga nten nu nxke' ti' cha' lka ne' cha' 'in Krixtu, n'ni cha' kuwe su'we la ti' ne' kan', cha' ka biya' ti' ne' bra kan', cha' lo'o bare lka ba cha' 'in Krixtu.
\v 8 Wa ykwiǐn' 'aǎn lo'o wan cha' wa nda ykwi' X'naan chabiya' 'wa, cha' tya'an ba se'en ndi'in wan; lo'o ngwaña'an, ja njyu'u 'a tiǎn' ni siya chkwiǐn' ngwaña'an lo'o wan. Wa lo'o chabiya' 'in Ndiose nda'an ba, cha' ka sten la wan cha' 'in Ni; ja nchka ti' ba ku'ni ñu'un ji ba kasiya 'wan.
\v 9 Ja nchka tiǎn' cha' chkwi' wan cha' mxitseěn 'wan lo'o kityi nu ngwa'aǎn ndyaa se'en ndi'in wan.
\v 10 Ndiya nu nchkwi' lo'o wan: Tnun 'a cha' nchkwi' Palyu kwa, tlá 'a yu 'ñaan, xa nu ndi'in yu tijyu'. Nchkwi' yu cha' ti ndijyan yu nde se'en ndi'ian, ndukwin ne' 'wan, lo'o ja nchka 'in yu kulo su'we yu tñan 'ñaan xa nu ndi'in yu lo'oan; ja nnaan siya' ti cha' nu nchkwi' yu, ndukwin ne' kan' bra kan'.
\v 11 Su'we si ka biya' ti' ne' kan' sikwa. Ska ti ña'an ndyo'o cha' nu nda'an ba lo kityi xa nu ndi'in ba tijyu'; kwi' ngwaña'an ku'ni ba lo'o wan xa nu tyi'in ba se'en ndi'in wan.
\p
\v 12 Lo'o bare, ja ka su'wa cha' 'wa lo'o nten kan', nxke' ti' ba; siye' 'a ne' kan' lo'o ta'a ne', ja nsu'wi 'a cha' tiya 'in ne' kan'. Ti ykwi' ti ne' wa y'ni biya' ne' 'in ne', kan' cha' nxke' ti' ne' cha' su'we 'a ngi'ni ykwi' ne'.
\v 13 Lo'o ja nchka ti' ba cha' chkwi' siye' ne' cha' 'wa chun' ska tñan nu wa y'ni xka ta nten; su'we ni siya chkwi' ne' cha' 'in tñan nu ngi'ni ti ba, cha' Ndiose lka nu nda chabiya' la se'en ku'ni skaa ba tñan. Kwi' ngwaña'an, mda Ni chabiya' cha' ngala ba nde se'en ndi'in wan, ne' Corinto.
\v 14 Kan' cha' ni, wa lo'o chabiya' 'in Ndiose yaa ba nde se'en ndi'in wan ti kulo, cha' ykwi' ba cha' su'we nu ndi'in 'in Krixtu lo'o wan; lo'o ja mdijin ta ba chabiya' nu wa mda Ni 'wa.
\v 15 Ja nchkwi' ba cha' 'in tñan nu ngi'ni xka ta nten chabiya' 'in Ndiose; nchkwi' ba cha' 'in sa kwa ti tñan nu nda Ni chabiya' cha' ku'ni ykwi' ba nde se'en ndi'in wan. Sa kan' ti cha' nchka ti' ba, cha' xñi su'we la wan cha' 'in Ndiose chun' ndi'in la, cha' bra kan' ka'an la tñan ka ku'ni ba lo'o wan, ti kwi' ña'an nu wa nda Ni chabiya' cha' ku'ni ba.
\v 16 Chun' ndi'in la kaja ña'an chkwi' ba cha' su'we nu ndi'in 'in Krixtu lo'o ne' tyun kichen nu ndi'in tijyu' la, nde loo la se'en ndi'in wan. Kan' cha' ja n'ni cha' chkwi' ba cha' 'in tñan nu ngi'ni xka ta nten cha' 'in Krixtu sikwa.
\p
\v 17 Si ndi'in cha' chkwian' ska cha', su'we la chkwian' cha' 'in ska tñan nu ngi'ni Ndiose sikwa.
\v 18 Ja nxñi Ndiose cha' nu nchkwi' nten nu nchkwi' 'a cha' 'in tñan nu ngi'ni ne', ti ykwi' ti ne'; xñi Ni cha' nchkwi' nchga nten nu chkwi' Ni cha' su'we ngi'ni ne' tñan. 
\c 11
\s Nten nu kwiñi ti ndu'u cha' 'in Jesús 'in ne'
\p
\v 1 Lo'o ni, ku'ni wan cha' tlyu ti' 'ñaǎn, talo wan chin' 'ñaǎn, ni siya chkwiǐn' 'aǎn cha' 'ñaǎn, ti ykwiǐn' tiǎn, ña'an ti' nchkwi' ska nten nu mna' cha' tiya 'in.
