\id 1CO - Nopala (Chatino) NT [cya] - Mexico 2013 (web 2014)
\h 1 CORINTIOS
\toc1 1 Corintios
\toc2 1 Corintios
\toc3 1Co
\mt1 1 Corintios
\c 1
\s Yu Pablo nchcuiꞌ chaꞌ yu ꞌin jun Corinto
\p
\v 1 Nanꞌ yu Pablo, siꞌya chaꞌ cuiyaꞌ ꞌin Ndiose nguaꞌan tñan ñi ꞌñan tsa ycuinꞌ chaꞌ tsuꞌhue ꞌin Jesucristo. Tsatlyu loꞌo yu taꞌa na Sóstenes caꞌan tñan hua sca quityi re ꞌin um,
\v 2 ꞌun jun taꞌa na nu ndiꞌin cunta ꞌin Ndiose quichen Corinto, ꞌun nu cuaꞌ mdoꞌo hui ꞌin Cristo Jesús siꞌyana ca um sca nu luhui ꞌin ñi tsatlyu loꞌo nchgaa la ñaꞌan jun nu ndiꞌin scasca seꞌen nꞌni tnu ꞌin Ñi Xꞌnan na Jesucristo, ñi nu tsatlyu lca Xꞌnan na loꞌo jun.
\v 3 Stina Ndiose loꞌo Ñi Xꞌnan na Jesucristo taa ñi chaꞌ tsuꞌhue chuꞌhui niꞌ cusya ꞌin um, loꞌ cuꞌni ñi chaꞌ tyiꞌin tsuꞌhue um.
\s Yu Pablo mdyaa yu xuꞌhue ꞌin Ndiose
\p
\v 4 Ndyaan xuꞌhue ꞌin Ndiose nchgaa xaa siꞌya chaꞌ ꞌin um, siꞌya chaꞌ tsuꞌhue nu cuaꞌ mdaa ñi ꞌin um siꞌya Cristo Jesús,
\v 5 loꞌ siꞌya ñi mtsaꞌan yuꞌhui um loꞌo nchgaa loo chaꞌ, cuiꞌ chaꞌ nu nchcuiꞌ um loꞌo chaꞌ tiyaa nu ndaꞌan loꞌo um,
\v 6 tsañaꞌan nguiaa chaꞌ tsuꞌhue ꞌin Cristo nu cuaꞌ nguinu scua tla niꞌ cusya ꞌin um,
\v 7 canꞌ chaꞌ ñi sca loo chaꞌ cuiyaꞌ nu ndaa Ndiose ꞌin sñeꞌ ñi, a ndiya lyijyi na ꞌin um, tsalja nta um ꞌin Ñi Xꞌnan na Jesucristo tsaan nu quiaan ñi xiyaꞌ.
\v 8 Ndiose cuꞌni ñi chaꞌ ca ñi chaꞌ ꞌin um tsayaꞌ tsatii chaꞌ nu nchca loo chendyu re, ñaꞌan ca siꞌyana luhui tloo um tsaan nu cuꞌni Ñi Xꞌnan na Jesucristo xñan bsya ꞌin nten.
\v 9 Ñi ndiꞌin chaꞌ ꞌin Ndiose, ñi nu msiꞌya ꞌin um siꞌyana ca sca chaꞌ ti ꞌin um loꞌo Ñi Xꞌnan na Jesucristo nu lca Sñeꞌ ñi.
\s Cristo a mdoꞌo ñi tucua snan ta
\p
\v 10 Jñan sca chaꞌ tsuꞌhue ꞌin um, ꞌun jun taꞌa na, loꞌo chaꞌ cuiyaꞌ ꞌin Ñi Xꞌnan na Jesucristo, siꞌyana sca loo ti chaꞌ chcuiꞌ um nchgaa um, a nchca chaꞌ suꞌhue tiꞌin taꞌa um, cuiꞌ ca nu tyiꞌin um sca chaꞌ ti ꞌin um, cuiꞌ cuañaꞌan loꞌo chaꞌ tiyaa ꞌin um, loꞌ sca loo ti chaꞌ chuꞌhui tiquee um.
\v 11 ꞌUn jun taꞌa na, cuaꞌ ynan chaꞌ ñaꞌan ndiꞌin um, siꞌyana tucua snan nten ꞌin yu Cloé ndaa neꞌ suun siꞌyana a ndiꞌin ꞌa um sca chaꞌ ti ꞌin um.
\v 12 Siꞌyana cunda scaa um nchcuiꞌ um: Nanꞌ nguiꞌan tsoꞌ ꞌin yu Pablo. Xca nu nchcuiꞌ: Nanꞌ nguiꞌan tsoꞌ ꞌin yu Apolo. Nanꞌ nguiꞌan tsoꞌ ꞌin yu Tyo. A cunta xca nu nchcuiꞌ: Nanꞌ nguiꞌan tsoꞌ ꞌin Cristo.
\v 13 Xacanꞌ jan ñi: ¿Ta loꞌo Cristo mdoꞌo ñi tucua snan ta? ¿Ta yu Pablo nguaꞌan yu loo cusi tñan loo um? ¿Uta na mducua tya um loꞌo chaꞌ cuiyaꞌ ꞌin Pablo?
\v 14 Nanꞌ ndyaan xuꞌhue ꞌin Ndiose siꞌyana ñi sca um loꞌ a mducua tyan ꞌin um, tsaloo ti ꞌin yu Crispo loꞌo yu Gayo,
\v 15 siꞌyana a nchca tinꞌ caja nu chcuiꞌ siꞌyana mducua tya loꞌo chaꞌ cuiyaꞌ ꞌñan.
\v 16 A cunta mducua tyan ꞌin yu Estéfanas loꞌo nchgaa nu ndiꞌin naꞌan ꞌin yu, una nchgaa la tucui a ntsuꞌhui tinꞌ chaꞌ loꞌo canꞌ mducua tyan ꞌin.
\v 17 Cristo a nguaꞌan tñan ñi ꞌñan siꞌyana tucua tyan ꞌin nten, cuiꞌ ca nu siꞌyana chcuinꞌ chaꞌ tsuꞌhue ꞌin ñi, una siꞌi loꞌo chaꞌ tiyaa ꞌin nten chendyu, loꞌ tsatoꞌo quinu caꞌan chonꞌ chaꞌ nu ngujui Cristo loo cusi.
\s Cristo lca ñi chaꞌ cuiyaꞌ ꞌin Ndiose
\p
\v 18 Chaꞌ nu nchcuiꞌ na siꞌyana Cristo ngujui ñi loo cusi, chaꞌ tinto lca na ꞌin nten nu ndaꞌan ngunanꞌ, una cunta ꞌin nareꞌ nu nducua tloo tyiꞌo laa, lca na chaꞌ cuiyaꞌ nu tlyu ꞌin Ndiose.
\v 19 Siꞌyana nchcuiꞌ quityi ꞌin Ndiose: —Siꞌyu conꞌ chaꞌ tiyaa ꞌin nten nu tiyaa la, loꞌ xcuan tloon chaꞌ tiyaa ꞌin nten nu ndyiꞌya la cunta—.
\v 20 Xacanꞌ jan ñi, ¿la ncua nu tiyaa la? ¿La ncua nu ndloꞌo chaꞌ ꞌin lee, uta nu tsuꞌhue ꞌa nchcuiꞌ chaꞌ nu nchca loo chendyu re? ¿Ta siꞌi chaꞌ tiyaa ꞌin nten chendyu mꞌni Ndiose siꞌyana lca na chaꞌ tinto?
\v 21 Ndiose loꞌo chaꞌ tiyaa ꞌin ñi, a mdaa ñi chaꞌ cuiyaꞌ chuꞌhui lyoo neꞌ ꞌin ñi loꞌo chaꞌ tiyaa nu ꞌin neꞌ, cuiꞌ ca nu ncua lca tiquee ñi culo laa ñi ꞌin nten loo nu tsa quiꞌan tiꞌ neꞌ chaꞌ ꞌin ñi nu ndaꞌan ycuiꞌ na, siyaꞌ lca na chaꞌ tinto ꞌin xca tucui.
\v 22 Siꞌyana neꞌ judio njñan neꞌ chacuiꞌ chaꞌ nu tnu, loꞌ neꞌ griego ndaꞌan nan neꞌ chaꞌ tiyaa ꞌin nten chendyu,
\v 23 una nareꞌ ndaꞌan ycuiꞌ na chaꞌ ꞌin Cristo ñaꞌan ngujui ñi loo cusi, loꞌ chaꞌ ñi siꞌyana neꞌ judio nxcuan tloo neꞌ chaꞌ re, loꞌ tsoꞌ nu ꞌin neꞌ gentil lca na chaꞌ tinto,
\v 24 una tsalca nu cuaꞌ msiꞌya Ndiose ꞌin, siyaꞌ lca neꞌ judio uta gentil, Cristo lca ñi chaꞌ cuiyaꞌ loꞌo chaꞌ tiyaa ꞌin Ndiose.
\v 25 Siyaꞌ nxqueꞌ tiꞌ nten siꞌyana chaꞌ tiyaa ꞌin Ndiose lca na chaꞌ tinto, una cuaan la nscua chaꞌ canꞌ que ñaꞌan chaꞌ tiyaa ꞌin neꞌ, cuiꞌ cuañaꞌan sca chaꞌ nu naꞌan tiꞌ ꞌin Ndiose, una tla la ndiꞌin chaꞌ canꞌ que ñaꞌan chaꞌ ꞌin nten chendyu.
\v 26 ꞌUn jun taꞌa na, xñi um cunta ñaꞌan nten nu msiꞌya Ndiose ꞌin, siꞌyana siꞌi nchgaa um lca um nten nu mꞌni chaꞌan, ñi a lca um nten nu ntsuꞌhui chaꞌ cuiyaꞌ ꞌin uta mdoꞌo um loo ta nten nu ndon loo,
\v 27 cuiꞌ ca nu Ndiose ngulohui ñi sca chaꞌ nu ñan tiꞌ nten lca na chaꞌ tinto, siꞌyana taa canꞌ chaꞌ jyiꞌo ꞌin nu tiyaa la, cuiꞌ cuañaꞌan ngulohui ñi sca chaꞌ nu joꞌo la ñaꞌan, siꞌyana taa canꞌ chaꞌ jyiꞌo ꞌin nu tla la ndiꞌin chaꞌ ꞌin,
\v 28 a cunta ngulohui ñi sca chaꞌ nu a ntsuꞌhui lyoo, cuiꞌ chaꞌ nu nxcuan tloo neꞌ, chaꞌ nu a sca cunta ntsuꞌhui, siꞌyana siꞌyu coꞌ ñi chaꞌ nu nchca loo chendyu re,
\v 29 ñaꞌan ca siꞌyana a caja nu cuꞌni siyeꞌ ꞌin tloo Ndiose.
\v 30 Siꞌya ñi jui chendyu ꞌin um loꞌo Cristo Jesús, ñi nu lca chaꞌ tiyaa ꞌin Ndiose, ñi nu mxnu luhui ꞌin na, ngulohui ñi ꞌin na sca cunta, loꞌ msiꞌi ñi ꞌin na loꞌo tne ñi,
\v 31 ñaꞌan ca siꞌyana tsatoꞌo chaꞌ nu nchcuiꞌ quityi ꞌin Ndiose: —Chaꞌ ntsuꞌhui nu nchca tiꞌ taa loo ticuiiꞌ, ꞌin Ñi Xꞌnan na taa canꞌ loo—.
\c 2
\s Nchcuiꞌ yu Pablo chaꞌ ꞌin Cristo nu ngujui loo cusi
\p
\v 1 ꞌUn jun taꞌa na, xa ycuinꞌ chaꞌ tsuꞌhue ꞌin Ndiose loꞌo um, a ycuinꞌ chaꞌ nu tucui uta loꞌo chaꞌ tiyaa nu cuaan lati,
\v 2 cuiꞌ ca nu mdiꞌin tyaan ꞌñan siꞌyana sca loo ti chaꞌ ꞌin Jesucristo chcuinꞌ loꞌo um, siꞌyana ngujui ñi loo cusi.
\v 3 Lyee ꞌa msuꞌhuan chaꞌ nduhue tiꞌ tiqueen xa mdiꞌin loꞌo um, ndaꞌan ytsen nu hasta mchcuan.
\v 4 Ñi a jui quiꞌan la chaꞌ nu chcuinꞌ loꞌo um ta siꞌyana cuhue tiꞌ um, cuiꞌ ca nu loꞌo chaꞌ cuiyaꞌ ꞌin Espíritu ncua chcanꞌ loo chaꞌ canꞌ,
\v 5 seꞌen nu a chcua suun chaꞌ nu tsa quiꞌan tiꞌ um chonꞌ chaꞌ tiyaa ꞌin nten chendyu, cuiꞌ ca nu loo chaꞌ cuiyaꞌ ꞌin Ndiose.
\s Chaꞌ nu ngulyo scua la Espíritu
\p
\v 6 Una nchcuiꞌ hua sca chaꞌ tiyaa nu cuaan lati loꞌo tsalca jun nu tla ndon tucueen ꞌin Ndiose, loꞌ a lca na chaꞌ tiyaa ꞌin nten chendyu, uta chaꞌ tiyaa ꞌin yu nu ndlo tñan, nu ntsuꞌhui chaꞌ jlyo tiyaa xaa,
\v 7 cuiꞌ ca nu nchcuiꞌ hua chaꞌ tiyaa nu ntsuꞌhui cutsiꞌ ꞌin Ndiose, chaꞌ tiyaa nu ntsuꞌhui nchcun ꞌin ñi, chaꞌ nu mdiꞌin tyaa Ndiose xa tiꞌ lyijyi tsaaꞌ chendyu siꞌyana quiꞌni caꞌan chaꞌ canꞌ ꞌin na.
\v 8 Ñi sca yu nu ndlo tñan loo chendyu re a nguꞌya yu cunta chaꞌ re, chaꞌ cua na nguꞌya yu cunta ꞌin na, loꞌ a jyiꞌin caꞌan yu ꞌin Ñi Xꞌnan na loo cusi, ñi nu mdoꞌo loo xaa ꞌin Ndiose.
\v 9 Una ndeñaꞌan nchcuiꞌ quityi ꞌin Ndiose: —Chaꞌ re lca na sca chaꞌ nu a nchca ñaꞌan tloo neꞌ, ñi a nchca quine ꞌin neꞌ, ñi a nchca tucui quiñan tiꞌ chaꞌ re, loꞌ Ndiose taa ñi ꞌin na ꞌin tsalca nu lyee lca tiquee loꞌo ñi—.
\v 10 Una Ndiose cuaꞌ ngulyo scua la ñi chaꞌ re loꞌo na siꞌya Espíritu ꞌin ñi, siꞌyana Espíritu ndiya nan quiꞌi nchgaa loo chaꞌ, hasta loꞌo chaꞌ tiyaa nu quiꞌñi lati ꞌin Ndiose ndlyo scua la ñi.
\v 11 Xacanꞌ jan ñi, ¿ta tca chuꞌhui lyoo na chaꞌ nu ntsuꞌhui niꞌ cusya ꞌin xca tucui? ¿Ta siꞌi ticuiiꞌ canꞌ jlyo tiꞌ chaꞌ nu ntsuꞌhui tiquee? Cuiꞌ cuañaꞌan Ndiose, scati Espíritu ꞌin ñi jlyo tiꞌ chaꞌ nu ntsuꞌhui tiquee ñi.
\v 12 Nareꞌ a ncuan xuꞌhue na espíritu nu mdoꞌo loo chendyu re, cuiꞌ ca nu ncuan xuꞌhue na Espíritu nu mdoꞌo tsoꞌ ꞌin Ndiose, siꞌyana ca cuiyaꞌ tiꞌ na chaꞌ tsuꞌhue nu cuaꞌ mdaa ñi ꞌin na,
\v 13 cuiꞌ chaꞌ re nchcuiꞌ na cuaꞌ ñii, una siꞌi loꞌo chaꞌ tiyaa nu ndloꞌo nten chendyu, cuiꞌ ca nu lca na chaꞌ nu ndloꞌo Espíritu ꞌin na, loꞌ cuañaꞌan nchcua taꞌa chaꞌ nu nchcuiꞌ na loꞌo chaꞌ nu ñi ꞌin Ndiose.
\v 14 Una sca nten nu a ndiya quiꞌan tiꞌ ꞌin Ndiose a nducuan xuꞌhue neꞌ chaꞌ tsuꞌhue nu ndaa Espíritu ꞌin ñi, siꞌyana lca na chaꞌ tinto ꞌin neꞌ, ñi a nchca quiꞌya neꞌ cunta chaꞌ canꞌ, siꞌyana tsaloo ti siꞌya Espíritu nchca cuiyaꞌ tiꞌ na chaꞌ canꞌ.
\v 15 Una sca nten nu ndiya quiꞌan tiꞌ ꞌin Ndiose nchca nꞌni cuiyaꞌ neꞌ nchgaa loo chaꞌ, una a loꞌo canꞌ ntsuꞌhui nu cuꞌni cuiyaꞌ chaꞌ ꞌin,
\v 16 —siꞌyana, ¿ti nu nguꞌya cunta chaꞌ tiyaa ꞌin Ñi Xꞌnan na? ¿Ti nu cuaꞌ mda cueen ꞌin ñi—? Una nareꞌ cuaꞌ ndaꞌan loꞌo na chaꞌ tiyaa ꞌin Cristo.
\c 3
\s Tsatlyu nguiꞌni na tñan ꞌin Ndiose 

\p
\v 1 Canꞌ chaꞌ ꞌun jun taꞌa na, a jui ñaꞌan chcuinꞌ loꞌo um tsañaꞌan nchcuiꞌ na loꞌo sca nu tla ndon tucueen ꞌin Ndiose, cuiꞌ ca nu tsañaꞌan nchcuiꞌ na loꞌo sca nu tiꞌ cuneꞌ chaꞌ tiyaa ꞌin loꞌo tsoꞌ ꞌin Cristo, tsañaꞌan nchca tiꞌ sca nu suhue ti.
\v 2 Mxicoꞌon ꞌin um loꞌo chacuiꞌ styiꞌ, loꞌ a mdaan na nu tla ꞌin um, siꞌyana a ncua quiꞌya um cunta chaꞌ re, cuiꞌ cuañaꞌan hasta cuaꞌ ñii,
\v 3 siꞌyana tiꞌ nducui nchaꞌan um chaꞌ nu nchca loo chendyu re, tiꞌ ndiꞌin loꞌo um chaꞌ jñan tiꞌ, chaꞌ cusuun, chaꞌ nu nxisuun taꞌa neꞌ, loꞌo chaꞌ nu nsuꞌhue taꞌa neꞌ. ¿Ta siꞌi chaꞌ tiyaa ꞌin nten chendyu ndaꞌan loꞌo um?
\v 4 Siꞌyana ntsuꞌhui nu nchcuiꞌ: Nanꞌ nguiꞌan tsoꞌ ꞌin yu Pablo, xca nu nchcuiꞌ: Nanꞌ nguiꞌan tsoꞌ ꞌin Apolo. ¿Ta xtyi tiꞌ cuneꞌ ꞌa chaꞌ tiyaa ꞌin um?
