\id PHM    
\h FILEMÓN
\mt Ngwa'an Palyu kityi ndyaa se'en ndi'in Filemón 
\c 1
\p
\v 1 Palyu lkaǎn, lo'o ni, nsu'wiǐn ni' ña'an chkwan chun' nchkwiǐn' cha' 'in Jesucristo. Nda'aǎn kityi re lo'o Timu ta'aan, cha' chkwi' ba ska cha' lo'o nu'win, Filemón, cha' su'we 'a ta'a su'we ndi'ian lkaan, cha' ti kwi' ta'a tñan ngi'nian.
\v 2 Kwi' ngwaña'an, nda'an ba kityi re cha' nchga ne' ta'aan nu ndyo' ti'in se'en ndi'iin ka kunan ne' cha' nu chkwi' bare; lo'o nchka tiǎn' chkwiǐn' lo'o Apia ta'aan, lo'o Arquipo nu su'wa ti lye ngi'ni tñan lo'o ba cha' kanen cha' 'in Ndiose, cha' tyijin lyo ba 'in nu kuxi.
\v 3 Nde ña'an nchka tiǎn' cha' ka 'wan, cha' ña'an ti ku'ni Ndiose Stian cha' su'we lo'o wan, cha' ku'ni Ni cha' tiin ti tyi'in ni' kasiya 'wan chun' Jesucristo nu nka X'naan.
\s Ña'an ti msñi su'we Filemón cha' 'in Jesucristo
\p
\v 4 Ndyaǎn xu'we 'in Ndiose cha' 'iin, Filemón, nchga bra nu nchkwiǐn' lo'o Ndiose.
\v 5 La se'en ndi'iǐn re, wa ynen cha' su'we 'a msñii cha' 'in Jesús nu nka X'naan, ngwaña'an su'we 'a nka tiyee ña'aan 'in Jesús lo'o nchga nten 'in Ni nde kwa. Wa ynaǎn nchga cha' kan';
\v 6 kan' cha' njñaǎn cha' tlyu ti' 'in Ndiose, cha' ka biya' su'we ti' nchga nten nu wa ynan cha' nu ykwii' lo'o ne' cha' 'in Jesucristo. Bra kan' ka biya' su'we ti' ne' cha' xkwi' su'we 'a ngi'ni Krixtu lo'oan.
\v 7 Su'we 'a nka tiyeěn ni, ngula ti' ni' kasiya 'ñaǎn chun' nu'win, cha' wa ynaǎn cha' su'we 'a nka tiyee ña'aan 'in ne' ta'aan, cha' ndayaa' 'a 'in ne' ta'aan cha' talo ne' 'in nu ti'í. Lo'o chañi cha' lkaan ta'aan chun' Jesucristo.
\s Njñan Palyu ska cha' su'we cha' 'in Onésimo
\p
\v 8-9 Lo'o ni, njñaǎn ska cha' tlyu ti' 'iin. Jlyo tiǎn' sa ña'an su'we 'a nka tiyee ña'aan 'in nten, kan' cha' si'i ska tñan nu kuloǔn 'iin lka re, ni siya ndiya chabiya' 'ñaǎn cha' chkwiǐn' ngwaña'an lo'oo. Palyu lkaǎn, wa kulaǎn ni, kwi' ngwaña'an, ndi'iǐn ni' ña'an chkwan, chun' cha' nchkwiǐn' cha' 'in Jesucristo lo'o nten.
\v 10 Chkwiǐn' ska cha' lo'oo cha' 'in Onésimo, cha' lka yu ña'an ti' sñiěn'; ngwaña'an nka tiyeěn na'aǎn 'in yu kan' ni, cha' ni' ña'an chkwan re msñi yu cha' 'in Ndiose chun' cha' nu wa ykwiǐn' lo'o yu.
\p
\v 11 Onésimo kan' ni, ja ska tñan ngunanjo'o yu 'iin nu ngwa ti s'ni. Lo'o ni, xka ña'an ngi'ni yu ni; ni siya cha' 'iin, ni siya cha' 'ñaǎn, su'we 'a ngi'ni yu tñan ni.
\v 12 Wa nguloǔn tñan 'in yu cha' xitukwi yu tyaan yu nde se'en ndi'iin xiya', ña'an ti' si ti kwi' kasiya 'ñaǎn msu'waǎn ndyaa nde se'en ndi'iin.
