\id COL
\h Colosenses
\toc1 Colosenses
\toc2 Col
\mt Colosenses
\ip Mamabu̶inore coyu̶iyebu Pablo bácu̶ ũ̶i toivaicõjeiye
báquede paperayocare Colosas ãmicu̶riĩmarocavu̶ Jesúre ju̶
aipõevare. Pablo bácu̶ judíovacacu̶ bácu̶vacari, Jesús ũ̶i
yávaiye méne beorĩ coyu̶icõjeimu̶ marejaquémavu̶, coyu̶cu̶yu̶
ũ̶i yávaiye méne judíova ãmevu̶re, judíova ne ju̶ abe boje
ũ̶i coyu̶iyede. Lucas bácu̶ coyu̶rejaquemavu̶ Pablo bácu̶i borore
Hch 7:57-8:1, 9:1-31, 13:1-28:31. Ʉbenita Pablo bácu̶ aipiyede
nu̶mecu̶vacari Colosas ãmicu̶riĩmaroi, toivaicõjeiyu̶rejaquemavu̶
ṹ̶re toivacaipõecu̶ bácu̶re náre, ũ̶i u̶e boje náre (2:1-5)
aru Épafras bácu̶i coyu̶iye báque boje Pablo bácu̶re Colosacavu̶
ne borore (1:7-8). Javede toivaicõjenejaquemavu̶ pu̶cayoca ũ̶i
paperayocare Tesalónica ãmicu̶riĩmarocavu̶re, aru pu̶cayoca ũ̶i
paperayocare Corinto ãmicu̶riĩmarocavu̶re, ũ̶i paperayocare
Galacia ãmicu̶rijoborõcavu̶re, aru ũ̶i paperayocare Roma
ãmicu̶riĩmarocavu̶re máre. Apevu̶ ne dápiaiyepe, javede
toivaicõjenejaquemavu̶ ũ̶i paperayocare Filipos
ãmicu̶riĩmarocavu̶re. Toivaicõjenejaquemavu̶ yóbecu̶riyoca ũ̶i
paperayocare ãniu̶ju̶ bácarõre 60 d.C., ũ̶i cu̶ede ãmeina
teivu̶re jẽni jacoiñami Roma ãmicu̶riĩmaroi, cũináyocare
Éfeso ãmicu̶riĩmarocavu̶re, apeyocare Colosas
ãmicu̶riĩmarocavu̶re, aru apeyocare Filemón mácu̶re. Tíquico
bácu̶ nu̶varejaquemavu̶ iyoca yóbecu̶riyocare cũinátu̶ru̶ ũ̶i
nu̶iyede Roma ãmicu̶riĩmarore pu̶ Asia ãmicu̶rijoborõi. Pablo
bácu̶ coyu̶rejaquemavu̶ ṹ̶re toivacaipõecu̶ bácu̶re aipe ũ̶i
toivacaquiye báquede diyocare.
\ip Diyocaque Pablo bácu̶ d̶aicõjenejaquemavu̶ Jesúre ju̶
aipõevare yópe náre jau̶éde ne cu̶e boje Jesucristoque
cũinávu̶pe (3:1-4:6). Coyu̶rejaquemavu̶ náre Cristorã, caiyede
cu̶ed̶ayu̶ bácu̶re aru cu̶re d̶ayu̶re máre, que baru paru̶cu̶re
caivu̶ pu̶eno (1:15-23) aru cũinácu̶ra mead̶aiye majicu̶re ṹ̶re
ju̶ aivu̶re d̶abevu̶va yópe bueipõeva borocu̶rivu̶ ne
d̶aicõjeniduiyepe (2:6-23).
\ie
\c 1
\s Pablo ũ̶i meaicõjeino Colosacavu̶re
\p
\v 1-2 Yu̶, Pablo, aru majecu̶ Timoteo máre ũ̶i ju̶ aiye boje
Jesucristore meaicõjeivu̶bu mu̶jare, Colosas ãmicu̶riĩmarocavu̶
Jũ̶menijicu̶i põevare. Yú̶bu Jesucristoi yávaiye méne beorĩ
coyu̶icõjeimaracacu̶. Yu̶ toivaicõjeivu̶ apecu̶re iyoca
paperayocare mu̶jare, ñu̶jevu̶re, Jesucristore ju̶ aivu̶re, ũ̶i
u̶rõpe d̶aivu̶re, aru cu̶rivu̶re ṹ̶que dajocabevu̶va
cũinávu̶pe. Majepacu̶ Jũ̶menijicu̶, mearo d̶acajacu̶rĩ mu̶jare
bojecu̶beda ũ̶i me boje. Aru toroju̶rĩ cu̶re d̶ajacu̶rĩ mu̶jare
cãrijimevu̶va.
\s Pablo ũ̶i jẽniaino Jũ̶menijicu̶que Jesúre ju̶ aipõevare
\r (Ef 1.7, 6.12; Col 4.12; Flm 23)
\p
\v 3 Toroju̶ede jívu̶bu ñu̶ja Jũ̶menijicu̶re, ñai maje jabocu̶
Jesucristoi pacu̶re, cainu̶mu̶a ñu̶je jẽniaiye coapa
Jũ̶menijicu̶que mu̶jare boje.
\v 4 Jápiaivu̶bu ñu̶ja mu̶je ju̶ aiyede Jesucristore aru u̶rivu̶re
máre caivu̶ ina Jũ̶menijicu̶i põevare. Que baru toroju̶ede
jívu̶bu Jũ̶menijicu̶re mu̶jare boje.
\v 5 Javede mu̶ja jápiarejaquemavu̶ iye yávaiyede jãvene, Jesús
ũ̶i yávaiye méne. Mu̶je jápiaiyede diede, jápiarejaquemavu̶ iye
borore Jũ̶menijicu̶i mearo d̶acaquiyede mu̶jare cavarõ mearo ũ̶i
cu̶rõi. Mu̶je napini coreiye boje iye Jũ̶menijicu̶i mearo
d̶acaquiyede mu̶jare, mu̶ja ju̶ aivu̶bu Jesucristore aru u̶rivu̶bu
caivu̶ ina Jũ̶menijicu̶i põevare.
