\id GAL - Nopala (Chatino) NT [cya] - Mexico 2013 (web 2014)
\h GÁLATAS
\toc1 Gálatas
\toc2 Gálatas
\toc3 Gal
\mt1 Gálatas
\c 1
\s Yu Pablo nchcuiꞌ chaꞌ yu ꞌin jun nu ndiꞌin Galacia
\p
\v 1 Nanꞌ yu Pablo, siꞌya chaꞌ cuiyaꞌ ꞌin Jesucristo loꞌo Stina Ndiose, ñi nu mꞌni chaꞌ mdyiquiꞌo canꞌ, nguaꞌan tñan ñi ꞌñan tsa ycuinꞌ chaꞌ tsuꞌhue ꞌin ñi, loꞌ siꞌi siꞌyana jui nu ngulo ton ꞌñan uta siꞌya chaꞌ cuiyaꞌ ꞌin nten chendyu.
\v 2 A cunta nchgaa la ñaꞌan taꞌa ndiꞌin hua re nguaꞌan tñan hua quityi re ꞌin um, cunda scaa seꞌen ndiyoꞌ tiꞌin jun taꞌa na seꞌen lyiꞌya loo Galacia.
\v 3 Cuiꞌ Stina Ndiose loꞌo Ñi Xꞌnan na Jesucristo taa ñi chaꞌ tsuꞌhue nu chuꞌhui niꞌ cusya ꞌin um, loꞌ cuꞌni ñi chaꞌ tyiꞌin tsuꞌhue um,
\v 4 ñi nu mdyaa ꞌin siꞌya quiꞌya nducui na, siꞌyana culo laa ñi ꞌin na loo chaꞌ ngunanꞌ nu nchca loo chendyu re, tsañaꞌan nu lca tiquee Stina Ndiose loꞌo na,
\v 5 cuiꞌ scati ñi ntsuꞌhui chaꞌ cuꞌni tnu na tsala xaa. Amen.
\s A ntsuꞌhui xca loo chaꞌ nu tca culo laa ꞌin na
\p
\v 6 Ndyijyin yaꞌ nduhue tinꞌ ñi chaꞌ ndla ꞌa mdoꞌo tsoꞌ um siiꞌ Ndiose, ñi nu msiꞌya ꞌin um siꞌya chaꞌ tsuꞌhue ꞌin Cristo, loꞌ nducui nchaꞌan um xca loo chaꞌ nu ñan tiꞌ um tca culo laa ꞌin um.
\v 7 Siꞌi siꞌyana ntsuꞌhui xca loo chaꞌ, cuiꞌ ca nu siꞌyana jui xca tucui nu mꞌni tinto ꞌin um, nchca tiꞌ canꞌ xitsaꞌan ñaꞌan ntsuꞌhui chaꞌ tyiꞌo laa nten siꞌya Cristo.
\v 8 A ꞌni chaꞌ siyaꞌ huareꞌ uta angujle ꞌin Ndiose, chaꞌ chcuiꞌ hua loꞌo um xca loo chaꞌ tsañaꞌan ntsuꞌhui chaꞌ tyiꞌo laa um, una chaꞌ a suꞌhua ñaꞌan nguiaa na loꞌo chaꞌ nu ycuiꞌ hua loꞌo um tiꞌ culoo, tsaloo na caan ti yuhueꞌ chonꞌ hua.
\v 9 Cuiꞌ tsañaꞌan nu cuaꞌ ycuiꞌ hua loꞌo um tiꞌ culoo, nchcuinꞌ loꞌo um xiyaꞌ: Chaꞌ ntsuꞌhui xca tucui nu chcuiꞌ xca loo chaꞌ tsañaꞌan ntsuꞌhui chaꞌ tyiꞌo laa um, loꞌ chaꞌ a suꞌhua ñaꞌan nguiaa na loꞌo chaꞌ nu cuaꞌ ncuan xuꞌhue um, tsaloo na caan ti yuhueꞌ chonꞌ canꞌ.
\v 10 ¿Ta ñan tiꞌ um siꞌyana nchca tinꞌ quinu tsuꞌhue tiquee nten loꞌon, uta siꞌyana quinu tsuꞌhue tiquee Ndiose loꞌon? ¿Ta xqueꞌ tiꞌ um siꞌyana ꞌin nten nducua quiloon? Chaꞌ cuañaꞌan lca cusya ꞌñan, a lcan nguso ꞌin Cristo.
\s Tñan ꞌin Ndiose nguiꞌni yu Pablo
\p
\v 11 Ca cuiyaꞌ tiꞌ um chaꞌ re, ꞌun jun taꞌa na, chaꞌ tsuꞌhue ꞌin Cristo nu ycuinꞌ loꞌo um, a ljyaan na loo chaꞌ tiyaa ꞌin nten chendyu,
\v 12 siꞌyana a mꞌni chaꞌan chaꞌ re ta siꞌyana jui nu nguloꞌo ꞌñan, cuiꞌ ca nu ycuiꞌ ca Jesucristo nguloꞌo ñi ꞌñan.
\v 13 Siꞌyana cuaꞌ jlyo tiꞌ um ñaꞌan nten lcan tiꞌ culoo xa ncua sca chaꞌ ti ꞌñan loꞌo chaꞌ nu nguiꞌni chaꞌan neꞌ judio, lyee mducui nchaꞌan ꞌin jun nu cuaꞌ ndiꞌin cunta ꞌin Ndiose, loꞌ ncua tinꞌ cujlyon ꞌin jun siyaꞌ ti.
\v 14 Tsañaꞌan nguiaa chaꞌ ꞌin neꞌ judio, lyee lati msñi cunta ꞌñan loꞌo chaꞌ canꞌ que nchgaa la ñaꞌan yu taꞌa mꞌni chaꞌan, siꞌyana a ncua tinꞌ quinanꞌ ñi sca chaꞌ nu cuaꞌ ntsuꞌhui ꞌin nten cula ꞌñan.
\v 15 Una Ndiose tsuꞌhue ntsuꞌhui tiquee ñi ngulohui ñi ꞌñan xa nu tiꞌ lyijyi tiyaan chendyu, ngulo ton ñi ꞌñan siꞌya chaꞌ tsuꞌhue nu mdoꞌo tiquee ñi,
\v 16 loꞌ mꞌni ñi chaꞌ siꞌyana chuꞌhui lyoon ꞌin Sñeꞌ ñi, ñaꞌan ca siꞌyana tsa ycuinꞌ chaꞌ tsuꞌhue ꞌin ñi loꞌo neꞌ gentil. A mñichanꞌ ꞌin xca tucui ñaꞌan mdyisnan suun chaꞌ re,
\v 17 ñi a yiꞌan quichen Jerusalén seꞌen ndiꞌin yu taꞌa mdaꞌan Jesús, yu nu culo nducua la ycuiꞌ chaꞌ tsuꞌhue ꞌin ñi que ꞌñan nanꞌ, cuiꞌ ca nu yiꞌan seꞌen lca Arabia, la chonꞌ ndeꞌen mxitucuin nde quichen Damasco.
