\id 2PE    
\h 2 SAN PEDRO
\mt Xka kityi nu ngwa'an Tyu, nu ndyaa  se'en ndi'in nten  'in Jesucristo nu ndi'in tijyu' 
\c 1
\p
\v 1 Tyu Simón lkaǎn; ngi'niǐn tñan 'in Jesucristo, cha' wa ngulo suwi Ni 'ñaǎn cha' tsa'aǎn chkwiǐn' cha' su'we 'in Krixtu lo'o ne' tyun kichen tijyu'. Lo'o ni, nda'aǎn kityi re cha' tsaa se'en ndi'in nchga nten nu msñi cha' 'in Ndiose, ti kwi' sa ña'an cha' nu msñian ta'aan. Xkwi' cha' nu ñi ngi'ni Ndiose X'naan, ti kwi' Jesucristo nu ngulaa 'ñaan 'in cha' kuxi lka Ni; kan' cha' su'wa ti lkaan ta'aan chabiya' 'in Ndiose, su'we 'a nchka 'ñaan ta'aan chun' wa ndyaa ña'an tian' 'in Ni.
\p
\v 2 Wa nchka biya' su'we ti' wan cha' 'in Ndiose, kwi' ngwaña'an nchka biya' ti' wan cha' 'in Jesús nu nka X'naan; kan' cha' nchka tiǎn' cha' ti ku'ni Ni cha' su'we lo'o wan nchga tsan, cha' ti ku'ni Ni cha' tiin ti tyi'in ni' kasiya 'wan nchga bra.
\s Sa ña'an nu ndi'in cha' ka ska nten 'in Jesucristo
\p
\v 3 Wa nda Ndiose chabiya' 'ñaan cha' kaja chalyuu nu ja tsaa tii 'a 'ñaan; kwi' ngwaña'an, wa nda Ni chabiya' 'ñaan cha' tyi'ian lo chalyuu sa ña'an nu nchka ti' Ni cha' tyi'in nten 'in Ni; kan' lka cha' nu nchka 'ñaan ni, cha' ndaya' Ni 'ñaan. Wa ngulo suwi Ni 'ñaan, wa nda Ni chabiya' 'ñaan cha' xu'wi lyoan 'in Ni; kwi' ngwaña'an, wa ngwa biya' tian' cha' ja nsu'wi 'a xka nu tnun la cha' 'in, ja nsu'wi 'a xka nu nchka la 'in.
\v 4 Tlyu 'a nka Ndiose, kwi' ngwaña'an nchka 'in Ni ku'ni Ni nchga lo tñan. Wa jlyo tian' cha' xkwi' cha' nu ñi lka cha' nu nchkwi' Ni. Kwi' ngwaña'an, ndi'in taan cha' kaja cha' xu'we tnun 'ñaan, nu wa ytsa' Ni 'ñaan cha' kaja 'ñaan. Wa ngulaa Ni 'ñaan 'in cha' kuxi nu ndi'in 'ñaan, cha' ja tyijin lyo cha' kuxi kan' 'ñaan; nchga cha' kuxi nu ndiya 'a tian', kan' lka nu y'ni ñu'un 'ñaan se'en ndi'ian lo chalyuu. Lo'o ni, ngi'ni Ni cha' xlyaan ku'nian nchga lo cha' su'we, sa ña'an nu nchka ti' Ni cha' ku'nian.
\v 5 Kan' cha' tyukwi ti tiye wan, lo'o tyukwi jwersa 'wan, ku'ni wan xkwi' cha' su'we kan', cha' katsa' wan 'in xka ta nten cha' chañi cha' wa msñi wan cha' 'in Jesucristo. Kwi' ngwaña'an, ndi'in cha' ka biya' la ti' wan nchga cha', sa ña'an cha' nu ndiya la ti' Ndiose.
\v 6 Ndi'in cha' ka biya' la ti' wan sa ña'an ndi'in cha' 'in Ndiose; bra kan' ka ku'ni su'we wan kwenta 'wan, ti ykwi' ti wan, cha' ja tyijin lyo ya ña'an ti cha' kuxi 'wan. Si ka ku'ni su'we wan kwenta 'wan, ti ykwi' ti wan, bra kan' talo 'a wan ni siya ndi'in 'a cha' kuxi se'en ndi'in wan. Si ndalo 'a wan 'in cha' kuxi kan', bra kan' ka tyi'in wan sa ña'an nu nchka ti' Ndiose cha' tyi'in wan lo chalyuu.
