\id ROM - Nopala (Chatino) NT [cya] - Mexico 2013 (web 2014)
\h ROMANOS
\toc1 Romanos
\toc2 Romanos
\toc3 Rom
\mt1 Romanos
\c 1
\s Yu Pablo nchcuiꞌ chaꞌ yu ꞌin jun Roma
\p
\v 1 Nanꞌ yu Pablo nu lca nguso ꞌin Jesucristo ndaꞌan quityi re ꞌin um, ngulohui ñi ꞌñan siꞌyana cuꞌnin tñan ꞌin ñi, ngulo ton ñi ꞌñan siꞌyana chcuinꞌ chaꞌ tsuꞌhue ꞌin Ndiose,
\v 2 cuiꞌ chaꞌ nu mdiꞌin tyaa ñi loꞌo na tiꞌ culoo loꞌ nguinu scua na loo quityi ꞌin ñi, tsañaꞌan nu mxiycuiꞌ ñi ꞌin nguso ꞌin ñi cuaꞌ sꞌni.
\v 3 Loꞌ nchcuiꞌ na chaꞌ ꞌin Sñeꞌ ñi, cuiꞌ ñi Xꞌnan na Jesucristo nu yaan loo ta nten ꞌin Davi loꞌo tsoꞌ ꞌin cunanꞌ ñi,
\v 4 una loꞌo sca chaꞌ cuiyaꞌ nu tlyu, siꞌya Espíritu nu Luhui ꞌin Ndiose, ncua chcanꞌ loo siꞌyana lca ñi Sñeꞌ Ndiose xa mdyiquiꞌo ñi lja neꞌ ngujui.
\v 5 Siꞌya ñi canꞌ chaꞌ mchcuan hua chaꞌ tsuꞌhue re, ngulohui ñi ꞌin hua nu chcuiꞌ hua chaꞌ tsuꞌhue ꞌin ñi, ñaꞌan ca siꞌyana sca chcui chendyu tsa quiꞌan tiꞌ chaꞌ re, loꞌ caja nu cuꞌni tnu ꞌin ñi,
\v 6 cuiꞌ lja canꞌ ntsuꞌhui um, siꞌyana cuaꞌ msiꞌya ñi ꞌin um sten um tsoꞌ ꞌin Jesucristo,
\v 7 ꞌun nu ndiꞌin quichen Roma nu ndyuꞌhui cuiyaꞌ tiꞌ Ndiose ꞌin, loꞌ msiꞌya ñi ꞌin um siꞌyana ca um nu luhui ꞌin ñi. Stina Ndiose loꞌo Ñi Xꞌnan na Jesucristo taa ñi chaꞌ tsuꞌhue nu chuꞌhui niꞌ cusya ꞌin um loꞌ cuꞌni ñi chaꞌ tyiꞌin tsuꞌhue um.
\s Xa ncua tiꞌ yu Pablo tsaa yu quichen Roma
\p
\v 8 Tsañaꞌan nguiaa chaꞌ ꞌin um, culo nducua la ndyaan xuꞌhue ꞌin Ndiose siꞌya Jesucristo siꞌyana sca chcui chendyu nguia nscua cueen chaꞌ ꞌin um ñaꞌan nu ndiya quiꞌan tiꞌ um ꞌin ñi.
\v 9 Ndiose, ñi nu nguiꞌnin tñan ꞌin loꞌo nu chcui cusya ꞌñan, nchcuinꞌ chaꞌ tsuꞌhue ꞌin Sñeꞌ ñi, jlyo tiꞌ ñi siꞌyana nchgaa xaa ndiya yuꞌhui tinꞌ ꞌin um xa nchcuinꞌ lyiꞌon ꞌin ñi,
\v 10 loꞌ njñan ꞌin ñi chaꞌ taa ñi chaꞌ cuiyaꞌ nu tsaꞌan can seꞌen ndiꞌin um,
\v 11 siꞌyana lyee lca tiqueen ñaꞌan taꞌa na seꞌen nu ta yaanꞌ ꞌin um loꞌo chaꞌ nu ndiya quiꞌan tiꞌ um, siꞌyana tca tyon tla um loꞌo chaꞌ canꞌ,
\v 12 cuañaꞌan scasca na taa na chaꞌ tnu tiquee ꞌin taꞌa na loꞌo chaꞌ nu ndiya quiꞌan tiꞌ na.
\v 13 Ca cuiyaꞌ tiꞌ um, ꞌun jun taꞌa na, siꞌyana tyun yaꞌ ncua tinꞌ tsaꞌan seꞌen ndiꞌin um (una a ncua siꞌya scasca chaꞌ nu nchcui ndijin), siꞌyana ca chcanꞌ loo tñan nu nguiꞌnin lja um, cuiꞌ ñaꞌan nguiaa chaꞌ ꞌñan loꞌo nchgaa la ñaꞌan neꞌ gentil.
\v 14 Canꞌ chaꞌ ꞌni chaꞌ chcuinꞌ chaꞌ re loꞌo nchgaa tucui, neꞌ griego uta siꞌi neꞌ griego, ta lca neꞌ nu mꞌni chaꞌan uta a mꞌni chaꞌan neꞌ.
\v 15 Canꞌ chaꞌ cunta chaꞌ nu ꞌñan lyee lca tiqueen chcuinꞌ chaꞌ tsuꞌhue ꞌin Cristo loꞌo um, ꞌun nu ndiꞌin quichen Roma.
\s Chaꞌ ꞌin Cristo lca chaꞌ cuiyaꞌ ꞌin Ndiose
\p
\v 16 A nxijyiꞌo tinꞌ chcuinꞌ chaꞌ tsuꞌhue ꞌin Cristo, siꞌyana lca na chaꞌ cuiyaꞌ ꞌin Ndiose nu culo laa ꞌin nchgaa nu tsa quiꞌan tiꞌ ꞌin ñi, culo nducua la ꞌin neꞌ judio nguiꞌni caꞌan chaꞌ re, a cunta loꞌo neꞌ griego.
\v 17 Siꞌyana loo chaꞌ tsuꞌhue re nchca chcanꞌ loo ñaꞌan ntsuꞌhui chaꞌ quinu luhui na tloo Ndiose, una tsaloo ti siꞌya chaꞌ nu tsa quiꞌan tiꞌ na ꞌin ñi, tsañaꞌan nchcuiꞌ quityi ꞌin Ndiose: —Nu quinu luhui tloo Ndiose, caja chendyu ꞌin loo nu tsa quiꞌan tiꞌ ꞌin ñi—.
\s Nchgaa nten nducui quiꞌya
\p
\v 18 Siꞌyana tiꞌ la niꞌ cuaan ljyaan chaꞌ nsinꞌ tiꞌ nu ntsuꞌhui tiquee Ndiose siꞌya scasca chaꞌ ngunanꞌ nu nguiꞌni nten, cuiꞌ chaꞌ nu nchcui ndijin loo chaꞌ nu ñi ꞌin Ndiose.
\v 19 Siꞌyana tsañaꞌan ndiꞌin chaꞌ ꞌin Ndiose, nchca chcanꞌ loo na siꞌyana cuiꞌ ñi cuaꞌ ngulyo scua la ñi chaꞌ canꞌ loꞌo neꞌ.
\v 20 Siꞌyana chaꞌ nu a chcanꞌ ꞌin Ndiose, loꞌo chaꞌ cuiyaꞌ nu a ndiyatii ꞌin ñi, a cunta tsañaꞌan lca ñi, ncua chcanꞌ loo chaꞌ re tiꞌ xa mtñan ñi chendyu, loꞌ siꞌya na nu mtñan ñi canꞌ tca ca cuiyaꞌ tiꞌ neꞌ ñaꞌan ndiꞌin chaꞌ ꞌin ñi, loꞌ a ndyijyi ñaꞌan taa neꞌ quiꞌya.
\v 21 Siyaꞌ cuaꞌ yuꞌhui lyoo neꞌ ꞌin ñi, una a mꞌni tnu neꞌ ꞌin ñi tsañaꞌan Ndiose lca ñi, a mdyaa neꞌ xuꞌhue ꞌin ñi, cuiꞌ ca nu mdyaa neꞌ ꞌin neꞌ siyaꞌ ti loo chaꞌ tinto, loꞌ siꞌya chaꞌ canꞌ nde lyee la mchcun chaꞌ tiyaa ꞌin neꞌ.
\v 22 Siyaꞌ nchcuiꞌ neꞌ siꞌyana lca neꞌ sca nu tiyaa la, una nde lyee la ncua tiji nan neꞌ,
\v 23 loo nu ntsuꞌhui chaꞌ cuꞌni tnu neꞌ ꞌin Ndiose, ñi nu ndiꞌin tsala xaa, yatoꞌo mꞌni tnu neꞌ lcuin nten chendyu, lcuin quiñi, lcuin ꞌni loꞌo ꞌni nu nsuhueꞌ niꞌ.
\v 24 Canꞌ chaꞌ siyaꞌ ti ngula yaaꞌ Ndiose ꞌin neꞌ seꞌen ndaꞌan neꞌ loo chaꞌ ngunanꞌ canꞌ, yatoꞌo yten yuꞌhui neꞌ loꞌo ñaꞌan tucui ti, mdyaa neꞌ ꞌin neꞌ loo chaꞌ jyiꞌo,
\v 25 cuiꞌ siꞌyana mxitsaꞌan neꞌ chaꞌ nu ñi ꞌin Ndiose loꞌo chaꞌ cuiñi canꞌ, mdaa neꞌ loo na nu mtñan ñi loꞌ mꞌni tnu neꞌ ꞌin na, una a mꞌni tnu neꞌ ꞌin Ñi nu Mtñan ꞌin na, ñi nu ntsuꞌhui chaꞌ cuꞌni tnu na ꞌin tsala xaa. Amen.
\v 26 Canꞌ chaꞌ ngula yaaꞌ Ndiose ꞌin neꞌ loo chaꞌ ngunanꞌ canꞌ, nu a chuꞌhui lyoo ꞌa neꞌ ñi na lca chaꞌ jyiꞌo, loꞌ neꞌ cunaꞌan mxitsaꞌan neꞌ ñaꞌan chaꞌ ꞌin neꞌ loꞌo yu quiꞌyu loꞌ yten yuꞌhui neꞌ loꞌo ticuiꞌ taꞌa cunaꞌan neꞌ,
\v 27 ticuiꞌ cuañaꞌan yu quiꞌyu, mxitsaꞌan yu ñaꞌan chaꞌ nu cuaꞌ ntsuꞌhui ꞌin yu loꞌo neꞌ cunaꞌan, yatoꞌo lyee la ncua lca tiquee yu sten yuꞌhui yu loꞌo ticuiꞌ taꞌa quiꞌyu yu, nu a yuꞌhui lyoo ꞌa yu ñi na lca chaꞌ jyiꞌo, loꞌ cuañaꞌan ticuiiꞌ chonꞌ yu msoꞌ tucua yu nu tiꞌi siꞌya chaꞌ ngunanꞌ nu mꞌni yu.
\v 28 Siꞌyana a msuꞌhua loo neꞌ ꞌin Ndiose, canꞌ chaꞌ ngula yaaꞌ ñi ꞌin neꞌ siyaꞌ ti loo chaꞌ tiyaa ngunanꞌ canꞌ, seꞌen nu cuꞌni neꞌ na nu a ntsuꞌhui chaꞌ cuꞌni neꞌ,
\v 29 mtsaꞌan yuꞌhui neꞌ loꞌo chacuiꞌ chaꞌ nu a tsuꞌhue, chaꞌ nu nguiten yuꞌhui neꞌ loꞌo ñaꞌan tucui ti, chaꞌ nducunꞌ, chaꞌ xqueeꞌ, scasca chaꞌ ngunanꞌ, chaꞌ jñan tiꞌ, chaꞌ nu ndujui neꞌ nten, chaꞌ cusuun, chaꞌ cuiñi, chaꞌ mañan,
\v 30 chaꞌ nchca nchcuiꞌ, chaꞌ nu nchcuiꞌ caꞌan taꞌa neꞌ, nchca taꞌa cusuun neꞌ ꞌin Ndiose, ndaja taꞌa neꞌ, siyeꞌ neꞌ, ndaa neꞌ loo neꞌ ticuiiꞌ neꞌ, ndlo que neꞌ chaꞌ ngunanꞌ, a jaꞌan neꞌ ꞌin nten cula ꞌin neꞌ,
\v 31 tinto neꞌ, a nsuꞌhua loo neꞌ chaꞌ nu nchcuiꞌ neꞌ, a ntsuꞌhui chaꞌ tsuꞌhue ꞌin neꞌ loꞌo ñi sca tucui, a ndyi ꞌa tiꞌi tiquee neꞌ, loꞌ a ñaꞌan ꞌtnan tiꞌ neꞌ ꞌin taꞌa nten neꞌ.
\v 32 Siyaꞌ jlyo tiꞌ neꞌ chaꞌ nu cuaꞌ mdiꞌin tyaa Ndiose siꞌyana nu cuꞌni cuañaꞌan ndyiꞌo tñan caja canꞌ, una tiꞌ nguia quiñan neꞌ loꞌo chaꞌ canꞌ, loꞌ siꞌi tsacanꞌ ti, cuiꞌ ca nu tsuꞌhue ntsuꞌhui tiquee neꞌ xa nu loꞌo xca tucui nguiꞌni chaꞌ canꞌ.
\c 2
\s Xñan bsya nu ñi ꞌin Ndiose
\p
\v 1 Canꞌ chaꞌ a ndyijyi ñaꞌan suhui um tloo um, nchgaa ꞌun nu ndlo quiꞌya ꞌin xca tucui, siꞌyana tsañaꞌan nu ndlo quiꞌya um ꞌin nten, ticuiiꞌ um nsoꞌ tucua um quiꞌya chonꞌ um, siꞌyana scañaꞌan ti nguiꞌni um loꞌo canꞌ.
\v 2 Cuaꞌ jlyo tiꞌ na siꞌyana Ndiose loꞌo chaꞌ nu ñi nꞌni cuiyaꞌ ñi chaꞌ ꞌin nu nguiꞌni cuañaꞌan.
\v 3 ¿Ta ñan tiꞌ um siꞌyana a ntsuꞌhui chaꞌ cuꞌni cuiyaꞌ Ndiose chaꞌ ꞌin um, ꞌun nu ndlo quiꞌya ꞌin xca tucui loꞌ scañaꞌan ti nguiꞌni um loꞌo canꞌ?
\v 4 ¿Ta nxcuan tloo um ꞌin Ndiose, loꞌ tsala ñaꞌan tlyu chaꞌ tsuꞌhue ntsuꞌhui ꞌin ñi, ndaa loo ñi ꞌin nten, ntsuꞌhui chaꞌ tlyu tiꞌ ꞌin ñi? ¿Ta a jlyo tiꞌ um siꞌya chaꞌ tsuꞌhue ꞌin ñi ndyijyi ñaꞌan xiloꞌo chonꞌ um quiꞌya nguiꞌni um?
\v 5 Una siꞌya chaꞌ lyeꞌ tiꞌ loꞌo chaꞌ nu tla cusya ꞌin um, nguia nsoꞌ tucua um yuhueꞌ chonꞌ um nu quiꞌni caꞌan ꞌin um xa cuꞌni Ndiose xñan bsya ꞌin nten chendyu loꞌo sca chaꞌ nu ñi, cuiꞌ tsaan nu ca chcanꞌ loo chaꞌ nsinꞌ tiꞌ nu ntsuꞌhui tiquee ñi,
\v 6 —loꞌ suꞌhua lyiyaꞌ ñi ꞌin na cuaꞌ ñaꞌaan tñan mꞌni na cunda scaa na—:
\v 7 Nu a ndlaꞌ tiꞌ cuꞌni tñan tsuꞌhue, quiꞌni caꞌan ꞌin loꞌo chendyu nu a tsatii ꞌa, siꞌyana lyee lca tiquee canꞌ loꞌo xaa ꞌin Ndiose, nan canꞌ ñaꞌan nu quinu tsuꞌhue tiquee ñi loꞌo, loꞌ nta sca chendyu nu a ntsuꞌhui ꞌa chaꞌ jlyo.
\v 8 Una tsalca nu lyeꞌ tiꞌ nu a nducua tñan chaꞌ nu ñi, xitijin ñi ꞌin canꞌ nu tiꞌi loꞌo chaꞌ nsinꞌ tiꞌ nu ntsuꞌhui tiquee ñi, siꞌyana nguiaa canꞌ tsoꞌ ꞌin chaꞌ ngunanꞌ,
\v 9 loꞌ cuañaꞌan scasca nu tiꞌi loꞌo chaꞌ xiꞌin caan ꞌin nten chendyu nu nguiꞌni tñan ngunanꞌ, loꞌ culo nducua la quiꞌni caꞌan chaꞌ canꞌ ꞌin neꞌ judio, a cunta loꞌo neꞌ gentil.
\v 10 Una nchgaa nu nguiꞌni tñan tsuꞌhue quiꞌni caꞌan ꞌin canꞌ loo xaa ꞌin Ndiose, scuen cuaan ñi ꞌin canꞌ loꞌ a sca la chaꞌ chuꞌhui tiquee, culo nducua la quiꞌni caꞌan chaꞌ canꞌ ꞌin neꞌ judio, a cunta loꞌo neꞌ gentil,
\v 11 siꞌyana Ndiose scañaꞌan ti nguiꞌni cuiyaꞌ ñi chaꞌ ꞌin nten.
\v 12 Nchgaa nu nguiꞌni quiꞌya nu a nchca quine ꞌin chaꞌ ꞌin lee, quinanꞌ canꞌ, una siꞌi loꞌo cunta ꞌin lee, cuiꞌ cuañaꞌan nchgaa nu nguiꞌni quiꞌya loꞌ ndyuꞌhui lyoo lee, cunta ꞌin lee ca cuiyaꞌ chaꞌ ꞌin canꞌ,
\v 13 siꞌyana nu ne ꞌin chaꞌ ꞌin lee, siꞌi canꞌ nu quinu luhui tloo Ndiose, cuiꞌ ca nu siꞌyana nducua canꞌ tñan chaꞌ nu nchcuiꞌ na.
\v 14 Neꞌ gentil nu a ntsuꞌhui lee ꞌin, xa nꞌni neꞌ ñaꞌan nu nchcuiꞌ lee, ñaꞌan loo chaꞌ siꞌyana ndyuꞌhui lyoo neꞌ chaꞌ ꞌin lee, siyaꞌ a ntsuꞌhui na ꞌin neꞌ,
\v 15 loꞌ nchca chcanꞌ loo siꞌyana niꞌ cusya ꞌin neꞌ cuaꞌ ntsuꞌhui lee canꞌ, ticuiꞌ chaꞌ tiyaa ꞌin neꞌ ndaa suun chaꞌ ta cuiꞌ ñaꞌan uta siꞌi ñaꞌan nguiꞌni neꞌ.
\v 16 Tsatoꞌo chaꞌ re tsaan nu cuꞌni cuiyaꞌ Ndiose chaꞌ ꞌin nten chendyu siꞌya Jesucristo, nchgaa chaꞌ nu mꞌni cunan ti neꞌ, loꞌ nchcuinꞌ chaꞌ re tsañaꞌan chaꞌ tsuꞌhue nu mdaa Ndiose ꞌñan.
\s Chaꞌ ꞌin neꞌ judio loꞌo chaꞌ ꞌin lee
\p
\v 17 ꞌUn nchcuiꞌ um siꞌyana lca um neꞌ judio, a cunta nchcua quiloo um chaꞌ ꞌin lee, nguiꞌni siyeꞌ um siꞌyana tsoꞌ ꞌin Ndiose nguiaa um,
\v 18 loꞌ jlyo tiꞌ um chaꞌ nu nchca tiꞌ Ndiose, a cunta ndyiꞌya um chaꞌ tiyaa ñaꞌan chaꞌ nu tsuꞌhue lati, cuiꞌ siꞌyana nguiꞌni chaꞌan um chaꞌ ꞌin lee canꞌ.