\v 18 Xa cuaꞌ mdijin snan yjan, xacanꞌ yiꞌan quichen Jerusalén siꞌyana chuꞌhui lyoon ꞌin yu Tyo, canꞌ nguinun loꞌo yu tsa ꞌtñu tsaan.
\v 19 Una a naꞌan nchgaa la ñaꞌan taꞌa mdaꞌan Jesús, cuiꞌ ca nu scati Jacobo taꞌa ngula Ñi Xꞌnan na.
\v 20 Tsañaꞌan chaꞌ nu nguaꞌan re, a tca cuiñi lyiꞌon ꞌin um tloo Ndiose.
\v 21 Chonꞌ ndeꞌen canꞌ yiꞌan seꞌen lyiꞌya loo Siria loꞌo Cilicia.
\v 22 Ñi a nchca chuꞌhui lyoo jun ꞌñan xacanꞌ, jun nu cuaꞌ ntsuꞌhui chaꞌ ꞌin Cristo nu ndiyoꞌ tiꞌin scasca quichen seꞌen lyiꞌya loo Judea.
\v 23 Tsaloo ti nen chaꞌ nchcuiꞌ jun: Yu nu mducui nchaꞌan ꞌin na tiꞌ culoo, cuaꞌ ñii ndaꞌan ycuiꞌ yu chaꞌ tsuꞌhue ꞌin Cristo, yu nu ncua tiꞌ cuꞌni tyii chaꞌ re.
\v 24 Loꞌ mꞌni tnu jun ꞌin Ndiose siꞌya chaꞌ nu yatoꞌo ꞌñan.
\c 2
\p
\v 1 Xa cuaꞌ mdijin tilcua yjan xiyaꞌ yiꞌan quichen Jerusalén, loꞌ yiꞌan loꞌo yu Bernabé, a cunta loꞌo yu Tito.
\v 2 Una yiꞌan siꞌya chaꞌ nu ngulyo scua la Ndiose loꞌon, loꞌ ycuinꞌ loꞌo tsalca jun nu ndon loo la sca seꞌen ycuiꞌ ti jun, mtsanꞌ ꞌin jun tsañaꞌan nchcuinꞌ loꞌo neꞌ gentil ñaꞌan ntsuꞌhui chaꞌ tyiꞌo laa na, siꞌyana a tsa quiñan ꞌan uta cua chaꞌ ti mꞌnin tñan ꞌin Ndiose.
\v 3 A cunta yu Tito nu taꞌa ndaꞌan, siyaꞌ lca yu sca neꞌ griego, una a mxicuꞌni jun ꞌin yu siꞌyana ca circuncida ꞌin yu.
\v 4 Yatoꞌo lja hua ntsuꞌhui cunan tucua snan jun nu ndaꞌan loꞌo chaꞌ cuiñi, siꞌyana xñi canꞌ cunta ñaꞌan ndiꞌin chaꞌ ꞌin hua tsañaꞌan mdoꞌo laa hua siꞌya Cristo Jesús, loꞌ ncua tiꞌ canꞌ xicuꞌni ꞌin hua siꞌyana tiꞌ tsa nchaꞌan hua chaꞌ nu cuaꞌ ntsuꞌhui ꞌin.
\v 5 Una ñi tsa chinꞌ ti sꞌni loꞌ a mꞌni cunta hua ꞌin loꞌo chaꞌ nu ycuiꞌ, siꞌyana nducua tloo hua tsa nchaꞌan um chaꞌ nu ñi ꞌin Ndiose tsañaꞌan ntsuꞌhui chaꞌ tyiꞌo la na.
\v 6 Una tsalca jun nu ndon loo lati canꞌ, (loꞌ ñi a ndyuhue tinꞌ chaꞌ ta ntsuꞌhui tñan lyiꞌya jun tiꞌ culoo, siꞌyana scañaꞌan ti nguiꞌni Ndiose ꞌtnan ꞌin nten chendyu), ñi sca chaꞌ nu cui ti loꞌ a nguloꞌo jun ꞌñan.
\v 7 Cuiꞌ ca nu nguꞌya jun chaꞌ tiyaa siꞌyana Ndiose mxnu ñi cunta ꞌñan chcuinꞌ chaꞌ tsuꞌhue ꞌin Cristo loꞌo neꞌ gentil, tsañaꞌan nguinu cunta ꞌin yu Tyo chcuiꞌ yu loꞌo neꞌ judio.
\v 8 (Siꞌyana Ndiose nu ngulo ton ꞌin yu Tyo chcuiꞌ yu chaꞌ tsuꞌhue ꞌin Cristo loꞌo neꞌ judio, ticuiꞌ ñi ngulo ton ñi ꞌñan chcuinꞌ loꞌo neꞌ gentil).
\v 9 Xa ncua cuiyaꞌ tiꞌ jun siꞌyana Ndiose lca nu mdaa tñan re ꞌñan, yu Jacobo, yu Tyo loꞌo yu Xuhua, yu nu ndon loo la ꞌin jun, mdaa yu sca cuiyaꞌ ꞌin hua loꞌo Bernabé siꞌyana sca chaꞌ ti ꞌin hua cuꞌni hua tñan loꞌo yu, loꞌ huareꞌ tsa ycuiꞌ la hua chaꞌ tsuꞌhue ꞌin.
\s Cristo loꞌo neꞌ gentil loꞌ cuiꞌ yu chcuiꞌ yu loꞌo neꞌ judio.
\p
\v 10 Tsaloo ti chaꞌ nu mxnu yu cunta ꞌin hua siꞌyana quia yuꞌhui tiꞌ hua ꞌin nu tiꞌi ñaꞌan chendyu ꞌin, loꞌon cuaꞌ ntsuꞌhui chaꞌ canꞌ tiqueen, canꞌ chaꞌ msuꞌhuan juesa mꞌnin ꞌin na.
\s Yu Pablo ngusun loꞌo yu ꞌin yu Tyo
\p
\v 11 Una xa yaa yu Tyo quichen Antioquía, tloo ndon yu tla chaꞌ ycuinꞌ loꞌo yu siꞌyana siꞌi ñaꞌan nguiꞌni yu.
\v 12 Siꞌyana xa nu tiꞌ lyijyi tiyaa tucua snan yu judio, cuiꞌ yu nu nguaꞌan tñan Jacobo, yu Tyo tsatlyu nchcu yu loꞌo neꞌ gentil, una xa mdiyaa yu judio canꞌ mxijyiꞌo tiꞌ yu loꞌ a ycu ꞌa yu loꞌo neꞌ gentil siꞌyana ntsen yu tloo neꞌ judio.
\v 13 Cuiꞌ cuañaꞌan loꞌo neꞌ judio nu ndiꞌin ca canꞌ, a ñi ndiꞌin chaꞌ ꞌin neꞌ, ncua sca chaꞌ ti ꞌin neꞌ loꞌo yu Tyo, loꞌ hasta loꞌo yu Bernabé jui nu nguñi lyiꞌo ꞌin loꞌo chaꞌ canꞌ.