\v 2 Ndiya 'a tiǎn' 'wan. Lo'o ja chan kwi' ngwaña'an nka tiye Ndiose ña'an Ni 'wan. Wa mskaǎn' cha' lo'o Ni cha' taǎn 'wan cha' ka wan nten 'in Krixtu, nten nu luwi kasiya 'in, ña'an ti' ska nu kuna'an kune' nu kaja kwilyo'o lo'o ska ti yu ki'yu;
\v 3 nduwe 'a tiǎn' si wa ñu'un ti kasiya 'wan. Ti ngwa s'ni ni, wa mñi lyo'o kunan 'in Eva, cha' nchka 'a nchkwi' kune' xa'an kan'. Lo'o ja nchka tiǎn' cha' ñu'un cha' 'wan lo'o Krixtu ngwaña'an, ja nchka tiǎn' cha' kwiñi lyo'o kune' xa'an 'wan chun' cha' nu nchkwi' xka ta nten nu kwiñi; su'we 'a si tyukwi ti tiye wan msñi wan cha' 'in Krixtu.
\v 4 Lo'o si'i ngwaña'an lka rsun nu mjwi 'ñaǎn. Ndiya nu nchkwi' cha' su'we 'a nchkwi' wan lo'o ya ña'an ti nten nu ndijyan se'en ndi'in wan, ni siya xka ña'an cha' nchkwi' ne' cha' 'in Jesús; ja su'wa cha' nu nchkwi' ne' kan' lo'o cha' nu wa ytsa' ba 'wan nu ngwa ti kulo. Kwi' ngwaña'an, nnan wan xka la cha' kan', si'i cha' su'we 'in Jesús nu ndlaa 'ñaan 'in nchga cha' kuxi lka cha' kan', ti kwi' si'i cha' nu wa ykwi' ba lo'o wan nu ngwa ti kulo. Kan' cha' xka tyi'i nsu'wi ni' kasiya 'wan ni, lo'o si'i Tyi'i Ndiose lka kan'.
\v 5 Si'i nan kuxi la cha' nu nchkwiǐn', kwi' si'i nan su'we la cha' nu nchkwi' xka ta nten kan'; nan wa mñi lyo'o ne' 'wan se'en nchkwi' ne' cha' lka ne' tñan 'in Krixtu, kan' cha' xka ña'an cha' nda'an tiye wan ni.
\v 6 Ni siya ja nchka 'ñaǎn chkwiǐn' ñi lo'o nten, nxke' ti' wan, wa mdyii y'niin xa'aǎn su'we cha' 'in Jesús kan'; kwi' ngwaña'an, wa jlyo ti' wan cha' chañi 'a cha' nu nchkwiǐn' re, cha' tyun ya' wa na'an wan 'ñaǎn, nchga tñan nu wa y'niǐn.
\p
\v 7 Ja siya' msñiǐn liya' 'wan xa wa mdi'iǐn ngwa'uǔn cha' su'we 'in Ndiose 'wan. Wa mslyaǎn cha' ka ti'i la ña'an 'ñaǎn cha' 'wan, cha' ka kanun su'we la ka tiye ykwi' wan. ¿Ta ja su'we cha' y'niǐn ngwaña'an, nxke' ti' wan a?
\v 8 Nchga ta ne' ta'aan nu wa msñi cha' 'in Jesucristo nchga la kichen, kan' lka nu mdaya' 'ñaǎn lo'o tñi tyukwi tyempu nu y'niǐn tñan se'en ndi'in wan; wa msñiǐn liya' 'in ne' kan', cha' ngwaña'an ngwa 'ñaǎn tayaǎn' 'wan bra kan'.
\v 9 Tyukwi tyempu nu mdi'iǐn lo'o wan, bra nu mnanjo'o tñi 'ñaǎn, ja siya' mjñaǎn 'wan cha' taya' wan 'ñaǎn bra kan'; ne' Macedonia, ta'a msñian cha' 'in Krixtu, wa yan lo'o ne' kan' nchga nan nu lyiji chin' 'ñaǎn. Ngwaña'an y'niǐn nu ngwa bra kan', cha' ja taǎn ka'an 'a tñan 'wan, nka tiyeěn. Kwi' ngwaña'an ti ku'niǐn chun' ndi'in la, nka tiyeěn.
\v 10 Su'we la nka tiyeěn cha' ngwaña'an nchka 'ñaǎn. Kan' cha' ni, la se'en ndya'aǎn tyukwi lo yuu 'in Grecia, ja nchka tiǎn' cha' ta ne' liya' 'ñaǎn; wa jlyo ti' wan cha' chañi 'a cha' nu nchkwiǐn' re, chun' lkaǎn nten 'in Krixtu.
