\id LUK - Nopala (Chatino) NT [cya] - Mexico 2013 (web 2014)
\h LUCAS
\toc1 Lucas
\toc2 Lucas
\toc3 Lc
\mt1 Lucas
\c 1
\s Yu Luca nchcuiꞌ chaꞌ yu ꞌin yu Teófilo
\p
\v 1 Quiꞌan ꞌa nu cuaꞌ msuꞌhua juesa caꞌan lyicua quityi re tsañaꞌan nu chaꞌ ñi ca yatoꞌo lja hua,
\v 2 chcui ñaꞌan jui nu nguloꞌo ꞌin hua, nu naꞌan tloo chaꞌ re tiꞌ xa mdyisnan na, loꞌ mchcuan yu cunta siꞌyana tsa ycuiꞌ yu chaꞌ re loꞌo nten.
\v 3 Canꞌ chaꞌ loꞌon nanꞌ mdoꞌo tiqueen caꞌan quityi re lyicua la ꞌin um, ꞌun ñi Teófilo, siꞌyana cuaꞌ nguia nan tsuꞌhuen nchgaa chaꞌ re loꞌo chaꞌ tiyaa, tiꞌ la suun seꞌen mdyisnan na,
\v 4 siꞌyana ca cuiyaꞌ tsuꞌhue tiꞌ um loꞌ a cuꞌni tucua tiꞌ um loꞌo chaꞌ nu cuaꞌ jui nu nguloꞌo ꞌin um.
\s Ycuiꞌ angujle chaꞌ ꞌin yu Xuhua
\p
\v 5 Xa ncua yu Herode ree seꞌen lyiꞌya loo Judea, ndiꞌin sca yu naan Zacaría nu ntsuꞌhui cunta ꞌin laa, cuiꞌ ta ꞌin Abía, loꞌ cunaꞌan ꞌin Zacaría canꞌ naan Elisabet, ta nten ꞌin Aarón.
\v 6 Chcuaa canꞌ ñi ndiꞌin chaꞌ ꞌin tloo Ndiose, tsuꞌhue nguia nchaꞌan canꞌ nchgaa chaꞌ nu ndlo Ñi Xꞌnan na tñan loꞌo chaꞌ nu mdiꞌin tyaa ñi.
\v 7 Una a mdiꞌin sñeꞌ jun siꞌyana Elisabet laꞌ ñaꞌan a mduꞌhui sñeꞌ, a cunta chcuaa jun cuaꞌ cula jun.
\v 8 Yatoꞌo lja nguiꞌni Zacaría tñan ꞌin Ndiose, cuiꞌ tsaan nu mꞌni caꞌan ꞌin ta nu ntsuꞌhui yu,
\v 9 mdoꞌo xuꞌhue yu tiquin tucua yu na nu xityiꞌi niꞌ lyaa ꞌin Ñi Xꞌnan na, ñaꞌan chaꞌ nu cuaꞌ ntsuꞌhui ꞌin yu nu ndlo tñan niꞌ lyaa.
\v 10 Ñaꞌaan quichen neꞌ ndiꞌin nde lyiyaꞌ, nchcuiꞌ lyiꞌo neꞌ ꞌin Ndiose lja ndiquin na xityiꞌi canꞌ.
\v 11 Xacanꞌ nguꞌya ton sca angujle ꞌin Ñi Xꞌnan na tloo yu, luhuaꞌ tsoꞌ cueen seꞌen ndiquin na canꞌ.
\v 12 Xa naꞌan Zacaría ꞌin angujle canꞌ, ytsen yu loꞌ a ngujlyo ꞌa tiꞌ yu ñaꞌan ca.
\v 13 Una angujle canꞌ juin loꞌo yu: A cutsen Zacaría, siꞌyana cuaꞌ mxcuen Ndiose chaꞌ nu njñan, nten ꞌin nu lca Elisabet ntsuꞌhui chaꞌ tyiꞌin sca sñeꞌ, loꞌ tyiꞌin tyaa nii ca naan Xuhua.
\v 14 Ndyijyin yaꞌ ca tsuꞌhue chuꞌhui tiquee siꞌya chaꞌ re, cuiꞌ cuañaꞌan quiꞌan ꞌa nten ca tsuꞌhue chuꞌhui tiquee neꞌ xa ca cuneꞌ cuhuiꞌ,
\v 15 siꞌyana tlyu tucui ca canꞌ tloo Ndiose. A ntsuꞌhui chaꞌ coꞌo canꞌ vino uta sidra, siꞌyana cuaꞌ lca mtsaꞌan yuꞌhui canꞌ loꞌo Espíritu nu Luhui ꞌin Ndiose xa tiyaan chendyu.
\v 16 Cuꞌni canꞌ chaꞌ siꞌyana quiꞌan neꞌ Israel xitucui neꞌ loꞌ tsa quiꞌan tiꞌ neꞌ ꞌin Ñi Xꞌnan na, ñi nu lca Ndiose ꞌin neꞌ.
\v 17 Chcua loo yu cuꞌni yu tñan ꞌin Ñi Xꞌnan na loꞌo nu chcui lca tiquee yu tsañaꞌan chaꞌ cuiyaꞌ nu mdon loꞌo Elía, —cuꞌni yu chaꞌ chca tsuꞌhue lca tiquee nten cula canꞌ loꞌo sñeꞌ neꞌ—, cuiꞌ cuañaꞌan nu lyeꞌ tiꞌ tyisnan cuꞌni tñan tsuꞌhue, ñaꞌan ca siꞌyana tyiꞌin tya tiyaa yu sca quichen nu cuan xuꞌhue ꞌin Ñi Xꞌnan na.
\v 18 Xacanꞌ juin Zacaría ꞌin angujle canꞌ: ¿Ñaꞌan ta tca chuꞌhui lyoon chaꞌ re? A cunta cuaꞌ culan, cuiꞌ cuañaꞌan nten ꞌñan.
\v 19 Mxcuen angujle canꞌ ꞌin yu: Nanꞌ lcan Gabriel nu nguilyu tloo Ndiose, cuiꞌ ñi nguaꞌan tñan ñi ꞌñan siꞌyana chcuinꞌ loꞌo loꞌ ca jlyo tiꞌ chaꞌ tsuꞌhue re.
\v 20 Una tiꞌ cuaꞌ ñii a tca ꞌa chcuiꞌ tsayaꞌ tiyaa tsaan nu tsatoꞌo chaꞌ re, siꞌyana a ya quiꞌan tiꞌ chaꞌ nu ycuinꞌ loꞌo.
\v 21 Nten canꞌ nta neꞌ ꞌin Zacaría nde lyiyaꞌ, loꞌ nduhue tiꞌ neꞌ ñi chaꞌ lyee ꞌa ndiyaꞌ yu niꞌ lyaa canꞌ.
\v 22 Una xa mdyiꞌo yu a ncua ꞌa chcuiꞌ yu, xacanꞌ nguꞌya neꞌ cunta siꞌyana naꞌan xñii yu sca chaꞌ niꞌ lyaa canꞌ. Xtyi nꞌni yaaꞌ ti yu ntsaꞌ yu chaꞌ nu naꞌan yu, loꞌ a ncua ꞌa chcuiꞌ yu.
\v 23 Xa yatii tsaan nu nguilyu yu niꞌ lyaa, xacanꞌ nguila yu nde seꞌen ndiꞌin yu.
\v 24 Chonꞌ ndeꞌen canꞌ mxilyo ñaꞌan Elisabet, loꞌ tsaniꞌ caꞌyu cooꞌ a la ꞌa mdoꞌo neꞌ, loꞌ nchcuiꞌ neꞌ:
\v 25 Ndeñaꞌan mꞌni Ñi Xꞌnan na loꞌon siꞌyana nguia yuꞌhui tiꞌ ñi ꞌñan, loꞌ a caja ꞌa chaꞌ chcuiꞌ nten loꞌon cuaꞌ ñaꞌan ti.
\s Ycuiꞌ angujle chaꞌ ꞌin Jesús
\p
\v 26 Xa cuaꞌ nguiaa scua cooꞌ mxilyo ñaꞌan Elisabet, xacanꞌ nguaꞌan tñan Ndiose ꞌin angujle Gabriel canꞌ, tsaa quichen Nazaret seꞌen lyiꞌya loo Galilea,
\v 27 seꞌen ndiꞌin sca neꞌ cunaꞌan tsa suhue ti nu a nchca quiꞌni caꞌan yu quiꞌyu ꞌin, una cuaꞌ ncua cuiyaꞌ chaꞌ siꞌyana ca cuilyiꞌo neꞌ ꞌin sca yu naan See, cuiꞌ ta nten ꞌin Davi, loꞌ neꞌ cunaꞌan canꞌ naan neꞌ María.
\v 28 Xacanꞌ mdiyaa angujle seꞌen ndiꞌin neꞌ cunaꞌan canꞌ loꞌ juin: ¡Ca tsuꞌhue chuꞌhui tiquee tsañaꞌan chaꞌ tsuꞌhue nu mdoꞌo tiquee Ndiose loꞌo! Siꞌyana Ñi Xꞌnan na ndiꞌin loꞌo, loꞌ tlyu la xuꞌhue mdaa Ndiose ꞌin que nchgaa la ñaꞌan neꞌ cunaꞌan.
\v 29 Una xa naꞌan ꞌin angujle canꞌ, ytsen loꞌo chaꞌ nu ngune ꞌin, loꞌ msuꞌhua chaꞌ tiquee chaꞌ ñi chaꞌ ca lca chaꞌ canꞌ.
\v 30 Xacanꞌ juin angujle: María, a cutsen, siꞌyana Ndiose ndyuꞌhui cuiyaꞌ tiꞌ ñi ꞌin.
\v 31 Cuaꞌ ñii ntsuꞌhui chaꞌ xilyo ñaꞌan loꞌ tyiꞌin sca cuhuiꞌ quiꞌyu ꞌin, loꞌ tyiꞌin tyaa nii cuhuiꞌ ca naan cuhuiꞌ Jesús.
\v 32 Ntsuꞌhui chaꞌ ca ñi sca nu ndon loo, loꞌ ca naan ñi Sñeꞌ Ndiose, ñi nu tlyu lati, cuiꞌ Ndiose Xꞌnan na xiton ꞌin ñi, loꞌ chcuan ñi cunta chaꞌ cuiyaꞌ nu mdaa Ndiose ꞌin Davi, nu lca sti ta nten ꞌin ñi,
\v 33 tsala xaa culo ñi tñan ꞌin ta nten ꞌin Jacob, loꞌ a ntsuꞌhui chaꞌ tsatii chaꞌ cuiyaꞌ ꞌin ñi.
\v 34 Xacanꞌ juin María ꞌin angujle canꞌ: ¿Ñaꞌan ta tsatoꞌo chaꞌ re siꞌyana a nchca sca yu quiꞌyu quiꞌni caꞌan ꞌñan?
\v 35 Mxcuen angujle canꞌ: Espíritu nu Luhui ꞌin Ndiose quiꞌya yuꞌhui ꞌin, scati Ndiose ñi nu tlyu lati cuꞌni ñi chaꞌ choꞌo yuꞌhui chaꞌ cuiyaꞌ ꞌin ñi ꞌin, loꞌ nu ntsuꞌhui chaꞌ ca cuneꞌ canꞌ lca sca nu Luhui, canꞌ chaꞌ ca naan canꞌ Sñeꞌ Ndiose.
\v 36 Cuaꞌ ñii ca cuiyaꞌ tiꞌ siꞌyana loꞌo Elisabet nu tiꞌ nchca taꞌa, cuaꞌ mxilyo ñaꞌan siyaꞌ cuaꞌ cula, cuaꞌ nguiaa scua cooꞌ ꞌin loꞌo chaꞌ canꞌ, cuiꞌ nu nchcuiꞌ neꞌ ꞌin siꞌyana a ndyiꞌin sñeꞌ,
\v 37 una chaꞌ nu ꞌin Ndiose, a sca chaꞌ tucui.
\v 38 Xacanꞌ juin María: Nde ndon loꞌ ca jaꞌan ꞌin Ñi Xꞌnan na, loꞌ tsatoꞌo nchgaa chaꞌ nu ycuiꞌ um loꞌon. Xacanꞌ mdoꞌo angujle canꞌ nguiaa.
\s Ya naꞌan María ꞌin Elisabet
\p
\v 39 Xiꞌi ti mducui, ndla ti mꞌni María chaꞌ mdoꞌo nguiaa sca quichen ndiꞌin lja quiꞌya seꞌen lyiꞌya loo Judea,
\v 40 xa mdiyaa seꞌen nducua naꞌan ꞌin Zacaría, ycuiꞌ chaꞌ ꞌin Elisabet.
\v 41 Yatoꞌo xa ngune ꞌin Elisabet ycuiꞌ chaꞌ María canꞌ, ngüi tiꞌ Elisabet nguñan yuꞌhui cuhuiꞌ canꞌ ꞌin, cuiꞌ ñaꞌan lcaa mtsaꞌan yuꞌhui Elisabet loꞌo Espíritu nu Luhui ꞌin Ndiose.
\v 42 Cuiꞌ xaa mdoꞌo ycuiꞌ cueen: Tsuꞌhue ca xuꞌhue nuꞌhuin que ꞌin nchgaa la ñaꞌan neꞌ cunaꞌan, loꞌ tlyu ca xuꞌhue ntsuꞌhui ꞌin ñi nu lca sñeꞌ.
\v 43 Nduhue tinꞌ ñi chaꞌ mꞌni caꞌan chaꞌ re ꞌñan siꞌyana jyiꞌan Ñi Xꞌnan yan ycuiꞌ chaꞌ ꞌñan.
\v 44 Ñaꞌaan xa ngune ꞌñan ycuiꞌ chaꞌ, cuiꞌ xaa nguñan yuꞌhui cuhuiꞌ re ꞌñan loo nu lyee tsuꞌhue ntsuꞌhui tiquee cuhuiꞌ.
\v 45 Tsuꞌhue ca xuꞌhue siꞌyana ya quiꞌan tiꞌ, a sꞌni tsatoꞌo chaꞌ nu cuaꞌ mdiꞌin tyaa Ñi Xꞌnan na loꞌo.
\v 46 Xacanꞌ juin María: —Loꞌo nu chcui cusya ꞌñan cuꞌnin tnun ꞌin Ñi Xꞌnan na,
\v 47 loꞌ ndyijyin yaꞌ tsuꞌhue ntsuꞌhui tiqueen loꞌo Ndiose, Ñi nu ndlo laa ꞌñan,
\v 48 siꞌyana mdiꞌin tyaa ñi quiloo ñi ꞌñan, nanꞌ nu lca nguso ꞌin ñi—, loꞌ tiꞌ cuaꞌ ñii nchgaa ta nten nu caan nde loo re, chcuiꞌ siꞌyana tlyu ca xuꞌhue ntsuꞌhui ꞌñan.
\v 49 Siꞌyana Ñi nu tla la chaꞌ ꞌin mꞌni ñi sca chaꞌ nu tnu loꞌon, —loꞌ lca ñi sca nu Luhui ꞌa—.
\v 50 Tsala xaa —ñaꞌan ꞌtnan tiꞌ ñi ꞌin nten tsalca nu nchca jaꞌan ꞌin ñi—.
\v 51 Mꞌni ñi scasca chaꞌ nu tnu loꞌo chaꞌ cuiyaꞌ ꞌin ñi, ngujlyo ñi ꞌin nu siyeꞌ loꞌo cha tiyaa ꞌin canꞌ.
\v 52 Mchcuan ñi chaꞌ cuiyaꞌ ꞌin nu ndlo tñan loo chendyu re, loꞌ mscuen cuaan ñi ꞌin nu joꞌo la ndiꞌin chaꞌ ꞌin.
\v 53 Mdaa ñi nchgaa loo chaꞌ tsuꞌhue ꞌin nu ndaꞌan nguiteꞌ tiꞌ, una nu cuilyiyaꞌ mxnu ñi ꞌin canꞌ cua ti ñaꞌan.
\v 54 Mda yaaꞌ ñi ꞌin neꞌ Israel nu lca nguso ꞌin ñi, nguia yuꞌhui tiꞌ ñi ꞌin neꞌ loꞌ tsala ñaꞌan mñaꞌan ꞌtnan tiꞌ ñi ꞌin neꞌ,
\v 55 chaꞌ nu mdiꞌin tyaa ñi loꞌo nu ncua nten cula ꞌin na, cuiꞌ Abraham loꞌo ta nten nu lca sñeꞌ canꞌ, loꞌ nguinu scua chaꞌ re tsala xaa.
\v 56 Canꞌ nguinu María loꞌo Elisabet tsaniꞌ snan cooꞌ, chonꞌ ndeꞌen canꞌ mxitucui nde quichen tyi.
\s Xa ncua cuneꞌ yu Xuhua
\p
\v 57 Xa ya tucua tsaan canꞌ mdiyaan sca cuhuiꞌ quiꞌyu ꞌin Elisabet.
\v 58 Taꞌa ndiꞌin neꞌ cuiꞌ ti canꞌ loꞌo nchgaa la ñaꞌan taꞌa jun, xa ynan neꞌ chaꞌ siꞌyana Ndiose tlyu chaꞌ tsuꞌhue mꞌni ñi loꞌo jun, tsuꞌhue yuꞌhui tiquee neꞌ.
\v 59 Xa ncua snuꞌ tsaan cuhuiꞌ canꞌ, yaa jun seꞌen ntsuꞌhui chaꞌ ca circuncida ꞌin cuhuiꞌ, loꞌ mdiꞌin tyaa neꞌ nii cuhuiꞌ siꞌyana ca naan cuhuiꞌ Zacaría, ñaꞌan naan sti cuhuiꞌ.
\v 60 Una jyiꞌan cuhuiꞌ mxcuen: Siꞌi cuañaꞌan ca naan cuhuiꞌ, Xuhua ca naan cuhuiꞌ.
\v 61 Loꞌ juin neꞌ xacanꞌ: ¿Ñi chaꞌ ca naan cuhuiꞌ cuañaꞌan, loꞌ ñi sca ta nten ꞌin, a naan cuañaꞌan?
\v 62 Xacanꞌ mꞌni yaaꞌ ti neꞌ ꞌin sti cuhuiꞌ chaꞌ ñaꞌan ca naan cuhuiꞌ.
\v 63 Cuiꞌ xaa mjñan yu sca caꞌ lyoꞌ ti, loꞌ ndeñaꞌan nguaꞌan yu loo na: Xuhua ca naan cuhuiꞌ. Xacanꞌ nchgaa neꞌ yuhue tiꞌ neꞌ.
\v 64 Ticuiꞌ xaa nguila chaꞌ nchcuiꞌ ꞌin Zacaría canꞌ, loꞌ mdyaa yu xuꞌhue ꞌin Ndiose.
\v 65 Ndyijyin ꞌa yaꞌ nduhue tiꞌ nchgaa nten ndiꞌin cuiꞌ ti canꞌ, cuañaꞌan scasca quichen ndiꞌin lja quiꞌya seꞌen lyiꞌya loo Judea mscua cueen chaꞌ canꞌ.
\v 66 Nchgaa nu ngune ꞌin chaꞌ canꞌ msuꞌhua neꞌ chaꞌ tiquee neꞌ, loꞌ nchcuiꞌ neꞌ: ¿Ñi na ñaꞌan ndiꞌin chaꞌ ꞌin cuhuiꞌ cua? Loꞌ Ñi Xꞌnan na ntsuꞌhui ñi cunta ꞌin cuhuiꞌ.
\s Chaꞌ nu mxiycuiꞌ Ndiose ꞌin Zacaría
\p
\v 67 Loꞌ Zacaría sti cuhuiꞌ mtsaꞌan yuꞌhui loꞌo Espíritu nu Luhui ꞌin Ndiose loꞌ ndeñaꞌan mxiycuiꞌ ñi ꞌin:
\v 68 —Tlyu ca chaꞌ tsuꞌhue ntsuꞌhui ꞌin Ndiose Xꞌnan neꞌ Israel—, siꞌyana cuaꞌ mdiyaan ñi seꞌen nu culo laa ñi quichen ꞌin ñi,
\v 69 mxiton ñi sca nu tla la chaꞌ ꞌin nu culo laa ꞌin na, nu yaan loo ta nten ꞌin Davi nu ncua nguso ꞌin ñi,
\v 70 cuiꞌ tsañaꞌan chaꞌ nu mxiycuiꞌ ñi ꞌin nchgaa nu mdoꞌo hui ꞌin ñi tiꞌ culoo,
\v 71 siꞌyana culo laa ñi ꞌin na tuyaaꞌ taꞌa cusuun na loꞌo nchgaa nu nxcuan tloo ꞌin na,
\v 72 loꞌ cuañaꞌan ñaꞌan ꞌtnan tiꞌ ñi ꞌin nchgaa nten cula ꞌin na, loꞌ nguia yuꞌhui tiꞌ ñi chaꞌ nu mxnu ñi ꞌin canꞌ,
\v 73 cuiꞌ chaꞌ nu mdiꞌin tyaa ca ñi loꞌo nten cula ꞌin na Abraham, chaꞌ nu ntsuꞌhui chaꞌ taa ñi ꞌin na,
\v 74 siꞌyana tyiꞌo laa na tuyaaꞌ taꞌa cusuun na, loꞌ cuañaꞌan taa ñi chaꞌ cuiyaꞌ cuꞌni na tñan ꞌin ñi loꞌo nu chcui lca tiquee na,
\v 75 luhui chaꞌ tiyaa ꞌin na cuꞌni na tñan tsuꞌhue tloo ñi tsala xaa.
\v 76 Nuꞌhuin nu lca sñenꞌ, ntsuꞌhui chaꞌ caja nu culoꞌo naan ꞌin siꞌyana lca yu nu nxiycuiꞌ Ndiose ꞌin, ñi nu tlyu lati. Siꞌyana —chcua loo loꞌ cuꞌni chuꞌhue tucueen nu caan Ñi Xꞌnan na—.
\v 77 Loꞌ culoꞌo ꞌin quichen ꞌin ñi ñaꞌan ntsuꞌhui chaꞌ tyiꞌo laa neꞌ, ñaꞌan ca siꞌyana cuꞌni ñi chaꞌ tlyu tiꞌ ꞌin neꞌ loꞌo quiꞌya nducui neꞌ.
\v 78 Siꞌyana tlyu chaꞌ tsuꞌhue mdoꞌo tiquee Stina Ndiose loꞌo na, canꞌ chaꞌ tiꞌ la niꞌ cuaan ncua chcanꞌ sca xaa nu yaan ꞌin na,
\v 79 siꞌyana —tyuꞌhui xaa ꞌin nchgaa nu ndiꞌin seꞌen tla yta, nchgaa nu nsuꞌhua nchcun chaꞌ ndyija ꞌin—, a cunta siꞌyana culoꞌo ñi ꞌin na tucueen nu tsaa na, loꞌ cuañaꞌan tca tyiꞌin tsuꞌhue na.
\v 80 Cuhuiꞌ canꞌ nguia nguilo cuhuiꞌ, loꞌ cuañaꞌan nguia ndyija juesa ꞌin loꞌo tsoꞌ nu ꞌin Ndiose, loꞌ mdiꞌin yu sca seꞌen ngutyi tsayaꞌ mdiyaa tsaan nu nguloꞌo tloo yu ꞌin neꞌ Israel.
\c 2
\s Xa ncua cuneꞌ Jesús
\p
\v 1 Yatoꞌo yu nu lca ree Augusto César, mdiꞌin tyaa tla yu sca chaꞌ siꞌyana nchgaa nten chaꞌan scua nii neꞌ ñaꞌaan seꞌen ndlo yu tñan.
\v 2 Chaꞌ re yatoꞌo culoo xa nguꞌya yu Cirenio tñan seꞌen lyiꞌya loo Siria.
\v 3 Cunda scaa nten nguiaa neꞌ quichen tyi neꞌ siꞌyana chaꞌan scua nii neꞌ.
\v 4 Canꞌ chaꞌ loꞌo yu See mdoꞌo yu quichen Nazaret seꞌen lyiꞌya loo Galilea, nguiaa yu quichen tyi Davi, cuiꞌ Belén seꞌen lyiꞌya loo Judea, siꞌyana lca yu ta nten ꞌin Davi,
\v 5 canꞌ ntsuꞌhui chaꞌ chaꞌan scua nii jun loꞌo María nu lca cuilyiꞌo yu, loꞌ cuaꞌ nchcui cuiiꞌ chaꞌ tiyaan sñeꞌ canꞌ chendyu.
\v 6 Yatoꞌo lja ndiꞌin jun canꞌ, ya tucua xaa nu ntsuꞌhui chaꞌ tyijyin yuꞌhui ꞌin.
\v 7 Mdiꞌin sca cuhuiꞌ ꞌin, sñeꞌ nu culoo, loꞌ nguxen sca teꞌ ꞌin cuhuiꞌ, mdiꞌin tyaa ꞌin cuhuiꞌ sca seꞌen ndyuꞌhui na nchcu ꞌni, siꞌyana a jui naꞌan seꞌen quinu jun.
\s Chaꞌ ꞌin angujle loꞌo yu nu naꞌan seen slyaꞌ
\p
\v 8 Tuꞌhua quichen canꞌ ndiꞌin tucua snan yu nu naꞌan seen slyaꞌ, ntsuꞌhui yu cunta ꞌin ꞌin chcui tla.
\v 9 Tsati ntyin nguloꞌo tloo sca angujle ꞌin Ñi Xꞌnan na ꞌin yu, la niꞌ cuaan mdoꞌo sca xaa ꞌin Ñi Xꞌnan na msuꞌhua loꞌo ꞌin yu, loꞌ lyee ytsen yu.
\v 10 Una juin angujle canꞌ loꞌo yu: A cutsen um, siꞌyana nde ljyan loꞌon sca chaꞌ tsuꞌhue ꞌin um tsañaꞌan nu ca tsuꞌhue chuꞌhui tiquee nchgaa nten:
\v 11 Siꞌyana tla re ñii, quichen tyi Davi, ngula ñi nu culo laa ꞌin um, canꞌ nu lca Cristo ñi nu lca Xꞌnan na.
\v 12 Nde sca cuiyaꞌ nu ndyiꞌin tyaan ꞌin um: Quia nan um ꞌin sca cuhuiꞌ nu ntsuꞌhui niꞌ yca seꞌen ndyuꞌhui na nchcu ꞌni.
\v 13 Tsati ntyin ncua chcanꞌ quiꞌan la angujle la niꞌ cuaan nu nguiꞌni tnu ꞌin Ndiose, loꞌ nchcuiꞌ:
\v 14 ¡Cuꞌni tnu na ꞌin Ndiose, ñi nu nducua niꞌ cuaan, cuaꞌ ñii caja ñaꞌan tyiꞌin tsuꞌhue nten loo chendyu re, siꞌyana cuañaꞌan lca tiquee ñi loꞌo neꞌ!
\v 15 Yatoꞌo xa mxitucui angujle canꞌ nde niꞌ cuaan, yu nu naꞌan seen slyaꞌ canꞌ mdyisnan nchcuiꞌ yu scasca yu: Tsaa na quichen Belén loꞌ ca cuiyaꞌ tiꞌ na chaꞌ nu yatoꞌo, tsañaꞌan mtsaꞌ Ñi Xꞌnan na ꞌin na.
\v 16 Ticuiꞌ xaa mdoꞌo yu nguiaa yu, loꞌ nguija lyoo yu ꞌin María loꞌo yu See, loꞌ cuhuiꞌ canꞌ nscua cuhuiꞌ niꞌ yca seꞌen ndyuꞌhui na nchcu ꞌni.
\v 17 Xa naꞌan yu ꞌin cuhuiꞌ canꞌ, mdaa yu suun loꞌo jun nchgaa chaꞌ nu ngune ꞌin yu chaꞌ ꞌin cuhuiꞌ.
\v 18 Nduhue tiꞌ nchgaa nu ngune ꞌin chaꞌ nu ycuiꞌ yu nu naꞌan seen slyaꞌ canꞌ.
\v 19 Nguinu yuꞌhui chaꞌ canꞌ tiquee María, loꞌ quiꞌan chaꞌ nguñan tiꞌ siꞌya chaꞌ nu yatoꞌo.
\v 20 Xacanꞌ yu nu naꞌan seen slyaꞌ canꞌ mxitucui yu nguiaa yu, nguiꞌni tnu yu ꞌin Ndiose loꞌ ndyaa yu xuꞌhue ꞌin ñi siꞌya nchgaa chaꞌ nu naꞌan yu loꞌ ngune ꞌin yu, cuiꞌ tsañaꞌan chaꞌ nu ycuiꞌ angujle canꞌ loꞌo yu.
\s Mxnu jun cunta ꞌin cuhuiꞌ yaaꞌ Ñi Xꞌnan na
\p
\v 21 Xa mdaꞌa snuꞌ tsaan canꞌ mꞌni jun chaꞌ ncua circuncida ꞌin cuhuiꞌ, loꞌ mdiꞌin tyaa jun nii cuhuiꞌ siꞌyana ca naan cuhuiꞌ Jesús, cuiꞌ nii nu mdiꞌin tyaa angujle xa tiꞌ lyijyi xilyo ñaꞌan María.
\v 22 Xa mdaꞌa tsaan nu ntsuꞌhui chaꞌ suhui jun ꞌin jun, tsañaꞌan nu nchcuiꞌ lee nguaꞌan scua Moisé, xacanꞌ ya loꞌo jun ꞌin cuhuiꞌ quichen Jerusalén, siꞌyana xnu jun cunta ꞌin cuhuiꞌ yaaꞌ Ñi Xꞌnan na.
\v 23 (Siꞌyana ndeñaꞌan nguinu scua chaꞌ loo lee ꞌin Ñi Xꞌnan na: —Cuhuiꞌ quiꞌyu nu culoo ꞌin jyiꞌan, canꞌ nu tucua tloo Ñi Xꞌnan na ꞌin—.)
\v 24 A cunta siꞌyana taa jun sca lcuan nu squin tucua tloo Ndiose tsañaꞌan nchcuiꞌ lee ꞌin Ñi Xꞌnan na: Ntsuꞌhui chaꞌ taa jun —tsa ta ngroo uta tucua scunꞌ joꞌo nu cuneꞌ ti—.
\v 25 Cuiꞌ quichen Jerusalén ndiꞌin sca yu nu naan Simeón, lca yu sca nu ñi ndiꞌin chaꞌ ꞌin loꞌ nꞌni tnu yu ꞌin Ndiose, loꞌo yu nta yu tsaan nu ntsuꞌhui chaꞌ tyiꞌo laa neꞌ Israel, loꞌ mtsaꞌan yuꞌhui yu loꞌo Espíritu nu Luhui ꞌin Ndiose.
\v 26 Cuaꞌ mtsaꞌ Espíritu ꞌin yu siꞌyana a tyiꞌo yu loo chendyu re, chaꞌ siꞌi la cuaꞌ naꞌan tloo yu ꞌin ñi nu mdoꞌo hui ca ꞌin Ñi Xꞌnan na.
\v 27 Cuiꞌ tsaan canꞌ mduꞌhui Espíritu tiquee yu siꞌyana tsaa yu niꞌ lyaa, lja xacanꞌ mdiya loꞌo jun ꞌin cuhuiꞌ canꞌ, siꞌyana cuꞌni neꞌ loꞌo cuhuiꞌ tsañaꞌan nu nchcuiꞌ lee.
\v 28 Xacanꞌ mdiꞌin tyaa scun yu Simeón canꞌ ꞌin cuhuiꞌ, mdyaa yu xuꞌhue ꞌin Ndiose, loꞌ nchcuiꞌ yu:
\v 29 Ñi Xꞌnan hua, cuaꞌ ñii tca chcuan um ꞌñan ñaꞌan chaꞌ nu cuaꞌ mdiꞌin tyaa um,
\v 30 siꞌyana cuaꞌ naꞌan tloon ꞌin ñi nu ntsuꞌhui chaꞌ culo laa ꞌin hua,
\v 31 cuiꞌ chaꞌ tsuꞌhue nu cuaꞌ mdiꞌin tyaa um nu cuꞌni tsuꞌhue ꞌin nchgaa nten,
\v 32 nde nu lca sca xaa nu sla chaꞌ tiyaa ꞌin neꞌ gentil, cuiꞌ cuañaꞌan ca tsuꞌhue chuꞌhui tiquee neꞌ Israel nu lca quichen ꞌin um.
\v 33 Yu See loꞌo jyiꞌan cuhuiꞌ nduhue ꞌa tiꞌ jun chaꞌ nu nchcuiꞌ Simeón canꞌ chaꞌ ꞌin cuhuiꞌ.
\v 34 Loꞌ mjñan yu Simeón ꞌin Ndiose siꞌyana ncuan ñi ꞌin jun, xacanꞌ juin yu ꞌin María jyiꞌan cuhuiꞌ canꞌ: Nde nu ngulo ton Ndiose, loꞌ siꞌya ñi re quiꞌan ꞌa neꞌ Israel tyiton neꞌ, a cunta quiꞌan neꞌ ntsuꞌhui chaꞌ tlyu neꞌ, loꞌ caja nu ñaꞌan tiꞌi ꞌin,
\v 35 (loꞌ chaꞌ re tyijyin xiꞌyu na niꞌ cusya ꞌin tsañaꞌan nchca tiꞌ sca xlyu), ñaꞌan ca siꞌyana ca chcanꞌ loo tsañaꞌan lca cusya ꞌin nchgaa nten.
\v 36 A cunta niꞌ lyaa canꞌ nguilyu Ana, sca neꞌ cunaꞌan nu nxiycuiꞌ Ndiose ꞌin, sñeꞌ Fanuel nu lca ta nten ꞌin Aser, a cunta cuaꞌ cula neꞌ, loꞌ mdiꞌin neꞌ loꞌo cuilyiꞌo neꞌ cati yjan xa ncua suhue neꞌ,
\v 37 loꞌ cuaꞌ nguiaa jacua yla ntsuꞌhui jacua yjan nu nguinu neꞌ loꞌo chaꞌ ycuiꞌ ti. Nchgaa xaa nguilyu neꞌ niꞌ lyaa nguiꞌni tnu neꞌ ꞌin Ndiose, tla loꞌ cucha nchcuiꞌ lyiꞌo neꞌ ꞌin ñi, cuiꞌ cuañaꞌan nguiꞌni neꞌ ayuna.
\v 38 Lja xacanꞌ mdiyaa neꞌ seꞌen nguilyu jun loꞌo cuhuiꞌ canꞌ, loꞌ mdyaa neꞌ xuꞌhue ꞌin Ndiose, a cunta nchcuiꞌ neꞌ chaꞌ ꞌin cuhuiꞌ canꞌ loꞌo scasca neꞌ Jerusalén nu nta tsaan nu ntsuꞌhui chaꞌ culo laa ñi ꞌin neꞌ.
\s Xa mxitucui jun quichen Nazaret loꞌo Jesús
\p
\v 39 Xa cuaꞌ msuꞌhua ta jun chaꞌ ꞌin jun tsañaꞌan nchcuiꞌ lee ꞌin Ñi Xꞌnan na, xacanꞌ mxitucui jun seꞌen lyiꞌya loo Galilea, cuiꞌ quichen tyi jun seꞌen lca Nazaret.
\v 40 Cuhuiꞌ canꞌ nguia nguilo cuhuiꞌ, ndyija juesa ꞌin cuhuiꞌ, nguia ndyuꞌhui chaꞌ tiyaa ꞌin cuhuiꞌ, a cunta lyee ndyuꞌhui cuiyaꞌ tiꞌ Ndiose ꞌin cuhuiꞌ.
\s Xa nguija lyoo Jesús niꞌ lyaa
\p
\v 41 Nchgaa yjan ndyiꞌan nten cula ꞌin Jesús taꞌa Pascua quichen Jerusalén.
\v 42 Xa ntsuꞌhui Jesús tichcua yjan ya loꞌo jun ꞌin ñi seꞌen nchca taꞌa quichen canꞌ, tsañaꞌan chaꞌ nu cuaꞌ ntsuꞌhui ꞌin neꞌ.
\v 43 Loꞌ ñaꞌaan mdyi taꞌa canꞌ mxitucui jun nde quichen tyi jun, una a ngujlyo tiꞌ nten cula ꞌin Jesús siꞌyana nguinu ton ñi seꞌen lca Jerusalén,
\v 44 ñan tiꞌ jun chaꞌ ta yaan Jesús lja nten nu yaa taꞌa canꞌ, loꞌ chcui tsaan cuaꞌ mdaꞌan jun xa mdyisnan ngunan jun ꞌin Jesús lja nten nu tiꞌ nchca taꞌa jun, uta lja nchgaa la ñaꞌan taꞌa tsuꞌhue jun,
\v 45 loꞌ a nguija lyoo ñi, canꞌ chaꞌ xiyaꞌ mxitucui jun nde Jerusalén nu nguia nan jun ꞌin ñi.
\v 46 Una yatoꞌo la mdaꞌa cucha canꞌ nguija lyoo jun ꞌin ñi niꞌ lyaa, nducua ñi lja yu nu mꞌni chaꞌan chaꞌ ꞌin lee, loꞌ ndon nscan ñi chaꞌ nu nchcuiꞌ yu loꞌ ñichaꞌ ñi ꞌin yu.
\v 47 Nchgaa nu ne ꞌin chaꞌ nu nchcuiꞌ ñi, nduhue tiꞌ neꞌ siꞌyana tsuꞌhue chaꞌ tiyaa ndaꞌan loꞌo ñi, loꞌ nchgaa chaꞌ nxcuen ñi ꞌin neꞌ.
\v 48 Xa naꞌan jun ꞌin ñi nducua ñi lja yu canꞌ, yuhue ꞌa tiꞌ jun loꞌ juin jyiꞌan ñi: Sñenꞌ, ¿ñi chaꞌ mꞌni loꞌo hua cuañaꞌan? Ñaꞌan jan ñi, nanꞌ loꞌo sti ndaꞌan nan hua ꞌin, loꞌ lyee ꞌa msuꞌhua chaꞌ nduhue tiꞌ tiquee hua
\v 49 Xacanꞌ mxcuen Jesús ꞌin jun: ¿Ñi chaꞌ ndaꞌan nan um ꞌñan, ta a jlyo tiꞌ um siꞌyana ꞌni chaꞌ ꞌñan loꞌo tñan ꞌin Stin?
\v 50 Una a nguꞌya jun chaꞌ tiyaa ñi chaꞌ ycuiꞌ ñi cuañaꞌan.
\v 51 Xacanꞌ mxitucui ñi loꞌo jun nde quichen Nazaret, loꞌ ncua jaꞌan ñi ꞌin jun loꞌo nchgaa chaꞌ. Nguinu yuꞌhui nchgaa chaꞌ canꞌ niꞌ cusya ꞌin jyiꞌan ñi.
\v 52 Jesús nguia nguilo ñi, a cunta loꞌo chaꞌ tiyaa ꞌin ñi, lyee ndyuꞌhui cuiyaꞌ tiꞌ Ndiose ꞌin ñi, ticuiꞌ cuañaꞌan ndyuꞌhui cuiyaꞌ tiꞌ nten ꞌin ñi. 
\c 3
\s Chaꞌ ꞌin yu Xuhua nu mducua tya ꞌin nten
\p
\v 1 Yatoꞌo cuiꞌ yjan nu cuaꞌ nchca ꞌtñu nu ndlo yu Tiberio César tñan ñaꞌaan quichen canꞌ, xacanꞌ lca yu Poncio Pilato bsya seꞌen lyiꞌya loo Judea, loꞌ yu Herode tetrarca ndlo tñan seꞌen lyiꞌya loo Galilea, loꞌ yu Lpe taꞌa ngula yu ndlo tñan seꞌen lyiꞌya loo Iturea loꞌo seꞌen lca Traconite, loꞌ yu Lisanias tetrarca ndlo tñan seꞌen lyiꞌya loo Abilinia.
\v 2 Yu Anás loꞌo Caifás ndlo yu tñan niꞌ lyaa, cuiꞌ xacanꞌ mxiycuiꞌ Ndiose ꞌin yu Xuhua, sñeꞌ Zacaría, xa mdaꞌan yu seꞌen ngutyi canꞌ.
\v 3 Mdaꞌan yu luhuaꞌ seꞌen su chco tlyu Jordan, nchcuiꞌ yu loꞌo nten siꞌyana xiloꞌo chonꞌ neꞌ quiꞌya nguiꞌni neꞌ loꞌ chcua tya neꞌ, loꞌ Ndiose cuꞌni ñi chaꞌ tlyu tiꞌ ꞌin neꞌ,
\v 4 cuiꞌ tsañaꞌan nguinu scua chaꞌ loo quityi nu nguaꞌan yu Isaía, yu nu mxiycuiꞌ Ndiose ꞌin cuaꞌ sꞌni, loꞌ nchcuiꞌ na: —Ndeñaꞌan nchcuiꞌ cueen yu nu ndaꞌan seꞌen ngutyi canꞌ: Cuꞌni chuꞌhue um tucueen nu caan Ñi Xꞌnan na, loꞌ sla um sca tucueen nu ñi ti niꞌ cusya ꞌin um.
\v 5 Nchgaa seꞌen lca lja yuu chaꞌan yuꞌhui na, loꞌ quinu lyicua nchgaa seꞌen nducua quiꞌya, loꞌ tucueen nu nxitiꞌin ntsuꞌhui chaꞌ ca ñi na, a cunta tucueen nu chen ñaꞌan chca lyicua na.
\v 6 Loꞌ ñaꞌaan nten chendyu ca cuiyaꞌ tiꞌ neꞌ siꞌyana Ndiose tca culo laa ꞌin neꞌ—.
\v 7 Quiꞌan ꞌa nten ndyiꞌan neꞌ seꞌen ndon yu Xuhua canꞌ siꞌyana chcua tya neꞌ, loꞌ ndeñaꞌan nchcuiꞌ yu loꞌo neꞌ: ꞌUn ta nten nu cuiñi, ¿ti nu nguloꞌo ꞌin um siꞌyana xnan yuꞌhui um, loꞌ a quiꞌni caꞌan ꞌin um loꞌo chaꞌ nsinꞌ tiꞌ nu tyiꞌo tiquee Ndiose tiyaa xaa?
\v 8 Canꞌ chaꞌ cuꞌni um scasca tñan tsuꞌhue, loꞌ cuañaꞌan ca chcanꞌ loo siꞌyana cuaꞌ mxiloꞌo chonꞌ um quiꞌya ꞌin um, loꞌ a quiñan tiꞌ um: Cuaꞌ mdoꞌo laa hua siꞌyana Abraham lca nten cula ꞌin hua. Una cunen loꞌo um sca chaꞌ Ndiose tca xiton ñi quee nduꞌhui re loꞌ ca na sñeꞌ Abraham.
\v 9 A cunta cuaꞌ ndon tiyaa chcuan yca nu siꞌyu la suun yca, canꞌ chaꞌ nchgaa yca nu a ndyiꞌyu mti loo, xiꞌyu na loꞌ chuꞌhui na loo quiiꞌ.
\v 10 Nten canꞌ mñichaꞌ neꞌ ꞌin yu Xuhua canꞌ: Huareꞌ jan ñi, ¿ñi na ta cuꞌni hua?
\v 11 Xacanꞌ mxcuen yu: Nu ntsuꞌhui tucua ta steꞌ, taa sca na ꞌin nu a ntsuꞌhui na ꞌin, ticuiꞌ cuañaꞌan loꞌo nu ndiꞌin na nu najoꞌo ꞌin, ta yaaꞌ canꞌ ꞌin nu a ndiꞌin na ꞌin.
\v 12 Loꞌo tucua snan yu nu ndlo tñi mdiyaa canꞌ siꞌyana chcua tya yu, loꞌ juin yu ꞌin yu Xuhua canꞌ: ꞌUn ñi nu lca Bstro, huareꞌ jan ñi, ¿ñi na ta cuꞌni hua?
\v 13 Xacanꞌ mxcuen yu Xuhua canꞌ: A jñan um quiꞌan la tñi ꞌin nten, cuiꞌ tsañaꞌan nu ntsuꞌhui chaꞌ suꞌhua lyiyaꞌ ti neꞌ.
\v 14 A cunta loꞌo tucua snan yu sindatu mñichaꞌ yu ꞌin yu Xuhua canꞌ: Huareꞌ jan ñi, ¿ñaꞌan ta cuꞌni hua? Juin yu Xuhua canꞌ: A culo um tñi ꞌin neꞌ loꞌo juesa, uta suꞌhua um quiꞌya ꞌin neꞌ loꞌo chaꞌ cuiñi, cuiꞌ ca nu quinu tsuꞌhue tiquee um loꞌo tsañaꞌan siyaꞌ ti um.
\v 15 Siꞌyana nchgaa nten canꞌ ñan tiꞌ neꞌ chaꞌ ta cuiꞌ yu Xuhua canꞌ lca yu Cristo,
\v 16 canꞌ chaꞌ mxcuen yu ꞌin nten canꞌ: Nanꞌ nu chaꞌ ñi loꞌo tyiꞌa ti nducuan tyan ꞌin um, una ntsuꞌhui chaꞌ caan sca ñi nu tla la chaꞌ ꞌin que ꞌñan nanꞌ, loꞌ tsuꞌhue ꞌa chuꞌhui tiqueen chaꞌ cua na taa ñi chaꞌ cuiyaꞌ xtinꞌ tsa tisnan ti ñi. Canꞌ ñi nu ntsuꞌhui chaꞌ tucua tya ꞌin um, una loꞌo Espíritu nu Luhui ꞌin Ndiose, a cunta loꞌo quiiꞌ.
\v 17 Siꞌyana cuaꞌ nducua na yaaꞌ ñi nu scuin trigo, loꞌ xoꞌ ñi nu cuaꞌ nguhui canꞌ loꞌ xuꞌhua seꞌen ñi ꞌin na, una quixin trigo canꞌ suꞌhua ñi ꞌin na loo quiiꞌ nu a ntsuꞌhui chaꞌ tiꞌ tyuhuiꞌ.
\v 18 Quiꞌan ꞌa chaꞌ tiꞌ ycuiꞌ yu Xuhua loꞌo nten canꞌ, mda cueen yu ꞌin neꞌ tsañaꞌan nguiaa chaꞌ tsuꞌhue ꞌin Ndiose.
\v 19 Yatoꞌo ngusun loꞌo yu Xuhua canꞌ ꞌin Herode tetrarca, siꞌya chaꞌ nu ngulyaa yu ꞌin Herodía, cuilyiꞌo Lpe taꞌa ngula yu, a cunta siꞌya nchgaa la ñaꞌan chaꞌ ngunanꞌ nu nguiꞌni yu,
\v 20 loꞌ siꞌi tsacua ti ñaꞌan, cuiꞌ ca nu nde lyee la ngusoꞌ tucua yu quiꞌya chonꞌ yu siꞌyana msuꞌhua yu ꞌin Xuhua canꞌ naꞌan chcuan.
\s Xa mducua tya Jesús
\p
\v 21 Yatoꞌo xa nducua tya nten canꞌ, loꞌo Jesús mducua tya ñi, loꞌ lja nchcuiꞌ lyiꞌo ñi ꞌin Ndiose nguila tucua niꞌ cuaan,
\v 22 canꞌ ncua chcanꞌ nguiaan Espíritu nu Luhui ꞌin Ndiose seꞌen ndon ñi, loꞌ nguꞌya tucua Espíritu canꞌ que ñi tsañaꞌan ndyiꞌya tucua sca scunꞌ joꞌo, loꞌ ngune ycuiꞌ sca nu ycuiꞌ la niꞌ cuaan: Nuꞌhuin lca Sñenꞌ nu taꞌa lati ꞌñan, tsuꞌhue ꞌa ntsuꞌhui tiqueen loꞌo.