\v 7 Si ngwaña'an nchka ti' wan tyi'in wan lo chalyuu, bra kan' ndi'in cha' chka t'nan ti' wan 'in ta'a nten wan; ndi'in cha' su'we ti xu'wi tiye wan ña'an wan 'in nchga nten.
\p
\v 8 Bra nu ku'ni wan nchga lo tñan kan' tyukwi tyempu nu ndi'in wan lo chalyuu, bra kan' ka biya' la ti' wan sa ña'an ndi'in nchga cha' 'in Jesucristo nu nka X'naan. Ja ka ndaja ti' wan sikwa, cha' su'we 'a kunanjo'o wan 'in Ndiose bra kan'.
\v 9 Bra nu ja ku'ni wan cha' kan', lo'o ja ndi'in su'we wan bra kan', wa lka wan ña'an ti' ska nu kwityiin' nu ndukun' kiloo, ti ykwi' ti. Ja nchka ti' yu kwityiin' kan' tyu'wi ti' yu sa ña'an nu y'ni luwi Ndiose kasiya 'in yu, bra nu y'ni tyii Ni cha' kuxi nu ndi'in ni' kasiya 'in yu.
\v 10 Kan' cha' ti ku'ni la wan nchga cha' su'we kan', sa ña'an cha' ngwa'aǎn lo kityi ti kulo; kwi' ngwaña'an, tyu'wi la ti' wan cha' wa ngulo suwi Ndiose 'wan, cha' ka wan nten 'in Ni. Lo'o bra kan' ja ndi'in cha' kana' kasiya 'wan, si ngwaña'an ku'ni wan nchga lo cha' su'we kan'.
\v 11 Kan' ka tya'an su'we la wan tuwiin 'in Ndiose bra kan'. Jesucristo, X'naan nu nka ndloo la 'wan, ti kwi' lka nu ngulaa 'ñaan 'in nchga cha' kuxi. Lo'o ja tsaa tii 'a tsan cha' ka Ni ndloo la. Bra kan' su'we ti stean se'en ndi'in Ndiose nde ni' kwan.
\p
\v 12 Ti tyun ya' nka tiyeěn chkwiǐn' lo'o wan cha' 'in nchga cha' nu ñi 'in Ndiose, ni siya wa jlyo ti' wan cha' kan'. Lo'o ngwaña'an, jlyo tiǎn' cha' wa msñi su'we wan nchga cha' nu ngwa'aǎn lo kityi.
\v 13 Laja nu ti lu'uǔn, ku'niǐn cha' ja kjlyaa ti' wan cha' nu ñi kan'. Su'we la si ku'niǐn ngwaña'an, nxke' tiǎn',
\v 14 cha' ndii tiǎn' cha' wa tyii ti cha' 'ñaǎn lo chalyuu; wa ytsa' Jesucristo nu nka X'naan 'ñaǎn cha' wa ndla ti kajaǎn.
\v 15 Kan' cha' ku'niǐn cha' kanun cha' kan' lo'o wan, cha' ka tyu'wi ti' wan cha' su'we nu ndi'in 'in Jesucristo nchga tsan, ni siya wa ngujwiǐn.
\s Nten nu wa na'an cha' tnun 'a nu ndi'in 'in Jesucristo
\p
\v 16 Si'i kwentu, si'i cha' ngwi'ya ke ti ba lka cha' nu ykwi' ba lo'o wan, bra nu ytsa' ba 'wan cha' tnun 'a cha' ka 'in X'naan Jesucristo bra nu tyaan Ni xiya'. Ykwi' bare wa na'an ba 'in Jesús cha' tnun 'a cha' ndi'in 'in yu.
