\id 2CO - Nopala (Chatino) NT [cya] - Mexico 2013 (web 2014)
\h 2 CORINTIOS
\toc1 2 Corintios
\toc2 2 Corintios
\toc3 2Co
\mt1 2 Corintios
\c 1
\s Yu Pablo nchcuiꞌ chaꞌ yu ꞌin jun Corinto
\p
\v 1 Nanꞌ yu Pablo, siꞌya chaꞌ cuiyaꞌ ꞌin Ndiose nguaꞌan tñan Jesucristo ꞌñan tsa ycuinꞌ chaꞌ tsuꞌhue ꞌin ñi. Nanꞌ loꞌo yu taꞌa na Timoteo caꞌan tñan hua sca quityi re ꞌin um, ꞌun nu lca laa ꞌin Ndiose nu ndiyoꞌ tiꞌin quichen Corinto, tsatlyu loꞌo jun taꞌa na nu ndiꞌin seꞌen lyiꞌya loo Acaya.
\v 2 Stina Ndiose loꞌo Ñi Xꞌnan na Jesucristo taa ñi chaꞌ tsuꞌhue chuꞌhui niꞌ cusya ꞌin um, loꞌ cuꞌni ñi chaꞌ tyiꞌin tsuꞌhue um.
\s Tsala ñaꞌan mdijin yu Pablo nu tiꞌi
\p
\v 3 Tlyu ca chaꞌ tsuꞌhue ntsuꞌhui ꞌin Stina Ndiose, cuiꞌ Sti Ñi Xꞌnan na Jesucristo, ñi nu lyee nguiꞌni ꞌtnan ꞌin nten chendyu, cuiꞌ Ndiose nu tsuꞌhue ndaa chaꞌ tnu tiquee ꞌin neꞌ.
\v 4 Cuiꞌ ñi lca nu ndaa chaꞌ tnu tiquee ꞌin na loꞌo nchgaa chaꞌ nu ndijin na, ñaꞌan ca siꞌyana tca taa na chaꞌ tnu tiquee ꞌin nu ndijin cuati loo chaꞌ, cuiꞌ chaꞌ tnu tiquee nu ndaa Ndiose ꞌin na.
\v 5 Tsañaꞌan nu ndijin na scasca nu tiꞌi siꞌya Cristo, cuiꞌ cuañaꞌan siꞌya Cristo nde lyee la ndyijyi chaꞌ tnu tiquee ꞌin na.
\v 6 Chaꞌ huareꞌ ndijin hua nu tiꞌi, cuiꞌ siꞌyana nducua tloo hua tyiꞌo laa um loꞌ caja chaꞌ tnu tiquee ꞌin um. Chaꞌ Ndiose ndaa ñi chaꞌ tnu tiquee ꞌin hua, cuiꞌ siꞌyana caja la chaꞌ tnu tiquee ꞌin um, loꞌ a cuꞌni naꞌan tiꞌ um xa ndijin um scasca nu tiꞌi tsañaꞌan ndijin huareꞌ.
\v 7 Canꞌ chaꞌ a nguiꞌni tucua tiꞌ hua loꞌo um, siꞌyana jlyo tiꞌ hua scañaꞌan ti ndijin na nu tiꞌi, cuañaꞌan tsatlyu ndaa Ndiose chaꞌ tnu tiquee ꞌin na.
\v 8 ꞌUn jun taꞌa na, nchca tiꞌ hua siꞌyana ca cuiyaꞌ tiꞌ um tsala nu tiꞌi mdijin hua seꞌen lyiꞌya loo Asia, loꞌ ndyijyin yaꞌ tla yaan chaꞌ canꞌ ꞌin hua, cuaꞌ lca na a ta loo ꞌa hua, cuaꞌ mxñi tiꞌ hua siꞌyana a tyiꞌo laa ꞌa hua.
\v 9 Chaꞌ ñi siꞌyana xtyi nta ti hua nu caja hua, ñaꞌan ca siꞌyana siꞌi tsa ꞌin ti hua chcua quiloo hua, cuiꞌ ca nu ꞌin Ndiose, ñi nu nꞌni chaꞌ ndyiquiꞌo nten.
\v 10 Cuiꞌ ñi ngulo laa ñi ꞌin hua, loꞌ ndlo laa ñi ꞌin hua cuaꞌ ñii, loꞌ tiꞌ nducua tloo hua culo laa ñi ꞌin hua tuyaaꞌ chaꞌ ndyija siꞌya chaꞌ nu chen nchcui ꞌin hua,
\v 11 a cunta loꞌo um njñan um ꞌin Ndiose siꞌya chaꞌ ꞌin hua, loꞌ cuañaꞌan quiꞌan la nu tyaa xuꞌhue ꞌin Ndiose siꞌya chaꞌ tsuꞌhue nu cuꞌni ñi loꞌo hua, tsañaꞌan nu xcuen ñi ꞌin nchgaa nu njñan ꞌin ñi siꞌya hua.
\s A ncua tsaa yu Pablo quichen Corinto
\p
\v 12 Nde chaꞌ nu tsuꞌhue lati ntsuꞌhui tiquee hua, loꞌ ndii tiꞌ hua siꞌyana ñi ndiꞌin chaꞌ ꞌin hua tloo Ndiose, loꞌo suun ñaꞌan nduꞌhui hua chendyu tloo nten, loꞌ nde lyee lati loꞌo um, una siꞌi loꞌo chaꞌ tiyaa ꞌin nten chendyu, cuiꞌ ca nu siꞌya chaꞌ tsuꞌhue ꞌin Ndiose nu ndaa ñi ꞌin hua.
\v 13 Siꞌyana a nguaꞌan hua chaꞌ nu a tca chcuiꞌ um uta a quiꞌya um chaꞌ tiyaa, canꞌ chaꞌ nducua tloon quiꞌya tsuꞌhue la um cunta chaꞌ re.
\v 14 Loꞌ ñi a nchca quiꞌya tsuꞌhue um cunta ñaꞌan ndiꞌin chaꞌ ꞌin hua, una xa nu quiaan Ñi Xꞌnan na Jesús xacanꞌ ca tsuꞌhue chuꞌhui tiquee um loꞌo hua tsañaꞌan tsuꞌhue ntsuꞌhui tiquee hua loꞌo um cuaꞌ ñii.
\v 15 Siꞌyana cuañaꞌan ndyiꞌo tiqueen loꞌo um, canꞌ chaꞌ ncua tinꞌ tsaꞌan seꞌen ndiꞌin um culo nducua la, loꞌ tsatoꞌo tucua yaꞌ tijin seꞌen ndiꞌin um,
\v 16 ñan tinꞌ tijin seꞌen ndiꞌin um xa tsaꞌan Macedonia, loꞌ xa nde xitucuin tijin xiyaꞌ, xacanꞌ ta yaaꞌ um ꞌñan tsaꞌan seꞌen lca Judea.
\v 17 ¿Ta ñan tiꞌ um siꞌyana tucua chaꞌ tiyaa ꞌñan xa mdiꞌin tyaan chaꞌ re? Xa cuꞌnin sca chaꞌ, ¿ta ñan tiꞌ um cuꞌnin ñaꞌan nu nchca tinꞌ, loꞌ cunen: Tsaꞌan, loꞌ ticuiꞌ xaa: A tsaꞌan?
\v 18 Siꞌyana ñi ndiꞌin chaꞌ ꞌin Ndiose, a tca chcuiꞌ hua loꞌo um: Cuiꞌ na, loꞌ ticuiꞌ xaa: Siꞌi na.
\v 19 Siꞌyana tsañaꞌan nguiaa chaꞌ ꞌin Jesucristo, Sñeꞌ Ndiose, nu mdaꞌan ycuiꞌ hua loꞌo um, nanꞌ loꞌo Silvano loꞌo Timoteo, a ndaꞌan loꞌo hua tucua chaꞌ tiyaa, ta chcuiꞌ hua loꞌo um: Cuiꞌ na, loꞌ ticuiꞌ xaa chcuiꞌ hua: Siꞌi na. Cuiꞌ ca nu scañaꞌan ti nchcuiꞌ hua loꞌo um: Cuiꞌ na, siꞌyana cuañaꞌan nguiaa chaꞌ ꞌin ñi.
\v 20 Siꞌyana nchgaa chaꞌ nu cuaꞌ mdiꞌin tyaa Ndiose loꞌo na, cuiꞌ Cristo lca chaꞌ canꞌ, loꞌ siꞌya ñi nꞌni tnu na ꞌin Ndiose loꞌ nchcuiꞌ na: Amen.
\v 21 Ndiose lca nu nguiꞌni chaꞌ nchca ñi chaꞌ ꞌin hua loꞌo um siꞌya Cristo, a cunta ngulohui ñi ꞌin na,
\v 22 loꞌ mjyiꞌin caꞌan ñi sca cuiyaꞌ ꞌin na, cuiꞌ Espíritu nu ntsuꞌhui niꞌ cusya ꞌin na siꞌyana tca chcuan na chaꞌ tsuꞌhue nu taa ñi.
\v 23 Tloo Ndiose nchcuinꞌ chaꞌ re, ñi nu ndyuꞌhui lyoo cusya ꞌñan, nde chaꞌ nu a nchca tsaꞌan quichen Corinto, siꞌyana a nchca tinꞌ cujui yuhuanꞌ ꞌin um loꞌo chaꞌ nu chcuinꞌ.
\v 24 Una siꞌi siꞌyana xicuꞌni hua ꞌin um tsa quiꞌan tiꞌ um chaꞌ re, cuiꞌ ca nu ndyiꞌo tiquee hua ta yaaꞌ hua ꞌin um siꞌyana nde lyee la ca tsuꞌhue chuꞌhui tiquee um, siꞌyana tla ndon um loꞌo chaꞌ nu ndiya quiꞌan tiꞌ um.
\c 2
\p
\v 1 Canꞌ chaꞌ a msuꞌhuan ꞌan juesa tsaꞌan seꞌen ndiꞌin um, siꞌyana a nchca tinꞌ cuꞌni lyiꞌun cusya ꞌin um.
\v 2 Chaꞌ nanꞌ mꞌnin lyiꞌun cusya ꞌin um, ¿ti nu cuꞌni chuꞌhue lca cusya ꞌñan, chaꞌ siꞌi ꞌun nu mꞌnin lyiꞌun cusya ꞌin?
\v 3 Canꞌ chaꞌ nguaꞌan tñan quityi canꞌ ꞌin um, siꞌyana xa tyiꞌan seꞌen ndiꞌin um, a cuꞌni lyiꞌun um cusya ꞌñan, cuiꞌ ca nu cuꞌni um chaꞌ ca tsuꞌhue chuꞌhui tiqueen, loꞌ nducua tloon tsatlyu ca tsuꞌhue chuꞌhui tiquee na loꞌo um.
\v 4 Xa nguaꞌan quityi canꞌ ꞌin um ndyijyin yaꞌ tiꞌi ngaꞌan ꞌñan, hasta nguꞌya tuꞌhua tiqueen loꞌ nguilo tyiꞌa quiloon, una siꞌi siꞌyana ncua tinꞌ cuꞌnin lyiꞌun cusya ꞌin um, cuiꞌ ca nu siꞌyana ca cuiyaꞌ tiꞌ um tsala ñaꞌan tlyu chaꞌ tsuꞌhue ndyiꞌo tiqueen loꞌo um.
\s Mꞌni yu Pablo chaꞌ tlyu tiꞌ ꞌin nu mꞌni quiꞌya
\p
\v 5 Chaꞌ ntsuꞌhui nu mꞌni lyiꞌun cusya ꞌñan, una siꞌi tsa ꞌñan nanꞌ ti, cuiꞌ ca nu nchgaa um mꞌni lyiꞌun canꞌ cusya ꞌin um, (loo nu a chcuinꞌ lan chaꞌ re loꞌo um).
\v 6 Cuiꞌ lya tsañaꞌan quiꞌan jun mxitijin jun nu tiꞌi ꞌin canꞌ,
\v 7 una cuaꞌ ñii nde tsuꞌhue lati cuꞌni um chaꞌ tlyu tiꞌ ꞌin canꞌ loꞌ taa um chaꞌ tnu tiquee ꞌin, ñaꞌan ca siꞌyana a luꞌun tiꞌ canꞌ siyaꞌ ti.
\v 8 Canꞌ chaꞌ jñan chaꞌ tsuꞌhue ꞌin um, cunan um ñaꞌan chca tsuꞌhue lca tiquee canꞌ xiyaꞌ.
