\id PHP    
\h FILIPENSES
\mt Kityi nu ngwa'an Palyu ndyaa se'en ndi'in nten 'in Jesucristo nde kichen Filipos 
\c 1
\p
\v 1 Palyu lo'o Timu lka ba re. Ta'a tyukwaa ba ngi'ni ba tñan 'in Jesucristo, kan' cha' nda'an ba kityi re cha' tsaa se'en ndi'in wan, cha' ta'a nten 'in Ndiose lkaan. Wa msñian cha' 'in Jesucristo, kan' cha' lkaan nten 'in Ndiose. Kwi' ngwaña'an, lo'o kityi re chkwi' ba chin' lo'o nchga yu kula nu nka ndloo 'in nchga ta nten 'wan, lo'o chkwi' ba chin' lo'o xka ta la ne' nu lka tñan cha' 'wan, nu ndaya' 'a 'wan.
\v 2 Nde lka cha' nu nchka tiǎn', cha' ña'an ti ku'ni la Ndiose Stian cha' su'we lo'o wan, cha' tiin ti tyi'in wan chun' nu ndyaa ña'an ti' wan 'in Jesucristo nu nka X'naan. 
\s Nchkwi' Palyu lo'o Ndiose cha' 'in ne' Filipos kan'
\p
\v 3 Nchga bra nu ndyu'wi tiǎn' 'wan, bra kan' su'we 'a nka tiyeěn; ndyaǎn xu'we 'in Ndiose cha' 'in nchga wan bra kan'.
\v 4 Ndiya 'a tiǎn' njñaǎn ska cha' 'in Ndiose cha' 'wan bra nu nchkwiǐn' lo'o Ni.
\v 5 Ti bra nu ynan wan cha' su'we 'in Krixtu ti kulo, ña'an ti ja ya tyii cha' ndaya' wan 'ñaǎn cha' chkwiǐn' cha' kan' lo'o xka ta nten nu ndi'in tijyu' la;
\v 6 kan' cha' jlyo tiǎn' ni, cha' ña'an ti ku'ni Ndiose tñan ni' kasiya 'wan, sa ña'an ya' nu tsaa to'o su'we tñan kan', bra nu kan Jesucristo xiya', cha' kwi' Ndiose lka nu mdyisnan ngi'ni tñan ni' kasiya 'wan ti kulo.
\v 7 Su'we cha' ngwaña'an nda'an cha' tiyeěn cha' 'wan, cha' nchga tsan su'we 'a nka tiyeěn na'aǎn 'wan; su'wa ti nka tiye wan lo'oǔn, su'we 'a ngi'ni wan lo'oǔn cha' ngi'nian tñan 'in Jesucristo. Lye 'a ndaya' wan 'ñaǎn nu ngwa xkan' bra nu mdi'iǐn tloo ne' nu nka ndloo, cha' mdo'oǔn luwiǐn tloo ne' kan'. Bra kan' ykwiǐn' lo'o ne' cha' su'we 'a lka cha' nu wa ytsa' Ndiose 'ñaǎn, lo'o ngwaña'an ytsaǎn' ñi 'in ne' sa ña'an lka cha' nu ñi kan'. Lo'o ni, ti ndaya' 'a wan 'ñaǎn, ni siya nsu'wiǐn ni' ña'an chkwan chun' cha' nchkwiǐn' cha' 'in Jesús lo'o nten.
\v 8 Jlyo ti' Ndiose cha' sa ña'an nu su'we nka tiye Jesucristo ña'an Ni 'in ta'a wan, kwi' ngwaña'an su'we 'a nka tiyeěn na'aǎn 'wan.
\v 9 Nde lka cha' nu nchkwiǐn' lo'o Ndiose cha' 'wan: njñaǎn chabiya' 'in Ni cha' ña'an ti su'we la xu'wi tiye wan ña'an wan 'in ta'a nten wan, cha' ngwaña'an ka biya' la ti' wan nchga cha', cha' ngwaña'an su'we la tya'an cha' tiye wan;
\v 10 njñaǎn 'in Ni cha' nchga bra ka ki'ya cha' ke wan sa ña'an cha' nu su'we la ku'ni wan, cha' ja xlyaa 'a wan ku'ni wan cha' kuxi, lo'o ja kanun yuwe' 'wan bra nu tiya tsan cha' kan Krixtu xiya'.
\v 11 Ka'an 'a cha' su'we ka ku'ni wan nchga se'en ndi'in wan lo chalyuu chun' Jesucristo, cha' ngi'ni Krixtu tñan ni' kasiya 'wan; kan' cha' ka ku'ni tnun wan 'in Ndiose, bra nu tyu'wi ti' wan cha' tnun nu ngi'ni Ni.
\s Ska ti cha' nchka ti' Palyu lo chalyuu,  cha' ka yu tñan 'in Krixtu
\p
\v 12 'Wan ta'a msñian cha' 'in Krixtu, nchka tiǎn' cha' ka biya' su'we ti' wan cha' wa ynen la cha' su'we 'in Jesús lo kichen re, chun' nu ti'í nu ndijiǐn re.
\v 13 Nsu'wiǐn ni' ña'an chkwan ni, kan' cha' jlyo ti' nchga nten nu ndi'in na'an tnun 'in gobierno re, cha' wa msu'wa ne' 'ñaǎn ni' ña'an chkwan chun' cha' nda'aǎn lo tñan 'in Krixtu; ni siya nchga sndaru nu ndi'in nde re, ni siya xka ta nten, jlyo ti' ne' cha' kan'.