\v 11 Cha' su'we nka tiyeěn ña'aǎn 'wan, kan' cha' nchkwiǐn' lo'o wan ngwaña'an; wa jlyo ti' Ndiose cha' su'we 'a nka tiyeěn ña'aǎn 'wan.
\p
\v 12 Lo'o ti ku'niǐn laǎn sa ña'an nu ngi'niǐn kaǎn ni, cha' ja kaja ña'an chkwi' xka ta nten kan' cha' ngi'ni ne' ti kwi' tñan nu ngi'ni ba.
\v 13 Ja chañi cha' ngi'ni ne' kan' tñan 'in Krixtu; kwiñi ne' kan', ka'an 'a cha' kwiñi nchkwi' ne' kan' lo'o nten nchga se'en nda'an ne'. Xka ña'an ngi'ni ne' kan' lo'o nten, cha' ngwaña'an ka kwiñi lyo'o ne' 'in nten kan', cha' lka ne' nten su'we, cha' ngi'ni ne' tñan 'in Krixtu.
\v 14 Lo'o ja tlyu tñan cha' kwiñi lyo'o ne' kan' 'in nten ngwaña'an, cha' lo'o kune' xa'an nu naan Satanás nchka 'in kwiñi lyo'o 'in nten, bra nu xka ña'an ngi'ni yu tloo nten, cha' chkwi' ne' cha' lka yu ska angajle nu mdo'o lo xaa 'in Ndiose; lo'o ja chañi cha' kan'.
\v 15 Kwi' ngwaña'an nchka lo'o nten nu ngi'ni tñan 'in kune' xa'an kan'; ja tlyu tñan cha' ku'ni ne' cha' xka ña'an tloo ne', sa ña'an nu kwiñi lyo'o ne' kan' 'in nten 'in Krixtu ta'a wan cha' ngi'ni ne' tñan 'in Ndiose. Bra nu tiya bra cha' ka biya' 'in ne' lo'o Ndiose, la bra kan' tyijin ne' kan' nu ti'í sa ña'an nu ndi'in cha' ka 'in ne' si'ya cha' kuxi nu wa y'ni ne' xa wa yan ne' lo chalyuu.
\s Cha' ti'í nu nchka 'in Palyu nchga se'en mda'an yu
\p
\v 16 Xiya' chkwiǐn' lo'o wan; ni ska wan ja ndi'in cha' chkwi' wan cha' mna' cha' tiya 'ñaǎn. Ni siya nxke' ti' wan cha' ja nsu'wi 'a cha' tiya 'ñaǎn, ta wan chin' chabiya' 'ñaǎn chkwiǐn' cha' 'in nchga cha' tukwi nu wa ngwa 'ñaǎn.
\v 17 Ja ndiya tiǎn' chkwiǐn' cha' re, cha' si'i cha' nu wa nda Ndiose cha' chkwiǐn' lo'o nten lka cha' re, nxke' tiǎn'. Chañi cha' wa mna' cha' tiya 'ñaǎn, nxke' tiǎn', cha' lye 'a nchkwiǐn' cha' 'ñaǎn, ti ykwiǐn' tiǎn.
\v 18 Lo'o ja nduwe tiǎn' ni siya chkwiǐn' chin' ni, cha' nsu'wi 'a nten nu nchkwi' 'a cha' ka tnun la ykwi' ne', nka tiye ne'; kan' cha' lo'oǔn nsu'wi chabiya' 'ñaǎn chkwiǐn' chin', nxke' tiǎn'.
\v 19 ¡'Wan, nchka 'a 'wan! ¡Kan' cha' su'we 'a ndalo wan 'in nten nu ya ña'an ti ngi'ni!
\v 20 ¡Ndalo 'a wan 'in nchga yu kan' nu ngi'ni cha' kuxi, ni siya lye 'a ndlo ne' tñan 'wan, ni siya ngi'ni ne' kanan 'wan, ni siya ndatsaa 'a ne' 'wan cha' ku'ni wan cha' kuxi, ni siya lye 'a ngi'ni siye' ne' lo'o wan, ni siya ta'a ti nykwan' ne' tloo wan; ndalo 'a wan 'in ne' kan'!
\v 21 Lo'o bra kan' ndukwin wan cha' ja ngulo su'we ba tñan 'wan. ¡Chañi cha' ja ngi'ni tlá ba 'wan sa ña'an nu ngi'ni nten kan'!
\p ¡Su'we sikwa! Chkwiǐn' chin' cha' 'ñaǎn, ti ykwiǐn' tiǎn, ni siya ja nsu'wi cha' tiya 'ñaǎn cha' chkwiǐn' cha' re; si'i nten kwiñi ti kan' nu ka chkwi' cha' 'in ykwi' ne'.
