\id EPH
\h EFESIOS
\toc1 Efesios
\toc2 Ef
\mt1 MEJE PO CARTE PABLO TATINA, EFESO TOMARAPIWI TATINATSI
\c 1
\s Meje yabara poxonae Pablo tamropata pitaba xua tatina
pomonaetha pomonae Efeso tomarapiwi
\p
\v 1 Xan, Pablon, pacata tinatsi. Nacom necana exana xua
Cristo Jesús pia peitorobi jiwi jiwana tatsin xua bapon
peichichipaexae. Pacata tinatsi pomonae pam pomonae Nacom
piamonae pamxaem, pomonae pajinompame Efeso tomaratha. Paxam
beta xanepanaya pajume cowʉnteibame Cristo Jesús xua Nacom
caemonae painya nepaca exanaexae Cristo Jesustha.
\v 2 Barabʉ Nacom, pon Waxa irʉ Jesucristo, pon jiwi
Pecanamataxeinaein, baponbe paca yawenaena pia paca
necaantobexae. Mataʉtano barabʉ baponbe pebʉrʉya
jʉntema jinompa paca cana exanaena.
\s Meje yabara xua poxonae Nacom wanaca yawenaewa, wanaca
antobexae
\p
\v 3 Barabʉ waxainchi tsipaebatsi Nacomtha, Jesucristo
Wanacanamataxeinaein, pia Nacom tatsi xuano xua Paxa tatsi.
Jeichichi: “Nacom maisa pajʉntʉ coyene weiweinan jinya
pata taneyawenaewaxaem”, jeichichi. Daxita waxainchi Nacom
caemonae wanaca cana exanaexae Cristotha, daxota Nacom naca
yawena. Nacom bara tsitecaeya naca cata daxita carepaya
pejʉntʉ coyenein po pejʉntʉ coyenein xeina pia
nacuatheicha. Bapo jʉntʉ coyenein naca catsiba xua
wanantawenonaewatsi xua wanaca ajʉntʉcoyenesʉ exanaenexa
beta xua Nacom watsita jinompaenexatsi.
\v 4 Caena bayatha pewʉnaeya xua poxonae nacua forotsina,
Nacom naca wʉn duba xua piamonae tatsi wanaca exanaenexa
tsane poxoru Cristo caemonae wanaca exanaewa tsane bapontha.
Mataʉtano Nacom naca wʉn duba xua bichocono watsita
jʉntʉ coyene xanepanaenexa tsane bapon xua mataʉta jopa
watsita natsicuentsiwatsi tsane xua abe waexanaexae
bapontha.
\v 5 Nacom pia wanaca antobewaxae caena bayatha naca yabara
nanta cui yapu weta xua pia pexui tatsi wanaca cana exanaewa
tsane. Baxua Nacom naca cana exana xua pocotsiwa Jesucristo
pia wanacata exanaexae. Nacom ichichipa exana baxua petsita
xanepanaexaetsi.
\v 6 Daxota barabʉ Nacom wʉnae jainteibatsi pon bichocono
pexeinya coyenewa exana poxonae naca yawena wanaca
antobexae. Mataʉtano Nacom bichocono wanaca antobexae
amanaya daxitatsi caemonae naca cayawa exana Pexantotha, po
Pexanto bichocono antobe.
\v 7 Nacom pia pin wanaca antobexae naca capanenebiya exana
abe waexanae cuiru coyenein weya. Nacom tsitatsi xua jopa
watsita natsicuentsiwatsi xua abe waexanaexae, yawa naca
cayabara cui jʉntemaina barapo cui. Baxua exana poxoru
Nacom Pexanto tatsi jana pichapabarena poxonae bexotsi,
poxonae abe waexanae cuiru coyene naca yabara tsitʉpa
naetotha.
\v 8 Nacom naca tsita itapeinya xeina xua bichocono jopa
juniya naca antobeyo. Mataʉtano naca cana exana xua
wayabara yaputaewatsi bapon.
\v 9 Nacom bayatha exana pocotsiwa xua caena bayatha
juntucuru exana. Nacom naca yaputane exana xua wayaputaewa
pocotsiwa bapon moya yawʉn xeina xua jiwi jopa yabara
yaputaeyo po coyene xua bapon ichichipa peexanaewa. Baxua
xua pocotsiwa moya yawʉn xeina caena bayatha Nacom
juntucuru nanta xeina xua Pexanto peitorobiwa tsane po cae
pin nacuathe tsique pon pewʉn Jesucristo.
\v 10 Caena bayatha Nacom cayabara nanta xeina pocotsiwa xua
exanaena. Barapo coyene exanaena po coyene xua daxita
caetutsina pocotsiwan Cristo pecanamataxeinaewa tsane picoya
xua xuan peitabocotha piawan xuano xua xuan po irathe
piawan. Baxuan exanaena poxonae jopaena barapo matacabi xua
poxonae po mataqueitha Nacom ichichipa beexanaena baraxua.
\p
\v 11 Daxita po coyenein Nacom exana, bapon exana po
coyeneya xua ichichipa. Daxota caena bayatha Nacom pana wʉn
duba pata tanaexanaewa tsane piamonae tatsi poxoru Cristo
caemonae wanaca exanaewa tsane bapontha. Daxita pocotsiwan
xua Nacom pana cana exana caena bayatha bapon tsiwanaya
juntucuru nanta xeina xua exanaena baxuan tsipei Nacom exana
daxita xua pocotsiwan tsita wʉnaetsi.
\v 12 Paxan, judiomonae pan, pomonae pan xua copiya pawʉnae
ewatan xua Cristo pepatopaewa tsane. Barabʉ daxota Nacom
bichocono wʉnae pajainchin pexeinya peitʉpanaewa
peexanaeinxae.
\v 13 Pocotsiwa xua pexainyei jume diwesi, barapo diwesi
apara Nacom pia pecapanenebiyae diwesi tatsi. Poxonae barapo
pexainyei jume diwesi pajume taneme Nacom paca cana exana
piamonae tatsi painya nejume cowʉntsixaem Cristo painya
nepaca capanenebiyaenexa. Bapoxonae Nacom tsita itapeinya
xeina xua paxam piamonae tatsi pam poxonae paca cata pia
Pejumope tʉnaxʉ tatsi. Bayatha Nacom yabara paca tsiwʉnae
muxu duta xua pinae paca catsina barapo pia Pejumope
tʉnaxʉ tatsi.
\v 14 Nacom pia Pejumope tʉnaxʉ tatsi naca cata wanaca
barʉ poponaenexa. Baxua naca tsita itapeinya xeina xua
daxota xaniwaicha yaputainchi xua bexa ichawan xua Nacom
naca catsina pocotsiwan yabara naca tsiwʉnae muxu duta xua
naca catsina. Nacom baxua exanaena poxonae daxita cana
exanaena piamonae tatsi, pomonae daxita bewa jume
cowʉntsina Jesucristo. Bapoxonae jiwi wʉnae jainchina
Nacom bichocono pexeinya peitʉpanaewa peexanaeinxae.
\s Meje yabara poxonae Pablo Nacomtha tawʉca pomonae pejume
cowʉntsi jiwi xua Nacom yaputane pecana exanaewa tsane
barapomonae pomonae pejume cowʉntsiwi
\p
\v 15 Paca yabara jume tainchi xua paxam pinae beta pajume
cowʉntame Jesús, pon jiwi Pecanamataxeinaein. Mataʉtano
paca yabara jume tainchi xua pinae beta paantobem pomonae
irʉ pejume cowʉntsiwi.
\v 16 Daxota ataya pacata wʉqueibatsi Nacom, janje: “Nacom
maisa jʉntʉ coyene weiweinan xua Efeso tomarapiwi
neyawenaewa, pomonae necajume cowʉntsiwi”, jan.
\v 17 Wʉcan Nacom, Jesucristo Wanacanamataxeinaein, pia
Nacom tatsi, pon Waxa pon bichocono pexeinya peitʉpanaewa
peexanaein. Wʉcan xua painya nepaca cacatsinexa pia
Pejumope tʉnaxʉ tatsi painya neyaputaewa tsane pocotsiwan
xua xainyei xua Nacom yabara. Mataʉtano wʉcan xua painya
beta neyaputaeponaenexa Nacom.
\v 18 Nacom wʉcan xua painya neyaputaenexa painya jʉntʉ
coyeneintha. Bapoxonae paca itacʉpaena xua payaputaename
pocotsiwa Nacom yabara paca tsiwʉn duba xua painya
nexeinaenexa pocotsiwa yabara paca tsiwʉnae muxu duba.
¡Maisa bichocono jopa juniyiyo xua pocotsiwa Nacom catsina
pomonaetha pomonae pia pejume cowʉntsi jiwithaxaetsi
pocotsiwa bapon jʉntana jeba barapomonae!