\v 14 Lo'o ngwaña'an nchga ta'a msñian cha' 'in Jesús, su'we la ndyaa ña'an ti' ne' cha' 'in X'naan ni, ngwa ngula la chin' tiye ne' ni; ja ntsen ne' chkwi' ne' cha' 'in Ndiose lo'o xka la nten, cha' lo'o na' ja ntseěn laja nu nsu'wiǐn ni' ña'an chkwan re.
\p
\v 15 Chañi cha' ndiya nten nu nchkwi' cha' 'in Krixtu lo'o ta'a nten ne', ni siya chen nka tiye ne'; nchka 'a ti' nten kan' xuun ta'a ne' lo'o ba. Lo'o ti ndiya la chin' xka ta nten nu nchkwi' cha' kan' cha' su'we nka tiye ne' lo'o ba.
\v 16-17 Su'we 'a nka tiye ne' kan' ña'an ne' 'in Ndiose, lo'o ngwaña'an jlyo ti' ne' cha' wa nda Ni tñan 'ñaǎn cha' xkweěn 'in nten nu nxuun lo'oan cha' su'we nu 'in Krixtu. Nten nu chen nka tiye ni, si'i tyukwi ti tiye ne' nchkwi' ne' cha' 'in Krixtu; nchka ti' ne' tyijin lyo ne' 'in ta'a nten ne'. Lo'o ngwaña'an, nchka 'a ti' ne' kan' ta la ne' nu ti'í 'ñaǎn laja nu nsu'wiǐn ni' ña'an chkwan re.
\v 18 Ja nduwe tiǎn' sa ña'an ngi'ni ne' kan', ni siya tyukwi ti tiye ne' chkwi' ne' cha' 'in Krixtu lo'o nten, ni siya cha' kwiñi nka tiye ne' bra nu nchkwi' ne' cha' kan'; su'we 'a nka tiyeěn cha' 'in ya ña'an ti nten nu chkwi' cha' 'in Krixtu kan'.
\p Ngwaña'an su'we la ka tiyeěn tyempu nde loo la.
\v 19 Nxke' tiǎn' cha' ndla ti ka su'we la cha' 'ñaǎn re, cha' jlyo tiǎn' sa ña'an njñan 'a wan cha' 'in Ndiose cha' tyo'oǔn ni' ña'an chkwan re, cha' wa lyaǎn; jlyo tiǎn' cha' ti kwi' Tyi'i ykwi' Jesucristo lye 'a nsu'wa ya' 'ñaǎn.
\v 20 Nde lka tñan nu nchka tiǎn' ku'niǐn: Nchka 'a tiǎn' cha' ja ka jyu'u tiǎn' chkwiǐn' cha' 'in Jesús lo'o nten; ni siya tyempu nu ndijyan nde loo la, ni siya bra ni, ja ka jyu'u tiǎn' bra kan', nka tiyeěn. Nchka tiǎn' cha' ka ngula la tiyeěn cha' chkwiǐn' cha' 'in Jesús lo'o nten. Ngwaña'an nchka tiǎn' ku'niǐn, cha' ña'an ti ku'niǐn tnuǔn 'in Krixtu, ni siya ti lu'uǔn, ni siya wa ngujwiǐn.
\v 21 Ska ti cha' nchka tiǎn' ku'niǐn lo chalyuu, cha' kaǎn tñan 'in Krixtu. Su'we la ni siya kajaǎn, nxke' tiǎn', cha' bra kan' ka ña'aǎn 'in Ndiose;
\v 22 ja jlyo tiǎn' nan lka nu su'we la ku'niǐn, cha' ja chan ka ku'niǐn ti ka'an la tñan 'in nu nka X'naan, si ti ndi'iǐn laǎn lo chalyuu.
\v 23 Tyukwaa lo cha' nchka tiǎn' cha' ka 'ñaǎn sikwa: Nchka 'a tiǎn' kulaa ti'iǐn chalyuu re, cha' bra kan' ka tyi'iǐn lo'o Krixtu, cha' kan' nu su'we la, nxke' tiǎn';
\v 24 lo'o ni, ndloo la cha' 'wan cha' tyi'iǐn laǎn lo chalyuu re.
\v 25 Nxke' tiǎn' cha' ngwaña'an ka 'ñaǎn, cha' ti tyi'iǐn laǎn ti chin' lo chalyuu re. Bra kan' ka tayaǎn' laǎn 'wan ta'a wan, cha' sten su'we la wan cha' 'in Krixtu; ngwaña'an ka su'we la ka tiye wan cha' nu su'we la tsaa ña'an ti' wan 'in Ni.
\v 26 Bra nu kaǎn tyi'iǐn se'en ndi'in wan xiya', bra kan' su'we la ka tiye wan cha' 'in Jesucristo chun' tñan nu wa y'niǐn.
\p
\v 27 Kan' cha' ni, ki'ya wan kwenta sa ña'an ndi'in cha' ku'ni wan lo chalyuu xa wa msñi wan cha' 'in Krixtu. Si ngwaña'an ku'ni wan, bra kan' ja n'ni cha' ni siya kaǎn kichen tyi wan, ni siya ja ka kaǎn. Ja chan kaja cha' 'ñaǎn cha' ska ti cha' nsu'wi tiye wan lo'o ta'a wan, cha' nsu'wi 'a cha' tlyu ti' 'wan lo'o nten nu nxuun lo'o wan; ja chan su'wa ti nda'an cha' tiye wan lo'o ta'a wan, ni siya chan 'a nchkwi' wan lo'o ne' cha' xñi ne' cha' su'we kan' 'in Krixtu.