\s Chaꞌ ꞌin ta nten ꞌin Jesús
\p
\v 23 Jesús ntsuꞌhui ñi cla tyii yjan xa mdyisnan mꞌni ñi tñan ꞌin Ndiose. Nchcuiꞌ nten siꞌyana See lca sti ñi, loꞌ sti See canꞌ ncua naan Elí,
\v 24 loꞌ sti Elí ncua naan Matat, sti Matat ncua naan Leví, sti Leví ncua naan Melqui, sti Melqui ncua naan Jana, sti Jana ncua naan See,
\v 25 sti See ncua naan Matatía, sti Matatía ncua naan Amós, sti Amós ncua naan Nahum, sti Nahum ncua naan Esli, sti Esli ncua naan Nagai,
\v 26 sti Nagai ncua naan Maat, sti Maat ncua naan Matatía, sti Matatía ncua naan Semei, sti Semei ncua naan See, sti See ncua naan Judá,
\v 27 sti Judá ncua naan Joana, sti Joana ncua naan Resa, sti Resa ncua naan Zorobabel, sti Zorobabel ncua naan Salatiel, sti Salatiel ncua naan Neri,
\v 28 sti Neri ncua naan Melqui, sti Melqui ncua naan Adi, sti Adi ncua naan Cosam, sti Cosam ncua naan Elmodam, sti Elmodam ncua naan Er,
\v 29 sti Er ncua naan Josué, sti Josué ncua naan Eliezer, sti Eliezer ncua naan Jorim, sti Jorim ncua naan Matat,
\v 30 sti Matat ncua naan Leví, sti Leví ncua naan Simeón, sti Simeón ncua naan Judá, sti Juda ncua naan See, sti See ncua naan Jonán, sti Jonán ncua naan Eliaquim,
\v 31 sti Eliaquim ncua naan Melea, sti Melea ncua naan Mainán, sti Mainán ncua naan Matata, sti Matata ncua naan Natán,
\v 32 sti Natán ncua naan Davi, sti Davi ncua naan Isaí, sti Isaí ncua naan Obed, sti Obed ncua naan Booz, sti Booz ncua naan Salmón, sti Salmón ncua naan Naasón,
\v 33 sti Naasón ncua naan Aminadab, sti Aminadab ncua naan Aram, sti Aram ncua naan Esrom, sti Esrom ncua naan Fares, sti Fares ncua naan Judá,
\v 34 sti Judá ncua naan Jacob, sti Jacob ncua naan Isaac, sti Isaac ncua naan Abraham, sti Abraham ncua naan Taré, sti Taré ncua naan Nacor,
\v 35 sti Nacor ncua naan Serug, sti Serug ncua naan Ragau, sti Ragau ncua naan Peleg, sti Peleg ncua naan Heber, sti Heber ncua naan Sala,
\v 36 sti Sala ncua naan Cainán, sti Cainán ncua naan Arfaxad, sti Arfaxad ncua naan Sem, sti Sem ncua naan Noé, sti Noé ncua naan Lamec,
\v 37 sti Lamec ncua naan Matusalén, sti Matusalén ncua naan Enoc, sti Enoc ncua naan Jared, sti Jared ncua naan Mahalaleel, sti Mahalaleel ncua naan Cainán,
\v 38 sti Cainán ncua naan Enós, sti Enós ncua naan Set, loꞌ sti Set ncua naan Adán nu lca sñeꞌ Ndiose. 
\c 4
\s Laxaꞌan ncua tiꞌ xityu ꞌin Jesús loo quiꞌya
\p
\v 1 Jesús mtsaꞌan yuꞌhui ñi loꞌo Espíritu ꞌin Ndiose xa mdoꞌo ñi chco tlyu Jordan canꞌ, loꞌ Espíritu mduꞌhui tiquee ñi siꞌyana tsaa ñi sca seꞌen ngutyi,
\v 2 canꞌ yuꞌhui lyijyi ñi tsaniꞌ tucua yla tsaan, loꞌ ncua tiꞌ laxaꞌan xityu ꞌin ñi loo quiꞌya. Ñi sca na loꞌ a ycu ñi chcui lja xacanꞌ, xa mdaꞌa tsaan canꞌ mdyisnan nguteꞌ tiꞌ ñi.
\v 3 Xacanꞌ juin laxaꞌan ꞌin ñi: Chaꞌ lca Sñeꞌ Ndiose, cuꞌni chaꞌ siꞌyana quee nduꞌhui re chca na jaslya.
\v 4 Una mxcuen Jesús: Ndeñaꞌan nchcuiꞌ quityi ꞌin Ndiose: —Siꞌi tsaloo ti siꞌya chaꞌ nchcu ndyuꞌhui nten chendyu—, cuiꞌ ca nu siꞌya nchgaa chaꞌ nu nchcuiꞌ Ndiose.
\v 5 Xacanꞌ ya loꞌo laxaꞌan ꞌin ñi sca loo quiꞌya cuaan, ticuiꞌ xaa canꞌ nguloꞌo ꞌin ñi ñaꞌaan sca chcui chendyu seꞌen ndlo neꞌ tñan,
\v 6 loꞌ juin ꞌin ñi: Ñaꞌaan chaꞌ cuiyaꞌ re tyaan cunta ꞌin loꞌ cuiꞌ cuañaꞌan loꞌo chaꞌ cuilyiyaꞌ taan ꞌin, siꞌyana tuyaanꞌ nguinu nchgaa chaꞌ re, loꞌ taan ꞌin na ꞌin nu nchca tinꞌ,
\v 7 chaꞌ nuꞌhuin tyiꞌya xtyinꞌ tloon loꞌ cuꞌni tnu ꞌñan, nchgaa chaꞌ re quinu na ꞌin.
\v 8 Mxcuen Jesús: Tyiꞌo tsoꞌ siinꞌ laxaꞌan, siꞌyana ndeñaꞌan nchcuiꞌ quityi ꞌin Ndiose: —ꞌIn Ndiose Xꞌnan ntsuꞌhui chaꞌ cuꞌni tnu, loꞌ scati ꞌin ñi ca jaꞌan—.
\v 9 Xacanꞌ ya loꞌo laxaꞌan ꞌin ñi quichen Jerusalén, loꞌ ycuen loꞌo ꞌin ñi la que laa sca seꞌen cuaan lati, loꞌ juin ꞌin ñi: Chaꞌ lca Sñeꞌ Ndiose, tyiꞌo cuaan re loꞌ quiꞌya ton la ꞌya cua,
\v 10 siꞌyana ndeñaꞌan nchcuiꞌ quityi ꞌin Ndiose: —Culo ñi tñan ꞌin angujle ꞌin ñi siꞌyana chuꞌhui cunta ꞌin,
\v 11 loꞌ suꞌhua yaaꞌ canꞌ ꞌin seꞌen nguiaa, siꞌyana a tsa ton quiyaꞌ loo quee—.
\v 12 Xacanꞌ mxcuen Jesús: Ndeñaꞌan nchcuiꞌ quityi ꞌin Ndiose: —A tyijyin lyoo ꞌin Ndiose Xꞌnan—.
\v 13 Siꞌyana a ncua ꞌin laxaꞌan xityu ꞌin ñi loo quiꞌya, mdoꞌo tsoꞌ siiꞌ ñi sca coꞌ xaa.
\s Xa mdyisnan mꞌni Jesús tñan ꞌin Ndiose
\p
\v 14 Jesús mxitucui ñi seꞌen lyiꞌya loo Galilea, mtsaꞌan yuꞌhui ñi loꞌo chaꞌ cuiyaꞌ ꞌin Espíritu, loꞌ mdyisnan mscua cueen chaꞌ ꞌin ñi sca chcui seꞌen canꞌ.
\v 15 Nguloꞌo ñi ꞌin nten naꞌan seꞌen ndiyoꞌ tiꞌin neꞌ, loꞌ nchgaa tucui tsuꞌhue ntsuꞌhui tiquee loꞌo ñi.
\s Jesús mxitucui ñi quichen Nazaret
\p
\v 16 Jesús nguila ñi quichen Nazaret, quichen seꞌen ylo ñi, loꞌ tsaan nu nxitñanꞌ neꞌ judio yten ñi seꞌen ndiyoꞌ tiꞌin neꞌ, tsañaꞌan chaꞌ nu cuaꞌ ntsuꞌhui ꞌin ñi, loꞌ mdyiton ñi siꞌyana chcuiꞌ ñi quityi ꞌin Ndiose,
\v 17 mdaa neꞌ quityi ꞌin ñi seꞌen mxiycuiꞌ Ndiose ꞌin Isaía, msla ñi ꞌin na loꞌ nguija lyoo sca seꞌen nchcuiꞌ:
\v 18 —Mtsaꞌan yuꞌhuin loꞌo Espíritu ꞌin Ñi Xꞌnan na, canꞌ chaꞌ ngulohui ñi ꞌñan siꞌyana chcuinꞌ chaꞌ tsuꞌhue ꞌin ñi loꞌo nu tiꞌi ñaꞌan chendyu ꞌin, nguaꞌan tñan ñi ꞌñan siꞌyana cuꞌni chcan cusya ꞌin nu luꞌun tiꞌ. Chcuinꞌ loꞌo nu ntsuꞌhui nchcun siꞌyana tca tyiꞌo laa, slan quiloo nu cuityinꞌ, loꞌ culo laan ꞌin nu nsñi suꞌhua yaaꞌ cuiꞌin xaꞌan ꞌin.
\v 19 A cunta chcuinꞌ loꞌo nten siꞌyana cuaꞌ ya tucua yjan nu cuꞌni Ñi Xꞌnan na sca chaꞌ tsuꞌhue loꞌo neꞌ—.
\v 20 Xacanꞌ mxcunꞌ ñi quityi canꞌ, mdyaa ñi ꞌin na ꞌin yu nu ntsuꞌhui cunta ꞌin na, yten tucua ñi loꞌ nchgaa nu ndiyoꞌ tiꞌin canꞌ nanꞌ ꞌya ꞌin ñi,
\v 21 loꞌ juin ñi: Cuaꞌ ñii ya tucua tsaan ñaꞌan nchcuiꞌ quityi re loꞌo um.
\v 22 Nchgaa neꞌ tsuꞌhue ndaa neꞌ suun chaꞌ ꞌin ñi, nduhue tiꞌ neꞌ siꞌyana tsuꞌhue ꞌa nguiaa chaꞌ nu nchcuiꞌ ñi, loꞌ scasca neꞌ nchcuiꞌ neꞌ: ¿Ta siꞌi sñeꞌ yu See lca yu re?
\v 23 Xacanꞌ juin ñi: A sꞌni ntsuꞌhui nu ñan tiꞌ chaꞌ re loꞌon: ꞌUn neꞌ nu nꞌni rmiyu, cuꞌni chca ꞌin ticuiiꞌ, tsala ñaꞌan quiꞌan chaꞌ nu cuaꞌ ngune ꞌin hua mꞌni quichen Capernaum, una cuaꞌ ñii cuꞌni ꞌin na quichen tyi re.
\v 24 Tiꞌ juin la ñi: Nu chaꞌ ñi cunen loꞌo um, sca nu nxiycuiꞌ Ndiose ꞌin, a ndyijyi nu nducuan xuꞌhue ꞌin quichen tyi.
\v 25 Chaꞌ ñi siꞌyana quiꞌan ꞌa neꞌ cunaꞌan Israel nguinu loꞌo chaꞌ ycuiꞌ ti lja mdaꞌan ycuiꞌ Elía, xa nu a nguꞌya ꞌa quioo tsaniꞌ snan yjan tluꞌhue, loꞌ lyee nguꞌya bjuꞌñan sca chcui seꞌen canꞌ,
\v 26 una a nguaꞌan tñan Ndiose ꞌin yu Elía tsaa yu seꞌen ndiꞌin scasca neꞌ cunaꞌan canꞌ, cuiꞌ ca nu yaa yu quichen Sarepta seꞌen lyiꞌya loo Sidón, seꞌen ndiꞌin sca neꞌ cunaꞌan nu nguinu loꞌo chaꞌ ycuiꞌ ti.
\v 27 Cuiꞌ cuañaꞌan xa mdaꞌan yu Eliseo, yu nu mxiycuiꞌ Ndiose ꞌin, quiꞌan ꞌa nu tiꞌi loꞌo quitsoꞌ la ndiꞌin quichen Israel, una ñi sca canꞌ loꞌ a mchca, cuiꞌ ca nu scati yu Naamán mchca yu, yu nu mdoꞌo seꞌen lyiꞌya loo Siria.
\v 28 Nchgaa nu nguioꞌ tiꞌin canꞌ ycuen tiqueꞌ loꞌo ñi xa ngune ꞌin neꞌ chaꞌ canꞌ,
\v 29 cuiꞌ xaa mdyiton neꞌ loꞌ ngulo neꞌ ꞌin ñi nde tuꞌhua quichen, ya loꞌo neꞌ ꞌin ñi loo quiꞌya seꞌen chen ñaꞌan, canꞌ ncua tiꞌ neꞌ xityu neꞌ ꞌin ñi.
\v 30 Una Jesús mdijin ñi tluꞌhue la lja neꞌ, mdoꞌo ñi nguiaa ñi.
\s Jesús ngulo ñi cuiꞌin xaꞌan ꞌin sca yu Capernaum
\p
\v 31 Xacanꞌ mdoꞌo Jesús nguiaa ñi quichen Capernaum seꞌen lyiꞌya loo Galilea, loꞌ ndloꞌo ñi ꞌin nten tsaan nu nxitñanꞌ neꞌ.
\v 32 Nduhue ꞌa tiꞌ neꞌ tsañaꞌan chaꞌ nu ndloꞌo ñi siꞌyana nchcuiꞌ ñi tsañaꞌan nchcuiꞌ sca nu ndaꞌan loꞌo chaꞌ cuiyaꞌ.
\v 33 Seꞌen nguioꞌ tiꞌin neꞌ nguilyu sca yu nu ntsuꞌhui cuiꞌin xaꞌan ꞌin,
\v 34 loꞌ nchcuiꞌ cueen yu: ¡A cuꞌni lyiꞌo ꞌin hua! ¿Ñi chaꞌ nducui ndijin loo hua, Jesús Nazaret? ¿Ta cuaꞌ ljyaan siꞌyana cujlyo ꞌin hua? Nanꞌ ndyuꞌhuin lyoon tucui lca, nuꞌhuin lca ycuiꞌ ca nu mdoꞌo hui ꞌin Ndiose.
\v 35 Una Jesús ngusun loꞌo ñi ꞌin cuiꞌin xaꞌan canꞌ, loꞌ juin ñi: Seen tyiꞌin, tyiꞌo seꞌen ntsuꞌhui cua. Cuiꞌ xaa mxitlyu cuiꞌin xaꞌan canꞌ ꞌin yu lja nten canꞌ, cuiꞌ ñaꞌan lcaa mdyiꞌo cuiꞌin xaꞌan canꞌ ꞌin yu loꞌ a sca tiꞌi ncua ꞌin yu.
\v 36 Yuhue ꞌa tiꞌ nchgaa nu ndiꞌin canꞌ, loꞌ nchcuiꞌ neꞌ: ¿Ñi chaꞌ nchca tiꞌ chcuiꞌ chaꞌ re siꞌyana loꞌo chaꞌ cuiyaꞌ ndlo yu tñan ꞌin cuiꞌin xaꞌan, loꞌ nchca jaꞌan ꞌin yu?
\v 37 Cuiꞌ xaa ti canꞌ mscua cueen chaꞌ ꞌin Jesús sca chcui seꞌen canꞌ.
\s Xa mꞌni chca Jesús ꞌin jyiꞌan laa yu Tyo
\p
\v 38 Xacanꞌ mdyiꞌo Jesús seꞌen ndiyoꞌ tiꞌin neꞌ, mdiyaa ñi la naꞌan ꞌin yu Tyo seꞌen nscua jyiꞌan laa yu tiꞌi siꞌyana lyee nduꞌhui tiqueꞌ ꞌin, loꞌ mjñan jun chaꞌ tsuꞌhue ꞌin ñi siꞌya neꞌ.
\v 39 Mxiton Jesús seꞌen nscua neꞌ loꞌ ngusun loꞌo ñi ꞌin tiqueꞌ canꞌ, mdyiꞌo na ꞌin neꞌ, cuiꞌ xaa mdyi tucui neꞌ loꞌ mꞌni cunta neꞌ ꞌin jun.
\s Xa mꞌni chca Jesús quiꞌan nu tiꞌi
\p
\v 40 Xa msiin tsaan canꞌ mdyisnan mdiya loꞌo neꞌ ꞌin nu tiꞌi loꞌo cuati loo quicha seꞌen ndon Jesús, cunda scaa neꞌ mdiꞌin tyaa ñi yaaꞌ ñi ꞌin neꞌ loꞌ mchca neꞌ.
\v 41 A cunta quiꞌan nu mdoꞌo cuiꞌin xaꞌan ꞌin, loꞌ nxiꞌya cueen loꞌ nchcuiꞌ: Nuꞌhuin lca ycuiꞌ ca Sñeꞌ Ndiose. Una ngusun loꞌo ñi ꞌin cuiꞌin canꞌ loꞌ a mdaa ꞌa ñi chaꞌ cuiyaꞌ tiꞌ chcuiꞌ, siꞌyana cuaꞌ jlyo tiꞌ cuiꞌin xaꞌan canꞌ siꞌyana lca ñi ycuiꞌ ca Cristo.
\s Jesús ycuiꞌ ñi chaꞌ ꞌin Ndiose seꞌen lyiꞌya loo Galilea
\p
\v 42 Xa cuaꞌ nguꞌya xaa mdoꞌo Jesús nguiaa ñi nde tuꞌhua quichen seꞌen scati ñi, una mdyisnan ngunan nten canꞌ ꞌin ñi, xa mdiyaa neꞌ seꞌen ndon ñi ncua tiꞌ neꞌ siꞌyana a tyiꞌo tsoꞌ ñi quichen canꞌ,
\v 43 una juin ñi ꞌin neꞌ: ꞌNi chaꞌ tsa ycuinꞌ chaꞌ tsuꞌhue ꞌin Ndiose scasca la quichen tsañaꞌan ntsuꞌhui chaꞌ culo ñi tñan ꞌin neꞌ, siꞌyana canꞌ tñan ljyaan.
\v 44 Scasca seꞌen ndiyoꞌ tiꞌin neꞌ judio seꞌen lyiꞌya loo Galilea, mdaꞌan ycuiꞌ ñi chaꞌ ꞌin Ndiose. 
\c 5
\s Mꞌni Jesús chaꞌ nguinu quiꞌan ꞌa cula
\p
\v 1 Yatoꞌo xa ndon Jesús tuꞌhua tiyoꞌ Genesaret, loꞌ nten quiꞌan canꞌ nsta suꞌhua taꞌa neꞌ tloo ñi loo nu lyee lca tiquee neꞌ quine ꞌin neꞌ chaꞌ ꞌin Ndiose.
\v 2 Naꞌan ñi nducui tucua yca naꞌan cuiꞌ ti tuꞌhua tyiꞌa seꞌen ndlyu yu cuta cula ñjyiꞌan yu quitan ꞌin yu.
\v 3 Xacanꞌ yten ñi niꞌ sca yca naꞌan cuiꞌ nu ꞌin yu Simón, mjñan ñi chaꞌ tsuꞌhue ꞌin yu siꞌyana tcanꞌ naꞌan chinꞌ yu ꞌin na nde loo tyiꞌa canꞌ, yten tucua ñi loꞌ mdyisnan nguloꞌo ñi ꞌin nten.
\v 4 Xa mdyi ycuiꞌ ñi loꞌo neꞌ, juin ñi ꞌin yu Simón canꞌ: Ya loꞌo um yca naꞌan re ꞌin um la seꞌen tlya la cua, loꞌ cuun um quitan cua ꞌin um loꞌ xñi um cula.
\v 5 Mxcuen yu Simón canꞌ ꞌin ñi: ꞌUn ñi nu lca Bstro, chcui tla mꞌni hua cuta loꞌ ñi sca cula a jui ꞌin hua, una cuun hua quitan re siꞌyana ꞌun ndlo um tñan ꞌin hua.
\v 6 Xa nguun yu ꞌin na quiꞌan ꞌa cula nguinu ꞌin yu, nu hasta loꞌo mdaꞌ quitan canꞌ.
\v 7 Xacanꞌ mꞌni yaaꞌ ti yu ꞌin nu ntsuꞌhui niꞌ xca yca naꞌan canꞌ siꞌyana can ta yaaꞌ ꞌin yu. Cuiꞌ xaa mdiyaa yu loꞌ mꞌni chaꞌan yu chcuaa yca naꞌan canꞌ, nu tichinꞌ ti na a ngutyinꞌ yuꞌhui na.
\v 8 Yu Simón Tyo canꞌ xa naꞌan yu chaꞌ re mdyiꞌya xtyinꞌ yu tloo ñi loꞌ juin yu: Ñi Xꞌnan, tyiꞌo tsoꞌ um siinꞌ siꞌyana nanꞌ lcan nten quiꞌya chendyu.
\v 9 Siꞌyana quiꞌan cula msñi yu, lyee msuꞌhua yu chaꞌ nduhue tiꞌ tiquee yu loꞌo nchgaa taꞌa ndaꞌan yu,
\v 10 cuiꞌ cuañaꞌan loꞌo chcuaa sñeꞌ Zebedeo, yu Jacobo loꞌo yu Xuhua, msuꞌhua yu chaꞌ tiquee yu, cuiꞌ yu nu taꞌa nguiꞌni yu Simón canꞌ tñan. Una Jesús juin ñi loꞌo Simón canꞌ: A cutsen siꞌyana tiꞌ cuaꞌ ñii tyisnan cuꞌni cuta, tyicana ꞌin nten.
\v 11 Xacanꞌ nchgaa yu ngulyo sti yu yca naꞌan canꞌ la tuꞌhua ysin, mxnu yu nchgaa na ꞌin yu loꞌ mducui nchaꞌan yu ꞌin ñi.
\s Mꞌni chca Jesús ꞌin sca yu tiꞌi loꞌo quitsoꞌ la
\p
\v 12 Yatoꞌo lja nguilyu Jesús sca quichen, mdiyaa ton sca yu quiꞌyu nu ngujlyo nguxen quitsoꞌ la ꞌin, loꞌ xa naꞌan yu ꞌin Jesús cuiꞌ xaa mdyiꞌya xtyinꞌ yu tloo ñi loꞌ mdyiꞌya sti yu tloo yu la lyuu, mjñan yu chaꞌ tsuꞌhue ꞌin ñi loꞌ juin yu: Ñi Xꞌnan hua, chaꞌ nchca tiꞌ um tca cuꞌni chca um ꞌñan.
\v 13 Xacanꞌ mxñii ñi yaaꞌ ñi loꞌ mꞌni caꞌan ñi ꞌin yu, loꞌ juin ñi: Nchca tinꞌ cuꞌnin chcan ꞌin, quinu luhui. Ticuiꞌ xaa canꞌ ngulyijyi quitsoꞌ la canꞌ ꞌin yu loꞌ mchca yu.
\v 14 Ngulo ñi tñan siꞌyana a chcuiꞌ yu loꞌo ñi sca tucui chaꞌ nu yatoꞌo, tsaloo juin ti ñi ꞌin yu: Yaa, loꞌ culoꞌo ꞌin tloo nu ntsuꞌhui cunta ꞌin laa, taa sca lcuan tsañaꞌan nu ngulo Moisé tñan, cuañaꞌan ca cuiyaꞌ tiꞌ nten siꞌyana cuaꞌ mchca.
\v 15 Una nde lyee la mscua cueen chaꞌ ꞌin ñi, quiꞌan nten nguioꞌ tiꞌin tloo ñi seꞌen nu ton nscan neꞌ chaꞌ nu nchcuiꞌ ñi, a cunta siꞌyana cuꞌni chca ñi ꞌin neꞌ loꞌo quicha nu ntsuꞌhui ꞌin neꞌ.
\v 16 Una Jesús laꞌ ñaꞌan ndyiꞌo ñi nchcuiꞌ lyiꞌo ñi ꞌin Ndiose seꞌen scati ñi.
\s Mꞌni chca Jesús ꞌin sca yu tiꞌi nu cuti tiꞌ ñaꞌaan
\p
\v 17 Yatoꞌo sca tsaan ndloꞌo Jesús ꞌin nten, lja canꞌ nducua tucua snan neꞌ fariseo loꞌo yu nu mꞌni chaꞌan chaꞌ ꞌin lee, nu mdoꞌo scasca quichen seꞌen lyiꞌya loo Galilea loꞌo Judea, a cunta loꞌo nu mdoꞌo quichen Jerusalén, loꞌ Jesús ndaꞌan loꞌo ñi chaꞌ cuiyaꞌ ꞌin Ñi Xꞌnan na nu cuꞌni chca ñi ꞌin nten.
\v 18 Xacanꞌ tucua snan yu quiꞌyu mdiya loꞌo yu sca quiꞌñan seꞌen nscua sca yu tiꞌi nu cuti tiꞌ ñaꞌaan, ncua tiꞌ yu siꞌyana sten loꞌo yu ꞌin la seꞌen ndon Jesús.
\v 19 Una a ncua sten yu siꞌya nten quiꞌan canꞌ, canꞌ chaꞌ ycuen yu nde que naꞌan loꞌ msla yu sca seꞌen, canꞌ mdyiꞌya yu quiꞌñan seꞌen nscua nu tiꞌi canꞌ tluꞌhue la seꞌen ndon Jesús.
\v 20 Xa naꞌan ñi siꞌyana lyee ndiya quiꞌan tiꞌ yu nu mdyiꞌya quiꞌñan canꞌ, xacanꞌ juin ñi ꞌin nu tiꞌi canꞌ: Ñaꞌan jan ñi, cuaꞌ nguten quiꞌya nducui.
\v 21 Neꞌ escriba loꞌo neꞌ fariseo cuiꞌ xaa mdaꞌan chaꞌ tiquee neꞌ loꞌ nguñan tiꞌ neꞌ: ¿Ta tnu ꞌa tiquee yu re ñaꞌan nchcuiꞌ caꞌan yu ꞌin Ndiose? ¿Ta siꞌi scati Ndiose nchca ꞌin ñi nxicuten ñi quiꞌya?
\v 22 Jesús nguꞌya ñi chaꞌ tiyaa ñaꞌan chaꞌ nu ñan tiꞌ neꞌ, loꞌ juin ñi: ¿Ñi chaꞌ ñan tiꞌ um cuañaꞌan loꞌo chaꞌ nu ycuinꞌ re?
\v 23 ¿Ti ñaꞌan ta chaꞌ nu a tucui la chcuinꞌ loꞌo yu tiꞌi re: Ta cunen loꞌo yu cuaꞌ nguten quiꞌya nducui, uta chcuinꞌ loꞌo yu, tyiton loꞌ quiaa?
\v 24 Ñaꞌan jan ñi, ca jlyo tiꞌ um siꞌyana loꞌon nanꞌ, Yu Quiꞌyu nu Mdoꞌo nde niꞌ Cuaan, ntsuꞌhui chaꞌ cuiyaꞌ ꞌñan xicuten quiꞌya nducui nten chendyu, (xacanꞌ juin ñi ꞌin yu tiꞌi canꞌ:) Nanꞌ chcuinꞌ loꞌo, tyiton, xñi sꞌñan loꞌ quiaa la naꞌan ꞌin.
\v 25 Cuiꞌ xaa mdyiton yu tloo naꞌan nchgaa nten canꞌ, msñi yu sꞌñan yu, mdoꞌo yu nguiaa yu nde ñaꞌan ꞌin yu, loꞌ nguiꞌni tnu yu ꞌin Ndiose.
\v 26 Nchgaa neꞌ canꞌ ndyijyin yaꞌ yuhue tiꞌ neꞌ, loꞌ mꞌni tnu neꞌ ꞌin Ndiose, msuꞌhua neꞌ chaꞌ tiquee neꞌ loꞌ nchcuiꞌ neꞌ: La ñii naꞌan na sca chaꞌ nu tnu ca.
\s Xa msiꞌya Jesús ꞌin yu Leví
\p
\v 27 Xa cuaꞌ mdijin chaꞌ canꞌ mdoꞌo Jesús nguiaa ñi, seꞌen mdijin ñi naꞌan ñi sca yu ndlo tñi nu naan Leví, nducua yu seꞌen nsuꞌhua lyiyaꞌ nten tñi, xacanꞌ juin ñi ꞌin yu: Chcui nchaꞌan ꞌñan.
\v 28 Cuiꞌ xaa mdyiton yu loꞌ mxnu yu nchgaa tñan canꞌ, loꞌ mducui nchaꞌan yu ꞌin ñi.
\v 29 Mꞌni yu Leví chaꞌ ncua sca taꞌa la naꞌan ꞌin yu siꞌya Jesús, a cunta tyun taꞌa ndlo yu tñi nducua ycu yu canꞌ tsatlyu loꞌo taꞌa tsuꞌhue yu.
\v 30 Neꞌ escriba loꞌo neꞌ fariseo mdyisnan nchcuiꞌ tyijyin neꞌ loꞌo yu taꞌa ndaꞌan ñi, loꞌ nchcuiꞌ neꞌ: ¿Ñi chaꞌ nducua ycu um loꞌ ndyiꞌyo um tsatlyu loꞌo yu ndlo tñi, loꞌo yu nducunꞌ?
\v 31 Xacanꞌ mxcuen Jesús ꞌin neꞌ: Nten nu a la ꞌin tiꞌi, a ꞌni chaꞌ ꞌin loꞌo rmiyu, una nu tiꞌi, canꞌ nu ꞌni chaꞌ ꞌin loꞌo na.
\v 32 Nanꞌ a ljyaan siꞌya nten nu a nducui quiꞌya, cuiꞌ ca nu ljyaan siꞌya nu nducui quiꞌya siꞌyana xiloꞌo chonꞌ neꞌ quiꞌya nguiꞌni neꞌ.
\s Chaꞌ ꞌin neꞌ nu nꞌni ayuna
\p
\v 33 Xacanꞌ juin neꞌ ꞌin ñi: ¿Ñi chaꞌ ta yu taꞌa ndaꞌan yu Xuhua laꞌ nchgaa ti xaa nꞌni yu ayuna loꞌ nchcuiꞌ lyiꞌo yu ꞌin Ndiose, cuiꞌ cuañaꞌan ta ꞌin neꞌ fariseo, una ñi chaꞌ ta yu taꞌa ndaꞌan nuꞌhuin nchcu yu loꞌ ndyiꞌyo yu?
\v 34 Mxcuen ñi ꞌin neꞌ: ¿Ta tca xicuꞌni um ꞌin nu ndaꞌan seꞌen ndyija cuilyiꞌo neꞌ, loꞌ cuꞌni canꞌ ayuna lja nu tiꞌ nducua yu nu ndyija cuilyiꞌo canꞌ?
\v 35 Tyicana tiyaa xaa, a la ꞌa quine cueen yu nu ndyija cuilyiꞌo re, la xacanꞌ cuꞌni canꞌ ayuna.
\v 36 Xacanꞌ mdiꞌin tyaa ñi sca chaꞌ loꞌ juin ñi: A tucui nu nsiꞌyu tsa yuꞌhue teꞌ tiji loꞌ nxcuan suꞌhua ꞌin na loꞌo teꞌ cula, siꞌyana chaꞌ cuꞌni neꞌ cuañaꞌan, cuaꞌ ngujlyo neꞌ teꞌ tiji canꞌ, a cunta a nchcua taꞌa teꞌ tiji canꞌ loꞌo teꞌ cula.
\v 37 Cuiꞌ cuañaꞌan a tucui nu nsuꞌhua vino nu tca mdoꞌo niꞌ sca cuijyin quijyin nu cuaꞌ cula, siꞌyana chaꞌ cuꞌni neꞌ cuañaꞌan, vino canꞌ chcuen na loꞌ cuꞌni na chaꞌ cutsu quijyin canꞌ, tsatoꞌo quilo vino loꞌ jlyo quijyin canꞌ.
\v 38 Canꞌ chaꞌ ntsuꞌhui chaꞌ chuꞌhui vino nu tca mdoꞌo ti niꞌ sca cuijyin quijyin nu tiji, loꞌ ñi vino loꞌ ñi quijyin canꞌ a jlyo na.
\v 39 A cunta nu ndyiꞌyo vino nu cuaꞌ sꞌni mdoꞌo, a ndyiꞌo tiquee canꞌ coꞌo vino nu tca mdoꞌo ti siꞌyana ndeñaꞌan nchcuiꞌ canꞌ: Tsuꞌhue la vino nu cuaꞌ sꞌni mdoꞌo. 
\c 6
\s Mston yu juun trigo tsaan nu nxitñanꞌ neꞌ
\p
\v 1 Yatoꞌo sca tsaan nu nxitñanꞌ neꞌ judio, mdijin xiꞌyu Jesús loꞌo yu taꞌa ndaꞌan ñi sca loo jyaan seꞌen nducua trigo, mdyisnan mston yu ꞌin na, mycui yaaꞌ yu ꞌin na siꞌyana tyiꞌo scuaꞌ na loꞌ cu yu mti na.
\v 2 Tucua snan neꞌ fariseo juin neꞌ loꞌo jun: ¿Ñi chaꞌ ta nguiꞌni um sca chaꞌ nu a ngaꞌan chaꞌ cuꞌni na tsaan nu nxitñanꞌ na?
\v 3 Mxcuen Jesús ꞌin neꞌ: ¿Ta na a nchca chcuiꞌ um quityi tsañaꞌan nguinu scua sca chaꞌ ꞌin yu Davi xa lyee nguteꞌ tiꞌ yu loꞌo taꞌa mdaꞌan yu?
\v 4 Yten yu seꞌen nꞌni tnu neꞌ ꞌin Ndiose loꞌ msñi yu jaslya nu cuaꞌ ncuan ꞌin Ndiose, cuiꞌ jaslya nu nchcu tsalca yu nu ndlo tñan seꞌen canꞌ, una Davi ycu ꞌin na, a cunta mdaa yu ꞌin na ꞌin taꞌa ndaꞌan yu.
\v 5 Loꞌ juin ñi ꞌin neꞌ: Yu Quiꞌyu nu Mdoꞌo nde niꞌ Cuaan, loꞌo tsaan nu nxitñanꞌ na lca Ñi Xꞌnan na.
\s Mchca sca yu quiꞌyu nu ngutyi sca tsoꞌ yaaꞌ
\p
\v 6 Yatoꞌo xca tsaan, ticuiꞌ tsaan nu nxitñanꞌ neꞌ judio, yten Jesús seꞌen nꞌni tnu neꞌ ꞌin Ndiose, mdyisnan nguloꞌo ñi ꞌin nten, lja canꞌ ntsuꞌhui sca yu quiꞌyu nu ngutyi yaaꞌ tsoꞌ cueen ꞌin.
\v 7 Neꞌ escriba loꞌo neꞌ fariseo nsñi neꞌ cunta ꞌin Jesús chaꞌ ta cuꞌni chca ñi ꞌin yu tiꞌi canꞌ tsaan nu nxitñanꞌ neꞌ, ñaꞌan ca siꞌyana suꞌhua neꞌ quiꞌya ꞌin ñi.
\v 8 Una Jesús nguꞌya ñi cunta chaꞌ nu ntsuꞌhui tiquee neꞌ, loꞌ juin ñi ꞌin yu nu ngutyi yaaꞌ canꞌ: Tyiton loꞌ caan la tluꞌhue re. Cuiꞌ xaa mdyiton yu loꞌ mdiyaa yu la seꞌen ndon ñi.
\v 9 Xacanꞌ juin Jesús ꞌin nten canꞌ: Cuaꞌ ñii cuñichanꞌ ꞌin um sca chaꞌ: ¿Ñi tñan tca cuꞌni na tsaan nu nxitñanꞌ na, chaꞌ nu tsuꞌhue uta chaꞌ nu a tsuꞌhue? ¿Culo laa na ꞌin nten uta na taa na yaꞌ caja neꞌ?
\v 10 Xacanꞌ mxinaꞌan ñi tyiꞌiin seꞌen ndiꞌin nten canꞌ, loꞌ juin ñi ꞌin yu tiꞌi canꞌ: Xñii yaaꞌ. Cuiꞌ xaa mxñii yu ꞌin na loꞌ mchca tsuꞌhue na ꞌin yu.
\v 11 Una neꞌ fariseo loꞌo neꞌ escriba lyee ꞌa msinꞌ tiꞌ neꞌ, loꞌ nchcuiꞌ neꞌ chaꞌ ñaꞌan ca tyisnan suꞌhua neꞌ quiꞌya ꞌin Jesús.
\s Ngulohui Jesús ꞌin tsa tichcua yu taꞌa tyiꞌan ca ñi
\p
\v 12 Yatoꞌo sca tsaan ycuen Jesús sca loo quiꞌya siꞌyana chcuiꞌ lyiꞌo ñi ꞌin Ndiose, canꞌ ycuiꞌ lyiꞌo ñi ꞌin Ndiose chcui tla.
\v 13 Xa nguꞌya xaa msiꞌya Jesús ꞌin nchgaa nu nducui nchaꞌan ꞌin ñi, ngulohui ñi ꞌin tsa tichcua yu taꞌa tyiꞌan ca ñi, loꞌ nguloꞌo naan ñi ꞌin yu apóstol siꞌyana tyiꞌan yu loꞌo chaꞌ cuiyaꞌ ꞌin ñi.
\v 14 Ngulohui ñi ꞌin Simón, nu mdiꞌin tyaa ñi nii ca naan Tyo, loꞌo yu Ndre taꞌa ngula yu, loꞌo Jacobo, yu Xuhua, yu Lpe loꞌo yu Bartolomé,
\v 15 yu Mateo, loꞌo Toma, loꞌo yu Jacobo sñeꞌ Alfeo, yu Simón nu nchcuiꞌ neꞌ loꞌo lca Zelote,
\v 16 yu Juda taꞌa ngula Jacobo, loꞌo Juda Iscariote yu nu mdyaa ꞌin Jesús nde loo la.
\s Mꞌni chca Jesús ꞌin nten quiꞌan
\p
\v 17 Xacanꞌ mdoꞌo Jesús loo quiꞌya canꞌ nguila ñi sca seꞌen ntinꞌ loꞌo nchgaa taꞌa ndaꞌan ñi, a cunta canꞌ nguioꞌ tiꞌin quiꞌan nten nu mdoꞌo seꞌen lyiꞌya loo Judea, loꞌo quichen Jerusalén, loꞌo luhuaꞌ nde ꞌya la seꞌen ndiꞌin quichen Tiro loꞌo Sidón, seꞌen nu quine ꞌin neꞌ chaꞌ nu nchcuiꞌ ñi, loꞌ cuꞌni chca ñi ꞌin neꞌ loꞌo scasca quicha ntsuꞌhui ꞌin neꞌ.
\v 18 Cuiꞌ cuañaꞌan mchca nchgaa nu ndijin nu tiꞌi siꞌya cuiꞌin xaꞌan nu ntsuꞌhui ꞌin.
\v 19 Nchgaa nten canꞌ nan neꞌ ñaꞌan nu culaꞌ neꞌ ꞌin ñi, siꞌyana loꞌo chaꞌ cuiyaꞌ ndaꞌan loꞌo ñi nguiꞌni chca ñi ꞌin nchgaa nu tiꞌi.
\s Chaꞌ nu nguloꞌo Jesús ꞌin nten quiꞌan canꞌ
\p
\v 20 Xacanꞌ mxinaꞌan ñi seꞌen ndiꞌin taꞌa ndaꞌan ñi loꞌ juin ñi: Tsuꞌhue ca xuꞌhue ꞌun nu tiꞌi ñaꞌan chendyu ꞌin, siꞌyana cuaꞌ jui chaꞌ tsuꞌhue ꞌin um seꞌen ndlo Ndiose tñan.
\v 21 Tsuꞌhue ca xuꞌhue ꞌun nu nguiteꞌ tiꞌ, siꞌyana chaꞌan yuꞌhui cusya ꞌin um tiyaa xaa. Tsuꞌhue ca xuꞌhue ꞌun nu nguinan, siꞌyana nde loo la re ca tsuꞌhue chuꞌhui tiquee um.
\v 22 Tsuꞌhue ca xuꞌhue um xa caja nu xcuan tloo ꞌin um, uta caja nu culo tsoꞌ ꞌin um, ta taja neꞌ ꞌin um, loꞌ chcuiꞌ neꞌ cuaꞌ ñaꞌan ti chaꞌ ꞌin um, siꞌyana nguiaa um tsoꞌ ꞌin Yu Quiꞌyu nu Mdoꞌo nde niꞌ Cuaan.
\v 23 Ca tsuꞌhue chuꞌhui tiquee um loꞌ chaꞌan yuꞌhui um loꞌo chaꞌ nducui tiꞌ, siꞌyana tlyu chaꞌ tsuꞌhue nu cuaꞌ jui ꞌin um la niꞌ cuaan, siꞌyana cuiꞌ cuañaꞌan mꞌni nten cula ꞌin canꞌ loꞌo nchgaa nu mxiycuiꞌ Ndiose ꞌin cuaꞌ sꞌni.
\v 24 Una ꞌtnan ca nchgaa ꞌun yu cuilyiyaꞌ, siꞌyana a sca na ndiya lyijyi ꞌin um.
\v 25 ꞌTnan ca ꞌun nu a ntsuꞌhui chaꞌ ndaꞌan nguteꞌ tiꞌ, siꞌyana tiyaa xaa quiteꞌ tiꞌ um. ꞌTnan ca ꞌun nu ndaꞌan nstyi cuaꞌ ñii, siꞌyana tiyaa xaa tyiꞌan ynan um.
\v 26 Una ꞌtnan ca um xa nchgaa tucui ndaa loo um, siꞌyana cuañaꞌan mꞌni nten cula ꞌin canꞌ loꞌo yu nu mdaꞌan ycuiꞌ chaꞌ cuiñi, loꞌ nchcuiꞌ siꞌyana Ndiose mxiycuiꞌ ꞌin.
\s Chuꞌhui chaꞌ tsuꞌhue ꞌin na loꞌo nu tiꞌi tiꞌ ꞌin na
\p
\v 27 Una chcuinꞌ sca chaꞌ loꞌo um, ꞌun nu ndon nscan chaꞌ re: Chuꞌhui chaꞌ tsuꞌhue ꞌin um loꞌo nu tiꞌi tiꞌ ꞌin um, loꞌ cuꞌni um tsuꞌhue loꞌo nu nxcuan tloo ꞌin um,
\v 28 cuiꞌ cuañaꞌan loꞌo nu ndaja ꞌin um cuꞌni um tsuꞌhue loꞌo canꞌ, loꞌ jñan um ꞌin Ndiose siꞌya chaꞌ ꞌin nu naꞌan tiꞌi ꞌin um.
\v 29 Chaꞌ ntsuꞌhui nu jyiꞌin sca tsoꞌ scaꞌ um, taa um yaꞌ jyiꞌin canꞌ xca tsoꞌ na, loꞌ chaꞌ ndeꞌen nu culyaa teꞌ tucuin nu lcoꞌ um, taa um yaꞌ lyaa canꞌ loꞌo xcanꞌ um.
\v 30 Ñaꞌan nu ti nu jñan na ndiꞌin ꞌin um tyaa um ꞌin na ꞌin, cuiꞌ cuañaꞌan chaꞌ cuiꞌya na nu ndiꞌin ꞌin um, a tyiꞌan ñichaꞌ um ꞌin na.
\v 31 Tsañaꞌan nducua tloo um cuꞌni nten loꞌo um, cuañaꞌan ntsuꞌhui chaꞌ cuꞌni um loꞌo neꞌ.
\v 32 Una chaꞌ ntsuꞌhui chaꞌ tsuꞌhue ꞌin um loꞌo tsalca nu tsuꞌhue ntsuꞌhui tiquee loꞌo um, ¿ñi cunta ntsuꞌhui ꞌin um xacanꞌ? Siꞌyana cuañaꞌan nguiaa chaꞌ ꞌin nten chendyu, ntsuꞌhui chaꞌ tsuꞌhue ꞌin neꞌ loꞌo tsalca nu tsuꞌhue ntsuꞌhui tiquee loꞌo neꞌ.
\v 33 Chaꞌ cuꞌni um tsuꞌhue loꞌo tsalca nu nguiꞌni tsuꞌhue loꞌo um, ¿ñi cunta ntsuꞌhui ꞌin um xacanꞌ? Siꞌyana ticuiꞌ cuañaꞌan nꞌni nten chendyu.
\v 34 Chaꞌ taa um tñi jñiꞌ tsalca nu tca xuꞌhua ꞌin na loꞌo sñeꞌ na, ¿ñi cunta ntsuꞌhui ꞌin um xacanꞌ? Siꞌyana cuañaꞌan nꞌni nten chendyu, ndaa canꞌ tñi njñiꞌ xca tucui siꞌyana nducua la na chcuan.
\v 35 Una ꞌun chuꞌhui chaꞌ tsuꞌhue ꞌin um loꞌo nu tiꞌi tiꞌ ꞌin um, cuꞌni um tsuꞌhue loꞌo canꞌ, taa um na jñan canꞌ siyaꞌ a nducua ꞌa tloo um tiꞌ tyaa canꞌ ꞌin na, cuañaꞌan ca tlyu la chaꞌ tsuꞌhue nu quiꞌni caꞌan ꞌin um, loꞌ ca jlyo tiꞌ nten siꞌyana lca um sñeꞌ Ndiose, ñi nu tlyu lati, siꞌyana nguiꞌni ñi ꞌtnan ꞌin nu lyeꞌ tiꞌ loꞌo nu nducunꞌ.
\v 36 Canꞌ chaꞌ ñaꞌan ꞌtnan tiꞌ taꞌa um tsañaꞌan nguiaa chaꞌ ꞌin Stina Ndiose loꞌo um.
\s A suꞌhua quiꞌya taꞌa na
\p
\v 37 A suꞌhua um quiꞌya ꞌin xca tucui, loꞌ cuañaꞌan a caja nu suꞌhua quiꞌya ꞌin um. A culo um yuhueꞌ ꞌin xca tucui, loꞌ cuañaꞌan a caja nu culo yuhueꞌ ꞌin um. Cuꞌni um chaꞌ tlyu tiꞌ ꞌin taꞌa nten um, cuiꞌ cuañaꞌan caja nu cuꞌni chaꞌ tlyu tiꞌ ꞌin um.
\v 38 Taa um chaꞌ tsuꞌhue ꞌin xca tucui, loꞌ cuañaꞌan caja nu taa chaꞌ tsuꞌhue ꞌin um, sca cuiyaꞌ nu chcui loꞌ mtsaꞌan yuꞌhui, siꞌyana tsañaꞌan cuiyaꞌ nu ndaa um, cuiꞌ cuañaꞌan cuiyaꞌ caja nu tyaa ꞌin um.
\v 39 Xacanꞌ mdiꞌin tyaa ñi sca chaꞌ loꞌ juin ñi ꞌin nten canꞌ: ¿Ta tca ꞌin sca nu cuityinꞌ tyiꞌan loꞌo ꞌin xca nu cuityinꞌ? ¿Ta siꞌi chcuaa canꞌ tsatoꞌo tyu yuꞌhui sca tuyuu?
\v 40 A sca nu nguiꞌni chaꞌan, ta ndon loo la que ꞌin nu ndloꞌo ꞌin, una nchgaa tucui nu tsuꞌhue mꞌni chaꞌan, a sꞌni tiyaa canꞌ cuiyaꞌ ꞌin nu ndloꞌo ꞌin.