\v 17 Wa y'ni tnun Ndiose Sti Jesús 'in yu, lo'o ndyuwi 'a tyukwi ña'aan Jesús lo'o xaa 'in Ndiose bra kan'. Ni siya ja na'an ba 'in Ndiose nu nka ndloo 'in nchga x'nan chalyuu, jlyo ti' ba cha' mdi'in Ni kwi' se'en ti tsan kan', cha' bra kan' ynan ba cha' nu ykwi' Ni lo'o nten: “Nu nde lka Sñiěn' nu ndiya 'a tiǎn'. Su'we 'a nka tiyeěn na'aǎn 'in yu” ndukwin Ni.
\v 18 Ykwi' bare wa ynan ba cha' nu ykwi' Tyi'i Ni nu mdo'o nde ni' kwan, cha' lo'o bare mdi'in ba lo ki'ya kan' nu ngwa tsan kan'.
\p
\v 19 Ngwaña'an ka biya' tian' cha' ñi 'a lka nchga cha' nu ykwi' ayman nu ykwi' cha' 'in Ndiose lo'o nten nu ngwa s'ni. Su'we la si tukwaan cha' kan', cha' ña'an ti' ska xaa luwi nu su'we 'a njyi'in la se'en tla 'a, kwi' ngwaña'an lka cha' 'in Jesús kan'. Kwa'u xaa kan' tuwiin su'we se'en tsaan bra wa ki'ya ti xaa xa wa mdiya tsan kan'. Bra kan' tyo'o tukwa ska kwi kulasiin tnun ña'an ti' nu ndyukwa xa wa ki'ya ti xaa; kan' lka ña'an ti' Krixtu, cha' nda yu xaa nu xu'wi ni' kasiya 'ñaan.
\v 20 Ndi'in cha' ka biya' ti' wan cha' ja tukwin ka 'in kwa'u cha' 'in ti ykwi' ti 'in nten, sa ña'an nu ndyo'o ska cha' nu ngwa'an ayman 'ñaan lo kityi 'in Ndiose nu ngwa s'ni. Ska ti si taya' Tyi'i Ndiose 'in ne' cha' ka biya' su'we ti' ne', bra kan' ka kwa'u ne' cha' kan' 'in xka ta nten chabiya' 'in Ndiose.
\v 21 Nchga nten nu ykwi' cha' 'in Ndiose lo'o nten nu ngwa s'ni, ja ykwi' ne' ya ña'an ti cha' nu ndiya ti ti' ne', bra nu ykwi' ne' chabiya' 'in Ni; xkwi' cha' nu ngwa'u Tyi'i ykwi' Ni 'in ne' kan', kan' lka cha' nu ykwi' ne' chabiya' 'in Ni. 
\c 2
\s Nten nu ndu'u cha' kwiñi
\p
\v 1 Wa yu'wi chin' yu kwiñi nu mdi'in laja ne' Israel nu ngwa s'ni; cha' 'in Ndiose nchkwi' ba, ndukwin yu kwiñi kan'. Kwi' ngwaña'an, ti kan la nten kwiñi se'en ndi'in wan ni; mnan ti kwa'u yu kwiñi kan' 'wan nchga cha' nu ki'ya ke ykwi' ti yu. Lo'o chkwi' yu kwiñi kan', cha' chabiya' 'in Ndiose nchkwi' yu. Si kunan wan cha' nu chkwi' yu kan', bra kan' tyisnan tyi'in wsuun wan lo'o ta'a wan sa ña'an ya' nu su'we ta'a wan. Bra kan' ka wan tukwa ta wan si'ya cha' kwiñi kan'. Tnun 'a tñan nu y'ni X'naan cha' kulaa 'ñaan ta'aan lo'o 'in yu kwiñi kan', ni siya ja nchka 'a ti' yu kwiñi kan' cha' ka Ndiose X'nan yu; ja siya' ndi'in cha' 'in yu kan' lo'o Ndiose, kan' cha' ndla ti tyii cha' 'in yu kwiñi kan'.
\v 2 Kwi' ngwaña'an, tukwa tyun ne' ta'aan cha' nu nchkwi' yu kwiñi kan'; lo'o ndiya ne' ta'aan nu ku'ni cha' chen ña'an lo'o ta'a ne' bra kan', sa ña'an cha' nu kwa'u yu kwiñi kan' 'in ne' cha' ku'ni ne'. Ja su'we ngwaña'an. Kan' cha' ka'an 'a cha' kuxi chkwi' nten 'ñaan bra kan', nten kichen nu ja siya' msñi cha' 'in Ndiose.
