\id MAT - Nopala (Chatino) NT [cya] - Mexico 2013 (web 2014)
\h MATEO
\toc1 Mateo
\toc2 Mateo
\toc3 Mt
\mt1 Mateo
\c 1
\s Ta nten ꞌin Jesucristo
\p
\v 1 Nde nguinu scua nii ta nten ꞌin Jesucristo, sñeꞌ ta nten ꞌin Davi, cuiꞌ sñeꞌ ta nten ꞌin Abraham.
\v 2 Abraham ncua sti Isaac, Isaac ncua sti Jacob, Jacob ncua sti Judá loꞌo nchgaa la ñaꞌan taꞌa ngula yu.
\v 3 Yu Judá canꞌ ncua sti Fares loꞌo Zara, loꞌ jyiꞌan chcuaa yu canꞌ ncua naan Tamar, loꞌ Fares ncua sti Esrom, Esrom ncua sti Aram.
\v 4 Aram canꞌ ncua sti Aminadab, Aminadab ncua sti Naasón, Naasón ncua sti Salmón.
\v 5 Yu Salmón ncua sti Booz, loꞌ jyiꞌan canꞌ ncua naan Rahab, Booz ncua sti Obed, loꞌ jyiꞌan canꞌ ncua naan Rut, Obed ncua sti Isaí.
\v 6 Isaí ncua sti yu nu ncua ree Davi, ree Davi canꞌ ncua sti Salomón, loꞌ jyiꞌan canꞌ ncua cuilyiꞌo yu Uría.
\v 7 Salomón ncua sti Roboam, Roboam ncua sti Abía, Abía ncua sti Asa.
\v 8 Yu Asa ncua sti Josafat, Josafat canꞌ ncua sti Joram, Joram ncua sti Uzía.
\v 9 Uzía ncua sti Jotam, Jotam s ncua sti Acaz, Acaz ncua sti Ezequía.
\v 10 Ezequía ncua sti Manasés, Manasés canꞌ ncua sti Amón, Amón ncua sti Josía.
\v 11 Yu Josía ncua sti Jeconía loꞌo taꞌa ngula yu, cuiꞌ Babilonia ncua cuneꞌ yu xa yaa neꞌ Israel preso.
\v 12 Chonꞌ ndeꞌen xa nguila neꞌ yaa neꞌ Babilonia ncua cuneꞌ Salatiel, cuiꞌ sñeꞌ Jeconía, yu Salatiel ncua sti Zorobabel,
\v 13 Zorobabel ncua sti Abiud, Abiud ncua sti Eliaquim, Eliaquim ncua sti Azor.
\v 14 Yu Azor ncua sti Sadoc, Sadoc ncua sti Aquim, Aquim ncua sti Eliud.
\v 15 Yu Eliud ncua sti Eleazar, Eleazar ncua sti Matán, Matán ncua sti Jacob.
\v 16 Jacob ncua sti yu See, cuiꞌ nu ncua cuilyiꞌo María nu ncua jyiꞌan Jesús, ñi nu lca Cristo.
\v 17 Cuañaꞌan yatoꞌo yton tsa tilcua ta nten, tiꞌ chendyu nu mdiꞌin yu Abraham hasta chendyu nu mdiꞌin yu Davi, ticuiꞌ cuañaꞌan yton cha tilcua ta nten, tiꞌ chendyu ꞌin Davi tsayaꞌ nguila neꞌ Israel yaa neꞌ preso seꞌen lca Babilonia, ticuiꞌ cuañaꞌan yton cha tilcua ta nten, tiꞌ xa nguila neꞌ yaa neꞌ Babilonia tsayaꞌ mdiyaan Cristo chendyu.
\s Xa ngula Jesucristo
\p
\v 18 Ndeñaꞌan yatoꞌo xa ngula Jesucristo: Ncua cuiyaꞌ chaꞌ siꞌyana yu See ntsuꞌhui chaꞌ ca cuilyiꞌo ꞌin María, jyiꞌan Jesús, una tiꞌ lyijyi chcuan yu cunta ꞌin María, xa cuaꞌ mxilyo ñaꞌan siꞌya chaꞌ cuiyaꞌ ꞌin Espíritu nu Luhui ꞌin Ndiose.
\v 19 Una yu See canꞌ tsuꞌhue nten lca yu, a ncua tiꞌ yu xicune yu chaꞌ canꞌ, loꞌ ncua lca tiquee yu siꞌyana cunan ti siꞌyu coꞌ yu chaꞌ canꞌ.
\v 20 Cuiꞌ chaꞌ canꞌ ntsuꞌhui tiquee yu, xa nguloꞌo tloo sca angujle ꞌin Ñi Xꞌnan na ꞌin yu niꞌ cula, loꞌ juin ꞌin yu: See, sñeꞌ ta nten ꞌin Davi, a cutsen chcuan cunta ꞌin María nu ca cuilyiꞌo, siꞌyana cuhuiꞌ nu ndon loꞌo cua, siꞌya chaꞌ cuiyaꞌ ꞌin Espíritu nu Luhui ꞌin Ndiose ca lca cuhuiꞌ.
\v 21 Cuhuiꞌ nu tyiꞌin cua ca naan cuhuiꞌ Jesús, siꞌyana culo laa ñi quichen ꞌin ñi siꞌya quiꞌya nducui neꞌ.
\v 22 Nchgaa chaꞌ re yatoꞌo na, siꞌyana chcua chaꞌ nu mxiycuiꞌ Ñi Xꞌnan na ꞌin yu Isaía xa juin yu:
\v 23 —Ñaꞌan jan ñii, ntsuꞌhui chaꞌ xilyo ñaꞌan sca neꞌ cunaꞌan tsa suhue ti loꞌ tyiꞌin sñeꞌ neꞌ, loꞌ ca naan canꞌ Emanuel—. Chaꞌ re nchca tiꞌ chcuiꞌ, Ndiose ndiꞌin ñi loꞌo na.
\v 24 Xa mjyin xaa tiꞌ yu See canꞌ, mducua yu tñan tsañaꞌan ycuiꞌ angujle ꞌin Ñi Xꞌnan na loꞌo yu, loꞌ mchcuan yu cunta ꞌin María.
\v 25 Una la cuaꞌ mdiyaan cuhuiꞌ chendyu xacanꞌ mꞌni caꞌan yu ꞌin nten ꞌin yu, loꞌ mdiꞌin tyaa yu nii cuhuiꞌ ca naan cuhuiꞌ Jesús, nde sñeꞌ neꞌ nu culoo.
\c 2
\s Xa ya naꞌan yu mago ꞌin Jesús
\p
\v 1 Xa nu ncua cuneꞌ Jesús quichen Belén seꞌen lyiꞌya loo Judea, cuiꞌ xa nu lca yu Herode ree, xacanꞌ mdiyaa tucua snan yu mago quichen Jerusalén nu mdoꞌo tijyoꞌ, luhuaꞌ seꞌen nchcua cucha,
\v 2 loꞌ mñichaꞌ yu: ¿La ndiꞌin yu nu lca ree ꞌin neꞌ judio, yu nu ngula canꞌ? Siꞌyana cuaꞌ naꞌan hua mdoꞌo tucua sca cuii, loꞌ nchcuiꞌ na chaꞌ ꞌin yu, ljyaan hua siꞌyana cuꞌni tnu hua ꞌin yu.
\v 3 Xa ynan yu ree Herode chaꞌ re, msuꞌhua yu chaꞌ tiquee yu, loꞌ cuiꞌ cuañaꞌan quichen Jerusalén.
\v 4 Mꞌni yu chaꞌ nguioꞌ tiꞌin nchgaa nu ntsuꞌhui cunta chaꞌ ꞌin laa, tsatlyu loꞌo neꞌ escriba nu ndiꞌin quichen canꞌ, loꞌ mñichaꞌ yu ꞌin neꞌ chaꞌ la ca ntsuꞌhui chaꞌ cula ñi nu lca Cristo.
\v 5 Mxcuen neꞌ ꞌin yu: Cuiꞌ quichen Belén seꞌen lyiꞌya loo Judea, siꞌyana ndeñaꞌan nguinu scua chaꞌ nu mxiycuiꞌ Ndiose ꞌin nguso ꞌin ñi cuaꞌ sꞌni:
\v 6 —Nuꞌhuin Belén, cuiꞌ quichen nu mꞌni caꞌan ꞌin Judá, a lca um nu chinꞌ la chaꞌ ꞌin lja nu ndon loo lati seꞌen lyiꞌya loo Judea, siꞌyana loo nuꞌhuin ntsuꞌhui chaꞌ tyiꞌo sca nu culo ca tñan, nu chuꞌhui cunta ꞌin quichen ꞌñan nu lca Israel—.
\v 7 Xacanꞌ yu Herode msiꞌya cunan ti yu ꞌin yu mago canꞌ, loꞌ mñichaꞌ lyicua yu ꞌin, chaꞌ tiꞌ ñi xaa mdoꞌo tucua cuii canꞌ,
\v 8 xacanꞌ nguaꞌan tñan yu ꞌin tsaa quichen Belén, loꞌ juin yu: Yaa um, loꞌ cunan tsuꞌhue um suun ñaꞌan ndiꞌin chaꞌ ꞌin cuhuiꞌ canꞌ, xa quija lyoo um ꞌin cuhuiꞌ, xitucui um loꞌ quitsaꞌ um ꞌñan, siꞌyana loꞌon nanꞌ tsa yꞌnin tnun ꞌin cuhuiꞌ.
\v 9 Xa mdyi ycuiꞌ ree canꞌ loꞌo yu, mdoꞌo yu nguiaa yu, loꞌ yuhue ꞌa tiꞌ yu siꞌyana xiyaꞌ mdoꞌo tucua cuii nu cuaꞌ naꞌan yu, luhuaꞌ seꞌen nchcua cucha, loꞌ mducua loo na loo yu tsayaꞌ mdiyaa na chcua seꞌen ndiꞌin cuhuiꞌ canꞌ, loꞌ canꞌ ycanꞌ tucui na.
\v 10 Ndyijyin yaꞌ tsuꞌhue ntsuꞌhui tiquee yu xa naꞌan yu ꞌin na.
\v 11 Xa yten yu ñaꞌan canꞌ, naꞌan yu ꞌin cuhuiꞌ canꞌ loꞌo María jyiꞌan cuhuiꞌ, mdyiꞌya xtyinꞌ yu loꞌ mꞌni tnu yu ꞌin cuhuiꞌ, msla yu seꞌen ntsuꞌhui chaꞌ tsuꞌhue nu ljyan loꞌo yu, loꞌ mdaa yu na oro ꞌin cuhuiꞌ, loꞌo na xityiꞌi nu ndiquin tucua neꞌ tloo Ndiose, loꞌo mirra.
\v 12 Yatoꞌo jui nu mtsaꞌ ꞌin yu niꞌ cula, siꞌyana a xitucui ꞌa yu seꞌen ndiꞌin yu Herode, canꞌ chaꞌ xca tucueen mxitucui yu nde quichen tyi yu.
\s Xa yjui neꞌ cuhuiꞌ quichen Belén
\p
\v 13 Xa cuaꞌ nguiaa yu mago canꞌ, sca angujle ꞌin Ñi Xꞌnan na nguloꞌo tloo ꞌin yu See canꞌ niꞌ cula, loꞌ juin ꞌin yu: Ndla ti cuꞌni, loꞌ tsa loꞌo ꞌin cuhuiꞌ cua loꞌo jyiꞌan cuhuiꞌ seꞌen lca Egipto, canꞌ tyiꞌin um la xa nu nanꞌ quitsanꞌ ꞌin, siꞌyana yu Herode nan yu ñaꞌan nu cujui yu ꞌin cuhuiꞌ.
\v 14 Cuiꞌ xaa mdyiꞌo sla yu, loꞌ ticuiꞌ tla canꞌ mdoꞌo yu nguiaa yu loꞌo cuhuiꞌ canꞌ loꞌo jyiꞌan cuhuiꞌ seꞌen lca Egipto.
\v 15 Canꞌ ndiꞌin yu xa ngujui yu Herode, yatoꞌo chaꞌ re siꞌyana chcua chaꞌ nu mxiycuiꞌ Ñi Xꞌnan na ꞌin nguso ꞌin ñi cuaꞌ sꞌni, loꞌ nchcuiꞌ na: —Seꞌen lca Egipto msiꞌyan ꞌin Sñenꞌ—.
\v 16 Loꞌ yatoꞌo lyee ꞌa ycuen tiqueꞌ yu Herode, xa ngujlyo tiꞌ yu siꞌyana nguñilyiꞌo yu mago ꞌin yu, ngulo yu tñan siꞌyana caja nchgaa cuhuiꞌ nu ndiꞌin quichen Belén loꞌo chcua tyiꞌiin tsoꞌ, tsalca cuhuiꞌ nu ndiyaa tucua yjan, tsañaꞌan cunta nu ngulo yu loꞌo suun nu mdaa yu mago canꞌ.
\v 17 Cuañaꞌan mducua chaꞌ nu mxiycuiꞌ Ndiose ꞌin yu ncua naan Jeremía xa juin yu:
\v 18 —Ngune msiꞌya yja cueen neꞌ quichen Ramá, nguinan neꞌ, tiꞌi ngaꞌan ꞌin Raquel siꞌya sñeꞌ, loꞌ a ncua lca tiquee caja nu tyaa chaꞌ tnu tiquee ꞌin siꞌyana ngujui sñeꞌ—.
\v 19 Xa cuaꞌ ngujui yu Herode canꞌ, nguloꞌo tloo sca angujle ꞌin Ñi Xꞌnan na ꞌin yu See canꞌ niꞌ cula, seꞌen ndiꞌin yu quichen Egipto,
\v 20 loꞌ juin ꞌin yu: Tyaa juesa xitucui seꞌen lca Israel loꞌo cuhuiꞌ cua loꞌo jyiꞌan cuhuiꞌ, siꞌyana cuaꞌ ngujui yu nu ncua tiꞌ cujui ꞌin cuhuiꞌ.
\v 21 Xacanꞌ mxitucui jun loꞌo cuhuiꞌ canꞌ, loꞌ nguila jun seꞌen lca Israel.
\v 22 Xa ynan yu chaꞌ siꞌyana yu Arquelao ndlo yu tñan seꞌen lyiꞌya loo Judea, tñan loo Herode sti yu, ytsen yu quila yu canꞌ, una jui nu mtsaꞌ ꞌin yu niꞌ cula, canꞌ chaꞌ mdoꞌo yu nguiaa yu seꞌen lyiꞌya loo Galilea.
\v 23 Mdiya tiꞌin jun quichen Nazaret, cuañaꞌan mducua chaꞌ nu ycuiꞌ nchgaa yu nu mxiycuiꞌ Ndiose ꞌin cuaꞌ sꞌni, ñaꞌan ca siꞌyana ca naan ñi Nazareno.

\c 3
\s Chaꞌ ꞌin Xuhua mducua tya ꞌin nten
\p
\v 1 Ya tucua tsaan, yu Xuhua nu mducua tya ꞌin nten, mdyisnan ycuiꞌ yu chaꞌ tsuꞌhue ꞌin Ndiose sca seꞌen ngutyi, cuiꞌ seꞌen lyiꞌya loo Judea,
\v 2 loꞌ nchcuiꞌ yu: Xiloꞌo chonꞌ um quiꞌya nguiꞌni um, siꞌyana cuaꞌ mdiyaa xaa culo Ndiose tñan ꞌin na.
\v 3 Nde chaꞌ nu mxiycuiꞌ Ndiose ꞌin Isaía cuaꞌ sꞌni: —Tyiꞌan yu seꞌen ngutyi loꞌ chcuiꞌ cueen yu: Cuꞌni chuꞌhue um tucueen seꞌen caan Ñi Xꞌnan na, loꞌ cuꞌni ñi um tucueen nu ntsuꞌhui chaꞌ tyijyin ñi—.
\v 4 Yu Xuhua canꞌ lcoꞌ yu sca teꞌ nu nguiaaꞌ loꞌo quichanꞌ camello, loꞌo sca quijyin nchcanꞌ na siiꞌ yu, loꞌ scua nu nchcu yu lca ꞌin scoꞌ, loꞌ ndyiꞌyo yu cuiñanꞌ nu ntsuꞌhui niꞌ quixinꞌ.
\v 5 Mdiyaan nten nu mdoꞌo quichen Jerusalén seꞌen ndlyu yu, loꞌo quichen seꞌen lyiꞌya loo Judea, loꞌo sca chcui seꞌen lyiꞌya loo chco tlyu Jordan,
\v 6 mducua tya yu ꞌin neꞌ chco tlyu canꞌ, loꞌ ñee neꞌ quiꞌya ꞌin neꞌ.
\v 7 Xa naꞌan yu siꞌyana quiꞌan neꞌ fariseo loꞌo neꞌ saduceo ljyaan neꞌ siꞌyana chcua tya neꞌ, nchcuiꞌ yu loꞌo neꞌ: ꞌUn ta nten nu cuiñi, ¿ti nu nguloꞌo ꞌin um siꞌyana xnan yuꞌhui um, loꞌ a quiꞌni caꞌan ꞌin um loꞌo chaꞌ nsinꞌ tiꞌ nu tyiꞌo tiquee Ndiose tiyaa xaa?
\v 8 Xiloꞌo chonꞌ um quiꞌya nguiꞌni um, loꞌ culoꞌo xñan um ꞌin um loꞌo sca chendyu nu luhui.
\v 9 A cuꞌni siyeꞌ um ta ljuin um: Sñeꞌ ta nten ꞌin Abraham lca hua. Cunen loꞌo um sca chaꞌ: Ndiose tca cuꞌni ñi chaꞌ cutsu xca ta nten chonꞌ quee re, loꞌ ca canꞌ sñeꞌ Abraham.
\v 10 A cunta chcuan yca cuaꞌ nducui cuta na chonꞌ xcuaꞌ yca, canꞌ chaꞌ nchgaa yca nu a ndyiꞌyu mti ntsuꞌhui chaꞌ xiꞌyu na, loꞌ tsaa na loo quiiꞌ.
\v 11 Chaꞌ ñii siꞌyana nducua tyan ꞌin um loꞌo tyiꞌa, siꞌyana cuaꞌ mxiloꞌo chonꞌ um quiꞌya ꞌin um, una nde loo la re ljyaan sca nu ndon loo la que ñaꞌan nanꞌ, loꞌ ndyijyin yaꞌ tsuꞌhue ntsuꞌhui tiqueen chaꞌ cua na tca cuiꞌyan snan ñi, cuiꞌ ñi tucua tya ñi ꞌin um loꞌo Espíritu nu Luhui ꞌin Ndiose, a cunta loꞌo quiiꞌ.
\v 12 Yaaꞌ ñi cuaꞌ nducua tiyaa na nu ntsuꞌhui chaꞌ tyuhui trigo nu cuaꞌ nguioꞌ tiꞌin, loꞌ xuꞌhua seꞌen ñi trigo canꞌ, a cunta ntsuꞌhui chaꞌ tiquin ñi quixin canꞌ, loꞌo sca quiiꞌ nu a ntsuꞌhui ꞌa chaꞌ tiꞌ tyuhuiꞌ.
\s Xa mducua tya Jesús
\p
\v 13 Xacanꞌ mdoꞌo Jesús seꞌen lca Galilea, loꞌ mdiyaa ñi chco tlyu Jordan seꞌen nu tucua tya yu Xuhua ꞌin ñi.
\v 14 Una yu Xuhua a ncua tiꞌ yu tucua tya yu ꞌin ñi, loꞌ juin yu: ꞌUn ntsuꞌhui chaꞌ tucua tya um ꞌñan nanꞌ, loꞌ nde ljyaan um siꞌyana nanꞌ tucua tyan ꞌin um.
\v 15 Una mxcuen Jesús ꞌin yu: Tyaa yaꞌ, siꞌyana cuañaꞌan ntsuꞌhui chaꞌ tucua na tñan nchgaa chaꞌ nu ñi ꞌin Ndiose. La xacanꞌ mslyaa yu.
\v 16 Ñaꞌaan mducua tya Jesús mdyiꞌo ñi loo tyiꞌa, cuiꞌ ñaꞌan lcaa nguila niꞌ cuaan, loꞌ naꞌan ñi nguꞌya tucua Espíritu ꞌin Ndiose que ñi, tsañaꞌan nchca tiꞌ ndyiꞌya tucua sca scunꞌ joꞌo.
\v 17 Xacanꞌ ngune ycuiꞌ sca nu ycuiꞌ la niꞌ cuaan: Nde Sñenꞌ nu taꞌa lati ꞌñan, tsuꞌhue ꞌa ntsuꞌhui tiqueen loꞌo. 
\c 4
\s Ncua tiꞌ laxaꞌan xityu ꞌin Jesús loo quiꞌya
\p
\v 1 Xacanꞌ Espíritu ꞌin Ndiose mxicuꞌni ꞌin Jesús siꞌyana tsaa ñi sca seꞌen ngutyi, loꞌ canꞌ ncua tiꞌ laxaꞌan xityu ꞌin ñi loo quiꞌya.
\v 2 Xa cuaꞌ mꞌni ñi ayuna tucua yla tsaan loꞌ tucua yla tla, xacanꞌ mdyisnan nguteꞌ tiꞌ ñi.
\v 3 Cuiꞌ ñaꞌan lcaa yaan laxaꞌan tloo ñi, loꞌ juin ꞌin ñi: Chaꞌ nuꞌhuin lca Sñeꞌ Ndiose, chcuiꞌ loꞌo quee re loꞌ chca na jaslya.
\v 4 Mxcuen ñi ꞌin, ndeñaꞌan nchcuiꞌ quityi ꞌin Ndiose: —Siꞌi tsaloo ti siꞌya chaꞌ nchcu ndyuꞌhui nten chendyu, cuiꞌ ca nu siꞌya nchgaa chaꞌ nu nchcuiꞌ Ndiose—.
\v 5 Xacanꞌ ya loꞌo laxaꞌan ꞌin ñi quichen Jerusalén, loꞌ ycuen loꞌo ꞌin ñi sca seꞌen cuaan lati ꞌin laa canꞌ,
\v 6 loꞌ juin ꞌin ñi: Chaꞌ lca Sñeꞌ Ndiose, tyiꞌo cuaan re loꞌ quiꞌya ton la ꞌya cua, siꞌyana nchcuiꞌ quityi ꞌin Ndiose: —Culo ñi tñan ꞌin angujle ꞌin ñi siꞌyana chuꞌhui cunta ꞌin, loꞌ suꞌhua yaaꞌ canꞌ ꞌin seꞌen nguiaa, siꞌyana a tsa ton quiyaꞌ loo quee—.
\v 7 Loꞌ juin Jesús: Una loꞌo chaꞌ re nguinu scua na loo quityi ꞌin Ndiose: —A tyijyin lyoo ꞌin Ndiose Xꞌnan—.
\v 8 Xacanꞌ ya loꞌo laxaꞌan ꞌin ñi sca loo quiꞌya cuaan yaꞌ, loꞌ nguloꞌo ꞌin ñi sca chcui chendyu seꞌen ndlo neꞌ tñan, loꞌo chaꞌ cuilyiyaꞌ ꞌin neꞌ,
\v 9 loꞌ juin ꞌin ñi: Ñaꞌaan chaꞌ re taan ꞌin, chaꞌ tyon xtyinꞌ loꞌ cuꞌni tnu ꞌñan.
\v 10 Mxcuen Jesús: Tyiꞌo tsoꞌ siinꞌ, Laxaꞌan, siꞌyana ndeñaꞌan nchcuiꞌ quityi ꞌin Ndiose: —ꞌIn Ndiose Xꞌnan ntsuꞌhui chaꞌ cuꞌni tnu, loꞌ scati ꞌin ñi ca jaꞌan—.
\v 11 Xacanꞌ mdoꞌo tsoꞌ laxaꞌan canꞌ siiꞌ ñi, cuiꞌ ñaꞌan lcaa mdiyaan angujle nu ta yaaꞌ ꞌin ñi.
\s Mdyisnan mꞌni Jesús tñan ꞌin Ndiose
\p
\v 12 Xa ynan Jesús chaꞌ siꞌyana yu Xuhua cuaꞌ ntsuꞌhui naꞌan chcuan, mxitucui ñi seꞌen lca Galilea.
\v 13 Xacanꞌ mdoꞌo ñi quichen Nazaret, loꞌ mchaꞌan tiꞌin ñi Capernaum, sca quichen ndiꞌin tuꞌhua tiyoꞌ, cuiꞌ loo yuu nu mꞌni caꞌan ꞌin Zabulón loꞌo Neftalí,
\v 14 siꞌyana tsatoꞌo chaꞌ nu mxiycuiꞌ Ndiose ꞌin yu Isaía cuaꞌ sꞌni xa juin yu:
\v 15 —Yuu nu mꞌni caꞌan ꞌin ta nten ꞌin Zabulón loꞌo seꞌen lyiꞌya loo Neftalí, cuiꞌ tucueen nu ndiyaa tuꞌhua tiyoꞌ xca tsoꞌ chco tlyu Jordan, seꞌen lyiꞌya loo Galilea, seꞌen ndiꞌin neꞌ gentil,
\v 16 sca quichen ndiꞌin seꞌen tla yta, naꞌan neꞌ sca xaa nu tlyu, nten nu ntsuꞌhui tuyaaꞌ chaꞌ ndyija, mꞌni sca xaa ꞌin neꞌ—.
\v 17 Tiꞌ xacanꞌ mdyisnan Jesús nguloꞌo ñi ꞌin nten, loꞌ nchcuiꞌ ñi: Xiloꞌo chonꞌ um quiꞌya nguiꞌni um, siꞌyana cuaꞌ mdiyaa xaa culo Ndiose tñan ꞌin um.
\v 18 Yatoꞌo sca tsaan mdaꞌan Jesús tuꞌhua tiyoꞌ Galilea, loꞌ naꞌan ñi ꞌin yu Tyo loꞌo yu Ndre taꞌa ngula yu, nduguun yu quitan loo tyiꞌa canꞌ siꞌyana yu cuta cula lca yu.
\v 19 Loꞌ juin ñi ꞌin yu: Chcui nchaꞌan um ꞌñan, nanꞌ culoꞌon ꞌin um cuꞌni um cuta, tyicana ꞌin nten.
\v 20 Ticuiꞌ xaa ngulaꞌ sti yu quitan ꞌin yu, loꞌ mducui nchaꞌan yu ꞌin ñi.
\v 21 Chinꞌ ti seꞌen tiꞌ mdaꞌan ñi, xa naꞌan ñi ꞌin tucua yu nu ndaꞌan loꞌo taꞌa ngula, Jacobo loꞌo yu Xuhua, ndlyu yu loꞌo Zebedeo sti yu niꞌ sca yca naꞌan, nxcuan suꞌhua yu quitan ꞌin yu, loꞌ msiꞌya ñi ꞌin yu.
\v 22 Cuiꞌ xaa mdyiꞌo yu niꞌ yca naꞌan canꞌ, ngulaꞌ ton yu ꞌin sti yu loꞌ mducui nchaꞌan yu ꞌin ñi.
\v 23 Ñaꞌaan seꞌen lyiꞌya loo Galilea mdaꞌan loꞌo ñi chaꞌ tsuꞌhue ꞌin Ndiose, loꞌo seꞌen ndiyoꞌ tiꞌin neꞌ judio, nguloꞌo ñi ñaꞌan ntsuꞌhui chaꞌ culo Ndiose tñan ꞌin nten, loꞌ mꞌni chca ñi ꞌin nchgaa nu tiꞌi loꞌo cuati loo quicha.
\v 24 Ñaꞌaan seꞌen lyiꞌya loo Siria mscua cueen chaꞌ ꞌin ñi, mdiyan loꞌo neꞌ ꞌin nu tiꞌi loꞌo cuati loo quicha, a cunta loꞌo nu ntsuꞌhui cuiꞌin xaꞌan ꞌin, loꞌo nu nxñi cuiꞌin ꞌin, loꞌo nu mchcunꞌ quiyaꞌ, loꞌ mꞌni chca ñi ꞌin.
\v 25 Quiꞌan ꞌa nten mducui nchaꞌan ꞌin ñi nu mdoꞌo seꞌen lyiꞌya loo Galilea, loꞌo Decápolis, loꞌo quichen Jerusalén, loꞌo seꞌen lyiꞌya loo Judea, a cunta nu mdoꞌo xca tsoꞌ chco tlyu Jordan. 
\c 5
\s Xa nguloꞌo Jesús ꞌin nten
\p
\v 1 Xa naꞌan Jesús siꞌyana quiꞌan ꞌa nten mdiya tiꞌin canꞌ, ycuen ñi sca seꞌen nu cuaan la, loꞌ ñaꞌaan yten tucua ñi mdiyaa yu taꞌa ndaꞌan ñi tloo ñi.
\v 2 Xacanꞌ mdyisnan nguloꞌo ñi ꞌin nten, loꞌ juin ñi:
\v 3 Tsuꞌhue ca xuꞌhue nu ndyiꞌya chaꞌ tiyaa siꞌyana ꞌni chaꞌ ꞌin loꞌo Ndiose, canꞌ nu caja chaꞌ tsuꞌhue ꞌin seꞌen ndlo Ndiose tñan.
\v 4 Tsuꞌhue ca xuꞌhue nu tiꞌi ngaꞌan ꞌin siꞌya quiꞌya mꞌni, canꞌ nu caja chaꞌ tnu tiquee ꞌin.
\v 5 Tsuꞌhue ca xuꞌhue nu suun nten lca, canꞌ nu quiꞌni caꞌan ꞌin yuu seꞌen ndlo Ndiose tñan.
\v 6 Tsuꞌhue ca xuꞌhue nu nguiteꞌ tiꞌ loꞌ nguityi tiꞌ chaꞌ nu ñi ꞌin Ndiose, canꞌ nu chaꞌan yuꞌhui cusya ꞌin.
\v 7 Tsuꞌhue ca xuꞌhue nu ñaꞌan ꞌtnan tiꞌ ꞌin taꞌa, canꞌ nu caja nu ñaꞌan ꞌtnan tiꞌ ꞌin.
\v 8 Tsuꞌhue ca xuꞌhue nu luhui cusya ꞌin, canꞌ nu ñaꞌan tloo ꞌin Ndiose tiyaa xaa.
\v 9 Tsuꞌhue ca xuꞌhue nu ndiya nan ñaꞌan tyiꞌin tsuꞌhue loꞌo nchgaa tucui, canꞌ nu ca naan sñeꞌ Ndiose.
\v 10 Tsuꞌhue ca xuꞌhue nu ndijin chaꞌ siꞌya tñan tsuꞌhue nu nguiꞌni, canꞌ nu caja chaꞌ tsuꞌhue ꞌin seꞌen ndlo Ndiose tñan.
\v 11 Tsuꞌhue ca xuꞌhue um xa caja nu ñaꞌan tiꞌi, loꞌ chcuiꞌ caꞌan ꞌin um siꞌya chaꞌ ꞌñan, loꞌ tñan neꞌ scasca quiꞌya ꞌin um.
\v 12 Chcui tiꞌ um loꞌ ca tsuꞌhue chuꞌhui tiquee um, siꞌyana tlyu chaꞌ tsuꞌhue quiꞌni caꞌan ꞌin um la niꞌ cuaan, siꞌyana cuañaꞌan jui nu mꞌni lyiꞌo ꞌin yu nu mxiycuiꞌ Ndiose ꞌin cuaꞌ sꞌni.
\s Chaꞌ ꞌin tejeꞌ
\p
\v 13 ꞌUn nguiaa chaꞌ ꞌin um ñaꞌan nchca tiꞌ tejeꞌ lja nten chendyu, chaꞌ tejeꞌ canꞌ tyiꞌo tiyenꞌ na, ¿ñaꞌan ta tca ca tiyenꞌ na xiyaꞌ? A la ꞌa cunajoꞌo na, tsaloo chcuan ti na loꞌ caja nu culoꞌ suꞌhua ꞌin na.
\s Chaꞌ ꞌin xaa
\p
\v 14 ꞌUn nguiaa chaꞌ ꞌin um ñaꞌan nchca tiꞌ xaa nu nduꞌhui loo chendyu, cuiꞌ cuañaꞌan sca quichen nu ndiꞌin sca loo quiꞌya, a tca nu a ca chcanꞌ na.
\v 15 A tucui nu caꞌan sca quiiꞌ loꞌ nde tucun tiꞌin ꞌin na, cuiꞌ ca nu cuaan chcua na siꞌyana tuꞌhui na xaa ꞌin nchgaa nu ndiꞌin ñaꞌan canꞌ.
\v 16 Cuiꞌ cuañaꞌan taa um yaꞌ ca um sca xaa ꞌin nten chendyu, ñaꞌan ca siꞌyana ca chcanꞌ loo tñan tsuꞌhue nu nguiꞌni um, loꞌ cuꞌni tnu neꞌ ꞌin Stina Ndiose, ñi nu nducua niꞌ cuaan.
\s Chaꞌ ꞌin lee
\p
\v 17 A quiñan tiꞌ um ljyaan siꞌyana tyijyin lyoon ꞌin lee, loꞌo chaꞌ nu nguaꞌan scua yu nu mxiycuiꞌ Ndiose ꞌin cuaꞌ sꞌni, siꞌi na xcuan tloon ꞌin na, cuiꞌ ca nu siꞌyana ca jaꞌan ꞌin na.
\v 18 Nu chaꞌ ñi cunen loꞌo um, tsalja nu tiꞌ chcanꞌ niꞌ cuaan loꞌo chendyu re, ñi sca chaꞌ nu suhue lati nducua loo lee canꞌ, loꞌ a tyijyin chaꞌ ꞌin na cuati ñaꞌan, cuiꞌ ca nu tsatoꞌo nchgaa chaꞌ nu nducua loo na.
\v 19 Canꞌ chaꞌ nu cucha tiꞌin chaꞌ nu suhue lati ngulo Ndiose tñan, loꞌ chaꞌ cuañaꞌan culoꞌo canꞌ ꞌin xca tucui, a caja nu suꞌhua loo ꞌin seꞌen ndlo Ndiose tñan. Una nu tucua tñan ꞌin na loꞌ culoꞌo ꞌin na, canꞌ nu ca sca nu ndon loo seꞌen ndlo Ndiose tñan.
\v 20 Cunen loꞌo um sca chaꞌ, chaꞌ a lyee la quia nan um ꞌin Ndiose que ñaꞌan nguiꞌni neꞌ escriba loꞌo neꞌ fariseo, a tca sten um seꞌen ndlo Ndiose tñan.
\s Chaꞌ nu nchcuen tiqueꞌ neꞌ
\p
\v 21 Cuaꞌ ngune ꞌin um ñaꞌan jui nu ycuiꞌ loꞌo neꞌ mdiꞌin sꞌni: —A cujui nten—, loꞌ nu cujui nten tyiꞌo quiꞌya ꞌin loꞌ ca xñan bsya ꞌin.
\v 22 Una nanꞌ cunen loꞌo um, nu nscuen tiqueꞌ loꞌo taꞌa, tyiꞌo quiꞌya ꞌin loꞌ ca xñan bsya ꞌin. Ticuiꞌ cuañaꞌan chaꞌ caja nu chcuiꞌ loꞌo taꞌa: Tijyi ꞌa nan, tyiꞌo quiꞌya ꞌin canꞌ seꞌen nchca cuiyaꞌ quiꞌya. Loꞌ ñaꞌan tucui ti nu chcuiꞌ loꞌo taꞌa: Tinto ꞌa, chen nchcui tsaa canꞌ loo quiiꞌ.
\v 23 Canꞌ chaꞌ xa yan loꞌo um sca lcuan ꞌin Ndiose, loꞌ lja xacanꞌ quia yuꞌhui tiꞌ um siꞌyana nducui nchaꞌan chaꞌ ꞌin um loꞌo taꞌa um,
\v 24 culaꞌ scua um lcuan canꞌ, loꞌ quia yꞌni chuꞌhue um chaꞌ ꞌin um loꞌo taꞌa um culo nducua la, xacanꞌ xitucui um, loꞌ tyaa um lcuan canꞌ ꞌin Ndiose.
\v 25 Ndla ti cuꞌni chuꞌhue um chaꞌ ꞌin um loꞌo taꞌa cusuun um tucueen nguiaa um, lja nu tiꞌ lyijyi ca cuiyaꞌ chaꞌ ꞌin um, ñaꞌan tuꞌ tyaa canꞌ cunta ꞌin um tloo bse, loꞌ yu bse canꞌ tyaa yu cunta ꞌin um yaaꞌ silyiya, canꞌ nu suꞌhua ꞌin um naꞌan chcuan.
\v 26 Nu chaꞌ ñi cunen loꞌo um, a tyiꞌo um naꞌan chcuan, chaꞌ siꞌi la suꞌhua lyiyaꞌ um nchgaa cunta nu nducui nchaꞌan ꞌin um.
\s Chaꞌ nu nguiten yuꞌhui neꞌ loꞌo cuilyiꞌo nten
\p
\v 27 Cuaꞌ ngune ꞌin um ñaꞌan jui nu ycuiꞌ: —A sten yuꞌhui um loꞌo cuilyiꞌo nten—.
\v 28 Una nanꞌ cunen loꞌo um, nu ñanꞌ ꞌya ꞌin sca neꞌ cunaꞌan, loꞌ suꞌhua chaꞌ nducunꞌ niꞌ cusya ꞌin loꞌo neꞌ, ñaꞌan loo chaꞌ cuaꞌ yten yuꞌhui loꞌo neꞌ.
\v 29 Chaꞌ siꞌya quiloo um nguiꞌni um quiꞌya, lyoo um ꞌin na, tsuꞌhue lati nu ndiya lyijyi sca tsoꞌ quiloo um sten um niꞌ cuaan, loꞌ siꞌi nu ñaꞌan chcui um tsaa um loo quiiꞌ.
\v 30 Cuiꞌ cuañaꞌan, chaꞌ siꞌya yaaꞌ um cuꞌni um quiꞌya, siꞌyu coꞌ um ꞌin na, tsuꞌhue lati nu ndiya lyijyi sca tsoꞌ yaaꞌ um sten um niꞌ cuaan, loꞌ siꞌi nu ñaꞌan chcui um tsaa um loo quiiꞌ.
\s Chaꞌ ꞌin nten nu ndlaꞌ tiꞌin taꞌa
\p
\v 31 A cunta jui nu ycuiꞌ: —Sca yu quiꞌyu nu nchca tiꞌ culaꞌ tiꞌin ꞌin cuilyiꞌo, ꞌni chaꞌ tsaꞌ scua sca quityi ꞌin yu—.
\v 32 Una nanꞌ cunen loꞌo um, yu nu culaꞌ tiꞌin ꞌin cuilyiꞌo, loꞌ chaꞌ siꞌi siꞌyana yten yuꞌhui neꞌ loꞌo xca tucui, ñaꞌan loo chaꞌ nxicuꞌni yu ꞌin neꞌ sten yuꞌhui neꞌ loꞌo ñaꞌan tucui ti, loꞌ yu nu ca cuilyiꞌo ꞌin canꞌ, loꞌo canꞌ cuꞌni quiꞌya.
\s A tyiꞌin tya ca na sca chaꞌ
\p
\v 33 A cunta cuaꞌ ngune ꞌin um ñaꞌan jui nu ycuiꞌ loꞌo neꞌ mdiꞌin sꞌni: —A tyiꞌin tya ca um sca chaꞌ—, cuiꞌ ca nu —tucua um tñan chaꞌ nu tyiꞌin tyaa um tloo Ñi Xꞌnan na—.
\v 34 Una nanꞌ cunen loꞌo um: Ñi sca chaꞌ loꞌ a ntsuꞌhui chaꞌ tyiꞌin tya ca um, ñi niꞌ cuaan loꞌ a cuꞌni tyiꞌya um siꞌyana la cua nducua Ndiose,
\v 35 ñi loo chendyu re siꞌyana nde nxitñanꞌ quiyaꞌ ñi, ñi a cuꞌni tyiꞌya um quichen Jerusalén siꞌyana lca na quichen ꞌin ñi nu lca Ree.
\v 36 Ñi a tyiꞌin tya ca um chendyu ꞌin um, siꞌyana ñi sca quichanꞌ que um loꞌ a tca cuꞌni um chaꞌ ca mta na uta ca mten na.
\v 37 Xa chcuiꞌ um sca chaꞌ, ljuin um: Cuiꞌ na, uta, siꞌi na, siꞌyana chaꞌ tiꞌ tucua la um chaꞌ canꞌ, cuaꞌ loꞌo chaꞌ cuiñi ljyan loꞌo na.
\s Chuꞌhui chaꞌ tsuꞌhue ꞌin na loꞌo taꞌa cusuun na
\p
\v 38 Cuaꞌ ngune ꞌin um jui nu ycuiꞌ: —Chaꞌ caja nu culo quiloo um, cuiꞌ cuañaꞌan cuꞌni um loꞌo canꞌ, chaꞌ caja nu xityu lyiꞌya um, ticuiꞌ cuañaꞌan cuꞌni um—.
\v 39 Una nanꞌ cunen loꞌo um, a cuꞌni suꞌhua um ꞌin um loꞌo nu nducunꞌ, cuiꞌ ca nu chaꞌ ycuanꞌ yu sca tsoꞌ tloo um, tyaa um xca tsoꞌ na ycuanꞌ yu.
\v 40 Chaꞌ ndeꞌen nu nchca tiꞌ taa quiꞌya ꞌin um loꞌ lyaa xcanꞌ um, tyaa um ꞌin na ꞌin cuiꞌ ñaꞌaan loꞌo teꞌ ycanꞌ tnu tuꞌhua canꞌ ꞌin um.
\v 41 Chaꞌ caja nu xicuꞌni ꞌin um cuiꞌya um suꞌhua sca kilometro, ꞌun cuiꞌya um ꞌin na tucua kilometro.
\v 42 Chaꞌ ndeꞌen la na jñan neꞌ ꞌin um, tyaa um ꞌin na, cuiꞌ cuañaꞌan chaꞌ ntsuꞌhui nu jñiꞌ na ꞌin um, a cuꞌni tiji um loꞌo canꞌ.
\v 43 Cuaꞌ ngune ꞌin um jui nu ycuiꞌ: —Ñaꞌan ꞌtnan tiꞌ um ꞌin taꞌa nten um—, loꞌ xcuan tloo um ꞌin taꞌa cusuun um.
\v 44 Una nanꞌ cunen loꞌo um: Ñaꞌan ꞌtnan tiꞌ um ꞌin taꞌa cusuun um, loꞌ chcuiꞌ um chaꞌ tsuꞌhue loꞌo nu nchcuiꞌ chaꞌ tiꞌi ꞌin um, cuꞌni um tsuꞌhue loꞌo nu nxcuan tloo ꞌin um, jñan um ꞌin Ndiose siꞌya chaꞌ ꞌin nu ndaja ꞌin um loꞌ nducui nchaꞌan ꞌin um,
\v 45 cuañaꞌan ca chcanꞌ loo siꞌyana lca um sñeꞌ Stina Ndiose, ñi nu nducua niꞌ cuaan, ñi nu nꞌni chaꞌ nduꞌhui xaa ꞌin nten nducunꞌ loꞌo nten nu tsuꞌhue, loꞌ nxi ꞌya ñi quioo ꞌin nten nu tsuꞌhue loꞌo nten nu nducunꞌ.
\v 46 Siꞌyana chaꞌ chuꞌhui chaꞌ tsuꞌhue ꞌin um loꞌo tsalca nu ntsuꞌhui chaꞌ tsuꞌhue ꞌin loꞌo um, ¿ñi chaꞌ tsuꞌhue ta nducua tloo um xacanꞌ? ¿Ta siꞌi loꞌo nten nu nducunꞌ nꞌni cuañaꞌan?
\v 47 Chaꞌ chcuiꞌ chaꞌ um ꞌin tsalca taꞌa ti um, ¿ta nducua la nguiꞌni um ꞌin xca tucui? ¿Ta siꞌi loꞌo neꞌ gentil nꞌni neꞌ cuañaꞌan?