\v 41 ¿Ñi chaꞌ nxñi um cunta yuu nu ntsuꞌhui quiloo taꞌa nten um, loꞌ a nꞌni cunta um tiꞌ ñaꞌaan coꞌ yca nu ntsuꞌhui quiloo um?
\v 42 ¿Ñaꞌan ta xtyi tiꞌ um chcuiꞌ um loꞌo canꞌ: Tyaa um culyoon yuu nu ntsuꞌhui quiloo um, loꞌ a nꞌni cunta um coꞌ yca nu ntsuꞌhui quiloo um? ꞌUn neꞌ cuiñi, culo nducua la culyoo um coꞌ yca nu ntsuꞌhui quiloo um, la xacanꞌ ca chcanꞌ ꞌin um culyoo um yuu nu ntsuꞌhui quiloo xca tucui.
\s Tca chuꞌhui lyoo na ꞌin nten cuaꞌ ñaꞌaan tñan nꞌni neꞌ
\p
\v 43 Sca yca nu tsuꞌhue a tca cuiꞌyu mti nu a tsuꞌhue loo na, cuiꞌ cuañaꞌan loꞌo yca nu a tsuꞌhue, a tca cuiꞌyu mti nu tsuꞌhue loo na.
\v 44 Siꞌyana cunda scaa yca nchca chcanꞌ ñaꞌan na siꞌya mti nu ndyiꞌyu loo na, canꞌ chaꞌ a ntsuꞌhui chaꞌ nsu neꞌ mti higo loo yca quicheꞌ, loꞌ ñi uva a nsu neꞌ ꞌin na loo yca quicheꞌ.
\v 45 Sca nten nu tsuꞌhue, chacuiꞌ chaꞌ tsuꞌhue ndyiꞌo niꞌ cusya ꞌin canꞌ, cuiꞌ cuañaꞌan loꞌo nu nducunꞌ, ticuiꞌ chaꞌ nducunꞌ ndyiꞌo niꞌ cusya ꞌin, siꞌyana cuaꞌ ñaꞌaan chaꞌ nu mtsaꞌan yuꞌhui niꞌ cusya ꞌin neꞌ, canꞌ chaꞌ nu ndyiꞌo tuꞌhua neꞌ.
\s Chaꞌ ꞌin tucua loo suun naꞌan
\p
\v 46 ¿Ñi chaꞌ ndloꞌo naan um ꞌñan: Ñi Xꞌnan hua, Ñi Xꞌnan hua, loꞌ a nducua um tñan chaꞌ nu nchcuinꞌ?
\v 47 Nchgaa nu nducui nchaꞌan ꞌñan, loꞌ ndon nscan chaꞌ nu nchcuinꞌ loꞌ nducua tñan ꞌin na,
\v 48 nguiaa chaꞌ ꞌin canꞌ tsañaꞌan nguiaa chaꞌ ꞌin sca nten nu mtñan naꞌan ꞌin, mjñi canꞌ quiꞌñi loꞌ mdiꞌin tyaa suun ꞌin na loo quee, loꞌ xa mdoꞌo tyiꞌa yuu mꞌni ꞌin naꞌan canꞌ, una a mdlyu na siꞌyana tsuꞌhue ndiꞌin suun na.
\v 49 Una tsalca nu ngune ꞌin chaꞌ nu ycuinꞌ loꞌ a nducua tñan ꞌin na, nguiaa chaꞌ ꞌin canꞌ tsañaꞌan nguiaa chaꞌ ꞌin sca nten nu mtñan naꞌan ꞌin, una a mjñi seꞌen ndiꞌin suun na, loꞌ xa mdoꞌo tyiꞌa yuu mꞌni ꞌin naꞌan canꞌ, cuiꞌ xaa mdlyu na loꞌ ngujlyo na ñaꞌaan na. 
\c 7
\s Mꞌni chca Jesús nguso ꞌin xꞌnan sindatu
\p
\v 1 Xa mdyi ycuiꞌ Jesús loꞌo nten canꞌ, mdoꞌo ñi nguiaa ñi quichen Capernaum.
\v 2 Canꞌ nscua sca yu tiꞌi, cuiꞌ nguso ꞌin xꞌnan sindatu nu lyee ndyuꞌhui cuiyaꞌ tiꞌ xꞌnan ꞌin, loꞌ cuaꞌ caja ti yu.
\v 3 Xꞌnan sindatu canꞌ xa ynan yu chaꞌ siꞌyana mdiyaa Jesús quichen canꞌ, cuiꞌ xaa mjñan yu chaꞌ tsuꞌhue ꞌin tucua snan quiꞌyu cula nu ndon loo la ꞌin neꞌ judio, siꞌyana tsa teꞌen yu ꞌin Jesús loꞌ cuꞌni chca ñi ꞌin yu nguso canꞌ.
\v 4 Xa mdiyaa yu seꞌen ndon Jesús lyee ꞌa mjñan yu chaꞌ tsuꞌhue ꞌin ñi, loꞌ nchcuiꞌ yu: Yu xꞌnan sindatu cua, ntsuꞌhui suun ꞌin yu ta yaaꞌ um ꞌin yu,
\v 5 siꞌyana nsuꞌhua loo yu quichen tyi na, a cunta cuaꞌ mtñan yu sca naꞌan seꞌen nꞌni tnu na ꞌin Ndiose.
\v 6 Xacanꞌ mdoꞌo Jesús nguiaa ñi loꞌo yu. Xa cuaꞌ tiyaa ti ñi seꞌen nducua naꞌan ꞌin yu xꞌnan sindatu canꞌ, cuiꞌ xaa nguaꞌan tñan yu chcua xnan taꞌa tsuꞌhue yu nu ya ycua ꞌin ñi loꞌ chcuiꞌ yu loꞌo Jesús: Ñi Xꞌnan, a nchca tinꞌ taan tñan ꞌin um lyee la, siꞌyana a ntsuꞌhui suun ꞌñan tsaa um seꞌen ndiꞌin,
\v 7 canꞌ chaꞌ a msti tinꞌ tsa jñan chaꞌ tsuꞌhue ꞌin um, una ñii tsaloo ti chcuiꞌ um sca chaꞌ loꞌ chca nguso ꞌñan.
\v 8 Siꞌyana loꞌon nanꞌ ntsuꞌhui xꞌnan, a cunta ndiꞌin sindatu nu ndlon tñan ꞌin, loꞌ xa cunen loꞌo canꞌ: Nde seꞌen tsaa, loꞌ tsaa yu, uta chcuinꞌ loꞌo xca yu: Cuan lya, cuiꞌ xaa caan yu, uta chcuinꞌ loꞌo sca nguso ꞌñan: Nde tñan cuꞌni, cuiꞌ xaa cuꞌni yu ꞌin na.
\v 9 Xa ngune ꞌin Jesús chaꞌ canꞌ, yuhue ꞌa tiꞌ ñi ꞌin yu, mxiton ñi ycuiꞌ ñi loꞌo nten nu ljyan nchaꞌan ꞌin ñi: Ñi sca neꞌ Israel loꞌ a nchcua taꞌa chaꞌ ꞌin neꞌ loꞌo yu re tsañaꞌan nu ndiya quiꞌan tiꞌ yu ꞌñan.
\v 10 Xa mxitucui yu nu nguaꞌan tñan xꞌnan sindatu canꞌ, naꞌan yu siꞌyana cuaꞌ mchca yu nguso canꞌ.
\s Mꞌni Jesús chaꞌ mdyiquiꞌo sñeꞌ sca neꞌ cunaꞌan Naín
\p
\v 11 Chonꞌ ndeꞌen canꞌ mdoꞌo Jesús nguiaa ñi sca quichen naan Naín, tsatlyu loꞌo nu nguiꞌni chaꞌan ꞌin ñi loꞌo nten quiꞌan canꞌ.
\v 12 Xa cuaꞌ tiyaa ti ñi tuloꞌo tuꞌhua quichen canꞌ, mchcua taꞌa ñi loꞌo nten quiꞌan nu nguia tsiꞌ ꞌin sca nu ngujui, loꞌ lca canꞌ tyi ca ñaꞌan sca sñeꞌ neꞌ cunaꞌan nu nguinu loꞌo chaꞌ ycuiꞌ ti.
\v 13 Ñi Xꞌnan na xa naꞌan ñi ljyaan neꞌ cunaꞌan canꞌ, cuiꞌ xaa mñaꞌan ꞌtnan tiꞌ ñi ꞌin neꞌ, loꞌ juin ñi loꞌo: A cunan ꞌa um.
\v 14 Xacanꞌ mdiyaa ñi cuiꞌ ti seꞌen ljyaan caja canꞌ, ylaꞌ ñi ꞌin na, loꞌ ycanꞌ ton yu nu lyiꞌya ꞌin na, loꞌ juin ñi ꞌin nu ngujui canꞌ: Nuꞌhuin yu tsa suhue ti nanꞌ nchcuinꞌ loꞌo, Tyitucui.
\v 15 Cuiꞌ xaa mdyitucua yu, mdyisnan ycuiꞌ yu, loꞌ mdyaa ñi cunta ꞌin yu ꞌin jyiꞌan yu.
\v 16 Nchgaa nten canꞌ ytsen neꞌ loꞌ mꞌni tnu neꞌ ꞌin Ndiose, loꞌ nchcuiꞌ neꞌ: La ñii ngulo ton Ndiose sca nu tlyu lati lja na nu nxiycuiꞌ ñi ꞌin. A cunta ntsuꞌhui nu nchcuiꞌ: La ñii mdiyaan ycuiꞌ ca Ndiose nu culo laa quichen ꞌin ñi.
\v 17 Loꞌ ñaꞌaan seꞌen lyiꞌya loo Judea loꞌo scasca quichen ndiꞌin cuiꞌ ti canꞌ mscua cueen chaꞌ ꞌin Jesús.
\s Msuꞌhua yu Xuhua nu ya ñichaꞌ ꞌin Jesús
\p
\v 18 Taꞌa ndaꞌan yu Xuhua canꞌ mtsaꞌ ꞌin yu nchgaa chaꞌ nu yatoꞌo canꞌ. Xacanꞌ msiꞌya yu Xuhua canꞌ ꞌin tucua taꞌa ndaꞌan yu,
\v 19 loꞌ nguaꞌan tñan yu ꞌin siꞌyana tsa ñichaꞌ ꞌin Jesús chaꞌ cuiꞌ ca ñi lca ñi nu ntsuꞌhui chaꞌ caan, uta quita yu ꞌin xca tucui.
\v 20 Xa mdiyaa chcuaa yu canꞌ seꞌen ndon Jesús, juin yu ꞌin ñi: Yu Xuhua nu mducua tya ꞌin nten msuꞌhua yu ꞌin hua siꞌyana cuñichaꞌ hua ꞌin um chaꞌ cuiꞌ um lca um ñi nu ntsuꞌhui chaꞌ caan, uta quita hua ꞌin xca tucui?
\v 21 Ticuiꞌ xaa canꞌ mꞌni chca ñi ꞌin quiꞌan nu tiꞌi loꞌo cuati loo quicha, loꞌo nu ntsuꞌhui cuiꞌin xaꞌan ꞌin, a cunta quiꞌan nu cuityinꞌ msla ñi quiloo.
\v 22 Xacanꞌ mxcuen Jesús ꞌin yu: Quia ytsaꞌ um ꞌin yu Xuhua nchgaa chaꞌ nu naꞌan um loꞌ ngune ꞌin um: —Nu cuityinꞌ nguila xaa quiloo, nu coꞌ quiyaꞌ cuaꞌ nchca ndyiꞌan—, nu tiꞌi loꞌo quitsoꞌ la nguinu luhui, —loꞌo nu cuꞌun cuaꞌ ne ꞌin—, ndyiquiꞌo nu ngujui, —loꞌ nu tiꞌi ñaꞌan chendyu ꞌin ndyijyi nu nchcuiꞌ chaꞌ tsuꞌhue ꞌin Ndiose loꞌo—,
\v 23 tsuꞌhue ca xuꞌhue nu a nguiꞌni tucua tiꞌ loꞌon.
\v 24 Xa cuaꞌ mdoꞌo yu nu nguaꞌan tñan yu Xuhua canꞌ nguiaa, xacanꞌ mdyisnan ycuiꞌ ñi loꞌo nten chaꞌ ꞌin yu Xuhua: ¿Tucui ca ꞌin ya nanꞌ ꞌya um seꞌen ngutyi cua? ¿Ta ꞌin nu chinꞌ chaꞌ ꞌin tsañaꞌan nguiaa chaꞌ ꞌin quii nu mcha tiꞌin cuiꞌin?
\v 25 Chaꞌ siꞌi, ¿tucui ca ꞌin ya nanꞌ ꞌya um xacanꞌ? ¿Ta cuiꞌ ꞌin sca yu quiꞌyu nu lcoꞌ teꞌ tsuꞌhue ñaꞌan? Ñaꞌan jan ñi, nu lcoꞌ teꞌ tsuꞌhue ñaꞌan nu ndaꞌan loꞌo chaꞌ nducui tiꞌ ꞌin, canꞌ nu ndiꞌin naꞌan ꞌin ree.
\v 26 ¿Tucui ca ꞌin ya naꞌan um chaꞌ na canꞌ? ¿Ta ꞌin yu nu nxiycuiꞌ Ndiose ꞌin? Cuiꞌ yu, una cunen loꞌo um sca chaꞌ: Ndon loo lati canꞌ que ꞌin sca nu nxiycuiꞌ Ndiose ꞌin.
\v 27 Ndeñaꞌan nchcuiꞌ quityi ꞌin Ndiose chaꞌ ꞌin canꞌ: —Ñaꞌan jan ñi, caꞌan tñan ꞌin sca nu chcua loo, canꞌ nu cuꞌni chuꞌhue tucueen tsaa—.
\v 28 Cunen loꞌo um sca chaꞌ, a sca yu nu mxiycuiꞌ Ndiose ꞌin nu cuaꞌ yaan loo chendyu re, ta ndon loo la que ñaꞌan yu Xuhua nu mducua tya ꞌin nten. Una cuaꞌ ñii nu chinꞌ la chaꞌ ꞌin seꞌen ndlo Ndiose tñan, canꞌ nu lyee la ndon loo que ꞌin yu Xuhua canꞌ.
\v 29 Nchgaa nten loꞌo yu nu ndlo tñi xa ngune ꞌin neꞌ chaꞌ nu ycuiꞌ Jesús, cuiꞌ xaa ncua cuiyaꞌ tiꞌ neꞌ siꞌyana ñi ndiꞌin chaꞌ ꞌin Ndiose, loꞌ mducua tya neꞌ tsañaꞌan nu nguloꞌo yu Xuhua canꞌ.
\v 30 Una neꞌ fariseo loꞌo nu mꞌni chaꞌan chaꞌ ꞌin lee, nde mxcuan tloo neꞌ chaꞌ nu cuaꞌ mdiꞌin tyaa Ndiose loꞌo neꞌ, a mslyaa neꞌ chcua tya neꞌ tsañaꞌan nguloꞌo yu Xuhua canꞌ.
\v 31 Xacanꞌ juin Ñi Xꞌnan na: ¿Tucui ta loꞌo tca cuꞌnin suꞌhuan ꞌin ta nten re tsañaꞌan nu nguiaa chaꞌ ꞌin neꞌ?
\v 32 Nguiaa chaꞌ ꞌin neꞌ re tsañaꞌan chaꞌ ꞌin nu suhue ti nu ndyiꞌin jya loquiyaꞌ, nxiꞌya taꞌa loꞌ nchcuiꞌ: Yla hua cuhuii quii loꞌ a yla quiyaꞌ um, yla hua jyiin nu nguitsiꞌ nten, loꞌ ñi a mdiꞌin ynan um.
\v 33 Xa mdiyaan yu Xuhua nu mducua tya ꞌin nten, loꞌ siꞌyana a ycu yu jaslya ñi a yiꞌo yu vino, juin um siꞌyana cuiꞌin xaꞌan ntsuꞌhui ꞌin yu.
\v 34 Una cuaꞌ ñii mdiyaan Yu Quiꞌyu nu Mdoꞌo nde niꞌ Cuaan, loꞌ siꞌyana nchcu yu loꞌ ndyiꞌyo yu, nchcuiꞌ um: Yu re lca yu sca yu tucunꞌ, yu cuꞌhui, loꞌ taꞌa tsuꞌhue yu ꞌin yu ndlo tñi loꞌo nten quiꞌya chendyu.
\v 35 Una chaꞌ tiyaa ꞌin Ndiose nchca chcanꞌ loo na loꞌo nchgaa nu lca sñeꞌ ñi, loꞌ ca cuiyaꞌ tiꞌ canꞌ siꞌyana ñi ndiꞌin chaꞌ ꞌin ñi.
\s Yaa Jesús seꞌen ndiꞌin Simón nu lca fariseo
\p
\v 36 Yatoꞌo sca yu fariseo ya jñan chaꞌ tsuꞌhue ꞌin Jesús siꞌyana tsa ycu ñi seꞌen ndiꞌin yu. Xa mdiyaa ñi la naꞌan ꞌin yu yten tucua ñi tuꞌhua msa canꞌ.
\v 37 Cuiꞌ quichen canꞌ ndiꞌin sca neꞌ cunaꞌan nducunꞌ, xa ncua jlyo tiꞌ neꞌ siꞌyana ñaꞌan ꞌin yu fariseo canꞌ mdiyaa Jesús, xacanꞌ mdiya loꞌo neꞌ sca teꞌen tyiꞌa xityiꞌi,
\v 38 loꞌ yten tucua neꞌ cuiꞌ ti seꞌen ndon quiyaꞌ Jesús, nguinan neꞌ loꞌ chonꞌ quiyaꞌ ñi nguilo tucua tyiꞌa quiloo neꞌ, nxityi neꞌ ꞌin na loꞌo quichanꞌ que neꞌ, a cunta nchcuiꞌ chaꞌ neꞌ quiyaꞌ ñi loꞌ nslo tucua neꞌ tyiꞌa xityiꞌi canꞌ chonꞌ quiyaꞌ ñi.
\v 39 Una yu fariseo nu ya teꞌen ꞌin Jesús xa naꞌan yu chaꞌ canꞌ, ndeñaꞌan nguñan tiꞌ yu: Chaꞌ cua na yu re lca yu nu nxiycuiꞌ ca Ndiose ꞌin, cuiꞌ xaa chuꞌhui lyoo yu loꞌ quiꞌya yu cunta siꞌyana sca neꞌ cunaꞌan nducunꞌ lca nu nguiꞌni caꞌan quiyaꞌ yu.
\v 40 Xacanꞌ juin Jesús loꞌo yu: Simón, cunen loꞌo um sca chaꞌ. Xacanꞌ mxcuen yu: Chcuiꞌ um.
\v 41 Loꞌ juin ñi: Ndiꞌin tucua yu nu nducui tñi ꞌin sca yu cuilyiyaꞌ, sca canꞌ nducui quiꞌan tñi, tsañaꞌan tñi nu nꞌni neꞌ canan caꞌyu ciento tsaan, loꞌ xca canꞌ nducui tsañaꞌan tñi nu nꞌni neꞌ canan tuꞌhua tyi tsaan.
\v 42 Siꞌyana a ncua ꞌa ꞌin yu xuꞌhua lyiyaꞌ yu tñi canꞌ, mꞌni yu chaꞌ tlyu tiꞌ ꞌin chcuaa yu canꞌ. Ljuin ñaꞌan na, ¿ti ñaꞌan chcuaa yu canꞌ lyee la lca tiquee yu loꞌo yu cuilyiyaꞌ canꞌ?
\v 43 Mxcuen yu Simón canꞌ: Ñan tinꞌ yu nu quiꞌan la tñi mducui canꞌ. Xacanꞌ juin ñi ꞌin yu: Cuiꞌ ñaꞌan ycuiꞌ.
\v 44 Xacanꞌ mxinaꞌan ñi seꞌen nducua neꞌ cunaꞌan canꞌ loꞌ juin ñi ꞌin yu Simón: ¿Ta cuaꞌ nguꞌya cunta ñaꞌan nguiꞌni neꞌ cunaꞌan re? Nanꞌ yten ñaꞌan ꞌin loꞌ a mdaa tyiꞌa quiten quiyanꞌ, una neꞌ cunaꞌan re mslo tucua neꞌ tyiꞌa quiloo neꞌ chonꞌ quiyanꞌ loꞌ mxityi neꞌ ꞌin na loꞌo quichanꞌ que neꞌ.
\v 45 A ycuiꞌ chaꞌ ꞌñan, una neꞌ cunaꞌan re tiꞌ xa yten ñaꞌan ꞌin, a ndlaꞌ tiꞌ neꞌ nchcuiꞌ chaꞌ neꞌ quiyanꞌ.
\v 46 A msuꞌhua ceite quen, una neꞌ cunaꞌan re msuꞌhua neꞌ tyiꞌa xityiꞌi quiyanꞌ.
\v 47 Canꞌ chaꞌ cunen loꞌo, cuaꞌ nguten nchgaa quiꞌya ꞌin neꞌ siꞌyana tlyu chaꞌ tsuꞌhue cuaꞌ mꞌni neꞌ loꞌon, una nu a ndyuꞌhui lyoo quiꞌya ꞌin chinꞌ ti chaꞌ tsuꞌhue ndyiꞌo tiquee canꞌ.
\v 48 Loꞌ juin ñi ꞌin neꞌ cunaꞌan canꞌ: Cuaꞌ nguten quiꞌya ꞌin.
\v 49 Yu taꞌa nducua ñi canꞌ mdyisnan ycuiꞌ yu: ¿Tucui ta lca yu re nu loꞌo nxicuten yu quiꞌya ꞌin nten?
\v 50 Una tiꞌ juin la ñi ꞌin neꞌ cunaꞌan canꞌ: Mdoꞌo laa siꞌyana ya quiꞌan tiꞌ ꞌñan, quiaa lyaa loꞌ a sca la chaꞌ suꞌhua tiquee.
\c 8
\s Chaꞌ ꞌin jun cunaꞌan nu mda yaaꞌ ꞌin Jesús
\p
\v 1 Chonꞌ ndeꞌen canꞌ mdijin Jesús scasca quichen, mdaꞌan ycuiꞌ ñi chaꞌ tsuꞌhue ꞌin Ndiose tsañaꞌan ntsuꞌhui chaꞌ culo ñi tñan ꞌin nten, mdaꞌan ñi loꞌo tsa tichcua yu canꞌ.
\v 2 A cunta loꞌo tucua snan jun cunaꞌan nducui nchaꞌan ꞌin ñi, cuiꞌ nu cuaꞌ mꞌni chca ñi ꞌin loꞌ ngulo ñi cuiꞌin xaꞌan ꞌin: María nu naan Magdalena, nu mdoꞌo tsa cati cuiꞌin xaꞌan ꞌin,
\v 3 loꞌo xca nu naan Juana, cuilyiꞌo yu Chuza, yu nu lyiꞌya cunta tñan ꞌin Herode, loꞌo Susana, a cunta loꞌo scasca la jun cunaꞌan nu nda yaaꞌ ꞌin ñi loꞌo na nu ndiꞌin ꞌin jun.
\s Chaꞌ ꞌin yu nu ntya mti trigo
\p
\v 4 Yatoꞌo mdyisnan nguioꞌ tiꞌin quiꞌan nten seꞌen ndon ñi, neꞌ nu mdoꞌo scasca quichen, xacanꞌ mdyisnan nguloꞌo ñi ꞌin neꞌ, loꞌ mdiꞌin tyaa ñi sca chaꞌ loꞌ nchcuiꞌ ñi:
\v 5 Sca yu quiꞌyu yta mti trigo, seꞌen msne yu ꞌin na tsachinꞌ na nguilo na tuꞌhua tucueen, loꞌ jui nu ngulo suꞌhua ꞌin na, a cunta yaan quiñi loꞌ ycu ꞌin na.
\v 6 Tichinꞌ mti canꞌ nguilo na sca seꞌen nu chinꞌ ti yuu nducua loo quee, cuaꞌ ñaꞌaan nducua na yaa nguityi na siꞌyana a tuꞌhua yuu seꞌen canꞌ.
\v 7 Tichinꞌ mti canꞌ nguilo na seꞌen nducua yca quicheꞌ, loꞌ siꞌyana tsatlyu nducua na loꞌo yca quicheꞌ, canꞌ chaꞌ ngujui yuꞌhui na.
\v 8 Una tichinꞌ mti canꞌ nguilo na loo yuu tsuꞌhue, tsuꞌhue ꞌa mducua na loꞌ ncua tñan na, ntsuꞌhui juun nu mdaa sca ciento mti scati loo juun na. Loꞌ ñaꞌaan mdyi ycuiꞌ Jesús chaꞌ canꞌ, ycuiꞌ cueen ñi: Nchgaa nu ndon nscan chaꞌ nu ycuinꞌ re cuꞌni cunta ꞌin na.
\v 9 Una yu taꞌa ndaꞌan ñi mñichaꞌ ꞌin ñi: ¿Ñi chaꞌ nchca tiꞌ chcuiꞌ chaꞌ nu ycuiꞌ um?
\v 10 Juin ñi ꞌin yu xacanꞌ: Cuaꞌ mdaa Ndiose chaꞌ cuiyaꞌ quiꞌya um cunta chaꞌ nu ntsuꞌhui cutsiꞌ ꞌin ñi tsañaꞌan nu ndlo ñi tñan. Una nchgaa la ñaꞌan nten a nchcuiꞌ lan loꞌo neꞌ, —siyaꞌ lyee la ñaꞌan neꞌ una a ndyiꞌya neꞌ cunta, siyaꞌ lyee la ndon nscan neꞌ una a ndyiꞌya neꞌ chaꞌ tiyaa—.
\v 11 Ndeñaꞌan nguiaa chaꞌ nu mdiꞌin tyaan canꞌ: Mti trigo canꞌ lca na ychaꞌ Ndiose.
\v 12 Mti trigo nu nguilo tuꞌhua tucueen canꞌ, nguiaa chaꞌ ꞌin na tsañaꞌan nguiaa chaꞌ ꞌin nten nu ne ꞌin chaꞌ tsuꞌhue ꞌin Ndiose, una cuiꞌ xaa ti ndyiꞌan laxaꞌan loꞌ ndlyoo chaꞌ tsuꞌhue nu cuaꞌ ntsuꞌhui niꞌ cusya ꞌin neꞌ, ñaꞌan ca siꞌyana a tsa quiꞌan tiꞌ neꞌ loꞌ a tyiꞌo laa neꞌ.
\v 13 Mti nu nguilo loo yuu nu titi tuꞌhua nducua loo quee canꞌ, nguiaa chaꞌ ꞌin na tsañaꞌan nguiaa chaꞌ ꞌin nten nu ne ꞌin chaꞌ tsuꞌhue ꞌin Ndiose, tsuꞌhue ntsuꞌhui tiquee neꞌ nducuan xuꞌhue neꞌ ꞌin na, una a nguꞌya xcuaꞌ na. Sca coꞌ xaa ndiya quiꞌan tiꞌ neꞌ, una xa ndyijyin neꞌ scasca loo chaꞌ, cuiꞌ xaa ndyiꞌo tsoꞌ neꞌ.
\v 14 Nu nguilo seꞌen nducua yca quicheꞌ canꞌ, nguiaa chaꞌ ꞌin na tsañaꞌan nguiaa chaꞌ ꞌin nten nu ne ꞌin chaꞌ tsuꞌhue ꞌin Ndiose, una siꞌya chaꞌ nduhue tiꞌ, ta chaꞌ cuilyiyaꞌ loꞌo scasca chaꞌ nducunꞌ nu nchcui tiꞌ neꞌ, canꞌ nu ndujui xuꞌhua chaꞌ tsuꞌhue canꞌ, loꞌ a ndyijyi ꞌa ñaꞌan cuton na.
\v 15 Una nu nguilo loo yuu tsuꞌhue canꞌ, nguiaa chaꞌ ꞌin na tsañaꞌan nguiaa chaꞌ ꞌin nten nu ne ꞌin chaꞌ tsuꞌhue ꞌin Ndiose, tsuꞌhue nxuꞌhua seꞌen neꞌ ꞌin na loꞌo sca cusya nu ñi, loꞌ tsuꞌhue nchca tñan na siꞌyana nxñi ton neꞌ ꞌin neꞌ loo chaꞌ canꞌ.
\s A sca chaꞌ nu nchca cutsiꞌ ta a ndyiꞌo scua la na
\p
\v 16 A tucui nu caꞌan sca quiiꞌ loꞌ nde tucun tiꞌin ꞌin na, uta suꞌhua ꞌin na nde niꞌ quiꞌñan, cuiꞌ ca nu tyiꞌin tyaa ꞌin na sca seꞌen cuaan, siꞌyana tuꞌhui na xaa ꞌin nu sten ñaꞌan canꞌ.
\v 17 Cuiꞌ cuañaꞌan loꞌo sca chaꞌ nu nchca cunan ti, a sꞌni ca chcanꞌ loo na tiyaa xaa, loꞌ cuañaꞌan ndiꞌin chaꞌ ꞌin sca chaꞌ nu nchca cutsiꞌ ti, a tyijyin yuꞌhui chaꞌ a tyiꞌo scua la chaꞌ ꞌin na.
\v 18 Canꞌ chaꞌ xñi um cunta nchgaa chaꞌ nu ne ꞌin um, siꞌyana nten nu nꞌni cunta chaꞌ nu nchcuinꞌ, nde lyee la ndyijyi chaꞌ tiyaa ꞌin canꞌ, una nu a nꞌni cunta chaꞌ re, loꞌo chaꞌ tiyaa nu ñan tiꞌ cuaꞌ jui ꞌin, ndlyaa ñi ꞌin na.
\s Chaꞌ ꞌin jyiꞌan Jesús loꞌo taꞌa ngula ñi
\p
\v 19 Xacanꞌ mdiyaa jyiꞌan Jesús loꞌo taꞌa ngula ñi seꞌen nguilyu ñi, una a ncua sten jun la seꞌen ndon ñi siꞌya nten quiꞌan canꞌ.
\v 20 Jui nu mtsaꞌ ꞌin ñi: Tunaꞌan lyiyaꞌ cua ndon ñi jyiꞌan um loꞌo taꞌa ngula um, nchca tiꞌ jun chcuiꞌ jun loꞌo um.
\v 21 Xacanꞌ juin ñi ꞌin nten canꞌ: Tsalca nu ndon nscan chaꞌ ꞌin Ndiose loꞌ nxuꞌhua seꞌen ꞌin na, canꞌ nu lca jyiꞌan nanꞌ loꞌ canꞌ nu lca taꞌa ngulan.
\s Mꞌni Jesús chaꞌ ngulyijyi quio cuiꞌin
\p
\v 22 Yatoꞌo sca tsaan yten Jesús loꞌo yu taꞌa ndaꞌan ñi sca niꞌ yca naꞌan, loꞌ juin ñi ꞌin yu: Tyijyin xiꞌyu na xca tsoꞌ tiyoꞌ re. Loꞌ mdoꞌo jun nguiaa jun.
\v 23 Una lja nguiaa jun loo tyiꞌa canꞌ nguꞌya sla ñi. Tsati ntyin yaan sca cuiꞌin tnu, loꞌ chen nchcui ꞌin jun siꞌyana cuaꞌ mdyisnan nguiten tyiꞌa ꞌin yca naꞌan canꞌ.
\v 24 Ngulyoo yu sla ñi, loꞌ juin yu ꞌin ñi: Ñi Bstro, Ñi Bstro, cuaꞌ quityinꞌ yuꞌhui ti na. Xacanꞌ mdyiton ñi loꞌ ngusun loꞌo ñi ꞌin cuiꞌin canꞌ loꞌo tiyoꞌ nu lyee nguitsa canꞌ, cuiꞌ xaa ngulyijyi na loꞌ mdiꞌin seen na.
\v 25 Xacanꞌ juin ñi ꞌin yu: ¿Ta na a ndiya quiꞌan tiꞌ um ꞌñan? Una scañaꞌan ti ndiꞌin ytsen yu, nduhue tiꞌ yu loꞌ ñichaꞌ taꞌa yu: ¿Tucui ta lca ñi re, ñi chaꞌ loꞌo cuiꞌin loꞌo tyiꞌa ndlo ñi tñan ꞌin na, loꞌ jaꞌan na ꞌin ñi?
\s Chaꞌ ꞌin yu Gadara nu ntsuꞌhui cuiꞌin xaꞌan ꞌin
\p
\v 26 Xacanꞌ mdyiꞌo tiꞌin jun loo yuu ꞌin neꞌ Gadara, cuiꞌ luhuaꞌ xca tsoꞌ seꞌen lyiꞌya loo Galilea.
\v 27 Loꞌ ñaꞌaan mdyiꞌo ton Jesús tuꞌhua tyiꞌa canꞌ, yan ycua sca yu Gadara seꞌen ndon ñi, yu nu cuaꞌ sꞌni ꞌa ntsuꞌhui cuiꞌin xaꞌan ꞌin, a nchcoꞌ ꞌa yu steꞌ yu, a cunta a ndyiꞌin ꞌa yu ñaꞌan ꞌin yu, cuiꞌ ca nu niꞌ lyiꞌo seꞌen nguitsiꞌ nten ndlyu yu nchgaa xaa.
\v 28 Yu re xa naꞌan yu ꞌin Jesús, msiꞌya yja cueen yu, mdyiꞌya xtyinꞌ yu tloo ñi, loꞌ ycuiꞌ cueen yu: Jesús, Sñeꞌ Ndiose, ñi nu tlyu lati nu nducua niꞌ cuaan, ¿ñi na lca ꞌin um loꞌon? Jñan sca chaꞌ tsuꞌhue ꞌin um a xitijin um ꞌñan nu tiꞌi.
\v 29 (Loꞌ mdyisnan ngulo ñi tñan ꞌin cuiꞌin xaꞌan canꞌ siꞌyana culaꞌ ton ꞌin yu, siꞌyana cuaꞌ sꞌni ꞌa nguiꞌni lyiꞌo ꞌtnan cuiꞌin xaꞌan canꞌ ꞌin yu. Tyun ꞌa yaꞌ mscanꞌ neꞌ yaaꞌ yu loꞌo quiyaꞌ yu loꞌo carena, una msiꞌyu yu ꞌin na, chacuiꞌ seꞌen ngutyi ndyiꞌan loꞌo cuiꞌin xaꞌan canꞌ ꞌin yu.)
\v 30 Mñichaꞌ Jesús ꞌin yu: ¿Ñaꞌan ta naan? Xacanꞌ mxcuen yu: Legión naan hua. Cuiꞌ siꞌyana quiꞌan ꞌa cuiꞌin xaꞌan ntsuꞌhui ꞌin yu.
\v 31 Cuiꞌin xaꞌan canꞌ mjñan chaꞌ tsuꞌhue ꞌin ñi siꞌyana a suꞌhua ñi ꞌin sca seꞌen quiꞌñi.
\v 32 Cuiꞌ siiꞌ quiꞌya canꞌ ndaꞌan nan ycu sca ta tlyu cuhueꞌ, loꞌ mjñan cuiꞌin xaꞌan canꞌ ꞌin Jesús chaꞌ taa ñi chaꞌ cuiyaꞌ sten ꞌin cuhueꞌ canꞌ, loꞌ mdaa ñi chaꞌ cuiyaꞌ.
\v 33 Ñaꞌaan mdyiꞌo cuiꞌin xaꞌan canꞌ ꞌin yu yten seꞌen ndiꞌin cuhueꞌ canꞌ, tsatlyu mdoꞌo ꞌin msnan ꞌin, loꞌ mxityu loo ꞌin loo tiyoꞌ, canꞌ ngujui yuꞌhui ꞌin.
\v 34 Yu nu naꞌan seen cuhueꞌ canꞌ, xa naꞌan yu chaꞌ nu yatoꞌo, cuiꞌ xaa msnan yu nguia ytsaꞌ yu ꞌin nten ndiꞌin quichen canꞌ loꞌo nten ngaꞌan niꞌ quixinꞌ.
\v 35 Mdoꞌo neꞌ ya naꞌan neꞌ chaꞌ nu yatoꞌo canꞌ, mdiyaa neꞌ seꞌen nducua Jesús, naꞌan neꞌ ꞌin yu nu yuꞌhui cuiꞌin xaꞌan ꞌin nducua yu tloo ñi, cuaꞌ lcoꞌ yu steꞌ yu, ntsuꞌhui chcui chaꞌ tiyaa ꞌin yu, loꞌ ytsen ꞌa neꞌ.
\v 36 Nchgaa nu naꞌan chaꞌ canꞌ mdaa suun loꞌo nten nu mdiyaa canꞌ, ñaꞌan mchca yu nu yuꞌhui cuiꞌin xaꞌan ꞌin canꞌ.
\v 37 Xacanꞌ nchgaa nten nu mdoꞌo chcua tyiꞌin tsoꞌ seꞌen lyiꞌya loo Gadara, mjñan neꞌ chaꞌ tsuꞌhue ꞌin ñi siꞌyana tyiꞌo tsoꞌ ñi seꞌen canꞌ loo nu lyee nguitsen neꞌ. Jesús yten ñi niꞌ yca naꞌan canꞌ, loꞌ mxitucui ñi nguiaa ñi.
\v 38 Yu nu quiꞌan ꞌa cuiꞌin xaꞌan yuꞌhui ꞌin canꞌ, mjñan yu chaꞌ tsuꞌhue ꞌin ñi chaꞌ tca chcui nchaꞌan yu ꞌin ñi, una Jesús mslaꞌ ñi ꞌin yu, loꞌ juin ñi:
\v 39 Quiaa nde ñaꞌan ꞌin, loꞌ taa suun tsala ñaꞌan tlyu chaꞌ tsuꞌhue mꞌni Ndiose loꞌo. Mdoꞌo yu nguiaa yu loꞌ mdaa yu suun ñaꞌaan loo quichen canꞌ tsala ñaꞌan tlyu chaꞌ tsuꞌhue mꞌni Jesús loꞌo yu.
\s Chaꞌ ꞌin sñeꞌ Jairo loꞌo chaꞌ ꞌin neꞌ cunaꞌan nu ylaꞌ steꞌ Jesús
\p
\v 40 Xa nguila Jesús seꞌen ndiꞌin nten quiꞌan canꞌ, tsuꞌhue ꞌa ntsuꞌhui tiquee neꞌ ncuan xuꞌhue neꞌ ꞌin ñi, siꞌyana cuaꞌ ndiꞌin ta neꞌ ꞌin ñi.
\v 41 Lja xacanꞌ mdiyaa sca yu naan Jairo, yu nu ndlo tñan seꞌen ndiyoꞌ tiꞌin neꞌ Judio, mdyiꞌya xtyinꞌ yu tloo Jesús loꞌ mjñan yu chaꞌ tsuꞌhue ꞌin ñi siꞌyana tsaa ñi la seꞌen ndiꞌin yu,
\v 42 siꞌyana cuaꞌ caja ti nu cunaꞌan sñeꞌ yu, tyi ca ñaꞌan sca canꞌ ndiꞌin ꞌin yu, loꞌ ntsuꞌhui tichcua yjan. Tucueen nguiaa ñi loꞌo yu msta suꞌhua taꞌa nten siꞌya ñi.
\v 43 Cuiꞌ lja canꞌ nguiaa sca neꞌ cunaꞌan nu cuaꞌ ntsuꞌhui tichcua yjan tiꞌi loꞌo quicha nguilo tne, cuaꞌ ngulyijyi neꞌ ñaꞌaan tñi ꞌin neꞌ loꞌo nu nꞌni rmiyu, una ñi sca canꞌ loꞌ a ncua ꞌin cuꞌni chca ꞌin neꞌ.
\v 44 Neꞌ cunaꞌan canꞌ yaan neꞌ cuiꞌ ti nde chonꞌ Jesús loꞌ ylaꞌ neꞌ tuꞌhua steꞌ ñi, cuiꞌ xaa ngulyijyi ylo tne ꞌin neꞌ.
\v 45 Xacanꞌ juin Jesús: ¿Ti nu ca mꞌni caꞌan ꞌñan? Nchgaa nten canꞌ juin neꞌ siꞌyana a tucui, xacanꞌ mxcuen yu Tyo loꞌo nchgaa taꞌa nguiaa yu: Ñi Bstro, jlyo tiꞌ um tsala ñaꞌan quiꞌan nten nsta suꞌhua ꞌin um, loꞌ tiꞌ nchcuiꞌ um: ¿Ti nu ca mꞌni caꞌan ꞌñan?
\v 46 Loꞌ tiꞌ juin la Jesús: Ntsuꞌhui nu mꞌni caꞌan ꞌñan, siꞌyana ngüi tinꞌ mdoꞌo juesa ꞌñan.
\v 47 Xa naꞌan neꞌ cunaꞌan canꞌ siꞌyana a ncua suꞌhua cutsiꞌ neꞌ chaꞌ nu mꞌni neꞌ, mdyisnan mchcuan neꞌ xa mdiyaa neꞌ tloo ñi, mdyiꞌya xtyinꞌ neꞌ, tloo ndiꞌin nten canꞌ mdaa neꞌ suun loꞌo ñi ñaꞌan ylaꞌ neꞌ steꞌ ñi loꞌ ticuiꞌ xaa mchca neꞌ.
\v 48 Loꞌ juin ñi ꞌin neꞌ: Sñenꞌ, cuaꞌ mchca siꞌyana ya quiꞌan tiꞌ ꞌñan, quia lya loꞌ a sca chaꞌ chuꞌhui tiquee.
\v 49 Canꞌ ca chaꞌ tiꞌ ndon ycuiꞌ ñi xa mdiya ytsaꞌ sca yu nu mdoꞌo la naꞌan ꞌin yu nu ndlo tñan canꞌ, loꞌ juin yu: Cuaꞌ ngujui sñeꞌ um, a najoꞌo ꞌa tiꞌ chcuiꞌ um loꞌo ñi re tsaa ñi.
\v 50 Xa ngune ꞌin Jesús chaꞌ nu ycuiꞌ yu canꞌ, juin ñi ꞌin yu nu ndlo tñan canꞌ: A cutsen um, tsaloo ti tsa quiꞌan tiꞌ um ꞌñan loꞌ chca sñeꞌ um.
\v 51 Xa mdiyaa ñi la naꞌan ꞌin yu, a mdaa ñi yaꞌ sten ñaꞌan nu ti, tsa yu Tyo ti, yu Jacobo loꞌo yu Xuhua, a cunta loꞌo nten cula ꞌin cuhuiꞌ canꞌ.
\v 52 Nchgaa nten canꞌ ndiꞌin ynan neꞌ siꞌya cuhuiꞌ canꞌ, loꞌ juin ñi ꞌin neꞌ: A cunan um, cuhuiꞌ re siꞌi na ngujui cuhuiꞌ, na ljaꞌ ti cuhuiꞌ.
\v 53 Nten canꞌ mstyi lyiꞌo neꞌ ꞌin ñi, siꞌyana jlyo tiꞌ neꞌ na ngujui cuhuiꞌ.
\v 54 Una Jesús msñi ñi yaaꞌ cuhuiꞌ, loꞌ ycuiꞌ cueen ñi: Sñenꞌ, tyitucui.
\v 55 Cuiꞌ ñaꞌan lcaa nguila cusya ꞌin cuhuiꞌ loꞌ mdyi tucui cuhuiꞌ, xacanꞌ ycuiꞌ ñi loꞌo jun siꞌyana taa jun na cu cuhuiꞌ.
\v 56 Nten cula ꞌin cuhuiꞌ ndyijyin yaꞌ yuhue tiꞌ jun chaꞌ canꞌ, una Jesús ngulo ñi tñan ꞌin jun siꞌyana a chcuiꞌ jun loꞌo ñi sca tucui chaꞌ nu yatoꞌo. 
\c 9
\s Xa nguaꞌan tñan Jesús ꞌin yu taꞌa mdaꞌan ñi
\p
\v 1 Xacanꞌ mxoꞌ tiꞌin Jesús ꞌin tichcua yu taꞌa ndaꞌan ñi, loꞌ mdaa ñi chaꞌ cuiyaꞌ ꞌin yu siꞌyana tca culo yu nchgaa loo cuiꞌin xaꞌan nu ntsuꞌhui ꞌin nten, loꞌ cuꞌni chca yu ꞌin nu tiꞌi loꞌo cuati loo quicha.
\v 2 Xacanꞌ nguaꞌan tñan ñi ꞌin yu siꞌyana tsa ycuiꞌ yu ñaꞌan ntsuꞌhui chaꞌ culo Ndiose tñan ꞌin nten, a cunta siꞌyana cuꞌni chca yu ꞌin nu tiꞌi.
\v 3 Loꞌ juin ñi ꞌin yu: Ñi sca na loꞌ a cuiꞌya um seꞌen tsaa um, ñi yca loꞌ a chcua yaaꞌ um, ñi cuijyin, ñi na cu um, ñi tñi a cuiꞌya um, loꞌ ñi a cuiꞌya um xca ta steꞌ um.
\v 4 Quichen seꞌen tiyaa um, chaꞌ ndeꞌen nu taa seꞌen quinu um, canꞌ tyiꞌin um tsalja ndiꞌin um quichen canꞌ.
\v 5 Chaꞌ nten canꞌ a cuan xuꞌhue neꞌ ꞌin um, tyiꞌo um quichen canꞌ loꞌ scuin um yuu quiyaꞌ um, cuañaꞌan quinu cunta ꞌin neꞌ chaꞌ ndeꞌen la chaꞌ nu caan ꞌin neꞌ.
\v 6 Xacanꞌ mdoꞌo yu nguiaa yu loꞌ mdijin yu scasca quichen suhue ti, mdaꞌan ycuiꞌ yu chaꞌ tsuꞌhue ꞌin Ndiose, loꞌ mꞌni chca yu ꞌin nu tiꞌi scasca seꞌen canꞌ.
\s Xa ngujui yu Xuhua nu mducua tya ꞌin nten
\p
\v 7 Yu Herode nu ndlo tñan canꞌ, xa ynan yu chaꞌ ñaꞌan nguiꞌni Jesús, msuꞌhua yu chaꞌ tiquee yu siꞌyana ntsuꞌhui nu nchcuiꞌ siꞌyana yu Xuhua canꞌ cuaꞌ mdyiquiꞌo yu,
\v 8 a cunta ntsuꞌhui xca nu nchcuiꞌ siꞌyana Elía cuaꞌ nguloꞌo tloo ꞌin neꞌ, loꞌ ntsuꞌhui xca nu nchcuiꞌ siꞌyana lca ñi scasca la nu mxiycuiꞌ Ndiose ꞌin cuaꞌ sꞌni, loꞌ cuaꞌ ñii mdyiquiꞌo canꞌ.
\v 9 Xacanꞌ juin yu Herode: Una nanꞌ ngulon tñan msiꞌyu yni yu Xuhua canꞌ, ¿tucui ta lca nu nchcuiꞌ nten cua chaꞌ ꞌin? Canꞌ chaꞌ nchca tiꞌ yu chuꞌhui lyoo yu ꞌin Jesús.
\s Mxicu Jesús ꞌin tsa caꞌyu mii yu quiꞌyu
\p
\v 10 Xa nguila yu taꞌa mdaꞌan Jesús, mdaa yu suun loꞌo ñi nchgaa chaꞌ nu mꞌni yu seꞌen yaa yu. Xacanꞌ mdoꞌo loꞌo ñi ꞌin tsalca ti yu, sca seꞌen nu cuaꞌ ntan la tuꞌhua quichen Betsaida.