\v 14 Una xa naꞌan siꞌyana a nguiꞌni neꞌ tsañaꞌan nguiaa chaꞌ nu nguloꞌo Cristo, xacanꞌ ycuinꞌ loꞌo yu Tyo tloo ndiꞌin nchgaa jun canꞌ: Nuꞌhuin lca sca neꞌ judio, una cuaꞌ ñii nguiꞌni tsañaꞌan nꞌni neꞌ gentil, loꞌ siꞌi ñaꞌan nꞌni neꞌ judio. ¿Ñi chaꞌ nchca tiꞌ xicuꞌni ꞌin neꞌ gentil cuꞌni neꞌ tsañaꞌan nꞌni neꞌ judio?
\v 15 Nareꞌ lca na neꞌ judio tiꞌ xa ngula na, loꞌ a lca na neꞌ gentil nu nguiꞌni quiꞌya,
\v 16 jlyo tsuꞌhue tiꞌ na siꞌyana a ndyijyin ñaꞌan quinu luhui sca nten tloo Ndiose loo nu xuꞌhua seꞌen neꞌ chaꞌ ꞌin lee, cuiꞌ ca nu la tsa quiꞌan tiꞌ neꞌ ꞌin Jesucristo. Nareꞌ cuaꞌ ya quiꞌan tiꞌ na ꞌin Jesucristo seꞌen nu quinu luhui na siꞌya ñi, loꞌ siꞌi siꞌyana xuꞌhua seꞌen na chaꞌ ꞌin lee, siꞌyana —a tucui nu tca quinu luhui tloo Ndiose— loo nu xuꞌhua seꞌen chaꞌ ꞌin lee.
\v 17 Chaꞌ nducua tloo na siꞌyana quinu luhui na tloo Ndiose siꞌya Cristo, ñaꞌan loo chaꞌ loꞌo na lca na nten quiꞌya chendyu. ¿Loꞌ ta siꞌya Cristo lca na nten quiꞌya chendyu? Siꞌi na.
\v 18 Chaꞌ nanꞌ xiyaꞌ chcui chaꞌan chaꞌ ꞌin lee, sca chaꞌ nu cuaꞌ mxnun caꞌan chonꞌ, nducuin quiꞌya xacanꞌ.
\v 19 Nanꞌ siꞌya chaꞌ ꞌin lee cuaꞌ ngujuin loꞌo cunta ꞌin na, ñaꞌan ca siꞌyana tuꞌhuin sca chendyu loꞌo tsoꞌ nu ꞌin Ndiose.
\v 20 Nanꞌ tsatlyu loꞌo Cristo ngaꞌan loo cusi, loꞌ siꞌi ꞌa cunta ꞌñan nduꞌhuin chendyu, cuiꞌ ca nu loꞌo cunta ꞌin Cristo, loꞌ chendyu nu nduꞌhuin cuaꞌ ñii, nduꞌhuin ꞌin na siꞌyana ndiya quiꞌan tinꞌ ꞌin Sñeꞌ Ndiose, ñi nu mñaꞌan ꞌtnan tiꞌ ꞌñan loꞌ mdyaa ꞌin siꞌyan.
\v 21 A nchca tinꞌ culon tsonꞌ chaꞌ tsuꞌhue ꞌin Ndiose, loꞌ chaꞌ cua na tyiꞌo laa na loo nu xuꞌhua seꞌen na chaꞌ ꞌin lee, cua chaꞌ ti ngujui Cristo xacanꞌ.
\c 3
\s Loo nu tsa quiꞌan tiꞌ na cuan xuꞌhue na ꞌin Espíritu
\p
\v 1 ¡Ta chinꞌ ꞌa chaꞌ tiyaa ꞌin um, ꞌun neꞌ Galacia! ¿Ti nu mꞌni tinto ꞌin um siꞌyana a ca jaꞌan um chaꞌ nu ñi? Loꞌ na tloo um cuaꞌ jui nu ngulyo scua la chaꞌ ꞌin Jesucristo tsañaꞌan nu nguaꞌan ñi loo cusi.
\v 2 Scati chaꞌ nchca tinꞌ cuñichanꞌ ꞌin um: ¿Ta ntsuꞌhui Espíritu niꞌ cusya ꞌin um loo nu mxuꞌhua seꞌen um chaꞌ ꞌin lee, uta siꞌyana ya quiꞌan tiꞌ um chaꞌ nu cuaꞌ ngune ꞌin um?
\v 3 ¿Ta tiji ꞌa na um xacanꞌ? Loꞌo chaꞌ cuiyaꞌ ꞌin Espíritu mdyisnan um chaꞌ re, loꞌ cuaꞌ ñii nguiꞌni tyii um loꞌo chaꞌ tiyaa ꞌin nten chendyu.
\v 4 ¿Ta cua chaꞌ ti mdijin um scasca loo chaꞌ nu yaan ꞌin um? ¿Ta xtyi tiꞌ xuꞌhue ti mdijin um chaꞌ canꞌ?
\v 5 Ndiose, ñi nu ndaa Espíritu ꞌin um nꞌni ñi chaꞌ nu tnu loꞌo um, ¿ta nguiꞌni ñi chaꞌ canꞌ siꞌyana nxuꞌhua seꞌen um chaꞌ ꞌin lee, uta siꞌyana ya quiꞌan tiꞌ um chaꞌ nu cuaꞌ ngune ꞌin um?
\s Chaꞌ nu mdiꞌin tyaa Ndiose loꞌo Abraham
\p
\v 6 Cuiꞌ cuañaꞌan Abraham —nguinu luhui yu tloo Ndiose loo nu ya quiꞌan tiꞌ yu ꞌin ñi—.
\v 7 Ca cuiyaꞌ tiꞌ um siꞌyana tsalca nu ndiya quiꞌan tiꞌ ꞌin Ndiose, canꞌ nu lca sñeꞌ Abraham.
\v 8 Siꞌyana quityi ꞌin Ndiose cuaꞌ mxitucua loo na sca chaꞌ siꞌyana ntsuꞌhui chaꞌ xicuten ñi quiꞌya ꞌin neꞌ gentil loo nu tsa quiꞌan tiꞌ neꞌ ꞌin ñi, canꞌ chaꞌ tiꞌ culoo cuaꞌ ycuiꞌ ñi chaꞌ tsuꞌhue ꞌin ñi loꞌo Abraham, loꞌ juin ñi: —Cuiꞌ siꞌya nuꞌhuin, canꞌ chaꞌ nchgaa nten chendyu ntsuꞌhui xuꞌhue neꞌ—.
\v 9 Canꞌ chaꞌ tsalca nu ndiya quiꞌan tiꞌ ꞌin Ndiose nguiꞌni caꞌan chaꞌ tsuꞌhue ꞌin canꞌ tsatlyu loꞌo Abraham, cuiꞌ yu nu ya quiꞌan tiꞌ ꞌin ñi.
