\id 1CO
\h 1 CORINTIOS
\toc1 1 Corintios
\toc2 1 Co
\mt1 MEJE PO CARTE COPIYA TATINA PABLO CORINTO TOMARAPIWI
TATINATSI
\c 1
\s Meje poxonae Pablo tatina Corinto tomarapiwi
\p
\v 1 Xan, Pablon, pacata tinatsi Nacom peichichipaexae xua
tana newabiwa xua tana neexanaewa Jesucristo pia peitorobi
jiwi jiwana tatsin. Irʉno Sóstenes pon irʉ pejume
cowʉntsin Jesucristo, baponbe panbe pacata tinatsi.
\v 2 Paxam pomonae painya nejume cowʉntsi jiwi pam Corinto
tomaratha. Barapomonae pam pacata tinatsi pomonae Nacom
piamonae tatsi pam painya neyawa jinompaexae Cristo Jesús.
Nacom paca waba painya nenajʉntʉ coyene wʉnae exanaenexa
Nacomtha. Pacata tinatsi daxita nacuapiwi pam, pomonae irʉ
painya nejume cowʉntsiwixae pam Jesucristo, xua pomonae
painya newʉn ununeibiwi Jesús pewʉn poxonae
pawʉqueibame Nacomtha. Bapon Jesucristo
Wanacanamataxeinaein irʉrʉ daxita nacuanthapiwi pomonae
pejume cowʉntsiwi barapomonae pia Pecanamataxeinaeinchi
tatsi.
\v 3 Barabʉ Nacom Waxa, irʉ Jesucristo pon jiwi
Pecanamataxeinaein jʉntema jinompa paca exanaena.
Mataʉtano barabʉ baponbe paca yawenaena pia paca
necaantobewaxae.
\s Meje poxonae Pablo tawʉca Nacomtha Corinto tomarapiwi
\p
\v 4 Daxita matacabi tsaibi Nacomtha pacata tsipaebeibatsi,
jan tsaibin: “Nacom maisa jʉntʉ coyene weiweinan xua
barapomonae tana neyawenaewa xua Cristo Jesús peantobexae
barapomonaetha”, jan tsaibin.
\v 5 Painya neyawa muxuna jinompaexae Cristo, daxota Nacom
peayapusʉwa jopa juniya paca catsiyo xua xaniwaicha painya
nepaebiwa pejume diwesi. Barapon Nacom paca cata po coyene
beta yabara painya neyaputaewa bapon.
\v 6 Po diwesi paca tsipaebatsi Cristo yabara xua bapon
paca cana exana painya nejinompaewa bapon nexa baxua
anoxuae xaniwaicha paexanaponame.
\v 7 Paxam paxeiname pocotsiwa Nacom pia Pejumope tʉnaxʉ
tatsi paca cata, daxita xua pocotsiwan panantawenoname xua
betiya painya nejinompaewa tsane Nacom nexa. Daxita baxuan
paxeina dubenanaebiyaename poxonae cataunxuae pawʉnae
ewatsiname xua poxonae Jesucristo po mataqueitha equeicha
patopeicaena pon Wanacanamataxeinaein.
\v 8 Nacom paca yaweneibina xua paajʉntʉsʉya
jinompaename beya poxonae Jesucristo equeicha patopaetsica.
Dapon xain aibi tsane pon paca yabara paeba xua painya
nenatsicuentsiwa xua abe painya neexanaexae Nacomtha xua
poxonae equeicha patopaetsica pon Wanacanamataxeinaein
Jesucristo.
\v 9 Nacom bara ataya exaneiba pocotsiwa pia petsiwʉnae
muxu dutsiwan. Barapon Nacom paca waba painya neyawa muxuna
jinompaenexa tsane Jesucristo pon Wanacanamataxeinaein,
Nacom Pexanto tatsi.
\s Meje poxonae Pablo yabara paeba po coyene pomonae pejume
cowʉntsiwi Cristo xua natsaba nacana exana
\p
\v 10 Tamonae pam, paxam pomonae irʉ painya nejume
cowʉntsiwixae Jesucristo. Jume daunweya paca tsipaebatsi
tajʉntʉ coyenetha tsipei daxita paxam Jesucristo piamonae
tatsi pam pon Wanacanamataxeinaein. Caemonae pebʉrʉya
cuita pacueicueijan tsurubenanaebiyama. Jopa pana najume
matsontsonobinde xua daxota painya nenatsabiwam tsipae.
Jame maisa pebʉrʉya pananta xeinare xua be bara caemonae
pam.
\v 11 Tamonae pam, pomonae irʉ painya nejume
cowʉntsiwixae Jesucristo. Daxota baxua paca tsipaebatsi,
yaitama yabʉyo powa pewʉn Cloé piamonae tatsi netsipaeba
pinae paxam nantiya pana najume matsontsonoba
dubenanaebiyame.
\v 12 Jume tan xua paxam jiwana xua barompaya tsanaya
paeba, jeye: “Pablo yabara jume cowʉntan pocotsiwa
cuiduba”, jei. Ichamonae jeye: “Apolos yabara jume
cowʉntan pocotsiwa cuiduba”, jei. Ichamonae jeye: “Pedro
yabara jume cowʉntan pocotsiwa cuiduba”, jei. Ichamonae
jeye: “Cristo yabara jume cowʉntan pocotsiwa cuiduba”,
jei.
\v 13 Daxita paxam jopa bewa barapo coyene paexanaem xua
ainyamonaein pana naexaname. Cristo jopa pia coutha
nanantarʉbiya exanaeyo tsipei Cristo apara bara caein.
Xan, Pablon, jopa apara paca tsitʉpaetsi naetotha. Jopa
apara paca bautisabichi tawʉntha xua daxota tamonae painya
nenaexanaenexam.
\v 14 ¡Pai jaibo! ¿Incane metha barichipaein? ¿Incane
metha bautisabichipan? Daxota Nacom tsipaeban janje:
“Nacom maisa jʉntʉ coyene weiweinan xua barapomonae jopa
tabautisabiwa”, jan. Saya meisa bautisaban Crispo irʉrʉ
Gayo.
\v 15 Daxota dapon aibi pon itacʉpatsi xua pejeiwa: “Xan
nebautisaba Pablo pewʉntha”, xua pejeiwa.
\v 16 Jaina irʉrʉ Estéfanas piamonae tatsi bautisaban.
Ichitha ichamonae jopa yabara nanta xeinaeinyo xua
tabautisabiwa bayatha.
\v 17 Cristo jopa neitorobiyo xua tabautisabinexa jiwi.
Jame saya Cristo neitoroba xua yabara tacueicueijeinexa
pecapanenebiyae diwesi. Ichitha jopa cueicueijanyo icha be
ichi pon bichocono cueicueijei poxoru bichocono
peyaputaexae. Ichi baxua exanaetsipan jiwi jopa yabara
yaputaetsipae Jesucristo pia pecapanenebiyae diwesi xua
poxonae Cristo naetotha tsitʉpa jiwi.
\s Meje poxonae Pablo yabara paeba xua Cristo xeina Nacom
pia peayapusʉwa tatsi xuano Nacom pia peyaputae coyenewano
tatsi
\p
\v 18 Ichamonae jopa beta yabara nanta xeinaeyo po diwesi
xua Cristo petsitʉpaewa naetotha jiwi. Barapomonae yawa
muxuna weraweracaena abe peexanaewan. Barapomonae jopa
pejume cowʉntsixae Jesucristo daxota nanta xeina xua
barapo diwesi be tsita penamitacueinchi diwesi jumetsi.
Ichitha ichamonae beta yabara nanta xeina barapo diwesi.
Barapomonae Nacom capanenebiyaena abe pia peexanae cuiru
coyenein tatsi weya. Barapomonae yaputane xua barapo diwesi
bichocono peayapusʉ diwesi xua Nacom weya.
\v 19 Nacom Pejume Diwesitha baxua yabara paeba. Nacom
jeye:
\q “Weraweraca exanaein peyaputae coyenewan, po
\q peyaputae coyenewan xeina pomonae peyaputaewi.
\q Pecuidubi coyenewan beban tsane,
\q po pecuidubi coyenewan xeina
\q pomonae peyaputaewi”, jei Nacom.
\p
\v 20 Pon xua peyaputaein irʉ pon xua pecuidubin, irʉ pon
jume daunweya yabara cueicueijei po nacuathe, barapomonae
Nacom jopa tsita ainya cuichi. Nacom cui capona peyaputae
coyenewan, po peyaputae coyenewan xeina pomonae peyaputae
jiwi barapo cae pin nacuathe.
\v 21 Nacom xainyeya xeina peyaputae coyenewa. Nacom jopa
copatsiyo jiwi xua peyaputaewatsi bapon, peyaputae
coyenewatha po peyaputae coyenewa xeina pomonae jinompa
barapo cae pin nacuathe. Jame Nacom ichichipa xua capanepa
jiwi abe pia peexanae cuiru coyenein weya pejume
cowʉntsixaetsi poxonae pacueicueijan Nacom Pejume Diwesi.
Barapo diwesi ichamonae tsita penamitacueinchi diwesichi.
\v 22 Judiomonae ichichipa tane nawita Nacom pia pexeinya
petsita itʉtsi coyenewan xua pejume cowʉntsinexa tsane
Nacom Pejume Diwesi. Seicaya nama griegomonae yabara jeita
nawita barapo irathe pia peyaputae coyenewan xua pejume
cowʉntsinexa tsane Nacom Pejume Diwesi.
\v 23 Ichitha paxan payabara cueicueijan Mesías pon
naetotha tsitʉpa xua jiwi abe pia peexanae cuiru coyenein
tatsi. Barapo diwesi judiomonae jopa be jume jejeyo poxoru
tsita ajumebetsi. Seicaya nama pomonae jopa judiomonae
naexanaeyo tsita penamitacueinchi diwesichi barapo diwesi.
\v 24 Ichitha pomonae Nacom waba pomonae bara metha bequein
judiomonae tsipae irʉrʉ pomonae metha bequein jopa
judiomonae naexanaeyo tsipae barapomonae jame Jesucristo
jume cowʉntatsi. Barapomonae nanta xeina xua Mesías xeina
Nacom pia peayapusʉ coyenewa tatsi mataʉtano xua Nacom
pia peyaputae coyenewa tatsi xua jiwi pecapanenebiyaenexa
tsainchi.
\v 25 Pocotsiwa jiwi tsita penamitacueinchi diwesichi xua
Nacom exana baxua apara bara jame Nacom bichocono tsita
peyaputae coyenewatsi, beyacaincha po peyaputae coyenewa
jiwi xeina barapo cae pin nacuathe. Mataʉtano pocotsiwa
jiwi jopa tsita peayapusʉtsi xua Nacom xeina baxua apara
bara jame Nacom tsita peayapusʉ coyenewatsi bichocono,
beyacaincha po peayapusʉ coyenewa jiwi xeina barapo cae
pin nacuathe.
\v 26 Tamonae pam, paxam pomonae irʉ painya nejume
cowʉntsiwixae Jesucristo. Paxam bewa pana nacayabara nanta
xeinaem xua eta po jiwi pam xua poxonae Nacom aena paca
waba. Bapoxonae pananta xeiname xua saya paxam caeyobe pam
pomonae peyaputae jiwi pam. Barichi paxam saya caeyobe pam
pomonae peayapusʉya itorobi jiwi pam. Mataʉtano paxam
saya caeyobe pam pomonae peainya cui jiwi pam.
\v 27 Nacom itapeta pomonae xua ichamonae yabara jeichi:
“Barapomonae apara pomonae jopa peyaputae jiwi”, jei.
Ichitha barapomonae Nacom pia peitapetsiwixae barapomonae
aura exana pomonaetha pomonae abe peyabara paebixaetsi,
pomonae bichocono peyaputaewi. Barapomonae pomonae pia
coutha peyaputaewi penaexanaewixae aura tsane, tsipei
yaputaena xua pomonae Nacom pia peitapetsiwixae tatsi
xaniwaicha barapomonae peyaputaewi. Mataʉtano Nacom
itapeta pomonae xua ichamonae yabara jeichi: “Apara
barapomonae pomonae pejʉntʉ coyene faefaenaewi pejume
cowʉntsiwatha”, jei. Ichitha barapomonae pomonae Nacom
pia peitapetsiwixae barapomonae aura exana pomonaetha
pomonae abe peyabara paebixaetsi pomonae pia coutha
penayabara nanta xeinaewa xua bichocono pexeinaewa
peajʉntʉcoyenesʉwa.
\v 28 Nacom itapeta pomonae barapo cae pin nacuathepiwi
jiwana, pomonae pecui pawi jiwi xua piamonae peexanaenexa.
Barapomonae pomonae ichamonae abe peyabara paebiwichi,
mataʉtano xuano pomonae ichamonae jopa petsita ainya cui
jiwichi. Nacom itapeta pomonae jopa peainya cui jiwi xua
penajume tsita itapeinya xeinaenexa xua Nacom jopa
peitapetsiwa pomonae pia coutha penacayabara nanta xeinaewa
xua peainya cui jiwi.
\v 29 Daxota dapon aibi pon peitacʉpaewatsi xua Nacom
peitabaratha atsaquiya penayabara paebiwa xua peainya cui
jitonxae.
\v 30 Nacom paca exana xua painya neyawa jinompaewa Cristo
Jesús pia peajʉntʉyapusʉwa tatsi. Mataʉtano Nacom naca
exana xua xeinatsi Cristo Jesús pia peyaputae coyenewa
tatsi wayaputaenexa Nacom. Mataʉtano Cristo naca cana
exana xua wajʉntʉ coyene xanepanaewa xua jopa
wanatsicuentsiwa xua abe waexanaexae Nacomtha. Mataʉtano
Cristo naca exana xua watanacuichinexa Nacom, bapon
piamonaexae tatsichi. Nacom naca yantomata xua Jesucristo
naca tsitʉpa naetotha wanaca capanenebiyaenexa abe
waexanae cuiru coyenein weya.
\v 31 Daxota Nacom Pejume Diwesitha paeba jeye: “Jiwi jopa
bewa pia coutha atsaquiya nayabara paebi xua peainya cui
jiwixae. Bʉ jame moya barapo jiwi bewa saya atsaquiya
yabara paebina po coyene Nacom pia peainya cui coyenewa
tatsi pon jiwi Pecanamataxeinaeinchi”, jei Nacom Pejume
Diwesitha.
\c 2
\s Meje xua Cristo petʉpaewa diwesi yabara
\p
\v 1 Tamonae pam, paxam pomonae irʉ painya nejume
cowʉntsiwixae Jesucristo. Patopan painya xantha tapaca
catsipaebinexatsi Nacom pia pexainyei diwesi jume.
Bapoxonae jopa paca tsipaebichi po diwesi ayapube xua
tacueicueijeiwa xua poxonae icha ichi xua paeba pon
peyaputaein bichocono.
\v 2 Poxonae poponan painya xantha, saya meisa Jesucristo
yabara nanta xeinan xua tapaca catsipaebinexatsi.
Mataʉtano yabara tapaca catsipaebinexatsi po coyene
poxonae bapon naetotha tʉpa.
\v 3 Poxonae paxamtha naitʉtan nayabara nanta xeinan xua
neita coxana xua beta tacueicueijeiwa. Mataʉtano tajunuwi
ʉnthʉthʉ deideijan.
\v 4 Poxonae paca tsipaebatsi Nacom Pejume Diwesi jopa paca
tsipaebichi po jumein ayapube xua icha ichi poxonae
cueicueijei pon bichocono peyaputaein. Ichitha seicaya nama
paca tsipaebatsi tana neitorobixae Nacom pia Pejumope
tʉnaxʉ tatsi yawano Nacom pia peayapusʉ itorobi
coyenewathano.
\v 5 Daxota poxonae pajume cowʉntame Jesucristo apara
poxoru jopa painya nejume cowʉntsixae jiwi pia peyaputae
coyenewa. Apara jame poxoru Nacom painya nepaca yawenaexae
pia peayapusʉ itorobi coyenewatha daxota pajume
cowʉntame.
\s Meje yabara xua Nacom naca yaputane exana pia Pejumope
tʉnaxʉtha tatsi
\p
\v 6 Paxan pacueicueijan pomonaetha pomonae bichocono
pejume cowʉntsiwi Nacomtha xua Nacom pia peyaputae
coyenewa tatsi. Nacom pia peyaputae coyenewa tatsi jopa
apara barapo cae pin nacuathe weya ponaeyo. Mataʉtano jopa
apara barapo coyene xua po coyene jopa ponaeyo pomonae
piamonae itorobiya pecanamataxeinaewi weya. Pomonae anoxuae
piamonae itorobiya pecanamataxeinaewi werapaena, yawano
weraweracaena pia peyaputae coyenewan tatsi.
\v 7 Po coyene xua paca tsipaebatsi apara Nacom pia
peyaputae coyenewa tatsi. Barapo coyene caena bayatha Nacom
namicha yawʉn xeina xua jiwi jopa yabara yaputaeyo beya
anoxuae Nacom najume tsita itapeinya xeina. Caena bayatha
pewʉnaeya poxonae Nacom nacua forotsina bapon nanta xeina
xua naca capanepaena. Baxua apara Nacom pia peyaputae
coyenewa tatsi xua matapainya naitʉta.
\v 8 Barapomonae pomonae piamonae itorobiya
pecanamataxeinaewi jopa yabara yaputaeyo Nacom pia
peyaputae coyenewa tatsi. Icha metha barapomonae
yaputaetsipa metha jopa Jesucristo naetotha tʉpa
exanaetsipaetsi, pon jiwi Pecanamataxeinaein, pon pexeinya
peitʉpanae coicha pexeinaein.
\v 9 Nacom Pejume Diwesitha baxua yabara jeye:
\q “Nacom bayatha jiwi tsiwʉnaeta po jiwi
\q peantobewixaetsi pocotsiwan xua bichocono
\q pewʉnaewan xua exana barapo jiwi nexa.
\q Barapocotsiwan jiwi jopa yabara yaputaeyo,
\q mataʉtano jopa yabara jume taeyo.
\q Mataʉtano Nacom tsiwʉnaeta pocotsiwa
\q xua jiwi jopa bapana yabara nanta xeinae
\q jopa juniya pewʉnaexae”, jei Nacom
\q Pejume Diwesitha.
\m
\v 10 Nacom yabara naca yaputane exana baxuan pia Pejumope
tʉnaxʉtha tatsi. Nacom pia Pejumope tʉnaxʉ tatsi daxita
yaputaeya necota pocotsiwa naca yaputane exana, beya yawa
muxunano naca yaputane exana pocotsiwa Nacom namicha yawʉn
xeina.
\p
\v 11 Jiton dapon aibi pon itacʉpatsi xua yaputane ichʉn
pia pejʉntʉ coyene tatsi. Saya jame meisa ichʉn
itacʉpatsi xua pia coutha najʉntʉ coyene yaputane. Bara
jʉta ichi meisa Nacom pia Pejumope tʉnaxʉ tatsi yaputane
xua Nacom pia pejʉntʉ coyenewa tatsi.
\v 12 Nacom jopa naca copatsiyo xua bara wacoutha
wayaputaewa tsane xua be pocotsi coyene Nacom pia penanta
xeinaewa tsane. Apara jame seicaya naca cata pia Pejumope
tʉnaxʉ tatsi, wanaca yaputane exanaenexa xua pocotsiwan
yabara Nacom wanaca catsiwa wanaca antobexae.
\v 13 Waxainchi diwesi cueicueijeichi pomonaetha pomonae
Nacom pejume cowʉntsiwi po coyenetha Nacom pia Pejumope
tʉnaxʉ tatsi naca yaputane exana. Jopa apara barapo
diwesin cueicueijeichi xua saya barapo cae pin nacuathepiwi
pia coyenetha tatsi xua saya ba wacoutha wananta xeinaewa.
Daxota yabara paebatsi pocotsiwan xua Nacom pia Pejumope
tʉnaxʉ tatsi ichichipa paeba pomonaetha pomonae Jesús
pejume cowʉntsiwichixaetsi. Barapomonae yaputane
barapocotsiwan.
\p
\v 14 Nama pon jopa pejume cowʉntsin Jesús jopa yaputaeyo
pocotsiwan wacueicueijeiwa, pocotsiwan Nacom pia Pejumope
tʉnaxʉ tatsi naca yaputane exana. Tsipei bapon tsita
penamitacueinchi jumetsi. Bapon jopa yaputaeyo barapo
diwesin tsipei jopa xeinaeyo Nacom pia Pejumope tʉnaxʉ
tatsi xua peyawenaenexatsi xua peyaputaewanexa.
\v 15 Jame pon pejume cowʉntsin Nacom, bapon yawenatsi
Nacom pia Pejumope tʉnaxʉ tatsi xua yabara peyaputaewa
daxitan. Ichamonae jopa itacʉpaetsi xua bapon peyabara
paebiwatsi xua penatsicuentsiwa xua abe peexanaexae.
\v 16 Nacom Pejume Diwesitha barapo coyene yabara jeye:
“¿Jintam yaputane Nacom pia penanta xeinaewa tatsi xua
pecuidubinexa tsane Nacomtha pon jiwi Pecanamataxeinaein?
Jume apara, apara dapon aibi”, jei Nacom Pejume Diwesitha.
Waxainchi nanta xeinatsi icha be pocotsi coyeneya Cristo
ichi xua penanta xeinaewa.
\c 3
\s Meje xua Pablo yabara paeba pomonae penabarʉ nacuichiwi
Nacom nexa
\p
\v 1 Tamonae pam, paxam pomonae irʉ painya nejume
cowʉntsiwixae Jesucristo. Jopa neitacʉpaeyo xua tapaca
catsipaebiwa tsainchi icha bichocono pajume cowʉntame
Nacomtha icha be pocotsi jiwimonae ichi pomonae bichocono
jume cowʉnta Nacom. Ichitha daxota paca tsipaebatsi tsipei
paxam be barapocotsi jiwimonae pam pomonae jopa bichocono
Nacom yabara yaputaetsi. Paxam paca tsipaebatsi be pexui
pam xua aena pajume cowʉntame Cristo.
\v 2 Pocotsi coyene xua ayapube jopa paca cuidubichi, icha
be coxiwa ichi xua poxonae apata mito pexuyo poxonae
cataunxuae jopa yaputaeyo xua xane pexaewa. Cataunxuae jopa
neitacʉpaeyo xua tapaca cuidubinexatsi po diwesi bichocono
daunwei poxoru awiya jopa payaputaem. Paxam be barapocotsi
pexui pam xua po pexui cataunxuae jopa itacʉpaetsi xua
pewito pexaewa.
\v 3 Paxam cataunxuae painompame icha be ichi poxonae
jinompa pomonae jopa pejume cowʉntsiwi Nacom. Poxonae
paxam nantiya pana nauwa dubenanaebiyame, yawa nantiya pana
naba dubenanaebiyame, painompame icha be ichi xua jinompa
xuano abe exana dubenanaebiya pomonae jopa pejume
cowʉntsiwi Nacom.
\v 4 Ichamonae pomonae paxam jiwana pam, jeye: “Pablo
yabara jume cowʉntan pocotsiwa cuiduba”, jei. Ichʉn
jeye: “Apolos yabara jume cowʉntan pocotsiwa cuiduba”,
jei. Poxonae papaebame baxua bapoxonae bara pajinompame
icha jiwi ichi poxonae jinompa pomonae jopa pejume
cowʉntsiwi Nacom.
\p
\v 5 Daxota paca tsipaebatsi: Xan Pablo jopa taainya cui
jiton, barichirʉ Apolos. Apara paxanbe saya ponbe amanaya
pata tanacuichinbe Nacom. Nacom Apolos pana neitorobabe xua
pata cueicueijeinexabe Nacom Pejume Diwesi. Apolos baxua
pata exanaexaebe daxota pajume cowʉntame Jesucristo pon
jiwi Pecanamataxeinaein.
\v 6 Xan Pablon paca cuidubatsi Nacom Pejume Diwesi. Apolos
xuya equeicha ichawa paca cuiduba Nacom yabara. Ichitha
nama Nacom apara bapon, pon paca yawena xua painya nejume
cocowʉntaponaenexa. Barapo coyene icha be nae ichi xua
peʉbi nae. Ichʉn ʉbanota. Ichʉn mera mata epababapona.
Ichitha nama Nacom, apara bapon, pon exana xua xaniwaicha
xuwa.
