\id 1PE
\h 1 SAN PEDRO
\toc1 1 San Pedro
\toc2 1 Pe
\mt1 MEJE PO CARTE COPIYA PEDRO TATINA, POMONAE JESUCRISTO
PEJUME COWɄNTSIWI TATINATSI
\c 1
\s Meje yabara poxonae Pedro tamropata pitaba xua tatina
pomonaetha pomonae Jesucristo pejume cowʉntsiwichi
\p
\v 1 Xan, Pedron, Jesucristo pia peitorobi jiwi jiwana
tatsin. Daxita barapomonae pam pacata tinatsi pomonae painya
nacua nacayayatsiya pawʉ jinompame xua ichamonae painya
nepaca yotabixae. Pomonae painya nejinompaewi pam Ponto
nacuatha, irʉrʉ pomonae painya nejinompaewi pam Galacia
nacuatha, irʉrʉ Capadocia nacuatha painya nejinompaemdʉ,
irʉrʉ Asia nacuatha painya nejinompaewi pamdʉ, irʉrʉ
Bitinia nacuatha painya nejinompaewi pamdʉ.
\v 2 Caena bayatha poxonae aena, bapoxonae Nacom paca
itapeta. Barapon Nacom, pon Waxa, paca yaputane xua pia
pexui tatsi pana naexaname. Nacom pia Pejumope tʉnaxʉ
tatsi paca exana xua bichocono pajʉntʉ coyene xanepaname
Nacomtha painya neexanaenexa pocotsiwa Nacom paca itoroba.
Poxonae Jesucristo paca tsitʉpa naetotha jana pichapabarena
painya nejume cowʉntsinexa Jesucristo pocotsiwa bapon paca
itoroba. Bapoxonae pajʉntʉ coyene xanepaname Nacomtha.
Barabʉ Nacom bichocono paca yawenaena pia paca
necaantobewaxae. Mataʉtano barabʉ barapon jʉntema jinompa
paca exana.
\s Meje yabara xua po coyeneya bewa beta jinompaetsi
Jesucristo nexa
\p
\v 3 Nacom wʉnae jaintatsi pon Jesucristo Paxa tatsi.
Jesucristo bapon pon Wanacanamataxeinaein. Nacom jeichichi:
“Nacom maisa pajʉntʉ coyene weiweinan xua pena jʉntʉ
coyenein patanecatsibiwam xua poxoru bichocono nantanuweya
pana yabara nanta xeiname. Baxua painta exaname poxonae
Jesucristo equeicha asʉ exaname petʉpae cuiru coyene
weya”, jeichichi. Jesucristo naca cana exana xua wʉnaeya
jume cowʉntsiya ewatatsi xua Nacom naca catsina
peajʉntʉyapusʉwa.
\v 4 Bara Nacom paca catsibina pocotsiwa paca jʉntana jeba
pia nacuatheicha pocotsiwa xua jopa itacʉpaetsi xua
peweraweracaewa xua mataʉta jopa abe caquiyo. Mataʉta jopa
abe tsoponaeyo xua jopa daichiyo icha pentono ichi.
\v 5 Nacom paca yapu eena pia peayapusʉwatha painya
neyabara jume cowʉntsixae bapon. Barapon Nacom paca
capanepa xua jopa painya neatenenexa xua abe painya
neexanaexae xua poxonae daxita barapo nacue weraweracaena.
\p
\v 6 Daxota pajʉntʉ coyene weiweiname, bara bequein saya
cae dapaeyobetha paca ajʉntʉcoyenerewe exana xua ichamonae
abe painya nepacata exanaexae matowa.
\v 7 Barapo painya nepaca caajʉntʉcoyenerewe exanaewan
piraichi pacata exana baxua xua pia yaputaetsi icha
xaniwaicha bara metha pajume cowʉntame Jesucristo. Po
penainto pewʉn oro nainto, jiwi ba piraichi isototha tauta
peyaputaenexa icha bara metha pepa oro nainto. Po pejume
cowʉntsiwa jiwi xeina bichocono daunwei beyacaincha oro
nainto bequein ichamonae jʉntʉ coyene jʉjʉta xua abe
peexanaenexa. Barapo oro nainto weraweraca. Barapoxonae
poxonae Jesucristo patopaetsica xua awiya beta painya nejume
cowʉnta dubenanaebiyaexae daxota Nacom wʉnae paca
jainchina. Mataʉtano paca cana exanaena xua peainya cui
jiwi pam. Mataʉtano paca cana exanaena xua jiwi paca barʉ
cui itura jinaena painya nejume cowʉntsiwixae.
\p
\v 8 Paxam paantobem Jesucristo bara bequein jopa bapon
pataem. Mataʉtano anoxuae pajume cowʉntame bequein jopa
bapon anoxuae pataem. Paxam bichocono pajʉntʉ coyene
weiweiname. Bara bequein barapo pexeinya pejʉntʉ coyene
weiweinae coyenewa bayatha payabara paebame daichitha awiya
pacata seica xua po jumetha beta payabara paebame barapo
peajʉntʉcoyenesʉwa. Daxota bichocono pajʉntʉ coyene
weiweiname tsipei pananta xeiname xua painya nexeinaewa
tsane pebarʉ cui itura jinaewa Nacom pia nacuatheicha.
\v 9 Painya nejume cowʉntsixae Jesucristo, Nacom paca
jʉntʉ coyene capanepaena xua jopa painya neatenenexa xua
abe painya neexanaexae.
\p
\v 10 Caena bayatha pomonae Nacom pia peitorobi jume
pepaebiwi yabara jejeitaponeiba nawita barapo
pecapanenebiyae diwesi, xuano yabara yainyabeiba nawita.
Barapomonae yabara paeba pecapanenebiyae diwesi, xua Nacom
paca catsibina barapo diwesi pia paca necaantobexae.
\v 11 Nacom pia Pejumope tʉnaxʉ tatsi, po jumope Cristo
weya pona, barapo jumope cueicueijei barapomonae pejʉntʉ
coyenewatha tatsi. Nacom pia Pejumope tʉnaxʉ tatsi
cueicueijei barapomonaetha, jeye: “Payabara tinare xua bexa
tsane Cristo, pon Nacom itorobina, atene tsane. Mataʉtano
bapon Cristo xeinaena pexeinya peitʉpanae coicha”, jei.
