\id MRK - Nopala (Chatino) NT [cya] - Mexico 2013 (web 2014)
\h MARCOS
\toc1 Marcos
\toc2 Marcos
\toc3 Mr
\mt1 Marcos
\c 1
\s Chaꞌ ꞌin yu Xuhua nu mducua tya ꞌin nten
\p
\v 1 Ndeñaꞌan mdyisnan suun chaꞌ tsuꞌhue ꞌin Jesucristo, Sñeꞌ Ndiose,
\v 2 tsañaꞌan nchcuiꞌ quityi nu nguaꞌan scua yu Isaía, yu nu mxiycuiꞌ Ndiose ꞌin cuaꞌ sꞌni: —Ñaꞌan jan ñi, nde caꞌan tñan sca yu chcua loo siꞌyana cuꞌni chuꞌhue yu tucueen nu caan.
\v 3 Tyiꞌan yu seꞌen ngutyi loꞌ chcuiꞌ cueen yu: Cuꞌni chuꞌhue um tucueen seꞌen caan Ñi Xꞌnan na, loꞌ cuꞌni ñi um tucueen nu ntsuꞌhui chaꞌ tyijyin ñi—.
\v 4 Yatoꞌo yu Xuhua mdaꞌan ycuiꞌ yu sca seꞌen ngutyi, nguloꞌo yu ꞌin neꞌ siꞌyana xiloꞌo chonꞌ neꞌ quiꞌya ꞌin neꞌ loꞌ chcua tya neꞌ, ñaꞌan ca siꞌyana cuꞌni Ndiose chaꞌ tlyu tiꞌ ꞌin neꞌ.
\v 5 Quiꞌan ꞌa neꞌ Jerusalén loꞌo nchgaa la ñaꞌan quichen ndiꞌin seꞌen lyiꞌya loo Judea, ndyiꞌan neꞌ seꞌen nchcuiꞌ yu Xuhua canꞌ, ñee neꞌ quiꞌya ꞌin neꞌ loꞌ mducua tya yu ꞌin neꞌ chco tlyu Jordan.
\v 6 Teꞌ nu nchcoꞌ yu Xuhua canꞌ nguiaaꞌ na loꞌo quichanꞌ camello, loꞌo sca quijyin nchcanꞌ na siiꞌ yu. Scua nu nchcu yu lca ꞌin scoꞌ, loꞌ ndyiꞌyo yu cuiñanꞌ nu ntsuꞌhui niꞌ quixinꞌ.
\v 7 Ndeñaꞌan nchcuiꞌ yu loꞌo nten canꞌ: Nde loo la re ntsuꞌhui chaꞌ caan ñi nu tla la chaꞌ ꞌin que ꞌñan nanꞌ. Tsuꞌhue ꞌa ntsuꞌhui tiqueen chaꞌ cua na tca xtinꞌ siyaꞌ tisnan ti ñi.
\v 8 Nanꞌ nu chaꞌ ñi loꞌo tyiꞌa ti nducuan tyan ꞌin um, una cuiꞌ ñi caꞌan tñan ñi Espíritu nu Luhui ꞌin Ndiose chuꞌhui niꞌ cusya ꞌin um.
\s Xa mducua tya Jesús
\p
\v 9 Yatoꞌo sca tsaan mdoꞌo Jesús quichen Nazaret seꞌen lyiꞌya loo Galilea, mdiyaa ñi seꞌen ndon yu Xuhua chco tlyu Jordan, loꞌ mducua tya yu ꞌin ñi.
\v 10 Xa cuaꞌ tyiꞌo Jesús loo tyiꞌa canꞌ, naꞌan ñi nguila tucua niꞌ cuaan, nguiaan Espíritu ꞌin Ndiose seꞌen ndon ñi, nguꞌya tucua que ñi tsañaꞌan nchca tiꞌ ndyiꞌya tucua sca scunꞌ joꞌo.
\v 11 Ngune ycuiꞌ sca nu ycuiꞌ la niꞌ cuaan: Nuꞌhuin lca Sñenꞌ nanꞌ nu taꞌa lati ꞌñan, tsuꞌhue ꞌa ntsuꞌhui tiqueen loꞌo.
\s Ncua tiꞌ laxaꞌan xityu ꞌin Jesús loo quiꞌya
\p
\v 12 Cuiꞌ xaa ti canꞌ mꞌni Espíritu chaꞌ yaa Jesús sca seꞌen ngutyi.
\v 13 Canꞌ yuꞌhui lyijyi ñi tsaniꞌ tucua yla tsaan, a cunta canꞌ ntsuꞌhui ꞌni la. Chcui lja xacanꞌ ncua tiꞌ laxaꞌan xityu ꞌin ñi loo quiꞌya, una angujle ꞌin Ndiose mda yaaꞌ ꞌin ñi.
\s Jesús mdyisnan mꞌni ñi tñan ꞌin Ndiose
\p
\v 14 Xa cuaꞌ ntsuꞌhui yu Xuhua naꞌan chcuan, mdoꞌo Jesús nguiaa ñi seꞌen lca Galilea, canꞌ mdyisnan ycuiꞌ ñi chaꞌ tsuꞌhue ꞌin Ndiose,
\v 15 loꞌ nchcuiꞌ ñi: Cuaꞌ mdiyaa xaa tyisnan culo Ndiose tñan ꞌin um. Xiloꞌo chonꞌ um quiꞌya nguiꞌni um loꞌ tsa quiꞌan tiꞌ um chaꞌ tsuꞌhue ꞌin ñi.
\s Msiꞌya Jesús ꞌin jacua yu cuta cula
\p
\v 16 Yatoꞌo mdijin Jesús tuꞌhua tiyoꞌ Galilea, canꞌ naꞌan ñi ꞌin yu Tyo loꞌo yu Ndre taꞌa ngula yu, nduguun yu quitan loo tyiꞌa canꞌ siꞌyana yu cuta cula lca yu.
\v 17 Loꞌ juin Jesús ꞌin yu: Chcui nchaꞌan um ꞌñan, loꞌ nanꞌ culoꞌon ꞌin um cuꞌni um cuta, tyicana ꞌin nten.
\v 18 Cuiꞌ xaa ti canꞌ ngulaꞌ sti yu quitan ꞌin yu loꞌ mducui nchaꞌan yu ꞌin ñi.
\v 19 Chinꞌ ti seꞌen tiꞌ mdaꞌan ñi, naꞌan ñi ꞌin yu Jacobo loꞌo yu Xuhua taꞌa ngula yu, sñeꞌ Zebedeo, nguiꞌni chuꞌhue yu quitan ꞌin yu niꞌ yca naꞌan canꞌ.
\v 20 Cuiꞌ xaa canꞌ msiꞌya ñi ꞌin yu, loꞌ ngulaꞌ ton yu ꞌin Zebedeo sti yu loꞌo nguso ꞌin yu niꞌ yca naꞌan canꞌ, loꞌ mducui nchaꞌan yu ꞌin ñi.
\s Mchca sca yu ntsuꞌhui cuiꞌin xaꞌan ꞌin
\p
\v 21 Xacanꞌ mdiyaa jun quichen Capernaum, loꞌ tsaan nu nxitñanꞌ neꞌ judio yten Jesús seꞌen nꞌni tnu neꞌ ꞌin Ndiose, loꞌ nguloꞌo ñi ꞌin neꞌ.
\v 22 Lyee ꞌa yuhue tiꞌ neꞌ ꞌin ñi siꞌyana ndloꞌo ñi ñaꞌan nchca tiꞌ sca nu ntsuꞌhui chaꞌ cuiyaꞌ ꞌin, loꞌ siꞌi ñaꞌan ndloꞌo neꞌ escriba.
\v 23 Lja canꞌ nguilyu sca yu nu ntsuꞌhui cuiꞌin xaꞌan ꞌin, loꞌ ycuiꞌ cueen yu:
\v 24 Jesús Nazaret, ¿ñi na nchca tiꞌ loꞌo hua? ¿Ta na ljyaan siꞌyana cujlyo ꞌin hua? Nanꞌ ndyuꞌhuin lyoon ti ca lca, nuꞌhuin lca ycuiꞌ ca nu mdoꞌo hui ꞌin Ndiose.
\v 25 Una Jesús ngusun loꞌo ꞌin cuiꞌin xaꞌan canꞌ, loꞌ juin ñi: Seen tyiꞌin, lyaꞌ ton ꞌin yu re.
\v 26 Cuiꞌin xaꞌan canꞌ mscuin tiꞌin na ꞌin yu xiyaꞌ ti, cuiꞌ ñaꞌan lcaa msiꞌya yja cueen yu xa mdyiꞌo na ꞌin yu.
\v 27 Nchgaa neꞌ yuhue tiꞌ neꞌ, mñichaꞌ taꞌa neꞌ loꞌ nchcuiꞌ neꞌ: ¿Ñi chaꞌ ta lca chaꞌ re? Chacuiꞌ chaꞌ nu cui ti ndloꞌo yu, hasta loꞌo cuiꞌin xaꞌan ndlo yu tñan ꞌin, loꞌ nchca jaꞌan ꞌin yu.
\v 28 Ndla ndsa ti canꞌ mdoꞌo yne chaꞌ ꞌin ñi sca chcui seꞌen lca Galilea.
\s Mꞌni chca Jesús ꞌin jyiꞌan laa yu Tyo
\p
\v 29 Ñaꞌaan mdyiꞌo Jesús seꞌen ndiyoꞌ tiꞌin neꞌ canꞌ, nguiaa ñi loꞌo yu Jacobo loꞌo yu Xuhua, loꞌ mdiyaa jun seꞌen nducua naꞌan ꞌin yu Tyo loꞌo yu Ndre.
\v 30 Cuiꞌ xaa jui nu mtsaꞌ ꞌin ñi siꞌyana jyiꞌan laa yu Tyo nscua tiꞌi loꞌo tiqueꞌ.
\v 31 Xacanꞌ yaa ñi seꞌen nscua neꞌ, msñi ñi yaaꞌ neꞌ loꞌ mxitucui ñi ꞌin neꞌ. Cuiꞌ xaa mdyiꞌo tiqueꞌ canꞌ ꞌin neꞌ, loꞌ mdyisnan mꞌni cunta neꞌ ꞌin jun.
\s Mꞌni chca Jesús quiꞌan nu tiꞌi xa nguꞌya tla
\p
\v 32 Xa cuaꞌ nguiaa cucha, mdiya loꞌo neꞌ nchgaa nu tiꞌi loꞌo nu ntsuꞌhui cuiꞌin xaꞌan ꞌin seꞌen ndon Jesús,
\v 33 ñaꞌaan quichen neꞌ nguioꞌ tiꞌin neꞌ tuꞌhua tunaꞌan canꞌ.
\v 34 Jesús mꞌni chca ñi ꞌin quiꞌan nu tiꞌi loꞌo cuati loo quicha nu ntsuꞌhui ꞌin neꞌ, ngulo ñi cuiꞌin xaꞌan nu ntsuꞌhui ꞌin neꞌ, loꞌ a mdaa ñi chaꞌ cuiyaꞌ tiꞌ chcuiꞌ cuiꞌin xaꞌan canꞌ siꞌyana jlyo tiꞌ canꞌ tucui ca lca ñi.
\s Mdaꞌan ycuiꞌ Jesús chaꞌ tsuꞌhue ꞌin Ndiose
\p
\v 35 Xa nde cuaꞌ ljyaan xaa, mdoꞌo Jesús nguiaa ñi nde tuꞌhua quichen scati ñi, canꞌ nchcuiꞌ lyiꞌo ñi ꞌin Ndiose.
\v 36 Yu Tyo loꞌo nchgaa la taꞌa ndaꞌan yu, mdoꞌo yu nguia nan yu ꞌin ñi.
\v 37 Xa nguija lyoo ñi ꞌin yu, xacanꞌ juin yu: Quiꞌan ꞌa nten ndaꞌan nan ꞌin um.
\v 38 Loꞌ juin ñi ꞌin yu: Tsaa na scasca la quichen nu ndiꞌin cuiꞌ ti re, loꞌ chcuinꞌ chaꞌ tsuꞌhue ꞌin Ndiose, siꞌyana canꞌ tñan ljyaan.
\v 39 Ñaꞌaan seꞌen lyiꞌya loo Galilea mdaꞌan ycuiꞌ ñi chaꞌ tsuꞌhue ꞌin Ndiose cunda scaa seꞌen nꞌni tnu neꞌ ꞌin Ndiose, a cunta ngulo ñi cuiꞌin xaꞌan nu ntsuꞌhui ꞌin nten.
\s Xa mchca sca nu tiꞌi loꞌo quitsoꞌ la
\p
\v 40 Yatoꞌo sca tsaan, tloo Jesús mdiyaa sca yu tiꞌi loꞌo quitsoꞌ la. Mdyiꞌya xtyinꞌ yu loꞌ ycuiꞌ ꞌtnan yu loꞌo ñi: Chaꞌ nchca tiꞌ um loꞌ cuꞌni chca um ꞌñan.
\v 41 Jesús mñaꞌan ꞌtnan tiꞌ ñi ꞌin yu, mxñii ñi yaaꞌ ñi loꞌ mꞌni caꞌan ñi ꞌin yu, loꞌ juin ñi: Nchca tinꞌ. Quinu luhui loꞌo quicha cua ꞌin.
\v 42 Cuiꞌ xaa ti ngulyijyi quicha canꞌ ꞌin yu, loꞌ mchca yu.
\v 43 Xacanꞌ ngulo ñi tñan ꞌin yu siꞌyana quiaa yu, una tla chaꞌ ycuiꞌ ñi loꞌo yu:
\v 44 Ñaꞌan jan ñi, xñi cunta siꞌyana a chcuiꞌ loꞌo ñi sca tucui chaꞌ re. Tsaloo ti tsaa seꞌen nducua laa loꞌ culoꞌo ꞌin ꞌin yu nu ndlo tñan niꞌ lyaa, taa sca lcuan ñaꞌan nu ngulo Moisé tñan, xacanꞌ ca cuiyaꞌ tiꞌ nten siꞌyana cuaꞌ mchca.
\v 45 Una yu nu mchca canꞌ mdoꞌo yu nguiaa yu, mdaa yu suun loꞌo ñaꞌan nu ti chaꞌ nu yatoꞌo ꞌin yu. Canꞌ chaꞌ a ncua ꞌa tiꞌ sten Jesús scasca quichen, tsaloo ti seꞌen nu a tca nten ndyiꞌan ñi, una ñi cuañaꞌan tiꞌ ndyiꞌo nten scasca quichen ndyiꞌan nan ꞌin ñi.
\c 2
\s Mchca sca yu a nchca tyiꞌan
\p
\v 1 Tsa mdijin tucua snan ti tsaan, xiyaꞌ mxitucui Jesús nde quichen Capernaum. Mscua cueen chaꞌ ꞌin ñi ñaꞌaan sca chcui quichen siꞌyana cuaꞌ nguila ñi nde ñaꞌan.
\v 2 Cuiꞌ ñaꞌan lcaa nguioꞌ tiꞌin quiꞌan nten, mtsaꞌan yuꞌhui neꞌ tunaꞌan lyiyaꞌ, loꞌ Jesús ndloꞌo ñi chaꞌ ꞌin Ndiose.
\v 3 Xacanꞌ tsa jacua yu quiꞌyu mdiya loꞌo yu sca nu tiꞌi nu ncua cuti tiꞌ ñaꞌaan, siꞌyana cuꞌni chca Jesús ꞌin.
\v 4 Siꞌya nten quiꞌan canꞌ, a ncua sten loꞌo yu ꞌin nu tiꞌi canꞌ seꞌen ndon ñi. Canꞌ chaꞌ ycuen loꞌo yu ꞌin nde que naꞌan, canꞌ msla yu sca seꞌen mdyiꞌya sti yu ꞌin nu tiꞌi canꞌ tloo ñi.
\v 5 Xa naꞌan Jesús siꞌyana lyee ndiya quiꞌan tiꞌ yu ꞌin ñi, xacanꞌ juin ñi ꞌin nu tiꞌi canꞌ: Sñenꞌ, cuaꞌ mchca quiꞌya ꞌin.
\v 6 Lja canꞌ nducua tucua snan neꞌ escriba, loꞌ nguñan tiꞌ neꞌ:
\v 7 ¿Ñaꞌan ꞌni tiquee yu re nchcuiꞌ yu cuañaꞌan? Na nchcuiꞌ caꞌan yu ꞌin Ndiose. ¿Ta siꞌi scati Ndiose nchca ꞌin ñi xicuten ñi quiꞌya?
\v 8 Jesús cuiꞌ xaa nguꞌya ñi cunta chaꞌ nu ñan tiꞌ neꞌ, loꞌ juin ñi: ¿Ñi chaꞌ ta ñan tiꞌ um cuañaꞌan?
\v 9 ¿Ti ñaꞌan ta chaꞌ nu a tucui la chcuinꞌ loꞌo yu tiꞌi re: Ta cunen loꞌo yu, cuaꞌ mchca quiꞌya ꞌin, uta chcuinꞌ, tyiton, loꞌ xñi sꞌñan loꞌ quiaa?
\v 10 Ñaꞌan jan ñi, siꞌyana ca cuiyaꞌ tiꞌ um siꞌyana nanꞌ, Yu Quiꞌyu nu Mdoꞌo nde niꞌ Cuaan, ntsuꞌhui chaꞌ cuiyaꞌ ꞌñan xicuten quiꞌya ꞌin nten loo chendyu re. (Xacanꞌ juin ñi ꞌin nu tiꞌi canꞌ):
\v 11 Nanꞌ chcuinꞌ loꞌo, tyiton loꞌ xñi sꞌñan, loꞌ quiaa nde ñaꞌan ꞌin.
\v 12 Cuiꞌ xaa mdyiton yu, msñi yu sꞌñan yu, mdoꞌo yu nguiaa yu tloo naꞌan nten canꞌ. Yuhue ꞌa tiꞌ neꞌ loꞌ mꞌni tnu neꞌ ꞌin Ndiose, loꞌ juin neꞌ: Ñi siyaꞌ a nchca ñaꞌan na chaꞌ nu naꞌan na cuaꞌ ñii.
\s Msiꞌya Jesús ꞌin yu Leví
\p
\v 13 Chonꞌ ndeꞌen canꞌ mdoꞌo Jesús nguiaa ñi nde tuꞌhua tiyoꞌ, ticuiꞌ ti ñaꞌan nducui nchaꞌan nten ꞌin ñi, loꞌ ndloꞌo ñi ꞌin neꞌ.
\v 14 Seꞌen nguiaa ñi naꞌan ñi ꞌin sca yu naan Leví, sñeꞌ yu Alfeo, nducua yu seꞌen nsuꞌhua lyiyaꞌ nten tñi, loꞌ juin ñi ꞌin yu: Chcui nchaꞌan um ꞌñan. Mdyiton yu loꞌ mducui nchaꞌan yu ꞌin ñi.
\v 15 Yatoꞌo mdiyaa Jesús loꞌo yu taꞌa ndaꞌan ñi naꞌan ꞌin yu Leví, tsatlyu ycu jun loꞌo nchgaa la ñaꞌan yu nu ndlo tñi, a cunta quiꞌan yu nducunꞌ taꞌa nchcu jun, siꞌyana quiꞌan ꞌa nten nducui nchaꞌan neꞌ ꞌin Jesús.
\v 16 Tucua snan neꞌ escriba loꞌo neꞌ fariseo, xa naꞌan neꞌ siꞌyana Jesús nchcu ñi loꞌo chacuiꞌ yu nducunꞌ, loꞌ juin neꞌ ꞌin yu taꞌa ndaꞌan ñi: ¿Ñi chaꞌ ta nchcu yu re loꞌo yu ndlo tñi loꞌo yu nducunꞌ?
\v 17 Ngune ꞌin Jesús chaꞌ nu ycuiꞌ neꞌ, loꞌ juin ñi ꞌin neꞌ: Neꞌ nu lyee tiꞌ, a najoꞌo rmiyu ꞌin neꞌ, una nu tiꞌi, canꞌ nu najoꞌo na ꞌin. A ljyan nan ꞌin nten nu cuaꞌ lca luhui, cuiꞌ ca nu ljyaan siꞌya neꞌ nu nducui quiꞌya.
\s Chaꞌ ꞌin neꞌ nu nꞌni ayuna
\p
\v 18 Yu taꞌa ndaꞌan yu Xuhua nguiꞌni yu ayuna, a cunta loꞌo neꞌ fariseo nguiꞌni neꞌ cuañaꞌan. Xacanꞌ mdiyaa tucua snan yu nu mñichaꞌ ꞌin Jesús: ¿Ñi chaꞌ ta yu nu nducui nchaꞌan ꞌin yu Xuhua, loꞌo yu nu nducui nchaꞌan ꞌin neꞌ fariseo nꞌni yu ayuna, loꞌ ñi chaꞌ ta yu taꞌa ndaꞌan um, a nꞌni yu cuañaꞌan?
\v 19 Juin Jesús ꞌin yu: Nten nu ndyiꞌan seꞌen ndyijyi cuilyiꞌo neꞌ, ¿ta tca cuꞌni canꞌ ayuna lja tiꞌ nducua yu nu ndyijyi cuilyiꞌo canꞌ? A tca ꞌin canꞌ siꞌyana tiꞌ nducua sca seꞌen ti loꞌo yu nu ndyijyi cuilyiꞌo canꞌ.
\v 20 Una tiyaa xaa a la ꞌa quine cueen yu nu jui cuilyiꞌo canꞌ, xacanꞌ tca cuꞌni canꞌ ayuna.
\v 21 A tucui nu nxcuan suꞌhua sca teꞌ nu cuaꞌ cula loꞌo tsa yuꞌhue teꞌ tiji, siꞌyana chaꞌ cuꞌni neꞌ cuañaꞌan, teꞌ tiji canꞌ xiyaꞌ na, loꞌ sta na ꞌin teꞌ cula canꞌ. Loꞌ seꞌen nu mdaꞌ canꞌ lyee la xeen na.
\v 22 A tucui nu nsuꞌhua vino nu cui ti niꞌ sca cuijyin quijyin nu cuaꞌ cula, chaꞌ cuꞌni neꞌ cuañaꞌan, chcuen vino canꞌ loꞌ cutsu quijyin canꞌ, tsatoꞌo quilo na loꞌ jlyo quijyin canꞌ. Canꞌ chaꞌ ntsuꞌhui chaꞌ suꞌhua neꞌ vino nu cui ti niꞌ sca cuijyin nu tiji.
\s Mston yu juun trigo tsaan nu nxitñanꞌ neꞌ
\p
\v 23 Yatoꞌo sca tsaan nu nxitñanꞌ neꞌ judio, mdijin Jesús loꞌo yu taꞌa ndaꞌan ñi sca loo jyaan seꞌen nducua trigo. Yu taꞌa ndaꞌan ñi mdyisnan mston yu juun trigo loꞌ ycu yu ꞌin na.
\v 24 Xacanꞌ juin neꞌ fariseo ꞌin ñi: Ñaꞌan jan ñi, ¿ñi chaꞌ ta nguiꞌni yu taꞌa ndaꞌan sca chaꞌ nu a ngaꞌan chaꞌ cuꞌni na tsaan nu nxitñanꞌ na?
\v 25 Una mxcuen ñi ꞌin neꞌ: ¿Ta na a nchca chcuiꞌ um quityi chaꞌ ꞌin Davi xa nguteꞌ tiꞌ yu loꞌo yu taꞌa mdaꞌan yu?
\v 26 Cuiꞌ xa ngulo Abiatar tñan niꞌ lyaa, yten yu Davi loꞌ ycu yu jaslya nu cuaꞌ ndiꞌin loꞌo cunta ꞌin Ndiose, loꞌ mdaa yu ꞌin na ꞌin yu taꞌa mdaꞌan yu, loꞌ na tsaloo ti yu nu ndlo tñan niꞌ lyaa ntsuꞌhui chaꞌ cuiyaꞌ cu ꞌin na.
\v 27 Tiꞌ juin la ñi ꞌin neꞌ: Tsaan nu nxitñanꞌ neꞌ, mdaa Ndiose ꞌin na siꞌyana najoꞌo na ꞌin nten, loꞌ siꞌi tsaan canꞌ culo na tñan ꞌin neꞌ.
\v 28 Canꞌ chaꞌ loꞌo tsaan nu nxitñanꞌ neꞌ, nanꞌ Yu Quiꞌyu nu Mdoꞌo nde niꞌ Cuaan, lcan Xꞌnan na. 
\c 3
\s Sca yu quiꞌyu nu ngutyi sca tsoꞌ yaaꞌ
\p
\v 1 Xiyaꞌ yatoꞌo yten Jesús seꞌen nꞌni tnu neꞌ ꞌin Ndiose, canꞌ ntsuꞌhui sca yu nu ngutyi sca tsoꞌ yaaꞌ.
\v 2 Loꞌ nsñi neꞌ cunta ꞌin Jesús chaꞌ ta cuꞌni chca ñi ꞌin yu tsaan nu nxitñanꞌ neꞌ, siꞌyana caja ñaꞌan suꞌhua neꞌ quiꞌya ꞌin ñi.
\v 3 Xacanꞌ juin Jesús ꞌin yu nu ngutyi yaaꞌ canꞌ: Tyiton loꞌ caan la tluꞌhue re.
\v 4 Loꞌ juin ñi ꞌin nten canꞌ: ¿Ñi tñan tsuꞌhue cuꞌni na tsaan nu nxitñanꞌ na, chaꞌ tsuꞌhue, uta chaꞌ nu a tsuꞌhue? ¿Culo laa na ꞌin nten, uta na taa na yaꞌ caja neꞌ? A mxcuen neꞌ ꞌin ñi.
\v 5 Xacanꞌ tla mxinaꞌan Jesús ꞌin neꞌ, tsacua seꞌen tiꞌi ngaꞌan ꞌin ñi siꞌyana ndyijyin yaꞌ tla cusya ꞌin neꞌ, juin ñi ꞌin yu tiꞌi canꞌ: Xñii yaaꞌ. Cuiꞌ xaa mxñii yu yaaꞌ yu, loꞌ mchca tsuꞌhue na ꞌin yu.
\v 6 Xacanꞌ mdoꞌo neꞌ fariseo, nguia yꞌni cuiyaꞌ neꞌ chaꞌ loꞌo tsalca ta nten ꞌin ree Herode, siꞌyana cujui neꞌ ꞌin Jesús.
\s Mchca nu tiꞌi tuꞌhua tiyoꞌ Galilea
\p
\v 7 Una Jesús mdoꞌo ñi nguiaa ñi loꞌo yu taꞌa ndaꞌan ñi nde tuꞌhua tiyoꞌ Galilea. Quiꞌan nten mducui nchaꞌan ꞌin ñi, neꞌ nu mdoꞌo seꞌen lyiꞌya loo Galilea loꞌo Judea,
\v 8 loꞌo quichen Jerusalén, loꞌo seꞌen lca Idumea, loꞌo xca tsoꞌ chco tlyu Jordan mdoꞌo neꞌ, loꞌo seꞌen lyiꞌya loo quichen Tiro loꞌo Sidón mdoꞌo neꞌ. Quiꞌan ꞌa nten mdaꞌan nan neꞌ ꞌin ñi, siꞌyana ynan neꞌ chaꞌ ñaꞌan chaꞌ nu tnu nguiꞌni ñi.
\v 9 Siꞌya nten quiꞌan canꞌ, ngulo Jesús tñan ꞌin yu taꞌa ndaꞌan ñi, siꞌyana tyiꞌin tiyaa yu loꞌo yca naꞌan nu ntsuꞌhui chaꞌ sten ñi seꞌen nu a sta suꞌhua neꞌ ꞌin ñi.
\v 10 Siꞌyana quiꞌan ꞌa nu tiꞌi cuaꞌ mꞌni chca ñi, nchgaa la ñaꞌan nu tiꞌi canꞌ nsta suꞌhua ꞌin ñi seꞌen nu culaꞌ neꞌ ꞌin ñi.
\v 11 Nten nu ntsuꞌhui cuiꞌin xaꞌan ꞌin, xa naꞌan neꞌ ꞌin Jesús, cuiꞌ xaa ndyiꞌya xtyinꞌ neꞌ tloo ñi, nxiꞌya yja cueen neꞌ, loꞌ nchcuiꞌ neꞌ: Nuꞌhuin lca Sñeꞌ Ndiose.
