\id 1TH
\h 1 TESALONICENSES
\toc1 1 Tesalonicenses
\toc2 1 Te
\mt1 MEJE PO CARTE COPIYA PABLO TATINA, TESALONICA
TOMARAPIWI TATINATSI
\c 1
\s Meje yabara poxonae Pablo tamropata pitaba xua tatina
pomonaetha pomonae Tesalónica tomarapiwi
\p
\v 1 Xan, Pablon, irʉ Silvano, irʉ Timoteo, barapoyobe
pan, barapo carte pacata tinatsi. Pacata tinatsi paxam
pomonae Tesalónica tomarapiwi pamxaem pomonae painya nejume
cowʉntsiwixae Jesucristo. Paxam pomonae pam pomonae painya
neyawa jinompaewi Nacom, pon Waxa, xua mataʉtano
Jesucristo, pon jiwi Pecanamataxeinaein. Barabʉ Nacom,
Waxa, irʉ Jesucristo, pon jiwi Pecanamataxeinaein, paca
yawena xua jʉntʉ coyene weiweinaya painya nejinompaewa
tsane xuano beta xanepanaya jʉntema painya nejinompaenexa.
\s Meje yabara xua Pablo yabara paeba xua Tesalónica
tomarapiwi pinae beta jume cowʉnta
\p
\v 2 Pacata tsipaebeibatsi Nacomtha, pajan tsaibi Nacomtha:
“Nacom maisa pajʉntʉ coyene weiweinan xua daxita
Tesalónica tomarapiwi beta jinompa, pomonae pecajume
cowʉntsiwi”, pajan tsaibi Nacomtha.
\v 3 Pajan tsaibi Nacomtha: “Pata Taxam, Nacom, maisa
barapo Tesalónica tomarapiwi bichocono cajume cowʉntsiya
cata exana dubenanaebiya. Mataʉtano, bichocono
necaantobexae daxota ayapusʉya cata nacuita dubenanaebiya.
Maisa bichocono barapomonae wʉnae ewateiba xua Jesucristo
pia pepatopeicaewanexa tsane, pon Pata
Tanecanamataxeinaein”, pajan tsaibi Nacomtha.
\v 4 Paxam pomonae painya nejume cowʉntsiwi pam Nacom. Bara
payaputan xua Nacom bichocono paca antobe, yawa caena
bayatha paca itapeta pia piamonae paca exanaetsi.
\v 5 Poxonae Nacom pia pecapanenebiyae diwesi jume paca
tsipaebatsi jopa saya meisa ʉ pata jume. Jame apara Nacom
pia Pejumope tʉnaxʉ tatsi pia peayapusʉ itorobi
coyenewatha tatsi pana yawena, xua pata cueicueijeiwa.
Barapo diwesi bara xaniwaicha jume cowʉntatsi xua barapo
diwesi bara pexainyei jume. Bara beta payaputaneme xua bara
beta pajinompan painya itʉtha xua pata paca
ajʉntʉcoyenesʉ exanaenexatsi xua irʉ jʉntʉ coyene
xanepanaya painya nejinompaenexa.
\p
\v 6 Paxam paexanaponame icha paichin xua pocotsiwa
paexanaponan. Mataʉtano beta paexanaponame icha ichi
poxonae beta exanapona pon jiwi Pecanamataxeinaein. Bequein
ichamonae atene paca exana painya nejume cowʉntsixae
Jesucristo, ichitha barapo diwesi awiya jʉntʉ coyene
weiweinaya pajume cowʉntame. Barapo pejʉntʉ weiweinae
coyene Nacom pia Pejumope tʉnaxʉ tatsi paca cata.
\v 7 Baxuan painya neexanaexae daxota ichamonae pomonae
pejume cowʉntsiwi Jesucristo, pomonae Macedonia nacuapiwi,
barapomonae exana pocotsiwa paexaname. Irʉrʉ baxuan exana
pomonae Acaya nacuanpiwi.
\v 8 Jesucristo, pon jiwi Pecanamataxeinaein, pia
pecapanenebiyae diwesi jume pacueicueijam ichamonaetha.
Barapo diwesi Macedonia nacuapiwi irʉ Acaya nacuapiwi jume
tane. Jopa meisa barapo nacuabepiwi bara apara daxita
nacuanpiwi irʉrʉ jume tanerʉ. Daxita barapo jiwi paca
yabara yaputane xua painya nejume cowʉntsiwa Nacom. Daxota
jopa panantawenonaeinyo xua paca yabara paebatsi
ichamonaetha.
