\id HEB    
\h HEBREOS
\mt Kityi nu ndyaa nchga se'en ndi'in ne' judío ta'a msñian cha' 'in Krixtu
\c 1 
\s Laa la ykwi' Ndiose lo'o nten chalyuu  xa nu mdiyan Krixtu
\p
\v 1 Nu ngwa s'ni ni, wa tyun 'a ya' ykwi' Ndiose lo'o ayman kula 'ñaan, ngwaña'an ti ña'an ytsa' Ni cha' 'in ayman kan', cha' kwa'u ne' 'in nchga ta'a kichen tyi ne' bra kan'.
\v 2 Bra wa ni, xa nu wa tyii ti chalyuu re, wa ykwi' Ndiose lo'oan xka tu'wa, cha' wa yan Krixtu lo chalyuu re se'en ndi'ian, ti kwi' ska ti kan' nu lka Sñi' Ni. Wa ndi'in Krixtu lo'o Ndiose Sti Ni bra nu ngwiñan Ni chalyuu ti kulo; bra nu ti nñan Ni nchga loo nan nu nsu'wi nde ni' kwan lo'o nchga loo nan nu nsu'wi lo chalyuu, ndi'in Krixtu lo'o Ndiose Sti Ni bra kan'. Kwi' ngwaña'an, wa nda Ndiose chabiya' 'in Krixtu cha' ka Ni ndloo 'in nchga cha' kan' bra kan'.
\v 3 Nchga xaa tnun nu nsu'wi se'en ndi'in Ndiose nganun lo'o Krixtu nu nka Sñi' Ni xa nu mdi'in Ni lo chalyuu. Sa ña'an lka Ndiose, kwi' ngwaña'an lka Krixtu Ndiose; su'we 'a ndlo Krixtu tñan 'in nchga cha' nu ndi'in lo chalyuu siya' ti, kan' cha' su'we ndi'in nchga nan bra kan'. Bra wa mdyii y'ni Krixtu tñan nu mdi'in cha' ku'ni Ni lo chalyuu re, cha' y'ni tyii Ni nchga ki'ya nu ndukwi nten chalyuu, xiya' ndyaa Ni se'en ndi'in Ndiose Sti Ni, ndyaa tukwa Ni nde la'a se'en kwin se'en ndukwa Ndiose nde ni' kwan bra kan'.
\s Ja su'wa ndi'in cha' 'in angajle lo'o Krixtu
\p
\v 4 Ska ti Krixtu nu lka Sñi' Ndiose, tnun la ti chabiya' mjwi 'in Ni ke nchga angajle nu nsu'wi nde ni' kwan, chun' tñan nu ngi'ni Ni 'in Sti Ni; tlyu 'a chabiya' nda Ndiose 'in Krixtu, cha' ska ti cha' 'in Ni lo'o Ndiose Sti Ni.
\v 5 Nde ndiya ska cha' nu wa ykwi' Ndiose lo'o Krixtu nu lka Sñi' ykwi' Ni:
\q Sñiěn' lkaa; wa mdaǎn Tyi'iǐn 'iin cha' lkaa Sñiěn', ndukwin Ni. 
\m Kwi' ngwaña'an wa ykwi' Ndiose xka cha' nu 'in Krixtu:
\q Na' kaǎn Sti yu; kwi' yu ka yu Sñiěn' ykwiǐn', ndukwin Ni.
\m Lo'o si'i cha' 'in angajle nu ndiya nde ni' kwan nchkwi' cha' kan', cha' 'in Krixtu nchkwi' cha' kan'.
\v 6 Nu ngwa ti kulo, bra nu wa ta ti Ndiose tñan 'in Sñi' ykwi' cha' ndijyan yu lo chalyuu re, ykwi' Ni bra kan':
\q Nchga angajle nu ndi'in cha' 'ñaǎn nde ni' kwan, ndi'in cha' ku'ni tnun 'in Sñiěn', ndukwin Ni.
\m
\v 7 Ngwaña'an ykwi' Ndiose cha' 'in Sñi' ykwi' Ni; lo'o xka ña'an ykwi' Ndiose cha' 'in angajle kan':
\q Wa lka angajle 'ñaǎn ña'an ti' kwi'in nu su'we 'a ngi'ni.
\q Sa ña'an ska kii' nu nchkin lye, cha' tijyu' 'a nxtyi xaa ran, kwi' ngwaña'an ngi'ni angajle 'ñaǎn tñan, ndukwin Ni.
\m
\v 8 Lo'o xka ña'an ykwi' Ndiose lo'o Krixtu nu lka Sñi' ykwi' Ni:
\q Ja tsaa tii 'a cha' ka nu'win ndloo la, cha' nu'win lkaa Ndiose, ndukwin Ni;
\q ñi 'a kuloo tñan, chun' nu'win lkaa nu nduun loo la 'in nten chalyuu.
\q
\v 9 Nu'win ndiya 'a tii' nchga cha' su'we nu ku'ni nten; kwi' msin' 'a tii' xa nu ku'ni nten cha' xa'an lo'o Ndiose Stii.
\q Kan' cha' ngulo suwiǐn 'iin cha' ku'nii tñan 'ñaǎn, ndukwin Ndiose.
\q Ngwaña'an su'we 'a nka tiyee ni, cha' tnun la chabiya' wa ndaǎn 'iin ke xka la nu, ndukwin Ndiose.
\m
\v 10 Ti ndiya xka cha' nu wa ykwi' Ndiose lo'o Krixtu nu lka Sñi' ykwi' Ni:
\q Nu'win lkaa X'nan ña'aan chalyuu, ndukwin Ndiose.
\q Ti kulo ngwiñaan nchga nan nu nsu'wi lo chalyuu, kwi' ngwaña'an, wa ngwiñaan nchga nan nu nsu'wi nde ni' kwan.
\q
\v 11 Chun' ndi'in la tsaa tii nchga nan ngwaña'an ti, lo'o ja ska cha' kuxi ka 'iin siya' ti,
\q ni siya kasun chalyuu, ni siya kasun nchga nan nu nsu'wi nde ni' kwan sa ña'an ngasun ska te'.
\q
\v 12 Xkwaan nu'win cha' kan', sa ña'an ncha tu'waan ska te' nu ja nnanjo'o 'a 'ñaan;
\q nxa'aan 'in ran cha' kaja xka nu tiji bra kan'.
\q Lo'o nu'win ni, ja tsaa tii cha' 'in ykwii';
\q ja ndi'in cha' kasuu' siya' ti, ndukwin Ndiose 'in Sñi' ykwi' Ni bra kan'.
\m
\v 13 Nde ndiya xka cha' nu ndukwa lo kityi kula cha' 'in Krixtu:
\q Tyaan lyaa nde re, tyukwaa lyaa se'en ndukwaǎn re.
\q Nde ti tyukwa nu'win sa ña'an ya' nu tyijin lyoǔn 'in nchga nu nxuun lo'oo, cha' nu'win lka ndloo 'in ne' kan' bra kan', ndukwin Ndiose.
\m Ja ya chkwi' Ndiose ngwaña'an cha' 'in ska angajle 'in Ni nde ni' kwan, ska ti lo'o Krixtu wa ykwi' Ni ngwaña'an.
\v 14 Nchga angajle nu ndiya nde ni' kwan ni, nchga tsan ngi'ni angajle kan' tñan nu ndlo Ndiose; kwi'in nu su'we 'a lka angajle kan'. Ndlo Ndiose tñan 'in angajle kan' ndijyan lo chalyuu, cha' taya' 'in nchga nten chalyuu nu wa tyo'o laa 'in cha' kuxi chun' Jesús, cha' nu wa tsaa tii chalyuu re. 
\c 2
\s Tnun 'a cha' lka cha' wa mdo'o laan 'in cha' xa'an
\p
\v 1 Tnun 'a ndi'in cha' 'in Jesús ni, kan' cha' ndi'in cha' xñiin su'wean nchga cha' nu wa ykwi' Jesús lo'oan, cha' ja xi'in chuan' 'in tuwiin ñi nu wa msñian.
\v 2 Nu ngwa s'ni ni, ykwi' angajle kan' lo'o nten cha' 'in Ndiose. Ñi 'a ykwi' angajle kan' lo'o ne' bra kan', cha' lye 'a ta Ndiose nu ti'í 'in nchga nten nu ku'ni cha' kuxi, kwi' nu ja xlyaa kunan cha' nu wa ykwi' Ni.
\v 3 Kwi' ngwaña'an ka 'ñaan ni, ja kaja ña'an lyaan 'in Ndiose xa wa mdyii chalyuu, bra nu ku'ni biya' Ni 'in nchga nten, si ja kunaan cha' nu wa ykwi' Ni, cha' nu tyo'o laan 'in cha' kuxi. Kulo ndukwa la ytsa' ykwi' Jesús nu nka X'naan cha' kan' 'in nten nu y'ni xa'an cha' 'in yu. Ynan ne' cha' nu ykwi' yu bra kan'; chun' ndi'in la lo'oan ytsa' ne' kan' 'ñaan. Kan' cha' jlyo tian' cha' chañi lka cha' kan'.
\v 4 Kwi' ngwaña'an, y'ni Ndiose tñan cha' ka biya' tian' cha' chañi 'a cha' nu ykwi' ne' kan', xa wa y'ni Ni ka'an 'a cha' tnun se'en ndi'ian cha' ña'aan 'in ran. Tyun 'a cha' tnun nu ja ka ku'ni nten chalyuu y'ni Ni bra kan', cha' kuwe tian' 'in Ndiose bra nu ña'aan cha' tnun kan' bra kan'. Lo'o msu'wa Ndiose Tyi'i ykwi' Ni cha' kanun ni' kasiya 'ñaan ta'aan, sa ña'an nka tiye Ni cha' ta Ni 'ñaan; kan' cha' nchka 'ñaan ku'nian tyun loo tñan cha' 'in Ndiose, nu ja nchka ku'ni nten, ti ykwi' ti ne'.
\s Ta'aan lka Jesucristo cha' nu ngwa Ni nten
\p
\v 5 Chkwian' ska cha' 'in chalyuu kwi nu ta Ndiose chun' ndi'in la. Kwi' ja nda Ndiose chabiya' cha' ka angajle ndloo la chalyuu kwi kan', ska ti Ndiose kulo tñan nde kwa bra kan'.
\v 6 Ndiya ska cha' nu ndukwa lo kityi kula se'en nchkwi' cha' re:
\q Ndiose nu nka X'nan ba, ja ska nan lka ba siya' ti, ta'a ba nu lka ba nten chalyuu; nu'win ja ndi'in cha' kuwe tii' 'wa.
\q Ja ndi'in cha' chkaa t'nan tii' 'wa, cha' lka ba nten chalyuu, ndukwin ayman kan'.
\q
\v 7 Lo'o ni, ndiya ska nten nu ngulo nu'win tñan 'in cha' mdiyan yu lo chalyuu;
\q ti xi'i ndaa chabiya' 'in angajle cha' ka tnun la 'in yu kan' bra kan'.
\q Lo'o chun' ndi'in la ndaa ska se'en su'we 'a se'en tyukwa yu lo'oo, ña'an ti' se'en ndukwa ska nten nu tnun 'a nchka, ska x'nan nten, ska se'en ku'ni tnun nten 'in yu.
\q
\v 8 Kwi' ngwaña'an, wa ndaa chabiya' cha' ka yu ndloo la 'in nchga nan nu nsu'wi lo chalyuu.
\m Ngwaña'an nchkwi' kityi kula kan'. Cha' 'ñaan ta'aan nu nsu'wian lo chalyuu nchkwi' kityi kan', bra nu nchkwi' cha' wa nda Ndiose chabiya' 'in yu cha' ka yu ndloo 'in nchga nan, ni siya ja ya ka chkan' cha' lka yu ndloo la ni.
\v 9 Wa jlyo tian' sa ña'an ngwa 'in Jesús nu ngwa bra kan', cha' chin' ti bra ngwa angajle tnun la 'in ykwi' yu. Ngujwi yu lo wsi si'ya nchga nten chalyuu, cha' xkwi' ka'an 'a cha' su'we ngi'ni Ndiose lo'oan. Lo'o ngwaña'an, nduwe 'a tian' sa ña'an nchka 'in Ni ni, cha' lye 'a ngi'ni tnun nten 'in Ni cha' ngujwi Ni si'yaan, cha' wa mdijin 'a Ni nu ti'í si'yaan.
\p
\v 10 Ti kulo ngwiñan Ndiose nchga nan nu nsu'wi lo chalyuu, kwi' ngwaña'an nxñi Ni kwenta 'in nchga nan; lo'o ngwaña'an, nchka ti' Ni cha' tyaan ta'aan nu lkaan sñi' Ni nde se'en su'we 'a ña'an se'en ndukwa Ni. Kan' cha' kulo ndukwa ndloo 'a cha' 'in Ndiose cha' tyii ku'ni Jesucristo nchga tñan nu ndi'in cha' ku'ni Ni lo chalyuu; lo'o ni, wa mdo'o laan 'in cha' kuxi chun' Jesús, ni siya ka'an 'a nu ti'í mdijin yu bra nu y'ni yu tñan kan'.
\v 11 Wa msuwi Jesús kasiya 'in nten chalyuu, kan' cha' Ndiose lka Stian ni; lo'o ta'aan nu ngwa luwi kasiya 'ñaan chun' Jesús, ska ti Stian lo'o Jesús, cha' Ndiose lka Stian ni. Lo'o ngwaña'an, ja njyu'u 'a ti' Jesús chkwi' Ni cha' lka Ni ta'aan.
\v 12 Ndiya ska cha' lo kityi kula nu nchkwi':
\q Ndiose Stiǐn, su'we 'a chkwiǐn' cha' 'iin lo'o ne' ta'aǎn se'en ndi'iǐn;
\q kula tu'waǎn, kwi' ku'niǐn tnuǔn 'iin tloo nchga nten nu ndyo' ti'in re.
\m
\v 13 Lo'o ndiya xka cha' nu ykwi' yu kan':
\q Lo'oǔn ndyaa ña'an 'a tiǎn' 'in Ndiose Stian, ndukwin.
\m Lo'o bra kan' ti ykwi' la yu xiya':
\q Nde ti ndi'in ba, su'wa ndi'iǐn lo'o sñiěn' nu wa nda Ndiose 'ñaǎn.
\m Ngwaña'an nchkwi' cha' nu wa ndukwa lo kityi kula kan'.
\p
\v 14 Nan nu lkaan nten chalyuu ni, ska ti kunaan', ska ti tnean lo'o ne' kula 'ñaan lo'o ne' ta'aan. Sa ña'an lkaan, kwi' ngwaña'an ngwa Jesús nten, kan' cha' ngwa 'in yu ngujwi yu si'yaan. Ska ti ngwaña'an mjwi ña'an mdijin lyo Jesús 'in kune' xa'an nu ndlo tñan lo kii' jwlyaa, se'en nchka ti' kune' xa'an cha' tsaa kasiya 'in nchga nten.
\v 15 Kan' cha' nchka 'in Ni kulaa Ni 'in nchga nten nu ntsen 'a cha' kaja; nchga tsan nu ndijyan ne' lo chalyuu, kuxi ti ndi'in ne', ti'í 'a tñan 'in ne', nxke' ti' ne', cha' xkwi' ntsen 'a ne' kaja ne'. Ngwaña'an y'ni tyii Jesús cha' ntsen nten, y'ni Ni cha' su'we ti tyi'in nten ni.
\v 16 Ja yan Jesús lo chalyuu cha' taya' yu 'in angajle 'in Ni nde ni' kwan; cha' 'ñaan re nu nkaan nten chalyuu, kan' cha' mdiyan Jesús, cha' su'wa ya' Ni 'ñaan, nka tiye Ni, cha' ta'aan lkaan nten 'in ayman Abraham, ni siya chun' ndi'in la chin' ndijyaan lo chalyuu.
\v 17 Kan' cha' y'ni su'wa Jesús cha' lo'o nten 'in Ni lo chalyuu re, chun' ngujwi Ni lo wsi si'yaan. Lo'o ni, ndukwa Ni ti kwi' se'en tnun se'en ndi'in Ndiose cha' chkwi' Ni lo'o Sti Ni, cha' ku'ni tyii Ni nchga ki'ya nu ndukwian. Lo'o ni, wa lka Jesús ña'an ti' ska sti jo'o nu ndloo la ti, nu ndyu'wi 'a ti' 'ñaan, nu lye 'a nchka t'nan ti' 'ñaan.
\v 18 Kan' cha' nchka 'in Jesús kulaa 'in nten nu ndatsaa 'a kune' xa'an 'in. Nchka 'in Ni ku'ni Ni ngwaña'an, cha' lo'o ykwi' Ni ngwa ti' kune' xa'an ku'ni kanan 'in Ni, lo'o Ni mdijin Ni nu ti'í bra nu mdi'in Ni lo chalyuu re. 
\c 3
\s Tnun la ti ndi'in cha' 'in Jesús ke Moisés
\p
\v 1 'Wan ta'a msñian cha' 'in Krixtu, 'wan nu wa ngulo suwi Ndiose 'wan, tya'an cha' tiye wan sa ña'an ndi'in cha' 'in Jesucristo. Nan wa ngulo Ndiose Sti yu tñan 'in yu cha' kan yu lo chalyuu re, lo'o ni, lka Ni ña'an ti' x'nan sti jo'o nu nduun loo la 'ñaan, cha' wa msñian cha' 'in Ni.
\v 2 Bra nu mdi'in Jesús lo chalyuu, y'ni Jesús nchga tñan nu ngulo Ndiose Sti yu 'in yu, mdukwa yu cha' nchkwi' Sti yu, kwi' nu ngulo tñan 'in yu cha' kan yu lo chalyuu re ti kulo. Kwi' ngwaña'an mdukwa ayman Moisés tñan nu ngulo Ndiose 'in yu nu ngwa s'ni la.