\v 12 Una Jesús tla chaꞌ ycuiꞌ loꞌo neꞌ, siꞌyana a chcuiꞌ la neꞌ tucui ca lca ñi.
\s Ngulohui Jesús ꞌin tsa tichcua yu taꞌan tyiꞌan ñi
\p
\v 13 Chonꞌ ndeꞌen canꞌ ycuen Jesús sca loo quiꞌya, msiꞌya ñi ꞌin tsalca nu ncua tiꞌ ñi, loꞌ nguioꞌ tiꞌin yu tloo ñi.
\v 14 Xacanꞌ ngulohui ñi ꞌin tsa tichcua yu nu taꞌa tyiꞌan ca ñi nchgaa xaa, yu nu caꞌan tñan ñi ꞌin chcuiꞌ chaꞌ tsuꞌhue ꞌin Ndiose.
\v 15 Mdaa ñi chaꞌ cuiyaꞌ ꞌin yu siꞌyana tca culo yu cuiꞌin xaꞌan nu ntsuꞌhui ꞌin nten, loꞌ tca cuꞌni chca yu ꞌin nu tiꞌi.
\v 16 Nde yu nu ngulohui ñi: Yu Simón, nu mdiꞌin tyaa ñi nii ca naan Tyo,
\v 17 yu Jacobo, sñeꞌ yu Zebedeo, loꞌo yu Xuhua taꞌa ngula yu, chcuaa yu canꞌ mdiꞌin tyaa ñi nii yu, Boanerges, loꞌ chaꞌ re nchca tiꞌ chcuiꞌ, sñeꞌ tyiꞌyu,
\v 18 yu Ndre, yu Lpe, yu Bartolomé, yu Mateo, yu Toma, loꞌo yu Jacobo, sñeꞌ yu Alfeo, yu Tadeo, loꞌo yu Simón nu ntsuꞌhui chaꞌ ꞌin neꞌ cananista,
\v 19 loꞌo yu Juda Iscariote nu mdyaa ꞌin Jesús. Xacanꞌ mxitucui jun loꞌ nguila jun la naꞌan.
\s Ycuiꞌ caꞌan neꞌ ꞌin Espíritu
\p
\v 20 Ñaꞌan ti yaꞌ nguioꞌ tiꞌin quiꞌan nten seꞌen ndiꞌin jun, ñi cu jun loꞌ a jui ꞌa xaa.
\v 21 Xa ynan ta nten ꞌin Jesús chaꞌ canꞌ, cuiꞌ xaa mdoꞌo jun nguia ꞌya jun ꞌin ñi, siꞌyana cuaꞌ nchcuiꞌ nten siꞌyana ndiyoꞌ ñi.
\v 22 Lja canꞌ ntsuꞌhui neꞌ escriba nu mdoꞌo quichen Jerusalén, nchcuiꞌ neꞌ siꞌyana Jesús ntsuꞌhui xꞌnan cuiꞌin xaꞌan ꞌin ñi nu naan Beelzebú, loꞌ siꞌya chaꞌ cuiyaꞌ ꞌin canꞌ ndlo ñi cuiꞌin xaꞌan nu ntsuꞌhui ꞌin nten.
\v 23 Xacanꞌ msiꞌya ñi ꞌin neꞌ escriba, loꞌ mdyisnan ycuiꞌ ñi scasca chaꞌ loꞌo neꞌ: ¿Ñaꞌan ta tca ꞌin Laxaꞌan culo ꞌin ticuiiꞌ?
\v 24 Cuiꞌ cuañaꞌan seꞌen nducua loꞌo neꞌ chaꞌ cuiyaꞌ, chaꞌ a sca chaꞌ ti ꞌin neꞌ, a tca cula scua chaꞌ ꞌin neꞌ.
\v 25 Ticuiꞌ cuañaꞌan loꞌo nten nu ndiꞌin sca naꞌan, chaꞌ a sca chaꞌ ti ꞌin canꞌ, a tca cula scua chaꞌ ꞌin neꞌ.
\v 26 Cuañaꞌan Laxaꞌan, chaꞌ nsuun canꞌ loꞌo ticuiiꞌ, chaꞌ a sca chaꞌ ti ꞌin, a tca cula scua chaꞌ ꞌin canꞌ, tsatoꞌo tsatii tuhue chaꞌ ꞌin.
\v 27 A cunta, a tucui nu tca sten naꞌan ꞌin sca yu nu ngula tiꞌ loꞌ cuꞌni cunan ꞌin yu, chaꞌ siꞌi culo nducua scanꞌ neꞌ ꞌin yu, la xacanꞌ cuiꞌya neꞌ na nu ndiꞌin ꞌin yu.
\v 28 Nu chaꞌ ñi chcuinꞌ loꞌo um, nchgaa quiꞌya nu nꞌni neꞌ, loꞌo nchgaa yuhueꞌ nu nchcuiꞌ neꞌ, tiꞌ cuꞌni Ndiose chaꞌ tlyu tiꞌ ꞌin neꞌ,
\v 29 tyicana nu nchcuiꞌ yuhueꞌ ꞌin Espíritu nu Luhui ꞌin Ndiose, a nducua ꞌa tsaan cuꞌni Ndiose chaꞌ tlyu tiꞌ ꞌin canꞌ, cuiꞌ ca nu nducui nchaꞌan yuhueꞌ ꞌin canꞌ tsala xaa.
\v 30 Juin Jesús cuañaꞌan, siꞌyana neꞌ escriba nchcuiꞌ neꞌ: Cuiꞌin xaꞌan ntsuꞌhui ꞌin yu.
\s Xa mdaꞌan nan jyiꞌan Jesús ꞌin ñi
\p
\v 31 Lja xacanꞌ mdiyaa jyiꞌan Jesús loꞌo taꞌa ngula ñi tunaꞌan lyiyaꞌ, loꞌ ngulo jun tñan ꞌin neꞌ siꞌyana xiꞌya neꞌ ꞌin ñi.
\v 32 Nten nu taꞌa nducua ñi canꞌ juin ꞌin ñi: Tunaꞌan lyiyaꞌ cua mdiyaan ñi jyiꞌan um loꞌo taꞌa ngula um, loꞌ nan jun ꞌin um.
\v 33 Mxcuen ñi ꞌin neꞌ: ¿Tucui ca lca jyiꞌan, loꞌ tucui lca taꞌa ngulan?
\v 34 Tyiꞌiin mxinaꞌan ñi, loꞌ juin ñi: Nde nu lca jyiꞌan loꞌo taꞌa ngulan,
\v 35 siꞌyana nchgaa nu nducua tñan chaꞌ nu nchcuiꞌ Ndiose, canꞌ nu lca taꞌan loꞌ canꞌ nu lca jyiꞌan. 
\c 4
\s Chaꞌ ꞌin yu nu ntya mti
\p
\v 1 Xiyaꞌ mdyisnan nguloꞌo Jesús ꞌin nten tuꞌhua tiyoꞌ canꞌ. Loꞌ siꞌya nten quiꞌan canꞌ yten tucua ñi niꞌ yca naꞌan. Nchgaa nten canꞌ nguioꞌ tiꞌin neꞌ tuꞌhua tiyoꞌ canꞌ.
\v 2 Quiꞌan ꞌa chaꞌ nguloꞌo ñi ꞌin neꞌ loꞌo scasca chaꞌ nu ycuiꞌ ñi, loꞌ ndeñaꞌan nchcuiꞌ ñi:
\v 3 Ton nscan um chaꞌ re: Nu ncua sca tsaan mdoꞌo sca yu quiꞌyu, nguia yta yu mti trigo.
\v 4 Seꞌen msne yu ꞌin na nguilo tsachinꞌ na tuꞌhua tucueen, cuiꞌ xaa ti yaan quiñi nu ycu ꞌin na.
\v 5 Tichinꞌ mti canꞌ nguilo na sca seꞌen nu chinꞌ ti yuu nducua loo quee. Ndla mducua na siꞌyana chinꞌ ti yuu mducun tiꞌin ꞌin na.
\v 6 Xa mdyisnan mꞌni tiqueꞌ cuaan ꞌin na cuiꞌ xaa nguinanꞌ na, loꞌ ngutyi na siꞌyana a nguꞌya xcuaꞌ tsuꞌhue na.
\v 7 Tichinꞌ mti canꞌ nguilo na sca seꞌen nducua yca quicheꞌ. Ndla la ylo yca quicheꞌ canꞌ, loꞌ a mdaa na yaꞌ culo trigo canꞌ.
\v 8 Loꞌ tichinꞌ na nguilo na loo yuu tsuꞌhue, tsuꞌhue ꞌa ylo na loꞌ ncua tñan na. Ntsuꞌhui juun canꞌ mdaa na cla tyii mti scati loo juun na, ntsuꞌhui juun nu mdaa snan yla mti, loꞌ ntsuꞌhui nu mdaa sca ciento na scati loo juun.
\v 9 Xacanꞌ juin ñi ꞌin neꞌ: Nchgaa nu ngune ꞌin chaꞌ nu ycuinꞌ, cuꞌni cunta ꞌin na.
\v 10 Xa cuaꞌ nguinu ton ñi loꞌo yu tichcua nu taꞌa ndaꞌan ñi, loꞌo chcua xnan nu ndon cuiꞌ ti canꞌ, mñichaꞌ yu ꞌin ñi sca cunta, chaꞌ ñi chaꞌ nchca tiꞌ chcuiꞌ chaꞌ nu ycuiꞌ ñi canꞌ.
\v 11 Loꞌ juin ñi ꞌin yu: Chaꞌ nu ntsuꞌhui cutsiꞌ ꞌin Ndiose tsañaꞌan ndlo ñi tñan, cuaꞌ mdaa ñi chaꞌ cuiyaꞌ ꞌin um siꞌyana quiꞌya um cunta chaꞌ re. Una nchgaa la ñaꞌan nten chacuiꞌ chaꞌ nu ntsuꞌhui nchcun nchcuinꞌ loꞌo neꞌ.
\v 12 —Siyaꞌ lyee la ñaꞌan neꞌ loꞌ a chcanꞌ ꞌin neꞌ, siyaꞌ lyee la ndon nscan neꞌ loꞌ a quiꞌya neꞌ chaꞌ tiyaa, ñaꞌan ca siꞌyana a quia nan neꞌ ꞌin Ndiose, loꞌ ñi a cuten quiꞌya ꞌin neꞌ—.
\v 13 Loꞌ juin Jesús ꞌin yu: ¿Ta na a nguꞌya um cunta chaꞌ nu ycuinꞌ canꞌ? ¿Ñaꞌan la ca nchgaa la ñaꞌan chaꞌ nu cuaꞌ mdiꞌin tyaan?
\v 14 Yu nu ntya mti trigo canꞌ, nguiaa chaꞌ ꞌin yu ñaꞌan chaꞌ ꞌin yu nu nchcuiꞌ chaꞌ tsuꞌhue ꞌin Ndiose.
\v 15 Mti trigo nu nguilo tuꞌhua tucueen canꞌ, lca na ñaꞌan chaꞌ ꞌin nten nu ne ꞌin chaꞌ tsuꞌhue ꞌin Ndiose. Cuiꞌ xaa ndyiꞌan Laxaꞌan loꞌ ndlyoo chaꞌ tsuꞌhue nu cuaꞌ ntsuꞌhui niꞌ cusya ꞌin neꞌ.
\v 16 Mti nu nguilo loo yuu nu titi tuꞌhua nducua loo quee canꞌ, lca na ñaꞌan chaꞌ ꞌin nten nu ne ꞌin chaꞌ tsuꞌhue ꞌin Ndiose, tsuꞌhue ntsuꞌhui tiquee neꞌ nducuan xuꞌhue neꞌ ꞌin na.
\v 17 Una a nguꞌya xcuaꞌ tsuꞌhue na niꞌ cusya ꞌin neꞌ, xiꞌi ti ndaa loo neꞌ, loꞌ siꞌya scasca chaꞌ nu ndyijyin neꞌ siꞌya chaꞌ ꞌin Ndiose, cuiꞌ xaa ndyiꞌo tsoꞌ neꞌ.
\v 18 Mti nu nguilo seꞌen nducua yca quicheꞌ canꞌ, nguiaa chaꞌ ꞌin na ñaꞌan chaꞌ ꞌin nten nu ne ꞌin chaꞌ tsuꞌhue ꞌin Ndiose.
\v 19 Una siꞌya scasca chaꞌ nu nchca loo chendyu re, chaꞌ xqueeꞌ ꞌin chaꞌ cuilyiyaꞌ, loꞌ nchcui tiꞌ neꞌ scasca la chaꞌ, canꞌ nu ndujui xuꞌhua chaꞌ tsuꞌhue nu cuaꞌ ntsuꞌhui niꞌ cusya ꞌin neꞌ, loꞌ a ndyijyi ꞌa ñaꞌan cuton na.
\v 20 Una mti nu nguine loo yuu tsuꞌhue canꞌ, nguiaa chaꞌ ꞌin na ñaꞌan chaꞌ ꞌin nten nu ne ꞌin chaꞌ tsuꞌhue ꞌin Ndiose, nducuan xuꞌhue neꞌ ꞌin na, loꞌ tsuꞌhue nchca tñan na: Ntsuꞌhui juun nu ndyiꞌyu cla tyi mti loo, ntsuꞌhui nu ndyiꞌyu snan yla na ꞌin, a cunta ntsuꞌhui juun nu ndyiꞌyu sca ciento na loo.
\s A sca chaꞌ na a tyiꞌo scua la
\p
\v 21 Nde xca chaꞌ ycuiꞌ ñi: A tucui nu nguiten loꞌo sca quiiꞌ ndiquin, loꞌ nde tucun tiꞌin ꞌin na niꞌ cuiyaꞌ scaꞌ, uta nde niꞌ quiꞌñan, cuiꞌ ca nu tyiꞌin tyaa neꞌ ꞌin na sca seꞌen cuaan siꞌyana tuꞌhui na xaa.
\v 22 Ticuiꞌ cuañaꞌan loꞌo sca chaꞌ nu nchca cunan ti, a tca a quine chaꞌ ꞌin na, uta loꞌo sca chaꞌ nu nchca cutsiꞌ ti, a tyijyin yuꞌhui chaꞌ a tyiꞌo scua la na.
\v 23 Nchgaa nu ne ꞌin chaꞌ nu nchcuinꞌ, cuꞌni cunta ꞌin na.
\v 24 Loꞌ tiꞌ juin la ñi: Ton nscan um chaꞌ re: Cuaꞌ yaa ñaꞌan cuiyaꞌ nu ndaa um, cuañaꞌan cuiyaꞌ caja nu taa ꞌin um, loꞌ hasta nde lyee la caja na ꞌin um.
\v 25 Siꞌyana nten nu cuaꞌ jui chaꞌ tsuꞌhue ꞌin, nde lyee la caja chaꞌ tsuꞌhue canꞌ ꞌin, una sca nten nu a ndiꞌin chaꞌ tsuꞌhue ꞌin, loꞌo tsachinꞌ chaꞌ nu nducua tloo canꞌ, caja nu lyaa ꞌin na.
\s Chaꞌ ꞌin sca mti nu ntya neꞌ
\p
\v 26 Loꞌ tiꞌ juin la ñi: Loꞌo chaꞌ re ca jlyo tiꞌ um ñaꞌan ntsuꞌhui chaꞌ culo Ndiose tñan ꞌin nten. Nguiaa chaꞌ re tsañaꞌan nguiaa chaꞌ ꞌin yu nu ntya sca mti.
\v 27 Ndijyaꞌ yu loꞌ ndyitucui yu, cuañaꞌan ndijin tsaan ꞌin yu, lja xacanꞌ nducua mti canꞌ, loꞌ a jlyo tiꞌ yu ñaꞌan nguia nguilo na.
\v 28 Chaꞌ ꞌin ti na ndyiꞌo tucua na loo yuu: Culoo nchcua lcaꞌ na, xacanꞌ ndyiꞌo juun na, la xacanꞌ ndyiꞌo tucua mti loo juun canꞌ.
\v 29 Xa cuaꞌ ngula na, nxoꞌ yu ꞌin na siꞌyana cuaꞌ mdiyaa xaa ꞌin na.
\s Chaꞌ ꞌin mti mostaza
\p
\v 30 Nde xca chaꞌ nu tiꞌ ycuiꞌ ñi: ¿Ti ñaꞌan ta chaꞌ tca tyiꞌin tyaa na siꞌyana tca quiꞌya na cunta ñaꞌan ntsuꞌhui chaꞌ culo Ndiose tñan ꞌin nten?
\v 31 Nguiaa chaꞌ canꞌ tsañaꞌan chaꞌ ꞌin mti mostaza, mti nu suhue lati nu ntya nten.
\v 32 Una xa cuaꞌ nguita na, tnu lati ndlyo na que nchgaa loo quixinꞌ nu ntya neꞌ, tnu ndlyo stanꞌ na loꞌ hasta loꞌo quiñi nchcua cuꞌhua ꞌin lja na.
\s Scasca chaꞌ ycuiꞌ Jesús loꞌo nten
\p
\v 33 Quiꞌan ꞌa chaꞌ tiꞌ ycuiꞌ la ñi loꞌo nten canꞌ, cuaꞌ ñaꞌaan ndyiꞌya neꞌ cunta ꞌin na.
\v 34 Scasca chaꞌ ycuiꞌ ñi loꞌo nten canꞌ, una xca cunta ndlyo scua la ñi chaꞌ canꞌ loꞌo yu taꞌa ndaꞌan ñi.
\s Mꞌni Jesús chaꞌ ngulyijyi quio cuiꞌin
\p
\v 35 Xa msiin tsaan canꞌ, juin Jesús ꞌin yu taꞌa ndaꞌan ñi: Tyijyin xiꞌyu na xca tsoꞌ tiyoꞌ re.
\v 36 Xacanꞌ mslaꞌ taꞌa ñi loꞌo nten canꞌ, loꞌ yu taꞌa ndaꞌan ñi nguia loꞌo yu ꞌin ñi niꞌ yca naꞌan, loꞌo nchgaa la ñaꞌan yca naꞌan canꞌ taꞌa nguiaa jun.
\v 37 Mdyisnan ncua cuiꞌin lyee yaꞌ, cuiꞌ ñaꞌan lcaa loꞌo tiyoꞌ canꞌ mdyisnan nguitsa na, ncua chaꞌ chaꞌan yuꞌhui tyiꞌa niꞌ yca naꞌan canꞌ.
\v 38 Una Jesús nguꞌya sla ñi nde chonꞌ la yca naꞌan canꞌ, nscua ꞌni quee ñi loo sca teꞌ. Yu taꞌa ndaꞌan ñi ngulyoo yu sla ñi, loꞌ juin yu: Ñi Bstro, ¿ta na a ndyuhue tiꞌ um ñaꞌan cuaꞌ quityinꞌ yuꞌhui ti na?
\v 39 Xacanꞌ mdyiton Jesús loꞌ ngusun loꞌo ñi ꞌin cuiꞌin canꞌ, loꞌ ycuiꞌ ñi loꞌo tiyoꞌ canꞌ: Seen tyiꞌin. Cuiꞌ xaa ngulaꞌ tiꞌ cuiꞌin canꞌ, loꞌo tiyoꞌ canꞌ ncua tiin na.
\v 40 Loꞌ juin ñi ꞌin yu taꞌa ndaꞌan ñi: ¿Ñi chaꞌ lyee ꞌa nguitsen um? ¿Ta na a ndiya quiꞌan tiꞌ um ꞌñan?
\v 41 Una yu taꞌa ndaꞌan ñi scañaꞌan ti ndiꞌin ytsen yu, loꞌ scasca yu ñichaꞌ taꞌa yu, loꞌ nchcuiꞌ yu: ¿Tucui ca lca ñi re, ñi chaꞌ hasta cuiꞌin loꞌo tyiꞌa, loꞌ jaꞌan ꞌin ñi? 
\c 5
\s Chaꞌ ꞌin yu Gadara
\p
\v 1 Xacanꞌ mdiyaa jun xca tsoꞌ tiyoꞌ canꞌ seꞌen lca loo yuu ꞌin neꞌ Gadara.
\v 2 Ñaꞌaan mdyiꞌo Jesús niꞌ yca naꞌan canꞌ, mdiyaa sca yu ndiyoꞌ tloo ñi nu mdoꞌo niꞌ lyiꞌo seꞌen nguitsiꞌ nten, loꞌ ntsuꞌhui cuiꞌin xaꞌan ꞌin yu.
\v 3 Canꞌ nguilyu yu nchgaa xaa, loꞌ a tucui nu nchca tyon tloo yu, ñi loꞌo carena loꞌ a nchca scanꞌ neꞌ ꞌin yu,
\v 4 siꞌyana tyun ꞌa yaꞌ mchcanꞌ quiyaꞌ yu loꞌo yaaꞌ yu loꞌo carena, loꞌ cuiꞌ xaa nsiꞌyu yu ꞌin na, a tucui nu ncua ꞌin loꞌo yu.
\v 5 Tla loꞌ cucha ndaꞌan nsiꞌya yja yu loo quiꞌya loꞌo seꞌen lca tucuaa, loꞌ ndyujui yuhuaꞌ yu ꞌin yu loꞌo quee.
\v 6 Tiꞌ tijyoꞌ ndon yu xa naꞌan yu ꞌin Jesús, msnan yu ya ycua yu ꞌin ñi, loꞌ mdyiꞌya xtyinꞌ yu tloo ñi.
\v 7 Ycuiꞌ cueen yu loꞌo ñi: Jesús, Sñeꞌ Ndiose, ñi nu tlyu lati nu nducua niꞌ cuaan, ¿ñi chaꞌ nguiꞌni lyiꞌo um ꞌñan? Nanꞌ jñan sca chaꞌ tsuꞌhue ꞌin um tloo Ndiose siꞌyana a xitijin um ꞌñan nu tiꞌi.
\v 8 Juin yu cuañaꞌan siꞌyana Jesús cuaꞌ nchcuiꞌ ñi: Cuiꞌin xaꞌan, lyaꞌ ton ꞌin yu re siyaꞌ ti.
\v 9 Mñichaꞌ ñi ꞌin yu: ¿Ñaꞌan ta naan? Loꞌ mxcuen yu ꞌin ñi: Legión naan hua, siꞌyana quiꞌan ꞌa hua.
\v 10 Lyee ꞌa mjñan cuiꞌin xaꞌan canꞌ chaꞌ tsuꞌhue ꞌin ñi, siꞌyana a culo tsoꞌ ñi ꞌin tijyoꞌ la.
\v 11 Cuiꞌ ti sca siiꞌ quiꞌya, quiꞌan ꞌa cuhueꞌ ndaꞌan nan ycu.
\v 12 Loꞌ nchgaa cuiꞌin xaꞌan canꞌ mjñan chaꞌ tsuꞌhue ꞌin ñi, loꞌ juin: Taa um chaꞌ cuiyaꞌ sten hua ꞌin cuhueꞌ cua.
\v 13 Cuiꞌ xaa mdaa Jesús chaꞌ cuiyaꞌ, cuiꞌ ñaꞌan lcaa mdyiꞌo cuiꞌin xaꞌan canꞌ ꞌin yu, loꞌ yten ꞌin cuhueꞌ canꞌ. Cuhueꞌ canꞌ ndiyaa ꞌin tsaa tucua mii ꞌin, loꞌ nchgaa ꞌin mdoꞌo snan ꞌin, loꞌ mxityu loo ꞌin loo tiyoꞌ canꞌ seꞌen ngujui ꞌin.
\v 14 Yu nu naꞌan seen cuhueꞌ canꞌ msnan yu, loꞌ mtsaꞌ yu ꞌin nten nchgaa seꞌen mdijin yu, niꞌ quixinꞌ loꞌo loo quichen, ñaꞌan chaꞌ nu yatoꞌo, cuiꞌ xaa ya naꞌan neꞌ chaꞌ ñi na nchca.
\v 15 Xa mdiyaa neꞌ seꞌen nducua Jesús, naꞌan neꞌ ꞌin yu nu yuꞌhui quiꞌan cuiꞌin xaꞌan ꞌin canꞌ, nducua yu chcui chaꞌ tiyaa ꞌin yu, nguxen yu sca teꞌ, loꞌ lyee ytsen neꞌ.
\v 16 Nu naꞌan nchgaa chaꞌ nu yatoꞌo canꞌ, mdaa suun loꞌo nten nu mdiyaa canꞌ, chaꞌ ꞌin yu nu yuꞌhui cuiꞌin xaꞌan ꞌin canꞌ, loꞌo chaꞌ ꞌin cuhueꞌ canꞌ.
\v 17 Xacanꞌ scasca neꞌ mjñan neꞌ ꞌin Jesús siꞌyana tyiꞌo ñi seꞌen canꞌ.
\v 18 Xa cuaꞌ yten Jesús niꞌ yca naꞌan canꞌ, loꞌ yu nu yuꞌhui cuiꞌin xaꞌan ꞌin canꞌ mjñan yu chaꞌ tsuꞌhue ꞌin ñi, chaꞌ tca tsaa yu loꞌo ñi.
\v 19 Una Jesús a mdaa ñi chaꞌ cuiyaꞌ, loꞌ juin ñi ꞌin yu: Quiaa nde ñaꞌan ꞌin, loꞌ quitsaꞌ ꞌin nchgaa nten ꞌin ñaꞌan chaꞌ tsuꞌhue mꞌni Ndiose loꞌo, loꞌ ñaꞌan mñaꞌan ꞌtnan tiꞌ ñi ꞌin.
\v 20 Xacanꞌ nguia ytsaꞌ yu ꞌin nten nu ndiꞌin scasca quichen seꞌen lyiꞌya loo Decápolis, ñaꞌan chaꞌ tsuꞌhue nu mꞌni Jesús loꞌo yu, loꞌ nchgaa neꞌ yuhue tiꞌ neꞌ.
\s Chaꞌ ꞌin sñeꞌ Jairo loꞌo nu ylaꞌ steꞌ Jesús
\p
\v 21 Xiyaꞌ mdijin xiꞌyu Jesús loꞌo yca naꞌan xca tsoꞌ tiyoꞌ canꞌ, loꞌ mdyisnan nguioꞌ tiꞌin quiꞌan nten tuꞌhua seꞌen ndon ñi canꞌ.
\v 22 Canꞌ mdiyaa sca yu naan Jairo, sca yu ndlo tñan seꞌen nꞌni tnu neꞌ judio ꞌin Ndiose, xa naꞌan yu ꞌin ñi mdyiꞌya xtyinꞌ yu tloo ñi.
\v 23 Lyee mjñan yu ꞌin ñi loꞌ nchcuiꞌ yu: Cuaꞌ caja ti sca sñenꞌ. Cuꞌni um chaꞌ tsuꞌhue tsaa um seꞌen nscua, loꞌ tiꞌin tyaa um yaaꞌ um ꞌin loꞌ chca.
\v 24 Xacanꞌ mdoꞌo ñi nguiaa ñi loꞌo yu, loꞌ quiꞌan ꞌa nten mducui nchaꞌan ꞌin ñi, hasta nsta suꞌhua taꞌa neꞌ loꞌo ñi.
\v 25 Lja nten canꞌ ntsuꞌhui sca neꞌ cunaꞌan, nu cuaꞌ ntsuꞌhui tichcua yjan tiꞌi loꞌo quicha nguilo tne.
\v 26 Lyee ꞌa cuaꞌ mdijin neꞌ nu tiꞌi yaaꞌ neꞌ nu nꞌni rmiyu, a cunta cuaꞌ ngulyijyi neꞌ ñaꞌaan tñi nu su ꞌin neꞌ, loꞌ a sca cunta yuꞌhui ꞌin neꞌ, cuiꞌ ca nu nde lyee la tiꞌi neꞌ.
\v 27 Xa ynan neꞌ chaꞌ ꞌin Jesús, cuiꞌ xaa yaan neꞌ nde chonꞌ ñi lja nten quiꞌan canꞌ, loꞌ ylaꞌ neꞌ steꞌ ñi,
\v 28 siꞌyana ñan tiꞌ neꞌ: Siyaꞌ cuaꞌ tsuꞌhue steꞌ ti ñi culanꞌ, loꞌ chcan.