\v 10 Siꞌyana nchgaa nu nducua tloo tyiꞌo laa loo nu xuꞌhua seꞌen chaꞌ ꞌin lee, nde nsoꞌ tucua canꞌ quiꞌya chonꞌ, siꞌyana nchcuiꞌ quityi ꞌin Ndiose: —Nducua yuhueꞌ chonꞌ nchgaa nu a nxuꞌhua seꞌen cunda scaa chaꞌ nu nguinu scua loo lee ꞌin Ndiose—.
\v 11 Canꞌ chaꞌ ñi sca tucui a tca quinu luhui tloo Ndiose loo nu xuꞌhua seꞌen chaꞌ ꞌin lee, la ndiꞌin chaꞌ re siꞌyana: —Nu quinu luhui tloo Ndiose, caja chendyu ꞌin loo nu tsa quiꞌan tiꞌ ꞌin ñi—.
\v 12 Una tsoꞌ chaꞌ nu ꞌin lee, siꞌi siꞌyana caja nu tsa quiꞌan tiꞌ ꞌin Ndiose canꞌ chaꞌ tyiꞌo laa, cuiꞌ ca nu nchcuiꞌ na: —Nu xuꞌhua seꞌen chaꞌ nu nchcuiꞌ lee, canꞌ nu tyuꞌhui chendyu—.
\v 13 Cristo cuaꞌ msuꞌhua lyiyaꞌ ñi nchgaa quiꞌya ꞌin na loꞌ msiꞌyu coꞌ ñi yuhueꞌ nducua chonꞌ na loo nu a mxuꞌhua seꞌen na chaꞌ ꞌin lee, loꞌ ticuiiꞌ chonꞌ ñi yaa yuhueꞌ canꞌ, (siꞌyana nchcuiꞌ quityi ꞌin Ndiose: —Yuhueꞌ nducua chonꞌ nchgaa nu nchcanꞌ tucui siiꞌ yca—.)
\v 14 Siꞌya Cristo Jesús, canꞌ chaꞌ quiꞌni caꞌan ꞌin neꞌ gentil chaꞌ tsuꞌhue nu mdaa Ndiose ꞌin Abraham, siꞌyana loo nu tsa quiꞌan tiꞌ na ꞌin ñi, cuan xuꞌhue na ꞌin Espíritu nu cuaꞌ mdiꞌin tyaa ñi chaꞌ loꞌo na.
\v 15 ꞌUn jun taꞌa na, chcuinꞌ sca chaꞌ loꞌo um tsañaꞌan nguiaa chaꞌ ꞌin sca nten nu cuaꞌ mꞌni cuiyaꞌ sca chaꞌ. Siyaꞌ lca na chaꞌ nu mdiꞌin tyaa nten chendyu, a tucui ꞌa nu tca cucha tiꞌin ꞌin na, uta caja nu tucua la chaꞌ canꞌ.
\v 16 Una cuaꞌ ñii loꞌo tsoꞌ ꞌin Ndiose, mdiꞌin tyaa ñi sca chaꞌ loꞌo Abraham, a cunta quiꞌni caꞌan chaꞌ re ꞌin sñeꞌ ta nten ꞌin yu. Una a nchcuiꞌ quityi canꞌ ta siꞌya chaꞌ ꞌin nchgaa sñeꞌ ta nten ꞌin yu, cuiꞌ ca nu nchcuiꞌ na chaꞌ ꞌin scati sñeꞌ ta nten ꞌin yu, canꞌ nu lca Cristo.
\v 17 Nde chaꞌ nchcuinꞌ loꞌo um: Culo nducua la mdiꞌin tya tla Ndiose sca chaꞌ loꞌo Abraham, cuiꞌ chaꞌ ꞌin Cristo, xa cuaꞌ mdijin jacua ciento ntsuꞌhui cla tyi yjan, xacanꞌ mducua suun chaꞌ ꞌin lee, una siꞌi canꞌ chaꞌ yatii chaꞌ nu cuaꞌ mdiꞌin tyaa ñi tiꞌ culoo, uta msiꞌyu coꞌ chaꞌ ꞌin na.
\v 18 Chaꞌ cua na ljyaan chaꞌ tsuꞌhue canꞌ loꞌo tsoꞌ chaꞌ ꞌin lee, a sca cunta ntsuꞌhui chaꞌ nu cuaꞌ mdiꞌin tya Ndiose xacanꞌ, una mdaa ñi chaꞌ tsuꞌhue canꞌ ꞌin Abraham siꞌya chaꞌ nu cuaꞌ mdiꞌin tyaa ñi loꞌo yu. Ñi chaꞌ nguinu scua chaꞌ ꞌin lee
\v 19 Xacanꞌ jan ñi, ¿Ñi chaꞌ nguinu scua chaꞌ ꞌin lee? Na mdya cula loꞌo na siꞌya quiꞌya nguiꞌni nten, tsayaꞌ mdiyaa tsaan nu yaan sñeꞌ nu ꞌin chaꞌ tsuꞌhue canꞌ. Angujle ꞌin Ndiose ycuiꞌ chaꞌ ꞌin lee loꞌo Moisé, loꞌ cuiꞌ yu mdijin yu suun canꞌ loꞌo nten.
\v 20 Una yu nu ndijin suun loꞌo nten, cuiꞌ siꞌyana nchcuiꞌ yu chaꞌ nu ycuiꞌ xca tucui, una Ndiose scati ñi ndiꞌin tya ñi sca chaꞌ.
\v 21 ¿Ta xqueꞌ tiꞌ na siꞌyana lee canꞌ a nchcua taꞌa na loꞌo chaꞌ nu cuaꞌ mdiꞌin tya Ndiose? Siꞌi na. Siꞌyana chaꞌ cua na tca tyiꞌo laa na siꞌya chaꞌ ꞌin lee, a sꞌni quinu luhui na tloo Ndiose xacanꞌ.
\v 22 Quityi ꞌin Ndiose nchcuiꞌ la na siꞌyana nchgaa nten nducua yuhueꞌ chonꞌ neꞌ siꞌya quiꞌya ꞌin neꞌ, una cuaꞌ mdiꞌin tyaa ñi chaꞌ siꞌyana taa ñi chaꞌ tsuꞌhue nu quiꞌni caꞌan ꞌin tsalca nu tsa quiꞌan tiꞌ ꞌin Jesucristo.
\v 23 Xa nu tiꞌ lyijyi caan chaꞌ tsuꞌhue nu ntsuꞌhui chaꞌ tsa quiꞌan tiꞌ na, ntsuꞌhui nchcun na siꞌya chaꞌ ꞌin lee, canꞌ nu msñi suꞌhua yaaꞌ ꞌin na chcui lja nu tiꞌ lyijyi ca chcanꞌ loo chaꞌ nu ntsuꞌhui chaꞌ tsa quiꞌan tiꞌ na.
\v 24 Nde chaꞌ tsuꞌhue nu mꞌni lee siꞌyana ya loꞌo na ꞌin na siiꞌ Cristo, ñaꞌan ca siꞌyana quinu luhui na tloo Ndiose loo nu tsa quiꞌan tiꞌ na ꞌin ñi.