\v 22 Su'wa ti lkaǎn yu hebreo lo'o ne' kan'; kwi' ngwaña'an, su'wa ti lkaǎn yu israel lo'o ne' kan', cha' ngwaña'an ska ti ayman Abraham ngwa ne' kula 'wa lo'o ne' kan'.
\v 23 Ndukwin ne' kan', cha' tñan 'in Krixtu ngi'ni ne'; ti kwi' tñan kan' ngi'niǐn. Ni siya ja nsu'wi 'a cha' tiya 'ñaǎn cha' chkwiǐn' ngwaña'an, su'we la tñan ngi'niǐn ke tñan nu ngi'ni ne' kan'; lye la y'niǐn tñan, ta'a ti msu'wa ne' 'ñaǎn ni' ña'an chkwan, tyun ya' wa mji'in ne' 'ñaǎn lo'o kijin, ta'a ti nchka cha' wa kajaǎn tiǎn cha' 'in Krixtu.
\v 24 Kalatyii ndukwa kaa ya' njyi'in ne' 'in yu kuxi chabiya' 'in ne' judío ni, kwi' ngwaña'an ki'yu ya' mji'in ne' judío 'ñaǎn sa kwa ya'.
\v 25 Lo'o ngwaña'an, snan ya' mji'in ne' romano yka chuǔn', kwi' ska ya' nguun ne' kee 'ñaǎn cha' ngwa ti' ne' kujwi ne' 'ñaǎn. Snan ya' ngwa kuxi 'in yka na'an se'en mda'aǎn, yten ran ni' tyi'a; wa mdiya ska ya' nganuǔn nxkwatyaǎn lo tyi'a ska tsan lo'o ska tla.
\v 26 Ka'an 'a se'en mda'aǎn tuwiin se'en nu ja chan ka kuxi 'ñaǎn; wa mdiya bra nu ngunuǔn jlu'we tyi'a xa wa ndukwi ylaa tyi'a chku; kwi' ngwaña'an mdi'in 'a nten nu ku'ni kunan tuwiin; ni siya ne' judío ta'aǎn, ni siya ne' xka la'a tsu', ngwa ti' ne' ku'ni ne' cha' kuxi lo'oǔn; kwi' ngwaña'an, ni siya mda'aǎn nde kichen tnun, ni siya mda'aǎn nde ni' kixin', ni siya nsu'wiǐn lo tyi'a tujo'o, ndyukwaan 'aǎn cha' kuxi; lo'o ngwaña'an, wa mdiya nten nu su'wa nda'an lo'o nten 'in Jesucristo, lo'o cha' kwiñi ngi'ni ne' kan', cha' kuxi nda'an tiye ne' ña'an ne' 'ñaǎn.
\v 27 Wa mdiya ka'an 'a tñan 'ñaǎn, ka'an 'a cha' tukwi mdijiǐn nde se'en mda'aǎn, tyun 'a ya' ja ngwa kajaǎn'; wa mdiya bra lye 'a mte' tiǎn', kwi' ngwityi tiǎn'; wa mdiya tsan nu ja ska nan mjwi kuǔn siya' ti, wa mdiya tsan nu lye 'a ngwa tlya' tiǎn' cha' ja mjwi te' kuǔn'. Nchga cha' kan' mdijiǐn nde se'en mda'aǎn.
\p
\v 28 Lo'o ngwaña'an, ti ndi'in la cha' tukwi 'ñaǎn; nchga tsan nduwe 'a tiǎn' sa ña'an nchka 'in nchga ta nten 'in Krixtu nchga la kichen, lye 'a nduwe tiǎn' ni' kasiya 'ñaǎn cha' nu ndyu'wi tiǎn' 'in ne' kan'.
\v 29 Xa nu na'an 'a ti' ska yu ta'aan, bra kan' lo'o na' nchka na'an tiǎn' cha' 'in yu kan'; xa nu ndi'in ki'ya 'in ska yu kan', kwi' ngwaña'an na', xi'in 'a tiǎn' bra kan'.
\v 30 Bra nu nchkwiǐn' 'ñaǎn ti ykwiǐn' tiǎn, su'we la si chkwiǐn' cha' 'in nchga cha' nu ngi'ni cha' ja ndaloǔn se'en ndi'iǐn skaǎn tiǎn.
\v 31 Ndiose Sti Jesucristo nu nka X'naan, nchga bra ndi'in cha' ku'niin tnuan 'in Ni: ti kwi' Ni jlyo ti' Ni cha' si'i cha' kwiñi nchkwiǐn' lo'o wan.
\v 32 Nde ña'an ngwa 'ñaǎn xa wa mdi'iǐn nde kichen Damasco. Nu lka x'nan kichen kwa, tñan 'in ree Aretas lka yu; kwi' ngulo tñan 'in skan 'in yu cha' tyuun yu kwan tyi'iin tu'wa lo'o kichen kan', cha' xñi tuun yu 'ñaǎn, cha' tyaa lo'o yu 'ñaǎn ni' ña'an chkwan bra kan'.