\v 7 Ichʉn copiya ʉba irʉ ichʉn xuya mata epababa
meratha. Pon peʉbixae jopa ainya cui jitonyo. Irʉ pon
xuya pemata epababaponaexae meratha, bapon jopa ainya cui
jitonyo. Jame saya meisa Nacom ainya cui, tsipei Nacom
daxita xuwa exana naewan. Daxota Nacom bichocono ainya cui
beyacaincha xua barapo pebinbe. Barichi Apolos irʉ xan
Pablon jopa ainya cui jitonyo panbe. Jame Nacom bichocono
ainya cui beyacaincha paxanbe.
\v 8 Pomonae xua ʉba irʉ pomonae xuya meratha mata
epababapona barapomonae Nacom tsita najʉpatsi. Nacom
pentoma cata barapomonaetha be pocotsi coyeneya xua
barapomonae petanacuichiwa. Pon xua abeya petanacuichixae,
be conotha matoma catsinchi. Pon xua wʉnaeya
petanacuichixae, wʉnaeya matoma catsinchi.
\v 9 Paxan pana nabarʉ yawa tanacuitan Nacom xua pata
cueicueijeiwa Nacom Pejume Diwesi poxonae paca cuidubatsi
xua painya nejume cowʉntsiwa tsane Nacom. Barapocotsi
jʉta coyeneya paexanan poxonae Nacom Pejume Diwesi paca
cuidubatsi icha pebin ichi poxonae ʉba pabitha xua
petanaforotsinexatsi pexaewa. Nacom paca exana xua beta
painya nejume cocowʉntaponaewa bapon xua beya bichocono
painya nejʉntʉ coyene xanepanaewa tsane. Baxua Nacom paca
cana exana, icha be pocotsi jʉta coyeneya ichi poxonae
pebin bomʉxʉ acabapona xua beya poxonae bichocono
pexeinya bo.
\v 10 Nacom necopata xua ponxaein copiya matha tapaca
cayawenaewatsi xua painya nejume cowʉntsinexa bapon. Nama
bapoxonae xuya ichamonae paca cuidubapona Nacom Pejume
Diwesi xua painya nejume cocowʉntaponaenexa. Barapocotsi
jʉta coyeneya exanan poxonae tapaca cayawenaewatsi, icha
pebin ichi pon peyaputaein xua bo peacabiwa poxonae bo
acaba po bo ibo bo. Bapon copiya matha tsicobe nobabareca
po iboton beta petabʉ caumenaewa xua ichamonae tsicobe
nobabarecatsi. Athawetsica xuya ichamonae exanapona. Daxita
pomonae acaba barapo ibo bo bewa beta xanepanaya exanaena
icha jiwi ichi xua poxonae bewa beta taexanaena xua
pocotsiwa taexana Nacom nexa.
\v 11 Poxonae jiton ibo bo acaba bapon copiya beta noba po
iboton xua copiya nanta caumena. Bapoxonae ichʉn bewa icha
iboton beta cuaranobi barapo iboton pecoyoreca xua bo
pexeinya bo petsuncuaenexa. Barapocotsi jʉta coyeneya
ichi, poxonae paca cuidubatsi Jesucristo pejume diwesi.
Ichʉn bewa beta yabara paca cuidubina icha coyene xua
baxua painya nejume cowʉntsinexa.
\v 12 Po pebin ibo bo acaba barapo pebin itacʉpatsi xua
jebabapona ichawa barapo ibotontha, po ibotontha copiya
nanta caumena. Pocotsiwan bapon itacʉpatsi xua jebabapona
bichocono ayapusʉ be pocotsiwa pewʉn oro nain, yawano
pocotsiwa xua pewʉn plata nain yawa pocotsiwa be iboton po
iboton xua bichocono ainya matoma. Ichacuitha barapo pebin
itacʉpatsi xua barapo ibotontha jebabapona pocotsiwan xua
pepawi be naepawa, yawa be naepanaewan yawa be musuriboton.
Bara jʉta ichi, pebin itacʉpatsi xua yawenaena
ichamonaetha. Ichacuitha beta cuidubina pomonae xua jume
cowʉnta Jesucristotha pocotsiwa xua bichocono ayapusʉ.
Ichacuitha cuidubina pocotsiwa xua pepawi pomonae xua jume
cowʉnta Jesucristotha xua jopa ayapusʉyo.
\v 13 Jopaena matacabi po mataqueitha Nacom yabara paebina
jiwi xua penatsicuentsiwa xua abe peexanaexae. Barapo
mataqueitha Nacom taena po coyene xua jiwi taexana Nacom.
Nacom bichocono tsita xanepanatsi pocotsiwa xua bichocono
ayapusʉ po coyenein jiwi taexana bapon nexa. Ichitha nama
Nacom naitemata po coyene jopa tsita xanepanaetsi xua
pocotsiwa bequein jiwi taexana bapon nexa.
\v 14 Icha pebin exana pocotsiwa xua bichocono ayapusʉ xua
Nacom nexa, Nacom matoma catsina bapontha.
\v 15 Ichitha icha ichʉn taexana Nacom pocotsiwa Nacom
jopa tsita xanepanaetsi, daxita barapo coyenein Nacom
naitemata po coyene bequein bapon Nacom taexanatsi. Ichitha
bapon capanepatsi poxonae Nacom naitemata po coyene bapon
exana, icha pebin ichichi xua capanepatsi isoto weya
bequein daxita tataxotsi xua pocotsiwa xeina.
\p
\v 16 Barapara paxam payaputaneme xua painya jʉntʉ coyene
Nacom tsitatsi xua bara be Nacom pin pia bo tatsi tsipei
Nacom pia Pejumope tʉnaxʉ tatsi popona painya jʉntʉ
coyenetha.
\v 17 Icha ichʉn saraboba Nacom pin pia bo, Nacom xuya
weraweraca exanaena barapo jitontha. Nacom pin pia bo
tatsi, bara po bo Nacom tsita xanepanatsi poxoru pia
Pejumope tʉnaxʉ tatsi pepoponaexae barapo botha. Icha
Nacom ichi xua weraweraca cana exana pontha pon
petasarabobixaetsi pin pia bo tatsi, barichi xuya Nacom
weraweraca cana exanaena pontha pon paca jʉntʉ coyene
itoroba xua abe painya neexanaewa tsane. Nacom baxua exana
tsipei Nacom pia Pejumope tʉnaxʉ tatsi popona painya
jʉntʉ coyenetha.
\p
\v 18 Jopa pacopatsinde xua painya coutha pana
namuxuitorobame. Icha ichʉn pia coutha nacayabara nanta
xeina xua bichocono peyaputaein icha barapo cae pin
nacuathepiwi ichi, bewa bapon pia coutha equeicha caewa
naexanae be pocotsin jopa peyaputaein. Bapoxonae bapon bara
Nacom tsita be pon pepa peyaputaeinchi.
\v 19 Nacom tsita penamitacueinchi jumetsi po peyaputae
coyenewan yaputane jiwi pomonae barapo cae pin nacuathe
jinompa. Nacom Pejume Diwesitha barapo jiwi yabara jeichi:
“Nacom tsitatsi xua apara xeina penatsicuentsiwa xua abe
peexanaexae pocotsi jiton peyaputaein, peexanaexae
barompaya pia peyaputae coyenewatha”, jei Nacom Pejume
Diwesitha.
\v 20 Mataʉtano Nacom Pejume Diwesitha baxua yabara jeino:
“Nacom yaputane po coyenein nanta xeina pomonae
peyaputaewi. Barapocotsi coyenein Nacom tsita
penamitacueinchi jumetsi”, jei Nacom Pejume Diwesitha.
\v 21 Pomonae pejume cowʉntsiwi Jesucristo jopa bewa
atsaquiya pana neyabara paebi tsane xua pejeiwa: “Pon jume
cowʉntan pocotsiwa cuiduba bapon bichocono peyaputaein
beyacaincha ichʉn pon peyaputaein”, xua pata taneyabara
jeiwa pomonae pejume cowʉntsiwi. Tsipei paxan pomonae
pecuidubiwi pan saya pebiwi pan xua jopa bichocono
peyaputaewi pan. Dapocotsiwa aibi xua pocotsiwa
payaweraweracame xua jopa paxeinaem. Daxita pomonae painya
nepaca cuidubiwi, irʉno daxita coyenein pocotsiwa Nacom
forota, bara Nacom exana paxam nexa painya nepaca
cayawenaewa tsane.
\v 22 Xan Pablon Nacom neitoroba, irʉ Apolos itorobatsi,
irʉ Pedro itorobatsi xua pata paca cayawenaenexatsi. Nacom
paca cata daxita xua barapo ira piawan, xua painya nepaca
yawenaenexa. Mataʉtano yabara paca yaputane exana xua
peajʉntʉyapusʉwa, po coyenewano petʉpae coyenewa,
mataʉtano po coyene anoxuae piawa yabara, po coyenewano
bexa piawa yabara xua painya nepaca yawenaenexa.
\v 23 Baraxuan daxita paxeiname Cristo piamonae jiwi tatsi
pamxaem. Barichi Cristo barapara Nacom Pexanto tatsi.
\c 4
\s Meje xua Jesucristo pia peitorobi jiwi tatsi taexana,
Nacom taexanatsi
\p
\v 1 Paxam bewa pana neyabara nanta xeinaename xua paxan
meisa saya barapomonae pan xua pomonae Cristo amanaya pata
tanacuichi jiwi pan. Paxan yabara pacuiduban Nacom moya pia
peyawʉn xeinaewa tatsi po coyene copiya bequein bayatha
moya yawʉn xeina xua jiwi jopa yabara yaputaeyo. Barapo
coyene xua moya peyawʉn xeinaewa, anoxuae Nacom najume
yabara copata xua jiwi bara peyaputaenexa.
\v 2 Pon tanacuita pia pecanamataxeinaeinchi, barapon bewa
bara xaniwaicha exanaena pocotsiwa pia
pecanamataxeinaeinchi tsipaeba xua bepa exanaena pinae xua
daxota pejume cowʉntsinexatsi pia pecanamataxeinaeinchi
xua bara xaniwaicha exana.
\v 3 Jopa netsita ainya cuiyo xua paxam tapaneyabara
paebiwam xua tacuidubiwa yabara xua icha metha bara exanan
pocotsiwa Nacom neitoroba. Mataʉtano jopa netsita ainya
cuiyo xua jiwi taneyabara paebiwa xua barapo coyene xua
icha metha bara exanan. Barichi tacoutha jopa nayabara
nanta xeinaeinyo xua icha metha barapo coyene jopa
exanaeinyo, xua daxota tanatsicuentsixae abe taexanaexae
Nacomtha.
\v 4 Tajʉntʉ coyene netsipaeba xua bara pinae xanepanaya
taexanaewa. Bequein tajʉntʉ coyene baxua netsipaeba
ichitha jopa nayaputaeinyo xua metha apara abe taexanaewa
xua daxota Nacom tsita natsicuentan. Nacom pon jiwi
Pecanamataxeinaein bapon apara pon taneyabara paebin xua
tanatsicuentsiwa xua abe taexanaexae. Bapon meisa nejʉntʉ
coyene yaputane icha bara metha tsita xeinan xua
tanatsicuentsiwa xua abe taexanaexae.
\v 5 Jopa bepijawa payabara paebinde ichamonae xua abe pia
peexanaewa. Abʉ tsane beya poxonae patopaetsica pon jiwi
Pecanamataxeinaein bapoxonae payabara paebiname abe pia
peexanaewa. Barapon Nacom tsita itʉtsina po coyene xua
jiwi pia pejʉntʉ coyenewatha namicha xeina po coyene xua
ichamonae jopa taeyo. Bapon Nacom pon jiwi
Pecanamataxeinaein itʉtsina po coyenein jiwi namicha xeina
pejʉntʉ coyeneintha xua penatsicuentsiwan po coyenein xua
Nacom petsita exanaewatsi. Daxita barompaya jiwitha Nacom
yabara paebina po coyene pia petaexanaewichi. Pontha pon
xanepanaya petanacuitsinchi Nacom wʉnae jainchina
bapontha. Nacom jopa wʉnae jainti tsane pon jopa
xanepanaya petanacuitinchi.
\p
\v 6 Tamonae pam, paxam pomonae irʉ painya nejume
cowʉntsiwixae Jesucristo. Yabara paca tsipaebatsi barapo
coyenein po coyenein paexanan, xanepanaya painya
nejinompaenexa. Barichi paca tsipaebatsi Apolos yabara irʉ
xua xan yabara painya nenacuidubinexam pocotsiwa paexanan.
Bapoxonae painya neexanaewa tsane icha paichin poxonae xua
paexanan. Pajinompa dubenanaebiyama icha be pocotsi
coyeneya Nacom Pejume Diwesitha paeba. Jopa painya neexana
dubenanaebiyaenexa pocotsiwa jopa paebiyo Nacom Pejume
Diwesitha. Painya xoba atsaquiya pacayabara nanta xeiname
ponbe Nacom petanacuichinchibe, xua ichʉn bichocono
peainya cui jiton beyacaincha ichʉn.
\v 7 Nacom jopa paca exanaeyo xua peainya cui jiwi pam
beyacaincha xua ichamonae pomonae irʉ pejume cowʉntsiwi
Nacom. Pocotsiwa paxeiname jopa apara pana nacatsim painya
coutha barapocotsiwa. Apara jame daxita baxuan paxeiname
pocotsiwa Nacom paca catsiba. Daxota jopa bewa atsaquiya
pana nayabara paebim painya coutha. Poxonae baxua papaebame
apara pajʉntemainame pocotsiwa xua Nacom painya nepaca
catsibiwa daxita.
\p
\v 8 Itara mexeya daxita painya nexeinae jiwi pam po
coyenein xua paichichipame painya neyaputaewa Nacom yabara
daichitha jopa barapomonae pam. Pananta xeiname icha
pomonae copei pexeinaewi ichi irʉ icha ichi pomonae jiwi
itorobiya pia pepa peewatsiwichi xua xeina daxita xua
ichichipa yawa daxita xua xuan pocotsiwa
pecanantawenonaewa. Paxan jopa nama bara paichinyo. Maisa
anoxuae bequein pana ita cui jicha xua yatsicaewa paxam
pomonae painya neyaputae jiwi pam daxita xua Nacom Pejume
Diwesi yabara xua bapoxonae pata tana nebarʉ yaputaewam
tsane daxita Nacom Pejume Diwesi.
\v 9 Paxan Jesucristo pia peitorobi jiwi tatsi pan. Xan
nanta xeinan xua Nacom bara be copata pata tana cana
exanaewa xua jiwi pata tana necui caponaewa xua poxoru
imoxoyo pata werapaewa tsane. Paxan be pocotsi jiwimonae
pecui pawi jiwimonae pan xua daxota daxita nacuanpiwi irʉ
matatsunpiwi pana ichichi xeica.
\v 10 Jiwi pana neyabara nanta xeina xua paxan pata
nemuxuxenae jiwi pan, yaitama paxan Cristo payabara
cueicueijan. Jaina maisa paxam jiwi paca yabara nanta xeina
xua paxam beta yabara painya neyaputae jiwi pam Cristo.
Paxan nama jopa pana daichibenaeinyo. Paxan jiwi pana
yabara nanta xeina xua pajʉntʉ coyene faefaenabenan.
Jaina nama pana nayabara nanta xeiname xua pajʉntʉ coyene
daunwam Nacomtha. Jaina maisa jiwi paca barʉ cui itura
jina, jopa pana daichibenaeinyo. Nama atsaquiya abeya pana
yabara paeba.
\v 11 Caena bayatha beya anoxuae, paxan bichocono
pajainpan. Mataʉtano pameratsipanno bichocono. Mataʉtano
painta paparuwan bichocono jonopa. Jiwi pana neba
bichocono. Yawano jopa bo paxeinaeinyo.
\v 12 Pana nacobe fifinatontan, patain pata nacuichixae
bichocono. Bequein jiwi tsʉmʉ jumetha pana casebeiba
daichitha barapomonae Nacomtha patawʉqueiban xua
barapomonae peyawenaenexa tsaibi tsainchi. Poxonae jiwi
pana atene exaneiba bara saya pacui copatan.
\v 13 Bara bequein jiwi abeya pana neyabara paebeiba
ichamonaetha, daichitha baxua jopa pajume naitaewatsinyo.
Saya jame xanepanaya patsipaeban barapomonaetha. Jiwi pana
neyabara nanta xeina xua pinae peabe jiwi pan. Barapo jiwi
pana itaweta icha be poxonae jiton ichi poxonae piawa
basuratha xuba. Baxua jiwi painta exanapona beya anoxuae.
\p
\v 14 Jopa baxua pacata tinaetsi xua paca aura exanatsi.
Jame pacata tinatsi xua pata cayawenaenexatsi xua painya
neexanaenexa pocotsiwa bewa paexanaename. Paxam be tapexui
pam, tsipei bichocono paca antobetsi.
\v 15 Bequein icha bara metha paxeinaetsipame diez mil
poyobe pomonae painya cacuidubi jiwi po coyene xua Cristo
yabara, ichitha saya pacata compa pon be painya axa
natsicotane. Saya meisa xan compan copiyan pon be painya
axa tapacata natsicotaeinchi, tsipei paxam copiya Cristo
Jesús pajume cowʉntame poxonae paca cuidubatsi Nacom
Pejume Diwesi.
\v 16 Daxota bichocono paca muxu jeichi, paexanaponde icha
xan ichin xua exanaponan.
\p
\v 17 Daxota pacata itorobatsi Timoteo pon bichocono
antobein. Bapon bara be taxanto, tsipei yawenan xua pejume
cowʉntsiwa Jesucristo pon jiwi Pecanamataxeinaein. Bapon
exaneiba pocotsiwa itorobeiban. Bapon Timoteo paca
tsipaebina xua tana neyabara paebiwa tsane po coyene xua
xanepanaya tapoponaewa tajume cowʉntsixae Cristo Jesús.
Barapo coyenein cuidubeiban ichaxota poneiban daxita i
dapocotsi penacaetutsi bon jiwitha pomonae Nacom pejume
cowʉntsiwichi.
\v 18 Ichamonae pomonae paxam jiwana pam, bichocono jʉntʉ
coyene yʉcatsi xua ichamonae peaebiwatsi. Baxua exana
tsipei barapomonae nanta xeina xua xan jopa tapaca siwa
ponaewa tsainchi.
\v 19 Icha Nacom pon jiwi Pecanamataxeinaein copatsina xua
bara taponaewa tsane aunxuae paca siwa ponaeinchi.
Bapoxonae taein pomonae xua ichamonae peaebiwichi icha
metha barapomonae xeina Nacom pia peayapusʉ itorobi
coyenewa tatsi. Ichacuitha metha tsipae apara metha saya
paeba.
\v 20 Jiwi jopa patsi tsane Nacom pia peitorobi nacua
beicha xua poxoru wʉnae pepaebixae tsane pia coutha. Apara
jame jiwi patsina bara beicha pexeinaexae Nacom pia
peayapusʉ itorobi coyenewa tatsi.
\v 21 ¿Eta xua painyatsi? ¿Paca tsicapatinchi naewan xua
xota paca beinchi? Jume apara. Ichacuitha metha tsipae
¿paichichipame xua tapaca casiwa ponaewatsi tapaca
caantobexaetsi? ¿Mataʉtano beta pacata exanaeinchi xua
jopa taanaepanaexae? Aa jame baxua.
\c 5
\s Meje xua poxonae Pablo itaweta pon penowa tsiperʉ
nacoyoba
\p
\v 1 Ichʉn netsipaeba xua pinae caein pon paxam jiwana pam
pinae bichocono abe exana. Pinae bapon penowa tsiperʉ
nacoyoba powa paxa tatsi bayatha barʉ popona. Barapo
peexanae coyenewa bichocono abe. Pomonae bequein jopa
peyabara yaputaewa Nacom barapo coyene jopa copatsiyo xua
jiwi peexanaewa tsane baxua.
\v 2 Paxam pomonae painya nenanta xeinae jiwi pam xua
peainya cui jiwi pam xua daxota jopa panantawenonaem xua
painya neitawetsiwa bapon. Jame bewa baxua payabara jʉntʉ
coyene wecoyam. Pon painya xantha pita penowa powa paxa
tatsi xeina bewa patorotsim painya xainya weya.
\v 3 Bequein jopa yatsicaewa paca barʉ ecaetsi ichitha
paca yabara nanta xeineibatsi be poxonae paca barʉ ecatsi
yatsicaewa. Bara bapon yabara paeban xua penatsicuentsiwa
xua abe peexanaexae tsipei yabara paeban Jesucristo pia
peayapusʉ itorobi coyenewatha tatsi, pon
Wanacanamataxeinaein. Baxua exanan icha be poxonae
yatsicaewa tapaca barʉ ecaewatsi.
\v 4 Poxonae panacaetutame daxita pam, pomonae painya
nejume cowʉntsi jiwi Jesús, paca yabara nanta
xeineibinchi icha be poxonae tapaca barʉ ecaewatsi
yatsicaewa. Mataʉtano Jesús pon jiwi Pecanamataxeinaein
pia peitorobiwa tatsi xua peayapusʉwa tatsi paxeina
dubenanaebiyama.
\v 5 Pon xua awiya abe exanapona barapo jiton bara pacopare
Satanastha pon caurimonae pia pentacaponaeintha tatsi.
Bapoxonae barapo caurimonae pia pentacaponaein tatsi atene
cana exanaena bapontha xua saya pia pepontha tatsi poxoru
barapo jiton ichichipa xua abe peexanaewa. Bapoxonae barapo
pebin equeicha jume cowʉntsina Nacom po pebin copiya abe
peexanaexae. Pia pejumope tʉnaxʉ tatsi Nacom capanepaena
po mataqueitha poxonae Jesús patopeicaena, pon jiwi
Pecanamataxeinaein.
\p
\v 6 Paxam jopa bewa atsaquiya pajinompaem xua poxoru
pocotsiwa painya neexana dubenanaebiyaexae. Icha caein
payabara cui copatame xua bara abe exanapona painya xantha
pon abe peexanaein bequein xua saya conotha exana,
bapoxonae pinmonae painyamonae abe exanapona. Bara paxam
payaputaneme pocotsi diwesiyo ba jiwi yabara canaʉta
jʉtsiya paeba baxua yabara xua pejeiwa: “Levadura
matawʉn xoyo bequein peyauyo baxoyo daxita pantha cotowa
exana”, xua pejeiwa.
\v 7 Painya xainya weya patorore pon abe peexanaein abe
peexanaeyainwa daxita painyamonae xua icha bapon ichi xua
abe exana. Barapo coyene icha be ichi poxonae jiwi levadura
bebai, po levadura peru levadura abe peexanaeyainwa pan
matabʉtha. Poxonae bapo pebin patorotame bapoxonae
painyamonae pomonae pejume cowʉntsiwi xanepanaya
jinompaena. Caena bayatha judiomonae juteba oveja xua
poxonae pewʉnaeya tsane poxonae Egipto nacua weya pona.
Bapoxonae Nacom yabara jʉntemaina judiomonae abe pia
peexanae cuiru coyenein tatsi poxonae cordero bexotsi xua
oveja pebto penʉn. Nacom tsitatsi xua Cristo bara be
cordero poxonae tʉpa naetotha. Cristo naca tsitʉpa xua
abe waexanae cuiru coyenein icha cordero ichi xua tsitʉpa
xua judiomonae abe pia peexanae cuiru coyenein tatsi.
\v 8 Waxainchi jopa bewa peabe coyenewa exanaetsi. Jame
bewa xaniwaicha jʉntʉ coyene xanepanaya jinompa
dubenanaebiyaetsi Jesucristo pia pejume
cowʉntsiwichixaetsi.
\p
\v 9 Icha cartatha paca tsipaebatsi xua jopa bewa
painyamonae jiwi pacana exanaem pomonae pesi cui weiweinae
jiwi xua bequein jopa piseuri jiwi.