\v 28 Bra nu ku'ni wan ngwaña'an, bra kan' ja ndi'in cha' kutsen wan 'in nu nxuun lo'o wan, chun' cha' ka biya' ti' ne' cha' ndi'in cha' ku'ni tyii Ndiose nchga nten kuxi. Lo'o 'wan ni, wa ngulaa wan 'in nu kuxi kan'; wa y'ni Ndiose cha' ka tyijin lyo wan 'in nchga cha' kuxi kan'.
\v 29 Su'we 'a lka cha' mda Ndiose chabiya' cha' msñi wan cha' 'in Krixtu, ni siya ndi'in cha' tyijin wan chin' nu ti'í, cha' nu msñi wan cha' 'in Krixtu kan'.
\v 30 Su'wa ti nchka cha' 'wan lo'oǔn, ti'in 'a tñan nu wa mjwi 'ñaan. Wa na'an wan sa ña'an y'niǐn tñan ti ngwa xkan', cha' lye 'a msuǔn lo'o nu kuxi; kwi' ngwaña'an, ka biya' ti' wan cha' lye 'a ngi'niǐn tñan ni. 
\c 2
\s Ngwa Jesús ska yu ti'i bra nu yan yu lo chalyuu,  lo'o chun' ndi'in la tlyu 'a chabiya'  mda Ndiose 'in yu
\p
\v 1 Ja chan wa ngula la tiye wan ni, cha' wa msñi wan cha' 'in Krixtu; wa su'we la nka tiye wan ni, cha' su'we 'a nka tiye Ni ña'an Ni 'wan. Ti kwi' ti cha', lo'o Tyi'i Ndiose su'wa ti ndi'in cha' 'wan lo'o ta'a wan, ngwaña'an lo'o Ndiose. Lo'o ni, ngwa t'nan la ti' wan 'in ta'a nten wan, wa ngwa su'we tiye wan ña'an wan 'in ta'a nten wan.
\v 2 Kan' cha' ni, si chañi cha' ngwaña'an ngi'ni wan, ku'ni wan cha' ka su'we ka tiyeěn sikwa; ngwaña'an ka bra nu ña'aǎn cha' su'wa 'a ndi'in cha' 'wan lo'o ta'a wan, cha' ska ti cha' nka tiye wan, cha' ska ti cha' nda'an tiye wan, cha' ska ti biya' su'we ti ngi'ni wan lo'o ta'a wan.
\v 3 Ja chkwi' wan lye 'a bra nu ku'ni wan ska tñan; si'i xkwi' cha' 'wan, ti ykwi' ti wan, tya'an cha' tiye wan. Kwi' ngwaña'an, ja ku'ni siye' wan lo'o ta'a wan. Su'we la si tya'an cha' re tiye wan, cha' su'we la xka yu ta'a wan, ja su'we ykwi' wan.
\v 4 Kuwe la ti' wan 'in xka yu ta'a wan cha' ka su'we la cha' 'in ne', si'i xkwi' cha' 'wan, ti ykwi' ti wan, nu ndi'in cha' kuwe ti' wan.
\p
\v 5 Su'we la si tya'an cha' tiye wan cha' re, ti kwi' ña'an cha' nu mda'an tiye ykwi' Jesucristo. Ngwaña'an ngwa 'in yu:
\v 6 Tyukwi tyempu lka Jesucristo Ndiose siya' ti, ja nsu'wi bra nu ja lka yu Ndiose; bra nu yan yu lo chalyuu, ja mda'an cha' tiye Jesús cha' kan lo'o yu nchga chabiya' 'in Ndiose, ni siya yu'wi 'a chabiya' 'in yu se'en mdi'in yu nu ngwa ti kulo, cha' su'wa ndi'in cha' 'in yu lo'o Ndiose Sti yu.
\v 7 Mxnun yu chabiya' nu nsu'wi 'in yu se'en ndi'in Ndiose Sti yu, cha' su'we la ngwa tiye yu xa nu y'ni yu ngwaña'an. Bra kan' mslyaa yu ngwa yu nten, cha' kaja ña'an taya' yu 'ñaan; sa ña'an ndlya nten, ngwaña'an ngula yu lo chalyuu, nten siya' ti ngwa yu.
\v 8 Ngwa yu ska nten ti'i, lo'o ngwaña'an su'we 'a mdukwa yu tñan nu ngulo Ndiose Sti yu 'in yu, ni siya ngujwi yu. Lo'o ngujwi yu lo wsi, ña'an ti' ndujwi nten 'in ne' nu xa'an 'a bra kan'.
\v 9 Kan' cha' ni, wa ndyaa lo'o Ndiose 'in yu cha' su'wa ti tyi'in yu nde se'en tlyu la se'en ndukwa Ni; lo'o tlyu 'a chabiya' wa nda Ni 'in Jesús ni. Tyukwi ña'aan chalyuu ja nsu'wi la xka chabiya' nu tlyu la,
\v 10 cha' ngwaña'an tyuun xtyin' nchga nan lu'u tloo Jesús, ni siya nten, ni siya kwi'in. Ja tyii cha' ku'ni tnun nten 'in Ni, cha' 'in chabiya' nu tnun 'a nu wa nda Ni 'in yu, ni siya nu ndi'in ni' kwan, ni siya nu ndi'in lo chalyuu, ni siya nten nu wa ngutsi', lo'o ayman kan' ku'ni tnun ne' 'in yu.
\v 11 Kwen 'a chkwi' nchga nten cha' Jesucristo lka X'nan nchga chalyuu, ngwaña'an su'we 'a ku'ni tnun ne' 'in Ndiose Stian.
