\id EPH - Nopala (Chatino) NT [cya] - Mexico 2013 (web 2014)
\h EFESIOS
\toc1 Efesios
\toc2 Efesios
\toc3 Ef
\mt1 Efesios
\c 1
\s Yu Pablo nchcuiꞌ chaꞌ yu ꞌin jun Efeso
\p
\v 1 Nanꞌ yu Pablo, siꞌya chaꞌ cuiyaꞌ ꞌin Ndiose nguaꞌan tñan Jesucristo ꞌñan tsa ycuinꞌ chaꞌ tsuꞌhue ꞌin ñi, loꞌ caꞌan tñan sca quityi re ꞌin um, ꞌun nu ndiꞌin quichen Efeso, nchgaa nu cuaꞌ mdoꞌo hui ꞌin Cristo Jesús nu ndiya quiꞌan tiꞌ ꞌin ñi.
\v 2 Stina Ndiose loꞌo Ñi Xꞌnan na Jesucristo taa ñi chaꞌ tsuꞌhue nu chuꞌhui niꞌ cusya ꞌin um, loꞌ cuꞌni ñi chaꞌ tyiꞌin tsuꞌhue um.
\s Tlyu chaꞌ tsuꞌhue jui ꞌin na siꞌya Cristo
\p
\v 3 Tlyu ca xuꞌhue ntsuꞌhui ꞌin Ndiose, Sti Ñi Xꞌnan na Jesucristo, siꞌyana mdaa ñi nchgaa loo chaꞌ tsuꞌhue ꞌin na nu mdoꞌo la niꞌ cuaan siꞌya Cristo.
\v 4 Cuiꞌ siꞌya ñi ngulohui Ndiose ꞌin na xa nu tiꞌ lyijyi tñan ñi chendyu, siꞌyana ca na nten nu luhui ꞌin ñi nu a nducui ꞌa quiꞌya.
\v 5 Siꞌya chaꞌ tsuꞌhue nu mdoꞌo tiquee ñi, mjyiꞌin caꞌan ñi xuꞌhue na siꞌyana xisñeꞌ ñi ꞌin na siꞌya Jesucristo tsañaꞌan nu ncua tiꞌ ñi,
\v 6 ñaꞌan ca siꞌyana cuꞌni tnu na ꞌin ñi siꞌya chaꞌ tsuꞌhue nu tlyu mdoꞌo tiquee ñi, nu jui ꞌin na xuꞌhue ti siꞌya Sñeꞌ ñi nu taꞌa lati ꞌin ñi.
\v 7 Siꞌya Sñeꞌ ñi mdoꞌo laa na loꞌo tne ñi, loꞌ nguten quiꞌya ꞌin na siꞌya chaꞌ tsuꞌhue nu tlyu mdoꞌo tiquee ñi,
\v 8 mꞌni ñi chaꞌ mtsaꞌan yuꞌhui chaꞌ tsuꞌhue canꞌ ꞌin na, tsañaꞌan nu ndyiꞌya ñi cunta loꞌo nchgaa loo chaꞌ tiyaa,
\v 9 ngulyo scua la ñi chaꞌ nu ntsuꞌhui tiquee ñi, chaꞌ nu yuꞌhui cutsiꞌ ꞌin ñi, tsañaꞌan chaꞌ nu cuaꞌ mdiꞌin tyaa ñi tiꞌ culoo, siꞌya chaꞌ tsuꞌhue nu mdoꞌo tiquee ñi,
\v 10 loꞌ cuꞌni ñi chaꞌ ca scati chaꞌ ꞌin nchgaa loo na siꞌya Cristo, na nu ndiꞌin loo chendyu re loꞌo na nu ndiꞌin la niꞌ cuaan, tsaan nu tsa tucua chaꞌ nu cuaꞌ mdiꞌin tyaa ñi.
\v 11 Cuiꞌ siꞌya Cristo jui chaꞌ tsuꞌhue ꞌin na, xuꞌhue nu cuaꞌ mꞌni caꞌan ꞌin na cuaꞌ ñaꞌaan chaꞌ nu mdiꞌin tyaa ñi, ñi nu nꞌni nchgaa loo chaꞌ tsañaꞌan nu nchca tiꞌ ñi,
\v 12 ñaꞌan ca siꞌyana cuꞌni tnu na ꞌin ñi siꞌya chaꞌ cuiyaꞌ nu tlyu ꞌin ñi, nchgaa naa neꞌ nu culo nducua lati nducua quiloo ꞌin Cristo.
\v 13 Cuiꞌ cuañaꞌan ꞌun, sca chaꞌ ti ꞌin um loꞌo ñi tiꞌ xa ngune ꞌin um chaꞌ nu ñi canꞌ, cuiꞌ chaꞌ tsuꞌhue ꞌin Cristo nu ndlo laa ꞌin um, loꞌ siꞌya chaꞌ nu ya quiꞌan tiꞌ um ꞌin ñi, mjyiꞌin caꞌan ñi sca cuiyaꞌ ꞌin um loꞌo Espíritu nu Luhui ꞌin Ndiose tsañaꞌan nu cuaꞌ mdiꞌin tyaa ñi chaꞌ,
\v 14 siꞌyana tca chcuan na cunta chaꞌ tsuꞌhue nu cuaꞌ mxnu Ndiose ꞌin na, loꞌ nta na tsaan nu chcuan ca na cunta chaꞌ canꞌ, ñaꞌan ca siꞌyana cuꞌni tnu na ꞌin ñi siꞌya chaꞌ cuiyaꞌ nu tlyu ꞌin ñi.
\s Mjñan yu Pablo chaꞌ tiyaa ꞌin Ndiose
\p
\v 15 Canꞌ chaꞌ loꞌon nanꞌ, tiꞌ xa ynan chaꞌ ñaꞌan nu ndiya quiꞌan tiꞌ um ꞌin Ñi Xꞌnan na Jesús, a cunta siꞌyana ntsuꞌhui chaꞌ tsuꞌhue ꞌin um loꞌo nchgaa jun nu cuaꞌ mdoꞌo hui ꞌin ñi,
\v 16 a ndlaꞌ tinꞌ ndyaan xuꞌhue ꞌin Ndiose siꞌya um, loꞌ ndiya yuꞌhui tinꞌ ꞌin um nchgaa yaꞌ nchcuinꞌ lyiꞌon ꞌin ñi,
\v 17 siꞌyana Ndiose ꞌin Ñi Xꞌnan na Jesucristo, cuiꞌ Stina ñi nu tlyu lati, taa ñi chaꞌ tiyaa ꞌin um loꞌ culyo scua la ñi chaꞌ ꞌin ñi loꞌo um tsañaꞌan nu lca ñi ycuiꞌ ñi.