\v 19 Mataʉtano wʉcan xua painya neyabara yaputaewa tsane
Nacom pia peayapusʉ itorobi coyenewa, po peayapusʉ
coyenewa bichocono wʉnae xua jopa wetsiyo. Barapo
peayapusʉya itorobi coyeneyatha Nacom naca yawena wajume
cowʉntsiwixae.
\v 20 Barapo peayapusʉ itorobi coyenewa jʉpa po peayapusʉ
itorobi coyenewatha Cristo asʉ exainchi petʉpae cuiru
coyene weya xua Nacom exana. Barapo pia peayapusʉ itorobi
coyenewatha Nacom Pexanto cuareta pia pecoxa weya xua
peitabocotheicha xua Pexanto ainya cui cana exana.
\v 21 Nacom Pexanto cana exana xua Jesucristo toxeincha
canamataxeina pomonaetha daxita pomonae ichamonae
canamataxeinatsi itabocotha, mataʉtano xua barapo cae pin
nacuathe. Mataʉtano bapon canamataxeina daxita pomonaetha
pomonae nacuan peewatsiwi, barichino pomonaetha pomonae
piamonae pematacaponaewichi. Cristo canamataxeina pia
peayapusʉ itorobi coyenewatha, po peayapusʉ itorobi
coyenewatha bichocono ayapusʉ beyacaincha ichamonae pia
peitorobi coyenewan tatsi. Po wʉn xua Jesucristo xeina xua
“Cristo”, jeichichi barapo wʉn yabara matawʉn dutatsi
pia peexanaewa. Barapo wʉn bichocono peainya cui wʉn,
beyacaincha ichamonae pewʉnxi, po wʉnxi xua yabara
matawʉn dubatsi xua peexanaewa pomonae anoxuae jinompa irʉ
pomonae bexa jinompaenano.
\v 22 Nacom exana xua daxita coyenewantha Cristo itoroba pia
peayapusʉ itorobi coyenewatha. Mataʉtano Nacom exana xua
Cristo daxita pepa pecanamataxeinaein piamonae daxita
pomonae pejume cowʉntsiwixaetsi.
\v 23 Pomonae pejume cowʉntsiwi Cristo barapomonae be bara
Cristo pia pepon tatsi tsipei Cristo cana exana xua
barapomonae caemonae naexana bapontha. Dapocotsiwa ajibi
pocotsiwa Cristo petaseicaewatsi tsipei nantaʉta pomonae
pejume cowʉntsiwichi. Barichi dapocotsiwa ajibi pocotsiwa
petaseicaewatsi pomonae Cristo pejume cowʉntsiwichi tsipei
Cristo ataya tsitecaeya barʉ popona barapomonae daxita
nacuantha.
\c 2
\s Meje yabara poxonae xua Nacom naca capanenebiya, wanaca
antobexae
\p
\v 1 Copiya bayatha poxonae jopa pajume cowʉntsim Nacom
bichocono abe paexana dubenanaebiyame. Mataʉta pajumefebame
Nacom poxoru paxam be pomonae pewerapaewi pam jopa painya
yawa jinompaexae Nacom pia Pejumope tʉnaxʉ tatsi.
\v 2 Bayatha jopa xapain painompaem. Painompame icha barapo
cae pin nacuathepiwi ichi xua bichocono abe exana
dubenanaebiya. Paexaname bayatha xua caurimonae pia
pentacaponaein tatsi painya nepaca cui itorobixae. Bapon
canamataxeina caurimonae po caurimonae jinompa itabocotha
barapo nacue matatsuntha xua beyano Nacom pia nacua beicha
tatsino. Barapo caurimonae pia pentacaponaein tatsi, pomonae
Nacom jumefebatsi, barapomonae jʉntʉ coyene itorobatsi xua
abe peexanaewa tsane.
\v 3 Caena bayatha waxainchi barichichi exana
dubenanaebiyatsi barapocotsi coyenein xua abe. Exainchi
pocotsiwa xua ichichipatsi xua wajʉntʉ coyenewa naca cui
itoroba xuano xua wapepon naca cui itoroba. Tsipei waxainchi
jiwichi xua yacuiya naexanatsi xua abe waexanaewa, daxota
bayatha Nacom anaya nanta xeina xua naca atene exana icha
ichamonae ichichi xua atene exanatsi abe peexanaexae.
\v 4 Daichitha Nacom jopa juniya naca matateicaeyo xua
wanaca yawenaewa bichocono wanaca antobexae.
\v 5 Bequein poxonae cataunxuae bichocono abe exana
dubenanaebiyatsi waxainchi, xua daxota be petʉpaewi
jinompatsi abe waexanaexae, bapoxonae Nacom naca yawena.
Baraxua be bapon naca barʉ ajʉntʉcoyenesʉ xua Cristo
wanaca cana exanaexae xua caemonae naexainchi bapontha.
Nacom naca capanenebiya saya apara poxoru wanaca antobexae.
\v 6 Wajume cowʉntsixae Jesucristo, waxainchi Nacom
tsitatsi xua apara be bara bayatha bapon naca asʉ exana
petʉpae coyene weya icha Cristo Jesús ichichi xua asʉ
exanatsi petʉpae coyene weya. Mataʉtano waxainchi tsitatsi
xua apara be bara bayatha naca exana xua waenaewa ichaxota
Cristo Jesús eca pia nacuatheicha.
\v 7 Nacom juntucuru baxua exana petsita itapeinya
xeinaenexa xua xeina pia pin peantobe coyenewa xua waxainchi
nexa xua daxita matacabintha tsoponae tsane. Nacom naca
tsita itapeinya xeina xua bichocono naca antobe poxonae naca
exana xua caemonae naexanaeinchi Cristo Jesustha.
\v 8 Tsipei Nacom paca antobe daxota paca capanenebiya
poxonae pajume cowʉntame bapon. Apara jopa baxua painya
coutha paexanaem, apara Nacom jame baxua amanaya paca cana
exana.
\v 9 Nacom apara jopa baxua paca cana exanaeyo xua painya
nenacuichixae. Icha paca itacʉpa xua poxonae payabara
nacuichipame xua painya nepaca capanenebiyaenexa bapoxonae
be painya neatsacae jiwi pam tsipae xua poxonae ichʉntha
pajam: “Beta paexanan daxota Nacom pana capanenebiya”,
pajam.
\v 10 Nacom naca exana xua pena jʉntʉ coyenewatha
jinompatsi Cristo Jesús nexa xua beta xanepanaya
waexaneibinexano bapon nexa poxonae jinompatsi. Caena
bayatha baxuan Nacom yabara nanta xeina xua naca jʉntʉ
coyene cana cui weta exana xua po coyeneya waxainchi beta
wataexanaewa tsane ichamonae.
\s Meje yabara po jʉntʉ coyenetha Nacom naca cana exana
xua jʉntema wajinompaewa caemonae wanaexanaexae Cristotha
\p
\v 11 Poxonae panaexaname jopa panaexanaem judiomonae. Paxam
pomonae jopa judiomonae painya nenaexanae jiwixaem pana
nacui yabara jʉntanainare xua eta po jiwi pamda caena
bayatha poxonae jopa pajume cowʉntsim. Judiomonae paca
yabara jei: “Barapomonae jopa pewi thabiwichi xua ichaxota
pia penareixacaenaewa xua petsita itapeinya xeinaewa tsane
xua barapomonae Nacom piamonae”, paca yabara jei.
Judiomonae pia coutha nayabara jei: “Waxainchi pomonaetsi,
pomonae naca wi thaba xua ichaxota wanareixacaenaewa watsita
itapeinya xeinaewa tsane xua Nacom piamonaetsi”, nayabara
jei. Barapo pewi thabi coyene xua ichaxota pebiwi
penareixacaenaewa saya jiwi pia coya nacanaʉtsiya exana.
\v 12 Bayatha barapo dapaetha poxonae cataunxuae jopa pajume
cowʉntsim jopa Cristo payabara yaputaem. Mataʉtano paxam
be painya nenanapaincha jinompaewi pam xua icha nacua werena
painya neponaewi xua jopa Israel nacuapiwi jiwana pam. Po
petsiwʉnae yabara muxu dutsi coyenewan xua Nacom juntucuru
nanta xeina xua caemonae naexana piamonaetha, xua
judiomonaetha, barapo coyenein apara jopa paxam nexa.
Mataʉtano pajinompame barapo cae pin nacuathe ichitha jopa
pawʉnae ewatsim xua pocotsiwa xua wʉnae xua Nacom exanaena
paxam nexa cataunxuae jopa painya nejume cowʉntsixae.
Tsipei jopa painya neyabara yaputae jiwi pam Nacom.
\v 13 Ichitha anoxuae Cristo Jesús paca exana xua caemonae
pana naexaname bapontha. Paxam pomonae bayatha jopa Nacom
painya nejume cowʉntsi jiwi pam xua jopa painya yabara
yaputaexaem bapon. Ichitha anoxuae pajume cowʉntame painya
neyabara yaputaexae Cristo Jesús, pon naetotha painya
abewan paca yabara tsitʉpa, poxonae jana pichapabarena
poxonae bexotsi.