\v 10 Barapomonae pomonae pesi cui weiweinae jiwi pomonae
jopa pejume cowʉntsiwi Jesús apara jopa paca tsipaebichi
barapomonae yabara. Pomonae jimʉn jiwi xua ichichipa copei
xeinaewi naexana xua beyacaincha ichamonae pomonae jopa
pejume cowʉntsiwi Jesús apara jopa paca tsipaebichi
barapomonae yabara. Pomonae jopa pejume cowʉntsiwi
Jesucristo pomonae pecaibi jiwi apara jopa paca tsipaebichi
barapomonae yabara. Pomonae ibo nacomʉn wʉnae pejainchiwi
apara jopa paca tsipaebichi barapomonae yabara. Barapomonae
pexainya weya painya newarapaenexa maisa jame bewa
pawarapaem barapo cae pin nacua weya, xua ichaxota po nacua
jiwaibi beya xua bara beya painya newarapaenexa.
\v 11 Pocotsiwa aunxuae paca tsipaebatsi baraxua icha
cartatha bayatha pacata tinatsi. Jan: “Jopa bewa payawa
muxuna jinompaem pomonae abe peexanae jiwi bequein paeba
xua pinae jume cowʉnta Jesucristo. Barapomonae jopa bewa
payawa muxuna jinompaem pomonae pesi cui weiweinae jiwi,
irʉno pomonae jimʉn jiwi xua ichichipa copei xeinaewi
naexana beyacaincha xua ichamonae irʉno pomonae ibo
nacomʉn wʉnae pejainchiwi, irʉno pomonae nacʉpa
penaexanaewi, irʉno pomonae jiwi pebiataewi, irʉno
pomonae pecaibi jiwi daxita barapomonae jopa bewa pabarʉ
xaem bequein paca wabitha tsipaeno xua painya nenanabanaewa
tsane”, jan.
\v 12 Xan jopa neitacʉpaeyo xua jiwi tayabara paebiwa xua
penatsicuentsiwa Nacomtha xua abe peexanaexae pomonae jopa
jume cowʉntsiyo.
\v 13 Jame apara meisa Nacom yabara paeba xua
penatsicuentsiwa xua abe peexanaexae pomonae jopa Nacom
pejume cowʉntsiwichi. Ichitha bewa payabara paebim xua
penatsicuentsiwa pomonae penacaetutsi jiwi pomonae pejume
cowʉntsiwixae xua abe peexaneibixae poxonae. Daxota bewa
paxam patorotsim pon abe exana painya xantha pon penowa
tsiperʉ wenacoyoba xua awiya barʉ jijinapona.
\c 6
\s Meje yabara pomonae pejume cowʉntsiwi Jesucristo xua
peponaewa pontha pon jiwi yabara paeba xua penatsicuentsiwa
xua abe peexanaexae
\p
\v 1 Poxonae ichamonae pomonae pejume cowʉntsiwi jiwana
pacata abe exana painya xoba paponame ichaxota eca pon jiwi
yabara paeba xua penatsicuentsiwa xua abe peexanaexae.
Jamaisa baxua paexaname xua pawʉcame pon jopa pejume
cowʉntsin pon jiwi yabara paeba xua penatsicuentsiwa xua
bapon peitawetsinexa pomonae abe peexanaewi. Bapoxonae
painya pia bapon paca tsipaebichi xua barapomonae paca
tsita natsicuenta xua abe peexanaexae. Jame bewa
paponaename ichaxota nacaetuta pomonae pejume cowʉntsiwi
Jesucristo. Bapoxonae barapomonae yabara paebina pomonae
xua penatsicuentsiwi xua abe peexanaexae paxamtha.
\v 2 Paxam payaputaneme xua pomonae pejume cowʉntsiwi
Jesucristo, barapomonae yabara paebina pomonae xua
penatsicuentsiwi xua abe peexanaexae pomonaetha pomonae
barapo nacuathepiwi. Barichi bexa tsane poxonae Cristo
patopeicaena payabara paebiname pomonae barapo nacuathepiwi
xua penatsicuentsiwa xua abe peexanaexae. Daxota anoxuae
bewa paexanaem xua payabara paebiname xua penatsicuentsiwa
xua bequein bara conotha abe peexanaexae pomonaetha pomonae
pejume cowʉntsiwi Jesucristo po coyenein bara bequein
bichocono jopa abeyo.
\v 3 Waxainchi yaputainchi xua bexa tsane wayabara paebiwa
matatsunpiwi penatsicuentsiwa xua abe peexanaexae Nacomtha.
Baxua exanaeinchi poxonae Cristo patopeicaena. Daxota
anoxuae paca itacʉpa xua painya neyabara paebiwa xua
penatsicuentsiwa xua abe painya nepaca tsita exanaexae
pomonaetha pomonae pejume cowʉntsiwi xua wajinompaewa
yabara barapo cae pin nacuathe.
\v 4 Icha paxeiname po coyenein xua abe pacata exana
pomonae irʉrʉ pejume cowʉntsiwi, jopa bewa paponaem
ichaxota pon jiwi peyabara paebin jiwi xua penatsicuentsiwa
xua abe peexanaexae pon jopa pejume cowʉntsin.
\v 5 Baxua paca tsipaebatsi xua painya neauramnexa tsane.
Pon ba peyaputaein bapon ba itacʉpatsi xua jiwi peyabara
paebiwa pomonaetha pomonae xua penatsicuentsiwa xua abe
peexanaexae, xua ichamonaetha abe peexanaexae pomonaetha
pomonae irʉ pejume cowʉntsiwixae Jesucristo. Ichitha
poxonae paponame ichʉntha pontha pon jiwi peyabara paebin
xua penatsicuentsiwa xua abe peexanaexae, pon jopa pejume
cowʉntsin, apara jopa xapain paexanaem. ¿Metha bara
painyamonae jiwanapin dapocotsin yatsicaewa aibi jampa pon
jiwi peyabara paebin xua penatsicuentsiwa xua abe
peexanaexae jampa?
\v 6 Ponbe paxam jiwana pam, ponbe pejume cowʉntsinbe
Jesucristo, baponbe nababe. Ichʉn xua baponbe jiwana pona
ichaxota pon jiwi peyabara paebin pon jopa pejume
cowʉntsin, xua peyabara paebinexatsi pon abe peexanaexae
ichʉntha.
\p
\v 7 Poxonae paxeineibame po coyenein xua pana nabeibame
xua daxota paponeibame pontha pon jiwi peyabara paebin
baxua abe paexaname. Poxonae ichamonae abe pacata exana
saya bara pacui yabara copabare. Jame baxua pacata
xanepana. Bapoxonae jopa painya nenantawenonaewa xua painya
neponaewa pontha pon jiwi peyabara paebin xua
penatsicuentsiwa xua abe peexanaexae. Barichino poxonae
ichamonae paca caiba saya bara pacopare xua jopa abe painya
neexanaenexa tsane bapomonaetha.
\v 8 Payopitame xua pinae painyamonae pacata abe exana,
yawa xua pinae paca caiba. Ichitha apara paxam bara paichim
abe paexaname, xua poxonae paponame pomonaetha pomonae jopa
pejume cowʉntsiwi xua peyabara paebinexatsi pomonae abe
pacata exana.
\p
\v 9-10 Paxam payaputaneme xua pomonae abe peexanaewi jopa
patsi tsane Nacom pia peitorobi nacua beicha. Painya xoba
pana nayabara cui copatame xua painya coutha painya
nenamuxuitorobiwa barapo coyene yabara xua daxota pananta
xeiname xua barapomonae apara patsina Nacom pia nacua
beicha. Pomonae jopa patsi tsane Nacom pia peitorobi nacua
beya xua peexanaexae po coyenein xuaje: Pomonae pesi cui
weiweinae jiwi, pomonae wʉnae pejainchiwi ibo nacomʉn,
irʉ pomonae penotsiwi yabʉxi powaxi bara bequein pia
pebiwi xeina, irʉ po pebiwi cae pebiwi penaisa maichiwi,
irʉ pomonae pecaibi jiwi, irʉ pomonae jimʉn jiwi xua
ichichipa copei xeinaewi naexana beyacaincha xua ichamonae,
irʉrʉ pomonae nacʉpa penaexanaewi, peatsaxa meran,
irʉno pomonae jiwi pebiataewi, irʉno pomonae peyabara
muxuitorobi jiwi pecaibinexa.
\v 11 Copiyatha paxam be barapocotsi jiwimonae pam xua
poxonae matha aena pajume cowʉntame xua abe painya
neexanae jiwi pam. Daichitha Nacom paca yabara jʉntemaina
abe painya neexanae cuiru coyenein. Mataʉtano Nacom paca
yabara caunuta jeye: “Tapexuimonae jiwi”, paca yabara
jei. Mataʉtano Nacom jopa painya tsita natsicuentsiwa xua
abe painya neexanaexae. Nacom pia Pejumope tʉnaxʉ tatsi
irʉ Jesucristo pacata exana baxua xua poxonae pajume
cowʉntame Jesucristo pon jiwi Pecanamataxeinaein.
\s Meje xua Pablo jei: “Wapepon Nacom piawa”, jei
\p
\v 12 Jiwi ba jeye: “Xan necopata xua bara taexanaewanexa
pocotsiwa xua ichichipan”, jei. Bara bequein xainyei jiwi
xua pepaebiwa, ichitha ichacuitha barapo jiwi jopa xapain
pia coutha nata exanaetsipae. Bequein barichin bequein
necopata xua bara daxita taexanaewa, daichitha ichacuitha
jopa xapain nata exanaeinchipae xua poxonae icha nanta
xeinaetsipan xua jopa neitacʉpaeyo xua bara tana necui
copatsiwa.
\v 13 Bara jiwi ba xainyeya paeba poxonae jeye: “Pexaewa
wʉnae xua pecotsoro nexa, irʉ pecotsoro wʉnae xua
pexaewa nexa”, jei. Ichitha bexa tsane Nacom weraweraca
cana exanaena barapo naxobe jumebe. Nacom apara jopa nacata
exanaeyo wapepon xua wapepon abe wanata exanaewa xua wanasi
cui taetaewa. Wapepon Nacom exana xua pia coutha
natsiexana, xua watanacuichinexa bapon, pon jiwi
Pecanamataxeinaein. Nacom yawena xua wapepon yawenatsi xua
pia wanaca capanepaenexa.
\v 14 Icha Nacom ichi xua asʉ exana petʉpae cuiru coyene
weya pon jiwi Pecanamataxeinaein Jesucristo, Nacom bara
naca ichi tsane, asʉ naca exanaena petʉpae cuiru coyene
weya pia peayapusʉ itorobi coyeneyatha.
\p
\v 15 Paxam Corinto tomarapiwi pam. Payaputaneme xua daxita
carepaya paxam Cristo piamonae jiwana tatsi pam, pomonae
pejʉntʉ coyene xanepanae jiwi. Xan irʉ barapo pejʉntʉ
coyene xanepanae jiwi piamonae jiwanan tatsin. Daxota jopa
benatsiperʉ jayababinyo powaxitha powaxi pesi cui
weiweinaewaxi, tsipei tapepon apara Cristo tatanacuichinexa
bapon.
\v 16 Paxam payaputaneme icha pebin natsiperʉ jayababa
powatha powa penasi cui matacaetsiwa baraponbe bara be
caeinbe naexanabe. Nacom Pejume Diwesitha jeye: “Poxonae
pebin piowa pita bara be caein naexanabe”, jei Nacom
Pejume Diwesitha.
\v 17 Poxonae ichʉn cae jʉntʉ coyene naexana Cristotha
pon jiwi Pecanamataxeinaein, bapon bara apara caein naexana
Cristotha pia pejʉntʉ coyenewatha.
\p
\v 18 Painya xoba paexanaename icha pocotsi coyeneya ichi
xua peexanaewa pomonae pesi cui weiweinaewi. Daxita po
coyenein pebiwi exana xua abe peexanaewa apara jopa pia
coutha abe nacana exanaeyo. Apara jame ichʉntha abe exana.
Saya jame poxonae pebiwi pesi cui weiweinaewi bapoxonae
barapo pebiwi pia coutha abe nacana exana.
\v 19 Paxam payaputaneme xua Nacom pia Pejumope tʉnaxʉ
tatsi paca barʉ jinompa pia paca nacana jumope tʉnaxʉ
catsixae paxamtha. Icha barapo Nacom pia Pejumope tʉnaxʉ
tatsi ichi xua paca barʉ jinompa, barichi barapo Nacom pia
Pejumope tʉnaxʉ tatsi popona Nacom pin pia botha tatsi.
Tsipei anoxuae Nacom piamonaexae tatsi pam, apara paxam
jopa painya coutha painya nenacanamataxeinaewi jiwi pam.
\v 20 Nacom bayatha pacata pematomatsiwa exana xua poxonae
Jesús naetotha painya nepaca tsitʉpaewa xua abe painya
neexana cuiru coyenein. Daxota beta pajume cowʉntsiya
jinompare ichamonae petitʉtha tatsi. Bapoxonae barapomonae
Nacom barʉ cui itura jinatsi xua pon xanepanaya peexanaein
poxonae paca cui tane xua xanepanaya pajinompame.
\c 7
\s Meje xua Pablo yabara muxuweta xua jitha peenaewa yabara
\p
\v 1 Anoxuae paca jume notatsi po peyainyabiwa pana
yainyabame cartatha. Icha pebin jopa jitha beecaeyo bʉ
bara moya jopa jitha ecae tsane, bequein bara baxua
taxanepanatsi bapon.
\v 2 Ichacuitha poxonae pebin jopa jitha ecaeyo besi cui
weiweinaena powatha xua bequein pia pebin xeina. Daxota
pecuiyainwa barapo coyene bapon bewa jitha ecaena, xua
barompaya piowa tatsi. Barichi daxita yabʉxi bewa
barompaya seicaya notsina pia pebiwi.
\v 3 Pebin bewa bara exanaena piowatha xua poxonae peisa
maitecae coyenewa. Barichirʉ yabʉyo bewa bara exanaena
pia pebintha xua poxonae petsicuara maitecae coyenewa.
\v 4 Petsiriwa powa jitha eca, jopa bewa nayabara nanta
xeinae xua penaperʉ xeinaewa xua saya pia coutha nexa.
Jame bewa nanta xeinae xua apara bara pia pebin tatsi pia
perʉto tatsirʉ. Barichi pebin jopa bewa nayabara nanta
xeinae xua penaperʉ xeinaewa xua saya pia coutha nexa.
Jame bewa nanta xeinae xua apara bara piowa tatsi pia
perʉto tatsirʉ.
\v 5 Petsiriwa jopa bewa aichaxaibi tsane xua isa maiteca
pia pebin. Pebin irʉ jopa bewa aichaxaibi tsane xua piowa
peisa maitecaewatsi. Poxonae pebin piowabe eenatsibe
caentacabiyobetha xua Nacomtha wʉcauyabe bapoxonae baponbe
itacʉpatsi xua itompa exanaenabe xua peexanaewa po coyene
penaisa maitecae cui coyenewa. Saya caentacabiyobetha baxua
bewa itompa exanaena po coyene xua penaisa maitecae cui
coyenewa. Jame poxonae po mataqueitha najume wetsina xua
Nacomtha pewʉcaewabe bapoxonae jame bara bewa exanaenabe
equeicha penaisa maitecae cui coyenewa. Baxua bewa
exanaenabe xua jopa pejʉntʉ coyene jʉjʉtsinexa
tsainchibe caurimonae pia pentacaponaein tatsi xua abe
peexanaenexa tsanebe xua naitompa penaexanaexaebe.
\p
\v 6 Saya baxua paca muxuwetatsi apara xua jitha painya
neenaewa xua daxota jopa abe painya neexanaewa tsane. Jopa
apara paca itorobichi daxita pam xua jitha painya neenaewa.
Bara moya jitha ecaena pon ichichipa.
\v 7 Ichichipan xua daxita jiwi jinompa dubenanaebiyaena
icha po coyeneya ichin xua poxonae poponan xua jeinya ecan.
Daichitha Nacom cata daxita jiwitha xua daxita jiwi
barompaya pia cui coyenewan xexeina tsiniya. Po coyenein
xua Nacom cata daxita barompaya jiwitha jopa nacui coyene
jʉpaeyo.
\p
\v 8 Pomonae pemisa dubenaewi pam irʉ powaxi painya
seuriwi painya necacuenta werapaewaxichi pam, daxita
barapomonae pam paca tsipaebatsi. Bara wʉnae tsipae icha
jopa jitha paenaemtsipae icha be xan ichin xua jopa jitha
taecaewa.
\v 9 Ichitha icha jopa paca itacʉpaeyo xua painya nejeinya
enaewa moya bara jitha bewa paenaem. Jame baxua pacata
xanepana xua jitha paename xua daxota jopa painya nesi cui
weiweinaewa.
\p
\v 10 Ichitha pomonae xua bayatha jitha painya neenaewi pam
barapomonae pam paca itorobatsi. Jopa apara taitorobi
coyeneya paca tsipaebichi. Jame apara Nacom taneitorobixae
xua po coyeneya tapaca catsipaebinexatsi. Paca jeichi:
“Yabʉyo jopa bewa cuenta warapaena pia pebin xua
pexubinexa”, paca jeichi.
\v 11 Powa punaxuba pia pebin, barapowa bara misa ecaena.
Jopa pitsi tsane icha pebin equeicha. Metha jame
xanepanaetsipa icha bapowa caewa pichapa pia pebin. Barichi
pebin jopa bewa punaxubi tsane piowa.
\p
\v 12 Anoxuae nama icha coyene paca tsipaebatsi po coyenewa
jopa Nacom neitorobiyo saya xua tacoutha tananta xeinaewa.
Icha pebin pon pejume cowʉntsin xeina piseuri powa jopa
pejume cowʉntsiwayo bapon jopa bewa punaxubi tsane bapowa
icha bapowa ichichipa xua bapon pebarʉ poponaewatsi.
\v 13 Barichi icha yabʉyo powa jume cowʉnta xeina pebin
pon jopa pejume cowʉntsin bapowa jopa bewa punaxubi tsane
icha bapon ichichipa xua bapowa pebarʉ poponaewatsi.
\v 14 Po pebin bequein jopa jume cowʉntsiyo, Nacom
tsitatsi xua po coyene barapon penacoyobiwa bara xanepana,
tsipei bapon piowa xeina powa pejume cowʉntsiwayo. Barichi
powa jopa bequein pejume cowʉntsiwayo, Nacom tsitatsi xua
po coyene barapowa jitha peecaewa bara xanepana, tsipei
bapowa xeina pia pebin pon pejume cowʉntsin. Icha Nacom
barapocotsi coyeneya jopa exanaetsipae nexata painya pexui
be pomonae jopa Nacom pejume cowʉntsiwi pia pexui tatsi
tsipae. Ichitha poxoru barapo coyene painya netsita
xeinaexae Nacom daxota Nacom yawa muxuna tsitatsi xua
barapo painya pexui barapoxi jʉntʉ coyene xanepanena.
\v 15 Ichacuitha pebin pon jopa pejume cowʉntsin ichichipa
punaxuba piowa powa pejume cowʉntsiwayo. Bapoxonae bapowa
bara copata xua pepunaxubiwatsi pia pebin. Barichi
ichacuitha yabʉyo powa jopa pejume cowʉntsiwayo ichichipa
punaxuba pia pebin pon pejume cowʉntsin. Bapoxonae bapon
bʉ bara copata xua pepunaxubiwatsi pia petsiriwa. Nacom
copata barapomonae jopa pejume cowʉntsiwixaetsi xua
piseuriwi pepunapentsiwa tsipei ichichipa xua jʉntemiya
wanabarʉ jinompaewa tsane saya.
\v 16 Yabʉyom icha ewatsiwatham tsipae xua jinya pebin
pejume cowʉntsinexa, daichitha jopa jume cowʉntsipae
Nacom. Barichi pebim icha ewatsiwatham tsipae xua jinseuri
pejume cowʉntsinexa, daichitha jopa jume cowʉntsipae
Nacom.
\p
\v 17 Daxita paxam bewa xanepanaya pajinompaename icha
pocotsi coyeneya Nacom painya nepaca catsixae tsane. Baxua
bewa paexanaename xua po coyene Nacom paca yabara tsiwaba
bara bequein painya seurixi paxeiname ichacuitha bara metha
bequein jopa paxeinaem tsane painya seurixi. Baxuan
cuiduban daxita carepaya penacaetutsi bontha pomonae Nacom
pejume cowʉntsiwichi.
\v 18 Ichacuitha Nacom waba xua pebin wabatsi pejume
cowʉntsinexa tsane. Icha barapo pebin caena bayatha wi
thabatsi bʉ saya barabʉ tsane baxua. Barichi ichacuitha
Nacom waba xua pebin wabatsi pejume cowʉntsinexa tsane.
Barichi icha barapocotsi pebin caena bayatha jopa wi
thabichi bʉ saya barabʉ tsane baxua xua jopa pewi
thabinexatsi.
\v 19 Bapana Nacom jopa tsita ainya cuichi, metha bequein
pebin bayatha wi thabatsi, ichacuitha metha bequein jopa wi
thabichi. Po coyene xua peainya cui coyene xua jiwi bewa
exanaena, jame maisa bewa jiwi jume cowʉntsiya exanaena
pocotsiwa Nacom itoroba.
\v 20 Daxita paxam bewa jʉpa paexana dubenanaebiyaename
icha copiya paichim xua paexana dubenanaebiyame poxonae
copiya aena Nacom paca waba.
\v 21 Poxonae Nacom waba pon paxam jiwana pam xua
poxonaerʉ bapoxonae amanaya tanacuita pia pentacaponaein,
bapon jopa bewa yabara nantʉ exabi baxuan xua pia saya
poponaetsi. Ichitha icha bapon itacʉpatsi xua saya
pepoponaewa bʉ moya saya popona xua jopa
penantawenonaenexa tsane xua amanaya petanacuichiwa ichʉn.
\v 22 Barichi ichacuitha pon bayatha exanatsi xua amanaya
petanacuichinexa ichʉn bapon jume cowʉnta Jesús.
Bapoxonae bapon naexana pon saya pepoponaein pia
pentacaponaein weya, peexanaenexa pocotsiwa Cristo itoroba.
Barichi ichacuitha pon saya pepoponaein xua jopa amanaya
tanacuichiyo ichʉn bapon jume cowʉnta Jesucristo.
Bapoxonae bapon naexana pon Jesús amanaya pia
petanacuitinchi tatsi tsipei exana pocotsiwa Cristo
itoroba.
\v 23 Nacom pin matomatha pacata matomata poxonae Jesús
naetotha paca tsitʉpa abe painya neexanae cuiru coyenein
nexa. Painya xoba pacopatame xua jiwi equeicha caewa painya
nepaca itorobiwa xua abe painya neexanaewa.
\v 24 Tamonae pam daxota paca itorobatsi xua painya nejume
cowʉnta dubenanaebiyaenexa Nacom, icha paichim xua pajume
cowʉnta dubenanaebiyame poxonae copiya Nacom aena paca
waba.
\p
\v 25 Jopa xeinaeinyo po jumetha xua tacueicueijeiwa po
coyenewa xua Nacom pon jiwi Pecanamataxeinaein neyaputane
exana xua pomonae piseuriwi penotsiwi nexa. Saya apara paca
tsipaebatsi po coyeneya xua saya tacoutha tananta xeinaewa.
Ichitha paxam paca itacʉpa xua pata tana nejume
cowʉntsiwam tsipei Nacom necata barapo peyaputae coyenewa
tana neantobexae.
\v 26 Xan tacoya nanta xeinan xuaje: Bara bewa saya jiwi
jeinya enaena. Jopa jitha peenaewa tsane, tsipei anoxuae
barapo dapaetha xeinatsi nawita po coyenein bichocono
nacata ayapube tsounae xua wanapapeichiwatsi.
\v 27 Icha jitha paename painya xoba pana napunapentame.
Barichi icha pajeinya ename painya xoba pasi cui
weiweiname.
\v 28 Icha jitha paename jopa apara bara abe paexanaem.
Irʉ icha yabʉyo jitha eca bapowa apara jopa abe exanaeyo.
Daichitha pomonae jitha peenaewi bichocono taayapubetsi xua
pejinompaewa nexa barapo cae pin nacuathe. Xan ichichipan
paca yawenatsi daxota baxuan yabara paca tsipaebatsi xua
pacata ayapubeyainwa xua jitha painya neenaewaxae tsipae.