\v 9 Nchgaa canꞌ chaꞌ nguaꞌan tñan quityi canꞌ ꞌin um, loꞌ cuañaꞌan ca cuiyaꞌ tinꞌ chaꞌ na nchca jaꞌan um nchgaa chaꞌ nu ycuinꞌ loꞌo um.
\v 10 Chaꞌ ntsuꞌhui nu cuꞌni um chaꞌ tlyu tiꞌ ꞌin, loꞌon nanꞌ cuꞌnin chaꞌ tlyu tiꞌ ꞌin canꞌ, a cunta chaꞌ ntsuꞌhui chaꞌ nu tiꞌ nducui nchaꞌan ꞌin canꞌ cuaꞌ mꞌnin chaꞌ tlyu tiꞌ ꞌin, loꞌ siꞌya um canꞌ chaꞌ mꞌni chaꞌ re tloo Cristo,
\v 11 ñaꞌan ca siꞌyana a cuñilyiꞌo Laxaꞌan ꞌin na, siꞌyana jlyo tsuꞌhue tiꞌ na tsala ñaꞌan mañan canꞌ.
\s A naꞌan taꞌa yu Pablo loꞌo yu Tito quichen Troas
\p
\v 12 Xa mdyiꞌan quichen Troas siꞌyana chcuinꞌ chaꞌ tsuꞌhue ꞌin Cristo, loꞌ siyaꞌ mdaa Ñi Xꞌnan na chaꞌ cuiyaꞌ cuꞌnin tñan canꞌ,
\v 13 una a nguinu tsuꞌhue lca tiqueen siꞌyana a naꞌan ꞌin yu taꞌa na Tito, canꞌ chaꞌ mslaꞌ taꞌa hua loꞌo jun ndiꞌin canꞌ, loꞌ mdoꞌon nguiꞌan seꞌen lyiꞌya loo Macedonia.
\s Cuaꞌ mꞌni na canan siꞌya Cristo
\p
\v 14 Una tyaa na xuꞌhue ꞌin Ndiose siꞌyana ndaa ñi chaꞌ cuiyaꞌ nꞌni ñi canan nchgaa xaa siꞌya Cristo Jesús, loꞌ tsañaꞌan nguiaa chaꞌ ꞌin sca na nu xityiꞌi, cuiꞌ cuañaꞌan nguine yuꞌhui chaꞌ ꞌin ñi nchgaa seꞌen siꞌya hua.
\v 15 Siꞌyana cunta ꞌin Ndiose lca hua sca na nu xityiꞌi siꞌya Cristo, loꞌ nguine yuꞌhui tyiꞌi canꞌ lja nten nu ntsuꞌhui chaꞌ tyiꞌo laa loꞌo nu ntsuꞌhui chaꞌ quinanꞌ.
\v 16 Tyiꞌi chaꞌ ndyija lca na ꞌin canꞌ loꞌ tsa loꞌo na ꞌin loo chaꞌ ndyija, una tsoꞌ ꞌin nten nu ntsuꞌhui chaꞌ tyiꞌo laa lca na sca chendyu nu cui ti ꞌin neꞌ tsala xaa. Chaꞌ cuañaꞌan ndiꞌin chaꞌ re, ¿ti nu tca tsa loꞌo ꞌin na?
\v 17 Una a loꞌo hua nguiꞌni hua ñaꞌan nꞌni scasca la tucui nu nsuꞌhua chaꞌ cuiñi loo chaꞌ ꞌin Ndiose loꞌ nguiꞌni jyinsya loꞌo chaꞌ canꞌ, cuiꞌ ca nu ñi ndiꞌin chaꞌ ꞌin hua tloo Ndiose, loꞌ cuiꞌ cunta ꞌin ñi ndaꞌan ycuiꞌ hua chaꞌ tsuꞌhue ꞌin Cristo.
\c 3
\s Ndaꞌan ycuiꞌ yu nguso ꞌin Ndiose chaꞌ nu cui ti
\p
\v 1 ¿Ta xiyaꞌ tyisnan taa hua suun loꞌo um siꞌyana chuꞌhui lyoo um ꞌin hua? ¿Ta xtyi tiꞌ um jñan um sca quityi ꞌin hua nu taa suun ñaꞌan nten lca hua, uta nchca tiꞌ um taa um sca quityi chcua yaaꞌ hua, tsañaꞌan nꞌni scasca la tucui?
\v 2 ¿Ta siꞌi cuiꞌ um lca um quityi canꞌ, cuiꞌ sca quityi nu cuaꞌ ntsuꞌhui niꞌ cusya ꞌin hua, nu nchgaa tucui ndyuꞌhui lyoo loꞌ nchcuiꞌ ꞌin na?
\v 3 Nchca chcanꞌ loo siꞌyana lca um sca quityi nguaꞌan Cristo siꞌya chaꞌ nu ycuiꞌ hua loꞌo um, nguaꞌan ñi quityi canꞌ una siꞌi loꞌo tyintya, cuiꞌ ca nu loꞌo Espíritu ꞌin Ndiose, ñi nu loꞌo ca, ñi siꞌi loo caꞌ quee nguaꞌan scua chaꞌ canꞌ, cuiꞌ ca nu nguinu scua na niꞌ cusya ꞌin um.
\v 4 Siꞌya Cristo ndyijyi chaꞌ tnu tiquee ꞌin hua tloo Ndiose,
\v 5 una siꞌi loꞌo cunta ꞌin hua ndon tiyaa hua, uta ticuiiꞌ hua nda hua loo hua, cuiꞌ ca nu ndon tiyaa hua siꞌya chaꞌ cuiyaꞌ ꞌin Ndiose.
\v 6 Siꞌya ñi canꞌ chaꞌ nchca nꞌni hua tñan re, sca chaꞌ nu cui ti mdiꞌin tyaa ñi, una siꞌi loꞌo cunta ꞌin lee, cuiꞌ ca nu ljyaan na loꞌo tsoꞌ ꞌin cusya ꞌin na, siꞌyana lee canꞌ ndlo na tñan caja nten, una Espíritu ndaa chendyu ꞌin neꞌ.
\v 7 Lee nu nguinu scua loo caꞌ quee nu ndlo quiꞌya ꞌin nten loo chaꞌ ndyija, chaꞌ yan loꞌo na sca chaꞌ cuiyaꞌ nu tlyu, nu hasta neꞌ Israel loꞌ a ncua ñaꞌan neꞌ tloo Moisé, loo nu lyee nchaꞌan xaa ꞌin na, sca xaa nu ntsuꞌhui chaꞌ tsatii chaꞌ ꞌin.
\v 8 ¿Ñaꞌan la ca tñan tsuꞌhue nu cuꞌni Espíritu loꞌo na?
\v 9 Chaꞌ cuañaꞌan tlyu chaꞌ cuiyaꞌ yan loꞌo lee nu ndlo quiꞌya ꞌin nten, una nde lyee lati tlyu chaꞌ cuiyaꞌ yan loꞌo chaꞌ nu tca xnu luhui ꞌin na tloo Ndiose.
\v 10 Siyaꞌ tlyu chaꞌ cuiyaꞌ yan loꞌo lee canꞌ, una yatii chaꞌ ꞌin na, siꞌyana a mchcua taꞌa chaꞌ ꞌin na tsañaꞌan tlyu chaꞌ cuiyaꞌ re.
\v 11 Chaꞌ tlyu chaꞌ cuiyaꞌ ꞌin nu cuaꞌ mdijin canꞌ, una tlyu lati chaꞌ cuiyaꞌ yan loꞌo chaꞌ nu a tsatii ꞌa re.
\v 12 Chaꞌ cuañaꞌan nducua tloo hua loꞌo chaꞌ re, una a ntsen hua chcuiꞌ la hua chaꞌ re,
\v 13 siꞌi ñaꞌan mꞌni Moisé xa mducun yu tloo yu loꞌo sca teꞌ siꞌyana a ñaꞌan neꞌ Israel ñaꞌan nguia ndyuhuiꞌ xaa canꞌ tloo yu,
\v 14 siꞌyana mchcun chaꞌ tiyaa ꞌin neꞌ, loꞌ cuañaꞌan ndiꞌin chaꞌ ꞌin nten hasta cuaꞌ ñii xa nchcuiꞌ neꞌ quityi cula canꞌ, cuaꞌ lca na tiꞌ nchcun tloo neꞌ loꞌo teꞌ canꞌ, una scati Cristo tca sla ñi chaꞌ tiyaa ꞌin neꞌ.
\v 15 Hasta cuaꞌ ñii xa nchcuiꞌ neꞌ quityi nu nguaꞌan Moisé, ticuiꞌ teꞌ canꞌ nchcui ndijin na niꞌ cusya ꞌin neꞌ.
\v 16 —Una xa ndyaa tiꞌ nten ꞌin Ñi Xꞌnan na, nguitan teꞌ canꞌ tloo neꞌ—.
\v 17 Siꞌyana Ñi Xꞌnan na lca ñi Espíritu, loꞌ seꞌen ntsuꞌhui Espíritu ꞌin Ñi Xꞌnan na, ñi sca chaꞌ loꞌ a nchcui ndijin.
\v 18 Nchgaa na nanꞌ ꞌya na loo cunan seꞌen nchcanꞌ xaa ꞌin Ñi Xꞌnan na, ñi a nchcun ꞌa tloo na, loꞌ cunda scaa tsaan nguia nxitsaꞌan ñi ꞌin na tsañaꞌan nu lca ñi ycuiꞌ ñi, loꞌ cuiꞌ Espíritu ꞌin Ñi Xꞌnan na nguiꞌni ñi chaꞌ re.
\c 4
\p
\v 1 Ndiose lyee mñaꞌan ꞌtnan tiꞌ ñi ꞌin hua, canꞌ chaꞌ a nguiꞌni naꞌan tiꞌ hua loꞌo tñan re nu mxnu ñi ꞌin hua.
\v 2 Nxcuan tloo hua nchgaa chaꞌ ngunanꞌ nu nguiꞌni cunan ti nten, chaꞌ nu ndaa chaꞌ jyiꞌo ꞌin neꞌ, loꞌ a ndaꞌan hua loꞌo chaꞌ mañan, uta nxitsaꞌan hua chaꞌ ꞌin Ndiose. Cuiꞌ ca nu ndlyo scua la hua chaꞌ nu ñi loꞌo nchgaa tucui, loꞌ ca cuiyaꞌ tiꞌ neꞌ siꞌyana nduꞌhui hua sca chendyu nu luhui tloo Ndiose.
\v 3 Chaꞌ ntsuꞌhui nchcun chaꞌ tsuꞌhue ꞌin Cristo nu ndaꞌan ycuiꞌ hua, una ntsuꞌhui nchcun na ꞌin nten nu ntsuꞌhui chaꞌ quinanꞌ cusya ꞌin.
\v 4 Loꞌ siꞌya laxaꞌan nu ndlo tñan loo chendyu re, mducun chaꞌ tiyaa ꞌin nten nu a ndiya quiꞌan tiꞌ ꞌin Ndiose, ñaꞌan ca siꞌyana a quiꞌni xaa ꞌin neꞌ, cuiꞌ xaa nu ljyaan loo chaꞌ tsuꞌhue ꞌin Cristo, ñi nu lca lcuin ca Ndiose.
\v 5 Siꞌyana a ndaꞌan ycuiꞌ hua chaꞌ nu ꞌin hua, cuiꞌ ca nu nchcuiꞌ hua chaꞌ ꞌin Ñi Xꞌnan na Jesucristo, loꞌ cunta ꞌin huareꞌ lca hua nguso ꞌin um siꞌya chaꞌ tsuꞌhue nu ndyiꞌo tiquee hua siꞌya Jesús.
\v 6 Ndiose, ñi nu ngulo tñan siꞌyana xtyi xaa seꞌen tla yta, cuiꞌ ñi lca ñi xaa nu msti niꞌ cusya ꞌin na, ñaꞌan ca siꞌyana quila chaꞌ tiyaa ꞌin na, loꞌ chuꞌhui lyoo na tsala ñaꞌan tsuꞌhue ñaꞌan xaa ꞌin Ndiose nu chcanꞌ siꞌya Jesucristo.
\s Chcua quiloo na chaꞌ nu ndiya quiꞌan tiꞌ na
\p
\v 7 Una cuaꞌ ntsuꞌhui chaꞌ cuilyiyaꞌ re niꞌ cusya ꞌin hua, huareꞌ nu nguiaaꞌ loꞌo yuu, siꞌyana ca chcanꞌ loo tsala ñaꞌan tlyu chaꞌ cuiyaꞌ ꞌin Ndiose, loꞌ siꞌi loꞌo cunta ꞌin hua.