\v 5 ¿Tucui ta lca yu Pablo, loꞌ tucui lca Apolo? ¿Ta siꞌi nguso ꞌin Ndiose lca hua nu ycuiꞌ chaꞌ nu ya quiꞌan tiꞌ um, cuaꞌ ñaꞌaan tñan nu mdaa Ñi Xꞌnan na ꞌin hua cunda scaa hua?
\v 6 Nanꞌ ytan chaꞌ re, loꞌ yu Apolo msuꞌhua yu tyiꞌa ꞌin na, una Ndiose mꞌni ñi chaꞌ ylo na.
\v 7 Canꞌ chaꞌ a tucui lca nu ntya jyaan uta nu nchaꞌ ꞌin na, cuiꞌ ca nu scati Ndiose, ñi nu nꞌni chaꞌ ndlyo na lca ñi nu ndon loo.
\v 8 Siꞌyana scañaꞌan ti ndiꞌin chaꞌ ꞌin nu ntya ꞌin na loꞌo nu nchaꞌ ꞌin na, una cunda scaa canꞌ ntsuꞌhui chaꞌ xñi siyaꞌ cuaꞌ ñaꞌaan tñan mꞌni.
\v 9 Siꞌyana tsatlyu nguiꞌni hua tñan ꞌin Ndiose, loꞌ ꞌun lca um ñaꞌan nchca tiꞌ yuu seꞌen nguiꞌni ñi tñan, loꞌ lca um sca naꞌan nu ntñan ñi.
\v 10 Siꞌya chaꞌ tsuꞌhue ꞌin Ndiose nu cuaꞌ mdaa ñi ꞌñan, nanꞌ lcan ñaꞌan nchca tiꞌ yu cuityi naꞌan nu culoo, nu mdiꞌin tyaa suun naꞌan, loꞌ xca tucui ntñan tucua ꞌin na chonꞌ canꞌ, una cunda scaa na xñi na cunta ñaꞌan ntsuꞌhui chaꞌ tñan na ꞌin na.
\v 11 Siꞌyana a ndiꞌin xca suun naꞌan nu tca tyiꞌin tyaa na que ꞌin nu cuaꞌ ndiꞌin canꞌ, loꞌ suun canꞌ lca Jesucristo.
\v 12 Chaꞌ chonꞌ canꞌ tyisnan tñan tucua na naꞌan loꞌo oro, uta loꞌo plata, ta loꞌo quee tsuꞌhue ñaꞌan, uta loꞌo yca, ta loꞌo quií, uta loꞌo lcaꞌ ngutyi,
\v 13 loꞌ ca chcanꞌ loo tñan nu mꞌni na cunda scaa na, tsaan nu culyo scua la Ndiose chaꞌ canꞌ, una loꞌo quiiꞌ ca chcanꞌ loo na, cunda scaa tñan nu mꞌni na tyijyin na loo quiiꞌ, xacanꞌ ca chcanꞌ ñaꞌan chaꞌ ñi na loꞌo nguiaaꞌ na.
\v 14 Chaꞌ quinu ton tñan nu mꞌni na canꞌ, quiꞌni caꞌan ꞌin na loꞌo chaꞌ tsuꞌhue nu taa Ndiose.
\v 15 Chaꞌ ntsuꞌhui nu squin tñan nu mꞌni, a quiꞌni caꞌan ꞌin loꞌo chaꞌ tsuꞌhue canꞌ, una tiꞌ tyiꞌo laa siyaꞌ seen ti tyiꞌo canꞌ loo quiiꞌ.
\v 16 ¿Ta a jlyo tiꞌ um siꞌyana ꞌun lca um laa ꞌin Ndiose, loꞌ Espíritu ꞌin Ndiose ntsuꞌhui niꞌ cusya ꞌin um?
\v 17 Chaꞌ ndeꞌen nu cuꞌni tiꞌi loꞌo laa ꞌin Ndiose, cuañaꞌan cuꞌni Ndiose loꞌo canꞌ, siꞌyana laa ꞌin Ndiose luhui na, loꞌ cuiꞌ canꞌ lca um.
\v 18 A cuñilyiꞌo um ꞌin um ticuiiꞌ um, loꞌ chaꞌ ndeꞌen nu xqueꞌ tiꞌ tiyaa la ntsuꞌhui lja um, cuꞌni canꞌ ꞌin siꞌyana lca sca nu tinto, la xacanꞌ tca quiꞌya canꞌ chaꞌ tiyaa.
\v 19 Siꞌyana cunta ꞌin Ndiose, chaꞌ tiyaa nu nchca loo chendyu re lca na chaꞌ tinto, siꞌyana quityi ꞌin Ndiose nchcuiꞌ na: Nu nxqueꞌ tiꞌ tiyaa la, Ndiose ndyija lyoo ñi ꞌin canꞌ lca sca nu cuiñi.
\v 20 Nde xca chaꞌ nu nchcuiꞌ quityi canꞌ: Ñi Xꞌnan na jlyo tiꞌ ñi siꞌyana chaꞌ tiyaa ꞌin nten chendyu lca na chaꞌ nu cuityi,
\v 21 canꞌ chaꞌ a ntsuꞌhui chaꞌ chcua quiloo um ꞌin nten chendyu, siꞌyana nchgaa loo chaꞌ cuaꞌ ntsuꞌhui tuyaaꞌ um,
\v 22 siyaꞌ yu Pablo, uta yu Apolo, loꞌ ta yu Tyo, uta ñaꞌaan chendyu re, uta chendyu nu ndon loꞌo um, uta loꞌo chaꞌ ndyija, loꞌ ta chaꞌ nu nchca cuaꞌ ñii uta chaꞌ nu ca tiyaa xaa, nchgaa chaꞌ re cuaꞌ ntsuꞌhui tuyaaꞌ um,
\v 23 ꞌun cuaꞌ ndiꞌin um tsoꞌ ꞌin Cristo, loꞌ Cristo ndiꞌin ñi tsoꞌ ꞌin Ndiose.
\c 4
\s Tñan nguiꞌni nguso ꞌin Cristo 

\p
\v 1 Canꞌ chaꞌ xñi um cunta ꞌin hua tsañaꞌan nchca tiꞌ sca nu nguiꞌni tñan ꞌin Cristo, loꞌ mxnu ñi tñan re ꞌin hua siꞌyana chcuiꞌ hua loꞌo nten chaꞌ nu ntsuꞌhui cutsiꞌ ꞌin Ndiose.
\v 2 Nu nchcuan cunta tñan ꞌin xꞌnan, ꞌni chaꞌ ca canꞌ sca nu ñi ndiꞌin chaꞌ ꞌin.
\v 3 Nanꞌ a nduhue tinꞌ chaꞌ ꞌun uta bsya cuꞌni cuiyaꞌ chaꞌ ꞌñan, loꞌ ñi a ntsuꞌhui chaꞌ cuꞌni cuiyanꞌ chaꞌ ꞌñan ticuiinꞌ.
\v 4 Siyaꞌ a sca chaꞌ nducui nchaꞌan ꞌñan, una siꞌi canꞌ chaꞌ cuaꞌ luhui tloon, siꞌyana cuiꞌ Ñi Xꞌnan na lca nu nguiꞌni cuiyaꞌ chaꞌ ꞌñan.
\v 5 Canꞌ chaꞌ a ntsuꞌhui chaꞌ cuꞌni cuiyaꞌ um sca chaꞌ culo nducua la, cuiꞌ ca nu quita um la xa quiaan Ñi Xꞌnan na, siꞌyana cuiꞌ ñi culyo scua la ñi chaꞌ nu ntsuꞌhui cutsiꞌ seꞌen tla yta, a cunta ca chcanꞌ loo chaꞌ nu ntsuꞌhui niꞌ cusya ꞌin nten, la xacanꞌ taa Ndiose loo na cunda scaa na.
\v 6 ꞌUn jun taꞌa na, nchgaa chaꞌ re nchcuinꞌ loꞌo um siꞌyana cuꞌni na tsuꞌhue ꞌin um, xñi um cunta ñaꞌan nguiaa chaꞌ ꞌin hua loꞌo yu Apolo, cuꞌni chaꞌan um ꞌin hua loꞌ a tyijyin lyoo um chaꞌ nu cuaꞌ nducua loo quityi ꞌin Ndiose, ñaꞌan tuꞌ tsatoꞌo cuꞌni siyeꞌ um loꞌ ca tiꞌi ꞌin um scasca um.
\v 7 Xacanꞌ jan ñi, ¿ti nu tca chcuiꞌ siꞌyana cuaan la ndiꞌin chaꞌ ꞌin? ¿Ta siꞌi Ndiose lca nu mdaa nchgaa na nu ndiꞌin ꞌin um? Loꞌ chaꞌ jui nu mdaa ꞌin na ꞌin um, ¿ñi chaꞌ nguiꞌni siyeꞌ um, loꞌ siꞌi loꞌo cunta ꞌin um jui na?
\v 8 Xqueꞌ tiꞌ um cuaꞌ mdaꞌa jui na ꞌin um, cuaꞌ ncua cuilyiyaꞌ um, cuaꞌ ndlo um tñan chaꞌ ꞌin ti um, ¡una tsuꞌhue ca chaꞌ cua na cuaꞌ ndlo ca um tñan siꞌyana loꞌo huareꞌ culo hua tñan tsatlyu loꞌo um!
\v 9 Ñan tinꞌ siꞌyana tsalca hua nu ndaꞌan ycuiꞌ hua chaꞌ tsuꞌhue ꞌin Ndiose, la chonꞌ mdyi mdiꞌin tyaa ñi ꞌin hua, loꞌ nguiaa chaꞌ ꞌin hua tsañaꞌan nchca tiꞌ sca nu mdoꞌo quiꞌya ꞌin loo chaꞌ ndyija, hasta angujle loꞌ nanꞌ ꞌya ꞌin hua tsatlyu loꞌo nchgaa nten chendyu.
\v 10 Huareꞌ lca hua sca nu tinto siꞌya Cristo, una cunta nu ꞌin um tiyaa la um siꞌya Cristo, huareꞌ lca hua nu naꞌan tiꞌ, una ꞌun tla ndiꞌin chaꞌ ꞌin um, loꞌ ndyijyi nu nducuan xuꞌhue ꞌin um, una huareꞌ nde nxcuan tloo neꞌ ꞌin hua.
\v 11 Hasta cuaꞌ ñii loꞌ ndijin yteꞌ tiꞌ hua, ndijin ytyi tiꞌ hua, a cunta ndiya lyijyi steꞌ hua, cuaꞌ ñaꞌan ti nꞌni lyiꞌo neꞌ ꞌin hua, loꞌ ñi a nducua naꞌan ꞌin hua.
\v 12 A cunta ndyujui tñanꞌ hua ꞌin hua siꞌya na nu cunajoꞌo ꞌin hua, ndaja neꞌ ꞌin hua, una huareꞌ nde njñan hua ꞌin Ndiose siꞌya neꞌ, nxitijin neꞌ ꞌin hua nu tiꞌi loꞌ nda loo hua,
\v 13 nchcuiꞌ caꞌan neꞌ ꞌin hua, una huareꞌ nxcuen hua ꞌin neꞌ loꞌo chaꞌ tsuꞌhue, tsoꞌ nu ꞌin nchgaa tucui lca hua sca nu ꞌya la ndiꞌin chaꞌ ꞌin loo chendyu re, tsañaꞌan nchca tiꞌ mti nu nxcuan neꞌ.
\v 14 A ndaꞌan quityi re ꞌin um ta siꞌyana ca chen lca tiquee um, cuiꞌ ca nu siꞌyana suꞌhua tiyaan ꞌin um ñaꞌan nchca tiꞌ sca sñenꞌ nu taꞌa la ꞌñan.
\v 15 Siyaꞌ ntsuꞌhui tsa tii mii yu nu ndloꞌo ꞌin um chaꞌ ꞌin Cristo, una a ntsuꞌhui quiꞌan la sti um, siꞌyana nanꞌ ycuinꞌ chaꞌ tsuꞌhue ꞌin Cristo Jesús loꞌo um xa ya quiꞌan tiꞌ um ꞌin ñi.
\v 16 Jñan sca chaꞌ tsuꞌhue ꞌin um siꞌyana cuꞌni chaꞌan um ꞌñan tsañaꞌan chendyu nu nduꞌhuin.
\v 17 Canꞌ chaꞌ msuꞌhuan ꞌin yu Timoteo tsaa yu seꞌen ndiꞌin um, yu nu lca ñaꞌan nchca tiꞌ sca sñeꞌ nu taꞌa la ꞌñan, loꞌ ñi ndiꞌin chaꞌ ꞌin yu loꞌo chaꞌ ꞌin Ñi Xꞌnan na, loꞌ siꞌya yu a sꞌni quia yuꞌhui tiꞌ um ꞌñan tsañaꞌan nguiaa chaꞌ ꞌñan loꞌo Cristo, siꞌyana scañaꞌan ti ndloꞌon ꞌin jun taꞌa na nchgaa seꞌen ndiyoꞌ tiꞌin jun.
\v 18 Una ntsuꞌhui um nguiꞌni siyeꞌ um, loꞌ ñan tiꞌ um siꞌyana a ntsuꞌhui ꞌa chaꞌ tsaꞌan seꞌen ndiꞌin um,
\v 19 una tsaꞌan seꞌen ndiꞌin um nu ndla ti re, chaꞌ Ñi Xꞌnan na taa ñi chaꞌ cuiyaꞌ, xacanꞌ ca jlyo tinꞌ chaꞌ na ntsuꞌhui ca chaꞌ cuiyaꞌ ꞌin nu nguiꞌni siyeꞌ ꞌin, uta lca na chacuiꞌ chaꞌ ti.
\v 20 Siꞌyana tsañaꞌan nu ndlo Ndiose tñan, a lca na chaꞌ ti, cuiꞌ ca nu lca na chaꞌ cuiyaꞌ ꞌin ñi.
\v 21 ¿Ñaꞌan ta nchca tiꞌ um xacanꞌ? ¿Ta tsaꞌan seꞌen ndiꞌin um loꞌo yca chcua yaanꞌ uta tsaꞌan loꞌo chaꞌ tsuꞌhue loꞌo sca cusya nu cuti?
\c 5
\s Yu Pablo mꞌni cuiyaꞌ yu sca chaꞌ niꞌ lyaa 

\p
\v 1 Cuaꞌ ne chaꞌ siꞌyana lja um re ntsuꞌhui nu nguiten yuꞌhui loꞌo sca neꞌ cunaꞌan, ñi lja neꞌ gentil loꞌ a ne chaꞌ nꞌni neꞌ cuañaꞌan, nu hasta ntsuꞌhui nu ndaꞌan loꞌo jyiꞌan naꞌan.
\v 2 ¡Loo nu ngaꞌan chaꞌ ca tiꞌi ngaꞌan ꞌin um, nde nducui tiꞌ um! ¿Ta siꞌi ndyiꞌo la tñan culyoo um ꞌin yu nu nguiꞌni cuañaꞌan?
\v 3 Siyaꞌ tijyoꞌ nchcan, una cusya ꞌñan ndiꞌin loꞌo um, canꞌ chaꞌ nanꞌ cuaꞌ mꞌni cuiyanꞌ chaꞌ ꞌin yu.
\v 4 Loꞌo cunta ꞌin Ñi Xꞌnan na Jesucristo xa quioꞌ tiꞌin um tsatlyu, loꞌ cuꞌni um cunta siꞌyana loꞌon ndiꞌin loꞌo um, loꞌ siꞌya chaꞌ cuiyaꞌ ꞌin Ñi Xꞌnan na Jesucristo,
\v 5 tyaa um cunta ꞌin yu tuyaaꞌ Laxaꞌan, siꞌyana xitijin canꞌ ꞌin yu nu tiꞌi loꞌo tsoꞌ ꞌin cunanꞌ yu, una cusya ꞌin yu tyiꞌo laa na tsaan nu cuꞌni Ñi Xꞌnan na Jesús xñan bsya ꞌin nten.
\v 6 Canꞌ chaꞌ a ntsuꞌhui chaꞌ cuꞌni siyeꞌ um. ¿Ta a jlyo tiꞌ um siꞌyana loꞌo tsachinꞌ suun jaslya nꞌni lyiꞌun na ñaꞌaan scuan canꞌ?
\v 7 Tsuꞌhue lati culo tsoꞌ um suun jaslya nu cula canꞌ, loꞌ ca um scuan nu cui ti, nu luhui ñaꞌan nu ntsuꞌhui chaꞌ ca um, siꞌyana Cristo ñi nu lca slyaꞌ ꞌin na, cuaꞌ ngujui ñi tñan loo na.
\v 8 Canꞌ chaꞌ cuꞌni na taꞌa pascua, una siꞌi ꞌa ticuiꞌ loꞌo suun jaslya nu cula canꞌ, ñi siꞌi loꞌo chaꞌ ngunanꞌ uta loꞌo chaꞌ mañan, cuiꞌ ca nu cuꞌni na taꞌa loꞌo jaslya nu a mxitiyaaꞌ loꞌo scuan cula canꞌ, loꞌ tyiꞌan loꞌo na sca chaꞌ tiyaa nu luhui loꞌo chaꞌ nu ñi.
\v 9 Cuaꞌ ycuinꞌ chaꞌ re xa nguaꞌan tñan sca quityi ꞌin um, siꞌyana a tyiꞌan ꞌa um loꞌo nu nguiten yuꞌhui loꞌo ñaꞌan tucui ti,
\v 10 loꞌ a nchcuinꞌ chaꞌ ꞌin nten nu a ndiya quiꞌan tiꞌ, nu nguiten yuꞌhui loꞌo ñaꞌan tucui ti, uta siꞌya chaꞌ ꞌin nu ndyiꞌo tiquee loꞌo chaꞌ cuilyiyaꞌ, ta yu cunan, uta nu nꞌni tnu lcuin joꞌo, siꞌyana chaꞌ siyaꞌ ti a nchca tiꞌ um ñaꞌan um ꞌin nten canꞌ, ꞌni chaꞌ tyiꞌo um loo chendyu re xacanꞌ.
\v 11 Cuiꞌ ca nu nguaꞌan tñan quityi canꞌ ꞌin um siꞌyana a tyiꞌan ꞌa um loꞌo nu nchcuiꞌ siꞌyana lca taꞌa ndiya quiꞌan tiꞌ um, loꞌ chaꞌ tiꞌ nguiten yuꞌhui canꞌ loꞌo ñaꞌan tucui ti, ta nchcui tiꞌ chaꞌ cuilyiyaꞌ, nguiꞌni tnu lcuin joꞌo, nxiychaꞌ ꞌin xca tucui, nchca cuꞌhui, nguiꞌni cunan, ñi a ntsuꞌhui chaꞌ cu um sca seꞌen ti loꞌo canꞌ.
\v 12 Xacanꞌ jan ñi, ¿ta ntsuꞌhui suun ꞌñan cuꞌnin cuiyanꞌ chaꞌ ꞌin nu a ndiya quiꞌan tiꞌ? Loꞌ ꞌun jan ñi, ¿ta a ngaꞌan chaꞌ cuꞌni cuiyaꞌ um chaꞌ ꞌin jun nu ntsuꞌhui lja um?
\v 13 Siꞌyana tsalca nu a ndiya quiꞌan tiꞌ ꞌin Ndiose, cuiꞌ ñi cuꞌni cuiyaꞌ ñi chaꞌ ꞌin canꞌ. Canꞌ chaꞌ —culo tsoꞌ um ꞌin yu nu nguiꞌni chaꞌ ngunanꞌ canꞌ lja um—.