\v 6 Yópe mu̶je jápiaiyepe iye Jesús ũ̶i yávaiye méne,
nopedeca obedivu̶ põeva apenoa joborõacavu̶ máre jápiad̶ama
diede. Que baru caijãravu̶a apevu̶ põeva ju̶ ad̶ama diede. Aru
pu̶eno baju mearo d̶ad̶ama, ne ju̶ aiye boje diede. Aru quédeca
vaidéjaquemavu̶ mu̶jare. Mamaru̶mu̶re mu̶je jápiaiyede iye Jesús
ũ̶i yávaiyede jãvene pu̶ caride máre, coreóvaivu̶bu mu̶ja jãve
Jũ̶menijicu̶ mearo d̶acayu̶re bojecu̶beda, ũ̶i pu̶eno meacu̶ baju
boje. Que baru caijãravu̶a apevu̶ mu̶jacavu̶ ju̶ ad̶ama diede.
\v 7 Diede bueibi ñu̶je u̶mu̶ Épafras. Ñai Épafrarecabe, memecayu̶
Jesucristore ñu̶jaque, coreóvare d̶ayu̶ bácu̶ mu̶jare iye
Jũ̶menijicu̶i mearo d̶acaiyede põevare bojecu̶beda. Que teni
cad̶ateyu̶ ñu̶jare memecaibi Jesucristore.
\v 8 Ʉ̃ coyu̶ibi ñu̶jare aipe ñai Espíritu Santo u̶re d̶ayu̶re
mu̶jare caivu̶ Jũ̶menijicu̶i põevare.
\p
\v 9 Que baru ñu̶je jápiaiye boje mu̶je borore, coyu̶ivu̶bu
mu̶jare Jũ̶menijicu̶que máre. Ñu̶je jápiaiyede mu̶je borore
coyu̶rĩ bú̶carã mu̶jare Jũ̶menijicu̶que. Aru caride máre
coyu̶re nu̶ivu̶bu mu̶jare Jũ̶menijicu̶que. Jẽniaivu̶bu ṹ̶que
ũ̶i coreóvare d̶aiyede mu̶jare jãve caino yo ũ̶i u̶rõre, mu̶je
d̶arãjiyepe aivu̶ yópe ũ̶i u̶rõpe. Que baru jẽniaivu̶bu
Jũ̶menijicu̶que, mu̶je cu̶varãjiyepe aivu̶ majié caiyede aru
coreóvaiye méne mu̶je ũmeque.
\v 10 Jẽniaivu̶bu diede, mu̶je d̶arãjiyepe aivu̶ yópe ina
Jũ̶menijicu̶ jina ne d̶aiyepe, Jũ̶menijicu̶i toroju̶quiyepe aivu̶
mu̶jaque cainu̶mu̶a. Pu̶eno baju jẽniaivu̶bu Jũ̶menijicu̶que mu̶je
mearo d̶arãjiyepe aivu̶ yópe ũ̶i u̶rõpe aru mu̶je
coreóvarãnu̶rajiyepe aivu̶ Jũ̶menijicu̶re pu̶eno baju
caijãravu̶a.
\v 11 Aru pu̶eno baju jẽniaivu̶bu Jũ̶menijicu̶que, ũ̶i paru̶re
d̶aquiyepe aivu̶ mu̶jare mu̶je ũmei ũ̶i majié pu̶eno baju
paru̶éque ũ̶i jã́d̶ovaiyede põevare, mu̶je napinajiyepe aivu̶
mu̶je ñájinajiyede cainu̶mu̶a toroju̶rivu̶ mu̶je ũmei.
\v 12 Aru pu̶eno baju jẽniaivu̶bu Jũ̶menijicu̶que, mu̶je
toroju̶ede jínajiyepe aivu̶ majepacu̶ Jũ̶menijicu̶re, ũ̶i cu̶vare
d̶aiye boje mu̶jare iye mu̶je cu̶varõ coapa, ũ̶i mearo
d̶acaquiyede ũ̶i põevare cavarõ mearo ũ̶i cu̶rõ miad̶ároi.
\s Maje cu̶e cãrijimevu̶va Jũ̶menijicu̶que Jesúi yaiye báque
boje
\r (Jn 1.1-3.18; Hch 26.23; Ef 1.22-23, 2.16, 4.15, 6.12; He 1.2-3;
Ap 1.5)
\p
\v 13 Jũ̶menijicu̶ mead̶aibi majare ñai abujuvai jabocu̶i
jaboteino ñeminore jocarĩ. Que baru epeibi majare maje jabocu̶va
mamacu̶re, ũ̶i u̶mu̶re.
\v 14 Ñai mamacu̶re bojed̶are d̶aibi majare, ũ̶ jina marajiyépe
ayu̶. Que baru ãru̶meteibi maje ãmeina teiyede.
\v 15 Ñai mamacu̶ cũinátu̶ru̶be jípacu̶ Jũ̶menijicu̶que. Aru
põeva jã́ri bu̶ojarejaquemavu̶ Jesucristore. Ʉbenita jã́ri
bu̶ojabenama Jũ̶menijicu̶re. Ñai mamacu̶ paru̶cu̶ caivu̶ pu̶eno
cu̶rejaquemavu̶ jípacu̶que caiyede cu̶ed̶aquiye jipocare.
\v 16 Ʉ̃́recabe Jũ̶menijicu̶i caiyede cu̶ed̶are d̶aimu̶ mácu̶.
Ʉ̃́recabe cu̶ed̶ayu̶ bácu̶ caijĩene cavarõ mearo ũ̶i
cu̶rõquede, aru joborõquede máre, aru caijĩene maje jã́iyede
aru maje jã́mene máre. Que baru cu̶ed̶arejaquemavu̶ caivu̶ ina
jabovare, aru pu̶ru̶cu̶varivu̶re, cõjeivu̶re, aru paru̶rivu̶re
máre cavarõ mearo ũ̶i cu̶rõcavu̶re. Que teni Jũ̶menijicu̶
ṹ̶re cu̶ed̶are d̶arejaquemavu̶ caiyede. Aru cu̶ed̶are
d̶acarejaquemavu̶ caiyede ṹ̶re boje, ñai mamacu̶ caivu̶ ne
mearore jímu̶ maquiyépe ayu̶.
\v 17 Cristorecabe caivu̶ ne jipocacacu̶. Ʉ̃́recabe cu̶cu̶ caiyede
cu̶ed̶aquiye jipocare. Aru ṹ̶recabe Jũ̶menijicu̶i caiyede mautede
d̶are d̶aimu̶, caiye cu̶quiyepe ayu̶ me.