\v 19 Ñan tiꞌ um siꞌyana ndloꞌo um ꞌin nu cuityinꞌ, loꞌ lca um sca xaa ꞌin nu ndaꞌan loꞌo chaꞌ tla yta ꞌin,
\v 20 xqueꞌ tiꞌ um siꞌyana ndloꞌo um ꞌin nu a sca chaꞌ jlyo tiꞌ uta ꞌin nu suhue ti, nchcuiꞌ um siꞌyana cuaꞌ jui chaꞌ tiyaa ꞌin um loꞌ ndyuꞌhui lyoo um chaꞌ nu ñi, cuiꞌ siꞌya chaꞌ ꞌin lee canꞌ.
\v 21 ꞌUn nu ndloꞌo ꞌin xca tucui, ¿ñi chaꞌ a ndloꞌo um ꞌin um ticuiiꞌ um? ꞌUn nu nchcuiꞌ siꞌyana a ntsuꞌhui chaꞌ cuꞌni na cunan, ¿ta a nguiꞌni um cunan?
\v 22 A cunta nchcuiꞌ um siꞌyana a sten yuꞌhui na loꞌo cuilyiꞌo nten, ¿ta a nguiten yuꞌhui um loꞌo ñaꞌan tucui ti? Cuiꞌ cuañaꞌan nxcuan tloo um ꞌin lcuin joꞌo, loꞌ ꞌun ¿ta nda um loo Ndiose ñaꞌan nu ntsuꞌhui chaꞌ?
\v 23 ꞌUn nu nguiꞌni siyeꞌ ꞌin loꞌo chaꞌ ꞌin lee, ¿ta siꞌi ꞌin Ndiose nxcuan tloo um loo nu ncha tiꞌin um chaꞌ ꞌin lee canꞌ?
\v 24 Siꞌyana ndeñaꞌan nchcuiꞌ quityi ꞌin Ndiose: —Siꞌya um, canꞌ chaꞌ ndaja neꞌ gentil ꞌin Ndiose—.
\v 25 Chaꞌ ñi siꞌyana ꞌun nu ncua circuncida ꞌin, ntsuꞌhui lyoo chaꞌ canꞌ ꞌin um chaꞌ cua na nducua um tñan chaꞌ ꞌin lee, una siꞌyana a nducua um tñan ꞌin na, cua chaꞌ ti ncua circuncida ꞌin um.
\v 26 Chaꞌ ntsuꞌhui xca ta nu a ncua circuncida ꞌin, una chaꞌ nxuꞌhua seꞌen canꞌ chaꞌ ꞌin lee, ñaꞌan loo chaꞌ siꞌyana loꞌo canꞌ ncua circuncida ꞌin.
\v 27 Tsatoꞌo nu a ncua circuncida ꞌin, cuiꞌ nu tsuꞌhue nxuꞌhua seꞌen chaꞌ ꞌin lee, canꞌ nu ntsuꞌhui suun ꞌin culo quiꞌya ꞌin um, siꞌyana ꞌun ncua circuncida ꞌin um loꞌ a nxuꞌhua seꞌen um chaꞌ ꞌin lee canꞌ.
\v 28 Siꞌyana sca nten, a lca neꞌ judio loꞌo tsoꞌ ꞌin cunanꞌ neꞌ, cuiꞌ cuañaꞌan loꞌo chaꞌ nu nchca circuncida ꞌin neꞌ, a ljyaan na loꞌo tsoꞌ ꞌin cunanꞌ neꞌ,
\v 29 cuiꞌ ca nu nde niꞌ cusya ꞌin na lca na neꞌ judio, xa nu chaꞌ ñi ca nchca circuncida ꞌin na, chaꞌ re ljyaan na siꞌya chaꞌ cuiyaꞌ ꞌin Espíritu loꞌ siꞌi loꞌo cunta ꞌin lee, canꞌ nu quinu tsuꞌhue loꞌo Ndiose, loꞌ siꞌi loꞌo nten chendyu.
\c 3
\p
\v 1 Xacanꞌ jan ñi, ¿ñi tsuꞌhue cuꞌni chaꞌ lca na neꞌ judio, loꞌ ñi canan chuꞌhui ꞌin na ca circuncida ꞌin na?
\v 2 Ntsuꞌhui ñaꞌan nda yaaꞌ na, siꞌyana culo nducua la ꞌin neꞌ judio mxnu Ndiose cunta chaꞌ nu ycuiꞌ ñi.
\v 3 Xacanꞌ jan ñi, chaꞌ ntsuꞌhui nu a mdoꞌo ñi chaꞌ ꞌin tloo Ndiose, ¿ta canꞌ chaꞌ a ñi ndiꞌin chaꞌ ꞌin Ndiose?
\v 4 Siꞌi na, siꞌyana Ndiose ñi ndiꞌin chaꞌ ꞌin ñi, loꞌ nchgaa nten chendyu lca neꞌ nu cuiñi, cuiꞌ ñaꞌan nchcuiꞌ quityi ꞌin Ndiose: —Siꞌyana mdoꞌo ñi chaꞌ ꞌin um loꞌo chaꞌ nu ycuiꞌ um, loꞌ cuꞌni um canan xa caja nu culo quiꞌya ꞌin um—.
\v 5 Chaꞌ siꞌya quiꞌya ꞌin na nchca chcanꞌ loo chaꞌ nu ñi ꞌin Ndiose, ¿ñaꞌan ta ljuin na xacanꞌ? ¿Tsañaꞌan nxitijin ñi ꞌin nten nu tiꞌi, ta canꞌ chaꞌ a ñi ndiꞌin chaꞌ ꞌin Ndiose? (Nchcuinꞌ loꞌo um tsañaꞌan nguiaa chaꞌ tiyaa ꞌin nten chendyu.)
\v 6 Ndiose ñi ndiꞌin chaꞌ ꞌin ñi, loꞌ chaꞌ siꞌi na, ¿ñaꞌan ta tca cuꞌni ñi xñan bsya ꞌin nten chendyu chaꞌ na canꞌ?
\v 7 Loꞌ siꞌya chaꞌ cuiñi ꞌñan, ncua chcanꞌ loo chaꞌ nu ñi ꞌin Ndiose seꞌen nu scuen cuaan chaꞌ ꞌin ñi, ¿ñi chaꞌ tiꞌ ndyijyi nu ndlo quiꞌya ꞌñan chaꞌ na canꞌ?
\v 8 ¿Ta tsuꞌhue lati chaꞌ chcuiꞌ na: Cuꞌni na tñan ngunanꞌ, ñaꞌan ca siꞌyana ca chcanꞌ loo chaꞌ tsuꞌhue? (Ntsuꞌhui nu nchcuiꞌ caꞌan ꞌin na siꞌyana cuañaꞌan ndloꞌo na, una ntsuꞌhui suun ꞌin canꞌ caan yuhueꞌ chonꞌ).
\s A tucui nu ñi ndiꞌin chaꞌ ꞌin
\p
\v 9 Xacanꞌ jan ñi, ¿ta tsuꞌhue la nten lca na que ꞌin nchgaa la tucui? Siꞌi na, ¿ta siꞌi cuaꞌ ycuiꞌ na siꞌyana neꞌ judio loꞌo neꞌ gentil nguiꞌni neꞌ quiꞌya?
\v 10 Siꞌyana ndeñaꞌan nchcuiꞌ quityi ꞌin Ndiose: —A tucui nu ñi ndiꞌin chaꞌ ꞌin, ñi sca canꞌ loꞌ a ntsuꞌhui,
\v 11 a tucui nu ndyiꞌya cunta chaꞌ nu ñi, a tucui nu ndiya nan ꞌin Ndiose.
\v 12 Nchgaa neꞌ mdoꞌo tsoꞌ neꞌ, mtsaꞌan yuꞌhui neꞌ loꞌo chaꞌ ngunanꞌ, a tucui nu nguiꞌni tñan tsuꞌhue, ñi sca canꞌ loꞌ a ntsuꞌhui.
\v 13 Tuꞌhua neꞌ nguiaa chaꞌ ꞌin na tsañaꞌan sca tucuaa nu nducua la, nguilyu tseꞌ neꞌ loo chaꞌ cuiñi, loꞌo tuꞌhua neꞌ nꞌni neꞌ tiꞌi tsañaꞌan nchca tiꞌ sca cunaan la.
\v 14 Mtsaꞌan yuꞌhui tuꞌhua neꞌ loꞌo yuhueꞌ siꞌya chaꞌ tla cusya ꞌin neꞌ.
\v 15 Ndla ndsa nguiaa neꞌ seꞌen nu cujui taꞌa neꞌ.
\v 16 Nguiaa neꞌ njlyo neꞌ ꞌin taꞌa nten neꞌ, loꞌ nxnu neꞌ chaꞌ xiꞌin tucueen nguiaa neꞌ.
\v 17 A yuꞌhui lyoo neꞌ tucueen nu taa chaꞌ tsuꞌhue ꞌin neꞌ,
\v 18 ñi a ntsen neꞌ tloo Ndiose—.
\v 19 Una cuaꞌ jlyo tiꞌ na siꞌyana nchgaa chaꞌ nu nchcuiꞌ lee, nchcuiꞌ na chaꞌ ꞌin nten nu nguiꞌni chaꞌan ꞌin na, ñaꞌan ca siꞌyana nchgaa nten chcua seen tuꞌhua neꞌ, loꞌ ñaꞌaan nten chendyu ca cuiyaꞌ tiꞌ neꞌ siꞌyana nducui neꞌ quiꞌya tloo Ndiose.
\v 20 —Siꞌyana ñi sca tucui a quinu luhui tloo Ndiose— loo nu xuꞌhua seꞌen chaꞌ ꞌin lee, cuiꞌ ca nu siꞌya lee canꞌ ca cuiyaꞌ tiꞌ na siꞌyana nducui na quiꞌya.
\s Quinu luhui na tloo Ndiose loo nu tsa quiꞌan tiꞌ na
\p
\v 21 Cuaꞌ ñii nchca chcanꞌ loo ñaꞌan nu ntsuꞌhui chaꞌ quinu luhui na tloo Ndiose, una siꞌi loꞌo cunta ꞌin lee, siꞌyana lee canꞌ tsatlyu loꞌo chaꞌ nu nguaꞌan yu nu mxiycuiꞌ Ndiose ꞌin ndaa na suun chaꞌ re,
\v 22 siꞌyana quinu luhui nten tloo Ndiose loo nu tsa quiꞌan tiꞌ neꞌ ꞌin Jesucristo, loꞌ quiꞌni caꞌan chaꞌ re ꞌin nchgaa nu tsa quiꞌan tiꞌ ꞌin ñi, siꞌyana scañaꞌan ti ndiꞌin chaꞌ ꞌin na nchgaa na,
\v 23 siꞌyana nchgaa na mꞌni na quiꞌya, mducua tijyoꞌ na loo xaa ꞌin Ndiose.
\v 24 Una siꞌya chaꞌ tsuꞌhue nu mdoꞌo tiquee ñi, xuꞌhue ti mxnu luhui ñi ꞌin na siꞌya Cristo Jesús xa msiꞌi ñi ꞌin na,
\v 25 Ndiose mdiꞌin tyaa ñi chaꞌ siꞌyana Cristo ca ñi ñaꞌan nchca tiꞌ sca lcuan nu siꞌya tne ñi xuꞌhua lyiyaꞌ quiꞌya ꞌin nten loo nu tsa quiꞌan tiꞌ neꞌ ꞌin ñi, cuañaꞌan ca chcanꞌ loo siꞌyana ñi ndiꞌin chaꞌ ꞌin Ndiose loo nu yuꞌhui chaꞌ tlyu tiꞌ ꞌin ñi loꞌo neꞌ nu mdiꞌin cuaꞌ sꞌni tsañaꞌan cuaan ti mdijin ñi quiꞌya ꞌin neꞌ,
\v 26 loꞌ ca cuiyaꞌ tiꞌ nten cuaꞌ ñii, tsala ñaꞌan ñi ndiꞌin chaꞌ ꞌin ñi, cuiꞌ siꞌyana scati ñi lca ñi nu luhui, loꞌ scati ñi tca suhui ñi ꞌin nu tsa quiꞌan tiꞌ ꞌin Jesús.
\v 27 Xacanꞌ jan ñi, ¿la nguinu chaꞌ siyeꞌ canꞌ? A la nguiten na. ¿Ta siꞌyana ndon loo lee canꞌ, uta ndeꞌen la tñan tsuꞌhue mꞌni neꞌ? Siꞌi na, cuiꞌ ca nu siꞌyana ndiya quiꞌan tiꞌ neꞌ ꞌin Ndiose.
\v 28 Nchca cuiyaꞌ tiꞌ na xacanꞌ siꞌyana nten chendyu quinu luhui neꞌ loo nu tsa quiꞌan tiꞌ neꞌ ꞌin ñi, loꞌ siꞌi siꞌyana xuꞌhua seꞌen canꞌ chaꞌ ꞌin lee.
\v 29 ¿Ta lca ñi Ndiose ꞌin neꞌ judio ti? ¿Ta siꞌi loꞌo neꞌ gentil lca ñi Ndiose ꞌin neꞌ? Chaꞌ ñi lca ñi Ndiose ꞌin neꞌ gentil.
\v 30 Siꞌyana —scati Ndiose ntsuꞌhui—, loꞌ tsañaꞌan nsuhui ñi ꞌin nu ncua circuncida ꞌin loo nu ndiya quiꞌan tiꞌ ꞌin ñi, cuiꞌ cuañaꞌan nsuhui ñi ꞌin nu a ncua circuncida ꞌin.
\v 31 ¿Ta siꞌyana ndiya quiꞌan tiꞌ na ꞌin ñi, canꞌ chaꞌ nde nxcuan tloo na chaꞌ ꞌin lee canꞌ? Siꞌi na, cuiꞌ ca nu nde lyee la nsuꞌhua loo na chaꞌ canꞌ.
\c 4
\s Chendyu ꞌin Abraham 
\p
\v 1 Xacanꞌ jan ñi, ¿ñi canan yuꞌhui ꞌin Abraham nu ncua nten cula ꞌin na siꞌya chendyu nu mduꞌhui yu?
\v 2 Chaꞌ cua na Abraham nguinu luhui tloo Ndiose siꞌya chaꞌ tsuꞌhue nu mꞌni, ntsuꞌhui suun ꞌin cuꞌni siyeꞌ, una siꞌi siꞌya chaꞌ ꞌin Ndiose.
\v 3 Una, ¿ñaꞌan ta nchcuiꞌ quityi ꞌin Ndiose? —Abraham nguinu luhui tloo Ndiose loo nu ya quiꞌan tiꞌ ꞌin ñi—.
\v 4 Sca yu nu nꞌni tñan, siꞌi xuꞌhue ti nxñi siyaꞌ yu, cuiꞌ ca nu siꞌyana cuaꞌ mꞌni yu tñan.
\v 5 Una xcañaꞌan loꞌo sca nten nu a nducua tloo loꞌo tñan tsuꞌhue nu nguiꞌni, cuiꞌ ca nu ndiya quiꞌan tiꞌ canꞌ ꞌin Ndiose, ñi nu nsuhui ꞌin nten quiꞌya chendyu, loꞌ siꞌya chaꞌ canꞌ ndijin ñi cunta ꞌin lca sca nu luhui,
\v 6 tsañaꞌan nchcuiꞌ Davi siꞌyana tsuꞌhue ca xuꞌhue sca nten nu nxnu luhui Ndiose ꞌin, una siꞌi siꞌyana ndeꞌen la tñan tsuꞌhue nu cuaꞌ mꞌni,
\v 7 loꞌ ndeñaꞌan nchcuiꞌ quityi ꞌin Ndiose: —Tsuꞌhue ca xuꞌhue sca nten nu mꞌni Ndiose chaꞌ tlyu tiꞌ ꞌin, loꞌ mxca ñi nchgaa quiꞌya ꞌin.
\v 8 Tsuꞌhue ca xuꞌhue sca nten nu a ndlo quiꞌya Ñi Xꞌnan na ꞌin—.
\v 9 Xacanꞌ jan ñi, ¿ta tsa nten nu nchca circuncida ti ꞌin ntsuꞌhui xuꞌhue neꞌ loꞌo chaꞌ re, uta na loꞌo nu a nchca circuncida ꞌin? Nchcuiꞌ na siꞌyana Abraham —nguinu luhui tloo Ndiose loo nu ya quiꞌan tiꞌ ꞌin ñi—.
\v 10 ¿Ñaꞌan ta mchcua yu chaꞌ tsuꞌhue re? ¿Ta xa ncua circuncida ꞌin yu uta xa tiꞌ lyijyi ca na? Mchcuan yu chaꞌ re xa nu tiꞌ lyijyi ca circuncida ꞌin yu, loꞌ siꞌi xa nu cuaꞌ mꞌni yu ꞌin na.
\v 11 Chonꞌ ndeꞌen canꞌ ncua circuncida ꞌin yu, una cuaꞌ lca luhui yu tloo Ndiose loo nu ya quiꞌan tiꞌ yu ꞌin ñi, siꞌyana ca yu sti nchgaa nu ndiya quiꞌan tiꞌ ꞌin Ndiose siyaꞌ a ncua circuncida ꞌin, siꞌyana loꞌo canꞌ quinu luhui loo nu tsa quiꞌan tiꞌ ꞌin ñi.
\v 12 A cunta siꞌyana ca yu sti nchgaa nu nchca circuncida ꞌin, una siꞌi tsaloo ti siꞌya chaꞌ canꞌ, cuiꞌ ca nu siꞌyana chcui nchaꞌan canꞌ chendyu ꞌin Abraham nu ncua nten cula ꞌin na, loꞌ tsa quiꞌan tiꞌ canꞌ ꞌin Ndiose tsañaꞌan nu mꞌni Abraham xa nu tiꞌ lyijyi ca circuncida ꞌin.
\s Loo nu ya quiꞌan tiꞌ yu jui chaꞌ tsuꞌhue ꞌin yu
\p
\v 13 Siꞌi loꞌo cunta ꞌin lee mdiꞌin tyaa Ndiose sca chaꞌ loꞌo Abraham tsatlyu loꞌo ta nten ꞌin yu, siꞌyana chcuan yu cunta ñaꞌaan chendyu re, cuiꞌ ca nu siꞌya chaꞌ nu ya quiꞌan tiꞌ yu ꞌin ñi nguinu luhui yu.
\v 14 Chaꞌ cua na tsalca nu nguia nchaꞌan chaꞌ ꞌin lee ntsuꞌhui xuꞌhue loꞌo chaꞌ canꞌ, cua chaꞌ ti tsa quiꞌan tiꞌ nten, loꞌ a sca cunta ntsuꞌhui chaꞌ nu cuaꞌ mdiꞌin tyaa Ndiose xacanꞌ.
\v 15 Siꞌya lee canꞌ chaꞌ nxitijin Ndiose ꞌin nten nu tiꞌi, una chaꞌ a ntsuꞌhui lee, a sca chaꞌ nchcui nchaꞌan ꞌin na xacanꞌ.