\v 29 Cuiꞌ ñaꞌan lcaa ngulyijyi ylo tne canꞌ ꞌin neꞌ, loꞌ ngüi tiꞌ neꞌ siꞌyana mchca neꞌ.
\v 30 Cuiꞌ xaa nguꞌya Jesús cunta siꞌyana loꞌo chaꞌ cuiyaꞌ ꞌin ñi mchca sca nu ylaꞌ ꞌin ñi, loꞌ mxiton ñi mñichaꞌ ñi ꞌin nten canꞌ, chaꞌ ti nu ylaꞌ steꞌ ñi.
\v 31 Yu taꞌa ndaꞌan ñi juin ꞌin ñi: Ñaꞌan um tsala ñaꞌan quiꞌan nten re nsta suꞌhua neꞌ ꞌin um, loꞌ tiꞌ ñichaꞌ um, ti ca nu ylaꞌ ꞌin um.
\v 32 Una Jesús tyiꞌiin mxinaꞌan ñi chaꞌ ti ca nu ylaꞌ ꞌin ñi.
\v 33 Neꞌ cunaꞌan canꞌ nguꞌya neꞌ chaꞌ tiyaa ñaꞌan chaꞌ nu yatoꞌo ꞌin neꞌ, mdyisnan mchcuan neꞌ siꞌyana lyee ytsen neꞌ, loꞌ mdyiꞌya xtyinꞌ neꞌ tloo ñi, loꞌ mtsaꞌ neꞌ ꞌin ñi ñaꞌaan chaꞌ nu yatoꞌo ꞌin neꞌ.
\v 34 Loꞌ juin ñi ꞌin neꞌ cunaꞌan canꞌ: Sñenꞌ, cuaꞌ mchca siꞌyana ya quiꞌan tiꞌ ꞌñan. Quia lya loꞌ quinu luhui, a sca la chaꞌ chuꞌhui tiquee.
\v 35 Canꞌ chaꞌ tiꞌ ndon ycuiꞌ ñi, xa mdiyaa tucua snan yu nu mdoꞌo la naꞌan ꞌin yu nu ndlo ca tñan canꞌ, loꞌ juin yu: Cuaꞌ ngujui sñeꞌ um. ¿Ñi chaꞌ tiꞌ ndaa um chaꞌ nsinꞌ tiꞌ ꞌin ñi re?
\v 36 Ngune ꞌin Jesús chaꞌ nu ycuiꞌ yu, loꞌ juin ñi ꞌin yu nu ndlo tñan canꞌ: A cutsen um, tsaloo ti tsa quiꞌan tiꞌ um.
\v 37 A mdaa ñi yaꞌ chcui nchaꞌan quiꞌan la nten ꞌin ñi, tsa yu Tyo ti, yu Jacobo, loꞌo yu Xuhua taꞌa ngula yu Jacobo, ya loꞌo ñi.
\v 38 Xa mdiyaa jun naꞌan ꞌin yu nu ndlo tñan canꞌ, naꞌan ñi quiꞌan ꞌa nten cuaꞌ ndiꞌin canꞌ, loꞌ ndiꞌin ynan neꞌ.
\v 39 Ñaꞌaan yten ñi ñaꞌan canꞌ, juin ñi ꞌin nten canꞌ: ¿Ñi chaꞌ lyee ꞌa nguilo tiꞌin um loꞌ nguinan um? Cuhuiꞌ cua, siꞌi na ngujui cuhuiꞌ, na ljaꞌ ti cuhuiꞌ.
\v 40 Xacanꞌ mstyi lyiꞌo neꞌ ꞌin ñi. Mꞌni ñi chaꞌ mdoꞌo neꞌ nde lyiyaꞌ, tsa sti ti cuhuiꞌ loꞌo jyiꞌan cuhuiꞌ, loꞌo yu taꞌa ndaꞌan ti ñi, yten loꞌo ñi la seꞌen nscua cuhuiꞌ canꞌ.
\v 41 Msñi ñi yaaꞌ cuhuiꞌ, loꞌ juin ñi ꞌin loꞌo chaꞌ nu nchcuiꞌ ñi: Talita cumi. Chaꞌ re nchca tiꞌ chcuiꞌ: Maa, ꞌin nchcuiꞌ lyiꞌon, tyitucui.
\v 42 Cuiꞌ xaa mdyitucui cuhuiꞌ loꞌ mdyisnan mdaꞌan cuhuiꞌ. Loꞌ cuaꞌ ntsuꞌhui cuhuiꞌ tichcua yjan. Ndyijyin yaꞌ yuhue tiꞌ neꞌ ñaꞌan chaꞌ nu yatoꞌo canꞌ.
\v 43 Una lyee ꞌa mjñan ñi ꞌin neꞌ, siꞌyana a chcuiꞌ neꞌ loꞌo ñi sca tucui chaꞌ nu yatoꞌo, loꞌ ngulo ñi tñan siꞌyana taa neꞌ na cu cuhuiꞌ. 
\c 6
\s Xa nguila Jesús quichen Nazaret
\p
\v 1 Xacanꞌ mdoꞌo Jesús nguiaa ñi loꞌo yu taꞌa ndaꞌan ñi nde quichen tyi ñi.
\v 2 Xa mdiyaa tsaan nu nxitñanꞌ neꞌ, mdyisnan nguloꞌo ñi ꞌin nten ndiꞌin seꞌen nꞌni tnu neꞌ ꞌin Ndiose. Quiꞌan ꞌa nten canꞌ ngune ꞌin neꞌ chaꞌ nu ndloꞌo Jesús, nduhue tiꞌ neꞌ ꞌin ñi, loꞌ nchcuiꞌ neꞌ: ¿La ta ngulo yu re chaꞌ nu nchcuiꞌ yu? ¿La jui chaꞌ tiyaa re ꞌin yu, loꞌ nchca nꞌni yu scasca chaꞌ nu tnu?
\v 3 ¿Ta siꞌi cuityi yca lca yu re, cuiꞌ sñeꞌ María? ¿Ta siꞌi Jacobo, yu See, yu Juda loꞌo Simón lca taꞌa ngula yu? ¿Ta siꞌi nchgaa nu cunaꞌan taꞌa yu ndiꞌin loꞌo na quichen re? Canꞌ chaꞌ a tsuꞌhue lca tiquee neꞌ loꞌo ñi.
\v 4 Juin Jesús ꞌin nten canꞌ: Sca yu nu nxiycuiꞌ Ndiose ꞌin, xca quichen ndyijyi nu nducuan xuꞌhue ꞌin yu, una quichen tyi yu, ta lja ta nten ꞌin yu, uta la naꞌan ꞌin yu, a ndyijyi nu cuan xuꞌhue ꞌin yu.
\v 5 A jui ñaꞌan cuꞌni Jesús quiꞌan la chaꞌ nu tnu quichen tyi ñi, cuiꞌ ca nu tucua snan ti nu tiꞌi mꞌni chca ñi, xa mdiꞌin tyaa ñi yaaꞌ ñi ꞌin.
\v 6 Nduhue ꞌa tiꞌ ñi ꞌin taꞌa quichen tyi ñi siꞌyana a ndiya quiꞌan tiꞌ neꞌ ꞌin ñi. Xacanꞌ mdoꞌo Jesús, nguiaa ñi scasca quichen suhue ti nu ndiꞌin cuiꞌ ti canꞌ, loꞌ nguloꞌo ñi ꞌin neꞌ.
\s Xa nguaꞌan tñan Jesús ꞌin tichcua yu
\p
\v 7 Xacanꞌ msiꞌya ñi ꞌin tsa tichcua yu taꞌa ndaꞌan ca ñi, loꞌ cunda tucua ti yu nguaꞌan tñan ñi ꞌin yu tsaa yu scasca quichen, mdaa ñi chaꞌ cuiyaꞌ culo yu cuiꞌin xaꞌan nu ntsuꞌhui ꞌin nten.
\v 8 Ngulo ñi tñan ꞌin yu siꞌyana ñi sca na loꞌ a cuiꞌya yu, tsaloo yca scaan ti yu, ñi a cuiꞌya yu cuijyin, ñi na nu cu yu, ñi tñi loꞌ a cuiꞌya yu,
\v 9 tsaloo ti quinan loꞌo steꞌ ndon ti yu tsaa yu.
\v 10 Xacanꞌ juin ñi ꞌin yu: Xa tiyaa um sca quichen, chaꞌ ndeꞌen nu taa naꞌan ꞌin quinu um, canꞌ tyiꞌin um tsalja nu quilyu um quichen canꞌ.
\v 11 Chaꞌ ndeꞌen seꞌen a cuan xuꞌhue neꞌ ꞌin um, ñi a ton nscan neꞌ chaꞌ nu chcuiꞌ um, tyiꞌo um canꞌ loꞌ scuin um yuu quiyaꞌ um, loꞌ quinu cunta ꞌin neꞌ chaꞌ ndeꞌen la chaꞌ caan ꞌin neꞌ. Nu chaꞌ ñi chcuinꞌ loꞌo um, nten ndiꞌin quichen canꞌ, lyee la tyijyin neꞌ nu tiꞌi que ñaꞌan ntsuꞌhui chaꞌ tyijyin neꞌ Sodoma loꞌo Gomorra, xa cuꞌni Ndiose xñan bsya ꞌin nten chendyu.
\v 12 Xacanꞌ mdoꞌo yu nguiaa yu, loꞌ ycuiꞌ yu loꞌo nten siꞌyana xiloꞌo chonꞌ neꞌ quiꞌya nguiꞌni neꞌ.
\v 13 Ngulo yu quiꞌan cuiꞌin xaꞌan nu ntsuꞌhui ꞌin nten, a cunta quiꞌan nu tiꞌi mxitaꞌan yu ceite ꞌin, loꞌ mchca.
\s Xa ngujui yu Xuhua nu mducua tya ꞌin nten
\p
\v 14 Yu nu lca ree Herode ynan yu chaꞌ ꞌin Jesús, siꞌyana cuaꞌ mscua cueen chaꞌ ꞌin ñi sca chcui seꞌen canꞌ. Ndeñaꞌan nchcuiꞌ yu chaꞌ ꞌin ñi: Yu Xuhua nu mducua tya ꞌin nten cuaꞌ mdyiquiꞌo yu, canꞌ chaꞌ nchca nꞌni yu chaꞌ nu tnu.
\v 15 Ntsuꞌhui xca nu nchcuiꞌ: Elía lca yu re. Ntsuꞌhui xca nu nchcuiꞌ: Cuiꞌ sca yu nu nxiycuiꞌ Ndiose ꞌin lca yu, tsañaꞌan mxiycuiꞌ ñi ꞌin scasca la tucui cuaꞌ sꞌni.
\v 16 Xa ynan yu Herode chaꞌ canꞌ, juin yu: Cuiꞌ ca yu Xuhua nu ngulon tñan xiꞌyu yni canꞌ lca yu re, loꞌ cuaꞌ ñii cuaꞌ mdyiquiꞌo yu.
\v 17 Ycuiꞌ ca yu Herode ngulo yu tñan siꞌyana quinu yu Xuhua canꞌ, scanꞌ yu loꞌo carena loꞌ tsaa yu naꞌan chcuan. Mꞌni yu cuañaꞌan siꞌya sca neꞌ cunaꞌan naan Herodía, cuilyiꞌo yu Lpe taꞌa ngula yu, yatoꞌo ngulyaa yu Herode ꞌin neꞌ loꞌ ndiꞌin lyiꞌo yu ꞌin neꞌ.
\v 18 Yu Xuhua canꞌ nchcuiꞌ yu loꞌo Herode siꞌyana a tsuꞌhue tyiꞌin lyiꞌo yu cunaꞌan ꞌin taꞌa yu.
\v 19 Canꞌ chaꞌ lyee la yten chaꞌ nsinꞌ tiꞌ tiquee neꞌ cunaꞌan canꞌ, loꞌ nan neꞌ ñaꞌan nu cujui neꞌ ꞌin yu Xuhua, tyicana a jui ñaꞌan na,
\v 20 siꞌyana yu Herode ntsuꞌhui sca ytsen ꞌin yu tloo yu Xuhua canꞌ, jlyo tiꞌ yu lca canꞌ sca nten nu ñi ndiꞌin chaꞌ ꞌin, nu nduꞌhui sca chendyu nu luhui tloo Ndiose, canꞌ chaꞌ nxñi yu cunta siꞌyana a sca ca ꞌin. Nducui tiꞌ yu ne ꞌin yu chaꞌ nu nchcuiꞌ yu Xuhua canꞌ, siyaꞌ lyee nsuꞌhua yu chaꞌ tiquee yu.
\v 21 Una mdiyaa tsaan nu nta neꞌ cunaꞌan canꞌ, cuiꞌ tsaan nu nguꞌya nii yu Herode, msuꞌhua yu sca taꞌa. Msiꞌya yu ꞌin nchgaa taꞌa lyiꞌya yu tñan nu ndon loo lati, loꞌo xꞌnan sindatu, loꞌo nu ndon loo lati ndiꞌin seꞌen lyiꞌya loo Galilea.
\v 22 Lja nchca taꞌa canꞌ yten neꞌ cunaꞌan sñeꞌ Herodía loꞌ yla quiyaꞌ neꞌ tloo ree Herode canꞌ, mdiyaa ꞌa tiꞌ yu loꞌo nchgaa taꞌa nducua yu ñaꞌan yla quiyaꞌ neꞌ cunaꞌan canꞌ. Xacanꞌ juin yu ꞌin neꞌ cunaꞌan canꞌ: Jñan na nu nchca tiꞌ, loꞌ nanꞌ taan ꞌin na ꞌin.
\v 23 Mꞌni tyiꞌya yu ꞌin Ndiose xa juin yu ꞌin neꞌ: Jñan na nu nchca tiꞌ, loꞌ a ꞌni chaꞌ siyaꞌ tsa tluꞌhue chaꞌ cuilyiyaꞌ nu ndiꞌin ꞌñan, loꞌ taan ꞌin na ꞌin.
\v 24 Mdoꞌo neꞌ cunaꞌan canꞌ, nguia ñichaꞌ neꞌ ꞌin jyiꞌan neꞌ, loꞌ juin neꞌ: ¿Ñi na ta jñan ꞌin ree? Cuiꞌ xaa mxcuen jyiꞌan neꞌ: Jñan que Xuhua nu mducua tya ꞌin nten.
\v 25 Ndla ndsa ti yten neꞌ cunaꞌan canꞌ seꞌen nducua ree canꞌ, loꞌ juin: Jni re ñii nchca tinꞌ sca quiꞌnan seꞌen ntsuꞌhui que Xuhua nu mducua tya ꞌin nten.
\v 26 Nguluꞌun ꞌa tiꞌ yu ree, loꞌ siꞌyana cuaꞌ ycuiꞌ yu sca chaꞌ nu ñi ca tloo nchgaa taꞌa nducua yu, a jui ꞌa ñaꞌan tiꞌ xitsaꞌan yu chaꞌ nu cuaꞌ mdiꞌin tyaa yu.
\v 27 Cuiꞌ xaa ngulo yu tñan ꞌin sca sindatu ꞌin yu siꞌyana quia ꞌya que yu Xuhua canꞌ.
\v 28 Yaa yu sindatu loꞌ msiꞌyu yni yu Xuhua seꞌen ntsuꞌhui yu naꞌan chcuan, nguian loꞌo yu que canꞌ ndiꞌin na sca niꞌ quiꞌnan, loꞌ mdyaa yu ꞌin na ꞌin nu cunaꞌan canꞌ, loꞌ nu cunaꞌan canꞌ cuaꞌ mdyaa ꞌin na ꞌin jyiꞌan.
\v 29 Yu taꞌa mdaꞌan yu Xuhua, xa ynan yu chaꞌ siꞌyana cuaꞌ ngujui yu, ya chcuan yu cunta ꞌin, loꞌ ya tsiꞌ yu ꞌin.
\s Mxicu Jesús tsa caꞌyu mii yu quiꞌyu
\p
\v 30 Xacanꞌ nguila yu taꞌa ndaꞌan ca Jesús, loꞌ mtsaꞌ yu ꞌin ñi nchgaa ñaꞌan nu mꞌni yu, loꞌo ñaꞌan nu nguloꞌo yu ꞌin nten seꞌen yaa yu.
\v 31 Loꞌ juin ñi ꞌin yu: Tsa xitñanꞌ na sca seꞌen tsa ycuiꞌ ti na. Juin ñi cuañaꞌan siꞌyana quiꞌan ꞌa nten nguia yaan neꞌ seꞌen nguilyu ñi, loꞌ ñi nu tiꞌ cu jun, loꞌ a ndyijyi ꞌa xaa.
\v 32 Xacanꞌ yten jun niꞌ yca naꞌan, mdoꞌo jun nguiaa jun sca seꞌen tsa ycuiꞌ ti jun.
\v 33 Una quiꞌan ꞌa nten naꞌan neꞌ xa mdoꞌo jun nguiaa jun, loꞌ yuꞌhui lyoo neꞌ ꞌin jun, canꞌ chaꞌ scasca quichen mdoꞌo neꞌ mdaꞌan quiyaꞌ ti neꞌ, loꞌ culo nducua la neꞌ mdiyaa neꞌ seꞌen ntsuꞌhui chaꞌ tiyaa ñi.
\v 34 Xa mdyiꞌo Jesús niꞌ yca naꞌan canꞌ, naꞌan ñi siꞌyana quiꞌan ꞌa nten cuaꞌ nguioꞌ tiꞌin canꞌ, loꞌ mñaꞌan ꞌtnan tiꞌ ñi ꞌin neꞌ siꞌyana ndiꞌin neꞌ ñaꞌan nchca tiꞌ slyaꞌ nu a ntsuꞌhui xꞌnan. Loꞌ quiꞌan ꞌa chaꞌ nguloꞌo ñi ꞌin neꞌ.
\v 35 Xa cuaꞌ msiin tsaan canꞌ, mdiyaa yu taꞌa ndaꞌan ñi tloo ñi loꞌ juin yu: Cuaꞌ msiin na, loꞌ tijyoꞌ nguinu quichen re.
\v 36 Tsuꞌhue lati chaꞌ chcuiꞌ um loꞌo neꞌ, tsa siꞌi neꞌ na nu cunajoꞌo ꞌin neꞌ, la ñaꞌan ti seꞌen ngaꞌan nten niꞌ quixinꞌ uta quichen suhue ti, siꞌyana a ndaꞌan loꞌo neꞌ na nu cu neꞌ.
\v 37 Mxcuen Jesús ꞌin yu: ¿Ñi chaꞌ ta a xicu um ꞌin neꞌ? Juin yu: ¿Ta nchca tiꞌ um culyijyi hua tñi tsañaꞌan nu cuꞌni na canan tucua ciento tsaan, loꞌ xiꞌi hua jaslya nu cu neꞌ re?
\v 38 Loꞌ juin ñi ꞌin yu: Cuꞌni cunta um chaꞌ ñi ncua jaslya ndaꞌan loꞌo um. Xa ngujlyo tiꞌ yu xacanꞌ juin yu: Caꞌyu ti jaslya loꞌo tucua ti cula.
\v 39 Ngulo ñi tñan ꞌin yu taꞌa ndaꞌan ñi siꞌyana chcuiꞌ yu loꞌo nten canꞌ, siꞌyana sten tucua neꞌ cunda scaa ta neꞌ loo quii suhue ti canꞌ.
\v 40 Yten tucua neꞌ cunda scaa ta neꞌ: Ntsuꞌhui seꞌen nducua cunda ciento neꞌ, loꞌ xca seꞌen nducua neꞌ cunda tuꞌhua tyi neꞌ.
\v 41 Xacanꞌ msñi Jesús taꞌa caꞌyu jaslya loꞌo chcuaa cula canꞌ, mscuen ñi tloo ñi nde niꞌ cuaan loꞌ mdyaa ñi xuꞌhue ꞌin Ndiose, msuꞌhue ñi ꞌin na loꞌ mdaa ñi ꞌin na ꞌin yu taꞌa ndaꞌan ñi. Canꞌ yu mtsa ꞌin na ꞌin nchgaa nten canꞌ. Cuiꞌ cuañaꞌan mꞌni ñi loꞌo chcuaa cula canꞌ.
\v 42 Nchgaa neꞌ ycu neꞌ tsayaꞌ ngulaꞌ tiꞌ neꞌ.
\v 43 Loꞌ tiꞌ mxoꞌ yu cha tichcua xcuhui jaslya nu nguinu ycu neꞌ loꞌo cula canꞌ.
\v 44 Tsalca yu quiꞌyu nu ycu jaslya canꞌ ndiyaa yu tsa caꞌyu mii yu.
\s Xa mdaꞌan Jesús loo tyiꞌa
\p
\v 45 Cuiꞌ xaa ngulo Jesús tñan ꞌin yu taꞌa ndaꞌan ñi siꞌyana sten yu niꞌ yca naꞌan, chcua loo yu loꞌ tyijyin yu xca tsoꞌ tiyoꞌ canꞌ seꞌen ndiꞌin quichen Betsaida, lja nu tiꞌ nslaꞌ taꞌa ñi loꞌo nten quiꞌan canꞌ.
\v 46 Xa cuaꞌ mslaꞌ taꞌa ñi loꞌo nten canꞌ, ycuen ñi sca loo quiꞌya siꞌyana chcuiꞌ lyiꞌo ñi ꞌin Ndiose.
\v 47 Xa cuaꞌ nguꞌya tla canꞌ, cuaꞌ tiyaa ti yca naꞌan canꞌ tluꞌhue tiyoꞌ, una tiꞌ ndon ñi tuꞌhua tyiꞌa canꞌ scati ñi.
\v 48 Naꞌan ñi siꞌyana cuaꞌ xtyi loꞌo juesa ti nguiaa yu taꞌa ndaꞌan ñi, siꞌya cuiꞌin nu ljyaan loo yu. Nde cuaꞌ ljyaan xaa mdoꞌo Jesús nguia nchaꞌan ñi ꞌin yu, mdaꞌan quiyaꞌ ñi loo tyiꞌa canꞌ, mꞌni ñi chaꞌ tyijyin ta ti ñi seꞌen nguiaa yca naꞌan canꞌ.
\v 49 Xa naꞌan yu ndaꞌan quiyaꞌ ti ñi loo tyiꞌa canꞌ, msqueꞌ tiꞌ yu siꞌyana sca cuxee lca ñi, loꞌ msiꞌya yja yu,
\v 50 siꞌyana nchgaa yu naꞌan yu ꞌin ñi, loꞌ lyee ytsen yu. Una cuiꞌ xaa canꞌ ycuiꞌ Jesús loꞌo yu: Cuꞌni tnu tiquee um siꞌyana nanꞌ lcan, a cutsen um.
\v 51 Xacanꞌ ycuen ñi niꞌ yca naꞌan canꞌ, cuiꞌ xaa ngulyijyi cuiꞌin canꞌ, loꞌ ndyijyin yaꞌ yuhueꞌ tiꞌ yu.
\v 52 Ñi a nchca quiꞌya yu chaꞌ tiyaa, ñi chaꞌ nchca tiꞌ chcuiꞌ xa msuꞌhue ñi jaslya nu ycu neꞌ canꞌ, siꞌyana tiꞌ nchcun chaꞌ tiyaa ꞌin yu.
\s Mꞌni chca Jesús ꞌin neꞌ Genesaret
\p
\v 53 Xa cuaꞌ mdijin xiꞌyu jun loo tyiꞌa canꞌ, mdiyaa jun loo yuu Genesaret. Loꞌ tuꞌhua tyiꞌa canꞌ mscanꞌ caꞌan jun ꞌin yca naꞌan canꞌ.
\v 54 Ñaꞌaan mdyiꞌo jun niꞌ yca naꞌan canꞌ, cuiꞌ xaa yuꞌhui lyoo nten canꞌ ꞌin Jesús.
\v 55 Msnan neꞌ, nguia ꞌya neꞌ ꞌin nu tiꞌi sca chcui seꞌen canꞌ, loꞌ mdiya loꞌo neꞌ ꞌin nscua loo quiꞌñan seꞌen nu ngune chaꞌ mdiyaa ñi.
\v 56 Loꞌ la ñaꞌan ti quichen suhue ti seꞌen ndaꞌan ñi, loꞌo quichen tnu, ta seꞌen ngaꞌan nten niꞌ quixinꞌ, uta tuꞌhua tucueen seꞌen nu ntsuꞌhui chaꞌ tyijyin ñi, ndiya loꞌo neꞌ ꞌin nu tiꞌi. Loꞌ nu tiꞌi canꞌ njñan chaꞌ tsuꞌhue ꞌin ñi, siyaꞌ cuaꞌ tsuꞌhue tuꞌhua steꞌ ti ñi chaꞌ taa ñi culaꞌ canꞌ, loꞌ nchgaa nu ylaꞌ steꞌ ñi mchca. 
\c 7
\s Chaꞌ cooꞌ nu ntsuꞌhui niꞌ cusya ꞌin nten
\p
\v 1 Xacanꞌ mdiya tiꞌin tucua snan neꞌ fariseo tloo Jesús, loꞌo chcua xnan neꞌ escriba nu mdoꞌo quichen Jerusalén.
\v 2 Xa naꞌan neꞌ siꞌyana yu taꞌa ndaꞌan Jesús nchcu yu, loꞌ a ngunanꞌ yu tsañaꞌan nu ntsuꞌhui chaꞌ ꞌin neꞌ, mdaa neꞌ quiꞌya siꞌya chaꞌ canꞌ.
\v 3 Siꞌyana tsalca neꞌ fariseo loꞌo nchgaa la ñaꞌan neꞌ judio, tla ꞌa nguia nchaꞌan neꞌ nchgaa chaꞌ nu mxnu scua nten cula ꞌin neꞌ, loꞌ a nchcu neꞌ chaꞌ a culo nducua ñaanꞌ neꞌ.
\v 4 Xa nguila neꞌ ndyiꞌan neꞌ seꞌen nchca quiyaꞌ, a nchcu neꞌ chaꞌ a culo nducua ñaanꞌ neꞌ. A cunta quiꞌan la chaꞌ nu tiꞌ nxuꞌhua seꞌen neꞌ, ñaꞌan nchca tiꞌ scasca loo na nu njyiꞌan neꞌ, vaso, quitonꞌ, ta castyo chcuan, a cunta loꞌo quiꞌñan.
\v 5 Neꞌ fariseo loꞌo neꞌ escriba mñichaꞌ neꞌ ꞌin Jesús: ¿Ñi chaꞌ ta yu taꞌa ndaꞌan, a nꞌni cunta yu ñaꞌan chaꞌ nu mxnu scua nten cula ꞌin na, loꞌ a ñaanꞌ yu xa nchcu yu?
\v 6 Mxcuen ñi ꞌin neꞌ: ꞌUn neꞌ nu a ñi ndiꞌin chaꞌ ꞌin, chaꞌ ñi ca ñaꞌan chaꞌ nu mxiycuiꞌ Ndiose ꞌin yu Isaía chaꞌ nu ꞌin um, xa juin yu: —Nten re nꞌni tnu neꞌ ꞌñan loꞌo tuꞌhua ti neꞌ, una cusya ꞌin neꞌ tijyoꞌ nchca na siinꞌ.
\v 7 Cua chaꞌ ti nꞌni tnu neꞌ ꞌñan, siꞌyana chaꞌ nu ndloꞌo neꞌ lca na chacuiꞌ chaꞌ nu ndlo que neꞌ, loꞌ nchcuiꞌ neꞌ siꞌyana chaꞌ ꞌin Ndiose lca na—.
\v 8 Una nxnu caꞌan chonꞌ um chaꞌ nu ngulo Ndiose tñan, loꞌ nde tsuꞌhue lati nguia nchaꞌan um chaꞌ nu cuaꞌ ntsuꞌhui ꞌin nten, ñaꞌan nchca tiꞌ njyiꞌan um scasca loo na nu ndlyaꞌ um, ta quitonꞌ, uta vaso, a cunta quiꞌan ꞌa chaꞌ tiꞌ nxuꞌhua seꞌen um.
\v 9 Tiꞌ juin la ñi ꞌin neꞌ: ꞌUn ndlo tsoꞌ um chaꞌ nu ngulo Ndiose tñan, seꞌen nu tyon loo chaꞌ nu cuaꞌ ntsuꞌhui ꞌin um.