\s Sa ña'an xaa nu nda kwii kulasiin xa tla, ngwaña'an nkaan  laja nu ndi'ian lo chalyuu
\p
\v 12 'Wan ne' ta'aan nu ndiya 'a tiǎn' 'wan, mdukwa 'a wan cha' nu ykwiǐn' nchga tsan bra nu mdi'iǐn lo'o wan; lo'o ña'an ti ndloo 'a cha' 'wan cha' ti tukwa la wan cha' nu nchkwiǐn' ni, ni siya tijyu' 'a ndi'iǐn se'en ndi'in wan. Ña'an ti ku'ni wan tñan cha' ku'ni ji nchga cha' nu ngwa ti' Ndiose ku'ni ni' kasiya 'wan bra nu ngulaa Jesucristo 'wan 'in cha' kuxi. Chin' ti cha' xu'wi tiye wan, ti ykwi' ti wan, kuwe la ti' wan 'in Ndiose.
\v 13 Tyu'wi ti' wan cha' nchga tsan ngi'ni Ndiose tñan ni' kasiya 'wan, cha' ka ku'ni wan tñan 'in Ni; ngwaña'an ngi'ni Ni cha' xlyaa wan ku'ni wan nchga tñan nu nchka ti' Ndiose cha' ku'ni wan.
\p
\v 14 Nchga lo tñan nu ku'ni wan ni, si'i xkwi' nan ngi'ni ki'ya wan ska cha' xa nu ngi'ni wan tñan kan'. Ja chkwi' wan cha' chen ña'an lo'o nten,
\v 15 cha' ja ka chkwi' ne' cha' ndukwi wan ki'ya, si'ya cha' kuxi nu ngi'ni wan bra kan'. Su'we la si ka biya' ti' ne' cha' chañi cha' lka wan sñi' Ndiose tyukwi ti tiye wan, ni siya xkwi' laja nten kuxi ndi'in wan lo chalyuu, laja nten nu chen nka tiye ne' ña'an ne' 'in ta'a nten ne'. Cha' 'wan ndi'in cha' kanen cha' 'in Jesús nchga se'en ndi'in nten kan'; sa ña'an xaa nu nda kulasiin tla, ngwaña'an ta wan xaa lo chalyuu,
\v 16 bra nu chkwi' wan lo'o ne' cha' su'we nu 'in Krixtu nu ka ta chalyuu nu ja tsaa tii 'a 'in ne'. Si ngwaña'an ku'ni wan, ka su'we 'a ka tiyeěn na'aǎn 'wan bra nu tiya tsan nu ku'ni biya' Krixtu 'in nchga nten. Bra kan' ka biya' tiǎn' cha' su'we ti yaa to'o tñan 'ñaǎn, si'i nan mna' tñan 'ñaǎn ya ña'an ti.
\v 17-18 Jlyo tiǎn' cha' si'i chin' ti tñan y'ni wan bra nu msñi wan cha' 'in Ndiose; ka'an 'a nan nu mxnun wan, tyun ya' nda wan tyukwi ña'aan wan cha' ka wan tñan 'in Krixtu, chun' nu wa msñi wan cha' 'in Ni. Lo'oǔn kujwi ne' 'ñaǎn ni, nxke' tiǎn'; kana' chalyuu 'ñaǎn ni cha' 'wan. Lo'o ja ntseěn; ni siya ngwaña'an ka 'ñaǎn, su'we 'a ka tiyeěn se'en ndi'iǐn. Kwi' ngwaña'an nxke' tiǎn' cha' ka su'we tiye wan, cha' su'wa ti ka su'we tiyeěn lo'o wan.
\s Nchkwi' Palyu cha' 'in Timu lo'o Epafrodito
\p
\v 19 Chabiya' 'in Jesús nu nka X'naan, ja chan ndla ti su'waǎn 'in Timu cha' tsaa yu se'en ndi'in wan, cha' kaja chin' rsun 'ñaǎn sa ña'an ndi'in wan; su'we 'a ka tiyeěn bra nu kunaǎn cha' kan'.
\v 20 Ska ti yu kan' lka nu chañi cha' su'wa ti nka tiye yu lo'oǔn, nu chañi cha' su'we nka tiye yu ña'an yu 'wan;
\v 21 ja nsu'wi 'a xka ne' ta'aan nde re nu nduwe ti' sa ña'an nchka tñan 'in Jesucristo se'en ndi'in wan; xkwi' tñan 'in ne' nsu'wi la tiye ne'.
\v 22 Lo'o 'wan, wa jlyo ti' wan cha' luwi 'a tñan nu ngi'ni Timu kan'. Su'wa ti ngi'ni yu tñan lo'oǔn sa ña'an si wa lka yu sñiěn', su'wa ti nda'an ba nchkwi' ba cha' su'we 'in Jesús lo'o ne' xka kichen.
\v 23 Bra nu tyii ka biya' 'ñaǎn lo'o wse, bra kan' su'waǎn 'in yu cha' bra ti tsaa yu se'en ndi'in wan,
\v 24 ni siya nxke' tiǎn' cha' lo'oǔn ykwiǐn' kaǎn ndla ti se'en ndi'in wan, chabiya' 'in ykwi' X'naan.