\v 16 Cuꞌni na cunta ljyaan chaꞌ tsuꞌhue canꞌ ꞌin na loo nu ya quiꞌan tiꞌ na ꞌin Ndiose, cuiꞌ siꞌyana xuꞌhue ti caja chaꞌ canꞌ, ñaꞌan ca siꞌyana quinu scua tla chaꞌ re loꞌo ta nten ꞌin sñeꞌ Abraham. Siꞌi tsa ꞌin ti nu nguia nchaꞌan chaꞌ ꞌin lee quiꞌni caꞌan chaꞌ re ꞌin, cuiꞌ ca nu loꞌo nchgaa nu ndiya quiꞌan tiꞌ ꞌin Ndiose tsañaꞌan mꞌni Abraham, nu lca sti nchgaa nareꞌ,
\v 17 (cuiꞌ ñaꞌan nchcuiꞌ quityi ꞌin Ndiose: —Nanꞌ mdiꞌin tyaan ꞌin siꞌyana ca sti quiꞌan ꞌa nten—.) Tloo Ndiose nguinu scua chaꞌ re, cuiꞌ ñi nu ꞌin ya quiꞌan tiꞌ Abraham, ñi nu nꞌni chaꞌ ndyiquiꞌo nten, loꞌ ndloꞌo naan ñi sca na nu a chcanꞌ tsañaꞌan nchca tiꞌ sca na nu cuaꞌ ndiꞌin.
\v 18 Siyaꞌ a nducua tloo Abraham chaꞌ tsuꞌhue re, una ya quiꞌan tiꞌ yu chaꞌ nu mdiꞌin tyaa Ndiose loꞌo yu, cuiꞌ siꞌyana tsa tucua xaa ca yu sti quiꞌan nten, tsañaꞌan chaꞌ nu cuaꞌ juin ñi loꞌo yu: —Cuañaꞌan ntsuꞌhui chaꞌ ca quiꞌan ta nten ꞌin sñeꞌ—.
\v 19 A mꞌni naꞌan tiꞌ yu loꞌo chaꞌ nu ya quiꞌan tiꞌ yu siyaꞌ cuaꞌ cula yu, a cunta cuaꞌ caja ti yu (siꞌyana cuaꞌ tiyaa yu sca ciento yjan), a cunta Sara nu lca cuilyiꞌo yu a nchca siyaꞌ tyiꞌin sñeꞌ canꞌ.
\v 20 Una a mꞌni naꞌan tiꞌ yu loꞌ ñi a mꞌni tucua tiꞌ yu loꞌo chaꞌ nu mdiꞌin tyaa Ndiose loꞌo yu, cuiꞌ ca nu msuꞌhua loo yu chaꞌ nu ndiya quiꞌan tiꞌ yu loꞌ mꞌni tnu yu ꞌin Ndiose,
\v 21 ñi tsachinꞌ ti loꞌ a mꞌni tucua tiꞌ yu, ta na a tca ꞌin Ndiose cuꞌni ñi nchgaa chaꞌ nu cuaꞌ mdiꞌin tyaa ñi,
\v 22 canꞌ chaꞌ —nguinu luhui yu tloo Ndiose loo nu ya quiꞌan tiꞌ ꞌin ñi—.
\v 23 Siꞌi siꞌya chaꞌ ꞌin Abraham ti nguaꞌan scua chaꞌ re tsañaꞌan nguinu luhui yu,
\v 24 cuiꞌ ca nu loꞌo chaꞌ ꞌin nareꞌ nguinu scua na siꞌyana quinu luhui na tloo ñi, tsalca naa nu ndiya quiꞌan tiꞌ ꞌin ñi nu mꞌni chaꞌ mdyiquiꞌo Ñi Xꞌnan na Jesús,
\v 25 ñi nu mdaa Ndiose chaꞌ cuiyaꞌ caja siꞌya quiꞌya nducui na, loꞌ mdyiquiꞌo ñi siꞌyana tca quinu luhui na tloo Ndiose.
\c 5
\s Chaꞌ tsuꞌhue nu cuaꞌ jui ꞌin na loꞌo tsoꞌ ꞌin Ndiose 

\p
\v 1 Siꞌyana cuaꞌ nguinu luhui na tloo Ndiose loo nu ya quiꞌan tiꞌ na ꞌin ñi, canꞌ chaꞌ mchca tsuꞌhue chaꞌ ꞌin na loꞌo Ndiose siꞌya Ñi Xꞌnan na Jesucristo.
\v 2 Siꞌya ñi tca sten na tloo Ndiose loꞌ chcuan na chaꞌ tsuꞌhue ꞌin ñi loo nu ya quiꞌan tiꞌ na, loꞌ tla ndon na loo chaꞌ re, a cunta tsuꞌhue ntsuꞌhui tiquee na siꞌyana nducua tloo na quiꞌni caꞌan ꞌin na loo xaa ꞌin Ndiose.
\v 3 Siꞌi tsacanꞌ ti chaꞌ tsuꞌhue ntsuꞌhui tiquee na, cuiꞌ ca nu siꞌyana ndijin na scasca nu tiꞌi, jlyo tiꞌ na siꞌyana loꞌo chaꞌ nu ndijin na nde lyee la chuꞌhui chaꞌ tlyu tiꞌ ꞌin na,
\v 4 siꞌya chaꞌ tlyu tiꞌ canꞌ nde lyee la ca ngula tiꞌ na, cuañaꞌan nde lyee la chcua quiloo na chaꞌ nu cuaꞌ mdiꞌin tyaa Ndiose.
\v 5 Jlyo tiꞌ na tsatoꞌo chaꞌ re, siꞌyana mtsaꞌan yuꞌhui chaꞌ tsuꞌhue ꞌin Ndiose niꞌ cusya ꞌin na siꞌya Espíritu nu Luhui nu mdaa ñi ꞌin na.
\v 6 Xa naꞌan ndiꞌin chaꞌ ꞌin na, ya tucua tsaan ngujui Cristo tñan loo nten quiꞌya chendyu.
\v 7 Chaꞌ ñi siꞌyana sca nten tucui ti ñaꞌan caja neꞌ tñan loo sca nu ñi ndiꞌin chaꞌ ꞌin, tinaꞌan ntsuꞌhui nu xtyi tiꞌ caja tñan loo sca nten nu tsuꞌhue.
\v 8 Una Ndiose nguloꞌo la ñi chaꞌ tsuꞌhue nu mdoꞌo tiquee ñi, loꞌ siyaꞌ lca na nten quiꞌya chendyu, Cristo ngujui ñi tñan loo na.
\v 9 Loꞌ siꞌyana cuaꞌ mxnu luhui ñi ꞌin na siꞌya tne ñi, nde lyee la ntsuꞌhui suun tyiꞌo laa na siꞌya ycuiꞌ ca ñi, tsaan nu xitijin ñi ꞌin nten nu tiꞌi.
\v 10 Chaꞌ ncua taꞌa cusuun na ꞌin Ndiose loꞌ tiꞌ mchca tsuꞌhue chaꞌ ꞌin na loꞌo ñi loo nu ngujui Sñeꞌ ñi, ¿ta siꞌi lyee la ntsuꞌhui suun tyiꞌo laa na siꞌya chendyu ꞌin Sñeꞌ ñi?
\v 11 Siꞌi tsare ti chaꞌ, cuiꞌ ca nu tsuꞌhue ntsuꞌhui tiquee na loꞌo Ndiose siꞌya Ñi Xꞌnan na Jesucristo, nu siꞌya ñi cuaꞌ mchca tsuꞌhue chaꞌ ꞌin na loꞌo Ndiose.
\s Chaꞌ ꞌin Adán loꞌo Cristo
\p
\v 12 Siꞌya scati yu quiꞌyu yten quiꞌya loo chendyu re, loꞌ siꞌya quiꞌya canꞌ nducui nchaꞌan chaꞌ ndyija ꞌin nten, canꞌ chaꞌ nguiꞌni caꞌan chaꞌ ndyija ꞌin nchgaa nten siꞌyana nchgaa neꞌ nducui neꞌ quiꞌya.
\v 13 Xa nu tiꞌ lyijyi quinu scua lee ꞌin Ndiose, cuaꞌ nguiꞌni nten quiꞌya, una siꞌyana a ntsuꞌhui lee xacanꞌ, a jui ñaꞌan tyiꞌo quiꞌya ꞌin neꞌ.
\v 14 Una chaꞌ ndyija canꞌ cuaꞌ nsñi suꞌhua yaaꞌ ꞌin neꞌ tiꞌ xa mdiꞌin Adán tsayaꞌ mdiyaan Moisé, siyaꞌ a mꞌni nten canꞌ quiꞌya nu mꞌni Adán, una mꞌni caꞌan chaꞌ ndyija canꞌ ꞌin neꞌ, loꞌ siꞌi cuañaꞌan yatoꞌo loꞌo ñi nu cuaꞌ yaan canꞌ.
\v 15 Siꞌyana chaꞌ tsuꞌhue nu cuaꞌ jui ꞌin na a nchcua taꞌa chaꞌ ꞌin na loꞌo quiꞌya canꞌ: Chaꞌ quiꞌya nu mꞌni scati yu quiꞌyu yatoꞌo quiꞌan nten ngujui, una siꞌya chaꞌ tsuꞌhue ꞌin scati yu quiꞌyu nu lca Jesucristo, nde lyee la ncua lca tiquee Ndiose loꞌo nten quiꞌan canꞌ loꞌ mdaa ñi chaꞌ tsuꞌhue canꞌ ꞌin neꞌ.
\v 16 Chaꞌ ñi siꞌyana a nchcua taꞌa chaꞌ ꞌin quiꞌya nu mꞌni scati yu canꞌ loꞌo chaꞌ tsuꞌhue nu mdaa ñi ꞌin na: Nguioꞌ tucua yuhueꞌ chonꞌ nten chendyu siꞌya scati quiꞌya canꞌ, una ncua chcanꞌ loo chaꞌ tsuꞌhue ꞌin ñi siꞌya scasca quiꞌya nu mꞌni na, ñaꞌan ca siꞌyana xnu luhui ñi ꞌin na.
\v 17 Siꞌya quiꞌya nu mꞌni scati yu canꞌ yatoꞌo msñi suꞌhua yaaꞌ chaꞌ ndyija ꞌin nten chendyu, cuiꞌ cuañaꞌan siꞌya scati ñi nu lca Jesucristo, nde lyee la caja chendyu ꞌin neꞌ, tsalca nu cuan xuꞌhue chaꞌ tsuꞌhue tlyu nu mdaa Ndiose, cuiꞌ chaꞌ nu xnu luhui ꞌin neꞌ xuꞌhue ti.
\v 18 Siꞌya scati nu mꞌni quiꞌya canꞌ yatoꞌo yaan yuhueꞌ chonꞌ nchgaa nten, cuiꞌ cuañaꞌan siꞌya scati nu mꞌni tñan tsuꞌhue, yaan chendyu nu a tsatii ꞌa ꞌin nchgaa nten siꞌyana cuaꞌ mxnu luhui ñi ꞌin neꞌ.
\v 19 Siꞌya scati nu a ncua jaꞌan ꞌin Ndiose, yatoꞌo nchgaa nten nducui neꞌ quiꞌya, cuiꞌ cuañaꞌan siꞌya scati nu ncua jaꞌan ꞌin Ndiose, quiꞌan nten tca quinu luhui neꞌ tloo ñi.
\v 20 Mdaa Ndiose lee canꞌ ꞌin neꞌ siꞌyana lyee la ca chcanꞌ loo quiꞌya nguiꞌni neꞌ, loꞌ xa nu cuaꞌ lyee yton quiꞌya canꞌ, una nde lyee la ncua chcanꞌ loo chaꞌ tsuꞌhue ꞌin ñi,
\v 21 siꞌyana tsañaꞌan ndiꞌin chaꞌ ꞌin quiꞌya, ya loꞌo na ꞌin neꞌ loo chaꞌ ndyija, cuiꞌ cuañaꞌan chaꞌ tsuꞌhue ꞌin Ndiose yaan na siꞌyana tca quinu luhui neꞌ tloo ñi, loꞌ chcuan neꞌ sca chendyu nu a tsatii ꞌa siꞌya Ñi Xꞌnan na Jesucristo.
\c 6
\s Cuaꞌ ngujui na loꞌo tsoꞌ chaꞌ ꞌin quiꞌya
\p
\v 1 ¿Ñaꞌan ta ljuin na xacanꞌ? ¿Ta tiꞌ tsa quiñan cuꞌni na quiꞌya, ñaꞌan ca siꞌyana lyee la ca chcanꞌ loo chaꞌ tsuꞌhue ꞌin Ndiose?
\v 2 Siꞌi na, loꞌ siꞌyana cuaꞌ ngujui na loꞌo tsoꞌ chaꞌ ꞌin quiꞌya, ¿ñaꞌan tiꞌ tsa quiñan la na cuꞌni na quiꞌya?
\v 3 ¿Ta a jlyo tiꞌ um siꞌyana nchgaa nu cuaꞌ mducua tya loꞌo tsoꞌ ꞌin Cristo Jesús, sca chaꞌ ti ꞌin canꞌ loꞌo ñi xa ngujui ñi?
\v 4 Siꞌya chaꞌ nu mducua tya na, tsatlyu mtsiꞌ na loꞌo ñi loꞌo tsoꞌ ꞌin chaꞌ ndyija, ñaꞌan ca siꞌyana tyuꞌhui na sca chendyu nu cui ti, tsañaꞌan nu mdyiquiꞌo Cristo siꞌya chaꞌ cuiyaꞌ ꞌin Stina Ndiose.
\v 5 Chaꞌ cuañaꞌan sca chaꞌ ti ꞌin na loꞌo ñi xa ngujui ñi, cuiꞌ cuañaꞌan sca chaꞌ ti ꞌin na loꞌo ñi xa mdyiquiꞌo ñi.
\v 6 Cuaꞌ jlyo tiꞌ na siꞌyana tsatlyu ngaꞌan na loo cusi loꞌo ñi, ñaꞌan ca siꞌyana jlyo quiꞌya nu msñi suꞌhua yaaꞌ ꞌin na, loꞌ a tsa quiñan ꞌa na tiꞌ cuꞌni na quiꞌya loꞌo cunanꞌ re.
\v 7 Siꞌyana sca nten nu cuaꞌ ngujui, cuaꞌ mdyiꞌo seꞌen ntsuꞌhui loo quiꞌya.
\v 8 Chaꞌ naa cuaꞌ ngujui na loꞌo Cristo, nducua tloo na tyiꞌin na loꞌo ñi tsala xaa,
\v 9 siꞌyana cuaꞌ jlyo tiꞌ na mdyiquiꞌo Cristo loꞌ a ntsuꞌhui ꞌa chaꞌ caja ñi, cuiꞌ siꞌyana mdyiꞌo ñi tuyaaꞌ chaꞌ ndyija.
\v 10 Tsañaꞌan nu ngujui ñi, siyaꞌ ti ngujui ñi siꞌya quiꞌya, una loꞌo ñi cuaꞌ ñii siꞌyana tucua ñi tñan chaꞌ nu nchca tiꞌ Ndiose.
\v 11 Cuiꞌ cuañaꞌan ꞌun, ca cuiyaꞌ tiꞌ um siꞌyana cuaꞌ ngujui um loꞌo tsoꞌ chaꞌ ꞌin quiꞌya, una loꞌo um cuaꞌ ñii siꞌyana tucua tloo Ndiose ꞌin um, sca chaꞌ ti ꞌin um loꞌo Cristo Jesús, ñi nu lca Xꞌnan na.
\v 12 Canꞌ chaꞌ a taa um yaꞌ tiꞌ tyon loo chaꞌ ꞌin quiꞌya loo chendyu ꞌin um, loꞌ ca jaꞌan um chaꞌ ngunanꞌ nu ndyiꞌo tiquee um,
\v 13 ñi a nchca chaꞌ tyaa um scasca seꞌen ꞌin cunanꞌ um loꞌ cuꞌni um quiꞌya, uta cunajoꞌo na ꞌin um loo chaꞌ ngunanꞌ, cuiꞌ ca nu tyaa um ꞌin um siyaꞌ ti loꞌo tsoꞌ ꞌin Ndiose tsañaꞌan nchca tiꞌ sca nu cuaꞌ mdyiquiꞌo, cuañaꞌan sca chcui um cunajoꞌo um ꞌin Ndiose loꞌo sca tñan nu luhui.
\v 14 Canꞌ chaꞌ a taa um yaꞌ tiꞌ culo quiꞌya canꞌ tñan ꞌin um, siꞌyana a ntsuꞌhui ꞌa um tuyaaꞌ lee, cuiꞌ ca nu ntsuꞌhui um tuyaaꞌ Ndiose siꞌya chaꞌ tsuꞌhue ꞌin ñi.
\s Lca na nguso ꞌin Ndiose nu cuꞌni tñan tsuꞌhue
\p
\v 15 Xacanꞌ jan ñi, ¿ta tiꞌ tsa quiñan na cuꞌni na quiꞌya siꞌyana a ntsuꞌhui ꞌa na tuyaaꞌ lee, loꞌ cuaꞌ ndiꞌin na loo chaꞌ tsuꞌhue ꞌin Ndiose? Nducua chaꞌ siꞌi na.
\v 16 ¿Ta a jlyo tiꞌ um siꞌyana xa tyaa um ꞌin um tuyaaꞌ xca tucui loꞌ ca jaꞌan um ꞌin, cuiꞌ nguso ꞌin canꞌ lca um siꞌyana nchca jaꞌan um ꞌin? ¿Ta ca um nguso ꞌin quiꞌya nu tsa loꞌo ꞌin um loo chaꞌ ndyija, uta ca jaꞌan um ꞌin Ndiose loꞌ xnu luhui ñi ꞌin um?
\v 17 Una cuaꞌ xuꞌhue ca ꞌin Ndiose, siyaꞌ ncua um nguso ꞌin quiꞌya, una cuaꞌ ñii loꞌo nu chcui lca tiquee um nducua um tñan chaꞌ nu nguiꞌni chaꞌan um, loꞌ cuaꞌ mdyaa um ꞌin um siyaꞌ ti loo chaꞌ canꞌ.
\v 18 Loꞌ siꞌyana cuaꞌ mdyiꞌo um loo chaꞌ ngunanꞌ canꞌ, cuaꞌ lca um nguso ꞌin nchgaa loo chaꞌ tsuꞌhue.
\v 19 Nchcuinꞌ loꞌo um sca chaꞌ nu a tucui siꞌyana tca quiꞌya um chaꞌ tiyaa: Tsañaꞌan nu mdyaa um ꞌin um loo chaꞌ ngunanꞌ seꞌen nu lyee la cuꞌni um scasca la quiꞌya, una cuaꞌ ñii tyaa um ꞌin um loo chaꞌ nu luhui siꞌyana cuꞌni um scasca tñan tsuꞌhue.
\v 20 Siꞌyana xa ncua um nguso ꞌin quiꞌya, tijyoꞌ nchca um siiꞌ chaꞌ nu tsuꞌhue.
\v 21 ¿Ta jui chaꞌ tsuꞌhue ꞌin um xacanꞌ, ta siꞌi chacuiꞌ chaꞌ jyiꞌo jui ꞌin um? Loo chaꞌ ndyija ndiyatii chaꞌ canꞌ.
\v 22 Una cuaꞌ ñii siꞌyana mdyiꞌo um loo quiꞌya loꞌ mchca um nguso ꞌin Ndiose, tca tyuꞌhui um sca chendyu nu luhui, loꞌ tsatoꞌo caja chendyu nu a tsatii ꞌa ꞌin um.
\v 23 Chaꞌ cuꞌni na quiꞌya tsatii chaꞌ ꞌin na loo chaꞌ ndyija, una chaꞌ tsuꞌhue nu ndaa Ndiose ꞌin na lca na chendyu nu a tsatii ꞌa siꞌya Ñi Xꞌnan na Jesucristo.
\c 7
\s Nten nu ndiꞌin cuilyiꞌo loꞌo tsoꞌ chaꞌ ꞌin lee
\p
\v 1 ꞌUn jun taꞌa na, a tucui quiꞌya um chaꞌ tiyaa loꞌo chaꞌ re (siꞌyana lca um sca nten nu cuaꞌ ndyuꞌhui lyoo chaꞌ ꞌin lee), ¿ta a jlyo tiꞌ um siꞌyana lee canꞌ ndlo na tñan ꞌin nten tsalja nu tiꞌ loꞌo neꞌ?