\v 48 Canꞌ chaꞌ ca um sca nten nu ñi ndiꞌin chaꞌ ꞌin, tsañaꞌan Sti um ñi nu nducua niꞌ cuaan, ñi ndiꞌin chaꞌ ꞌin ñi. 
\c 6
\s Chaꞌ ꞌin lcuan
\p
\v 1 Xñi um cunta siꞌyana siꞌi tloo ñaꞌan nten cuꞌni um scasca loo chaꞌ tsuꞌhue, ta siꞌyana taa neꞌ loo um, loꞌ chaꞌ cuañaꞌan cuꞌni um, a sca chaꞌ tsuꞌhue quiꞌni caꞌan ꞌin um loꞌo tsoꞌ ꞌin Stina Ndiose nu nducua niꞌ cuaan.
\v 2 Canꞌ chaꞌ xa taa um sca lcuan, a xicune um chaꞌ canꞌ tloo nten, siꞌyana cuañaꞌan nguiꞌni sca nu a ñi ndiꞌin chaꞌ ꞌin seꞌen nꞌni tnu neꞌ ꞌin Ndiose, uta sca seꞌen la, ñaꞌan ca siꞌyana caja nu taa loo canꞌ. Nu chaꞌ ñi cunen loꞌo um, loꞌo tsacanꞌ ti cuaꞌ lca siyaꞌ canꞌ.
\v 3 Una xa taa um sca lcuan, a ntsuꞌhui chaꞌ ca jlyo tiꞌ tsoꞌ ca ꞌin um na nu taa tsoꞌ cuen ꞌin um,
\v 4 cunan ti ntsuꞌhui chaꞌ taa um lcuan, loꞌ Sti um, ñi nu nanꞌ ꞌya nchgaa loo chaꞌ, xitucui ñi chaꞌ tsuꞌhue ꞌin um tloo naꞌan nten.
\s Chcuiꞌ lyiꞌo na ꞌin Ndiose
\p
\v 5 Xa chcuiꞌ lyiꞌo um ꞌin Ndiose, a cuꞌni um tsañaꞌan nꞌni nu a ñi ndiꞌin chaꞌ ꞌin, siꞌyana nducui tiꞌ canꞌ ndyon nchcuiꞌ lyiꞌo ꞌin Ndiose seꞌen nꞌni tnu neꞌ ꞌin ñi, uta sca seꞌen la, siꞌyana caja nu taa loo canꞌ. Nu chaꞌ ñi cunen loꞌo um, loꞌo tsacua ti ñaꞌan cuaꞌ jui siyaꞌ canꞌ.
\v 6 Una xa chcuiꞌ lyiꞌo um ꞌin Stina Ndiose, yten um ñaꞌan ꞌin um loꞌ tucun um ꞌin na, loꞌ chcuiꞌ um loꞌo ñi nu a chcanꞌ nducua, loꞌ Sti um, ñi nu nanꞌ ꞌya nchgaa loo chaꞌ, xcuen ñi ꞌin um tloo naꞌan nten.
\v 7 Xa nchcuiꞌ lyiꞌo um ꞌin Ndiose, a chcuiꞌ um ticuiꞌ ti loo chaꞌ tsañaꞌan nꞌni neꞌ gentil nu a ndyuꞌhui lyoo ꞌin Ndiose, ñan tiꞌ neꞌ ta siꞌyana quiꞌan chaꞌ chcuiꞌ neꞌ, caja nu cuꞌni cunta ꞌin neꞌ.
\v 8 A nchca chaꞌ cuꞌni um ñaꞌan nu nguiꞌni neꞌ, siꞌyana ñi nu lca Sti um cuaꞌ jlyo tiꞌ ñi chaꞌ nu ꞌni ꞌin um, siyaꞌ tiꞌ lyijyi jñan um ꞌin na.
\v 9 Canꞌ chaꞌ xa chcuiꞌ lyiꞌo um ꞌin Ndiose, ndeñaꞌan chcuiꞌ um: Ndiose Sti hua, ꞌun ñi nu nducua niꞌ cuaan, scati um ntsuꞌhui chaꞌ cuꞌni tnu hua ꞌin um.
\v 10 Nchca tiꞌ hua siꞌyana tsatlyu culo um tñan ꞌin hua, loꞌ cuꞌni um tsañaꞌan nu lca tiquee um loo chendyu re, cuiꞌ tsañaꞌan nguiꞌni um la niꞌ cuaan.
\v 11 Cunda scaa tsaan taa um na nu cunajoꞌo ꞌin hua.
\v 12 Cuꞌni um chaꞌ tlyu tiꞌ ꞌin hua siꞌya quiꞌya nguiꞌni hua, siꞌyana cuañaꞌan nguiꞌni hua chaꞌ tlyu tiꞌ ꞌin nchgaa nu nguiꞌni chaꞌ ngunanꞌ loꞌo hua.
\v 13 A taa um chaꞌ cuiyaꞌ sten chaꞌ ngunanꞌ tiquee hua, cuiꞌ ca nu culo tsoꞌ um ꞌin hua siiꞌ chaꞌ ngunanꞌ canꞌ, siꞌyana scati um ndlo um tñan, loꞌ tlyu chaꞌ cuiyaꞌ ntsuꞌhui ꞌin um, tsala xaa cuꞌni tnu hua ꞌin um. Amen.
\v 14 Chaꞌ cuꞌni um chaꞌ tlyu tiꞌ ꞌin taꞌa nten um, cuiꞌ cuañaꞌan Sti um, ñi nu nducua niꞌ cuaan, cuꞌni ñi chaꞌ tlyu tiꞌ ꞌin um,
\v 15 una chaꞌ a cuꞌni um chaꞌ tlyu tiꞌ ꞌin taꞌa nten um, ticuiꞌ cuañaꞌan Sti um, ñi nu nducua niꞌ cuaan, a cuꞌni ñi chaꞌ tlyu tiꞌ ꞌin um siꞌya quiꞌya nguiꞌni um.
\s Chaꞌ ꞌin ayuno
\p
\v 16 Xa cuꞌni um ayuna, a taa um yaꞌ ca xiꞌin tloo um tsañaꞌan nꞌni nu a ñi ndiꞌin chaꞌ ꞌin, nꞌni xiꞌin canꞌ tloo siꞌyana ca jlyo tiꞌ nten siꞌyana nguiꞌni ayuna. Nu chaꞌ ñi cunen loꞌo um, loꞌo tsacua ti ñaꞌan cuaꞌ jui siyaꞌ canꞌ.
\v 17 Una xa cuꞌni um ayuna, cuꞌni chuꞌhue um ꞌin um, loꞌ ycui um tyiꞌa tloo um,
\v 18 siꞌyana a ca chcanꞌ ñaꞌan siꞌyana nguiꞌni um ayuna, cuiꞌ ca nu cuꞌni um chaꞌ canꞌ tloo Stina Ndiose, ñi nu a chcanꞌ nducua, loꞌ Sti um, ñi nu nanꞌ ꞌya nchgaa loo chaꞌ, xcuen ñi ꞌin um tloo naꞌan nten.
\s Chaꞌ ꞌin chaꞌ cuilyiyaꞌ
\p
\v 19 A soꞌ tiꞌin um chaꞌ cuilyiyaꞌ loo chendyu re, seꞌen nu sta ꞌni ꞌin na loꞌ jlyo na, seꞌen nu sten yu cunan loꞌ cuiꞌya ꞌin na,
\v 20 cuiꞌ ca nu soꞌ tiꞌin um chaꞌ cuilyiyaꞌ la niꞌ cuaan, seꞌen nu a tca sta ꞌni ꞌin na, ñi a ntsuꞌhui chaꞌ jlyo na, ñi yu cunan loꞌ a cuiꞌya ꞌin na.
\v 21 Siꞌyana seꞌen ndiꞌin chaꞌ cuilyiyaꞌ ꞌin um, canꞌ nguilyu cusya ꞌin um.
\s Quiloo na nduꞌhui xaa ꞌin na
\p
\v 22 Quiloo um nduꞌhui na xaa ꞌin um, canꞌ chaꞌ xa nu tsuꞌhue xaa quiloo um, tiꞌ ñaꞌaan um mtsaꞌan yuꞌhui xaa canꞌ ꞌin um,
\v 23 una chaꞌ a tsuꞌhue xaa quiloo um, ticuiꞌ cuañaꞌan ñaꞌaan um tla yta um. Loꞌ chaꞌ tla yta chaꞌ tiyaa ꞌin um, ¿ñaꞌan la ca ycuiꞌ ca tla yta canꞌ?
\s Chaꞌ ꞌin tucua xꞌnan na
\p
\v 24 A tucui nu tca chuꞌhui tucua xꞌnan, siꞌyana ñaꞌan tiꞌi yu ꞌin sca, loꞌ xca canꞌ lyee la chuꞌhui yu cunta ꞌin, uta lyee la suꞌhua loo yu ꞌin sca, loꞌ xca xcuan tloo yu ꞌin. Cuiꞌ cuañaꞌan a tca tyiꞌin tyaa um quiloo um ꞌin Ndiose, loꞌ ticuiꞌ xaa chcua quiloo um ꞌin chaꞌ cuilyiyaꞌ.
\s Chaꞌ ꞌin chaꞌ nduhue tiꞌ
\p
\v 25 Canꞌ chaꞌ cunen loꞌo um: A suꞌhua um chaꞌ nduhue tiꞌ tiquee um loꞌo na nu cunajoꞌo ꞌin um, ñi steꞌ um loꞌ a chuꞌhui yuhueꞌ tiꞌ um. ¿Ta a ndon loo la chendyu ꞌin um que ꞌin chaꞌ nchcu, cuiꞌ cuañaꞌan cunanꞌ um, ta a ntsuꞌhui lyoo la na que ꞌin steꞌ um?
\v 26 Xñi um cunta ñaꞌan ndiꞌin chaꞌ ꞌin quiñi, a ntya ꞌin jyaan, a sca na nxoꞌ ꞌin, ñi a ntñan ꞌin juꞌhua, una Sti um, ñi nu nducua niꞌ cuaan nxicu ꞌin ꞌin. ¿Ta siꞌi lyee la ntsuꞌhui lyoo um que ꞌin quiñi?
\v 27 Siyaꞌ lyee la nsuꞌhua um chaꞌ nduhue tiꞌ tiquee um, ¿ta ñan tiꞌ um tca tya cula la um ꞌin um loꞌo xca lii scun um?
\v 28 A cunta loꞌo teꞌ nu ntsuꞌhui chaꞌ coꞌ um, ¿ñi chaꞌ lyee ꞌa nsuꞌhua um chaꞌ nduhue tiꞌ tiquee um loꞌo na? Xñi um cunta ñaꞌan ndlyo sca yca quee nu nducua niꞌ quixinꞌ, a nꞌni na tñan, ñi a ntñan na teꞌ,
\v 29 una cunen loꞌo um sca chaꞌ, ñi yu ree Salomón tsañaꞌan nu ncua cuilyiyaꞌ yu, loꞌ a tsuꞌhue la ycoꞌ yu que ñaꞌan quee cua.
\v 30 Chaꞌ cuañaꞌan nxicoꞌ Ndiose ꞌin quixinꞌ, cuaꞌ ñii tsuꞌhue ñaꞌan na una quiaa quinanꞌ na loꞌ tsaa na loo quiiꞌ. ¿Ta siꞌi nde lyee la xicoꞌ ñi ꞌin um, ꞌun nu joꞌo ndiya quiꞌan tiꞌ ꞌin ñi?
\v 31 Canꞌ chaꞌ a suꞌhua um chaꞌ nduhue tiꞌ tiquee um, ta ljuin um: ¿Ñi na cu na, ñi na coꞌo na, loꞌ ñi na coꞌ na?
\v 32 Siꞌyana chonꞌ nchgaa chaꞌ re nchcua quiloo neꞌ gentil, una ñi nu lca Sti um, ñi nu nducua niꞌ cuaan, jlyo tiꞌ ñi siꞌyana ꞌni chaꞌ ꞌin um loꞌo nchgaa chaꞌ re.
\v 33 Quia nan um ꞌin Ndiose culo nducua la, loꞌ tucua um tñan chaꞌ nu ñi ꞌin ñi, loꞌ nchgaa chaꞌ re tya cula loꞌo ñi ꞌin um.
\v 34 Canꞌ chaꞌ a suꞌhua um chaꞌ nduhue tiꞌ tiquee um ñaꞌan tyijyin um tsaan quiaa, siꞌyana quiaa cuaꞌ ljyan loꞌo na chaꞌ nduhue tiꞌ ꞌin na, cuiꞌ lya loꞌo chaꞌ nu nchca tsaan re ñii. 
\c 7
\s A suꞌhua quiꞌya taꞌa na
\p
\v 1 A nchca chaꞌ suꞌhua quiꞌya taꞌa um, siꞌyana a caja nu suꞌhua quiꞌya ꞌin um.
\v 2 Siꞌyana tsañaꞌan nsuꞌhua um quiꞌya ꞌin xca tucui, cuañaꞌan caja nu suꞌhua quiꞌya ꞌin um, loꞌo cuiyaꞌ nu nsuꞌhua cuiyaꞌ um, cuiꞌ cuañaꞌan caja nu suꞌhua cuiyaꞌ ꞌin um.
\v 3 ¿Ñi chaꞌ lyee ꞌa nxñi um cunta mti nu ntsuꞌhui quiloo taꞌa nten um, loꞌ a nꞌni cunta um coꞌ yca nu ntsuꞌhui quiloo um?
\v 4 ¿Ñaꞌan ta tca ljuin um ꞌin taꞌa um: Tyaa um yaꞌ culyoon mti nu ntsuꞌhui quiloo um, loꞌ chaꞌ quiloo um ntsuꞌhui sca coꞌ yca ꞌin na?
\v 5 ꞌUn neꞌ nu a ñi ndiꞌin chaꞌ ꞌin, lyoo um coꞌ yca nu ntsuꞌhui quiloo um culo nducua la, la xacanꞌ ca chcanꞌ tsuꞌhue ꞌin um culyoo um mti nu ntsuꞌhui quiloo xca tucui.
\v 6 A suꞌhua um na nu luhui tloo xniꞌ, ñi a suꞌhua um na nu ntsuꞌhui lyoo ꞌin um tloo cuhueꞌ, ñaꞌan tuꞌ sti quiyaꞌ ꞌin ꞌin na, loꞌ xiton ꞌin loꞌo um, canꞌ chaꞌ xñi um cunta ꞌin um loꞌo nten.
\s Ntsuꞌhui chaꞌ jñan na ꞌin Ndiose
\p
\v 7 Jñan um na nu nchca tiꞌ um, loꞌ caja na ꞌin um, quia nan um chaꞌ canꞌ loꞌ quija lyoo na ꞌin um, chcuiꞌ um loꞌ caja nu sla tunaꞌan ꞌin um.
\v 8 Siꞌyana nchgaa nu jñan sca chaꞌ, a sꞌni caja na ꞌin, loꞌ nu nan chaꞌ canꞌ, a sꞌni quija lyoo na ꞌin, loꞌ nu nchcuiꞌ, a sꞌni ndyijyi nu sla tunaꞌan ꞌin.
\v 9 ¿Ti ñaꞌan um ndiꞌin sñeꞌ um, loꞌ xa jñan jaslya ꞌin um, ta xtyi tiꞌ um taa um quee ꞌin canꞌ?
\v 10 ¿Uta chaꞌ jñan cula ꞌin um, ta xtyi tiꞌ um taa um cunaan ꞌin canꞌ?
\v 11 Chaꞌ ꞌun lca um nten nu nducunꞌ, loꞌ ndaa um na nu tsuꞌhue ꞌin sñeꞌ um, ¿ñaꞌan la ca Stina Ndiose, ñi nu nducua niꞌ cuaan, na a taa ñi chaꞌ tsuꞌhue nu jñan um ꞌin ñi?
\v 12 Canꞌ chaꞌ, tsañaꞌan nu nducua tloo um cuꞌni nten loꞌo um, cuañaꞌan ntsuꞌhui chaꞌ cuꞌni um loꞌo neꞌ, siꞌyana nde chaꞌ nu nsuꞌhua loꞌo ñaꞌaan chaꞌ nu nchcuiꞌ lee loꞌo chaꞌ nu ycuiꞌ yu nu mxiycuiꞌ Ndiose ꞌin cuaꞌ sꞌni.
\s Chaꞌ ꞌin tunaꞌan nu luꞌhui
\p
\v 13 Quia nan um ñaꞌan sten um tunaꞌan nu luꞌhui, siꞌyana xeen ꞌa tunaꞌan loꞌ xeen tucueen nu ndiyaa loo chaꞌ ngunanꞌ, loꞌ quiꞌan ꞌa nten nguiten neꞌ tunaꞌan canꞌ.
\v 14 Siꞌyana luꞌhui tunaꞌan loꞌ titi tucueen nu ndiyaa seꞌen caja chendyu, loꞌ chinꞌ nu nguija lyoo na ꞌin.
\s Chuꞌhui lyoo na nten cuaꞌ ñaꞌaan tñan nꞌni neꞌ
\p
\v 15 Xñi um cunta ꞌin um loꞌo yu cuiñi nu nchcuiꞌ siꞌyana Ndiose nxiycuiꞌ ꞌin, yu nu nguiꞌni ꞌin tsañaꞌan nchca tiꞌ sca slyaꞌ, una cusya ꞌin yu nguia chaꞌ ꞌin na ñaꞌan nchca tiꞌ ꞌni la.
\v 16 Siꞌya tñan nu nꞌni yu tca chuꞌhui lyoo um ꞌin yu. ¿Ta tca cuiꞌyu mti uva loo ti quicheꞌ, uta tyiꞌo mti higo loo yca quicheꞌ?
\v 17 Cuiꞌ cuañaꞌan ndiꞌin chaꞌ ꞌin sca yca: Chaꞌ tsuꞌhue na, tsuꞌhue mti ndyiꞌyu loo na, loꞌ chaꞌ a tsuꞌhue na, ticuiꞌ cuañaꞌan a tsuꞌhue mti ndyiꞌo loo na.
\v 18 Siꞌyana sca yca nu tsuꞌhue, a ntsuꞌhui chaꞌ cuiꞌyu mti nu a tsuꞌhue loo na, cuiꞌ cuañaꞌan sca yca nu a tsuꞌhue, a tca cuiꞌyu mti nu tsuꞌhue loo na.
\v 19 Canꞌ chaꞌ nchgaa yca nu a ndyiꞌyu mti nu tsuꞌhue ñaꞌan loo, xiꞌyu na loꞌ tsaa na loo quiiꞌ.
\v 20 Canꞌ chaꞌ siꞌya tñan nu nꞌni sca nten tca chuꞌhui lyoo na ꞌin neꞌ.
\s Chaꞌ ꞌin nu a siyaꞌ yuꞌhui lyoo ñi
\p
\v 21 Siꞌi nchgaa nu nchcuiꞌ: Ñi Xꞌnan hua, Ñi Xꞌnan hua, tca sten seꞌen ndlo Ndiose tñan, cuiꞌ ca nu tsalca nu nducua tñan ñaꞌan nu nchca tiꞌ Stin, ñi nu nducua niꞌ cuaan.
\v 22 Quiꞌan ꞌa nu chcuiꞌ loꞌon tiyaa xaa, loꞌ ljuin: Ñi Xꞌnan hua, Ñi Xꞌnan hua, ¿ta siꞌi loꞌo chaꞌ cuiyaꞌ ꞌin um mdaꞌan ycuiꞌ hua chaꞌ tsuꞌhue re? ¿Ta siꞌi loꞌo chaꞌ cuiyaꞌ ꞌin um ngulo hua cuiꞌin xaꞌan nu ntsuꞌhui ꞌin nten? ¿A cunta mꞌni hua scasca chaꞌ nu tnu loꞌo chaꞌ cuiyaꞌ ꞌin um?
\v 23 Xacanꞌ xcuen ꞌin canꞌ: —A siyaꞌ yuꞌhui lyoon ꞌin um, tyiꞌo tsoꞌ um siinꞌ, ꞌun nu nguiꞌni tñan ngunanꞌ—.
\s Chaꞌ ꞌin suun tucua naꞌan
\p
\v 24 Nu quine ꞌin chaꞌ nu nchcuinꞌ re, loꞌ ca jaꞌan ꞌin na, nguiaa chaꞌ ꞌin canꞌ tsañaꞌan nguiaa chaꞌ ꞌin sca nten nu mdiꞌin tyaa suun naꞌan ꞌin loo quee nu tla.
\v 25 Mdyisnan nguꞌya quioo loꞌ ycuen yla chco tlyu, a cunta yaan cuiꞌin tnu nu mdijin seꞌen nducua naꞌan canꞌ, una a mdlyu na siꞌyana tsuꞌhue mdiꞌin suun na chonꞌ quee canꞌ.
\v 26 Una nu quine ꞌin chaꞌ nu nchcuinꞌ re, loꞌ a ca jaꞌan ꞌin na, nguiaa chaꞌ ꞌin canꞌ ñaꞌan chaꞌ ꞌin nten nu ndiya lyijyi chaꞌ tiyaa ꞌin, nu mdiꞌin tyaa suun naꞌan ꞌin loo ysin.
\v 27 Mdyisnan nguꞌya quioo loꞌ ycuen yla chco tlyu, yaan cuiꞌin tnu loꞌ mxitlyu ꞌin na, loꞌ ñaꞌaan na ꞌin yu ngujlyo na.
\v 28 Xa mdyi ycuiꞌ Jesús chaꞌ canꞌ, lyee ꞌa yuhue tiꞌ neꞌ ñaꞌan chaꞌ nu ndloꞌo ñi,
\v 29 siꞌyana loꞌo chaꞌ cuiyaꞌ ndloꞌo ñi, loꞌ siꞌi ñaꞌan ndloꞌo neꞌ escriba. 
\c 8
\s Yu ncua tiꞌi loꞌo quitsoꞌ la
\p
\v 1 Xa mdoꞌo Jesús loo quiꞌya lyoꞌ ti canꞌ, quiꞌan ꞌa nten mducui nchaꞌan ꞌin ñi.
\v 2 Xacanꞌ yaan sca yu nu nguxen quitsoꞌ la ꞌin seꞌen ndon ñi, loꞌ mdyiꞌya xtyinꞌ yu tloo ñi loꞌ juin yu: Ñi Xꞌnan hua, chaꞌ nchca tiꞌ um tca cuꞌni chca um ꞌñan.
\v 3 Jesús mxñii ñi yaaꞌ ñi loꞌ ylaꞌ ñi ꞌin yu, loꞌ juin ñi: Nchca tinꞌ cuꞌni chcan ꞌin, quinu luhui loꞌo quicha cua ꞌin. Ticuiꞌ xaa ngulyijyi quitsoꞌ la canꞌ ꞌin yu.
\v 4 Xacanꞌ juin Jesús ꞌin yu: Ñaꞌan jan ñi, a chcuiꞌ loꞌo ñi sca tucui, cuiꞌ ca nu tsaa loꞌ culoꞌo ꞌin tloo yu nu ntsuꞌhui cunta chaꞌ ꞌin laa, loꞌ taa sca lcuan tsañaꞌan nu ngulo Moisé tñan, cuañaꞌan ca jlyo tiꞌ nten siꞌyana cuaꞌ mchca.
\s Xa mchca nguso ꞌin xꞌnan sindatu
\p
\v 5 Xa mdiyaa Jesús tuꞌhua quichen Capernaum, sca xꞌnan sindatu yan ycua ꞌin ñi, loꞌ mdyisnan mjñan yu chaꞌ tsuꞌhue ꞌin ñi,
\v 6 loꞌ juin yu: Ñi Xꞌnan hua, sca yu nguso ꞌñan nscua yu la naꞌan ꞌñan, tiꞌi ꞌa ndijin yu loꞌ a nchca tyiꞌan yu.
\v 7 Xacanꞌ mxcuen Jesús ꞌin yu: Nanꞌ tsaꞌan loꞌ cuꞌni chcan ꞌin yu.
\v 8 Xꞌnan sindatu canꞌ mxcuen ꞌin ñi: Ñi Xꞌnan hua, a ntsuꞌhui suun ꞌñan sten um ñaꞌan ꞌñan, tsaloo ti chcuiꞌ um sca chaꞌ loꞌ chca nguso ꞌñan.
\v 9 Siꞌyana loꞌon nanꞌ ntsuꞌhui nu ndlo tñan ꞌñan, a cunta ndlon tñan ꞌin sca ta sindatu, loꞌ chaꞌ cunen loꞌo sca yu: Nde seꞌen tsaa, loꞌ tsaa yu. Chaꞌ cunen loꞌo xca yu: Quiaan nde re, loꞌ quiaan yu. Chaꞌ chcuinꞌ loꞌo nguso ꞌñan: Nde tñan cuꞌni, loꞌ cuꞌni yu ꞌin na.
\v 10 Xa ngune ꞌin Jesús chaꞌ canꞌ, yuhue ꞌa tiꞌ ñi loꞌ juin ñi ꞌin nten nu ndaꞌan nchaꞌan ꞌin ñi: Nu chaꞌ ñi cunen loꞌo um, ñi sca neꞌ Israel, loꞌ a ndiyaa neꞌ cuiyaꞌ tsañaꞌan ndiya quiꞌan tiꞌ yu re ꞌñan.
\v 11 Cunen loꞌo um sca chaꞌ, quiꞌan ꞌa neꞌ nu ntsuꞌhui chaꞌ tyiꞌo luhuaꞌ seꞌen nchcua cucha, loꞌo luhuaꞌ seꞌen nguiaa cucha, canꞌ nu chcua sca seꞌen ti loꞌo Abraham, loꞌo Isaac, loꞌo Jacob la niꞌ cuaan seꞌen ndlo Ndiose tñan.
\v 12 Una nu ntsuꞌhui ca chaꞌ quiꞌni caꞌan ꞌin seꞌen ndlo Ndiose tñan, canꞌ nu tsatoꞌo quinu nde lyiyaꞌ seꞌen tla yta, loꞌ xiꞌya yja cueen canꞌ loo nu lyee tyijyin nu tiꞌi.
\v 13 Xacanꞌ juin Jesús ꞌin xꞌnan sindatu canꞌ: Quia lya, loꞌ tsatoꞌo ñaꞌan nu ndiya quiꞌan tiꞌ. Ticuiꞌ xaa mchca nguso ꞌin yu.
\s Xa mchca jyiꞌan laa yu Tyo
\p
\v 14 Mdiyaa Jesús la naꞌan ꞌin yu Tyo, loꞌ naꞌan ñi siꞌyana jyiꞌan laa yu nscua tiꞌi loꞌo tiqueꞌ.
\v 15 Ylaꞌ ñi yaaꞌ, loꞌ cuiꞌ xaa mdyiꞌo tiqueꞌ canꞌ, mdyiton neꞌ loꞌ mdyisnan mꞌni cunta neꞌ ꞌin jun.
\v 16 Xa nguꞌya tla mdyisnan mdiyan loꞌo neꞌ quiꞌan ꞌa nu ntsuꞌhui cuiꞌin xaꞌan ꞌin seꞌen ndon ñi, loꞌ ngulo ñi cuiꞌin xaꞌan canꞌ siꞌya chaꞌ nu ycuiꞌ ñi, loꞌ mꞌni chca ñi ꞌin nchgaa nu tiꞌi,
\v 17 siꞌyana chcua chaꞌ nu mxiycuiꞌ Ndiose ꞌin yu Isaía xa juin yu: —Cuiꞌ ñi nguꞌya ñi quicha ꞌin na, loꞌ mdijin ñi nu tiꞌi tñan loo na—.
\s Chaꞌ ꞌin nu ncua tiꞌ chcui nchaꞌan ꞌin Jesús
\p
\v 18 Naꞌan Jesús siꞌyana quiꞌan ꞌa nten msuꞌhua loꞌo ꞌin ñi, canꞌ chaꞌ mdiꞌin tyaa ñi chaꞌ siꞌyana tyijyin xiꞌyu jun xca tsoꞌ tiyoꞌ.
\v 19 Yaan sca yu escriba seꞌen ndon ñi loꞌ juin yu ꞌin ñi: ꞌUn ñi nu lca Bstro, chcui nchaꞌan ꞌin um nchgaa seꞌen tsaa um.
\v 20 Mxcuen Jesús ꞌin yu: Sca cutaꞌ nducua tyi ꞌin, cuiꞌ cuañaꞌan quiñi ntsuꞌhui ten ꞌin, una Yu Quiꞌyu nu Mdoꞌo nde niꞌ Cuaan, a ndyijyi seꞌen nxitñanꞌ yu.
\v 21 Xca yu nu nducui nchaꞌan ꞌin ñi juin yu ꞌin ñi: Ñi Xꞌnan hua, taa um chaꞌ cuiyaꞌ quia tsinꞌ ꞌin stin culo nducua la.
\v 22 Mxcuen Jesús ꞌin yu: Chcui nchaꞌan ꞌñan, siꞌyana a sꞌnan nu chuꞌhui yuhueꞌ tiꞌ cutsiꞌ ꞌin nu cuaꞌ ngujui.
\s Mꞌni Jesús chaꞌ ngulyijyi quio cuiꞌin
\p
\v 23 Ñaꞌaan yten Jesús niꞌ yca naꞌan, cuaꞌ loꞌo yu taꞌa ndaꞌan ñi yten ꞌin na.
\v 24 Cuiꞌ xaa ti canꞌ yaan sca quio cuiꞌin tnu, loꞌ mdyisnan nguitsa tiyoꞌ canꞌ, mdyiton sten na loꞌ nchoꞌo tiꞌin na ꞌin yca naꞌan canꞌ, una Jesús nscua ljaꞌ ñi.
\v 25 Yu taꞌa ndaꞌan ñi ngulyoo sla ñi loꞌ juin ꞌin ñi: ¡Ñi Xꞌnan hua, culo laa um ꞌin hua, cuaꞌ quityinꞌ yuꞌhui ti na!
\v 26 Juin ñi ꞌin yu: ¿Ñi chaꞌ ta nguitsen um, ta joꞌo ꞌa ndiya quiꞌan tiꞌ um? Xacanꞌ mdyiton ñi, loꞌ ngusun loꞌo ñi ꞌin cuiꞌin canꞌ loꞌo tiyoꞌ canꞌ, loꞌ cuiꞌ xaa mdiꞌin tiin na.
\v 27 Ndyijyin yaꞌ yuhue tiꞌ yu taꞌa ndaꞌan ñi loꞌ juin yu: ¿Tucui ca lca ñi re, ñi chaꞌ hasta cuiꞌin loꞌo tiyoꞌ re, loꞌ jaꞌan na ꞌin ñi?
\s Xa mchca yu Gadara
\p
\v 28 Xa mdiyaa jun xca tsoꞌ tiyoꞌ canꞌ seꞌen lca loo yuu ꞌin neꞌ Gadara, yan ycua tucua yu nu ntsuꞌhui cuiꞌin xaꞌan ꞌin, nu mdoꞌo niꞌ lyiꞌo seꞌen nguitsiꞌ nten, ndyijyin cuiyaꞌ la yu, ñi a tucui ꞌa xtyi tiꞌ tyijyin tucueen canꞌ.
\v 29 Ycuiꞌ cueen yu: Jesús, ꞌun ñi nu lca Sñeꞌ Ndiose, ¿ñi chaꞌ ljyan taa um chaꞌ nsinꞌ tiꞌ ꞌin hua? ¿Ta na ljyaan um xitijin um ꞌin hua nu tiꞌi, loꞌ na tiꞌ lyijyi tiyaa xaa ꞌin hua?
\v 30 Cuaꞌ tijyoꞌ chinꞌ ndaꞌan nan ycu sca ta tlyu cuhueꞌ.
\v 31 Cuiꞌin xaꞌan canꞌ mjñan chaꞌ tsuꞌhue ꞌin ñi, loꞌ juin: Chaꞌ ntsuꞌhui tiquee um culo um ꞌin hua, una taa um chaꞌ cuiyaꞌ sten hua ꞌin cuhueꞌ cua.
\v 32 Mxcuen ñi ꞌin: Yaa um. Cuiꞌ xaa mdoꞌo cuiꞌin xaꞌan canꞌ loꞌ yten seꞌen ndiꞌin cuhueꞌ canꞌ, cuiꞌ ñaꞌan lcaa mdoꞌo ꞌin msnan ꞌin, loꞌ tsatlyu mxityu loo ꞌin loo tiyoꞌ canꞌ, canꞌ ngujui yuꞌhui ꞌin.
\v 33 Yu nu naꞌan seen ꞌin ꞌin, msnan yu nguiaa yu nde quichen, mdaa yu suun chaꞌ nu yatoꞌo, loꞌo chaꞌ ꞌin yu nu ntsuꞌhui cuiꞌin xaꞌan canꞌ ꞌin.
\v 34 Ñaꞌaan quichen neꞌ ya ycua neꞌ ꞌin Jesús. Loꞌ xa naꞌan neꞌ ꞌin ñi, mjñan neꞌ chaꞌ tsuꞌhue ꞌin ñi siꞌyana xitucui ñi nde seꞌen mdoꞌo ñi. 
\c 9
\s Xa mchca sca yu nu a nchca tyiꞌan
\p
\v 1 Xacanꞌ yten ñi niꞌ yca naꞌan canꞌ, mdyiꞌo caꞌan ñi xca tsoꞌ loꞌ nguila ñi quichen seꞌen ndiꞌin ñi.
\v 2 Yatoꞌo mdiyan loꞌo neꞌ sca yu tiꞌi nscua loo quiꞌñan seꞌen ndon ñi, loꞌ a nchca tyiꞌan yu. Xa naꞌan Jesús siꞌyana lyee ndiya quiꞌan tiꞌ yu nu ndiya loꞌo ꞌin nu tiꞌi canꞌ, xacanꞌ juin ñi ꞌin nu tiꞌi canꞌ: Sñenꞌ, cuꞌni tnu tiquee, cuaꞌ nguten quiꞌya ꞌin.
\v 3 Lja canꞌ nducua tucua snan neꞌ escriba, loꞌ ñan tiꞌ neꞌ: Yu re, nchcuiꞌ caꞌan yu ꞌin Ndiose.
\v 4 Jesús, cuiꞌ xaa ngujlyo tiꞌ ñi ñaꞌan chaꞌ nu ñan tiꞌ neꞌ, loꞌ juin ñi ꞌin neꞌ: ¿Ñi chaꞌ ñan tiꞌ cusya ꞌin um chaꞌ ngunanꞌ?
\v 5 ¿Ti ñaꞌan ta chaꞌ a tucui la chcuinꞌ loꞌo yu tiꞌi re: Ta cunen loꞌo yu, cuaꞌ nguten quiꞌya ꞌin, uta na cunen loꞌo yu, tyiton, xñi sꞌñan loꞌ quiaa?
\v 6 Ca jlyo tiꞌ um siꞌyana loꞌon nanꞌ, Yu Quiꞌyu nu Mdoꞌo nde niꞌ Cuaan, ntsuꞌhui chaꞌ cuiyaꞌ ꞌñan xicuten quiꞌya ꞌin nten, (xacanꞌ juin ñi ꞌin yu tiꞌi canꞌ): Tyiton, xñi sꞌñan loꞌ quiaa nde ñaꞌan ꞌin.
\v 7 Cuiꞌ xaa mdyiton yu tiꞌi canꞌ, loꞌ nguiaa yu nde ñaꞌan ꞌin yu.
\v 8 Xa naꞌan neꞌ chaꞌ nu yatoꞌo, ndyijyin yaꞌ yuhue tiꞌ ne loꞌ mꞌni tnu neꞌ ꞌin Ndiose, siꞌyana tsacua ñaꞌan chaꞌ cuiyaꞌ mdaa ñi ꞌin nten chendyu.
\s Xa msiꞌya Jesús ꞌin yu Mateo
\p
\v 9 Xacanꞌ mdoꞌo Jesús nguiaa ñi, seꞌen mdijin ñi, canꞌ naꞌan ñi sca yu naan Mateo, nducua yu seꞌen nsuꞌhua lyiyaꞌ nten tñi, loꞌ juin ñi ꞌin yu: Chcui nchaꞌan ꞌñan. Cuiꞌ xaa mdyiton yu loꞌ mducui nchaꞌan yu ꞌin ñi.
\v 10 Yatoꞌo sca tsaan mdiyaa ñi sca naꞌan, loꞌ yten tucua ñi tuꞌhua msa loꞌo yu taꞌan ndaꞌan ñi, a cunta quiꞌan nu mdiya tiꞌin canꞌ, neꞌ nducunꞌ loꞌo yu nu ndlo tñi, tsatlyu mducua neꞌ loꞌo Jesús.
\v 11 Xa naꞌan neꞌ fariseo chaꞌ re, juin neꞌ ꞌin yu taꞌa ndaꞌan ñi: ¿Ñi chaꞌ sca seꞌen ti nchcu yu nu lca Bstro ꞌin um loꞌo yu nducunꞌ, loꞌo yu nu ndlo tñi?
\v 12 Xa ngune ꞌin Jesús chaꞌ nu ycuiꞌ neꞌ, xacanꞌ juin ñi: Nten nu tsuꞌhue lca ꞌin, a ꞌni chaꞌ ꞌin neꞌ loꞌo nu nꞌni rmiyu, una nu tiꞌi canꞌ nu ꞌni chaꞌ ꞌin.
\v 13 Quia nan um chaꞌ tiyaa ꞌin um ñi chaꞌ nchca tiꞌ chcuiꞌ chaꞌ re: —Chaꞌ tsuꞌhue nu tyiꞌo niꞌ cusya ꞌin um nchca tinꞌ, loꞌ siꞌi nu tiquin tucua um ꞌni tloon—. Siꞌyana a ljyan nan ꞌin nten nu cuaꞌ lca tsuꞌhue, cuiꞌ ca nu ꞌin nten nu nguiꞌni quiꞌya, siꞌyana xiloꞌo chonꞌ neꞌ chaꞌ ngunanꞌ ꞌin neꞌ.
\s Chaꞌ ꞌin neꞌ nu nꞌni ayuna
\p
\v 14 Yatoꞌo sca tsaan mdiyaa tucua snan taꞌa ndaꞌan yu Xuhua, loꞌ mñichaꞌ yu ꞌin Jesús: ¿Ñi chaꞌ huareꞌ loꞌo neꞌ fariseo lyee ꞌa nꞌni hua ayuna, loꞌ yu taꞌa ndaꞌan um a nꞌni yu ayuna?
\v 15 Loꞌ juin Jesús ꞌin yu: ¿Ta tca tyiꞌin luꞌun tiꞌ nten nu ndiꞌin seꞌen ndyija cuilyiꞌo neꞌ, chaꞌ na tiꞌ nducua yu nu ndyija cuilyiꞌo canꞌ? Una tsa tucua tsaan, yu nu ndyija cuilyiꞌo canꞌ, a la ꞌa quine cueen yu, la xacanꞌ cuꞌni neꞌ ayuna.
\v 16 A tucui nu nxcuan suꞌhua sca teꞌ cula loꞌo tsa yuꞌhue teꞌ tiji, siꞌyana teꞌ tiji canꞌ xiyaꞌ na, loꞌ seꞌen mdaꞌ ꞌin na quita lyijyi na.
\v 17 Cuiꞌ cuañaꞌan a tucui nu nsuꞌhua vino nu cui ti niꞌ sca cuijyin quijyin nu cula, siꞌyana chaꞌ cuꞌni neꞌ cuañaꞌan, cutsu quijyin canꞌ loꞌ quilo vino canꞌ, a cunta jlyo quijyin canꞌ. Canꞌ chaꞌ nsuꞌhua neꞌ vino nu cui ti niꞌ sca cuijyin quijyin nu cui ti, loꞌ ñi sca na loꞌ a jlyo na xacanꞌ.
\s Chaꞌ ꞌin sñeꞌ Jairo loꞌo nu ylaꞌ steꞌ Jesús
\p
\v 18 Lja nu tiꞌ nchcuiꞌ ñi chaꞌ canꞌ mdiyaan sca yu nu ndon loo quichen canꞌ seꞌen ndon Jesús, mdyiꞌya xtyinꞌ yu tloo ñi loꞌ juin yu: Sca sñenꞌ nanꞌ nu cunaꞌan tca ngujui, cuꞌni um sca chaꞌ tsuꞌhue tsaa um loꞌ tyiꞌin tyaa um yaaꞌ um que, loꞌ tyiquiꞌo.
\v 19 Cuiꞌ xaa mdoꞌo Jesús nguiaa ñi loꞌo taꞌa ndaꞌan ñi la naꞌan ꞌin yu.
\v 20 Una nde chonꞌ ñi mducui nchaꞌan sca neꞌ cunaꞌan, nu cuaꞌ ntsuꞌhui tichcua yjan tiꞌi loꞌo quicha nguilo tne, cuiꞌ ti mdiyaa neꞌ loꞌ ylaꞌ neꞌ tuꞌhua steꞌ ñi,
\v 21 siꞌyana ndeñaꞌan ñan tiꞌ neꞌ: Si cuaꞌ tsuꞌhue steꞌ ti ñi culanꞌ, loꞌ chcan.
\v 22 Una Jesús mxiton ñi loꞌ naꞌan ñi ꞌin neꞌ, loꞌ juin ñi: Sñenꞌ, cuꞌni tnu tiquee, cuaꞌ mchca siꞌyana ndiya quiꞌan tiꞌ. Ticuiꞌ xaa canꞌ mchca neꞌ.
\v 23 Xa yten Jesús ñaꞌan ꞌin yu nu ndon loo canꞌ, naꞌan ñi siꞌyana cuaꞌ ndiꞌin yla yu cuhuii, a cunta quiꞌan nten cuaꞌ ndiꞌin canꞌ.
\v 24 Loꞌ juin ñi ꞌin neꞌ: Quia lya um, siꞌyana siꞌi na ngujui cuhuiꞌ re, na ljaꞌ ti cuhuiꞌ. Xacanꞌ mstyi lyiꞌo neꞌ ꞌin ñi.
\v 25 Xa cuaꞌ mꞌni ñi chaꞌ mdyiꞌo neꞌ nde lyiyaꞌ, yten ñi ñaꞌan, msñi ñi yaaꞌ cuhuiꞌ canꞌ, loꞌ cuiꞌ xaa mdyitucui cuhuiꞌ.
\v 26 Ñaꞌaan seꞌen canꞌ mscua cueen chaꞌ nu yatoꞌo.
\s Tucua yu cuityinꞌ nguila xaa quiloo
\p
\v 27 Xa mdoꞌo Jesús nguiaa ñi, tucua yu cuityinꞌ mducui nchaꞌan ꞌin ñi, msiꞌya yja cueen yu, loꞌ nchcuiꞌ yu: ꞌUn ñi nu lca Sñeꞌ ta nten ꞌin Davi, ñaꞌan ꞌtnan tiꞌ um ꞌin hua.
\v 28 Xa mxitucui ñi nde ñaꞌan, mdiya nchaꞌan yu cuityinꞌ canꞌ ꞌin ñi, loꞌ juin Jesús ꞌin yu: ¿Ta ndiya quiꞌan tiꞌ um siꞌyana tca cuꞌni chcan ꞌin um? Mxcuen yu: Ndiya quiꞌan tiꞌ hua, Ñi Xꞌnan hua.
\v 29 Xacanꞌ ylaꞌ ñi quiloo yu loꞌ juin ñi: Cuiꞌ tsañaꞌan ndiya quiꞌan tiꞌ um, loꞌ cuañaꞌan tsatoꞌo na.
\v 30 Cuiꞌ xaa nguila xaa quiloo yu. Una Jesús tla mdiꞌin tyaa ñi chaꞌ loꞌo yu loꞌ juin ñi: Ñaꞌan jan ñi, a chcuiꞌ um loꞌo ñi sca tucui chaꞌ re.