\p
\v 25 Lo'o ngwaña'an, ndi'in 'a cha' kan xka yu se'en ndi'in wan, nka tiyeěn; Epafrodito naan yu kan'. Ti kwi' yu ta'a nda'an ba tñan lka yu, lo'o ngwaña'an, ngula 'a tñan y'ni yu lo'o ba bra nu mxkwen ba 'in ne' kuxi cha' 'in Jesús. Ti kwi' yu kan' lka yu nu msu'wa wan 'in yu yan se'en mdi'iǐn nu ngwa xkan', cha' taya' yu 'ñaǎn lo'o nan lka nu lyiji chin' 'ñaǎn cha' tyijin yu'wi 'ñaǎn lo chalyuu.
\v 26 Ndiya 'a ti' yu 'wan, kan' cha' nchka ti' yu kan na'an yu 'wan xiya'; ka'an 'a cha' mda'an tiye yu bra nu mjwi rsun 'in yu cha' wa ynan wan cha' ti'í 'a yu.
\v 27 Lo'o chañi cha' ti'í 'a yu nu ngwa bra kan', ngwa cha' kaja yu; lo'o Ndiose ngwa t'nan ti' Ni 'in yu. Kwi' ngwaña'an, ngwa t'nan ti' Ni 'ñaǎn, cha' ngwa xi'in 'a tiǎn' nde re; lo'o kan' lye la ngwa xi'in tiǎn' si wa ngujwi yu, lo'o wa nchkaa yu ni.
\v 28 Kan' cha' su'we 'a nka tiyeěn ni, si ndla ti kan yu se'en ndi'in wan, cha' lo'o wan ka su'we la ka tiye wan, bra nu ña'an wan 'in yu xiya'. Ja ndi'in cha' kuwe 'a tiǎn' cha' 'wan bra kan'.
\v 29 Ka su'we 'a ka tiye wan lo'o yu ni; su'we 'a chkwi' wan lo'o yu bra nu tiyan yu se'en ndi'in wan, cha' lka yu ta'a msñi wan cha' 'in X'naan. Kwi' ngwaña'an, ku'ni tlyu wan 'in ya ña'an ti nten nu ku'ni sa ña'an nu ngi'ni yu kan';
\v 30 ja ytsen yu, ni siya wa kaja ti yu laja nu mdaya' yu 'wa lo'o tñan 'in Krixtu re ti ngwa xkan'. Ni siya ja ngwa kan wan nde re, wa msu'wa wan 'in ykwi' yu yan yu cha' ku'ni yu ti kwi' tñan nu ja ngwa 'wan ku'ni wan, cha' nu ndaya' 'a yu 'wa bra kan'. 
\c 3
\s Sa ña'an nu chañi ka cha' katin ki'ya  nu nsu'wi 'ñaan cha' 'in Ndiose
\p
\v 1 'Wan ta'a msñian cha' 'in Jesús, nchka 'a tiǎn' cha' ka su'we 'a ka tiye wan ni chabiya' 'in ykwi' nu nka X'naan. Ja n'ni cha' 'ñaǎn, ni siya xiya' chkwiǐn' ti kwi' ta'a cha' nu ytsaǎn' 'wan ti kulo; ja chan tayaǎn' chin' 'wan, si chkwiǐn' ngwaña'an xiya'.
\v 2 Kan' cha' ni, ndii ti ti' wan, ki'ya su'we wan kwenta 'in ne' kuxi kan', cha' nu sa ña'an nu ngi'ni xne' ndaja, ngwaña'an ngi'ni ne' kan'. Lo'o cha' kula nu ndyaa ña'an 'a ti' ne' kan', kan' cha' ndatsaa ne' 'in xka ta nten cha' xi'yu kijin 'in ne', ni siya kuxi nsu'wi tiye ne' ngi'ni ne' tñan kan', si'i nan su'we nka tiye ne'.
\v 3 Nan ni, chañi lka cha' nkwan Ndiose 'ñaan, ni siya xka ña'an nchkwi' ne' kan'. Ngi'ni tnuan 'in Ndiose chabiya' 'in Tyi'i Ni; su'we 'a nka tiyean ndi'ian lo chalyuu ni, xa wa mjwi chalyuu kwi 'ñaan nu nda Jesucristo, lo'o ja ndyaa ña'an tian' xka la cha' nu ndatsaa 'a 'in nten chalyuu ta'aan.
\v 4 Lo'oǔn, yaa ña'an 'a tiǎn' 'in cha' kula kan'. Ti ngwa xkan' la ni, ja yu'wi xka nten nu su'wa y'ni lo'oǔn, lye la mdukwaǎn nchga cha' kula nu nsu'wi 'in ne' judío ta'a ba.
\v 5 Wa snu' ti tsan nsu'wiǐn bra nu msi'yu ne' kijiǐn cha' nkwan ne' 'ñaǎn; ne' judío lkaǎn ti xa nu ngulaǎn, tnen ne' hebreo kan' lka tneěn. Ngwaña'an ti kwi' ne' Benjamín ngwa ne' kula 'ñaǎn. Ne' fariseo lkaǎn, kan' cha' mdukwaǎn 'aǎn nchga tñan nu ndi'in cha' ku'ni ba cha' 'in cha' kula 'in ne' judío;
\v 6 chun' cha' nu yaa ña'an 'a tiǎn' 'in cha' kula kan', kan' cha' lye 'a mdaǎn nu ti'í 'in ya ña'an ti nten nu msñi cha' 'in Jesucristo, y'niǐn liye' 'a tiǎn' 'in ne' kan'. Lo'o ngwaña'an, ja ndi'in 'a ki'ya 'ñaǎn lo'o ne' judío cha' 'in cha' kula kan', cha' mdukwaǎn 'aǎn nchga cha' kula kan'; ti s'ni wa ngwa luwi kasiya 'ñaǎn, si chañi cha' ka su'we kasiya 'ñaan cha' 'in Ndiose ngwaña'an ti.