\v 10 Nde sca chaꞌ nu ycuiꞌ Moisé: —Cuꞌni suun um ꞌin um tloo sti um loꞌo jyiꞌan um—, loꞌ —nu taja ꞌin sti loꞌo jyiꞌan tyiꞌo tñan caja canꞌ—.
\v 11 Una ꞌun nchcuiꞌ um chaꞌ sca yu quiꞌyu nu ndiꞌin na ꞌin, loꞌ tsaloo chcuiꞌ ti yu loꞌo nten cula ꞌin yu, siꞌyana na nu ndiꞌin ꞌin yu lca na Corbán (chaꞌ re nchca tiꞌ na nchcuiꞌ na siꞌyana cuaꞌ lca na sca lcuan ꞌin Ndiose),
\v 12 loꞌ ndiyatoꞌo a ndaa um chaꞌ cuiyaꞌ tiꞌ ta yaaꞌ yu ꞌin nten cula ꞌin yu.
\v 13 Cuañaꞌan ndlo tsoꞌ um ychaꞌ Ndiose, ñaꞌan ca siꞌyana tsa quiñan um loꞌo chaꞌ nu cuaꞌ ntsuꞌhui ꞌin um. Cuiꞌ cuañaꞌan ljyan yꞌni um loꞌo scasca la chaꞌ.
\v 14 Xacanꞌ msiꞌya Jesús ꞌin nten canꞌ, loꞌ juin ñi: Nchgaa um quine ꞌin um, loꞌ quiꞌya um chaꞌ tiyaa chaꞌ nu chcuinꞌ.
\v 15 Siꞌi siꞌya chaꞌ nchcu, canꞌ chaꞌ a luhui cusya ꞌin neꞌ, cuiꞌ ca nu siꞌya chaꞌ nu ndyiꞌo niꞌ cusya ꞌin neꞌ, canꞌ nu nꞌni cooꞌ ꞌin neꞌ.
\v 16 Nchgaa nu ndon nscan chaꞌ re, quiꞌya cunta ꞌin na.
\v 17 Xacanꞌ mdoꞌo tsoꞌ Jesús loꞌo yu taꞌa ndaꞌan ñi lja nten quiꞌan canꞌ, loꞌ yten jun sca naꞌan, canꞌ mñichaꞌ yu ꞌin ñi, chaꞌ ñaꞌan ndyiꞌo chaꞌ nu ycuiꞌ ñi canꞌ.
\v 18 Loꞌ juin ñi ꞌin yu: ¿Ta na loꞌo um nchcun chaꞌ tiyaa ꞌin um? ¿Ta na a ndyiꞌya um cunta siꞌyana siꞌi siꞌya chaꞌ nchcu, nchca cooꞌ cusya ꞌin neꞌ?
\v 19 Siꞌi niꞌ cusya ꞌin neꞌ ndyiꞌan na nu nchcu neꞌ, cuiꞌ ca nu nde niꞌ neꞌ nguiaa na loꞌ ndyijyin ti na. Loꞌo chaꞌ nu ycuiꞌ ñi re ca jlyo tiꞌ na siꞌyana nchgaa loo na tca cu na.
\v 20 Loꞌ tiꞌ juin la ñi: Chaꞌ nu ndyiꞌo niꞌ cusya ꞌin nten, canꞌ na nu nꞌni cooꞌ ꞌin neꞌ.
\v 21 Siꞌyana niꞌ cusya ꞌin neꞌ ndyiꞌo nchgaa chaꞌ tiyaa ngunanꞌ, chaꞌ nu nguiten yuꞌhui neꞌ loꞌo cuilyiꞌo nten uta loꞌo neꞌ ycuiꞌ ti, chaꞌ nu ndujui taꞌa neꞌ,
\v 22 chaꞌ cunan, nu nchcui tiꞌ neꞌ chaꞌ cuilyiyaꞌ, chaꞌ nducunꞌ, chaꞌ cuiñi, nu a ndii tiꞌ neꞌ chaꞌ jyiꞌo, chaꞌ njñan tiꞌ, chaꞌ nu nchcuiꞌ caꞌan taꞌa neꞌ, chaꞌ siyeꞌ, loꞌo chaꞌ nu nꞌni neꞌ cuaꞌ ñaꞌan ti.
\v 23 Nchgaa chaꞌ re ndyiꞌo niꞌ cusya ꞌin neꞌ, canꞌ nu nꞌni cooꞌ ꞌin neꞌ.
\s Chaꞌ ꞌin neꞌ sirofenicia
\p
\v 24 Xacanꞌ mdoꞌo Jesús nguiaa ñi seꞌen lyiꞌya loo quichen Tiro loꞌo Sidón, canꞌ yten ñi sca naꞌan, ncua tiꞌ ñi siꞌyana a tucui nu ca jlyo tiꞌ la mdiyaa ñi, una a ncua chuꞌhui cutsiꞌ ñi.
\v 25 Sca neꞌ cunaꞌan nu ntsuꞌhui cuiꞌin xaꞌan ꞌin sñeꞌ, xa ynan neꞌ chaꞌ siꞌyana mdiyaa ñi canꞌ, cuiꞌ xaa mdiyaa neꞌ seꞌen ndon ñi, loꞌ mdyiꞌya xtyinꞌ neꞌ tloo ñi.
\v 26 Lca neꞌ sca neꞌ griego nu ncua tyi Sirofenicia, mjñan neꞌ chaꞌ tsuꞌhue ꞌin ñi siꞌyana culo ñi cuiꞌin xaꞌan nu ntsuꞌhui ꞌin sñeꞌ neꞌ.
\v 27 Una mxcuen Jesús ꞌin neꞌ: Tyaa yaꞌ cu sñeꞌ nten culo nducua la, siꞌyana a ntsuꞌhui chaꞌ caja nu culyaa jaslya nu ntsuꞌhui tuyaaꞌ sñeꞌ neꞌ, loꞌ taa ꞌin na cu xniꞌ.
\v 28 Mxcuen neꞌ ꞌin ñi: Chaꞌ ñi ꞌin um Ñi Xꞌnan hua, una loꞌo xniꞌ nu ndlyu nde niꞌ msa, nxoꞌ ycu ꞌin ta nu nguilo tuꞌhua nu xuhue ti.
\v 29 Xacanꞌ juin Jesús ꞌin neꞌ: Tsuꞌhue ñaꞌan nu ycuiꞌ, quia lya, cuiꞌin xaꞌan canꞌ cuaꞌ mdyiꞌo ꞌin sñeꞌ.
\v 30 Xa nguila neꞌ la naꞌan ꞌin neꞌ, nguija lyoo neꞌ ꞌin sñeꞌ neꞌ nscua loo quiꞌñan, cuaꞌ mdyiꞌo cuiꞌin xaꞌan canꞌ ꞌin.
\s Xa mchca sca yu cuꞌun nu yja nchcuiꞌ
\p
\v 31 Xacanꞌ mdoꞌo Jesús quichen Tiro canꞌ, mdijin ñi quichen Sidón, loꞌ xa cuaꞌ mxisti ñi seꞌen lca Decápolis, xacanꞌ nguila ñi tuꞌhua tiyoꞌ Galilea.
\v 32 Canꞌ mdiya loꞌo neꞌ ꞌin sca yu cuꞌun nu yja nchcuiꞌ seꞌen ndon Jesús, mjñan neꞌ chaꞌ tsuꞌhue ꞌin ñi siꞌyana tyiꞌin tyaa ñi yaaꞌ ñi ꞌin yu.
\v 33 Lja nten canꞌ mdoꞌo loꞌo Jesús ꞌin yu ntan ti, yjoꞌ yaaꞌ ñi tunscan yu, nguloꞌo siyeꞌ ñi, loꞌ ylaꞌ ñi loo tseꞌ yu,
\v 34 xacanꞌ mxinaꞌan ñi nde niꞌ cuaan, loꞌ xiꞌin ꞌa nguiaan tiꞌ ñi, loꞌ juin ñi ꞌin yu: Efata. Chaꞌ re nchca tiꞌ na nchcuiꞌ na: Quila na.
\v 35 Cuiꞌ xaa nguila tunscan yu loꞌ mchca tsuꞌhue tseꞌ yu, loꞌ mdyisnan ycuiꞌ tsuꞌhue yu.
\v 36 Xacanꞌ ngulo ñi tñan ꞌin nten canꞌ siꞌyana a chcuiꞌ neꞌ loꞌo ñi sca tucui chaꞌ nu yatoꞌo. Una siyaꞌ lyee la ngulo ñi tñan ꞌin neꞌ siꞌyana a chcuiꞌ neꞌ, nde lyee lati mxicune neꞌ chaꞌ canꞌ.
\v 37 Nten canꞌ ndyijyin yaꞌ yuhue tiꞌ neꞌ ꞌin ñi loꞌ nchcuiꞌ neꞌ: Nchgaa chaꞌ nu nꞌni ñi tsuꞌhue na, hasta loꞌo nu cuꞌun loꞌ nꞌni ñi chaꞌ nguila tunscan, nu a nchca chcuiꞌ loꞌ nꞌni ñi chaꞌ nchcuiꞌ. 
\c 8
\s Mxicu Jesús jacua mii yu quiꞌyu
\p
\v 1 Yatoꞌo sca tsaan nguioꞌ tiꞌin quiꞌan ꞌa nten, loꞌ a loꞌo ꞌa na nu cu neꞌ, xacanꞌ msiꞌya Jesús ꞌin yu taꞌa ndaꞌan ñi, loꞌ juin ñi ꞌin yu:
\v 2 ꞌTnan ꞌa tinꞌ ꞌin nten re, siꞌyana cuaꞌ nchca tsa cucha ndiꞌin neꞌ loꞌon, loꞌ a loꞌo ꞌa na nu cu neꞌ.
\v 3 Chaꞌ culon tñan ꞌin neꞌ quiaa neꞌ la naꞌan ꞌin neꞌ, loꞌ siꞌyana a nchca cu neꞌ, tsatoꞌo ñaꞌan tiꞌ neꞌ tucueen quiaa neꞌ, siꞌyana ntsuꞌhui neꞌ re tijyoꞌ mdoꞌo neꞌ.
\v 4 Yu taꞌa ndaꞌan ñi mxcuen ꞌin ñi: ¿Ñaꞌan ta cuꞌni na caja jaslya nu cu neꞌ re, loꞌ a tucui ndiꞌin ca re?
\v 5 Xacanꞌ mñichaꞌ ñi ꞌin yu: ¿Ñi ncua ta jaslya ndaꞌan loꞌo um? Mxcuen yu ꞌin ñi: Tsa cati ti na.
\v 6 Ngulo ñi tñan ꞌin nten canꞌ siꞌyana sten tucua neꞌ lyuu. Msñi ñi taꞌa cati jaslya canꞌ, mdyaa ñi xuꞌhue ꞌin Ndiose, msuꞌhue ñi ꞌin na, loꞌ mdaa ñi ꞌin na ꞌin yu taꞌa ndaꞌan ñi, canꞌ yu nu cuaꞌ mtsa ꞌin na ꞌin nchgaa nten canꞌ.
\v 7 A cunta ndaꞌan loꞌo yu tucua snan cula suhue ti, ncuan ñi ꞌin ꞌin, loꞌ ngulo ñi tñan ꞌin yu siꞌyana quitsa ꞌin lja nten canꞌ.
\v 8 Nchgaa neꞌ ycu neꞌ tsayaꞌ ngulaꞌ tiꞌ neꞌ. Loꞌ tiꞌ mxoꞌ yu cha cati xcuhui na nu nguinu ycu neꞌ.
\v 9 Neꞌ nu ycu canꞌ ndiyaa neꞌ jacua mii neꞌ. Xacanꞌ mslaꞌ taꞌa ñi loꞌo neꞌ.
\v 10 Cuiꞌ xaa yten ñi niꞌ yca naꞌan loꞌo yu taꞌa ndaꞌan ñi, mdoꞌo jun nguiaa jun seꞌen lca Dalmanuta.
\s Mjñan neꞌ fariseo chaꞌ nu tnu ꞌin Jesús
\p
\v 11 Xacanꞌ mdiyaa tucua snan neꞌ fariseo seꞌen ndon Jesús, loꞌ ncua tiꞌ neꞌ siꞌyana cuꞌni ñi sca chaꞌ nu tnu nu tyiꞌo nde niꞌ cuaan, ñaꞌan ca siꞌyana suꞌhua neꞌ quiꞌya ꞌin ñi.
\v 12 Xacanꞌ xiꞌin ꞌa nguiaan tiꞌ ñi, loꞌ juin ñi: ¿Ñi chaꞌ nten re chacuiꞌ chaꞌ nu tnu njñan neꞌ ꞌñan? Una chaꞌ ñi chcuinꞌ loꞌo um, ñi sca chaꞌ nu tnu loꞌ a cuꞌnin tloo neꞌ.
\v 13 Ngulaꞌ ton ñi ꞌin neꞌ, loꞌ xiyaꞌ yten jun niꞌ yca naꞌan canꞌ, mdoꞌo jun nguiaa jun nde xca tsoꞌ tiyoꞌ.
\s Chaꞌ ꞌin neꞌ fariseo
\p
\v 14 Yu taꞌa ndaꞌan ñi ngujlya tiꞌ yu cuiꞌya yu na nu cu jun, seen scati jaslya ndaꞌan loꞌo yu niꞌ yca naꞌan canꞌ.
\v 15 Msuꞌhua tiyaa ñi ꞌin yu, loꞌ juin ñi: Xñi um cunta ꞌin um loꞌo suun jaslya ꞌin neꞌ fariseo, loꞌo nu ꞌin yu Herode.
\v 16 Scasca yu nchcuiꞌ yu: Cuiꞌ siꞌyana a lyiꞌya na jaslya, canꞌ chaꞌ nchcuiꞌ ñi cuañaꞌan.
\v 17 Nguꞌya Jesús cunta chaꞌ nchcuiꞌ yu, loꞌ juin ñi ꞌin yu: ¿Ñi chaꞌ nchcuiꞌ um siꞌyana a loꞌo jaslya lyiꞌya um? ¿Ta xtyi tiꞌ a chcanꞌ ꞌin um loꞌ a ndyiꞌya um cunta? ¿Ta tiꞌ nchcun ꞌa chaꞌ tiyaa ꞌin um?
\v 18 Ndiꞌin quiloo um loꞌ a chcanꞌ ꞌin um, nducua tunscan um loꞌ a ne ꞌin um. ¿Ta na a ndiya yuꞌhui tiꞌ um ñaꞌan mꞌnin?
\v 19 Xa msuꞌhuen caꞌyu jaslya, loꞌ tsa caꞌyu mii nten ycu ꞌin na, ¿ñi ncua xcuhui tiꞌ mꞌni chaꞌan um loꞌo na nu nguinu ycu neꞌ canꞌ?
\s Mxcuen yu ꞌin ñi: Cha tichcua na.
\p
\v 20 Ticuiꞌ cuañaꞌan xa msuꞌhuen cati jaslya nu ycu jacua mii nten canꞌ, ¿ñi ncua xcuhui na tiꞌ mxoꞌ um? Mxcuen yu ꞌin ñi: Cha cati na.
\v 21 Loꞌ juin ñi ꞌin yu: ¿Ta cuiꞌ ñaꞌan ti a ndyiꞌya um chaꞌ tiyaa?
\s Mchca sca yu cuityinꞌ quichen Betsaida
\p
\v 22 Xa mdiyaa jun quichen Betsaida, mdiya loꞌo neꞌ ꞌin sca yu cuityinꞌ seꞌen ndon Jesús, loꞌ mjñan neꞌ chaꞌ tsuꞌhue ꞌin ñi siꞌyana culaꞌ ñi ꞌin yu.
\v 23 Xacanꞌ msñi ñi yaaꞌ yu cuityinꞌ canꞌ, mdoꞌo loꞌo ñi ꞌin yu nde tuꞌhua quichen, canꞌ nguloꞌo siyeꞌ ñi chcuaa tsoꞌ quiloo yu, mdiꞌin tyaa ñi yaaꞌ ñi ꞌin yu, loꞌ mñichaꞌ ñi ꞌin yu chaꞌ cuaꞌ chcanꞌ chinꞌ ꞌin yu.
\v 24 Mxinaꞌan yu, loꞌ juin yu: Chcanꞌ ꞌñan seꞌen nguilyu nten, loꞌ cuaꞌ lca na yca ndaꞌan na xqueꞌ tinꞌ.
\v 25 Xiyaꞌ mdiꞌin tyaa ñi yaaꞌ ñi quiloo yu, ngulo ñi tñan ꞌin yu siꞌyana xinaꞌan tsuꞌhue ca yu, loꞌ nguila xaa quiloo yu, tijyoꞌ loo ncua chcanꞌ ꞌin yu.
\v 26 Ngulo ñi tñan ꞌin yu siꞌyana quiaa yu nde ñaꞌan ꞌin yu, loꞌ juin ñi: Una a sten loo quichen, ñi a chcuiꞌ loꞌo ñi sca tucui chaꞌ nu yatoꞌo ꞌin.
\s Ycuiꞌ la yu Tyo tucui ca lca Jesús
\p
\v 27 Chonꞌ ndeꞌen canꞌ mdoꞌo Jesús loꞌo yu taꞌa ndaꞌan ñi, nguiaa jun nde quichen seꞌen lca Cesarea de Filipo. Tucueen nguiaa jun mñichaꞌ ñi ꞌin yu: ¿Tucui ta lcan nanꞌ nchcuiꞌ nten?
\v 28 Mxcuen yu ꞌin ñi: Ntsuꞌhui nu nchcuiꞌ siꞌyana lca um yu Xuhua nu mducua tya ꞌin nten, xca nu nchcuiꞌ siꞌyana lca um Elía, a cunta ntsuꞌhui nu nchcuiꞌ lca um scasca la yu nu mxiycuiꞌ Ndiose ꞌin cuaꞌ sꞌni.
\v 29 Xacanꞌ juin ñi ꞌin yu: Loꞌ ꞌun jan ñi, ¿tucui ta lcan nanꞌ xqueꞌ tiꞌ um? Mxcuen yu Tyo ꞌin ñi: ꞌUn lca um ñi nu lca Cristo.
\v 30 Una ngulo ñi tñan ꞌin nchgaa yu canꞌ, siꞌyana a chcuiꞌ yu loꞌo ñi sca tucui ti ca lca ñi.
\s Ycuiꞌ Jesús siꞌyana ntsuꞌhui chaꞌ caja ñi
\p
\v 31 Mdyisnan nguloꞌo ñi ꞌin yu siꞌyana Yu Quiꞌyu nu Mdoꞌo nde niꞌ Cuaan, ntsuꞌhui chaꞌ tyijyin ñi nu tiꞌi lyee yaꞌ, juin ñi siꞌyana quiꞌyu cula loꞌo yu nu ndlo ca tñan niꞌ lyaa, loꞌo neꞌ escriba, ntsuꞌhui chaꞌ xcuan tloo neꞌ ꞌin ñi, loꞌ cujui neꞌ ꞌin ñi, una nu cuaꞌ ca snan tsaan ntsuꞌhui chaꞌ tyiquiꞌo ñi.
\v 32 Mtsaꞌ la ñi ꞌin yu chaꞌ canꞌ. Una yu Tyo ngulo tsoꞌ yu ꞌin ñi, loꞌ mdyisnan ngusun loꞌo yu ꞌin ñi.
\v 33 Una Jesús mxinaꞌan ñi seꞌen ndon nchgaa la ñaꞌan yu taꞌa ndaꞌan ñi, loꞌ ngusun loꞌo ñi ꞌin yu Tyo canꞌ: Laxaꞌan, tyiꞌo tsoꞌ siinꞌ, siꞌyana a ndaꞌan loꞌo chaꞌ tiyaa ꞌin Ndiose, cuiꞌ ca nu ndaꞌan loꞌo chaꞌ tiyaa ꞌin nten chendyu.
\v 34 Xacanꞌ msiꞌya ñi ꞌin yu taꞌa ndaꞌan ñi tsatlyu loꞌo nten canꞌ, loꞌ juin ñi: Chaꞌ ta ndeꞌen nu nchca tiꞌ chcui nchaꞌan ꞌñan, ꞌni chaꞌ jlya tiꞌ ꞌin ticuiiꞌ, loꞌ nu chcui nchaꞌan ꞌñan, tyaa canꞌ ꞌin siyaꞌ ti.
\v 35 Loꞌ nchgaa nu ñan tiꞌ culo laa ꞌin ticuiiꞌ, tsatoꞌo quinanꞌ canꞌ, una nchgaa nu tyaa ꞌin siꞌya chaꞌ ꞌñan, loꞌo siꞌya chaꞌ tsuꞌhue ꞌin Ndiose, canꞌ nu tyiꞌo laa.
\v 36 Siꞌyana, ¿ñi canan chuꞌhui ꞌin neꞌ cuꞌni ꞌin neꞌ ñaꞌaan chendyu, loꞌ nde quinanꞌ cusya ꞌin neꞌ?
\v 37 ¿Ñi na tca cuꞌni neꞌ nu tiꞌ chcuan neꞌ cusya ꞌin neꞌ xiyaꞌ?
\v 38 Chaꞌ ndeꞌen nu xijyiꞌo tiꞌ loꞌon tloo nten nducunꞌ re, neꞌ quiꞌya chendyu, a cunta chaꞌ xijyiꞌo tiꞌ loꞌo chaꞌ nu nchcuinꞌ, loꞌon nanꞌ, Yu Quiꞌyu nu Mdoꞌo nde niꞌ Cuaan, xijyiꞌo tinꞌ loꞌo canꞌ xa yaan xiyaꞌ loꞌo chaꞌ cuiyaꞌ ꞌin Stin, loꞌo angujle nu luhui ꞌin ñi. 
\c 9
\p
\v 1 Loꞌ tiꞌ ycuiꞌ la ñi loꞌo yu: Nu chaꞌ ñi cunen loꞌo um, ntsuꞌhui nu ndon re a caja chaꞌ siꞌi culo nducua la ñaꞌan sca chaꞌ cuiyaꞌ nu tlyu ꞌin Ndiose ñaꞌan ntsuꞌhui chaꞌ culo ñi tñan.
\s Xa mchaꞌan ñaꞌan Jesús
\p
\v 2 Xa cuaꞌ mdaꞌa scua tsaan canꞌ, mdoꞌo loꞌo Jesús ꞌin yu Tyo, yu Jacobo, loꞌo yu Xuhua, sca loo quiꞌya cuaan seꞌen ycuiꞌ ti jun, canꞌ tloo naꞌan yu mchaꞌan ñaꞌan ñi.
\v 3 Steꞌ ñi nguinu nduhui mten tsuꞌhue ñaꞌan na, ñi teꞌ nu tsuꞌhue lati nguiten, loꞌ a nchcua na ñaꞌan mten steꞌ ñi.
\v 4 Tloo naꞌan yu nguꞌya ton yu ncua naan Elía loꞌo Moisé, loꞌ ndaa jun chaꞌ loꞌo Jesús.
\v 5 Xacanꞌ juin yu Tyo ꞌin Jesús: Ñi Bstro, tsuꞌhue ꞌa siꞌyana ndiꞌin hua re, nde tñan hua snan quisin, sca na tyiꞌin um, xca na tyiꞌin Moisé, loꞌ xca na tyiꞌin Elía.
\v 6 Ñi a ngujlyo ꞌa tiꞌ yu, ñi chaꞌ chcuiꞌ yu siꞌyana scañaꞌan ti ndiꞌin ytsen yu.
\v 7 Xacanꞌ nguꞌya tiꞌin coo loꞌ ngoꞌo yuꞌhui na seꞌen ndon jun, loꞌ niꞌ coo canꞌ ngune ycuiꞌ sca nu ycuiꞌ: Nde Sñenꞌ nu taꞌa lati ꞌñan, quine ꞌin um chaꞌ nu chcuiꞌ.
\v 8 Xa mxinaꞌan yu a tucui ꞌa nu ncua chcanꞌ, xca ti Jesús tiꞌ ndon ñi.
\v 9 Xa cuaꞌ mdoꞌo jun loo quiꞌya canꞌ yaan jun, ngulo ñi tñan ꞌin yu siꞌyana a chcuiꞌ yu loꞌo ñi sca tucui chaꞌ nu naꞌan yu, cuiꞌ ca nu xa cuaꞌ mdyiquiꞌo Yu Quiꞌyu nu Mdoꞌo nde niꞌ Cuaan la xacanꞌ tca chcuiꞌ yu chaꞌ re.
\v 10 Yuꞌhui cunan chaꞌ re niꞌ cusya ꞌin yu, loꞌ scasca yu ñichaꞌ taꞌa yu, chaꞌ ñaꞌan ntsuꞌhui chaꞌ tyiquiꞌo neꞌ cuaꞌ ngujui.
\v 11 Mñichaꞌ yu ꞌin ñi: ¿Ñi chaꞌ ta nchcuiꞌ neꞌ escriba, siꞌyana yu nu ncua naan Elía ntsuꞌhui chaꞌ caan yu culo nducua la loo chendyu re?
\v 12 Mxcuen ñi ꞌin yu: Chaꞌ ñi siꞌyana Elía ntsuꞌhui chaꞌ caan culo nducua la, cuiꞌ yu ntsuꞌhui chaꞌ cuꞌni chuꞌhue yu nchgaa loo chaꞌ. ¿Ñi chaꞌ ta nchcuiꞌ quityi ꞌin Ndiose siꞌyana Yu Quiꞌyu nu Mdoꞌo nde niꞌ Cuaan ntsuꞌhui chaꞌ tyijyin ñi nu tiꞌi, loꞌ caja nu cuꞌni lyiꞌo ꞌtnan ꞌin ñi?
\v 13 Una cunen loꞌo um siꞌyana yu Elía cuaꞌ yaan yu, loꞌ jui nu mꞌni lyiꞌo ꞌin yu tsañaꞌan nu ncua tiꞌ neꞌ, cuiꞌ chaꞌ nu cuaꞌ nguinu scua chaꞌ ꞌin yu.
\s Mchca sca yu un ntsuꞌhui cuiꞌin xaꞌan ꞌin
\p
\v 14 Xa nguila jun seꞌen ndiꞌin nchgaa la ñaꞌan yu taꞌa ndaꞌan ñi, naꞌan ñi siꞌyana quiꞌan ꞌa nten msuꞌhua loꞌo ꞌin yu, loꞌ naꞌan ñi siꞌyana neꞌ escriba lyee nchcuiꞌ tyijyin neꞌ loꞌo yu.
\v 15 Nchgaa nten canꞌ yuhue ꞌa tiꞌ neꞌ ꞌin ñi xa nguila ñi, ndla ndsa ti ya ycuiꞌ chaꞌ neꞌ ꞌin ñi.
\v 16 Mñichaꞌ ñi ꞌin yu taꞌa ndaꞌan ñi: ¿Ñi chaꞌ siꞌya nchcuiꞌ tyijyin um loꞌo nten re?
\v 17 Lja canꞌ ndon sca nu ycuiꞌ loꞌo Jesús: ꞌUn ñi nu lca Bstro, nde ljyan loꞌon sñenꞌ nu ntsuꞌhui cuiꞌin xaꞌan ꞌin, loꞌ mxnu cuꞌun na ꞌin yu.
\v 18 La ñaꞌan ti ndon yu nxñi cuiꞌin ꞌin yu, nxitlyu na ꞌin yu, nchcua ngooꞌ tuꞌhua yu, nchcu lyiꞌya yu, loꞌ nguia nguityi yu. Cuaꞌ ycuinꞌ loꞌo yu taꞌa ndaꞌan um, siꞌyana culo yu cuiꞌin xaꞌan ntsuꞌhui ꞌin sñenꞌ, loꞌ a ncua ꞌin yu.
\v 19 Xacanꞌ juin Jesús: ꞌUn lca um neꞌ nu a ndiya quiꞌan tiꞌ, ¿tsala ta xaa cuiꞌ ti ꞌñan nducua tloo um? ¿Tsala ta xaa ntsuꞌhui chaꞌ ta loon ꞌin um? Quian loꞌo um ꞌin yu.
\v 20 Xacanꞌ mdiya loꞌo neꞌ ꞌin yu lyoꞌ ti canꞌ seꞌen ndon ñi, una xa naꞌan cuiꞌin xaꞌan canꞌ ꞌin Jesús, lyee lati msñi na ꞌin yu tsayaꞌ mxitlyu na ꞌin yu, mxita yuu na ꞌin yu, loꞌ mducua ngooꞌ tuꞌhua yu.