\c 6
\s Ticuiꞌ jun culyohui jun chaꞌ nu ndiꞌin ꞌin jun 

\p
\v 1 Chaꞌ ntsuꞌhui um ndiꞌin nsuun um loꞌo taꞌa ndiya quiꞌan tiꞌ um, ¿ta xtyi tiꞌ um tsa taa um quiꞌya ꞌin canꞌ tloo bsya nu a ndiya quiꞌan tiꞌ, loꞌ siꞌi tloo jun taꞌa na?
\v 2 ¿Ta a jlyo tiꞌ um siꞌyana jun taꞌa na cuꞌni xñan bysa ꞌin nten chendyu tiyaa xaa? Chaꞌ cuañaꞌan ntsuꞌhui chaꞌ cuꞌni cuiyaꞌ um chaꞌ ꞌin nten chendyu, ¿ñi chaꞌ a tca cuꞌni cuiyaꞌ um sca chaꞌ nu suhue la nchca lja um?
\v 3 ¿Ta a jlyo tiꞌ um siꞌyana hasta loꞌo angujle ntsuꞌhui chaꞌ cuꞌni cuiyaꞌ na chaꞌ ꞌin? ¿Ñaꞌan la ca chaꞌ nu nchca lja um, na a tca culyohui um?
\v 4 Canꞌ chaꞌ xa culyohui um scasca chaꞌ, ¿ñi chaꞌ ndyiꞌan taa um quiꞌya tloo sca nten nu a tucui lca niꞌ lyaa seꞌen ndiyoꞌ tiꞌin um?
\v 5 Nchcuinꞌ loꞌo um chaꞌ re siꞌyana xijyiꞌo tiꞌ um, ¿ta na a ntsuꞌhui sca nu tiyaa lja um nu culyohui chaꞌ nu nchca ꞌin um?
\v 6 ¿Ñi chaꞌ ticuiiꞌ jun taꞌa na ndiꞌin suun jun, loꞌ tloo nten nu a ndiya quiꞌan tiꞌ ndyiꞌan taa jun quiꞌya?
\v 7 Tsañaꞌan nu ndiꞌin yꞌni um, cuaꞌ mtnanꞌ um chaꞌ ꞌin um siꞌyana nsuun um loꞌo ticuiiꞌ taꞌa um. ¿Ta a tsuꞌhue la chaꞌ ta loo um loꞌo chaꞌ canꞌ? Chaꞌ ntsuꞌhui nu nguiꞌni mañan loꞌo um, ¿ta a tsuꞌhue chaꞌ xnu um chaꞌ canꞌ cuati ñaꞌan?
\v 8 Una nguiꞌni um nu tiꞌi canꞌ, loꞌ nguiꞌni um chaꞌ mañan loꞌo ticuiiꞌ jun taꞌa na.
\v 9 ¿Ta a jlyo tiꞌ um siꞌyana nu nducunꞌ a sten canꞌ seꞌen ndlo Ndiose tñan? A taa um yaꞌ caja nu cuñilyiꞌo ꞌin um, siꞌyana nu nguiten yuꞌhui loꞌo ñaꞌan tucui ti, nu nꞌni tnu lcuin joꞌo, nu nguiten yuꞌhui loꞌo cuilyiꞌo nten, uta yu nu nꞌni ꞌin tsañaꞌan nꞌni neꞌ cunaꞌan, ta nguiten yuꞌhui yu loꞌo ticuiiꞌ taꞌa quiꞌyu yu,
\v 10 nu nꞌni cunan, nu nchcui tiꞌ chaꞌ cuilyiyaꞌ, nu cuꞌhui, nu ñan quiꞌya ꞌin xca tucui, loꞌo nu nꞌni mañan. Nchgaa nu nguiꞌni chaꞌ re a sten canꞌ seꞌen ndlo Ndiose tñan.
\v 11 Loꞌ re tucui ncua um cuaꞌ sꞌni, una cuaꞌ ñii cuaꞌ mxnu luhui ñi ꞌin um, lca um nten nu cuaꞌ mdoꞌo hui ꞌin ñi, a xca ꞌa quiꞌya nducui um siꞌya chaꞌ cuiyaꞌ ꞌin Ñi Xꞌnan na Jesús loꞌo Espíritu ꞌin Stina Ndiose.
\s Lca na laa ꞌin Ndiose
\p
\v 12 Nanꞌ nchgaa chaꞌ tca cuꞌnin, una siꞌi nchgaa na ndyiꞌo tñan cuꞌnin ꞌin na, tca cuꞌnin nchgaa loo chaꞌ, una ñi sca canꞌ a taan chaꞌ cuiyaꞌ culo na tñan ꞌñan.
\v 13 Na nu nchcu na ndyiꞌya tiꞌin na niꞌ na, loꞌ siꞌya niꞌ na canꞌ chaꞌ nchcu na, una chcuaa chaꞌ re cuꞌni tyii Ndiose ꞌin na. Una a msuꞌhua Ndiose ꞌin na siꞌyana sten yuꞌhui na loꞌo ñaꞌan tucui ti, cuiꞌ ca nu siꞌyana ca jaꞌan na ꞌin Ñi Xꞌnan na, loꞌ cuiꞌ ñi culo ñi tñan ꞌin na.
\v 14 Loꞌ Ndiose, ñi nu mꞌni chaꞌ mdyiquiꞌo Ñi Xꞌnan na, cuiꞌ cuañaꞌan cuꞌni ñi chaꞌ tyiquiꞌo nareꞌ siꞌya chaꞌ cuiyaꞌ ꞌin ñi.
\v 15 ¿Ta a jlyo tiꞌ um siꞌyana cunanꞌ na sca chaꞌ ti ꞌin na loꞌo Cristo? ¿Ta cuꞌni na chaꞌ siꞌyana cunanꞌ Cristo ca sca chaꞌ ti ꞌin na loꞌo neꞌ cunaꞌan nducunꞌ? A ntsuꞌhui chaꞌ cuꞌni na cuañaꞌan.
\v 16 ¿Ta a jlyo tiꞌ um siꞌyana nu nguiten yuꞌhui loꞌo neꞌ cunaꞌan nducunꞌ, sca tucui ti lca loꞌo neꞌ? Siꞌyana nchcuiꞌ quityi ꞌin Ndiose: —Chcuaa canꞌ sca tucui ti lca—.
\v 17 Una nu nducuan xuꞌhue ꞌin Ñi Xꞌnan na, sca cusya ti ꞌin loꞌo ñi.
\v 18 Canꞌ chaꞌ tyiꞌo tsoꞌ um siiꞌ chaꞌ nu nguiten yuꞌhui um loꞌo ñaꞌan tucui ti. Siꞌyana scasca la quiꞌya, a nꞌni na tiꞌi loꞌo na ticuiiꞌ na, una nu nguiten yuꞌhui loꞌo xca tucui, canꞌ nu nguiꞌni tiꞌi loꞌo ticuiiꞌ.
\v 19 ¿Ta a jlyo tiꞌ um siꞌyana cunda scaa um lca um laa seꞌen ntsuꞌhui Espíritu nu Luhui ꞌin Ndiose, ñi nu ncuan xuꞌhue um loꞌo cunta ꞌin Ndiose, loꞌ a ndiꞌin ꞌa um loꞌo cunta ꞌin um?
\v 20 Siꞌyana cuaꞌ jui nu msuꞌhua lyiyaꞌ ꞌin um loꞌo tne, canꞌ chaꞌ cuꞌni tnu um ꞌin Ndiose siꞌyana cuiꞌ ñi ntsuꞌhui ñi cunta ꞌin um loꞌo cusya ꞌin um.
\c 7
\s Chaꞌ ꞌin jun nu ndyijyi cuilyiꞌo 

\p
\v 1 Loꞌ xca chaꞌ tsañaꞌan nu mñichaꞌ um ꞌñan loo quityi nu nguaꞌan tñan um canꞌ, tsuꞌhue chaꞌ cua na yu quiꞌyu a cunan yu nten ꞌin yu,
\v 2 una siꞌya chaꞌ nu nguiten yuꞌhui yu loꞌo ñaꞌan tucui ti, cunda scaa yu quiꞌyu caja cuilyiꞌo yu, ticuiꞌ cuañaꞌan jun cunaꞌan, cunda scaa jun ntsuꞌhui chaꞌ tyiꞌin jun loꞌo cuilyiꞌo jun.
\v 3 Yu quiꞌyu cua suꞌhua ta yu chaꞌ nu quiꞌni caꞌan ꞌin yu loꞌo cuilyiꞌo yu, cuiꞌ cuañaꞌan nten ꞌin yu ca jaꞌan loꞌo chaꞌ canꞌ.
\v 4 Siꞌyana jun cunaꞌan, cuaꞌ mdyaa jun ꞌin jun ꞌin cuilyiꞌo jun, cuiꞌ cuañaꞌan yu quiꞌyu, cuaꞌ mdyaa yu ꞌin yu ꞌin nten ꞌin yu.
\v 5 Canꞌ chaꞌ a nchca chaꞌ tyon queeꞌ um scasca um ꞌin cuilyiꞌo um, una tca siꞌyu coꞌ um chaꞌ re, chaꞌ cuꞌni sca um chaꞌ ꞌin um lja nu chcuiꞌ lyiꞌo um ꞌin Ndiose, xacanꞌ xitucui um chaꞌ re loꞌo cuilyiꞌo um, siꞌyana a cuꞌni laxaꞌan canan ꞌin um, ta sten yuꞌhui um loꞌo xca tucui.
\v 6 Nchcuinꞌ chaꞌ re loꞌo um siꞌyana ntsuꞌhui suun ꞌin um, una siꞌi siꞌyana xicuꞌnin ꞌin um ta cuꞌni um cuañaꞌan.
\v 7 Siꞌyana cunta chaꞌ nu ꞌñan, tsuꞌhue ꞌa chaꞌ cua na nchgaa yu quiꞌyu tyiꞌin yu tsañaꞌan nu nanꞌ ndiꞌin scan tin, una cunda scaa na cuaꞌ mdaa Ndiose xuꞌhue na, loꞌ siꞌi scañaꞌan ti ntsuꞌhui chaꞌ tyiꞌin na.
\v 8 Una tsalca yu nu ndiꞌin ycuiꞌ ti uta jun nu nguinu loꞌo chaꞌ ycuiꞌ ti, tsuꞌhue ꞌa chaꞌ cua na tca tyiꞌin jun tsañaꞌan nu nanꞌ ndiꞌin scan tin,
\v 9 una chaꞌ a tca tyiꞌin canꞌ scati tca caja cuilyiꞌo, siꞌyana tsuꞌhue la nu caja nten ꞌin canꞌ, loꞌ siꞌi nu tyiꞌan ntsuꞌhui chaꞌ canꞌ tiquee.
\v 10 Una tsalca nu cuaꞌ ndiꞌin cuilyiꞌo, chcuinꞌ loꞌo siꞌya chaꞌ cuiyaꞌ ꞌin Ñi Xꞌnan na: Jun cunaꞌan a ntsuꞌhui chaꞌ culaꞌ tiꞌin jun ꞌin cuilyiꞌo jun,
\v 11 loꞌ chaꞌ culaꞌ tiꞌin canꞌ ꞌin yu, quinu canꞌ scati uta cuꞌni chuꞌhue chaꞌ ꞌin loꞌo yu, cuiꞌ cuañaꞌan yu quiꞌyu a ntsuꞌhui chaꞌ culaꞌ tiꞌin yu ꞌin nten ꞌin yu.
\v 12 A cunta nchcuinꞌ loꞌo nchgaa la tucui, siyaꞌ a ycuiꞌ Ñi Xꞌnan na chaꞌ re: Chaꞌ yu taꞌa na ndiꞌin lyiꞌo yu neꞌ cunaꞌan nu a ndiya quiꞌan tiꞌ, una chaꞌ tsuꞌhue ntsuꞌhui tiquee neꞌ ndiꞌin neꞌ loꞌo yu, a ntsuꞌhui chaꞌ culaꞌ tiꞌin yu ꞌin neꞌ.
\v 13 Ticuiꞌ cuañaꞌan jun cunaꞌan nu ndiꞌin loꞌo yu quiꞌyu nu a ndiya quiꞌan tiꞌ, una chaꞌ tsuꞌhue ntsuꞌhui tiquee yu ndiꞌin yu loꞌo jun, a ntsuꞌhui chaꞌ culaꞌ tiꞌin jun ꞌin yu.
\v 14 Siꞌyana nu a ndiya quiꞌan tiꞌ canꞌ, cuaꞌ ndiꞌin cunta ꞌin Ndiose siꞌya chaꞌ ꞌin cuilyiꞌo nu ndiya quiꞌan tiꞌ, canꞌ chaꞌ loꞌo sñeꞌ canꞌ caja ñaꞌan tyiꞌo laa, una chaꞌ culaꞌ tiꞌin taꞌa jun chen nchcui quinanꞌ sñeꞌ jun.
\v 15 Una chaꞌ nu a ndiya quiꞌan tiꞌ canꞌ nchca tiꞌ culaꞌ tiꞌin ꞌin nten ꞌin, culaꞌ tiꞌin tu ꞌin yu, loꞌ chaꞌ cuañaꞌan tsatoꞌo quinu jun scati jun, yu quiꞌyu uta nu cunaꞌan, a sca la chaꞌ nducui nchaꞌan ꞌin jun, siꞌyana Ndiose nchca tiꞌ ñi tyiꞌin tsuꞌhue na loꞌo taꞌa na.
\v 16 Xacanꞌ jan ñi, ꞌun neꞌ cunaꞌan nu ndiya quiꞌan tiꞌ, ¿ta naꞌan na, na a tyiꞌo laa cuilyiꞌo um siꞌya chaꞌ nu ndiya quiꞌan tiꞌ um? Cuiꞌ cuañaꞌan ꞌun yu quiꞌyu nu ndiya quiꞌan tiꞌ, ¿ta naꞌan na, na a tyiꞌo laa nten ꞌin um siꞌya chaꞌ nu ndiya quiꞌan tiꞌ um?
\v 17 Una cunda scaa na cuaꞌ ñaꞌaan xuꞌhue mdaa Ñi Xꞌnan na ꞌin na, loꞌ tsañaꞌan msiꞌya ñi ꞌin na, cuañaꞌan tsa quiñan na. Cuiꞌ chaꞌ re ndlon tñan ꞌin jun taꞌa na nchgaa seꞌen ndiyoꞌ tiꞌin jun.
\v 18 ¿Ta ndeꞌen um cuaꞌ ncua circuncida ꞌin um xa ya quiꞌan tiꞌ um? Quinu tu um cuañaꞌan. Chaꞌ ya quiꞌan tiꞌ um, loꞌ a ncua circuncida ꞌin um, a ꞌni ꞌa chaꞌ tiꞌ ca na ꞌin um.
\v 19 Siꞌyana a sca cunta ntsuꞌhui chaꞌ ncua circuncida ꞌin na uta a ncua na, una nu xuꞌhua seꞌen na chaꞌ nu ndlo Ndiose tñan, canꞌ chaꞌ nu ndon loo la.
\v 20 Canꞌ chaꞌ cunda scaa na ca tsuꞌhue chuꞌhui tiquee na tsañaꞌan ndiꞌin chaꞌ ꞌin na xa ya quiꞌan tiꞌ na ꞌin ñi.
\v 21 ¿Ta cuaꞌ lca um sca nguso nu jui nu msiꞌi ꞌin xa ya quiꞌan tiꞌ um? A cuhue tiꞌ um chaꞌ canꞌ, una chaꞌ caja ñaꞌan culyohui um chaꞌ canꞌ loꞌo xꞌnan um, hasta tsuꞌhue lati.
\v 22 Siꞌyana nu cuaꞌ lca nguso ꞌin xca tucui xa ya quiꞌan tiꞌ ꞌin Ñi Xꞌnan na, cuaꞌ mdoꞌo laa canꞌ cunta ꞌin Ñi Xꞌnan na, ticuiꞌ cuañaꞌan loꞌo nu a lca nguso xa ya quiꞌan tiꞌ, una cuaꞌ ñii lca canꞌ nguso ꞌin Cristo.
\v 23 Siꞌyana cuaꞌ jui nu msuꞌhua lyiyaꞌ chaꞌ ꞌin um, a ntsuꞌhui chaꞌ xñi suꞌhua yaaꞌ xca tucui ꞌin um.
\v 24 Canꞌ chaꞌ cunda scaa ꞌun jun taꞌa na, tsañaꞌan chaꞌ ꞌin um xa ya quiꞌan tiꞌ um, cuañaꞌan tsa quiñan um sca chaꞌ ti ꞌin um loꞌo Ndiose.
\v 25 Tsañaꞌan ndiꞌin chaꞌ ꞌin nu a nchca caja cuilyiꞌo, a ngulo Ñi Xꞌnan na tñan ꞌñan loꞌo chaꞌ re, una ntsuꞌhui suun ꞌñan taan sca chaꞌ tiyaa ꞌin um siꞌyana Ñi Xꞌnan na mñaꞌan ꞌtnan tiꞌ ñi ꞌñan.
\v 26 Nde chaꞌ nu ñan tinꞌ cuiꞌ siꞌya scasca chaꞌ nu nchca loo chendyu re, tsuꞌhue la chaꞌ cua na tyiꞌin tu yu quiꞌyu tsañaꞌan cuaꞌ ndiꞌin ca yu.
\v 27 ¿Ta cuaꞌ jui cuilyiꞌo um? A culaꞌ tiꞌin um ꞌin canꞌ. ¿Ta ndiꞌin um scati um? A cunan um nten ꞌin um.
\v 28 Una chaꞌ caja cuilyiꞌo um, siꞌi quiꞌya nguiꞌni um, ticuiꞌ cuañaꞌan loꞌo ngüiꞌ cunaꞌan tsa suhue ti, chaꞌ ta caja cuilyiꞌo canꞌ, siꞌi quiꞌya lca na ꞌin, tyicana xa nu cuaꞌ jui cuilyiꞌo canꞌ, a sꞌni ljyaan scasca chaꞌ nduhue tiꞌ ꞌin, loꞌ a nchca tinꞌ tyijyin canꞌ cuañaꞌan.
\v 29 Nde chaꞌ nu chcuinꞌ loꞌo um, ꞌun jun taꞌa na: Tichinꞌ xaa ndiꞌin na loo chendyu re, canꞌ chaꞌ ꞌun nu ndiꞌin cuilyiꞌo, cuꞌni um cunta chcui nu nguia nde loo re siꞌyana a ndiꞌin cuilyiꞌo um,
\v 30 a cunta nu ndyiꞌya tuꞌhua tiquee, cuꞌni canꞌ cunta siꞌyana a sca chaꞌ ndijin, loꞌ nu tsuꞌhue ntsuꞌhui tiquee cuꞌni cunta siꞌyana luꞌun tiꞌ, cuiꞌ cuañaꞌan loꞌo nu nxiꞌi na cuꞌni canꞌ cunta siꞌyana a sca na ndiꞌin ꞌin.
\v 31 A cunta nu ndiꞌin na ꞌin loo chendyu re, cuꞌni canꞌ cunta siꞌyana a ꞌni chaꞌ ꞌin loꞌo chaꞌ canꞌ, siꞌyana chaꞌ nu nchca loo chendyu re ntsuꞌhui chaꞌ tsatii chaꞌ ꞌin na.