Barapomonae nayainyaba, jeye: “¿Eta bichi tsane jiwitha
poxonae baxua exanaena? ¿Yawa eta poxonae metha baxua
exanaena?” najei barapomonae.
\v 12 Ichitha Nacom, barapomonae yabara yaputane exainchi
xua po diwesi barapomonae xua Jesucristo yabara tsiwʉnae
paebatsi apara jopa barapomonae nexa. Apara jame barapo
diwesi paxam nexa. Po diwesi xua caena bayatha barapomonae
yabara paeba barapo diwesi jʉpa po diwesi xua anoxuae
ichamonae yabara paca tsipaeba. Barapo diwesi xua
pecapanenebiyae diwesi barapomonae paca tsipaeba Nacom pia
Pejumope tʉnaxʉ tatsi pia peayapusʉ itorobi coyeneyatha
tatsi po jumope itorobatsi itaboco wetsica. Barapomonae
yabara paeba barapo pecapanenebiyae diwesi po diwesi
matatsunpiwi bequein irʉ ichichipa yabara yaputane.
\s Meje yabara xua Nacom naca itoroba xua bewa xeinaetsi
pepa pejʉntʉ coyene xanepanaewa
\p
\v 13 Daxota pana najʉntʉ coyene wʉnaere Nacom nexa xua
pana najʉntʉ coyene itorobare xua barompaya painya nenanta
xeinaewatha. Ajʉntʉyapusʉya payabara jume cowʉntsiya
eware pocotsiwa Nacom paca catsibina pia paca
necaantobewaxae xua poxonae Jesucristo patopaetsica.
\v 14 Paexande icha pexui ichi xua ba exana pocotsiwa
coxiyʉn itoroba. Jopa paichichipaeinde xua abe paexaname po
coyenewa icha be paichim copiya xua abe paexaname poxonae
cataunxuae jopa payabara yaputaem Nacom.
\v 15 Seicaya pajinompare pepa painya nejʉntʉ coyene
xanepanaewatha, tsipei Nacom pon paca waba bichocono pepa
pejʉntʉ coyene xanepanaein.
\v 16 Baxua paexande poxoru Nacom Pejume Diwesitha jeye:
“Paxam daxita bichocono pajʉntʉ coyene xanepande, tsipei
bichocono tajʉntʉ coyene xanepanaein”, jei.
\p
\v 17 Nacom Waxa, pon jiwi peyabara paebin xua
penatsicuentsiwa xua abe peexanaexae, barapon Nacom jopa
nanta xeinaeyo xua ichʉn bichocono peainya cuin beyacaincha
ichʉn. Icha paxam barapo Nacomtha pajam: “Axa”, pajam,
xua pia painya nepaca yawenaenexa bapoxonae pajunuware xua
abe painya neexanaeyainwa Nacomtha. Mataʉtano barapon Nacom
bichocono paantobeinde daxita matacabin poxonae pajinompame
po irathe.
\v 18 Jesucristo paca capanepa painya abeya nejinompaewa
weya. Poxonae Jesucristo paca yantomata xua paca
capanenebiya, jopa catsiyo po penainto pewʉn oro nainto.
Mataʉtano jopa catsiyo po penainto pewʉn plata nainto.
Barapo naxobe penaintobe saya weraweraca. Barichino
payaputaneme xua Jesucristo jopa paca capanepaeyo tsipei
bara paichim xua paexaname icha painya amo susato jiwi ichi
xua barapo abeya jʉntʉ coyenewatha jinompa. Baxua paca
yawena aibi.
\v 19 Saya meisa Cristo naca yantomata abe waexanae cuiru
coyenein weya. Baxua apara xua poxonae Jesucristo naca
tsitʉpa naetotha, icha caena bayatha oveja ichichi xua
poxonae bexotsi xua tʉpa exanatsi xua Nacom peyabara
jʉntemainaenexa jiwi abe pia peexanae cuiru coyenein tatsi.
Barapo oveja pexeinya oveja xua jopa mataʉta xeinaeyo
wanyo, icha Cristo ichi xua jopa xeinaeyo peabe coyenewa
tsipei pejʉntʉ coyene xanepanaein.
\v 20 Nacom itapeta xua Cristo itapetatsi petʉpaenexa tsane
naetotha caena bayatha poxonae cataunxuae jopa forotsiyo po
cae pin nacue. Nacom paca tsita itʉta bapon Cristo barapo
petabʉ ducuae matacabitha.
\v 21 Cristo painya nepaca tsitʉpaexae naetotha xua abe
painya neexanae cuiru coyenein daxota Nacom pajume
cowʉntame. Nacom equeicha Cristo asʉ exanatsi petʉpae
cuiru coyene weya. Mataʉtano Nacom pia nacuatheicha cana
exana bapontha xua xeina pepa peainya cui coyenewa. Daxota
anoxuae pajume cowʉntame Nacom. Mataʉtano pajume
cowʉntsiya ewatame Nacomtha xua bexa Nacom paca catsina
pocotsiwa xua bayatha yabara paca tsiwʉnae muxu duta.
\p
\v 22 Anoxuae pajume cowʉntame Nacom pia pexainyei diwesi
jume xua Nacom pia Pejumope tʉnaxʉ tatsi paca tsipaeba.
Daxota paca itacʉpa xua pana najʉntʉ coyene wʉnae
exaname Nacomtha xua xaniwaicha painya neantobenexa
ichamonae pomonae irʉ pejume cowʉntsiwi Nacom. Daxota bewa
bichocono nantiya pana naantobem daxita painya nejʉntʉ
coyene daunweyatha.
\v 23 Paxam icha jʉntʉ coyene paxeiname tsipei be pena
jiwi pana naexaname, xua pajʉntʉ coyene xanepaname. Jopa
panaexanaem xua pocotsiwa peweraweracaewa werena. Anoxuae
nama panaexaname pocotsiwa xua jopa peweraweracaewiyo
werena. Ichitha pena jiwi pana naexaname painya nejume
cowʉntsixae Nacom Pejume Diwesi, po jume diwesi jopa
weraweracaeyo, xua ataya tsitecapona.