\v 14 Cristo meisa bapon naca cata po jʉntʉ coyenewatha
xua ichamonaetha xuya jʉntema jinompa exanatsi. Cristo
exana xua caemonae naexana pomonae xua judiomonae irʉ
pomonae jopa judiomonae naexanaeyo. Cristo cui weraweraca
exana po jʉntʉ coyenein xua judiomonae irʉ pomonae jopa
judiomonae naexanaeyo penaaitafaetabi jiwi naexana xua saya
be caemonae penaexanaewa tsane. Baxua exana poxonae naetotha
tsitʉpa jiwi.
\v 15 Poxonae Cristo naetotha tʉpa bapoxonae bapon cana
exana xua Moisés pia peitorobi coyenewa tatsi jopa equeicha
xeinaeyo peayapusʉ itorobi coyenewa xua jiwi peitorobiwatsi
pocotsi coyenein jiwi bewa exanae. Bapon Cristo cana exana
xua barapomonae Cristo caemonae pebarʉ naexanaewa tsainchi
pomonae xua copiya pia peaitafaetabi jiwixaetsi. Poxonae
Cristo baxuan cana exana bapoxonae barapo bicheitomonaebe
jʉntema nabarʉ jinompa cana exana.
\v 16 Petʉpaexae naetotha Cristo exana xua equeicha
barapomonaebe jopa nabiyo. Mataʉtano bapoxonae Cristo naita
coxone exana xua barapomonaebe jʉntema pejinompaewa
Nacomtha xua icha be jopa ichiyo xua poxonae copiya jinompa
xua Nacom pia peaitafaetabi jiwichi. Cristo exana xua
barapomonaebe Nacom caemonae exainchi.
\p
\v 17 Cristo patopa po cae pin nacuathe tsique. Bapon daxita
paxam paca tsipaeba Nacom pia pexeinya jume diwesi tatsi.
Barapo jʉntʉ coyenewatha jiwi equeicha caewa Nacom ita
coxonatsi xua Nacom jʉntema petsita jinompaewa tsainchi.
Daxita paxamtha paca tsipaeba barapo diwesi pomonaetha irʉ
pam pomonae copiya jopa Nacom payabara yaputaem, xua pomonae
jopa judiomonae pam. Irʉ tsipaebatsi pomonae yatsicaya
judiomonae pomonae Nacom yaputainchi pejume cowʉntsixae.
\v 18 Cristo jiwi petsitʉpaexaetsi abe pia peexanae
coyenewan tatsi daxota Nacom pia Pejumope tʉnaxʉ tatsi
yawena xua pomonae judiomonae irʉ pomonae jopa judiomonae
naexanaeyo be caemonae naexanabe xua cae axa xeina, bapon
Nacom.
\v 19 Daxota anoxuae jopa be painya nenanapaincha jinompaewi
pam xua be icha nacua werena painya neponaewi. Paxam irʉ
ichamonae pomonae Nacom pejume cowʉntsiwirʉ be pomonae cae
nacuapiwi pam. Paxam Nacom piamonae jiwana tatsi pam.
\v 20 Poxonae ba jiwi Nacom pin pia bo acaba copiya matha
beta noba po iboton xua iratha tabʉ caumena. Nexata beta
nota po iboto xua ainya cui xua po iboto bo daunweya
babatanota po iboto xua epataʉta botabiya. Bapoxonae nanta
cajejebabapona icha iboton, xua pepa bo exana. Icha pebiwi
ichi poxonae bo acaba, Nacom piamonae bara cana jʉtsiya
cana ichi. Pomonae Cristo pia peitorobi jiwi tatsi irʉ
pomonae Nacom pia peitorobi jume pepaebiwi barapomonae be
bara pocotsi iboton xua tabʉ caumena tsipei barapomonae
copiya paca cuiduba Nacom Pejume Diwesi tatsi. Irʉ
Jesucristo be barapocotsi ainya cui iboto po iboto daunweya
babatanota po iboto epataʉta botabiya, tsipei Cristo paca
yawena xua painya nejume cowʉntsiwa bapon. Irʉ paxam be po
iboton xua jiwi nanta cajejebabapona, pomonae penanta
carubenae jiwi pam, tsipei cotacaya painya nejume
cowʉntsixae.
\v 21 Cristo piamonae bara cana jʉtsiya ichiya cana exana,
icha po iboto ichi xua ainya cui xua bo daunweya babatanota
exana. Cristo pon jiwi Pecanamataxeinaein, exana xua
piamonae tatsi pinmonae tsoponae xua xanepanaya caemonae
nabarʉ jijinapona, pomonae Nacom tsita jʉntʉ coyene
xanepanatsi.
\v 22 Poxonae jiwi weta barapo pin bo, bapoxonae cana exana
xua barapo bo apara Nacom pia bo tatsi ichaxota Nacom
popona. Nacom paca cana exana xua paxam irʉ daxita
ichamonae pomonae irʉ pejume cowʉntsiwi Nacom, caemonae
pana naexaname xua Nacom pia Pejumope tʉnaxʉ tatsi pia
paca barʉ jinompaenexa icha Nacom ichi xua pia pin botha
popona.
\c 3
\s Meje yabara poxonae Nacom Pablo itorobatsi xua
pecueicueijeiwa Nacom Pejume Diwesi pomonaetha pomonae jopa
judiomonae naexanaeyo
\p
\v 1 Xan, Pablon, jiwi pecʉbi botha ecan yabara tanatsipei
cueicueijeixae Cristo Jesús poxonae bapon yabara tapaca
cuidubiwatsi pomonae pam jopa judiomonae panaexanaem.
\v 2 ¡Bara pajume taneme xua Nacom necata barapo
tatanacuichiwa xua inta bichocono wʉnae! ¡Nacom neitoroba
tana neantobexae xua tapaca cuidubinexatsi tapaca
yawenaenexatsi!
\v 3 Nacom itʉta xua po coyene xua moya yawʉn xeina po
coyene xua Nacom capanenebiyaena jiwi xua jiwi copiya jopa
yabara yaputaeyo. Nacom neyaputane exana barapo coyene xua
moya peyabara cui yawʉn xeinaewa po coyene bexa exanaena
xua jiwi jopa yabara yaputaeyo. Baxua bayatha yabara pacata
tinatsi xua imoxoyo diwesi tsecae.
\v 4 Poxonae barapo carte payorobiname payaputaename xua
bara xan yaputan po coyene xua Cristo moya yabara cui yawʉn
xeinatsi po coyene xua bexa Nacom exanaena xua jiwi jopa
yabara yaputaeyo.
\v 5 Bayatha jiwi jopa yaputaeyo po coyene xua Nacom Cristo
moya yabara cui yawʉn xeinatsi po coyene xua Nacom
exanaena. Ichitha anoxuae Nacom pia Pejumope tʉnaxʉ tatsi
baxuan yaputane cana exana pomonaetha pomonae pia coya
Nacomtha nacana exana xua Nacom petanacuichiwa tsainchi
pomonae Cristo Jesús pia peitorobi jiwixae tatsi,
mataʉtano Nacom pia peitorobi jume pepaebi jiwitha tatsi.
\v 6 Meje baxue xua pocotsiwa moya peyawʉn xeinaewa:
Pomonae jopa judiomonae naexanaeyo barapomonae irʉ xeinaena
po coyene xua Nacom cata judiomonaetha po coyene bichocono
wʉnae xua bayatha Nacom jʉntana jeba. Barapomonae pomonae
jopa judiomonae naexanaeyo Jesucristo pejume cowʉntsixaetsi
caemonae nanaexana pepa judiomonaetha pomonae irʉrʉ Cristo
Jesús pejume cowʉntsiwixaetsi. Barapomonae irʉ xeinaena
po coyene Nacom yabara tsiwʉnae muxu duta judiomonaetha xua
Cristo Jesús yabara. Barapomonae pomonae jopa judiomonae
naexanaeyo daxita baxuan irʉ xeinaena poxoru jume
cowʉntarʉ Nacom pia pecapanenebiyae diwesi jume.
\p
\v 7 Nacom neitoroba xua tacueicueijeiwa barapo pexeinya
jume diwesi amanaya tatanacuichixae Cristo. Nacom necata
barapo tatanacuichiwa pia tana neantobexae xua tayawenaewa
tsane ichamonae. Mataʉtano Nacom necata pia peayapusʉ
itorobi coyenewa xua tacueicueijeiwa tsane barapo pexeinya
jume diwesi.
\v 8 Pomonae xua be conotha ainya cui xua Cristo piamonae
tatsi barapomonae ainya cui beyacaincha xua xan. Daichitha
Nacom necata barapo tatanacuichiwa xua inta bichocono
wʉnae. Nacom neitoroba xua tacueicueijeiwa tsane pia
pexeinya jume diwesi pomonaetha pomonae jopa judiomonae
naexanaeyo. Cueicueijan po pexeinya jume diwesi xua Cristo
bichocono peantobexae jopa juniya yawenaeyo barapomonae
pomonae jopa judiomonae naexanaeyo.