\v 2 Ñaꞌan nchca tiꞌ sca neꞌ cunaꞌan nu cuaꞌ jui cuilyiꞌo, ꞌni chaꞌ chuꞌhui lyoo canꞌ cuilyiꞌo tsalja nu loꞌo yu, una chaꞌ caja yu a sca ꞌa chaꞌ nducui nchaꞌan ꞌin neꞌ loꞌo tsoꞌ chaꞌ cuilyiꞌo canꞌ.
\v 3 Una chaꞌ neꞌ cunaꞌan canꞌ tyiꞌin lyiꞌo neꞌ ꞌin xca yu quiꞌyu loꞌ tiꞌ loꞌo cuilyiꞌo neꞌ, quiꞌya nguiꞌni loꞌo tsoꞌ chaꞌ ꞌin lee canꞌ, una chaꞌ cuaꞌ ngujui cuilyiꞌo neꞌ, a xca ꞌa chaꞌ nducui nchaꞌan ꞌin neꞌ loꞌo tsoꞌ chaꞌ canꞌ, tca caja cuilyiꞌo neꞌ loꞌo xca tucui, loꞌ siꞌi quiꞌya lca na.
\v 4 Cuiꞌ cuañaꞌan ꞌun jun taꞌa na, cuaꞌ ngujui um loꞌo tsoꞌ chaꞌ ꞌin lee siꞌya chaꞌ nu ngujui Cristo, loꞌ xca tucui cuiꞌya loo ꞌin um, cuiꞌ ñi nu mdyiquiꞌo canꞌ, ñaꞌan ca siꞌyana cuꞌni um scasca tñan tsuꞌhue ñaꞌan nu nchca tiꞌ Ndiose.
\v 5 Siꞌyana lja mdaꞌan na loo chaꞌ ngunanꞌ, lee canꞌ nde lyee la mxiloo tiꞌin na chaꞌ ngunanꞌ nu ntsuꞌhui tiquee na, loꞌ mꞌni na scasca quiꞌya seꞌen nu tsa loꞌo na ꞌin na loo chaꞌ ndyija.
\v 6 Una cuaꞌ ñii a xca ꞌa chaꞌ nducui nchaꞌan ꞌin na siꞌyana cuaꞌ ngujui na loꞌo tsoꞌ chaꞌ ꞌin lee, cuiꞌ chaꞌ nu msñi suꞌhua yaaꞌ ꞌin na, ñaꞌan ca siꞌyana cunajoꞌo na ꞌin Ndiose loꞌo chaꞌ tiyaa nu cui ti nu mdaa Espíritu ꞌin na, loꞌ siꞌi ꞌa loꞌo chaꞌ tiyaa cula nu nchcuiꞌ lee canꞌ.
\s Chaꞌ ꞌin quiꞌya nu ndon loꞌo na
\p
\v 7 ¿Ñaꞌan ta ljuin na xacanꞌ, ta chaꞌ ngunanꞌ lca chaꞌ ꞌin lee? Siꞌi na. A ca jlyo tinꞌ ñi na lca quiꞌya chaꞌ siꞌi siꞌya lee, ñi a ca jlyo tinꞌ siꞌyana a tsuꞌhue chcui tiꞌ na ndeꞌen la na, chaꞌ a nchcuiꞌ lee: —A chcui tiꞌ um ndeꞌen la na—.
\v 8 Una siꞌya lee canꞌ nde lyee la mxiloo tiꞌin na chaꞌ ngunanꞌ nu ntsuꞌhui tiqueen, siꞌyana a juesa ꞌin quiꞌya chaꞌ a yaan lee canꞌ.
\v 9 Sca coꞌ xaa mduꞌhuin chendyu, a mꞌnin cunta chaꞌ ꞌin lee, una ya tucua tsaan nguꞌyan chaꞌ tiyaa tsañaꞌan ndlo lee canꞌ tñan, loꞌ quiꞌya canꞌ jui la juesa ꞌin na, yjui xuꞌhua na ꞌñan.
\v 10 Loo nu ntsuꞌhui chaꞌ taa lee canꞌ chendyu ꞌñan, yatoꞌo ticuiiꞌ na ya loꞌo na ꞌñan loo chaꞌ ndyija,
\v 11 loꞌ siꞌya lee canꞌ, jui ñaꞌan nguñilyiꞌo quiꞌya ꞌñan, loꞌ siꞌya ticuiiꞌ lee canꞌ yatoꞌo yjui xuꞌhua quiꞌya ꞌñan.
\v 12 Jlyo tiꞌ na siꞌyana lee canꞌ lca na sca chaꞌ nu luhui, cuiꞌ cuañaꞌan luhui chaꞌ nu ndlo na tñan, ñi ndiꞌin chaꞌ ꞌin na loꞌ tsuꞌhue na.
\v 13 Xacanꞌ jan ñi, ¿ta sca na nu tsuꞌhue mxilyoo chaꞌ ndyija ꞌñan? Siꞌi na. Cuiꞌ ca nu siꞌya chaꞌ tsuꞌhue canꞌ nde lyee la ca chcanꞌ loo quiꞌya, loꞌ mxilyoo na ꞌñan chaꞌ ndyija, ñaꞌan ca siꞌyana loꞌo scasca chaꞌ nu ndlo lee canꞌ tñan, ca cuiyaꞌ tinꞌ tsala ñaꞌan tla chaꞌ ꞌin quiꞌya.
\v 14 Jlyo tiꞌ na siꞌyana lee canꞌ ljyaan na loꞌo tsoꞌ ꞌin Ndiose, una nanꞌ lcan nten chendyu nu cuaꞌ mdyaa ꞌin siyaꞌ ti loo quiꞌya,
\v 15 siꞌyana a ndyiꞌyan cunta chaꞌ nu nguiꞌnin. Loo nu cuꞌnin tñan tsuꞌhue nu nchca tinꞌ, nde ndyiꞌo yꞌnin chaꞌ nu nxcuan tloon.
\v 16 Chaꞌ nguiꞌnin chaꞌ nu a nchca tinꞌ, nchca tiꞌ chcuiꞌ siꞌyana tsuꞌhue lee canꞌ.
\v 17 Ndiyatoꞌo xacanꞌ siꞌin nguiꞌnin chaꞌ canꞌ, cuiꞌ ca nu quiꞌya ntsuꞌhui niꞌ cusya ꞌñan nguiꞌni ꞌin na.
\v 18 Cuaꞌ jlyo tinꞌ siꞌyana ñi sca chaꞌ tsuꞌhue a ndon loꞌon tsoꞌ nu ꞌin cunanꞌ re, siyaꞌ ndyiꞌo tiqueen cuꞌnin tñan tsuꞌhue, una a ndyijyi juesa cuꞌnin ꞌin na.
\v 19 Loo nu cuꞌnin tñan tsuꞌhue nu nchca tinꞌ, nde ndyiꞌo yꞌnin chaꞌ ngunanꞌ, cuiꞌ chaꞌ nu a nchca tinꞌ cuꞌnin.
\v 20 Chaꞌ nguiꞌnin chaꞌ nu a nchca tinꞌ, una siꞌin nguiꞌnin ꞌin na, cuiꞌ ca nu quiꞌya ntsuꞌhui niꞌ cusya ꞌñan nguiꞌni chaꞌ canꞌ.
\v 21 Nde chaꞌ nu nchca cuiyaꞌ tinꞌ: Xa nchca tinꞌ cuꞌnin tñan tsuꞌhue, cuiꞌ xaa nchca chcanꞌ loo quiꞌya ndon loꞌon.
\v 22 Una la niꞌ cusya ꞌñan, tsuꞌhue ntsuꞌhui tiqueen loꞌo lee ꞌin Ndiose,
\v 23 una ntsuꞌhui xca chaꞌ nu ndlo tñan ꞌin cunanꞌ re, canꞌ nu nsuun loꞌo chaꞌ tiyaa ꞌñan, loꞌ nsñi suꞌhua yaaꞌ ꞌñan seꞌen nu tiꞌ cuꞌnin quiꞌya loꞌo cunanꞌ re.
\v 24 ꞌTnan can loꞌo chaꞌ re, ¿ti ca nu culo laa ꞌñan siꞌya quiꞌya nu nguia loꞌo ꞌñan loo chaꞌ ndyija?
\v 25 Tyaan xuꞌhue ꞌin Ndiose siꞌya chaꞌ ꞌin Ñi Xꞌnan na Jesucristo. Canꞌ chaꞌ loꞌo chaꞌ tiyaa ꞌñan nducuan tñan chaꞌ nu nchcuiꞌ lee ꞌin Ndiose, una tsoꞌ nu ꞌin cunanꞌ re tiꞌ nguilyu na loo chaꞌ ngunanꞌ.
\c 8
\s Nduꞌhui na loꞌo chaꞌ cuiyaꞌ ꞌin Espíritu 
\p
\v 1 Canꞌ chaꞌ a xca ꞌa yuhueꞌ tiꞌ nducua chonꞌ nu sca chaꞌ ti ꞌin loꞌo Cristo Jesús, tsalca nu a ndaꞌan ꞌa loꞌo chaꞌ tiyaa ngunanꞌ, cuiꞌ ca nu nguia nchaꞌan chaꞌ nu nchca tiꞌ Espíritu ꞌin Ndiose.
\v 2 Siꞌya Cristo Jesús jui chaꞌ cuiyaꞌ ꞌin Espíritu nu ndaa chendyu ꞌñan, canꞌ nu ngulyoo ꞌñan tuyaaꞌ quiꞌya loꞌo tuyaaꞌ chaꞌ ndyija.
\v 3 Lee canꞌ a ncua ta yaaꞌ na ꞌin na siꞌyana a juesa ꞌin na loꞌo tsoꞌ ꞌin cunanꞌ re, una siꞌya quiꞌya ꞌin na Ndiose nguaꞌan tñan ñi ꞌin Sñeꞌ ñi nu yaan tsañaꞌan nchca tiꞌ sca nten, loꞌ mꞌni tyii ñi chaꞌ ꞌin quiꞌya nu ndon loꞌo cunanꞌ re,
\v 4 ñaꞌan ca siꞌyana loo chendyu ꞌin na ca chcanꞌ loo chaꞌ ꞌin lee, naa nu nguia nchaꞌan chaꞌ nu nchca tiꞌ Espíritu, loꞌ siꞌi ñaꞌan nu nchca tiꞌ na.
\v 5 Tsalca nu nguiaa tsoꞌ ꞌin cunanꞌ, cuiꞌ chaꞌ tiyaa ngunanꞌ ntsuꞌhui tiquee canꞌ, una nu cuaꞌ nguiaa tsoꞌ nu ꞌin Espíritu, cuiꞌ chaꞌ tiyaa ꞌin Espíritu ndaꞌan loꞌo canꞌ.
\v 6 Siꞌyana nu ndaꞌan loꞌo chaꞌ tiyaa ngunanꞌ, tsoꞌ ꞌin chaꞌ ndyija ntsuꞌhui canꞌ, una nu ndaꞌan loꞌo chaꞌ tiyaa ꞌin Espíritu, cuaꞌ jui chendyu ꞌin loꞌ nxitñanꞌ cusya ꞌin.
\v 7 Siꞌyana chaꞌ ngunanꞌ nu ntsuꞌhui tiquee na lca na taꞌa cusuun Ndiose, siꞌyana a jaꞌan canꞌ ñaꞌan nu ndlo ñi tñan, loꞌ ñi a nchca ꞌin ca jaꞌan chaꞌ canꞌ,
\v 8 loꞌ nu tiꞌ ndaꞌan loo chaꞌ ngunanꞌ, a tca cuꞌni canꞌ chaꞌ nu ndyuꞌhui cuiyaꞌ tiꞌ Ndiose.
\v 9 Una ꞌun a ndaꞌan ꞌa um loo chaꞌ ngunanꞌ, cuiꞌ ca nu nduꞌhui um chendyu tsañaꞌan nu nchca tiꞌ Espíritu, chaꞌ na cuaꞌ ntsuꞌhui Espíritu ꞌin Ndiose niꞌ cusya ꞌin um. Nu a ntsuꞌhui Espíritu ꞌin Cristo niꞌ cusya ꞌin, a nguiaa canꞌ tsoꞌ ꞌin ñi.
\v 10 Una chaꞌ Cristo cuaꞌ ntsuꞌhui ñi niꞌ cusya ꞌin um, ca cuiyaꞌ tiꞌ um siꞌyana cuaꞌ ngujui cunanꞌ um loꞌo tsoꞌ ꞌin quiꞌya, una cusya ꞌin um loꞌo na siꞌyana cuaꞌ mxnu luhui ñi ꞌin um.
\v 11 Loꞌ chaꞌ Espíritu ꞌin Ndiose, ñi nu mꞌni chaꞌ mdyiquiꞌo Jesús cuaꞌ ntsuꞌhui niꞌ cusya ꞌin um, cuiꞌ ñi nu mꞌni chaꞌ mdyiquiꞌo Cristo Jesús, cuꞌni ñi chaꞌ tyiquiꞌo um loꞌo cunanꞌ um tiyaa xaa siꞌya Espíritu nu cuaꞌ ntsuꞌhui niꞌ cusya ꞌin um.
\v 12 Canꞌ chaꞌ ꞌun jun taꞌa na, nducui nchaꞌan sca chaꞌ ꞌin na, una siꞌi loꞌo tsoꞌ ꞌin cunanꞌ na, ta siꞌyana tiꞌ cuꞌni na ñaꞌan nu nchca tiꞌ na,
\v 13 siꞌyana chaꞌ tiꞌ ndaꞌan um loo chaꞌ ngunanꞌ nu ndyiꞌo tiquee um, tsatoꞌo caja um xacanꞌ, una chaꞌ siꞌyu coꞌ um chaꞌ ngunanꞌ canꞌ siꞌya chaꞌ cuiyaꞌ ꞌin Espíritu, tsatoꞌo tyuꞌhui um chendyu.
\v 14 Siꞌyana nchgaa nu nchca jaꞌan ꞌin Espíritu ꞌin Ndiose, canꞌ nu lca sñeꞌ Ndiose.
\v 15 Siꞌyana a ncuan xuꞌhue um sca espíritu nu tiꞌ xñi suꞌhua yaaꞌ ꞌin um loo chaꞌ ytsen, cuiꞌ ca nu ncuan xuꞌhue um sca espíritu nu mxisñeꞌ ꞌin um, canꞌ chaꞌ ndyiꞌo tiquee na nxiꞌya na ꞌin Ndiose: ¡Abba, ꞌun lca um Ndiose ꞌñan!
\v 16 Ycuiꞌ ca Espíritu nxiycuiꞌ ꞌin cusya ꞌin na siꞌyana lca na sñeꞌ Ndiose.
\v 17 Chaꞌ cuaꞌ lca na sñeꞌ Ndiose, cuiꞌ cuañaꞌan chcuan na chaꞌ tsuꞌhue nu taa ñi ꞌin na, tsatlyu quiꞌni caꞌan chaꞌ canꞌ ꞌin na loꞌo Cristo. Chaꞌ tsatlyu ndijin na nu tiꞌi loꞌo ñi, cuiꞌ cuañaꞌan tsatlyu quiꞌni caꞌan ꞌin na loo xaa ꞌin ñi.
\v 18 Cunen loꞌo um sca chaꞌ, tsañaꞌan tiꞌi nu ndijin na cuaꞌ ñii, a nchcua taꞌa na loꞌo chaꞌ tsuꞌhue nu quiꞌni caꞌan ꞌin na tiyaa xaa.
\v 19 Siꞌyana nchgaa na nu mtñan Ndiose loo chendyu re, tsaloo nta ti canꞌ tsaan nu ca chcanꞌ loo xaa ꞌin Ndiose nu quiꞌni caꞌan ꞌin nchgaa nu lca sñeꞌ ñi.
\v 20 Siꞌyana nchgaa na nu nguiaꞌ canꞌ mdoꞌo ngunanꞌ chaꞌ ꞌin na, una siꞌi siꞌyana cuañaꞌan ncua tiꞌ na, cuiꞌ ca nu siꞌyana mdaa ñi chaꞌ cuiyaꞌ ꞌin na loꞌ nta na xca chaꞌ,
\v 21 siꞌyana tyiꞌo laa na seꞌen ntsuꞌhui nchcun na seꞌen ntsuꞌhui chaꞌ jlyo na, loꞌ quiꞌni caꞌan ꞌin na loo xaa ꞌin Ndiose tsatlyu loꞌo nchgaa sñeꞌ ñi.
\v 22 Cuaꞌ jlyo tiꞌ na siꞌyana tiꞌ xa mtñan Ndiose nchgaa loo na, ndijyin na nu tiꞌi tsañaꞌan nchca tiꞌ sca neꞌ cunaꞌan nu cuaꞌ tiyaan sñeꞌ chendyu,
\v 23 loꞌ siꞌi tsacanꞌ ti nu ndijin cuañaꞌan, cuiꞌ ca nu loꞌo nareꞌ, naa nu nta chaꞌ tsuꞌhue nu mdiꞌin tyaa Ndiose siꞌya Espíritu nu cuaꞌ ntsuꞌhui niꞌ cusya ꞌin na, canꞌ chaꞌ loꞌo nareꞌ ndiyaan tiꞌ cusya ꞌin na loꞌ nta na tsaan nu xisñeꞌ ca ñi ꞌin na, xa quiꞌni caꞌan ꞌin na loꞌo sca cunanꞌ nu cui ti.
\v 24 Siꞌya chaꞌ nu nducua tloo na, canꞌ chaꞌ mdoꞌo laa na, siꞌyana chaꞌ quita na chaꞌ nu cuaꞌ chcanꞌ, a sca cunta ntsuꞌhui, loꞌ chaꞌ tiꞌ quita na chaꞌ nu naꞌan tloo na, ¿ñi na tiꞌ nta na xacanꞌ?
\v 25 Una chaꞌ nducua tloo na chaꞌ nu a chcanꞌ, ꞌni chaꞌ ta loo na lja quita na chaꞌ canꞌ.
\v 26 Cuiꞌ cuañaꞌan nda yaaꞌ Espíritu ꞌin na siꞌyana naꞌan ndiꞌin chaꞌ ꞌin na, ñi a jlyo tiꞌ na ñaꞌan ntsuꞌhui chaꞌ jñan na ꞌin Ndiose, una ticuiꞌ Espíritu njñan ꞌin ñi siꞌya chaꞌ ꞌin na, loꞌ tsañaꞌan nu njñan canꞌ a jlyo tiꞌ na ñaꞌan culyo scua na chaꞌ canꞌ.
\v 27 Scati Ndiose, ñi nu jlyo tiꞌ ñaꞌan lca cusya ꞌin nten, cuiꞌ ñi ndyiꞌya ñi cunta tsañaꞌan chaꞌ tiyaa ꞌin Espíritu, njñan canꞌ ꞌin Ndiose tsañaꞌan nu nchca tiꞌ ñi siꞌya chaꞌ ꞌin nchgaa sñeꞌ ñi.
\s Cuaꞌ mꞌni na canan siꞌya Cristo
\p
\v 28 Jlyo tiꞌ na siꞌyana nchgaa loo chaꞌ cuꞌni tsuꞌhue ꞌin nu lyee lca tiquee loꞌo Ndiose, tsalca nu msiꞌya ñi ꞌin siꞌyana cuꞌni chaꞌ nu nchca tiꞌ ñi.
\v 29 Culo nducua la yuꞌhui lyoo ñi ꞌin canꞌ, a cunta mdiꞌin tyaa ñi chaꞌ siꞌyana ca canꞌ tsañaꞌan nu lca Sñeꞌ ñi, ñaꞌan ca siꞌyana ca Sñeꞌ ñi sca nu ndon loo lja nchgaa nu ca taꞌa ñi.