\v 33 Lo'o xka tuwiin msñiǐn yi'aǎn bra kan'; mdiyan lo'o ne' ta'aan ska xkuwi se'en xu'wiǐn ni' ran, lo'o bra kan' yojo' ne' 'ñaǎn ña'aan lo'o xkuwi tuna'an ventana cha' ngwi'ya ne' 'ñaǎn lo'o ti chun' lo'o kichen kan' nde liya'. Ngwaña'an ngwa cha' ngulaǎn 'in x'nan kichen kan'. 
\c 12
\s Ngwa'u tloo Ndiose 'in Palyu laja sla yu
\p
\v 1 Ndi'in cha' ti chkwiǐn' la chin' cha' 'ñaǎn, ti ykwiǐn' tiǎn, ni siya ja su'we chkwiǐn' ngwaña'an lo'o xka nten. Kitsaǎn' ska cha' 'wan sa ña'an cha' nu ykwi' slaǎn. Laja slaǎn ngwa'u tloo ykwi' X'naan 'ñaǎn, ykwi' Ni ska cha' lo'oǔn bra kan'.
\v 2 Nten nu wa msñi cha' 'in Krixtu lkaǎn; lo'o ni, wa nsu'wi tii lkwa yijan ti bra nu mgii tiǎn' cha' nu yan y'ya Ndiose 'ñaǎn, cha' bra kan' yi'aǎn la xka chalyuu nde kwan la, nde se'en ndi'in Ndiose. Ja jlyo tiǎn' si chañi cha' yi'aǎn la kwa, o ta laja slaǎn tiǎn ngwa'u tloo Ni 'ñaǎn; ska ti Ndiose jlyo ti'.
\v 3 Xiya' chkwiǐn' lo'o wan cha' ja jlyo tiǎn' si chañi cha' ndyaa lo'o lye Ndiose 'ñaǎn nde chalyuu kan' se'en su'we 'a ña'an nchga nan, ta si nan mske' ti tiǎn' cha' nu yi'aǎn la kan'; ska ti Ndiose jlyo ti'.
\v 4 La kan' ynaǎn ka'an 'a cha' nu ja nchka chkwiǐn' 'in ran, kwi' ngwaña'an ja ndyiji ña'an chkwi' nten chalyuu 'in cha' kan' siya' ti.
\v 5 Su'we si chkwiǐn' chin' lo'o wan, cha' ngwaña'an ngwa 'ñaǎn ti bra kan'; ja su'we chkwiǐn' xka la cha' 'ñaǎn, ti ykwiǐn' tiǎn, ska ti si chkwiǐn' chin' cha' 'in nchga cha' se'en nu ja ndaloǔn se'en ndi'iǐn ykwiǐn' tiǎn.
\v 6 Si'i nan wa mna' cha' tiya 'ñaǎn nchkwiǐn' cha' 'ñaǎn ti ykwiǐn' tiǎn. Chañi lka cha' nu nchkwiǐn' lo'o wan ni. Ja nchka tiǎn' chkwiǐn' ka'an 'a cha' lo'o wan, chun' ja nchka tiǎn' cha' ku'ni tnun ne' 'ñaǎn si ja ya ña'an ne' sa ña'an ngi'niǐn, ta ja ya kunan ne' cha' nchkwiǐn'. Xa wa nsu'wi lyo ne' 'ñaǎn, kan' ka chkwi' su'we ne' cha' 'ñaǎn bra kan', nka tiyeěn.
\p
\v 7 Bra kan' mda Ndiose chabiya' cha' nu mdijiǐn chin' nu ti'í, cha' ja ka siyeěn' lye 'a lo'o nten chun' cha' tnun nu wa na'aǎn laja slaǎn nde ni' kwan; mda Ni ska lo nu ti'í 'ñaǎn nu ti'í 'a ngi'ni lo'oǔn. Wa lka ran ña'an ti' ska kiche' tnun nu yojo' ti'í laja kunaǎn', ña'an ti' si ndi'ian ya' kune' xa'an cha' ta yu nu ti'í 'ñaan, cha' lye 'a ngi'ni nu ti'í kan' lo'oǔn, cha' ja ka siyeěn' lo'o xka ta nten.
\v 8 Wa mda'a snan ya' ykwiǐn' lo'o Ndiose; t'nan 'a ykwiǐn' lo'o Ni cha' tyo'o tsu' nu ti'í kan' 'ñaǎn.