\v 11 Una nten nu nguinu tiꞌin canꞌ xa ngujlyo tiꞌ neꞌ la tucueen nguiaa ñi, mducui nchaꞌan neꞌ ꞌin ñi, cuiꞌ xaa ncuan xuꞌhue ñi ꞌin neꞌ, loꞌ ycuiꞌ ñi loꞌo neꞌ ñaꞌan ndlo Ndiose tñan ꞌin nten, a cunta mꞌni chca ñi ꞌin nchgaa nu ntsuꞌhui quicha ꞌin.
\v 12 Xa msiin tsaan canꞌ mdiya ycuiꞌ yu taꞌa ndaꞌan ñi loꞌo ñi: Chcuiꞌ um loꞌo nten re siꞌyana cunan neꞌ seꞌen quinu neꞌ seꞌen ndiꞌin scasca quichen uta seꞌen ngaꞌan nten niꞌ quixinꞌ, canꞌ caja na cu neꞌ siꞌyana tijyoꞌ nguilyu na re.
\v 13 Juin ñi ꞌin yu xacanꞌ: ꞌUn xicu um ꞌin neꞌ. Mxcuen yu ꞌin ñi: Una seen caꞌyu ti jaslya ndaꞌan loꞌo hua loꞌo tucua ti cula, uta na nchca tiꞌ um tsa siꞌi hua na nu cu nten quiꞌan re.
\v 14 Tsalca yu quiꞌyu canꞌ ndiyaa yu caꞌyu mii yu. Xacanꞌ juin ñi ꞌin yu taꞌa ndaꞌan ñi: Cuꞌni um chaꞌ chcua nten re cunda tuꞌhua tyii neꞌ.
\v 15 Cuañaꞌan mꞌni yu chaꞌ yten tucua nchgaa nten canꞌ.
\v 16 Xacanꞌ msñi Jesús taꞌa caꞌyu jaslya loꞌo chcua cula canꞌ, loꞌ mscuen ñi tloo ñi nde cuaan, mdyaa ñi xuꞌhue ꞌin Ndiose, xacanꞌ msuꞌhue ñi ꞌin na, loꞌ mdaa ñi ꞌin na ꞌin yu taꞌa ndaꞌan ñi siꞌyana cutsa yu ꞌin na.
\v 17 Nchgaa neꞌ ycu neꞌ tsayaꞌ ngulaꞌ tiꞌ neꞌ, loꞌ na nu nguinu canꞌ tiꞌ mꞌni chaꞌan yu cha tichcua xcuhui loꞌo na.
\s Juin yu Tyo siꞌyana Jesús lca ñi Cristo
\p
\v 18 Yatoꞌo lja nchcuiꞌ lyiꞌo Jesús ꞌin Ndiose scati ñi, una loꞌo yu taꞌa ndaꞌan ñi nguilyu canꞌ, loꞌ mñichaꞌ ñi ꞌin yu: ¿Tucui ta lcan nanꞌ nchcuiꞌ nten?
\v 19 Mxcuen yu ꞌin ñi: Ntsuꞌhui nu nchcuiꞌ siꞌyana lca um yu Xuhua nu mducua tya ꞌin nten, loꞌ ntsuꞌhui nu nchcuiꞌ siꞌyana lca um yu Elía, a cunta ntsuꞌhui xca nu nchcuiꞌ siꞌyana lca um sca yu nu mxiycuiꞌ Ndiose ꞌin cuaꞌ sꞌni, loꞌ cuaꞌ ñii mdyiquiꞌo canꞌ.
\v 20 Xacanꞌ juin ñi ꞌin yu: Loꞌ ꞌun jan ñi, ¿tucui ñan tiꞌ um lcan nanꞌ? Mxcuen yu Tyo canꞌ: ꞌUn lca um ycuiꞌ ca Cristo nu mdoꞌo seꞌen nducua Ndiose.
\s Mtsaꞌ Jesús siꞌyana ntsuꞌhui chaꞌ caja ñi
\p
\v 21 Una tla chaꞌ mdiꞌin tyaa ñi loꞌo yu siꞌyana a chcuiꞌ yu chaꞌ re loꞌo ñi sca tucui.
\v 22 Juin ñi ꞌin yu: Yu Quiꞌyu nu Mdoꞌo nde niꞌ Cuaan, quiꞌan ꞌa nu tiꞌi ntsuꞌhui chaꞌ tyijyin ñi, ntsuꞌhui chaꞌ xcuan tloo quiꞌyu cula ꞌin ñi, cuiꞌ cuañaꞌan loꞌo yu nu ndlo ca tñan niꞌ lyaa loꞌo neꞌ escriba, cunan neꞌ ñaꞌan cujui neꞌ ꞌin ñi, una nu cuaꞌ ca snan tsaan ntsuꞌhui chaꞌ tyiquiꞌo ñi.
\v 23 Xacanꞌ tsatlyu ycuiꞌ ñi loꞌo nten canꞌ: Chaꞌ ndeꞌen nu nchca tiꞌ chcui chaꞌan ꞌñan, ꞌni chaꞌ jlya tiꞌ canꞌ ꞌin, loꞌ nu chcui nchaꞌan ꞌñan, tyaa canꞌ ꞌin siyaꞌ ti.
\v 24 Siꞌyana nchgaa nu ñan tiꞌ culo laa ꞌin, tsatoꞌo quinanꞌ canꞌ tiyaa xaa, una nchgaa nu tyaa chendyu ꞌin ꞌñan, canꞌ nu tyiꞌo laa.
\v 25 ¿Siꞌyana ñi canan chuꞌhui ꞌin neꞌ cuꞌni ꞌin neꞌ ñaꞌaan chendyu, loꞌ tsatoꞌo jlyo neꞌ uta tnanꞌ neꞌ ꞌin neꞌ?
\v 26 Siꞌyana nu xijyiꞌo tiꞌ loꞌon nanꞌ uta loꞌo chaꞌ nu nchcuinꞌ, cuiꞌ cuañaꞌan Yu Quiꞌyu nu Mdoꞌo nde niꞌ Cuaan xijyiꞌo tiꞌ ñi loꞌo canꞌ xa quiaan ñi xiyaꞌ loꞌo chaꞌ cuiyaꞌ ꞌin ñi, tsatlyu loꞌo chaꞌ cuiyaꞌ ꞌin Stina Ndiose loꞌo angujle nu luhui ꞌin ñi.
\v 27 Nu chaꞌ ñi cunen loꞌo um, ntsuꞌhui nu ndlyu re, a caja chaꞌ siꞌi culo nducua la ñaꞌan tloo chaꞌ cuiyaꞌ ꞌin Ndiose tsañaꞌan nu ntsuꞌhui chaꞌ culo ñi tñan.
\s Xa mchaꞌan ñaꞌan Jesús
\p
\v 28 Yatoꞌo nu cuaꞌ nchca snuꞌ tsaan ycuiꞌ ñi chaꞌ canꞌ, mdoꞌo loꞌo ñi ꞌin yu Tyo, yu Xuhua loꞌo Jacobo, loꞌ ycuen jun sca loo quiꞌya siꞌyana chcuiꞌ lyiꞌo ñi ꞌin Ndiose.
\v 29 Lja nchcuiꞌ lyiꞌo ñi ꞌin Ndiose mchaꞌan ñaꞌan tloo ñi, loꞌ steꞌ ñi nguinu nduhui na tsuꞌhue ñaꞌan mten na.
\v 30 Canꞌ nguꞌya ton tucua yu quiꞌyu nu ndaa chaꞌ loꞌo Jesús, cuiꞌ Moisé loꞌo Elía,
\v 31 msuꞌhua loꞌo sca xaa nu tsuꞌhue ñaꞌan ꞌin jun, loꞌ ndaa jun chaꞌ ñaꞌan ntsuꞌhui chaꞌ caja ñi quichen Jerusalén.
\v 32 Yu Tyo canꞌ loꞌo taꞌa nducua yu lyee ꞌa ndyuꞌhui sla yu, una mdaa loo yu a yjaꞌ yu, naꞌan tloo yu xaa nu tsuꞌhue ꞌa ñaꞌan canꞌ ꞌin Jesús loꞌo chcuaa yu taꞌa ndon ñi.
\v 33 Ñaꞌaan xa ngulaꞌ ton chcuaa yu canꞌ ꞌin Jesús, xacanꞌ juin yu Tyo canꞌ loꞌo ñi: Ñi Bstro, tsuꞌhue siꞌyana ndiꞌin hua loꞌo um re, nde tñan hua snan quisin, sca na tyiꞌin um, xca na ꞌin Moisé, loꞌ xca na tyiꞌin Elía. Juin yu cuañaꞌan siꞌyana a ngujlyo ꞌa tiꞌ yu ñi chaꞌ tiꞌ chcuiꞌ yu.
\v 34 Lja nu tiꞌ nchcuiꞌ yu chaꞌ canꞌ, nguꞌya tiꞌin ndlaa loꞌ ngoꞌo yuꞌhui na ꞌin jun, loꞌ ytsen yu xa mchcun yuꞌhui yu niꞌ ndlaa canꞌ.
\v 35 Tiꞌ la niꞌ ndlaa canꞌ jui nu ycuiꞌ: Nde Sñenꞌ nanꞌ nu taꞌa lati ꞌñan, quine ꞌin um chaꞌ nu chcuiꞌ re.
\v 36 Una xa mdyi ycuiꞌ canꞌ, xca ti Jesús nguinu ton ñi, loꞌ yu taꞌa ndaꞌan ñi xꞌni ꞌa msuꞌhua cutsiꞌ yu chaꞌ nu naꞌan tloo yu canꞌ.
\s Mꞌni chca Jesús ꞌin sca yu nu ntsuꞌhui cuiꞌin xaꞌan ꞌin
\p
\v 37 Xca tsaan canꞌ mdoꞌo jun loo quiꞌya canꞌ, tucueen yaan jun quiꞌan ꞌa nten ya ycua ꞌin jun.
\v 38 Lja nten canꞌ mdoꞌo ycuiꞌ cueen sca yu quiꞌyu: Ñi Bstro, jñan sca chaꞌ tsuꞌhue ꞌin um cuꞌni cunta um ꞌin yu lyoꞌ ti re ꞌñan, siꞌyana tyi ca ñaꞌan sca yu ꞌñan.
\v 39 Xa nxñi cuiꞌin ꞌin yu, tsati ntyin nxiꞌya yja yu, nscuin tiꞌin na ꞌin yu loꞌo juesa, nchcua ngooꞌ tuꞌhua yu, lyee nsuhueꞌ sti na ꞌin yu, loꞌ queꞌ ꞌa tiꞌ ndla na ꞌin yu.
\v 40 Cuaꞌ mjñan chaꞌ tsuꞌhue ꞌin yu taꞌa ndaꞌan um siꞌyana culo yu cuiꞌin canꞌ ꞌin sñenꞌ, una a ncua ꞌin yu.
\v 41 Xacanꞌ juin Jesús ꞌin nten canꞌ: ꞌUn lca um nten nu a ndiya quiꞌan tiꞌ, loꞌ lyeꞌ tiꞌ. ¿Ta re ti ñaꞌan ndiꞌin loꞌo um tsala xaa? Can loꞌo um ꞌin sñeꞌ um.
\v 42 Xa cuaꞌ tiyaa ti yu seꞌen ndon ñi, cuiꞌin canꞌ mxitlyu ꞌin yu loꞌ mscuin tiꞌin na ꞌin yu loꞌo juesa, una Jesús ngusun loꞌo ñi ꞌin cuiꞌin xaꞌan canꞌ loꞌ mꞌni chca ñi ꞌin yu, loꞌ mdyaa ñi cunta ꞌin yu ꞌin sti yu.
\v 43 Nchgaa nten canꞌ yuhue tiꞌ neꞌ tsala ñaꞌan tlyu chaꞌ cuiyaꞌ ꞌin Ndiose.
\s Ycuiꞌ Jesús xiyaꞌ ñaꞌan ntsuꞌhui chaꞌ caja ñi
\p Lja tiꞌ ndiꞌin yuhue tiꞌ neꞌ siꞌya chaꞌ nu mꞌni ñi, juin ñi ꞌin yu taꞌa ndaꞌan ñi:
\v 44 Tyaa um yaꞌ ton nscan tsuꞌhue um chaꞌ re, siꞌyana tsa tucua xaa Yu Quiꞌyu nu Mdoꞌo nde niꞌ Cuaan, caja nu tyaa ꞌin ñi tuyaaꞌ nten chendyu.
\v 45 Una yu taꞌa ndaꞌan ñi a nguꞌya yu chaꞌ tiyaa chaꞌ nu ycuiꞌ ñi, siꞌyana a jui chaꞌ cuiyaꞌ quiꞌya yu cunta chaꞌ canꞌ, ñi a msti tiꞌ yu cuñichaꞌ yu ꞌin ñi. ¿Ti nu lca nu ndon loo la?
\v 46 Xacanꞌ mdyisnan ycuiꞌ tyijyin yu taꞌa ndaꞌan ñi chaꞌ ti ñaꞌan yu ntsuꞌhui chaꞌ ca yu nu ndon loo la.
\v 47 Jesús nguꞌya ñi cunta chaꞌ nu ñan tiꞌ yu, canꞌ chaꞌ mꞌni ñi chaꞌ yaan sca nu lyoꞌ ti seꞌen ndon ñi,
\v 48 loꞌ juin ñi ꞌin yu taꞌa ndaꞌan ñi: Ñaꞌan nu ti nu cuan xuꞌhue ꞌin nu lyoꞌ ti re siꞌya chaꞌ ꞌñan, cuꞌni canꞌ cunta siꞌyana ꞌñan cuan xuꞌhue. Loꞌ ñaꞌan nu ti nu cuan xuꞌhue ꞌñan, siꞌi ꞌñan nanꞌ ti cuan xuꞌhue canꞌ, cuiꞌ ca nu loꞌo ꞌin nu nguaꞌan tñan ꞌñan. Siꞌyana nu nꞌni lyoꞌ ꞌin, canꞌ nu ndon loo lati lja um.
\s Chaꞌ ꞌin nu nguiaa tsoꞌ ꞌin Jesús
\p
\v 49 Xacanꞌ mdoꞌo ycuiꞌ yu Xuhua canꞌ: Ñi Bstro, cua naꞌan hua sca yu nu ndlo cuiꞌin xaꞌan ꞌin nten loꞌo chaꞌ cuiyaꞌ ꞌin um, una msiꞌyu coꞌ hua chaꞌ nu nguiꞌni yu siꞌyana a ndaꞌan yu loꞌo na.
\v 50 Xacanꞌ juin Jesús loꞌo yu: A chcui ndijin um loꞌo chaꞌ nu nguiꞌni yu, siꞌyana nu a tiꞌi tiꞌ ꞌin na, tsoꞌ ꞌin na nguiaa canꞌ.
\s Jesús ngusun loꞌo ñi ꞌin Jacobo loꞌo yu Xuhua
\p
\v 51 Xa cuaꞌ nchcui cuiiꞌ chaꞌ quiaa ñi nde niꞌ cuaan, xacanꞌ mdiꞌin tyaa ñi cusya ꞌin ñi siꞌyana tsaa ñi quichen Jerusalén.
\v 52 Xacanꞌ nguaꞌan tñan ñi ꞌin tucua snan yu nu chcua loo tsaa sca quichen lyoꞌ ti seꞌen lyiꞌya loo Samaria loꞌ cunan yu seꞌen quinu ñi canꞌ. Mdoꞌo yu nguiaa yu loꞌ mdiyaa yu quichen canꞌ,
\v 53 una nten ndiꞌin canꞌ a ncuan xuꞌhue neꞌ ꞌin ñi xa mdiyaa ñi, siꞌyana jlyo tiꞌ neꞌ tyijyin ti ñi tsaa ñi quichen Jerusalén.
\v 54 Xa naꞌan Jacobo loꞌo yu Xuhua chaꞌ re, juin yu ꞌin ñi: Ñi Xꞌnan hua, ¿ta nchca tiꞌ um jñan hua chaꞌ quiꞌya quiiꞌ tsañaꞌan mꞌni yu Elía, loꞌ cujlyo na ꞌin neꞌ?
\v 55 Mxinaꞌan ñi seꞌen ndon yu loꞌ ngusun loꞌo ñi ꞌin yu: ꞌUn a nchca quiꞌya um cunta la tsoꞌ nguiaa um,
\v 56 siꞌyana nanꞌ Yu Quiꞌyu nu Mdoꞌo nde niꞌ Cuaan, a ljyaan siꞌyana cujlyon ꞌin nten chendyu, cuiꞌ ca nu siꞌyana culo laan ꞌin neꞌ. Xacanꞌ mdoꞌo jun nguiaa jun loꞌ mdiyaa jun xca quichen lyoꞌ ti.
\s Tsalca nu mdoꞌo tiquee chcui nchaꞌan ꞌin Jesús
\p
\v 57 Tucueen nguiaa jun canꞌ mdoꞌo ycuiꞌ sca yu quiꞌyu loꞌo ñi: Ñi Xꞌnan hua, nchca tinꞌ chcui nchaꞌan ꞌin um la ñaꞌan ti nguiaa um.
\v 58 Mxcuen Jesús ꞌin yu: Sca cutaꞌ nducua tuque tyi ꞌin, cuiꞌ cuañaꞌan quiñi, cuaꞌ lca seꞌen nxcua ten ꞌin, una Yu Quiꞌyu nu Mdoꞌo nde niꞌ Cuaan, a ndyijyi seꞌen xitñanꞌ canꞌ.
\v 59 Xacanꞌ juin ñi ꞌin xca yu canꞌ: Chcui nchaꞌan ꞌñan. Mxcuen yu ꞌin ñi: Ñi Xꞌnan hua, taa um yaꞌ quia tsinꞌ ꞌin stin culo nducua la.
\v 60 Mxcuen Jesús ꞌin yu: A sꞌnan nu chuꞌhui yuhueꞌ tiꞌ cutsiꞌ ꞌin nu cuaꞌ ngujui, una nuꞌhuin tsa ycuiꞌ chaꞌ tsuꞌhue ꞌin Ndiose tsañaꞌan nu ntsuꞌhui chaꞌ culo ñi tñan ꞌin nten.
\v 61 Xacanꞌ mdoꞌo ycuiꞌ xca yu loꞌo ñi: Ñi Xꞌnan hua, loꞌon nanꞌ nchca tinꞌ chcui nchaꞌan ꞌin um, una taa um yaꞌ culo nducua la quia slanꞌ ꞌin nu ndiꞌin naꞌan ꞌñan.
\v 62 Jesús mxcuen ꞌin yu: Sca yu nu nxñi yaaꞌ yca nguita yuu loꞌ xinaꞌan nde chonꞌ, a ca tñan canꞌ cuꞌni tñan ꞌin Ndiose seꞌen ndlo ñi tñan.
\c 10
\s Xa nguaꞌan tñan Jesús ꞌin snan yla ntsuꞌhui tii yu
\p
\v 1 Chonꞌ ndeꞌen canꞌ, Ñi Xꞌnan na ngulohui ñi cha xnan yla ntsuꞌhui tii yu, loꞌ nguaꞌan tñan ñi ꞌin yu cunda tucua ti yu chcua loo yu tsaa yu scasca quichen seꞌen ntsuꞌhui chaꞌ tyijyin ñi.
\v 2 Loꞌ juin ñi ꞌin yu: Chaꞌ ñi siꞌyana quiꞌan tñan ndiꞌin ꞌin Ndiose, cuaꞌ tca quioꞌ na, una chinꞌ ti yu nguso, canꞌ chaꞌ jñan um chaꞌ tsuꞌhue ꞌin ñi nu lca Xꞌnan tñan re siꞌyana suꞌhua ñi nguso nu xoꞌ ꞌin na.
\v 3 Nanꞌ suꞌhuan ꞌin um tsaa um ñaꞌan nchca tiꞌ slyaꞌ nu nguiten lja niꞌ la.
\v 4 A cuiꞌya um cuijyin, ñi tñi loꞌ ñi quinan loꞌ a cuiꞌya um, a nchca chaꞌ tiyaꞌ um loꞌo ñi sca tucui nu chcua um tucueen.
\v 5 La ñaꞌan ti tiyaa um seꞌen nducua naꞌan ꞌin nten, ndeñaꞌan chcuiꞌ um loꞌo neꞌ culo nducua la: Ndiose taa ñi chaꞌ tsuꞌhue nu chuꞌhui niꞌ cusya ꞌin um nchgaa ꞌun nu ndiꞌin naꞌan re.
\v 6 Chaꞌ ntsuꞌhui nu nguiaa tsoꞌ ꞌin chaꞌ tsuꞌhue, cuan xuꞌhue canꞌ chaꞌ nu chcuiꞌ um, loꞌ chaꞌ a cuan xuꞌhue canꞌ ꞌin um, a quinu chaꞌ tsuꞌhue seꞌen ndiꞌin canꞌ.
\v 7 Naꞌan seꞌen cuan xuꞌhue neꞌ ꞌin um, canꞌ quinu um, cuan xuꞌhue um na nu taa neꞌ cu um loꞌo na nu coꞌo um, siꞌyana sca yu nguso ntsuꞌhui suun ꞌin yu xñi yu siyaꞌ yu. A nchca chaꞌ quinu um scasca naꞌan.
\v 8 Ñaꞌan quichen ti tiyaa um, chaꞌ cuan xuꞌhue neꞌ ꞌin um, ca xuꞌhue um na nu tyiꞌin tyaa neꞌ tloo um,
\v 9 cuꞌni chca um ꞌin nchgaa nu tiꞌi, loꞌ chcuiꞌ um loꞌo neꞌ: Cuaꞌ mdiyaan chaꞌ tsuꞌhue ꞌin um tsañaꞌan ntsuꞌhui chaꞌ culo Ndiose tñan ꞌin na.
\v 10 Chaꞌ ndeꞌen quichen sten um a cuan xuꞌhue neꞌ ꞌin um, tyiꞌan um chcui tucueen loo quichen canꞌ, loꞌ ndeñaꞌan chcuiꞌ um loꞌo neꞌ:
\v 11 Yuu ta nu msñi caꞌan quiyaꞌ hua loo quichen re scuin hua ꞌin na siꞌyana a ncuan xuꞌhue um ꞌin hua, loꞌ ca jlyo tiꞌ um siꞌyana cuaꞌ mdiyaan chaꞌ tsuꞌhue seꞌen ndiꞌin um ñaꞌan ntsuꞌhui chaꞌ culo Ndiose tñan ꞌin na.
\v 12 Chcuinꞌ loꞌo um sca chaꞌ, tsaan nu ntsuꞌhui chaꞌ cuꞌni Ndiose xñan bsya ꞌin nten chendyu, lyee lati tyijyin nten canꞌ nu tiꞌi que ñaꞌan nu tiꞌi ntsuꞌhui chaꞌ tyijyin quichen Sodoma.
\s Yuhueꞌ nu caan ꞌin quichen nu mscuan tloo ꞌin Jesús
\p
\v 13 ꞌTnan ca um, ꞌun nu ndiꞌin quichen Corazín, loꞌ ꞌtnan ca um, ꞌun nu ndiꞌin quichen Betsaida, tsala ñaꞌan chaꞌ tnu cuaꞌ mꞌnin tloo um. Chaꞌ cua na mꞌnin chaꞌ re quichen Tiro loꞌo Sidón, cuaꞌ sꞌni mxiloꞌo chonꞌ neꞌ quiꞌya nguiꞌni neꞌ, loꞌ ca chcanꞌ loo siꞌyana tiꞌi ngaꞌan ꞌin neꞌ loꞌo ñaꞌan nu nchcoꞌ neꞌ loꞌo ñaꞌan nu nꞌni neꞌ.
\v 14 Canꞌ chaꞌ tsaan nu ntsuꞌhui chaꞌ cuꞌni Ndiose xñan bsya ꞌin nten chendyu, neꞌ nu ndiꞌin quichen Corazín loꞌo Betsaida, lyee lati tyijyin canꞌ nu tiꞌi que ñaꞌan tiꞌi nu ntsuꞌhui chaꞌ tyijyin quichen Tiro loꞌo Sidón.
\v 15 Loꞌ ꞌun quichen Capernaum, —xqueꞌ tiꞌ um siꞌyana cuaꞌ jui xuꞌhue um la niꞌ cuaan, una tiyaa xaa caja nu suꞌhua ꞌin um seꞌen tyijyin um nu tiꞌi—.
\v 16 Canꞌ chaꞌ nchgaa nu ton nscan chaꞌ nu chcuiꞌ um, ñaꞌan loo chaꞌ ꞌñan nanꞌ ton nscan canꞌ, loꞌ nu xcuan tloo ꞌin um, ꞌñan nanꞌ xcuan tloo canꞌ, loꞌ nu xcuan tloo ꞌñan, ꞌin ñi nu nguaꞌan tñan ꞌñan xcuan tloo canꞌ.
\s Xa nguila snan yla ntsuꞌhui tii yu canꞌ
\p
\v 17 Xa nguila snan yla ntsuꞌhui tii yu canꞌ, ndyijyin yaꞌ tsuꞌhue ntsuꞌhui tiquee yu loꞌ nchcuiꞌ yu: Ñi Xꞌnan hua, loꞌo cuiꞌin xaꞌan ncua jaꞌan ꞌin hua siꞌya chaꞌ cuiyaꞌ ꞌin um.
\v 18 Mxcuen ñi ꞌin yu: Chaꞌ ñi ꞌin um, tiꞌ la niꞌ cuaan naꞌan mdyiꞌo tyu Laxaꞌan tsañaꞌan nchca tiꞌ quiiꞌ ꞌin tyiꞌyu.
\v 19 Ñaꞌan jan ñi, cuaꞌ mdaan chaꞌ cuiyaꞌ ꞌin um siꞌyana tca lyoꞌ suꞌhua um ꞌin cunaan la loꞌo xeꞌen, tlyu la chaꞌ cuiyaꞌ re que ꞌin taꞌa cusuun um, loꞌ a sca tiꞌi ca ꞌin um.
\v 20 Una siꞌi canꞌ chaꞌ ca tsuꞌhue chuꞌhui tiquee um, ta siꞌyana nchca jaꞌan cuiꞌin xaꞌan ꞌin um, cuiꞌ ca nu ca tsuꞌhue chuꞌhui tiquee um siꞌyana cuaꞌ nguaꞌan scua nii um la niꞌ cuaan.
\s Tsuꞌhue yuꞌhui tiquee Jesús
\p
\v 21 Xacanꞌ ndyijyin yaꞌ tsuꞌhue ntsuꞌhui tiquee Jesús siꞌya Espíritu ꞌin Ndiose, loꞌ juin ñi: Stina Ndiose, nanꞌ cuꞌnin tnun ꞌin um, ꞌun nu lca Xꞌnan niꞌ cuaan loꞌo loo chendyu re, siꞌyana msuꞌhua cutsiꞌ um chaꞌ re ꞌin nu tiyaa loꞌo nu nxqueꞌ tiꞌ ndyiꞌya la chaꞌ tiyaa, loꞌ ngulyo scua la um chaꞌ re loꞌo nu chinꞌ la chaꞌ ꞌin. ꞌUn nu lca Stin, chaꞌ ñi ꞌin um siꞌyana cuañaꞌan nchca tiꞌ um.
\v 22 Nchgaa loo chaꞌ mdyaa Stin cunta ꞌñan, nanꞌ nu lca Sñeꞌ ñi, loꞌ a tucui nu jlyo tiꞌ tucui lcan, cuiꞌ ca nu scati Stina Ndiose, cuiꞌ cuañaꞌan a tucui nu jlyo tiꞌ tucui lca Stina Ndiose, cuiꞌ ca nu scan tin, a cunta culyo scua lan chaꞌ re loꞌo nu nchca tinꞌ.
\v 23 Xacanꞌ mxinaꞌan ñi seꞌen ndon taꞌa ndaꞌan ca ñi, loꞌ ycuiꞌ ñi loꞌo yu sca cunta: Tsuꞌhue ca xuꞌhue nchgaa nu naꞌan chaꞌ nu naꞌan um cuaꞌ ñii,
\v 24 siꞌyana cunen loꞌo um sca chaꞌ, quiꞌan ꞌa yu nu mxiycuiꞌ Ndiose ꞌin cuaꞌ sꞌni cuiꞌ cuañaꞌan loꞌo nu ncua ree, ncua tiꞌ yu ñaꞌan yu chaꞌ nu naꞌan um cuaꞌ ñii, una a naꞌan yu ꞌin na, loꞌ ncua tiꞌ yu quine ꞌin yu chaꞌ nu ne ꞌin um cuaꞌ ñii, una a ngune ꞌin yu chaꞌ re.
\s Chaꞌ tsuꞌhue nu mꞌni yu Samaria
\p
\v 25 Yatoꞌo mdyiton sca yu nu mꞌni chaꞌan chaꞌ ꞌin lee, loꞌ mñichaꞌ yu ꞌin Jesús seꞌen nu suꞌhua yu quiꞌya ꞌin ñi, loꞌ juin yu: ꞌUn ñi nu lca Bstro, ¿ti ñaꞌan chaꞌ nu tca cuꞌnin siꞌyana caja chendyu nu a tsatii ꞌa ꞌñan?
\v 26 Mxcuen ñi ꞌin yu: ¿Ñaꞌan ta nchcuiꞌ lee canꞌ? ¿Ñaꞌan ta ndyiꞌya um cunta ꞌin na?
\v 27 Xacanꞌ mxcuen yu: —Loꞌo nu chcui cusya ꞌin um tyaa um ꞌin um ꞌin Ndiose Xꞌnan um, loꞌo nu chcui lca tiquee um, loꞌo nchgaa juesa ꞌin um—, loꞌo nchgaa chaꞌ tiyaa ꞌin um, a cunta —ñaꞌan ꞌtnan tiꞌ um ꞌin taꞌa nten um tsañaꞌan nꞌni um ꞌtnan ꞌin um—.
\v 28 Juin ñi ꞌin yu: Cuiꞌ ñaꞌan ycuiꞌ um, cuꞌni um cuañaꞌan loꞌ caja chendyu ꞌin um.
\v 29 Ncua tiꞌ yu suhui yu tloo yu, canꞌ chaꞌ juin yu ꞌin Jesús: ¿Tucui ca lca taꞌan?
\v 30 Xacanꞌ mxcuen Jesús ꞌin yu: Sca yu quiꞌyu mdoꞌo yu Jerusalén nguiaa yu nde quichen Jericó, tucueen nguiaa yu canꞌ mdoꞌo yu cunan nu yjui tiꞌin ꞌin yu, ngulyaa na ꞌin yu, loꞌ mxnu sti yu ꞌin ñaꞌan nchca tiꞌ sca yu ngujui.
\v 31 Yatoꞌo tucueen canꞌ nguiaa sca yu nu ntsuꞌhui cunta ꞌin laa, una xa naꞌan yu ꞌin nu su canꞌ mdijin ti yu.
\v 32 Cuiꞌ cuañaꞌan loꞌo sca yu Leví nu nda yaaꞌ chaꞌ ꞌin laa, mdijin tucueen canꞌ, xa naꞌan yu ꞌin nu su canꞌ ticuiꞌ mdijin ti yu.
\v 33 Cuiꞌ cuañaꞌan mdijin sca yu Samaria, una xa naꞌan yu ꞌin nu su canꞌ cuiꞌ xaa mñaꞌan ꞌtnan tiꞌ yu ꞌin.
\v 34 Mdiyaa yu seꞌen su, msuꞌhua yu ceite loꞌo vino seꞌen tiꞌi canꞌ, loꞌ nguxen yu teꞌ ꞌin na, xacanꞌ mscuen yu ꞌin chonꞌ burru ꞌin yu, loꞌ ya xnu yu ꞌin sca naꞌan seꞌen ntsuꞌhui chaꞌ cuꞌni cunta neꞌ ꞌin.
\v 35 Xca tsaan canꞌ xa cuaꞌ tyiꞌo yu tsaa yu, mxnu yu tucua tñi plata ꞌin nu ndiꞌin naꞌan canꞌ, loꞌ juin yu ꞌin: Cuꞌni um chaꞌ tsuꞌhue cuꞌni cunta um ꞌin yu tiꞌi re, loꞌ chaꞌ nducua la tñi culyijyi um siꞌya yu, nanꞌ xuꞌhuan lyiyanꞌ ꞌin na xa nde xitucuin.
\v 36 ¿Ti ñaꞌan ta taꞌa snan yu re lca taꞌa yu nu mꞌni lyiꞌo yu cunan ꞌin canꞌ?
\v 37 Mxcuen yu ꞌin ñi: Cuiꞌ yu nu mꞌni chaꞌ tsuꞌhue loꞌo canꞌ. Xacanꞌ juin Jesús ꞌin yu: Yaa um, loꞌ ticuiꞌ cuañaꞌan cuꞌni um.
\s Yaa Jesús seꞌen ndiꞌin Marta loꞌo María
\p
\v 38 Yatoꞌo mdoꞌo Jesús nguiaa ñi, mdiyaa ñi sca quichen lyoꞌ ti, canꞌ ndiꞌin sca neꞌ cunaꞌan naan Marta nu ncuan xuꞌhue ꞌin ñi.
\v 39 Ndiꞌin sca taꞌa ngula neꞌ naan María, canꞌ nu yten tucua cuiꞌ ti seꞌen nducua Jesús siꞌyana ton nscan chaꞌ nu nchcuiꞌ ñi.
\v 40 Una Marta canꞌ lyee la ntsuꞌhui yuhue tiꞌ tñan nu ndiꞌin tuquiiꞌ, xacanꞌ yaa seꞌen nducua ñi loꞌ juin ꞌin ñi: Ñi Xꞌnan hua, ¿ta a nduhue tiꞌ um tsala ñaꞌan tñan mxnu taꞌan ꞌñan? Chcuiꞌ um loꞌo siꞌyana ta yaaꞌ ꞌñan.
\v 41 Una mxcuen Jesús ꞌin: Marta, Marta, ta lyee ꞌa nsuꞌhua yuhue tiꞌ tiquee siꞌya scasca tñan nguiꞌni.
\v 42 Ntsuꞌhui sca chaꞌ nu ndon loo lati, canꞌ nu ngulohui María, loꞌ a tucui nu tca lyaa chaꞌ canꞌ ꞌin.
\c 11
\s Nguloꞌo Jesús ñaꞌan chcuiꞌ lyiꞌo jun ꞌin Ndiose 

\p
\v 1 Yatoꞌo sca tsaan Jesús nchcuiꞌ lyiꞌo ñi ꞌin Ndiose sca seꞌen, xa mdyi ycuiꞌ ñi juin sca yu taꞌa ndaꞌan ñi loꞌo ñi: Ñi Xꞌnan hua, culoꞌo um ꞌin hua ñaꞌan ntsuꞌhui chaꞌ chcuiꞌ lyiꞌo hua ꞌin Ndiose, tsañaꞌan nguloꞌo yu Xuhua ꞌin taꞌa mdaꞌan yu.
\v 2 Xacanꞌ juin ñi ꞌin nchgaa yu canꞌ: Xa chcuiꞌ lyiꞌo um ꞌin Ndiose ndeñaꞌan chcuiꞌ um: Ndiose Sti hua, ꞌun nu nducua niꞌ cuaan, scati um ntsuꞌhui chaꞌ cuꞌni tnu hua ꞌin um. Nchca tiꞌ hua siꞌyana tsatlyu culo um tñan ꞌin hua. Cuꞌni um ñaꞌan nu nchca tiꞌ um loo chendyu re tsañaꞌan nguiꞌni um la niꞌ cuaan.
\v 3 A cunta taa um na nu cunajoꞌo ꞌin hua cunda scaa tsaan.
\v 4 Cuꞌni um chaꞌ tlyu tiꞌ ꞌin hua loꞌo quiꞌya nguiꞌni hua, siꞌyana cuañaꞌan nguiꞌni hua chaꞌ tlyu tiꞌ ꞌin nchgaa nu nguiꞌni chaꞌ ngunanꞌ loꞌo hua. A taa um yaꞌ sten chaꞌ ngunanꞌ tiquee hua, cuiꞌ ca nu culo tsoꞌ um ꞌin hua siiꞌ chaꞌ ngunanꞌ canꞌ.
\v 5 Loꞌ tiꞌ juin la ñi ꞌin yu: Chaꞌ ndiꞌin sca taꞌa tsuꞌhue um, loꞌ tiyaa um seꞌen ndiꞌin canꞌ tluꞌhue tla, loꞌ chcuiꞌ um loꞌo canꞌ: Jñan sca chaꞌ tsuꞌhue ꞌin, taa snan ti jaslya ꞌñan,
\v 6 siꞌyana sca yu taꞌa tsuꞌhue ntsuꞌhuin tca mdiyaan yu seꞌen ndiꞌin, loꞌ a sca na ndiꞌin ꞌñan taan cu yu.
\v 7 Chaꞌ tiꞌ la ñaꞌan xcuen yu ꞌin um: Ñi chaꞌ ljyan taa chaꞌ nsinꞌ tiꞌ ꞌñan, ta a jlyo tiꞌ cuaꞌ nchcun tunaꞌan ꞌñan, cuaꞌ ljanꞌ loꞌo nu xuhue ti ꞌñan, a tca tyitucuin taan na nu nchca tiꞌ.
\v 8 Una cunen loꞌo um sca chaꞌ, siꞌi siꞌyana lca canꞌ taꞌa tsuꞌhue yu ta canꞌ chaꞌ tyitucui yu loꞌ taa yu nchgaa na nu njñan canꞌ, cuiꞌ ca nu siꞌyana ndaja ti yu ndon taa canꞌ chaꞌ nsinꞌ tiꞌ ꞌin yu.
\v 9 Canꞌ chaꞌ chcuinꞌ loꞌo um sca chaꞌ: Jñan um na nu nchca tiꞌ um loꞌ caja na ꞌin um, quia nan um chaꞌ canꞌ loꞌ quija lyoo na ꞌin um, chcuiꞌ um loꞌ caja nu sla tunaꞌan ꞌin um.
\v 10 Siꞌyana nchgaa nu njñan sca chaꞌ, a sꞌni ndyijyi na ꞌin, loꞌ nu ndiya nan chaꞌ canꞌ, a sꞌni quija lyoo na ꞌin, loꞌ nu nchcuiꞌ, a sꞌni ndyijyi nu sla tunaꞌan ꞌin.
\v 11 Tsañaꞌan nguiaa chaꞌ ꞌin um loꞌo sñeꞌ um, ¿ta xtyi tiꞌ um taa um sca quee ꞌin canꞌ chaꞌ na jñan sca jaslya ꞌin um? Uta chaꞌ jñan canꞌ sca cula ꞌin um, a xtyi tiꞌ um taa um sca cunaan ꞌin canꞌ.
\v 12 Uta chaꞌ jñan canꞌ sca scuhue cutu ꞌin um, a xtyi tiꞌ um taa um sca xeꞌen ꞌin canꞌ.
\v 13 Chaꞌ ꞌun lca um sca nten nu nducunꞌ, una jlyo tiꞌ um ndaa um na nu tsuꞌhue ꞌin sñeꞌ um, ñaꞌan la ca Ndiose, ñi nu lca Sti um nu nducua niꞌ cuaan, ntsuꞌhui chaꞌ taa ñi Espíritu nu Luhui ꞌin ñi ꞌin nchgaa nu njñan ꞌin ñi.
\s Ycuiꞌ Jesús chaꞌ ꞌin cuiꞌin xaꞌan
\p
\v 14 Yatoꞌo ngulo Jesús sca cuiꞌin xaꞌan nu cuaꞌ mxnu cuꞌun ꞌin sca yu quiꞌyu, loꞌ xa mdyiꞌo cuiꞌin xaꞌan canꞌ ꞌin yu mdyisnan ycuiꞌ yu, loꞌ ndyijyin yaꞌ yuhue tiꞌ nten canꞌ.
\v 15 Una scasca neꞌ mdyisnan nchcuiꞌ neꞌ: Siꞌya chaꞌ cuiyaꞌ ꞌin Beelzebú, xꞌnan cuiꞌin xaꞌan, canꞌ chaꞌ nchca ꞌin yu re ndlo yu cuiꞌin xaꞌan nu ntsuꞌhui ꞌin nten.
\v 16 Ntsuꞌhui nu mjñan ꞌin ñi siꞌyana cuꞌni ñi sca chaꞌ nu tnu loꞌo chaꞌ cuiyaꞌ ꞌin Ndiose, seꞌen nu caja ñaꞌan suꞌhua neꞌ quiꞌya ꞌin ñi.
\v 17 Una nguꞌya ñi cunta ñaꞌan chaꞌ nu ndaꞌan tiquee neꞌ, loꞌ juin ñi: Sca quichen tnu tsatii chaꞌ ꞌin na chaꞌ tyisnan xuun na loꞌo ticuiꞌ taꞌa na, cuiꞌ cuañaꞌan sca naꞌan chaꞌ tyisnan xuun neꞌ loꞌo ticuiꞌ taꞌa neꞌ, tsatoꞌo tyiꞌo tsoꞌ taꞌa neꞌ.
\v 18 A cunta Laxaꞌan chaꞌ tyisnan xuun canꞌ loꞌo ticuiꞌ taꞌa, ¿ta tca tsa quiñan canꞌ culo tñan xacanꞌ? Loꞌ ꞌun nchcuiꞌ um siꞌyana loꞌo chaꞌ cuiyaꞌ ꞌin Beelzebú ndlon cuiꞌin xaꞌan nu ntsuꞌhui ꞌin nten.
\v 19 Chaꞌ nanꞌ ndlon cuiꞌin xaꞌan loꞌo chaꞌ cuiyaꞌ ꞌin Beelzebú, una tsoꞌ ꞌin taꞌa ndaꞌan um, ¿la mdoꞌo chaꞌ cuiyaꞌ nu ndlo canꞌ cuiꞌin xaꞌan chaꞌ na canꞌ? Canꞌ nu ntsuꞌhui chaꞌ cuꞌni cuiyaꞌ chaꞌ ꞌin um.
\v 20 Una chaꞌ nanꞌ ndlon cuiꞌin xaꞌan loꞌo chaꞌ cuiyaꞌ ꞌin Ndiose, ca cuiyaꞌ tiꞌ um siꞌyana Ndiose cuaꞌ ndlo ñi tñan lja um.
\v 21 Sca yu quiꞌyu nu ngula tiꞌ, chaꞌ tyon tiyaa yu loꞌo na nu culaa ꞌin yu, a sca ca seꞌen ndiꞌin yu.
\v 22 Una chaꞌ tiyaa sca nu lyee la ngula tiꞌ, cuꞌni canꞌ canan ꞌin yu loꞌ lyaa canꞌ na nu nducua tloo yu culaa ꞌin yu, loꞌ cutsa canꞌ nchgaa na nu ndiꞌin ꞌin yu.
\v 23 Nu a nguiaa tsoꞌ ꞌñan, canꞌ nu lca taꞌa cusuun, loꞌ nu a nda yaaꞌ quioꞌ tñan ꞌñan, nde njlyo canꞌ ꞌin na.
\s Xiyaꞌ nxitucui cuiꞌin xaꞌan seꞌen mdoꞌo
\p
\v 24 Xa ndyiꞌo cuiꞌin xaꞌan nu ntsuꞌhui ꞌin nten, ndaꞌan nan canꞌ seꞌen tyiꞌin sca seꞌen ngutyi. Loꞌ siꞌyana a ndyijyi seꞌen tyiꞌin ndeñaꞌan ñan tiꞌ: Xitucuin nde naꞌan seꞌen mdoꞌon.
\v 25 Xa quila canꞌ seꞌen mdiꞌin, quija lyoo ꞌin na siꞌyana cuaꞌ ncua na, cuaꞌ lca ncua tsuꞌhue na.
\v 26 Xacanꞌ tsa nan cha cati cuiꞌin xaꞌan nu nducunꞌ lati que ñaꞌan ycuiꞌ, loꞌ tsatlyu sten niꞌ cusya ꞌin neꞌ, loꞌ nde lyee lati cuꞌni lyiꞌo cuiꞌin xaꞌan canꞌ ꞌin neꞌ que ñaꞌan tiꞌ culoo.
\s Chaꞌ ꞌin nu ntsuꞌhui xuꞌhue tloo Ndiose
\p
\v 27 Lja nchcuiꞌ Jesús chaꞌ re, mdoꞌo ycuiꞌ cueen sca neꞌ cunaꞌan lja nten quiꞌan canꞌ: Tsuꞌhue ca xuꞌhue neꞌ cunaꞌan nu mꞌni chaꞌ ncua cuneꞌ um, nu mdaa ytiꞌ um.
\v 28 Xacanꞌ mxcuen ñi ꞌin neꞌ: Tsuꞌhue la xuꞌhue nu ndon nscan chaꞌ ꞌin Ndiose loꞌ nducua tñan ꞌin na.
\s Nten nducunꞌ lca nu njñan chaꞌ nu tnu
\p
\v 29 Tsa nducua quiꞌan la nten ndiyoꞌ tiꞌin neꞌ seꞌen ndon ñi, loꞌ ndeñaꞌan ycuiꞌ ñi: Ta nten nu ndiꞌin loo chendyu re nducunꞌ neꞌ, njñan neꞌ scasca chaꞌ nu tnu, una a ntsuꞌhui chaꞌ ñaꞌan neꞌ chaꞌ nu cuañaꞌan, tsaloo ti chaꞌ nu mdaꞌan ycuiꞌ Jonás ntsuꞌhui chaꞌ ñaꞌan neꞌ.
\v 30 Tsañaꞌan msuꞌhua tiyaa Ndiose ꞌin quichen Nínive loꞌo chaꞌ nu ycuiꞌ Jonás, cuiꞌ cuañaꞌan nsuꞌhua tiyaa ñi ꞌin ta nten nu ndiꞌin cuaꞌ ñii siꞌya chaꞌ ꞌin Yu Quiꞌyu nu Mdoꞌo nde niꞌ Cuaan.
\v 31 Neꞌ cunaꞌan ꞌin ree nu mdoꞌo seꞌen lca Arabia, tyiquiꞌo neꞌ tiyaa xaa tsatlyu loꞌo ta nten ndiꞌin re xa ca xñan bsya ꞌin neꞌ, culo quiꞌya neꞌ ꞌin nten re siꞌyana tijyoꞌ mdoꞌo neꞌ seꞌen nu quine ꞌin neꞌ chaꞌ tiyaa ꞌin yu Salomón, una lja na re ndon sca un ndon loo lati que ꞌin Salomón.
\v 32 Ticuiꞌ cuañaꞌan loꞌo neꞌ Nínive, ntsuꞌhui chaꞌ tyiquiꞌo neꞌ tsatlyu loꞌo ta nten ndiꞌin re xa ca xñan bsya ꞌin neꞌ, culo quiꞌya neꞌ ꞌin nten re siꞌyana loꞌo chaꞌ nu ycuiꞌ Jonás mxiloꞌo chonꞌ neꞌ quiꞌya mꞌni neꞌ, una lja na re ndon sca nu ndon loo lati que ꞌin Jonás.
\s Ca na sca xaa ꞌin nten chendyu
\p
\v 33 A tucui nu suꞌhua cutsiꞌ sca quiiꞌ uta suꞌhua ꞌin na niꞌ cuiyaꞌ mblya, cuiꞌ ca nu tyiꞌin tyaa ꞌin na cuaan siꞌyana tuꞌhui na xaa ꞌin nu sten ñaꞌan canꞌ.
\v 34 Quiloo um ndaa na xaa ꞌin um, loꞌ chaꞌ tsuꞌhue xaa quiloo um tiꞌ ñaꞌaan um mtsaꞌan yuꞌhui um loꞌo xaa canꞌ, una chaꞌ a tsuꞌhue xaa quiloo um, cuiꞌ cuañaꞌan tla yta chaꞌ tiyaa ꞌin um.
