\id ACT - Nopala (Chatino) NT [cya] - Mexico 2013 (web 2014)
\h HECHOS
\toc1 Hechos
\toc2 Hechos
\toc3 Hch
\mt1 Hechos
\c 1
\s Chaꞌ ꞌin Espíritu ꞌin Ndiose
\p
\v 1 Culoo quityi nguaꞌan tñan ꞌin um, cuaꞌ mtsanꞌ ꞌin um, ñi Teófilo, nchgaa ñaꞌan nu mꞌni Jesús loꞌo nchgaa chaꞌ nu nguloꞌo ñi tiꞌ xa nu mdyisnan mꞌni ñi tñan,
\v 2 tsayaꞌ mdiyaa tsaan nu ycuen ñi nde niꞌ cuaan. Una culo nducua la, loꞌo chaꞌ cuiyaꞌ ꞌin Espíritu nu Luhui ꞌin Ndiose ycuiꞌ ñi loꞌo yu taꞌa mdaꞌan ñi, yu nu cuaꞌ ngulohui ñi, ñi tñan ntsuꞌhui chaꞌ cuꞌni.
\v 3 Una xa cuaꞌ mdyiquiꞌo ñi, tiꞌ nguloꞌo tloo ñi ꞌin yu cha niꞌ chcua yla tsaan, siꞌyana ca cuiyaꞌ tsuꞌhue ti yu siꞌyana loꞌo ca ñi, tiꞌ ycuiꞌ ñi loꞌo yu ñaꞌan ntsuꞌhui chaꞌ culo Ndiose tñan ꞌin nten.
\v 4 Lja nguioꞌ tiꞌin yu ngulo ñi tñan ꞌin yu siꞌyana a tyiꞌo yu quichen Jerusalén cuiꞌ xaa, cuiꞌ ca nu quita yu tsayaꞌ nu caan chaꞌ nu cuaꞌ mdiꞌin tyaa Ndiose, cuiꞌ chaꞌ nu cuaꞌ ycuiꞌ ñi loꞌo yu:
\v 5 Chaꞌ ñi siꞌyana yu Xuhua mducua tya yu ꞌin nten loꞌo tyiꞌa, una niꞌ chcua xnan ti tsaan, chaꞌan yuꞌhui Espíritu nu Luhui ꞌin Ndiose ꞌin um.
\s Xa ycuen Jesús nde niꞌ cuaan
\p
\v 6 Xacanꞌ yu nu nguioꞌ tiꞌin canꞌ mñichaꞌ yu ꞌin ñi, loꞌ juin yu: Ñi Xꞌnan hua, ¿ta cuaꞌ taa um chaꞌ cuiyaꞌ ꞌin quichen Israel siꞌyana xiyaꞌ culo na tñan seꞌen lyiꞌya loo na?
\v 7 Mxcuen ñi ꞌin yu: A ꞌni chaꞌ ca jlyo tiꞌ um ñi tsaan loꞌ ñi xaa tsatoꞌo sca chaꞌ nu cuaꞌ mdiꞌin tyaa Stina Ndiose, siꞌyana scati ñi ntsuꞌhui chaꞌ cuiyaꞌ canꞌ ꞌin ñi,
\v 8 una caja chaꞌ cuiyaꞌ ꞌin um xa chaꞌan yuꞌhui Espíritu nu Luhui ꞌin Ndiose ꞌin um, xacanꞌ tsa ycuiꞌ um chaꞌ tsuꞌhue re ꞌñan loꞌo neꞌ Jerusalén, loꞌo nchgaa nu ndiꞌin seꞌen lyiꞌya loo Judea, loꞌo Samaria, loꞌo ñaꞌaan sca chcui chendyu.
\v 9 Ñaꞌaan mdyi ycuiꞌ Jesús chaꞌ re, tloo naꞌan yu mꞌni Ndiose chaꞌ ycuen ñi nde niꞌ cuaan, loꞌ ngulyijyi yuꞌhui ñi niꞌ ndlaa.
\v 10 Lja ndon nanꞌ ꞌya yu seꞌen nguia nchcuen ñi nde niꞌ cuaan, tsati ntyin nguꞌya ton tucua yu quiꞌyu nu mten steꞌ,
\v 11 loꞌ juin loꞌo yu: ꞌUn neꞌ Galilea, ¿ñi chaꞌ nanꞌ ꞌya um nde niꞌ cuaan? Cuiꞌ Jesús, ñi nu mꞌni Ndiose chaꞌ ycuen nde niꞌ cuaan, cuiꞌ tsañaꞌan naꞌan um ycuen ñi cuaꞌ ñii, cuiꞌ cuañaꞌan ntsuꞌhui chaꞌ quiaan ñi loo chendyu re xiyaꞌ.
\s Ngulo ton jun ꞌin Matía tñan loo yu Juda
\p
\v 12 Xacanꞌ mdoꞌo jun loo quiꞌya nu naan Olivo, mxitucui jun nde quichen Jerusalén. Cuiꞌ ti nguinu quiꞌya canꞌ seꞌen lca Jerusalén, tsañaꞌan cuiyaꞌ nu nchcuiꞌ lee ꞌin neꞌ nu tca tyiꞌan neꞌ tsaan nu nxitñanꞌ neꞌ.
\v 13 Xa nguila jun quichen canꞌ, yten jun ñaꞌan seꞌen nu cuaꞌ nchca tucua nde cuaan seꞌen nguinu yu Tyo, loꞌo yu Jacobo, loꞌo yu Xuhua, loꞌo yu Ndre, yu Lpe, yu Toma, yu Bartolomé, yu Mateo, loꞌo yu Jacobo sñeꞌ yu Alfeo, loꞌo yu Simón ta yu Zelote, loꞌo yu Juda taꞌa yu Jacobo.
\v 14 Nchgaa jun sca chaꞌ ti ꞌin jun nchcuiꞌ lyiꞌo jun ꞌin Ndiose, tsatlyu loꞌo María jyiꞌan Jesús, loꞌo taꞌa ngula ñi, loꞌo chcua xnan jun cunaꞌan ndiyoꞌ tiꞌin canꞌ.
\v 15 Yatoꞌo sca tsaan canꞌ, mdyiton yu Tyo lja jun taꞌa na, (loꞌ jun nu nguioꞌ tiꞌin canꞌ, ndiyaa jun sca ciento ntsuꞌhui cla jun), loꞌ juin yu ꞌin jun:
\v 16 Nchgaa ꞌun jun taꞌa na, mꞌni chaꞌ yatoꞌo tsañaꞌan nu mxiycuiꞌ Espíritu nu Luhui ꞌin Ndiose ꞌin Davi chaꞌ ꞌin yu Juda, cuiꞌ yu nu ya loꞌo ꞌin nten nu msñi ꞌin Jesús.
\v 17 Tñan ꞌin Ndiose mꞌni hua loꞌo yu, cuiꞌ ta ꞌin hua ncua yu.
\v 18 Una loꞌo tñi nu msuꞌhua lyiyaꞌ neꞌ ꞌin yu siꞌya chaꞌ ngunanꞌ nu mꞌni yu, msiꞌi neꞌ sca yuu, loꞌ seꞌen mchcanꞌ tucui yu mdyu yu loo yuu canꞌ, ytsu niꞌ yu, loꞌ ñaꞌaan tixeꞌen yu mdoꞌo tiꞌin na.
\v 19 Mscua cueen chaꞌ re ñaꞌaan quichen Jerusalén, canꞌ chaꞌ mdiꞌin tyaa neꞌ nii seꞌen canꞌ ca naan na Acéldama, chaꞌ re nchca tiꞌ chcuiꞌ: Yuu seꞌen nguilo tne.
\v 20 Siꞌyana nde chaꞌ nu nguinu scua loo quityi Salmo: —Seꞌen lca tyi yu, ntsuꞌhui chaꞌ quinu tucua lja na, a caja ꞌa xca tucui nu tiꞌ tyiꞌin ꞌin na—. Nde xca chaꞌ nu nchcuiꞌ quityi canꞌ: —Xca tucui ntsuꞌhui chaꞌ sten tñan loo yu—.
\v 21 Canꞌ chaꞌ cuaꞌ ñii, ꞌni chaꞌ tyiꞌo hui sca yu nu taꞌa mdyisnan mdaꞌan hua loꞌo Ñi Xꞌnan na Jesús,
\v 22 tiꞌ tsaan nu mducua tya yu Xuhua ꞌin ñi, tsayaꞌ mdiyaa tsaan nu ycuen ñi nde niꞌ cuaan, siꞌyana ca sca chaꞌ ti ꞌin hua loꞌo yu nu taa hua suun siꞌyana cuaꞌ mdyiquiꞌo ñi.
\v 23 Xacanꞌ ngulo ton jun ꞌin tucua yu nu ntsuꞌhui lja canꞌ, cuiꞌ yu naan See Barsabás, nu nchcuiꞌ neꞌ loꞌo lca Justo, loꞌo xca yu naan Matía.
\v 24 Xacanꞌ ycuiꞌ lyiꞌo jun ꞌin Ndiose, loꞌ juin jun: Ñi Ndiose Xꞌnan hua, scati um jlyo tiꞌ um nchgaa ñaꞌan lca cusya ꞌin nten, quitsaꞌ um ꞌin hua ti ñaꞌan chcuaa yu re cuaꞌ ngulohui um,
\v 25 nu ca sca chaꞌ ti ꞌin hua loꞌo yu nu cuꞌni hua tñan ꞌin um, cuiꞌ tñan nu mxnu tiꞌin yu Juda canꞌ, siꞌyana cuaꞌ nguiaa yu seꞌen nu ntsuꞌhui chaꞌ quiꞌni caꞌan ꞌin yu siꞌya tñan ngunanꞌ nu mꞌni yu.
\v 26 Xacanꞌ ngulo jun xuꞌhue ꞌin chcuaa yu canꞌ, loꞌ Matía mꞌni caꞌan chaꞌ ꞌin siꞌyana ca sca chaꞌ ti ꞌin loꞌo cha tixca yu taꞌa mdaꞌan ca Jesús.
\c 2
\s Xa nguꞌya Espíritu ꞌin jun
\p
\v 1 Xa mdiyaa taꞌa Pentecostés, sca seꞌen ti nguioꞌ tiꞌin jun, nchgaa jun.
\v 2 Tsati ntyin ngune nde niꞌ cuaan tsañaꞌan ne seꞌen ljyaan sca cuiꞌin tnu, cuiꞌ ñaꞌan lcaa ngune ꞌin jun seꞌen ndiꞌin jun ñaꞌan canꞌ,
\v 3 xacanꞌ ncua chcanꞌ nguꞌya tucua sca na que jun cunda scaa jun, tsañaꞌan nchca tiꞌ sca quiiꞌ.
\v 4 Nchgaa jun mtsaꞌan yuꞌhui Espíritu nu Luhui ꞌin Ndiose ꞌin jun, loꞌ mdyisnan ycuiꞌ jun scasca loo chaꞌ nu siꞌi ꞌa chaꞌ nu nchcuiꞌ ca jun, cuiꞌ tsañaꞌan mxiycuiꞌ Espíritu ꞌin jun.
\v 5 Loꞌ Jerusalén canꞌ mdiyaa quiꞌan ꞌa neꞌ judio nu mdoꞌo scasca quichen tnu siꞌyana cuꞌni neꞌ taꞌa canꞌ.
\v 6 Quiꞌan ꞌa nten mdyisnan nguioꞌ tiꞌin seꞌen ngune canꞌ, a ngujlyo ꞌa tiꞌ neꞌ ñi lyijyi chaꞌ tiꞌ quiñan tiꞌ neꞌ siꞌyana cunda scaa neꞌ ngune ꞌin neꞌ ñaꞌan nchcuiꞌ jun loꞌo chaꞌ nu nchcuiꞌ ca neꞌ.
\v 7 Lyee ꞌa yuhue tiꞌ neꞌ loꞌ nchcuiꞌ neꞌ scasca neꞌ: ¿Ta siꞌi neꞌ Galilea ca lca nchgaa nu ndiꞌin nchcuiꞌ chaꞌ re?
\v 8 ¿Ñaꞌan ta ne ꞌin na cunda scaa na chaꞌ nu nchcuiꞌ neꞌ loꞌo chaꞌ nu nchcuiꞌ ca na tiꞌ xa ngula na?
\v 9 Loꞌo neꞌ Partia ndiꞌin neꞌ re loꞌo na, loꞌo neꞌ Media, loꞌo neꞌ Elam, neꞌ mdoꞌo quichen Mesopotamia, neꞌ mdoꞌo seꞌen lca Judea, neꞌ mdoꞌo Capadocia, loꞌo neꞌ Ponto, loꞌo neꞌ nu mdoꞌo seꞌen lyiꞌya loo Asia,
\v 10 neꞌ Frigia, neꞌ Panfilia, loꞌo neꞌ Egipto, loꞌo neꞌ Africa nu mdoꞌo nde loo la quichen Cirene, loꞌ ndiꞌin neꞌ Roma loꞌo na re, nu lca ycuiꞌ ca neꞌ judio, a cunta loꞌo neꞌ nu ntsuꞌhui ñaꞌan chaꞌ nu cuaꞌ ntsuꞌhui na,
\v 11 loꞌo neꞌ Creta loꞌo neꞌ Arabia ndiꞌin neꞌ re, cunda scaa chaꞌ nu nchcuiꞌ na, ne ꞌin na ñaꞌan nchcuiꞌ neꞌ re chaꞌ tsuꞌhue ꞌin Ndiose.
\v 12 Nchgaa neꞌ canꞌ ndiꞌin yuhue tiꞌ neꞌ, a jlyo ꞌa tiꞌ neꞌ ñi lyijyi chaꞌ tiꞌ quiñan tiꞌ neꞌ, loꞌ scasca neꞌ ñichaꞌ taꞌa neꞌ: ¿Ñi chaꞌ ta nchca tiꞌ chcuiꞌ chaꞌ nu nchca re?
\v 13 Una ntsuꞌhui nu nde nstyi lyiꞌo ꞌin yu, loꞌ nchcuiꞌ neꞌ: Na cuꞌhui yu re.
\s Chaꞌ nu culoo ycuiꞌ yu Tyo loꞌo nten
\p
\v 14 Xacanꞌ mdyiton yu Tyo loꞌo taꞌa tixca yu taꞌa mdaꞌan Jesús, loꞌ mdyisnan ycuiꞌ cueen yu loꞌo nten canꞌ: Nchgaa ꞌun, taꞌa lca na neꞌ judio, ꞌun nu ndiꞌin Jerusalén re, ca jlyo tiꞌ um loꞌ quine ꞌin um chaꞌ nu chcuinꞌ loꞌo um.
\v 15 Yu nu ndiꞌin re siꞌi na cuꞌhui yu ñaꞌan nu ꞌun ñan tiꞌ um, loꞌ na tca ntsuꞌhui ti braa cuaꞌ caa tlya.
\v 16 Cuiꞌ ca nu nchca ñaꞌan chaꞌ nu mxiycuiꞌ Ndiose ꞌin yu Joel, loꞌ nchcuiꞌ na:
\v 17 —Ndeñaꞌan ntsuꞌhui chaꞌ cuꞌnin, juin Ndiose, xa tsatii chaꞌ nu nchca loo chendyu re: Cuꞌnin chaꞌ chaꞌan yuꞌhui nchgaa nten loꞌo Espíritu ꞌñan, xiycuinꞌ ꞌin sñeꞌ um, yu tsa suhue ti ñaꞌan xñii yu chaꞌ nu ntsuꞌhui chaꞌ ca, cuiꞌ cuañaꞌan yu cula chcuiꞌ sla yu chaꞌ canꞌ.
\v 18 Nu chaꞌ ñi sꞌni, cuꞌnin chaꞌ chaꞌan yuꞌhui Espíritu ꞌñan ꞌin nguso ꞌñan, yu quiꞌyu loꞌo nu cunaꞌan chcuiꞌ canꞌ chaꞌ tsuꞌhue ꞌñan loꞌo nten.
\v 19 Nanꞌ cuꞌnin chaꞌ nu tnu nde niꞌ cuaan loꞌo loo chendyu re: Ntsuꞌhui chaꞌ quilo tne, ntsuꞌhui chaꞌ squin quiiꞌ nu tnu, loꞌ xtyi sñi ti quinu tiꞌin xacanꞌ.
\v 20 Cucha ntsuꞌhui chaꞌ tyuhuiꞌ na, loꞌ cooꞌ chca ngaꞌá na ñaꞌan nchca tiꞌ tne. Tsatoꞌo chaꞌ re xa tiꞌ lyijyi cuꞌni cuiyaꞌ ñi nu lca Xꞌnan um chaꞌ ꞌin nten chendyu, cuiꞌ tsaan nu cuꞌnin sca chaꞌ nu tlyu xa ca chcanꞌ loo chaꞌ cuiyaꞌ ꞌñan.
\v 21 Nchgaa nu tsa quiꞌan tiꞌ siꞌyana lcan Xꞌnan, canꞌ nu tyiꞌo laa—.
\v 22 ꞌUn neꞌ Israel, quine ꞌin um chaꞌ nu chcuinꞌ: Cuaꞌ jlyo tiꞌ um siꞌyana Jesús Nazaret, loꞌo chaꞌ cuiyaꞌ nu mdaa Ndiose ꞌin ñi quiꞌan ꞌa chaꞌ nu tnu mꞌni ñi tloo naꞌan um, loꞌ ncua cuiyaꞌ tiꞌ um siꞌyana Ndiose ngulohui ꞌin ñi.
\v 23 Una siꞌya chaꞌ nu cuaꞌ mdiꞌin tyaa Ndiose cuaꞌ sꞌni yatoꞌo nguinu Jesús tuyaaꞌ um, loꞌ mdyaa um cunta ꞌin ñi ꞌin neꞌ nducunꞌ loꞌ yjui neꞌ ꞌin ñi loo cusi,
\v 24 una Ndiose mꞌni ñi chaꞌ mdyiquiꞌo Jesús, ngulyoo ñi ꞌin canꞌ seꞌen ndijin neꞌ nu tiꞌi, a ncua ꞌin chaꞌ ndyija canꞌ xñi suꞌhua yaaꞌ ꞌin ñi.
\v 25 Siꞌyana ndeñaꞌan nguaꞌan scua Davi chaꞌ ꞌin ñi: —Nchgaa xaa ndiꞌin Ñi Xꞌnan na loꞌon, a sca chaꞌ ntsuꞌhui chaꞌ cutsen siꞌyana ndon ñi tsoꞌ cueen ꞌñan.
\v 26 Canꞌ chaꞌ tsuꞌhue ntsuꞌhui tiqueen, nducui tinꞌ nchcuinꞌ chaꞌ re, a ndyuhue tinꞌ xa ntsuꞌhui chaꞌ cajan,
\v 27 siꞌyana a xnu suꞌhua um cusya ꞌñan yaaꞌ chaꞌ ndyija, ñi a taa um yaꞌ cutsoꞌ tiꞌin cunanꞌ, nanꞌ nu lca Sñeꞌ um nu luhui lati.
\v 28 Nguloꞌo um sca tucueen nu taa chendyu ꞌñan, cuiꞌ um cuꞌni um chaꞌ ca tsuꞌhue lca tiqueen la tloo um—.
\v 29 ꞌUn nu ndiꞌin re, nchca tinꞌ chcuinꞌ la yaꞌ loꞌo um chaꞌ ꞌin Davi nu ncua nten cula ꞌin na, ñaꞌan ngujui yu loꞌ mtsiꞌ yu, loꞌ hasta cuaꞌ ñii jlyo tiꞌ na la mtsiꞌ yu.
\v 30 Ncua yu sca nu mxiycuiꞌ Ndiose ꞌin, cuiꞌ ñi mdiꞌin tyaa tla ñi chaꞌ re loꞌo yu, ngujlyo tsuꞌhue tiꞌ yu siꞌyana loo ta nten ꞌin yu ntsuꞌhui chaꞌ caan Cristo nu ntsuꞌhui chaꞌ culo ca tñan ꞌin na,
\v 31 tiꞌ xacanꞌ cuaꞌ naꞌan Davi ñaꞌan mdyiquiꞌo Cristo, canꞌ chaꞌ juin yu siꞌyana a nguinu yuꞌhui cusya ꞌin ñi yaaꞌ chaꞌ ndyija, ñi a ytsoꞌ tiꞌin cunanꞌ ñi.
\v 32 Cuiꞌ ñi nu lca Jesús mꞌni Ndiose chaꞌ mdyiquiꞌo, loꞌ nchgaa hua ndaa hua suun siꞌyana cuañaꞌan yatoꞌo.
\v 33 Xacanꞌ mchcuan ñi sca chaꞌ cuiyaꞌ nu tlyu nde tsoꞌ cueen ꞌin Ndiose, a cunta mchcuan ñi Espíritu nu cuaꞌ mdiꞌin tyaa Sti ñi chaꞌ chaꞌan yuꞌhui niꞌ cusya ꞌin na, cuiꞌ chaꞌ nu naꞌan tloo um cuaꞌ ñii loꞌ ne ꞌin um.
\v 34 Siꞌyana yu Davi a nchca scuen yu nde niꞌ cuaan xa nu juin yu: —Ndiose Xꞌnan na juin ñi loꞌo Ñi Xꞌnan: Chcua tsoꞌ cueen ꞌñan,
\v 35 lja xicuꞌnin ꞌin taꞌa cusuun quinu nde tuquiyaꞌ—.
\v 36 Canꞌ chaꞌ cuaꞌ ñii, ꞌun neꞌ Israel, ca cuiyaꞌ ca tiꞌ um siꞌyana Jesús nu mjyiꞌin caꞌan um ꞌin loo cusi, Ndiose cuaꞌ mꞌni ñi chaꞌ lca Ñi Xꞌnan na, loꞌ lca ñi Cristo.
\v 37 Cuiꞌ xaa nguꞌya sca tuꞌhua niꞌ cusya ꞌin neꞌ xa ngune ꞌin neꞌ chaꞌ canꞌ, loꞌ mñichaꞌ neꞌ ꞌin yu Tyo loꞌo nchgaa la ñaꞌan taꞌa mdaꞌan Jesús: ꞌUn jun taꞌa na, ¿ñi na tca cuꞌni hua?
\v 38 Xacanꞌ mxcuen yu Tyo canꞌ: Tyaa tiꞌ um ꞌin Ndiose loꞌ chcua tya um loꞌo chaꞌ cuiyaꞌ ꞌin Jesucristo siꞌyana cuten quiꞌya nducui um, loꞌ chaꞌan yuꞌhui Espíritu nu Luhui ꞌin Ndiose ꞌin um.
\v 39 Siꞌyana ntsuꞌhui chaꞌ quiꞌni caꞌan chaꞌ tsuꞌhue re ꞌin um, loꞌo sñeꞌ um, loꞌo nchgaa nten nu ndiꞌin tijyoꞌ loo, nchgaa nu cuaꞌ ngulohui Ndiose Xꞌnan na.
\v 40 Quiꞌan ꞌa chaꞌ tiꞌ ycuiꞌ la yu Tyo loꞌo nten canꞌ, mdaa yu chaꞌ tnu tiquee ꞌin neꞌ, loꞌ juin yu: Tyiꞌo tsoꞌ um tucueen ngunanꞌ nu nguiaa um.
\v 41 Yatoꞌo nchgaa nu mꞌni cunta chaꞌ nu ycuiꞌ yu Tyo canꞌ mducua tya neꞌ, ticuiꞌ tsaan canꞌ ndiyaa neꞌ tsa snan mii neꞌ nu mchca sca chaꞌ ti ꞌin neꞌ loꞌo jun.
\v 42 Tsatlyu ndiꞌin loꞌo jun chaꞌ nu ndloꞌo yu taꞌa mdaꞌan Jesús, sca chaꞌ ti ꞌin jun nchcu jun, cuiꞌ cuañaꞌan sca chaꞌ ti ꞌin jun nchcuiꞌ lyiꞌo jun ꞌin Ndiose.
\s Tsañaꞌan ndiꞌin jun tiꞌ culoo
\p
\v 43 Yten sca ytsen niꞌ cusya ꞌin nchgaa tucui siꞌya scasca chaꞌ nu tnu nguiꞌni yu taꞌa mdaꞌan Jesús.
\v 44 Nchgaa jun nu cuaꞌ ya quiꞌan tiꞌ ꞌin ñi, sca chaꞌ ti ꞌin jun loꞌo taꞌa jun, loꞌ tsatlyu ndiꞌin na ꞌin jun nchgaa jun.
\v 45 Ntsuꞌhui nu yjuiꞌ seꞌen ndlo tñan, ntsuꞌhui nu yjuiꞌ na nu ndiꞌin ꞌin, loꞌ mtsa jun tñi canꞌ cuaꞌ ñaꞌaan ꞌni cha ꞌin jun cunda scaa jun.
\v 46 Sca chaꞌ ti ꞌin jun ndiyoꞌ tiꞌin jun nchgaa tsaan niꞌ lyaa, tsatlyu nchcu jun ñaꞌan ꞌin cunda scaa jun, tsuꞌhue ntsuꞌhui tiquee jun ndiꞌin jun loꞌo suun ñaꞌan,
\v 47 nꞌni tnu jun ꞌin Ndiose, loꞌ nten ndiꞌin quichen canꞌ ndyuꞌhui cuiyaꞌ tiꞌ neꞌ ñaꞌan ndiꞌin jun loꞌo taꞌa jun. Cunda scaa tsaan canꞌ nguiꞌni Ñi Xꞌnan na chaꞌ nchca tyun la jun, nchgaa nu ntsuꞌhui chaꞌ tyiꞌo laa.
\c 3
\s Mchca sca yu mchcunꞌ quiyaꞌ
\p
\v 1 Yatoꞌo sca tsaan yu Tyo loꞌo yu Xuhua nguiaa yu seꞌen nducua laa, tsa ntsuꞌhui braa cuaꞌ snan siin xa nchcuiꞌ lyiꞌo neꞌ ꞌin Ndiose.
\v 2 Tulaa nu naan ndyiꞌya ꞌa, nchgaa tsaan ndyiꞌan loꞌo neꞌ ꞌin sca yu nu mchcunꞌ quiyaꞌ tiꞌ xa ngula, canꞌ nchcua jñan yu tñi ꞌin neꞌ nu nguiten canꞌ.
\v 3 Xa naꞌan yu siꞌyana cuaꞌ sten yu Tyo loꞌo yu Xuhua niꞌ lyaa, mjñan yu tñi ꞌin chcuaa yu canꞌ.
\v 4 Una yu Tyo loꞌo yu Xuhua mxinaꞌan tsuꞌhue ca yu tloo yu canꞌ, loꞌ juin yu ꞌin: Ñaꞌan um jan ñi.
\v 5 Xacanꞌ sa ꞌa yu siꞌyana cuaꞌ xñi yu tñi ꞌin yu canꞌ.
\v 6 Una yu Tyo canꞌ juin yu ꞌin: A loꞌo tñi ꞌñan, una taan na nu loꞌo ꞌñan. Loꞌo chaꞌ cuiyaꞌ ꞌin Jesucristo Nazaret, tyiton um loꞌ tyiꞌan um.
\v 7 Xacanꞌ msñi yu Tyo canꞌ yaaꞌ yu tsoꞌ cueen nu xiton yu ꞌin, ticuiꞌ xaa mchca tsuꞌhue quiyaꞌ yu.
\v 8 Sca juesa ti mdyiton yu, mdyisnan mdaꞌan yu, yten yu loꞌo chcuaa yu canꞌ niꞌ lyaa, mdaꞌan yu, mdoꞌo cuaan yu, mꞌni tnu yu ꞌin Ndiose siꞌyana cuaꞌ mchca yu.
\v 9 Nchgaa neꞌ naꞌan neꞌ ñaꞌan ndaꞌan yu loꞌ nguiꞌni tnu yu ꞌin Ndiose.
\v 10 Cuiꞌ xaa yuꞌhui lyoo neꞌ ꞌin yu siꞌyana lca yu nu nchcua njñan tñi canꞌ tulaa nu naan ndyiꞌya ꞌa. Yuhue ꞌa tiꞌ neꞌ, a cunta ytsen neꞌ siꞌya chaꞌ nu yatoꞌo canꞌ.
\s Chaꞌ nu ycuiꞌ yu Tyo tulaa
\p
\v 11 Yu nu mchca quiyaꞌ canꞌ nsñi ton yu ꞌin yu Tyo loꞌo yu Xuhua seꞌen nu nguiaꞌ tucui tulaa nu naan Salomón. Nchgaa neꞌ msnan neꞌ mdiyaa neꞌ seꞌen ndon yu siꞌyana lyee yuhue tiꞌ neꞌ.
\v 12 Xa naꞌan yu Tyo siꞌyana cuaꞌ nguioꞌ tiꞌin nten canꞌ, mdyisnan ycuiꞌ yu loꞌo neꞌ: ꞌUn neꞌ Israel, ¿ñi chaꞌ nduhue ꞌa tiꞌ um chaꞌ re? ¿Ñi chaꞌ nanꞌ ꞌya um ꞌin hua, ta nxqueꞌ tiꞌ um siꞌyana loꞌo chaꞌ cuiyaꞌ ꞌin hua, uta loꞌo chaꞌ tsuꞌhue ꞌin hua mchca yu re?
\v 13 —Ndiose ꞌin Abraham, loꞌo Isaac, loꞌo Jacob, cuiꞌ Ndiose ꞌin nten cula ꞌin na—, mꞌni ñi chaꞌ ycuen cuaan chaꞌ ꞌin Sñeꞌ ñi nu lca Jesús, ñi nu mdyaa um cunta ꞌin tuyaaꞌ yu Pilato, ñi nu ncua tiꞌ yu culaa yu, loꞌ ꞌun a mslyaa um.
\v 14 Yatoꞌo mscuan tloo um ꞌin ñi nu Luhui lati, nu Ñi ndiꞌin chaꞌ ꞌin, loꞌ nde mjñan um chaꞌ lyaa sca yu nu ndujui nten.
\v 15 Yjui um ꞌin ñi nu ndaa chendyu ꞌin na, una Ndiose mꞌni ñi chaꞌ mdyiquiꞌo canꞌ, loꞌ huareꞌ ndaa hua suun chaꞌ re.
\v 16 Siꞌya chaꞌ nu ndiya quiꞌan tiꞌ hua ꞌin Jesús mchca yu re, yu nu ndyuꞌhui lyoo um loꞌ nanꞌ ꞌya um, loꞌ siꞌyana ndiya quiꞌan tiꞌ hua ꞌin ñi, canꞌ chaꞌ siyaꞌ ti mꞌni chca ñi ꞌin yu tloo naꞌan um.
\v 17 Una cuaꞌ ñii, ꞌun jun taꞌa na, jlyo tiꞌ hua siꞌyana mꞌni um chaꞌ re loꞌo chaꞌ tinto tsatlyu loꞌo jun nu ndlo tñan ꞌin um.
\v 18 Una Ndiose mꞌni ñi chaꞌ yatoꞌo chaꞌ re tsañaꞌan chaꞌ nu cuaꞌ mxiycuiꞌ ñi ꞌin nchgaa nguso ꞌin ñi, siꞌyana Cristo ntsuꞌhui chaꞌ tyijyin ñi nu tiꞌi.
\v 19 Canꞌ chaꞌ cuaꞌ ñii, tyaa tiꞌ um ꞌin Ndiose siꞌyana chca quiꞌya nducui um, loꞌ Ñi Xꞌnan na cuꞌni ñi chaꞌ xitñanꞌ cusya ꞌin um,
\v 20 loꞌ caꞌan tñan ñi ꞌin Jesucristo, ñi nu cuaꞌ mdoꞌo ton siꞌyana culo laa ꞌin um.
\v 21 Una nta ñi la niꞌ cuaan lja nu tsatoꞌo nchgaa la ñaꞌan chaꞌ nu cuaꞌ mdiꞌin tyaa Ndiose, tsañaꞌan chaꞌ nu cuaꞌ mxiycuiꞌ ñi ꞌin nchgaa nu ngulohui ñi ꞌin tiꞌ cuaꞌ sꞌni.
\v 22 Siꞌyana yu Moisé ndeñaꞌan juin yu ꞌin nten cula ꞌin na: —Ndiose nu lca Xꞌnan na juin ñi siꞌyana lja taꞌa na ntsuꞌhui chaꞌ caan sca yu nu xiycuiꞌ Ndiose ꞌin tsañaꞌan nu nxiycuiꞌ Ndiose ꞌñan nanꞌ, canꞌ nu cuꞌni cunta um chaꞌ nu chcuiꞌ.
\v 23 Nchgaa nu a cuan xuꞌhue chaꞌ nu chcuiꞌ canꞌ, caja nu culo tsoꞌ ꞌin—.
\v 24 Cuiꞌ cuañaꞌan nchgaa la ñaꞌan yu nu mxiycuiꞌ Ndiose ꞌin, tiꞌ yu Samuel nu ljyaan nde loo, ticuiꞌ chaꞌ re mdaꞌan ycuiꞌ yu.
\v 25 Ncua yu nten cula ꞌin na, canꞌ chaꞌ nguiꞌni caꞌan chaꞌ tsuꞌhue re ꞌin na, cuiꞌ chaꞌ nu mdiꞌin tyaa Ndiose loꞌo nten cula ꞌin na, loꞌ ndeñaꞌan juin ñi ꞌin Abraham: —Loo ta nten ꞌin ntsuꞌhui chaꞌ caan sca sñeꞌ nu ljyan loꞌo chaꞌ tsuꞌhue ꞌin nchgaa nten chendyu—.
\v 26 ¿Ta siꞌi lja na culo nducua la mxiton Ndiose ꞌin scati Sñeꞌ ñi nu taa chaꞌ tsuꞌhue ꞌin na loꞌo um, ñaꞌan ca siꞌyana xiloꞌo chonꞌ na quiꞌya nguiꞌni na cunda scaa na?
\c 4
\s Mꞌni cuiyaꞌ neꞌ chaꞌ ꞌin yu Tyo loꞌo yu Xuhua
\p
\v 1 Lja nchcuiꞌ yu loꞌo nten canꞌ mdiyaa yu nu ndlo tñan niꞌ lyaa, tsatlyu loꞌo yu nu lca que ꞌin yu silyiya nu ntsuꞌhui cuan niꞌ lyaa canꞌ, loꞌo neꞌ saduceo.
\v 2 Tiꞌi tiꞌ neꞌ siꞌyana ndloꞌo yu ꞌin nten siꞌyana Jesús cuaꞌ mdyiquiꞌo ñi, loꞌ siꞌya chaꞌ canꞌ nchca cuiyaꞌ tiꞌ neꞌ siꞌyana ntsuꞌhui chaꞌ tyiquiꞌo nu cuaꞌ ngujui.
\v 3 Msñi neꞌ silyiya ꞌin chcuaa yu canꞌ, msuꞌhua yu ꞌin naꞌan chcuan, loꞌ siꞌyana cuaꞌ msiin la xca tsaan canꞌ ncua cuiyaꞌ chaꞌ ꞌin yu.
\v 4 Una quiꞌan ꞌa nten nu ngune ꞌin chaꞌ ꞌin Ndiose ya quiꞌan tiꞌ neꞌ ꞌin ñi. Tsalca yu quiꞌyu nu ya quiꞌan tiꞌ canꞌ, ndiyaa yu caꞌyu mii yu.
\v 5 Yatoꞌo xca tsaan canꞌ, cuiꞌ Jerusalén nguioꞌ tiꞌin yu nu ndlo tñan niꞌ lyaa ꞌin neꞌ judio, loꞌo quiꞌyu cula, loꞌo neꞌ escriba,
\v 6 loꞌo yu Anás, yu nu ndlo ca tñan niꞌ lyaa canꞌ, loꞌo yu Caifás, loꞌo sca yu nu naan Xuhua, loꞌo yu Jantro, loꞌo nchgaa la ñaꞌan nten ꞌin yu nu ndlo ca tñan niꞌ lyaa canꞌ nguioꞌ tiꞌin canꞌ.
\v 7 Xa nu cuaꞌ ndon chcuaa yu canꞌ tloo neꞌ mñichaꞌ neꞌ ꞌin yu: ¿La jui chaꞌ cuiyaꞌ re ꞌin um, loꞌ ti nu mdaa ꞌin na loꞌo tsañaꞌan nu mꞌni um?
\v 8 Yu Tyo canꞌ mtsaꞌan yuꞌhui Espíritu nu Luhui ꞌin Ndiose ꞌin yu, loꞌ juin yu: ꞌUn nu ndlo tñan ꞌin hua, nchgaa ꞌun nu lca quiꞌyu cula ꞌin neꞌ Israel,
\v 9 cuaꞌ ñii nchca cuiyaꞌ chaꞌ ꞌin hua siꞌya chaꞌ tsuꞌhue nu yatoꞌo ꞌin yu nu ncua tiꞌi re, loꞌ ñaꞌan ncua mchca yu,
\v 10 canꞌ chaꞌ quitsanꞌ ꞌin um, loꞌ ca jlyo tiꞌ ꞌun neꞌ Israel, siꞌyana loꞌo chaꞌ cuiyaꞌ ꞌin Jesús Nazaret, ñi nu lca Cristo, ñi nu mjyiꞌin caꞌan um ꞌin loo cusi loꞌ mꞌni Ndiose chaꞌ mdyiquiꞌo, loꞌ siꞌya Jesús ndon yu re tsuꞌhue lca ꞌin yu.
\v 11 Cuiꞌ Jesús lca ñi —quee nu mscuan tloo um, ꞌun nu lca cuityi naꞌan, cuaꞌ ñii lca ñi quee nu nsñi ton ꞌin naꞌan—.
\v 12 Ñi a caja ꞌa xca tucui nu tca culo laa ꞌin na, cuiꞌ ca nu scati ñi nu lca Jesús mdaa Ndiose ꞌin nten chendyu nu tca xicuten quiꞌya ꞌin na.
\v 13 Nduhue ꞌa tiꞌ neꞌ ꞌin yu Tyo loꞌo yu Xuhua canꞌ siꞌyana loꞌo chaꞌ tnu tiquee ꞌin yu nchcuiꞌ yu, jlyo tiꞌ neꞌ siꞌyana a sca chaꞌ mꞌni chaꞌan yu, ñi a sca tñan lyiꞌya yu, xacanꞌ ncua cuiyaꞌ tiꞌ neꞌ siꞌyana loꞌo Jesús taꞌa mdaꞌan yu.
\v 14 A xca ꞌa chaꞌ tiꞌ ncua chcuiꞌ neꞌ loꞌo yu, siꞌyana sca seꞌen ti ndon yu loꞌo yu nu mchca canꞌ.
\v 15 Xacanꞌ ngulo neꞌ tñan siꞌyana tyiꞌo yu nde lyiyaꞌ lja cuꞌni cuiyaꞌ neꞌ chaꞌ ꞌin yu loꞌo taꞌa nducua neꞌ canꞌ,
\v 16 loꞌ ndeñaꞌan nchcuiꞌ neꞌ: ¿Ñaꞌan cuꞌni na loꞌo yu cua? Cuaꞌ mꞌni yu sca chaꞌ nu tnu loꞌ ñaꞌaan quichen Jerusalén cuaꞌ mscua cueen chaꞌ re, a ndyijyi ꞌa ñaꞌan suꞌhua cutsiꞌ na chaꞌ re.
\v 17 Cuaꞌ ñii siꞌyana a quine yuꞌhui chaꞌ re lyee la, tsuꞌhue lati xicutsen na ꞌin yu siꞌyana a chcuiꞌ ꞌa yu loꞌo ñi xca tucui chaꞌ ꞌin Jesús chcui nu nguiaa nde loo la re.
\v 18 Xacanꞌ mxiꞌya neꞌ ꞌin yu, loꞌ tla ꞌa mdiꞌin tyaa neꞌ chaꞌ loꞌo yu siꞌyana a chcuiꞌ ꞌa yu loꞌo ñi xca tucui chaꞌ ꞌin Jesús, ñi a culoꞌo ꞌa yu ꞌin nten chaꞌ canꞌ.
\v 19 Una yu Tyo loꞌo yu Xuhua canꞌ mxcuen yu ꞌin neꞌ: ¿Ti ñaꞌan ta chaꞌ re nu tsuꞌhue la na tloo Ndiose? ¿Ta tsuꞌhue la chaꞌ ca jaꞌan hua ꞌin um, uta na ca jaꞌan hua ꞌin Ndiose?
\v 20 Siꞌyana huareꞌ a tca cula tiꞌ hua chcuiꞌ hua loꞌo nten ñaꞌan chaꞌ nu cuaꞌ naꞌan hua loꞌ ngune ꞌin hua.
\v 21 Tla ꞌa chaꞌ ycuiꞌ neꞌ loꞌo yu seꞌen nu xicutsen tiꞌ yu, xacanꞌ ngulaa neꞌ ꞌin yu, a jui ñaꞌan culo quiꞌya neꞌ ꞌin yu siꞌyana ytsen neꞌ ꞌin nten quiꞌan canꞌ, siꞌyana nchgaa neꞌ mꞌni tnu neꞌ ꞌin Ndiose siꞌya chaꞌ nu yatoꞌo canꞌ,
\v 22 siꞌyana yu nu ncua tiꞌi canꞌ cuaꞌ ndyijyin tucua yla yjan ntsuꞌhui yu, loꞌ Ndiose mꞌni chca ꞌin yu.
\s Xa mjñan jun ꞌin Ndiose siꞌyana taa ñi chaꞌ tnu tiquee ꞌin jun
\p
\v 23 Xa ngulaa neꞌ ꞌin yu, nguila yu seꞌen ndiꞌin nchgaa la ñaꞌan taꞌa ndaꞌan yu, mdaa yu suun ñaꞌan chaꞌ nu ycuiꞌ yu nu ndlo ca tñan niꞌ lyaa loꞌo quiꞌyu cula canꞌ.
\v 24 Xa ngune ꞌin jun ñaꞌan chaꞌ nu mdaa yu canꞌ, sca chaꞌ ti ꞌin jun mdyisnan ycuiꞌ lyiꞌo jun ꞌin Ndiose, loꞌ juin jun: Ndiose Xꞌnan hua, ꞌun ntsuꞌhui chaꞌ cuiyaꞌ yaaꞌ um loꞌo nchgaa loo chaꞌ, —cuiꞌ um mtñan um niꞌ cuaan, loꞌo chendyu re, loꞌo tyiꞌa tujoꞌo, cuiꞌ um mtñan um nchgaa loo na nu ndiꞌin ꞌin na—,
\v 25 cuiꞌ um mxiycuiꞌ um ꞌin Davi nu ncua nguso ꞌin um, loꞌ juin um: ¿—Ñi chaꞌ ta lyee ꞌa nguilo tiꞌin nten re, ñi chaꞌ nsuꞌhua loo neꞌ chaꞌ nu a ntsuꞌhui cunta?
\v 26 Yu nu lca ree loo chendyu re, tsatlyu loꞌo yu nu ntsuꞌhui chaꞌ cuiyaꞌ yaaꞌ, ndiyoꞌ tiꞌin yu seꞌen nu xuun yu loꞌon nanꞌ nu lca Xꞌnan yu, loꞌo Cristo nu ngulohuin—.
\v 27 Chaꞌ ñi siꞌyana cuañaꞌan nguioꞌ tiꞌin nten re, yu Herode loꞌo yu Poncio Pilato, neꞌ gentil loꞌo neꞌ Israel, seꞌen nu ñaꞌan tiꞌi neꞌ ꞌin Sñeꞌ um, ñi nu luhui lati nu ngulohui um, nu lca Jesús,
\v 28 siꞌyana cuꞌni neꞌ tsañaꞌan chaꞌ nu cuaꞌ mdiꞌin tyaa um cuaꞌ sꞌni, nchgaa chaꞌ nu ntsuꞌhui chaꞌ ca.
\v 29 Cuaꞌ ñii, ꞌun Ñi Xꞌnan hua, xñi um cunta ñaꞌan nchcuiꞌ tiꞌi tiꞌ neꞌ ꞌin hua, una taa um chaꞌ cuiyaꞌ ꞌin hua nu lca nguso ꞌin um, siꞌyana a xicutsen tiꞌ hua chcuiꞌ hua chaꞌ tsuꞌhue ꞌin um loꞌo nten,
\v 30 lja xacanꞌ cuꞌni chca um ꞌin nu tiꞌi, cuꞌni um scasca chaꞌ nu tnu loꞌo chaꞌ cuiyaꞌ ꞌin Sñeꞌ um, ñi nu luhui lati ꞌin um nu lca Jesús.