\v 31 Una xa mdoꞌo yu nguiaa yu, mdyisnan mꞌni cueen yu chaꞌ ꞌin ñi sca chcui seꞌen canꞌ.
\s Xa mchca sca yu cuꞌun
\p
\v 32 Ñaꞌaan mdoꞌo yu seꞌen canꞌ, cuaꞌ mdiyan loꞌo neꞌ sca yu cuꞌun nu ntsuꞌhui cuiꞌin xaꞌan ꞌin.
\v 33 Xa ngulo ñi cuiꞌin xaꞌan canꞌ, yu cuꞌun canꞌ cuiꞌ xaa mdyisnan ycuiꞌ yu. Ndyijyin yaꞌ yuhue tiꞌ nten loꞌ nchcuiꞌ neꞌ: Ñi siyaꞌ lya ñaꞌan na chaꞌ nu cuañaꞌan seꞌen lca Israel.
\v 34 Una neꞌ fariseo juin neꞌ: Loꞌo chaꞌ cuiyaꞌ ꞌin xꞌnan cuiꞌin xaꞌan, ndlo yu re cuiꞌin xaꞌan ntsuꞌhui ꞌin nten.
\s Ycuiꞌ Jesús siꞌyana quiꞌan tñan ndiꞌin
\p
\v 35 Jesús mdyisnan mdijin ñi scasca quichen tnu loꞌo quichen suhue ti, ndloꞌo ñi ꞌin nten seꞌen nꞌni tnu neꞌ ꞌin Ndiose, nchcuiꞌ ñi chaꞌ tsuꞌhue ꞌin ñi ñaꞌan ntsuꞌhui chaꞌ culo ñi tñan ꞌin nten, loꞌ nguiꞌni chca ñi ꞌin nchgaa nu tiꞌi loꞌo cuati loo quicha.
\v 36 Xa naꞌan ñi ꞌin nten quiꞌan canꞌ mñaꞌan ꞌtnan tiꞌ ñi ꞌin neꞌ, siꞌyana lca neꞌ ñaꞌan nchca tiꞌ slyaꞌ nu a ntsuꞌhui xꞌnan, sca nu cuaꞌ ñaꞌan ndaꞌan ti, loꞌ a tucui nu ntsuꞌhui cunta ꞌin.
\v 37 Xacanꞌ juin ñi ꞌin yu taꞌa ndaꞌan ñi: Nu chaꞌ ñi sꞌni, quiꞌan ꞌa tñan ndiꞌin loꞌ chinꞌ nguso ꞌñan.
\v 38 Canꞌ chaꞌ jñan um ꞌin ñi nu lca Xꞌnan tñan re, loꞌ caꞌan tñan ñi nguso ꞌin ñi loo xñan ñi. 
\c 10
\s Xa ngulohui Jesús ꞌin yu taꞌa tyiꞌan ñi
\p
\v 1 Xacanꞌ msiꞌya ñi ꞌin tsa tichcua yu nu ca taꞌa tyiꞌan ca ñi, loꞌ mdaa ñi chaꞌ cuiyaꞌ ꞌin yu siꞌyana culo yu cuiꞌin xaꞌan nu ntsuꞌhui ꞌin nten, loꞌ cuꞌni chca yu nchgaa nu tiꞌi loꞌo cuati loo quicha.
\v 2 Ndeñaꞌan naan taꞌa tichcua yu nu lca apóstol: Nu culoo canꞌ lca yu Simón nu nchcuiꞌ neꞌ loꞌo lca Tyo, loꞌo yu Ndre taꞌa ngula yu, loꞌo Jacobo loꞌo yu Xuhua, sñeꞌ Zebedeo,
\v 3 yu Lpe, yu Bartolomé, yu Toma, loꞌo Mateo nu ngulo tñi, yu Jacobo, sñeꞌ Alfeo, yu Lebeo nu nchcuiꞌ neꞌ loꞌo lca Tadeo,
\v 4 yu Simón nu lca neꞌ cananista, loꞌo yu Juda Iscariote, yu nu mdyaa ꞌin ñi.
\s Tsa tichcua yu nguaꞌan tñan Jesús
\p
\v 5 Tsa tichcua yu re nguaꞌan tñan Jesús ꞌin yu, loꞌ nguloꞌo ñi ꞌin yu ñaꞌan ntsuꞌhui chaꞌ cuꞌni yu, loꞌ juin ñi: A nchca chaꞌ tsaa um seꞌen ndiꞌin neꞌ gentil, ñi quichen Samaria loꞌ a sten um,
\v 6 cuiꞌ ca nu culo nducua la tsaa um loꞌo neꞌ Israel, cuiꞌ slyaꞌ nu ngunanꞌ yuꞌhui canꞌ.
\v 7 Cuaꞌ yaa ñaꞌan ndaꞌan um, chcuiꞌ um loꞌo neꞌ: Cuaꞌ nchcui cuiiꞌ chaꞌ culo Ndiose tñan ꞌin nten.
\v 8 Cuꞌni chca um nu tiꞌi, loꞌo nu ndon quitsoꞌ la ꞌin, xiquiꞌo um nu cuaꞌ ngujui, loꞌ culo um cuiꞌin xaꞌan nu ntsuꞌhui ꞌin nten. Chaꞌ tsuꞌhue nu cuaꞌ jui ꞌin um, cuiꞌ cuañaꞌan taa um ꞌin na ꞌin xca tucui.
\v 9 A nchca chaꞌ cuiꞌya um tñi,
\v 10 ñi cuijyin loꞌ a cuiꞌya um, ñi a cuiꞌya um xca ta steꞌ um, ñi quinan, ñi yca loꞌ a chcua yaaꞌ um, siꞌyana sca yu nu nꞌni tñan ntsuꞌhui suun ꞌin yu cu yu loo tñan nu nguiꞌni yu.
\v 11 Xa tiyaa um scasca quichen cunan um seꞌen quinu um, canꞌ quinu um tsalja tyiꞌin um quichen canꞌ.
\v 12 Chcuiꞌ chaꞌ um xa sten um naꞌan canꞌ.
\v 13 Chaꞌ nten canꞌ cuan xuꞌhue neꞌ ꞌin um, chcua tucui neꞌ chaꞌ tsuꞌhue, una chaꞌ a cuan xuꞌhue neꞌ ꞌin um, a chcua tucui neꞌ chaꞌ tsuꞌhue canꞌ.
\v 14 Chaꞌ siyaꞌ ti a cuan xuꞌhue neꞌ ꞌin um loꞌo chaꞌ nu nchcuiꞌ um, tyiꞌo um seꞌen canꞌ loꞌ scuin um yuu quiyaꞌ um, quinu cunta ꞌin neꞌ chaꞌ ndeꞌen la chaꞌ caan ꞌin neꞌ.
\v 15 Nu chaꞌ ñi cunen loꞌo um, xa cuꞌni Ndiose xñan bsya ꞌin nten chendyu, nten ndiꞌin quichen canꞌ, lyee la tyijyin neꞌ nu tiꞌi que ñaꞌan ntsuꞌhui chaꞌ tyijyin neꞌ Sodoma loꞌo Gomorra.
\s Tyijyin yu scasca chaꞌ siꞌya Jesús
\p
\v 16 Ñaꞌan jan ñi, nanꞌ caꞌan tñan ꞌin um tsaa um ñaꞌan nchca tiꞌ sca slyaꞌ lja ꞌni la, canꞌ chaꞌ tyiꞌan tiyaa um ñaꞌan ndaꞌan sca cunaan, loꞌ suun ñaꞌan cuꞌni um ꞌin um ñaꞌan nchca tiꞌ sca scunꞌ joꞌo.
\v 17 Xñi um cunta ꞌin um loꞌo nten, siꞌyana ntsuꞌhui chaꞌ tyaa neꞌ cunta ꞌin um tloo bsya, loꞌ jyiꞌin neꞌ ꞌin um seꞌen nꞌni tnu neꞌ ꞌin Ndiose.
\v 18 Loꞌ hasta tloo gubierno loꞌo ree ntsuꞌhui chaꞌ tyaa neꞌ cunta ꞌin um siꞌya chaꞌ ꞌñan, ñaꞌan ca siꞌyana taa um suun loꞌo canꞌ tsatlyu loꞌo neꞌ gentil ñaꞌan ndiꞌin chaꞌ ꞌñan.
\v 19 Xa tyaa neꞌ cunta ꞌin um tloo bsya, a chuꞌhui yuhue tiꞌ um ñaꞌan ntsuꞌhui chaꞌ xcuen um, loꞌ ñi chaꞌ nu chcuiꞌ um, siꞌyana lja xacanꞌ caja chaꞌ nu chcuiꞌ um,
\v 20 una siꞌi loꞌo chaꞌ tiyaa ꞌin um, cuiꞌ ca nu Espíritu ꞌin Stina Ndiose xiycuiꞌ ꞌin um xacanꞌ.
\v 21 A cunta yu quiꞌyu ntsuꞌhui chaꞌ tyaa yu ꞌin taꞌa ngula yu seꞌen caja nu cujui ꞌin, cuiꞌ cuañaꞌan tyaa neꞌ ꞌin sñeꞌ neꞌ, loꞌ sñeꞌ neꞌ ca tiꞌi tiꞌ ꞌin neꞌ loꞌ tyaa canꞌ ꞌin nten cula ꞌin seꞌen caja nu cujui ꞌin.
\v 22 Nchgaa tucui ntsuꞌhui chaꞌ xcuan tloo ꞌin um siꞌya chaꞌ ꞌñan, una nu ta loo tsayaꞌ tsatii chaꞌ nu nchca loo chendyu re, canꞌ nu tyiꞌo laa.
\v 23 Xa tyisnan cuꞌni lyiꞌo neꞌ ꞌin um quichen seꞌen tiyaa um, tsaa um xca quichen. Nu chaꞌ ñi cunen loꞌo um, ñi a nchca tyiꞌo yso um ñaꞌaan seꞌen lca Israel, xa quiaan Yu Quiꞌyu nu Mdoꞌo nde niꞌ Cuaan xiyaꞌ.
\v 24 Sca nu nguiꞌni chaꞌan, a ndon loo la que ꞌin nu ndloꞌo ꞌin, cuiꞌ cuañaꞌan loꞌo sca nguso, a ndon loo la que ꞌin xꞌnan.
\v 25 Nu nguiꞌni chaꞌan canꞌ, quinu tsuꞌhue tiquee ca ñaꞌan nchca tiꞌ nu ndloꞌo ꞌin, cuiꞌ cuañaꞌan nguso canꞌ, quinu tsuꞌhue tiquee ca ñaꞌan nchca tiꞌ xꞌnan. Ñi nu lca xꞌnan jun nu ndiꞌin sca naꞌan, chaꞌ ndloꞌo naan neꞌ ꞌin lca Beelzebú, xꞌnan cuiꞌin xaꞌan, ¿ñaꞌan la ca ljuin um ꞌin nchgaa la ñaꞌan jun nu ndiꞌin naꞌan canꞌ?
\s Chuꞌhui sca ytsen ꞌin na loꞌo Ndiose
\p
\v 26 Canꞌ chaꞌ a cutsen um ꞌin nten, siꞌyana a sca chaꞌ nu nchca cunan ti, ta a ca chcanꞌ loo na, loꞌ nchgaa na nu nchca cutsiꞌ ti, ndyiꞌo yne chaꞌ ꞌin na.
\v 27 Chaꞌ nu chcuinꞌ loꞌo um seꞌen tla, chcuiꞌ la um ꞌin na cucha xaa, chaꞌ nu ngune ꞌin um cunan ti, tca chcuiꞌ cueen um ꞌin na sca seꞌen la.
\v 28 A cutsen um ꞌin nu ndujui nten, siꞌyana a loꞌo cusya ꞌin um tca cujlyo canꞌ, cuiꞌ ca nu cutsen um ꞌin ñi nu tca suꞌhua ꞌin um loꞌo cusya ꞌin um loo quiiꞌ.
\v 29 ¿Ta siꞌi loꞌo jacua tñi ti nxiꞌi neꞌ tucua quiñi? Siyaꞌ cuañaꞌan, loꞌ a caja chaꞌ cuiyaꞌ tyu ꞌin, chaꞌ siꞌi siꞌya chaꞌ cuiyaꞌ ꞌin Stina Ndiose.
\v 30 Hasta quichanꞌ que um, loꞌ cuaꞌ lca ncua na ꞌin ñi.
\v 31 Canꞌ chaꞌ a suꞌhua um chaꞌ tiquee um, siꞌyana quiꞌan la ntsuꞌhui lyoo um que ꞌin quiꞌan quiñi.
\v 32 Ñaꞌan nu ti nu cuan xuꞌhue ꞌñan, cuiꞌ cuañaꞌan cuan xuꞌhuen ꞌin canꞌ tloo Stin, ñi nu nducua niꞌ cuaan.
\v 33 Una nu xcuan tloo ꞌñan, cuiꞌ cuañaꞌan xcuan tloon ꞌin canꞌ tloo Stin, ñi nu nducua niꞌ cuaan.
\s Tyiꞌin cusuun nten siꞌya chaꞌ ꞌin Jesús
\p
\v 34 A quiñan tiꞌ um ta siꞌyana ljyaan, canꞌ chaꞌ tyiꞌin tsuꞌhue nten, cuiꞌ ca nu siꞌya chaꞌ ꞌñan tyisnan xuun neꞌ.
\v 35 Cuañaꞌan tsatoꞌo —yu quiꞌyu xuun yu loꞌo sti yu, neꞌ cunaꞌan xuun neꞌ loꞌo jyiꞌan neꞌ, cuiꞌ cuañaꞌan neꞌ cunaꞌan xuun neꞌ loꞌo jyiꞌan laa neꞌ,
\v 36 ticuiiꞌ jun nu ndiꞌin naꞌan chca taꞌa cusuun jun—.
\v 37 Nu lyee la nsuꞌhua loo ꞌin sti loꞌo jyiꞌan que ꞌñan nanꞌ, a tca chcui nchaꞌan ꞌñan. Cuiꞌ cuañaꞌan nu lyee la nsuꞌhua loo ꞌin sñeꞌ yu quiꞌyu uta nu cunaꞌan que ꞌñan nanꞌ, a tca chcui nchaꞌan ꞌñan.
\v 38 Chaꞌ a cuaꞌ mꞌni tiquee canꞌ tyaa ꞌin siyaꞌ ti siꞌya chaꞌ ꞌñan, a tca chcui nchaꞌan ꞌñan.
\v 39 Siꞌyana nchgaa nu ñan tiꞌ culo laa ꞌin ticuiiꞌ, tsatoꞌo quinanꞌ canꞌ tiyaa xaa, una nchgaa nu tyaa cusya ꞌin ꞌñan, canꞌ nu tyiꞌo laa.
\s Ntsuꞌhui xuꞌhue na siꞌya tñan nguiꞌni na
\p
\v 40 Nu cuan xuꞌhue ꞌin um, loꞌo ꞌñan nanꞌ cuan xuꞌhue canꞌ, loꞌ nu cuan xuꞌhue ꞌñan, cuiꞌ cuañaꞌan cuan xuꞌhue ꞌin ñi nu nguaꞌan tñan ꞌñan.
\v 41 Nu cuan xuꞌhue ꞌin sca nu ndaꞌan ycuiꞌ chaꞌ ꞌin Ndiose, siꞌya chaꞌ ꞌñan, scañaꞌan ti quiꞌni caꞌan chaꞌ tsuꞌhue ꞌin loꞌo nu nchcuiꞌ canꞌ. Nu cuan xuꞌhue ꞌin sca nu nguiꞌni tñan tsuꞌhue, siꞌya chaꞌ ꞌñan, scañaꞌan ti quiꞌni caꞌan chaꞌ tsuꞌhue ꞌin loꞌo nu nguiꞌni tñan canꞌ.
\v 42 Ñaꞌan tucui ti nu taa siyaꞌ sca vaso ti tyiꞌa coꞌo nu joꞌo la ndiꞌin chaꞌ ꞌin re, cuiꞌ siꞌyana nguiꞌni chaꞌan ꞌñan, nu chaꞌ ñi cunen loꞌo um, a quinanꞌ xuꞌhue ntsuꞌhui ꞌin canꞌ. 
\c 11
\s Chaꞌ ꞌin taꞌa mdaꞌan yu Xuhua mducua tya nten
\p
\v 1 Xa mdyi chaꞌ nu nguloꞌo Jesús ꞌin tsa tichcua yu taꞌa ndaꞌan ñi, mdoꞌo ñi seꞌen canꞌ, nguiaa ñi scasca quichen, nguloꞌo ñi loꞌ ycuiꞌ ñi chaꞌ tsuꞌhue ꞌin Ndiose.
\v 2 Tiꞌ seꞌen ntsuꞌhui yu Xuhua naꞌan chcuan ynan yu chaꞌ nchgaa tñan nu nguiꞌni Cristo, xacanꞌ nguaꞌan tñan yu tucua taꞌa ndaꞌan yu seꞌen ndlyu ñi.
\v 3 Nde chaꞌ nu mñichaꞌ yu ꞌin ñi: ¿Ta cuiꞌ um lca um ñi nu ntsuꞌhui chaꞌ caan, uta na quita na ꞌin xca tucui?
\v 4 Xacanꞌ mxcuen Jesús ꞌin yu: Quia ytsaꞌ um ꞌin yu Xuhua nchgaa chaꞌ nu ngune ꞌin um loꞌ naꞌan um cuaꞌ ñii:
\v 5 —Nu cuityinꞌ nguila xaa quiloo, nu coꞌ quiyaꞌ nchca ndyiꞌan—, nu tiꞌi loꞌo quitsoꞌ la nguinu luhui canꞌ, —loꞌo nu cuꞌun cuaꞌ ne ꞌin—, loꞌ nu ngujui ndyiquiꞌo, —loꞌ nu tiꞌi ñaꞌan chendyu ꞌin ndyijyi nu nchcuiꞌ chaꞌ tsuꞌhue ꞌin Ndiose loꞌo—.
\v 6 Tsuꞌhue ca xuꞌhue nu a nguiꞌni tucua tiꞌ loꞌon.
\v 7 Xa mdoꞌo nu nguaꞌan tñan yu Xuhua canꞌ nguiaa, xacanꞌ mdyisnan ycuiꞌ Jesús loꞌo nten canꞌ chaꞌ ꞌin yu Xuhua, loꞌ juin ñi: ¿Ñi na ya nanꞌ ꞌya um seꞌen ngutyi cua? ¿Ta cuiꞌ ꞌin quii nu mcha tiꞌin cuiꞌin canꞌ?
\v 8 Chaꞌ siꞌi, ¿ñi na ta nanꞌ ꞌya um xacanꞌ? ¿Ta cuiꞌ ꞌin sca yu quiꞌyu nu lcoꞌ teꞌ tsuꞌhue ñaꞌan? Ñaꞌan jan ñi, nu lcoꞌ teꞌ tsuꞌhue ñaꞌan, canꞌ nu ndiꞌin naꞌan ꞌin ree.
\v 9 ¿Tucui naꞌan um chaꞌ na canꞌ? ¿Ta sca nu nxiycuiꞌ Ndiose ꞌin? Cuiꞌ yu, una cunen loꞌo um sca chaꞌ: Ndon loo la canꞌ que ꞌin sca nu nxiycuiꞌ Ndiose ꞌin.
\v 10 Ndeñaꞌan nguinu scua sca chaꞌ loo quityi chaꞌ ꞌin yu Xuhua: —Ñaꞌan jan ñi, caꞌan tñan ꞌin sca nu chcua loo, cuꞌni chuꞌhue tucueen nu tsaa—.
\v 11 Ñaꞌan jan ñi, tsalca nten nu cuaꞌ mdiyaan loo chendyu re, ñi sca yu nu mxiycuiꞌ Ndiose ꞌin, loꞌ a ndon loo la canꞌ que ñaꞌan Xuhua nu mducua tya ꞌin nten. Una cuaꞌ ñii tsañaꞌan nu ndlo Ndiose tñan ꞌin nten, nu chinꞌ la chaꞌ ꞌin, canꞌ nu ndon loo la que ñaꞌan chaꞌ ꞌin yu Xuhua.
\v 12 Tiꞌ tsaan nu mdaꞌan yu Xuhua mducua tya ꞌin nten hasta cuaꞌ ñii, tsañaꞌan ntsuꞌhui chaꞌ culo Ndiose tñan ꞌin nten, ljyan nguilo na loꞌo sca chaꞌ cuiyaꞌ nu tlyu, loꞌ tsalca ti nu tnu tiquee nguiten loo chaꞌ canꞌ.
\v 13 Siꞌyana nchgaa yu nu mxiycuiꞌ Ndiose ꞌin cuaꞌ sꞌni loꞌo chaꞌ ꞌin lee nu nguinu scua, nchcuiꞌ siꞌyana cuañaꞌan tsatoꞌo tsaan nu caan yu Xuhua.
\v 14 Chaꞌ nchca tiꞌ um cuan xuꞌhue um chaꞌ re, yu Xuhua canꞌ ca lca yu Elía nu ntsuꞌhui chaꞌ caan, tsañaꞌan chaꞌ nu nguinu scua.
\v 15 Nchgaa nu ndon nscan chaꞌ nu ycuinꞌ re cuꞌni cunta ꞌin na.
\v 16 ¿Ñaꞌan ta chaꞌ nu tca tyiꞌin tyaan loꞌo ta nten re ñaꞌan nu nguiaa chaꞌ ꞌin neꞌ? Nguiaa chaꞌ ꞌin neꞌ re, ñaꞌan chaꞌ ꞌin nu suhue ti nu ndiꞌin loquiyaꞌ loꞌ nxiꞌya taꞌa,
\v 17 loꞌ nchcuiꞌ: Yla hua cuhuii quii, loꞌ a yla quiyaꞌ um, yla hua jyiin nu nguitsiꞌ nten, loꞌ ñi a mdiꞌin ynan um.
\v 18 Xa mdiyaan yu Xuhua nu mducua tya nten, loꞌ siꞌyana a ycu yu ñi a yiꞌo yu, canꞌ chaꞌ juin um: Cuiꞌin xaꞌan ntsuꞌhui ꞌin yu.
\v 19 Cuaꞌ ñii mdiyaan Yu Quiꞌyu nu Mdoꞌo nde niꞌ Cuaan, loꞌ siꞌyana nchcu yu loꞌ ndyiꞌyo yu, canꞌ chaꞌ nchcuiꞌ um: Yu re lca yu sca nu tucunꞌ loꞌo chaꞌ nchcu, yu cuꞌhui, loꞌ taꞌa tsuꞌhue yu ꞌin nu ndlo tñi loꞌo nu nducunꞌ. Siꞌya chaꞌ tiyaa nu ñi nchca chcanꞌ loo scasca tñan nu tsuꞌhue.
\s Caan yuhueꞌ ꞌin nten nu mscuan tloo ꞌin Jesús
\p
\v 20 Xacanꞌ mdyisnan ngusun loꞌo ñi ꞌin scasca quichen seꞌen mꞌni ñi chaꞌ nu tnu, siꞌyana a mslyaa neꞌ xiloꞌo chonꞌ neꞌ quiꞌya ꞌin neꞌ, loꞌ juin ñi:
\v 21 ꞌTnan ca um, ꞌun nu ndiꞌin quichen Corazín, loꞌ ꞌtnan ca um, ꞌun nu ndiꞌin quichen Betsaida, tsala ñaꞌan chaꞌ nu tnu cuaꞌ mꞌnin tloo um, loꞌ chaꞌ cua na mꞌnin chaꞌ re nde quichen Tiro loꞌo Sidón, cuaꞌ sꞌni mxiloꞌo chonꞌ neꞌ quiꞌya ꞌin neꞌ, loꞌ ca chcanꞌ loo siꞌyana tiꞌi ngaꞌan ꞌin neꞌ loꞌo ñaꞌan nu nchcoꞌ neꞌ a cunta loꞌo ñaꞌan nu nꞌni neꞌ.
\v 22 Canꞌ chaꞌ cunen loꞌo um sca chaꞌ: Tsaan nu ntsuꞌhui chaꞌ ca xñan bsya ꞌin nten chendyu, lyee la tyijyin um nu tiꞌi que ñaꞌan nu tyijyin quichen Tiro loꞌo Sidón.
\v 23 A cunta ꞌun nu ndiꞌin quichen Capernaum, —xqueꞌ tiꞌ um siꞌyana cuaꞌ jui xuꞌhue um la niꞌ cuaan, una tiyaa xaa caja nu suꞌhua ꞌin um seꞌen ndyijyin neꞌ nu tiꞌi—, loꞌ chaꞌ cua na mꞌnin chaꞌ nu tnu quichen Sodoma tsañaꞌan nu mꞌnin seꞌen ndiꞌin um, quichen canꞌ tiꞌ ndiꞌin na hasta cuaꞌ ñii.
\v 24 Canꞌ chaꞌ xiyaꞌ cunen loꞌo um: Tsaan nu cuꞌni Ndiose xñan bsya ꞌin nten chendyu, lyee la tyijyin um nu tiꞌi que ñaꞌan tyijyin quichen Sodoma.
\s Nꞌni Jesús chaꞌ xitñanꞌ cusya ꞌin na
\p
\v 25 Ticuiꞌ xaa canꞌ mdyisnan ycuiꞌ ñi loꞌ juin ñi: Stina Ndiose, nanꞌ cuꞌnin tnun ꞌin um, ꞌun nu lca Xꞌnan niꞌ cuaan loꞌo chendyu re, siꞌyana msuꞌhua cutsiꞌ um chaꞌ re ꞌin nu tiyaa la loꞌo nu nxqueꞌ tiꞌ lyee la mꞌni chaꞌan, loꞌ ngulyo scua la um chaꞌ re loꞌo nu chinꞌ la chaꞌ ꞌin.
\v 26 Chaꞌ ñi, ꞌun ñi nu lca Stin, cuañaꞌan mdoꞌo tiquee um.
\v 27 Ñi nu lca Stin nchgaa loo chaꞌ mdyaa ñi cunta ꞌñan, loꞌ a tucui nu ndyuꞌhui lyoo ca ꞌin Sñeꞌ ñi, cuiꞌ ca nu scati Stina Ndiose, loꞌ a tucui nu ndyuꞌhui lyoo ca ꞌin Stina Ndiose, cuiꞌ ca nu scati Sñeꞌ ñi, a cunta culyo scua la canꞌ chaꞌ re loꞌo tsalca nu nchca tiꞌ.
\v 28 Quiaan um, nchgaa ꞌun nu cuaꞌ tñanꞌ loꞌ xiꞌin chendyu ꞌin, —loꞌ nanꞌ cuꞌni chaꞌ xitñanꞌ cusya ꞌin um—.
\v 29 Taa um yaꞌ ca sca chaꞌ ti ꞌñan loꞌo um, cuꞌni chaꞌan um ꞌñan, siꞌyana cuti cusya ꞌñan, suun ñaꞌan ndiꞌin chaꞌ ꞌñan, loꞌ xitñanꞌ cusya ꞌin um,
\v 30 siꞌyana a tucui tñan nu taan ꞌin um, loꞌ ñi a tiꞌin na.
\c 12
\s Xa mston yu juun trigo
\p
\v 1 Nu ncua sca tsaan, cuiꞌ tsaan nu nxitñanꞌ neꞌ judio, mdijin Jesús loꞌo yu taꞌa ndaꞌan ñi sca loo jyaan seꞌen nducua trigo, loꞌ siꞌyana nguiteꞌ tiꞌ yu, mston yu jun trigo canꞌ loꞌ ycu yu ꞌin na.
\v 2 Xa naꞌan tucua snan neꞌ fariseo ñaꞌan nguiꞌni yu, loꞌ juin neꞌ ꞌin ñi: Ñaꞌan jan ñi, xñi um cunta ñaꞌan nguiꞌni yu taꞌa ndaꞌan um, sca chaꞌ nu a ntsuꞌhui chaꞌ cuꞌni na tsaan nu nxitñanꞌ na.
\v 3 Mxcuen ñi ꞌin neꞌ: ¿Ta a nchca chcuiꞌ um seꞌen nchcuiꞌ chaꞌ ꞌin yu Davi ñaꞌan mꞌni yu xa nguteꞌ tiꞌ yu loꞌo yu taꞌa mdaꞌan yu?
\v 4 Yten yu seꞌen nꞌni tnu neꞌ ꞌin Ndiose, loꞌ ycu yu jaslya nu cuaꞌ ncuan ꞌin Ndiose, na nu a ntsuꞌhui chaꞌ cu yu, ñi loꞌo taꞌa ndaꞌan yu, cuiꞌ ca nu tsalca ti yu nu ntsuꞌhui cunta seꞌen canꞌ, tca cu yu ꞌin na.
\v 5 ¿Ta a nchca chcuiꞌ um seꞌen nguinu scua chaꞌ ꞌin lee canꞌ, siꞌyana yu nu ntsuꞌhui cunta seꞌen nꞌni tnu neꞌ ꞌin Ndiose nguiꞌni yu tñan tsaan nu nxitñanꞌ neꞌ, una a nducui yu quiꞌya siꞌya chaꞌ canꞌ?
\v 6 Una cunen loꞌo um sca chaꞌ, lja na re ndon sca nu ndon loo lati que chaꞌ ꞌin laa.
\v 7 Chaꞌ cua na ca cuiyaꞌ tiꞌ um, ñi chaꞌ nchca tiꞌ chcuiꞌ sca chaꞌ nu cuaꞌ nguinu scua loo quityi: —Chaꞌ tsuꞌhue nu tyiꞌo niꞌ cusya ꞌin um nchca tinꞌ, loꞌ siꞌi nu tiquin tucua um ꞌni tloon—. Chaꞌ cua na quiꞌya um cunta chaꞌ re, loꞌ a culo quiꞌya um ꞌin nu a mꞌni quiꞌya,
\v 8 siꞌyana Yu Quiꞌyu nu Mdoꞌo nde niꞌ Cuaan lca Ñi Xꞌnan tsaan nu nxitñanꞌ na.
\s Mchca sca yu quiꞌyu ngutyi sca tsoꞌ yaaꞌ
\p
\v 9 Ñaꞌaan mdoꞌo ñi canꞌ mdiyaa ñi seꞌen nꞌni tnu neꞌ ꞌin Ndiose.
\v 10 Canꞌ ndiꞌin sca yu nu ngutyi sca tsoꞌ yaaꞌ. Neꞌ fariseo ngunan neꞌ ñaꞌan nu suꞌhua neꞌ quiꞌya ꞌin ñi, loꞌ mñichaꞌ neꞌ ꞌin ñi: ¿Ta ntsuꞌhui chaꞌ cuiyaꞌ cuꞌni chca na sca nu tiꞌi tsaan nu nxitñanꞌ na?
\v 11 Mxcuen ñi ꞌin neꞌ: Chaꞌ ndon sca slyaꞌ ꞌin um, loꞌ tyu yuꞌhui ꞌin sca tuyuu tsaan nu nxitñanꞌ na, ¿ta siꞌi cuiꞌ xaa quia lyoo um ꞌin ꞌin?
\v 12 ¿Ta a ntsuꞌhui lyoo la sca nten que ꞌin sca slyaꞌ? Canꞌ chaꞌ nchgaa loo tñan tsuꞌhue tca cuꞌni na siyaꞌ tsaan nu nxitñanꞌ na.
\v 13 Xacanꞌ juin ñi ꞌin nu tiꞌi canꞌ: Xñii yaaꞌ. Cuiꞌ xaa mxñii yu yaaꞌ yu, loꞌ mchca tsuꞌhue na ꞌin yu tsañaꞌan xca tsoꞌ canꞌ.
\v 14 Neꞌ fariseo xa mdyiꞌo neꞌ seꞌen canꞌ, mꞌni cuiyaꞌ neꞌ chaꞌ ñaꞌan tca cujui neꞌ ꞌin Jesús.
\s Sca nguso nu cuaꞌ mdoꞌo hui ꞌin Ndiose
\p
\v 15 Xa ngujlyo tiꞌ Jesús chaꞌ canꞌ, mdoꞌo ñi nguiaa ñi, loꞌ quiꞌan ꞌa nten mducui nchaꞌan ꞌin ñi, loꞌ mꞌni chca ñi ꞌin nchgaa nu tiꞌi.
\v 16 Una mdiꞌin tya tla ñi sca chaꞌ loꞌo neꞌ, siꞌyana a chcuiꞌ la neꞌ chaꞌ ꞌin ñi loꞌo nten,
\v 17 siꞌyana chcua chaꞌ nu mxiycuiꞌ Ndiose ꞌin yu Isaía xa juin yu:
\v 18 —Nde nu lca nguso ꞌñan nu cuaꞌ ngulohuin, ñi nu taꞌa lati ꞌñan, loꞌ ndyijyin yaꞌ tsuꞌhue ntsuꞌhui tiqueen loꞌo ñi. Taan Espíritu ꞌñan chuꞌhui niꞌ cusya ꞌin ñi. Tyiꞌan ycuiꞌ ñi loꞌo neꞌ gentil chaꞌ nu ñi ꞌñan.
\v 19 Ñi a ca jñan tiꞌ ñi chaꞌ cusuun, uta xiꞌya loꞌo ñi ꞌin neꞌ, ñi a quine tijyoꞌ loo xa chcuiꞌ ñi.
\v 20 Ñi sca quii nu cuaꞌ mtsa tucui, loꞌ a cucha lyijyi ñi ꞌin na. A cunta sca quiiꞌ nu cuaꞌ tyuhuiꞌ ti, a suhuiꞌ lyijyi ñi ꞌin na, chaꞌ siꞌi la cuaꞌ ngulyo scua la ñi chaꞌ nu ñi ꞌin Ndiose,
\v 21 loꞌ siꞌya ñi nchgaa neꞌ gentil nducua tloo neꞌ tyiꞌo laa neꞌ—.
\s Nten nu nchcuiꞌ caꞌan ꞌin Espíritu
\p
\v 22 Chonꞌ ndeꞌen canꞌ ya loꞌo neꞌ ꞌin sca yu ntsuꞌhui cuiꞌin xaꞌan ꞌin tloo Jesús, a cunta cuityinꞌ yu loꞌ cuꞌun yu. Mꞌni chca ñi ꞌin yu, cuiꞌ xaa ncua chcanꞌ ꞌin yu loꞌ mdyisnan ycuiꞌ yu.
\v 23 Ndyijyin yaꞌ yuhueꞌ tiꞌ neꞌ, loꞌ nchcuiꞌ neꞌ: ¿Ta xtyi tiꞌ cuiꞌ Sñeꞌ ta nten ꞌin Davi, ñi nu ntsuꞌhui chaꞌ caan lca ñi re?
\v 24 Xa ngune ꞌin neꞌ fariseo chaꞌ re, xacanꞌ juin neꞌ: Yu re ndlo yu cuiꞌin xaꞌan ntsuꞌhui ꞌin nten loꞌo chaꞌ cuiyaꞌ ꞌin Beelzebú, xñan cuiꞌin xaꞌan.
\v 25 Nguꞌya Jesús cunta ñaꞌan lca tiquee neꞌ, loꞌ juin ñi ꞌin neꞌ: Sca quichen tnu tsatii chaꞌ ꞌin na chaꞌ tyisnan xuun na loꞌo ticuiiꞌ taꞌa na, cuiꞌ cuañaꞌan loꞌo cunda scaa quichen uta cunda scaa naꞌan, chaꞌ nsuun canꞌ loꞌo ticuiiꞌ taꞌa, a cula scua chaꞌ ꞌin.
\v 26 Chaꞌ Laxaꞌan ndlo ꞌin cuiꞌin xaꞌan, ticuiiꞌ taꞌa ndlo tsoꞌ ꞌin xacanꞌ. ¿Loꞌ ñaꞌan ta tca cula scua chaꞌ ꞌin seꞌen ndlo tñan?
\v 27 Chaꞌ nanꞌ ndlon cuiꞌin xaꞌan loꞌo chaꞌ cuiyaꞌ ꞌin Beelzebú, loꞌ ti nu mdaa chaꞌ cuiyaꞌ ꞌin nu taꞌa ndaꞌan um ndlo cuiꞌin xaꞌan chaꞌ na canꞌ? Canꞌ yu nu cuꞌni cuiyaꞌ chaꞌ ꞌin um loꞌo chaꞌ re.
\v 28 Una chaꞌ nanꞌ ndlon cuiꞌin xaꞌan loꞌo chaꞌ cuiyaꞌ ꞌin Espíritu ꞌin Ndiose, ca cuiyaꞌ tiꞌ um siꞌyana cuaꞌ mdiyaa tsaan nu culo Ndiose tñan ꞌin um.
\v 29 A tucui nu tca sten ñaꞌan ꞌin sca yu ngula tiꞌ loꞌ cuiꞌya na ndiꞌin ꞌin yu, chaꞌ siꞌi culo nducua la caja nu scanꞌ ꞌin yu, la xacanꞌ tca cuiꞌya canꞌ na nu ndiꞌin ꞌin yu.
\v 30 Nu a nguiaa tsoꞌ ꞌñan, canꞌ nu lca taꞌa cusuun, loꞌ nu a nxoꞌ tiꞌin slyaꞌ ꞌñan, canꞌ nu nde nsuꞌhua ta ꞌin ꞌin.
\v 31 Chcuinꞌ sca chaꞌ loꞌo um: Ndiose cuꞌni ñi chaꞌ tlyu tiꞌ ꞌin nten siꞌya nchgaa loo quiꞌya nu nꞌni neꞌ, loꞌo nchgaa loo chaꞌ ngunanꞌ nu nchcuiꞌ neꞌ, una nu nchcuiꞌ caꞌan ꞌin Espíritu, a chuꞌhui ꞌa chaꞌ tlyu tiꞌ ꞌin ñi loꞌo canꞌ.
\v 32 Nchgaa tucui nu nchcuiꞌ chaꞌ tiꞌi ꞌin Yu Quiꞌyu nu Mdoꞌo nde niꞌ Cuaan, tiꞌ chuꞌhui chaꞌ tlyu tiꞌ ꞌin ñi loꞌo canꞌ, una nu nchcuiꞌ chaꞌ tiꞌi ꞌin Espíritu nu Luhui ꞌin Ndiose, a cuꞌni ñi chaꞌ tlyu tiꞌ ꞌin canꞌ, ñi cuaꞌ ñii loꞌ ñi tsala xaa.
\v 33 Sca yca nu tsuꞌhue, ticuiꞌ tsuꞌhue mti ndyiꞌyu loo na, loꞌ yca nu a tsuꞌhue, ticuiꞌ a tsuꞌhue mti ndyiꞌyu loo na. Chuꞌhui lyoo na sca yca cuaꞌ ñaꞌaan mti ndyiꞌo loo na.
\v 34 ¡ꞌUn lca um sñeꞌ ta nten nu cuiñi! ¿Ta tca chcuiꞌ um chaꞌ nu tsuꞌhue chaꞌ lca um nten nu nducunꞌ? Chaꞌ nu mtsaꞌan yuꞌhui niꞌ cusya ꞌin nten, canꞌ chaꞌ nu ndyiꞌo tuꞌhua neꞌ.
\v 35 Sca nten nu tsuꞌhue chaꞌ ꞌin, nchcuiꞌ chaꞌ tsuꞌhue nu ntsuꞌhui niꞌ cusya ꞌin, cuiꞌ cuañaꞌan sca nten nu nducunꞌ, nchcuiꞌ chaꞌ nducunꞌ nu ndyiꞌo niꞌ cusya ꞌin.
\v 36 Una cunen loꞌo um sca chaꞌ, nchgaa chaꞌ nu a seꞌen ñaꞌan nchcuiꞌ nten, ntsuꞌhui chaꞌ tyaa neꞌ cunta ꞌin na tsaan nu ntsuꞌhui chaꞌ ca xñan bsya ꞌin neꞌ.
\v 37 Siꞌya chaꞌ nu nchcuiꞌ um tca quinanꞌ um uta tca tyiꞌo laa um.
\s Nten nducunꞌ njñan chaꞌ nu tnu
\p
\v 38 Xacanꞌ tucua snan neꞌ escriba loꞌo neꞌ fariseo juin ꞌin ñi: ꞌUn ñi nu lca Bstro, nchca tiꞌ hua cuꞌni um sca chaꞌ nu tnu tloo hua.
\v 39 Mxcuen ñi ꞌin neꞌ: Ta nten nducunꞌ nu a ñi ndiꞌin chaꞌ ꞌin, canꞌ nu njñan scasca chaꞌ nu tnu, una a ntsuꞌhui chaꞌ ñaꞌan neꞌ chaꞌ canꞌ, cuiꞌ lya loꞌo chaꞌ nu yatoꞌo ꞌin Jonás.
\v 40 Tsañaꞌan —yuꞌhui yu niꞌ cula snan tsaan loꞌ snan tla—, ticuiꞌ cuañaꞌan Yu Quiꞌyu nu Mdoꞌo nde niꞌ Cuaan ntsuꞌhui chaꞌ caja nu suꞌhua ꞌin yu niꞌ yuu snan tsaan loꞌ snan tla.
\v 41 Xa ca xñan bsya ꞌin nten chendyu, tyiton neꞌ Nínive loꞌ culo quiꞌya neꞌ ꞌin ta nten re, siꞌyana nten canꞌ mxiloꞌo chonꞌ neꞌ quiꞌya ꞌin neꞌ loꞌo chaꞌ nu ycuiꞌ Jonás, una lja na re ndon sca nu ndon loo lati que ꞌin Jonás.
\v 42 Ticuiꞌ cuañaꞌan neꞌ cunaꞌan ꞌin ree nu mdoꞌo seꞌen lca Arabia, tyiton neꞌ loꞌ culo quiꞌya neꞌ ꞌin ta nten re xa nu ca xñan bsya ꞌin nten chendyu, siꞌyana tijyoꞌ mdoꞌo neꞌ nu quine ꞌin chaꞌ tiyaa nu taa yu Salomón, una lja na re ndon sca nu ndon loo lati que ꞌin yu Salomón.
\s Chaꞌ ꞌin cuiꞌin xaꞌan nu nxitucui xiyaꞌ
\p
\v 43 Xa nu cuiꞌin xaꞌan ndyiꞌo ꞌin sca nten, ndaꞌan nan canꞌ seꞌen tyiꞌin sca seꞌen ngutyi, una a ndyijyi na.
\v 44 Ndeñaꞌan nchcuiꞌ xacanꞌ: Tsuꞌhue lati chaꞌ xitucuin seꞌen mdoꞌon. Loꞌ xa quila canꞌ seꞌen mdiꞌin, quija lyoo na ꞌin lja na, cuaꞌ lca luhui na, a cunta ncua tsuꞌhue na.
\v 45 Xacanꞌ tsa nan cha cati cuiꞌin xaꞌan nu nducunꞌ lati que ꞌin, loꞌ tsatlyu tyiꞌin canꞌ seꞌen nguila, loꞌ nducua la tsatoꞌo ꞌin neꞌ que ñaꞌan tiꞌ culoo. Cuiꞌ cuañaꞌan tsatoꞌo ꞌin ta nten nu nducunꞌ re.
\s Jyiꞌan Jesús loꞌo taꞌa ngula ñi
\p
\v 46 Lja nu tiꞌ nchcuiꞌ ñi loꞌo nten canꞌ, xa mdiyaa ton jyiꞌan ñi loꞌo taꞌa ngula ñi tunaꞌan lyiyaꞌ, loꞌ nchca tiꞌ jun chcuiꞌ jun loꞌo ñi.
\v 47 Loꞌ jui nu mtsaꞌ ꞌin ñi: La tunaꞌan lyiyaꞌ cua ndon jyiꞌan um loꞌo taꞌa ngula um, nchca tiꞌ jun nchcuiꞌ jun loꞌo um.
\v 48 Xacanꞌ mxcuen ñi ꞌin nu mtsaꞌ ꞌin ñi: ¿Ti nu lca jyiꞌan loꞌ ti nu lca taꞌa ngulan?
