\id TIT    
\h TITO
\mt Ngwa'an Palyu kityi ndyaa se'en ndi'in Tito 
\c 1
\p
\v 1 Palyu lkaǎn. Nda'aǎn lo tñan 'in Ndiose, kwi' ngwaña'an, mda Jesucristo tñan 'ñaǎn cha' tsa'aǎn chkwiǐn' cha' su'we 'in Jesús lo'o nten nu ndi'in tyun kichen tijyu'; ndi'in cha' chkwiǐn' lo'o nten nu wa ngulo suwi Ndiose 'in cha' ka ne' nten 'in Ni, cha' su'we la tsaa ña'an ti' ne' kan' 'in Ni bra kan'. Wa msu'wa Jesucristo 'ñaǎn ndijyaǎn cha' ka biya' ti' ne' nchga cha' nu ñi 'in Ni, cha' nchgaan ka ku'niin tnuan 'in Ndiose;
\v 2 kwi' ngwaña'an, ka tyi'in ta ne' 'in chalyuu nu ja tsaa tii 'a 'ñaan bra kan'. Ja kwiñi Ndiose. S'ni 'a ykwi' Ni cha' kaja chalyuu kan' 'ñaan, ti bra nu mñan Ni chalyuu re; ti bra kan' ytsa' Ni 'in nten chalyuu nu wa yten cha' 'in Ni, cha' chañi ka tyi'in ne' se'en ndi'in ykwi' Ni.
\v 3 Lo'o ni, wa mdiya bra nu su'we 'a cha' kanen tijyu' cha' su'we nu nchkwi' Ndiose Stian, nu ka kulaa 'ñaan 'in nchga cha' kuxi; kwi' ngwaña'an, wa ngulo Ni tñan 'ñaǎn cha' kwa'uǔn cha' su'we kan' 'in nchga nten.
\v 4 Nda'aǎn kityi re cha' tsaa se'en ndi'in nu'win, Tito, cha' ña'an ti' sñiěn', ngwaña'an nka tiyeěn na'aǎn 'iin, cha' ska ti ña'an msñian cha' 'in Ndiose. Lo'o ni, nchka tiǎn' cha' ña'an ti ku'ni Ndiose Stian cha' su'we lo'oo, cha' ña'an ti chka t'nan ti' Jesucristo 'iin, cha' ku'ni Ni cha' tiin ti tyi'in ni' kasiya 'iin bra kan'.
\s Tñan nu ngi'ni Tito lo yuu 'in Creta
\p
\v 5 Wa ykwiǐn' lo'oo cha' ti kanuun laa lo yuu Creta kwa, cha' ku'nii jii tñan nu ndi'in cha' ku'nii, cha' nu'win kulo suwii yu kula nu ka ndloo 'in nten ta'a msñian cha' 'in Jesús nchga kichen nde kwa; kulo suwii 'in yu kula kan' sa ña'an nu niǐn 'iin nu ngwa xkan'.
\v 6 Ndi'in cha' xkwi' su'we ti ku'ni yu kula kan', cha' ja kaja ña'an nu xtya nten ki'ya 'in ne'. Kaja kwilyo'o ne' kan' lo'o ska ti nu kuna'an. Lo'o sñi' yu kula kan', ndi'in cha' xñi ne' cha' 'in Jesucristo, cha' ja ku'ni ne' cha' kuxi lo'o xka ta nten; ndi'in cha' tukwa ne' cha' nu chkwi' yu kula sti yu.