\v 31 Ñaꞌaan mdyi ycuiꞌ lyiꞌo jun ꞌin Ndiose, nguñan seꞌen nguioꞌ tiꞌin jun, mtsaꞌan yuꞌhui Espíritu nu Luhui ꞌin Ndiose ꞌin nchgaa jun, loꞌ mꞌni tnu tiquee jun ycuiꞌ jun chaꞌ tsuꞌhue ꞌin Ndiose.
\s Tsatlyu ndiꞌin na ꞌin jun
\p
\v 32 Sca chaꞌ ti ꞌin jun nu cuaꞌ ya quiꞌan tiꞌ ꞌin Jesús, loꞌ sca cusya ti ꞌin jun ndiꞌin jun canꞌ, a tucui nu nchcuiꞌ siꞌyana na ꞌin lca na nu ndiꞌin ꞌin, siꞌyana tsatlyu ndiꞌin na ꞌin jun.
\v 33 Yu taꞌa mdaꞌan ca Jesús, tnu ꞌa tiquee yu nchcuiꞌ yu loꞌo nten siꞌyana mdyiquiꞌo Ñi Xꞌnan na Jesús, loꞌ Ndiose mꞌni ñi chaꞌ mtsaꞌan yuꞌhui chaꞌ tsuꞌhue ꞌin ñi niꞌ cusya ꞌin jun.
\v 34 A xca ꞌa jun tiꞌ nguiꞌni chaꞌ ꞌin jun, siꞌyana nchgaa jun nu ndiꞌin yuu ꞌin, ta nducua naꞌan ꞌin, ndyijuiꞌ jun ꞌin na loꞌ ndiya loꞌo jun ñaꞌaan tñi canꞌ,
\v 35 ndaa jun ꞌin na ꞌin yu taꞌa mdaꞌan Jesús, loꞌ yu canꞌ cuaꞌ ntsa yu ꞌin na cuaꞌ ñaꞌaan ꞌni chaꞌ ꞌin jun cunda scaa jun.
\v 36 Lja jun canꞌ ndiꞌin sca yu naan See nu mdoꞌo seꞌen lca Chipre, una yu taꞌa mdaꞌan Jesús mdiꞌin tyaa nii yu ca naan yu Bernabé. (Nii yu nchca tiꞌ chcuiꞌ: Sñeꞌ nu ndaa chaꞌ tnu tiquee.) Lca yu ta nten ꞌin neꞌ Leví.
\v 37 Loꞌo yu canꞌ yjuiꞌ yu sca yuu ꞌin yu, loꞌ ñaꞌaan tñi canꞌ mdaa yu ꞌin yu taꞌa mdaꞌan Jesús.
\c 5
\s Chaꞌ ꞌin Ananía loꞌo Safira
\p
\v 1 Una xca yu naan Ananía loꞌo Safira cuilyiꞌo yu, yjuiꞌ jun sca yuu ꞌin jun,
\v 2 una mꞌni cuiyaꞌ jun chaꞌ siꞌyana quinu tsa chinꞌ tñi canꞌ ꞌin jun, loꞌ xa mdaa yu tñi canꞌ mꞌni yu chaꞌ siꞌyana ñaꞌaan na mdaa yu ꞌin yu taꞌa mdaꞌan Jesús.
\v 3 Xacanꞌ juin yu Tyo ꞌin yu Ananía: ¿Ñi chaꞌ mdaa um yaꞌ nguñi lyiꞌo Laxaꞌan ꞌin um, ncua tiꞌ um cuñilyiꞌo um ꞌin Espíritu nu Luhui ꞌin Ndiose, loꞌ mxuꞌhua seꞌen um tichinꞌ tñi nu yjuiꞌ um yuu canꞌ?
\v 4 ¿Ta siꞌi seꞌen ndlo ca um tñan lca na? Xa yjuiꞌ um ꞌin na, ¿ta siꞌi cunta ꞌin um su tñi canꞌ? ¿Ñi chaꞌ mdaa um yaꞌ yten chaꞌ ngunanꞌ niꞌ cusya ꞌin um? Una siꞌi tloo nten ycuiꞌ um chaꞌ cuiñi re, cuiꞌ ca nu tloo Ndiose.
\v 5 Ñaꞌaan ngune ꞌin yu Ananía chaꞌ canꞌ mdlyu yu loꞌ ngujui yu. Nchgaa neꞌ yten sca ytsen ꞌin neꞌ xa ynan neꞌ chaꞌ canꞌ.
\v 6 Cuiꞌ xaa mdiyaa tucua snan yu tsa suhue ti, nguxen teꞌ ꞌin yu loꞌ ya tsiꞌ ꞌin yu.
\v 7 Tsa mdijin snan braa xa mdiyaan nten ꞌin yu nu ngujui canꞌ, una a ngujlyo tiꞌ neꞌ ñaꞌan chaꞌ nu yatoꞌo canꞌ.
\v 8 Xacanꞌ juin yu Tyo canꞌ ꞌin neꞌ: Quitsaꞌ um ꞌin hua, ¿ta cuiꞌ tsacua ti ncua yuu nu yjuiꞌ um canꞌ? Mxcuen neꞌ ꞌin yu: Cuiꞌ tsacua ti ncua na.
\v 9 Juin yu Tyo ꞌin neꞌ: ¿Ñi chaꞌ ncua sca chaꞌ ti ꞌin um loꞌ ncua tiꞌ um cuñilyiꞌo um ꞌin Espíritu ꞌin Ñi Xꞌnan na? Ñaꞌan jan ñi, tunaꞌan cua cuaꞌ nguila yu nu ya tsiꞌ ꞌin nten ꞌin um, loꞌ cuiꞌ cuañaꞌan tsa loꞌo yu ꞌin um.
\v 10 Cuiꞌ ñaꞌan lcaa mdlyu neꞌ cunaꞌan canꞌ tloo yu Tyo canꞌ, loꞌ ngujui neꞌ. Ñaꞌaan nguila yu tsa suhue ti canꞌ naꞌan yu siꞌyana cuaꞌ ngujui neꞌ. Xacanꞌ ya tsiꞌ yu ꞌin neꞌ siiꞌ seꞌen su cuilyiꞌo neꞌ.
\v 11 Yten sca ytsen niꞌ cusya ꞌin nchgaa jun taꞌa na, cuiꞌ cuañaꞌan loꞌo nchgaa la ñaꞌan nten nu ynan chaꞌ canꞌ.
\s Scasca chaꞌ nu tnu mꞌni Ndiose
\p
\v 12 Siꞌya chaꞌ cuiyaꞌ nu mdaa Ndiose ꞌin yu taꞌa mdaꞌan Jesús, ncua mꞌni yu scasca chaꞌ nu tnu tloo naꞌan nten canꞌ, sca chaꞌ ti ꞌin jun ndiyoꞌ tiꞌin jun seꞌen nguiaꞌ tucui tulaa Salomón canꞌ.
\v 13 Nchgaa la ñaꞌan nten canꞌ tsuꞌhue ꞌa chaꞌ nchcuiꞌ neꞌ ꞌin jun, una a msti tiꞌ neꞌ quioꞌ tiꞌin neꞌ sca seꞌen ti loꞌo jun,
\v 14 siyaꞌ cuañaꞌan nde lyee la nguia nguiton nten nu cuaꞌ ya quiꞌan tiꞌ ꞌin Ñi Xꞌnan na, tsañaꞌan quiꞌan yu quiꞌyu loꞌ cuañaꞌan quiꞌan jun cunaꞌan.
\v 15 A cunta ndyiꞌan loꞌo neꞌ ꞌin nu tiꞌi, mdiꞌin tyaa neꞌ ꞌin loo jaaꞌ uta loo quiꞌñan tuꞌhua tucueen seꞌen ntsuꞌhui chaꞌ tyijyin yu Tyo, loꞌ siyaꞌ xñii ti yu chaꞌ quiꞌni caꞌan ꞌin nu tiꞌi canꞌ, loꞌ nchca.
\v 16 Scasca quichen nu ndiꞌin cuiꞌ ti canꞌ, ndyiꞌo loꞌo neꞌ ꞌin nu tiꞌi loꞌo nu ntsuꞌhui cuiꞌin xaꞌan ꞌin, mdiya loꞌo neꞌ ꞌin seꞌen ndiꞌin jun quichen Jerusalén, loꞌ nchgaa canꞌ mchca.
\s Xa mꞌni lyiꞌo ꞌtnan neꞌ ꞌin yu Tyo loꞌo yu Xuhua
\p
\v 17 Yu nu ndlo ca tñan niꞌ lyaa tsatlyu loꞌo taꞌa ndaꞌan yu, cuiꞌ ta ꞌin neꞌ Saduceo, yten sca chaꞌ xlya niꞌ cusya ꞌin neꞌ,
\v 18 loꞌ ngulo neꞌ tñan siꞌyana quinu yu taꞌa mdaꞌan Jesús, loꞌ tsaa yu naꞌan chcuan.
\v 19 Una ticuiꞌ tla canꞌ nguꞌya ton sca angujle ꞌin Ñi Xꞌnan na seꞌen ntsuꞌhui yu, loꞌ msla tunaꞌan chcuan canꞌ, xa cuaꞌ ngulyoo ꞌin yu xacanꞌ juin:
\v 20 Yaa um loꞌ sten um niꞌ lyaa, loꞌ chcuiꞌ la um loꞌo nten ñaꞌan nguiaa chaꞌ ꞌin chendyu nu cui ti.
\v 21 Mꞌni yu cunta chaꞌ canꞌ, loꞌ ñaꞌaan nguꞌya xaa yten yu niꞌ lyaa, loꞌ mdyisnan nguloꞌo yu ꞌin nten canꞌ. Una lja xacanꞌ, yu nu ndlo ca tñan niꞌ lyaa loꞌo taꞌa ndaꞌan yu, mxiꞌya yu ꞌin nchgaa yu nu ntsuꞌhui chaꞌ cuiyaꞌ yaaꞌ, tsatlyu loꞌo quiꞌyu cula ꞌin neꞌ Israel, loꞌ ngulo neꞌ tñan ꞌin yu silyiya siꞌyana quia lyoo yu ꞌin yu nu ntsuꞌhui ñaꞌan chcuan canꞌ.
\v 22 Una xa mdiyaa yu naꞌan yu siꞌyana a tucui ꞌa ntsuꞌhui canꞌ, xacanꞌ nguia ytsaꞌ yu ꞌin nchgaa yu nu nguioꞌ tiꞌin canꞌ,
\v 23 loꞌ juin yu: Nu chaꞌ ñi sꞌni, xa mdiyaa hua seꞌen nducua naꞌan chcuan cua, naꞌan hua siꞌyana nchcun tsuꞌhue na, loꞌ yu nu ntsuꞌhui cuan ꞌin na ndon yu tunaꞌan canꞌ, una xa msla hua ꞌin na, a tucui ꞌa ntsuꞌhui canꞌ.
\v 24 Yu nu ndlo ca tñan niꞌ lyaa loꞌo yu nu lca que ꞌin silyiya nu ntsuꞌhui cuan niꞌ lyaa, loꞌo nchgaa la ñaꞌan yu nu ndlo tñan canꞌ, quiꞌan ꞌa chaꞌ mdaꞌan tiquee yu, loꞌ nguñan tiꞌ yu ñaꞌan tsatoꞌo chaꞌ re.
\v 25 Una cuiꞌ xaa mdiyaa sca yu nu mdaa suun, loꞌ juin yu: Yu nu msuꞌhua um naꞌan chcuan, cuaꞌ ñii ndloꞌo yu ꞌin nten niꞌ lyaa cua.
\v 26 Xacanꞌ mdoꞌo yu nu lca que loꞌo silyiya ꞌin yu, nguia ꞌya yu ꞌin chcuaa yu canꞌ, loꞌo chaꞌ tsuꞌhue ti nguian loꞌo neꞌ ꞌin yu, siꞌyana nguitsen neꞌ chaꞌ ta jyiꞌin nten canꞌ quee ꞌin neꞌ.
\v 27 Xa nguila loꞌo neꞌ ꞌin yu, mdyaa neꞌ cunta ꞌin yu yaaꞌ nu ntsuꞌhui chaꞌ cuꞌni cuiyaꞌ chaꞌ ꞌin yu, loꞌ yu nu ndlo ca tñan niꞌ lyaa canꞌ mñichaꞌ ꞌin yu:
\v 28 ¿Ta siꞌi na cuaꞌ ycuiꞌ na loꞌo um siꞌyana a culoꞌo ꞌa um ꞌin nten chaꞌ ꞌin yu canꞌ? Cuaꞌ ñii, ñaꞌaan Jerusalén cuaꞌ ngune ꞌin neꞌ chaꞌ nu ndloꞌo um, loꞌ nchca tiꞌ um suꞌhua um quiꞌya chonꞌ hua siꞌya chaꞌ nu ngujui yu.
\v 29 Mxcuen yu Tyo canꞌ loꞌo nchgaa la ñaꞌan taꞌa mdaꞌan Jesús: ꞌNi chaꞌ ca jaꞌan hua ꞌin Ndiose culo nducua la, loꞌ siꞌi ꞌin nten chendyu.
\v 30 Cuiꞌ Ndiose ꞌin nten cula ꞌin na nguaꞌan tñan ñi ꞌin Jesús, loꞌ ꞌun yjui um ꞌin ñi xa mjyiꞌin caꞌan um ꞌin ñi sca siiꞌ yca.
\v 31 ꞌIn ñi cuaꞌ mdaa Ndiose sca chaꞌ cuiyaꞌ nu tlyu tsoꞌ cueen ꞌin ñi, siꞌyana ca Ñi nu ndon loo, Ñi nu ndlo laa ꞌin na, seꞌen nu xiloꞌo chonꞌ neꞌ Israel quiꞌya nguiꞌni neꞌ, loꞌ cuꞌni ñi chaꞌ tlyu tiꞌ ꞌin neꞌ.
\v 32 Huareꞌ ndaa hua suun chaꞌ re tsatlyu loꞌo Espíritu nu Luhui ꞌin Ndiose, cuiꞌ Espíritu nu ndaa Ndiose chuꞌhui niꞌ cusya ꞌin nchgaa nu ca jaꞌan ꞌin ñi.
\v 33 Una nde lyee la ycuen tiqueꞌ neꞌ xa ngune ꞌin neꞌ chaꞌ canꞌ, loꞌ ncua tiꞌ neꞌ cujui neꞌ ꞌin yu.
\v 34 Una lja canꞌ mdyiton sca yu fariseo naan Gamaliel, lca yu sca nu ndloꞌo chaꞌ ꞌin lee, loꞌ lyee ndyuꞌhui cuiyaꞌ tiꞌ nten ꞌin yu. Ngulo yu tñan siꞌyana culyoo neꞌ ꞌin yu taꞌa mdaꞌan Jesús tsa xiꞌi nde lyiyaꞌ,
\v 35 xacanꞌ juin yu ꞌin taꞌa nducua yu: ꞌUn neꞌ Israel, xñi na cunta ñaꞌan cuꞌni na loꞌo yu cua.
\v 36 A sꞌni lyee mdaꞌan sca yu ncua naan Teudas, juin yu siꞌyana ntsuꞌhui chaꞌ cuiyaꞌ yaaꞌ yu, loꞌ mxoꞌ tiꞌin yu jacua ciento yu quiꞌyu nu ncua sca chaꞌ ti ꞌin loꞌo yu, una xa ngujui yu, nchgaa taꞌa mdaꞌan yu cuaꞌ la tucueen ngunaan yu.
\v 37 Chonꞌ ndeꞌen canꞌ mdaꞌan sca yu Galilea nu ncua naan Juda, cuiꞌ xa mdaꞌan sñi neꞌ nii nten quichen, cuiꞌ cuañaꞌan quiꞌan nten mxoꞌ tiꞌin yu, una xa ngujui yu ticuiꞌ ti ñaꞌan yatoꞌo ꞌin taꞌa mdaꞌan yu, cuaꞌ la tucueen ngunaan neꞌ.
\v 38 Canꞌ chaꞌ cuaꞌ ñii chcuinꞌ loꞌo um: Tsuꞌhue lati culaa na ꞌin yu re, a ta quiyaꞌ na ꞌin yu loꞌo chaꞌ nu ndloꞌo yu, siꞌyana chaꞌ ta lca na chaꞌ ꞌin nten chendyu, tsatii tuhue chaꞌ ꞌin yu.
\v 39 Una chaꞌ lca na chaꞌ ꞌin Ndiose, a tca chcui ndijin na loo chaꞌ cua, ñaꞌan tuꞌ quija lyoo na nsuun na loꞌo Ndiose.
\v 40 Nguinu tsuꞌhue tiquee neꞌ loꞌo ñaꞌan chaꞌ nu ycuiꞌ yu. Xacanꞌ mxiꞌya neꞌ ꞌin yu taꞌa mdaꞌan Jesús, ngulo neꞌ tñan siꞌyana quiꞌni yu loꞌ mdiꞌin tyaa tla neꞌ sca chaꞌ loꞌo yu siꞌyana a chcuiꞌ a yu chaꞌ ꞌin Jesús, xacanꞌ ngulaa neꞌ ꞌin yu.
\v 41 Tsuꞌhue ntsuꞌhui tiquee yu mdyiꞌo yu seꞌen canꞌ siꞌyana mdaa Ndiose chaꞌ cuiyaꞌ mdijin yu nu tiꞌi siꞌya Jesús.
\v 42 Nchgaa tsaan ndloꞌo yu ꞌin nten niꞌ lyaa uta la naꞌan ꞌin neꞌ, a ndlaꞌ tiꞌ yu nchcuiꞌ yu chaꞌ tsuꞌhue ꞌin Jesucristo.
\c 6
\s Xa ngulo ton jun ꞌin tsa cati yu nu ta yaaꞌ
\p
\v 1 Cuiꞌ lja xacanꞌ nguia nguiton jun nu ntsuꞌhui chaꞌ ꞌin Jesús, una mdyisnan msuꞌhua quiꞌya taꞌa jun nu nchcuiꞌ chaꞌ griego loꞌo nu nchcuiꞌ chaꞌ hebreo, siꞌyana lyee la nda yaaꞌ jun ꞌin neꞌ cunaꞌan nu nguinu loꞌo chaꞌ ycuiꞌ ti nu nchcuiꞌ chaꞌ hebreo que ꞌin nu nchcuiꞌ chaꞌ griego.
\v 2 Xacanꞌ taꞌa tichcua yu canꞌ mxoꞌ tiꞌin yu ꞌin nchgaa jun nu cuaꞌ ntsuꞌhui chaꞌ ꞌin Jesús, loꞌ juin yu: A ndyiꞌo tñan culaꞌ tiꞌ hua chcuiꞌ hua chaꞌ ꞌin Ndiose, loꞌ cutsa hua na nu cunajoꞌo ꞌin jun.
\v 3 Canꞌ chaꞌ, ꞌun jun taꞌa na, culohui um tsa cati yu quiꞌyu lja na re, yu nu ndyiꞌya ñaꞌan chendyu nduꞌhui, yu nu mtsaꞌan yuꞌhui loꞌo Espíritu nu Luhui ꞌin Ndiose, yu nu tiyaa, canꞌ nu xnu na ꞌin cuꞌni tñan re.
\v 4 Loꞌ huareꞌ tsa quiñan la hua chcuiꞌ lyiꞌo hua ꞌin Ndiose loꞌ chcuiꞌ hua chaꞌ tsuꞌhue ꞌin ñi.
\v 5 Nguinu tsuꞌhue tiquee jun loꞌo chaꞌ nu ycuiꞌ yu. Xacanꞌ ngulo ton jun ꞌin yu Steba, sca yu nu lyee ndiya quiꞌan tiꞌ nu mtsaꞌan yuꞌhui Espíritu nu Luhui ꞌin Ndiose ꞌin, loꞌo yu Lpe, yu Prócoro, Nicanor, yu Timón, yu Parmenas, loꞌo yu Nicolás nu mdoꞌo quichen Antioquía, sca yu cuaꞌ ntsuꞌhui ñaꞌan chaꞌ ꞌin neꞌ judio.
\v 6 Mdiya loꞌo jun ꞌin yu tloo yu taꞌa mdaꞌan Jesús, ycuiꞌ lyiꞌo yu ꞌin Ndiose, loꞌ mdiꞌin tyaa yu yaaꞌ yu que.
\v 7 Tsa nducua lyee la nguia nguine yuꞌhui chaꞌ tsuꞌhue ꞌin Ñi Xꞌnan na quichen Jerusalén, loꞌ cuañaꞌan lyee la nchca quiꞌan jun nu cuaꞌ ntsuꞌhui chaꞌ ꞌin Jesús, cuiꞌ cuañaꞌan tyun yu nu ndlo tñan niꞌ lyaa ꞌin neꞌ judio ya quiꞌan tiꞌ ꞌin Jesús.
\s Xa nguinu yu Steba
\p
\v 8 Yu Steba canꞌ mtsaꞌan yuꞌhui yu loꞌo chaꞌ tsuꞌhue ꞌin Ndiose, ndaꞌan loꞌo yu chaꞌ cuiyaꞌ ꞌin ñi, canꞌ chaꞌ nguiꞌni yu scasca chaꞌ nu tnu tloo nten canꞌ.
\v 9 Yatoꞌo tucua snan yu judio nu ndiyoꞌ tiꞌin seꞌen nchcuiꞌ neꞌ lca Liberto, loꞌo chcua xnan yu nu mdoꞌo quichen Cirene loꞌo Alejandría, loꞌo yu nu mdoꞌo seꞌen lca Cilicia loꞌo Asia, mdyisnan ycuiꞌ tyijyin neꞌ loꞌo yu Steba canꞌ.
\v 10 A ngujlyo ꞌa tiꞌ neꞌ ñaꞌan tiꞌ xcuen neꞌ ꞌin yu, siꞌyana loꞌo chaꞌ tiyaa nchcuiꞌ yu siꞌya chaꞌ cuiyaꞌ nu mdaa Espíritu ꞌin Ndiose ꞌin yu.
\v 11 Xacanꞌ msuꞌhua lyiyaꞌ neꞌ ꞌin tucua snan nu chcuiꞌ siꞌyana ngune ꞌin ñaꞌan mdaja yu Steba canꞌ ꞌin Moisé loꞌo ꞌin Ndiose.
\v 12 Siꞌya chaꞌ cuiñi canꞌ nguilo tiꞌin nten, quiꞌyu cula loꞌo neꞌ escriba. Siyaꞌ nguꞌya ti neꞌ msñi neꞌ ꞌin yu Steba canꞌ, loꞌ ya loꞌo neꞌ ꞌin yu seꞌen nu ntsuꞌhui chaꞌ ca cuiyaꞌ chaꞌ ꞌin yu.
\v 13 Ngulo ton neꞌ chcua xnan nu chcuiꞌ chaꞌ cuiñi: Yu re a ndlaꞌ tiꞌ yu nchcuiꞌ caꞌan yu ꞌin laa nu luhui ꞌin na, a cunta loꞌo chaꞌ ꞌin lee ndaja yu.
\v 14 Ngune ꞌin hua juin yu siꞌyana Jesús Nazaret ntsuꞌhui chaꞌ cujlyo yu seꞌen re, loꞌ xitsaꞌan yu nchgaa ñaꞌan chaꞌ nu nguloꞌo Moisé ꞌin na.
\v 15 Nchgaa nu nducua seꞌen nchca cuiyaꞌ quiꞌya canꞌ, mxinaꞌan neꞌ tloo yu Steba canꞌ, loꞌ ncua chcanꞌ tloo yu tsañaꞌan tloo angujle.
\c 7
\s Chaꞌ nu ycuiꞌ yu Steba xa yjui neꞌ ꞌin yu
\p
\v 1 Yu nu ndlo ca tñan niꞌ lyaa canꞌ mñichaꞌ ꞌin yu Steba: ¿Ta chaꞌ ñi ñaꞌan nchcuiꞌ nchgaa yu re chaꞌ ꞌin?
\v 2 Xacanꞌ mdyisnan ycuiꞌ yu Steba: ꞌUn nu lca nten cula ꞌin na, quine ꞌin um chaꞌ nu chcuinꞌ. Ndiose ñi nu tlyu lati nguloꞌo tloo ꞌin nten cula ꞌin na nu ncua naan Abraham seꞌen lca Mesopotamia, xa nu tiꞌ lyijyi tsa tiꞌin yu seꞌen lca Harán,
\v 3 loꞌ juin Ndiose ꞌin yu: —Xnu yuu quichen tyi, tyiꞌo tsoꞌ lja ta nten ꞌin, loꞌ tsa tiꞌin xca loo yuu seꞌen nu nanꞌ quitsanꞌ ꞌin—.
\v 4 Xacanꞌ mdoꞌo yu Abraham seꞌen ndiꞌin neꞌ caldeo, mdiya tiꞌin yu quichen Harán, loꞌ xa ngujui sti yu mxitsaꞌan tiꞌin Ndiose ꞌin yu loo yuu seꞌen ndiꞌin na cuaꞌ ñii.
\v 5 —Ñi seꞌen quiꞌya ton sca tsoꞌ quiyaꞌ ti yu—, a mdaa ñi chaꞌ cuiyaꞌ culo yu tñan. —Una mdiꞌin tyaa ñi sca chaꞌ loꞌo yu siꞌyana ntsuꞌhui chaꞌ quinu yuu canꞌ ꞌin yu loꞌo sñeꞌ yu—, siyaꞌ ñi sca sñeꞌ yu loꞌ a nchca tyiꞌin xacanꞌ.
\v 6 Ndeñaꞌan juin Ndiose ꞌin yu: —Sñeꞌ ta nten ꞌin ntsuꞌhui chaꞌ tsa tiꞌin xca loo yuu, canꞌ xitijin neꞌ ꞌin nu tiꞌi loꞌ ca nguso ꞌin neꞌ tsaniꞌ jacua ciento yjan—.
\v 7 Una nanꞌ cuꞌni xñan bsya ꞌin quichen tnu canꞌ, juin Ndiose, —loꞌ tsa tucua xaa xitucui loo yuu seꞌen ntsuꞌhui chaꞌ cuꞌni tnu ꞌñan—.
\v 8 Xacanꞌ mdiꞌin tyaa Ndiose sca chaꞌ loꞌo Abraham siꞌyana ca circuncida ꞌin yu, chonꞌ ndeꞌen canꞌ mdaa ñi sca sñeꞌ yu nu ncua naan Isaac, cuiꞌ cuañaꞌan mꞌni yu loꞌo Isaac xa ntsuꞌhui yu snuꞌ ti tsaan, cuañaꞌan ya quiñan Isaac canꞌ loꞌo Jacob, loꞌ cuañaꞌan mꞌni canꞌ loꞌo taꞌa tichcua sñeꞌ yu nu lca nten cula ꞌin na.
\v 9 Siꞌya chaꞌ jñan tiꞌ ꞌin canꞌ yatoꞌo yjuiꞌ ꞌin yu See taꞌa ngula seꞌen lca Egipto, una Ndiose a ngula yaaꞌ ñi ꞌin yu See canꞌ,
\v 10 mda yaaꞌ ñi ꞌin yu loꞌo nchgaa nu tiꞌi yaan ꞌin yu, —mdaa ñi chaꞌ tiyaa ꞌin yu loꞌ mꞌni ñi chaꞌ yuꞌhui cuiyaꞌ tiꞌ Faraón, ree ꞌin neꞌ Egipto, ꞌin yu See canꞌ, ngulo ton neꞌ ꞌin yu ca yu bsya ñaꞌaan seꞌen lca Egipto, tsatlyu loꞌo naꞌan ꞌin neꞌ—.
\v 11 Chonꞌ ndeꞌen canꞌ nguꞌya bjuꞌñan ñaꞌaan seꞌen lyiꞌya loo Egipto loꞌo Canaán, yaan nu tiꞌi tnu seꞌen canꞌ, hasta loꞌo nten cula ꞌin na a jui ꞌa na nu cunajoꞌo ꞌin neꞌ.
\v 12 Xa ynan yu Jacob chaꞌ siꞌyana ndiꞌin trigo seꞌen lca Egipto, nguaꞌan tñan yu ꞌin sñeꞌ yu, cuiꞌ nu lca nten cula ꞌin na, siꞌyana tsa ꞌya neꞌ trigo seꞌen canꞌ.
\v 13 Xa nu cuaꞌ nchca tucua yaꞌ ndyiꞌan neꞌ, la xacanꞌ mtsaꞌ la yu See siꞌyana lca yu taꞌa ngula neꞌ, loꞌ yuꞌhui lyoo tsuꞌhue yu ree Faraón ñi ta nten lca yu See canꞌ.
\v 14 Ngulo yu See tñan ꞌin taꞌa ngula yu, siꞌyana quia ꞌya yu ꞌin Jacob nu lca sti yu loꞌo nchgaa ta nten ꞌin yu, loo nchgaa neꞌ ndiyaa neꞌ snan yla ntsuꞌhui ꞌtñu neꞌ.
\v 15 Cuañaꞌan yatoꞌo mdiyaa yu Jacob seꞌen lca Egipto, canꞌ ngujui yu, loꞌ cuiꞌ cuañaꞌan loꞌo nten cula ꞌin na.
\v 16 Xa mdoꞌo neꞌ canꞌ nguian loꞌo neꞌ tijyan nten cula ꞌin na seꞌen lca Siquem, mdiꞌin tyaa neꞌ ꞌin na niꞌ tuquee nu yjuiꞌ sñeꞌ Hamor ꞌin Abraham nu ncua nten cula ꞌin na.
\v 17 Lja mdiꞌin neꞌ quichen Egipto lyee yton neꞌ, una Ndiose a ngujlya tiꞌ ñi ñaꞌan chaꞌ nu cuaꞌ mdiꞌin tyaa ñi loꞌo Abraham,
\v 18 yatoꞌo mdoꞌo ton xca ree seꞌen lca Egipto, una a yuꞌhui lyoo ꞌa yu chaꞌ ꞌin yu See canꞌ.
\v 19 Yu ree canꞌ loꞌo chaꞌ cuiñi ngunan yu ñaꞌan nu xitijin yu ꞌin neꞌ nu tiꞌi, loꞌ ngulo yu tñan ꞌin neꞌ siꞌyana xcuan neꞌ sñeꞌ neꞌ siꞌyana a cuton ꞌa neꞌ.
\v 20 Lja xacanꞌ ncua cuneꞌ yu Moisé, canꞌ nu yuꞌhui cuiyaꞌ tiꞌ Ndiose ꞌin, loꞌ tsaniꞌ snan cooꞌ nten cula ꞌin yu mꞌni coꞌo ꞌin yu.
\v 21 Una ngula yaaꞌ jun ꞌin yu siꞌya chaꞌ nu mdiꞌin tyaa ree canꞌ, yatoꞌo ticuiiꞌ sñeꞌ ree Faraón nu cunaꞌan mchcuan cunta ꞌin yu, mꞌni coꞌo neꞌ ꞌin yu ñaꞌan nchca tiꞌ sca sñeꞌ ca neꞌ.
\v 22 Moisé canꞌ mꞌni chaꞌan yu tsañaꞌan chaꞌ ꞌin neꞌ Egipto, loꞌ mdon loꞌo yu sca chaꞌ cuiyaꞌ nu tlyu.
\v 23 Xa ntsuꞌhui yu tucua yla yjan, ncua lca tiquee yu tsa naꞌan yu seꞌen ndlyu taꞌa yu, neꞌ Israel.
\v 24 Xa naꞌan yu siꞌyana sca neꞌ Egipto ndyijui tiꞌin neꞌ ꞌin ta nten ꞌin yu, cuiꞌ xaa ngula yu ꞌin loꞌ yjui yu ꞌin neꞌ Egipto canꞌ.
\v 25 Nguñan tiꞌ yu siꞌyana nchgaa ta nten ꞌin yu quiꞌya chaꞌ tiyaa siꞌyana Ndiose lca nu nguaꞌan tñan ꞌin yu nu culaa yu ꞌin neꞌ, una a nguñan tiꞌ neꞌ cuañaꞌan.
\v 26 Xca tsaan canꞌ mdiyaa yu seꞌen nsuun tucua yu quiꞌyu, msuꞌhue yu cusuun canꞌ, loꞌ juin yu: Sca ta ti nten lca um, ¿ñi chaꞌ ta nsuun um?
\v 27 Yu nu nsuun canꞌ mducua yaaꞌ yu ꞌin yu Moisé, loꞌ juin yu ꞌin: ¿—Ti nu mdiꞌin tyaa ꞌin lca sca bsya uta sca bse lja hua re?
\v 28 ¿Ta na ñan tiꞌ cujui ꞌñan ñaꞌan yjui ꞌin sca yu Egipto lca—?
\v 29 Xa ngune ꞌin yu chaꞌ canꞌ, msnan yu loꞌ mdiyaa yu xca loo yuu seꞌen lca Madián, canꞌ jui cuilyiꞌo yu loꞌ mdiꞌin tucua sñeꞌ yu.
\v 30 Tucua yla yjan mdijin, yu Moisé ndaꞌan yu sca seꞌen ngutyi seꞌen nducua quiꞌya Sinai, canꞌ nguloꞌo tloo sca angujle ꞌin yu loo quiiꞌ ndiquin lja yca quicheꞌ canꞌ.
\v 31 Yuhue ꞌa tiꞌ yu xa naꞌan yu chaꞌ canꞌ, ya ton yu cuiꞌ la siꞌyana cuꞌni quii tsuꞌhue yu ꞌin na, xacanꞌ ngune ꞌin yu ycuiꞌ Ñi Xꞌnan na:
\v 32 —Nanꞌ lcan Ndiose ꞌin nten cula ꞌin, Ndiose ꞌin Abraham, Ndiose ꞌin Isaac, Ndiose ꞌin Jacob. Mdyisnan mchcuan yu Moisé loꞌ a mxinaꞌan ꞌa yu seꞌen ndiquin canꞌ—.
\v 33 Loꞌ juin Ñi Xꞌnan na ꞌin yu: —Lyoo quinan ntsuꞌhui quiyaꞌ siꞌyana seꞌen luhui ꞌa ndon.
\v 34 Nanꞌ cuaꞌ naꞌan loꞌ jlyo tinꞌ siꞌyana chaꞌ ñi ndijin sñeꞌ nu tiꞌi seꞌen lca Egipto, cuaꞌ ngune ꞌñan tsañaꞌan nu njñan neꞌ ꞌñan, loꞌ nguꞌya ton siꞌyana culo laan ꞌin neꞌ. Canꞌ chaꞌ cuaꞌ ñii caꞌan tñan ꞌin tsaa seꞌen lca Egipto—.
\v 35 Yatoꞌo yu nu mscuan tloo neꞌ ꞌin xa juin neꞌ: ¿Ti nu mdiꞌin tyaa ꞌin lca sca bsya uta sca bse lja hua? Canꞌ yu nu nguaꞌan tñan Ndiose ꞌin xa nguloꞌo tloo angujle ꞌin yu seꞌen ndiquin yca quicheꞌ canꞌ, siꞌyana ca yu sca nu ndon loo lati nu culo laa ꞌin ta nten ꞌin yu tuyaaꞌ neꞌ Egipto.
\v 36 Mdoꞌo loꞌo yu ꞌin neꞌ seꞌen lca Egipto xa mꞌni yu scasca chaꞌ nu tnu, loꞌo seꞌen lca tujoꞌo ngaꞌá, cuiꞌ cuañaꞌan loo yuu ngutyi seꞌen mdaꞌan neꞌ tsaniꞌ tucua yla yjan.
\v 37 Cuiꞌ Moisé lca nu juin ꞌin neꞌ Israel: Lja ta nten ꞌin na, Ndiose Xꞌnan na, ntsuꞌhui chaꞌ xiton ñi sca nu xiycuiꞌ ñi ꞌin tsañaꞌan nchcuinꞌ loꞌo um cuaꞌ ñii, canꞌ nu cuꞌni cunta um chaꞌ nu chcuiꞌ.
\v 38 Cuiꞌ Moisé canꞌ lca nu mdon lja nten cula ꞌin na seꞌen nguioꞌ tiꞌin neꞌ Israel loo yuu ngutyi canꞌ, xa ycuiꞌ sca angujle loꞌo yu loo quiꞌya Sinai, loꞌ mchcuan yu cunta chaꞌ tsuꞌhue nu taa chendyu ꞌin na.
\v 39 Una nten cula ꞌin na a ncua jaꞌan neꞌ ꞌin yu, cuiꞌ ca nu nde mscuan tloo neꞌ ꞌin yu, loꞌ ncua lca tiquee neꞌ xitucui neꞌ seꞌen lca Egipto,
\v 40 xa juin neꞌ ꞌin yu Aaron: —Tñan um lcuin joꞌo ꞌin hua nu chcua loo seꞌen nguiaa hua, siꞌyana yu Moisé nu ngulyoo ꞌin hua seꞌen lca Egipto, a jlyo tiꞌ hua ñi na ncua ꞌin yu—.
\v 41 Xacanꞌ mtñan neꞌ sca lcuin bta cuneꞌ nu ca joꞌo xꞌnan neꞌ, loꞌ mdiquin tucua neꞌ ꞌni tloo canꞌ, loꞌ siꞌya na nu mtñan yaaꞌ neꞌ canꞌ, tsuꞌhue ntsuꞌhui tiquee neꞌ nguiꞌni neꞌ taꞌa.
\v 42 Canꞌ chaꞌ Ndiose ngula yaaꞌ ꞌin neꞌ, loꞌ mdyisnan mꞌni tnu neꞌ na nu nducua niꞌ cuaan, cuiꞌ tsañaꞌan chaꞌ nu mxiycuiꞌ Ndiose ꞌin yu nu nguaꞌan scua quityi cuaꞌ sꞌni: —Un neꞌ Israel, ¿ta ñan tiꞌ um siꞌyana ꞌñan nanꞌ mꞌni tnu um xa mdiquin tucua um scasca ꞌni tloo joꞌo xꞌnan um xa mdaꞌan um loo yuu ngutyi tsaniꞌ tucua yla yjan?
\v 43 Nguꞌya um sca teꞌ naꞌan ꞌin joꞌo Moloc, loꞌo lcuin cuii nu lca joꞌo xꞌnan um Renfán, lcuin nu mtñan yaaꞌ nten mꞌni tnu um. Canꞌ chaꞌ cuaꞌ ñii cuꞌnin chaꞌ tsa loꞌo neꞌ ꞌin um sca seꞌen tijyoꞌ lati que ꞌin Babilonia—.
\v 44 Cuiꞌ cuañaꞌan mdaꞌan loꞌo nten cula ꞌin na teꞌ naꞌan nu nguiaꞌ xa mdiꞌin tyaa Ndiose chaꞌ loꞌo neꞌ seꞌen ngutyi canꞌ, loꞌ mtñan yu Moisé ꞌin na chcui ñaꞌan ngulo Ndiose tñan ꞌin yu, tsañaꞌan lcuin nu naꞌan xñii yu.
\v 45 A cunta mdiya loꞌo neꞌ teꞌ naꞌan canꞌ xa yten Josué loo yuu ꞌin neꞌ gentil, loꞌ mchcuan yu cunta ꞌin na siꞌyana Ndiose lca nu mꞌni chaꞌ mdoꞌo neꞌ seꞌen canꞌ, canꞌ mdiꞌin teꞌ naꞌan canꞌ tsayaꞌ mdiyaa tsaan nu ngulo yu Davi tñan.
\v 46 Canꞌ yu nu yuꞌhui cuiyaꞌ tiꞌ Ndiose ꞌin, loꞌ mjñan yu chaꞌ cuiyaꞌ chaꞌ tca tñan yu sca seꞌen tyiꞌin ñi, cuiꞌ Ndiose ꞌin Jacob.
\v 47 Una yu Salomón mꞌni yu chaꞌ nguiaꞌ sca laa ꞌin ñi.
\v 48 Chaꞌ ñi siꞌyana Ndiose, ñi nu tlyu lati nducua niꞌ cuaan, a ndyiꞌin ñi niꞌ lyaa mtñan yaaꞌ nten chendyu, tsañaꞌan nchcuiꞌ quityi nu nguaꞌan scua nguso ꞌin ñi cuaꞌ sꞌni:
\v 49 —Niꞌ cuaan lca na seꞌen nducuan, loꞌ chendyu re lca na seꞌen nxitñanꞌ quiyanꞌ, ¿ñaꞌan ta tñan um sca naꞌan ꞌñan, nchcuiꞌ Ñi Xꞌnan na, uta sca seꞌen ntsuꞌhui chaꞌ xitñanꞌ?
\v 50 ¿Ta siꞌi cuinꞌ mtñan nchgaa loo na nu chcanꞌ loo chendyu re?
\v 51 ꞌUn lca um nten nu lyeꞌ tiꞌ, tla cusya ꞌin um, loꞌ nducun tunscan um—, scañaꞌan ti nxcuan tloo um Espíritu nu Luhui ꞌin Ndiose. Tsañaꞌan mꞌni nten cula ꞌin na, loꞌ cuañaꞌan nguiꞌni um cuaꞌ ñii.
\v 52 ¿Ta ndeꞌen nu mxiycuiꞌ Ndiose ꞌin cuaꞌ sꞌni, na a mnaꞌan tiꞌi nten cula ꞌin na? Yatoꞌo yjui um ꞌin nu mdaꞌan ycuiꞌ siꞌyana ntsuꞌhui chaꞌ caan sca nu ñi ndiꞌin chaꞌ ꞌin, a sꞌni mdyaa um ꞌin ñi tuyaaꞌ neꞌ nducunꞌ loꞌ yjui um ꞌin ñi,
\v 53 ꞌun nu mchcuan cunta chaꞌ ꞌin lee nu mdaa angujle, una a mxuꞌhua seꞌen um ꞌin na.
\v 54 Xa ngune ꞌin neꞌ chaꞌ canꞌ, lyee ꞌa ycuen tiquee neꞌ loꞌo yu Steba canꞌ, hasta nchcu lyiꞌya neꞌ ndon neꞌ.
\v 55 Una yu Steba mtsaꞌan yuꞌhui Espíritu nu Luhui ꞌin Ndiose ꞌin yu, mxinaꞌan yu nde niꞌ cuaan loꞌ naꞌan yu sca xaa nu tsuꞌhue ñaꞌan seꞌen nducua Ndiose, loꞌ tsoꞌ cueen ꞌin ñi nducua Jesús.
\v 56 Loꞌ juin yu: Ñaꞌan jan ñi, chcanꞌ ꞌñan nguila tucua niꞌ cuaan, loꞌ Yu Quiꞌyu nu Mdoꞌo nde niꞌ Cuaan nducua ñi tsoꞌ cueen ꞌin Ndiose.
\v 57 Xacanꞌ msiꞌya yja cueen neꞌ, loꞌ mducun neꞌ tunscan neꞌ, loꞌ siyaꞌ nguꞌya ti neꞌ chonꞌ yu,
\v 58 ngulo neꞌ ꞌin yu nde tuꞌhua quichen, canꞌ mjyiꞌin neꞌ quee ꞌin yu, loꞌ teꞌ tucuin nu lcoꞌ neꞌ mdyaa neꞌ cunta ꞌin na ꞌin sca yu naan Saulo.
\v 59 Yu Steba canꞌ ycuiꞌ lyiꞌo yu ꞌin Ndiose lja njyiꞌin neꞌ quee ꞌin yu, loꞌ juin yu: Jesús, ꞌun ñi nu lca Xꞌnan hua, chcuan um cunta cusya ꞌñan.
\v 60 Ñaꞌaan mdyiꞌya xtyinꞌ yu, ycuiꞌ cueen yu: Ñi Xꞌnan hua, a cuꞌni um cunta ñaꞌan quiꞌya nguiꞌni neꞌ re loꞌon. Xa mdyi ycuiꞌ yu chaꞌ re ngujui yu.
\c 8
\s Mxitijin yu Saulo ꞌin jun nu tiꞌi
\p
\v 1 Yu Saulo, sca chaꞌ ti ꞌin yu loꞌo neꞌ nu yjui ꞌin yu Steba canꞌ. Cuiiꞌ tsaan canꞌ nde lyee la mxitijin neꞌ nu tiꞌi ꞌin jun nu cuaꞌ ya quiꞌan tiꞌ ꞌin Jesús, jun nu ndiꞌin Jerusalén, cuaꞌ la tucueen ngunaan jun. Ntsuꞌhui jun nu mdiyaa seꞌen lyiꞌya loo Judea loꞌo Samaria, una taꞌa tichcua yu taꞌa mdaꞌan Jesús, a la mdoꞌo yu.
\v 2 Neꞌ nu ya tsiꞌ ꞌin yu Steba canꞌ lca neꞌ chacuiꞌ nten nu suun, loꞌ lyee ynan loꞌo neꞌ ꞌin yu.
