\id JUD Cubeo [cub] NT (Colombia) -2009 bd. \h San Judas \toc1 San Judas \toc2 Jud \mt San Judas \ip Mamabʉinore coyʉiyebu Judas bácʉ ũ̶i toivacaiye báquede paperayocare Jesúre jʉ aipõevare (1-3). Ʉbenita ã́rocavʉ ũ̶i toivacaimara mácavʉre aru ã́ri ũ̶i cʉede ũ̶i toivacaiyede diyocare máre caivʉ majibevʉ. Judas bácʉ judíovacacʉ barejaquémavʉ. Jesucristoi yócʉ barejaquémavʉ. Majidivʉ ne dápiaiyepe, toivacarejaquemavʉ diyocare ãniʉjʉa báquede 66-90 d.C. \ip Toivacarejaquemavʉ Jesúre jʉ aipõeva, ne me jã́rajiyepe ayʉ, Jũ̶menijicʉre jʉ abevʉ ne jʉjovabenajiyepe ayʉ náre ne bueiye jãve ãmeque, ne vainí tʉrĩ bíjabenajiyepe ayʉ ne jʉ aiyede jarʉvarĩ (4-16). Coyʉrejaquemavʉ náre aipe d̶aiye jaʉrõre Jesúre jʉ aipõevare (17-23). Aru ũ̶i toivacarĩ bʉojaiyede, jídejaquemavʉ mearore Jũ̶menijicʉre, majare mead̶ayʉre Jesucristoi d̶aiye báque boje (24-25). \c 1 \s Judas ũ̶i meaicõjeino Jesúre jʉ aipõevare \r (Mt 13.55; Mr 6.3) \p \v 1 Yú̶bu Judas, Santiagoi yócʉ, Jesucristore memecayʉ. Toivacaivʉ yʉ mʉjare, Jũ̶menijicʉi cutuimara mácavʉre. Majepacʉ Jũ̶menijicʉi jecʉmaramu mʉja. Aru Jesucristoi coreimaramu mʉja máre. \v 2 Jũ̶menijicʉ pʉeno baju cõmaje ãroje jã́jacʉrĩ mʉjare, me cʉre d̶ajacʉrĩ mʉjare cãrijimevʉva, aru jecʉjacʉrĩ mʉjare. \s Ina borocʉede bueivʉre coyʉino \r (He 11.4; 2 P 2.1-7; 1 Jn 3.12; Ap 2.14, 12.7) \p \v 3 Mʉja, ji ʉmara, yʉ toivacarĩduivʉ mʉjare iye ména maje cʉvaede caride, Jũ̶menijicʉi mead̶aiye báque boje majare maje ãmeina teiyede jarʉvarĩ. Ʉbenita jaʉvʉ yʉre ji jẽniaiye parʉéque mʉjare, mʉje corenajiyepe ayʉ iye yávaiye méne maje jʉ aiyede, Jũ̶menijicʉ cũinára ũ̶i jíye báquede ũ̶i põevare. Que baru apevʉ ne ãmeina yávaru diede aru apevʉ ne oatʉvaiyʉru diede, parʉrõreca coyʉjarã mʉja iye yávaiyede jãvene. \v 4 Apevʉ jʉjovaivʉ cʉrivʉbu maje jẽneboi, yavenina ecoivʉ bácavʉ maje cójijiñamia jívʉi. Ina yópe teivʉ ʉbenina dápiare d̶aiyʉrĩduyama mʉjare. Ʉbenita Jũ̶menijicʉre jʉ abevʉ, ãmeno d̶ad̶ama. Jũ̶menijicʉi mearo d̶acaiyedeca ina põevare bojecʉbeda ũ̶i me boje, ʉrarõ ãmenore d̶aivʉ, “Jũ̶menijicʉ ãrʉmetecʉyʉme caiye iyede”, arĩ dápiarĩduyama na. Aru jʉ abenama Jesucristore, majare upacʉre aru maje jabocʉre cũinácʉra. Que baru yópe