\v 18 A cunta sla la ñi chaꞌ tiyaa ꞌin um, ca jlyo tiꞌ um ñi chaꞌ msiꞌya ñi ꞌin um, ca cuiyaꞌ tiꞌ um tsala ñaꞌan tlyu chaꞌ tsuꞌhue nu cuaꞌ jui ꞌin nchgaa nu cuaꞌ mdoꞌo hui ꞌin ñi,
\v 19 tsala ñaꞌan tlyu chaꞌ cuiyaꞌ ꞌin ñi nu nda yaaꞌ ꞌin na, naa neꞌ nu ndiya quiꞌan tiꞌ ꞌin ñi, loꞌ ndyiꞌan loꞌo na chaꞌ cuiyaꞌ ꞌin ñi,
\v 20 cuiꞌ chaꞌ cuiyaꞌ nu ncua chcanꞌ xa mꞌni ñi chaꞌ mdyiquiꞌo Cristo, loꞌ mdaa ñi seꞌen chcua canꞌ tsoꞌ cueen ꞌin ñi la niꞌ cuaan,
\v 21 mchcuan canꞌ chaꞌ cuiyaꞌ nu cuaan lati ꞌin nchgaa bsya, loꞌo nu cuaan la tñan lyiꞌya, loꞌo nu ntsuꞌhui chaꞌ cuiyaꞌ yaaꞌ, loꞌo nchgaa nu lyee la ndlo tñan, loꞌ cuaan la chaꞌ cuiyaꞌ ꞌin ñi que nchgaa chaꞌ nu ndloꞌo naan neꞌ ꞌin loo chendyu re loꞌo la niꞌ cuaan, loꞌ ndlo ñi tñan cuaꞌ ñii, cuiꞌ cuañaꞌan tsala xaa.
\v 22 —Ndiose mxnu ñi nchgaa loo chaꞌ nde tuquiyaꞌ Sñeꞌ ñi—, cuiꞌ cuañaꞌan ngulo ton ñi ꞌin canꞌ siꞌyana ca ñi que loꞌ culo ñi tñan ꞌin nchgaa laa,
\v 23 loꞌ laa canꞌ lca na cunanꞌ Cristo nu mtsaꞌan yuꞌhui loꞌo Ñi, ñi nu nꞌni chaꞌ chaꞌan yuꞌhui nchgaa loo na sca chcui seꞌen.
\c 2
\s Tyiꞌo laa na siꞌya chaꞌ tsuꞌhue ꞌin Ndiose 

\p
\v 1 Ndiose lca nu mdaa chendyu ꞌin um lja mdaꞌan yꞌni um cuati loo chaꞌ ngunanꞌ, loꞌ siꞌya quiꞌya canꞌ a yuꞌhui chendyu ꞌin um tloo ñi.
\v 2 Chacuiꞌ chaꞌ ngunanꞌ mdaꞌan yꞌni um xacanꞌ, mducui nchaꞌan um chaꞌ nu nchca loo chendyu, ncua jaꞌan um ꞌin laxaꞌan nu nducui loo cuiꞌin seꞌen ndlo tñan, loꞌ nchgaa nu lyeꞌ tiꞌ nchca jaꞌan ꞌin canꞌ,
\v 3 cuiꞌ lja canꞌ yuꞌhui na tiꞌ culoo, mducui nchaꞌan na chaꞌ nu mdoꞌo tiquee na, mꞌni na ñaꞌan nu ncua tiꞌ na siꞌya chaꞌ tiyaa ngunanꞌ ꞌin na, loꞌ suꞌhua ñaꞌan mdiꞌin chaꞌ ꞌin na loꞌo nchgaa nten nu ntsuꞌhui chaꞌ tyijyin nu tiꞌi tiyaa xaa.
\v 4 Una Ndiose, ñi nu mtsaꞌan yuꞌhui chaꞌ tsuꞌhue ꞌin, lyee mñaꞌan ꞌtnan tiꞌ ñi ꞌin na,
\v 5 loꞌ siyaꞌ ngujui na tloo ñi siꞌya quiꞌya nducui na, una mdaa ñi chendyu ꞌin na tsatlyu loꞌo Cristo, (loꞌ siꞌya chaꞌ tsuꞌhue ꞌin ñi mdoꞌo laa um),
\v 6 cuiꞌ cuañaꞌan tsatlyu mꞌni ñi chaꞌ mdyiquiꞌo na loꞌo Cristo, loꞌ mdaa ñi seꞌen chcua na sca seꞌen ti loꞌo Cristo Jesús la niꞌ cuaan,
\v 7 seꞌen nu culyo scua la ñi chaꞌ tsuꞌhue ꞌin ñi tsala xaa, loꞌ ca chcanꞌ loo tsala ñaꞌan tlyu chaꞌ tsuꞌhue mdoꞌo tiquee ñi loꞌo na siꞌya Cristo Jesús.
\v 8 Siꞌya chaꞌ tsuꞌhue ꞌin Ndiose mdoꞌo laa um loo nu ya quiꞌan tiꞌ um ꞌin ñi, loꞌ siꞌi cunta ꞌin um lca chaꞌ canꞌ, cuiꞌ ca nu siꞌya chaꞌ tsuꞌhue ꞌin Ndiose ti,
\v 9 loꞌ siꞌi siꞌya tñan tsuꞌhue nu cuaꞌ mꞌni um, siꞌyana a tucui nu cuꞌni siyeꞌ.
\v 10 Siꞌyana Ndiose lca nu mtñan ꞌin na, mꞌni sca ñi chaꞌ ꞌin na loꞌo Cristo Jesús siꞌyana cuꞌni na nchgaa loo tñan tsuꞌhue, cuiꞌ chaꞌ nu mdiꞌin tyaa Ndiose tiꞌ culoo siꞌyana tucua na tñan ꞌin na.
\s Ndiose mꞌni chuꞌhue ñi chaꞌ ꞌin na xa ngujui Cristo
\p
\v 11 Canꞌ chaꞌ a jlya tiꞌ um chaꞌ re, ꞌun nu lca ycuiꞌ ca neꞌ gentil, siꞌyana nu ncua tiꞌ culoo neꞌ judio nu nchca circuncida ꞌin nguloꞌo naan neꞌ ꞌin um nten nu a nchca circuncida ꞌin,
\v 12 cuiꞌ siꞌyana a nchca chuꞌhui lyoo um ꞌin Cristo, a cunta tijyoꞌ mchca um siiꞌ neꞌ Israel, ñi a yuꞌhui xuꞌhue um loꞌo chaꞌ tsuꞌhue nu mdiꞌin tyaa Ndiose loꞌo neꞌ, ñi a sca chaꞌ mducua tloo um lja mdaꞌan um loo chendyu re, loꞌ ñi a yuꞌhui lyoo um ꞌin Ndiose.