\v 3 Lo'o ni, lye la ngi'niin tnuan 'in Jesús, cha' ja su'wa ndi'in cha' 'in ayman Moisés lo'o Jesús. Ña'an ti' xa wa mdyii ndya' ska na'an, su'we 'a nchkwi' nten cha' 'in yu nu ngwiñan na'an kan', ni siya ja chkwi' lye ne' cha' 'in ykwi' na'an; kwi' ngwaña'an ndi'in cha' 'in Jesús ni, lye la ngi'ni tnun nten 'in Jesús, ni siya ja lye ndyu'wi ti' ne' 'in Moisés kan'.
\v 4 Nchga na'an nu nñan nten ni, wa ndiya nu nka x'nan na'an kan'; lo'o Ndiose nka X'nan nchga nan, chun' ngwiñan Ni nchga chalyuu lo'o nchga nten nu ndi'in lo chalyuu kan'.
\v 5 Su'we 'a tñan y'ni Moisés xa nu ngwa yu ndloo la nu ngwa s'ni, cha' nu y'ni yu tñan cha' 'in nten 'in Ndiose lo chalyuu re; ykwi' 'a ayman kan' nchga cha' nu ngwa ti' Ndiose chkwi' lo'o nten.
\v 6 Lo'o Krixtu ni, su'we la ti tñan nu y'ni yu, chun' lka yu Sñi' ykwi' Ndiose, lka yu ndloo 'in nchga nten nu ndi'in cha' 'in Ni. Lo'o nan, ti kwi' nten 'in Ndiose lkaan, xa nu ja ntsean 'aan tyukwi tyempu nu nsu'wian chalyuu, bra nu ti ndyaa ña'an su'ween tian' 'in Ni cha' ndi'in taan 'in Krixtu cha' kulaa ji Ni 'ñaan.
\s Chañi cha' tyi'iin su'wean bra nu tsaa ña'an tian'  cha' nu nchkwi' Ndiose
\p
\v 7 Lo kityi kula ndukwa ska cha' nu ykwi' Tyi'i Ndiose lo'o nten nu ngwa s'ni. Nde nchkwi' cha' kan':
\q Lo'o ni, kunan su'we wan cha' nu chkwiǐn' lo'o wan:
\q
\v 8 Ja xu'wi 'a cha' kuxi tiye wan lo'oǔn,
\q kwi' ja ku'ni wan sa ña'an nu y'ni ayman kula 'wan nu ngwa ti s'ni.
\q Nu ngwa bra kan', lye 'a msuun ne' lo'oǔn tuwiin ni' kixin' se'en mda'an yu'wi ne', ndukwin Ni.
\q Ngwa ti' ne' ña'an biya' ne' 'ñaǎn, si ku'niǐn tláǎn 'in ne'.
\q
\v 9 Liye' 'a ti' ayman kan' 'ñaǎn nu ngwa bra kan';
\q mstyi lyo'o ne' 'ñaǎn chun' tu'wa yijan, ni siya wa na'an ne' nchga cha' tnun nu y'niǐn cha' 'in ne' tyukwi tyempu kan', ndukwin Ni.
\q
\v 10 Kan' cha' msin' 'a tiǎn' 'in ne' kan' bra kan'.
\q Ykwiǐn' cha' 'in ne' bra kan':
\q “Xkwi' cha' kuxi nda'an tiye ne' kwa, ja xlyaa ne' cha' kanun cha' 'ñaǎn ni' kasiya 'in ne' siya' ti;
\q ja xlyaa ne' ku'ni ne' sa ña'an nu nchkwiǐn' lo'o ne' cha' ku'ni ne'” ndukwiǐn bra kan'.
\q
\v 11 Kan' cha' msin' 'a tiǎn' 'in ne' kan' bra kan', sa ña'an nu lye 'a ykwiǐn' lo'o ne' bra kan':
\q “Ja kan 'a wan se'en ndi'iǐn cha' tyi'in su'we wan lo'oǔn nde kwa” ndukwiǐn.
\m Ngwaña'an ndi'in cha' nu ykwi' Ndiose lo'o ne' nu ngwa bra kan'.
\p
\v 12 'Wan ta'a msñian cha' 'in Jesús, ku'ni wan kwenta 'wan, ti ykwi' ti wan, cha' ja ska wan xi'in chun' wan cha' 'in Ndiose ykwi', cha' ja ka kuxi ni' kasiya 'wan, cha' ja kulaa ya' wan cha' nu nchkwi' Ni.
\v 13 Ja su'we si kwiñi lyo'o cha' kuxi 'wan, lo'o tyisnan ka kuxi ni' kasiya 'wan bra kan'. Kan' cha' nchga tsan ndi'in cha' taya' wan 'in ta'a wan, cha' kanun tsaa la cha' 'in Jesús ni' kasiya 'wan lo'o ta'a wan, cha' ja kwiñi lyo'o cha' kuxi 'wan tyukwi tyempu nu ndi'in wan lo chalyuu.
\v 14 Ta'aan, ti ndi'in cha' 'ñaan lo'o Krixtu xa nu ti nxñiin su'wean cha' 'in Ni sa ña'an bra nsu'wian chalyuu, ti kwi' sa ña'an nu ndyaa ña'an tian' 'in Ni nu ngwa ti kulo.
\p
\v 15 Nde ndiya cha' nu wa ykwi' Ndiose, kwi' nu ndukwa lo kityi kula kan':
\q Kunan su'we wan cha' nu chkwiǐn' lo'o wan ni. Ja xu'wi 'a cha' kuxi tiye wan ña'an wan 'ñaǎn,
\q ja ku'ni wan sa ña'an nu y'ni ayman kula 'wan nu ngwa ti s'ni, xa nu lye 'a msuun ne' lo'oǔn.
\m
\v 16 Nchga nten nu ndyaa lo'o Moisés bra nu mdo'o ne' lo yuu 'in Egipto, ynan ne' kan' cha' nu ykwi' Ndiose lo'o ne' nu ngwa bra kan', lo'o lye 'a msuun ne' lo'o Ni bra kan';
\v 17 kan' cha' msin' 'a ti' Ndiose 'in ne' tyukwi tyempu nu mda'a tu'wa yijan, kwi' ngujwi ayman kan' ngwa ti ña'an tu'wa tuwiin ni' kixin' se'en mda'an yu'wi ne' bra kan'.
\v 18 Wa lye 'a ykwi' Ni lo'o nten nu msuun lo'o Ni: “Ja kan 'a wan se'en ndi'iǐn, cha' tyi'in su'we wan lo'oǔn nde re” ndukwin Ni bra kan'.
\v 19 Ka biya' tian' sikwa, cha' ja mdiya ne' kan' se'en ndukwin Ni 'in ne' cha' tsaa ne', chun' nu ja yaa ña'an ti' ne' cha' nu ykwi' Ndiose. 
\c 4
\p
\v 1 Wa ykwi' Ndiose ska cha' lo'oan sikwa, cha' ka tsaan se'en ndi'in Ni, cha' tyi'iin su'wean la kan'. Kan' cha' ndi'in cha' kuwe tian' 'in nchga ne' ta'aan, cha' ja ska ne' kan' tyo'o ntan ne' tuwiin nu ñi nu tsaa se'en tyi'ian lo'o Ni.
\v 2 Sa ña'an nu ynan ayman kan' cha' su'we nu ykwi' Ndiose lo'o ne' cha' tyo'o laa ne', kwi' ngwaña'an nan, wa ynaan cha' su'we nu ykwi' Jesús. Nchga ayman kan' ni, ja ngwa luwi kasiya 'in ne', ni siya wa ynan ne' cha' kan', cha' nu ja yaa ña'an ti' ne' cha' kan', cha' ja mslyaa ne' xñi su'we ne' cha' kan'.
\v 3 Nan ni, xa wa msñian cha' nu ykwi' Ni, ka tsaan se'en ndi'in Ni cha' tyi'iin su'wean lo'o Ni bra kan'. Lo'o ayman kan' ni, ja y'ni ne' ngwaña'an, chun' wa ykwi' Ndiose cha' re 'in ne' kan':
\q Msin' 'a tiǎn' bra kan', ndukwin Ni.
\q Lye 'a ykwiǐn' cha' 'in ne' kan', cha' ja kan 'a ne' kan' se'en ndi'iǐn re,
\q ja tyi'in su'we ne' lo'oǔn nde re.
\m Ngwaña'an ndukwin Ndiose, ni siya wa mdyii nchga tñan 'in Ni ti bra nu ndya' chalyuu.
\v 4 Ndiya ska cha' lo kityi kula nu nchkwi' cha' 'in tsan kati, kwi' tsan nu nxitña' ne' judío ta'aan.
\q Mxitña' Ndiose xa wa mda'a kati tsan bra kan', ja y'ni 'a Ni tñan tsan kan' bra kan', ndukwin kityi kula.
\m
\v 5 Xiya' chkwian' ti kwi' ti cha' nu ndukwa lo kityi kula kan':
\q Ja kan 'a ne' kan' se'en ndi'iǐn re cha' tyi'in su'we ne' lo'oǔn, ndukwin Ni.
\m
\v 6 Kan' lka nten nu kulo ndukwa la ynan cha' su'we nu wa ykwi' Ni lo'o ne', cha' tyo'o laa ne' 'in cha' kuxi. Chun' ndi'in la ja ngwa 'a tsaa ne' kan' se'en ndi'in Ndiose, ja ngwa tyi'in su'we ne' se'en ndukwin Ni cha' tyi'in ne', cha' nu ja mslyaa ne' kan' tukwa ne' cha' nu ykwi' Ni lo'o ne'. Lo'o ni, ti lyiji chin' ta'a nten nu ndi'in cha' tyi'in su'we lo'o Ndiose;
\v 7 ti nda Ni ti chin' tyempu 'ñaan, cha' kunaan cha' kan', ni siya ni ti. Wa mdijin tyun yijan ti bra nu ngujwi ayman Moisés kan', bra nu ykwi' Ndiose lo'o David bra kan'. Nde ndiya cha' nu ykwi' Ni:
\q Kunan su'we wan cha' nu chkwiǐn' lo'o wan; ja xu'wi 'a cha' kuxi tiye wan ña'an wan 'ñaǎn.
\m
\v 8 Nu ngwa s'ni kan', ja ngwa 'in ayman Josué tsaa lo'o yu 'in ne' Israel se'en ndi'in Ndiose ska ya' ti; kan' cha' ni, ti nda Ni ti chin' tyempu cha' kunaan cha' kan'.
\v 9 Lo'o nan, si xñiin su'wean cha' 'in Ndiose, ka tyi'iin su'wean lo'o Ni bra kan', sa ña'an ngwa tsan nu mxitña' Ni xa wa mda'a kati tsan kan'.
\v 10 Ni siya tyii tñan 'ñaan lo chalyuu, tsaan se'en ndi'in Ndiose bra kan'; ni siya ti nsu'wi tñan 'ñaan lo chalyuu, ti kwi' ti cha' ka tyi'iin su'wean lo'o Ni, sa ña'an nu mxitña' Ndiose xa wa mdyii tñan 'in Ni bra wa mda'a kati tsan kan'.
\v 11 Nchga tsan lye ku'nian tñan sikwa, cha' ti xu'wi cha' 'ñaan lo'o Ndiose, cha' ka tyi'iin su'wean bra kan'. Ja ku'nian sa ña'an nu y'ni ayman kula kan', nu ja mdukwa cha' nu ykwi' Ndiose siya' ti, lo'o ja ngwa 'a 'in ne' tsaa ne' se'en ndukwin Ni cha' tsaa ne' bra kan'.
\p
\v 12 Nchga cha' nu nchkwi' Ndiose lo'o nten ni, ña'an ti' ska nan lu'u, ngwaña'an lka cha' kan'. Nchga bra ngi'ni cha' kan' tñan ni' kasiya 'in nten nu kunan cha' kan'. Wa nka cha' kan' ña'an ti' ska  xlyu nu cha 'a tu'wa ta'a tyukwaa la'a; ka slaa ran kunaan' sa ña'an nu tiya se'en nsu'wi tijyaan, sa ya' nu tiya ran se'en nsu'wi tyukwa ni' tijyaan. Kwi' ngwaña'an lka bra nu kunaan cha' 'in Ndiose, ngiten cha' kan' kean, ngiten cha' kan' ni' kasiya 'ñaan. Bra nu kunaan ska cha' nu nchkwi' Ndiose lo'o nten, tyija lyo ñi cha' 'ñaan kwenta skaan, nchga cha' nu nka tiyean cha' kaja 'ñaan, nchga cha' nu nda'an tiyean.
\v 13 Ja ka xu'wi kutsi' ska cha' nu nda'an tiyean, ska cha' nu ndi'in 'ñaan 'in Ndiose. Ndiose jlyo ti' nchga cha' kan'. Ña'an Ni nchga nten nu wa ngwiñan Ni, nu wa msu'wa Ni lo chalyuu; jlyo ti' Ni nchga cha' nu ndi'in 'ñaan. Ja ska tñan ka ku'nian mnan tloo Ndiose, cha' ndi'in cha' taan kwenta 'in Ndiose cha' 'in nchga tñan nu y'nian kwenta skaan lo chalyuu, bra nu tsaa tii chalyuu 'ñaan.
\s Wa nka Jesús ña'an ti' x'nan sti jo'o,  cha' njñan Ni cha' 'ñaan tloo Ndiose.
\p
\v 14 Xa wa msñian cha' 'in Jesús, ndi'in cha' ku'nian tñan cha' kanun su'we cha' 'in Ni ni' kasiya 'ñaan bra kan'. Wa lka ndiya ska x'nan sti jo'o nu njñan cha' 'ñaan 'in Ndiose; Jesús, ska ti nu lka Sñi' ykwi' Ndiose, kan' lka Ni. Wa ndyaa Jesús nde se'en ndi'in Ndiose Sti yu; lo'o ni, ndi'in Jesús tloo Ni, cha' nchkwi' Ni cha' 'ñaan lo'o Ni.
\v 15 Wa nka Jesús ña'an ti' x'nan sti jo'o cha' 'ñaan, kwi' ngwaña'an nchka t'nan 'a ti' Jesús 'ñaan. Wa jlyo ti' Ni cha' tyun ya' wa ku'ni ti kune' xa'an kanan 'ñaan; ti kwi' ti cha', lye 'a y'ni lyo'o kune' xa'an 'in yu, ngwa 'a ti' kune' xa'an cha' ku'ni Jesús cha' kuxi, bra nu ti mdi'in yu lo chalyuu re. Lo'o Jesús ni, ja ska cha' xa'an y'ni yu, kan' cha' lka yu x'nan sti jo'o cha' 'ñaan ni, cha' jlyo ti' yu cha' kwiñi 'a kune' xa'an.
\v 16 Ja ndi'in cha' kutsean siya' ti sikwa, tyukwi ti tiyean ka jñaan cha' 'in Ndiose, chun' kwi' Ni nka Ni ndloo. Chkwian' lo'o Ndiose nu xkwi' cha' su'we ngi'ni Ni lo'o nten chalyuu; jñaan cha' 'in Ni cha' chka t'nan ti' Ni 'ñaan, cha' su'wa ya' Ni 'ñaan, bra nu ndi'in la cha' nu lyiji 'ñaan. 
\c 5
\p
\v 1 Xka la x'nan sti jo'o nu nsu'wi lo chalyuu ni, ndlo suwi ne' 'in ta'a sti jo'o ne' ti ka nu ka x'nan sti jo'o, cha' ka yu kan' tñan 'in Ndiose cha' 'in nten. Nxñi sti jo'o kan' lomstan nu ndijyan lo'o nchga nten, nxtya 'in ran lo msaa 'in Ndiose; kwi' ngwaña'an, njñan yu kan' cha' tlyu ti' 'in Ni 'in ki'ya nu ndukwi nten bra kan'.
\v 2 Nten chalyuu ti lka sti jo'o kan'; lo'o ykwi' yu ndukwi yu ki'ya, kan' cha' ka chka t'nan ti' yu 'in nten nu ja nnan siya' ti, nu ngi'ni 'a cha' xa'an.
\v 3 Ti kwi' bra nu ngi'ni yu kan' tñan cha' 'in nchga nten kichen, ndi'in cha' jñan yu cha' tlyu ti' 'in Ndiose 'in ki'ya nu ndukwi yu, ti ykwi' ti yu.
\p
\v 4 Ja tukwin ndi'in chabiya' 'in cha' ka x'nan sti jo'o cha' nchka ti ti' yu ka yu tñan kan'; Ndiose ndlo suwi ti ka nu ndiya la ti' Ni cha' ka x'nan sti jo'o cha' 'in Ni, sa ña'an nu ngulo suwi Ni 'in ayman Aarón cha' ngwa yu x'nan sti jo'o bra kan'.
\v 5 Lo'o Krixtu ni, wa lka Ni sti jo'o nu nka ndloo la ti cha' 'ñaan. Lo'o si'i cha' 'in yu, ti ykwi' ti yu, y'ni yu ngwaña'an, ja mjñan yu cha' 'in Ndiose Sti yu cha' ka tnun la cha' 'in yu. Ndiose Sti yu wa ykwi' lo'o yu ti kulo la:
\q Ska ti nu'win lkaa Sñiěn'; ykwiěn' msu'waǎn kasiya 'iin cha' lkaa Sñiěn'.
\m Kan' ngwa cha' nu ykwi' Ni lo'o Krixtu.
\v 6 Lo'o ndukwa xka cha' lo kityi kula nu ykwi' Ndiose:
\q Nchga tyempu nu'win kaa sti jo'o siya' ti; sa ña'an nu y'ni ayman Melquisedec nu ngwa ti s'ni, kwi' ngwaña'an ku'ni nu'win cha' 'in nten chalyuu ni.
\m
\v 7 Bra nu ti mdi'in Jesús lo chalyuu, tyun ya' msi'ya yu, kwi' tyun ya' ynan yu bra nu ykwi' yu lo'o Ndiose Sti yu; lye 'a yuwe ti' yu ni' kasiya 'in yu bra nu mjñan yu cha' 'in Ndiose Sti yu, cha' ja ta chabiya' kaja yu si nu ngwaña'an ngwa ti' Ni; lo'o ynan Ni cha' nu ykwi' yu lo'o Ni, cha' mslyaa yu ku'ni yu nchga cha' nu ykwi' Ndiose Sti yu lo'o yu.
