\id 2TI    
\h 2 TIMOTEO
\mt Ngwa'an Palyu xka kityi nu ndyaa se'en ndi'in Timu 
\c 1
\p
\v 1 Palyu lkaǎn. Wa ngulo Ndiose tñan 'ñaǎn cha' tsa'aǎn tijyu' nde kichen tyi ne' xka la'a tsu', cha' chkwiǐn' cha' 'in Jesucristo lo'o nten. Wa ytsa' Ni 'ñaan cha' ja tsaa tii 'a chalyuu 'in nten nu xñi cha' 'in Jesucristo.
\v 2 Lo'o na' nda'aǎn kityi re cha' tsaa se'en ndi'iin, Timu, cha' su'wa ña'an nchka ti' sñiěn', ngwaña'an lkaa, nxke' tiǎn'; kwi' ngwaña'an su'we 'a nka tiyeěn na'aǎn 'iin. Nde lka tñan nu nchka tiǎn' cha' ka 'iin, cha' ña'an ti ku'ni Ndiose cha' su'we lo'oo, cha' chka t'nan ti' Ni 'iin, cha' lo'o ku'ni Ni cha' tiin ti tyi'in ni' kasiya 'iin chun' tñan nu y'ni Jesucristo nu nka X'naan.
\s Ykwi' Palyu cha' 'in cha' tnun nu ngi'ni Ndiose lo'o nten
\p
\v 3 Sa ña'an nu y'ni ayman 'ñaan nu ngwa s'ni, tyukwi ti tiye ne' y'ni ne' tñan 'in Ndiose, kwi' ngwaña'an tyukwi ti tiyeěn ngi'niǐn tñan 'in Ni sa bra ni. Ndyaǎn xu'we 'in Ndiose bra nu nchkwiǐn' lo'o Ni cha' 'iin, tsan lo'o tla nchkwiǐn' lo'o Ni.
\v 4 Ndyu'wi tiǎn' cha' ynaan bra nu mdo'oǔn yi'aǎn nu ngwa xkan', kan' cha' nchka 'a tiǎn' ña'aǎn 'iin xiya' cha' ka su'we ka tiyeěn.
\v 5 Ndyu'wi tiǎn' cha' chañi cha' msñii cha' 'in Jesús. Lo'o jya'aan kula, ne' kula Loida ni, kan' lka nu wa msñi cha' kan' ti kulo; lo'o kan' ne' kula Eunice jya'aan, lo'o msñi cha' kan'; kwi' ngwaña'an nu'win, su'we 'a msñii cha' 'in Jesús.
\p
\v 6 Chkwiǐn' ska cha' lo'oo ni: Xñii su'we kwenta 'in cha' su'we nu wa nda Ndiose 'iin ti bra nu mstyaǎn yaǎn' kee, cha' kaa ku'nii tñan cha' 'in nu nka X'naan.
\v 7 Ja nchka ti' Ndiose cha' kutsean; kan' cha' nda Ni Tyi'i ykwi' Ni cha' kanun ni' kasiya 'ñaan, cha' ka ngula la tian' ni' kasiya 'ñaan, cha' su'we ti xu'wi tiyean ña'aan 'in ta'a ntean, cha' ka ku'nian nchga tñan nu nchka ti' Ni cha' ku'nian nchga tsan.
\v 8 Ja ka jyu'u tii' sikwa; katsaa' cha' re 'in nten, sa ña'an nka nchga cha' 'in X'naan. Kwi' ngwaña'an, ja ka jyu'u tii' cha' nsu'wiǐn ni' ña'an chkwan. Nda ne' nu ti'í 'ñaǎn cha' nchkwiǐn' cha' 'in X'naan, kan' cha' ja tya'an cha' tiyee lye 'a si lo'oo ta ne' nu ti'í 'iin cha' nchkwii' cha' su'we 'in Jesucristo lo'o nten. Ta Ndiose jwersa 'ñaan cha' taloan,
\v 9 cha' kan' lka nu ndlaa 'ñaan; wa ngulo suwi Ni 'ñaan cha' ku'nian tñan nu nchka ti' Ni cha' ka lo chalyuu. Nxlyaa Ni kulaa Ni 'ñaan cha' su'we ti nka tiye Ni, si'i cha' su'we nu 'ñaan tian. Su'we 'a nka tiye Ni ña'an Ni 'ñaan; kan' lka cha' nu ndu'u Jesucristo 'ñaan, cha' nchka ti' Ndiose ku'ni cha' su'we lo'oan bra nu ti ji kwiñan Ni chalyuu.