\v 9 Nama barapomonae pana neyabara paeba xua paxam
panententa weyataeya wabame. Mataʉtano barapomonae paca
yabara paeba xua pinae paxam ibo nacomʉn po ibo nacomʉn
copiya wʉnae pajainteibame pabebam painya nejume
cowʉntsixae Nacom. Mataʉtano paca yabara paeba xua
bapoxonae patamropatarʉcʉpame xua pata taexaname Nacom pia
petanacuichiwa tatsi, pon yatsicaewa pepa Nacom, pon ataya
tsitecaeya asʉ pepoponaein.
\v 10 Mataʉtano barapomonae pana netsipaeba xua pinae paxam
Jesús pawʉnae ewatame xua pepatopeicaewa peitaboco
wetsica. Barapon Jesús Nacom Pexanto tatsi, po Pexantoxae
Nacom asʉ exana petʉpae coyene cuiru weya. Barapon Jesús
naca napaeba exanaena Nacom beya, poxonae Nacom copatsina
xua jiwi bichocono peraxa jʉbebinchi abe peexanaexae.
\c 2
\s Meje yabara po coyeneya Pablo tanacuita Tesalónica
tomarapiwi
\p
\v 1 Patamonae paxam pomonae pam pomonae irʉ painya nejume
cowʉntsiwi Jesucristo icha paxan paichin. Payaputaneme xua
tapaca siwa ponaewatsi baxua wʉnae pata cayawenaexaetsi.
\v 2 Poxonae Filipos tomaratha paponan, barapomonae abe pana
exana. Yawa tsʉmʉ jumeya pana tsipaeba. Bequein
barapomonae baxua pana cana exana ichitha payaputaneme xua
Nacom pana yawena tapata catsipaebinexatsi barapo Nacom pia
pecapanenebiyae diwesi jume. Baxua paexanan xua jopa jʉntʉ
deideijeya paca tsipaebichi barapo diwesi bequein
barapomonae pana jume matawenta.
\v 3 Poxonae paca tsipaebatsi Nacom Pejume Diwesi jopa apara
paca tsipaebichi po jume xua jopa xainyeyo xua po jume
pejumexaei. Mataʉtano jopa paca tsipaebichi po jʉntʉ
coyene wajʉntʉ coyene abeya naca tsipaeba. Mataʉtano jopa
paca muxujainyabichi xua daxota abe painya neexanaenexa.
\v 4 Nama Nacom patsita jʉntʉ coyene xanepanan xua
xainyeya pata tacueicueijeixae. Daxota Nacom pana neitoroba
xua pata tapaebinexa pia pecapanenebiyae diwesi jume. Apara
jopa baxua paexanaeinyo xua daxota jiwi pata
taneweyataenexa. Jame apara baxua paexanan xua Nacom pata
taneweyataenexa. Barapon pana nejʉntʉ coyene yaputane xua
poxonae paexaneiban.
\v 5 Paxam bayatha payaputaneme xua jopa paca tsipaebichi po
jume ba jiwi piraichi jume wʉnaeya paeba xua bepa pia
weyataetsi. Mataʉtano payaputaneme xua jopa pacueicueijanyo
pata paratixichi. Nacom bara pana tane xua jopa baxua bara
paexanaeinyo.
\v 6 Jopa bapana paichichipaeinyo xua jiwi wʉnae pata
tanejainchiwa, xua poxonae metha bequein bara barapomonae
pam, ichacuitha xua poxonae bequein ichamonae irʉ.
\v 7 Bequein paxan pana itacʉpa xua pata caitorobiwatsi,
bequein bara Cristo pia peitorobi jiwi tatsi pan, daichitha
jopa paexanaeinyo barapo coyene. Nama apara saya bewayo paca
yayawenaponatsi, icha be pocotsi coyeneya petsiriwa ichi
poxonae pia pexui bewayo wichitiya yayawenapona.
\v 8 Bichocono paca antobetsi, daxota paichichipan xua pata
paca catsiwatsi Nacom Pejume Diwesi. Jopa meisa xua poxonae
daxota barapo coyenewa, bara yawa daxita muxuna paca
yawenatsi daxita pata jʉntʉ coyeneintha. ¡Bara jopa
juniya pata paca antobewatsi!
\v 9 Patamonae pam, paxam pomonae irʉ painya nejume
cowʉntsixae Jesucristo. Paxam payaputaneme xua bichocono
panacuitan pata xeinaenexa pocotsiwa panantawenonan xua pata
nabanaewanexa. Jopa juniya panacuiteibinyo matacabintha,
yawa merawinthano. Daxota jopa panantawenonaem xua pana
catame xua pocotsiwa pata nantawenonaewa pata
jinompaewanexa. Jopa paichipaeinyo xua paca nacui matowa
xeina exanatsi poxonae paca cuidubatsi Nacom Pejume Diwesi.