\v 32 Nchca tinꞌ chaꞌ cua na a chuꞌhui chaꞌ nduhue tiꞌ tiquee um, siꞌyana yu ndiꞌin scati lyee la nsuꞌhua loo yu chaꞌ nu ꞌin Ñi Xꞌnan na, seꞌen nu quinu tsuꞌhue tiquee ñi loꞌo yu.
\v 33 Una yu ndiꞌin cuilyiꞌo, ntsuꞌhui yuhue tiꞌ yu tñan nu cuꞌni yu, ñaꞌan ca siꞌyana quinu tsuꞌhue tiquee nten ꞌin yu loꞌo yu.
\v 34 Ticuiꞌ cuañaꞌan neꞌ cunaꞌan nu cuaꞌ jui cuilyiꞌo, siꞌi scañaꞌan ti ndiꞌin chaꞌ ꞌin loꞌo ngüiꞌ cunaꞌan tsa suhue ti, siꞌyana nu a nchca caja cuilyiꞌo, lyee la nsuꞌhua loo canꞌ chaꞌ nu ꞌin Ñi Xꞌnan na, seꞌen nu cuꞌni tñan ꞌin ñi loꞌo nu nchcui tiquee. Una jun nu ndiꞌin cuilyiꞌo, lyee la ntsuꞌhui yuhue tiꞌ tñan nu ntsuꞌhui chaꞌ cuꞌni, siꞌyana quinu tsuꞌhue tiquee cuilyiꞌo canꞌ loꞌo.
\v 35 Chaꞌ nu cuꞌni tsuꞌhue ꞌin um ca nchcuinꞌ, siꞌi siꞌyana nchca tinꞌ chcui ndijin loo chendyu ꞌin um, cuiꞌ ca nu siꞌyana cuꞌni um ñaꞌan nu ntsuꞌhui chaꞌ, loꞌ a sca chaꞌ chcui ndijin seꞌen nu quia nan um ꞌin Ñi Xꞌnan na.
\v 36 Una chaꞌ ntsuꞌhui nu ñan tiꞌ siꞌyana cuaꞌ mdiyaa xaa caja cuilyiꞌo nu cunaꞌan sñeꞌ, tca cuꞌni cuiyaꞌ chaꞌ canꞌ siꞌyana siꞌi quiꞌya lca na, cuiꞌ ca nu ntsuꞌhui chaꞌ cuiyaꞌ ꞌin caja cuilyiꞌo chaꞌ nchca tiꞌ.
\v 37 Una chaꞌ cuaꞌ mꞌni tiquee canꞌ siꞌyana a caja cuilyiꞌo, loꞌ ñi a ꞌni chaꞌ ꞌin loꞌo chaꞌ canꞌ, tsuꞌhue siꞌyana a chuꞌhui yuhue tiꞌ sti canꞌ ꞌin sñeꞌ nu caja cuilyiꞌo.
\v 38 Canꞌ chaꞌ nu taa ꞌin sñeꞌ caja cuilyiꞌo, tsuꞌhue ñaꞌan nu cuꞌni canꞌ, loꞌ nu a ñan tiꞌ taa sñeꞌ hasta tsuꞌhue lati tsatoꞌo ꞌin canꞌ.
\v 39 Siꞌyana neꞌ cunaꞌan nu cuaꞌ jui cuilyiꞌo, a ntsuꞌhui chaꞌ cuiyaꞌ tyiꞌin loꞌo xca tucui lja nu tiꞌ loꞌo yu, una chaꞌ caja yu tca caja cuilyiꞌo neꞌ xiyaꞌ, ca ti na ndiya quiꞌan tiꞌ canꞌ ꞌin Ñi Xꞌnan na.
\v 40 Una cunta chaꞌ nu ꞌñan, tsuꞌhue lati nu quinu canꞌ loꞌo chaꞌ ycuiꞌ ti, siꞌyana ñan tinꞌ loꞌon ntsuꞌhui Espíritu ꞌin Ndiose ꞌñan.
\c 8
\s Na nu cuaꞌ msuꞌhua neꞌ loo joꞌo 

\p
\v 1 Tsañaꞌan nguiaa chaꞌ ꞌin na nu cuaꞌ msuꞌhua neꞌ loo joꞌo, nchgaa na ndyiꞌya na cunta chaꞌ re, loꞌ tca tsa loꞌo na ꞌin na loo chaꞌ siyeꞌ, una chaꞌ ntsuꞌhui chaꞌ tsuꞌhue ꞌin na loꞌo taꞌa na, canꞌ chaꞌ nu nda yaaꞌ ꞌin na.
\v 2 Chaꞌ ntsuꞌhui nu ñan tiꞌ siꞌyana cuaꞌ nguꞌya chaꞌ tiyaa, a nchca ca jlyo tiꞌ ñaꞌan nu ntsuꞌhui ca chaꞌ.
\v 3 Una chaꞌ ntsuꞌhui nu lyee lca tiquee loꞌo Ndiose, canꞌ nu ndyuꞌhui lyoo tsuꞌhue ñi ꞌin.
\v 4 Loꞌ tsañaꞌan nguiaa chaꞌ ꞌin nu nchcu na nu cuaꞌ yuꞌhui loo joꞌo, cuaꞌ jlyo tiꞌ na siꞌyana lcuin joꞌo a ntsuꞌhui cusya ꞌin na, cuiꞌ ca nu scati Ndiose ntsuꞌhui.
\v 5 Siyaꞌ ntsuꞌhui scasca ndiose ꞌin neꞌ, ta la niꞌ cuaan uta loo chendyu re, (loꞌ chaꞌ ñi siꞌyana quiꞌan ndiose ntsuꞌhui ꞌin neꞌ, a cunta quiꞌan xꞌnan neꞌ),
\v 6 una cunta ꞌin nareꞌ, scati Ndiose ntsuꞌhui, cuiꞌ ñi nu lca Stina, ñi nu mtñan nchgaa loo na, loꞌ cuiꞌ cunta ꞌin ñi ndiꞌin na. Cuiꞌ cuañaꞌan ntsuꞌhui scati Xꞌnan na, ñi nu lca Jesucristo, loꞌ cuiꞌ siꞌya ñi ndiꞌin nchgaa loo na, canꞌ chaꞌ loꞌo na.
\v 7 Una siꞌi nchgaa jun ndyiꞌya jun cunta chaꞌ re, siꞌyana xa nchcu jun na nu cuaꞌ yuꞌhui loo joꞌo, a nchca jlya tiꞌ jun chaꞌ ꞌin lcuin joꞌo, loꞌ siꞌyana a ndyiꞌya tsuꞌhue jun cunta, nꞌni tucua tiꞌ jun loꞌo chaꞌ re.
\v 8 Loꞌ ñi siꞌi siꞌya chaꞌ nchcu, ta canꞌ chaꞌ cuan xuꞌhue Ndiose ꞌin na. Cu na, uta a cu na ꞌin na, scañaꞌan ti ntsuꞌhui lyoo na tloo ñi.
\v 9 Chaꞌ ta xqueꞌ tiꞌ um siꞌyana tca cu um ꞌin na, una xñi um cunta siꞌyana a xitlyu um ꞌin jun nu nguiꞌni tucua tiꞌ loꞌo chaꞌ re.
\v 10 Siꞌyana chaꞌ ꞌun ndyiꞌya la um cunta loꞌo chaꞌ re, loꞌ nducua ycu um tuꞌhua msa tloo sca lcuin joꞌo, loꞌ chaꞌ sca jun nu cuneꞌ chaꞌ tiyaa ꞌin ñaꞌan ꞌin um, ¿ta a loꞌo canꞌ ca tiꞌ cu na nu cuaꞌ yuꞌhui loo joꞌo?
\v 11 Loꞌ siꞌya chaꞌ tiyaa ꞌin um tsatoꞌo quinanꞌ sca jun taꞌa na nu joꞌo ti ndiꞌin chaꞌ ꞌin, cuiꞌ nu ngujui Cristo tñan loo.
\v 12 Chaꞌ cuañaꞌan cuꞌni um chaꞌ cuꞌni naꞌan tiꞌ sca taꞌa ndiya quiꞌan tiꞌ um, loꞌ tyisnan cuꞌni tucua tiꞌ canꞌ, ñaꞌan loo chaꞌ tloo Cristo nguiꞌni um quiꞌya.
\v 13 Chaꞌ ta siꞌya chaꞌ nchcu xityun ꞌin sca taꞌa ndiya quiꞌan tinꞌ loo quiꞌya, siyaꞌ ti a najoꞌo cun cunanꞌ, siꞌyana a nchca tinꞌ chcui ndijin loo chendyu ꞌin sca taꞌa ndiya quiꞌan tinꞌ.
\c 9
\s Chaꞌ cuiyaꞌ nu ntsuꞌhui ꞌin yu Pablo
\p
\v 1 ¿Ta a lcan nanꞌ sca nu nguaꞌan tñan Ndiose ꞌin? ¿Ta a ntsuꞌhui suun ꞌñan cuꞌnin nchgaa loo chaꞌ? ¿Ta siꞌi loꞌon nanꞌ naꞌan tloon ꞌin Ñi Xꞌnan na Jesús? ¿Ta siꞌi um ya quiꞌan tiꞌ um ꞌin Ñi Xꞌnan na siꞌya chaꞌ nu ycuinꞌ?
\v 2 Chaꞌ xca tucui nchcuiꞌ siꞌyana a lcan yu nu nguaꞌan tñan Ndiose ꞌin, una ꞌun jlyo tsuꞌhue tiꞌ um tucui lcan. ¿Ta siꞌi cuiꞌ um lca um nu ncua chcanꞌ loo siꞌyana Ñi Xꞌnan na nguaꞌan tñan ñi ꞌñan?
\v 3 Nde chaꞌ nu xcuen ꞌin tsalca nu nsuꞌhua quiꞌya ꞌñan:
\v 4 ¿Ta a ntsuꞌhui suun ꞌin hua cuan xuꞌhue hua na nu tyiꞌin tyaa jun tloo hua?
\v 5 ¿Ta a ntsuꞌhui chaꞌ cuiyaꞌ can loꞌo hua sca jun cunaꞌan taꞌa na nu lca cuilyiꞌo hua, tsañaꞌan nguiꞌni nchgaa la ñaꞌan yu nu ndaꞌan ycuiꞌ chaꞌ tsuꞌhue ꞌin Ndiose, tsañaꞌan mꞌni yu taꞌa ngula Ñi Xꞌnan na, uta yu Tyo?
\v 6 ¿Ta huareꞌ ti loꞌo yu Bernabé a ntsuꞌhui suun ꞌin hua chcuan hua cunta tñan nu nguiꞌni hua?
\v 7 ¿Ta ndeꞌen sindatu a xñi siyaꞌ seꞌen nguiꞌni tñan? ¿Ti nu ntya ti uva, loꞌ a nchcu na nu ndyiꞌyu loo na? ¿Ti nu nꞌni coꞌo bta loꞌ a ndyiꞌyo styiꞌ ꞌin?
\v 8 ¿Ta ñan tiꞌ um siꞌyana loꞌo chaꞌ tiyaa ꞌñan nchcuinꞌ chaꞌ re? ¿Ta siꞌi cuañaꞌan nchcuiꞌ quityi ꞌin Ndiose?
\v 9 Siꞌyana ndeñaꞌan nchcuiꞌ lee nu nguaꞌan Moisé: —A suꞌhua um quiso tuꞌhua bta nu nguiꞌni tñan—. ¿Ta chaꞌ ꞌin bta ca nchcuiꞌ Ndiose,
\v 10 uta siꞌya chaꞌ ꞌin huareꞌ? Siꞌya chaꞌ ꞌin hua nguaꞌan scua na, siꞌyana yu nu nsta yuu loꞌo yu nu nxoꞌ ꞌin na nducua tloo yu chcuan yu cunta tñan nu mꞌni yu.
\v 11 Chaꞌ huareꞌ yta hua chaꞌ tsuꞌhue ꞌin Ndiose seꞌen ndiꞌin um, ¿ta a tca tucua chinꞌ tloo hua ꞌin um loꞌo tñan nu nguiꞌni um?
\v 12 Chaꞌ xca tucui nguiꞌni caꞌan ꞌin loꞌo tñan nu nguiꞌni um, ¿ta a lyee la ntsuꞌhui suun ꞌin huareꞌ cuan xuꞌhue hua tñan nu nguiꞌni um? Una a xtyi tiꞌ hua cuꞌni hua cuañaꞌan, cuiꞌ ca nu nda loo hua ndijin hua nchgaa loo chaꞌ siꞌyana a nchca tiꞌ hua chcui ndijin hua tloo nu nducuan xuꞌhue chaꞌ tsuꞌhue ꞌin Cristo.
\v 13 ¿Ta a jlyo tiꞌ um siꞌyana nu nguiꞌni tñan niꞌ lyaa, ticuiꞌ niꞌ lyaa tyiꞌo na nu cunajoꞌo ꞌin? Cuiꞌ cuañaꞌan loꞌo nu ndiquin tucua ꞌni seꞌen nguiꞌni tnu neꞌ ꞌin Ndiose, ¿ta siꞌi cuiꞌ canꞌ ndyiꞌo na nu cunajoꞌo ꞌin?
\v 14 Cuiꞌ cuañaꞌan ngulo Ñi Xꞌnan na tñan ꞌin nu ndaꞌan ycuiꞌ chaꞌ tsuꞌhue ꞌin ñi, siꞌyana ticuiꞌ loo tñan canꞌ caja na nu cunajoꞌo ꞌin.
\v 15 Una ñi sca chaꞌ re loꞌ a nducua tloon, loꞌ ñi a nguaꞌan quityi re ta siꞌyana nducua tloon taa um na nu cunajoꞌo ꞌñan, cuiꞌ ca nu ndyiꞌo lati tiqueen cajan culo nducua la, loꞌ siꞌi nu caja nu siꞌyu coꞌ chaꞌ nu nducui tinꞌ cuꞌnin.
\v 16 Tsañaꞌan nu nchcuinꞌ chaꞌ tsuꞌhue ꞌin Cristo, a tca cuꞌnin siyenꞌ loꞌo chaꞌ re, siꞌyana tñan ntsuꞌhui chaꞌ cuꞌnin ca lca na. ¡Una tiꞌi ca xuꞌhuen chaꞌ a chcuinꞌ chaꞌ tsuꞌhue ꞌin Cristo!
\v 17 Chaꞌ nanꞌ chcuinꞌ chaꞌ tsuꞌhue ꞌin Cristo loꞌo chaꞌ tsuꞌhue nu ndyiꞌo tiqueen, nducua tloon quiꞌni caꞌan chaꞌ tsuꞌhue ꞌñan, loꞌ chaꞌ a ndyiꞌo tiqueen chcuinꞌ ꞌin na, una a ndyijyi ñaꞌan siꞌyana tñan cuaꞌ nguaꞌan ꞌñan ca lca na.
\v 18 ¿Ti ñaꞌan ta chaꞌ tsuꞌhue quiꞌni caꞌan ꞌñan xacanꞌ? Cuiꞌ siꞌyana xuꞌhue ti chcuinꞌ chaꞌ tsuꞌhue ꞌin Cristo, loꞌ a nducua tloon ta cuiꞌ seꞌen tyijyin yuꞌhui ꞌñan loo tñan re, siyaꞌ ntsuꞌhui suun ꞌñan.
\v 19 Siyaꞌ ñi sca tucui loꞌ a nducua tloon ꞌin, una nchgaa tucui nducua tloo ꞌñan, ñaꞌan ca siꞌyana quiꞌan la nten tsa quiꞌan tiꞌ.
\v 20 Nꞌnin ꞌñan ñaꞌan nchca tiꞌ neꞌ judio, siꞌyana nducua tloon tsa quiꞌan tiꞌ neꞌ judio ꞌin Cristo. Cuiꞌ cuañaꞌan loꞌo nchgaa nu nguia nchaꞌan chaꞌ ꞌin lee (siyaꞌ nanꞌ a nguia nchaꞌan chaꞌ ꞌin lee), una nꞌnin ꞌñan tsañaꞌan nꞌni sca nu nguia nchaꞌan chaꞌ ꞌin lee, siꞌyana nducua tloon tsa quiꞌan tiꞌ canꞌ ꞌin Cristo.
\v 21 Ticuiꞌ cuañaꞌan loꞌo nu a mꞌni chaꞌan chaꞌ ꞌin lee, nꞌnin ꞌñan ñaꞌan nchca tiꞌ nu a mꞌni chaꞌan chaꞌ ꞌin lee, siꞌyana nducua tloon tsa quiꞌan tiꞌ canꞌ ꞌin Cristo, (una siꞌi siꞌyana nscuan tloon lee ꞌin Ndiose, cuiꞌ ca nu lee ꞌin Cristo nguia nchaꞌan),
\v 22 Cuiꞌ cuañaꞌan loꞌo jun nu naꞌan tiꞌ, nꞌnin ꞌñan siꞌyana naꞌan tinꞌ siꞌyana suꞌhua loo la jun chaꞌ ꞌin Ndiose. Scasca ñaꞌan nguiꞌnin loꞌo nchgaa tucui, ñaꞌan ca siꞌyana lja canꞌ ntsuꞌhui nu tyiꞌo laa.
\v 23 Nꞌnin cuañaꞌan siꞌya chaꞌ tsuꞌhue ꞌin Cristo nu ya quiꞌan tinꞌ, siꞌyana quiꞌni caꞌan ꞌñan chaꞌ tsuꞌhue nu ljyan loꞌo chaꞌ canꞌ.
\v 24 ¿Ta a jlyo tiꞌ um siꞌyana yu nu nxnan suꞌhua, tsatlyu nxnan yu, una scati yu nꞌni yu canan? Cuiꞌ cuañaꞌan ꞌun suꞌhua um juesa siꞌyana cuꞌni um canan chaꞌ tsuꞌhue canꞌ.
\v 25 Cuiꞌ cuañaꞌan loꞌo yu nu nsuꞌhua juesa ꞌin loꞌo chaꞌ cuijya, nxñi canꞌ cunta ꞌin loꞌo nchgaa loo chaꞌ, siꞌyana nducua tloo canꞌ cuꞌni canan sca chaꞌ tsuꞌhue, siyaꞌ lca na sca na nu ntsuꞌhui chaꞌ jlyo, una tsoꞌ nu ꞌin nareꞌ nducua tloo na cuꞌni na canan chaꞌ tsuꞌhue nu a ntsuꞌhui chaꞌ tsatii.
\v 26 Canꞌ chaꞌ cuañaꞌan nsuꞌhuan juesa ꞌñan, una siꞌi cua chaꞌ ti, loꞌ ñi siꞌi tsañaꞌan nꞌni yu nu ycuanꞌ loo cuiꞌin ti,
\v 27 cuiꞌ ca nu nsuꞌhuan juesa ꞌñan loꞌ a ndaan yaꞌ siꞌyana cunanꞌ re cuꞌni na canan ꞌñan, ñaꞌan tuꞌ tsatoꞌo quinun caꞌan chonꞌ, nanꞌ yu nu ycuiꞌ chaꞌ tsuꞌhue ꞌin Ndiose loꞌo xca tucui.