\v 7 Ti s'ni mske' tiǎn' cha' su'we 'a nten lkaǎn chun' nu mdukwaǎn cha' kula kan'; lo'o ni, ja ndloo 'a cha' kan' 'ñaǎn chun' ndyaa ña'an tiǎn' 'in Krixtu.
\v 8 Lo'o ngwaña'an, ni siya kana' nchga cha' nu ndiya 'a tiǎn' lo chalyuu, ja nduwe tiǎn'; tlyu la lka cha' su'we nu wa mjwi 'ñaǎn ni, cha' nsu'wi lyoǔn 'in Jesucristo nu nka X'naǎn. Wa y'ni Krixtu cha' wa ngulaa yaǎn' nchga cha' kula kan'; lo'o ja su'we cha' kula kan' siya' ti, nxke' tiǎn' ni. Sa kan' ti cha' nchka tiǎn', cha' sñiǐn su'weěn cha' 'in Krixtu,
\v 9 cha' su'wa ka tiyeěn lo'o Ni. Nu ngwa s'ni, ja y'ni tyii 'a Ndiose ki'ya 'ñaǎn ni siya mdukwaǎn 'aǎn cha' kula kan'; siya' ti bra nu ndyaa ña'an tiǎn' tñan nu y'ni Krixtu, bra kan' y'ni tyii ji Ni ki'ya 'ñaǎn. Sa kan' ti tñan y'ni Ni cha' ka su'we kasiya 'ñaǎn.
\v 10 Lo'o ni, sa kan' ti cha' nchka tiǎn', cha' xu'wi lyoǔn jiǐn 'in Krixtu, cha' ka jlyo tiǎn' cha' ti ngi'ni Ndiose tñan lo'oǔn lo'o ti kwi' jwersa nu wa yu'wi 'in Ni bra nu y'ni Ni cha' ndyu'u Jesús xiya'. Ja n'ni cha' ni siya ngwaña'an tyijiǐn nu ti'í sa ña'an nu wa mdijin Jesús nu ti'í, ni siya kana' chalyuu 'ñaǎn kajaǎn sa ña'an nu ngujwi Krixtu lo wsi.
\v 11 Lo'o ni, ndi'in taǎn cha' kaja xka chalyuu 'ñaǎn chun' ndi'in la, ska chalyuu nu ja tsaa tii 'a 'ñaǎn ni siya wa ngujwiǐn.
\s Ku'nian tñan cha' kaja ska cha' tnun 'ñaan  nde loo la
\p
\v 12 Ja chkwiǐn' cha' wa mdyii ngwa su'we kasiya 'ñaǎn tloo Ndiose siya' ti, lo'o ni, ja ndi'in 'a ki'ya 'ñaǎn; ja chkwiǐn' ngwaña'an. Nan wa ykwi' Jesucristo lo'oan cha' lkaan nten 'in Ndiose, kan' cha' lye 'a ngi'niǐn tñan cha' ka su'we ji kasiya 'ñaǎn.
\v 13 'Wan ta'a msñian cha' 'in Krixtu, jlyo tiǎn' cha' ti ji ka 'ñaǎn ngwaña'an. Sa kan' ti cha' ndloo 'a 'ñaǎn, cha' ndla ti ku'niǐn cha' kaja cha' tnun 'ñaǎn nde loo la, cha' ka su'we ji kasiya 'ñaǎn lo'o Ndiose, ni siya ja tyaa yu'wi 'a tiǎn' nchga cha' nu ngwa 'ñaǎn nu ngwa ti s'ni.
\v 14 Kan' cha' sikwa, ndi'in cha' xñian tuwiin nu ñi cha' kaja cha' tnun kan' 'ñaan, ti kwi' cha' kan' nu wa y'ni xu'we Ndiose cha' 'ñaan se'en ndi'in Ni. Ka kaja cha' kan' 'ñaan la bra kan', chun' cha' nu wa ngwa su'wa cha' 'ñaan lo'o Jesucristo.
\p
\v 15 Su'we 'a si kwi' ngwaña'an tya'an cha' tiyean, ta'aan nu wa msñiin su'wean cha' 'in Jesús; Ndiose lka nu kwa'u ñi la 'wan bra kan', si nsu'wi xka la ne' ta'a wan nu nda'an tiye xka la cha'.
\v 16 Su'we sikwa, ti ku'niin laan ti kwi' ta'a cha', sa ña'an nu ngwa biya' su'we tian' ti kulo.
\p
\v 17 'Wan ta'a msñian cha' 'in Jesús, su'we si ku'ni wan sa ña'an cha' nu wa na'an wan 'ñaǎn ngi'niǐn. Kwi' ngwaña'an, ki'ya su'we wan kwenta sa ña'an nu ngi'ni xka la ne' ta'aan, nu ngi'ni sa ña'an nu ngi'ni ti bare, kwi' ngwaña'an ku'ni wan.
\v 18 Wa tyun 'a ya' wa ytsa' ba cha' re 'wan, lo'o ni, chkwiǐn' lo'o wan xiya', ni siya xi'in 'a tiǎn' chkwiǐn' cha' re: Nsu'wi 'a nten nu nxuun lo'o Krixtu, ni siya wa ngujwi yu lo wsi cha' katin ki'ya 'in ne'; ta'a wsuun Krixtu lka ne' kan', cha' nsu'wi 'a cha' kuxi nu ngi'ni ne' nchga se'en nda'an ne'.