\v 8 Ngwaña'an y'ni xa'an Jesús nchga tñan nu ngwa ti' Ndiose Sti yu cha' ku'ni yu, xa nu mdijin 'a yu nu ti'í lo chalyuu, ni siya ska ti yu lka yu Sñi' ykwi' Ndiose.
\v 9 Chun' ndi'in la, xa wa mdijin nchga cha' 'in Jesús, xa wa y'ni yu tñan nu ngulo Ndiose 'in yu cha' ku'ni yu, bra kan' mdyisnan ndlaa Jesús 'in nchga nten chalyuu nu ngi'ni cha' nu ykwi' yu bra kan'. Kwi' ngwaña'an ja tsaa tii 'a cha' kulaa Ni 'in nten 'in cha' kuxi nu ngi'ni ne'.
\v 10 Kan' cha' ykwi' Ndiose cha' lka Jesús sti jo'o nu nka ndloo la ti; sa ña'an tñan nu y'ni ayman Melquisedec nu ngwa ti s'ni, kwi' ngwaña'an ngi'ni Jesús cha' 'ñaan ni.
\s Tyo'o kuxi cha' 'ñaan si xi'iin chuan' cha' 'in Jesús
\p
\v 11 Ti ndiya ka'an 'a cha' nu nchka ti' ba chkwi' ba lo'o wan cha' 'in Krixtu, cha' ti ka'an 'a cha' ti ji ka biya' ti' wan. Lo'o ja nchka kwa'u su'we ba cha' kan' 'wan; tlyu 'a tñan ka, chun' ykwi' wan ja ngi'ni kuwe ti' wan cha' ka biya' ti' wan cha' kan'.
\v 12 Wa s'ni 'a ynan wan cha' 'in Krixtu ti kulo; lo'o wa mdijin 'a tyempu ni. Ja chan wa lka wan mstru cha' 'in Krixtu ni, lo'o ngwa ti ña'an ndi'in wan. Ti ndi'in cha' kwa'u la ne' 'wan xiya' sa ña'an ndi'in kiya' cha' 'in Ndiose, ti kwi' cha' nu ngwa ti' Ni katsa' Ni 'in nten chalyuu nu ngwa ti kulo. Sa ña'an nu ngi'ni ska kuwi' nu ti ngati', nu ja ya ku tyaja, kwi' ngwaña'an ngi'ni wan, cha' ja nchka 'a ku'ni xa'an wan cha' 'in Ndiose.
\v 13 Kuwi' nu ti ngati' ni, kune' 'a ne'; kwi' ngwaña'an lka wan, cha' ja ya ka jlyo ti' wan siya' ti sa ña'an cha' su'we nu ndi'in cha' ku'ni wan, xa nu ngwa su'we ni' kasiya 'wan cha' 'in Ndiose.
\v 14 Nten nu wa ngulu chin', kan' nu nchku tyaja; lo'o 'wan ka wan ngwaña'an, si tya'an ti' wan tya'an su'we cha' tiye wan sa ña'an ndyo'o ska cha', si lka cha' su'we, si lka cha' kuxi. 
\c 6
\p
\v 1 Ndla ti ku'nian sikwa, cha' kunaan su'wean nchga cha' nu nchkwi' Krixtu; ndi'in cha' kaan nten nu su'we nda'an cha' tiye. Ja su'we si ska loo ti cha' ku'nian, sa ña'an nu y'ni xa'aan tian ti kulo. Lo'o nchga cha' nu nchkwi' Krixtu ndi'in cha' ku'nian. Wa jlyo su'we tian' la se'en ndi'in kiya' cha' 'in Krixtu: wa mdyii ykwian' sa ña'an ka kulaa yaan' nchga cha' kuxi nu y'nian nu ngwa s'ni, nu ja nnanjo'o 'ñaan cha' 'in Ndiose; wa ykwian' sa ña'an ka tsaa ña'an tian' cha' 'in Ndiose;
\v 2 wa ykwian' sa ña'an tyukwatyaan chabiya' 'in Krixtu; wa ykwian' sa ña'an xtya ne' ya' kean chabiya' 'in Krixtu; wa ykwian' sa ña'an tyu'uan xiya' chun' ndi'in la, ni siya wa ngujwian; wa ykwian' cha' ndi'in cha' ku'ni biya' Ni 'in nchga nten nu nsu'wi chalyuu.
\v 3 Lo'o ni, ndla ti ndi'in cha' kunaan nchga cha' 'in Jesús nu ti ji ku'niin xa'aan; kwi' ngwaña'an ku'nian sikwa, si ti ta Ndiose chalyuu 'ñaan.
\p
\v 4 Ja kaja ña'an ku'nian lo'o nten nu mdo'o ntan 'in cha' kan' siya' ti. Wa jlyo ti' ne' kan' sa ña'an ngwa bra wa yten xaa 'in Ndiose ni' kasiya 'in ne'. Kwi' ngwaña'an, wa jlyo ti' ne' kan' cha' su'we 'a nchga cha' nu nda Ndiose 'in ne'. Lo'o ne' kan', wa y'ni Tyi'i Ndiose tñan ni' kasiya 'in ne'.
\v 5 Wa jlyo ti' ne' kan', wa na'an ne' cha' su'we 'a nchga cha' nu nchkwi' Ni lo'oan; wa mgii ti' ne' kan' cha' tnun 'a cha' nchka, bra wa mdyisnan chalyuu kwi 'in Ndiose se'en ndi'in ne'.
\v 6 Lo'o bra kan' wa ngulaa ya' ne' kan' cha' 'in Jesús. Kan' cha' ja kaja 'a ña'an ku'nian ni, cha' xiya' xñi su'we ne' kan' cha' 'in Jesús. Nda ne' kan' nu ti'í 'in Jesús nu nka Sñi' ykwi' Ndiose, chun' ngi'ni ne' ña'an ti' si nxtya ne' 'in Jesús lo wsi xiya', cha' xtyi lyo'o nten chalyuu 'in Ni xiya'.
\v 7 Ña'an ti' ska yuu nu su'we se'en ngi'ni nten chalyuu tñan, ta'a ti ndi'ya tyoo lo yuu kan'; ndi'yo yuu kan' tyi'a tyoo bra kan', chun' su'we 'a ngi'ni Ndiose lo'o yuu cha' kalu nan kwiñi nu wa yta ne', cha' kunanjo'o 'in ne' nu ngi'ni tñan kan'.
\v 8 Lo'o ja su'we yuu se'en xkwi' kixin' kuxi, xkwi' yka kiche' ndukwa lo ran; kulaa ti'in ne' 'in yuu nu ngwaña'an, cha' ña'an ti' ska yuu nu wa ndukwa yuwe' chun', ngwaña'an lka ran. Ndi'in cha' xu'u ne' kii' lo yuu kan', cha' tyii chkin nchga cha' kuxi nu nsu'wi lo yuu kan'. Sa ña'an nu ka 'in yuu nu ja su'we siya' ti, kwi' ngwaña'an ka kuxi 'ñaan si kulaa yaan' cha' 'in Jesús bra kan'.
\s Wa ykwi' Ndiose cha' ja kulaa ya' Ni 'ñaan,  kan' cha' xñiin su'wean cha' 'in Ni sikwa
\p
\v 9 'Wan ta'a su'ween ndi'ian, nu su'we 'a nka tiye ba ña'an ba 'wan, jlyo su'we ti' ba 'wan cha' ja ka 'wan ngwaña'an, ni siya tka nchkwi' ti ba cha' kan'. Wa jlyo ti' ba cha' su'we la ndi'in wan ni, ti bra nu ngulaa Jesús 'wan 'in cha' kuxi.
\v 10 Lo'o ngwaña'an, ñi 'a cha' ngi'ni Ndiose lo'o nten chalyuu. Ja kjlyaa 'a ti' Ni nchga cha' su'we nu wa y'ni wan, cha' ndaya' 'a wan 'in ne' ta'a msñian cha' 'in Jesús; wa ka'an 'a tñan y'ni wan cha' 'in ne' kan'. Cha' nu wa y'ni wan ngwaña'an, kan' cha' jlyo ti' xka ta nten cha' su'we 'a nka tiye wan lo'o Jesús, lo'o ti ngi'ni wan cha' su'we lo'o ne'.
\v 11 Lo'o nchka ti' ba cha' ti ku'ni wan ngwaña'an tyukwi tyempu nde loo la, laja nu ndi'in ta wan 'in Ndiose sa ña'an bra nu tsaa to'o nchga cha' nu wa ykwi' Ni lo'oan bra kan'.
\v 12 Ja nchka ti' ba cha' ka ndaja ti' wan; nan nchka ti' ba cha' ku'ni wan sa ña'an nu ngi'ni xka ta ta'a msñian cha' 'in Jesús, nu ngi'ni 'a cha' tlyu ti' 'in nten bra nu ndi'in ta ne' 'in Ndiose. Kan' cha' ndyiji nchga cha' 'in ne', sa ña'an nu ndukwin Ni cha' kaja 'in ne'.
\p
\v 13 Nu ngwa ti s'ni, bra nu y'ni biya' Ndiose ska cha' lo'o ayman Abraham, kwi' mda Ndiose nin Ni 'in yu kula kan' bra nu mskan' Ni cha' re lo'o yu: “Chabiya' 'ñaǎn, ti ykwiǐn' tiǎn ku'niǐn tñan kan' cha' 'iin” ndukwin Ni. Ja ndiya 'a xka nten nu tnun la cha' 'in ke Ndiose, kan' cha' mda Ndiose nin ykwi' Ni 'in yu, cha' skan' Ni cha' lo'o ayman Abraham kan'.
\v 14 Nde ndiya cha' nu ykwi' Ni lo'o ayman kan' bra kan': “Chañi cha' nu chkwiǐn' lo'oo, cha' su'we 'a ku'niǐn lo'oo, lo'o ka'an 'a nten 'iin nu ndijyan lo chalyuu re nu ndyaa nde loo la.” Ngwaña'an ndukwin Ni nu ngwa bra kan'.
\v 15 X'ni 'a mdalo Abraham bra kan', cha' nu ndi'in ta yu sa ña'an bra nu ka cha' nu wa ykwi' Ndiose lo'o yu; kan' cha' yaa to'o su'we nchga cha' nu ngwa 'in yu.
\v 16 Nde ña'an ngi'ni nten chalyuu ni. Si nchka ti' ne' cha' kanun tsaa ska cha' nu ku'ni biya' ne' lo'o ta'a ne', kan' kulo naan ne' ska jo'o, cha' tnun la cha' 'in, xke' ti' ne' bra kan'; chun' ndi'in la ja xuun 'a ne' si'ya cha' kan' bra kan'.
\v 17 Kwi' ngwaña'an y'ni Ndiose, ytsa' ñi Ni 'in ne' kan' sa ña'an nu ka cha' kan' 'in ne' nu ndyaa nde loo la, cha' ja tyo'o ntan Ni siya' ti 'in ska cha' nu wa mskan' Ni lo'o ne'; kan' cha' mda Ni nin Ni ti kulo, cha' ngwaña'an y'ni biya' Ni cha' lo'o ayman Abraham kan'.
\v 18 Lo'o nchga cha' kan' wa jlyo tian' cha' ja xa'an 'a ska cha' nu wa ykwi' Ndiose cha' ka; ja kwiñi lyo'o Ni 'ñaan siya' ti. Lo'o su'we ti ndi'in tiyean ni, cha' ja ndiya ska cha' kuxi nu ka xitsen 'ñaan, cha' nu wa ndyaa ña'an tian' cha' nu ykwi' Ndiose lo'oan; wa y'ni Ni cha' ka tnun la tiyean, cha' xñiin su'wean kwenta nchga cha' nu wa ykwi' Ni lo'oan sa ña'an bra nu tsaa to'o cha' kan'.
\v 19 Ña'an ti' chkwan stan' nu nduguun ne' nde suun yka na'an, cha' tsaa xñi ka'an chkwan kan' chun' kee la ni' tyi'a, cha' tyukwi se'en ti yka na'an kan' lo tyi'a kan', cha' ja ka tyo'o tsu' yka na'an kan' siya' ti bra kan'; kwi' ngwaña'an ngi'ni Jesús lo'oan. Ngi'ni Ni cha' kanun tsaa cha' 'in Ndiose ni' kasiya 'ñaan, cha' ja tyo'oun tsuan' cha' 'in Ni siya' ti. Wa ndiya Jesús nde ni' kwan, ña'an ti' si wa mdijin Ni se'en ndukwi te' tukwin nu ndyukwi loo jo'o ni' lyaa tnun; lo'o ni, wa ndyaa tukwa Ni ti kwi' se'en ndukwa Ndiose nde ni' kwan.
\v 20 Cha' 'ñaan, kan' cha' wa ndyaa Jesús la kan' kulo ndukwa la, cha' ka su'wa ya' Ni 'ñaan bra kan'. Lo'o ja tsaa tii 'a cha' lka Jesús sti jo'o nu nka ndloo la ti cha' 'ñaan. Sa ña'an tñan nu y'ni ayman Melquisedec nu ngwa sti jo'o ti s'ni, kwi' ngwaña'an ku'ni Jesús cha' 'ñaan ni. 
\c 7
\s Sa ña'an ngwa Melquisedec sti jo'o,  kwi' ngwaña'an lka Jesús sti jo'o  cha' 'ñaan bra nu ni
\p
\v 1 Ayman Melquisedec kan' ni, x'nan kichen Salem ngwa yu kula kan'; cha' 'in Ndiose nu nka ndloo la ti ngwa yu kula sti jo'o, kan' tñan ngwa yu kula kan'. Nu ngwa bra kan', wa mdo'o ña'an ayman Abraham 'in tyun ree xa'an, cha' msuun yu lo'o ne' kan', yjwi yu 'in ne' xa'an kan' bra kan'. Tuwiin nu ndyaan yu, mdo'o Melquisedec ndyaa tu'wa tuwiin cha' tyukwa ta'a yu kula kan' lo'o Abraham bra kan'; nkwan Melquisedec 'in yu chabiya' 'in Ndiose bra kan'.
\v 2 Kan' cha' msu'we Abraham nchga nan nu ndi'in 'in yu, nu mjwi 'in yu xiya', ti kwi' nan nu wa y'ni ne' xa'an kan' kunan; la mda'a tii yu'we nchga nan kan', kan' mda yu ska yu'we 'in yu kula Melquisedec kan'. Nde ña'an ndyo'o cha' Melquisedec kan': X'nan kichen nu ñi 'a ngi'ni biya' ska cha', ngwaña'an ndyo'o cha' kan' cha'tñan. Cha' x'nan kichen Salem ngwa yu kula kan', kan' cha' ka chkwian': Tiin ti ndi'in ne' kichen chabiya' 'in x'nan ne', cha' ngwaña'an ndyo'o cha' Salem cha'tñan.
\v 3 Ja nchkwi' kityi sa ña'an ngwa naan sti jya'an Melquisedec kan', kwi' ngwaña'an, ja ska cha' ndukwa lo kityi cha' 'in ayman 'in yu kula kan'; ja nchkwi' ni tyempu ngula, ni tyempu ngujwi yu kula kan'. Ña'an ti' Melquisedec, kwi' ngwaña'an lka Jesús, cha' nchga tyempu lka Ni sti jo'o cha' 'ñaan; lo'o Jesús ni, lka Ni ska ti nu lka Sñi' ykwi' Ndiose.
\p
\v 4 Kuwe chin' ti' wan sikwa, ni cha' tnun la ndi'in cha' 'in yu kula Melquisedec ke Abraham nu ngwa ayman 'ñaan. Abraham mda ña'aan ska yu'we nan nu ndi'in 'in yu 'in Melquisedec, ti kwi' nan nu wa mjwi 'in yu xiya', nu wa y'ni ne' xa'an kan' kunan bra kan'.
\v 5 Nde loo la chin', ska loo ti nten ta'a ayman Leví ngwa sti jo'o; kan' ti nten ngwa nu mda Ndiose chabiya' 'in cha' xñi lomstan nu mda ne' Israel 'in Ndiose. Ti kwi' nten ta'a Abraham nu yan chalyuu nde loo la ngwa sti jo'o kan'. (Lomstan kan' lka ska yu'we la mda'a tii yu'we nchga cha' su'we nu ndi'in 'in nten.)
\v 6 Yu kula Melquisedec kan' ni, msñi yu lomstan nu mda Abraham 'in Ndiose, ni siya si'i ta'a ne' Leví ngwa yu kan'; kwi' nkwan yu kula kan' 'in Abraham bra kan', ni siya wa mskan' Ndiose cha' lo'o Abraham kulo ndukwa la.
\v 7 Kan' cha' ka jlyo tian' cha' tnun la cha' 'in ayman Melquisedec kan' ke ayman Abraham. Nan wa nkwan yu kula kan' 'in ayman Abraham nu ngwa bra kan', kan' cha' tnun la chabiya' ndiya 'in yu kula kan' ke Abraham.
\v 8 Xkwi' ndyaa tii cha' 'in sti jo'o nu nxñi lomstan nu nda nten chalyuu 'in Ndiose, ska yu'we ti cha' su'we nu nsu'wi 'in skaa ne' nda ne' lomstan; lo'o Melquisedec ni, ti lu'u yu kan', ja ndukwa cha' lo kityi kula cha' ngujwi yu. Ti kwi' yu kan' lka nu wa msñi lomstan nu mda Abraham bra kan'.
\v 9 Ka chkwian' cha' lo'o ayman Leví mda lomstan 'in Melquisedec tsan kan', ni siya chun' ndi'in la yan Leví lo chalyuu. Ti kwi' ayman Leví lo'o nchga sñi' yu nu yan nde loo la ngwa sti jo'o, kwi' nu nxñi lomstan nu nda nten chalyuu 'in Ndiose.
\v 10 Bra nu ndyukwa ta'a Melquisedec lo'o Abraham, mda Abraham lomstan 'in yu kula kan', kan' cha' ngwaña'an ngwa, ña'an ti' si lo'o Leví mda lomstan bra kan', chun' Abraham ngwa ayman 'in yu, cha' sñi' ste' Abraham ngwa sti Leví kan'.
