\id JHN - Nopala (Chatino) NT [cya] - Mexico 2013 (web 2014)
\h JUAN
\toc1 Juan
\toc2 Juan
\toc3 Jn
\mt1 Juan
\c 1
\s Chaꞌ ꞌin Jesucristo xa yaan ñi loo chendyu
\p
\v 1 Xa tiꞌ lyijyi tsaaꞌ chendyu cuaꞌ ndiꞌin Chaꞌ ꞌin Ndiose, tsatlyu ndiꞌin Ndiose loꞌo Chaꞌ canꞌ, loꞌ Ndiose lca Chaꞌ canꞌ.
\v 2 Cuaꞌ ndiꞌin Chaꞌ canꞌ loꞌo Ndiose xa tiꞌ lyijyi tsaaꞌ chendyu.
\v 3 Cuiꞌ ñi mtñan ñi nchgaa loo na, ñi sca na loꞌ a nguiaaꞌ, chaꞌ siꞌi siꞌya ñi.
\v 4 Cuiꞌ ñi ndaꞌan loꞌo ñi chendyu ꞌin nten, loꞌ chendyu canꞌ lca na xaa ꞌin neꞌ.
\v 5 Nxtyi xaa canꞌ seꞌen tla yta, una tla yta canꞌ, a nchca ꞌin na chcui ndijin na loo xaa canꞌ.
\v 6 Yatoꞌo ngulo ton Ndiose ꞌin sca yu ncua naan Xuhua.
\v 7 Nde nu yan ytsaꞌ ꞌin nten, mdaa yu suun ñaꞌan ndiꞌin chaꞌ ꞌin xaa canꞌ, siꞌyana tsa quiꞌan tiꞌ nchgaa nten siꞌya chaꞌ nu chcuiꞌ yu.
\v 8 Una siꞌi yu lca yu xaa canꞌ, cuiꞌ ca nu yaan yu siꞌyana taa yu suun ñaꞌan ndiꞌin chaꞌ ꞌin xaa canꞌ.
\v 9 Xaa canꞌ lca na chaꞌ nu ñi nu ndaa chendyu ꞌin nchgaa nten, loꞌ mdiyaan xaa canꞌ loo chendyu re.
\v 10 Mdiꞌin ñi loo chendyu re, cuiꞌ ñi mtñan ñi ꞌin na, una nten chendyu a yuꞌhui lyoo neꞌ tucui lca ñi.
\v 11 Yaan ñi seꞌen nu mtñan ñi, una a ncuan xuꞌhue ta nten ꞌin ñi.
\v 12 Una tsalca nu ncuan xuꞌhue ꞌin ñi, nu ndiya quiꞌan tiꞌ ꞌin ñi, mdaa ñi chaꞌ cuiyaꞌ siꞌyana ca canꞌ sñeꞌ Ndiose,
\v 13 una a ncua cuneꞌ canꞌ loꞌo juesa ꞌin nten chendyu, ta siꞌya chaꞌ cuiyaꞌ ꞌin neꞌ, cuiꞌ ca nu ncua cuneꞌ canꞌ siꞌya chaꞌ cuiyaꞌ ꞌin Ndiose.
\v 14 Loꞌ ñi nu lca Chaꞌ canꞌ ncua ñi sca nten, tsatlyu mdiꞌin ñi loꞌo hua, (naꞌan hua chaꞌ cuiyaꞌ ꞌin ñi, chaꞌ cuiyaꞌ nu ndaꞌan loꞌo scati Sñeꞌ Ndiose), loꞌ mtsaꞌan yuꞌhui chaꞌ tsuꞌhue ꞌin ñi loꞌ ycuiꞌ ñi chaꞌ nu ñi.
\v 15 Yu Xuhua canꞌ mdaa yu suun chaꞌ ꞌin ñi, loꞌ nchcuiꞌ yu: Cuiꞌ chaꞌ ꞌin ñi re lca nu ycuinꞌ loꞌo um siꞌyana cuaꞌ ljyaan sca nu ndon loo lati que ꞌñan, siꞌyana cuaꞌ sꞌni la ndiꞌin canꞌ.
\v 16 Loo nu mtsaꞌan yuꞌhui chaꞌ tsuꞌhue ꞌin ñi, nguiꞌni caꞌan scasca chaꞌ tsuꞌhue ꞌin na nchgaa na.
\v 17 Ndiose mdaa ñi lee ꞌin na siꞌya Moisé, una chaꞌ tsuꞌhue loꞌo chaꞌ nu ñi yaan na siꞌya Jesucristo.
\v 18 A tucui nu cuaꞌ naꞌan tloo ꞌin Ndiose, scati Sñeꞌ ñi nu sca chaꞌ ti ꞌin ñi loꞌo, canꞌ nu ngulyo scua la chaꞌ ꞌin Ndiose loꞌo na.
\s Suun nu mdaa yu Xuhua nu mducua tya ꞌin nten
\p
\v 19 Yatoꞌo nguaꞌan tñan neꞌ judio tucua snan yu levita, loꞌo yu nu ntsuꞌhui cunta ꞌin laa quichen Jerusalén, siꞌyana cuñichaꞌ neꞌ ꞌin yu Xuhua chaꞌ tucui ca lca yu, loꞌ nde suun nu mdaa yu,
\v 20 ycuiꞌ la yu, loꞌ juin yu: Nanꞌ a lcan ñi nu lca Cristo.
\v 21 ¿Tucui ta lca xacanꞌ? ¿Ta cuiꞌ lca Elía? Mxcuen yu ꞌin neꞌ: Siꞌin. ¿Uta na lca ycuiꞌ ca nu nxiycuiꞌ Ndiose ꞌin? Mxcuen yu ꞌin neꞌ: Siꞌi canꞌ nu lcan.
\v 22 Xacanꞌ juin neꞌ ꞌin yu: ¿Tucui ta lca chaꞌ na canꞌ, siꞌyana tca tyaa hua cunta ꞌin yu nu nguaꞌan tñan ꞌin hua? ¿Ñi suun ndaa chaꞌ nu ꞌin?
\v 23 Mxcuen yu ꞌin neꞌ: Nanꞌ lcan yu nu cuaꞌ nguinu chaꞌ —tyiꞌan seꞌen ngutyi loꞌ chcuiꞌ cueen: Cuꞌni ñi um tucueen seꞌen caan Ñi Xꞌnan na—, tsañaꞌan chaꞌ nu mxiycuiꞌ Ndiose ꞌin yu Isaía cuaꞌ sꞌni.
\v 24 Cuiꞌ ta ꞌin neꞌ fariseo lca nu mdiyaa canꞌ,
\v 25 loꞌ tiꞌ mñichaꞌ neꞌ ꞌin yu: ¿Ñi chaꞌ ta nducua tya ꞌin nten, chaꞌ na siꞌi Cristo lca, ñi a lca Elía, ñi a lca nu nxiycuiꞌ Ndiose ꞌin?
\v 26 Mxcuen yu Xuhua canꞌ: Nanꞌ nducua tyan ꞌin nten loꞌo tyiꞌa, una cuiꞌ lja um re tyiꞌo sca nu a nchca chuꞌhui lyoo um ꞌin.
\v 27 Canꞌ nu cuaꞌ ljyaan, loꞌ ndon loo lati que ꞌñan nanꞌ, loꞌ tsuꞌhue ntsuꞌhui tiqueen chaꞌ cua na taa ñi chaꞌ cuiyaꞌ xtinꞌ tsa tisnan ti ñi.
\v 28 Nchgaa chaꞌ re yatoꞌo na seꞌen lca Betábara, xca tsoꞌ chco tlyu Jordan seꞌen nu mducua tya yu Xuhua ꞌin nten. Ñi nu lca Slyaꞌ ꞌin Ndiose
\v 29 Xca tsaan canꞌ naꞌan yu Xuhua ljyaan Jesús seꞌen ndon yu, loꞌ juin yu ꞌin nten: Nde ñi nu lca Slyaꞌ ꞌin Ndiose nu nxicuten quiꞌya ꞌin nten chendyu.
\v 30 Cuiꞌ chaꞌ ꞌin ñi re lca nu ycuinꞌ loꞌo um siꞌyana cuaꞌ ljyaan ñi nu ndon loo lati que ꞌñan nanꞌ, siꞌyana cuaꞌ sꞌni la ndiꞌin ñi.
\v 31 Nanꞌ a ndyuꞌhui lyoon ꞌin ñi, una nde chaꞌ nducua tyan ꞌin neꞌ, siꞌyana chuꞌhui lyoo neꞌ Israel ꞌin ñi,
\v 32 Ndeñaꞌan juin yu Xuhua canꞌ: Nanꞌ naꞌan xa mdoꞌo Espíritu ꞌin Ndiose la niꞌ cuaan, nguꞌya tucua que ñi tsañaꞌan nchca tiꞌ ndyiꞌya tucua sca scunꞌ joꞌo.
\v 33 Nanꞌ a ndyuꞌhui lyoon ꞌin ñi, una ñi nu nguaꞌan tñan ꞌñan siꞌyana tucua tyan ꞌin nten loꞌo tyiꞌa, juin ñi ꞌñan: Ñi nu ñaꞌan quiꞌya tucua Espíritu nu Luhui ꞌin Ndiose que, canꞌ nu cuꞌni chaꞌ tucua tya ꞌin nten, una loꞌo Espíritu ꞌin Ndiose.
\v 34 Nanꞌ naꞌan tloon can ꞌin ñi, canꞌ chaꞌ ndaan suun siꞌyana cuiꞌ ñi lca ñi Sñeꞌ Ndiose.
\s Xa msiꞌya Jesús ꞌin culoo yu taꞌa mdaꞌan ñi
\p
\v 35 Xca tsaan canꞌ nguilyu yu Xuhua ticuiꞌ seꞌen canꞌ loꞌo tucua yu taꞌa ndaꞌan yu.
\v 36 Naꞌan yu Xuhua seꞌen nguilyu Jesús loꞌ juin yu: Ñaꞌan jan ñi, cua ndon ñi nu lca Slyaꞌ ꞌin Ndiose.
\v 37 Xa ngune ꞌin chcuaa yu canꞌ chaꞌ nu ycuiꞌ yu, cuiꞌ xaa mducui nchaꞌan yu ꞌin Jesús.
\v 38 Xa naꞌan Jesús siꞌyana ljyan nchaꞌan yu ꞌin ñi, juin ñi ꞌin yu: ¿Tucui ca ꞌin ndaꞌan nan um? Mxcuen yu ꞌin ñi: Rabí, (chaꞌ re nchca tiꞌ chcuiꞌ, ꞌUn ñi nu lca Bstro), ¿la ta ndiꞌin um?
\v 39 Loꞌ juin ñi ꞌin yu: Tsaa na loꞌ ca jlyo tiꞌ um. Xacanꞌ yaa yu loꞌ mdiyaa yu seꞌen ndiꞌin ñi. Canꞌ nguinu yu siꞌyana cuaꞌ ntsuꞌhui braa cuaꞌ jacua siin xa mdiyaa yu.
\v 40 Chcuaa yu nu ngune ꞌin ycuiꞌ yu Xuhua canꞌ mducui nchaꞌan ꞌin Jesús, sca canꞌ naan Ndre, taꞌa ngula yu Simón nu nchcuiꞌ neꞌ loꞌo lca Tyo.
\v 41 Cuiꞌ xaa nguia nan yu ꞌin Simón taꞌa ngula yu, loꞌ juin yu ꞌin: Cuaꞌ nguija lyoo hua ꞌin ñi nu lca Mesía (chaꞌ re nchca tiꞌ chcuiꞌ, Cristo, ñi nu nguaꞌan tñan Ndiose ꞌin).
\v 42 Ya loꞌo yu ꞌin tloo Jesús, loꞌ xa naꞌan ñi ꞌin yu juin ñi: Nuꞌhuin lca Simón, sñeꞌ Jonás, una cuaꞌ ñii ca naan Cefas, (chaꞌ re nchca tiꞌ chcuiꞌ Tyo).
\s Xa msiꞌya Jesús ꞌin yu Lpe loꞌo Natanael
\p
\v 43 Xca tsaan canꞌ mdoꞌo tiquee Jesús tsaa ñi seꞌen lyiꞌya loo Galilea, canꞌ mchcua taꞌa ñi loꞌo yu Lpe, loꞌ juin ñi ꞌin yu: Chcui nchaꞌan ꞌñan.
\v 44 Quichen Betsaida mdoꞌo yu Lpe canꞌ, cuiꞌ quichen tyi yu Ndre loꞌo yu Tyo.
\v 45 Yu Lpe ya nan ꞌin yu Natanael, loꞌ juin yu ꞌin: Cuaꞌ nguija lyoo hua ꞌin ñi nu ntsuꞌhui chaꞌ caan, ñi nu cuaꞌ nguaꞌan scua Moisé chaꞌ ꞌin, cuiꞌ chaꞌ nu nguaꞌan scua yu nu mxiycuiꞌ Ndiose ꞌin cuaꞌ sꞌni, loꞌ lca ñi Jesús, sñeꞌ See, nu mdoꞌo quichen Nazaret.
\v 46 Loꞌ juin yu Natanael: ¿Ta xtyi tiꞌ Nazaret tyiꞌo sca nu cuꞌni tñan tsuꞌhue? Xacanꞌ juin yu Lpe: Tsaa na loꞌ ca cuiyaꞌ tiꞌ.
\v 47 Xa naꞌan Jesús ljyaan yu Natanael, juin ñi: Nde ljyaan sca yu Israel nu cuaꞌ tyi ca, nu ñi sca chaꞌ cuiñi loꞌ a ntsuꞌhui ꞌin.
\v 48 Yu Natanael canꞌ juin yu ꞌin ñi: ¿La ta yuꞌhui lyoo um ꞌñan? Mxcuen Jesús ꞌin yu: Cuaꞌ naꞌan ꞌin xa nducua suun yca higo canꞌ, xa tiꞌ lyijyi tsa teꞌen yu Lpe ꞌin.
\v 49 Xacanꞌ mxcuen yu Natanael ꞌin ñi: Rabí, ꞌun lca um ycuiꞌ ca Sñeꞌ Ndiose, ꞌun lca um Ree ꞌin neꞌ Israel.
\v 50 Loꞌ juin Jesús ꞌin yu: ¿Ta ya quiꞌan tiꞌ ꞌñan siꞌyana nen naꞌan nducua suun yca higo canꞌ? Una ntsuꞌhui chaꞌ ñaꞌan chaꞌ nu tnu lati que ñaꞌan chaꞌ nu naꞌan cuaꞌ ñii.
\v 51 Loꞌ tiꞌ juin la ñi ꞌin yu: Nu chaꞌ ñi sꞌni cunen loꞌo, chcui nu nguiaa nde loo re ñaꞌan quila tucua niꞌ cuaan, loꞌ canꞌ ñaꞌan —scuen loꞌ quiꞌya angujle ꞌin Ndiose— seꞌen ndon Yu Quiꞌyu nu Mdoꞌo nde niꞌ Cuaan.
\c 2
\s Xa jui cuilyiꞌo neꞌ seꞌen lca Caná
\p
\v 1 Nu cuaꞌ nchca snan tsaan canꞌ nchca sca taꞌa seꞌen ndyijyi cuilyiꞌo neꞌ quichen Caná seꞌen lyiꞌya loo Galilea. Loꞌo jyiꞌan Jesús nguilyu canꞌ.
\v 2 A cunta loꞌo Jesús loꞌo taꞌa ndaꞌan ñi jui nu nguni ꞌin jun tsaa jun seꞌen nchca taꞌa canꞌ.
\v 3 Xa yatii vino ꞌin neꞌ juin jyiꞌan Jesús ꞌin ñi: Cuaꞌ mdyi vino re.
\v 4 Xacanꞌ mxcuen Jesús: ¿Ñi chaꞌ lyee ꞌa ntsuꞌhui yuhue tiꞌ um chaꞌ re? Tiꞌ lyijyi tiyaa braa nu cuꞌnin sca chaꞌ.
\v 5 Xacanꞌ juin jyiꞌan ñi loꞌo yu nu nsuꞌhua vino canꞌ: Tucua um tñan nchgaa chaꞌ nu chcuiꞌ ñi.
\v 6 Canꞌ ndon tsa scua quitonꞌ tnu, nu nguiaaꞌ loꞌo quee loꞌ najoꞌo na ꞌin neꞌ judio xa nsuhui neꞌ chaꞌ ꞌin neꞌ. Cunda scaa quitonꞌ canꞌ ndyuꞌhui tucua uta snan teꞌen tyiꞌa ꞌin na.
\v 7 Loꞌ juin Jesús ꞌin neꞌ: Cuꞌni chaꞌan um quitonꞌ cua loꞌo tyiꞌa. Cuiꞌ xaa mꞌni chaꞌan neꞌ ꞌin na hasta la tuꞌhua na.
\v 8 Xacanꞌ juin ñi ꞌin neꞌ: Suꞌhua um tsachinꞌ na, loꞌ tsa loꞌo um ꞌin na ꞌin yu nu ntsuꞌhui cunta ꞌin taꞌa re. Loꞌ cuañaꞌan mꞌni neꞌ.
\v 9 Yu nu ntsuꞌhui cunta ꞌin taꞌa canꞌ a ngujlyo tiꞌ yu la mdoꞌo na, una nu ya loꞌo ꞌin na jlyo tiꞌ la mdoꞌo na. Xa yiꞌo yu tyiꞌa nu mchca vino canꞌ, cuiꞌ xaa msiꞌya yu ꞌin yu nu ndyijyi cuilyiꞌo canꞌ,
\v 10 loꞌ juin yu ꞌin: Nchgaa nten nsuꞌhua neꞌ culo nducua la vino nu tsuꞌhue, loꞌ xa cuaꞌ tlya na yiꞌo neꞌ, xacanꞌ nsuꞌhua neꞌ vino nu cuxi ti, una ꞌun la cuaꞌ ñii msuꞌhua um vino nu tsuꞌhue la.
\v 11 Nde culoo chaꞌ nu tnu mꞌni Jesús quichen Caná seꞌen lyiꞌya loo Galilea, xa ncua chcanꞌ loo chaꞌ cuiyaꞌ ndaꞌan loꞌo ñi, loꞌ yu taꞌa ndaꞌan ñi ya quiꞌan tiꞌ ꞌin ñi.
\v 12 Chonꞌ ndeꞌen canꞌ mdoꞌo Jesús nguiaa ñi nde quichen Capernaum tsatlyu loꞌo jyiꞌan ñi loꞌo taꞌa ngula ñi, loꞌo yu taꞌa ndaꞌan ñi. Canꞌ nguinu jun tucua snan tsaan.
\s Ngulo Jesús ꞌin nten nu nguiꞌni quiyaꞌ niꞌ lyaa
\p
\v 13 Cuaꞌ nchcui cuiiꞌ chaꞌ ca taꞌa pascua ꞌin neꞌ judio, loꞌ Jesús yaa ñi quichen Jerusalén.
\v 14 Xa mdiyaa ñi seꞌen nducua laa canꞌ, naꞌan ñi ꞌin nten nu ndyijuiꞌ bta loꞌo slyaꞌ loꞌo scunꞌ joꞌo, a cunta loꞌo yu nu nxitsaꞌan tñi nducua yu canꞌ.
\v 15 Xacanꞌ mxijnan ñi sca tiso nducua yaaꞌ ñi, loꞌ ngulo ñi ꞌin nchgaa nu ndiꞌin canꞌ nde lyiyaꞌ, loꞌo slyaꞌ loꞌo bta ꞌin neꞌ, mslo tuꞌhui ñi tñi ꞌin neꞌ nu nxitsaꞌan tñi canꞌ, loꞌ mxiquilyu ñi msa,
\v 16 loꞌ juin ñi ꞌin neꞌ nu ndyijuiꞌ scunꞌ joꞌo canꞌ: Lyoo um nchgaa na re nde lyiyaꞌ, loꞌ a cuꞌni um naꞌan ꞌin Stin ca na naꞌan loquiyaꞌ.
\v 17 Xacanꞌ nguia yuꞌhui tiꞌ yu taꞌa ndaꞌan ñi ñaꞌan nchcuiꞌ quityi ꞌin Ndiose: Cuaꞌ lca na a ta loon ꞌan siꞌyana lyee nsuꞌhuan chaꞌ tiqueen siꞌya chaꞌ ꞌin laa ꞌin um.
\v 18 Mñichaꞌ neꞌ judio ꞌin ñi: ¿La jui chaꞌ cuiyaꞌ ꞌin loꞌo chaꞌ nu nguiꞌni re?
\v 19 Mxcuen Jesús ꞌin neꞌ: Xicuten um laa re, loꞌ niꞌ snan ti tsaan xiton ꞌin na xiyaꞌ.
\v 20 Cuiꞌ xaa juin neꞌ judio canꞌ: Tsaniꞌ tucua yla ntsuꞌhui scua yjan nguiaaꞌ laa re, ¿loꞌ nuꞌhuin loꞌo snan ti tsaan xiton ꞌin na xiyaꞌ?
\v 21 Una laa nu nchcuiꞌ ñi chaꞌ ꞌin canꞌ lca na ticuiiꞌ ñi.
\v 22 Xa nu cuaꞌ mdyiquiꞌo ñi, xacanꞌ nguia yuꞌhui tiꞌ yu taꞌa mdaꞌan ñi siꞌya chaꞌ nu ycuiꞌ ñi re, loꞌ ya quiꞌan tiꞌ yu chaꞌ nu nguinu scua loo quityi ꞌin Ndiose loꞌo chaꞌ nu ycuiꞌ Jesús.
\s Jesús jlyo tiꞌ ñi ñaꞌan lca cusya ꞌin nten
\p
\v 23 Lja nu tiꞌ ndiꞌin ñi quichen Jerusalén seꞌen nchca taꞌa pascua canꞌ, quiꞌan ꞌa nten ya quiꞌan tiꞌ ꞌin ñi siꞌya scasca chaꞌ nu tnu nguiꞌni ñi.
\v 24 Una Jesús ncua cuiyaꞌ tiꞌ ñi siꞌyana a ñi ndiꞌin chaꞌ ꞌin neꞌ, siꞌyana ndyuꞌhui lyoo tsuꞌhue ñi ꞌin nchgaa nten,
\v 25 ñi a ꞌni chaꞌ caja nu quitsaꞌ ꞌin ñi ñaꞌan ndiꞌin chaꞌ ꞌin nten, siꞌyana jlyo tiꞌ ñi ñaꞌan lca cusya ꞌin neꞌ.
\c 3
\s Chaꞌ ꞌin Jesús loꞌo Nicodemo
\p
\v 1 Cuiꞌ ta ꞌin neꞌ fariseo ndiꞌin sca yu naan Nicodemo, lca yu sca nu ndon loo ꞌin neꞌ judio.
\v 2 Yatoꞌo sca tla yaa yu seꞌen ndiꞌin Jesús, loꞌ juin yu ꞌin ñi: Rabí, cuaꞌ jlyo tiꞌ hua siꞌyana loꞌo cunta ꞌin Ndiose ndloꞌo um, siꞌyana a tucui nu tca cuꞌni scasca chaꞌ nu tnu ñaꞌan nu ꞌun nguiꞌni um, chaꞌ siꞌi loꞌo chaꞌ cuiyaꞌ ꞌin Ndiose.
\v 3 Mxcuen Jesús ꞌin yu: Nu chaꞌ ñi sꞌni cunen loꞌo, a tucui nu tca sten seꞌen ndlo Ndiose tñan chaꞌ na a chca cuneꞌ xiyaꞌ.
\v 4 Loꞌ juin yu Nicodemo: ¿Ñaꞌan tca ca cuneꞌ sca nten chaꞌ cuaꞌ cula neꞌ? ¿Ta tiꞌ tca ca cuneꞌ neꞌ ꞌin jyiꞌan neꞌ xiyaꞌ?
\v 5 Xacanꞌ mxcuen Jesús ꞌin yu: Nu chaꞌ ñi sꞌni cunen loꞌo, sca nten nu a ca cuneꞌ loꞌo tyiꞌa, loꞌo Espíritu, a tca sten canꞌ seꞌen ndlo Ndiose tñan.
\v 6 Siꞌyana nu nchca cuneꞌ loꞌo juesa ꞌin nten chendyu, ticuiꞌ nten chendyu lca canꞌ, una nu nchca cuneꞌ loꞌo chaꞌ cuiyaꞌ ꞌin Espíritu, cuaꞌ mchca cuneꞌ cusya ꞌin canꞌ.
\v 7 A cuhue tiꞌ lyee la chaꞌ nu ycuinꞌ loꞌo siꞌyana ꞌni chaꞌ ca cuneꞌ xiyaꞌ.
\v 8 Cuiꞌin nchca na la ñaꞌan ti, loꞌ ne nguiaa na, una a tucui jlyo tiꞌ la mdoꞌo na uta la nguiaa na, cuiꞌ cuañaꞌan ndiꞌin chaꞌ ꞌin nu nchca cuneꞌ loꞌo Espíritu ꞌin Ndiose.
\v 9 Mxcuen Nicodemo ꞌin Jesús: ¿Ñaꞌan tca ca cuiyaꞌ tiꞌ na chaꞌ re?
\v 10 Mxcuen Jesús ꞌin yu: ¿Ta siꞌi nuꞌhuin lca nu ndloꞌo ꞌin neꞌ Israel, loꞌ a ndyiꞌya cunta chaꞌ re?
\v 11 Nu chaꞌ ñi sꞌni cunen loꞌo, nchcuiꞌ hua chaꞌ nu jlyo tiꞌ hua loꞌ ndaa hua suun chaꞌ nu cuaꞌ naꞌan hua, una a ndiya quiꞌan tiꞌ um chaꞌ nu nchcuiꞌ hua.
\v 12 Chaꞌ nu nchca loo chendyu re cuaꞌ ycuinꞌ loꞌo um una a ndiya quiꞌan tiꞌ um, ¿ñaꞌan la ca chaꞌ nu nchca la niꞌ cuaan na tca tsa quiꞌan tiꞌ um?
\v 13 A tucui nu cuaꞌ ycuen la niꞌ cuaan, cuiꞌ ca nu scati Yu Quiꞌyu nu Mdoꞌo nde niꞌ Cuaan, ñi nu ndiꞌin ca la niꞌ cuaan mdiyaan loo chendyu re.
\v 14 Tsañaꞌan mꞌni Moisé xa mdaꞌan yu seꞌen ngutyi, mxiton yu sca yca seꞌen mjyiꞌin caꞌan yu cunaan, loꞌ cuañaꞌan ꞌni chaꞌ jyiꞌin caꞌan neꞌ ꞌñan siiꞌ yca, Nanꞌ Yu Quiꞌyu nu Mdoꞌo nde niꞌ Cuaan,
\v 15 ñaꞌan ca siꞌyana nchgaa nu tsa quiꞌan tiꞌ ꞌin ñi a quinanꞌ cusya ꞌin, cuiꞌ ca nu caja chendyu nu a tsatii ꞌa ꞌin.
\s Tsala ñaꞌan tlyu chaꞌ tsuꞌhue ꞌin Ndiose
\p
\v 16 Tsala ñaꞌan tlyu chaꞌ tsuꞌhue ꞌin Ndiose, nu hasta mdaa ñi scati Sñeꞌ ñi ꞌin nten chendyu, siꞌyana nchgaa nu tsa quiꞌan tiꞌ ꞌin ñi a quinanꞌ cusya ꞌin, cuiꞌ ca nu caja chendyu nu a tsatii ꞌa ꞌin.
\v 17 Siꞌyana a nguaꞌan tñan Ndiose ꞌin Sñeꞌ ñi loo chendyu re, ta siꞌyana soꞌ tucua ñi quiꞌya chonꞌ nten, cuiꞌ ca nu yaan ñi siꞌyana culo laa ñi ꞌin neꞌ.
\v 18 Nu ndiya quiꞌan tiꞌ ꞌin ñi, a nducua ꞌa quiꞌya chonꞌ, una nu a ndiya quiꞌan tiꞌ ꞌin ñi tiꞌ nducua quiꞌya chonꞌ, cuiꞌ siꞌyana a nchca tsa quiꞌan tiꞌ ꞌin scati Sñeꞌ Ndiose.
\v 19 Nde chaꞌ nducua quiꞌya chonꞌ neꞌ: Siꞌyana ñi nu lca xaa cuaꞌ yaan loo chendyu re, una nten chendyu lyee la lca tiquee neꞌ loꞌo chaꞌ tla yta, siꞌyana chacuiꞌ chaꞌ ngunanꞌ ntsuꞌhui tiquee neꞌ.
\v 20 Siꞌyana tsalca nu nguiꞌni chaꞌ ngunanꞌ a ndyiꞌan neꞌ loo xaa ꞌin ñi, ñi a ndaa canꞌ yaꞌ quiꞌni xaa ꞌin, seꞌen nu a ca chcanꞌ loo tñan ngunanꞌ nu nguiꞌni.
\v 21 Una nu nguia nchaꞌan chaꞌ nu ñi, canꞌ nu ndyiꞌan loo xaa ꞌin Ndiose, seꞌen nu ca chcanꞌ loo tñan tsuꞌhue nu nguiꞌni canꞌ siꞌya chaꞌ cuiyaꞌ ꞌin ñi.
\s Taꞌa tsuꞌhue yu nu ndyijyi cuilyiꞌo
\p
\v 22 Chonꞌ ndeꞌen canꞌ yaa Jesús loꞌo yu taꞌa ndaꞌan ñi seꞌen lyiꞌya loo Judea, canꞌ mdiꞌin ñi loꞌo yu sca coꞌ xaa, mducua tya ñi ꞌin nten.
\v 23 Loꞌo yu Xuhua mducua tya yu ꞌin nten sca seꞌen naan Enón, cuiꞌ ti seꞌen lca Salim, siꞌyana canꞌ tlya tyiꞌa ntsuꞌhui, loꞌ mducua tya yu ꞌin nten nu mdiyaa canꞌ.
\v 24 Tiꞌ lyijyi suꞌhua neꞌ ꞌin yu Xuhua naꞌan chcuan xa mꞌni yu chaꞌ re.
\v 25 Xacanꞌ mdyisnan ycuiꞌ tyijyin neꞌ judio loꞌo taꞌa ndaꞌan yu Xuhua, loꞌ a ncua ca sca chaꞌ ti ꞌin yu loꞌo neꞌ ñaꞌan ntsuꞌhui chaꞌ quinu luhui nten tloo Ndiose.
\v 26 Ya ytsaꞌ neꞌ ꞌin yu Xuhua loꞌ juin neꞌ: Rabí, ñaꞌan um jan ñi, yu nu taꞌa nguilyu um xca tsoꞌ chco tlyu Jordan, yu nu mdaa um suun ñaꞌan ndiꞌin chaꞌ ꞌin, loꞌo yu cuaꞌ nducua tya yu ꞌin nten, loꞌ quiꞌan ꞌa nten cuaꞌ nducui nchaꞌan ꞌin yu.
\v 27 Mxcuen yu Xuhua: A tucui nu tca cuan xuꞌhue sca chaꞌ, chaꞌ siꞌi Ndiose taa ñi chaꞌ cuiyaꞌ.
\v 28 Cuiꞌ um ngune ꞌin um chaꞌ nu ycuinꞌ siꞌyana siꞌi Cristo lcan, una mducua loon siꞌyana taan suun ñaꞌan ndiꞌin chaꞌ ꞌin ñi.
\v 29 Sca yu nu ndyijyi cuilyiꞌo ntsuꞌhui chaꞌ chcuan yu cunta ꞌin cuilyiꞌo yu. Loꞌ nu lca taꞌa tsuꞌhue yu ndon cuiꞌ ti siiꞌ yu, tsuꞌhue ntsuꞌhui tiquee yu xa ne ꞌin yu chaꞌ nu nchcuiꞌ yu nu ndyijyi cuilyiꞌo canꞌ. Cuiꞌ cuañaꞌan ndiꞌin chaꞌ ꞌñan cuaꞌ ñii, cuaꞌ ya tucua xaa nu ca tsuꞌhue chuꞌhui tiqueen.
\v 30 Cuiꞌ ñi ntsuꞌhui chaꞌ scuen cuaan ñi, loꞌ nanꞌ nde quiꞌya teꞌen chaꞌ ꞌñan. Ñi nu mdoꞌo nde niꞌ cuaan
\v 31 Ñi nu mdoꞌo nde niꞌ cuaan scati ñi lca ñi nu ndon loo la, una nten chendyu, ticuiꞌ loo chendyu re ngula neꞌ loꞌ nchcuiꞌ neꞌ chaꞌ nu nchca loo chendyu re. Una ñi nu mdoꞌo nde niꞌ cuaan scati ñi lca ñi nu ndon loo lati.
\v 32 Ndaa ñi suun chaꞌ nu naꞌan ñi loꞌo chaꞌ nu cuaꞌ ngune ꞌin ñi, una a tucui nu nducuan xuꞌhue chaꞌ nu nchcuiꞌ ñi.
\v 33 Nu nꞌni cunta chaꞌ nu nchcuiꞌ ñi, canꞌ nu ndaa suun siꞌyana Ndiose ñi ndiꞌin chaꞌ ꞌin ñi.
\v 34 Siꞌyana ñi nu nguaꞌan tñan Ndiose ꞌin, cuiꞌ chaꞌ ꞌin Ndiose nchcuiꞌ canꞌ, siꞌyana siꞌi na ndyuꞌhui cuiyaꞌ ti Espíritu nu ndaa Ndiose ꞌin canꞌ.
\v 35 Stina Ndiose lyee ndyuꞌhui cuiyaꞌ tiꞌ ñi ꞌin Sñeꞌ ñi, loꞌ yaaꞌ canꞌ mxnu ñi cunta nchgaa loo chaꞌ.
\v 36 Nu ndiya quiꞌan tiꞌ ꞌin Sñeꞌ Ndiose, cuaꞌ jui chendyu nu a tsatii ꞌa ꞌin, una nu xcuan tloo ꞌin Sñeꞌ ñi, a quiꞌni caꞌan ꞌin canꞌ chendyu nu a tsatii ꞌa, cuiꞌ ca nu nde xitijin Ndiose ꞌin canꞌ nu tiꞌi.