\v 18 Maja ṹ̶re ju̶ aivu̶ caiyajuboa põeyajuboacavu̶ ũ̶i bajupe
paivu̶bu. Aru ṹ̶vacari, maje jipobu̶pe páyu̶, maje jabocu̶be,
majare d̶aicõjeñu̶. Ʉ̃́recabe cu̶re d̶ayu̶ jãve caivu̶ ina
ṹ̶re ju̶ aivu̶re ne bajure aru ne ũmene máre, ũ̶i nacajaiye
báque boje yainore jaru̶varĩ caivu̶ jipocai, jabotecu̶yu̶ paru̶cu̶
caivu̶ apevu̶ pu̶eno cainu̶mu̶a.
\p
\v 19 Jũ̶menijicu̶vacari beorejaquemavu̶ cu̶cu̶re mamacu̶que yópe
ũ̶i baju u̶rõpe. Que baru Cristorecabe jã́d̶ovañu̶ jãve aipe
ãrojacu̶re jípacu̶ Jũ̶menijicu̶re. Aru Jũ̶menijicu̶pe páyu̶
matu̶iye coju̶vu̶ jípacu̶re.
\v 20 Jũ̶menijicu̶ cãrijimene d̶aiyu̶rejaquemavu̶ caivu̶re
ṹ̶que. Aru ména cu̶re d̶aiyu̶rejaquemavu̶ caiyede máre.
D̶aiyu̶rejaquemavu̶ diede mamacu̶que, caivu̶ ne mearore jímu̶
maquiyépe ayu̶. Que baru mamacu̶i jive meiye báque boje ũ̶i yaiye
báquede jocu̶cu̶jaravena, Jũ̶menijicu̶ cãrijimene d̶arejaquemavu̶
caivu̶re ṹ̶que, caivu̶ ijãravu̶cavu̶re aru caivu̶ cavarõ
mearocavu̶re máre. Aru caiye ijãravu̶quede aru caiye cavarõ
mearoquede máre ména cu̶re d̶arejaquemavu̶ Jũ̶menijicu̶.
\p
\v 21 Aru mu̶jacapũravu̶ javede ãmeina dápiaivu̶ barejaquémavu̶
aru ãmenore d̶aivu̶ barejaquémavu̶. Que baru Jũ̶menijicu̶re
coreóvabevu̶va maucu̶varivu̶ barejaquémavu̶ mu̶ja.
\v 22 Ʉbenita caride Jũ̶menijicu̶ cãrijimene d̶arĩ yóvare
d̶aibi mu̶jare ṹ̶que. Nópe d̶arejaquemavu̶ mamacu̶i yaiye
báquede ũ̶i baju. Nópe d̶acarejaquemavu̶ mu̶jare, d̶acu̶yu̶ meara
yópe ũ̶i u̶rõpe, ye ãmeno cu̶bequino mu̶jare, aru põeva ne boro
coyu̶rĩ ad̶arĩ bu̶ojabenajino mu̶je borore, ũ̶i ecovaquiyede
mu̶jare ũ̶i yebai.
\v 23 Nópe vaiquíyebu mu̶je d̶aiye boje yópe d̶aiye jau̶épe.
Jau̶vu̶ mu̶jare mu̶je ju̶ are nu̶iye Jesús ũ̶i yávaiye méne,
“¿Jãve márica?” arĩ dápiabevu̶va. Aru jau̶vu̶ mu̶jare mu̶je
napini corede nu̶iye maje cu̶rãjiyede Jũ̶menijicu̶que cainu̶mu̶a
yópe mu̶je napini coreni bu̶iye báquepe mu̶je mamaru̶mu̶
jápiaiyede iye Jesús ũ̶i yávaiye méne. Iye yávaiye méne
obedivu̶ põeva cainoa joborõacavu̶ jápiad̶ama. Aru yú̶vacari,
Pablo, Jũ̶menijicu̶re memecayu̶, coyu̶yu̶bu diede.
\s Pablo Jesús ũ̶i memecaicõjeimu̶ ṹ̶re ju̶ aipõevare
\r (Ef 3.2; Ap 3.14-22)
\p
\v 24 Caride toroju̶vu̶ yu̶ ji ũmei ji ñájiyede mu̶jare boje. Que
teni bu̶ojaivu̶ yu̶ ji ñájiquiye jau̶rõre yu̶re ji baju,
cad̶atecu̶yu̶ ina caiyajuboa põeyajuboacavu̶ Jesúre ju̶ aivu̶re.
Ji ñájiyebu yópe Cristoi ñájiye báquepe ina caiyajuboacavu̶
ṹ̶re ju̶ aivu̶re boje. Jesucristoi bajupe paivu̶bu na.
\v 25 Yu̶recabu Jũ̶menijicu̶i epeimu̶, corecu̶yu̶ aru cad̶atecu̶yu̶
mu̶jare. Que baru memecayu̶recabu ina caiyajuboa põeyajuboacavu̶
Jesúre ju̶ aivu̶re, coreóvare d̶acu̶yu̶ mu̶jare caiye iye
Jũ̶menijicu̶i yávaiye méne.
\v 26 Javede Jũ̶menijicu̶ jã́d̶ovamenejaquemavu̶ iye yávaiye
méne, caivu̶ ina põeva javecavu̶ bácavu̶ ne majibenajiyepe ayu̶.
Ʉbenita caride jã́d̶ovaimi diede ũ̶i põevare, ne majinajiyepe
ayu̶.
\v 27 Jũ̶menijicu̶ u̶bi mu̶je majinajiyepe ayu̶ mu̶ja judíova
ãmevu̶ ũ̶i pu̶eno baju mearo d̶acaimara márajivu̶re u̶rarõ ũ̶i
pu̶eno baju mearo d̶aiyeque. Que baru jã́d̶ovaimi diede. Iyebu
yávaiye jã́d̶ovame máque põevare jipocamia: Cristo cu̶bi
cũinávu̶pe majaque. Que baru toroju̶rĩ maje ũmei napini
coreivu̶bu maja yo mearo maje cu̶varãjinore cavarõ mearo
Jũ̶menijicu̶i cu̶rõi.
\p
\v 28 Que baru ñu̶ja coyu̶ivu̶bu Cristoi borore caivu̶re.
Coyu̶ivu̶bu caivu̶re paru̶rõreca aipe d̶aiye jau̶rõre náre. Aru
caivu̶re majicaivu̶bu ũ̶i majiéque. Nópe d̶acaivu̶bu ñu̶ja caivu̶
cu̶rivu̶re Jesucristoque cũinávu̶pe, ne cu̶rãjiyepe aivu̶ meara
baju jau̶beda yópe Jũ̶menijicu̶i u̶rõpe, ñu̶je eare darãjiyepe
aivu̶ náre Jũ̶menijicu̶ yebai.