\v 7 Kwi' ngwaña'an, nten nu ka ndloo la 'in nchga ta ne' ta'aan ni, ja su'we si ndi'in cha' xtya xka nten ki'ya 'in ne' kan', cha' tñan 'in Ndiose ngi'ni ne' kan'. Kan' cha', nu'win Tito, ndi'in cha' kunaan 'in nten nu ja tiji tloo, nten nu ja msin' ti', nten nu ja ku'wi, nten nu ja ndi'in cha' wsuun lo'o ta'a nten, nten nu ja ndiya 'a ti' tñi;
\v 8 kunaan 'in nten nu nda se'en tyi'in yu nu ndyo'o xka kichen tijyu', nten nu xkwi' ndiya ti' ku'ni cha' su'we, nten nu su'we ti nchkwi' lo'o ta'a nten, nten nu ska ti cha' 'in Jesús nda'an tiye, nten nu ngi'ni sa ña'an nu nchka ti' Ndiose cha' ku'nian, nten nu nchka 'in ku'ni kwenta 'in, ti ykwi' ti.
\v 9 Su'we 'a ka ne' tñan kan' xa wa ndya'an 'a ti' ne' 'in cha' nu ñi nu ngwa'uǔn 'iin, cha' ka 'in ne' kwa'u ne' cha' nu ñi kan' 'in ta'a nten ne', cha' ka 'in ne' xkwen ne' cha' 'in ne' kwiñi.
\p
\v 10 Wa ndiya tyun nten nu ja xlyaa tukwa cha' nu nchkwi' nu nka ndloo, lo'o ka'an 'a ne' judío ndiya nu ngwaña'an ngi'ni; nchkwi' 'a ne' kan' cha' mna', kwi' ngwaña'an, nñilyo'o ne' 'in ta'a nten ne'.
\v 11 Ndi'in cha' tukun' wan tu'wa yu kwiñi kan', cha' ja kwa'u 'a yu cha' kuxi kan' 'in ka'an nten, ta'a ndi'in wan ska ni' ña'an nu wa msñi wan cha' nu ñi 'in Jesús. Ndu'u yu kan' cha' kwiñi 'ñaan ta'aan, chun' nchka ti' yu kaja la tñi 'in yu.
\p
\v 12 Chañi ykwi' ska ayman ta'a kichen tyi ne' Creta se'en ndi'iin, bra nu ykwi' yu cha' jo'o re: “Kwiñi 'a nchga ne' Creta ta'aan, xa'an 'a ne'. Ka'an 'a nan nchku ne', lo'o ja xlyaa 'a ne' ku'ni ne' tñan” ndukwin ayman kan'.
\v 13 Chañi cha' nu ykwi' ayman kan'; kan' cha' lye 'a chkwii' lo'o ne' kan', cha' su'we ti xñi ne' nchga cha' 'in Jesús nu wa ynan ne',
\v 14 cha' ja kunan 'a ne' kwentu nu nchkwi' ne' judío, cha' ja tukwa 'a ne' cha' nu nchkwi' nten chalyuu nu wa ngulaa ya' nchga cha' nu ñi.
\p
\v 15 Luwi 'a nchga loo nan, lka cha' nu nda'an tiye nchga nten nu luwi kasiya 'in tloo Ndiose; lo'o nten nu kuxi kasiya 'in, ja ska nan luwi ndiya lo chalyuu, nxke' ti' ne', chun' ja ndyaa ña'an ti' ne' cha' nu ñi 'in Ndiose. Ngi'ni ne' kan' cha' kuxi, lo'o ja ndi'ya yu kwenta cha' kuxi ran, chun' ndi'in 'a cha' kuxi ni' kasiya 'in ne'.
\v 16 Nten 'in Ndiose lka ne' kan', ndukwin ne', lo'o ja siya' ngi'ni ne' tñan nu nchka ti' Ndiose; kan' cha' ka biya' tian' cha' kwiñi ne' kan'. Kuxi 'a ngi'ni ne', chun' ja xlyaa ne' tukwa ne' cha' nu ñi; kwi' ngwaña'an, ja ska 'a cha' su'we ka ku'ni ne' kan' siya' ti. 
\c 2
\s Cha' nu ñi kwa'u Tito 'in nten cha' kanun su'we tiye  lo'o ta'a nten
\p
\v 1 Nu'win ni, Tito, xkwi' cha' nu ñi kwa'uu 'in nten.