\c 4
\s Chaꞌ ꞌin neꞌ cunaꞌan Samaria
\p
\v 1 Yatoꞌo neꞌ fariseo ngune ꞌin neꞌ siꞌyana quiꞌan la nten nducui nchaꞌan ꞌin Jesús, loꞌ lyee la nducua tya ñi ꞌin nten que ꞌin yu Xuhua,
\v 2 (siyaꞌ siꞌi Jesús nducua tya ñi ꞌin nten, cuiꞌ ca nu yu taꞌa ndaꞌan ñi).
\v 3 Canꞌ chaꞌ mdoꞌo ñi seꞌen lyiꞌya loo Judea, mxitucui ñi nde seꞌen lyiꞌya loo Galilea,
\v 4 una ꞌni chaꞌ tyijyin ñi seꞌen lyiꞌya loo Samaria.
\v 5 Mdiyaa ñi sca quichen naan Sicar seꞌen lyiꞌya loo Samaria, seꞌen su sca yuu nu mdaa Jacob ꞌin yu See nu ncua sñeꞌ yu.
\v 6 Canꞌ nducua sca chco mtñan Jacob, tuꞌhua chco canꞌ yten tucua Jesús siꞌyana ncua tñanꞌ ñi tucueen yaan ñi, loꞌ tsa ntsuꞌhui ndyiꞌya cuaan ti lca na.
\v 7 Xacanꞌ mdiyaa sca neꞌ cunaꞌan Samaria nu nguia ꞌya tyiꞌa, loꞌ juin Jesús ꞌin neꞌ: Taa tsachinꞌ tyiꞌa coꞌon.
\v 8 Yu taꞌa ndaꞌan ñi tiꞌ ntsuꞌhui lyijyi yu nde loo quichen, nguia siꞌi yu na nu cunajoꞌo ꞌin jun.
\v 9 Neꞌ cunaꞌan Samaria juin neꞌ ꞌin ñi: ꞌUn lca um neꞌ judio loꞌ nanꞌ lcan neꞌ Samaria, ¿ñi chaꞌ njñan um tyiꞌa coꞌo um ꞌñan? Juin neꞌ cuañaꞌan siꞌyana neꞌ judio a tsuꞌhue ndiꞌin neꞌ loꞌo neꞌ Samaria.
\v 10 Mxcuen Jesús ꞌin neꞌ: Chaꞌ cua na nuꞌhuin suꞌhua loo chaꞌ tsuꞌhue nu ndaa Ndiose, loꞌ quiꞌya cunta tucui ca nu njñan tyiꞌa ꞌin, cuiꞌ xaa jñan chaꞌ tsuꞌhue ꞌñan, loꞌ taan tyiꞌa nu taa chendyu ꞌin.
\v 11 Xacanꞌ juin neꞌ ꞌin ñi: Una ꞌun, a loꞌo na nu culo um tyiꞌa re loꞌ chco re quiꞌñi na. ¿La ta culo um tyiꞌa nu taa chendyu ꞌñan?
\v 12 ¿Ta lyee la ndon loo um que ꞌin Jacob nu ncua nten cula ꞌin hua? Canꞌ nu mdaa chco re ꞌin hua, cuiꞌ re yiꞌo canꞌ tyiꞌa loꞌo sñeꞌ loꞌo scunꞌ.
\v 13 Mxcuen Jesús ꞌin neꞌ: Ñaꞌan nu ti nu coꞌo tyiꞌa re, a sꞌni tiꞌ quityi tiꞌ canꞌ xiyaꞌ.
\v 14 Una nu coꞌo tyiꞌa nu nanꞌ taan, a ntsuꞌhui ꞌa chaꞌ tiꞌ quityi tiꞌ canꞌ, siꞌyana tyiꞌa nu taan chcua na niꞌ cusya ꞌin tsañaꞌan nducua tyiꞌa tlya, loꞌ taa na chendyu nu a tsatii ꞌa ꞌin.
\v 15 Mxcuen neꞌ cunaꞌan canꞌ: Ñi xꞌnan hua, tyaa um tyiꞌa canꞌ coꞌo hua, loꞌ a quityi ꞌa tiꞌ hua, ñi a can ꞌya ꞌa hua tyiꞌa chco re.
\v 16 Loꞌ juin Jesús ꞌin neꞌ: Quia teꞌen ꞌin cuilyiꞌo loꞌ can loꞌo ꞌin.
\v 17 Mxcuen neꞌ cunaꞌan canꞌ: A ndiꞌin cuilyiꞌo hua. Loꞌ juin Jesús: Cuiꞌ ñaꞌan nu juin siꞌyana a ndiꞌin cuilyiꞌo,
\v 18 siꞌyana cuaꞌ nchca caꞌyu cuilyiꞌo, loꞌ nu ndiꞌin loꞌo cuaꞌ ñii siꞌi cuilyiꞌo ca lca canꞌ, chaꞌ ñi ñaꞌan juin loꞌon.
\v 19 Xacanꞌ juin neꞌ ꞌin ñi: Cuaꞌ lca na ꞌun lca um nu nxiycuiꞌ Ndiose ꞌin.
\v 20 Neꞌ nu ncua nten cula ꞌin hua mꞌni tnu neꞌ ꞌin Ndiose loo quiꞌya re, una tsalca ꞌun neꞌ judio nchcuiꞌ um siꞌyana quichen Jerusalén ntsuꞌhui chaꞌ cuꞌni tnu neꞌ ꞌin Ndiose.
\v 21 Loꞌ juin Jesús ꞌin neꞌ: Tsa quiꞌan tiꞌ chaꞌ nu chcuinꞌ loꞌo, siꞌyana tiyaa xaa, ñi siꞌi loo quiꞌya cua loꞌ ñi siꞌi quichen Jerusalén ntsuꞌhui chaꞌ tsa yꞌni tnu um ꞌin Ndiose.
\v 22 ꞌUn neꞌ Samaria, nguiꞌni tnu um chaꞌ nu a ndyiꞌya um cunta, una huareꞌ nguiꞌni tnu hua chaꞌ nu cuaꞌ jlyo tiꞌ hua, loꞌ siꞌya neꞌ judio caja ñaꞌan tyiꞌo laa nten.
\v 23 Cuaꞌ ñii cuaꞌ mdyisnan chaꞌ re, loꞌ tsalca nu chaꞌ ñi ca cuꞌni tnu ꞌin Ndiose, loꞌo sca cusya nu ñi cuꞌni tnu canꞌ ꞌin ñi, siꞌyana cuañaꞌan nchca tiꞌ Stina Ndiose caja nu cuꞌni tnu ꞌin ñi.
\v 24 Ndiose lca ñi Espíritu, loꞌ nu cuꞌni tnu ꞌin ñi, ꞌni chaꞌ cuꞌni tnu ꞌin ñi loꞌo sca cusya nu ñi.
\v 25 Xacanꞌ juin neꞌ cunaꞌan canꞌ ꞌin ñi: Huareꞌ jlyo tiꞌ hua siꞌyana ntsuꞌhui chaꞌ caan nu lca Mesía, ñi nu ca naan Cristo, loꞌ xa caan ñi culyo scua la ñi chaꞌ re loꞌo na.
\v 26 Juin Jesús ꞌin neꞌ: Cuiꞌ canꞌ lca nu nchcuiꞌ loꞌo cuaꞌ ñii.
\v 27 Lja xacanꞌ nguila yu taꞌa ndaꞌan ñi, loꞌ nduhue tiꞌ yu siꞌyana loꞌo sca neꞌ cunaꞌan taꞌa nchcuiꞌ ñi, una a sca yu msti tiꞌ yu cuñichaꞌ yu ꞌin ñi chaꞌ ñi chaꞌ ca nchca tiꞌ ñi uta ñi chaꞌ nchcuiꞌ ñi loꞌo neꞌ.
\v 28 Xacanꞌ ngulaꞌ ton neꞌ teꞌen ꞌin neꞌ, loꞌ mdoꞌo neꞌ nguiaa neꞌ nde loo quichen, loꞌ juin neꞌ loꞌo nten canꞌ:
\v 29 Cuan lya um loꞌ chuꞌhui lyoo um sca yu nu nguꞌya cunta nchgaa ñaꞌan chaꞌ nu cuaꞌ mꞌni hua. ¿Ta siꞌi ca cua nu lca Cristo?
\v 30 Cuiꞌ xaa mdoꞌo nten canꞌ nguia naꞌan neꞌ seꞌen nducua ñi.
\v 31 Lja xacanꞌ yu taꞌa ndaꞌan ñi juin ꞌin ñi: Ñi Bstro, ¿ta a ca xuꞌhue um?
\v 32 Mxcuen ñi ꞌin yu: Nanꞌ ndaꞌan loꞌon na nu cunajoꞌo ꞌñan, una ꞌun a jlyo tiꞌ um.
\v 33 Xacanꞌ scasca yu mdyisnan nchcuiꞌ yu loꞌo taꞌa yu: ¿Ta xtyi tiꞌ ntsuꞌhui nu yan loꞌo na nu cunajoꞌo ꞌin ñi?
\v 34 Loꞌ juin Jesús ꞌin yu: Chaꞌ nchcu ꞌñan ca lca nu tucuan tñan chaꞌ nu nchca tiꞌ ñi nu nguaꞌan tñan ꞌñan, loꞌ cuꞌnin tyiin tñan nu mdaa ñi ꞌñan.
\v 35 ¿Ta siꞌi ndeñaꞌan nchcuiꞌ um sca chaꞌ: Ñii cha jacua cooꞌ quioꞌ na nu yta na? Una cunen loꞌo um sca chaꞌ, xla um quiloo um loꞌ cuꞌni quii um seꞌen nguita jyaan cua, siꞌyana cuaꞌ ngula na loꞌ cuaꞌ tca quioꞌ na.
\v 36 Yu nu nxoꞌ ꞌin na nxñi siyaꞌ yu, loꞌ a tsatii chaꞌ tsuꞌhue canꞌ ꞌin yu la niꞌ cuaan, siꞌyana tsatlyu tsuꞌhue chuꞌhui tiquee yu nu yta ꞌin na loꞌo yu nu nxoꞌ ꞌin na.
\v 37 Chaꞌ ñi ñaꞌan nu nchcuiꞌ neꞌ sca chaꞌ: Sca nu ntya loꞌ xca nu nxoꞌ.
\v 38 Nanꞌ nguaꞌan tñan ꞌin um tsa xoꞌ um na nu a yta um, xca tucui cuaꞌ mꞌni tñan canꞌ loꞌ ꞌun quiꞌni caꞌan ꞌin um xoꞌ um ꞌin na.
\v 39 Quichen canꞌ quiꞌan ꞌa neꞌ Samaria ya quiꞌan tiꞌ ꞌin ñi, siꞌya chaꞌ nu ycuiꞌ neꞌ cunaꞌan canꞌ xa juin neꞌ: Nchgaa ñaꞌan nu cuaꞌ mꞌni hua nguꞌya ñi cunta.
\v 40 Xacanꞌ neꞌ Samaria nu mdiyaa canꞌ mjñan chaꞌ tsuꞌhue ꞌin ñi siꞌyana quinu ñi quichen canꞌ, loꞌ canꞌ nguinu ñi tucua tsaan.
\v 41 Cuañaꞌan quiꞌan la nten ya quiꞌan tiꞌ neꞌ loꞌo chaꞌ nu ycuiꞌ ñi,
\v 42 loꞌ juin neꞌ ꞌin neꞌ cunaꞌan canꞌ: Siꞌi ꞌa siꞌya chaꞌ nu ycuiꞌ ti ya quiꞌan tiꞌ hua, cuiꞌ ca nu siꞌyana ngune ꞌin hua ñaꞌan chaꞌ nu ycuiꞌ ñi, loꞌ ncua cuiyaꞌ tiꞌ hua siꞌyana nde ñi nu chaꞌ ñi ca lca Cristo, ñi nu ndlo laa ꞌin nten chendyu.
\s Mꞌni chca Jesús ꞌin sñeꞌ sca yu lyiꞌya tñan
\p
\v 43 Xa mdaꞌa cucha canꞌ mdoꞌo ñi nguiaa ñi nde seꞌen lyiꞌya loo Galilea.
\v 44 Ticuiꞌ Jesús juin ñi siꞌyana sca yu nu nxiycuiꞌ Ndiose ꞌin, a nducuan xuꞌhue taꞌa quichen tyi neꞌ chaꞌ nu nchcuiꞌ yu.
\v 45 Xa nguila ñi seꞌen lyiꞌya loo Galilea, nchgaa neꞌ mꞌni cunta neꞌ ꞌin ñi siꞌyana cuaꞌ naꞌan neꞌ chaꞌ nu tnu mꞌni ñi seꞌen yaa ñi taꞌa quichen Jerusalén, siꞌyana loꞌo neꞌ Galilea yaa neꞌ taꞌa canꞌ.
\v 46 Nguila Jesús xiyaꞌ quichen Caná seꞌen lyiꞌya loo Galilea, seꞌen nu mꞌni ñi chaꞌ mchca vino tyiꞌa canꞌ. Quichen Capernaum ndiꞌin sca yu lyiꞌya tñan ꞌin ree, loꞌ tiꞌi sca sñeꞌ yu.
\v 47 Xa ynan yu chaꞌ siꞌyana Jesús cuaꞌ nguila ñi seꞌen lyiꞌya loo Galilea nu yaa ñi Judea, ya jñan yu chaꞌ tsuꞌhue ꞌin ñi siꞌyana tsa yꞌni chca ñi ꞌin sñeꞌ yu siꞌyana cuaꞌ caja ti.
\v 48 Xacanꞌ juin Jesús ꞌin yu: A tsa quiꞌan tiꞌ um chaꞌ a ñaꞌan um sca chaꞌ nu tnu.
\v 49 Yu nu lyiꞌya tñan canꞌ juin ꞌin ñi: Ñi Xꞌnan hua, cuꞌni um sca chaꞌ tsuꞌhue tsaa um seꞌen ndiꞌin lja nu tiꞌ lyijyi tsatii sñenꞌ.
\v 50 Loꞌ juin Jesús ꞌin yu: Quia lya um siꞌyana cuaꞌ mchca sñeꞌ um. Ya quiꞌan tiꞌ yu chaꞌ nu ycuiꞌ Jesús, cuiꞌ xaa mdoꞌo yu nguiaa yu.
\v 51 Xa nu cuaꞌ quila ti yu, mdoꞌo tucua snan nguso nu ya ycua ꞌin yu, canꞌ nu mtsaꞌ ꞌin yu siꞌyana cuaꞌ xaꞌ lca ꞌin sñeꞌ yu.
\v 52 Xacanꞌ mñichaꞌ yu ꞌin nguso canꞌ: ¿Ñi braa ta mchca tsuꞌhue lca ꞌin yu? Loꞌ juin yu nguso canꞌ: Cuiꞌ lca, tsa ntsuꞌhui braa cuaꞌ sca siin xa mdyiꞌo tiqueꞌ canꞌ ꞌin yu.
\v 53 Xacanꞌ nguꞌya yu cunta siꞌyana cuiꞌ braa canꞌ ycuiꞌ Jesús loꞌo yu xa nu juin ñi: Cuaꞌ mchca sñeꞌ um. Loꞌ ya quiꞌan tiꞌ yu ꞌin Jesús tsatlyu loꞌo nchgaa nu ndiꞌin naꞌan ꞌin yu.
\v 54 Nde chaꞌ nu tnu mꞌni Jesús nu cuaꞌ nchca tucua juesa, xa mdoꞌo ñi seꞌen lyiꞌya loo Judea loꞌ nguila ñi seꞌen lyiꞌya loo Galilea.
\c 5
\s Sca yu cuxi quiyaꞌ mchca yu seꞌen lca Betesda
\p
\v 1 Chonꞌ ndeꞌen canꞌ yaa Jesús quichen Jerusalén seꞌen nu nchca taꞌa ꞌin neꞌ judio.
\v 2 Cuiꞌ ti tuꞌhua quichen seꞌen nguiten neꞌ Tuloꞌo Slyaꞌ canꞌ, nducua sca seꞌen ndiꞌin tyiꞌa tlya, loꞌ ndloꞌo naan neꞌ ꞌin na loꞌo chaꞌ hebreo, Betesda. Tyiꞌiin siiꞌ canꞌ nguiaꞌ tucui loꞌ nducua tsa caꞌyu tunaꞌan ꞌin na.
\v 3 Canꞌ ndiꞌin quiꞌan nu tiꞌi loꞌo cuati loo quicha, nu cuityinꞌ, nu coꞌ quiyaꞌ loꞌo nu cuxi quiyaꞌ, nta neꞌ chaꞌ ñi xaa quiñan tiꞌin tyiꞌa canꞌ.
\v 4 Siꞌyana cuaꞌ lca ti xaa ndyiꞌya sca angujle nu nxiquiñan tiꞌin tyiꞌa canꞌ, loꞌ nu sten culo nducua la loo tyiꞌa canꞌ xa ndyi quiñan tiꞌin na, canꞌ nu nchca loꞌo ñaꞌan quicha ti nu ntsuꞌhui ꞌin.
\v 5 Canꞌ su sca yu nu cuaꞌ ntsuꞌhui cla tyii ntsuꞌhui snuꞌ yjan tiꞌi.
\v 6 Jesús naꞌan ñi su yu, loꞌ xa ngujlyo tiꞌ ñi siꞌyana cuaꞌ sꞌni tiꞌi yu, juin ñi ꞌin yu: ¿Ta nchca tiꞌ um chca um?
\v 7 Mxcuen yu ꞌin ñi: ꞌUn jlyo tiꞌ um siꞌyana a ndyijyi nu suꞌhua ꞌñan loo tyiꞌa re xa nguiñan tiꞌin na. Xa nchca tinꞌ sten ꞌin na xca tucui nu ndla la nguiten que ꞌñan nanꞌ.
\v 8 Loꞌ juin Jesús ꞌin yu: Tyiton um, xñi um jaaꞌ ꞌin um loꞌ quiaa um.
\v 9 Ticuiꞌ xaa mchca yu, msñi yu jaaꞌ ꞌin yu, mdoꞌo yu nguiaa yu, loꞌ lca na tsaan nu nxitñanꞌ neꞌ judio.
\v 10 Xacanꞌ juin neꞌ judio loꞌo yu nu mchca canꞌ: Tsaan nu nxitñanꞌ na lca na cuaꞌ ñii, a ntsuꞌhui chaꞌ cuiyaꞌ ꞌin cuiꞌya jaaꞌ ꞌin.
\v 11 Mxcuen yu ꞌin neꞌ: Una nu mꞌni chca ꞌñan juin loꞌon: Xñi um jaaꞌ ꞌin um loꞌ quiaa um.
\v 12 Xacanꞌ mñichaꞌ neꞌ ꞌin yu: ¿Tucui ca nu juin loꞌo siꞌyana xñi jaaꞌ ꞌin loꞌ quiaa?
\v 13 A ngujlyo tiꞌ yu ti ca nu mꞌni chca ꞌin yu siꞌyana Jesús a ncua chcanꞌ ꞌa ñi lja nten quiꞌan canꞌ.
\v 14 La cuaꞌ msiin la canꞌ nguija lyoo Jesús ꞌin yu niꞌ lyaa, loꞌ juin ñi ꞌin yu: Cuaꞌ mchca um ñii, a cuꞌni ꞌa um quiꞌya, ñaꞌan tuꞌ tlyu la chaꞌ nu ñaꞌan um.
\v 15 Xacanꞌ mdoꞌo yu nguiaa yu, loꞌ mtsaꞌ yu ꞌin neꞌ judio siꞌyana Jesús lca nu mꞌni chca ꞌin yu.
\v 16 Cuiꞌ siꞌya chaꞌ re mdyisnan mnaꞌan tiꞌi neꞌ judio ꞌin Jesús, loꞌ nan neꞌ ñaꞌan nu cujui neꞌ ꞌin ñi siꞌyana tsaan nu nxitñanꞌ neꞌ mꞌni chca ñi ꞌin nten.
\v 17 Xacanꞌ mxcuen Jesús ꞌin neꞌ: A nchca tsatii tñan nu nguiꞌni Stin, cuiꞌ cuañaꞌan nanꞌ.
\v 18 Canꞌ chaꞌ neꞌ judio nde lyee la ngunan neꞌ ñaꞌan nu cujui neꞌ ꞌin ñi, siꞌyana a nꞌni cunta ñi tsaan nu nxitñanꞌ neꞌ, loꞌ siꞌi tsacanꞌ ti chaꞌ, cuiꞌ ca nu nchcuiꞌ ñi siꞌyana Ndiose lca ycuiꞌ ca Sti ñi, loꞌ nguiꞌni sca ñi ꞌin ñi loꞌo Ndiose.
\s Chaꞌ cuiyaꞌ ꞌin Sñeꞌ Ndiose
\p
\v 19 Xacanꞌ mxcuen Jesús ꞌin neꞌ: Nu chaꞌ ñi sꞌni cunen loꞌo um, Sñeꞌ Ndiose, ñi sca chaꞌ loꞌ a tca cuꞌni chaꞌ ꞌin ti, cuiꞌ ca nu cuꞌni canꞌ tsañaꞌan nu cuaꞌ mꞌni chaꞌan ꞌin Stina Ndiose, siꞌyana nchgaa tñan nu nguiꞌni Stina Ndiose, ticuiꞌ cuañaꞌan nguiꞌni Sñeꞌ ñi.
\v 20 Siꞌyana Stina Ndiose lyee ndyuꞌhui cuiyaꞌ tiꞌ ñi ꞌin Sñeꞌ ñi, loꞌ ndloꞌo ñi ꞌin canꞌ nchgaa tñan nu nguiꞌni ñi, hasta tnu la chaꞌ ntsuꞌhui chaꞌ culoꞌo ñi ꞌin canꞌ que ñaꞌan chaꞌ nu naꞌan um cuaꞌ ñii, loꞌ lyee la cuhue tiꞌ um xacanꞌ.
\v 21 Siꞌyana tsañaꞌan nxiquiꞌo Stina Ndiose ꞌin neꞌ cuaꞌ ngujui, cuañaꞌan ndaa Sñeꞌ ñi chendyu nu cuiꞌ ti ꞌin nu nchca tiꞌ ñi.
\v 22 Siꞌyana Stina Ndiose, a nꞌni ñi xñan bsya ꞌin nten chendyu, cuiꞌ ca nu mdaa ñi chaꞌ cuiyaꞌ canꞌ ꞌin Sñeꞌ ñi,
\v 23 ñaꞌan ca siꞌyana cuꞌni tnu nchgaa nten ꞌin Sñeꞌ ñi tsañaꞌan nꞌni tnu neꞌ ꞌin Stina Ndiose. Nu a cuꞌni tnu ꞌin Sñeꞌ ñi ticuiꞌ cuañaꞌan a nꞌni tnu canꞌ ꞌin nu nguaꞌan tñan ꞌin ñi.
\v 24 Nu chaꞌ ñi sꞌni cunen loꞌo um, nu ndon nscan chaꞌ nu nchcuinꞌ loꞌ ndiya quiꞌan tiꞌ ꞌin nu nguaꞌan tñan ꞌñan, cuaꞌ jui chendyu nu a tsatii ꞌa ꞌin, a nducua ꞌa quiꞌya chonꞌ siꞌyana cuaꞌ mdoꞌo tsoꞌ canꞌ siiꞌ chaꞌ ndyija loꞌ cuaꞌ jui chendyu ꞌin.
\v 25 Nu chaꞌ ñi sꞌni cunen loꞌo um, cuaꞌ mdiyaa xaa ntsuꞌhui chaꞌ quine ꞌin neꞌ ngujui chaꞌ nu chcuiꞌ Sñeꞌ Ndiose, loꞌ nu cuꞌni cunta ꞌin ñi caja chendyu ꞌin.
\v 26 Siꞌyana Stina Ndiose laꞌ ñaꞌan cuaꞌ ndiꞌin ñi, cuiꞌ cuañaꞌan mdaa ñi chaꞌ cuiyaꞌ canꞌ ꞌin Sñeꞌ ñi.
\v 27 A cunta mdaa ñi chaꞌ cuiyaꞌ ꞌin canꞌ siꞌyana cuꞌni xñan bsya ꞌin nten chendyu, siꞌyana lca canꞌ Yu Quiꞌyu nu Mdoꞌo nde niꞌ Cuaan.
\v 28 A cuhue tiꞌ um chaꞌ re, siꞌyana tiyaa xaa nchgaa nu ntsuꞌhui niꞌ cuaa quine ꞌin chaꞌ nu chcuiꞌ canꞌ.
\v 29 Nu mꞌni tñan tsuꞌhue tyiquiꞌo canꞌ loꞌ caja chendyu ꞌin, nu mꞌni tñan ngunanꞌ tyiquiꞌo canꞌ una tyijyin canꞌ nu tiꞌi tsala xaa. Ñi nu ndaa suun chaꞌ ꞌin Cristo
\v 30 Ñi sca chaꞌ, loꞌ a tca cuꞌnin chaꞌ ꞌñan tin, cuiꞌ ca nu nguiꞌnin xñan bsya tsañaꞌan ndlo Stin tñan ꞌñan, ñi ndiꞌin chaꞌ ꞌñan loꞌo chaꞌ re siꞌyana a nguiꞌnin ñaꞌan nu nchca tinꞌ, cuiꞌ ca nu nguiꞌnin chaꞌ nu nchca tiꞌ ñi nu nguaꞌan tñan ꞌñan.
\v 31 Chaꞌ ticuiinꞌ ndaan suun ñaꞌan ndiꞌin chaꞌ ꞌñan, a sca cunta ntsuꞌhui chaꞌ canꞌ.
\v 32 Una ntsuꞌhui xca tucui nu ndaa suun chaꞌ ꞌñan, loꞌ jlyo tinꞌ siꞌyana suun nu ndaa canꞌ lca na chaꞌ nu ñi.
\v 33 Cuiꞌ um nguaꞌan tñan um ꞌin nu ya ñichaꞌ ꞌin yu Xuhua canꞌ, loꞌ suun nu mdaa yu lca na chaꞌ nu ñi.
\v 34 Nanꞌ a najoꞌo suun nu ndaa nten chendyu ꞌñan, una chcuinꞌ chaꞌ re siꞌyana caja ñaꞌan tyiꞌo laa um.
\v 35 Yu Xuhua ncua yu ñaꞌan nchca tiꞌ sca quiiꞌ nu nduꞌhui xaa, loꞌ sca coꞌ xaa tsuꞌhue ꞌa yuꞌhui tiquee um loꞌo chaꞌ canꞌ.
\v 36 Nanꞌ ndaan sca suun nu ndon loo la que ñaꞌan nu mdaa yu Xuhua, siꞌyana ticuiꞌ tñan nu mdaa Stina Ndiose ꞌñan nguiꞌnin cuaꞌ ñii, canꞌ nu ndaa suun siꞌyana Stina Ndiose nguaꞌan tñan ꞌñan.
\v 37 A cunta Stina Ndiose, ñi nu nguaꞌan tñan ꞌñan, mdaa ñi suun ñaꞌan ndiꞌin chaꞌ ꞌñan. Ñi siyaꞌ loꞌ a nchca quine ꞌin um chaꞌ nu nchcuiꞌ ñi, ñi a nchca ñaꞌan tloo um ꞌin ñi,
\v 38 ñi a nducuan xuꞌhue um chaꞌ nu nchcuiꞌ ñi, siꞌyana a ndiya quiꞌan tiꞌ um ꞌin nu nguaꞌan tñan ñi.
\v 39 Cuꞌni quii tsuꞌhue um quityi ꞌin Ndiose, ꞌun nchcuiꞌ um siꞌyana ndaa na chendyu nu a tsatii ꞌa, loꞌ cuiꞌ chaꞌ ꞌñan lca nu nchcuiꞌ quityi canꞌ.
\v 40 Una a nchca tiꞌ um cuan xuꞌhue um ꞌñan seꞌen nu caja chendyu nu a tsatii ꞌa ꞌin um.
\v 41 Nanꞌ a nducua tloon quinu tsuꞌhue tiquee nten loꞌon,
\v 42 ndyuꞌhui lyoon cusya ꞌin um loꞌ jlyo tinꞌ siꞌyana a tsuꞌhue ntsuꞌhui tiquee um loꞌo Ndiose.
\v 43 Nanꞌ ljyaan loꞌo chaꞌ cuiyaꞌ ꞌin Stin, loꞌ a nducuan xuꞌhue um ꞌñan, una chaꞌ caan xca tucui loꞌo chaꞌ cuiyaꞌ nu ꞌin ti, canꞌ nu cuan xuꞌhue um ꞌin.
\v 44 ¿Ta tca tsa quiꞌan tiꞌ um chaꞌ scasca um nducua tloo um quinu tsuꞌhue tiquee nten loꞌo um, loꞌ siꞌi nu nsuꞌhua loo um chaꞌ nu nchca tiꞌ ycuiꞌ ca Ndiose?
\v 45 A quiñan tiꞌ um ta nanꞌ suꞌhuan quiꞌya ꞌin um tloo Stina Ndiose, una ntsuꞌhui nu ndlo quiꞌya ꞌin um, cuiꞌ Moisé nu nducua tloo um ꞌin.
\v 46 Chaꞌ ndiya quiꞌan tiꞌ um ꞌin Moisé, cuiꞌ cuañaꞌan tsa quiꞌan tiꞌ um ꞌñan, siꞌyana ticuiꞌ chaꞌ ꞌñan nguaꞌan Moisé.
\v 47 Una chaꞌ a ndiya quiꞌan tiꞌ um chaꞌ nu nguaꞌan scua yu, ¿ñaꞌan la ca chaꞌ nu nchcuinꞌ?
\c 6
\s Mdaa Jesús na ycu tsa caꞌyu mii yu quiꞌyu
\p
\v 1 Chonꞌ ndeꞌen canꞌ mdoꞌo Jesús nguiaa ñi xca tsoꞌ tiyoꞌ Galilea, ticuiꞌ tiyoꞌ Tiberias lca na.
\v 2 Quiꞌan ꞌa nten nducui nchaꞌan ꞌin ñi siꞌyana naꞌan neꞌ chaꞌ nu tnu nguiꞌni ñi loꞌo nu tiꞌi.
\v 3 Xacanꞌ ycuen Jesús sca loo nten, canꞌ yten tucua ñi loꞌo yu taꞌa ndaꞌan ñi.
\v 4 Cuaꞌ nchcui chaꞌ ca taꞌa pascua ꞌin neꞌ judio.
\v 5 Xa mxinaꞌan Jesús siꞌyana quiꞌan ꞌa nten ljyaan seꞌen nducua ñi, xacanꞌ juin ñi ꞌin yu Lpe: ¿La ta xiꞌi na jaslya nu cu nten re?
\v 6 Ycuiꞌ cuiyaꞌ ti ñi loꞌo yu chaꞌ ñaꞌan ca xcuen yu, una cuaꞌ jlyo tiꞌ ñi ñaꞌan ntsuꞌhui chaꞌ cuꞌni ñi.
\v 7 Mxcuen yu Lpe canꞌ: Ñi tñi nu cuꞌni na canan tucua ciento tsaan, a cula na xiꞌi na jaslya nu cu nten re.
\v 8 Una yu Ndre, cuiꞌ taꞌa ndaꞌan ñi, taꞌa ngula yu Simón Tyo, juin yu ꞌin ñi:
\v 9 Nde ndon sca yu lyoꞌ ti nu ndaꞌan loꞌo caꞌyu ti jaslya loꞌo tucua cula suhue ti. Una ñi ca cula na loꞌo tsare nten.
\v 10 Nducua quixinꞌ xuhue ti seꞌen canꞌ. Xacanꞌ juin Jesús: Chcuiꞌ um loꞌo nten re siꞌyana sten tucua neꞌ. Tsalca yu quiꞌyu nu yten tucua canꞌ ndiyaa yu caꞌyu mii yu.
\v 11 Xacanꞌ msñi Jesús jaslya canꞌ, mdyaa ñi xuꞌhue ꞌin Ndiose, msuꞌhue ñi ꞌin na loꞌ mdaa ñi ꞌin na ꞌin yu taꞌa ndaꞌan ñi, canꞌ yu nu cuaꞌ mtsa ꞌin na ꞌin nchgaa nten. Ticuiꞌ cuañaꞌan mꞌni ñi loꞌo cula canꞌ, ycu neꞌ tsañaꞌan nu ncua ꞌin neꞌ.
\v 12 Xa cuaꞌ mdyi ycu neꞌ juin Jesús ꞌin yu taꞌa ndaꞌan ñi: Xoꞌ um nchgaa yuꞌhue nu nguinu cua siꞌyana a lyiꞌun na.
\v 13 Xacanꞌ mxoꞌ yu ꞌin na, loꞌ mꞌni chaꞌan yu tsa tichcua xcuhui loꞌo yuꞌhue jaslya nu nguinu ycu neꞌ loo tsa caꞌyu ti jaslya cebada canꞌ.
\v 14 Xa naꞌan nten canꞌ chaꞌ nu tnu mꞌni Jesús, mdyisnan ycuiꞌ neꞌ: Nu chaꞌ ñi ca, nde ñi nu nxiycuiꞌ ca Ndiose ꞌin, nu cuaꞌ mdiyaan loo chendyu re.
\v 15 Una Jesús nguꞌya ñi cunta siꞌyana nchca tiꞌ neꞌ xicuꞌni neꞌ ꞌin ñi nu ca ñi ree ꞌin neꞌ, canꞌ chaꞌ mdoꞌo tsoꞌ ñi lja nten canꞌ, loꞌ nguiaa ñi nde siiꞌ quiꞌya canꞌ scati ñi.
\s Mdaꞌan quiyaꞌ Jesús loo tyiꞌa
\p
\v 16 Xa nguꞌya tla canꞌ mdoꞌo yu taꞌa ndaꞌan ñi nguiaa yu tuꞌhua tiyoꞌ canꞌ.
\v 17 Canꞌ yten yu niꞌ sca yca naꞌan nu tyijyin xiꞌyu yu xca tsoꞌ tiyoꞌ canꞌ nu tiyaa yu quichen Capernaum. Cuaꞌ nguꞌya tsuꞌhue tla, loꞌ Jesús a nchca tsa nchaꞌan ñi ꞌin yu.
\v 18 Mdyisnan ncua cuiꞌin lyee yaꞌ, cuiꞌ ñaꞌaan cuaꞌ loꞌo tiyoꞌ canꞌ mdyisnan nguitsa na.