\p
\v 10 Paxam pomonae painya nejume cowʉntsixaemxae
Jesucristo pana yaputaneme irʉ Nacom pana yaputane xua
jʉntʉ coyene xanepanaya pata jinompaewa painya xantha
daxita carepaya paxamtha. Mataʉtano Nacom patsita jʉntʉ
coyene xanepanan, xua penatsicuentsiwa jopa bapon patsita
xeinaeinyo. Daxota ichamonae jopa pana neyabara paebiyo xua
abe pata pacata exanaewatsi.
\v 11 Mataʉtano payaputaneme xua paca itorobatsi xua beta
pajinompame. Mataʉtano yawa payaputaneme xua paca jʉntʉ
tsacabatsi xua xanepanaya painya nejinompaenexa. Mataʉtano
bara payaputaneme xua daxita paxam paca cui matateicatsi xua
poxonae bichocono paanthʉthʉtanem tsaibi xua abe painya
nepacata exanaexae ichamonae. Daxita barapo coyenein bara
paexanan icha be pocotsi coyeneya coxiyan cana ichiya exana
pia pexuitha.
\v 12 Paca itorobatsi xua bewa beta pajinompaem, icha
pomonae Nacom pejume cowʉntsiwi ichi xua bewa beta
jinompae. Baraxua paexande poxoru Nacom paca wʉn duba
piamonae painya paca exanaenexa xua painya nebarʉ
itorobinexa tsane jiwi Nacom pia peitorobi nacua beicha
tatsi. Nacom pia peitorobi coyenewa xua jiwi peitorobi
coyenewatsi bichocono peitʉpanae coyenewa.
\p
\v 13 Mataʉtano paxan Nacomtha patsipaeban pajanje: “Nacom
maisa pajʉntʉ coyene weiweinan xua Tesalónica tomarapiwi
cajume cowʉnta poxonae patsipaeban jinya jume diwesi.
Barapomonae nanta xeina xua po diwesi patsipaeban barapara
jinya jume diwesi. Jopa nanta xeinaeyo xua barapo diwesi
apara saya jiwi pia diwesi”, pajan Nacomtha. Xaniwaicha
barapo diwesi apara Nacom Pejume Diwesi painya paca cana
exanaexae xua icha jʉntʉ coyene painya nexeinaewa pomonae
painya nejume cowʉntsixae Jesucristo.
\v 14 Patamonae pam. Ichamonae atene paca exana pomonae
painyamonaexae. Baxua paca cana exana, icha Judea nacuapiwi
ichichi pomonae pejume cowʉntsiwi Cristo Jesús. Daxita
barapomonae ajʉntʉcoyenetane exainchi pomonae piamonaexae
pomonae judiomonaexae.
\v 15 Caena bayatha judiomonae pia pamo susato jiwi tatsi
juteba, pomonae Nacom pia peitorobi jume pepaebiwi tatsi
jutebatsi. Cotacaya icha judiomonae Jesús pon jiwi
Pecanamataxeinaein tʉpa exanadutatsi naetotha. Matapainya
anoxuae icha judiomonae pana yotaba pata penacaetutsi bo
weya. Pocotsiwan barapomonae exana Nacom baxuan jopa tsita
xanepanaetsi. Barapomonae nacana exana pomonae daxita jiwi
pia peaitafaetabi jiwichi.
\v 16 Paichichipan xua patsipaeban Nacom Pejume Diwesi
pomonaetha pomonae jopa judiomonae naexanaeyo xua irʉ Nacom
pecapanenebiyaenexa tsane bequein judiomonae pata tanejume
itawetsiwatha tsane poxonae patsipaeban Nacom Pejume Diwesi.
Poxonae judiomonae barapo abe peexanae coyene pana tsiexana
bapoxonae opi duta wetsiya exana daxita po peabe coyenewan
xua bayatha itacʉpatsi xua eexanapona. Daxota anoxuae nama
matapainya Nacom bichocono anaepana barapomonaetha. Nacom
juntucuru peraxa jʉba exanaena barapomonae,
penatsicuentsixae abe peexanaexae bapontha.
\s Meje yabara xua equeicha Pablo besiwa ponaena Tesalónica
tomarapiwi
\p
\v 17 Paxam pomonae patamonae pam, poxonae bequein paxan
tajʉ paca cuenta enatsi, xua saya bara caetotha jopa
imoxoyo paca taetsi, ichitha paca yabara nanta xeineibatsi
pata paca itaxaneibixaetsi. Bichocono paichichipan xua pata
paca cataewatsi.
\v 18 Paxan matowa paichichipan xua caewa pata paca siwa
ponaewatsi. Xan, Pablon, ichacuitha matowa nanta xeineiban
xua paca siwa poneibinchi. Ichitha caurimonae pia
pentacaponaein tatsi, Satanás, pana necui yancababeiba.