\v 3 Una yu Saulo canꞌ, lyee la mxitijin yu ꞌin jun taꞌa na nu tiꞌi, yten yu cunda scaa naꞌan, loꞌ ncuan quii suhueꞌ yu ꞌin jun, yaa jun naꞌan chcuan, yu quiꞌyu loꞌo jun cunaꞌan.
\s Xa mdiyaa chaꞌ tsuꞌhue ꞌin Ndiose quichen Samaria
\p
\v 4 Jun nu cuaꞌ la tucueen ngunaan canꞌ, mdyisnan ycuiꞌ jun chaꞌ tsuꞌhue ꞌin Jesús seꞌen mdiyaa jun.
\v 5 Sca yu naan Lpe mdiyaa yu quichen Samaria, loꞌ mdyisnan ycuiꞌ yu chaꞌ tsuꞌhue ꞌin Cristo.
\v 6 Sca chaꞌ ti ꞌin neꞌ ndon nscan neꞌ chaꞌ nu nchcuiꞌ yu, siꞌyana naꞌan neꞌ chaꞌ nu tnu nguiꞌni yu,
\v 7 siꞌyana xa ndlo yu cuiꞌin xaꞌan ntsuꞌhui ꞌin nten, nxiꞌya yja cueen neꞌ, a cunta quiꞌan ꞌa nu tiꞌi mꞌni chca yu, neꞌ nu a nchca tyiꞌan loꞌo nu nchcunꞌ quiyaꞌ,
\v 8 canꞌ chaꞌ tsuꞌhue ꞌa ntsuꞌhui tiquee nchgaa nten canꞌ.
\v 9 Cuiꞌ canꞌ ndiꞌin sca yu jlyo tiꞌ naan Simón, lyee ꞌa cuaꞌ nguñilyiꞌo yu ꞌin neꞌ Samaria canꞌ, mꞌni yu ꞌin yu siꞌyana lca yu sca nu ndon loo ꞌa.
\v 10 Cula luhue neꞌ tsuꞌhue ndon nscan neꞌ chaꞌ nu nchcuiꞌ yu, loꞌ nchcuiꞌ neꞌ siꞌyana tlyu ꞌa chaꞌ cuiyaꞌ ꞌin Ndiose ndaꞌan loꞌo yu.
\v 11 Tsuꞌhue nꞌni cunta neꞌ chaꞌ canꞌ, siꞌyana cuaꞌ sꞌni ñilyiꞌo yu ꞌin neꞌ loꞌo chaꞌ jlyo tiꞌ ꞌin yu.
\v 12 Una xa ycuiꞌ yu Lpe canꞌ chaꞌ tsuꞌhue ꞌin Jesucristo ñaꞌan ntsuꞌhui chaꞌ culo Ndiose tñan, ya quiꞌan tiꞌ neꞌ loꞌ mducua tya neꞌ, yu quiꞌyu loꞌo jun cunaꞌan.
\v 13 Loꞌo yu Simón ya quiꞌan tiꞌ yu loꞌ mducua tya yu, loꞌ mdyisnan mdaꞌan yu loꞌo yu Lpe canꞌ, nduhue ꞌa tiꞌ yu ñaꞌan chaꞌ nu tnu nguiꞌni yu.
\v 14 Una yu taꞌa mdaꞌan ca Jesús, yu nu ndiꞌin Jerusalén, xa ynan yu chaꞌ siꞌyana loꞌo neꞌ Samaria cuaꞌ ncuan xuꞌhue neꞌ chaꞌ ꞌin Ndiose, cuiꞌ xaa nguaꞌan tñan yu ꞌin yu Tyo loꞌo yu Xuhua siꞌyana tsaa yu seꞌen canꞌ.
\v 15 Xa mdiyaa yu canꞌ ycuiꞌ lyiꞌo yu ꞌin Ndiose, siꞌyana loꞌo neꞌ Samaria chaꞌan yuꞌhui Espíritu nu Luhui ꞌin Ndiose ꞌin neꞌ,
\v 16 siꞌyana tiꞌ lyijyi chuꞌhui ñi niꞌ cusya ꞌin neꞌ, cuiꞌ ca nu mducua tya neꞌ loꞌo chaꞌ cuiyaꞌ ꞌin Jesús.
\v 17 Xacanꞌ chcuaa yu mdiꞌin tyaa yu yaaꞌ yu ꞌin neꞌ, cuiꞌ ñaꞌan lcaa mtsaꞌan yuꞌhui Espíritu nu Luhui ꞌin Ndiose ꞌin neꞌ.
\v 18 Una xa naꞌan yu Simón siꞌyana tsaloo ndiꞌin tyaa ti yu yaaꞌ yu ꞌin neꞌ loꞌ nchcuan neꞌ Espíritu nu Luhui ꞌin Ndiose, xacanꞌ ncua tiꞌ yu xiꞌi yu chaꞌ cuiyaꞌ canꞌ,
\v 19 loꞌ juin yu: Loꞌon nanꞌ nchca tinꞌ taa um chaꞌ cuiyaꞌ re ꞌñan, siꞌyana xa tyiꞌin tyaan yaanꞌ ꞌin ñaꞌan nu ti, loꞌo canꞌ chcuan Espíritu nu Luhui ꞌin Ndiose.
\v 20 Xacanꞌ mxcuen yu Tyo canꞌ ꞌin yu Simón: Tsatoꞌo quinanꞌ nuꞌhuin loꞌo tñi ꞌin, siꞌyana ñan tiꞌ tca caja chaꞌ tsuꞌhue ꞌin Ndiose loꞌo tñi.
\v 21 A ntsuꞌhui chaꞌ quiꞌni caꞌan chaꞌ cuiyaꞌ re ꞌin, ñi a mdiyaa xuꞌhue loꞌo chaꞌ re, siꞌyana a ñi ndiꞌin chaꞌ ꞌin tloo Ndiose.
\v 22 Xiloꞌo chonꞌ quiꞌya ꞌin loꞌ jñan ꞌin Ndiose, tinaꞌan tiꞌ cuꞌni ñi chaꞌ tlyu tiꞌ ꞌin loꞌo ñaꞌan nu ñan tiꞌ cusya ꞌin.
\v 23 Nanꞌ jlyo tinꞌ siꞌyana tla ꞌa cusya ꞌin, quiꞌya ꞌin mducun na chaꞌ tiyaa ꞌin.
\v 24 Mxcuen yu ꞌin Simón canꞌ: Jñan um ꞌin Ñi Xꞌnan na siꞌya chaꞌ ꞌñan, siꞌyana a sca chaꞌ nu ycuiꞌ um cua caan ꞌñan.
\v 25 Xa mdyi ycuiꞌ yu Tyo loꞌo yu Xuhua chaꞌ ꞌin Ndiose loꞌo neꞌ Samaria, mxitucui yu nde Jerusalén. Quiꞌan ꞌa quichen suhue ti mdijin yu seꞌen lyiꞌya loo Samaria, ycuiꞌ yu chaꞌ tsuꞌhue ꞌin Jesús.
\s Chaꞌ ꞌin yu Lpe loꞌo yu Etiopía
\p
\v 26 Yatoꞌo sca angujle ꞌin Ñi Xꞌnan na mdoꞌo ycuiꞌ loꞌo yu Lpe canꞌ: Ndla ti cuꞌni, loꞌ tsaa tucueen nu ndyiꞌo Jerusalén nu ndiyaa quichen Gaza, cuiꞌ tucueen nu ndyijyin loo yuu ngutyi canꞌ.
\v 27 Cuiꞌ xaa mdoꞌo yu nguiaa yu. Canꞌ naꞌan yu ꞌin sca yu Etiopía, lca yu sca yu eunuco nu ntsuꞌhui cunta chaꞌ cuilyiyaꞌ ndiꞌin ꞌin Candace, neꞌ cunaꞌan ꞌin ree Etiopía, loꞌ ya yꞌni tnu yu ꞌin Ndiose quichen Jerusalén.
\v 28 Xa mxitucui yu nducua ycuiꞌ yu quityi ꞌin Ndiose niꞌ carreta ꞌin yu, quityi nu nguaꞌan scua yu Isaía nu mxiycuiꞌ Ndiose ꞌin cuaꞌ sꞌni.
\v 29 Xacanꞌ ycuiꞌ Espíritu ꞌin Ndiose loꞌo yu Lpe: Ya ycua ꞌin carreta cua.
\v 30 Xa mchcua yu carreta canꞌ, ngune ꞌin yu siꞌyana quityi nguaꞌan scua yu Isaía nguia ycuiꞌ yu canꞌ. Xacanꞌ juin yu Lpe canꞌ: ¿Ta ndyiꞌya um chaꞌ tiyaa chaꞌ nu nchcuiꞌ quityi cua?
\v 31 Mxcuen yu ꞌin: ¿Ñaꞌan ta quiꞌyan chaꞌ tiyaa chaꞌ a caja nu quitsaꞌ ꞌñan? Xacanꞌ mjñan yu chaꞌ tsuꞌhue ꞌin yu Lpe canꞌ siꞌyana chcua sca seꞌen ti loꞌo yu.
\v 32 Quityi ꞌin Ndiose seꞌen nchcuiꞌ yu canꞌ nchcuiꞌ na: —Ya loꞌo neꞌ ꞌin ñi ñaꞌan nchca tiꞌ sca slyaꞌ seꞌen ntsuꞌhui chaꞌ cujui neꞌ ꞌin ꞌin. Loꞌ ñaꞌan nchca tiꞌ sca slyaꞌ cuneꞌ nu a nxiꞌya xa nsiꞌyu neꞌ quichanꞌ, cuañaꞌan mꞌni coꞌon ñi ꞌin ñi.
\v 33 Xa mdijin ñi nu tiꞌi, a jui nu tyiꞌo chaꞌ ꞌin ñi. A sca ta nten ꞌin ñi tca taa suun chaꞌ ꞌin ñi, siꞌyana cuiꞌ xaa jui nu ngulyoo ꞌin ñi loo chendyu re—.
\v 34 Xacanꞌ juin yu eunuco ꞌin yu Lpe canꞌ: Cuꞌni um chaꞌ tsuꞌhue quitsaꞌ um ꞌñan, ¿ti nu ꞌin chaꞌ nchcuiꞌ na, ta nchcuiꞌ yu chaꞌ ꞌin yu ticuiiꞌ yu, uta na nchcuiꞌ yu chaꞌ ꞌin xca tucui?
\v 35 Ticuiꞌ loo quityi nu nchcuiꞌ yu canꞌ mdyisnan ycuiꞌ yu Lpe chaꞌ tsuꞌhue ꞌin Jesús.
\v 36 Tucueen nguiaa yu canꞌ, mdiyaa yu sca seꞌen ntsuꞌhui tyiꞌa, loꞌ juin yu ꞌin yu Lpe canꞌ: Nde ntsuꞌhui tyiꞌa. ¿Ta ndyijyi ñaꞌan chaꞌ chcua tyan cuaꞌ ñii?
\v 37 Mxcuen yu Lpe canꞌ: Tca na chaꞌ ꞌun ndiya quiꞌan tiꞌ um loꞌo nu chcui cusya ꞌin um. Loꞌ juin yu: Ndiya quiꞌan tinꞌ siꞌyana Jesucristo lca ñi Sñeꞌ Ndiose.
\v 38 Cuiꞌ xaa ngulo yu tñan siꞌyana xicanꞌ ton neꞌ carreta canꞌ, chcuaa yu nguꞌya ton yu loꞌ yten yu loo tyiꞌa, xacanꞌ mducua tya yu Lpe canꞌ ꞌin yu.
\v 39 Ñaꞌaan mdyiꞌo yu loo tyiꞌa canꞌ, a ncua chcanꞌ ꞌa yu Lpe canꞌ siꞌyana Espíritu ꞌin Ñi Xꞌnan na nguia loꞌo ꞌin yu, una tsuꞌhue ꞌa ntsuꞌhui tiquee yu eunuco canꞌ nguiaa yu.
\v 40 Loꞌ xa ngüi tiꞌ yu Lpe canꞌ cuaꞌ ndon yu quichen Azoto, loꞌ mdaꞌan ycuiꞌ yu chaꞌ tsuꞌhue ꞌin Jesús cunda scaa quichen mdijin yu tsayaꞌ mdiyaa yu seꞌen lca Cesarea.
\c 9
\s Xa ya quiꞌan tiꞌ yu Saulo ꞌin Jesús
\p
\v 1 u Saulo canꞌ, nde lyee la ycuen tiqueꞌ yu loꞌo jun nu cuaꞌ ntsuꞌhui chaꞌ ꞌin Ñi Xꞌnan na, nu ncua tiꞌ yu cujui yu ꞌin jun, canꞌ chaꞌ yaa yu seꞌen ndiꞌin yu nu ndlo ca tñan niꞌ lyaa,
\v 2 loꞌ mjñan yu quityi chaꞌ cuiyaꞌ nu tsa loꞌo yu ꞌin na scasca seꞌen ndiyoꞌ tiꞌin neꞌ judio quichen Damasco, seꞌen nu quinu jun nu cuaꞌ ntsuꞌhui tucueen ꞌin Jesús, yu quiꞌyu uta neꞌ cunaꞌan, loꞌ quian loꞌo yu ꞌin jun nde Jerusalén nu chuꞌhui jun naꞌan chcuan.
\v 3 Cuaꞌ tiyaa ti yu quichen Damasco xa nu tsati ntyin msti sca xaa nu mdoꞌo la niꞌ cuaan, loꞌ msuꞌhua loꞌo na ꞌin yu.
\v 4 Canꞌ mdlyu yu, loꞌ ngune ꞌin yu jui sca nu ycuiꞌ: Saulo, Saulo, ¿ñi chaꞌ ndaꞌan yꞌni lyiꞌo ꞌñan?
\v 5 Xacanꞌ juin yu: ¿Tucui ca lca ꞌun Ñi Xꞌnan hua? Mxcuen ñi ꞌin yu: Nanꞌ lcan Jesús nu ndaꞌan yꞌni lyiꞌo. ¿Ta a jlyo tiꞌ siꞌyana ticuiiꞌ nguiꞌni nu tiꞌi loꞌo, ñaꞌan nu nguiꞌni cua?
\v 6 Mdyisnan mchcuan yu siꞌyana lyee ytsen yu, loꞌ juin yu: Ñi Xꞌnan hua, ¿ñi na ta nchca tiꞌ um cuꞌnin? Xacanꞌ juin Ñi Xꞌnan na ꞌin yu: Tyiton loꞌ sten loo quichen cua, la cua caja nu quitsaꞌ ꞌin ñaꞌan ntsuꞌhui chaꞌ cuꞌni.
\v 7 Yu taꞌa ndaꞌan yu Saulo canꞌ, lyee ytsen yu siꞌyana ngune ca ꞌin yu ñaꞌan jui nu ycuiꞌ, una a tucui naꞌan yu.
\v 8 Mdyiton yu Saulo loꞌ msla yu quiloo yu, una a ncua chcanꞌ ꞌa ꞌin yu. Taꞌa ndaꞌan yu canꞌ msñi yaaꞌ yu, loꞌ yten loꞌo ꞌin yu quichen Damasco.
\v 9 Canꞌ mdiꞌin yu snan tsaan a ncua chcanꞌ ꞌa ꞌin yu, ñi a ycu ꞌa yu, ñi a yiꞌo ꞌa yu.
\v 10 Una quichen Damasco canꞌ ndiꞌin sca yu nu cuaꞌ ntsuꞌhui chaꞌ ꞌin Jesús, naan yu Ananía. Ñi Xꞌnan na mꞌni ñi chaꞌ naꞌan xñii yu sca chaꞌ, loꞌ juin ñi: Ananía. Mxcuen yu ꞌin ñi: Nde ndon, Ñi Xꞌnan hua.
\v 11 Xacanꞌ juin Ñi Xꞌnan na ꞌin yu: Tyiton, loꞌ tsaa tucueen nu naan Ñi Yaꞌ, loꞌ ñaꞌan ꞌin yu Juda quia nan ꞌin sca yu mdoꞌo quichen Tarso nu naan Saulo, siꞌyana nchcuiꞌ lyiꞌo yu ꞌñan,
\v 12 loꞌ cuaꞌ ñii naꞌan xñii yu siꞌyana mdiyaa sca yu naan Ananía seꞌen ndiꞌin yu, loꞌ mdiꞌin tyaa yaaꞌ ꞌin yu siꞌyana quila xaa quiloo yu.
\v 13 Xacanꞌ mxcuen yu Ananía: Ñi Xꞌnan hua, lyee ꞌa cuaꞌ ynan chaꞌ ꞌin yu cua, tsala ñaꞌan cuaꞌ mxitijin yu ꞌin jun nu tiꞌi, nu cuaꞌ ngulohui um nu ndiꞌin quichen Jerusalén,
\v 14 loꞌ mdiyaan yu nde re loꞌo chaꞌ cuiyaꞌ ꞌin yu nu ndlo ca tñan niꞌ lyaa canꞌ, siꞌyana scanꞌ yu ꞌin nchgaa nu ndiya quiꞌan tiꞌ ꞌin um.
\v 15 Loꞌ juin Ñi Xꞌnan na ꞌin yu: Yaa lya, siꞌyana lca yu sca nu cuaꞌ mdoꞌo hui ꞌñan, siꞌyana tsa ycuiꞌ yu chaꞌ tsuꞌhue ꞌñan tloo ree loꞌo neꞌ gentil, a cunta loꞌo neꞌ Israel.
\v 16 Nanꞌ quitsanꞌ ꞌin yu tsala nu tiꞌi ntsuꞌhui chaꞌ tyijyin yu siꞌyan.
\v 17 Xacanꞌ mdoꞌo yu Ananía nguiaa yu, loꞌ yten yu ñaꞌan canꞌ. Mdiꞌin tyaa yu yaaꞌ yu ꞌin yu Saulo canꞌ, loꞌ juin yu: Ñi taꞌa na Saulo, Jesús ñi nu lca Xꞌnan na, ñi nu nguloꞌo tloo ꞌin um tucueen yaan um, nguaꞌan tñan ñi ꞌñan siꞌyana quila xaa quiloo um, a cunta chaꞌan yuꞌhui Espíritu nu Luhui ꞌin Ndiose ꞌin um.
\v 18 Ticuiꞌ xaa canꞌ, mdoꞌo tyu sca na quiloo yu ñaꞌan nchca tiꞌ xꞌñan cula, cuiꞌ ñaꞌan lcaa nguila xaa quiloo yu, mdyiton yu loꞌ mducua tya yu.
\v 19 Mdyisnan ycu yu, loꞌ cuañaꞌan nguila juesa ꞌin yu. Tiꞌ nguinu yu chcua xnan tsaan loꞌo jun nu ndiꞌin quichen Damasco.
\s Ycuiꞌ Saulo chaꞌ ꞌin Ndiose quichen Damasco
\p
\v 20 Xacanꞌ mdyisnan ycuiꞌ yu chaꞌ tsuꞌhue ꞌin Cristo cunda scaa seꞌen ndiyoꞌ tiꞌin neꞌ judio, loꞌ nchcuiꞌ yu siꞌyana cuiꞌ ñi lca ñi Sñeꞌ Ndiose.
\v 21 Yuhue ꞌa tiꞌ neꞌ ꞌin yu, loꞌ nchcuiꞌ neꞌ: ¿Ta siꞌi yu re lca yu nu mxitijin ꞌin jun nu tiꞌi, nu cuaꞌ ya quiꞌan tiꞌ ꞌin Jesús quichen Jerusalén? ¿Ta siꞌi canꞌ chaꞌ ca mdiyaan yu re siꞌyana scanꞌ yu ꞌin neꞌ, loꞌ quia loꞌo yu ꞌin neꞌ tloo yu nu ndlo ca tñan niꞌ lyaa quichen Jerusalén?
\v 22 Una yu Saulo canꞌ nde lyee la ycuiꞌ yu loꞌo neꞌ judio nu ndiꞌin quichen Damasco. Ngulyo scua la yu chaꞌ ꞌin Jesús siꞌyana cuiꞌ ñi lca ñi Cristo, loꞌ a ngujlyo ꞌa tiꞌ neꞌ ñi lyijyi chaꞌ tiꞌ quiñan tiꞌ neꞌ.
\s Xa mdoꞌo laa yu Saulo tuyaaꞌ neꞌ judio
\p
\v 23 Cuaꞌ yaa ñaꞌan ndijin tsaan canꞌ, mdya ycuiꞌ neꞌ judio nu ndiꞌin quichen canꞌ siꞌyana cujui neꞌ ꞌin yu Saulo,
\v 24 una jui nu mtsaꞌ ꞌin yu chaꞌ canꞌ. Tla loꞌ cucha ntsuꞌhui ta neꞌ ꞌin yu tunaꞌan seꞌen ntsuꞌhui chaꞌ tyiꞌo yu tuꞌhua quichen canꞌ siꞌyana cujui neꞌ ꞌin yu.
\v 25 Xacanꞌ jun nu cuaꞌ ntsuꞌhui chaꞌ ꞌin Jesús, msuꞌhua jun ꞌin yu sca niꞌ xcuhui, loꞌ tla canꞌ mdyiꞌya jun ꞌin yu loꞌo sca tiso tuꞌhua quee chonꞌ loꞌo canꞌ.
\s Xa nguila yu Saulo quichen Jerusalén
\p
\v 26 Una xa nguila yu quichen Jerusalén, ncua tiꞌ yu quioꞌ tiꞌin yu loꞌo jun nu cuaꞌ ntsuꞌhui chaꞌ ꞌin Jesús, una nchgaa jun ytsen jun ꞌin yu, a ya quiꞌan tiꞌ jun siꞌyana loꞌo yu cuaꞌ ntsuꞌhui yu chaꞌ ꞌin Jesús.
\v 27 Xacanꞌ yu Bernabé ya loꞌo ꞌin yu seꞌen ndiꞌin yu taꞌa mdaꞌan Jesús, loꞌ mdaa yu suun siꞌyana yu Saulo cuaꞌ naꞌan yu ꞌin Ñi Xꞌnan na tucueen yaa yu quichen Damasco loꞌ ycuiꞌ ñi loꞌo yu, a cunta mꞌni tnu tiquee yu ycuiꞌ yu chaꞌ tsuꞌhue ꞌin Jesús loꞌo nten ndiꞌin canꞌ.
\v 28 Cuañaꞌan mdyisnan mdaꞌan yu Saulo loꞌo jun nu cuaꞌ ntsuꞌhui chaꞌ ꞌin Jesús quichen Jerusalén.
\v 29 A ntsen yu nchcuiꞌ yu chaꞌ ꞌin Ñi Xꞌnan na, nu hasta nxicune taꞌa yu loꞌo neꞌ judio nu nchcuiꞌ chaꞌ griego, loꞌ ngunan neꞌ ñaꞌan nu cujui neꞌ ꞌin yu.
\v 30 Xa ynan jun taꞌa na chaꞌ canꞌ, ya loꞌo jun ꞌin yu seꞌen lca Cesarea, xacanꞌ nguaꞌan tñan jun ꞌin yu quiaa yu quichen Tarso.
\v 31 La xacanꞌ nchgaa laa mdiꞌin tiin na, jun nu ndiyoꞌ tiꞌin seꞌen lca Judea, Galilea, loꞌo Samaria. Cuañaꞌan tsa nducua lyee la nguia nguilo jun, ntsuꞌhui sca ytsen ꞌin Ñi Xꞌnan na niꞌ cusya ꞌin jun, loꞌ Espíritu nu Luhui ꞌin Ndiose ndaa chaꞌ tnu tiquee ꞌin jun, loꞌ cuañaꞌan nguia nguiton la jun nchgaa seꞌen.
\s Xa mchca yu Enea
\p
\v 32 Yatoꞌo mdijin yu Tyo scasca seꞌen ndiꞌin jun nu cuaꞌ mdoꞌo hui ꞌin Jesús, loꞌ mdiyaa yu seꞌen ndiꞌin jun quichen Lida.
\v 33 Canꞌ naꞌan yu ꞌin sca yu naan Enea, nu cuaꞌ ntsuꞌhui snuꞌ yjan nscua tiꞌi loo quiꞌñan, loꞌ a nchca tyiꞌan yu.
\v 34 Xacanꞌ juin yu Tyo ꞌin yu: Enea, Jesucristo cuꞌni chca ñi ꞌin um cuaꞌ ñii, tyitucui um loꞌ cuꞌni chuꞌhue um loo sꞌñan um. Ticuiꞌ xaa mdyitucui yu.
\v 35 Nchgaa neꞌ ndiꞌin quichen Lida loꞌo Sidón naꞌan neꞌ siꞌyana mchca yu, loꞌ ya quiꞌan tiꞌ neꞌ ꞌin Ñi Xꞌnan na.
\s Xa mdyiquiꞌo Dorca
\p
\v 36 Quichen Jope ndiꞌin sca neꞌ cunaꞌan nu cuaꞌ ntsuꞌhui chaꞌ ꞌin Jesús, loꞌ naan neꞌ Tabita, loꞌ chaꞌ re nchca tiꞌ chcuiꞌ: Dorca. Quiꞌan ꞌa chaꞌ tsuꞌhue mꞌni neꞌ, mda yaaꞌ neꞌ ꞌin nu tiꞌi ñaꞌan ꞌin, cuiꞌ cuañaꞌan loꞌo lcuan.
\v 37 Lja xacanꞌ ncua tiꞌi neꞌ loꞌ ngujui neꞌ. Xa nu cuaꞌ mxicuta neꞌ ꞌin, ycuen loꞌo neꞌ ꞌin seꞌen cuaꞌ nchca tucua naꞌan nde cuaan, seꞌen ntsuꞌhui chaꞌ xcua yuu.
\v 38 A tijyoꞌ nguinu quichen Lida seꞌen lca Jope canꞌ, loꞌ ynan jun taꞌa na chaꞌ siꞌyana quichen Lida ndiꞌin yu Tyo, cuiꞌ xaa nguaꞌan tñan jun tucua nu tsa teꞌen ꞌin yu siꞌyana jñan chaꞌ tsuꞌhue ꞌin yu tsaa yu cuiꞌ xaa.
\v 39 Mdoꞌo yu Tyo canꞌ, nguiaa loꞌo chcuaa yu canꞌ nde quichen Jope, mdiyaa jun seꞌen nducua naꞌan canꞌ loꞌ ycuen loꞌo jun ꞌin yu seꞌen nscua nu ngujui canꞌ. Nchgaa neꞌ cunaꞌan nu nguinu loꞌo chaꞌ ycuiꞌ ti ndiꞌin ynan neꞌ, msuꞌhua loꞌo neꞌ ꞌin yu Tyo loꞌ mdyisnan nguloꞌo neꞌ scasca loo teꞌ nu mxcuan Dorca xa nu tiꞌ loꞌo.
\v 40 Ngulo yu Tyo canꞌ ꞌin nchgaa neꞌ nde lyiyaꞌ. Mdyiꞌya xtyinꞌ yu loꞌ mjñan yu ꞌin Ndiose. Xacanꞌ mxinaꞌan yu seꞌen nscua nu ngujui canꞌ, loꞌ juin yu: Tabita, tyiton. Ticuiꞌ xaa msla neꞌ quiloo neꞌ. Xa naꞌan neꞌ ꞌin yu Tyo canꞌ, cuiꞌ xaa mdyi tucua neꞌ,
\v 41 msñi yu yaaꞌ neꞌ, loꞌ mxiton yu ꞌin neꞌ. Xacanꞌ mxiꞌya yu ꞌin nchgaa jun taꞌa na loꞌo neꞌ nu nguinu loꞌo chaꞌ ycuiꞌ ti canꞌ, loꞌ naꞌan jun siꞌyana cuaꞌ mdyiquiꞌo nu Dorca canꞌ.
\v 42 Mscua cueen chaꞌ canꞌ sca chcui quichen Jope, loꞌ quiꞌan ꞌa nten ya quiꞌan tiꞌ ꞌin Ñi Xꞌnan na.
\v 43 Tyun ꞌa tsaan tiꞌ nguinu yu Tyo canꞌ quichen Jope, naꞌan ꞌin yu Simón cuityi quijyin canꞌ.
\c 10
\s Chaꞌ ꞌin yu Tyo loꞌo Cornelio
\p
\v 1 Quichen Cesarea ndiꞌin sca yu naan Cornelio, lca yu que ꞌin sca ciento sindatu, cuiꞌ ta nu naan Italiana.
\v 2 Suun ꞌa nten lca yu loꞌo sñeꞌ yu, nꞌni tnu yu ꞌin Ndiose. Lyee ꞌa ndaa yu lcuan ꞌin neꞌ judio, loꞌ nchgaa xaa nchcuiꞌ lyiꞌo yu ꞌin Ndiose.
\v 3 Yatoꞌo sca tsaan, tsa ntsuꞌhui braa cuaꞌ snan siin, naꞌan xñii yu yten sca angujle ꞌin Ndiose seꞌen ndiꞌin yu, loꞌ juin ꞌin yu: Cornelio.
\v 4 Xacanꞌ mxinaꞌan tsuꞌhue ca yu ꞌin angujle canꞌ, loꞌ nguitsen yu mxcuen yu: ¿Ñi na nchca tiꞌ um cuꞌnin, Ñi Xꞌnan hua? Mxcuen angujle canꞌ ꞌin yu: Nchgaa chaꞌ nu cuaꞌ ycuiꞌ loꞌo Ndiose loꞌo chaꞌ tsuꞌhue nu cuaꞌ mꞌni, cuaꞌ mchcuan ñi cunta ꞌin na.
\v 5 Canꞌ chaꞌ cuaꞌ ñii, caꞌan tñan tucua snan nguso ꞌin tsaa quichen Jope, tsa teꞌen yu ꞌin yu Simón, yu nu nchcuiꞌ neꞌ loꞌo lca Tyo.
\v 6 Cuaꞌ ñii ndiꞌin yu naꞌan ꞌin Simón, yu cuityi quijyin nu nducua naꞌan ꞌin cuiꞌ ti tuꞌhua tyiꞌa tujoꞌo. Cuiꞌ yu quitsaꞌ yu ꞌin, ñi tñan ntsuꞌhui chaꞌ cuꞌni.
\v 7 Xa ngulyijyi yuꞌhui angujle canꞌ, cuiꞌ ñaꞌan lcaa msiꞌya Cornelio ꞌin tucua nguso ꞌin yu, loꞌo sca sindatu nu jaꞌan la ꞌin yu nu nꞌni tnu ꞌin Ndiose,
\v 8 mtsaꞌ yu ꞌin taꞌa snan yu canꞌ nchgaa chaꞌ nu yatoꞌo ꞌin yu, loꞌ nguaꞌan tñan yu ꞌin nguiaa quichen Jope.
\v 9 Xca tsaan canꞌ, xa nu cuaꞌ tiyaa ti yu tuꞌhua quichen Jope canꞌ, tsa ntsuꞌhui ndyiꞌya cuan xa ycuen yu Tyo canꞌ nde que naꞌan seꞌen ndiꞌin yu, siꞌyana chcuiꞌ lyiꞌo yu ꞌin Ndiose.
\v 10 Mdyisnan nguiteꞌ tiꞌ yu lyee yaꞌ, loꞌ lja nta yu nu nchca tsuꞌhue na nu cu yu, Ndiose mꞌni ñi chaꞌ naꞌan xñii yu sca chaꞌ.
\v 11 Naꞌan yu nguila nde niꞌ cuaan, canꞌ nguiaan ñaꞌan nchca tiꞌ sca teꞌ xeen nu nchcanꞌ taꞌa jacua nscan, ndyiꞌya na nde lyuu.
\v 12 Niꞌ teꞌ canꞌ ntsuꞌhui cuati loo ꞌni, loꞌo ꞌni nu nsuhueꞌ niꞌ, a cunta loꞌo ꞌni nducua jlyuꞌhue.
\v 13 Ngune ꞌin yu jui sca nu ycuiꞌ: Tyo, tyiton loꞌ cujui ꞌni re, loꞌ cu ꞌin ꞌin.
\v 14 Loꞌ juin yu Tyo canꞌ: Ñi Xꞌnan hua, a cun ꞌin ꞌin siꞌyana a nchca siyaꞌ cun cunanꞌ ꞌni nu a ntsuꞌhui chaꞌ nchcu hua.
\v 15 Xiyaꞌ jui nu ycuiꞌ loꞌo yu: Nchgaa na nu cuaꞌ msuhui Ndiose, a chcuiꞌ siꞌyana cooꞌ na.
\v 16 Xa cuaꞌ nchca snan yaꞌ jui nu ycuiꞌ canꞌ, xacanꞌ mchcuen teꞌ canꞌ nde niꞌ cuaan.
\v 17 Lja ndon yuhue tiꞌ yu Tyo chaꞌ canꞌ, ñi chaꞌ nchca tiꞌ na chcuiꞌ na, xa mdiyaa nguso nu nguaꞌan tñan Cornelio tunaꞌan, ñichaꞌ yu la ca nducua naꞌan ꞌin yu naan Simón.
\v 18 Mñichaꞌ yu chaꞌ canꞌ ndiꞌin yu Simón, nu nchcuiꞌ neꞌ loꞌo lca Tyo.
\v 19 Tiꞌ ndon yuhue la tiꞌ yu Tyo chaꞌ canꞌ xa ycuiꞌ Espíritu ꞌin Ndiose loꞌo yu: Nde cuaꞌ mdiyaan snan yu ndaꞌan nan ꞌin.
\v 20 Quiꞌya lya, a cuꞌni tucua tiꞌ tsaa loꞌo yu, siꞌyana nanꞌ nguaꞌan tñan ꞌin yu.
\v 21 Xacanꞌ nguꞌya yu Tyo canꞌ seꞌen ndon nguso nu nguaꞌan tñan Cornelio, loꞌ juin yu ꞌin: Nanꞌ lcan yu nu ndaꞌan nan um, chaꞌ ñi tñan ljyaan um?
\v 22 Mxcuen yu ꞌin yu Tyo canꞌ: Yu Cornelio, nu lca que ꞌin sca ciento sindatu, sca yu nu suun ndiꞌin chaꞌ ꞌin, loꞌ nꞌni tnu yu ꞌin Ndiose, a cunta nchgaa neꞌ judio ndyuꞌhui cuiyaꞌ tiꞌ neꞌ ꞌin yu, loꞌ sca angujle ꞌin Ndiose cuaꞌ mdaa suun loꞌo yu siꞌyana ntsuꞌhui chaꞌ tsaa um seꞌen ndiꞌin yu, loꞌ quine ꞌin yu chaꞌ nu chcuiꞌ um.
\v 23 Xacanꞌ mxiꞌya yu Tyo ꞌin yu nde ñaꞌan loꞌ canꞌ nguinu yu. Xca tsaan canꞌ mdoꞌo yu nguiaa yu loꞌo yu canꞌ, loꞌo chcua xnan jun taꞌa na nu ndiꞌin Jope.
\v 24 La xca tsaan canꞌ mdiyaa jun quichen Cesarea, loꞌ yu Cornelio cuaꞌ mxoꞌ tiꞌin taꞌa yu loꞌo nchgaa nten ꞌin yu, loꞌo nchgaa taꞌa tsuꞌhue yu.
\v 25 Xa mdiyaa yu Tyo canꞌ tunaꞌan ꞌin yu Cornelio, cuiꞌ xaa mdoꞌo yu, mdon xtyinꞌ yu tloo, loꞌ mꞌni tnu yu ꞌin.
\v 26 Una yu Tyo canꞌ cuiꞌ xaa mxiton yu ꞌin, loꞌ juin yu: Tyiton um siꞌyana nten chendyu lcan na loꞌo um.
\v 27 Xa cuaꞌ ycuiꞌ chaꞌ taꞌa jun, xacanꞌ yten jun ñaꞌan, loꞌ naꞌan yu siꞌyana quiꞌan ꞌa nten cuaꞌ nguioꞌ tiꞌin canꞌ.
\v 28 Loꞌ juin yu Tyo: Nchgaa um cuaꞌ jlyo tiꞌ um siꞌyana a ntsuꞌhui chaꞌ quioꞌ tiꞌin neꞌ judio sca seꞌen ti loꞌo xca ta nten. Una Ndiose cuaꞌ nguloꞌo ñi ꞌñan siꞌyana a ntsuꞌhui chaꞌ culoꞌo naan hua ꞌin ñi sca tucui siꞌyana lca neꞌ nten nu a luhui.
\v 29 Canꞌ chaꞌ a mꞌni lyeꞌ tinꞌ xa mdiyaa yu nu ya teꞌen ꞌñan, loꞌ cuaꞌ ñii nchca tinꞌ ca jlyo tinꞌ ñi chaꞌ msiꞌya um ꞌñan.
\v 30 Xacanꞌ mxcuen yu Cornelio: Cuaꞌ ntsuꞌhui jacua tsaan, cuiꞌ ñaꞌan braa cuaꞌ ñii, nguiꞌnin ayuna loꞌ nchcuinꞌ lyiꞌon ꞌin Ndiose, cuiꞌ braa cuaꞌ snan siin mdiya ton sca yu quiꞌyu nu tsuꞌhue ñaꞌan nduhui steꞌ,
\v 31 loꞌ juin ꞌñan: Cornelio, nchgaa chaꞌ nu cuaꞌ mjñan ꞌin Ndiose cuaꞌ mdiyaa na tloo ñi, cuiꞌ cuañaꞌan loꞌo nchgaa lcuan nu cuaꞌ mdaa.
\v 32 Caꞌan tñan ꞌin nu tsa teꞌen ꞌin yu Simón quichen Jope, yu nu nchcuiꞌ neꞌ loꞌo lca Tyo, yu nu ndiꞌin naꞌan ꞌin Simón, yu cuityi quijyin nu ndiꞌin cuiꞌ ti tuꞌhua tyiꞌa tujoꞌo, loꞌ xa caan yu chcuiꞌ yu loꞌo.
\v 33 Canꞌ chaꞌ cuiꞌ xaa msuꞌhuan ꞌin yu nu ya teꞌen ꞌin um, loꞌ tsuꞌhue siꞌyana yaan um. Cuaꞌ ñii nguioꞌ tiꞌin hua tloo Ndiose, siꞌyana quine ꞌin hua chaꞌ nu taa ñi chcuiꞌ um.
\v 34 Xacanꞌ mdyisnan ycuiꞌ yu Tyo canꞌ: Nu chaꞌ ñi sꞌni nguꞌyan chaꞌ tiyaa siꞌyana Ndiose scañaꞌan ti nꞌni ñi ꞌtnan ꞌin nten,
\v 35 tsuꞌhue ntsuꞌhui tiquee ñi loꞌo nchgaa nu nꞌni tnu ꞌin ñi loꞌ nꞌni tñan tsuꞌhue sca chcui chendyu.
\v 36 Ndiose ycuiꞌ ñi chaꞌ tsuꞌhue ꞌin ñi loꞌo huareꞌ neꞌ Israel, seꞌen nu tyiꞌin tsuꞌhue na loꞌo ñi siꞌya Jesucristo, ñi nu lca Xꞌnan nchgaa tucui.
\v 37 ꞌUn cuaꞌ ynan um chaꞌ ñaꞌan yatoꞌo ñaꞌaan seꞌen lca Judea, loꞌ mdyisnan chaꞌ re tiꞌ la seꞌen lca Galilea, xa nu cuaꞌ mducua tya yu Xuhua canꞌ ꞌin nten,
\v 38 loꞌ jlyo tiꞌ um siꞌyana Ndiose mdaa ñi chaꞌ cuiyaꞌ nu tlyu ꞌin Jesús Nazaret, loꞌ mtsaꞌan yuꞌhui Espíritu nu Luhui ꞌin Ndiose ꞌin ñi, loꞌ mꞌni ñi scasca chaꞌ tsuꞌhue, mꞌni chca ñi ꞌin nchgaa nu tiꞌi nu ntsuꞌhui tuyaaꞌ laxaꞌan, cuiꞌ siꞌyana Ndiose ndon loꞌo ñi nchgaa xaa.
\v 39 Huareꞌ naꞌan hua loꞌ ndaa hua suun nchgaa chaꞌ nu mꞌni Jesús xa mdaꞌan ñi seꞌen lca Judea loꞌo Jerusalén, chonꞌ ndeꞌen yjui neꞌ ꞌin ñi xa mjyiꞌin caꞌan neꞌ ꞌin ñi loo cusi.
\v 40 Una Ndiose mꞌni ñi chaꞌ mdyiquiꞌo canꞌ nu cuaꞌ ca snan tsaan, loꞌ nguloꞌo tloo ñi ꞌin nten.
\v 41 A nguloꞌo tloo ñi ꞌin nchgaa tucui, cuiꞌ ca nu ꞌin tsa huareꞌ ti nu cuaꞌ ngulohui Ndiose ꞌin naꞌan tloo hua chaꞌ re, huareꞌ nu ycu sca seꞌen ti loꞌo ñi xa cuaꞌ mdyiquiꞌo ñi.
\v 42 Ngulo ñi tñan ꞌin hua siꞌyana tsa ycuiꞌ hua loꞌo nchgaa nten, loꞌ quitsaꞌ hua ꞌin neꞌ siꞌyana Ndiose cuaꞌ mdiꞌin tyaa ꞌin Jesús lca ñi Bse nu cuꞌni xñan bsya ꞌin nten tsatlyu loꞌo neꞌ cuaꞌ ngujui.
\v 43 Cuiꞌ chaꞌ ꞌin ñi mdaꞌan ycuiꞌ yu nu mxiycuiꞌ Ndiose ꞌin cuaꞌ sꞌni, siꞌyana nchgaa nu tsa quiꞌan tiꞌ ꞌin ñi, cuꞌni Ndiose chaꞌ tlyu tiꞌ ꞌin canꞌ siꞌya ñi.
\v 44 Lja tiꞌ nchcuiꞌ yu Tyo chaꞌ canꞌ, nguꞌya Espíritu nu Luhui ꞌin Ndiose ꞌin nchgaa nu ne ꞌin chaꞌ nu nchcuiꞌ yu.
\v 45 Yu judio taꞌa ndaꞌan yu Tyo canꞌ, ndyijyin yaꞌ yuhue tiꞌ yu siꞌyana loꞌo neꞌ gentil cuaꞌ mtsaꞌan yuꞌhui Espíritu nu Luhui ꞌin Ndiose ꞌin neꞌ,
\v 46 siꞌyana ngune ꞌin yu ñaꞌan nchcuiꞌ neꞌ canꞌ lenguas, loꞌ nguiꞌni tnu neꞌ ꞌin Ndiose.
\v 47 Loꞌ juin yu Tyo canꞌ: ¿Ta ntsuꞌhui nu nchcui ndijin chaꞌ chcua tya neꞌ re, loꞌ scañaꞌan ti mtsaꞌan yuꞌhui Espíritu nu Luhui ꞌin Ndiose ꞌin neꞌ, tsañaꞌan yatoꞌo ꞌin nareꞌ?
\v 48 Xacanꞌ ngulo yu Tyo tñan siꞌyana chcua tya neꞌ loꞌo chaꞌ cuiyaꞌ ꞌin Ñi Xꞌnan na Jesús. Mjñan neꞌ chaꞌ tsuꞌhue ꞌin yu siꞌyana tiꞌ quinu la yu chcua xnan tsaan loꞌo neꞌ.
\c 11
\s Mtsaꞌ yu Tyo ñaꞌan ya quiꞌan tiꞌ neꞌ gentil
\p
\v 1 Nchgaa la ñaꞌan yu taꞌa mdaꞌan Jesús, loꞌo jun taꞌa na nu ndiꞌin seꞌen lca Judea, ynan jun chaꞌ siꞌyana loꞌo neꞌ gentil cuaꞌ ncuan xuꞌhue neꞌ chaꞌ tsuꞌhue ꞌin Ndiose.
\v 2 Xa nguila yu Tyo quichen Jerusalén, ngusun loꞌo neꞌ judio ꞌin yu,
\v 3 loꞌ nchcuiꞌ neꞌ: ¿Ñi chaꞌ yaa seꞌen ndiꞌin neꞌ gentil loꞌ ycu sca seꞌen ti loꞌo neꞌ?
\v 4 Xacanꞌ mdyisnan mdaa lyicua yu Tyo canꞌ suun nchgaa chaꞌ nu yatoꞌo ꞌin yu, loꞌ juin yu:
\v 5 Nanꞌ mdiꞌin quichen Jope, lja nchcuinꞌ lyiꞌon ꞌin Ndiose, naꞌan xñii sca chaꞌ ñaꞌan nchca tiꞌ sca teꞌ xeen nu nchcanꞌ taꞌa jacua nscan, loꞌ mdoꞌo na nde niꞌ cuaan yaan na seꞌen ndon.