\v 19 Xa cuaꞌ nguiaa yu tsa ntsuꞌhui lyoo caꞌyu uta scua kilometro, xacanꞌ naꞌan yu ljyan nchaꞌan Jesús ꞌin yu, ndaꞌan quiyaꞌ ti ñi loo tyiꞌa canꞌ, loꞌ lyee ꞌa ytsen yu.
\v 20 Loꞌ juin ñi ꞌin yu: Nanꞌ lcan, a cutsen um.
\v 21 Tsuꞌhue ꞌa ntsuꞌhui tiquee yu xa yten ñi niꞌ yca naꞌan canꞌ, cuiꞌ xaa ti mdiyaa yca naꞌan canꞌ seꞌen ntsuꞌhui chaꞌ tyiꞌo tiꞌin jun.
\s Xa mdaꞌan nan nten ꞌin Jesús
\p
\v 22 Xca tsaan canꞌ nten nu nguinu tiꞌin xca tsoꞌ tiyoꞌ canꞌ, ngujlyo tiꞌ neꞌ siꞌyana tsa yu taꞌa ndaꞌan ti Jesús yten niꞌ xca ti yca naꞌan nu nguinu nducui canꞌ, una a loꞌo Jesús yten ñi.
\v 23 Una mdyiꞌo tiꞌin chcua xnan yca naꞌan nu mdoꞌo quichen Tiberias, loꞌ mdiyaa na cuiꞌ ti seꞌen ycu neꞌ jaslya xa cuaꞌ mdyaa Ñi Xꞌnan na xuꞌhue ꞌin Ndiose.
\v 24 Xa ncua cuiyaꞌ tiꞌ nten canꞌ siꞌyana a loꞌo Jesús, loꞌ ñi yu taꞌa ndaꞌan ñi a loꞌo canꞌ, xacanꞌ yten neꞌ niꞌ yca naꞌan canꞌ, mdoꞌo neꞌ nguia nan neꞌ ꞌin Jesús nde quichen Capernaum.
\s Jesús lca ñi jaslya nu ndaa chendyu ꞌin nten
\p
\v 25 La xca tsoꞌ tiyoꞌ canꞌ nguija lyoo neꞌ ꞌin ñi, loꞌ juin neꞌ: ꞌUn ñi nu lca Bstro, ¿ñi xaa mdiyaan um nde re?
\v 26 Mxcuen Jesús ꞌin neꞌ: Nu chaꞌ ñi sꞌni cunen loꞌo um, ndaꞌan nan um ꞌñan, una siꞌi siꞌya chaꞌ nu tnu nu naꞌan um, cuiꞌ ca nu siꞌyana ycu um jaslya ñaꞌan nu ncua tiꞌ um.
\v 27 Cuꞌni um tñan, una siꞌi siꞌya chaꞌ nchcu ti, na nu ntsuꞌhui chaꞌ lyiꞌun, cuiꞌ ca nu suꞌhua um juesa ꞌin um loꞌo na nu ntsuꞌhui chaꞌ ta loo tsala xaa, na nu ntsuꞌhui chaꞌ taa Yu Quiꞌyu nu Mdoꞌo nde niꞌ Cuaan ꞌin um, siꞌyana nde ñi nu mdoꞌo hui ca ꞌin Stina Ndiose.
\v 28 Xacanꞌ mxcuen neꞌ ꞌin ñi: ¿Ñaꞌan ta cuꞌni hua siꞌyana tca tucua hua tñan tsañaꞌan nu nchca tiꞌ Ndiose?
\v 29 Mxcuen Jesús ꞌin neꞌ: Nde chaꞌ nu nchca tiꞌ Ndiose, siꞌyana tsa quiꞌan tiꞌ um ꞌin nu nguaꞌan tñan ñi.
\v 30 Xacanꞌ mxcuen neꞌ ꞌin ñi: ¿Ti ñaꞌan ta chaꞌ nu tnu cuꞌni um tloo hua, loꞌ tsa quiꞌan tiꞌ hua ꞌin um? ¿Ñi tñan cuꞌni um cuaꞌ ñii?
\v 31 Nu ncua nten cula ꞌin na ycu neꞌ jaslya nu mdoꞌo nde niꞌ cuaan lja nu mdaꞌan neꞌ loo yuu ngutyi canꞌ, cuiꞌ tsañaꞌan nchcuiꞌ quityi ꞌin Ndiose: —Jaslya nu mdoꞌo nde niꞌ cuaan mdaa ñi ycu neꞌ—.
\v 32 Juin Jesús ꞌin neꞌ: Nu chaꞌ ñi sꞌni cunen loꞌo um, siꞌi Moisé lca nu mdaa jaslya nu mdoꞌo nde niꞌ cuaan ꞌin um, cuiꞌ ca nu Stin lca nu ndaa ycuiꞌ ca jaslya ꞌin um.
\v 33 Siꞌyana jaslya ꞌin Ndiose lca nu mdoꞌo nde niꞌ cuaan loꞌ ndaa na chendyu ꞌin nten.
\v 34 Loꞌ juin neꞌ ꞌin ñi: Ñi Xꞌnan hua, tyaa um jaslya canꞌ cu hua tsala xaa.
\v 35 Xacanꞌ juin Jesús ꞌin neꞌ: Nanꞌ lcan jaslya nu ndaa chendyu ꞌin nten. Nu ndiya nan ꞌñan, ñi xiyaꞌ loꞌ ꞌa quiteꞌ ꞌa tiꞌ canꞌ, loꞌ nu ndiya quiꞌan tiꞌ ꞌñan, ñi xiyaꞌ loꞌ a quityi ꞌa tiꞌ.
\v 36 Cuiꞌ ñaꞌan cuaꞌ nen loꞌo um, siyaꞌ naꞌan tloo um ꞌñan una a ndiya quiꞌan tiꞌ um.
\v 37 Siꞌyana tsalca nu ndaa Stina Ndiose cha cuiyaꞌ ꞌin, canꞌ nu quia nan ꞌñan, loꞌ nu quia nan ꞌñan a ntsuꞌhui chaꞌ xcuan tloon ꞌin canꞌ.
\v 38 Nanꞌ mdoꞌon nde niꞌ cuaan, una siꞌi siꞌyana cuꞌnin ñaꞌan nu nchca tinꞌ, cuiꞌ ca nu ñaꞌan nu nchca tiꞌ ñi nu nguaꞌan tñan ꞌñan.
\v 39 Nde chaꞌ nu nchca tiꞌ Stina Ndiose, ñi nu nguaꞌan tñan ꞌñan, siꞌyana a quinanꞌ ñi sca nu cuaꞌ mdaa ñi ꞌñan, cuiꞌ ca nu cuꞌnin chaꞌ tyiquiꞌo canꞌ xa tsatii chaꞌ nu nchca loo chendyu re.
\v 40 Nde chaꞌ nu nchca tiꞌ ñi nu nguaꞌan tñan ꞌñan, siꞌyana nchgaa nu chcua quiloo ꞌin Sñeꞌ ñi loꞌ tsa quiꞌan tiꞌ ꞌin ñi, caja chendyu nu a tsatii ꞌa ꞌin, loꞌ nanꞌ cuꞌnin chaꞌ tyiquiꞌo canꞌ xa tsatii chaꞌ nu nchca loo chendyu re.
\v 41 Xacanꞌ mdyisnan ycuiꞌ tyijyin scasca neꞌ judio siꞌya chaꞌ nu juin Jesús: Nanꞌ lcan jaslya nu mdoꞌo nde niꞌ cuaan.
\v 42 Nchcuiꞌ neꞌ: ¿Ta siꞌi Jesús sñeꞌ See lca yu re, ta siꞌi na cuaꞌ ndyuꞌhui lyoo na ꞌin sti yu loꞌo jyiꞌan yu? ¿Ñaꞌan ta nchcuiꞌ yu siꞌyana nde niꞌ cuaan mdoꞌo yu?
\v 43 Jesús juin ñi ꞌin neꞌ: A najoꞌo chcuiꞌ tyijyin um lyee la.
\v 44 A tucui nu quia nan ꞌñan chaꞌ siꞌi Stina Ndiose, ñi nu nguaꞌan tñan ꞌñan, tuꞌhui tiquee canꞌ, loꞌ nanꞌ cuꞌnin chaꞌ tyiquiꞌo canꞌ xa tsatii chaꞌ nu nchca loo chendyu re.
\v 45 Nde chaꞌ nu nguaꞌan yu nu mxiycuiꞌ Ndiose ꞌin: —Nchgaa nten ntsuꞌhui chaꞌ culoꞌo Ndiose ꞌin—. Canꞌ chaꞌ nchgaa nu cuaꞌ ngune ꞌin chaꞌ nu ycuiꞌ Stina Ndiose loꞌ mꞌni chaꞌan ꞌin ñi, canꞌ nu ndiya nan ꞌñan.
\v 46 Siꞌi siꞌyana ndeꞌen la tucui nu cuaꞌ naꞌan tloo ꞌin Stina Ndiose, cuiꞌ ca nu scati ñi nu mdoꞌo seꞌen nducua ñi, canꞌ nu cuaꞌ naꞌan tloo ꞌin Stina Ndiose.
\v 47 Nu chaꞌ ñi sꞌni cunen loꞌo um, nu ndiya quiꞌan tiꞌ ꞌñan cuaꞌ jui chendyu nu a tsatii ꞌa ꞌin.
\v 48 Nanꞌ lcan jaslya nu ndaa chendyu ꞌin nten.
\v 49 Nu ncua nten cula ꞌin na ycu neꞌ jaslya nu mdoꞌo nde niꞌ cuaan xa mdaꞌan neꞌ loo yuu ngutyi canꞌ, una chonꞌ ndeꞌen canꞌ ngujui neꞌ.
\v 50 Una nde jaslya nu mdoꞌo nde niꞌ cuaan, loꞌ nu cu ꞌin na, a caja ꞌa canꞌ.
\v 51 Nanꞌ lcan jaslya nu loꞌo ca nu mdoꞌo nde niꞌ cuaan, loꞌ nu cu jaslya re tyuꞌhui canꞌ chendyu tsala xaa. Nanꞌ lcan jaslya canꞌ, loꞌ tyaan ꞌñan siꞌyana caja chendyu ꞌin nten.
\v 52 Xacanꞌ neꞌ judio mdyisnan nchcuiꞌ tyijyin neꞌ loꞌo taꞌa neꞌ, loꞌ nchcuiꞌ neꞌ: ¿Ñaꞌan ta tca taa yu re ticuiiꞌ cunanꞌ yu cu na?
\v 53 Loꞌ juin Jesús ꞌin neꞌ: Nu chaꞌ ñi sꞌni cunen loꞌo um, chaꞌ na a cu um cunanꞌ Yu Quiꞌyu nu Mdoꞌo nde niꞌ Cuaan, loꞌ chaꞌ a coꞌo um tne yu, a ntsuꞌhui chendyu ꞌin um.
\v 54 Nu cu cunanꞌ loꞌ coꞌo tnen, cuaꞌ jui chendyu nu a tsatii ꞌa ꞌin, loꞌ nanꞌ cuꞌnin chaꞌ tyiquiꞌo canꞌ xa tsatii chaꞌ nu nchca loo chendyu re.
\v 55 Siꞌyana cunanꞌ lca na ycuiꞌ ca chaꞌ nchcu, loꞌ tnen lca na ycuiꞌ ca chaꞌ ndyiꞌo.
\v 56 Nu cu cunanꞌ loꞌ coꞌo tnen, sca chaꞌ ti ꞌin loꞌon, cuiꞌ cuañaꞌan nanꞌ loꞌo canꞌ.
\v 57 Stina Ndiose, ñi nu loꞌo ca, nguaꞌan tñan ñi ꞌñan, loꞌ siꞌya ñi canꞌ chaꞌ loꞌon nanꞌ, cuiꞌ cuañaꞌan taan chendyu ꞌin nu cuan xuꞌhue ꞌñan.
\v 58 Nde jaslya nu mdoꞌo nde niꞌ cuaan, una siꞌi ñaꞌan jaslya nu ycu nten cula ꞌin na loꞌ ngujui neꞌ, nu cu jaslya re caja chendyu nu a tsatii ꞌa ꞌin.
\v 59 Nde chaꞌ nu ycuiꞌ Jesús xa nguloꞌo ñi ꞌin nten seꞌen ndiyoꞌ tiꞌin neꞌ judio quichen Capernaum.
\s Chaꞌ nu ndaa chendyu ꞌin nten
\p
\v 60 Quiꞌan ꞌa nu nducui nchaꞌan ꞌin ñi ngune ꞌin chaꞌ nu ycuiꞌ ñi, loꞌ juin neꞌ: Tucui ꞌa chaꞌ nu ndloꞌo ñi re. ¿Tucui ca nu quiꞌya cunta ꞌin na?
\v 61 Ngüi tiꞌ Jesús ñaꞌan chaꞌ nu nchcuiꞌ nu nducui nchaꞌan ꞌin ñi, loꞌ juin ñi ꞌin neꞌ: ¿Ta na a mdiyaa tiꞌ um chaꞌ nu ycuinꞌ?
\v 62 ¿Ñaꞌan ta cuꞌni um chaꞌ ñaꞌan tloo um scuen Yu Quiꞌyu nu Mdoꞌo nde niꞌ Cuaan seꞌen ndiꞌin ñi tiꞌ culoo?
\v 63 Siꞌya cusya ꞌin na canꞌ chaꞌ loꞌo na, cunanꞌ re a sca ntsuꞌhui lyoo na. Chaꞌ nu ycuinꞌ loꞌo um lca na chaꞌ nu loꞌo ca loꞌ ndaa na chendyu ꞌin um.
\v 64 Una ntsuꞌhui um re a ndiya quiꞌan tiꞌ um ꞌñan. Juin Jesús cuañaꞌan siꞌyana tiꞌ culoo cuaꞌ ngujlyo tiꞌ ñi tsalca nu a ndiya quiꞌan tiꞌ ꞌin ñi, loꞌ ti nu ntsuꞌhui chaꞌ tyaa ꞌin ñi.
\v 65 Tiꞌ juin la ñi: Canꞌ chaꞌ cuaꞌ ycuinꞌ loꞌo um siꞌyana a tucui nu quia nan ꞌñan, chaꞌ siꞌi Stina Ndiose nduꞌhui tiquee canꞌ.
\v 66 Tiꞌ xacanꞌ quiꞌan ꞌa nu nducui nchaꞌan ꞌin ñi mdoꞌo tsoꞌ, loꞌ a mdaꞌan ꞌa loꞌo ñi.
\v 67 Xacanꞌ juin Jesús loꞌo tichcua yu taꞌa ndaꞌan ñi: ¿Ta na loꞌo um nchca tiꞌ um tyiꞌo tsoꞌ um?
\v 68 Yu Simón Tyo canꞌ mxcuen yu ꞌin ñi: Ñi Xꞌnan hua, ¿tucui ta ꞌin chcui nchaꞌan hua, loꞌ scati um ndaꞌan loꞌo um chaꞌ nu ndaa chendyu nu a tsatii ꞌa ꞌin hua?
\v 69 Huareꞌ cuaꞌ ya quiꞌan tiꞌ hua ꞌin um, loꞌ ncua cuiyaꞌ tiꞌ hua siꞌyana ꞌun lca um Cristo, Sñeꞌ Ndiose, ñi nu loꞌo ca.
\v 70 Mxcuen Jesús ꞌin yu: ¿Ta siꞌi nanꞌ ngulohuin ꞌin taꞌa tichcua um, loꞌ sca um nguiaa um tsoꞌ ꞌin laxaꞌan?
\v 71 Ycuiꞌ ñi cuañaꞌan siꞌya chaꞌ ꞌin yu Juda Iscariote, sñeꞌ Simón, siꞌyana canꞌ nu ntsuꞌhui chaꞌ tyaa ꞌin ñi, loꞌ cuiꞌ ta yu tichcua canꞌ lca yu.
\c 7
\s Taꞌa Jesús a mslyaa tsa quiꞌan tiꞌ ꞌin ñi
\p
\v 1 Chonꞌ ndeꞌen canꞌ mdaꞌan Jesús seꞌen lyiꞌya loo Galilea, a ncua tiꞌ ñi tsaa ñi seꞌen lyiꞌya loo Judea, siꞌyana ntsuꞌhui tiquee neꞌ judio cujui ꞌin ñi.
\v 2 Cuaꞌ nchcui cuiiꞌ chaꞌ ca taꞌa ꞌin neꞌ judio xa ntñan neꞌ quisin.
\v 3 Taꞌa Jesús juin ꞌin ñi: ¿Ñi chaꞌ ta a tsaa seꞌen lca Judea, siꞌyana loꞌo yu taꞌa ndaꞌan ñaꞌan yu chaꞌ nu tnu nguiꞌni?
\v 4 Siꞌyana a tucui nu culyo scua la chaꞌ ꞌin, cuꞌni sca chaꞌ nu cunan ti, Chaꞌ cuañaꞌan nguiꞌni chaꞌ nu tnu, cuꞌni ꞌin na tloo naꞌan nchgaa nten.
\v 5 Loꞌ ñi sca taꞌa Jesús a ndiya quiꞌan tiꞌ ꞌin ñi.
\v 6 Xacanꞌ juin Jesús ꞌin taꞌa ñi: A nchca tiyaa braa nu ꞌñan, una ꞌun ñaꞌan braa ti tsuꞌhue ꞌin um.
\v 7 Ñi a ntsuꞌhui chaꞌ xcuan tloo nten ꞌin um, una nanꞌ nxcuan tloo neꞌ ꞌñan siꞌyana ndlyo scua lan chaꞌ ngunanꞌ nu nguiꞌni neꞌ.
\v 8 Una ꞌun tca tsaa um taꞌa cua, nanꞌ a tsaꞌan siꞌyana a nchca tiyaa braa nu ꞌñan.
\v 9 Tiꞌ nguinu la ñi seꞌen lca Galilea xa ycuiꞌ ñi chaꞌ re.
\s Yaa Jesús taꞌa quichen Jerusalén
\p
\v 10 Una xa cuaꞌ mdoꞌo taꞌa ñi nguiaa, xacanꞌ mdoꞌo ñi scati ñi nguiaa ñi seꞌen nchca taꞌa canꞌ, a mdaꞌan la ñi, cuiꞌ ca nu ndaꞌan cutsiꞌ ti ñi.
\v 11 Seꞌen nchca taꞌa canꞌ ndaꞌan nan neꞌ judio ꞌin ñi, loꞌ nchcuiꞌ neꞌ: ¿La ta ncua yu canꞌ?
\v 12 Lja nten quiꞌan canꞌ scasca ñaꞌan nchcuiꞌ neꞌ chaꞌ ꞌin ñi, ntsuꞌhui nu nchcuiꞌ: Tsuꞌhue nten lca ñi. Ntsuꞌhui nu nchcuiꞌ: Siꞌi na, cuiꞌ ca nu ndaꞌan ñilyiꞌo yu ꞌin nten.
\v 13 Una a tucui nu nchcuiꞌ la chaꞌ ꞌin ñi siꞌyana nguitsen neꞌ tloo neꞌ judio.
\v 14 Tluꞌhue nguiaa nchca taꞌa canꞌ xa yten Jesús niꞌ lyaa, loꞌ mdyisnan nguloꞌo ñi ꞌin nten.
\v 15 Nduhue ꞌa tiꞌ neꞌ judio ꞌin ñi, loꞌ nchcuiꞌ neꞌ: ¿La ta ngulo yu chaꞌ tiyaa re, loꞌ a chcanꞌ yuꞌhui yu xcula?
\v 16 Xacanꞌ juin Jesús ꞌin neꞌ: Chaꞌ nu ndloꞌon ꞌin um, siꞌi chaꞌ tiyaa ꞌñan lca na, cuiꞌ ca nu lca na chaꞌ tiyaa ꞌin ñi nu nguaꞌan tñan ꞌñan.
\v 17 Nu nchca tiꞌ tucua tñan chaꞌ nu nchca tiꞌ Ndiose, quiꞌya canꞌ cunta chaꞌ na ndloꞌon chaꞌ ꞌin Ndiose, uta na nchcuinꞌ loꞌo chaꞌ tiyaa nu ꞌñan tin.
\v 18 Sca nten nu nchcuiꞌ loꞌo cunta ꞌin, nsuꞌhua loo canꞌ ꞌin ticuiiꞌ, una chaꞌ nsuꞌhua loo canꞌ ꞌin nu nguaꞌan tñan ꞌin, ñi ndiꞌin chaꞌ ꞌin loꞌ a nchcuiꞌ chaꞌ cuiñi.
\v 19 ¿Ta siꞌi Moisé lca nu mdaa lee ꞌin um, loꞌ ñi sca um a nducua um tñan ꞌin na? ¿Ñi chaꞌ ta nchca tiꞌ um cujui um ꞌñan?
\v 20 Xacanꞌ mxcuen nten canꞌ: Cuiꞌin xaꞌan ntsuꞌhui ꞌin nuꞌhuin. ¿Ti nu nchca tiꞌ cujui ꞌin?
\v 21 Mxcuen Jesús ꞌin neꞌ: Scati chaꞌ nu tnu cuaꞌ mꞌnin, loꞌ nchgaa um nduhue tiꞌ um.
\v 22 Chaꞌ ñi siꞌyana Moisé ngulo tñan siꞌyana ca circuncida ꞌin um, (una siꞌi Moisé mducua suun chaꞌ re, cuiꞌ ca nu mdyisnan na loꞌo nten cula ꞌin na), ¿ta siꞌi cuiꞌ tsaan nu nxitñanꞌ na nꞌni um circuncida ꞌin sñeꞌ um?
\v 23 Loꞌ siꞌyana a nchca tiꞌ um tnanꞌ um chaꞌ ꞌin lee nu mdaa Moisé, nꞌni um circuncida ꞌin sñeꞌ um siyaꞌ tsaan nu nxitñanꞌ na, ¿ñi chaꞌ tiꞌi tiꞌ um ꞌñan siꞌyana mꞌnin chcan can ꞌin sca yu quiꞌyu tsaan nu nxitñanꞌ na?
\v 24 A cuꞌni cuiyaꞌ um sca chaꞌ loꞌo chaꞌ tiyaa nu ꞌin um, cuiꞌ ca nu cuꞌni cuiyaꞌ um ꞌin na loꞌo sca chaꞌ tiyaa nu ñi. ¿Ta re ñi nu lca Cristo?
\v 25 Xacanꞌ mdyisnan nchcuiꞌ scasca neꞌ Jerusalén: ¿Ta siꞌi re nu ndaꞌan nan neꞌ siꞌyana cujui neꞌ ꞌin?
\v 26 Cuaꞌ ñii nchcuiꞌ la yu tloo nten re, loꞌ a tucui nu nchcui ndijin. ¿Ta xtyi tiꞌ loꞌo bsya cuaꞌ mꞌni cunta siꞌyana lca yu ycuiꞌ ca Cristo?
\v 27 Yu re jlyo tiꞌ na la quichen mdoꞌo yu, una xa ntsuꞌhui chaꞌ caan ñi nu lca Cristo, a tucui ca jlyo tiꞌ la tyiꞌo canꞌ.
\v 28 Xacanꞌ ycuiꞌ cueen Jesús seꞌen ndon ñi ndloꞌo ñi niꞌ lyaa canꞌ: ꞌUn ndyuꞌhui lyoo um ꞌñan loꞌ jlyo tiꞌ um la mdoꞌon, nanꞌ a ljyaan loꞌo cunta nu ꞌñan tin, una ñi ndiꞌin chaꞌ ꞌin ñi nu nguaꞌan tñan ꞌñan, loꞌ a ndyuꞌhui lyoo um ꞌin ñi.
\v 29 Una nanꞌ ndyuꞌhui lyoon ꞌin ñi siꞌyana mdoꞌon seꞌen nducua ñi, loꞌ cuiꞌ ñi nguaꞌan tñan ñi ꞌñan.
\v 30 Ncua tiꞌ neꞌ siꞌyana quinu ñi, una a tucui nu msñi ꞌin ñi siꞌyana a nchca tiyaa braa ꞌin ñi.
\v 31 Quiꞌan ꞌa nten ya quiꞌan tiꞌ ꞌin ñi, loꞌ nchcuiꞌ neꞌ: Xa caan ñi nu lca Cristo, ¿ta lyee la cuꞌni ñi chaꞌ nu tnu que ñaꞌan yu re?
\s Msuꞌhua neꞌ fariseo ꞌin silyiya siꞌyana quinu Jesús
\p
\v 32 Neꞌ fariseo ngune ꞌin neꞌ ñaꞌan nchcuiꞌ nten canꞌ chaꞌ ꞌin Jesús, loꞌ yu nu ndlo ca tñan niꞌ lyaa loꞌo neꞌ fariseo, nguaꞌan tñan neꞌ ꞌin yu nu ntsuꞌhui cuan canꞌ, siꞌyana xñi yu ꞌin Jesús.
\v 33 Xacanꞌ juin Jesús ꞌin neꞌ: Tiꞌ ñaꞌan taꞌa na xca coꞌ xaa, la xacanꞌ quiꞌan seꞌen nducua ñi nu nguaꞌan tñan ꞌñan.
\v 34 Siyaꞌ quia nan um ꞌñan una a quija lyoon ꞌin um, loꞌ ñi a tca tsaa um seꞌen nu nanꞌ tsaꞌan.
\v 35 Xacanꞌ mdyisnan ycuiꞌ neꞌ judio: ¿La ta tsaa yu re siꞌyana a quija lyoo yu ꞌin na? ¿Uta tsaa yu seꞌen ndiꞌin taꞌa judio na nu ndiꞌin xca quichen, loꞌ culoꞌo yu ꞌin neꞌ griego?
\v 36 ¿Ñi chaꞌ nchca tiꞌ chcuiꞌ ñaꞌan juin yu: Siyaꞌ quia nan um ꞌñan una a quija lyoon ꞌin um, loꞌ ñi a tca tsaa um seꞌen nu nanꞌ tsaꞌan?
\s Jesús lca ñi tyiꞌa nu loꞌo ca
\p
\v 37 Xca ti tsaan nu nchca taꞌa canꞌ, cuiꞌ tsaan nu ndon loo lati ꞌin neꞌ, mdyiton Jesús loꞌ ycuiꞌ cueen ñi: Chaꞌ ntsuꞌhui nu nguityi tiꞌ tyiꞌa, tca caan loꞌ taan tyiꞌa coꞌo canꞌ.
\v 38 Nu ndiya quiꞌan tiꞌ ꞌñan, cuiꞌ ñaꞌan nchcuiꞌ quityi ꞌin Ndiose, nde niꞌ cusya ꞌin ntsuꞌhui chaꞌ chcua tyiꞌa nu loꞌo ca.
\v 39 Nde chaꞌ nu ycuiꞌ ñi siꞌya Espíritu ꞌin Ndiose nu ntsuꞌhui chaꞌ chaꞌan yuꞌhui niꞌ cusya ꞌin nchgaa nu tsa quiꞌan tiꞌ ꞌin Jesús. Xa ycuiꞌ ñi chaꞌ re tiꞌ lyijyi caan Espíritu nu Luhui ꞌin Ndiose, siꞌyana Jesús a nchca scuen ñi nde niꞌ cuaan.
\s A ncua ꞌa ca sca chaꞌ ti ꞌin neꞌ
\p
\v 40 Xa ngune ꞌin nten canꞌ chaꞌ nu ycuiꞌ ñi mdyisnan ycuiꞌ neꞌ scasca neꞌ: Nu chaꞌ ñi ca siꞌyana nde yu nu nxiycuiꞌ Ndiose ꞌin.
\v 41 Ntsuꞌhui xca nu nchcuiꞌ: Ycuiꞌ ca Cristo lca yu re. A cunta ntsuꞌhui nu nchcuiꞌ: ¿Ta Galilea tyiꞌo ñi nu lca Cristo?
\v 42 ¿Ta siꞌi na nchcuiꞌ quityi ꞌin Ndiose siꞌyana —loo ta nten ꞌin Davi tyiꞌo— ñi nu lca Cristo, —cuiꞌ Belén— quichen tyi Davi?
\v 43 Loꞌ siꞌya ñi a ncua ca sca chaꞌ ti ꞌin neꞌ.
\v 44 Ntsuꞌhui nu ncua tiꞌ siꞌyana quinu ñi, una a tucui nu msti tiꞌ.
\s Yuhue tiꞌ neꞌ ñaꞌan nchcuiꞌ Jesús
\p
\v 45 Yu nu ntsuꞌhui cuan canꞌ mxitucui yu seꞌen ndiyoꞌ tiꞌin yu nu ndlo ca tñan niꞌ lyaa tsatlyu loꞌo neꞌ fariseo, loꞌ mñichaꞌ neꞌ ꞌin yu: ¿Ñi chaꞌ ta a nguian loꞌo um ꞌin yu?
\v 46 Mxcuen yu: Ñi sca tucui loꞌ a nchca quine ꞌin hua chcuiꞌ tsañaꞌan nchcuiꞌ yu cua.
\v 47 Xacanꞌ juin neꞌ fariseo: ¿Ta xtyi tiꞌ loꞌo um cuaꞌ jui nu nguñilyiꞌo ꞌin um?
\v 48 ¿Ta ndeꞌen yu nu lyiꞌya tñan re uta loꞌo neꞌ fariseo cuaꞌ ya quiꞌan tiꞌ ꞌin yu?
\v 49 Una nten re siꞌyana a ndyuꞌhui lyoo neꞌ lee, nducua yuhueꞌ chonꞌ neꞌ.
\v 50 Xacanꞌ yu Nicodemo, yu nu ya ycuiꞌ lyiꞌo Jesús sca tla, cuiꞌ ta nten ꞌin neꞌ fariseo lca yu,
\v 51 loꞌ juin yu: Una tsañaꞌan nchcuiꞌ lee ꞌin na, ¿ta tca cuꞌni cuiyaꞌ na chaꞌ ꞌin sca nten, chaꞌ tiꞌ lyijyi quine ꞌin na chaꞌ nu mꞌni neꞌ?
\v 52 Mxcuen neꞌ ꞌin yu: ¿Ta na loꞌo um lca um neꞌ Galilea? Cuꞌni quii tsuꞌhue um loo quityi ꞌin Ndiose loꞌ quiꞌya um cunta siꞌyana a ntsuꞌhui chaꞌ tyiꞌo sca nu nxiycuiꞌ Ndiose ꞌin seꞌen lca Galilea.
\v 53 Xacanꞌ cunda scaa neꞌ mdoꞌo neꞌ nguiaa neꞌ nde ñaꞌan ꞌin neꞌ.
\c 8
\s Chaꞌ ꞌin neꞌ cunaꞌan nducunꞌ
\p
\v 1 Xacanꞌ mdoꞌo Jesús nguiaa ñi seꞌen nducua quiꞌya Olivo.
\v 2 Tlya xca tsaan canꞌ mxitucui ñi loꞌ yten ñi niꞌ lyaa, ñaꞌaan quichen neꞌ nguioꞌ tiꞌin neꞌ seꞌen nducua ñi, loꞌ mdyisnan nguloꞌo ñi ꞌin neꞌ.
\v 3 Xacanꞌ neꞌ escriba loꞌo neꞌ fariseo mdiya loꞌo yu ꞌin sca neꞌ cunaꞌan nu yten yuꞌhui loꞌo xca yu quiꞌyu. Lja nten canꞌ mdiꞌin tyaa yu ꞌin neꞌ cunaꞌan canꞌ.
\v 4 Loꞌ juin yu ꞌin ñi: ꞌUn ñi nu lca Bstro, neꞌ cunaꞌan re nguija lyoo neꞌ lja nguiten yuꞌhui neꞌ loꞌo xca yu quiꞌyu.
\v 5 Lee nu mxnu scua Moisé ndlo na tñan siꞌyana sca neꞌ cunaꞌan nu nguiꞌni cuañaꞌan, ꞌni chaꞌ cujui neꞌ ꞌin loꞌo quee. Cuaꞌ ñii, ¿ñaꞌan ta ljuin um?
\v 6 Ycuiꞌ cuiyaꞌ ti yu chaꞌ ñaꞌan ca xcuen ñi seꞌen nu suꞌhua yu quiꞌya ꞌin ñi. Una Jesús yten tucua ñi loꞌ mdyisnan nguaꞌan ñi lyuu loꞌo loyaaꞌ ñi.
\v 7 Siꞌyana ticuiꞌ ti loo chaꞌ nchcuiꞌ yu, mdyiton ñi, loꞌ juin ñi ꞌin nten canꞌ: Nu ñan tiꞌ siꞌyana a sca quiꞌya nducui, canꞌ nu culo nducua la jyiꞌin quee ꞌin neꞌ cunaꞌan re.
\v 8 Xiyaꞌ yten tucua ñi loꞌ nguaꞌan ñi lyuu canꞌ.
\v 9 Una xa ngune ꞌin neꞌ chaꞌ nu ycuiꞌ ñi, cuiꞌ xaa nguꞌya neꞌ cunta siꞌyana nducui neꞌ quiꞌya, cunda scaa ti neꞌ mdoꞌo neꞌ nguiaa neꞌ tiꞌ nu cula la hasta loꞌo nu suhue ti. Xca ti Jesús nguinu tucua ñi seꞌen ndon neꞌ cunaꞌan canꞌ.
\v 10 Xacanꞌ mdyiton Jesús loꞌ naꞌan ñi siꞌyana a tucui ꞌa nu ndon canꞌ, cuiꞌ ca nu xca ti neꞌ cunaꞌan canꞌ, loꞌ juin ñi ꞌin neꞌ: ¿La ncua nu nsuꞌhua quiꞌya ꞌin? ¿Ti nu ngulo tñan siꞌyana caja?
\v 11 Mxcuen neꞌ cunaꞌan canꞌ: A tucui, Ñi Xꞌnan hua. Xacanꞌ juin Jesús loꞌo neꞌ: Ñi nanꞌ a suꞌhuan quiꞌya ꞌin. Quiaa lya, loꞌ a cuꞌni ꞌa quiꞌya.
\s Jesús lca ñi xaa nu nduꞌhui ꞌin nten
\p
\v 12 Xiyaꞌ mdyisnan ycuiꞌ Jesús loꞌo nten canꞌ: Nanꞌ lcan nu nduꞌhui xaa ꞌin nten chendyu. Nu chcui nchaꞌan ꞌñan, a tyiꞌan ꞌa seꞌen tla yta, cuiꞌ ca nu tyiꞌan canꞌ loo xaa nu ndaa chendyu.