\v 35 Xñi um cunta siꞌyana a chca xaa cua ꞌin um tla yta.
\v 36 Chaꞌ tiꞌ ñaꞌaan um mtsaꞌan yuꞌhui um loꞌo xaa, loꞌ a la ꞌa tiꞌ tla yta loo chendyu ꞌin um, lca um chacuiꞌ xaa tsañaꞌan nchca tiꞌ sca quiiꞌ nu tsuꞌhue ñaꞌan xaa ꞌin.
\s Tla chaꞌ ycuiꞌ Jesús loꞌo neꞌ fariseo loꞌo neꞌ escriba
\p
\v 37 Xa mdyi ycuiꞌ Jesús chaꞌ canꞌ, sca yu fariseo mjñan yu chaꞌ tsuꞌhue chaꞌ tsa ycu tlya ñi loꞌo yu, loꞌ ñaꞌaan yten ñi ñaꞌan canꞌ yten tucua ñi tuꞌhua msa.
\v 38 Una yuhue ꞌa tiꞌ yu fariseo siꞌyana a culo nducua ngunanꞌ ñi.
\v 39 Una juin Ñi Xꞌnan na ꞌin yu: ꞌUn neꞌ fariseo, tsa nde chonꞌ ti vaso loꞌo quiꞌnan njyiꞌan um, una nde niꞌ cusya ꞌin um mtsaꞌan yuꞌhui chaꞌ jñan tiꞌ loꞌo chaꞌ nducunꞌ.
\v 40 ꞌUn neꞌ lyeꞌ tiꞌ, ¿ta siꞌi nu mtñan nde chonꞌ vaso canꞌ lca nu mtñan nde niꞌ na?
\v 41 Chaꞌ cua na tca taa um sca lcuan nu tyiꞌo niꞌ cusya ꞌin um, nchgaa chaꞌ luhui ꞌin um xacanꞌ.
\v 42 ꞌTnan ca um, ꞌun neꞌ fariseo, siꞌyana hasta loꞌo scasca na quixinꞌ ndaa um tsachinꞌ ti ꞌin Ndiose, loꞌo menta nu xityiꞌi, loꞌo ruda, una a nsuꞌhua loo um chaꞌ nu ñi ꞌin Ndiose loꞌo chaꞌ tsuꞌhue ꞌin ñi. Cuꞌni um nchgaa chaꞌ re, una a jlya tiꞌ um chaꞌ nu ndon loo lati nu ngaꞌan chaꞌ cuꞌni um.
\v 43 ꞌTnan ca ꞌun neꞌ fariseo, siꞌyana seꞌen nꞌni tnu na ꞌin Ndiose lyee lca tiquee um chcua um loo yca xlya seꞌen nchcua nten nu ndon loo, loꞌ tsuꞌhue ntsuꞌhui tiquee um xa ndyijyi nu nchcuiꞌ chaꞌ ꞌin um loꞌo suun ñaꞌan seꞌen nchca quiyaꞌ.
\v 44 ꞌTnan ca ꞌun neꞌ fariseo loꞌo neꞌ escriba, ꞌun nu a ñi ndiꞌin chaꞌ ꞌin, nguiaa chaꞌ ꞌin um tsañaꞌan nchca tiꞌ sca cuaa nu a chcanꞌ su, loꞌ nchgaa nten nu ndijin chonꞌ canꞌ a jlyo tiꞌ neꞌ la ndloꞌ suꞌhua neꞌ.
\v 45 Xacanꞌ mdoꞌo xcuen sca yu nu nguiꞌni chaꞌan chaꞌ ꞌin lee, loꞌ juin yu: ꞌUn ñi nu lca Bstro, chaꞌ nu nchcuiꞌ um cua loꞌo ꞌin hua mꞌni loꞌo na.
\v 46 Mxcuen ñi ꞌin yu: Cuiꞌ cuañaꞌan ꞌun nu nguiꞌni chaꞌan chaꞌ ꞌin lee, ꞌtnan ca um, siꞌyana nxi ꞌya um yuꞌhua tiꞌin ꞌin nten nu a nchca cuiꞌya neꞌ, una chaꞌ nu ꞌin um, ñi sca loyaaꞌ ti um loꞌ a nguiꞌni caꞌan ꞌin na.
\v 47 ꞌTnan ca ꞌun nu nguiꞌni chuꞌhue cuaa seꞌen mtsiꞌ yu nu mxiycuiꞌ Ndiose ꞌin cuaꞌ sꞌni, yu nu ngujui yaaꞌ nten cula ꞌin um.
\v 48 Nchca chcanꞌ ñaꞌan siꞌyana sca chaꞌ ti ꞌin um loꞌo nten cula ꞌin um, siꞌyana canꞌ nu yjui ꞌin yu, loꞌ ꞌun nguiꞌni chuꞌhue um seꞌen mtsiꞌ yu.
\v 49 Canꞌ chaꞌ juin Ndiose loꞌo chaꞌ tiyaa ꞌin ñi: Nde caꞌan tñan ꞌin nu xiycuinꞌ ꞌin, a cunta loꞌo nu chcuiꞌ chaꞌ tsuꞌhue ꞌñan loꞌo nten, ntsuꞌhui canꞌ caja nu cujui ꞌin loꞌ ntsuꞌhui nu xitijin neꞌ ꞌin nu tiꞌi,
\v 50 canꞌ chaꞌ ta nten ndiꞌin re ntsuꞌhui chaꞌ tyaa neꞌ cunta ꞌñan siꞌya tne nu nguilo ꞌin nchgaa yu nu mxiycuinꞌ ꞌin cuaꞌ sꞌni tiꞌ xa nu mdyisnan suun chendyu re,
\v 51 tiꞌ tne nu mslo neꞌ ꞌin Abel loꞌ mꞌni tyii neꞌ chaꞌ re loꞌo Zacaría, yu nu yjui neꞌ ꞌin tluꞌhue la lyiyaꞌ seꞌen ndiquin tucua ꞌni loꞌo tulaa canꞌ. Cunen loꞌo um sca chaꞌ siꞌyana ta nten re ntsuꞌhui chaꞌ tyaa neꞌ cunta siꞌya chaꞌ canꞌ.
\v 52 ꞌTnan ca ꞌun nu nguiꞌni chaꞌan chaꞌ ꞌin lee, siꞌyana nducui ndijin um seꞌen nu quiꞌya neꞌ cunta chaꞌ ꞌin Ndiose, ñi ycuiꞌ um loꞌ a nguiten um, loꞌ a ndaa um yaꞌ sten xca tucui.
\v 53 Xa mdyi ycuiꞌ ñi chaꞌ re, neꞌ escriba loꞌo neꞌ fariseo ycuen tiqueꞌ neꞌ loꞌ mdyisnan mñichaꞌ neꞌ ꞌin ñi scasca chaꞌ nu tucui,
\v 54 ñaꞌan ca siꞌyana suꞌhua neꞌ quiꞌya ꞌin ñi loꞌo chaꞌ nu chcuiꞌ ñi.
\c 12
\s Chaꞌ cuiñi ꞌin neꞌ fariseo 

\p
\v 1 Lja xacanꞌ nguioꞌ tiꞌin tyun mii nten seꞌen nguilyu Jesús, nu hasta loꞌo nsta suꞌhua taꞌa neꞌ, loꞌ culo nducua la mdyisnan ycuiꞌ ñi loꞌo yu taꞌa ndaꞌan ñi: Xñi um cunta ꞌin um loꞌo chaꞌ nu nchcuiꞌ neꞌ fariseo, siꞌyana a ñi ndiꞌin chaꞌ ꞌin neꞌ.
\v 2 A sca na nu nchca cunan ti, ta a chcanꞌ loo na, uta sca chaꞌ nu nchca cutsiꞌ, ta a tyiꞌo scua la na.
\v 3 Canꞌ chaꞌ nchgaa chaꞌ nu ycuiꞌ um seꞌen tla yta, a sꞌni caja nu culyo scua la ꞌin na tiyaa xaa, cuiꞌ cuañaꞌan loꞌo chaꞌ nu ycuiꞌ cunan ti um seꞌen ntsuꞌhui nchcun um, a sꞌni tyiꞌo yne chaꞌ canꞌ lja nten. ꞌIn Ndiose ntsu ꞌhui chaꞌ cutsen na
\v 4 Cunen loꞌo um sca chaꞌ, ꞌun nu lca taꞌa tsuꞌhuen: A cutsen um ꞌin nten ta siꞌyana cujui neꞌ ꞌin um una a tca cuꞌni neꞌ tiꞌi loꞌo cusya ꞌin um.
\v 5 Una quitsanꞌ ꞌin um tucui ca ꞌin ntsuꞌhui chaꞌ cutsen um: Cutsen um ꞌin ñi nu tca cujui ꞌin um loꞌ suꞌhua cusya ꞌin um loo quiiꞌ, nu chaꞌ ñi cunen loꞌo um, canꞌ ñi nu ntsuꞌhui chaꞌ cutsen um ꞌin.
\v 6 ¿Ta siꞌi loꞌo tucua tñi suhue ti nxiꞌi neꞌ tsa caꞌyu quiñi? Siyaꞌ cuañaꞌan, cunda scaa ꞌin ntsuꞌhui Ndiose cunta ꞌin ꞌin.
\v 7 Hasta loꞌo quichanꞌ que um, cuaꞌ lca ncua na ꞌin ñi. Canꞌ chaꞌ a suꞌhua um chaꞌ tiquee um, siꞌyana ꞌun lyee la ntsuꞌhui lyoo um que ꞌin quiꞌan la quiñi.
\s Chaꞌ ꞌin nu a nxijyiꞌo tiꞌ loꞌo Jesús
\p
\v 8 Cunen loꞌo um sca chaꞌ, nchgaa nu a nxijyiꞌo tiꞌ chcuiꞌ siꞌyana tsoꞌ ꞌñan nguiaa, cuiꞌ cuañaꞌan nanꞌ, Yu Quiꞌyu nu Mdoꞌo nde niꞌ Cuaan, a xijyiꞌo tinꞌ loꞌo canꞌ tloo angujle ꞌin Ndiose.
\v 9 Una nu nchcuiꞌ siꞌyana a ndyuꞌhui lyoo ꞌñan, cuiꞌ cuañaꞌan tloo angujle ꞌin Ndiose caja nu xcuan tloo ꞌin canꞌ.
\v 10 Nchgaa nu chcuiꞌ chaꞌ tiꞌi ꞌin Yu Quiꞌyu nu Mdoꞌo nde niꞌ Cuaan, tiꞌ ntsuꞌhui chaꞌ tlyu tiꞌ ꞌin canꞌ, una nu chcuiꞌ caꞌan ꞌin Espíritu nu Luhui ꞌin Ndiose, a chuꞌhui ꞌa chaꞌ tlyu tiꞌ ꞌin canꞌ.
\v 11 Xa tsa loꞌo neꞌ ꞌin um tloo nu cuꞌni cuiyaꞌ chaꞌ ꞌin um seꞌen nguiꞌni tnu neꞌ judio ꞌin Ndiose, uta tloo bsya, ta tloo bsya tnu, a suꞌhua um chaꞌ tiquee um ñaꞌan chcuiꞌ um uta ñaꞌan xcuen um ꞌin neꞌ,
\v 12 siꞌyana ticuiꞌ xaa canꞌ taa Espíritu nu Luhui ꞌin Ndiose chaꞌ nu chcuiꞌ um.
\s Chaꞌ ꞌin yu cuilyiyaꞌ nu tiji nan
\p
\v 13 Xacanꞌ mdoꞌo ycuiꞌ sca nu ntsuꞌhui lja nten quiꞌan canꞌ: ꞌUn ñi nu lca Bstro, chcuiꞌ um loꞌo yu taꞌan siꞌyana taa yu tsa tluꞌhue tñan nu nguinu ꞌin yu ꞌñan.
\v 14 Mxcuen ñi ꞌin yu: Ñaꞌan jan ñi, a tucui nu ngulo ton ꞌñan siꞌyana can bse loꞌ cutsan yuu ꞌin um.
\v 15 Mdyisnan ycuiꞌ ñi loꞌo nten canꞌ: Xñi um cunta siꞌyana a sten scasca chaꞌ xqueꞌ niꞌ cusya ꞌin um, siꞌyana chendyu ꞌin nten a ljyaan na tsoꞌ ꞌin chaꞌ cuilyiyaꞌ.
\v 16 A cunta mdiꞌin tyaa ñi sca chaꞌ loꞌ juin ñi: Ndiꞌin sca yu cuilyiyaꞌ, loꞌ tsuꞌhue ꞌa ncua tñan na nu yta yu.
\v 17 Ñan tiꞌ yu xacanꞌ: ¿Ñaꞌan ta ca ñii, loꞌ a nducua seꞌen tlyu la quioꞌ yuꞌhui na nu ntsuꞌhui chaꞌ xonꞌ?
\v 18 Loꞌ juin yu: Ndeñaꞌan cuꞌnin, xcan nchgaa naꞌan suhue ti re loꞌ cuꞌnin chaꞌ tsaaꞌ nu tnu la, canꞌ xuꞌhua seꞌen nchgaa na ꞌñan loꞌo na nu ntsuꞌhui chaꞌ xonꞌ.
\v 19 Ndeñaꞌan ñan tinꞌ: Tsala ñaꞌan quiꞌan chaꞌ cuilyiyaꞌ nu cuaꞌ ndiꞌin ꞌñan, ta loo na ꞌñan tyun yjan, canꞌ chaꞌ cuaꞌ ñii xitñanꞌ, cun loꞌ coꞌon, cuañaꞌan ca tsuꞌhue chuꞌhui tiqueen.
\v 20 Una Ndiose juin ꞌin yu: ¿Ta tiji ꞌa nan? Tla re ñii caan nu chcuan cunta cusya ꞌin, ¿loꞌ ti nu ta quinu loꞌo nchgaa na nu cuaꞌ mxuꞌhua seꞌen?
\v 21 Cuañaꞌan ndiyatoꞌo loꞌo nu nsoꞌ tiꞌin chaꞌ cuilyiyaꞌ loo chendyu re, una tiꞌi ñaꞌan ꞌin canꞌ loꞌo tsoꞌ nu ꞌin Ndiose.
\s A suꞌhua na chaꞌ nduhue tiꞌ tiquee na
\p
\v 22 Xacanꞌ juin ñi ꞌin yu taꞌa ndaꞌan ñi: Canꞌ chaꞌ nchcuinꞌ loꞌo um chaꞌ re: A suꞌhua um chaꞌ nduhue tiꞌ tiquee um loꞌo na nu cunajoꞌo ꞌin um, loꞌ ñi loꞌo steꞌ um.
\v 23 Siꞌyana ntsuꞌhui lyoo la chendyu ꞌin um que ꞌin chaꞌ nchcu, cuiꞌ cuañaꞌan ntsuꞌhui lyoo la um que ꞌin steꞌ um.
\v 24 Xñi um cunta ñaꞌan ndiꞌin chaꞌ ꞌin sca quiñi, a ntya ꞌin jyaan, a sca na nxoꞌ ꞌin, loꞌ a la ndyiꞌin seꞌen na ꞌin ꞌin, una Ndiose nxicu ꞌin ꞌin. ¿Ta siꞌi lyee la ntsuꞌhui lyoo um que ꞌin quiñi?
\v 25 Siyaꞌ lyee la nsuꞌhua um chaꞌ nduhue tiꞌ tiquee um, ¿ta tca ta yaaꞌ chaꞌ canꞌ ꞌin um culo um xca lii scun um?
\v 26 Chaꞌ a nchca ꞌin um cuꞌni um nducuii chaꞌ nu suhue la re, ¿ñi chaꞌ ntsuꞌhui yuhue tiꞌ um nchgaa la ñaꞌan chaꞌ?
\v 27 Xñi um cunta sca yca quee nducua niꞌ quixinꞌ, a nꞌni na tñan, a la nxcuan steꞌ na, una cunen loꞌo um sca chaꞌ, tsala ñaꞌan cuilyiyaꞌ ncua yu ree Salomón, una a ycoꞌ yu teꞌ tsuꞌhue ñaꞌan tsañaꞌan quee cua.
\v 28 Chaꞌ cuañaꞌan nxicoꞌ Ndiose ꞌin quixinꞌ cua, cuaꞌ ñii tsuꞌhue ñaꞌan na, una quiaa cuaꞌ nguinanꞌ na loꞌ tsaa na loo quiiꞌ, ¿ñaꞌan la ca ꞌun, chaꞌ cua na tca tsa quiꞌan tiꞌ um?
\v 29 Canꞌ chaꞌ ꞌun a nchca chaꞌ chuꞌhui yuhue tiꞌ um siꞌya na nu cunajoꞌo ꞌin um, loꞌ ñi a tyiꞌan luꞌun tiꞌ um siꞌya chaꞌ canꞌ.
\v 30 Siꞌyana chonꞌ nchgaa chaꞌ re nchcua quiloo nten chendyu, una ñi nu lca Sti um cuaꞌ jlyo tiꞌ ñi nchgaa chaꞌ nu ꞌni ꞌin um.
\v 31 Cuiꞌ ca nu quia nan um ꞌin Ndiose loꞌ tucua um tñan chaꞌ nu nchcuiꞌ ñi, loꞌ cuiꞌ ñi suꞌhua yaaꞌ ñi ꞌin um loꞌo nchgaa chaꞌ re.
\s Xoꞌ tiꞌin na chaꞌ cuilyiyaꞌ la niꞌ cuaan
\p
\v 32 ꞌUn nu lca slyaꞌ ꞌñan, siyaꞌ chinꞌ ti um, una a cutsen um siꞌyana Ndiose loꞌo nu chcui lca tiquee ñi cuaꞌ mdaa ñi chaꞌ cuiyaꞌ quiꞌni caꞌan ꞌin um seꞌen ndlo ñi tñan.
\v 33 Canꞌ chaꞌ cujuiꞌ um na nu ndiꞌin ꞌin um, loꞌ ta yaaꞌ um ꞌin nu tiꞌi ñaꞌan chendyu ꞌin, cuañaꞌan xoꞌ tiꞌin um chaꞌ cuilyiyaꞌ nu a ntsuꞌhui ꞌa chaꞌ tyii, loꞌ tyiꞌin na ꞌin um tsala xaa la niꞌ cuaan, seꞌen nu a ntsuꞌhui chaꞌ sten yu cunan, loꞌ ñi a tca sta ꞌni ꞌin na.
\v 34 Siꞌyana seꞌen ndiꞌin chaꞌ cuilyiyaꞌ ꞌin um, canꞌ nchca cusya ꞌin um.
\s Chaꞌ ꞌin nguso nu ndon tiyaa nchgaa xaa
\p
\v 35 Tyon tiyaa um, scanꞌ um siiꞌ um loꞌ yaaꞌ um chcua sca quiiꞌ ndiquin,
\v 36 loꞌ cuꞌni chaꞌan um ñaꞌan chaꞌ ꞌin nguso nu ndon tiyaa chaꞌ ñi xaa quila xꞌnan nu nguiaa seꞌen ndyija cuilyiꞌo neꞌ, siꞌyana ñaꞌaan quila canꞌ cunꞌ tunaꞌan, loꞌ sla yu nguso canꞌ ꞌin na.
\v 37 Tsuꞌhue ca xuꞌhue nchgaa yu nguso nu ndon tiyaa xa quila xꞌnan. Nu chaꞌ ñi cunen loꞌo um, xꞌnan yu nguso canꞌ scanꞌ tsuꞌhue siiꞌ, cuꞌni chaꞌ chcua yu nguso canꞌ tuꞌhua msa, loꞌ tyisnan suꞌhua na cu yu.
\v 38 Siyaꞌ quila canꞌ tluꞌhue tla uta nde cuaꞌ ljyaan xaa, loꞌ chaꞌ tiꞌ quija lyoo yu ndon tiyaa yu, tsuꞌhue ca xuꞌhue yu nguso canꞌ.
\v 39 Una ca cuiyaꞌ tiꞌ um chaꞌ re: Chaꞌ cua na ca jlyo tiꞌ neꞌ ñi braa caan yu cunan, cuaꞌ lca ndon tiyaa neꞌ, loꞌ a taa neꞌ yaꞌ sten yu seꞌen ndiꞌin neꞌ.
\v 40 Cuiꞌ cuañaꞌan ꞌun, tyiꞌin tiyaa um, siꞌyana Yu Quiꞌyu nu Mdoꞌo nde niꞌ Cuaan quiaan ñi lja nu a sca chaꞌ ntsuꞌhui tiquee um.
\s Chaꞌ ꞌin nguso nu a ncua jaꞌan ꞌin xꞌnan
\p
\v 41 Yu Tyo canꞌ mdoꞌo ycuiꞌ yu: Ñi Xꞌnan hua, ¿ta ycuiꞌ um chaꞌ re siꞌya huareꞌ ti, uta siꞌya nchgaa la tucui?
\v 42 Juin Ñi Xꞌnan na: ¿La quija lyoo sca nguso nu ñi ndiꞌin chaꞌ ꞌin loꞌ tiyaa, nu chuꞌhui cunta naꞌan ꞌin xꞌnan, loꞌ tsuꞌhue cuꞌni coꞌo nchgaa la ñaꞌan nguso canꞌ?
\v 43 Tsuꞌhue ca xuꞌhue nguso canꞌ chaꞌ cuañaꞌan nguiꞌni yu xa quila xꞌnan yu.
\v 44 Nu chaꞌ ñi cunen loꞌo um, xꞌnan tñan canꞌ xnu nchgaa la ñaꞌan tñan ꞌin yu yaaꞌ nguso canꞌ.
\v 45 Una chaꞌ yu nguso canꞌ quiñan tiꞌ yu: Ñi xꞌnan a quila ñi cuiꞌ xaa. Loꞌ chaꞌ tyisnan cuꞌni lyiꞌo ꞌtnan ꞌin nchgaa nguso canꞌ, tyisnan cu yu loꞌ coꞌo yu, a cunta ca cuꞌhui yu,
\v 46 loꞌ tsati ntyin quila xꞌnan yu lja nu a sca chaꞌ ntsuꞌhui tiꞌ yu, xacanꞌ lyee xitijin canꞌ ꞌin yu nu tiꞌi, loꞌ suꞌhua ꞌin yu loo quiiꞌ seꞌen ntsuꞌhui nu lyeꞌ tiꞌ.
\v 47 Sca nguso nu cuaꞌ jlyo tiꞌ chaꞌ nu nchca tiꞌ xꞌnan, loꞌ chaꞌ a ndon tiyaa, ñi a nducua tñan chaꞌ nu nchca tiꞌ xꞌnan, canꞌ nu lyee ntsuꞌhui chaꞌ tyijyin nu tiꞌi.
\v 48 Una sca nguso nu a jlyo tiꞌ chaꞌ nu nchca tiꞌ xꞌnan, siyaꞌ tnanꞌ canꞌ ndeꞌen la chaꞌ, joꞌo ti tyijyin canꞌ nu tiꞌi, siꞌyana tsalca nu quiꞌan la jui ꞌin, cuiꞌ cuañaꞌan quiꞌan la tyaa canꞌ, loꞌ tsalca nu quiꞌan cunta mchcuan, cuañaꞌan quiꞌan la cunta tyaa canꞌ.
\s Nten ntsuꞌhui chaꞌ tyiꞌin cusuun neꞌ siꞌya Jesús
\p
\v 49 Nanꞌ ljyaan siꞌyana xiquiꞌon quiiꞌ loo chendyu re, ¿loꞌ ñaꞌan la ta nchca tinꞌ, ta siꞌi cuaꞌ ndiquin na?
\v 50 Una ntsuꞌhui chaꞌ tijin sca nu tiꞌi tnu, loꞌ luꞌun ꞌa tinꞌ tsayaꞌ nu tsatoꞌo chaꞌ re.
\v 51 ¿Ta ñan tiꞌ um ljyan loꞌon chaꞌ tsuꞌhue nu xitiꞌin tsuꞌhue ꞌin nten chendyu? Chcuinꞌ loꞌo um siꞌyana siꞌi na, cuiꞌ ca nu chaꞌ cusuun lca na.
\v 52 Tiꞌ cuaꞌ ñii nu tsaa nde loo re, chaꞌ cusuun tyisnan scasca naꞌan. Seꞌen ndiꞌin caꞌyu nten, snan canꞌ xuun loꞌo tucua, loꞌ tucua canꞌ xuun loꞌo snan.
\v 53 —Sti canꞌ xuun loꞌo ticuiꞌ sñeꞌ, loꞌ cuañaꞌan cuꞌni sñeꞌ yu loꞌo yu, a cunta jyiꞌan canꞌ xuun loꞌo ticuiꞌ sñeꞌ, cuiꞌ cuañaꞌan cuꞌni sñeꞌ neꞌ loꞌo neꞌ, jyiꞌan laa neꞌ xuun loꞌo ticuiꞌ sñeꞌ xen, loꞌ nu lca xen canꞌ xuun loꞌo jyiꞌan laa—.
\s Chaꞌ ꞌin nten nu a ndyiꞌya cunta chaꞌ nu nchca
\p
\v 54 Tiꞌ ycuiꞌ la ñi loꞌo nten canꞌ: Xa ñaꞌan um siꞌyana lyee ndla tiꞌ xaa luhuaꞌ seꞌen nguiaa cucha, nchcuiꞌ um siꞌyana quiꞌya quio, loꞌ cuañaꞌan ndiyatoꞌo na.
\v 55 Xa nxcua cuiꞌin nu ndyiꞌo seꞌen lca sur, nchcuiꞌ um siꞌyana ca tiqueꞌ cuaan, loꞌ cuañaꞌan ndiyatoꞌo na.
\v 56 ¡ꞌUn lca um nten nu cuiñi! Ndyiꞌya um cunta chaꞌ nu nchca niꞌ cuaan loꞌo loo chendyu re, ¿loꞌ ñi chaꞌ ta a ndyiꞌya um cunta chaꞌ nu naꞌan tloo um cuaꞌ ñii?
\s Cuꞌni chuꞌhue um chaꞌ ꞌin um loꞌo taꞌa cusuun um
\p
\v 57 ¿Ñi chaꞌ a ndlohui um chaꞌ nu tsuꞌhue lati?
\v 58 Xa tsaa um loꞌo taꞌa cusuun um tloo bsya, tiꞌ tucueen nguiaa ti um cuꞌni chuꞌhue um chaꞌ ꞌin um loꞌo canꞌ, siꞌyana a tsa loꞌo canꞌ ꞌin um loꞌo juesa la tloo bse, loꞌ yu bse canꞌ tyaa yu cunta ꞌin um yaaꞌ silyiya, loꞌ tsatoꞌo suꞌhua yu ꞌin um naꞌan chcuan.
\v 59 Cunen loꞌo um sca chaꞌ, a tyiꞌo um naꞌan chcuan canꞌ chaꞌ a suꞌhua lyiyaꞌ um nchgaa cunta nu nducui nchaꞌan ꞌin um.
\c 13
\s Tsatoꞌo quinanꞌ nu a xiloꞌo chonꞌ quiꞌya ꞌin 

\p
\v 1 Lja xacanꞌ mdoꞌo ycuiꞌ tucua snan yu nu mtsaꞌ ꞌin Jesús tsañaꞌan mxitiyaꞌ tne neꞌ galilea loꞌo tne ꞌni, xa nu mꞌni yu Pilato chaꞌ ngujui tucua snan neꞌ lja ndiquin tucua neꞌ ꞌni tloo Ndiose.
\v 2 Mxcuen Jesús ꞌin yu: Chaꞌ nu yatoꞌo ꞌin neꞌ Galilea canꞌ, ¿ta ñan tiꞌ um siꞌyana lyee la nducui yu quiꞌya que nchgaa la ñaꞌan taꞌa Galilea neꞌ?
\v 3 Cunen loꞌo um siꞌyana siꞌi na, una chaꞌ ꞌun a xiloꞌo chonꞌ um quiꞌya nguiꞌni um, ticuiꞌ scañaꞌan ti quinanꞌ um loꞌo neꞌ.
\v 4 Uta loꞌo ꞌtñuxnan yu nu ngujui nu mscua ꞌni torre Siloé ꞌin, ¿ta ñan tiꞌ um siꞌyana lyee la nducui canꞌ quiꞌya que nchgaa la ñaꞌan nten nu ndiꞌin Jerusalén?
\v 5 Cunen loꞌo um siꞌyana siꞌi na, una chaꞌ ꞌun a xiloꞌo chonꞌ um quiꞌya nguiꞌni um, ticuiꞌ scañaꞌan ti quinanꞌ um loꞌo yu.
\s Chaꞌ ꞌin yca higo un a ndyiꞌyu mti
\p
\v 6 A cunta mdiꞌin tyaa ñi sca chaꞌ loꞌo nten canꞌ, loꞌ juin ñi: Sca yu quiꞌyu ndiꞌin sca yuu seꞌen nducua ti uva ꞌin yu, canꞌ nducua sca yca higo, ya naꞌan yu chaꞌ lyiꞌyu mti na una a jui na ꞌin yu.
\v 7 Loꞌ juin yu ꞌin nu ntsuꞌhui cunta seꞌen canꞌ: Ñaꞌan jan ñi, cuaꞌ nchca snan yjan ndaꞌan nan mti loo yca re, una a ndyiꞌyu na, tsuꞌhue lati xiꞌyu na siꞌyana cua chaꞌ ti nducua na.
\v 8 Xacanꞌ mxcuen yu nu ntsuꞌhui cunta seꞌen canꞌ: Ñi xꞌnan, tyaa um yaꞌ chcua na siyaꞌ xca yjan ti, loꞌ xoꞌ caꞌan yuu suun na loꞌ suꞌhuan yuu cuti ꞌin na.
\v 9 Chaꞌ tyisnan cuiꞌyu na, tsuꞌhue, loꞌ chaꞌ a cuiꞌyu na tca xiꞌyu na.
\s Mꞌni chca Jesús ꞌin sca neꞌ cunaꞌan tsaan nu nxitñanꞌ neꞌ
\p
\v 10 Yatoꞌo sca tsaan nu nxitñanꞌ neꞌ, ndloꞌo Jesús ꞌin nten seꞌen nguiꞌni tnu neꞌ ꞌin Ndiose,
\v 11 canꞌ nducua sca neꞌ cunaꞌan nu nguinu xincun siꞌya cuiꞌin, loꞌ cuaꞌ ntsuꞌhui ꞌtñuxnan yjan a nchca ꞌa quiñi ton neꞌ.
\v 12 Xa naꞌan Jesús ꞌin neꞌ, msiꞌya ñi ꞌin neꞌ loꞌ juin ñi: Neꞌ cunaꞌan, cuaꞌ mdoꞌo laa loꞌo quicha nu ntsuꞌhui ꞌin.
\v 13 Mdiꞌin tyaa ñi yaaꞌ ñi ꞌin neꞌ cunaꞌan canꞌ, cuiꞌ xaa nguñi ton neꞌ loꞌ mꞌni tnu neꞌ ꞌin Ndiose.
\v 14 Una yu nu ntsuꞌhui cunta seꞌen canꞌ, ycuen tiqueꞌ yu siꞌyana mꞌni chca Jesús ꞌin neꞌ cunaꞌan canꞌ tsaan nu nxitñanꞌ neꞌ, loꞌ juin yu ꞌin nten canꞌ: Scua tsaan ntsuꞌhui chaꞌ cuꞌni na tñan, lja xacanꞌ tca caan um siꞌyana chca um, una siꞌi tsaan nu nxitñanꞌ na.
\v 15 Xacanꞌ mxcuen Ñi Xꞌnan na ꞌin yu: ꞌUn nu cuiñi cua, ¿ta siꞌi cunda scaa um ndyiꞌan taa um tyiꞌa coꞌo ꞌni ꞌin um siyaꞌ tsaan nu nxitñanꞌ na?
\v 16 Neꞌ cunaꞌan re ticuiꞌ ta nten ꞌin Abraham lca neꞌ, cuaꞌ nguiaa ꞌtñuxnan yjan nsñi suꞌhua yaaꞌ Laxaꞌan ꞌin neꞌ. Tsañaꞌan nu mchcanꞌ neꞌ, ¿ta a ntsuꞌhui chaꞌ cuiyaꞌ caja nu xtinꞌ ꞌin neꞌ siyaꞌ tsaan nu nxitñanꞌ na?
\v 17 Xa ycuiꞌ ñi chaꞌ re mxijyiꞌo tiꞌ nchgaa nu tiꞌi tiꞌ ꞌin ñi, una ñaꞌaan quichen neꞌ tsuꞌhue ntsuꞌhui tiquee neꞌ siꞌya scasca chaꞌ nu tnu nguiꞌni ñi.
\s Chaꞌ ꞌin mti mostaza
\p
\v 18 Loꞌ tiꞌ juin la ñi ꞌin nten canꞌ: ¿Ti ñaꞌan ta chaꞌ tca tyiꞌin tyaan loꞌo um siꞌyana tca quiꞌya um cunta ñaꞌan ntsuꞌhui chaꞌ culo Ndiose tñan ꞌin nten?
\v 19 Nguiaa chaꞌ canꞌ tsañaꞌan nguiaa chaꞌ ꞌin mti mostaza nu ya yta sca yu quiꞌyu loo jyaan ꞌin yu, cuiꞌ xaa mducua na loꞌ tlyu ylo na, hasta loꞌo quiñi msuꞌhua ten ꞌin lja stanꞌ na.
\s Chaꞌ ꞌin suun jaslya
\p
\v 20 Xiyaꞌ mxitucui ñi ycuiꞌ ñi: ¿Ti ñaꞌan ta chaꞌ tca tyiꞌin tyaan loꞌo um siꞌyana tca quiꞌya um cunta ñaꞌan ntsuꞌhui chaꞌ culo Ndiose tñan ꞌin nten?
\v 21 Nguiaa chaꞌ canꞌ tsañaꞌan nguiaa chaꞌ ꞌin suun jaslya nu mxitiyaꞌ neꞌ cunaꞌan ꞌin na loꞌo snan cuiyaꞌ quita, loꞌ ñaꞌaan na mchcuen na.
\s Chaꞌ ꞌin tunaꞌan nu luꞌhui
\p
\v 22 Tucueen nguiaa Jesús quichen Jerusalén mdijin ñi scasca quichen tnu loꞌo quichen suhue ti, loꞌ ndloꞌo ñi ꞌin nten canꞌ.
\v 23 Jui nu mñichaꞌ ꞌin ñi: Ñi Xꞌnan hua, ¿ta chinꞌ ti nten nu ntsuꞌhui chaꞌ tyiꞌo laa? Mxcuen ñi ꞌin neꞌ:
\v 24 Suꞌhua um juesa sten um tunaꞌan nu luꞌhui, siꞌyana cunen loꞌo um sca chaꞌ, quiꞌan ꞌa nten ca lca tiquee neꞌ sten neꞌ canꞌ, una a tca ꞌin neꞌ.
\v 25 Xa cuaꞌ mducun xꞌnan naꞌan canꞌ tunaꞌan ꞌin, xacanꞌ ꞌun tyisnan cunꞌ um ꞌin na, loꞌ chcuiꞌ um: Ñi Xꞌnan hua, Ñi Xꞌnan hua, sla um tunaꞌan re sten hua. Loꞌ xcuen ñi ꞌin um: A ndyuꞌhui lyoon ꞌin um.
\v 26 Xacanꞌ tyisnan chcuiꞌ um: Tsatlyu mducua na loꞌ ycu na, loꞌ seꞌen nchca quiyaꞌ, canꞌ nguloꞌo um ꞌin hua.
\v 27 Una xcuen ñi ꞌin um: Cunen loꞌo um, a ndyuꞌhui lyoon ꞌin um, nchgaa ꞌun nu nguiꞌni tñan ngunanꞌ, tyiꞌo tsoꞌ um siinꞌ.
\v 28 Canꞌ tyisnan cunan um loo nu lyee tyijyin um nu tiꞌi, xa ñaꞌan um ꞌin Abraham, Isaac, loꞌo Jacob tsatlyu loꞌo nchgaa yu nu mxiycuiꞌ Ndiose ꞌin cuaꞌ sꞌni, ndiꞌin seꞌen ndlo Ndiose tñan, loꞌ ꞌun tsatoꞌo quinu ton um nde lyiyaꞌ.
\v 29 Taꞌa jacua nscan chendyu tyiꞌo nten nu sten seꞌen ndlo Ndiose tñan, loꞌ chcua canꞌ tsatlyu tuꞌhua msa ꞌin ñi.
\v 30 Cunen loꞌo um sca chaꞌ, nu nguinu caꞌan chonꞌ, canꞌ nu ca nu culoo tiyaa xaa, loꞌ nu culoo cuaꞌ ñii, tiyaa xaa quinu caꞌan chonꞌ canꞌ.
\s Xa nguꞌya tuꞌhua tiquee Jesús siꞌya quichen Jerusalén
\p
\v 31 Cuiꞌ tsaan canꞌ mdiyaa tucua snan neꞌ fariseo seꞌen ndon Jesús, loꞌ juin neꞌ ꞌin ñi: Tyiꞌo quichen re siꞌyana yu Herode ntsuꞌhui tiquee yu cujui yu ꞌin.
\v 32 Loꞌ juin ñi ꞌin neꞌ: Yaa um loꞌ chcuiꞌ um loꞌo cutaꞌ cua: Tsaan re ñii loꞌo quiaa quilyun re, culon cuiꞌin xaꞌan nu ntsuꞌhui ꞌin nten loꞌ cuꞌni chcan ꞌin nu tiꞌi, loꞌ la taꞌa snan tsaan tyii tñan re ꞌñan.
\v 33 Una ꞌni chaꞌ tsa quiñan tucueen nu cuaꞌ nguiꞌan cuaꞌ ñii loꞌo quiaa loꞌo bcha, siꞌyana a ndyiꞌo tñan caja sca yu nu nxiycuiꞌ Ndiose ꞌin chaꞌ siꞌi la Jerusalén.
\v 34 ¡Jerusalén, Jerusalén! ꞌUn neꞌ nu ndujui ꞌin yu nu nxiycuiꞌ Ndiose ꞌin, loꞌo quee ti ndujui um ꞌin nchgaa nu ndaꞌan tñan ñi ꞌin um, tsala ñaꞌan tyun yaꞌ ncua tinꞌ xoꞌ tiꞌin ꞌin um, tsañaꞌan nꞌni cutu loꞌo sñeꞌ ꞌin, una a mslyaa um.
\v 35 Una tiyaa xaa quinu tucua xiꞌin naꞌan ꞌin um. Cunen loꞌo um sca chaꞌ, a ntsuꞌhui ꞌa chaꞌ ñaꞌan tloo um ꞌñan tsayaꞌ tiyaa tsaan nu chcuiꞌ um: —Tlyu chaꞌ tsuꞌhue ntsuꞌhui ꞌin ñi nu ljyaan loꞌo chaꞌ cuiyaꞌ ꞌin Ñi Xꞌnan na—.
\c 14
\s Jesús mꞌni chca ñi ꞌin sca yu tiꞌi loꞌo quicha quiin 

\p
\v 1 Yatoꞌo sca tsaan nu nxitñanꞌ neꞌ judio, ya ycu tlya Jesús la naꞌan ꞌin sca yu fariseo nu ndon loo ꞌin neꞌ, loꞌ nchgaa la ñaꞌan neꞌ nsñi neꞌ cunta chaꞌ ñaꞌan ca cuꞌni ñi.
\v 2 Lja xacanꞌ mdiyaa sca yu tiꞌi loꞌo quicha quiin seꞌen nducua ñi.
\v 3 Xacanꞌ juin Jesús ꞌin yu nu mꞌni chaꞌan chaꞌ ꞌin lee loꞌo neꞌ fariseo canꞌ: ¿Ta ntsuꞌhui chaꞌ cuiyaꞌ cuꞌni chca na ꞌin sca nu tiꞌi tsaan nu nxitñanꞌ na, uta na a ntsuꞌhui na?
\v 4 Ñi sca neꞌ loꞌ a mxcuen neꞌ ꞌin ñi. Xacanꞌ msñi ñi yaaꞌ yu tiꞌi canꞌ loꞌ mꞌni chca ñi ꞌin yu, loꞌ juin ñi siꞌyana quiaa yu.
\v 5 Xacanꞌ mñichaꞌ ñi ꞌin neꞌ: Chaꞌ ntsuꞌhui um ndon ꞌni ꞌin um, loꞌ chaꞌ tyu yuꞌhui ꞌin sca tuyuu tsaan nu nxitñanꞌ na, ¿ta siꞌi cuiꞌ xaa ti tsa lyoo um ꞌin ꞌin?
\v 6 Una a ngujlyo tiꞌ neꞌ ñaꞌan xcuen neꞌ ꞌin ñi loꞌo chaꞌ canꞌ.
\s Chaꞌ ꞌin nten nu ndyiꞌan seꞌen ndyijyi cuilyiꞌo neꞌ
\p
\v 7 Jesús nsñi ñi cunta ꞌin neꞌ siꞌyana chacuiꞌ la que msa ndlohui neꞌ nchcua neꞌ, xacanꞌ mdiꞌin tyaa ñi sca chaꞌ ꞌin nchgaa nu mdiyaa seꞌen nchca taꞌa canꞌ, loꞌ juin ñi:
\v 8 Xa cuni neꞌ ꞌin um tsaa um seꞌen caja cuilyiꞌo neꞌ, a culohui um seꞌen chcua um la que msa, ñaꞌan tuꞌ tiyaan xca nu ndon loo la que ꞌin um,
\v 9 loꞌ tsatoꞌo chcuiꞌ yu nu msuꞌhua taꞌa canꞌ loꞌo um: Tyiꞌo um seꞌen ntsuꞌhui chaꞌ chcua yu re. Xacanꞌ tiꞌ jyiꞌo tiꞌ um tyiꞌo um seꞌen canꞌ loꞌ tsa tucua um la chonꞌ.
\v 10 Canꞌ chaꞌ xa caja nu cuni ꞌin um tsaa um taꞌa, tsuꞌhue lati chcua um la chonꞌ, loꞌ xa ñaꞌan yu ꞌin um nducua um canꞌ ljuin yu ꞌin um: Quiaan um loꞌ chcua um la loo re. Xacanꞌ tloo ñaꞌaan nten canꞌ caja nu ta loo um.
\v 11 Siꞌyana nu scuen cuaan ꞌin ticuiiꞌ tsatoꞌo caja nu tyiꞌya teꞌen ꞌin, loꞌ nu nꞌni lyoꞌ ꞌin caja nu scuen cuaan ꞌin.
\v 12 Xacanꞌ mdyisnan ycuiꞌ Jesús loꞌo yu nu msuꞌhua taꞌa canꞌ: Xa cuꞌni um sca taꞌa, a nchca chaꞌ xiꞌya um ꞌin taꞌa tsuꞌhue um uta taꞌa ngula um, uta ꞌin ta nten ꞌin um, ta yu cuilyiyaꞌ taꞌa nducua ti um, siꞌyana canꞌ nu xitucui chaꞌ tsuꞌhue ꞌin um xa cuꞌni taꞌa.
\v 13 Cuiꞌ ca nu cuni um ꞌin nu tiꞌi ñaꞌan chendyu ꞌin, nu cuxi yaaꞌ, nu cuxi quiyaꞌ, loꞌo nu cuityinꞌ,
\v 14 xacanꞌ ntsuꞌhui xuꞌhue um siꞌyana a caja ꞌin canꞌ tyaa ꞌin um, una tiyaa xaa chcuan um chaꞌ tsuꞌhue canꞌ xa ntsuꞌhui chaꞌ tyiquiꞌo nchgaa nu ñi cusya ꞌin.
\s Chaꞌ ꞌin taꞌa seꞌen ycu siin neꞌ
\p
\v 15 Sca yu taꞌa nducua ñi tuꞌhua msa canꞌ, xa ngune ꞌin yu chaꞌ nu ycuiꞌ ñi, juin yu loꞌo ñi: Tsuꞌhue ca xuꞌhue nu chcua ycu tuꞌhua msa la seꞌen ndlo Ndiose tñan.
\v 16 Mxcuen Jesús ꞌin yu: Sca yu quiꞌyu mꞌni yu sca taꞌa tlyu, quiꞌan ꞌa nten nguni yu tsa ycu siin seꞌen ndiꞌin yu.
\v 17 Xa cuaꞌ lca siin canꞌ, msuꞌhua yu sca nguso ꞌin yu tsa teꞌen ꞌin nchgaa nu cuaꞌ nguni yu canꞌ, loꞌ ndeñaꞌan ngulo yu tñan ꞌin chcuiꞌ: Cuaꞌ tca tsaa um, siꞌyana cuaꞌ lca na nu ntsuꞌhui chaꞌ ca siin ꞌin um.
\v 18 Nchgaa yu canꞌ scañaꞌan ti mdyisnan mdaa yu quiꞌya, loꞌ juin sca yu: Cuꞌni um chaꞌ tlyu tiꞌ ꞌñan, a tca tsaꞌan siꞌyana tca msiꞌin sca yuu loꞌ ꞌni chaꞌ tsa naꞌan ꞌin na.
\v 19 Xca yu juin yu: Cuꞌni um chaꞌ tlyu tiꞌ ꞌñan siꞌyana a tca tsaꞌan, tca msiꞌin tsa caꞌyu ta bta, loꞌ ꞌni chaꞌ tsa naꞌan chaꞌ cuaꞌ tca cuꞌni ꞌin tñan.
\v 20 Loꞌ juin xca yu: Nanꞌ a tca tsaꞌan siꞌyana tca jui cuilyiꞌon.
\v 21 Mxitucui yu nguso canꞌ, nguia ytsaꞌ yu ꞌin xꞌnan yu chaꞌ canꞌ, loꞌ msinꞌ tiꞌ xꞌnan yu loꞌ juin ꞌin yu nguso canꞌ: Ndla ti cuꞌni loꞌ tsaa nde seꞌen nchca quiyaꞌ, tyijyin scasca tucueen loo quichen, loꞌ cuꞌni chaꞌ caan nu tiꞌi ñaꞌan chendyu ꞌin, nu cuxi yaaꞌ loꞌo nu cuxi quiyaꞌ, a cunta loꞌo nu cuityinꞌ can loꞌo.
\v 22 Xacanꞌ juin yu nguso canꞌ: Ñi xꞌnan hua, cuaꞌ mducuan tñan tsañaꞌan nu juin um, una tiꞌ lja seꞌen re.
\v 23 Juin xꞌnan yu ꞌin yu: Yaa nde tuꞌhua quichen cua, tyijyin scasca tucueen, loꞌ xicuꞌni ꞌin neꞌ can ycu siin neꞌ, loꞌ chaꞌan yuꞌhui neꞌ tuꞌhua msa re ꞌñan.
\v 24 Cunen loꞌo um sca chaꞌ, ñi sca nten nu nguni ꞌin tiꞌ culoo, a cu siin ꞌa neꞌ loꞌon.
\s Chaꞌ ꞌin nu nchcui nchaꞌan ꞌin Cristo
\p
\v 25 Tucueen nguiaa ñi quiꞌan nten nguia nchaꞌan ꞌin ñi, loꞌ mdyisnan ycuiꞌ ñi loꞌo neꞌ:
\v 26 Chaꞌ ntsuꞌhui nu nchca tiꞌ tsa quiꞌan tiꞌ ꞌñan, ꞌni chaꞌ suꞌhua loo canꞌ ꞌñan lyee la que ꞌin nten cula ꞌin, loꞌo nten ꞌin, loꞌo sñeꞌ, uta ꞌin nchgaa taꞌa ngula, uta ꞌin ticuiiꞌ, canꞌ nu ntsuꞌhui suun ꞌin chcui nchaꞌan ꞌñan.