\p
\v 11 Sti jo'o nu yan lo chalyuu chun' ndi'in la, ti kwi' ta'a ayman Leví ngwa yu kan' bra kan'. Ñi 'a ngwa'u yu 'in ne' Israel cha' ku'ni ne' nchga tñan nu ngulo Ndiose 'in ne'. Lo'o ja mdalo sti jo'o kan' ku'ni yu tyukwi tñan kan', kan' cha' ni, wa yan xka nu lka sti jo'o cha' 'ñaan. Ja lka Ni sti jo'o sa ña'an ngwa ayman Aarón lo'o nchga ta'a sti jo'o yu, wa lka Ni ska sti jo'o nu xka ña'an tñan ngi'ni; ngi'ni Ni sa ña'an tñan nu y'ni ayman Melquisedec nu ngwa s'ni.
\v 12 Bra nu nxa'an nchga ta sti jo'o, kwi' ngwaña'an nxa'an tñan nu ndi'in cha' ku'ni nten cha' 'in Ndiose.
\v 13 Cha' 'in Jesús nu nka X'naan nchkwi' cha' nu ndukwa lo kityi kula kan'. Lo'o Jesús ni, xka ta nten ngwa yu, si'i ta'a Leví ngwa yu; ja ska ta'a Jesús ngwa sti jo'o nu ngwa s'ni la.
\v 14 Wa jlyo ti' ne' cha' Juda lka nin Jesús ti bra nu ngula yu; lo'o bra nu ykwi' ayman Moisés ti ka nu ka sti jo'o, ja siya' ykwi' yu cha' 'in ne' Juda bra kan'.
\p
\v 15 Lo'o ni, Jesús lka ska sti jo'o nu xka ña'an ngi'ni; sa ña'an nu y'ni ayman Melquisedec tñan kan', kwi' ngwaña'an ngi'ni Jesús ni. Kan' cha' su'we la nchka biya' tian' ni, cha' wa mdyii cha' 'in cha' kula kan', xa nu wa yan Jesús cha' ka yu ska sti jo'o kwi cha' 'ñaan.
\v 16 Wa mda Ndiose tñan 'in Jesús cha' ka yu sti jo'o, chun' ja ngwa 'in nten chalyuu kujwi 'in yu siya' ti; wa ndyu'u Jesús xiya' xa wa ngujwi yu. Lo'o ja tsaa tii 'a cha' 'in Jesús; kan' cha' lka Ni sti jo'o cha' 'ñaan ni, lo'o ja ndi'in cha' ku'ni Jesús nchga tñan nu y'ni sti jo'o Leví nu ngwa nten chalyuu ti bra kan'.
\v 17 Ndukwa ska cha' lo kityi kula nu wa ykwi' Ndiose lo'o Krixtu:
\q Nchga tyempu ka nu'win sti jo'o; sa ña'an nu y'ni ayman Melquisedec nu ngwa s'ni, kwi' ngwaña'an ku'nii cha' 'in nten chalyuu ni, ndukwin Ni.
\m
\v 18 Kan' cha' wa ngulo ntan Ndiose 'in nchga cha' kula nu lye 'a ndatsaa 'ñaan, chun' ja nnanjo'o 'a cha' kula kan' 'ñaan ni; ja ka tyii ki'ya nu ndi'in 'ñaan lo'o Ndiose ngwaña'an.
\v 19 Ti ji 'a ka su'we kasiya 'ñaan cha' 'in Ndiose, ni siya wa y'nian nchga tñan nu ngulo ayman Moisés 'in ne' ta'aan nu ngwa bra kan', chun' ja ngwa kulaa cha' kula kan' 'ñaan 'in cha' kuxi. Lo'o ni, ka tsaa ña'an su'we tian' 'in Ndiose cha' kwi' se'en ti ndiya Ndiose 'ñaan ni chun' Jesús; su'we la siya' ti cha' nu yan lo'o Jesús cha' chkwi' lo'oan.
\p
\v 20 Su'we la ti Jesús ni, cha' wa su'we la ti cha' nu mskan' Ndiose lo'o Sñi' Ni bra nu ykwi' cha' re: “Na' taǎn chabiya' cha' ka nu'win sti jo'o” ndukwin Ndiose 'in Jesús.
\v 21 Lo'o ja ykwi' Ni ngwaña'an lo'o sti jo'o nu ngwa ne' Leví. Nde ndiya cha' nu ykwi' Ndiose lo'o Jesús bra nu mdyisnan Jesús cha' ka Ni sti jo'o:
\q Ñi 'a chkwiǐn' cha' 'iin, ndukwin Ndiose, lo'o ja xi'in chuǔn' siya' ti 'in cha' nu wa ykwiǐn':
\q “Nchga tyempu ka nu'win sti jo'o.
\q Sa ña'an nu y'ni ayman Melquisedec nu ngwa s'ni, kwi' ngwaña'an ku'ni nu'win cha' 'in nten chalyuu bra ni”.
\m
\v 22 Kan' cha' wa su'we la ti mskan' Ndiose cha' lo'oan ni, chun' tñan nu y'ni Jesús cha' 'ñaan.
\v 23 Sti jo'o ta'a Leví ni, xkwi' nan ndyaa tii cha' 'in ne' kan'. Lo'o xka la ta'a ne' nganun tñan loo ne' xka tu'wa bra kan', kan' cha' ka'an 'a sti jo'o wa mdijin chun' tyun 'a yijan bra kan'.
\v 24 Lo'o Jesús ni, ti lu'u Ni ni; ja ndi'in cha' kaja Ni, kan' cha' ja tsaa tii 'a cha' nka Ni sti jo'o cha' 'ñaan, cha' ja ndi'in 'a cha' kan xka nten tñan loo Ni chun' ndi'in la.
\v 25 Nchga bra, ni siya ni, ni siya nde loo la, ka 'in Ni kulaa Ni 'in nchga nten nu xñi cha' 'in Ndiose. Nchga tyempu ndi'in Jesús nde se'en ndi'in Ndiose, cha' chkwi' Ni lo'o Sti Ni cha' 'ñaan.
\p
\v 26 Tsaa ña'an tian' 'in Jesús sikwa; kan' lka sti jo'o nu nka ndloo la ti, nu chañi cha' ka su'wa ya' 'ñaan. Nten luwi siya' ti lka Jesús, cha' ja ndiya cha' kuxi 'in Ni, ja ska ki'ya ndukwi Ni. Ja mda Ndiose chabiya' kanun la yu se'en ndi'in nten chalyuu nu ngi'ni 'a cha' xa'an, wa nda Sti yu se'en tyukwa yu ti kwi' se'en tnun se'en ndukwa Ndiose Sti yu nde ni' kwan.
\v 27 Tnun la ti cha' nu ndi'in 'in Jesús ke cha' nu ndi'in 'in xka la x'nan sti jo'o nu ndi'in lo chalyuu re. Nchga tsan nxtya ne' kan' lomstan lo msaa se'en kti, cha' ngwaña'an katin la ki'ya nu ndi'in 'in ne' lo'o Ndiose; kulo ngi'ni ne' cha' katin ki'ya 'in ne', ti ykwi' ti ne', chun' ndi'in la ngi'ni ne' cha' katin ki'ya nu ndukwi nchga nten kichen bra kan'. Lo'o Jesús ni, ska ya' ti mstya yu lomstan bra nu mdi'in yu lo chalyuu cha' katin ki'ya nu ndukwi nten chalyuu; tyukwi ña'aan yu ngwa yu lomstan kan', bra nu mstya ne' 'in yu lo wsi.
\v 28 Xkwi' nten chalyuu lka x'nan sti jo'o nu ngi'ni tñan nu ykwi' ayman Moisés cha' ka, nten nu ndukwi ki'ya lka ne' kan'; lo'o Jesús ska ti nu lka Sñi' ykwi' Ndiose ni, luwi Ni siya' ti. Bra wa tsaa tii ti tyempu kula, xa nu ndukwa 'a ne' tñan nu ngulo ayman Moisés, bra kan' ngulo Ndiose tñan 'in Sñi' ykwi' Ni, nu lka Jesús, cha' ka Ni sti jo'o cha' 'ñaan. “Na' taǎn chabiya' cha' ka nu'win sti jo'o” ndukwin Ndiose 'in Jesús bra kan'. 
\c 8
\s Jesús ndi'in nde se'en ndi'in Ndiose,  cha' chkwi' lo'o Ni cha' 'ñaan
\p
\v 1 Nde ña'an cha' nchka tiǎn' chkwiǐn' lo'o wan ni: Nde ni' kwan ndukwa Jesús nde la'a se'en kwin se'en ndukwa Ndiose, cha' ndlo Ni tñan ña'aan chalyuu; la kan' ndukwa Jesús cha' lka Ni x'nan sti jo'o cha' 'ñaan.
\v 2 Kti 'a se'en lka, kwi' Ndiose ngwiñan se'en nu ngi'ni Jesús tñan ni; si'i nten chalyuu nu ngwiñan 'in ran, cha' lka ran sa ña'an nu ngwa ti' Ndiose cha' ka ran.
\v 3 Nchga x'nan sti jo'o lo chalyuu re ni, ndi'in cha' xtya ne' lomstan tloo Ndiose, lo'o ndi'in cha' tikin ne' xka lomstan lo msaa se'en nchkin kii', cha' kan' lka tñan ndi'in cha' ku'ni ne'. Kwi' ngwaña'an Jesús ni, ndiya lomstan nu mstya Ni tloo Ndiose cha' 'ñaan,
\v 4 ni siya ja ngwa Jesús sti jo'o bra nu mdi'in yu lo chalyuu re. Ja mda nten tñan kan' cha' ka yu bra kan', cha' wa lka ndi'in xka ta sti jo'o kula nu nxtya lomstan nu ndi'in cha' ta ne' kichen cha' 'in ayman Moisés.
\v 5 Xka ta sti jo'o kan', cha' lka ne' kan' nten, kan' cha' ndi'in cha' tsaa tii cha' 'in ne'; wa lka ti tñan ngi'ni ne', ja nchka ne' lye. Chun' tñan nu ngi'ni ne' kan' ka jlyo tian' cha' su'we la ti sti jo'o lka Jesús, kwi' nu ndukwa se'en ndi'in Ndiose nde ni' kwan. Lo'o laa te' na'an nu ngwiñan ayman Moisés se'en y'ni tnun ayman 'ñaan 'in Ndiose nu ngwa ti s'ni, ndiya ska cha' nu ykwi' Ni lo'o yu kula kan', cha' 'in laa te' na'an kan': “Xñi wan kwenta cha' kwiñan wan ska laa te' na'an re sa ña'an nu ngwa'uǔn 'wan bra nu mduǔn ykwiǐn' lo'o wan lo ki'ya kwan kan'” ndukwin Ni 'in Moisés. Ska nkwin ti ngwa cha' kan', ska nan nu mtin bra ti, lo'o su'we la ti se'en ndukwa Jesús nde ni' kwan ni.
\v 6 Kan' cha' ka jlyo tian' cha' su'we la ti tñan nu ngi'ni Jesús cha' 'ñaan, chin' la tñan ngi'ni xka ta sti jo'o nu lka nten chalyuu ti. Lo'o ni, ti kwi' cha' nu wa mskan' Ndiose lo'oan, ndlo 'a cha' kan' 'ñaan ni, chun' Jesús, cha' xkwi' cha' su'we nchkwi' Ndiose lo'oan. 
\p
\v 7-8 Ti ka'an 'a cha' lyiji 'in cha' kula kan', ti kwi' cha' nu wa mskan' Ndiose lo'o nten nu ngwa ti kulo. Lo'o ja yaa to'o su'we cha' kan', ja ngwa 'in cha' kula kan' ku'ni xu'we kasiya 'in nten cha' 'in Ndiose, cha' ja su'we tñan y'ni nten kan' bra kan'. Kan' cha' mskan' Ndiose xka cha' lo'o nten. Nde ndiya cha' nu ndukwa lo kityi 'in Ndiose nu nchkwi' cha' kan':
\q Bra ti tiya tsan nu skaǎn' cha' lo'o nchga ne' Israel xiya', kwi' ngwaña'an lo'o nchga ne' Juda, ndukwin Ndiose nu nka X'naan.
\q
\v 9 Si'i ti kwi' cha' nu wa mskaǎn' lo'o ayman 'in ne' nu ngwa s'ni, ndukwin Ni.
\q Nu ngwa bra kan' mdayaǎn' 'in ne' cha' mdo'o ne' kichen tyi ne' Egipto, ndyaa ne'.
\q Lo'o ja ynan ne' cha' nu wa ykwiǐn' lo'o ne'; ti y'ni la ne' cha' kuxi, kan' cha' ngulaa yaǎn' 'in ne', ndukwin Ndiose nu nka X'naan.
\q
\v 10 Lo'o ni, nde lka cha' nu kwi nu skaǎn' lo'o ne' Israel, ndukwin Ni. Xa nu tiya bra, kan' ku'niǐn cha' kanun su'we nchga cha' nu chkwiǐn' ni' kasiya 'in ne' bra kan'.
\q Tyukwi ti tiye ne' ku'ni ne' tñan 'ñaǎn bra kan';
\q na' kaǎn Ndiose X'nan ne', lo'o ne' kan' ka ne' nten 'ñaǎn bra kan'.
\q
\v 11 Nchga ne' kan' ka xu'wi lyo ne' 'ñaǎn bra kan', ta'a ne' tnun lo'o xuwe, nchga ne' xu'wi lyo ne' 'ñaan bra kan'.
\q Tyempu kan' ja n'ni cha' kunicha' ne' 'in ta'a ne' ti ka nu lkaǎn;
\q ti kwi' ti cha', ja n'ni cha' kwa'u ne' 'in ta'a kichen tyi ne' cha' na' lkaǎn Ndiose X'nan ne'.
\q
\v 12 Ku'niǐn cha' tlyu ti' nchga ki'ya nu ndukwi ne', ja tyaa yu'wi 'a tiǎn' nchga cha' kuxi nu y'ni ne' bra kan'.
\m Ngwaña'an nchkwi' lo kityi 'in Ndiose kan'.
\v 13 Nan wa tyii ti katin cha' kula nu mdi'in ti kulo; ngwaña'an ndyo'o cha' kan' bra kan', bra nu nchkwi' Ndiose cha' 'in xka cha' kwi nu skan' Ni lo'oan. S'ni 'a mdyisnan cha' kula kan'; lo'o ni, wa mdyii mtin nchga cha' kan' bra kan'.  
\c 9
\s Krixtu, kan' nu wa mslaa tuwiin 'ñaan  cha' tsaan se'en ndi'in Ndiose
\p
\v 1 Nchga cha' kula nu ykwi' Ndiose lo'o ne' Israel nu ngwa s'ni, kan' nu ytsa' 'in ne' sa ña'an ku'ni tnun ne' 'in Ndiose. Lo'o ngwaña'an, wa yu'wi ska na'an nu kti 'in ne', se'en yu'ni tnun ne' kan' 'in Ni, ni siya nten chalyuu ti ngwiñan na'an kan';
\v 2 ska laa te' na'an ngwiñan ne', kan' nu mdukwa jlu'we ni' lyo'oo se'en nda'an ska ti sti jo'o. Ni' lyaa te' na'an kan' mdiya kandlyeru chkwan se'en nchkin kii' nchga bra; kwi' ngwaña'an, mduun ska msaa se'en ndyukwa jaxlya nu ka lomstan 'in Ndiose. Nchga tsan nxtya sti jo'o lomstan kan' lo msaa kan'.
\v 3 Nde chun' te' tukwin nu ndukwi loo jo'o kan', la kan' mdiya xka kwartu, ska se'en nu kti 'a 'in ne'.
\v 4 La kan' mduun msaa oro se'en ndikin sti jo'o ynan; ti kwi' la kan' mdiya tña' nu kti, kwi' nu mxiin chkwan oro ña'aan chun' tña' kan'. Ni' tña' kan' mxkwan se'en ne' sa yu'we nan nu msu'wa Ndiose cha' ku ne' Israel lo nten' wtyi kan', tuwiin nu mda'an ne' nu ngwa s'ni. Ña'an ti' skwan, ngwaña'an nchka ti' ran bra kan'; ska ni' styu oro yu'wi nan nu yku ne' kan' bra kan'. Kwi' ngwaña'an, ni' tña' kan' yu'wi se'en yka skan 'in ayman Aarón, yka skan nu mdukwa kutin cha' 'in ti. Kwi' ngwaña'an, yu'wi ta'a tyukwaa kee kwaja'; lo kee kan' mdukwa ta'a tii cha' kan', tñan nu wa ngulo Ndiose 'in ne' cha' ku'ni ne'. Nchga nan kan' yu'wi se'en ran ni' tña' kti kan' bra kan'.
\v 5 Chun' tña' kan' mdiya tukwa nkwin angajle nu xaa 'a tyukwi ña'aan chun'; msñi ya' ta'a angajle nduwi kan' chun' tña', cha' tyaa yu'wi ti' nten cha' la kan' ndijyan Ndiose cha' katin nchga ki'ya nu ndukwi ne'. Angajle nduwi kan' mduun chun' tña' kan', cha' ka biya' ti' ne' Israel cha' nchga tsan ndi'in Ndiose se'en ndi'in ne' bra kan'. Lo'o ni, ja kaja 'a bra 'ñaǎn cha' chkwiǐn' jiǐn nchga cha' kan'.
\p
\v 6 Ngwaña'an ngwa cha' mdi'in nchga nan kan' ni' lyaa te' na'an se'en y'ni tnun ne' 'in Ndiose, cha' nchga tsan nda'an sti jo'o ni' lyaa te' na'an kan', cha' ku'ni yu tñan 'in Ndiose ni' lyaa kan'.
\v 7 Ska ti x'nan sti jo'o nda'an yu se'en nu kti 'a kan' 'in ne', ska ya' ti nda'an yu ska yijan. Lo'o tnen 'ni nda'an sti jo'o kan' bra kan', cha' skwin tnen kan' se'en ndi'in Ndiose nde se'en kti kan', cha' ngwaña'an katin ki'ya nu ndukwi sti jo'o kan'; kwi' ngwaña'an, katin nchga ki'ya nu ndukwi nten kichen, ni siya ki'ya nu ja jlyo ti' ne' si wa y'ni ne'. Cha' 'in Ndiose y'ni x'nan sti jo'o tñan kan'.