\v 49 Nguloꞌo yaaꞌ ñi seꞌen ndiꞌin nchgaa taꞌa ndaꞌan ñi loꞌ juin ñi: Nde ndiꞌin nu lca jyiꞌan loꞌo taꞌa ngulan.
\v 50 Ñaꞌan nu ti nu ca jaꞌan chaꞌ nu nchca tiꞌ Stin, ñi nu nducua niꞌ cuaan, canꞌ nu lca taꞌa ngulan loꞌ canꞌ nu lca jyiꞌan.
\c 13
\s Chaꞌ ꞌin nten nu ntya mti
\p
\v 1 Ticuiꞌ tsaan canꞌ mdyiꞌo Jesús ñaꞌan canꞌ, loꞌ mdiyaa ñi tuꞌhua tiyoꞌ.
\v 2 Mdyisnan nguioꞌ tiꞌin quiꞌan nten seꞌen ndlyu ñi, yten tucua ñi niꞌ sca yca naꞌan, loꞌ nten canꞌ ndiꞌin neꞌ tuꞌhua tiyoꞌ canꞌ,
\v 3 nguloꞌo ñi scasca chaꞌ loꞌ nchcuiꞌ ñi: Nu ncua sca tsaan mdoꞌo sca yu nguia yta mti trigo.
\v 4 Seꞌen msne yu mti canꞌ nguilo tsachinꞌ na tuꞌhua tucueen, cuiꞌ xaa ti yaan quiñi loꞌ ycu ꞌin mti canꞌ.
\v 5 Tichinꞌ mti canꞌ nguilo na sca seꞌen nu chinꞌ ti yuu nducua loo quee, loꞌ cuiꞌ xaa mducua na siꞌyana chinꞌ ti yuu canꞌ,
\v 6 una xa cuaꞌ mꞌni tiqueꞌ cuaan ꞌin na, cuiꞌ xaa nguinanꞌ na, loꞌ siꞌyana a jui seꞌen tyiꞌya xcuaꞌ na, canꞌ chaꞌ ngutyi na.
\v 7 Tichinꞌ mti canꞌ nguilo na lja yca quicheꞌ, una yca quicheꞌ canꞌ yjui xuꞌhua na ꞌin trigo canꞌ.
\v 8 Tichinꞌ mti canꞌ nguilo na loo yuu tsuꞌhue, loꞌ tsuꞌhue ncua tñan na: Ntsuꞌhui juun nu mdoꞌo sca ciento mti loo, ntsuꞌhui nu mdoꞌo snan yla na, a cunta ntsuꞌhui nu mdoꞌo cla tyii na ꞌin.
\v 9 Nchgaa nu ndon nscan chaꞌ nu ycuinꞌ re, cuꞌni cunta ꞌin na.
\s Mñichaꞌ yu ꞌin Jesús chaꞌ nu ycuiꞌ ñi
\p
\v 10 Xacanꞌ yu taꞌa ndaꞌan ñi mñichaꞌ yu ꞌin ñi xca cunta: ¿Ñi chaꞌ scasca chaꞌ ndyiꞌin tyaa um loꞌo nten cua?
\v 11 Mxcuen ñi ꞌin yu: ꞌUn cuaꞌ mdaa Ndiose chaꞌ cuiyaꞌ ca cuiyaꞌ tiꞌ um scasca chaꞌ nu yuꞌhui cutsiꞌ ꞌin ñi, tsañaꞌan ntsuꞌhui chaꞌ culo ñi tñan ꞌin um, una tsoꞌ nu ꞌin neꞌ cua, a mdaa ñi chaꞌ cuiyaꞌ quiꞌya neꞌ cunta chaꞌ re.
\v 12 Nu cuaꞌ ntsuꞌhui chaꞌ ꞌin Ndiose niꞌ cusya ꞌin, nde taa la ñi chaꞌ tiyaa ꞌin canꞌ, loꞌ ñi a tsa lyijyi na ꞌin, una tsalca nu a ntsuꞌhui chaꞌ re niꞌ cusya ꞌin, nde caja nu lyoo tsachinꞌ chaꞌ nu cuaꞌ ngune ꞌin.
\v 13 Canꞌ chaꞌ ndyiꞌin tyaan scasca chaꞌ loꞌo neꞌ, ñaꞌan ca siꞌyana siyaꞌ lyee la ñaꞌan neꞌ loꞌ a ca chcanꞌ ꞌin neꞌ, siyaꞌ lyee la ton nscan neꞌ loꞌ a quine ꞌin neꞌ, loꞌ ñi a quiꞌya neꞌ chaꞌ tiyaa.
\v 14 Tsatoꞌo ꞌin neꞌ ñaꞌan mxiycuiꞌ Ndiose ꞌin yu Isaía xa juin yu: —Ñi lyee la quine ꞌin um, loꞌ a quiꞌya um chaꞌ tiyaa, siyaꞌ lyee la ñaꞌan um, loꞌ a ca chcanꞌ ꞌin um.
\v 15 Siꞌyana nten re ncua tla cusya ꞌin neꞌ, cuaꞌ mxiyaꞌ tiꞌ neꞌ ne ꞌin neꞌ, mducun neꞌ quiloo neꞌ, ñaꞌan ca siꞌyana a ca chcanꞌ ꞌin neꞌ, ñi a quine ꞌin neꞌ, ñi a quiꞌya neꞌ chaꞌ tiyaa, ñi a quia nan neꞌ ꞌñan seꞌen nu cuꞌnin chcan ꞌin neꞌ—.
\v 16 Una tsuꞌhue ca xuꞌhue um siꞌyana tsuꞌhue xaa quiloo um, loꞌ xaa tunscan um.
\v 17 Chcuinꞌ sca chaꞌ nu ñi loꞌo um: Quiꞌan yu nu mxiycuiꞌ Ndiose ꞌin cuaꞌ sꞌni, loꞌo yu nu mꞌni tñan tsuꞌhue, ncua lca tiquee yu ñaꞌan yu chaꞌ nu naꞌan um cuaꞌ ñii, una a naꞌan yu ꞌin na, ñi a ngune ꞌin yu chaꞌ nu ne ꞌin um cuaꞌ ñii.
\s Jesús ngulyo scua la ñi chaꞌ ꞌin trigo
\p
\v 18 Quiꞌya um cunta ñaꞌan nguiaa chaꞌ ꞌin yu nu ntya mti trigo:
\v 19 Sca nten nu ne ꞌin chaꞌ tsuꞌhue ꞌin Ndiose, loꞌ a ndyiꞌya neꞌ cunta chaꞌ canꞌ, cuiꞌ xaa ndyiꞌan laxaꞌan loꞌ ndlyoo chaꞌ tsuꞌhue nu cuaꞌ nguita niꞌ cusya ꞌin neꞌ. Canꞌ nu nguiaa chaꞌ ꞌin tsañaꞌan nguiaa chaꞌ ꞌin mti nu nguilo tuꞌhua tucueen canꞌ.
\v 20 Mti nu nguilo seꞌen chinꞌ ti yuu nducua loo quee canꞌ, nguiaa chaꞌ ꞌin na tsañaꞌan nguiaa chaꞌ ꞌin nten nu ne ꞌin chaꞌ tsuꞌhue ꞌin Ndiose, loꞌ ticuiꞌ xaa nducuan xuꞌhue neꞌ chaꞌ canꞌ, tsuꞌhue ntsuꞌhui tiquee neꞌ.
\v 21 Loꞌ siꞌyana a ndyiꞌya xcuaꞌ tsuꞌhue na niꞌ cusya ꞌin neꞌ, chinꞌ ti xaa ndon loꞌo neꞌ chaꞌ canꞌ, siꞌya scasca chaꞌ nu ndyijyin neꞌ siꞌya chaꞌ tsuꞌhue ꞌin Ndiose, cuiꞌ xaa ndyiꞌo tsoꞌ neꞌ.
\v 22 Mti nu nguilo seꞌen nducua yca quicheꞌ canꞌ, nguiaa chaꞌ ꞌin na tsañaꞌan nguiaa chaꞌ ꞌin nten nu ne ꞌin chaꞌ tsuꞌhue ꞌin Ndiose, una siꞌya scasca chaꞌ nu nchca loo chendyu re, uta siꞌya chaꞌ cuilyiyaꞌ nu ñilyiꞌo ꞌin neꞌ, canꞌ nu ndujui xuꞌhua chaꞌ tsuꞌhue nu cuaꞌ nguita niꞌ cusya ꞌin neꞌ, loꞌ a ndyijyi ñaꞌan cuton na.
\v 23 Una mti nguilo loo yuu nu tsuꞌhue canꞌ, nguiaa chaꞌ ꞌin na tsañaꞌan nguiaa chaꞌ ꞌin nten nu ne ꞌin chaꞌ tsuꞌhue ꞌin Ndiose, tsuꞌhue ndyiꞌya neꞌ cunta chaꞌ canꞌ, nchca chcanꞌ loo chendyu ꞌin neꞌ tsañaꞌan nguiaa chaꞌ ꞌin juun trigo nu ndaa sca ciento mti loo, ta snan yla na, uta cla tyii na scaa loo juun.
\s Xca loo quixinꞌ nu nchcua lja trigo
\p
\v 24 Ycuiꞌ ñi xca chaꞌ loꞌ juin ñi: Tsañaꞌan ndlo Ndiose tñan ꞌin nten, nguiaa chaꞌ ꞌin na tsañaꞌan nguiaa chaꞌ ꞌin sca nten nu msne mti trigo nu tsuꞌhue lati loo jyaan ꞌin,
\v 25 una tla xa ljaꞌ neꞌ yaa taꞌa cusuun neꞌ, msne mti nu a tsuꞌhue lja trigo canꞌ, xacanꞌ mdoꞌo nguiaa.
\v 26 Tsatlyu mdoꞌo tucua na, una xa mdyisnan mducua juun na, la xacanꞌ ncua chcanꞌ loo na siꞌyana siꞌi chacuiꞌ trigo nducua canꞌ.
\v 27 Tucua snan yu nguso ya ytsaꞌ yu ꞌin xꞌnan tñan canꞌ, loꞌ juin yu: ꞌUn nu lca xꞌnan hua, ¿ta siꞌi mti nu cuaꞌ mdoꞌo hui yta um loo xꞌñan um? Loꞌ xca loo mti canꞌ, ¿la mdoꞌo na xacanꞌ?
\v 28 Xacanꞌ mxcuen xꞌnan tñan canꞌ ꞌin yu: Ndeꞌen la taꞌa cusuun na ya yꞌni tñan cua. Loꞌ juin yu nguso canꞌ: ¿Ta nchca tiꞌ um loꞌ xton hua ꞌin na?
\v 29 Mxcuen xꞌnan yu ꞌin yu: A quiton na, ñaꞌan tuꞌ loꞌo trigo cua xton um.
\v 30 Tyaa um yaꞌ culo na tsatlyu loꞌ cula tucua na, loꞌ xa quioꞌ na chcuinꞌ loꞌo yu nguso canꞌ: Xoꞌ um culo nducua la quixinꞌ nu a tsuꞌhue canꞌ, scanꞌ yni um ꞌin na loꞌ squin na, xacanꞌ xoꞌ um mti trigo canꞌ loꞌ tyiꞌin seꞌen na.
\s Chaꞌ ꞌin mti mostaza
\p
\v 31 Nde xca chaꞌ nu ycuiꞌ Jesús: Tsañaꞌan nu ndlo Ndiose tñan ꞌin nten, nguiaa chaꞌ ꞌin na tsañaꞌan nguiaa chaꞌ ꞌin mti mostaza nu yta sca yu quiꞌyu loo xꞌñan yu.
\v 32 Chaꞌ ñi siꞌyana lca na sca mti nu suhue lati que ꞌin nchgaa loo mti, una tnu la ndlyo na que ꞌin nchgaa loo quixinꞌ, ndlyo na tsañaꞌan nchca tiꞌ sca yca, loꞌ hasta quiñi nsuꞌhua ten ꞌin lja stanꞌ na.
\s Chaꞌ ꞌin suun jaslya
\p
\v 33 Nde xca chaꞌ nu ycuiꞌ ñi: Tsañaꞌan nu ndlo Ndiose tñan ꞌin nten, nguiaa chaꞌ ꞌin na tsañaꞌan nguiaa chaꞌ ꞌin suun jaslya nu mxitiyaꞌ neꞌ loꞌo snan cuiyaꞌ quita, loꞌ tsatlyu mchcuen na xacanꞌ.
\s Nde siꞌya chaꞌ ycuiꞌ nchcun Jesús
\p
\v 34 Nchgaa chaꞌ re ycuiꞌ nchcun Jesús loꞌo nten, loꞌ a ncua nu a chcuiꞌ nchcun ñi loꞌo neꞌ,
\v 35 cuiꞌ siꞌyana chcua chaꞌ nu mxiycuiꞌ Ndiose ꞌin nguso ꞌin ñi xa juin yu: —Chacuiꞌ chaꞌ nu ntsuꞌhui nchcun chcuinꞌ loꞌo nten, culyo scua lan chaꞌ nu ntsuꞌhui cutsiꞌ ꞌin Ndiose tiꞌ xa mtñan ñi chendyu—.
\s Chaꞌ ꞌin quixinꞌ nu mducua lja trigo
\p
\v 36 Xa mslaꞌ taꞌa Jesús loꞌo nten canꞌ yten ñi ñaꞌan canꞌ, loꞌ yu taꞌa ndaꞌan ñi yaa yu cuiꞌ la seꞌen ndon ñi, loꞌ juin yu ꞌin ñi: Cuꞌni um chaꞌ tsuꞌhue quitsaꞌ la um ꞌin hua ñi chaꞌ nchca tiꞌ chcuiꞌ chaꞌ ꞌin quixinꞌ nu mducua lja trigo canꞌ.
\v 37 Mxcuen ñi ꞌin yu: Yu nu ntya mti nu tsuꞌhue canꞌ lca Yu Quiꞌyu nu Mdoꞌo nde niꞌ Cuaan.
\v 38 Yuu seꞌen nguita na lca na chendyu re, loꞌ nchgaa nu lca sñeꞌ Ndiose lca mti nu tsuꞌhue canꞌ, loꞌ mti nu a tsuꞌhue canꞌ lca sñeꞌ laxaꞌan.
\v 39 Laxaꞌan canꞌ lca taꞌa cusuun xꞌnan tñan canꞌ, cuiꞌ nu ya sne mti canꞌ, loꞌ xa quioꞌ na nchca tiꞌ chcuiꞌ xa tsatii chaꞌ nu nchca loo chendyu re, loꞌ nu ntsuꞌhui chaꞌ xoꞌ ꞌin na lca angujle.
\v 40 Cuiꞌ ñaꞌan nguiton quixinꞌ nu nducua lja trigo canꞌ loꞌ ndiquin na, cuañaꞌan tsatoꞌo tiyaa xaa xa tsatii chaꞌ nu nchca loo chendyu re.
\v 41 Yu Quiꞌyu nu Mdoꞌo nde niꞌ Cuaan caꞌan tñan angujle ꞌin seꞌen ndlo tñan, xoꞌ tiꞌin canꞌ ꞌin nchgaa nu nchcui ndijin loꞌo nchgaa nu nguiꞌni quiꞌya,
\v 42 loꞌ suꞌhua ꞌin canꞌ loo quiiꞌ tnu, canꞌ xiꞌya yja cueen loo nu lyee tyijyin nu tiꞌi.
\v 43 Xacanꞌ tsañaꞌan luhui xaa ꞌin cucha, cuañaꞌan tyiꞌo scua la chaꞌ ꞌin nchgaa nu ñi ndiꞌin chaꞌ ꞌin seꞌen ndlo Ndiose tñan. Nchgaa nu ndon nscan chaꞌ nu ycuinꞌ re, cuꞌni cunta ꞌin na.
\s Chaꞌ ꞌin tñi nu ntsuꞌhui cutsiꞌ
\p
\v 44 Tiꞌ juin la ñi: Tsañaꞌan nu ndlo Ndiose tñan ꞌin nten, ticuiꞌ cuañaꞌan nguiaa chaꞌ ꞌin na tsañaꞌan nguiaa chaꞌ ꞌin tñi nu ntsuꞌhui cutsiꞌ niꞌ yuu, loꞌ nguija lyoo na ꞌin sca nten, una msuꞌhua cutsiꞌ neꞌ ꞌin na xiyaꞌ. Loo nu tsuꞌhue ntsuꞌhui tiquee neꞌ yjuiꞌ neꞌ nchgaa na nu ndiꞌin ꞌin neꞌ loꞌ msiꞌi neꞌ yuu canꞌ.
\s Chaꞌ ꞌin perla nu ntsuꞌhui lyoo
\p
\v 45 A cunta nde xca chaꞌ nu tca quiꞌya um chaꞌ tiyaa tsañaꞌan nu ndlo Ndiose tñan ꞌin nten, nguiaa chaꞌ ꞌin na tsañaꞌan ndiꞌin chaꞌ ꞌin sca yu nu ndujuiꞌ na, loꞌ nan yu chacuiꞌ perla nu tsuꞌhue la,
\v 46 loꞌ xa nguija lyoo yu sca perla nu ndyiꞌya la canꞌ, xacanꞌ yjuiꞌ yu nchgaa na nu ndiꞌin ꞌin yu loꞌ msiꞌi yu ꞌin na.
\s Chaꞌ ꞌin quitan nguinu cula
\p
\v 47 Tiꞌ juin la ñi: Tsañaꞌan nu ndlo Ndiose tñan ꞌin nten, nguiaa chaꞌ canꞌ tsañaꞌan nguiaa chaꞌ ꞌin quitan nu nduguun neꞌ loo tyiꞌa, loꞌ nguinu cuati loo cula,
\v 48 loꞌ xa cuaꞌ nguinu ꞌin, ndlyoo neꞌ ꞌin na nde tuꞌhua tyiꞌa, xacanꞌ nchcua lyohui neꞌ cula canꞌ, nu tsuꞌhue canꞌ nxuꞌhua seꞌen neꞌ, loꞌ nxcuan neꞌ nu a tsuꞌhue canꞌ.
\v 49 Cuañaꞌan tsatoꞌo xa tsatii chaꞌ nu nchca loo chendyu re, caan angujle loꞌ culo tsoꞌ ꞌin nten nu nducunꞌ lja nten nu ñi ndiꞌin chaꞌ ꞌin,
\v 50 loꞌ suꞌhua ꞌin canꞌ loo quiiꞌ tnu, canꞌ xiꞌya yja cueen loo nu lyee tyijyin nu tiꞌi.
\s Na nu cui ti loꞌo na nu cula
\p
\v 51 Loꞌ juin Jesús ꞌin yu taꞌa ndaꞌan ñi: ¿Ta nguꞌya um chaꞌ tiyaa chaꞌ re? Mxcuen yu ꞌin ñi: Nguꞌya hua chaꞌ tiyaa Ñi Xꞌnan hua.
\v 52 Xacanꞌ juin ñi ꞌin yu: Sca yu nu tsuꞌhue ndyiꞌya cunta ñaꞌan ndiꞌin chaꞌ ꞌin Ndiose, nguiaa chaꞌ ꞌin yu tsañaꞌan nguiaa chaꞌ ꞌin sca nten nu ntsuꞌhui cunta sca naꞌan, siꞌyana loo na nu ntsuꞌhui seꞌen canꞌ ꞌin, ndlyoo na nu cui ti loꞌo na nu cula.
\s Jesús nguila ñi quichen Nazaret
\p
\v 53 Xa mdyi ycuiꞌ Jesús scasca chaꞌ canꞌ, mdoꞌo ñi nguiaa ñi,
\v 54 nguila ñi quichen seꞌen mdiꞌin ñi, loꞌ mdyisnan nguloꞌo ñi ꞌin nten seꞌen nꞌni tnu neꞌ ꞌin Ndiose, loꞌ nten canꞌ lyee ꞌa yuhue tiꞌ neꞌ ꞌin ñi loꞌ nchcuiꞌ neꞌ: ¿La ngulo yu re chaꞌ tiyaa tsañaꞌan nu nchcuiꞌ yu loꞌ nꞌni yu chaꞌ nu tnu?
\v 55 ¿Ta siꞌi sñeꞌ yu cuityi yca ca lca yu re? ¿Ta siꞌi jyiꞌan yu lca María, loꞌ taꞌa ngula yu lca Jacobo, loꞌo yu See, yu Simón loꞌo yu Juda?
\v 56 ¿Ta siꞌi nchgaa nu cunaꞌan taꞌa ngula yu ndiꞌin loꞌo na quichen re? ¿La ta ngulo yu nchgaa chaꞌ re?
\v 57 Siꞌya chaꞌ canꞌ yten chaꞌ tucua tiꞌ niꞌ cusya ꞌin neꞌ loꞌo ñi. Una juin Jesús loꞌo neꞌ: Sca yu nu nxiycuiꞌ Ndiose ꞌin ndyijyi nu nducuan xuꞌhue ꞌin yu xca seꞌen, una siꞌi quichen tyi yu uta lja ta nten ꞌin yu.
\v 58 A mꞌni ñi quiꞌan la chaꞌ nu tnu quichen tyi ñi, siꞌya chaꞌ nu a ya quiꞌan tiꞌ neꞌ ꞌin ñi. 
\c 14
\s Xa ngujui yu Xuhua mducua tya ꞌin nten
\p
\v 1 Yu Herode Antipas nu ndlo tñan canꞌ, ynan yu nchgaa chaꞌ nu mꞌni Jesús,
\v 2 loꞌ juin yu ꞌin nguso ꞌin yu: Cuiꞌ yu Xuhua mducua tya ꞌin nten lca yu cua, loꞌ cuaꞌ ñii mdyiquiꞌo yu, canꞌ chaꞌ nchca nꞌni yu scasca chaꞌ nu tnu.
\v 3 Juin yu Herode cuañaꞌan siꞌyana cuiꞌ yu mꞌni yu chaꞌ nguinu yu Xuhua canꞌ, loꞌ mscanꞌ neꞌ ꞌin yu loꞌo carena, loꞌ msuꞌhua neꞌ ꞌin yu naꞌan chcuan, siꞌya Herodía, neꞌ cunaꞌan ꞌin yu Lpe taꞌa ngula yu.
\v 4 Siꞌyana yu Xuhua nchcuiꞌ yu loꞌo Herode: A tsuꞌhue tyiꞌin lyiꞌo um ꞌin cunaꞌan ꞌin taꞌa ngula um.
\v 5 Canꞌ chaꞌ ncua tiꞌ yu Herode cujui yu ꞌin yu Xuhua, una ntsen yu tloo nten quichen siꞌyana nsuꞌhua loo neꞌ ꞌin yu lca yu sca nu nxiycuiꞌ Ndiose ꞌin.
\v 6 Una xa nguꞌya nii Herode msuꞌhua yu sca taꞌa, lja xacanꞌ sca nu cunaꞌan sñeꞌ Herodía yla quiyaꞌ tluꞌhue la seꞌen nducua yu, loꞌ mdiyaa ꞌa tiꞌ yu ñaꞌan yla quiyaꞌ neꞌ,
\v 7 loꞌ siꞌya chaꞌ canꞌ, mdiꞌin tyaa yu sca chaꞌ nu chaꞌ ñi ca loꞌo neꞌ cunaꞌan canꞌ, siꞌyana taa yu ñaꞌan na ti nu jñan neꞌ ꞌin yu.
\v 8 Loꞌ jyiꞌan neꞌ cunaꞌan canꞌ msuꞌhua tiquee neꞌ siꞌyana chcuiꞌ neꞌ: Jni re ñii nchca tinꞌ sca quiꞌnan seꞌen ndiꞌin que yu Xuhua mducua tya ꞌin nten.
\v 9 Yu ree canꞌ cuiꞌ xaa nguluꞌun tiꞌ yu. Loꞌ siꞌya sca chaꞌ nu cuaꞌ mdiꞌin tyaa yu tloo nchgaa taꞌa nducua yu, mxcuen yu chaꞌ nu ncua tiꞌ neꞌ,
\v 10 ngulo yu tñan siꞌyana xiꞌyu yni yu Xuhua seꞌen ntsuꞌhui yu naꞌan chcuan.
\v 11 Niꞌ sca quiꞌnan mdiꞌin que canꞌ nguian loꞌo yu ꞌin na, loꞌ mdyaa yu ꞌin na ꞌin neꞌ cunaꞌan canꞌ, cuiꞌ xaa mdyaa neꞌ ꞌin na ꞌin jyiꞌan neꞌ.
\v 12 Xacanꞌ taꞌa mdaꞌan yu Xuhua canꞌ nguia ꞌya ꞌin yu seꞌen su, loꞌ ya tsiꞌ yu ꞌin. Chonꞌ ndeꞌen canꞌ ya ytsaꞌ yu ꞌin Jesús chaꞌ nu yatoꞌo.
\s Mxicu Jesús caꞌyu mii yu quiꞌyu
\p
\v 13 Xa ngujlyo tiꞌ Jesús chaꞌ canꞌ, cuiꞌ xaa mdoꞌo ñi nguiaa ñi loꞌ yten ñi niꞌ sca yca naꞌan, mdiyaa ñi sca seꞌen scati ñi seꞌen nu a tca nten. Xa ngujlyo tiꞌ nten la nde nguiaa ñi, cuiꞌ xaa mdoꞌo neꞌ scasca quichen mdaꞌan quiyaꞌ ti neꞌ ya nchaꞌan neꞌ ꞌin ñi.
\v 14 Xa mdyiꞌo ñi niꞌ yca naꞌan canꞌ, naꞌan ñi siꞌyana quiꞌan ꞌa nten cuaꞌ ndiꞌin canꞌ, mñaꞌan ꞌtnan tiꞌ ñi ꞌin neꞌ loꞌ mꞌni chca ñi ꞌin nu tiꞌi.
\v 15 Xa cuaꞌ msiin tsaan canꞌ mdiya ycuiꞌ yu taꞌa ndaꞌan ñi loꞌo ñi, loꞌ juin yu: Cuaꞌ msiin ꞌa loꞌ tijyoꞌ a nguinu seꞌen re, tsuꞌhue lati slaꞌ tijin um ꞌin nten re, loꞌ tsa siꞌi neꞌ na nu cunajoꞌo ꞌin neꞌ scasca quichen suhue ti.
\v 16 Loꞌ juin Jesús ꞌin yu: A najoꞌo quiaa neꞌ, ꞌun xicu um ꞌin neꞌ.
\v 17 Mxcuen yu ꞌin ñi: Una a ndaꞌan loꞌo hua na quiꞌan la, seen cha caꞌyu ti jaslya loꞌo chcua ti cula ndaꞌan loꞌo hua.
\v 18 Loꞌ juin ñi ꞌin yu xacanꞌ: Tyaa um ꞌin na ꞌñan.
\v 19 Xacanꞌ ngulo ñi tñan siꞌyana sten tucua nten canꞌ loo quixinꞌ xuhue ti canꞌ. Msñi ñi caꞌyu jaslya loꞌo tucua cula canꞌ, mscuen ñi tloo ñi loꞌ mdyaa ñi xuꞌhue ꞌin Ndiose, msuꞌhue ñi ꞌin na loꞌ mdaa ñi ꞌin na ꞌin yu taꞌa ndaꞌan ñi, canꞌ yu cuaꞌ mtsa ꞌin na ꞌin nten canꞌ.
\v 20 Nchgaa neꞌ ycu neꞌ tsayaꞌ nu ngulaꞌ tiꞌ neꞌ, loꞌ tsa tichcua xcuhui tiꞌ mꞌni chaꞌan yu loꞌo yuꞌhue jaslya nu nguinu canꞌ.
\v 21 Nten nu ycu canꞌ mdiyaa neꞌ tsa caꞌyu mii neꞌ tsalca yu quiꞌyu ti, loꞌ ñi a ncua yu ꞌin jun cunaꞌan loꞌo nu suhue ti.
\s Xa mdaꞌan Jesús loo tyiꞌa
\p
\v 22 Xacanꞌ msuꞌhua Jesús ꞌin yu taꞌa ndaꞌan ñi, siꞌyana chcua loo yu tsaa yu niꞌ yca naꞌan, loꞌ tyiꞌo caꞌan yu xca tsoꞌ tiyoꞌ canꞌ, lja nu tiꞌ nslaꞌ ñi ꞌin nten canꞌ.
\v 23 Xa cuaꞌ mslaꞌ taꞌa ñi loꞌo nten canꞌ, ycuen ñi sca loo quiꞌya lyoꞌ ti, canꞌ nxiton ñi scati ñi xa nguꞌya tla.
\v 24 Yca naꞌan canꞌ cuaꞌ nguiaa na tluꞌhue tiyoꞌ canꞌ, lyee nguiꞌni xcua na loo tyiꞌa siꞌya cuiꞌin nu ljyaan loo na.
\v 25 Tla nde cuaꞌ ljyaan xaa, mdoꞌo Jesús nguia ycua ñi ꞌin yu loo tyiꞌa canꞌ, loꞌ ndaꞌan quiyaꞌ ti ñi.
\v 26 Yu taꞌa ndaꞌan ñi naꞌan yu ljyaan sca nu ndaꞌan quiyaꞌ ti loo tyiꞌa canꞌ, lyee ytsen yu loꞌ msiꞌya yja cueen yu, loꞌ nchcuiꞌ yu: ¡Sca cuxee ca cua!
\v 27 Una cuiꞌ xaa ycuiꞌ Jesús loꞌo yu: ¡Cuꞌni tnu tiquee um siꞌyana nanꞌ lcan, a cutsen um!
\v 28 Xacanꞌ mxcuen yu Tyo ꞌin ñi: Ñi Xꞌnan hua, chaꞌ ꞌun lca um, cuꞌni um chaꞌ tsa ycuan ꞌin um loo tyiꞌa re.
\v 29 Loꞌ juin ñi ꞌin yu: Cuan lya. Yu Tyo canꞌ cuiꞌ xaa nguꞌya ton yu loo tyiꞌa canꞌ, loꞌ mdyisnan mdaꞌan yu nu tsa ycua yu ꞌin ñi.
\v 30 Una xa naꞌan yu siꞌyana lyee nchca cuiꞌin cuiꞌ xaa ytsen yu, cuiꞌ ñaꞌan lcaa nguityinꞌ yuꞌhui yu, loꞌ ycuiꞌ cueen yu: ¡Ñi Xꞌnan hua, culo laa um ꞌñan!
\v 31 Loꞌ Jesús cuiꞌ xaa mxñii ñi yaaꞌ ñi, ngulyoo ñi ꞌin yu, loꞌ juin ñi: ¿Ta joꞌo ꞌa ndiya quiꞌan tiꞌ, ñi chaꞌ nguiꞌni tucua tiꞌ?
\v 32 Xa cuaꞌ ycuen ñi loꞌo yu niꞌ yca naꞌan canꞌ, cuiꞌ ñaꞌan cuaꞌ loꞌo cuiꞌin canꞌ ngulyijyi na.
\v 33 Xacanꞌ nchgaa nu ntsuꞌhui niꞌ yca naꞌan canꞌ, cuiꞌ xaa mdyiꞌya xtyinꞌ yu tloo ñi loꞌ mꞌni tnu yu ꞌin ñi, loꞌ nchcuiꞌ yu: Nu chaꞌ ñi ca siꞌyana Sñeꞌ Ndiose lca um.
\s Mꞌni chca Jesús ꞌin neꞌ Genesaret
\p
\v 34 Xacanꞌ mdoꞌo caꞌan jun tuꞌhua tiyoꞌ loo yuu ꞌin neꞌ Genesaret.
\v 35 Xa yuꞌhui lyoo nten canꞌ ꞌin ñi, cuiꞌ ñaꞌan lcaa mxicune neꞌ chaꞌ sca chcui seꞌen canꞌ, loꞌ cuiꞌ xaa ya loꞌo neꞌ ꞌin nchgaa nu tiꞌi seꞌen ndon ñi.
\v 36 Mjñan neꞌ chaꞌ tsuꞌhue ꞌin ñi siꞌyana tca culaꞌ neꞌ siyaꞌ tuꞌhua steꞌ ti ñi, loꞌ nchgaa nu ylaꞌ steꞌ ñi mchca.
\c 15
\s Chaꞌ nu cooꞌ ntsuꞌhui niꞌ cusya ꞌin nten
\p
\v 1 Xacanꞌ mdiya tiꞌin tucua snan neꞌ escriba, loꞌo neꞌ fariseo nu mdoꞌo quichen Jerusalén, loꞌ nchcuiꞌ neꞌ:
\v 2 ¿Ñi chaꞌ yu taꞌa ndaꞌan um ncha tiꞌin yu chaꞌ nu mxnu scua nten cula ꞌin na? ¿Ñi chaꞌ a ñaanꞌ yu xa nchcu yu?
\v 3 Mxcuen ñi ꞌin neꞌ: Ticuiꞌ cuañaꞌan ꞌun, ¿ñi chaꞌ ncha tiꞌin um chaꞌ nu ndlo Ndiose tñan, loꞌo ñaꞌan chaꞌ nu cuaꞌ ntsuꞌhui ꞌin um?
\v 4 Nde chaꞌ nu nchcuiꞌ Ndiose: —Cuꞌni suun um ꞌin um tloo sti um loꞌo jyiꞌan um—, loꞌ nde xca chaꞌ: —Nu taja ꞌin sti loꞌo jyiꞌan tyiꞌo tñan caja canꞌ—.
\v 5 Una ꞌun ndeñaꞌan nda cueen um ꞌin nten: Tca chcuiꞌ um loꞌo nten cula ꞌin um, siꞌyana nchgaa chaꞌ tsuꞌhue nu ndiꞌin ꞌin um cuaꞌ lca na lcuan ꞌin Ndiose,
\v 6 canꞌ chaꞌ a nguiꞌni caꞌan ꞌa ꞌin um ta yaaꞌ um ꞌin nten cula ꞌin um. Cuañaꞌan nguia ncha tiꞌin um chaꞌ nu ndlo Ndiose tñan siꞌya chaꞌ nu cuaꞌ ntsuꞌhui ꞌin um.
\v 7 ꞌUn neꞌ nu a ñi ndiꞌin chaꞌ ꞌin, chaꞌ ñi ꞌa ñaꞌan mxiycuiꞌ Ndiose ꞌin yu Isaía chaꞌ ꞌin um xa juin yu:
\v 8 —Nten re loꞌo tuꞌhua ti neꞌ nꞌni tnu neꞌ ꞌñan, una cusya ꞌin neꞌ tijyoꞌ nchca na siinꞌ.
\v 9 Cua chaꞌ ti nꞌni tnu neꞌ ꞌñan, siꞌyana chaꞌ nu ndlo que neꞌ ndijin neꞌ cunta ꞌin na lca na chaꞌ nu ꞌin Ndiose—.
\v 10 Tsatlyu msiꞌya ñi ꞌin nten loꞌ juin ñi: Ton nscan um loꞌ quiꞌya um cunta chaꞌ re.
\v 11 Siꞌi na nu nchcu nten, nꞌni chaꞌ nchca cooꞌ cusya ꞌin neꞌ tloo Ndiose, chaꞌ nu ndyiꞌo tuꞌhua neꞌ, canꞌ nu nꞌni chaꞌ nchca cooꞌ cusya ꞌin neꞌ.
\v 12 Xacanꞌ mdiya tiꞌin yu taꞌa ndaꞌan ñi tloo ñi, loꞌ juin yu: ¿Ta nguꞌya um cunta siꞌyana neꞌ fariseo a mdiyaa tiꞌ neꞌ chaꞌ nu ycuiꞌ um?
\v 13 Mxcuen ñi ꞌin yu: Nchgaa yca nu a yta Stin, ñi nu nducua niꞌ cuaan, ntsuꞌhui chaꞌ quiton na ñaꞌan loꞌo xcuaꞌ na.
\v 14 A ta quiyaꞌ um ꞌin neꞌ, siꞌyana cuityinꞌ neꞌ loꞌ tiꞌ nchca tiꞌ neꞌ xñi neꞌ yaaꞌ taꞌa cuityinꞌ neꞌ, una tsatoꞌo chcuaa canꞌ tyu sca tuyuu.
\v 15 Xacanꞌ mdoꞌo ycuiꞌ yu Tyo loꞌ juin yu ꞌin ñi: Cuꞌni um chaꞌ tsuꞌhue quitsaꞌ um ꞌin hua ñaꞌan nguiaa chaꞌ nu ycuiꞌ nchcun um re.
\v 16 Juin Jesús ꞌin yu: ¿Ta na loꞌo um nchcun chaꞌ tiyaa ꞌin um?
\v 17 ¿Ta na a ndyiꞌya um cunta siꞌyana nchgaa na nu nchcu neꞌ ndyijyin ti na niꞌ neꞌ?
\v 18 Una chaꞌ nu ndyiꞌo tuꞌhua neꞌ, nde niꞌ cusya ꞌin neꞌ ndyiꞌo na, canꞌ nu nꞌni chaꞌ nchca cooꞌ cusya ꞌin neꞌ.
\v 19 Siꞌyana nde niꞌ cusya ꞌin neꞌ ndyiꞌo chaꞌ tiyaa ngunanꞌ, chaꞌ nu ndujui neꞌ nten, nguiten yuꞌhui neꞌ loꞌo cuilyiꞌo nten uta loꞌo ñaꞌan tucui ti, chaꞌ cunan, chaꞌ cuiñi, chaꞌ nu ndaja taꞌa neꞌ.
\v 20 Nde chaꞌ nu nꞌni chaꞌ nchca cooꞌ cusya ꞌin neꞌ, una nu cu neꞌ loꞌ a ñaanꞌ neꞌ, a cuꞌni cooꞌ chaꞌ canꞌ ꞌin neꞌ.
\s Chaꞌ ꞌin sca neꞌ cunaꞌan Canaán
\p
\v 21 Xacanꞌ mdoꞌo Jesús nguiaa ñi, loꞌ mdiyaa ñi loo yuu seꞌen lyiꞌya loo quichen Tiro loꞌo Sidón.
\v 22 Yatoꞌo sca neꞌ cunaꞌan nu mdoꞌo seꞌen lyiꞌya loo Canaán ycuiꞌ cueen neꞌ loꞌo ñi, loꞌ nchcuiꞌ neꞌ: ¡Ñi Xꞌnan hua, ꞌun ñi nu lca Sñeꞌ ta nten ꞌin Davi, ñaꞌan ꞌtnan tiꞌ um ꞌin hua! Siꞌyana sca neꞌ cunaꞌan sñenꞌ lyee ꞌa tiꞌi ndijin siꞌya cuiꞌin xaꞌan nu ntsuꞌhui ꞌin.
\v 23 Una Jesús a mxcuen ñi ꞌin neꞌ. Yu taꞌa ndaꞌan ñi mdiyaa yu cuiꞌ la seꞌen nguiaa ñi, loꞌ juin yu ꞌin ñi: Chcuiꞌ um loꞌo neꞌ siꞌyana quiaa neꞌ, loꞌ a can siꞌya ꞌa neꞌ nde chonꞌ na.
\v 24 Loꞌ juin ñi xacanꞌ: Ndiose nguaꞌan tñan ꞌñan siꞌya slyaꞌ nu ndaꞌan ngunanꞌ yuꞌhui seꞌen lca Israel.
\v 25 Cuiꞌ ñaꞌan lcaa mdiyaa neꞌ tloo ñi, mdyiꞌya xtyinꞌ neꞌ, loꞌ mjñan neꞌ chaꞌ tsuꞌhue ꞌin ñi: ¡Ñi Xꞌnan hua, ta yaaꞌ um ꞌin hua!
\v 26 Mxcuen ñi ꞌin neꞌ: A ntsuꞌhui chaꞌ caja nu lyoo jaslya nu ntsuꞌhui tuyaaꞌ sñeꞌ, loꞌ taa ꞌin na cu xniꞌ.
\v 27 Juin neꞌ xacanꞌ: Chaꞌ ñi ꞌin um, Ñi Xꞌnan hua, una hasta loꞌo xniꞌ, loꞌ nxoꞌ ycu ꞌin ta nu nguilo nde niꞌ msa ꞌin xꞌnan ꞌin.
\v 28 Mxcuen Jesús ꞌin neꞌ: Chaꞌ ñi siꞌyana lyee ndiya quiꞌan tiꞌ um, cuiꞌ ñaꞌan chaꞌ nu ntsuꞌhui tiquee um cuañaꞌan tsatoꞌo. Ticuiꞌ braa canꞌ mchca sñeꞌ neꞌ cunaꞌan canꞌ.
\s Mꞌni chca Jesús ꞌin quiꞌan nu tiꞌi
\p
\v 29 Jesús mdoꞌo ñi seꞌen canꞌ loꞌ mxitucui ñi nde tuꞌhua tiyoꞌ Galilea, ycuen ñi sca loo quiꞌya lyoꞌ ti, canꞌ yten tucua ñi.
\v 30 Quiꞌan ꞌa nten nguioꞌ tiꞌin canꞌ, mdiya loꞌo neꞌ ꞌin nu a nchca tyiꞌan, nu cuityinꞌ, nu a nchca chcuiꞌ, a cunta loꞌo nu cuxi yaaꞌ, cuañaꞌan quiꞌan nu tiꞌi loꞌo cuati loo quicha, mdiya loꞌo neꞌ ꞌin tloo Jesús, loꞌ mꞌni chca ñi ꞌin.
\v 31 Nten quiꞌan canꞌ lyee ꞌa yuhue tiꞌ neꞌ xa naꞌan neꞌ siꞌyana nu cuꞌun canꞌ ncua ycuiꞌ, nchgaa nu cuxi yaaꞌ nguinu tsuꞌhue na ꞌin, nu a nchca tyiꞌan loꞌ mdyisnan mdaꞌan, a cunta nguila xaa quiloo nu cuityinꞌ, loꞌ tsatlyu mꞌni tnu neꞌ ꞌin Ndiose ꞌin neꞌ Israel.
\s Mxicu Jesús jacua mii yu quiꞌyu
\p
\v 32 Xacanꞌ msiꞌya Jesús ꞌin yu taꞌa ndaꞌan ñi, loꞌ juin ñi: ꞌTnan ꞌa tinꞌ ꞌin nten re siꞌyana cuaꞌ nchca snan tsaan ndiꞌin neꞌ loꞌon, loꞌ a loꞌo ꞌa na nu cu neꞌ, a nchca tinꞌ tucui xuꞌhuan ꞌin neꞌ chaꞌ a nchca cu neꞌ, chen nchcui ñaꞌan tiꞌ neꞌ tucueen quiaa neꞌ.
\v 33 Mxcuen yu taꞌa ndaꞌan ñi: ¿La caja jaslya xicu na ꞌin nten quiꞌan re, loꞌ niꞌ quixinꞌ lca na re?
\v 34 Loꞌ juin Jesús ꞌin yu: ¿Ñi ncua jaslya tiꞌ ndaꞌan loꞌo um? Mxcuen yu ꞌin ñi: Cha cati ti na loꞌo chcua xnan cula xuhue ti.
\v 35 Xacanꞌ ngulo ñi tñan ꞌin nten canꞌ siꞌyana sten tucua neꞌ lyuu.
\v 36 Msñi ñi taꞌa cati jaslya loꞌo cula canꞌ, loꞌ mdyaa ñi xuꞌhue ꞌin Ndiose, xacanꞌ msuꞌhue ñi ꞌin na loꞌ mdaa ñi ꞌin na ꞌin yu taꞌa ndaꞌan ñi, canꞌ nu cuaꞌ mtsa ꞌin na ꞌin nten canꞌ.
\v 37 Nchgaa neꞌ ycu neꞌ tsayaꞌ ngulaꞌ tiꞌ neꞌ, loꞌ tiꞌ mxoꞌ yu tsa cati xcuhui loꞌo yuꞌhue jaslya nu nguinu canꞌ.
\v 38 Nten nu ycu canꞌ mdiyaa neꞌ jacua mii neꞌ tsalca yu quiꞌyu ti, loꞌ ñi a ncua yu ꞌin jun cunaꞌan loꞌo nu suhue ti.