\v 9 Mataʉtano Nacom neitoroba xua daxita jiwitha yabara
yaputane taexanaewa tsane po coyene xua Nacom exanaena bexa
tsane, po coyene Nacom moya yawʉn xeina. Barapo coyene
Nacom pon daxita peforotsin, caena bayatha moya nayawʉn
xeina xua jiwi jopa peyaputaewa tsane xua pocotsiwa bapon
exanaena.
\v 10 Anoxuae Nacom yaputane exana matatsunpiwi, pomonae
itoroba itabocotha, mataʉtano pomonae pecanamataxeinaewa
itabocotha. Barapomonae Nacom yaputane exana pocotsiwa bapon
moya yawʉn xeina caena bayatha xua jiwi jopa yabara
yaputaeyo. Barapo itabocopiwi nacuiduba xua bara Nacom
bichocono yaputane daxita carepaya coyenewan. Baraxua
yaputane poxonae tane xua pomonae judiomonae mataʉtano
pomonae jopa judiomonae naexanaeyo daxita barapomonae
caemonae naexana pejume cowʉntsiwichixaetsi Cristo Jesús.
\v 11 Nacom exana baxua icha be pocotsi coyeneya caena
bayatha yabara nanta xeineibapona. Bapon baxua exana
Jesucristo pon Wanacanamataxeinaein petʉpaexae naetotha.
\v 12 Naca itacʉpa xua watsipaebiwatsi Nacom wajume
cowʉntsixae Cristo. Waxainchi yaputainchi xua bapon bara
naca jume tane caemonae wanaexanaexae Cristotha, daxota cui
tsacatsacapiya watsipaebiwa Nacom.
\v 13 Daxota jopa ichichipaeinyo xua paajʉntʉcoyenerewiya
jinompame xua ichamonae atene tana neexanaexae paxam nexa.
Ichitha jame bewa baxua paichichipaem tsipei baxua jame paca
yawena.
\s Meje yabara xua Cristo jiwi peantobewatsi
\p
\v 14 Poxonae yabara nanta xeinan xua po coyenewa xua Nacom
exana bapoxonae tantabocototha uncuan xua tatsita itapeinya
xeinaewa tsane xua barʉ cui itura jinan Waxa pon itabocotha
pepoponaein.
\v 15 Daxita Nacom piamonae pomonae pejume cowʉntsiwichi,
pomonae itabocopiwi irʉ pomonae po irathepiwi, daxita
barapomonae Nacom tsitatsi xua barapomonae be caemonae
naexana. Bapon daxita barapomonae paxa tatsi.
\v 16 Nacomtha pacata wʉcatsi. Tsipei Nacom pexeinaexae
peitaboco beicha pocotsiwa jopa juniyiyo xua bichocono
wʉnae daxota jan: “Nacom care Efeso tomarapiwi xua
bichocono jinya neayapusʉ itorobi coyenewa. Barapomonae
nejumopetha jʉntʉ coyene daunweya jinompa exande.
\v 17 Barabʉ Cristo barʉ poponeibina barapomonae pejume
cowʉntsixaetsi. Barabʉ barapomonae bichocono antobe jiwi
bichocono pejʉntʉ coyene yʉcaewaxaetsi peantobe coyenewa.
\v 18 Barabʉ barapomonae beta yabara yaputaena Cristo pia
peantobe coyenewa tatsi xua irʉrʉ daxita ichamonaerʉ
yaputaena pomonae pejume cowʉntsiwi. Barapon Cristo pia
peantobe coyenewa tatsi bichocono ayei xainto jʉntʉ
coyenewa.
\v 19 Cawʉcatsi Nacom xua barapomonae barabʉ yaputaena
barapo coyene po coyene Cristo pia peantobe coyenewa tatsi,
xua po peantobe coyenewa ayei xainto jʉntʉ coyenewa xua
jiwi jopa itacʉpaetsi xua peyabara yaputaewa. Cawʉcatsi
xua barapomonae nejʉntʉ coyene yʉca exanaenexa daxita
jinya nejʉntʉ coyenewatha.
\p
\v 20 “Wʉnae cajaintatsi poxoru caitacʉpa xua bichocono
pata tana neyawenaewam beyacaincha xua pata tacawʉcaewatsi,
xuano beyacaincha pata nanta xeinaewa. Baxua painta exaname
poxonae jinya neayapusʉ itorobi coyenewa nacuita pata
jʉntʉ coyenewatha.
\v 21 Barabʉ daxita pomonae pejume cowʉntsiwi pomonae
caemonae naexana Cristo Jesustha wʉnae cajainchina xua
ataya petsitecaeponaewa tsane. Je bara ichi tsane”, jan xua
pacata wʉcatsi Nacomtha.
\c 4
\s Meje yabara xua Nacom pia Pejumope tʉnaxʉ tatsi cana
exana xua caemonae naexana Nacom piamonae tatsi
\p
\v 1 Tatanacuichixae Jesucristo pon jiwi Pecanamataxeinaein
daxota jiwi neeta jiwi pecʉbi botha. Pecono jumetha paca
muxuwetatsi xua beta xanepanaya painya nejinompaewa xua
Nacom itapeta painya nepaca wʉn dubixae painya nejume
cowʉntsixae bapon icha be pocotsi coyeneya xua Nacom tsita
xanepanatsi.
\v 2 Ita ururanaya pajinompeibare xua jopa painya
neatsacaewa tsane. Mataʉtano jume xanepanaya nantiya pana
natsipaebeibare xua jopa paantʉtsaxande. Mataʉtano saya
jopa paaitaconaeinde xua daxota jʉntema painompaename
poxonae bequein ichamonae abe pacata exana. Mataʉtano
patsita itapeinya xeinare xua nantiya pana nacui yabara
antobem pocotsiwa bequein jopa pana nacui coyene jʉpaem.
\v 3 Nacom pia Pejumope tʉnaxʉ tatsi paca cana exana xua
caemonae painya nenaexanaewa tsane. Daxota
peajʉntʉcoyenesʉwatha paexande daxita coyeneya xua
caemonae jʉntema painya nenabarʉ jinompaewam tsane.
\v 4 Paxam pomonae painya nejume cowʉntsi jiwixae Cristo
Jesús daxota caemonae paca exana. Bequein daxita carepaya
paxam barompaya paxeiname Nacom pia Pejumope tʉnaxʉ tatsi,
ichitha barapo pejumope saya bara caein. Nacom yabara paca
wʉn duba xua daxita paxam painya nexeinaewa tsane cae
coyenewa xua po coyene pebʉrʉya pana nabarʉ wʉnae
ewatame pocotsiwa xua bexa Nacom exanaena.
\v 5 Mataʉtano bara caein pon jiwi Pecanamataxeinaein.
Mataʉtano cae coyenewa xeinatsi po coyenewa xua wajume
cowʉntsiwa Cristo. Mataʉtano saya cae wʉntha
nabautisabatsi xua Cristo pewʉntha tatsi.
\v 6 Mataʉtano bara caein Nacom pon Waxa xua daxitatsi
waxainchi. Bapon daxita jiwi canamataxeinatsi, mataʉtano
daxita carepaya nacuantha popona. Mataʉtano daxita
waxainchi carepaya naca barʉ popona.
\p
\v 7 Daxita waxainchitha seicaya cabarompaya naca cana
jʉntʉ cui coyene duba exana pocotsi coyeneintha xua
watsita exanaewa tsane bapon. Barapo coyenein Cristo naca
catsiba po coyenein jiwana xua bapon nawita xeina icha bapon
ichichipa.
\v 8 Daxota Nacom Pejume Diwesitha jeye Cristo yabara:
\q “Bapon athabe juinya tajʉ beicha.
\q Poxonae athabe juinya barʉ juinya pomonae
\q pia peaitafaetabi jiwichi petsita
\q itapeinya xeinaenexa xua amanayaba
\q barapo peaitafaetabi jiwichi.
\q Mataʉtano bapon pia pejume cowʉntsiwichi
\q catsiba po jʉntʉ cui coyenewantha xua
\q barapomonae Nacom petsita exanaenexatsi”,
\q jei Nacom Pejume Diwesitha.
\p
\v 9 ¿Eta xua metha baxua caunuta poxonae paeba xua
“athabe juinya tajʉ beicha”? jei. Baxua caunuta xua
copiya matha Cristo po irathe patopeica xua bapoxonae
equeicha caibe juinya athabeicha itaboco beicha.
\v 10 Pon xua po irathe patopeica, barichi bapon athabe
juinya tajʉ beicha xua bapon pepoponaewa tsane daxita
nacuantha xuano daxita itabocotha.
\v 11 Cristo catsiba jiwitha xua seicaya barompaya pejʉntʉ
cui coyenein. Ichamonaetha cana exana pomonae pia peitorobi
jiwixae tatsi. Ichamonaetha cana exana pomonae pecueicueijei
jiwi pia peitorobi jume diwesi tatsi. Ichamonaetha cana
exana pomonae xua pecueicueijei dubenanoutsiwi Nacom pia
pexeinya jume diwesi tatsi xua pecapanenebiyae diwesi jume.