\v 8 Siyaꞌ ndijin hua scasca nu tiꞌi, una nda loo hua, siyaꞌ a jlyo ꞌa tiꞌ hua ñaꞌan ca, una siꞌi canꞌ chaꞌ nxiyaꞌ tiꞌ hua,
\v 9 siyaꞌ ndyijyi nu nducui nchaꞌan ꞌin hua, una a ndla yaaꞌ Ndiose ꞌin hua, loꞌ siyaꞌ njyiꞌin quee neꞌ ꞌin hua, una a nchca cujlyo neꞌ ꞌin hua,
\v 10 la ñaꞌan ti ndaꞌan hua, a sꞌni cuiꞌ chaꞌ ndyija nta hua siꞌya Jesús, ñaꞌan ca siꞌyana ca chcanꞌ loo chendyu ꞌin Jesús loo chendyu ꞌin hua.
\v 11 Siꞌyana tsalca huareꞌ nu tiꞌ loꞌo, nchgaa xaa ndon tiyaa hua caja hua siꞌya Jesús, seꞌen nu ca chcanꞌ loo chendyu ꞌin Jesús loo chendyu ꞌin hua, huareꞌ nu lca cunanꞌ nu ntsuꞌhui chaꞌ tsatii chaꞌ ꞌin.
\v 12 Cuañaꞌan chen nchcui ꞌin hua nchgaa xaa loꞌo chaꞌ ndyija, una ꞌun cuaꞌ jui chendyu ꞌin um loꞌo tsoꞌ nu ꞌin Ndiose.
\v 13 Scañaꞌan ti lca tiquee hua loꞌo nu ycuiꞌ sca chaꞌ nu nguinu scua loo quityi ꞌin Ndiose: —Nanꞌ ya quiꞌan tinꞌ, canꞌ chaꞌ ycuinꞌ—, cuiꞌ cuañaꞌan huareꞌ, ndiya quiꞌan tiꞌ hua, canꞌ chaꞌ nchcuiꞌ hua.
\v 14 Jlyo tiꞌ hua siꞌyana ñi nu mꞌni chaꞌ mdyiquiꞌo Ñi Xꞌnan na Jesús, ticuiꞌ cuañaꞌan cuꞌni ñi chaꞌ tyiquiꞌo na siꞌya Jesús, loꞌ tsatlyu tsa loꞌo ñi ꞌin na tloo Ndiose.
\v 15 Ndijin hua nchgaa nu tiꞌi re siꞌya um, ñaꞌan ca siꞌyana ca quiꞌan la nten nu chcua chaꞌ tsuꞌhue ꞌin Ndiose, loꞌ cuañaꞌan nde lyee la tyaa canꞌ xuꞌhue ꞌin ñi loꞌ cuꞌni tnu ꞌin ñi.
\v 16 Canꞌ chaꞌ a nguiꞌni naꞌan tiꞌ hua, siyaꞌ nguia nchca cula hua, una cusya ꞌin hua nde lyee la nguia nchca cui na cunda scaa tsaan.
\v 17 Tsa chinꞌ tiꞌi nu ndijin hua cuaꞌ ñii lca na chaꞌ nu tsa tyijyin ti, una tiyaa xaa nde lyee la tlyu chaꞌ tsuꞌhue quiꞌni caꞌan ꞌin hua, loꞌ tsala xaa tyiꞌin hua loo xaa ꞌin ñi,
\v 18 canꞌ chaꞌ a chcua quiloo hua chaꞌ nu chcanꞌ loo chendyu re, cuiꞌ ca nu chcua quiloo hua chaꞌ nu a chcanꞌ, siꞌyana chaꞌ nu chcanꞌ tsa ndyijyin ti chaꞌ ꞌin na, una chaꞌ nu a chcanꞌ a ntsuꞌhui chaꞌ tsatii na.
\c 5
\p
\v 1 Cuaꞌ jlyo tiꞌ na siꞌyana lca na sca cunanꞌ nu joꞌo ti ndiꞌin chaꞌ ꞌin tsañaꞌan nguiaa chaꞌ ꞌin sca teꞌ naꞌan, loꞌ xa nu jlyo cunanꞌ re Ndiose cuaꞌ mdiꞌin tyaa ñi chaꞌ siꞌyana taa ñi xca cunanꞌ nu cui ti ꞌin na, sca naꞌan nu chcuan na cunta la niꞌ cuaan tsala xaa, nu a nguiaaꞌ loꞌo juesa ꞌin nten chendyu.
\v 2 Canꞌ chaꞌ hasta ndiyaan tiꞌ na siꞌyana lyee lca tiquee na nu cuaꞌ chcuan na cunta cunanꞌ nu cui ti canꞌ la niꞌ cuaan,
\v 3 cuañaꞌan chca cui cunanꞌ na loꞌ a quinu na loꞌo chaꞌ jyiꞌo.
\v 4 Lja ndiꞌin na loo chendyu re hasta ndiyaan tiꞌ na loo nu tiꞌi ngaꞌan ꞌin na, siꞌyana a nchca tiꞌ na quinu na loꞌo chaꞌ jyiꞌo siꞌya cunanꞌ re, cuiꞌ ca nu lca tiquee na chca cui na loꞌ chaꞌan na loꞌo chendyu nu a tsatii ꞌa.
\v 5 Ndiose lca nu mdiꞌin tyaa chaꞌ re loꞌo na, cuaꞌ mdaa ñi sca cuiyaꞌ ꞌin na, cuiꞌ Espíritu nu ntsuꞌhui niꞌ cusya ꞌin na, siꞌyana tca chcuan na chaꞌ tsuꞌhue ꞌin ñi.
\v 6 Canꞌ chaꞌ scañaꞌan ti chcua quiloo na loo chaꞌ tsuꞌhue re, siꞌyana cuaꞌ jlyo tiꞌ na tsalja ndon na loo chendyu re a nchca tya tiꞌin na loꞌo Ñi Xꞌnan na,
\v 7 (siꞌyana loo chendyu re nducua quiloo na chaꞌ nu a chcanꞌ, loꞌ a nchcui nchaꞌan na chaꞌ nu chcanꞌ),
\v 8 cuiꞌ ca nu nducua tloo na, loꞌ ca lca tiquee na tyiꞌin na loꞌo Ñi Xꞌnan na loꞌ xnu tiꞌin na cunanꞌ re.
\v 9 Canꞌ chaꞌ nchgaa xaa quia nan na ñaꞌan nu quinu tsuꞌhue tiquee ñi loꞌo na, lja nu ndiꞌin na loo chendyu re uta xa cuaꞌ mdiyaa na tloo ñi.
\v 10 Siꞌyana nchgaa na ntsuꞌhui chaꞌ tiya ton na tloo Cristo seꞌen nꞌni cuiyaꞌ ñi chaꞌ, cunda scaa na ntsuꞌhui chaꞌ xñi siyaꞌ na cuaꞌ ñaꞌaan tñan mꞌni na lja mdiꞌin na loo chendyu re, ta mꞌni na tñan tsuꞌhue uta chaꞌ ngunanꞌ.
\s Ncuan xuꞌhue Ndiose ꞌin na siꞌya Cristo
\p
\v 11 Jlyo tiꞌ na cuꞌni Ñi Xꞌnan na xñan bsya ꞌin nten, canꞌ chaꞌ nan hua ñaꞌan nu quiꞌya neꞌ chaꞌ tiyaa, una Ndiose jlyo tsuꞌhue tiꞌ ñi ñaꞌan nten lca hua, loꞌ nducua tloo hua siꞌyana loꞌo um tca quiꞌya um cunta chaꞌ re.
\v 12 Una siꞌi siꞌyana nchca tiꞌ hua taa hua loo hua loꞌo um, cuiꞌ ca nu ndaa hua seꞌen siꞌyana ca tsuꞌhue chuꞌhui tiquee um loꞌo hua, loꞌ cuañaꞌan tca xcuen um ꞌin nu nchcua quiloo ꞌin nten, loꞌ siꞌi chaꞌ nu ntsuꞌhui niꞌ cusya ꞌin neꞌ.
\v 13 Chaꞌ xqueꞌ tiꞌ um ndiyoꞌ hua, una ndiyoꞌ hua siꞌya chaꞌ ꞌin Ndiose, loꞌ chaꞌ chcui chaꞌ tiyaa ꞌin hua, cuiꞌ siꞌyana lyee lca tiquee hua loꞌo um.
\v 14 Cuiꞌ chaꞌ tsuꞌhue ꞌin Cristo lca nu nxicuꞌni ꞌin hua loꞌo tñan re, loꞌ ncua cuiyaꞌ tiꞌ hua siꞌyana scati ñi ngujui ñi tñan loo nchgaa tucui, cuañaꞌan yatoꞌo nchgaa na ngujui na loꞌo tsoꞌ nu ꞌin Ndiose,
\v 15 loꞌ siꞌyana ngujui ñi tñan loo nchgaa tucui, naa nu ndiya quiꞌan tiꞌ ꞌin ñi a tyuꞌhui ꞌa na chendyu loꞌo cunta ꞌin na, cuiꞌ ca nu loꞌo cunta ꞌin ñi nu ngujui tñan loo na loꞌ mdyiquiꞌo ñi.
\v 16 Cuaꞌ ñii chcui nu nguiaa nde loo re, a cuꞌni cuiyaꞌ ꞌa hua ꞌin nten ñaꞌan ndyon neꞌ loꞌo tsoꞌ ꞌin cunanꞌ neꞌ, loꞌ siyaꞌ cuañaꞌan yuꞌhui lyoo hua ꞌin Cristo tsañaꞌan nu ndyon ñi, una cuaꞌ ñii xcañaꞌan ntsuꞌhui lyoo hua ꞌin ñi.
\v 17 Siꞌyana nu cuaꞌ nguiaa tsoꞌ ꞌin Cristo, sca nten nu cui ti lca canꞌ, cuaꞌ mdijin chaꞌ cula canꞌ, loꞌ cuaꞌ ñii mchca cui nchgaa loo chaꞌ.
\v 18 Nchgaa chaꞌ re ljyaan na tsoꞌ ꞌin Ndiose, ñi nu mꞌni chaꞌ ca tsuꞌhue chaꞌ ꞌin na loꞌo ñi siꞌya Cristo, mxnu ñi tñan re ꞌin hua siꞌyana chcuiꞌ hua loꞌo nten ñaꞌan ntsuꞌhui chaꞌ quinu tsuꞌhue chaꞌ ꞌin neꞌ loꞌo ñi.
\v 19 Ndiose sca chaꞌ ti ꞌin ñi loꞌo Cristo xa nguinu tsuꞌhue chaꞌ ꞌin na loꞌo ñi, a ndlo quiꞌya ñi ꞌin nten, loꞌ yatoꞌo mxnu ñi tñan re ꞌin hua siꞌyana chcuiꞌ hua loꞌo nten ñaꞌan ntsuꞌhui chaꞌ quinu tsuꞌhue chaꞌ ꞌin neꞌ loꞌo ñi.
\v 20 Canꞌ chaꞌ lca hua nten nu ndaꞌan loꞌo chaꞌ cuiyaꞌ ꞌin Cristo, ñaꞌan loo chaꞌ siꞌyana Ndiose lca nu nchcuiꞌ loꞌo um tñan loo hua. Jñan hua chaꞌ tsuꞌhue ꞌin um loꞌo chaꞌ cuiyaꞌ ꞌin Cristo siꞌyana cuꞌni chuꞌhue um chaꞌ ꞌin um loꞌo Ndiose.
\v 21 Yatoꞌo msuꞌhua Ndiose quiꞌya nducui na chonꞌ Cristo, ñi nu a sca quiꞌya nducui, ñaꞌan ca siꞌyana quinu luhui na tloo Ndiose siꞌya ñi.
\c 6
\p
\v 1 Tsatlyu nguiꞌni hua tñan loꞌo Ndiose, canꞌ chaꞌ jñan hua chaꞌ tsuꞌhue ꞌin um siꞌyana siꞌi cua chaꞌ ti cuan xuꞌhue um chaꞌ tsuꞌhue nu mdoꞌo tiquee Ndiose,
\v 2 siꞌyana nchcuiꞌ quityi ꞌin Ndiose: —Cuiꞌ ꞌa ñaꞌan tsaan mꞌnin cunta chaꞌ nu ycuiꞌ um, cuiꞌ cuañaꞌan loꞌo tsaan nu nguinu chaꞌ tyiꞌo laa um, cuaꞌ mdan yaanꞌ ꞌin um. Cuaꞌ ñii ya tucua tsaan canꞌ, cuiꞌ tsaan nu tca tyiꞌo laa um—.