\v 30 Tsalca nu cuaꞌ mdoꞌo hui canꞌ, msiꞌya ñi ꞌin, loꞌ nu msiꞌya ñi ꞌin, canꞌ nu mxnu luhui ñi ꞌin, loꞌ nu nguinu luhui canꞌ, mdaa ñi chaꞌ cuiyaꞌ sten loo xaa ꞌin ñi.
\v 31 ¿Ñaꞌan ta ljuin na loꞌo chaꞌ re, chaꞌ na Ndiose nguiaa ñi tsoꞌ ꞌin na, ti nu tca cuꞌni tiꞌi loꞌo na?
\v 32 Ndiose siyaꞌ mñaꞌan ꞌtnan tiꞌ ñi ꞌin Sñeꞌ ñi xa mdijin canꞌ nu tiꞌi, una mdyaa ñi ꞌin canꞌ siꞌya nchgaa nareꞌ, ¿ta xtyi tiꞌ ñi a taa ñi nchgaa loo chaꞌ tsuꞌhue ꞌin na tsatlyu loꞌo Sñeꞌ ñi xacanꞌ?
\v 33 ¿Ti nu tca culo quiꞌya ꞌin nu cuaꞌ ngulohui Ndiose? ¿Ta siꞌi Ndiose lca nu mxnu luhui ꞌin na?
\v 34 ¿Ti nu tca culo yuhueꞌ ꞌin na? ¿Ta siꞌi Cristo lca nu ngujui tñan loo na, a cunta mdyiquiꞌo ñi loꞌ nducua ñi tsoꞌ cueen ꞌin Ndiose, njñan ñi chaꞌ ꞌin na?
\v 35 ¿Ti nu tca culo tsoꞌ ꞌin na siiꞌ chaꞌ tsuꞌhue ꞌin Cristo? ¿Ta siꞌya chaꞌ nu ndijin na, ta siꞌya scasca nu tiꞌi, ta siꞌyana tiꞌi tiꞌ neꞌ ꞌin na siꞌya chaꞌ ꞌin Ndiose, ta siꞌyana a caja na nu cu na, ta siꞌya ndiya lyijyi steꞌ na, ta siꞌyana chen nchcui ꞌin na, uta siꞌyana cujui neꞌ ꞌin na?
\v 36 Cuiꞌ ñaꞌan nchcuiꞌ quityi ꞌin Ndiose: —Siꞌya um chen nchcui ꞌin hua nchgaa xaa, Nguiaa chaꞌ ꞌin hua ñaꞌan nchca tiꞌ sca slyaꞌ nu cuaꞌ cujui neꞌ ꞌin—.
\v 37 Siyaꞌ cuañaꞌan, cuaꞌ mꞌni na canan nchgaa chaꞌ re, cuiꞌ siꞌya ñi nu mꞌni ꞌtnan ꞌin na.
\v 38 Canꞌ chaꞌ jlyo tsuꞌhue tinꞌ siꞌyana ñi chaꞌ ndyija, ñi chaꞌ nu nchca loo chendyu re, ñi angujle, loꞌ ñi cuiꞌin nu ndlo tñan, uta nu cuaan la chaꞌ cuiyaꞌ ntsuꞌhui yaaꞌ, ñi chaꞌ nu nchca cuaꞌ ñii uta chaꞌ nu caan nde loo,
\v 39 ta chaꞌ nu nchca nde niꞌ cuaan uta chaꞌ nu nchca nde ꞌya la ꞌin chendyu re, ñi sca loo na nu ndiꞌin loo chendyu re, a tca ꞌin na culo tsoꞌ na ꞌin na siiꞌ chaꞌ tsuꞌhue ꞌin Ndiose, siꞌya chaꞌ ꞌin Ñi Xꞌnan na Cristo Jesús.
\c 9
\s Ndiose ngulohui ñi ꞌin neꞌ Israel 

\p
\v 1 Sca chaꞌ ti ꞌñan loꞌo Cristo nchcuinꞌ chaꞌ nu ñi loꞌ a ñilyiꞌon ꞌin um, Espíritu nu Luhui ꞌin Ndiose jlyo tiꞌ ñaꞌan lca cusya ꞌñan.
\v 2 Tsala ñaꞌan luꞌun tinꞌ loꞌ scañaꞌan ti tiꞌi ngaꞌan ꞌñan,
\v 3 nu hasta lca tiqueen chaꞌ cua na tca caan yuhueꞌ chonꞌ, loꞌ toꞌo tsonꞌ siiꞌ Cristo siꞌya taꞌa quichen tyin nu lca ta nten ꞌñan,
\v 4 cuiꞌ neꞌ Israel, nu cuaꞌ nguinu chaꞌ xisñeꞌ Ndiose ꞌin, nu cuaꞌ naꞌan tloo xaa ꞌin ñi, nu cuaꞌ mdiꞌin tyaa ñi sca chaꞌ loꞌo, a cunta cuaꞌ mdaa ñi lee ꞌin neꞌ, loꞌo ñaꞌan nu cuꞌni tnu neꞌ ꞌin ñi, cuaꞌ mdaa ñi chaꞌ nu tucua tloo neꞌ tsala xaa,
\v 5 cuiꞌ ta nten canꞌ mdoꞌo nu lca nten cula ꞌin na, loo canꞌ yaan Cristo loꞌo tsoꞌ nu ꞌin cunanꞌ ñi, ñi nu lca Ndiose ꞌin nchgaa loo chaꞌ, loꞌ tsala xaa caja nu cuꞌni tnu ꞌin ñi. Amen.
\v 6 Una a quiñan tiꞌ na ta siꞌyana a mdoꞌo ñi chaꞌ nu cuaꞌ mdiꞌin tyaa Ndiose, siꞌyana a nchgaa neꞌ Israel nguiaa neꞌ tsoꞌ ꞌin Ndiose.
\v 7 Siyaꞌ lca neꞌ ta nten ꞌin Abraham, una siꞌi canꞌ chaꞌ nchgaa neꞌ lca neꞌ sñeꞌ yu, cuiꞌ ca nu ndeñaꞌan juin Ndiose loꞌo yu: —Loo Isaac nu lca sñeꞌ tsa quiñan ta nten ꞌin—.
\v 8 Canꞌ chaꞌ ta nten ꞌin Abraham a lca canꞌ sñeꞌ Ndiose loꞌo tsoꞌ nu ꞌin cunanꞌ, cuiꞌ ca nu nchgaa nu ljyaan loo chaꞌ nu mdiꞌin tyaa Ndiose, canꞌ nu lca ta nten ꞌin yu.
\v 9 Nde chaꞌ nu mdiꞌin tyaa ñi loꞌo yu: —Ñii xca yjan ljyaan xiyaꞌ, loꞌ Sara cuaꞌ ndiꞌin sñeꞌ—.
\v 10 Siꞌi tsacanꞌ ti chaꞌ ycuiꞌ ñi, cuiꞌ ca nu loꞌo chaꞌ ꞌin Rebeca xa nu mxilyo ñaꞌan loꞌo cunta ꞌin Isaac nu ncua nten cula ꞌin na,
\v 11 (tiꞌ lyijyi tyiꞌin chcuaa sñeꞌ canꞌ xa cuaꞌ mdiꞌin tyaa Ndiose chaꞌ re, a cunta ñi chaꞌ tsuꞌhue loꞌ ñi chaꞌ ngunanꞌ a nchca cuꞌni canꞌ, ñaꞌan ca siꞌyana quinu scua tla chaꞌ nu cuaꞌ mdiꞌin tyaa ñi, ñi nu ngulohui ꞌin Jacob, loꞌ siꞌi siꞌyana ndeꞌen la tñan tsuꞌhue nu cuaꞌ mꞌni canꞌ).
\v 12 Canꞌ chaꞌ juin ñi ꞌin Rebeca siꞌya chaꞌ ꞌin chcuaa sñeꞌ nu ntsuꞌhui chaꞌ tyiꞌin: —Yu nu cula la canꞌ ca yu nguso ꞌin nu cuneꞌ la—.
\v 13 Cuiꞌ ñaꞌan nchcuiꞌ quityi ꞌin Ndiose: —Nanꞌ ndyuꞌhui cuiyaꞌ tinꞌ ꞌin Jacob, una mscuan tloon ꞌin Esaú—.
\v 14 Xacanꞌ jan ñi, ¿ta ljuin na siꞌyana a ñi ndiꞌin chaꞌ ꞌin Ndiose? Siꞌi na.
\v 15 Siꞌyana ndeñaꞌan juin Ndiose loꞌo Moisé: —Nanꞌ nꞌnin ꞌtnan loꞌ ndyuꞌhui chaꞌ tlyu tiꞌ ꞌñan loꞌo nu nchca tinꞌ—.
\v 16 Ca cuiyaꞌ tiꞌ na siꞌyana Ndiose nꞌni ñi ꞌtnan ꞌin nu nchca tiꞌ ñi, loꞌ siꞌi siꞌya chaꞌ nu nchca tiꞌ canꞌ uta siꞌyana nsuꞌhua canꞌ juesa.
\v 17 Siꞌyana loo quityi ꞌin Ndiose juin ñi ꞌin Faraón: —Nanꞌ mdiꞌin tyaan ꞌin siꞌyana ca ree, loꞌ ca cuiyaꞌ tiꞌ tsala ñaꞌan tlyu chaꞌ cuiyaꞌ ꞌñan, ñaꞌan ca siꞌyana xcua cueen chaꞌ ꞌñan sca chcui chendyu—.
\v 18 Ca cuiyaꞌ tiꞌ na siꞌyana Ndiose nꞌni ñi ꞌtnan ꞌin nu nchca tiꞌ ñi, ticuiꞌ cuañaꞌan nꞌni tla ñi cusya ꞌin nu nchca tiꞌ ñi.
\v 19 Tinaꞌan ñan tiꞌ um: ¿Ñi chaꞌ tiꞌ ndlo quiꞌya Ndiose ꞌin nten chaꞌ na canꞌ? Siꞌyana, ¿ti nu tca chcui ndijin loꞌo chaꞌ nu nchca tiꞌ Ndiose?
\v 20 Nuꞌhuin jan ñi, ¿tucui lca siꞌyana cuaꞌ ñaꞌan ti nxcuen ꞌin Ndiose? ¿—Ta xtyi tiꞌ sca quitonꞌ cuñichaꞌ ꞌin nu mtñan ꞌin, ñi chaꞌ mtñan ꞌñan cuañaꞌan—?
\v 21 ¿Ta a ntsuꞌhui suun ꞌin nu ñan quitonꞌ, tñan na nu nchca tiꞌ loꞌo yuu canꞌ? ¿Tca tñan canꞌ sca na nu tsuꞌhue loꞌ tca tñan canꞌ sca na nu cuaꞌ ñaꞌan ti.
\v 22 ¿Ñaꞌan ta ljuin na? Chaꞌ Ndiose ncua tiꞌ ñi culo ñi chaꞌ nsinꞌ tiꞌ ntsuꞌhui tiquee ñi, seꞌen nu ca chcanꞌ loo chaꞌ cuiyaꞌ ꞌin ñi loꞌo nten nu cuaꞌ nguaꞌan cuiyaꞌ ꞌin siꞌyana jlyo, una siyaꞌ cuañaꞌan lyee mda loo ñi ꞌin neꞌ,
\v 23 a cunta siꞌyana xcua cueen chaꞌ ꞌin ñi, tsala ñaꞌan tlyu chaꞌ tsuꞌhue ntsuꞌhui ꞌin ñi loꞌo nu mñaꞌan ꞌtnan tiꞌ ñi ꞌin, cuiꞌ nu cuaꞌ mdiꞌin tyaa ñi chaꞌ quiꞌni caꞌan ꞌin loo xaa ꞌin ñi.
\v 24 Canꞌ chaꞌ msiꞌya ñi ꞌin tsatlyu loꞌo nareꞌ, una siꞌi tsa ꞌin neꞌ judio ti, cuiꞌ ca nu loꞌo neꞌ gentil.
\v 25 Cuiꞌ tsañaꞌan mxiycuiꞌ Ndiose ꞌin yu Osea: —Nanꞌ cunen loꞌo nten re siꞌyana lca neꞌ quichen ꞌñan, siyaꞌ siꞌi quichen ꞌñan lca canꞌ. Sca quichen nu a lca tiqueen loꞌo, chcuinꞌ loꞌo siꞌyana lca tiqueen loꞌo.
\v 26 Tsatoꞌo seꞌen jui nu ycuiꞌ loꞌo neꞌ: A lca um quichen ꞌñan, canꞌ culoꞌo naan neꞌ ꞌin um lca um sñeꞌ Ndiose, ñi nu loꞌo ca—.
\v 27 A cunta loꞌo Isaía ycuiꞌ cueen yu sca chaꞌ siꞌya chaꞌ ꞌin neꞌ Israel, loꞌ juin yu: —Siyaꞌ quiꞌan la neꞌ Israel ndiꞌin tsañaꞌan ndiꞌin ysin tuꞌhua tyiꞌa tujoꞌo, una chinꞌ ti canꞌ ntsuꞌhui chaꞌ tyiꞌo laa,
\v 28 siꞌyana cuaꞌ nchcui cuiiꞌ chaꞌ cuꞌni cuiyaꞌ Ñi Xꞌnan na chaꞌ ꞌin nten sca chcui chendyu loꞌo sca chaꞌ nu ñi—.
\v 29 Nde xca chaꞌ nu ycuiꞌ yu Isaía: —Ñi Xꞌnan na, ñi nu tla la chaꞌ ꞌin, chaꞌ cua na a mxnu ꞌa ñi ta nten ꞌin na, cuaꞌ sꞌni ngujlyo na tsañaꞌan quichen Sodoma loꞌo quichen Gomorra—.
\s Quinu luhui na loo nu tsa quiꞌan tiꞌ na ꞌin Cristo
\p
\v 30 ¿Ñaꞌan ta ljuin na xacanꞌ? Neꞌ gentil nu a ñan tiꞌ quinu luhui tloo Ndiose, canꞌ nu yatoꞌo mchcua chaꞌ tsuꞌhue re, nguinu luhui neꞌ loo nu ya quiꞌan tiꞌ neꞌ ꞌin ñi.
\v 31 Cuiꞌ lya neꞌ Israel, nu nducua ca tloo quinu luhui tloo Ndiose siꞌya chaꞌ ꞌin lee, yatoꞌo a mchcua neꞌ chaꞌ canꞌ.
\v 32 ¿Ñi chaꞌ ta? Siꞌyana ncua tiꞌ neꞌ chcua neꞌ chaꞌ canꞌ loo nu xuꞌhua seꞌen neꞌ chaꞌ ꞌin lee, loꞌ a mdiꞌin tyaa neꞌ quiloo neꞌ ꞌin Ndiose, yatoꞌo mducua quee quiyaꞌ neꞌ siꞌya chaꞌ re,
\v 33 tsañaꞌan nchcuiꞌ quityi ꞌin Ndiose: —Ñaꞌan jan ñi, quichen Jerusalén tyiꞌin tyaan sca quee nu chcua quiyaꞌ neꞌ, quee nu xitlyu ꞌin neꞌ, loꞌ nu tsa quiꞌan tiꞌ ꞌin canꞌ a quinu loꞌo chaꞌ jyiꞌo—.
\c 10
\p
\v 1 ꞌUn jun taꞌa na, nde chaꞌ nu lyee lati lca tiqueen, loꞌ njñan ꞌin Ndiose siꞌyana tca tyiꞌo laa neꞌ Israel.
\v 2 Nanꞌ ndaan suun siꞌyana lyee lca tiquee neꞌ loꞌo Ndiose, una a nchcua taꞌa chaꞌ canꞌ loꞌo chaꞌ nu ñi.
\v 3 Siꞌyana a ndyiꞌya neꞌ cunta tsañaꞌan nxnu luhui Ndiose ꞌin nten, nan neꞌ chaꞌ canꞌ una loꞌo chaꞌ tiyaa nu ꞌin neꞌ, canꞌ chaꞌ a nducuan xuꞌhue neꞌ chaꞌ tsuꞌhue ꞌin Ndiose nu xnu luhui ꞌin neꞌ.
\v 4 Lee canꞌ nguinu scua na siꞌyana tca tsa loꞌo na ꞌin na ꞌin Cristo, ñaꞌan ca siꞌyana quinu luhui nchgaa nu tsa quiꞌan tiꞌ ꞌin ñi.
\v 5 Cunta chaꞌ ꞌin lee nu mdaa Moisé ndeñaꞌan quinu luhui na: —Nu xuꞌhua seꞌen chaꞌ nu nchcuiꞌ lee, canꞌ nu tyuꞌhui chendyu—.
\v 6 Una nde chaꞌ nu nchcuiꞌ Ndiose ꞌin nu nchca tiꞌ quinu luhui loo nu tsa quiꞌan tiꞌ ꞌin ñi: —A quiñan tiꞌ canꞌ, ¿ti nu scuen nde niꞌ cuaan—? (ta siꞌyana quia ꞌya ꞌin Cristo),
\v 7 uta chaꞌ ljuin, ¿—ti nu tsaa seꞌen ntsuꞌhui neꞌ ngujui—? (ta siꞌyana quia ꞌya ꞌin Cristo lja neꞌ ngujui).
\v 8 ¿Ñaꞌan ta nchcuiꞌ quityi canꞌ? —A tijyoꞌ nchca um siiꞌ ychaꞌ Ndiose, cuiꞌ ca nu tuꞌhua um loꞌo niꞌ cusya ꞌin um cuaꞌ ntsuꞌhui na—. Nde chaꞌ nu ndiya quiꞌan tiꞌ hua nu nchcuiꞌ hua loꞌo nten:
\v 9 Chaꞌ chcuiꞌ um siꞌyana Jesús lca Ñi Xꞌnan na, loꞌ chaꞌ loꞌo cusya ꞌin um tsa quiꞌan tiꞌ um siꞌyana Ndiose mꞌni ñi chaꞌ mdyiquiꞌo canꞌ, xacanꞌ tyiꞌo laa um.
\v 10 Loꞌo cusya ꞌin na ndiya quiꞌan tiꞌ na, loꞌ quinu luhui na tloo Ndiose, cuiꞌ cuañaꞌan loꞌo tuꞌhua na nchcuiꞌ na chaꞌ re, loꞌ tyiꞌo laa na.
\v 11 Siꞌyana ndeñaꞌan nchcuiꞌ quityi ꞌin Ndiose: —Nchgaa nu tsa quiꞌan tiꞌ ꞌin Cristo a quinu canꞌ loꞌo chaꞌ jyiꞌo—.
\v 12 Siꞌyana scañaꞌan ti ntsuꞌhui lyoo neꞌ judio loꞌo neꞌ griego, siꞌyana cuiꞌ Ñi Xꞌnan na lca Xꞌnan nchgaa tucui, loꞌ scañaꞌan tiꞌ ndaa ñi chaꞌ tsuꞌhue ꞌin nchgaa nu njñan ꞌin ñi,
\v 13 —siꞌyana nchgaa nu jñan loꞌo chaꞌ cuiyaꞌ ꞌin Ñi Xꞌnan na, canꞌ nu tyiꞌo laa—.
\v 14 ¿Ñaꞌan ta tca jñan na ꞌin ñi, chaꞌ a nchca tsa quiꞌan tiꞌ na ꞌin ñi? ¿Ñaꞌan ta tca tsa quiꞌan tiꞌ na, chaꞌ a nchca quine ꞌin na chaꞌ ꞌin ñi? ¿Loꞌ ñaꞌan ta tca quine ꞌin na, chaꞌ a caja nu chcuiꞌ chaꞌ tsuꞌhue ꞌin ñi loꞌo na?
\v 15 ¿Ti nu tsa ycuiꞌ chaꞌ tsuꞌhue re, chaꞌ a tucui nu caꞌan tñan ꞌin? Siꞌyana ndeñaꞌan nchcuiꞌ quityi ꞌin Ndiose: —Tsuꞌhue ca xa ndiyaan nu chcuiꞌ chaꞌ tsuꞌhue ꞌin Ndiose, tsañaꞌan ntsuꞌhui chaꞌ cuꞌni chuꞌhue na chaꞌ ꞌin na loꞌo ñi—.