\v 13 Xacanꞌ juin neꞌ fariseo ꞌin ñi: Ticuiꞌ ti ndaa suun ñaꞌan ndiꞌin chaꞌ ꞌin, canꞌ chaꞌ a sca cunta ntsuꞌhui ñaꞌan nu nchcuiꞌ.
\v 14 Mxcuen Jesús: Siyaꞌ ticuinꞌ ndaan suun chaꞌ ꞌñan, una lca na chaꞌ nu ñi, siꞌyana jlyo tinꞌ la mdoꞌon, loꞌ jlyo tinꞌ la quiꞌan, una ꞌun a jlyo tiꞌ um la mdoꞌon uta la quiꞌan.
\v 15 ꞌUn nꞌni cuiyaꞌ um chaꞌ loꞌo chaꞌ tiyaa ꞌin nten chendyu, una nanꞌ a nguiꞌnin cuiyanꞌ chaꞌ ꞌin ñi sca tucui.
\v 16 Loꞌ chaꞌ cuꞌnin cuiyanꞌ chaꞌ ꞌin nten, cuꞌnin ꞌin na loꞌo chaꞌ nu ñi, siꞌyana siꞌi scan tin, cuiꞌ ca nu loꞌo Stina Ndiose, ñi nu nguaꞌan tñan ꞌñan.
\v 17 Ticuiꞌ lee ꞌin um nchcuiꞌ na, chaꞌ tucua yu scañaꞌan ti suun taa yu, lca na chaꞌ nu ñi.
\v 18 Nanꞌ ndaan suun tsañaꞌan ndiꞌin chaꞌ ꞌñan, cuiꞌ cuañaꞌan Stina Ndiose, ñi nu nguaꞌan tñan ꞌñan, ndaa ñi suun ñaꞌan ndiꞌin chaꞌ ꞌñan.
\v 19 Xacanꞌ juin neꞌ ꞌin ñi: ¿La ta ncua Sti? Mxcuen Jesús: Ñi ꞌñan nanꞌ, loꞌ a ndyuꞌhui lyoo um, loꞌ ñi ꞌin Stin. Chaꞌ cua na ndyuꞌhui lyoo um ꞌñan, loꞌo Stin ndyuꞌhui lyoo um xacanꞌ.
\v 20 Ndloꞌo Jesús chaꞌ re niꞌ lyaa seꞌen ndyiꞌya neꞌ lcuan, loꞌ a tucui nu msñi ꞌin ñi siꞌyana tiꞌ lyijyi tiyaa braa ꞌin ñi.
\s Ycuiꞌ Jesús siꞌyana quiaa ñi seꞌen nducua Ndiose
\p
\v 21 Xiyaꞌ ycuiꞌ Jesús loꞌo nten canꞌ: Nanꞌ ntsuꞌhui chaꞌ tsaꞌan, loꞌ ꞌun tyiꞌan nan um ꞌñan, una tsatoꞌo caja um loo quiꞌya ꞌin um, canꞌ chaꞌ a tca tsaa um seꞌen ntsuꞌhui chaꞌ tsaꞌan.
\v 22 Scasca neꞌ judio mdyisnan ycuiꞌ neꞌ: ¿Ta xtyi tiꞌ cujui yu ꞌin yu ticuiiꞌ yu? ¿Ta canꞌ chaꞌ nchcuiꞌ yu siꞌyana a tca tsaa na seꞌen ntsuꞌhui chaꞌ quiaa yu?
\v 23 Juin Jesús ꞌin neꞌ: ꞌUn ndiꞌin loo chendyu re, nanꞌ mdoꞌon nde niꞌ cuaan. Loo chendyu re mdoꞌo um, una nanꞌ siꞌi re mdoꞌon.
\v 24 Canꞌ chaꞌ nen loꞌo um ntsuꞌhui chaꞌ caja um loo quiꞌya ꞌin um. Chaꞌ na a tsa quiꞌan tiꞌ um tucui lcan, loo quiꞌya ꞌin um ntsuꞌhui chaꞌ caja um.
\v 25 Xacanꞌ juin neꞌ ꞌin ñi: Nuꞌhuin jan ñi, ¿tucui ta lca chaꞌ na canꞌ? Mxcuen Jesús: Cuiꞌ ñaꞌan cuaꞌ nen loꞌo um tiꞌ culoo.
\v 26 Quiꞌan ꞌa chaꞌ tiꞌ ntsuꞌhui chaꞌ chcuinꞌ loꞌo ñaꞌan nu nguiꞌni um. Ñi nu nguaꞌan tñan ꞌñan, ñi ndiꞌin chaꞌ ꞌin ñi, loꞌ nchcuinꞌ chaꞌ nu ngune ꞌñan ycuiꞌ ñi.
\v 27 Una a nguꞌya neꞌ cunta siꞌyana chaꞌ ꞌin Stina Ndiose nchcuiꞌ ñi.
\v 28 Xacanꞌ juin Jesús ꞌin neꞌ: Xa jyiꞌin caꞌan um ꞌin Yu Quiꞌyu nu Mdoꞌo nde niꞌ Cuaan loo cusi, xacanꞌ ca cuiyaꞌ tiꞌ um siꞌyana nanꞌ lcan ñaꞌan cuaꞌ nen loꞌo um, ñi sca chaꞌ loꞌ a nguiꞌnin loꞌo chaꞌ cuiyaꞌ nu ꞌñan, cuiꞌ ca nu nchcuinꞌ chaꞌ nu mꞌni chaꞌan ꞌin Stina Ndiose.
\v 29 Ñi nu nguaꞌan tñan ꞌñan ndiꞌin ñi loꞌon, loꞌ a mxnu Stina Ndiose ꞌñan scan tin, siꞌyana nchgaa xaa nducuan tñan ñaꞌan chaꞌ nu nchca tiꞌ ñi.
\v 30 Xa ycuiꞌ ñi chaꞌ re, quiꞌan ꞌa nten ya quiꞌan tiꞌ ꞌin ñi.
\s Tyiꞌo laa um siꞌya chaꞌ nu ñi
\p
\v 31 Xacanꞌ juin Jesús ꞌin neꞌ judio nu ya quiꞌan tiꞌ ꞌin ñi: Chaꞌ ꞌun tyon tla um loꞌo chaꞌ nu nchcuinꞌ, chaꞌ ñi ca lca um nu nguiꞌni chaꞌan ꞌñan,
\v 32 chuꞌhui lyoo um chaꞌ nu ñi, loꞌ chaꞌ nu ñi canꞌ culo laa na ꞌin um.
\v 33 Mxcuen neꞌ ꞌin ñi: Huareꞌ lca hua ta nten ꞌin Abraham, loꞌ ñi siyaꞌ loꞌ a nchca ca hua nguso ꞌin xca tucui loꞌo juesa, ¿ñaꞌan ta nchcuiꞌ siꞌyana ntsuꞌhui chaꞌ tyiꞌo laa hua?
\v 34 Xacanꞌ mxcuen Jesús ꞌin neꞌ: Nu chaꞌ ñi sꞌni cunen loꞌo um, nchgaa nu nguiꞌni quiꞌya, nguso ꞌin quiꞌya lca canꞌ.
\v 35 Sca nguso a tca quinu loꞌo xꞌnan tsala xaa, una yu nu lca sñeꞌ xꞌnan canꞌ, tsala xaa ntsuꞌhui chaꞌ quinu loꞌo sti.
\v 36 Canꞌ chaꞌ, chaꞌ na Sñeꞌ Ndiose culo laa ꞌin um, nu chaꞌ ñi ca tyiꞌo laa um xacanꞌ.
\v 37 Nanꞌ jlyo tinꞌ siꞌyana lca um ta nten ꞌin Abraham, una nchca tiꞌ um cujui um ꞌñan, siꞌyana a nducuan xuꞌhue um chaꞌ nu nchcuinꞌ.
\v 38 Nanꞌ nchcuinꞌ tsañaꞌan chaꞌ nu naꞌan tloon seꞌen nducua Stina Ndiose, una ꞌun nguiꞌni um chaꞌ nu nchcuiꞌ sti um.
\s Chaꞌ ꞌin nu nguiaa tsoꞌ ꞌin laxaꞌan
\p
\v 39 Mxcuen neꞌ ꞌin ñi: Abraham lca nu ncua nten cula ꞌin hua. Xacanꞌ juin Jesús ꞌin neꞌ: Chaꞌ na lca um sñeꞌ Abraham, cuiꞌ tñan nu mꞌni Abraham cuꞌni um xacanꞌ.
\v 40 Una nde nchca tiꞌ um cujui um ꞌñan, cuiꞌ nu nchcuiꞌ chaꞌ nu ñi tsañaꞌan nu ngune ꞌin ycuiꞌ Ndiose. Una Abraham a mꞌni yu cuañaꞌan.
\v 41 Una ꞌun nguiꞌni um tñan nu nguiꞌni sti um. Xacanꞌ juin neꞌ ꞌin ñi: Una huareꞌ siꞌi ñaꞌan tucui ti lca sti hua, siꞌyana scati Ndiose lca sti hua.
\v 42 Xacanꞌ mxcuen Jesús ꞌin neꞌ: Chaꞌ na Ndiose lca sti um, tsuꞌhue ntsuꞌhui tiquee um loꞌon, siꞌyana nanꞌ mdoꞌon seꞌen nducua Ndiose loꞌ mdiyaan re, una siꞌi loꞌo chaꞌ cuiyaꞌ nu ꞌñan tin, cuiꞌ ca nu loꞌo chaꞌ cuiyaꞌ ꞌin ñi nu nguaꞌan tñan ꞌñan.
\v 43 ¿Ñi chaꞌ a ndyiꞌya um cunta chaꞌ nu nchcuinꞌ? Cuiꞌ siꞌyana a nchca tiꞌ um cuan xuꞌhue um ꞌin na.
\v 44 ꞌUn nguiaa um tsoꞌ ꞌin laxaꞌan nu lca sti um, loꞌ nguia nchaꞌan um ñaꞌan nu nguiꞌni canꞌ. Tiꞌ culoo lca canꞌ nu ndujui nten, a ndon canꞌ loo chaꞌ nu ñi siꞌyana a ñi ndiꞌin chaꞌ ꞌin, laꞌ ñaꞌan nchcuiꞌ canꞌ chaꞌ cuiñi siꞌyana lca nu cuiñi, ycuiꞌ ca sti chaꞌ cuiñi.
\v 45 Nanꞌ siꞌyana nchcuinꞌ chaꞌ nu ñi, canꞌ chaꞌ a ndiya quiꞌan tiꞌ um ꞌñan.
\v 46 ¿Ti nu tca chcuiꞌ siꞌyana nducuin quiꞌya? Chaꞌ na nchcuinꞌ chaꞌ nu ñi, ¿ñi chaꞌ a ndiya quiꞌan tiꞌ um ꞌñan?
\v 47 Nu nguiaa tsoꞌ ꞌin Ndiose ndon nscan chaꞌ ꞌin Ndiose, canꞌ chaꞌ a ndon nscan um chaꞌ re siꞌyana a nguiaa um tsoꞌ ꞌin Ndiose.
\s Xa tiꞌ lyijyi tyiꞌin Abraham cuaꞌ ndiꞌin Cristo
\p
\v 48 Xacanꞌ mxcuen neꞌ judio ꞌin ñi: Cuiꞌ ñaꞌan cuaꞌ ycuiꞌ hua loꞌo siꞌyana lca neꞌ Samaria, loꞌ ntsuꞌhui cuiꞌin xaꞌan ꞌin.
\v 49 Mxcuen Jesús: A ntsuꞌhui cuiꞌin xaꞌan ꞌñan. Cuiꞌ ca nu nguiꞌnin tnun ꞌin Stin, una ꞌun nxcuan tloo um ꞌñan.
\v 50 Ñi a nchca tinꞌ scuen cuaan ꞌñan ticuiinꞌ, una xca tucui nscuen cuaan ꞌñan, canꞌ nu cuꞌni cuiyaꞌ chaꞌ ꞌñan.
\v 51 Nu chaꞌ ñi sꞌni cunen loꞌo um, nu xuꞌhua seꞌen chaꞌ nu nchcuinꞌ, a ntsuꞌhui chaꞌ caja canꞌ.
\v 52 Xacanꞌ juin neꞌ judio ꞌin ñi: Cuaꞌ ñii nguꞌya hua cunta siꞌyana ntsuꞌhui cuiꞌin xaꞌan ꞌin. Abraham ngujui yu, cuiꞌ cuañaꞌan ngujui nchgaa la ñaꞌan yu nu mxiycuiꞌ Ndiose ꞌin, loꞌ nuꞌhuin nchcuiꞌ: Nu xuꞌhua seꞌen chaꞌ nu nchcuinꞌ, a ntsuꞌhui chaꞌ caja canꞌ.
\v 53 ¿Ta ndon loo la nuꞌhuin que ꞌin Abraham nu ncua nten cula ꞌin na? Ngujui yu loꞌ ngujui nchgaa la ñaꞌan yu nu mxiycuiꞌ Ndiose ꞌin, loꞌ nuꞌhuin, ¿tucui ta lca ñan tiꞌ?
\v 54 Mxcuen Jesús: Chaꞌ nanꞌ scuen cuaan ꞌñan ticuiinꞌ, a sca cunta ntsuꞌhui, una ñi nu lca Stin, canꞌ nu nscuen cuaan ꞌñan, cuiꞌ ñi nu nchcuiꞌ um lca Ndiose ꞌin um.
\v 55 ꞌUn a ndyuꞌhui lyoo um ꞌin ñi, una nanꞌ ndyuꞌhui lyoon ꞌin ñi. Chaꞌ cunen a ndyuꞌhui lyoon ꞌin ñi, lcan sca nu cuiñi tsañaꞌan ndiꞌin chaꞌ ꞌin um. Una nanꞌ ndyuꞌhui lyoon ꞌin ñi loꞌ nxuꞌhua seꞌen chaꞌ nu nchcuiꞌ ñi.
\v 56 Abraham nu ncua nten cula ꞌin um, tsuꞌhue yuꞌhui tiquee yu xa ynan yu chaꞌ siꞌyana ntsuꞌhui chaꞌ caan, naꞌan yu chaꞌ canꞌ loꞌ ncua tsuꞌhue yuꞌhui tiquee yu.
\v 57 Xacanꞌ juin neꞌ judio ꞌin ñi: Ñi tuꞌhua tyii yjan a nchca chuꞌhui, loꞌ nchcuiꞌ siꞌyana cuaꞌ naꞌan ꞌin Abraham.
\v 58 Juin Jesús ꞌin neꞌ: Nu chaꞌ ñi sꞌni cunen loꞌo um, tiꞌ lyijyi tyiꞌin Abraham loꞌ nanꞌ cuaꞌ ndiꞌin.
\v 59 Xacanꞌ msñi neꞌ quee siꞌyana jyiꞌin neꞌ ꞌin Jesús, una yuꞌhui cutsiꞌ ñi loꞌ mdyiꞌo ñi niꞌ lyaa canꞌ, mdijin ñi lja nten canꞌ nguiaa ñi.
\c 9
\s Msla Jesús quiloo sca yu cuityinꞌ

\p
\v 1 Tucueen seꞌen mdijin Jesús, naꞌan ñi nducua sca yu cuaꞌ lca cuityinꞌ tiꞌ xa ngula.
\v 2 Yu taꞌa ndaꞌan ñi mñichaꞌ ꞌin ñi: Rabí, ¿ti nu nducui quiꞌya, yu re uta na nten cula ꞌin yu, ñi chaꞌ cuaꞌ lca cuityinꞌ yu xa mdiyaan yu chendyu?
\v 3 Xacanꞌ mxcuen Jesús: Siꞌi yu, loꞌ ñi nten cula ꞌin yu a nducui jun quiꞌya, cuiꞌ ca nu siꞌyana ca chcanꞌ loo chaꞌ nu tnu cuꞌni Ndiose loꞌo yu.
\v 4 ꞌNi ꞌni ca chaꞌ cuꞌnin tñan ꞌin ñi nu nguaꞌan tñan ꞌñan lja nu tiꞌ ndyijyi xaa, siꞌyana chaꞌ cuaꞌ nguꞌya tla a tucui ꞌa nu cuꞌni tñan.
\v 5 Lja nu tiꞌ ndiꞌin loo chendyu re, nanꞌ lcan nu nduꞌhui xaa ꞌin nten chendyu.
\v 6 Ñaꞌaan mdyi ycuiꞌ ñi chaꞌ re nguloꞌo siyeꞌ ñi lyuu, mꞌni ñi tsachinꞌ mtsoꞌ loꞌo tyiꞌa siyeꞌ ñi, loꞌ mxitaꞌan ñi ꞌin na quiloo yu cuityinꞌ canꞌ,
\v 7 loꞌ juin ñi ꞌin yu: Ya ycui tyiꞌa tloo niꞌ plyaa Siloé cua, (chaꞌ re nchca tiꞌ chcuiꞌ: Nu nguaꞌan tñan neꞌ ꞌin). Xacanꞌ ya ycui yu tyiꞌa tloo yu, loꞌ cuaꞌ lca nguila na ꞌin yu xa mxitucui yu.
\v 8 Tsalca taꞌa nducua ti yu, loꞌo nu jlyo tiꞌ siꞌyana ncua yu sca nu cuityinꞌ, nchcuiꞌ neꞌ: ¿Ta siꞌi re yu cuityinꞌ nu nchcua njñan lcuan nchgaa xaa?
\v 9 Ntsuꞌhui nu nchcuiꞌ: Cuiꞌ yu. Ntsuꞌhui xca nu nchcuiꞌ: Na chcui ñaꞌan ti yu. Ticuiiꞌ yu mxcuen yu ꞌin neꞌ: Nanꞌ lcan.
\v 10 Mñichaꞌ neꞌ ꞌin yu: ¿Loꞌ ñaꞌan ta ncua nguila quiloo?
\v 11 Mxcuen yu ꞌin neꞌ: Cuiꞌ yu nu naan Jesús mꞌni chuꞌhue yu tsachinꞌ mtsoꞌ, mxitaꞌan yu ꞌin na quiloon, loꞌ juin yu ꞌñan: Ya ycui tyiꞌa tloo seꞌen lca Siloé cua. Cuiꞌ xaa ya ycuin tyiꞌa tloon, loꞌ ncua chcanꞌ ꞌñan.
\v 12 Xacanꞌ juin neꞌ ꞌin yu: ¿La ta ncua yu ñii? Mxcuen yu ꞌin neꞌ: A jlyo tinꞌ.
\s Mñichaꞌ neꞌ fariseo ꞌin yu nu ncua cuityinꞌ
\p
\v 13 Ya loꞌo neꞌ ꞌin yu nu ncua cuityinꞌ canꞌ tloo neꞌ fariseo.
\v 14 Lca na tsaan nu nxitñanꞌ neꞌ judio xa mꞌni chuꞌhue Jesús mtsoꞌ canꞌ, loꞌ mꞌni ñi chaꞌ nguila quiloo yu.
\v 15 Ticuiꞌ cuañaꞌan mñichaꞌ neꞌ fariseo ꞌin yu chaꞌ ñaꞌan ncua nguila quiloo yu. Loꞌ juin yu ꞌin neꞌ: Tsachinꞌ mtsoꞌ mxitaꞌan yu quiloon, mjyiꞌan ꞌin na, loꞌ cuaꞌ ñii chcanꞌ ꞌñan.
\v 16 Xacanꞌ mdyisnan ycuiꞌ neꞌ fariseo: Yu cua a mdoꞌo yu seꞌen nducua Ndiose siꞌyana a nxuꞌhua seꞌen yu tsaan nu nxitñanꞌ na. Ntsuꞌhui xca nu nchcuiꞌ: ¿Una ñaꞌan ta nꞌni yu chaꞌ nu tnu chaꞌ na lca yu nten quiꞌya chendyu? Loꞌ a ncua ꞌa ca sca chaꞌ ti ꞌin neꞌ siꞌya ñi.
\v 17 Xiyaꞌ mñichaꞌ neꞌ ꞌin yu nu ncua cuityinꞌ canꞌ: ¿Ñaꞌan ta ñan tiꞌ loꞌo yu nu msla quiloo? Mxcuen yu ꞌin neꞌ: Yu nu nxiycuiꞌ Ndiose ꞌin lca yu.
\v 18 Una a ya quiꞌan tiꞌ neꞌ siꞌyana ncua yu sca nu cuityinꞌ loꞌ cuaꞌ ñii nguila quiloo yu. Canꞌ chaꞌ mꞌni neꞌ chaꞌ yaan nten cula ꞌin yu,
\v 19 loꞌ mñichaꞌ neꞌ ꞌin: ¿Ta sñeꞌ um lca yu re? ¿Ta chaꞌ ñi siꞌyana cuaꞌ lca cuityinꞌ yu xa mdiyaan yu chendyu? ¿Ñaꞌan ta ncua nguila quiloo yu?
\v 20 Nten cula ꞌin yu mxcuen ꞌin neꞌ: Jlyo tiꞌ hua siꞌyana sñeꞌ hua lca yu, loꞌ jlyo tiꞌ hua siꞌyana cuaꞌ lca cuityinꞌ yu xa ngula yu,
\v 21 una tsañaꞌan nguila quiloo yu, a ndyiꞌya hua cunta loꞌ ñi a jlyo tiꞌ hua ti ca nu msla quiloo yu, una cuaꞌ cula yu re, tca cuñichaꞌ um ꞌin yu, loꞌ cuiꞌ yu quitsaꞌ yu ꞌin um.
\v 22 Ycuiꞌ jun cuañaꞌan siꞌyana nguitsen jun tloo neꞌ judio, siꞌyana cuaꞌ mꞌni cuiyaꞌ neꞌ chaꞌ, chaꞌ ndeꞌen nu chcuiꞌ siꞌyana Jesús lca ñi nu mdoꞌo hui ca ꞌin Ndiose, cuiꞌ xaa culo neꞌ ꞌin canꞌ seꞌen ndiyoꞌ tiꞌin neꞌ.
\v 23 Canꞌ chaꞌ juin nten cula ꞌin yu: Cuaꞌ cula yu re, tca cuñichaꞌ um ꞌin yu.
\v 24 Xiyaꞌ mxiꞌya neꞌ ꞌin yu nu ncua cuityinꞌ canꞌ loꞌ juin neꞌ ꞌin yu: Tyaa xuꞌhue ꞌin Ndiose siꞌya chaꞌ re, huareꞌ jlyo tiꞌ hua siꞌyana yu cua lca yu nten quiꞌya chendyu.
\v 25 Xacanꞌ mxcuen yu canꞌ: A jlyo tinꞌ chaꞌ ta lca yu nten quiꞌya chendyu, scati chaꞌ nu jlyo tinꞌ siꞌyana ncuan sca yu cuityinꞌ loꞌ cuaꞌ ñii chcanꞌ ꞌñan.
\v 26 Xiyaꞌ mñichaꞌ neꞌ ꞌin yu: ¿Ñaꞌan ta mꞌni yu loꞌo? ¿Ñaꞌan ta msla yu quiloo?
\v 27 Mxcuen yu ꞌin neꞌ: Cuaꞌ nen loꞌo um, una a nꞌni cunta um chaꞌ nu nchcuinꞌ. ¿Ñi chaꞌ ta nchca tiꞌ um quitsanꞌ ꞌin um xiyaꞌ, ta na loꞌo um ndyiꞌo tiquee um chcui chaꞌan um ꞌin yu?
\v 28 Xacanꞌ ycuen tiqueꞌ neꞌ loꞌo yu loꞌ juin neꞌ: Nuꞌhuin lca nu nguiꞌni chaꞌan ꞌin yu cua, una huareꞌ nguiꞌni chaꞌan hua chaꞌ ꞌin Moisé.
\v 29 Jlyo tiꞌ hua siꞌyana Ndiose lca nu ycuiꞌ loꞌo Moisé, una yu cua a jlyo tiꞌ hua la mdoꞌo yu.
\v 30 Xacanꞌ mxcuen yu: Nduhue ꞌa tinꞌ chaꞌ re, siꞌyana a jlyo tiꞌ um la mdoꞌo yu, una cuiꞌ yu msla yu quiloon.
\v 31 Cuaꞌ jlyo tiꞌ na siꞌyana sca nten quiꞌya chendyu a nꞌni cunta Ndiose chaꞌ nu njñan canꞌ, una sca nten nu nꞌni tnu ꞌin ñi loꞌ nchca jaꞌan ꞌin ñi, canꞌ nu nꞌni cunta ñi chaꞌ nu nchcuiꞌ.
\v 32 Ñi siyaꞌ a nchca quine chaꞌ ta ndeꞌen nu cuaꞌ msla quiloo sca nu cuaꞌ lca cuityinꞌ tiꞌ xa ngula.
\v 33 Chaꞌ cua na a mdoꞌo yu seꞌen nducua Ndiose, ñi sca chaꞌ loꞌ a tca cuꞌni yu.
\v 34 Mxcuen neꞌ ꞌin yu: Nuꞌhuin nu cuaꞌ lca nducua quiꞌya chonꞌ tiꞌ xa ngula, ¿loꞌ cuaꞌ ñii ñan tiꞌ culoꞌo ꞌin hua? Cuiꞌ xaa ngulo neꞌ ꞌin yu nde lyiyaꞌ.
\s Chaꞌ ꞌin nu cuityinꞌ loꞌo chaꞌ ꞌin Ndiose
\p
\v 35 Ynan Jesús chaꞌ siꞌyana cuaꞌ ngulo neꞌ ꞌin yu nde lyiyaꞌ, loꞌ xa nguija lyoo ñi ꞌin yu juin ñi: ¿Ta ndiya quiꞌan tiꞌ ꞌin Sñeꞌ Ndiose?
\v 36 Mxcuen yu canꞌ: Quitsaꞌ um ꞌñan chaꞌ ti ca lca canꞌ, loꞌ tsa quiꞌan tinꞌ ꞌin ñi.
\v 37 Juin Jesús ꞌin yu: Cuaꞌ ndyuꞌhui lyoo ꞌin canꞌ, siꞌyana cuiꞌ ñi taꞌa nchcuiꞌ cuaꞌ ñii.
\v 38 Juin yu ꞌin ñi: Ñi Xꞌnan hua, ndiya quiꞌan tinꞌ ꞌin um, xacanꞌ mꞌni tnu yu ꞌin ñi.
\v 39 Loꞌ juin Jesús: Nanꞌ mdiyaan loo chendyu re siꞌyana cuꞌnin cuiyanꞌ chaꞌ ꞌin nten, ñaꞌan ca siꞌyana nu a chcanꞌ ꞌin, quila xaa quiloo, loꞌ nu chcanꞌ ꞌin, nde quinu cuityinꞌ.
\v 40 Xa ngune ꞌin neꞌ fariseo chaꞌ nu ycuiꞌ Jesús, juin neꞌ ꞌin ñi: ¿Ta loꞌo huareꞌ cuityinꞌ hua?
\v 41 Xacanꞌ mxcuen Jesús ꞌin neꞌ: Chaꞌ cua na cuityinꞌ um a nducui um quiꞌya, una cuaꞌ ñii siꞌyana nchcuiꞌ um chcanꞌ ꞌin um, canꞌ chaꞌ nducua quiꞌya chonꞌ um.
\c 10
\s Ycuiꞌ Jesús chaꞌ ꞌin slyaꞌ 

\p
\v 1 Nu chaꞌ ñi sꞌni cunen loꞌo um, sca nu a nguiten nde tuloꞌo ꞌin slyaꞌ, cuiꞌ ca nu ndyiꞌo cuaan nde tuꞌhua loꞌo, canꞌ nu nducunꞌ loꞌ cunan.
\v 2 Una nu nguiten nde tuloꞌo, canꞌ nu ntsuꞌhui cunta ꞌin slyaꞌ canꞌ.
\v 3 Yu nu ndon tuloꞌo canꞌ, cuiꞌ xaa nsla yu ꞌin na xa ndiyaa yu nu naꞌan seen slyaꞌ canꞌ, loꞌ slyaꞌ canꞌ ne ꞌin ꞌin xa nchcuiꞌ yu, cunda scaa ꞌin ndloꞌo naan yu ꞌin ꞌin, loꞌ ndyiꞌan loꞌo yu ꞌin ꞌin seꞌen nan ycu ꞌin.
\v 4 Xa ndlyoo yu slyaꞌ ꞌin yu nchcua loo yu loo ꞌin, loꞌ nchcui nchaꞌan ꞌin ꞌin yu siꞌyana ndyuꞌhui lyoo ꞌin ñaꞌan tyiꞌi nchcuiꞌ yu.
\v 5 Una a nchcui nchaꞌan ꞌin ꞌin nten nu a ndyuꞌhui lyoo ꞌin, cuiꞌ ca nu nde nxnan ꞌin siꞌyana a ndyuꞌhui lyoo ꞌin ñaꞌan tyiꞌi nchcuiꞌ canꞌ.
\v 6 Nde chaꞌ nu mdiꞌin tyaa Jesús loꞌo neꞌ, una a nguꞌya neꞌ cunta ñi chaꞌ lca na.
\s Jesús lca ñi nu naꞌan seen slyaꞌ
\p
\v 7 Xiyaꞌ mxitucui Jesús ycuiꞌ ñi: Nu chaꞌ ñi sꞌni cunen loꞌo um, nanꞌ lcan tuloꞌo seꞌen nguiten slyaꞌ.
\v 8 Nchgaa nu yaan xa tiꞌ lyijyi caan nanꞌ, lca canꞌ yu nducunꞌ loꞌ cunan, una slyaꞌ canꞌ a mꞌni cunta ꞌin chaꞌ nu ycuiꞌ canꞌ.
\v 9 Nanꞌ lcan tuloꞌo canꞌ, nu sten ꞌin na loꞌo cunta ꞌñan, canꞌ nu tyiꞌo laa, tsa nan ycu, loꞌ ticuiꞌ canꞌ quila xiyaꞌ.
\v 10 Yu cunan ljyaan yu siꞌyana cujui yu, siꞌyana cujlyo yu loꞌ cuꞌni yu cunan. Una nanꞌ ljyaan siꞌyana caja chendyu ꞌin um, sca chendyu nu chaꞌan yuꞌhui um loꞌo.
\v 11 Nanꞌ lcan sca nu tsuꞌhue ñaꞌan seen slyaꞌ, loꞌ nu tsuꞌhue ñaꞌan seen slyaꞌ canꞌ ndyaa cusya ꞌin siꞌya ꞌin.
\v 12 Una yu nguso siꞌyana a lca yu xꞌnan ꞌin, xa ñaꞌan yu ljyaan sca ꞌni la, nde nxnan yuꞌhui yu loꞌ nxnu tiꞌin yu slyaꞌ canꞌ, loꞌ ꞌni la canꞌ nꞌni lyiꞌo ꞌin ꞌin, loꞌ cuaꞌ la tucueen ndaꞌan ꞌin xacanꞌ.
\v 13 Yu nguso canꞌ nxnan yu siꞌyana nguso ti lca yu, canꞌ chaꞌ a nduhue tiꞌ yu nxnu tiꞌin yu slyaꞌ canꞌ.
\v 14 Nanꞌ lcan nu tsuꞌhue ñaꞌan seen slyaꞌ, ndyuꞌhui lyoon slyaꞌ ꞌñan, loꞌ slyaꞌ canꞌ ndyuꞌhui lyoo ꞌñan,
\v 15 tsañaꞌan ndyuꞌhui lyoo Stina Ndiose ꞌñan, loꞌ nanꞌ ndyuꞌhui lyoon ꞌin ñi, nu hasta ndyaan cusya ꞌñan siꞌya ꞌin.
\v 16 A cunta ndiꞌin xca ta slyaꞌ ꞌñan nu a ntsuꞌhui niꞌ lyiꞌo re, loꞌo canꞌ ntsuꞌhui chaꞌ quia ꞌyan, loꞌ cuꞌni cunta chaꞌ nu chcuinꞌ. Sca niꞌ lyiꞌo ti chuꞌhui ꞌin nchgaa ꞌin, loꞌ scati nu ñaꞌan seen ꞌin ꞌin.
\v 17 Canꞌ chaꞌ tsuꞌhue ꞌa ntsuꞌhui tiquee Stina Ndiose loꞌon, siꞌyana hasta loꞌo chendyu ꞌñan ndyaan seꞌen nu tca chcuan ꞌin na xiyaꞌ.
\v 18 A tucui nu tca chcuan chendyu ꞌñan, cuiꞌ ca nu ticuiinꞌ ndyaan ꞌin na. Ntsuꞌhui chaꞌ cuiyaꞌ ꞌñan tyaan ꞌin na, loꞌ ntsuꞌhui chaꞌ cuiyaꞌ ꞌñan chcuan ꞌin na xiyaꞌ. Nde chaꞌ cuiyaꞌ nu mdaa Stin ꞌñan.
\v 19 Neꞌ judio canꞌ, ticuiꞌ ti ñaꞌan a ncua ꞌa ca sca chaꞌ ti ꞌin neꞌ siꞌya chaꞌ nu ycuiꞌ Jesús.
\v 20 Quiꞌan nu nchcuiꞌ: Cuiꞌin xaꞌan ntsuꞌhui ꞌin yu re, canꞌ chaꞌ ndiyoꞌ yu. ¿Ñi chaꞌ ndon nscan um chaꞌ nu nchcuiꞌ yu?
\v 21 Ntsuꞌhui xca nu nchcuiꞌ: Una sca nu ntsuꞌhui cuiꞌin xaꞌan ꞌin a nchcuiꞌ canꞌ tsañaꞌan nchcuiꞌ yu re. ¿Ta tca ꞌin cuiꞌin xaꞌan sla quiloo sca yu cuityinꞌ?
\s Nxcuan tloo neꞌ judio ꞌin Jesús
\p
\v 22 Lja xacanꞌ nchca taꞌa ꞌin laa nu nducua quichen Jerusalén, loꞌ lca na tsaan nu ndyiꞌya tiꞌin tlyaꞌ.
\v 23 Jesús nxiton ñi niꞌ lyaa seꞌen nguiaꞌ tucui tulaa nu naan Salomón.
\v 24 Msuꞌhua loꞌo neꞌ judio ꞌin ñi loꞌ juin neꞌ: ¿Tsala ta xaa tyiꞌan loꞌo hua chaꞌ tucua tiꞌ re? Chaꞌ na cuiꞌ lca Cristo, siyaꞌ ti quitsaꞌ la ꞌin hua.