\v 39 Xa cuaꞌ mslaꞌ taꞌa ñi loꞌo nten canꞌ, yten ñi niꞌ yca naꞌan, loꞌ mdoꞌo caꞌan ñi xca tsoꞌ tiyoꞌ seꞌen lyiꞌya loo quichen Magdala. 
\c 16
\s Chaꞌ ꞌin nten nu njñan chaꞌ nu tnu
\p
\v 1 Neꞌ fariseo loꞌo neꞌ saduceo mdiyaan neꞌ loꞌo chaꞌ mañan ꞌin neꞌ, mjñan neꞌ ꞌin Jesús siꞌyana cuꞌni ñi chaꞌ nu tnu nu tyiꞌo nde niꞌ cuaan.
\v 2 Mxcuen ñi ꞌin neꞌ: Xa nxiin tsaan ndeñaꞌan nchcuiꞌ um: Tsuꞌhue ꞌa luhui xaa siꞌyana ngaꞌá niꞌ cuaan.
\v 3 Loꞌ xa nde tlya nchcuiꞌ um: Cuaꞌ ñii quiꞌya quioo siꞌyana ngaꞌá ndla nducui niꞌ cuaan. ꞌUn neꞌ nu a ñi ndiꞌin chaꞌ ꞌin, ndyiꞌya um cunta chaꞌ nu nchca niꞌ cuaan, ¿loꞌ ñi chaꞌ a ndyiꞌya um chaꞌ tiyaa chaꞌ nu nchca tloo um cuaꞌ ñii?
\v 4 Ta nten nducunꞌ nu a ñi ndiꞌin chaꞌ ꞌin, canꞌ nu nchca tiꞌ ñaꞌan chaꞌ nu tnu, una a ntsuꞌhui chaꞌ ñaꞌan neꞌ chaꞌ canꞌ, cuiꞌ lya loꞌo chaꞌ nu yatoꞌo ꞌin Jonás. Xacanꞌ ngulaꞌ ton ñi ꞌin neꞌ, mdoꞌo ñi nguiaa ñi.
\s Chaꞌ mañan ꞌin neꞌ fariseo
\p
\v 5 Xa mdiyaa yu taꞌa ndaꞌan ñi xca tsoꞌ tiyoꞌ canꞌ, nguia yuꞌhui tiꞌ yu siꞌyana a loꞌo jaslya lyiꞌya yu.
\v 6 Loꞌ juin Jesús ꞌin yu: Ñaꞌan jan ñi, xñi um cunta ꞌin um siꞌya suun jaslya ꞌin neꞌ fariseo loꞌo neꞌ saduceo.
\v 7 Ndeñaꞌan ñan tiꞌ yu: Nchcuiꞌ ñi chaꞌ re siꞌyana a lyiꞌya na jaslya.
\v 8 Nguꞌya ñi cunta chaꞌ canꞌ loꞌ juin ñi: ¿Ta cuañaꞌan chaꞌ ndaꞌan tiquee um siꞌyana a lyiꞌya um jaslya, ꞌun neꞌ nu joꞌo ndiya quiꞌan tiꞌ?
\v 9 ¿Ta na a nchca quiꞌya um chaꞌ tiyaa, loꞌ a ndiya yuꞌhui tiꞌ um chaꞌ ꞌin tsa caꞌyu jaslya nu ycu caꞌyu mii yu quiꞌyu, loꞌ ñi ncua xcuhui na tiꞌ mxoꞌ um?
\v 10 A cunta loꞌo cha cati jaslya nu ycu jacua mii nten, ¿loꞌ ñi ncua xcuhui na tiꞌ mxoꞌ um?
\v 11 ¿Ta a ndyiꞌya um chaꞌ tiyaa? Siꞌi siꞌya chaꞌ ꞌin jaslya nchcuinꞌ chaꞌ re. Xñi um cunta ꞌin um siꞌya suun jaslya ꞌin neꞌ fariseo loꞌo neꞌ saduceo.
\v 12 La xacanꞌ nguꞌya yu cunta siꞌyana siꞌi chaꞌ ꞌin suun jaslya nchcuiꞌ ñi, cuiꞌ ca nu siꞌya ñaꞌan ndloꞌo neꞌ fariseo loꞌo neꞌ saduceo.
\s Ycuiꞌ la yu Tyo siꞌyana Jesús lca ñi Cristo
\p
\v 13 Mdiyaa Jesús seꞌen lyiꞌya loo quichen Cesarea de Filipo, loꞌ mñichaꞌ ñi ꞌin yu taꞌa ndaꞌan ñi: Tsañaꞌan nu nchcuiꞌ nten, ¿ti ca lca Yu Quiꞌyu nu Mdoꞌo nde niꞌ Cuaan?
\v 14 Mxcuen yu ꞌin ñi: Ntsuꞌhui nu nchcuiꞌ siꞌyana lca um yu Xuhua nu mducua tya ꞌin nten, xca nu nchcuiꞌ siꞌyana lca um yu Elía, loꞌ ntsuꞌhui nu nchcuiꞌ siꞌyana Jeremía lca um, uta scasca yu nu mxiycuiꞌ Ndiose ꞌin cuaꞌ sꞌni.
\v 15 Loꞌ juin ñi ꞌin yu: Loꞌ ꞌun jan ñi, ¿tucui ta lcan nanꞌ ñan tiꞌ um?
\v 16 Xacanꞌ mxcuen yu Tyo: ꞌUn lca um ycuiꞌ ca Cristo, Sñeꞌ Ndiose, ñi nu loꞌo ca.
\v 17 Xacanꞌ mxcuen Jesús ꞌin yu: Tsuꞌhue ca xuꞌhue, Simón sñeꞌ Jonás, siꞌyana siꞌi nten chendyu ngulyo scua la chaꞌ re loꞌo, cuiꞌ ca nu Stin, ñi nu nducua niꞌ cuaan.
\v 18 Nanꞌ cunen loꞌo: Nuꞌhuin lca Tyo, loꞌ chonꞌ quee re cuꞌnin chaꞌ tsa quiñan nchgaa nu tsa quiꞌan tiꞌ ꞌñan, loꞌ ñi chaꞌ ndyija loꞌ a tca cuꞌni tiꞌi loꞌo canꞌ.
\v 19 ꞌIn nuꞌhuin taan chaꞌ cuiyaꞌ chcuiꞌ loꞌo nten tsañaꞌan ntsuꞌhui chaꞌ culo Ndiose tñan ꞌin neꞌ, nchgaa chaꞌ nu scanꞌ loo chendyu re, cuaꞌ nchcanꞌ na la niꞌ cuaan, loꞌ nchgaa chaꞌ nu xtinꞌ loo chendyu re, cuaꞌ nguitinꞌ na la niꞌ cuaan.
\v 20 Xacanꞌ ngulo ñi tñan ꞌin yu taꞌa ndaꞌan ñi, siꞌyana a chcuiꞌ yu loꞌo ñi sca tucui siꞌyana lca ñi Jesús, ñi nu lca Cristo.
\s Jesús mtsaꞌ ñi siꞌyana ntsuꞌhui chaꞌ caja ñi
\p
\v 21 Tiꞌ xacanꞌ Jesús mdyisnan ngulyo scua la ñi chaꞌ loꞌo yu taꞌa ndaꞌan ñi, siꞌyana ꞌni chaꞌ tsaa ñi quichen Jerusalén, loꞌ canꞌ tyijyin ñi nu tiꞌi tuyaaꞌ quiꞌyu cula, loꞌo yu nu ndlo ca tñan niꞌ lyaa, loꞌo neꞌ escriba, nu hasta cujui neꞌ ꞌin ñi, una nu cuaꞌ ca snan tsaan tyiquiꞌo ñi.
\v 22 Yu Tyo canꞌ ngulo tsoꞌ yu ꞌin ñi sca seꞌen, loꞌ ngusun loꞌo yu ꞌin ñi: Ñi Xꞌnan hua, a cula yaꞌ Ndiose ꞌin um ca cuañaꞌan.
\v 23 Cuiꞌ xaa mxiton ñi loꞌ juin ñi ꞌin yu Tyo canꞌ: Laxaꞌan, tyiꞌo tsoꞌ siinꞌ loꞌ a chcui ndijin loon, siꞌyana chaꞌ tiyaa ꞌin, a nchcua taꞌa na loꞌo chaꞌ tiyaa ꞌin Ndiose, cuiꞌ ca nu ndaꞌan loꞌo chaꞌ tiyaa ꞌin nten chendyu.
\v 24 Xacanꞌ juin Jesús loꞌo yu taꞌa ndaꞌan ñi: Chaꞌ ndeꞌen nu nchca tiꞌ chcui nchaꞌan ꞌñan, ꞌni chaꞌ jlya tiꞌ canꞌ ꞌin, loꞌ cuꞌni tnu tiquee caja siꞌyan, loꞌ tsa quiñan chcui nchaꞌan ꞌñan.
\v 25 Loꞌ nchgaa nu ñan tiꞌ culo laa ꞌin ticuiiꞌ, tsatoꞌo quinanꞌ canꞌ tiyaa xaa, una nchgaa nu tyaa ꞌin siꞌya chaꞌ ꞌñan, canꞌ nu tyiꞌo laa.
\v 26 Siꞌyana, ¿Ñi canan chuꞌhui ꞌin neꞌ cuꞌni ꞌin neꞌ ñaꞌaan chendyu, loꞌ nde quinanꞌ cusya ꞌin neꞌ? ¿Ñi na tca cuꞌni neꞌ nu tiꞌ chcuan neꞌ cusya ꞌin neꞌ xiyaꞌ?
\v 27 Yu Quiꞌyu nu Mdoꞌo nde niꞌ Cuaan ntsuꞌhui chaꞌ quiaan ñi loo xaa ꞌin Sti ñi loꞌo angujle ꞌin ñi, xacanꞌ xuꞌhua lyiyaꞌ ñi ꞌin cunda scaa nten cuaꞌ ñaꞌaan tñan mꞌni neꞌ.
\v 28 Chaꞌ ñi cunen loꞌo um, ntsuꞌhui nu ndon re a caja, chaꞌ siꞌi culo nducua la ñaꞌan ꞌin Yu Quiꞌyu nu Mdoꞌo nde niꞌ Cuaan xa tyisnan culo ñi tñan. 
\c 17
\s Xa mchaꞌan ñaꞌan Jesús
\p
\v 1 Xa cuaꞌ mdijin scua tsaan, sca cunta mdoꞌo loꞌo Jesús ꞌin yu Tyo, yu Jacobo, loꞌo yu Xuhua taꞌa ngula yu, nguiaa jun sca loo quiꞌya cuaan.
\v 2 Tloo naꞌan yu mchaꞌan ñaꞌan ñi, nduhui tloo ñi tsañaꞌan nchca tiꞌ cucha, loꞌ steꞌ ñi nguinu mten na tsañaꞌan nchca tiꞌ sca xaa.
\v 3 Lja xacanꞌ naꞌan yu mdoꞌo ton Moisé loꞌo Elía nu nchcuiꞌ loꞌo ñi.
\v 4 Xacanꞌ juin yu Tyo ꞌin Jesús: Ñi Xꞌnan hua, tsuꞌhue ꞌa siꞌyana loꞌo hua ndlyu hua re. Chaꞌ nchca tiꞌ um loꞌ tñan hua snan quisin, sca na ꞌin um, xca na ꞌin Moisé, loꞌ xca na ꞌin Elía.
\v 5 Lja nu tiꞌ nchcuiꞌ yu chaꞌ canꞌ, nguoꞌo yuꞌhui sca ndla tsuꞌhue ñaꞌan xaa ꞌin jun, cuiꞌ xaa ngune ycuiꞌ sca nu ycuiꞌ niꞌ ndla canꞌ: Nde Sñenꞌ nanꞌ nu taꞌa lati ꞌñan, quine ꞌin um chaꞌ nu chcuiꞌ re.
\v 6 Xa ngune ꞌin yu taꞌa ndaꞌan ñi chaꞌ canꞌ, cuiꞌ xaa mdyiꞌya sti yu ꞌin yu la lyuu loꞌ lyee ytsen yu.
\v 7 Yaan Jesús loꞌ ylaꞌ ñi ꞌin yu, loꞌ juin ñi: Tyiton loꞌ a cutsen um.
\v 8 Xa mscuen yu tloo yu, a tucui ꞌa naꞌan yu, cuiꞌ ca nu xca ti Jesús ndon ñi.
\v 9 Xa mdoꞌo jun loo quiꞌya canꞌ, ngulo Jesús tñan ꞌin yu: A chcuiꞌ um loꞌo ñi sca tucui chaꞌ nu naꞌan um, chaꞌ siꞌi la xa cuaꞌ mdyiquiꞌo Yu Quiꞌyu nu Mdoꞌo nde niꞌ Cuaan.
\v 10 Xacanꞌ mñichaꞌ yu taꞌa ndaꞌan ñi ꞌin ñi: ¿Ñi chaꞌ ta nchcuiꞌ neꞌ escriba siꞌyana yu Elía caan yu culo nducua la?
\v 11 Mxcuen Jesús ꞌin yu: Chaꞌ ñi siꞌyana yu Elía caan yu culo nducua la, loꞌ cuꞌni chuꞌhue yu nchgaa loo chaꞌ.
\v 12 Una cunen loꞌo um siꞌyana cuaꞌ yaan Elía, loꞌ a yuꞌhui lyoo neꞌ ꞌin yu, cuiꞌ ca nu mꞌni lyiꞌo neꞌ ꞌin yu ñaꞌan nu ncua tiꞌ neꞌ, cuiꞌ cuañaꞌan xitijin neꞌ nu tiꞌi ꞌin Yu Quiꞌyu nu Mdoꞌo nde niꞌ Cuaan.
\v 13 Xacanꞌ yu taꞌa ndaꞌan ñi nguꞌya yu chaꞌ tiyaa siꞌyana nchcuiꞌ ñi chaꞌ ꞌin yu Xuhua mducua tya ꞌin nten.
\s Mchca sca yu tsa suhue ti
\p
\v 14 Xa nguila jun seꞌen ndiꞌin nten quiꞌan canꞌ, mdiyaan sca yu quiꞌyu loꞌ mdyiꞌya xtyinꞌ yu tloo ñi, loꞌ nchcuiꞌ yu:
\v 15 Ñi Xꞌnan hua, ñaꞌan ꞌtnan tiꞌ um ꞌin sñenꞌ nanꞌ, siꞌyana nxñi cuiꞌin ꞌin yu loꞌ tiꞌi ꞌa ndijin yu, cuaꞌ tyun yaꞌ nxitlyu suꞌhua na ꞌin yu loo quiiꞌ uta loo tyiꞌa.
\v 16 Cuaꞌ yan loꞌon ꞌin yu tloo yu taꞌa ndaꞌan um, una a ncua ꞌin yu cuꞌni chca yu ꞌin.
\v 17 Mxcuen Jesús: ¡ꞌUn lca um nten nu a ndiya quiꞌan tiꞌ loꞌ lca um nten nducunꞌ! ¿Tsala ta xaa cuiꞌ ti ꞌñan nducua tloo um, loꞌ tsala xaa tiꞌ ta loon ꞌin um? Quian loꞌo um ꞌin sñeꞌ um.
\v 18 Ngusun loꞌo Jesús ꞌin cuiꞌin xaꞌan canꞌ, xacanꞌ ngulaꞌ ton na ꞌin yu, ticuiꞌ xaa mchca yu.
\v 19 Yu taꞌa ndaꞌan Jesús mñichaꞌ yu ꞌin ñi sca cunta: ¿Ñi chaꞌ huareꞌ, a ncua ꞌin hua culo hua cuiꞌin xaꞌan cua?
\v 20 Juin Jesús ꞌin yu: Cuiꞌ siꞌyana joꞌo ndiya quiꞌan tiꞌ um. Nu chaꞌ ñi cunen loꞌo um, mti mostaza suhue ti na, siyaꞌ tsacua ti ñaꞌan tsa quiꞌan tiꞌ um, loꞌ tca chcuiꞌ um loꞌo quiꞌya cua: Tyiꞌo loꞌ tsa tucua la cua, loꞌ cuañaꞌan tsatoꞌo, loꞌ a sca chaꞌ ta a tca cuꞌni um.
\v 21 Una cuiꞌin nu cuañaꞌan, a tyiꞌo canꞌ chaꞌ siꞌi culo nducua la chcuiꞌ lyiꞌo na ꞌin Ndiose loꞌ cuꞌni na ayuna.
\s Xiyaꞌ ycuiꞌ Jesús siꞌyana cujui neꞌ ꞌin ñi
\p
\v 22 Lja nu tiꞌ ntsuꞌhui lyijyi jun seꞌen lyiꞌya loo Galilea, juin Jesús ꞌin yu taꞌa ndaꞌan ñi: Yu Quiꞌyu nu Mdoꞌo nde niꞌ Cuaan caja nu tyaa ꞌin ñi tuyaaꞌ nten,
\v 23 loꞌ cujui neꞌ ꞌin ñi, una nu cuaꞌ ca snan tsaan ntsuꞌhui chaꞌ tyiquiꞌo ñi. Una yu taꞌa ndaꞌan ñi ndyijyin yaꞌ nguluꞌun tiꞌ yu.
\s Msuꞌhua lyiyaꞌ Jesús tñi chaꞌ ꞌin laa
\p
\v 24 Xa nguila jun quichen Capernaum, mdijin yu nu nxoꞌ tñi chaꞌ ꞌin laa, loꞌ juin yu ꞌin yu Tyo: Ñi nu lca Xꞌnan um, ¿ta a loꞌo ñi taa ñi tñi nu nxoꞌ hua re?
\v 25 Mxcuen yu: Loꞌo ñi. Ñaꞌaan yten yu Tyo ñaꞌan canꞌ culo nducua la Jesús ycuiꞌ loꞌo yu: ¿Ñaꞌan ljuin, Simón? Yu nu nchca ree loo chendyu re, ¿ti ca ꞌin ndlo yu scasca tñi, ꞌin sñeꞌ yu uta na ꞌin nten quita?
\v 26 Mxcuen yu Tyo ꞌin ñi: ꞌIn nten quita. Xacanꞌ juin Jesús: Tsalca sñeꞌ yu, a loꞌo canꞌ suꞌhua lyiyaꞌ.
\v 27 Una siꞌyana a ljuin yu ta lyeꞌ tiꞌ na, yaa loo tiyoꞌ cua loꞌ cuun chcuin ꞌin, loꞌ culoo cula nu quinu ꞌin sla tuꞌhua ꞌin, canꞌ quija lyoo sca tñi plata, culyoo ꞌin na loꞌ taa ꞌin na ꞌin yu tñan loo na. 
\c 18
\s ¿Tucui ca lca nu ndon loo la?
\p
\v 1 Xacanꞌ mñichaꞌ yu taꞌa ndaꞌan Jesús ꞌin ñi: ¿Tucui ca lca nu ndon loo la seꞌen ndlo Ndiose tñan?
\v 2 Msiꞌya Jesús ꞌin sca yu lyoꞌ ti, loꞌ mdiꞌin tyaa ñi ꞌin yu tluꞌhue la canꞌ,
\v 3 loꞌ juin ñi: Nu chaꞌ ñi cunen loꞌo um, chaꞌ a xitsaꞌan um chaꞌ tiyaa ꞌin um, loꞌ ñi a cuꞌni um ꞌin um ñaꞌan nu suhue ti, a tca sten um seꞌen ndlo Ndiose tñan.
\v 4 Canꞌ chaꞌ ñaꞌan tucui ti nu cuꞌni lyoꞌ ꞌin tsañaꞌan ndiꞌin chaꞌ ꞌin yu lyoꞌ ti re, canꞌ nu ndon loo lati seꞌen ndlo Ndiose tñan.
\v 5 Ñaꞌan nu ti nu cuan xuꞌhue ꞌin sca nu lyoꞌ ti ñaꞌan yu re, siꞌya chaꞌ ꞌñan, cuꞌni canꞌ cunta siꞌyana ꞌñan cuan xuꞌhue.
\s A xityu na ꞌin xca tucui loo quiꞌya
\p
\v 6 Ñaꞌan tucui ti nu xityu ꞌin sca nu ndiya quiꞌan tiꞌ ꞌñan, tsañaꞌan ndiꞌin chaꞌ ꞌin nu suhue ti re, ndyiꞌo la tñan yni canꞌ scanꞌ tucui sca quee tlyu nu ndiyo neꞌ trigo, loꞌ cuun neꞌ ꞌin tluꞌhue la tyiꞌa tujoꞌo.
\v 7 ¡ꞌTnan ca nten chendyu nu xityu ꞌin xca tucui loo quiꞌya! A ndyijyin yuꞌhui nu a caan chaꞌ canꞌ. ¡Una ꞌtnan ca nu xityu ꞌin xca tucui loo quiꞌya!
\v 8 Chaꞌ siꞌya yaaꞌ um uta quiyaꞌ um cuꞌni um quiꞌya, siꞌyu um ꞌin na loꞌ xcuan um ꞌin na, siꞌyana tsuꞌhue lati chaꞌ coꞌ yaaꞌ um loꞌ coꞌ quiyaꞌ um sten um tloo Ndiose, loꞌ siꞌi nu chcuaa tsoꞌ yaaꞌ um loꞌ chcuaa tsoꞌ quiyaꞌ um tsaa um loo quiiꞌ tsala xaa.
\v 9 Chaꞌ siꞌya quiloo um cuꞌni um quiꞌya, culo um ꞌin na loꞌ xcuan um ꞌin na, siꞌyana tsuꞌhue lati chaꞌ sca tsoꞌ ti quiloo um sten um tloo Ndiose, loꞌ siꞌi nu chcuaa tsoꞌ quiloo um tsaa um loo quiiꞌ.
\s Chaꞌ ꞌin slyaꞌ nu ngunanꞌ yuꞌhui
\p
\v 10 Xñi um cunta siꞌyana a xcuan tloo um ꞌin nu suhue ti re, cunen loꞌo um siꞌyana angujle nu ntsuꞌhui cunta ꞌin re, nchgaa xaa ndon tloo Stin, ñi nu nducua niꞌ cuaan.
\v 11 Yu Quiꞌyu nu Mdoꞌo nde niꞌ Cuaan mdiyaan ñi siꞌyana culo laa ñi ꞌin nu ngunanꞌ yuꞌhui.
\v 12 ¿Ñaꞌan ljuin um? Chaꞌ sca yu quiꞌyu ndiꞌin sca ciento slyaꞌ ꞌin yu, loꞌ chaꞌ tyiꞌo tsoꞌ sca ꞌin, ¿ta a xnu tiꞌin yu ꞌin cha jacua yla ntsuꞌhui ꞌtñulcua nu canꞌ, loꞌ quia nan yu ꞌin nu ngunanꞌ yuꞌhui canꞌ?
\v 13 Chaꞌ quija lyoo ꞌin, nu chaꞌ ñi cunen loꞌo um, lyee la ca tsuꞌhue chuꞌhui tiquee yu loꞌo canꞌ, que ꞌin cha jacua yla ntsuꞌhui ꞌtñulcua nu a ngunanꞌ yuꞌhui canꞌ.
\v 14 Cuiꞌ cuañaꞌan Stina Ndiose, ñi nu nducua niꞌ cuaan, a lca tiquee ñi quinanꞌ ñi sca nu suhue ti re.
\s Cuꞌni na chaꞌ tlyu tiꞌ ꞌin taꞌa na
\p
\v 15 Chaꞌ sca jun taꞌa na cuꞌni quiꞌya loꞌ cuꞌni tiꞌi loꞌo um, chcuiꞌ um loꞌo canꞌ seꞌen scati um, chaꞌ cuꞌni cunta chaꞌ nu chcuiꞌ um, cuaꞌ mꞌni um canan mchca tsuꞌhue chaꞌ ꞌin.
\v 16 Chaꞌ a cuꞌni cunta chaꞌ chcuiꞌ um, cuni um tucua snan jun taꞌa tsaa um, —loꞌ tyiꞌo scua la sca chaꞌ siꞌya tucua snan nu taa suun chaꞌ canꞌ—.
\v 17 Chaꞌ a cuꞌni cunta canꞌ ꞌin jun taꞌa yaa um, quitsaꞌ um ꞌin laa, loꞌ chaꞌ a cuꞌni cunta chaꞌ nu chcuiꞌ nchgaa jun taꞌa na, cuꞌni um cunta ꞌin canꞌ lca sca nu nducunꞌ loꞌ tiji nan.
\v 18 Nu chaꞌ ñi cunen loꞌo um, nchgaa chaꞌ nu scanꞌ um loo chendyu re, cuaꞌ nchcanꞌ na la niꞌ cuaan, loꞌ nchgaa chaꞌ nu xtinꞌ um loo chendyu re, cuaꞌ nguitinꞌ na la niꞌ cuaan.
\v 19 Xiyaꞌ cunen loꞌo um, chaꞌ tucua um ca sca chaꞌ ti ꞌin um loo chendyu re, loꞌ nchgaa chaꞌ nu jñan um ꞌin Stin, ñi nu nducua niꞌ cuaan, cuiꞌ ñi cuꞌni ñi chaꞌ canꞌ.
\v 20 Siꞌyana seꞌen ndiyoꞌ tiꞌin tucua snan jun siꞌya chaꞌ ꞌñan, nanꞌ ndon tluꞌhue la canꞌ.
\v 21 Xacanꞌ mdiyaa yu Tyo la tloo ñi, loꞌ juin yu: Ñi Xꞌnan hua, ¿ñi ncua yaꞌ cuꞌnin chaꞌ tlyu tiꞌ ꞌin sca yu taꞌa na nu cuꞌni sca chaꞌ ngunanꞌ loꞌon? ¿Tsa cati yaꞌ?
\v 22 Juin Jesús ꞌin yu: Siꞌi tsa cati yaꞌ, cuiꞌ ca nu snan yla ntsuꞌhui tii yaꞌ cuꞌni um cati canꞌ.
\s Chaꞌ ꞌin tucua yu nducui tniꞌ
\p
\v 23 Canꞌ chaꞌ tsañaꞌan ndlo Ndiose tñan, suꞌhua ñaꞌan nguiaa chaꞌ ꞌin na loꞌo chaꞌ ꞌin sca yu ree nu mꞌni chuꞌhue cunta ꞌin loꞌo nguso ꞌin.
\v 24 Xa mdyisnan mꞌni yu cunta, mdiyaa sca nguso nu nducui tyun millon tñi ꞌin yu.
\v 25 Loꞌ siꞌyana a ncua ꞌin yu xuꞌhua lyiyaꞌ yu tniꞌ canꞌ, ngulo xꞌnan yu tñan siꞌyana ca quiyaꞌ yu, tsatlyu loꞌo nten ꞌin yu loꞌo sñeꞌ yu loꞌo nchgaa na nu ndiꞌin ꞌin yu, loꞌ cuañaꞌan xicuten yu tñi nducui yu.
\v 26 Xacanꞌ mdyiꞌya xtyinꞌ yu nguso canꞌ, mjñan yu chaꞌ tsuꞌhue ꞌin xꞌnan yu, loꞌ nchcuiꞌ yu: Ñi xꞌnan hua, chuꞌhui chaꞌ tlyu tiꞌ ꞌin um loꞌon, nanꞌ xuꞌhua lyiyanꞌ ñaꞌaan tñi nu nducuin ꞌin um.
\v 27 Xꞌnan nguso canꞌ mñaꞌan ꞌtnan tiꞌ ꞌin yu, loꞌ mꞌni chaꞌ tlyu tiꞌ ꞌin yu loꞌo tñi canꞌ, loꞌ ngulaa ꞌin yu nguiaa yu.
\v 28 Ñaꞌaan mdoꞌo yu nguso canꞌ, mchcua tucui yu ꞌin xca taꞌa nguso yu nu nducui tsachinꞌ tñi ꞌin yu, cuiꞌ xaa yaa yu loꞌ msñanꞌ yu yni, loꞌ nchcuiꞌ yu: Xuꞌhua lyiyaꞌ na nu nducui ꞌñan.
\v 29 Taꞌa nguso yu canꞌ mdyiꞌya xtyinꞌ tloo yu, loꞌ mjñan chaꞌ tsuꞌhue ꞌin yu, loꞌ nchcuiꞌ: Chuꞌhui chaꞌ tlyu tiꞌ ꞌin loꞌon, nanꞌ xuꞌhua lyiyanꞌ ñaꞌaan tñi nu nducuin ꞌin.
\v 30 Una yu nguso canꞌ a mꞌni yu cunta chaꞌ canꞌ, cuiꞌ ca nu msuꞌhua yu ꞌin naꞌan chcuan, loꞌ canꞌ chuꞌhui yu tsayaꞌ nu xuꞌhua lyiyaꞌ tñi canꞌ.
\v 31 Xa naꞌan nchgaa la ñaꞌan taꞌa lca yu nguso chaꞌ nu yatoꞌo, ndyijyin yaꞌ nguluꞌun tiꞌ yu, loꞌ ya taa yu suun ꞌin xꞌnan yu nchgaa chaꞌ nu yatoꞌo.
\v 32 Xacanꞌ msiꞌya xꞌnan nguso canꞌ ꞌin yu loꞌ juin: Nuꞌhuin lca sca nguso nu nducunꞌ, ñaꞌaan tñi nducui ꞌñan mꞌni chaꞌ tlyu tiꞌ ꞌin loꞌo na, siꞌyana mjñan chaꞌ tsuꞌhue ꞌñan.
\v 33 Loꞌ nuꞌhuin jan ñi, ¿ta a ncua cuꞌni chaꞌ tlyu tiꞌ ꞌin taꞌa lca nguso, tsañaꞌan nu nanꞌ mꞌnin loꞌo?
\v 34 Lyee ꞌa ycuen tiqueꞌ xꞌnan yu, loꞌ mdyaa cunta ꞌin yu seꞌen nu ntsuꞌhui chaꞌ tyijyin nu tiꞌi, tsayaꞌ nu xuꞌhua lyiyaꞌ yu ñaꞌaan tñi nducui yu.
\v 35 Cuiꞌ cuañaꞌan cuꞌni Stin, ñi nu nducua niꞌ cuaan loꞌo um, chaꞌ a cuꞌni um chaꞌ tlyu tiꞌ loꞌo nu chcui lca tiquee um, ꞌin cunda scaa taꞌa um nu nguiꞌni chaꞌ ngunanꞌ loꞌo um.
\c 19
\s Nten nu ndlaꞌ tiꞌin ꞌin cuilyiꞌo
\p
\v 1 Yatoꞌo xa mdyi ycuiꞌ Jesús chaꞌ re, mdoꞌo ñi seꞌen lyiꞌya loo Galilea, loꞌ mdiyaa ñi seꞌen lyiꞌya loo Judea, mdoꞌo caꞌan ñi xca tsoꞌ chco tlyu Jordan.
\v 2 Quiꞌan ꞌa nten mducui nchaꞌan ꞌin ñi, canꞌ mꞌni chca ñi ꞌin neꞌ.
\v 3 Xacanꞌ mdiyaan tucua snan neꞌ fariseo, loꞌ nan neꞌ ñaꞌan suꞌhua neꞌ quiꞌya ꞌin ñi loꞌo chaꞌ nu xcuen ñi, loꞌ juin neꞌ ꞌin ñi: ¿Ta ntsuꞌhui chaꞌ cuiyaꞌ ꞌin yu quiꞌyu culaꞌ tiꞌin yu ꞌin cuilyiꞌo yu, siꞌya chaꞌ a ngujlyo ñaꞌan?
\v 4 Mxcuen ñi ꞌin neꞌ: ¿Ta na a nchca chcuiꞌ um quityi seꞌen mdyisnan suun chaꞌ re? Ñi nu mtñan ꞌin nten chendyu, —quiꞌyu loꞌ cunaꞌan mtñan ñi—,
\v 5 loꞌ juin ñi: —Canꞌ chaꞌ yu quiꞌyu ntsuꞌhui chaꞌ tyiꞌo tsoꞌ yu siiꞌ sti yu loꞌo jyiꞌan yu, loꞌ tyiꞌin yu loꞌo cuilyiꞌo yu, loꞌ chcuaa canꞌ sca tucui ti lca—.
\v 6 Cuaꞌ siꞌi ꞌa tucua lca canꞌ, cuiꞌ ca nu scati lca canꞌ, canꞌ chaꞌ nu cuaꞌ mꞌni sca Ndiose ꞌin, a ntsuꞌhui ꞌa chaꞌ tiꞌ culaꞌ tiꞌin taꞌa.
\v 7 Xacanꞌ juin neꞌ ꞌin ñi: ¿Ñi chaꞌ Moisé mdaa chaꞌ cuiyaꞌ ꞌin yu quiꞌyu culaꞌ tiꞌin yu cuilyiꞌo yu, chaꞌ na tsaꞌ scua sca quityi ꞌin yu?
\v 8 Loꞌ juin ñi ꞌin neꞌ: Siꞌya chaꞌ tla cusya ꞌin um, mdaa Moisé chaꞌ cuiyaꞌ siꞌyana tyiꞌo chaꞌ cuilyiꞌo ꞌin um, una siꞌi cuañaꞌan lca na tiꞌ culoo.
\v 9 Una nanꞌ cunen loꞌo um, yu culaꞌ tiꞌin ꞌin cuilyiꞌo loꞌ tyiꞌin loꞌo xca neꞌ cunaꞌan, quiꞌya nguiꞌni canꞌ, cuiꞌ cuañaꞌan neꞌ cunaꞌan nu ngulaꞌ tiꞌin yu canꞌ, chaꞌ tyiꞌin neꞌ loꞌo xca yu quiꞌyu, ticuiꞌ quiꞌya nguiꞌni neꞌ. Siꞌya scati chaꞌ tca tyiꞌo chaꞌ cuilyiꞌo ꞌin nten, chaꞌ na yten yuꞌhui canꞌ loꞌo xca tucui.
\v 10 Yu taꞌa ndaꞌan ñi canꞌ juin yu ꞌin ñi: Chaꞌ cuañaꞌan ndiꞌin chaꞌ ꞌin yu quiꞌyu loꞌo neꞌ cunaꞌan, a ndyiꞌo tñan ja cuilyiꞌo yu.
\v 11 Xacanꞌ juin ñi ꞌin yu: Siꞌi nchgaa tucui tca quiꞌya cunta chaꞌ re, cuiꞌ ca nu tsalca nu cuaꞌ mdaa Ndiose chaꞌ cuiyaꞌ ꞌin tca cuan xuꞌhue chaꞌ re.
\v 12 Ntsuꞌhui yu nu lca eunuco nu cuaꞌ lca ñaꞌan xa ngula, loꞌ ntsuꞌhui yu nu nchca eunuco loꞌo cunta ꞌin nten chendyu, a cunta ntsuꞌhui yu nu nsuꞌhua juesa ꞌin loꞌo chaꞌ re siꞌya tñan ꞌin Ndiose. Yu nu cuan xuꞌhue chaꞌ re, tsuꞌhue chaꞌ tca cuꞌni yu ꞌin na.
\s Xa mcuan Jesús ꞌin nu suhue ti
\p
\v 13 Xacanꞌ mdiyan loꞌo neꞌ ꞌin nu suhue ti tloo ñi, siꞌyana tyiꞌin tyaa ñi yaaꞌ ñi que, loꞌ jñan ñi ꞌin Ndiose siꞌya. Loꞌ yu taꞌa ndaꞌan ñi ngusun loꞌo yu ꞌin neꞌ.
\v 14 Una Jesús juin ñi ꞌin yu: Tyaa um yaꞌ caan nu suhue ti seꞌen ndon, loꞌ a chcui ndijin um, siꞌyana seꞌen ndlo Ndiose tñan sten tsalca nu cuꞌni lyoꞌ ꞌin tsañaꞌan nu suhue ti re.
\v 15 Xa cuaꞌ mdiꞌin tyaa ñi yaaꞌ ñi que nu suhue ti canꞌ, mdoꞌo ñi nguiaa ñi.
\s Chaꞌ ꞌin sca yu cuilyiyaꞌ
\p
\v 16 Xacanꞌ mdiyaan sca yu juin ꞌin ñi: ꞌUn lca um bstro nu tsuꞌhue ca, ¿ñi tñan tsuꞌhue cuꞌnin siꞌyana caja chendyu nu a tsatii ꞌa ꞌñan?
\v 17 Xacanꞌ juin ñi ꞌin yu: ¿Ñi chaꞌ nchcuiꞌ siꞌyana lcan sca nu tsuꞌhue? Scati Ndiose tsuꞌhue ñi. Chaꞌ nchca tiꞌ caja chendyu nu a tsatii ꞌa ꞌin, xuꞌhua seꞌen chaꞌ nu ngulo ñi tñan.
\v 18 Loꞌ juin yu: ¿Ti ñaꞌan ta chaꞌ? Mxcuen Jesús ꞌin yu: —A cujui um nten, a sten yuꞌhui um loꞌo cuilyiꞌo nten, a cuꞌni um cunan, a chcuiꞌ um chaꞌ cuiñi.
\v 19 Cuꞌni suun um ꞌin um tloo sti um loꞌo jyiꞌan um—, a cunta —ñaꞌan ꞌtnan tiꞌ um ꞌin taꞌa nten um tsañaꞌan nꞌni um ꞌtnan ꞌin um—.
\v 20 Xacanꞌ mxcuen yu ꞌin ñi: Tiꞌ lyonꞌ nxuꞌhua seꞌen nchgaa chaꞌ re. ¿Ti ñaꞌan la chaꞌ tiꞌ lyijyi ꞌñan?
\v 21 Juin Jesús ꞌin yu: Chaꞌ nchca tiꞌ ca sca nu ñi ndiꞌin chaꞌ ꞌin, quiaa loꞌ cujuiꞌ nchgaa na nu ndiꞌin ꞌin, loꞌ cutsa tñi canꞌ ꞌin nu tiꞌi, cuañaꞌan caja chaꞌ cuilyiyaꞌ ꞌin la niꞌ cuaan, xacanꞌ ljyaan loꞌ chcui nchaꞌan ꞌñan.
\v 22 Xa ngune ꞌin yu chaꞌ canꞌ, nguluꞌun ꞌa tiꞌ yu siꞌyana ndyijyin yaꞌ cuilyiyaꞌ yu.
\v 23 Xacanꞌ juin Jesús ꞌin yu taꞌa ndaꞌan ñi: Nu chaꞌ ñi cunen loꞌo um, tucui ꞌa ñaꞌan sten neꞌ cuilyiyaꞌ seꞌen ndlo Ndiose tñan.
\v 24 Xiyaꞌ cunen loꞌo um: Cuti la tyijyin sca camello quito quiyaꞌ cuxa, que nu sten sca yu cuilyiyaꞌ seꞌen ndlo Ndiose tñan.
\v 25 Xa ngune ꞌin yu taꞌa ndaꞌan ñi chaꞌ re, lyee ꞌa yuhue tiꞌ yu loꞌ nchcuiꞌ yu: ¿Ti nu ta tca tyiꞌo laa chaꞌ na canꞌ?
\v 26 Xacanꞌ mxinaꞌan Jesús ꞌin yu, loꞌ juin ñi: Chaꞌ ꞌin nten, a ndyijyi ñaꞌan chaꞌ re, una a sca chaꞌ tucui ꞌin Ndiose.
\v 27 Yu Tyo mdoꞌo ycuiꞌ yu loꞌ juin yu ꞌin ñi: Ñaꞌan um jan ñi, huareꞌ cuaꞌ ngulaꞌ tiꞌin hua nchgaa na nu ndiꞌin ꞌin hua, loꞌ nducui nchaꞌan hua ꞌin um, ¿ñi chaꞌ tsuꞌhue ta quiꞌni caꞌan ꞌin hua?
\v 28 Mxcuen Jesús ꞌin yu taꞌa ndaꞌan ñi: Nu chaꞌ ñi cunen loꞌo um, tiyaa xaa chca cui nchgaa chaꞌ, xa nu Yu Quiꞌyu nu Mdoꞌo nde niꞌ Cuaan chcua ñi loo xaa seꞌen ntsuꞌhui chaꞌ culo ñi tñan, nchgaa ꞌun nu nducui nchaꞌan ꞌñan, loꞌo um ntsuꞌhui chaꞌ chcua um loo tsa tichcua yca xlya, loꞌ cuꞌni cuiyaꞌ um chaꞌ ꞌin tsa tichcua ta nten ꞌin neꞌ Israel.
\v 29 Ñaꞌan tucui ti nu xnu tucua naꞌan ꞌin, uta xnu tiꞌin taꞌa ngula, uta ꞌin sti loꞌo jyiꞌan, loꞌo cuilyiꞌo, loꞌo sñeꞌ, uta yuu seꞌen nꞌni tñan, cuiꞌ siꞌya chaꞌ ꞌñan, quiꞌan la caja ꞌin canꞌ, a cunta loꞌo chendyu nu a tsatii ꞌa.
\v 30 Siꞌyana quiꞌan ꞌa nu culoo cuaꞌ ñii, quinu caꞌan chonꞌ canꞌ tiyaa xaa. Loꞌ nu nguinu caꞌan chonꞌ cuaꞌ ñii, canꞌ nu chcua loo tiyaa xaa.
\c 20
\s Chaꞌ ꞌin yu nguso nu nguiꞌni tñan
\p
\v 1 Tsañaꞌan ndlo Ndiose tñan, nguiaa chaꞌ ꞌin na ñaꞌan ndiꞌin chaꞌ ꞌin sca nu ndlo tñan, loꞌ tlya mdoꞌo yu nguia nan yu nguso nu cuꞌni tñan seꞌen nducua ti uva ꞌin yu.
\v 2 Xa cuaꞌ mꞌni cuiyaꞌ yu chaꞌ loꞌo siꞌyana suꞌhua lyiyaꞌ yu ꞌin tsañaꞌan siyaꞌ yu sca tsaan, xacanꞌ nguaꞌan tñan yu ꞌin la loo xñan yu.
\v 3 Tsa ntsuꞌhui braa cuaꞌ caa tlya mdijin yu nde loquiyaꞌ, canꞌ naꞌan yu tucua snan yu nu a sca tñan nguiꞌni,
\v 4 loꞌ juin yu ꞌin: Yaa um loꞌ cuꞌni um tñan ꞌñan, loꞌ suꞌhua lyiyanꞌ ꞌin um ñaꞌan nu ntsuꞌhui chaꞌ, loꞌ mdoꞌo yu nguiaa yu.
\v 5 Xiyaꞌ tsa ntsuꞌhui ndyiꞌya cuaan loꞌo braa cuaꞌ snan siin, mdoꞌo xꞌnan tñan canꞌ nguiaa, ticuiꞌ ti ñaꞌan mꞌni yu.
\v 6 Xiyaꞌ mdoꞌo yu tsa ntsuꞌhui braa cuaꞌ caꞌyu siin, nguija lyoo chcua xnan yu nu a sca tñan nguiꞌni, loꞌ juin yu ꞌin: ¿Ñi chaꞌ ndon um chcui tsaan re, loꞌ a sca tñan nguiꞌni um?
\v 7 Mxcuen yu ꞌin: Siꞌyana a nchca tucui cuni ꞌin hua. Xacanꞌ juin xꞌnan tñan canꞌ: Tsaa na loꞌ cuꞌni um tñan, loꞌ caja siyaꞌ um ñaꞌan nu ntsuꞌhui chaꞌ.
\v 8 Xa msiin tsaan canꞌ, xꞌnan tñan canꞌ msiꞌya ꞌin yu nu ntsuꞌhui cunta tñan, loꞌ juin ꞌin yu: Xiꞌya ꞌin yu nu mꞌni tñan cua loꞌ suꞌhua lyiyaꞌ tsaan ꞌin yu, una tyisnan loꞌo yu nu yten tñan la msiin la, loꞌ cuañaꞌan tsa quiñan loꞌo nchgaa la ñaꞌan yu.
\v 9 Xa mdiyaan yu nu yten tñan braa cuaꞌ caꞌyu siin canꞌ, cunda scaa yu jui siyaꞌ yu tsañaꞌan siyaꞌ yu sca tsaan.