\v 16 Una siꞌi nchgaa tucui ncuan xuꞌhue chaꞌ tsuꞌhue ꞌin Ndiose, siꞌyana ndeñaꞌan nchcuiꞌ quityi nguaꞌan yu Isaía: —Ñi Xꞌnan hua, ¿ti nu ya quiꞌan tiꞌ chaꞌ nu ycuiꞌ hua—?
\v 17 Ca cuiyaꞌ tiꞌ na siꞌyana loo nu quine ꞌin na chaꞌ tsuꞌhue ꞌin ñi ndyijyi ñaꞌan tsa quiꞌan tiꞌ na, loꞌ chaꞌ tsuꞌhue canꞌ lca na ychaꞌ Ndiose.
\v 18 Cunen loꞌo um sca chaꞌ: ¿Ta na a nchca quine ꞌin nten chaꞌ re? Una ndeñaꞌan nchcuiꞌ quityi ꞌin Ndiose: —Ñaꞌaan sca chcui chendyu cuaꞌ ngune cueen chaꞌ nu ycuiꞌ nguso ꞌin ñi, cuaꞌ mdoꞌo yso na sca chcui chendyu—.
\v 19 A cunta cunen loꞌo um: ¿Ta a nguꞌya neꞌ Israel cunta chaꞌ re? Siꞌyana culo nducua la mxiycuiꞌ Ndiose ꞌin Moisé loꞌ juin ñi: —Nanꞌ suꞌhuan chaꞌ xlya tiquee um siꞌya chaꞌ ꞌin xca ta nten, loꞌ suꞌhuan chaꞌ nsinꞌ tiꞌ tiquee um siꞌya chaꞌ ꞌin xca ta nten nu nchcun chaꞌ tiyaa ꞌin—.
\v 20 A cunta la ꞌa mxiycuiꞌ Ndiose ꞌin Isaía: —Nten nu a ndaꞌan nan ꞌñan, yatoꞌo canꞌ nu nguija lyoo ꞌñan, ngulyo scua lan chaꞌ ꞌñan loꞌo nten nu a ntsuꞌhui tiquee ꞌñan—.
\v 21 Una ndeñaꞌan ycuiꞌ ñi chaꞌ ꞌin neꞌ Israel: —Sca chcui tsaan mducui yaanꞌ ꞌin nten nu lyeꞌ tiꞌ loꞌ tiji nan—.
\c 11
\s Ta neꞌ Israel nu ya quiꞌan tiꞌ ꞌin Ndiose 
\p
\v 1 Xacanꞌ jan ñi, ¿ta mscuan tloo Ndiose ꞌin nu lca quichen ꞌin ñi? A tca ljuin na cuañaꞌan, siꞌyana loꞌon nanꞌ lcan neꞌ Israel, cuiꞌ ta nten ꞌin Abraham nu ncua nten cula ꞌin na, loꞌ mdoꞌon loo ta nten ꞌin Benjamin.
\v 2 A ntsuꞌhui chaꞌ xcuan tloo Ndiose quichen ꞌin ñi, cuiꞌ nu cuaꞌ sꞌni ngulohui ñi. ¿Ta a jlyo tiꞌ um ñaꞌan nchcuiꞌ quityi ꞌin Ndiose chaꞌ ꞌin yu Elía xa mdaa yu quiꞌya chaꞌ ꞌin neꞌ Israel? Loꞌ juin yu:
\v 3 —Ñi Xꞌnan hua, cuaꞌ yjui neꞌ ꞌin nchgaa yu nu mxiycuiꞌ um ꞌin, a cunta mxicuten neꞌ nchgaa seꞌen ndiquin tucua neꞌ slyaꞌ, loꞌ xcan tin nguinun, una ntsuꞌhui tiquee neꞌ cujui neꞌ ꞌñan—.
\v 4 Una, ¿ñaꞌan ta mxcuen Ndiose ꞌin yu? —Tiꞌ ndiꞌin tsa cati mii yu nguso ꞌñan nu a nchca tyiꞌya xtyinꞌ tloo lcuin Baal—.
\v 5 Cuiꞌ cuañaꞌan cuaꞌ ñii, ndiꞌin sca ta nten nu cuaꞌ ngulohui ñi siꞌya chaꞌ tsuꞌhue ꞌin ñi.
\v 6 Chaꞌ mdoꞌo hui neꞌ siꞌya chaꞌ tsuꞌhue ꞌin ñi, a la nguiten tñan nu nguiꞌni neꞌ xacanꞌ, siꞌyana chaꞌ tsuꞌhue ꞌin ñi ljyaan na xuꞌhue ti. Loꞌ chaꞌ ljyaan na siꞌya tñan nu nguiꞌni neꞌ, siꞌi ꞌa xuꞌhue ti ljyaan na xacanꞌ.
\v 7 Canꞌ chaꞌ tca ljuin na siꞌyana chaꞌ tsuꞌhue nu ndaꞌan nan neꞌ Israel, a nchca chcuan neꞌ cunta ꞌin na, una tsalca nu cuaꞌ ngulohui ñi cuaꞌ jui na ꞌin, loꞌ nchgaa la ñaꞌan neꞌ ncua tla cusya ꞌin neꞌ,
\v 8 tsañaꞌan nchcuiꞌ quityi ꞌin Ndiose: —Ndiose mducun cusya ꞌin neꞌ, loꞌo quiloo neꞌ siꞌyana a ca chcanꞌ ꞌin neꞌ, loꞌo tunscan neꞌ siꞌyana a quine ꞌin neꞌ, loꞌ cuañaꞌan hasta cuaꞌ ñii—.
\v 9 A cunta ndeñaꞌan juin Davi: —Chaꞌ tsuꞌhue nu nducua tloo neꞌ chca na ꞌin neꞌ chaꞌ ngunanꞌ, suꞌhua nchcun na ꞌin neꞌ, xityu na ꞌin neꞌ loo nu tiꞌi, canꞌ nu ca siyaꞌ neꞌ.
\v 10 Quinu tla yta xaa quiloo neꞌ siꞌyana a ca chcanꞌ ꞌin neꞌ, loꞌ quinu xincun neꞌ tsala xaa—.
\s Loꞌo neꞌ gentil ntsuꞌhui chaꞌ tyiꞌo laa neꞌ
\p
\v 11 Xacanꞌ jan ñi, ¿ta mducua quee quiyaꞌ neꞌ Israel siꞌyana a tyiton ꞌa neꞌ? Siꞌi na, una siꞌya chaꞌ lyeꞌ tiꞌ ꞌin neꞌ jui ñaꞌan tyiꞌo laa neꞌ gentil, ñaꞌan ca siꞌyana caja chaꞌ nsinꞌ tiꞌ ꞌin neꞌ Israel.
\v 12 Siꞌya chaꞌ lyeꞌ tiꞌ canꞌ ꞌin neꞌ mchca na chaꞌ cuilyiyaꞌ ꞌin nten chendyu, loꞌ siꞌya chaꞌ nu ngunanꞌ neꞌ canꞌ ncua cuilyiyaꞌ neꞌ gentil, ¿ñaꞌan la ca xa tyiton ca neꞌ Israel?
\v 13 Nchcuinꞌ chaꞌ re loꞌo um, ꞌun neꞌ gentil, siꞌyana Ndiose nguaꞌan tñan ñi ꞌñan chcuinꞌ chaꞌ tsuꞌhue ꞌin ñi lja neꞌ gentil, loꞌ msuꞌhua loon tñan nu mdaa ñi ꞌñan,
\v 14 chaꞌ cua na tca sten chaꞌ xlya niꞌ cusya ꞌin taꞌa quichen tyin, loꞌ tsatoꞌo lja canꞌ caja nu tyiꞌo laa.
\v 15 Siꞌya chaꞌ nu mdoꞌo tsoꞌ neꞌ Israel, jui ñaꞌan cuꞌni chuꞌhue nten chendyu cunta ꞌin neꞌ loꞌo Ndiose, ¿ñaꞌan la ca xa xitucui neꞌ Israel? Cuaꞌ lca na tca mdyiquiꞌo neꞌ.
\v 16 Chaꞌ jaslya nu mdoꞌo culoo canꞌ lca na sca lcuan ꞌin Ndiose, ¿ta siꞌi ñaꞌaan scuan nu nguinu canꞌ luhui na xacanꞌ? Cuiꞌ cuañaꞌan loꞌo sca yca, chaꞌ tsuꞌhue xcuaꞌ na, cuiꞌ cuañaꞌan tsuꞌhue stanꞌ na.
\v 17 Chaꞌ cuañaꞌan yatoꞌo nguitan stanꞌ yca olivo, loꞌ ꞌun lca um ñaꞌan nchca tiꞌ yca nu nducua niꞌ quixinꞌ, cuaꞌ jui nu mjyiꞌin caꞌan ꞌin um seꞌen nguitan ycuiꞌ ca stanꞌ canꞌ, loꞌ cuaꞌ ñii sca chaꞌ ti ꞌin um loꞌo suun yca olivo canꞌ, tsala ñaꞌan tsuꞌhue nguiꞌni coꞌo xcuaꞌ canꞌ ꞌin um.
\v 18 Canꞌ chaꞌ a quiñan tiꞌ um ta lyee la ndon loo um que ꞌin stanꞌ yca nu nguitan canꞌ, loꞌ chaꞌ cuañaꞌan nguiꞌni siyeꞌ um, una a jlya tiꞌ um siꞌyana xcuaꞌ yca canꞌ nguiꞌni coꞌo ꞌin um, loꞌ siꞌi um nguiꞌni coꞌo um ꞌin na.
\v 19 Tinaꞌan ljuin um: Nguitan stanꞌ yca canꞌ siꞌyana quiꞌni caꞌan ꞌin na seꞌen nguitan na.
\v 20 Chaꞌ ñi siꞌyana nguitan stanꞌ canꞌ siꞌyana a ya quiꞌan tiꞌ canꞌ ꞌin Ndiose, una ꞌun tla ndon um siꞌyana ya quiꞌan tiꞌ um, canꞌ chaꞌ a ntsuꞌhui chaꞌ cuꞌni siyeꞌ um, cuiꞌ ca nu tyon loꞌo um sca ytsen.
\v 21 Chaꞌ Ndiose a mꞌni ñi chaꞌ tlyu tiꞌ ꞌin ycuiꞌ ca stanꞌ canꞌ, ¿ñaꞌan la ca ꞌun chaꞌ a ca jaꞌan um?
\v 22 Ñaꞌan jan ñi, tsala ñaꞌan tlyu chaꞌ tsuꞌhue ꞌin Ndiose loꞌo um, a cunta tla chaꞌ ꞌin ñi loꞌo nu mdoꞌo tsoꞌ canꞌ. Canꞌ chaꞌ a ntsuꞌhui chaꞌ tyiꞌo tsoꞌ um siiꞌ chaꞌ tsuꞌhue, ñaꞌan tuꞌ loꞌo um siꞌyu coꞌ ñi chaꞌ ꞌin um.
\v 23 Neꞌ Israel, chaꞌ cua na a tsa quiñan neꞌ loꞌo chaꞌ tla yta ꞌin neꞌ, tiꞌ caja ñaꞌan tya caꞌan canꞌ siiꞌ yca canꞌ, siꞌyana tlyu chaꞌ cuiyaꞌ ꞌin Ndiose loꞌ tca jyiꞌin caꞌan ñi ꞌin canꞌ xiyaꞌ.
\v 24 Chaꞌ mdoꞌo um loo yca nducua niꞌ quixinꞌ, loꞌ ncua mdya caꞌan um siiꞌ xca yca olivo nu tsuꞌhue la, ¿ta a cuti la tya caꞌan stanꞌ yca olivo canꞌ loꞌo stanꞌ nu ꞌin ca na?
\s Tiꞌ tyiꞌo laa neꞌ Israel
\p
\v 25 ꞌUn jun taꞌa na, nchca tinꞌ siꞌyana quiꞌya um cunta chaꞌ re, chaꞌ nu yuꞌhui cutsiꞌ ꞌin Ndiose, loꞌ a cuꞌni siyeꞌ um ꞌin um, siꞌyana neꞌ Israel, sca coꞌ xaa mꞌni tla neꞌ cusya ꞌin neꞌ tsayaꞌ nu tiyaa cuiyaꞌ tsa quiꞌan tiꞌ neꞌ gentil ꞌin Ndiose,
\v 26 la xacanꞌ tyiꞌo laa neꞌ Israel, tsañaꞌan nchcuiꞌ quityi ꞌin Ndiose: —Quichen Jerusalén tyiꞌo Ñi nu Culo Laa ꞌin nten, culo tsoꞌ ñi ta nten ꞌin Jacob loo chaꞌ ngunanꞌ—.
\v 27 Loꞌ juin Ndiose: —Nde chaꞌ nu tyiꞌin tyaan loꞌo neꞌ, cuiꞌ xa nu xicuten quiꞌya nducui neꞌ—.
\v 28 Yatoꞌo neꞌ Israel mchca taꞌa cusuun Ndiose seꞌen nu tsa quiꞌan tiꞌ um chaꞌ tsuꞌhue re, una tsañaꞌan ngulohui ñi ꞌin neꞌ, nguiꞌni ñi ꞌtnan ꞌin neꞌ siꞌya chaꞌ nu cuaꞌ mdiꞌin tyaa ñi loꞌo nten cula ꞌin neꞌ.
\v 29 Siꞌyana Ndiose a ntsuꞌhui chaꞌ chcuan ñi chaꞌ tsuꞌhue nu cuaꞌ mdaa ñi, loꞌ ñi a xcuan tloo ñi ꞌin nu cuaꞌ msiꞌya ñi.
\v 30 Ñaꞌan nchca tiꞌ ꞌun, a ncua jaꞌan um ꞌin Ndiose tiꞌ culoo, una cuaꞌ ñii cuaꞌ mchcuan um chaꞌ tsuꞌhue canꞌ ꞌin ñi, cuiꞌ siꞌya chaꞌ lyeꞌ tiꞌ ꞌin neꞌ Israel.
\v 31 Loꞌ siyaꞌ lyeꞌ tiꞌ neꞌ, una tiyaa xaa quiꞌni caꞌan ꞌin neꞌ loꞌo ticuiꞌ chaꞌ tsuꞌhue nu mdaa ñi ꞌin um.
\v 32 Ndiose mdaa ñi yaꞌ ca lyeꞌ tiꞌ ñaꞌaan nten chendyu, siꞌyana tca ñaꞌan ꞌtnan tiꞌ ñi ꞌin nchgaa tucui.
\v 33 ¡Tsala ñaꞌan tlyu chaꞌ cuilyiyaꞌ ntsuꞌhui ꞌin Ndiose loꞌo chaꞌ tiyaa ꞌin ñi, tsañaꞌan ndyiꞌya ñi cunta nchgaa loo chaꞌ! ¡Ñi sca tucui loꞌ a tca quiꞌya chaꞌ tiyaa tsañaꞌan chaꞌ nu cuaꞌ mdiꞌin tyaa ñi, a cunta tsañaꞌan nguiaa chaꞌ ꞌin ñi!
\v 34 Siꞌyana, ¿—ti nu nguꞌya cunta chaꞌ tiyaa ꞌin Ñi Xꞌnan na? ¿Ti nu cuaꞌ mda cueen ꞌin ñi—?
\v 35 ¿—Ti nu cuaꞌ mxitucua loo mdaa sca na ꞌin ñi—?
\v 36 Siꞌya ñi ljyaan nchgaa loo na, ndiꞌin na loꞌo cunta ꞌin ñi, loꞌ siꞌya ñi nguiaaꞌ na. Scati ꞌin ñi ntsuꞌhui chaꞌ cuꞌni tnu na tsala xaa. Amen.
\c 12
\s Chaꞌ nu ntsuꞌhui chaꞌ cuꞌni jun 
\p
\v 1 Canꞌ chaꞌ ꞌun jun taꞌa na, siꞌya chaꞌ tsuꞌhue nu tlyu ꞌin Ndiose, taan chaꞌ tnu tiquee ꞌin um siꞌyana tyiꞌin tyaa um ꞌin um tloo Ndiose tsañaꞌan sca lcuan nu loꞌo ca, nu luhui ꞌin ñi, ñaꞌan nu nchca tiꞌ ñi, siꞌyana cuañaꞌan ntsuꞌhui chaꞌ cuꞌni tnu na ꞌin ñi.
\v 2 A chcui nchaꞌan um chaꞌ nu nchca loo chendyu re, cuiꞌ ca nu taa um yaꞌ xitsaꞌan ñi ꞌin um loꞌo chaꞌ tiyaa nu cui ti, ñaꞌan ca siꞌyana ca cuiyaꞌ tiꞌ um ñaꞌan chaꞌ nu nchca tiꞌ Ndiose, cuiꞌ chaꞌ nu ndyuꞌhui cuiyaꞌ tiꞌ ñi, loꞌo chaꞌ nu ñi.
\v 3 Chcuinꞌ loꞌo um cunda scaa um siꞌya chaꞌ tsuꞌhue nu mdaa Ndiose ꞌñan, siꞌyana a xqueꞌ tiꞌ um ta cuaan la ndiꞌin chaꞌ ꞌin um que ñaꞌan cuiyaꞌ nu cuaꞌ jui ꞌin um, cuiꞌ ca nu suꞌhua loo um ꞌin um, cuaꞌ ñaꞌaan cuiyaꞌ nu mdaa Ndiose ꞌin cunda scaa um siꞌya chaꞌ nu ndiya quiꞌan tiꞌ um.
\v 4 Tsañaꞌan nguiaa chaꞌ ꞌin cunanꞌ na, quiꞌan ꞌa seꞌen ntsuꞌhui ꞌin na, una siꞌi sca loo ti tñan nguiꞌni na,
\v 5 cuiꞌ cuañaꞌan nareꞌ, quiꞌan na ndiꞌin na, una sca chaꞌ ti ꞌin na loꞌo Cristo, loꞌ nchgaa na scati tucui lca na loꞌo taꞌa na.
\v 6 Canꞌ chaꞌ, cuaꞌ ñaꞌaan chaꞌ cuiyaꞌ nu mdaa Ndiose ꞌin na suꞌhua loo um chaꞌ canꞌ. Chaꞌ ntsuꞌhui nu nchcuiꞌ chaꞌ tsuꞌhue ꞌin ñi, chcuiꞌ canꞌ cuaꞌ ñaꞌaan cuiyaꞌ nu ndiya quiꞌan tiꞌ.
\v 7 Chaꞌ ta yaaꞌ um ꞌin xca tucui, suꞌhua loo um chaꞌ canꞌ, uta chaꞌ culoꞌo um ꞌin nten, cuiꞌ cuañaꞌan suꞌhua loo um chaꞌ canꞌ.
\v 8 Chaꞌ taa um chaꞌ tnu tiquee ꞌin xca tucui, suꞌhua loo um chaꞌ canꞌ, uta chaꞌ taa um lcuan, cuꞌni um chaꞌ canꞌ loꞌo nu chcui tiquee um, loꞌ nu chuꞌhui cunta ꞌin jun taꞌa na, suꞌhua loo tñan canꞌ, cuiꞌ cuañaꞌan loꞌo nu cuꞌni ꞌtnan ꞌin xca tucui, tsuꞌhue chuꞌhui tiquee canꞌ cuꞌni ꞌin na.
\v 9 Chuꞌhui chaꞌ tsuꞌhue ꞌin um loꞌo taꞌa um, loꞌo sca cusya nu ñi. Xcuan tloo um chaꞌ ngunanꞌ loꞌ chcui nchaꞌan um chaꞌ nu tsuꞌhue.