\v 3 Kwi' ngwaña'an, nxitukwi 'a ti' yu kwiñi kan' 'in nan nu nsu'wi 'wan; nchka 'a ti' yu tyijin lyo yu 'wan, kan' cha' sa ti chkwi' yu cha' kwiñi lo'o wan. Ndi'in cha' ta Ndiose nu ti'í 'in yu kwiñi kan', cha' wa s'ni ykwi' Ni cha' kuxi 'a ku'ni ne' ngwaña'an. Si'i nan laja' Ndiose; jlyo ti' Ni sa ña'an ngi'ni yu kwiñi kan', kan' cha' ku'ni tyii Ni 'in yu ndla ti.
\p
\v 4 Nu ngwa s'ni, ja y'ni Ni cha' tlyu ti' 'in angajle 'in Ni nu ja mslyaa tukwa tñan 'in Ni; msu'wa Ni 'in angajle kan' ya' kune' xa'an kan', ndyaa angajle kan' nde lo jwlyaa, nde se'en tla 'a siya' ti. Nde kwa, ndi'in nchkan' angajle kan' lo'o karenan, cha' kanun nde kwa sa ña'an bra tiya tsan cha' ku'ni biya' Ni 'in nchga nten chalyuu, lo'o 'in angajle kan'.
\v 5 Nchga nten chalyuu nu ngwa ti s'ni, nu ja mdukwa 'in Ndiose, ja y'ni Ni cha' tlyu ti' 'in ne' kan'; y'ni Ni cha' ngwi'ya tyoo tlyaa, sa ña'an nu wa ytsa' Ni 'in ne' kan' cha' ka. Wa ytsa' ayman Noé cha' 'in Ndiose 'in nchga nten, lo'o ja ynan ne' kan'. Ngujwi nchga ne' kan' bra kan'; ska ti Noé kan' lo'o ta'a kati nten 'in yu, ngulaa Ni 'in ne' kan', chun' nu ynan ne' kan' cha' nu ykwi' yu lo'o ne'.
\v 6 Ti kwi' ti cha', ngwa kuxi 'in ne' kichen Sodoma lo'o 'in ne' kichen Gomorra, cha' kuxi 'a y'ni ne' kan'; siya' ti y'ni tyii Ni ta'a tyukwaa kichen kan'. Xa wa mdyii mkin kichen kan', jii lo'o nsuwi' ti nganun se'en mdi'in kichen kan' nu ngwa xkan'. Ngwaña'an y'ni Ndiose nu ngwa bra kan', cha' ka biya' ti' nchga nten nu ndiya ti' ku'ni nchga lo cha' kuxi, ni siya ni ti, ni siya chun' ndi'in la, cha' ta Ni nu ti'í 'in ne' kan' bra nu wa tyii ti cha' 'in ne' kan' siya' ti.
\v 7 Ska ti ayman Lot, ngulaa Ni 'in yu cha' mdo'o yu kichen Sodoma kan'; kan' cha' ska ti yu kula Lot kan' ja ngujwi yu bra nu mdyii cha' 'in kichen Sodoma kan'. Nten su'we ngwa Lot; kan' cha' mda'an 'a cha' tiye yu, lye 'a ngwa xi'in ti' yu, cha' 'in nchga cha' chen ña'an, nchga cha' kuxi nu y'ni nchga nten kichen kan'.
\v 8 Su'we tiye Lot kan', nchga tsan lye 'a yuwe ti' yu cha' na'an yu nchga cha' kuxi kan'; ka'an 'a cha' mda'an tiye yu bra nu ynan yu cha' chen ña'an nu ykwi' nten kichen kan'.
\v 9 Ngwaña'an ka biya' tian' cha' nchka 'in X'naan kulaa 'in nten nu su'we kasiya 'in, cha' ja tyijin lyo cha' kuxi 'in ne' kan'. Kwi' ngwaña'an, jlyo ti' Ni ti ka lka nu ta Ni nu ti'í 'in bra nu ku'ni biya' Ni 'in nchga nten. Wa jlyo ti' Ni ti ka nu ndi'in cha' kuxi tiye.