\v 29 Que baru yu̶ pu̶eno baju memeñu̶mu pu̶ u̶etu̶yu̶vacari. Que
d̶are d̶aibi yu̶re Cristo ũ̶i majié paru̶éque.
\c 2
\p
\v 1 Coreóvare d̶aiyu̶vu̶ mu̶jare pu̶eno baju ji memeiyede pu̶
u̶etu̶yu̶vacari, cad̶atecu̶yu̶ mu̶jare aru ina Jesúre ju̶ aivu̶
Laodicea ãmicu̶riĩmarocavu̶re, aru apevu̶ Jesúre ju̶ aivu̶re
máre, yu̶re jã́mevu̶ bácavu̶re.
\v 2 Yópe memeivu̶, paru̶re d̶acu̶yu̶ caivu̶ mu̶jare mu̶je ũmei,
mu̶je cu̶e boje cũinávu̶pe mu̶je u̶ede mu̶je bajumia. Aru yópe
memeivu̶, mu̶je jápiarĩ coreóvarãjiyepe ayu̶ jãve caiye iye
Jũ̶menijicu̶i majiéde ũ̶i mead̶aiyede mu̶jare. Que teni jãve
coreóvarãjaramu mu̶ja Cristoi borore. Ʉ̃́recabe Jũ̶menijicu̶i
jã́d̶ovamemu̶ mácu̶ cãreja javede.
\v 3 Cristo cũinácu̶rabe majicu̶ pu̶eno baju caiye iye põeva ne
majibede aru ne coreóvabede máre. Majibi caiyede. Aru ũ̶i
majiébu pu̶eno baju me, yópe põecu̶i bojecu̶ede yaveiyepe paiye.
\v 4 Caiye diede toivaicõjeivu̶ apecu̶re mu̶jare, apevu̶ ne
ju̶jovabenajiyepe ayu̶ mu̶jare borocu̶eque.
\v 5 Ji cu̶edeca joai mu̶jare jocarĩ ãru̶vu̶ yu̶ mu̶jare
cainu̶mu̶a. Coreóvaivu̶ yu̶ mu̶jare cu̶rivu̶re Jesucristoque
cũinávu̶pe aru ju̶ aivu̶re ṹ̶re paru̶rõreca. Que baru toroju̶vu̶
yu̶ ji ũmei.
\s Apu̶é mamae jau̶rõ majare, Jesúre ju̶ aipõevare
\r (Ro 6.4; Gá 4.3, 9; Ef 2.1-5, 15)
\p
\v 6 Mu̶je ju̶ aiye báque boje iye maje jabocu̶ Jesucristoi
yávaiyede, d̶ajarã mu̶ja cainu̶mu̶a yópe ne d̶aiye jau̶rõpe ina
cu̶rivu̶ Jesucristoque cũinávu̶pe.
\v 7 Que teni ju̶ are nu̶jara Jesucristore, aru d̶are nu̶jara yópe
ñu̶je bueiyepe mu̶jare ũ̶i yávaiye méne mamaru̶mu̶re.
Caijãravu̶a pu̶eno baju d̶are nu̶jara yópe ũ̶i u̶rõpe. Aru,
“Jesucristoi yávaiye me jãvetamu”, are nu̶jara. Nopedeca
buedejaquemavu̶ mu̶jare mamaru̶mu̶re. Aru pare toroju̶ede jíde
nu̶jara majepacu̶ Jũ̶menijicu̶re cainu̶mu̶a.
\p
\v 8 Me jã́jara mu̶ja. Mu̶je bajumia apevu̶re ju̶jovaicõjemejara
ne bueiye bojecu̶beque aru borocu̶eque máre, ne d̶abenajiyepe aivu̶
mu̶jare ne bueimarare. Iye ne bueiye põeva néñecuva mácavu̶ ne
d̶arĩ cõmajiyebu. Iye ne bueiye põeva ne majiébu. Aru iye ne
bueiyedecabu Cristoi yávaiyede, “Jãve ãmevu̶” aiye. Que baru
jãve ãmevu̶ aru bojecu̶bevu̶ iye ne bueiye.
\p
\v 9 Jũ̶menijicu̶vacari cu̶bi Cristoque. Ʉ̃i bajurecabe ã́ri
Jũ̶menijicu̶ cu̶cu̶ jã́d̶ovañu̶ jãve aipe ãrojacu̶re. Que baru
maje jã́iyede Cristore, majivu̶ aipe ãrojacu̶ bajure
Jũ̶menijicu̶re.
\v 10 Jũ̶menijicu̶ jãve cu̶re d̶aibi mu̶jare mu̶je ũmei, mu̶je
cu̶e boje cũinávu̶pe Cristoque, ñai jaboteyu̶ caivu̶ jabovare aru
cõjeivu̶re máre. Que baru ye jau̶bevu̶ mu̶jare mu̶je ũmei.
\v 11 Yópe ũ̶mu̶va ne buraicõjeiyepe ne cajede, ãru̶rajivu̶ ne
baju Jũ̶menijicu̶ jinava, nopedeca Cristo d̶aibi mu̶jare
Jũ̶menijicu̶ jinare, mu̶je cu̶e boje ṹ̶que cũinávu̶pe. Ʉbenita
ũ̶ burarĩ ĩni jaru̶vabebi mu̶je cajede. Quénora d̶aiyu̶bede
d̶aibi mu̶jare ãmeina teiyede, mu̶je ãmeina teiye d̶aiyu̶e
cõjeimara ãmenajiyepe ayu̶.
\p
\v 12 Mu̶je jã́d̶ovaiye báquede Jũ̶menijicu̶re ocoque yaivu̶
bácavu̶pe tedejaquemavu̶ mu̶ja Cristoque, aru ne põe jaru̶vainoi
epeiye báquepe mu̶jare ṹ̶que, aru Jũ̶menijicu̶i nacovaiye
báquepe mu̶jare ṹ̶que máre yainore jaru̶varĩ. Que
d̶acarejaquemavu̶ Jũ̶menijicu̶ mu̶jare ũ̶i majié paru̶éque mu̶je
ju̶ aiyede ṹ̶re, “Jãve Jũ̶menijicu̶ nacovarejaquemavu̶ Cristore
yainore jaru̶varĩ”, mu̶je aiyede.