\v 10 Xa mdiyaan yu nu yten tlya canꞌ, ñan tiꞌ yu siꞌyana quiꞌan la caja ꞌin yu, una scañaꞌan ti jui siyaꞌ yu, chaꞌ ꞌin sca tsaan.
\v 11 Una xa cuaꞌ msñi siyaꞌ yu, xacanꞌ mdyisnan ycuiꞌ tyijyin yu loꞌo xꞌnan tñan canꞌ,
\v 12 loꞌ nchcuiꞌ yu: Yu nu yten tñan la msiin la, seen sca braa ti mꞌni yu tñan, loꞌ suꞌhua ñaꞌan msuꞌhua lyiyaꞌ um ꞌin hua loꞌo yu, loꞌ chcui tsaan mꞌni hua tñan, a cunta tiqueꞌ cuaan.
\v 13 Xacanꞌ mxcuen xꞌnan tñan canꞌ ꞌin sca yu canꞌ: Migo, a nguiꞌnin tiꞌi loꞌo, ¿ta a nguinu na chaꞌ siꞌyana xñi siyaꞌ chaꞌ ꞌin sca tsaan?
\v 14 Xñi lya siyaꞌ loꞌ quiaa, una nanꞌ nchca tinꞌ suꞌhua lyiyanꞌ ꞌin yu nu yten msiin la re, tsañaꞌan nu msuꞌhua lyiyanꞌ ꞌin nuꞌhuin.
\v 15 ¿Ta a ntsuꞌhui suun ꞌñan cuꞌnin ñaꞌan nu nchca tinꞌ loꞌo na nu ꞌñan? ¿Uta na ntsuꞌhui chaꞌ jñan tiꞌ ꞌin siꞌyana tsuꞌhue chaꞌ ꞌñan?
\v 16 Canꞌ chaꞌ nu culoo cuaꞌ ñii, quinu caꞌan chonꞌ canꞌ tiyaa xaa, loꞌ nu nguinu caꞌan chonꞌ cuaꞌ ñii, ntsuꞌhui chaꞌ ca nu culoo, siꞌyana quiꞌan nten jui nu msiꞌya ꞌin, una chinꞌ ti nu mdoꞌo hui.
\s Xiyaꞌ ycuiꞌ Jesús siꞌyana cujui neꞌ ꞌin ñi
\p
\v 17 Jesús mdoꞌo ñi nguiaa ñi quichen Jerusalén, loꞌ tucueen nguiaa jun sca cunta ycuiꞌ ñi loꞌo tsa tichcua yu canꞌ, loꞌ juin ñi:
\v 18 Cuaꞌ ñii tsaa na quichen Jerusalén, loꞌ Yu Quiꞌyu nu Mdoꞌo nde niꞌ Cuaan, ntsuꞌhui chaꞌ quinu ñi tuyaaꞌ yu nu ndlo ca tñan niꞌ lyaa, loꞌo neꞌ escriba, loꞌ culo quiꞌya neꞌ ꞌin ñi tsayaꞌ caja ñi.
\v 19 Tyaa neꞌ cunta ꞌin ñi yaaꞌ neꞌ gentil, xacanꞌ taa neꞌ chaꞌ jyiꞌo ꞌin ñi, jyiꞌin neꞌ ꞌin ñi loꞌ jyiꞌin caꞌan neꞌ ꞌin ñi loo cusi, una nu cuaꞌ ca snan tsaan ntsuꞌhui chaꞌ tyiquiꞌo ñi.
\s Mjñan yu Xuhua loꞌo yu Jacobo sca chaꞌ ꞌin Jesús
\p
\v 20 Xacanꞌ mdiyaan cunaꞌan ꞌin yu Zebedeo loꞌo chcuaa sñeꞌ neꞌ, loꞌ mdyiꞌya xtyinꞌ tloo ñi, loꞌ mjñan sca chaꞌ tsuꞌhue ꞌin ñi.
\v 21 Loꞌ juin ñi ꞌin: ¿Ñi na nchca tiꞌ? Neꞌ cunaꞌan canꞌ juin ꞌin ñi: Taa um chaꞌ cuiyaꞌ ꞌin chcuaa sñenꞌ nanꞌ, siꞌyana scaa tsoꞌ siiꞌ um chcua seꞌen ntsuꞌhui chaꞌ culo um tñan.
\v 22 Xacanꞌ mxcuen Jesús: A jlyo tiꞌ um ñi na njñan um. ¿Ta tca tyijyin um nu tiꞌi tsañaꞌan ntsuꞌhui chaꞌ tijin, loꞌ sca nu tiꞌi ti tyijyin na loꞌo um? Mxcuen yu ꞌin ñi: Tca ꞌin hua.
\v 23 Loꞌ juin ñi ꞌin yu: Chaꞌ ñi ñaꞌan nu nchcuiꞌ um siꞌyana sca nu tiꞌi ti ntsuꞌhui chaꞌ tyijyin na, loꞌ scañaꞌan ti tyijyin na loꞌo um. Una nu chcua um tsoꞌ cueen ꞌñan loꞌo tsoꞌ ca, siꞌi cunta ꞌñan lca chaꞌ canꞌ, cuiꞌ ca nu canꞌ chcua nu taa Stin chaꞌ cuiyaꞌ ꞌin.
\v 24 Cha tii yu taꞌa ndaꞌan ñi, xa ngune ꞌin yu chaꞌ nu ycuiꞌ chcuaa yu canꞌ, lyee ꞌa ycuen tiqueꞌ yu.
\v 25 Xacanꞌ msiꞌya Jesús ꞌin nchgaa yu, loꞌ juin ñi: ꞌUn cuaꞌ jlyo tiꞌ um siꞌyana tsalca yu nu ndlo tñan quichen tnu, siꞌya chaꞌ cuiyaꞌ ꞌin yu nꞌni xꞌnan neꞌ ꞌin yu, loꞌ yu nu ndon loo ꞌin yu tla ꞌa ndlo yu tñan ꞌin nten canꞌ.
\v 26 Una siꞌi cuañaꞌan cuꞌni um, cuiꞌ ca nu chaꞌ ndeꞌen um nchca tiꞌ um ca um nu ndon loo, canꞌ nu tucua tloo nchgaa tucui.
\v 27 Nu nchca tiꞌ ca nu ndon loo, canꞌ nu ca nguso ꞌin nchgaa tucui.
\v 28 Siꞌyana Yu Quiꞌyu nu Mdoꞌo nde niꞌ Cuaan, a ljyan nan ñi nu ca nguso ꞌin ñi, cuiꞌ ca nu siꞌyana ca ñi nguso ꞌin nchgaa tucui, loꞌ taa ñi chendyu ꞌin ñi siꞌyana tyiꞌo laa quiꞌan nten.
\s Tucua yu cuityinꞌ nguila xaa quiloo
\p
\v 29 Xa mdijin jun tuꞌhua quichen Jericó, quiꞌan ꞌa nten mducui nchaꞌan ꞌin jun.
\v 30 Tuꞌhua tucueen canꞌ nducua tucua yu cuityinꞌ, xa ngune ꞌin yu siꞌyana ndijin Jesús canꞌ, msiꞌya cueen yu ꞌin ñi: Ñi Xꞌnan hua, Sñeꞌ ta nten ꞌin Davi, ñaꞌan ꞌtnan tiꞌ um ꞌin hua.
\v 31 Scasca nu ngusun loꞌo ꞌin yu siꞌyana chcua seen tuꞌhua yu, una nde lyee la msiꞌya yu ꞌin ñi: Ñi Xꞌnan hua, ta nten ꞌin Davi, ñaꞌan ꞌtnan tiꞌ um ꞌin hua.
\v 32 Xacanꞌ ycanꞌ ton Jesús, msiꞌya ñi ꞌin yu loꞌ juin ñi: ¿Ñi na ta nchca tiꞌ um?
\v 33 Mxcuen yu: Ñi Xꞌnan hua, nchca tiꞌ hua siꞌyana quila xaa quiloo hua.
\v 34 Jesús mñaꞌan ꞌtnan tiꞌ ꞌin yu, ylaꞌ ñi quiloo yu, cuiꞌ xaa nguila xaa quiloo yu, loꞌ mducui nchaꞌan yu ꞌin ñi. 
\c 21
\s Xa yten Jesús quichen Jerusalén
\p
\v 1 Xa cuaꞌ tiyaa ti jun quichen Jerusalén, cuiꞌ ti canꞌ ndiꞌin quichen Betfagé seꞌen nducua quiꞌya Olivo, xacanꞌ nguaꞌan tñan Jesús ꞌin tucua yu taꞌa ndaꞌan ñi.
\v 2 Loꞌ juin ñi ꞌin yu: Yaa um seꞌen ndiꞌin quichen lyoꞌ ti cua, canꞌ quija lyoo um nchcanꞌ ton sca burra loꞌo sñeꞌ, xtinꞌ um ꞌin ꞌin loꞌ quian loꞌo um ꞌin ꞌin.
\v 3 Chaꞌ ntsuꞌhui nu cuñichaꞌ ꞌin um ndeꞌen la chaꞌ, ljuin um ꞌin: Ñi Xꞌnan na nchca tiꞌ ꞌin ꞌin, una cuiꞌ xaa quian loꞌo hua ꞌin ꞌin.
\v 4 Nchgaa chaꞌ re yatoꞌo na siꞌyana tsa tucua chaꞌ nu mxiycuiꞌ Ndiose ꞌin nguso ꞌin ñi cuaꞌ sꞌni, xa juin yu:
\v 5 —Chcuiꞌ um loꞌo neꞌ Jerusalén: Ñaꞌan um jan ñi, nde cuaꞌ ljyaan ñi nu lca Ree ꞌin um, suun ñaꞌan ndiꞌin chaꞌ ꞌin ñi, nducua ñi chonꞌ sca burru cuneꞌ ti, sñeꞌ sca ꞌni nu ndyiꞌya yuꞌhua—.
\v 6 Yu taꞌa ndaꞌan Jesús yaa yu, loꞌ mꞌni yu ñaꞌan nu ngulo ñi tñan ꞌin yu.
\v 7 Nguian loꞌo yu ꞌin burra canꞌ loꞌo sñeꞌ ꞌin, loꞌ msla scua yu steꞌ yu chonꞌ ꞌin, loꞌ mducua ñi ꞌin ꞌin.
\v 8 Nten quiꞌan canꞌ mdyisnan msla sti neꞌ steꞌ neꞌ tucueen ljyaan ñi, ntsuꞌhui nu ncha stanꞌ quixinꞌ, ticuiꞌ cuañaꞌan ndyiꞌin tyaa neꞌ ꞌin na tucueen ljyaan ñi.
\v 9 Nten nu nducua loo canꞌ loꞌo nu ljyaan nde chonꞌ nchcuiꞌ neꞌ: ¡—Culo laa um ꞌin hua—, ꞌun ñi nu lca Sñeꞌ ta nten ꞌin Davi! ¡—Tlyu chaꞌ tsuꞌhue ntsuꞌhui ꞌin ñi nu ljyaan loꞌo chaꞌ cuiyaꞌ ꞌin Ñi Xꞌnan na! ¡Culo laa um ꞌin hua—, ꞌun ñi nu nducua la niꞌ cuaan!
\v 10 Xa yten ñi Jerusalén, ñaꞌaan quichen neꞌ nguilo tiꞌin neꞌ, loꞌ nchcuiꞌ neꞌ: ¿Tucui ca lca yu re?
\v 11 Nten nu nducui nchaꞌan canꞌ juin neꞌ: Nde nu lca Jesús, ñi nu nxiycuiꞌ Ndiose ꞌin, nu mdoꞌo quichen Nazaret seꞌen lyiꞌya loo Galilea.
\s Ngulo Jesús ꞌin nten niꞌ lyaa
\p
\v 12 Xacanꞌ yten Jesús niꞌ lyaa seꞌen nguiꞌni tnu neꞌ ꞌin Ndiose, ngulo ñi ꞌin nchgaa nu ndyujuiꞌ na loꞌo nu nsiꞌi na, mxitlyu ñi msa seꞌen nducua yu nu nxitsaꞌan tñi, loꞌo yca xlya ꞌin yu nu ndyujuiꞌ quiñi,
\v 13 loꞌ juin ñi: Ndeñaꞌan nguinu scua sca chaꞌ loo quityi ꞌin Ndiose: —Naꞌan ꞌñan lca na seꞌen nchcuiꞌ lyiꞌo neꞌ ꞌñan—, loꞌ ꞌun nguiꞌni um ꞌin na lca na —naꞌan tyi yu cunan—.
\v 14 Seꞌen ndlyu ñi niꞌ lyaa canꞌ, mdiyan loꞌo neꞌ ꞌin nu cuityinꞌ loꞌo nu coꞌ quiyaꞌ, loꞌ mꞌni chca ñi ꞌin.
\v 15 Una yu nu ndlo tñan niꞌ lyaa loꞌo neꞌ escriba, lyee ycuen tiqueꞌ neꞌ xa naꞌan neꞌ chaꞌ nu tnu nguiꞌni ñi, a cunta ne ꞌin neꞌ ñaꞌan nchcuiꞌ yu suhue ti niꞌ lyaa canꞌ: ¡—Culo laa um ꞌin hua—, ꞌun ñi nu lca Sñeꞌ ta nten ꞌin Davi!
\v 16 Loꞌ juin neꞌ ꞌin ñi: ¿Ta ne ꞌin chaꞌ nu nchcuiꞌ yu suhue ti re? Xacanꞌ mxcuen Jesús ꞌin neꞌ: Nen ꞌñan, ¿ta na a nchca chcuiꞌ um chaꞌ re: —Ndiose mꞌni ñi chaꞌ siꞌyana tuꞌhua nu suhue ti loꞌo nu tiꞌ nguitiꞌ cuꞌni tnu ꞌin ñi—?
\v 17 Xacanꞌ mxnu ton ñi ꞌin neꞌ, mdoꞌo ñi nguiaa ñi quichen Betania, canꞌ nguinu ñi sca tla.
\s Msuꞌhua Jesús yuhueꞌ ꞌin yca higo
\p
\v 18 Tlya ti xca tsaan canꞌ mxitucui ñi nde quichen Jerusalén, loꞌ mdyisnan nguteꞌ tiꞌ ñi.
\v 19 Tuꞌhua tucueen canꞌ naꞌan ñi nducua sca yca higo, mdiyaa ñi seꞌen nducua na, loꞌ naꞌan ñi siꞌyana a lyiꞌyu mti loo na, cuiꞌ ca nu chacuiꞌ lcaꞌ ti na nducua. Loꞌ juin ñi ꞌin na: Ñi xca tsaan, loꞌ a ñaꞌan ꞌa cuiꞌyu mti loo. Cuiꞌ xaa ngutyi yca higo canꞌ.
\v 20 Xa naꞌan yu taꞌa ndaꞌan ñi chaꞌ re, lyee ꞌa yuhue tiꞌ yu loꞌ nchcuiꞌ yu: ¿Ñaꞌan ta ncua ngutyi yca re cuiꞌ xaa?
\v 21 Mxcuen Jesús ꞌin yu: Nu chaꞌ ñi cunen loꞌo um, chaꞌ ꞌun tsa quiꞌan tiꞌ um loꞌ a cuꞌni tucua tiꞌ um, siꞌi tsañaꞌan mꞌnin tin loꞌo yca higo re tca cuꞌni um, cuiꞌ ca nu tca chcuiꞌ um loꞌo quiꞌya cua: Tyiꞌo seꞌen nducua loꞌ tsa yuꞌhui la loo tyiꞌa tujoꞌo, loꞌ cuiꞌ cuañaꞌan tsatoꞌo.
\v 22 Chaꞌ tsa quiꞌan tiꞌ um, chcuan um cunta nchgaa chaꞌ nu jñan um ꞌin Ndiose.
\s Mñichaꞌ neꞌ ꞌin Jesús siꞌya chaꞌ cuiyaꞌ ꞌin ñi
\p
\v 23 Yatoꞌo xiyaꞌ yten ñi niꞌ lyaa, loꞌ yu nu ndlo ca tñan niꞌ lyaa, loꞌo quiꞌyu cula mdiyaa neꞌ seꞌen ndloꞌo ñi ꞌin nten canꞌ, loꞌ juin neꞌ ꞌin ñi: ¿La jui chaꞌ cuiyaꞌ ꞌin nu nguiꞌni chaꞌ re, loꞌ ti nu mdaa ꞌin na ꞌin?
\v 24 Mxcuen Jesús ꞌin neꞌ: Loꞌon nanꞌ nchca tinꞌ cuñichanꞌ ꞌin um sca chaꞌ, loꞌ chaꞌ xcuen um ꞌñan loꞌo chaꞌ re, xacanꞌ quitsanꞌ ꞌin um la jui chaꞌ cuiyaꞌ nu nguiꞌnin chaꞌ re.
\v 25 Tsañaꞌan nu mducua tya yu Xuhua ꞌin nten, ¿la mdoꞌo chaꞌ cuiyaꞌ canꞌ? ¿Seꞌen nducua Ndiose, uta tsoꞌ ꞌin nten chendyu? Xacanꞌ scasca neꞌ mñichaꞌ taꞌa neꞌ: Chaꞌ ljuin na siꞌyana la niꞌ cuaan mdoꞌo chaꞌ cuiyaꞌ canꞌ, tinaꞌan xcuen yu ꞌin na, ñi chaꞌ a ya quiꞌan tiꞌ na chaꞌ canꞌ.
\v 26 Chaꞌ ljuin na siꞌyana nten chendyu mdaa chaꞌ cuiyaꞌ canꞌ, una a tca chcuiꞌ na cuañaꞌan, siꞌyana ñaꞌaan quichen neꞌ cuaꞌ jlyo tiꞌ neꞌ siꞌyana yu Xuhua canꞌ ncua yu sca nu mxiycuiꞌ Ndiose ꞌin.
\v 27 Xacanꞌ mxcuen neꞌ ꞌin Jesús: A jlyo tiꞌ hua. Juin ñi ꞌin neꞌ: Ñi nanꞌ loꞌ a quitsanꞌ ꞌin um la jui chaꞌ cuiyaꞌ re ꞌñan.
\s Chaꞌ ꞌin yu quiꞌyu nu ndiꞌin tucua sñeꞌ
\p
\v 28 ¿Ñaꞌan ta ljuin um loꞌo chaꞌ re? Sca yu quiꞌyu ndiꞌin tucua sñeꞌ yu, loꞌ juin yu ꞌin nu culoo canꞌ: Sñenꞌ, yaa chinꞌ tñan ꞌñan tsaan re ñii seꞌen nducua ti uva cua.
\v 29 Xacanꞌ mxcuen yu: A nchca tinꞌ tsaꞌan, una chonꞌ ndeꞌen canꞌ mxitsaꞌan yu chaꞌ tiyaa ꞌin yu, loꞌ yaa yu.
\v 30 Ticuiꞌ cuañaꞌan juin yu ꞌin xca sñeꞌ yu, una sñeꞌ yu mxcuen ꞌin yu: Nanꞌ tsaꞌan. Una a yaa yu.
\v 31 ¿Ti ñaꞌan ta chcuaa yu re mducua yu tñan chaꞌ nu ycuiꞌ sti yu? Mxcuen neꞌ ꞌin ñi: Yu nu culoo canꞌ. Juin Jesús ꞌin neꞌ: Nu chaꞌ ñi cunen loꞌo um, nten nu nducunꞌ lati, culo nducua lati canꞌ sten seꞌen ndlo Ndiose tñan que ꞌin um.
\v 32 Cuaꞌ yaan yu Xuhua loꞌ nguloꞌo yu chaꞌ nu ñi, una a ya quiꞌan tiꞌ um chaꞌ nu ycuiꞌ yu, una nten nu nducunꞌ lati, loꞌ ya quiꞌan tiꞌ neꞌ, una ꞌun naꞌan tloo um chaꞌ re loꞌ a mxiloꞌo chonꞌ um quiꞌya nguiꞌni um, ñi a ya quiꞌan tiꞌ um chaꞌ nu ycuiꞌ yu.
\s Yu nducunꞌ yuꞌhui cunta seꞌen nducua ti uva
\p
\v 33 Nde xca chaꞌ nu chcuinꞌ loꞌo um: Sca yu quiꞌyu yta yu sca jyaan chacuiꞌ ti uva, loꞌ msuꞌhua loꞌo yu ꞌin na, mtñan yu sca seꞌen tyiꞌo tyiꞌa uva canꞌ, a cunta mtñan yu sca seꞌen cuaan siꞌyana chcua nu chuꞌhui cuan ꞌin na. Mxnu yu ꞌin na ꞌin xca tucui nda tluꞌhue, loꞌ mdoꞌo yu nguiaa yu sca seꞌen tijyoꞌ.
\v 34 Xa mdiyaa xaa nu ntsuꞌhui chaꞌ quioꞌ mti canꞌ, nguaꞌan tñan yu nguso ꞌin yu nu tsa chcuan cunta na nu quiꞌni caꞌan ꞌin yu.
\v 35 Una yu nu ntsuꞌhui cunta tñan canꞌ, cuañaꞌan ti mꞌni yu loꞌo nguso nu mdiyaa canꞌ, ntsuꞌhui nu mjyiꞌin yu ꞌin, loꞌ xca canꞌ yjui yu, loꞌ xca canꞌ mjyiꞌin yu quee ꞌin.
\v 36 Xiyaꞌ nguaꞌan tñan xꞌnan tñan canꞌ quiꞌan la nguso ꞌin yu, una ticuiꞌ ti ñaꞌan mꞌni lyiꞌo yu ꞌin canꞌ.
\v 37 Una la xca ti yaꞌ canꞌ nguaꞌan tñan yu ꞌin sñeꞌ yu, loꞌ ndeñaꞌan nguñan tiꞌ yu: Tinaꞌan cuꞌni cunta yu chaꞌ nu chcuiꞌ sñenꞌ nanꞌ.
\v 38 Una yu nu ntsuꞌhui cunta ꞌin tñan canꞌ, xa naꞌan yu ljyaan sñeꞌ xꞌnan tñan canꞌ, ndeñaꞌan ycuiꞌ scasca yu: Nde ljyaan yu nu ntsuꞌhui chaꞌ chcuan cunta tñan re, ndla ti um loꞌ cujui na ꞌin yu, loꞌ quinu tñan re ꞌin na.
\v 39 Cuiꞌ xaa ngulo yu ꞌin nde chonꞌ loꞌo canꞌ, loꞌ yjui yu ꞌin.
\v 40 Xa caan xꞌnan tñan canꞌ, ¿ñaꞌan ta cuꞌni canꞌ loꞌo yu nu ntsuꞌhui cunta tñan canꞌ?
\v 41 Mxcuen neꞌ ꞌin ñi: Cuꞌni lyiꞌo yu ꞌin canꞌ a seꞌen ꞌa ñaꞌan, loꞌ cujui yu ꞌin, loꞌ cunan yu xca nu chuꞌhui cunta tñan canꞌ, cuiꞌ nu tyaa cunta na nu ntsuꞌhui chaꞌ quiꞌni caꞌan ꞌin yu.
\v 42 Loꞌ juin Jesús ꞌin neꞌ: ¿Ta a nchca chcuiꞌ um quityi seꞌen nguinu scua sca chaꞌ: —Quee nu mscuan tloo yu cuityi naꞌan, cuaꞌ ñii lca na quee nu nsñi ton ꞌin naꞌan. Ñi Xꞌnan na mꞌni ñi chaꞌ re, loꞌ nduhue tiꞌ na chaꞌ nu naꞌan tloo na—?
\v 43 Cunen loꞌo um sca chaꞌ, Ndiose ntsuꞌhui chaꞌ chcuan ñi chaꞌ tsuꞌhue canꞌ ꞌin um, loꞌ taa ñi ꞌin na ꞌin xca ta nten nu jlyo tiꞌ suꞌhua loo ꞌin na.
\v 44 Nchgaa nu tlyu scua chonꞌ quee canꞌ, quita tiꞌin canꞌ, una chaꞌ tyu quee canꞌ chonꞌ, quinu ta canꞌ siyaꞌ ti.
\v 45 Yu nu ndlo ca tñan niꞌ lyaa canꞌ loꞌo neꞌ fariseo, cuiꞌ xaa nguꞌya neꞌ cunta siꞌyana chaꞌ ꞌin neꞌ ca ycuiꞌ ñi.
\v 46 Ngunan neꞌ ñaꞌan nu quinu ñi, una a msti tiꞌ neꞌ siꞌyana nguitsen neꞌ ꞌin nten quichen canꞌ, siꞌyana chaꞌ nu ꞌin nten canꞌ lca ñi sca nu nxiycuiꞌ Ndiose ꞌin. 
\c 22
\s Chaꞌ ꞌin ree nu msuꞌhua sca taꞌa
\p
\v 1 Xiyaꞌ mdyisnan ycuiꞌ Jesús xca chaꞌ loꞌ juin ñi:
\v 2 Seꞌen ndlo Ndiose tñan, nguiaa chaꞌ ꞌin na tsañaꞌan ndiꞌin chaꞌ ꞌin sca yu ree nu msuꞌhua taꞌa seꞌen jui cuilyiꞌo sñeꞌ.
\v 3 Xacanꞌ nguaꞌan tñan yu nguso ꞌin yu tsa teꞌen ꞌin nchgaa nu cuaꞌ nguaꞌan chaꞌ ꞌin tsaa taꞌa canꞌ, una a mslyaa neꞌ tsaa neꞌ.
\v 4 Xiyaꞌ nguaꞌan tñan yu xca ta nguso ꞌin yu, loꞌ juin yu ꞌin: Chcuiꞌ um loꞌo nchgaa nu ntsuꞌhui chaꞌ caan taꞌa re, siꞌyana cuaꞌ mꞌni chaꞌ ngujui ꞌni loꞌo bta cojoꞌ ꞌñan, cuaꞌ ncua tsuꞌhue scua re, cuaꞌ ndiꞌin tiyaa nchgaa chaꞌ re.
\v 5 Una a tucui nu mdaa quiyaꞌ chaꞌ nu ycuiꞌ yu nguso canꞌ, cuiꞌ ca nu ntsuꞌhui nu nguiaa loo xñan, loꞌ xca canꞌ nguiaa loo chaꞌ jyinsya ꞌin.
\v 6 A cunta ntsuꞌhui nu cuaꞌ ñaꞌan ti mꞌni lyiꞌo ꞌin yu nguso canꞌ, nu hasta loꞌo yjui neꞌ ꞌin yu.
\v 7 Xa ynan yu ree canꞌ chaꞌ re, cuiꞌ xaa ycuen tiqueꞌ yu, msuꞌhua yu sindatu ꞌin yu tsa jlyo nchgaa nu yjui nguso ꞌin yu, loꞌ mdiquin yu quichen canꞌ.
\v 8 Xacanꞌ juin yu loꞌo nguso ꞌin yu: Nu chaꞌ ñi siꞌyana cuaꞌ lca taꞌa re, una nu ntsuꞌhui ca chaꞌ caan, a ngujlyo tiꞌ cuan xuꞌhue chaꞌ re.
\v 9 Canꞌ chaꞌ cuaꞌ ñii, yaa um la tucueen cua, loꞌ chcuiꞌ um loꞌo ñaꞌan tucui ti nu quija lyoo um siꞌyana caan taꞌa re.
\v 10 Mdoꞌo yu nguso canꞌ nguiaa yu la tucueen, loꞌ mdyisnan nguni yu ñaꞌan tucui ti nu nguija lyoo yu, neꞌ nducunꞌ loꞌo nten tsuꞌhue, loꞌ mtsaꞌan yuꞌhui neꞌ seꞌen nchca taꞌa canꞌ.
\v 11 Xacanꞌ yten yu ree canꞌ nu chcuiꞌ chaꞌ yu ꞌin nten canꞌ, canꞌ naꞌan yu nducua sca nu a lcoꞌ teꞌ, tsañaꞌan nchcoꞌ nten nu ndyiꞌan taꞌa seꞌen ndyijyi cuilyiꞌo neꞌ.
\v 12 Loꞌ juin yu ꞌin: Migo, ¿ñaꞌan ncua yten seꞌen nchca taꞌa re, loꞌ a lcoꞌ teꞌ ñaꞌan nu ntsuꞌhui chaꞌ coꞌ? Una yu canꞌ, ñi sca chaꞌ loꞌ a mxcuen yu.
\v 13 Xacanꞌ juin yu ree canꞌ loꞌo yu nu nsuꞌhua na loo msa: Scanꞌ um quiyaꞌ yu loꞌo yaaꞌ yu, loꞌ cuun ꞌin yu nde lyiyaꞌ seꞌen tla yta, cua xtyi ynan yu loo nu lyee tyijyin yu nu tiꞌi.
\v 14 Siꞌyana quiꞌan nten jui nu msiꞌya ꞌin, una chinꞌ ti nu mdoꞌo hui.
\s Tñi nu msuꞌhua lyiyaꞌ neꞌ ꞌin César
\p
\v 15 Xacanꞌ mdoꞌo neꞌ fariseo nguiaa neꞌ, loꞌ mꞌni cuiyaꞌ neꞌ chaꞌ ñaꞌan ntsuꞌhui chaꞌ culo quiꞌya neꞌ ꞌin Jesús loꞌo chaꞌ nu chcuiꞌ ñi.
\v 16 Nguaꞌan tñan neꞌ tucua snan yu nu mꞌni chaꞌan chaꞌ ꞌin neꞌ, loꞌo nu ntsuꞌhui tsoꞌ ꞌin neꞌ Herode, mdiyaa neꞌ seꞌen nguilyu ñi loꞌ juin neꞌ: ꞌUn ñi nu lca Bstro, cuaꞌ jlyo tiꞌ hua siꞌyana nchcuiꞌ um loꞌ ndloꞌo um chaꞌ nu ñi ꞌin Ndiose, ñi a nan um ñaꞌan nu quinu tsuꞌhue tiquee nten loꞌo um, loꞌ ñi a nxñi um cunta ñaꞌan chaꞌ ꞌin nten.
\v 17 ¿Ñaꞌan ljuin um loꞌo chaꞌ re, ta tsuꞌhue chaꞌ tiꞌ taa na tñi nu njñan yu César, uta na a tsuꞌhue ꞌa?
\v 18 Una Jesús ngujlyo tiꞌ ñi siꞌyana nchcuiꞌ neꞌ loꞌo chaꞌ mañan, loꞌ juin ñi ꞌin neꞌ: ꞌUn neꞌ nu a ñi ndiꞌin chaꞌ ꞌin, ¿ñi chaꞌ nan um ñaꞌan nu suꞌhua um quiꞌya ꞌñan?
\v 19 Tyaa um sca tñi ꞌñan. Xacanꞌ mdaa neꞌ sca tñi ꞌin ñi, nu nꞌni neꞌ canan sca tsaan.
\v 20 Xacanꞌ juin ñi ꞌin neꞌ: ¿Tucui ta ꞌin lcuin ngaꞌan chonꞌ tñi re, loꞌo niin nu ngaꞌan ꞌin na?
\v 21 Mxcuen neꞌ ꞌin ñi: Yu César. Loꞌ juin ñi ꞌin neꞌ: Canꞌ chaꞌ tyaa um ꞌin César na nu quiꞌni caꞌan ꞌin yu, cuiꞌ cuañaꞌan tyaa um ꞌin Ndiose na nu quiꞌni caꞌan ꞌin ñi.
\v 22 Yuhueꞌ tiꞌ neꞌ xa ngune ꞌin neꞌ chaꞌ re, xacanꞌ ngulaꞌ ton neꞌ ꞌin ñi, mdoꞌo neꞌ nguiaa neꞌ.
\s Chaꞌ ꞌin neꞌ ngujui nu tyiquiꞌo
\p
\v 23 Ticuiꞌ tsaan canꞌ mdiyaa tucua snan neꞌ saduceo seꞌen nguilyu ñi, neꞌ nu a ndiya quiꞌan tiꞌ siꞌyana ndyiquiꞌo neꞌ cuaꞌ ngujui, loꞌ mñichaꞌ neꞌ ꞌin ñi:
\v 24 ꞌUn ñi nu lca Bstro, nguaꞌan scua yu Moisé sca chaꞌ loꞌ nchcuiꞌ na: —Chaꞌ sca yu quiꞌyu caja yu, loꞌ ñi sca sñeꞌ yu loꞌ a mdiꞌin loꞌo cuilyiꞌo yu, ꞌni chaꞌ ticuiꞌ taꞌa ngula yu tyiꞌin lyiꞌo ꞌin neꞌ cunaꞌan canꞌ, loꞌ chaꞌ tyiꞌin sñeꞌ neꞌ, cuꞌni neꞌ cunta siꞌyana sñeꞌ neꞌ loꞌo cuilyiꞌo ca neꞌ lca canꞌ—.
\v 25 Nde sca chaꞌ yatoꞌo lja hua, mdiꞌin tsa cati yu quiꞌyu, sca taꞌa ngula ti yu. Yu nu cula la canꞌ jui cuilyiꞌo yu, loꞌ ngujui yu, loꞌ siꞌyana a mdiꞌin sñeꞌ neꞌ loꞌo yu, xca taꞌa ngula yu mdiꞌin lyiꞌo ꞌin neꞌ.
\v 26 Ngujui canꞌ, loꞌ cuañaꞌan yatoꞌo loꞌo nu cuaꞌ nchca snan canꞌ tsayaꞌ mdaꞌa cati yu canꞌ.
\v 27 Yatoꞌo loꞌo neꞌ cunaꞌan canꞌ ngujui neꞌ.
\v 28 Xa ntsuꞌhui chaꞌ tyiquiꞌo neꞌ cuaꞌ ngujui, ¿ti ñaꞌan taꞌa cati yu canꞌ lca cuilyiꞌo ca neꞌ cunaꞌan canꞌ, siꞌyana nchgaa yu mdiꞌin lyiꞌo yu ꞌin neꞌ?
\v 29 Xacanꞌ mxcuen Jesús ꞌin neꞌ: Siꞌi ñaꞌan chaꞌ tiyaa ꞌin um, ¿ta na a ndyiꞌya um cunta ñaꞌan nchcuiꞌ quityi ꞌin Ndiose, loꞌ tsala ñaꞌan tlyu chaꞌ cuiyaꞌ ꞌin ñi?
\v 30 Xa ntsuꞌhui chaꞌ tyiquiꞌo neꞌ cuaꞌ ngujui, a ntsuꞌhui ꞌa chaꞌ tiꞌ caja cuilyiꞌo neꞌ, loꞌ ñi a taa ꞌa neꞌ chaꞌ cuilyiꞌo ꞌin nten, cuiꞌ ca nu suꞌhua ñaꞌan ndiꞌin chaꞌ ꞌin neꞌ loꞌo angujle ꞌin Ndiose la niꞌ cuaan.
\v 31 Una chaꞌ ꞌin neꞌ nu ntsuꞌhui chaꞌ tyiquiꞌo, ¿ta na a nchca chcuiꞌ um quityi ꞌin Ndiose xa juin ñi:
\v 32 —Nanꞌ lcan Ndiose ꞌin Abraham, Ndiose ꞌin Isaac, Ndiose ꞌin Jacob—? Siꞌyana Ndiose a lca ñi Ndiose ꞌin neꞌ ngujui, cuiꞌ ca nu lca ñi Ndiose ꞌin neꞌ nu loꞌo.
\v 33 Xa ngune ꞌin nten chaꞌ nu ycuiꞌ ñi, lyee nduhue tiꞌ neꞌ loꞌo chaꞌ nu ndloꞌo ñi.
\s Chaꞌ nu ndon loo la ngulo Ndiose tñan
\p
\v 34 Neꞌ fariseo xa naꞌan neꞌ siꞌyana Jesús mꞌni ñi chaꞌ ncua tiin ꞌin neꞌ saduceo canꞌ, cuiꞌ xaa mꞌni sca neꞌ chaꞌ ꞌin neꞌ ñaꞌan ntsuꞌhui chaꞌ cuꞌni neꞌ.
\v 35 Lja canꞌ ntsuꞌhui nu ndloꞌo chaꞌ ꞌin lee, mñichaꞌ ꞌin ñi loꞌo chaꞌ mañan, loꞌ juin:
\v 36 ꞌUn ñi nu lca Bstro, ¿ti ñaꞌan ta chaꞌ nu ndon loo lati nu nchcuiꞌ lee?
\v 37 Mxcuen Jesús ꞌin neꞌ: —Loꞌo nu chcui cusya ꞌin um tyaa um ꞌin um ꞌin Ndiose Xꞌnan um, loꞌo nu chcui lca tiquee um—, loꞌo nchgaa chaꞌ tiyaa ꞌin um.
\v 38 Nde chaꞌ nu tlyu lati loꞌ ndon loo la nu ntsuꞌhui chaꞌ xuꞌhua seꞌen na.
\v 39 Nu cuaꞌ nchca tucua ticuiꞌ ndon loo na: —Ñaꞌan ꞌtnan tiꞌ um ꞌin taꞌa nten um tsañaꞌan nꞌni um ꞌtnan ꞌin um—.
\v 40 Chcuaa chaꞌ re nsuꞌhua loꞌo na ꞌin nchgaa la ñaꞌan chaꞌ nu nchcuiꞌ lee, loꞌo chaꞌ nu mxiycuiꞌ Ndiose ꞌin nguso ꞌin ñi cuaꞌ sñi.
\s ¿Tucui ca sñeꞌ ꞌin ñi nu lca Cristo?
\p
\v 41 Tsatlyu ndiꞌin neꞌ fariseo, loꞌ Jesús mñichaꞌ ñi ꞌin neꞌ sca chaꞌ,
\v 42 loꞌ juin ñi: ¿Ñaꞌan ta ñan tiꞌ um chaꞌ ꞌin Cristo? ¿Tucui ta lca ñi? Mxcuen neꞌ ꞌin ñi: Cuiꞌ sñeꞌ ta nten ꞌin Davi.
\v 43 Juin ñi xacanꞌ: ¿Ñi chaꞌ ndloꞌo naan Davi ꞌin ñi siꞌyana lca ñi Xꞌnan yu, xa mxiycuiꞌ Espíritu ꞌin yu ndeñaꞌan:
\v 44 —Ndiose Xꞌnan na juin ñi loꞌo Ñi Xꞌnan: Chcua tsoꞌ cueen ꞌñan lja xicuꞌnin ꞌin taꞌa cusuun quinu nde tuquiyaꞌ—?
\v 45 Chaꞌ Davi ndloꞌo naan yu ꞌin ñi lca ñi Xꞌnan yu, ¿ñaꞌan ta lca ñi sñeꞌ ta nten ꞌin yu chaꞌ na canꞌ?
\v 46 Una a tucui nu ncua mxcuen ꞌin ñi loꞌo chaꞌ re, loꞌ ñi a tucui ꞌa msti tiꞌ cuñichaꞌ ꞌin ñi ndeꞌen la chaꞌ. 
\c 23
\s Ycuiꞌ Jesús chaꞌ ꞌin neꞌ escriba loꞌo neꞌ fariseo
\p
\v 1 Xacanꞌ mdyisnan ycuiꞌ Jesús loꞌo nten canꞌ tsatlyu loꞌo taꞌa ndaꞌan ñi, loꞌ juin ñi:
\v 2 Neꞌ escriba loꞌo neꞌ fariseo nchcua neꞌ, loꞌ ndloꞌo neꞌ chaꞌ ꞌin lee nu mxnu scua Moisé.
\v 3 Ca jaꞌan um loꞌ tucua um tñan chaꞌ nu nchcuiꞌ neꞌ, una a nchca chaꞌ cuꞌni um ñaꞌan nu nꞌni neꞌ, siꞌyana nchcuiꞌ neꞌ sca chaꞌ loꞌ a nꞌni neꞌ ꞌin na.
\v 4 Siꞌyana nxi ꞌya neꞌ yuꞌhua nu tiꞌin ꞌin nten loꞌo chaꞌ nu ndloꞌo neꞌ, una chaꞌ nu ꞌin neꞌ, ñi tsachinꞌ ti loꞌ a lca tiquee neꞌ quiꞌni caꞌan neꞌ ꞌin na.
\v 5 Tsaloo ti nꞌni neꞌ tñan tsuꞌhue siꞌyana caja nu chcua quiloo ꞌin neꞌ, nducui tiꞌ neꞌ nchaꞌan ychaꞌ Ndiose tuchcan neꞌ loꞌo scun neꞌ, lyee la que ñaꞌan nu ntsuꞌhui ca chaꞌ cuꞌni neꞌ, ticuiꞌ cuañaꞌan nꞌni chuꞌhue neꞌ tuꞌhua steꞌ neꞌ.
\v 6 Nducui tiꞌ neꞌ nchcu siin neꞌ seꞌen nchcua yu nu ndon loo lati, ticuiꞌ cuañaꞌan nan neꞌ seꞌen tsuꞌhue la nchcua neꞌ seꞌen nꞌni tnu neꞌ ꞌin Ndiose.
\v 7 Nducui tiꞌ neꞌ ndyijyi nu chcuiꞌ chaꞌ ꞌin neꞌ loꞌo suun ñaꞌan seꞌen nchca quiyaꞌ, uta ndloꞌo naan neꞌ ꞌin: Bstro, Bstro.
\v 8 Una ꞌun a tucua tloo um caja nu chcuiꞌ loꞌo um, Bstro, siꞌyana scati ñi nu lca Bstro, cuiꞌ Cristo, loꞌ nchgaa la ñaꞌan um lca um chacuiꞌ taꞌa ngula um.
\v 9 A nchca chaꞌ culoꞌo naan um ꞌin sca yu quiꞌyu, Stina, siꞌyana scati Ndiose nu nducua niꞌ cuaan lca Stina.
\v 10 Ñi a tucua tloo um siꞌyana caja nu culoꞌo naan ꞌin um, Bstro, siꞌyana scati ñi nu lca Bstro, cuiꞌ Cristo.
\v 11 Nu ndon loo lati ntsuꞌhui lja um, canꞌ nu ntsuꞌhui chaꞌ ca nguso ꞌin um.
\v 12 Siꞌyana nu scuen cuaan ꞌin ticuiiꞌ, caja nu cuꞌni lyoꞌ ꞌin, loꞌ nu cuꞌni lyoꞌ ꞌin caja nu scuen cuaan ꞌin.
\v 13 ¡ꞌTnan ca ꞌun neꞌ escriba loꞌo neꞌ fariseo, a ñi ndiꞌin chaꞌ ꞌin um! Siꞌyana nchcui ndijin um tloo nten chendyu nu nchca tiꞌ sten seꞌen ndlo Ndiose tñan, ñi ycuiꞌ um loꞌ a nguiten um loꞌ ñi a ndaa um yaꞌ sten nten.
\v 14 ¡ꞌTnan ca ꞌun neꞌ escriba loꞌo neꞌ fariseo, a ñi ndiꞌin chaꞌ ꞌin um! Siꞌyana ndlyaa um naꞌan ꞌin neꞌ cunaꞌan nu nguinu loꞌo chaꞌ ycuiꞌ ti, loꞌ siꞌyana a ca chcanꞌ chaꞌ ngunanꞌ nu nguiꞌni um, canꞌ chaꞌ chaan nchcuiꞌ lyiꞌo um ꞌin Ndiose, una siꞌya chaꞌ re tlyu la yuhueꞌ nsoꞌ tucua um chonꞌ um.
\v 15 ¡ꞌTnan ca ꞌun neꞌ escriba loꞌo neꞌ fariseo, a ñi ndiꞌin chaꞌ ꞌin um! Siꞌyana ndyiꞌan snan sti um sca chcui chendyu siꞌyana cuꞌni um canan siyaꞌ cuaꞌ tsuꞌhue scati nu sten tsoꞌ ꞌin um, loꞌ chaꞌ cuaꞌ mꞌni um canan ꞌin canꞌ, ndla lati tsaa canꞌ loo quiiꞌ que ꞌin um.