\p
\v 10 Lo'o nten nu xkwi' cha' chen ña'an ngi'ni, lye la ta Ndiose nu ti'í 'in ne' kan', cha' ja ndukwa ne' kan' cha' nu nchkwi' nu nka ndloo 'in ne'; ja nduwe ti' ne' kan', cha' siye' 'a ne'. Ja ntsen ne' kan', ni siya chkwi' lyo'o ne' 'in angajle 'in Ndiose.
\v 11 Angajle kan', ngula la ti', nchka la 'in ke nten chalyuu; lo'o ja ykwi' angajle kan' cha' kuxi 'in nten chalyuu, ja mstya ki'ya 'in yu kwiñi kan' tloo X'naan.
\p
\v 12 Ña'an ti' 'ni nu nsu'wi ni' kixin' nu ja nduwe ti', ngwaña'an lka nten kwiñi kan', cha' xkwi' cha' chen ña'an nchkwi' ne' kan' 'in nchga cha' nu ja nchka biya' ti' ne'. Nxñian 'in 'ni tlá nu nsu'wi ni' kixin', ndujwian 'in i' bra kan'. Kwi' ngwaña'an ne' kwiñi kan', ngi'ni ñu'un ne' 'in nchga lo nan su'we ni siya ja nchka biya' ti' ne' cha' kan'. Lo'o tyii cha' 'in ne' kan' siya' ti nde loo la;
\v 13 tyijin ne' kan' nu ti'í sa ña'an nu ti'í nu nda ykwi' ne' 'in xka ta nten. Tsan lo'o tla ngi'ni ne' cha' kuxi kan', cha' ja nchka ndaja ti' ne' 'in cha' kuxi kan'; ja nchka jyu'u ti' ne' kan' siya' ti, ni siya kuxi 'a tñan nu ngi'ni ne'. Sa ña'an si chañi cha' ta'aan lka ne' kan', kwi' ngwaña'an su'wa ti ndyo' ti'in ne' kan' lo'o wan bra nu ngi'ni tnun wan ta'a.
\p
\v 14 Xkwi' cha' kuxi nda'an tiye ne' kwiñi kan' bra nu ña'an ne' 'in ska nu kuna'an, cha' ja tyii cha' xitukwi ti' ne' 'in nu kuna'an cha' ku'ni ne' cha' kuxi lo'o. Kwi' ngwaña'an, bra ti kwa'u ne' kan' cha' kuxi 'in xka ta nten nu ja ya ka biya' su'we ti' cha' 'in Jesucristo. Wa y'ni xa'an 'a ne' kwiñi kan' nchga lo cha' kuxi, kan' cha' lye 'a nxitukwi ti' ne' ska nan; lo'o ja ngala' ti' ne' kan' siya' ti. Wa lka ngulo Ndiose yuwe' 'in ne' kwiñi kan'.
\v 15 Wa mdo'o tsu' ne' kan' tuwiin nu tsaan se'en ndi'in Ndiose, lo'o xka tuwiin msñi ne' kan'. Kwi' ngwaña'an, mna' 'a kasiya 'in ne' kan', cha' ti kwi' tuwiin se'en mda'an ayman Balaam sñi' Beor nda'an ne' kan' ni. Balaam kan', lye 'a mxitukwi ti' yu 'in tñi, kan' cha' y'ni yu cha' kuxi, cha' kaja la tñi 'in yu, ngwa ti' yu.
\v 16 Cha' 'in Ndiose ykwi' Balaam kan' nu ngwa s'ni; kan' cha' y'ni Ni cha' ykwi' buru 'in yu lo'o yu kan', cha' xitsen i' 'in yu kan', cha' ja ku'ni 'a yu cha' kuxi kan'.
\p
\v 17 Ña'an ti' ska ni' chku tiyu nu wtyi siya' ti, se'en nu ja nsu'wi tyi'a, ngwaña'an lka ne' kan'. Ña'an ti' ska koo ngaten ti, nu nxnan 'a lo kwi'in ti, nu ja nda cha' ki'ya tyoo; nan nda'an ti ran ni' kwan, ngwaña'an lka ne' kan'. Yu kwiñi kan', ja ndi'in cha' su'we tiye ne' siya' ti, kan' cha' ndi'in cha' tsaa ne' kan' se'en tla 'a; nde kwa wa mñan Ndiose ska se'en nu kuxi 'a ña'an, se'en tsaa ne' nu ngi'ni ngwaña'an.