\c 10
\s A sten yuꞌhui na chaꞌ ꞌin joꞌo
\p
\v 1 ꞌUn jun taꞌa na, a nchca chaꞌ jlya tiꞌ na siꞌyana nchgaa nten cula ꞌin na mdaꞌan neꞌ seꞌen nducui ndlaꞌ, loꞌ nchgaa neꞌ mdijin xiꞌyu neꞌ sca yaaꞌ tujoꞌo,
\v 2 loꞌ nchgaa neꞌ loꞌo Moisé mdaꞌan neꞌ seꞌen nducui ndlaꞌ canꞌ, mdijin xiꞌyu neꞌ tujoꞌo canꞌ,
\v 3 a cunta nchgaa neꞌ ycu neꞌ jaslya nu mdaa Ndiose ꞌin neꞌ,
\v 4 cuiꞌ cuañaꞌan nchgaa neꞌ yiꞌo neꞌ tyiꞌa nu mdaa Ndiose, cuiꞌ nu mdoꞌo loo quee nu mdaa ñi, loꞌ quee canꞌ lca Cristo, ñi nu mdaꞌan loꞌo ꞌin neꞌ.
\v 5 Una quiꞌan la neꞌ a nguinu tsuꞌhue tiquee Ndiose loꞌo neꞌ, canꞌ chaꞌ ngula yaaꞌ ñi ꞌin neꞌ siꞌyana caja neꞌ seꞌen ngutyi canꞌ.
\v 6 Yatoꞌo chaꞌ re siꞌyana chuꞌhui chaꞌ tiyaa ꞌin na, loꞌ a chcui tiꞌ na chaꞌ ngunanꞌ ñaꞌan mꞌni neꞌ canꞌ.
\v 7 A nchca chaꞌ cuꞌni tnu um joꞌo tsañaꞌan nguinu scua chaꞌ ꞌin neꞌ: —Yten tucua nten canꞌ ycu neꞌ, mdyisnan yiꞌo neꞌ, loꞌ mdiꞌin jya neꞌ—.
\v 8 Loꞌ ñi a ntsuꞌhui chaꞌ sten yuꞌhui na loꞌo scasca neꞌ cunaꞌan ñaꞌan mꞌni neꞌ, loꞌ yatoꞌo ngujui tsa cla nducua snan mii neꞌ, niꞌ sca tsaan ti.
\v 9 Ñi a quijya suꞌhua na loꞌo chaꞌ ꞌin Ñi Xꞌnan na ñaꞌan mꞌni neꞌ, yatoꞌo ngujui neꞌ xa ycu cunaan ꞌin neꞌ.
\v 10 Ñi a chcuiꞌ yuhueꞌ um siꞌya scasca chaꞌ, ñaꞌan nu mꞌni neꞌ, loꞌ yatoꞌo yjui angujle ꞌin neꞌ.
\v 11 Chaꞌ re yatoꞌo na siꞌyana quiꞌya na cunta scasca chaꞌ, loꞌ nguaꞌan scua na siꞌyana suꞌhua tiyaa na ꞌin na, tsalca nu tiꞌ ndiꞌin xa tsatii chaꞌ nu nchca loo chendyu re.
\v 12 Canꞌ chaꞌ nu xqueꞌ tiꞌ tla ndon loꞌo chaꞌ nu ndiya quiꞌan tiꞌ, xñi cunta siꞌyana a tyu loo quiꞌya.
\v 13 Scasca chaꞌ nu ljyaan ꞌin um, a sꞌni nchgaa tucui ndijin chaꞌ canꞌ, una tla chaꞌ ꞌin Ndiose, a taa ñi yaꞌ tyijyin um sca chaꞌ nu a ta loo um, cuiꞌ ca nu loo chaꞌ canꞌ sla ñi sca tucueen nu tyiꞌo um nde loo, siꞌyana tyijyin um chaꞌ canꞌ.
\v 14 Canꞌ chaꞌ ꞌun jun taꞌa na nu ndyuꞌhui cuiyaꞌ tinꞌ ꞌin, a cuꞌni tnu um lcuin joꞌo.
\v 15 Nchcuinꞌ loꞌo um siꞌyana lca um nten nu ndyiꞌya chaꞌ tiyaa, loꞌ cuꞌni quii tsuꞌhue um chaꞌ ta cuiꞌ ñaꞌan nchcuinꞌ.
\v 16 Xa ndyaa na xuꞌhue ꞌin Ndiose siꞌya vino nu cuaꞌ ncuan ñi, ¿ta siꞌi sca chaꞌ ti ꞌin na siꞌya tne Cristo? Ticuiꞌ cuañaꞌan xa nchcu na jaslya, ¿ta siꞌi sca chaꞌ ti ꞌin na loꞌo Cristo?
\v 17 Siyaꞌ quiꞌan tucui lca na una tsatlyu nchcu na scati jaslya, canꞌ chaꞌ sca chaꞌ ti ꞌin na nchgaa na.
\v 18 Xñi um cunta ꞌin neꞌ Israel xa nchcu neꞌ cunanꞌ ꞌni nu ndiquin tucua neꞌ tloo Ndiose, ¿ta siꞌi sca chaꞌ ti ꞌin neꞌ loꞌo ñi xacanꞌ?
\v 19 ¿Ñaꞌan ta xacanꞌ? ¿Ta siꞌya chaꞌ re ntsuꞌhui lyoo joꞌo canꞌ uta na nu cuaꞌ mducua loo na?
\v 20 Una cunen loꞌo um siꞌyana neꞌ gentil xa ndujui neꞌ sca ꞌni tloo joꞌo ꞌin neꞌ, ꞌin cuiꞌin xaꞌan nguiꞌni tnu neꞌ, loꞌ siꞌi ꞌin Ndiose, canꞌ chaꞌ a cuꞌni sca um chaꞌ ꞌin um loꞌo cuiꞌin xaꞌan.
\v 21 A ntsuꞌhui chaꞌ coꞌo um vino tsoꞌ nu ꞌin Ñi Xꞌnan na, loꞌ ticuiꞌ xaa tsoꞌ ꞌin cuiꞌin xaꞌan, a tca cuan xuꞌhue um na nu nducua loo msa ꞌin Ñi Xꞌnan na, loꞌ ticuiꞌ xaa na nu nducua loo msa ꞌin cuiꞌin xaꞌan.
\v 22 ¿Ta xtyi tiꞌ na taa na chaꞌ nsinꞌ tiꞌ ꞌin Ñi Xꞌnan na? ¿Ta tla la chaꞌ ꞌin nareꞌ que ꞌin ñi?
\s Suꞌhua loo na ꞌin Ndiose siꞌya nchgaa loo chaꞌ
\p
\v 23 Nchgaa chaꞌ tca cuꞌnin, una siꞌi nchgaa na ndyiꞌo tñan cuꞌnin ꞌin na, nchgaa chaꞌ tca cuꞌnin, una a nchgaa na nda yaaꞌ na ꞌin xca tucui.
\v 24 A chuꞌhui yuhue tiꞌ na tsa ꞌin ti na, cuiꞌ ca nu chuꞌhui yuhue tiꞌ na ꞌin xca tucui.
\v 25 Ñaꞌan nchca tiꞌ cunanꞌ ꞌni nu ndujuiꞌ neꞌ seꞌen nchca quiyaꞌ, tca cu um nchgaa loo cunanꞌ canꞌ, una a cuñichaꞌ um la jui na, ta siꞌyana nguiꞌni tucua tiꞌ um,
\v 26 —siꞌyana chendyu re loꞌo nchgaa na nu ndiꞌin ꞌin na, na ꞌin Ñi Xꞌnan na lca na—.
\v 27 Chaꞌ ndeꞌen nu a ndiya quiꞌan tiꞌ ꞌin Ndiose cuni ꞌin um cu um loꞌo, loꞌ chaꞌ ndyiꞌo tiquee um tsaa um, tca cu um nchgaa loo na nu tyiꞌin tyaa tloo um, una a cuñichaꞌ um la jui na, ta siꞌyana nguiꞌni tucua tiꞌ um.
\v 28 Una chaꞌ ndeꞌen nu quitsaꞌ ꞌin um siꞌyana cuaꞌ mducua na loo joꞌo, a cu um ꞌin na, cuiꞌ siꞌya chaꞌ ꞌin nu mtsaꞌ ꞌin um ta siꞌyana ntsuꞌhui nu nguiꞌni tucua tiꞌ, —siꞌyana chendyu re loꞌo nchgaa na nu ndiꞌin ꞌin na, na ꞌin Ñi Xꞌnan na lca na—.
\v 29 Siꞌi chaꞌ ꞌin um ca nchcuinꞌ, cuiꞌ ca nu chaꞌ ꞌin nu nguiꞌni tucua tiꞌ canꞌ. ¿Ta ndyiꞌo tñan cuꞌnin sca chaꞌ tloo xca tucui siꞌyana culo quiꞌya canꞌ ꞌñan?
\v 30 Chaꞌ nanꞌ tsuꞌhue ntsuꞌhui tiqueen nchcun sca na loꞌ ndyaan xuꞌhue ꞌin Ndiose, ¿ta ndyiꞌo tñan caja nu chcui ndijin siꞌya chaꞌ canꞌ?
\v 31 Canꞌ chaꞌ xa cu um loꞌ coꞌo um, uta cuꞌni um scasca loo chaꞌ, suꞌhua loo um ꞌin Ndiose siꞌya chaꞌ canꞌ.
\v 32 A nchca chaꞌ chcui ndijin um tloo neꞌ judio, uta neꞌ gentil, loꞌ ñi tloo jun taꞌa na.
\v 33 Cuiꞌ cuañaꞌan nanꞌ ntsuꞌhui yuhue tinꞌ ꞌin nchgaa la tucui loꞌo nchgaa loo chaꞌ, loꞌ siꞌi tsa ꞌñan tin ntsuꞌhui yuhue tinꞌ, cuiꞌ ca nu nchca tinꞌ siꞌyana quinu tsuꞌhue nchgaa tucui, ñaꞌan ca siꞌyana tca tyiꞌo laa quiꞌan nten. 
\c 11
\p
\v 1 Cuꞌni chaꞌan um ꞌñan tsañaꞌan nanꞌ nguiꞌnin chaꞌan ꞌin Cristo.
\s Chaꞌ ꞌin teꞌ nu nxcua que jun cunaꞌan
\p
\v 2 Tsuꞌhue ntsuꞌhui tiqueen tsañaꞌan nguiaa chaꞌ ꞌin um, ꞌun jun taꞌa na, siꞌyana ndiya yuꞌhui tiꞌ um ꞌñan, loꞌ nguia nchaꞌan um nchgaa chaꞌ nu cuaꞌ mxnun ꞌin um.
\v 3 Una nchca tinꞌ ca jlyo tiꞌ um siꞌyana Cristo lca ñi que ꞌin nchgaa yu quiꞌyu, loꞌ yu quiꞌyu lca yu que ꞌin nten ꞌin yu, loꞌ Ndiose lca ñi que ꞌin Cristo.
\v 4 A ntsuꞌhui chaꞌ xcua teꞌ que yu quiꞌyu lja nchcuiꞌ lyiꞌo yu ꞌin Ndiose uta ndloꞌo yu chaꞌ ꞌin ñi, siꞌyana sca chaꞌ jyiꞌo ndaa yu ꞌin nu lca que ꞌin yu.
\v 5 Una jun cunaꞌan, chaꞌ a xcua teꞌ que jun xa nchcuiꞌ lyiꞌo jun ꞌin Ndiose uta ndloꞌo jun chaꞌ ꞌin ñi, chaꞌ jyiꞌo ndaa jun ꞌin nu lca que ꞌin jun, loꞌ suꞌhua ñaꞌan ndiꞌin chaꞌ ꞌin jun chaꞌ cua na ngulya que jun siyaꞌ ti.
\v 6 Chaꞌ a nchca tiꞌ jun xcua teꞌ que jun, tsuꞌhue lati xiꞌyu quichanꞌ que jun, loꞌ chaꞌ jyiꞌo tiꞌ jun xiꞌyu quichanꞌ que jun uta quilya na ꞌin jun, tsuꞌhue lati xcua teꞌ que jun.
\v 7 Siꞌyana yu quiꞌyu a ntsuꞌhui chaꞌ xcua teꞌ que yu, siꞌyana Ndiose mtñan ꞌin yu chcui ñaꞌan ñi, loꞌ mdaa ñi sca chaꞌ cuiyaꞌ ꞌin yu, una jun cunaꞌan ndiꞌin canꞌ cunta ꞌin nten ꞌin.
\v 8 Siꞌyana yu quiꞌyu a mdoꞌo yu tsoꞌ ꞌin neꞌ cunaꞌan, cuiꞌ ca nu neꞌ cunaꞌan mdoꞌo neꞌ tsoꞌ ꞌin yu quiꞌyu,
\v 9 ticuiꞌ cuañaꞌan a mtñan Ndiose ꞌin yu quiꞌyu siꞌya chaꞌ ꞌin neꞌ cunaꞌan, cuiꞌ ca nu siꞌya yu quiꞌyu mtñan ñi ꞌin neꞌ.
\v 10 Canꞌ chaꞌ xcua teꞌ que jun cunaꞌan, loꞌ cuañaꞌan ca chcanꞌ loo siꞌyana ntsuꞌhui nu lca que ꞌin jun, a cunta siꞌya chaꞌ ꞌin angujle.
\v 11 Una cunta ꞌin Ñi Xꞌnan na, a tca tyiꞌin yu quiꞌyu chaꞌ a loꞌo neꞌ cunaꞌan, cuañaꞌan neꞌ cunaꞌan, a tca tyiꞌin neꞌ chaꞌ a loꞌo yu quiꞌyu,
\v 12 siꞌyana tsañaꞌan nu mtñan Ndiose ꞌin neꞌ cunaꞌan siꞌya yu quiꞌyu, cuañaꞌan nchca cuneꞌ sca yu quiꞌyu siꞌya neꞌ cunaꞌan. Nchgaa chaꞌ re ljyaan na tsoꞌ ꞌin Ndiose.
\v 13 Cuꞌni cunta um chaꞌ re: ¿Ta ntsuꞌhui suun ꞌin jun cunaꞌan chcuiꞌ lyiꞌo jun ꞌin Ndiose chaꞌ a xcua teꞌ que jun?
\v 14 Tsañaꞌan ndiꞌin chaꞌ ꞌin na, ¿ta a jlyo tiꞌ na siꞌyana chaꞌ jyiꞌo lca na ꞌin yu quiꞌyu chaꞌ tucuin quichanꞌ que yu?
\v 15 Una siꞌi cuañaꞌan loꞌo jun cunaꞌan, sca chaꞌ nducui tiꞌ lca na ꞌin jun chaꞌ tucuin quichanꞌ que jun, tsañaꞌan nducun sca teꞌ que jun cunaꞌan cuañaꞌan nguiaa chaꞌ ꞌin jun loꞌo quichanꞌ que jun.
\v 16 Una chaꞌ ntsuꞌhui nu nchca tiꞌ chcuiꞌ tyijyin siꞌya chaꞌ re, ca cuiyaꞌ tiꞌ canꞌ siꞌyana sca chaꞌ ti ꞌin hua loꞌo chaꞌ nu cuaꞌ ntsuꞌhui ꞌin jun, scasca seꞌen ndiyoꞌ tiꞌin jun loꞌo cunta ꞌin Ndiose.
\s A seꞌen ñaꞌan nꞌni jun xa nꞌni jun siin
\p
\v 17 Una chaꞌ nu chcuinꞌ loꞌo um cuaꞌ ñii a tca cunen siꞌyana ndyiꞌya ndiꞌin um, siꞌyana loo nu ngaꞌan chaꞌ tyiꞌin tsuꞌhue um, nde ndiꞌin suun um.
\v 18 Xa ndiyoꞌ tiꞌin um, culo nducua la chaꞌ nu nen ꞌñan siꞌyana tyun ta lca um, loꞌ tsacua seꞌen ndiya quiꞌan tinꞌ chaꞌ re.
\v 19 Una chaꞌ cuaꞌ lca siꞌyana tyisnan chaꞌ cusuun lja um, loꞌ ca chcanꞌ loo ti ñaꞌan nu ñi ndiꞌin chaꞌ ꞌin.
\v 20 Loo nu ngaꞌan chaꞌ cuꞌni um siin siꞌyana quia yuꞌhui tiꞌ um ꞌin Ñi Xꞌnan na, siꞌi ñaꞌan nꞌni um,
\v 21 xa cuaꞌ tyisnan cu siin um, cunda scaa um nxitucua loo um chaꞌ ꞌin um loꞌo na nu lyiꞌya um, ntsuꞌhui nu a sca na nguiꞌni caꞌan ꞌin, loꞌ ntsuꞌhui nu hasta loꞌo nchca cuꞌhui.
\v 22 ¿Ta na a nducua naꞌan ꞌin um seꞌen ntsuꞌhui chaꞌ cu um? ¿Ñi chaꞌ nxcuan tloo um ꞌin jun nu ndiya quiꞌan tiꞌ ꞌin Ndiose loꞌ mdaa um chaꞌ jyiꞌo ꞌin jun nu tiꞌi ñaꞌan chendyu ꞌin? ¿Ñaꞌan ta cunen siꞌya chaꞌ re? ¿Ta tsuꞌhue ñaꞌan ndiꞌin yꞌni um cua? A tca cunen siꞌyana tsuꞌhue na.
\s Mxnu Ñi Xꞌnan na chaꞌ nu cuꞌni na siin
\p
\v 23 Nde chaꞌ nu mxnu Ñi Xꞌnan na ꞌñan, cuiꞌ ñaꞌan chaꞌ nu cuaꞌ nguloꞌon ꞌin um: Tla nu ntsuꞌhui chaꞌ quinu Ñi Xꞌnan na Jesús, nducua ycu siin jun, loꞌ msñi ñi sca jaslya,
\v 24 mdyaa ñi xuꞌhue ꞌin Ndiose, msuꞌhue ñi ꞌin na, loꞌ juin ñi: Xñi um loꞌ ca xuꞌhue um ꞌin na, siꞌyana nde nu lca cunanꞌ nanꞌ, nu siꞌya um mdyaan ꞌñan, cuꞌni um chaꞌ re loꞌ quia yuꞌhui tiꞌ um ꞌñan.
\v 25 Cuiꞌ cuañaꞌan xa mdyi ycu siin ñi, msñi ñi vaso seꞌen ntsuꞌhui vino, loꞌ juin ñi: Nde sca chaꞌ nu cui ti loꞌ siꞌya tnen cuꞌni chuꞌhue um chaꞌ ꞌin um loꞌo Ndiose. Cuꞌni um chaꞌ re loꞌ quia yuꞌhui tiꞌ um ꞌñan nchgaa yaꞌ coꞌo um ꞌin na.
\v 26 Canꞌ chaꞌ nchgaa yaꞌ cu um jaslya re loꞌ coꞌo um vino re, ndaa um suun siꞌyana ngujui Ñi Xꞌnan na, loꞌ cuañaꞌan tsa quiñan um loꞌo chaꞌ re tsayaꞌ quiaan ñi xiyaꞌ.
\s Xñi na cunta ꞌin na xa nꞌni na siin
\p
\v 27 Ñaꞌan tucui ti nu cu jaslya loꞌ coꞌo vino re, siꞌya chaꞌ ꞌin Ñi Xꞌnan na, loꞌ chaꞌ a ñi ndiꞌin chaꞌ ꞌin, nducui canꞌ quiꞌya siꞌyana a msuꞌhua loo chaꞌ ꞌin cunanꞌ Ñi Xꞌnan na loꞌo tne ñi.