\v 6 Xa mxinaꞌan tsuꞌhuen can ꞌin na, naꞌan cuati loo ꞌni nu ntsuꞌhui niꞌ na, a cunta ꞌni la, loꞌo nu nsuhueꞌ niꞌ, loꞌo nu nducua jlyuꞌhue.
\v 7 Ngune ꞌñan jui sca nu ycuiꞌ: Tyo, tyiton loꞌ cujui ꞌni re loꞌ cu ꞌin ꞌin.
\v 8 Nen xacanꞌ: Ñi Xꞌnan hua, a cun ꞌin ꞌin siꞌyana a nchca siyaꞌ cun ꞌni nu a ntsuꞌhui chaꞌ nchcu hua.
\v 9 Xiyaꞌ jui nu ycuiꞌ loꞌon nde niꞌ cuaan: Nchgaa na nu cuaꞌ msuhui Ndiose, a chcuiꞌ siꞌyana cooꞌ na.
\v 10 Chaꞌ re yatoꞌo na snan juesa, xacanꞌ mchcuen teꞌ canꞌ nde niꞌ cuaan.
\v 11 Cuiꞌ ñaꞌan lcaa mdiyaan snan yu nu mdiyan teꞌen ꞌñan nu mdoꞌo quichen Cesarea.
\v 12 Espíritu ꞌin Ndiose ycuiꞌ loꞌon siꞌyana a cuꞌni tucua tinꞌ tsaꞌan loꞌo yu. Yiꞌan loꞌo tsa scua jun taꞌa na re, mdiyaa hua la naꞌan ꞌin yu nu msiꞌya ꞌñan,
\v 13 mtsaꞌ yu ꞌin hua ñaꞌan nguꞌya ton sca angujle tloo yu seꞌen ndiꞌin yu, loꞌ juin ꞌin yu: Caꞌan tñan ꞌin nu tsaa quichen Jope nu tsa teꞌen ꞌin Simón, yu nu nchcuiꞌ neꞌ loꞌo lca Tyo,
\v 14 canꞌ nu chcuiꞌ chaꞌ tsuꞌhue ꞌin Ndiose ñaꞌan ntsuꞌhui chaꞌ tyiꞌo laa, loꞌo nchgaa nu ndiꞌin naꞌan ꞌin.
\v 15 Lja nchcuinꞌ loꞌo neꞌ tsati ntyin nguꞌya Espíritu nu Luhui ꞌin Ndiose ꞌin neꞌ, tsañaꞌan yatoꞌo ꞌin nareꞌ tiꞌ culoo.
\v 16 Xacanꞌ nguia yuꞌhui tinꞌ chaꞌ nu ycuiꞌ Ñi Xꞌnan na loꞌo na xa nu juin ñi: Chaꞌ ñi siꞌyana yu Xuhua mducua tya yu ꞌin nten loꞌo tyiꞌa, una ꞌun ntsuꞌhui chaꞌ chaꞌan yuꞌhui Espíritu nu Luhui ꞌin Ndiose ꞌin um.
\v 17 Chaꞌ Ndiose lca nu mdaa chaꞌ tsuꞌhue re ꞌin neꞌ, ñaꞌan nu yatoꞌo ꞌin nareꞌ, naa nu cuaꞌ ya quiꞌan tiꞌ ꞌin Ñi Xꞌnan na Jesucristo, ¿tucui ta lcan nanꞌ siꞌyana chcui ndijin tloo Ndiose?
\v 18 Xa ngune ꞌin neꞌ chaꞌ nu ycuiꞌ yu Tyo canꞌ, cuiꞌ xaa mdiꞌin tiin neꞌ loꞌ mdyisnan mꞌni tnu neꞌ ꞌin Ndiose, loꞌ nchcuiꞌ neꞌ: Ca nu loꞌo neꞌ gentil cuaꞌ mdaa Ndiose chaꞌ cuiyaꞌ siꞌyana xiloꞌo chonꞌ neꞌ quiꞌya ꞌin neꞌ, loꞌ caja sca chendyu nu a tsa ti ꞌa ꞌin neꞌ.
\s Jun nu ndiꞌin quichen Antioquía
\p
\v 19 Tiꞌ xa nu yjui neꞌ ꞌin yu Steba canꞌ mꞌni lyiꞌo ꞌtnan neꞌ ꞌin jun, cuaꞌ la tucueen ngunaan jun, ntsuꞌhui nu mdiyaa seꞌen lca Fenicia, loꞌo seꞌen lca Chipre, a cunta loꞌo quichen Antioquía mdiyaa jun. Una a ycuiꞌ jun chaꞌ tsuꞌhue ꞌin Ndiose loꞌo ñaꞌan tucui ti, cuiꞌ ca nu tsalca ti loꞌo neꞌ judio.
\v 20 Una lja canꞌ ntsuꞌhui tucua snan yu Chipre loꞌo yu Cirene nu mdiya tiꞌin quichen Antioquía, mdyisnan ycuiꞌ yu chaꞌ tsuꞌhue ꞌin Ñi Xꞌnan na Jesús loꞌo neꞌ griego ndiꞌin canꞌ.
\v 21 Siꞌya chaꞌ cuiyaꞌ ꞌin Ñi Xꞌnan na, quiꞌan ꞌa nten ya quiꞌan tiꞌ neꞌ loꞌ mducui nchaꞌan neꞌ ꞌin ñi.
\v 22 Xa ynan jun nu ndiꞌin quichen Jerusalén chaꞌ canꞌ, nguaꞌan tñan jun ꞌin yu Bernabé siꞌyana tsaa yu quichen Antioquía.
\v 23 Una xa mdiyaa yu quichen canꞌ, tsuꞌhue ꞌa yuꞌhui tiquee yu siꞌyana naꞌan yu ñaꞌan chaꞌ tsuꞌhue nu nguiꞌni Ndiose loꞌo jun canꞌ. Mdaa yu chaꞌ tnu tiquee ꞌin jun siꞌyana tyiꞌin tyaa jun cusya ꞌin jun, a tyiꞌo tsoꞌ jun loo chaꞌ tsuꞌhue ꞌin Ñi Xꞌnan na.
\v 24 Ñi ndiꞌin chaꞌ ꞌin yu, mtsaꞌan yuꞌhui Espíritu nu Luhui ꞌin Ndiose ꞌin yu, a cunta loꞌo chaꞌ nu ndiya quiꞌan tiꞌ yu. Loꞌ quiꞌan ꞌa nten ya quiꞌan tiꞌ ꞌin Ñi Xꞌnan na.
\v 25 Chonꞌ ndeꞌen canꞌ yaa yu Bernabé quichen Tarso, ya nan yu ꞌin yu Saulo, loꞌ nguian loꞌo yu ꞌin nde quichen Antioquía.
\v 26 Canꞌ nguioꞌ tiꞌin yu loꞌo jun taꞌa na niꞌ sca yjan, quiꞌan ꞌa nten nguloꞌo yu ꞌin quichen Antioquía canꞌ. Culoo yaꞌ mdyisnan nguloꞌo naan neꞌ ꞌin jun nu cuaꞌ ntsuꞌhui chaꞌ ꞌin Cristo: Cristiano.
\v 27 Yatoꞌo sca tsaan, tucua snan yu nu nxiycuiꞌ Ndiose ꞌin mdoꞌo yu Jerusalén, mdiyaa yu quichen Antioquía.
\v 28 Sca yu canꞌ naan yu Agabo, mdyiton yu loꞌ mtsaꞌ yu ñaꞌan mxiycuiꞌ Espíritu ꞌin yu, siꞌyana ntsuꞌhui chaꞌ quiꞌya bjuꞌñan sca chcui seꞌen canꞌ. Chaꞌ re yatoꞌo na xa ncua yu Claudio ree.
\v 29 Xacanꞌ nchgaa jun Antioquía nu cuaꞌ ntsuꞌhui chaꞌ ꞌin Jesús, mꞌni cuiyaꞌ jun chaꞌ siꞌyana cunda scaa jun taa jun tñi cuaꞌ ñaꞌaan tca ꞌin jun, loꞌ caꞌan tñan jun ꞌin na ꞌin jun nu ndiꞌin seꞌen lyiꞌya loo Judea.
\v 30 Cuañaꞌan yatoꞌo, nguaꞌan tñan jun tñi canꞌ loꞌo yu Bernabé loꞌo yu Saulo, canꞌ nu mdyaa cunta ꞌin na ꞌin yu nu ntsuꞌhui cunta ꞌin jun.
\c 12
\s Yjui neꞌ ꞌin yu Jacobo, loꞌ msuꞌhua neꞌ ꞌin yu Tyo naꞌan chcuan
\p
\v 1 Cuiꞌ xacanꞌ, yu nu lca ree Herode msuꞌhua yu ꞌin tucua snan jun nu cuaꞌ ya quiꞌan tiꞌ ꞌin Jesús naꞌan chcuan, siꞌyana xitijin neꞌ ꞌin jun nu tiꞌi,
\v 2 ngulo yu tñan siꞌyana xiꞌyu yni yu Jacobo, taꞌa ngula yu Xuhua.
\v 3 Naꞌan yu ree canꞌ siꞌyana mdiyaa ꞌa tiꞌ neꞌ judio ñaꞌan nu mꞌni yu, xacanꞌ ngunan yu ñaꞌan nu quinu yu Tyo lja taꞌa Pascua xa nchcu neꞌ jaslya nu a yuꞌhui suun.
\v 4 Xa nguinu yu Tyo canꞌ, msuꞌhua neꞌ ꞌin yu naꞌan chcuan. Mdyaa neꞌ cunta ꞌin yu yaaꞌ tsa jacua ta yu sindatu nu chuꞌhui cuan ꞌin yu, jacua yu scaa ta yu. Lca chaꞌ ꞌin yu ree canꞌ siꞌyana culyoo neꞌ ꞌin yu Tyo canꞌ, loꞌ tloo nten quichen canꞌ ca cuiyaꞌ chaꞌ ꞌin yu xa tsatii taꞌa canꞌ,
\v 5 canꞌ chaꞌ tsuꞌhue ꞌa ntsuꞌhui neꞌ cuan ꞌin yu. Una chcui lja xacanꞌ a ndlaꞌ tiꞌ jun chcuiꞌ lyiꞌo jun ꞌin Ndiose siꞌya chaꞌ ꞌin yu.
\s Xa ngulyoo angujle ꞌin yu Tyo naꞌan chcuan
\p
\v 6 Cuaꞌ xca ti tla canꞌ nu cuꞌni cuiyaꞌ Herode chaꞌ ꞌin yu Tyo, loꞌ yu re ljaꞌ yu tluꞌhue la lja tucua yu sindatu canꞌ, nchcanꞌ tsuꞌhue yaaꞌ yu loꞌo carena, nchgaa la ñaꞌan yu sindatu canꞌ ndon yu cuan nde tunaꞌan lyiyaꞌ.
\v 7 Tsati ntyin msti sca xaa ñaꞌan chcuan canꞌ xa nguꞌya ton sca angujle ꞌin Ñi Xꞌnan na, ylaꞌ siiꞌ yu Tyo canꞌ siꞌyana tyiꞌo sla yu, loꞌ juin ꞌin yu: Ndla ti cuꞌni loꞌ tyitucui. Cuiꞌ ñaꞌan lcaa nguitinꞌ carena canꞌ yaaꞌ yu.
\v 8 Tiꞌ juin la ꞌin yu: Xcanꞌ siiꞌ loꞌ suꞌhua snan. Loꞌ cuañaꞌan mꞌni yu. Tiꞌ juin angujle canꞌ: Quixen steꞌ loꞌ chcui nchaꞌan ꞌñan.
\v 9 Xacanꞌ mducui nchaꞌan yu ꞌin angujle canꞌ, una a ñan tiꞌ yu siꞌyana chaꞌ ñi ca ñaꞌan nu nguiꞌni canꞌ loꞌo yu, msqueꞌ tiꞌ yu siꞌyana nchcuiꞌ sla ti yu.
\v 10 Xa mdijin yu seꞌen ndon yu sindatu nu cuaꞌ nchca tucua ta canꞌ, nguila yu seꞌen ndon tunaꞌan tlyu nu nguiaꞌ loꞌo chcuan, ycuiiꞌ na nguila na, xacanꞌ mdyiꞌo ton yu nde lyiyaꞌ. Loꞌ xa mdiyaa yu seꞌen ndyaa cusi tucueen canꞌ, mdoꞌo tsoꞌ angujle canꞌ siiꞌ yu.
\v 11 La xacanꞌ nguila chaꞌ tiyaa ꞌin yu, loꞌ juin yu: La ñii ncua cuiyaꞌ tinꞌ siꞌyana Ñi Xꞌnan na nguaꞌan tñan ñi angujle nu ngulo laa ꞌñan tuyaaꞌ Herode loꞌo neꞌ judio, ñaꞌan nu ncua tiꞌ neꞌ cuꞌni lyiꞌo neꞌ ꞌñan.
\v 12 Xa nu nguꞌya tsuꞌhue ca yu cunta chaꞌ canꞌ, mdoꞌo yu nguiaa yu la naꞌan ꞌin María, jyiꞌan yu Xuhua, yu nu nchcuiꞌ neꞌ loꞌo lca Marco. Canꞌ quiꞌan ꞌa jun ndiyoꞌ tiꞌin jun, nchcuiꞌ lyiꞌo jun ꞌin Ndiose.
\v 13 Xa ngune ycuiꞌ yu Tyo tunaꞌan lyiyaꞌ, mdoꞌo sca nu cunaꞌan tsa suhue ti naan Rode, ya naꞌan chaꞌ ti ca lca canꞌ,
\v 14 una cuiꞌ xaa yuꞌhui lyoo tyiꞌi nchcuiꞌ yu Tyo canꞌ. Loo nu tsuꞌhue ntsuꞌhui tiquee, ñi a msla tunaꞌan canꞌ, cuiꞌ xaa nguia ytsaꞌ ꞌin jun siꞌyana yu Tyo ndon yu tunaꞌan lyiyaꞌ canꞌ.
\v 15 Loꞌ juin jun ꞌin: Na ndiyoꞌ nuꞌhuin. Mxcuen nu cunaꞌan canꞌ: Nu chaꞌ ñi ca, cua ndon. Xiyaꞌ juin jun ꞌin: Cuiꞌ angujle nu nsñi cunta ꞌin yu ca lca cua.
\v 16 Yu Tyo canꞌ a ndla tiꞌ yu ndon ycuiꞌ yu tunaꞌan canꞌ, loꞌ xa msla jun ꞌin na ndyijyin yaꞌ yuhue tiꞌ jun xa naꞌan jun ꞌin yu.
\v 17 Mꞌni yaaꞌ yu siꞌyana seen tyiꞌin jun, mdyisnan mtsaꞌ yu ñaꞌan ngulyoo Ñi Xꞌnan na ꞌin yu naꞌan chcuan canꞌ, loꞌ juin yu: Cuꞌni um chaꞌ tsuꞌhue quitsaꞌ um ꞌin yu Jacobo loꞌo nchgaa la ñaꞌan jun taꞌa na chaꞌ re. Xacanꞌ mdoꞌo yu nguiaa yu xca seꞌen.
\v 18 Una xa nguꞌya xaa canꞌ, lyee ꞌa nguilo tiꞌin yu sindatu siꞌya chaꞌ ꞌin yu Tyo canꞌ, chaꞌ ñaꞌan ncua mdyiꞌo yu.
\v 19 Yu Herode canꞌ ngulo yu tñan siꞌyana quia nan neꞌ ꞌin yu, una a la nguija lyoo yu, loꞌ xa cuaꞌ mxicunee yu ꞌin nchgaa yu nu yuꞌhui cuan canꞌ, mdoꞌo tñan siꞌyana caja yu. Chonꞌ ndeꞌen la canꞌ, yu Herode mdoꞌo yu seꞌen lca Judea loꞌ mdiyaa yu seꞌen lca Cesarea.
\s Xa ngujui yu ree Herode
\p
\v 20 Yu Herode canꞌ ycuen tiqueꞌ yu loꞌo nten ndiꞌin quichen Tiro loꞌo Sidón. Una mdya ycuiꞌ neꞌ chaꞌ ñaꞌan cuꞌni chuꞌhue neꞌ chaꞌ ꞌin neꞌ tloo ree canꞌ, loꞌ mjñan neꞌ chaꞌ tsuꞌhue ꞌin yu Blasto, sca yu nu lyiꞌya tñan tloo ree, siꞌyana chcuiꞌ yu chaꞌ ꞌin neꞌ seꞌen nu caꞌan tñan la yu ree canꞌ na nu cunajoꞌo ꞌin neꞌ.
\v 21 Xa mdiyaa tsaan canꞌ, yten tucua yu Herode seꞌen ndlo yu tñan, lcoꞌ yu sca teꞌ tsuꞌhue ñaꞌan, xacanꞌ mdyisnan mda cueen yu ꞌin nten canꞌ.
\v 22 Ycuiꞌ cueen nten canꞌ loꞌo yu: Ycuiꞌ ca Ndiose lca nu nchcuiꞌ re, loꞌ siꞌi ꞌa nten chendyu.
\v 23 Ticuiꞌ xaa nguꞌya ton sca angujle ꞌin Ñi Xꞌnan na, mꞌni chaꞌ msñi sca quicha ꞌin yu, mdyisnan ytsu yuꞌhui cunuꞌ ꞌin yu loꞌ ngujui yu, cuiꞌ siꞌyana a mdaa yu loo Ndiose tloo nten canꞌ.
\v 24 Chaꞌ tsuꞌhue ꞌin Ñi Xꞌnan na nde lyee la nguia nguine yuꞌhui na, ncua quiꞌan la nten nu ya quiꞌan tiꞌ ꞌin ñi.
\v 25 Yu Bernabé loꞌo yu Saulo, xa cuaꞌ msuꞌhua ta yu tñan nu yaa yu quichen Jerusalén, mxitucui yu nde Antioquía, loꞌ nguia loꞌo yu ꞌin yu Xuhua nu nchcuiꞌ neꞌ loꞌo lca Marco.
\c 13
\s Xa culoo nguaꞌan tñan jun ꞌin yu Bernabé loꞌo yu Saulo
\p
\v 1 Seꞌen ndiyoꞌ tiꞌin jun quichen Antioquía, canꞌ ndiꞌin yu nu nxiycuiꞌ Ndiose ꞌin loꞌo yu nu ndloꞌo ꞌin jun: Yu Bernabé, yu Simón nu nchcuiꞌ neꞌ loꞌo lca Niger, Lucio nu mdoꞌo seꞌen lca Cirene, loꞌo Manaén, yu nu mꞌni coꞌo neꞌ ꞌin sca seꞌen ti loꞌo Herode tetrarca, a cunta loꞌo yu Saulo.
\v 2 Lja nguiꞌni tnu yu canꞌ ꞌin Ñi Xꞌnan na, nguiꞌni yu ayuna, xacanꞌ ycuiꞌ Espíritu nu Luhui ꞌin Ndiose loꞌo yu: Lyo ton um ꞌin yu Bernabé loꞌo yu Saulo, siꞌyana cuꞌni yu tñan ꞌñan.
\v 3 Xa mdyi ycuiꞌ lyiꞌo yu ꞌin Ndiose nu mꞌni yu ayuna, xacanꞌ mdiꞌin tyaa yu yaaꞌ yu ꞌin chcuaa yu canꞌ, loꞌ nguaꞌan tñan jun ꞌin yu nguiaa yu.
\s Ycuiꞌ yu chaꞌ ꞌin Ndiose seꞌen lca Chipre
\p
\v 4 Siꞌyana cuaꞌ nguaꞌan tñan Espíritu nu Luhui ꞌin Ndiose ꞌin chcuaa yu canꞌ, mdiyaa yu quichen Seleucia, canꞌ yten yu sca niꞌ yca naꞌan loꞌ mdijin xiꞌyu yu xca tsoꞌ seꞌen lca Chipre.
\v 5 Xa mdoꞌo caꞌan yu canꞌ mdiyaa yu quichen Salamina, canꞌ mdyisnan ycuiꞌ yu chaꞌ ꞌin Ndiose scasca seꞌen nꞌni tnu neꞌ judio ꞌin ñi. Loꞌo yu Xuhua Marco ndaꞌan nda yaaꞌ ꞌin yu.
\v 6 Xa cuaꞌ tyiꞌo yso yu ñaꞌaan seꞌen lyiꞌya loo Chipre, mdiyaa yu quichen Pafos. Canꞌ mchcua taꞌa yu loꞌo sca yu judio, nu jlyo tiꞌ nu naan Barjesús, loꞌ nchcuiꞌ yu siꞌyana Ndiose lca nu nxiycuiꞌ ꞌin yu.
\v 7 Nguiꞌni yu tñan loꞌo yu Sergio Paulo nu lca gubierno canꞌ, loꞌ yu gubierno lca yu sca nu tiyaa, loꞌ msiꞌya yu ꞌin yu Bernabé loꞌo yu Saulo siꞌyana quine ꞌin yu chaꞌ tsuꞌhue ꞌin Ndiose.
\v 8 Una yu Elima, yu jlyo tiꞌ canꞌ (siꞌyana canꞌ chaꞌ nchca tiꞌ chcuiꞌ nii yu), ncua tiꞌ yu chcui ndijin yu siꞌyana a tsa quiꞌan tiꞌ gubierno canꞌ ꞌin Jesús.
\v 9 Xacanꞌ yu Saulo canꞌ, nu nchcuiꞌ neꞌ loꞌo Pablo, mtsaꞌan yuꞌhui Espíritu nu Luhui ꞌin Ndiose ꞌin yu, mxinaꞌan tsuꞌhue ca yu ꞌin yu jlyo tiꞌ canꞌ,
\v 10 loꞌ juin yu ꞌin: Nuꞌhuin lca sñeꞌ laxaꞌan nu mtsaꞌan yuꞌhui chaꞌ cuiñi loꞌo nchgaa loo chaꞌ ngunanꞌ ꞌin, lca sca nu nxcuan tloo chaꞌ tsuꞌhue ꞌin Ndiose. ¿La ñi xaa culaꞌ tiꞌ chcui ndijin loo chaꞌ nu ñi ꞌin Ñi Xꞌnan na Jesús?
\v 11 Canꞌ chaꞌ cuaꞌ ñii, xitijin Ñi Xꞌnan na ꞌin nu tiꞌi loꞌ a ca chcanꞌ ꞌa ꞌin sca coꞌ xaa. Cuiꞌ ñaꞌan lcaa nguinu tla yta tloo yu, loꞌ mdyisnan mjnan yaaꞌ yu chaꞌ caja nu ta yaaꞌ ꞌin yu.
\v 12 Xa naꞌan yu gubierno chaꞌ nu yatoꞌo ꞌin yu canꞌ, cuiꞌ xaa ya quiꞌan tiꞌ yu ꞌin Ñi Xꞌnan na, ndyijyin yaꞌ nduhue tiꞌ yu ñaꞌan nguiaa chaꞌ tsuꞌhue ꞌin ñi.
\s Xa mdiyaa jun seꞌen lyiꞌya loo Pisidia
\p
\v 13 Xacanꞌ mdoꞌo yu Pablo loꞌo taꞌa ndaꞌan yu seꞌen lca quichen Pafos, loꞌ yten yu niꞌ sca yca naꞌan tsayaꞌ mdiyaa yu quichen Perge seꞌen lyiꞌya loo Panfilia. Una yu Xuhua Marco canꞌ mxitucui yu nde Jerusalén.
\v 14 Mdoꞌo chcuaa yu canꞌ quichen Perge loꞌ mdiyaa yu quichen Antioquía seꞌen lyiꞌya loo Pisidia. Tsaan nu nxitñanꞌ neꞌ judio yten yu seꞌen nꞌni tnu neꞌ ꞌin Ndiose, canꞌ yten tucua yu.
\v 15 Yu nu ndlo tñan seꞌen canꞌ, xa mdyi ycuiꞌ yu quityi seꞌen nguaꞌan scua lee, loꞌo chaꞌ nu nguaꞌan scua yu nu mxiycuiꞌ Ndiose ꞌin cuaꞌ sꞌni, xacanꞌ mñichaꞌ yu ꞌin chcuaa yu canꞌ: ꞌUn taꞌa Judio na, chaꞌ ta ndeꞌen la chaꞌ lyiꞌya um tca culoꞌo um ꞌin hua.
\v 16 Xacanꞌ mdyiton yu Pablo, loꞌ mꞌni yaaꞌ yu siꞌyana tyisnan chcuiꞌ yu, loꞌ juin yu: ꞌUn neꞌ Israel, quine ꞌin um nchgaa ꞌun neꞌ nu nꞌni tnu ꞌin Ndiose.
\v 17 Ndiose ꞌin neꞌ Israel, ñi nu ngulohui ꞌin nten cula ꞌin na, mꞌni ñi chaꞌ ncua neꞌ sca quichen tlyu, siyaꞌ lca neꞌ sca neꞌ mdaꞌan yuꞌhui ti seꞌen lca Egipto, loꞌ ngulyoo ñi ꞌin neꞌ seꞌen canꞌ loꞌo sca chaꞌ cuiyaꞌ nu tlyu.
\v 18 Tsaniꞌ tucua yla yjan yuꞌhui chaꞌ tlyu tiꞌ ꞌin Ndiose loꞌo neꞌ, lja mdaꞌan yuꞌhui neꞌ seꞌen lca yuu ngutyi canꞌ.
\v 19 Xacanꞌ ngujlyo ñi tsa cati quichen tnu seꞌen lyiꞌya loo Canaán, seꞌen nu quinu yuu canꞌ ꞌin nten cula ꞌin na.
\v 20 Xa cuaꞌ mdijin jacua ciento tluꞌhue yjan, Ndiose mdaa ñi chaꞌ cuiyaꞌ siꞌyana culo ton neꞌ bse nu culo tñan ꞌin neꞌ, tsayaꞌ mdiyaa tsaan nu mdoꞌo ton yu Samuel, yu nu mxiycuiꞌ Ndiose ꞌin.
\v 21 Chonꞌ ndeꞌen canꞌ mjñan neꞌ sca ree nu culo ca tñan ꞌin neꞌ, xacanꞌ ngulohui Ndiose ꞌin yu Saul, sñeꞌ yu Cis nu lca ta nten ꞌin yu Benjamin. Tsaniꞌ tucua yla yjan ngulo yu tñan.
\v 22 Xa cuaꞌ ngujui yu Saul, ngulohui Ndiose ꞌin yu Davi nu ca yu ree, loꞌ ndeñaꞌan ycuiꞌ ñi chaꞌ ꞌin yu: Davi, sñeꞌ Isaí, nde nu suꞌhua ñaꞌan lca cusya ꞌin loꞌon, loꞌ cuꞌni yu tsañaꞌan nu nchca tinꞌ.
\v 23 Cuiꞌ loo ta nten ꞌin yu Ndiose nguaꞌan tñan ñi ꞌin Jesús siꞌyana culo laa ñi ꞌin neꞌ Israel, tsañaꞌan chaꞌ nu cuaꞌ mdiꞌin tyaa Ndiose loꞌo nten cula ꞌin na tiꞌ sꞌni.
\v 24 Tiꞌ lyijyi tyisnan cuꞌni ñi tñan ꞌin Ndiose, xa cuaꞌ mdaꞌan ycuiꞌ yu Xuhua loꞌo neꞌ Israel siꞌyana tyaa tiꞌ neꞌ ꞌin Ndiose loꞌ chcua tya neꞌ.
\v 25 Xa nu cuaꞌ tyii tñan nguiꞌni yu Xuhua canꞌ, juin yu loꞌo nten: ¿Tucui ta lcan nanꞌ ñan tiꞌ um? Siꞌi ñi nu ñan tiꞌ um canꞌ lcan. Nde chonꞌ re ljyaan sca ñi nu tlyu lati que ꞌñan nanꞌ, loꞌ ndyijyin yaꞌ nducui tinꞌ chaꞌ cua na siyaꞌ tisnan ti ñi xtinꞌ.
\v 26 Nchgaa naan nu lca ta nten ꞌin Abraham, loꞌo nchgaa ꞌun neꞌ nu nꞌni tnu ꞌin Ndiose nducua um re, Ndiose nguaꞌan tñan ñi chaꞌ tsuꞌhue re ꞌin um siꞌyana tca tyiꞌo laa um.
\v 27 Neꞌ ndiꞌin quichen Jerusalén loꞌo yu nu nguꞌya tñan canꞌ, a nguꞌya neꞌ chaꞌ tiyaa tucui ca lca Jesús, siyaꞌ nchgaa tsaan nu nxitñanꞌ neꞌ nchcuiꞌ neꞌ quityi nu nguaꞌan scua yu nu mxiycuiꞌ Ndiose ꞌin cuaꞌ sꞌni, yatoꞌo mducua neꞌ tñan chaꞌ canꞌ xa ngulo quiꞌya neꞌ ꞌin Jesús.
\v 28 Siyaꞌ a sca quiꞌya nguija lyoo ꞌin ñi, una mjñan neꞌ ꞌin Pilato siꞌyana cujui neꞌ ꞌin ñi.
\v 29 Xa cuaꞌ yatoꞌo nchgaa chaꞌ nu nguaꞌan scua nu nchcuiꞌ chaꞌ ꞌin ñi, xacanꞌ mdyiꞌya neꞌ ꞌin ñi loo cusi loꞌ ya tsiꞌ neꞌ ꞌin ñi,
\v 30 una Ndiose mꞌni chaꞌ mdyiquiꞌo ñi.
\v 31 Tyun ꞌa tsaan tiꞌ nguloꞌo tloo ñi ꞌin jun nu mdiya loꞌo ñi quichen Jerusalén xa mdoꞌo ñi seꞌen lca Galilea, canꞌ nu ndaa suun chaꞌ ꞌin ñi.
\v 32 Loꞌo huareꞌ ndaꞌan ycuiꞌ hua chaꞌ tsuꞌhue ꞌin ñi loꞌo um, cuiꞌ chaꞌ nu mdiꞌin tyaa Ndiose loꞌo nten cula ꞌin na.
\v 33 Nchgaa chaꞌ tsuꞌhue re cuaꞌ mdaa Ndiose ꞌin nareꞌ nu lca sñeꞌ ñi xa mꞌni ñi chaꞌ mdyiquiꞌo Jesús, cuiꞌ tsañaꞌan nchcuiꞌ Salmo nu cuaꞌ nchca tucua: —Nuꞌhuin lca Sñenꞌ, loꞌ nanꞌ lcan Sti cuaꞌ ñii—.
\v 34 Nchcuiꞌ Salmo siꞌyana tyiquiꞌo ñi, a xca ꞌa tsaan tiꞌ cutsoꞌ tiꞌin cunanꞌ ñi: —In nuꞌhuin quiꞌni caꞌan nchgaa chaꞌ tsuꞌhue nu cuaꞌ mdiꞌin tyaan loꞌo yu Davi—.
\v 35 Canꞌ chaꞌ ndeñaꞌan nchcuiꞌ quityi Salmo xca seꞌen: —A taa um chaꞌ cuiyaꞌ siꞌyana cutsoꞌ tiꞌin cunanꞌ Sñeꞌ um nu cuaꞌ ngulohui um—.
\v 36 Chaꞌ ñi siꞌyana yu Davi ngulo yu tñan tsañaꞌan nu mdaa Ndiose chaꞌ cuiyaꞌ ꞌin yu, xacanꞌ ngujui yu, sca seꞌen ti mtsiꞌ yu loꞌo nten cula ꞌin yu, loꞌ ytsoꞌ tiꞌin cunanꞌ yu.
\v 37 Una ñi nu mꞌni Ndiose chaꞌ mdyiquiꞌo canꞌ, a ytsoꞌ tiꞌin cunanꞌ ñi.
\v 38 ꞌUn nu lca ta nten ꞌin na, ca jlyo tiꞌ um chaꞌ re: Siꞌya Jesús caja ñaꞌan cuꞌni Ndiose chaꞌ tlyu tiꞌ ꞌin na,
\v 39 siꞌyana cunta chaꞌ ꞌin lee nu nguaꞌan scua Moisé, a ncua xnu luhui na ꞌin na siꞌya quiꞌya nducui na, una nchgaa nu tsa quiꞌan tiꞌ ꞌin Jesús quinu luhui canꞌ tloo Ndiose.
\v 40 Canꞌ chaꞌ cuaꞌ ñii, xñi um cunta siꞌyana a caan chaꞌ nu nguaꞌan scua yu nu mxiycuiꞌ Ndiose ꞌin, loꞌ nchcuiꞌ na:
\v 41 —Xñi um cunta ꞌun nu nxcuan tloo ꞌñan, loꞌ chuꞌhui yuhue tiꞌ um ñaꞌan ntsuꞌhui chaꞌ caja um, siꞌyana nanꞌ cuꞌnin sca chaꞌ nu tnu tloo um, loꞌ ñi a tsa quiꞌan tiꞌ um siyaꞌ caja nu quitsaꞌ ꞌin um—.
\v 42 Xa mdyiꞌo yu Pablo loꞌo yu Bernabé seꞌen ndiyoꞌ tiꞌin neꞌ canꞌ, neꞌ gentil nu ntsuꞌhui lja canꞌ mjñan neꞌ chaꞌ tsuꞌhue ꞌin yu siꞌyana tiꞌ chcuiꞌ la yu chaꞌ canꞌ taꞌa snuꞌ tsaan, cuiꞌ tsaan nu nxitñanꞌ neꞌ.
\v 43 Xa nu cuaꞌ mslaꞌ taꞌa jun, quiꞌan ꞌa neꞌ judio, loꞌo nu cuaꞌ ntsuꞌhui ñaꞌan chaꞌ ꞌin neꞌ, mducui nchaꞌan neꞌ ꞌin yu Pablo loꞌo yu Bernabé, xacanꞌ mdyisnan mda cueen yu ꞌin nten canꞌ ñaꞌan nu tiꞌ tsa quiñan la neꞌ loo chaꞌ tsuꞌhue ꞌin Ndiose.
\v 44 Mdaꞌa snuꞌ tsaan canꞌ, laꞌ nchgaa ti nten canꞌ nguioꞌ tiꞌin neꞌ seꞌen nu quine ꞌin neꞌ chaꞌ tsuꞌhue ꞌin Ndiose.
\v 45 Una xa naꞌan neꞌ judio siꞌyana quiꞌan ꞌa nten nguioꞌ tiꞌin neꞌ, xacanꞌ yten chaꞌ nsinꞌ tiꞌ tiquee neꞌ, loꞌ mdyisnan ycuiꞌ tyijyin neꞌ loꞌ mdaja neꞌ ꞌin yu Pablo.
\v 46 Yu Pablo loꞌo yu Bernabé, a ytsen yu mxcuen yu ꞌin neꞌ: Loꞌo um ntsuꞌhui chaꞌ chcuiꞌ hua chaꞌ tsuꞌhue re ꞌin Ndiose culo nducua la, una mscuan tloo um ꞌin na, a ñan tiꞌ um siꞌya chaꞌ re caja chendyu nu a tsa ti ꞌa ꞌin um, canꞌ chaꞌ cuaꞌ ñii, tsuꞌhue lati chcuiꞌ hua loꞌo neꞌ gentil.
\v 47 Siꞌyana nde tñan ngulo Ñi Xꞌnan na ꞌin hua, loꞌ nchcuiꞌ ñi: —Nanꞌ mdiꞌin tyaan ꞌin siꞌyana ca sca xaa ꞌin neꞌ gentil nu ndiꞌin sca chcui chendyu, siꞌyana tyiꞌo laa neꞌ—.
\v 48 Xa ngune ꞌin neꞌ gentil chaꞌ canꞌ, tsuꞌhue ꞌa yuꞌhui tiquee neꞌ, loꞌ mꞌni tnu neꞌ ꞌin Ñi Xꞌnan na siꞌya ychaꞌ ñi, loꞌ ya quiꞌan tiꞌ nchgaa nu cuaꞌ mdoꞌo hui ꞌin Ndiose, jun nu ntsuꞌhui chaꞌ caja chendyu nu a tsa ti ꞌa ꞌin.
\v 49 Chaꞌ tsuꞌhue ꞌin Ñi Xꞌnan na nguine yuꞌhui na ñaꞌaan sca chcui seꞌen canꞌ.
\v 50 Una neꞌ judio mdyisnan mxoꞌ tiꞌin taꞌa neꞌ loꞌo yu nu lyiꞌya tñan quichen canꞌ, loꞌo neꞌ cunaꞌan nu suun lca chaꞌ ꞌin, msuꞌhua neꞌ tiquee nten quichen canꞌ, loꞌ mducui lyiꞌo neꞌ ꞌin yu Pablo loꞌo yu Bernabé.
\v 51 Tuꞌhua quichen canꞌ mscuin yu yuu quiyaꞌ yu, mdoꞌo yu nguiaa yu nde quichen Iconio.
\v 52 Tsalca jun nu cuaꞌ ntsuꞌhui chaꞌ ꞌin Jesús nu ndiꞌin quichen Antioquía, tsuꞌhue ꞌa ntsuꞌhui tiquee jun siꞌyana mtsaꞌan yuꞌhui Espíritu nu Luhui ꞌin Ndiose ꞌin jun.
\c 14
\s Xa mdiyaa yu quichen Iconio
\p
\v 1 Mdiyaa chcuaa yu canꞌ quichen Iconio, yten yu seꞌen nꞌni tnu neꞌ judio ꞌin Ndiose, loꞌ siꞌya chaꞌ nu ycuiꞌ yu canꞌ, quiꞌan ꞌa nten ya quiꞌan tiꞌ ꞌin Jesús, neꞌ judio, loꞌo neꞌ gentil.
\v 2 Una nchgaa la ñaꞌan neꞌ judio nu a ya quiꞌan tiꞌ, msuꞌhua tiquee taꞌa neꞌ loꞌo neꞌ gentil seꞌen nu lyiꞌun tiꞌ neꞌ loꞌ a cuꞌni cunta ꞌa neꞌ ꞌin jun taꞌa na.
\v 3 Siyaꞌ cuañaꞌan, tyun ꞌa tsaan tiꞌ nguinu yu quichen canꞌ, a ytsen yu ycuiꞌ yu chaꞌ tsuꞌhue ꞌin Ñi Xꞌnan na, mdaa ñi chaꞌ cuiyaꞌ ꞌin yu cuꞌni yu scasca chaꞌ nu tnu, loꞌ ca cuiyaꞌ tiꞌ neꞌ siꞌyana lca na chaꞌ nu ñi.
\v 4 A ncua ꞌa ca sca chaꞌ ti ꞌin nten canꞌ, ntsuꞌhui nu yaa tsoꞌ ꞌin neꞌ judio, loꞌ ntsuꞌhui nu yaa tsoꞌ ꞌin chcuaa yu canꞌ.
\v 5 Una neꞌ judio loꞌo neꞌ gentil mꞌni cuiyaꞌ neꞌ chaꞌ loꞌo yu bsya, siꞌyana tucui lyiꞌo neꞌ ꞌin chcuaa yu canꞌ, loꞌ cujui neꞌ ꞌin yu loꞌo quee ti.
\v 6 Una xa ynan yu chaꞌ canꞌ, cuiꞌ xaa mdoꞌo yu quichen canꞌ, loꞌ mdiyaa yu quichen Listra loꞌo Derbe, seꞌen lyiꞌya loo Licaonia.
\v 7 Ñaꞌaan seꞌen canꞌ mdaꞌan ycuiꞌ yu chaꞌ tsuꞌhue ꞌin Jesús.
\s Xa mjyiꞌin neꞌ quee ꞌin yu Pablo quichen Listra
\p
\v 8 Quichen Listra, canꞌ ndiꞌin sca yu mchcunꞌ chcua tsoꞌ quiyaꞌ tiꞌ xa ngula.
\v 9 Yu re ngune ꞌin yu chaꞌ nu nchcuiꞌ yu Pablo, xacanꞌ mxinaꞌan yu seꞌen nducua yu tiꞌi canꞌ, loꞌ ngüi tiꞌ yu siꞌyana ndiya quiꞌan tiꞌ canꞌ ꞌin Ndiose nu tca cuꞌni chca ꞌin,
\v 10 loꞌ ycuiꞌ cueen yu loꞌo: Xñii um quiyaꞌ um, loꞌ tyiton um. Sca juesa ti mdyiton yu loꞌ mdaꞌan yu.
\v 11 Xa naꞌan nten ñaꞌan chaꞌ nu mꞌni yu Pablo, xacanꞌ mdyisnan ycuiꞌ cueen neꞌ loꞌo ychaꞌ neꞌ Licaonia: Ñii nu naꞌan tloo ca na ꞌin tucua joꞌo tsañaꞌan nchca tiꞌ sca yu quiꞌyu.
\v 12 Mdiꞌin tyaa neꞌ nii yu Bernabé, Stina Joꞌo Jupiter, loꞌ yu Pablo ndloꞌo naan neꞌ ꞌin yu, Stina Joꞌo Mercurio, siꞌyana canꞌ nu lyee la nchcuiꞌ.
\v 13 Yu nu lca stijoꞌo ꞌin laa seꞌen nducua Stina Jupiter, cuiꞌ laa nu nducua tuꞌhua quichen canꞌ, ya loꞌo yu tucua snan toro tulaa canꞌ, a cunta mꞌni chuꞌhue yu quee seꞌen nu cuꞌni tnu yu ꞌin chcuaa yu loꞌo nchgaa nten canꞌ.
\v 14 Una xa ynan yu Pablo loꞌo yu Bernabé chaꞌ canꞌ, hasta msta yu steꞌ yu yten yu lja nten canꞌ, loꞌ ycuiꞌ cueen yu:
\v 15 Nchgaa ꞌun nu ndiꞌin re, ¿ñi chaꞌ nguiꞌni um cuañaꞌan? Loꞌo huareꞌ lca hua nten chendyu ñaꞌan nu lca um, ta siꞌi cuiꞌ chaꞌ re nchcuiꞌ hua siꞌyana tyaa tiꞌ um ꞌin Ndiose, ñi nu loꞌo ca, —ñi nu mtñan niꞌ cuaan loꞌo chendyu re, loꞌo tyiꞌa tujoꞌo, loꞌo nchgaa loo na nu ndiꞌin ꞌin na—.
\v 16 Chendyu nu mdijin Ndiose mda loo ñi ꞌin nten, siyaꞌ mdaꞌan neꞌ ñaꞌan nu ncua tiꞌ neꞌ.
\v 17 Una tiꞌ nguiꞌni ñi chaꞌ tsuꞌhue loꞌo na seꞌen nu a jlya tiꞌ na ꞌin ñi: Ndyiꞌya ñi quioo, nguiꞌni ñi chaꞌ nchca tñan na nu ntya na, a ndiya lyijyi na nu najoꞌo ꞌin na, tsuꞌhue ntsuꞌhui tiquee na nchgaa xaa.
\v 18 Loꞌo chaꞌ nu ycuiꞌ yu canꞌ, queꞌ ꞌa ncua canan nu a cuꞌni tnu neꞌ ꞌin yu loꞌo ꞌni canꞌ.
\v 19 Xacanꞌ mdiyaan tucua snan neꞌ judio nu mdoꞌo quichen Antioquía loꞌo quichen Iconio, nu msuꞌhua tiquee nten quiꞌan canꞌ, loꞌ yatoꞌo mjyiꞌin neꞌ quee ꞌin yu Pablo, msqueꞌ tiꞌ neꞌ siꞌyana cuaꞌ ngujui yu, loꞌ ncuan quii suhueꞌ neꞌ ꞌin yu la tuꞌhua quichen.
\v 20 Nchgaa jun nu cuaꞌ ntsuꞌhui chaꞌ ꞌin Jesús msuꞌhua loꞌo jun ꞌin yu, mdyiton yu loꞌ yten yu loo quichen canꞌ xiyaꞌ. Xca tsaan canꞌ mdoꞌo yu nguiaa yu loꞌo yu Bernabé nde seꞌen lca quichen Derbe.
\v 21 Mdyisnan ycuiꞌ yu chaꞌ tsuꞌhue ꞌin Jesús quichen canꞌ, quiꞌan ꞌa nten mꞌni yu canan nu ya quiꞌan tiꞌ ꞌin Jesús, xacanꞌ mxitucui yu, loꞌ mdijin yu quichen Listra, loꞌo Iconio, loꞌo Antioquía.
\v 22 Mdaa yu chaꞌ tnu tiquee ꞌin jun nu cuaꞌ ntsuꞌhui chaꞌ ꞌin Jesús, siꞌyana a tyiꞌo tsoꞌ jun loo chaꞌ nu cuaꞌ ya quiꞌan tiꞌ jun, loꞌ juin yu ꞌin jun: Loo nu sten na seꞌen ndlo Ndiose tñan, ꞌni chaꞌ tyijyin na scasca nu tiꞌi.