\v 13 Mu̶ja yaivu̶ bácavu̶pe mu̶je ũme coatede d̶aimara
marejaquémavu̶ Jũ̶menijicu̶re jaru̶varĩ, mu̶je vainí tu̶iye boje
aru mu̶je d̶aicõjeiye boje mu̶je ãmeina d̶aiyu̶eque. Dinu̶mu̶re
Cristo epebedejaquemavu̶ mu̶jare cãreja Jũ̶menijicu̶ jinava.
Ʉbenita caride Jũ̶menijicu̶ apu̶re d̶aibi mu̶jare apu̶é mamaeque
Cristoque. Que teni ãru̶meteibi caiye maje ãmeina teiyede.
\v 14 Jũ̶menijicu̶i toivaicõjeiye báque boje ũ̶i d̶aicõjeiyede,
d̶aiye jau̶rejaquemavu̶ majare. Ʉbenita maje d̶abe boje diede,
bojecu̶be d̶aiye cu̶varejaquemavu̶ Jũ̶menijicu̶que. Maja d̶abevu̶
bácavu̶reca iye d̶aicõjeiyede, ye boropateivu̶pe jã́menejaquemavu̶
majare Jũ̶menijicu̶. Quénora Cristoi yaiye báqueque
jocu̶cu̶jaravena jaru̶varejaquemavu̶ maje bojecu̶be d̶aiye báquede
ṹ̶re.
\v 15 Que d̶ayu̶ Jũ̶menijicu̶ pu̶eno baju vainí tu̶rejaquemavu̶
caivu̶ ina jabovare aru cõjeivu̶re ũ̶i cãchinoi. Náre cu̶yoje
tede d̶arĩ, jã́d̶ovaimi paru̶cu̶re caivu̶ apevu̶ pu̶eno Cristo
ũ̶i d̶aiyeque. Que d̶aibi Jũ̶menijicu̶ caivu̶ põeva ne jã́iyede.
\s Ijãravu̶que bu̶obevu̶ Jesúre ju̶ aipõeva
\r (Mt 15.9, 22.44; Ro 6.4-11, 14.1-6; Gá 2.19-20; Ef 1.22,
4.15-16; Fil 1.21; Col 2.21; He 1.3)
\p
\v 16 Que baru jápiarĩ ad̶abejarã mu̶ja ácu̶ põecu̶ ãmeina
yávayu̶re mu̶jare, mu̶je ãiye boje aru mu̶je ũcuiye boje máre,
aru mu̶je toroju̶ve tebe boje ṹ̶pe ũ̶i toroju̶ve teijãravu̶are
caiu̶ju̶a coapa, caivu̶ aviáva coapa, aru sábadore máre caisumana
coapa.
\v 17 Iye javeque d̶aicõjeiyeque ãiyeda coyu̶iyede, aru toroju̶ve
teiyeda coyu̶iyede, aru apejĩena coyu̶iyede máre Jũ̶menijicu̶
epedejaquemavu̶, buecu̶yu̶ ñu̶jare. Iye d̶aicõjeiyeque Jũ̶menijicu̶
jã́d̶ovañu̶ marejaquémavu̶ aipe ũ̶i d̶aquiyede yóbore. Cristo
cu̶cu̶yu̶rã máre jã́d̶ovañu̶ marejaquémavu̶ ũ̶. “Yópe ṹ̶re
vaiquíyebu”, arĩ jã́d̶ovañu̶ marejaquémavu̶. Que
barĩdurejaquemavu̶ iye d̶aicõjeiye.
\v 18 Aru jápiarĩ ad̶abejarã mu̶ja ácu̶ põecu̶ ãmeina
yávayu̶re mu̶jare, mu̶je mearore jíye boje Jũ̶menijicu̶re ṹ̶pe
ãmevu̶. Que teni apecu̶ ũ̶i cãchinocavu̶pe tebejarã mu̶ja. Aru
mearore jíbejarã ángelevare máre, yópe ũ̶i d̶aiyepe.
Ʉ̃́recabe arĩduyu̶ u̶benina “Jãvemu ji coyu̶iye, ji jã́iye báque boje
apu̶cu̶ yópe decoboainope”.
Ʉbenita jã́memi iyede, ũ̶i coyu̶iye borore. Aru,
“¿Meacu̶ bárica apevu̶
pu̶eno?” u̶benina arĩduibi. Nópe arĩduibi ũ̶i d̶aicõjeiye boje
ũ̶i dápiainore ũ̶i ãmeina d̶aiyu̶eque.
\v 19 Ʉ̃́recabe dajocayu̶ bácu̶ ũ̶i cu̶ede Cristoque
cũinávu̶pe. Que baru majibebi iye bueiye jãvene Cristoi borore.
Cristo maje jabocu̶be. Que baru d̶aicõjeimi caivu̶ ina caiyajuboa
põeyajuboacavu̶ ṹ̶re ju̶ aivu̶re, ne pu̶eno baju d̶are
nu̶rajiyepe ayu̶ yópe Jũ̶menijicu̶i u̶rõpe. Que baru caijãravu̶a
pu̶eno baju majide nu̶ñama na, ṹ̶re ju̶ aivu̶ caivu̶, me
cu̶rãjivu̶ ne ũmei yópe Jũ̶menijicu̶i u̶rõpe.
\p
\v 20-21 Mu̶je cu̶e boje Cristoque cũinávu̶pe, yaivu̶ bácavu̶pe
paivu̶bu ṹ̶que. Aru jau̶bevu̶ ina yaivu̶ bácavu̶re ne ju̶ aiye
d̶aicõjeiyede. Que baru jau̶bevu̶ mu̶jare mu̶je ju̶ aiye iye
d̶aicõjeiyede põeva ne majiéque coyu̶iyede. Que barureca apevu̶re
d̶aicõjeiye jau̶bevu̶ mu̶jare. Jau̶bevu̶ mu̶jare cãreja mu̶je ju̶
aiye põeva ne d̶aicõjeiyede, yópe ne aiyede: “Jẽmejara
apejĩene. Aru ãmejara apejĩene. Aru tu̶obejarã apejĩene
máre”, ne aiyede.
\v 22 Quénora iye ijãravu̶que cũiquíyede coyu̶yama põeva ne
d̶aicõjeiyede coyu̶iyeque. Aru diedecabu põevavacari ne
d̶aicõjeiye aru ne bueiye máre.