\v 25 Mxcuen Jesús ꞌin neꞌ: Cuaꞌ nen loꞌo um, loꞌ a ndiya quiꞌan tiꞌ um ꞌñan. Una ticuiiꞌ tñan nu nguiꞌnin loꞌo chaꞌ cuiyaꞌ ꞌin Stin, ndaa na suun tucui ca lcan.
\v 26 Una ꞌun a ndiya quiꞌan tiꞌ um siꞌyana a lca um slyaꞌ ꞌñan, cuiꞌ tsañaꞌan nu cuaꞌ ycuinꞌ loꞌo um.
\v 27 Una tsalca slyaꞌ ꞌñan ne ꞌin chaꞌ nu nchcuinꞌ, loꞌ ndyuꞌhui lyoon ꞌin ꞌin, loꞌ nchcui nchaꞌan ꞌin ꞌñan.
\v 28 Nanꞌ ndaan chendyu nu a tsatii ꞌa ꞌin ꞌin, loꞌ a ntsuꞌhui chaꞌ quinanꞌ cusya ꞌin ꞌin, ñi a tucui nu tca culyoo ꞌin ꞌin tuyaanꞌ.
\v 29 Stin, ñi nu mdyaa ꞌin ꞌin ꞌñan, scati ñi ndon loo la ñi, loꞌ a tucui nu tca culyoo ꞌin ꞌin tuyaaꞌ ñi.
\v 30 Nanꞌ loꞌo Stina Ndiose, scati lca hua.
\v 31 Xiyaꞌ msñi neꞌ judio quee nu jyiꞌin neꞌ ꞌin ñi.
\v 32 Loꞌ juin Jesús ꞌin neꞌ: Tsala quiꞌan tñan tsuꞌhue cuaꞌ mꞌnin tloo um loꞌo chaꞌ cuiyaꞌ ꞌin Stin. ¿Ti ñaꞌan ta siꞌya chaꞌ canꞌ nchca tiꞌ um jyiꞌin um quee ꞌñan?
\v 33 Xacanꞌ mxcuen neꞌ judio ꞌin ñi: Siꞌi siꞌya tñan tsuꞌhue canꞌ jyiꞌin hua quee ꞌin, cuiꞌ ca nu siꞌyana nchcuiꞌ caꞌan ꞌin Ndiose, nuꞌhuin lca nten chendyu loꞌ nchcuiꞌ siꞌyana lca Ndiose.
\v 34 Mxcuen Jesús ꞌin neꞌ: ¿Ta a nguinu scua sca chaꞌ loo lee ꞌin um: —Nanꞌ cuaꞌ nen siꞌyana ndiose lca um—?
\v 35 Chaꞌ na Ndiose juin ñi siꞌyana ndiose lca nu mchcuan cunta chaꞌ ꞌin ñi, (loꞌ jlyo tiꞌ na siꞌyana chaꞌ nu nguinu scua canꞌ a tca cutsa tiꞌin na),
\v 36 ¿loꞌ ñaꞌan ta ljuin um chaꞌ ꞌin nu cuaꞌ ngulohui ca Stina Ndiose, loꞌ nguaꞌan tñan ñi ꞌin yaan loo chendyu re? Nchcuiꞌ um siꞌyana ycuinꞌ caꞌan ꞌin Ndiose xa nen: Sñeꞌ Ndiose lcan.
\v 37 Chaꞌ cua na siꞌi tñan ꞌin Stin nguiꞌnin, a na joꞌo tsa quiꞌan tiꞌ um ꞌñan.
\v 38 Una chaꞌ nguiꞌnin ꞌin na, siyaꞌ a tsa quiꞌan tiꞌ um ꞌñan, una tsa quiꞌan tiꞌ um siꞌya tñan nu nguiꞌnin, loꞌ ca cuiyaꞌ tiꞌ um loꞌ tsa quiꞌan tiꞌ um siꞌyana sca chaꞌ ti ꞌñan loꞌo Stina Ndiose.
\v 39 Xiyaꞌ ncua tiꞌ neꞌ quinu Jesús, una mdoꞌo ñi tuyaaꞌ neꞌ.
\v 40 Xacanꞌ xiyaꞌ nguiaa ñi xca tsoꞌ chco tlyu Jordan, seꞌen nu mducua tya yu Xuhua ꞌin nten tiꞌ culoo. Canꞌ nguinu ñi sca coꞌ xaa.
\v 41 Quiꞌan ꞌa nten ndyiꞌan neꞌ seꞌen ndiꞌin ñi, loꞌ nchcuiꞌ neꞌ: Chaꞌ ñi siꞌyana yu Xuhua ñi sca chaꞌ nu tnu loꞌ a mꞌni yu, una nchgaa chaꞌ nu ycuiꞌ yu chaꞌ ꞌin ñi re, chaꞌ ñi lca na.
\v 42 Quiꞌan ꞌa nten ya quiꞌan tiꞌ ꞌin Jesús seꞌen canꞌ.
\c 11
\s Xa ngujui yu Lázaro
\p
\v 1 Yatoꞌo quichen Betania ncua tiꞌi sca yu naan Lázaro, cuiꞌ quichen tyi María loꞌo Marta taꞌa ngula yu.
\v 2 (María taꞌa ngula yu Lázaro nu ncua tiꞌi canꞌ, lca nu msuꞌhua tyiꞌa xityiꞌi ꞌin Ñi Xꞌnan na, loꞌ mxityi quiyaꞌ ñi loꞌo quichanꞌ que.)
\v 3 Chcuaa jun cunaꞌan canꞌ msuꞌhua suun ꞌin Jesús, loꞌ nchcuiꞌ jun: Ñi Xꞌnan hua, yu taꞌa tsuꞌhue ntsuꞌhui um, cuaꞌ ñii nscua yu tiꞌi yu.
\v 4 Xa ngune ꞌin Jesús chaꞌ re, xacanꞌ juin ñi: Siꞌi quicha ntsuꞌhui chaꞌ cujui ꞌin yu ca lca na, cuiꞌ ca nu siꞌyana ca chcanꞌ loo chaꞌ cuiyaꞌ ꞌin Ndiose loꞌ caja nu cuꞌni tnu ꞌin Sñeꞌ ñi.
\v 5 Marta loꞌo nu cunaꞌan taꞌa, loꞌo Lázaro lca jun taꞌa tsuꞌhue Jesús.
\v 6 Xa ynan Jesús chaꞌ siꞌyana yu canꞌ tiꞌi yu, tiꞌ nguinu la ñi chcua tsaan seꞌen canꞌ.
\v 7 Xacanꞌ juin ñi ꞌin yu taꞌa ndaꞌan ñi: Tsaa na xiyaꞌ seꞌen lca Judea.
\v 8 Mxcuen yu taꞌa ndaꞌan ñi ꞌin ñi: Rabí, a tyun tsaan ncua tiꞌ neꞌ judio jyiꞌin neꞌ quee ꞌin um, loꞌ cuaꞌ ñii nchca tiꞌ um tsaa um xiyaꞌ.
\v 9 Mxcuen Jesús ꞌin yu: ¿Ta siꞌi tichcua braa nchca sca tsaan? Tsalca nu ndaꞌan cucha, a ntsuꞌhui chaꞌ chcua quee quiyaꞌ canꞌ siꞌyana ndaꞌan loo xaa.
\v 10 Una nu ndaꞌan tla, nchcua quee quiyaꞌ canꞌ siꞌyana a ndaꞌan loo xaa.
\v 11 Xa mdyi ycuiꞌ ñi chaꞌ re, xiyaꞌ juin ñi ꞌin yu: Yu taꞌa tsuꞌhue na Lázaro nguꞌya sla yu, una cuaꞌ ñii tsa xitucuin ꞌin yu.
\v 12 Xacanꞌ mxcuen yu taꞌa ndaꞌan ñi: Ñi Xꞌnan hua, chaꞌ na ljaꞌ ti yu, quila juesa ꞌin yu.
\v 13 Jesús nchcuiꞌ ñi chaꞌ re siꞌyana ngujui yu Lázaro, una yu taꞌa ndaꞌan ñi ñan tiꞌ yu siꞌyana ljaꞌ ti yu.
\v 14 La xacanꞌ mtsaꞌ la ca Jesús ꞌin yu: Yu Lázaro cuaꞌ ngujui yu,
\v 15 loꞌ siꞌya um tsuꞌhue ntsuꞌhui tiqueen siꞌyana a ndlyun la cua, ñaꞌan ca siꞌyana tsa quiꞌan tiꞌ um ꞌñan, cuaꞌ ñii tsaa na seꞌen su yu.
\v 16 Xacanꞌ yu Toma, nu nchcuiꞌ neꞌ loꞌo lca Dídimo, juin yu loꞌo nchgaa la ñaꞌan taꞌa ndaꞌan yu: Tsaa na, loꞌ tsatlyu caja na loꞌo ñi la cua.
\s Jesús nꞌni ñi chaꞌ ndyiquiꞌo nten
\p
\v 17 Xa mdiyaa Jesús canꞌ ynan ñi chaꞌ siꞌyana cuaꞌ nguiaa jacua tsaan mtsiꞌ yu Lázaro.
\v 18 Quichen Betania, cuiꞌ ti nguinu na seꞌen lca quichen Jerusalén, tsa ntsuꞌhui lyoo snan ti kilometro.
\v 19 Quiꞌan ꞌa neꞌ judio mdiyaa neꞌ seꞌen ndiꞌin Marta loꞌo María, nu taa neꞌ chaꞌ tnu tiquee ꞌin siꞌyana ngujui yu taꞌa ngula.
\v 20 Xa ynan Marta chaꞌ siꞌyana cuaꞌ ljyaan Jesús, mdoꞌo ya ycua ꞌin ñi, una María canꞌ nguinu nde naꞌan.
\v 21 Loꞌ juin Marta ꞌin Jesús: Ñi Xꞌnan hua, chaꞌ cua na ꞌun ndiꞌin um re, loꞌ a caja taꞌa hua.
\v 22 Una jlyo tinꞌ siꞌyana nchgaa chaꞌ nu njñan um ꞌin Ndiose nxcuen ñi ꞌin um.
\v 23 Juin Jesús: Una taꞌa ngula ntsuꞌhui chaꞌ tyiquiꞌo.
\v 24 Mxcuen Marta canꞌ ꞌin ñi: Cuaꞌ jlyo tinꞌ siꞌyana ntsuꞌhui chaꞌ tyiquiꞌo, una la xa tsatii chaꞌ nu nchca loo chendyu re.
\v 25 Xacanꞌ juin Jesús ꞌin neꞌ: Nanꞌ lcan nu nꞌni chaꞌ ndyiquiꞌo nten, nanꞌ lcan chendyu ꞌin neꞌ, loꞌ nu ndiya quiꞌan tiꞌ ꞌñan, tyiquiꞌo canꞌ siyaꞌ cuaꞌ ngujui.
\v 26 Nchgaa nu loꞌo loꞌ ndiya quiꞌan tiꞌ ꞌñan, a caja ꞌa canꞌ. ¿Ta ndiya quiꞌan tiꞌ chaꞌ re?
\v 27 Loꞌ juin ꞌin ñi: Chaꞌ ñi, Ñi Xꞌnan hua, ndiya quiꞌan tinꞌ siꞌyana lca um ñi nu lca Cristo, cuiꞌ Sñeꞌ Ndiose nu mdiyaan loo chendyu re.
\s Ynan Jesús tucuaa ꞌin yu Lázaro
\p
\v 28 Xa mdyi ycuiꞌ Marta chaꞌ canꞌ, mxitucui nde naꞌan nguia ytsaꞌ cunan ti ꞌin María taꞌa ngula, loꞌ juin: Cua ndon ñi nu lca Bstro loꞌ nxiꞌya ñi ꞌin tsaa.
\v 29 Xa ynan chaꞌ canꞌ, cuiꞌ xaa mdoꞌo nguiaa seꞌen ndon ñi.
\v 30 Una Jesús a nchca sten ñi loo quichen, tiꞌ ndon ñi seꞌen ya ycua Marta ꞌin ñi.
\v 31 Neꞌ judio nu mdiyaa seꞌen ndiꞌin María nu taa chaꞌ tnu tiquee ꞌin, xa naꞌan neꞌ siꞌyana ndla ndsa mdoꞌo nguiaa, mducui nchaꞌan neꞌ ꞌin loꞌ nchcuiꞌ neꞌ: Cuiꞌ la tucuaa nguia ynan cuaꞌ ñii.
\v 32 Xa mdiyaa María seꞌen ndon Jesús, cuiꞌ xaa mdyiꞌya xtyinꞌ tloo ñi xa naꞌan ꞌin ñi, loꞌ juin ꞌin ñi: Ñi Xꞌnan hua, chaꞌ cua na ꞌun ndiꞌin um re, loꞌ a caja taꞌa hua.
\v 33 Xa naꞌan Jesús siꞌyana nguinan, a cunta nguinan neꞌ judio nu mdiya nchaꞌan ꞌin, loꞌo ñi nguꞌya tuꞌhua tiquee ñi siꞌyana tiꞌi ngaꞌan ꞌin ñi.
\v 34 Loꞌ juin ñi: ¿La ta mtsiꞌ um ꞌin yu? Juin neꞌ ꞌin ñi: Ñi Xꞌnan hua, caan um nde re loꞌ ñaꞌan um seꞌen mtsiꞌ.
\v 35 Loꞌ ynan Jesús.
\v 36 Nchcuiꞌ neꞌ judio: Ñaꞌaan, tsala tiꞌi ngaꞌan ꞌin ñi loꞌo yu.
\v 37 Ntsuꞌhui nu nchcuiꞌ: Chaꞌ yu re msla quiloo yu cuityinꞌ canꞌ, ¿ñi chaꞌ ta a mꞌni yu chaꞌ siꞌyana a caja yu Lázaro?
\s Xa mdyiquiꞌo yu Lázaro
\p
\v 38 Xiyaꞌ nguꞌya tuꞌhua tiquee Jesús, loꞌ mdiyaa ñi tucuaa canꞌ. Seꞌen mtsiꞌ neꞌ ꞌin yu lca na sca tuquee, loꞌ nchcun na loꞌo sca quee tlyu yaꞌ.
\v 39 Xacanꞌ juin Jesús: Lyo ntan um quee cua. Marta taꞌa ngula nu ngujui canꞌ juin ꞌin ñi: Ñi Xꞌnan hua, una cuaꞌ nxcua tyiꞌi siꞌyana cuaꞌ nguiaa jacua tsaan mtsiꞌ.
\v 40 Mxcuen Jesús ꞌin: ¿Ta siꞌi canꞌ chaꞌ nen loꞌo chaꞌ ndiya quiꞌan tiꞌ, loꞌ ñaꞌan chaꞌ cuiyaꞌ ꞌin Ndiose?
\v 41 Xacanꞌ ngulo ntan neꞌ quee nu nchcun tucuaa seꞌen su yu ngujui canꞌ. Mscuen Jesús tloo ñi nde cuaan, loꞌ juin ñi: Stina Ndiose, tyaan xuꞌhue ꞌin um siꞌyana ngune ꞌin um chaꞌ nu ycuinꞌ loꞌo um.
\v 42 Nanꞌ jlyo tinꞌ siꞌyana nchgaa xaa ne ꞌin um chaꞌ nu nchcuinꞌ, una siꞌya nten quiꞌan ndiꞌin re ycuinꞌ cuañaꞌan, ñaꞌan ca siꞌyana tsa quiꞌan tiꞌ neꞌ cuiꞌ um nguaꞌan tñan um ꞌñan.
\v 43 Xa mdyi ycuiꞌ ñi chaꞌ re ycuiꞌ cueen ñi: Lázaro, tyiꞌo nde lyiyaꞌ.
\v 44 Yu nu ngujui canꞌ mdyiꞌo yu ñaꞌan tiꞌ nguixen yu teꞌ loꞌo yaaꞌ yu loꞌo quiyaꞌ yu, a cunta loꞌo tloo yu nguxen xca teꞌ. Juin Jesús ꞌin neꞌ: Xtinꞌ um ꞌin yu loꞌ quiaa yu.
\s Mꞌni cuiyaꞌ neꞌ chaꞌ cujui neꞌ ꞌin Jesús
\p
\v 45 Xacanꞌ quiꞌan ꞌa neꞌ judio nu taꞌa mdiyaa María, xa naꞌan neꞌ chaꞌ nu mꞌni Jesús ya quiꞌan tiꞌ neꞌ ꞌin ñi.
\v 46 Una ntsuꞌhui nu ya ytsaꞌ ꞌin neꞌ fariseo ñaꞌan mꞌni Jesús.
\v 47 Xacanꞌ nchgaa nu ndlo ca tñan niꞌ lyaa, tsatlyu loꞌo neꞌ fariseo mxoꞌ tiꞌin taꞌa neꞌ siꞌyana cuꞌni cuiyaꞌ neꞌ chaꞌ, loꞌ nchcuiꞌ neꞌ: ¿Ñaꞌan ta cuꞌni na loꞌo yu cua, siꞌyana quiꞌan ꞌa chaꞌ tnu nguiꞌni yu?
\v 48 Chaꞌ a chcui ndijin na ñaꞌan nguiꞌni yu re, ñaꞌaan quichen re tsa quiꞌan tiꞌ ꞌin yu, chen nchcui caan neꞌ romano loꞌ cujlyo neꞌ seꞌen nꞌni tnu na ꞌin Ndiose tsatlyu loꞌo quichen re.
\v 49 Xacanꞌ mdoꞌo ycuiꞌ sca yu naan Caifás, loꞌ cuiꞌ yjan canꞌ lca yu nu ndlo ca tñan niꞌ lyaa, loꞌ juin yu: ꞌUn ñi sca chaꞌ loꞌ a jlyo tiꞌ um,
\v 50 ñi a ndyiꞌya um cunta siꞌyana tsuꞌhue lati caja scati yu quiꞌyu siꞌya quichen, loꞌ siꞌi nu jlyo ñaꞌaan nten re.
\v 51 A ycuiꞌ yu chaꞌ canꞌ loꞌo chaꞌ tiyaa nu ꞌin ti yu, cuiꞌ ca nu siꞌyana yjan canꞌ lca yu nu ndlo ca tñan niꞌ lyaa, canꞌ chaꞌ mxiycuiꞌ Ndiose ꞌin yu siꞌyana Jesús ntsuꞌhui chaꞌ caja ñi tñan loo ñaꞌaan quichen neꞌ.
\v 52 Siꞌi tsaloo ti siꞌyana caja ñi siꞌya quichen, cuiꞌ ca nu siꞌyana xoꞌ tiꞌin taꞌa nchgaa sñeꞌ Ndiose nu ndiꞌin sca chcui chendyu, loꞌ tsatlyu ca sca chaꞌ ti ꞌin jun.
\v 53 Tiꞌ xacanꞌ cuaꞌ yten tiquee neꞌ cujui neꞌ ꞌin Jesús.
\v 54 Canꞌ chaꞌ Jesús a mdaꞌan la ꞌa ñi lja neꞌ judio, cuiꞌ ca nu mdoꞌo tsoꞌ ñi loꞌ mdiyaa ñi sca quichen naan Efraín nu ndiꞌin cuiꞌ ti sca seꞌen ngutyi, canꞌ nguinu ñi loꞌo yu taꞌa ndaꞌan ñi.
\v 55 Cuaꞌ nchcui cuiiꞌ chaꞌ taꞌa Pascua nu nꞌni tnu neꞌ judio, loꞌ quiꞌan ꞌa nten mdoꞌo neꞌ scasca quichen, loꞌ mdiyaa neꞌ Jerusalén nu suhui neꞌ ꞌin neꞌ lja nu tiꞌ lyijyi tyisnan taꞌa Pascua.
\v 56 Nan neꞌ ꞌin Jesús, loꞌ scasca neꞌ ñichaꞌ taꞌa neꞌ seꞌen ndiyoꞌ tiꞌin neꞌ niꞌ lyaa canꞌ: ¿Ñaꞌan ta ljuin um, ta caan yu canꞌ taꞌa cuaꞌ ñii?
\v 57 Nchgaa yu nu ndlo ca tñan niꞌ lyaa loꞌo neꞌ fariseo, cuaꞌ mdiꞌin tyaa neꞌ sca chaꞌ siꞌyana chaꞌ ntsuꞌhui nu ñaꞌan ꞌin Jesús cuiꞌ xaa quitsaꞌ ꞌin neꞌ siꞌyana quinu ñi.
\c 12
\s Mslo tucua María tyiꞌa xityiꞌi quiyaꞌ Jesús 

\p
\v 1 Tiꞌ lyijyi cha xcua tsaan nu ntsuꞌhui chaꞌ ca taꞌa Pascua, yaa Jesús quichen Betania seꞌen ndiꞌin yu Lázaro, cuiꞌ yu nu ngujui canꞌ loꞌ mꞌni ñi chaꞌ mdyiquiꞌo.
\v 2 Canꞌ mꞌni chuꞌhue jun na nu cu siin ñi. Marta msuꞌhua na loo msa, loꞌ Lázaro lca sca nu taꞌa nducua ñi tuꞌhua msa canꞌ.
\v 3 Xacanꞌ María msñi sca teꞌen tyiꞌa xityiꞌi nu tsa tluꞌhue litro, nu chacuiꞌ nardo, loꞌ quiꞌan ꞌa ntsuꞌhui lyoo na, mslo tucua ꞌin na chonꞌ quiyaꞌ Jesús, loꞌ mxityi ꞌin na loꞌo quichanꞌ que, mtsaꞌan yuꞌhui tyiꞌi na ñaꞌan canꞌ.
\v 4 Sca yu taꞌa ndaꞌan ñi, cuiꞌ yu Juda Iscariote sñeꞌ Simón, yu nu ntsuꞌhui chaꞌ tyaa ꞌin ñi, juin ꞌin ñi:
\v 5 ¿Ñi chaꞌ ta a ncua quiyaꞌ tyiꞌa xityiꞌi re loꞌ caja tñi nu nꞌni neꞌ canan snan ciento tsaan, loꞌ quitsa na ꞌin nu tiꞌi ñaꞌan chendyu ꞌin?
\v 6 Ycuiꞌ yu chaꞌ re, una siꞌi siꞌyana ntsuꞌhui yuhue tiꞌ yu ꞌin nu tiꞌi, cuiꞌ ca nu siꞌyana lca yu sca nu cunan, loꞌ ntsuꞌhui yu cunta tñi ꞌin yu taꞌa ndaꞌan ñi, loꞌ nxñi suꞌhua yaaꞌ yu ꞌin na.
\v 7 Xacanꞌ juin Jesús ꞌin yu: A chcui ndijin ñaꞌan nu nguiꞌni neꞌ re, na mxuꞌhua seꞌen neꞌ ꞌin na siꞌyana cuiꞌ tñan cuꞌni na tsaan nu ntsuꞌhui chaꞌ quitsinꞌ.
\v 8 Nu tiꞌi ñaꞌan ꞌin, nchgaa xaa ndiꞌin canꞌ loꞌo um, una nanꞌ siꞌi nchgaa xaa ñaꞌan tloo um ꞌñan.
\s Mꞌni cuiyaꞌ neꞌ chaꞌ cujui neꞌ ꞌin yu Lázaro
\p
\v 9 Quiꞌan ꞌa neꞌ judio ynan neꞌ chaꞌ siꞌyana canꞌ ndiꞌin Jesús, cuiꞌ xaa mdiyaa neꞌ, una siꞌi tsaloo ti siꞌya Jesús, cuiꞌ ca nu siꞌyana nchca tiꞌ neꞌ ñaꞌan neꞌ ꞌin Lázaro, yu nu ngujui loꞌ mdyiquiꞌo.
\v 10 Una nchgaa yu nu ndlo ca tñan niꞌ lyaa ꞌin neꞌ judio, mꞌni cuiyaꞌ neꞌ chaꞌ siꞌyana loꞌo yu Lázaro ntsuꞌhui chaꞌ caja yu.
\v 11 Siꞌya yu quiꞌan ꞌa neꞌ judio cuaꞌ mdoꞌo tsoꞌ neꞌ loꞌ ya quiꞌan tiꞌ neꞌ ꞌin Jesús.
\s Xa yten Jesús quichen Jerusalén loꞌ mꞌni tnu neꞌ ꞌin ñi
\p
\v 12 Xca tsaan canꞌ, nten quiꞌan nu cuaꞌ mdiyaa siꞌya taꞌa canꞌ, xa ynan neꞌ chaꞌ siꞌyana cuaꞌ tiyaan Jesús quichen Jerusalén,
\v 13 mdoꞌo neꞌ ya ycua neꞌ ꞌin ñi, lyiꞌya neꞌ lcaꞌ yca quiñan, loꞌ nchcuiꞌ cueen neꞌ: —¡Culo laa um ꞌin hua! Tlyu chaꞌ tsuꞌhue ntsuꞌhui ꞌin ñi nu ljyaan loꞌo chaꞌ cuiyaꞌ ꞌin Ñi Xꞌnan na—, ñi nu lca Ree ꞌin neꞌ Israel.
\v 14 Loꞌ jui sca burru cuneꞌ ti mducua Jesús tsañaꞌan nchcuiꞌ quityi ꞌin Ndiose:
\v 15 —A cutsen um, ꞌun nu ndiꞌin quichen Jerusalén, nde cuaꞌ ljyaan ñi nu lca Ree ꞌin um, nducua ñi chonꞌ sca burru cuneꞌ ti—.
\v 16 Yu taꞌa ndaꞌan ñi, a nguꞌya yu cunta chaꞌ re, la cuaꞌ ycuen Jesús nde niꞌ cuaan, xacanꞌ nguia yuꞌhui tiꞌ yu chaꞌ nu mꞌni neꞌ loꞌo ñi siꞌyana nducua na loo quityi ꞌin Ndiose.
\v 17 Nten nu naꞌan tloo xa mꞌni ñi chaꞌ mdyiquiꞌo yu Lázaro tucuaa canꞌ, mdaa neꞌ suun chaꞌ nu yatoꞌo,
\v 18 canꞌ chaꞌ quiꞌan nten ya ycua ꞌin ñi, siꞌyana cuaꞌ ynan neꞌ chaꞌ ñaꞌan chaꞌ nu tnu mꞌni ñi.
\v 19 Una neꞌ fariseo mdyisnan ycuiꞌ neꞌ scasca neꞌ: Ñaꞌan um jan ñi, ñi sca chaꞌ loꞌ a tca cuꞌni na siꞌyana ñaꞌaan quichen neꞌ nducui nchaꞌan ꞌin yu.
\s Neꞌ griego mdaꞌan nan neꞌ ꞌin Jesús
\p
\v 20 Yatoꞌo tucua snan neꞌ griego nu ya yꞌni tnu taꞌa canꞌ,
\v 21 mdiyaa neꞌ seꞌen ndon yu Lpe, yu mdoꞌo quichen Betsaida seꞌen lyiꞌya loo Galilea, loꞌ mjñan neꞌ chaꞌ tsuꞌhue ꞌin yu: Nchca tiꞌ hua ñaꞌan hua ꞌin Jesús.
\v 22 Xacanꞌ ya ytsaꞌ yu Lpe canꞌ ꞌin yu Ndre, loꞌ chcuaa yu ycuiꞌ yu loꞌo Jesús.
\v 23 Mxcuen Jesús ꞌin yu: Cuaꞌ mdiyaa braa scuen cuaan chaꞌ ꞌin Yu Quiꞌyu nu Mdoꞌo nde niꞌ Cuaan.
\v 24 Nu chaꞌ ñi sꞌni cunen loꞌo um, sca mti trigo chaꞌ a tyu na lyuu, ticuiꞌ ti loo scati na, una chaꞌ tyu na loꞌ chcua na, quiꞌan la chca na.
\v 25 Nu nꞌni ꞌtnan chendyu ꞌin, quinanꞌ canꞌ tiyaa xaa, una nu a nꞌni ꞌtnan ꞌin, canꞌ nu quiꞌni caꞌan ꞌin loꞌo chendyu nu a tsatii ꞌa.
\v 26 Chaꞌ ntsuꞌhui nu nchca tiꞌ cuꞌni tñan ꞌñan, chcui nchaꞌan ꞌñan, loꞌ seꞌen nu nanꞌ tiꞌin, canꞌ tyiꞌin nguso ꞌñan. Tsalca nu cuꞌni tñan ꞌñan, loꞌo Stin chuꞌhui cunta ꞌin canꞌ.
\s Ycuiꞌ Jesús siꞌyana ntsuꞌhui chaꞌ caja ñi
\p
\v 27 Cuaꞌ ñii luꞌun ꞌa tiꞌ cusya ꞌñan, ¿loꞌ ñaꞌan ta cunen? ¿Ta na chcuinꞌ loꞌo Stin, a taa um chaꞌ cuiyaꞌ tijin chaꞌ re? ¿Ta siꞌi canꞌ chaꞌ mdiyaan loo chendyu re siꞌyana tijin nu tiꞌi?
\v 28 Stina Ndiose, cuꞌni um chaꞌ ca chcanꞌ loo chaꞌ cuiyaꞌ ꞌin um. Xacanꞌ ngune ycuiꞌ sca nu ycuiꞌ la niꞌ cuaan: Cuaꞌ ncua chcanꞌ loo chaꞌ cuiyaꞌ ꞌñan, loꞌ xiyaꞌ ntsuꞌhui chaꞌ ca chcanꞌ loo na.
\v 29 Nten quiꞌan canꞌ ngune ꞌin neꞌ xa jui nu ycuiꞌ, loꞌ nchcuiꞌ neꞌ siꞌyana tyiꞌyu ngune. Ntsuꞌhui xca nu nchcuiꞌ siꞌyana sca angujle ycuiꞌ lyiꞌo ꞌin ñi.
\v 30 Mxcuen Jesús ꞌin neꞌ: Siꞌi siꞌyan jui nu ycuiꞌ cua, cuiꞌ ca nu siꞌya um ca lca na.
\v 31 Cuaꞌ mdiyaa braa nu ntsuꞌhui chaꞌ ca cuiyaꞌ chaꞌ nu nchca loo chendyu re, loꞌ caja nu culo tsoꞌ ꞌin laxaꞌan nu ndlo tñan loo chendyu re.
\v 32 Xa ntsuꞌhui chaꞌ xiton neꞌ ꞌñan, tsatlyu xiꞌyan ꞌin nchgaa nten siꞌyana chcui nchaꞌan neꞌ ꞌñan.
\v 33 Loꞌo chaꞌ nu ycuiꞌ ñi re, ngulyo scua la ñi ñaꞌan ntsuꞌhui chaꞌ caja ñi.
\v 34 Mxcuen nten canꞌ ꞌin ñi: Huareꞌ cuaꞌ ngune ꞌin hua ñaꞌan nchcuiꞌ quityi ꞌin Ndiose siꞌyana ñi nu lca Cristo ntsuꞌhui chaꞌ tyiꞌin ñi tsala xaa. ¿Ñi chaꞌ ta nchcuiꞌ nuꞌhuin, siꞌyana Yu Quiꞌyu nu Mdoꞌo nde niꞌ Cuaan ntsuꞌhui chaꞌ cujui neꞌ ꞌin? ¿Ti nu ta lca Yu Quiꞌyu nu Mdoꞌo nde niꞌ Cuaan?
\v 35 Xacanꞌ juin Jesús ꞌin neꞌ: Tixiꞌi ti tiꞌ nduꞌhui xaa ꞌin um, canꞌ chaꞌ chcui nchaꞌan um ꞌin xaa canꞌ, ñaꞌan tuꞌ tsatoꞌo tsati ntyin quiꞌya tla yta seꞌen ndaꞌan um, siꞌyana nu ndaꞌan seꞌen tla yta, a jlyo tiꞌ canꞌ la nguiaa.
\v 36 Canꞌ chaꞌ lja nu tiꞌ nduꞌhui xaa ꞌin um tsa quiꞌan tiꞌ um ꞌin xaa canꞌ, loꞌ cuañaꞌan ca um sca sñeꞌ nu ndaꞌan loo xaa. Tsare chaꞌ nu ycuiꞌ Jesús, xacanꞌ mdoꞌo ñi nguiaa ñi loꞌ yuꞌhui cutsiꞌ ñi ꞌin neꞌ.
\s Chaꞌ nu tla cusya ꞌin neꞌ judio
\p
\v 37 Siyaꞌ lyee la mꞌni ñi chaꞌ nu tnu tloo nten canꞌ, una a ya quiꞌan tiꞌ neꞌ ꞌin ñi,
\v 38 ñaꞌan ca siꞌyana tsatoꞌo ñaꞌan chaꞌ nu mxiycuiꞌ Ndiose ꞌin yu Isaía xa juin yu: —Ñi Xꞌnan hua, ¿ti nu ya quiꞌan tiꞌ chaꞌ nu ycuiꞌ hua? ¿Ti nu ꞌin ngulyo scua la um chaꞌ cuiyaꞌ ꞌin um, ꞌun Ñi Xꞌnan hua—?
\v 39 Canꞌ chaꞌ a ncua tsa quiꞌan tiꞌ neꞌ ꞌin ñi, siꞌyana nde xca chaꞌ nu ycuiꞌ Isaía:
\v 40 —Yatoꞌo mducun neꞌ quiloo neꞌ siꞌyana a ca chcanꞌ ꞌin neꞌ, mꞌni tla neꞌ cusya ꞌin neꞌ siꞌyana a quiꞌya neꞌ chaꞌ tiyaa, loꞌ chaꞌ cua na xitucui neꞌ, nanꞌ cuꞌnin chcan ꞌin neꞌ—.
\v 41 Yu Isaía ycuiꞌ yu chaꞌ re xa naꞌan tloo yu chaꞌ cuiyaꞌ ꞌin ñi, loꞌ cuiꞌ chaꞌ ꞌin ñi lca nu mdaꞌan ycuiꞌ yu.
\v 42 Ñi cuañaꞌan quiꞌan nten nu ndon loo lati ꞌin neꞌ judio ya quiꞌan tiꞌ ꞌin ñi, una siꞌya neꞌ fariseo a nguloꞌo la neꞌ ꞌin neꞌ, siꞌyana nguitsen neꞌ caja nu culo ꞌin neꞌ seꞌen nu nꞌni tnu neꞌ ꞌin Ndiose.
\v 43 Lyee la nducua tloo neꞌ quinu tsuꞌhue tiquee nten loꞌo neꞌ, que ꞌin Ndiose.