\v 10 Chuꞌhui chaꞌ tsuꞌhue ꞌin um, cuti ti tsa chaꞌ ꞌin um, cunda scaa um suꞌhua loo um ꞌin taꞌa um loꞌo suun ñaꞌan.
\v 11 Suꞌhua um juesa loꞌ siꞌi na ca ndaja tiꞌ um cuꞌni um tñan ꞌin Ñi Xꞌnan na, cuiꞌ ca nu ndon tiꞌ um suꞌhua loo um chaꞌ canꞌ.
\v 12 A cunta ca tsuꞌhue chuꞌhui tiquee um quita um chaꞌ nu nducua tloo um, ta loo um loꞌo chaꞌ nu ndijin um, loꞌ a culaꞌ tiꞌ um chcuiꞌ lyiꞌo um ꞌin Ndiose.
\v 13 Chuꞌhui yuhue tiꞌ um ꞌin jun taꞌa na nu ꞌni chaꞌ ꞌin, loꞌ taa um seꞌen quinu nu tiyaa seꞌen ndiꞌin um.
\v 14 Jñan um ꞌin Ndiose siꞌyana lcuan ñi ꞌin nu tiꞌi tiꞌ ꞌin um, cuti ti chcuiꞌ um loꞌo canꞌ, loꞌ siꞌi nu nde taja um ꞌin.
\v 15 Ca tsuꞌhue chuꞌhui tiquee um loꞌo nu tsuꞌhue ntsuꞌhui tiquee, loꞌ quiꞌya tuꞌhua tiquee um loꞌo nu ndiꞌin nguinan.
\v 16 Nchgaa um ca sca chaꞌ ti ꞌin um, a taa um yaꞌ sten chaꞌ siyeꞌ ꞌin um, cuiꞌ ca nu suꞌhua loo um ꞌin nu joꞌo ti ndiꞌin chaꞌ ꞌin, a quiñan tiꞌ um ta lyee la tiyaa um.
\v 17 A nchca chaꞌ cuꞌni um chaꞌ ngunanꞌ loꞌo nu mꞌni chaꞌ ngunanꞌ loꞌo um, cuiꞌ ca nu cunan um ñaꞌan cuꞌni um tsuꞌhue loꞌo nchgaa tucui.
\v 18 Tsoꞌ nu ꞌin um, cunan um ñaꞌan tyiꞌin um tsuꞌhue loꞌo nchgaa tucui.
\v 19 ꞌUn jun taꞌa na nu ndyuꞌhui cuiyaꞌ tinꞌ ꞌin, a nchca chaꞌ culyoo um tiꞌi nducua tiquee um loꞌo nu mꞌni chaꞌ ngunanꞌ loꞌo um, cuiꞌ ca nu taa um yaꞌ Ndiose cuꞌni cuiyaꞌ ñi chaꞌ canꞌ, siꞌyana ndeñaꞌan nguinu scua chaꞌ ꞌin ñi: —Nanꞌ nguiꞌni caꞌan ꞌñan xitucuin nu tiꞌi canꞌ, nanꞌ xuꞌhuan lyiyanꞌ ꞌin neꞌ, juin Ñi Xꞌnan na—.
\v 20 Ticuiꞌ cuañaꞌan —chaꞌ taꞌa cusuun um nguiteꞌ tiꞌ, taa um na cu canꞌ, uta chaꞌ nguityi tiꞌ, tyaa um tyiꞌa coꞌo, loꞌ cuañaꞌan tyon chen tiqueꞌ tloo canꞌ loꞌo chaꞌ jyiꞌo ꞌin—.
\v 21 A taa um yaꞌ chaꞌ ngunanꞌ cuꞌni canan ꞌin um, cuiꞌ ca nu nde cuꞌni um canan ꞌin na siꞌya chaꞌ tsuꞌhue nu cuꞌni um. 
\c 13
\p
\v 1 Nchgaa tucui ntsuꞌhui chaꞌ ca jaꞌan ꞌin bsya, siꞌyana a sca yu nu nchca bsya ta siꞌi Ndiose ndaa chaꞌ cuiyaꞌ ꞌin, loꞌ yu nu lyiꞌya tñan cuaꞌ ñii, Ndiose mdiꞌin tyaa ꞌin yu.
\v 2 Canꞌ chaꞌ nu cuꞌni lyeꞌ tiꞌ ꞌin bsya, cuiꞌ chaꞌ nu mdiꞌin tyaa Ndiose nguiꞌni lyeꞌ tiꞌ canꞌ, loꞌ nu nguiꞌni cuañaꞌan, ticuiiꞌ nsoꞌ tucua quiꞌya chonꞌ.
\v 3 Yu nchca bsya, a nducua yu ta siꞌyana suꞌhua ytsen yu ꞌin nten nu nguiꞌni tñan tsuꞌhue, cuiꞌ ca nu ꞌin nten nu nducunꞌ. ¿Ta nchca tiꞌ um a xicutsen tiꞌ um ꞌin bsya? Cuꞌni um tñan tsuꞌhue loꞌ cuañaꞌan taa yu loo um,
\v 4 siꞌyana tñan ꞌin Ndiose nguiꞌni canꞌ, ñaꞌan ca siꞌyana tca tyiꞌin tsuꞌhue um. Una chaꞌ nguiꞌni um tñan ngunanꞌ, tyiꞌan ytsen um siꞌyana siꞌi cua chaꞌ ti nducua spada yaaꞌ canꞌ. Nguso ꞌin Ndiose lca canꞌ, loꞌ ntsuꞌhui suun ꞌin xitijin nu tiꞌi ꞌin nu nguiꞌni tñan ngunanꞌ.
\v 5 ꞌNi chaꞌ ca jaꞌan um ꞌin bsya, una siꞌi siꞌyana nguitsen um tyijyin um nu tiꞌi, cuiꞌ ca nu siꞌyana jlyo tiꞌ um tñan tsuꞌhue ntsuꞌhui chaꞌ cuꞌni um.
\v 6 Canꞌ chaꞌ nsuꞌhua lyiyaꞌ um tñi nu njñan bsya, siꞌyana ticuiꞌ tñan ꞌin Ndiose nguiꞌni loꞌ nsuꞌhua ta canꞌ chaꞌ nu nchca seꞌen nducua.
\v 7 Canꞌ chaꞌ suꞌhua lyiyaꞌ um nchgaa tñi nu nguiꞌni caꞌan ꞌin um, chaꞌ ꞌin yuu uta scasca tñi nu njñan bsya. Cuiꞌ cuañaꞌan loꞌo nten, cuꞌni suun um ꞌin um, loꞌ taa um loo canꞌ.
\v 8 A nchca chaꞌ quinu tucui um tniꞌ ꞌin ñi sca tucui, tsaloo ti chuꞌhui chaꞌ tsuꞌhue ꞌin um scasca um, siꞌyana nu ntsuꞌhui chaꞌ tsuꞌhue ꞌin loꞌo taꞌa cuaꞌ mducua canꞌ tñan chaꞌ nu nchcuiꞌ lee.
\v 9 Siꞌyana nchcuiꞌ quityi ꞌin Ndiose: —A sten yuꞌhui um loꞌo cuilyiꞌo nten, a cujui um nten, a cuꞌni um cunan, a chcuiꞌ um chaꞌ cuiñi, a chcui tiꞌ um scasca loo chaꞌ—. Nchgaa la ñaꞌan chaꞌ nu ndlo Ndiose tñan nguiꞌni sca na ꞌin na loꞌo chaꞌ re: —Ñaꞌan ꞌtnan tiꞌ um ꞌin taꞌa nten um tsañaꞌan nꞌni um loꞌo um ticuiiꞌ um—.
\v 10 Chaꞌ tsuꞌhue re a la nꞌni na tiꞌi, canꞌ chaꞌ nu ntsuꞌhui chaꞌ tsuꞌhue ꞌin loꞌo taꞌa, cuaꞌ nducua canꞌ tñan chaꞌ ꞌin lee.
\v 11 Nchgaa chaꞌ re quiꞌya um chaꞌ tiyaa, loꞌ ca cuiyaꞌ tiꞌ um siꞌyana cuaꞌ mdiyaa braa nu tyiꞌo sla na, siꞌyana cuiꞌ la ljyaan tsaan nu ntsuꞌhui chaꞌ tyiꞌo na loo chendyu re que ñaꞌan xa nu ya quiꞌan tiꞌ na.
\v 12 Cuaꞌ nguiaa ndijin tla loꞌ nde cuaꞌ ljyaan xaa, canꞌ chaꞌ xcuan tloo na chaꞌ ngunanꞌ canꞌ, loꞌ coꞌ tsuꞌhue na nchgaa chaꞌ cuiyaꞌ nu ljyan loꞌo xaa canꞌ.
\v 13 Tyiꞌan na loꞌo sca chaꞌ tiyaa nu ñi tsañaꞌan ndaꞌan sca nten xa cucha, loꞌ siꞌi loꞌo chaꞌ cuꞌhui uta chaꞌ tucunꞌ, chaꞌ nu nguiten yuꞌhui neꞌ loꞌo ñaꞌan tucui ti, ta cuꞌni na ñaꞌan nu nchca tiꞌ na, chaꞌ cusuun uta loꞌo chaꞌ njñan tiꞌ,
\v 14 cuiꞌ ca nu coꞌ tsuꞌhue na chaꞌ tsuꞌhue ꞌin Ñi Xꞌnan na Jesucristo, loꞌ a taa na yaꞌ ca lca tiquee na loꞌo chaꞌ ngunanꞌ.
\c 14
\s Chaꞌ ꞌin jun nu naꞌan tiꞌ 
\p
\v 1 Tsalca jun nu a tla ndon loꞌo chaꞌ nu ndiya quiꞌan tiꞌ, cuan xuꞌhue um ꞌin canꞌ, una siꞌi siꞌyana chcuiꞌ tyijyin um loꞌo.
\v 2 Siꞌyana ntsuꞌhui nu nxqueꞌ tiꞌ tca cu nchgaa loo na, loꞌ ntsuꞌhui nu nchcu tsaloo ti na quixinꞌ, siꞌyana nguiꞌni tucua tiꞌ canꞌ loꞌo chaꞌ tiyaa ꞌin.
\v 3 Una nu nchcu nchgaa loo na, a ntsuꞌhui chaꞌ xcuan tloo ꞌin nu a nchcu ꞌin na, ticuiꞌ cuañaꞌan nu a nchcu nchgaa loo na, a ntsuꞌhui chaꞌ xiychaꞌ canꞌ ꞌin nu nchcu ꞌin na, siꞌyana Ndiose cuaꞌ ncuan xuꞌhue ñi ꞌin canꞌ.
\v 4 ¿Tucui ta lca nuꞌhuin siꞌyana cuꞌni cuiyaꞌ chaꞌ ꞌin sca nguso nu cuaꞌ ntsuꞌhui xꞌnan? Cuaꞌ jlyo tiꞌ xꞌnan canꞌ, chaꞌ nguiꞌni tñan tsuꞌhue uta nguiꞌni tñan ngunanꞌ, una ntsuꞌhui chaꞌ tyon tla canꞌ siꞌyana tla chaꞌ ꞌin Ñi Xꞌnan na, ñi nu nsñi ton ꞌin.
\v 5 Ntsuꞌhui nu ñan tiꞌ siꞌyana cuaꞌ lca ti tsaan ndon loo na, loꞌ ntsuꞌhui nu nxqueꞌ tiꞌ siꞌyana scañaꞌan ti ndiꞌin chaꞌ ꞌin nchgaa tsaan, una cunda scaa na tyon ñi na cuaꞌ ñaꞌaan chaꞌ tiyaa ꞌin na.
\v 6 Nu nxuꞌhua seꞌen scasca la tsaan, siꞌya Ñi Xꞌnan na nguiꞌni ꞌin na, loꞌ nu a nxuꞌhua seꞌen tsaan canꞌ, ticuiꞌ siꞌya Ñi Xꞌnan na a nguiꞌni ꞌin na. Nu nchcu nchgaa loo na, siꞌya Ñi Xꞌnan na nchcu ꞌin na siꞌyana ndyaa canꞌ xuꞌhue ꞌin Ndiose, loꞌ nu a nchcu ꞌin na ticuiꞌ siꞌya Ñi Xꞌnan na a nchcu ꞌin na, una ticuiꞌ ndyaa canꞌ xuꞌhue ꞌin Ndiose.
\v 7 Siꞌyana nareꞌ a sca na nduꞌhui na chendyu loꞌo cunta ꞌin na, cuiꞌ cuañaꞌan siꞌi loꞌo cunta ꞌin na tyiꞌo na loo chendyu re.
\v 8 Chaꞌ nduꞌhui na chendyu, siꞌya Ñi Xꞌnan na nduꞌhui na, loꞌ chaꞌ caja na, ticuiꞌ siꞌya Ñi Xꞌnan na caja na. Canꞌ chaꞌ siyaꞌ loꞌo na uta chaꞌ ngujui na, ticuiꞌ yaaꞌ Ñi Xꞌnan na ntsuꞌhui na.
\v 9 Cuiꞌ siꞌya chaꞌ re ngujui Cristo loꞌ mdyiquiꞌo ñi, loꞌo ñi cuaꞌ ñii siꞌyana ca ñi Xꞌnan nchgaa nu tiꞌ loꞌo tsatlyu loꞌo nu cuaꞌ ngujui.
\v 10 Una nuꞌhuin, ¿ñi chaꞌ nchca tiꞌ cuꞌni cuiyaꞌ chaꞌ ꞌin taꞌa? Loꞌ nuꞌhuin jan ñi, ¿ñi chaꞌ nxcuan tloo ꞌin taꞌa? Siꞌyana nchgaa na ntsuꞌhui chaꞌ tiyaa na tloo Cristo seꞌen nchca cuiyaꞌ chaꞌ.
\v 11 Siꞌyana ndeñaꞌan nchcuiꞌ quityi ꞌin Ndiose: —Nanꞌ lcan, juin Ñi Xꞌnan na, canꞌ chaꞌ tloon ntsuꞌhui chaꞌ tyiꞌya xtyinꞌ sca chcui chendyu, loꞌ nchgaa tucui cuꞌni tyiꞌya ꞌin Ndiose—.
\v 12 Cuañaꞌan cunda scaa na ntsuꞌhui chaꞌ tyaa na cunta tloo Ndiose.
\v 13 A nchca chaꞌ xiychaꞌ na ꞌin taꞌa na, cuiꞌ ca nu tyiꞌin tyaa na chaꞌ siꞌyana a ca ꞌa na sca quee nu chcua quiyaꞌ canꞌ, loꞌ tsatoꞌo tyu loo quiꞌya.
\v 14 Nanꞌ ndiya quiꞌan tinꞌ ꞌin Ñi Xꞌnan na Jesús, loꞌ jlyo tinꞌ siꞌyana ñi sca na a ti ndiꞌin chaꞌ ꞌin, una chaꞌ ntsuꞌhui nu ñan tiꞌ siꞌyana ti ndiꞌin chaꞌ canꞌ, cunta ꞌin canꞌ ca lca na.
\v 15 Chaꞌ cuꞌni lyiꞌun um cusya ꞌin taꞌa ndiya quiꞌan tiꞌ um siꞌya chaꞌ nchcu, a ntsuꞌhui chaꞌ tsuꞌhue ꞌin um loꞌo xacanꞌ. Canꞌ chaꞌ a taa um yaꞌ quinanꞌ sca nu cuaꞌ ngujui Cristo tñan loo siꞌya chaꞌ nchcu.
\v 16 A tsatoꞌo xiychaꞌ canꞌ chaꞌ tsuꞌhue nu nguiꞌni um,
\v 17 siꞌyana tsañaꞌan nu ndlo Ndiose tñan ꞌin na, a ljyaan na loo chaꞌ nchcu uta loo chaꞌ ndyiꞌyo, cuiꞌ ca nu ljyaan na loo Espíritu nu Luhui ꞌin ñi, ndaa yaaꞌ ñi ꞌin na cuꞌni na tñan tsuꞌhue, cuꞌni ñi chaꞌ tyiꞌin tsuꞌhue na loꞌ ca tsuꞌhue chuꞌhui tiquee na.
\v 18 Tsalca nu nchca jaꞌan ꞌin Cristo loꞌo chaꞌ re, tsuꞌhue ntsuꞌhui tiquee Ndiose loꞌo canꞌ, a cunta loꞌo nten ndyuꞌhui cuiyaꞌ tiꞌ neꞌ ꞌin.
\v 19 Canꞌ chaꞌ tsa quiñan na loꞌ cunan na ñaꞌan nu tyiꞌin tsuꞌhue na, ta yaaꞌ taꞌa na siꞌyana tsatlyu culo na.
\v 20 A nchca chaꞌ cujlyo um tñan ꞌin Ndiose siꞌya chaꞌ nchcu. Chaꞌ ñi siꞌyana nchgaa loo na luhui, una a tsuꞌhue xityu na ꞌin xca tucui loo quiꞌya siꞌya chaꞌ nchcu.
\v 21 Una tsuꞌhue chaꞌ a cu um cunanꞌ loꞌ a coꞌo um vino, ñi a cuꞌni um scasca chaꞌ nu xityu ꞌin taꞌa ndiya quiꞌan tiꞌ um loo quiꞌya, uta ca tiꞌi ꞌin canꞌ, ta cuꞌni naꞌan tiꞌ.
\v 22 ¿Ta ñan tiꞌ um siꞌyana cuiꞌ ñaꞌan nguiꞌni um? Una cunta ꞌin um loꞌo Ndiose lca chaꞌ canꞌ. Una tsuꞌhue ca xuꞌhue sca nten nu a ndlo quiꞌya chaꞌ tiyaa ꞌin loꞌo ñaꞌan nu nguiꞌni.
\v 23 Nu nguiꞌni tucua tiꞌ loꞌo chaꞌ nchcu, nsoꞌ tucua canꞌ quiꞌya chonꞌ, siꞌyana nchcu canꞌ loꞌo chaꞌ tucua tiꞌ, loꞌ nchgaa chaꞌ nu cuꞌni na loꞌo chaꞌ tucua tiꞌ, ticuiꞌ quiꞌya lca na. 
\c 15
\p
\v 1 Canꞌ chaꞌ naa nu tla ndon chuꞌhui chaꞌ tlyu tiꞌ ꞌin na siꞌya scasca chaꞌ nguiꞌni nu naꞌan ndiꞌin chaꞌ ꞌin, loꞌ siꞌi nu suꞌhua loo na ꞌin na ticuiiꞌ na.
\v 2 Cuiꞌ ca nu cunda scaa na suꞌhua loo na ꞌin taꞌa na, ñaꞌan ca siꞌyana culo canꞌ loꞌo chaꞌ nu ndiya quiꞌan tiꞌ.
\v 3 Ñi Cristo loꞌ a mꞌni ñi chaꞌ nu ncua tiꞌ ñi, cuiꞌ ca nu yatoꞌo ñaꞌan nchcuiꞌ quityi ꞌin Ndiose: Nchgaa chaꞌ tiꞌi nu ycuiꞌ neꞌ loꞌo um, nguioꞌ tucua na chonꞌ nanꞌ.
\v 4 Canꞌ chaꞌ nchgaa chaꞌ nu nguinu scua loo quityi ꞌin Ndiose, chaꞌ nu cuꞌni chaꞌan na lca na, loꞌ nda yaaꞌ quityi canꞌ ꞌin na, ndaa na chaꞌ tnu tiquee nu tyijyin na scasca chaꞌ, ñaꞌan ca siꞌyana chcua quiloo na chaꞌ tsuꞌhue nu taa Ndiose.
\v 5 Cuiꞌ Ndiose, ñi nu nda yaaꞌ ꞌin na loꞌo chaꞌ nu ndyijyin na, loꞌ ndaa ñi chaꞌ tnu tiquee ꞌin na, cuꞌni ñi chaꞌ siꞌyana ca sca chaꞌ ti ꞌin um nchgaa um tsañaꞌan nu nchca tiꞌ Cristo Jesús,
\v 6 ñaꞌan ca siꞌyana tsatlyu cula loꞌo um loꞌ cuꞌni tnu um ꞌin Ndiose, Sti Ñi Xꞌnan na Jesucristo.