\v 13 Una cuaꞌ ñii sca chaꞌ ti ꞌin um loꞌo Cristo Jesús, ꞌun nu mducua tijyoꞌ siiꞌ ñi tiꞌ culoo, loꞌ cuaꞌ ñii cuiiꞌ nchca um siiꞌ ñi siꞌya tne Cristo.
\v 14 Siꞌyana cuiꞌ ñi mꞌni ñi chaꞌ tyiꞌin tsuꞌhue na tsatlyu, mꞌni sca ñi ꞌin na loꞌo chcuaa ta nten canꞌ, ngujlyo ñi na nu nguiꞌni tucui tluꞌhue la seꞌen ndiꞌin na,
\v 15 loꞌ mꞌni ñi chaꞌ yatii chaꞌ cusuun canꞌ xa ngujui ñi, msiꞌyu coꞌ ñi chaꞌ ꞌin lee loꞌo scasca chaꞌ nu ndlo canꞌ tñan, ñaꞌan ca siꞌyana tyiꞌin tyaa ñi sca ta nten nu cui ti, chcuaa ta nten canꞌ chca tsatlyu neꞌ loꞌo ñi, loꞌ cuañaꞌan mꞌni ñi chaꞌ tyiꞌin tsuꞌhue na.
\v 16 Siꞌya chaꞌ nu ngujui ñi loo cusi, jui ñaꞌan nguinu tsuꞌhue chaꞌ ꞌin chcuaa ta nten canꞌ loꞌo Ndiose, mꞌni sca ñi ꞌin neꞌ xa mꞌni tyii ñi chaꞌ cusuun canꞌ.
\v 17 Yaan ñi loꞌ ycuiꞌ ñi chaꞌ tsuꞌhue ꞌin ñi tsañaꞌan nu ntsuꞌhui chaꞌ tyiꞌin tsuꞌhue um tloo Ndiose, —ꞌun nu mducua tijyoꞌ siiꞌ ñi, cuiꞌ cuañaꞌan ycuiꞌ ñi loꞌo nchgaa nu ndiꞌin cuiꞌ seꞌen ti—,
\v 18 loꞌ siꞌya Cristo ndyijyi ñaꞌan sten na tloo Stina Ndiose cunda scaa ta na, siꞌyana scañaꞌan ti Espíritu ntsuꞌhui niꞌ cusya ꞌin na.
\v 19 Canꞌ chaꞌ a lca ꞌa um nten nu mdoꞌo xca quichen uta nten ndaꞌan ti, cuiꞌ ca nu sca quichen tyi ti um loꞌo jun nu ndiya quiꞌan tiꞌ ꞌin Cristo, loꞌ lca um ta nten nu cuaꞌ ndiꞌin tsoꞌ ꞌin Ndiose.
\v 20 Cuaꞌ ndon um loo chaꞌ nu cuaꞌ mdiꞌin tyaa yu nu mxiycuiꞌ Ndiose ꞌin cuaꞌ sꞌni, loꞌo chaꞌ nu ycuiꞌ yu taꞌa mdaꞌan Jesús, loꞌ quee nu ndon loo lati nu nsñi ton ꞌin naꞌan lca ycuiꞌ ca Jesucristo.
\v 21 Siꞌya ñi nguia nchca tlyu naꞌan canꞌ, sca chaꞌ ti ꞌin na loꞌo ñi, loꞌ cuañaꞌan ca na sca laa nu luhui ꞌin Ñi Xꞌnan na.
\v 22 Siꞌya ñi tsatlyu nguia nguilo na, ñaꞌan ca siꞌyana ca na sca laa seꞌen tyiꞌin Ndiose siꞌya Espíritu ꞌin ñi.
\c 3
\s Tñan ꞌin Ndiose mꞌni yu Pablo lja neꞌ gentil 

\p
\v 1 Cuiꞌ siꞌya chaꞌ re, nanꞌ yu Pablo ntsuꞌhuin naꞌan chcuan siꞌya Cristo, ñaꞌan ca siꞌyana ca nu tsuꞌhue ꞌin um, ꞌun neꞌ gentil.
\v 2 A sꞌni cuaꞌ ynan um chaꞌ siꞌyana Ndiose lca nu mdaa tñan re ꞌñan, loꞌ siꞌya chaꞌ tsuꞌhue ꞌin ñi ca nu tsuꞌhue ꞌin um.
\v 3 Ngulyo scua la ñi chaꞌ nu yuꞌhui cutsiꞌ ꞌin ñi, tsañaꞌan tsa chinꞌ chaꞌ nu cuaꞌ nguaꞌan ꞌin um,
\v 4 tca chcuiꞌ um ꞌin na loꞌ ca cuiyaꞌ tiꞌ um tsala ñaꞌan chaꞌ tiyaa mdaa ñi ꞌñan, cuiꞌ chaꞌ nu yuꞌhui cutsiꞌ ꞌin ñi, chaꞌ ꞌin Cristo,
\v 5 chaꞌ nu msuꞌhua cutsiꞌ ñi ꞌin nten nu mdiꞌin cuaꞌ sꞌni, una cuaꞌ ñii siꞌya Espíritu ꞌin ñi ngulyo scua la ñi chaꞌ re loꞌo yu nu ngulo ton ñi tsa ycuiꞌ chaꞌ tsuꞌhue ꞌin ñi, a cunta loꞌo nu nxiycuiꞌ ñi ꞌin.
\v 6 Nde chaꞌ nu yuꞌhui cutsiꞌ canꞌ: Neꞌ gentil tsatlyu quiꞌni caꞌan chaꞌ tsuꞌhue ꞌin neꞌ loꞌo neꞌ judio, chca sca chaꞌ ti ꞌin neꞌ, loꞌ scañaꞌan ti tucua tloo neꞌ chaꞌ tsuꞌhue nu taa Cristo Jesús, cuiꞌ siꞌyana jui nu ycuiꞌ chaꞌ tsuꞌhue ꞌin ñi loꞌo um.
\v 7 Siꞌya chaꞌ tsuꞌhue ꞌin Ndiose nu mdaa ñi ꞌñan canꞌ chaꞌ ndaꞌan ycuinꞌ chaꞌ tsuꞌhue ꞌin ñi, tsañaꞌan tlyu chaꞌ cuiyaꞌ nu ntsuꞌhui ꞌin ñi.