\v 16 ¡ꞌTnan ca ꞌun nu nchcun chaꞌ tiyaa ꞌin, loꞌ ndloꞌo um ꞌin xca tucui! Chaꞌ ntsuꞌhui nu ndlo ca ꞌin loꞌo chaꞌ ꞌin laa, a sca ntsuꞌhui lyoo na, una chaꞌ ndloꞌo naan canꞌ oro nu ntsuꞌhui niꞌ lyaa, la xacanꞌ nguinu scua tla chaꞌ nu nchcuiꞌ canꞌ.
\v 17 ¡ꞌUn neꞌ tinto loꞌ nchcun chaꞌ tiyaa ꞌin um! ¿Ti ñaꞌan ta chaꞌ re nu ndon loo la, oro uta na laa seꞌen ntsuꞌhui oro canꞌ?
\v 18 A cunta nchcuiꞌ um: Chaꞌ ntsuꞌhui nu ndlo ca ꞌin, loꞌ ndloꞌo naan loo seꞌen nꞌni tnu na Ndiose, a sca ntsuꞌhui lyoo na, una chaꞌ ndloꞌo naan canꞌ lcuan nu nscua loo canꞌ, xacanꞌ nguinu scua tla chaꞌ nu nchcuiꞌ canꞌ.
\v 19 ¡Tiji ꞌa nan um loꞌ nchcun chaꞌ tiyaa ꞌin um! ¿Ti ñaꞌan ta chaꞌ re nu ndon loo la, lcuan canꞌ uta na seꞌen ndyiꞌya na lcuan tloo Ndiose?
\v 20 Siꞌyana nu ndlo ca ꞌin, loꞌ ndloꞌo naan loo seꞌen nꞌni tnu na Ndiose, siꞌi tsaloo ti seꞌen canꞌ nsuꞌhua loo canꞌ, cuiꞌ ca nu loꞌo lcuan nu nscua canꞌ ndlo ca ꞌin loꞌo na.
\v 21 Nu ndlo ca ꞌin loꞌo chaꞌ ꞌin laa, siꞌi tsaloo ti ꞌin laa nsuꞌhua loo canꞌ, cuiꞌ ca nu loꞌo Ndiose ndlo ca ꞌin.
\v 22 Loꞌ nu ndlo ca ꞌin loꞌo niꞌ cuaan, siꞌi tsaloo ti niꞌ cuaan nsuꞌhua loo canꞌ, cuiꞌ ca nu loꞌo seꞌen nducua Ndiose, tsatlyu loꞌo ñi ndlo ca canꞌ ꞌin.
\v 23 ¡ꞌTnan ca ꞌun neꞌ escriba loꞌo neꞌ fariseo, a ñi ndiꞌin chaꞌ ꞌin um! Siꞌyana scasca quixinꞌ nu ndyuꞌhui loo scua ndaa um tsachinꞌ canꞌ ꞌin Ndiose, loꞌ nxnu caꞌan chonꞌ um chaꞌ nu ndon loo lati nchcuiꞌ lee: Nu chcui nchaꞌan na chaꞌ nu ñi, loꞌ ñaꞌan ꞌtnan tiꞌ na ꞌin nten, loꞌ tsa quiꞌan tiꞌ na ꞌin Ndiose. Nde chaꞌ nu ndon loo nu ntsuꞌhui chaꞌ cuꞌni um, una siꞌi canꞌ chaꞌ culaꞌ tiꞌ um cuꞌni um nchgaa la ñaꞌan chaꞌ canꞌ.
\v 24 ¡ꞌUn nu nchcun chaꞌ tiyaa ꞌin loꞌo chaꞌ nu ndloꞌo um! Nducua hui um na nu ndyiꞌyo um siꞌyana a ycuinꞌ um cuiyaꞌ, una ndiyatoꞌo ycuinꞌ um sca camello.
\v 25 ¡ꞌTnan ca ꞌun neꞌ escriba loꞌo neꞌ fariseo, a ñi ndiꞌin chaꞌ ꞌin um! Siꞌyana njyiꞌan um nde chonꞌ vaso loꞌo nde chonꞌ quiꞌnan seꞌen nchcu um, una nde niꞌ cusya ꞌin um mtsaꞌan yuꞌhui chaꞌ ngunanꞌ, a cunta loꞌo chaꞌ cunan.
\v 26 ¡ꞌUn neꞌ fariseo nu nchcun chaꞌ tiyaa ꞌin! Chaꞌ cua na suhui um culo nducua la nde niꞌ vaso loꞌo quiꞌnan ꞌin um, cuañaꞌan loꞌo chonꞌ na quinu luhui.
\v 27 ¡ꞌTnan ca ꞌun neꞌ escriba loꞌo neꞌ fariseo, a ñi ndiꞌin chaꞌ ꞌin um! Siꞌyana suꞌhua ñaꞌan nguiaa chaꞌ ꞌin um loꞌo sca tucuaa nu tsuꞌhue ñaꞌan mten, una nde niꞌ na mtsaꞌan yuꞌhui tijyan neꞌ ngujui loꞌo nchgaa loo na nu cooꞌ.
\v 28 Cuiꞌ cuañaꞌan nguiaa chaꞌ ꞌin um, nꞌni um chaꞌ siꞌyana ñi ndiꞌin chaꞌ ꞌin um tloo taꞌa nten um, una nde niꞌ cusya ꞌin um mtsaꞌan yuꞌhui chaꞌ cuiñi loꞌo chaꞌ nducunꞌ.
\v 29 ¡ꞌTnan ca ꞌun neꞌ escriba loꞌo neꞌ fariseo, a ñi ndiꞌin chaꞌ ꞌin um! Siꞌyana ntñan tucua um tucuaa seꞌen mtsiꞌ yu nu mxiycuiꞌ Ndiose ꞌin cuaꞌ sꞌni, loꞌ nꞌni chuꞌhue um tucuaa seꞌen mtsiꞌ nten tsuꞌhue,
\v 30 loꞌ nchcuiꞌ um xacanꞌ: Chaꞌ cua na mdiꞌin na tiꞌ xa mdiꞌin nten cula ꞌin na, a ca taꞌa loꞌo na ꞌin nu yjui ꞌin yu nu mxiycuiꞌ Ndiose ꞌin.
\v 31 Loꞌo chaꞌ re ndaa um suun siꞌyana lca um ticuiꞌ ta nten nu yjui ꞌin yu nu mxiycuiꞌ Ndiose ꞌin cuaꞌ sꞌni.
\v 32 Canꞌ chaꞌ tsa quiñan la um cuꞌni um nchgaa tñan ngunanꞌ nu mꞌni nten cula ꞌin um.
\v 33 ¡ꞌUn lca um ñaꞌan nchca tiꞌ ꞌni la, loꞌ lca um sñeꞌ neꞌ cuiñi! ¿Ñaꞌan ta tyiꞌo laa um loo quiiꞌ siꞌya yuhueꞌ nducua chonꞌ um?
\v 34 Canꞌ chaꞌ ndaꞌan tñan ꞌin yu nu nxiycuiꞌ Ndiose ꞌin lja um, loꞌo yu nu tiyaa, yu nu ndloꞌo ꞌin um. Una ntsuꞌhui canꞌ cujui um ꞌin loꞌ hasta jyiꞌin caꞌan um ꞌin loo cusi, loꞌ ntsuꞌhui nu jyiꞌin um ꞌin seꞌen nꞌni tnu um ꞌin Ndiose, a cunta chcui nchaꞌan um ꞌin canꞌ scasca quichen,
\v 35 cuiꞌ siꞌyana caan yuhueꞌ chonꞌ um siꞌya nchgaa tne nu nguilo ꞌin nten nu suun nu mdiꞌin loo chendyu re, tiꞌ tne nu mslo neꞌ ꞌin Abel hasta loꞌo nu ꞌin Zacaría, sñeꞌ Berequía, yu nu yjui nten cula ꞌin um niꞌ lyaa. Loꞌ tluꞌhue la seꞌen yjui neꞌ ꞌin yu, sca tsoꞌ canꞌ nducua seꞌen ndiquin tucua neꞌ ꞌni, loꞌ xca tsoꞌ canꞌ nducua laa.
\v 36 Nu chaꞌ ñi cunen loꞌo um, nchgaa chaꞌ re caan na chonꞌ ta nten nu ndiꞌin cuaꞌ ñii.
\s Nguꞌya tuꞌhua tiquee Jesús siꞌya Jerusalén
\p
\v 37 ¡Jerusalén, ꞌun nu ndiꞌin Jerusalén, ndujui um ꞌin nu nxiycuiꞌ Ndiose ꞌin, loꞌo quee ti ndujui um ꞌin nu ndaꞌan tñan Ndiose ꞌin um. Tsala ñaꞌan tyun yaꞌ ncua tinꞌ xoꞌ tiꞌin ꞌin um, tsañaꞌan nxoꞌ tiꞌin cutu ꞌin sñeꞌ ꞌin nde niꞌ jlyuꞌhue ꞌin, una a mslyaa um.
\v 38 Ñaꞌan jan ñi, —tiyaa xaa quinu tucua lja naꞌan re—.
\v 39 Cunen loꞌo um sca chaꞌ, a ntsuꞌhui ꞌa chaꞌ ñaꞌan tloo um ꞌñan, chaꞌ siꞌi la xa nu chcuiꞌ um: —Tlyu chaꞌ tsuꞌhue ntsuꞌhui ꞌin ñi nu ljyaan loꞌo chaꞌ cuiyaꞌ ꞌin Ñi Xꞌnan na—. 
\c 24
\s Ntsuꞌhui chaꞌ jlyo laa ꞌin neꞌ judio
\p
\v 1 Xa mdoꞌo Jesús niꞌ lyaa canꞌ, yu taꞌa ndaꞌan ñi mdiyaa yu cuiꞌ la seꞌen ndon ñi, loꞌ nguloꞌo yu ꞌin ñi tsala ñaꞌan tlyu nguiaaꞌ laa canꞌ.
\v 2 Mxcuen ñi ꞌin yu: ¡Naꞌan um tsala ñaꞌan nguiaaꞌ na! Nu chaꞌ ñi cunen loꞌo um, ntsuꞌhui chaꞌ cuten na re, ñi xca quee loꞌ a quinu scua ꞌa na chonꞌ taꞌa na.
\s Xa nu tsatii chendyu
\p
\v 3 Lja nducua ñi loo quiꞌya Olivo canꞌ, sca cunta mdiyaa yu taꞌa ndaꞌan ñi cuiꞌ la seꞌen nducua ñi, loꞌ juin yu: Quitsaꞌ um ꞌin hua chaꞌ ñi xaa tsatoꞌo chaꞌ re, loꞌ ñi lyijyi chaꞌ ca chcanꞌ loo xa quiaan um uta xa tsatii chendyu re.
\v 4 Mxcuen Jesús ꞌin yu: Xñi um cunta siꞌyana a tucui nu cuñilyiꞌo ꞌin um.
\v 5 Siꞌyana quiꞌan ꞌa nu caan, loꞌ cuꞌni ꞌin siꞌyana ljyaan loꞌo chaꞌ cuiyaꞌ ꞌñan, loꞌ chcuiꞌ: Nanꞌ lcan Cristo. Quiꞌan ꞌa nten cuñilyiꞌo canꞌ.
\v 6 A cunta cunan um chaꞌ siꞌyana cuaꞌ nguiꞌni neꞌ cusuun seꞌen tijyoꞌ loꞌo seꞌen cuiꞌ ti, una a suꞌhua um chaꞌ nduhue tiꞌ tiquee um siꞌyana nchgaa chaꞌ re ntsuꞌhui chaꞌ ca na, una siꞌi canꞌ chaꞌ cuaꞌ tsatii chendyu re.
\v 7 Ntsuꞌhui chaꞌ xuun quichen tnu loꞌo taꞌa quichen tnu na, loꞌ sca chcui chendyu tyiꞌin suun neꞌ. A cunta scasca seꞌen ntsuꞌhui chaꞌ quiꞌya bjuꞌñan loꞌo quicha, loꞌ ntsuꞌhui chaꞌ quiñan lyee yaꞌ.
\v 8 Nchgaa chaꞌ re lca nu tiꞌi nu tca tyisnan.
\v 9 Xacanꞌ tyaa neꞌ ꞌin um seꞌen tyijyin um nu tiꞌi, loꞌ cujui neꞌ ꞌin um, loꞌ chcua tyiꞌiin tsoꞌ ntsuꞌhui chaꞌ xcuan tloo neꞌ ꞌin um siꞌya chaꞌ ꞌñan.
\v 10 Quiꞌan ꞌa nten tyiꞌo tsoꞌ neꞌ siiꞌ Ndiose, scasca neꞌ tnanꞌ taꞌa neꞌ, a cunta xcuan tloo taꞌa neꞌ.
\v 11 Quiꞌan ꞌa nu cuiñi chcuiꞌ siꞌyana Ndiose nxiycuiꞌ ꞌin, loꞌ tsacua quiꞌan nu cuñilyiꞌo canꞌ.
\v 12 Loꞌ siꞌyana lyee ꞌa cuaꞌ yton quiꞌya, nguiaa ndiyatii chaꞌ tsuꞌhue nu ntsuꞌhui tiquee neꞌ scasca neꞌ.
\v 13 Una nu tla ndon hasta yaꞌ tsatii chaꞌ nu nchca loo chendyu re, canꞌ nu tyiꞌo laa.
\v 14 Una chaꞌ tsuꞌhue ꞌin Ndiose caja nu chcuiꞌ ꞌin na sca chcui chendyu, ñaꞌan ca siꞌyana ca cuiyaꞌ tiꞌ neꞌ chaꞌ re, xacanꞌ tsatii chaꞌ nu nchca loo chendyu re.
\v 15 Canꞌ chaꞌ xa ñaꞌan um cuaꞌ nchca —chaꞌ ngunanꞌ seꞌen nꞌni tnu neꞌ ꞌin Ndiose—, tsañaꞌan chaꞌ nu mxiycuiꞌ Ndiose ꞌin Daniel (canꞌ chaꞌ quiꞌya um cunta, ꞌun nu nchcuiꞌ quityi re).
\v 16 Xacanꞌ nu ndiꞌin seꞌen lca Judea, xnan yuꞌhui canꞌ nde loo quiꞌya.
\v 17 Nu nguilyu nde que naꞌan ꞌin, a bla ꞌa quiꞌya canꞌ lyoo na ndiꞌin ñaꞌan ꞌin.
\v 18 Cuañaꞌan nu nguiꞌni tñan niꞌ quixinꞌ, a bla ꞌa ꞌin canꞌ tiꞌ quia ꞌya steꞌ.
\v 19 Una ꞌtnan ca neꞌ cunaꞌan nu cuaꞌ xcañaꞌan nxiton, loꞌo nu cuneꞌ sñeꞌ.
\v 20 Canꞌ chaꞌ jñan um ꞌin Ndiose siꞌyana a tsatoꞌo chaꞌ re tsaan nu tlyaꞌ, uta tsaan nu nxitñanꞌ na,
\v 21 siꞌyana ntsuꞌhui chaꞌ caan —scasca nu tiꞌi tnu nu a nchca siyaꞌ tsatoꞌo tiꞌ xa mtñan Ndiose chendyu, ñi a ntsuꞌhui ꞌa chaꞌ tiꞌ caan la na—.
\v 22 Chaꞌ Ndiose a siꞌyu coꞌ ñi chaꞌ re, a tucui nu tyiꞌo laa, una siꞌya nten nu cuaꞌ mdoꞌo hui ꞌin ñi, canꞌ chaꞌ siꞌyu coꞌ ñi chaꞌ re.
\v 23 Chaꞌ ndeꞌen nu ljuin loꞌo um: Ñaꞌan jan ñi, nde ndon Cristo, uta chaꞌ ljuin: La cua ndon ñi. A tsa quiꞌan tiꞌ um ꞌin canꞌ.
\v 24 Siꞌyana ntsuꞌhui chaꞌ caan scasca nu cuiñi loꞌ ljuin siꞌyana lca Cristo, a cunta chcuiꞌ siꞌyana Ndiose nxiycuiꞌ ꞌin, loꞌ cuꞌni canꞌ scasca chaꞌ nu tnu seꞌen nu cuhue tiꞌ nten ꞌin, loꞌ hasta loꞌo nu cuaꞌ ngulohui Ndiose ꞌin cuñilyiꞌo, chaꞌ cua na tca ꞌin.
\v 25 Cuaꞌ msuꞌhua tiyaan ꞌin um loꞌo chaꞌ re.
\v 26 Canꞌ chaꞌ, chaꞌ ntsuꞌhui nu ljuin loꞌo um: Ñaꞌan jan ñi, la seꞌen ngutyi cua nguilyu ñi, a tsaa um. Uta ljuin: Nde ñaꞌan cua nducua. A tsa quiꞌan tiꞌ um.
\v 27 Tsañaꞌan nchca tiꞌ xa ndyuhui niꞌ cuaan, loꞌ nxtyi xaa scasca tsoꞌ, cuañaꞌan ca chcanꞌ quiaan Yu Quiꞌyu nu Mdoꞌo nde niꞌ Cuaan tiyaa xaa.
\v 28 Seꞌen xtyi nu ngujui, canꞌ ntsuꞌhui chaꞌ quioꞌ tiꞌin laxo.
\s Xa quiaan Cristo xiyaꞌ
\p
\v 29 Cuiꞌ ñaꞌan lcaa xa cuaꞌ mdijin nchgaa nu tiꞌi canꞌ, —ntsuꞌhui chaꞌ quiꞌya tla loo cucha, ñi cooꞌ loꞌ a tyuꞌhui ꞌa xaa ꞌin na, cuii nu nducua niꞌ cuaan ntsuꞌhui chaꞌ quilo na, loꞌ ñaꞌaan niꞌ cuaan ntsuꞌhui chaꞌ quiñan tucui na—.
\v 30 Xacanꞌ ca chcanꞌ loo Yu Quiꞌyu nu Mdoꞌo nde niꞌ Cuaan. —Nchgaa nten chendyu quiꞌya tuꞌhua tiquee neꞌ—, loꞌ ñaꞌan tloo neꞌ ꞌin —Yu Quiꞌyu nu Mdoꞌo nde niꞌ Cuaan quiaan ñi niꞌ ndlaa— loꞌo sca chaꞌ cuiyaꞌ nu tlyu, loꞌo sca xaa tsuꞌhue ñaꞌan.
\v 31 Xacanꞌ tyiꞌo ne sca cuhuii, cuiꞌ ñaꞌan lcaa caꞌan tñan ñi angujle ꞌin ñi, nu tsa xoꞌ ꞌin nchgaa nu cuaꞌ mdoꞌo hui ꞌin ñi taꞌa jacua nscan chendyu.
\v 32 Xñi um cunta ñaꞌan nguiaa chaꞌ ꞌin sca yca higo: Xa ñaꞌan um cuaꞌ tyisnan chcua lcaꞌ cojoꞌ na, cuaꞌ jlyo tiꞌ um siꞌyana cuaꞌ nchcui cuiiꞌ chaꞌ quila quioo.
\v 33 Cuiꞌ cuañaꞌan xa ñaꞌan um cuaꞌ nchca nchgaa chaꞌ re, ca jlyo tiꞌ um siꞌyana cuaꞌ nchcui cuiiꞌ chaꞌ quiaan ñi.
\v 34 Nu chaꞌ ñi cunen loꞌo um, tiꞌ ndiꞌin ta nten re xa tsatoꞌo nchgaa chaꞌ re.
\v 35 Niꞌ cuaan loꞌo chendyu re, a la ꞌa quine cueen na tiyaa xaa, una chaꞌ nu nchcuinꞌ loꞌo um, tsala xaa quinu scua na.
\v 36 A tucui nu jlyo tiꞌ ñi tsaan loꞌ ñi braa tsatoꞌo chaꞌ re, ñi angujle nu ndiꞌin niꞌ cuaan, cuiꞌ ca nu scati Stin jlyo tiꞌ ñi chaꞌ re.
\v 37 Tsañaꞌan yatoꞌo xa mdiꞌin yu Noé, cuañaꞌan tsatoꞌo xa quiaan Yu Quiꞌyu nu Mdoꞌo nde niꞌ Cuaan.
\v 38 Xa tiꞌ lyijyi caan quio tnu canꞌ, nchcu neꞌ, ndyiꞌyo neꞌ, ndyija cuilyiꞌo neꞌ, loꞌ ndaa neꞌ chaꞌ cuilyiꞌo ꞌin taꞌa nten neꞌ, tsayaꞌ mdiyaa tsaan yten yu Noé niꞌ yca naꞌan canꞌ.
\v 39 Nguꞌya neꞌ cunta chaꞌ canꞌ la cuaꞌ mdyisnan quio tnu loꞌ ngujlyo na ꞌin neꞌ nchgaa neꞌ, cuañaꞌan tsatoꞌo xa quiaan Yu Quiꞌyu nu Mdoꞌo nde niꞌ Cuaan.
\v 40 Tucua yu nguiꞌni tñan niꞌ quixinꞌ, sca canꞌ quia loꞌo ñi ꞌin, loꞌ xca canꞌ quinu ton.
\v 41 Tucua neꞌ cunaꞌan ndiyo, sca canꞌ quia loꞌo ñi ꞌin, loꞌ xca canꞌ quinu ton.
\v 42 Canꞌ chaꞌ tyiꞌin tiyaa um, siꞌyana a jlyo tiꞌ um ñi braa quiaan Ñi nu lca Xꞌnan um.
\v 43 Una ca jlyo tiꞌ um chaꞌ re: Chaꞌ cua na ca jlyo tiꞌ xꞌnan naꞌan ñi braa caan yu cunan, cuaꞌ lca ndon tiyaa canꞌ, loꞌ a cuiꞌya yu na nu ndiꞌin ꞌin.
\v 44 Cuañaꞌan ꞌun, tyiꞌin tiyaa um, siꞌyana Yu Quiꞌyu nu Mdoꞌo nde niꞌ Cuaan ntsuꞌhui chaꞌ quiaan ñi lja nu a sca chaꞌ ntsuꞌhui tiquee um.
\v 45 ¿Ti nu lca nguso nu ñi ndiꞌin chaꞌ ꞌin loꞌ tiyaa? Ta siꞌi cuiꞌ yu nguso nu mxnu xꞌnan cunta ꞌin loꞌo nchgaa loo tñan, siꞌyana tyiꞌin tiyaa yu loꞌ taa yu na nu cunajoꞌo ꞌin nu ndiꞌin naꞌan canꞌ.
\v 46 Tsuꞌhue ca xuꞌhue yu nguso canꞌ, chaꞌ cuañaꞌan nguiꞌni yu xa quila xꞌnan yu.
\v 47 Nu chaꞌ ñi cunen loꞌo um, xꞌnan nguso canꞌ xnu cunta ꞌin yu loꞌo nchgaa la ñaꞌan tñan canꞌ.
\v 48 Una yu nguso canꞌ, chaꞌ lca yu sca nu nducunꞌ loꞌ tyisnan tyiꞌan chaꞌ tiquee yu, loꞌ ljuin yu: Ñi xꞌnan a quila ñi cuiꞌ xaa,
\v 49 loꞌ tyisnan jyiꞌin yu ꞌin nchgaa la ñaꞌan yu nguso canꞌ, loꞌ tyiꞌan yu loꞌo yu cuꞌhui,
\v 50 loꞌ chaꞌ quila xꞌnan yu sca tsaan nu a nta yu ꞌin, lja nu a sca chaꞌ ntsuꞌhui tiꞌ yu,
\v 51 tsaloo ti xitijin canꞌ ꞌin yu nu tiꞌi, loꞌ suꞌhua ꞌin yu sca seꞌen ti loꞌo nu cuiñi, canꞌ xtyi ynan yu loo nu lyee tyijyin yu nu tiꞌi. 
\c 25
\s Chaꞌ ꞌin tsa tii ngüiꞌ tsa suhue ti
\p
\v 1 Tsañaꞌan ndlo Ndiose tñan, nguiaa chaꞌ ꞌin na ñaꞌan ndiꞌin chaꞌ ꞌin tsa tii ngüiꞌ tsa suhue ti, nu taꞌa nguiaa ꞌin xen nu chcuan cunta ꞌin cuilyiꞌo, loꞌ yaaꞌ neꞌ nducua quiiꞌ nu nduꞌhui xaa ꞌin neꞌ.
\v 2 Tsa caꞌyu neꞌ canꞌ tiyaa neꞌ, loꞌ cha caꞌyu neꞌ tinto neꞌ.
\v 3 Nu tinto canꞌ msñi seꞌen ndiquin quiiꞌ canꞌ ꞌin, una a lyiꞌya xca ta ceite nu tiꞌ tiquin la.
\v 4 Una neꞌ nu tiyaa canꞌ, msñi neꞌ seꞌen ndiquin quiiꞌ canꞌ ꞌin neꞌ tsatlyu loꞌo xca teꞌen ceite.
\v 5 Yu nu ndyijyi cuilyiꞌo canꞌ a mdiyaan yu cuiꞌ xaa, loꞌ mdyisnan yaan sla ngüiꞌ canꞌ, loꞌ yjaꞌ ngüiꞌ.
\v 6 Xa mdiyaa tluꞌhue tla mdyisnan ycuiꞌ cueen nten canꞌ loꞌ nchcuiꞌ neꞌ: Nde cuaꞌ ljyaan yu nu ndyija cuilyiꞌo canꞌ, yaa um loꞌ tsa tucua um ꞌin.
\v 7 Xacanꞌ mdyiꞌo sla ngüiꞌ, loꞌ mdyisnan mꞌni chuꞌhue ngüiꞌ seꞌen ndiquin quiiꞌ canꞌ ꞌin ngüiꞌ.
\v 8 Nu tinto canꞌ juin ꞌin nu tiyaa canꞌ: Tyaa um tsachinꞌ ceite ꞌin hua siꞌyana a xlyaa na re xñi quiiꞌ ꞌin na.
\v 9 Una ngüiꞌ nu tiyaa canꞌ mxcuen: Tsuꞌhue lati tsa siꞌi um ceite nu cunajoꞌo ꞌin um, siꞌyana a sca na tsa lyijyi na ꞌin na.
\v 10 Lja mdoꞌo neꞌ nguia siꞌi neꞌ ceite canꞌ, mdiyaan yu nu ndyija cuilyiꞌo canꞌ, loꞌ ngüiꞌ nu cuaꞌ ndon tiyaa canꞌ tsatlyu yten ñaꞌan loꞌo yu nu ndyija cuilyiꞌo canꞌ, xacanꞌ mchcun tunaꞌan canꞌ.
\v 11 Chonꞌ ndeꞌen canꞌ nguila cha caꞌyu ngüiꞌ canꞌ, loꞌ nchcuiꞌ ngüiꞌ: ¡Ñi Xꞌnan hua, Ñi Xꞌnan hua, xla um tunaꞌan re loꞌ sten hua!
\v 12 Una mxcuen ñi ꞌin neꞌ: Nu chaꞌ ñi cunen loꞌo um, a ndyuꞌhui lyoon ꞌin um.
\v 13 Canꞌ chaꞌ tyiꞌin tiyaa um, siꞌyana a jlyo tiꞌ um ñi tsaan loꞌ ñi braa caan Yu Quiꞌyu nu Mdoꞌo nde niꞌ Cuaan.
\s Chaꞌ ꞌin yu nu mchcuan cunta tñi
\p
\v 14 Tsañaꞌan ndlo Ndiose tñan, nguiaa chaꞌ ꞌin na ñaꞌan ndiꞌin chaꞌ ꞌin sca yu cuaꞌ tsaa sca seꞌen tijyoꞌ, loꞌ msiꞌya yu nguso ꞌin yu siꞌyana xnu yu cunta tñan canꞌ ꞌin.
\v 15 Mdyaa yu cunta ꞌin sca yu nguso canꞌ caꞌyu millon tñi, loꞌ xca canꞌ mchcuan cunta tucua millon, xca canꞌ mchcuan cunta sca millon, cunda scaa yu cuaꞌ ñaꞌaan cunta tiꞌ yu loꞌo tñi. Xacanꞌ mdoꞌo xꞌnan tñan canꞌ, nguiaa sca seꞌen tijyoꞌ.
\v 16 Yu nu mchcuan caꞌyu millon canꞌ, mꞌni yu jyinsya loꞌ mꞌni yu canan cha caꞌyu millon tñi.
\v 17 Ticuiꞌ cuañaꞌan mꞌni yu nu mchcuan cunta tucua millon canꞌ, mꞌni yu canan chcua millon loꞌo na.
\v 18 Una yu nu mchcuan sca millon canꞌ, yatoꞌo mjñi yu sca tuyuu loꞌ msuꞌhua cutsiꞌ yu tñi nu mdaa xꞌnan yu.
\v 19 La cuaꞌ sꞌni canꞌ nguila xꞌnan nguso canꞌ, mdyisnan mjñan cunta ꞌin yu nguso canꞌ.
\v 20 Mdiyaa yu nu msñi caꞌyu millon canꞌ, loꞌo cha caꞌyu millon lyiꞌya yu, loꞌ juin yu: Ñi xꞌnan hua, nde tyaan caꞌyu millon nu mxnu um cunta ꞌñan, a cunta nde cha caꞌyu millon nu mꞌnin canan loꞌo na.
\v 21 Xacanꞌ juin xꞌnan yu: Tsuꞌhue ꞌa ñaꞌan nu mꞌni, nuꞌhuin lca sca nguso nu tsuꞌhue loꞌ ñi ndiꞌin chaꞌ ꞌin. Loꞌo tsachinꞌ cunta nu nguinu yaaꞌ mdoꞌo ñi chaꞌ ꞌin, cuaꞌ ñii quiꞌan la cunta tyaan ꞌin, loꞌ tsatlyu ca tsuꞌhue chuꞌhui tiquee loꞌo ñi nu lca xꞌnan.
\v 22 Xacanꞌ mdiyaa yu nu msñi tucua millon canꞌ, loꞌ juin yu: Ñi xꞌnan hua, nde tyaan tucua millon nu mxnu um cunta ꞌñan, a cunta nde chcua millon nu mꞌnin canan loꞌo na.
\v 23 Juin xꞌnan yu loꞌo yu: Tsuꞌhue ꞌa ñaꞌan nu mꞌni, nuꞌhuin lca sca nguso nu tsuꞌhue loꞌ ñi ndiꞌin chaꞌ ꞌin. Loꞌo tsachinꞌ cunta nu nguinu yaaꞌ mdoꞌo ñi chaꞌ ꞌin, cuaꞌ ñii quiꞌan la cunta tyaan ꞌin, loꞌ tsatlyu ca tsuꞌhue chuꞌhui tiquee loꞌo ñi nu lca xꞌnan.
\v 24 Xacanꞌ mdiyaa yu nu msñi sca millon canꞌ, loꞌ juin yu: Ñi xꞌnan hua, jlyo tinꞌ siꞌyana ꞌun lca um sca nu tla chaꞌ ꞌin, loꞌ nxoꞌ um na nu a ntya um, loꞌ nxoꞌ um tñan ꞌin xca tucui,
\v 25 loꞌ siꞌyana ytsen culyijyin tñi re ꞌin um, canꞌ chaꞌ msuꞌhuan cutsinꞌ ꞌin na tuyuu, una nde tyaan na ꞌin um.
\v 26 Mxcuen xꞌnan yu ꞌin yu: Nuꞌhuin lca sca nguso nu nducunꞌ loꞌ ndaja, cuaꞌ jlyo tiꞌ siꞌyana nxonꞌ na nu a ntyan, loꞌ nxonꞌ tñan ꞌin xca tucui.
\v 27 Chaꞌ cua na mdaa um tñi ꞌñan mjñiꞌ xca tucui, loꞌ xa xitucuin chcuan ꞌin na loꞌo sñeꞌ na.
\v 28 Chcuan um tñi cua ꞌin yu, loꞌ tyaa um ꞌin na ꞌin yu nu cuaꞌ ndiꞌin tii millon ꞌin.
\v 29 Siꞌyana nu cuaꞌ jui chaꞌ tsuꞌhue ꞌin, nde caja nu taa la na ꞌin loꞌ ca quiꞌan la na ꞌin, una nu a jui chaꞌ tsuꞌhue ꞌin, hasta loꞌo tsachinꞌ na nu cuaꞌ ndiꞌin ꞌin, caja nu chcuan lyijyi ꞌin na.
\v 30 Yu nguso nu a ncua tñan re, lyoo um ꞌin yu nde lyiyaꞌ seꞌen tla yta cua, canꞌ xtyi ynan yu loo nu lyee tyijyin yu nu tiꞌi.
\s Xa ca xñan bsya ꞌin nten chendyu
\p
\v 31 Xa nu tyiꞌo Yu Quiꞌyu nu Mdoꞌo nde niꞌ Cuaan loo xaa ꞌin ñi, loꞌ tsatlyu caan ñi loꞌo nchgaa angujle ꞌin ñi, xacanꞌ sten tucua ñi seꞌen ntsuꞌhui chaꞌ culo ñi tñan loo xaa ꞌin ñi,
\v 32 ñaꞌaan sca chcui chendyu quioꞌ tiꞌin tloo ñi, loꞌ culohui ñi ꞌin cunda scaa ta, tsañaꞌan nꞌni yu nu naꞌan seen slyaꞌ xa ndlohui yu ꞌin ꞌin lja chiu.
\v 33 Xoꞌ tiꞌin ñi slyaꞌ canꞌ tsoꞌ cueen ꞌin ñi, loꞌ chiu canꞌ quioꞌ tiꞌin tsoꞌ ca ꞌin ñi.
\v 34 Xacanꞌ chcuiꞌ ñi nu lca Ree canꞌ loꞌo nu ndiꞌin tsoꞌ cueen ꞌin ñi: Quiaan um, ꞌun nu cuaꞌ ndaꞌan loꞌo chaꞌ tsuꞌhue nu mdaa Stin, chcuan um cunta seꞌen ndlo ñi tñan, cuiꞌ chaꞌ nu cuaꞌ mdiꞌin tyaa ñi tiꞌ xa mtñan ñi chendyu re, loꞌ cuaꞌ ñi quiꞌni caꞌan na ꞌin um.
\v 35 Siꞌyana xa nguteꞌ tinꞌ mdaa um na ycun, xa ngutyi tinꞌ mdaa um tyiꞌa yiꞌon, xa ncuan sca yu ndaꞌan ti mdaa um seꞌen nguinun.
\v 36 A cunta ya lyijyi stenꞌ mdaa um teꞌ yconꞌ, xa ncua tiꞌin ꞌun mꞌni cunta um ꞌñan, yuꞌhuin naꞌan chcuan loꞌ ya naꞌan um seꞌen ntsuꞌhuin.
\v 37 Xacanꞌ xcuen jun nu mdoꞌo hui ꞌin ñi: ¿Ñi Xꞌnan hua, ñi xaa nguteꞌ tiꞌ um loꞌ mdaa hua na ycu um, ñi xaa ngutyi tiꞌ um loꞌ mdaa hua tyiꞌa yiꞌo um?
\v 38 ¿Ñi xaa ncuan xuꞌhue hua ꞌin um xa ncua um sca nu ndaꞌan ti, uta ya lyijyi steꞌ um loꞌ mdaa hua teꞌ ycoꞌ um?
\v 39 ¿Ñi xaa ncua tiꞌi um, uta yuꞌhui um naꞌan chcuan loꞌ mꞌni cunta hua ꞌin um?
\v 40 Loꞌ xcuen ñi nu lca Ree canꞌ: Nu chaꞌ ñi cunen loꞌo um, nchgaa yaꞌ mꞌni um chaꞌ tsuꞌhue loꞌo taꞌan nu ndon re, siyaꞌ nu chinꞌ la chaꞌ ꞌin, mꞌnin cunta siꞌyana loꞌon nanꞌ mꞌni um ꞌin na.
\v 41 Xacanꞌ chcuiꞌ ñi loꞌo nu ndiꞌin tsoꞌ ca ꞌin ñi: Tyiꞌo tsoꞌ um siinꞌ, ꞌun nu nducua yuhueꞌ chonꞌ loꞌ tsaa um loo quiiꞌ tsala xaa, seꞌen nu cuaꞌ ncua tsuꞌhue tsaa laxaꞌan tsatlyu loꞌo angujle ꞌin.
\v 42 Siꞌyana nguteꞌ tinꞌ loꞌ a mdaa um na cun, ngutyi tinꞌ loꞌ a mdaa um tyiꞌa coꞌon.
\v 43 Xa ncuan sca nu ndaꞌan ti, a mdaa um seꞌen quinun, ya lyijyi stenꞌ loꞌ a mdaa um teꞌ conꞌ, ncua tiꞌin, a cunta yuꞌhuin naꞌan chcuan loꞌ a mꞌni cunta um ꞌñan.
\v 44 Ticuiꞌ cuañaꞌan xcuen neꞌ canꞌ ꞌin ñi: Ñi Xꞌnan hua, ¿ñi xaa naꞌan hua siꞌyana nguteꞌ tiꞌ um, uta ngutyi tiꞌ um, loꞌ ñi xaa ncua um sca nu ndaꞌan ti, uta ya lyijyi steꞌ um, loꞌ ta ncua tiꞌi um uta yaa um naꞌan chcuan, loꞌ a mꞌni cunta hua ꞌin um?
\v 45 Xacanꞌ xcuen ñi ꞌin neꞌ: Nu chaꞌ ñi cunen loꞌo um, loo nu a mꞌni um chaꞌ tsuꞌhue re loꞌo taꞌan nu ndon re, siyaꞌ chinꞌ la chaꞌ ꞌin, mꞌnin cunta siꞌyana ꞌñan mscuan tloo um.
\v 46 Canꞌ nu tsaa loo quiiꞌ tsala xaa, una jun nu cuaꞌ ncuan xuꞌhue ꞌñan, quiꞌni caꞌan ꞌin canꞌ chendyu nu a tsatii ꞌa. 
\c 26
\s Ngunan neꞌ ñaꞌan nu quinu Jesús
\p
\v 1 Xa mdyi ycuiꞌ Jesús nchgaa chaꞌ re, juin ñi loꞌo yu taꞌa ndaꞌan ñi:
\v 2 Cuaꞌ jlyo tiꞌ um siꞌyana niꞌ chcua ti tsaan cuaꞌ ca taꞌa pascua, loꞌ Yu Quiꞌyu nu Mdoꞌo nde niꞌ Cuaan tyaa neꞌ ꞌin ñi, loꞌ jyiꞌin caꞌan neꞌ ꞌin ñi loo cusi.
\v 3 Lja xacanꞌ yu nu ndlo tñan niꞌ lyaa loꞌo neꞌ escriba, tsatlyu loꞌo quiꞌyu cula nguioꞌ tiꞌin neꞌ tunaꞌan lyiyaꞌ seꞌen ndiꞌin yu Caifás, yu nu ndlo ca tñan niꞌ lyaa ꞌin neꞌ,
\v 4 mꞌni cuiyaꞌ neꞌ chaꞌ ñaꞌan ntsuꞌhui chaꞌ quinu Jesús loꞌo chaꞌ cuiñi ꞌin neꞌ, loꞌ cujui neꞌ ꞌin ñi.
\v 5 Loꞌ ndeñaꞌan nchcuiꞌ neꞌ: Una siꞌi lja taꞌa re, siꞌyana a nchca tiꞌ na quilo tiꞌin nten quichen re.
\s Xa mslo tucua neꞌ tyiꞌa xityiꞌi que Jesús
\p
\v 6 Jesús ndiꞌin ñi quichen Betania, naꞌan ꞌin Simón nu ncua tiꞌi loꞌo quitsoꞌ la,
\v 7 lja xacanꞌ mdiyaa sca neꞌ cunaꞌan seꞌen nducua ñi tuꞌhua msa, lyiꞌya neꞌ sca teꞌen tyiꞌa xityiꞌi nu quiꞌan nchca, loꞌ mslo tucua neꞌ ꞌin na que ñi.
\v 8 Xa naꞌan yu taꞌa ndaꞌan ñi chaꞌ canꞌ, msinꞌ tiꞌ yu loꞌ nchcuiꞌ yu: ¿Ñi chaꞌ mslo luꞌun neꞌ tyiꞌa xityiꞌi re?
\v 9 Tsuꞌhue lati chaꞌ cua na ncua quiyaꞌ na, caja tñi loꞌo na loꞌ quitsa na ꞌin nu tiꞌi ñaꞌan chendyu ꞌin.
\v 10 Nguꞌya Jesús cunta chaꞌ nchcuiꞌ yu, loꞌ juin ñi: ¿Ñi chaꞌ nducui ndijin um loꞌo chaꞌ nu nguiꞌni neꞌ cunaꞌan re? Sca nu tsuꞌhue nguiꞌni neꞌ loꞌon.
\v 11 Nu tiꞌi ñaꞌan chendyu ꞌin, nchgaa xaa ndiꞌin canꞌ loꞌo um, una nanꞌ siꞌi tsala xaa ñaꞌan tloo um ꞌñan.
\v 12 Tsañaꞌan mslo tucua neꞌ tyiꞌa xityiꞌi ꞌñan, cuaꞌ mxitucua loo neꞌ chaꞌ ꞌin neꞌ xa nu quitsinꞌ.
\v 13 Nu chaꞌ ñi cunen loꞌo um, ñaꞌan tucui ti nu tyiꞌan ycuiꞌ chaꞌ tsuꞌhue re ꞌñan sca chcui chendyu, loꞌo chaꞌ ꞌin neꞌ cunaꞌan re chcuiꞌ canꞌ, loꞌ ca jlyo tiꞌ nten tsañaꞌan nu mꞌni neꞌ re.
\s Ycuiꞌ yu Juda siꞌyana tyaa yu ꞌin Jesús
\p
\v 14 Xacanꞌ sca yu nu nchca tichcua canꞌ, yu nu naan Juda Iscariote, yaa yu seꞌen ndiꞌin yu nu ndlo ca tñan niꞌ lyaa,
\v 15 loꞌ juin yu ꞌin neꞌ: ¿Tsala taa um ꞌñan, loꞌ nanꞌ tyaan ꞌin Jesús tuyaaꞌ um? —Xacanꞌ ncua neꞌ cla tyii tñi plata mdaa neꞌ ꞌin yu—.
\v 16 Tiꞌ xacanꞌ ngunan yu ñaꞌan nu tyaa yu ꞌin ñi tuyaaꞌ neꞌ canꞌ.
\s Xa ycu siin Jesús loꞌo yu taꞌa mdaꞌan ñi
\p
\v 17 Culoo tsaan nu nchca taꞌa, xa nchcu neꞌ jaslya nu a yuꞌhui suun ꞌin, yu taꞌa ndaꞌan ñi mdiyaa yu cuiꞌ la tloo ñi, loꞌ juin yu: ¿La ta nchca tiꞌ um tsa yꞌni chuꞌhue hua na nu cu siin na taꞌa pascua re?
\v 18 Juin ñi ꞌin yu: Yaa um loo quichen cua, loꞌ ndeñaꞌan chcuiꞌ um loꞌo sca yu nu cuaꞌ ndon tiyaa canꞌ: Ñi nu lca Bstro ꞌin na juin ñi siꞌyana cuaꞌ nchcui cuiiꞌ chaꞌ ꞌin ñi. Ñaꞌan ꞌin um ntsuꞌhui chaꞌ cu siin ñi loꞌo yu taꞌa ndaꞌan ñi taꞌa pascua re.
\v 19 Yu taꞌa ndaꞌan ñi mducua yu tñan ñaꞌan nu juin Jesús, loꞌ mꞌni chuꞌhue yu na nu cu siin jun taꞌa pascua canꞌ.
\v 20 Xa nguꞌya tla canꞌ yten tucua ñi loꞌo taꞌa tichcua yu taꞌa ndaꞌan ñi,
\v 21 loꞌ lja nchcu siin jun mdyisnan ycuiꞌ ñi: Nu chaꞌ ñi cunen loꞌo um, sca um nu taꞌa nducua na re ntsuꞌhui chaꞌ tyaa um ꞌñan.