\v 10 Wa nchka biya' tian' cha' kan' ni, cha' wa yan Jesucristo lo chalyuu, cha' kan' lka nu ndlaa 'ñaan; ska ya' ti mdijin lyo Jesús 'in kune' xa'an bra nu ndyu'u yu xiya' xa wa ngujwi yu, kan' cha' ja tsaa tii 'a chalyuu 'ñaan ta'aan nu msñian cha' 'in Ni, cha' ngulaa Jesús 'ñaan 'in cha' kuxi.
\p
\v 11 Cha' nu 'in Jesucristo re, kan' lka cha' nu nchkwiǐn' lo'o nten. Wa ngulo suwi Ndiose 'ñaǎn cha' nda'aǎn ndu'uǔn cha' kan' 'in ne' xka la'a tsu' chabiya' 'in Ni.
\v 12 Kan' cha' ndijiǐn nu ti'í ni. Lo'o ja jyu'u tiǎn', cha' na' wa jlyo tiǎn' cha' Ndiose ka nu mda cha' re 'ñaǎn. Jlyo tiǎn' cha' nchka 'in Ni ku'ni kuwe ti' Ni 'ñaǎn; nchka 'in Ni taya' Ni 'ñaǎn bra nu ngi'niǐn tñan nu nda Ni 'ñaǎn, cha' ka tsaa to'o su'we tñan 'ñaǎn bra nu tiya tsan nu kan Jesús lo chalyuu xiya'.
\p
\v 13 Ti tyu'wi tii' nchga cha' nu wa ngwa'uǔn 'iin sikwa. Cha' nu ñi 'a lka cha' kan', lo'o su'we 'a si xñii su'we cha' kan'. Su'we ti xu'wi tiyee ña'aan 'in nten, chun' ndi'in cha' 'iin lo'o Jesucristo.
\v 14 Xñii su'we kwenta 'in cha' su'we nu wa ykwi' Ndiose lo'oan; lo'o Tyi'i Ni taya' Ni 'iin cha' ku'nii tñan kan', kan' cha' nganun Tyi'i Ni ni' kasiya 'ñaan.
\p
\v 15 Ja chan jlyo tii' cha' ka'an nten 'in Jesucristo wa ngulaa ya' ne' 'ñaǎn; ni siya nchga ne' nu ndi'in lo yuu 'in Asia, lo'o Figelo, lo'o Hermógenes, wa ngulaa ya' ne' kan' 'ñaǎn.
\v 16 Ska ti Onesíforo ni, lye 'a mdaya' yu kan' 'ñaǎn; lo'o ja mjyu'u ti' yu cha' nsu'wiǐn ni' ña'an chkwan, ta'a ti nda'an na'an yu 'ñaǎn nde re. Kan' cha' nchka tiǎn' cha' chka t'nan ti' Ndiose 'in yu, lo'o nchga nten nu ndi'in se'en ndi'in yu kan'.
\v 17 Bra nu mdiyan yu kichen Roma re, bra kan' mda'an naan 'a yu 'ñaǎn cha' kan yu se'en ndi'iǐn.
\v 18 Nchka tiǎn' cha' chka t'nan ti' X'naan 'in yu kan', bra nu tiya tsan nu ku'ni biya' Ni 'in nchga nten. Kwi' ngwaña'an, jlyo su'we ti' Ni nchga cha' su'we nu y'ni yu lo'oǔn nde kichen Efeso. 
\c 2
\s Ka ngula la ni' kasiya 'in Timu, nchka ti' Palyu
\p
\v 1 Sñiěn', nchka tiǎn' cha' chkwiǐn' xka cha' lo'oo ni: Ndi'in cha' ka ngula la ni' kasiya 'iin chabiya' 'in Jesucristo nu xkwi' cha' su'we ngi'ni lo'oan.
\v 2 Wa ynaan nchga cha' nu ngwa'uǔn se'en ndi'in tyun nten; lo'o ni, ti kwi' sa ña'an cha' nu ngwa'uǔn 'in ne', kwi' ngwaña'an kwa'uu 'in nten nu tyukwi ti tiye nchka ti' kwa'u cha' kan' 'in xka ta nten, cha' ku'ni xa'an su'we ne' kan' cha' 'in Ndiose.