\v 8 Laja nu nchkwian' cha' 'in te' na'an nu ngwa laa kan', ngi'ni Tyi'i Ndiose cha' ka biya' tian', cha' ti ji stean se'en nu kti 'a 'in Ndiose, si ti ndi'in cha' 'ñaan lo'o cha' kula kan'; ti ji tsaan tuwiin se'en ndi'in Ndiose, si ti ngi'ni tnuan 'in Ndiose sa ña'an nu y'ni ne' kula kan' nu ngwa s'ni.
\v 9 Lo'o nchga cha' kula kan', kan' cha' ka biya' su'we la tian' nchga cha' nu ndi'in ni. Ja kaja ña'an ka luwi kasiya 'ñaan cha' 'in Ndiose xa nu ti ngi'niin tnuan 'in Ni sa ña'an nu y'ni ne' lo'o cha' kula kan'. Ni siya ka'an 'a lomstan taan 'in Ni, ni siya tikian ka'an 'a 'ni lo msaa se'en nchkin kii' kan', ja ka katin ki'ya nu ndukwian tloo Ndiose ngwaña'an.
\v 10 Xkwi' cha' 'in nten chalyuu ti lka cha' kula kan', ni siya nchkwi' ne' cha' ja su'we kuan ska nan, ta ja su'we ko'oan ska nan, ni siya nchkwi' ne' sa ña'an ku'nian cha' ka luwi kasiya 'ñaan. Kan' lka cha' nu ndatsaa nten chalyuu ti 'ñaan cha' ku'nian; ti xi'i ti talo cha' kan', ti chin' ti wa xa'an Ndiose nchga cha' kan'.
\p
\v 11 Lo'o ni, wa yan Krixtu, nu nka xka loo x'nan sti jo'o nu su'we la ti cha' 'ñaan; wa lka mdyisnan nchka su'we chalyuu chun' tñan nu y'ni Ni. Lo'o ja yan Ni ku'ni Ni tñan ska ni' lyaa tnun nu ngwiñan nten chalyuu ti, ngi'ni Ni tñan ska se'en nu su'we la ti.
\v 12 Nde ndiya tñan nu y'ni Krixtu cha' 'ñaan, bra nu yten Ni ti kwi' se'en kti 'a se'en ndi'in Ndiose: ja lo'o tnen chivu, ja lo'o tnen kuta kune' mda'an Ni bra kan', cha' skwin Ni tnen kan' se'en ndi'in Ndiose, cha' katin ki'ya nu ndukwian bra kan'; nan wa ngujwi Krixtu lo wsi, lye 'a ngalu tnen yu si'ya ki'ya nu ndukwian. Kan' cha' ngulaa Krixtu 'ñaan siya' ti, chun' tñan nu y'ni Ni 'ñaan, lo'o ja tsaa tii 'a cha' kan'.
\v 13 Nu ngwa s'ni, si mdiya ska cha' nu y'ni cha' ja luwi ska nten, mskwin sti jo'o tnen chivu tnen kuta chun' ne' kan' bra kan', cha' ka luwi ne' cha' 'in Ndiose xiya' bra kan'; kwi' ngwaña'an mskwin sti jo'o jii chun' ne', jii kuta kune' nu ngwa lomstan nu wa mkin cha' 'in ne'.
\v 14 Ni siya ngwaña'an tñan y'ni sti jo'o kan' nu ngwa bra kan', ¡tnun la ti tñan y'ni Krixtu ni!, cha' ngalu tnen ykwi' yu bra nu ngujwi yu lo wsi si'yaan. Tyi'i Ndiose, kan' nu y'ni cha' ngwa 'in Krixtu mda yu 'in yu, ti ykwi' ti yu, cha' katin ki'ya nu ndi'in 'ñaan lo'o Ndiose siya' ti; lo'o Krixtu ni, ja ska ki'ya ndukwi yu siya' ti. Kan' cha' ni, ka 'in Ni ku'ni luwi Ni kasiya 'ñaan ta'aan, xa nu tyaa yu'wi tian' sa ña'an nu y'ni Ni cha' ngalu tnen Ni lo wsi. Lo'o ka 'in Ni ku'ni tyii Ni nchga cha' kuxi nu ngi'ni ñu'un 'ñaan, cha' ngwaña'an ka 'ñaan ku'nian tñan 'in Ndiose ykwi' lo chalyuu re bra kan'.
\p
\v 15 Kan' cha' Krixtu lka nu mskan' ska cha' kwi cha' tyi'in cha' 'in Ndiose lo'o nten chalyuu, kwi' lo'o nchga nten nu wa ngulo suwi Ndiose. Ngwaña'an y'ni Krixtu, bra nu ngujwi yu, cha' ngwaña'an mdo'o laan 'in nchga cha' kuxi nu mdi'in 'ñaan xa nu mdukwaan cha' kula kan'. Lo'o ni, ka kaja nchga cha' nu wa ykwi' Ndiose Stian lo'oan cha' kaja 'ñaan lo'o 'in nchga nten nu wa ngulo suwi Ni; lo'o ja tsaa tii 'a cha' kan' 'ñaan siya' ti bra kan'.
\v 16 Kityi nu nñan nten chalyuu cha' kanun chin' cha' su'we 'in ne' 'in ta'a ne' xa wa ngujwi ne', nde ña'an ngi'ni kityi kan': Ja nnanjo'o kityi kan' 'in ta'a ne', si ti lu'u nten nu ndi'ya loo cha' su'we kan';
\v 17 ja ndi'in chabiya' xñi ne' nan 'in ta'a ne', xa nu ti ji kaja nten nu ndi'ya loo cha' su'we kan'. Siya' ti bra wa na'an ne' cha' ngujwi nten kan', bra kan' kunanjo'o kityi kan' 'in ta'a nten kan' bra kan'.
\v 18 Lo'o ngwaña'an cha' kula nu mdi'in ti kulo kan', ngunanjo'o ran 'in ne', chun' nu yjwi ne' ska 'ni nu ngwa lomstan cha' katin ki'ya nu ndukwi ne'.
\v 19 Nu ngwa ti kulo, kan' ytsa' ayman Moisés nchga cha' kula kan' 'in nchga ne' Israel kan', ytsa' yu nchga tñan nu wa ngulo Ndiose 'in yu cha' ku'ni ne'. Chun' ndi'in la msñi yu tnen kuta kune' lo'o tnen chivu nu tka yjwi ti ne', mxtiyaa' yu tnen kan' lo'o tyi'a luwi bra kan'. Kwi' msñi yu ska stan' yka nu nguxiin kichan' slya' nu wa nguo'o tya'an nga'a chun' ran; lo'o kichan' slya' kan' mskwin yu tnen kan' chun' nten kan', kwi' lo kityi se'en ndukwa cha' kula kan' bra kan'.
\v 20 Bra kan' ykwi' yu lo'o nchga nten kan': “Lo'o tnen re mskan' Ndiose cha' lo'o wan, cha' ku'ni wan nchga loo tñan nu wa ngulo Ni 'wan” ndukwin Moisés 'in ne' kan' bra kan'.
\v 21 Kwi' ngwaña'an mskwin Moisés tnen chun' te' na'an nu ngwa laa kan', lo'o chun' nchga nan nu ndi'in se'en ngi'ni tnun ne' 'in Ndiose.
\v 22 Kan' cha' xkwi' lo'o tnen ska 'ni nu wa yjwi nten, ngwaña'an ngwa luwi nchga nan cha' 'in cha' kula kan'; ska loo ti ngwaña'an y'ni Ndiose cha' tlyu ti' 'in ne' 'in ki'ya nu ndukwi ne'.
\s Y'ni tyii Krixtu ki'ya nu ndukwi nten chalyuu  bra nu ngujwi Ni lo wsi
\p
\v 23 Ngwaña'an y'ni ayman kula 'ñaan, bra nu y'ni tnun ne' 'in Ndiose ni' lyaa te' na'an nu ngwa bra kan', cha' ka luwi nchga nan nu nnanjo'o 'in ne'; lo chalyuu re mdi'in nan kan', ni siya mdukwa ran cha' 'in Ndiose. Lo'o xka cha' ni, tnun la ti cha', cha' katin ki'ya nu ndukwi nten chalyuu tloo Ndiose, su'we la ti tñan y'ni Krixtu cha' kulaa Ni 'in nten, cha' tyo'o laa ne' 'in cha' kuxi kan'.
\v 24 Kan' cha' ja yaa Krixtu ska ni' lyaa nu ngwiñan nten chalyuu ti cha' ku'ni Ni tñan kan', ni siya mdukwa ran chabiya' 'in Ndiose; nan wa ndyaa ñi Ni se'en ndi'in Ndiose nde ni' kwan. La kan' nduun Ni ni, cha' chkwi' Ni lo'o Ndiose cha' 'ñaan.
\v 25 Cha' kula nu ngwa bra kan', nchga yijan wa mdiya ska tsan nu nda'an x'nan sti jo'o judío se'en nu kti 'a ni' lyaa kan'; nda'an x'nan sti jo'o lo'o tnen 'ni nu tka yjwi ti ne' cha' ka lomstan, cha' katin nchga ki'ya nu ndi'in 'in ne' Israel. Lo'o Krixtu ni, ja ndi'in cha' tsaa Ni tyun ya' se'en ndi'in Ndiose nde ni' kwan.
\v 26 Ja ndyaa Ni tyun ya' la kan', chun' ja mstya ne' 'in Ni tyun ya' lo wsi ti bra nu ndya' chalyuu. Ska ya' ti yan Ni lo chalyuu nu ja s'ni lye, xa wa tyii ti chalyuu kula, yan Ni cha' ku'ni tyii Ni ki'ya nu ndi'in 'in nchga nten chalyuu chun' ngujwi Ni lo wsi.
\v 27 Ta'aan ndi'in cha' kajaan ska ya' ti, bra kan' ku'ni biya' Ndiose 'ñaan;
\v 28 kwi' ngwaña'an Krixtu, ska ya' ti ngujwi yu lo wsi, cha' ngwaña'an y'ni tyii Ni ki'ya nu ndukwi ka'an 'a nten. Lo'o ti kan Krixtu xiya' chun' ndi'in la; ja kan 'a Ni cha' ku'ni tyii Ni ki'ya nu ndukwi nten bra kan', cha' nu ngwa s'ni mdyii y'ni Ni tñan kan'. Kan Ni cha' kulaa Ni 'in nchga nten nu ndi'in ta 'in Ni, sa ña'an bra nu kan Ni xiya'. 
\c 10
\p
\v 1 Bra nu ku'nian xkwi' cha' kula nu ykwi' ayman Moisés lo'o ayman kula 'ñaan, ja ka jlyo tian' sa ña'an kaja cha' su'we 'ñaan chun' ndi'in la chun' tñan nu y'ni Jesús, cha' ja nchkwi' cha' kula kan' lo'oan sa ña'an ka nchga cha' kan'. Chin' ti cha' ngitsa' cha' kula kan' 'ñaan, ña'an ti' ska nkwin nu ndijyan sa ndijin ti, nu kitsa' ska tñan nu ka nde loo, ngwaña'an nchka ti' cha' kula kan'. Ne' judío ta'a kichen tyian ni, nchga yijan ngi'ni ne' ti kwi' ña'an tñan; nchga yijan nda'an ne' lo'o ti kwi' lomstan cha' xiya' katin ki'ya nu ndukwi ne' tloo Ndiose, lo'o ja nchka 'a tsaa tii cha' kti kan' 'in ne', cha' nu lomstan nu nda'an lo'o ne' ni' lyaa, ja ka suwi ran ni' kasiya 'in nten tloo Ndiose.
\v 2 Si ka luwi kasiya 'in ne' chun' cha' kula kan', cha' nda'an lo'o ne' lomstan 'in ne', bra kan' ja kii 'a ti' ne' cha' ndi'in yuwe' 'in ne' bra kan', ja n'ni 'a cha' tya'an lo'o ne' lomstan 'in ne' xiya' bra kan'.
\v 3 Ska loo ti tñan ngi'ni lomstan kan' cha' 'in ne', cha' nchga yijan siya' ti ngi'ni ran cha' tyaa yu'wi ti' ne' cha' ti ndukwi ne' ki'ya tloo Ndiose;
\v 4 lo'o ja nchka katin ki'ya kan' 'in ne', ni siya nskwin sti jo'o tnen toro, ni siya nskwin tnen chivu chun' ne'.
\p
\v 5-6 Bra nu wa kan ti Krixtu lo chalyuu re ni, ykwi' Ni cha' re lo'o Ndiose Sti Ni:
\q Nu'win ja nchka tii' cha' kan nten lo'o 'ni nu skin cha' ka lomstan, ndukwin Krixtu 'in Ndiose.
\q Ja su'we nka tiyee ña'aan 'in nten se'en nxtya ne' 'ni lo msaa se'en nchkin kii', cha' ka i' lomstan;
\q ni siya xka loo lomstan xtya ne' cha' katin ki'ya nu ndi'in 'in ne', nu'win ja ndiya tii' cha' kan'.
\q Kan' cha' nu'win ngi'nii cha' tsa'aǎn chalyuu, nu'win ndaa tyukwi ña'aǎn cha' kaǎn ña'an ti' ska lomstan nu lu'u, ndukwin Krixtu.
\q
\v 7 Kan' cha' ndijyaǎn re ni, Ndiose Stiǐn, cha' ku'niǐn nchga tñan nu ndloo 'ñaǎn, sa ña'an nu nchkwi' cha' nu ndukwa lo kityi kula cha' 'ñaǎn.
\m Ngwaña'an ngwa cha' nu ykwi' Krixtu nu ngwa bra kan'.
\v 8 Lo kityi kan', ti kulo ndukwin Krixtu cha' ja nchka 'a ti' Ndiose 'ni nu ka lomstan; kwi' ngwaña'an, ndukwin Ni cha' ja ndiya ti' Ndiose cha' xkwi' nda'an lo'o ne' lomstan, ni siya lomstan ngwa ti ña'an, ni siya 'ni lu'u nu ka lomstan nu skin lo kii', cha' katin ki'ya nu ndukwi ne' tloo Ndiose. Ngwaña'an ykwi' Ni, ni siya ngwaña'an nchkwi' cha' kula 'in ne' cha' ku'ni ne' kan'.
\v 9 Bra kan' ykwi' Krixtu lo'o sti Ni: “Wa ndijyaǎn nde re, Ndiose Stiǐn, cha' ku'niǐn nchga tñan nu ndloo 'ñaǎn.” Ngwaña'an ngwa cha' ngulaa ti'in Ndiose cha' kula kan', nu nchkwi' sa ña'an ka lomstan nu tsaa lo'o ne' ska ya'; lo'o ni, xka cha' kwi y'ni Ndiose, bra nu ngulo Ni tñan 'in Krixtu cha' kan Ni lo chalyuu cha' 'ñaan.
\v 10 Y'ni Jesucristo nchga tñan nu ngwa ti' Ndiose Sti yu cha' ku'ni yu, cha' mda yu tyukwi ña'aan yu 'in Ni cha' xtya ne' 'in yu lo wsi; ykwi' yu ngwa yu lomstan ska ya' ti, ti kwi' lomstan nu ngwa ti' Ndiose Sti yu cha' ka yu bra kan'. Kan' cha' wa nganun luwi kasiya 'ñaan tloo Ndiose ni, wa mdyii nchga ki'ya nu ndukwian.
\p
\v 11 Sti jo'o 'in ne' judío ni, nchga tsan ndi'in ne' kan' ngi'ni ne' tñan cha' nxtya ne' ti kwi' ta'a lomstan lo msaa nu kti tloo Ndiose, ni siya tyun ya' ska yijan; lo'o ja ya tyii cha' nxtya ne' lomstan kan', cha' ja ka 'a katin ki'ya nu ndi'in 'in nten lo'o lomstan kan'.
\v 12 Lo'o Jesucristo ni, ska ya' ti ngujwi yu lo wsi cha' katin ki'ya nu ndukwi nten. Ni siya chalyuu ni, ja ya tyii jwersa 'in tñan nu y'ni yu. Chun' ndi'in la mdo'o Jesús chalyuu re ndyaa yu nde ni' kwan, ndyaa tukwa yu la'a se'en kwin se'en ndukwa Ndiose Sti yu nde ni' kwan.
\v 13 La kan' ndukwa Jesús ni, ndi'in ta Ni sa ña'an bra nu tyii tyijin lyo Ndiose 'in nchga nu nxuun lo'o 'in Ni.
\v 14 Ska ya' ti ngujwi Jesús lo wsi sikwa, cha' y'ni luwi yu kasiya 'in nten tloo Ndiose; ngwaña'an ngwa ñi cha' 'in nten lo'o Ni xiya' bra kan'.
\v 15 Ska ti lo'o Tyi'i Ndiose ka biya' tian' sa ña'an tñan y'ni Krixtu nu ngwa bra kan', kan' cha' y'ni Tyi'i Ni cha' ndukwa cha' re lo kityi:
\q
\v 16 Nde ndiya cha' kwi nu skaǎn' lo'o nten xiya', ndukwin Ni nu nka X'naan:
\q Bra nu tiya tsan kan' ku'niǐn cha' kanun su'we cha' 'ñaǎn ni' kasiya 'in nten bra kan', nchga cha' nu chkwiǐn' lo'o ne' bra kan';
\q kwi' ku'niǐn cha' kanun tsaa cha' kan' ke ne' bra kan'.
\m
\v 17 Lo'o ykwi' Ndiose xka cha' bra kan':
\q Ja tyu'wi 'a tiǎn' nchga cha' kuxi nu wa y'ni ne' bra kan', ja chkwiǐn' 'aǎn cha' 'in ki'ya nu mdukwi ne'.
\m Ngwaña'an ykwi' Ndiose.
\v 18 Kan' cha' ni, ja ndi'in 'a cha' tsaa lo'o nten lomstan cha' katin ki'ya nu ndukwi ne', cha' wa y'ni Ndiose cha' tlyu ti' 'in ne' 'in nchga ki'ya nu ndi'in 'in ne'.