\v 13 Nu'win jlyo tii' cha' nsu'wiǐn ni' ña'an chkwan nde, chun' nchkwiǐn' cha' su'we 'in Jesucristo lo'o nten; kwi' ngwaña'an, su'we 'a ka tiyeěn ni siya kanun yu lo'oǔn nde re, cha' taya' yu 'ñaǎn ña'an ti' si ndi'iin ykwii' nde re.
\v 14 Nchka tiǎn' cha' skaǎn' cha' lo'oo kulo ndukwa la, Filemón. Nu'win, su'we 'a tiyee, lo'o nchka tiǎn' cha' ku'nii lo'o yu sa ña'an nu nchka tii' ykwii'; ja nchka tiǎn' kuloǔn tñan 'iin cha' kanun yu lo'oǔn.
\v 15 Ja chan msnan yu chin' 'iin, cha' nu chun' ndi'in la, ti ta Ndiose chabiya' kala yu se'en ndi'iin xiya', cha' la ni, kanun yu se'en ndi'iin tyukwi tyempu nu tyi'in yu lo chalyuu.
\v 16 Lo'o si'i msu nu msi'i wan ka yu ni, ta'aan lka yu; lo'o lka yu ta'aǎn chun' nu su'we 'a nka tiyeěn ña'aǎn 'in yu. Kwi' ngwaña'an ta'a nu su'we la ndi'in 'iin ka yu ni; ka yu ska msu nu su'we la ti ndi'in 'iin ni, cha' kwi' ta'a nten 'in Jesucristo lka wan.
\p
\v 17 Kan' cha' chkwii' su'we lo'o yu bra nu kala yu se'en ndi'iin, ti kwi' sa ña'an nu su'we nchkwii' lo'oǔn bra nu nda'aǎn se'en ndi'iin, cha' ska ti cha' 'in Ndiose msñian.
\v 18 Si ndukwi yu tne' 'iin chun' cha' kuxi nu y'ni yu nu ngwa s'ni, xtyaa tne' kan' kwenta 'ñaǎn.
\v 19 Tyaǎn tñi kan' 'iin, kan' cha' nsu'waǎn niǐn nde re: Palyu. Ja chkwiǐn' 'aǎn cha' ndiya nan nu ndukwii 'ñaǎn, ni siya ka'an 'a cha' ndukwii, cha' kwi' chalyuu nu ja tsaa tii 'a 'iin wa mjwi 'iin chun' cha' nu wa ykwiǐn' lo'oo.
\v 20 Ta'aan lka yu chabiya' 'in Jesucristo, kan' cha' sa ña'an nu tka mjñaǎn 'iin, cha' su'we ti chkwii' lo'o yu, ngwaña'an ku'nii lo'o yu. Ja chan ka su'we la tiyeěn si ta wan chabiya' tyaan yu nde re cha' taya' yu 'ñaǎn. 
\p
\v 21 Jlyo tiǎn' cha' ndukwaa nchga cha' nu nchkwiǐn' lo'oo, kan' cha' nda'aǎn kityi re cha' tsaa se'en ndi'iin; kwi' ngwaña'an, jlyo tiǎn' cha' ti ka'an la cha' su'we ti ku'nii lo'oǔn.
\v 22 Lo'o xka cha' ni, wa ynan Ndiose cha' ta'a ti njñan wan ska cha' 'ñaǎn 'in Ni, kan' cha' su'we si ku'ni xu'we wan ska se'en tyi'iǐn; nxke' tiǎn' cha' xu'we ti tyo'oǔn ni' ña'an chkwan re, tyaǎn se'en ndi'in wan bra kan'.
\s Mdyii ykwi' yu lo'o ne'
\p
\v 23 Lo'o Epafras ta'a nsu'wiǐn ni' ña'an chkwan re chun' cha' nchkwi' ba cha' 'in Jesucristo, lo'o yu kan' nchka ti' yu chkwi' su'we yu lo'o wan.
\v 24 Kwi' ngwaña'an Marku, lo'o Aristarco, lo'o Dema, lo'o Luka, ta'a ne' ndyu'wi ti' ne' 'iin. Ndaya' 'a ne' kan' 'ñaǎn lo'o tñan 'in Ndiose nde re.
\p
\v 25 Ña'an ti ku'ni Jesucristo nu nka X'naan cha' su'we lo'o ta'a wan sikwa. Ngwaña'an ka sikwa.