Ichamonaetha cana exana pomonae eena jiwi pomonaetha pomonae
pejume cowʉntsi jiwi. Ichamonaetha cana exana pomonae xua
pecuidubi jiwi pomonaetha pomonae pejume cowʉntsiwi.
\v 12 Poxonae barapo coyene Cristo exana, piamonae cana
jʉntʉ coyene wetsiya cana exana xua beta petaexanaewa
tsainchi pia petanacuichiwa tatsi. Bapoxonae daxita piamonae
tatsi mataropeichiya ajʉntʉyapusʉya jume cocowʉntapona
pomonae piamonaexae tatsi pomonae bara be Cristo pia pepon
tatsi.
\v 13 Baxua Cristo exana xua beya waxainchi caemonae
wanaexanaewa tsainchi xua caemonae wanabarʉ jume
cowʉntsixaetsi Cristotha. Bapoxonae naexanatsi xua
pebʉrʉya caemonae wanabarʉ yabara yaputaewa tsainchi
Nacom Pexanto tatsi. Mataʉtano bapoxonae yatsicaya beta
jume cowʉntatsi, bapoxonae jinompatsi be pomonae bayatha
pinyontsi xua pocotsimonae itacʉpatsi xua Nacom beta
petsita jinompaewatsi. Bapoxonae wajʉntʉ coyene naca
cayabara cui wetsiya exana xua wajʉntʉ coyene xanepanaewa
icha Cristo ichi xua bichocono pejʉntʉ coyene xanepanaewa.
\v 14 Bapoxonae jopa be pexui natsicotae tsainchi equeicha.
Pexui ba ainya muxu xeina ichawa beya ba jume cowʉnta xua
pocotsi coyenein xua poxonae nacuidubeiba xua poxonae
cuiduba pomonae jiwi pemuxuitorobiwi. Barapo pemuxuitorobi
jiwi yaputane nawita po jʉntʉ coyeneintha xua jiwi
pemuxujainyabiwatsi.
\v 15 Jame bewa pexainyei jume tsipaebichi ichamonaetha po
coyeneya xua barapomonae yaputane xua waxainchi antobetsi
barapomonae. Bapoxonae beta xanepanaya exanaeinchi
wanajʉntʉ coyene xanepana exanaponaenexatsi daxita
coyenewantha xua icha be Cristo ichi. Bapon canamataxeina
pomonae pia pejume cowʉntsiwichi. Bapon bara be pentasipa
pomonae pejume cowʉntsiwichi be bapon pepon tatsi.
\v 16 Cristo canamataxeina pia pejume cowʉntsiwichi.
Mataʉtano cana exana xua barapomonae barompaya xeina pia
petanacuichiwantsi. Bequein barapomonae piawan barompaya
xeina ichitha Cristo cana exana xua caemonae nantiya
nayawena be caemonae naexana. Poxonae barapomonae barompaya
piawa beta exanapona pia penacuichiwan, bapoxonae be
caemonae beta naajʉntʉcoyenesʉ xanepana eexanapona,
nantiya penaantobexae.
\s Meje yabara po pena jʉntʉ coyenewatha wajinompaewa
wajume cowʉntsixae Cristo
\p
\v 17 Anoxuae paca tsipaebatsi xua painya tapaca
muxuwetsinexatsi, Cristo pon jiwi Pecanamataxeinaein
taneitorobixae: Jopa bewa pajinompaem icha barapo cae pin
nacuathepiwi ichi xua poxonae jinompa poxonae jopa Nacom
yaputaetsi. Pocotsiwa xua barapomonae pia penanta xeinae
coyenewan tatsi, jopa ainya cuiyo. Jopa pejʉntʉ coyene
yawenaexaetsi barapo penanta xeinae coyenewantha.
\v 18 Barapomonae pia peyaputae coyenewan tatsi jopa xapain
pepa peyaputae coyenewiyo. Barapomonae jopa xeinaeyo
peajʉntʉcoyenesʉwa pocotsi peajʉntʉcoyenesʉwa Nacom
cata piamonae. Barapo coyene barapomonae jopa xeinaeyo
poxoru aichaxaibi xua Nacom peyabara peyaputaewatsi, xuano
poxoru barapomonae najʉntʉ coyene ararana xua jopa
peichichipaexae xua Nacom peyabara jume taewatsi.
\v 19 Barapomonae jopa ajʉntʉcoyeneuriyo poxonae abe
exana. Mataʉtano barapomonae atsaquiya abe eexanapona, xua
pecʉpaewatsi atsaxa mera yawa weiweina ichamonae
piseurixitha tatsi. Barapomonae cui xeica xua daxita
coyenewan abe peexanaponaewa.
\v 20 Ichitha poxonae ichamonae yabara paca cuiduba Cristo,
jopa apara paca cuidubiyo barapo coyene xua abe painya
neexanaewa tsane.
\v 21 Xaniwaicha yabara pajume taneme Cristo, xuano piamonae
tatsi painya nenaexanaewa poxonae ichamonae paca cuiduba po
pexainyei jumein xua pexeinya jume diwesi xua Jesucristo
yabara.
\v 22 Pana nacui barapende po jʉntʉ coyene xua bayatha
paexaname poxonae jopa cataunxuae pajume cowʉntsim. Barapo
jʉntʉ cui coyene bichocono abe, tsipei paca cana exana xua
paexaname pocotsiwan xua painya coya paichichipame poxonae
paca muxuitoroba exana xua daxota abe painya neexanaewam.
\v 23 Pacopare xua bara Nacom paca jʉntʉ coyene xanepana
exanaponaena, xua daxota pena coyene painya nenanta
xeinaponaewa tsane.
\v 24 Painompare pena jʉntʉ coyenetha, po jʉntʉ coyene
Nacom exana xua painya paca catsibinexa. Bapoxonae
paxeinaename be pocotsi jʉntʉ coyene Nacom xeina. Poxonae
paxeiname barapo jʉntʉ coyene po jʉntʉ coyene xua
pexainyeiwa, bapoxonae beta nantiya pana nabarʉ jinompame
yawa xua bichocono paca tsita xanepana Nacomtha.
\p
\v 25 Daxota anoxuae jopa nantiya bewa pana namuxuitorobim.
Bewa daxita pam xanepanaya patsipaebim pomonaetha pomonae
irʉ pejume cowʉntsiwi, tsipei waxainchi daxitatsi caemonae
naexanatsi Cristotha.
\p
\v 26 Icha paanaepaname jopa pacopatsinde xua painya jʉntʉ
coyene paca itoroba xua anaya anaepanaya abe painya
neexanaewa ichʉntha. Icha paanaepaname jopa abe
paexanaeinde. Came jopa paanaepana dubenanaebiyaeinde xua
beya quirei tsanaicha, saya jame bara caetotha pande.
\v 27 Jopa pacopatsinde xua bara caurimonae pia
pentacaponaein tatsi paca jʉntʉ coyene jʉjʉta abe painya
neexanaewa tsane.
\p
\v 28 Pon xua pecaibin, bʉ jopa equeicha caibeibiyo. Bewa
jame bapon tsinacuichina pocotsiwa xua xainyeya yabara
nacuita xua jopa naerabiyo. Bapoxonae bapon itacʉpatsi xua
ichamonaetha xuya catsina pomonaetha xua acopeibiwi pomonae
jopa xeinaeyo xua pocotsiwa nantawenona.
\p
\v 29 Jopa ajumebeya pacueicueijam tsurubenanaebiyaeinde.
Jame maisa jume xanepanaya pacueicueijam tsurubenanaebiyama.
Papaebare pocotsi jumeintha xua ichamonae jume
cocowʉntapona exanatsi po jumeintha xua jiwi muxu xeica
exanatsi xuano xua yawenatsi po jumein xua paca jume tane.
\v 30 Nacom pia Pejumope tʉnaxʉ tatsi jopa pajʉntʉ
coyene wecoyei exanaeinde xua painya nepaca cui taexae xua
paexaname. Tsipei paca barʉ popona Nacom pia Pejumope
tʉnaxʉ tatsi, baraxua tsita itapeinya xeina xua bara
xaniwaicha Nacom piamonae tatsi pam. Nacom pia Pejumope
tʉnaxʉ tatsi naca jʉntʉ coyene ararana wanaca
yawenaenexa beya poxonae po mataqueitha Jesucristo naca
capanenebiya exanaena.
\p
\v 31 Jopa paxeinaeinde painya jʉntʉ coyenein weya po
coyenein xua ichamonae payabara jʉntʉ ajom xua came
bichocono painya neyabara nanta xeinaexae xua ichamonae abe
pia pacata exanaexae. Mataʉtano jopa paxeinaeinde po coyene
xua jemeicha anaya paexaname. Mataʉtano jopa paxeinaeinde
po coyene xua saya bichocono panthʉthʉ anaepaneibame.