\v 8 Siyaꞌ lcan sca nu chinꞌ la chaꞌ ꞌin que nchgaa la ñaꞌan nu ndiya quiꞌan tiꞌ ꞌin ñi, una mꞌni ñi chaꞌ tsuꞌhue loꞌon mdaa ñi chaꞌ cuiyaꞌ tsa ycuinꞌ loꞌo neꞌ gentil, tsala ñaꞌan tlyu chaꞌ tsuꞌhue ntsuꞌhui ꞌin Cristo loꞌo neꞌ,
\v 9 a cunta culyo scua lan chaꞌ loꞌo nchgaa tucui tsañaꞌan chaꞌ nu cuaꞌ mdiꞌin tyaa Ndiose cuaꞌ sꞌni, chaꞌ nu yuꞌhui cutsiꞌ ꞌin ñi, ñi nu mtñan nchgaa loo na,
\v 10 ñaꞌan ca siꞌyana loꞌo cunta ꞌin jun nu lca laa ꞌin ñi, tca culyo scua la jun nchgaa loo chaꞌ tiyaa ꞌin Ndiose, loꞌo yu nu nchca bsya loꞌo nu ntsuꞌhui chaꞌ cuiyaꞌ yaaꞌ tloo ñi la niꞌ cuaan,
\v 11 tsañaꞌan chaꞌ nu mdiꞌin tyaa ñi tiꞌ culoo, loꞌ ya tucua chaꞌ re siꞌya Cristo Jesús, ñi nu lca Xꞌnan na.
\v 12 Cuiꞌ siꞌya ñi, canꞌ chaꞌ tnu tiquee na loꞌ a nguiꞌni tucua tiꞌ na sten na tloo Ndiose siꞌyana ndiya quiꞌan tiꞌ na ꞌin Cristo.
\v 13 Canꞌ chaꞌ chcuinꞌ loꞌo um siꞌyana a cuꞌni naꞌan tiꞌ um siꞌya scasca nu tiꞌi ndijin siꞌya um, siꞌyana chaꞌ tsuꞌhue ꞌin um lca na.
\s Tsala ñaꞌan tlyu chaꞌ tsuꞌhue ꞌin Cristo
\p
\v 14 Canꞌ chaꞌ ndyiꞌya xtyinꞌ tloo Ndiose, Sti Ñi Xꞌnan na Jesucristo,
\v 15 ñi nu nguia loꞌo cunta nii nchgaa ta nten, tsañaꞌan la niꞌ cuaan loꞌo loo chendyu re.
\v 16 Njñan ꞌin ñi siꞌyana caja la juesa ꞌin um loꞌo tsoꞌ ꞌin Ndiose siꞌya Espíritu ꞌin ñi, cuiꞌ tsañaꞌan tlyu chaꞌ tsuꞌhue nu ntsuꞌhui ꞌin ñi,
\v 17 ñaꞌan ca siꞌyana chuꞌhui Cristo niꞌ cusya ꞌin um loo nu tsa quiꞌan tiꞌ um ꞌin ñi, a cunta siꞌyana tla tyon um loo chaꞌ tsuꞌhue ꞌin ñi,
\v 18 siꞌyana tca quiꞌya um cunta loꞌo nchgaa nu ndiya quiꞌan tiꞌ ꞌin ñi, tsala ñaꞌan xeen chaꞌ tsuꞌhue ꞌin Cristo, tsala ñaꞌan tucuin, tsala ñaꞌan quiꞌñi, loꞌ tsala ñaꞌan cuaan na,
\v 19 a cunta ca cuiyaꞌ tiꞌ um tsala ñaꞌan tlyu chaꞌ tsuꞌhue ndyiꞌo tiquee Cristo loꞌo na, ñi a ndlya chaꞌ tiyaa ꞌin na quiꞌya na cunta chaꞌ re, ñaꞌan ca siꞌyana chaꞌan yuꞌhui Ndiose ꞌin um tsañaꞌan nu lca ñi ycuiꞌ ca ñi.
\v 20 Scati Ndiose, ñi nu nchca nꞌni nchgaa loo chaꞌ, loꞌ hasta nducua la nꞌni ñi chaꞌ nu njñan na, nu ñi a ndyiꞌya na chaꞌ tiyaa, cuiꞌ siꞌya chaꞌ cuiyaꞌ ꞌin ñi nu cuaꞌ mdaa ñi ꞌin na,
\v 21 ꞌin ñi cuꞌni tnu na tsala xaa siꞌya Cristo Jesús, nchgaa nu lca laa ꞌin ñi, loꞌ cuañaꞌan tsa quiñan canꞌ cuꞌni tsala xaa. Amen.
\c 4
\s Sca chaꞌ ti ꞌin jun siꞌya Espíritu 

\p
\v 1 Canꞌ chaꞌ nanꞌ, nu ntsuꞌhui preso siꞌya chaꞌ ꞌin Ñi Xꞌnan na, jñan chaꞌ tsuꞌhue ꞌin um siꞌyana tyiꞌan loꞌo um sca chendyu nu luhui tsañaꞌan nchca tiꞌ ñi nu msiꞌya ꞌin um.
\v 2 Loꞌo suun ñaꞌan cuꞌni um, ndyiꞌya ti tsaa chaꞌ ꞌin um, ta loo um scasca um, chuꞌhui chaꞌ tlyu tiꞌ ꞌin um loꞌo nu chcui tiquee um,
\v 3 loꞌ cunan um ñaꞌan nu tyiꞌin tsuꞌhue um, sca chaꞌ ti ꞌin um loꞌo Espíritu ꞌin Ndiose.
\v 4 Siꞌyana scati tucui lca na, scati Espíritu ntsuꞌhui ꞌin na, a cunta scañaꞌan ti nducua tloo na tsañaꞌan msiꞌya Ndiose ꞌin na,
\v 5 scati Ñi Xꞌnan na, sca loo ti chaꞌ ndiya quiꞌan tiꞌ na, cuiꞌ cuañaꞌan loꞌo chaꞌ nu nchcua tya na,
\v 6 scati Ndiose lca Stina, ñi nu cuaan la chaꞌ cuiyaꞌ ntsuꞌhui ꞌin que nchgaa tucui, ñi nu nda yaaꞌ ꞌin na nchgaa na, ñi nu ntsuꞌhui niꞌ cusya ꞌin na nchgaa na.
\v 7 Una cunda scaa na cuaꞌ mdaa Ndiose chaꞌ tsuꞌhue nu chuꞌhui niꞌ cusya ꞌin na tsañaꞌan chaꞌ cuiyaꞌ nu ntsuꞌhui ꞌin Cristo.
\v 8 Canꞌ chaꞌ nchcuiꞌ quityi ꞌin Ndiose: —Xa ycuen Cristo nde niꞌ cuaan, nguia loꞌo ñi nchgaa nu cuaꞌ ntsuꞌhui tuyaaꞌ ñi, loꞌ mdaa ñi scasca chaꞌ tsuꞌhue ꞌin nten chendyu—.
\v 9 ¿Ñaꞌan ta ndyiꞌo chaꞌ re ñaꞌan nu ycuen ñi nde niꞌ cuaan? ¿Ta siꞌi culo nducua la nguꞌya ñi seꞌen nu ꞌya lati ꞌin chendyu re?
\v 10 Ñi nu nguꞌya canꞌ lca ticuiꞌ ñi nu ycuen seꞌen nu cuaan lati nde niꞌ cuaan, siꞌyana cuꞌni chaꞌan ñi sca chcui seꞌen canꞌ.