arĩ, “Jesucristo jabocʉ cũinácʉra ãmemi”, borocʉrĩ ad̶ama na. Javede Jũ̶menijicʉ toivaicõjenejaquemavʉ ũ̶i yávaiyede, põeva nópe aivʉ ñájinajivʉre, ne ãmeina teiye boje. \p \v 5 Iye ji coyʉiyede mʉjare caride jave majivʉ mʉja. Ʉbenita ãrʉre d̶aiyʉvʉ mʉjare Jũ̶menijicʉ ñájine d̶ayʉre ãmeina teivʉre, ne ãmeina teiye boje. Ina Israecavʉ bácavʉre, maje jabocʉ Jũ̶menijicʉ ũ̶i etavarĩburu yóboi mead̶acʉyʉ na mácavʉre Egipto ãmicʉrijoborõre jocarĩ, bíjare d̶arejaquemavʉ nácavʉ bácavʉ jʉ abevʉ bácavʉre ṹ̶re. \v 6 Aru ina ángelevare máre, d̶abevʉre iye ne memeiyede Jũ̶menijicʉi d̶aicõjeiye báquede náre, Jũ̶menijicʉre ne ʉbeni jarʉvarĩburu yóboi aru ne cʉrõ mearore jocarĩ etarĩburu yóbore máre, Jũ̶menijicʉ bʉorĩ epedejaquemavʉ náre ñeminitucubʉi. Noi bʉoimara mautenajarama tãumeaque cainʉmʉa pʉ dijãravʉ Jũ̶menijicʉi ñájiovaquijãravʉ baquinóita. \v 7 Aru quédeca ina Sodoma aru Gomorra ãmicʉriĩmaroacavʉ bácavʉre, aru apenoa ĩmaroa joabenoacavʉ bácavʉre máre, Jũ̶menijicʉ ñájine d̶arejaquemavʉ na mácavʉre toabo cũiméboque, ne ʉrarõ ãmeno d̶aiye báque boje ne bajumia. Dajocarejaquemavʉ na mácavʉ ne d̶aiye báquede ne baju yópe Jũ̶menijicʉi cʉed̶aiye báquepedeca põevare ũ̶i ʉrõpe, ne d̶arãjiyepe ayʉ ʉrarõ cʉyojarõ ne d̶aiye báquede ne baju ũ̶mʉva matʉivʉ bácavʉ. Jũ̶menijicʉ ẽ́icõjenejaquemavʉ na mácavʉre, apevʉ ne majinajiyepe ayʉ aipe vaiquíyede põeva nópe ãmeno d̶aivʉre. \p \v 8 Aru napedeca ina jʉjovaivʉ, borocʉede bueivʉ, maje jẽneboi jʉjovad̶ama ne baju. “Jãvemu no” aru “Mearomu yo”, arĩ dápiarĩduyama na. Ʉbenita ãmeina d̶ad̶ama ne bajumia. Jʉ abenama jabovare. Aru ãmeina yávad̶ama ina pʉeno parʉrivʉre máre. \v 9 Ʉbenita Miguevacari, ñai ángelevai jabocʉ, ũ̶i jaraiye báquede ñai abujuvai jabocʉre ne jijateiye báquede ũ̶i ĩ́ye báqueda Moisés bácʉi baju bácarõre pued̶ayʉ ãmeina yávabedejaquemavʉ ṹ̶re. “Ñájicʉyʉmu mʉ”, abedejaquemavʉ, ũ̶i pued̶aiye boje ṹ̶re. Quénora “Jũ̶menijicʉ ñájine d̶ajacʉrĩ mʉre”, arejaquemavʉ Miguecapũravʉ. \v 10 Ina jʉjovaivʉ, borocʉede bueivʉ, ãmeina yávad̶ama iye ne coreóvabede. Aru iye ne coreóvaiyede coreóvabenama ne majiéque yópe põeva dápiaivʉpe. Quénora coreóvad̶ama diede ne dápiaiyeque jĩ́cua yópe ãimara dápiabevʉpe. Aru bíjarãjarama