\v 21 Mñichaꞌ Jesús ꞌin sti yu: ¿Tiꞌ ñi xaa nchca ꞌin yu cuañaꞌan? Mxcuen yu ꞌin ñi: Tiꞌ lyoꞌ yu.
\v 22 Lyee ꞌa nxitlyu suꞌhua na ꞌin yu loo quiiꞌ loꞌo loo tyiꞌa, nu nchca tiꞌ na cujui na ꞌin yu. Chaꞌ ꞌun ndeꞌen la ñaꞌan tca cuꞌni um, ñaꞌan ꞌtnan tiꞌ um ꞌin hua loꞌ ta yaaꞌ um ꞌin hua loꞌo yu.
\v 23 Xacanꞌ juin Jesús ꞌin yu: Chaꞌ ꞌun tsa quiꞌan tiꞌ um ꞌin Ndiose nchgaa chaꞌ tca, siꞌyana a sca chaꞌ tucui ꞌin nu ndiya quiꞌan tiꞌ ꞌin ñi.
\v 24 Cuiꞌ xaa ycuiꞌ cueen sti yu: Ndiya quiꞌan tinꞌ, una tya yaaꞌ um ꞌñan siꞌyana lyee la tsa quiꞌan tinꞌ.
\v 25 Xa naꞌan Jesús siꞌyana lyee nguilo tiꞌin nten canꞌ, ngusun loꞌo ñi ꞌin cuiꞌin xaꞌan canꞌ: Cuiꞌin, nuꞌhuin nu mxnu cuꞌun ꞌin yu re, nanꞌ culon tñan ꞌin siꞌyana tyiꞌo, loꞌ a xitucui ꞌa.
\v 26 Cuiꞌ ñaꞌan lcaa msiꞌya yja yu, mscuin tiꞌin na ꞌin yu loꞌo juesa xa mdyiꞌo na ꞌin yu, ngulaꞌ sti na ꞌin yu ñaꞌan nchca tiꞌ sca nu ngujui. Scasca neꞌ nchcuiꞌ neꞌ siꞌyana cuaꞌ ngujui yu.
\v 27 Una Jesús msñi ñi yaaꞌ yu loꞌ mxiton ñi ꞌin yu.
\v 28 Xa cuaꞌ yten Jesús ñaꞌan, yu taꞌa ndaꞌan ñi mñichaꞌ yu ꞌin ñi sca cunta: ¿Ñi chaꞌ huareꞌ a ncua ꞌin hua culo hua cuiꞌin xaꞌan cua?
\v 29 Loꞌ juin ñi ꞌin yu: Sca cuiꞌin nu cuañaꞌan a ndyijyi ñaꞌan tyiꞌo canꞌ, chaꞌ siꞌi culo nducua chcuiꞌ lyiꞌo na ꞌin Ndiose loꞌ cuꞌni na ayuna.
\s Xiyaꞌ ycuiꞌ Jesús ñaꞌan ntsuꞌhui chaꞌ caja ñi
\p
\v 30 Xacanꞌ mdoꞌo jun nguiaa jun seꞌen lca Galilea, loꞌ Jesús ncua tiꞌ ñi siꞌyana a tucui nu ca jlyo tiꞌ la tucueen nguiaa jun,
\v 31 siꞌyana ndloꞌo ñi ꞌin yu taꞌa ndaꞌan ñi, loꞌ nchcuiꞌ ñi: Nanꞌ, Yu Quiꞌyu nu Mdoꞌo nde niꞌ Cuaan, caja nu tyaa ꞌñan tuyaaꞌ nten chendyu nu cujui ꞌñan, una nu cuaꞌ ca snan tsaan tyiquiꞌon.
\v 32 Yu taꞌa ndaꞌan ñi a nguꞌya yu chaꞌ tiyaa chaꞌ nu ycuiꞌ ñi, loꞌ a msti tiꞌ yu ñichaꞌ yu ꞌin ñi.
\s ¿Tucui ca nu ndon loo la?
\p
\v 33 Xa nguila jun quichen Capernaum, loꞌ xa cuaꞌ ndiꞌin jun ñaꞌan, mñichaꞌ ñi ꞌin yu taꞌa ndaꞌan ñi: ¿Ñi na siꞌya lyee ꞌa ljyan ycuiꞌ tyijyin um tucueen?
\v 34 A mxcuen ꞌa yu ꞌin ñi, siꞌyana jyiꞌo tiꞌ yu ñaꞌan ljyan ycuiꞌ yu, chaꞌ ti ñaꞌan yu lca yu nu ndon loo lati.
\v 35 Xacanꞌ yten tucua ñi loꞌ msiꞌya ñi ꞌin taꞌa tichcua yu, loꞌ juin ñi: Chaꞌ ndeꞌen nu nchca tiꞌ ca nu culoo, canꞌ nu quiꞌni caꞌan ꞌin la chonꞌ, loꞌ ca nguso ꞌin nchgaa la tucui.
\v 36 Xacanꞌ msiꞌya ñi ꞌin sca nu lyoꞌ ti, loꞌ mdiꞌin tyaa ñi ꞌin tluꞌhue la seꞌen nducua jun, msuꞌhua tuscun ñi ꞌin, loꞌ juin ñi:
\v 37 Chaꞌ ntsuꞌhui nu nducuan xuꞌhue ꞌin sca nu lyoꞌ ti ñaꞌan nu re, siꞌya chaꞌ ꞌñan, cuꞌni canꞌ cunta siꞌyana ꞌñan nducuan xuꞌhue, loꞌ nu nducuan xuꞌhue ꞌñan, siꞌi tsa ꞌñan tin nducuan xuꞌhue canꞌ, cuiꞌ ca nu ꞌin ñi nu nguaꞌan tñan ꞌñan.
\s Chaꞌ ꞌin nu nguiaa tsoꞌ ꞌin Jesús
\p
\v 38 Yu Xuhua canꞌ juin ꞌin ñi: ꞌUn ñi nu lca Bstro, seꞌen yaa hua naꞌan hua sca yu nu ndlo cuiꞌin xaꞌan loꞌo chaꞌ cuiyaꞌ ꞌin um, una siꞌyana siꞌi taꞌa ndaꞌan yu ꞌin na, a mdaa hua chaꞌ cuiyaꞌ tiꞌ cuꞌni yu cuañaꞌan.
\v 39 Una Jesús juin ñi: A caꞌa um cuꞌni yu cuañaꞌan, a tucui nu tca cuꞌni chaꞌ nu tnu loꞌo chaꞌ cuiyaꞌ ꞌñan, loꞌ nde chcuiꞌ caꞌan ꞌñan.
\v 40 Siꞌyana nu a tiꞌi tiꞌ ꞌin na, cuiꞌ tsoꞌ ꞌin na nguiaa canꞌ.
\v 41 Ñaꞌan tucui ti nu taa siyaꞌ sca vaso ti tyiꞌa coꞌo um, siꞌya chaꞌ ꞌñan loꞌ siꞌyana nguiaa um tsoꞌ ꞌin Cristo, nu chaꞌ ñi cunen loꞌo um, a quinanꞌ xuꞌhue canꞌ.
\s Chaꞌ ꞌin nu nxityu ꞌin xca tucui loo quiꞌya
\p
\v 42 Chaꞌ ndeꞌen nu xityu ꞌin sca nu lyoꞌ ti re loo quiꞌya, nu ndiya quiꞌan tiꞌ ꞌñan, tsuꞌhue lati yni canꞌ scanꞌ tucui sca quee tlyu nu ndiyo neꞌ trigo, loꞌ cuun neꞌ ꞌin loo tyiꞌa tujoꞌo.
\v 43 Chaꞌ siꞌya yaaꞌ um cuꞌni um quiꞌya, siꞌyu coꞌ um ꞌin na, tsuꞌhue lati chaꞌ coꞌ yaaꞌ um sten um chendyu nu a tsatii ꞌa, loꞌ siꞌi nu chcuaa tsoꞌ yaaꞌ um tsaa um loo quiiꞌ nu a ntsuꞌhui ꞌa chaꞌ tyuhuiꞌ,
\v 44 —sca seꞌen nu a ntsuꞌhui chaꞌ tyi ycu cunuꞌ ꞌin, loꞌ ñi quiiꞌ a ntsuꞌhui ꞌa chaꞌ tiꞌ tyuhuiꞌ—.
\v 45 Chaꞌ siꞌya quiyaꞌ um cuꞌni um quiꞌya, siꞌyu coꞌ um ꞌin na, tsuꞌhue lati chaꞌ coꞌ quiyaꞌ um sten um chendyu nu a tsatii ꞌa, loꞌ siꞌi nu chcuaa tsoꞌ quiyaꞌ um caja nu xityu ꞌin um loo quiiꞌ nu a ntsuꞌhui ꞌa chaꞌ tyuhuiꞌ,
\v 46 —sca seꞌen nu a ntsuꞌhui chaꞌ tyi ycu cunuꞌ ꞌin, loꞌ ñi quiiꞌ a ntsuꞌhui ꞌa chaꞌ tyuhuiꞌ—.
\v 47 Chaꞌ siꞌya quiloo um cuꞌni um quiꞌya, culo um ꞌin na, tsuꞌhue lati chaꞌ sca tsoꞌ ti quiloo um sten um seꞌen ndlo Ndiose tñan, loꞌ siꞌi nu chcuaa tsoꞌ quiloo um caja nu xityu ꞌin um loo quiiꞌ,
\v 48 —sca seꞌen nu a ntsuꞌhui chaꞌ tyi ycu cunuꞌ ꞌin, loꞌ ñi quiiꞌ loꞌ a ntsuꞌhui ꞌa chaꞌ tyuhuiꞌ—.
\v 49 Siꞌyana cunda scaa um ntsuꞌhui chaꞌ ca tiyenꞌ um loꞌo quiiꞌ, loꞌ nchgaa ꞌni nu tiquin tucua neꞌ tloo Ndiose ca tiyenꞌ na loꞌo tejeꞌ.
\v 50 Tejeꞌ tsuꞌhue ꞌa na, una chaꞌ tyiꞌo tiyenꞌ ꞌin na, ¿ñaꞌan ta tca ca tiyenꞌ na xiyaꞌ? Canꞌ chaꞌ ꞌun taa um yaꞌ ca tiyenꞌ um, loꞌ ndyiꞌya ti tyiꞌin um scasca um.
\c 10
\s Chaꞌ ꞌin neꞌ nu ndlaꞌ tiꞌin cuilyiꞌo
\p
\v 1 Mdoꞌo Jesús nguiaa ñi, loꞌ mdiyaa ñi seꞌen lca Judea, xacanꞌ mdoꞌo caꞌan ñi xca tsoꞌ chco tlyu Jordan. Ticuiꞌ ti ñaꞌan nguioꞌ tiꞌin nten seꞌen mdiyaa ñi, loꞌ xiyaꞌ nguloꞌo ñi ꞌin neꞌ siꞌyana cuañaꞌan ntsuꞌhui chaꞌ ꞌin ñi.
\v 2 Tucua snan neꞌ fariseo mdiyaa neꞌ seꞌen ndon Jesús, sca chaꞌ canꞌ ti ꞌin neꞌ mñichaꞌ neꞌ ꞌin ñi: ¿Ta ntsuꞌhui chaꞌ cuiyaꞌ ꞌin yu quiꞌyu culaꞌ tiꞌin yu cuilyiꞌo yu?
\v 3 Mxcuen ñi ꞌin neꞌ: ¿Ñaꞌan ta ngulo Moisé tñan ꞌin um?
\v 4 Loꞌ juin neꞌ ꞌin ñi: Yu Moisé mdaa chaꞌ cuiyaꞌ ꞌin yu quiꞌyu culaꞌ tiꞌin yu cuilyiꞌo yu, una chaꞌ tsaꞌ scua sca quityi ꞌin yu.
\v 5 Loꞌ juin Jesús ꞌin neꞌ: Mdaa yu chaꞌ cuiyaꞌ canꞌ, una siꞌya chaꞌ lyeꞌ tiꞌ ꞌin um.
\v 6 Una culoo xa mtñan Ndiose chendyu, —quiꞌyu loꞌ cunaꞌan mtñan ñi.
\v 7 Canꞌ chaꞌ yu quiꞌyu ntsuꞌhui chaꞌ tyiꞌo tsoꞌ yu siiꞌ sti yu loꞌo jyiꞌan yu, loꞌ tyiꞌin yu loꞌo cuilyiꞌo yu,
\v 8 loꞌ chcuaa canꞌ sca tucui ti lca—, cuaꞌ siꞌi ꞌa tucua lca canꞌ, cuiꞌ ca nu scati lca.
\v 9 Canꞌ chaꞌ nu cuaꞌ mꞌni sca Ndiose ꞌin, a ntsuꞌhui ꞌa chaꞌ tiꞌ culaꞌ tiꞌin taꞌa.
\v 10 Xa cuaꞌ mdiyaa jun ñaꞌan, yu taꞌa ndaꞌan ñi mñichaꞌ yu ꞌin ñi siꞌya chaꞌ canꞌ.
\v 11 Mxcuen ñi ꞌin yu: Yu nu ndlaꞌ tiꞌin ꞌin cuilyiꞌo, loꞌ tyiꞌin yu loꞌo xca neꞌ cunaꞌan, quiꞌya nguiꞌni yu tloo cuilyiꞌo ca yu.
\v 12 Ticuiꞌ cuañaꞌan sca neꞌ cunaꞌan nu ndlaꞌ tiꞌin ꞌin cuilyiꞌo, loꞌ tyiꞌin neꞌ loꞌo xca yu quiꞌyu, ticuiꞌ quiꞌya nguiꞌni neꞌ.
\s Xa mcuan Jesús ꞌin nu suhue ti
\p
\v 13 Xacanꞌ mdiyan loꞌo neꞌ ꞌin nu suhue ti seꞌen nducua Jesús, siꞌyana tyiꞌin tyaa ñi yaaꞌ ñi que, una yu taꞌa ndaꞌan ñi ngusun loꞌo yu ꞌin neꞌ.
\v 14 Xa naꞌan Jesús chaꞌ canꞌ, a mdyaa tiꞌ ñi loꞌ ngusun loꞌo ñi ꞌin yu, loꞌ juin ñi: Tyaa um yaꞌ caan nu suhue ti seꞌen nducuan, loꞌ a chcui ndijin um, siꞌyana nchgaa nu cuꞌni lyoꞌ ꞌin ñaꞌan nu suhue ti re, canꞌ nu quiꞌni caꞌan ꞌin seꞌen ndlo Ndiose tñan.
\v 15 Nu chaꞌ ñi cunen loꞌo um: Sca nten chaꞌ a cuan xuꞌhue neꞌ ꞌin Ndiose tsañaꞌan nguiaa chaꞌ ꞌin nu suhue ti, a tca sten neꞌ seꞌen ndlo ñi tñan.
\v 16 Xacanꞌ msuꞌhua tuscun ñi ꞌin nu suhue ti canꞌ, mdiꞌin tyaa ñi yaaꞌ ñi que, loꞌ ncuan ñi ꞌin.
\s Chaꞌ ꞌin sca yu cuilyiyaꞌ
\p
\v 17 Xa mdoꞌo Jesús nguiaa ñi, carre ti mdoꞌo sca yu nu yan ycua ꞌin ñi, mdyiꞌya xtyinꞌ yu tloo ñi, loꞌ mñichaꞌ yu ꞌin ñi: ꞌUn ñi nu lca Bstro, lca um sca nu tsuꞌhue ꞌa, ¿ñi na tca cuꞌnin siꞌyana caja chendyu nu a tsatii ꞌa ꞌñan?
\v 18 Mxcuen Jesús ꞌin yu: ¿Ñi chaꞌ nchcuiꞌ siꞌyana lcan sca nten nu tsuꞌhue? A tucui nu tsuꞌhue, scati Ndiose tsuꞌhue ñi.
\v 19 Cuaꞌ jlyo tiꞌ ñaꞌan tñan ngulo Ndiose: —A sten yuꞌhui um loꞌo cuilyiꞌo nten, a cujui um nten, a cuꞌni um cunan, a chcuiꞌ um chaꞌ cuiñi—, ñi a cuñilyiꞌo um nten, —cuꞌni suun um ꞌin um tloo sti um loꞌo jyiꞌan um—.
\v 20 Xacanꞌ mxcuen yu ꞌin ñi: Ñi Bstro, tiꞌ lyonꞌ nxuꞌhuan seꞌen nchgaa chaꞌ re.
\v 21 Jesús mxinaꞌan ñi tloo yu loꞌ mñaꞌan ꞌtnan tiꞌ ñi ꞌin yu, loꞌ juin ñi: Ndiyaa lyijyi xca chaꞌ ꞌin, quiaa loꞌ cujuiꞌ nchgaa na nu ndiꞌin ꞌin loꞌ cutsa tñi canꞌ ꞌin nu tiꞌi, cuañaꞌan caja chaꞌ cuilyiyaꞌ ꞌin la niꞌ cuaan, xacanꞌ chcui nchaꞌan ꞌñan, siyaꞌ ti tyaa ꞌin siꞌya chaꞌ ꞌñan.
\v 22 Ndyijyin yaꞌ nguluꞌun tiꞌ yu nguiaa yu siꞌya chaꞌ nu ycuiꞌ ñi loꞌo yu, siꞌyana lyee cuilyiyaꞌ yu.
\v 23 Xacanꞌ tyiꞌiin mxinaꞌan Jesús, loꞌ juin ñi ꞌin yu taꞌa ndaꞌan ñi: Tucui ꞌa ñaꞌan sten sca yu cuilyiyaꞌ seꞌen ndlo Ndiose tñan.
\v 24 Yu taꞌa ndaꞌan ñi lyee ꞌa yuhue tiꞌ yu siꞌya chaꞌ nu ycuiꞌ ñi, una Jesús ycuiꞌ ñi xiyaꞌ: Sñenꞌ, sca nten nu nchcui tiꞌ chaꞌ cuilyiyaꞌ, tucui ꞌa ñaꞌan sten canꞌ seꞌen ndlo Ndiose tñan.
\v 25 Cuti la tyijyin sca camello quito quiyaꞌ cuxa, que ñaꞌan nu sten sca yu cuilyiyaꞌ seꞌen ndlo Ndiose tñan.
\v 26 Yu taꞌa ndaꞌan ñi lyee la yuhue tiꞌ yu, loꞌ scasca yu ñichaꞌ taꞌa yu: ¿Ti nu tca tyiꞌo laa chaꞌ na canꞌ?
\v 27 Mxinaꞌan Jesús seꞌen ndiꞌin yu, loꞌ juin ñi: Chaꞌ nu ꞌin nten, a ndyijyi ñaꞌan na, una loꞌo tsoꞌ ꞌin Ndiose nchgaa chaꞌ tca.
\v 28 Yu Tyo mdyisnan ycuiꞌ yu loꞌo ñi: Una huareꞌ cuaꞌ ngulaꞌ tiꞌin hua nchgaa na nu ndiꞌin ꞌin hua, loꞌ ljyan nchaꞌan hua ꞌin um.
\v 29 Mxcuen Jesús ꞌin yu: Nu chaꞌ ñi cunen loꞌo um, chaꞌ ndeꞌen nu xnu tucua naꞌan ꞌin, uta xnu tiꞌin taꞌa ngula, uta ꞌin sti loꞌo jyiꞌan, uta ꞌin cuilyiꞌo, uta sñeꞌ, loꞌ ta culaꞌ sti yuu seꞌen nꞌni tñan, loꞌ nu cuꞌni cuañaꞌan siꞌya chaꞌ ꞌñan, loꞌo siꞌya chaꞌ tsuꞌhue nu nchcuiꞌ Ndiose,
\v 30 nde lyee lati caja chaꞌ tsuꞌhue ꞌin loo chendyu re: Nde quinu naꞌan ꞌin canꞌ, cuañaꞌan loꞌo taꞌa ngula, loꞌo jyiꞌan, loꞌo sñeꞌ, loꞌo yuu, a cunta loꞌo scasca nu tiꞌi tyijyin canꞌ, una tiyaa xaa caja chendyu nu a tsatii ꞌa ꞌin.
\v 31 Siꞌyana quiꞌan ꞌa nu culoo cuaꞌ ñii, quinu caꞌan chonꞌ tiyaa xaa, loꞌ nu nguinu caꞌan chonꞌ, ca nu culoo tiyaa xaa.
\s Xiyaꞌ ycuiꞌ Jesús ñaꞌan ntsuꞌhui chaꞌ caja ñi
\p
\v 32 Yatoꞌo nguiaa jun tucueen Jerusalén, loꞌ nducua loo Jesús loo yu taꞌa ndaꞌan ñi, ntsuꞌhui chaꞌ tiquee yu, a cunta nguitsen yu, cuiꞌ cuañaꞌan loꞌo nchgaa la ñaꞌan nu nchcui nchaꞌan ꞌin ñi. Xiyaꞌ ngulo tsoꞌ Jesús ꞌin taꞌa tichcua yu canꞌ seꞌen ycuiꞌ ti jun, loꞌ mdyisnan mtsaꞌ ñi ꞌin yu ñaꞌan ntsuꞌhui chaꞌ tsatoꞌo ꞌin ñi.
\v 33 Loꞌ juin ñi: Ñaꞌan jan ñi, cuaꞌ ñii tiyaa na quichen Jerusalén, loꞌ Yu Quiꞌyu nu Mdoꞌo nde niꞌ Cuaan ntsuꞌhui chaꞌ quinu ñi tuyaaꞌ yu nu ndlo ca tñan niꞌ lyaa, loꞌo tuyaaꞌ neꞌ escriba, canꞌ nu culo quiꞌya ꞌin ñi seꞌen nu caja ñi, loꞌ tyaa neꞌ ꞌin ñi tuyaaꞌ neꞌ gentil.
\v 34 Canꞌ nu taa chaꞌ jyiꞌo ꞌin ñi, jyiꞌin ꞌin ñi, suꞌhua siyeꞌ neꞌ tloo ñi, loꞌ cujui neꞌ ꞌin ñi, una nu cuaꞌ ca snan tsaan tyiquiꞌo ñi.
\s Mjñan yu Jacobo loꞌo yu Xuhua sca chaꞌ ꞌin Jesús
\p
\v 35 Xacanꞌ yu Jacobo loꞌo yu Xuhua, sñeꞌ Zebedeo, mdiyaa yu cuiꞌ ti seꞌen ndon Jesús, loꞌ juin yu: ꞌUn ñi nu lca Bstro, nchca tiꞌ hua cuꞌni um sca chaꞌ tsuꞌhue loꞌo hua.
\v 36 Loꞌ juin ñi ꞌin yu: ¿Ñi na ta nchca tiꞌ um?
\v 37 Mxcuen yu ꞌin ñi: Nchca tiꞌ hua chaꞌ taa um chaꞌ cuiyaꞌ chcua hua scaa tsoꞌ siiꞌ um la seꞌen ntsuꞌhui chaꞌ culo um tñan.
\v 38 Xacanꞌ juin Jesús ꞌin yu: A jlyo tiꞌ um ñi na jñan um. Vaso nu ntsuꞌhui chaꞌ coꞌon, ¿ta tca coꞌo um ꞌin na? ¿Ta tca tyijyin um nu tiꞌi tsañaꞌan nu ntsuꞌhui chaꞌ tijin?
\v 39 Mxcuen yu ꞌin ñi: Tca ꞌin hua. Juin Jesús ꞌin yu: Chaꞌ ñi ñaꞌan nchcuiꞌ um siꞌyana sca vaso ti coꞌo um loꞌon, ticuiꞌ sca nu tiꞌi ti ntsuꞌhui chaꞌ tyijyin um loꞌon.
\v 40 Una nu chcua um tsoꞌ cueen ꞌñan loꞌo tsoꞌ ca, a ntsuꞌhui chaꞌ cuiyaꞌ ꞌñan taan ꞌin um, siꞌyana canꞌ chcua nu cuaꞌ nguaꞌan cuiyaꞌ ꞌin.
\v 41 Cha tii yu canꞌ ycuen tiqueꞌ yu loꞌo yu Jacobo loꞌo yu Xuhua, xa ngune ꞌin yu chaꞌ nu ycuiꞌ yu canꞌ.
\v 42 Una Jesús msiꞌya ñi ꞌin nchgaa yu: ꞌUn cuaꞌ jlyo tiꞌ um siꞌyana tsalca yu nu ndlo tñan quichen tnu, loꞌo chaꞌ cuiyaꞌ ꞌin yu nꞌni xꞌnan neꞌ ꞌin yu, loꞌ yu nu ndon loo ꞌin yu, tla ꞌa ndlo yu tñan ꞌin nten canꞌ.
\v 43 Una siꞌi cuañaꞌan ntsuꞌhui chaꞌ cuꞌni um, cuiꞌ ca nu chaꞌ ndeꞌen um nchca tiꞌ um ca um nu ndon loo lati, canꞌ nu tucua tloo nchgaa tucui.
\v 44 Chaꞌ ndeꞌen nu nchca tiꞌ ca nu culoo, canꞌ nu ca nguso ꞌin nchgaa tucui.
\v 45 Yu Quiꞌyu nu Mdoꞌo nde niꞌ Cuaan, a ljyaan ñi ta siꞌyana caja nu ca nguso ꞌin ñi, cuiꞌ ca nu siꞌyana ca ñi nguso ꞌin nchgaa tucui, loꞌ taa ñi chendyu ꞌin ñi siꞌyana tyiꞌo laa quiꞌan nten.
\s Chaꞌ ꞌin sca yu cuityinꞌ naan Bartimeo
\p
\v 46 Xacanꞌ mdiyaa jun quichen Jericó. Xa nde cuaꞌ mdoꞌo Jesús tuꞌhua quichen loꞌo yu taꞌa ndaꞌan ñi, quiꞌan nten nducui nchaꞌan ꞌin jun, loꞌ tuꞌhua tucueen canꞌ nducua sca yu cuityinꞌ naan Bartimeo, sñeꞌ yu Timeo, njñan yu lcuan.
\v 47 Xa ynan yu chaꞌ siꞌyana Jesús Nazaret ndijin canꞌ, xacanꞌ msiꞌya cueen yu ꞌin ñi: Jesús, Sñeꞌ ta nten ꞌin Davi, ñaꞌan ꞌtnan tiꞌ um ꞌñan.
\v 48 Scasca neꞌ ngusun loꞌo neꞌ ꞌin yu siꞌyana chcua seen tuꞌhua yu, una nde lyee la msiꞌya yu ꞌin ñi: Sñeꞌ ta nten ꞌin Davi, ñaꞌan ꞌtnan tiꞌ um ꞌñan.
\v 49 Xacanꞌ ycanꞌ ton Jesús, loꞌ ngulo ñi tñan siꞌyana xiꞌya neꞌ ꞌin yu cuityinꞌ canꞌ. Msiꞌya neꞌ ꞌin yu, loꞌ juin neꞌ: Cuꞌni tnu tiquee, tyiton siꞌyana nxiꞌya ñi ꞌin.
\v 50 Yu cuityinꞌ canꞌ cuiꞌ xaa ngulaꞌ sti yu teꞌ nguixen yu, mdyiton yu, loꞌ mdiyaa yu tloo Jesús.
\v 51 Loꞌ juin Jesús ꞌin yu: ¿Ñi na nchca tiꞌ cuꞌnin loꞌo? Yu cuityinꞌ canꞌ mxcuen yu ꞌin ñi: ꞌUn ñi nu lca Bstro, nchca tinꞌ quila xaa quiloon.
\v 52 Jesús juin ꞌin yu: Tca quiaa, cuaꞌ mchca siꞌyana ya quiꞌan tiꞌ ꞌñan. Ticuiꞌ xaa nguila xaa quiloo yu, loꞌ mducui nchaꞌan yu ꞌin Jesús seꞌen nguiaa ñi. 