\v 23 Cunda scaa quichen canꞌ, ngulo ton yu ꞌin yu nu chuꞌhui cunta ꞌin jun taꞌa na, loꞌ xa cuaꞌ mꞌni yu ayuna nu ycuiꞌ lyiꞌo yu ꞌin Ndiose, mxnu yu cunta ꞌin yu canꞌ yaaꞌ Ñi Xꞌnan na, ñi nu ꞌin ya quiꞌan tiꞌ yu.
\s Xa mxitucui yu quichen Antioquía seꞌen lyiꞌya loo Siria
\p
\v 24 Xacanꞌ mdoꞌo chcuaa yu canꞌ nguiaa yu, mdijin yu seꞌen lyiꞌya loo Pisidia, loꞌ mdiyaa yu loo yuu ꞌin neꞌ Panfilia.
\v 25 Quichen Perge, canꞌ ycuiꞌ yu chaꞌ tsuꞌhue ꞌin Ndiose, xacanꞌ mdoꞌo yu nguiaa yu tsayaꞌ mdiyaa yu quichen Atalia.
\v 26 Canꞌ yten yu niꞌ yca naꞌan, siꞌyana xitucui yu quichen Antioquía, seꞌen nu mxnu jun cunta ꞌin yu yaaꞌ Ndiose loꞌo tñan nu yaa yu.
\v 27 Xa nguila yu quichen canꞌ, mxoꞌ tiꞌin yu ꞌin jun taꞌa na, loꞌ mdaa yu suun tsala ñaꞌan tnu chaꞌ nu mꞌni Ndiose loꞌo yu seꞌen yaa yu, loꞌ ñaꞌan msla Ndiose sca tucueen ꞌin neꞌ gentil siꞌyana tsa quiꞌan tiꞌ neꞌ ꞌin ñi.
\v 28 Quichen canꞌ xꞌni ꞌa nguinu chcuaa yu canꞌ loꞌo jun nu cuaꞌ ya quiꞌan tiꞌ ꞌin Jesús.
\c 15
\s Xa mꞌni cuiyaꞌ jun chaꞌ quichen Jerusalén
\p
\v 1 Canꞌ mdiyaa tucua snan yu nu mdoꞌo seꞌen lyiꞌya loo Judea, mdyisnan nguloꞌo yu ꞌin jun taꞌa na, loꞌ nchcuiꞌ yu: Chaꞌ na a ca circuncida ꞌin um ñaꞌan chaꞌ nu nguaꞌan scua Moisé, a tca tyiꞌo laa um.
\v 2 Una yu Pablo loꞌo yu Bernabé a ncua ca sca chaꞌ ti ꞌin yu loꞌo yu canꞌ, lyee ꞌa ycuiꞌ tyijyin yu scasca yu, canꞌ chaꞌ mdiꞌin tyaa jun chaꞌ siꞌyana tsaa yu Pablo loꞌo yu Bernabé quichen Jerusalén, loꞌo chcua xnan jun nu ca taꞌa tsaa yu, loꞌ cuꞌni cuiyaꞌ yu chaꞌ canꞌ loꞌo yu taꞌa mdaꞌan Jesús, tsatlyu loꞌo yu nu ntsuꞌhui cunta ꞌin jun taꞌa na canꞌ.
\v 3 Xacanꞌ nguaꞌan tñan jun ꞌin yu nguiaa yu, loꞌ mdijin yu seꞌen lyiꞌya loo Fenicia loꞌo Samaria, mdaa yu suun loꞌo jun taꞌa na siꞌyana loꞌo neꞌ gentil cuaꞌ ya quiꞌan tiꞌ ꞌin Jesús, loꞌ nchgaa jun tsuꞌhue ntsuꞌhui tiquee jun siꞌya chaꞌ canꞌ.
\v 4 Xa mdiyaa yu Jerusalén, yu taꞌa mdaꞌan Jesús loꞌo yu nu ntsuꞌhui cunta ꞌin jun mchcuan cunta ꞌin yu, loꞌ mdyisnan mdaa yu suun ñaꞌan chaꞌ tsuꞌhue mꞌni Ndiose loꞌo yu seꞌen yaa yu.
\v 5 Yu nu yuꞌhui tsoꞌ ꞌin neꞌ fariseo nu cuaꞌ ya quiꞌan tiꞌ ꞌin Jesús, cuiꞌ xaa mdyiton yu, loꞌ juin yu: ꞌNi chaꞌ ca circuncida ꞌin neꞌ gentil loꞌ xuꞌhua seꞌen neꞌ chaꞌ ꞌin lee nu nguaꞌan scua Moisé.
\v 6 Xacanꞌ nguioꞌ tiꞌin yu taꞌa mdaꞌan Jesús loꞌo yu nu ntsuꞌhui cunta ꞌin jun taꞌa na, siꞌyana cuꞌni cuiyaꞌ jun chaꞌ canꞌ.
\v 7 Xa nu cuaꞌ lyee ꞌa ycuiꞌ tyijyin jun chaꞌ canꞌ, mdyiton yu Tyo loꞌ juin yu: Nchgaa ꞌun jun taꞌa na, jlyo tiꞌ na siꞌyana cuaꞌ sꞌni ngulohui Ndiose ꞌñan nu tsa ycuinꞌ chaꞌ tsuꞌhue ꞌin ñi loꞌo neꞌ gentil seꞌen nu tsa quiꞌan tiꞌ neꞌ ꞌin ñi.
\v 8 Ndiose, ñi nu ndyuꞌhui lyoo ñaꞌan lca cusya ꞌin na, ncuan xuꞌhue ñi ꞌin neꞌ loꞌ mdaa ñi Espíritu nu Luhui ꞌin ñi tsañaꞌan yatoꞌo ꞌin nareꞌ.
\v 9 Scañaꞌan ti na tloo Ndiose loꞌo neꞌ gentil, siꞌyana msuhui ñi niꞌ cusya ꞌin neꞌ xa nu ya quiꞌan tiꞌ neꞌ.
\v 10 Cuaꞌ ñii, ¿ñi chaꞌ ta nguiꞌni lyeꞌ tiꞌ um ꞌin Ndiose siꞌya chaꞌ re? ¿Ta na nchca tiꞌ um soꞌ tucua um sca yuꞌhua chonꞌ jun nu cuaꞌ ntsuꞌhui chaꞌ ꞌin Jesús, sca yuꞌhua nu ñi nten cula ꞌin na, ñi nareꞌ, loꞌ a nchca cuiꞌya na?
\v 11 Cuiꞌ ca nu ndiya quiꞌan tiꞌ na siꞌyana tyiꞌo laa na siꞌya chaꞌ tsuꞌhue ꞌin Ñi Xꞌnan na Jesús, cuiꞌ cuañaꞌan tyiꞌo laa neꞌ gentil.
\v 12 La xacanꞌ mdiꞌin tiin nchgaa jun canꞌ, loꞌ ngune ꞌin jun ñaꞌan chaꞌ nu ycuiꞌ yu Bernabé loꞌo yu Pablo, ñaꞌan mꞌni Ndiose scasca chaꞌ nu tnu loꞌo neꞌ gentil nchgaa seꞌen yaa yu.
\v 13 Xa mdyi ycuiꞌ yu chaꞌ canꞌ, juin yu Jacobo: Nchgaa ꞌun jun taꞌa na, quine ꞌin um sca chaꞌ nu chcuinꞌ:
\v 14 Yu Tyo cuaꞌ mtsaꞌ yu ꞌin na ñaꞌan chaꞌ tsuꞌhue mꞌni Ndiose loꞌo neꞌ gentil culoo yaꞌ, siꞌyana lja canꞌ caja nu cuꞌni tnu ꞌin ñi.
\v 15 Chaꞌ re nchcua taꞌa na loꞌo chaꞌ nu nguaꞌan scua yu nu mxiycuiꞌ Ndiose ꞌin cuaꞌ sꞌni, loꞌ nchcuiꞌ na:
\v 16 —Nde loo la re, nanꞌ xitucuin, loꞌ xiyaꞌ xiton naꞌan ꞌin Davi nu cuaꞌ ngujlyo canꞌ, cuꞌni chuꞌhuen suun na, loꞌ xiton ꞌin na xiyaꞌ,
\v 17 ñaꞌan ca siꞌyana nchgaa la ñaꞌan nten quia nan neꞌ ꞌin ñi Xꞌnan na, nchgaa neꞌ gentil, tsalca nu cuaꞌ ngulohuin nu ca jaꞌan ꞌñan.
\v 18 Cuañaꞌan juin Ñi Xꞌnan na, ñi nu cuaꞌ sꞌni nguiꞌni chaꞌ re—.
\v 19 Canꞌ chaꞌ ñan tinꞌ, a nchca chaꞌ chcui ndijin na loo chendyu ꞌin neꞌ gentil nu cuaꞌ ya quiꞌan tiꞌ ꞌin Ndiose.
\v 20 Cuiꞌ ca nu caꞌan tñan na sca quityi ꞌin jun, siꞌyana a cu ꞌa jun na nu cuaꞌ yuꞌhui loo joꞌo, ñi a sten yuꞌhui jun loꞌo cuilyiꞌo nten uta loꞌo neꞌ ycuiꞌ ti, ñi a cu neꞌ cunanꞌ ꞌni nu a nslo tne, ñi a ntsuꞌhui chaꞌ cu neꞌ tne ꞌni.
\v 21 Siꞌyana tiꞌ cuaꞌ sꞌni cunda scaa quichen seꞌen nꞌni tnu neꞌ judio ꞌin Ndiose, ndyijyi nu nchcuiꞌ quityi nu nguaꞌan scua Moisé nchgaa tsaan nu nxitñanꞌ na.
\v 22 Xacanꞌ yu taꞌa mdaꞌan Jesús loꞌo yu nu ntsuꞌhui cunta ꞌin jun, tsatlyu loꞌo nchgaa la jun taꞌa na, mꞌni cuiyaꞌ jun chaꞌ siꞌyana culohui jun nu taꞌa quiaa yu Pablo loꞌo Bernabé nde quichen Antioquía. Nguaꞌan tñan jun ꞌin yu Sila, loꞌo Juda, nu nchcuiꞌ neꞌ loꞌo Barsabás, cuiꞌ jun nu ndon loo lati ꞌin jun taꞌa na.
\v 23 Nguaꞌan jun sca quityi nu cuiꞌya yu, loꞌ nchcuiꞌ na: Nchgaa hua nu taꞌa mdaꞌan hua loꞌo Jesús, loꞌo nchgaa hua nu ntsuꞌhui cunta ꞌin jun taꞌa na, tsatlyu loꞌo jun taꞌa na nchcuiꞌ chaꞌ hua ꞌin um, ꞌun neꞌ gentil nu lca taꞌa na nu ndiꞌin quichen Antioquía, loꞌo seꞌen lyiꞌya loo Siria loꞌo Cilicia.
\v 24 Cuaꞌ ynan hua chaꞌ siꞌyana tucua snan yu nu mdoꞌo lja hua yaa yu seꞌen ndiꞌin um, siꞌi loꞌo chaꞌ cuiyaꞌ ꞌin hua, loꞌ msuꞌhua yu chaꞌ nduhue tiꞌ tiquee um loꞌo chaꞌ nu ycuiꞌ yu siꞌyana ca circuncida ꞌin um, loꞌ tucua um tñan chaꞌ ꞌin lee nu nguaꞌan scua Moisé.
\v 25 Huareꞌ mꞌni cuiyaꞌ hua chaꞌ siꞌyana caꞌan tñan hua ꞌin yu nu taꞌa quiaa yu Bernabé loꞌo yu Pablo, yu nu ndyuꞌhui cuiyaꞌ tiꞌ hua ꞌin,
\v 26 yu nu cuaꞌ tyun yaꞌ nchca chaꞌ caja siꞌya chaꞌ ꞌin Ñi Xꞌnan na Jesucristo.
\v 27 Canꞌ chaꞌ nguaꞌan tñan hua ꞌin yu Juda loꞌo yu Sila seꞌen ndiꞌin um siꞌyana tca taa yu suun chaꞌ re.
\v 28 Siꞌya Espíritu nu Luhui ꞌin Ndiose nu mxicuꞌni cusya ꞌin hua, a ncua lca tiquee hua tiꞌin tyaa hua sca chaꞌ nu tucui ꞌin um, tsaloo ti xuꞌhua seꞌen um chaꞌ nu ndon loo lati re:
\v 29 A cu um ñi sca loo na nu cuaꞌ yuꞌhui loo joꞌo, ñi a cu um tne, ñi cunanꞌ ꞌni nu a nslo tne, ñi a sten yuꞌhui um loꞌo cuilyiꞌo nten uta loꞌo neꞌ ycuiꞌ ti. Tsuꞌhue chaꞌ cuꞌni cunta um chaꞌ re. Tsacua ti chaꞌ chcuiꞌ na.
\v 30 Xacanꞌ mxitucui yu quichen Antioquía, loꞌ mxoꞌ tiꞌin yu nchgaa jun taꞌa na, loꞌ mdyaa yu cunta quityi canꞌ.
\v 31 Xa mdyi ycuiꞌ jun ꞌin na, tsuꞌhue ꞌa ntsuꞌhui tiquee jun siꞌya chaꞌ canꞌ.
\v 32 Siꞌyana yu Juda loꞌo yu Sila lca yu nu nxiycuiꞌ Ndiose ꞌin, a yaa lyijyi chaꞌ nu nguloꞌo yu nu taa chaꞌ tnu tiquee ꞌin jun, loꞌ mdiꞌin tya tla la yu ꞌin jun tucueen ꞌin Ndiose.
\v 33 Canꞌ nguinu yu loꞌo jun sca coꞌ xaa, loꞌ xa nde xitucui yu seꞌen ndiꞌin jun nu nguaꞌan tñan ꞌin yu, loꞌo suun ñaꞌan mslaꞌ taꞌa jun loꞌo yu.
\v 34 Una yu Sila canꞌ ncua lca tiquee yu quinu la yu quichen canꞌ.
\v 35 Yu Pablo loꞌo Bernabé tiꞌ nguinu la yu quichen Antioquía, sca chaꞌ ti ꞌin yu loꞌo jun mdaꞌan ycuiꞌ jun chaꞌ tsuꞌhue ꞌin Ñi Xꞌnan na, loꞌ nguloꞌo jun ꞌin neꞌ.
\s Xa mdaꞌan yu Pablo tijyoꞌ loo nu cuaꞌ nchca tucua juesa
\p
\v 36 Chonꞌ ndeꞌen la canꞌ juin yu Pablo ꞌin yu Bernabé: Tsa naꞌan na ꞌin nchgaa jun taꞌa na nu ndiꞌin scasca quichen seꞌen ycuiꞌ na chaꞌ tsuꞌhue ꞌin Ñi Xꞌnan na, chaꞌ ñaꞌan ca ndiꞌin jun.
\v 37 Yu Bernabé ncua tiꞌ yu tsa loꞌo yu ꞌin yu Xuhua, yu nu nchcuiꞌ neꞌ loꞌo lca Marco.
\v 38 Una yu Pablo a mslyaa tsa loꞌo ꞌin yu, siꞌyana tiꞌ la seꞌen lca Panfilia mxitucui yu loꞌ a mslyaa ꞌa yu tiꞌ cuꞌni yu tñan ꞌin Ndiose.
\v 39 Loꞌ siꞌyana a ncua ca sca chaꞌ ti ꞌin yu, canꞌ chaꞌ mdoꞌo tsoꞌ yu scasca yu. Yu Bernabé ya loꞌo ꞌin yu Marco, loꞌ yten yu niꞌ sca yca naꞌan nu tiyaa seꞌen lca Chipre.
\v 40 Yu Pablo ngulohui ꞌin yu Sila siꞌyana ca taꞌa tyiꞌan yu, loꞌ xa cuaꞌ mxnu jun cunta ꞌin yu yaaꞌ Ñi Xꞌnan na mdoꞌo yu nguiaa yu.
\v 41 Mdijin yu seꞌen lyiꞌya loo Siria loꞌo Cilicia, mdaa yu chaꞌ tnu tiquee ꞌin nchgaa jun nu cuaꞌ ya quiꞌan tiꞌ ꞌin Jesús.
\c 16
\s Xa mdaꞌan yu Timoteo loꞌo yu Pablo loꞌo Sila
\p
\v 1 Chonꞌ ndeꞌen canꞌ mdiyaa yu quichen Derbe loꞌo Listra, canꞌ ndiꞌin sca yu nu cuaꞌ ntsuꞌhui chaꞌ ꞌin Jesús, loꞌ naan yu Timoteo. Neꞌ judio lca jyiꞌan yu, loꞌ ndiya quiꞌan tiꞌ ꞌin Jesús, una sti yu lca neꞌ griego.
\v 2 Jun taꞌa na ndiꞌin quichen Listra loꞌo Iconio, tsuꞌhue ꞌa suun ndaa jun chaꞌ ꞌin yu Timoteo.
\v 3 Yu Pablo ncua tiꞌ yu tsa loꞌo yu ꞌin Timoteo, canꞌ chaꞌ mꞌni yu chaꞌ ncua circuncida ꞌin yu, siꞌya chaꞌ ꞌin neꞌ judio nu ndiꞌin quichen seꞌen ntsuꞌhui chaꞌ tyijyin yu, loꞌ jlyo tiꞌ neꞌ siꞌyana neꞌ griego lca sti yu Timoteo.
\v 4 Cunda scaa quichen ndyijyin yu, mtsaꞌ yu ꞌin jun ñaꞌan chaꞌ nu mxnu scua yu taꞌa mdaꞌan Jesús loꞌo yu nu ntsuꞌhui cunta ꞌin jun nu ndiꞌin quichen Jerusalén, siꞌyana xuꞌhua seꞌen jun nchgaa chaꞌ nu nchcuiꞌ quityi canꞌ.
\v 5 Cuañaꞌan nde lyee la jui chaꞌ tnu tiquee ꞌin jun loꞌo chaꞌ nu cuaꞌ ya quiꞌan tiꞌ jun, cunda scaa tsaan canꞌ nchca quiꞌan la jun.
\s Xa naꞌan xñii yu Pablo chaꞌ ꞌin yu Macedonia
\p
\v 6 Mdijin ti yu seꞌen lca Frigia loꞌo seꞌen lyiꞌya loo Galacia, siꞌyana a mdaa Espíritu nu Luhui ꞌin Ndiose chaꞌ cuiyaꞌ chcuiꞌ yu chaꞌ tsuꞌhue ꞌin ñi sca chcui seꞌen lyiꞌya loo Asia.
\v 7 Xa mdiyaa yu seꞌen lyiꞌya loo Misia nu cuaꞌ tyijyin yu seꞌen lyiꞌya loo Bitinia, ticuiꞌ ti ñaꞌan a mdaa Espíritu chaꞌ cuiyaꞌ sten yu seꞌen canꞌ.
\v 8 Xacanꞌ mdijin ñi ti yu seꞌen lyiꞌya loo Misia, loꞌ mdiyaa yu quichen Troas.
\v 9 Sca tla canꞌ naꞌan xñii yu Pablo sca chaꞌ, naꞌan yu ndon sca yu mdoꞌo seꞌen lyiꞌya loo Macedonia, njñan chaꞌ tsuꞌhue ꞌin yu loꞌ nchcuiꞌ: Tyijyin xiꞌyu um loꞌ caan um seꞌen lyiꞌya loo Macedonia, loꞌ ta yaaꞌ um ꞌin hua.
\v 10 Xa naꞌan yu chaꞌ canꞌ, cuiꞌ xaa mꞌni hua chaꞌ nu tsaa hua seꞌen lyiꞌya loo Macedonia, siꞌyana ngujlyo tsuꞌhue tiꞌ hua Ndiose lca nu ngulo tñan ꞌin hua tsa ycuiꞌ hua chaꞌ tsuꞌhue ꞌin ñi seꞌen canꞌ.
\s Xa yuꞌhui yu naꞌan chcuan quichen Filipo
\p
\v 11 Xacanꞌ yten hua niꞌ sca yca naꞌan, mdijin ñi ti hua tsayaꞌ mdiyaa hua seꞌen lca Samotracia, xca tsaan canꞌ mdoꞌo caꞌan hua quichen Neápolis.
\v 12 Canꞌ mdoꞌo hua mdaꞌan quiyaꞌ tiꞌ hua, mdiyaa hua quichen Filipos, sca quichen nu ndon loo lati ꞌin Macedonia, loꞌ lca na quichen romano, canꞌ nguinu hua tucua snan tsaan.
\v 13 Tsaan nu nxitñanꞌ neꞌ judio mdoꞌo hua nde tuꞌhua quichen seꞌen su chco tlyu, ñan tiꞌ hua quija lyoo hua sca seꞌen nchcuiꞌ lyiꞌo neꞌ ꞌin Ndiose. Canꞌ yten tucua hua, loꞌ mdyisnan ycuiꞌ hua chaꞌ tsuꞌhue ꞌin Jesús loꞌo neꞌ cunaꞌan nu cuaꞌ nguioꞌ tiꞌin canꞌ.
\v 14 Lja canꞌ ndon nscan sca neꞌ cunaꞌan naan Lidia nu mdoꞌo quichen Tiatira, ndujuiꞌ neꞌ teꞌ nu tsuꞌhue ñaꞌan cuaa, loꞌ lca neꞌ nu ndiya quiꞌan tiꞌ ꞌin Ndiose. Siꞌya chaꞌ nu ycuiꞌ yu Pablo msla Ñi Xꞌnan na chaꞌ tiyaa ꞌin neꞌ siꞌyana tca cuꞌni cunta neꞌ chaꞌ canꞌ.
\v 15 Xa cuaꞌ mducua tya neꞌ loꞌo nchgaa nu ndiꞌin naꞌan ꞌin neꞌ, juin neꞌ loꞌo hua: Chaꞌ ꞌun ndyuꞌhui lyoo um siꞌyana ndiya quiꞌan tiꞌ hua ꞌin Ñi Xꞌnan na, tsaa um loꞌ quinu um la naꞌan ꞌin hua. Cuañaꞌan mxicuꞌni neꞌ ꞌin hua nguinu hua canꞌ.
\v 16 Yatoꞌo sca tsaan xa nguiaa hua seꞌen nchcuiꞌ lyiꞌo neꞌ ꞌin Ndiose, canꞌ mchcua taꞌa hua loꞌo sca neꞌ cunaꞌan tsa suhue ti nu ntsuꞌhui cuiꞌin xaꞌan ꞌin nu ntsaꞌ ñaꞌan chaꞌ nu ljyaan ꞌin nten. Quiꞌan ꞌa canan nꞌni xꞌnan neꞌ cunaꞌan canꞌ siꞌya chaꞌ jlyo tiꞌ canꞌ ꞌin neꞌ.
\v 17 Mducui nchaꞌan neꞌ ꞌin yu Pablo seꞌen nguiaa hua, loꞌ nchcuiꞌ cueen neꞌ: Nchgaa yu re lca yu nguso ꞌin Ndiose, ñi nu tlyu lati, loꞌ nchcuiꞌ yu ñaꞌan ntsuꞌhui chaꞌ tyiꞌo laa um.
\v 18 Ticuiꞌ ti loo chaꞌ ndaꞌan ycuiꞌ neꞌ cunaꞌan canꞌ nchgaa tsaan, yu Pablo mxiyaꞌ tiꞌ yu ñaꞌan nchcuiꞌ neꞌ, canꞌ chaꞌ mxiton yu, loꞌ juin yu ꞌin cuiꞌin canꞌ: Nanꞌ culon tñan ꞌin loꞌo chaꞌ cuiyaꞌ ꞌin Jesucristo, tyiꞌo loꞌ culaꞌ ton ꞌin neꞌ. Cuiꞌ xaa mdyiꞌo cuiꞌin canꞌ ꞌin neꞌ.
\v 19 Xa ngujlyo tiꞌ xꞌnan neꞌ cunaꞌan canꞌ siꞌyana a ndyuꞌhui ꞌa canan ꞌin neꞌ loꞌo chaꞌ jlyo tiꞌ canꞌ, xacanꞌ msñi neꞌ ꞌin yu Pablo loꞌo yu Sila nu tyaa neꞌ cunta ꞌin yu ꞌin bsya.
\v 20 Ñaꞌaan mdiya loꞌo neꞌ ꞌin yu tloo bsya, juin neꞌ: Chcuaa yu judio re nxilo tiꞌin yu ꞌin nten quichen,
\v 21 loꞌ ndloꞌo yu ñaꞌan chaꞌ nu cuaꞌ ntsuꞌhui ꞌin yu, chaꞌ nu a ngaꞌan chaꞌ cuꞌni na, ñi a tca xuꞌhua seꞌen na, siꞌyana ndiꞌin na seꞌen lyiꞌya loo Roma.
\v 22 Xacanꞌ tsatlyu nguꞌya nten canꞌ chonꞌ yu, loꞌ yu bsya canꞌ ngulo yu tñan siꞌyana tyiꞌo steꞌ yu loꞌ quiꞌni yu.
\v 23 Xa lyee ꞌa cuaꞌ mjyiꞌin neꞌ ꞌin yu, xacanꞌ msuꞌhua neꞌ ꞌin yu naꞌan chcuan, loꞌ ngulo neꞌ tñan ꞌin yu nu ntsuꞌhui cuan canꞌ, siꞌyana xñi tsuꞌhue yu cunta ꞌin chcuaa yu canꞌ.
\v 24 Mchcuan yu cunta ꞌin jun loꞌ msuꞌhua yu ꞌin jun cuarto nu quiꞌñi la, canꞌ mscanꞌ yu quiyaꞌ jun tulja yca.
\v 25 Yu Pablo loꞌo yu Sila nchcuiꞌ lyiꞌo yu ꞌin Ndiose, nguila loꞌo yu ꞌin ñi tluꞌhue tla, loꞌ ne ꞌin nchgaa la ñaꞌan yu preso canꞌ.
\v 26 Tsati ntyin mdyisnan nguñan lyee yaꞌ, tsayaꞌ mchcuin tiꞌin suun naꞌan chcuan canꞌ, juesa nu nguñan nguila nchgaa tunaꞌan canꞌ, cuiꞌ ñaꞌan lcaa nguitinꞌ carena nchcanꞌ nchgaa yu preso canꞌ.
\v 27 Mdyiꞌo sla yu nu ntsuꞌhui cuan canꞌ, naꞌan yu siꞌyana cuaꞌ nducua la nchgaa tunaꞌan canꞌ, ngulyoo yu spada loꞌ ncua tiꞌ yu cujui yu ꞌin yu siꞌyana ñan tiꞌ yu cuaꞌ ngulaa nchgaa preso canꞌ.
\v 28 Una yu Pablo ycuiꞌ cueen yu: A cuꞌni um tiꞌi loꞌo um, siꞌyana nchgaa hua ndiꞌin hua re.
\v 29 Xacanꞌ yu nu ntsuꞌhui cuan canꞌ mjñan yu quiiꞌ, loꞌ ndla ndsa ti yten yu ñaꞌan chcuan canꞌ, lyee mchcuan yu, mdyiꞌya sti yu ꞌin yu tloo yu Pablo loꞌo yu Sila canꞌ.
\v 30 Xacanꞌ ngulyoo yu ꞌin chcuaa yu canꞌ, loꞌ mñichaꞌ yu ꞌin: ¿Ñi na tca cuꞌnin siꞌyana tca tyiꞌo laan?
\v 31 Mxcuen chcuaa yu canꞌ: Tsa quiꞌan tiꞌ um ꞌin Ñi Xꞌnan na Jesucristo, loꞌ tyiꞌo laa um loꞌo nchgaa nu ndiꞌin naꞌan ꞌin um.
\v 32 Ycuiꞌ yu chaꞌ tsuꞌhue ꞌin Ñi Xꞌnan na loꞌo yu canꞌ, tsatlyu loꞌo nchgaa nu ndiꞌin naꞌan ꞌin yu.
\v 33 Ticuiꞌ tla canꞌ mjyiꞌan yu seꞌen tiꞌi ꞌin chcuaa yu canꞌ, cuiꞌ ñaꞌan lcaa mducua tya yu loꞌo nchgaa nu ndiꞌin naꞌan ꞌin yu.
\v 34 Xacanꞌ ya loꞌo yu ꞌin chcuaa yu canꞌ la naꞌan ꞌin yu, canꞌ mxicu neꞌ ꞌin yu. Tsuꞌhue ntsuꞌhui tiquee yu tsatlyu loꞌo nchgaa nu ndiꞌin naꞌan ꞌin yu, siꞌyana ya quiꞌan tiꞌ yu ꞌin Ndiose.
\v 35 Xa nguꞌya xaa, yu bsya canꞌ ngulo yu tñan ꞌin tucua snan silyiya siꞌyana tsa loꞌo yu suun ꞌin yu nu ntsuꞌhui cuan canꞌ, siꞌyana tca culaa yu ꞌin yu Pablo loꞌo yu Sila.
\v 36 Yu nu ntsuꞌhui cuan canꞌ juin ꞌin yu Pablo: Yu bsya msuꞌhua yu suun siꞌyana culaa hua ꞌin um. Cuaꞌ tca quiaa um, a sca la chaꞌ chuꞌhui tiquee um.
\v 37 Xacanꞌ mxcuen yu Pablo canꞌ: Huareꞌ lca hua neꞌ lyiꞌya loo Roma, mjyiꞌin neꞌ ꞌin hua tloo nten quichen loꞌ tiꞌ lyijyi ca cuiyaꞌ chaꞌ ꞌin hua, msuꞌhua neꞌ ꞌin hua naꞌan chcuan, loꞌ cuaꞌ ñii nchca tiꞌ neꞌ culaa neꞌ ꞌin hua cuati ñaꞌan. Una a tyiꞌo hua chaꞌ na siꞌi ycuiꞌ ca yu quian lyoo yu ꞌin hua.
\v 38 Xacanꞌ nguia ytsaꞌ yu silyiya canꞌ ꞌin yu bsya ñaꞌan chaꞌ nu ycuiꞌ yu Pablo canꞌ. Ytsen yu xa ynan yu chaꞌ siꞌyana yu Pablo loꞌo yu Sila lca yu neꞌ lyiꞌya loo Roma.
\v 39 Cuiꞌ xaa yaa yu bsya canꞌ, loꞌ mjñan yu chaꞌ tlyu tiꞌ ꞌin chcuaa yu canꞌ, xacanꞌ ngulaa neꞌ ꞌin yu, loꞌ mjñan neꞌ chaꞌ tsuꞌhue ꞌin yu siꞌyana tyiꞌo yu quichen canꞌ.
\v 40 Xa mdyiꞌo yu naꞌan chcuan, mdijin yu seꞌen nducua naꞌan ꞌin Lidia, canꞌ naꞌan taꞌa yu loꞌo jun taꞌa na, mdaa yu chaꞌ tnu tiquee ꞌin jun, xacanꞌ mdoꞌo yu nguiaa yu.
\c 17
\s Xa nguilo tiꞌin neꞌ Tesalónica
\p
\v 1 Tucueen nguiaa yu mdijin yu quichen Anfípolis loꞌo Apolonia, xacanꞌ mdiyaa yu quichen Tesalónica, canꞌ nducua sca seꞌen nꞌni tnu neꞌ judio ꞌin Ndiose.
\v 2 Ñaꞌan chaꞌ nu cuaꞌ ntsuꞌhui ꞌin yu Pablo yaa yu seꞌen ndiyoꞌ tiꞌin neꞌ judio, loꞌ tsaniꞌ snan snan ya ycuiꞌ yu loꞌo neꞌ, cuiꞌ tsaan nu nxitñanꞌ neꞌ,
\v 3 ndlyo scua la yu chaꞌ ꞌin Cristo tsañaꞌan nchcuiꞌ quityi ꞌin Ndiose, siꞌyana mꞌni ꞌa chaꞌ ngujui ñi loꞌ mdyiquiꞌo ñi. Nchcuiꞌ yu: Jesús, ñi nu ꞌin chaꞌ nchcuinꞌ re lca ñi Cristo.
\v 4 Tucua snan neꞌ judio nu ya quiꞌan tiꞌ ꞌin Jesús, ncua sca chaꞌ ti ꞌin neꞌ loꞌo yu Pablo loꞌo yu Sila canꞌ. A cunta quiꞌan neꞌ griego nu ndiyoꞌ tiꞌin canꞌ ya quiꞌan tiꞌ ꞌin ñi, cuiꞌ cuañaꞌan tyun neꞌ cunaꞌan nu ndon loo lati.
\v 5 Una yten chaꞌ nsinꞌ tiꞌ ꞌin neꞌ judio nu a ya quiꞌan tiꞌ, mxoꞌ taꞌa neꞌ loꞌo yu nducunꞌ nu cuaꞌ la nxiton ti, loꞌ mxilo tiꞌin neꞌ nten quichen, nducua ñi mdiyaa neꞌ ñaꞌan ꞌin yu Jasón siꞌyana culyoo neꞌ ꞌin chcuaa yu canꞌ, loꞌ tyaa neꞌ cunta ꞌin yu tloo nten quichen.
\v 6 Una a nguija lyoo yu, canꞌ chaꞌ ticuiiꞌ yu Jasón ya loꞌo neꞌ ꞌin yu tloo bsya, loꞌo chcua xnan jun taꞌa na, loꞌ nchcuiꞌ cueen neꞌ: Yu re ndaꞌan nxilo tiꞌin nten sca chcui chendyu, loꞌ cuaꞌ ñii mdiyaan yu quichen tyi na re.
\v 7 Yu Jasón, nde nu mdaa seꞌen mdiyaan yu, loꞌ nguiꞌni lyeꞌ tiꞌ yu ꞌin lee nu mxnu scua yu César, nchcuiꞌ yu siꞌyana ntsuꞌhui xca ree ꞌin yu nu lca Jesús.
\v 8 Xa ngune ꞌin neꞌ chaꞌ canꞌ, nde lyee la nguilo tiꞌin neꞌ loꞌo bsya ꞌin neꞌ.
\v 9 Una la msuꞌhua lyiyaꞌ yu Jasón loꞌo taꞌa ndaꞌan yu, xacanꞌ ngulaa bsya ꞌin yu.
\s Xa mdiyaa yu Pablo loꞌo Sila quichen Berea
\p
\v 10 Ticuiꞌ tla canꞌ mducui xuꞌhua jun taꞌa na ꞌin yu Pablo loꞌo yu Sila nde quichen Berea. Xa mdiyaa yu quichen canꞌ yten yu seꞌen nꞌni tnu neꞌ judio ꞌin Ndiose.
\v 11 Lyee la suun ñaꞌan ndiꞌin chaꞌ ꞌin neꞌ canꞌ que ꞌin neꞌ Tesalónica, siꞌyana cuiꞌ xaa ncuan xuꞌhue neꞌ chaꞌ tsuꞌhue ꞌin Ndiose. Cunda scaa tsaan canꞌ nguiꞌni quii tsuꞌhue neꞌ loo quityi ꞌin Ndiose, chaꞌ na cuiꞌ ca ñaꞌan ndloꞌo yu Pablo canꞌ.
\v 12 Quiꞌan ꞌa neꞌ judio ya quiꞌan tiꞌ ꞌin Jesús, cuiꞌ cuañaꞌan quiꞌan neꞌ cunaꞌan nu ndon loo lati lja neꞌ griego, a cunta quiꞌan yu quiꞌyu ya quiꞌan tiꞌ yu.
\v 13 Una xa ynan neꞌ judio nu ndiꞌin quichen Tesalónica siꞌyana loꞌo quichen Berea cuaꞌ ndaꞌan ycuiꞌ yu Pablo chaꞌ tsuꞌhue ꞌin Ndiose, cuiꞌ xaa yaa neꞌ quichen canꞌ, ticuiꞌ ti ñaꞌan mxilo tiꞌin neꞌ ꞌin nten canꞌ.
\v 14 Ticuiꞌ xaa mducui xuꞌhua jun ꞌin yu Pablo tsaa yu tucueen nu ndiyaa tuꞌhua tyiꞌa tujoꞌo. Yu Sila loꞌo yu Timoteo tiꞌ nguinu yu quichen canꞌ.
\v 15 Ntsuꞌhui jun nu mdiya loꞌo yu Pablo la quichen Atenas. Xacanꞌ mxitucui jun loꞌ nguꞌya jun suun ꞌin yu Sila loꞌo yu Timoteo, siꞌyana tsaa yu ticuiꞌ xaa seꞌen nta yu Pablo canꞌ ꞌin yu.
\s Xa mdiyaa yu Pablo quichen Atenas
\p
\v 16 Lja nta yu Pablo ꞌin taꞌa ndaꞌan yu quichen Atenas canꞌ, tiꞌi ꞌa ngaꞌan ꞌin yu xa naꞌan yu siꞌyana siyaꞌ ti mdyaa neꞌ ꞌin neꞌ loꞌo tsoꞌ chaꞌ ꞌin joꞌo.
\v 17 Seꞌen ndiyoꞌ tiꞌin neꞌ judio mdyisnan ycuiꞌ tyijyin neꞌ loꞌo yu siꞌya chaꞌ ꞌin Ndiose, neꞌ judio loꞌo neꞌ gentil, a cunta nchgaa tsaan nchcuiꞌ yu loꞌo ñaꞌan tucui ti seꞌen nchca quiyaꞌ canꞌ.
\v 18 Quichen canꞌ ndiꞌin tucua ta yu bstro nu mꞌni chaꞌan chaꞌ tiyaa ꞌin nten chendyu, sca ta neꞌ naan neꞌ epicurios, loꞌ xca ta neꞌ naan neꞌ estoicos. Mdyisnan ycuiꞌ tyijyin neꞌ loꞌo yu Pablo, loꞌ ntsuꞌhui nu nchcuiꞌ: ¿Ñi na nchcuiꞌ yu nchca nchcuiꞌ re? Ntsuꞌhui xca nu nchcuiꞌ: Cuaꞌ lca na nchcuiꞌ yu chaꞌ ꞌin xca joꞌo nu cui ti. Siꞌyana yu Pablo nchcuiꞌ yu chaꞌ tsuꞌhue ꞌin Jesús, a cunta siꞌyana ndyiquiꞌo nten.
\v 19 Xacanꞌ ya loꞌo neꞌ ꞌin yu sca seꞌen naan Areópago, canꞌ mñichaꞌ neꞌ ꞌin yu: ¿Ta tca quitsaꞌ um ꞌin hua ñaꞌan chaꞌ nu cui ti ndloꞌo um?
\v 20 Siꞌyana nchcuiꞌ um chaꞌ nu a nchca siyaꞌ quine ꞌin hua, loꞌ nchca tiꞌ hua ca jlyo tiꞌ hua ñi chaꞌ nchca tiꞌ chcuiꞌ chaꞌ re.
\v 21 (Siꞌyana nchgaa neꞌ Atenas loꞌo neꞌ nu mdiya tiꞌin ti canꞌ, a sca la xaꞌ chaꞌ ntsuꞌhui yuhue tiꞌ neꞌ, cuiꞌ ca nu nchcuiꞌ neꞌ uta ne ꞌin neꞌ chaꞌ nu cui ti.)
\v 22 Xacanꞌ mdyiton yu Pablo tluꞌhue la seꞌen lca Areópago, loꞌ juin yu: Nchgaa ꞌun neꞌ Atenas, ncua cuiyaꞌ tinꞌ siꞌyana lca um nten nu lyee ꞌa ndiya quiꞌan tiꞌ.
\v 23 Siꞌyana seꞌen mdijin loo quichen re mꞌnin quiin scasca seꞌen nducua joꞌo ꞌin um, canꞌ naꞌan sca chaꞌ loꞌ nchcuiꞌ na: ꞌIN NDIOSE NU A NDYUꞌHUI LYOO NA. Nꞌni tnu um ꞌin ñi siyaꞌ a ndyuꞌhui lyoo um ꞌin ñi, canꞌ ñi nu ꞌin chaꞌ nchcuinꞌ cuaꞌ ñii,
\v 24 cuiꞌ Ndiose nu mtñan chendyu loꞌo nchgaa loo na nu chcanꞌ, loꞌ siꞌyana lca ñi Xꞌnan niꞌ cuaan loꞌo loo chendyu re, a nducua ñi niꞌ lyaa nu mtñan yaaꞌ nten chendyu.
\v 25 Ñi a ꞌni chaꞌ caja nu ta yaaꞌ ꞌin ñi, ta siꞌyana ndeꞌen la chaꞌ ndiya lyijyi ꞌin ñi, cuiꞌ ca nu nde ycuiꞌ ñi ndaa ñi chendyu ꞌin na, nꞌni ñi chaꞌ ndiyaan cuiꞌin na, loꞌ ndaa ñi nchgaa loo na nu najoꞌo ꞌin na.
\v 26 Siꞌya scati yu quiꞌyu, mꞌni ñi chaꞌ yton nchgaa ta nten siꞌyana tyiꞌin neꞌ sca chcui chendyu, cuiꞌ ñi mꞌni cuiyaꞌ ñi cuaan xaa, cuiꞌ cuañaꞌan seꞌen ntsuꞌhui chaꞌ tyiꞌin na,
\v 27 ñaꞌan ca siꞌyana quia nan na ꞌin Ndiose, loꞌ a sꞌni quija lyoo ñi ꞌin na, siyaꞌ jnan yaaꞌ ti na, siꞌyana chaꞌ ñi a tijyoꞌ nchca ñi ꞌin na cunda scaa na.
\v 28 Siꞌya ñi canꞌ chaꞌ nduꞌhui na, ndyiꞌan na, canꞌ chaꞌ loꞌo na. Lca na ñaꞌan juin sca yu taꞌa quichen tyi um xa nguaꞌan yu chaꞌ re: Ta nten ꞌin Ndiose lca na.
\v 29 Loꞌ siꞌyana lca na ta nten ꞌin Ndiose, a ntsuꞌhui chaꞌ quiñan tiꞌ na, ta lca ñi ñaꞌan nchca tiꞌ sca lcuin oro uta plata, loꞌ ta sca lcuin quee, ñaꞌan nchca tiꞌ sca na nu ntñan yaaꞌ nten chendyu loꞌo chaꞌ tiyaa ꞌin neꞌ.
\v 30 Una Ndiose yuꞌhui chaꞌ tlyu tiꞌ ꞌin ñi loꞌo nten nu mdiꞌin cuaꞌ sꞌni siꞌya chaꞌ tinto ꞌin neꞌ, una cuaꞌ ñii ndlo ñi tñan ꞌin nchgaa nten sca chcui chendyu siꞌyana tyaa tiꞌ neꞌ ꞌin ñi.
\v 31 Siꞌyana Ndiose cuaꞌ mdiꞌin tyaa ñi sca tsaan nu cuꞌni ñi xñan bsya ꞌin nten chendyu loꞌo sca chaꞌ nu ñi, siꞌya scati yu quiꞌyu nu cuaꞌ mdoꞌo hui ꞌin ñi, loꞌ tca tsa quiꞌan tiꞌ na ꞌin ñi, siꞌyana Ndiose mꞌni ñi chaꞌ mdyiquiꞌo canꞌ.
\v 32 Una xa ngune ꞌin neꞌ siꞌyana ntsuꞌhui chaꞌ tyiquiꞌo neꞌ cuaꞌ ngujui, ntsuꞌhui nu mstyi lyiꞌo ꞌin yu, loꞌ ntsuꞌhui nu juin: La xiyaꞌ la quine ꞌin hua chaꞌ nu nchcuiꞌ um re.
\v 33 Xacanꞌ mdoꞌo yu Pablo seꞌen nguioꞌ tiꞌin neꞌ canꞌ.
\v 34 Una ntsuꞌhui tucua snan nu ya quiꞌan tiꞌ ꞌin Jesús nu ncua sca chaꞌ ti ꞌin loꞌo yu. Lja canꞌ ntsuꞌhui sca yu naan Dionisio, cuiꞌ ta ꞌin neꞌ Areópago, a cunta ya quiꞌan tiꞌ sca neꞌ cunaꞌan naan Dámaris, loꞌo chcua xnan taꞌa ndaꞌan neꞌ.
\c 18
\s Xa mdiyaa yu Pablo quichen Corinto
\p
\v 1 Chonꞌ ndeꞌen canꞌ mdoꞌo yu Pablo quichen Atenas, loꞌ mdiyaa yu quichen Corinto.
\v 2 Canꞌ mchcua taꞌa yu loꞌo sca yu judio naan Aquila nu ncua cuneꞌ seꞌen lca Ponto. Tiꞌ mdoꞌo ti yu seꞌen lca Italia loꞌo Priscila cuilyiꞌo yu, siꞌya chaꞌ ꞌin Claudio nu ngulo tñan siꞌyana ntsuꞌhui chaꞌ tyiꞌo nchgaa neꞌ judio quichen Roma.