\v 24 Nacom Pejume Diwesi jeye:
\q “Naepanaewa ba tsewa tsoponae
\q yawa pentono ba othopeica.
\q Icha naepanaewa ichi jiwi ba barichi,
\q ba werapa.
\q Mataʉtano pocotsiwa jiwi exana xua bequein
\q tsita ainya cuichi ichitha weraweracaena.
\q
\v 25 Ichitha nama Nacom Pejume Diwesi ataya
\q ayapusʉ tsoponae”, jei Nacom Pejume Diwesitha.
\m Barapo diwesi apara pecapanenebiyae diwesi xua po diwesi
paca tsipaebatsi.
\c 2
\p
\v 1 Daxota daxita pana nacui barapende daxita abe peexanae
cuiru coyenein, yawano xua pemuxuitorobi coyenewan, yawano
xua naerabiya peexanae coyenewan xua naemata wʉnae
pepaebiwa, yawano xua peyabara uwi coyenewan xua ichʉn
xeina, yawano xua abe peyabara paebiwa ichamonaetha xua
ichʉn peyabara paebiwatsi.
\v 2 Pexui ba poxi anoxuaetha naexana ba jeita mito pia
apaetsi xua pewichibinexa peapaexae mito. Icha pexui ichi,
barapocotsi jʉta coyeneya paichinde. Saya ʉ meisa Nacom
Pejume Diwesi payorobare nawita xua painya nejume cowʉnta
dubenanaebiyaenexa tsane, mataʉtano xua painya nepaca
capanenebiyaenexa tsane Nacom.
\v 3 Icha paita coxoneme Nacom, painya jʉntʉ coyenetha
bara payaputaneme xua pon jiwi Pecanamataxeinaein bichocono
bara pewʉnaein.
\s Meje yabara iboto, po iboto peainya cui iboto
\p
\v 4 Jesucristo pajume cocowʉntaponde, pon jiwi
Pecanamataxeinaeinchi, pon xua ataya tsitecaeya
ajʉntʉyapusʉya pepoponaein. Barapon Jesucristo yabara
caunutatsi be pocotsi iboto xua copiya boca xua poxonae
bomʉxʉ exana. Icha jiwi ichi xua barapo iboto xuba jiwi
barichi Jesucristo pentatsi. Ichitha Nacom itapeta xua
Jesucristo itapetatsi, tsipei bapon Jesucristo Nacom tsita
ainya cuichi.
\v 5 Poxonae jiton ibo bo exana xua Nacom pin pia bo nexa,
itapeta po iboton wʉnae. Bara jʉtiya ichi Nacom itapeta
jiwi, xua pomonae piamonae tatsi cana exana pomonae pejume
cowʉntsi jiwichixaetsi. Painya coutha pana najʉntʉ coyene
doure Nacomtha beta painya netanacuichinexa icha
sacerdotemonae ichi xua najʉntʉ coyene douta Nacomtha
poxonae beta tanacuita. Poxonae baxua paexaname bara baxua
Nacom tsita xanepanatsi xua Jesucristo painya nejume
cowʉntsixae.
\v 6 Nacom Pejume Diwesitha jeye:
\q “Pajume taema, itorobarecan Jesucristo
\q Sión tomaratha tana nejume
\q cowʉntsiwi taitorobarecan.
\q Bapon itapetan xua bichocono peainya
\q cuixae, icha iboto ichi, po iboto
\q babatanota bomʉxʉ.
\q Pon Jesucristo jume cowʉntatsi bapon jopa
\q aura tsane xua bapon Jesucristo pejume
\q cowʉntsixaetsi”, jei Nacom Pejume Diwesitha.
\m
\v 7 Painya nejume cowʉntsixae bapontha, daxota
payaputaneme xua bapon bichocono asiwiya paantobem. Ichitha
pomonae jopa bapon jume cowʉntsichi barapomonae canacui
yabara jume wetatsi be pocotsi coyeneya bayatha Nacom Pejume
Diwesi paeba, xua Jesucristo yabara caunutatsi, jeye:
\q “Po iboto xua jiwi naitemata xua pomonae
\q ibo bon peacabiwi, barapo iboto
\q pecanamatawenonae ibotatsi naexana”,
\q jei Nacom Pejume Diwesi, xua Jesucristo
\q yabara caunutatsi.
\m
\v 8 Nacom Pejume Diwesitha equeicha jeye:
\q “Barapo ibotiyotha jiton taxu aʉtabatsi.
\q Mataʉtano barapo iboto, ichacuitha
\q jiton xuirapopa exainchi”,
\q jei Nacom Pejume Diwesi.
\m Jiton ba xuirapopa poxoru jopa taeyo barapo iboto. Po
iboto Nacom yabara paeba barapo iboto Jesucristo yabara
jʉtsiya canaʉtapaebatsi. Jiwi jopa beta exanaeyo poxoru
jopa jume cowʉntsiyo xua Nacom Pejume diwesitha Jesucristo
yabara paebatsi. Caena bayatha Nacom pewʉnaeya yabara cui
yaputane xua barapomonae peexanaewa tsane baxua.
\p
\v 9 Paxam Nacom painya nepaca itapetsi jiwi pam. Paxam po
sacerdotemonae pam xua pata nacuitame Nacom pon jiwi
itorobiya pia pepa Peewatsinchi. Mataʉtano paxam pomonae
Nacom patsita jʉntʉ coyene xanepaname jopa painya tsita
natsicuentsixae bapon. Mataʉtano Nacom pia pepa piamonae
tatsi pam. Nacom baxuan pacata exana pia painya yabara
netacueicueijeinexa xua pia pexeinya petsita itʉbi
coyenewan tatsi. Barapon Nacom paca waba abe painya neexanae
cuiru coyenein weya. Paca waba pia painya yabara
neyaputaenexa Nacom xua xeina pexeinya peitʉpanae coicha.