\p
\v 3 Sa ña'an nu ndalo 'a ska sndaru bra nu nda'an yu wsuun, lo'o nu'win, kwi' ngwaña'an ndi'in cha' taloo bra nu tyijiin nu ti'í cha' ti'í ti' nten 'iin, cha' sndaru 'in Jesucristo lkaa ni.
\v 4 Ska loo ti tñan ngi'ni sndaru, kan' ndi'in cha' ku'ni yu; ja ku'ni yu xka loo tñan, cha' nchka ti' yu cha' ka su'we tiye x'nan yu lo'o yu, cha' kan' lka nu ngulo suwi 'in yu cha' ka yu sndaru.
\v 5 Kwi' ngwaña'an lka se'en ndi'in jya ne' lo'o ta'a ne'; wa lka ndiya biya' sa ña'an nu ndi'in cha' tyi'in jya ne', cha' ka ku'ni ska yu kanan 'in ta'a yu. Si ja ku'ni ne' sa ña'an biya' nu ndukwa kan', bra kan' ja ska nan kaja 'in yu nu ku'ni kanan xa wa mdyii mdi'in jya ne' bra kan'.
\v 6 Xka cha' ni, ska nten nu tlyu 'a tñan ngi'ni lo jyan 'in yu, kwi' yu nu ndi'in cha' ku yu kulo nan nu tyo'o lo jyan kan'.
\v 7 Tya'an chin' cha' tiyee cha' tiya nu tka ngwa'uǔn tian 'iin re, lo'o nu nka X'naan taya' Ni 'iin cha' ka biya' tii' nchga cha' kan'.
\p
\v 8 Tyu'wi tii' 'in Jesucristo, cha' kan' lka nu ndyu'u xiya' bra nu ngujwi yu. Ti kwi' nten 'in ayman David ngwa Ni kan'. Ti kwi' cha' su'we 'in Jesús nu lu'u, kan' lka cha' nu nchkwiǐn' lo'o nten,
\v 9 kan' cha' ti'í ti' nten 'ñaǎn ni. Sa ña'an nu nda ne' nu ti'í 'in ska nten nu ndi'in ki'ya 'in, ngwaña'an mskan' ne' 'ñaǎn ni' ña'an chkwan ni. Chañi cha' msu'wa ne' 'ñaǎn ni' ña'an chkwan, ni siya ja nchka 'in ne' su'wa nchkun' ne' cha' su'we 'in Ndiose ngwaña'an;
\v 10 kan' cha' ndaloǔn 'in ne', ni siya lye 'a nda ne' nu ti'í 'ñaǎn. Taloǔn 'in cha' kuxi kan' cha' 'in ta'a nten nu ngulo suwi Ndiose 'in, cha' lo'o kulaa Jesucristo 'in ne', cha' kaja chalyuu nu ja tsaa tii 'a 'in ne'. Lo'o bra kan' ka tyi'in ne' nde se'en ndi'in Ndiose, se'en su'we 'a ña'an nchga nan.
\p
\v 11 Ndi'in cha' xñi su'we wan cha' nu ñi nu ndukwa re:
\q Si kajaan, cha' lkaan nten 'in Jesucristo, bra ti tyaan tyi'ian lo'o Ndiose bra kan'.
\q
\v 12 Si taloan bra nu ta ne' nu ti'í 'ñaan chun' nchkwian' cha' 'in Jesús, bra kan' kaja se'en tyi'ian lo'o Ni nde se'en nka Ni ndloo. 
\q Si chkwian' cha' ja ndi'in cha' 'ñaan lo'o Jesucristo, kwi' ngwaña'an Ndiose, chkwi' Ni cha' ja ndi'in cha' 'in Ni lo'oan.
\q
\v 13 Ni siya kulaa ti'ian cha' 'in Ni, ña'an ti su'we 'a ku'ni Ni lo'oan;
\q ja nxa'an cha' 'in Jesús, ña'an ti ku'ni Ni nchga cha' nu wa ykwi' Ni cha' ku'ni Ni.