\v 18 Jlyo 'a ti' ne' kwiñi kan' cha' chkwi' lo'o nten sa ña'an ka kwiñi lyo'o ne' kan' 'in nten nu tka msñi ti cha' su'we 'in Jesucristo. Nchka 'a ti' ne' kwiñi kan' cha' lo'o nten kan' ku'ni cha' chen ña'an. Sa ña'an y'ni ne' cha' kuxi ti kulo, bra nu ja ya kunan ne' cha' su'we 'in Ndiose, kwi' ngwaña'an nchka ti' ne' kwiñi kan' ku'ni ne' xiya'.
\v 19 Nchkwi' ne' kwiñi kan' lo'o xka ta nten cha' ja ndi'in cha' tukwa ne' nchga tñan nu ngulo Ndiose 'in nten, cha' wa mdo'o laa ne' 'in cha' kan', ndukwin ne' kwiñi kan'; lo'o ja ya ka biya' ti' ne' kwiñi kan', cha' ykwi' ne' lka ne' msu 'in ya ña'an ti cha' kuxi nu ngi'ni ne'. Nchga nten nu ta chabiya' 'in ska cha' kuxi cha' tyijin lyo 'in, wa nda ne' chabiya' 'in cha' kuxi kan' cha' ka x'nan ne' bra kan'.
\v 20 Kuxi la ka 'in nten nu wa ngulaa ya' 'in cha' kuxi ska ya', lo'o bra kan' ta ne' chabiya' 'in cha' kuxi cha' tyijin lyo 'in ne' xiya'; wa mdo'o laa ne' kan' 'in nchga cha' kuxi nu nsu'wi lo chalyuu nu ngwa s'ni la, ngi'ni xa'an ne' cha' 'in Jesucristo nu nka X'naan, ti kwi' Ni nu wa ngulaa 'ñaan 'in cha' kuxi.
\v 21 Su'we la si ja y'ni xa'an ne' siya' ti tuwiin nu ñi se'en tsaan nde se'en ndi'in Ndiose; ja su'we cha' ngwa biya' ti' ne' cha' kan', lo'o bra ti mdo'o tsu' ne' tuwiin nu ñi kan'. Ja ndukwa 'a ne' kan' cha' nu wa ykwi' Krixtu lo'oan bra kan'.
\v 22 Bra nu ña'aan 'in nten nu wa ngulaa ya' cha' 'in Krixtu, bra kan' ka biya' tian' cha' nu ñi 'a ndyo'o cha' re: “Ska xne' nu ndukwen nan yku i', bra ti tsaa i' ku i' nan nu wa ykwen i' xiya'. Kwi' ngwaña'an ska kuwe' tye' ni, bra wa yta i' chku, bra ti tsaa sti i' lo yuu kutsuu' xiya'.” 
\c 3
\s Nde ña'an ka bra nu tyaan X'naan xiya'
\p
\v 1 'Wan ta'a su'we nsu'wian, wa ngwa'aǎn xka kityi ndyaa se'en ndi'in wan ti ngwa xkan' la. Ni nda'aǎn kityi re, cha' ka tyaa yu'wi ti' wan nchga cha' 'in Krixtu lo'o ta'a tyukwaa kityi, cha' ngwaña'an ka tya'an su'we cha' tiye wan nchga bra.
\v 2 Ndi'in cha' ta'a ti tyaa yu'wi ti' wan cha' 'in Ndiose nu wa ykwi' ne' lo'o nten nu ngwa s'ni, lo'o nchga cha' nu wa ykwi' ti kwi' X'naan nu ngulaa 'ñaan. Wa ngulo suwi Ni 'wa cha' kwa'u ba cha' 'in Ndiose 'wan, kan' cha' su'we si tukwa wan nchga cha' nu wa ynan wan bra nu ngwa'u ba 'wan.