\v 9 Lo'o nde ña'an mxkwen Ni 'ñaǎn bra kan': “Sa kan' ti cha' ndi'in cha' tyu'wi tii', cha' ka'an xu'we ngi'niǐn lo'oo ngwaña'an ti. Kwi' lye la ka ku'niǐn tñan lo'oo, bra nu ja nsu'wi 'a jwersa 'iin” ndukwin Ni 'ñaǎn. Kan' cha' ni, su'we 'a nka tiyeěn ni siya ja nchka 'ñaǎn lye, cha' bra kan' ka ku'ni ykwi' Krixtu tñan ni' kasiya 'ñaǎn cha' ka 'ñaǎn.
\v 10 Kan' cha' su'we nka tiyeěn, ni siya ja nchka 'ñaǎn siya' ti, ni siya ka'an 'a cha' ti'í chkwi' nten 'ñaǎn, ni siya ti'í 'a 'ñaǎn, ni siya lye 'a ti'í ti' nten 'ñaǎn, ni siya tukwi 'a tñan se'en ndi'iǐn cha' 'in Krixtu; ti kwi' ña'an bra nu ja nchka 'ñaǎn siya' ti, ti kwi' bra kan' su'we la ndyiji jwersa 'ñaǎn, kwi' jwersa nu nda Krixtu.
\s Mda'an 'a cha' tiye Palyu sa ña'an nchka 'in ne' Corinto  nu msñi cha' 'in Krixtu
\p
\v 11 'Wan y'ni lo'o wan 'ñaǎn cha' nchkwiǐn' cha' mna' re, ni siya ndi'in cha' chkwi' su'we wan 'ñaǎn. Ndiya 'a ti' wan ngi'ni wan tñan 'in ne' kwiñi kan'; ni siya xke' ti' wan cha' chin' la tñan ngi'niǐn lo'o ka'an la tñan ngi'ni yu kwiñi kan'.
\v 12 Wa mdaloǔn nchga cha' kuxi nu ngwa 'ñaǎn, chun' ngi'niǐn tñan nu wa mda X'naan 'ñaǎn, cha' nduǔn nchkwiǐn' cha' 'in Ni lo'o wan. Wa jlyo ti' wan cha' Ndiose lka nu mda tñan re 'ñaǎn, xa wa na'an wan cha' tnun nu wa y'ni Ni nde se'en ndi'in wan laja nu mdi'iǐn lo'o wan, cha' ngwaña'an kuwe la ti' wan 'in Ni. Ja nchka ku'ni nten chalyuu tñan kan' ngwaña'an ti.
\v 13 Sa kan' ti cha', ja mjñaǎn 'wan cha' taya' wan 'ñaǎn, kan' cha' nxke' ti' wan cha' chen nka tiyeěn ña'aǎn 'wan; su'we la ngi'niǐn lo'o ne' xka kichen, nxke' ti' wan. ¡Ku'ni wan chin' cha' tlyu ti' 'ñaǎn, cha' ja njñaǎn cha' kan' 'wan sikwa!
\p
\v 14 Wa tyaǎn tiǎn nde se'en ndi'in wan xiya'. Nde mda'a snan ya' ndijyaǎn se'en ndi'in wan ni, ti kwi' ti cha' ja ndijyaǎn cha' kuloǔn ska tñan tukwi 'wan. Siya' ti nchka tiǎn' cha' ka wan nten 'in Ndiose; ja nka tiyeěn cha' nu jñaǎn tñi 'wan. Ña'an ti' nten nu nsu'wi sñi', nu ta liya' loo nchga nan nu lyiji 'in sñi'; si'i sñi' ne' ta liya' kan'.
\v 15 Kwi' ngwaña'an na', su'we 'a nka tiyeěn ni siya kwijiǐn jiǐn ti chin' ti nan nu nsu'wi 'ñaǎn, ni siya ka na'an tiǎn' siya' ti, cha' kaja ña'an tayaǎn' chin' 'wan. Kan' cha' ja su'we si chin' ti nka tiye wan ña'an wan 'ñaǎn, lo'o su'we 'a nka tiyeěn ña'aǎn 'wan.
\p
\v 16 Ja ka'an 'a tñi ngwiji wan loǔn bra kan', lo'o ti nsu'wi chin' ne' ta'a wan nu nchkwi' cha' wa mñi lyo'oǔn 'wan cha' ku'niǐn kanan 'wan.
\v 17 ¿Ni sa ña'an ngwa cha' kan' a? Ja nguloǔn tñan 'in nten nu ndijyan se'en ndi'in wan cha' xñi ne' liya' 'wan cha' 'ñaǎn, si'i ngwaña'an nka tiyeěn.
\v 18 Chañi cha' ykwiǐn' lo'o Tito kan', cha' tsaa yu se'en ndi'in wan nu ngwa xkan'; ndyaa yu lo'o kwi' xka yu ta'a msñian cha' 'in Jesús bra kan'. Lo'o ja y'ni Tito kanan 'wan; ska ti ña'an ngi'ni yu tñan sa ña'an nu ngi'niǐn tñan, ska ti cha' nsu'wi tiye ba ta'a tyukwaa ba.