\v 10 Copiya paxam jopa Nacom piamonae tatsi pam, ichitha
anoxuae nama Nacom piamonae tatsi pam. Mataʉtano copiyatha
jiwi jopa paca yabara nantanuweya nanta xeinaeyo xua pia
paca necayawenaewa tsane. Ichitha anoxuae Nacom paca yabara
nantanuweya nanta xeina xua pia paca necayawenaewa tsane.
\s Meje yabara xua jiwi bewa beta jinompae xua Nacom
petanacuita dubenanaebiyaenexatsi
\p
\v 11 Tamonae pam, pomonae tapaca caantobe jiwichi pam.
Paxam pomonae be penanapaincha jinompaewi pam xua icha nacua
werena painya neponaewi. Daxota paca itorobatsi xua jopa
painya neexanaewa tsane pocotsiwa abe pocotsiwa xua painya
jʉntʉ coyenewatha ichichipa xua peexanaewa. Barapo abe
peexanae cuiru coyenein paca jʉntʉ coyene itoroba
bichocono xua painya neexanaenexa po coyenein abe peexanae
cuiru coyenein.
\v 12 Beta pajinompare Nacom nexa xua peitʉtha tatsi
pomonae Nacom jopa jume cowʉntsichi. Icha barapomonae abe
paca yabara paebichipa be pomonae abe painya neexanae jiwi
pam tsipae bichocono daichitha barapomonae taena xua beta
painya neexanaewa. Bapoxonae barapomonae Nacom wʉnae
jaintinchi wʉnae painya neexanaexae xua po mataqueitha
Nacom yabara paebina jiwi xua penatsicuentsiwa xua abe
peexanaexae.
\p
\v 13 Painya nejume cowʉntsixae pon jiwi pepa
Pecanamataxeinaeinchi bara paexande pocotsiwa paca itoroba
daxita pomonae pecanamataxeinaewi painya nacua. Mataʉta
paexande pocotsiwa paca itoroba pon romanomonae itorobiya
pepa peewatsinchi. Jame Nacom ichichipa xua waexanaewa
baxua.
\v 14 Paexande pocotsiwa paca itoroba pomonae nacuan
peewatsiwi pomonae xua tanacuitatsi pon romanomonae
itorobiya pepa peewatsinchi. Nacom itoroba barapomonaetha
pomonae nacua peewatsiwi xua barapomonae cuainchina
pomonaetha pomonae abe peexanaewi. Mataʉtano Nacom itoroba
barapomonaetha xua wʉnae jainchina pomonaetha pomonae beta
peexanaewi.
\v 15 Nacom ichichipa xua beta painya neexanaewa tsane
pomonaetha pomonae xua jopa Nacom yabara yaputaetsi xua
barapomonae pemoyanexa xua jopa abe painya nepaca yabara
paebinexa.
\p
\v 16 Pajinompare, icha be ichi pomonae jopa nantawenonaeyo
xua ichamonae amanaya petanacuichiwatsi. Ichitha jopa abe
paexanaeinde xua poxoru saya painya nejinompaexae. Beta
pajinompare, icha be ichi pomonae Nacom amanaya tanacuita
dubenanaebiyatsi.
\v 17 Beta payabara nanta xeinare daxita jiwi. Mataʉtano
paantobeinde ichamonae pomonae irʉ pejume cowʉntsiwi
Jesucristo. Nacom pacunuware xua abe painya nepaca
exanaeyainwa, xua abe painya neexanaexae. Pabarʉ cui itura
jinareno pon romanomonae itorobiya pepa peewatsinchi.
\s Meje yabara po coyene xua Cristo atene peexanaewatsi
\p
\v 18 Paxam pomonae amanaya painya netanacuichi jiwi pam
ichamonae barapomonae pam paca tsipaebatsi. Bewa pajume
barʉ cui jejam tsaibim tsane pomonae xua paca itorobeiba
pomonae painya nepaca canamataxeinaewi. Baxua paexande
poxonae bequein ichamonae wʉnae peexaneibiwi, mataʉtano
xua poxonae ichamonae bequein abe peexaneibiwi poxonae paca
itoroba.
\v 19 Baxua Nacom tsita wʉnaetsi xua pabarʉ cui itura
jiname barapomonae pomonae painya nepaca canamataxeinaewi
xua poxonae bequein paca cuainta barapomonae xua xaniwaicha
painya neexanaexae painya nejume cowʉntsixae Nacom.
\v 20 Icha abe paexaname xua daxota paca cuainta, baxua
Nacom jopa tsita coyene xanepanaetsi xua bequein saya
beitatemaya moya paumename poxonae paca cuainta. Ichitha
icha jame paca cuainta xua wʉnae painya neexanaexae xuano
xua icha beitatemaya moya paumename baxuan jame Nacom tsita
coyene xanepanatsi.
\v 21 Xua ichamonae atene painya nepaca caexanaexae daxota
Nacom itapeta paca waba. Ichamonae Jesucristo atene exainchi
waxainchi nexa. Jesucristo cana caunutsiya exanatsi xua
waxainchi bewa exanaetsi icha bapon ichi xua pocotsiwa
exana.
\v 22 Bapon Jesucristo bapana jopa abe exanae. Mataʉtano
bapana jopa muxuitorobi ichamonaetha.
\v 23 Poxonae ichamonae Jesucristo biatainchi jopa xuya jume
barabotsiyo Jesucristo. Poxonae Jesucristo bʉtsi, jopa
Jesucristo jeyo, “Aunxuae xuya paca cuaintinchi”, jopa
jeyo. Ichitha Jesucristo jume cowʉnta Nacom xua pocotsiwa
poxonae Nacom exanaena barapomonaetha pocotsiwa xua be
Jesucristo peyantomatsiwatsi. Tsipei Nacom xaniwaicha beta
yabara paeba jiwi, xua penatsicuentsiwa xua abe peexanaexae.
\v 24 Cristo pia pepontha yawa muxuna tʉpa abe waexanae
cuiru coyenein poxonae tʉpa naetotha. Poxonae bapon
Jesucristo nacata exana barapo coyene, waxainchi abe
waexanae cuiru coyenein weya panenebiyatsi xua jopa equeicha
waexanaewa tsane abe waexanae cuiru coyenein, yawano xua
beta jʉntʉ coyene xanepanaya jinompaeinchi Nacomtha.