\s Nten nu su'we 'a tñan ngi'ni
\p
\v 14 Ta'a ti chkwii' lo'o ne' cha' tukwa ne' nchga cha' nu nda'aǎn re. Wa jlyo ti' X'naan nchga tñan nu ngi'ni skaa ne', kan' cha' kuloo tñan cha' ja chkwi' ne' ka'an 'a cha' lo'o ta'a ne' cha' 'in ya ña'an ti kwentu nu nchkwi' nten. Ja su'we siya' ti ngwaña'an, cha' lye 'a xtiyaa' cha' nu nsu'wi ke nten nu kunan cha' kan'.
\v 15 Lye 'a ku'nii tñan nu wa nda Ndiose 'iin, cha' ja ka jyu'u tii' 'in tñan nu wa y'nii nde re, bra nu tsaa tyi'ian nde se'en ndi'in Ni. Chañi 'a lka cha' 'in Ndiose, kan' cha' ti kwa'uu la cha' nu ñi kan' 'in ne' sikwa; lo'o su'we ti ka tiye Ni ña'an Ni 'iin bra kan'.
\v 16 Ja kunaan 'aa cha' kuxi nu nchkwi' ne' kwiñi kan', cha' tijyu' 'a nduun ne' kan' 'in Ndiose; ja nda'an 'a ne' kan' tuwiin 'in Ni.
\v 17 Cha' kuxi ndu'u ne' kan', kwi' ngwaña'an tlyu la ka cha' kuxi kan' nde loo la. Sa ña'an nu ndyaa nxeen ska kitsu' tlá nu ndiya lo kunaan', sa la nu ku'ni ñu'un ña'aan kunaan', kwi' ngwaña'an lka cha' kwiñi nu ndu'u Himeneo lo'o Fileto kan'.
\v 18 Ngulaa ya' ne' kan' cha' nu ñi 'in Ndiose, lo'o ni, nchkwi' ne' kan', cha' ja ndi'in cha' tyu'uan xiya'. “Nan wa ndyu'u ne' xiya', nchga nten nu ndi'in cha' tyu'u” ndukwin ne' kwiñi kan'. Lo'o ndiya chin' ne' ta'aan nu wa msñi cha' nu nchkwi' ne' kan', lo'o ni, ja jlyo su'we ti' ne' ni ña'an cha' nu yaa ña'an ti' ne' ti kulo.
\v 19 Wa mstya su'we Ndiose kiya' cha' 'in ña'an nu nka nten 'in Ni. Nde ndukwa ska cha': “Wa nsu'wi lyo ykwi' Ni nchga nu ka nten 'in Ni.” Lo'o ndukwa xka cha' re: “Nchga nten nu ndi'in cha' 'in lo'o Krixtu, ndi'in cha' kulaa ya' ne' nchga cha' kuxi.” Ngwaña'an nchkwi' lo kityi 'in Ndiose.
\p
\v 20 Nsu'wi tyun lo nan ni' ña'an kii' 'in ska na'an tnun: ndiya nan oro, ndiya nan plata, ndiya nan yka, lo'o ndiya nan yuu. Xkwi' tñan su'we ngi'ni nten lo'o ka'nan oro, lo'o ka'nan plata; ni siya ja nduwe ti' ne' cha' 'in ka'nan yka, ka'nan yuu, cha' x'nan la nsu'wi lyo ran.
\v 21 Ña'an ti' nan nu nnanjo'o ni' ña'an kii', ngwaña'an lka nten 'in Jesucristo; nxke' tiǎn' cha' nduwe ti' X'naan 'ñaan sa ña'an nu nduwe ti' x'nan na'an 'in ka'nan 'in yu, nu ka'an 'a nga'an. Lo'o ja ka ku'nian tñan su'we kan' si ja luwi kasiya 'ñaan; kan' cha' ndi'in cha' kulaa yaan' nchga cha' kuxi cha' ka luwi kasiya 'ñaan, cha' ska ti tñan nu nda Ndiose 'ñaan ka ku'nian bra kan'.
\p
\v 22 Kune' nu'win, Timu, kwi' ngwaña'an nsu'wi 'a cha' kuxi nu ndiya ti' yu kune'; ja ku'nii 'a cha' kuxi kan'. Ña'an ti xñii su'we cha' nu ñi kan', su'we ti xu'wi tiyee ña'aan 'in nten, su'we ti tyi'iin lo'o ta'a nten wan; su'wa 'a ku'nii cha' re lo'o nchga ta'a wan nu wa y'ni luwi Ndiose kasiya 'wan, kwi' ta'a ndi'in cha' 'wan lo'o X'naan.