\v 27 Chaꞌ a tyaa ꞌin siyaꞌ ti siꞌya chaꞌ ꞌñan, a tca ꞌin canꞌ ca sca nu cuꞌni nchaꞌan ꞌñan.
\v 28 Siꞌyana, ¿ti nu tñan sca naꞌan cuaan, chaꞌ siꞌi culo nducua la culo cunta chaꞌ cula tñi ꞌin tsaꞌ tucua na?
\v 29 Ñaꞌan tuꞌ tyiꞌin tyaa suun yu ꞌin na, una chaꞌ a tyi tsaaꞌ na ꞌin yu, ñaꞌan nu ti tca xtyi lyiꞌo ꞌin yu,
\v 30 loꞌ chcuiꞌ neꞌ: Yu cua mdyisnan mtñan yu naꞌan ꞌin yu, una a mdyi tsaaꞌ na ꞌin yu.
\v 31 Ticuiꞌ cuañaꞌan loꞌo sca ree nu tsa cusuun, a sꞌni chcua yu culo nducua la loꞌ culo yu cunta chaꞌ tca cuꞌni yu canan loꞌo tsa tii mii sindatu ꞌin yu, loꞌ xuun yu loꞌo tsa cla mii sindatu ꞌin xca ree.
\v 32 Chaꞌ a lyiꞌya yaꞌ tca ꞌin yu, cuiꞌ xaa caꞌan tñan yu nu tsa ycuiꞌ loꞌo xca ree canꞌ xa tiꞌ lyijyi tiyaan yu, loꞌ cunan yu ñaꞌan chuꞌhua tiꞌin chaꞌ cusuun canꞌ.
\v 33 Cuiꞌ cuañaꞌan ꞌun, chaꞌ a cula yaꞌ um nchgaa chaꞌ nu ndiꞌin ꞌin um, a tca chcui nchaꞌan um ꞌñan.
\s Chaꞌ ꞌin tejeꞌ nu ndiya lyijyi tiyenꞌ
\p
\v 34 Tejeꞌ tsuꞌhue ꞌa na, una chaꞌ tyiꞌo tiyenꞌ ꞌin na, ¿ñaꞌan ta tca ca tiyenꞌ na xiyaꞌ?
\v 35 A ca tñan na quine na loo yuu uta quioꞌ tiꞌin na ca na yuu cuti, cuiꞌ ca nu siyaꞌ ti nxcuan neꞌ ꞌin na. Nchgaa nu ndon nscan chaꞌ nu nchcuinꞌ re cuꞌni cunta ꞌin na.
\c 15
\s Chaꞌ ꞌin slyaꞌ nu ngunanꞌ yuꞌhui 

\p
\v 1 Nchgaa nu ndlo tñi loꞌo nu nducunꞌ mdiyaa tloo Jesús siꞌyana ton nscan neꞌ chaꞌ nu nchcuiꞌ ñi,
\v 2 una neꞌ fariseo loꞌo neꞌ escriba mdyisnan ycuiꞌ tyijyin neꞌ siꞌya ñi, loꞌ juin neꞌ: Yu re nducuan xuꞌhue yu ꞌin nten quiꞌya chendyu loꞌ sca seꞌen ti nchcu yu loꞌo neꞌ.
\v 3 Xacanꞌ mdiꞌin tyaa ñi sca chaꞌ loꞌo neꞌ, loꞌ juin ñi:
\v 4 Chaꞌ ndiꞌin sca ciento slyaꞌ ꞌin um, loꞌ quinanꞌ sca ꞌin, ¿ti nu a xnu tiꞌin taꞌa jacua yla ntsuꞌhui ꞌtñulcua canꞌ, loꞌ quia nan ꞌin nu ngunanꞌ yuꞌhui canꞌ tsayaꞌ quija lyoo ꞌin ꞌin?
\v 5 Loꞌ xa quija lyoo um ꞌin ꞌin, tyiꞌin tya scun um ꞌin ꞌin, tsuꞌhue ntsuꞌhui tiquee um quian loꞌo um ꞌin ꞌin.
\v 6 Xa quila um la naꞌan ꞌin um, xoꞌ tiꞌin um nchgaa taꞌa tsuꞌhue um loꞌo taꞌa nducua ti um, loꞌ ljuin um ꞌin canꞌ: Ca tsuꞌhue chuꞌhui tiquee na, siꞌyana nguija lyoo slyaꞌ nu ngunanꞌ yuꞌhui canꞌ ꞌñan.
\v 7 Cunen loꞌo um sca chaꞌ, lyee la tsuꞌhue ntsuꞌhui tiquee Ndiose, ñi nu nducua niꞌ cuaan, siꞌya sca nten nu nxiloꞌo chonꞌ quiꞌya ꞌin, que ꞌin jacua yla ntsuꞌhui ꞌtñulcua nu a ꞌni chaꞌ ꞌin loꞌo chaꞌ canꞌ.
\s Chaꞌ ꞌin sca tñi nu ngunanꞌ
\p
\v 8 Sca neꞌ cunaꞌan su tsa tii tñi plata ꞌin neꞌ, loꞌ chaꞌ quinanꞌ sca na, ¿ti nu ta a caꞌan sca quiiꞌ loꞌ tyisnan cua ñaꞌan ꞌin, loꞌ tsuꞌhue ti quia nan ꞌin na tsayaꞌ quija lyoo na ꞌin?
\v 9 Xa nguija lyoo na, xoꞌ tiꞌin ꞌin nchgaa taꞌa tsuꞌhue loꞌo taꞌa nducua ti, loꞌ ljuin xacanꞌ: Ca tsuꞌhue chuꞌhui tiquee na, siꞌyana nguija lyoo tñi nu ngunanꞌ canꞌ ꞌñan.
\v 10 Cunen loꞌo um sca chaꞌ, cuañaꞌan tsuꞌhue ntsuꞌhui tiquee angujle ꞌin Ndiose siꞌya sca nten nu nxiloꞌo chonꞌ quiꞌya ꞌin.
\s Chaꞌ ꞌin yu tsa suhue ti nu ngunanꞌ yuꞌhui
\p
\v 11 Loꞌ tiꞌ ycuiꞌ Jesús xca chaꞌ: Sca yu quiꞌyu ndiꞌin tucua sñeꞌ yu.
\v 12 Yu cuneꞌ la canꞌ juin yu ꞌin sti yu: Paa, tyaa um chaꞌ tsuꞌhue nu ntsuꞌhui chaꞌ quiꞌni caꞌan ꞌñan. Xacanꞌ mdaa sti yu chaꞌ tsuꞌhue nu ntsuꞌhui chaꞌ quiꞌni caꞌan ꞌin chcuaa yu.
\v 13 Una xiꞌi ti mducui, yu nu cuneꞌ la canꞌ yjuiꞌ yu nchgaa na nu cuaꞌ jui ꞌin yu, mdoꞌo yu nguiaa yu tijyoꞌ xca loo yuu, canꞌ mdyisnan ngulyijyi yu tñi ꞌin yu cuaꞌ ñaꞌan ti loꞌo chacuiꞌ chaꞌ ngunanꞌ.
\v 14 Yatoꞌo xa mdyi tñi ꞌin yu, mdyisnan nguꞌya bjuꞌñan ñaꞌaan seꞌen canꞌ, loꞌ a jui ꞌa na nu cunajoꞌo ꞌin yu.
\v 15 Ya jñan yu tñan cuꞌni yu seꞌen ndiꞌin sca yu ndiꞌin quichen canꞌ, canꞌ nu msuꞌhua ꞌin yu la seꞌen ndiꞌin tñan ꞌin siꞌyana ñaꞌan seen yu cuhueꞌ ꞌin.
\v 16 Lyee ncua lca tiquee yu cu yu na nu nchcu cuhueꞌ canꞌ, una a tucui nu mdaa ꞌin na cu yu.
\v 17 Nguñan tiꞌ yu xacanꞌ: ¡Tsala ñaꞌan quiꞌan nguso ndiꞌin ꞌin stin loꞌ a sca na ndiya lyijyi ꞌin canꞌ, loꞌ nanꞌ ndiꞌin re ndijin yteꞌ tinꞌ!
\v 18 Tsuꞌhue lati xitucuin nde seꞌen ndiꞌin stin, loꞌ cunen loꞌo: Paa, nanꞌ mꞌnin quiꞌya tloo Ndiose loꞌ mꞌnin quiꞌya tloo um.
\v 19 A ngaꞌan ꞌa chaꞌ tiꞌ cuan xuꞌhue um ꞌñan tsañaꞌan nchca tiꞌ sca sñeꞌ um, cuiꞌ ca nu cuꞌni um loꞌon tsañaꞌan nꞌni um loꞌo sca nguso ꞌin um.
\v 20 Xacanꞌ mdoꞌo yu nguiaa yu, loꞌ nguila yu seꞌen ndiꞌin sti yu. Tiꞌ tijyoꞌ yaan yu cuaꞌ naꞌan sti yu ꞌin yu, loꞌ mñaꞌan ꞌtnan tiꞌ ꞌin yu, cuiꞌ xaa mdoꞌo ya ycua ꞌin yu, ycuiꞌ chaꞌ taꞌa yu loꞌ msuꞌhua tuscun ꞌin yu.
\v 21 Juin yu ꞌin sti yu: Paa, nanꞌ mꞌnin quiꞌya tloo Ndiose, loꞌ mꞌnin quiꞌya tloo um, a ngaꞌan ꞌa chaꞌ tiꞌ cuan xuꞌhue um ꞌñan tsañaꞌan nchca tiꞌ sca sñeꞌ um.
\v 22 Una sti yu ngulo tñan ꞌin nguso ꞌin: Quia ꞌya um teꞌ nu tsuꞌhue la ñaꞌan loꞌ xicoꞌ um ꞌin sñenꞌ, suꞌhua um sca cuiiꞌ loyaaꞌ yu loꞌ taa um quinan chuꞌhui quiyaꞌ yu,
\v 23 quia ꞌya um bta nu cojoꞌ canꞌ, cujui um ꞌin ꞌin loꞌ cuꞌni na sca taꞌa loꞌ tsatlyu cu na,
\v 24 siꞌyana yu sñenꞌ re mꞌnin cunta siꞌyana cuaꞌ ngujui yu, una cuaꞌ ñii mdyiquiꞌo yu, cuaꞌ ngunanꞌ yu, una xiyaꞌ nguila yu. Xacanꞌ mdyisnan mꞌni neꞌ taꞌa loꞌo nu chcui lca tiquee neꞌ.
\v 25 Una xca sñeꞌ yu nu cula la canꞌ, yaan yu yaa yu tñan, xa cuaꞌ quila ti yu seꞌen nducua naꞌan ꞌin sti yu, ngune ꞌin yu ndiꞌin yla yu bstro loꞌ nguila quiyaꞌ nten canꞌ.
\v 26 Xacanꞌ msiꞌya yu ꞌin sca nguso canꞌ, loꞌ mñichaꞌ yu ꞌin chaꞌ ñi na nchca.
\v 27 Juin yu nguso canꞌ: Yu taꞌa ngula um nguila yu, loꞌ sti um ngulo tñan siꞌyana cujui hua bta nu cojoꞌ canꞌ, siꞌyana nguila yu tsuꞌhue lca ꞌin yu.
\v 28 Xacanꞌ ycuen tiqueꞌ yu nu cula la canꞌ, loꞌ a mslyaa yu sten yu ñaꞌan. Cuiꞌ xaa mdoꞌo sti yu, mjñan chaꞌ tsuꞌhue ꞌin yu siꞌyana quiaan yu ñaꞌan.
\v 29 Una mxcuen yu ꞌin sti yu: Nanꞌ cuaꞌ sꞌni ꞌa nguiꞌnin tñan ꞌin um, ñi siyaꞌ loꞌ a nchca cuꞌnin lyeꞌ tinꞌ ꞌin um, una ñi sca chiu cuneꞌ ti ꞌin um, a nchca taa um siꞌyana cuꞌnin chinꞌ sca taꞌa loꞌo yu taꞌa tsuꞌhue ntsuꞌhuin.
\v 30 Una cuaꞌ ñii siꞌyana nguila sñeꞌ um, yu nu cuaꞌ ngulyijyi ñaꞌaan chaꞌ tsuꞌhue nu mdaa um ꞌin loꞌo neꞌ cunaꞌan nducunꞌ, loꞌ nde ngulo um tñan siꞌyana caja bta nu cojoꞌ canꞌ siꞌya yu.
\v 31 Xacanꞌ mxcuen sti yu: Sñenꞌ, nuꞌhuin nchgaa xaa ndiꞌin loꞌon, loꞌ nchgaa na nu ndiꞌin ꞌñan, na ꞌin lca na.
\v 32 A mdijin yuꞌhui nu a cuꞌni na taꞌa loꞌ ca tsuꞌhue chuꞌhui tiquee na, siꞌyana yu taꞌa ngula mꞌni na cunta siꞌyana ngujui yu, loꞌ la ñii mdyiquiꞌo yu, cuaꞌ ngunanꞌ yu, una cuaꞌ ñii nguila yu.
\c 16
\s Chaꞌ ꞌin yu nguso nu a ñi ndiꞌin chaꞌ ꞌin
\p
\v 1 Nde xca chaꞌ nu ycuiꞌ ñi loꞌo yu taꞌa ndaꞌan ñi: Ndiꞌin sca yu cuilyiyaꞌ, loꞌ yu nguso nu nguia loꞌo cunta tñan ꞌin yu, jui nu msuꞌhua quiꞌya ꞌin yu siꞌyana ndlyijyi suꞌhua yu na nu ndiꞌin ꞌin xꞌnan yu.
\v 2 Xacanꞌ msiꞌya xꞌnan yu ꞌin yu loꞌ juin: ¿Ta chaꞌ ñi ñaꞌan nchcuiꞌ nten chaꞌ ꞌin? Tsuꞌhue lati chaꞌ tyaa cunta nu nguia loꞌo siꞌyana a tca ꞌa cuꞌni tñan re.
\v 3 Nguñan tiꞌ yu nguso canꞌ: ¿Ñaꞌan ta cuꞌnin ñii, siꞌyana cuaꞌ chcuan yu xꞌnan cunta nu ntsuꞌhui yaanꞌ? Nu tiꞌ cuꞌnin tñan niꞌ quixinꞌ a tca ꞌa ꞌñan, loꞌ jyiꞌo tinꞌ jñan lcuan ꞌin nten.
\v 4 Cuaꞌ jlyo tinꞌ ñaꞌan ntsuꞌhui chaꞌ cuꞌnin, ñaꞌan ca siꞌyana tiꞌ caja nu cuan xuꞌhue ꞌñan xa cuaꞌ mdyaan cunta re.
\v 5 Xacanꞌ msiꞌya yu ꞌin cunda scaa nten nu nducui ꞌin xꞌnan yu, loꞌ juin yu ꞌin nu mdiyaa culoo canꞌ: ¿Tsala nducui ꞌin yu xꞌnan?
\v 6 Loꞌ juin neꞌ: Sca ciento barri ceite. Xacanꞌ juin yu loꞌo neꞌ: Ndla ti cuꞌni loꞌ chcua, suꞌhua nii quityi re loꞌ quinu na ꞌin loꞌo tuꞌhua tyi.
\v 7 Juin yu ꞌin xca neꞌ: Nuꞌhuin, ¿tsala nducui? Mxcuen neꞌ ꞌin: Sca ciento cuijyin trigo. Xacanꞌ juin yu loꞌo neꞌ: Nde suꞌhua nii loꞌ quinu na ꞌin loꞌo jacua yla.
\v 8 Xꞌnan yu nguso canꞌ yuhue ꞌa tiꞌ yu ꞌin siꞌyana tiyaa ꞌa yu loꞌo chaꞌ mañan. Tsañaꞌan nguiaa chaꞌ ꞌin nten chendyu, tiyaa la neꞌ loꞌo chaꞌ mañan que ñaꞌan nguiaa chaꞌ ꞌin sñeꞌ Ndiose nu ndaꞌan loo xaa ꞌin ñi.
\v 9 Cunen loꞌo um sca chaꞌ: Cunan um ñaꞌan nu chuꞌhui taꞌa tsuꞌhue um loꞌo chaꞌ cuilyiyaꞌ nu ndiꞌin loo chendyu re, siꞌyana xa tsatii na, caja nu cuan xuꞌhue ꞌin um sca seꞌen tyiꞌin um niꞌ cuaan tsala xaa.
\v 10 Sca nu ñi ndiꞌin chaꞌ ꞌin loꞌo sca cunta nu suhue ti, cuiꞌ cuañaꞌan ñi ndiꞌin chaꞌ ꞌin loꞌo cunta nu tnu. Sca nu a ñi ndiꞌin chaꞌ ꞌin loꞌo cunta nu suhue ti, cuiꞌ cuañaꞌan nguiaa chaꞌ ꞌin loꞌo cunta nu tnu.
\v 11 Chaꞌ a ñi ndiꞌin chaꞌ ꞌin um loꞌo chaꞌ cuilyiyaꞌ nu ndiꞌin loo chendyu re, ¿ta caja nu xnu cunta ꞌin um loꞌo sca chaꞌ nu ñi ca?
\v 12 Chaꞌ a ñi ndiꞌin chaꞌ ꞌin um loꞌo na ꞌin xca tucui, ¿ta caja nu taa na nu quiꞌni caꞌan ꞌin um?
\v 13 Sca nguso, a tca chuꞌhui tucua xꞌnan yu, siꞌyana ñaꞌan tiꞌi yu ꞌin sca loꞌ xca canꞌ lyee la chuꞌhui yu cunta ꞌin, uta lyee la suꞌhua loo yu ꞌin canꞌ loꞌ xcuan tloo yu ꞌin xca. Ticuiꞌ cuañaꞌan a tca tyiꞌin tyaa um quiloo um ꞌin Ndiose loꞌ ticuiꞌ xaa loꞌo chaꞌ cuilyiyaꞌ.
\v 14 Loꞌo neꞌ fariseo ngune ꞌin neꞌ nchgaa chaꞌ nu ycuiꞌ Jesús, loꞌ mdyisnan mstyi lyiꞌo neꞌ ꞌin ñi siꞌyana lyee ꞌa lca tiquee neꞌ loꞌo tñi.
\v 15 Xacanꞌ juin ñi ꞌin neꞌ: ꞌUn nsuhui um tloo um ticuiiꞌ um, una Ndiose ndyuꞌhui lyoo ñi ñaꞌan lca cusya ꞌin um. Na nu ndon loo ꞌin nten chendyu, Ndiose nxcuan tloo ñi ꞌin na.
\s Jesús ycuiꞌ ñi chaꞌ ꞌin lee
\p
\v 16 Xa tiꞌ lyijyi tiyaan yu Xuhua, jui nu ycuiꞌ chaꞌ ꞌin lee loꞌo chaꞌ nu mdaꞌan ycuiꞌ yu nu mxiycuiꞌ Ndiose ꞌin cuaꞌ sꞌni, una tiꞌ xa mdiyaan yu ndyijyi nu nchcuiꞌ chaꞌ tsuꞌhue ꞌin Ndiose tsañaꞌan ntsuꞌhui chaꞌ culo ñi tñan ꞌin nten, loꞌ nchgaa neꞌ nsuꞌhua neꞌ juesa sten neꞌ loo chaꞌ canꞌ.
\v 17 Ntsuꞌhui chaꞌ tsatii chaꞌ nu nchca niꞌ cuaan loꞌo loo chendyu re, una siꞌi cuañaꞌan loꞌo chaꞌ ꞌin lee, siꞌyana hasta loꞌo chaꞌ nu suhue lati nducua loo na ntsuꞌhui chaꞌ tsatoꞌo na.
\s Chaꞌ ꞌin nten nu ndlaꞌ tiꞌin taꞌa
\p
\v 18 Nchgaa yu nu ndlaꞌ tiꞌin cuilyiꞌo, loꞌ chaꞌ ca cuilyiꞌo yu ꞌin xca neꞌ cunaꞌan nguiꞌni yu quiꞌya, ticuiꞌ cuañaꞌan yu nu ca cuilyiꞌo ꞌin neꞌ cunaꞌan canꞌ, ticuiꞌ quiꞌya nguiꞌni yu.
\s Sca yu cuilyiyaꞌ loꞌo sca yu tiꞌi naan Lázaro
\p
\v 19 Ndiꞌin sca yu cuilyiyaꞌ nu nchcoꞌ chacuiꞌ teꞌ tsuꞌhue ñaꞌan, loꞌ nchgaa tsaan nguiꞌni yu taꞌa nu tnu seꞌen ndiꞌin yu.
\v 20 Tunaꞌan lyiyaꞌ ꞌin yu su sca yu tiꞌi naan Lázaro, tiꞌ ñaꞌaan yu nguxen quitsoꞌ ꞌin yu,
\v 21 lyee lca tiquee yu chaꞌ tca cu yu na nu nguilo nde niꞌ msa ꞌin yu cuilyiyaꞌ canꞌ, hasta xniꞌ loꞌ ndyiꞌan leꞌe ꞌin loo quitsoꞌ canꞌ ꞌin yu.
\v 22 Yatoꞌo ngujui yu tiꞌi canꞌ, loꞌ ya loꞌo angujle ꞌin yu la niꞌ cuaan seꞌen nducua Abraham. A cunta loꞌo yu cuilyiyaꞌ canꞌ ngujui yu loꞌ mtsiꞌ yu.
\v 23 Tiꞌ la seꞌen ndijin yu nu tiꞌi mscuen yu tloo yu, naꞌan yu ꞌin Abraham msuꞌhua tuscun ꞌin yu Lázaro.
\v 24 Ycuiꞌ cueen yu cuilyiyaꞌ canꞌ: Abraham, ꞌun nu lca sti hua, ñaꞌan ꞌtnan tiꞌ um ꞌñan, caꞌan tñan um ꞌin Lázaro caan seꞌen ntsuꞌhuin, cuchaꞌ sca loyaaꞌ loꞌo tyiꞌa loꞌ xicuꞌhua chinꞌ tsenꞌ seꞌen ndijin nu tiꞌi loo quiiꞌ re.
\v 25 Una Abraham mxcuen ꞌin yu: Sñenꞌ, quia yuꞌhui tiꞌ tsala ñaꞌan tsuꞌhue mdiꞌin loo chendyu, a sca na ya lyijyi ꞌin, loꞌ yu Lázaro tiꞌi ꞌa mdijin yu, una cuaꞌ ñii ndyijyi chaꞌ tnu tiquee ꞌin yu, loꞌ nuꞌhuin ndijin nu tiꞌi.
\v 26 A cunta tluꞌhue la re ntsuꞌhui sca seꞌen xeen loꞌ quiꞌñi na, nu ndiꞌin nde re a tca tyijyin tsaa nde cua, cuiꞌ cuañaꞌan loꞌo nu ndiꞌin nde cua, a tca tyijyin caan nde re.
\v 27 Xacanꞌ juin yu cuilyiyaꞌ canꞌ: Una jñan sca chaꞌ tsuꞌhue ꞌin um, ꞌun nu lca sti hua, caꞌan tñan um ꞌin Lázaro tsaa la naꞌan ꞌin stin,
\v 28 siꞌyana tiꞌ ndiꞌin cha caꞌyu taꞌa ngulan, loꞌ suꞌhua tiyaa ꞌin yu siꞌyana a caan yu tyijyin yu nu tiꞌi re.
\v 29 Mxcuen Abraham ꞌin yu: Cuaꞌ nguinu scua chaꞌ nu nguaꞌan Moisé loꞌo chaꞌ nu nguaꞌan yu nu mxiycuiꞌ Ndiose ꞌin cuaꞌ sꞌni, canꞌ chaꞌ nu ntsuꞌhui chaꞌ cuꞌni cunta yu.
\v 30 Xacanꞌ juin yu cuilyiyaꞌ canꞌ: Chaꞌ ñi ñaꞌan nu juin um, una chaꞌ tyiquiꞌo sca nu cuaꞌ ngujui loꞌ tsaa seꞌen ndiꞌin yu, cuiꞌ xaa xiloꞌo chonꞌ yu quiꞌya nguiꞌni yu.
\v 31 Una mxcuen Abraham ꞌin yu: Chaꞌ a nꞌni cunta yu chaꞌ nu nguaꞌan scua Moisé loꞌo chaꞌ nu mxiycuiꞌ Ndiose ꞌin nchgaa la nguso ꞌin ñi, ticuiꞌ cuañaꞌan a tsa quiꞌan tiꞌ yu ꞌin sca nu cuaꞌ mdyiquiꞌo lja neꞌ ngujui.
\c 17
\s Chaꞌ ꞌin nu nxityu xca tucui loo quiꞌya
\p
\v 1 Xacanꞌ juin Jesús ꞌin yu taꞌa ndaꞌan ñi: A sꞌni ljyaan scasca chaꞌ ngunanꞌ nu xityu ꞌin um loo quiꞌya, ¡una ꞌtnan ca nu ljyan loꞌo chaꞌ ngunanꞌ canꞌ!
\v 2 Ndyiꞌo la tñan yni canꞌ, caja nu scanꞌ tucui sca quee tlyu nu ndiyo neꞌ trigo, loꞌ cuun neꞌ ꞌin loo tyiꞌa tujoꞌo, loꞌ siꞌi nu xityu canꞌ ꞌin sca nu suhue ti re loo quiꞌya.
\v 3 Canꞌ chaꞌ xñi um cunta ꞌin um. Chaꞌ sca taꞌa um cuꞌni sca chaꞌ ngunanꞌ loꞌo um, chcuiꞌ um loꞌo siꞌya chaꞌ canꞌ, loꞌ chaꞌ quiꞌya canꞌ cunta siꞌyana siꞌi ñaꞌan mꞌni, cuꞌni um chaꞌ tlyu tiꞌ ꞌin.
\v 4 Chaꞌ tnanꞌ canꞌ chaꞌ ꞌin loꞌo um tsa cati yaꞌ sca tsaan, loꞌ cuiꞌ tsacua yaꞌ xitucui jñan chaꞌ tlyu tiꞌ ꞌin um, cuꞌni um chaꞌ tlyu tiꞌ ꞌin.
\s Chaꞌ ꞌin mti mostaza
\p
\v 5 Yu taꞌa ndaꞌan Ñi Xꞌnan na juin yu ꞌin ñi: Ta yaa um ꞌin hua siꞌyana lyee la tsa quiꞌan tiꞌ hua ꞌin um.
\v 6 Xacanꞌ juin Ñi Xꞌnan na: Xñi um cunta tsala ñaꞌan suhue mti mostaza, una chaꞌ ꞌun ndiya quiꞌan tiꞌ um ꞌñan, tca chcuiꞌ um loꞌo yca cua siꞌyana quiton na seꞌen nducua na loꞌ tsa yuꞌhui na loo tyiꞌa tujoꞌo, loꞌ cuiꞌ cuañaꞌan tsatoꞌo.
\s Chaꞌ ꞌin sca nguso loꞌo tñan ꞌin xꞌnan yu
\p
\v 7 Chaꞌ ndiꞌin sca nguso ꞌin um nu nguiꞌni tñan nguita yuu uta naꞌan seen yu bta ꞌin um, loꞌ xa quila yu yaa yu tñan, ¿ta ngaꞌan chaꞌ chcuiꞌ um loꞌo canꞌ: Chcua lya loꞌ ca xuꞌhue na nu nducua loo msa re?
\v 8 ¿Ta siꞌi na nde ljuin um loꞌo canꞌ: Chaꞌan steꞌ loꞌ cuꞌni chuꞌhue na nu cu siin, loꞌ cuꞌni cunta ꞌñan lja nu cun, loꞌ ndiꞌa cu?
\v 9 ¿Ta ndyaa um xuꞌhue ꞌin yu nguso canꞌ siꞌyana mducua yu tñan tsañaꞌan nu juin um loꞌo yu? Nducua chaꞌ siꞌi na.
\v 10 Cuiꞌ cuañaꞌan ꞌun, xa cuaꞌ mdyi yꞌni um nchgaa tñan nu ngulon ꞌin um, tca ljuin um xacanꞌ: Lca hua sca nguso ti, loꞌ seen ti mꞌni hua tsa tñan nu mdoꞌo ti ꞌin hua.
\s Chaꞌ ꞌin tsa tii yu nu tiꞌi loꞌo quitsoꞌ la
\p
\v 11 Xacanꞌ mdoꞌo Jesús nguiaa ñi tucueen Jerusalén, loꞌ mdijin ñi tuꞌhua yuu ꞌin neꞌ Samaria loꞌo Galilea.
\v 12 Cuaꞌ tiyaa ti ñi sca quichen lyoꞌ ti xa mdoꞌo tsa tii yu nu tiꞌi loꞌo quitsoꞌ la, tijyoꞌ ti ndon yu,
\v 13 loꞌ nchcuiꞌ cueen yu: ¡Jesús, ꞌun ñi nu lca Bstro, ñaꞌan ꞌtnan tiꞌ um ꞌin hua!
\v 14 Xa naꞌan ñi ꞌin yu, xacanꞌ juin ñi: Yaa um loꞌ culoꞌo um ꞌin um ꞌin yu nu ntsuꞌhui cunta ꞌin laa, ñaꞌaan mdoꞌo yu nguiaa yu, mchca yu.
\v 15 Una sca yu canꞌ xa naꞌan yu siꞌyana cuaꞌ mchca yu, cuiꞌ xaa mxitucui yu seꞌen ndon ñi, ycuiꞌ cueen yu loꞌ mꞌni tnu yu ꞌin Ndiose,
\v 16 mdyiꞌya xtyinꞌ yu tloo Jesús tsayaꞌ mdyiꞌya tiꞌin yu tloo yu la lyuu, loꞌ mdyaa yu xuꞌhue ꞌin ñi, loꞌ lca yu neꞌ Samaria.
\v 17 Xacanꞌ juin Jesús: ¿Ta siꞌi tsa tii lca um nu mchca um? Loꞌ cha caa yu canꞌ, ¿la ncua yu ñii?
\v 18 ¿Ta a jui xca tucui nu xitucui tyaa xuꞌhue ꞌin Ndiose, tyi ca ñaꞌan sca yu mxitucui yu, loꞌ lca yu neꞌ Samaria?
\v 19 Xacanꞌ juin ñi ꞌin yu: Tyiton loꞌ quiaa, mchca siꞌyana ya quiꞌan tiꞌ.
\s Chaꞌ nu tsatoꞌo xa quiaan Cristo xiyaꞌ
\p
\v 20 Neꞌ fariseo mñichaꞌ neꞌ ꞌin Jesús chaꞌ ñi xaa tyisnan culo Ndiose tñan ꞌin nten, loꞌ mxcuen ñi ꞌin neꞌ: Tsañaꞌan ntsuꞌhui chaꞌ culo Ndiose tñan ꞌin nten, a ca chcanꞌ ñaꞌan tyisnan chaꞌ canꞌ,
\v 21 ñi a caja nu ljuin: Nde re cuaꞌ mdiyaan na, ta nde cua ndiꞌin na. Una cunen loꞌo um sca chaꞌ: Ndiose cuaꞌ ndlo ñi tñan ꞌin um.
\v 22 Loꞌ juin ñi ꞌin yu taꞌa ndaꞌan ñi: Tiyaa xaa, lyee ca lca tiquee um tiꞌ ñaꞌan um ꞌin Yu Quiꞌyu nu Mdoꞌo nde niꞌ Cuaan siyaꞌ xca tsaan ti, una a la a quine cueen ñi.
\v 23 Caja nu chcuiꞌ loꞌo um xacanꞌ: Nde re cuaꞌ mdiyaan ñi, ta nde cua ndiꞌin ñi. Una a nchca chaꞌ tsaa um, loꞌ ñi a chcui nchaꞌan um ꞌin canꞌ.
\v 24 Siꞌyana tsañaꞌan nchca tiꞌ xa ndyuhui loꞌ nxtyi xaa chcua tyiꞌiin tsoꞌ, cuiꞌ cuañaꞌan ca chcanꞌ Yu Quiꞌyu nu Mdoꞌo nde niꞌ Cuaan tsaan nu ntsuꞌhui chaꞌ quiaan ñi xiyaꞌ.
\v 25 Una culo nducua la ꞌni chaꞌ tyijyin ñi scasca nu tiꞌi, loꞌ xcuan tloo nten chendyu ꞌin ñi.
\v 26 Tsañaꞌan mꞌni nten xa mdiꞌin yu Noé, cuiꞌ cuañaꞌan cuꞌni neꞌ xa tiyaa tsaan nu quiaan Yu Quiꞌyu nu Mdoꞌo nde niꞌ Cuaan.
\v 27 Nten canꞌ nchcu neꞌ, ndyiꞌyo neꞌ, scasca neꞌ ndyija cuilyiꞌo neꞌ tsayaꞌ nu mdiyaa tsaan yten yu Noé niꞌ yca naꞌan, xacanꞌ mdyisnan nguꞌya quio tnu loꞌ ngujlyo na ꞌin nchgaa nten canꞌ.
\v 28 Ticuiꞌ cuañaꞌan mꞌni nten xa mdiꞌin yu Lot, nchcu neꞌ, ndyiꞌyo neꞌ, nsiꞌi neꞌ loꞌ ndyujuiꞌ neꞌ na, nguita neꞌ jyaan loꞌ ntñan neꞌ naꞌan,
\v 29 una tsaan nu mdoꞌo yu Lot quichen Sodoma, mdyiꞌya Ndiose quiiꞌ nu mxitiyaꞌ loꞌo azufre, loꞌ ñaꞌaan nten canꞌ ngujlyo neꞌ.
\v 30 Cuiꞌ cuañaꞌan cuꞌni nten tsaan nu ntsuꞌhui chaꞌ ca chcanꞌ loo Yu Quiꞌyu nu Mdoꞌo nde niꞌ Cuaan.
\v 31 Xacanꞌ yu nu ndlyu nde que naꞌan ꞌin, a bla ꞌa quiꞌya canꞌ lyoo na nu ndiꞌin ñaꞌan ꞌin, ticuiꞌ cuañaꞌan loꞌo yu nu nguiꞌni tñan niꞌ quixinꞌ, a bla ꞌa canꞌ tiꞌ xitucui nde ñaꞌan ꞌin.
\v 32 Quia yuꞌhui tiꞌ um ñaꞌan yatoꞌo ꞌin neꞌ cunaꞌan ꞌin yu Lot.
\v 33 Siꞌyana nchgaa nu ñan tiꞌ culo laa ꞌin ticuiiꞌ, tsatoꞌo quinanꞌ canꞌ tiyaa xaa, una nchgaa nu tyaa chendyu ꞌin ꞌñan, canꞌ nu tyiꞌo laa.
\v 34 Cunen loꞌo um, cuiꞌ tla xa ntsuꞌhui chaꞌ tsatoꞌo chaꞌ re, tucua nu nscua loo quiꞌñan, sca canꞌ quiaa loꞌ xca canꞌ quinu scua.
\v 35 A cunta tucua neꞌ cunaꞌan nu ndiyo sca seꞌen ti, sca canꞌ quiaa loꞌ xca canꞌ quinu ton.
\v 36 Uta tucua yu nu nguiꞌni tñan niꞌ quixinꞌ, sca canꞌ quiaa loꞌ xca canꞌ quinu ton.
\v 37 Yu taꞌa ndaꞌan ñi juin ꞌin ñi: Ñi Xꞌnan hua, ¿la ta tsatoꞌo chaꞌ re? Xacanꞌ mxcuen ñi ꞌin yu: Cuiꞌ seꞌen quinu tuꞌhui nu ngujui, canꞌ ntsuꞌhui chaꞌ quioꞌ tiꞌin laxo.
\c 18
\s Chaꞌ ꞌin neꞌ cunaꞌan loꞌo yu bse
\p
\v 1 A cunta tiꞌ ycuiꞌ la Jesús xca chaꞌ loꞌo yu taꞌa ndaꞌan ñi siꞌyana ꞌni chaꞌ chcuiꞌ lyiꞌo na ꞌin Ndiose nchgaa xaa, loꞌ a cuꞌni naꞌan tiꞌ na.
\v 2 Ndeñaꞌan juin ñi: Ndiꞌin sca yu bse sca quichen, ñi a ntsen yu tloo Ndiose, ñi tloo nten chendyu.
\v 3 A cunta quichen canꞌ ndiꞌin sca neꞌ cunaꞌan nu nguinu loꞌo chaꞌ ycuiꞌ ti, nchgaa xaa ndaꞌan ycuiꞌ neꞌ loꞌo yu bse canꞌ: Cuꞌni cuiyaꞌ um chaꞌ ꞌin hua siꞌya chaꞌ ꞌin nu tiꞌi tiꞌ ꞌin hua.
\v 4 Yu bse canꞌ a mꞌni cunta yu chaꞌ canꞌ cuiꞌ xaa, una chonꞌ ndeꞌen canꞌ nguñan tiꞌ yu: Siyaꞌ a ntsen tloo Ndiose loꞌ ñi a nꞌni suun ꞌin nten,
\v 5 una neꞌ cunaꞌan re ndaꞌan taa neꞌ chaꞌ nsinꞌ tiꞌ ꞌñan, canꞌ chaꞌ cuꞌni cuiyanꞌ chaꞌ ꞌin neꞌ, ñaꞌan tuꞌ tsatii chaꞌ tlyu tiꞌ ꞌñan loꞌo neꞌ.
\v 6 Tiꞌ juin la Ñi Xꞌnan na: Ton nscan um tsañaꞌan ycuiꞌ yu bse nu a ñi ndiꞌin chaꞌ ꞌin canꞌ.
\v 7 Xacanꞌ jan ñi, ¿ta a ndla la cuꞌni cunta Ndiose ꞌin nchgaa nu cuaꞌ mdoꞌo hui ꞌin ñi nu njñan ꞌin ñi tla loꞌ cucha? ¿Ta siꞌi cuiꞌ xaa ti xcuen ñi ꞌin canꞌ?
\v 8 Cunen loꞌo um siꞌyana cuiꞌ xaa ti cuꞌni cuiyaꞌ ñi chaꞌ ꞌin canꞌ. Una Yu Quiꞌyu nu Mdoꞌo nde niꞌ Cuaan, tsaan nu ntsuꞌhui chaꞌ quiaan ñi xiyaꞌ, ¿ta caja nu tsa quiꞌan tiꞌ ꞌin ñi?
\s Chaꞌ ꞌin neꞌ fariseo loꞌo yu nu ndlo tñi
\p
\v 9 Tiꞌ ycuiꞌ la Jesús xca chaꞌ, cuiꞌ chaꞌ ꞌin nu nsuhui tloo ticuiiꞌ una nxcuan tloo ꞌin xca tucui, loꞌ juin ñi:
\v 10 Tucua yu quiꞌyu mdiyaa yu niꞌ lyaa siꞌyana chcuiꞌ lyiꞌo yu ꞌin Ndiose, sca canꞌ lca neꞌ fariseo, loꞌ xca canꞌ lca nu ndlo tñi.
\v 11 Neꞌ fariseo canꞌ ndon neꞌ loꞌ nchcuiꞌ lyiꞌo neꞌ ꞌin Ndiose: Stina Ndiose, tyaan xuꞌhue ꞌin um siꞌyana a lcan ñaꞌan nchca tiꞌ nchgaa la tucui, yu cunan, yu nducunꞌ, yu nguiten yuꞌhui loꞌo scasca neꞌ cunaꞌan, loꞌ ñi a lcan ñaꞌan nchca tiꞌ yu nu ndlo tñi re,
\v 12 cuiꞌ ca nu nꞌnin ayuna tucua yaꞌ sca snan, loꞌ ndaan lcuan loo tñi nu nꞌnin canan sca snan.
\v 13 Una yu nu ndlo tñi canꞌ tijyoꞌ ti ndon yu, ñi a xtyi tiꞌ yu scuen yu tloo yu nde cuaan, cuiꞌ ca nu mdyisnan nycuanꞌ yu jyan tiquee yu loꞌ nchcuiꞌ yu: Stina Ndiose, ñaꞌan ꞌtnan tiꞌ um ꞌñan siꞌyana nanꞌ lcan nten quiꞌya chendyu.
\v 14 Una cunen loꞌo um, yu re mxitucui yu nde ñaꞌan ꞌin yu, a xca ꞌa quiꞌya nducui yu tloo Ndiose, una siꞌi cuañaꞌan loꞌo xca neꞌ canꞌ. Siꞌyana nu nchca tiꞌ scuen cuaan ꞌin ticuiiꞌ, Ndiose ndyiꞌya teꞌen ñi ꞌin canꞌ, una nu nꞌni lyoꞌ ꞌin, canꞌ nu scuen cuaan Ndiose ꞌin.
\s Mxnu Jesús cunta ꞌin nu suhue ti yaaꞌ Ndiose
\p
\v 15 Xacanꞌ mdyisnan mdiyan loꞌo neꞌ ꞌin nu suhue ti tloo Jesús siꞌyana tyiꞌin tyaa ñi yaaꞌ ñi que, loꞌ yu taꞌa ndaꞌan ñi ngusun loꞌo yu ꞌin nten nu ndiyaa canꞌ.
\v 16 Una Jesús msiꞌya ñi ꞌin yu loꞌ juin ñi: Tyaa um yaꞌ caan nu suhue ti seꞌen nducuan, loꞌ a chcui ndijin um, siꞌyana canꞌ nu ntsuꞌhui chaꞌ quiꞌni caꞌan ꞌin seꞌen ndlo Ndiose tñan.
\v 17 Nu chaꞌ ñi cunen loꞌo um, nu nchca tiꞌ sten seꞌen ndlo Ndiose tñan, chaꞌ a tsa quiꞌan tiꞌ ꞌin ñi tsañaꞌan nguiaa chaꞌ ꞌin nu suhue ti, a tca sten canꞌ.
\s Chaꞌ ꞌin sca yu cuilyiyaꞌ
\p
\v 18 Yatoꞌo sca nu ndon loo la ꞌin neꞌ judio mñichaꞌ ꞌin Jesús: ꞌUn lca um sca nu tsuꞌhue ꞌa, ¿ñi na tca cuꞌnin siꞌyana caja chendyu nu a tsatii ꞌa ꞌñan?
\v 19 Mxcuen Jesús ꞌin yu: ¿Ñi chaꞌ nchcuiꞌ siꞌyana lcan sca nten nu tsuꞌhue? A tucui nu tsuꞌhue, cuiꞌ ca nu scati Ndiose.
\v 20 Cuaꞌ jlyo tiꞌ ñaꞌan tñan ngulo Ndiose: —A sten yuꞌhui loꞌo cuilyiꞌo nten, a cujui nten, a cuꞌni cunan, a chcuiꞌ chaꞌ cuiñi, cuꞌni suun ꞌin tloo sti loꞌo jyiꞌan—.
\v 21 Mxcuen yu ꞌin ñi: Tiꞌ lyonꞌ nxuꞌhuan seꞌen nchgaa chaꞌ re.
\v 22 Xa ngune ꞌin Jesús chaꞌ nu ycuiꞌ yu, juin ñi ꞌin yu: Xca ti chaꞌ ya lyijyi ꞌin. Quiaa yjuiꞌ nchgaa na nu ndiꞌin ꞌin loꞌ cutsa tñi canꞌ ꞌin nu tiꞌi, cuañaꞌan caja chaꞌ cuilyiyaꞌ ꞌin la niꞌ cuaan, xacanꞌ chcui nchaꞌan ꞌñan.
\v 23 Xa ngune ꞌin yu chaꞌ canꞌ, nguluꞌun ꞌa tiꞌ yu siꞌyana cuilyiyaꞌ ꞌa yu.
\v 24 Xa naꞌan Jesús siꞌyana nguluꞌun tiꞌ yu, xacanꞌ juin ñi: Tucui ꞌa ñaꞌan sten neꞌ cuilyiyaꞌ seꞌen ndlo Ndiose tñan.
\v 25 A tucui la tyijyin sca camello quito quiyaꞌ cuxa que ñaꞌan nu sten neꞌ cuilyiyaꞌ seꞌen ndlo Ndiose tñan.
\v 26 Loꞌ nu ngune ꞌin chaꞌ canꞌ mdyisnan ycuiꞌ: ¿Ti nu tca tyiꞌo laa chaꞌ na canꞌ?
\v 27 Xacanꞌ juin ñi: Chaꞌ nu tucui ꞌin nten chendyu, a tucui na ꞌin Ndiose.
\v 28 Xacanꞌ juin yu Tyo: Huareꞌ cuaꞌ mxnu tiꞌin hua nchgaa na nu ndiꞌin ꞌin hua, loꞌ nducui nchaꞌan hua ꞌin um.
\v 29 Mxcuen Jesús ꞌin yu: Nu chaꞌ ñi cunen loꞌo um, chaꞌ ndeꞌen nu xnu tucua naꞌan ꞌin, uta xnu tiꞌin nten cula ꞌin, loꞌo taꞌa ngula, ta cunaꞌan ꞌin uta sñeꞌ, siꞌya chaꞌ ꞌin Ndiose,
\v 30 canꞌ nu lyee la caja chaꞌ tsuꞌhue ꞌin loo chendyu re, a cunta tiyaa xaa quiꞌni caꞌan ꞌin loꞌo chendyu nu a tsatii ꞌa.
\s Xiyaꞌ ycuiꞌ Jesús siꞌyana ntsuꞌhui chaꞌ caja ñi
\p
\v 31 Xacanꞌ sca cunta mdoꞌo loꞌo Jesús ꞌin yu taꞌa ndaꞌan ñi, loꞌ juin ñi ꞌin yu: Cuaꞌ ñii tsaa na Jerusalén, loꞌ tsatoꞌo nchgaa chaꞌ nu nguinu scua chaꞌ ꞌin Yu Quiꞌyu nu Mdoꞌo nde niꞌ Cuaan, tsañaꞌan nguaꞌan yu nu mxiycuiꞌ Ndiose ꞌin cuaꞌ sꞌni.
\v 32 Tyaa neꞌ ꞌin ñi tuyaaꞌ neꞌ gentil, taa neꞌ chaꞌ jyiꞌo ꞌin ñi, cuꞌni lyiꞌo ꞌtnan neꞌ loꞌ suꞌhua siyeꞌ neꞌ tloo ñi.
\v 33 Xa cuaꞌ mjyiꞌin neꞌ ꞌin ñi, xacanꞌ cujui neꞌ ꞌin ñi, una xa cuaꞌ ca snan tsaan tyiquiꞌo ñi.
\v 34 Una yu taꞌa ndaꞌan ñi a nguꞌya yu chaꞌ tiyaa siꞌyana tiꞌ nchcun chaꞌ tiyaa ꞌin yu, canꞌ chaꞌ a ngujlyo tiꞌ yu chaꞌ nu ycuiꞌ ñi.
\s Chaꞌ ꞌin sca yu cuityinꞌ ndiꞌin quichen Jericó
\p
\v 35 Yatoꞌo xa mdiyaa Jesús tuꞌhua quichen Jericó, tuꞌhua tucueen canꞌ nducua sca yu cuityinꞌ nu njñan lcuan ꞌin nten,
\v 36 xa ngune ꞌin yu ndijin nten quiꞌan canꞌ, mñichaꞌ yu chaꞌ ñi na nchca.
\v 37 Jui nu mtsaꞌ ꞌin yu siꞌyana Jesús Nazaret nguiaa canꞌ.
\v 38 Xacanꞌ mdyisnan msiꞌya cueen yu ꞌin ñi: Jesús, Sñeꞌ ta nten ꞌin Davi, ñaꞌan ꞌtnan tiꞌ um ꞌñan.