\v 3 Siꞌyana sca loo ti tñan nꞌni yu Pablo loꞌo jun, canꞌ chaꞌ nguinu yu seꞌen ndiꞌin jun, loꞌ tsatlyu mtñan jun teꞌ naꞌan.
\v 4 Cunda scaa tsaan nu nxitñanꞌ neꞌ judio, ndyiꞌan yu Pablo seꞌen ndiyoꞌ tiꞌin neꞌ loꞌ nan yu ñaꞌan nu quiꞌya neꞌ chaꞌ tiyaa, una neꞌ judio loꞌo neꞌ griego lyee nchcuiꞌ tyijyin neꞌ loꞌo yu.
\v 5 Xa mdiyaa yu Sila loꞌo yu Timoteo nu mdoꞌo seꞌen lyiꞌya loo Macedonia, la xacanꞌ jui ñaꞌan mdyaa yu Pablo ꞌin yu siyaꞌ ti nu chcuiꞌ yu chaꞌ tsuꞌhue ꞌin Ndiose, loꞌ mtsaꞌ la yu ꞌin neꞌ judio siꞌyana Jesús lca ñi Cristo, ñi nu nguaꞌan tñan Ndiose.
\v 6 Una neꞌ judio canꞌ mꞌni lyeꞌ tiꞌ neꞌ, mdyisnan mdaja neꞌ ꞌin yu, xacanꞌ mscuin yu Pablo steꞌ yu loꞌ juin yu ꞌin neꞌ: Quinu cunta ꞌin um chaꞌ quinanꞌ cusya ꞌin um, loꞌ siꞌi ꞌa cunta ꞌñan. Tiꞌ cuaꞌ ñii tsa ycuinꞌ chaꞌ tsuꞌhue re loꞌo neꞌ gentil.
\v 7 Ñaꞌaan mdyiꞌo yu seꞌen canꞌ mdiyaa yu naꞌan ꞌin sca yu naan Justo, lca yu sca nu nꞌni tnu ꞌin Ndiose, loꞌ nducua naꞌan ꞌin yu siiꞌ seꞌen ndiyoꞌ tiꞌin neꞌ judio.
\v 8 Yatoꞌo yu Crispo, yu nu ndlo tñan seꞌen nꞌni tnu neꞌ judio ꞌin Ndiose, ya quiꞌan tiꞌ yu ꞌin Ñi Xꞌnan na loꞌo nchgaa nu ndiꞌin ñaꞌan ꞌin yu. Cuiꞌ cuañaꞌan quiꞌan neꞌ Corinto, xa ngune ꞌin chaꞌ tsuꞌhue ꞌin Jesús ya quiꞌan tiꞌ neꞌ ꞌin ñi, loꞌ mducua tya neꞌ.
\v 9 Sca tla canꞌ naꞌan xñii yu Pablo ꞌin Ñi Xꞌnan na, loꞌ nchcuiꞌ ñi: A cutsen, tsa quiñan chcuiꞌ la chaꞌ re, loꞌ a culaꞌ tiꞌ,
\v 10 siꞌyana nanꞌ ndiꞌin loꞌo nchgaa xaa, a tucui nu tca cuꞌni tiꞌi loꞌo, siꞌyana quiꞌan ꞌa nten ndiꞌin quichen re nu cuaꞌ ngulohuin.
\v 11 Canꞌ mdiꞌin yu Pablo sca yjan tluꞌhue, ndloꞌo yu ꞌin nten chaꞌ tsuꞌhue ꞌin Ndiose.
\v 12 Yu Galión ncua yu gubierno seꞌen lyiꞌya loo Acaya, loꞌ neꞌ judio tsatlyu mꞌni sca neꞌ chaꞌ msñi neꞌ ꞌin yu Pablo, loꞌ ya loꞌo neꞌ ꞌin yu seꞌen nchca cuiyaꞌ quiꞌya,
\v 13 loꞌ juin neꞌ: Yu re ndaꞌan xicuꞌni yu ꞌin nten siꞌyana xcañaꞌan cuꞌni tnu na ꞌin Ndiose, loꞌ siꞌi ꞌa ñaꞌan nu nchcuiꞌ lee ꞌin na.
\v 14 Cuaꞌ tyiꞌo ycuiꞌ ti yu Pablo xa mdoꞌo ycuiꞌ yu Galión, loꞌ juin yu ꞌin neꞌ judio: Nchgaa ꞌun neꞌ judio, chaꞌ ndeꞌen la quiꞌya mꞌni yu re, uta yjui yu nten, la xacanꞌ tca cuꞌnin cunta chaꞌ nu nchcuiꞌ um.
\v 15 Una chaꞌ lca na chacuiꞌ chaꞌ ti, ñaꞌan nu nguiꞌni tyiꞌya um nii nten loꞌo lee ꞌin um, tca cuꞌni cuiyaꞌ um chaꞌ canꞌ ticuiꞌ ti um, siꞌyana nanꞌ a nguiten yuꞌhuin chaꞌ nu cuañaꞌan.
\v 16 Xacanꞌ ngulyoo yu ꞌin neꞌ nde lyiyaꞌ.
\v 17 Cuiꞌ ñaꞌaan lca msñi neꞌ ꞌin yu Sóstenes, yu nu ndlo tñan seꞌen nꞌni tnu neꞌ judio ꞌin Ndiose, loꞌ yjui tiꞌin neꞌ ꞌin yu cuiꞌ seꞌen ti seꞌen nchca cuiyaꞌ quiꞌya canꞌ, una yu Galión canꞌ a mda quiyaꞌ yu ꞌin neꞌ.
\v 18 Yu Pablo tyun ꞌa tsaan tiꞌ nguinu yu quichen canꞌ. Xa cuaꞌ mslaꞌ taꞌa yu loꞌo jun, mdoꞌo yu nguiaa yu loꞌo Priscila loꞌo yu Aquila, loꞌ mdiyaa jun quichen Cencrea, canꞌ msiꞌyu quichanꞌ que yu Pablo siꞌya sca ca nu cuaꞌ mdiꞌin tyaa yu, xacanꞌ yten jun niꞌ sca yca naꞌan siꞌyana nde cuaꞌ quiaa yu Pablo seꞌen lca Siria.
\v 19 Xacanꞌ mdyiꞌo tiꞌin yca naꞌan canꞌ quichen Efeso, canꞌ nguinu yu Aquila loꞌo Priscila. Tiꞌ yaa yu Pablo seꞌen nꞌni tnu neꞌ judio ꞌin Ndiose, loꞌ mdyisnan ycuiꞌ tyijyin neꞌ loꞌo yu.
\v 20 Mjñan neꞌ chaꞌ tsuꞌhue ꞌin yu siꞌyana tiꞌ quinu la yu loꞌo neꞌ chcua xnan tsaan, una a jui ꞌa ñaꞌan ꞌin yu.
\v 21 Xacanꞌ mslaꞌ taꞌa yu loꞌo neꞌ loꞌ juin yu: ꞌNi chaꞌ tsaꞌan quichen Jerusalén siꞌyana cuaꞌ nchcui chaꞌ ca taꞌa la cua, una xiyaꞌ la ljyaan chaꞌ Ndiose ljuin ñi. Xacanꞌ yten yu niꞌ yca naꞌan, mdoꞌo yu nguiaa yu.
\s Mdoꞌo yu Pablo tijyoꞌ loo nu cuaꞌ nchca snan yaꞌ
\p
\v 22 Xa mdiyaa yca naꞌan canꞌ quichen Cesarea, mdoꞌo yu nguiaa yu nde Jerusalén, ya ycuiꞌ chaꞌ yu ꞌin jun taꞌa na, xacanꞌ mdoꞌo yu nguiaa yu nde quichen Antioquía.
\v 23 Xa cuaꞌ mdiꞌin yu canꞌ sca coꞌ xaa, xca juesa yaa yu cunda scaa quichen, ya naꞌan yu ꞌin jun nu cuaꞌ ntsuꞌhui chaꞌ ꞌin Jesús nu ndiꞌin seꞌen lyiꞌya loo Galacia, loꞌo Frigia, loꞌ mdaa yu chaꞌ tnu tiquee ꞌin jun.
\s Xa ycuiꞌ yu Apolo chaꞌ ꞌin Ndiose quichen Efeso
\p
\v 24 Yatoꞌo quichen Efeso mdiyaa sca yu judio naan Apolo, nu ncua tyi quichen Alejandría, tsuꞌhue ꞌa nchcuiꞌ yu, loꞌ ndyuꞌhui lyoo tsuꞌhue yu quityi ꞌin Ndiose.
\v 25 Jui nu nguloꞌo ꞌin yu chaꞌ tsuꞌhue ꞌin Ñi Xꞌnan na, nchcuiꞌ yu chaꞌ canꞌ loꞌo nu chcui lca tiquee yu, loꞌ ndloꞌo yu chcui ñaꞌan nguiaa chaꞌ ꞌin Ñi Xꞌnan na, siyaꞌ tsa mducua tya ti yu ñaꞌan nu nguloꞌo yu Xuhua ꞌin nten.
\v 26 Mdyisnan nguloꞌo yu ꞌin neꞌ judio seꞌen nꞌni tnu neꞌ ꞌin Ndiose loꞌo chaꞌ tnu tiquee ꞌin yu, una xa ngune ꞌin Priscila loꞌo yu Aquila ñaꞌan chaꞌ nchcuiꞌ yu, ya loꞌo jun ꞌin yu seꞌen scati yu, mtsaꞌ lyicua la jun ꞌin yu sca chcui ñaꞌan nguiaa chaꞌ ꞌin Ndiose.
\v 27 Yten tiquee yu tyijyin xiꞌyu yu tsaa yu seꞌen lyiꞌya loo Acaya, cuiꞌ cuañaꞌan mdaa jun chaꞌ tnu tiquee ꞌin yu, xacanꞌ nguaꞌan jun sca quityi cuiꞌya yu siꞌyana cuan xuꞌhue jun ꞌin yu, loꞌ xa mdiyaa yu lyee ꞌa mda yaaꞌ yu ꞌin jun loꞌo tsoꞌ chaꞌ ꞌin Ndiose, cuiꞌ jun nu cuaꞌ ya quiꞌan tiꞌ siꞌya chaꞌ tsuꞌhue ꞌin ñi.
\v 28 Ngula ꞌa ycuiꞌ yu loꞌo neꞌ judio tloo nten quichen canꞌ, siꞌyana siꞌi ñaꞌan chaꞌ tiyaa ꞌin neꞌ, loꞌ ngulyo scua la yu ñaꞌan nchcuiꞌ quityi ꞌin Ndiose siꞌyana Jesús lca ñi Cristo, ñi nu nguaꞌan tñan Ndiose.
\c 19
\s Yu Pablo mdiyaa yu quichen Efeso
\p
\v 1 Lja tiꞌ ndiꞌin yu Apolo quichen Corinto canꞌ, yu Pablo cuaꞌ mdijin yu scasca quichen nu ndiꞌin nde loo la seꞌen lca Frigia tsayaꞌ mdiyaa yu quichen Efeso, canꞌ naꞌan taꞌa yu loꞌo tucua snan yu nu cuaꞌ ntsuꞌhui chaꞌ ꞌin Jesús.
\v 2 Mñichaꞌ yu Pablo ꞌin yu: ¿Ta ncuan xuꞌhue um ꞌin Espíritu nu Luhui ꞌin Ndiose xa ya quiꞌan tiꞌ um? Mxcuen yu xacanꞌ: Ñi siyaꞌ a nchca quine ꞌin hua chaꞌ ntsuꞌhui Espíritu nu Luhui ꞌin Ndiose.
\v 3 Xacanꞌ juin yu Pablo ꞌin yu: ¿Ñaꞌan ta mducua tya um chaꞌ na canꞌ? Xacanꞌ mxcuen yu: Tsaloo mducua tya ti hua ñaꞌan nguloꞌo yu Xuhua ꞌin nten.
\v 4 Juin yu Pablo: Yu Xuhua mducua tya yu ꞌin nten tsalca nu cuaꞌ mxiloꞌo chonꞌ quiꞌya nguiꞌni, una ycuiꞌ yu loꞌo neꞌ siꞌyana tsa quiꞌan tiꞌ neꞌ ꞌin nu ntsuꞌhui chaꞌ caan nde chonꞌ la, cuiꞌ Jesús, ñi nu lca Cristo.
\v 5 Xa ngune ꞌin yu chaꞌ canꞌ, mducua tya yu loꞌo chaꞌ cuiyaꞌ ꞌin Ñi Xꞌnan na Jesús.
\v 6 Xa mdiꞌin tyaa yu Pablo yaaꞌ yu ꞌin yu canꞌ, cuiꞌ ñaꞌan lcaa mtsaꞌan yuꞌhui Espíritu nu Luhui ꞌin Ndiose ꞌin yu, loꞌ mdyisnan ycuiꞌ yu lenguas loꞌ ycuiꞌ yu chaꞌ ꞌin Ndiose.
\v 7 Loo nchgaa yu ndiyaa yu tsaa tichcua yu.
\v 8 Yu Pablo canꞌ, tsaniꞌ snan cooꞌ loꞌo chaꞌ tnu tiquee ꞌin yu ndaꞌan ycuiꞌ yu loꞌo neꞌ judio seꞌen nꞌni tnu neꞌ ꞌin Ndiose, lyee ꞌa ycuiꞌ tyijyin neꞌ loꞌo yu, una ngunan yu ñaꞌan nu quiꞌya neꞌ chaꞌ tiyaa ñaꞌan ntsuꞌhui chaꞌ culo Ndiose tñan ꞌin neꞌ.
\v 9 Ntsuꞌhui nu tla cusya ꞌin, a mslyaa tsa quiꞌan tiꞌ, mxiychaꞌ neꞌ Tucueen ꞌin Ñi Xꞌnan na tloo ndiꞌin nten canꞌ. Canꞌ chaꞌ ngulo tsoꞌ yu Pablo ꞌin tsalca jun nu cuaꞌ ntsuꞌhui chaꞌ ꞌin Jesús, loꞌ ya loꞌo yu ꞌin jun seꞌen nducua sca naꞌan xcula ꞌin sca yu naan Tiranno, loꞌ cunda scaa tsaan ndlyo scua la yu chaꞌ ꞌin Ndiose loꞌo jun.
\v 10 Cuañaꞌan ya quiñan ycuiꞌ yu loꞌo nten tsaniꞌ tucua yjan, yatoꞌo nchgaa neꞌ judio loꞌo neꞌ gentil nu ndiꞌin seꞌen lyiꞌya loo Asia ngune ꞌin neꞌ chaꞌ tsuꞌhue ꞌin Ñi Xꞌnan na Jesús.
\v 11 Mdaa Ndiose chaꞌ cuiyaꞌ ꞌin yu Pablo siꞌyana cuꞌni yu scasca chaꞌ nu tnu,
\v 12 nu hasta loꞌo teꞌ pañitu uta teꞌ nu nchcoꞌ yu, chaꞌ tsa loꞌo jun ꞌin na seꞌen nscua nu tiꞌi, loꞌ nchca, loꞌ nu ntsuꞌhui cuiꞌin xaꞌan ꞌin cuiꞌ xaa ndlaꞌ ton na ꞌin.
\v 13 Quichen canꞌ mdiyaa tucua snan neꞌ judio nu ndaꞌan loo cuiꞌin xaꞌan ꞌin nten, ncua tiꞌ neꞌ siꞌyana loꞌo chaꞌ cuiyaꞌ ꞌin Ñi Xꞌnan na Jesús culo neꞌ cuiꞌin xaꞌan canꞌ, loꞌ nchcuiꞌ neꞌ: Loꞌo chaꞌ cuiyaꞌ ꞌin Jesús nu nꞌni tyiꞌya yu Pablo, tyiꞌo lyiyaꞌ.
\v 14 Cuañaꞌan mꞌni tsa cati sñeꞌ sca yu judio naan Esceva, yu nu ndlo tñan seꞌen nꞌni tnu neꞌ judio ꞌin Ndiose quichen canꞌ.
\v 15 Una mxcuen cuiꞌin xaꞌan canꞌ ꞌin taꞌa yu canꞌ: Ndyuꞌhui lyoon ꞌin Jesús, loꞌ jlyo tinꞌ ti ca lca Pablo, una ꞌun, ¿ti ca lca um?
\v 16 Yu nu ntsuꞌhui cuiꞌin xaꞌan canꞌ ꞌin, siyaꞌ mdoꞌo cuaan ti yu chonꞌ nchgaa yu canꞌ, loꞌ mꞌni canan ꞌin yu tsayaꞌ mdoꞌo yu ñaꞌan canꞌ msnan yu cunanꞌ ti yu, a cunta ngujui yuhuaꞌ yu.
\v 17 Mscua cueen chaꞌ re ñaꞌaan quichen Efeso canꞌ, loꞌ neꞌ judio loꞌo neꞌ gentil yten sca ytsen niꞌ cusya ꞌin neꞌ, nde lyee la mꞌni tnu neꞌ ꞌin Ñi Xꞌnan na Jesús siꞌya chaꞌ canꞌ.
\v 18 Quiꞌan ꞌa jun nu ndiya quiꞌan tiꞌ ꞌin Jesús mdyisnan nguñee jun quiꞌya ꞌin jun tloo nchgaa la ñaꞌan jun canꞌ.
\v 19 Cuiꞌ cuañaꞌan loꞌo neꞌ jlyo tiꞌ, nguian loꞌo neꞌ nchgaa quityi nu mꞌni chaꞌan neꞌ, loꞌ mdiquin neꞌ ꞌin na tloo ndiꞌin jun canꞌ. Ngulo neꞌ cunta tsañaꞌan ntsuꞌhui lyoo quityi canꞌ, loꞌ ndiyaa na tuꞌhua tyi mii tñi plata.
\v 20 Cuañaꞌan lyee la nguia nguine yuꞌhui chaꞌ tsuꞌhue ꞌin Ñi Xꞌnan na loꞌo chaꞌ cuiyaꞌ ꞌin ñi.
\v 21 Xa cuaꞌ mdijin nchgaa chaꞌ canꞌ, yten tiquee yu Pablo xitucui yu Jerusalén. Una culo nducua la tsa tijin yu ñaꞌaan seꞌen lyiꞌya loo Macedonia loꞌo seꞌen lca Acaya. Ñan tiꞌ cusya ꞌin yu: Xa cuaꞌ mdiꞌin chinꞌ canꞌ, ꞌni chaꞌ tsaꞌan quichen Roma.
\v 22 Yu Pablo nguaꞌan tñan yu ꞌin tucua yu taꞌa ndaꞌan yu, Timoteo loꞌo Erasto, tsaa yu seꞌen lyiꞌya loo Macedonia, loꞌ tiꞌ nguinu la yu xca coꞌ xaa seꞌen lyiꞌya loo Asia.
\s Xa nguilo tiꞌin neꞌ Efeso
\p
\v 23 Lja xacanꞌ lyee ꞌa nguilo tiꞌin neꞌ Efeso siꞌya jun nu cuaꞌ ntsuꞌhui Tucueen ꞌin Jesús.
\v 24 Sca yu naan Demetrio ntñan yu lcuin laa suhue ti loꞌo plata ꞌin sca joꞌo naan Diana, loꞌ quiꞌan ꞌa canan nꞌni yu loꞌo tñan canꞌ,
\v 25 mxoꞌ tiꞌin yu ꞌin taꞌa cuityi chcuan yu, loꞌ juin yu: ꞌUn yu nu taꞌa nguiꞌni na tñan re, jlyo tsuꞌhue tiꞌ um siꞌyana ndyuꞌhui ꞌa canan ꞌin na loꞌo tñan re.
\v 26 Nchgaa na naꞌan na loꞌ ne ꞌin na ñaꞌan nda tsaa yu Pablo ꞌin nten, loꞌ tsala ñaꞌan quiꞌan neꞌ cuaꞌ ngulo tsoꞌ yu ꞌin quichen re loꞌo ñaꞌaan seꞌen lyiꞌya loo Asia, loꞌ nchcuiꞌ yu siꞌyana siꞌi Ndiose lca na nu ntñan yaaꞌ nten.
\v 27 Chen nchcui ꞌin na, siꞌi tsa tñan ti re tnanꞌ na, cuiꞌ ca nu loꞌo laa ꞌin na seꞌen nducua joꞌo Diana, a tucui ꞌa nu suꞌhua loo ꞌin na, loꞌ tsatoꞌo tsuꞌhue tsuꞌhue ti jlya tiꞌ neꞌ ꞌin joꞌo xꞌnan na nu lyiꞌya loo ñaꞌaan seꞌen lca Asia, loꞌo sca chcui chendyu.
\v 28 Xa ngune ꞌin yu chaꞌ canꞌ, lyee ꞌa ycuen tiqueꞌ yu, loꞌ ycuiꞌ cueen yu: ¡Tla chaꞌ ꞌin joꞌo Diana, xꞌnan neꞌ Efeso!
\v 29 Xacanꞌ nguilo tiꞌin ñaꞌaan quichen neꞌ, tsatlyu nguꞌya neꞌ chonꞌ tucua yu Macedonia taꞌa ndaꞌan yu Pablo, yu Gayo loꞌo yu Aristarco, ya loꞌo neꞌ ꞌin yu seꞌen nchca cuiyaꞌ quiꞌya.
\v 30 Yu Pablo ncua tiꞌ yu tsa ycuiꞌ yu loꞌo nten quichen canꞌ, una a mdaa jun chaꞌ cuiyaꞌ.
\v 31 Cuiꞌ cuañaꞌan tucua snan taꞌa tsuꞌhue yu Pablo nu lca bsya seꞌen lyiꞌya loo Asia, msuꞌhua neꞌ suun ꞌin yu loꞌ mjñan neꞌ chaꞌ tsuꞌhue siꞌyana a tsa suꞌhua tloo yu seꞌen nguioꞌ tiꞌin nten quichen canꞌ.
\v 32 Nten canꞌ scasca ñaꞌan nchcuiꞌ cueen neꞌ seꞌen nchca cuiyaꞌ chaꞌ canꞌ, una quiꞌan la nu a ndyiꞌya chaꞌ tiyaa ñi na nchca.
\v 33 Lja nten canꞌ mxicuꞌni neꞌ judio ꞌin sca yu naan Jantro siꞌyana chcuiꞌ yu tloo nten canꞌ, loꞌ mꞌni yaaꞌ yu siꞌyana tyiꞌin seen neꞌ seꞌen nu chcuiꞌ yu tñan loo neꞌ judio.
\v 34 Una xa yuꞌhui lyoo neꞌ siꞌyana lca yu neꞌ judio, xacanꞌ tsatlyu ycuiꞌ cueen neꞌ tsaniꞌ tucua braa, loꞌ nchcuiꞌ neꞌ: ¡Tla chaꞌ ꞌin joꞌo Diana, xꞌnan neꞌ Efeso!
\v 35 Yu lca scarano quichen canꞌ, xa mꞌni yu canan mdiꞌin seen nten canꞌ, juin yu xacanꞌ: Nchgaa ꞌun neꞌ Efeso, ¿ta ntsuꞌhui nu a jlyo tiꞌ siꞌyana quichen re nducua laa ꞌin joꞌo Diana, a cunta nde nducua joꞌo xꞌnan na nu mdoꞌo tyu nde niꞌ cuaan seꞌen lca Jupiter?
\v 36 A tucui nchcuiꞌ siꞌyana siꞌi cuañaꞌan ca lca na, tsuꞌhue lati tyiꞌin seen um, a cuꞌni um sca chaꞌ ndla ndsa,
\v 37 tsañaꞌan mdiyan loꞌo um ꞌin chcuaa yu re, ñi sca cunan loꞌ a nchca cuꞌni yu niꞌ lyaa re, ñi a nchcuiꞌ caꞌan yu ꞌin joꞌo xꞌnan na.
\v 38 Chaꞌ yu Demetrio loꞌo taꞌa nguiꞌni yu tñan ntsuꞌhui ñaꞌan nsuun yu loꞌo ndeꞌen la tucui, mdiyaa seꞌen ca cuiyaꞌ chaꞌ ꞌin yu tloo bse, canꞌ tca suꞌhua quiꞌya taꞌa yu.
\v 39 Chaꞌ ta ndeꞌen la xca chaꞌ ndiꞌin ꞌin um, tca chcuiꞌ um chaꞌ canꞌ, una tsaan nu nꞌni cuiyaꞌ ca na tñan.
\v 40 Siꞌyana tsañaꞌan nu nguilo tiꞌin na cuaꞌ ñii, chen ꞌa nchcui ꞌin na chaꞌ ca jlyo tiꞌ gubierno chaꞌ re, ñi a jlyo tiꞌ na ñi suun taa na chaꞌ cuñichaꞌ neꞌ ꞌin na.
\v 41 Ñaꞌaan mdyi ycuiꞌ yu chaꞌ canꞌ mslaꞌ taꞌa yu loꞌo nten canꞌ.
\c 20
\s Xa mdoꞌo yu Pablo seꞌen lyiꞌya loo Macedonia loꞌo Grecia
\p
\v 1 Xa cuaꞌ mdiꞌin tiin nten canꞌ, mxoꞌ tiꞌin yu Pablo ꞌin jun taꞌa na, mdaa yu chaꞌ tnu tiquee ꞌin jun, loꞌ mslaꞌ taꞌa yu loꞌo jun, xacanꞌ mdoꞌo yu nguiaa yu seꞌen lyiꞌya loo Macedonia.
\v 2 Mdijin yu scasca quichen seꞌen ndiꞌin jun, quiꞌan ꞌa chaꞌ ycuiꞌ yu loꞌ mdaa yu chaꞌ tnu tiquee ꞌin jun, xacanꞌ mdoꞌo yu nguiaa yu seꞌen lyiꞌya loo Grecia.
\v 3 Canꞌ nguinu yu snan cooꞌ. Cuaꞌ sten yu niꞌ yca naꞌan nu tsaa seꞌen lyiꞌya loo Siria, xa ynan yu chaꞌ siꞌyana ntsuꞌhui ta neꞌ judio ꞌin yu, canꞌ chaꞌ mdiꞌin tyaa yu chaꞌ siꞌyana xitucui yu seꞌen lyiꞌya loo Macedonia.
\v 4 Nde taꞌa mdaꞌan yu Pablo tsayaꞌ yten jun seꞌen lyiꞌya loo Asia: Yu Sópater nu mdoꞌo quichen Berea, loꞌo tucua yu Tesalónica, yu Aristarco loꞌo yu Segundo, yu Gayo nu mdoꞌo quichen Derbe, yu Timoteo, loꞌo tucua yu Asia, yu Tíquico loꞌo yu Trófimo.
\v 5 Yu re mducua loo yu, loꞌ mta yu ꞌin hua quichen Troas.
\v 6 Xa cuaꞌ mdyi taꞌa nu nchcu neꞌ jaslya nu a yuꞌhui suun, xacanꞌ mdoꞌo hua quichen Filipo yten hua niꞌ yca naꞌan, loꞌ niꞌ caꞌyu tsaan yuꞌhui lyijyi hua nu mdiyaa hua quichen Troas, canꞌ naꞌan taꞌa hua loꞌo yu Pablo xiyaꞌ seꞌen nguinu hua sca snan.
\s Yu Pablo mslaꞌ taꞌa yu loꞌo jun Troas
\p
\v 7 Culoo tsaan nu mducua snan canꞌ, nguioꞌ tiꞌin jun taꞌa na nu cuꞌni jun siin, loꞌ yu Pablo mdyisnan nguloꞌo yu ꞌin jun tsayaꞌ mdiyaa tluꞌhue tla, siꞌyana xca ti tsaan canꞌ cuaꞌ ntsuꞌhui chaꞌ tyiꞌo yu.
\v 8 Nguioꞌ tiꞌin jun sca naꞌan nu cuaꞌ nchca snan nde cuaan seꞌen tyun ꞌa quiiꞌ nducua quiin.
\v 9 Sca yu lyoꞌ ti naan Eutico nducua yu seꞌen lca ventana, loꞌ nguꞌya tnu sla yu siꞌyana chaan ꞌa ycuiꞌ yu Pablo. Tiꞌ la canꞌ mdoꞌo tyu yu, cuaꞌ lca ngujui yu xa mxitucui neꞌ ꞌin yu.
\v 10 Mdiyaa yu Pablo seꞌen su yu lyoꞌ ti canꞌ, loꞌ msuꞌhua tuscun yu ꞌin seꞌen su, loꞌ juin yu ꞌin jun: A suꞌhua um chaꞌ tiquee um siꞌyana cuaꞌ nguila chaꞌ tiyaa ꞌin yu re.
\v 11 Xiyaꞌ ycuen yu Pablo la cuaan canꞌ, loꞌ xa cuaꞌ mdyi ycu siin yu loꞌo jun, xca juesa mdyisnan nguloꞌo yu ꞌin jun tsayaꞌ nde cuaꞌ ljyaan xaa, la xacanꞌ mdoꞌo yu nguiaa yu.
\v 12 Tsuꞌhue ꞌa ntsuꞌhui tiquee jun nguia loꞌo jun ꞌin yu lyoꞌ ti canꞌ siꞌyana tiꞌ nguila chaꞌ tiyaa ꞌin yu.
\s Xa mdiyaa yu Pablo seꞌen lca Mileto
\p
\v 13 Xacanꞌ nchgaa la ñaꞌan hua mducua loo hua yten hua niꞌ yca naꞌan canꞌ, mdiyaa hua quichen Asón seꞌen mta hua ꞌin yu Pablo, siꞌyana mdiꞌin tyaa yu chaꞌ tsaa yu tucueen lyuu.
\v 14 Xa mchcua yu ꞌin hua quichen Asón, yten hua niꞌ yca naꞌan loꞌo yu, loꞌ mdiyaa hua quichen Mitilene.
\v 15 Xca tsaan canꞌ mdiyaa hua nde loo la quichen Quío, ticuiꞌ cuañaꞌan xca tsaan canꞌ mdoꞌo hua nguiaa hua, loꞌ mdyiꞌo tiꞌin hua seꞌen lca Samos. Xca tsaan canꞌ mdijin hua quichen Trogilio, loꞌ mdyiꞌo tiꞌin hua quichen Mileto.
\v 16 Siꞌyana a ncua tiꞌ yu Pablo tiyaꞌ ton yu seꞌen lyiꞌya loo Asia, mdijin ti hua quichen Efeso, chaꞌ tiꞌ bla quiꞌni caꞌan ꞌin yu taꞌa Pentecostés quichen Jerusalén.
\s Mslaꞌ taꞌa yu Pablo loꞌo jun Efeso
\p
\v 17 Quichen Mileto ndiꞌin hua xa msuꞌhua yu Pablo suun ꞌin jun taꞌa na Efeso, siꞌyana caan nchgaa yu nu ntsuꞌhui cunta ꞌin jun seꞌen ndiꞌin hua.
\v 18 Xa mdiyaan jun xacanꞌ juin yu Pablo: ꞌUn cuaꞌ ndyuꞌhui lyoo um ñaꞌan chaꞌ ꞌñan tiꞌ tsaan nu mdiyaan seꞌen lyiꞌya loo Asia,
\v 19 siꞌyana loꞌo suun ñaꞌan mꞌnin tñan ꞌin Ñi Xꞌnan na, nguꞌya tuꞌhua tiqueen loꞌo um, a cunta neꞌ judio ncua tiꞌ neꞌ cujui neꞌ ꞌñan,
\v 20 a ngulaꞌ tinꞌ ycuinꞌ chaꞌ nu cuꞌni tsuꞌhue loꞌo um, nguloꞌon ꞌin um seꞌen ndiyoꞌ tiꞌin um, a cunta mdaꞌan la naꞌan ꞌin um cunda scaa um.
\v 21 Scañaꞌan ti ycuinꞌ loꞌo neꞌ judio loꞌo neꞌ gentil, siꞌyana tyaa tiꞌ neꞌ ꞌin Ndiose loꞌ tsa quiꞌan tiꞌ neꞌ ꞌin Ñi Xꞌnan na Jesucristo.
\v 22 Cuaꞌ ñii ñan tiꞌ cusya ꞌñan tsaꞌan quichen Jerusalén, ñi a jlyo tinꞌ ñi na tsatoꞌo ꞌñan la cua.
\v 23 Una ntsaꞌ la Espíritu nu Luhui ꞌin Ndiose ꞌñan nchgaa seꞌen ndijin, siꞌyana ntsuꞌhui chaꞌ tsaꞌan naꞌan chcuan, loꞌ tijin scasca nu tiꞌi.
\v 24 Una a sca chaꞌ canꞌ cuꞌnin cunta, ñi a nguiꞌnin ꞌtnan chendyu ꞌñan, scati chaꞌ nu nchca tinꞌ siꞌyana loꞌo nu chcui lca tiqueen cuꞌnin tyiin tñan nu mdaa Ñi Xꞌnan na Jesús ꞌñan, loꞌ chcuinꞌ chaꞌ tsuꞌhue ꞌin Ndiose tsañaꞌan nguiꞌni ñi ꞌtnan ꞌin neꞌ.
\v 25 Una cuaꞌ ñii quitsanꞌ ꞌin um sca chaꞌ, siꞌyana ñi xca um loꞌ a ñaꞌan taꞌa ꞌa na loꞌo um, ꞌun neꞌ nu cuaꞌ ycuinꞌ chaꞌ tsuꞌhue ꞌin Ndiose loꞌo.
\v 26 Canꞌ chaꞌ chcuinꞌ loꞌo um, siꞌi ꞌa cunta ꞌñan chaꞌ ndeꞌen um quinanꞌ cusya ꞌin um,
\v 27 siꞌyana a msuꞌhuan cutsinꞌ ñi sca chaꞌ loꞌo um nchgaa ñaꞌan nguiaa chaꞌ ꞌin Ndiose.
\v 28 Xñi um cunta ꞌin um tsatlyu loꞌo jun taꞌa na nu cuaꞌ mxnu Espíritu nu Luhui ꞌin Ndiose cunta ꞌin um, loꞌ cuañaꞌan chuꞌhui um cunta ꞌin jun nu cuaꞌ msiꞌi Ñi Xꞌnan na loꞌo tne ñi.
\v 29 Jlyo tinꞌ siꞌyana xa toꞌon re ntsuꞌhui chaꞌ sten nu cuñilyiꞌo ꞌin um loꞌ cuꞌni tiꞌi loꞌo um, tsañaꞌan nchca tiꞌ nguiten yuꞌhui sca ꞌni la lja slyaꞌ.
\v 30 Ticuiꞌ lja um re tyiꞌo nu chcuiꞌ chaꞌ cuiñi seꞌen nu culo tsoꞌ ꞌin jun taꞌa na.
\v 31 Canꞌ chaꞌ tyiꞌin tiyaa um, loꞌ quia yuꞌhui tiꞌ um ñaꞌan nguꞌya tuꞌhua tiqueen siꞌya um, a ngulaꞌ tinꞌ nguloꞌon ꞌin um cunda scaa um tsaniꞌ snan yjan, tla loꞌ cucha.
\v 32 Canꞌ chaꞌ cuaꞌ ñii, ꞌun jun taꞌa na, xnun cunta ꞌin um yaaꞌ Ndiose loꞌ tyon um loo chaꞌ tsuꞌhue ꞌin ñi, siꞌyana cuiꞌ na tca ta yaaꞌ na ꞌin um, loꞌ taa na chaꞌ tsuꞌhue nu quiꞌni caꞌan ꞌin um, tsatlyu loꞌo nchgaa la ñaꞌan nu cuaꞌ ngulohui Ndiose ꞌin.
\v 33 Ñi siyaꞌ, a mducua tloon tñi ꞌin um uta steꞌ um.
\v 34 Cuiꞌ ca nu jlyo tiꞌ um, siꞌyana mꞌnin tñan, jui na nu ngunajoꞌo ꞌñan loꞌo nchgaa la ñaꞌan yu taꞌa mdaꞌan.
\v 35 Cuaꞌ jlyo tiꞌ um ñaꞌan nguloꞌon ꞌin um, la nu cuꞌni na tñan tca ta yaaꞌ na ꞌin nu ꞌni chaꞌ ꞌin, loꞌ quia yuꞌhui tiꞌ na chaꞌ nu ycuiꞌ Ñi Xꞌnan na Jesús: Tsuꞌhue lati nu taa um, loꞌ siꞌi nu nde caja nu taa ꞌin um.
\v 36 Ñaꞌaan mdyi ycuiꞌ yu Pablo chaꞌ canꞌ, mdon xtyinꞌ yu loꞌ ycuiꞌ lyiꞌo yu ꞌin Ndiose loꞌo nchgaa la ñaꞌan jun canꞌ.
\v 37 Nchgaa jun nguꞌya tuꞌhua tiquee jun, loꞌ msuꞌhua tuscun jun ꞌin yu Pablo siꞌyana cuaꞌ quiaa yu.
\v 38 Chaꞌ nu tiꞌi lati ngaꞌan ꞌin jun, siꞌya chaꞌ nu ycuiꞌ yu siꞌyana a ñaꞌan taꞌa ꞌa yu loꞌo jun. Xacanꞌ ya loꞌo ta jun ꞌin yu la seꞌen nducui yca naꞌan canꞌ.
\c 21
\s Xa nguila yu Pablo Jerusalén
\p
\v 1 Xa mslaꞌ taꞌa hua loꞌo jun, xacanꞌ yten hua niꞌ yca naꞌan canꞌ, loꞌ nguiaa hua nducua ñi seꞌen lca quichen Cos, xca tsaan canꞌ mdiyaa hua seꞌen lca Rodas, la xacanꞌ mdiyaa hua quichen Pátara.
\v 2 Canꞌ yten hua niꞌ xca yca naꞌan nu ntsuꞌhui chaꞌ tiyaa seꞌen lyiꞌya loo Finicia, mdoꞌo hua nguiaa hua.
\v 3 Mdijin hua seꞌen su yuu ngutyi seꞌen lca Chipre, loꞌ mxnu hua ꞌin na tsoꞌ ca ꞌin hua, tsayaꞌ mdiyaa hua seꞌen lyiꞌya loo Siria, xacanꞌ mdyiꞌo tiꞌin hua quichen Tiro siꞌyana tyiꞌo yuꞌhua ntsuꞌhui niꞌ yca naꞌan canꞌ.
\v 4 Naꞌan taꞌa hua loꞌo jun ndiꞌin canꞌ, loꞌ nguinu hua loꞌo jun sca snan, lyee ꞌa mjñan jun chaꞌ tsuꞌhue ꞌin yu Pablo siꞌyana a tsaa yu Jerusalén, tsañaꞌan mxiycuiꞌ Espíritu ꞌin jun.
\v 5 Xa yatii snan canꞌ, mdoꞌo hua nde tuꞌhua quichen loꞌo nchgaa jun tsatlyu loꞌo nten ꞌin jun loꞌo sñeꞌ jun, ya loꞌo ta jun ꞌin hua la loo ysin tuꞌhua tyiꞌa tujoꞌo, canꞌ mdon xtyinꞌ hua loꞌ ycuiꞌ lyiꞌo hua ꞌin Ndiose.
\v 6 Msuꞌhua tuscun taꞌa hua loꞌ mslaꞌ taꞌa hua loꞌo jun, xacanꞌ yten hua niꞌ yca naꞌan canꞌ, loꞌ mxitucui jun nde ñaꞌan ꞌin jun.
\v 7 Mdoꞌo hua quichen Tiro loꞌ mdiyaa hua seꞌen lca quichen Tolemaida, canꞌ yatii chaꞌ nu mdaꞌan hua niꞌ yca naꞌan. Ya ycuiꞌ chaꞌ hua ꞌin jun taꞌa na, loꞌ canꞌ nguinu hua sca tla.
\v 8 Xca tsaan canꞌ mdoꞌo hua loꞌo yu Pablo, nguiaa hua nchgaa hua, loꞌ mdiyaa hua quichen Cesarea. Yaa hua seꞌen nducua naꞌan ꞌin yu Lpe, yu nu ndyiꞌan ycuiꞌ chaꞌ tsuꞌhue ꞌin Ndiose, cuiꞌ yu nu yuꞌhui lja tsa cati yu nu mda yaaꞌ ꞌin jun tiꞌ culoo, canꞌ nguinu hua loꞌo yu.
\v 9 Yu Lpe canꞌ ndiꞌin jacua ngüiꞌ cunaꞌan sñeꞌ yu nu nxiycuiꞌ Ndiose ꞌin.
\v 10 Canꞌ mdiꞌin hua tucua snan tsaan xa mdiyaa sca yu naan Agabo nu mdoꞌo seꞌen lca Judea, loꞌo yu canꞌ nxiycuiꞌ Ndiose ꞌin yu.
\v 11 Mdiyaa yu seꞌen ndiꞌin hua, loꞌ msñi yu quijyin ndiꞌin siiꞌ yu Pablo, ticuiiꞌ yu mscanꞌ yu quiyaꞌ yu loꞌo yaaꞌ yu, loꞌ juin yu: Cuaꞌ mtsaꞌ Espíritu nu Luhui ꞌin Ndiose ꞌñan, siꞌyana cuañaꞌan ntsuꞌhui chaꞌ scanꞌ neꞌ judio ndiꞌin quichen Jerusalén ꞌin xꞌnan quijyin re, loꞌ tyaa neꞌ cunta ꞌin yu tuyaaꞌ neꞌ gentil.
\v 12 Xa ngune ꞌin hua chaꞌ re, loꞌo jun nu ndiꞌin naꞌan canꞌ mjñan hua chaꞌ tsuꞌhue ꞌin yu Pablo siꞌyana a tsaa yu quichen Jerusalén.
\v 13 Xacanꞌ mxcuen yu Pablo: ¿Ñi chaꞌ nguinan loꞌo um ꞌñan, loꞌ nguiꞌni xiꞌin um cusya ꞌñan? Nanꞌ cuaꞌ mxñin tinꞌ siꞌyana siꞌi tsaloo scanꞌ ti neꞌ ꞌñan, cuiꞌ ca nu loꞌo cujui neꞌ ꞌñan quichen Jerusalén, siꞌya chaꞌ ꞌin Ñi Xꞌnan na Jesús.
\v 14 Siꞌyana a jui ñaꞌan tiꞌ xitiyaaꞌ la hua ꞌin yu, canꞌ chaꞌ juin hua: Quinu chaꞌ re cunta ꞌin Ñi Xꞌnan na.
\v 15 Xa yatii snan canꞌ, mꞌni chuꞌhue hua suꞌhua hua, mdoꞌo hua nguiaa hua nde Jerusalén,
\v 16 loꞌ taꞌa nguiaa hua ꞌin tucua snan yu taꞌa na mdoꞌo Cesarea, loꞌo sca yu Chipre naan Mnasón, sca yu nu cuaꞌ sꞌni ya quiꞌan tiꞌ ꞌin Jesús, siꞌyana cuiꞌ yu taa yu seꞌen quinu hua la Jerusalén.
\s Xa msñi neꞌ ꞌin yu Pablo niꞌ lyaa
\p
\v 17 Tsuꞌhue ꞌa ntsuꞌhui tiquee nchgaa jun nu ndiꞌin quichen Jerusalén xa mdiyaa hua seꞌen ndiꞌin jun.
\v 18 Xca tsaan canꞌ yaa hua loꞌo yu Pablo seꞌen ndiꞌin yu Jacobo, canꞌ cuaꞌ nguioꞌ tiꞌin nchgaa yu nu cuaꞌ ntsuꞌhui cunta ꞌin jun.
\v 19 Xa cuaꞌ ycuiꞌ chaꞌ taꞌa hua loꞌo jun, xacanꞌ yu Pablo mdyisnan mdaa yu suun cunda scaa chaꞌ nu mꞌni Ndiose loꞌo neꞌ gentil seꞌen yaa yu siꞌya tñan ꞌin ñi.
\v 20 Xa ngune ꞌin jun chaꞌ canꞌ cuiꞌ xaa mꞌni tnu jun ꞌin Ndiose, loꞌ juin jun ꞌin yu Pablo: Tsuꞌhue ꞌa ñi taꞌa na, una mii neꞌ judio nu cuaꞌ ya quiꞌan tiꞌ ꞌin Jesús tiꞌ nxuꞌhua seꞌen neꞌ chaꞌ ꞌin lee.
\v 21 Cuaꞌ ynan neꞌ chaꞌ ꞌin um ñaꞌan ndloꞌo um ꞌin taꞌa judio na nu ntsuꞌhui lja neꞌ gentil, siꞌyana a ca jaꞌan neꞌ chaꞌ nu mxnu scua Moisé, ñi a cuꞌni neꞌ circuncida ꞌin sñeꞌ neꞌ, ñi a tsa nchaꞌan ꞌa neꞌ chaꞌ nu cuaꞌ ntsuꞌhui ꞌin na.