\v 2 Kwa'uu 'in yu nu kula la cha' ja ka ku'wi yu, cha' xkwi' cha' nu ñi tsaa ña'an ti' yu, cha' ku'ni yu kwenta 'in yu, ti ykwi' ti yu, cha' xkwi' cha' su'we ku'ni yu bra kan'; kwa'uu 'in yu kula kan' cha' su'we 'a tsaa ña'an ti' yu nchga cha' nu ñi, cha' su'we xu'wi tiye yu 'in ta'a nten yu, cha' lye 'a talo yu bra nu ña'an ti'í nten 'in yu.
\v 3 Kwi' ngwaña'an, kwa'uu 'in ne' kuna'an kula sa ña'an nu ndi'in cha' tyi'in ne' cha' ku'ni tnun ne' 'in Ndiose, cha' ja chkwi' 'a ne' kwentu 'in nten, cha' ja ka ku'wi ne', cha' xkwi' su'we ti ku'ni ne' tloo ta'a nten ne'.
\v 4 Bra nu ña'an nu kuna'an kune' 'in ne' kula kan', ku'ni xa'an ne' cha' su'we xu'wi tiye ne' ña'an ne' 'in kwilyo'o ne' lo'o sñi' ne' bra kan';
\v 5 ku'ni xa'an nu kuna'an kune' cha' ku'ni ne' kwenta 'in ne', ti ykwi' ti ne', cha' xkwi' cha' su'we ku'ni ne', sa ña'an nu ndi'in cha' ku'ni nten nu wa ngwa luwi kasiya 'in cha' 'in Ndiose; ku'ni xa'an ne' sa ña'an nu su'we ti ku'ni ne' tñan na'an tyi ne', sa ña'an nu chka t'nan ti' ne' 'in ta'a nten ne', sa ña'an nu tukwa ne' cha' nu nchkwi' kwilyo'o ne'. Si xkwi' su'we ti ku'ni nu kuna'an kune', bra kan' ja kaja ña'an chkwi' xka ta nten cha' kuxi 'in Ndiose si'ya ne' kan'.
\p
\v 6 Kwi' ngwaña'an, chkwii' lo'o yu kune' cha' ku'ni yu kwenta 'in yu, ti ykwi' ti yu, cha' xkwi' cha' su'we ku'ni yu.
\v 7 Lo'o nu'wiin, su'we ti ku'nii, cha' ngwaña'an ku'ni xa'an yu kune' kan' nchga cha' su'we xa nu ña'an nten nchga tñan nu ngi'nii; ñi ti kwa'uu nchga cha' 'in yu kan', si'i cha' wjya ti chkwii' lo'o yu.
\v 8 Su'we ti kwa'uu 'in ne' sikwa, cha' ja tukwin ka chkwi' cha' 'iin, cha' ngi'nii cha' kuxi. Bra kan' ka jyu'u ti' yu nu kuxi kasiya 'in, cha' ja kaja ña'an chkwi' yu cha' kuxi 'wan bra kan'.
\p
\v 9 Chkwii' lo'o msu nu msi'i nten, ta'a ndi'in cha' 'wan lo'o Jesús nde kwa, cha' tukwa ne' nchga cha' nu chkwi' x'nan ne', cha' su'we ti ka tiye ne' ku'ni ne' nchga tñan nu kulo x'nan ne', cha' ja xkwen ne' cha' kuxi 'in x'nan ne'.
\v 10 Ja su'we si ku'ni msu kunan nan nu nsu'wi 'in x'nan ne', ni siya chin' ti cha'; xkwi' cha' nu ñi ku'ni msu sikwa. Ku'ni tnun ne' 'in x'nan ne', cha' ka biya' ti' xka ta nten cha' su'we 'a ndi'in cha' 'in Ndiose nu ndlaa 'ñaan.