Mataʉtano jopa paxeinaeinde po coyene xua tsʉmʉ jume
pabarʉ paebame ichamonae. Barichi jopa paxeinaeinde po
coyene xua ichamonae pabiataneme. Mataʉtano daxita jopa
paxeinaeinde po coyenein xua bichocono paaitafaetabim
ichamonae.
\v 32 Jame seicaya maisa nantiya caemonae xanepanaya pana
nata exande. Mataʉtano nantiya pana naweyataema xua nantiya
painya nenayawenaewam tsane. Mataʉtano nantiya pana nacui
yabara jʉntemainare xua abe nantiya pana nata exaname, icha
Nacom paca yabara ichi xua paca cayabara jʉntemaina abe
painya neexanae cuiru coyenein Cristo painya nepaca
tsitʉpaexae poxonae naetotha tʉpa exanadutatsi poxonae
bexotsi.
\c 5
\s Meje yabara xua po jʉntʉ coyeneyatha bewa jinompaena
Nacom pia pexui tatsi
\p
\v 1 Tsipei paxam Nacom pia pexui tatsi pam xua bapon
bichocono painya nepaca caantobe jiwi pam, daxota bewa pacui
jontsiya jinompaename icha bapon ichi poxonae popona.
\v 2 Nantiya pana naantobeya jinompare icha Cristo ichi xua
naca antobe. Bapon Cristo pia pepon nacaenaeta xua naca
tsitʉpa xua abe waexanae cuiru coyenein poxonae bexotsi.
Baxua be poxonae icha duwei ichichi xua poxonae jiwi
tsibexotsi xua daxota barapo jiwi jopa penatsicuentsiwa xua
abe peexanaexae Nacomtha. Bapoxonae Nacom tsita xanepanatsi
barapo jiwi. Barichi xua Cristo exana Nacom tsita
xanepanatsi icha be pocotsi duwei tuxusi xeicaewa ichi xua
poxonae jiwi duwei tauta xua Nacom pecatsinexatsi.
\p
\v 3 Tsipei paxam Nacom pia pexui tatsi pam, daxota jopa
bewa paexanaem po coyenein xua daxota ichamonae pomonae
painyamonae paca yabara paeba xua abe paexaname. Mataʉtano
jopa bewa pana nasi cui matacaetsim xua paweiweiname xua
jopa bequein painya seuri jiwi. Jopa bewa payabara paebim po
jume xua jiwi aura exanatsi. Mataʉtano jopa bewa bichocono
painya ita copeichi xua payabara uwame xua ichamonae xeina.
\v 4 Jopa nantiya pana nayabara yʉyʉjande. Mataʉtano jopa
nantiya pana najume cui caponaeinde po jumein xua jopa
wʉnaeyo. Mataʉtano jopa nantiya tsʉmʉ jume pana nayabara
paebinde. Daxita barapo coyenein bichocono abe. Jame maisa
bewa itapeta Nacom wʉnae pajainchim painya nepaca
capanenebiyaexae barapo coyenein weya.
\v 5 Tsipei paxam bayatha payaputaneme xua Nacom cana
exanaena pomonaetha pomonae meje: Pomonae xua penasi cui
matacaetsiwa xua jopa poxonae piseuri jiwi, yawano pomonae
xua yabara paeba po jume xua jiwi aura exanatsi, yawano
pomonae bichocono pitacopeichi xua yabara uwa xua ichamonae
xeina. Nacom tsita abetsi barapo coyenein icha tsita ichichi
xua poxonae jiton bichocono beita cui jichatsi xua wʉnae
jainta ibo nacom. Pomonae barapo coyenein exana bapomonae
bapana jopa itacʉpaetsi xua jiwi itorobiya peewatsiwatsi
xua ichaxota Cristo itorobiya pecanamataxeinaewa jiwi xua
irʉ ichaxota barichi Nacom.
\v 6 Jopa pacopatsinde xua ichamonae paca necamuxuitorobiwa
peyabara paebixae barapo coyenein, po jumeintha xua jopa
xainyeyo. Poxoru jiwi peexanaexae barapo abe peexanae
coyenein daxota Nacom anaya peraxa exanaena barapomonaetha.
Nacom anaya peraxa exanaena barapomonaetha tsipei jopa jume
jejeyo pocotsiwa xua Nacom itoroba.
\v 7 Barapomonaetha jopa imoxoyo pacuicuinaeinde, pomonae
Nacom jopa jume jejeichi.
\p
\v 8 Paxam copitha abe paexaname jopa painya yabara
yaputaexaem Nacom. Baxua be poxonae pomonae pona
pequireiwatha jopa beta ponaeyo jopa beta penecotsixae.
Ichitha anoxuae beta paexaname painya yabara yaputaexaem
Nacom pon jiwi Pecanamataxeinaein. Baxua be poxonae pomonae
pona, poxonae pentha, beta pona beta pia petaexae.
Pajinompare beta painya nejinompaenexa Nacom nexa icha
pomonae ichi poxonae pona poxonae pentha.
\v 9 Pomonae yawa jinompa Nacom barapomonae beta jinompa
icha pomonae ichi xua poxonae beta jinompa poxonae pentha.
Barapomonae peyawa jinompaexae Nacom exaneiba pocotsiwa xua
wʉnaeya peexanaewa yawa xua pocotsiwa tsita xanepanatsi
Nacom, yawa xua pocotsiwa pexainyeiwa.
\v 10 Incane pana nacuidubare pocotsiwa xua Nacom pon jiwi
Pecanamataxeinaein ichichipa pocotsiwa Nacom tsita
xanepanatsi.
\v 11 Jopa paexanaeinde pocotsiwa jopa ainya cuiyo pocotsiwa
ichamonae exana pomonae xua be poxonae pequireiwatha jinompa
poxoru Nacom jopa peyabara yaputaexaetsi. Jame maisa
barapomonae patsita itapeinya xeinare pocotsiwan xua
barapomonae abe peexanaewanxae.
\v 12 Icha payabara paebichipan po coyenein barapomonae abe
peexanaewa, bichocono aura pana exanaetsipa pocotsiwa
namicha peexanaewa barapomonae tsipei bichocono abe.
\v 13 Poxonae pecoicha pentha exana poxonae quirei bapoxonae
daxita pichiwan beta pataneme pentha perubenaexae. Barichi
poxonae barapomonae jume tane po jumein xua yaputane
exainchi, bapoxonae tsita itapeinya xeinaeinchi xua
pocotsiwa namicha exana, apara deta cou abe. Bapoxonae
barapomonae itacʉpatsi xua naexanaena Nacom piamonae tatsi.
\v 14 Daxota Nacom piamonae tatsi ichʉn yabara jeichi:
\q “Nacui cayabara cananta xeinatabare,
\q tsipei xam be pon abe neexanaein.
\q Natsixire pia xainya weya tatsi pomonae
\q be petʉpaewi pejinompaewi jopa
\q tana nejume cowʉntsi jiwixae.
\q Cristo cacana exanaena xua yabara
\q neyaputaewa bapon pocotsiwa xua
\q pia pexainyei coyenewa tatsi”,
\q jei xua ichʉn yabara paebatsi.
\p
\v 15 Dota pam, xua abe painya neexanaewa. Jame maisa
xanepanaya pajinompare. Jopa pajinompaeinde icha be ichi
poxonae jinompa pomonae Nacom jopa jume cowʉntsiya
yaputaetsi. Barapomonae jopa peyaputaewi. Jame maisa
pajinompare icha be ichi poxonae jinompa pomonae jume
cowʉntsiya peyaputaewi Nacom. Barapomonae peyaputaewi.
\v 16 Beta pa-eexanaponde daxita coyeneya xua paca itacʉpa
poxonae cataunxuae anoxuae pajinompame, tsipei barapo
matacabintha jiwi abe bichocono peexanaewi.
\v 17 Jopa pajinompaeinde icha be ichi poxonae jinompa
pomonae amameibatsi jopa Nacom peyabara yaputaexaetsi. Jame
maisa payaputaeya exanaponde pocotsiwa xua Cristo ichichipa,
pon jiwi Pecanamataxeinaein.
\v 18 Jopa pana nacʉpa exanaeinde peatsaxa meran xua jiton
acoyenebeya exanaeya exainchi. Jame maisa Nacom pia Pejumope
tʉnaxʉ tatsi pacopabeibare xua daxita bara paca jʉntʉ
coyene itorobeiba xua beta painya neexaneibiwa tsane.
\v 19 Nantiya pana natsipaebare pocotsiwa xua Nacom paca
jʉntʉ coyene weiweina exana. Nantiya pana nabarʉ
naxʉnare David pia weixi, po weixi pewʉn salmos.
Mataʉtano panaxʉnare po wei pomonae pejume cowʉntsiwi pia
weixi tatsi xua pewʉnae jainchi weixi Jesucristotha, pon
jiwi Pecanamataxeinaein. Panaxʉnare painya jʉntʉ coyene
weya po weixi xua Nacom wʉnae pejainchiwatsi.