\v 22 ¿Ñaꞌan ta cuꞌni na ñii? A sꞌni cunan neꞌ suun siꞌyana cuaꞌ nguila um, loꞌ tyisnan xoꞌ tiꞌin taꞌa neꞌ.
\v 23 Canꞌ chaꞌ tsuꞌhue lati cuꞌni um nchgaa ñaꞌan nu chcuiꞌ hua loꞌo um. Lja na re ntsuꞌhui jacua yu nu cuaꞌ mdiꞌin tyaa sca ca ꞌin loꞌo Ndiose.
\v 24 Tsaa um loꞌ tsatlyu tyuhui cusya ꞌin um loꞌo yu, cuiꞌ um suꞌhua lyiyaꞌ um chaꞌ canꞌ loꞌ xiꞌyu quichanꞌ quee yu, xacanꞌ ca cuiyaꞌ tiꞌ neꞌ siꞌyana a ndaꞌan um ñaꞌan nu nchca tiꞌ um, cuiꞌ ca nu tiꞌ nxuꞌhua seꞌen um chaꞌ ꞌin lee, loꞌ siꞌi ñaꞌan nu nchcuiꞌ neꞌ chaꞌ ꞌin um.
\v 25 Una neꞌ gentil nu cuaꞌ ya quiꞌan tiꞌ ꞌin Jesús, cuaꞌ nguaꞌan tñan hua sca quityi ꞌin jun siꞌyana a ꞌni chaꞌ xuꞌhua seꞌen jun ñi sca chaꞌ re, tsaloo ti a cu jun na nu cuaꞌ yuꞌhui loo joꞌo, ñi tne ꞌni uta cunanꞌ ꞌni nu a nslo tne, ñi a sten yuꞌhui ꞌa jun loꞌo cuilyiꞌo nten uta loꞌo neꞌ ycuiꞌ ti.
\v 26 Xca tsaan canꞌ xa cuaꞌ ngüi cusya ꞌin yu Pablo loꞌo yu canꞌ, yten jun niꞌ lyaa loꞌ mñichaꞌ yu ꞌin yu nu ndlo tñan canꞌ, chaꞌ ñi xaa taꞌa tsaan nu quian loꞌo yu lcuan ꞌin cunda scaa yu canꞌ.
\v 27 Xa nde cuaꞌ taꞌa cati tsaan canꞌ, naꞌan tucua snan neꞌ judio nu mdoꞌo seꞌen lca Asia ꞌin yu Pablo niꞌ lyaa canꞌ, cuiꞌ xaa mxilo tiꞌin neꞌ ꞌin nten ndiꞌin canꞌ, loꞌ msñi neꞌ ꞌin yu Pablo.
\v 28 Ycuiꞌ cueen neꞌ: Nchgaa ꞌun neꞌ Israel, ta yaaꞌ um ꞌin hua. Nde yu nu ndloꞌo ꞌin nten nchgaa seꞌen siꞌyana ñaꞌan tiꞌi neꞌ ꞌin na, nchcuiꞌ caꞌan neꞌ ꞌin lee loꞌo laa nu nducua re, a cunta nguiten loꞌo yu ꞌin neꞌ gentil seꞌen re, loꞌ nguiꞌni cooꞌ yu ꞌin na.
\v 29 Juin neꞌ cuañaꞌan siꞌyana tiꞌ culoo cuaꞌ naꞌan neꞌ ndaꞌan yu Pablo loꞌo yu Trófimo nu mdoꞌo Efeso, loꞌ msqueꞌ tiꞌ neꞌ siꞌyana cuaꞌ yten loꞌo yu ꞌin niꞌ lyaa.
\v 30 Canꞌ chaꞌ nguilo tiꞌin ñaꞌaan quichen neꞌ, msñi neꞌ ꞌin yu Pablo, ncuan quii suhueꞌ neꞌ ꞌin yu nde lyiyaꞌ, loꞌ cuiꞌ xaa mducun ton neꞌ laa.
\v 31 Cuaꞌ cujui ti neꞌ ꞌin yu xa jui nu mtsaꞌ ꞌin xꞌnan sindatu, siꞌyana ñaꞌaan quichen Jerusalén cuaꞌ nguilo tiꞌin neꞌ.
\v 32 Yu re cuiꞌ xaa mxoꞌ tiꞌin yu ꞌin sindatu ꞌin yu loꞌo nchgaa yu nu cuaꞌ ndlo tñan, ticuiꞌ xaa mdiyaa yu seꞌen ndiꞌin nten canꞌ. Xa naꞌan neꞌ siꞌyana cuaꞌ ljyaan yu sindatu loꞌo xꞌnan yu, cuiꞌ xaa ngulaꞌ tiꞌ neꞌ njyiꞌin neꞌ ꞌin yu Pablo.
\v 33 Ñaꞌaan mdiyaa yu xꞌnan sindatu canꞌ, msñi yu ꞌin yu Pablo, loꞌ ngulo yu tñan ꞌin sindatu ꞌin yu siꞌyana scanꞌ neꞌ ꞌin yu loꞌo tucua carena, xacanꞌ mñichaꞌ yu ꞌin nten canꞌ chaꞌ tucui ca lca yu, loꞌ ñi na mꞌni yu.
\v 34 Una nten canꞌ scasca chaꞌ mxcuen neꞌ ꞌin yu, loꞌ siꞌyana a jui nu taa tsuꞌhue suun loꞌo yu tsañaꞌan nguilo tiꞌin nten canꞌ, ngulo yu tñan siꞌyana tsa loꞌo neꞌ sindatu ꞌin yu Pablo seꞌen nꞌni neꞌ tñan.
\v 35 Xa mdiyaa neꞌ seꞌen nchcuen caꞌan ndiyaꞌ canꞌ, cuaꞌ cuaan ti lyiꞌya neꞌ sindatu ꞌin yu siꞌyana cuaꞌ ñaꞌan ti nguia yꞌni lyiꞌo nten canꞌ ꞌin yu,
\v 36 siꞌyana ñaꞌaan nten canꞌ nducui nchaꞌan neꞌ ꞌin yu, loꞌ nchcuiꞌ cueen neꞌ: Yjui tijin um ꞌin yu.
\s Xa ycuiꞌ yu Pablo loꞌo nten quichen
\p
\v 37 Cuaꞌ sten loꞌo neꞌ sindatu ꞌin yu Pablo ñaꞌan canꞌ, xa ycuiꞌ yu loꞌo xꞌnan sindatu canꞌ: ¿Ta taa um chaꞌ cuiyaꞌ chcuinꞌ sca chaꞌ? Xacanꞌ mxcuen neꞌ ꞌin yu: ¿Ta nchcuiꞌ chaꞌ griego?
\v 38 ¿Ta siꞌi nuꞌhuin lca yu Egipto nu mxoꞌ tiꞌin tsa jacua mii yu nducunꞌ nu ncua xcanꞌ, loꞌ ya loꞌo ꞌin yu seꞌen ngutyi canꞌ?
\v 39 Xacanꞌ mxcuen yu Pablo ꞌin xꞌnan sindatu canꞌ: Nanꞌ lcan sca neꞌ judio nu mdoꞌo quichen Tarso, sca quichen nu ndon loo seꞌen lyiꞌya loo Cilicia, loꞌ jñan chaꞌ tsuꞌhue ꞌin um taa um chaꞌ cuiyaꞌ chcuinꞌ loꞌo nten re.
\v 40 Xacanꞌ mdaa xꞌnan sindatu canꞌ chaꞌ cuiyaꞌ ꞌin yu Pablo, mdyiton yu loo ndiyaꞌ canꞌ, mꞌni yaaꞌ yu ꞌin nten, loꞌ cuiꞌ xaa mdiꞌin seen neꞌ, mdyisnan ycuiꞌ yu chaꞌ hebreo, loꞌ juin yu:
\c 22
\p
\v 1 Tsacua loo ndiꞌin um cuaꞌ ñii, nchca tinꞌ chcuinꞌ sca chaꞌ loꞌo um.
\v 2 Xa ngune ꞌin neꞌ ycuiꞌ yu chaꞌ hebreo, lyee la mꞌni cunta neꞌ chaꞌ nu nchcuiꞌ yu. Loꞌ juin yu:
\v 3 Nanꞌ lcan neꞌ judio taꞌa um, loꞌ quichen Tarso ngulan seꞌen lyiꞌya loo Cilicia. Una loo quichen re yatoꞌo ylon, loꞌ nde yuꞌhuin xcula. Cuiꞌ yu Gamaliel nguloꞌo yu ꞌñan nchgaa loo chaꞌ ꞌin lee nu ntsuꞌhui ꞌin nten cula ꞌin na. Loꞌo nu chcui lca tiqueen mꞌnin tñan ꞌin Ndiose ñaꞌan nguiꞌni um cuaꞌ ñii.
\v 4 Hasta mꞌnin lyiꞌon ꞌin nchgaa nu cuaꞌ ntsuꞌhui Tucueen canꞌ, siꞌyana caja tijin neꞌ. Canꞌ chaꞌ a yaꞌ seꞌen ti mdaꞌan, mscanꞌ ꞌin neꞌ loꞌ msuꞌhuan ꞌin neꞌ naꞌan chcuan, yu quiꞌyu loꞌo neꞌ cunaꞌan.
\v 5 A cunta yu nu ndlo ca tñan niꞌ lyaa loꞌo quiꞌyu cula jlyo tiꞌ yu chaꞌ re, siꞌyana cuiꞌ yu mdaa yu quityi chaꞌ cuiyaꞌ ꞌñan nu cuiꞌyan tsaꞌan quichen Damasco, nu taan ꞌin jun taꞌa judio na. Mdoꞌon, loꞌ lca chaꞌ ꞌñan scanꞌ ꞌin jun, loꞌ quian loꞌon ꞌin jun quichen Jerusalén re, seꞌen nu ntsuꞌhui chaꞌ tyijyin jun nu tiꞌi.
\s Mdaa yu Pablo chaꞌ ñaꞌan ya quiꞌan tiꞌ yu
\p
\v 6 Una yatoꞌo cuaꞌ tyiꞌan tin quichen Damasco, chcua ndyiꞌya cuaan, tsati ntyin msti sca xaa tlyu nu mdoꞌo la niꞌ cuaan, loꞌ msuꞌhua loꞌo na ꞌñan.
\v 7 Cuiꞌ xaa mdlyun, loꞌ ngune ꞌñan jui sca nu ycuiꞌ, loꞌ juin ꞌñan: Saulo, Saulo, ¿ñi chaꞌ ndaꞌan yꞌni lyiꞌo ꞌñan?
\v 8 Mxcuen xacanꞌ: ¿Tucui ca lca um, Ñi Xꞌnan hua? Loꞌ juin ñi ꞌñan: Nanꞌ lcan Jesús Nazaret nu ndaꞌan yꞌni lyiꞌo.
\v 9 Loꞌo yu taꞌa ndaꞌan naꞌan yu xaa canꞌ, lyee ꞌa ytsen yu, una a nguꞌya yu chaꞌ tiyaa tucui ca ycuiꞌ canꞌ.
\v 10 Xacanꞌ nen ꞌin ñi: Ñi Xꞌnan hua, ¿ñi na ta nchca tiꞌ um cuꞌnin? Loꞌ juin ñi ꞌñan: Tyiton loꞌ sten quichen cua, cua caja nu quitsaꞌ ꞌin ñi tñan ntsuꞌhui chaꞌ cuꞌni.
\v 11 A ncua chcanꞌ ꞌa ꞌñan siꞌya xaa nu mꞌni ꞌñan, canꞌ chaꞌ yu taꞌa ndaꞌan msñi yu yaanꞌ, loꞌ yten loꞌo yu ꞌñan quichen Damasco.
\v 12 Canꞌ ndiꞌin sca yu naan Ananía, sca yu nu nxñi ꞌa cunta ꞌin loꞌo chaꞌ ꞌin Ndiose, loꞌ ndyuꞌhui cuiyaꞌ tiꞌ neꞌ judio chendyu ꞌin yu.
\v 13 Yaan yu seꞌen ndiꞌin loꞌ juin yu ꞌñan: Yu taꞌa na Saulo, ntsuꞌhui chaꞌ quila xaa quiloo xiyaꞌ. Ticuiꞌ xaa naꞌan ꞌin yu.
\v 14 Loꞌ juin yu ꞌñan: Ndiose ꞌin nten cula ꞌin na ngulohui ñi ꞌin, siꞌyana ca jlyo tiꞌ ñaꞌan chaꞌ ꞌin ñi, loꞌ tca ñaꞌan ꞌin ñi nu Luhui lati, loꞌ quine ꞌin nchgaa chaꞌ nu chcuiꞌ ñi loꞌo.
\v 15 Cuiꞌ cunajoꞌo ꞌin ñi loꞌ chcuiꞌ loꞌo nchgaa nten tsañaꞌan chaꞌ nu cuaꞌ naꞌan loꞌ ngune ꞌin.
\v 16 Canꞌ chaꞌ cuaꞌ ñii, a quita lyee la. Tyiton loꞌ chcua tya, loꞌ cuten quiꞌya ꞌin loꞌo chaꞌ cuiyaꞌ ꞌin ñi.
\s Tsa ycuiꞌ yu Pablo chaꞌ ꞌin Ndiose loꞌo neꞌ gentil
\p
\v 17 Yatoꞌo xa mxitucuin quichen Jerusalén, yten niꞌ lyaa loꞌ naꞌan xñii sca chaꞌ lja nchcuinꞌ lyiꞌon ꞌin Ndiose.
\v 18 Canꞌ naꞌan ꞌin nu juin ꞌñan: Ndla ti cuꞌni tyiꞌo quichen re, siꞌyana nten re a cuan xuꞌhue neꞌ ꞌñan loꞌo chaꞌ nu chcuiꞌ.
\v 19 Xacanꞌ nen ꞌin ñi: Ñi Xꞌnan hua, jlyo tsuꞌhue tiꞌ nten re ñaꞌan mdaꞌan nan ꞌin jun nu cuaꞌ ya quiꞌan tiꞌ ꞌin um cunda scaa seꞌen ndiyoꞌ tiꞌin neꞌ judio, mjyiꞌin ꞌin jun loꞌ msuꞌhuan ꞌin jun naꞌan chcuan.
\v 20 Xa yjui neꞌ ꞌin yu Steba, yu nu ycuiꞌ chaꞌ tsuꞌhue ꞌin um, loꞌon nanꞌ ndon xacanꞌ, sca chaꞌ ti ꞌñan loꞌo neꞌ, loꞌ yuꞌhuin cunta steꞌ neꞌ lja ndyujui neꞌ ꞌin yu.
\v 21 Una tiꞌ juin la ñi ꞌñan: Yaa, siꞌyana nanꞌ caꞌan tñan ꞌin tsaa tijyoꞌ seꞌen ndiꞌin neꞌ gentil.
\s Xa msñi neꞌ sindatu cunta ꞌin yu Pablo
\p
\v 22 Tsacanꞌ chaꞌ nu cuaꞌ ycuiꞌ yu Pablo xa mdyisnan ycuiꞌ cueen neꞌ: Yjui tijin um ꞌin yu siꞌyana a ngaꞌan ꞌa chaꞌ tiꞌ tyuꞌhui yu chendyu.
\v 23 Mdyisnan msiꞌya loꞌo neꞌ ꞌin yu Pablo lyee yaꞌ, loꞌ hasta msta neꞌ steꞌ neꞌ loꞌ mxiloo neꞌ sñi yuu.
\v 24 Canꞌ chaꞌ cuiꞌ xaa ngulo xꞌnan sindatu canꞌ tñan, siꞌyana sten loꞌo neꞌ ꞌin yu Pablo naꞌan seꞌen ndiꞌin neꞌ loꞌ quiꞌni yu tsayaꞌ quitsaꞌ yu ñi chaꞌ nsiꞌya loꞌo nten canꞌ ꞌin yu.
\v 25 Xa mscanꞌ neꞌ ꞌin yu Pablo loꞌo tiso, mñichaꞌ yu ꞌin sca nu ndlo tñan canꞌ: ¿Ta ntsuꞌhui chaꞌ cuiyaꞌ jyiꞌin um ꞌin sca yu romano, loꞌ tiꞌ lyijyi tyiꞌo quiꞌya ꞌin yu?
\v 26 Xa ngujlyo tiꞌ yu chaꞌ canꞌ, cuiꞌ xaa ya ytsaꞌ yu ꞌin xꞌnan yu, loꞌ juin yu: ¿Ñaꞌan ta ljuin um cuaꞌ ñii siꞌyana neꞌ romano lca yu re?
\v 27 Xacanꞌ ya ñichaꞌ xꞌnan sindatu canꞌ ꞌin yu Pablo: Quitsaꞌ ꞌñan, ¿ta chaꞌ ñi siꞌyana lca neꞌ romano? Mxcuen yu Pablo: Cuiꞌ yu.
\v 28 Loꞌ juin yu xꞌnan sindatu canꞌ: Loꞌon na lcan yu romano, una loꞌo tñi jui chaꞌ cuiyaꞌ re ꞌñan. Xacanꞌ mxcuen yu Pablo: Una nanꞌ lcan sca yu nu ngula ca quichen romano.
\v 29 Neꞌ sindatu nu lca chaꞌ jyiꞌin ꞌin yu Pablo canꞌ, cuiꞌ xaa mdoꞌo tsoꞌ neꞌ loꞌ hasta loꞌo xꞌnan sindatu canꞌ ytsen, siꞌyana mscanꞌ neꞌ ꞌin yu Pablo, loꞌ lca yu neꞌ romano.
\s Xa ncua cuiyaꞌ chaꞌ ꞌin yu Pablo tloo neꞌ judio
\p
\v 30 Yu xꞌnan sindatu canꞌ siꞌyana nchca tiꞌ yu ca jlyo tiꞌ yu ñi quiꞌya ca msuꞌhua neꞌ judio ꞌin yu Pablo, canꞌ chaꞌ xca tsaan canꞌ mxoꞌ tiꞌin yu ꞌin nchgaa yu nu ndlo tñan niꞌ lyaa ꞌin neꞌ loꞌo quiꞌyu cula, xacanꞌ mxtinꞌ neꞌ carena nchcanꞌ yu Pablo loꞌ ngulyoo neꞌ ꞌin yu tloo ndiꞌin nten canꞌ.
\c 23
\p
\v 1 Yu Pablo mxinaꞌan tsuꞌhue ca yu tloo nten canꞌ, loꞌ juin yu: ꞌUn taꞌa judio na, nanꞌ jlyo tinꞌ siꞌyana nduꞌhuin sca chendyu nu luhui tloo Ndiose, cuiꞌ cuañaꞌan cuaꞌ ñii.
\v 2 Yu Ananía, cuiꞌ yu nu ndlo ca tñan niꞌ lyaa, ngulo yu tñan ꞌin yu nu ndon cuiꞌ ti siiꞌ yu Pablo siꞌyana ycuanꞌ neꞌ tuꞌhua yu.
\v 3 Xacanꞌ mxcuen yu Pablo ꞌin yu: Ndiose ycuanꞌ ñi tuꞌhua um, siꞌyana lca um ñaꞌan nchca tiꞌ sca siiꞌ naꞌan nu tsuꞌhue ñaꞌan mten, una nde niꞌ na cooꞌ. ¿Ta siꞌi na nducua um seꞌen nu cuꞌni cuiyaꞌ um chaꞌ ꞌñan loꞌo chaꞌ ꞌin lee, una nde nsti quiyaꞌ um ꞌin na, loꞌ ndlo um tñan siꞌyana jyiꞌin neꞌ ꞌñan?
\v 4 Nten nu taꞌa ndon yu Pablo canꞌ juin ꞌin yu: ¿Ta cuañaꞌan ndaja um ꞌin yu nu ndlo ca tñan niꞌ lyaa ꞌin na, yu nu nguiꞌni tñan ꞌin Ndiose?
\v 5 Juin yu Pablo xacanꞌ: A ncua jlyo tinꞌ siꞌyana lca yu nu ndlo tñan niꞌ lyaa, loꞌ chaꞌ ñi siꞌyana ndeñaꞌan nchcuiꞌ quityi ꞌin Ndiose: —A chcuiꞌ chaꞌ tiꞌi loꞌo yu nu ndlo tñan ꞌin—.
\v 6 Xa naꞌan yu Pablo siꞌyana lja canꞌ ntsuꞌhui neꞌ saduceo, a cunta loꞌo neꞌ fariseo, ycuiꞌ cueen yu: ꞌUn taꞌa judio na, nanꞌ lcan neꞌ fariseo, sñeꞌ ta nten ꞌin neꞌ fariseo, loꞌ cuaꞌ ñii siꞌyana ndiya quiꞌan tinꞌ ntsuꞌhui chaꞌ tyiquiꞌo neꞌ ngujui, canꞌ cha nchca cuiyaꞌ chaꞌ ꞌñan.
\v 7 Xa ycuiꞌ yu Pablo chaꞌ re, cuiꞌ xaa mdyisnan ycuiꞌ tyijyin scasca ta neꞌ, neꞌ fariseo loꞌo neꞌ saduceo, loꞌ a ncua ꞌa ca sca chaꞌ ti ꞌin neꞌ.
\v 8 Neꞌ saduceo nchcuiꞌ neꞌ siꞌyana a ntsuꞌhui chaꞌ tyiquiꞌo neꞌ ngujui, ñi a ntsuꞌhui angujle ꞌin Ndiose uta scasca cuiꞌin. Una neꞌ fariseo ndiya quiꞌan tiꞌ neꞌ nchgaa chaꞌ canꞌ.
\v 9 Siꞌyana lyee ycuiꞌ tyijyin neꞌ, canꞌ chaꞌ mdyiton tucua snan neꞌ escriba, nu sca chaꞌ ti ꞌin loꞌo neꞌ fariseo, loꞌ juin neꞌ: A sca quiꞌya nguija lyoo hua ꞌin yu re, tinaꞌan sca angujle uta sca cuiꞌin ycuiꞌ loꞌo yu, loꞌ chaꞌ cuañaꞌan ndiꞌin chaꞌ, a tsuꞌhue xuun na loꞌo Ndiose.
\v 10 Tsa nducua lyee la nguilo tiꞌin nten canꞌ, loꞌ siꞌyana nguitsen xꞌnan sindatu canꞌ ta cujui yuhuaꞌ neꞌ ꞌin yu Pablo, ngulo yu tñan siꞌyana quia lyaa yu sindatu ꞌin yu Pablo tuyaaꞌ nten canꞌ, loꞌ tsa loꞌo yu ꞌin naꞌan seꞌen ndiꞌin yu sindatu.
\v 11 Xa nguꞌya tla canꞌ nguloꞌo tloo Ñi Xꞌnan na ꞌin yu Pablo, loꞌ juin ñi ꞌin yu: Pablo, cuꞌni tnu tiquee, siꞌyana tsañaꞌan ycuiꞌ chaꞌ tsuꞌhue ꞌñan quichen Jerusalén, cuiꞌ cuañaꞌan chcuiꞌ quichen Roma.
\s Xa mꞌni cuiyaꞌ neꞌ chaꞌ cujui neꞌ ꞌin yu Pablo
\p
\v 12 Xca tsaan canꞌ mꞌni cuiyaꞌ neꞌ judio chaꞌ siꞌyana cujui neꞌ ꞌin yu Pablo, ngulo ca neꞌ ꞌin neꞌ siꞌyana a cu ꞌa neꞌ, ñi a coꞌo ꞌa neꞌ tyiꞌa tsayaꞌ nu cujui neꞌ ꞌin yu.
\v 13 Ndyijyin tsa tucua yla neꞌ nu mdiꞌin tyaa ꞌin loꞌo chaꞌ canꞌ.
\v 14 Xacanꞌ ya ycuiꞌ neꞌ loꞌo yu nu ndlo tñan niꞌ lyaa ꞌin neꞌ, loꞌo nchgaa quiꞌyu cula, loꞌ juin neꞌ: Huareꞌ cuaꞌ ngulo ca hua ꞌin hua siꞌyana a cu ꞌa hua tsayaꞌ nu cujui hua ꞌin yu Pablo.
\v 15 Canꞌ chaꞌ nchgaa ꞌun nu ndlo tñan, cuꞌni ti um chaꞌ siꞌyana tiꞌ cunan la um suun chaꞌ ꞌin yu Pablo loꞌ jñan um ꞌin xꞌnan sindatu siꞌyana tsa loꞌo neꞌ ꞌin yu quiaa tlya, loꞌ huareꞌ cuaꞌ ndiꞌin tiyaa hua tucueen siꞌyana cujui hua ꞌin yu.
\v 16 Una sñeꞌ nu cunaꞌan taꞌa ngula yu Pablo, ngune ꞌin yu chaꞌ canꞌ, cuiꞌ xaa yaa yu seꞌen ndiꞌin neꞌ sindatu canꞌ, loꞌ mtsaꞌ yu ꞌin yu Pablo nchgaa chaꞌ canꞌ.
\v 17 Yu Pablo mdaa yu suun chaꞌ re ꞌin sca nu lca que ꞌin sindatu, loꞌ juin yu: Tsa loꞌo um ꞌin yu lyoꞌ ti re tloo yu nu lca xꞌnan um, siꞌyana ntsuꞌhui sca chaꞌ chcuiꞌ yu la cua.
\v 18 Xacanꞌ ya loꞌo neꞌ ꞌin yu seꞌen ndiꞌin xꞌnan neꞌ, loꞌ juin neꞌ: Yu Pablo nu ntsuꞌhui naꞌan chcuan cua mjñan yu chaꞌ tsuꞌhue ꞌñan, siꞌyana can loꞌon ꞌin yu lyoꞌ ti re, siꞌyana ntsuꞌhui sca chaꞌ quitsaꞌ yu ꞌin um.
\v 19 Xꞌnan sindatu msñi yaaꞌ yu lyoꞌ ti canꞌ, ngulo tsoꞌ ꞌin yu loꞌ mñichaꞌ ꞌin yu: ¿Ñi chaꞌ nchca tiꞌ chcuiꞌ?
\v 20 Xacanꞌ juin yu lyoꞌ ti canꞌ: Sca ta neꞌ judio cuaꞌ mꞌni sca neꞌ chaꞌ, loꞌ can jñan neꞌ chaꞌ tsuꞌhue ꞌin um siꞌyana quiaa tlya tsa loꞌo um ꞌin yu Pablo tloo neꞌ seꞌen nu tyiꞌo scua la chaꞌ ꞌin yu.
\v 21 Una a tsa quiꞌan tiꞌ um ꞌin neꞌ siꞌyana ndyijyin tucua yla nu chuꞌhui ta ꞌin yu Pablo, cuaꞌ ngulo ca neꞌ ꞌin neꞌ siꞌyana a cu ꞌa neꞌ ñi a coꞌo neꞌ tyiꞌa tsayaꞌ nu cujui neꞌ ꞌin yu. Loꞌ cuaꞌ ñii tsaloo nta ti neꞌ ꞌin um, chaꞌ ñaꞌan ljuin um.
\v 22 Xacanꞌ xꞌnan sindatu canꞌ mducui xuꞌhua ꞌin yu lyoꞌ ti canꞌ quiaa yu, loꞌ juin yu ꞌin: A chcuiꞌ loꞌo ñi sca tucui siꞌyana cuaꞌ mtsaꞌ ꞌñan.
\s Xa mdyaa neꞌ cunta ꞌin yu Pablo yaaꞌ yu Felix
\p
\v 23 Yu canꞌ msiꞌya yu ꞌin tucua nu lca que ꞌin sindatu, loꞌ ngulo yu tñan ꞌin siꞌyana tyiꞌin tyaa yu siꞌyana ntsuꞌhui chaꞌ tyiꞌo yu braa cuaꞌ caa tla. Tsa loꞌo yu tucua ciento sindatu ꞌin yu la quichen Cesarea, loꞌo snan yla ntsuꞌhui tii yu nu nchcua cuiyu, loꞌo chcua ciento yu nu cuiꞌya quilyaa chcuan.
\v 24 A cunta tyon tiyaa cuiyu nu chcua yu Pablo nu tsa loꞌo neꞌ ꞌin yu seꞌen ndiꞌin yu Felix nu lca gubierno, loꞌ cuꞌni neꞌ cunta ꞌin yu tucueen tsaa yu.
\v 25 Xacanꞌ nguaꞌan yu sca quityi nu cuiꞌya neꞌ, loꞌ ndeñaꞌan nchcuiꞌ na:
\v 26 Nanꞌ lcan Claudio Lisias nu nchcuiꞌ chaꞌ ꞌin um loo quityi re, ꞌun nu lca gubierno Felix.
\v 27 Yu re msñi neꞌ judio ꞌin yu, ncua tiꞌ neꞌ cujui neꞌ ꞌin yu, loꞌ ngulaan ꞌin yu loꞌo sindatu ꞌñan siꞌyana ncua jlyo tinꞌ lca yu sca neꞌ romano.
\v 28 Siꞌyana ca jlyo tinꞌ ñi quiꞌya msuꞌhua neꞌ ꞌin yu, canꞌ chaꞌ ya loꞌon ꞌin yu seꞌen nchca cuiyaꞌ quiꞌya ꞌin neꞌ.
\v 29 Ncua cuiyaꞌ tinꞌ siꞌyana ngulo quiꞌya neꞌ ꞌin yu siꞌya chaꞌ ꞌin lee ꞌin neꞌ, una a sca quiꞌya nguija lyoon ꞌin yu nu tsaa yu naꞌan chcuan uta caja yu.
\v 30 Una xa jui nu mtsaꞌ ꞌñan siꞌyana cuaꞌ mꞌni cuiyaꞌ neꞌ judio chaꞌ cujui neꞌ ꞌin yu, cuiꞌ xaa nguaꞌan tñan ꞌin yu seꞌen ndlo um tñan, cuaꞌ ycuinꞌ loꞌo tsalca nu msuꞌhua quiꞌya ꞌin yu, chaꞌ nchca tiꞌ neꞌ can suꞌhua neꞌ quiꞌya tloo um. Tsacua ti chaꞌ chcuiꞌ na.
\v 31 Ticuiꞌ tla canꞌ mdoꞌo loꞌo sindatu ꞌin yu Pablo tsayaꞌ mdiyaa neꞌ quichen Antípatris, tsañaꞌan nu mdoꞌo tñan ꞌin neꞌ.
\v 32 Xca tsaan canꞌ nguinu cunta ꞌin yu nu nchcua cuiyu siꞌyana tsa loꞌo lyijyi ꞌin yu Pablo canꞌ, loꞌ nchgaa la ñaꞌan yu sindatu canꞌ mxitucui yu seꞌen mdoꞌo yu.
\v 33 Xa mdiyaa neꞌ quichen Cesarea, mdyaa neꞌ cunta quityi canꞌ ꞌin yu nu lca gubierno, loꞌ mchcuan neꞌ cunta ꞌin yu Pablo.
\v 34 Xa mdyi ycuiꞌ yu nu lca gubierno quityi canꞌ, mñichaꞌ yu ꞌin Pablo chaꞌ la quichen mdoꞌo yu. Xa ngujlyo tiꞌ yu siꞌyana mdoꞌo yu seꞌen lyiꞌya loo Cilicia,
\v 35 juin yu ꞌin Pablo: Xa caan yu msuꞌhua quiꞌya ꞌin, xacanꞌ cuꞌnin cuiyanꞌ chaꞌ ꞌin. Ngulo yu tñan siꞌyana tsa loꞌo neꞌ ꞌin yu Pablo seꞌen nducua naꞌan tñan ꞌin yu Herode, canꞌ chuꞌhui neꞌ cuan ꞌin yu.
\c 24
\s Chaꞌ nu ycuiꞌ yu Pablo tloo yu Felix
\p
\v 1 Xa mdaꞌa caꞌyu tsaan mdiyaa yu Ananía nu ndlo ca tñan niꞌ lyaa ꞌin neꞌ judio, loꞌo chcua xnan quiꞌyu cula, loꞌo sca yu naan Tértulo, siꞌyana canꞌ yu nu ntsuꞌhui chaꞌ chcuiꞌ loꞌo gubierno. Mdiyaa neꞌ tloo gubierno siꞌyana suꞌhua neꞌ quiꞌya ꞌin yu Pablo.
\v 2 Xa nguila ton yu Pablo, mdyisnan msuꞌhua yu Tértulo quiꞌya tloo gubierno, loꞌ juin yu: Nde mdiyaan hua loꞌ ncua cuiyaꞌ tiꞌ hua siꞌyana tsuꞌhue ꞌa chaꞌ tiyaa ꞌin um loꞌo ñaꞌan nu ndlo um tñan, canꞌ chaꞌ tsuꞌhue ndiꞌin hua,
\v 3 loꞌ tsuꞌhue ntsuꞌhui tiquee hua nducuan xuꞌhue hua ꞌin um nchgaa seꞌen ndlo um tñan, ꞌun nu lca Felix.
\v 4 Cuaꞌ ñii siꞌyana a cuꞌni tiyaꞌ hua ꞌin um lyee la, cuꞌni um chaꞌ tlyu tiꞌ ꞌin hua loꞌo chaꞌ nu chcuiꞌ hua.
\v 5 Nchca tiꞌ hua quitsaꞌ hua ꞌin um siꞌyana yu re lca yu ñaꞌan nchca tiꞌ sca quicha, ndaꞌan xisuun yu ꞌin neꞌ judio sca chcui chendyu, loꞌ lca yu que ꞌin ta neꞌ nazareno.
\v 6 Cuaꞌ ñaꞌan ti ncua tiꞌ yu cuꞌni yu niꞌ lyaa ꞌin hua, canꞌ chaꞌ mꞌni hua chaꞌ nguinu yu siꞌyana cuꞌni cuiyaꞌ hua chaꞌ ꞌin yu tsañaꞌan nu nchcuiꞌ lee ꞌin hua.
\v 7 Una yu Lisias xꞌnan sindatu canꞌ, yten yu loꞌo juesa loꞌ ngulaa ꞌin yu re tuyaaꞌ hua,
\v 8 loꞌ ngulo yu tñan ꞌin hua siꞌyana can suꞌhua hua quiꞌya ꞌin yu tloo um, loꞌ ca cuiyaꞌ tiꞌ um chaꞌ re xa cuñichaꞌ um ꞌin yu.
\v 9 Scañaꞌan ti nchcuiꞌ nchgaa neꞌ judio ndiꞌin canꞌ.
\v 10 Xacanꞌ mꞌni yaaꞌ gubierno canꞌ ꞌin yu Pablo siꞌyana tca chcuiꞌ yu, loꞌ ndeñaꞌan mdyisnan ycuiꞌ yu: Nanꞌ jlyo tinꞌ siꞌyana cuaꞌ tyun yjan ndlo um tñan, canꞌ chaꞌ loꞌo nu chcui lca tiqueen chcuinꞌ loꞌo um cuaꞌ ñii.
\v 11 A tucui ñaꞌan ca cuiyaꞌ tiꞌ um chaꞌ re, siꞌyana tsa ntsuꞌhui tichcua ti tsaan yiꞌan quichen Jerusalén ya yꞌnin tnun ꞌin Ndiose.
\v 12 A nguija lyoo neꞌ ꞌñan nchcuinꞌ cuaꞌ ñaꞌan ti loꞌo nten niꞌ lyaa, uta nxilo tiꞌin ꞌin neꞌ scasca seꞌen ndiyoꞌ tiꞌin neꞌ judio, uta loo quichen.
\v 13 A ndyijyi ñaꞌan culyo scua la neꞌ quiꞌya nu msuꞌhua neꞌ ꞌñan.
\v 14 Una quitsanꞌ ꞌin um cuaꞌ ñii siꞌyana Tucueen nu nxcuan tloo neꞌ re cuaꞌ ntsuꞌhuin, ticuiꞌ Ndiose ꞌin nten cula ꞌin hua nguiꞌnin tnun, loꞌ ndiya quiꞌan tinꞌ nchgaa chaꞌ nguinu scua loo quityi chaꞌ ꞌin lee loꞌo chaꞌ nu nguaꞌan yu nu mxiycuiꞌ Ndiose ꞌin cuaꞌ sꞌni.
\v 15 Suꞌhua ñaꞌan nducua tloo hua ꞌin Ndiose loꞌo neꞌ re, siꞌyana ntsuꞌhui chaꞌ tyiquiꞌo neꞌ cuaꞌ ngujui, nten tsuꞌhue uta neꞌ nducunꞌ.
\v 16 Canꞌ chaꞌ nchgaa xaa nsñin cunta ꞌñan, siꞌyana a nchca tinꞌ cuꞌnin quiꞌya tloo Ndiose, uta cuꞌnin cuaꞌ ñaꞌan ti loꞌo nten.
\v 17 Siꞌyana cuaꞌ tyun ꞌa yjan yiꞌan, canꞌ chaꞌ xiyaꞌ nguilan siꞌyana taan sca lcuan ꞌin taꞌa hua neꞌ judio, a cunta taan lcuan niꞌ lyaa.
\v 18 Cuiꞌ tñan canꞌ nguiꞌnin niꞌ lyaa xa cuaꞌ ngüi chaꞌ ꞌñan, loꞌ tucua snan yu judio nu mdoꞌo seꞌen lca Asia naꞌan neꞌ ꞌñan, una a nguilyu quiꞌan nten, ñi a nxilo tiꞌin ꞌin neꞌ.
\v 19 Canꞌ nu ngaꞌan chaꞌ can suꞌhua quiꞌya ꞌñan, chaꞌ ta ndeꞌen la chaꞌ nducui nchaꞌan ꞌin yu loꞌon.
\v 20 Uta ticuiꞌ neꞌ re quitsaꞌ neꞌ ꞌin um, chaꞌ ndeꞌen la chaꞌ ngunanꞌ mꞌnin tloo neꞌ xa mꞌni cuiyaꞌ neꞌ chaꞌ ꞌñan la cua.
\v 21 Tinaꞌan siꞌyana cueen ycuinꞌ sca chaꞌ xa nu nen: Cuaꞌ ñii nguiꞌni cuiyaꞌ um chaꞌ ꞌñan siꞌyana ndiya quiꞌan tinꞌ ntsuꞌhui chaꞌ tyiquiꞌo neꞌ cuaꞌ ngujui.
\v 22 Xa ngune ꞌin yu Felix chaꞌ re, cuiꞌ xaa mxitiyaꞌ tiꞌin yu chaꞌ canꞌ, siꞌyana cuaꞌ jlyo tsuꞌhue tiꞌ yu ñaꞌan nguiaa chaꞌ ꞌin Tucueen canꞌ. Loꞌ juin yu: Xa caan yu Lisias xꞌnan sindatu canꞌ, cuꞌnin cuiyanꞌ lyijyin chaꞌ re ꞌin um.
\v 23 Ngulo yu tñan ꞌin que ꞌin sindatu siꞌyana chuꞌhui neꞌ cuan ꞌin yu Pablo, una a cunta ꞌa ti neꞌ loꞌo yu lyee, taa neꞌ yaꞌ sten nchgaa taꞌa tsuꞌhue yu loꞌ tijin neꞌ na nu cunajoꞌo ꞌin yu.
\v 24 Mdijin tucua snan tsaan xa mdiyan loꞌo yu Felix ꞌin Drusila cuilyiꞌo yu, loꞌ lca neꞌ sca neꞌ judio. Msuꞌhua yu suun siꞌyana caan yu Pablo loꞌ yatoꞌo ngune ꞌin yu ñaꞌan nguiaa chaꞌ tsuꞌhue ꞌin Jesucristo,
\v 25 una xa mdyisnan ycuiꞌ yu Pablo siꞌyana ꞌni chaꞌ tyiꞌin tsuꞌhue na, loꞌ xñi na cunta ꞌin na siꞌyana tiyaa xaa cuꞌni Ndiose xñan bsya ꞌin na, cuiꞌ xaa ytsen yu Felix, loꞌ juin yu ꞌin Pablo canꞌ: Quiaa lya, cua xiꞌyan ꞌin xa nu tyiꞌo lja ꞌñan.
\v 26 Yu Felix canꞌ nducua tloo yu siꞌyana suꞌhua lyiyaꞌ yu Pablo ꞌin yu, la xacanꞌ culaa yu ꞌin, canꞌ chaꞌ luꞌhua ti mxiꞌya yu ꞌin.
\v 27 Mdijin tucua yjan xa mdiyaa yu Felix canꞌ cunta chaꞌ cuiyaꞌ ntsuꞌhui yaaꞌ yu ꞌin xca gubierno nu naan Porcio Festo. Loꞌ seꞌen nu quinu tsuꞌhue tiquee neꞌ judio loꞌo yu, mxnu quiꞌya yu ꞌin yu Pablo canꞌ yaaꞌ yu Festo.
\c 25
\s Chaꞌ nu ycuiꞌ yu Pablo tloo yu Festo 
\p
\v 1 Tsa ntsuꞌhui snan ti tsaan mdiya tiꞌin yu Festo canꞌ quichen Cesarea, xa yaa yu nde Jerusalén.
\v 2 Yu nu ndlo tñan niꞌ lyaa ꞌin neꞌ judio, loꞌo nchgaa la ñaꞌan yu nu ndon loo ꞌin neꞌ, mdiyaa neꞌ tloo yu Festo seꞌen nu suꞌhua neꞌ quiꞌya ꞌin yu Pablo, loꞌ mjñan neꞌ chaꞌ tsuꞌhue ꞌin yu,
\v 3 chaꞌ tca ca cuiyaꞌ chaꞌ ꞌin yu Pablo xiyaꞌ quichen Jerusalén. Chaꞌ ꞌin ti neꞌ cuaꞌ mꞌni cuiyaꞌ neꞌ chaꞌ siꞌyana chuꞌhui cunan neꞌ tucueen, loꞌ cujui neꞌ ꞌin yu.
\v 4 Una yu Festo mxcuen yu: Cuaꞌ ntsuꞌhui neꞌ cuan ꞌin yu Pablo la quichen Cesarea, loꞌ nde cua cuaꞌ ntsuꞌhui chaꞌ xitucuin.
\v 5 Canꞌ chaꞌ tsalca nu ndon loo la ꞌin um, tca tsaa canꞌ loꞌon, la cua suꞌhua canꞌ quiꞌya ꞌin yu chaꞌ ta ndeꞌen la na mꞌni yu.
\v 6 Tiꞌ mdiyaꞌ la yu Festo canꞌ cha xnuꞌ uta cha tii tsaan, xacanꞌ mxitucui yu nde quichen Cesarea. Xca tsaan canꞌ yten tucua yu seꞌen nꞌni cuiyaꞌ yu quiꞌya, loꞌ ngulo yu tñan siꞌyana quia ꞌya neꞌ ꞌin yu Pablo canꞌ.
\v 7 Ñaꞌaan yten yu Pablo msuꞌhua loꞌo neꞌ judio nu mdoꞌo quichen Jerusalén ꞌin yu, loꞌ mdyisnan msuꞌhua neꞌ scasca quiꞌya ꞌin yu, chacuiꞌ quiꞌya nu tnu, una ñi sca na loꞌ a nguñi na ꞌin yu.
\v 8 Xacanꞌ mxcuen yu Pablo: Ñi sca chaꞌ ngunanꞌ loꞌ a mꞌnin loꞌo chaꞌ ꞌin lee ꞌin neꞌ judio, ñi loꞌo laa, ñi loꞌo César, a sca quiꞌya nducuin.
\v 9 Yu Festo seꞌen nu quinu tsuꞌhue yu loꞌo neꞌ judio, mñichaꞌ yu ꞌin yu Pablo: ¿Ta nchca tiꞌ xitucui quichen Jerusalén, loꞌ la cua cuꞌnin cuiyanꞌ chaꞌ ꞌin?
\v 10 Xacanꞌ mxcuen yu Pablo: ¡Ta siꞌi tloo um ndon cuaꞌ ñii seꞌen ndlo yu César tñan, cuiꞌ re ntsuꞌhui chaꞌ ca cuiyaꞌ chaꞌ ꞌñan! ꞌUn jlyo tiꞌ um siꞌyana a sca quiꞌya nducuin tloo neꞌ judio.
\v 11 Una chaꞌ ndeꞌen la chaꞌ mꞌnin nu hasta cujui neꞌ ꞌñan, a cunen loꞌo um ta a cajan. Una chaꞌ a sca quiꞌya nguija lyoo ꞌñan ñaꞌan nu ndlo quiꞌya neꞌ ꞌñan, a ntsuꞌhui chaꞌ quinun tuyaaꞌ neꞌ re. Jñan chaꞌ tsuꞌhue ꞌin um siꞌyana yu César cuꞌni cuiyaꞌ yu chaꞌ ꞌñan.