\v 19 Ichichipan paca siwa ponatsi poxoru paxam pana necana
exaname xua pajʉntʉ coyene weiweinan. Barichi paxam
pomonae pana necana exaname xua pawʉnae ewatan. Barichi
paxam pomonae pana necana exaname xua matowa payabara paeban
pocotsiwa xua paexanan poxonae paca cuidubatsi. Poxonae
Jesucristo pon jiwi Pecanamataxeinaein equeicha caewa
patopeicaena bapontha paca yabara paebinchi po coyene xua
paxam pana necana exaname.
\v 20 Xaniwaicha paxam pomonae pam pana nejʉntʉ coyene
weiweina cana exaname. Mataʉtano paxan pomonae pana necana
exaname xua paca yabara wʉnae jainchinchi Jesucristo
peitabaratha poxonae bapon peitabaratha tatsi paca barʉ
umenaeinchi beta painya neexanaexae.
\c 3
\p
\v 1-2 Jopa pana itacʉpaeyo xua awiya equeicha pata
ewatsiwa xua pata paca yabara yaputaewa tsainchi. Daxota
juntucuru pananta xeinan xua paitoroban Timoteo pon jume
cowʉnta Nacom painya pia paca necataenexa tsanebe.
Mataʉtano juntucuru pananta xeinan xua Silvano compa
paecaeinbe Atenas tomaratha. Timoteo paitoroban, tsipei
bapon beta tanacuita Nacom nexa. Barapon Timoteo pana yawena
poxonae pacueicueijan Cristo pia pexeinya jume diwesi tatsi.
Bapon Timoteo itacʉpatsi xua ajʉntʉcoyeneyapusʉ paca
cana exana. Mataʉtano itacʉpatsi xua paca jʉntʉ cui
tsacaba exana xua awiya mataropeichiya painya nejume
cowʉntaponaenexam Nacom.
\v 3 Bapoxonae dapon aibi tsane paxam jiwana pon
ajʉntʉcoyenefaetabiya jume cowʉnta xua ichamonae abe
peexanaexae bapontha. Paxam bayatha payaputaneme xua daxota
bewa ichamonae atene naca exanaena wajume cowʉntsixae
Jesucristo.
\v 4 Mataʉtano poxonae cataunxuae paca barʉ enatsi, paca
tsipaebatsi xua daxota bewa ichamonae naca atene exanaena
poxonae nacata abe exana. Bara baxua bayatha exana
barapomonae icha be pocotsi coyeneya bayatha paca
tsipaebatsi, xuano payaputanemeno.
\v 5 Tsipei xan jopa neitacʉpaeyo xua equeicha taewatsiwa
xua tapaca yabara yaputaewa tsainchi, daxota Timoteo
itoroban. Bapon inta paca yainyabiya jei: “¿Bara awiya
pajume cowʉnta dubenanaebiyame Jesucristo?” jei. Baxua
beyaputaein tajunuwixae xua caurimonae pia pentacaponaein
tatsi pon jiwi pejʉntʉ coyene jʉjʉtsin paca cui
jʉjʉtsipa xua abe painya neexanaewa tsane. Bapoxonae
pocotsiwa xua pata tapacata nacuichiwatsi jopa paca
yawenaetsipae xua jopa xapain painya nejume cowʉntsixaem
tsipae.
\p
\v 6 Ichitha bayatha bapon Timoteo caewa patopa xua bara
werena xua painya tomara werena. Bapon yabara pana tsipaeba,
bichocono jume xanepana xua pinae awiya pajume cowʉnta
dubenanaebiyame Jesucristo. Mataʉtano yabara pana tsipaeba
xua pinae nantiya pana naantobe tsurubenanaebiyam.
Mataʉtano yabara pana tsipaeba xua pinae pana neyabara
antobeya nanta xeiname mataʉta xua pinae bepana netaename,
icha paichin xua bena tapaca taewatsi tsainchi.
\v 7 Patamonae pam, paca tsipaebatsi bequein ichamonae
painta ayapube exana yawa pana atene exana, ichitha
pajʉntʉ coyene sadʉjan poxonae pajume tan xua pinae beta
pajume cowʉnta dubenanaebiyame Jesucristo.
\v 8 Poxonae paxam awiya beta pajume cowʉnta
dubenanaebiyame Jesucristo, pon jiwi Pecanamataxeinaein,
baxua pajʉntʉ coyene sadʉjan pata jinompaewatha Nacom
nexa.
\v 9 Anoxuae pana itacʉpa xua pata jeiwa: “Nacom maisa
pajʉntʉ coyene weiweinan Tesalónica tomarapiwi beta
necajume cowʉntsixae”, pata jeiwa. Paxam pomonae pana
nejʉntʉ coyene weiweina cana exaname poxonae Nacom
patsipaeban.
\v 10 Matacabintha, merawinthano Nacomtha pacata
wʉqueibatsi. Nacom pawʉqueiban xua bara pata necopatsinexa
xua pata tapaca casiwa ponaenexa tsainchi. Paichichipan xua
pata paca yawenaewatsi xua beta painya nejume cowʉntsiwa
Jesucristo pocotsiwa yabara pacata seica xua painya yabara
neyaputaewa Jesucristo.