\s Ku'nian cha' ka ska ti cha' 'ñaan lo'o Ndiose
\p
\v 19 'Wan ne' ta'a msñian cha' 'in Krixtu, wa mjwi chabiya' 'ñaan ni, cha' tsaan se'en ndi'in Ndiose, nu luwi 'a cha' ndi'in 'in siya' ti. Jesús, kan' nu nda chabiya' kan' 'ñaan, chun' ngalu tnen yu bra nu ngujwi yu lo wsi, cha' katin ki'ya nu ndukwian.
\v 20 Bra nu mda yu 'in yu cha' ngujwi yu cha' 'ñaan, kan' mslaa yu xka tuwiin kwi 'ñaan; kan' cha' ni, chun' Jesús ka xñian tuwiin nu ñi kan' cha' tsaan se'en ndi'in Ndiose.
\v 21 Wa ndi'in cha' 'ñaan lo'o Jesús ni, kan' nu nka x'nan sti jo'o cha' 'ñaan. Lo'o Jesús, nka Ni ndloo 'in nchga nan 'in Ndiose Sti Ni.
\v 22 Tsaan se'en ndi'in Ndiose sikwa; tyukwi ti tiyean ku'nian cha' ka ska ti cha' 'ñaan lo'o Ndiose Stian, cha' xñiin su'wean cha' 'in Ni bra kan'. Wa y'ni tyii Ni nchga cha' kuxi nu y'nian, kwi' nu lye 'a mda cha' jyu'u 'ñaan; lo'o luwi kasiya 'ñaan ni, ña'an ti' si wa ytaan chku lo'o tyi'a nu luwi 'a.
\v 23 Ku'nian cha' tsaa ña'an su'we tian' cha' nu wa msñian ti kulo sikwa, ja xi'in chuan' 'in cha' kan' siya' ti. Ka tsaa ña'an tian' 'in Ndiose, cha' chañi ku'ni Ni nchga cha' nu wa ykwi' Ni lo'oan.
\v 24 Tya'an su'we cha' tiyean sikwa, cha' kaja ña'an tayaan' 'in xka ta ta'a msñian cha' 'in Jesús; tayaan' 'in ne' kan', cha' xkwi' cha' su'we ku'ni ne' lo'o ta'a ne', cha' ngwaña'an ka xu'wi cha' su'we tiye ne' ña'an ne' 'in ta'a ne'.
\v 25 Ndiya ne' ta'aan nu ja nda'an se'en ndi'in ta'a msñian cha' 'in Jesús, nu ja ndyo' ti'in lo'o ta'aan. Ja su'we ku'nian ngwaña'an; ndi'in cha' ti tsaan tyo' ti'ian lo'o ta'aan, cha' kanun tsaa la cha' 'in Ndiose ni' kasiya 'ñaan, ta'aan nu wa msñian cha' 'in Ni. Wa ndyaa ña'an tian' cha' wa kan ti X'naan xiya', kan' cha' ta'a ti tyo' ti'ian lo'o ne' ta'aan ni.
\p
\v 26 Ja ndiya 'a xka lomstan nu taan 'in Ndiose, si ti ndiya tian' ku'nian cha' kuxi bra kan'; ja ndiya xka la cha' nu ka ku'nian, cha' katin ki'ya nu ndi'in 'ñaan. Wa ngwa biya' tian' cha' chañi 'a cha' 'in Jesús kan', lo'o ja ku'ni 'a Ndiose cha' tlyu ti' 'ñaan si xi'in chuan' 'in cha' kan'.
\v 27 Sa kan' ti cha' ka 'ñaan bra kan', kutsean 'in Ndiose xa nu tiya bra nu ku'ni biya' Ni 'in nchga nten nu nxuun lo'o Ni. Kan' ku'ni tyii Ni 'in nchga ne' kan', tyaa ne' lo kii' tnun nu ja tsaa tii 'a chkin bra kan'.
\v 28 Nu ngwa s'ni, xa wa mdiya ne' judío nu ja ynan siya' ti tñan nu ngulo Ndiose 'in, yjwi ne' 'in nten kan' bra kan'. Y'ni biya' ne' 'in nten kan' ti kulo cha' 'in ayman Moisés lo'o tukwa snan nten nu katsa' ñi sa ña'an ngwa cha' kan'; bra wa mstya ne' ki'ya 'in nten kan', yjwi ne' 'in ne' bra kan', cha' ja mjwi ña'an jñan ne' cha' tlyu ti' 'in Ndiose 'in cha' kuxi nu wa y'ni ne' bra kan'. Ngwaña'an ngwa ti s'ni.
\v 29 Lo'o ni, lye la kaja nu ti'í 'in nchga nten nu chen 'a nka tiye ña'an 'in Jesús, ska ti nu lka Sñi' ykwi' Ndiose kan'. Lye 'a nchkwi' ne' kan' cha' kuxi 'in tñan nu y'ni Jesús lo wsi, ni siya chun' cha' ngujwi yu lo wsi kan', kan' cha' nchka luwi kasiya 'ñaan. Lo'o ngwaña'an, si chkwian' cha' kuxi 'in Tyi'i Ndiose, lye la tyijian nu ti'í, cha' xkwi' su'we 'a ngi'ni Tyi'i Ni lo'oan.
\v 30 Jlyo tian' cha' wa ykwi' Ndiose cha' re nu ngwa s'ni: “Na' lkaǎn nu taǎn nu ti'í 'in nten chalyuu” ndukwin Ni. “Taǎn nu ti'í 'in nten, chun' cha' kuxi nu wa y'ni ne' bra kan'.” Kwi' ngwaña'an xka cha' ykwi' Ni: “Ku'niǐn biyaǎn' 'in nten 'ñaǎn, cha' na' lkaǎn X'nan ne'” ndukwin Ni bra kan'.
\v 31 ¡Tnun 'a cha' lka, si ta'an ya' Ndiose 'ñaan cha' ta Ni nu ti'í 'ñaan, ti kwi' Ndiose nu lu'u nka Ni!
\p
\v 32 Tyaa yu'wi ti' wan sikwa, sa ña'an ngwa wan nu ngwa s'ni, bra nu tka yten xaa 'in Ndiose ke wan cha' kunan su'we wan cha' 'in Ni bra kan'. Ka'an 'a nu ti'í wa mdijin wan lo chalyuu bra kan'. Lo'o mdalo 'a wan bra kan', ja ngwa 'in ne' kuxi tyijin lyo 'wan bra kan'.
\v 33 Tyun ya' y'ni liye' 'a ti' ne' 'wan, tyun ya' mda ne' nu ti'í 'wan xa nu nduun wan laja nten lo kiya' nu ngwa bra kan'. Kwi' ngwaña'an, mslyaa wan nganun wan se'en ndi'in ne' ta'a wan bra nu ti'í ti' nten 'in ne' kan', ni siya ja liye' ti' ne' 'wan, ti ykwi' ti wan bra kan'.
\v 34 Kwi' ngwaña'an, ndyaa na'an wan 'in ne' ta'a wan bra nu yu'wi ne' ni' ña'an chkwan, su'we 'a mdaya' wan 'in ne' kan' bra kan'. Ni siya y'ni nten kunan nchga cha' su'we nu mdi'in 'wan, mdalo wan bra kan'. Su'we 'a ngwa tiye wan, cha' wa jlyo ti' wan cha' su'we la siya' ti cha' 'in Jesús nu wa msñi wan kan'; jlyo ti' wan cha' ja tsaa tii 'a cha' kan', ti kwi' cha' nu wa ynan wan 'in Jesús.
\v 35 Ja kulaa ya' wan cha' 'in Jesús sikwa. Lye la ku'ni wan cha' ka ngula ti' kasiya 'wan, cha' su'we 'a cha' nu kaja 'wan chun' ndi'in la tloo Ndiose, si ti xñi su'we wan cha' 'in Ni bra kan'.
\v 36 Ndi'in cha' talo wan ti x'ni ni siya chan 'a, si ti nchka ti' wan ku'ni wan nchga tñan nu nchka ti' Ndiose, cha' ti ña'an wan nchga cha' nu wa ykwi' Ni cha' ka chun' ndi'in la.
\v 37 Wa ndukwa cha' re lo kityi kula, ska cha' nu ykwi' Ndiose:
\q Ti chin' ti bra ti ji cha' tiyan yu xiya', yu nu ndi'in cha' tiyan; wa kan ti yu kan', ndukwin Ni.
\q
\v 38 Lo'o nten nu ka luwi kasiya 'in chabiya' 'ñaǎn ni, bra nu xñi ne' cha' 'ñaǎn,
\q kan' nu kaja chalyuu nu ja tsaa tii 'a 'in ne', ndukwin Ni.
\q Lo'o ja su'we nka tiyeěn ña'aǎn 'in nten nu xi'in chun' 'in cha' 'ñaǎn.
\m
\v 39 Nan ni, ja ka xi'in chuan' 'in cha' 'in Jesús. Si xi'in chuan' 'in Ni, kana' jian tyukwi ña'aan lo'o kasiya 'ñaan bra kan'. Nan, wa lkaan nten nu sa ku' ti nxñian cha' 'in Ni, kan' cha' kulaa Ni 'ñaan 'in cha' kuxi. 
\c 11
\s Nten nu tyukwi ti tiye ndyaa ña'an ti' cha' 'in Ndiose
\p
\v 1 Bra nu chañi cha' ndyaa ña'an tian' ska cha', bra kan' ndi'in taan cha' chañi ka cha' kan', kwi' ngwaña'an jlyo tian' cha' ka cha' kan' 'ñaan, ni siya ti ji ña'aan 'in ran.
\v 2 Yaa ña'an ti' ayman kula 'ñaan nu y'ni tnun 'in Ndiose nu ngwa s'ni, kan' cha' ngwa ne' nten su'we, lo'o kan' cha' mskan' Ni cha' lo'o ne' kan'.
\p
\v 3 Ndyaa ña'an tian' 'in Ndiose, kan' cha' nchka biya' tian' cha' ti kulo ykwi' Ndiose ska cha', lo'o ndya' chalyuu re bra kan', sa ña'an nu ndukwin Ni cha' ka ran; ja na'aan sa ña'an ngwa cha' ndya' ran s'ni, sa kan' ti cha' ndyaa ña'an tian' cha' wa mñan Ndiose nchga nan nu ña'aan lo chalyuu re ni. 
\p
\v 4 Yaa ña'an ti' ayman Abel 'in Ndiose, kan' cha' su'we la y'ni yu ke ayman Caín ta'a yu, bra nu mstya yu lomstan tloo Ndiose. Msñi Ndiose cha' nu ykwi' Abel, cha' nu yaa ña'an ti' yu 'in Ni; luwi 'a kasiya 'in yu ndukwin Ndiose, bra nu na'an Ni 'in yu se'en mstya yu lomstan. Kan' cha' ni, ti nchka biya' tian' cha' msñi ayman Abel cha' 'in Ndiose, ni siya s'ni 'a ngujwi yu.
\p
\v 5 Yaa ña'an ti' ayman Enoc 'in Ndiose, kan' cha' ja ngujwi yu. Ngwa ti ña'an ndyaa lo'o Ndiose 'in yu nde se'en ndi'in Ni; ja la 'a ña'an nten 'in yu bra kan', cha' nu wa yan y'ya Ndiose 'in yu. Nchkwi' kityi cha' ndiya 'a ti' Ni sa ña'an nu y'ni Enoc kan' xa nu mdi'in yu lo chalyuu.
\v 6 Lo'o ja skaan ka ku'niin tlaan' tiye Ndiose, si ja ndyaa ña'an tian' 'in Ni. Si nchka tian' cha' chkwian' lo'o Ni, ndi'in cha' tsaa ña'an tian' cha' lu'u Ni; ndi'in cha' tsaa ña'an tian' cha' ka taya' Ni 'ñaan nchga bra nu jñaan ska cha' 'in Ni.
\p
\v 7 Yaa ña'an ti' ayman Noé 'in Ndiose, kan' cha' ynan yu cha' nu ykwi' Ni lo'o yu, bra nu ykwi' Ni sa ña'an ka cha' kuxi nu wa ndijyan ti lo chalyuu, ni siya ja mgii 'a ti' Noé sa ña'an ka cha' kan'. Msñi yu cha' 'in Ndiose, lo'o ngwiñan yu ska yka na'an se'en tyi'in yu lo'o nchga ta'a ndi'in yu bra kan'; ngwaña'an ngwa cha' wa lka ti ne' kan' mdo'o laa ne' 'in tyoo tlya kan' bra kan'. Jlyo tian' ni, cha' kuxi 'a ngwa chalyuu kula kan'; ska ti Noé yaa ña'an ti' yu cha' nu ykwi' Ndiose lo'o yu, kan' cha' y'ni Ni cha' su'we 'a nganun kasiya 'in yu bra kan'.
\p
\v 8 Yaa ña'an ti' ayman Abraham 'in Ndiose, kan' cha' ynan yu bra nu ykwi' Ni lo'o yu cha' tsaa yu ska lo yuu tijyu' 'a, cha' ka kichen tyi yu nde kwa. Mdo'o yu lo yuu se'en mdi'in yu ti kulo, ndyaa yu bra kan', ni siya ja jlyo 'a ti' yu la nde ya' tsaa yu.
\v 9 Cha' nu ndyaa ña'an ti' yu 'in Ndiose, kan' cha' nganun yu lo yuu se'en ykwi' Ni lo'o yu cha' ka kichen tyi yu nde kwa. La kan' mdi'in yu ña'an ti' ska nten nu nda'an xi'i ti; rmara te' na'an ti mñan yu se'en tyi'in yu. Kwi' ngwaña'an y'ni ayman Isaac sñi' yu lo'o ayman Jacob sñi' ste' yu nde loo la. Ta'a tyukwaa ayman kan' yaa ña'an ti' cha' nu wa ykwi' Ndiose lo'o ayman Abraham sti ne' kan'.
\v 10 Yaa ña'an ti' Abraham cha' nde loo la ku'ni xu'we Ndiose xka se'en su'we la se'en tyi'in yu, nu ja tsaa tii 'a siya' ti 'in yu; kwiñan Ndiose ña'aan kichen la kan'.
\p
\v 11 Lo'o Sara kwilyo'o yu, yaa ña'an ti' 'in Ndiose, kan' cha' ngwa tnan, ni siya kula 'a, ni siya ja ya tyi'in sñi' siya' ti. Kan' cha' mdi'in sñi', cha' nu yaa ña'an ti' 'in Ndiose, cha' chañi ku'ni Ni nchga cha' nu wa ykwi' Ni lo'o ne' kan' bra kan'.
\v 12 Lo'o ngwaña'an ngwa cha' ka'an 'a nten 'in yu yan chalyuu nde loo la chun' ska ti yu kula Abraham, ni siya wa tyii ti cha' 'in yu cha' kula 'a yu. Sa ña'an lka kwii kulasiin nu nsu'wi nde ni' kwan, sa kwa nten yan lo chalyuu chun' ndi'in la bra kan'. Lo'o ni, ja ka lkwaan 'in ne' kan'; ña'an ti' ysiin, ja ka 'a 'ñaan lkwaan sa ña'an kata ysiin ndi'in tu'wa tujo'o.
\p
\v 13 Nchga ayman kan', ti ndyaa ña'an ti' ne' 'in Ndiose bra nu ngujwi ne', ni siya ja na'an ne' cha' ngwa nchga cha' nu wa ykwi' Ni cha' ka. Su'we 'a nka tiye ne' kan', cha' nu jlyo ti' ne' cha' wa laa ndijyan cha' kan', sa ña'an si sa kunun ti na'an ne' 'in ran. Jlyo ti' ne' cha' tijyu' mdo'o ykwi' ne' ndijyan ne', lo'o ja nsu'wi na'an tyi ne' lo chalyuu re.
\v 14 Yaa ña'an ti' ne' cha' nsu'wi ska se'en su'we la se'en kala ne' chun' ndi'in la, kan' cha' ngwa tiye ne' ngwaña'an.
\v 15 Ja ndyaa yu'wi 'a ti' Abraham lo'o nten 'in yu kichen tyi ne' lo yuu tijyu' se'en mdo'o ne' bra kan', cha' bra ti xi'in chun' ne' tyaa ne' la kan', si ngwaña'an mda'an cha' tiye ne'.
\v 16 Lo'o si'i ngwaña'an mda'an cha' tiye ne', cha' nu yaa ña'an ti' ne' cha' ta Ndiose ska se'en su'we la siya' ti se'en tyi'in ne'; ngwa ti' ne' kan' kala ne' ti kwi' se'en ndi'in Ndiose. Kan' cha' ja njyu'u ti' Ni cha' nchkwi' ne' cha' Ndiose nka X'nan ne'; nan wa y'ni xu'we Ni ska se'en tyi'in ne' nde se'en ndi'in Ni.
\p
\v 17-18 Yaa ña'an ti' ayman Abraham cha' nu wa ykwi' Ndiose lo'o yu, kan' cha' ndyaa lo'o yu 'in Isaac sñi' yu, cha' ykwi' yu xuwe kan' ka lomstan cha' xkwa lo msaa kee 'in Ndiose bra kan'; ngwaña'an ngwa cha' na'an biya' Ni 'in yu bra kan'. Nan wa mskan' Ndiose cha' lo'o Abraham ti s'ni la cha' kala sñi' kwilyo'o yu; ti bra kan' wa ykwi' Ni lo'o yu: “Chun' Isaac ndijyan ka'an 'a nten 'iin lo chalyuu re chun' ndi'in la.” Lo'o mslyaa Abraham ndyaa lo'o yu 'in nu xuwe Isaac kan' bra kan', cha' ka nu xuwe kan' lomstan bra kan'; ska ti kan' nka sñi' yu lo'o kwilyo'o yu.
\v 19 Nchka 'in Ndiose ku'ni cha' tyu'u Isaac xiya' si wa ngujwi, nka tiye Abraham; kan' cha' mslyaa yu y'ni yu ngwaña'an lo'o sñi' yu. Ti kwi' bra nu nskwa Isaac lo msaa cha' kaja, ngulaa Ni 'in nu xuwe kan', xiya' ndya Ni 'in yu 'in Abraham sti yu bra kan'; ja ngujwi nu xuwe kan' bra kan'.