\v 20 Nacom pon Waxa bapontha pajacobeibare, pajan
tsaibinde: “Nacom maisa pajʉntʉ coyene weiweinan xua
pocotsiwa daxita pata tana necatsixaemxae. Paca wʉcatsi
Jesucristo pata Tanecanamataxeinaein pabʉxʉna
bobenounan”, pajan tsaibinde.
\s Meje yabara po coyene xua pebin piseuribe bewa nabarʉ
poponaenabe ponbe pejume cowʉntsinbe
\p
\v 21 Daxita pam bewa bara pacopatsim xua nantiya pana
nacanamataxeiname xua painya neexaneibinexa pocotsiwa xua
nantiya pana nacui itorobeibame. Bapoxonae xua painya
itapeinya xeinaenexa xua painya nebarʉ itura cui jinaewa
pocotsiwa Cristo paca cui itoroba.
\p
\v 22 Yabʉxi pam, bewa bara pacopatsim xua painya seuriwi
paca canamataxeina xua painya neexaneibiwa pocotsiwa painya
seuriwi paca cui itorobeiba. Baraxua paexande icha paichim
poxonae Cristo pon jiwi Pecanamataxeinaein paca cui itoroba.
\v 23 Tsipei pebin canamataxeina piowa, icha Cristo ichi xua
canamataxeina piamonae pomonae pia pejume
cowʉntsiwichixaetsi. Bapon Cristo barapomonae pia
Pecapanenebiyaeinchi tatsi. Barapomonae pomonae pejume
cowʉntsiwi bara be Cristo pia pepon tatsi. Cristo bara be
pentasipa pecanamataxeinaexae barapomonae.
\v 24 Icha barapomonae ichi pomonae Cristo pejume
cowʉntsiwichi xua pichichi xua peexanaewa pocotsiwa Cristo
itoroba, yabʉxi bewa barichi. Bewa exanae daxita pocotsiwa
piseuriwi itorobatsi.
\p
\v 25 Pebiwi pam paantobeinde painya seuri jiwi, icha Cristo
ichi xua antobe daxita xua i dapomonae pomonae pejume
cowʉntsiwichixaetsi. Cristo pia peantobexae barapomonae
tsitʉpa poxonae naetotha tʉpa exanadutatsi poxonae
bexotsi.
\v 26 Cristo tsitʉpa barapomonae xua daxita i dapomonae
pomonae peyabara jume cowʉntsiwixaetsi po coyene xua Cristo
jʉntʉ coyene xanepana pecana exanaenexa Nacom nexa. Baxua
exana xua barapomonae jopa pexeinaewa tsane xua
penatsicuentsiwa xua abe peexanaexae. Baxua Cristo cana
exana poxonae barapomonae tabautisabatsi meratha, xuano xua
poxonae paeba xua pinae jume cowʉnta Nacom Pejume Diwesi.
\v 27 Cristo baxua exana daxita pomonaetha pomonae pia
pejume cowʉntsiwichi xua pecuaranobinexa tsane pia
itabaratha, xua yawa pemuxuna cuaranobinexa pia pexeinya
peitʉpanae coicha. Poxonae barapomonae umenaena Cristo
peitabaratha jopa yawa umenae tsane peabe coyenewan.
Mataʉtano jopa yawa umenae tsane pocotsiwa xua barapomonae
abe exanatsi. Barapomonae pejʉntʉ coyene xanepanaewi tsane
Nacomtha xua jopa xeinaeyo xua penatsicuentsiwa xua abe
peexanaexae.
\v 28 Pebiwi bewa antobe pia seuriwi, pecui ʉntabexae icha
barapo pebiwi ichi xua pia pepon natsiʉntabe. Pon pia
coutha natsiʉntabe bapon piowa antobe xua be caein
penaexanaewa tsanebe.
\v 29 Dapon ba ajibi pon pia coutha naaitafaetabi. Saya jame
naapatsina pexaewa yawano naewatsina beta. Cristo bara jʉta
ichiya cana ichi pomonae Nacom piamonae tatsi daxita xua i
dapomonae pomonae Cristo pejume cowʉntsiwichixaetsi.
\v 30 Cristo beta eena barapomonae tsipei barapomonae be pia
pepon tatsi. Waxainchi yaputainchi baxua tsipei barapomonae
jiwanatsi. Waxainchi pomonaetsi xua caemonae wanaexanae
jiwichi Cristotha.
\v 31 Xua pebin yawa piseuri caein naexanabe Nacom Pejume
Diwesitha baxua yabara jeye: “Daxota pebin paxa wepu
natsata, yawa pena wepu natsata xua piseuribe penaperʉ
cuicuinaenexabe. Bapoxonae baponbe piseuribe be caein
naexanabe”, jei Nacom Pejume Diwesitha.
\v 32 Barapo Nacom Pejume Diwesi xua pebin piseuribe yabara
baraxua bara be Nacom moya yawʉn xeina xua po coyene
bichocono ainya cui xua jiwi jopa yabara yaputaeyo. Barapo
diwesi yabara caunuta xua Cristo irʉ Nacom piamonae tatsi
pomonae pejume cowʉntsiwichi, daxita be caemonae naexana
icha pebin piseuribe ichi xua be caeinbe naexanabe.
\v 33 Barichi barapo diwesi paca yabara caunuta. Daxita
pebiwi pam bewa paantobem painya seuriwi, icha paichim xua
painya coutha pana natsiʉntabem. Barichi daxita yabʉxi pam
painya seuriwi bewa paca yabara barʉ cui itura jinaena.
\c 6
\p
\v 1 Pexui pam, paxam pomonae painya nejume cowʉntsi jiwi
pam Cristo. Painya neantobemxae pon jiwi Pecanamataxeinaein
daxota paxam bewa pajume barʉ jejam pocotsiwa painya axeiwi
paca itoroba, tsipei baxua pexeinya cui coyene.
\v 2-3 Moisés pia peitorobi coyenewa ainya coyenewan xeina.
Po peitorobi coyenewa copiya po peitorobi coyene xua
ichaxota muxuna xeina xua peyabara tsiwʉnae muxu dutsiwa,
barapo coyenewatha baxua jeye: “Axa cui barʉ itura jinare,
yawa ena cui barʉ itura jinare, xua painya jʉntʉ coyene
xanepanaya jinompaenexa, mataʉtano xua painya
nejinompaenexa ainya wei dapaein barapo cae pin nacuathe”,
jei Moisés pia peitorobi coyenewatha.
\p
\v 4 Paxam pomonae coxiyei jiwi pam, jopa anaepanaya
paitorobeibinde xua daxota painya pexui paca caseba. Jame
maisa bewa antobeya pawichitim pocotsi coyeneya Jesucristo,
pon jiwi Pecanamataxeinaein, tsita xanepanatsi. Pacuidubare
painya pexui xua beta pejinompaenexa. Mataʉtano pamuxuwere
xua peexanaenexa pocotsiwa bewa exanae.
\p
\v 5 Pomonae amanaya painya nepaca cabusi tatayebeibi jiwi
pam xua poxonae ichamonae pata nacuitame pajume barʉ
jejande pocotsiwa xua painya nepaca canamataxeinaewi paca
itoroba barapo cae pin nacuathe. Barapomonae pabarʉ cui
itura jinare, yawano pacui cunuware barapo painya nepaca
canamataxeinaewi xua abe painya nepaca exanaeyainwa.
Mataʉtano yatsicaya jume xainyeya pata exande. Barapomonae
beta patanacuire icha poxonae paichim poxonae Cristo
patanacuitame.
\v 6 Daunweya patanacuire bequein painya nepaca
canamataxeinaewi jopa paca taeyo. Jopa saya daunweya
patanacuichinde xua barapomonae painya nepaca taexae.
Poxonae baxua paexaname apara saya poxoru painya pia nepaca
canamataxeinaewi xanepanaya paca yabara nanta xeinaetsi.
Jame maisa patanacuire icha paichim poxonae painya ichichi
xua amanaya painya netanacuichiwa painya nepaca
canamataxeinaein nexa Cristo. Bichocono daunweya panacuire
pocotsiwa xua Nacom tsita xanepanatsi pocotsiwa xua bapon
ichichipa.
\v 7 Poxonae pata nacuitame pomonae painya nepaca
canamataxeinaewi weiweinaya panacuire icha be poxonae
paichim xua poxonae pata nacuitame pon jiwi
Pecanamataxeinaein, pon Cristo Jesús. Jopa bara paichinde
xua poxonae jopa xapain patanacuichim pomonae xua poxoru
saya jiwixae.
\v 8 Paxam payaputaneme pocotsiwa xua daxita beta paexaname
bara Nacom paca busi cui matomata. Baraxua Nacom pon jiwi
Pecanamataxeinaein jʉpa barapocotsi matoma paca cata,
poxonae bequein amanaya painya nepaca busi cui tatayebeibi
jiwi pam xua poxonae ichʉn pata nacuitame, xuano xua saya
poxonae bequein paratixi patsinacuitame.