Daxota Cristo wan exanatsi xua equeicha jopa abe painya
neexanaenexa tsane.
\v 25 Ichacuitha oveja itaxanuncuatsi, pipato pepoponaexae
jopa penantaʉtsixae pon peenaein ovejan. Icha oveja ichi
paxam bara pocotsi jʉta coyeneya paichim. Copiya jopa
xanepanaya painompaem, jopa painya nenantaʉtsixae
Jesucristo. Ichitha anoxuae xanepanaya pajinompame, tsipei
anoxuae Jesucristo panantaʉtame pon paca yawena. Bapon
nepaca eenaein, icha be ichi pon oveja peenaein. Yawano
bapon Cristo paca jʉntʉ coyene canamataxeina.
\c 3
\s Meje yabara xua po coyeneya bewa jinompae pomonae jitha
peenaewi
\p
\v 1 Paxam powaxi jitha painya neenaewaxi pam, paexande
pocotsiwa painya seuriwi paca itoroba. Painya pebiwi
ichacuitha jopa jume cowʉntsiyo Nacom. Painya neexanaexae
pocotsiwa painya seuriwi paca itoroba barapo painya seuriwi
jume cowʉntsina Nacom painya nepaca cui taexae bara bequein
Jesucristo jopa payabara paebim.
\v 2 Barapo painya seuriwi paca taena xua Nacom paantobem.
Yawano xua paca taena xua jʉntʉ coyene xanepanaya
painompame.
\v 3 Jopa metha meisa painya pepon pexeinyowa pana
naexanaemtsipaem, xua daxota jiwi painya nepaca yabara
paebeibiwa, xua pexeinyowaxi pam. Jopa matowa pana mata
cachetsinde xua bichocono pexeinyowa pana naexaname. Jopa
pana napepenaeinde po penaintotha pewʉn oro nainto.
Mataʉtano jopa pana nama xatabinde po paparuwan bichocono
ainya matoman xua bichocono pexeinyowaxi pana naexaname.
\v 4 Icha pexeinyowaxi ichichipa pana naexaname moya maisa
pana najʉntʉ coyene wʉnae exande. Barapo pexeinyowa
coyenewa bʉpana xeina jiwi pejʉntʉ coyenewatha. Barapo
pexeinyowa coyenewa jopa itacʉpaetsi xua peweraweracaewa.
Painya pexeinyowa coyenewa bewa payabara ita ururanaya
pajinompaem, yawano jʉntema pajinompareno. Baxuan jame
bichocono tsita coyene xanepanatsi Nacom.
\v 5 Barapo pexeinyowa coyenewa caena bayatha xeina po
yabʉxi xua bichocono pepa pejʉntʉ coyene xanepanaewaxi.
Barapo yabʉxi jume cowʉntsiya ewata Nacomtha, xua Nacom
exanaena pocotsiwa yabara tsiwʉnae muxu duta. Mataʉtano
barapo yabʉxi exana pocotsiwa piseuriwi itorobatsi.
\v 6 Petsiriwa powa pewʉn Sara bara jʉtiya ichiya exana.
Barapowa exaneiba pocotsiwa piseuri itorobeibatsi pon pewʉn
Abraham. Barapowa piseuritha jeye: “Tanecanamataxeinaem”,
jei bapowa. Paxam bara paichim tsane icha barapowa Sara ichi
icha beta paexanaename, yawano xua jopa pajunuwim, bequein
painya seurixi jopa xanepanaya paca itorobeibiyo.
\p
\v 7 Barichi pam pebiwi pam, po pebiwi painya seuriwi painya
nexeinae jiwi pam. Beta payabara cui yaputaema painya
seuriwi. Yawano painya seuriwi pabarʉ cui itura jinare
tsipei yabʉxi jopa acuicoyenesʉyo icha jopa be pebiwi
ichiyo. Pananta xeinare xua pebin piseuribe xeinabe po
peajʉntʉyapusʉwa jopa bapana weraweracae, po
peajʉntʉyapusʉwa Nacom cata piamonaetha pomonae pia
peantobewixaetsi. Baxua paexande painya seuriwitha xua
wʉnae painya neexanaewa xua Nacom bara beta painya nepaca
jume taenexa poxonae pawʉcame.
\s Meje yabara xua jiwi atene pomonae xua beta peexanaewixae
\p
\v 8 Matapainya paca tsipaebatsi nantiya beta jinompa pana
naexande. Yawano nantiya beta pana nayabara nanta xeinare
xua painya nenayawenaexaem tsane. Nantiya pana naantobeinde
painya nejume cowʉntsixae Nacom, icha be ichi poxonae
barompaya painya eweicho jiwi nantiya pana naantobem.
Pomonae jiwi peyawenae jiwi pana naexande xua painya
neantobexae barapo jiwi. Mataʉtano jopa bichocono painya
coutha pana nayabara nanta xeinaeinde. Jame maisa ichamonae
itapeta bichocono payabara nanta xeinare.
\v 9 Poxonae ichamonae abe pacata exana xuya jopa
paexanaeinde. Yawano poxonae ichamonae paca biatane jopa
xuya pabiataeinde. Seicaya nama paexande. Jame Nacomtha
patawʉcare barapomonae xua Nacom pecana exanaenexa xua
barapomonae pejʉntʉ coyene weiweinaenexa. Daxota Nacom
paca waba xua xuya pacata exana tsipei barapomonae beta
pacana exaname.
\v 10 Tsipei Nacom Pejume Diwesitha jeye:
\q “Pon xua antobe xua po coyene cataunxuae
\q pepoponaewa, xuano xua daxita matacabi
\q jʉntʉ coyene weiweina poneiba, bapon bewa
\q peebatotha jopa paebi tsane peabe jumeyo.
\q Mataʉtano peopiratotha jopa bewa paebi tsane
\q xua ichamonae naerabiya peyabara paebiwatsi.
\q
\v 11 Bewa tajʉ beya paponaem xua peabe
\q coyenewan weya.