\v 25 Loꞌ xa cuaꞌ mdiyaan chaꞌ nu ntsuꞌhui chaꞌ tsa quiꞌan tiꞌ na, a ꞌni ꞌa chaꞌ tiꞌ tsa loꞌo lee canꞌ ꞌin na.
\v 26 Nchgaa um cuaꞌ lca um sñeꞌ Ndiose loo nu ya quiꞌan tiꞌ um ꞌin Cristo Jesús,
\v 27 siꞌyana nchgaa ꞌun nu cuaꞌ mducua tya loꞌo chaꞌ cuiyaꞌ ꞌin Cristo, sca chaꞌ tiꞌ ꞌin um loꞌo ñi.
\v 28 Scañaꞌan ti neꞌ judio loꞌo neꞌ gentil, scañaꞌan ti nu lca nguso nu msiꞌi neꞌ ꞌin loꞌo nu nguiꞌni tñan chaꞌ ꞌin ti, cuiꞌ cuañaꞌan yu quiꞌyu loꞌo neꞌ cunaꞌan, sca chaꞌ ti ꞌin um nchgaa um loꞌo Cristo Jesús.
\v 29 Chaꞌ ndiꞌin um cunta ꞌin Cristo, cuaꞌ lca um ta nten ꞌin Abraham, loꞌ nchgaa chaꞌ tsuꞌhue nu cuaꞌ mdiꞌin tyaa Ndiose loꞌo yu cuaꞌ mꞌni caꞌan ꞌin um.
\c 4
\p
\v 1 Chaꞌ nu nchcuinꞌ loꞌo um, sca yu lyoꞌ ti nu tiꞌ lyijyi chcuan cunta chaꞌ tsuꞌhue ꞌin sti, suꞌhua ñaꞌan ndiꞌin chaꞌ ꞌin yu loꞌo sca nguso, siyaꞌ lca yu xꞌnan nchgaa loo na.
\v 2 Una ntsuꞌhui nu nsñi cunta ꞌin yu tsatlyu loꞌo tñan canꞌ, tsayaꞌ tsa tucua tsaan xnu sti yu cunta tñan canꞌ ꞌin yu.
\v 3 Cuiꞌ cuañaꞌan mdiꞌin chaꞌ ꞌin nareꞌ xa ncua suhue na, jui nu msñi suꞌhua yaaꞌ ꞌin na loꞌ mducui nchaꞌan na scasca chaꞌ nu nchca loo chendyu re.
\v 4 Una ya tucua tsaan, Ndiose nguaꞌan tñan ñi ꞌin Sñeꞌ ñi nu ngula ꞌin sca neꞌ cunaꞌan lja nu ndiꞌin chaꞌ ꞌin lee,
\v 5 siꞌyana culo laa ñi ꞌin nchgaa nu nsñi suꞌhua yaaꞌ lee canꞌ ꞌin, a cunta siꞌyana xisñeꞌ ñi ꞌin na.
\v 6 Loꞌ siꞌyana cuaꞌ lca um sñeꞌ Ndiose, nguaꞌan tñan ñi Espíritu ꞌin Sñeꞌ ñi nu chuꞌhui niꞌ cusya ꞌin um, loꞌ nchcuiꞌ: ¡Abba, ꞌun lca um Sti hua!
\v 7 Canꞌ chaꞌ a lca ꞌa um sca nguso ti, cuiꞌ ca nu lca um sñeꞌ ñi, loꞌ chaꞌ lca um sñeꞌ Ndiose, cuiꞌ chaꞌ tsuꞌhue ꞌin ñi quiꞌni caꞌan ꞌin um siꞌya Cristo.
\s A xitucui ꞌa na xiyaꞌ loo chaꞌ ꞌin lee
\p
\v 8 Nu chaꞌ ñi siꞌyana nu ncua tiꞌ culoo a yuꞌhui lyoo um ꞌin Ndiose, ncua jaꞌan um ꞌin scasca joꞌo nu a lca Ndiose.
\v 9 Una cuaꞌ ñii ndyuꞌhui lyoo um ꞌin Ndiose, uta tsuꞌhue la cunen loꞌo um siꞌyana Ndiose cuaꞌ ndyuꞌhui lyoo ñi ꞌin um, ¿ñaꞌan ta nchca tiꞌ um xitucui um xiyaꞌ chcui nchaꞌan um scasca chaꞌ nu a tca ta yaaꞌ ꞌin um, ñi a tca cuꞌni chaꞌan canꞌ cusya ꞌin um, loꞌ nde taa um yaꞌ culo canꞌ tñan ꞌin um xiyaꞌ?
\v 10 ꞌUn tiꞌ nxuꞌhua seꞌen um tsaan nu nꞌni tnu neꞌ judio, loꞌo cooꞌ loꞌo yjan, loꞌ cuaꞌ lca ti xaa nu nꞌni ti um ꞌin um.
\v 11 Nsuꞌhuan chaꞌ tiqueen loꞌo um, ¿ta cua chaꞌ ti mꞌnin tñan siꞌya um?
\v 12 ꞌUn jun taꞌa na, jñan chaꞌ tsuꞌhue ꞌin um, tyaa um yaꞌ cuꞌni chaꞌan um ꞌñan siꞌyana loꞌon nanꞌ sca chaꞌ ti ꞌñan loꞌo um, loꞌ ñi a sca tiꞌi ta cuaꞌ mꞌni um loꞌon.
\v 13 Cuaꞌ jlyo tiꞌ um siꞌya quicha nu ncua tiꞌin, yatoꞌo ycuinꞌ chaꞌ tsuꞌhue ꞌin Cristo loꞌo um tiꞌ culoo.
\v 14 Ñi a mnaꞌan tiꞌi um loꞌ ñi a mscuan tloo um ꞌñan siꞌya quicha nu ntsuꞌhui ꞌñan, cuiꞌ ca nu ncuan xuꞌhue um ꞌñan tsañaꞌan nchca tiꞌ sca angujle ꞌin Ndiose, uta tsañaꞌan Cristo Jesús.
\v 15 Cuaꞌ ñii, ¿la ncua chaꞌ tsuꞌhue ntsuꞌhui tiquee canꞌ ꞌin um? Nanꞌ ndiya yuꞌhui tinꞌ siꞌyana hasta quiloo um ncua tiꞌ um culo um loꞌ taa um ꞌñan.
\v 16 ¿Ta nde mchca taꞌa cusuun na siꞌyana ycuinꞌ loꞌo um chaꞌ nu ñi?
\v 17 Nten cua, lyee ntsuꞌhui yuhue tiꞌ neꞌ ꞌin um, una siꞌi siꞌyana ca nu tsuꞌhue ꞌin um, cuiꞌ ca nu nchca tiꞌ neꞌ culo tsoꞌ neꞌ ꞌin um siiꞌ hua loꞌ tsatoꞌo chuꞌhui yuhue tiꞌ um ꞌin neꞌ.