na no boje. \p \v 11 ¡Chĩorajarama na! D̶ad̶ama yópe Caín mácʉpe, ñai ĩmacʉ bácʉre boarĩ́ jarʉvayʉ bácʉpe. Aru ãmeina ted̶ama, earãjivʉ tãutʉrare yópe Balaam mácʉpe. Ʉbenita bíjarãjarama, ne jʉ abe boje jabovare yópe Coré bácʉpe. \v 12 Yópe cuitótecajede mʉje docʉ jacorĩ ãmed̶aiyepe, nopedeca ina jʉjovaivʉ, borocʉede bueivʉ, ãmetede d̶ad̶ama mʉjacavʉre, ne cʉyoje tede d̶aiye boje pued̶abevʉva apevʉre mʉje ãranʉiyede torojʉve teinoai. Yópe ovejavare coreipõeva ne baju me ãiyepe ʉbenita jíbevʉva ãiyede ovejavare, nopedeca ina jʉjovaivʉ ãri ũcuñama apevʉ pʉeno. Aru yópe ocopeniboa ũmevʉque japuino ʉbenita ocabeni cad̶atebenope põevare ne ocainore coreniduiyede, nopedeca ina borocʉede bueivʉ, cad̶atebenama põevai ũmene ne bueiyeque. Aru yópe jocʉcʉ jẽidʉa cʉbecʉ jẽijãravʉre meamecʉpe, nopedeca ina jʉjovaiyede bueivʉ yaivʉ bácavʉpe paivʉbu na, ne meame boje. Aru yópe pʉeno baju meamecʉpe dicʉre ĩniburu yóbore caino nʉoque jobore jarʉvarĩ, nopedeca pʉeno baju meamema na. \v 13 Aru yópe pãcaiboa ʉraboa jia ʉrad̶ai jarʉvaiboape ẽcarʉi caivʉ ne jã́inoi yaore aru pojeiyede máre, ãme ũ̶rojʉede, nopedeca ina jã́icõjed̶ama caivʉre ne d̶aiye cʉyojeda. Aru yópe abiácova tʉivʉ bácavʉpe ne nʉimare jocarĩ pʉ ñeminitucubʉi, nopedeca ina jʉjovaivʉ cʉrãjarama cainʉmʉa ñeminitucubʉ pʉeno baju ñeminoi, no Jũ̶menijicʉi náre d̶acaino mácarõi. \p \v 14 Ina jʉjovaivʉre, borocʉede bueivʉre, Enoc Jũ̶menijicʉi yávaiyede coyʉcarejaquemavʉ javede nápe paivʉ ne borore. Ñai Enoc yaibécʉ, Jũ̶menijicʉi nʉvaimʉ mácʉ apʉcʉra ijãravʉre jocarĩ, Adán mácʉi pãramecʉ bácʉi pãramecʉ bácʉi pãramecʉ barejaquémavʉ ũ̶, Enoc. Yópe arĩ, Jũ̶menijicʉi yávaiyede coyʉcarejaquemavʉ ũ̶: “Me jã́jara. Maje jabocʉ Jũ̶menijicʉ dacʉyʉme. Aru obedivʉ baju ũ̶i ángeleva meara baju darãjarama ṹ̶que. \v 15 Bojed̶acʉyʉme caivʉ põevare, ne d̶aiye báque boje ijãravʉi. Ñájine d̶acʉyʉme caivʉ ina ãmeno d̶aivʉre ne ãmeina teiye báque boje ne jʉ abe báquede ṹ̶re, aru ne ãmeina yávaiye báque boje copʉ ṹ̶re”, arejaquemavʉ Enoc. \v 16 Ina jʉjovaivʉ, borocʉede bueivʉ, ãmeina yávad̶ama caiyede. Ye apeno ne jã́ino ye baquinó ãmevʉ náre. Aru ãmecorod̶ama caivʉ apevʉre máre. Ne ãmeina d̶aiyʉepe d̶ad̶ama na. Ne baju “Ñʉja