\v 3 Cunan hua ñaꞌan siꞌyana ñi sca tucui loꞌ a taa quiꞌya ꞌin hua, siꞌyana a quinanꞌ tñan nguiꞌni hua,
\v 4 cuiꞌ ca nu ndloꞌo xñan hua ꞌin hua chcui ñaꞌan nguiaa chaꞌ ꞌin nguso ꞌin Ndiose. Nda loo hua loꞌo scasca chaꞌ, uta xa lyee ndijin hua nu tiꞌi, uta loꞌo chaꞌ nu ꞌni ꞌin hua, uta loꞌo chaꞌ nduhue tiꞌ nu nsñi suꞌhua yaaꞌ ꞌin hua,
\v 5 ta xa njyiꞌin neꞌ ꞌin hua, uta nsuꞌhua neꞌ ꞌin hua naꞌan chcuan, ta xa nxilo tiꞌin taꞌa neꞌ siꞌya hua, a cunta xa nguiꞌni hua tñan lyee yaꞌ, uta nguitsa sla hua, loꞌ ta ndijin yteꞌ tiꞌ hua.
\v 6 Cuiꞌ cuañaꞌan nduꞌhui hua sca chendyu nu luhui, tsuꞌhue ndyiꞌya hua cunta chaꞌ nu ñi, ntsuꞌhui chaꞌ tlyu tiꞌ ꞌin hua loꞌo scasca tucui, ntsuꞌhui chaꞌ tsuꞌhue ꞌin hua loꞌo nten, cuiꞌ Espíritu nu Luhui ꞌin Ndiose ntsuꞌhui niꞌ cusya ꞌin hua, ñi ndiꞌin chaꞌ ꞌin hua tsañaꞌan ndyiꞌo chaꞌ tsuꞌhue tiquee hua loꞌo nten,
\v 7 nchcuiꞌ hua chaꞌ nu ñi, loꞌ ndaꞌan loꞌo hua chaꞌ cuiyaꞌ ꞌin Ndiose, chcua tyiꞌiin tsoꞌ tca culaa hua ꞌin hua siꞌya chaꞌ nu ñi ndiya quiꞌan tiꞌ hua,
\v 8 ntsuꞌhui nu nscuen cuaan ꞌin hua loꞌ ntsuꞌhui nu ndyiꞌya teꞌen ꞌin hua, cuiꞌ cuañaꞌan ntsuꞌhui nu nxiychaꞌ ꞌin hua loꞌ ntsuꞌhui nu tsuꞌhue ndaa suun chaꞌ ꞌin hua, ntsuꞌhui nu nchcuiꞌ siꞌyana lca hua sca nu cuiñi, una huareꞌ ñi ndiꞌin chaꞌ ꞌin hua.
\v 9 Nꞌni neꞌ cunta siꞌyana a tucui ndyuꞌhui lyoo ꞌin hua, siyaꞌ mscua cueen chaꞌ ꞌin hua, chen nchcui ꞌin hua loꞌo chaꞌ ndyija, una tiꞌ loꞌo hua, lyee nxitijin neꞌ ꞌin hua nu tiꞌi, una a nchca caja hua,
\v 10 cuaꞌ lca na luꞌun tiꞌ hua, una nchgaa xaa tsuꞌhue ntsuꞌhui tiquee hua, tiꞌi ñaꞌan chendyu ꞌin hua, una quiꞌan nu cuaꞌ nguiꞌni cuilyiyaꞌ hua ꞌin, siyaꞌ a sca na ndiꞌin ꞌin hua, una nchgaa chaꞌ cuaꞌ jui ꞌin hua.
\v 11 Canꞌ chaꞌ cuaꞌ ñii, ꞌun jun taꞌa na Corinto, cuaꞌ ycuiꞌ la hua loꞌo um nchgaa chaꞌ, loꞌ msla hua cusya ꞌin hua loꞌo um.
\v 12 Ñi siyaꞌ loꞌ a mscuan tloo hua ꞌin um, tyicana ꞌun mducun um cusya ꞌin um loꞌo hua.
\v 13 Loꞌ siꞌyana ca suꞌhua chaꞌ ꞌin na loꞌo um, (nchcuinꞌ loꞌo um tsañaꞌan nchcuiꞌ na loꞌo sca sñeꞌ na), xla um cusya ꞌin um loꞌ cuan xuꞌhue um ꞌin hua.
\s Lca na laa ꞌin Ndiose nu loꞌo ca
\p
\v 14 A nchca chaꞌ ca sca chaꞌ ti ꞌin um loꞌo nten nu a ndiya quiꞌan tiꞌ ꞌin Ndiose, siꞌyana ¿ñaꞌan ta tca chcua taꞌa chaꞌ tsuꞌhue loꞌo chaꞌ ngunanꞌ? ¿Ta nchcua taꞌa chaꞌ ꞌin xaa loꞌo tla yta?
\v 15 ¿Ta nchcua taꞌa chaꞌ ꞌin Laxaꞌan loꞌo Cristo? ¿Ta suꞌhua ñaꞌan nguiaa chaꞌ ꞌin sca nu ndiya quiꞌan tiꞌ loꞌo nu a ndiya quiꞌan tiꞌ?
\v 16 ¿Ta tca ca sca chaꞌ ti laa ꞌin Ndiose loꞌo lcuin joꞌo? ꞌUn lca um laa ꞌin Ndiose, ñi nu loꞌo ca, cuiꞌ ñaꞌan juin Ndiose: —Nanꞌ tyiꞌin sca seꞌen ti loꞌo neꞌ, loꞌ quilyun lja neꞌ, can Ndiose ꞌin neꞌ loꞌ cuiꞌ neꞌ ca neꞌ quichen ꞌñan—.
\v 17 Canꞌ chaꞌ ndeñaꞌan juin Ñi Xꞌnan na: —Tyiꞌo tsoꞌ um lja nten cua, loꞌ tyiꞌin um xca seꞌen, loꞌ ñi a sten yuꞌhui um loꞌo chaꞌ nu cooꞌ, loꞌ nanꞌ cuan xuꞌhuen ꞌin um,
\v 18 loꞌ cuꞌni um cunta siꞌyana nanꞌ lcan Sti um, loꞌ ꞌun lca um sñenꞌ, yu quiꞌyu uta nu cunaꞌan, ndeñaꞌan nchcuiꞌ Ñi Xꞌnan na, ñi nu tla la chaꞌ ꞌin—.
\c 7
\p
\v 1 Canꞌ chaꞌ ꞌun jun nu ndyuꞌhui cuiyaꞌ tiꞌ hua ꞌin, chaꞌ cuañaꞌan tlyu chaꞌ tsuꞌhue nu mdiꞌin tyaa Ndiose loꞌo na, tyiꞌo tsoꞌ na siiꞌ nchgaa chaꞌ ngunanꞌ loꞌ suhui na ꞌin na loꞌo tsoꞌ ꞌin cunanꞌ na loꞌo cusya ꞌin na, loꞌ cunan na ñaꞌan tyuꞌhui na luhui ti siꞌya ytsen nu ntsuꞌhui ꞌin na tloo Ndiose.
\s Tsuꞌhue ntsuꞌhui tiquee yu Pablo siꞌya jun Corinto
\p
\v 2 Cuan xuꞌhue um ꞌin hua, siꞌyana a tucui nu mꞌni hua tiꞌi loꞌo, ñi a tucui nu ngulo ngunanꞌ hua ꞌin, loꞌ ñi a tucui nu nguñi lyiꞌo hua.
\v 3 A nchcuiꞌ hua chaꞌ re siꞌyana culo quiꞌya hua ꞌin um, cuiꞌ ca nu xiyaꞌ nchcuiꞌ hua siꞌyana lyee ꞌa lca tiquee hua loꞌo um, siyaꞌ caja na uta tyiꞌin na tsatlyu loꞌo um.
\v 4 Ndyijyin yaꞌ la tiquee hua loꞌo um, ndiya ꞌa tiꞌ hua ñaꞌan nguiaa chaꞌ ꞌin um, loꞌ jui chaꞌ tnu tiquee ꞌin hua, a cunta lyee ꞌa tsuꞌhue ntsuꞌhui tiquee hua siyaꞌ ndijin hua scasca nu tiꞌi.
\v 5 Chaꞌ ñi siꞌyana xa mdiyaa hua seꞌen lca Macedonia, a jui ñaꞌan xitñanꞌ hua, cuiꞌ ca nu chcua tyiꞌiin tsoꞌ mdijin hua chaꞌ, sca tsoꞌ canꞌ mxitijin neꞌ ꞌin hua nu tiꞌi, a cunta ytsen hua.
\v 6 Una Ndiose, ñi nu ndaa chaꞌ tnu tiquee ꞌin nu luꞌun tiꞌ cusya ꞌin, mdaa ñi chaꞌ tnu tiquee ꞌin hua xa mdiyaa yu Tito seꞌen ndiꞌin hua.
\v 7 Loꞌ siꞌi tsaloo siꞌyana mdiyaa yu, cuiꞌ ca nu siꞌya chaꞌ tnu tiquee nu mdaa um ꞌin yu jui chaꞌ tnu tiquee ꞌin hua, mdaa yu suun siꞌyana lyee lca tiquee um loꞌo hua, ñaꞌan nguꞌya tuꞌhua tiquee um, tsala ñaꞌan nsuꞌhua um chaꞌ nduhue tiꞌ tiquee um siꞌya hua, canꞌ chaꞌ nu lyee lati tsuꞌhue ntsuꞌhui tiquee hua cuaꞌ ñii.
\v 8 Siyaꞌ mꞌnin lyiꞌun cusya ꞌin um loꞌo quityi nu nguaꞌan tñan canꞌ, una siꞌi canꞌ chaꞌ tiꞌi ntsuꞌhui tiqueen. Chaꞌ ñi siꞌyana msuꞌhuan chaꞌ nduhue tiꞌ tiqueen xa nguaꞌan tñan ꞌin na, una xiꞌi tiꞌ nguluꞌun tiꞌ um siꞌya chaꞌ canꞌ.
\v 9 Una cuaꞌ ñii mchca tsuꞌhue lca tiqueen, una siꞌi siꞌyana nguluꞌun tiꞌ um, cuiꞌ ca nu siꞌyana jui ñaꞌan xitsaꞌan um chaꞌ tiyaa ꞌin um. Chaꞌ xiꞌin canꞌ ya loꞌo na ꞌin um tloo Ndiose, loꞌ a sca tiꞌi mꞌni hua loꞌo um.
\v 10 Chaꞌ xiꞌin nu ljyaan tsoꞌ ꞌin Ndiose cuꞌni na chaꞌ quia nan na ꞌin ñi, cuiꞌ ñi xitsaꞌan ñi chaꞌ tiyaa ꞌin na seꞌen nu tyiꞌo laa na, loꞌ a tsaa tiꞌi tiquee na siꞌya chaꞌ canꞌ, una chaꞌ xiꞌin nu ljyan loꞌo chendyu re ndyiꞌan loꞌo na ꞌin neꞌ loo chaꞌ ndyija.
\v 11 Una cuaꞌ ñii siꞌyana nguia nan um ꞌin Ndiose siꞌya chaꞌ xiꞌin canꞌ, tsala ñaꞌan tsuꞌhue mꞌni na loꞌo um: Tsacua seꞌen ngulaa um ꞌin um, loꞌ cua coꞌ seꞌen msinꞌ tiꞌ um, loꞌ cua seꞌen ytsen um, lyee lca tiquee um loꞌon, loꞌ ngunan um ñaꞌan nu quinu tsuꞌhue chaꞌ canꞌ, a cunta mꞌni cuiyaꞌ um chaꞌ canꞌ loꞌo chaꞌ nu ñi. Nchgaa chaꞌ canꞌ nguloꞌo um ꞌin um siꞌyana a sca chaꞌ nducui nchaꞌan ꞌin um.
\v 12 Siyaꞌ nguaꞌan tñan quityi canꞌ ꞌin um, una siꞌi siꞌya chaꞌ ꞌin nu mꞌni tiꞌi canꞌ uta nu ncua tiꞌi ꞌin canꞌ, cuiꞌ ca nu siꞌyana tloo Ndiose ca chcanꞌ loo tsala ñaꞌan ntsuꞌhui yuhue tiꞌ hua ꞌin um.
\v 13 Siꞌya chaꞌ re tsatlyu jui chaꞌ tnu tiquee ꞌin na loꞌo um, una nde lyee lati tsuꞌhue ntsuꞌhui tiquee hua tsatlyu loꞌo yu Tito, siꞌya chaꞌ tnu tiquee nu mdaa um ꞌin yu.