\q Yawano saya bewa beta paexanaem.
\q Itapeta paexande pocotsiwa xua jiwi
\q jʉntema jinompa exainchi.
\q Bara ajʉntʉyapusʉya paexanaponde baxua.
\q
\v 12 Tsipei Nacom, pon jiwi Pecanamataxeinaein,
\q yawena pomonaetha pomonae pejʉntʉ
\q coyene xanepanaewi.
\q Yawano Nacom jume tane xua pewʉcaewatsi.
\q Ichitha Nacom jopa yawenaeyo pomonae abe
\q peexanaewi”, jei Nacom Pejume Diwesitha.
\p
\v 13 Dapon aibi pon itacʉpatsi xua abe pacata exana icha
saya paexaneibame pocotsiwa xua wʉnae.
\v 14 Bequein icha ichamonae pacata abe exanaena jʉntʉ
coyene xanepanaya painya nejinompaexae, daichitha Nacom paca
cana exana xua pajʉntʉ coyene weiweinaya jinompame. Jopa
ichamonae pacunuwinde, yawano jopa pacuitaya jʉntʉ
deideijande.
\v 15 Jame maisa Cristo bichocono payabara nanta xeinare
painya jʉntʉ coyenetha xua bapon bichocono ainya cui.
Pajande: “Pon jiwi Necanamataxeinaem”, pajande. Pana
najʉntʉ coyene wʉnaeteibare xua painya nejume noteibinexa
pomonae paca yainyabiya jeye: “¿Eta pocotsiwa pajume
cowʉntsiya ewatame xua Jesucristo bexa paca capanepaena?”
paca jei.
\v 16 Ichitha saya ita ururaquiya pajume noteibare, jopa
paaebeibinde. Yawano pajunuware Nacomtha xua abe painya
nepaca exanaeyainwa Nacom, abe painya neexanaexae.
Pajinompare xua painya jʉntʉ coyenewa paca tsipaeba xua
wʉnae bara paexaname. Bapoxonae icha ichamonae abe paca
yabara paeba, barapomonae aura tsane xanepanaya painya
nejume cowʉntsiya jinompaexae Cristo.
\p
\v 17 Icha Nacom ichichipa xua ichamonae atene paca exana,
beta painya neexanaexae, baxua jame wʉnae, beyacaincha xua
poxonae atene paca exana poxoru abe paexaname.
\v 18 Tsipei Cristo atene exanatsi poxonae tsitʉpa abe
waexanae cuiru coyenein daxita xua poxonae cae coyenetha
tʉpa. Cristo bapana jopa abe exanae. Ichitha bapon Cristo
naca tsitʉpa pomonae abe waexanae jiwichi. Baxua Cristo
nacata exana, xua wanaca exanaenexa xua wapatsiwa tsane
Nacom beicha. Bapon Cristo bequein tʉpa pepon ichitha
equeicha asʉ exanatsi pia pejumope tʉnaxʉ tatsi.
\v 19 Bapoxonae Jesucristo pia pejumope tʉnaxʉ tatsi pona
ichaxota jiwi pia pejumopein tatsi be cʉbathopeibatsi
pomonae xua caena bayatha werapa. Barapon Jesucristo pia
jumope tʉnaxʉ tatsi yabara cueicueijei barapo jumopeintha
xua Nacom pia pecapanenebiyae diwesi tatsi.
\v 20 Caena bayatha barapomonae jopa jume cowʉntsiyo Nacom
poxonae po mataqueitha Noé popona po irathe. Nacom
beitatemaya ewateiba barapomonae, ainya dapaein xua pejume
cowʉntsinexatsi poxonae xua cataunxuae Noé cobe naemata
xua pin jera nae exana. Ichitha saya ocho poyobe jiwi
panenebiya poxonae bichocono awʉbo xua butuxuba po cae pin
nacue.
\v 21 Barapo awʉbo caunuta xua be naca bautisaba. Poxonae
naca bautisaba apara jopa wanaca perʉ iquicaenexa tsane xua
tsoreichi, apara jame daxota naca bautisaba Nacom, wanaca
capanepaexae abe waexanae cuiru coyenein weya. Yawano Nacom
wʉcatsi xua wanaca jʉntʉ coyene xanepana exanaewa tsane.
Bapoxonae wajʉntʉ coyene naca tsipaeba xua bara beta
exanatsi. Waxainchi naca itacʉpa xua wanaca bautisabiwa
tsipei Jesucristo equeicha asʉ exanatsi petʉpae cuiru
coyene weya.
\v 22 Jesucristo peitaboco beicha pona. Bapon Jesucristo eca
Nacomtha, xua Nacom pia pecoxa weya tatsi. Matatsunpiwi,
irʉrʉ pomonae itoroba itabocotha barapomonae exana
pocotsiwa Jesucristo itoroba.
\c 4
\s Meje yabara xua jiwi bewa beta tanacuichi Nacom icha be
po coyeneya Nacom cata jiwi barompaya pia peexanae coyenewan
tatsi
\p
\v 1 Yaitama copiya Cristo atene exanatsi ichamonae,
waxainchi daxota bewa nanta xeinaetsi xua irʉ naca atene
exanaena ichamonae. Pon atene exanatsi ichamonae bapon abe
pia peexanae cuiru coyenein wepu pona xua bichocono pejume
cowʉntsixae Jesucristo.
\v 2 Paxam jopa bewa paexanaem pocotsiwa xua paichichipame
xua abe painya neexanaewa poxonae cataunxuae pajinompame.
Ichitha cataunxuae paexanaponde pocotsiwa Nacom ichichipa
poxonae cataunxuae pajinompame barapo cae pin nacuathe.
\v 3 Caena bayatha paexaname pocotsiwa xua ichamonae exana
pomonae jopa yaputaeyo Nacom. Barapomonae abe exaneiba xua
nasi cui exana icha yabʉxitha xua jopa piseuriwi. Yawano
exaneiba xua pocotsiwa abe yabara nanta xeina pejʉntʉ
coyeneintha. Yawano nacʉpa exaneiba peatsaxae meran. Yawano
pin penabanaewan exaneiba po penabanaewantha jiwi weiweinaya
abe exana xua napenajʉba yawa bichocono cʉpatsi. Yawano
ibo nacomʉn wʉnae jainteibatsi.