\p
\v 29 Tamonae pam, paxam pomonae irʉ painya nejume
cowʉntsiwixae Jesucristo. Po coyenewa xua ichichipan
tapaca tsipaebiwatsi tsainchi xua meje xua janje:
“Waxainchi pin dapae jopa xeinae tsainchi po mataqueitha
poxonae Jesús patopeicaena”, jan. Daxota pomonae jitha
ena bewa jinompa dubenanaebiyae icha be poxonae ichi
poxonae xua jinompa dubenanaebiya pomonae jeinya peenaewi
xua xaniwaicha Nacom daunweya petanacuichiwatsi.
\v 30 Daxita jiwi bewa eenaetsi xua Nacom petanacuita
dubenanaebiyaewatsi. Daxota pomonae anthʉthʉtane xua
pewecoyeixae bʉ barapomonae jinompa icha ichi xua jinompa
pomonae jopa anthʉthʉtaneyo xua jopa pewecoyeixae xua
daunweya penacuichixae Nacom nexa. Barichi pomonae xua
bichocono jʉntʉ coyene weiweina bʉ barapomonae jinompa
icha ichi xua jinompa pomonae jopa jʉntʉ coyene
weiweinaeyo xua daunweya penacuichixae Nacom nexa. Barichi
pomonae xua pecomoca dubenanaebiyaewi bʉ barapomonae
jinompa icha ichi xua jinompa pomonae jopa pecomoca
dubenanaebiyaewi xua daunweya penacuichixae Nacom nexa.
\v 31 Poxonae cataunxuae pajinompame barapo cae pin
nacuathe jopa paichichipa dubenanaebiyaeinde pocotsiwan xua
barapo cae pin nacuathe xeina. Tsipei pocotsiwa barapo cae
pin nacuathe xeina daxita weraweracaena.
\p
\v 32 Ichichipan xua bichocono jopa painya neyabara nanta
xeinaewa pocotsiwa barapo cae pin nacuathe xeina xua paca
jʉntʉ deideijei exana. Po pebin jeinya eca itacʉpatsi
xua penajʉntʉ coyene eena exanaewa xua petaexanaewatsi
Nacom pon jiwi Pecanamataxeinaein. Barapo coyene Nacom
jʉntʉ coyene weiweina exanatsi.
\v 33 Po pebin jitha eca bapon bichocono yabara eenatsi
nawita xua yabara nanta xeina nawita xua po coyeneya
piseuri peewatsiwa xua daxota bapowa piseuri peyabara barʉ
jʉntʉ coyene weiweinaenexa.
\v 34 Barapon barapo naxobe coyenewabe muxuna yawa nanta
xeina. Barichi yabʉxi powaxi jeinya ena irʉrʉ powaxi
jitha ena barompaya tsanaya piawan yabara nanta xeina. Powa
xua bapana jopa jitha ecae bapowa itacʉpatsi xua
penajʉntʉ coyene eena exanaewa xua petaexanaewa po coyene
Nacom ichichipa pon jiwi Pecanamataxeinaein. Barapowa
ichichipa exana xua Nacom pejʉntʉ coyene weiweina
exanaewatsi tsainchi pocotsiwa xua bapowa peexanaewaxae
xuano bapowa pocotsiwa penanta xeinaewaxae. Ichitha nama
powa jitha eca bapowa bichocono yabara eenatsi nawita xua
yabara nanta xeina nawita xua po coyeneya pia piseuri
peewatsinexa xua daxota bapon piseuri peyabara bara jʉntʉ
coyene weiweinaenexa.
\p
\v 35 Baxua paca tsipaebatsi tsipei ichichipan xua tapaca
cayawenaewatsi. Apara jopa paca itorobichi xua jopa painya
nenotsiwa tsane painya seuriwi. Ichichipan xua beta painya
nejinompaewa xua painya netanacuita dubenanaebiyaenexa
Nacom daxita painya jʉntʉ coyeneintha.
\p
\v 36 Pebin irʉ yabʉyo nanta xeinabe xua penapichinexa
tsanebe. Ichitha cataunxuae ewatabe xua penapichiwa
tsanebe. Bapon ichichipa nawita xua pepichiwa bapowa, irʉ
petsiriwa bayatha wei weta. Daxota moya bara bewa
napichinabe. Baxua jopa abeyo po coyene baponbe exanabe.
\v 37 Ichitha icha pebin itacʉpatsi xua jopa
nantawenonaeyo xua pepichinexa pecotsiwa, xuano juntucuru
jopa pichi tsane pecotsiwa, bara jemba tsane icha bapon
pecotsiwa jopa pichi tsane. Bara saya jeinya ecaena.
Bapoxonae bapon bara saya beta exana.
\v 38 Pon pecotsiwa pita beta exana bequein. Ichitha nama
pon jopa jitha ecaeyo bapon jame bichocono beta exana
beyacaincha pon pecotsiwa pita.
\p
\v 39 Petsiriwa powa jitha eca powa pejume cowʉntsiwa bewa
piseuri cuicuinaena poxonae cataunxuae jopa tatʉpaetsi
piseuri. Icha pia pebin tatʉpatsi barapowa itacʉpatsi xua
pichina icha pebin pon saya pejume cowʉntsin.
\v 40 Jame metha bapowa bichocono yatsicaewa jʉntʉ coyene
weiweinaetsipa icha jopa equeicha pichipae icha pebin.
Bapoxonae bapowa bichocono jʉntʉ coyene weiweinaetsipa
beyacaincha poxonae pita icha pebin. Baxua nanta xeinan xua
saya tananta xeinaewa. Mataʉtano irʉrʉ barichin jume
cowʉntan xua Nacom pia Pejumope tʉnaxʉ tatsi tana
nebarʉ poponaewa. Daxota neitacʉpa xua yabara tapaebiwa
barapo coyenein.
\c 8
\s Meje xua Pablo peyabara paebiwa pexaewa po pexaewa jiwi
tajeba ibo nacomʉn
\p
\v 1 Anoxuae ichichipan xua pexaewa yabara tapacata
tinaewatsi po pexaewa jiwi tajeba ibo nacomʉn poxonae jiwi
wʉnae jainteiba ibo nacomʉn. Bequein xainyei xua baxuan
yabara yaputainchi, daichitha barapo peyaputae coyenewan
naca atsaca exana. Ichitha jame po peantobe coyenewa
xeinatsi apara naca yawena xua beta wanabarʉ
jinompaewatsi.
\v 2 Pon xua nanta xeina xua pinae yaputane bichocono bapon
apara taacoibichi pocotsiwa xua bapon bewa yaputaena.
\v 3 Icha ichʉn Nacom antobetsi bara Nacom jʉntʉ coyene
yaputane bapontha.
\p
\v 4 Daxota equeicha pexaewa yabara paca tsipaebatsi, po
pexaewa jiwi tajeba ibo nacomʉn. Barapo pexaewa xuya
ichamonae xane cotacaya. Waxainchi yaputainchi xua ibo
nacomʉn jopa xaniwaicha xeinaeyo peayapusʉwa xua apara
saya jiwi pecobetha forota. Jame nama yaputainchi pepa
Nacom, pon compa.
\v 5 Jiwi jume cowʉnta xua pinae pinmonae jinompa, pomonae
nacomʉn, itabocotha, barapo cae pin nacuatheno. Barichino
xua pinae pentacaponaewi jinompa itabocotha barapo cae pin
nacuatheno.
\v 6 Nama waxainchi yaputainchi xua compa popona Nacom, pon
Waxa. Daxita coyenein Nacom pia xainya werena
tapichipapoinchi, bara bequein daxita baxuan Cristo forota
Waxa nexa. Mataʉtano Nacom naca cana exana pia
watanacuichinexa bapon. Barichi meisa compa popona pon pepa
jiwi Pecanamataxeinaein, bapon Jesucristo. Bapon Jesucristo
daxita forota Nacom nexa. Waxainchi xeinatsi
peajʉntʉcoyenesʉwa, po peajʉntʉcoyenesʉwa xua bapon
naca cata.
\p
\v 7 Ichamonae pomonae pejume cowʉntsiwi Nacom, jopa
yabara yaputaeyo xua ibo nacomʉn. Barapomonae awiya nanta
xeina xua ibo nacom peayapusʉwa xeina bequein anoxuae
barapomonae jume cowʉnta Nacom. Barapomonae bayatha pia
cui xeina xua pexaewa tajebeiba ibo nacomʉn poxonae wʉnae
jainteiba barapo ibo nacomʉn. Barapomonae abetha nanta
xeina jeye: “Icha xaetsipan pewi po pewi ichamonae tajeba
ibo nacomʉn metha neajʉntʉcoyenebe cana exanaetsipa
poxoru barapo pewi ibo nacomʉn piawa”, jei xua abetha
nanta xeina. Bequein barapomonae jume cowʉnta Nacom
ichitha jopa yaputaeyo xua ibo nacomʉn pia pexaewa jopa
itacʉpaetsi xua ajʉntʉcoyenebe cana exanatsi barapomonae
icha jiwana xaetsipa barapo ibo nacomʉn pia pexaewa.
\v 8 Pexaewa jopa naca yawenaeyo xua wanajʉntʉ coyene
xanepana exanaewatsi xua daxota Nacom wanaca weyataewa
tsane. Icha waxainchi nabʉnatsi pexaewa jopa naca
yawenaeyo xua Nacom tsita jʉntʉ coyene xanepanatsi
beyacaincha xua poxonae jopa nabanaetsi. Barichi icha
najainbotatsi baxua jopa naca yawenaeyo xua Nacom tsita
jʉntʉ coyene xanepanatsi beyacaincha xua poxonae
nabʉnatsi.
\v 9 Paca itacʉpa xua paxaneme xua pocotsiwa painya
neichichipaewa. Icha pajiwana xaneme po pexaewa jiwi tajeba
ibo nacomʉn, baxua jopa paca tsita abeyo. Ichitha poxonae
paexaname baxua pomonae ainya ʉnthʉton pexeinaewi, aena
pejume cowʉntsiwixae, barapomonae tsita ayapubetsi. Icha
barapomonae xaena barapo pexaewa painya neexanaewaxae
bequein barapomonae tsitatsi xua abe peexanaewi poxonae
xane barapo ibo nacomʉn pia pexaewa tatsi. Daxota painya
xoba paexaname po coyene painya neichichipaewa.
\v 10 Metha beya paca taetsipa pon pejume cowʉntsin
poxonae panabaname pexaewa po pexaewa jiwi tajebeiba ibo
nacomʉn poxonae wʉnae jainteiba barapo ibo nacomʉn.
Irʉrʉ metha beya tsipae bapon naxaetsipa barapo pexaewa
poxonae bapon paca jain tane. Paxam pomonae painya neyabara
yaputaewi pam barapo pexaewa. Payaputaneme xua barapo
pexaewa apara jopa itacʉpaetsi xua jiwi ajʉntʉcoyenebe
cana exanatsi. Ichitha pomonae ainya ʉnthʉton pexeinaewi
aena pejume cowʉntsiwixae jopa yaputaeyo baxua yabara icha
paxam paichim. Barapomonae awiya nanta xeina jeye: “Icha
barapo pexaewa xaein neajʉntʉcoyenebe exanaena”, jei.
\v 11 Ichacuitha paxaneme barapo pexaewa bequein payabara
yaputaetham xua jopa abe paca cana exanaeyo. Painya
neexanaexae baxua xua paxaneme barapo pexaewa daxota
bichocono abe paexaname pontha pon ainya ʉnthʉton xeina,
pon abetha nanta xeina, jeye: “Icha barapo pexaewa xaein
neajʉntʉ coyenebe exanaena”, jei. Daxota bapon payabara
nanta xeinare xua apara irʉ Cristo tsitʉpa bapon icha
ichi xua paca tsitʉpa.
\v 12 Pacata jopa abeyo xua poxonae paxaneme barapo
pexaewa. Jame apara abe paexaname poxonae irʉrʉ xane
barapo pexaewa pomonae ainya ʉnthʉton xeina. Poxonae abe
paexaname barapomonaetha apara bara irʉ abe paexaname
Cristotha, tsipei apara barapomonae pomonae irʉ pejume
cowʉntsiwixae Cristo.
\v 13 Metha beya xaetsipan pewito pocotsi wito xua ichʉn,
pon irʉ pejume cowʉntsin yabara nanta xeineiba xua jopa
bapana xae po pewi xua jiwi tajebeiba ibo nacomʉn. Poxonae
bapon nejain tane, bapon irʉ xane, najʉntʉ coyene
taxoba. Bapoxonae abe exana cana exanan. Daxota metha
xanepanaetsipa icha bapana jopa xaetsipaein equeicha
barapocotsi wito xua jopa taexanaewanexa xua bapon abe
peexanaewa tsane.
\c 9
\s Meje po coyenein yabara pomonae Jesús pia peitorobi
jiwi tatsi itacʉpatsi xua peexanaewa
\p
\v 1 Tajʉntʉ coyene jopa netsipaebiyo xua abe taexanaewa
icha xaein barapo pexaewa xua jiwi tajeba ibo nacomʉn.
Ichʉn jopa itacʉpaetsi xua yabara tana neitorobiwa barapo
pexaewa tsipei xan Jesús pia peitorobi jiwi jiwana tatsin.
Xan bara yatsicaewa tan Jesús, pon Wanacanamataxeinaein.
Paxam pajume cowʉntame Jesús daunweya tatanacuichixae pon
jiwi Pecanamataxeinaein.
\v 2 Ichamonae jopa neyabara tsaqueinaeyo xua xan Jesús
pia peitorobi jiwi jiwana tatsin. Jame paxam pana neyabara
yaputaneme xua xan Jesús pia peitorobi jiwi jiwana tatsin.
Painya nejume cowʉntsixae pon jiwi Pecanamataxeinaein
ichamonae patsita itapeinya xeiname xua xan bara ponxaein
Jesús tana neitorobin.
\p
\v 3 Baraxua jume notan pomonaetha pomonae yabara
neyainyaba xua pinae icha bara metha yatsicaewa pon Jesús
tana neitorobin.
\v 4 Barapomonaetha janje: Bernabé irʉ xan bara pana
neitacʉpabe xua pata wecobe noteibiwabe pocotsiwa xua jiwi
pata necatsibiwabe pexaewa. Mataʉtano pana neitacʉpabe
xua pata wecobe noteibiwabe pocotsiwa paapan xua poxonae
patanacuita ducuanaebiyanbe Jesús.
\v 5 Mataʉtano icha jitha ecaetsipan bara neitacʉpaetsipa
xua tabarʉ ponaewa taseuri icha Jesús pia peitorobi jiwi
tatsi ichi xua itacʉpatsi xua peexanaewa baraxua xua
piseuriwi barʉ warapa. Irʉrʉ barichi Jesucristo pon jiwi
Pecanamataxeinaein pia peweicho jiwi tatsi baxua exana.
Irʉ Pedro exana baxua xua piseuri barʉ pona.
\v 6 Poxonae ichamonae paca tsipaeba Nacom Pejume Diwesi,
payawename barapomonae pocotsiwa penantawenonaewa. Paxanbe
Bernabé irʉ xan panacuitanbe paxam nexa poxonae Nacom
Pejume Diwesi paca tsipaebatsi. Ichitha jopa pana
neyawenaem pocotsiwa panantawenonanbe. Paxanbe bewa
panacuichinbe icha penacuitsiwa yawa pata comocaenexa
pocotsiwa panantawenonanbe. Meisa paxanbe baxua paexananbe,
ichamonae jopa daichiyo.
\v 7 Soldadomonaepin poxonae ba naba pia pentacaponaein
nexa jopa ba natamatomatsiyo pia pexaewa. Pon ba jame
itoroba apata pexaewa pia soldadomonae. Barichi pon ba uva
pabi nacuita itacʉpatsi xua yawa uva cuei xaexaepona.
Barichirʉ pon ba vaca yapu eena bapon ba itacʉpatsi mipi
yuyucapona vaca xua peapaponaenexa.
\v 8 Saya jopa meisa jiwi yabara nanta xeinaeyo baxua xua
pon tanacuita itacʉpatsi yawa xane. Apara irʉ Moisés pia
peitorobi coyenewatha baxua yabara paebarʉ.
\v 9 Moisés tina po diwesi pia peitorobi coyenewathaxae,
xua jeye: “Poxonae po duwein pon pewʉn buey nanacuitapona
xua pexu xu taxunaunabapona, bapoxonae pebin jopa copatsiyo
xua pecoibo acatsiwa xua jopa pexaenexa. Saya bara
copatsina xua yawa xaexaeponaena poxonae nacuitapona”,
jei. Nacom jopa yabara paebiyo baxua xua saya meisa poxoru
peyabara nanta xeinaexae buey. Jame saya apara poxoru
peyabara nanta xeinaexae jiwi.
\v 10 Nacom pana necayabara jʉta paeba poxonae buey yabara
paeba. Baxua painta exana xua pata taneyawenaenexa. Pon ba
nacobe weta xua ʉba pabitha, irʉrʉ pon xuya nota poxonae
naweta, baponbe xeinaenabe pexaewa xua penawetsiwa.
\v 11 Paxan paca cuidubatsi Nacom Pejume Diwesi. Tsipei
paca yawenatsi daxota bewa xuya pana necatsibim pocotsiwa
xua panantawenonan xua pata jinompaewanexa.
\v 12 Paxam pacatsibame pocotsiwa xua nantawenona ichamonae
pomonae Nacom Pejume Diwesi paca cuiduba, ichitha paxan
paca yawenatsi beyacaincha xua barapomonae paca yawena.
Daxota bewa pana necatsibeibim icha paca wʉqueibichipatsi
beyacaincha xua pacatsibeibame ichamonae.
\p Ichitha baxua jopa paexanaeinyo xua pata cawʉcaewatsi.
Paxan bichocono paatanein xua jopa pata xeinaexae pocotsiwa
xua pata nantawenonaewa pata jinompeibiwanexa bequein jopa
paca wʉqueibichi. Jopa paca wʉcaetsi tsipei jopa
paichipaeinyo xua jopa painya nejume cowʉntsiwa Cristo pia
pexeinya jume diwesi. Jopa paca wʉcaetsi poxoru metha
pananta xeinaetsipame xua paxan apara pata paratixichi paca
tsipaebatsi Nacom Pejume Diwesi.
\v 13 Paxam payaputaneme xua pomonae ba nacuita Nacom pin
pia botha barapomonae ba apatʉtsi pexaewa Nacom pin pia
botha. Barichirʉ pomonae ba nacuita ichaxota iboto uncua
po ibototha duwein bexuba xua tauta xua petuxusi exanaenexa
Nacom nexa barapomonae ba itacʉpatsi xua xuya penabanaewa
barapo duwein xua saya jiwana xane.
\v 14 Barichi Nacom pon jiwi Pecanamataxeinaein jeye:
“Pomonae inta nacuita xua paeba dubenanaebiya
tacapanenebiyae diwesi jume, barapomonae apatatsi pexaewa
xua poxonae ichamonae apateiba be pematomaqueibiwatsi
tsipei barapomonae cueicueijei tsurubenanaebiya tajume
diwesi”, jei Nacom.
\v 15 Ichitha jopa bapana wʉcaeinyo jiwi xua tana
apatsinexa pexaewa xua be tanamatomatsiwa. Pacata tinatsi
xua jopa tapaca wʉcaewatsi. Ichichipan xua tatʉpaewa
tsane pewʉnaeya xua poxonae tapaca wʉcaewatsi tsainchi.
Bichocono jʉntʉ coyene weiweinan poxonae tapaca
tsipaebiwatsi Nacom Pejume Diwesi. Yaitama jopa pana
necatsibeibim xua be pata tanematomaqueibiwam, daxota
atsaquiya paca tsipaebatsi.
\p
\v 16 Jopa neitacʉpaeyo xua atsacan xua tacueicueijeixae
Nacom pia pecapanenebiyae diwesi jume. Nacom neitoroba xua
bewa tacueicueijeiwa tsane barapo diwesi. ¡Ichitha xan
tsocuaein tsipae icha jopa cueicueijan tsipae barapo
diwesi!
\v 17 Bequein icha Nacom jopa neitorobichipae xua saya xan
tacoutha tsipaebaponaetsipan Jesucristo pia pexeinya diwesi
nexata ewatsipan xua jiwi tanematomatsinexa
tacueicueijeixae barapo diwesi. Ichitha jame tsipaebaponan
pexeinya jume diwesi Nacom tana neitorobixae. Jume
cowʉntaponan be pocotsi coyeneya Nacom neitorobapona.
\v 18 Daxota xua be tanematomatsiwa apara xua poxonae
jʉntʉ coyene weiweinan tapaca tsipaebixaetsi barapo Nacom
Pejume Diwesi bequein metha jopa pana catsibeibichipaem xua
patanematomatsiwam, mataʉtano metha poxonae bara
tapanecatsibeibichipaem pocotsiwa tapanematomatsiwam. Paxam
jopa pana necatsim pocotsiwa be pata nematomatsiwam. Jopa
paca wʉcaetsi bequein bara neitacʉpa xua tapaca
wʉcaewatsi pocotsi matoma bewa panecatsibeibim. Bara
pocotsi matoma jiwi bewa catsina pomonaetha pomonae Nacom
Pejume Diwesi tsipaebatsi xua pejinompeibiwa tsane.
\p
\v 19 Bequein jopa bewa amanaya tanacuichin tsane ichʉn,
ichitha tacoutha nacana exanan be pon amanaya tanacuichin
daxita jiwi nexa. Barapo coyene exanan xua pinmonae pejume
cowʉntsinexa Cristo.
\v 20 Poxonae poponan judiomonae pia xantha tatsi, exana
ducuanaebiyan icha be barapo judiomonae ichi xua exana
dubenanaebiya pocotsiwa Moisés itoroba pia peitorobi
coyenewatha. Bara pocotsi coyenein exanan xua Moisés
itoroba, bara bequein jopa bewa exanaein tsane. Saya exanan
tsipei ichichipan xua tayawenaewa xua barapomonae pejume
cowʉntsinexa Cristo Jesús.
\v 21 Poxonae poponan pexantha tatsi pomonae jopa exanaeyo
pocotsiwa Moisés pia peitorobi coyenewatha itoroba,
bapoxonae popona ducuanaebiyan icha barapomonae ichi xua
jinompa dubenanaebiya. Bapoxonae jopa exanaeinyo pocotsiwa
Moisés pia peitorobi coyenewatha itoroba, xua barapomonae
tayawenaenexa, xua pejume cowʉntsiwanexa Jesús. Jopa paca
tsipaebichi xua tajume naitematsiwa Nacom xua tana
neitorobiwa. Jame bara exanan pocotsiwa Cristo neitoroba.
\v 22 Poxonae poponan pexantha tatsi pomonae jʉntʉ coyene
faefaena Nacomtha xua pejume cowʉntsiwa xua aena pejume
cowʉntsixae bapoxonae exana ducuanaebiyan icha barapomonae
ichi xua exana dubenanaebiya tayawenaenexa xua equeicha
bichocono mataropeicha pejume cowʉntsiwanexa Jesucristo.
Daxita carepaya jiwitha peitʉtha poponeiban, poxonae be
pocotsi coyeneya jinompeiba barapo jiwi tayawenaenexa xua
equeicha bichocono mataropeicha pejume cowʉnteibinexa
Jesucristo.
\v 23 Daxita baxuan exana ducuanaebeiban tacueicueijei
tsaibinexa Nacom pia pecapanenebiyae diwesi jume,
mataʉtano tsipei ichichipan xua tajʉntʉ coyene
weiweinaewa tsane poxonae barapomonae jume cowʉntsina
Jesucristo.
\p
\v 24 Paxam payaputaneme poxonae jiwi ba namtotha
cuinaepona saya caein meisa copiya patopa. Bapon ba catatsi
pocotsiwa pematomatsiwatsi copiya pepatopaexae xua beta
cuinaepona. Bara pocotsi jʉta coyeneya ichi, beta pata
exanaponde Jesucristo pia petanacuichiwa tatsi xua painya
nepaca catsibinexa xua painya nepaca matomacaewan.
\v 25 Pomonae ba xua nacui wʉnaeta xua penaxenacaenexa
ichawa jopa exanaeyo pocotsiwa taayapubetsi poxonae
pecuinaeponaenexa. Barapomonae ba baxua exana pia xeinaetsi
pocotsiwa pecui yabara matomacaewatsi. Barapo pentoma noxu
tepa pocotsiwa xua saya caena naxuba xua weraweraca. Nama
waxainchi beta exanapoinchi Nacom pia petanacuichiwa tatsi,
xua Nacom wanaca catsibiwa tsane pocotsiwa wanaca yabara
cui matomacaewa, pocotsiwa xua ataya ayapusʉ xua jopa
weraweracaeyo.