\v 12 Xa mdyi ycuiꞌ yu Festo loꞌo taꞌa lyiꞌya yu tñan, xacanꞌ juin yu ꞌin Pablo: Cuaꞌ mjñan siꞌyana yu César cuꞌni cuiyaꞌ chaꞌ ꞌin, canꞌ chaꞌ seꞌen nducua yu César tsaa.
\s Xa ycuiꞌ yu Pablo tloo yu Agripa loꞌo Berenice
\p
\v 13 Mdijin tucua snan tsaan canꞌ, mdiyaa yu ree Agripa loꞌo Berenice siꞌyana chcuiꞌ chaꞌ neꞌ ꞌin yu Festo.
\v 14 Loꞌ siꞌyana tyun tsaan mdiꞌin neꞌ canꞌ, jui ñaꞌan mdaa yu Festo suun chaꞌ ꞌin yu Pablo loꞌo neꞌ, loꞌ juin yu: Nde mxnu suꞌhua yu Felix sca yu preso.
\v 15 Xa yiꞌan Jerusalén, yu nu ndlo ca tñan niꞌ lyaa ꞌin neꞌ judio, loꞌo nchgaa quiꞌyu cula, mjñan neꞌ chaꞌ cuiyaꞌ ꞌñan siꞌyana tyiꞌo quiꞌya ꞌin yu tsayaꞌ nu caja yu.
\v 16 Una mxcuen ꞌin neꞌ siꞌyana a ntsuꞌhui chaꞌ ꞌin neꞌ romano ndyaa neꞌ sca tucui loo chaꞌ ndyija, chaꞌ na a nchca ca cuiyaꞌ chaꞌ ꞌin yu tloo ndon nu nsuꞌhua quiꞌya ꞌin yu, loꞌ tiꞌ lyijyi chcuiꞌ yu chaꞌ nu ꞌin yu.
\v 17 Canꞌ chaꞌ xa mdiyaan neꞌ nde re, tlya xca tsaan canꞌ mxiꞌyan ꞌin yu preso canꞌ siꞌyana ca cuiyaꞌ chaꞌ ꞌin yu.
\v 18 Mdyisnan ycuiꞌ neꞌ, una ñi sca quiꞌya ñaꞌan nu ñan tinꞌ, a mdaa neꞌ ꞌin yu.
\v 19 Tsaloo siꞌya chaꞌ nu cuaꞌ ntsuꞌhui ꞌin neꞌ, canꞌ quiꞌya mdaa neꞌ ꞌin yu. Nꞌni tyiꞌya neꞌ ꞌin sca yu naan Jesús nu cuaꞌ ngujui, una yu Pablo nchcuiꞌ yu siꞌya loꞌo ca yu canꞌ.
\v 20 Siꞌyana a ngujlyo ñaꞌan ndiꞌin chaꞌ re, canꞌ chaꞌ mñichanꞌ ꞌin yu Pablo chaꞌ nchca tiꞌ yu xitucui yu nde Jerusalén, loꞌ la cua ca cuiyaꞌ chaꞌ ꞌin yu.
\v 21 Una yu Pablo mjñan yu siꞌyana yu Augusto cuꞌni cuiyaꞌ chaꞌ ꞌin yu, canꞌ chaꞌ ngulon tñan siꞌyana tiꞌ chuꞌhui neꞌ cuan ꞌin yu tsayaꞌ caꞌan tñan ꞌin yu tsaa yu seꞌen nducua yu canꞌ.
\v 22 Xacanꞌ yu Agripa juin yu ꞌin yu Festo: Loꞌon nanꞌ nchca tinꞌ quine ꞌñan chaꞌ nchcuiꞌ yu cua. Loꞌ juin yu Festo: Quiaa quine ꞌin um chaꞌ nu chcuiꞌ yu.
\v 23 Xca tsaan canꞌ yu Agripa loꞌo Berenice, lcoꞌ tsuꞌhue neꞌ yten neꞌ ñaꞌan loꞌo nchgaa xꞌnan sindatu, loꞌo nchgaa la ñaꞌan neꞌ nu ndon loo ꞌin neꞌ quichen canꞌ, xacanꞌ mꞌni yu Festo chaꞌ nguian loꞌo neꞌ ꞌin yu Pablo canꞌ,
\v 24 loꞌ juin yu Festo: ꞌUn yu nu lca ree Agripa loꞌo tsalca nu taꞌa nducua na re, tloo um cuaꞌ ndon yu re, loꞌ ñaꞌaan neꞌ judio msuꞌhua quiꞌya ꞌin yu xa yiꞌan Jerusalén, a cunta yan suꞌhua neꞌ quiꞌya ꞌin yu la re, loꞌ nchcuiꞌ cueen neꞌ siꞌyana caja tijin yu.
\v 25 Una cuiꞌ xaa nguꞌyan chaꞌ tiyaa siꞌyana a sca quiꞌya mꞌni yu nu loꞌo caja yu. Loꞌ siꞌyana cuiꞌ yu mjñan yu siꞌyana yu Augusto cuꞌni cuiyaꞌ chaꞌ ꞌin yu, canꞌ chaꞌ ntsuꞌhui tiqueen caꞌan tñan ꞌin yu la cua.
\v 26 Una a ngujlyo tinꞌ ñaꞌan tsaaꞌ quityi quiꞌya ꞌin yu nu caꞌan tñan ꞌin yu xꞌnan na, canꞌ chaꞌ mꞌnin chaꞌ yaan yu tloo um, ꞌun nu lca ree Agripa tsatlyu loꞌo nchgaa taꞌa nducua na re, loꞌ ca cuiyaꞌ chaꞌ ꞌin yu, xacanꞌ caja ñaꞌan tsaaꞌ quityi chaꞌ ꞌin yu.
\v 27 Siꞌyana a ntsuꞌhui chaꞌ tijin na sca preso, chaꞌ siꞌi culo nducua taa na suun ñi quiꞌya mꞌni yu.
\c 26
\s Chaꞌ nu ycuiꞌ yu Pablo tloo yu Agripa 
\p
\v 1 Xacanꞌ juin yu Agripa ꞌin yu Pablo: Ntsuꞌhui chaꞌ cuiyaꞌ ꞌin chcuiꞌ. Xacanꞌ mscuen yu Pablo yaaꞌ yu, loꞌ mdyisnan mdaa yu suun ñaꞌan ndiꞌin chaꞌ ꞌin yu, loꞌ juin yu:
\v 2 Tsuꞌhue ꞌa ntsuꞌhui tiqueen siꞌyana tca taan suun loꞌo um, ꞌun nu lca ree Agripa, loꞌ ca cuiyaꞌ tiꞌ um ñaꞌan ndiꞌin chaꞌ ꞌñan, loꞌ siꞌi ñaꞌan quiꞌya nsuꞌhua neꞌ judio ꞌñan.
\v 3 Tsuꞌhue ꞌa siꞌyana ꞌun cuaꞌ jlyo tiꞌ um ñaꞌan chaꞌ nu ntsuꞌhui ꞌin neꞌ judio loꞌo scasca chaꞌ nu nchcuiꞌ tyijyin neꞌ. Cuꞌni um chaꞌ tlyu tiꞌ ꞌñan loꞌo chaꞌ nu chcuinꞌ.
\s Chendyu mduꞌhui yu Pablo cuaꞌ sꞌni
\p
\v 4 Nchgaa neꞌ judio ndyuꞌhui lyoo tsuꞌhue neꞌ ꞌñan ñaꞌan chendyu nu mduꞌhuin, siꞌyana lja neꞌ ncua suhuen, a cunta mdiꞌin quichen Jerusalén.
\v 5 Jlyo tiꞌ neꞌ siꞌyana cuaꞌ sꞌni nducui nchaꞌan chaꞌ ꞌin neꞌ fariseo, ta nu ti lati ndiꞌin neꞌ, loꞌ cuiꞌ neꞌ tca quitsaꞌ neꞌ ꞌin um chaꞌ re.
\v 6 Cuaꞌ ñii nchca cuiyaꞌ chaꞌ ꞌñan siꞌya chaꞌ nu nducua tloon, tsañaꞌan chaꞌ nu cuaꞌ mdiꞌin tyaa Ndiose loꞌo nten cula ꞌin hua,
\v 7 cuiꞌ chaꞌ nu nducua tloo tsa tichcua ta nten ꞌin hua, nu tla loꞌ cucha nguiꞌni tnu hua ꞌin Ndiose lja nta hua chaꞌ nu cuaꞌ mdiꞌin tyaa ñi, loꞌ siꞌya chaꞌ re, ꞌun nu lca ree Agripa, ndlo quiꞌya neꞌ judio ꞌñan.
\v 8 ¿Ta ñan tiꞌ um siꞌyana Ndiose a tca cuꞌni ñi chaꞌ tyiquiꞌo neꞌ cuaꞌ ngujui? Ñaꞌan mxitijin yu Pablo nu tiꞌi ꞌin jun tiꞌ culoo
\v 9 Nanꞌ nguñan tinꞌ tiꞌ culoo siꞌyana cuiꞌ ꞌa ñaꞌan mꞌnin, xa mnaꞌan tiꞌin chaꞌ ꞌin Jesús Nazaret,
\v 10 canꞌ chaꞌ loꞌo chaꞌ cuiyaꞌ ꞌin yu nu ndlo ca tñan niꞌ lyaa, tiꞌ la quichen Jerusalén msuꞌhuan ꞌin jun nu ndiya quiꞌan tiꞌ ꞌin Jesús naꞌan chcuan, loꞌ xa yjui neꞌ ꞌin jun ncua sca chaꞌ ti ꞌñan loꞌo neꞌ.
\v 11 Tyun ꞌa yaꞌ mxitijin ꞌin jun nu tiꞌi nchgaa seꞌen nꞌni tnu neꞌ judio ꞌin Ndiose, loꞌ mxicuꞌnin ꞌin jun siꞌyana chcuiꞌ caꞌan jun chaꞌ nu ndiya quiꞌan tiꞌ jun. Lyee ncua tiꞌi tinꞌ ꞌin jun, canꞌ chaꞌ scasca quichen mducui nchaꞌan ꞌin jun.
\s Yu Pablo mdaa yu suun ñaꞌan ya quiꞌan tiꞌ yu
\p
\v 12 Cuiꞌ siꞌya chaꞌ canꞌ nguiꞌan quichen Damasco loꞌo chaꞌ cuiyaꞌ ꞌin yu nu ndlo ca tñan niꞌ lyaa ꞌin neꞌ judio.
\v 13 Cuaꞌ ca ndyiꞌya cuaan nguiꞌan tucueen canꞌ, naꞌan msti sca xaa nu mdoꞌo la niꞌ cuaan nu tsuꞌhue lati ñaꞌan que xaa ꞌin cucha, loꞌ msuꞌhua loꞌo na ꞌñan loꞌo yu taꞌa nguiꞌan canꞌ.
\v 14 Cuiꞌ ñaꞌan lcaa mdlyu hua nchgaa hua, xacanꞌ ngune ꞌñan jui sca nu ycuiꞌ loꞌo chaꞌ hebreo, loꞌ juin ꞌñan: Saulo, Saulo, ¿ñi chaꞌ ndaꞌan yꞌni lyiꞌo ꞌñan? ¿Ta a jlyo tiꞌ siꞌyana ticuiiꞌ nguiꞌni tiꞌi loꞌo ñaꞌan nu nguiꞌni cua?
\v 15 Xacanꞌ mxcuen: ¿Tucui ca lca um Ñi Xꞌnan hua? Loꞌ juin Ñi Xꞌnan na ꞌñan: Nanꞌ lcan Jesús nu ndaꞌan yꞌni lyiꞌo.
\v 16 Tyiton lya, nanꞌ nguloꞌon tloon ꞌin siꞌyana ca sca nguso ꞌñan, loꞌ tsa ycuiꞌ loꞌo nten chaꞌ nu naꞌan cuaꞌ ñii, loꞌo chaꞌ nu tiꞌ lyijyi culoꞌon ꞌin.
\v 17 Culaan ꞌin tuyaaꞌ neꞌ judio loꞌo neꞌ gentil, siꞌyana cuaꞌ ñii caꞌan tñan ꞌin tsaa seꞌen ndiꞌin neꞌ,
\v 18 loꞌ sla chaꞌ tiyaa ꞌin neꞌ, ñaꞌan ca siꞌyana tyiꞌo tsoꞌ neꞌ loo chaꞌ tla yta ꞌin neꞌ loꞌ tyon neꞌ loo xaa ꞌin Ndiose, tyiꞌo neꞌ seꞌen ntsuꞌhui neꞌ tuyaaꞌ laxaꞌan loꞌ chcui nchaꞌan neꞌ ꞌin Ndiose, xacanꞌ chca quiꞌya nducui neꞌ loo nu tsa quiꞌan tiꞌ neꞌ ꞌñan, loꞌ chcuan neꞌ cunta chaꞌ tsuꞌhue nu taa Ndiose ꞌin nchgaa nu mdoꞌo hui ꞌin ñi. Ñaꞌan ncua jaꞌan yu Pablo ꞌin Jesús
\v 19 Canꞌ chaꞌ cuaꞌ ñii quitsanꞌ ꞌin um, ꞌun nu lca ree Agripa, siꞌyana a mꞌnin lyeꞌ tinꞌ loꞌo chaꞌ nu mdoꞌo la niꞌ cuaan.
\v 20 Culo nducua la ycuinꞌ chaꞌ re loꞌo neꞌ ndiꞌin quichen Damasco, a cunta loꞌo neꞌ Jerusalén, loꞌo ñaꞌaan seꞌen lyiꞌya loo Judea, cuiꞌ cuañaꞌan ycuinꞌ loꞌo neꞌ gentil siꞌyana tyaa tiꞌ neꞌ ꞌin Ndiose, loꞌ culoꞌo xñan neꞌ ꞌin neꞌ loꞌo scasca chaꞌ tsuꞌhue nu cuꞌni neꞌ.
\v 21 Siꞌya chaꞌ re msñi neꞌ judio ꞌñan la niꞌ lyaa ꞌin neꞌ, loꞌ ncua chaꞌ cujui neꞌ ꞌñan.
\v 22 Una Ndiose mda yaaꞌ ñi ꞌñan, canꞌ chaꞌ loo chaꞌ re ndon hasta cuaꞌ ñii, cula loꞌ suhue nchcuinꞌ chaꞌ tsuꞌhue ꞌin ñi loꞌo, chcui ñaꞌan nguiaa chaꞌ nu ycuiꞌ Moisé loꞌo chaꞌ nu ycuiꞌ nchgaa la ñaꞌan yu nu mxiycuiꞌ Ndiose ꞌin cuaꞌ sꞌni:
\v 23 siꞌyana ñi nu lca Cristo ntsuꞌhui chaꞌ tyijyin ñi nu tiꞌi tsayaꞌ caja ñi, loꞌ culoo la ñi tyiquiꞌo ñi siꞌyana ca ñi sca xaa ꞌin neꞌ judio loꞌo neꞌ gentil.
\s Ncua tiꞌ yu Pablo siꞌyana tsa quiꞌan tiꞌ yu Agripa
\p
\v 24 Lja nchcuiꞌ yu chaꞌ re, ycuiꞌ cueen yu Festo: Cuaꞌ ndiyoꞌ Pablo, loo nu lyee ꞌa mꞌni chaꞌan canꞌ chaꞌ nchca ndiyoꞌ.
\v 25 Xacanꞌ mxcuen yu Pablo: ꞌUn ñi Festo, siꞌi na ndiyonꞌ, cuiꞌ ca nu nchcuinꞌ chaꞌ nu ñi loꞌo sca chaꞌ tiyaa nu chcui.
\v 26 Nde nducua yu ree, jlyo tsuꞌhue tiꞌ yu ñaꞌan ndiꞌin chaꞌ re, canꞌ chaꞌ a sca lca tiqueen chcuinꞌ tloo yu, siꞌyana nchgaa chaꞌ re ndyiꞌya yu cunta siꞌyana siꞌi chaꞌ nu yatoꞌo cunan ti ca lca na.
\v 27 ꞌUn nu lca ree Agripa, ¿ta ndiya quiꞌan tiꞌ um chaꞌ nu mxnu scua yu nu mxiycuiꞌ Ndiose ꞌin? Nanꞌ jlyo tinꞌ siꞌyana ndiya quiꞌan tiꞌ um.
\v 28 Xacanꞌ mxcuen yu ree canꞌ: ¿Ta ñan tiꞌ siꞌyana loꞌo chaꞌ nu ycuiꞌ ti cua, tsa quiꞌan tinꞌ ꞌin Cristo?
\v 29 Mxcuen yu Pablo: Chaꞌ Ndiose ljuin, a ꞌni chaꞌ ta cuiꞌ xaa uta ndiyaꞌ la, una ꞌni chaꞌ tsa quiꞌan tiꞌ um loꞌo nchgaa taꞌa nducua um re, loꞌ ca um sca sñeꞌ ñi ñaꞌan nu lcan, una siꞌi ñaꞌan nu nchcanꞌ loꞌo carena re.
\v 30 Xa mdyi ycuiꞌ yu Pablo chaꞌ re, tsatlyu mdyiton yu ree canꞌ, loꞌo gubierno, loꞌo Berenice, loꞌo nchgaa la ñaꞌan taꞌa nducua yu.
\v 31 Mdoꞌo ntan neꞌ seꞌen canꞌ, mdyisnan ycuiꞌ neꞌ scasca neꞌ, loꞌ nchcuiꞌ neꞌ: A sca quiꞌya nducui yu re nu quinu yuꞌhui yu naꞌan chcuan uta caja yu.
\v 32 Yu Agripa canꞌ juin yu ꞌin Festo: Tca lyaa yu re chaꞌ cua na a mjñan yu chaꞌ siꞌyana yu César cuꞌni cuiyaꞌ chaꞌ ꞌin yu.
\c 27
\s Xa nguiaa yu Pablo preso quichen Roma 
\p
\v 1 Mdiyaa xaa nu juin neꞌ siꞌyana tsaa hua seꞌen lca Italia, xacanꞌ mdyaa neꞌ cunta ꞌin yu Pablo yaaꞌ yu Julio, nu lca que ꞌin yu sindatu ta ꞌin yu Augusta, a cunta loꞌo chcua xnan yu preso.
\v 2 Xacanꞌ yten hua niꞌ yca naꞌan nu mdoꞌo quichen Adramitio, nu ntsuꞌhui chaꞌ tyiꞌo tiꞌin scasca seꞌen lyiꞌya loo Asia. Mdoꞌo hua nguiaa hua, loꞌ taꞌa nguiaa hua ꞌin yu Aristarco nu mdoꞌo quichen Tesalónica seꞌen lyiꞌya loo Macedonia.
\v 3 Xca tsaan canꞌ mdyiꞌo tiꞌin hua quichen Sidón, loꞌ siꞌyana mñaꞌan ꞌtnan tiꞌ yu Julio ꞌin yu Pablo, mdaa yu chaꞌ cuiyaꞌ tsaa yu seꞌen ndiꞌin taꞌa tsuꞌhue yu siꞌyana cuꞌni cunta ꞌin yu.
\v 4 Xacanꞌ yten hua niꞌ yca naꞌan canꞌ, loꞌ siꞌyana lyee nchca cuiꞌin seꞌen nguiaa hua, canꞌ chaꞌ msñi hua luhuaꞌ tsoꞌ cueen seꞌen su yuu ngutyi seꞌen lca Chipre.
\v 5 Xa mdijin hua seꞌen lyiꞌya loo Cilicia loꞌo Panfilia, xacanꞌ mdyiꞌo tiꞌin hua quichen Mira seꞌen lyiꞌya loo Licia.
\v 6 Canꞌ naꞌan yu nu lca que ꞌin sindatu xca yca naꞌan nu mdoꞌo quichen Alejandría nu tiyaa seꞌen lca Italia, loꞌ niꞌ canꞌ yten loꞌo yu ꞌin hua.
\v 7 Tyun ꞌa tsaan yuꞌhui lyijyi hua loo tyiꞌa canꞌ, queꞌ ꞌa mdiyaa hua chcua seꞌen ndiꞌin quichen Gnido, cuañaꞌan tiꞌ nchca cuiꞌin nde loo seꞌen nguiaa hua, canꞌ chaꞌ mxisti hua luhuaꞌ tsoꞌ nde ꞌya seꞌen su yuu ngutyi seꞌen lca Creta, chcua seꞌen ndiꞌin quichen Salmón.
\v 8 Lyee ꞌa tñan mdijin hua cuaꞌ juin tuꞌhua tyiꞌa canꞌ, tsayaꞌ mdyiꞌo tiꞌin hua sca seꞌen nu nchcuiꞌ neꞌ loꞌo Buenos Puertos, loꞌ cuiꞌ ti canꞌ ndiꞌin quichen Lasea.
\v 9 Siꞌyana cuaꞌ tyun tsaan mtnanꞌ hua, a cunta cuaꞌ mdijin tsaan nu nꞌni neꞌ judio ayuna, chen nchcui ꞌin hua tiꞌ tsaa la hua niꞌ yca naꞌan canꞌ, canꞌ chaꞌ yu Pablo mdaa yu chaꞌ tiyaa ꞌin taꞌa ndaꞌan yu,
\v 10 loꞌ juin yu: Nchgaa ꞌun yu taꞌa ndaꞌan na re, nanꞌ xqueꞌ tinꞌ siꞌyana chen nchcui ꞌin na nu tiꞌ tsaa la na, quinanꞌ yca naꞌan re loꞌo yuꞌhua ntsuꞌhui niꞌ na, loꞌ tsatoꞌo loꞌo nareꞌ quinanꞌ na.
\v 11 Una yu nu lca que ꞌin sindatu canꞌ a mꞌni cunta yu chaꞌ ycuiꞌ yu Pablo, lyee la mꞌni cunta yu ꞌin yu ndaꞌan loꞌo ꞌin yca naꞌan canꞌ loꞌo xꞌnan na.
\v 12 Siꞌyana tucui ti ñaꞌan quinu yu seꞌen canꞌ tsaan nu tlyaꞌ, canꞌ chaꞌ quiꞌan la yu mꞌni sca yu chaꞌ nu tyijyin yu tsaa yu chaꞌ tiꞌ bla tiyaa yu quichen Fenice seꞌen lyiꞌya loo Creta, sca seꞌen chcanꞌ tucua nscan chendyu, loꞌ canꞌ quinu yu tsaan nu tlyaꞌ.
\s Xa yaan quio cuiꞌin loo tyiꞌa tujoꞌo
\p
\v 13 Mdyisnan mscua cuiꞌin joꞌo ti nu nguiaa tsoꞌ ca seꞌen ntsuꞌhui chaꞌ tsaa yu, loꞌ ñan tiꞌ yu tsa loꞌo na ꞌin yu, canꞌ chaꞌ ngulyoo yu chcuan nu nsñi tucui ꞌin yca naꞌan canꞌ, loꞌ mdoꞌo yu nguiaa yu cuaꞌ juin tuꞌhua tyiꞌa seꞌen lyiꞌya loo Creta.
\v 14 Xiꞌi ti mducui yaan sca cuiꞌin tnu nu nchcuiꞌ neꞌ loꞌo Euroclidón, loꞌ msiꞌyu taa na loo yca naꞌan canꞌ.
\v 15 Siꞌyana juesa ꞌa yaan cuiꞌin canꞌ, loꞌ a ncua ꞌa ꞌin hua tsa loꞌo hua ꞌin yca naꞌan canꞌ, mdaa tu hua yaꞌ ya loꞌo cuiꞌin canꞌ ꞌin hua seꞌen nu ncua tiꞌ na.
\v 16 Ya loꞌo cuiꞌin canꞌ ꞌin hua nde luhuaꞌ tsoꞌ ca seꞌen su yuu ngutyi nu naan Clauda, queꞌ ꞌa ncua canan ngulyoo hua ꞌin yca naꞌan lyoꞌ ti nu nducuan quii yca naꞌan canꞌ.
\v 17 Xa mdyiꞌo scua na chonꞌ yca naꞌan tlyu canꞌ, xacanꞌ mdyisnan nguxen yu tiso siiꞌ yca naꞌan tlyu canꞌ loꞌ mscanꞌ tla yu ꞌin na. Nguitsen yu chaꞌ tsa ycanꞌ yuꞌhui yca naꞌan canꞌ loo ysin seꞌen lca Sirte, canꞌ chaꞌ mdyiꞌya yu teꞌ nducua que yca naꞌan canꞌ, loꞌ ngula yaaꞌ yu ꞌin na.
\v 18 Una xca tsaan canꞌ lyee la mscuin tiꞌin cuiꞌin ꞌin yca naꞌan canꞌ, xacanꞌ mdyisnan mscuan yu yuꞌhua ntsuꞌhui niꞌ na loo tyiꞌa.
\v 19 Nu cuaꞌ nchca snan tsaan canꞌ, na nu ꞌni lati chaꞌ ꞌin yca naꞌan canꞌ loꞌ mscuan hua ꞌin na.
\v 20 Tyun ꞌa tsaan, ñi cucha ñi cuii a ncua chcanꞌ ꞌa, loꞌ tsacua ñaꞌan nchca quio cuiꞌin tnu nu mscuin tiꞌin ꞌin yca naꞌan canꞌ, cuaꞌ mxñii tiꞌ hua siꞌyana a tyiꞌo laa ꞌa hua.
\v 21 Siꞌyana cuaꞌ tyun tsaan a nchca cu ꞌa hua, mdyiton yu Pablo tluꞌhue la lja hua, loꞌ juin yu: Nchgaa ꞌun yu taꞌa ndaꞌan na re, chaꞌ cua na ngune ꞌin um ñaꞌan chaꞌ nu ycuinꞌ loꞌo um siꞌyana a tyiꞌo na seꞌen lca Creta, loꞌ a ñaꞌan na chaꞌ tnu re.
\v 22 Una cuaꞌ ñii chcuinꞌ loꞌo um siꞌyana cuꞌni tnu tiquee um, siyaꞌ yca naꞌan re jlyo na una nareꞌ a sca ca ꞌin na.
\v 23 Siꞌyana tla nu mdijin re, Ndiose Xꞌnan, ñi nu nguiꞌni tnu hua ꞌin, nguaꞌan tñan ñi sca angujle nu mdiꞌin loꞌon.
\v 24 Loꞌ juin ꞌñan: A cutsen Pablo, siꞌyana ntsuꞌhui chaꞌ tiyaa ton tloo yu César, loꞌ siꞌyana mjñan chaꞌ tsuꞌhue ꞌñan, tyiꞌo laa nchgaa la ñaꞌan yu taꞌa ndaꞌan re.
\v 25 Canꞌ chaꞌ cuaꞌ ñii, nchgaa um cuꞌni tnu tiquee um, siꞌyana ndiya quiꞌan tinꞌ ꞌin Ndiose, loꞌ chcui ñaꞌan mtsaꞌ angujle ꞌñan, cuiꞌ cuañaꞌan tsatoꞌo na.
\v 26 Una ntsuꞌhui chaꞌ tsa ycanꞌ yuꞌhui yca naꞌan re cuiꞌ ti seꞌen su sca yuu ngutyi.
\v 27 Xa cuaꞌ nchca tilcua tla nu cuaꞌ nguia loꞌo cuiꞌin canꞌ ꞌin hua loo tyiꞌa tujoꞌo Adriático, tluꞌhue tla canꞌ yu nu ndaꞌan loꞌo ꞌin na ngüi tiꞌ yu siꞌyana cuaꞌ tyiꞌo caꞌan ti hua loo yuu ngutyi.
\v 28 Xacanꞌ msuꞌhua cuiyaꞌ yu tsala ñaꞌan quiꞌñi seꞌen nguiaa hua canꞌ, loꞌ ntsuꞌhui na cla ta. Xa cuaꞌ nguiaa na nde loo la msuꞌhua cuiyaꞌ la yu ꞌin na, loꞌ chaꞌ ꞌtñu ti ta tiꞌ ndiyaa na xacanꞌ.
\v 29 Loꞌ nguitsen yu chaꞌ tsa tucua yca naꞌan canꞌ loo quee, canꞌ chaꞌ nde chonꞌ mxityu suꞌhua yu tsa jacua chcuan nu nxñi tucui ꞌin na, loꞌ lca tiquee yu chaꞌ cua na cuaꞌ quiꞌya xaa.
\v 30 Tsalca yu nu ndaꞌan loꞌo yca naꞌan canꞌ ncua tiꞌ yu tyiꞌo cunan ti yu niꞌ yca naꞌan lyoꞌ ti canꞌ, loꞌ mdyiꞌya yu ꞌin na loo tyiꞌa, loꞌ mꞌni ti yu chaꞌ siꞌyana culo jni yu tiso nu nchcanꞌ chcuan tiꞌin nu nducui nde chonꞌ yca naꞌan canꞌ.
\v 31 Una yu Pablo juin yu ꞌin yu nu lca que canꞌ loꞌo nchgaa la ñaꞌan yu sindatu: Chaꞌ na yu re xnan yu, ñi sca um loꞌ a tyiꞌo laa um.
\v 32 Yu sindatu canꞌ msiꞌyu yu tiso nu nchcanꞌ caꞌan yca naꞌan lyoꞌ ti canꞌ, loꞌ mdaa tu yu yaꞌ quinanꞌ yuꞌhui na loo tyiꞌa canꞌ.
\v 33 Xa cuaꞌ ljyaan xaa, yu Pablo mdaa yu chaꞌ tnu tiquee ꞌin nchgaa yu canꞌ siꞌyana cu chinꞌ yu, loꞌ juin yu: Cuaꞌ nchca tilcua tsaan nguitsa sla na, loꞌ a nchca cu ꞌa na.
\v 34 Canꞌ chaꞌ cuaꞌ ñii, taa na juesa cu chinꞌ na siꞌyana a ñaꞌan tiꞌ na lyee la, loꞌ chaꞌ ñi siꞌyana ñi sca quichanꞌ que na a quinanꞌ na.
\v 35 Xa mdyi ycuiꞌ yu chaꞌ re msñi yu sca jaslya, tloo naꞌan nchgaa yu canꞌ mdyaa yu xuꞌhue ꞌin Ndiose, msuꞌhue yu ꞌin na loꞌ ycu yu ꞌin na.
\v 36 Xacanꞌ nchgaa la ñaꞌan yu jui chaꞌ tnu tiquee ꞌin yu, loꞌ mdyisnan ycu yu.
\v 37 Loo nchgaa hua ndiyaa hua tsa tucua ciento ntsuꞌhui snan yla ntsuꞌhui ꞌtñuxca hua, nu ntsuꞌhui hua niꞌ yca naꞌan canꞌ.
\v 38 Xa cuaꞌ ycu yu, mdyisnan mslo suꞌhua yu mti trigo loo tyiꞌa canꞌ siꞌyana quisa la suꞌhua yca naꞌan canꞌ.
\s Xa ngutyinꞌ yuꞌhui yca naꞌan
\p
\v 39 Xa nguꞌya xaa, a yuꞌhui lyoo yu seꞌen canꞌ, una naꞌan yu sca seꞌen yten yuꞌhui tyiꞌa tujoꞌo, chcanꞌ loo ysin ꞌin na, loꞌ mdya ycuiꞌ yu chaꞌ tca tsa loꞌo yu ꞌin yca naꞌan canꞌ loo ysin canꞌ.
\v 40 Xacanꞌ msiꞌyu yu tiso nu nsñi tucui ꞌin yca naꞌan canꞌ, mxnu sti yu chcuan canꞌ niꞌ tyiꞌa, cuiꞌ ñaꞌan lcaa mxtinꞌ yu ti nu nchcanꞌ caꞌan yca nu nda juesa ꞌin na, xacanꞌ mscuen yu teꞌ nu chcua nde loo yca naꞌan canꞌ, mdoꞌo na nguiaa na chcua tuꞌhua ysin canꞌ.
\v 41 Una xa mdiyaa na sca seꞌen nguioꞌ tucua ysin, canꞌ ycanꞌ yuꞌhui na loꞌ nguinu tucua cuaan suun na, juesa nu ndiyan ytsa tyiꞌa canꞌ mdyisnan msta na ꞌin yca naꞌan canꞌ.
\v 42 Xacanꞌ yu sindatu mꞌni cuiyaꞌ yu chaꞌ siꞌyana cujui yu ꞌin nchgaa yu preso canꞌ, siꞌyana a xcua yu tyiꞌa loꞌ lyaa yu.
\v 43 Una yu nu lca que canꞌ a mdaa yu chaꞌ cuiyaꞌ siꞌyana ntsuꞌhui tiquee yu culaa yu ꞌin yu Pablo canꞌ. Xacanꞌ ngulo yu tñan chaꞌ ti ñaꞌan yu nchca nxcua yu tyiꞌa, tyiꞌo caꞌan yu loo ysin canꞌ,
\v 44 loꞌ nchgaa la ñaꞌan yu loꞌo juesa ꞌin caꞌ ti uta chonꞌ yuꞌhua nu nducui loo tyiꞌa canꞌ tiyaa yu la canꞌ. Cuañaꞌan yatoꞌo nchgaa yu mdoꞌo laa yu loo tyiꞌa canꞌ.
\c 28
\s Xa mdyiꞌo caꞌan yu Pablo loo yuu seꞌen lca Malta 
\p
\v 1 Xa cuaꞌ mdyiꞌo caꞌan hua loo ysin canꞌ, jui nu mtsaꞌ ꞌin hua siꞌyana loo yuu ngutyi seꞌen mdiyaa hua canꞌ naan na Malta.
\v 2 Nten ndiꞌin canꞌ tsuꞌhue ꞌa chaꞌ ꞌin neꞌ, mxiquiꞌo neꞌ quiiꞌ loꞌ mxiꞌya neꞌ ꞌin hua siꞌyana ndyiꞌya quioo, a cunta tlyaꞌ.
\v 3 Yu Pablo canꞌ mxoꞌ yu stanꞌ yca ngutyi, lja msuꞌhua yu ꞌin na loo quiiꞌ canꞌ, mdoꞌo snan sca cunaan nu la loo quiiꞌ canꞌ, loꞌ ycu ꞌin yaaꞌ yu.
\v 4 Xa naꞌan nten nu ndiꞌin ca canꞌ, siꞌyana nducui ti ꞌin loo yaaꞌ yu, scasca neꞌ mdyisnan ycuiꞌ neꞌ: Nu chaꞌ ñi ca siꞌyana lca yu re nu ndujui nten, loꞌ siyaꞌ mdoꞌo laa yu loo tyiꞌa, una cuaꞌ ñii ngula yaaꞌ ndiose ꞌin yu.
\v 5 Mscuin yu yaaꞌ yu, loꞌ mdyu yuꞌhui cunaan canꞌ loo quiiꞌ loꞌ a sca ncua ꞌin yu.
\v 6 Nta neꞌ ñi xaa scuen quiin yu, uta caja yu, una xa naꞌan neꞌ siꞌyana cuaꞌ tsaan ycu cunaan canꞌ ꞌin yu, loꞌ a sca ncua ꞌin yu, xacanꞌ mxitsaꞌan neꞌ chaꞌ tiyaa ꞌin neꞌ, loꞌ nchcuiꞌ neꞌ siꞌyana lca yu sca ndiose.
\v 7 Cuiꞌ ti canꞌ ndiꞌin yuu ꞌin sca yu naan Publio, loꞌ lca yu bsya seꞌen canꞌ, ncuan xuꞌhue yu ꞌin hua loꞌ niꞌ snan tsaan tsuꞌhue ꞌa mnaꞌan seen yu ꞌin hua.
\v 8 Yatoꞌo sti yu Publio canꞌ nscua yu tiꞌi yu loꞌo tiqueꞌ, a cunta loꞌo quicha tne. Yu Pablo yten seꞌen nscua yu canꞌ, loꞌ xa mdyi ycuiꞌ lyiꞌo yu ꞌin Ndiose mdiꞌin tyaa yu yaaꞌ yu ꞌin, loꞌ mꞌni chca yu ꞌin.
\v 9 Xacanꞌ nchgaa la ñaꞌan nu tiꞌi ndiꞌin canꞌ mdyisnan yaan seꞌen ndiꞌin yu Pablo, loꞌ nchgaa neꞌ mchca neꞌ.
\v 10 Lja mdiꞌin hua canꞌ tsuꞌhue ꞌa yuꞌhui neꞌ cunta ꞌin hua, loꞌ xa cuaꞌ tyiꞌo hua tsaa hua niꞌ xca yca naꞌan, xacanꞌ mda xuꞌhue neꞌ nchgaa loo na nu cunajoꞌo ꞌin hua tucueen tsaa hua.
\s Xa mdiyaa yu Pablo quichen Roma
\p
\v 11 Tsaniꞌ snan cooꞌ mdiꞌin hua seꞌen canꞌ, xacanꞌ mdoꞌo hua nguiaa hua niꞌ xca yca naꞌan nu mdoꞌo quichen Alejandría, canꞌ nguinu tucui na tsalja mdijin tsaan nu tlyaꞌ, loꞌ tloo na ngaꞌan lcuin Castor loꞌo Pólux.
\v 12 Xacanꞌ mdyiꞌo tiꞌin hua quichen Siracusa seꞌen nguinu hua snan tsaan.
\v 13 Canꞌ mdoꞌo hua nguiaa hua cuaꞌ juin tuꞌhua tyiꞌa tsayaꞌ mdiyaa hua quichen Regio. Xca tsaan canꞌ mdoꞌo hua nguiaa hua, loꞌ mdyisnan mscua cuiꞌin nde chonꞌ seꞌen cuaꞌ mdijin hua, la xca tsaan canꞌ mdiyaa hua quichen Puteoli.
\v 14 Canꞌ naꞌan taꞌa hua loꞌo jun taꞌa na, mjñan jun chaꞌ tsuꞌhue ꞌin hua siꞌyana quinu hua loꞌo jun sca snan. Xacanꞌ mdoꞌo hua nguiaa hua nde quichen Roma tucueen lyuu.
\v 15 Jun taꞌa na ndiꞌin Roma, xa ynan jun chaꞌ siꞌyana cuaꞌ ljyaan hua tucueen, ya ycua jun ꞌin hua la seꞌen lca Foro de Apio. Xa mdiyaa hua seꞌen lca Snan Tienta, loꞌo canꞌ ndiꞌin ta la jun ꞌin hua. Xa naꞌan yu Pablo ꞌin nchgaa jun canꞌ, mdyaa yu xuꞌhue ꞌin Ndiose loꞌ jui chaꞌ tnu tiquee ꞌin yu.
\v 16 Xa mdiyaa hua quichen Roma, yu nu lca que ꞌin sindatu canꞌ mdyaa yu cunta ꞌin nchgaa yu preso yaaꞌ xca xꞌnan yu sindatu. Mdaa yu chaꞌ cuiyaꞌ siꞌyana tyiꞌin yu Pablo xca seꞌen, loꞌ scati sindatu chuꞌhui cunta ꞌin yu.
\s Ycuiꞌ yu Pablo chaꞌ ꞌin Jesús quichen Roma
\p
\v 17 Xa mdaꞌa snan tsaan canꞌ, yu Pablo mꞌni yu chaꞌ mxiꞌya yu ꞌin nchgaa neꞌ judio nu ndon loo lati quichen canꞌ, xa cuaꞌ nguioꞌ tiꞌin neꞌ juin yu ꞌin neꞌ: Nchgaa ꞌun taꞌa judio na, quitsanꞌ ꞌin um siꞌyana a nchca sca chaꞌ quinanꞌ ꞌñan loꞌo nchgaa taꞌa judio na, ñi loꞌo ñaꞌan chaꞌ nu cuaꞌ ntsuꞌhui ꞌin na, una tiꞌ la Jerusalén mdyaa neꞌ cunta ꞌñan yaaꞌ yu bsya romano, loꞌ nguaꞌan tñan yu ꞌñan ljyaan preso nde re.
\v 18 Yu bsya cuaꞌ mꞌni cuiyaꞌ yu chaꞌ ꞌñan, loꞌ ncua tiꞌ neꞌ culaa neꞌ ꞌñan siꞌyana a sca quiꞌya nguija lyoo ꞌñan nu loꞌo cujui neꞌ ꞌñan.
\v 19 Una siꞌya neꞌ judio nu mtñan quiꞌya ꞌñan, mjñan siꞌyana yu César cuꞌni cuiyaꞌ yu chaꞌ ꞌñan, loꞌ siꞌi siꞌyana ndeꞌen la na mꞌnin.
\v 20 Canꞌ chaꞌ msiꞌyan ꞌin um siꞌyana chcuinꞌ loꞌo um chaꞌ re, loꞌ ca jlyo tiꞌ um siꞌya chaꞌ nu nta naa neꞌ Israel, canꞌ chaꞌ nchcanꞌ loꞌo carena re.
\v 21 Xacanꞌ mxcuen neꞌ ꞌin yu Pablo: Ñi sca quityi nu mdoꞌo Judea, a nchca chcuan hua cunta nu nchcuiꞌ chaꞌ ꞌin, ñi sca taꞌa judio na, a nchca can tiꞌin tyaa quiꞌya ꞌin nde re, ta ndeꞌen la chaꞌ nducui nchaꞌan ꞌin.
\v 22 Una nchca tiꞌ hua quine ꞌin hua ñaꞌan chaꞌ nu ndloꞌo, siꞌyana nchgaa seꞌen naꞌan tiꞌi neꞌ ñaꞌan chaꞌ nu ntsuꞌhui cua.
\v 23 Mꞌni cuiyaꞌ neꞌ chaꞌ loꞌo yu tsaan nu ntsuꞌhui chaꞌ chcuiꞌ yu loꞌo neꞌ, quiꞌan ꞌa neꞌ mdiyaa neꞌ ñaꞌan seꞌen ntsuꞌhui yu, loꞌ chcui tsaan canꞌ ngulyo scua la yu tsañaꞌan ntsuꞌhui chaꞌ culo Ndiose tñan, ycuiꞌ yu chaꞌ ꞌin lee nu nguaꞌan scua Moisé, loꞌo chaꞌ nu nguaꞌan scua yu nu mxiycuiꞌ Ndiose ꞌin, ñaꞌan ca siꞌyana tsa quiꞌan tiꞌ neꞌ ꞌin Jesús.
\v 24 Ntsuꞌhui nu ya quiꞌan tiꞌ chaꞌ nu ycuiꞌ yu Pablo, loꞌ ntsuꞌhui nu a ya quiꞌan tiꞌ.
\v 25 A ncua ca sca chaꞌ ti ꞌin neꞌ, canꞌ chaꞌ juin yu Pablo xa nu cuaꞌ tyiꞌo tsoꞌ neꞌ: Chaꞌ ñi ñaꞌan mxiycuiꞌ Espíritu nu Luhui ꞌin Ndiose ꞌin yu Isaía xa ycuiꞌ yu loꞌo nten cula ꞌin na, loꞌ juin ñi:
\v 26 —Yaa, loꞌ chcuiꞌ loꞌo nten cua: Siyaꞌ lyee la ne ꞌin um, una a ndyiꞌya um chaꞌ tiyaa, siyaꞌ lyee la ñaꞌan um loꞌ a chcanꞌ ꞌin um.
\v 27 Siꞌyana nten re ncua tla cusya ꞌin neꞌ, cuaꞌ mxiyaꞌ tiꞌ neꞌ ne ꞌin neꞌ, mducun neꞌ quiloo neꞌ, ñaꞌan ca siꞌyana a ca chcanꞌ ꞌin neꞌ, ñi a quine ꞌin neꞌ, ñi a quiꞌya neꞌ chaꞌ tiyaa, ñi a quia nan neꞌ ꞌñan seꞌen nu cuꞌnin chcan ꞌin neꞌ—.
\v 28 Canꞌ chaꞌ ca jlyo tiꞌ um cuaꞌ ñii, siꞌyana loꞌo neꞌ gentil cuaꞌ mdaa Ndiose chaꞌ cuiyaꞌ tyiꞌo laa neꞌ, canꞌ nu quine ꞌin chaꞌ re.
\v 29 Xa mdyi ycuiꞌ yu chaꞌ re, mdoꞌo neꞌ judio nguiaa neꞌ, scasca neꞌ mdyisnan ycuiꞌ tyijyin neꞌ siꞌya chaꞌ canꞌ.
\v 30 Yu Pablo msuꞌhua lyiyaꞌ yu sca naꞌan seꞌen mdiꞌin quiꞌya yu tsaniꞌ tucua yjan, loꞌ nducuan xuꞌhue yu nchgaa nu ndyiꞌan canꞌ,
\v 31 loꞌ nchcuiꞌ yu ñaꞌan ntsuꞌhui chaꞌ culo Ndiose tñan ꞌin neꞌ, ndloꞌo yu chaꞌ ꞌin Ñi Xꞌnan na Jesucristo, ñi a ytsen ꞌa yu ycuiꞌ yu loꞌ ñi a tucui ꞌa nu nducui ndijin.