\v 23 Põeva iye d̶aicõjeiyede d̶aivu̶ Jũ̶menijicu̶re pued̶aivu̶pe
ãrojariduivu̶bu. Aru jã́d̶ovariduivu̶bu ne baju apevu̶ ne
cãchinocavu̶re. Ñájine d̶arĩ ne bajure, Jũ̶menijicu̶re
pued̶aivu̶pe teniduivu̶bu na. Iye ne d̶aiyede yópe ne
d̶aicõjeiyepe majidivu̶pe teniduivu̶bu. Ʉbenita iye d̶aicõjeiyede
d̶aivu̶vacari, ye dajocabema ne baju ãmeina d̶aiyu̶ede. Que baru
iye d̶aicõjeiye ne cu̶vae bojecu̶bevu̶ náre.
\c 3
\p
\v 1 Mu̶jarecabu yópe Jũ̶menijicu̶i nacovaimara mácavu̶pe
Cristoque yainore jaru̶varĩ. Que baru Cristo jinatamu mu̶ja. Que
baru mu̶je ãmeina teiyede mu̶je javeque d̶aiyede dajocarĩ,
oatu̶vad̶avũ̶ mu̶ja, mearo d̶arãjivu̶. Oatu̶vaimara mácavu̶
mu̶ja, cainu̶mu̶a u̶re nu̶jara yo cavarõ mearo Jũ̶menijicu̶i
cu̶rõcarõre. No cavarõ mearotamu Cristo ũ̶i cu̶rõ, dobacu̶ ũ̶i
dobarõ mearo Jũ̶menijicu̶i meapũravu̶ yebai, ũ̶i paru̶é cu̶vae
boje.
\p
\v 2-3 Caride mu̶ja d̶abevu̶ yópe mu̶je d̶aiye báquepe, mu̶je
yaivu̶ bácavu̶pe paiye boje Cristoque. Que baru coatede
d̶aimaratamu mu̶ja mu̶je cu̶e báquede jaru̶varĩ. Quénora
cu̶rivu̶bu mu̶ja mu̶je ũmei Cristoque cũinávu̶pe Jũ̶menijicu̶i
jã́inore. Ʉbenita apevu̶ põeva jã́mema cãreja iye mu̶je jãve
cu̶ede Cristoque. Quénora Jũ̶menijicu̶i yaveimarapebu mu̶ja
caride. Que baru cainu̶mu̶a dápiare nu̶jara yo cavarõ mearo
Jũ̶menijicu̶i cu̶rõcarõre. Dápiabejarã iye ãmene
ijãravu̶quede ijãravu̶cavu̶ ne d̶aiyede.
\v 4 Cristorecabe jãve cu̶re d̶ayu̶ mu̶jare mu̶je ũmei. Ʉ̃i
copaidaquiyede ijãravu̶i cojedeca caivu̶ ne jã́iyede, mu̶ja máre
cu̶rãjaramu ṹ̶que. Dinu̶mu̶ maquinóre meara marajáramu mu̶ja ye
jau̶beda yópe Jũ̶menijicu̶i u̶rõpe.
\s Aipe d̶aiye jau̶rõ Jesúre ju̶ aipõevare
\r (Ef 2.3, 10, 4.2, 22, 24, 32, 5.19-20)
\p
\v 5 Coatejarã mu̶je baju mu̶je ãmeina d̶aiyu̶ede jaru̶varĩ.
Ãmeina d̶abejarã apevu̶que mu̶jemarebu̶cu̶va ãmevu̶que, aru
ãmeina d̶abejarã ũ̶mu̶va nomivaque aru nomiva ũ̶mu̶vaque máre.
Caiye iye ãmene d̶aiyu̶bejarã mu̶ja. Mu̶je baju ãmeina daiyu̶epe
d̶abejarã mu̶ja. Ʉbejarã pu̶eno baju mu̶je cu̶vaede. Que d̶aivu̶
baru, d̶ajebu mu̶je cu̶vaede yópe jũ̶menijinape.
\v 6 Aru Jũ̶menijicu̶ jorojĩni jã́ri ina ṹ̶re jápiabevu̶re,
ñájine d̶acu̶yu̶me náre, ãmene ne d̶aiye boje.
\v 7 Mu̶ja máre javede ãmenore d̶arejaquemavu̶ napedeca mu̶je
jápiabede cãreja Jũ̶menijicu̶re.
\v 8 Ʉbenita caride mu̶jacapũravu̶ dajocajarã caiye ãmene. Que
baru jarabejarã apevu̶re. Aru jorojĩmejara náre máre. Ãmeina
dápiabejarã apevu̶re. Aru coyu̶bejarã ãmenore caivu̶ ne
jápiaiyede apevu̶i borore. Ãmeina yávabejarã apevu̶re ne
jápiaiyede máre.
\v 9 Que baru borod̶abejarã mu̶je bajumia. Mu̶ja aipe ãrojarivu̶
bácavu̶re mu̶je ãmeina d̶aiyu̶eque aru mu̶je d̶are nu̶iye báquede
ãmenore dajocad̶avũ̶ mu̶ja.
\p
\v 10 Caride mearape ãrojarivu̶bu mu̶ja. Aru caijãravu̶a
Jũ̶menijicu̶ pu̶eno baju meara nu̶re d̶aibi mu̶jare, mu̶je
ãrojarajiyepe ayu̶ ṹ̶pe, ñai mu̶jare cu̶ed̶ayu̶ bácu̶pe
mamaũmeque, mu̶je coreóvarãjiyepe ayu̶ ṹ̶re jãve.
\v 11 Que baru caride ye baju ãmevu̶ põecu̶ judío o judío
ãmecu̶, aru buraicõjeñu̶ ũ̶i cajede o buraicõjemecu̶ diede, aru
yávayu̶ griego ãmicu̶ricamua yávaicamuare o yávabecu̶ diede, aru
ĩmarocacu̶ o u̶beni cu̶rijĩcu̶, aru apecu̶i yebacacu̶ o apecu̶i
yebacacu̶ ãmecu̶ máre. Quénora Cristorecabe cũinácu̶ra paru̶cu̶
caivu̶ apevu̶ pu̶eno cainu̶mu̶a. Aru caivu̶ ũ̶ jinaque cu̶bi ũ̶.
\p
\v 12 Mu̶ja Jũ̶menijicu̶ ũ̶i beoimaramu, ũ̶ jinatamu, aru ũ̶i
u̶maramu máre. Que baru yópe paivu̶ bájarã mu̶ja. Cõmaje
ãroje jã́jara mu̶jevu̶re. Aru cad̶atejarã náre. Dápiabejarã
mu̶je baju mearape apevu̶ pu̶eno. Pued̶ajarã mu̶jevu̶re meara
põevape. Aru napijara náre.