\v 26 Daunweya exanaponeiban Nacom pia petanacuichiwa tatsi
be poxonae xua bichoina cuinaeponan xua tatoxeincha
patopaewa. Jopa exanaeinyo icha ichi xua pon
naitacueinchiya jiraba.
\v 27 Ichitha nama seicayiya exanan xua tapepon daunweya
tacoya naitoroban xua daxota jopa abe exanaeinyo. Tapepon
itoroban xua tana nejume cowʉntsiwa xua peexanaewa
pocotsiwa itoroban. Antʉyapusʉya tanacuitan Nacom
tajunuwixae xua jopa beta taexanaewa xua bequein bara
ichamonae cuidubithan barapo coyenein. Icha jopa beta
exanaeinchipae Nacom jopa tsita xanepanaeinchipae xua
daxota taneitawetsiwa tsipae.
\c 10
\s Meje xua Pablo muxuweta pomonae wʉnae jainta ibo
nacomʉn
\p
\v 1 Tamonae pam, paxam pomonae irʉ painya nejume
cowʉntsiwixae Jesucristo. Ichichipan xua painya
neyaputaewa tsane po coyene xua poxonae wamo susato jiwitha
pecana exanaewatsi. Barapomonae Egipto nacua weya pona.
Bapoxonae tsaquinaebowa matatsun dubenapoinchi. Barapo
tsaquinaebowa barapomonae matacapoinchi xua ichaxota
ichichipa peponaewa barapomonae. Daxita barapomonae icha
muxunene beepa ʉncababiya po pin pucua pewʉn Mar Rojo
wʉn pucua. Barapo pin bicheito epataʉta iyapona xua
poxonae Nacom tsewa taexaniya xua be namto taexaniya.
\v 2 Barapomonae tsaquinaebowa be caemonae matatsun
dubenapoinchi. Mataʉta barapomonae be caemonae Mar Rojo
wʉn pucua epataʉta iya pona. Barapoxonae be caemonae
naexana Moisestha xua Moisés pematacapanaenexa
barapomonae. Barapomonae barapocotsi jʉta coyeneya exana
icha be poxonae jiton ichi xua poxonae bautisabatsi mentha
caemonae penaexanaenexa Cristotha, xua Cristo
pecanamataxeinaenexa bapontha.
\v 3 Daxita barapomonae xane po pexaewa Nacom taitorobica
itaboco wetsica.
\v 4 Yawano barapomonae apa po mera xua Cristo itoroba ira
xuepana susato tsurucuae nacuatha. Barapo mera iboton weya
mene pichapa. Cristo barapo mera apatapona poxonae yanta
xua barapomonae yantatsi.
\v 5 Daichitha pin bicheitomonae xua barapomonae jiwana
jopa exanaeyo pocotsiwa Nacom ichichipa. Daxota Nacom
copata xua barapomonae bara pejiwana werapaponaewa tsane
barapo ira xuepana susato tsurucuae nacuatha.
\p
\v 6 Baxua exana xua nacata yabara canaʉta jʉtsiya exana.
Jopa bewa waichichipaewa tsainchi pocotsiwa jopa nacata
wʉnaeyo xua icha barapomonae ichi poxonae pia coutha abe
nata exana.
\v 7 Daxota jopa bewa wʉnae pajainchim ibo nacomʉn icha
be barapomonae jiwana ichi. Barapomonae wʉnae jainta ibo
nacomʉn. Nacom Pejume Diwesitha barapomonae yabara jeichi:
“Barapomonae ena xua pexaenexa yawa xua peapaenexa.
Bapoxonae yatsicaewa barapomonae nawiraba ibo nacom tsita
nawirabatsi”, jei Nacom Pejume Diwesitha.
\v 8 Waxainchi jopa bewa exanaetsi xua nasi cui weiweina
exanatsi icha be barapomonae jiwana ichi. Barapomonae
jiwana nasi cui exana yabʉxitha xua jopa piseurixi. Daxota
caentaqueitha veintitrés mil pebiwi werapa abe
peexanaexae.
\v 9 Mataʉtano jopa bewa najʉntʉ coyene jʉjʉta
exanaetsi Nacomtha xua wanaca barʉ anaepanaenexa, icha
barapomonae jiwana ichi. Barapomonae najʉntʉ coyene
jʉjʉta exana Nacomtha. Daxota Nacom copata xua
barapomonae werapa poxonae jomon sinebatsi barapomonae.
\v 10 Jopa bewa Nacom anaepanaya barʉ paebichi, icha be
barapomonae jiwana ichi. Barapomonae Nacom anaepanaya barʉ
paebatsi, daxota Nacom copata xua barapomonae weraweraca
poxonae matatsunpin juteba po matatsunpin jiwi pejutebin.
\p
\v 11 Nacom exana daxita baxuan barapomonaetha, xua wanaca
muxuweta exanaenexa xua jopa waraichiwanexa icha
barapomonae ichi. Moisés yabara tina barapomonae xua
yaputane wanaca exanaewa xua bara nama imoxoyo barapo nacue
weraweracaena.
\v 12 Daxota tsipaeban pon paxam jiwana pam pon xua
nayabara nanta xeina xua pinae bichocono pejume
cowʉntsixae peajʉntʉcoyenesʉwa xeina Nacomtha. Janje:
“Dota jinya xoba abe exaname. Poxoru icha metha nanta
xeinaetsipame xua jopa abe exanaem, bapoxonae metha abe
exanaetsipame”, jan.
\v 13 Jopa meisa paxam caurimonae pia pentacaponaein tatsi
paca jʉntʉ coyene jʉjʉtsiyo. Barapara irʉ ichamonae
pomonae pejume cowʉntsiwi barichichi jʉntʉ coyene
jʉjʉtatsi abe peexanaenexa. Paxam paca itacʉpa xua
pajʉntʉ coyene amanayabame barapo caurimonae pia
pentacaponaein tatsi. Baraxua paexaname icha barapomonae
ichi xua jʉntʉ coyene amanayaba barapo caurimonae pia
pentacaponaeintha tatsi. Daichitha paca itacʉpa xua
payabara jume cowʉntame Nacom xua bara bapon paca
yawenaena. Nacom jopa copatsiyo xua caurimonae pia
pentacaponaein tatsi bichocono paca jʉntʉ coyene
jʉjʉtsina xua pocotsiwa bichocono pacata ayapube xua
daxota abe painya neexanaewa tsane. Ichitha poxonae
caurimonae pia pentacaponaein tatsi paca jʉntʉ coyene
jʉjʉta, Nacom paca yawenaena xua painya nerʉcʉpaewa
bapon weya xua daxota jopa abe painya neexanaenexa.
\p
\v 14 Tamonae pam paxam pomonae irʉ painya nejume
cowʉntsiwixae Jesucristo. Paxam pomonae tapaca caantobe
jiwichi pam. Painya xoba wʉnae pajaintame ibo nacomʉn.
\v 15 Paca tsipaebatsi paxam pomonae painya neyaputae jiwi
pam. Paxam payaputaneme xua painya neyabara nanta xeinaewa
pocotsiwa paca tsipaebatsi icha metha bara xaniwaicha
paeban.
\v 16 Waxainchi nacaetutatsi wayabara jʉntanainaenexa xua
Cristo wanaca tsitʉpaewa naetotha. Bapoxonae apatsi vino
mera yawa xainchi pan. Barapo vino mera Cristo pia pejana
tatsi yabara caunutatsi. Mataʉtano barapo pan Cristo pia
pepon tatsi yabara caunutatsi. Poxonae apatsi barapo vino
mera Nacom tsipaebatsi barapo vino mera nexa po vino mera
tsijunta eca corotiyotha. Jeichichi: “Maisa Nacom painta
pexeinya coyene exaname”, jeichichi. Bapoxonae be caemonae
naexainchi Cristotha waapaexae barapo vino mera. Barichi
poxonae pan janacatsi be caemonae naexainchi Cristotha
waxaexae barapo pan.
\v 17 Bequein waxainchi pinmonaetsi xua cae pan nabarʉ
xainchi, ichitha waxainchi be caemonaetsi bapon Cristotha
tsipei bara cae pan nabarʉ xainchi.
\p
\v 18 Payabara nanta xeinare xua judiomonae pomonae Israel
nacuamonaepiwi. Barapomonae judiomonae xane po duwein
ichamonae tauta xua petuxusi exanaewa Nacom nexa. Bapoxonae
barapomonae be caemonae naexana Nacomtha.
\v 19 Jopa apara paca tsipaebichi xua ibo nacom xeina
peajʉntʉyapusʉwa. Mataʉtano jopa paca tsipaebichi xua
po wi jiwi tajeba ibo nacomʉn ainya cui barapo wi
beyacaincha xua icha pewi.
\v 20 Paca tsipaebatsi xua jiwi tajeba pewi ibo nacomʉn
pomonae jopa yaputaeyo Nacom. Barapomonae tajeba barapo
pewi caurimonae. Jopa apara tajebiyo Nacom. Jopa
ichichipaeinyo xua caemonae pana naexaname caurimonae
pijimonaetha. Metha baraxua paexanaetsipame poxonae
panabarʉ xaneme pomonae nacaetuta pexaenexa po wi jiwi
tajeba ibo nacomʉn.
\v 21 Paxam panabaname pon jiwi Pecanamataxeinaein pia
penabanaethopaewatha tatsi yawa xua paapameno. Jopa paca
itacʉpaeyo xua panabaname yawa xua paapameno ichaxota
exanompa cauri pia cui coyene pomonae jopa pejume
cowʉntsiwi.
\p
\v 22 Icha waxainchi wʉnae jaintatsi caurimonae poxonae
xainchi po pewi jiwi tajeba ibo nacom bapoxonae waxainchi
exanatsi xua pon jiwi Pecanamataxeinaein naca caseba pia
wanaca asiwixae. Waxainchi jopa xeinaetsi po peayapusʉwa
xua bichocono daunwei xua beyacaincha Nacom.
\s Meje xua Pablo yabara paeba xua bewa jiwi yabara nanta
xeinae pewi poxonae xane
\p
\v 23 Baraxua bequein xainyei poxonae jiton jeye:
“Neitacʉpa xua taexanaewa pocotsiwa ichichipan”, jei
bapon. Daichitha jopa daxita nacata wʉnaeyo xua pocotsiwa
exanatsi. Bequein waxainchi naca itacʉpa xua waexana
dubenanaebiyaewa pocotsiwa xua waichichipaewatsi. Daichitha
daxita baxuan jopa naca yawenaeyo xua wajume cowʉnta
dubenanaebiyaewa Jesús.
\v 24 Jopa bewa payabara nanta xeinaem xua saya painya
coutha nexa xua painya nenayawenaenexam. Jame bewa payabara
nanta xeinaem xua apara irʉ ichamonae painya
neyawenaenexarʉ.
\p
\v 25 Po pewi pacomoqueibame po wi jiwi caenaeta
pecaenaetsi bontha, painya xoba matha payabara
yainyabeibame barapo pewi. Jopa payainyabinde icha metha
xua apara po wi bayatha jiwi tajeba ibo nacom. Jame bara
saya itatemaya paxaibare. Xain bapoxonae painya jʉntʉ
coyene jopa paca tsipaebiyo xua apara abe paexaname.
\v 26 Nacom Pejume Diwesitha jeye: “Barapo cae pin nacue
yawa xua xuan xeina barapo cae pin nacuathe Nacom pon
Pecanamataxeinaein bapon piawan”, jei Nacom Pejume
Diwesitha.
\v 27 Poxonae jiton pon jopa pejume cowʉntsin Jesús, paca
tsiwaba pexaewa xua pia paca barʉ xaetsi, icha
paichichipame moya pana napuna xaema. Paxaema pocotsiwa xua
pexaethopaewatha bobena. Jopa payabara yainyabinde barapo
pexaewa icha metha barapo pewi ibo nacom werena capona.
Xain bapoxonae painya jʉntʉ coyene jopa paca tsipaebiyo
xua apara abe paexaname.
\v 28 Ichacuitha metha ichʉn paca tsipaebichipa, xua jeye:
“Apara barapo pewi jiwi tajeba ibo nacom poxonae wʉnae
jainta barapo ibo nacomtha”, jei bapon. Bapoxonae painya
xoba paxaneme barapo pewito. Tsipei icha barapo pewi
pajiwana xaename abe exana pacana exaname pontha pon xua
yabara paca tsipaeba barapo pewi. Poxoru ichamonae pomonae
pejume cowʉntsiwi Nacom, yabara nanta xeina xua apara jiwi
abe exana icha barapo wi xane. Daxota bapon junuwa xua abe
exana icha pexaewa tsane barapo pewito. Icha jopa baxua
peitʉtha paexanaem tsane bapoxonae bapon jʉntʉ coyene
xanepanaya poponaena Nacomtha.
\v 29 Yabara paca tsipaebatsi po coyene xua ichʉn yabara
nanta xeina barapo pewi pejʉntʉ coyenewatha. Jopa apara
yabara paca tsipaebichi po coyene paxam xua payabara nanta
xeiname barapo pewi painya jʉntʉ coyenewatha.
\p Ichitha metha ichʉn neyainyabichipa, jei tsipae:
“¿Eta pocotsiwa metha nantawenonan xua taexanaewa
pocotsiwa ichʉn yabara nanta xeina barapo pewi?” jei
tsipae.
\v 30 Equeicha metha bapon jei tsipae: “Poxonae pexaewa
nabanan Nacomtha tsipaeban barapo pexaewa nexa, janje:
Nacom, maisa jʉntʉ coyene weiweinan xua barapo pexaewa
tanecatsiwam, jan. Icha baxua exanan ¿eta pocotsiwa metha
nexata ichamonae abe neyabara paeba poxonae xan barapo
pexaewe?” jei tsipae.
\v 31 Yabara paca tsipaebatsi baraxuan daxita xua xuan
painya neapaewan yawa daxita xua xuan painya nenabanaewan
yawa daxita icha coyeneinno xua xuan painya neexanaewan
daxita bara pocotsi coyenein beta paexaneibare xua daxota
poxonae jiwi paca cui taibina bapoxonae jiwi wʉnae
jainteibina Nacom.
\v 32 Jopa paexanaeinde pocotsiwa xua abe paexaname xua
pocotsiwa daxota ichamonae jʉpa exanaena. Baraxua jopa
paexanaeinde judiomonaetha, irʉ pomonaetha pomonae jopa
judiomonae naexanaeyo, irʉ pomonaetha pomonae Nacom pejume
cowʉntsiwichi jiwanamonae.
\v 33 Xan ichichipan beta taexanaewa po coyene xua
ichamonae tsita xanepanatsi. Jopa exanaeinyo pocotsiwa xua
tacoutha taichichipaewa. Saya meisa beta exanan po coyene
ichamonae tsita xanepanatsi xua po coyenewatha barapomonae
peyawenaenexatsi xua pecapanenebiyaenexatsi abe pia
peexanae cuiru coyenein weya.
\c 11
\p
\v 1 Paexanaponde icha be pocotsi coyeneya ichin poxonae
exanaponan, tsipei exanan pocotsiwa Cristo exanapona.
\s Meje xua Pablo yabʉxi yabara paeba powaxi poxonae ena
penacaetutsi botha xua poxonae wʉnae jainta Nacom
\p
\v 2 Tamonae pam paca weyatainchi tsipei paneyabara nanta
xeinaponame xua daxita coyeneyatha. Paxam paexana
dubenanaebiyame pocotsiwa xua paca cuidubatsi.
\v 3 Ichitha ichichipan xua painya neyaputaewa xua Cristo
canamataxeina daxita pebiwitha. Barichirʉ daxita pebiwi
barompaya piseuriwi canamataxeina. Barichi Nacom Cristo
canamataxeinatsi.
\v 4 Icha pebin nantasipa acata poxonae Nacomtha tsipaeba
xuano poxonae cueicueijei Nacom Pejume Diwesi, barapon
Cristo jopa barʉ cui itura jinaetsi. Saya pia coutha ainya
cui nacana exana.
\v 5 Jame icha yabʉyo jopa nantasipa acatsiyo xua poxonae
cueicueijei Nacom Pejume Diwesi, xuano poxonae Nacomtha
tsipaeba, bapowa pia pebin jopa barʉ cui itura jinaeyo
poxonae jopa nantasipa acatsiyo paparuwatha. Bapowa tsita
itapeinya xeina xua jopa exanaeyo pocotsiwa pia pebin
itorobatsi. Baraxua jʉpa icha be poxonae ichi xua daxita
matana sibatsi abe peexanaexae.
\v 6 Icha jopa yabʉyo nantasipa acatsiyo bewa barapowa
daxita nanta sibina. Ichitha icha barapowa aura xua penanta
sibiwa daxota bewa nanta acatsina.
\v 7 Poxonae Nacom exana pebin barapo pebin Nacom cui
jʉpatsi. Daxota barapo pebiwi xeinarʉ barapo
pecanamataxeinae coyenewa po coyenewa Nacom xeina. Pebin
jopa bewa nantasipa acatsina poxonae Nacomtha tsipaeba,
xuano poxonae Nacom Pejume Diwesi cueicueijei xua daxota
pebarʉ cui itura jinaenexa xua Nacom pebarʉ cui itura
jinaenexatsi. Ichitha yabʉyo bewa barʉ cui itura jinae
pia pebin, tsipei pia pebin canamataxeinatsi.
\v 8 Poxonae Nacom forota jopa Nacom exanaeyo pebin yabʉyo
weya. Saya jame Nacom exana yabʉyo pebin pexainya weya
tatsi.
\v 9 Nacom jopa forotsiyo xua pebin yabʉyo tsiexanatsi.
Jame Nacom forota xua yabʉyo pebin tsiexanatsi.
\v 10 Daxota yabʉyo bewa nanta acatsina penacaetutsi
botha. Bapoxonae bapowa tsita itapeinya xeina
matatsunpiwimonaetha xua bapowa barʉ cui itura jina pia
pebin pecanamataxeinaexaetsi.
\v 11 Daichitha pomonae Nacom pejume cowʉntsiwixae, pebin
nantawenona yabʉyo, irʉ yabʉyo nantawenona pebin.
\v 12 Bequein Nacom exana yabʉyo pebin peyene weya tatsi,
ichitha pebiwi ba nowaeumenapona yabʉxi weya. Barapo
naxobe coyenewabe Nacom forota, pebin yawa yabʉyo.
\p
\v 13 Pananta xeinare xua icha bara xaniwaicha xua yabʉyo
jopa nanta acatsiyo poxonae Nacomtha tsipaeba penacaetutsi
botha xua poxonae wʉnae pejainchinexa Nacom.
\v 14 Wacui coyenewa ba naca yaputane exana xua pebiwichi
jopa bewa antanapiya naexanaetsi. Baxota ba aura naca
exana.
\v 15 Barichirʉ wacui coyenewa ba naca yaputane exana xua
yabʉxi wʉnae exana poxonae nantana copaba xua
antanapipiya. Bapoxonae yabʉyo pia pentanantha nantasipa
acata.
\v 16 Pon ichichipa xua yabara pana nejume matsontsonoba
baxuan, pajanje bapontha: “Barapo coyene pacuiduban.
Mataʉta daxita penacaetutsi bonmonae jiwi pomonae Nacom
pejume cowʉntsiwi pebʉrʉya pana nabarʉ jʉpaya nanta
xeinan tsipei icha coyene jopa payaputaeinyo”, pajan.
\s Meje xua Pablo yabara paeba xua abe exana pomonae pejume
cowʉntsiwi Nacom poxonae nainya xane po penabanaewa
cayabara nanta xeina xua Jesús pia petsitʉpaewa jiwi
\p
\v 17 Pacata tinatsi anoxuae xua po coyenein yabara xua
jopa tana neitacʉpaewa xua tapaca tsipaebiwatsi xua beta
painya neexanaewa. Bequein pana nabarʉ nacaetutame ichitha
painya jʉntʉ coyene jopa paca cana exanaeyo xua
paayapusʉ tsoponaem. Maisa apara abe paexaname.
\v 18 Copiya matha paca tsipaebatsi janje: “Ichʉn
netsipaeba xua pinae poxonae pana nabarʉ nacaetutame,
wʉnae painya nejainchinexa Nacom, pinae ainyamonaein
tsanaya pana natsabame. Bapoxonae pinae pana najume
matsontsonobame”, jan. Nanta xeinan xua apara xainyei po
coyene ichamonae netsipaeba xua paca yabara paeba.
\v 19 ¡Moya ainya bicheiton pana naexande xain bapoxonae
pana najume matsontsonobame! ¡Xain bapoxonae ichamonae
tane xua ichamonae petaenexatsi pomonae jopa irʉ najume
matsontsonobiyo pomonae xua beta peexanaewi!
\v 20 Bequein pana nabarʉ nacaetuteibame xua painya
xaenexa pexaewa poxonae pacayabara nanta xeiname xua pon
jiwi Pecanamataxeinaein paca tsitʉpa, daichitha saya
paxaneme. Apara jopa pacayabara nanta xeinaem barapo
coyene.
\v 21 Daxita paxam carepaya barompaya pia pexaewa nainya
xane. Jopa pawʉnae ewateibim ichamonae xua painya
nenabarʉ xaenexa. Daxota ichamonae jainpa pomonae cotacaya
pata. Ichamonae bichocono tonsana beya poxonae nacʉpa
exana peatsaxa meran xua apa poxonae muxuna xane pexaewa.
\v 22 Apara paxeiname painya bon ichaxota paca itacʉpa xua
pana napena jʉbame. Baraxua be paaichaxaibim pomonae Nacom
pejume cowʉntsiwichi pomonae penacaetutsi bomonae jiwi
poxonae baxua paexaname. Aura paexaname pomonaetha pomonae
peacopeibiwi pomonae jopa itacʉpaetsi xua capana pexaewa,
pomonae cotacaya pepatsixae. ¿Eta paca yabara jumichicuae
tsainchi? Paca yabara jei tsainchi: ¿Bara beta xanepanaya
paexaname jan tsane? ¡Jume! Baxua jopa neitacʉpaeyo xua
tapaca yabara paebiwatsi.
\s Meje xua Pablo yabara cuiduba pexaewa po pexaewa poxonae
jiwi cayabara nanta xeina Jesús
\r (Mt 26.26-29; Mr 14.22-25; Lc 22.14-20)
\p
\v 23 Po coyene xua paca cuidubatsi baxua copiya Nacom
necuiduba. Paca jeichi: Po merawitha Jesús caenaetatsi pon
jiwi Pecanamataxeinaein, barapo merawitha Jesús pan pita
pecobetha.
\v 24 Poxonae najume weta xua paxa tsipaeba xua jei: “Axa
maisa jʉntʉ coyene weiweinan xua tanecatsiwam pan”, jei,
bapoxonae pan epa janaca. Bapon barai pijimonae jeye:
“Panore pan yawa paxaemano. Barapo pan neyabara caunuta
xua tapepon. Tapepon inta atene exanaeinchi painya nepaca
cayawenaenexa tsane xua painya tanejume cowʉntsiwaxaem
tsane. Poxonae baxua paexaneibame xua paxaibame
panecayabara jʉntanaineibare painya jʉntʉ coyenewatha”,
jei Jesús xua pijimonae tsipaeba.
\v 25 Barichiya exana poxonae najain weta. Bapoxonae
corotiyo pita pecobetha yawa jeye: “Pena petsiwʉnae muxu
dutsi coyenewa paca tsipaebatsi. Barapo uva mera po mera
xua corotiyotha tsijunta eca, barapo uva mera yabara
caunuta tajana xua jana othoparenaein poxonae tʉpaein.
Barapo jana tsita itapeinya xeinaena xua jiwi pinmonae
yabara jʉntemainaein abe pia peexanae cuiru coyenein
tatsi. Daxita coyeneintha poxonae baxua paexaneibame xua
paapeibame barapo uva mera, bapoxonae panecayabara
jʉntanaineibare painya jʉntʉ coyenewatha xua tapaca
catsitʉpaewaxaetsi”, jei Jesús, xua pijimonae tsipaeba.