\v 18 Tsuꞌhue chaꞌ cua na nchgaa xaa suꞌhua yuhue tiꞌ um ꞌin nchgaa tucui, una loꞌo sca chaꞌ tiyaa nu luhui, loꞌ siꞌi tsalja ndiꞌin tin loꞌo um.
\v 19 Sñenꞌ, cuaꞌ xiyaꞌ ndijin nu tiꞌi siꞌya um tsañaꞌan nu tiꞌi ndyijyin sca neꞌ cunaꞌan nu ndiyaan sñeꞌ chendyu, loꞌ tijin chaꞌ re tsayaꞌ nu quinu scua tla chaꞌ ꞌin Cristo niꞌ cusya ꞌin um.
\v 20 Lyee ꞌa lca tiqueen ñaꞌan taꞌa na loꞌo um, loꞌ quia nan ñaꞌan nu chcuinꞌ loꞌo um, siꞌyana tsañaꞌan nu nguiꞌni um a jlyo ꞌa tinꞌ ñaꞌan tiꞌ quiñan tinꞌ.
\s Chaꞌ ꞌin Sara loꞌo Agar
\p
\v 21 Quitsaꞌ um ꞌñan, ꞌun nu tiꞌ nchca tiꞌ xuꞌhua seꞌen chaꞌ ꞌin lee, ¿Ta na a nchca ca cuiyaꞌ tiꞌ um ñaꞌan nchcuiꞌ na?
\v 22 Nchcuiꞌ na siꞌyana Abraham mdiꞌin tucua sñeꞌ, sca canꞌ sñeꞌ yu loꞌo neꞌ cunaꞌan nguso ꞌin yu, loꞌ xca canꞌ lca sñeꞌ yu loꞌo cuilyiꞌo yu.
\v 23 Sñeꞌ yu loꞌo neꞌ cunaꞌan nguso canꞌ mdiꞌin loꞌo cunta ꞌin ti yu, una xca canꞌ mdiꞌin loꞌo chaꞌ cuiyaꞌ ꞌin Ndiose, cuiꞌ tsañaꞌan chaꞌ nu cuaꞌ mdiꞌin tyaa ñi loꞌo yu.
\v 24 Quiꞌan ꞌa chaꞌ tca quiꞌya na cunta loꞌo chaꞌ re. Chcuaa neꞌ cunaꞌan canꞌ lca na tucua chaꞌ nu mdiꞌin tyaa Ndiose. Sca chaꞌ canꞌ mdiꞌin tyaa ñi lca quiꞌya Sinai, loꞌ nu chcui nchaꞌan chaꞌ canꞌ xñi suꞌhua yaaꞌ na ꞌin, canꞌ nu lca Agar.
\v 25 Siꞌyana Agar canꞌ lca na quiꞌya Sinai nu nducua seꞌen lca Arabia, sca chaꞌ ti ꞌin canꞌ loꞌo chaꞌ nu tiꞌ ntsuꞌhui ꞌin neꞌ Jerusalén, loꞌ tsatlyu nxñi suꞌhua yaaꞌ chaꞌ canꞌ ꞌin loꞌo sñeꞌ.
\v 26 Una ycuiꞌ ca Jerusalén nu ndiꞌin la niꞌ cuaan, a loꞌo canꞌ caja nu xñi suꞌhua yaaꞌ ꞌin, canꞌ nu lca jyiꞌan nchgaa nareꞌ.
\v 27 Siꞌyana nchcuiꞌ quityi ꞌin Ndiose: ¡—Ca tsuꞌhue chuꞌhui tiquee nuꞌhuin neꞌ cunaꞌan nu a nchca siyaꞌ tyiꞌin sñeꞌ! ¡Cueen xiꞌya styi nuꞌhuin nu a jlyo tiꞌ ñaꞌan nu tiꞌi ndiyaan sñeꞌ neꞌ chendyu! Siꞌyana quiꞌan la sñeꞌ neꞌ cunaꞌan nu jui nu mscuan tloo ꞌin, que ꞌin nu yten yuꞌhui ti loꞌo cuilyiꞌo canꞌ—.
\v 28 Canꞌ chaꞌ ꞌun jun taꞌa na, nareꞌ lca na tsañaꞌan nchca tiꞌ Isaac, sñeꞌ nu cuaꞌ mꞌni caꞌan chaꞌ tsuꞌhue canꞌ ꞌin.
\v 29 Una yatoꞌo sñeꞌ nu mdiꞌin loꞌo juesa ꞌin nten chendyu mnaꞌan tiꞌi ꞌin sñeꞌ nu mdiꞌin loꞌo chaꞌ cuiyaꞌ ꞌin Espíritu, cuiꞌ cuañaꞌan cuaꞌ ñii.
\v 30 ¿Una ñaꞌan ta nchcuiꞌ quityi ꞌin Ndiose? —Culo tsoꞌ ꞌin neꞌ cunaꞌan nguso canꞌ loꞌo sñeꞌ neꞌ, siꞌyana a ntsuꞌhui chaꞌ quiꞌni caꞌan ꞌin canꞌ loꞌo chaꞌ tsuꞌhue nu cuaꞌ mꞌni caꞌan ꞌin sñenꞌ nanꞌ—.
\v 31 Canꞌ chaꞌ ꞌun jun taꞌa na, quiꞌya na cunta siꞌyana a lca na sñeꞌ neꞌ cunaꞌan nguso canꞌ, cuiꞌ ca nu lca na sñeꞌ neꞌ cunaꞌan nu ndiꞌin ca cuilyiꞌo.
\c 5
\s A tyiꞌo tsoꞌ na siiꞌ Cristo
\p
\v 1 Canꞌ chaꞌ tla tyun um loo chaꞌ tsuꞌhue nu cuaꞌ jui ꞌin na siꞌya Cristo tsañaꞌan ndlo laa ñi ꞌin na, a taa um yaꞌ tiꞌ caja nu soꞌ tucua yuꞌhua chonꞌ um, loꞌ tsatoꞌo xiyaꞌ xñi suꞌhua yaaꞌ lee canꞌ ꞌin um.
\v 2 Ñaꞌan jan ñi, nanꞌ yu Pablo chcuinꞌ sca chaꞌ loꞌo um: Chaꞌ na tiꞌ ca circuncida ꞌin um, a nducua tloo um ꞌin Cristo xacanꞌ.
\v 3 Xiyaꞌ xitucuin chcuinꞌ loꞌo um chaꞌ re: Nchgaa yu quiꞌyu nu tiꞌ nchca tiꞌ ca circuncida ꞌin, ꞌni chaꞌ xuꞌhua seꞌen nchgaa la ñaꞌan chaꞌ nu nchcuiꞌ lee.
\v 4 Nchgaa nu nchca tiꞌ quinu luhui tloo Ndiose loo nu xuꞌhua seꞌen chaꞌ ꞌin lee, cuaꞌ msiꞌyu coꞌ canꞌ chaꞌ ꞌin loꞌo Cristo, loꞌ mducua tijyoꞌ siiꞌ chaꞌ tsuꞌhue ꞌin ñi.