\v 14 Chaꞌ ta ntsuꞌhui xaa mdaan loo um loꞌo yu Tito, una a nguinun loꞌo chaꞌ jyiꞌo, siꞌyana tsañaꞌan nu nchcuiꞌ hua chaꞌ nu ñi loꞌo um nchgaa xaa, cuiꞌ cuañaꞌan mdoꞌo ñi chaꞌ nu ycuiꞌ hua loꞌo yu chaꞌ nu ꞌin um.
\v 15 Una lyee ꞌa lca tiquee yu xa ndiya yuꞌhui tiꞌ yu ꞌin um tsañaꞌan mꞌni um cunta chaꞌ nu ycuiꞌ yu, loꞌ ncuan xuꞌhue um ꞌin yu loꞌo suun ñaꞌan siꞌya ytsen nu ntsuꞌhui niꞌ cusya ꞌin um.
\v 16 Tsuꞌhue ntsuꞌhui tiqueen, loꞌ ñi sca chaꞌ a nguiꞌni tucua tinꞌ loꞌo um.
\c 8
\s Mda yaaꞌ taꞌa jun loꞌo lcuan 

\p
\v 1 Loꞌ xca chaꞌ ꞌun jun taꞌa na, nchca tiꞌ hua siꞌyana ca cuiyaꞌ tiꞌ um tsala ñaꞌan tlyu chaꞌ tsuꞌhue ꞌin Ndiose nu ncua chcanꞌ loo seꞌen ndiyoꞌ tiꞌin jun taꞌa na, scasca quichen seꞌen lyiꞌya loo Macedonia.
\v 2 Siyaꞌ tnu chaꞌ mdijin jun, loꞌ ndyijyin cuiyaꞌ tiꞌi ñaꞌan chendyu ꞌin jun, una ticuiꞌ cuañaꞌan lyee tsuꞌhue ntsuꞌhui tiquee jun, msuꞌhua jun juesa mda yaaꞌ jun loꞌo lcuan siꞌya chaꞌ tsuꞌhue nu mdoꞌo tiquee jun.
\v 3 Nanꞌ ndaan suun siꞌyana mdaa jun lcuan canꞌ tsañaꞌan nu ncua ꞌin jun, una nducua lati mdaa jun loo nu tsuꞌhue ntsuꞌhui tiquee jun,
\v 4 loꞌ nde mjñan jun chaꞌ tsuꞌhue ꞌin hua chaꞌ tca loꞌo jun ta yaaꞌ jun loꞌo lcuan canꞌ, siꞌya jun taꞌa na nu ꞌni chaꞌ ꞌin.
\v 5 Siꞌi tsañaꞌan nu nguñan ti tiꞌ hua, cuiꞌ ca nu siꞌyana culo nducua la mdyaa jun cusya ꞌin jun ꞌin Ñi Xꞌnan na, xacanꞌ mda yaaꞌ jun ꞌin hua ñaꞌan nu Ndiose mꞌni caꞌan cusya ꞌin jun.
\v 6 Siꞌya chaꞌ re mdaa hua chaꞌ tnu tiquee ꞌin yu Tito siꞌyana cuꞌni tyii yu tñan nu mdyisnan yu, loꞌ tsa quiñan xoꞌ yu lcuan nu taa um loꞌo chaꞌ tsuꞌhue nu tyiꞌo tiquee um.
\v 7 Loꞌ siꞌyana a sca chaꞌ ndiya lyijyi ꞌin um loꞌo tsoꞌ ꞌin Ndiose, ñi loꞌo chaꞌ nu ndiya quiꞌan tiꞌ um, ta loꞌo chaꞌ nu nchcuiꞌ um uta chaꞌ tiyaa nu ntsuꞌhui ꞌin um, a cunta nsuꞌhua loo um scasca tñan nguiꞌni um, cuiꞌ cuañaꞌan lyee lca tiquee um loꞌo hua, canꞌ chaꞌ ngaꞌan chaꞌ suꞌhua um juesa loꞌo chaꞌ ꞌin lcuan re.
\v 8 Siꞌi siꞌyana nchca tinꞌ xicuꞌnin ꞌin um, cuiꞌ ca nu taan chaꞌ tnu tiquee ꞌin um siꞌyana loꞌo um tyiꞌo chaꞌ tsuꞌhue tiquee um tsañaꞌan nguiꞌni xca tucui.
\v 9 Siꞌyana cuaꞌ yuꞌhui lyoo um chaꞌ tsuꞌhue ꞌin Ñi Xꞌnan na Jesucristo, loꞌ siꞌya chaꞌ tsuꞌhue mdoꞌo tiquee ñi loꞌo um, mꞌni lyoꞌ ñi ꞌin ñi siyaꞌ lca ñi sca nu cuilyiyaꞌ, seꞌen nu ca cuilyiyaꞌ um loꞌo ñaꞌan nu mꞌni ñi.
\v 10 Taan sca chaꞌ tiyaa ꞌin um nu cuꞌni tsuꞌhue loꞌo um, siꞌyana tiꞌ yjan mdijin mdoꞌo chaꞌ tsuꞌhue tiquee um loꞌ mdyisnan mxoꞌ um lcuan canꞌ,
\v 11 canꞌ chaꞌ taa um juesa cuꞌni um chaꞌ canꞌ. Tsañaꞌan tsuꞌhue ntsuꞌhui tiquee um mducua suun um chaꞌ canꞌ, cuañaꞌan tsuꞌhue ntsuꞌhui tiquee um culo scua um ꞌin na cuaꞌ ñaꞌaan tca ꞌin um.
\v 12 Siꞌyana chaꞌ ndyiꞌo tiquee na taa na sca lcuan, cuan xuꞌhue ñi ꞌin na cuaꞌ ñaꞌaan tca ꞌin na, loꞌ siꞌi loꞌo juesa.
\v 13 A nchcuinꞌ chaꞌ re ta siꞌyana nde quinu na ꞌin xca tucui, loꞌ tsatoꞌo ꞌun tsa lyijyi na ꞌin um,
\v 14 cuiꞌ ca nu siꞌyana scasca um ta yaaꞌ taꞌa um. Cuaꞌ ñii ndyijyi ñaꞌan ta yaaꞌ um ꞌin nu ꞌni chaꞌ ꞌin, cuiꞌ cuañaꞌan xa nu ꞌni chaꞌ ꞌin um tca ta yaaꞌ canꞌ ꞌin um, xacanꞌ chcua taꞌa chaꞌ ꞌin um scasca um,
\v 15 siꞌyana ndeñaꞌan nchcuiꞌ quityi ꞌin Ndiose: —Yu nu quiꞌan na mxoꞌ, a nguinu na ꞌin yu, loꞌ yu nu chinꞌ na mxoꞌ, a ya lyijyi na ꞌin yu—.
\v 16 Una cuaꞌ xuꞌhue ꞌin Ndiose siꞌyana tsañaꞌan lca tiqueen loꞌo um, ticuiꞌ cuañaꞌan lca tiquee yu Tito.
\v 17 Chaꞌ ñi siꞌyana mꞌni cunta yu chaꞌ nu ycuiꞌ hua loꞌo yu, una loꞌo yu cuaꞌ ntsuꞌhui tiquee yu chaꞌ re, canꞌ chaꞌ msuꞌhua yu juesa mdiyaa yu seꞌen ndiꞌin um,
\v 18 loꞌ nguaꞌan tñan hua ꞌin sca taꞌa nguiaa yu, sca yu nu tsuꞌhue nchcuiꞌ chaꞌ tsuꞌhue ꞌin Cristo, yu nu ndyuꞌhui cuiyaꞌ tiꞌ scasca laa ꞌin.
\v 19 Siꞌi tsacanꞌ ti chaꞌ, cuiꞌ ca nu scasca laa ngulo ton ꞌin yu nu taꞌa tsa loꞌo hua lcuan nu cuaꞌ nguia nxoꞌ hua, ñaꞌan ca siꞌyana scuen cuaan la chaꞌ ꞌin Ñi Xꞌnan na, loꞌ ca chcanꞌ loo chaꞌ tsuꞌhue ndyiꞌo tiquee um.
\v 20 A nchca tiꞌ hua caja nu suꞌhua quiꞌya ꞌin hua siꞌyana quiꞌan lcuan ntsuꞌhui hua cunta,
\v 21 canꞌ chaꞌ —loꞌo chaꞌ tiyaa nan hua ñaꞌan nu cuꞌni hua chaꞌ re tloo Ñi Xꞌnan na loꞌo tloo nten chendyu—.
\v 22 A cunta nguaꞌan tñan hua xca nu ca taꞌa tsaa jun canꞌ, sca yu taꞌa na nu cuaꞌ yuꞌhui lyoo tsuꞌhue hua ꞌin, sca yu ndon ꞌa tiꞌ loꞌo nchgaa loo chaꞌ, cuaꞌ ñii nde lyee lati mdoꞌo tiquee yu loꞌo chaꞌ re, siꞌyana jlyo tiꞌ yu ñi ndiꞌin chaꞌ ꞌin um.
\v 23 Tsañaꞌan nguiaa chaꞌ ꞌin yu Tito, sca chaꞌ ti ꞌin hua loꞌo yu nguiꞌni hua tñan lja um, loꞌ jun taꞌa nguiaa yu, nguiaa jun loꞌo cunta ꞌin scasca laa, ñaꞌan ca siꞌyana scuen cuaan jun chaꞌ ꞌin Cristo.
\v 24 Canꞌ chaꞌ tsuꞌhue ntsuꞌhui tiquee um cuꞌni cunta um ꞌin jun, loꞌ ca cuiyaꞌ tiꞌ nchgaa la ñaꞌan laa siꞌyana ntsuꞌhui chaꞌ tsuꞌhue ꞌin um scasca um, tsañaꞌan nu ndaa hua loo um. 
\c 9
\p
\v 1 Tsañaꞌan nu ntsuꞌhui chaꞌ taa na sca lcuan ꞌin jun taꞌa na, a ꞌni chaꞌ tiꞌ caꞌan tñan lan quityi ꞌin um siꞌya chaꞌ re,
\v 2 siꞌyana cuaꞌ jlyo tinꞌ tsala ñaꞌan ndyiꞌo chaꞌ tsuꞌhue tiquee um, loꞌ tsuꞌhue ntsuꞌhui tiqueen ndaan suun chaꞌ re loꞌo jun taꞌa na ndiꞌin seꞌen lyiꞌya loo Macedonia, siꞌyana jun ndiꞌin seꞌen lca Acaya cuaꞌ mdiꞌin tyaa jun chaꞌ re tiꞌ yjan mdijin, loꞌ laꞌ nchgaa ti jun jui chaꞌ tnu tiquee ꞌin jun siꞌya chaꞌ nu mdiꞌin tyaa um.
\v 3 Canꞌ chaꞌ msuꞌhuan ꞌin jun taꞌa na tsaa jun seꞌen ndiꞌin um, loꞌ siꞌi cua chaꞌ ti mdaan loo um loꞌo chaꞌ nu cuaꞌ mdiꞌin tyaa um, cuiꞌ ca nu siꞌyana cuaꞌ ndon tiyaa um loꞌo chaꞌ canꞌ,
\v 4 ñaꞌan tuꞌ tsaa hua loꞌo tucua snan yu Macedonia seꞌen ndiꞌin um, loꞌ quija lyoo um a ndon tiyaa um, tsatoꞌo quinu hua loꞌo chaꞌ jyiꞌo tsañaꞌan nducua tloo hua ꞌin um, loo nu a chcuiꞌ hua siꞌyana ꞌun lyee la tyiꞌo chaꞌ jyiꞌo ꞌin um.
\v 5 Canꞌ chaꞌ mxitucua loon ꞌin tucua snan jun taꞌa na nu tsaa seꞌen ndiꞌin um, siꞌyana suꞌhua ta um chaꞌ ꞌin lcuan canꞌ tsañaꞌan chaꞌ nu cuaꞌ mdiꞌin tyaa um, cuaꞌ lca na xa tsaꞌan seꞌen ndiꞌin um, tsañaꞌan chaꞌ nu mdoꞌo tiquee um loꞌ siꞌi loꞌo juesa mxicuꞌni hua ꞌin um.
\v 6 Chcuinꞌ sca chaꞌ: Nu ntya chinꞌ ti na, ticuiꞌ cuañaꞌan chinꞌ ti na xoꞌ canꞌ, loꞌ nu ntya quiꞌan na, cuiꞌ cuañaꞌan quiꞌan na xoꞌ canꞌ.