\v 26 Daxita tsaibi poxonae paxaibame pan yawa paapeibameno
barapocotsi uva mera xua tsijunta eca corotiyotha, jiwi
patsita itapeinya xeiname xua Cristo pacui yabara
jʉntanainame xua painya nepaca tsitʉpaewa. Baxua
paexaneibare beya poxonae equeicha Jesús patopaetsica, pon
jiwi Pecanamataxeinaein.
\s Meje yabara xua poxonae jiwi bewa beta exanae xua
poxonae xane po pexaewa poxonae cayabara nanta xeinatsi
Jesús
\p
\v 27 Pon xane barapo pan xuano apa barapo uva mera xua
tsijunta eca corotiyotha xua Jesucristo cayabara nanta
xeinatsi icha bapon jopa jʉntʉ coyene xanepanaeyo
Nacomtha, apara abe exana Cristotha. Bapoxonae bapon Nacom
tsita xeinatsi xua penatsicuentsiwa xua abe peexanaexae
Cristo pepontha tatsi xuano xua pia pejanathano tatsi
tsipei bapon jopa barʉ cui itura jinaeyo barapo coyene.
\v 28 Daxota daxita jiwi bewa barompaya matha pewʉnaeya
najʉntʉ coyene cayabara nanta xeinaena. Barapo jiwi bewa
nanta xeinaena icha metha bara xanepanaya exana beya
poxonae xaena barapo pan xuano poxonae apa barapo uva mera
xua tsijunta eca corotiyotha.
\v 29 Pon xane barapo pan xuano xua apa barapo uva mera xua
tsijunta eca corotiyotha xua Jesucristo peyabara xaenexa
ichacuitha bapon natsicuenta Nacomtha abe peexanaexae.
Bapon natsicuenta Nacomtha tsipei matha jopa yabara nanta
xeinaeyo barapo pexaewa xua apara bichocono ainya cui
coyenewa xeina beyacaincha icha pexaewa.
\v 30 Daxota pinmonae pajiwana atenem xuano jopa xeinaeyo
peajʉntʉyapusʉwa. Daxota ichamonae bayatha pajiwana
werapame.
\v 31 Poxonae apatsi uva mera xuano poxonae xainchi pan po
pexaewa poxonae Cristo cayabara nanta xeinatsi, matha bewa
najʉntʉ coyene cayabara nanta xeinaetsi, xua icha metha
bara wʉnae waexanaewa. Bapoxonae xain Nacom jopa naca
atene exanaeyo xua wanatsicuentsiwaxae xua abe waexanaexae.
\v 32 Bequein baxua Nacom nacata exana wanaca cuidubinexa
xua equeicha xanepanaya waexanaenexa tsane. Nacom baxua
nacata exanaena xua jopa wanaca yabara jeinexa: “Paxam abe
paexaname icha ichi pomonae jinompa barapo cae pin nacuathe
pomonae bichocono abe peexanaewi, pomonae jopa pejume
cowʉntsiwi”, xua jopa pewanaca yabara jeinexa.
\p
\v 33 Daxota tamonae pam poxonae pana nacaetutame xua
painya nabarʉ xaenexa po pexaewa xua poxonae Jesucristo
cayabara nanta xeinatsi, matha abʉ ichamonae paewateibare.
\v 34 Icha ichʉn jainpa bʉ bapon matha pia botha xane
pewʉnaeya xua poxonae napatopaena penacaetutsi botha xua
poxonae wʉnae jainta Nacom. Bapoxonae itacʉpatsi xua
bapon penaxaewa po pexaewa poxonae Jesucristo cayabara
nanta xeinatsi. Bapoxonae Nacom jopa peraxa jʉbi tsane
bapon xua abe peexanaexae poxonae nanacaetuta pomonaetha
pomonae Nacom pejume cowʉntsiwichi. Poxonae paca siwa
ponaeinchi xua tapaca taenexa tsainchi, bapoxonae paca
cuidubinchi pocotsiwan xua yabara pana neyainyabame.
\c 12
\s Meje xua pejʉntʉ cui coyenein yabara po pejʉntʉ
coyenein Nacom pia Pejumope tʉnaxʉ tatsi amanaya cata
daxita carepaya pomonaetha pomonae Nacom pejume
cowʉntsiwichi
\p
\v 1 Tamonae pam, paxam pomonae irʉ painya nejume
cowʉntsiwixae Jesucristo. Yabara paca tsipaebatsi po
coyene ichichipan xua painya neyaputaewa. Nacom pia
Pejumope tʉnaxʉ tatsi cata pejʉntʉ cui coyenein daxita
barompaya carepaya pomonaetha pomonae Nacom pejume
cowʉntsiwichi.
\v 2 Paxam payaputaneme xua abe paexaname pewʉnaeya
poxonae pajume cowʉntame. Pacopatame xua bara ichamonae
ichawa beya paca matacapona xua wʉnae painya nejainchinexa
ibo nacomʉn, po ibo nacomʉn jopa cueicueijeiyo.
\v 3 Daxota ichichipan xua painya neyaputaewa tsane xua
poxonae jeye: Dapocotsin aibi, pon itacʉpatsi xua jeye:
“Jesús apara jopa Nacom Pexanto tatsi”, xua poxonae jei,
icha bapon xeina Nacom pia Pejumope tʉnaxʉ tatsi pia
peayapusʉ itorobi coyenewa tatsi. Barichi dapocotsin aibi
pon itacʉpatsi xua poxonae jeye: “Bapon Jesús apara pon
jiwi Pecanamataxeinaein”, xua poxonae jei, icha bapon jopa
xeinaeyo Nacom pia Pejumope tʉnaxʉ tatsi pia peayapusʉ
itorobi coyenewa tatsi.
\p
\v 4 Jiwi itacʉpatsi xua daxita carepaya barompaya
pexeinaewa ainya jʉntʉ cui coyenein pomonae pejume
cowʉntsiwixae Nacom. Barapo jʉntʉ cui coyenein jopa
nacui coyene jʉpaeyo. Bequein daxita jiwi xeina barapo
coyenein daichitha bara saya compa pon pecatsixae apara
bapon Nacom pia Pejumope tʉnaxʉ tatsi.
\v 5 Jiwi pomonae pejume cowʉntsiwixae Nacom, itacʉpatsi
xua daxita carepaya barompaya pexeinaewa ainya petanacuichi
coyenewan Nacom nexa. Ichitha meisa saya bapon Nacom compa
pon jiwi Pecanamataxeinaein daxitatsi waxainchi
tanacuitatsi bapon.
\v 6 Jiwi pomonae Nacom pejume cowʉntsiwixaetsi
itacʉpatsi xua pexeinaewa ainya cui coyenein po coyeneinya
xua Nacom petanacuichiwatsi. Ichitha daxita barapo coyenein
jopa nacui coyene jʉpaeyo. Saya compa Nacom pon daxita
barapo jiwi cana exanatsi xua peexanaewa daxitan barapo
coyeneinyatha.
\v 7 Nacom pia Pejumope tʉnaxʉ tatsi tsita itapeinya
xeina Nacom pia peayapusʉ itorobiwa tatsi. Baxua exana
poxonae Nacom barompaya naca cana exana xua beta waexanaewa
wayawenaenexa tsane daxita jiwitha.
\v 8 Ichamonae jiwanatha, Nacom pia Pejumope tʉnaxʉ tatsi
cata pejʉntʉ cui coyenewa xua po coyene barapomonae
pejʉntʉ coyenetha beta yaputane xua peexanaenexa
pocotsiwa pecueicueijeiwa ichamonaetha. Barichi ichamonae
jiwanatha Nacom pia Pejumope tʉnaxʉ tatsi cata pejʉntʉ
cui coyenewa po coyene xua beta pecuidubiwa po coyene
peyaputaewa xua daunwei yabara yaputane pecana exanaenexa
xua ichamonae yabara yaputane pecana exanaenexatsi.
\v 9 Ichamonae jiwanatha Nacom pia Pejumope tʉnaxʉ tatsi
cata peyabara jume cowʉntsi coyenewa xua daxota bapomonae
nanta xeina xua bara itacʉpatsi xua peexanaewa daxita
coyenein xua Nacom itoroba xua bapomonae peyawenaexaetsi
Nacom. Barichi ichamonae jiwanatha Nacom pia Pejumope
tʉnaxʉ tatsi cata xua po coyenewatha peatenewi axaibi
peexanaewatsi.
\v 10 Ichamonae jiwanatha, Nacom pia Pejumope tʉnaxʉ
tatsi cata po coyenewatha pexeinya petsita itʉtsi coyene
peexanaewa. Ichamonae jiwanatha, Nacom pia Pejumope
tʉnaxʉ tatsi cata po coyeneya xua pecueicueijeiwa Nacom
Pejume Diwesi. Ichamonae jiwanatha Nacom pia Pejumope
tʉnaxʉ tatsi cata po coyeneya beta peyaputaewa xua po
coyene poxonae Nacom pia Pejumope tʉnaxʉ tatsi jiwi
cueicueijei exanatsi yawa po coyene poxonae jiwi
cueicueijei exanatsi caurimonae. Ichamonae jiwanatha Nacom
pia Pejumope tʉnaxʉ tatsi cata po coyeneya xua ichamonae
pecueicueijeiwa icha jumeintha, po jumein bequein jopa
nacuidubiyo. Ichamonae jiwanatha Nacom pia Pejumope
tʉnaxʉ tatsi cata po coyeneya xua barapomonae xuya jume
yaputane exana po jumein xua ichamonae paeba po jumein xua
ichamonae bequein jopa nacuidubiyo.
\v 11 Daxita barapo jʉntʉ coyenein exana ducuanaebiya pon
Nacom pia Pejumope tʉnaxʉ tatsi. Barapo jumope daxita
coyenein meisa compa exana, po jumope Nacom pia Pejumope
tʉnaxʉ tatsi. Barapo pejumope daxita carepaya jiwitha
cata icha be pocotsi coyeneya barapo jumope peichichipaexae
xua pecatsiwa.
\s Meje yabara xua daxitatsi be caemonaetsi Jesustha
\p
\v 12 Pepon bequein caein ichitha nawita xeina xua pia
pecueyabiwatsi, petaxube, pesitobeno, pemaxʉbeno yawa
ichawanno. Barapo pepon pecueyabiwatsi bequein ainyawan
daichitha daxita bara caewa ompin naexana pepontha.
Barapocotsi jʉta coyeneya ichi, Cristo pinmonae xeina pia
pejume cowʉntsiwichi bequein bara barapon Jesús caein.
\v 13 Barapocotsi jʉta coyeneya ichi, waxainchi seicaya
jiwichi. Daichitha daxita waxainchi be caemonae jiwichi
wajume cowʉntsixae Jesús. Ichamonae waxainchi jiwanatsi
judiomonaetsi. Ichamonaetsi pomonae jopa judiomonae
naexanaeyo. Ichamonaetsi pomonae amanaya tanacuitatsi
ichamonae nexa. Ichamonaetsi pomonae saya wajinompaewi xua
saya wawan wanata exanae jiwi. Daichitha daxita
waxainchichi naca bautisaba. Waxainchi be caemonaetsi
naexanatsi Nacom pia Pejumope tʉnaxʉ tatsi wanaca barʉ
jinompaexae. Nacom daxita waxainchi barompaya carepayatsi
naca cata barapo pejumope tʉnaxʉ, pon bara saya meisa
caein.
\p
\v 14 Pepon jopa xeinaeyo bara caewa xua pecueyatsiwatsi.
Apara nawita xeina xuan pecueyabiwatsi.
\v 15 Metha petaxu jei tsipae: “Xan apara jopa pecobeinyo,
daxota xan pepon nexa aibi”, jei tsipae. Bequein baxua
paebichipa daichitha apara bara pepon cueyatatsi icha
itacʉpatsi xua paeba.
\v 16 Metha pemuxuyoroto jei tsipae: “Xan apara jopa
peitamaiqueitʉnyo daxota xan pepon nexa aibi”, jei
tsipae. Bequein baxua paebichipa daichitha apara bara pepon
cueyatatsi icha itacʉpatsi xua paeba.
\v 17 Icha daxita wapepon ʉ peitacuereto tsipae, jopa naca
itacʉpaeyo xua wajume taewa tsipae. Barichi icha wapepon
daxita ʉ pemuxuyoroto tsipae, jopa naca itacʉpaeyo xua
watuxubiwa tsipae.
\v 18 Ichitha Nacom pitacuiya duba xua ichaxota ichichipa
duba daxita baxuan xua pocotsiwan pepon pecueyabiwatsi.
\v 19 Icha daxita baxuan saya ʉ najʉpaetsipa, bapoxonae
jopa xapain xeinaetsipaetsi pepon.
\v 20 Bequein anoxuae nawita xeinatsi xuan wanaca
cueyabiwan wapepontha, daichitha awiya bara cae pepontsi.
\p
\v 21 Peitacuereto jopa itacʉpaetsi xua pejeiwa pecobetha:
“Xam jopa cacanamatawenonaetsi”, jopa pejeiwa. Barichi
pentasipa jopa itacʉpaetsi xua pejeiwa petaxubetha:
“Paxambe jopa paca canamatawenonaetsibe”, jopa pejeiwa.
\v 22 Po wanaca cueyatsiwa wapepontha xua jopa naca tsita
ainya cuiyo, apara bara baxua ainya cui
wacanamatawenonaenexa.
\v 23 Wapepon xua wanaca cueyatsiwa xua jopa naca tsita
ainya cuiyo, paparuwatha nama acatatsi xua wabarʉ itura
jinaenexatsi. Pocotsiwa wanaca cueyatsiwa xua wapepontha
xua pocotsiwa jiwi jopa benaca taeyo, naacabatsi
paparuwantha wapin uraxae.
\v 24 Po wanaca cueyatsiwa wapepontha pocotsiwa jiwi nacata
tane baxuan jopa ainya cuiyo xua waacabinexa paparuwatha
xua jopa waauraxaetsi. Nacom nacata exana pepon xua
waxainchi beta nayaewatatsi paparuwatha, po wanaca
cueyatsiwa wapepontha xua bichocono pecanantawenonaewa
baxua.
\v 25 Nacom baxuan exana xua jopa baxuan penawepu tsabinexa
pepon weya. Daxita baxuan xua wanaca cueyabiwan eenatsi xua
nantiya penayawenaewa tsane icha pomonae Nacom pejume
cowʉntsiwichi ichi xua nantiya bewa nayawenae.
\v 26 Icha barapo wanaca cueyabiwan caewa jiwana wepu
atene, bara barichi pepon daxita atenerʉ. Mataʉta icha
baxuan caewa jiwana ainya cui cana exanatsi bara daxita
nabarʉ weiweinaya dubena pepontha.
\p
\v 27 Paxam Jesucristo piamonae tatsi jiwana pamxaem,
caemonae pananaexaname, icha Jesucristo ichi xua xeina pia
pecueyabiwatsi pia pepontha. Bequein bara caemonae
pananaexaname ichitha carepaya barompaya patanacuitame
Cristo.
\v 28 Nacom itapeta xua pomonae pejume cowʉntsiwichi xua
pomonae pia petanacuichinexa tsainchi. Copiya itapetatsi
pomonae Jesucristo pia peitorobi jiwi tatsi. Bapoxonae
irʉrʉ itapetatsi pomonae Nacom pia peitorobi jume
pepaebiwi. Equeicha bapoxonae irʉrʉ itapetatsi pomonae
jiwi pecuidubiwi Nacom Pejume Diwesi. Bapoxonae irʉrʉ
itapetatsi pomonae pexeinya petsita itʉtsi coyenewan
exana. Bapoxonae irʉ itapetatsi pomonae axaibi peexanaewi
peatenewi. Irʉno bapoxonae itapetatsi pomonae jiwi
peyawenaewi. Bapoxonae irʉrʉ itapetatsi pomonae
peitorobiwi pomonaetha pomonae pejume cowʉntsiwi. Irʉrʉ
bapoxonae itapetatsi pomonae cueicueijei icha jumeintha, po
jumein bequein jopa nacuidubiyo.
\v 29-30 Nacom jopa apara daxita piamonae exanaeyo pomonae
Jesús pia peitorobi jiwi tatsi. Mataʉtano Nacom jopa
apara daxita piamonae exanaeyo pomonae Nacom pia peitorobi
jume pepaebiwi. Barichi Nacom jopa apara daxita piamonae
exanaeyo pomonae jiwi pecuidubiwi Nacom Pejume Diwesi.
Barichi jopa apara daxita jiwiyo pomonae exana pexeinya
petsita itʉtsi coyenewan. Mataʉtano jopa apara daxita
jiwiyo pomonae axaibi peexanaewi peatenewi. Barichi jopa
apara daxita jiwiyo pomonae cueicueijei icha jumeintha po
jumein bequein jopa nacuidubiyo. Barichi jopa apara daxita
jiwiyo pomonae xuya piamonae yabara yaputane exana po
jumein ichamonae cueicueijei po jumein bequein jopa
nacuidubiyo.
\v 31 Ichitha paxam bewa paichichipaename po jʉntʉ cui
coyenein xua bichocono wʉnae po coyenein xua Nacom amanaya
cata piamonaetha.
\s Meje xua Pablo yabara paeba peantobe coyenewa
\p Ichitha anoxuae yabara paca cuidubinchi icha jʉntʉ cui
coyenewa po jʉntʉ cui coyenewa bichocono toxeinchiya
wʉnae beyacaincha xua po jʉntʉ cui coyenein aunxuae
yabara paeban.
\c 13
\p
\v 1 Metha icha bequein neitacʉpaetsipa xua
tacueicueijeiwa ainya jumein po jumein ichamonae
cueicueijei, xuano po jumein matatsunpiwi cueicueijei.
Bequein metha neitacʉpaetsipa daichitha icha jopa
ichamonae tsita xeinaeinyo peantobe coyenewa, bapoxonae
saya apara pin busi jumein exanan poxonae saya cueicueijan.
\v 2 Metha xan Nacom pia peitorobi jume tacueicueijan
tsipae, mataʉtano metha yaputaetsipan daxita po coyenein
Nacom moya yawʉn xeina xua bexa Nacom exanaena, mataʉtano
metha yaputaetsipan daxita peyaputae coyenewan, mataʉtano
metha beta jume cowʉntsipan xua taneitacʉpaewa xua
tsipaeban demxuwatha xua peponaenexa. Bequein metha
xeinaetsipan daxita barapo coyenein ichitha came jopa
xeinaeinchipae peantobe coyenewa barapoxonae jopa ainya cui
jitonyo.
\v 3 Icha peacopeibi jiwitha catan daxita pocotsiwa xeinan,
yawano icha caenaetan tapepon xua tanetautsinexa tatʉpaein
tajume cowʉntsixae, ichitha awiya came jopa xeinaeinchipae
peantobe coyenewa daxita jiwi nexa, Nacom jopa tsita ainya
cuiyʉnyo.
\p
\v 4 Jame pon xua peantobe coyenewa xeina daxita jiwi nexa
bapon jame jʉntema popona poxonae bequein ichamonae abe
taexanaetha xua bapon bequein abe taexanaethatsi. Barichi
pon peantobe coyenewa xeina, bapon jame amanaya yabara
nanta xeinaeya yawena ichamonae. Bapon jame jopa peyabara
uwin pocotsiwa ichamonae xeina. Mataʉtano bapon jame jopa
pia coutha penayabara nanta xeinaein xua peainya cui jiton.
Mataʉtano jame bapon jopa peaebin jiwi.
\v 5 Barichi bapon jame jopa atsaquiya pepaebin. Mataʉtano
bapon jame jopa peyabara nanta xeinaein xua saya ʉ piawa
nexa. Bapon jame jopa peanaepanaein ichamonaetha. Bapon
jame xuya jopa peyantomateibin xua xuya peexanaenexa abe
bapontha.
\v 6 Barichi bapon jame jopa jʉntʉ coyene weiweinaeyo
poxonae ichamonae abe exana. Saya bapon jame jʉntʉ coyene
weiweina poxonae ichamonae bara xainyeya exana.
\v 7 Pon ba jame peantobe coyenewa xeina ichamonae nexa,
bapon jame exanapona beta bequein ichamonae daunweya
ayapubeya taexanaetha xua bapon daunweya ayapubeya
taexanaethatsi. Bapon ba jame yabara jume cowʉntapona
ichamonae xua barapomonae pomonae ichamonaexae itacʉpatsi
xua xanepanaya peexanaewa. Mataʉtano bapon jame yabara
jume cowʉntsiya ewatapona xua ichamonae bexa beta
peexanaewa tsane bequein abe peexanaewi. Mataʉtano bapon
ba saya jʉntema popona bequein bapon abe taexanaethatsi
ichamonae.
\p
\v 8 Po coyene xua jiwi antobe ichamonae barapo coyenewa
bapana jopa weraweracae tsane. Jopaena matacabi po
matacabitha jopa nantawenonae tsane xua pomonae
pecueicueijei jiwi Nacom nexa pocotsiwa Nacom yaputane
exana. Barichino jopa cueicueijei tsane icha jumeintha po
jumein barapomonae jopa bequein nacuidubiyo. Mataʉtano
jopa nantawenonae tsainchi po coyene peyaputae coyenewa.
\v 9 Anoxuae wayaputae coyenewa nacata seica daxota be
conotha yaputainchi. Mataʉtano Nacom yabara
wacueicueijeiwa nacata seica daxota be conotha yabara
cueicueijeichi Nacom.
\v 10 Ichitha poxonae Cristo patopaetsica pon daxita
coyenein peyaputaein bapoxonae bapon naca yaputane exanaena
po coyene xua nacata seica xua wayabara cueicueijeiwa
bapon, xuano xua bapon yabara yaputainchi. Barapo ainya
coyenebe weraweracaena bapoxonae.
\p
\v 11 Poxonae xan awiya pexuyon cueicueijan xua najume
pexuinan. Yawano nanta xeinan icha pexuyo ichi. Mataʉtano
yaputan xua pexuyoxaein. Ichitha poxonae pinyonba nacui
baraxuban pocotsiwa exanaponan poxonae pexuyon.
\v 12 Bara jʉta coyeneya ichi anoxuae. Saya be conotha
Nacom yabara yaputainchi. Baraxua be icha be pocotsi jʉta
coyeneya ichi poxonae tsabocototha nayatainchi xua dʉdʉna
xua daichitha jopa nataetsi. Ichitha bexa tsane yatsicaewa
Nacom pentha taeinchi peitabara. Anoxuae be conotha Nacom
yabara yaputan. Ichitha bexa tsane xaniwaicha daxita beta
yaputaein icha anoxuae Nacom neichi xua tanejʉntʉ coyene
yaputaewa.
\v 13 Acoibi po coyenewabe ataya ayapusʉ tsane. Meje
barapo acoibi po jume coyenewabe xuaje: Pejume cowʉntsi
coyenewarʉ Nacomtha, barichi peyabara jume cowʉntsiya
ewatsi coyenewarʉ Nacomtha, mataʉtano peantobe
coyenewarʉ. Jame po jume coyenewa bichocono toxeinchiya
ainya cui beyacaincha xua icha coyenewa barapo coyenewa
jame apara xua peantobe coyenewa, xua ichamonae waantobe
coyenewatsi. Barapo jume coyenewa bichocono toxeinchiya
ainya cui.
\c 14
\s Meje xua Pablo yabara paeba xua ainya jumein pepaebiwa
yabara po jumein bequein jopa nacuidubiyo
\p
\v 1 Bewa paichichipaename xua painya nexeinaewa peantobe
coyenewa. Barapoxonae bewano paichichipaename icha jʉntʉ
coyenein pocotsi jʉntʉ cui coyenein Nacom amanaya paca
cata. Po jʉntʉ cui coyene xua bichocono wʉnae
beyacaincha xua icha jʉntʉ cui coyenewa, apara barapo
jʉntʉ cui coyenetha pacueicueijam Nacom pia peitorobi
diwesi. Baxua jame bewa paichichipaename.
\v 2 Pon ba icha jumetha cueicueijei po jumeintha xua bapon
bequein jopa nacuidubiyo bapon apara tsipaeba Nacomtha.
Bapon apara jopa tsipaebiyo jiwitha tsipei jiwi jopa
yaputaeyo pocotsiwa paeba bapon. Pocotsiwa bapon paeba
apara Nacom pia Pejumope tʉnaxʉ tatsi cueicueijei exana.
Bapon apara paeba pocotsiwa Nacom moya yawʉn xeina,
pocotsiwa xua bequein jiwi jopa yaputaeyo.