\v 5 Una cunta ꞌin nareꞌ nducua tloo na quinu luhui na tloo Ndiose siꞌya Espíritu ꞌin ñi loo nu ndiya quiꞌan tiꞌ na.
\v 6 Siꞌyana tsañaꞌan nguiaa chaꞌ ꞌin na loꞌo Cristo Jesús, scañaꞌan ti nu cuaꞌ ncua circuncida ꞌin loꞌo nu a nchca ca na ꞌin, una nde chaꞌ nu ntsuꞌhui lyoo tloo Ndiose, cuiꞌ chaꞌ tsuꞌhue nu ndyiꞌo tiquee na loo nu ndiya quiꞌan tiꞌ na ꞌin ñi.
\v 7 Tsuꞌhue ꞌa tsañaꞌan nu ljyaan um, ¿una ti nu mducui ndijin siꞌyana a xuꞌhua seꞌen ꞌa um chaꞌ nu ñi?
\v 8 Chaꞌ nu mducui ndijin canꞌ a ljyaan na tsoꞌ ꞌin Ndiose, ñi nu msiꞌya ꞌin um.
\v 9 Siꞌyana loꞌo tsa chinꞌ suun jaslya tca xitiyaaꞌ na ñaꞌaan scuan jaslya canꞌ.
\v 10 Nanꞌ nducua tloon siꞌyana sca loo ti chaꞌ chuꞌhui tiquee na siꞌya Ñi Xꞌnan na, una nu nguiꞌni tinto ꞌin um, a ꞌni chaꞌ siyaꞌ ñi tuꞌ tucui, tsaloo na caan ti yuhueꞌ chonꞌ.
\v 11 ꞌUn jun taꞌa na, chaꞌ nanꞌ tiꞌ chcuinꞌ siꞌyana ꞌni chaꞌ ca circuncida ꞌin nten, ¿Ñi chaꞌ tiꞌ ndijin nu tiꞌi siꞌya neꞌ judio chaꞌ na canꞌ? Chaꞌ cua na tiꞌ nchcuinꞌ chaꞌ re a ca tiꞌi tiꞌ neꞌ xa nu quine ꞌin neꞌ chaꞌ ꞌin Cristo ñaꞌan ngujui ñi loo cusi.
\v 12 Una yu nu ndaꞌan yꞌni tinto ꞌin um loꞌo chaꞌ canꞌ, ¡tsuꞌhue lati chaꞌ cua na xiꞌyu na ꞌin yu siyaꞌ ti!
\v 13 Siꞌyana ꞌun jun taꞌa na, Ndiose msiꞌya ñi ꞌin um siꞌyana tyiꞌo laa um, una siꞌi canꞌ chaꞌ tiꞌ tsa quiñan um cuꞌni um chaꞌ ngunanꞌ, cuiꞌ ca nu scasca um ta yaaꞌ taꞌa um loꞌo nu chcui lca tiquee um.
\v 14 Loꞌo scati chaꞌ re quiꞌya na chaꞌ tiyaa ñaꞌan ntsuꞌhui chaꞌ xuꞌhua seꞌen na ñaꞌaan chaꞌ ꞌin lee: —Ñaꞌan ꞌtnan tiꞌ um ꞌin taꞌa nten um tsañaꞌan nꞌni um loꞌo um ticuiiꞌ um—.
\v 15 Una chaꞌ ndiꞌin suun um loꞌ ndiꞌin ycu taꞌa um scasca um, chen nchcui jlyo um nchgaa um.
\s Chaꞌ ngunanꞌ nchcui ndijin loo Espíritu
\p
\v 16 Canꞌ chaꞌ chcuinꞌ loꞌo um: Tyuꞌhui um sca chendyu tsañaꞌan nu ndlo Espíritu tñan, loꞌ a tsatoꞌo cuꞌni um chaꞌ ngunanꞌ nu ndyiꞌo tiquee um.
\v 17 Siꞌyana chaꞌ nu ndyiꞌo tiquee na nchcui ndijin na loo chaꞌ nu ꞌin Espíritu, cuiꞌ cuañaꞌan Espíritu nchcui ndijin canꞌ loo chaꞌ nu ndyiꞌo tiquee na, loꞌ chcuaa canꞌ a nchcua taꞌa chaꞌ ꞌin, canꞌ chaꞌ a ndyijyi ñaꞌan cuꞌni um chaꞌ tsuꞌhue nu nchca tiꞌ um.
\v 18 Una chaꞌ taa um yaꞌ culo Espíritu tñan ꞌin um, a ntsuꞌhui ꞌa um tuyaaꞌ lee xacanꞌ.
\v 19 Siꞌyana nchca chcanꞌ loo chaꞌ ngunanꞌ nu ndyiꞌo tiquee neꞌ: Chaꞌ nu nguiten yuꞌhui neꞌ loꞌo cuilyiꞌo nten uta loꞌo neꞌ ycuiꞌ ti, chaꞌ tiyaa ngunanꞌ, chaꞌ nu a ndii tiꞌ neꞌ chaꞌ jyiꞌo,
\v 20 chaꞌ nu nꞌni tnu neꞌ joꞌo, chaꞌ nu nꞌni btaꞌa neꞌ, chaꞌ nu nsuꞌhua neꞌ chaꞌ nsinꞌ tiꞌ tiquee neꞌ, chaꞌ cusuun, chaꞌ xlya, chaꞌ nu nchcuen tiqueꞌ neꞌ, chaꞌ nu nxisuun taꞌa neꞌ, chaꞌ nu nsuꞌhue taꞌa neꞌ, chaꞌ nu nducuan qui taꞌa neꞌ,
\v 21 chaꞌ njñan tiꞌ, chaꞌ ndujui taꞌa neꞌ, chaꞌ nchca cuꞌhui neꞌ, chaꞌ nducunꞌ nu nꞌni neꞌ xa nꞌni neꞌ taꞌa, a cunta loꞌo scasca la chaꞌ ngunanꞌ nu ndyiꞌo tiquee neꞌ. Cuiꞌ chaꞌ re lca nu nsuꞌhuan tiyaan ꞌin um, tsañaꞌan nu cuaꞌ nen loꞌo um tiꞌ culoo, nu nguiꞌni chaꞌ re a ntsuꞌhui chaꞌ sten canꞌ seꞌen ndlo Ndiose tñan.
\v 22 Una ndeñaꞌan nchca chcanꞌ loo tñan nu nguiꞌni Espíritu: Chaꞌ tsuꞌhue nu ndyiꞌo tiquee na, chaꞌ tsuꞌhue ntsuꞌhui tiquee na, chaꞌ tsuꞌhue ndiꞌin na, chaꞌ ntsuꞌhui chaꞌ tlyu tiꞌ ꞌin na, chaꞌ tsuꞌhue nguiaa chaꞌ ꞌin na, chaꞌ nꞌni na tñan tsuꞌhue, chaꞌ ñi ndiꞌin chaꞌ ꞌin na,
\v 23 chaꞌ suun ñaꞌan nguiaa chaꞌ ꞌin na, a cunta chaꞌ nxñi na cunta ꞌin na. Nchgaa chaꞌ re a la ndlo quiꞌya lee ꞌin nu nguiꞌni cuañaꞌan.