\v 13 Jarabejarã mu̶je bajumia. Aru apecu̶ mu̶jecu̶ ũ̶i ãmeina
yávaru o ãmeina d̶aru mu̶jare, ãru̶metejarã ũ̶i ãmeina
d̶aiyede. Yópe maje jabocu̶ Jesucristo ũ̶i ãru̶meteiye báquepe
mu̶je ãmeina teiyede, mu̶ja máre ãru̶metejarã mu̶jevu̶ ne
ãmeina teiyede.
\v 14 Aru paru̶ébu caiye die pu̶eno mu̶je u̶e mu̶je baju. Mu̶je
u̶ede apevu̶re, cu̶rãjaramu cũinávu̶pe yópe Jũ̶menijicu̶i
u̶rõpe. Que baru u̶jarã apevu̶re.
\p
\v 15 Cristo cãrijimene d̶aibi mu̶jare. Aru Jũ̶menijicu̶ cuturĩ
epeibi mu̶jare, mu̶je cu̶rãjiyepe ayu̶ cũinávu̶pe cãrijimevu̶va.
Que baru cãrijimena cu̶re nu̶jara mu̶ja. Aru cainu̶mu̶a toroju̶ede
jíde nu̶jara Jũ̶menijicu̶re.
\v 16 Coreóvare nu̶jara caiye iye yávaiye méne Cristoi borore.
Yópe d̶ajarã mu̶je bueiyede aru mu̶je coyu̶iyede paru̶rõreca
mu̶jevu̶re máre u̶re majiéque. Majicajarã aru coyu̶jarã
paru̶rõreca Salmos ãmicu̶eque, aru mearore jíjarã
Jũ̶menijicu̶re yu̶riainoque, aru ũ̶i Espíritu jino yu̶riainoque
máre. Que teni yu̶riajarã Jũ̶menijicu̶re, toroju̶ede jínajivu̶
ṹ̶re mu̶je ũmeque.
\p
\v 17 Que baru caiye mu̶je coyu̶iyede aru caiye mu̶je d̶aiyede
máre, d̶ajarã yópe ina Jesucristore ju̶ aivu̶re jau̶épe, ina
jẽniaivu̶ ũ̶i paru̶éque. Aru cainu̶mu̶a Cristoi cad̶ateiyeque
toroju̶ede jíjarã majepacu̶ Jũ̶menijicu̶re.
\s Mearo d̶aiye jau̶rõ cũ̶ramicavu̶que aru memeivu̶que máre
\r (Ef 5.16, 22, 25, 6.1, 4-9, 18-20; Fil 4.6; 1 P 3.1, 7)
\p
\v 18 Mu̶ja, ũ̶mu̶cu̶rivu̶, ju̶ ajarã mu̶jemarepacu̶re ũ̶i
coyu̶iyede mu̶jare. Ju̶ aiye jau̶vu̶ mu̶jare ṹ̶re, mu̶je cu̶e boje
maje jabocu̶ Cristoque cũinávu̶pe.
\v 19 Mu̶ja, nomicu̶rivu̶, jecu̶jarã mu̶jemarepacore. Jarabejarã
ṍre.
\p
\v 20 Mu̶ja, ju̶ed̶ova, cainu̶mu̶a ju̶ ajarã me mu̶jebu̶cu̶vare ne
coyu̶iyede mu̶jare. Jũ̶menijicu̶ toroju̶rĩ jã́imi mu̶je ju̶
aiyede náre.
\v 21 Mu̶ja, nébu̶cu̶va, jorojĩne d̶abejarã mu̶jemarare, ne
chĩomenajiyepe aivu̶.
\p
\v 22 Mu̶ja, memecaivu̶, cainu̶mu̶a ju̶ ajarã me mu̶je jabova
ijãravu̶cavu̶re ne coyu̶iyede mu̶jare. Cainu̶mu̶a ju̶ ajarã náre
me mu̶je ũmeque. Ju̶ aivu̶ ãmejara náre quénora ne jã́iyede
mu̶jare, “Mearo d̶aivu̶bu” ne arãjiyepe aivu̶ mu̶jare. Ju̶ ajarã
náre, mu̶je pued̶aiye boje maje jabocu̶ Cristore.
\v 23 Toroju̶rivu̶ memecajarã mu̶ja. Yópe mu̶je põevare
memecaju̶roepe ãmevu̶. Quénora yópe maje jabocu̶ Cristore mu̶je
memecaju̶roepe d̶ajarã mu̶ja.
\v 24 Cristorecabe mu̶je jabocu̶ jãve. Ʉ̃́recabe mu̶je memecaimu̶
jãve. Que baru coreóvaivu̶bu mu̶ja maje jabocu̶vacari Cristo
bojed̶acu̶yu̶re mu̶jare yópe Jũ̶menijicu̶i aiye báquepedeca, ũ̶i
mearo d̶acaquiyede mu̶jare.
\v 25 Ʉbenita ácu̶ mu̶jacacu̶ ũ̶i ãmeina d̶are nu̶ru,
Jũ̶menijicu̶, jã́ñu̶ caivu̶ põevare cũinátu̶ru̶ra, ñájine
d̶acu̶yu̶me ṹ̶re ũ̶i ãmeina d̶aiye báquepedeca. Que teni
Jũ̶menijicu̶recabe bojed̶ayu̶ caivu̶ põevare yópe ne d̶aiye
báquepedeca.
\c 4
\p
\v 1 Mu̶ja, ne jabova, d̶ajarã me mu̶jare memecaivu̶re yópe
mu̶jare jau̶épe Jũ̶menijicu̶i jã́inore, mu̶je coreóvaiye boje
mu̶je jabocu̶ cavarõ mearocacu̶ cu̶cu̶re, mu̶je coyu̶rãjimu̶re
aipe mu̶je d̶aiye báquede.
\p
\v 2 Ʉetu̶bevu̶va coyu̶jarã Jũ̶menijicu̶que. Mu̶je coyu̶iyede
ṹ̶que, me dápiajarã mu̶je coyu̶iyede aru toroju̶ede jíjarã
ṹ̶re.