\v 3 Ichitha nama seicaya pon jame Nacom Pejume Diwesi
cueicueijei jiwitha, jiwi yaputane exanaeinchi Nacom
yabara. Mataʉtano bapon poxonae Nacom Pejume Diwesi
cueicueijei yawena ichamonaetha xua barapomonae jʉntʉ cui
coyene tsacabatsi xua Nacom pejume cowʉntsiwatsi. Barichi
poxonae cueicueijei Nacom Pejume Diwesi jʉntʉ coyene
sadʉjei exana pomonae anthʉthʉrewe xua anthʉthʉtane.
\v 4 Pon ba cueicueijei ainya jumeintha po jumeintha
bequein bapon jopa nacuidubiyo, bapon ba saya pia coutha
nayawena xua peyabara yaputaewa Nacom. Ichitha pon ba
cueicueijei jiwitha Nacom nexa po coyene Nacom yaputane
exana, bapon jiwi yaputane exainchi Nacom yabara pomonae
xua Nacom pejume cowʉntsiwichi.
\p
\v 5 Ichichipan xua daxita paxam painya necueicueijeiwa
icha jumeintha, po jumein bequein jopa panacuidubim. Jame
yatsicaewa bichocono ichichipan xua painya necueicueijeiwa
Nacom Pejume Diwesi ichamonaetha. Pon ba xua Nacom Pejume
Diwesi cueicueijei ichamonaetha, bapon ba jame wʉnae exana
beyacaincha pon icha jumeintha cueicueijei. Ichacuitha
bapon pon icha jumeintha paeba itacʉpatsi xua yabara jume
yaputane exana jiwitha po jumein xua pipato pepaebi jumein.
Icha bapon barapo coyene exana bapoxonae bapon yawena
pomonae pejume cowʉntsiwi Nacom xua beta mataropeicha
pejume cocowʉntaponaenexa Cristo.
\v 6 Tamonae pam, icha poxonae paca siwa ponaetsipatsi paca
tsipaebichipatsi po jumeintha jopa nacuidubinyo tacoutha,
bapoxonae apara jopa paca yawenaetsipaetsi. Ichitha icha
paca tsipaebichipatsi po diwesi Nacom neyaputane exana,
baxua jame paca yawenaetsipa xua beta painya nejume
cowʉntsiwa Nacom. Ichitha icha ichacuitha paca
tsipaebichipatsi pocotsiwa xua nacuiduban baxua jame paca
yawenaetsipa. Mataʉtano icha ichacuitha paca
tsipaebichipatsi pocotsiwa xua Nacom Pejume Diwesi paeba
pocotsiwa bexa Nacom exanaena, baxua jame paca
yawenaetsipa. Ichacuitha icha paca cuidubichipatsi Nacom
Pejume Diwesi baxua paca yawenaetsipa.
\p
\v 7 Jiwi ba tanbaba po petanbabiwa arpa matawʉn, xuano ba
oba po peobiwa pewʉn flauta. Ichitha icha barapo ainya
pecajume exanaewan jopa xapain busi pichapaetsipae
bapoxonae jiwi jopa xapain yaputaetsipae po wei xua icha
jiwi wei tanbaba.
\v 8 Barichi poxonae ba jiwi naba ichamonaetha bapoxonae ba
oba xua penajunutsiwa. Ichitha icha barapo busi, busi
caewa, jiwi jopa xapain busi taeyo. Bapoxonae jiwi jopa
itacʉpaetsi xua penacui wʉnaetsiwa xua penabinexa.
\v 9 Barichi paxamtha. Icha icha jumeintha papaebichipame
jiwitha, po jumeintha bequein jopa panacuidubim, xuano irʉ
barapo jiwi jopa nacuidubiyo bapoxonae jiwi jopa xapain
paca yaputaetsipae. Baraxua apara be saya poxonae sito
patsipaebame.
\v 10 Metha beya tsipae xua barapo nacuathe ainya jumein
xeinaetsipa xua jiwi barompaya tsanaya pijumeintha paeba.
Daxita barompaya pia matabʉxʉmonaein tsiniya xeina po
jumein xua yaputane barapomonae.
\v 11 Ichitha icha xan jopa yaputaeinyo po jumetha xua
ichʉn netsipaeba bapoxonae xan be tsita tana nanapaincha
poponaein xua be icha nacua werena taponaein irʉ bapondʉ
be netsita penanapaincha poponaein xua be icha nacua werena
peponaein.
\v 12 Paxam paichichipame po jʉntʉ cui coyenein Nacom pia
Pejumope tʉnaxʉ tatsi amanaya cata piamonaetha. Yaitama
baxuan paichichipame daxota bichocono pawʉcare barapo
Nacom pia Pejumope tʉnaxʉ tatsi xua painya nepaca
catsibinexa po jʉntʉ cui bichocono wʉnae. Baxua
pawʉcare xua painya neyawenaenexa pomonae pejume
cowʉntsiwi Nacom, xua beta pejume cocowʉntaponaenexa
Nacom.
\p
\v 13 Daxota pon icha cueicueijei icha jumetha po jumetha
bequein bapon jopa nacuidubiyo, bapon bewa wʉcaena
Nacomtha xua Nacom bapontha yabara jume yaputane pecana
exanaenexa barapo jume. Bapoxonae bapon itacʉpatsi xua
yabara yaputane exana barapo jume xua ichamonae yaputane
exanatsi.
\v 14 Icha icha jumetha tsipaeban Nacomtha po jume bequein
jopa yaputaeinyo saya apara tajumope tʉnaxʉ tsipaeba
Nacomtha. Tajʉntʉ coyene jopa yaputaeyo xua tatsipaebiwa
Nacom. Barichi ichamonae jopa yaputaeyo xua tatsipaebiwa
Nacom.
\v 15 ¿Eta xua bewa exanocuaein? Jame, bewa wʉcaein Nacom
tajumope tʉnaxʉtha po jumein jopa yaputaeinyo. Mataʉtano
bewa wʉcaein Nacom tajʉntʉ coyenewatha po jumein
yaputan. Barichi bewa naxʉnaein Nacomtha tajumope
tʉnaxʉtha po jumein jopa yaputaeinyo. Mataʉtano bewa
naxʉnaein tajʉntʉ coyenewatha po jumein yaputan.
\v 16 Ichacuitha metha icha jumetha wʉnae jainchipame
Nacom xua nejumope tʉnaxʉ cueicueijei cacana exana.
Pomonae xua cajume taetsipa jopa cajume yaputaetsipae.
Daxota jopa itacʉpaetsipaetsi xua pebʉrʉya necajume
notsiwa Nacom nexa, xua pejeinexa: “Bara ichi tsane”, xua
pejeiwa.
\v 17 Poxonae bequein Nacomtha wʉcaetsipame icha jumetha
bara bequein wʉnae pocotsiwa xua paebame, daichitha ichʉn
jopa yawenaetsipaetsi xua beta pejume cowʉntsiwa Nacom.
\v 18 Nacomtha tsipaeban paxam yabara, janje: “Nacom maisa
jʉntʉ coyene weiweinan, xua icha jumeintha
tacatsipaebiwatsi, beyacaincha daxita barapomonae xua icha
jumeintha catsipaeba”, jan.
\v 19 Ichitha poxonae pomonae Nacom pejume cowʉntsiwichi
nacaetuta penacaetutsi botha bara saya wʉnae tsipae xua
icha saya cinco po jumebe tacuidubiwa tsipae xua jiwi
peyaputaewa tsane. Baxua beyacaincha xua poxonae icha metha
cueicueijan tsipae diez mil po jumebe, po jume xua jopa
nacuidubinyo. Bequein barapo diez mil po jumebe paebichipan
daichitha jiwi jopa yaputaetsipae xua tacueicueijeiwa.
\p
\v 20 Tamonae pam, paxam pomonae irʉ painya nejume
cowʉntsiwixae Jesucristo. Painya xoba pananta xeiname icha
pexui ichi poxonae nanta xeina. Jame pajinompa
dubenanaebiyama icha pexui ichi poxi pencuetixi xua jopa
abe exanaeyo. Maisa jame pananta xeina dubenanaebiyama icha
pomonae pinyon ichi xua nanta xeina dubenanaebiya.
\v 21 Nacom jeye pia peitorobi jume diwesitha: “Paebin
barapo judiomonaetha poxonae cueicueijei cana exanaein
pomonae penanapaincha jinompaewi xua icha nacuapiwi po
jumein xua jopa yaputaeyo pomonae xua petsipaebixaetsi.
Bequein baxua exanaein ichitha cataunxuae barapo judiomonae
jopa nejume tae tsane”, jei pon jiwi Pecanamataxeinaein
pia peitorobi jume diwesitha.
\v 22 Daxota xua pecueicueijeiwa icha jumeintha tsita
itapeinya xeina xua pomonaetha pomonae jopa pejume
cowʉntsiwi xua apara Nacom atene exanaena barapomonae jopa
pejume cowʉntsixae. Barapo jumein jopa apara nexiyo
pomonae xua bayatha pejume cowʉntsiwi, poxoru Nacom jopa
atene exanae tsane barapomonae. Ichitha xua cueicueijei
Nacom Pejume Diwesi, baxua tsita itapeinya xeina pomonaetha
pomonae pejume cowʉntsiwi xua apara Nacom yawenaena
barapomonae peantobexae tsipei barapomonae Nacom jume
cowʉntatsi. Barapo Nacom Pejume Diwesi pecueicueijeiwa
jopa apara nexiyo pomonae jopa pejume cowʉntsiwi poxoru
Nacom jopa yawenae tsane barapomonae jopa pejume
cowʉntsixae Nacom.
\v 23 Ichacuitha metha patsipa painya nenacaetutsiwatha xua
poxonae Nacom wʉnae pajaintame pomonae jopa yabara
yaputaeyo poxonae ichamonae pecueicueijeiwa icha jumeintha,
irʉrʉ pomonae jopa pejume cowʉntsiwi Nacom. Icha metha
daxita paxam barompaya papaebichipame icha jumeintha
barapomonae jopa paca yaputaetsipae. Bapoxonae barapomonae
paca yabara nanta xeinaetsipa xua apara painya
nepacamatajemabi jiwi pam.
\v 24 Ichitha metha pebiwi patsipa painya nenacaetutsiwatha
xua poxonae Nacom wʉnae pajaintame pomonae jopa yabara
yaputaeyo poxonae ichamonae pecueicueijeiwa icha jumeintha,
irʉ pomonae jopa pejume cowʉntsiwi Nacom. Poxonae daxita
paxam Nacom Pejume Diwesi papaebichipame barapomonae paca
yaputaetsipa xua papaebame. Bapoxonae barapomonae najʉntʉ
coyene cayabara nanta xeinaetsipa xua abe peexanaewa.
Mataʉtano barapomonae yaputaetsipa xua Nacom petsita
natsicuentsiwatsi xua abe peexanaexae xua poxonae painya
necajume taexae poxonae papaebame Nacom Pejume Diwesi.
\v 25 Nacom exana xua barapomonae peyaputaewa po coyene xua
Nacom daxita beta yabara yaputane po coyene xua barapomonae
nanta xeina pejʉntʉ coyenewatha. Bapoxonae barapomonae
yaputaena xua bara Nacom jʉntemaina barapomonae abe pia
peexanae cuiru coyenein tatsi. Bapoxonae pentabocototha
umenaena xua Nacom wʉnae pejainchinexa tsainchi.
Barapomonae jei tsane paxamtha: “¡Jaina, maisa deta Nacom
paca barʉ jinompa!” paca jei tsane barapomonae.
\s Meje xua Pablo jeye: “Beta xanepanaya paexanaponde
penacaetutsi bontha poxonae wʉnae pajainteibame Nacom”,
jei
\p
\v 26 Tamonae pam, paxam pomonae irʉ painya nejume
cowʉntsiwixae Jesucristo. Paca tsipaebatsi xuaje: Poxonae
pana nacaetutame, ichamonae painyamonae jiwana barabʉ
naxʉnaena peweixi xua wʉnae pejainchinexa Nacom.
Ichamonae irʉ barabʉ cuidubina ichamonaetha. Ichamonae
irʉ barabʉ cuidubina po coyenein Nacom yaputane exana.
Ichamonae irʉ barabʉ icha jumeintha cueicueijei tsane po
jumein bequein jopa nacuidubiyo. Ichamonae irʉ barabʉ
xuya barapo jumein yabara jume yaputane exanaena daxita
jiwitha po jumein ichamonae paeba. Daxita po coyenein xua
paexaname bara wʉnae paexande poxonae panacaetutame wʉnae
painya jaintsinexa Nacom xua daxota xanepanaya mataropeicha
painya nejume cocowʉnta dubenanaebiyaenexa Nacom.
\v 27 Poxonae icha jumeintha pacueicueijam bewa saya
cueicueijei nacueyatabe poyobe ichacuitha poxonae acoibi
poyobe. Ichitha ichamonae ajibi tsane. Barapo acoibi poyobe
bewa xuya cotacaya barompaya tsana cueicueijei tsoponae
tsane. Bewa bapoxonae xuya ichʉn cotacaya yabara jume
yaputane exanae pocotsiwan xua barapo acoibi poyobe
barompaya seicaya paeba.
\v 28 Ichʉn dapocotsin aibi pon itacʉpatsi xua xuya
cotacaya peyabara jume yaputane exanaewa, jopa bewa barapo
acoibi poyobe icha jumeintha paebi tsane penacaetutsi
jiwitha xua poxonae Nacom wʉnae pejainchinexa. Saya bewa
moya pia coutha cueicueijei Nacomtha.
\v 29 Bara wʉnae tsipae icha saya pacopatsipame
nacueyatabe poyobe xua pecueicueijeiwa Nacom Pejume Diwesi
xua ichacuitha poxonae saya acoibi poyobe. Ichamonae bewa
jume taena icha metha bara xaniwaicha paeba barapo acoibi
poyobe.
\v 30 Icha ichʉn eca baxota pon Nacom yaputane exana po
jumein bewa cueicueijei tsane bapoxonae pon xua copiya
asiya uncua bewa moya ecaena xua daxota barapon pon ichʉn
itacʉpatsi xua cueicueijei po jumein Nacom yaputane exana.
\v 31 Daxita paxam paca itacʉpa xua painya necueicueijeiwa
Nacom Pejume Diwesi, painya necana exanaenexa xua daxita
barapomonae penacuidubinexa. Mataʉtano paca itacʉpa
painya necueicueijeiwa painya nejʉntʉ cui tsacabinexa
daxita jiwi pejume cowʉntsinexa Nacom. Ichitha jame paxam
barompaya tsanaya xuya patamropatsiya cueicueijam
tsoponeibim tsane.
\v 32 Pomonae Nacom Pejume Diwesi pecueicueijeiwi
barapomonae itacʉpatsi xua penajʉntʉ coyene itorobiwa.
Daxota barapomonae ewata xua ichʉn matha
pecueicueijeinexa, xua bapoxonae bara pecueicueijeinexa
tsane ichamonaetha.
\v 33 Tsipei Nacom jopa ichipaeyo xua jiwi ajumeyaexa
poxonae daxita jiwi pebʉrʉya cueicueijei Nacom Pejume
Diwesi. Jame Nacom ichichipa xua pomonae pejume cowʉntsiwi
jʉntema penabarʉ jinompaewa poxonae nacaetuteiba xua
wʉnae pejainchinexa Nacom.
\p Daxita pomonae xua nacaetuta pejume cowʉntsixae
Jesucristotha, exana xuaje:
\v 34 Yabʉxi bewa saya moya poxonae nacaetuta pomonae
Nacom pejume cowʉntsiwi xua Nacom Pejume Diwesi
pecueicueijeinexa. Nacom baxua jopa copatsiyo xua yabʉxi
pecueicueijeiwa baxota. Barapo yabʉxi bewa jume
cowʉntsina pia seuriwi pocotsiwa itorobeibatsi icha be
pocotsi coyeneya bayatha Moisés pia peitorobi coyenewatha
paeba.
\v 35 Icha barapo yabʉxi ichichipa xua peyaputaewa
pocotsiwa ichamonae paeba, bewa barapowaxi pia boxitha
yainyabi pia seuriwi. Tsipei jopa wʉnae tsipae icha
yabʉyo cueicueijei penacaetutsimonaetha pomonae Nacom
pejume cowʉntsiwichi xua poxonae yainyaba pia pebiwi.
\p
\v 36 Paxam bewa payaputaename xua Nacom Pejume Diwesi jopa
copiya matha tamropata pitabiyo painya xantha. Mataʉtano
jopa paxam compa pam pomonae meisa paxeiname Nacom Pejume
Diwesi.
\v 37 Ichamonae pomonae paxam jiwana pam nanta xeina xua
xeina po jʉntʉ coyenewatha pecueicueijeiwa Nacom Pejume
Diwesi. Barapo jʉntʉ coyene xua Nacom pia Pejumope
tʉnaxʉ tatsi amanaya cata. Mataʉtano ichamonae pomonae
paxam jiwana pam nanta xeina xua xeina icha jʉntʉ
coyenewa po jʉntʉ coyene Nacom cata. Daxita paxam bewa
payaputaename xua po coyenein yabara pacata tinatsi xua
apara Nacom wanaca itorobiwa.
\v 38 Icha pebin jopa bejume cowʉntsiyo pocotsiwa paeban,
bapoxonae painya xoba pajume cowʉntame pocotsiwa bapon
paeba.
\p
\v 39 Tamonae pam, paxam pomonae irʉ painya nejume
cowʉntsiwixae Jesucristo. Bewa jame paichichipaename xua
painya necueicueijeiwa Nacom Pejume Diwesi. Painya xoba
pajume itawetame poxonae ichamonae cueicueijei icha jumein
po jumein bequein jopa nacuidubiyo.
\v 40 Daxita beta xanepanaya paexanaponde poxonae pana
nacaetutame penacaetutsi botha xua poxonae wʉnae painya
nejainchinexa Nacom, xua barompaya tsanaya patamropatsiya
exanaponde.
\c 15
\s Meje xua Pablo yabara paeba poxonae Cristo equeicha asʉ
exainchi
\p
\v 1 Tamonae pam, paxam pomonae irʉ painya nejume
cowʉntsiwixae Jesucristo. Ichichipan xua pacayabara nanta
xeiname po diwesi pecapanenebiyae diwesi jume, po diwesi
paca tsipaebatsi. Barapo pecapanenebiyae diwesi pajume
cowʉntame, xua daxota beta pajume cowʉntsiya jinompame
Nacomtha.
\v 2 Painya nejume cowʉnta dubenanaebiyaexae barapo
pecapanenebiyae diwesi, anoxuae painya nepaca capanenebiyae
jiwi pam abe painya neexanae cuiru coyenein weya. Barapo
coyene paxeina dubenanaebiyaename icha beta payabara
jʉntanainame pocotsiwa paca cuidubatsi xuano icha
xaniwaicha pajume cowʉntame baxuan. Icha copiya jopa
pajume cowʉntsim tsane painya jʉntʉ coyenetha barapo
pecapanenebiyae diwesi bapoxonae Nacom jopa paca
capanenebiyae tsane.
\p
\v 3 Copiya paca cuidubatsi pocotsiwa xua ichʉn necuiduba
xua Cristo yabara. Paca cuidubatsi xua Cristo naca tsitʉpa
abe waexanae cuiru coyenein nexa icha be pocotsi coyeneya
bayatha Nacom Pejume Diwesitha yabara paeba baxua.
\v 4 Poxonae Jesucristo tʉpa bapoxonae mʉthʉtha xotsi.
Ichitha poxonae acoibi po matacabibe jopa, barapo
matacabitha equeicha asʉ exanatsi, icha be pocotsi
coyeneya bayatha Nacom Pejume Diwesitha yabara paeba baxua.
\v 5 Bapoxonae Pedro tsita naitʉtatsi Jesucristo.
Bapoxonae equeicha Jesucristo tsita naitʉta pia peitorobi
jiwi tatsitha pomonae doce poyobe.
\v 6 Bapoxonae caena equeicha Jesucristo tsita naitʉta
pomonaetha pomonae pia pejume cowʉntsi jiwixaetsi, pomonae
beyacaincha quinientos poyobe jiwi. Awiya pinmonae barapo
bicheito jiwanamonae jinompa anoxuae pomonae xua Jesús
tainchi bequein ichamonae werapa bayatha, pomonae
barapomonae jiwana.
\v 7 Bapoxonae equeicha Santiago tsita naitʉtatsi
Jesucristo. Bapoxonae equeicha Jesús tsita naitʉta daxita
pomonaetha pomonae pia peitorobi jiwi tatsi.
\p
\v 8 Bapoxonae nama matapainya xan Pablon netsita naitʉta
Jesucristo. Nacom necana exana pon pia peitorobi jiwi
jiwana tatsin, xua pon tabʉ ducuan. Xan be pon xua nainya
jemeicha jume cowʉntan icha be pocotsi coyeneya ichi
poxonae pexuyo pena nainya jemeicha tsiperʉ wenaexana.
\v 9 Xan wepu be conotha ainya cuin pomonae Jesucristo pia
peitorobi jiwi tatsi. Ichamonae pomonae Jesucristo pia
peitorobi jiwi tatsi bichocono ainya cui beyacaincha xua
xan. Bequein Nacom neyabara caunuta xua xan Jesucristo pia
peitorobi jiwi tatsi jiwanan ichitha auran tsipei bichocono
abeya exanan pomonaetha pomonae penacaetutsimonae jiwitha
pomonae pejume cowʉntsiwi Nacom. Pebaraxuaxae jopa bewa
neyabara caunutsi baxua.
\v 10 Ichitha xan nama anoxuae seicayiya exanan Nacom
taneyawenaexae. Bapon tana neantobexae jopa abeya
taexanaeinyo. Jame nama seicaya bichocono ayapusʉya
nacuitan Jesucristo nexa beyacaincha ichamonae pomonaexae
Jesucristo pia peitorobi jiwi tatsi. Ichitha xan jopa
tacouthinyo xua tanacuichiwa, apara jame Nacom neyawena
tana neantobexae.
\v 11 Jopa ainya cuiyiyo pomonae bayatha paca cuiduba Nacom
Pejume Diwesi. Jopa ainya cuiyiyo icha ichamonae pomonae
Jesús pia peitorobi jume pepaebi jiwi bayatha paca
cuiduba. Mataʉtano jopa ainya cuiyiyo icha xan bayatha
paca cuidubatsi. Saya jame ainya cui xua daxita paxan nanta
jʉpaya tapaca cuidubiwatsi barapo Nacom pia
pecapanenebiyae diwesi jume xuano xua painya nejume
cowʉntsiwa baxua.
\s Meje xua Pablo yabara paeba pomonae xua equeicha asʉ
exanatsi petʉpae cuiru coyene weya
\p
\v 12 Paca cuidubatsi xua Cristo equeicha asʉ exanatsi
petʉpae cuiru coyene weya. Daichitha pomonae paxam jiwana
pam paeba xua pinae Nacom jopa equeicha asʉ exanaeyo jiwi
petʉpae cuiru coyene weya. ¿Eta xua nexata metha baxua
paeba painyamonae jiwana? Bara bayatha payabara
yaputanemeba.
\v 13 Icha jiwi jopa equeicha asʉ exanaetsipaetsi petʉpae
cuiru coyene weya, bara nexata Cristo barichipaetsi, jopa
equeicha asʉ exanaetsipaetsi petʉpae cuiru coyene weya.
\v 14 Icha Cristo jopa equeicha asʉ exanaetsipaetsi
petʉpae cuiru coyene weya, bapoxonae jopa ainya cui tsipae
pocotsiwan paca cuidubatsi. Bapoxonae baxua be xua
pejumexaei tsipae tsipei jopa paca yawenaetsipae.
Mataʉtano barichi painya nejume cowʉntsiwa jopa ainya cui
tsipae jopa painya nepaca yawenaexae tsipae.
\v 15 Icha baxua xaniyei paxan be pomonae pemuxuitorobi
jiwi pan tsipaein pocotsiwa Nacom payabara paeban, tsipei
paxan apara papaeban xua Cristo equeicha asʉ exanatsi
petʉpae cuiru coyene weya. Papaeban xua Nacom equeicha
Cristo asʉ exanatsi petʉpae cuiru coyene weya ichitha
baxua jopa xainyeyo icha jiwi jopa equeicha asʉ exanaetsi
petʉpae cuiru coyene weya.