\p
\v 3 Ti kulo ndi'in cha' ka biya' ti' wan cha' xa wa tiya tsan nu tyii chalyuu, bra kan' tyo'o tukwa nten nu xtyi lyo'o 'a 'in cha' 'in Ndiose. Ku'ni ne' kan' nchga cha' kuxi nu ndiya ti' ne' ku'ni ne', ti ykwi' ti ne'.
\v 4 Bra kan' nde ña'an nchkwin ne' kan' 'wan: “¿Ña'an bra kan Krixtu sikwa a? ¿Ni cha' ti ndi'in taa 'a wan 'in yu cha' tyaan yu a? Wa mdijin 'a bra kan', cha' wa ngujwi nchga ne' kula 'ñaan, lo'o ngwaña'an, wa kulaan 'aan ni. Ña'an ti ndi'in chalyuu re, sa ña'an nu ndi'in ran ti bra mdyisnan ran ti kulo.”
\v 5 Ngwaña'an nchkwin ne' kwiñi kan', cha' ja nchka ti' ne' tyaa yu'wi ti' ne' tñan nu wa y'ni Ndiose. Nu ngwa ti kulo ja mdi'in chalyuu siya' ti, bra kan' kwi' Ndiose ykwi' ska cha', lo'o bra ti ngwiñan Ni nchga nan nu nsu'wi nde ni' kwan. Lo'o tyi'a ti ngwiñan Ni tyukwi ña'aan chalyuu, kwi' ngwaña'an jlu'we la lo tyi'a mdo'o yuu wtyi lo chalyuu ti kulo.
\v 6 Chun' ndi'in la, kwi' lo'o tyi'a ti y'ni tyii Ni chalyuu kan' bra nu ngwi'ya tyoo tlyaa.
\v 7 Bra kan' xiya' ngulo Ndiose tñan cha' ña'an ti kanun nchga nan nu nsu'wi nde ni' kwan, ña'an ti kanun nchga lo nan nu nsu'wi lo chalyuu, xa wa tiya tsan nu ku'ni biya' Ni 'in nchga nan lo'o kii'. Bra kan' tyii nchga nan kan' skin ran, kwi' ngwaña'an tyii cha' 'in nchga nten nu ja ndi'in cha' 'in lo'o Ndiose.
\p
\v 8 'Wan ta'a su'we nsu'wian, su'we la si kuwe ti' wan cha' ña'an ti' ska tsan ti, ngwaña'an lka ska mi yijan cha' 'in Ndiose; lo'o ndiya ya' ña'an ti' ska mi yijan, kwi' ngwaña'an lka ska tsan cha' 'in Ni.
\v 9 Si'i nan tiya' 'a ti' Ndiose cha' ku'ni Ni tñan nu ndukwin Ni cha' ku'ni Ni nu ndyaa nde loo la; lka cha' ndi'in ta 'a Ni 'ñaan nten chalyuu, cha' ja nchka ti' Ni cha' tna' Ni ni siya ska ti nten. Nchka la ti' Ni cha' ka biya' ti' nchga nten cha' ndi'in cha' kuxi 'in ne'; lo'o bra kan' ka jyu'u ti' ne' 'in cha' kuxi kan', kulaa ya' ne' cha' kuxi kan' bra kan'. Ngwaña'an ka 'in ne', nchka ti' Ndiose.
\p
\v 10 Chañi cha' tiya ska tsan bra nu tyaan X'naan xiya', ni siya ja jlyo tian' ni tsan ka kan'. Sa ña'an lka si kan ska nu ku'ni kunan na'an tyian bra nu ja ndii tian', ngwaña'an ka tsan kan'. Ngwa ti ña'an katin nchga nan nu nsu'wi ni' kwan, lye 'a kanen cha' kan', tyii nchga nan kan' skin ran ska ya' ti. Ngwaña'an tyukwi ña'aan chalyuu ni, tyii ran siya' ti bra kan'.
\v 11 Tyii nchga nan bra nu tiya tsan kan', kan' cha' 'wan ni, ¿ni sa ña'an tyi'in wan lo chalyuu sikwa? Ndi'in cha' ka wan nten nu luwi kasiya 'in, cha' ka wan nten nu ngwa su'we kasiya 'wan cha' 'in Ndiose.