\v 4 Pomonae jopa yaputaeyo Nacom, barapomonae paca cui
yabara nanta xeina, jeye: “¿Eta xua metha jopa naca barʉ
exanaeyo xua waxainchi abe exanatsi?” najei barapomonae.
Barapomonae paca cui capana yawa daxota abe paca yabara
paeba.
\v 5 Payabara nanta xeinare pomonae abe exana. Barapomonae
bewa yabara caununaya jume notsina Nacomtha pocotsiwa xua
abe exana. Nacom yabara paebina pomonaetha pomonae xua
cataunxuae jinompa yawa pomonaetha pomonae bayatha werapa
xua penatsicuentsiwa xua abe peexanaexae.
\v 6 Daxota Nacom Pejume Diwesi bayatha cueicueijei
pomonaetha pomonae bequein bayatha werapa xua barapo
pewerapae jiwi pejumope tʉnaxʉn pejinompaenexa tsane icha
Nacom ichi xua popona. Bayatha Nacom yabara paeba
barapomonae xua penatsicuentsiwa xua abe peexanaexae barapo
cae pin nacuathe xua daxota pia pepon tatsi werapa icha
daxita jiwi ichouneibi.
\p
\v 7 Bara nama imoxoyo po dapaetha poxonae Nacom daxita
weraweraca exanaena barapo cae pin nacue. Daxota painya
coutha pana najʉntʉ coyene itorobare xua xanepanaya
paexaname Nacomtha beta painya wʉcaenexa tsane.
\v 8 Pocotsiwa xua ainya cui xua jame bewa bichocono nantiya
pana naantobeinde. Poxonae ichʉn paantobem, pajʉntemainame
poxonae bequein xua bapon abe pacata exana.
\v 9 Paxam nantiya pana nantenta weyataeya wabeibare painya
boxitha xua painya nenaapateibinexa tsane, xua jopa pana
naita aenae-aenande.
\v 10 Daxita barompaya paxam Nacom paca cana exana xua
painya nexeinaewa barompaya painya neexanae coyenewan. Paxam
nantiya pana nayawende barapo cui coyenetha, bapoxonae paxam
pomonae beta painya neexanae jiwi pam tsane pocotsi
coyenewatha xua Nacom paca cana exana.
\v 11 Icha ichʉn cueicueijei, bʉ bara cueicueijei
pocotsiwa Nacom cueicueijei exana bapon. Icha pebin yawena
xua ichʉn yawenatsi bʉ bara barapo pebin yawena ichʉntha
po peayapusʉwatha xua Nacom cata. Daxita pocotsiwan xua
paexaname bara beta paexande xua jiwi wʉnae pejainchinexa
Nacom xua beta painya neexanaexae xua Jesucristo
peyabaraxae. Bʉ bara Jesucristo ataya xeinaena peainya cui
coyenewa, yawano xeinaena xua peayapusʉ itorobi coyenewa.
Je bara ichi tsane.
\s Meje yabara po coyeneya xua bewa exanaetsi wajume
cowʉntsixae Cristo xua poxonae bequein ichamonae atene naca
exana
\p
\v 12 Tamonae pam painya tapaca caantobetsi jiwichi pam irʉ
painya nejume cowʉntsixae Jesucristo. Jopa yabara pana
nabenaecaeinde poxonae bichocono atene paca cana exana
ichamonae painya nejume cowʉntsixae Jesucristo. Jopa
pananta xeinaeinde xua baxua pocotsiwa jopa bewa pacata
exanae tsane.
\v 13 Jame seicaya pajʉntʉ coyene weiweinare xua painya
nepaca itacʉpaewa xua ichamonae atene paca exana icha
Cristo ichichi xua atene exanatsi. Yawano bexa pajʉntʉ
coyene weiweinaename poxonae Jesucristo yawa patopaetsica
pia peainya cui coyenewa.
\v 14 Icha ichamonae paca muxucona painya nejume
cowʉntsixae Cristo saya pajʉntʉ coyene weiweinare, tsipei
Nacom pia Pejumope tʉnaxʉ tatsi, po jumope pexeinya
peitʉpanae coicha yawa popona, barapo pejumope paca yawa
popona.
\v 15 Jopa bewa paexanaem tsane xua ichamonae pajutebame xua
daxota ichamonae paca atene exana. Mataʉtano jopa bewa
paexanaem tsane xua ichamonae piawan tatsi pacaibame xua
daxota ichamonae paca atene exana. Mataʉtano jopa bewa
paexanaem tsane xua ichamonae pajʉntʉ coyene anaepana
exaname xua daxota ichamonae paca atene exana. Mataʉtano
jopa bewa paexanaem tsane xua ichʉn pajʉntʉ coyene
itorobame xua abe peexanaewa tsane xua daxota ichamonae
atene paca exana.
\v 16 Icha ichʉn atene exanatsi ichamonae, pejume
cowʉntsixae Jesucristo jopa bewa bapon aura tsane. Ichitha
jame bapon bewa wʉnae jainchina Nacom tsipei atene exanatsi
pejume cowʉntsixae Jesucristo.
\p
\v 17 Po matacabitha aena Nacom tamropata pitaba xua Nacom
yabara paebina daxita jiwi xua penatsicuentsiwa xua abe
peexanaexae, apara barapo matacabi bayatha patopa. Barapo
matacabitha Jesucristo piamonae tatsi umenaena Nacom
peitabaratha xua Nacom peyabara paebinexa tsane xua
penatsicuentsiwa xua barapomonae abe peexanaexae. Yaitama
Nacom baxua nacata exana nama yatsicaya jopa Nacom juniya
exanaeyo pomonaetha pomonae jopa pejume cowʉntsiwi Nacom
pia pecapanenebiyae diwesi tatsi.
\v 18 Daunwei nawita pon capanepatsi abe pia peexanae cuiru
coyenein weya pon wʉnae peexanaein. Ichitha nama bichocono
tadaunweichi xua pon capanepatsi abe pia peexanae cuiru
coyene weya pon bichocono abe peexanaein.