\p
\v 11 Paichichipan xua Nacom pon Waxa irʉ Jesús pon jiwi
Pecanamataxeinaein pana yawenaena xua pata paca casiwa
ponaenexatsi.
\v 12 Mataʉtano paichichipan xua Jesús, pon jiwi
Pecanamataxeinaein, paca cana exanaena xua equeicha
bichocono toxeinchiya paxeinaponaename peantobe coyenewa xua
nantiya painya nenaantobexaem tsane. Mataʉtano paichichipan
xua barapo peantobe coyenewa daxita jiwi painya tsita
xeinaenexa icha paca ichichi xua bichocono paca antobetsi.
\v 13 Mataʉtano paichichipan xua Nacom pon Waxa, painya
nepaca cana exanaenexa xua bichocono painya nejʉntʉ coyene
xanepanaewa. Mataʉtano paichichipan xua Nacom pon Waxa
bichocono ajʉntʉyapusʉya paca cana exanaena. Bapoxonae
paxam bichocono Nacom tsita jʉntʉ coyene xanepanaeinchi.
Bapoxonaeno jopa patsita natsicuentsim tsane abe painya
neexanaexae bapontha. Barapocotsi jʉta coyene awiya
paexanaponaename beya poxonae Jesús pon
Wanacanamataxeinaein, piamonae barʉ patopeicaena daxita.
\c 4
\s Meje yabara po jʉntʉ coyeneya bewa jiwi tajinompae
Nacom po coyene xua Nacom tsita xanepanatsi
\p
\v 1 Patamonae pam anoxuae jume daunweya paca jeichi, yawa
paca itorobiya jeichi: “Tsipei Jesús pon jiwi
Pecanamataxeinaein, pana necayawa popona daxota paca
itorobatsi. Pocotsiwa paca cuidubatsi paxam bara paichinde.
Bayatha paca cuidubatsi xua bewa equeicha mataropeichiya
payajʉntʉ coyene jinompaem po jʉntʉ coyene xua Nacom
tsita xanepanatsi. Mataʉtano anoxuae equeicha matowa
paexanaponde barapo coyenein, po coyenein xua anoxuae
paexanaponame”, paca jeichi.
\p
\v 2 Paxam payaputaneme po pecuidubiwan paca cuidubatsi
apara barapo pecuidubiwan Jesús pana itoroba, pon jiwi
Pecanamataxeinaein.
\v 3 Xua jame Nacom pocotsiwa ichichipa xua paxam bewa
bichocono jʉntʉ coyene xanepanaya pajinompaem Nacom
peitabaratha xua daxota ichamonae patsita itapeinya xeiname
xua bara Nacom painya neantobe jiwi pam. Jopa panasi cui
exana dubenanaebiyaeinde ichamonae pia seurixitha tatsi.
\v 4 Pebin bewa yaputaena xua beta cuicuinaena piseuritha po
coyeneya xua Nacom tsita xanepanatsi xuano xua jiwi tsita
xanepanatsi. Mataʉtano bapon bewa barʉ cui itura jinaena
piowa pia peantobexae. Daxita barompaya pebiwi pam bewa irʉ
bara paichim tsane.
\v 5 Barichi barapo pebin jopa bewa exanae tsane barapowatha
po coyene xua saya pia penaquenta exanaetsi. Tsipei
ichamonae pomonae jopa Nacom yaputaeyo, barapomonae abe
nanta xeina nawita xua yabʉxi yabara xua penaquentsiwa
yabara. Barapo coyene painya xoba paexaname.
\v 6 Jopa paexanaeinde barapo abe peexanae coyenewatha
pontha pon irʉrʉ pejume cowʉntsin Nacom. Jopa bewa
papichim barapon piowa tatsi. Icha baxua paexanaetsipame pon
jiwi Pecanamataxeinaein bichocono atene paca cana
exanaetsipa abe painya neexanaexae. Bayatha barapocotsiwa
paca muxuwetatsi.
\v 7 Nacom jopa naca wʉn dubiyo piamonae wanaca exanaenexa
xua abe waexanaponaewa tsane. Jame apara Nacom naca wʉn
duba xua jʉntʉ coyene wʉnaeya wajinompaenexa Nacom
peitabaratha tatsi xua daxota ichamonae tsita itapeinya
xeinatsi xua bara Nacom pijimonae tatsi wanaexanaenexatsi.
\v 8 Pon jume itaweta po coyene xua ichʉn pepichiwa yabara
xua ichʉn piowa tatsi, apara bara bapon jume itaweta Nacom
pia pecuidubi coyenewa tatsi. Jopa apara jume itawetsiyo
pebin pia pecuidubi coyenewa tatsi. Barapon Nacom paca cata
pia Pejumope tʉnaxʉ tatsi xua painya yawa jinompaenexa.