\v 16 Icha petʉpae jiwi jopa equeicha asʉ exanaetsipaetsi
petʉpae cuiru coyene weya, barichi Cristo bayatha jopa
equeicha asʉ exanaetsipaetsi petʉpae cuiru coyene weya.
\v 17 Icha Cristo jopa equeicha asʉ exanaetsipaetsi
petʉpae cuiru coyene weya bapoxonae jopa paca
yawenaetsipae xua painya nejume cowʉntsiwa. Daxota awiya
paexana dubenanaebiyaetsipame abe painya neexanae cuiru
coyenein.
\v 18 Icha baxua xainyei tsipae xua Cristo jopa asʉ
exanaetsipaetsi petʉpae cuiru coyene weya bapoxonae
pomonae xua bayatha werapa bequein jume cowʉntsitha tsipae
Jesús, ichitha weraweracaetsipa xua abe peexanaexae.
\v 19 Waxainchi jume cowʉntsiya wʉnae ewatatsi xua bexa
tsane Cristo naca asʉ exanaena poxonae werapaeinchi.
Ichitha icha saya jume cowʉnta dubenanaebiyaetsipatsi xua
Nacom wanaca yawenaewa tsane barapo cae pin nacuathe,
bapoxonae wajume cowʉntsiwa jopa naca yawenaetsipae xua po
coyene Nacom bexa asʉ wanaca exanaewa tsane poxonae
werapaeinchi. Bapoxonae jiwi pomonae jopa pejume
cowʉntsiwi naca yabara jei tsipae: “¡Pai barapomonae
tsobenae beyacaincha ichamonae bequein jume cowʉntsitha
tsobenae!” xua wanaca yabara jeichiwa tsipae.
\p
\v 20 Ichitha pocotsiwa xua yatsicaya jame xainyei, apara
jame xua Cristo bara yatsicaya asʉ exanatsi petʉpae cuiru
coyene weya. Bapon Cristo copiya jiwi asʉ canamata
exanatsi xua petʉpae cuiru coyene weya pomonae xua ataya
tsitecaeya peasʉnexa xua jopa weraweracaeyo.
\v 21 Jiwi abe peexanae cuiru coyenein peexanaexae daxota
werapa, tsipei jiton copiya abe canamata exana, bapon
Adán. Nama jiwi equeicha asʉ exanatsi, tsipei jiton
copiya asʉ canamata exanatsi, bapon Jesucristo.
\v 22 Jiwi werapaena icha Adán ichi abe peexanaexae.
Daxita pomonae Cristo piamonae tatsi equeicha asʉ
exanaeinchi petʉpae cuiru coyene weya icha Cristo cana
ichichi xua asʉ exanatsi xua petsitecaenexa.
\v 23 Nacom iche tsane xua poxonae exanaena xuaje: Copiya
matha Cristo asʉ exanatsi. Bexa tsane pomonae Cristo
piamonae tatsi asʉ exanaeinchi petʉpae cuiru coyene weya
poxonae Cristo equeicha patopaetsica barapo irathe tsique.
\v 24 Cristo weraweraca exanaena daxita, xua peitorobi
coyenewan. Mataʉtano muxuna weraweraca exanaena xua nacuan
peewatsi coyenewan. Mataʉtano muxuna weraweraca exanaena
peayapusʉya itorobi coyenewa po peayapusʉ itorobi
coyenewa xua jopa Nacom pia coyenewa tatsi. Bapoxonae
poxonae wetsina daxita, Cristo pia peayapusʉ itorobi
coyenewa Paxa caewa catsina, pon Nacom.
\v 25 Tsipei Cristo bewa tsiwanaya exanaponaena daxita
jiwitha be pon jiwi itorobiya pia pepa peewatsinchi. Baxua
bewa exanaena beya poxonae Nacom weraweraca exanaena
pomonae Cristo pia peaitafaetabi jiwichi.
\v 26 Po coyene Nacom cotacaya exanaena xua apara piamonae
asʉ cana exanaena xua bapana jopa peweraweracaewa tsane.
\v 27 Tsipei Nacom Pejume Diwesitha paeba xua pinae Nacom
itorobina Pexanto pon Jesucristo xua itorobiya
pecanamataxeinaenexa daxitantha. Bequein bara Jesucristo
daxitantha itorobiya canamataxeinaena saya Paxatha meisa
jopa itorobiyo tsane.
\v 28 Copiya Nacom exanaena xua Cristo itorobiya
canamataxeinaena daxitantha. Bapoxonae Cristo Nacom Pexanto
tatsi pia coutha nacana exanaena xua Paxa itorobiya
pecanamataxeinaenexa tsainchi. Bapoxonae Nacom xaniwaicha
itorobiya canamataxeinaena daxitantha.
\p
\v 29 Ichacuitha ichamonae bautisabatsi pomonae pewerapaewi
tsibautisabatsi xua barapomonae equeicha peasʉnexa
pepatsinexa Nacom pia nacuatha. Icha pewerapaewi jopa
equeicha asʉ exanaetsi petʉpae cuiru coyene weya
bapoxonae barapomonae pomonae pewerapaewi jopa yawenaetsi
bequein petsibautisabithatsi xua ichamonae bautisabatsi xua
peasʉnexa pomonae werapa.
\v 30 Daxita matacabi jinompeibatsi xua naca peipeita
ichamonae xua naca abe exana wajume cowʉntsixae. Icha jopa
equeicha asʉ naca exanaetsipae jopa ainya cui tsipae xua
wacueicueijei tsurubenanaebiwa Nacom Pejume Diwesi.
\v 31 Tamonae pam, paxam pomonae irʉ painya nejume
cowʉntsiwixae Jesucristo. Daxita matacabi muxu tatʉpeibi
xua ichamonae tanepeipeita exaneibixae. Baraxua xaniyei
icha ichi xua xaniyei xua jʉntʉ coyene weiweinan xua
Jesucristo pon Wanacanamataxeinaein xanepanaya peexanaexae
painya xantha.
\v 32 Xan bara imoxoyo tatʉpae poxonae Efeso tomarapiwi
inta abe exana. Barapomonae baraxua necana exana icha
neʉthʉ ichi poxonae ichʉn waetabatsi. Bequein
barapomonae baxua necana exana xua muxu tatʉpae ichitha
jopa asʉ neexanaetsipae petʉpae cuiru coyene weya icha
jiwi equeicha jopa asʉ exanaetsipaetsi. Icha jopa equeicha
caewa asʉ naca exanaetsipae bara saya exana
dubenanaebiyaetsipatsi pocotsiwa ichichipatsi. Poxonae
baraxua exanatsi jʉpa exanatsi icha ichamonae ichi pomonae
jopa peyabara jume cowʉntsiwa xua bara asʉ peexanaewatsi.
Barapomonae jeye: “Anoxuae nabanaeinchi yawa apaeinchi,
tsipei baya werapaeinchi jopa naca tsita ainya cuiyo”, jei
barapomonae, pomonae jopa pejume cowʉntsiwi.
\p
\v 33 Painya xoba pacopatame xua bara ichamonae painya
nepaca muxuitorobeibiwa. Jiwi ba pia pecayabara jʉta
pepaebi diwesiyo ba jei: “Pomonae abe peexanaewi cuiduba
ichamonaetha pomonaetha pomonae ichipa beta exana, xua
barapomonae abe peexanaenexa”, ba jei barapo diwesiyo.
\v 34 Equeicha caewa paexande po jʉntʉ coyene xua
bichocono Nacom tsita xanepanatsi. Painya xoba equeicha abe
paexaname. Ichamonae paxam jiwana pam jopa Nacom
yaputaetsi. Baxua paca tsipaebatsi xua painya neauranexa.
\s Meje po coyeneya xua Nacom exanaena poxonae jiwi
equeicha asʉ exanaeinchi petʉpae cuiru coyene weya
\p
\v 35 Metha ichʉn yainyabina, jei tsane: “¿Eta po
coyeneya Nacom exanaena poxonae pewerapaewi equeicha asʉ
exanaeinchi? ¿Eta pocotsi pepon barapomonae xeinaena?”
jei tsane.
\v 36 Barapo peyainyabiwa saya pejumexaei. Poxonae paʉbame
peʉbi xuto, barapo xuto bʉpana bocareca iratha xua pexu
nantafobabinexa poxonae xua nae pexuwinexa.
\v 37 Poxonae paʉbame jopa apara pepaboto paʉbim xua pepa
nae pexuwinexa. Jame apara ba pexu paʉbame, metha beya xua
trigo xuto tsipae, ichacuitha metha icha pexuton tsipaeno.
\v 38 Cotacaya Nacom exana xua barapo pexu xuwa icha be
pocotsi coyeneya Nacom ichichipa. Daxita peʉbi xuton
tsanaya seicaya pia cui barompa poxonae xuwa.
\v 39 Barichi jiwi pepon daxita jopa najʉpaeyo. Jiwi pia
pepon seicaya tsanaya barompa. Duwei unupiwi pia pepon
seicaya tsanaya barompa. Duwei menepiwi seicaya pia pepon
tsanaya barompa. Pepupunaewi seicaya pia pepon tsanaya
barompa.
\v 40 Peitabocotha xeina ainya pepon po ainya pepon
peitabocotha pejinompaewi nexa. Barichi barapo irathe xeina
ainya pepon pomonae barapo irathe pejinompaewi nexa. Po
pepon pexeinya peitʉpanae coicha xeina xua peitabocotha
jinompa barapo pepon bichocono pexeinya pepon. Barichi
wapepon pexeinya pepon po pepon xeinatsi po cae pin
nacuathe.
\v 41 Xometo poto atsato pia pexeinya peitʉpanae coicha
barompa. Barichi jomocoichato pia peitʉpanae coicha
barompa. Opiteino pia peitʉpanae coicha barompa. Icha
opitei pia peitʉpanae coicha jopa nacoicha jʉpaeyo icha
opiteitontha po opiteiton pia peitʉpanae coicha xeina.
\v 42 Barapocotsi jʉta coyeneya ichi pomonae xua equeicha
asʉ exanatsi petʉpae cuiru coyene weya. Poxonae pomonae
pewerapaewi iratha mʉthʉcatsi equeicha caewa tsorobo
naexana petsabanaexae. Bapoxonae equeicha Nacom asʉ
exanaena pena pepon xua petsitecaenexa. Barapo pena pepon
bapana jopa tʉpae tsane equeicha, jopa petsabanaexae
tsane.
\v 43 Barapo peru pepon jopa xeinaeyo peitʉpanae coicha
poxonae mʉthʉtha xotsi. Ichitha jame barapo pena pepon
xeina pexeinya peitʉpanae coicha. Barapo peru pepon jopa
xeinaeyo peasʉwa poxonae mʉthʉtha boca. Ichitha jame
barapo pena pepon xeina peasʉwa.
\v 44 Barapo peru pepon saya barapo cae pin nacuathe nexa.
Daxota poxonae tʉpa, tsabana naexana, tsorobo equeicha
caewa penaexanaenexa. Ichitha poxonae barapo pepon asʉ
exanaeinchi, bapoxonae pena pepon naexanaena pejumope
tʉnaxʉ nexa xua Nacom pia nacuatha peponaenexa. Icha jiwi
xeina peru pepon xua barapo cae pin nacuathe nexa, barichi
pena pepon xeinaena xua Nacom pia nacuatheicha nexa.
\p
\v 45 Nacom Pejume Diwesitha jeye: “Po jiton copiya Nacom
forota, bapon Adán. Bapon peasʉwa xeina xua pepoponaenexa
barapo cae pin nacuathe”, jei Nacom. Ichitha Cristo Adán
bichocono toxeincha ainya cuichi equeicha caewa asʉ
peexanaexaetsi. Daxota bapon Cristo itacʉpatsi xua
ichamonaetha cana exana xua pexeinaewa peajʉntʉyapusʉwa
xua po peajʉntʉyapusʉwa ataya tsiteca.
\v 46 Copiya jopa xeinaetsi po pepon Nacom pia nacuatha
nexa. Saya copiya xeinatsi po pepon barapo cae pin nacuathe
nexa. Ichitha cotacaya bexa tsane xeinaeinchi po pepon pena
pepon Nacom pia nacuatha nexa.
\v 47 Po jiton copiya exanatsi, pon tsorobo weya exanatsi,
bara bapon apara saya barapo cae pin nacuathe nexa. Po
jiton xua cotacaya patopa bapon apara Cristo pon itaboco
wepatopeica.
\v 48 Po jiwi xua barapo nacuathe jinompe pia pepon
exanatsi icha Adán ichichi xua pia pepon tsorobo weya
exanatsi. Ichitha pomonae Jesucristo piamonae tatsixae
barapomonae xeinaena pepon icha ichi xua pocotsi pepon
xeina Cristo, pon xua itaboco wetsica pona.
\v 49 Anoxuae wapepon werapaena icha Adán pia pepon tatsi
ichi xua bayatha tʉpa. Ichitha poxonae Nacom pia nacuatha
patinchi wapepon xeinaeinchi pocotsi pepon icha Cristo pia
pepon tatsi ichi xua pexeinya peitʉpanae coicha xeina.
\p
\v 50 Tamonae pam paxam pomonae irʉ painya nejume
cowʉntsiwixae Jesucristo, yabara paca tsipaebatsi po pepon
yawa jinompatsi. Barapo pepon jopa naca itacʉpaeyo xua
wayawa patsiwa Nacom pia peitorobi nacuatheicha xua ataya
tsitecaeya wajinompaenexa tsane, tsipei barapo pepon tʉpa.
\v 51 Paca tsipaebatsi pocotsiwa xua namicha xua jiwi jopa
yabara yaputaeyo xua Nacom moya yawʉn xeina. Daxita
pomonae waxainchi jiwanatsi jopa weraweracae tsainchi xua
ataya tsane. Ichitha daxita waxainchi xeinaeinchi icha
pepon.
\v 52 Poxonae trompeta matawʉn asiya obina xua poxonae
Nacom daxita wetsina, bapoxonae Nacom jemeicha nainya asʉ
exanaena pomonae pewerapaewi pomonae pejume cowʉntsiwixae
Cristo. Baxua nainya exanaena icha be pocotsi jʉta
coyeneya ichi poxonae jiton nainya naichaquetabiya
necotaba. Pewerapaewi asʉ exanaeinchi xua equeicha bapana
jopa peweraweracaenexa tsane. Bapoxonae waxainchi
pomonaetsi cataunxuae jinompatsi nainya icha pena pepon
xeinaeinchi.
\v 53 Wapepon po pepon tsorobo weya naexana bewa naexanaena
icha pepon xua jopa weraweraca exanaetsi. Wapepon xua
itacʉpatsi xua pewerapaewa, bewa pepon naexanaena po pepon
xua jopa werapaeyo.
\v 54-55 Wapepon xua weraweracaena Nacom equeicha asʉ
exanaena pena pepon po pepon jopa weraweracae tsane.
Poxonae baxua exanaena jopa weraweracaeyo. Yawa barapo
pepon itacʉpatsi xua werapa ichitha barapo pepon
naexanaena po pepon xua jopa werapaeyo. Bapoxonae baxua
nayabara jume cui weta xua exana pocotsiwa bayatha Nacom
Pejume Diwesitha tsiwʉnae yabara muxu duta. Nacom Pejume
Diwesitha jeye: “Poxonae Nacom pena pepon cana exanaena
piamonae, bapoxonae Nacom amanayabina pontha pon jiwi tʉpa
peexanaein”, jei Nacom Pejume Diwesitha.
\v 56 Pocotsiwa xua naca amanayaba, apara xua wawerapaewa
abeya waexanaexae. Pomonae exanaetha pocotsiwa Moisés pia
peitorobi coyenewatha itoroba, barapomonae awiya werapa
poxoru barapomonae awiya abe peexanaexae.
\v 57 Paxan pajan Nacomtha: “Nacom, maisa pajʉntʉ coyene
weiweinan xua pata tanecatsiwam jinya neayapusʉ itorobi
coyenewa pata amanayabinexa abe peexanae cuiru coyenein.
Barapo coyene pana catame xua poxonae Jesucristo pon pata
Necanamataxeinaein naetotha pata tana tsitʉpaexae”,
pajan.
\p
\v 58 Tamonae pam, paxam pomonae tapaca caantobe jiwichi
pam. Painya neamanayabixae abe painya neexanae cuiru
coyenein, pana najʉntʉ ayapusʉ exande Nacomtha. Painya
xoba payabara cui copatame xua bara ichamonae paca cana
exanaena xua icha coyeneya painya neexanaewa tsane. Ataya
beta panacuita dubenanaebiyama Nacom nexa. Tsipei paxam
payaputaneme po penacuichiwa Nacom pata tanacuita
dubenanaebiyame, bara Nacom tsita xanepanatsi.
\c 16
\s Meje xua Pablo paratixi yabara paeba po paratixi jiwi
catsiba ichamonaetha pomonaetha pomonae pejume cowʉntsiwi
Nacom
\p
\v 1 Yabara paca tsipaebatsi paratixi po paratixi
penacaetutsimonae jejebapona ichamonae nexa pomonae pejume
cowʉntsiwi Nacom. Paexande icha pomonae penacaetutsi
jiwimonae ichi xua exana pocotsiwa itoroban pomonae Galacia
nacuamonaepiwi.
\v 2 Daxita domingo wʉn matacabintha paxam daxita
barompaya painya paratixi pajiwana wetsabiya
pajejebaponaename pocotsi matoma pana busi matoma
xeineibame. Pomonae pin matoman nabusi matoma xeineiba bewa
ainya paratixi jejebaponaena. Pomonae tsiqui matomaxi
nabusi matoma xeineiba bewa cae paratixi jejebaponaena.
Abʉ paratixi pajebare xua jopa painya neexanaewa tsane
baraxua xua poxonae equeicha patopaein.
\v 3 Poxonae patopaein bapoxonae paitapetsiname pebiwi po
pebiwi pecaponaenexa carta. Barapo pebiwi Jerusalén tomara
beya caitorobin carta. Barapomonae carta caponaena yawa
muxuna caponaena paratixi po paratixi pajejebaponame
Jerusalén tomarapiwi nexa pomonae pejume cowʉntsiwi
Nacom.
\v 4 Icha nanta xeinaein xua yapu wʉnaein paratixi
penawichixae metha moya bara ponaetsipan Jerusalén tomara
beya. Bapoxonae barapomonae nepuna ponaena.
\s Meje xua Pablo yabara nanta xeina, xua pewarapaewa tsane
\p
\v 5 Poxonae ponaein, bewa Macedonia nacua iyan tsane.
Bapoxonae cotacaya paca siwa ponaeinchi Corinto tomaratha.
\v 6 Metha beya paca barʉ ecaetsipatsi be
caentacabiyobetha. Ichacuitha metha poxonae awʉbo paca
barʉ ecaetsipatsi. Bapoxonae poxonae weta xua awʉbo, paca
itacʉpa xua pata neyawenaewam pocotsiwa nantawenonan
poxonae warapaein icha tomara beya.
\v 7 Jopa ichipaeinyo xua saya bara caetotha tapaca siwa
ponaewatsi. Jame ichichipan xua be pecono daepayobe tapaca
barʉ ecaewatsi tsainchi poxonae patopaein. Baxua exanaein
icha Nacom baxua inta copatsina.
\v 8 Ecan xote Efeso tomaratha beya poxonae matacabi
jopaena po matacabi pewʉn Pentecostés. Barapo matacabi po
matacabi jiwi yabara jʉntanaina xua poxonae matha Nacom
pia Pejumope tʉnaxʉ tatsi patopa penacaetutsi jiwitha
pomonaetha pomonae pejume cowʉntsiwi.
\v 9 Anoxuae neitacʉpa xua bichocono tatanacuichiwa Nacom
xua jiwi pinmonae pejume cowʉntsinexa barapo tomaratha.
Ichitha ayei jiwi ichichipa abe necana exana xua jopa
taexanaenexa tsane.
\p
\v 10 Icha Timoteo patopaena painya xantha, pantenta
weyataema xua bapon jʉntema pepoponaenexa painya xantha.
Baxua pata exande poxoru bapon exana pocotsiwa Nacom
ichichipa, icha xan ichin xua exanan pocotsiwa Nacom
ichichipa.
\v 11 Daxita paxam jopa payabara jande: “Apara bapon
Timoteo pewowin, jopa apara peyaputaein”, jopa payabara
jande. Jame maisa bapon payawende xua equeicha jʉntema
caewa peponaenexa taxainya berena. Baxua paexande tsipei
xan irʉ ichamonae pomonae irʉ pejume cowʉntsiwixae
Jesucristo, panabarʉ wʉnae ewatan bapon xua Timoteo
paewatan.
\p
\v 12 Apolos pon irʉ pejume cowʉntsin matowa tsipaeban
xua painya nepaca cataenexa xua bapon pecueyabinexa
tsainchi ichamonae pomonae irʉ pejume cowʉntsiwixae
Jesucristo. Ichitha bapon nanta xeina xua anoxuae jopa yapu
jʉpaetsi xua peponaewa tsane xua painya nepaca siwa
ponaewa. Bapon ponaena ichitha poxonae tayapu jʉpaeinchi.
\s Meje poxonae Pablo najume wetsiya paeba
\p
\v 13 Dota pam, pomonae xua abe pacata exana. Beta
paajʉntʉsʉya pajume cowʉnta dubenanaebiyama. Paexana
dubenanaebiyama icha pebiwi ichi xua jopa cunuwiya exana
dubenanaebiyaeyo xua beta peexanaewa.
\v 14 Daxita pocotsiwan xua paexaneibame, peantobe
coyeneyatha paexaneibare ichamonaetha.
\p
\v 15 Tamonae pam, paxam pomonae irʉ painya nejume
cowʉntsiwixae Jesucristo. Paxam payaputaneme xua
Estéfanas piamonae tatsi copiya jume cowʉnta Jesucristo
Acaya nacuatha. Barapomonae bichocono yawena ichamonaetha
pomonaetha pomonae irʉ pejume cowʉntsi jiwi Nacom.
\v 16 Paca tsipaebatsi xua paxam xuya paexana
dubenanaebiyama pocotsiwan barapomonae paca itoroba.
Pabarʉ nacuire barapomonae xuano ichamonae irʉ pabarʉ
nacuitame pomonae jʉpaeya exana icha barapomonae ichi.
\v 17 Maisa bichocono jʉntʉ coyene weiweinan xua
Estéfanas irʉ Fortunato irʉ Acaico xote pate.
Barapomonae inta exana pocotsiwa jopa paca itacʉpaeyo xua
painta exaname xua jopa xote tapaca barʉ ecaexaetsi.
\v 18 Barapomonae nejʉntʉ cui coyene tsacaba exana xua
xaniwaicha tapoponaenexa Nacom nexa. Barichi irʉ baxua
pacata exana. Beta paweyataename barapocotsi jiwimonae.
\p
\v 19 Pomonae penacaetutsimonaepiwi, pomonae pejume
cowʉntsiwi Nacom, pomonae Asia nacuatha jinompa,
barapomonae paca jacoba. Aquila irʉ piowa tatsi Prisca,
irʉ pomonae petanacaetutsi dubenanaebiyae jiwichi pia
botha tatsi, barapomonae bichocono paca jacoba peantobe
jiwixae xua peantobexaetsi pon jiwi Pecanamataxeinaein.
\v 20 Daxita pomonae pejume cowʉntsiwixae Cristo pomonae
xote jinompe daxita paca jacoba. Betiya painta nantiya pana
najacobare painya neantobewaxae Cristo.
\p
\v 21 Xan Pablon pacata tinatsi po diwesiyo xua cotacaya
opi ducua. Yatsicaya tacoutha tacobe couya pacata tinatsi
tapaca jacobinexatsi.
\p
\v 22 Icha ichʉn jopa Jesucristo antobetsi pon jiwi
Pecanamataxeinaein barabʉ Nacom itawetsina pexainya weya,
xua bapon be pon abe peexanae jiton tsane. ¡Xam ponxaem
Pata Necanamataxeinaem nainya antha patopare!
\p
\v 23 Barabʉ Jesucristo pon jiwi Pecanamataxeinaein paca
yawenaena pia paca nepaca caantobewaxae xua xanepanaya
painya nejinompaenexa.
\v 24 Daxita paxam pacata itorobatsi po coyene xua tapaca
caantobe coyenewatsi taantobewaxae Cristo Jesús.
\p Baja Pablo.