\s Chaꞌ nu nchcuiꞌ Jesús cuꞌni na xñan bsya ꞌin nten
\p
\v 44 Ycuiꞌ cueen Jesús: Nu ndiya quiꞌan tiꞌ ꞌñan, siꞌi tsa ꞌñan tin ndiya quiꞌan tiꞌ canꞌ, cuiꞌ ca nu loꞌo ꞌin ñi nu nguaꞌan tñan ꞌñan.
\v 45 Nu cuaꞌ naꞌan ꞌñan, cuaꞌ naꞌan ꞌin ñi nu nguaꞌan tñan ꞌñan.
\v 46 Nanꞌ lcan xaa nu cuaꞌ mdiyaan loo chendyu re, siꞌyana nchgaa nu tsa quiꞌan tiꞌ ꞌñan, a quinu canꞌ seꞌen tla yta.
\v 47 Nu ne ꞌin chaꞌ nu nchcuinꞌ, loꞌ a nxuꞌhua seꞌen ꞌin na, siꞌin cuꞌni cuiyanꞌ chaꞌ ꞌin canꞌ, siꞌyana a ljyan yꞌnin xñan bsya ꞌin nten, cuiꞌ ca nu siꞌyana culon laan ꞌin neꞌ.
\v 48 Nu nxcuan tloo ꞌñan, loꞌ a nducuan xuꞌhue chaꞌ nu nchcuinꞌ, ntsuꞌhui xca nu cuꞌni cuiyaꞌ chaꞌ ꞌin, cuiꞌ chaꞌ nu cuaꞌ ycuinꞌ lca nu cuꞌni cuiyaꞌ chaꞌ ꞌin, xa tsatii chaꞌ nu nchca loo chendyu re.
\v 49 Siꞌyana a nchcuinꞌ loꞌo cunta ꞌñan, cuiꞌ ca nu Stina Ndiose, ñi nu nguaꞌan tñan ꞌñan, mdaa ñi chaꞌ nu chcuinꞌ, loꞌo chaꞌ nu culoꞌon.
\v 50 Jlyo tinꞌ siꞌyana chaꞌ nu ndlo ñi tñan ꞌin na lca na chendyu nu a tsatii ꞌa, canꞌ chaꞌ nchgaa chaꞌ nu nchcuinꞌ lca na chaꞌ nu ndlo Stina Ndiose tñan ꞌñan.
\c 13
\s Mjyiꞌan Jesús quiyaꞌ yu taꞌa mdaꞌan ñi 

\p
\v 1 Lja nu cuaꞌ tyisnan taꞌa pascua, Jesús cuaꞌ jlyo tiꞌ ñi siꞌyana cuaꞌ mdiyaa xaa nu ntsuꞌhui chaꞌ tyiꞌo ñi loo chendyu re loꞌ quiaa ñi seꞌen nducua Stina Ndiose. Jesús lyee mꞌni ñi ꞌtnan ꞌin nu ya quiꞌan tiꞌ ꞌin ñi lja mdiꞌin ñi loo chendyu re, loꞌ cuañaꞌan mꞌni ñi hasta mdyiꞌo ñi loo chendyu.
\v 2 Nducua ycu siin jun, loꞌ yu Juda Iscariote, sñeꞌ yu Simón, cuaꞌ mdiꞌin tyaa laxaꞌan chaꞌ niꞌ cusya ꞌin yu siꞌyana tyaa yu ꞌin Jesús,
\v 3 una Jesús cuaꞌ jlyo tiꞌ ñi siꞌyana tuyaaꞌ ñi mxnu Stina Ndiose nchgaa loo chaꞌ cuiyaꞌ, a cunta jlyo tiꞌ ñi siꞌyana seꞌen nducua Ndiose mdoꞌo ñi, loꞌ ticuiꞌ canꞌ ntsuꞌhui chaꞌ quiaa ñi.
\v 4 Mdyiton ñi seꞌen nducua ycu siin ñi, ngulyoo ñi teꞌ tucuin nu lcoꞌ ñi, msñi ñi sca teꞌ loꞌ mscanꞌ ñi ꞌin na siiꞌ ñi.
\v 5 Xacanꞌ msuꞌhua ñi tyiꞌa sca niꞌ siꞌyu, loꞌ mdyisnan mjyiꞌan ñi quiyaꞌ yu taꞌa ndaꞌan ñi, mxityi ñi ꞌin na loꞌo teꞌ nchcanꞌ siiꞌ ñi.
\v 6 Xa mdiyaa ñi seꞌen nducua yu Simón Tyo, juin yu ꞌin ñi: Ñi Xꞌnan hua, ¿ta ꞌun jyiꞌan um quiyanꞌ?
\v 7 Mxcuen Jesús ꞌin yu: Tsañaꞌan nguiꞌnin cuaꞌ ñii, a ndyiꞌya cunta, una nde loo la ca jlyo tiꞌ chaꞌ re.
\v 8 Yu Tyo canꞌ juin yu ꞌin ñi: Una a ntsuꞌhui chaꞌ jyiꞌan um quiyanꞌ nanꞌ. Mxcuen Jesús ꞌin yu: Chaꞌ na a jyiꞌan quiyaꞌ, siꞌi ꞌa sca chaꞌ ti ꞌin na.
\v 9 Juin yu Simón Tyo canꞌ: Ñi Xꞌnan hua, siꞌi tsa quiyanꞌ tin jyiꞌan um xacanꞌ, cuiꞌ ca nu loꞌo yaanꞌ loꞌo quen jyiꞌan um.
\v 10 Juin Jesús ꞌin yu: Sca nu cuaꞌ yta, a ꞌni ꞌa chaꞌ tiꞌ cuta xiyaꞌ siꞌyana ñaꞌaan cuaꞌ luhui, cuiꞌ lya tsa quiyaꞌ ti canꞌ quiten na. Loꞌ ꞌun cuaꞌ luhui um, una siꞌi nchgaa um.
\v 11 Cuaꞌ jlyo tiꞌ ñi ti ca nu ntsuꞌhui chaꞌ tyaa ꞌin ñi, canꞌ chaꞌ juin ñi: Siꞌi nchgaa um luhui um.
\v 12 Xa mdyi jyiꞌan ñi quiyaꞌ jun, ycoꞌ ñi teꞌ tucuin canꞌ ꞌin ñi loꞌ xiyaꞌ yten tucua ñi tuꞌhua msa canꞌ, loꞌ juin ñi: ¿Ta ndyiꞌya um cunta ñaꞌan chaꞌ nu mꞌnin loꞌo um?
\v 13 ꞌUn ndloꞌo naan um ꞌñan, Ñi Bstro, a cunta Ñi Xꞌnan hua, loꞌ chaꞌ ñi ñaꞌan nu nchcuiꞌ um siꞌyana canꞌ nu lcan.
\v 14 Chaꞌ nanꞌ lcan Xꞌnan um loꞌo Bstro ꞌin um, loꞌ mjyiꞌan quiyaꞌ um, cuiꞌ cuañaꞌan ntsuꞌhui chaꞌ jyiꞌan um quiyaꞌ scasca taꞌa um.
\v 15 Nde chaꞌ nu tyiꞌin tyaan loꞌo um, siꞌyana cuiꞌ ñaꞌan chaꞌ nu mꞌnin cuaꞌ ñii, cuañaꞌan ntsuꞌhui chaꞌ cuꞌni um.
\v 16 Nu chaꞌ ñi cunen loꞌo um, sca nguso a ndon loo la canꞌ que ꞌin xꞌnan, cuiꞌ cuañaꞌan loꞌo sca nu ndyiꞌan loꞌo suun, a ndon loo la canꞌ que ꞌin nu nguaꞌan tñan ꞌin.
\v 17 Chaꞌ ndyiꞌya um cunta chaꞌ re, tsuꞌhue ca xuꞌhue um chaꞌ tucua um tñan ꞌin na.
\v 18 Una a nchcuinꞌ chaꞌ nu ꞌin nchgaa um, siꞌyana cuaꞌ jlyo tinꞌ tiꞌ lyijyi nu cuaꞌ ngulohuin, una nde chaꞌ nu nguinu scua loo quityi ꞌin Ndiose, loꞌ nchcuiꞌ na: —Nu nchcu jaslya sca seꞌen ti loꞌon, yatoꞌo mchca taꞌa cusuun ꞌñan—.
\v 19 Tiꞌ cuaꞌ ñii quitsanꞌ ꞌin um lja nu tiꞌ lyijyi tsatoꞌo chaꞌ re, loꞌ xa nu tsatoꞌo na ca cuiyaꞌ tiꞌ um siꞌyana nanꞌ lcan ñaꞌan cuaꞌ nen loꞌo um.
\v 20 Nu chaꞌ ñi sꞌni cunen loꞌo um, nu cuan xuꞌhue ꞌin nu ntsuꞌhui chaꞌ caꞌan tñan, ꞌñan nanꞌ cuan xuꞌhue canꞌ, loꞌ nu cuan xuꞌhue ꞌñan, cuiꞌ cuañaꞌan cuan xuꞌhue canꞌ ꞌin nu nguaꞌan tñan ꞌñan.
\s Ycuiꞌ Jesús siꞌyana ntsuꞌhui chaꞌ tyaa yu Juda ꞌin ñi
\p
\v 21 Ñaꞌaan mdyi ycuiꞌ Jesús chaꞌ canꞌ, nguꞌya sca tuꞌhua tiquee ñi, xacanꞌ mtsaꞌ la ñi ꞌin jun: Nu chaꞌ ñi sꞌni cunen loꞌo um, sca um ntsuꞌhui chaꞌ tyaa um ꞌñan.
\v 22 Xacanꞌ scasca yu taꞌa ndaꞌan ñi mxinaꞌan tloo taꞌa yu, msuꞌhua yu chaꞌ tiquee yu chaꞌ ti ñaꞌan nu ꞌin chaꞌ nchcuiꞌ ñi.
\v 23 Sca yu taꞌa ndaꞌan ñi, cuiꞌ yu nu lyee ndyuꞌhui cuiyaꞌ tiꞌ ñi ꞌin, nducua yu cuiꞌ ti siiꞌ Jesús,
\v 24 loꞌ yu Simón Tyo canꞌ mꞌni yaaꞌ ꞌin yu siꞌyana cuñichaꞌ yu ꞌin Jesús chaꞌ ti ca ꞌin chaꞌ nchcuiꞌ ñi.
\v 25 Yu canꞌ cuiꞌ la ya tucua yu siiꞌ Jesús, loꞌ juin yu ꞌin ñi: Ñi Xꞌnan hua, ti ca ꞌin chaꞌ nchcuiꞌ um?
\v 26 Mxcuen Jesús: Yu nu taan jaslya nu cuchanꞌ re ꞌin, canꞌ nu lca yu. Xacanꞌ mchaꞌ ñi jaslya loꞌ mdaa ñi ꞌin na ꞌin yu Juda Iscariote, sñeꞌ yu Simón.
\v 27 Xa mdyi ycu yu ꞌin na, yten Laxaꞌan niꞌ cusya ꞌin yu. Xacanꞌ juin Jesús ꞌin yu: Cuꞌni lya chaꞌ nu ntsuꞌhui tiquee cuꞌni.
\v 28 Una ñi sca yu taꞌa nducua ñi a nguꞌya yu cunta ñi chaꞌ ycuiꞌ ñi loꞌo yu cuañaꞌan.
\v 29 Siꞌyana yu Juda ndaꞌan loꞌo yu cuijyin seꞌen ntsuꞌhui tñi, ntsuꞌhui nu msqueꞌ tiꞌ siꞌyana ngulo Jesús tñan ꞌin yu tsa siꞌi yu na nu cunajoꞌo ꞌin jun lja taꞌa canꞌ, uta taa yu sca lcuan ꞌin nu tiꞌi ñaꞌan chendyu ꞌin.
\v 30 Xa mdyi ycu yu jaslya canꞌ, cuiꞌ xaa mdoꞌo yu nguiaa yu, loꞌ cuaꞌ nguꞌya tsuꞌhue tla xacanꞌ.
\s Sca chaꞌ nu cui ti ngulo Jesús tñan ꞌin jun
\p
\v 31 Xa cuaꞌ nguiaa yu, xacanꞌ juin Jesús: Cuaꞌ mdiyaa braa scuen cuaan chaꞌ ꞌñan, Yu Quiꞌyu nu Mdoꞌo nde niꞌ Cuaan, cuiꞌ cuañaꞌan Ndiose scuen cuaan chaꞌ ꞌñan.
\v 32 Chaꞌ cuañaꞌan siꞌyan scuen cuaan chaꞌ ꞌin Ndiose, cuiꞌ cuañaꞌan scuen cuaan Ndiose chaꞌ ꞌñan, loꞌ cuaꞌ nchcui cuiiꞌ chaꞌ cuꞌni ñi chaꞌ re.
\v 33 Sñenꞌ, tiꞌ chinꞌ ꞌa xaa tiꞌ ndiꞌin loꞌo um. Ntsuꞌhui chaꞌ quia nan um ꞌñan, una cuiꞌ ñaꞌan cuaꞌ nen loꞌo neꞌ judio, chcuinꞌ loꞌo um cuaꞌ ñii: Seꞌen nu ntsuꞌhui chaꞌ tsaꞌan, ꞌun a tca tsaa um.
\v 34 Nde chaꞌ nu cui ti culon tñan ꞌin um, scasca um chuꞌhui chaꞌ tsuꞌhue ꞌin um. Tsañaꞌan ntsuꞌhui chaꞌ tsuꞌhue ꞌñan loꞌo um, cuañaꞌan chuꞌhui chaꞌ tsuꞌhue ꞌin um scasca um.
\v 35 Ndeñaꞌan ca cuiyaꞌ tiꞌ nten siꞌyana nguiꞌni chaꞌan um ꞌñan, siꞌyana ntsuꞌhui chaꞌ tsuꞌhue ꞌin um scasca um loꞌo taꞌa um.
\s Ycuiꞌ Jesús siꞌyana yu Tyo ntsuꞌhui chaꞌ xcuan tloo ꞌin ñi
\p
\v 36 Yu Simón Tyo juin yu ꞌin ñi: Ñi Xꞌnan hua, ¿la ta tsaa um? Mxcuen Jesús ꞌin yu: Seꞌen nu nanꞌ tsaꞌan, a tca chcui nchaꞌan ꞌñan, una nde loo la re ntsuꞌhui chaꞌ chcui nchaꞌan ꞌñan.
\v 37 Xacanꞌ juin yu Tyo: Ñi Xꞌnan hua, ¿ñi chaꞌ a tca chcui nchaꞌan ꞌin um cuaꞌ ñii? Cuaꞌ mꞌnin tiqueen cajan siꞌya um.
\v 38 Mxcuen Jesús ꞌin yu: ¿Ta cuaꞌ mꞌni tiquee caja siꞌyan? Nu chaꞌ ñi sꞌni cunen loꞌo, lja nu tiꞌ lyijyi xiꞌya latyee, tsatoꞌo snan yaꞌ chcuiꞌ siꞌyana a ndyuꞌhui lyoo ꞌñan.
\c 14
\s Jesús lca ñi tucueen
\p
\v 1 A suꞌhua um chaꞌ tiquee um lyee la, tsa quiꞌan tiꞌ um ꞌin Ndiose, loꞌ tsa quiꞌan tiꞌ um ꞌñan.
\v 2 La naꞌan ꞌin Stin, quiꞌan ꞌa seꞌen lja. Chaꞌ siꞌi cuañaꞌan lca na, nde cuaꞌ sꞌni mtsanꞌ ꞌin um. Una quiꞌan, loꞌ cuꞌnin chuꞌhuen seꞌen ntsuꞌhui chaꞌ tyiꞌin um.
\v 3 Quia yꞌni chuꞌhuen seꞌen ntsuꞌhui chaꞌ tyiꞌin um, una yaan xiyaꞌ, yan ꞌyan ꞌin um siꞌyana tsatlyu tyiꞌin na loꞌo um.
\v 4 Cuaꞌ jlyo tiꞌ um la quiꞌan, loꞌ jlyo tiꞌ um tucueen canꞌ.
\v 5 Yu Toma juin yu ꞌin ñi: Ñi Xꞌnan hua, a jlyo tiꞌ hua la tsaa um, ¿ñaꞌan ta ca jlyo tiꞌ hua tucueen canꞌ?
\v 6 Loꞌ juin Jesús ꞌin yu: Nanꞌ lcan tucueen, lcan chaꞌ nu ñi, loꞌ lcan chendyu. A tucui nu tca tiyaa seꞌen nducua Stina Ndiose, chaꞌ siꞌi siꞌyan.
\v 7 Chaꞌ ꞌun ndyuꞌhui lyoo um ꞌñan, loꞌo ꞌin Stin ndyuꞌhui lyoo um, loꞌ tiꞌ cuaꞌ ñii cuaꞌ ndyuꞌhui lyoo um ꞌin ñi, loꞌ naꞌan um ꞌin ñi.
\v 8 Yu Lpe juin yu ꞌin ñi: Ñi Xꞌnan hua, taa um yaꞌ ñaꞌan tloo hua ꞌin Stina Ndiose, loꞌ quinu tsuꞌhue tiquee hua.
\v 9 Mxcuen Jesús ꞌin yu: Lipe, tsala ñaꞌan cuaꞌ sꞌni ndiꞌin loꞌo um, ¿ta a nchca chuꞌhui lyoo ꞌñan? Nu cuaꞌ naꞌan tloo ꞌñan, cuaꞌ naꞌan canꞌ ꞌin Stina Ndiose. ¿Ñi chaꞌ ta nchcuiꞌ siꞌyana nchca tiꞌ ñaꞌan tloo ꞌin Stina Ndiose?
\v 10 ¿Ta a ndiya quiꞌan tiꞌ siꞌyana sca chaꞌ ti ꞌñan loꞌo Stina Ndiose, loꞌ cuañaꞌan Stina Ndiose loꞌon? Chaꞌ nu nchcuinꞌ loꞌo um a nchcuinꞌ ꞌin na loꞌo cunta ꞌñan, cuiꞌ ca nu Stina Ndiose, ñi nu ntsuꞌhui niꞌ cusya ꞌñan, canꞌ ñi nu nguiꞌni tñan re.
\v 11 Tsa quiꞌan tiꞌ um chaꞌ re: Sca chaꞌ ti ꞌñan loꞌo Stina Ndiose, loꞌ cuañaꞌan Stina Ndiose loꞌon. Chaꞌ a ndiya quiꞌan tiꞌ um, siyaꞌ cuaꞌ tsuꞌhue tñan nu nguiꞌnin tsa quiꞌan tiꞌ um.
\v 12 Nu chaꞌ ñi sꞌni cunen loꞌo um: Nu ndiya quiꞌan tiꞌ ꞌñan, cuiꞌ tñan nu nguiꞌnin cuꞌni canꞌ, hasta tlyu la tñan tca cuꞌni canꞌ siꞌyana quiꞌan seꞌen nducua Stina Ndiose.
\v 13 Nchgaa chaꞌ nu jñan um ꞌin Stina Ndiose loꞌo chaꞌ cuiyaꞌ ꞌñan, cuꞌnin ꞌin na, ñaꞌan ca siꞌyana scuen cuaan chaꞌ ꞌin Stina Ndiose siꞌya Sñeꞌ ñi.
\v 14 Chaꞌ ndeꞌen la chaꞌ jñan um loꞌo chaꞌ cuiyaꞌ ꞌñan, nanꞌ cuꞌnin ꞌin na.
\s Chaꞌ ꞌin Espíritu nu Luhui ꞌin Ndiose
\p
\v 15 Chaꞌ lyee lca tiquee um loꞌon, xuꞌhua seꞌen um chaꞌ nu chcuinꞌ.
\v 16 Nanꞌ jñan ꞌin Stina Ndiose, loꞌ taa ñi xca nu taa chaꞌ tnu tiquee ꞌin um nu tyiꞌin loꞌo um tsala xaa,
\v 17 cuiꞌ Espíritu nu ñi ꞌin Ndiose, una nten chendyu a tca cuan xuꞌhue ꞌin ñi siꞌyana a ñaꞌan tloo neꞌ ꞌin ñi, ñi a ndyuꞌhui lyoo neꞌ ꞌin ñi. Una ꞌun cuaꞌ ndyuꞌhui lyoo um ꞌin ñi siꞌyana cuaꞌ ndiꞌin ñi loꞌo um, loꞌ chuꞌhui ñi niꞌ cusya ꞌin um.
\v 18 A ntsuꞌhui chaꞌ xnun ꞌin um tsa ycuiꞌ ti um, siꞌyana tiꞌ yaan xiyaꞌ.
\v 19 Cuaꞌ nchcui cuiiꞌ chaꞌ a ñaꞌan tloo ꞌa nten chendyu ꞌñan, una ꞌun ntsuꞌhui chaꞌ ñaꞌan tloo um ꞌñan. Siꞌyana loꞌon nanꞌ, canꞌ chaꞌ loꞌo um tuꞌhui um chendyu.
\v 20 Xacanꞌ ca cuiyaꞌ tiꞌ um siꞌyana sca chaꞌ ti ꞌñan loꞌo Stina Ndiose, loꞌ cuañaꞌan sca chaꞌ ti ꞌin na loꞌo um.
\v 21 Nu ndon nscan chaꞌ nu nchcuinꞌ loꞌ nxuꞌhua seꞌen ꞌin na, canꞌ nu chaꞌ ñi ca lca tiquee loꞌon, loꞌ nu lyee lca tiquee loꞌon cuañaꞌan ca lca tiquee Stin loꞌo canꞌ, a cunta loꞌon nanꞌ lyee lca tiqueen loꞌo, loꞌ culoꞌon tloon ꞌin canꞌ.
\v 22 Yu Juda, (una siꞌi yu Iscariote) juin yu ꞌin ñi: Ñi Xꞌnan hua, ¿ñaꞌan ta culoꞌo tloo um ꞌin tsa huareꞌ ti, loꞌ siꞌi ꞌin nchgaa tucui?
\v 23 Mxcuen Jesús ꞌin yu: Nu lyee lca tiquee loꞌon, xuꞌhua seꞌen canꞌ chaꞌ nu nchcuinꞌ, loꞌ cuañaꞌan Stin ntsuꞌhui chaꞌ ca lca tiquee loꞌo canꞌ, loꞌ caan hua seꞌen ndiꞌin canꞌ loꞌ tsatlyu tyiꞌin hua loꞌo.
\v 24 Nu a lca tiquee loꞌon, a xuꞌhua seꞌen canꞌ chaꞌ nu nchcuinꞌ. Chaꞌ nu nen loꞌo um cuaꞌ ñii, siꞌi ychanꞌ lca na, cuiꞌ ca nu ychaꞌ Stina Ndiose, ñi nu nguaꞌan tñan ꞌñan.
\v 25 Nchgaa chaꞌ re nchcuinꞌ lja nu tiꞌ ndiꞌin loꞌo um.
\v 26 Una xa caan ñi nu taa chaꞌ tnu tiquee ꞌin um, cuiꞌ Espíritu nu Luhui ꞌin Ndiose, ñi nu caꞌan tñan Stina Ndiose loꞌo chaꞌ cuiyaꞌ ꞌñan, cuiꞌ ñi culoꞌo ñi ꞌin um nchgaa la ñaꞌan chaꞌ, xuꞌhua tiꞌ ñi ꞌin um nchgaa chaꞌ nu cuaꞌ ycuinꞌ.
\v 27 Loo chaꞌ tsuꞌhue xnun ꞌin um, nanꞌ cuꞌnin chaꞌ tyiꞌin tsuꞌhue um, una siꞌi ñaꞌan nꞌni nten chendyu. A suꞌhua um chaꞌ tiquee um lyee la, loꞌ ñi a cutsen um.
\v 28 Cuaꞌ ngune ꞌin um chaꞌ nu ycuinꞌ: Quiꞌan, una yaan xiyaꞌ. Chaꞌ lyee lca tiquee um loꞌon, a sꞌni tsuꞌhue ntsuꞌhui tiquee um xa nen siꞌyana quiꞌan seꞌen nducua Stina Ndiose, siꞌyana ndon loo la ñi que ꞌñan nanꞌ.
\v 29 Cuaꞌ msuꞌhuan tiyaan ꞌin um lja nu tiꞌ lyijyi tsatoꞌo chaꞌ re, ñaꞌan ca siꞌyana tsa quiꞌan tiꞌ um xa nu ca na.
\v 30 A ndyijyi ñaꞌan tiꞌ chcuinꞌ quiꞌan la chaꞌ loꞌo um, siꞌyana cuaꞌ ljyaan laxaꞌan nu ndlo tñan loo chendyu re, una a sca chaꞌ cuiyaꞌ ntsuꞌhui ꞌin canꞌ loꞌon nanꞌ.
\v 31 Una seꞌen nu ca cuiyaꞌ tiꞌ nten tsala ñaꞌan lca tiqueen loꞌo Stina Ndiose, canꞌ chaꞌ nchgaa chaꞌ nu ndlo ñi tñan nguiꞌnin ꞌin na. Tyiton um, loꞌ quiaa na.
\c 15
\s Jesús lca ñi suun ti uva nu loꞌo ca
\p
\v 1 Nanꞌ lcan suun ti uva nu loꞌo ca, loꞌ Stin lca nu nguiꞌni tñan ꞌin na.
\v 2 Nchgaa stanꞌ nu lyiꞌya loon nu a ndyiꞌyu mti ꞌin, nsiꞌyu ñi ꞌin na. Una nchgaa stanꞌ nu ndyiꞌyu mti loo, nsuhui ñi ꞌin na siꞌyana lyee la cuiꞌyu na.
\v 3 ꞌUn cuaꞌ nguinu luhui um siꞌya chaꞌ nu cuaꞌ ycuinꞌ loꞌo um.
\v 4 Xñi ton um ꞌin um loꞌo chaꞌ ꞌñan, loꞌ cuañaꞌan nanꞌ loꞌo um. Tsañaꞌan nguiaa chaꞌ ꞌin stanꞌ ti uva, a ndyiꞌyu na chaꞌ quitan na seꞌen nducua suun na, cuiꞌ cuañaꞌan ndiꞌin chaꞌ ꞌin um chaꞌ a nsñi ton um ꞌin um loꞌo chaꞌ ꞌñan.
\v 5 Nanꞌ lcan suun ti uva loꞌ ꞌun lca um stanꞌ na, nu nsñi ton ꞌin loꞌo chaꞌ ꞌñan, loꞌ cuañaꞌan nanꞌ loꞌo canꞌ, lyee ndyiꞌyu mti loo, una chaꞌ tyiꞌo tsoꞌ um siinꞌ a sca na tca cuꞌni um.
\v 6 Nu a nsñi ton ꞌin loꞌo chaꞌ ꞌñan, nguiaa chaꞌ ꞌin canꞌ tsañaꞌan nguiaa chaꞌ ꞌin stanꞌ yca nu nsiꞌyu neꞌ, nguityi tiꞌin na, ndiyoꞌ tiꞌin na siꞌyana squin na.
\v 7 Chaꞌ xñi ton um ꞌin um loꞌo chaꞌ ꞌñan, loꞌ quinu yuꞌhui chaꞌ nu nchcuinꞌ niꞌ cusya ꞌin um, tca jñan um ñaꞌan chaꞌ nu nchca tiꞌ um, loꞌ caja na ꞌin um.
\v 8 Loꞌo chaꞌ re scuen cuaan chaꞌ ꞌin Stin, xa culo xñan um ꞌin um loꞌ ca chcanꞌ loo siꞌyana nguiꞌni chaꞌan um ꞌñan.
\v 9 Tsañaꞌan tsuꞌhue lca tiquee Stina Ndiose loꞌon, cuiꞌ cuañaꞌan nanꞌ loꞌo um, tyon um loo chaꞌ tsuꞌhue ꞌñan.
\v 10 Chaꞌ xuꞌhua seꞌen um chaꞌ nu ndlon tñan, cuiꞌ cuañaꞌan ntsuꞌhui chaꞌ tyon um loo chaꞌ tsuꞌhue ꞌñan, tsañaꞌan nanꞌ nxuꞌhua seꞌen chaꞌ nu ndlo Stin tñan ꞌñan, loꞌ ndon loo chaꞌ tsuꞌhue ꞌin ñi.
\v 11 Nde chaꞌ nu nchcuinꞌ loꞌo um, siꞌyana tsatlyu ca tsuꞌhue chuꞌhui tiquee na, loꞌ cuañaꞌan nde lyee la ca tsuꞌhue chuꞌhui tiquee um.
\v 12 Nde chaꞌ nu ndlon tñan ꞌin um: Chuꞌhui chaꞌ tsuꞌhue ꞌin um scasca um, tsañaꞌan nu lca tiqueen loꞌo um.
\v 13 Siꞌyana a tucui nu tlyu la chaꞌ tsuꞌhue ntsuꞌhui ꞌin que ñaꞌan nu tyaa canꞌ ꞌin siꞌya taꞌa tsuꞌhue.
\v 14 ꞌUn lca um taꞌa tsuꞌhuen chaꞌ nguiꞌni um chaꞌ nu ndlon tñan.
\v 15 A nꞌnin cunta siꞌyana lca um sca nguso ti, siꞌyana sca nguso a jlyo tiꞌ yu ñi na nguiꞌni xꞌnan yu, cuiꞌ ca nu nchcuinꞌ loꞌo um siꞌyana lca um sca taꞌa tsuꞌhuen, siꞌyana cuaꞌ mtsanꞌ ꞌin um nchgaa chaꞌ nu cuaꞌ ycuiꞌ Stin loꞌon.
\v 16 Siꞌi um ngulohui um ꞌñan, cuiꞌ ca nu nanꞌ ngulohuin ꞌin um, ñaꞌan ca siꞌyana tsala xaa ca chcanꞌ loo chaꞌ tsuꞌhue ꞌñan loo chendyu ꞌin um, loꞌ nchgaa chaꞌ nu jñan um ꞌin Stina Ndiose loꞌo chaꞌ cuiyaꞌ ꞌñan, taa ñi ꞌin na.
\v 17 Nde chaꞌ nu ndlon tñan ꞌin um siꞌyana chuꞌhui chaꞌ tsuꞌhue ꞌin um scasca um.
\s Ntsuꞌhui chaꞌ xcuan tloo neꞌ ꞌin yu taꞌa mdaꞌan ñi
\p
\v 18 Chaꞌ nten chendyu nxcuan tloo neꞌ ꞌin um, ca cuiyaꞌ tiꞌ um siꞌyana culo nducua la ꞌñan mscuan tloo neꞌ.
\v 19 Chaꞌ cua na sca chaꞌ ti ꞌin um loꞌo nten chendyu, ca tsuꞌhue chuꞌhui tiquee neꞌ loꞌo um, una ꞌun a nguiaa um tsoꞌ ꞌin neꞌ siꞌyana cuaꞌ ngulohuin ꞌin um, canꞌ chaꞌ nxcuan tloo neꞌ ꞌin um.
\v 20 Quia yuꞌhui tiꞌ um chaꞌ nu ycuinꞌ loꞌo um, sca nguso a ndon loo la canꞌ que ꞌin xꞌnan. Chaꞌ jui nu mnaꞌan tiꞌi ꞌñan, cuiꞌ cuañaꞌan caja nu ñaꞌan tiꞌi neꞌ ꞌin um, loꞌ chaꞌ jui nu mducua tñan chaꞌ nu ycuinꞌ, cuiꞌ cuañaꞌan caja nu cuꞌni cunta chaꞌ nu chcuiꞌ um.
\v 21 Siꞌyan caja nu xcuan tloo ꞌin um, siꞌyana a ndyuꞌhui lyoo neꞌ ꞌin ñi nu nguaꞌan tñan ꞌñan.
\v 22 Chaꞌ cua na a yaan loo chendyu re, loꞌ ñi a ycuinꞌ chaꞌ re loꞌo neꞌ, a sca quiꞌya nducui neꞌ. Una cuaꞌ ñii a ndyijyi ñaꞌan nchcuiꞌ neꞌ ta a nducui neꞌ quiꞌya.
\v 23 Nu nxcuan tloo ꞌñan, loꞌo ꞌin Stin nxcuan tloo canꞌ.
\v 24 Chaꞌ cua na a mꞌnin scasca chaꞌ tnu nu a nchca tucui cuꞌni, a nducui neꞌ quiꞌya, una cuaꞌ ñii cuaꞌ naꞌan tloo neꞌ chaꞌ canꞌ, loꞌ tiꞌ nxcuan tloo neꞌ ꞌñan tsatlyu loꞌo Stin.
\v 25 Una nguiꞌni neꞌ chaꞌ re siꞌyana tsatoꞌo ñaꞌan chaꞌ nu cuaꞌ nguinu scua loo lee ꞌin neꞌ, loꞌ nchcuiꞌ na: —Mscuan tloo neꞌ ꞌñan siyaꞌ a nducuin quiꞌya—.
\v 26 Una xa caan ñi nu ntsuꞌhui chaꞌ taa chaꞌ tnu tiquee ꞌin um, canꞌ nu taa suun ñaꞌan ndiꞌin chaꞌ ꞌñan, loꞌ nanꞌ caꞌan tñan ꞌin ñi loꞌo cunta ꞌin Stina Ndiose, cuiꞌ Espíritu nu ñi nu tyiꞌo seꞌen nducua Ndiose.
\v 27 A cunta loꞌo um ntsuꞌhui chaꞌ taa um suun ñaꞌan ndiꞌin chaꞌ re, siꞌyana tsatlyu mdiꞌin na loꞌo um tiꞌ culoo.
\c 16
\p
\v 1 Nde chaꞌ nu nchcuinꞌ loꞌo um siꞌyana a cuꞌni naꞌan tiꞌ um loꞌo chaꞌ nu ndiya quiꞌan tiꞌ um.
\v 2 Ntsuꞌhui chaꞌ culo neꞌ ꞌin um seꞌen ndiyoꞌ tiꞌin neꞌ judio. A cunta ntsuꞌhui chaꞌ cujui neꞌ ꞌin um, loꞌ quiñan tiꞌ canꞌ siꞌyana tñan tsuꞌhue nguiꞌni tloo Ndiose.
\v 3 Cuꞌni neꞌ cuañaꞌan siꞌyana a ndyuꞌhui lyoo neꞌ ꞌin Stina Ndiose, loꞌ ñi a ndyuꞌhui lyoo neꞌ ꞌñan.