\p
\v 9 Po peantobewa xeina pomonae pejume cowʉntsiwi Nacom,
xua nantiya caemonae penaantobewa, xan jopa nantawenonaeinyo
xua yabara tapacata tinaewatsi barapo coyene. Tsipei Nacom
pia coya paca cuiduba po coyene xua nantiya painya
nenaantobewam tsane.
\v 10 Bara baxua paexaneibame xua paantobe tsurubenanaebiyam
daxita pomonae jinompa Macedonia nacuatha, pomonae pejume
cowʉntsiwi Nacom. Ichitha paxam patamonae pam painya nejume
cowʉntsiwixae Nacom, paca itorobatsi xua awiya mataropeicha
paantobe tsurubenanaebiyama equeicha matowa.
\v 11 Bichocono paichichipare xua painya neexanaewa xua po
coyene meje: Jʉntema parubenanaebiyama, xua jopa pana
najume matsontsonoba dubenanaebiyam. Mataʉtano painya xoba
patsipaebeibame ichamonaetha po coyenein barapomonae bewa
exanae. Mataʉtano barompaya painya penacuichiwan pana
natsiexana dubenanaebiyama icha be pocotsi coyeneya bayatha
paca tsipaebatsi.
\v 12 Icha barapocotsiwa paexanaename ichamonae pomonae jopa
Nacom pejume cowʉntsiwi paca barʉ cui itura jinaena xua
bara beta painya neexanaexaem. Mataʉtano jopa
panantawenonaem xua ichamonae pawʉcame pocotsiwa xua
panantawenoname.
\s Meje yabara poxonae Jesucristo pon jiwi
Pecanamataxeinaein equeicha caewa patopaetsica
\p
\v 13 Patamonae pam, paichichipan xua painya neyaputaewa po
coyene pexainyei coyene, xua petʉpaewi yabara. Mataʉtano
jopa paichichipaeinyo xua be wecoyeya pajinompame icha be
ichamonae ichi pomonae jopa pejume cowʉntsiwi Nacom.
Barapomonae be wecoyeya jinompa jopa xanepanaya pewʉnae
ewatsixae po coyene xua poxonae petʉpaewi equeicha asʉ
tsane.
\v 14 Waxainchi jume cowʉntatsi xua Jesús tʉpa naetotha
xuano equeicha Nacom asʉ juina exana. Icha Nacom pexanto
cana ichi, waxainchi jume cowʉntatsi xua Nacom bara cana
ichi tsane pomonaetha pomonae bayatha werapa. Barapomonae
pejume cowʉntsixae Jesús, poxonae werapa asʉ jujuina
exanaeinchi xua Nacom exanaena. Nacom barapomonae barʉ
jujuinya exanaeinchi Jesús, xua Jesús pemuxuna
caponaenexatsi Nacom pexainya beicha.
\p
\v 15 Daxota paca tsipaebatsi pocotsiwa xua Jesús pana
netsipaeba pon jiwi Pecanamataxeinaein. Yabara paca
tsipaebatsi xua pomonae cataunxuae asʉ jinompa poxonae
patopaena pon jiwi Pecanamataxeinaein barapomonae copiya
jopa jujuinya exanae tsainchi xua Jesús pecaxibinexa
tsainchi athabeicha. Jame copiya matha asʉ jujuina
exanaeinchi pomonae bayatha werapa.
\v 16 Jesús pon jiwi Pecanamataxeinaein patopaetsica
peitaboco wetsica. Barapo mataqueitha jiwi jume taena
peajumeyapusʉ itorobi wawaiwa, xuano xua cueicueijei
matatsunpiwi pia pentacaponaein tatsi, xuano xua trompeta
jume busi xubina Nacom pia trompeta tatsi. Bapoxonae pomonae
Cristo jume cowʉntatsi xua pomonae bayatha yacui werapaeya
othopa bapomonae copiya asʉ jujuina exanaeinchi.
\v 17 Bapoxonae cotacaya waxainchi pomonae cataunxuae asʉ
jinompatsi, pomonae wajume cowʉntsiwi Jesús naca cayawa
muxuna caetucaetutsiya caponaena pomonae copiya pewerapaewi.
Daxita barapomonaetsi Nacom naca caponaena xua naca
caponaena tsaquinaebowatha xua Jesús pon jiwi
Pecanamataxeinaein wacaxibiyaenexa tsainchi athabeicha.
Baxoteicha ataya tsitecaeya daxita waxainchi Jesús pon jiwi
Pecanamataxeinaein, naca barʉ jinompeibina.
\v 18 Daxota barapo jumetha caemonae nantiya pana najʉntʉ
coyene tsacabare xua painya neyaputaewa tsane, po coyene xua
pewerapaewi yabara.