\v 22 Lyee nguluꞌun tiꞌ yu, loꞌ cunda scaa yu juin yu ꞌin ñi: Ñi Xꞌnan hua, ¿ta xtyi tiꞌ nanꞌ lcan?
\v 23 Mxcuen ñi ꞌin yu: Cuiꞌ yu nu cuchaꞌ jaslya ꞌin sca niꞌ quiꞌnan ti loꞌon, canꞌ nu ntsuꞌhui chaꞌ tyaa ꞌñan.
\v 24 Nu chaꞌ ñi siꞌyana Yu Quiꞌyu nu Mdoꞌo nde niꞌ Cuaan, ntsuꞌhui chaꞌ tyijyin ñi ñaꞌan chaꞌ nu cuaꞌ nguaꞌan scua loo quityi ꞌin Ndiose. ¡Una ꞌtnan ca yu nu ntsuꞌhui chaꞌ tyaa ꞌin Yu Quiꞌyu nu Mdoꞌo nde niꞌ Cuaan! Tiꞌ tsuꞌhue lati chaꞌ cua na a mdiyaan yu chendyu.
\v 25 Xacanꞌ juin yu Juda, cuiꞌ yu nu ntsuꞌhui chaꞌ tyaa ꞌin ñi: ꞌUn ñi nu lca Bstro, ¿ta xtyi tiꞌ nanꞌ? Mxcuen ñi ꞌin yu: Cuiꞌ ñaꞌan nu nchcuiꞌ cua.
\v 26 Lja nchcu siin jun canꞌ msñi Jesús sca jaslya, mdyaa ñi xuꞌhue ꞌin Ndiose, msuꞌhue ñi ꞌin na loꞌ mdaa ñi ꞌin na ꞌin yu taꞌa ndaꞌan ñi, loꞌ juin ñi: Xñi um loꞌ ca xuꞌhue um ꞌin na, nde nu lca cunanꞌ nanꞌ.
\v 27 Xacanꞌ msñi ñi seꞌen ntsuꞌhui vino canꞌ. Xa cuaꞌ mdyaa ñi xuꞌhue ꞌin Ndiose mdaa ñi ꞌin na ꞌin yu, loꞌ juin ñi: Yiꞌo um ꞌin na nchgaa um.
\v 28 Nde nu lca tnen nanꞌ, loꞌ siꞌya na chca tsuꞌhue chaꞌ ꞌin nten loꞌo Ndiose, loꞌ ntsuꞌhui chaꞌ quilo na, siꞌyana chca quiꞌya ꞌin quiꞌan nten.
\v 29 Cunen loꞌo um sca chaꞌ, ñi xiyaꞌ loꞌ a coꞌon ꞌan vino lja nu tiꞌ ndiꞌin loꞌo um, chaꞌ siꞌi la xa coꞌo na ꞌin na seꞌen ndlo Stin tñan.
\s Yu Tyo ntsuꞌhui chaꞌ xcuan tloo yu ꞌin Jesús
\p
\v 30 Xa cuaꞌ mdyi yla jun sca jyiin ꞌin Ndiose, mdoꞌo jun nguiaa jun nde loo quiꞌya Olivo.
\v 31 Xacanꞌ juin Jesús ꞌin yu: Nchgaa um ntsuꞌhui chaꞌ xnu ton um ꞌñan xcan tin tla re ñii, siꞌyana cuañaꞌan nguinu scua sca chaꞌ loo quityi ꞌin Ndiose: —Taan chaꞌ cuiyaꞌ cujui neꞌ ꞌin ñi nu naꞌan seen slyaꞌ, loꞌ slyaꞌ canꞌ cuaꞌ la tucueen cunaan ꞌin—.
\v 32 Una xa cuaꞌ mdyiquiꞌon, culo nducua la tsaꞌan seꞌen lca Galilea que ꞌin um.
\v 33 Yu Tyo canꞌ mxcuen yu ꞌin ñi: Chaꞌ nchgaa yu re xnu ton yu ꞌin um, una nanꞌ a cuꞌnin cuañaꞌan.
\v 34 Juin Jesús ꞌin yu: Nanꞌ cunen loꞌo, cuiꞌ tla re ñii lja nu tiꞌ lyijyi xiꞌya latyee, tsatoꞌo snan yaꞌ chcuiꞌ siꞌyana a ndyuꞌhui lyoo ꞌñan.
\v 35 Una juin yu Tyo ꞌin ñi: A ꞌni chaꞌ siyaꞌ cajan loꞌo um, una a xcuan tloon ꞌin um. Scañaꞌan ti ycuiꞌ nchgaa la ñaꞌan yu taꞌa ndaꞌan ñi.
\s Ycuiꞌ lyiꞌo Jesús ꞌin Ndiose seꞌen lca Getsemaní
\p
\v 36 Xacanꞌ mdiyaa Jesús loꞌo yu taꞌa ndaꞌan ñi sca seꞌen naan Getsemaní, loꞌ juin ñi ꞌin yu: Nde ti chcua um lja chcuiꞌ lyiꞌon ꞌin Ndiose la cua.
\v 37 Mdoꞌo loꞌo ñi ꞌin yu Tyo loꞌo chcuaa sñeꞌ Zebedeo, loꞌ mdyisnan nguꞌya sca tuꞌhua tiquee ñi nu lyee tiꞌi ngaꞌan ꞌin ñi.
\v 38 Xacanꞌ juin Jesús ꞌin yu: Luꞌun ꞌa tiꞌ cusya ꞌñan, lyiꞌya ca yaꞌ nu cuaꞌ cajan. Nde ti quinu um loꞌ a taa um yaꞌ quiꞌya sla um.
\v 39 Chinꞌ ti seꞌen tiꞌ mdaꞌan ñi, loꞌ mdyiꞌya xtyinꞌ ñi hasta nguꞌya tiꞌin tloo ñi la lyuu, loꞌ mjñan ñi ꞌin Ndiose loꞌ juin ñi: ꞌUn ñi nu lca Stin, chaꞌ caja ñaꞌan nu a tijin nu tiꞌi re, una siꞌi ñaꞌan nu nchca tinꞌ, cuiꞌ ca nu ñaꞌan nu ꞌun nchca tiꞌ um.
\v 40 Xacanꞌ mxitucui ñi seꞌen nguinu tucua yu canꞌ, nguija lyoo ñi ꞌin yu ljaꞌ yu, loꞌ juin ñi ꞌin yu Tyo: ¿Ta xtyi tiꞌ ñi sca braa ti loꞌ a ncua chcua um ndii tiꞌ um?
\v 41 Chcua tiyaa um loꞌ chcuiꞌ lyiꞌo um ꞌin Ndiose, siꞌyana a sten chaꞌ ngunanꞌ tiquee um. Lca tiquee um cuꞌni um sca tñan tsuꞌhue, una nu cuꞌni um ꞌin na naꞌan tiꞌ um.
\v 42 Xiyaꞌ yaa ñi loꞌ ycuiꞌ lyiꞌo ñi ꞌin Ndiose nu cuaꞌ nchca tucua yaꞌ, loꞌ nchcuiꞌ ñi: ꞌUn ñi nu lca Stin, chaꞌ a ndyijyi ñaꞌan nu a tijin nu tiꞌi re, una cuꞌni tu um ñaꞌan nu nchca tiꞌ um.
\v 43 Xacanꞌ mxitucui ñi xiyaꞌ, ticuiꞌ ti ñaꞌan ljaꞌ yu siꞌyana lyee tiꞌin ljyaan sla yu.
\v 44 Mxnu tucua ñi ꞌin yu, loꞌ nu cuaꞌ nchca snan yaꞌ ycuiꞌ lyiꞌo ñi ꞌin Ndiose ticuiꞌ ti loo chaꞌ canꞌ.
\v 45 Xiyaꞌ mxitucui ñi seꞌen nducua yu taꞌa ndaꞌan ñi, loꞌ juin ñi ꞌin yu: Cajaꞌ lya um, xitñanꞌ um, siꞌyana cuaꞌ mdiyaa braa, Yu Quiꞌyu nu Mdoꞌo nde niꞌ Cuaan ntsuꞌhui chaꞌ quinu ñi tuyaaꞌ nten nu nducunꞌ.
\v 46 Tyiton um loꞌ quiaa na. Ñaꞌan jan ñi, nde cuaꞌ ljyaan yu nu ntsuꞌhui chaꞌ tyaa ꞌñan.
\s Chaꞌ ꞌin Jesús xa nguinu ñi
\p
\v 47 Lja nchcuiꞌ ñi chaꞌ canꞌ mdiyaa yu Juda, cuiꞌ sca yu nu nchca tichcua canꞌ, loꞌ quiꞌan ꞌa nten mdiya loꞌo yu, ntsuꞌhui nu lyiꞌya spada, ntsuꞌhui nu nducua yca yaaꞌ. Mdiyaa neꞌ siꞌya chaꞌ cuiyaꞌ ꞌin yu nu ndlo ca tñan niꞌ lyaa tsatlyu loꞌo quiꞌyu cula.
\v 48 Yu nu ntsuꞌhui chaꞌ tyaa ꞌin Jesús, mꞌni cuiyaꞌ yu chaꞌ loꞌo neꞌ ñaꞌan ntsuꞌhui chaꞌ tyaa yu ꞌin ñi, loꞌ ndeñaꞌan juin yu: Yu nu chcuiꞌ chanꞌ la siiꞌ scaꞌ, canꞌ nu ca lca yu. Cuiꞌ xaa xñi um ꞌin yu.
\v 49 Cuiꞌ ñaꞌan lcaa mdiyaa yu seꞌen ndon Jesús, loꞌ ycuiꞌ chaꞌ yu la siiꞌ sca ñi loꞌ juin yu: ꞌUn ñi nu lca Bstro.
\v 50 Loꞌ juin Jesús ꞌin yu: Migo, ¿ñi tñan ljyaan? Cuiꞌ xaa mdiyaa neꞌ loꞌ msñi neꞌ ꞌin Jesús.
\v 51 Una sca yu nu taꞌa ndaꞌan Jesús ngulo yu spada ꞌin yu, loꞌ msiꞌyu yu nscan sca nguso ꞌin yu nu ndlo ca tñan niꞌ lyaa canꞌ.
\v 52 Xacanꞌ juin Jesús ꞌin yu: Xuꞌhua seꞌen spada ꞌin niꞌ tyi na, siꞌyana nchgaa nu ndaꞌan loꞌo spada, ticuiꞌ loꞌo spada caja canꞌ.
\v 53 ¿Ta ñan tiꞌ siꞌyana a tca jñan ꞌin Stin, loꞌ caꞌan tñan ñi tyun mii angujle nu ta yaaꞌ ꞌñan?
\v 54 Una, ¿ñaꞌan ta quinu chaꞌ nu nguinu scua loo quityi ꞌin Ndiose, siꞌyana ꞌni chaꞌ tsatoꞌo nchgaa chaꞌ re?
\v 55 Xacanꞌ juin Jesús ꞌin neꞌ: ¿Ñi chaꞌ ljyan ꞌya um ꞌñan tsañaꞌan nchca tiꞌ sca yu cunan, hasta loꞌo spada loꞌo yca nducua yaaꞌ um? ¿Ta siꞌi nchgaa xaa nguilyun loꞌo um, loꞌ ndloꞌon ꞌin nten niꞌ lyaa, ñi chaꞌ a msñi um ꞌñan xacanꞌ?
\v 56 Una nchgaa chaꞌ re nchca na, siꞌyana tsatoꞌo chaꞌ nu cuaꞌ nguaꞌan scua yu nu mxiycuiꞌ Ndiose ꞌin cuaꞌ sꞌni. Xacanꞌ nchgaa yu taꞌa ndaꞌan ñi mxnu ton yu ꞌin ñi xca ti ñi, loꞌ msnan yu.
\s Xa mꞌni cuiyaꞌ neꞌ chaꞌ ꞌin Jesús
\p
\v 57 Neꞌ nu msñi ꞌin Jesús ya loꞌo neꞌ ꞌin ñi tloo Caifás, yu nu ndlo ca tñan niꞌ lyaa, canꞌ nguioꞌ tiꞌin neꞌ escriba loꞌo quiꞌyu cula.
\v 58 Una yu Tyo tijyoꞌ ti mducui nchaꞌan yu ꞌin Jesús, tsayaꞌ mdiyaa yu tunaꞌan lyiyaꞌ ꞌin yu nu ndlo ca tñan canꞌ. Canꞌ yten tucua yu sca seꞌen ti loꞌo yu silyiya, siꞌyana ñaꞌan yu ñi lyijyi ñaꞌan tsatoꞌo chaꞌ canꞌ.
\v 59 Nchgaa yu nu ndlo tñan niꞌ lyaa tsatlyu loꞌo quiꞌyu cula, loꞌo nchgaa la ñaꞌan taꞌa nducua yu canꞌ, ngunan neꞌ ñaꞌan nu suꞌhua neꞌ quiꞌya ꞌin Jesús loꞌo chaꞌ cuiñi, ñaꞌan ca siꞌyana cujui neꞌ ꞌin ñi.
\v 60 Loꞌ a sca quiꞌya nguija lyoo ꞌin ñi, siyaꞌ quiꞌan la nten msuꞌhua neꞌ quiꞌya chonꞌ ñi. Una chonꞌ ndeꞌen canꞌ mdiyaan chcua yu nu msuꞌhua quiꞌya ꞌin ñi loꞌo chaꞌ cuiñi,
\v 61 loꞌ nchcuiꞌ yu: Yu re nchcuiꞌ yu siꞌyana xicuten yu laa ꞌin Ndiose nu nducua re, loꞌ tsaniꞌ snan ti tsaan xiton ꞌin na.
\v 62 Xacanꞌ mdyiton yu nu ndlo ca tñan niꞌ lyaa canꞌ, loꞌ juin yu ꞌin ñi: ¿Ñi chaꞌ ñi sca chaꞌ loꞌ a nxcuen? ¿Ñaꞌan ta ndyiꞌo chaꞌ nu nsuꞌhua neꞌ re quiꞌya ꞌin?
\v 63 Una Jesús ñi sca chaꞌ loꞌ a mxcuen ñi. Xacanꞌ juin yu nu ndlo ca tñan canꞌ: Tiꞌ Ndiose ñi nu loꞌo ca, quitsaꞌ ꞌin hua chaꞌ nuꞌhuin lca ycuiꞌ ca Cristo, Sñeꞌ Ndiose.
\v 64 Mxcuen Jesús ꞌin yu: ꞌUn nchcuiꞌ um cuañaꞌan. Una cunen loꞌo um sca chaꞌ: Tiꞌ cuaꞌ ñii ñaꞌan um ꞌin —Yu Quiꞌyu nu Mdoꞌo nde niꞌ Cuaan nducua ñi tsoꞌ cueen ꞌin Ndiose—, cuiꞌ cuañaꞌan ñaꞌan um ꞌin ñi —quiaan ñi niꞌ ndlaa—.
\v 65 Xacanꞌ yu nu ndlo ca tñan canꞌ hasta msta yu steꞌ yu, loꞌ juin yu: Yu re nchcuiꞌ caꞌan yu ꞌin Ndiose. A ꞌni ꞌa chaꞌ cunan na xca nu taa suun loꞌo na, siꞌyana cuaꞌ ngune ꞌin na ñaꞌan ndaja yu re ꞌin Ndiose.
\v 66 ¿Ñaꞌan ljuin um? Nchgaa neꞌ tsatlyu mxcuen neꞌ: ¡Tsaloo na caja ti yu!
\v 67 Scasca neꞌ mdyisnan msuꞌhua siyeꞌ neꞌ tloo ñi, ntsuꞌhui nu mycuanꞌ ꞌin ñi, loꞌ ntsuꞌhui nu mjyiꞌin yaaꞌ tloo ñi,
\v 68 loꞌ nchcuiꞌ neꞌ: Cristo, chcuiꞌ ñaꞌan na chaꞌ tucui ca mjyiꞌin ꞌin.
\s Yu Tyo mscuan tloo yu ꞌin Jesús
\p
\v 69 Yu Tyo tiꞌ nducua yu tunaꞌan lyiyaꞌ canꞌ, loꞌ sca neꞌ cunaꞌan nguso mdiya ton cuiꞌ ti seꞌen nducua yu, loꞌ juin neꞌ: Loꞌo nuꞌhuin taꞌa ndaꞌan Jesús nu mdoꞌo seꞌen lyiꞌya loo Galilea.
\v 70 Una yu Tyo canꞌ ytsen yu, loꞌ juin yu tloo nchgaa nten canꞌ: A jlyo tinꞌ ñi chaꞌ nchcuiꞌ um.
\v 71 Xa mdoꞌo ton yu tunaꞌan lyiyaꞌ, canꞌ mdoꞌo ycuiꞌ xca neꞌ cunaꞌan nguso, loꞌ nchcuiꞌ neꞌ: Loꞌo yu re ndaꞌan yu loꞌo Jesús Nazaret.
\v 72 Una yu Tyo canꞌ hasta mꞌnin tyiꞌya yu ꞌin Ndiose, loꞌ mxcuen yu ꞌin neꞌ: A ndyuꞌhui lyoon ꞌin yu cua.
\v 73 Cuiꞌ xaa ti mdiyaa xca nu juin ꞌin yu Tyo: Yu re nu chaꞌ ñi ca taꞌa ndaꞌan yu cua, siꞌyana tiꞌ chaꞌ nchcuiꞌ ti chcanꞌ ñaꞌan na.
\v 74 Xacanꞌ mdyisnan msuꞌhua yu Tyo sca chaꞌ chonꞌ yu, loꞌ hasta mꞌni tyiꞌya yu ꞌin Ndiose, loꞌ juin yu: A ndyuꞌhui lyoon ꞌin yu cua. Cuiꞌ xaa canꞌ msiꞌya sca latyee.
\v 75 La xacanꞌ nguia yuꞌhui tiꞌ yu Tyo chaꞌ nu ycuiꞌ Jesús loꞌo yu xa nu juin ñi: Tiꞌ lyijyi xiꞌya latyee, loꞌ snan yaꞌ ljuin siꞌyana a ndyuꞌhui lyoo ꞌñan. Xacanꞌ mdoꞌo yu nde lyiyaꞌ, nguꞌya tuꞌhua tiquee yu loꞌ ynan yu. 
\c 27
\s Ya loꞌo neꞌ ꞌin Jesús tloo yu Pilato
\p
\v 1 Nguꞌya ti xaa canꞌ, nchgaa yu nu ndlo ca tñan niꞌ lyaa tsatlyu loꞌo quiꞌyu cula, mꞌni cuiyaꞌ neꞌ chaꞌ ñaꞌan ntsuꞌhui chaꞌ cujui neꞌ ꞌin Jesús.
\v 2 Nchcanꞌ ñi mdyaa neꞌ cunta ꞌin ñi yaaꞌ yu Pilato, nu lca gubierno.
\s Xa ngujui yu Juda
\p
\v 3 Yu Juda nu mdyaa ꞌin ñi, xa naꞌan yu siꞌyana cuaꞌ ncua cuiyaꞌ chaꞌ siꞌyana caja ñi, tiꞌi ꞌa ngaꞌan ꞌin yu. Cuiꞌ xaa nguia loꞌo yu cla tyii tñi plata canꞌ, loꞌ mdiyaa yu tloo yu nu ndlo ca tñan niꞌ lyaa loꞌo quiꞌyu cula canꞌ,
\v 4 loꞌ juin yu ꞌin neꞌ: Nanꞌ nducuin quiꞌya siꞌyana mdyaan sca nu ñi ndiꞌin chaꞌ ꞌin. Mxcuen neꞌ ꞌin yu: ¿Ñi chaꞌ ndyuhue tiꞌ huareꞌ chaꞌ canꞌ? Quinu cunta ꞌin.
\v 5 Xacanꞌ nguun yu tñi canꞌ la niꞌ lyaa, mdoꞌo yu nguiaa yu loꞌ msuꞌhua yu sca canꞌ yni yu.
\v 6 Nchgaa yu nu ndlo ca tñan niꞌ lyaa canꞌ, msñi yu tñi canꞌ loꞌ juin yu: A tsuꞌhue quinu tñi re niꞌ lyaa, siꞌyana cuiꞌ na yuꞌhui lyiyaꞌ na tne nten.
\v 7 Xa cuaꞌ mꞌni cuiyaꞌ neꞌ chaꞌ, msiꞌi neꞌ sca yuu ꞌin sca nu ntñan quitonꞌ, siꞌyana canꞌ quitsiꞌ nten nu ndaꞌan ti.
\v 8 Canꞌ chaꞌ hasta cuaꞌ ñii ndloꞌo naan neꞌ seꞌen canꞌ: Yuu nu yuꞌhui lyiyaꞌ loꞌo tne nten.
\v 9 Cuañaꞌan mducua chaꞌ nu mxiycuiꞌ Ndiose ꞌin Jeremía xa juin yu: —Ta nten ꞌin neꞌ Israel, loꞌo cla tyii tñi plata msuꞌhua lyiyaꞌ neꞌ tne ñi nu taꞌa lati ꞌñan, tsañaꞌan cuiyaꞌ nu cuaꞌ mdiꞌin tyaa neꞌ.
\v 10 Loꞌo tñi canꞌ msiꞌi neꞌ sca yuu ꞌin sca nu ntñan quitonꞌ, tsañaꞌan nu ngulo Ñi Xꞌnan na tñan ꞌñan—.
\s Ncua cuiyaꞌ chaꞌ ꞌin Jesús tloo yu Pilato
\p
\v 11 Loꞌ Jesús ndon ñi tloo yu Pilato, loꞌ mñichaꞌ yu ꞌin ñi: ¿Ta cuiꞌ lca Ree ꞌin neꞌ judio? Jesús mxcuen ñi ꞌin yu: ꞌUn nchcuiꞌ um cuañaꞌan.
\v 12 Lja xacanꞌ msuꞌhua neꞌ quiꞌya ꞌin ñi, yu nu ndlo ca tñan niꞌ lyaa canꞌ loꞌo quiꞌyu cula, una ñi sca chaꞌ loꞌ a mxcuen ñi.
\v 13 Xacanꞌ juin yu Pilato ꞌin ñi: ¿Ta na a ne ꞌin, tsala ñaꞌan nsuꞌhua neꞌ quiꞌya ꞌin?
\v 14 Siyaꞌ cuañaꞌan, a mxcuen Jesús ñi sca chaꞌ, canꞌ chaꞌ nde lyee lati yuhue tiꞌ yu Pilato ꞌin ñi.
\s Mdyaa yu Pilato cunta siꞌyana cujui neꞌ ꞌin Jesús
\p
\v 15 Ndeñaꞌan ntsuꞌhui sca chaꞌ ꞌin gubierno nchgaa yjan xa nchca Pascua, ndlaa yu sca preso, ñaꞌan nu ti nu jñan nten quichen chaꞌ lyaa.
\v 16 Cuiꞌ lja xacanꞌ ntsuꞌhui sca yu preso nu nducunꞌ lati naan Barrabás.
\v 17 Yu Pilato mñichaꞌ yu ꞌin nten nu nguioꞌ tiꞌin tloo yu: ¿Ti ñaꞌan chcuaa yu re nchca tiꞌ um culaan, ta Barrabás, uta ꞌin Jesús nu nchcuiꞌ neꞌ lca Cristo?
\v 18 Juin yu cuañaꞌan siꞌyana jlyo tiꞌ yu siꞌya chaꞌ njñan tiꞌ mdyaa neꞌ ꞌin Jesús tuyaaꞌ yu.
\v 19 Lja nducua yu seꞌen nchca cuiyaꞌ chaꞌ, xa nguaꞌan tñan neꞌ cunaꞌan ꞌin yu sca suun ꞌin yu, loꞌ nchcuiꞌ neꞌ: A nchca chaꞌ ca taꞌa loꞌo um nten cua, siꞌyana a sca quiꞌya nducui yu cua, a cunta tla re ñii lyee msuꞌhuan chaꞌ tiqueen siꞌya chaꞌ nu ycuinꞌ slan.
\v 20 Una yu nu ndlo ca tñan niꞌ lyaa tsatlyu loꞌo quiꞌyu cula, nde lyee la mxicuꞌni neꞌ ꞌin nten quiꞌan canꞌ siꞌyana jñan neꞌ chaꞌ lyaa Barrabás, loꞌ cujui neꞌ ꞌin Jesús.
\v 21 Mxcuen yu Pilato ꞌin nten canꞌ: ¿Ti ñaꞌan ta chcuaa yu re nchca tiꞌ um culaan? Mxcuen neꞌ: ꞌIn Barrabás.
\v 22 Mñichaꞌ yu Pilato ꞌin neꞌ: ¿Ñaꞌan ta nchca tiꞌ um cuꞌnin loꞌo Jesús, nu nchcuiꞌ neꞌ lca Cristo? Tsatlyu ycuiꞌ neꞌ: ¡Jyiꞌin caꞌan um ꞌin yu loo cusi!
\v 23 Yu Pilato canꞌ juin yu: ¿Una ñi quiꞌya ta mꞌni yu? Nde lyee la ycuiꞌ cueen neꞌ: ¡Jyiꞌin caꞌan um ꞌin yu loo cusi!
\v 24 Xa naꞌan yu Pilato siꞌyana a ncua ꞌa chcui ndijin yu loꞌo chaꞌ canꞌ, cuiꞌ ca nu nde lyee la nguilo tiꞌin nten canꞌ, canꞌ chaꞌ mjñan yu tyiꞌa mjyiꞌan yu yaaꞌ yu tloo nchgaa nten canꞌ, loꞌ juin yu: Siꞌi cunta ꞌñan chaꞌ caja yu nu ñi ndiꞌin chaꞌ ꞌin re, quinu cunta ꞌin um.
\v 25 Xacanꞌ mxcuen ñaꞌaan quichen neꞌ: A ꞌni chaꞌ siyaꞌ chonꞌ hua, uta chonꞌ sñeꞌ hua tsaa chaꞌ re siꞌya tne yu.
\v 26 Xacanꞌ ngulaa yu Pilato ꞌin Barrabás, loꞌ ngulo yu tñan siꞌyana quiꞌni Jesús. Mdyaa yu cunta ꞌin ñi tuyaaꞌ sindatu siꞌyana jyiꞌin caꞌan yu ꞌin ñi loo cusi.
\v 27 Xacanꞌ ya loꞌo yu sindatu ꞌin Jesús tunaꞌan tñan ꞌin yu, loꞌ mxoꞌ tiꞌin taꞌa yu seꞌen ndon ñi,
\v 28 ngulyoo yu steꞌ ñi loꞌ mxicoꞌ yu sca teꞌ ngaꞌá ꞌin ñi.
\v 29 Xacanꞌ mdiꞌin tyaa yu sca sniꞌ quicheꞌ que ñi, loꞌ msuꞌhua yu sca yca yaaꞌ ñi tsoꞌ cueen, mdyiꞌya xtyinꞌ yu tloo ñi loꞌ mstyi lyiꞌo yu ꞌin ñi loꞌ nchcuiꞌ yu: ¡Nchcuiꞌ chaꞌ hua ꞌin um, ꞌun ñi nu lca Ree ꞌin neꞌ judio!
\v 30 Xacanꞌ msuꞌhua siyeꞌ yu tloo ñi, ticuiꞌ yca nducua yaaꞌ ñi msñi yu loꞌ mjyiꞌin yu que ñi.
\v 31 Ngulyoo yu teꞌ ngaꞌá nu lcoꞌ ñi, loꞌ mxicoꞌ yu ꞌin ñi loꞌo steꞌ ca ñi, loꞌ ya loꞌo yu ꞌin ñi seꞌen chaꞌan ñi loo cusi.
\s Xa ngujui Jesús loo cusi
\p
\v 32 Tucueen seꞌen nguia loꞌo yu sindatu ꞌin Jesús, mchcua taꞌa yu loꞌo sca yu Cirene nu naan Simón, loꞌ mxicuꞌni yu ꞌin siꞌyana cuiꞌya cusi canꞌ.
\v 33 Xacanꞌ mdiya loꞌo yu sindatu ꞌin ñi sca seꞌen naan Gólgota, chaꞌ re nchca tiꞌ chcuiꞌ, que jyiꞌo.
\v 34 Mdaa yu vino coꞌo Jesús nu mxitiyaꞌ loꞌo sca na nu lyee tlyaaꞌ, una xa cuaꞌ yiꞌo caꞌan ñi ꞌin na, a mslyaa ꞌa ñi coꞌo ñi ꞌin na.
\v 35 Xa cuaꞌ mjyiꞌin caꞌan yu sindatu canꞌ ꞌin ñi loo cusi, xacanꞌ ngulo yu xuꞌhue yu loꞌo steꞌ ñi, chaꞌ ñaꞌan quiꞌni caꞌan na ꞌin yu cunda scaa yu, siꞌyana tsa tucua chaꞌ nu mxiycuiꞌ Ndiose ꞌin nguso ꞌin ñi cuaꞌ sꞌni, xa juin yu: —Mtsa yu stenꞌ, a cunta ngulo yu xuꞌhue yu loꞌo na—.
\v 36 Canꞌ nducua yu loꞌ ntsuꞌhui yu cuan ꞌin ñi.
\v 37 Que cusi canꞌ nguaꞌan yu sca chaꞌ loꞌo quiꞌya nu msuꞌhua neꞌ ꞌin ñi, loꞌ nchcuiꞌ na: Nde Jesús nu lca Ree ꞌin neꞌ judio.
\v 38 A cunta loꞌo tucua yu cunan mjyiꞌin caꞌan yu sindatu ꞌin loo cusi, sca yu tsoꞌ cueen ꞌin ñi, loꞌ xca yu tsoꞌ ca.
\v 39 Nten nu ndijin cuiꞌ ti canꞌ nchcuiꞌ caꞌan neꞌ ꞌin ñi, loꞌ hasta nxiquiñan neꞌ que neꞌ,
\v 40 loꞌ nchcuiꞌ neꞌ: ¿Ta siꞌi nuꞌhuin juin siꞌyana xicuten laa nducua re, loꞌ tsaniꞌ snan ti tsaan xiton ꞌin na xiyaꞌ? ¡Lyo laa ꞌin ticuiiꞌ! Chaꞌ cuiꞌ lca Sñeꞌ Ndiose, quiꞌya loo cusi cua.
\v 41 Yu nu ndlo ca tñan niꞌ lyaa tsatlyu loꞌo neꞌ escriba, neꞌ fariseo loꞌo quiꞌyu cula, ticuiꞌ cuañaꞌan nchcuiꞌ caꞌan neꞌ ꞌin ñi loꞌ nchcuiꞌ neꞌ:
\v 42 Yu re xca tucui ngulo laa yu, una a nchca culo laa yu ꞌin yu. Chaꞌ na cuiꞌ yu lca yu Ree ꞌin neꞌ Israel, tca quiꞌya yu loo cusi, loꞌ tsa quiꞌan tiꞌ na ꞌin yu.
\v 43 ¿—Ta siꞌi ꞌin Ndiose mdiꞌin tyaa yu quiloo yu? Cuiꞌ ñi tca culo laa ñi ꞌin yu chaꞌ na nꞌni ñi ꞌtnan ꞌin yu—, siꞌyana cuiꞌ yu juin yu: Nanꞌ lcan Sñeꞌ Ndiose.
\v 44 Ticuiꞌ cuañaꞌan yu nu taꞌa ngaꞌan ñi loo cusi nchcuiꞌ caꞌan ꞌin ñi.
\v 45 Xa mdiyaa ndyiꞌya cuaan, nguꞌya tla yta ñaꞌaan seꞌen canꞌ tsayaꞌ mdiyaa braa cuaꞌ snan siin.
\v 46 Chcua braa cuaꞌ snan siin canꞌ ycuiꞌ cueen Jesús: —Elí, Elí, ¿lama sabactani—? Chaꞌ re nchca tiꞌ chcuiꞌ: —Ndiose ꞌñan, Ndiose ꞌñan, ¿ñi chaꞌ ta ngula yaaꞌ um ꞌñan—?
\v 47 Ntsuꞌhui nu ngune ꞌin chaꞌ nu ycuiꞌ ñi, loꞌ nchcuiꞌ neꞌ: Yu re nsiꞌya yu ꞌin nu ncua naan Elía.
\v 48 Cuiꞌ ñaꞌan lcaa mdoꞌo sca yu nu nguia ꞌya sca teꞌ, loꞌ mchaꞌ yu ꞌin na loꞌo tyiꞌa vinagre, loꞌ mscuen yu ꞌin na sca tucoꞌ yca siꞌyana xoꞌ yiꞌo ñi ꞌin na.
\v 49 Loꞌ juin nchgaa la ñaꞌan yu canꞌ: Quita na ñaꞌan na chaꞌ caan Elía, loꞌ culo laa ꞌin yu.
\v 50 Una Jesús xiyaꞌ msiꞌya cueen ñi, cuiꞌ ñaꞌan lcaa mdoꞌo cusya ꞌin ñi.
\v 51 Cuiꞌ xacanꞌ teꞌ tlyu nu nducui niꞌ lyaa canꞌ, mdaꞌ tluꞌhue la na, tiꞌ ndyiꞌo la cuaan tsayaꞌ nguꞌya la lyuu, loꞌ juesa nu nguñan canꞌ hasta loꞌo quee nguita na.
\v 52 Hasta loꞌo tucuaa nguila tucua na, loꞌ quiꞌan jun nu cuaꞌ ya quiꞌan tiꞌ ꞌin Ndiose mdyiquiꞌo xacanꞌ,
\v 53 mdyiꞌo jun niꞌ cuaa canꞌ xa cuaꞌ mdyiquiꞌo Jesús, xacanꞌ yten jun loo quichen Jerusalén, loꞌ quiꞌan nten naꞌan tloo ꞌin jun.
\v 54 Yu nu lca que ꞌin sindatu ntsuꞌhui yu cuan ꞌin Jesús loꞌo nchgaa la ñaꞌan taꞌa ndiꞌin yu canꞌ, xa naꞌan yu mdyisnan nguñan, a cunta loꞌo nchgaa chaꞌ nu yatoꞌo, lyee ytsen yu, loꞌ nchcuiꞌ yu: Nu chaꞌ ñi ca siꞌyana yu re ncua yu Sñeꞌ Ndiose.
\v 55 A cunta tyun jun cunaꞌan ndon tijyoꞌ ti, nguiꞌni quii jun, cuiꞌ nu nguiꞌni cunta ꞌin Jesús tiꞌ la seꞌen lca Galilea,
\v 56 lja canꞌ ndon María Magdalena, loꞌo María jyiꞌan Jacobo loꞌo yu See, a cunta loꞌo jyiꞌan sñeꞌ Zebedeo.
\s Xa mtsiꞌ Jesús
\p
\v 57 Xa cuaꞌ msiin tsaan canꞌ mdiyaa sca yu cuilyiyaꞌ naan See nu mdoꞌo Arimatea, loꞌo yu cuaꞌ ntsuꞌhui yu chaꞌ ꞌin Jesús.
\v 58 Ya jñan yu chaꞌ cuiyaꞌ ꞌin Pilato siꞌyana cutsiꞌ yu ꞌin Jesús. Xacanꞌ ngulo yu tñan ꞌin sindatu ꞌin yu siꞌyana chcuan yu See canꞌ cunta ꞌin Jesús.
\v 59 Yu See canꞌ mdyiꞌya yu ꞌin ñi loꞌ nguxen yu sca teꞌ nu luhui ꞌin ñi,
\v 60 loꞌ mdiꞌin tyaa yu ꞌin ñi sca niꞌ tuquee nu tca nguiaaꞌ, xacanꞌ mducun yu tucuaa canꞌ loꞌo sca quee nu tlyu, loꞌ mdoꞌo yu nguiaa yu.
\v 61 Cuiꞌ ti tucuaa canꞌ ndon María Magdalena loꞌo xca María.
\s Yuꞌhui yu cuan seꞌen mtsiꞌ Jesús
\p
\v 62 Xca tsaan canꞌ, cuiꞌ tsaan nu nxitñanꞌ neꞌ judio, nchgaa yu nu ndlo ca tñan niꞌ lyaa, loꞌo neꞌ fariseo mdiyaa neꞌ tloo yu Pilato,
\v 63 loꞌ juin neꞌ: ꞌUn nu lca xꞌnan hua, nguia yuꞌhui tiꞌ hua sca chaꞌ nu ycuiꞌ yu cuiñi canꞌ xa tiꞌ loꞌo yu, loꞌ juin yu siꞌyana taꞌa snan tsaan tyiquiꞌo yu.
\v 64 Canꞌ chaꞌ cuaꞌ ñii jñan hua sca chaꞌ tsuꞌhue ꞌin um, caꞌan tñan um ꞌin yu nu chuꞌhui cuan tucuaa canꞌ tsaniꞌ snan tsaan, ñaꞌan tuꞌ tla tsaa taꞌa mdaꞌan yu loꞌ culyoo ꞌin yu, loꞌ tyisnan chcuiꞌ loꞌo nten siꞌyana cuaꞌ mdyiquiꞌo yu, loꞌ hasta lyee la tsa quiꞌan tiꞌ neꞌ chaꞌ cuiñi re ꞌin yu que ñaꞌan tiꞌ culoo.
\v 65 Mxcuen yu Pilato ꞌin neꞌ: Una ndiꞌin silyiya ꞌin um, tca suꞌhua um ꞌin canꞌ tsaa loꞌ chuꞌhui cuan tucuaa canꞌ, tsañaꞌan nu tca ꞌin um.
\v 66 Xacanꞌ yaa neꞌ tucuaa canꞌ loꞌ mducun tsuꞌhue la neꞌ ꞌin na, hasta mjyiꞌin caꞌan neꞌ sca cuiyaꞌ ꞌin na, canꞌ mxnu tucua neꞌ ꞌin yu nu chuꞌhui cuan ꞌin na. 
\c 28
\s Xa mdyiquiꞌo Jesús
\p
\v 1 Xa mdijin tsaan nu nxitñanꞌ neꞌ judio, tlya ti culoo tsaan ꞌin snan canꞌ, loꞌ María Magdalena loꞌo xca María mdiyaa jun tucuaa canꞌ.
\v 2 Xacanꞌ lyee nguñan siꞌyana sca angujle ꞌin Ñi Xꞌnan na mdoꞌo la niꞌ cuaan, loꞌ ngulo ntan quee nu nchcun tucuaa canꞌ, loꞌ canꞌ yten tucua.
\v 3 Tsuꞌhue ñaꞌan tloo tsañaꞌan nchca tiꞌ xa ndyuhui, tsuꞌhue ñaꞌan mten steꞌ tsañaꞌan nchca tiꞌ coo.
\v 4 Yu nu ntsuꞌhui cuan canꞌ lyee ytsen yu, loꞌ mdyisnan mchcuan yu xa naꞌan yu ꞌin angujle canꞌ, mdlyu yu loꞌ msti yu tsañaꞌan nchca tiꞌ sca yu ngujui.
\v 5 Una angujle juin ꞌin jun cunaꞌan canꞌ: A cutsen um, jlyo tinꞌ siꞌyana ndaꞌan nan um ꞌin Jesús, ñi nu nguaꞌan loo cusi,
\v 6 una a ntsuꞌhui ꞌa ñi re, siꞌyana cuaꞌ mdyiquiꞌo ñi ñaꞌan nu cuaꞌ juin ñi. Quiaan um loꞌ cuꞌni quii um seꞌen nu mdiꞌin tyaa neꞌ ꞌin Ñi Xꞌnan na.
\v 7 Ndla ti xitucui um loꞌ quia ytsaꞌ um ꞌin yu taꞌa mdaꞌan ñi siꞌyana cuaꞌ mdyiquiꞌo ñi, a cunta culo nducua la tsaa ñi seꞌen lca Galilea, loꞌ canꞌ ñaꞌan um ꞌin ñi. Cuaꞌ ñii ngune ꞌin um chaꞌ re.
\v 8 Xacanꞌ mdoꞌo jun tucuaa canꞌ, nguitsen jun loꞌ tsacua ñaꞌan tsuꞌhue ntsuꞌhui tiquee jun, ndla ndsa ti nguia ytsaꞌ jun ꞌin yu taꞌa mdaꞌan ñi chaꞌ nu naꞌan jun.
\v 9 Tucueen nguiaa jun canꞌ tsa nduꞌhui nguloꞌo tloo Jesús ꞌin jun, loꞌ ycuiꞌ chaꞌ ñi ꞌin jun, cuiꞌ xaa mdyiꞌya xtyinꞌ jun tloo ñi, msuꞌhua tuscun jun quiyaꞌ ñi, loꞌ mꞌni tnu jun ꞌin ñi.
\v 10 Xacanꞌ juin Jesús ꞌin jun: A cutsen um, xitucui um loꞌ taa um suun loꞌo nchgaa yu taꞌan siꞌyana tsaa yu seꞌen lca Galilea, la cua ñaꞌan taꞌa hua loꞌo yu.
\s Chaꞌ ꞌin silyiya nu yuꞌhui cuan
\p
\v 11 Lja nguiaa jun cunaꞌan canꞌ, mdoꞌo yu silyiya canꞌ nguiaa yu nde loo quichen, loꞌ mtsaꞌ yu ꞌin yu nu ndlo ca tñan niꞌ lyaa nchgaa chaꞌ nu yatoꞌo.
\v 12 Mxoꞌ tiꞌin taꞌa neꞌ loꞌo quiꞌyu cula, loꞌ mꞌni cuiyaꞌ neꞌ chaꞌ siꞌyana suꞌhua lyiyaꞌ neꞌ quiꞌan tñi ꞌin yu silyiya canꞌ,
\v 13 loꞌ nchcuiꞌ neꞌ loꞌo yu: Nde chaꞌ nu chcuiꞌ um loꞌo nten: Yu taꞌa mdaꞌan yu cua, yaa yu tla loꞌ ngulyoo yu ꞌin nu ngujui canꞌ lja nguꞌya sla hua.
\v 14 Siyaꞌ gubierno cunan chaꞌ re, una huareꞌ cunan hua ñaꞌan nu chcuiꞌ hua loꞌo yu, loꞌ a sca chaꞌ chen nchcui ꞌin um.
\v 15 Yu silyiya canꞌ msñi yu tñi canꞌ, ncua jaꞌan yu nchgaa chaꞌ nu ycuiꞌ neꞌ loꞌo yu, cuañaꞌan yatoꞌo mxicune neꞌ chaꞌ re lja neꞌ judio hasta cuaꞌ ñii.
\s Mxnu Jesús tñan ꞌin yu taꞌa mdaꞌan ñi
\p
\v 16 Cha tixca yu taꞌa mdaꞌan ñi mdoꞌo yu nguiaa yu seꞌen lca Galilea, mdiyaa yu loo quiꞌya seꞌen mxnu Jesús chaꞌ tsaa yu.
\v 17 Xa naꞌan yu ꞌin ñi mꞌni tnu yu ꞌin ñi, una ntsuꞌhui nu mꞌni tucua tiꞌ loꞌo ñi.
\v 18 Xacanꞌ mdiyaa Jesús cuiꞌ la canꞌ, loꞌ juin ñi ꞌin yu: Nchgaa chaꞌ cuiyaꞌ cuaꞌ jui ꞌñan la niꞌ cuaan loꞌo loo chendyu re.
\v 19 Canꞌ chaꞌ yaa um sca chcui chendyu loꞌ cunan um nu cuꞌni chaꞌan chaꞌ re, tucua tya um ꞌin canꞌ loꞌo chaꞌ cuiyaꞌ ꞌin Stina Ndiose, loꞌo Sñeꞌ ñi, loꞌo Espíritu nu Luhui ꞌin ñi,
\v 20 loꞌ culoꞌo um ꞌin canꞌ siꞌyana xuꞌhua seꞌen nchgaa chaꞌ nu cuaꞌ ycuinꞌ loꞌo um. Ñaꞌan jan ñi, nanꞌ ndiꞌin loꞌo um nchgaa xaa tsayaꞌ nu tsatii chaꞌ nu nchca loo chendyu re. Amen.