\v 23 Ja xkween 'a cha' 'in nten nu ja jlyo ti' siya' ti sa ña'an lka ska cha' nu ñi; ja ska cha' jlyo ti' ne' kan'; nan nchka ti' ne' xuun ne' lo'oan cha' 'in ska cha' laja ti 'in ne'.
\v 24 Si nka wan nten nu ngi'ni tñan 'in nu nka X'naan ni, ja su'we si tyi'in wan wsuun lo'o ta'a wan; ndi'in cha' chkwi' su'we wan lo'o nchga nten. Lo'o su'we 'a si nchka 'wan kwa'u wan cha' 'in Ndiose 'in xka ta nten; kwi' ngwaña'an, ndi'in cha' talo wan 'in nten nu ti'í ti' 'wan,
\v 25 lo'o 'in nten nu msin' ti' 'wan. Su'we ti chkwi' wan lo'o nten nu msin' ti', cha' ngwaña'an ka ku'ni X'naan tñan ni' kasiya 'in ne' kan', cha' ka kwa'u Ni 'in ne' sa ña'an ndyo'o cha' nu ñi kan'. Su'we 'a si kulaa ya' nten nu msin' ti' kan' 'in nchga cha' kuxi nu ngi'ni ne',
\v 26 cha' bra kan' ka kulaa Ni 'in ne' ya' kune' xa'an. Nan wa msñi kune' xa'an 'in nten nu msin' ti' kan' ti ngwa s'ni cha' ku'ni ne' tñan kuxi cha' 'in. 
\c 3
\s Tyempu kuxi nu ka bra wa tyii ti chalyuu
\p
\v 1 Tya'an su'we chin' cha' tiyee, Timu; xa wa tyii ti chalyuu, kan' ka'an 'a cha' tukwi ka 'in nten.
\v 2 Tyempu nde loo la, kan' tyi'in 'a nu kuxi lo chalyuu: ni siya nten nu ska ti tñan 'in ti ykwi' ti nduwe ti', ni siya nten nu nchka 'a ti' kaja tñi 'in, ni siya nten nu siye' 'a ngi'ni lo'o ta'a nten, ni siya nten nu nchka ti' cha' ka tnun 'a ti ykwi' ti, ni siya nten nu chen 'a ña'an nchkwi' cha' 'in Ndiose, ni siya nten nu ja nnan cha' nchkwi' ne' kula 'in ne', ni siya nten nu ja ndya xu'we 'in Ndiose, nu ja ndya xu'we 'in ta'a nten, ni siya nten nu ja xlyaa kunan cha' su'we 'in Ndiose siya' ti,
\v 3 ni siya nten nu ja su'we 'a nka tiye ña'an 'in ta'a nten, ni siya nten nu ja ngi'ni 'a cha' tlyu ti' 'in ta'a nten, ni siya nten nu lye 'a nchkwi' kwentu 'in ta'a nten, ni siya nten nu ja xlyaa xñi kwenta 'in ti ykwi' ti, chun' nchka ti' ne' ku'ni ne' nchga cha' kuxi nu ndiya ti' ne' ku'ni ne', ni siya nten nu xa'an 'a tiye, ni siya nten nu ja ska cha' su'we nchka ti' ku'ni,
\v 4 ni siya nten nu ndujwi' xu'wa 'in ta'a su'we ndi'in, ni siya nten nu ja nduwe ti' siya' ti si lye 'a tyijin lyo 'in ta'a nten; ku'ni nten kan' nchga cha' kuxi nu jñan kasiya 'in ti ykwi' ti ne', cha' ja nchka 'a ti' ne' kan' kunan ne' cha' 'in Ndiose.
\v 5 Kwiñi 'a ne' kan' bra nu ku'ni tnun ne' 'in Ndiose; nxke' tian' cha' su'we 'a ngi'ni ne', lo'o ja nda 'a ne' chabiya' nu ku'ni cha' 'in Ndiose tñan ni' kasiya 'in ne'.