\p
\v 19 Si'i nan nchka ti' ba cha' tyo'o luwi cha' 'wa lo'o wan; wa lka nduwe ti' ba cha' ña'an Ndiose 'wa, kan' cha' sa kwa ti cha' nchkwi' ba, sa ña'an cha' nu nchka ti' Krixtu cha' chkwi' ba lo'o wan. Kwi' ngwaña'an, nchga tñan nu ngi'ni ba, ngi'ni ba tñan kan' cha' taya' ba 'wan, cha' su'we 'a nka tiye ba ña'an ba 'wan ta'a su'we ndi'in ba.
\v 20 Ka'an chin' cha' nda'an tiyeěn cha' 'wan ni. Bra nu tiyaǎn se'en ndi'in wan, ¿ta tyija lyo cha' 'wan 'ñaǎn cha' xka ña'an ngi'ni wan, si'i sa ña'an nu ngwa'uǔn 'wan ti kulo a? ¿Ni sa ña'an ku'niǐn lo'o wan bra kan' a? Ka biya' ti' wan bra kan', cha' ka 'ñaǎn ku'niǐn tláǎn chin' 'wan, ni siya ja ndiya ti' wan cha' ku'niǐn ngwaña'an. Nduwe 'a tiǎn' cha' ndiya chin' ne' ta'a wan nu ti nxuun ne' lo'o ta'a ne', nu liye' 'a ti' ne' 'in ta'a ne', nu msin' 'a ti' ne' 'in ta'a ne', nu ska lo ti cha' 'in ne' nduwe ti' ne'; kwi' ngwaña'an, nchkwi' 'a ne' kwentu 'in ta'a ne', nchkwi' lyo'o ne' 'in ta'a ne', lye 'a ngi'ni siye' ne' lo'o ta'a ne'. Nchga lo cha' kuxi kan' ngi'ni ne' chun' ja nduwe ti' ne' 'in Ndiose siya' ti.
\v 21 Bra nu tiyaǎn xiya' se'en ndi'in wan, si tyija lyo cha' 'ñaǎn cha' ngwaña'an ngi'ni wan, ja chan lye 'a ka jyu'u tiǎn' cha' 'in Ndiose nu nka X'naan, bra nu ña'aǎn cha' kuxi nu ngi'ni 'wan. Ja chan kunaǎn 'aǎn bra kan' cha' 'wan; ka xi'in 'a tiǎn' cha' 'in nten nu y'ni cha' kuxi kan' ti ngwa s'ni la, cha' ja ya ka jyu'u ti' ne' kan' 'in cha' kuxi nu y'ni ne', cha' nsu'wi 'a cha' kuxi nu ngi'ni ne' lo'o ta'a ne', cha' ja luwi kasiya 'in ne' kan' siya' ti. 
\c 13
\s Ñi nchkwi' Palyu lo'o ne' bra wa tyii nda'an yu kityi
\p
\v 1 Wa mda'a snan ya' ni, cha' ndijyaǎn na'aǎn 'wan. Nde ña'an ku'niǐn ni: ndi'in cha' ku'niǐn biyaǎn' 'in nchga nten nu ngi'ni cha' kuxi; ni siya xkwi' lo'o tukwa snan nten nu wa na'an cha' kuxi kan', ngwaña'an ku'ni biyaǎn' 'in ne'.
\v 2 Kan' lka cha' nu nchkwiǐn' lo'o ta'a wan ne' Corinto nu wa msñi cha' 'in Jesucristo, kwi' ngwaña'an nchkwiǐn' lo'o nchga wan nde kwa nu y'ni cha' kuxi ti ngwa s'ni la. Bra nu yi'aǎn nde kwa nu nka tyukwa ya' ni, wa ytsaǎn' cha' re 'wan bra kan'. Lo'o ni, cha' ndi'iǐn tijyu', ti chkwiǐn' cha' re lo'o wan xiya': Ja tukwin nu ngi'ni cha' kuxi tyo'o laa 'ñaǎn bra nu tiyaǎn xiya'; ku'niǐn biyaǎn' 'in nchga ne' kan'.
\v 3 Lo'o bra kan' ka biya' ti' wan cha' ti kwi' Krixtu lka nu nda chabiya' cha' chkwiǐn'; lo'o si'i chin' ti tñan nchka 'in Krixtu xa nu ta Ni nu ti'í 'wan, ni siya lye la ku'ni Ni tñan cha' kaja nu ti'í 'wan bra kan'.