\v 11 Cuiꞌ ñi mdaa ñi chaꞌ cuiyaꞌ ꞌin cunda scaa nu ntsuꞌhui chaꞌ cuꞌni tñan ꞌin ñi: Cuaꞌ lca nu ngulo ton ñi ꞌin nu tucua suun tñan ꞌin ñi, a cunta loꞌo nu xiycuiꞌ ñi ꞌin, loꞌo nu tyiꞌan ycuiꞌ chaꞌ tsuꞌhue ꞌin ñi, cuiꞌ cuañaꞌan loꞌo nu chuꞌhui cunta ꞌin jun loꞌ culoꞌo ꞌin jun,
\v 12 ñaꞌan ca siꞌyana tca cuꞌni chaꞌan jun ñaꞌan ntsuꞌhui chaꞌ cuꞌni jun tñan ꞌin Ndiose, culo jun tsatlyu sca chaꞌ ti ꞌin jun loꞌo Cristo,
\v 13 tsayaꞌ tiyaa na cuiyaꞌ nu ca sca chaꞌ ti ꞌin na nchgaa na, tsañaꞌan nu ntsuꞌhui chaꞌ tsa quiꞌan tiꞌ na ꞌin ñi loꞌ chuꞌhui lyoo tsuꞌhue na ꞌin Sñeꞌ Ndiose, tiyaa na sca cuiyaꞌ tsañaꞌan ndiꞌin chaꞌ ꞌin sca nten nu cuaꞌ cula, tsañaꞌan cuiyaꞌ nu lca ycuiꞌ ca Cristo,
\v 14 a ca ꞌa na ñaꞌan nchca tiꞌ sca nu suhue ti nu joꞌo ti ndon, nu nducuan qui suhueꞌ cuiꞌin ꞌin la ñaꞌan ti, ta siꞌya scasca chaꞌ nu ndloꞌo nten, siꞌyana loꞌo chaꞌ mañan ꞌin neꞌ nsuꞌhua neꞌ chaꞌ cuiñi seꞌen nu cuñilyiꞌo neꞌ ꞌin canꞌ.
\v 15 Cuiꞌ ca nu chcui nchaꞌan na chaꞌ nu ñi, loꞌ tyiꞌo chaꞌ tsuꞌhue tiquee na scasca na, cuañaꞌan tsa culo na loꞌo nchgaa loo chaꞌ, ca sca chaꞌ ti ꞌin na loꞌo Cristo, ñi nu lca que ꞌin na.
\v 16 Cuiꞌ ñi nguiꞌni ñi chaꞌ siꞌyana tsatlyu nguia nguilo na, loꞌ tsañaꞌan ndiꞌin chaꞌ ꞌin cunanꞌ na, tsuꞌhue ndiya tucua tijyan na loꞌo chcuin na, ticuiiꞌ na nda yaaꞌ taꞌa na, cuañaꞌan loꞌo tñan nguiꞌni na cunda scaa na, nguia nguilo na tsatlyu loꞌ nde nchca quiꞌan la chaꞌ tsuꞌhue nu ndyiꞌo tiquee na.
\s Chendyu nu cui ti siꞌya Cristo
\p
\v 17 Nchcuinꞌ loꞌo chaꞌ cuiyaꞌ ꞌin Ñi Xꞌnan na, nchca tinꞌ siꞌyana a cuꞌni ꞌa um tsañaꞌan nꞌni nchgaa la ñaꞌan neꞌ gentil, ndaꞌan loꞌo neꞌ chaꞌ tiyaa ngunanꞌ nu a sca cunta ntsuꞌhui,
\v 18 siꞌyana chaꞌ tiyaa ꞌin neꞌ tla yta na, tijyoꞌ nchca neꞌ siiꞌ Ndiose, ñi nu ndaa chendyu ꞌin neꞌ, nchcun chaꞌ tiyaa ꞌin neꞌ siꞌyana ncua tla cusya ꞌin neꞌ,
\v 19 ñi a ngüi ꞌa tiꞌ neꞌ chaꞌ jyiꞌo, mdyaa neꞌ ꞌin neꞌ siyaꞌ ti loo chaꞌ nducunꞌ seꞌen nu cuꞌni neꞌ ñaꞌan nu nchca tiꞌ neꞌ.
\v 20 Una ꞌun siꞌi cuañaꞌan mꞌni chaꞌan um ꞌin Cristo,
\v 21 chaꞌ ꞌun cuaꞌ ngune ꞌin um, loꞌ jui nu nguloꞌo ꞌin um tsañaꞌan nguiaa chaꞌ nu ñi ꞌin Jesús.
\v 22 Tsañaꞌan chendyu mduꞌhui um tiꞌ culoo, xcuan tloo um nchgaa chaꞌ cula canꞌ, cuiꞌ chaꞌ ngunanꞌ loꞌo chaꞌ xqueꞌ nu nꞌni lyiꞌun ꞌin nten,
\v 23 cuiꞌ ca nu chca cui chaꞌ tiyaa ꞌin um loꞌo cusya ꞌin um,
\v 24 chcuan um sca chendyu nu cui ti tsañaꞌan nguiaa chaꞌ ꞌin Ndiose, ñi nu nguiꞌni tñan tsuꞌhue, luhui chaꞌ tiyaa ꞌin ñi, tsañaꞌan ñi ndiꞌin chaꞌ ꞌin ñi.
\v 25 Canꞌ chaꞌ xcuan tloo um chaꞌ cuiñi, —loꞌ chcuiꞌ um chaꞌ nu ñi scasca um—, siꞌyana scati tucui lca na nchgaa na.
\v 26 —Chaꞌ scuen tiqueꞌ um una a cuꞌni um quiꞌya—, a taa um yaꞌ chuꞌhui chaꞌ canꞌ tiquee um tsayaꞌ xiin tsaan,
\v 27 ñi a taa um yaꞌ ꞌin laxaꞌan.
\v 28 Nu mꞌni cunan, a tsa quiñan ꞌa canꞌ tiꞌ cuꞌni cunan, cuiꞌ ca nu cuꞌni canꞌ tñan nu luhui, cuañaꞌan tca ta yaaꞌ canꞌ ꞌin nu ꞌni chaꞌ ꞌin.
\v 29 A chcuiꞌ um ñi sca chaꞌ nu a tsuꞌhue, cuiꞌ ca nu quia nan um ñaꞌan chcuiꞌ um loꞌo taꞌa um chaꞌ nu cuꞌni tsuꞌhue loꞌo, ñaꞌan ca siꞌyana tca ta yaaꞌ na ꞌin nu quine ꞌin.