\v 28 Canꞌ chaꞌ cunda scaa um ntsuꞌhui chaꞌ cuꞌni quii um chendyu ꞌin um, xacanꞌ tca cuan xuꞌhue um jaslya loꞌo vino re.
\v 29 Siꞌyana nu nchcu jaslya loꞌ ndyiꞌyo vino, chaꞌ a nsuꞌhua loo canꞌ chaꞌ ꞌin Ñi Xꞌnan na, ticuiiꞌ nsoꞌ tucua quiꞌya chonꞌ.
\v 30 Canꞌ chaꞌ quiꞌan ꞌa nu tiꞌi ntsuꞌhui lja um, a cunta ntsuꞌhui nu nguia nguiꞌni naꞌan tiꞌ, loꞌ ntsuꞌhui nu cuaꞌ ngujui.
\v 31 Chaꞌ naa cuꞌni quii na chendyu ꞌin na, a ntsuꞌhui chaꞌ ca xñan bsya ꞌin na,
\v 32 una chaꞌ Ñi Xꞌnan na cuꞌni cuiyaꞌ ñi chaꞌ ꞌin na, xitijin ñi ꞌin na nu tiꞌi, una siꞌi nu caan yuhueꞌ chonꞌ na tsatlyu loꞌo nten chendyu.
\v 33 Canꞌ chaꞌ ꞌun jun taꞌa na, xa quioꞌ tiꞌin um loꞌ cuꞌni um siin, ꞌni chaꞌ quita taꞌa um.
\v 34 Loꞌ chaꞌ ntsuꞌhui nu nguiteꞌ tiꞌ, tca cu canꞌ la naꞌan ꞌin, loꞌ siꞌi nu soꞌ tucua quiꞌya chonꞌ. Nchgaa la ñaꞌan chaꞌ nu tiꞌ lyijyi chcuinꞌ loꞌo um, cua lyohui na ꞌin na xa tsaꞌan seꞌen ndiꞌin um.
\c 12
\s Chaꞌ ꞌin scasca chaꞌ cuiyaꞌ mdaa Ndiose
\p
\v 1 ꞌUn jun taꞌa na, nchca tinꞌ siꞌyana quiꞌya um cunta tsañaꞌan ndiꞌin chaꞌ ꞌin scasca chaꞌ cuiyaꞌ nu ndaa Ndiose ꞌin na.
\v 2 Cuaꞌ jlyo tiꞌ um xa tiꞌ lyijyi tsa quiꞌan tiꞌ um, cuti ꞌa ncua jaꞌan um ꞌin lcuin joꞌo nu a ne ꞌin.
\v 3 Canꞌ chaꞌ ca cuiyaꞌ tiꞌ um siꞌyana ñi sca nu nchcuiꞌ loꞌo chaꞌ cuiyaꞌ ꞌin Espíritu ꞌin Ndiose, a tca chcuiꞌ caꞌan canꞌ ꞌin Jesús, cuiꞌ cuañaꞌan a tucui nu tca culoꞌo naan ꞌin Jesús siꞌyana lca Ñi Xꞌnan canꞌ, chaꞌ siꞌi loꞌo chaꞌ cuiyaꞌ ꞌin Espíritu nu Luhui ꞌin Ndiose.
\v 4 Scasca loo chaꞌ cuiyaꞌ ndaa Ndiose ꞌin na, una scati Espíritu ndaa ꞌin na.
\v 5 A cunta scasca loo tñan tca ta yaaꞌ taꞌa na, una cuiꞌ Ñi Xꞌnan na nducua tloo na.
\v 6 Ticuiꞌ cuañaꞌan scasca ñaꞌan nu nguiꞌni na, una scati Ndiose nguiꞌni ñi nchgaa chaꞌ canꞌ tsatlyu.
\v 7 Cunda scaa na nchca chcanꞌ loo chaꞌ cuiyaꞌ ꞌin Espíritu nu cuaꞌ jui ꞌin na, seꞌen nu cuꞌni tsuꞌhue ꞌin xca tucui.
\v 8 Ntsuꞌhui nu ndaa Espíritu chaꞌ cuiyaꞌ ꞌin siꞌyana tca chcuiꞌ loꞌo chaꞌ tiyaa, loꞌ ntsuꞌhui nu ndyijyi chaꞌ cuiyaꞌ ꞌin siꞌyana tca quiꞌya la cunta ñaꞌan nu ntsuꞌhui chaꞌ culoꞌo, una scati Espíritu nguiꞌni chaꞌ canꞌ.
\v 9 Xca nu ndyijyi chaꞌ cuiyaꞌ ꞌin siꞌyana tca tsa quiꞌan tiꞌ chaꞌ nu tucui, una scati Espíritu nguiꞌni chaꞌ canꞌ. Cuiꞌ cuañaꞌan ndaa ñi chaꞌ cuiyaꞌ ꞌin xca canꞌ siꞌyana tca cuꞌni chca ꞌin nu tiꞌi, una ticuiꞌ scati Espíritu nguiꞌni chaꞌ canꞌ.
\v 10 Ntsuꞌhui xca nu nchca nꞌni chaꞌ nu tnu, a cunta ntsuꞌhui nu nchcuiꞌ chaꞌ ꞌin Ndiose, ntsuꞌhui nu ndyiꞌya cunta chaꞌ ndeꞌen nu ndaꞌan loꞌo chaꞌ cuiñi, ntsuꞌhui nu nchcuiꞌ lenguas, a cunta ntsuꞌhui xca nu ndlyo scua la chaꞌ canꞌ.
\v 11 Una ticuiꞌ scati Espíritu nguiꞌni nchgaa chaꞌ re, cunda scaa na nguiꞌni caꞌan chaꞌ re ꞌin na cuaꞌ ñaꞌaan ndyiꞌo tiquee ñi.
\v 12 Tsañaꞌan ndiꞌin chaꞌ ꞌin cunanꞌ na, quiꞌan ꞌa cula na ntsuꞌhui, una sca chaꞌ ti ꞌin na, loꞌ siyaꞌ quiꞌan la na, una scati tucui lca na, cuiꞌ cuañaꞌan ndiꞌin chaꞌ ꞌin na loꞌo Cristo.
\v 13 Siꞌya scati Espíritu ꞌin Ndiose nchgaa na mducua tya na loꞌ mꞌni sca ñi ꞌin na, neꞌ judio uta neꞌ griego, loꞌ ta nguso nu msiꞌi neꞌ ꞌin uta nu nguiꞌni tñan chaꞌ ꞌin ti, nchgaa na mꞌni ñi chaꞌ mtsaꞌan yuꞌhui scati Espíritu ꞌin na.
\v 14 A cunta, cunanꞌ na siꞌi scati cula na ntsuꞌhui, cuiꞌ ca nu quiꞌan na.
\v 15 Chaꞌ ljuin quiyaꞌ na: Siꞌyana a lcan yaaꞌ, a tucui lcan, ¿ta canꞌ chaꞌ a ntsuꞌhui lyoo na?
\v 16 Chaꞌ ljuin nscan na: Siꞌyana a lcan quiloo, a tucui lcan. ¿Ta canꞌ chaꞌ a ntsuꞌhui lyoo na?
\v 17 Chaꞌ ñaꞌaan cunanꞌ na lca na chacuiꞌ quiloo na, ¿la ta nducua nscan na xacanꞌ? Chaꞌ ñaꞌaan cunanꞌ na lca na nscan na, ¿la ta nducua siyenꞌ na xacanꞌ?
\v 18 Una cunda scaa seꞌen ꞌin cunanꞌ na, cuaꞌ lca seꞌen mdiꞌin tyaa Ndiose ꞌin na tsañaꞌan nu ncua tiꞌ ñi.
\v 19 Chaꞌ scañaꞌan ti nchgaa seꞌen ꞌin na, ¿ta chcui cunanꞌ na xacanꞌ?
\v 20 Una siyaꞌ quiꞌan la cula na ntsuꞌhui, una scati tucui lca na.
\v 21 Canꞌ chaꞌ a ndyijyi ñaꞌan chcuiꞌ quiloo na loꞌo yaaꞌ na: A ꞌni chaꞌ ꞌñan loꞌo. Loꞌ ñi a tca ljuin que na ꞌin quiyaꞌ na: A sca chaꞌ ꞌni ꞌñan loꞌo.
\v 22 Ntsuꞌhui seꞌen ꞌin cunanꞌ na nxqueꞌ tiꞌ na a ndon loo na, una canꞌ nu lyee la ꞌni chaꞌ ꞌin.
\v 23 Ndeꞌen seꞌen ꞌin cunanꞌ na, a nguia tiꞌ na loꞌo na, una canꞌ nu tsuꞌhue lati nxicoꞌ na ꞌin, cuiꞌ cuañaꞌan loꞌo sca seꞌen nu a nsuꞌhua loo na, canꞌ nu taꞌa lati ꞌin na.
\v 24 Seꞌen nu tsuꞌhue la ñaꞌan ꞌin cunanꞌ na, a sca na ndiya lyijyi ꞌin na, una Ndiose mdiꞌin tyaa ñi chaꞌ siꞌyana nde lyee la suꞌhua loo na ꞌin sca seꞌen nu ndiya lyijyi chaꞌ ꞌin canꞌ,
\v 25 ñaꞌan ca siꞌyana a cula yaꞌ taꞌa na, cuiꞌ ca nu scasca na ta yaaꞌ taꞌa na.
\v 26 Chaꞌ cuañaꞌan ntsuꞌhui seꞌen tiꞌi ꞌin na, tiꞌ ñaꞌaan na ndii tiꞌ na tiꞌi, ticuiꞌ cuañaꞌan chaꞌ ntsuꞌhui yuhue tiꞌ na sca seꞌen ꞌin cunanꞌ na, ñaꞌaan na tsuꞌhue lca ꞌin na xacanꞌ.
\v 27 Canꞌ chaꞌ tsatlyu lca um cunanꞌ Cristo, loꞌ cunda scaa um lyiꞌya loo um ꞌin cunanꞌ canꞌ.
\v 28 Lja jun taꞌa na ngulo ton Ndiose ꞌin jun cunda scaa jun, culo nducua la nguaꞌan tñan ñi ꞌin nu tucua suun tñan ꞌin ñi, xacanꞌ ngulo ton ñi ꞌin nu chcuiꞌ chaꞌ tsuꞌhue ꞌin ñi, loꞌ nu cuaꞌ nchca snan, canꞌ nu culoꞌo ꞌin jun, xacanꞌ loꞌo nu nꞌni chaꞌ nu tnu, loꞌo nu nꞌni chca ꞌin nu tiꞌi, loꞌo nu nda yaaꞌ loꞌo scasca tñan, loꞌo nu lyiꞌya cunta tñan ꞌin jun, a cunta loꞌo nu nchcuiꞌ lenguas.
\v 29 ¿Ta nchgaa canꞌ nguaꞌan tñan Ndiose ꞌin siꞌyana tucua suun tñan ꞌin ñi? ¿Ta nchgaa canꞌ ndyiꞌan ycuiꞌ chaꞌ tsuꞌhue ꞌin ñi? ¿Ta nchgaa canꞌ ndloꞌo ꞌin jun? ¿Uta nchgaa canꞌ nꞌni chaꞌ nu tnu?
\v 30 ¿Ta nchgaa canꞌ nꞌni chca ꞌin nu tiꞌi? ¿Ta nchgaa canꞌ nchcuiꞌ lenguas? ¿Ta nchgaa canꞌ nchca ꞌin ndlyo scua la chaꞌ?
\v 31 Canꞌ chaꞌ suꞌhua loo um chaꞌ cuiyaꞌ nu cuaꞌ jui ꞌin um, una nde lyee lati loꞌo scasca chaꞌ nu ndon loo la canꞌ, una cuaꞌ ñii quitsanꞌ ꞌin um xca chaꞌ nu tsuꞌhue lati.
\c 13
\s Ndon loo nu chuꞌhui chaꞌ tsuꞌhue ꞌin na 

\p
\v 1 Chaꞌ cua na tca chcuinꞌ nchgaa loo chaꞌ nu nchcuiꞌ nten chendyu uta chaꞌ nu nchcuiꞌ angujle, loꞌ chaꞌ a ntsuꞌhui chaꞌ tsuꞌhue ꞌñan, nguiaa chaꞌ ꞌñan tsañaꞌan nchca tiꞌ sca chcuan nu la xnan ne ti uta ñaꞌan ne sca chcuan xa ndiya caꞌan taꞌa na.
\v 2 Chaꞌ tca chcuinꞌ chaꞌ tsuꞌhue ꞌin Ndiose, uta quiꞌyan cunta nchgaa loo chaꞌ nu ntsuꞌhui cutsiꞌ ꞌin ñi, loꞌ chaꞌ mtsaꞌan yuꞌhuin loꞌo chaꞌ tiyaa, uta lyee ndiya quiꞌan tinꞌ nu hasta sca quiꞌya loꞌ tca xitsaꞌan tucuan, una chaꞌ a ntsuꞌhui chaꞌ tsuꞌhue ꞌñan, a tucui lcan.
\v 3 Uta chaꞌ cutsan nchgaa chaꞌ cuilyiyaꞌ nu ndiꞌin ꞌñan loꞌ xicun ꞌin nu tiꞌi, hasta tyaan ꞌñan nu tiquin neꞌ, una chaꞌ a ntsuꞌhui chaꞌ tsuꞌhue ꞌñan, a sca cunta ntsuꞌhui.
\v 4 Chaꞌ ntsuꞌhui chaꞌ tsuꞌhue ꞌin na ntsuꞌhui chaꞌ tlyu tiꞌ ꞌin na, cuti nguiaa chaꞌ ꞌin na, a ntsuꞌhui chaꞌ jñan tiꞌ, ñi chaꞌ siyeꞌ loꞌ a ntsuꞌhui ꞌin na, loꞌ a nscuen cuaan na ꞌin na ticuiiꞌ na,
\v 5 siꞌi la xnan nꞌni na scaa chaꞌ uta tsa ꞌin ti na ntsuꞌhui yuhue tiꞌ na, ñi a nchcuen tiqueꞌ na uta nxuꞌhua seꞌen na chaꞌ nsinꞌ tiꞌ,
\v 6 siꞌi na nde tsuꞌhue ntsuꞌhui tiquee na xa nchca sca chaꞌ ngunanꞌ, cuiꞌ ca nu tsuꞌhue ntsuꞌhui tiquee na loꞌo chaꞌ nu ñi.
\v 7 Nda loo na ndyijyin na nchgaa nu tiꞌi, loꞌ ndiya quiꞌan tiꞌ na loꞌo nu chcui lca tiquee na, nducua tloo na quinu tsuꞌhue nchgaa loo chaꞌ, cuiꞌ cuañaꞌan nda loo na loꞌo nchgaa chaꞌ ndijin na.
\v 8 Chaꞌ tsuꞌhue canꞌ a ntsuꞌhui chaꞌ tsatii na, una chaꞌ nu nxiycuiꞌ Ndiose ꞌin nten loꞌo chaꞌ nu nchcuiꞌ neꞌ lenguas, cuiꞌ cuañaꞌan loꞌo chaꞌ tiyaa nu nchca loo chendyu re tsatii tuhue chaꞌ ꞌin na.
\v 9 Siꞌyana nducua seꞌen ti ndyiꞌya na cunta, cuiꞌ cuañaꞌan xa nchcuiꞌ na chaꞌ ꞌin Ndiose,
\v 10 una tiyaa tsaan ca chcui chaꞌ ꞌin na, loꞌ a la ꞌa quine cueen chaꞌ nu ndiya lyijyi canꞌ.
\v 11 Xa ncuan sca yu suhue ti, ycuinꞌ ñaꞌan nchcuiꞌ yu suhue ti, nguñan tinꞌ ñaꞌan ñan tiꞌ yu suhue ti, loꞌ chaꞌ tiyaa ꞌñan ñaꞌan chaꞌ tiyaa ꞌin yu suhue ti, una xa cuaꞌ culan mxnun nchgaa chaꞌ nu nꞌni yu suhue ti.
\v 12 Cuaꞌ ñii naꞌan na tsañaꞌan sca cunan nu joꞌo ti xaa ꞌin, una tiyaa xaa ñaꞌan tloo taꞌa ca na. Siyaꞌ cuaꞌ ñii nducua seꞌen ti ndyiꞌyan cunta, una tiyaa xaa chuꞌhui lyoon nchgaa chaꞌ tsañaꞌan nu cuaꞌ yuꞌhui lyoo Ndiose ꞌñan.
\v 13 Nde chaꞌ nu nguinu scua cuaꞌ ñii: Tsa quiꞌan tiꞌ na ꞌin ñi, tucua tloo na ꞌin ñi, loꞌ chuꞌhui chaꞌ tsuꞌhue ꞌin na. Snan loo chaꞌ ca lca na, una chaꞌ nu ndon loo lati, siꞌyana chuꞌhui chaꞌ tsuꞌhue ꞌin na scasca na.
\c 14
\s Chaꞌ nu nchcuiꞌ neꞌ lenguas
\p
\v 1 Chuꞌhui chaꞌ tsuꞌhue ꞌin um scasca um, loꞌ suꞌhua loo um scasca chaꞌ cuiyaꞌ nu cuaꞌ jui ꞌin um, una nu lyee lati ngaꞌan chaꞌ chcuiꞌ um chaꞌ tsuꞌhue ꞌin Ndiose.
\v 2 Siꞌyana nu nchcuiꞌ lenguas, siꞌi loꞌo nten taꞌa nchcuiꞌ canꞌ, cuiꞌ ca nu nchcuiꞌ canꞌ loꞌo Ndiose, siꞌyana a tucui nu ndyiꞌya cunta chaꞌ canꞌ, siyaꞌ loꞌo chaꞌ cuiyaꞌ ꞌin Espíritu nchcuiꞌ canꞌ chaꞌ nu ntsuꞌhui cutsiꞌ ꞌin ñi.
\v 3 Una nu nchcuiꞌ chaꞌ ꞌin Ndiose, loꞌo nten taꞌa nchcuiꞌ canꞌ seꞌen nu culo neꞌ, caja juesa ꞌin neꞌ, loꞌ caja chaꞌ tnu tiquee ꞌin neꞌ.
\v 4 Una nu nchcuiꞌ xca loo lengua, tsa ꞌin ti canꞌ nda yaaꞌ na, una nu nchcuiꞌ chaꞌ ꞌin Ndiose, tsatlyu nda yaaꞌ chaꞌ canꞌ ꞌin nchgaa jun taꞌa na.
\v 5 Cunta chaꞌ nu ꞌñan, tsuꞌhue chaꞌ cua na nchgaa um chcuiꞌ um lenguas, una nu lyee lati chcuiꞌ um chaꞌ ꞌin Ndiose, siꞌyana ndon loo la chaꞌ canꞌ que ꞌin nu nchcuiꞌ lenguas, una chaꞌ caja nu culyo scua la ꞌin na xacanꞌ nchgaa jun culo jun.
\v 6 Canꞌ chaꞌ ꞌun jun taꞌa na, chaꞌ nanꞌ tsaꞌan seꞌen ndiꞌin um loꞌ chcuinꞌ lenguas, ¿ñi cunta ntsuꞌhui ꞌin um? Una xcañaꞌan chaꞌ chcuinꞌ loꞌo um chaꞌ nu ndaa Ndiose ꞌñan, uta culyo scua lan chaꞌ tiyaa ꞌin ñi, loꞌ ta chcuinꞌ chaꞌ ꞌin Ndiose tloo um, uta culoꞌon ꞌin um ñaꞌan nu nguiaa chaꞌ ꞌin ñi.