\c 5
\p
\v 1 Patamonae pam, jopa nantawenonaeinyo xua yabara pacata
tinatsi matacabi, yawa dapae yabara xua poxonae Jesucristo
pepatopeicaewa tsane.
\v 2 Bayatha payaputaneme xua equeicha patopeicaena pon jiwi
Pecanamataxeinaein. Mataʉtano payaputaneme xua bapon
patopaetsica poxonae xapain jopa nanta xeinae tsainchi, icha
pon pecaibin ichi xua jemeicha patopa merawitha.
\v 3 Poxonae jiwi jei tsane: “Maisa jʉntema jinompatsi
tsipei daxita wʉnae tsurucuae”, jei tsane, bapoxonae
patopaena jemeicha po dapaetha poxonae jiwi bichocono atene
exanaeinchi. Jiwi jopa itacʉpae tsainchi xua panenebiyaena
barapo peatenewa weya. Jiwi atene exanaeinchi icha yabʉyo
ichi xua bichocono bewa atene tsane xua pexuyo poxonae
naexanaena.
\v 4 Patamonae pam, paxam jopa dapocotsimonae pam,
pocotsimonae jopa jume cowʉntsiyo Nacom. Poxonae equeicha
patopaetsica, pon jiwi Pecanamataxeinaein jopa pana
nabenaecaem tsane, icha jopa be ichiyo poxonae jiwi
nabenaeca xua pecaibin jemeicha patopa.
\v 5 Paxam pomonae Nacom payabara yaputaneme. Daxota beta
painompame icha be ichamonae ichi, xua mataqueitha beta
taeya jinompa xua pentha petsuncuaexae. Waxainchi jopa
dapomonaetsi xua icha be ichi pomonae abeya jinompa jopa
pejume cowʉntsi jiwixae Nacom. Barapocotsimonae be pomonae
poxonae jinompa pequireiwatha, jopa beta jinompaeyo pequirei
tsuncuaexae.
\v 6 Pomonae jopa pejume cowʉntsiwichi Jesucristo
barapomonae jopa tsaca jinompaeyo xua pewʉnae ewatsinexa
Jesucristo pia pepatopeicaewa tsica tsane. Barapomonae be
pocotsimonae xua maita, xua jopa itacʉpaetsi xua
penacosabiwa. Ichitha jame bewa waxainchi wacoutha barompaya
jʉntʉ coyene coxonaetsi xua tsaca wajinompaewa poxonae
wʉnae ewatatsi Jesucristo pia pepatopeicaewa tsica tsane.
\v 7 Pomonae ba xua maita, bara merawi maita. Irʉrʉ
pomonae ba cʉpatsi peatsaxa mera, bara merawi cʉpatsi.
Daxita barapomonae jopa xapain Jesucristo wʉnae ewatichi.
\v 8 Ichitha waxainchi wajume cowʉntsixaetsi Jesucristo,
daxota bewa jʉntʉ coyene coxonaetsi xua tsaca jinompatsi
xua wawʉnae ewatsiwa Jesucristo. Waxainchi xanepanaya bewa
beta jume cowʉntichi Nacom. Mataʉtano bewa beta nantiya
naantobetsi. Barapo coyenebe naca jʉntʉ coyene yaitata xua
jopa abe exanaetsi, icha soldadomonaepin ichi xua nayaitata
penaintotha xua nantacari xatata xua pecawatsiyainwatsi
dejonatha. Barichi waxainchi bewa jume cowʉntsiya wʉnae
ewatichi xua Nacom naca capanenebiya tsane. Barapo coyeneya
naca yaitata xua abe waexanaeyainwa icha soldadomonaepin
ichi xua nantasipa yaitata penain yoreitha xua peantasipabe
exanaeyainwatsi.
\v 9 Nacom jopa naca itapetsiyo xua wanaca atene exanaenexa
wanatsicuentsiwaxae abe waexanaexae bapontha. Saya apara
naca itapeta wanaca capanenebiyaenexa xua Jesucristo wanaca
tsitʉpaexae naetotha pon Wanacanamataxeinaein.
\v 10 Jesucristo naca tsitʉpa naetotha wanaca barʉ
jinompaewa tsane pia nacuatheicha, bequein waxainchi bayatha
werapatsi, yawano ichacuitha bequein waxainchi awiya asʉ
jinompatsi, poxonae bapon patopaetsica.
\v 11 Daxota paxam bewa awiya daxita nantiya pana najʉntʉ
coyene tsacabim. Mataʉta bewa nantiya pana
naajʉntʉcoyenesʉ exanaem beta painya nejume cowʉntsinexa
icha paichiponaem xua anoxuae paexanaponame.