\v 7 Canꞌ chaꞌ cunda scaa na taa na sca lcuan cuaꞌ ñaꞌaan ndyiꞌo ti tiquee na, a ca tiꞌi ngaꞌan ꞌin na, loꞌ ñi siꞌi loꞌo juesa, siꞌyana —Ndiose ndyuꞌhui cuiyaꞌ tiꞌ ñi ꞌin nu ndaa sca lcuan tsuꞌhue ntsuꞌhui tiquee—.
\v 8 Tla chaꞌ ꞌin Ndiose nu cuꞌni ñi chaꞌ ca quiꞌan la chaꞌ tsuꞌhue ꞌin um, cuañaꞌan nchgaa xaa a sca na tsa lyijyi ꞌin um, cuiꞌ ca nu nde quinu na ꞌin um loꞌ tsa quiñan cuꞌni um nchgaa loo tñan tsuꞌhue.
\v 9 Siꞌyana ndeñaꞌan nchcuiꞌ quityi ꞌin Ndiose: —Quiꞌan chaꞌ tsuꞌhue mdaa ñi ꞌin nu tiꞌi ñaꞌan chendyu ꞌin, loꞌ tsala xaa quinu scua chaꞌ tsuꞌhue canꞌ ꞌin ñi—.
\v 10 Ñi nu ndaa nchgaa loo na nu ntya nten, loꞌ ndaa ñi jaslya nu nchcu neꞌ, taa la ñi na nu cunajoꞌo ꞌin um, cuꞌni ñi chaꞌ cuton nchgaa loo chaꞌ tsuꞌhue ꞌin um, loꞌ cuꞌni ñi chaꞌ siꞌyana nde lyee la ca chcanꞌ loo nchgaa loo chaꞌ tsuꞌhue nu nguiꞌni um,
\v 11 ñaꞌan ca siꞌyana ca cuilyiyaꞌ um loꞌo nchgaa loo chaꞌ, cuañaꞌan nde lyee la tyiꞌo chaꞌ tsuꞌhue tiquee um loꞌo nchgaa tucui, loꞌ siꞌya chaꞌ canꞌ caja ñaꞌan tyaa hua xuꞌhue ꞌin Ndiose.
\v 12 Siꞌyana tsañaꞌan nu nda yaaꞌ um ꞌin jun taꞌa na, siꞌi tsaloo ti siꞌyana ꞌni chaꞌ ꞌin jun, cuiꞌ ca nu siꞌyana nde lyee la tyaa jun xuꞌhue ꞌin Ndiose.
\v 13 Siꞌya chaꞌ tsuꞌhue nu mꞌni um, caja nu cuꞌni tnu ꞌin Ndiose siꞌyana nducua um tñan tsañaꞌan nguiaa chaꞌ tsuꞌhue ꞌin Cristo nu ndiya quiꞌan tiꞌ um, siꞌyana quiꞌan chaꞌ tsuꞌhue mdoꞌo tiquee um loꞌo jun tsatlyu loꞌo nchgaa la tucui.
\v 14 A cunta xa nchcuiꞌ lyiꞌo jun ꞌin Ndiose siꞌya chaꞌ ꞌin um, lyee lca tiquee jun loꞌo um siꞌya chaꞌ tsuꞌhue nu tlyu mdaa Ndiose ꞌin um.
\v 15 Cuaꞌ xuꞌhue ꞌin Ndiose siꞌya chaꞌ tsuꞌhue nu mdaa ñi ꞌin na, loꞌ ñi a jlyo tiꞌ na ñaꞌan tiꞌ chcuiꞌ na siꞌya chaꞌ re.
\c 10
\s Loꞌo chaꞌ cuiyaꞌ ꞌin Ndiose nguiꞌni yu Pablo tñan 

\p
\v 1 Loꞌ siꞌyana suun ñaꞌan nguiaa chaꞌ ꞌin Cristo, cuti chaꞌ ꞌin ñi, canꞌ chaꞌ nanꞌ yu Pablo jñan chaꞌ tsuꞌhue ꞌin um, siꞌyana a xtyi tinꞌ chcuinꞌ tla chaꞌ loꞌo um, una xa nu cuaꞌ nchcan tijyoꞌ tla chaꞌ chcuinꞌ,
\v 2 canꞌ chaꞌ jñan chaꞌ tsuꞌhue ꞌin um siꞌyana xa tsaꞌan seꞌen ndiꞌin um, a nchca tinꞌ chcuinꞌ tla chaꞌ loꞌo um, una ntsuꞌhui tiqueen chcuinꞌ tla chaꞌ loꞌo tsalca nu nchcuiꞌ siꞌyana ndaꞌan hua ñaꞌan nu nchca tiꞌ hua.
\v 3 Siyaꞌ ndiꞌin hua loo chendyu re, una a tca xuun hua ñaꞌan nu nchca tiꞌ hua,
\v 4 siꞌyana na nu nchcua yaaꞌ hua, a ljyaan na loꞌo chaꞌ cuiyaꞌ ꞌin nten chendyu, cuiꞌ ca nu lca na sca chaꞌ cuiyaꞌ nu tlyu ꞌin Ndiose nu cujlyo ꞌin nchgaa chaꞌ nu tla chaꞌ ꞌin nu lca taꞌa cusuun hua.
\v 5 A cunta cujlyo canꞌ ꞌin nchgaa loo chaꞌ tiyaa loꞌo chaꞌ siyeꞌ nu nchcui ndijin, nu a nchcua taꞌa loꞌo chaꞌ tiyaa ꞌin Ndiose, loꞌ xicuꞌni na nchgaa loo chaꞌ tiyaa siꞌyana ca jaꞌan na ꞌin Cristo,
\v 6 cuaꞌ ndon tiyaa hua cuꞌni cuiyaꞌ hua ꞌin nchgaa nu a jaꞌan ꞌin ñi, cuiꞌ xa nu quiꞌya um chaꞌ tiyaa loꞌ tyisnan ca jaꞌan um ꞌin ñi.
\v 7 ꞌUn lyee ꞌa nchcua quiloo um chaꞌ nu nducua loo ti. Chaꞌ ntsuꞌhui nu ndyiꞌya cunta siꞌyana cuaꞌ nguiaa tsoꞌ ꞌin Cristo, cuiꞌ cuañaꞌan cuꞌni canꞌ cunta siꞌyana loꞌo huareꞌ nguiaa hua tsoꞌ ꞌin Cristo tsañaꞌan nu lca canꞌ.
\v 8 Nducui tinꞌ chcuinꞌ tsañaꞌan chaꞌ cuiyaꞌ nu cuaꞌ jui ꞌin hua, siyaꞌ nducua la chaꞌ nchcuinꞌ, una a xijyiꞌo tinꞌ siꞌyana Ñi Xꞌnan na mdaa ñi chaꞌ cuiyaꞌ culo um loꞌo chaꞌ nu ndiya quiꞌan tiꞌ um loꞌ siꞌi nu nde cujlyo na ꞌin um,
\v 9 a nchca tinꞌ xicutsen ꞌin um loꞌo nchgaa quityi nu cuaꞌ nguaꞌan tñan canꞌ.
\v 10 Chaꞌ ñi siꞌyana ndeñaꞌan ntsuꞌhui nu nchcuiꞌ chaꞌ ꞌñan: Tiꞌin ꞌa chaꞌ nchcuiꞌ yu loꞌ tla chaꞌ ndiꞌin tyaa yu loo quityi ꞌin yu, una xa ndiꞌin yu loꞌo na joꞌo ti ndiꞌin chaꞌ ꞌin yu, loꞌ xa nchcuiꞌ yu ñi a nsuꞌhua loo neꞌ ꞌin yu.
\v 11 Nu nchcuiꞌ cuañaꞌan quiꞌya canꞌ chaꞌ tiyaa siꞌyana scañaꞌan ti nguiaa chaꞌ ꞌin hua, siyaꞌ nchca hua tijyoꞌ uta ndiꞌin hua loꞌo um. Tsañaꞌan chaꞌ nu nchcuiꞌ hua loo quityi canꞌ cuañaꞌan nguiaa chaꞌ ꞌin hua.
\v 12 Siꞌyana a xtyi tiꞌ hua cuꞌni suꞌhua hua ꞌin hua, uta ca sca chaꞌ ti ꞌin hua loꞌo nchgaa nu ndaa loo ticuiiꞌ, nu ndiꞌin tyaa cuiyaꞌ ñaꞌan ntsuꞌhui chaꞌ cuꞌni scasca la taꞌa, loꞌ nguiꞌni suꞌhua ꞌin ticuiiꞌ, siꞌyana a ntsuꞌhui chaꞌ tiyaa ꞌin.
\v 13 Una huareꞌ a ndaa hua loo hua ndyijyin cuiyaꞌ, cuiꞌ ca nu tsañaꞌan cuiyaꞌ nu cuaꞌ mdaa Ndiose ꞌin hua, seꞌen nu tca tiyaa hua la seꞌen ndiꞌin um.
\v 14 Siꞌi na ndijin lyoo hua chaꞌ cuiyaꞌ nu ntsuꞌhui ꞌin hua loꞌo um, cuiꞌ ca nu culo nducua la hua mdiya loꞌo hua chaꞌ tsuꞌhue ꞌin Cristo seꞌen ndiꞌin um.
\v 15 A xtyi tiꞌ hua cuꞌni siyeꞌ hua ndyijyin cuiyaꞌ loꞌo tñan nguiꞌni xca tucui, cuiꞌ ca nu nducua tloo hua, cuaꞌ ñaꞌaan nguia nguilo um loꞌo chaꞌ nu ndiya quiꞌan tiꞌ um, xeen la seꞌen cuꞌni hua tñan lja um, cuiꞌ tsañaꞌan cuiyaꞌ nu cuaꞌ mdaa ñi ꞌin hua,
\v 16 ñaꞌan ca siꞌyana tsa ycuiꞌ hua chaꞌ tsuꞌhue ꞌin Cristo nde loo la seꞌen ndiꞌin um, loꞌ a sten yuꞌhui hua loo xñan xca tucui siꞌyana a nchca tiꞌ hua cuꞌni siyeꞌ hua loꞌo tñan nu cuaꞌ lca.
\v 17 Una, —chaꞌ ndeꞌen tucui nchca tiꞌ um taa um loo, tyaa um loo ꞌin Ñi Xꞌnan na—,
\v 18 siꞌyana a sca ntsuꞌhui lyoo nu nscuen cuaan ꞌin ticuiiꞌ, chaꞌ siꞌi Ndiose scuen cuaan ꞌin canꞌ. 
\c 11
\p
\v 1 Tsuꞌhue ca chaꞌ cua na taa loo um loꞌo tsa chinꞌ chaꞌ tinto nu chcuinꞌ loꞌo um, loꞌ cuꞌni um chaꞌ tsuꞌhue taa loo um ꞌñan.
\v 2 Siꞌyana tsañaꞌan nu lca tiqueen loꞌo um ljyaan na tsoꞌ ꞌin Ndiose, siꞌyana cuaꞌ mꞌnin cuiyanꞌ chaꞌ siꞌyana ca cuilyiꞌo um ꞌin Cristo, loꞌ scati ñi ntsuꞌhui chaꞌ chcuan ñi cunta ꞌin um tsañaꞌan nchca tiꞌ sca ngüiꞌ tsa suhue ti nu a sca chaꞌ nducui nchaꞌan ꞌin.
\v 3 Una msuꞌhuan chaꞌ tiqueen loꞌo um chaꞌ caja nu cuñilyiꞌo ꞌin um tsañaꞌan nu nguñilyiꞌo laxaꞌan ꞌin Eva loꞌo chaꞌ mañan ꞌin, loꞌ tsatoꞌo chcua tijyoꞌ chaꞌ tiyaa ꞌin um loꞌ a tyiꞌo ñi chaꞌ ꞌin um tsañaꞌan nu cuaꞌ mdyisnan um loꞌo Cristo.
\v 4 Ndaꞌan scasca nu nchcuiꞌ chaꞌ ꞌin Jesús, una siꞌi Jesús nu ndaꞌan ycuiꞌ hua chaꞌ ꞌin. Nchca tiꞌ canꞌ siꞌyana cuan xuꞌhue um xca espíritu nu siꞌi Espíritu nu cuaꞌ ntsuꞌhui niꞌ cusya ꞌin um, uta cuan xuꞌhue um xca loo chaꞌ nu a nchcua taꞌa loꞌo cha tsuꞌhue nu cuaꞌ ya quiꞌan tiꞌ um. Siyaꞌ cuañaꞌan una cuti nducuan xuꞌhue um ꞌin canꞌ,
\v 5 ñi a ñan tinꞌ chaꞌ ta tlyu la tucui lca canꞌ que ꞌñan nanꞌ, cuiꞌ nu nxqueꞌ tiꞌ siꞌyana lca sca nu mdoꞌo hui ca ꞌin Ndiose.