\v 3-4 Aru mu̶je coyu̶iyede jẽniajara Jũ̶menijicu̶que yu̶re boje
máre, cu̶cu̶re ãmeina teivu̶re jẽni jacoiñami jívu̶i, ji
coyu̶iye báque boje iye yávaiye méne, Cristoi borore,
jã́d̶ovameno mácarõre jipocamia u̶benita jã́d̶ovainore caride.
Jẽniajara Jũ̶menijicu̶que ũ̶i yávayu̶ bu̶ojare d̶aquiyepe yu̶re,
ji coyu̶quiyepe aivu̶ diede caivu̶ ne jápiaiyede yópe yu̶re
jau̶épe.
\p
\v 5 Coyu̶jarã mu̶ja Jesús ũ̶i yávaiye méne ina ṹ̶re ju̶
abevu̶re. Cainu̶mu̶a mu̶je cu̶ede náque me majiéque d̶ajarã
náre.
\v 6 Coyu̶jarã náre, me coju̶quiyepe aivu̶ náre aipe ãrojarore
mu̶je coyu̶inore. Que teni coreóvarãjaramu mu̶ja aipe ãrojae
jau̶rõre mu̶jare mu̶je coyu̶iyede náre ne jẽniari jã́iyede
mu̶jaque.
\s Pablo ũ̶i meaicõjeino Colosacavu̶re
\r (Hch 12.12, 25, 13.13, 15.37-39, 19.29, 20.4, 27.2; Ef 6.21-22;
Col 1.7; 2 Ti 4.10-12; Flm 2, 10-12, 23-24; Ap 3.14-22)
\p
\v 7 Caiye iye vaiyede yu̶re ñai Tíquico coyu̶cu̶yu̶me mu̶jare.
Ʉ̃́recabe majecu̶, maje u̶mu̶, yu̶re cad̶ateyu̶ dajocabecu̶va, aru
maje jabocu̶ Cristore memecayu̶ yú̶que máre.
\v 8 Darocu̶yu̶mu ṹ̶re mu̶je yebai, ũ̶i coreóvare d̶aquiyepe ayu̶
aipe vaiyede ñu̶jare, ũ̶i toroju̶re d̶aquiyepe ayu̶ mu̶jare mu̶je
ũmei.
\v 9 Aru nu̶vacu̶yu̶me ñai Onésimore ṹ̶que, majecu̶
dajocabecu̶re, maje u̶mu̶re, mu̶je ĩmarocacu̶re. Na pu̶carã
coyu̶rãjarama mu̶jare caiye vaiyede ñu̶je yebare.
\p
\v 10 Ñai Aristarco, ãmeina teivu̶re jẽni jacoiñami cu̶cu̶
yú̶que, meaicõjeimi mu̶jare. Aru ñai Marcos máre, Bernabé ũ̶i
chimacu̶, meaicõjeimi mu̶jare. Javede coyu̶cacu̶ mu̶jare ũ̶i
borore. Que baru ũ̶i earu mu̶je yebai, me copu̶ etajarã ṹ̶re.
\v 11 Aru ñai Jesús máre, apenu̶mu̶ ne aimu̶ Justo, meaicõjeimi
mu̶jare. Ina yóbecu̶rã quévu̶ra judíovacavu̶ Jesucristore ju̶
aivu̶recabu memeivu̶ yú̶que caride, põeva ne jaboteicõjenajiyepe
aivu̶ Jũ̶menijicu̶re náre. Na cad̶ateivu̶ yu̶re me toroju̶re
d̶ad̶ama ji ũmei.
\v 12 Aru ñai Épafras máre, mu̶je ĩmarocacu̶, aru Cristore
memecayu̶, meaicõjeimi mu̶jare. Ʉ̃́recabe cainu̶mu̶a pu̶eno baju
jẽniañu̶ mu̶jare Jũ̶menijicu̶que. Jẽniañu̶me mu̶je meara
marajiyépe ayu̶ mu̶je ũmei ye jau̶beda yópe Jũ̶menijicu̶i
u̶rõpe aru mu̶je coreóvarãjiyepe ayu̶ aipe caino Jũ̶menijicu̶i
u̶rõre, “¿Jãve márica?” arĩ dápiabevu̶va.
\v 13 Pu̶eno baju u̶bi mu̶je cu̶rãjiyepe ayu̶ me Jũ̶menijicu̶i
jã́inore, aru náre máre, ina Jesucristore ju̶ aivu̶re Laodicea
ãmicu̶riĩmarocavu̶re aru Hierápolis ãmicu̶riĩmarocavu̶re máre.
Que baru paru̶rõreca jẽniaimi Jũ̶menijicu̶que mu̶jare boje.
Yú̶vacari coreóvaivu̶ die jãvene.
\v 14 Aru ñai Lucas, majare ju̶oipõecu̶, maje u̶mu̶, aru Demas
máre, meaicõjed̶ama mu̶jare.
\p
\v 15 Meajarari na Jesúre ju̶ aipõeva Laodiceacavu̶. Aru meajarari
Ninfa aru ina Jesúre ju̶ aipõeva cójijivaivu̶ õi cũ̶rami
jívu̶i.
\v 16 Jã́ri boroteicõjejara iyoca paperayocare mu̶je cójijinoi
caivu̶ ne jápiaiyede. Aru mu̶je jápiarĩburu yóboi, jã́ri
boroteicõjejara diyocare ina Laodiceacavu̶ Jesúre ju̶ aipõeva ne
cójijinoi caivu̶ ne jápiaiyede máre. Aru apeyoca paperayocare
máre, ji toivaino mácarõre, Laodiceacavu̶re mu̶ja máre jã́ri
boroteicõjejara diyocare mu̶je cójijinoi caivu̶ ne jápiaiyede.
\v 17 Yópe arĩ, coyu̶jarã ñai Arquipore: “Me jã́jacu̶ mu̶,
bu̶ojacu̶yu̶ yo mi memeinore maje jabocu̶ Jesucristo ũ̶i epeiye
báquede mu̶re mi cu̶e boje cũinávu̶pe ṹ̶que”. Que ajarã
ṹ̶re.
\p
\v 18 Yú̶vacari, Pablo, toivaivu̶ ji pu̶ru̶que caride. Meaicõjeivu̶
caivu̶ mu̶jare. Ãru̶jara yu̶re ne bu̶oimu̶re tãumeaque, ãmeina
teivu̶re jẽni jacoiñami cu̶cu̶re. Jũ̶menijicu̶ mearo
d̶acajacu̶rĩ mu̶jare bojecu̶beda ũ̶i me boje. Quénoramu.
\e