\c 11
\s Xa yten Jesús quichen Jerusalén
\p
\v 1 Xa cuaꞌ tiyaa jun quichen Jerusalén, cuiꞌ ti canꞌ ndiꞌin tucua quichen suhue ti, Betfagé loꞌo Betania, loꞌ chcua canꞌ nducua quiꞌya Olivo, loꞌ Jesús ngulo ñi tñan ꞌin tucua yu taꞌa ndaꞌan ñi,
\v 2 loꞌ juin ñi ꞌin yu: Yaa um seꞌen ndiꞌin quichen lyoꞌ ti cua. Xa tiyaa um tuꞌhua quichen cua, canꞌ nchcanꞌ ton sca burru cuneꞌ ti nu a nchca tucui chcua. Xtinꞌ um ꞌin ꞌin, loꞌ quian loꞌo um ꞌin ꞌin.
\v 3 Chaꞌ ndeꞌen nu cuñichaꞌ ꞌin um ñichaꞌ nxtinꞌ um ꞌin ꞌin, xacanꞌ ljuin um ꞌin neꞌ siꞌyana ñi nu lca Xꞌnan um nchca tiꞌ ꞌin ꞌin, loꞌ cuiꞌ xaa ti caꞌan tñan ñi ꞌin ꞌin.
\v 4 Mdoꞌo yu nguiaa yu, loꞌ nguija lyoo yu burru canꞌ, nchcanꞌ caꞌan ꞌin tuꞌhua tucueen tunaꞌan lyiyaꞌ, loꞌ mxtinꞌ yu ꞌin ꞌin.
\v 5 Cuiꞌ xaa ycuiꞌ tucua snan nu ndon canꞌ: ¿Ñi chaꞌ nxtinꞌ um burru cua?
\v 6 Xacanꞌ mtsaꞌ yu ꞌin neꞌ ñaꞌan juin Jesús, la xacanꞌ mdaa neꞌ chaꞌ cuiyaꞌ ꞌin yu.
\v 7 Nguian loꞌo yu burru canꞌ seꞌen ndon Jesús, loꞌ mdiꞌin tyaa yu steꞌ yu chonꞌ ꞌin, loꞌ mducua ñi ꞌin ꞌin.
\v 8 Quiꞌan ꞌa nten mdyisnan msla sti neꞌ steꞌ neꞌ tucueen nguiaa ñi, a cunta ntsuꞌhui nu mcha stanꞌ quixinꞌ, loꞌ mdiꞌin tyaa neꞌ ꞌin na tucueen canꞌ.
\v 9 Nten nu nducua loo loꞌo nu ljyaan nde chonꞌ nchcuiꞌ cueen neꞌ: ¡—Culo laa um ꞌin hua! Tlyu chaꞌ tsuꞌhue ntsuꞌhui ꞌin ñi nu ljyaan loꞌo chaꞌ cuiyaꞌ ꞌin Ñi Xꞌnan na—.
\v 10 Tlyu chaꞌ tsuꞌhue ntsuꞌhui ꞌin ñi nu ljyaan loꞌo chaꞌ cuiyaꞌ ꞌin Davi nu ncua nten cula ꞌin na. ¡—Culo laa um ꞌin hua—, ꞌun ñi nu nducua niꞌ cuaan!
\v 11 Xacanꞌ yten Jesús loo quichen Jerusalén, loꞌ yten ñi niꞌ lyaa, mꞌni quii ñi ñaꞌaan niꞌ lyaa canꞌ. Loꞌ siꞌyana cuaꞌ msiin tsaan mxitucui ñi nde quichen Betania loꞌo taꞌa tichcua yu.
\s Xa ngulo Jesús yuhueꞌ ꞌin yca higo
\p
\v 12 Xca tsaan canꞌ mdoꞌo jun quichen Betania, loꞌ tucueen nguiaa jun nguteꞌ tiꞌ Jesús.
\v 13 Tiꞌ tijyoꞌ nguiaa ñi naꞌan ñi nducua sca yca higo nu nducua lcaꞌ, ya naꞌan ñi chaꞌ lyiꞌyu mti na. Una xa mdiyaa ñi seꞌen nducua na, a sca na lyiꞌyu loo na siꞌyana siꞌi tsaan ꞌin na, cuiꞌ ca nu lcaꞌ ti na nducua.
\v 14 Xacanꞌ juin Jesús ꞌin yca canꞌ: Ñi xca tsaan loꞌ a caja ꞌa nu cu mti nu cuiꞌyu loo. Yu taꞌa ndaꞌan ñi ngune ꞌin yu chaꞌ nu ycuiꞌ ñi.
\s Ngulo Jesús ꞌin nten niꞌ lyaa
\p
\v 15 Xa mdiyaa jun quichen Jerusalén yten Jesús niꞌ lyaa, loꞌ mdyisnan nguloo ñi ꞌin nchgaa nu nguiꞌni quiyaꞌ canꞌ. Mxiquilyu ñi msa ꞌin yu nu nxitsaꞌan tñi, loꞌo yca xlya ꞌin nu ndyujuiꞌ quiñi.
\v 16 A mdaa ꞌa ñi chaꞌ cuiyaꞌ tiꞌ tyijyin neꞌ niꞌ lyaa loꞌo suꞌhua neꞌ.
\v 17 Nguloꞌo ñi ꞌin nten loꞌ juin ñi: ¿Ta siꞌi quityi ꞌin Ndiose nchcuiꞌ na: —Naꞌan ꞌñan lca na seꞌen nchcuiꞌ lyiꞌo sca chcui chendyu ꞌñan—? Loꞌ ꞌun nguiꞌni um ꞌin na lca na —naꞌan tyi yu cunan—.
\v 18 Yu nu ndlo tñan niꞌ lyaa loꞌo neꞌ escriba, ngune ꞌin yu chaꞌ nu ycuiꞌ Jesús, loꞌ nan yu ñaꞌan nu cujui yu ꞌin ñi, siꞌyana quiꞌan ꞌa nten cuaꞌ nguiꞌni cunta chaꞌ nu ndloꞌo ñi, canꞌ chaꞌ nguitsen yu ꞌin ñi.
\v 19 Xa nguꞌya tla mdoꞌo Jesús quichen canꞌ.
\s Chaꞌ ꞌin yca higo nu mdoꞌo yuhueꞌ ꞌin
\p
\v 20 Tlya xca tsaan mdijin jun seꞌen nducua yca higo canꞌ, loꞌ naꞌan jun siꞌyana cuaꞌ ngutyi na.
\v 21 Yu Tyo nguia yuꞌhui tiꞌ yu ñaꞌan ycuiꞌ Jesús loꞌo yca canꞌ, loꞌ juin yu ꞌin ñi: Ñi Bstro, ñaꞌan um jan ñi, ñaꞌan ti ngutyi yca nu ngulo um yuhueꞌ ꞌin cua.
\v 22 Mxcuen Jesús ꞌin yu taꞌa ndaꞌan ñi: Tsa quiꞌan tiꞌ um ꞌin Ndiose.
\v 23 Nu chaꞌ ñi cunen loꞌo um, chaꞌ ndeꞌen nu chcuiꞌ loꞌo quiꞌya cua siꞌyana tyiꞌo na seꞌen nducua na, loꞌ tsa yuꞌhui na la loo tyiꞌa tujoꞌo, cuiꞌ cuañaꞌan tsatoꞌo, una la chaꞌ tsa quiꞌan tiꞌ canꞌ, loꞌ a cuꞌni tucua tiꞌ.
\v 24 Cunen loꞌo um, nchgaa chaꞌ nu njñan um ꞌin Ndiose, cuꞌni um cunta siꞌyana cuaꞌ jui na ꞌin um, loꞌ cuiꞌ cuañaꞌan tsatoꞌo.
\v 25 Xa nchcuiꞌ lyiꞌo um ꞌin ñi, cuꞌni um chaꞌ tlyu tiꞌ ꞌin nu ntsuꞌhui chaꞌ tiquee um loꞌo, ñaꞌan ca siꞌyana loꞌo Ndiose, ñi nu nducua niꞌ cuaan, cuꞌni ñi chaꞌ tlyu tiꞌ ꞌin um siꞌya quiꞌya nducui um.
\v 26 Chaꞌ a cuꞌni um chaꞌ tlyu tiꞌ ꞌin taꞌa nten um, cuiꞌ cuañaꞌan Ndiose, ñi nu nducua niꞌ cuaan, a cuꞌni ñi chaꞌ tlyu tiꞌ ꞌin um siꞌya quiꞌya nducui um.
\s Mñichaꞌ neꞌ ꞌin Jesús siꞌya chaꞌ cuiyaꞌ ꞌin ñi
\p
\v 27 Xiyaꞌ mdiyaa jun quichen Jerusalén, loꞌ yten Jesús niꞌ lyaa, canꞌ nguilyu ñi xa mdiyaa tucua snan yu nu ndlo tñan niꞌ lyaa, tsatlyu loꞌo neꞌ escriba, loꞌo quiꞌyu cula.
\v 28 Loꞌ juin neꞌ ꞌin ñi: ¿La jui chaꞌ cuiyaꞌ ꞌin nu nguiꞌni nchgaa chaꞌ re, loꞌ ti nu mdaa ꞌin na?
\v 29 Mxcuen Jesús ꞌin yu: Loꞌon nanꞌ cuñichanꞌ ꞌin um sca chaꞌ, xcuen um ꞌñan, loꞌ quitsanꞌ ꞌin um ti nu mdaa chaꞌ cuiyaꞌ nguiꞌnin nchgaa chaꞌ re.
\v 30 ¿Ti nu mdaa chaꞌ cuiyaꞌ ꞌin yu Xuhua nu mducua tya ꞌin nten, Ndiose uta nten chendyu? Xcuen um ꞌñan.
\v 31 Xacanꞌ scasca neꞌ mñichaꞌ taꞌa neꞌ: Chaꞌ ljuin na niꞌ cuaan mdoꞌo chaꞌ cuiyaꞌ canꞌ, tinaꞌan xcuen yu ꞌin na: ¿Ñi chaꞌ a ya quiꞌan tiꞌ um ꞌin yu chaꞌ na canꞌ?
\v 32 Chaꞌ ljuin na siꞌyana nten chendyu mdaa ꞌin na... Una nguitsen neꞌ tloo nten quichen canꞌ, siꞌyana nchgaa neꞌ mda neꞌ loo yu Xuhua, ncua yu sca nu chaꞌ ñi ca mxiycuiꞌ Ndiose ꞌin.
\v 33 Canꞌ chaꞌ mxcuen neꞌ ꞌin Jesús: A jlyo tiꞌ hua. Xacanꞌ mxcuen Jesús ꞌin neꞌ: Ñi nanꞌ a quitsanꞌ ꞌin um ti nu mdaa chaꞌ cuiyaꞌ nguiꞌnin nchgaa chaꞌ re. 
\c 12
\s Yu nducunꞌ yuꞌhui cuan seꞌen nducua ti uva
\p
\v 1 Xacanꞌ mdyisnan ycuiꞌ Jesús scasca chaꞌ loꞌo nten, loꞌ juin ñi: Sca yu quiꞌyu msuꞌhua loꞌo yu seꞌen nducua ti uva ꞌin yu. Niꞌ lyiꞌo canꞌ mtñan yu sca seꞌen xiinꞌ uva canꞌ. A cunta mtñan yu sca seꞌen cuaan, chcua nu chuꞌhui cunta ꞌin na, loꞌ cunda tluꞌhue mxnu yu tñan canꞌ ꞌin yu nu chuꞌhui cunta ꞌin na, mdoꞌo yu nguiaa yu sca seꞌen tijyoꞌ.
\v 2 Mdiyaa xaa nu ntsuꞌhui chaꞌ quioꞌ mti canꞌ, xꞌnan tñan canꞌ nguaꞌan tñan yu sca nguso nu tsa chcuan cunta ꞌin mti nu ntsuꞌhui chaꞌ quiꞌni caꞌan ꞌin yu.
\v 3 Una yu nu ntsuꞌhui cunta tñan canꞌ yjui tiꞌin yu ꞌin nguso nu mdiyaa canꞌ, loꞌ mxitucui yu loꞌ a sca na nguꞌya yu.
\v 4 Xacanꞌ nguaꞌan tñan xꞌnan tñan canꞌ xca nguso ꞌin yu, canꞌ nu mjyiꞌin yu ꞌin loꞌo quee, yjui yuhuaꞌ yu que, cuaꞌ ñaꞌan ti mꞌni lyiꞌo yu ꞌin.
\v 5 Xiyaꞌ nguaꞌan tñan yu xca nguso ꞌin yu, canꞌ nu yjui yu ꞌin. Cuañaꞌan yatoꞌo loꞌo nchgaa la ñaꞌan nguso nu yaa canꞌ, ntsuꞌhui nu yjui yuhuaꞌ yu, loꞌ ntsuꞌhui nu yjui yu ꞌin.
\v 6 Ndiꞌin scati sñeꞌ xꞌnan tñan canꞌ nu taꞌa la tiꞌ ꞌin yu, loꞌ nguaꞌan tñan yu ꞌin yaa seꞌen ndiꞌin tñan ꞌin yu. Ñan tiꞌ yu: Ñii caꞌan tñan ꞌin ycuiꞌ ca sñeꞌ, nde nu cuꞌni cunta yu chaꞌ nu chcuiꞌ.
\v 7 Una yu nu ntsuꞌhui cunta tñan canꞌ, mdyisnan mꞌni cuiyaꞌ yu chaꞌ loꞌo taꞌa yu, loꞌ nchcuiꞌ yu: Nde ljyaan ycuiꞌ ca sñeꞌ xꞌnan tñan nu ntsuꞌhui chaꞌ quinu tñan re ꞌin, cujui na ꞌin yu loꞌ quinu tñan re ꞌin na.
\v 8 Cuiꞌ ñaꞌan lcaa msñi yu ꞌin loꞌ yjui yu ꞌin, mscuan yu ꞌin nde chonꞌ loꞌo.
\v 9 Cuaꞌ ñii jan ñi, ¿ñaꞌan ta cuꞌni xꞌnan tñan canꞌ? Cuiꞌ ca nu tsa yjui yu ꞌin yu nu ntsuꞌhui cunta tñan canꞌ, loꞌ taa yu ꞌin na cuꞌni cunta xca tucui.
\v 10 ¿Ta a nchca chcuiꞌ um sca chaꞌ nu nguinu scua loo quityi ꞌin Ndiose: —Quee nu mscuan tloo yu cuityi naꞌan, cuaꞌ ñii lca na quee nu nsñi ton ꞌin naꞌan.
\v 11 Ñi Xꞌnan na mꞌni ñi chaꞌ re, loꞌ nduhue tiꞌ na chaꞌ nu naꞌan tloo na—?
\v 12 Ngunan neꞌ ñaꞌan quinu Jesús siꞌyana nguꞌya neꞌ chaꞌ tiyaa, chaꞌ ꞌin neꞌ ca ycuiꞌ ñi. Loꞌ siꞌyana nguitsen neꞌ tloo nten quiꞌan canꞌ, ngulaꞌ ton neꞌ ꞌin ñi, mdoꞌo neꞌ nguiaa neꞌ.
\s Chaꞌ ꞌin tñi nu mdaa neꞌ ꞌin César
\p
\v 13 Xacanꞌ nguaꞌan tñan neꞌ tucua snan neꞌ fariseo, loꞌo chcua xnan nten ꞌin ree Herode nu tsa ycuiꞌ loꞌo Jesús, loꞌ cunan neꞌ ñaꞌan nu suꞌhua neꞌ quiꞌya chonꞌ ñi.
\v 14 Xa mdiyaa neꞌ tloo ñi, juin neꞌ ꞌin ñi: ꞌUn ñi nu lca Bstro, huareꞌ jlyo tiꞌ hua siꞌyana ꞌun lca um sca nu nchcuiꞌ chaꞌ nu ñi, loꞌ ñi a nan um ñaꞌan nu quinu tsuꞌhue nten loꞌo um, ñi a nxñi um cunta ñaꞌan chaꞌ ꞌin nten, cuiꞌ ca nu ndloꞌo um chaꞌ nu ñi ꞌin Ndiose, ñaꞌan ntsuꞌhui chaꞌ cuꞌni na. Ñaꞌan ljuin um, ¿ta tsuꞌhue chaꞌ taa na tñi nu njñan yu César, uta na a tsuꞌhue ꞌa? ¿Taa na ꞌin na, uta na a taa na ꞌin na?
\v 15 Jesús ngüi tiꞌ ñi siꞌyana a ñi cusya ꞌin neꞌ, loꞌ juin ñi: ¿Ñi chaꞌ nan um ñaꞌan suꞌhua um quiꞌya chonꞌ? Tyaa um sca tñi ꞌñan, ñaꞌan na.
\v 16 Mdaa neꞌ tñi canꞌ ꞌin ñi, loꞌ mñichaꞌ ñi ꞌin neꞌ: ¿Ti nu ꞌin lcuin ngaꞌan chonꞌ tñi re, loꞌo nii nu ngaꞌan ꞌin na? Mxcuen neꞌ ꞌin ñi: Yu César.
\v 17 Xacanꞌ mxcuen Jesús ꞌin neꞌ: Tyaa um ꞌin César na nu quiꞌni caꞌan ꞌin yu, cuiꞌ cuañaꞌan tyaa um ꞌin Ndiose na nu quiꞌni caꞌan ꞌin ñi. Lyee ꞌa yuhue tiꞌ neꞌ ꞌin ñi.
\s Chaꞌ nu tyiquiꞌo neꞌ cuaꞌ ngujui
\p
\v 18 Xacanꞌ mdiyaa tucua snan neꞌ saduceo seꞌen ndon Jesús nu a ndiya quiꞌan tiꞌ siꞌyana tyiquiꞌo neꞌ cuaꞌ ngujui. Mñichaꞌ neꞌ ꞌin ñi:
\v 19 ꞌUn ñi nu lca Bstro, yu Moisé nguaꞌan scua yu sca quityi loꞌ nchcuiꞌ na: —Sca yu quiꞌyu chaꞌ caja yu, loꞌ ñi sca sñeꞌ yu loꞌ a mdiꞌin loꞌo cuilyiꞌo yu, ꞌni chaꞌ ticuiꞌ taꞌa ngula yu tyiꞌin lyiꞌo ꞌin neꞌ cunaꞌan canꞌ, loꞌ chaꞌ tyiꞌin sñeꞌ neꞌ cuꞌni neꞌ cunta siꞌyana sñeꞌ neꞌ loꞌo cuilyiꞌo ca neꞌ lca canꞌ—.
\v 20 Yatoꞌo mdiꞌin tsa cati yu quiꞌyu sca taꞌa ngula ti yu. Yu nu cula canꞌ jui cuilyiꞌo yu, loꞌ ngujui yu, una ñi sca sñeꞌ neꞌ loꞌ a mdiꞌin loꞌo yu.
\v 21 Yu nu cuaꞌ nchca tucua canꞌ mdiꞌin lyiꞌo ꞌin neꞌ cunaꞌan canꞌ, ticuiꞌ cuañaꞌan ngujui yu, a sca sñeꞌ neꞌ mdiꞌin loꞌo yu. Cuañaꞌan yatoꞌo loꞌo yu nu cuaꞌ nchca snan canꞌ.
\v 22 Scañaꞌan ti yatoꞌo ꞌin taꞌa cati yu, ngujui yu, una ñi sca sñeꞌ neꞌ loꞌ a mdiꞌin loꞌo yu. Yatoꞌo loꞌo neꞌ cunaꞌan canꞌ ngujui neꞌ.
\v 23 Xa ntsuꞌhui chaꞌ tyiquiꞌo neꞌ cuaꞌ ngujui, ¿ti ñaꞌan ta yu canꞌ nu cuilyiꞌo ca neꞌ cunaꞌan canꞌ, siꞌyana mdiꞌin neꞌ loꞌo taꞌa cati yu?
\v 24 Xacanꞌ mxcuen Jesús ꞌin neꞌ: Siꞌi ñaꞌan chaꞌ tiyaa ꞌin um, siꞌyana a ndyiꞌya um cunta ñaꞌan nchcuiꞌ quityi ꞌin Ndiose, ñi a jlyo tiꞌ um tsala chaꞌ cuiyaꞌ nu ntsuꞌhui ꞌin ñi.
\v 25 Xa tyiquiꞌo neꞌ cuaꞌ ngujui, a ntsuꞌhui ꞌa chaꞌ tiꞌ caja cuilyiꞌo neꞌ, ñi a taa ꞌa neꞌ chaꞌ cuilyiꞌo ꞌin nten, cuiꞌ ca nu scañaꞌan ti tyiꞌin neꞌ ñaꞌan nchca tiꞌ angujle ꞌin Ndiose la niꞌ cuaan.
\v 26 Una tsoꞌ ꞌin neꞌ cuaꞌ ngujui loꞌ tyiquiꞌo, ¿ta na a nchca quiꞌya um chaꞌ tiyaa ñaꞌan nchcuiꞌ quityi nu nguaꞌan scua Moisé, xa ycuiꞌ Ndiose loꞌo yu lja yca quicheꞌ ndiquin canꞌ, loꞌ juin ñi: —Nanꞌ lcan Ndiose ꞌin Abraham, Ndiose ꞌin Isaac, Ndiose ꞌin Jacob—?
\v 27 Siꞌyana Ndiose a lca ñi Ndiose ꞌin neꞌ ngujui, cuiꞌ ca nu lca ñi Ndiose ꞌin neꞌ nu loꞌo. Canꞌ chaꞌ nchcuinꞌ loꞌo um siꞌyana siꞌi ñaꞌan chaꞌ tiyaa ꞌin um.
\s Chaꞌ nu ndon loo la ꞌin Ndiose
\p
\v 28 Xacanꞌ sca yu escriba nu ngune ꞌin chaꞌ nu ycuiꞌ neꞌ loꞌo Jesús, mdiyaa yu seꞌen ndon ñi. Loꞌ siꞌyana tsuꞌhue mxcuen ñi ꞌin neꞌ, canꞌ chaꞌ mñichaꞌ yu ꞌin ñi: ¿Ti ñaꞌan ta chaꞌ nu ndon loo lati ngulo Ndiose tñan ꞌin na?
\v 29 Mxcuen Jesús ꞌin yu: Nde chaꞌ nu ndon loo lati que nchgaa la ñaꞌan chaꞌ: —Neꞌ Israel quine ꞌin um chaꞌ re. Ndiose nu lca Xꞌnan um, scati ñi lca ñi Xꞌnan um.
\v 30 Loꞌo nu chcui lca cusya ꞌin um tyaa um ꞌin um ꞌin Ndiose Xꞌnan um, loꞌo nu chcui lca tiquee um—, loꞌo nchgaa chaꞌ tiyaa ꞌin um, —loꞌo nchgaa juesa ꞌin um—. Nde chaꞌ nu ndon loo lati que nchgaa la ñaꞌan chaꞌ.
\v 31 Nu cuaꞌ nchca tucua ticuiꞌ ndon loo na: —Ñaꞌan ꞌtnan tiꞌ um ꞌin taꞌa nten um tsañaꞌan nꞌni um ꞌtnan ꞌin um—. A ntsuꞌhui xca chaꞌ nu ndon loo la que chcuaa chaꞌ re.
\v 32 Xacanꞌ juin yu escriba canꞌ ꞌin Jesús: Ñi Bstro, chaꞌ ñi ñaꞌan nu nchcuiꞌ um siꞌyana scati Ndiose lca Ñi Xꞌnan na, loꞌ a ntsuꞌhui ꞌa xca tucui ñaꞌan nu lca ñi.
\v 33 Chaꞌ ñi siꞌyana loꞌo nu chcui cusya ꞌin na ntsuꞌhui chaꞌ tyaa na ꞌin na ꞌin ñi, loꞌo nu chcui lca tiquee na, loꞌo nchgaa chaꞌ tiyaa ꞌin na, loꞌo nchgaa juesa ꞌin na. A cunta ñaꞌan ꞌtnan tiꞌ na ꞌin taꞌa nten na tsañaꞌan nꞌni na ꞌtnan ꞌin na. Chaꞌ re lyee la ntsuꞌhui lyoo na tloo Ndiose que nchgaa la ñaꞌan chaꞌ nu nguiꞌni neꞌ xa ndiquin tucua neꞌ sca ꞌni tloo ñi.
\v 34 Xa ngune ꞌin Jesús siꞌyana loꞌo chaꞌ tiyaa mxcuen yu ꞌin ñi, xacanꞌ juin ñi ꞌin yu: A tijyoꞌ nchca um seꞌen ndlo Ndiose tñan. A tucui ꞌa nu tiꞌ msti tiꞌ cuñichaꞌ ꞌin ñi scasca la chaꞌ.
\s ¿Tucui ca sñeꞌ ꞌin ñi nu lca Cristo?
\p
\v 35 Lja ndloꞌo Jesús ꞌin nten niꞌ lyaa, mñichaꞌ ñi ꞌin neꞌ sca chaꞌ: ¿Ñi chaꞌ ta nchcuiꞌ neꞌ escriba siꞌyana Cristo lca ñi ticuiꞌ sñeꞌ ta nten ꞌin Davi?
\v 36 Siꞌyana ticuiꞌ Davi nguaꞌan yu sca chaꞌ xa mxiycuiꞌ Espíritu nu Luhui ꞌin Ndiose ꞌin yu: —Ndiose Xꞌnan na juin ñi loꞌo Ñi Xꞌnan: Chcua tsoꞌ cueen ꞌñan lja xicuꞌnin ꞌin taꞌa cusuun quinu nde tuquiyaꞌ—.
\v 37 Ticuiiꞌ Davi ndloꞌo naan yu ꞌin ñi siꞌyana lca ñi Xꞌnan yu, ¿ñaꞌan ta lca ñi sñeꞌ ta nten ꞌin yu chaꞌ na canꞌ? Nten quiꞌan canꞌ tsuꞌhue ꞌa ntsuꞌhui tiquee neꞌ ndon nscan neꞌ chaꞌ nu nchcuiꞌ ñi.
\s Msuꞌhua tiyaa Jesús ꞌin nten loꞌo chaꞌ ꞌin neꞌ escriba
\p
\v 38 Loꞌ ndloꞌo ñi ꞌin nten canꞌ: Xñi um cunta ꞌin um loꞌo neꞌ escriba, neꞌ nu nducui tiꞌ nchcoꞌ teꞌ tucuin nu tsuꞌhue ñaꞌan, loꞌ ndiya tiꞌ neꞌ xa nchcuiꞌ chaꞌ neꞌ ꞌin loꞌo suun ñaꞌan seꞌen nchca quiyaꞌ.
\v 39 Nchcua neꞌ seꞌen ndon loo lati seꞌen nu nꞌni tnu neꞌ ꞌin Ndiose, ticuiꞌ cuañaꞌan nducui tiꞌ neꞌ nchcua ycu siin neꞌ loo yca xlya nu ndon la loo lati.
\v 40 Ndlyaa neꞌ naꞌan ꞌin neꞌ cunaꞌan nu nguinu loꞌo chaꞌ ycuiꞌ ti, canꞌ chaꞌ chaan nchcuiꞌ lyiꞌo neꞌ ꞌin Ndiose tloo nten, canꞌ neꞌ nu tlyu lati nu tiꞌi ntsuꞌhui chaꞌ tyijyin tiyaa xaa.
\s Chaꞌ ꞌin neꞌ cunaꞌan nu mdaa lcuan
\p
\v 41 Jesús nducua ñi chcua seꞌen nscua quiñanꞌ seꞌen ndyiꞌya neꞌ lcuan, nguiꞌni quii ñi ñaꞌan ndyiꞌya nten canꞌ lcuan. Neꞌ nu cuilyiyaꞌ quiꞌan ꞌa lcuan ndyiꞌya neꞌ.
\v 42 Xacanꞌ mdiyaa sca neꞌ cunaꞌan tiꞌi ñaꞌan chendyu ꞌin nu nguinu loꞌo chaꞌ ycuiꞌ ti, mdyiꞌya neꞌ tsa tucua tñi suhue ti, nu chinꞌ ti ntsuꞌhui lyoo.
\v 43 Mxiꞌya ñi ꞌin yu taꞌa ndaꞌan ñi, loꞌ juin ñi: Nu chaꞌ ñi chcuinꞌ loꞌo um, neꞌ cunaꞌan nu nguinu loꞌo chaꞌ ycuiꞌ ti re, tiꞌi ñaꞌan ꞌin neꞌ, una quiꞌan la lcuan mdyiꞌya neꞌ que nchgaa la ñaꞌan nten re.