\p
\v 11 Su'we 'a ngi'ni Ndiose lo'o nten chalyuu cha' nchka ti' Ni kulaa Ni 'ñaan 'in cha' kuxi;
\v 12 kwi' ngwaña'an, wa ngwa'u Ni 'ñaan sa ña'an ka tyi'iin su'wean lo chalyuu. Nchka ti' Ni cha' kulaa yaan' nchga cha' nu ja su'we, nchga cha' kuxi nu ndiya tian' ku'nian, cha' lkaan nten chalyuu, cha' su'we ti ku'nian lo'o ta'a ntean. Bra kan' ka ku'niin tnuan 'in Ndiose su'we ti.
\v 13 Kwi' ngwaña'an ndu'u Ni 'ñaan, cha' ka su'we tiyean bra nu ndi'in taan 'in Ndiose nu tnun 'a cha' ndi'in 'in, ña'an bra nu tyaan Ni xiya'. Luwi 'a xaa xu'wi se'en ndi'in Ni bra kan', bra nu tyo'o tukwa Jesucristo nu ndlaa 'ñaan 'in cha' kuxi.
\v 14 Bra nu mda Jesús chabiya' yjwi ne' 'in yu, cha' ka tyo'o laan 'in cha' kuxi. Ngwaña'an y'ni luwi yu ni' kasiya 'ñaan cha' kaan nten 'in Ni, cha' xlyaan ku'nian xkwi' cha' su'we bra kan'.
\p
\v 15 Ngwaña'an lka cha' nu ndi'in cha' kwa'uu 'in nten, lye chkwii' nchga cha' kan' lo'o ne'. Kuloo tñan 'in ne', nchga loo tñan su'we nu ndi'in cha' ku'ni ne'; ja taa chabiya' ku'ni ne' tñan nu ja su'we, cha' nu'win nkaa ndloo. Ja taa se'en tyukwa kiya' cha' chkwi' nten cha' kuxi 'iin. 
\c 3
\s Sa ña'an nu ndi'in cha' ku'nian si lkaan nten 'in Jesús
\p
\v 1 Kwa'uu 'in ne' ta'a wan nu ndi'in cha' 'in Jesucristo cha' tukwa ne' cha' nu nchkwi' nchga nu nduun loo la 'in ne', nchga ne' wsiya; ndi'in cha' tukwa ne' nchga loo tñan su'we nu kulo ne' kan' 'in ne'.
\v 2 Ja su'we chkwi' ne' kwentu 'in xka la nten, kwi' ja su'we xuun ne' lo'o ta'a nten ne'; ndi'in cha' kuwe ti' ne' 'in xka la nten, cha' su'we ti chkwi' ne' lo'o nchga nten.
\p
\v 3 Nu ngwa s'ni la, ja ndi'yaan kwenta siya' ti sa ña'an nu ndi'in cha' 'in Ndiose; ja ndukwaan 'aan cha' 'in Ni bra kan', cha' wa mñi lyo'o kune' xa'an 'ñaan cha' ku'nian nchga cha' kuxi nu jñan kasiya 'ñaan cha' ku'nian. Mdiya 'a tian' ngi'nian cha' kuxi kan' bra kan', liye' 'a tian' 'in ta'a ntean. Na'an ti'í nten 'ñaan, kwi' ngwaña'an nan, na'an ti'ian 'in nten.
\v 4 Bra kan' ynaan cha' nchka 'a ti' Ndiose kulaa Ni 'ñaan 'in nchga cha' kuxi; cha' su'we 'a ngi'ni Ni lo'oan, cha' su'we 'a nka tiye Ni ña'an Ni 'ñaan nu lkaan nten chalyuu, kan' cha' y'ni Ni ngwaña'an.
\v 5 Lo'o ngulaa Ni 'ñaan chun' nchka t'nan 'a ti' Ni 'ñaan bra kan'; nchka t'nan ti' Ni 'ñaan ni, si'i chun' ska cha' su'we nu wa y'nian, si'i chun' ska tñan kti nu wa y'nian. Ndiose y'ni tñan kan', Ndiose y'ni luwi kasiya 'ñaan, kan' cha' ka chkwian' cha' wa ngula kwian xiya'; wa ngwa kwi kasiya 'ñaan ni, chun' tñan nu wa y'ni Tyi'i Ndiose lo'oan.