\v 30 A cuꞌni lyiꞌun um ꞌin Espíritu nu Luhui ꞌin Ndiose nu cuaꞌ mdaa ñi ꞌin um, lca canꞌ sca cuiyaꞌ nu cuaꞌ nguaꞌan ꞌin um siꞌyana tca sten um la niꞌ cuaan xa nu tsa tucua xaa.
\v 31 Xcuan tloo um chendyu tlyaꞌ nu nduꞌhui um, chaꞌ nsinꞌ tiꞌ, chaꞌ nu nchcuen tiqueꞌ um, chaꞌ nu nxiꞌya loꞌo taꞌa um, chaꞌ ndaja taꞌa um, loꞌo nchgaa loo chaꞌ ngunanꞌ.
\v 32 Cuiꞌ ca nu cuꞌni um tsuꞌhue scasca um, ñaꞌan ꞌtnan tiꞌ taꞌa um, cuꞌni um chaꞌ tlyu tiꞌ ꞌin taꞌa um tsañaꞌan mꞌni Ndiose chaꞌ tlyu tiꞌ ꞌin um siꞌya Cristo.
\c 5
\s Chendyu nu ndyuꞌhui sñeꞌ Ndiose 

\p
\v 1 Canꞌ chaꞌ taa um yaꞌ chcui nchaꞌan um ꞌin Ndiose siꞌyana lca um sca sñeꞌ ñi nu taꞌa ꞌin ñi.
\v 2 Chuꞌhui chaꞌ tsuꞌhue ꞌin um scasca um tsañaꞌan mñaꞌan ꞌtnan tiꞌ Cristo ꞌin na, mdyaa ñi ꞌin ñi tsañaꞌan nchca tiꞌ sca lcuan nu xityiꞌi nu ndiquin tucua tloo Ndiose.
\v 3 Una tsañaꞌan nguiaa chaꞌ ꞌin nu nguiten yuꞌhui loꞌo xca neꞌ cunaꞌan, loꞌo scasca chaꞌ ngunanꞌ, uta chaꞌ nu nchcui tiꞌ neꞌ, ñi sca chaꞌ re loꞌ a ntsuꞌhui chaꞌ chuꞌhui lja um, siꞌyana siꞌi cuañaꞌan ntsuꞌhui chaꞌ tyuꞌhui sca sñeꞌ Ndiose.
\v 4 Ñi sca chaꞌ ngunanꞌ loꞌ a tyiꞌo tuꞌhua um, uta scasca chaꞌ tinto, uta loꞌo chaꞌ nducunꞌ nu nxistyi taꞌa neꞌ, chaꞌ nu a sca cunta ntsuꞌhui, cuiꞌ ca nu loꞌo tuꞌhua um tyaa um xuꞌhue ꞌin Ndiose.
\v 5 Cuaꞌ jlyo tiꞌ um chaꞌ re, siꞌyana ñi sca nu nguiten yuꞌhui loꞌo xca neꞌ cunaꞌan, uta nguiꞌni scasca chaꞌ ngunanꞌ, uta lyee lca tiquee neꞌ loꞌo chaꞌ cuilyiyaꞌ, a quiꞌni caꞌan chaꞌ tsuꞌhue ꞌin canꞌ seꞌen ndlo Ndiose tñan loꞌo Cristo, siꞌyana nu nchcui tiꞌ chaꞌ canꞌ suꞌhua ñaꞌan nguiaa chaꞌ ꞌin loꞌo nu nꞌni tnu lcuin joꞌo.
\v 6 A taa um yaꞌ caja nu cuñilyiꞌo ꞌin um loꞌo chaꞌ nu a jlyo ñaꞌan, siꞌya chaꞌ re caꞌan tñan Ndiose nu tiꞌi ꞌin nchgaa nu lyeꞌ tiꞌ.
\v 7 Canꞌ chaꞌ a nchca chaꞌ ca sca chaꞌ ti ꞌin um loꞌo nu nguiꞌni cuañaꞌan.
\v 8 Siꞌyana nu ncua tiꞌ culoo mdon um loo chaꞌ tla yta, una cuaꞌ ñii lca um sca xaa siꞌya Ñi Xꞌnan na, canꞌ chaꞌ tyiꞌan um tsañaꞌan ndyiꞌan sca nu cuaꞌ ndaꞌan loo xaa ꞌin ñi,
\v 9 (siꞌyana tñan nu nguiꞌni Espíritu ꞌin Ndiose nchca chcanꞌ loo nchgaa loo chaꞌ tsuꞌhue nu nguiꞌni na, chaꞌ nu luhui loꞌo chaꞌ nu ñi),
\v 10 canꞌ chaꞌ cunan um ñaꞌan nu cuꞌni um tsañaꞌan nu nchca tiꞌ Ñi Xꞌnan na.
\v 11 A sten yuꞌhui um loo chaꞌ ngunanꞌ nu nguiꞌni nten nu ndaꞌan loꞌo chaꞌ tla yta ꞌin, chaꞌ nu a sca cunta ntsuꞌhui, cuiꞌ ca nu nde xcuan tloo um chaꞌ canꞌ,
\v 12 siꞌyana hasta jyiꞌo tiꞌ na chcuiꞌ na nchgaa chaꞌ nu nguiꞌni neꞌ seꞌen cutsiꞌ ti.
\v 13 Siꞌyana nchgaa chaꞌ re xa nguiꞌni xaa ꞌin na, ndyiꞌo scua la na, siꞌyana xaa canꞌ nꞌni chaꞌ nchca chcanꞌ loo nchgaa loo chaꞌ.
\v 14 Canꞌ chaꞌ nguinu scua sca chaꞌ: Jyin xaa tiꞌ ꞌun neꞌ nu ljaꞌ, loꞌ tyiquiꞌo um lja neꞌ ngujui, loꞌ Cristo tuꞌhui ñi xaa ꞌin um.
\v 15 Xñi tsuꞌhue um cunta ñaꞌan tyuꞌhui um chendyu, siꞌi tsañaꞌan ndaꞌan sca nu tinto, cuiꞌ ca nu tyiꞌan um loꞌo chaꞌ tiyaa,
\v 16 suꞌhua loo um chaꞌ re lja nu tiꞌ ndyijyi xaa, siꞌyana chacuiꞌ chaꞌ ngunanꞌ nchca loo chendyu re.
\v 17 Canꞌ chaꞌ a taa um yaꞌ ca tinto um, cuiꞌ ca nu quiꞌya um cunta tsañaꞌan nu nchca tiꞌ Ñi Xꞌnan na.