\v 44 Siꞌyana nchgaa la ñaꞌan neꞌ re, mdyiꞌya neꞌ lcuan loꞌo tñi nu nguinu ti ꞌin neꞌ. Una neꞌ cunaꞌan re, loꞌo chaꞌ tiꞌi chendyu ꞌin neꞌ mdyiꞌya neꞌ ñaꞌaan tñi nu su ꞌin neꞌ, tñi nu ntsuꞌhui chaꞌ cunajoꞌo ꞌin neꞌ.
\c 13
\s Ntsuꞌhui chaꞌ jlyo laa ꞌin neꞌ
\p
\v 1 Ñaꞌan mdoꞌo Jesús niꞌ lyaa, sca yu taꞌa ndaꞌan ñi juin loꞌo ñi: Ñi Bstro, ñaꞌan um jan ñi, ñaꞌan ti tnu quee re loꞌ tsala ñaꞌan tlyu nguiaaꞌ laa re.
\v 2 Mxcuen Jesús ꞌin yu: Xñi cunta tsala ñaꞌan tlyu nguiaaꞌ na, una tiyaa xaa ñi xca quee re a quinu scua ꞌa na chonꞌ taꞌa na, siꞌyana ñaꞌaan na ntsuꞌhui chaꞌ cuten na.
\s Xa nu tsatii chendyu
\p
\v 3 Xa mdiyaa jun seꞌen nducua quiꞌya Olivo, canꞌ yten tucua ñi chcua seꞌen nducua laa. Yu Tyo, yu Jacobo, yu Xuhua, loꞌo yu Ndre mñichaꞌ yu ꞌin Jesús sca cunta, loꞌ juin yu:
\v 4 Quitsaꞌ um ꞌin hua chaꞌ ñi xaa tsatoꞌo chaꞌ re, loꞌ ñaꞌan ntsuꞌhui chaꞌ ca cuiyaꞌ tiꞌ hua xa nu cuaꞌ nchcui cuiiꞌ na?
\v 5 Mxcuen Jesús ꞌin yu: Xñi um cunta siꞌyana a tucui nu cuñilyiꞌo ꞌin um.
\v 6 Quiꞌan ꞌa nu ntsuꞌhui chaꞌ caan loꞌ chcuiꞌ siꞌyana loꞌo chaꞌ cuiyaꞌ ꞌñan ljyan loꞌo, loꞌ chcuiꞌ canꞌ: Nanꞌ lcan Cristo. Loꞌ quiꞌan ꞌa nten cuñilyiꞌo canꞌ.
\v 7 Xa cunan um chaꞌ cuaꞌ nsuun scasca quichen, uta tijyoꞌ loo ne chaꞌ nsuun neꞌ, a suꞌhua um chaꞌ nduhue tiꞌ tiquee um, siꞌyana a tyijyin yuꞌhui nu a ca chaꞌ re, una siꞌi canꞌ chaꞌ cuaꞌ tsatii chendyu.
\v 8 Siꞌyana ntsuꞌhui chaꞌ xuun quichen tnu loꞌo taꞌa quichen tnu na, sca chcui chendyu tyiꞌin suun. Ntsuꞌhui chaꞌ quiñan scasca seꞌen, quiꞌya bjuꞌñan, loꞌ cuañaꞌan quilo tiꞌin nten. Canꞌ nu tiꞌi ntsuꞌhui chaꞌ tyijyin neꞌ culo nducua la.
\v 9 Canꞌ chaꞌ xñi um cunta ꞌin um. Ntsuꞌhui chaꞌ tyaa neꞌ ꞌin um yaaꞌ bsya, jyiꞌin neꞌ ꞌin um seꞌen nu nꞌni tnu neꞌ ꞌin Ndiose. Cuiꞌ siꞌya chaꞌ ꞌñan tsa loꞌo neꞌ ꞌin um tloo bsya tnu uta tloo ree, ñaꞌan ca siꞌyana taa um suun ñaꞌan chaꞌ ꞌin Ndiose,
\v 10 siꞌyana ꞌni chaꞌ culo nducua la caja nu chcuiꞌ chaꞌ tsuꞌhue ꞌin Ndiose sca chcui chendyu.
\v 11 Xa tsa loꞌo neꞌ ꞌin um tloo bsya, a cuhue tiꞌ um ñaꞌan chaꞌ nu chcuiꞌ um, cuiꞌ ca nu chcuiꞌ um ñaꞌan chaꞌ nu tyiꞌo tiquee um, siꞌyana siꞌi loꞌo cunta ꞌin um chcuiꞌ um, cuiꞌ ca nu Espíritu nu Luhui ꞌin Ndiose xiycuiꞌ ꞌin um.
\v 12 Tsatoꞌo ticuiꞌ taꞌa ngula neꞌ tyaa ꞌin neꞌ seꞌen nu cujui neꞌ ꞌin, cuiꞌ cuañaꞌan cuꞌni neꞌ loꞌo sñeꞌ neꞌ, a cunta sñeꞌ neꞌ ca tiꞌi tiꞌ ꞌin nten cula ꞌin, tyaa canꞌ ꞌin neꞌ seꞌen nu cujui neꞌ ꞌin.
\v 13 A cunta ñaꞌan tucui ti ca tiꞌi tiꞌ ꞌin um siꞌyan, una nchgaa nu ta loo loꞌo chaꞌ re, canꞌ nu tyiꞌo laa.
\v 14 Xa ñaꞌan um cuaꞌ nchca —sca chaꞌ ngunanꞌ nu cujlyo ꞌin neꞌ seꞌen nu a ngaꞌan chaꞌ ca na—, cuiꞌ ñaꞌan chaꞌ nu mxiycuiꞌ Ndiose ꞌin yu Daniel, (canꞌ chaꞌ quiꞌya um cunta, ꞌun nu nchcuiꞌ quityi re), xacanꞌ nchgaa neꞌ nu ndiꞌin seꞌen lca Judea, xnan yuꞌhui neꞌ loo quiꞌya.
\v 15 Nchgaa nu nguilyu nde que naꞌan, a bla ꞌa quiꞌya canꞌ, lyoo na nu ndiꞌin ñaꞌan ꞌin.
\v 16 Cuiꞌ cuañaꞌan loꞌo nu nguiꞌni tñan niꞌ quixinꞌ, a bla ꞌa tiꞌ quia ꞌya canꞌ steꞌ.
\v 17 Una ꞌtnan ca neꞌ cunaꞌan nu cuaꞌ xcañaꞌan nxiton, loꞌo nu cuneꞌ sñeꞌ.
\v 18 Canꞌ chaꞌ jñan um ꞌin Ndiose siꞌyana a tsatoꞌo chaꞌ re tsaan nu ndiꞌya tiꞌin tlyaꞌ.
\v 19 Siꞌyana caan —scasca nu tiꞌi tnu, nu a nchca siyaꞌ tsatoꞌo tiꞌ xa mtñan Ndiose chendyu, loꞌ ñi a ntsuꞌhui ꞌa chaꞌ tiꞌ caan la na—.
\v 20 Chaꞌ Ñi Xꞌnan na a siꞌyu coꞌ ñi chaꞌ canꞌ, a tucui nu tyiꞌo laa, una siꞌya nten nu cuaꞌ mdoꞌo hui ꞌin ñi, canꞌ chaꞌ siꞌyu coꞌ ñi chaꞌ re.
\v 21 Chaꞌ ndeꞌen nu chcuiꞌ loꞌo um: Ñaꞌan jan ñi, nde ndon Cristo, uta ljuin: La cua ndon ñi. A tsa quiꞌan tiꞌ um ꞌin canꞌ.
\v 22 Siꞌyana ntsuꞌhui chaꞌ caan scasca nu cuiñi loꞌ ljuin siꞌyana lca Cristo, a cunta chcuiꞌ siꞌyana Ndiose nxiycuiꞌ ꞌin, loꞌ cuꞌni canꞌ scasca chaꞌ nu tnu seꞌen nu cuhue tiꞌ nten ꞌin, loꞌ cunan canꞌ ñaꞌan nu cuñilyiꞌo ꞌin nu cuaꞌ ngulohui Ndiose, chaꞌ cua na tca ꞌin.
\v 23 Canꞌ chaꞌ xñi um cunta ꞌin um, cuaꞌ msuꞌhuan tiyaan ꞌin um loꞌo chaꞌ re.
\s Xa quiaan Cristo xiyaꞌ
\p
\v 24 Xa cuaꞌ mdijin nchgaa nu tiꞌi re, —ntsuꞌhui chaꞌ quiꞌya tla loo cucha, ñi cooꞌ loꞌ a tyuꞌhui ꞌa xaa ꞌin na.
\v 25 Cuii cua ntsuꞌhui chaꞌ quilo na, ñaꞌaan niꞌ cuaan quiñan tucui na—.
\v 26 La xacanꞌ ñaꞌan neꞌ ꞌin —Yu Quiꞌyu nu Mdoꞌo nde niꞌ Cuaan quiaan ñi niꞌ ndlaa— loꞌo sca chaꞌ cuiyaꞌ nu tlyu loꞌo sca xaa tsuꞌhue ñaꞌan.
\v 27 Xacanꞌ caꞌan tñan Ndiose angujle ꞌin ñi, tsa xoꞌ ꞌin nchgaa nu cuaꞌ ngulohui ñi nu ndiꞌin sca chcui chendyu.
\v 28 Xñi um cunta ñaꞌan ndiꞌin chaꞌ ꞌin sca yca higo xa cuaꞌ tyisnan ca cuneꞌ stanꞌ na, loꞌ chcua lcaꞌ cojoꞌ na, cuaꞌ jlyo tiꞌ um siꞌyana cuaꞌ nchcui cuiiꞌ chaꞌ quila quioo.
\v 29 Cuiꞌ cuañaꞌan ꞌun xa ñaꞌan um cuaꞌ nchca nchgaa chaꞌ re, cuaꞌ jlyo tiꞌ um siꞌyana cuaꞌ nchcui cuiiꞌ chaꞌ yaan loo chendyu re xiyaꞌ.
\v 30 Nu chaꞌ ñi chcuinꞌ loꞌo um, ta nten re tiꞌ ndiꞌin neꞌ xa ntsuꞌhui chaꞌ ca nchgaa chaꞌ re.
\v 31 Niꞌ cuaan loꞌo chendyu re, a la ꞌa quine cueen na tiyaa xaa, una chaꞌ nu nchcuinꞌ a tyijyin yuꞌhui a tsatoꞌo na.
\v 32 A tucui nu jlyo tiꞌ ñi tsaan loꞌ ñi braa tsatoꞌo chaꞌ re, ñi angujle ꞌin Ndiose nu nducua niꞌ cuaan, loꞌ ñi Sñeꞌ ñi, cuiꞌ ca nu scati Stina Ndiose jlyo tiꞌ ñi chaꞌ re.
\v 33 Canꞌ chaꞌ xñi um cunta ꞌin um, tyiꞌin tiyaa um, loꞌ chcuiꞌ lyiꞌo um ꞌin Ndiose, siꞌyana a jlyo tiꞌ um ñi xaa tsatoꞌo chaꞌ re.
\v 34 Nguiaa chaꞌ re ñaꞌan nchca tiꞌ sca yu quiꞌyu nu nguiaa tijyoꞌ, yaaꞌ nguso ꞌin yu mxnu yu cunta naꞌan ꞌin yu, cuaꞌ ñaꞌaan tñan mꞌni caꞌan ꞌin yu cunda scaa yu, loꞌ yu nu chuꞌhui cuan tunaꞌan canꞌ, mxnu yu cunta siꞌyana tyiꞌin tiyaa yu nchgaa xaa.
\v 35 Ticuiꞌ cuañaꞌan ꞌun ntsuꞌhui chaꞌ tyiꞌin tiyaa um, siꞌyana a jlyo tiꞌ um ñi xaa quila ñi nu lca xꞌnan um, ta nde xa siin, uta tluꞌhue tla, loꞌ ta xa nu nxiꞌya culoo latyee, uta nde cuaꞌ ljyaan xaa.
\v 36 Canꞌ chaꞌ xñi um cunta ꞌin um, siꞌyana xa quiaan ñi tsati ntyin, a quija lyoo ñi ꞌin um ljaꞌ um.
\v 37 Chaꞌ nu nchcuinꞌ loꞌo um, cuañaꞌan nchcuinꞌ loꞌo nchgaa tucui: Tyiꞌin tiyaa um.
\c 14
\s Mꞌni cuiyaꞌ yu chaꞌ siꞌyana quinu Jesús
\p
\v 1 Tiꞌ lyijyi chcua ti tsaan nu ca taꞌa Pascua, loꞌo taꞌa xa nchcu neꞌ jaslya nu a yuꞌhui suun ꞌin. Nchgaa yu nu ndlo ca tñan niꞌ lyaa tsatlyu loꞌo neꞌ escriba, nan neꞌ ñaꞌan nu suꞌhua neꞌ chaꞌ cuiñi siꞌyana quinu Jesús, loꞌ cujui neꞌ ꞌin ñi.
\v 2 Nchcuiꞌ neꞌ: Una siꞌi lja taꞌa re quinu yu, siꞌyana a nchca tiꞌ na xilo tiꞌin na nten.
\s Msuꞌhua neꞌ tyiꞌa xityiꞌi ꞌin Jesús
\p
\v 3 Jesús ndiꞌin ñi quichen Betania seꞌen nducua naꞌan ꞌin yu Simón, yu nu ncua tiꞌi loꞌo quitsoꞌ la. Lja nducua ycu jun xa mdiyaa sca neꞌ cunaꞌan seꞌen nducua Jesús. Lyiꞌya neꞌ sca teꞌen tyiꞌa xityiꞌi nu chacuiꞌ nardo, loꞌ quiꞌan ntsuꞌhui lyoo na. Mcha neꞌ yni teꞌen canꞌ loꞌ mslo tucua neꞌ tyiꞌa xityiꞌi canꞌ que ñi.
\v 4 Ntsuꞌhui yu nu taꞌa nducua ñi canꞌ msinꞌ tiꞌ yu, loꞌ nchcuiꞌ yu: ¿Ñi chaꞌ ta mslo luꞌun neꞌ tyiꞌa xityiꞌi re?
\v 5 Tsuꞌhue lati chaꞌ cua na ncua quiyaꞌ na, loꞌ caja quiꞌan tñi loꞌo na, tsañaꞌan nu nꞌni neꞌ canan ndyijyin snan ciento tsaan, loꞌ quitsa na ꞌin nu tiꞌi. Lyee ꞌa ycuiꞌ tyijyin yu siꞌya chaꞌ ꞌin neꞌ cunaꞌan canꞌ.
\v 6 Una Jesús juin ñi ꞌin yu: A ta quiyaꞌ um ꞌin neꞌ, loꞌ a chcui ndijin um, siꞌyana sca chaꞌ tsuꞌhue nguiꞌni neꞌ loꞌon.
\v 7 Ñaꞌan nchca tiꞌ nu tiꞌi ñaꞌan chendyu ꞌin, nchgaa xaa ndiꞌin canꞌ loꞌo um, loꞌ tca ta yaaꞌ um ꞌin canꞌ ñaꞌan xaa nchca tiꞌ um, una nanꞌ siꞌi nchgaa xaa ñaꞌan tloo um ꞌñan.
\v 8 Neꞌ cunaꞌan re cuaꞌ mꞌni neꞌ tsa seꞌen nu ncua ꞌin neꞌ, msuꞌhua neꞌ tyiꞌa xityiꞌi ꞌñan, siꞌyana xitucua loo neꞌ chaꞌ ꞌin neꞌ tsaan nu ntsuꞌhui chaꞌ quitsinꞌ.
\v 9 Nu chaꞌ ñi chcuinꞌ loꞌo um: Yu nu tyiꞌan ycuiꞌ chaꞌ tsuꞌhue ꞌin Ndiose sca chcui chendyu, loꞌo chaꞌ ꞌin neꞌ cunaꞌan re chcuiꞌ yu, siꞌyana caja nu quia yuꞌhui tiꞌ ꞌin neꞌ.
\s Juin yu Juda siꞌyana tyaa yu ꞌin Jesús
\p
\v 10 Xacanꞌ yu Juda Iscariote, cuiꞌ ta yu tichcua nu taꞌa ndaꞌan ñi, ya ytsaꞌ yu ꞌin nchgaa nu ndlo ca tñan niꞌ lyaa, siꞌyana tyaa yu ꞌin Jesús tuyaaꞌ neꞌ.
\v 11 Mdiyaa ꞌa tiꞌ neꞌ xa ycuiꞌ yu chaꞌ canꞌ, loꞌ mdiꞌin tyaa neꞌ chaꞌ siꞌyana suꞌhua lyiyaꞌ neꞌ ꞌin yu. Tiꞌ xacanꞌ nan yu ñaꞌan ntsuꞌhui chaꞌ tiyaa yu ꞌin Jesús.
\s Ycu siin Jesús loꞌo yu taꞌa mdaꞌan ñi
\p
\v 12 Culoo tsaan ꞌin taꞌa xa nchcu neꞌ jaslya nu a yuꞌhui suun, cuiꞌ xa ndujui neꞌ slyaꞌ cuneꞌ taꞌa Pascua, loꞌ yu taꞌa ndaꞌan ñi mñichaꞌ ꞌin ñi: ¿La ta nchca tiꞌ um tsa yꞌni chuꞌhue hua, na nu ca siin ꞌin na taꞌa Pascua re?
\v 13 Xacanꞌ nguaꞌan tñan Jesús tucua yu taꞌa ndaꞌan ñi, loꞌ juin ñi ꞌin yu: Yaa um loo quichen cua, canꞌ chcua um ꞌin sca yu lyiꞌya sca teꞌen tyiꞌa loꞌ chcui nchaꞌan um ꞌin yu.
\v 14 Ñaꞌan seꞌen sten yu, canꞌ sten um. Ndeñaꞌan chcuiꞌ um loꞌo xꞌnan naꞌan canꞌ: Ñi nu lca Bstro juin ñi, ¿chaꞌ la ca cu siin ñi loꞌo yu taꞌa ndaꞌan ñi taꞌa Pascua re?
\v 15 Cuiꞌ yu quitsaꞌ yu ꞌin um seꞌen nducua sca naꞌan tlyu, nu cuaꞌ nchca tucua nde cuaan, canꞌ ndiꞌin nchgaa na nu cunajoꞌo ꞌin na, loꞌ cuꞌni chuꞌhue um na nu ntsuꞌhui chaꞌ cu siin na.
\v 16 Xacanꞌ mdoꞌo yu taꞌa ndaꞌan ñi loꞌ yten yu loo quichen canꞌ, cuiꞌ ñaꞌan ycuiꞌ Jesús loꞌo yu, cuañaꞌan yatoꞌo. Mdyisnan mꞌni chuꞌhue yu na nu cu siin jun lja taꞌa Pascua canꞌ.
\v 17 Xa nguꞌya tla, mdiyaa Jesús loꞌo taꞌa tichcua yu taꞌa ndaꞌan ñi seꞌen nducua naꞌan canꞌ.
\v 18 Yten tucua jun, loꞌ lja nchcu siin jun juin Jesús ꞌin yu: Nu chaꞌ ñi cunen loꞌo um, sca um nu taꞌa nchcu na re ntsuꞌhui chaꞌ tyaa ꞌñan.
\v 19 Mdyisnan nguluꞌun tiꞌ yu, cunda scaa yu mñichaꞌ yu ꞌin ñi: ¿Ta xtyi tiꞌ nanꞌ?
\v 20 Jesús mxcuen ñi ꞌin yu: Cuiꞌ sca um nu nchca tichcua um re lca canꞌ, cuiꞌ nu cuchaꞌ jaslya ꞌin sca niꞌ quiꞌnan ti loꞌon.
\v 21 Nu chaꞌ ñi siꞌyana Yu Quiꞌyu nu Mdoꞌo nde niꞌ Cuaan, ntsuꞌhui chaꞌ tyijyin ñi ñaꞌan chaꞌ nu cuaꞌ nguaꞌan scua loo quityi ꞌin Ndiose, una ꞌtnan ca yu nu ntsuꞌhui chaꞌ tyaa ꞌin Yu Quiꞌyu nu Mdoꞌo nde niꞌ Cuaan tuyaaꞌ nten. Tiꞌ tsuꞌhue lati chaꞌ cua na a mdiyaan yu chendyu.
\v 22 Lja nchcu siin jun msñi Jesús sca jaslya, mdyaa ñi xuꞌhue ꞌin Ndiose, msuꞌhue ñi ꞌin na loꞌ mdaa ñi ꞌin na ꞌin yu. Loꞌ juin ñi: Cu xuꞌhue um ꞌin na, nde nu lca cunanꞌ.
\v 23 Xacanꞌ msñi ñi sca vaso vino, mdyaa ñi xuꞌhue ꞌin Ndiose, loꞌ mdaa ñi ꞌin na ꞌin yu, nchgaa yu yiꞌo yu ꞌin na.
\v 24 Loꞌ juin ñi ꞌin yu: Nde nu lca tnen, loꞌ siꞌya na, chca tsuꞌhue chaꞌ ꞌin nten chendyu loꞌo Ndiose, loꞌ ntsuꞌhui chaꞌ quilo na siꞌyana quiꞌan nten tyiꞌo laa neꞌ.
\v 25 Nu chaꞌ ñi cunen loꞌo um: Ñi xiyaꞌ loꞌ a coꞌon ꞌan vino lja nu tiꞌ ndiꞌin loꞌo um re, chaꞌ siꞌi la seꞌen ndlo Ndiose tñan.
\s Yu Tyo ntsuꞌhui chaꞌ xcuan tloo yu ꞌin Jesús
\p
\v 26 Xa cuaꞌ yla jun sca jyiin, xacanꞌ mdoꞌo jun nguiaa jun nde loo quiꞌya Olivo.
\v 27 Xacanꞌ juin Jesús ꞌin yu: Nchgaa um ntsuꞌhui chaꞌ xnu ton um ꞌñan tla re ñi, tsañaꞌan nchcuiꞌ quityi ꞌin Ndiose: —Taan chaꞌ cuiyaꞌ cujui neꞌ ꞌin ñi nu naꞌan seen slyaꞌ, loꞌ slyaꞌ canꞌ cuaꞌ la tucueen cunaan ꞌin—.
\v 28 Loꞌ xa cuaꞌ mdyiquiꞌon, culo nducua la tsaꞌan seꞌen lca Galilea que ꞌin um.
\v 29 Yu Tyo juin yu ꞌin ñi: Chaꞌ ta nchgaa yu re xnu ton yu ꞌin um, una nanꞌ a cuꞌnin cuañaꞌan.
\v 30 Jesús mxcuen ꞌin yu: Nu chaꞌ ñi cunen loꞌo, tla re ñi lja nu tiꞌ lyijyi xiꞌya latyee tucua yaꞌ, tsatoꞌo snan yaꞌ ljuin siꞌyana a ndyuꞌhui lyoo ꞌñan.
\v 31 Yu Tyo nde lyee la mdiꞌin tyaa yu chaꞌ loꞌo ñi, loꞌ juin yu: Una a ꞌni chaꞌ siyaꞌ cujui neꞌ ꞌñan loꞌo um, una a xcuan tloon ꞌin um. Scañaꞌan ti ycuiꞌ nchgaa yu.
\s Jesús ycuiꞌ lyiꞌo ñi ꞌin Ndiose seꞌen lca Getsemaní
\p
\v 32 Xacanꞌ mdiyaa jun sca seꞌen naan Getsemaní, loꞌ juin ñi ꞌin taꞌa ndaꞌan ñi: Nde ti chcua um lja chcuinꞌ lyiꞌon ꞌin Ndiose.
\v 33 Tsa ꞌin yu Tyo ti, yu Jacobo, loꞌo yu Xuhua mdoꞌo loꞌo ñi ntan ti, loꞌ mdyisnan nguꞌya sca tuꞌhua tiquee ñi nu lyee tiꞌi ngaꞌan ꞌin ñi.
\v 34 Loꞌ juin ñi ꞌin yu: Luꞌun ꞌa tiꞌ cusya ꞌñan, cuaꞌ lca na cuaꞌ cajan. Nde ti quinu um loꞌ tyiꞌin um ndii tiꞌ um.
\v 35 Chinꞌ ti seꞌen tiꞌ mdaꞌan ñi, canꞌ mdyiꞌya sti ñi ꞌin ñi la lyuu, mjñan ñi ꞌin Ndiose chaꞌ caja ñaꞌan nu a tyijyin ñi nu tiꞌi.
\v 36 Loꞌ juin ñi: Abba, Sti hua, nchgaa chaꞌ tca ꞌin um, a taa um chaꞌ cuiyaꞌ tijin nanꞌ nu tiꞌi re, una siꞌi ñaꞌan nu nchca tinꞌ, cuiꞌ ca nu ñaꞌan nu ꞌun nchca tiꞌ um.
\v 37 Xacanꞌ mxitucui ñi seꞌen nducua snan yu canꞌ, nguija lyoo ñi ꞌin yu ljaꞌ yu, loꞌ juin ñi ꞌin yu Tyo: Simón, ¿ta ljaꞌ? ¿Ta xtyi tiꞌ ñi sca braa a mda loo chcua ndii tiꞌ?
\v 38 Chcua um ndii tiꞌ um loꞌ chcuiꞌ lyiꞌo um ꞌin Ndiose, siꞌyana a sten chaꞌ ngunanꞌ tiquee um. ꞌUn ñan tiꞌ cusya ꞌin um cuꞌni um tñan tsuꞌhue, una nu cuꞌni um ꞌin na naꞌan tiꞌ um.
\v 39 Xiyaꞌ yaa ñi, ticuiꞌ ti ñaꞌan mjñan ñi ꞌin Ndiose loꞌo ñaꞌan chaꞌ nu cuaꞌ ycuiꞌ ñi.
\v 40 Xacanꞌ mxitucui ñi xiyaꞌ, naꞌan ñi siꞌyana ticuiꞌ ti ñaꞌan ljaꞌ yu, siꞌyana lyee tiꞌin ljyaan sla yu, loꞌ a ngujlyo ꞌa tiꞌ yu ñaꞌan tiꞌ xcuen yu ꞌin ñi.
\v 41 Nu cuaꞌ nchca snan yaꞌ mxitucui ñi, xacanꞌ juin ñi ꞌin yu: Cajaꞌ lya um loꞌ xitñanꞌ um, ca tu siꞌyana cuaꞌ mdiyaa braa quinu Yu Quiꞌyu nu Mdoꞌo nde niꞌ Cuaan tuyaaꞌ nten quiꞌya chendyu.
\v 42 Tyiton um loꞌ quiaa na. Ñaꞌan jan ñi, cua ljyaan yu nu ntsuꞌhui chaꞌ tyaa ꞌñan.
\s Xa nguinu Jesús
\p
\v 43 Lja nu tiꞌ nchcuiꞌ Jesús mdiyaa yu Juda seꞌen ndon ñi, cuiꞌ ta yu tichcua canꞌ lca yu. Quiꞌan ꞌa nten mdiya loꞌo yu, ntsuꞌhui nu lyiꞌya spada, ntsuꞌhui nu nducua yca yaaꞌ, mdiyaa yu siꞌya chaꞌ cuiyaꞌ ꞌin nchgaa yu nu ndlo ca tñan niꞌ lyaa, loꞌo neꞌ escriba, loꞌo quiꞌyu cula.
\v 44 Yu nu ntsuꞌhui chaꞌ tyaa ꞌin Jesús, cuaꞌ mꞌni cuiyaꞌ yu chaꞌ ñaꞌan cuꞌni yu, loꞌ juin yu: Yu nu chcuiꞌ chanꞌ la siiꞌ scaꞌ, canꞌ nu ca lca, xñi um ꞌin yu una xñi tsuꞌhue um cunta ꞌin yu.
\v 45 Cuiꞌ ñaꞌan lcaa mdiyaa yu seꞌen ndon Jesús loꞌ juin yu: Ñi Bstro, Ñi Bstro. Xacanꞌ ycuiꞌ chaꞌ yu la siiꞌ scaꞌ ñi.
\v 46 Cuiꞌ xaa msñi neꞌ ꞌin ñi.
\v 47 Una sca yu taꞌa ndaꞌan ñi ngulo yu spada ꞌin yu, loꞌ msiꞌyu yu nscan nguso ꞌin yu nu ndlo ca tñan niꞌ lyaa.