\v 7 Xñi na cunta tsañaꞌan ndiꞌin chaꞌ ꞌin cuhuii xa ne na, ñaꞌan nchca tiꞌ cuhuii quii uta sne tnu, loꞌ chaꞌ a quine na ñaꞌan nu ntsuꞌhui chaꞌ, ¿ñaꞌan ta ca jlyo tiꞌ na ñi jyiin nguila cuhuii canꞌ?
\v 8 Ticuiꞌ cuañaꞌan loꞌo yu sindatu xa nxicune yu cuhuii ꞌin yu, chaꞌ a taa yu tyiꞌi na ñaꞌan nu ntsuꞌhui chaꞌ, ¿ti nu tca tyon tiyaa loꞌ tsaa cusuun?
\v 9 Cuañaꞌan ꞌun loꞌo tuꞌhua um chaꞌ a chcuiꞌ la um sca chaꞌ, ¿ti nu tca quiꞌya chaꞌ tiyaa chaꞌ nu chcuiꞌ um? Cuꞌni um cunta siꞌyana loo cuiꞌin ti nchcuiꞌ um.
\v 10 Quiꞌan ꞌa loo chaꞌ nu nchcuiꞌ nten loo chendyu re, loꞌ cunda scaa na ntsuꞌhui nu ndyiꞌya cunta ꞌin na.
\v 11 Una chaꞌ a ndyiꞌyan cunta chaꞌ nu nchcuiꞌ xca tucui, cuꞌni canꞌ cunta siꞌyana lcan sca nu mdoꞌo tijyoꞌ, loꞌ nanꞌ cuꞌnin cunta siꞌyana lca canꞌ xca ta nten.
\v 12 Cuiꞌ cuañaꞌan ꞌun chaꞌ lyee lca tiquee um loꞌo scasca chaꞌ cuiyaꞌ nu ndaa Espíritu ꞌin um, una taa um yaꞌ chaꞌan yuꞌhui um loꞌo sca chaꞌ nu tca ta yaaꞌ ꞌin nchgaa jun taꞌa na.
\v 13 Canꞌ chaꞌ nu nchcuiꞌ xca loo lengua lja um, jñan canꞌ ꞌin Ndiose siꞌyana tca tyiꞌo scua la chaꞌ nu nchcuiꞌ.
\v 14 Siꞌyana chaꞌ chcuinꞌ lyiꞌon ꞌin Ndiose loꞌo xca loo chaꞌ nu siꞌi chaꞌ nchcuinꞌ, tsa cusya ti ꞌñan nchcuiꞌ na, una siꞌi loꞌo chaꞌ tiyaa ꞌñan.
\v 15 ¿Ñaꞌan ta cuꞌnin xacanꞌ? Chcuinꞌ lyiꞌon ꞌin Ndiose loꞌo cusya ꞌñan tsatlyu loꞌo chaꞌ tiyaa ꞌñan. Cula loꞌon ꞌin Ndiose loꞌo cusya ꞌñan, una cuiꞌ cuañaꞌan loꞌo chaꞌ tiyaa ꞌñan.
\v 16 Siꞌyana chaꞌ ꞌun cuꞌni tnu um ꞌin Ndiose loꞌo cusya ti ꞌin um, loꞌ nu ndon nscan chaꞌ nu nchcuiꞌ um, ¿ñaꞌan ta tca tyaa canꞌ xuꞌhue ꞌin Ndiose tsatlyu loꞌo um, chaꞌ a ndyiꞌya canꞌ cunta chaꞌ nu nchcuiꞌ um?
\v 17 Chaꞌ ñi siꞌyana ꞌun tsuꞌhue ꞌa ndyaa um xuꞌhue ꞌin Ndiose, una a nda yaaꞌ chaꞌ canꞌ ꞌin xca tucui.
\v 18 Nanꞌ ndyaan xuꞌhue ꞌin Ndiose siꞌyana lyee la nchcuinꞌ lenguas que ꞌin nchgaa um,
\v 19 una xa ndiyoꞌ tiꞌin na loꞌo taꞌa na, tsuꞌhue lati chaꞌ chcuinꞌ siyaꞌ caꞌyu ti chaꞌ nu ndyiꞌyan cunta, ñaꞌan ca siꞌyana tca culoꞌon ꞌin nchgaa la tucui, loꞌ siꞌi nu chcuinꞌ tsa tii mii chaꞌ nu a tucui ndyiꞌya cunta.
\v 20 Canꞌ chaꞌ ꞌun jun taꞌa na, a quiñan tiꞌ um tsañaꞌan ñan tiꞌ nu suhue ti, cuiꞌ ca nu cuꞌni um tsañaꞌan nꞌni nu suhue ti nu a sca chaꞌ ngunanꞌ ntsuꞌhui tiquee, una loꞌo sca chaꞌ tiyaa nu chcui.
\v 21 Siꞌyana ndeñaꞌan nchcuiꞌ lee ꞌin Ndiose: —Chcuinꞌ loꞌo nten re loꞌo chaꞌ nu nchcuiꞌ xca ta nten, siyaꞌ cuañaꞌan a cuꞌni cunta neꞌ chaꞌ nu chcuinꞌ—, juin Ñi Xꞌnan na.
\v 22 Canꞌ chaꞌ nu nchcuiꞌ lenguas, a lca na sca cuiyaꞌ ꞌin nu ndiya quiꞌan tiꞌ, cuiꞌ ca nu nsuꞌhua tiyaa na ꞌin nten nu nxcuan tloo ꞌin Ndiose. Una nu nchcuiꞌ chaꞌ ꞌin Ndiose tloo jun taꞌa na, canꞌ chaꞌ nu nguiꞌni caꞌan ꞌin nu ndiya quiꞌan tiꞌ, loꞌ siꞌi ꞌin nten nu a ndiya quiꞌan tiꞌ.
\v 23 Chaꞌ tsatlyu quioꞌ tiꞌin jun taꞌa na, loꞌ nchgaa jun tyisnan chcuiꞌ jun lenguas, loꞌ chaꞌ sten sca jun nu cui ti uta nten nu a ndiya quiꞌan tiꞌ, ¿ta a xqueꞌ tiꞌ canꞌ siꞌyana ndiyoꞌ um?
\v 24 Una chaꞌ cunda scaa um chcuiꞌ um chaꞌ ꞌin Ndiose, loꞌ chaꞌ sten sca nten nu a ndiya quiꞌan tiꞌ uta sca nu cui ti, a sꞌni suꞌhua canꞌ chaꞌ tiquee siꞌya chaꞌ nu quine ꞌin, loꞌ quiꞌya canꞌ chaꞌ tiyaa siꞌyana ntsuꞌhui chaꞌ tyaa cunta siꞌya chendyu ꞌin,
\v 25 tyiꞌo scua la chaꞌ nu ntsuꞌhui cutsiꞌ niꞌ cusya ꞌin, xacanꞌ tyiꞌya xtyinꞌ tloo Ndiose loꞌ cuꞌni tnu ꞌin ñi, loꞌ tyisnan chcuiꞌ siꞌyana chaꞌ ñi ca ndiꞌin Ndiose loꞌo um.
\v 26 ¿Ñaꞌan ta ndiꞌin chaꞌ xacanꞌ, ꞌun jun taꞌa na? Siꞌyana xa ndiyoꞌ tiꞌin um ntsuꞌhui nu lyiꞌya sca salmo, ntsuꞌhui nu ndloꞌo ꞌin jun, xca nu nchcuiꞌ lenguas, uta ntsuꞌhui nu nchcuiꞌ chaꞌ nu ndaa Ndiose ꞌin, a cunta ntsuꞌhui nu ndlyo scua la chaꞌ canꞌ. Nchgaa chaꞌ nu cuꞌni um, cunan um ñaꞌan nu culo jun siꞌya chaꞌ canꞌ.
\v 27 Chaꞌ ntsuꞌhui nu nchca tiꞌ chcuiꞌ xca loo lengua, tca chcuiꞌ tucua ti uta snan ti jun, una siꞌi tsatlyu chcuiꞌ jun, loꞌ xca nu culyo scua la chaꞌ canꞌ.
\v 28 Una chaꞌ a ntsuꞌhui nu tca culyo scua la chaꞌ canꞌ, tsuꞌhue lati chcua seen tuꞌhua canꞌ seꞌen ndiyoꞌ tiꞌin jun, loꞌ chcuiꞌ lyiꞌo canꞌ ꞌin Ndiose loꞌo cunta nu ꞌin ti.
\v 29 Ticuiꞌ cuañaꞌan jun nu chcuiꞌ chaꞌ ꞌin Ndiose tloo jun taꞌa na, tucua ti uta snan ti jun ntsuꞌhui chaꞌ chcuiꞌ jun, loꞌ nchgaa la ñaꞌan jun xñi jun cunta chaꞌ ta cuiꞌ ñaꞌan nchcuiꞌ canꞌ.
\v 30 Chaꞌ Ndiose taa ñi chaꞌ nu chcuiꞌ xca nu ntsuꞌhui lja um, tca culaꞌ tiꞌ nu mdyisnan ycuiꞌ culoo la canꞌ,
\v 31 loꞌ cuañaꞌan tca chcuiꞌ um chaꞌ ꞌin Ndiose cunda scaa um, ñaꞌan ca siꞌyana tca cuꞌni chaꞌan um nchgaa um loꞌ tsatlyu caja chaꞌ tnu tiquee ꞌin um.
\v 32 Loꞌ tsalca nu nchcuiꞌ chaꞌ ꞌin Ndiose, cunda scaa canꞌ ntsuꞌhui chaꞌ xñi cunta ꞌin loꞌo chaꞌ canꞌ,
\v 33 siꞌyana Ndiose a lca ñi Ndiose nu nꞌni tinto ꞌin nten, cuiꞌ ca nu nꞌni ñi chaꞌ siꞌyana tsatlyu tyiꞌin tsuꞌhue na. A cunta tsañaꞌan nguiaa chaꞌ ꞌin jun taꞌa na scasca seꞌen ndiyoꞌ tiꞌin jun,
\v 34 jun cunaꞌan ntsuꞌhui chaꞌ chcua seen jun, siꞌyana a ntsuꞌhui chaꞌ cuiyaꞌ ꞌin jun chcuiꞌ jun seꞌen ndiyoꞌ tiꞌin um, cuiꞌ ca nu cuꞌni suun jun ꞌin jun tsañaꞌan nchcuiꞌ quityi ꞌin Ndiose.
\v 35 Chaꞌ ndeꞌen la chaꞌ nchca tiꞌ jun cuñichaꞌ jun, la naꞌan cuñichaꞌ jun ꞌin nten ꞌin jun, siꞌyana a ntsuꞌhui chaꞌ chcuiꞌ sca jun cunaꞌan lja seꞌen ndiyoꞌ tiꞌin jun taꞌa na.
\v 36 ¿Ta xqueꞌ tiꞌ um siꞌyana seꞌen ndiꞌin um mducua suun chaꞌ ꞌin Ndiose, uta na tsa seꞌen ndiꞌin ti um mdiyaa chaꞌ canꞌ?
\v 37 Chaꞌ ntsuꞌhui nu ñan tiꞌ siꞌyana nchca ꞌin chcuiꞌ chaꞌ ꞌin Ndiose tloo jun, uta lyee ndiya quiꞌan tiꞌ, cuꞌni canꞌ cunta chaꞌ nu nguaꞌan re siꞌyana lca na chaꞌ nu ndlo Ñi Xꞌnan na tñan.
\v 38 Chaꞌ ntsuꞌhui nu a cuꞌni cunta chaꞌ re, ticuiꞌ cuañaꞌan a cuꞌni um cunta ꞌin canꞌ.
\v 39 Canꞌ chaꞌ ꞌun jun taꞌa na, cunan um ñaꞌan nu chcuiꞌ um chaꞌ ꞌin Ndiose, loꞌ a chcui ndijin um chaꞌ ntsuꞌhui nu nchcuiꞌ lenguas,
\v 40 una loꞌo suun ñaꞌan, a cunta loꞌo chaꞌ tiyaa cuꞌni um nchgaa chaꞌ. Ñaꞌan ntsuꞌhui chaꞌ tyiquiꞌo neꞌ ngujui.
\c 15
\p
\v 1 A cunta ꞌun jun taꞌa na, nchca tinꞌ xuꞌhuan tiꞌ um tsañaꞌan nguiaa chaꞌ tsuꞌhue ꞌin Cristo nu ycuinꞌ loꞌo um, cuiꞌ chaꞌ nu ncuan xuꞌhue um, loꞌ tla ndon um loꞌo chaꞌ re hasta cuaꞌ ñii.
\v 2 Siꞌya chaꞌ re ntsuꞌhui chaꞌ tyiꞌo laa um, chaꞌ suꞌhua loo um chaꞌ nu cuaꞌ ycuinꞌ, loꞌ chaꞌ siꞌi, cua chaꞌ ti ya quiꞌan tiꞌ um xacanꞌ.
\v 3 Siꞌyana cuaꞌ mtsanꞌ ꞌin um chaꞌ nu ndon loo lati, chaꞌ nu cuaꞌ mꞌni chaꞌan, siꞌyana Cristo ngujui ñi siꞌya quiꞌya ꞌin na, tsañaꞌan nchcuiꞌ quityi ꞌin Ndiose,
\v 4 ya tsiꞌ neꞌ ꞌin ñi loꞌ mdyiquiꞌo ñi nu cuaꞌ ca snan tsaan, tsañaꞌan nchcuiꞌ quityi ꞌin Ndiose,
\v 5 loꞌ nguloꞌo tloo ñi ꞌin yu Tyo, chonꞌ ndeꞌen canꞌ nguloꞌo tloo ñi ꞌin taꞌa tichcua yu nu taꞌa mdaꞌan ñi.
\v 6 Chonꞌ ndeꞌen la tsatlyu nguloꞌo tloo ñi ꞌin jun taꞌa na, ndyijyi caꞌyu ciento jun, ntsuꞌhui nu cuaꞌ ngujui, una quiꞌan la nu tiꞌ loꞌo.
\v 7 Xacanꞌ nguloꞌo tloo ñi ꞌin yu Jacobo, chonꞌ ndeꞌen la canꞌ nguloꞌo tloo ñi ꞌin nchgaa yu taꞌa mdaꞌan ca ñi,
\v 8 una la xiyaꞌ ti canꞌ nguloꞌo tloo ñi ꞌñan, tsañaꞌan nchca tiꞌ sca cuhuiꞌ nu a ntsuꞌhui chaꞌ tiyaan chendyu.
\v 9 Siꞌyana joꞌo la ndiꞌin chaꞌ ꞌñan que ꞌin nchgaa la ñaꞌan taꞌa mdaꞌan ñi, loꞌ ñi a ntsuꞌhui suun caja nu culoꞌo naan ꞌñan lcan nu mdoꞌo hui ca ꞌin Ndiose, siꞌyana mxitijin nu tiꞌi ꞌin jun nu cuaꞌ ya quiꞌan tiꞌ ꞌin ñi.
\v 10 Una siꞌya chaꞌ tsuꞌhue ꞌin Ndiose lcan tsañaꞌan nu lcan cuaꞌ ñii, loꞌ siꞌi cua chaꞌ ti mdaa ñi chaꞌ tsuꞌhue canꞌ ꞌñan, cuiꞌ ca nu nde quiꞌan la tñan nu cuaꞌ mꞌnin que ꞌin nchgaa la ñaꞌan jun canꞌ, una siꞌi loꞌo juesa ꞌñan, cuiꞌ ca nu siꞌya chaꞌ tsuꞌhue ꞌin Ndiose nu nda yaaꞌ ꞌñan.
\v 11 A ꞌni chaꞌ siyaꞌ nanꞌ uta jun canꞌ, una sca loo ti chaꞌ ndaꞌan ycuiꞌ hua, cuiꞌ chaꞌ nu ya quiꞌan tiꞌ um.
\v 12 Chaꞌ ndaꞌan ycuiꞌ hua siꞌyana mdyiquiꞌo Cristo, ¿ñaꞌan ta nchcuiꞌ um scasca um siꞌyana a ntsuꞌhui chaꞌ tyiquiꞌo neꞌ ngujui?
\v 13 Loꞌ chaꞌ a ntsuꞌhui chaꞌ tyiquiꞌo neꞌ ngujui, a mdyiquiꞌo Cristo xacanꞌ.
\v 14 Chaꞌ Cristo a mdyiquiꞌo ñi, a sca cunta ntsuꞌhui chaꞌ nu ndaꞌan ycuiꞌ hua, cuiꞌ cuañaꞌan cua chaꞌ ti ya quiꞌan tiꞌ um.
\v 15 Ndiyatoꞌo loꞌo huareꞌ lca hua nu cuiñi tsañaꞌan ndaa hua suun siꞌyana Ndiose mꞌni ñi chaꞌ mdyiquiꞌo Cristo. Loꞌ chaꞌ ñi a mdyiquiꞌo ñi chaꞌ na a ntsuꞌhui chaꞌ tyiquiꞌo neꞌ ngujui.
\v 16 Siꞌyana chaꞌ a ndyiquiꞌo neꞌ ngujui, a mdyiquiꞌo Cristo xacanꞌ,
\v 17 loꞌ chaꞌ Cristo a mdyiquiꞌo ñi, cua chaꞌ ti ndiya quiꞌan tiꞌ um, loꞌ cuiꞌ ñaꞌan ti nducui um quiꞌya.
\v 18 Cuiꞌ cuañaꞌan nchgaa nu cuaꞌ ngujui nu ya quiꞌan tiꞌ ꞌin Cristo, cuaꞌ ngunanꞌ chaꞌ ꞌin canꞌ.
\v 19 Chaꞌ nducua tloo na ꞌin Cristo tsalja ndiꞌin ti na loo chendyu re, tiꞌi lati xuꞌhue na que ꞌin nchgaa la tucui.
\v 20 Una Cristo cuaꞌ mdyiquiꞌo ñi, loꞌ lca ñi nu culoo mdyiquiꞌo lja neꞌ ngujui.
\v 21 Siꞌya scati yu quiꞌyu yten chaꞌ ndyija loo chendyu re, cuiꞌ cuañaꞌan siꞌya scati yu quiꞌyu ndyiquiꞌo neꞌ ngujui.
\v 22 Siꞌya Adán nchgaa tucui ntsuꞌhui chaꞌ caja, cuiꞌ cuañaꞌan siꞌya Cristo, nchgaa tucui chcuan chendyu ꞌin.
\v 23 Una cuaꞌ lca ñaꞌan ntsuꞌhui chaꞌ tyiquiꞌo na: Culo nducua la mdyiquiꞌo Cristo, loꞌ xa quiaan ñi xiyaꞌ quiꞌni caꞌan ꞌin nu ya quiꞌan tiꞌ ꞌin ñi.
\v 24 Xacanꞌ tsatii chaꞌ nu nchca loo chendyu re, tyaa ñi cunta tñan nu yuꞌhui yaaꞌ ñi ꞌin Stina Ndiose, xa cuaꞌ ngujlyo ñi ꞌin nchgaa nu ndlo tñan, loꞌo nu ntsuꞌhui chaꞌ cuiyaꞌ yaaꞌ, a cunta loꞌo nu tla la chaꞌ ꞌin.