\v 24 Una nchgaa nu cuaꞌ ndiꞌin cunta ꞌin Cristo cuaꞌ mjyiꞌin caꞌan canꞌ ꞌin loo cusi loꞌo nchgaa chaꞌ ngunanꞌ nu ndyiꞌo tiquee loꞌo chaꞌ nu nchcui tiꞌ.
\v 25 Chaꞌ nduꞌhui na chendyu loꞌo chaꞌ cuiyaꞌ ꞌin Espíritu, cuiꞌ cuañaꞌan taa na yaꞌ culo ñi tñan ꞌin na.
\v 26 A nchca chaꞌ cuꞌni siyeꞌ na, ta taa na chaꞌ nsinꞌ tiꞌ ꞌin taꞌa na, loꞌ ñi a cuꞌni jñan tiꞌ na scasca na.
\c 6
\p
\v 1 ꞌUn jun taꞌa na, chaꞌ ndeꞌen nu mdyu loo quiꞌya, loꞌ tsalca ꞌun nu tla ndon siꞌya Espíritu ꞌin Ndiose, loꞌo suun ñaꞌan chcuiꞌ um loꞌo canꞌ siꞌyana xiton xiyaꞌ, una xñi um cunta ꞌin um ñaꞌan tuꞌ loꞌo um tyu um loo quiꞌya.
\v 2 Ta yaaꞌ taꞌa um loꞌo chaꞌ nu ndijin um, loꞌ cuañaꞌan tucua um tñan chaꞌ nu ndlo Cristo tñan.
\v 3 Siꞌyana chaꞌ ntsuꞌhui nu xqueꞌ tiꞌ cuaan la ndiꞌin chaꞌ ꞌin, loꞌ a sca tucui lca, canꞌ nu ñilyiꞌo ꞌin ticuiiꞌ.
\v 4 Cunda scaa na ca cuiyaꞌ tiꞌ na chaꞌ cuiꞌ ñaꞌan nguiꞌni na, la xacanꞌ ca tsuꞌhue chuꞌhui tiquee na siꞌya tñan tsuꞌhue nu nguiꞌni na, loꞌ siꞌi siꞌya tñan ꞌin xca tucui,
\v 5 siꞌyana cunda scaa na ntsuꞌhui chaꞌ tyiꞌo loꞌo na chaꞌ nu nguiꞌni na.
\v 6 A cunta nu nguiꞌni chaꞌan chaꞌ ꞌin Ndiose, ngaꞌan chaꞌ ta yaaꞌ canꞌ ꞌin nu ndloꞌo ꞌin loꞌo na nu cunajoꞌo ꞌin.
\v 7 A cuñilyiꞌo um ꞌin um ticuiiꞌ um, siꞌyana Ndiose a caja nu cuiñi lyiꞌo ꞌin ñi: Nchgaa na nu ntya na, ticuiꞌ chaꞌ canꞌ xoꞌ na.
\v 8 Siꞌyana nu ntsuꞌhui yuhue tiꞌ ꞌin loꞌo tsoꞌ chaꞌ ꞌin cunanꞌ, tsatoꞌo chcuan canꞌ chaꞌ ndyija, una nu ntsuꞌhui yuhue tiꞌ ꞌin loꞌo tsoꞌ chaꞌ ꞌin Espíritu, cuiꞌ siꞌya Espíritu chcuan canꞌ chendyu nu a tsatii ꞌa.
\v 9 Canꞌ chaꞌ a ca ndaja tiꞌ na cuꞌni na tsuꞌhue, siꞌyana tiyaa xaa quiꞌni caꞌan chaꞌ tsuꞌhue canꞌ ꞌin na, chaꞌ a cuꞌni naꞌan tiꞌ na loꞌo chaꞌ re.
\v 10 Canꞌ chaꞌ lja nu tiꞌ ndyijyi xaa, cuꞌni na tsuꞌhue loꞌo nchgaa tucui, una nde lyee lati loꞌo taꞌa ndiya quiꞌan tiꞌ na.
\s Msuꞌhua loo yu Pablo chaꞌ nu ngujui Cristo loo cusi
\p
\v 11 Ñaꞌan um jan ñi, tsala ñaꞌan tnu letra ndaꞌan cuaꞌ ñii.
\v 12 Nchgaa nu xicuꞌni ꞌin um siꞌyana ca circuncida ꞌin um, canꞌ nu nchca tiꞌ quinu tsuꞌhue loꞌo taꞌa nten, tsaloo siꞌyana a nchca tiꞌ canꞌ tyijyin nu tiꞌi siꞌya chaꞌ ꞌin Cristo, ñi nu ngujui loo cusi.
\v 13 Siꞌyana ñi yu nu ncua circuncida ꞌin a nxuꞌhua seꞌen yu chaꞌ ꞌin lee, una nchca tiꞌ yu siꞌyana ca circuncida ꞌin um, seꞌen nu cuꞌni siyeꞌ yu siꞌya chaꞌ ꞌin um.
\v 14 Una chaꞌ nu ꞌñan tijyoꞌ nchca chaꞌ siyeꞌ canꞌ, tsaloo ti nducua quiloon siꞌyana ngujui Ñi Xꞌnan na Jesucristo loo cusi, canꞌ chaꞌ nꞌnin cunta siꞌyana cuaꞌ ngujuin loꞌo tsoꞌ chaꞌ nu nchca loo chendyu, loꞌ ñi a ndlo ꞌa na tñan ꞌñan.
\v 15 Siꞌyana tsoꞌ chaꞌ ꞌin Cristo Jesús, a sca ntsuꞌhui lyoo chaꞌ nu nchca circuncida ꞌin nten uta chaꞌ a ncua na, cuiꞌ ca nu siꞌyana ca na sca nten nu cui ti ꞌin ñi.
\v 16 Nchgaa nu nguia nchaꞌan chaꞌ re, tsuꞌhue ti tyiꞌin canꞌ, loꞌ Ndiose ñaꞌan ꞌtnan tiꞌ ñi ꞌin tsatlyu loꞌo neꞌ Israel nu cuaꞌ ndiꞌin cunta ꞌin ñi.
\v 17 Canꞌ chaꞌ cuaꞌ ñii chcui nu nguiaa nde loo re, a nchca tinꞌ caja nu chcuiꞌ tyijyin loꞌon siꞌya chaꞌ re, siꞌyana cuaꞌ lyiꞌyan scasca cuiyaꞌ siꞌya chaꞌ ꞌin Ñi Xꞌnan na Jesús.
\s Yu Pablo mslaꞌ taꞌa yu loꞌo jun taꞌa na
\p
\v 18 ꞌUn jun taꞌa na, cuiꞌ chaꞌ tsuꞌhue ꞌin Ñi Xꞌnan na Jesucristo quinu yuꞌhui niꞌ cusya ꞌin um. Amen.