\v 39 Nten nu nducua loo canꞌ ngusun loꞌo ꞌin yu siꞌyana chcua seen tuꞌhua yu, una nde lyee la msiꞌya yu: Sñeꞌ ta nten ꞌin Davi, ñaꞌan ꞌtnan tiꞌ um ꞌñan.
\v 40 Xacanꞌ ycanꞌ ton Jesús, loꞌ ngulo ñi tñan siꞌyana tsa teꞌen neꞌ ꞌin yu. Xa mdiyaa yu seꞌen ndon ñi, mñichaꞌ ñi ꞌin yu:
\v 41 ¿Ñi na ta nchca tiꞌ cuꞌnin loꞌo? Mxcuen yu xacanꞌ: Ñi Xꞌnan hua, nchca tinꞌ siꞌyana quila xaa quiloon.
\v 42 Xacanꞌ juin Jesús: Quila xaa quiloo, cuaꞌ mchca siꞌyana ya quiꞌan tiꞌ ꞌñan.
\v 43 Ticuiꞌ xaa canꞌ nguila xaa quiloo yu, loꞌ mducui nchaꞌan yu ꞌin ñi, mꞌni tnu yu ꞌin Ndiose. Nchgaa nten xa naꞌan neꞌ chaꞌ canꞌ mdaa neꞌ loo Ndiose.
\c 19
\s Chaꞌ ꞌin Jesús loꞌo Zaqueo
\p
\v 1 Jesús nguia ndijin ñi quichen Jericó,
\v 2 canꞌ ndiꞌin sca yu cuilyiyaꞌ naan Zaqueo, xꞌnan yu nu ndlo tñi.
\v 3 Nchca tiꞌ yu chuꞌhui lyoo yu ꞌin Jesús, una a ncua ñaꞌan yu ꞌin ñi siꞌya nten quiꞌan canꞌ, a cunta siꞌyana lyoꞌ ti ndyon yu.
\v 4 Xacanꞌ mdoꞌo yu msnan yu nde loo seꞌen ntsuꞌhui chaꞌ tyijyin ñi, canꞌ ycuen yu sca loo yca nu naan sicómoro seꞌen nu tca ñaꞌan yu ꞌin ñi.
\v 5 Xa mdijin Jesús canꞌ, mxinaꞌan ñi nde cuaan loꞌ naꞌan ñi ꞌin yu, loꞌ juin ñi: Zaqueo, ndla ti quiꞌya, siꞌyana cuaꞌ ñii tsaꞌan seꞌen ndiꞌin.
\v 6 Ndla ndsa ti nguꞌya yu, tsuꞌhue ntsuꞌhui tiquee yu ncuan xuꞌhue yu ꞌin ñi seꞌen ndiꞌin yu.
\v 7 Xa naꞌan nten chaꞌ canꞌ, scasca neꞌ mdyisnan ycuiꞌ neꞌ ñi chaꞌ mdiyaa ñi seꞌen ndiꞌin sca nten quiꞌya chendyu.
\v 8 Xacanꞌ mdyiton yu Zaqueo seꞌen nducua yu loꞌo Ñi Xꞌnan na, loꞌ juin yu: Ñi Xꞌnan hua, cuaꞌ ñii taan tsa tluꞌhue na nu ndiꞌin ꞌñan ꞌin nu tiꞌi ñaꞌan chendyu ꞌin, loꞌ chaꞌ ndeꞌen nu ngulon tñi ꞌin loꞌo chaꞌ mañan, tsa jacua ta xuꞌhuan ꞌin na ꞌin.
\v 9 Loꞌ juin Jesús ꞌin yu: Naꞌan re ndiꞌin sca nu cuaꞌ mdoꞌo laa, siꞌyana loꞌo yu lca yu ta nten ꞌin Abraham.
\v 10 Siꞌyana Yu Quiꞌyu nu Mdoꞌo nde niꞌ Cuaan ljyan nan ñi ꞌin nu ngunanꞌ yuꞌhui siꞌyana tyiꞌo laa.
\s Chaꞌ ꞌin tsa tii nguso nu mchcuan cunta tñi
\p
\v 11 Siꞌyana ndon nscan neꞌ chaꞌ nu nchcuiꞌ ñi, mdyisnan ycuiꞌ ñi xca chaꞌ, a cunta cuiꞌ ti canꞌ ndiꞌin Jerusalén, loꞌ nten canꞌ ñan tiꞌ neꞌ siꞌyana ticuiꞌ xaa tyisnan culo Ndiose tñan ꞌin neꞌ.
\v 12 Juin ñi xacanꞌ: Sca yu quiꞌyu nu ndon loo la ꞌin neꞌ nguiaa yu sca seꞌen tijyoꞌ, siꞌyana chcuan yu sca chaꞌ cuiyaꞌ nu culo yu tñan, la xacanꞌ xitucui yu.
\v 13 Xa tiꞌ lyijyi tyiꞌo yu msiꞌya yu ꞌin tsa tii nguso ꞌin yu, loꞌ mdaa yu tñi ꞌin cunda scaa yu, loꞌ juin yu ꞌin: Cuꞌni um tñan loꞌo tñi re ꞌñan lja tsaꞌan loꞌ xitucuin.
\v 14 Una taꞌa quichen tyi yu tiꞌi tiꞌ neꞌ ꞌin yu, loꞌ nguaꞌan tñan neꞌ tucua snan nu ya suꞌhua quiꞌya ꞌin yu seꞌen nguiaa yu, loꞌ juin neꞌ: A nchca tiꞌ hua siꞌyana culo yu cua tñan ꞌin hua.
\v 15 Yatoꞌo xa cuaꞌ mchcuan yu chaꞌ cuiyaꞌ canꞌ nguila yu, xacanꞌ msiꞌya yu ꞌin nguso nu mchcuan cunta tñi canꞌ, siꞌyana ca cuiyaꞌ tiꞌ yu tsala cuaꞌ mꞌni na canan.
\v 16 Loꞌ juin nu mdiyaan culoo canꞌ: Ñi Xꞌnan hua, tsa tii tñi mꞌnin canan loꞌo tñi nu mdaa um ꞌñan.
\v 17 Loꞌ juin xꞌnan yu xacanꞌ: Tsuꞌhue ꞌa, nuꞌhuin lca sca nguso nu ñi ndiꞌin chaꞌ ꞌin, loo nu mducua tñan loꞌo tsachinꞌ na nu mxnun ꞌin, canꞌ chaꞌ cuaꞌ ñii ntsuꞌhui chaꞌ culo tñan ꞌin tsa tii quichen.
\v 18 Xacanꞌ mdiyaan xca yu, loꞌ juin yu: Ñi xꞌnan hua, tsa caꞌyu tñi mꞌnin canan loꞌo tñi nu mdaa um ꞌñan.
\v 19 Ticuiꞌ cuañaꞌan juin xꞌnan canꞌ ꞌin: Loꞌo nuꞌhuin ntsuꞌhui chaꞌ culo tñan ꞌin tsa caꞌyu quichen.
\v 20 Chonꞌ ndeꞌen canꞌ mdiyaan xca yu loꞌ juin: Ñi xꞌnan hua, nde tñi nu mdaa um ꞌñan, tsuꞌhue ꞌa yuꞌhui seꞌen na ꞌñan,
\v 21 ytsen ꞌin um siꞌyana tla ꞌa ndiꞌin tyaa um sca chaꞌ, nchcuan um loꞌo na nu a ndaa um, loꞌ nxoꞌ um na nu a ntya um.
\v 22 Xacanꞌ mxcuen xꞌnan yu ꞌin yu: Nuꞌhuin lca sca nguso nu a ñi ndiꞌin chaꞌ ꞌin, ticuiiꞌ chonꞌ yaan chaꞌ nu ycuiꞌ. Chaꞌ jlyo tiꞌ siꞌyana tla chaꞌ nchcuinꞌ, nchcuan loꞌo na nu a ndaan, loꞌ nxonꞌ na nu a ntyan,
\v 23 ¿ñi chaꞌ a mdaa tñi canꞌ jñiꞌ xca tucui, loꞌ nu nguilan cuaꞌ ñii chcuan ꞌin na loꞌo sñeꞌ na?
\v 24 Xacanꞌ juin xꞌnan canꞌ ꞌin nu ndon cuiꞌ ti canꞌ: Chcuan um tñi ꞌin yu re, loꞌ taa um ꞌin na ꞌin nu cuaꞌ su tsa tii na ꞌin.
\v 25 Mxcuen neꞌ: Ñi Xꞌnan hua, una yu cua cuaꞌ su tsa tii tñi ꞌin yu.
\v 26 Una cunen loꞌo um sca chaꞌ, nchgaa nu cuaꞌ ndiꞌin chaꞌ tsuꞌhue ꞌin nde caja la na ꞌin, una nu a ndiꞌin na ꞌin, loꞌo tsachinꞌ na nu ndiꞌin ꞌin nde caja nu lyaa ꞌin na.
\v 27 A cunta loꞌo nu tiꞌi tiꞌ ꞌñan, nu a ncua tiꞌ ca jaꞌan ꞌñan, can loꞌo um ꞌin canꞌ loꞌ cujui um ꞌin.
\s Yten Jesús quichen Jerusalén loꞌ mꞌni tnu neꞌ ꞌin ñi
\p
\v 28 Xa cuaꞌ mdyi ycuiꞌ ñi chaꞌ canꞌ, mducua loo ñi nguiaa ñi nde quichen Jerusalén.
\v 29 Yatoꞌo xa cuaꞌ tiyaa ti jun quichen Betfagé loꞌo quichen Betania, cuiꞌ ti canꞌ nducua quiꞌya nu nchcuiꞌ neꞌ loꞌo lca Olivo, loꞌ mxitucua loo ñi ꞌin tucua yu taꞌa ndaꞌan ñi,
\v 30 loꞌ juin ñi ꞌin yu: Yaa um seꞌen ndiꞌin quichen lyoꞌ ti cua, loꞌ xa sten um tuꞌhua quichen cua, ñaꞌan um chcanꞌ ton sca burru cuneꞌ ti nu a nchca tucui chcua. Xtinꞌ um ꞌin ꞌin loꞌ quian loꞌo um ꞌin ꞌin.
\v 31 Chaꞌ ndeꞌen nu cuñichaꞌ ꞌin um: ¿Ñi chaꞌ nxtinꞌ um ꞌin ꞌin? Loꞌ ljuin um ꞌin neꞌ siꞌyana Ñi Xꞌnan na nchca tiꞌ ꞌin ꞌin.
\v 32 Xacanꞌ mdoꞌo chcuaa yu canꞌ nguiaa yu, loꞌ nguija lyoo yu ꞌin ꞌin tsañaꞌan nu juin ñi loꞌo yu.
\v 33 Lja ndon xtinꞌ yu ꞌin ꞌin, mdoꞌo xꞌnan ꞌin loꞌ juin loꞌo yu: ¿Ñi chaꞌ nxtinꞌ um burru cua?
\v 34 Mxcuen yu ꞌin neꞌ: Siꞌyana Ñi Xꞌnan na nchca tiꞌ ꞌin ꞌin.
\v 35 Xacanꞌ nguila loꞌo yu ꞌin ꞌin seꞌen ndon Jesús, msla scua yu steꞌ yu chonꞌ ꞌin, loꞌ mda yaaꞌ yu ꞌin ñi ycuen ñi chonꞌ ꞌin.
\v 36 Cuaꞌ yaa ñaꞌan nguiaa ñi, msla sti neꞌ steꞌ neꞌ tucueen canꞌ.
\v 37 Xa cuaꞌ nguiaa ñi tsalcui quiyaꞌ quiꞌya Olivo canꞌ, nchgaa nu nguia nchaꞌan ꞌin ñi tsatlyu loꞌo taꞌa ndaꞌan ñi, ndyijyin yaꞌ tsuꞌhue ntsuꞌhui tiquee neꞌ nchcuiꞌ cueen neꞌ, loꞌ nguiꞌni tnu neꞌ ꞌin Ndiose siꞌya scasca chaꞌ tnu nu naꞌan neꞌ,
\v 38 loꞌ nchcuiꞌ neꞌ: —Tlyu chaꞌ tsuꞌhue ntsuꞌhui ꞌin ñi nu lca Ree nu ljyaan loꞌo chaꞌ cuiyaꞌ ꞌin Ñi Xꞌnan na—. Cuaꞌ mꞌni chuꞌhue ñi chaꞌ ꞌin na la niꞌ cuaan, cuꞌni tnu na ꞌin Ndiose.
\v 39 Xacanꞌ tucua snan neꞌ fariseo nu nguiaa lja nten canꞌ juin neꞌ ꞌin ñi: ꞌUn ñi nu lca Bstro, xun loꞌo um ꞌin taꞌa ndaꞌan um re siꞌyana chcua seen tuꞌhua neꞌ.
\v 40 Mxcuen ñi ꞌin neꞌ: Cunen loꞌo um sca chaꞌ, chaꞌ nten re chcua seen tuꞌhua neꞌ, quee cua tsatoꞌo chcuiꞌ cueen na xacanꞌ.
\v 41 Cuaꞌ tiyaa ti ñi tuꞌhua quichen Jerusalén, una xa naꞌan ñi ꞌin na, nguꞌya sca tuꞌhua tiquee ñi loꞌ ynan ñi siꞌya na,
\v 42 loꞌ juin ñi ꞌin quichen canꞌ: Chaꞌ cua na tca ca cuiyaꞌ tiꞌ um chaꞌ nu cuꞌni tsuꞌhue loꞌo um, siyaꞌ cuaꞌ tsuꞌhue sca tsaan ti re ñii, una mchcun yuꞌhui chaꞌ re tsoꞌ nu ꞌin um.
\v 43 Siꞌyana cuaꞌ ljyaan tsaan nu chen chcui ꞌin um, xa caan taꞌa cusuun um suꞌhua loꞌo ꞌin um, tñan canꞌ xca loꞌo quee chcua tyiꞌiin tsoꞌ seꞌen ndiꞌin um, loꞌ cuañaꞌan suꞌhua nchcun ꞌin um,
\v 44 cujlyo canꞌ ꞌin um siyaꞌ ti tsatlyu loꞌo sñeꞌ um, loꞌ ñi sca quee loꞌ a quinu scua ꞌa na chonꞌ taꞌa na, siꞌyana a ncuan xuꞌhue um ꞌin ñi nu ljyaan seꞌen ndiꞌin um.
\s Ngulo Jesús ꞌin nten nu ndyujuiꞌ na niꞌ lyaa
\p
\v 45 Xacanꞌ yten ñi niꞌ lyaa, loꞌ ngulo ñi ꞌin nchgaa nu ndujuiꞌ loꞌ nsiꞌi na tunaꞌan lyiyaꞌ canꞌ.
\v 46 Juin ñi ꞌin nten canꞌ: Quityi ꞌin Ndiose nchcuiꞌ na: —Naꞌan ꞌñan lca na seꞌen nchcuiꞌ lyiꞌo neꞌ ꞌñan—, loꞌ ꞌun nguiꞌni um ꞌin na lca na —naꞌan tyi yu cunan—.
\v 47 Cunda scaa tsaan ndloꞌo ñi ꞌin nten niꞌ lyaa canꞌ, una yu nu ndlo ca tñan, tsatlyu loꞌo neꞌ escriba loꞌo quiꞌyu cula, ngunan neꞌ ñaꞌan nu cujui neꞌ ꞌin ñi.
\v 48 Una a jui ñaꞌan cuꞌni neꞌ tsañaꞌan nu nchca tiꞌ neꞌ, siꞌyana ñaꞌaan quichen canꞌ tsuꞌhue ndon nscan neꞌ chaꞌ nu ndloꞌo ñi.
\c 20
\s Chaꞌ cuiyaꞌ nu ndon loꞌo Jesús
\p
\v 1 Yatoꞌo xca tsaan lja ndloꞌo Jesús ꞌin nten niꞌ lyaa, nchcuiꞌ ñi chaꞌ tsuꞌhue ꞌin Ndiose, loꞌ tucua snan yu nu ndlo ca tñan niꞌ lyaa, tsatlyu loꞌo neꞌ escriba, loꞌo quiꞌyu cula mdiyaa neꞌ seꞌen ndon ñi,
\v 2 loꞌ juin neꞌ ꞌin ñi: Quitsaꞌ ꞌin hua, ¿la jui chaꞌ cuiyaꞌ ꞌin loꞌo chaꞌ nu nguiꞌni re, loꞌ ti nu mdaa ꞌin na ꞌin?
\v 3 Mxcuen Jesús ꞌin neꞌ: Loꞌon nanꞌ nchca tinꞌ cuñichanꞌ ꞌin um sca chaꞌ, chaꞌ ñaꞌan xcuen um ꞌñan.
\v 4 Yu Xuhua nu mducua tya ꞌin nten, ¿ta niꞌ cuaan mdoꞌo chaꞌ cuiyaꞌ ꞌin yu, uta na nten chendyu mdaa ꞌin na?
\v 5 Xacanꞌ scasca neꞌ mñichaꞌ taꞌa neꞌ: Chaꞌ ljuin na siꞌyana niꞌ cuaan mdoꞌo chaꞌ cuiyaꞌ canꞌ, tinaꞌan xcuen yu ꞌin na, ¿ñi chaꞌ a ya quiꞌan tiꞌ um ꞌin yu?
\v 6 Chaꞌ ljuin na siꞌyana nten chendyu mdaa chaꞌ cuiyaꞌ canꞌ, una ñaꞌaan quichen neꞌ jyiꞌin neꞌ quee ꞌin na, siꞌyana ncua cuiyaꞌ tiꞌ neꞌ yu Xuhua canꞌ ncua yu sca nu mxiycuiꞌ Ndiose ꞌin.
\v 7 Mxcuen neꞌ ꞌin ñi siꞌyana a jlyo tiꞌ neꞌ ti nu mdaa chaꞌ cuiyaꞌ canꞌ.
\v 8 Xacanꞌ juin Jesús ꞌin neꞌ: Loꞌon nanꞌ a tca quitsanꞌ ꞌin um la jui chaꞌ cuiyaꞌ ꞌñan loꞌo chaꞌ nu nguiꞌnin re.
\s Chaꞌ ꞌin yu nducunꞌ loꞌo seꞌen nducua ti uva
\p
\v 9 Xacanꞌ mdiꞌin tyaa Jesús sca chaꞌ loꞌo nten canꞌ loꞌ juin ñi: Sca yu quiꞌyu yta sca jyan chacuiꞌ ti uva, loꞌ mxnu yu ꞌin na nda tluꞌhue loꞌo yu nu chuꞌhui cunta ꞌin na, xacanꞌ mdoꞌo yu nguiaa yu sca seꞌen tijyoꞌ xꞌni yaꞌ.
\v 10 Xa mdiyaa xaa nu ntsuꞌhui chaꞌ quioꞌ mti canꞌ, nguaꞌan tñan yu sca nguso nu chcuan cunta na nu quiꞌni caꞌan ꞌin yu. Una yu nu ntsuꞌhui cunta tñan canꞌ mjyiꞌin ꞌin yu nu mdiyaa canꞌ, loꞌ mducui xuꞌhua ꞌin yu nguiaa yu cua ti ñaꞌan.
\v 11 Xꞌnan tñan canꞌ nguaꞌan tñan yu xca nguso ꞌin yu, una ticuiꞌ cuañaꞌan mjyiꞌin yu ꞌin nu mdiyaa canꞌ, cuaꞌ ñaꞌan ti mꞌni lyiꞌo yu ꞌin, loꞌ mducui xuꞌhua yu ꞌin nguiaa cua ti ñaꞌan.
\v 12 Yu xꞌnan tñan canꞌ nguaꞌan tñan yu xca nguso ꞌin yu, nu cuaꞌ nchca snan juesa, ticuiꞌ ti ñaꞌan yjui yuhuaꞌ yu ꞌin nu mdiyaa canꞌ loꞌ ngulo yu ꞌin nde chonꞌ loꞌo.
\v 13 Xacanꞌ nguñan tiꞌ xꞌnan tñan canꞌ: ¿Ñaꞌan ta cuꞌnin ñii? Caꞌan tñan ycuiꞌ ca sñenꞌ nu taꞌa la ꞌñan, tinaꞌan cuꞌni cunta yu chaꞌ nu nchcuiꞌ canꞌ xa tiyaa la cua.
\v 14 Una yu nu ntsuꞌhui cunta ꞌin tñan canꞌ, xa naꞌan yu ljyaan sñeꞌ xꞌnan tñan canꞌ mdyisnan ycuiꞌ scasca yu: Nde ljyaan yu nu quinu ca tñan re ꞌin, ndla ti um loꞌ cujui na ꞌin yu loꞌ quinu tñan re ꞌin na.
\v 15 Cuiꞌ xaa ngulo yu ꞌin nde chonꞌ loꞌo, loꞌ yjui yu ꞌin. Xacanꞌ jan ñi, ¿ñaꞌan ta cuꞌni xꞌnan tñan canꞌ loꞌo yu?
\v 16 Cuiꞌ ca nu xitucui yu loꞌ cujui yu ꞌin nu ntsuꞌhui cunta tñan canꞌ, loꞌ taa yu ꞌin na cuꞌni cunta xca tucui. Xa ngune ꞌin neꞌ chaꞌ nu ycuiꞌ ñi, juin neꞌ xacanꞌ: ¡A cula yaꞌ Ndiose ꞌin na!
\v 17 Una Jesús mxinaꞌan ñi seꞌen ndon neꞌ loꞌ juin ñi: ¿Ñi chaꞌ nchca tiꞌ chcuiꞌ quityi ꞌin Ndiose xa nchcuiꞌ na: —Quee nu mscuan tloo yu cuityi naꞌan, cuaꞌ ñii lca na quee nu nsñi ton ꞌin naꞌan—?
\v 18 Nchgaa nu tlyu scua chonꞌ quee canꞌ, quita canꞌ, una chaꞌ quee canꞌ tyu na chonꞌ neꞌ, jlyo neꞌ siyaꞌ ti.
\s Chaꞌ ꞌin tñi nu suꞌhua lyiyaꞌ neꞌ ꞌin César
\p
\v 19 Xacanꞌ yu nu ndlo ca tñan niꞌ lyaa loꞌo neꞌ escriba ngunan neꞌ ñaꞌan nu quinu Jesús ticuiꞌ xaa, siꞌyana nguꞌya neꞌ cunta chaꞌ ꞌin neꞌ ycuiꞌ ñi, una a msti tiꞌ neꞌ xñi neꞌ ꞌin ñi siꞌyana nguitsen neꞌ ꞌin nten quichen canꞌ.
\v 20 Una xa jui ñaꞌan ꞌin neꞌ nguaꞌan tñan neꞌ tucua snan nu tsaa loꞌo chaꞌ mañan, loꞌ cuꞌni canꞌ ꞌin siꞌyana lca sca nten nu suun, ñaꞌan ca siꞌyana suꞌhua neꞌ quiꞌya ꞌin ñi loꞌo chaꞌ nu chcuiꞌ ñi, la xacanꞌ tyaa neꞌ ꞌin ñi tuyaaꞌ bsya nu cuꞌni cuiyaꞌ chaꞌ ꞌin ñi.
\v 21 Loꞌ mñichaꞌ neꞌ ꞌin ñi: ꞌUn ñi nu lca Bstro, cuaꞌ jlyo tiꞌ hua siꞌyana cuiꞌ ñaꞌan ndloꞌo um, a cunta scañaꞌan ti nꞌni um ꞌtnan ꞌin nten, loꞌ ndloꞌo um chaꞌ nu ñi ꞌin Ndiose tsañaꞌan nu ntsuꞌhui chaꞌ cuꞌni na.
\v 22 ¿Ta tiꞌ tsuꞌhue taa na tñi nu njñan yu César, uta na a tsuꞌhue ꞌa?
\v 23 Una ngüi tiꞌ ñi siꞌyana nchcuiꞌ neꞌ loꞌo chaꞌ mañan, xacanꞌ juin ñi ꞌin neꞌ: ¿Ñi chaꞌ ta nchcuiꞌ um loꞌon cuañaꞌan?
\v 24 Tyaa um sca tñi ꞌñan, ñaꞌan na. ¿Tucui ca ꞌin lcuin ngaꞌan chonꞌ tñi re, loꞌ ti nu niin ngaꞌan ꞌin na? Xacanꞌ mxcuen neꞌ ꞌin ñi: Yu César.
\v 25 Juin ñi xacanꞌ: Tyaa um ꞌin César na nu ntsuꞌhui chaꞌ quiꞌni caꞌan ꞌin yu, cuiꞌ cuañaꞌan taa um ꞌin Ndiose na nu quiꞌni caꞌan ꞌin ñi.
\v 26 Siꞌya nten quiꞌan canꞌ a jui ñaꞌan suꞌhua neꞌ quiꞌya ꞌin ñi loꞌo chaꞌ nu ycuiꞌ ñi, cuiꞌ ca nu nguinu ton seen neꞌ loꞌ yuhue ꞌa tiꞌ neꞌ loꞌo chaꞌ nu mxcuen ñi.
\s Neꞌ saduceo loꞌo chaꞌ nu tyiquiꞌo nten
\p
\v 27 Xacanꞌ mdiyaa tucua snan neꞌ saduceo seꞌen ndon ñi, cuiꞌ nu a ndiya quiꞌan tiꞌ siꞌyana ntsuꞌhui chaꞌ tyiquiꞌo nten, loꞌ mñichaꞌ neꞌ ꞌin ñi:
\v 28 ꞌUn ñi nu lca Bstro, yu Moisé ndeñaꞌan nguaꞌan yu sca chaꞌ: —Sca yu quiꞌyu nu cuaꞌ jui cuilyiꞌo loꞌ chaꞌ caja yu, loꞌ ñi sca sñeꞌ neꞌ loꞌ a mdiꞌin loꞌo yu, xacanꞌ ticuiꞌ taꞌa ngula nu ngujui canꞌ tyiꞌin lyiꞌo ꞌin neꞌ cunaꞌan canꞌ, loꞌ chaꞌ tyiꞌin sñeꞌ neꞌ cuꞌni neꞌ cunta siꞌyana sñeꞌ neꞌ loꞌo cuilyiꞌo ca neꞌ lca canꞌ—.
\v 29 Tyiꞌin tyaa na sca chaꞌ, ndiꞌin tsa cati yu quiꞌyu, sca taꞌa ngula ti yu. Yu nu cula la canꞌ jui cuilyiꞌo yu, loꞌ ngujui yu, una a mdiꞌin sñeꞌ neꞌ loꞌo yu.
\v 30 Xacanꞌ yu nu cuaꞌ nchca tucua canꞌ mdiꞌin lyiꞌo ꞌin neꞌ cunaꞌan canꞌ, ticuiꞌ cuañaꞌan ngujui yu, loꞌ ñi sca sñeꞌ neꞌ loꞌ a mdiꞌin loꞌo yu.
\v 31 Ticuiꞌ cuañaꞌan yatoꞌo loꞌo nu cuaꞌ nchca snan canꞌ, ngujui yu, loꞌ scañaꞌan ti yatoꞌo ꞌin taꞌa cati yu canꞌ, loꞌ a mdiꞌin sñeꞌ neꞌ loꞌo yu.
\v 32 Yatoꞌo loꞌo neꞌ cunaꞌan canꞌ ngujui neꞌ.
\v 33 Xacanꞌ jan ñii, xa ntsuꞌhui chaꞌ tyiquiꞌo nten, ¿ti ñaꞌan yu canꞌ lca cuilyiꞌo ca neꞌ cunaꞌan canꞌ, siꞌyana taꞌa cati yu mdiꞌin lyiꞌo yu ꞌin neꞌ?
\v 34 Xacanꞌ mxcuen Jesús ꞌin yu: Nten chendyu re ndyijyi cuilyiꞌo neꞌ,
\v 35 una nten un tyiquiꞌo loꞌ ntsuꞌhui xuꞌhue loꞌo xca chendyu, a ntsuꞌhui ꞌa chaꞌ tiꞌ caja cuilyiꞌo neꞌ,
\v 36 loꞌ ñi a ntsuꞌhui ꞌa chaꞌ tiꞌ caja canꞌ, siꞌyana suꞌhua ñaꞌan ndiꞌin chaꞌ ꞌin loꞌo angujle, cuaꞌ lca canꞌ sñeꞌ Ndiose siꞌya chaꞌ nu mdyiquiꞌo.
\v 37 Una tsañaꞌan ndiꞌin chaꞌ ꞌin neꞌ ngujui nu ntsuꞌhui chaꞌ tyiquiꞌo, yu Moisé nguaꞌan yu chaꞌ re xa naꞌan yu ꞌin yca quicheꞌ nu ndiquin canꞌ, loꞌ nchcuiꞌ na siꞌyana Ñi Xꞌnan na lca ñi —Ndiose ꞌin Abraham, Ndiose ꞌin Isaac, Ndiose ꞌin Jacob—.
\v 38 A lca ñi Ndiose ꞌin neꞌ ngujui, cuiꞌ ca nu lca ñi Ndiose ꞌin neꞌ nu loꞌo, siꞌyana cunta chaꞌ nu ꞌin ñi nchgaa nten loꞌo neꞌ.
\v 39 Xacanꞌ tucua snan neꞌ escriba juin ꞌin ñi: ꞌUn ñi nu lca Bstro, cuiꞌ ñaꞌan nu ycuiꞌ um.
\v 40 Loꞌ ñi xca chaꞌ a msti ꞌa tiꞌ neꞌ cuñichaꞌ neꞌ ꞌin ñi. ¿Ti nu sñeꞌ ꞌin Cristo?
\v 41 Xacanꞌ juin ñi ꞌin nten canꞌ: ¿Ñi chaꞌ ta nchcuiꞌ nten siꞌyana Cristo lca ñi ticuiꞌ sñeꞌ ta nten ꞌin Davi?
\v 42 ¿Ta siꞌi ticuiꞌ Davi nguaꞌan yu sca chaꞌ loo quityi Salmo, loꞌ nchcuiꞌ na: —Ndiose Xꞌnan na juin ñi loꞌo Ñi Xꞌnan: Chcua tsoꞌ cueen ꞌñan,
\v 43 lja xicuꞌnin ꞌin taꞌa cusuun quinu nde tuquiyaꞌ—?
\v 44 Ticuiiꞌ Davi ndloꞌo naan ꞌin ñi siꞌyana lca ñi Xꞌnan yu, ¿loꞌ ñaꞌan ta lca ñi sñeꞌ ta nten ꞌin yu chaꞌ na canꞌ?
\s Msuꞌhua tiyaa Jesús ꞌin nten loꞌo chaꞌ ꞌin neꞌ escriba
\p
\v 45 Lja ndon nscan nten canꞌ chaꞌ nu nchcuiꞌ ñi, juin ñi ꞌin yu taꞌa ndaꞌan ñi:
\v 46 Xñi um cunta ꞌin um loꞌo neꞌ escriba, cuiꞌ nu nducui tiꞌ nchcoꞌ teꞌ tucuin nu tsuꞌhue ñaꞌan, nducui tiꞌ neꞌ xa ndyijyi nu nchcuiꞌ chaꞌ ꞌin neꞌ loꞌo suun ñaꞌan seꞌen nchca quiyaꞌ, a cunta nchcua neꞌ la loo seꞌen nꞌni tnu neꞌ ꞌin Ndiose uta seꞌen nchca taꞌa,
\v 47 a cunta ndlyaa neꞌ naꞌan ꞌin neꞌ cunaꞌan nu nguinu loꞌo chaꞌ ycuiꞌ ti, canꞌ chaꞌ chaan nchcuiꞌ lyiꞌo neꞌ ꞌin Ndiose tloo naꞌan nten, una canꞌ tlyu la nu tiꞌi tyijyin tiyaa xaa.
\c 21
\s Chaꞌ ꞌin neꞌ cunaꞌan nu mdaa sca lcuan
\p
\v 1 Mxinaꞌan ñi seꞌen ndlyu tucua snan neꞌ cuilyiyaꞌ ndyiꞌya lcuan niꞌ lyaa canꞌ.
\v 2 A cunta naꞌan ñi xa mdiyaa sca neꞌ cunaꞌan nu tiꞌi ñaꞌan chendyu ꞌin nu nguinu loꞌo chaꞌ ycuiꞌ ti, canꞌ mdyiꞌya neꞌ tucua ti tñi suhue ti.
\v 3 Juin ñi xacanꞌ: Nu chaꞌ ñi cunen loꞌo um, neꞌ cunaꞌan nu nguinu loꞌo chaꞌ ycuiꞌ ti re, tiꞌi ñaꞌan ꞌin neꞌ, una quiꞌan la lcuan mdyiꞌya neꞌ que ꞌin nchgaa la ñaꞌan nten re.
\v 4 Siꞌyana nten re mdyiꞌya neꞌ lcuan loꞌo tñi nu cuaꞌ nguinu ti ꞌin neꞌ, una neꞌ cunaꞌan re, loꞌo chaꞌ tiꞌi chendyu ꞌin neꞌ mdyiꞌya neꞌ ñaꞌaan tñi nu su ꞌin neꞌ, tñi nu ntsuꞌhui chaꞌ cunajoꞌo ꞌin neꞌ.
\s Ycuiꞌ Jesús siꞌyana ntsu ꞌhui chaꞌ jlyo laa
\p
\v 5 Mdyisnan ycuiꞌ tucua snan yu chaꞌ ꞌin laa canꞌ, siꞌyana ndyiꞌya ꞌa nguiaꞌ cuityi na loꞌo quee nu lca lcuan nu mdaa neꞌ, loꞌ juin ñi ꞌin yu:
\v 6 Tsañaꞌan nu naꞌan um nducua na cuaꞌ ñii, una tiyaa xaa caja nu xicuten ꞌin na, loꞌ ñi xca quee re a quinu scua ꞌa na chonꞌ taꞌa na.
\s Chaꞌ nu tsatoꞌo xa tsatii chendyu
\p
\v 7 Xacanꞌ mñichaꞌ yu ꞌin ñi: ꞌUn ñi nu lca Bstro, quitsaꞌ um ꞌin hua ñi xaa tsatoꞌo chaꞌ re, ¿loꞌ ñaꞌan ca cuiyaꞌ tiꞌ hua xa nu cuaꞌ nchcui cuiiꞌ chaꞌ re?
\v 8 Mxcuen ñi ꞌin yu: Xñi um cunta siꞌyana a tucui nu cuñilyiꞌo ꞌin um, siꞌyana quiꞌan ꞌa nu caan loꞌ chcuiꞌ siꞌyana ljyaan loꞌo chaꞌ cuiyaꞌ ꞌñan, loꞌ chcuiꞌ canꞌ: Nanꞌ lcan Cristo, uta ljuin: Cuaꞌ mdiyaa xaa nu tyiꞌo laa um. Una a chcui nchaꞌan um ꞌin canꞌ.
\v 9 Xa cunan um chaꞌ siꞌyana cuaꞌ nchca cusuun scasca seꞌen, a nchca chaꞌ cutsen um siꞌyana nchgaa chaꞌ re ntsuꞌhui chaꞌ tsatoꞌo na culo nducua la, una siꞌi canꞌ chaꞌ cuaꞌ tsatii chendyu.
\v 10 Tiꞌ juin la ñi: Scasca quichen tnu tyiꞌin suun,
\v 11 ntsuꞌhui chaꞌ quiñan lyee yaꞌ, a cunta scasca seꞌen ntsuꞌhui chaꞌ quiꞌya bjuꞌñan uta quicha, loꞌ ca chcanꞌ loo chaꞌ nu cutsen nten loꞌo chaꞌ nu tnu nde niꞌ cuaan.
\v 12 Una xa tiꞌ lyijyi tsatoꞌo nchgaa chaꞌ re, ntsuꞌhui chaꞌ quinu um tuyaaꞌ nu xitijin ꞌin um nu tiꞌi, loꞌ tyaa neꞌ cunta ꞌin um yaaꞌ yu nu ntsuꞌhui cunta seꞌen nꞌni tnu neꞌ ꞌin Ndiose, suꞌhua neꞌ ꞌin um naꞌan chcuan, loꞌ siꞌya chaꞌ ꞌñan tsa loꞌo neꞌ ꞌin um tloo bsya tnu uta tloo ree,
\v 13 cuañaꞌan tca taa um suun ñaꞌan nguiaa chaꞌ tsuꞌhue ꞌin Ndiose.
\v 14 Ñi a suꞌhua um chaꞌ nduhue tiꞌ tiquee um ñaꞌan ntsuꞌhui chaꞌ xcuen um ꞌin nu cuꞌni cuiyaꞌ chaꞌ ꞌin um,
\v 15 siꞌyana cuiꞌ xacanꞌ taan chaꞌ tiyaa ꞌin um loꞌo chaꞌ nu chcuiꞌ um, loꞌ nchgaa nu tiꞌi tiꞌ ꞌin um a quija lyoo ñaꞌan xcuen ꞌin um uta ljuin siꞌyana siꞌi ñaꞌan nchcuiꞌ um.
\v 16 Hasta loꞌo nten cula ꞌin um, taꞌa ngula um, nten ꞌin ti um, uta taꞌa tsuꞌhue um ntsuꞌhui chaꞌ tyaa ꞌin um yaaꞌ bsya, loꞌ ntsuꞌhui um caja nu cujui ꞌin um,
\v 17 loꞌ nchgaa tucui xcuan tloo ꞌin um siꞌya chaꞌ ꞌñan.
\v 18 Una ñi sca quichanꞌ que um loꞌ a ntsuꞌhui chaꞌ quinanꞌ na.
\v 19 Chaꞌ ꞌun ta loo um loꞌo chaꞌ nu ljyaan ꞌin um, xacanꞌ tyiꞌo laa um.
\v 20 Una xa ñaꞌan um siꞌyana cuaꞌ msuꞌhua loꞌo sindatu ꞌin quichen Jerusalén, ca cuiyaꞌ tiꞌ um siꞌyana cuaꞌ jlyo quichen canꞌ.
\v 21 Xacanꞌ nchgaa nten nu ndiꞌin seꞌen lyiꞌya loo Judea xnan yuꞌhui neꞌ loo quiꞌya, cuiꞌ cuañaꞌan nu ndiꞌin quichen canꞌ tyiꞌo tsoꞌ neꞌ, loꞌ nu nguiꞌni tñan niꞌ quixinꞌ a xitucui ꞌa canꞌ nde quichen.
\v 22 Siꞌyana lca na sca tsaan nu xitijin Ndiose ꞌin neꞌ nu tiꞌi, loꞌ tsatoꞌo nchgaa chaꞌ nu cuaꞌ nguinu scua loo quityi ꞌin ñi.
\v 23 Una ꞌtnan ca neꞌ cunaꞌan nu cuaꞌ mxilyo ñaꞌan, loꞌo neꞌ nu nguitiꞌ sñeꞌ xacanꞌ, siꞌyana caan nu tiꞌi tnu loo chendyu re, siꞌya chaꞌ nsinꞌ tiꞌ nu ntsuꞌhui tiquee Ndiose.
\v 24 Tyisnan cujui neꞌ ꞌin nten loꞌo spada, a cunta ntsuꞌhui nu tsa loꞌo neꞌ ꞌin preso sca chcui chendyu, quichen Jerusalén canꞌ ntsuꞌhui chaꞌ quinu na tuyaaꞌ neꞌ gentil, loꞌ cuꞌni neꞌ ñaꞌan nu nchca tiꞌ neꞌ loꞌo na tsayaꞌ nu tsa tucua tsaan nu cuaꞌ mdiꞌin tyaa Ndiose.
\s Xa quiaan Yu Quiꞌyu nu Mdoꞌo nde niꞌ Cuaan xiyaꞌ
\p
\v 25 Xacanꞌ ca chcanꞌ chaꞌ nu tnu loo cucha, loo cooꞌ, loꞌo loo cuii, nten chendyu lyee ꞌa suꞌhua neꞌ chaꞌ tiquee neꞌ, loꞌ a jlyo ꞌa tiꞌ neꞌ ñaꞌan tiꞌ cuꞌni neꞌ tsañaꞌan nu cueen ne tyiꞌa tujoꞌo siꞌyana lyee nguitsa na,
\v 26 tyisnan ñaꞌan tiꞌ neꞌ loo nu lyee nguitsen neꞌ, siꞌya scasca chaꞌ tnu nu cuaꞌ ljyaan loo chendyu re, siꞌyana —loꞌo niꞌ cuaan ntsuꞌhui chaꞌ quiñan tucui na—.
\v 27 Xacanꞌ ñaꞌan neꞌ ꞌin —Yu Quiꞌyu nu Mdoꞌo nde niꞌ Cuaan quiaan ñi niꞌ ndlaa— loꞌo chaꞌ cuiyaꞌ nu tlyu, loꞌ xtyi sca xaa nu tsuꞌhue ñaꞌan.
\v 28 Xa tyisnan ca chcanꞌ chaꞌ re, cuꞌni tnu tiquee um loꞌ scuen um tloo um nde cuaan, siꞌyana cuaꞌ mdiyaa braa nu tyiꞌo laa um.
\v 29 Mdiꞌin tyaa ñi xca chaꞌ loꞌ juin ñi: Xñi um cunta tsañaꞌan nguiaa chaꞌ ꞌin yca higo loꞌo scasca la yca,
\v 30 xa ñaꞌan um siꞌyana cuaꞌ tyisnan chcua lcaꞌ cojoꞌ na, cuaꞌ jlyo tiꞌ um siꞌyana cuaꞌ nchcui cuiiꞌ chaꞌ quila quio.
\v 31 Cuiꞌ cuañaꞌan ꞌun xa ñaꞌan um cuaꞌ nchca scasca chaꞌ canꞌ, ca cuiyaꞌ tiꞌ um siꞌyana cuaꞌ nchcui cuiiꞌ chaꞌ nu culo Ndiose tñan ꞌin nten.
\v 32 Nu chaꞌ ñi cunen loꞌo um, ta nten re tiꞌ ndiꞌin neꞌ xa nu ntsuꞌhui chaꞌ ca nchgaa chaꞌ re.
\v 33 Niꞌ cuaan loꞌo chendyu re, a la ꞌa quine cueen na tiyaa xaa, una chaꞌ nu nchcuinꞌ loꞌo um quinu scua na tsala xaa.
\v 34 Canꞌ chaꞌ xñi um cunta siꞌyana a chaꞌan yuꞌhui niꞌ cusya ꞌin um loꞌo chaꞌ nu nchca loo chendyu re, chaꞌ cuꞌhui, chaꞌ tucunꞌ, ñaꞌan tuꞌ lja xacanꞌ tsati ntyin caan chaꞌ tnu canꞌ chonꞌ um.
\v 35 Siꞌyana chaꞌ tnu canꞌ ntsuꞌhui chaꞌ caan na tsañaꞌan nchca tiꞌ sca canꞌ chonꞌ nten chendyu.
\v 36 Canꞌ chaꞌ tyiꞌin tiyaa um loꞌ chcuiꞌ lyiꞌo um ꞌin Ndiose nchgaa xaa siꞌyana ta loo um tyijyin um nchgaa chaꞌ re, loꞌ cuañaꞌan tiyaa um tloo Yu Quiꞌyu nu Mdoꞌo nde niꞌ Cuaan.
\v 37 Cunda scaa tsaan ndyiꞌan loꞌo ñi ꞌin nten niꞌ lyaa canꞌ, loꞌ xa nxiin tsaan nxitucui ñi nde loo quiꞌya seꞌen lca Olivo.
\v 38 Canꞌ chaꞌ tlya ti ndiyaa nten niꞌ lyaa canꞌ, siꞌyana quine ꞌin neꞌ chaꞌ nu ndloꞌo ñi.
\c 22
\s Mꞌni cuiyaꞌ neꞌ chaꞌ siꞌyana quinu Jesús
\p
\v 1 Cuaꞌ nchcui cuiiꞌ chaꞌ cuꞌni neꞌ taꞌa pascua, cuiꞌ xa nchcu neꞌ jaslya nu a yuꞌhui suun ꞌin.
\v 2 Yu nu ndlo ca tñan niꞌ lyaa loꞌo neꞌ escriba nan neꞌ ñaꞌan nu cujui neꞌ ꞌin Jesús, una loꞌo chaꞌ mañan siꞌyana nguitsen neꞌ tloo nten quichen.
\v 3 Yu Juda nu nchcuiꞌ neꞌ loꞌo lca Iscariote, cuiꞌ ta yu nu tichcua canꞌ, yten Laxaꞌan niꞌ cusya ꞌin yu.
\v 4 Ya yꞌni cuiyaꞌ yu chaꞌ loꞌo nu ndlo ca tñan niꞌ lyaa, tsatlyu loꞌo nu lca que ꞌin silyiya chaꞌ ꞌin laa, ñaꞌan ntsuꞌhui chaꞌ tyaa yu ꞌin Jesús.
\v 5 Mdiyaa ꞌa tiꞌ neꞌ chaꞌ canꞌ, loꞌ mꞌni cuiyaꞌ neꞌ chaꞌ loꞌo yu siꞌyana suꞌhua lyiyaꞌ neꞌ ꞌin yu.
\v 6 Ncua sca chaꞌ ti ꞌin yu loꞌo neꞌ, loꞌ ngunan yu ñaꞌan tyaa yu ꞌin Jesús lja nu a ndlyu nten.
\s Xa ycu siin Jesús xiyaꞌ ti loꞌo yu taꞌa mdaꞌan ñi
\p
\v 7 Mdiyaa tsaan xa nchcu neꞌ jaslya nu a yuꞌhui suun ꞌin, loꞌ lca na tsaan nu ꞌni chaꞌ cujui neꞌ ꞌin slyaꞌ siꞌya taꞌa pascua.
\v 8 Xacanꞌ nguaꞌan tñan Jesús ꞌin yu Tyo loꞌo yu Xuhua, loꞌ juin ñi ꞌin yu: Yaa um loꞌ cuꞌni chuꞌhue um na nu cu siin na taꞌa pascua re.
\v 9 Juin yu ꞌin ñi: ¿La nchca tiꞌ um cuꞌni chuꞌhue hua ꞌin na?
\v 10 Mxcuen ñi ꞌin yu: Ñaꞌan jan ñi, xa sten um loo quichen cua, canꞌ chcua taꞌa um loꞌo sca yu nu lyiꞌya sca teꞌen tyiꞌa, chcui nchaꞌan um ꞌin yu tsayaꞌ sten yu sca naꞌan.
\v 11 Chcuiꞌ um loꞌo yu nu lca xꞌnan naꞌan canꞌ: Ndeñaꞌan juin ñi nu lca Bstro: ¿La nducua naꞌan seꞌen cu siin ñi loꞌo yu taꞌa ndaꞌan ñi taꞌa pascua re?
\v 12 Quitsaꞌ yu ꞌin um seꞌen nducua sca naꞌan tlyu nu cuaꞌ nchca tucua nde cuaan, canꞌ cuaꞌ ndiꞌin nchgaa na nu cunajoꞌo ꞌin na, canꞌ ntsuꞌhui chaꞌ cuꞌni chuꞌhue um na nu cu siin na.
\v 13 Xacanꞌ mdoꞌo yu nguiaa yu, loꞌ chcui ñaꞌan juin ñi loꞌo yu cuañaꞌan yatoꞌo, canꞌ mꞌni chuꞌhue yu na nu cu siin jun taꞌa pascua.
\v 14 Xa mdiyaa braa canꞌ, yten tucua ñi tuꞌhua msa tsatlyu loꞌo yu taꞌa ndaꞌan ca ñi.
\v 15 Loꞌ juin ñi ꞌin yu: Lyee ꞌa ncua lca tiqueen cu siin na loꞌo um taꞌa pascua re, lja nu tiꞌ lyijyi tijin nu tiꞌi.
\v 16 Cunen loꞌo um sca chaꞌ, a cuꞌnin ꞌan siin taꞌa pascua re chaꞌ siꞌi la seꞌen ndlo Ndiose tñan.