\v 6 Una siyaꞌ cuaꞌ ñaꞌan ti nchcuinꞌ, una siꞌi cuañaꞌan chaꞌ tiyaa ꞌñan, nchgaa xaa ndloꞌo xñan hua ꞌin hua loꞌo nchgaa loo chaꞌ.
\v 7 ¿Ta quiꞌya mꞌnin siꞌyana mꞌni lyonꞌ ꞌñan, loꞌ xuꞌhue ti ycuinꞌ chaꞌ tsuꞌhue ꞌin Ndiose loꞌo um, siꞌyana scuen cuaan chaꞌ ꞌin um?
\v 8 Cuiꞌ ca nu scasca laa mda yaaꞌ ꞌñan loꞌo tñi, seꞌen nu cuꞌnin cunta ꞌin um.
\v 9 Xa mdiꞌin loꞌo um scasca chaꞌ mꞌnin ꞌñan, una ñi sca tucui loꞌ a msuꞌhuan chaꞌ nduhue tiꞌ tiquee loꞌo chaꞌ canꞌ, cuiꞌ ca nu jun nu mdoꞌo seꞌen lyiꞌya loo Macedonia mda yaaꞌ ꞌñan, siꞌyana ñi sca chaꞌ nduhue tiꞌ loꞌ a ncua tinꞌ taan ꞌin um, cuiꞌ cuañaꞌan cuaꞌ ñii.
\v 10 Siꞌya chaꞌ nu ñi ꞌin Cristo nu ndon loꞌon, sca chcui seꞌen lyiꞌya loo Acaya, loꞌ a ndyijyi ñaꞌan nu a xcua cueen chaꞌ ꞌñan tsañaꞌan lca tiqueen loꞌo um.
\v 11 ¿Ñi chaꞌ ta? ¿Ta na a lca tiqueen loꞌo um? Ndiose jlyo tiꞌ ñi tsañaꞌan lca cusya ꞌñan loꞌo um.
\v 12 Una tsañaꞌan nu nguiꞌnin, tsa quiñan cuꞌnin chaꞌ canꞌ, siꞌyana a caja ñaꞌan chcuiꞌ scasca nu ndaꞌan loꞌo chaꞌ siyeꞌ, ta ljuin canꞌ siꞌyana suꞌhua ñaꞌan nguiaa chaꞌ ꞌin hua loꞌo.
\v 13 Una lca canꞌ sca nu cuiñi, nchcuiꞌ siꞌyana Ndiose lca nu nguaꞌan tñan ꞌin loꞌ nguiꞌni tñan ꞌin ñi, a cunta nguiꞌni chaa ꞌin siꞌyana lca sca nu mdoꞌo hui ca ꞌin Cristo.
\v 14 Siꞌi chaꞌ cuhue tiꞌ na lca chaꞌ re, siꞌyana ticuiiꞌ Laxaꞌan nguiꞌni chaa ꞌin siꞌyana lca sca angujle ꞌin Ndiose,
\v 15 canꞌ chaꞌ a tsaa ñaꞌan ndiꞌin chaꞌ re, siꞌyana loꞌo nguso ꞌin canꞌ nguiꞌni chaa ꞌin ñaꞌan nchca tiꞌ sca nu ñi ndiꞌin chaꞌ ꞌin, una tiyaa xaa chcuan canꞌ cunta cuaꞌ ñaꞌaan tñan mꞌni.
\s Chaꞌ nu mdijin yu Pablo siꞌya chaꞌ ꞌin Ndiose
\p
\v 16 Xiyaꞌ chcuinꞌ loꞌo um: A quiñan tiꞌ um siꞌyana lcan sca yu tinto, una chaꞌ ñan tiꞌ um cuañaꞌan, cuan xuꞌhue um ꞌñan siyaꞌ lcan sca yu tinto, siꞌyana loꞌon nanꞌ nchca tinꞌ scuen cuaan chinꞌ ꞌñan.
\v 17 Chaꞌ nu chcuinꞌ re, a chcuinꞌ ꞌin na loꞌo cunta ꞌin Ñi Xꞌnan na, cuiꞌ ca nu chcuinꞌ ꞌin na loꞌo chaꞌ tinto ꞌñan, siꞌyana nchca tinꞌ scuen cuaan ꞌñan.
\v 18 Chaꞌ cuañaꞌan nscuen cuaan ñaꞌan tucui ti ꞌin, loꞌon nanꞌ tca cuꞌnin cuañaꞌan,
\v 19 tsala ñaꞌan nda loo um ꞌin sca yu tinto, siyaꞌ lca um sca nu tiyaa la.
\v 20 Nda loo um siyaꞌ caja nu xñi suꞌhua yaaꞌ ꞌin um, uta caja nu lyaa na nu ndiꞌin ꞌin um, uta cuiꞌ seꞌen nducua tloo neꞌ ꞌin um, loꞌ ta nguiꞌni siyeꞌ neꞌ tloo um, uta ycuanꞌ neꞌ tuꞌhua um.
\v 21 Una sca chaꞌ jyiꞌo lca na ꞌñan siꞌyana joꞌo yaa chaꞌ ꞌin hua loꞌo um. Chaꞌ ntsuꞌhui nu xtyi tiꞌ scuen cuaan ꞌin ticuiiꞌ (loꞌ cuaꞌ ñii nchcuinꞌ loꞌo um siꞌya chaꞌ tinto ꞌñan), una loꞌon nanꞌ xtyi tinꞌ scuen cuaan ꞌñan.
\v 22 Chaꞌ lca canꞌ neꞌ hebreo, loꞌon nanꞌ lcan neꞌ hebreo. Uta lca canꞌ neꞌ Israel, loꞌon nanꞌ lcan neꞌ Israel. Chaꞌ lca canꞌ ta nten ꞌin Abraham, ¿ta siꞌi ticuiꞌ ta nten canꞌ lcan nanꞌ?
\v 23 Chaꞌ nguiꞌni canꞌ tñan ꞌin Cristo (loꞌ nchcuinꞌ loꞌo um tsañaꞌan nchcuiꞌ sca yu tinto), una tsoꞌ nu ꞌñan lyee la lcan nguso ꞌin Cristo, siꞌyana quiꞌan la tñan nu cuaꞌ mꞌnin, loꞌ quiꞌan la yaꞌ mjyiꞌin neꞌ ꞌñan, a cunta tyun la juesa msuꞌhua neꞌ ꞌñan naꞌan chcuan, cuiꞌ cuañaꞌan tyun yaꞌ ncua chaꞌ cajan.
\v 24 Neꞌ judio mjyiꞌin neꞌ ꞌñan tsa cla tyi ntsuꞌhui caa yaꞌ, loꞌ caꞌyu juesa mjyiꞌin neꞌ ꞌñan tsa cuañaꞌan.
\v 25 A cunta snan juesa jui nu mjyiꞌin ꞌñan loꞌo yca, loꞌ siyaꞌ mjyiꞌin neꞌ ꞌñan loꞌo quee, snan yaꞌ ngutyinꞌ yuꞌhui yca naꞌan seꞌen ntsuꞌhuin, loꞌ sca tsaan loꞌ sca tla mducuin loo tyiꞌa tujoꞌo.
\v 26 Quiꞌan ꞌa yaꞌ yuꞌhui lyijyin tucueen, cuañaꞌan chen nchcui ꞌñan loꞌo chco tlyu, loꞌo yu cunan, loꞌo taꞌa quichen tyin, loꞌo neꞌ gentil, a cunta chen nchcui ꞌñan seꞌen mdaꞌan quichen tnu, seꞌen ngutyi, uta loo tyiꞌa tujoꞌo, chen nchcui ꞌñan loꞌo yu nu nchcuiꞌ siꞌyana lca taꞌa na.
\v 27 Cuiꞌ cuañaꞌan lyee ꞌa cuaꞌ mꞌnin tñan, lyee ꞌa mtsa slan, mdijin yteꞌ tinꞌ loꞌ mdijin ytyi tinꞌ, tyun juesa a jui na nu cun, a cunta mdan loon loꞌo tlyaꞌ loꞌ a jui teꞌ conꞌ.
\v 28 A cunta xca chaꞌ nu tiꞌi ngaꞌan ꞌñan cunda scaa tsaan, loꞌ ntsuꞌhui chaꞌ nduhue tiꞌ tiqueen siꞌya chaꞌ ꞌin jun taꞌa na nu ndiyoꞌ tiꞌin sca chcui seꞌen.
\v 29 Chaꞌ ntsuꞌhui nu naꞌan tiꞌ, ¿ta siꞌi loꞌon nanꞌ ndii tinꞌ chaꞌ canꞌ? Chaꞌ ndeꞌen nu mxityu ꞌin xca tucui loo quiꞌya, ¿ta siꞌi loꞌon nanꞌ tiꞌi ntsuꞌhui tiqueen xacanꞌ?
\v 30 Chaꞌ mdiyaa ñaꞌan cuꞌnin siyenꞌ, cuꞌnin siyenꞌ siꞌya chaꞌ naꞌan tiꞌ ꞌñan.
\v 31 Ndiose, Sti Ñi Xꞌnan na Jesucristo, jlyo tiꞌ ñi siꞌyana siꞌi chaꞌ cuiñi nchcuinꞌ loꞌo um, ñi nu ngaꞌan chaꞌ cuꞌni tnu na ꞌin tsala xaa.
\v 32 Quichen Damasco, yu bsya ndiꞌin cunta ꞌin ree Aretas ngulo yu tñan siꞌyana chuꞌhui neꞌ cuan tunaꞌan tuꞌhua quichen siꞌyana xñi neꞌ ꞌñan,
\v 33 una jui nu mdyiꞌya ꞌñan nde chonꞌ loꞌo tuꞌhua quee canꞌ niꞌ sca xcuhui seꞌen nducua sca tunaꞌan lyoꞌ ti, loꞌ mdoꞌo laan tuyaaꞌ neꞌ canꞌ.
\c 12
\s Tiꞌi nu ndon loꞌo yu Pablo loꞌo tsoꞌ ꞌin cunanꞌ yu 

\p
\v 1 Chaꞌ ñi siꞌyana a ndyiꞌo tñan cuꞌnin siyenꞌ, una tsa quiñan chcuinꞌ loꞌo um chaꞌ nu naꞌan xñiin tsañaꞌan nu nguloꞌo Ñi Xꞌnan na ꞌñan.
\v 2 Nanꞌ ndyuꞌhui lyoon ꞌin sca yu quiꞌyu nu cuaꞌ ya quiꞌan tiꞌ ꞌin Cristo, cuaꞌ nguiaa tilcua yjan xa jui nu ya loꞌo ꞌin yu seꞌen nu cuaꞌ nchca snan niꞌ cuaan, (una a jlyo tinꞌ chaꞌ ta ycuiꞌ ca yu yaa yu uta na cusya ti ꞌin yu, scati Ndiose jlyo tiꞌ ñi),
\v 3 nanꞌ ndyuꞌhui lyoon ꞌin yu, (una a jlyo tinꞌ chaꞌ ta ycuiꞌ ca yu yaa yu uta na cusya ti ꞌin yu, scati Ndiose jlyo tiꞌ ñi),
\v 4 jui nu ya loꞌo ꞌin yu la niꞌ cuaan seꞌen lca paraíso, canꞌ ngune ꞌin yu ycuiꞌ sca nu ycuiꞌ chacuiꞌ chaꞌ nu a ndyijyi ñaꞌan chcuiꞌ na, loꞌ ñi a ntsuꞌhui chaꞌ cuiyaꞌ chcuiꞌ na chaꞌ canꞌ.
\v 5 Xtyi tinꞌ scuen cuaan chaꞌ ꞌin yu, una cunta nu ꞌñan a xtyi tinꞌ scuen cuaan ꞌñan, cuiꞌ ca nu chcuinꞌ loꞌo um tsañaꞌan nu naꞌan tinꞌ.
\v 6 Chaꞌ tyisnan scuen cuaan ꞌñan, a caja nu chcuiꞌ siꞌyana lcan sca nu tinto siꞌyana chcuinꞌ can chaꞌ nu ñi, una a nchca tinꞌ caja nu xqueꞌ tiꞌ siꞌyana cuaan la ndiꞌin chaꞌ ꞌñan loꞌo ñaꞌan nu nguiꞌnin, uta loꞌo ñaꞌan nu nchcuinꞌ.