\p
\v 9 Paxam pomonae pecanamataxeinae jiwi pam, bewa beta pata
exanaem xuya barapo amanaya painya nebusi cui tatayebeibi
jiwi. Jopa yabara pamuxuwetsinde xua painya necuainchiwa
tsane icha jopa xapain exanaeyo barapomonae. Pananta xeinare
xua barapomonae bewa exanae pocotsiwa itoroba pon jiwi
Pecanamataxeinaein icha paichim xua irʉ bewa paexanaename
pocotsiwa bapon paca itoroba, pon eca itabocotha. Bapon
daxita tsita najʉpatsi jiwi poxonae yabara paeba
peyaputaenexa icha barapomonae natsicuenta xua abe
peexanaexae.
\s Meje yabara xua pomonae pejume cowʉntsiwi Cristo po
coyeneintha bewa amanayabi caurimonaetha
\p
\v 10 Tamonae pam, anoxuae wetan pocotsiwa xua tapaca
tsipaebiwatsi. Ajʉntʉsʉya pajinompare pon
Pecanamataxeinaein jiwi pia peayapusʉ itorobi coyenewatha
tatsi caemonae painya nenaexanaexae bapontha.
\v 11 Painya jʉntʉ coyene pana naewatsiya yawenare daxita
po coyenewantha xua Nacom paca cata xua xota pana
nayaewatame painya jʉntʉ coyenewa. Bapoxonae paca itacʉpa
xua caurimonae pia pentacaponaein tatsi paamanayabame
poxonae paca jʉntʉ coyene jʉjʉta xua abe painya
neexanaenexa.
\v 12 Tsipei anoxuae jopa nabetsi xua pepa jiwitha. Jame
apara anoxuae penabi coyene exanatsi pomonaetha pomonae
peinya pejinompaewi xua caurimonaetha. Barapo caurimonae
xeina pia peayapusʉwa yawa peitorobi coyene xua jiwi
canamataxeinatsi barapo cae pin nacuathe tsique, pomonae abe
peexanae jiwi. Mataʉtano jinompa barapo cae pin nacua
matatsunthe.
\v 13 Daxota paxeinare daxita pocotsi jʉntʉ coyenein xua
Nacom paca cata pocotsi coyeneintha xua pana nayaewatame.
Anoxuae pana najʉntʉ coyene wʉnaere xua painya jʉntʉ
coyene amanayabi dubenanaebiyaenexa tsane barapo peinya
pejinompaewi. Baxua paexande xain awiya bichocono pajʉntʉ
coyene daunwam poxonae po mataqueitha paca jʉntʉ coyene
jʉjʉtsina xua abe painya neexanaewa tsane. Bequein paca
jʉjʉtsina, awiya ajʉntʉcoyenesʉya pajinompaename.
\p
\v 14 Pana nacui wʉnare icha soldadomonae ichi xua yabara
nacui wʉnaeta penabinexa ichamonaetha. Painya jʉntʉ
coyenewatha paxeinare Nacom pia pexainyei coyenewa painya
tsita itapeinya xeinaenexa baraxua xua bara xainyeya pata
exaname Nacom. Barapocotsi jʉta coyeneya paichinde icha be
soldadomonae ichi xua poxonae yabara nacui wʉnaeta
penabinexa ichamonaetha bapoxonae naepa catʉrʉba paparuwan
xua tsita itapeinya xeina xua bapomonae nacui wʉnaeta xua
bara xainyeya penabinexa xua pon pentacaponaein
peitorobixae. Mataʉtano pejʉntʉ coyene xanepanaewa Nacom
patsita xeinare painya jʉntʉ coyenetha, painya
nenayaewatsinexa icha be poxonae soldadomonae ichi xua xeina
po penaintotha xua nantacari acaba poxonae nacui wʉnaeta
xua penabinexa.
\v 15 Pana najʉntʉ coyene wʉnaere xua painya
necueicueijei tsurubenanaebiyaenexa Nacom pia pexeinya jume
diwesi xua po diwesi yabara xua jiwi jʉntema pejinompaewa.
Barapocotsi jʉta coyeneya bara paichinde icha be poxonae
soldadomonae ichi, xua poxonae nataxu wʉnaetaduba sapaton
xua penacui wʉnaetsinexa xua naba.
\v 16 Mataʉtano pamuxuna xeinare xua bichocono painya
nejume cowʉntsiwa Nacom, xua pana najʉntʉ coyene yawename
poxonae caurimonae pia pentacaponaein tatsi paca jʉntʉ
coyene jʉjʉta. Barapocotsi jʉta coyeneya bara paichinde
icha be soldadomonae ichi xua pemaxʉntha duba peperacae
nain xua naita arababa. Poxonae pia peaitafaetabi jiwi
cawababatsi pocotsiwantha xua peopi sojeiwantha xua iso
itere xeina, bapoxonae barapo peperacae naintontha naita
arababa barapomonae, yawano baxota itaxubaba iso itere.
\v 17 Pacopare xua bara Nacom paca capanenebiyaena painya
paca jʉntʉ coyene araranaenexa caurimonae pecuiyainwa.
Barapocotsi jʉta coyeneya bara paichinde icha be
soldadomonae ichi xua penain yoreitha nanta acaba. Nacom
Pejume Diwesi painya jʉntʉ coyenetha paxeinare xua po jume
Nacom pia Pejumope tʉnaxʉ tatsi paca cata xua po jumetha
painya nenayaewatsinexa painya nepaca caaitafaetabi jiwi
pecuiyainwa. Barapocotsi jʉta coyeneya bara paichinde icha
be soldadomonae ichi xua capona cusi penayaewatsinexa pia
peaitafaetabi jiwichi pecuiyainwa.
\v 18 Nacomtha matowa patsipaebeibare daxita matacabintha be
pocotsi coyeneya paca yawena Nacom pia Pejumope tʉnaxʉ
tatsi. Nacomtha pawʉqueibare daxita painya newʉcae
coyenewatha tsaibi pocotsiwan xua panantawenoname. Xain
daxita matacabintha tsaibi tsaca painompeibame, mataʉta
bapana jopa paajʉntʉcoyenefaetabinde xua pawʉcame Nacom.
Bichocono matowa patawʉcare daxita pomonae Nacom piamonae
tatsi.
\v 19 Barichi painta wʉcare Nacomtha xua bapon
tanecatsinexa po jume diwesitha xua tacueicueijeinexa.
Mataʉtano painta wʉcare xua tana neitacʉpaewa xua cui
tsacatsacapiya tacueicueijeinexa, xua jiwi yabara yaputane
taexanaenexa pocotsiwa xua Nacom moya yawʉn xeina po coyene
yabara xua Nacom capanepa exana pomonae jopa judiomonae
naexanaeyo.
\v 20 Nacom neitoroba icha nacuantha xua tacueicueijeinexa
Nacom Pejume Diwesi bapon nexa. Daxota anoxuae ichamonae
neeta jiwi pecʉbi botha tacueicueijeixae Nacom nexa. Painta
Nacomtha wʉcare xua cui tsacatsacapiya tacueicueijeinexa
tsane poxonae icha bewa cueicueijan tsane.
\s Meje yabara poxonae Pablo najume wetsiya paeba barapo
cartathe
\p
\v 21 Tíquico pon paxan paantobein, pon irʉ pejume
cowʉntsin Jesucristo bapon pacata itorobatsi. Bapon
Tíquico bara xainyeya exana poxonae pana neyawena Nacom pia
petanacuichiwa tatsi pon jiwi Pecanamataxeinaein. Bapon
daxita paca tsipaebina xua neyabara paebina, yawano
pocotsiwa xua exanan baxua yabara paca tsipaebina.
\v 22 Bapon Tíquico pacata itorobatsi yaitama ichichipan
xua bapon yabara paca tsipaebina xua pata jinompaewa.
Bapoxonae bapon paca jʉntʉ coyene tsacabina, jʉntʉ
coyene weiweinaya sadʉjei painya nejinompaewa tsane xua
bara beta tapoponaexae.
\p
\v 23 Barabʉ Nacom, pon Waxa, irʉrʉ Jesucristo, pon jiwi
Pecanamataxeinaein, baponbe jʉntema jinompa cana exanaenabe
pomonaetha daxita pomonae pia pejume cowʉntsiwixaetsi.
Mataʉtano barabʉ exanaenabe xua barapomonae nantiya
naantobe tsane. Mataʉtano barabʉ exanaenabe xua
barapomonae ajʉntʉcoyenesʉya jume cowʉnta
dubenanaebiyaena.
\v 24 Mataʉtano barabʉ Nacom peantobexae yawenaena daxita
pomonaetha pomonae peantobewi Jesucristo pon
Wanacanamataxeinaein. Bapoxonae barapomonae pexeinaenexa
tsane po coyene antobe ichamonaetha po coyenewa xua ataya
tsiteca.
\p Baja Pablo.