\p Nu'win Timu, kulaa yaa' 'in nchga nten nu ku'ni ngwaña'an.
\v 6 Kwi' ngwaña'an ndiya nu kuxi nu nñi lyo'o 'in nu kuna'an tintu nu ja nchka 'a tya'an su'we cha' tiye ne'. Nda'an nu kwiñi kan' ni' ña'an 'in ne' cha' kwa'u cha' kwiñi 'in ne'. Nan tintu 'a nu kuna'an kan', cha' ndi'in 'a ki'ya 'in ne', cha' nchka 'a ti' ne' xñi ne' ya ña'an ti cha' kuxi.
\v 7 Nchka 'a ti' nu kuna'an kan' ku'ni xa'an ska cha', lo'o ja nchka 'a 'in ne' ka biya' ti' ne' ska cha' nu ñi.
\v 8 Sa ña'an ngwa ayman Janes lo'o ayman Jambres, yu ta'á nu msuun lo'o ayman Moisés nu ngwa s'ni, kwi' ngwaña'an nka nu kwiñi kan' cha' nxuun ne' lo'o nchga cha' nu ñi. Ja nchka tya'an su'we cha' tiye ne', cha' ja ndyaa ña'an ti' ne' kan' 'in Jesús siya' ti.
\v 9 Sa kan' ti cha', ja talo nten chalyuu tyun tsan 'in cha' kuxi nu ngi'ni ne' kuxi kan'. Sa ña'an nu ngwa biya' ti' nten s'ni cha' kwiñi 'a ayman Janes lo'o ayman Jambres, kwi' ngwaña'an ka biya' ti' nchga nten cha' xkwi' nñi lyo'o ne' kuxi kan' 'in ne' ni.
\s Xiya' ndlo Palyu tñan 'in Timu
\p
\v 10 Lo'o ni, Timu, jlyo tiǎn' cha' su'wa ti nka tiyee lo'oǔn, kan' cha' ngi'nii sa ña'an nu ngwa'uǔn 'iin; nu'win ngi'nii tñan sa ña'an nu ngi'niǐn tñan, cha' ndyaa ña'an tii' cha' 'in Jesús sa ña'an nu ndyaa ña'an tiǎn' 'in Ni. Wa na'aan cha' ndaloǔn 'aǎn 'in nten, cha' su'we 'a nka tiyeěn na'aǎn 'in nten, cha' ndaloǔn,
\v 11 ni siya lye 'a ti'í ti' nten 'ñaǎn, ni siya lye 'a ndijiǐn nu ti'í. Wa jlyo tii' sa ña'an cha' kuxi ngwa 'ñaǎn nde kichen Antioquía, nde kichen Iconio, nde kichen Listra, bra nu ngwa ti'í ti' ne' 'ñaǎn la kan'; lo'o nu nka X'naan ngulaa 'ñaǎn 'in nchga cha' kuxi kan'.
\v 12 Lo'o chañi cha' ta nten nu ti'í 'in nchgaan nu nchka tian' cha' ka luwi kasiya 'ñaan cha' 'in Jesucristo.
\v 13 Nten nu ngi'ni cha' kuxi ni, ndi'in cha' ti ku'ni la ne' cha' kuxi kan'; lo'o nu kwiñi ni, ndi'in cha' ti chkwi' la ne' cha' kwiñi. Ti ykwi' ti ne', ti ndyaa ña'an 'a ti' ne' cha' nu nchkwi' ta'a kwiñi ne' bra kan'.
\p
\v 14 Nu'win ni, ña'an ti xñii su'we nchga cha' nu wa y'nii xa'an; nan wa ngwa biya' su'we tii' cha' kan', cha' nu ñi lka kan'. Kwi' ngwaña'an, wa jlyo tii' ti nka nu ngwa'u cha' kan' 'iin ti kulo.
\v 15 Ti kunee' mdyisnan y'nii xa'an kityi 'in Ndiose; kan' lka kityi nu ka kwa'u ñi 'ñaan sa ña'an ka tyo'o laan 'in cha' kuxi, si xñiin su'wean cha' 'in Jesucristo kan'.