\v 6 Su'we 'a nda Ndiose Tyi'i ykwi' Ni nu kanun ni' kasiya 'ñaan chabiya' 'in Jesucristo nu ndlaa 'ñaan;
\v 7 lo'o tnun 'a cha' su'we y'ni Ndiose lo'oan ngwaña'an, cha' kaan sa ña'an si lkaan sñi' Ni, xa wa mjwi chalyuu kwi 'ñaan, kwi' nu ja tsaa tii 'a 'ñaan.
\p
\v 8 Ndi'in cha' xñi su'we wan cha' nu ñi nu nda'aǎn lo kityi re, kan' cha' lye chkwii' cha' re lo'o nchga nten nu msñi cha' 'in Ndiose la kwa, cha' xkwi' cha' su'we ku'ni wan bra kan'. Su'we 'a cha' nu ñi re, ka kunanjo'o cha' kan' 'in ya ña'an ti nten.
\v 9 Ja su'we chkwi' wan ska cha' nu ja lka, kwi' ngwaña'an ja xkwen wan cha' kuxi 'in ta'a wan chun' tñan nu y'ni ayman kula 'ñaan; ti kwi' ti cha', ja ndi'in cha' chkwi' luwe wan cha' nu ngwa'an ayman Moisés nu ngwa s'ni. Ja la tsaa to'o su'we ska cha' si nu ku'ni wan ngwaña'an. Kana' tyempu 'wan ngwaña'an, cha' xkwi' cha' nu ndukwi lo kwi'in ti nchkwi' wan bra kan'.
\p
\v 10 Ska tukwa ya' chkwii' lo'o ne' ta'a wan nu nchka ti' xisuun 'wan, cha' ja su'we ta'a wan 'wan, nu ndi'in cha' 'wan lo'o Jesucristo. Si ja kunan ne' kan', bra kan' kulaa ya' wan 'in ne' kan'.
\v 11 Wa mna' siya' ti cha' tiya 'in ne' kan', kwi' ngwaña'an ndi'in ki'ya 'in ne'; ti ykwi' ti ne' jlyo ti' ne' cha' ndi'in ki'ya 'in ne'.
\s Mdyii ykwi' Palyu lo'o Tito
\p
\v 12 Wa su'waǎn tiǎn ska nten nu tsaa se'en ndi'iin, ni siya Artemas, ni siya Tíquico. Bra nu tiya yu nde kwa, bra kan' bra ti tsaa nde kichen Nicópolis si ka 'iin; tyukwa ta'aan nde kwa bra kan', cha' tyi'ian kichen kan' tyempu tlya', nka tiyeěn.
\v 13 Tayaa' 'in Zenas, nu nchkwi' cha' 'ñaan lo'o yu wsiya, lo'o tayaa' 'in Polo. Ki'ya kwenta 'in ne' cha' ja ska nan lyiji 'in ne' bra nu ti tsaa la ne' tuwiin.
\v 14 Ndi'in cha' ku'ni xa'an nchga nten 'in Jesucristo nde kwa, cha' ku'ni ne' nchga cha' su'we, cha' ka taya' ne' 'in ta'a nten ne' nu lyiji chin' nan 'in. Ja su'we si xkwi' cha' ndaja ti ti' ne' ta'aan ndi'in ne' lo chalyuu.
\p
\v 15 Ta'a ba ndi'in ba nde re nchka ti' ba chkwi' su'we ba lo'o wan. Kwi' ngwaña'an nu'win, su'we ti chkwii' lo'o ta'a wan, kwi' nu lka ta'a su'we nsu'wi ba nde kwa, cha' lka ne' ta'a msñian cha' 'in Jesús. Lo'o ña'an ti ku'ni Ndiose cha' su'we lo'o nchga wan. Ngwaña'an ka sikwa.