\p
\v 20 Yaa ña'an ti' ayman Isaac cha' nu ykwi' Ndiose lo'o yu, kan' cha' ykwi' yu kula kan' lo'o ta'a tyukwaa sñi' yu, nu ngwa Jacob lo'o Esaú, cha' su'we 'a ka 'in nten 'in ne' nu ndijyan nde loo la.
\v 21 Yaa ña'an ti' ayman Jacob cha' nu ykwi' Ndiose lo'o yu, kan' cha' msu'wa yu kula kan' nkwan ke ta'a tyukwaa sñi' ste' yu nu ngwa sñi' Se, xa wa kaja ti yu kula kan'. Bra kan' y'ni tnun yu kula kan' 'in Ndiose, laja nu msñi tuun 'in yu lo'o yka skan 'in yu.
\v 22 Yaa ña'an ti' ayman Se 'in Ndiose, kan' cha' xa wa kaja ti yu, ykwi' yu ska cha' lo'o ne' ta'a yu, cha' chañi cha' tyo'o ta'a ne' Israel lo yuu Egipto kan' chun' ndi'in la, tyaa ne' cha' su'we ti bra kan'. Lo'o ngwaña'an, ytsa' yu la nde ya' katsi' tijyan yu xiya' xa wa mdo'o ne' ndyaa ne'.
\p
\v 23 Yaa ña'an ti' sti jya'an ayman Moisés 'in Ndiose, kan' cha' xa wa ngula sñi' ne', msu'wa kutsi' ne' 'in yu ni' ña'an snan ko', cha' ja ña'an nten cha' su'we 'a ña'an kuwi' kune' kan'. Ja ytsen ne' kan' 'in ree xa'an, ni siya ja mdukwa ne' tñan kuxi nu ngulo ree kan'.
\v 24 Xa wa tlyu Moisés, bra kan' ja mdiya ti' yu cha' nchkwi' nten cha' lka yu sñi' nu kuna'an sñi' ree nu nka ndloo 'in ne' Egipto, chun' ndyaa ña'an ti' yu 'in Ndiose nu nka X'nan ne' Israel;
\v 25 su'we la cha' su'wa ti tyijin yu nu ti'í lo'o nchga nten 'in Ndiose, nka tiye yu. Ja nka tiye yu cha' tya'an yu xkwi' cha' paseya, ja nka tiye yu ku'ni yu chin' cha' kuxi cha' ska bra ti ka tsaa ti' yu, ti ykwi' ti yu;
\v 26 su'we la cha' su'wa ti tyi'in yu lo'o ta'a kichen tyi yu, ni siya chen ña'an ka tiye xka ta nten ña'an 'in yu, nka tiye yu. Sa ña'an mdijin ykwi' Krixtu nu ti'í nde loo la, kwi' ngwaña'an mdijin Moisés nu ti'í nu ngwa bra kan'; ja nduwe ti' yu cha' kuliya' 'a ne' Egipto, mxnun ti'in yu nchga cha' su'we nu nsu'wi 'in ne', cha' ndyaa ña'an ti' yu cha' su'we la ka 'in nten 'in yu nde loo la chun' Ndiose.
\v 27 Yaa ña'an ti' ayman Moisés 'in Ndiose, kan' cha' mdo'o yu lo yuu Egipto kan'; ja ytsen yu ni siya msin' 'a ti' ree xa'an kan' bra kan', kwi' ja mxi'in chun' yu siya' ti. Ndyaa lo'o yu 'in ne' Israel tuwiin tijyu', ña'an ti' si ndyaa ña'an yu 'in Ndiose; ni siya Ndiose ni, ja nchka ña'aan 'in Ni.
\p
\v 28 Yaa ña'an ti' Moisés cha' nu ykwi' Ndiose lo'o yu, kan' cha' ykwi' yu cha' ku'ni ne' ta'a pascua, ti kwi' tla xa wa tyijin ti ska angajle se'en ndi'in ne' Egipto; cha' 'in Ndiose yan angajle kan', cha' ta Ni nu ti'í 'in ne' Egipto kan'. Kan' cha' ngulo Moisés tñan cha' ta'an ne' tnen se'en lka tu'wa tuna'an 'in nchga ne' Israel. Bra nu ña'an angajle kan' tnen, ja kujwi Ni 'in sñi' ne' Israel bra kan', ni siya wa yjwi angajle kan' 'in sñi' nu ngula kulo 'in nchga ne' Egipto kan'.
\v 29 Yaa ña'an ti' Moisés 'in Ndiose, kan' cha' ngalaa ska tuwiin wtyi jlu'we la tyi'a Tujo'o Nga'a, cha' mdijin ne' la xka la'a tsu'. Xa nu ngwa ti' ne' Egipto tyo'o ña'an 'in ne' Israel, ja ngwa 'in ne' bra kan', cha' nganun ne' ni' tyi'a kan'; mdyii ne' Egipto, ngujwi ne' bra kan'.
\p
\v 30 Yaa ña'an ti' ne' Israel cha' nu ykwi' Ndiose, kan' cha' mda'an ne' mxiti'in ne' ña'aan chun' kichen Jericó, ña'aan chun' lo'oo kee nu nduun tu'wa kichen kan' bra kan'. Kati tsan mda'an ne' sa tlyu ti, lo'o mdyii lo'oo kan' ngutin bra kan'.
\v 31 Ayman Rahab, ska nu kuna'an tsaa ti' nu mdi'in kichen kan', yaa ña'an ti' 'in Ndiose; kan' cha' ykwi' su'we lo'o tyukwaa ne' Israel nu yaa mnan ti, yaa na'an ne' lo kichen kan' ti kulo. Mda Rahab kan' se'en tyi'in ne', kan' cha' ja ngujwi nu kuna'an kan' bra nu ngujwi xka la ta'a kichen tyi nu ja mdukwa cha' nu nchkwi' Ndiose siya' ti.
\p
\v 32 Ti ndiya ka'an 'a cha' nu ka chkwiǐn' lo'o wan, cha' 'in cha' tnun nu y'ni ayman 'ñaan, nten nu chañi yaa ña'an ti' 'in Ndiose: ka chkwiǐn' cha' 'in Gedeón, lo'o Barac, lo'o Sansón, lo'o Jefté, lo'o David, lo'o Samuel, lo'o ta'a ayman kula nu ykwi' cha' 'in Ndiose lo'o nten nu ngwa s'ni bra kan'.
\v 33 Yaa ña'an ti' nchga ne' kan' 'in Ndiose, kan' cha' msuun ne' lo'o nten kuxi nu mdi'in xka nasiyun tijyu' la, mdijin lyo ne' 'in nchga nten nu mdi'in nde kwa bra kan'. Su'we 'a tñan y'ni ne' kan', kan' cha' y'ni Ni nchga cha' nu wa ykwi' Ni cha' ku'ni Ni cha' 'in ne' kan'. Ngwa 'in ne' kan' tukun' tu'wa kwichi la sa'a cha' ja yku 'in ne';
\v 34 kwi' ngwaña'an, mdalo 'a ne' kan', ni siya mxkwan ne' xa'an 'in ne' lo kii' tnun cha' skin ne'; ja ska ngwa 'in ne' kan', ni siya ngulo nten xtyi wsuun cha' kujwi 'in ne'. Kulo ndukwa la, ja mdalo ne' kan' siya' ti, cha' chin' ti jwersa yu'wi 'in ne'; chun' ndi'in la, ngwa ngula la ti' ni' kasiya 'in ne' kan', cha' tnun 'a jwersa mjwi 'in ne' xa nu msuun ne' lo'o nten xka nasiyun nu sa tlyu ti ndijyan cha' tyijin lyo 'in ne' bra kan'.
\v 35 Kwi' ngwaña'an nu kuna'an ni, xiya' ngala yu ki'yu 'in ne' ña'an lu'u ti, cha' nu yaa ña'an ti' ne' cha' ka 'in Ndiose kulaa 'in yu ni siya wa ngujwi yu ska ya'.
\p Ti'í 'a mji'in ne' kuxi kan' 'in xka ta ta'a yu bra kan', chun' ja mslyaa yu kan' kulaa ya' yu 'in Ndiose. Si nu kulaa ya' yu kan' 'in Ni, ja jwi'in ne' kuxi 'in yu bra kan'; kulaa ne' kuxi 'in yu kan' bra kan'. Mdi'in ta 'a yu kan' ña'aan bra kan y'ya Ni 'in yu, cha' ta Ni xka chalyuu nu su'we la 'in yu.
\v 36 Xka la ta'a yu kan' ni, ykwi' ne' kuxi cha' ti'í 'in yu laja nu mji'in ne' 'in yu. Ndiya yu nu mskan' ne' kuxi lo'o karenan, ndiya yu nu msu'wa ne' 'in yu ni' ña'an chkwan.
\v 37 Ska tukwa yu kan' ngujwi yu bra kan', cha' ti'í 'a nguun kee ne' chun' yu kan', lo'o ndiya ya' mduwe ne' 'in xka ta yu kan' lo'o siyera. Kwi' ngwaña'an xka ta yu kan', ngujwi yu tu'wa xtyi 'in ne' kuxi. Kwi' ngwaña'an, ndiya yu nu nda'an yu'wi ti yu, kijin slya' ti nchku' yu bra kan', ni siya kijin chivu. Kwi' ngwaña'an ndiya nu ti'i, cha' nu ti'í 'a ti' ne' kuxi 'in yu.
\v 38 Kuxi 'a nten chalyuu re nu y'ni ngwaña'an. Ja jlyo ti' nten chalyuu cha' su'we la yu nu mjwi cha kan' ke ykwi' ne', ni siya mda'an yu'wi ti yu kan', ni siya yu'wi kutsi' ti yu ni' kixin' si' ki'ya, cha' nu ti'í 'a ti' nten chalyuu 'in yu. Mdi'in yu kan' tukee, kwi' ngulu yu tiyuu se'en tyi'in yu.
\v 39 Lo'o ni, ti ndyu'wi tian' 'in yu kan', ta'a nten nu ngwaña'an yaa ña'an 'a ti' 'in Ndiose nu ngwa s'ni, ni siya ja na'an ne' kan' nchga cha' nu wa ykwi' Ni cha' ka nde loo la.
\v 40 Su'we la cha' nu mda'an tiye ykwi' Ni cha' ku'ni Ni lo'o ta'aan ni, cha' lo'o cha' 'ñaan mda'an cha' tiye Ni. Ngwa ti' Ni cha' kaan nten nu tyukwi ti tiye su'wa ti lo'o ne' kan'. Ta'aan lo'o ayman kula kan' 'ñaan, kaan sa ña'an nu ngwa ti' Ni cha' kaan bra kan'. 
\c 12
\s Tya'an cha' tiyean sa ña'an nu y'ni Jesús  xa nu mdijin lyo yu 'in nu ti'í ti' 'in yu
\p
\v 1 Lo'o ni, nde ña'an ku'nian lo chalyuu re, ña'an ti' si ti ndi'in ayman kula kan' sa tlyu ti lo'oan: Tyu'wi su'we tian' nchga cha' tnun nu y'ni ayman kan' nu ngwa s'ni, chun' nu yaa ña'an ti' ne' 'in Ndiose. Kan' cha' kulaa yaan' nchga cha' nu ngi'ni tukwi 'ñaan cha' ja xñiin su'wean cha' 'in Jesús; kulaa yaan' nchga cha' kuxi nu ndiya la tian'. Lo'o bra kan' ka ngula la ti' kasiya 'ñaan cha' ku'nian cha' su'we lo chalyuu re, sa kwa bra nu ti ta Ni chalyuu 'ñaan bra kan'.
\v 2 Tya'an cha' tiyean sa ña'an nu y'ni Jesús, chun' Jesús lka suun nchga cha' nu ndyaa ña'an tian' ni. Si ngwaña'an ku'nian, ka tsaa ña'an tian' 'in Ni sa ya' nu tyii chalyuu 'ñaan. Jesús ni, ja mxi'in chun' yu 'in tñan nu mdi'in cha' ku'ni yu, ni siya jlyo ti' yu cha' wa kaja ti yu lo wsi. Chun' ndi'in la xa wa mdijin lyoo yu 'in nu kuxi, su'we 'a ngwa tiye yu bra kan'; kan' cha' ja mjyu'u ti' yu siya' ti, ni siya mda ne' nu ti'í 'in yu lo wsi. Lo'o ni, wa ndyaa tukwa Jesús nde la'a se'en kwin se'en tnun se'en ndukwa Ndiose Stian.
\p
\v 3 Tya'an su'we cha' tiye wan cha' 'in nchga cha' kuxi nu ngwa 'in Jesús bra kan'. Mdalo 'a yu 'in ne' nu y'ni cha' kuxi kan' lo'o yu bra kan', ni siya ti'í 'a ti' ne' kuxi 'in yu. Kan' cha', lo'o 'wan ni, ja ndi'in cha' ka na'an ti' kasiya 'wan cha' 'in Jesús, ja ndi'in cha' ka ndaja ti' wan 'in Ni.
\v 4 Ni siya lye 'a nxuun wan lo'o nchga cha' kuxi, ja ya kujwi ne' 'in ska wan cha' 'in Jesús.
\v 5 Ja ndi'in cha' kjlyaa ti' wan cha' re xa nu su'we 'a nchkwi' Ndiose lo'o wan ña'an ti' si lka wan sñi' Ni:
\q Sñiěn', ndukwin Ndiose, ja ki'ya ti'í 'wan lo'oǔn ni siya taǎn nu ti'í 'wan;
\q ja ka ndaja ti' wan 'ñaǎn, ni siya ja taǎn chabiya' 'wan cha' ku'ni wan ska cha' kuxi.
\q
\v 6 Cha' nu na' lkaǎn X'nan wan, lo'o su'we 'a nka tiyeěn ña'aǎn 'wan, kan' cha' taǎn nu ti'í 'wan ti xi'i, ndukwin Ndiose.
\q Ndiya ya' ndaǎn chin' nu ti'í 'in nten 'ñaǎn, cha' sñiěn' lka ne'.
\m Ngwaña'an nchkwi' Ndiose lo'oan,
\v 7 kan' cha' chan talo wan bra nu tyijin wan nu ti'í chabiya' 'in Ndiose Sti wan sikwa. Ndijin wan chin' nu ti'í ni, kan' cha' ka biya' ti' wan cha' lka wan sñi' Ndiose, cha' ngwaña'an ngi'ni Ndiose lo'o wan. Nchga nten nu nsu'wi sñi', ndiya ya' ku'ni tlá ne' 'in sñi' ne'; bra nu ja nnan nu xuwe kan' cha' nu nchkwi' sti ne', nda sti ne' nu ti'í 'in sñi' bra kan'. Kwi' ngwaña'an ngi'ni Ndiose lo'oan.
\v 8 Ndi'in cha' ta Ndiose nu ti'í 'wan sa ña'an nu nda Ni nu ti'í 'in nchga sñi' Ni, cha' ka biya' ti' wan cha' chañi cha' wa lka wan sñi' Ni bra kan'; ja lka wan sñi' nu mjwi 'in nten lo kichen ti.
\v 9 Lo chalyuu re nda stian nu ti'í 'ñaan, kan' cha' nnaan cha' nu nchkwi' ne' kula 'ñaan lo'oan. Kan' cha' ni, ¿ta ja su'we si taan chabiya' cha' ta Ndiose Stian nu ti'í 'ñaan a?, cha' su'we la tyi'ian nde loo la bra kan'.
\v 10 Wa lka ti bra nu nda stian nu ti'í 'ñaan lo chalyuu re, sa ña'an nu su'we cha' 'ñaan skaan ngi'ni ne' kula kan', cha' ku'niin xa'aan, nka tiye ne' kula 'ñaan; ti kwi' ti cha', nchka ti' Ndiose cha' ka su'we cha' 'ñaan, kan' cha' nda Ni nu ti'í 'ñaan ngwaña'an. Xa wa ngutin ki'ya nu ndukwian, ka su'wa cha' 'ñaan lo'o Ndiose Stian, nu ja nsu'wi cha' kuxi 'in siya' ti bra kan'.
\v 11 Chañi cha' xi'in tian' bra nu ndijian nu ti'í, si'i nan su'we nka tiyean bra kan'; chun' ndi'in la ka ku'nian ka'an la cha' su'we, cha' tiin ti tyi'ian lo chalyuu bra kan', cha' wa msñian su'wean cha' 'in Ndiose bra nu mdijian nu ti'í.
\s Tnun 'a cha' lka si kulaa yaan' 'in cha' 'in Ndiose
\p
\v 12 Xiya' ku'ni ngula la ti' ni' kasiya 'wan; ja kutsen wan sikwa, ni siya ngwa tña' 'a wan, ni siya ngwa ndaja ti' wan nu ngwa xkan'.
\v 13 Tsaa naan la wan tuwiin nu ñi se'en tsaa wan, cha' ja ka ñu'un la tuwiin 'in xka ta ne' ta'a wan nu na'an la ti' ni' kasiya 'in ne'; ku'ni wan cha' ka tyukwi la ti tiye nten kan', cha' ja ka ñu'un la ti' ne'.
\p
\v 14 Lye ku'ni wan tñan cha' su'we ti tyi'in wan lo'o nchga nten; ku'ni luwi wan kasiya 'wan, cha' nu ja ta Ndiose chabiya' ña'aan 'in Ni si ti ji ka luwi kasiya 'ñaan.
\v 15 Xñi wan kwenta 'in ta'a wan cha' ja ska wan kulaa ya' ngwa ti ña'an nchga cha' su'we nu wa y'ni Ndiose lo'oan. Nu kulaa ya' wan 'in Ni, ja chan ka wan ña'an ti' ska loo yan nu ku'ni tna' 'in xka la ne' ta'a msñi wan cha' 'in Jesús. Ña'an ti' ska kixin' tlá nu ku'ni ñu'un 'in nten cha' lka ran yan, kwi' ngwaña'an kaan lo'o ta'aan bra nu ndi'in ska cha' kuxi 'ñaan.