\v 4 Nchgaa chaꞌ re nchcuinꞌ loꞌo um siꞌyana quia yuꞌhui tiꞌ xa ntsuꞌhui chaꞌ ca na. A ycuinꞌ chaꞌ re tiꞌ culoo siꞌyana tiꞌ xꞌni ntsuꞌhui chaꞌ tyiꞌin loꞌo um.
\s Tñan nu nꞌni Espíritu nu Luhui ꞌin Ndiose
\p
\v 5 Una ntsuꞌhui chaꞌ quiꞌan seꞌen nducua ñi nu nguaꞌan tñan ꞌñan, una ñi sca um a ñichaꞌ um ꞌñan chaꞌ la tsaꞌan.
\v 6 Cuiꞌ ca nu nde quiꞌya xiꞌin ꞌin um siꞌyana mtsanꞌ ꞌin um nchgaa chaꞌ re.
\v 7 Una nchcuinꞌ loꞌo um chaꞌ nu ñi, tyiꞌo la cunta ꞌin um chaꞌ quiꞌan, siꞌyana ntsuꞌhui chaꞌ caꞌan tñan Ñi nu taa chaꞌ tnu tiquee ꞌin um. Una chaꞌ a quiꞌan, a caan ñi nu tyiꞌin loꞌo um.
\v 8 Loꞌ xa caan ñi, cuꞌni ñi chaꞌ ca chcanꞌ loo chaꞌ tiyaa ngunanꞌ ꞌin nten chendyu, siꞌyana ca cuiyaꞌ tiꞌ neꞌ ñi na lca quiꞌya, loꞌ ñi na lca chaꞌ tsuꞌhue, a cunta siꞌyana Ndiose cuꞌni ñi xñan bsya ꞌin nten.
\v 9 Ca cuiyaꞌ tiꞌ neꞌ ñi na lca quiꞌya, siꞌyana a xlyaa neꞌ tsa quiꞌan tiꞌ neꞌ ꞌñan.
\v 10 Ca cuiyaꞌ tiꞌ neꞌ ñi na lca chaꞌ tsuꞌhue, siꞌyana cuaꞌ quiꞌan seꞌen nducua Stina Ndiose, loꞌ a ñaꞌan ꞌa um ꞌñan.
\v 11 A cunta ca cuiyaꞌ tiꞌ neꞌ siꞌyana Ndiose ntsuꞌhui chaꞌ cuꞌni ñi xñan bsya ꞌin nten, siꞌyana cuaꞌ msuꞌhua ñi yuhueꞌ chonꞌ laxaꞌan nu ndlo tñan ꞌin neꞌ.
\v 12 Quiꞌan ꞌa chaꞌ tiꞌ ntsuꞌhui chaꞌ chcuinꞌ loꞌo um, una cuaꞌ ñii a ta loo um quine ꞌin um chaꞌ re.
\v 13 Una xa caan Espíritu nu ñi ꞌin Ndiose, cuiꞌ ñi culoꞌo ñi ꞌin um nchgaa la ñaꞌan chaꞌ nu ñi, siꞌyana a chcuiꞌ ñi loꞌo chaꞌ ꞌin ti ñi, cuiꞌ ca nu chcuiꞌ ñi nchgaa chaꞌ nu ne ꞌin ñi, loꞌ quitsaꞌ ñi ꞌin um chaꞌ nu tsatoꞌo.
\v 14 Cuiꞌ ñi scuen cuaan ñi chaꞌ ꞌñan siꞌyana ntsuꞌhui chaꞌ culyo scua la ñi chaꞌ ꞌñan loꞌo um.
\v 15 Nanꞌ sca chaꞌ ti ꞌñan loꞌo Stina Ndiose, canꞌ chaꞌ nen loꞌo um siꞌyana Espíritu ntsuꞌhui chaꞌ culyo scua la chaꞌ ꞌñan loꞌo um.
\s Mdaa Jesús chaꞌ tnu tiquee ꞌin taꞌa mdaꞌan ñi
\p
\v 16 Sca coꞌ xaa a ñaꞌan ꞌa um ꞌñan, una xca coꞌ xaa tiꞌ ñaꞌan tloo um ꞌñan, siꞌyana cuaꞌ quiꞌan seꞌen nducua Stina Ndiose.
\v 17 Xacanꞌ tucua snan yu taꞌa ndaꞌan ñi mñichaꞌ taꞌa yu loꞌ nchcuiꞌ yu: ¿Ñaꞌan ta ndyiꞌo chaꞌ nu nchcuiꞌ ñi re, siꞌyana sca coꞌ xaa a ñaꞌan ꞌa na ꞌin ñi, loꞌ xca coꞌ xaa tiꞌ ñaꞌan na ꞌin ñi, loꞌ quiaa ñi seꞌen nducua Stina Ndiose?
\v 18 Tiꞌ nchcuiꞌ la yu: ¿Ñaꞌan ta ndyiꞌo chaꞌ nu ycuiꞌ ñi chaꞌ ꞌin xca coꞌ xaa canꞌ? A ndyiꞌya na cunta chaꞌ nu nchcuiꞌ ñi.
\v 19 Una Jesús nguꞌya ñi cunta siꞌyana nchca tiꞌ yu cuñichaꞌ yu ꞌin ñi siꞌya chaꞌ canꞌ, loꞌ juin ñi ꞌin yu: ¿Ta na ñichaꞌ taꞌa um siꞌya chaꞌ nu ycuinꞌ re xa nen: Sca coꞌ xaa a ñaꞌan ꞌa um ꞌñan, loꞌ xca coꞌ xaa tiꞌ ñaꞌan um ꞌñan?
\v 20 Nu chaꞌ ñi sꞌni cunen loꞌo um, ntsuꞌhui chaꞌ quiꞌya tuꞌhua tiquee um loꞌ cunan um, loꞌ nten chendyu ca tsuꞌhue chuꞌhui tiquee neꞌ xacanꞌ. Siyaꞌ tiꞌi ngaꞌan ꞌin um, una tiyaa xaa chca tsuꞌhue lca tiquee um.
\v 21 Ñaꞌan nchca tiꞌ sca neꞌ cunaꞌan nu ndiyaan sñeꞌ chendyu, tyisnan caan tiꞌi ꞌin neꞌ siꞌyana cuaꞌ mdiyaa braa ꞌin neꞌ, una xa cuaꞌ mdijin yuꞌhui ꞌin neꞌ, a quia yuꞌhui ꞌa tiꞌ neꞌ tiꞌi nu mdijin neꞌ loo nu tsuꞌhue ntsuꞌhui tiquee neꞌ siꞌyana cuhuiꞌ quiꞌyu lca sñeꞌ neꞌ.
\v 22 Cuañaꞌan ndiꞌin chaꞌ ꞌin um cuaꞌ ñii, tiꞌi ngaꞌan ꞌin um, una ntsuꞌhui chaꞌ ñaꞌan taꞌa na loꞌo um xiyaꞌ, xacanꞌ chca tsuꞌhue lca tiquee um, loꞌ a tucui ꞌa nu tiꞌ cuꞌni lyiꞌun cusya ꞌin um.
\v 23 Xa tiyaa tsaan canꞌ a sca ꞌa chaꞌ tiꞌ cuñichaꞌ um ꞌñan. Nu chaꞌ ñi sꞌni cunen loꞌo um, nchgaa chaꞌ nu jñan um ꞌin Stina Ndiose loꞌo chaꞌ cuiyaꞌ ꞌñan, cuiꞌ ñi xcuen ñi chaꞌ canꞌ.
\v 24 Hasta cuaꞌ ñii loꞌ a nchca sca chaꞌ jñan um loꞌo chaꞌ cuiyaꞌ ꞌñan. Jñan um ꞌin na loꞌ caja na ꞌin um, ñaꞌan ca siꞌyana nde lyee la ca tsuꞌhue chuꞌhui tiquee um.
\s Mꞌni Jesús canan chaꞌ nu nchca loo chendyu re
\p
\v 25 Nanꞌ a ycuiꞌ lan chaꞌ re loꞌo um, una tiyaa xaa a ntsuꞌhui ꞌa chaꞌ tiꞌ chcuinꞌ loꞌo um cuañaꞌan, cuiꞌ ca nu siyaꞌ ti culyo scua lan chaꞌ ꞌin Stina Ndiose loꞌo um.
\v 26 Xacanꞌ ntsuꞌhui chaꞌ jñan um ꞌin ñi loꞌo chaꞌ cuiyaꞌ ꞌñan, ñi a cunen loꞌo um siꞌyana tiꞌ jñan ꞌin Stina Ndiose siꞌya chaꞌ ꞌin um,
\v 27 siꞌyana ycuiꞌ ca Stina Ndiose tsuꞌhue lca tiquee ñi loꞌo um, cuiꞌ siꞌyana lyee lca tiquee um loꞌon, loꞌ ya quiꞌan tiꞌ um siꞌyana mdoꞌon seꞌen nducua Ndiose.
\v 28 Mdoꞌon seꞌen nducua Stina Ndiose, mdiyaan loo chendyu re, loꞌ cuaꞌ ñii xnun chendyu re, loꞌ xiyaꞌ quiꞌan seꞌen nducua ñi.
\v 29 Juin yu taꞌa ndaꞌan ñi: La ñii ycuiꞌ la ca um, loꞌ a ycuiꞌ nchcun ꞌa um loꞌo hua.
\v 30 La ñii ndyiꞌya hua cunta siꞌyana jlyo tiꞌ um nchgaa loo chaꞌ, loꞌ a ꞌni chaꞌ tiꞌ caja nu quitsaꞌ ꞌin um ndeꞌen la chaꞌ, siꞌya chaꞌ re ndiya quiꞌan tiꞌ hua siꞌyana mdoꞌo um seꞌen nducua Ndiose.
\v 31 Mxcuen Jesús ꞌin yu: ¿Ta la cuaꞌ ñii ndiya quiꞌan tiꞌ um ꞌñan?
\v 32 Tiyaa xaa, loꞌ cuiꞌ cuaꞌ ñii mdiyaa braa nu xnu ton um ꞌñan xcan tin, cunda scaa um ntsuꞌhui chaꞌ quiaa um seꞌen ndiꞌin um. Una siꞌi xcan tin quinun ton siꞌyana Stina Ndiose ndiꞌin ñi loꞌon.
\v 33 Nde chaꞌ ycuinꞌ loꞌo um siꞌyana tsatlyu tyiꞌin tsuꞌhue na. Loo chendyu re ntsuꞌhui chaꞌ tyijyin um scasca loo chaꞌ, una cuꞌni tnu tiquee um siꞌyana nanꞌ cuaꞌ mꞌnin canan chaꞌ nu nchca loo chendyu re.
\c 17
\s Mjñan Jesús ꞌin Ndiose siꞌya chaꞌ ꞌin taꞌa mdaꞌan ñi 

\p
\v 1 Xa mdyi ycuiꞌ Jesús chaꞌ canꞌ mscuen ñi tloo ñi nde cuaan, loꞌ juin ñi: Ndiose, ꞌun lca um Stin, cuaꞌ mdiyaa braa scuen cuaan um chaꞌ ꞌin Sñeꞌ um, ñaꞌan ca siꞌyana loꞌo Sñeꞌ um scuen cuaan ꞌin um.
\v 2 Siꞌyana cuaꞌ mdaa um chaꞌ cuiyaꞌ ꞌñan culon tñan ꞌin nchgaa nten, siꞌyana taan chendyu nu a tsatii ꞌa ꞌin tsalca nu cuaꞌ mdyaa um cunta ꞌñan.
\v 3 Nde chendyu nu a tsatii ꞌa: Siꞌyana chuꞌhui lyoo neꞌ ꞌin um, ꞌun ñi nu lca ycuiꞌ ca Ndiose, loꞌ chuꞌhui lyoo neꞌ ꞌin Jesucristo, ñi nu nguaꞌan tñan um.
\v 4 Nanꞌ mꞌnin tnun ꞌin um loo chendyu re, loꞌ cuaꞌ mꞌnin tyiin tñan nu mdaa um ꞌñan.
\v 5 ꞌUn ñi nu lca Stin, cuꞌni um chaꞌ scuen cuaan chaꞌ ꞌñan la seꞌen nducua um, tsañaꞌan nguiaa chaꞌ ꞌñan tiꞌ culoo xa tiꞌ lyijyi tsaaꞌ chendyu re.
\v 6 Cuaꞌ ngulyo scua lan chaꞌ ꞌin um loꞌo tsalca nu mdyaa um cunta ꞌñan, cuiꞌ nu culo nducua la ndiꞌin cunta ꞌin um, loꞌ cuaꞌ ñii mdyaa um cunta ꞌin canꞌ ꞌñan, loꞌ mxuꞌhua seꞌen jun ychaꞌ um.
\v 7 Ncua cuiyaꞌ tiꞌ jun siꞌyana nchgaa chaꞌ nu mdaa um ꞌñan mdoꞌo na seꞌen nducua um,
\v 8 siꞌyana cuaꞌ ycuinꞌ loꞌo jun nchgaa chaꞌ nu mdaa um ꞌñan, loꞌ ncuan xuꞌhue jun ꞌin na, jlyo tsuꞌhue tiꞌ jun siꞌyana mdoꞌon seꞌen nducua um, loꞌ ya quiꞌan tiꞌ jun siꞌyana cuiꞌ um nguaꞌan tñan um ꞌñan.
\v 9 Njñan ꞌin um siꞌya chaꞌ ꞌin jun, loꞌ siꞌi siꞌya ñaꞌan tucui ti, cuiꞌ ca nu siꞌya chaꞌ ꞌin jun nu cuaꞌ mdyaa um cunta ꞌñan, siꞌyana cunta ꞌin um ndiꞌin jun.
\v 10 Nchgaa nu ntsuꞌhui tuyaanꞌ, ticuiꞌ tuyaaꞌ um ntsuꞌhui canꞌ, loꞌ nchgaa nu ntsuꞌhui tuyaaꞌ um, ticuiꞌ cuañaꞌan ntsuꞌhui canꞌ tuyaanꞌ, loꞌ nchca chcanꞌ loo chaꞌ cuiyaꞌ ꞌñan loo chendyu ꞌin jun.
\v 11 Tixiꞌi ti ndiꞌin loo chendyu re, una tiꞌ quinu la jun, loꞌ nanꞌ quiꞌan seꞌen nducua um. Ndiose, ꞌun ñi nu lca Stin, ñi nu luhui lati, loꞌo chaꞌ cuiyaꞌ ꞌin um xñi um cunta ꞌin nchgaa nu cuaꞌ mdaa um ntsuꞌhui tuyaanꞌ, siꞌyana ca sca chaꞌ ti ꞌin jun tsañaꞌan sca chaꞌ ti ꞌin nareꞌ.
\v 12 Lja mdiꞌin loꞌo jun, tsuꞌhue ꞌa yuꞌhuin cunta ꞌin jun loꞌo chaꞌ cuiyaꞌ ꞌin um, jun nu cuaꞌ mdaa um ntsuꞌhui yaanꞌ, msñin cunta ꞌin jun, loꞌ ñi sca jun loꞌ a ngunanꞌ jun, cuiꞌ ca sca yu nu ntsuꞌhui ca chaꞌ quinanꞌ, siꞌyana tsatoꞌo ñaꞌan chaꞌ nu cuaꞌ nguinu scua loo quityi ꞌin um.
\v 13 Una cuaꞌ ñii quiꞌan seꞌen nducua um, loꞌ chcuinꞌ chaꞌ re lja nu tiꞌ ndiꞌin loo chendyu re, siꞌyana lyee la ca tsuꞌhue chuꞌhui tiquee jun loꞌon.
\v 14 Cuaꞌ ycuinꞌ loꞌo jun nchgaa chaꞌ nu mdaa um ꞌñan, una nten chendyu mscuan tloo ꞌin jun siꞌyana a nchcua taꞌa chaꞌ ꞌin jun loꞌo chaꞌ tiyaa ngunanꞌ ꞌin neꞌ, tsañaꞌan nu a nchcua taꞌa chaꞌ ꞌñan loꞌo neꞌ.
\v 15 A njñan ꞌin um siꞌyana culyoo um ꞌin jun loo chendyu re, cuiꞌ ca nu xñi um cunta siꞌyana a sten chaꞌ ngunanꞌ tiquee jun.
\v 16 A nchcua taꞌa chaꞌ ꞌin jun loꞌo chaꞌ tiyaa ngunanꞌ nu nchca loo chendyu re, tsañaꞌan nu a nchcua taꞌa chaꞌ ꞌñan loꞌo neꞌ.
\v 17 Cuꞌni um chaꞌ siꞌyana quinu luhui cusya ꞌin jun loꞌo chaꞌ nu ñi, chaꞌ nu nchcuiꞌ um lca na chaꞌ nu ñi.
\v 18 Tsañaꞌan nguaꞌan tñan um ꞌñan loo chendyu re, cuañaꞌan nguaꞌan tñan ꞌin jun cuꞌni jun tñan ꞌin um.
\v 19 Siꞌya jun, ndyaan ꞌñan ꞌin um, siꞌyana loꞌo jun quinu luhui cusya ꞌin jun siꞌya chaꞌ nu ñi ꞌin um.
\v 20 Una siꞌi tsaloo ti chaꞌ ꞌin jun njñan ꞌin um, cuiꞌ ca nu siꞌya nchgaa nu ntsuꞌhui chaꞌ tsa quiꞌan tiꞌ ꞌñan xa quine ꞌin chaꞌ nu chcuiꞌ jun,
\v 21 siꞌyana tsatlyu ca sca chaꞌ ti ꞌin nchgaa jun, tsañaꞌan sca chaꞌ ti ꞌin na, ꞌun nu lca Stin, cuiꞌ cuañaꞌan tsatlyu ca sca chaꞌ ti ꞌin jun loꞌo na. Xacanꞌ ca cuiyaꞌ tiꞌ nten siꞌyana ꞌun nguaꞌan tñan um ꞌñan.
\v 22 Tsañaꞌan chaꞌ cuiyaꞌ mdaa um ꞌñan, cuañaꞌan chaꞌ cuiyaꞌ mdaan ꞌin jun, siꞌyana ca sca chaꞌ ti ꞌin jun tsañaꞌan sca chaꞌ ti ꞌin nareꞌ.
\v 23 Nanꞌ sca chaꞌ ti ꞌñan loꞌo jun tsañaꞌan sca chaꞌ ti ꞌñan loꞌo um, ñaꞌan ca siꞌyana ca sca chaꞌ ti ꞌin jun nu chaꞌ ñi ca, xacanꞌ ca cuiyaꞌ tiꞌ nten siꞌyana ꞌun nguaꞌan tñan um ꞌñan, siꞌyana lyee lca tiquee um loꞌon, loꞌ cuañaꞌan lca tiquee um loꞌo jun.
\v 24 ꞌUn ñi nu lca Stin, nchca tinꞌ siꞌyana tsalca jun nu cuaꞌ mxnu um tuyaanꞌ, sca seꞌen ti tyiꞌin loꞌo jun, siꞌyana ñaꞌan jun chaꞌ cuiyaꞌ nu mdaa um ꞌñan, tsañaꞌan ncua lca tiquee um loꞌon xa tiꞌ lyijyi tsaaꞌ chendyu.
\v 25 ꞌUn ñi nu lca Stin, nu nguiꞌni tñan tsuꞌhue, a nchca chuꞌhui lyoo nten chendyu ꞌin um, una nanꞌ cuaꞌ ndyuꞌhui lyoon ꞌin um, loꞌ jlyo tiꞌ jun re siꞌyana ꞌun nguaꞌan tñan um ꞌñan.
\v 26 Cuaꞌ ngulyo scua lan chaꞌ ꞌin um loꞌo jun, loꞌ tiꞌ tsa quiñan cuꞌnin chaꞌ re, siꞌyana tsañaꞌan lyee lca tiquee um loꞌon, cuañaꞌan quii tiꞌ jun, loꞌ tsatlyu ca sca chaꞌ ti ꞌñan loꞌo jun.
\c 18
\s Xa nguinu Jesús 

\p
\v 1 Xa mdyi ycuiꞌ Jesús chaꞌ re, mdoꞌo ñi nguiaa ñi loꞌo yu taꞌa ndaꞌan ñi xca tsoꞌ tuti nu naan Cedrón, canꞌ yten yuꞌhui jun sca seꞌen nducua yca olivo.
\v 2 Yu Juda, yu nu ntsuꞌhui chaꞌ tyaa ꞌin ñi, ndyuꞌhui lyoo yu seꞌen canꞌ, siꞌyana tyun yaꞌ nguioꞌ tiꞌin Jesús loꞌo yu taꞌa ndaꞌan ñi canꞌ.
\v 3 Mdiya loꞌo yu Juda tsa ta yu sindatu, loꞌo xca ta yu silyiya cunta ꞌin neꞌ fariseo loꞌo yu nu ndlo ca tñan niꞌ lyaa. Lyiꞌya neꞌ quiiꞌ, a cunta loꞌo quiiꞌ ndiquin, loꞌo spada.
\v 4 Una Jesús cuaꞌ jlyo tiꞌ ñi tsala chaꞌ nu ntsuꞌhui chaꞌ tyijyin ñi, canꞌ chaꞌ nde ya ycua ñi ꞌin neꞌ, loꞌ juin ñi: ¿Tucui ca ꞌin ndaꞌan nan um?
\v 5 Loꞌ mxcuen neꞌ ꞌin ñi: ꞌIn Jesús Nazaret. Juin ñi ꞌin neꞌ: Nanꞌ lcan. Loꞌo yu Juda taꞌa ndaꞌan neꞌ canꞌ, yu nu ndyaa ꞌin ñi.
\v 6 Xa juin Jesús: Nanꞌ lcan, cuiꞌ xaa mdaꞌan chonꞌ neꞌ loꞌ mdlyu tiꞌin neꞌ.
\v 7 Xiyaꞌ mñichaꞌ ñi ꞌin neꞌ: ¿Tucui ca ꞌin ndaꞌan nan um? Loꞌ juin neꞌ: Cuiꞌ ꞌin Jesús Nazaret.
\v 8 Mxcuen Jesús ꞌin neꞌ: Cuaꞌ nen loꞌo um siꞌyana nanꞌ lcan. Chaꞌ na ndaꞌan nan um ꞌñan, tyaa um yaꞌ quiaa yu taꞌa ndaꞌan re.
\v 9 Juin ñi cuañaꞌan siꞌyana tsatoꞌo ñaꞌan chaꞌ nu cuaꞌ ycuiꞌ ñi xa juin ñi: Ñi sca nu mdaa um ꞌñan, loꞌ a ngunanꞌ.
\v 10 Xacanꞌ yu Simón Tyo ngulyoo yu spada nu ndaꞌan loꞌo yu, loꞌ yjui yuhuaꞌ yu sca nguso ꞌin yu nu ndlo ca tñan niꞌ lyaa, msiꞌyu yu nscan tsoꞌ cueen ꞌin yu, loꞌ naan yu Malco.
\v 11 Xacanꞌ juin Jesús ꞌin yu Tyo: Xuꞌhua seꞌen spada ꞌin niꞌ tyi na. Chaꞌ Stina Ndiose cuaꞌ juin ñi tijin nu tiꞌi re, ¿ñi chaꞌ a tijin ꞌin na?
\s Ya loꞌo neꞌ ꞌin Jesús tloo Anás
\p
\v 12 Xacanꞌ yu sindatu loꞌo xꞌnan yu, tsatlyu loꞌo xca ta silyiya ꞌin neꞌ judio, msñi neꞌ ꞌin Jesús loꞌ mscanꞌ neꞌ ꞌin ñi.
\v 13 Ya loꞌo neꞌ ꞌin ñi tloo Anás culo nducua la, siꞌyana canꞌ nu lca sti lyaa Caifás, yu nu ndlo ca tñan niꞌ lyaa yjan canꞌ.
\v 14 Yu Caifás canꞌ lca yu nu msuꞌhua tiquee neꞌ judio, xa juin yu siꞌyana tsuꞌhue lati chaꞌ caja scati yu quiꞌyu tñan loo ñaꞌaan quichen neꞌ.
\s Nguinu ton yu Tyo tunaꞌan lyiyaꞌ seꞌen ndiꞌin Anás
\p
\v 15 Yu Simón Tyo canꞌ mducui nchaꞌan yu ꞌin Jesús, a cunta loꞌo xca yu taꞌa ndaꞌan ñi taꞌa nguiaa yu, yu re ndyuꞌhui lyoo tsuꞌhue yu ꞌin yu nu ndlo ca tñan niꞌ lyaa, tsatlyu yten yu loꞌo Jesús tunaꞌan lyiyaꞌ seꞌen ndiꞌin nu ndlo tñan canꞌ.
\v 16 Una yu Tyo nguinu ton yu nde tunaꞌan lyiyaꞌ. Xacanꞌ yu taꞌa ndaꞌan ñi, cuiꞌ yu nu cuaꞌ ndyuꞌhui lyoo ꞌin yu nu ndlo ca tñan canꞌ, nguia ycuiꞌ yu loꞌo neꞌ cunaꞌan nu ntsuꞌhui cuan tunaꞌan canꞌ, loꞌ mꞌni yu chaꞌ yten yu Tyo seꞌen canꞌ.
\v 17 Xacanꞌ neꞌ cunaꞌan nu ntsuꞌhui cunta tunaꞌan canꞌ juin neꞌ ꞌin yu Tyo: ¿Ta siꞌi loꞌo nuꞌhuin lca taꞌa ndaꞌan yu quiꞌyu cua? Mxcuen yu Tyo canꞌ: A loꞌon.
\v 18 Tucua snan yu nguso loꞌo yu silyiya canꞌ mxiquiꞌo yu quiiꞌ siꞌyana tlyaꞌ, canꞌ ndon yu nguitson tiꞌ yu, a cunta loꞌo yu Tyo ndon canꞌ.
\s Xa mꞌni cuiyaꞌ Anás chaꞌ ꞌin Jesús
\p
\v 19 Yu nu ndlo ca tñan niꞌ lyaa, mñichaꞌ yu ꞌin Jesús ñaꞌan nguiaa chaꞌ ꞌin ñi loꞌo chaꞌ nu ndloꞌo ñi, a cunta chaꞌ ꞌin yu taꞌa ndaꞌan ñi.
\v 20 Mxcuen Jesús ꞌin yu: Tloo nten quiꞌan mdaꞌan ycuinꞌ, loꞌ nguloꞌon ꞌin neꞌ seꞌen ndiyoꞌ tiꞌin neꞌ, uta niꞌ lyaa ꞌin neꞌ judio, loꞌ ñi sca chaꞌ a msuꞌhua cutsinꞌ ꞌin neꞌ.
\v 21 ¿Ñi chaꞌ ꞌñan ñichaꞌ um? Cuñichaꞌ um ꞌin nu ngune ꞌin chaꞌ nu ycuinꞌ, canꞌ nu jlyo tiꞌ nchgaa chaꞌ re.
\v 22 Ñaꞌaan mdyi ycuiꞌ ñi chaꞌ re, sca yu silyiya nu ndon cuiꞌ ti siiꞌ ñi mjyiꞌin yaaꞌ tloo ñi, loꞌ juin yu ꞌin ñi: ¿Ta cuañaꞌan ntsuꞌhui chaꞌ xcuen ꞌin ñi nu ndlo ca tñan niꞌ lyaa ꞌin na?
\v 23 Mxcuen Jesús ꞌin yu: Chaꞌ siꞌi ñaꞌan ycuinꞌ, quitsaꞌ um ꞌñan chaꞌ ñi chaꞌ lca na, loꞌ chaꞌ ycuinꞌ chaꞌ nu ñi, ¿ñi chaꞌ ta mjyiꞌin um ꞌñan?
\v 24 Xacanꞌ ñaꞌan nchcanꞌ Jesús nguaꞌan tñan Anás ꞌin ñi la seꞌen ndiꞌin Caifás, yu nu ndlo ca tñan niꞌ lyaa.
\s Mscuan tloo yu Tyo ꞌin Jesús
\p
\v 25 Lja nu tiꞌ ndon yu Tyo nguitson tiꞌ yu, mñichaꞌ neꞌ ꞌin yu: ¿Ta siꞌi loꞌo nuꞌhuin lca taꞌa ndaꞌan yu cua? A msti tiꞌ yu quitsaꞌ yu ꞌin neꞌ, loꞌ juin yu: A loꞌon.
\v 26 Canꞌ nguilyu sca yu nguso ꞌin yu nu ndlo ca tñan, cuiꞌ yu nu tiꞌ nchca taꞌa yu nu msiꞌyu yu Tyo canꞌ nscan, loꞌ juin yu ꞌin: ¿Ta siꞌi cuiꞌ naꞌan ꞌin lja yca olivo loꞌo yu cua?
\v 27 Xiyaꞌ mxcuen yu Tyo loꞌ juin yu siꞌyana a loꞌo yu. Cuiꞌ xaa canꞌ msiꞌya sca latyee.
\s Mꞌni cuiyaꞌ yu Pilato chaꞌ ꞌin Jesús
\p
\v 28 Xacanꞌ mdoꞌo neꞌ seꞌen ndiꞌin Caifás, loꞌ ya loꞌo neꞌ ꞌin Jesús seꞌen nducua naꞌan tñan ꞌin gubierno, cuaꞌ quiꞌya ti xaa, una neꞌ judio a mslyaa neꞌ sten neꞌ ñaꞌan canꞌ siꞌyana a ncua tiꞌ neꞌ tyiꞌo ngunanꞌ chaꞌ ꞌin neꞌ loꞌo chaꞌ nu cuaꞌ ntsuꞌhui ꞌin neꞌ, siꞌyana ntsuꞌhui chaꞌ cu siin neꞌ taꞌa pascua canꞌ.
\v 29 Canꞌ chaꞌ mdoꞌo yu Pilato mñichaꞌ yu ꞌin neꞌ: ¿Ñi quiꞌya ta ljyan suꞌhua um ꞌin yu re?
\v 30 Mxcuen neꞌ ꞌin yu: Chaꞌ cua na a lca yu sca yu nducunꞌ, ñi a can loꞌo hua ꞌin yu tloo um.
\v 31 Xacanꞌ juin yu Pilato: Quia loꞌo um ꞌin yu, cuiꞌ um cuꞌni cuiyaꞌ um chaꞌ ꞌin yu tsañaꞌan nu nchcuiꞌ lee ꞌin um. Una neꞌ judio canꞌ mxcuen neꞌ ꞌin yu: Huareꞌ a ntsuꞌhui chaꞌ cuiyaꞌ ꞌin hua cujui hua sca nten.
\v 32 Ycuiꞌ neꞌ cuañaꞌan siꞌyana tsatoꞌo tsañaꞌan nu juin Jesús ñaꞌan ntsuꞌhui chaꞌ caja ñi.
\v 33 Xacanꞌ yten yu Pilato ñaꞌan tñan xiyaꞌ, loꞌ mxiꞌya yu ꞌin Jesús loꞌ mñichaꞌ yu ꞌin ñi: ¿Ta cuiꞌ lca Ree ꞌin neꞌ judio?
\v 34 Mxcuen Jesús ꞌin yu: ¿Ta chaꞌ ꞌin ti ꞌin um nchcuiꞌ um chaꞌ re, ta na xca tucui mtsaꞌ ꞌin um ñaꞌan ndiꞌin chaꞌ ꞌñan?
\v 35 Loꞌ juin yu Pilato: ¿Ta ñan tiꞌ lcan neꞌ judio? Nten taꞌa quichen tyi, loꞌo neꞌ nu ndlo tñan niꞌ lyaa, canꞌ nu mdyaa cunta ꞌin tuyaanꞌ. ¿Ñi quiꞌya ta mꞌni?
\v 36 Mxcuen Jesús ꞌin yu: Siꞌi loo chendyu re mdoꞌo chaꞌ cuiyaꞌ ꞌñan. Chaꞌ cua na ndlon tñan loo chendyu re, nchgaa nu taꞌa ndaꞌan tyiꞌo chaꞌ ꞌñan loꞌ a quinun tuyaaꞌ neꞌ judio. Una chaꞌ cuiyaꞌ nu ndaꞌan loꞌon, siꞌi re mdoꞌo na.
\v 37 Xacanꞌ juin yu Pilato: ¿Ta cuiꞌ lca ree xacanꞌ? Mxcuen Jesús: ꞌUn nchcuiꞌ um siꞌyana lcan ree. Cuiꞌ canꞌ chaꞌ mdiyaan loo chendyu re siꞌyana chcuinꞌ chaꞌ nu ñi. Nchgaa nten nu nꞌni cunta chaꞌ nu ñi ne ꞌin neꞌ chaꞌ nu nchcuinꞌ.
\v 38 Mxcuen yu Pilato ꞌin ñi: ¿Ñi na lca chaꞌ nu ñi? Ñaꞌaan mdyi ycuiꞌ yu chaꞌ canꞌ xiyaꞌ mdyiꞌo yu nde lyiyaꞌ seꞌen ndiꞌin neꞌ judio, loꞌ juin yu ꞌin neꞌ: Ñi sca quiꞌya, loꞌ a nducui yu re.
\v 39 Una ꞌun cuaꞌ ntsuꞌhui sca chaꞌ ꞌin um xa nchca taꞌa pascua, njñan um chaꞌ ndlyaa sca preso. ¿Ta nchca tiꞌ um culaan ꞌin yu nu lca Ree ꞌin neꞌ judio?
\v 40 Xacanꞌ tsatlyu nchcuiꞌ cueen neꞌ: A culaa um ꞌin yu cua, lyaa um ꞌin yu Barrabás. Loꞌ yu Barrabás canꞌ lca yu sca yu cunan. 
\c 19
\p
\v 1 Xacanꞌ mchcuan yu Pilato cunta ꞌin Jesús loꞌ ngulo yu tñan siꞌyana quiꞌni ñi.
\v 2 Yu sindatu canꞌ mtñan yu sca sniꞌ quicheꞌ, mdiꞌin tyaa yu ꞌin na que ñi, loꞌ mxicoꞌ yu sca teꞌ cuaa ꞌin ñi,
\v 3 loꞌ nchcuiꞌ yu: Tlyu chaꞌ cuiyaꞌ ꞌin Ree ꞌin neꞌ judio. A cunta njyiꞌin yaaꞌ yu tloo ñi.
\v 4 Xiyaꞌ mdyiꞌo yu Pilato ñaꞌan tñan canꞌ, loꞌ juin yu ꞌin neꞌ judio: Ñaꞌan jan ñi, nde ndon yu re loꞌ ca cuiyaꞌ tiꞌ um siꞌyana ñi sca quiꞌya loꞌ a nducui yu.