\v 48 Xacanꞌ juin Jesús loꞌo neꞌ: ¿Ñi chaꞌ loꞌo spada loꞌo yca ljyan sñi um ꞌñan tsañaꞌan nchca tiꞌ um loꞌo sca yu cunan?
\v 49 Nchgaa xaa nguilyun loꞌo um, loꞌ ndloꞌon ꞌin nten niꞌ lyaa, ¿ñi chaꞌ ta a msñi um ꞌñan xacanꞌ? Una ꞌni chaꞌ tsatoꞌo ñaꞌan chaꞌ nu cuaꞌ nguinu scua loo quityi ꞌin Ndiose.
\v 50 Nchgaa yu taꞌa ndaꞌan ñi ngula yaaꞌ yu ꞌin ñi, cuaꞌ la tucueen msnan yu.
\s Sca nu msñi loꞌo neꞌ ꞌin loꞌ msnan
\p
\v 51 Una sca yu tsa suhue ti nu nducui chaꞌan ꞌin Jesús, loꞌo yu msñi loꞌo neꞌ ꞌin yu, nguxen yu sca teꞌ,
\v 52 una mxnu sti yu teꞌ canꞌ, loꞌ msnan yu cunanꞌ ti yu.
\s Xa ncua cuiyaꞌ chaꞌ ꞌin Jesús
\p
\v 53 Xacanꞌ mdiya loꞌo neꞌ ꞌin Jesús seꞌen ndiꞌin yu nu ndlo ca tñan niꞌ lyaa, canꞌ nguioꞌ tiꞌin yu loꞌo nchgaa la ñaꞌan taꞌa ntsuꞌhui yu cunta, tsatlyu loꞌo quiꞌyu cula loꞌo neꞌ escriba.
\v 54 Yu Tyo tijyoꞌ ti mducui nchaꞌan yu ꞌin Jesús, tsayaꞌ mdiyaa yu tunaꞌan lyiyaꞌ seꞌen ndiꞌin yu nu ndlo ca tñan canꞌ. Sca seꞌen ti yten tucua yu loꞌo yu silyiya nu ntsuꞌhui cuan canꞌ, loꞌ nguitson tiꞌ yu seꞌen ndon quiiꞌ canꞌ.
\v 55 Nchgaa yu nu ndlo tñan niꞌ lyaa, tsatlyu loꞌo nchgaa la ñaꞌan taꞌa ndlo yu tñan, nan yu ñaꞌan nu suꞌhua yu quiꞌya chonꞌ Jesús seꞌen nu cujui neꞌ ꞌin ñi, una ñi sca chaꞌ loꞌ a nguija lyoo ꞌin ñi.
\v 56 Siyaꞌ quiꞌan la nu msuꞌhua quiꞌya ꞌin ñi, una a ncua ca sca chaꞌ ti ꞌin neꞌ, siꞌyana siꞌi scañaꞌan ti nchcuiꞌ neꞌ.
\v 57 Xacanꞌ mdyiton tucua snan yu nu msuꞌhua quiꞌya ꞌin ñi loꞌo chaꞌ cuiñi:
\v 58 Huareꞌ ngune ꞌin hua sca chaꞌ nu ycuiꞌ yu re, loꞌ juin yu: Nanꞌ xicuten laa nducua re nu nguiaaꞌ loꞌo juesa ꞌin nten chendyu, una nu cuaꞌ ca snan tsaan xiton xca na, una siꞌi ꞌa loꞌo juesa ꞌin nten chendyu.
\v 59 Ñi cuañaꞌan, loꞌ a ncua ca sca chaꞌ ti ꞌin neꞌ.
\v 60 Xacanꞌ yu nu ndlo ca tñan niꞌ lyaa mdyiton yu tluꞌhue la, loꞌ mñichaꞌ yu ꞌin Jesús: ¿Ñi chaꞌ ta ñi sca chaꞌ loꞌ a nxcuen, ñi quiꞌya ta nsuꞌhua neꞌ ꞌin?
\v 61 Una Jesús ñi sca chaꞌ loꞌ a mxcuen ñi. Xiyaꞌ mñichaꞌ yu nu ndlo ca tñan canꞌ: ¿Ta chaꞌ ñi siꞌyana nuꞌhuin lca Cristo, Sñeꞌ Ndiose ñi nu tlyu lati?
\v 62 Mxcuen Jesús ꞌin yu: Nanꞌ lcan. Ntsuꞌhui chaꞌ ñaꞌan um ꞌin —Yu Quiꞌyu nu Mdoꞌo nde niꞌ Cuaan nducua ñi tsoꞌ cueen ꞌin Ndiose—, a cunta ñaꞌan um ꞌin ñi —quiaan ñi niꞌ ndlaa—.
\v 63 Xacanꞌ yu nu ndlo ca tñan niꞌ lyaa msta yu steꞌ yu loo nu lyee ycuen tiqueꞌ yu, loꞌ juin yu: ¿Ñi chaꞌ tiꞌ cunan na xca nu chcuiꞌ ñaꞌan chaꞌ ꞌin yu re?
\v 64 Cuaꞌ ngune ꞌin na ñaꞌan ycuiꞌ caꞌan yu ꞌin Ndiose. ¿Ñaꞌan ljuin um ñii? Nchgaa yu msuꞌhua yu quiꞌya chonꞌ ñi, loꞌ juin yu: Tsaloo na caja ti yu.
\v 65 Scasca neꞌ mdyisnan msuꞌhua siyeꞌ neꞌ tloo ñi, mducun neꞌ tloo ñi loꞌ mycuanꞌ neꞌ ꞌin ñi, loꞌ nchcuiꞌ neꞌ: Ljuin ñaꞌan na, chaꞌ ti nu ca mycuanꞌ ꞌin. Loꞌo yu silyiya canꞌ mjyiꞌin yaaꞌ yu tloo ñi.
\s Xa mscuan tloo yu Tyo ꞌin Jesús
\p
\v 66 Yu Tyo tiꞌ nducua yu tunaꞌan lyiyaꞌ la ꞌya canꞌ, loꞌ mdiyaa ton sca neꞌ cunaꞌan nguso ꞌin yu nu ndlo ca tñan niꞌ lyaa.
\v 67 Naꞌan neꞌ nducua yu Tyo nguitson tiꞌ yu seꞌen ndon quiiꞌ canꞌ, loꞌ mxinaꞌan tsuꞌhue ca neꞌ ꞌin yu, loꞌ juin neꞌ: Loꞌo nuꞌhuin taꞌa ndaꞌan Jesús Nazaret.
\v 68 Loꞌ juin yu Tyo: A loꞌon, ñi a ndyuꞌhui lyoon ꞌin yu, ñi a jlyo tinꞌ ñi chaꞌ nchcuiꞌ um. Loꞌ mdoꞌo ton yu Tyo tuꞌhua tunaꞌan lyiyaꞌ, xacanꞌ msiꞌya sca latyee.
\v 69 Xiyaꞌ mxinaꞌan neꞌ cunaꞌan canꞌ seꞌen ndon yu Tyo, loꞌ ycuiꞌ neꞌ loꞌo nchgaa nu ndon cuiꞌ ti canꞌ: Ticuiꞌ ta cua lca yu re.
\v 70 Yu Tyo ticuiꞌ ti ñaꞌan juin yu siꞌyana a loꞌo yu ndaꞌan yu loꞌo Jesús. Chonꞌ ndeꞌen canꞌ ycuiꞌ scasca neꞌ loꞌo yu: Nu chaꞌ ñi ca siꞌyana loꞌo lca taꞌa ndaꞌan yu cua, siꞌyana tiꞌ chaꞌ nchcuiꞌ ti chcanꞌ ñaꞌan na siꞌyana lca sca yu Galilea.
\v 71 Xacanꞌ msuꞌhua yu Tyo canꞌ sca chaꞌ chonꞌ yu, loꞌ mꞌni tyiꞌya yu Ndiose, loꞌ juin yu: Nu chaꞌ ñi sꞌni, a ndyuꞌhui lyoon ꞌin yu nu nchcuiꞌ um chaꞌ ꞌin cua.
\v 72 Xacanꞌ msiꞌya latyee canꞌ nu cuaꞌ nchca tucua yaꞌ. La xacanꞌ nguia yuꞌhui tiꞌ yu Tyo ñaꞌan ycuiꞌ Jesús loꞌo yu, siꞌyana lja nu tiꞌ lyijyi xiꞌya latyee tucua yaꞌ, tsatoꞌo snan yaꞌ chcuiꞌ yu siꞌyana a ndyuꞌhui lyoo yu ꞌin ñi. Mdyisnan ynan yu xa nguia yuꞌhui tiꞌ yu chaꞌ canꞌ. 
\c 15
\s Xa mꞌni cuiyaꞌ yu Pilato chaꞌ ꞌin Jesús
\p
\v 1 Tlya ti xca tsaan canꞌ nchgaa yu nu ndlo tñan niꞌ lyaa, loꞌo quiꞌyu cula, loꞌo neꞌ escriba, tsatlyu loꞌo nchgaa la ñaꞌan yu taꞌa lyiꞌya yu tñan, mꞌni cuiyaꞌ neꞌ chaꞌ siꞌyana tsa loꞌo neꞌ ꞌin Jesús tloo Pilato, loꞌ ñaꞌan nchcanꞌ ñi mdyaa neꞌ cunta ꞌin ñi yaaꞌ yu.
\v 2 Yu Pilato canꞌ mñichaꞌ yu ꞌin ñi: ¿Ta cuiꞌ lca Ree ꞌin neꞌ judio? Mxcuen Jesús ꞌin yu: ꞌUn nchcuiꞌ um cuañaꞌan.
\v 3 Yu nu ndlo ca tñan niꞌ lyaa, nde lyee la msuꞌhua yu quiꞌya ꞌin Jesús.
\v 4 Xiyaꞌ mñichaꞌ yu Pilato ꞌin ñi: ¿Ñi chaꞌ ta ñi sca chaꞌ loꞌ a xcuen, loꞌ tsala ñaꞌan nsuꞌhua neꞌ re quiꞌya ꞌin?
\v 5 Una ñi cuañaꞌan loꞌ a mxcuen Jesús, canꞌ chaꞌ nduhue tiꞌ yu Pilato ꞌin ñi.
\s Xa mdyaa neꞌ cunta siꞌyana caja Jesús
\p
\v 6 Ndeñaꞌan ntsuꞌhui chaꞌ ꞌin gubierno nchgaa yjan xa nchca Pascua, ndlaa yu sca preso, ñaꞌan tucui ti nu ndyiꞌo neꞌ judio chaꞌ ꞌin.
\v 7 Sca yu naan Barrabás, tsatlyu loꞌo nchgaa la ñaꞌan taꞌa nducunꞌ yu, ntsuꞌhui yu preso siꞌyana yjui yu nten seꞌen mdiꞌin suun yu.
\v 8 Nten quiꞌan nu nguioꞌ tiꞌin canꞌ, mdyisnan mjñan neꞌ ꞌin yu Pilato chaꞌ culaa yu sca preso lja taꞌa canꞌ, cuiꞌ ñaꞌan chaꞌ nu cuaꞌ ntsuꞌhui ꞌin yu.
\v 9 Yu Pilato mxcuen yu ꞌin nten canꞌ: ¿Ta nchca tiꞌ um culaan ꞌin yu nu lca ree ꞌin neꞌ judio?
\v 10 Juin yu cuañaꞌan, siꞌyana nguꞌya yu cunta siꞌya chaꞌ jñan tiꞌ ꞌin neꞌ nu ndlo ca tñan niꞌ lyaa, canꞌ chaꞌ mdyaa neꞌ ꞌin Jesús cunta ꞌin yu.
\v 11 Una yu nu ndlo ca tñan niꞌ lyaa, nde lyee la msuꞌhua yu tiquee nten canꞌ, siꞌyana tsatlyu jñan neꞌ ꞌin yu Pilato siꞌyana culaa yu ꞌin Barrabás.
\v 12 Xiyaꞌ mñichaꞌ yu Pilato ꞌin neꞌ: ¿Ñaꞌan ta nchca tiꞌ um cuꞌnin, loꞌo yu nu nchcuiꞌ um siꞌyana lca ree ꞌin neꞌ judio?
\v 13 Xacanꞌ xiyaꞌ ycuiꞌ cueen nten canꞌ: Jyiꞌin caꞌan um ꞌin yu loo cusi.
\v 14 Loꞌ juin yu Pilato ꞌin neꞌ: Una a sca quiꞌya mꞌni yu re. Nten canꞌ nde lyee la ycuiꞌ cueen neꞌ: Jyiꞌin caꞌan um ꞌin yu loo cusi.
\v 15 Seꞌen nu quinu tsuꞌhue yu Pilato loꞌo nten canꞌ, ngulaa yu ꞌin Barrabás, loꞌ mdyaa yu cunta ꞌin Jesús yaaꞌ sindatu, ngulo yu tñan siꞌyana quiꞌni ñi, loꞌ chaꞌan ñi loo cusi.
\v 16 Yu sindatu yten loꞌo yu ꞌin Jesús ñaꞌan tñan, canꞌ mxoꞌ tiꞌin taꞌa yu tsatlyu.
\v 17 Mxicoꞌ yu sca teꞌ cuaa ꞌin ñi, mtñan yu sca sniꞌ quicheꞌ loꞌ mdiꞌin tyaa yu ꞌin na que ñi.
\v 18 Mdyisnan msiꞌya loꞌo yu ꞌin ñi, loꞌ nchcuiꞌ yu: ¡Nguiꞌni tnu hua ꞌin um, ꞌun nu lca ree ꞌin neꞌ judio!
\v 19 Loꞌo yca mjyiꞌin yu que ñi, msuꞌhua siyeꞌ yu ꞌin ñi, loꞌ mdon xtyinꞌ yu tloo ñi, siꞌyana lyee nguiꞌni tnu yu ꞌin ñi ca lca chaꞌ ꞌin yu.
\v 20 Xa cuaꞌ ngulaꞌ mstyi lyiꞌo yu ꞌin ñi, xacanꞌ ngulyoo yu teꞌ cuaa nu mxicoꞌ yu ꞌin ñi, loꞌ mxicoꞌ yu ꞌin ñi loꞌo steꞌ ca ñi. Ya loꞌo yu ꞌin ñi seꞌen chaꞌan ñi loo cusi.
\s Xa ngujui Jesús loo cusi
\p
\v 21 Tucueen nguiaa yu mchcua taꞌa yu loꞌo sca yu yaa tñan niꞌ quixinꞌ, sca yu naan Simón nu mdoꞌo quichen Cirene, sti yu Jantro loꞌo Rufo, loꞌ yu sindatu canꞌ mxicuꞌni yu ꞌin cuiꞌya cusi canꞌ.
\v 22 Xacanꞌ mdiya loꞌo yu sindatu ꞌin Jesús sca seꞌen nu naan Gólgota, loꞌ chaꞌ re nchca tiꞌ chcuiꞌ, seꞌen lca que jyiꞌo.
\v 23 Mdaa yu vino nu mxitiyaꞌ loꞌo mirra ꞌin Jesús, una a yiꞌo ñi ꞌin na.
\v 24 Xa cuaꞌ mjyiꞌin caꞌan yu ꞌin ñi loo cusi, mtsa yu steꞌ ñi, ngulo yu xuꞌhue yu loꞌo na, chaꞌ ñaꞌan quiꞌni caꞌan na ꞌin yu cunda scaa yu.
\v 25 Ntsuꞌhui braa cuaꞌ caa tlya xa mjyiꞌin caꞌan yu ꞌin ñi loo cusi.
\v 26 Loꞌ quiꞌya nu msuꞌhua neꞌ ꞌin Jesús ngaꞌan na nde que cusi, loꞌ nchcuiꞌ na: Nde yu lca ree ꞌin neꞌ judio.
\v 27 A cunta loꞌo tucua yu cunan mjyiꞌin caꞌan yu sindatu ꞌin loo cusi, sca yu tsoꞌ cueen ꞌin ñi, loꞌ xca yu tsoꞌ ca.
\v 28 Yatoꞌo chaꞌ nu nguinu scua loo quityi ꞌin Ndiose, loꞌ nchcuiꞌ na: Cuaꞌ lca na sca chaꞌ ti ꞌin ñi loꞌo neꞌ nducunꞌ.
\v 29 Nten nu ndyijyin cuiꞌ ti canꞌ nchcuiꞌ caꞌan neꞌ ꞌin ñi, nxiquiñan neꞌ que neꞌ loꞌ nchcuiꞌ neꞌ: Junꞌ, ¿ta siꞌi nuꞌhuin juin siꞌyana xicuten laa, loꞌ tsaniꞌ snan ti tsaan tñan ꞌin na xiyaꞌ?
\v 30 Canꞌ chaꞌ lyo laa ꞌin ticuiiꞌ, loꞌ quiꞌya loo cusi cua.
\v 31 Yu nu ndlo tñan niꞌ lyaa loꞌo neꞌ escriba, ticuiꞌ ti ñaꞌan nchcuiꞌ caꞌan yu ꞌin ñi, loꞌ nchcuiꞌ scasca yu: Yu re, xca tucui ngulo laa yu, una a nchca culo laa yu ꞌin yu ticuiiꞌ yu.
\v 32 Cuaꞌ ñii tloo naꞌan na chaꞌ quiꞌya Cristo loo cusi, cuiꞌ ree ꞌin neꞌ Israel, loꞌ tsa quiꞌan tiꞌ na ꞌin. A cunta yu nu taꞌa ngaꞌan ñi loo cusi, nchcuiꞌ caꞌan yu ꞌin ñi.
\v 33 Xa mdiyaa ndyiꞌya cuaan tsayaꞌ mdiyaa braa cuaꞌ snan siin, nguꞌya tla yta ñaꞌaan sca chcui seꞌen canꞌ.
\v 34 Cuiꞌ braa cuaꞌ snan siin ycuiꞌ cueen Jesús: —Eloi, Eloi, ¿lama sabactani—? Chaꞌ re nchca tiꞌ chcuiꞌ: —Ndiose ꞌñan, Ndiose ꞌñan, ¿ñi chaꞌ ta ngula yaaꞌ um ꞌñan—?
\v 35 Ntsuꞌhui nu ngune ꞌin chaꞌ nu ycuiꞌ ñi, loꞌ nchcuiꞌ neꞌ: Ñaꞌan jan ñi, nsiꞌya yu ꞌin nu ncua naan Elía.
\v 36 Xacanꞌ ndla ndsa ti mdoꞌo sca yu nu nguia ꞌya sca teꞌ, loꞌ mchaꞌ yu ꞌin na loꞌo tyiꞌa vinagre, mscuen yu ꞌin na sca tucoꞌ yca siꞌyana coꞌo Jesús ꞌin na, loꞌ nchcuiꞌ yu: Quita na ñaꞌan na chaꞌ caan ca yu Elía, loꞌ tyiꞌya ꞌin yu loo cusi.
\v 37 Una Jesús msiꞌya cueen ñi, cuiꞌ ñaꞌan lcaa ngujui ñi.
\v 38 Teꞌ tlyu nu nducui niꞌ lyaa mdaꞌ tluꞌhue la na, tiꞌ ndyiꞌo la cuaan nguꞌya la lyuu.
\v 39 Nde loo seꞌen ngaꞌan Jesús ndon xꞌnan sindatu, xa ngune ꞌin yu ñaꞌan msiꞌya Jesús xa ngujui ñi, loꞌ juin yu: Nu chaꞌ ñi ca siꞌyana yu re ncua yu Sñeꞌ Ndiose.
\v 40 A cunta loꞌo tucua snan jun cunaꞌan ndon jun tijyoꞌ ti nanꞌ ꞌya jun, cuiꞌ María Magdalena, María jyiꞌan yu See loꞌo Jacobo, yu nu cuneꞌ la canꞌ, a cunta loꞌo Salomé.
\v 41 Jun cunaꞌan re mducui nchaꞌan jun ꞌin Jesús, loꞌ mdaa yaaꞌ jun ꞌin ñi xa mdaꞌan ñi seꞌen lca Galilea. A cunta loꞌo xca ta jun cunaꞌan nu taꞌa mdiyaa ñi quichen Jerusalén, ndon canꞌ.
\s Xa mtsiꞌ Jesús
\p
\v 42 Siꞌyana cuaꞌ msiin tsaan nu cuaꞌ tyisnan xitñanꞌ neꞌ judio,
\v 43 yatoꞌo sca yu naan See Arimatea, mꞌni tnu tiquee yu ya jñan yu chaꞌ cuiyaꞌ ꞌin Pilato siꞌyana cutsiꞌ yu ꞌin Jesús. Lca yu sca nu ndon loo ꞌin neꞌ judio, loꞌo yu nta yu tsaan nu ntsuꞌhui chaꞌ culo Ndiose tñan ꞌin nten.
\v 44 Yu Pilato canꞌ yuhue ꞌa tiꞌ yu xa ynan yu chaꞌ siꞌyana cuaꞌ ngujui Jesús, canꞌ chaꞌ msiꞌya yu ꞌin xꞌnan sindatu canꞌ, loꞌ mñichaꞌ yu ꞌin chaꞌ na chaꞌ ñi ca cuaꞌ ngujui Jesús.
\v 45 Xa cuaꞌ jui suun ꞌin yu siꞌyana cuaꞌ ngujui Jesús, xacanꞌ mdyaa yu Pilato cunta ꞌin yu See canꞌ siꞌyana cutsiꞌ yu ꞌin ñi.
\v 46 Msiꞌi yu See canꞌ sca teꞌ tsuꞌhue ñaꞌan, loꞌ xa mdyiꞌya yu ꞌin Jesús loo cusi, nguxen yu teꞌ canꞌ ꞌin ñi. Mdiꞌin tyaa yu ꞌin ñi niꞌ sca tuquee nu cuaꞌ lca nguiaaꞌ, loꞌ mxixen yu sca quee siꞌyana tucun yu ꞌin na.
\v 47 María Magdalena, loꞌo María nu lca jyiꞌan yu See, naꞌan neꞌ la mtsiꞌ Jesús.
\c 16
\s Xa mdyiquiꞌo Jesús
\p
\v 1 Xa cuaꞌ mdijin tsaan nu nxitñanꞌ neꞌ judio, María Magdalena loꞌo María jyiꞌan yu Jacobo, loꞌo Salomé msiꞌi jun tyiꞌa xityiꞌi nu suꞌhua jun ꞌin Jesús seꞌen mtsiꞌ ñi.
\v 2 Tlya ti culoo tsaan ꞌin snan canꞌ, xa tsa nducua cucha mdoꞌo neꞌ nguiaa neꞌ tucuaa canꞌ.
\v 3 Tucueen nguiaa jun scasca jun nchcuiꞌ jun: ¿Ti nu culo ntan quee nu nchcun tucuaa canꞌ?
\v 4 Xa mdiyaa jun, naꞌan jun siꞌyana cuaꞌ mdoꞌo ntan quee canꞌ, loꞌ lca na sca quee tlyu.
\v 5 Yten jun seꞌen mtsiꞌ Jesús, loꞌ naꞌan jun nducua sca yu tsa suhue ti tsoꞌ cueen canꞌ, lcoꞌ yu sca teꞌ tucuin nu mten, loꞌ ytsen jun.
\v 6 Loꞌ juin yu ꞌin jun: A cutsen um, jlyo tinꞌ siꞌyana ndaꞌan nan um ꞌin Jesús Nazaret nu mjyiꞌin caꞌan neꞌ ꞌin loo cusi. Cuaꞌ mdyiquiꞌo ñi, loꞌ a ntsuꞌhui ꞌa ñi re, cuꞌni quii um seꞌen mdiꞌin tyaa neꞌ ꞌin ñi.
\v 7 Quia ytsaꞌ um ꞌin yu taꞌa mdaꞌan ñi, loꞌo yu Tyo, siꞌyana culo nducua la ñi tsaa ñi seꞌen lca Galilea, la cua ñaꞌan taꞌa ñi loꞌo yu, cuiꞌ ñaꞌan nu cuaꞌ ycuiꞌ ñi loꞌo yu.
\v 8 Ndla ndsa ti mdyiꞌo jun cunaꞌan canꞌ seꞌen mtsiꞌ ñi, mchcuan jun nu lyee nguitsen jun, loꞌ ñi a ycuiꞌ ꞌa jun loꞌo ñi xca tucui, siꞌyana lyee ytsen jun.
\s Xa naꞌan tloo Jesús ꞌin María Magdalena
\p
\v 9 Tlya culoo tsaan ꞌin snan xa mdyiquiꞌo Jesús, culo nducua la ꞌin María Magdalena nguloꞌo tloo ñi, cuiꞌ nu ngulo ñi tsa cati cuiꞌin xaꞌan ꞌin.
\v 10 Mdoꞌo jun nguia ytsaꞌ jun chaꞌ canꞌ ꞌin nchgaa la ñaꞌan taꞌa mdaꞌan Jesús, seꞌen ndiꞌin luꞌun tiꞌ yu loꞌ nguinan yu.
\v 11 Xa ynan yu chaꞌ siꞌyana loꞌo Jesús, a cunta María cuaꞌ naꞌan tloo ꞌin ñi, una a ya quiꞌan tiꞌ yu chaꞌ canꞌ.
\s Xa naꞌan tloo Jesús ꞌin tucua yu Emaús
\p
\v 12 Chonꞌ ndeꞌen la canꞌ, nguloꞌo tloo Jesús ꞌin tucua yu nu nguiaa sca tucueen niꞌ quixinꞌ, una xcañaꞌan nguloꞌo tloo ñi ꞌin yu.
\v 13 Cuiꞌ xaa ya ytsaꞌ yu ꞌin nchgaa la ñaꞌan taꞌa mdaꞌan ñi chaꞌ canꞌ, una ticuiꞌ ti ñaꞌan a ya quiꞌan tiꞌ yu.
\s Mxnu Jesús tñan ꞌin yu taꞌa mdaꞌan ñi
\p
\v 14 La xiyaꞌ ti canꞌ nguloꞌo tloo Jesús ꞌin ycuiꞌ ca yu taꞌa mdaꞌan ñi, cuiꞌ cha tixca yu canꞌ, seꞌen nducua ycu yu. Loꞌ ycuiꞌ ñi loꞌo yu ñi chaꞌ tla ꞌa cusya ꞌin yu, loꞌ a ya quiꞌan tiꞌ yu ꞌin nu naꞌan tloo ca ꞌin ñi xa cuaꞌ mdyiquiꞌo ñi.
\v 15 Xacanꞌ juin ñi ꞌin yu: Tsaa um sca chcui chendyu, loꞌ chcuiꞌ um chaꞌ tsuꞌhue ꞌin Ndiose loꞌo nchgaa nten.
\v 16 Nu tsa quiꞌan tiꞌ ꞌñan loꞌ chcua tya, canꞌ nu tyiꞌo laa. Una nu a tsa quiꞌan tiꞌ ꞌñan, canꞌ nu nducua yuhueꞌ chonꞌ tsala xaa.
\v 17 Nu tsa quiꞌan tiꞌ ꞌñan, scasca chaꞌ nu tnu cuꞌni canꞌ: Loꞌo chaꞌ cuiyaꞌ ꞌñan, culo canꞌ cuiꞌin xaꞌan nu ntsuꞌhui ꞌin nten, loꞌ chcuiꞌ canꞌ scasca lenguas nu cui ti.
\v 18 Chaꞌ xñi canꞌ sca cunaan nu la, loꞌ ta coꞌo canꞌ na nu yuꞌhui yaan ꞌin, loꞌ a sca ca ꞌin. A cunta tyiꞌin tyaa canꞌ yaaꞌ ꞌin nu tiꞌi loꞌ chca.
\s Xa ycuen Jesús nde niꞌ cuaan
\p
\v 19 Xa mdyi ycuiꞌ Ñi Xꞌnan na chaꞌ re, mꞌni Ndiose chaꞌ ycuen ñi nde niꞌ cuaan, loꞌ yten tucua ñi tsoꞌ cueen ꞌin ñi.
\v 20 Yu taꞌa mdaꞌan ñi ya ycuiꞌ yu chaꞌ tsuꞌhue ꞌin Ndiose nchgaa seꞌen, loꞌ Ñi Xꞌnan na mda yaaꞌ ñi ꞌin yu, loꞌ mxnu scua tla ñi chaꞌ nu ycuiꞌ yu loꞌo chaꞌ tnu nu mꞌni ñi. Amen.