\v 18 A nchca chaꞌ ca cuꞌhui um, siꞌyana canꞌ chaꞌ nu ndlo ngunanꞌ ꞌin nten, cuiꞌ ca nu taa um yaꞌ chaꞌan yuꞌhui Espíritu ꞌin Ndiose ꞌin um,
\v 19 xacanꞌ scasca um chcua taa um chaꞌ ꞌin Ndiose cula um salmo, loꞌo himno, loꞌo scasca jyiin nu ndyiꞌo niꞌ cusya ꞌin um, loꞌo nu chcui lca tiquee um cula loꞌo um ꞌin Ñi Xꞌnan na,
\v 20 nchgaa xaa tyaa um xuꞌhue ꞌin Stina Ndiose siꞌya nchgaa loo chaꞌ, loꞌo chaꞌ cuiyaꞌ ꞌin Ñi Xꞌnan na Jesucristo.
\s Scasca na suꞌhua loo na ꞌin taꞌa na
\p
\v 21 Scasca um suꞌhua loo um ꞌin taꞌa um siꞌyana jlyo tiꞌ um ti ca lca Ndiose.
\v 22 ꞌUn jun cunaꞌan ca jaꞌan um ꞌin cuilyiꞌo um tsañaꞌan ntsuꞌhui chaꞌ ca jaꞌan um ꞌin Ñi Xꞌnan na.
\v 23 Siꞌyana yu quiꞌyu lca yu que ꞌin nten ꞌin yu, cuiꞌ tsañaꞌan Cristo lca ñi que ꞌin laa ꞌin ñi, loꞌ cuiꞌ ñi lca ñi nu Ndlo Laa ꞌin na.
\v 24 Canꞌ chaꞌ tsañaꞌan ndiꞌin chaꞌ ꞌin laa, nchca jaꞌan canꞌ ꞌin Cristo, cuiꞌ cuañaꞌan jun cunaꞌan ntsuꞌhui chaꞌ ca jaꞌan jun ꞌin cuilyiꞌo jun loꞌo nchgaa loo chaꞌ.
\v 25 A cunta ꞌun yu quiꞌyu, chuꞌhui chaꞌ tsuꞌhue ꞌin um loꞌo nten ꞌin um, cuiꞌ tsañaꞌan yuꞌhui chaꞌ tsuꞌhue ꞌin Cristo loꞌo laa ꞌin ñi, mdyaa ñi ꞌin ñi siꞌya canꞌ,
\v 26 siꞌyana xnu luhui ñi ꞌin canꞌ xa mjyiꞌan ñi ꞌin loꞌo tyiꞌa siꞌya chaꞌ nu nchcuiꞌ ñi,
\v 27 cuaꞌ lca ncua tsuꞌhue canꞌ tsaan nu tiyaa tloo ñi, nu ñi sca cooꞌ loꞌ a ndon ꞌin, ñi a la cuunꞌ ꞌin, ñi sca chaꞌ ngunanꞌ loꞌ a nguija lyoo ꞌin, cuiꞌ ca nu lca canꞌ sca nu cuaꞌ mdoꞌo hui ꞌin ñi nu a sca quiꞌya nducui nchaꞌan ꞌin.
\v 28 Cuiꞌ cuañaꞌan ꞌun yu quiꞌyu, chuꞌhui yuhue tiꞌ um ꞌin nten ꞌin um tsañaꞌan ntsuꞌhui yuhue tiꞌ um ꞌin um. Yu nu nꞌni ꞌtnan ꞌin nten ꞌin, cuiꞌ cuañaꞌan nꞌni ꞌtnan ꞌin ticuiiꞌ.
\v 29 Siꞌyana a tucui nu nxcuan tloo ꞌin ticuiiꞌ, cuiꞌ ca nu tsuꞌhue ñaꞌan seen canꞌ ꞌin, ntsuꞌhui cunta ꞌin nchgaa xaa, cuiꞌ cuañaꞌan nguiꞌni Cristo loꞌo laa ꞌin ñi,
\v 30 siꞌyana nchgaa na scati tucui lca na loꞌo ñi, sca cunanꞌ ti na loꞌ sca tijyan ti na loꞌo ñi.
\v 31 —Canꞌ chaꞌ yu quiꞌyu ntsuꞌhui chaꞌ tyiꞌo tsoꞌ yu siiꞌ sti yu loꞌo jyiꞌan yu, loꞌ tyiꞌin yu loꞌo cuilyiꞌo yu, chcuaa canꞌ sca tucui ti ca xacanꞌ—.
\v 32 Chaꞌ tlyu ca lca chaꞌ re nu msuꞌhua cutsiꞌ Ndiose, una nchcuinꞌ chaꞌ re loꞌo um loꞌo tsoꞌ ꞌin Cristo siꞌya chaꞌ ꞌin laa.
\v 33 Canꞌ chaꞌ cunda scaa ꞌun yu quiꞌyu, chuꞌhui yuhue tiꞌ um ꞌin nten ꞌin um tsañaꞌan ntsuꞌhui yuhue tiꞌ um ꞌin um, cuiꞌ cuañaꞌan ꞌun jun cunaꞌan ntsuꞌhui chaꞌ cuꞌni suun um ꞌin um tloo nten ꞌin um. 
\c 6
\p
\v 1 Sñenꞌ, ca jaꞌan um ꞌin nten cula ꞌin um siꞌyana cuañaꞌan ntsuꞌhui chaꞌ cuꞌni um siꞌya Ñi Xꞌnan na.
\v 2 —Cuꞌni suun um ꞌin um tloo sti um loꞌo jyiꞌan um—, nde chaꞌ nu culoo mdiꞌin tyaa Ndiose nu ljyan loꞌo chaꞌ tsuꞌhue ꞌin na,
\v 3 —siꞌyana ca tsuꞌhue chuꞌhui tiquee um, loꞌ caja sca chendyu nu tucuin ꞌin um—.
\v 4 ꞌUn nu lca nten cula, a xiscuen tiqueꞌ um ꞌin sñeꞌ um loꞌo chaꞌ nu chcuiꞌ um, cuiꞌ ca nu cuꞌni coꞌo um ꞌin canꞌ loꞌo chaꞌ tiyaa ꞌin Ñi Xꞌnan na, loꞌ jyiꞌin um ꞌin xa siꞌi ñaꞌan cuꞌni.
\v 5 A cunta ꞌun nu lca nguso, tucua um tñan chaꞌ nu chcuiꞌ xꞌnan um, cuꞌni suun um ꞌin um tloo canꞌ loꞌ suꞌhua yuhue tiꞌ um tñan nguiꞌni um loꞌo sca cusya nu ñi, siꞌyana cunta ꞌin Cristo nguiꞌni um tñan canꞌ,
\v 6 una siꞌi tsalja ndon ti xꞌnan um caꞌan tiꞌ um cuꞌni um tñan, ta siꞌyana quinu um tsuꞌhue loꞌo canꞌ, cuiꞌ ca nu loꞌo nu chcui lca tiquee um cuꞌni um chaꞌ nu nchca tiꞌ Ndiose tsañaꞌan nꞌni sca nguso ꞌin Cristo.