\v 16 Ndiose y'ni cha' mbi'ya cha' kan' ke nten chalyuu, cha' ngwa'an ne' xkwi' cha' 'in Ni lo kityi kan', kan' cha' su'we 'a si ti kwa'uun laan cha' nu ndukwa lo kityi kan' 'in nten, cha' ka biya' ti' ne' nchga cha' 'in Ndiose. Kan' nu ka tukun' cha' 'in ne' cha' ja ku'ni 'a ne' cha' kuxi. Lo'o ndu'u kityi kan' 'ñaan sa ña'an ka xñiin su'ween laan cha' 'in Ndiose, ndu'u ran 'ñaan ni ña'an ku'ni xa'aan cha' xkwi' cha' su'we ku'nian.
\v 17 Ti kwi' kityi kan' lka nu kwa'u 'in ta'aan nu lkaan nten 'in Ndiose, sa ña'an ka nu su'we ti ku'nian nchga tñan nu nda Ni 'ñaan cha' ku'nian lo chalyuu. 
\c 4
\s Wa ndla ti tyii chalyuu 'in Palyu
\p
\v 1 Kuloǔn tñan 'iin chabiya' 'in Ndiose, kwi' ngwaña'an chabiya' 'in Jesucristo nu ku'ni biya' 'in nchga nten nu ti lu'u, lo'o 'in nchga nten nu wa ngujwi. Ti kan Jesucristo xiya' cha' ka ndloo Ni 'in nchga nten.
\v 2 Kuloǔn tñan 'iin cha' kwa'uu cha' 'in Ndiose 'in nten; ña'an ti kwa'uu cha' kan' 'in nchga nten, ni siya nchka ti' ne' kunan ne' cha' kan', ni siya ja nchka ti' ne' kunan ne'. Tyukwi ti tiyee kwa'uu 'in ne', cha' ki'ya ne' kwenta 'in nchga cha' kuxi nu nsu'wi ni' kasiya 'in ne'; ngwaña'an ka tayaa' 'in ne' cha' kulaa ya' ne' cha' kuxi kan'. Chan taloo 'in ne' cha' su'we ti kwa'uu cha' su'we kan' 'in ne'.
\v 3 Cha' nu tyempu nde loo la, ja xlyaa nten kunan cha' su'we kan' bra kan'; tya'an naan la ne' 'in tyun nten nu kwa'u 'in ne' nchga cha' kuxi nu ndiya la ti' ne' kan' kunan ne'.
\v 4 Bra kan' kulaa ya' ne' nchga cha' nu ñi nu wa ynan ne' ti kulo, chun' ja nchka ti' ne' kunan ne' cha' nu ñi kan'; xñi ne' nchga cha' kwiñi, nchga kwentu bra kan'.
\v 5 Nu'win ni, tya'an chin' cha' su'we tiyee nan lka nu su'we la ku'nii, cha' taloo la bra nu ti'í 'a ti' ne' 'iin, cha' ña'an ti chkwii' cha' su'we 'in Ndiose lo'o nten, cha' ti ku'nii la nchga tñan nu ndi'in cha' ku'nii cha' 'in Ndiose.
\p
\v 6 Lo'oǔn ni, wa tyii ti tñan 'ñaǎn lo chalyuu, cha' kwa'uǔn cha' su'we 'in Ndiose 'in nten; wa ndla ti kajaǎn, nxke' tiǎn'.
\v 7 Wa lye 'a msu'waǎn jwersa cha' katin cha' kuxi; wa mdyii mda'aǎn tuwiin 'in Jesucristo, kan' cha' wa tya'aǎn tiǎn se'en ndi'in Ndiose. Cha' su'we nu wa msñian ni, wa nganun su'we cha' kan' ni' kasiya 'ñaǎn,
\v 8 kan' cha' jlyo tiǎn' cha' ndiya ska cha' su'we nu kaja 'ñaǎn bra kan'; ta ykwi' X'naan cha' su'we kan' 'ñaǎn bra nu tiya tsan cha' ku'ni biya' Ni 'in nchga nten, cha' nu ñi 'a ngi'ni biya' Ndiose 'in nten. Ta Ni cha' su'we kan' 'in nchga nten nu tyi'in ta 'a 'in Krixtu, sa ña'an bra nu kan Ni xiya', cha' su'we 'a nka tiye ne' ña'an ne' 'in Ni; si'i skaǎn tiǎn nu ta Ni cha' su'we kan' 'ñaǎn.