\v 16 Xñi wan kwenta 'in ta'a wan cha' ja ska wan sten wan lo'o xka nten nu ja lka kwilyo'o wan. Ja ku'ni wan sa ña'an y'ni ayman Esaú; chen ña'an y'ni yu kan' lo'o nten 'in yu, cha' ja yuwe ti' yu 'in Ndiose. Sñi' kulo Isaac ngwa Esaú kan', lo'o mdyii nchga cha' su'we nu wa ta ti sti yu 'in yu yjwi' yu bra kan', cha' ngwa ti' yu ku yu ni siya ska ti ka'nan skwa nu mda ta'a yu 'in yu; ngwaña'an mñi lyo'o ta'a ngula yu 'in yu bra kan'.
\v 17 Wa jlyo ti' wan sa ña'an ngwa chun' ndi'in la. Bra nu ngwa ti' Esaú cha' lkwan sti yu 'in yu, kan' ja ynan 'a sti yu cha' nu ykwi' yu lo'o; ja mjwi 'a ña'an tya'an chun' yu 'in tñan nu wa y'ni yu, ni siya nganan 'a yu bra nu mjñan yu cha' kan' 'in sti yu.
\p
\v 18 Bra nu ynan wan cha' 'in Ndiose, ja ngwa 'wan sa ña'an nu ngwa 'in ne' Israel nu ngwa s'ni, xa nu mduun ne' kan' kiya' ki'ya Sinaí bra kan'. Ja ndii ti' wan ni, sa ña'an nu mgii ti' ne' kan' xa nu lye 'a mkin si' ki'ya Sinaí kan' nu ngwa bra kan'; liye 'a ngwa tla bra kan', ja ngwa ña'an ne' siya' ti, kwi' ngwaña'an lye 'a ngwa kwi'in tnun.
\v 19 Lo'o ngwaña'an, ja ynan wan bra nu kwen 'a ynen kuwi chkwan 'in Ndiose bra kan', ynen ykwi' Ndiose lo'o nten kan' bra kan'. Bra nu ynan ne' cha' nchkwi' Ndiose lo'o ne', lye 'a mjñan ne' 'in Ni cha' ja chkwi' 'a Ni lo'o ne' siya' ti bra kan'.
\v 20 Ytsen 'a ne' bra kan', cha' ja mdalo ne' kunan ne' cha' re nu ykwi' ayman Moisés lo'o ne' cha' 'in Ndiose: “Ja kan wan nde si' ki'ya re siya' ti; ni siya tsaa ska ta'a wan, ni siya tsaa ska 'ni 'wan si' ki'ya re, ndi'in cha' kujwi wan 'in bra ti lo'o kee.”
\v 21 Lye 'a ña'an ngwa bra kan'. Bra kan' ykwi' Moisés cha' re: “Lye 'a nchkwaǎn cha' ngitseěn”.
\p
\v 22 Lo'o si'i ngwaña'an nchka 'wan ni, cha' xka chalyuu kwi tsaa wan ni, ti kwi' se'en ndi'in Ndiose ykwi' nde ni' kwan. La kan' ndi'in Ndiose lo'o tyun 'a mi angajle 'in Ni. Su'we 'a ña'an la kan'; ña'an ti' si wa ndukwa xka ki'ya Sión nde ni' kwan, ña'an ti' si nde kwa nskwa xka kichen Jerusalén nu su'we la ña'an, ngwaña'an lka la kan'.
\v 23 Kwi' ngwaña'an, tsaa wan se'en ndi'in ta'a sñi' Ndiose nu wa ndyaa lo'o Ni 'in nde kwa, cha' wa ndukwa nin nchga sñi' Ni lo kityi 'in Ndiose nde ni' kwan. Su'we 'a nka tiye ne' kan' se'en ndyo' ti'in ne' bra kan'. Nan wa tsaa ti wan ti kwi' se'en ndi'in Ndiose nu ku'ni biya' 'in nchga nten, nde se'en ndi'in ta'a ayman nu luwi kasiya 'in cha' 'in Jesús, cha' wa nchka kwi tyukwi ña'aan ne'.
\v 24 La kan' ndi'in Jesús, nu wa mskan' xka cha' nu su'we la lo'oan tloo Ndiose. Su'we 'a ngwa cha' ngalu tnen ykwi' Jesús, cha' lo'o tñan nu y'ni Jesús, kan' cha' wa y'ni tyii Ndiose nchga cha' kuxi nu mdi'in 'ñaan bra kan'. Lo'o ayman Abel ni, kuxi 'a yaa to'o cha' 'in yu, bra nu ngalu tnen yu nu ngwa s'ni; mdi'in cha' kaja ti kwi' yu nu wa yjwi 'in yu bra kan'.
\p
\v 25 Ki'ya wan kwenta sikwa, cha' kunan su'we wan nchga cha' nu wa ykwi' Krixtu lo'o wan. Lye 'a mda Ndiose nu ti'í 'in ayman kula 'ñaan, chun' ja mslyaa ne' kunan ne' cha' nu ykwi' ayman Moisés lo'o ne' lo chalyuu re chabiya' 'in Ndiose; ja ngwa xnan ne' kan' 'in Ndiose. Lo'o tnun la cha' ka 'ñaan ni, si ja kunaan cha' nchkwi' Krixtu nu mdo'o se'en ndi'in Ndiose nde ni' kwan mdiyan lo chalyuu re; lo'o ni, wa ndyaa tukwa Ni xiya' nde se'en ndi'in Ndiose.
\v 26 Laja nu ykwi' Ndiose lo'o nten s'ni, ti kwi' bra kan' lye 'a mñan chalyuu; lo'o ni, nde ndiya xka cha' nu wa ykwi' Ni lo'oan: “Xiya' ti ku'niǐn cha' kiñan tyukwi ña'aan chalyuu, lo'o ti kwi' bra kan' xñaǎn ña'aan ni' kwan” ndukwin Ni.
\v 27 Bra nu ndukwin Ni “Xiya' ti”, ngwaña'an ka biya' tian' cha' ndi'in cha' xñan Ni nchga nan nu wa ngwiñan Ni, kulo tsu' Ni 'in nan kan' bra kan'. Sa kwa ti nan nu nsu'wi 'in Ndiose ykwi', kan' ti nan nu kanun bra kan', cha' ja ka katin ran siya' ti.
\v 28 Kwi' ngwaña'an, ja xa'an 'a chalyuu kwi nu wa mjwi 'ñaan chun' Krixtu, ja siya' tyii chalyuu kan'; kan' cha' tyaan xu'we 'in Ndiose sikwa. Ku'niin tnuan 'in Ni, cha' ngwaña'an nchka ti' Ni cha' ku'nian. Kuwe 'a tian' 'in Ni cha' tnun 'a cha' ndi'in 'in Ni; nchga tsan ku'niin tnuan 'in Ni sikwa.
\v 29 Ti kwi' Ndiose nu ngi'niin tnuan 'in, chañi cha' ka 'in Ni ku'ni tyii Ni 'ñaan ska bra ti, sa ña'an lka si skian ska lo kii' tnun, si nu nchka ti' Ni ku'ni Ni ngwaña'an. 
\c 13
\s Tñan nu nchka ti' Ndiose cha' ku'nian lo chalyuu
\p
\v 1 Ti chka t'nan ti' wan 'in ta'a msñi wan cha' 'in Krixtu, ku'ni wan cha' su'we lo'o ne' kan'.
\v 2 Tyu'wi ti' wan cha' chkwi' su'we wan lo'o nchga ne' xka kichen, nu tiyan na'an tyi wan; ta wan se'en tyi'in ne' kan', cha' ngwaña'an y'ni ayman kula 'wan nu ngwa s'ni, lo'o chun' ndi'in la ngwa biya' ti' ne' cha' angajle 'in Ndiose nu ndi'in nde ni' kwan ngwa ne' kan' nu yan na'an tyi ne'.
\p
\v 3 Tya'an cha' tiye wan sa ña'an ka taya' wan 'in ta'a msñian cha' 'in Ndiose nu nsu'wi ni' ña'an chkwan, ña'an ti' si ti kwi' wan nsu'wi wan nde kwa lo'o ne'. Kwi' ngwaña'an, taya' wan 'in ne' ta'aan nu lye 'a ndijin nu ti'í chun' ti'í ti' nten 'in ne'; taya' wan 'in ne' kan', ña'an ti' si 'wan, ti ykwi' ti wan, ndijin wan nu ti'í lo'o ne'.
\p
\v 4 Ta'a wan ndi'in cha' tyi'in su'we wan lo'o kwilyo'o wan; ja ku'ni wan cha' kuxi lo'o kwilyo'o wan, kwi' ja tyi'in cha' 'wan lo'o xka nten nu ja lka kwilyo'o wan. Ta Ndiose nu ti'í 'in nchga nten nu ku'ni cha' kuxi ngwaña'an, ta Ndiose nu ti'í 'in nten nu sten yu'wi lo'o kwilyo'o xka nten.
\p
\v 5 Ja xu'wi tiye wan xkwi' cha' 'in tñi; su'we si kala' ti' wan lo'o sa kwa ti nan nu nsu'wi chin' 'wan. Nan wa ykwi' Ndiose cha' re lo'oan: “Ja kulaa yaǎn' 'aǎn 'wan” ndukwin Ni, “ja xnuǔn 'aǎn 'wan ngwa ti ña'an.”
\v 6 Kan' cha' nde ña'an tya'an cha' tiye wan cha' ka ngula la ti' ni' kasiya 'wan kwenta skaa wan:
\q Ykwi' X'naǎn lka nu ndaya' 'ñaǎn.
\q Ja n'ni cha' kutseěn sikwa, cha' ja ka 'a ku'ni nten cha' kuxi lo'oǔn.
\p
\v 7 Tyaa yu'wi ti' wan 'in ayman ta'a wan nu ngwa ndloo la 'wan chabiya' 'in Jesucristo; ti kwi' ne' kan', ykwi' ne' cha' 'in Ndiose lo'o wan ti kulo, kan' cha' tya'an su'we cha' tiye wan cha' 'in tñan su'we nu y'ni ne' kan' lo chalyuu. Lo'o 'wan, ku'ni wan sa ña'an nu y'ni ne' kan' cha' su'we 'a yaa ña'an ti' ne' cha' 'in Ndiose.
\p
\v 8 Ja nxa'an Jesucristo. Sa ña'an nu ngwa Ni nu ngwa s'ni 'a, kwi' ngwaña'an lka Ni ni, lo'o ti kwi' ngwaña'an ka Ni nu ndyaa nde loo la.
\v 9 Ja ta wan chabiya' kwa'u nten xka la cha' 'wan, xka cha' nu ja su'wa nchkwi' lo'o cha' 'in Jesús, cha' ja xi'in chun' wan tuwiin nu ñi. Su'we la si kanun tsaa nchga cha' 'in Ndiose ni' kasiya 'ñaan, cha' nchga bra kuwe tian' 'in nchga cha' su'we nu ngi'ni Ni lo'oan. Lo'o ja ka kanun su'we cha' 'in Ndiose ni' kasiya 'ñaan xa nu kunaan xka ta lee nu tatsaa nten 'ñaan cha' xñian, xa nu nchkwi' ne' cha' ja su'we kuan ska loo nan nchkuan. Ni siya wa ynaan 'aan lee kan' nu ngwa xkan', ja nganun su'we la tiyean xa wa y'nian tñan kan'.
\p
\v 10 Xka ña'an y'ni Krixtu bra nu ngujwi yu lo wsi, cha' ngwa yu lomstan cha' katin ki'ya nu ndukwian tloo Ndiose, cha' tnun la siya' ti tñan nu y'ni Krixtu ke lomstan nu nxtya sti jo'o kula 'in ne' judío. Kan' cha' nchga nten nu ti ndyaa ña'an 'a ti' 'in sti jo'o kula kan', ja ka tyi'in su'we ne' kan' lo'o Krixtu.
\v 11 Ni siya x'nan sti jo'o 'in ne' judío ni, xkwi' lo'o tnen 'ni ndijyan lo'o sti jo'o kan' loo jo'o se'en kti 'a ni' lyaa kan', cha' katin ki'ya nu ndukwi nten tloo Ndiose bra kan'. Xa wa mdyii ngwa tñan kan', ndyaa lo'o ne' 'in nchga kuna' 'ni nu lka lomstan kan' tu'wa kichen; la kan' ndikin ne' kuna' kan'.
\v 12 Ti kwi' ti cha', tu'wa kichen mdijin Jesús nu ti'í, cha' kaja ña'an katin cha' kuxi nu ndi'in 'in nten, bra nu ngalu tnen ykwi' yu cha' ngujwi yu lo wsi bra kan'.
\v 13 Lo'o nan, su'we si ja kutsean, ni siya tsaa lo'o ne' 'ñaan cha' ta ne' nu ti'í 'ñaan cha' 'in Jesús, ña'an ti' si su'wa tsaan lo'o Jesús.
\v 14 Lo chalyuu re ja ndiya se'en su'we se'en kanuan; xkwi' nan ndi'iin taan ña'an bra nu tyaan la xka se'en nu su'we la ti, se'en tsaan xa wa mdyii chalyuu re.
\v 15 Kan' cha' nchga tsan ku'niin tnuan 'in Ndiose cha' 'in Jesús; ña'an ti' si taan lomstan 'in Ni, kwi' ngwaña'an lka xa nu tyukwi ti tiyean ku'niin tnuan 'in Ni. Lo'o ngwaña'an, ¡su'we 'a si nchga tsan chkwian' cha' tnun 'a cha' nu ndi'in 'in Ndiose Stian!
\v 16 Lo'o ja ka ndaja ti' wan ku'ni wan nchga cha' su'we, cha' ngwaña'an taya' wan 'in ta'a nten wan; kan' lka tñan nu ndiya ti' Ni cha' ku'nian cha' 'in Ni.
\p
\v 17 Kunan wan cha' nchkwi' nten nu nka tñan cha' 'in ska ta ne' ta'a wan; ku'ni wan nchga tñan nu kulo ne' kan' wan. Tnun 'a tñan nu ndi'in 'in ne' kan', cha' nduwe 'a ti' ne' sa ña'an tñan nu ngi'ni wan kwenta skaa wan; ndi'in cha' tijin ne' kwenta 'in Ndiose ykwi' si chañi cha' ti nganan su'we wan cha' 'in Ni. Lo'o su'we la nka tiye ne' kan' si ndiya ti' wan ku'ni wan sa ña'an tñan nu chkwi' ne' lo'o wan; si nu ja ku'ni wan ngwaña'an ni, ka xi'in ti' ne' kan' bra kan', lo'o ja ka 'a taya' ne' 'wan bra kan'.
\p
\v 18 Lo'o ngwaña'an, ti chkwi' wan lo'o Ndiose cha' 'ware. Tyukwi ti tiye ba jlyo ti' ba cha' ja ska cha' kuxi ndi'in 'wa cha' ka jyu'u ti' ba. Nchga bra nka tiye ba ku'ni ba nchga cha' nu su'we la cha' 'in Ndiose.
\v 19 Kan' cha' xiya' njñaǎn 'aǎn 'wan, cha' ta'a ti chkwi' wan lo'o Ndiose cha' 'ñaǎn. Ja chan ku'ni Ni cha' tyaǎn ndla la nde se'en ndi'in wan bra kan'.
\s Mslaa' yu 'in ne'
\p
\v 20 Ndiose lka nu y'ni tñan cha' ndyu'u Jesucristo nu nka X'naan xiya', xa wa ngujwi Ni. Lo'o ni, lka Jesús ndloo la ti, cha' ku'ni Ni kwenta 'ñaan nu lkaan nten 'in Ni, ña'an ti' si ngi'ni Ni kwenta 'in slya' 'in Ni, cha' ngujwi Ni cha' 'ñaan. Bra nu ngujwi Jesús ni, kan' mskan' Ni cha' lo'o nchga nten 'in Ni, ska cha' kwi nu ja tsaa tii 'a siya' ti.
\v 21 Ndiose y'ni cha' tiin ti tyi'in kasiya 'ñaan lo chalyuu, lo'o ni, nchka tiǎn' cha' su'wa ya' Ni 'wan nchga se'en lyiji 'wan, cha' ka ku'ni wan nchga tñan, sa ña'an tñan nu nchka ti' Ni cha' ku'ni wan. Lo'o nchka tiǎn' cha' ku'ni Ni lo'oan nchga nan nu su'we la nka tiye Ni, chabiya' 'in Jesucristo. Lo'o ngwaña'an nan, ja tsaa tii 'a cha' ku'niin tnuan 'in Krixtu. ¡Ngwaña'an ka sikwa!
\p
\v 22 'Wan ta'a msñian cha' 'in Krixtu, ku'ni wan cha' tlyu ti' 'ñaǎn, talo wan chin' 'ñaǎn, kunan wan cha' nu nchkwiǐn' re. Ja ka'an 'a cha' nda'aǎn lo kityi re, lo'o nchka tiǎn' cha' kanun su'we la cha' kan' ni' kasiya 'wan.
\v 23 Lo'o xka cha' nchka tiǎn' katsaǎn' 'wan ni, cha' wa ngulaa ne' 'in Timu, ta'aan nda'aan tñan, se'en yu'wi yu ni' ña'an chkwan; bra nu tsa'aǎn, tsa'aǎn lo'oǔn 'in yu bra kan', si ndla ti kala yu se'en ndi'iǐn.
\p
\v 24 Ta wan kasiya 'ñaǎn 'in nchga ne' nu nka ndloo 'wan cha' 'in Ndiose, kwi' ngwaña'an ta wan kasiya 'ñaǎn 'in nchga ne' ta'a wan nu msñi cha' 'in Ndiose. Nchga ne' nu ndi'in cha' 'in lo'o Ndiose nu ndi'in nde Italia re, lo'o ne' kan' nchka ti' ne' ta ne' kasiya 'wan.
\p
\v 25 Lo'o nchka tiǎn' cha' tyu'wi ti' wan nchga bra cha' xkwi' su'we ti ngi'ni Ndiose lo'oan ta'aan.