\v 7 Tsuꞌhue ntsuꞌhui tiquee um cuꞌni um tñan, cuꞌni um cunta siꞌyana tñan ꞌin Ñi Xꞌnan na nguiꞌni um loꞌ siꞌi tñan ꞌin nten chendyu.
\v 8 Siꞌyana cuaꞌ jlyo tiꞌ um cuaꞌ ñaꞌaan tñan tsuꞌhue nu nguiꞌni na, Ñi Xꞌnan na nxitucui ñi chaꞌ tsuꞌhue canꞌ, suꞌhua ñaꞌan ndiꞌin chaꞌ ꞌin nu lca nguso nu cuaꞌ msiꞌi neꞌ ꞌin, loꞌo nu nguiꞌni tñan chaꞌ ꞌin ti.
\v 9 A cunta ꞌun nu lca xꞌnan nguso, tsuꞌhue ti cuꞌni um loꞌo canꞌ, a nchca chaꞌ chcuiꞌ tla um, siꞌyana cuaꞌ jlyo tiꞌ um sca Xꞌnan ti um loꞌo canꞌ, ñi nu ndiꞌin la niꞌ cuaan, loꞌ cunta nu ꞌin ñi scañaꞌan ti nꞌni ñi ꞌtnan ꞌin nten chendyu.
\s Chaꞌ cuiyaꞌ ꞌin Ndiose nu culaa ꞌin na
\p
\v 10 Xca chaꞌ ꞌun jun taꞌa na, tla tyon um loꞌo Ñi Xꞌnan na, loꞌ tyiꞌan loꞌo um chaꞌ cuiyaꞌ nu tlyu ꞌin ñi.
\v 11 Coꞌ um ñaꞌaan chaꞌ cuiyaꞌ ꞌin Ndiose, siꞌyana tca tyon tiyaa um xa nu nchca tiꞌ laxaꞌan cuñilyiꞌo ꞌin um.
\v 12 Siꞌyana a nsuun na loꞌo taꞌa nten na, cuiꞌ ca nu loꞌo scasca cuiꞌin nu ndlo tñan, loꞌo nu cuaan la chaꞌ cuiyaꞌ ntsuꞌhui yaaꞌ, loꞌo nchgaa cuiꞌin nu ndlo tñan seꞌen nchca chaꞌ ngunanꞌ loo chendyu re, uta nu nguilyu niꞌ cuaan.
\v 13 Canꞌ chaꞌ chcuan um nchgaa chaꞌ cuiyaꞌ ꞌin Ndiose, siꞌyana tca ta loo um xa ljyaan chaꞌ ngunanꞌ, loꞌ tla ndon um xa cuaꞌ mdijin um nchgaa loo chaꞌ.
\v 14 Ndeñaꞌan ntsuꞌhui chaꞌ xñi ton tla um ꞌin um, —scanꞌ siiꞌ um loꞌo chaꞌ nu ñi, tucun um jyan tiquee um loꞌo nchgaa chaꞌ tsuꞌhue,
\v 15 chuꞌhui quinan quiyaꞌ um, loꞌ tyon tiyaa um tsa ycuiꞌ um chaꞌ tsuꞌhue ꞌin Cristo tsañaꞌan ntsuꞌhui chaꞌ cuꞌni chuꞌhue neꞌ cunta ꞌin neꞌ loꞌo Ndiose—.
\v 16 Chaꞌ nu ndon loo lati, xñi tsuꞌhue um chcuan nu nducua yaaꞌ um, cuiꞌ chaꞌ nu ndiya quiꞌan tiꞌ um, loꞌ tca suhuiꞌ um nchgaa quiiꞌ nu nduguun laxaꞌan.
\v 17 —Suꞌhua um na que um, cuiꞌ chaꞌ nu ndlo laa ꞌin um—, loꞌ chcua spada ꞌin Espíritu yaaꞌ um nu lca ychaꞌ Ndiose,
\v 18 nchgaa xaa chcuiꞌ lyiꞌo um ꞌin Ndiose siꞌya nchgaa loo chaꞌ, a culaꞌ tiꞌ um jñan um ꞌin ñi loꞌo chaꞌ cuiyaꞌ ꞌin Espíritu, cuañaꞌan tsa quiñan um ndii tiꞌ um, a ca ndaja tiꞌ um jñan um ꞌin ñi siꞌya chaꞌ ꞌin nchgaa jun taꞌa na.
\v 19 A cunta jñan um ꞌin Ndiose siꞌya chaꞌ ꞌñan, ñaꞌan ca siꞌyana taa la ñi chaꞌ nu chcuinꞌ loꞌo nu chcui lca tiqueen, culyo scua lan chaꞌ tsuꞌhue ꞌin Cristo nu yuꞌhui cutsiꞌ ꞌin Ndiose,
\v 20 cuiꞌ chaꞌ nu ndaꞌan ycuinꞌ loꞌo cunta ꞌin ñi, loꞌ siꞌya chaꞌ re nchcanꞌ loꞌo carena, una jñan um ꞌin Ndiose siꞌyana tca chcuinꞌ chaꞌ ꞌin ñi loꞌo chaꞌ tnu tiqueen tsañaꞌan nu ntsuꞌhui chaꞌ chcuinꞌ.
\s Yu Pablo mslaꞌ taꞌa yu loꞌo jun Efeso
\p
\v 21 Siꞌyana ca cuiyaꞌ tiꞌ um ñaꞌan ndiꞌin chaꞌ ꞌñan, canꞌ chaꞌ yu Tíquico tsaa yu seꞌen ndiꞌin um loꞌ taa yu suun nchgaa chaꞌ re, cuiꞌ sca yu taꞌa na nu ndyuꞌhui cuiyaꞌ tinꞌ ꞌin, loꞌ ñi ndiꞌin chaꞌ ꞌin yu loꞌo tñan ꞌin Ñi Xꞌnan na.
\v 22 Nde chaꞌ msuꞌhuan ꞌin yu tsaa yu seꞌen ndiꞌin um, siꞌyana ca cuiyaꞌ tiꞌ um ñaꞌan ndiꞌin chaꞌ ꞌin hua, loꞌ cuañaꞌan taa la yu chaꞌ tnu tiquee ꞌin um.
\v 23 Stina Ndiose loꞌo Ñi Xꞌnan na Jesucristo cuꞌni ñi chaꞌ tyiꞌin tsuꞌhue nchgaa jun taꞌa na, a cunta cuꞌni ñi chaꞌ chuꞌhui chaꞌ tsuꞌhue ꞌin jun scasca jun siꞌya chaꞌ nu ndiya quiꞌan tiꞌ jun.
\v 24 Cuiꞌ Ndiose taa ñi chaꞌ tsuꞌhue nu chuꞌhui niꞌ cusya ꞌin tsalca nu chaꞌ ñi ca tsuꞌhue ntsuꞌhui tiquee loꞌo Ñi Xꞌnan na Jesucristo. Amen.