\s Meje yabara xua Pablo muxuweta pomonae Jesucristo pejume
cowʉntsiwichi
\p
\v 12 Patamonae pam, paca muxuwetatsi xua pabarʉ cui itura
jinare pomonae painya xantha Nacom tanacuitatsi xua pomonae
paca matacapona. Barapomonae paca muxuweta xua Jesucristo
pon jiwi Pecanamataxeinaein pecui itorobixae abe painya
neexanaeyainwa.
\v 13 Bewa barapomonae beta pabarʉ cui itura jinaem peainya
cui jiwixae. Mataʉtano bewa bichocono paantobem xua
barapomonae betiya painya nepaca mataxeinaexae. Daxita pam
nantiya jʉntema jinompa pana naexande.
\p
\v 14 Patamonae pam, paca itorobatsi xua jume daunweya
pamuxuwere pomonae afaetabi xua penacuichiwa. Pajʉntʉ
coyene cui tsacabare pomonae jʉntʉ coyene junuwiya jinompa
ichamonae atene peexanaexae barapomonaetha. Mataʉtano
payawende pomonae jopa ajʉntʉcoyenesʉya jinompaeyo
Nacomtha. Bewayo payawende barapomonae xua jopa painya
neaitaconaewam.
\p
\v 15 Painya xoba ichamonaetha abe pata exaname, xua copiya
abe pia pacata exanaexae. Seicaya jame incane beta
xanepanaya daunweya pajʉjʉteibare xua nantiya painya
nenata exaneibinexa, xuano irʉ daxita jiwino.
\p
\v 16 Barabʉ tsitecaeya pajʉntʉ coyene weiweina
dubenanaebiyama.
\v 17 Daxita matacabi Nacomtha patsipaebeibare matowa.
\v 18 Daxita pocotsiwa pacata exana bequein jopa pacata
wʉnaeyo, ichitha awiya barapocotsiwan yabara Nacomtha
patsipaebeibare, pajam tsaibinde: “Nacom maisa pajʉntʉ
coyene weiweinan xua pata tana neyawenaewam poxonae bequein
painta daunwei tsaibi”, pajam tsaibinde. Poxonae baxuan
papaebame bichocono Nacom tsita xanepanatsi painya
neexanaexae pocotsiwa Nacom ichichipa Cristo Jesús pia paca
barʉ jinompaexae.
\p
\v 19 Jopa paitawetsinde Nacom pia Pejumope tʉnaxʉ tatsi
poxonae paca itoroba pocotsiwa bewa paexanaem.
\v 20 Jopa pajume itawetsinde po diwesi xua ichamonae paeba
pomonae Nacom Pejume Diwesi pepaebiwi.
\v 21 Incane pajume taema daxita po diwesin xua barapomonae
paeba icha bara metha xaniwaicha po diwesin pona Nacom weya.
Saya paitapere po coyene xua pexainyeiwa.
\v 22 Daxita po coyenein peabe coyenein panaitemare xua jopa
painya neexanaewam abe peexanae coyenein.
\p
\v 23 Bara Nacom, pon jʉntema jinompa naca exana, barabʉ
barapon paca jʉntʉ coyene ayapusʉ exanaena xua jʉpa paca
cana exanaena icha bapon ichi xua jʉntʉ coyene xanepana.
Mataʉtano barabʉ Nacom paca jʉntʉ coyene xanepana
exanaena painya nejinompaewa tsane bapon nexa xua jopa
painya nexeinaewam penatsicuentsiwa xua abe painya
neexanaexae bapontha. Barabʉ Nacom beta paca jumope
eenaena, yawano xua painya jʉntʉ coyenewa, mataʉtano xua
painya pepon xua Jesucristo nexa pon Wanacanamataxeinaein
xua beya poxonae bapon patopaetsica.
\v 24 Nacom ponxae xua paca wʉn duba pia paca exanaenexa
piamonae tatsi, bapon xainyeya pepaebin. Mataʉtano bapon
exanaena pocotsiwa xua bayatha yabara paca tsiwʉnae muxu
duta.
\s Meje yabara xua Pablo najume wetsiya paeba
\p
\v 25 Patamonae pam, painta Nacomtha wʉqueibare.
\p
\v 26 Antobeya painta jacobare daxita pomonae patamonae
pomonae Jesucristo pejume cowʉntsiwichi.
\p
\v 27 Xan paca itorobatsi tsipei Jesucristo, pon jiwi
Pecanamataxeinaein neitoroba. Paca jeichi: “Barapo carte
painta yorobare daxita pomonaetha pomonae Jesucristo pejume
cowʉntsiwichi”, paca jeichi.
\p
\v 28 Jesucristo, pon Wanacanamataxeinaein, barabʉ paca
yawena pia paca necaantobewaxae.
\p Baja Pablo, irʉ Silvano, irʉ Timoteono ponbe
necueyatabe.