\v 4 Chañi 'a cha' ngwa na'an ti' Krixtu bra nu yjwi ne' 'in yu, bra nu mstya ne' 'in yu lo wsi; chun' ndi'in la tnun 'a cha' y'ni Ndiose Sti yu cha' 'in yu, kan' cha' ti lu'u Ni ni. Ña'an ti' Krixtu, cha' ngwa na'an 'a ti' yu bra nu yjwi ne' 'in yu, kwi' ngwaña'an bare, na'an chin' ti' ba bra nu ngulo ba tñan 'wan nu ngwa xkan'; lo'o ni, ka biya' ti' wan cha' ti lu'u ba chin', cha' ti kwi' chabiya' 'in Ndiose nda'an lo'o ba ndijyan ba, ti kwi' ta'a chabiya' nu ndiya 'in Krixtu.
\p
\v 5 ¡Ku'ni biya' wan 'wan, ti ykwi' ti wan sikwa! Ngwaña'an ka biya' ti' wan si chañi cha' ti nganun tyukwi cha' 'in Jesucristo ni' kasiya 'wan. Ndi'in cha' tyaa yu'wi ti' wan cha' nganun Tyi'i Jesucristo ni' kasiya 'in ska wan; ska ti si cha' kwiñi ti msñi wan cha' 'in Ndiose, ja kanun Ni lo'o wan bra kan'.
\v 6 Lo'o ngwaña'an nchka tiǎn' cha' ka biya' ti' wan cha' ja lka ba nu kwiñi.
\v 7 Ta'a ti njñan ba cha' 'in Ndiose, cha' ja ta Ni chabiya' cha' ku'ni wan cha' kuxi; nchka ti' ba cha' su'wa ya' Ni 'wan cha' ka su'we ka tiye wan se'en ndi'in wan lo chalyuu. Ja nduwe ti' ba, ni siya ndiya nten nu ndukwin cha' ja nchka 'wa siya' ti.
\v 8 Ja n'ni cha' ku'ni tlá ba 'wan si ti nganun su'we cha' 'in Ni ni' kasiya 'wan, ti kwi' cha' 'in Jesús nu wa msñi wan. Bra nu ku'ni ñu'un wan 'in cha' nu 'in Jesús kan', bra kan' ku'ni tlá ba 'wan.
\v 9 Bra nu su'we 'a nganun tsaa cha' 'in Ndiose ni' kasiya 'wan, su'we 'a nka tiye ba bra kan', ni siya chin' ti cha' nchka 'in ykwi' ba; kan' cha' njñan ba cha' 'in Ndiose cha' 'wan, cha' xñi ñi tiye wan cha' 'in Ni.
\v 10 Kan' cha' nda'aǎn kityi re, ni siya tijyu' 'a ndi'in wan, cha' ja ku'niǐn tláǎn 'wan bra nu tiyaǎn kichen tyi wan. Chañi cha' wa nda ykwi' X'naan chabiya' 'ñaǎn, cha' kaja ña'an kanun tsaa la cha' 'in Ni ni' kasiya 'wan, lo'o ja nsu'wi chabiya' 'ñaǎn cha' ku'niǐn ñu'un jiǐn 'wan.
\p
\v 11 'Wan ta'a msñian cha' 'in Jesucristo, nslaǎn' lo'o wan ni, xa wa tyii ti kwa'aǎn kityi re. Ku'ni ji wan sa ña'an nu ndi'in cha' ku'ni wan cha' lka wan nten 'in Ndiose. Kunan su'we wan nchga cha' nu nchkwiǐn' lo kityi re. Ka su'wa ka tiye wan lo'o xka ta ta'a nten wan. Su'we ti tyi'in wan lo'o nchga nten. Lo'o bra kan' ti kwi' Ndiose, tyi'in Ni lo'o wan nchga tsan; su'we 'a ka tiye Ni ña'an Ni 'ñaan, kwi' ngi'ni Ni cha' tiin ti tyi'ian ni' kasiya 'ñaan.
\v 12 Tyukwi ti tiye wan chkwi' wan lo'o ta'a wan, xñi wan ya' ta'a wan chabiya' 'in Krixtu.
\v 13 Lo'o nchga ne' ta'a msñian cha' 'in Ndiose nde re, nchka ti' ne' chkwi' ne' “¿Ni rsun nda wan?” 'in nchga ne' ta'a wan nu ndi'in nde kwa.
\p
\v 14 Lo'o ni, nchka 'a tiǎn' cha' ja tsaa tii cha' su'wa ya' Jesucristo nu nka X'naan 'in nchga wan, cha' ka'an 'a cha' su'we ngi'ni Ni lo'oan nchga tsan. Kwi' ngwaña'an nchka tiǎn' cha' nchga tsan kuwe ti' wan cha' su'we 'a nka tiye Ni ña'an Ni 'ñaan. Kwi' ngwaña'an, nchka tiǎn' cha' kanun Tyi'i Ndiose ni' kasiya 'wan, cha' kwi' Ni ngi'ni Ni cha' su'wa ndi'in cha' 'ñaan lo'o Ni, lo'o xka ta nten ta'a msñian cha' 'in Ndiose. Ngwaña'an ka sikwa.