\v 7 Loꞌ siꞌyana a scuen cuaan ꞌñan ndyijyin cuiyaꞌ siꞌya chaꞌ tnu nu naꞌan xñiin canꞌ, Ndiose mdaa chaꞌ cuiyaꞌ tyiꞌo tucua sca tiꞌi ꞌñan loꞌo cunta ꞌin Laxaꞌan, siꞌyana a cuꞌnin siyenꞌ lyee la.
\v 8 Siꞌya tiꞌi canꞌ snan juesa cuaꞌ mjñan ꞌin Ñi Xꞌnan na siꞌyana culo tsoꞌ ñi chaꞌ canꞌ.
\v 9 Una ndeñaꞌan juin ñi ꞌñan: Quiꞌya tucui ti tsañaꞌan chaꞌ tsuꞌhue nu cuaꞌ mdaan ꞌin, siꞌyana xa naꞌan tiꞌ nde lyee la nchca chcanꞌ loo chaꞌ cuiyaꞌ ꞌñan. Canꞌ chaꞌ tsuꞌhue lati cuꞌnin siyenꞌ siꞌya chaꞌ nu naꞌan tinꞌ, ñaꞌan ca siꞌyana tyon loꞌon chaꞌ cuiyaꞌ ꞌin Cristo.
\v 10 Siꞌya Cristo, canꞌ chaꞌ tsuꞌhue ntsuꞌhui tiqueen xa naꞌan tinꞌ, uta xa ndaja neꞌ ꞌñan, ta xa ndiya lyijyi na ꞌñan, uta nxitijin neꞌ ꞌñan nu tiꞌi, ta xa lyee ndijin scasca chaꞌ, siꞌyana xa naꞌan tinꞌ lyee la ndaa ñi juesa ꞌñan.
\v 11 Nanꞌ lcan sca nu tinto tsañaꞌan nu mꞌnin siyenꞌ tloo um, tyicana ꞌun mxicuꞌni um ꞌñan loꞌo chaꞌ re. Loꞌ siyaꞌ a tucui lcan una ngaꞌan chaꞌ suꞌhua loo um ꞌñan, siꞌyana ñi sca chaꞌ loꞌ a nguinun caꞌan chonꞌ tsañaꞌan nguiaa chaꞌ ꞌin yu nu nxqueꞌ tiꞌ siꞌyana lca nu mdoꞌo hui ca ꞌin Ndiose.
\v 12 Lja mdiꞌin hua loꞌo um mꞌni hua scasca chaꞌ nu tnu tsañaꞌan nꞌni sca nu cuaꞌ mdoꞌo hui ca ꞌin Ndiose, ncua chcanꞌ loo chaꞌ nu tnu loꞌo chaꞌ nu cuhue tiꞌ na, a cunta mda loo hua scasca nu tiꞌi.
\v 13 Xacanꞌ jan ñi, ¿ta ñan tiꞌ um siꞌyana chinꞌ la chaꞌ ꞌin um que nchgaa la ñaꞌan ta jun taꞌa na, cuiꞌ siꞌyana a ncua tinꞌ suꞌhuan sca chaꞌ nduhue tiꞌ tiquee um loꞌo chaꞌ nu ꞌni ꞌñan? ¡Una cuꞌni um chaꞌ tlyu tiꞌ ꞌñan loꞌo chaꞌ canꞌ!
\s Xiyaꞌ tsaa yu Pablo quichen Corinto
\p
\v 14 Ñaꞌan jan ñi, nde nu cuaꞌ nchca snan yaꞌ tsaꞌan seꞌen ndiꞌin um, una a nchca tinꞌ chuꞌhui yuhue tiꞌ um ꞌñan, siꞌyana a nducua tloon na nu ndiꞌin ꞌin um, cuiꞌ ca nu siꞌya um canꞌ chaꞌ tsaꞌan, siꞌyana siꞌi nu suhue ti ntsuꞌhui yuhue tiꞌ ꞌin nten cula ꞌin, cuiꞌ ca nu nten cula ꞌin canꞌ ntsuꞌhui yuhue tiꞌ ꞌin.
\v 15 Loꞌo nu chcui lca tiqueen culyijyin nchgaa na nu ndiꞌin ꞌñan, loꞌ siꞌi tsacanꞌ ti, cuiꞌ ca nu loꞌo cusya ꞌñan tyaan siꞌya um, loꞌ siyaꞌ lyee la lca tiqueen loꞌo um, una ꞌun joꞌo ꞌa nsuꞌhua loo um ꞌñan.
\v 16 Una la ndiꞌin chaꞌ re siꞌyana ñi siyaꞌ loꞌ a msuꞌhuan chaꞌ nduhue tiꞌ tiquee um, una ntsuꞌhui nu nchcuiꞌ siꞌyana lcan sca nu tiyaa, loꞌ yatoꞌo nguñilyiꞌon ꞌin um.
\v 17 ¿Ta xqueꞌ tiꞌ um siꞌyana sca mañan ti mꞌnin loꞌo um xa nguaꞌan tñan tucua snan yu nu yaa seꞌen ndiꞌin um?
\v 18 Cuiꞌ ca nu mjñan chaꞌ tsuꞌhue ꞌin yu Tito siꞌyana tsaa yu loꞌo xca yu taꞌa na. ¿Ta msti tiꞌ yu Tito nguñilyiꞌo yu ꞌin um xacanꞌ? ¿Ta siꞌi sca chaꞌ ti ꞌin hua loꞌo yu, loꞌ scañaꞌan ti chaꞌ tiyaa ꞌin hua nguiꞌni hua tñan?
\v 19 ¿Ta ñan tiꞌ um siꞌyana nchca tiꞌ hua suhui hua tloo hua loꞌo um? Cuiꞌ ca nu tloo Ndiose loꞌo Cristo nchcuiꞌ hua chaꞌ re, ꞌun jun taꞌa na nu ndyuꞌhui cuiyaꞌ tinꞌ ꞌin, ñaꞌan ca siꞌyana culo um loꞌo chaꞌ ꞌin Ndiose.
\v 20 Loꞌ xa tyiꞌan seꞌen ndiꞌin um nsuꞌhuan chaꞌ tiqueen chaꞌ ta siꞌi ñaꞌan quija lyoon ꞌin um, uta siꞌi ñaꞌan quija lyoo um ꞌñan, ta ndiꞌin suun um, uta loꞌo chaꞌ jñan tiꞌ, chaꞌ nsinꞌ tiꞌ, nsuꞌhue tiꞌin taꞌa um, ndaja taꞌa um, nchcuiꞌ caꞌan taꞌa um, nguiꞌni siyeꞌ um, loꞌ cuaꞌ ñaꞌan ti ndiꞌin yꞌni um,
\v 21 loꞌ tsatoꞌo quinun loꞌo chaꞌ jyiꞌo tloo Ndiose xa tyiꞌan seꞌen ndiꞌin um, nu hasta quiꞌya tuꞌhua tiqueen siꞌya chaꞌ ꞌin nchgaa nu tiꞌ nguiꞌni quiꞌya loꞌ a nchca xitsaꞌan chaꞌ tiyaa ngunanꞌ ꞌin, chaꞌ nu nguiten yuꞌhui loꞌo ñaꞌan tucui ti siꞌya chaꞌ nducunꞌ ndyiꞌo tiquee canꞌ. 
\c 13
\p
\v 1 Nde nu cuaꞌ ca snan yaꞌ tsaꞌan seꞌen ndiꞌin um. —Loꞌ tyiꞌo scua la nchgaa chaꞌ loꞌo tucua snan nu taa suun chaꞌ canꞌ—.
\v 2 Cuaꞌ msuꞌhuan tiyaan ꞌin um tsatlyu loꞌo nu tiꞌ nguiꞌni quiꞌya canꞌ, loꞌ siyaꞌ tijyoꞌ nchcan, una xiyaꞌ chcuinꞌ loꞌo um loo quityi re, loꞌ a tsatoꞌo tla chaꞌ chcuinꞌ xa tsaꞌan seꞌen ndiꞌin um.
\v 3 Tiꞌ nguiꞌni tucua tiꞌ um siꞌyana nchcuinꞌ loꞌo chaꞌ cuiyaꞌ ꞌin Cristo, una a naꞌan ndiꞌin chaꞌ ꞌin ñi lja um, cuiꞌ ca nu tla chaꞌ ꞌin ñi loꞌo um.
\v 4 Siyaꞌ mꞌni naꞌan tiꞌ ñi xa ngujui ñi loo cusi, una loꞌo ñi siꞌya chaꞌ cuiyaꞌ ꞌin Ndiose. Cuiꞌ cuañaꞌan naꞌan ndiꞌin chaꞌ ꞌin hua, sca chaꞌ ti ꞌin hua loꞌo Cristo, una tyuꞌhui hua chendyu loꞌo ñi siꞌya chaꞌ cuiyaꞌ ꞌin Ndiose, loꞌ cuañaꞌan tca tucua tloo um ꞌin hua.
\v 5 Cuꞌni quii um cusya ꞌin um chaꞌ ta cuiꞌ ñaꞌan ndon um loꞌo chaꞌ nu ndiya quiꞌan tiꞌ um, loꞌ cuꞌni cuiyaꞌ um ꞌin um loꞌo chaꞌ canꞌ. ¿Ta a jlyo tiꞌ um siꞌyana Cristo ntsuꞌhui ñi niꞌ cusya ꞌin um, uta na a ñi ndiꞌin chaꞌ ꞌin um?
\v 6 Nducua tloon siꞌyana ca cuiyaꞌ tiꞌ um, ñi ndiꞌin chaꞌ ꞌin hua.
\v 7 Njñan hua ꞌin Ndiose siꞌyana a cuꞌni um chaꞌ ngunanꞌ, una siꞌi siꞌyana nchca tiꞌ hua suhui hua tloo hua, cuiꞌ ca nu siꞌyana cuꞌni um tñan tsuꞌhue, siyaꞌ nchcuiꞌ neꞌ a ñi ndiꞌin chaꞌ ꞌin hua.
\v 8 A tca ñaꞌan tiꞌi hua chaꞌ nu ñi, cuiꞌ ca nu nguiaa hua tsoꞌ chaꞌ nu ñi.
\v 9 Canꞌ chaꞌ tsuꞌhue ntsuꞌhui tiquee hua siyaꞌ naꞌan ndiꞌin chaꞌ ꞌin hua, loꞌ ꞌun tla ndon um, siyaꞌ cuañaꞌan njñan hua ꞌin Ndiose siꞌyana ca chcui la chaꞌ ꞌin um.
\v 10 Nde chaꞌ nu ndaꞌan tñan quityi re ꞌin um lja nu tiꞌ lyijyi tyiꞌan seꞌen ndiꞌin um, siꞌyana a nchca tinꞌ chcuinꞌ tla chaꞌ loꞌo um tsañaꞌan chaꞌ cuiyaꞌ nu cuaꞌ jui ꞌñan loꞌo cunta ꞌin Ñi Xꞌnan na, ñaꞌan ca siꞌyana culo um loꞌ siꞌi nu jlyo um siꞌya chaꞌ canꞌ.
\s Mslaꞌ taꞌa yu Pablo loꞌo jun Corinto
\p
\v 11 A cunta ꞌun jun taꞌa na, ca tsuꞌhue chuꞌhui tiquee um, loꞌ cuꞌni chuꞌhue um chaꞌ ꞌin um scasca um, tyaa um chaꞌ tnu tiquee ꞌin taꞌa um, ca sca chaꞌ ti ꞌin um, loꞌ cunan um ñaꞌan nu tyiꞌin tsuꞌhue um. Loꞌ Ndiose, ñi nu nꞌni chaꞌ nxitñanꞌ cusya ꞌin na, ñi nu nguiꞌni ꞌtnan ꞌin na, tyiꞌin ñi loꞌo um.
\v 12 Nchgaa um chcuiꞌ chaꞌ taꞌa um la siiꞌ scaꞌ um loꞌo suun ñaꞌan.
\v 13 Nchgaa jun taꞌa na nu ndiꞌin nde re nchcuiꞌ chaꞌ jun ꞌin um.
\v 14 Chaꞌ tsuꞌhue ꞌin Ñi Xꞌnan na Jesucristo, loꞌo chaꞌ tsuꞌhue ꞌin Ndiose, tsatlyu loꞌo Espíritu nu Luhui ꞌin ñi quinu loꞌo um. Amen.