\s Cha' nu ykwi' Palyu xa wa tyii ti kityi
\p
\v 9 Ku'nii xu'we lyaa tuwiin 'iin cha' ndla ti kaan nde se'en ndi'iǐn re.
\v 10 Wa ngulaa ya' Dema 'ñaǎn chun' ndiya la ti' yu cha' kuxi nu nsu'wi chalyuu, ndyaa yu kichen Tesalónica. Wa msu'waǎn 'in Crescente ndyaa yu nde Galacia, kwi' ngwaña'an wa msu'waǎn 'in Tito ndyaa yu nde Dalmacia;
\v 11 xka ti Luka ti ndi'in lo'oǔn nde re. Tsaa naan 'in Marku cha' kaan lo'o 'in yu nde re, cha' lo'o yu nchka 'in yu taya' yu 'ñaǎn lo'o tñan re.
\v 12 Wa nguloǔn tñan 'in Tíquico cha' tsaa yu nde kichen Efeso.
\v 13 Bra nu kaan nde re, kan y'yaa te' kichan' 'ñaǎn, chun' wa mxnuǔn 'in ran na'an tyi Carpo nde kichen Troas; kwi' ngwaña'an nchga libru 'ñaǎn lo'o nchga la kityi 'ñaǎn kaan lo'o 'in ran.
\p
\v 14 Jantru, nu lka kwityi chkwan kan', lye 'a na'an ti'í yu 'ñaǎn; ka'an 'a cha' kuxi y'ni yu lo'oǔn. Wa jlyo ti' X'naan nchga cha' kan', lo'o ndi'in cha' ta Ni nu ti'í 'in yu kan'.
\v 15 Cha' tiya ti tii' tyi'iin, cha' ja ku'ni Jantru kan' tukwi 'iin, bra nu chkwii' cha' su'we 'in Ndiose lo'o nten.
\p
\v 16 Bra nu ngwa biya' 'ñaǎn tloo yu wsiya ti kulo ni, ja tukwin ykwi' cha' su'we 'ñaǎn bra kan'; msnan ne'. Kan' cha' njñaǎn 'aǎn xu'we 'in Ndiose cha' ku'ni Ni cha' tlyu ti' 'in ne' kan'.
\v 17 Ykwi' X'naan mdaya' Ni 'ñaǎn bra kan', mdaya' Ni 'ñaǎn cha' ti mdaloǔn laǎn ngwa'uǔn cha' su'we 'in Jesucristo sa ña'an ya' nu ynan nchga nten xka la'a tsu' nu ndi'in nde re. Sa ña'an lka si wa ku ti kwichi tlá 'ñaǎn, ngwaña'an ngwa xa nu y'ni yu cha' kuxi lo'oǔn, lo'o ngulaa Ni 'ñaǎn ya' yu kuxi kan' bra kan'.
\v 18 Kwi' ngwaña'an, ti kulaa la Ni 'ñaǎn 'in nchga loo cha' kuxi nu tyukwaǎn; jlyo tiǎn' cha' ña'an ti ti xñi la Ni kwenta 'ñaǎn, cha' su'we ti kalaǎn la se'en ndlo Ndiose tñan. Lo'o ja tyii 'a tsan nu ku'niǐn tnuǔn 'in Ndiose la kan'. Kwi' ngwaña'an ka sikwa.
\s Mdyii ykwi' Palyu lo'o ne'
\p
\v 19 Taa cha' su'we 'ñaǎn lo'o Prisca lo'o Aquila, lo'o nchga ne' nu ndi'in na'an tyi Onesíforo.
\v 20 Wa nganun Rastu kichen Corinto, kwi' ngwaña'an wa mxnuǔn 'in Trófimo nde kichen Mileto cha' ti'í yu.
\v 21 Ku'nii lyaa cha' kaan nde re bra nu ti ji tyisnan tyempu tlya'. Nchga ne' re nchka ti' ne' chkwi' ne' lo'oo: lo'o Eubulo, lo'o Pudente, lo'o Lino, lo'o Claudia, lo'o nchga nten 'in Jesucristo kichen re.
\p
\v 22 Kanun Tyi'i ykwi' Jesucristo lo'oo, cha' ka ngula la tii' ni' kasiya 'iin. Ña'an ti ku'ni Ndiose cha' su'we lo'o nchga wan. Ngwaña'an ka sikwa.