\v 12 Kwi' ngwaña'an ndi'in cha' ka wan, laja nu ti ji tiya tsan nu tyaan Ndiose, cha' ngwaña'an ka 'wan taya' wan 'in Ndiose lo'o tñan 'in Ni lo chalyuu re. Tsan kan' skin tyukwi ña'aan ni' kwan, kwi' ngwaña'an tyii nchga nan nu nsu'wi ni' kwan kalaa ran lo kii' tnun kan'; tyii nchga cha' siya' ti bra kan'. Lo'o kwii kulasiin, lo'o kwichaa, lo'o ko', lo'o nchga nan, tyii ran kalaa ran.
\v 13 Xiya' kwiñan Ni xka chalyuu kwi, kwi' ngwaña'an xiya' kwiñan Ni nchga lo nan nu nsu'wi ni' kwan; kwiñan Ni ska chalyuu nu su'we 'a, se'en xkwi' su'we ti ku'ni ne' lo'o ta'a ne' bra kan'. Ngwaña'an ndukwin Ni cha' ka; lo'o jlyo tian' cha' ngwaña'an ka kan', cha' xkwi' cha' nu ñi nchkwi' Ndiose. Kan' cha' ndi'in taan 'in Ni ña'an bra ka cha' kan' sikwa.
\p
\v 14 'Wan ta'a su'we nsu'wian, ndi'in ta wan 'in cha' kan', kan' cha' ndi'in cha' ku'ni wan xkwi' cha' su'we ti, xkwi' cha' luwi ti lo'o ta'a nten wan, cha' tiin ti tyi'in ni' kasiya 'wan bra nu ña'an Ndiose 'wan.
\v 15 Tyu'wi ti' wan cha' ndalo 'a Ndiose 'ñaan, wa nda 'a Ni tyempu 'ñaan cha' tyo'o laan 'in cha' kuxi. Kwi' ngwaña'an Palyu ta'aan ni, ti kwi' ta'a cha' ngwa'an yu lo kityi; ta'a su'we nsu'wian lka yu kan', lo'o su'we 'a nchkwi' kityi nu ngwa'an yu ngala se'en ndi'in wan. Ndiose lka nu ngwa'u 'in yu nchga cha' su'we nu ngwa'an yu lo kityi kan'.
\v 16 Tyun kityi ngwa'an Palyu kan', ska ti biya' nchkwi' ta'a kityi kan', cha' 'in Ndiose nu nchkwian' ni. Ndiya chin' cha' nu ngwa'an Palyu kan' nu tukwi chin' cha' ka biya' su'we tian' 'in ran; kwi' ngwaña'an, ndiya nten nu lye 'a ndu'u cha' kwiñi lo'o kityi kan', cha' ja nchka biya' ti' ne' kan' cha' kan' siya' ti. Ja y'ni xa'an su'we ne' kan', cha' ja ya ka biya' su'we ti' ne' cha' kan'; kan' cha' ja ska kityi 'in Ndiose ndu'u ñi ne' kan' 'in ran. Kan' cha' tyii cha' 'in ne' kan' siya' ti si'ya cha' kwiñi nu ndu'u ne' 'in ta'a nten ne'.
\p
\v 17 'Wan ta'a su'we nsu'wian ni, wa ngwa'aǎn nchga cha' re cha' ndii ti ti' wan, cha' ja ta wan chabiya' 'in ne' kwiñi kan' cha' kwa'u ne' xka cha' 'wan. Chañi lka cha' nu y'ni xa'an wan ti kulo, lo'o ni, ja su'we si tukwa wan cha' kwiñi nu ndu'u ne' kan'; ja su'we kulaa ya' wan 'in cha' nu ñi 'in Jesús bra kan'.
\v 18 Su'we la si ku'ni xa'an la wan cha' su'we 'in Jesucristo nu nka X'naan, nu wa ngulaa 'ñaan; bra kan' ka tyi'in su'we la ni' kasiya 'wan cha' 'in X'naan. ¡Ku'niin tnuan 'in Ndiose lo chalyuu, lo'o ngwaña'an, ja tsaa tii 'a tsan nu ku'niin tnuan 'in Ni nde se'en ndi'in Ni! Ngwaña'an ka sikwa.