\v 5 Xacanꞌ mdoꞌo loꞌo yu ꞌin Jesús, nducua sca sniꞌ quicheꞌ que ñi, loꞌ lcoꞌ ñi sca teꞌ cuaa. Loꞌ juin yu Pilato: Nde ndon yu re.
\v 6 Nchgaa yu nu ndlo tñan niꞌ lyaa tsatlyu loꞌo yu silyiya nu ntsuꞌhui cuan chaꞌ ꞌin laa, xa naꞌan neꞌ ꞌin Jesús mdyisnan ycuiꞌ cueen neꞌ: Jyiꞌin caꞌan um ꞌin yu loo cusi, jyiꞌin caꞌan um ꞌin yu loo cusi. Loꞌ juin yu Pilato ꞌin neꞌ: Cuiꞌ um tsa loꞌo um ꞌin yu loꞌ jyiꞌin caꞌan um ꞌin yu loo cusi, siꞌyana cunta nu ꞌñan nanꞌ a sca quiꞌya nducui yu.
\v 7 Mxcuen neꞌ judio ꞌin yu: Huareꞌ ntsuꞌhui sca lee ꞌin hua, loꞌ ndlo quiꞌya na ꞌin yu, siꞌyana juin yu lca yu ycuiꞌ ca Sñeꞌ Ndiose.
\v 8 Xa ngune ꞌin yu Pilato chaꞌ canꞌ lyee la ytsen yu.
\v 9 Xiyaꞌ yten yu ñaꞌan tñan canꞌ loꞌ juin yu ꞌin Jesús: ¿La ta quichen mdoꞌo? Una Jesús a mxcuen ñi ꞌin yu.
\v 10 Xacanꞌ juin yu Pilato ꞌin ñi: ¿Ñi chaꞌ ta a nxcuen ꞌñan? ¿Ta a jlyo tiꞌ siꞌyana ntsuꞌhui chaꞌ cuiyaꞌ ꞌñan jyiꞌin caꞌan ꞌin loo cusi, loꞌ ntsuꞌhui chaꞌ cuiyaꞌ ꞌñan culaan ꞌin?
\v 11 Mxcuen Jesús ꞌin yu: A sca na tca cuꞌni um loꞌon chaꞌ siꞌi nde niꞌ cuaan mdoꞌo chaꞌ cuiyaꞌ ꞌin um. Canꞌ chaꞌ tlyu lati quiꞌya nducui nu mdyaa ꞌñan tuyaaꞌ um.
\v 12 Tiꞌ xacanꞌ yu Pilato ngunan yu ñaꞌan nu culaa yu ꞌin Jesús, una nde lyee lati nchcuiꞌ cueen neꞌ judio: Chaꞌ culaa um ꞌin yu re, a lca um taꞌa tsuꞌhue yu César, siꞌyana sca yu nu nguiꞌni ꞌin lca ree, taꞌa cusuun César lca canꞌ.
\v 13 Xa ngune ꞌin yu Pilato chaꞌ canꞌ, cuiꞌ xaa ngulyoo yu ꞌin Jesús nde lyiyaꞌ, loꞌ yten tucua yu seꞌen nꞌni cuiyaꞌ yu chaꞌ, sca seꞌen ndloꞌo naan neꞌ loꞌo chaꞌ hebreo, Gabata, chaꞌ re nchca tiꞌ chcuiꞌ, seꞌen ncua tsuꞌhue lyuu.
\v 14 Tsa ntsuꞌhui ndyiꞌya cuaan, cuiꞌ tsaan nu cu siin neꞌ judio siꞌya taꞌa pascua canꞌ, loꞌ juin yu Pilato ꞌin neꞌ: Nde ndon yu nu lca Ree ꞌin um.
\v 15 Nde lyee la ycuiꞌ cueen neꞌ: Lyoo um ꞌin yu nde lyiyaꞌ, lyoo um ꞌin yu nde lyiyaꞌ, jyiꞌin caꞌan um ꞌin yu loo cusi. Loꞌ juin yu Pilato canꞌ: ¿Ta nchca tiꞌ um jyiꞌin caꞌan ꞌin Ree ꞌin um loo cusi? Xacanꞌ nchgaa yu nu ndlo tñan niꞌ lyaa mxcuen yu: A ntsuꞌhui ꞌa xca ree ꞌin hua, cuiꞌ ca nu scati yu César.
\v 16 Cuañaꞌan yatoꞌo mdyaa yu Pilato cunta ꞌin Jesús tuyaaꞌ neꞌ siꞌyana chaꞌan ñi loo cusi, mchcuan neꞌ cunta ꞌin ñi loꞌ ya loꞌo neꞌ ꞌin ñi.
\s Xa nguaꞌan Jesús loo cusi
\p
\v 17 Cuiꞌ ñi lyiꞌya ñi cusi seꞌen ntsuꞌhui chaꞌ chaꞌan ñi, loꞌ mdiyaa ñi sca seꞌen nu nchcuiꞌ neꞌ loꞌo lca Que Jyiꞌo, loꞌo chaꞌ hebreo ndyiꞌo chaꞌ re Gólgota.
\v 18 Canꞌ mjyiꞌin caꞌan neꞌ ꞌin ñi loo cusi, a cunta loꞌo tucua yu nu taꞌa nguaꞌan ñi, scaa yu scaa tsoꞌ, loꞌ Jesús nguaꞌan ñi tluꞌhue la.
\v 19 Cuaꞌ lca nguaꞌan yu Pilato sca chaꞌ nu chaꞌan que cusi canꞌ, loꞌ nchcuiꞌ na: Nde nu lca Jesús Nazaret, Ree ꞌin neꞌ judio.
\v 20 Quiꞌan ꞌa neꞌ judio ycuiꞌ neꞌ chaꞌ re, siꞌyana seꞌen nu nguaꞌan Jesús loo cusi canꞌ, cuiꞌ ti tuꞌhua quichen lca na. Nguaꞌan na loꞌo chaꞌ hebreo, chaꞌ griego, loꞌo chaꞌ latín.
\v 21 Tsalca neꞌ nu ndlo ca tñan niꞌ lyaa ꞌin neꞌ judio, juin neꞌ ꞌin yu Pilato: A caꞌan um ꞌin na siꞌyana lca yu Ree ꞌin neꞌ judio, tsuꞌhue lati chaꞌan na tsañaꞌan nu juin yu: Nanꞌ lcan Ree ꞌin neꞌ judio.
\v 22 Mxcuen yu Pilato ꞌin neꞌ: Ñaꞌan chaꞌ nu cuaꞌ nguaꞌan, cuiꞌ cuañaꞌan quinu na.
\v 23 Xa cuaꞌ mjyiꞌin caꞌan yu sindatu canꞌ ꞌin Jesús loo cusi, msñi yu steꞌ ñi loꞌ ngulo yu ꞌin na jacua yuꞌhue, cunda scaa na ꞌin scaa yu. A cunta msñi yu teꞌ tucuin ꞌin ñi nu mchcuan sca coꞌ ti.
\v 24 Xacanꞌ mdyisnan ycuiꞌ scasca yu: A sta na ꞌin na, tsuꞌhue lati culo na xuꞌhue na loꞌo na, chaꞌ ti ñaꞌan nu quiꞌni caꞌan na ꞌin. Cuañaꞌan mꞌni yu, siꞌyana tsatoꞌo chaꞌ nu nguinu scua loo quityi ꞌin Ndiose seꞌen nchcuiꞌ: —Ticuiꞌ lja canꞌ mtsa yu stenꞌ, ngulo yu xuꞌhue yu loꞌo na—. Cuiꞌ cuañaꞌan mꞌni yu sindatu canꞌ.
\v 25 Cuiꞌ ti seꞌen ngaꞌan Jesús loo cusi ndon jyiꞌan ñi, loꞌo taꞌa ngula jyiꞌan ñi, loꞌo María cuilyiꞌo Cleofas, a cunta ndon María Magdalena.
\v 26 Jesús naꞌan ñi ndon jyiꞌan ñi, a cunta cuiꞌ ti canꞌ ndon sca yu taꞌa ndaꞌan ñi, cuiꞌ yu nu ndyuꞌhui cuiyaꞌ tiꞌ ñi ꞌin canꞌ, loꞌ juin ñi ꞌin jyiꞌan ñi: Cua ndon nu ca sñeꞌ um.
\v 27 Xacanꞌ juin ñi ꞌin yu taꞌa ndaꞌan ñi canꞌ: Cua ndon nu ca jyiꞌan. Tiꞌ xacanꞌ mchcuan yu canꞌ cunta ꞌin jyiꞌan ñi la seꞌen ndiꞌin yu.
\v 28 Ngujlyo tiꞌ Jesús siꞌyana cuaꞌ ya tucua nchgaa chaꞌ nu ntsuꞌhui chaꞌ tyijyin ñi, xacanꞌ juin ñi: Nguityi ꞌa tinꞌ. Juin ñi cuañaꞌan siꞌyana tsatoꞌo chaꞌ nu nguinu scua loo quityi ꞌin Ndiose.
\v 29 Canꞌ ndon sca teꞌen mtsaꞌan ntsuꞌhui tyiꞌa vinagre. Yu sindatu canꞌ mchaꞌ yu tyiꞌa canꞌ ꞌin sca teꞌ, loꞌ mdiꞌin tyaa yu ꞌin na loo sca yca, loꞌ mjyiꞌin caꞌan yu ꞌin na tuꞌhua Jesús.
\v 30 Xa cuaꞌ yiꞌo ñi tyiꞌa canꞌ juin ñi: Cuaꞌ ya tucua nchgaa chaꞌ. Cuiꞌ xaa mdyiꞌya tucui ñi que ñi, loꞌ mdyaa ñi cusya ꞌin ñi tuyaaꞌ Ndiose.
\s Yjoꞌ neꞌ chcuan cha siiꞌ Jesús
\p
\v 31 Siꞌyana lca na tsaan nu nsiin taꞌa pascua, a ncua tiꞌ neꞌ judio siꞌyana quinu caꞌan nu ngujui canꞌ loo cusi tsaan nu nxitñanꞌ neꞌ, (a cunta lja xacanꞌ ya tucua tsaan nu lyee la nꞌni tnu neꞌ taꞌa canꞌ), canꞌ chaꞌ ya ycuiꞌ neꞌ loꞌo yu Pilato chaꞌ taa yu chaꞌ cuiyaꞌ cutsa tijyan quiyaꞌ nu ngaꞌan loo cusi canꞌ, loꞌ tyiꞌya neꞌ ꞌin.
\v 32 Mdiyaa yu sindatu canꞌ loꞌ mcha yu tijyan quiyaꞌ yu nu taꞌa ngaꞌan Jesús, cuiꞌ cuañaꞌan mcha yu quiyaꞌ nu ngaꞌan xca tsoꞌ canꞌ.
\v 33 Una xa naꞌan yu siꞌyana cuaꞌ ngujui Jesús, a mcha ꞌa yu quiyaꞌ ñi.
\v 34 Xacanꞌ sca yu sindatu canꞌ yjoꞌ yu sca chcuan cha siiꞌ ñi, cuiꞌ ñaꞌan lcaa nguilo tne ñi nu mxitiyaꞌ loꞌo tyiꞌa.
\v 35 Yu nu naꞌan chaꞌ re ndaa yu suun chaꞌ nu yatoꞌo, loꞌ nchcuiꞌ yu chaꞌ nu ñi, a cunta jlyo tiꞌ yu siꞌyana suun nu ndaa yu lca na chaꞌ nu ñi, ñaꞌan ca siꞌyana loꞌo um tca tsa quiꞌan tiꞌ um chaꞌ re.
\v 36 Chaꞌ re yatoꞌo na siꞌyana tsa tucua chaꞌ nu nchcuiꞌ quityi ꞌin Ndiose: —Ñi sca tijyan ñi loꞌ a cutsa na—.
\v 37 Ndeñaꞌan nchcuiꞌ xca seꞌen loo quityi ꞌin Ndiose: —Chcua quiloo neꞌ ꞌin nu yjoꞌ neꞌ chcuan cha siiꞌ—.
\s Xa mtsiꞌ Jesús
\p
\v 38 Chonꞌ ndeꞌen canꞌ sca yu naan See nu mdoꞌo Arimatea, cuiꞌ sca yu ya quiꞌan tiꞌ ꞌin Jesús, una a nguloꞌo la yu ꞌin yu siꞌyana ntsen yu tloo neꞌ judio, mjñan yu chaꞌ cuiyaꞌ ꞌin Pilato siꞌyana cuiꞌya yu ꞌin Jesús, loꞌ mdaa yu chaꞌ cuiyaꞌ. Xacanꞌ mdiyaa yu seꞌen ngaꞌan ñi loꞌ nguꞌya yu ꞌin ñi.
\v 39 A cunta mdiyaa yu Nicodemo, cuiꞌ yu nu ya ycuiꞌ loꞌo Jesús sca tla, loꞌ lyiꞌya yu sca seꞌen ntsuꞌhui tyiꞌa xityiꞌi nu naan mirra nu mxitiyaaꞌ loꞌo áloes, loꞌ tiꞌin na cla tyi kilo.
\v 40 Xacanꞌ nguxen yu sca teꞌ ꞌin Jesús, loꞌ msuꞌhua yu tyiꞌa xityiꞌi ꞌin ñi tsañaꞌan ntsuꞌhui chaꞌ ꞌin neꞌ judio xa ntsiꞌ neꞌ ꞌin sca nu ngujui.
\v 41 Seꞌen nguaꞌan ñi loo cusi canꞌ, cuiꞌ ti nguinu sca seꞌen nducua yca, canꞌ cuaꞌ lca nguiaaꞌ sca cuaa nu a nchca tucui chuꞌhui.
\v 42 Canꞌ mtsiꞌ yu ꞌin Jesús siꞌyana cuiꞌ seꞌen ti su cuaa canꞌ, a cunta cuaꞌ tyisnan xitñanꞌ neꞌ judio.
\c 20
\s Xa mdyiquiꞌo Jesús 

\p
\v 1 Culoo tsaan ꞌin snan canꞌ, tiꞌ nducui lyoo xa mdoꞌo María Magdalena nguiaa tucuaa canꞌ, loꞌ naꞌan siꞌyana cuaꞌ mdoꞌo ntan quee nu nchcun na.
\v 2 Cuiꞌ xaa mdoꞌo msnan, nguia ytsaꞌ ꞌin yu Simón Tyo loꞌo xca yu taꞌa mdaꞌan Jesús, cuiꞌ yu nu ndyuꞌhui cuiyaꞌ tiꞌ ñi ꞌin canꞌ, loꞌ juin ꞌin yu: Cuaꞌ ngulyoo neꞌ ꞌin Ñi Xꞌnan na seꞌen mtsiꞌ ñi, loꞌ a jlyo tiꞌ hua la nguia loꞌo neꞌ ꞌin ñi.
\v 3 Cuiꞌ xaa mdoꞌo yu Tyo loꞌo xca yu taꞌa mdaꞌan ñi, nguiaa yu tucuaa canꞌ.
\v 4 Tsatlyu mdoꞌo chcuaa yu msnan yu, una xca yu canꞌ lyee la msnan yu que ꞌin yu Tyo, culo nducua la yu mdiyaa yu tucuaa canꞌ.
\v 5 Mducui ndlyu yu loꞌ msti quiloo yu niꞌ cuaa canꞌ, loꞌ naꞌan yu siꞌyana xtyi teꞌ nu nguxen ti ñi su canꞌ, una a yten yu niꞌ canꞌ.
\v 6 Cuiꞌ ñaꞌan cuaꞌ loꞌo yu Tyo canꞌ mdiyaa yu, loꞌ yten yu niꞌ cuaa canꞌ, naꞌan yu siꞌyana xtyi teꞌ nu nguxen ti ñi su canꞌ,
\v 7 a cunta naꞌan yu siꞌyana teꞌ nu nguxen tloo ñi a su ꞌa na sca seꞌen ti loꞌo teꞌ nu nguxen ca ñi, cuiꞌ ca nu mtsa tuꞌhua na nscua na xca seꞌen.
\v 8 Xacanꞌ yten xca yu taꞌa mdaꞌan ñi canꞌ, cuiꞌ yu nu mdiyaa culo nducua la canꞌ, naꞌan yu chaꞌ canꞌ loꞌ ya quiꞌan tiꞌ yu,
\v 9 una a nchca quiꞌya tsuꞌhue yu cunta tsañaꞌan nu nchcuiꞌ quityi ꞌin Ndiose ñaꞌan ntsuꞌhui chaꞌ tyiquiꞌo ñi.
\v 10 Xacanꞌ mxitucui yu taꞌa mdaꞌan ñi canꞌ nde seꞌen ndiꞌin yu.
\s Nguloꞌo tloo Jesús ꞌin María Magdalena
\p
\v 11 Una María tiꞌ nguinu ton tucuaa canꞌ loꞌ nguinan, lja xacanꞌ mducui ndlyu loꞌ msti quiloo niꞌ cuaa canꞌ,
\v 12 naꞌan nducua tucua angujle nu lcoꞌ teꞌ mten. Sca canꞌ nducua nde que seꞌen msti Jesús, loꞌ xca nde quiyaꞌ canꞌ.
\v 13 Loꞌ juin angujle canꞌ: ¿Ñi chaꞌ ta nguinan? Mxcuen María: Siꞌyana ngulyoo neꞌ ꞌin Ñi Xꞌnan, loꞌ a jlyo tinꞌ la nde nguia loꞌo neꞌ ꞌin ñi.
\v 14 Ñaꞌaan mdyi ycuiꞌ chaꞌ canꞌ mxiton nde chonꞌ loꞌ naꞌan ndon Jesús, una a ngujlyo tiꞌ siꞌyana Jesús lca nu ndon canꞌ.
\v 15 Loꞌ juin Jesús ꞌin: ¿Ñi chaꞌ ta nguinan? ¿Tucui ca ꞌin ndaꞌan nan? María msqueꞌ tiꞌ chaꞌ ta yu nu ntsuꞌhui cunta seꞌen nducua yca canꞌ lca nu ndon canꞌ, loꞌ juin xacanꞌ: Chaꞌ cuiꞌ um ngulyoo um ꞌin ñi, quitsaꞌ um ꞌñan la ya loꞌo um ꞌin ñi, loꞌ nanꞌ quia ꞌyan ꞌin ñi.
\v 16 Loꞌ juin Jesús ꞌin: ¡María! Cuiꞌ xaa mxiton loꞌ juin ꞌin ñi, ¡Raboni! (Chaꞌ re nchca tiꞌ na nchcuiꞌ na, ñi nu lca Bstro).
\v 17 Juin Jesús ꞌin: A culaꞌ ꞌñan siꞌyana tiꞌ lyijyi quiꞌan seꞌen nducua Stin, quia ytsaꞌ ꞌin nchgaa taꞌan siꞌyana cuaꞌ quiꞌan seꞌen nducua Stin, cuiꞌ ñi nu lca Sti um, Ndiose ꞌñan, loꞌ Ndiose ꞌin um.
\v 18 Xacanꞌ mdoꞌo María Magdalena nguia ytsaꞌ ꞌin yu taꞌa mdaꞌan Jesús siꞌyana naꞌan tloo ꞌin Ñi Xꞌnan na, loꞌ mtsaꞌ nchgaa chaꞌ nu ycuiꞌ ñi loꞌo.
\s Nguloꞌo tloo Jesús ꞌin yu taꞌa mdaꞌan ñi
\p
\v 19 Xa nguꞌya tla, cuiꞌ tsaan culoo ꞌin snan canꞌ, loꞌ seꞌen nguioꞌ tiꞌin yu taꞌa mdaꞌan ñi, mchcun tsuꞌhue tunaꞌan canꞌ siꞌyana ntsen yu ꞌin neꞌ judio, loꞌ tluꞌhue la seꞌen ndiꞌin yu yten Jesús, loꞌ juin ñi ꞌin yu: A suꞌhua um chaꞌ nduhue tiꞌ tiquee um.
\v 20 Xa mdyi ycuiꞌ ñi chaꞌ re, nguloꞌo ñi yaaꞌ ñi ꞌin jun loꞌo jyan siiꞌ ñi. Yu taꞌa mdaꞌan ñi tsuꞌhue ntsuꞌhui tiquee yu siꞌyana naꞌan yu ꞌin Ñi Xꞌnan na.
\v 21 Xiyaꞌ ycuiꞌ Jesús loꞌo yu: A suꞌhua um chaꞌ nduhue tiꞌ tiquee um, tsañaꞌan nu nguaꞌan tñan Stina Ndiose ꞌñan, cuañaꞌan caꞌan tñan ꞌin um.
\v 22 Xa ycuiꞌ ñi chaꞌ re ngulaꞌ suꞌhua ñi tloo yu loꞌ juin ñi: Quinu yuꞌhui Espíritu nu Luhui ꞌin Ndiose niꞌ cusya ꞌin um.
\v 23 Chaꞌ ꞌun cuꞌni um chaꞌ tlyu tiꞌ ꞌin ndeꞌen la tucui loꞌo quiꞌya nguiꞌni, a nducui ꞌa canꞌ quiꞌya, loꞌ chaꞌ ti ñaꞌan nu a cuꞌni um chaꞌ tlyu tiꞌ ꞌin, cuiꞌ ñaꞌan ti nducui canꞌ quiꞌya.
\s Xa mꞌni tucua tiꞌ yu Toma
\p
\v 24 Una yu Toma, cuiꞌ ta yu nu tichcua canꞌ, yu nu nchcuiꞌ neꞌ loꞌo lca Dídimo, a loꞌo yu nguioꞌ tiꞌin yu xa yaa Jesús.
\v 25 Nchgaa la ñaꞌan taꞌa mdaꞌan ñi juin yu ꞌin Toma: Cuaꞌ naꞌan tloo hua ꞌin Ñi Xꞌnan na. Mxcuen yu xacanꞌ: Chaꞌ a ñaꞌan loꞌ a cojoꞌ yaanꞌ seꞌen yten clau yaaꞌ ñi, loꞌ chaꞌ a cojoꞌ yaanꞌ jyan siiꞌ ñi, a tsa quiꞌan tinꞌ.
\v 26 Mdaꞌa snuꞌ tsaan nguioꞌ tiꞌin yu taꞌa mdaꞌan ñi ñaꞌan canꞌ, cuaꞌ loꞌo yu Toma xacanꞌ. Mchcun tsuꞌhue tunaꞌan canꞌ xa yten Jesús tluꞌhue la seꞌen ndiꞌin yu, loꞌ juin ñi: A suꞌhua um chaꞌ nduhue tiꞌ tiquee um.
\v 27 Loꞌ juin ñi ꞌin yu Toma canꞌ: Cojoꞌ yaaꞌ re loꞌ cuꞌni quii yaanꞌ, tyaa yaaꞌ loꞌ cojoꞌ yaaꞌ jyan siinꞌ, loꞌ a cuꞌni tucua tiꞌ, cuiꞌ ca nu tsa quiꞌan tiꞌ.
\v 28 Xacanꞌ mxcuen yu Toma ꞌin ñi: ꞌUn lca um Xꞌnan loꞌ lca um Ndiose ꞌñan.
\v 29 Loꞌ juin Jesús ꞌin yu: Siꞌyana naꞌan tloo ꞌñan, Toma, canꞌ chaꞌ ya quiꞌan tiꞌ, una tsuꞌhue ca xuꞌhue nu ya quiꞌan tiꞌ loꞌ a naꞌan ꞌñan. ¿Ñi chaꞌ nguaꞌan yu Xuhua quityi re?
\v 30 Tiꞌ mꞌni la Jesús scasca chaꞌ nu tnu tloo naꞌan yu taꞌa mdaꞌan ñi, una a nguaꞌan scua na loo quityi re.
\v 31 Una chaꞌ re nguaꞌan scua na siꞌyana tsa quiꞌan tiꞌ um siꞌyana Jesús lca ñi nu lca Cristo, Sñeꞌ Ndiose, loꞌ loo nu tsa quiꞌan tiꞌ um ꞌin ñi caja chendyu nu a tsatii ꞌa ꞌin um.
\c 21
\s Nguloꞌo tloo Jesús ꞌin tsa cati taꞌa mdaꞌan ñi 

\p
\v 1 Chonꞌ ndeꞌen canꞌ xiyaꞌ nguloꞌo tloo Jesús ꞌin yu taꞌa mdaꞌan ñi tuꞌhua tiyoꞌ Tiberias canꞌ, loꞌ ndeñaꞌan nguloꞌo tloo ñi ꞌin yu:
\v 2 Tsatlyu nguioꞌ tiꞌin yu Simón Tyo canꞌ loꞌo Toma nu nchcuiꞌ neꞌ loꞌo lca Dídimo, loꞌo Natanael nu mdoꞌo Caná seꞌen lyiꞌya loo Galilea, loꞌo chcuaa sñeꞌ Zebedeo, a cunta loꞌo chcua yu nu taꞌa mdaꞌan Jesús nguioꞌ tiꞌin yu canꞌ.
\v 3 Loꞌ juin yu Simón Tyo canꞌ: Tsaꞌan nanꞌ cuta cula. Mxcuen nchgaa la ñaꞌan yu canꞌ: Loꞌo huareꞌ tsaa hua. Xacanꞌ yten yu sca niꞌ yca naꞌan loꞌ mdoꞌo yu nguiaa yu, una ñi sca cula loꞌ a msñi yu sca chcui tla canꞌ.
\v 4 Xa nde cuaꞌ quiꞌya xaa, tuꞌhua ysin canꞌ ndon Jesús, una yu taꞌa mdaꞌan ñi a yuꞌhui lyoo yu siꞌyana Jesús ndon canꞌ.
\v 5 Ycuiꞌ ñi loꞌo yu: Sñenꞌ, ¿ñi na ndaꞌan loꞌo um cu na? Mxcuen yu ꞌin ñi: A sca na.
\v 6 Xacanꞌ juin ñi ꞌin yu: Nguun um quitan ꞌin um nde tsoꞌ cueen seꞌen nducui yca naꞌan cua, loꞌ quinu ꞌin ꞌin um. Xacanꞌ nguun yu ꞌin na, loꞌ hasta ñi a ncua ꞌa tiꞌ lyoo yu ꞌin na siꞌyana mtsaꞌan na ntsuꞌhui cula.
\v 7 Xacanꞌ xca yu taꞌa mdaꞌan ñi, cuiꞌ yu nu ndyuꞌhui cuiyaꞌ tiꞌ ñi ꞌin canꞌ, juin yu ꞌin yu Tyo: Cuiꞌ Ñi Xꞌnan na ndon cua. Loꞌ ñaꞌaan ngune ꞌin yu Simón Tyo siꞌyana Ñi Xꞌnan na lca ñi, cuiꞌ xaa ycoꞌ yu steꞌ yu (siꞌyana cuaꞌ ngulo yu ꞌin na), loꞌ mdoꞌo cuaan yu loo tyiꞌa canꞌ.
\v 8 Nchgaa la ñaꞌan yu nguia loꞌo yu yca naꞌan canꞌ la tuꞌhua ysin, nducuan qui yu quitan seꞌen ntsuꞌhui cula canꞌ siꞌyana a tijyoꞌ lyee nguinu tuꞌhua ysin canꞌ, tsa ntsuꞌhui lyoo sca ciento metro.
\v 9 Xa mdyiꞌo tiꞌin yu tuꞌhua ysin canꞌ, naꞌan yu ndiꞌin quiiꞌ nscuhuiꞌ, canꞌ nscua sca cula ndiqueꞌ ꞌin, a cunta loꞌo jaslya.
\v 10 Loꞌ juin Jesús ꞌin yu: Quian loꞌo um tucua snan cula nu tca msñi um cua.
\v 11 Cuiꞌ xaa ycuen yu Simón Tyo canꞌ niꞌ yca naꞌan loꞌ ngulyoo yu quitan canꞌ la tuꞌhua ysin, mtsaꞌan na ntsuꞌhui chacuiꞌ cula nu tnu, loꞌ ndiyaa ꞌin sca ciento ntsuꞌhui tuꞌhua tyi ntsuꞌhui snan ꞌin. Tsacanꞌ ꞌin ntsuꞌhui ꞌin niꞌ quitan canꞌ una a mdaꞌ na.
\v 12 Juin Jesús ꞌin yu: Quiaan um loꞌ ca xuꞌhue um na re. Ñi sca yu taꞌa mdaꞌan ñi loꞌ a msti tiꞌ yu cuñichaꞌ yu ꞌin ñi chaꞌ ti ca lca ñi, nguꞌya yu cunta siꞌyana Ñi Xꞌnan na lca ñi.
\v 13 Xacanꞌ msñi Jesús jaslya canꞌ loꞌ mdaa ñi ꞌin na ꞌin yu, cuiꞌ cuañaꞌan mꞌni ñi loꞌo cula canꞌ.
\v 14 Nde nu cuaꞌ nchca snan yaꞌ nguloꞌo tloo Jesús ꞌin yu taꞌa mdaꞌan ñi, tiꞌ xa mdyiquiꞌo ñi.
\s Ycuiꞌ Jesús loꞌo yu Tyo snan yaꞌ
\p
\v 15 Xa mdyi ycu jun juin Jesús ꞌin yu Simón Tyo canꞌ: Simón, sñeꞌ Jonás, ¿ta lyee la lca tiquee loꞌon que ꞌin chaꞌ re? Mxcuen yu ꞌin ñi: Cuiꞌ cuañaꞌan, Ñi Xꞌnan hua, ꞌun jlyo tiꞌ um siꞌyana lyee lca tiqueen loꞌo um. Juin ñi ꞌin yu xacanꞌ: Tsuꞌhue ti ñaꞌan seen slyaꞌ cuneꞌ ꞌñan.
\v 16 Mxitucui ñi ycuiꞌ ñi loꞌo yu nu cuaꞌ nchca tucua yaꞌ: Simón, sñeꞌ Jonás, ¿ta lyee lca tiquee loꞌon? Mxcuen yu Tyo: Cuiꞌ cuañaꞌan Ñi Xꞌnan hua, ꞌun jlyo tiꞌ um siꞌyana lyee lca tiqueen loꞌo um. Loꞌ juin ñi ꞌin yu: Tsuꞌhue ti ñaꞌan seen slyaꞌ ꞌñan.
\v 17 Xiyaꞌ ycuiꞌ ñi loꞌo yu nu cuaꞌ nchca snan yaꞌ: Simón, sñeꞌ Jonás, ¿ta lyee lca tiquee loꞌon? Yu Tyo canꞌ nguluꞌun tiꞌ yu siꞌyana snan yaꞌ ticuiꞌ ti loo chaꞌ ycuiꞌ ñi: ¿Ta lyee lca tiquee loꞌon? Yu Tyo canꞌ mxcuen yu ꞌin ñi: Ñi Xꞌnan hua, ꞌun jlyo tiꞌ um nchgaa loo chaꞌ, jlyo tiꞌ um siꞌyana lyee lca tiqueen loꞌo um. Juin Jesús ꞌin yu: Tsuꞌhue ti ñaꞌan seen slyaꞌ ꞌñan.
\v 18 Nu chaꞌ ñi sꞌni cunen loꞌo: Xa ncua sca yu tsa suhue ti, mscanꞌ siiꞌ loꞌ yaa seꞌen nu ncua tiꞌ. Una xa nu cuaꞌ cula ntsuꞌhui chaꞌ xñii neꞌ scun, loꞌ xca tucui nu scanꞌ ꞌin, tsa loꞌo canꞌ ꞌin seꞌen nu a nchca tiꞌ tsaa.
\v 19 Nde chaꞌ ycuiꞌ Jesús siꞌyana quiꞌya yu Tyo canꞌ cunta ñaꞌan ntsuꞌhui chaꞌ cujui neꞌ ꞌin yu, loꞌ taa yu loo Ndiose siꞌya chaꞌ canꞌ. Tiꞌ juin la ñi ꞌin yu: Chcui nchaꞌan ꞌñan.
\s Chaꞌ ꞌin yu nu taꞌa la ꞌin ñi
\p
\v 20 Xacanꞌ mxinaꞌan yu Tyo canꞌ nde chonꞌ yu, loꞌ naꞌan yu ljyaan xca yu taꞌa mdaꞌan ñi, cuiꞌ yu nu lyee ndyuꞌhui cuiyaꞌ tiꞌ ñi ꞌin canꞌ, yu nu nguaꞌan nanꞌ siiꞌ ñi xa ycu siin jun loꞌ mñichaꞌ ꞌin ñi: Ñi Xꞌnan hua, ¿tucui ca nu ntsuꞌhui chaꞌ tyaa ꞌin um?
\v 21 Loꞌ juin yu Tyo canꞌ ꞌin Jesús xa naꞌan ꞌin yu: Ñi Xꞌnan hua, ¿ñaꞌan ta tsatoꞌo ꞌin yu cua?
\v 22 Mxcuen Jesús ꞌin yu: Chaꞌ nanꞌ nchca tinꞌ siꞌyana tiꞌ ndiꞌin yu xa yaan xiyaꞌ, ¿ñi chaꞌ ntsuꞌhui yuhue tiꞌ chaꞌ re? Tsaloo chcui nchaꞌan ti ꞌñan.
\v 23 Siꞌya chaꞌ nu ycuiꞌ ñi canꞌ, mdoꞌo yne chaꞌ siꞌyana yu taꞌa mdaꞌan ñi canꞌ a caja ꞌa yu. Una a juin Jesús siꞌyana a ntsuꞌhui chaꞌ caja yu, cuiꞌ ca nu juin ñi: Chaꞌ nanꞌ nchca tinꞌ siꞌyana tiꞌ ndiꞌin yu xa yaan xiyaꞌ, ¿ñi chaꞌ ntsuꞌhui yuhue tiꞌ chaꞌ re?
\v 24 Cuiꞌ yu taꞌa mdaꞌan ñi canꞌ lca nu ndaa suun chaꞌ re, cuiꞌ yu nguaꞌan scua yu ꞌin na, loꞌ jlyo tiꞌ hua siꞌyana nchcuiꞌ yu chaꞌ nu ñi.
\v 25 Quiꞌan ꞌa chaꞌ nu tiꞌ mꞌni Jesús, loꞌ chaꞌ cua na chaꞌan scua na cunda scaa ti na, ñan tinꞌ a cula loo chendyu re tyiꞌin quityi nu chcuiꞌ chaꞌ canꞌ. Amen.