apa mearo d̶aivʉbu apevʉ pʉeno”, ʉbenina arĩ coyʉyama. Aru “Mʉja máre mearo d̶aivʉbu apevʉ pʉeno”, borocʉrĩ coyʉyama apevʉre. Que arĩ, mamarʉmʉre vorĩ ead̶ama náva méne apevʉ pʉeno. \s Judas ũ̶i majicaino Jesúre jʉ aipõevare \r (2 Ti 3.1-5; 2 P 3.3) \p \v 17 Mʉja, ji ʉmara, ãrʉjara iyede Jesucristoi yávaiye méne beorĩ coyʉicõjeimara ne coyʉiye báquede mʉjare jipocamia. \v 18 Coyʉivʉ barejaquémavʉ mʉjare, yópe arĩ: “Ãnijãravʉa bʉojaquijãravʉa baquiyéde, Cristoi copaidaquijãravʉ jipocare, darãjarama põeva Jũ̶menijicʉre jʉ abevʉ, yʉrivʉ, aru ne ãmeina d̶aiyʉepe d̶aivʉ”, arĩ coyʉrejaquemavʉ na. \v 19 Ina jʉjovaivʉ, borocʉede bueivʉ, nárecabu coatede d̶aiyʉrivʉ mʉjacavʉre mʉje baju. D̶aivʉbu ne ãmeina d̶aiyʉepe yópe ãimara dápiabevʉpe. Aru cʉrivʉbu ñai Espíritu Santore cʉvabevʉva. \p \v 20 Ʉbenita mʉja, jívʉ, ji ʉmara, parʉre d̶ajarã mʉje ũmei mʉje Jesucristore jʉ aiyeque me, Jũ̶menijicʉi majide d̶aiye báquede majare ũ̶i yávaiye méne, maje meara marajiyépe ayʉ jaʉbevʉva ũ̶i jã́inoi. Aru jẽniajara Jũ̶menijicʉre ñai Espíritu Santoi cad̶ateinoque. \v 21 Cainʉmʉa d̶ajarã mʉja yópe Jũ̶menijicʉi ʉrõpe ũ̶i ʉe boje mʉjare, mʉje napini coreiyedeca Jesucristoi cʉvare d̶aquiyede jãravʉ cũiméjãravʉ baquinóre, ũ̶i cõmaje ãroje jã́iye boje. \p \v 22 Cõmaje ãroje jã́jara mʉja ina jʉ abevʉre cãreja yávaiyede jãvene. \v 23 Apevʉre mead̶ajarã maumena yópe mʉje ĩ́yepe põecʉre toabore jocarĩ. Corebevʉva coyʉjarã náre Cristoi yávaiye méne. Aru apevʉre cõmaje ãroje jã́jara, ne ãmeina teiye boje. Coyʉjarã náre máre Cristoi yávaiye méne. Ʉbenita me d̶ajarã, mʉje d̶abenajiyepe aivʉ ãmenore nápe. Nácapũravʉ ne pare ãmeina teiye boje cuitótecaje docʉcʉricajede doivʉpe paivʉbu na. Que baru ʉbejarã ne ãmeina teiyede yópe mʉje ʉbepe dicajede. \s Mearore jíni bʉojaino \p \v 24-25 Jũ̶menijicʉ cũinácʉrabe majicʉ aru parʉcʉ mead̶acʉyʉ mʉjare, mʉje vainí tʉbenajiyepe ayʉ ye ãmeno cʉbevʉva. Ʉ̃́vacari núre d̶aibi mʉjare ũ̶i jã́inoi torojʉrivʉre mʉje ũmei. Jũ̶menijicʉ meacʉ baju mead̶aibi majare, Jesucristoi d̶aiye báque boje. Mearore jínajarevʉ ṹ̶re. Ʉ̃́tame meacʉ baju, majicʉ ʉrarõ, pʉeno parʉcʉ, aru caivʉ pʉeno jabocʉ jãravʉ jipocare aru caride aru cainʉmʉa. Quédecabu. Quénoramu.