\v 17 Xacanꞌ msñi ñi vaso seꞌen ntsuꞌhui vino, mdyaa ñi xuꞌhue ꞌin Ndiose, loꞌ juin ñi ꞌin yu: Xñi um ꞌin na nchgaa um, loꞌ ca xuꞌhue um ꞌin na.
\v 18 Cunen loꞌo um sca chaꞌ, a coꞌon ꞌan vino re chaꞌ siꞌi la seꞌen ndlo Ndiose tñan.
\v 19 Xacanꞌ msñi ñi jaslya, mdyaa ñi xuꞌhue ꞌin Ndiose, msuꞌhue ñi ꞌin na, loꞌ mdaa ñi ꞌin na ꞌin yu, xacanꞌ juin ñi: Nde nu lca cunanꞌ nanꞌ, loꞌ siꞌya um tyaan ꞌñan. Tsa quiñan um cuꞌni um chaꞌ re loꞌ quia yuꞌhui tiꞌ um ꞌñan.
\v 20 Xa mdyi ycu siin ñi, cuiꞌ cuañaꞌan msñi ñi vaso seꞌen ntsuꞌhui vino canꞌ, loꞌ juin ñi: Nde sca chaꞌ nu cui ti, loꞌ siꞌya tnen nu quilo siꞌya um caja ñaꞌan cuꞌni chuꞌhue um chaꞌ ꞌin um loꞌo Ndiose.
\v 21 Ñaꞌan um jan ñi, nde nducua na sca seꞌen ti loꞌo nu ntsuꞌhui chaꞌ tyaa ꞌñan.
\v 22 Nu chaꞌ ñi siꞌyana Yu Quiꞌyu nu Mdoꞌo nde niꞌ Cuaan ntsuꞌhui chaꞌ tyijyin ñi tsañaꞌan chaꞌ nu cuaꞌ nguaꞌan ꞌin ñi, una ꞌtnan ca yu nu ntsuꞌhui chaꞌ tyaa ꞌin ñi.
\v 23 Xacanꞌ scasca yu mñichaꞌ taꞌa yu chaꞌ ti ñaꞌan yu cuꞌni yu chaꞌ canꞌ.
\s Tucui ca lca nu ndon loo la
\p
\v 24 A cunta mdyisnan nchcuiꞌ tyijyin yu chaꞌ ti ñaꞌan yu lca yu nu ndon loo la.
\v 25 Xacanꞌ juin ñi ꞌin yu: Yu ree ndiꞌin loo chendyu re tla ꞌa ndlo yu tñan ꞌin nten, loꞌ tiꞌ nchcuiꞌ neꞌ siꞌyana lca yu sca nu nda yaaꞌ ꞌin nten,
\v 26 una ꞌun siꞌi cuañaꞌan cuꞌni um, siꞌyana sca nu ndon loo lja um ntsuꞌhui chaꞌ cuꞌni lyoꞌ canꞌ ꞌin, loꞌ yu nu ntsuꞌhui cunta ꞌin um cuꞌni canꞌ ꞌin tsañaꞌan nchca tiꞌ sca nguso.
\v 27 Xacanꞌ jan ñi, ¿ti ñaꞌan nu ndon loo la, nu nducua tuꞌhua msa uta nu nsuꞌhua na loo msa? ¿Ta siꞌi nu nducua tuꞌhua msa canꞌ? Una nanꞌ lcan tsañaꞌan nchca tiꞌ sca nguso ꞌin um.
\v 28 Cuañaꞌan ꞌun a nchca cula yaaꞌ um ꞌñan loꞌo nchgaa nu tiꞌi ndijin.
\v 29 Canꞌ chaꞌ taan sca chaꞌ cuiyaꞌ ꞌin um seꞌen culo um tñan, cuiꞌ tsañaꞌan mdaa Stin chaꞌ cuiyaꞌ ꞌñan,
\v 30 siꞌyana tca chcua um loꞌ cu na sca loo msa ti la seꞌen ntsuꞌhui chaꞌ culon tñan, a cunta ntsuꞌhui chaꞌ chcua um loꞌ cuꞌni cuiyaꞌ um chaꞌ ꞌin taꞌa tichcua ta neꞌ Israel.
\s Yu Tyo ntsuꞌhui chaꞌ xcuan tloo ꞌin ñi
\p
\v 31 Loꞌ tiꞌ juin la Ñi Xꞌnan na: Simón, Simón, cunen loꞌo sca chaꞌ, Laxaꞌan cuaꞌ mjñan chaꞌ cuiyaꞌ siꞌyana scuin tiꞌin ꞌin tsañaꞌan nchca tiꞌ nscuin neꞌ mti trigo.
\v 32 Una nanꞌ cuaꞌ mjñan ꞌin Ndiose siꞌya chaꞌ ꞌin, siꞌyana a cuꞌni naꞌan tiꞌ loꞌo chaꞌ nu ndiya quiꞌan tiꞌ, loꞌ xa nuꞌhuin tyiton, taa chaꞌ tnu tiquee ꞌin taꞌa ndiya quiꞌan tiꞌ.
\v 33 Xacanꞌ juin yu ꞌin ñi: Ñi Xꞌnan hua, cuaꞌ mꞌnin tiqueen siꞌyana siꞌi tsaloo naꞌan chcuan ti tsaꞌan loꞌo um, cuiꞌ ca nu cajan loꞌo um.
\v 34 Loꞌ juin ñi: Tyo, cunen loꞌo sca chaꞌ, tiꞌ lyijyi xiꞌya latyee loꞌ snan yaꞌ chcuiꞌ siꞌyana a ndyuꞌhui lyoo ꞌñan.
\s Ntsuꞌhui chaꞌ cuiꞌya yu spada
\p
\v 35 Tiꞌ juin la ñi loꞌo yu: Xa nguaꞌan tñan ꞌin um yaa um, nen loꞌo um siꞌyana a cuiꞌya um tñi, ñi cuijyin, ñi a cuiꞌya um quinan, ¿ta ndeꞌen la na ya lyijyi ꞌin um xacanꞌ? Mxcuen yu ꞌin ñi: A sca na.
\v 36 Juin ñi ꞌin yu: Una cuaꞌ ñii, tca cuiꞌya um tñi loꞌo cuijyin, loꞌ nu a ntsuꞌhui spada ꞌin, tca cujuiꞌ steꞌ loꞌ xiꞌi sca na.
\v 37 Cunen loꞌo um sca chaꞌ, ꞌni chaꞌ tsatoꞌo ꞌñan tsañaꞌan chaꞌ nu cuaꞌ nguinu scua loo quityi ꞌin Ndiose, loꞌ nchcuiꞌ na: —Tsatlyu mdaꞌan ñi loꞌo yu nducunꞌ—. Nchgaa chaꞌ nu cuaꞌ nguinu scua siꞌya chaꞌ ꞌñan, tsaloo na ca ti na.
\v 38 Xacanꞌ mxcuen yu ꞌin ñi: Ñi Xꞌnan hua, nde loꞌo tucua spada ꞌin hua. Loꞌ juin ñi: Cuiꞌ lya loꞌo cuati.
\s Ycuiꞌ lyiꞌo Jesús ꞌin Ndiose seꞌen lca Getsemaní
\p
\v 39 Xacanꞌ mdoꞌo ñi nguiaa ñi nde loo quiꞌya Olivo, cuiꞌ tsañaꞌan chaꞌ nu cuaꞌ ntsuꞌhui ꞌin ñi, loꞌo yu taꞌa ndaꞌan ñi nducui nchaꞌan ꞌin ñi.
\v 40 Xa mdiyaa ñi canꞌ juin ñi ꞌin yu: Chcuiꞌ lyiꞌo um ꞌin Ndiose siꞌyana a sten chaꞌ ngunanꞌ tiquee um.
\v 41 Mdoꞌo ntan ñi siiꞌ yu tsañaꞌan cuiyaꞌ seꞌen nduguun neꞌ sca quee, canꞌ mdyiꞌya xtyinꞌ ñi loꞌ mdyisnan ycuiꞌ lyiꞌo ñi ꞌin Ndiose:
\v 42 ꞌUn ñi nu lca Stin, chaꞌ a tyijyin yuꞌhui tijin nu tiꞌi re, una ñi siꞌi ñaꞌan nu nchca tinꞌ, cuiꞌ ca nu cuꞌni um ñaꞌan nu nchca tiꞌ um.
\v 43 Xacanꞌ nguloꞌo tloo sca angujle ꞌin ñi nu mdoꞌo nde niꞌ cuaan siꞌyana ta yaaꞌ ꞌin ñi.
\v 44 Loo chaꞌ tiꞌi ngaꞌan ꞌin ñi, nde lyee la ycuiꞌ lyiꞌo ñi ꞌin Ndiose, loꞌ mdyisnan nguilo tyiꞌa ta ñi la lyuu tsañaꞌan nchca tiꞌ tne.
\v 45 Xa mdyi ycuiꞌ lyiꞌo ñi ꞌin Ndiose, mdyiton ñi loꞌ nguila ñi seꞌen nducua yu taꞌa ndaꞌan ñi, nguija lyoo ñi ꞌin yu ljaꞌ yu siꞌyana lyee luꞌun tiꞌ yu.
\v 46 Loꞌ juin ñi ꞌin yu: ¿Ñi chaꞌ ta ljaꞌ um? Tyitucui um loꞌ chcuiꞌ lyiꞌo um ꞌin Ndiose siꞌyana a sten chaꞌ ngunanꞌ tiquee um.
\s Xa mdyaa yu Juda ꞌin Jesús
\p
\v 47 Lja nchcuiꞌ ñi chaꞌ canꞌ mdiyaan nten quiꞌan, loꞌ yu Juda cuiꞌ ta yu tichcua canꞌ, nducua loo yu loo nten canꞌ, mdiyaa yu seꞌen ndon Jesús siꞌyana chcuiꞌ chaꞌ yu la siiꞌ scaꞌ ñi.
\v 48 Xacanꞌ juin Jesús ꞌin yu: Juda, ¿ta cuañaꞌan mdyaa ꞌin Yu Quiꞌyu nu Mdoꞌo nde niꞌ Cuaan loꞌo ñaꞌan nu ycuiꞌ chaꞌ ꞌñan?
\v 49 Xa naꞌan yu taꞌa ndaꞌan ñi chaꞌ nu nchca, loꞌ juin yu ꞌin ñi: Ñi Xꞌnan hua, ¿ta siꞌyu hua ꞌin neꞌ loꞌo spada re?
\v 50 Sca yu taꞌa ndaꞌan ñi msiꞌyu nscan yu nguso ꞌin nu ndlo ca tñan niꞌ lyaa canꞌ, tsoꞌ cueen ꞌin yu.
\v 51 Xacanꞌ mxcuen Jesús ꞌin yu: Cuiꞌ lya tsacua ti ñaꞌan. Xacanꞌ ylaꞌ Jesús nscan yu nguso canꞌ, cuiꞌ xaa mchca na ꞌin yu.
\v 52 Xacanꞌ ycuiꞌ Jesús loꞌo nchgaa nu ljyan yꞌni lyiꞌo ꞌin ñi, cuiꞌ nu ndlo ca tñan niꞌ lyaa tsatlyu loꞌo nu lca que ꞌin silyiya nu ntsuꞌhui cuan ꞌin laa, loꞌo quiꞌyu cula, loꞌ juin ñi ꞌin yu: ¿Ñi chaꞌ loꞌo yca loꞌo spada nducua yaaꞌ um ljyan ꞌya um ꞌñan tsañaꞌan nchca tiꞌ um loꞌo sca yu cunan?
\v 53 Nchgaa xaa nguilyun loꞌo um niꞌ lyaa, ¿ñi chaꞌ a msñi um ꞌñan xacanꞌ? Una cuaꞌ ñii mdiyaa braa nu nta um tsañaꞌan nu ndlo laxaꞌan tñan ꞌin um.
\s Xa mscuan tloo yu Tyo ꞌin Jesús
\p
\v 54 Xacanꞌ msñi neꞌ ꞌin Jesús, ya loꞌo neꞌ ꞌin ñi seꞌen nducua naꞌan ꞌin yu nu ndlo ca tñan niꞌ lyaa. Yu Tyo canꞌ tijyoꞌ ti mducui nchaꞌan yu ꞌin nten canꞌ.
\v 55 Tluꞌhue la lyiyaꞌ mxiquiꞌo neꞌ quiiꞌ, tyiꞌiin siiꞌ na yten tucua neꞌ, a cunta loꞌo yu Tyo yten tucua yu lja canꞌ.
\v 56 Sca neꞌ cunaꞌan nu lca nguso, xa naꞌan neꞌ siꞌyana loꞌo yu Tyo nducua yu canꞌ, mxinaꞌan tsuꞌhue ca neꞌ ꞌin yu, loꞌ juin neꞌ: Loꞌo yu re taꞌa ndaꞌan yu cua.
\v 57 Una mscuan tloo yu chaꞌ canꞌ loꞌ juin yu: A ndyuꞌhui lyoon ꞌin yu nu nchcuiꞌ um chaꞌ ꞌin cua.
\v 58 Chonꞌ ndeꞌen canꞌ ticuiꞌ cuañaꞌan juin sca yu ꞌin yu Tyo canꞌ: Loꞌo nuꞌhuin taꞌa ndaꞌan yu cua. Mxcuen yu xacanꞌ: A loꞌon nanꞌ.
\v 59 Tsa ndyijyin sca braa ti, mdoꞌo ycuiꞌ xca yu loꞌ juin yu: Nu chaꞌ ñi sꞌni, siꞌyana loꞌo yu re lca yu taꞌa ndaꞌan yu cua, siꞌyana lca yu neꞌ Galilea.
\v 60 Mxcuen yu Tyo: A jlyo tinꞌ ñi chaꞌ nchcuiꞌ. Lja nu tiꞌ nchcuiꞌ yu chaꞌ canꞌ mdoꞌo siꞌya sca latyee.
\v 61 Xacanꞌ Ñi Xꞌnan na mxinaꞌan ñi seꞌen ndon yu Tyo canꞌ, cuiꞌ xaa nguia yuꞌhui tiꞌ yu chaꞌ nu ycuiꞌ ñi xa juin ñi loꞌo yu: Tiꞌ lyijyi xiꞌya latyee loꞌ snan yaꞌ chcuiꞌ siꞌyana a ndyuꞌhui lyoo ꞌñan.
\v 62 Mdoꞌo yu Tyo canꞌ nde lyiyaꞌ, loꞌ ynan yu siꞌyana ndyijyin yaꞌ tiꞌi ngaꞌan ꞌin yu.
\s Xa mjyiꞌin neꞌ ꞌin Jesús
\p
\v 63 Yu nu nsñi cunta ꞌin Jesús mxiychaꞌ neꞌ loꞌ mjyiꞌin neꞌ ꞌin ñi,
\v 64 a cunta mscanꞌ neꞌ sca teꞌ tloo ñi, mycuanꞌ neꞌ ꞌin ñi, loꞌ juin neꞌ: ¿Chcuiꞌ ñaꞌan na chaꞌ ti ca mycuanꞌ tloo?
\v 65 Quiꞌan ꞌa chaꞌ tiꞌi ycuiꞌ neꞌ loꞌo ñi.
\s Ncua cuiyaꞌ chaꞌ ꞌin Jesús loꞌo tsoꞌ chaꞌ ꞌin laa
\p
\v 66 Xa nguꞌya xaa canꞌ, tsatlyu nguioꞌ tiꞌin nchgaa quiꞌyu cula loꞌo yu nu ntsuꞌhui ca cunta laa ꞌin neꞌ loꞌo neꞌ escriba, mdiya loꞌo neꞌ ꞌin ñi seꞌen ntsuꞌhui chaꞌ ca cuiyaꞌ chaꞌ ꞌin ñi, loꞌ juin neꞌ ꞌin ñi:
\v 67 ¿Ta cuiꞌ lca Cristo? Quitsaꞌ la ꞌin hua. Mxcuen ñi ꞌin neꞌ: Chaꞌ cunen loꞌo um siꞌyana cuinꞌ, a tsa quiꞌan tiꞌ um ꞌñan.
\v 68 A cunta chaꞌ cuñichanꞌ ꞌin um sca chaꞌ, ñi a xcuen um ꞌñan, loꞌ ñi a culaa um ꞌñan.
\v 69 Una tiꞌ cuaꞌ ñii —sten tucua Yu Quiꞌyu nu Mdoꞌo nde niꞌ Cuaan tsoꞌ cueen ꞌin Ndiose—.
\v 70 Nchgaa neꞌ juin neꞌ ꞌin ñi: ¿Ca nu Sñeꞌ Ndiose lca xacanꞌ? Mxcuen ñi ꞌin neꞌ: ꞌUn nchcuiꞌ um cuañaꞌan.
\v 71 Xacanꞌ juin neꞌ: A ꞌni ꞌa chaꞌ tiꞌ cunan na xca tucui nu taa suun chaꞌ ꞌin yu re, siꞌyana cuiꞌ na ngune ꞌin na chaꞌ nu mdoꞌo tuꞌhua yu.
\c 23
\s Ncua cuiyaꞌ chaꞌ ꞌin Jesús tloo yu Pilato
\p
\v 1 Cuiꞌ ñaꞌan lcaa mdyiton nchgaa nten canꞌ, loꞌ ya loꞌo neꞌ ꞌin Jesús tloo yu Pilato.
\v 2 Mdyisnan msuꞌhua neꞌ quiꞌya ꞌin ñi tloo yu, loꞌ nchcuiꞌ neꞌ: Nguija lyoo hua ꞌin yu re nxilo tiꞌin yu ꞌin nten quichen, nchcuiꞌ yu siꞌyana a taa ꞌa hua tñi chaꞌ ꞌin yu César, a cunta nchcuiꞌ yu siꞌyana cuiꞌ yu lca yu Cristo, loꞌ lca yu ree.
\v 3 Xacanꞌ mñichaꞌ yu Pilato ꞌin ñi: ¿Ta cuiꞌ lca Ree ꞌin neꞌ judio? Mxcuen ñi ꞌin yu: ꞌUn nchcuiꞌ um chaꞌ re.
\v 4 Xacanꞌ juin yu Pilato ꞌin nten loꞌo yu nu ndlo ca tñan niꞌ lyaa canꞌ: A sca quiꞌya nguija lyoon ꞌin yu re.
\v 5 Una nten canꞌ nde lyee la mdon loo chaꞌ ꞌin neꞌ loꞌ nchcuiꞌ neꞌ: Nxilo tiꞌin yu ꞌin nten quichen loꞌo chaꞌ nu ndloꞌo yu ñaꞌaan seꞌen lyiꞌya loo Judea, loꞌ mdyisnan yu tiꞌ la seꞌen lca Galilea.
\s Yaa Jesús tloo yu Herode
\p
\v 6 Xa ngune ꞌin yu Pilato siꞌyana mꞌni tyiꞌya neꞌ Galilea, xacanꞌ mñichaꞌ yu ꞌin neꞌ chaꞌ Jesús lca ñi neꞌ Galilea.
\v 7 Xa ncua cuiyaꞌ tiꞌ yu Pilato siꞌyana mdoꞌo ñi seꞌen lyiꞌya loo Galilea seꞌen ndlo yu Herode tñan, xacanꞌ ngulo yu tñan siꞌyana tsa loꞌo neꞌ ꞌin ñi tloo yu Herode, siꞌyana lja xacanꞌ nguilyu yu quichen Jerusalén.
\v 8 Mdiyaa ꞌa tiꞌ yu xa naꞌan yu ꞌin Jesús, siꞌyana cuaꞌ sꞌni nchca tiꞌ yu ñaꞌan yu ꞌin ñi, quiꞌan ꞌa chaꞌ cuaꞌ ynan yu loꞌ nta yu chaꞌ ñi xaa cuꞌni ñi sca chaꞌ nu tnu tloo yu.
\v 9 Quiꞌan ꞌa chaꞌ mñichaꞌ yu ꞌin ñi, una a sca chaꞌ canꞌ mxcuen ñi.
\v 10 Nchgaa yu nu ntsuꞌhui cunta laa ꞌin neꞌ tsatlyu loꞌo neꞌ escriba, nde lyee la msuꞌhua neꞌ quiꞌya ꞌin ñi.
\v 11 Xacanꞌ yu Herode loꞌo sindatu ꞌin yu mscuan tloo ꞌin ñi loꞌ mxiychaꞌ yu ꞌin ñi, loꞌ mxicoꞌ yu sca teꞌ tsuꞌhue ñaꞌan ꞌin ñi, xiyaꞌ nguaꞌan tñan yu ꞌin ñi nde seꞌen ndiꞌin yu Pilato canꞌ.
\v 12 Cuañaꞌan mchca tsuꞌhue chaꞌ ꞌin yu Pilato loꞌo yu Herode, siꞌyana tiꞌ culoo a tsuꞌhue ndiꞌin yu.
\s Ngulo Pilato tñan siꞌyana caja Jesús
\p
\v 13 Xacanꞌ mxoꞌ tiꞌin yu Pilato ꞌin nchgaa nu ndlo tñan niꞌ lyaa, tsatlyu loꞌo yu nu lyiꞌya tñan loꞌo nten quichen canꞌ,
\v 14 loꞌ juin yu ꞌin neꞌ: Mdiyan loꞌo um ꞌin yu re tloon loꞌ nchcuiꞌ um siꞌyana nxilo tiꞌin yu nten quichen, una cuaꞌ mxicunen ꞌin yu tloo naꞌan um, loꞌ a sca quiꞌya nguija lyoon ꞌin yu ñaꞌan nu ndlo quiꞌya um ꞌin yu.
\v 15 Ñi yu Herode, loꞌ a ngulo quiꞌya ꞌin yu xa nguaꞌan tñan ꞌin yu yaa yu. Canꞌ chaꞌ cunen loꞌo um, a ndyiꞌo tñan caja yu siꞌyana a sca quiꞌya mꞌni yu.
\v 16 Culaan ꞌin yu ndiꞌa xa cuaꞌ mꞌni yu.
\v 17 Sca chaꞌ nu ntsuꞌhui ꞌin neꞌ, njñan neꞌ siꞌyana ndlyaa sca preso cunda scaa yjan xa nchca taꞌa canꞌ.
\v 18 Una nten quiꞌan canꞌ tsatlyu nchcuiꞌ cueen neꞌ: ¡Yjui um ꞌin yu re loꞌ culaa um ꞌin yu Barrabás!
\v 19 Ntsuꞌhui yu naꞌan chcuan siꞌyana mxilo tiꞌin yu nten quichen, a cunta yjui yu nten.
\v 20 Xiyaꞌ ycuiꞌ yu Pilato loꞌo nten canꞌ siꞌyana ntsuꞌhui tiquee yu culaa yu ꞌin Jesús.
\v 21 Una nten canꞌ ycuiꞌ cueen neꞌ: ¡Jyiꞌin caꞌan um ꞌin yu loo cusi, jyiꞌin caꞌan um ꞌin yu loo cusi!
\v 22 Xacanꞌ ycuiꞌ yu Pilato loꞌo nten canꞌ nu cuaꞌ nchca snan yaꞌ: ¿Ñi na ta mꞌni yu re? A sca quiꞌya nguija lyoon ꞌin yu nu hasta loꞌo caja yu. Canꞌ chaꞌ quiꞌni yu loꞌ ndiꞌa culaan ꞌin yu.
\v 23 Una nde lyee la ycuiꞌ cueen neꞌ loꞌ mjñan neꞌ chaꞌ siꞌyana chaꞌan ñi loo cusi. Mdon loo chaꞌ ꞌin neꞌ tsatlyu loꞌo nu ntsuꞌhui cunta laa ꞌin neꞌ.
\v 24 Xacanꞌ mdaa yu Pilato chaꞌ cuiyaꞌ siꞌyana cuꞌni neꞌ ñaꞌan nu nchca tiꞌ neꞌ.
\v 25 Ngulaa yu ꞌin yu nu mjñan nten canꞌ, yu nu ntsuꞌhui naꞌan chcuan siꞌyana mxilo tiꞌin yu nten, a cunta yjui yu nten, loꞌ mdyaa yu Pilato cunta ꞌin Jesús yaaꞌ neꞌ.
\s Xa ngujui Jesús loo cusi
\p
\v 26 Tucueen nguia loꞌo neꞌ ꞌin ñi mchcua taꞌa neꞌ loꞌo sca yu yaa tñan niꞌ quixinꞌ, yu Simón nu mdoꞌo quichen Cirene, mxicuꞌni neꞌ ꞌin yu siꞌyana cuiꞌya yu cusi nu lyiꞌya Jesús loꞌ chcui chaꞌan yu ꞌin ñi.
\v 27 Quiꞌan ꞌa nten nguia nchaꞌan ꞌin ñi, cuiꞌ cuañaꞌan neꞌ cunaꞌan nguia ynan siꞌya ñi.
\v 28 Una Jesús mxinaꞌan ñi nde chonꞌ seꞌen ljyaan neꞌ, loꞌ juin ñi ꞌin neꞌ: ꞌUn neꞌ cunaꞌan Jerusalén, a cunan loꞌo um ꞌñan, cuiꞌ ca nu cunan loꞌo um ꞌin um loꞌo sñeꞌ um.
\v 29 Cunen loꞌo um sca chaꞌ, ljyaan sca tsaan xa caja nu chcuiꞌ: Tsuꞌhue ca xuꞌhue neꞌ cunaꞌan nu a mdaa Ndiose chaꞌ cuiyaꞌ tyiꞌin sñeꞌ, nu a siyaꞌ mxilyo ñaꞌan, ñi a naꞌan neꞌ ytiꞌ sñeꞌ neꞌ.
\v 30 —Xacanꞌ chcuiꞌ nten canꞌ loꞌo quiꞌya: Choꞌo tiꞌin um ꞌin hua, cuiꞌ cuañaꞌan chcuiꞌ neꞌ loꞌo quiꞌya suhue ti: Tucun tiꞌin um ꞌin hua—.
\v 31 Chaꞌ cuañaꞌan nguiꞌni lyiꞌo neꞌ ꞌin sca yca yiꞌa, ñaꞌan la ca cuꞌni neꞌ loꞌo sca yca ngutyi.
\v 32 A cunta nguia loꞌo neꞌ ꞌin tucua yu nducunꞌ siꞌyana tsatlyu caja yu loꞌo Jesús.
\v 33 Xa mdiyaa neꞌ seꞌen naan que jyiꞌo, canꞌ mjyiꞌin caꞌan neꞌ ꞌin ñi loo cusi, a cunta loꞌo yu nducunꞌ ngaꞌan yu loo cusi, scaa yu sca tsoꞌ ꞌin ñi.
\v 34 Xacanꞌ juin Jesús: ꞌUn ñi nu lca Stin, cuꞌni um chaꞌ tlyu tiꞌ ꞌin nten re siꞌyana a jlyo tiꞌ neꞌ ñi na nguiꞌni neꞌ. —Ticuiꞌ lja canꞌ mtsa neꞌ stenꞌ, ngulo neꞌ xuꞌhue neꞌ loꞌo na—.
\v 35 Nten canꞌ nanꞌ ꞌya neꞌ ꞌin ñi, loꞌ yu nu lyiꞌya tñan canꞌ nchcuiꞌ caꞌan ꞌin ñi: Yu re ngulo laa yu ꞌin xca tucui, ¿ñi chaꞌ a culo laa yu ꞌin yu chaꞌ na chaꞌ ñi ca lca yu Cristo, ñi nu mdoꞌo hui ca ꞌin Ndiose?
\v 36 Loꞌo yu sindatu mstyi lyiꞌo ꞌin ñi, loꞌ ncua tiꞌ yu xicoꞌo yu vinagre ꞌin ñi,
\v 37 loꞌ nchcuiꞌ yu: Chaꞌ nuꞌhuin lca Ree ꞌin neꞌ judio, culo laa ꞌin ticuiiꞌ.
\v 38 A cunta ngaꞌan sca chaꞌ que cusi canꞌ loꞌo chaꞌ griego, chaꞌ latin, loꞌo chaꞌ hebreo, loꞌ nchcuiꞌ na: Nde yu nu lca Ree ꞌin neꞌ judio.
\v 39 Sca yu nducunꞌ nu taꞌa ngaꞌan ñi loo cusi mdyisnan ycuiꞌ caꞌan yu ꞌin ñi: Chaꞌ nuꞌhuin lca Cristo, culo laa ꞌin ticuiiꞌ, xacanꞌ culo laa ꞌin hua.
\v 40 Mxcuen xca yu canꞌ loꞌ ngusun loꞌo yu ꞌin: Ñi tsachinꞌ ti loꞌ a ntsen nuꞌhuin tloo Ndiose, loꞌ re ñaꞌan ndijin na nu tiꞌi.
\v 41 Nu chaꞌ ñi ntsuꞌhui suun ꞌin na tyijyin na nu tiꞌi re, siꞌya tñan ngunanꞌ nu mꞌni na, una yu re a sca chaꞌ ngunanꞌ mꞌni yu.
\v 42 Xacanꞌ juin yu ꞌin Jesús: Quia yuꞌhui tiꞌ um ꞌñan xa tiyaa um seꞌen culo um tñan.
\v 43 Xacanꞌ mxcuen Jesús ꞌin yu: Nu chaꞌ ñi cunen loꞌo, tiꞌ cuaꞌ ñii cuaꞌ ndiꞌin loꞌon la niꞌ cuaan.
\v 44 Tsa ntsuꞌhui ndyiꞌya cuaan tsayaꞌ mdiyaa braa cuaꞌ snan siin, nguꞌya tla yta sca chcui seꞌen canꞌ.
\v 45 Cucha a mduꞌhui ꞌa na xaa, loꞌ teꞌ tlyu nu nducui la niꞌ lyaa canꞌ mdaꞌ na tluꞌhue la na, mdoꞌo na tucua yuꞌhue.
\v 46 Xacanꞌ cueen ꞌa msiꞌya Jesús: ꞌUn ñi nu lca Stin, —tuyaaꞌ um xnun cusya ꞌñan—, loꞌ ñaꞌaan mdyi ycuiꞌ ñi chaꞌ re ngujui ñi.
\v 47 Xa naꞌan yu nu lca que ꞌin sindatu chaꞌ nu yatoꞌo, cuiꞌ xaa mꞌni tnu yu ꞌin Ndiose loꞌ juin yu: Nu chaꞌ ñi sꞌni, yu re ncua yu sca nten nu ñi ndiꞌin chaꞌ ꞌin tloo Ndiose.
\v 48 Nten quiꞌan nu nguioꞌ tiꞌin canꞌ xa naꞌan neꞌ chaꞌ nu yatoꞌo, mxitucui neꞌ loꞌ mycuanꞌ neꞌ jyan tiquee neꞌ loo nu tiꞌi ngaꞌan ꞌin neꞌ.
\v 49 Una nchgaa nu lca taꞌa tsuꞌhue ñi loꞌo jun cunaꞌan nu mducui nchaꞌan ꞌin ñi tiꞌ la seꞌen lca Galilea, tijyoꞌ ti ndon jun nanꞌ ꞌya jun.
\s Xa mtsiꞌ Jesús
\p
\v 50 Canꞌ ndiꞌin sca yu naan See nu mdoꞌo quichen Arimatea seꞌen lyiꞌya loo Judea, lca yu sca quiꞌyu cula ꞌin neꞌ judio, tsuꞌhue nten lca yu loꞌ ñi ndiꞌin chaꞌ ꞌin yu.
\v 51 Loꞌo yu nta yu chaꞌ ñi xaa culo Ndiose tñan ꞌin nten, a cunta xa mꞌni cuiyaꞌ neꞌ chaꞌ ꞌin Jesús a ncua taꞌa loꞌo yu ꞌin neꞌ, ñi loꞌo ñaꞌan nu mꞌni neꞌ.
\v 52 Ya jñan yu chaꞌ cuiyaꞌ ꞌin Pilato chaꞌ tca cutsiꞌ yu ꞌin Jesús.
\v 53 Xa mdyiꞌya yu ꞌin ñi loo cusi nguxen yu sca teꞌ ꞌin ñi, loꞌ ya tsiꞌ yu ꞌin ñi sca tuquee nu cuaꞌ lca nguiaaꞌ, seꞌen nu a nchca tucui quitsiꞌ.
\v 54 Lca na vierne siin nu cuaꞌ tyisnan xitñanꞌ neꞌ judio.
\v 55 Tsalca jun cunaꞌan nu mducui nchaꞌan ꞌin ñi tiꞌ la seꞌen lca Galilea, mdiya nchaꞌan jun ꞌin yu seꞌen mtsiꞌ ñi, loꞌ naꞌan jun ñaꞌan mdiꞌin tyaa yu ꞌin ñi niꞌ tucuaa canꞌ.
\v 56 Xacanꞌ mxitucui jun nguiaa jun, mꞌni chuꞌhue jun tyiꞌa xityiꞌi nu chuꞌhui ꞌin Jesús, loꞌ mxitñanꞌ jun tsaan canꞌ ñaꞌan chaꞌ nu cuaꞌ ntsuꞌhui ꞌin neꞌ.
\c 24
\s Xa mdyiquiꞌo Jesús
\p
\v 1 Una culoo tsaan nu mducua snan canꞌ, tlya ti nguiaa jun cunaꞌan tucuaa canꞌ, lyiꞌya jun tyiꞌa xityiꞌi nu cuaꞌ ncua tsuꞌhue, a cunta loꞌo chcua xnan jun cunaꞌan taꞌa nguiaa jun.
\v 2 Xa mdiyaa jun naꞌan jun siꞌyana cuaꞌ mdoꞌo ntan quee nu nchcun tucua canꞌ.
\v 3 Xacanꞌ yten jun loꞌ ꞌa naꞌan ꞌa jun su Ñi Xꞌnan na.
\v 4 Lja ndon yuhue tiꞌ jun chaꞌ canꞌ, tsati ntyin mdoꞌo ton tucua yu quiꞌyu nu lcoꞌ teꞌ tsuꞌhue ñaꞌan xaa.
\v 5 Lyee ytsen jun, canꞌ chaꞌ mdyiꞌya tucui jun tloo jun, loꞌ juin yu ꞌin jun: ¿Ñi chaꞌ ndaꞌan nan um ꞌin sca nu loꞌo lja neꞌ cuaꞌ ngujui?
\v 6 A ntsuꞌhui ꞌa ñi re, cuaꞌ mdyiquiꞌo ñi. Quia yuꞌhui tiꞌ um ñaꞌan ycuiꞌ ñi loꞌo um xa mdiꞌin ñi seꞌen lca Galilea,
\v 7 xa juin ñi: Yu Quiꞌyu nu Mdoꞌo nde niꞌ Cuaan, caja nu tyaa ꞌin ñi yaaꞌ nten quiꞌya chendyu, jyiꞌin caꞌan neꞌ ꞌin ñi loo cusi, una nu cuaꞌ ca snan tsaan ntsuꞌhui chaꞌ tyiquiꞌo ñi.
\v 8 Xacanꞌ nguia yuꞌhui tiꞌ jun chaꞌ nu ycuiꞌ ñi.
\v 9 Cuiꞌ xaa mdoꞌo jun nguia ytsaꞌ jun ꞌin cha tixca yu taꞌa mdaꞌan ñi loꞌo nchgaa la ñaꞌan jun chaꞌ nu yatoꞌo.
\v 10 Tsalca jun nu mdaa suun chaꞌ re loꞌo yu taꞌa mdaꞌan ñi lca María Magdalena, Juana, loꞌo María jyiꞌan Jacobo, a cunta loꞌo chcua xnan jun cunaꞌan nu taꞌa ndaꞌan jun.
\v 11 Una yu taꞌa mdaꞌan ñi msqueꞌ tiꞌ siꞌyana la xnan ycuiꞌ tinto jun cunaꞌan canꞌ, loꞌ a ya quiꞌan tiꞌ yu ꞌin jun.
\v 12 Una yu Tyo canꞌ msnan yu ya naꞌan yu seꞌen mtsiꞌ ñi, loꞌ xa msti quiloo yu naꞌan yu su teꞌ nu nguxen ti ñi, xacanꞌ mxitucui yu loꞌ ndyijyin yaꞌ nduhue tiꞌ yu siꞌya chaꞌ nu yaꞌ toꞌo canꞌ.
\s Xa nguiaa Jesús tucueen Emaús
\p
\v 13 Yatoꞌo cuiiꞌ tsaan canꞌ mxitucui tucua yu nu nguiaa nde quichen Emaús, loꞌ a tijyoꞌ nguinu na quichen Jerusalén, tsa ntsuꞌhui lyoo tixca kilometro.
\v 14 Nguia taa yu chaꞌ ñaꞌan chaꞌ nu yatoꞌo canꞌ.
\v 15 Lja nguia ycuiꞌ yu chaꞌ canꞌ, mdiya nchaꞌan Jesús ꞌin yu,
\v 16 una mchcun chaꞌ tiyaa ꞌin yu loꞌ a ncua chuꞌhui lyoo yu ꞌin ñi.
\v 17 Loꞌ juin ñi ꞌin yu: ¿Ñi chaꞌ ta nguia taa um, loꞌ luꞌun tiꞌ um?
\v 18 Sca yu canꞌ naan yu Cleofas, loꞌ mxcuen yu ꞌin ñi: ¿Ta scati nuꞌhuin yaa Jerusalén, a nchca ca jlyo tiꞌ chaꞌ nu yatoꞌo nu cuaꞌ nchca snan tsaan ti re?
\v 19 Xacanꞌ juin ñi ꞌin yu: ¿Ñi na ta nchca? Mxcuen yu ꞌin ñi: Cuiꞌ chaꞌ ꞌin Jesús Nazaret, sca nu mxiycuiꞌ Ndiose ꞌin, tlyu chaꞌ cuiyaꞌ mdaꞌan loꞌo ñi loꞌo chaꞌ nu ycuiꞌ ñi loꞌo ñaꞌan nu mꞌni ñi, loꞌ yuꞌhui cuiyaꞌ tiꞌ Ndiose ꞌin ñi, cuiꞌ cuañaꞌan loꞌo nten.
\v 20 Yatoꞌo nguinu ñi tuyaaꞌ yu nu ntsuꞌhui cunta chaꞌ ꞌin laa tsatlyu loꞌo nu lca bsya ꞌin na, loꞌ ngulo quiꞌya neꞌ ꞌin ñi tsayaꞌ nu mjyiꞌin caꞌan neꞌ ꞌin ñi loo cusi.
\v 21 Una huareꞌ ncua tiꞌ hua siꞌyana cuiꞌ ñi culo laa ñi ꞌin neꞌ Israel, loꞌ cuaꞌ nguiaa snan tsaan yatoꞌo chaꞌ re.
\v 22 A cunta tucua snan jun cunaꞌan msuꞌhua jun chaꞌ nduhue tiꞌ tiquee hua, tlya re ñii yaa jun tucuaa canꞌ,
\v 23 loꞌ siꞌyana a nguija lyoo ꞌa ñi ꞌin jun mxitucui jun, mdaa jun suun siꞌyana naꞌan xñii jun angujle, canꞌ nu mtsaꞌ ꞌin jun siꞌyana loꞌo ñi.
\v 24 Cuiꞌ cuañaꞌan tucua snan yu taꞌa ndaꞌan hua yaa yu tucuaa canꞌ, loꞌ nguija lyoo yu ꞌin na chcui ñaꞌan juin jun cunaꞌan canꞌ, una a naꞌan yu ꞌin ñi.
\v 25 Xacanꞌ mxcuen ñi ꞌin yu: ¡Ta chinꞌ ꞌa chaꞌ tiyaa ꞌin um, ta a ndiya quiꞌan tiꞌ um nchgaa chaꞌ nu nguaꞌan scua yu nu mxiycuiꞌ Ndiose ꞌin cuaꞌ sꞌni!
\v 26 ¿Ta siꞌi culo nducua la ntsuꞌhui chaꞌ tyijyin ñi nu lca Cristo nu tiꞌi, la xacanꞌ sten ñi la niꞌ cuaan loo xaa ꞌin ñi?
\v 27 Xacanꞌ tiꞌ la suun seꞌen mdyisnan nguaꞌan yu Moisé ngulyo scua la ñi chaꞌ ꞌin ñi loꞌo yu, cuañaꞌan ya quiñan ñi loꞌo cunda scaa quityi nu nguaꞌan nchgaa la ñaꞌan yu nu mxiycuiꞌ Ndiose ꞌin.
\v 28 Xa mdiyaa yu tuꞌhua quichen seꞌen ntsuꞌhui chaꞌ quinu yu, mꞌni ñi chaꞌ siꞌyana tijyoꞌ la tsaa ñi.
\v 29 Una mxicuꞌni yu ꞌin ñi siꞌyana quinu ñi loꞌo yu, loꞌ juin yu: ¿Ñi chaꞌ ta a quinu um loꞌo hua, siꞌyana cuaꞌ msiin loꞌ cuaꞌ quiꞌya tla? Xacanꞌ yten ñi ñaꞌan seꞌen ntsuꞌhui chaꞌ quinu ñi loꞌo yu.
\v 30 Yatoꞌo lja nducua ñi tuꞌhua msa canꞌ loꞌo yu, msñi ñi sca jaslya, mdyaa ñi xuꞌhue ꞌin Ndiose, msuꞌhue ñi ꞌin na loꞌ mdaa ñi ꞌin na ꞌin yu.
\v 31 La xacanꞌ nguila chaꞌ tiyaa ꞌin yu, loꞌ yuꞌhui lyoo yu ꞌin ñi, una a ncua chcanꞌ ꞌa ñi.
\v 32 Mdyisnan ycuiꞌ yu: Chaꞌ ñi tsañaꞌan nu ngüi tiꞌ cusya ꞌin na lja ndaa ñi chaꞌ tucueen ljyaan na, xa ngulyo scua la ñi chaꞌ nu nducua loo quityi ꞌin Ndiose.
\v 33 Ticuiꞌ xaa canꞌ mxitucui yu nde quichen Jerusalén, nguija lyoo yu ꞌin cha tixca yu taꞌa mdaꞌan ñi nguioꞌ tiꞌin yu loꞌo nchgaa la ñaꞌan jun,
\v 34 loꞌ ndeñaꞌan ndiꞌin ycuiꞌ jun xa mdiyaa yu: Nu chaꞌ ñi ca siꞌyana cuaꞌ mdyiquiꞌo Ñi Xꞌnan na, cuaꞌ nguloꞌo tloo ñi ꞌin yu Simón re.
\v 35 Xacanꞌ mdyisnan mdaa chcuaa yu canꞌ suun tsañaꞌan chaꞌ nu yatoꞌo ꞌin yu tucueen nguiaa yu, loꞌ ñaꞌan yuꞌhui lyoo yu ꞌin ñi xa msuꞌhue ñi jaslya canꞌ.
\s Nguloꞌo tloo Jesús ꞌin yu taꞌa mdaꞌan ñi
\p
\v 36 Lja nchcuiꞌ yu chaꞌ canꞌ, tsati ntyin nguloꞌo tloo Jesús tluꞌhue la seꞌen nguioꞌ tiꞌin jun, loꞌ juin ñi ꞌin jun: Tsuꞌhue ti tyiꞌin um scasca um.
\v 37 Nchgaa jun ytsen jun, loꞌ a jlyo ꞌa tiꞌ jun ñaꞌan tiꞌ quiñan tiꞌ jun, msqueꞌ tiꞌ jun siꞌyana sca cuiꞌin ti naꞌan jun.
\v 38 Xacanꞌ juin ñi: ¿Ñi chaꞌ ta nguitsen um, loꞌ nguiꞌni tucua tiꞌ um?
\v 39 Cuꞌni quii um yaanꞌ loꞌo quiyanꞌ loꞌ ca cuiyaꞌ tiꞌ um siꞌyana nanꞌ lcan. Culaꞌ um ꞌñan loꞌ ca jlyo tiꞌ um, siꞌyana sca cuiꞌin a ntsuꞌhui tijyan na loꞌ ñi a ntsuꞌhui cunanꞌ na tsañaꞌan nu naꞌan um ꞌñan cuaꞌ ñii.
\v 40 Xa ycuiꞌ ñi chaꞌ canꞌ, nguloꞌo ñi yaaꞌ ñi loꞌo quiyaꞌ ñi.
\v 41 Ndyijyin yaꞌ tsuꞌhue ntsuꞌhui tiquee jun siyaꞌ tiꞌ nguiꞌni tucua tiꞌ jun, a cunta nduhue tiꞌ jun, canꞌ chaꞌ juin ñi ꞌin jun: ¿Ta a sca na ndiꞌin ꞌin um cu na?
\v 42 Xacanꞌ mdaa jun tsa yuꞌhue cula nu cuaꞌ mqueꞌ ꞌin ñi, loꞌo scuaꞌ cuton nu ntsuꞌhui cuiñanꞌ.
\v 43 Msñi ñi ꞌin na loꞌ ycu ñi ꞌin na tloo naꞌan jun.
\v 44 Xacanꞌ juin ñi ꞌin jun: Nde chaꞌ ycuinꞌ xa mdaꞌan na loꞌo um, siꞌyana ꞌni chaꞌ tsatoꞌo nchgaa seꞌen nchcuiꞌ quityi ꞌin Ndiose chaꞌ ꞌñan, quityi nu nguaꞌan scua Moisé loꞌo nchgaa la ñaꞌan yu nu mxiycuiꞌ Ndiose ꞌin, loꞌo quityi salmo.
\v 45 Xacanꞌ msla ñi chaꞌ tiyaa ꞌin jun siꞌyana quiꞌya jun cunta ñaꞌan nchcuiꞌ quityi ꞌin Ndiose,
\v 46 loꞌ juin ñi ꞌin jun: Nde chaꞌ nu nguinu scua, Ñi nu lca Cristo ntsuꞌhui chaꞌ tyijyin ñi nu tiꞌi tsayaꞌ caja ñi, una tyiquiꞌo ñi nu cuaꞌ ca snan tsaan,
\v 47 a cunta caja nu tyiꞌan ycuiꞌ chaꞌ re loꞌo chaꞌ cuiyaꞌ ꞌin ñi sca chcui chendyu, siꞌyana xiloꞌo chonꞌ neꞌ quiꞌya ꞌin neꞌ loꞌ cuꞌni Ndiose chaꞌ tlyu tiꞌ ꞌin neꞌ, loꞌ tyisnan chcuiꞌ neꞌ chaꞌ re seꞌen lca Jerusalén.
\v 48 ꞌUn lca um nu naꞌan tloo chaꞌ re.
\v 49 Cunen loꞌo um sca chaꞌ, nanꞌ caꞌan tñan chaꞌ nu cuaꞌ mdiꞌin tyaa Ndiose loꞌo um, una quita um quichen Jerusalén re tsayaꞌ chcuan um chaꞌ cuiyaꞌ nu tyiꞌo la niꞌ cuaan.
\s Xa ycuen Jesús nde niꞌ cuaan
\p
\v 50 Xacanꞌ mdiya loꞌo ñi ꞌin jun nde tuꞌhua quichen Betania, loꞌ mscuen ñi yaaꞌ ñi loꞌ ncuan ñi ꞌin jun.
\v 51 Yatoꞌo lja ncuan ñi ꞌin jun mdyisnan ycuen ñi nde niꞌ cuaan.
\v 52 Xa cuaꞌ mꞌni tnu jun ꞌin ñi, mxitucui jun nde quichen Jerusalén, ndyijyin yaꞌ tsuꞌhue ntsuꞌhui tiquee jun.
\v 53 Nchgaa xaa nguilyu jun niꞌ lyaa, nguiꞌni tnu jun ꞌin Ndiose loꞌ ndyaa jun xuꞌhue ꞌin ñi. Amen.