\v 19 Ndi'in cha' tyaa ne' kan' la chalyuu tla bra nu kaja ne', cha' nsu'wi ska ndiose kwiñi 'in ne' kan'; nchga nan nu nxitukwi 'a ti' ne' cha' kaja 'in ne' lo chalyuu, kan' lka ndiose 'in ne' kan'. Lo'o ngwaña'an, siye' 'a ngi'ni ne' lo'o ta'a ne', ni siya ndi'in cha' ka jyu'u 'a ti' ne'; xkwi' nsu'wi tiye ne' 'in nchga nan nu nsu'wi lo chalyuu.
\v 20 Nan ni, nde se'en ndi'in Ndiose siya' ti, nde kwa ndi'in kichen tyian nu chañi ka. Lo'o ni, su'we 'a nka tiyean ndi'in taan 'in X'naan Jesucristo, ña'an bra tyo'o Ni ni' kwan kwi' se'en nu ka kichen tyian, cha' kan y'ya Ni 'ñaan lo chalyuu, cha' kulaa ji Ni 'ñaan.
\v 21 Xa'an Ndiose tyukwi ña'aan bra kan', cha' kaan sa ña'an nu lka ykwi' Ni. Na'an 'a tian' tyukwi ña'aan ni, lo'o Ndiose, su'we 'a ña'an Ni tyukwi ña'aan Ni; kan' cha' xa'an Ni 'ñaan tyukwi ña'aan cha' kaan sa ña'an nu nchka ti' Ni nde loo la bra kan'. Ka 'in Ni kulo Ni tñan 'in nchga lo nan nu nsu'wi chalyuu, lo'o ngwaña'an, ka 'in Ni xa'an Ni tyukwi ña'aan siya' ti. 
\c 4
\s Nchga tsan ka su'we ka tiyean chabiya' 'in nu nka X'naan
\p
\v 1 'Wan ta'a msñian cha' 'in Jesús, ndiya 'a tiǎn' 'wan; nten nu wa nda Ndiose 'ñaǎn lka wan, cha' su'wa ngi'nian tñan 'in Ni. Su'we 'a nka tiyeěn cha' 'wan, lo'o ngwaña'an, xi'in chin' tiǎn' xa nu ja ndi'iǐn se'en ndi'in wan. Ku'ni wan tñan cha' kanun su'we cha' 'in nu nka X'naan ni' kasiya 'wan.
\p
\v 2 Lo'o 'wan Evodia lo'o Síntique ni, ku'ni wan cha' tlyu ti' 'ñaǎn chkwiǐn' ska cha' lo'o wan: Ndi'in cha' su'wa ti xu'wi tiye wan lo'o ta'a wan. Jesús nu nka X'naan y'ni cha' lka wan ta'aan, kan' cha' ku'ni wan cha' katin cha' wsuun nu nsu'wi 'wan lo'o ta'a wan.
\v 3 Lo'o nu'win ni, nu su'we 'a ta'a nda'aǎn tñan, nchka tiǎn' cha' tayaa' 'in ta'a tyukwaa ne' kula kan', cha' ka su'we tiye ne' kan' lo'o ta'a ne'. Ta'a tyukwaa ne' kula kan' wa y'ni 'a ne' tñan cha' kanen la cha' su'we 'in Jesús nu ngwa xkan'; su'wa ti y'ni ne' kan' tñan lo'oǔn, lo'o Clemente, lo'o xka ne' ta'a nda'an ba tñan. Wa mda'an nin nchga ne' kan' lo kityi 'in Ndiose, se'en ndukwa nin nten nu kaja chalyuu nu ja tsaa tii 'a 'in ne'.
\p
\v 4 Nchka tiǎn' cha' nchga tsan ka su'we ka tiye wan chabiya' 'in nu nka X'naan. Ni siya tukwa ya' chkwiǐn' cha' kan' lo'o wan: ¡Nchka tiǎn' cha' ka su'we ka tiye wan!
\v 5 Xkwi' chka t'nan 'a ti' wan 'in nchga nten, cha' ka biya' ti' ne' cha' ngwaña'an ngi'ni wan. Wa ndla ti kan ykwi' X'naan xiya'. 
\p
\v 6 Ja ska cha' kuwe ti' wan se'en, jñan wan cha' 'in Ndiose cha' 'in ya ña'an ti cha' nu ka 'wan. Lo'o ngwaña'an, tya wan xu'we 'in Ndiose cha' 'in nchga cha' nu nchka 'wan, bra nu chkwi' wan lo'o Ni.
\v 7 Lo'o kan' tiin ti tyi'in wan, ni siya ja ka biya' ti' nten chalyuu ni cha' lka 'wan ngwaña'an. Ja ki'ya cha' kuxi ke wan bra kan', ja ka kuxi kasiya 'wan bra kan', chun' nu wa ngwa su'wa cha' 'wan lo'o Jesucristo.
\s Xu'wi tiyean 'in nchga cha' nu su'we la
\p
\v 8 'Wan ta'a msñian cha' 'in Krixtu, nde ña'an tya'an cha' tiye wan tyukwi tyempu nu ndi'in wan lo chalyuu: Tya'an cha' tiye wan 'in nchga cha' nu ñi; lo'o nchga cha' nu ngi'ni tlyu nten 'in, nchga ña'an nu ñi la ku'nian lo'o nten, nchga cha' nu luwi la xu'wi tiyean, nchga cha' nu su'we 'a ña'an, nchga cha' nu su'we 'a ndiya ti' ne' ña'an ne', ni siya nchga cha' su'we kan', nu ngwaña'an su'we 'a nchkwi' nten 'in, kan' lka cha' nu ndi'in cha' xu'wi tiye wan.
