\id 2JN
\h 2 SAN JUAN
\toc1 2 San Juan
\toc2 2 Jn
\mt1 MEJE PO CARTE JUAN EPATOTHA TATINA, POMONAE JESUCRISTO
PEJUME COWɄNTSIWI TATINATSI. BARAPO CARTE EPATOWA CARTA.
\c 1
\s Meje xua pexainyei diwesi yabara, yawano peantobe diwesi
yabara
\p
\v 1 Xan Juan, pon bayatha pitirin naexanan, pacata tinatsi
barapo carte pomonae pam pomonae panacaetutame Nacom painya
nejume cowʉntsixaem. Nacom paca itapeta painya paca
exanaenexa piamonae. Irʉ tatinan pomonae paca barʉ
nacaetuta pomonae be painya pexui natsicotane. Xaniwaicha
betiya paca antobetsi painya neyaputaexae pexainyeiwa.
Mataʉtano ichamonae paca antobe pomonae yaputane pexainyei
jumein.
\v 2 Xan bichocono paca antobetsi poxoru painya nejume
cowʉntsixae Nacom pia pexainyei diwesi tatsi. Barapo
pexainyei diwesi wajʉntʉ coyenewantha cajinompeibatsi
anoxuae, mataʉtano xua ataya tsane.
\v 3 Cajinompatsi Nacom pia pexainyei coyenewa tatsi pia
peantobe coyenewa tatsino. Daxota Nacom Waxa irʉ Jesucristo
Wanacanamataxeinaein pon Nacom Pexanto tatsi baponbe naca
yawenabe. Baponbe naca yawenaena, mataʉtano amanayiya
baponbe naca yabara nantanuweya nanta xeinaena pia wanaca
yawenaenexa. Mataʉtano baponbe jʉntema jinompa naca
exanaena.
\p
\v 4 Jʉntʉ coyene weiweinan tsipei painyamonae jiwana cui
tan, xua beta pejinompaewa. Barapo painyamonae exana po
coyenewa xua pexainyei coyenewa, icha be pocotsi coyeneya
xua Nacom Waxa naca cui itoroba.
\v 5 Paxam, irʉ painya nejume cowʉntsixae Nacom, paca
tsipaebatsi bewa waxainchi nantiya naantobe tsainchi. Po
peitorobi coyenewa pacata tinatsi jopa pena peitorobi
coyenewiyo. Barapo peitorobi coyenewa copiya xeinatsi
poxonae aena jume cowʉntatsi.
\v 6 Icha waxainchi Nacom antobetsi, barapoxonae bewa jume
cowʉntsiya jinompaeinchi icha be pocotsi coyeneya Nacom
naca itoroba pia peitorobi diwesi jumetha. Barapo peitorobi
diwesi jume pajume taneme poxonae aena pajume cowʉntame.
Barapo peitorobi diwesi jume naca jeye: “Nantiya pana
naantobeinde”, jei.
\s Meje yabara pomonae jiwi pemuxujainyabi jiwi
\p
\v 7 Po cae pin nacuathe jiwi ayei jinompa, pomonae jiwi
pemuxujainyabi jiwi. Barapomonae jeye: “Nacom jopa
itorobiyo Pexanto barapo cae pin nacuathe, pon pewʉn
Jesucristo xua pepa jiton naexana”, jei barapomonae.
Pomonae xua bapocotsiwa paeba, bapomonae apara pomonae jiwi
pemuxujainyabi jiwi yawa bapomonae Cristo abe peyabara
paebiwichi.
\v 8 Dota pam bʉ caurimonae paca jʉntʉ coyene jʉjʉta,
abe painya neexanaewa tsane, xua daxota Nacom painya nepaca
catsinexa pentoma xua abe painya neexanaexae. Maisa jame
beta xanepanaya paexande, xua Nacom painya nepaca catsinexa
daxita barapo pentoma xua beta painya neexanaexae.
\p
\v 9 Pon xua equeicha ichichipa icha coyenewa xua
pecuidubiwa beyacaincha xua Cristo pia pecuidubi coyenewa
tatsi, bapon jopa nantaʉtsiyo Nacom xua be Paxa. Ichitha
jame pon exana ducuanaebiya pocotsiwa xua Jesucristo pia
pecuidubi coyenewatha paeba, bapon jame nantaʉta Nacom be
Paxa, mataʉtano nantaʉta Jesucristo pon Nacom Pexanto
tatsi.
\v 10 Icha ichʉn paca siwa pona pia nepaca cuidubinexa icha
coyenewa xua pecuidubiwa xua Nacom yabara, po pecuidubi
coyenewa xua jopa Jesús pia pecuidubi coyenewa tatsi
bapoxonae bapon jopa matenta weiweinaya pajacobinde painya
bo berena.
\v 11 Tsipei pon matenta weiweinaya waba pontha pon
pecuidubinexatsi icha pecuidubi coyenewatha, bapon apara
irʉrʉ abe exanarʉ icha be bapon ichi pon ichʉn pon pia
botha petapatopaexaetsi.
\s Meje yabara poxonae xua Juan opi wetaba po carte
\p
\v 12 Ainya diwesin bequein cataunxuae xeinan xua tapaca
camuxu tsipaebiwa tsainchi, ichitha jopa beyabara tinaeinyo
paperatha barapo diwesin. Daichitha ewatan xua tapaca
cataewa tsainchi bexa, mataʉtano xua tapaca catsipaebiwa
tsainchi. Bapoxonae wajʉntʉ coyene weiweinaenexa tsainchi
bichocono.
\p
\v 13 Pomonae irʉ Nacom pejume cowʉntsiwi icha paxam
paichim, pomonae irʉ Nacom itapeta, barapomonae paca
jacoba.
\p Baja Juan.