\v 19 Poxonae ichamonae paca atene exana, bara awiya beta
paexande icha bara baraxua xua pocotsiwa Nacom cuita
jichipa. Bewa pajume barʉ jejam tsane Nacom xua paexaname
bara bequein paayapube taetham. Nacom paca necaforotsixae
yawa peexanaexae xua pocotsiwa yabara paca tsiwʉnae muxu
dubeiba xua exana paebeiba, daxota Nacom pia coya
canamataxeina painya jʉntʉ coyene.
\c 5
\s Meje yabara xua Pedro muxuweta pomonaetha pomonae pejume
cowʉntsi jiwi
\p
\v 1 Ichichipan xua tamuxu wetsiwa penapatae jiwi pomonae
paxam jiwana pam pomonae painya nejume cowʉntsi jiwi pam.
Xan irʉ bichocono penapataein icha barapomonae ichi. Xan
natan poxonae Cristo naetotha tʉparucua exanatsi. Xan irʉ
yawa xeinaein po peainya cui coyenewa Cristo xeina poxonae
patopaetsica.
\v 2 Beta pa-eenare pomonaetha xua Nacom paca cana exana xua
pamatacaponame, icha pon oveja peyapu eenaein ichi xua beta
yapu eena ovejamonae. Jopa meisa baxua paexanaeinde xua
poxoru Nacom pia paca necaitorobixae. Jame maisa baxua
paexande xua poxoru painya coutha painya neichichipaexae.
Baxua jame Nacom ichichipa. Mataʉtano jopa baxua
paexanaeinde xua poxoru paratixi painya neichichipaexae,
ichitha poxoru Nacom painya neantobexae bichocono.
\v 3 Jopa atsaquiya pamatacaponaeinde pomonae xua
pamatacaponame. Jame saya maisa beta pamatacaponde xua
painya necacui taenexa xua bara jʉta ichiya peexanaenexa.
\v 4 Nexata poxonae patopaetsica pon jiwi itorobiya pepa
Peewatsin, bapon Jesucristo paca catsina po pematomatsiwa
peainya cui coyenewa, po peainya cui coyenewa xua bapana
jopa weraweracaeyo.
\p
\v 5 Barichi pomonae pewowi jiwi pam, bewa paexanaem
pocotsiwa xua penapatae jiwi paca itoroba. Daxita paxam bewa
nantiya pana naantobem, yawa bewa nantiya pana nayabara ita
ururanaya jinompaem. Baxua paexande tsipei Nacom Pejume
Diwesitha jeye:
\q “Nacom aichaxaibi pomonae peaebiwi ichamonaetha.
\q Ichitha Nacom yawena xua peantobexae pomonae
\q barʉ ita ururanaya jina ichamonae”, jei.
\m
\v 6 Daxota papende po coyene xua paaebame ichamonae.
Paexande pocotsiwa xua Nacom pecobetha paca ita cowai pia
peayapusʉ itorobiwatha xua Nacom ainya cui paca
necaexanaenexa tsane poxonae Jesucristo equeicha
patopaetsica.
\v 7 Bara pacopare xua Nacom bara daxita paca wepichina
daxitan po coyenein xua jʉntʉ coyene natsepa paca cana
exana tsipei Nacom paca yabara nanta xeina nawita xua painya
nepaca cayawenaewa tsane.
\p
\v 8 Painya coutha pana najʉntʉ coyene itorobare xua beta
pajinompare. Tsaca pajinompare poxoru caurimonae pia
pentacaponaein tatsi ichichipa paca abe exana. Bapon pacata
exana icha neʉthʉ ichi xua ba piyain fiba poxonae jeita
ducuanaeta pon ichichipa bexaena.
\v 9 Dota pam panaitemare bapon xua beta painya nejume
cowʉntsiwatha. Pananta xeinare xua daxita nacuanpiwi jiwana
pomonae pejume cowʉntsiwi Jesucristo barapomonae atene
exanatsi icha paca ichi.
\v 10 Ichitha bexa tsane xua caeto poxonae paca atene
exanaena ichamonae, bapoxonae Nacom paca jʉntʉ coyene
xanepana exanaena. Yawano Nacom paca exanaena xua beta
painya nejume cowʉntsiwa tsane. Yawano paca exanaenano xua
bichocono painya neajʉntʉcoyenesʉwam tsane. Barapon Nacom
painya nepaca antobexae paca waba pia paca catichi po
peainya cui coyenewa xua ataya tsiteca xua Jesucristo xeina.
\v 11 Bʉ bara Jesucristo ataya xeinaena peainya cui
coyenewa, yawano xua peayapusʉ itorobi coyenewa. Je bara
ichi tsane.
\s Meje yabara poxonae Pedro najume wetsiya paeba
\p
\v 12 Pon pewʉn Silvano, pon be tayapin tatsicotaein
irʉrʉ pejume cowʉntsixae Jesucristo, bapon cobe itoroban
xua inta tina barapo peya cartiyo xua bapoxonae tapacata
itorobinexatsi xua tapaca muxuwetsinexatsi. Barapo cartatha
paca jʉntʉ coyene tsacaba exanatsi xua Nacom xaniwaicha
painya nepaca cayawenaewa tsane painya nepaca caantobexae.
Daxota baxua awiya pajume cowʉntsiya jinompare.
\p
\v 13 Pomonae Babilonia tomaratha jinompa pomonae Nacom
pejume cowʉntsiwichi, barapomonae paca jacoba. Barapomonae
pomonae Babilonia tomarapiwi Nacom itapeta icha paca ichi
xua paca itapeta. Irʉ Marcos paca jacoba be pon taxanto
tatsicotaein tsipei yawenan xua pejume cowʉntsiwa
Jesucristo.
\v 14 Paxam nantiya pana najacobare painya nenaantobexae.
\p Paxam pomonae Cristo piamonae tatsi pam barapomonae pam
bara Nacom jʉntema jinompa paca exana. Je bara ichi tsane.
\p Baja Pedro.