\v 9 Tyu'wi ti' wan nchga cha' nu wa y'ni xa'an wan 'ñaǎn, ni siya ska cha' nu wa ynan wan ti bra nu wa ykwiǐn' cha' kan' lo'o wan, ni siya ska cha' nu wa na'an wan ngi'niǐn; kan' lka cha' nu ndi'in cha' ku'ni wan, lo'o ku'ni Ndiose cha' tiin ti tyi'in ni' kasiya 'wan bra kan'.
\s Su'we 'a nka tiye Palyu cha' wa yan lo'o ne'  lomstan se'en ndi'in yu
\p
\v 10 Su'we 'a nka tiyeěn bra nu na'aǎn cha' ngala lomstan nu msu'wa wan cha' mdiyan se'en ndi'iǐn. Jlyo tiǎn' cha' Jesús nu nka X'naan y'ni cha' ndyu'wi ti' wan 'ñaǎn xiya', kan' cha' su'we 'a nka tiyeěn. Jlyo tiǎn' cha' ja mjlyaa ti' wan 'ñaǎn, ni siya ja mjwi ña'an taya' wan 'ñaǎn ti ngwa xkan' la.
\v 11 Ja chkwiǐn' cha' lyiji 'a cha' su'we 'ñaǎn; su'we 'a ngala' tiǎn' lo'o ya ña'an ti nan nu ndyiji 'ñaǎn.
\v 12 Ndiya ya' nu lyiji 'a nan 'ñaǎn, lo'o ndiya ya' nu ka'an 'a nan mjwi 'ñaǎn; ngwaña'an ngala' tiǎn' lo'o ya ña'an ti nan nu kaja 'ñaǎn nchga se'en nda'aǎn lo tñan re. Ja n'ni cha' 'ñaǎn ni siya su'we 'a ndyiji nan kuǔn, ni siya ngite' tiǎn'; ni siya ka'an 'a nan nsu'wi 'ñaǎn, ni siya chin' 'a, ja ndlo 'a cha' kan' 'ñaǎn.
\v 13 Kwi' Krixtu nda jwersa 'ñaǎn cha' taloǔn 'in nchga cha', nan lka nu kaja 'ñaǎn.
\v 14 Ni siya ngwaña'an, su'we 'a nka tiyeěn cha' wa ndaya' wan 'ñaǎn bra nu ndijiǐn cha' kuxi nde re.
\p
\v 15 'Wan ne' Filipos, jlyo ti' wan sa ña'an ngwa 'ñaǎn bra nu mdo'oǔn lo yuu 'in Macedonia, cha' nu mda'aǎn ykwiǐn' cha' 'in Jesús lo'o ne' kan'; bra kan' ska ta ti wan nu ngi'ni tnun wan 'in Ndiose nde kwa, nda wan lomstan cha' ka xu'we 'ñaǎn, cha' su'we 'a y'ni xa'an wan cha' 'in Jesús bra nu mdi'iǐn se'en ndi'in wan.
\v 16 Lo'o ngwaña'an, tyun ya' wa nda wan xu'we 'ñaǎn cha' kaja chin' nan nu tyijin yu'wi 'ñaǎn nde kichen Tesalónica.
\v 17 Lo'o si'i nan nka tiyeěn cha' kaja ska cha' su'we 'ñaǎn, su'we la nka tiyeěn ni siya kanun su'we cha' 'in Ndiose ni' kasiya 'wan.
\v 18 Nde lka cha' nu chkwiǐn' lo'o wan ni: Wa ka'an 'a nan nda wan 'ñaǎn, kan' cha' nchka 'a tiǎn' tyaǎn xu'we 'wan; ja ndiya xka nan nu lyiji 'ñaǎn bra ni, ti bra nu yan Epafrodito, yan lo'o yu nchga cha' su'we nu wa nda wan 'ñaǎn. Ña'an ti' ska lomstan nu ndiya 'a ti' Ndiose 'in, ska nan nu nxkwa xi 'a tyi'i nchga se'en, ngwaña'an lka cha' su'we nu nda wan 'ñaǎn cha' 'in Ndiose.
\v 19 Tnun 'a cha' su'we ndi'in 'in Ndiose, kan' cha' ta Ni nchga nan nu lyiji cha' tyijin yu'wi 'wan lo chalyuu; jlyo tiǎn' cha' ngwaña'an ngi'ni X'naan lo'o nten chabiya' 'in Jesucristo.
\v 20 ¡Tyukwi tyempu ku'ni tnuan 'in Ndiose Stian sikwa! Ngwaña'an ka cha'.
\s Mslaa' yu 'in ne'
\p
\v 21 Chabiya' 'in Jesucristo ta ba kasiya 'wan ta'a wan, ta'a nten 'in Ndiose nu ndi'in nde kwa; kwi' ngwaña'an nchka ti' nchga ne' ta'a nda'an ba nde re.
\v 22 Lo'o nchga ne' nu msñi cha' 'in Ndiose kichen re, lo'o ne' nu ndi'in ngi'ni tñan ni' ña'an tlyu cha' 'in x'naan nu nka ndloo la nu nka emperador, nchka 'a ti' ne' chkwi' ne' su'we lo'o wan.
\p
\v 23 Lo'oǔn nchka 'a tiǎn' cha' ña'an ti ku'ni la Jesucristo nu nka X'naan cha' su'we lo'o wan tyukwi tyempu nu ndijyan nde loo la. Ngwaña'an ka cha'.