\s Quine ꞌin neꞌ gentil chaꞌ tsuꞌhue ꞌin Ndiose
\p
\v 7 Canꞌ chaꞌ scasca um cuan xuꞌhue um ꞌin taꞌa um tsañaꞌan nu ncuan xuꞌhue Cristo ꞌin na, canꞌ chaꞌ nu ndyuꞌhui cuiyaꞌ tiꞌ Ndiose.
\v 8 Chaꞌ nu nchca tinꞌ chcuinꞌ, Cristo Jesús yaan ñi siꞌyana tucua tloo neꞌ judio ꞌin ñi, ngulyo scua la ñi siꞌyana ñi ndiꞌin chaꞌ ꞌin Ndiose nu cuꞌni ñi chaꞌ tsatoꞌo nchgaa chaꞌ nu cuaꞌ mdiꞌin tyaa ñi loꞌo nten cula ꞌin na,
\v 9 ñaꞌan ca siꞌyana nchgaa ta nten caja ñaꞌan cuꞌni tnu ꞌin Ndiose siꞌya chaꞌ tsuꞌhue ꞌin ñi, tsañaꞌan nchcuiꞌ quityi ꞌin Ndiose: —Siꞌya chaꞌ re cuꞌnin tnun ꞌin um lja neꞌ gentil, loꞌ cula loꞌon ꞌin um—.
\v 10 Ndeñaꞌan nchcuiꞌ quityi canꞌ xca seꞌen: —Ca tsuꞌhue chuꞌhui tiquee um, ꞌun neꞌ gentil, tsatlyu loꞌo quichen ꞌin ñi—.
\v 11 Loꞌ xca seꞌen nchcuiꞌ na: ¡—ꞌUn neꞌ gentil cuꞌni tnu um ꞌin Ñi Xꞌnan na! ¡Sca chcui chendyu scuen cuaan ꞌin ñi—!
\v 12 Nde chaꞌ nu ycuiꞌ Isaía: —Xcuaꞌ nu lca Isaí tyiꞌo sca nu culo tñan ꞌin neꞌ gentil, loꞌ nchgaa neꞌ gentil tucua tloo ꞌin ñi—.
\v 13 Loꞌ Ndiose, ñi nu nducua tloo na, cuꞌni ñi chaꞌ nde lyee la ca tsuꞌhue chuꞌhui tiquee um, loꞌ xitñanꞌ cusya ꞌin um siꞌya chaꞌ nu ndiya quiꞌan tiꞌ um, ñaꞌan ca siꞌyana scañaꞌan ti chcua quiloo um ꞌin ñi siꞌya chaꞌ cuiyaꞌ ꞌin Espíritu nu Luhui ꞌin ñi.
\v 14 Una tsañaꞌan nguiaa chaꞌ ꞌin um, ꞌun jun taꞌa na, a nguiꞌni tucua tinꞌ loꞌo um, siꞌyana mtsaꞌan yuꞌhui chaꞌ tsuꞌhue ꞌin um, a cunta loꞌo chaꞌ tiyaa, ticuiiꞌ um tca ta yaaꞌ taꞌa um loꞌo chaꞌ re.
\v 15 Nde chaꞌ nguaꞌan quityi re ꞌin um, ꞌun jun taꞌa na, loꞌ mꞌnin tnu tiqueen ycuinꞌ loꞌo um, loꞌ xuꞌhuan tiꞌ um nchgaa chaꞌ re siꞌya chaꞌ tsuꞌhue nu mdaa Ndiose ꞌñan,
\v 16 siꞌyana cuꞌnin tñan ꞌin Jesucristo lja neꞌ gentil, loꞌ chcuinꞌ chaꞌ tsuꞌhue ꞌin Ndiose loꞌo neꞌ, ñaꞌan ca siꞌyana loꞌo neꞌ gentil ca neꞌ sca lcuan nu ndyuꞌhui cuiyaꞌ tiꞌ Ndiose, nu cuaꞌ msuhui Espíritu nu Luhui ꞌin ñi.
\v 17 Canꞌ chaꞌ siꞌya Cristo Jesús, tca scuen cuaan ꞌñan siꞌya tñan ꞌin Ndiose nguiꞌnin.
\v 18 Siꞌyana a xtyi tinꞌ chcuinꞌ chaꞌ ꞌñan, chaꞌ siꞌi Cristo mꞌni ñi chaꞌ canꞌ, ñaꞌan nchca jaꞌan neꞌ ꞌin Ndiose siꞌya chaꞌ nu ycuinꞌ uta loꞌo tñan nu mꞌnin,
\v 19 loꞌ mdaa ñi chaꞌ cuiyaꞌ cuꞌnin scasca chaꞌ nu tnu siꞌya chaꞌ cuiyaꞌ ꞌin Espíritu ꞌin Ndiose, canꞌ chaꞌ tiꞌ la seꞌen lca Jerusalén tsayaꞌ ndiyaa seꞌen lyiꞌya loo Ilírico, nchgaa seꞌen canꞌ msne suꞌhuan chaꞌ tsuꞌhue ꞌin Cristo.
\v 20 Cuañaꞌan yatoꞌo msuꞌhuan juesa ycuinꞌ chaꞌ tsuꞌhue ꞌin Ndiose, una siꞌi quichen nu cuaꞌ ncuan xuꞌhue chaꞌ ꞌin Cristo, a ncua tinꞌ tyiꞌin tyaan suun chaꞌ canꞌ chonꞌ tñan nu cuaꞌ mꞌni xca tucui,
\v 21 cuiꞌ ca nu tsatoꞌo ñaꞌan nchcuiꞌ quityi ꞌin Ndiose: —Nten nu a nchca caja nu chcuiꞌ chaꞌ ꞌin ñi loꞌo, chcua quiloo canꞌ ꞌin ñi. Nten nu a nchca quine ꞌin, canꞌ nu tsa quiꞌan tiꞌ ꞌin ñi—.
\s Ntsuꞌhui tiquee yu Pablo tsaa yu quichen Roma
\p
\v 22 Tyun yaꞌ ncua tinꞌ tsaꞌan seꞌen ndiꞌin um, una siꞌya tñan re a jui ñaꞌan tsaꞌan.
\v 23 Una cuaꞌ ñii cuaꞌ mtsaꞌan yuꞌhui luhuaꞌ nde re loꞌo chaꞌ ꞌin Ndiose, a cunta cuaꞌ tyun yjan ñan tinꞌ tsaꞌan seꞌen ndiꞌin um,
\v 24 canꞌ chaꞌ xa tsaꞌan seꞌen lca España tijin seꞌen ndiꞌin um, siꞌyana nducua tloon ñaꞌan taꞌa na loꞌo um, loꞌ xa nu cuaꞌ mdiꞌin chinꞌ na loꞌo um, nducua tloon ta yaaꞌ um ꞌñan loꞌo tucueen nu tiꞌ tsaꞌan lan.
\v 25 Una culo nducua la tsaꞌan Jerusalén siꞌyana taan chaꞌ tnu tiquee ꞌin jun.
\v 26 Siꞌyana jun nu ndiꞌin seꞌen lyiꞌya loo Macedonia loꞌo Acaya, mꞌni jun chaꞌ tsuꞌhue mxoꞌ jun sca lcuan nu ta yaaꞌ ꞌin jun taꞌa na ndiꞌin Jerusalén, cuiꞌ jun nu ꞌni chaꞌ ꞌin.
\v 27 Mꞌni jun chaꞌ re siꞌya chaꞌ tsuꞌhue mdoꞌo tiquee jun, loꞌ chaꞌ ñi siꞌyana quiꞌni caꞌan ꞌin jun loꞌo chaꞌ re, siꞌyana chaꞌ ncuan xuꞌhue jun chaꞌ tsuꞌhue ꞌin Ndiose siꞌya neꞌ judio, nguiꞌni caꞌan ꞌin jun ta yaaꞌ jun ꞌin canꞌ loꞌo chaꞌ nu ꞌni ꞌin.
\v 28 Canꞌ chaꞌ xa cuaꞌ msuꞌhua tan nchgaa chaꞌ re, loꞌ tyaan cunta lcuan canꞌ ꞌin jun, xacanꞌ tsaꞌan seꞌen lca España, cuiꞌ ñaꞌan tijin seꞌen ndiꞌin um.
\v 29 Jlyo tinꞌ siꞌyana xa tyiꞌan seꞌen ndiꞌin um, chaꞌan yuꞌhui cusya ꞌñan loꞌo nchgaa loo chaꞌ tsuꞌhue ꞌin Cristo.
\v 30 Jñan sca chaꞌ tsuꞌhue ꞌin um, ꞌun jun taꞌa na, siꞌyana jñan um ꞌin Ndiose siꞌya chaꞌ ꞌñan, loꞌo chaꞌ cuiyaꞌ ꞌin Ñi Xꞌnan na Jesucristo siꞌya chaꞌ tsuꞌhue nu ndaa Espíritu ꞌin na,
\v 31 siꞌyana culo laa ñi ꞌñan tuyaaꞌ neꞌ nducunꞌ ndiꞌin seꞌen lca Judea, a cunta siꞌyana jun taꞌa na ndiꞌin Jerusalén tsuꞌhue chuꞌhui tiquee jun cuan xuꞌhue jun lcuan re,
\v 32 a cunta siꞌyana tsuꞌhue chuꞌhui tiqueen tyiꞌan seꞌen ndiꞌin um loꞌo chaꞌ cuiyaꞌ ꞌin Ndiose, loꞌ caja chaꞌ tnu tiquee ꞌin na loꞌo um xacanꞌ.
\v 33 Loꞌ Ndiose, ñi nu nꞌni chaꞌ ndyiꞌin tsuꞌhue na, tyiꞌin ñi loꞌo um nchgaa um. Amen.
\c 16
\s Mslaꞌ taꞌa yu Pablo loꞌo jun Roma 
\p
\v 1 A cunta chcuinꞌ loꞌo um chaꞌ ꞌin ñi cunaꞌan taꞌa na Febe, ñi nu nda yaaꞌ ꞌin jun loꞌo tñan ꞌin Ndiose seꞌen ndiyoꞌ tiꞌin jun quichen Cencrea,
\v 2 siꞌyana cuan xuꞌhue um ꞌin ñi loꞌo chaꞌ cuiyaꞌ ꞌin Ñi Xꞌnan na, tsañaꞌan ntsuꞌhui chaꞌ cuꞌni na loꞌo taꞌa ndiya quiꞌan tiꞌ na. Ta yaaꞌ um ꞌin ñi loꞌo nchgaa chaꞌ nu ꞌni ꞌin ñi, siꞌyana quiꞌan ꞌa nu cuaꞌ mda yaaꞌ ñi ꞌin, cuiꞌ cuañaꞌan mda yaaꞌ ñi ꞌñan.
\v 3 Chcuiꞌ chaꞌ um ꞌin Priscila loꞌo Aquila tñan loon, cuiꞌ nu taꞌa nguiꞌnin tñan ꞌin Cristo Jesús,
\v 4 jun nu hasta loꞌo ncua chaꞌ caja siꞌyan, nu siꞌi scan tin ndyaan xuꞌhue ꞌin Ndiose siꞌya jun, cuiꞌ ca nu loꞌo nchgaa quichen seꞌen ndiyoꞌ tiꞌin jun taꞌa na neꞌ gentil.
\v 5 Chcuiꞌ chaꞌ um ꞌin nchgaa jun nu ndiyoꞌ tiꞌin la naꞌan ꞌin Priscila loꞌo Aquila. Chcuiꞌ chaꞌ um ꞌin yu Epeneto, yu nu ndyuꞌhui cuiyaꞌ tinꞌ ꞌin, yu nu culo nducua la ya quiꞌan tiꞌ ꞌin Cristo seꞌen lyiꞌya loo Acaya.
\v 6 Cuiꞌ cuañaꞌan chcuiꞌ chaꞌ um ꞌin María nu lyee ꞌa cuaꞌ mda yaaꞌ ꞌin um loꞌo tñan re.
\v 7 Chcuiꞌ chaꞌ um ꞌin Adronico loꞌo Junias, cuiꞌ yu nu tiꞌ nchca taꞌa hua loꞌ taꞌa yuꞌhui hua naꞌan chcuan, yu nu lyee ndyuꞌhui cuiyaꞌ tiꞌ yu taꞌa mdaꞌan Jesús ꞌin, loꞌ culo nducua la ya quiꞌan tiꞌ ꞌin Cristo que ꞌñan.
\v 8 Chcuiꞌ chaꞌ um ꞌin yu Amplias, yu nu lyee ndyuꞌhui cuiyaꞌ tinꞌ ꞌin siꞌya Ñi Xꞌnan na.
\v 9 Chcuiꞌ chaꞌ um ꞌin yu Urbano, yu nu taꞌa nguiꞌni na tñan ꞌin Cristo Jesús, loꞌo yu Estaquis, yu nu ndyuꞌhui cuiyaꞌ tinꞌ ꞌin.
\v 10 Cuiꞌ cuañaꞌan chcuiꞌ chaꞌ um ꞌin yu Apeles, yu nu cuaꞌ nguloꞌo xñan ꞌin loꞌo tsoꞌ ꞌin Cristo, loꞌ chcuiꞌ chaꞌ um ꞌin yu Aristóbulo loꞌo nchgaa nu ndiꞌin naꞌan ꞌin yu.
\v 11 Chcuiꞌ chaꞌ um ꞌin yu Herodión, yu nu tiꞌ nchca taꞌan. Chcuiꞌ chaꞌ um ꞌin yu Narciso loꞌo nchgaa nu ndiꞌin naꞌan ꞌin yu, jun nu ndiya quiꞌan tiꞌ ꞌin Ñi Xꞌnan na.
\v 12 Cuiꞌ cuañaꞌan chcuiꞌ chaꞌ um ꞌin chcua jun cunaꞌan taꞌa na Trifena loꞌo Trifosa, jun nu nguiꞌni tñan ꞌin Ñi Xꞌnan na. Chcuiꞌ chaꞌ um ꞌin ñi cunaꞌan taꞌa na Persida, ñi nu ndyuꞌhui cuiyaꞌ tiꞌ na ꞌin, loꞌ lyee ꞌa msuꞌhua loo ñi tñan ꞌin Ñi Xꞌnan na.
\v 13 Chcuiꞌ chaꞌ um ꞌin yu Rufo, yu nu cuaꞌ mdoꞌo hui ꞌin Ñi Xꞌnan na, loꞌo jyiꞌan yu, ñi nu nꞌnin cunta siꞌyana lca ñi jyiꞌan.
\v 14 Chcuiꞌ chaꞌ um ꞌin yu Asíncrito, loꞌo yu Flegonte, yu Hermas, yu Patrobas, loꞌo yu Hermes loꞌo nchgaa jun taꞌa na nu ndiyoꞌ tiꞌin loꞌo yu.
\v 15 A cunta chcuiꞌ chaꞌ um ꞌin yu Filólogo, loꞌo ñi Julia, loꞌo yu Nereo tsatlyu loꞌo nu cunaꞌan taꞌa yu, loꞌo yu Olimpas loꞌo nchgaa jun taꞌa na nu ndiyoꞌ tiꞌin loꞌo jun.
\v 16 Loꞌo suun ñaꞌan chcuiꞌ chaꞌ taꞌa um la siiꞌ scaꞌ um. Nchgaa laa nu ndiꞌin loꞌo cunta ꞌin Cristo nde re nchcuiꞌ chaꞌ ꞌin um.
\v 17 Jñan sca chaꞌ tsuꞌhue ꞌin um, ꞌun jun taꞌa na, siꞌyana xñi um cunta ꞌin um loꞌo nu nsuꞌhue tiꞌin ꞌin jun taꞌa na, uta nxitsaꞌan chaꞌ nu cuaꞌ mꞌni chaꞌan um. Tyiꞌo tsoꞌ um siiꞌ canꞌ.
\v 18 Siꞌyana nten nu nguiꞌni cuañaꞌan a jaꞌan canꞌ ꞌin Ñi Xꞌnan na Jesucristo, cuiꞌ ca nu nꞌni cunta canꞌ chaꞌ nu ndyiꞌo tiquee, cuti chaꞌ nchcuiꞌ canꞌ, loꞌ ndaa canꞌ loo jun nu cui ti seꞌen nu cuñilyiꞌo ꞌin jun.
\v 19 Siꞌyana cuaꞌ mscua cueen chaꞌ ꞌin um tsañaꞌan nchca jaꞌan um ꞌin Ndiose, canꞌ chaꞌ tsuꞌhue ntsuꞌhui tiqueen loꞌo um. Una nchca tinꞌ siꞌyana nde lyee la suꞌhua loo um chaꞌ nu tsuꞌhue, loꞌ chcua tijyoꞌ um siiꞌ chaꞌ ngunanꞌ.
\v 20 Loꞌ Ndiose, ñi nu nꞌni chaꞌ ndyiꞌin tsuꞌhue na, nu ndla ti re cuꞌni ñi chaꞌ quinu sti Laxaꞌan nde tuquiyaꞌ um. Cuiꞌ chaꞌ tsuꞌhue ꞌin Ñi Xꞌnan na Jesucristo quinu loꞌo um.
\v 21 Yu Timoteo, yu taꞌa nguiꞌnin tñan, nchcuiꞌ chaꞌ yu ꞌin um, cuiꞌ cuañaꞌan yu Lucio, loꞌo Jasón, loꞌo yu Sosípater nchcuiꞌ chaꞌ yu ꞌin um, cuiꞌ yu nu tiꞌ nchca taꞌa hua.
\v 22 Nanꞌ yu Tercio nchcuiꞌ chanꞌ ꞌin um loꞌo chaꞌ cuiyaꞌ ꞌin Ñi Xꞌnan na, nanꞌ nguaꞌan quityi re loꞌo cunta ꞌin Pablo.
\v 23 A cunta nchcuiꞌ chaꞌ yu Gayo ꞌin um, yu nu mdaa seꞌen ndiꞌin, a cunta mdaa yu seꞌen ndiyoꞌ tiꞌin jun taꞌa na. Loꞌo yu Erasto nchcuiꞌ chaꞌ yu ꞌin um, yu nu lyiꞌya cunta tñi ꞌin nten quichen re, loꞌo yu taꞌa na Cuarto nchcuiꞌ chaꞌ yu ꞌin um.
\v 24 Chaꞌ tsuꞌhue ꞌin Ñi Xꞌnan na Jesucristo quinu loꞌo um nchgaa um. Amen.
\s Cuꞌni tnu na ꞌin Ndiose
\p
\v 25 Scati Ndiose tca tyiꞌin tya tla ñi ꞌin um siꞌya chaꞌ tsuꞌhue ꞌin Jesucristo nu ndaꞌan ycuinꞌ, cuaꞌ ngulyo scua la ñi chaꞌ re, cuiꞌ chaꞌ nu ntsuꞌhui nchcun ꞌin ñi tiꞌ cuaꞌ sꞌni,
\v 26 una cuaꞌ ñii ncua chcanꞌ loo na, loꞌ siꞌya quityi nu nguaꞌan scua yu nu mxiycuiꞌ Ndiose ꞌin cuaꞌ sꞌni, mdyiꞌo scua la chaꞌ re loꞌo nchgaa nten, ñaꞌan ca siꞌyana tsa quiꞌan tiꞌ neꞌ loꞌ ca jaꞌan neꞌ ꞌin ñi, tsañaꞌan nu ndlo Ndiose tñan, cuiꞌ ñi nu ndiꞌin tsala xaa.
\v 27 ꞌIn scati Ndiose, ñi nu tiyaa la, cuꞌni tnu na tsala xaa siꞌya Jesucristo. Amen.