\v 25 Chaꞌ cuaꞌ lca siꞌyana culo ñi tñan la cuaꞌ mꞌni ñi canan ꞌin nchgaa taꞌa cusuun ñi.
\v 26 A cunta cujlyo ñi ꞌin xca ti taꞌa cusuun na nu lca chaꞌ ndyija.
\v 27 Siꞌyana —Ndiose cuaꞌ mxnu ñi nchgaa loo chaꞌ nde tuquiyaꞌ Sñeꞌ ñi—. Loꞌ xa nchcuiꞌ na siꞌyana nchgaa loo chaꞌ cuaꞌ ntsuꞌhui yaaꞌ canꞌ, una a loꞌo Ndiose, ñi nu mxnu nchgaa loo chaꞌ, ntsuꞌhui yaaꞌ canꞌ.
\v 28 Xa cuaꞌ nguinu nchgaa loo chaꞌ yaaꞌ Sñeꞌ Ndiose, xacanꞌ tyaa ñi ꞌin ñi ycuiꞌ ca ñi yaaꞌ Ndiose, ñi nu cuaꞌ mxnu nchgaa loo chaꞌ yaaꞌ canꞌ, ñaꞌan ca siꞌyana scati Ndiose culo ñi tñan ꞌin nchgaa tucui.
\v 29 Chaꞌ siꞌi, ¿ñaꞌan ta tsatoꞌo ꞌin nu nchcua tya loꞌo cunta ꞌin neꞌ cuaꞌ ngujui, chaꞌ na a ntsuꞌhui chaꞌ tyiquiꞌo canꞌ? ¿Ta siꞌi cua chaꞌ ti nchcua tya neꞌ loꞌo cunta ꞌin canꞌ?
\v 30 Huareꞌ, ¿ta siꞌyana chen chcui ꞌin hua nchgaa xaa, canꞌ chaꞌ a chcuiꞌ ꞌa hua siꞌyana tyiquiꞌo neꞌ ngujui?
\v 31 ꞌUn jun taꞌa na, nchgaa tsaan cuaꞌ mꞌnin tiqueen loꞌo chaꞌ ndyija, loꞌ nchcuinꞌ chaꞌ re siꞌyana ndyijyin yaꞌ lca tiqueen loꞌo um, sca chaꞌ ti ꞌin na loꞌo Ñi Xꞌnan na Jesucristo.
\v 32 Tsañaꞌan lyee msuꞌhuan juesa ꞌñan quichen Efeso, ¿ñi cunta ntsuꞌhui mdijin scasca nu tiꞌi tuyaaꞌ nten nu nguiaa chaꞌ ꞌin ñaꞌan nchca tiꞌ ꞌni la? Loꞌ chaꞌ a ntsuꞌhui chaꞌ tyiquiꞌo neꞌ ngujui, —tsuꞌhue lati tyisnan cu na loꞌ coꞌo na, siꞌyana quia cuaꞌ caja na—.
\v 33 A taa um yaꞌ caja nu cuñilyiꞌo ꞌin um: Nu ndyiꞌan loꞌo nten nu nducunꞌ a sꞌni culaꞌ tiꞌ canꞌ cuꞌni tñan tsuꞌhue.
\v 34 Canꞌ chaꞌ xñi um cunta ꞌin um loꞌ a cuꞌni um quiꞌya, siꞌyana ntsuꞌhui um a nchca chuꞌhui lyoo um ꞌin Ndiose, loꞌ nchcuinꞌ chaꞌ re siꞌyana xijyiꞌo tiꞌ um.
\v 35 Tinaꞌan ntsuꞌhui nu nchcuiꞌ: ¿Ñaꞌan ta ntsuꞌhui chaꞌ tyiquiꞌo neꞌ ngujui? ¿Ñaꞌan ntsuꞌhui chaꞌ ca chcanꞌ loo neꞌ xiyaꞌ?
\v 36 ꞌUn neꞌ tinto, ta a jlyo tiꞌ um siꞌyana sca mti nu ntya na, a chcua na chaꞌ siꞌi culo nducua la xityi na ꞌin na.
\v 37 Xa ntya na sca na, siꞌi yca canꞌ ntya na, cuiꞌ ca nu ntya na sca mti nu cuaꞌ lca, ñaꞌan nchca tiꞌ sca mti trigo uta scasca la mti,
\v 38 una Ndiose nꞌni ñi chaꞌ nchcua mti canꞌ tsañaꞌan nu nchca tiꞌ ñi, loꞌ cuañaꞌan nꞌni ñi loꞌo cunda scaa mti.
\v 39 Ticuiꞌ cuañaꞌan loꞌo cunanꞌ, siꞌi scañaꞌan ti na: Ntsuꞌhui cunanꞌ nten loꞌ ntsuꞌhui cunanꞌ ꞌni, ntsuꞌhui cunanꞌ cula, a cunta ntsuꞌhui cunanꞌ quiñi.
\v 40 Ticuiꞌ cuañaꞌan la niꞌ cuaan loꞌo chendyu re, cuaꞌ lca na nu ndiꞌin ꞌin na, una siꞌi scañaꞌan ti xaa ꞌin na.
\v 41 Siꞌyana xcañaꞌan xaa ꞌin cucha, loꞌ xcañaꞌan xaa ꞌin cooꞌ, a cunta xcañaꞌan xaa ꞌin cuii, siꞌyana cunda scaa cuii canꞌ cuaꞌ lca ñaꞌan xaa ꞌin na.
\v 42 Ticuiꞌ cuañaꞌan ndiꞌin chaꞌ ꞌin neꞌ ngujui xa tyiquiꞌo neꞌ, nguitsiꞌ neꞌ loꞌ nchca yuu cunanꞌ neꞌ, una tyiquiꞌo neꞌ loꞌo sca cunanꞌ nu a ntsuꞌhui ꞌa chaꞌ tiꞌ jlyo.
\v 43 Nguitsiꞌ neꞌ loꞌo sca cunanꞌ nu cooꞌ, una tyiquiꞌo neꞌ loꞌo sca cunanꞌ nu tsuꞌhue ñaꞌan. Nguitsiꞌ neꞌ loꞌo sca cunanꞌ nu joꞌo ti ndiꞌin chaꞌ ꞌin, una tyiquiꞌo neꞌ loꞌo sca cunanꞌ nu ngula tiꞌ tsala xaa.
\v 44 Nguitsiꞌ neꞌ loꞌo sca cunanꞌ nu ngula loꞌo neꞌ, una tyiquiꞌo neꞌ loꞌo sca cunanꞌ nu cui ti nu taa Ndiose ꞌin neꞌ. Siꞌyana sca ta lca cunanꞌ nten chendyu, loꞌ xca ta lca cunanꞌ nu ljyaan tsoꞌ ꞌin Ndiose.
\v 45 Siꞌyana ndeñaꞌan nchcuiꞌ quityi ꞌin Ndiose: —Mtñan ñi ꞌin culoo yu quiꞌyu nu lca Adán, loꞌ msuꞌhua ñi cusya ꞌin—, nde loo la canꞌ yaan xca Adán, ñi nu lca chendyu ꞌin nten.
\v 46 Una siꞌi culo nducua la jui cunanꞌ nu cui ti ꞌin na, cuiꞌ ca nu mchcuan na sca cunanꞌ nu cuaꞌ ndiꞌin loo chendyu re, la xacanꞌ quiꞌni caꞌan ꞌin na loꞌo sca cunanꞌ nu cui ti.
\v 47 Culoo yu quiꞌyu nguiaaꞌ loꞌo yuu siꞌyana loo chendyu re mdoꞌo yu, una ñi nu cuaꞌ nchca tucua canꞌ mdoꞌo ñi nde niꞌ cuaan, loꞌ cuiꞌ ñi lca Ñi Xꞌnan na.
\v 48 Tsañaꞌan ndiꞌin chaꞌ ꞌin yu nu nguiaaꞌ loꞌo yuu canꞌ, cuañaꞌan ndiꞌin chaꞌ ꞌin nchgaa nu ndiꞌin loo chendyu re. Ticuiꞌ cuañaꞌan loꞌo nchgaa nu nguiaa tsoꞌ ꞌin Ndiose, scañaꞌan ti canꞌ loꞌo ñi.
\v 49 Cuiꞌ tsañaꞌan lcuin nten chendyu nu cuaꞌ ndon loꞌo na, ticuiꞌ cuañaꞌan ntsuꞌhui chaꞌ ca chcanꞌ loo lcuin Ndiose nu ndon loꞌo na.
\v 50 Una chcuinꞌ loꞌo um, ꞌun jun taꞌa na, siꞌyana cunanꞌ nten loꞌo tne neꞌ a tca sten canꞌ seꞌen ndlo Ndiose tñan, ticuiꞌ cuañaꞌan loꞌo sca na nu jlyo, a tca tyaa tiꞌin na loꞌo na nu a ntsuꞌhui chaꞌ jlyo.
\v 51 Cuaꞌ ñii chcuinꞌ xca chaꞌ nu ntsuꞌhui cutsiꞌ ꞌin Ndiose, siꞌi nchgaa na ntsuꞌhui chaꞌ caja na, tyicana nchgaa na ntsuꞌhui chaꞌ chaꞌan ñaꞌan na,
\v 52 tsati ntyin, tsañaꞌan nchca tiꞌ xa ntyinꞌ quiloo na, cuiꞌ xa nu xiyaꞌ ti quine cuhuii ꞌin Ndiose. Siꞌyana ntsuꞌhui chaꞌ quine cuhuii canꞌ, xacanꞌ tyiquiꞌo neꞌ ngujui loꞌo sca cunanꞌ nu cui ti nu a ntsuꞌhui ꞌa chaꞌ jlyo, loꞌ naa neꞌ nu loꞌo ntsuꞌhui chaꞌ chaꞌan ñaꞌan na.
\v 53 Siꞌyana cunanꞌ nu ntsuꞌhui chaꞌ jlyo re ꞌni ꞌni ca chaꞌ chca na sca cunanꞌ nu a ntsuꞌhui ꞌa chaꞌ tiꞌ jlyo, loꞌ cunanꞌ nu ntsuꞌhui chaꞌ caja re chca na sca cunanꞌ nu a ntsuꞌhui ꞌa chaꞌ tiꞌ caja.
\v 54 Xa cuaꞌ mchca cunanꞌ re sca cunanꞌ nu a ntsuꞌhui ꞌa chaꞌ tiꞌ jlyo, loꞌ cunanꞌ nu ntsuꞌhui chaꞌ caja re chca na sca cunanꞌ nu a ntsuꞌhui ꞌa chaꞌ tiꞌ caja, la xacanꞌ tsa tucua ñaꞌan nu nchcuiꞌ quityi ꞌin Ndiose: —Chaꞌ ndyija cuaꞌ yatii chaꞌ cuiyaꞌ ꞌin siꞌyana jui nu mꞌni canan ꞌin.
\v 55 Nuꞌhuin nu lca chaꞌ ndyija, ¿la ncua nuꞌhuin nu mꞌni tiꞌi? ¿Loꞌ la ncua chaꞌ cuiyaꞌ ꞌin—?
\v 56 Tiꞌi nu ndaa chaꞌ ndyija canꞌ yaan na siꞌya quiꞌya nu nducui nten, loꞌ siꞌya lee ꞌin Ndiose, canꞌ chaꞌ nducui neꞌ quiꞌya.
\v 57 Una cuaꞌ xuꞌhue ꞌin Ndiose siꞌyana ndaa ñi juesa ꞌin na, nguiꞌni na canan siꞌya Ñi Xꞌnan na Jesucristo.
\v 58 Canꞌ chaꞌ ꞌun jun taꞌa na nu ndyuꞌhui cuiyaꞌ tinꞌ ꞌin, tyaa um juesa, a cuꞌni naꞌan tiꞌ um, loꞌ cuañaꞌan suꞌhua loo um tñan ꞌin Ñi Xꞌnan na nchgaa xaa, siꞌyana cuaꞌ jlyo tiꞌ um siꞌi cua chaꞌ ti nguiꞌni um tñan ꞌin Ñi Xꞌnan na.
\c 16
\s Chaꞌ ꞌin lcuan 
\p
\v 1 Una cuaꞌ ñii chcuinꞌ chaꞌ ꞌin lcuan nu ntsuꞌhui chaꞌ caꞌan tñan na ꞌin jun taꞌa na, loꞌ tsañaꞌan chaꞌ nu mdiꞌin tyaan loꞌo jun scasca seꞌen ndiyoꞌ tiꞌin jun seꞌen lyiꞌya loo Galacia, cuiꞌ cuañaꞌan cuꞌni um.
\v 2 Culoo tsaan ꞌin cunda scaa snan, cunda scaa um cuaꞌ ñaꞌaan nꞌni um canan, tyiꞌin tya seꞌen um lcuan nu ntsuꞌhui chaꞌ taa um, loꞌ a tsatoꞌo xoꞌ um ꞌin na xa tsaꞌan seꞌen ndiꞌin um.
\v 3 Xa tyiꞌan seꞌen ndiꞌin um, caꞌan tñan ꞌin tucua snan yu nu cuaꞌ ngulo ton um nu tsa loꞌo lcuan canꞌ quichen Jerusalén, loꞌ cuiꞌya yu sca quityi tsaa yu.
\v 4 Loꞌ chaꞌ ñan tiꞌ um siꞌyana ꞌni chaꞌ tsaꞌan, tca tsaꞌan loꞌo yu.
\s Ntsuꞌhui tiquee yu Pablo tsaa yu quichen Corinto
\p
\v 5 Nchca tinꞌ tsaꞌan seꞌen ndiꞌin um xa cuaꞌ mdijin seꞌen lca Macedonia, siꞌyana nde tucueen Macedonia tsaꞌan.
\v 6 Tinaꞌan canꞌ quinun loꞌo um sca coꞌ xaa, uta tsalja tyijyin tsaan nu tlyaꞌ, loꞌ cuañaꞌan tca ta yaaꞌ um ꞌñan loꞌo tucueen nu tiꞌ tsaꞌan lan.
\v 7 A nchca tinꞌ tsa tijin tin seꞌen ndiꞌin um, nducua tloon quinun loꞌo um sca coꞌ xaa, chaꞌ Ñi Xꞌnan na taa ñi chaꞌ cuiyaꞌ.
\v 8 Nanꞌ quinun quichen Efeso re tsayaꞌ tiyaa taꞌa Pentecostés,
\v 9 siꞌyana cuaꞌ nguila sca seꞌen cuꞌnin tñan ꞌin Ndiose, sca tñan nu tlyu loꞌ ntsuꞌhui lyoo, tyicana quiꞌan ꞌa nten tiꞌi tiꞌ ꞌñan siꞌya chaꞌ re.
\v 10 Loꞌ xa tiyaa yu Timoteo seꞌen ndiꞌin um, cuꞌni cunta um ꞌin yu siꞌyana tyiꞌin yu ndon tiꞌ yu, siꞌyana cuiꞌ ñaꞌan nu nꞌnin tñan ꞌin Ñi Xꞌnan na cuañaꞌan nꞌni yu.
\v 11 Canꞌ chaꞌ ñi sca tucui loꞌ a nchca chaꞌ tyiꞌya teꞌen ꞌin yu, cuiꞌ ca nu tsuꞌhue ti ta yaaꞌ um ꞌin yu tucueen nu tsaa yu, siꞌyana nducua tloon tiyaan yu seꞌen ndiꞌin, tsatlyu nta hua ꞌin yu loꞌo jun taꞌa na.
\v 12 Una cuaꞌ ñii chcuinꞌ loꞌo um chaꞌ ꞌin yu Apolo, lyee ꞌa mjñan chaꞌ tsuꞌhue ꞌin yu tsaa yu seꞌen ndiꞌin um loꞌo chcua xnan yu taꞌa na, una a ncua lca tiquee yu tsaa yu cuiꞌ xaa, una tsaa yu xa caja ñaꞌan ꞌin yu.
\s Mslaꞌ taꞌa yu Pablo loꞌo jun Corinto
\p
\v 13 Tyiꞌin tiyaa um, loꞌ tla tyon um loꞌo chaꞌ nu ndiya quiꞌan tiꞌ um, cuꞌni tnu tiquee um loꞌ suꞌhua um juesa.
\v 14 Nchgaa chaꞌ nu cuꞌni um cuꞌni um ꞌin na loꞌo chaꞌ tsuꞌhue nu ndyiꞌo tiquee um.
\v 15 ꞌUn jun taꞌa na, cuaꞌ jlyo tiꞌ um siꞌyana yu Estéfanas loꞌo ta nten ꞌin yu, culo nducua la jun ya quiꞌan tiꞌ jun ꞌin Ndiose seꞌen lyiꞌya loo Acaya, a cunta lyee ꞌa nda yaaꞌ jun ꞌin nchgaa jun taꞌa na.
\v 16 Njñan chaꞌ tsuꞌhue ꞌin um siꞌyana cuꞌni cunta um ꞌin nten nu cuañaꞌan chaꞌ ꞌin, ticuiꞌ cuañaꞌan tucua um tñan chaꞌ nu nchcuiꞌ nchgaa nu nda yaaꞌ loꞌ nsuꞌhua juesa ꞌin loꞌo tñan ꞌin Ndiose.
\v 17 Ndyijyin yaꞌ tsuꞌhue ntsuꞌhui tiqueen siꞌyana yu Estéfanas, yu Fortunato loꞌo Acaico mdiyaan yu seꞌen ndiꞌin, loꞌ nꞌnin cunta siꞌyana tñan loo um mdiyaan yu,
\v 18 siꞌyana mdaa yu chaꞌ tnu tiquee ꞌñan tsañaꞌan nguiꞌni yu loꞌo um, canꞌ chaꞌ suꞌhua loo um nten nu lca cuañaꞌan.
\v 19 Jun taꞌa na nu ndiyoꞌ tiꞌin scasca seꞌen lyiꞌya loo Asia nchcuiꞌ chaꞌ jun ꞌin um. A cunta yu Aquila loꞌo Priscila, tsatlyu loꞌo jun nu ndiyoꞌ tiꞌin naꞌan ꞌin yu, loꞌo nu chcui lca tiquee jun nchcuiꞌ chaꞌ jun ꞌin um loꞌo cunta ꞌin Ñi Xꞌnan na.
\v 20 Nchgaa jun taꞌa na nu ndiꞌin nde re nchcuiꞌ chaꞌ jun ꞌin um. A cunta scasca um chcuiꞌ chaꞌ taꞌa um la siiꞌ scaꞌ um loꞌo sca cusya nu luhui ꞌin um.
\v 21 Nanꞌ yu Pablo ycuinꞌ can nchcuiꞌ chanꞌ ꞌin um loꞌo chaꞌ nu ndaꞌan re.
\v 22 Nu a ndyiꞌo chaꞌ tsuꞌhue tiquee loꞌo Ñi Xꞌnan na Jesucristo, quioꞌ tucua yuhueꞌ chonꞌ canꞌ. Ñi Xꞌnan na ntsuꞌhui chaꞌ quiaan ñi.
\v 23 Chaꞌ tsuꞌhue ꞌin Ñi Xꞌnan na Jesucristo quinu loꞌo um.
\v 24 Lyee lca tiqueen loꞌo um siꞌya Cristo Jesús. Amen.