\id PHP - Nopala (Chatino) NT [cya] - Mexico 2013 (web 2014)
\h FILIPENSES
\toc1 Filipenses
\toc2 Filipenses
\toc3 Flp
\mt1 Filipenses
\c 1
\s Yu Pablo nchcuiꞌ chaꞌ yu ꞌin jun Filipos
\p
\v 1 Nanꞌ yu Pablo loꞌo Timoteo nu lca nguso ꞌin Jesucristo, nguaꞌan tñan hua sca quityi ꞌin um, nchgaa ꞌun nu cuaꞌ ya quiꞌan tiꞌ ꞌin Cristo Jesús nu ndiꞌin quichen Filipos tsatlyu loꞌo yu nu ntsuꞌhui cunta ꞌin um, a cunta loꞌo yu nu nda yaaꞌ ꞌin um loꞌo tñan ꞌin Ndiose.
\v 2 Stina Ndiose loꞌo Ñi Xꞌnan na Jesucristo taa ñi chaꞌ tsuꞌhue nu chuꞌhui niꞌ cusya ꞌin um, loꞌ cuꞌni ñi chaꞌ tyiꞌin tsuꞌhue um.
\s Mjñan yu Pablo ꞌin Ndiose siꞌya chaꞌ ꞌin jun
\p
\v 3 Ndyaan xuꞌhue ꞌin Ndiose ꞌñan xa ndiya yuꞌhui tinꞌ ꞌin um,
\v 4 loꞌ nchgaa xaa tsuꞌhue ntsuꞌhui tiqueen njñan ꞌin ñi siꞌya chaꞌ ꞌin um xa nchcuinꞌ lyiꞌon ꞌin ñi,
\v 5 siꞌyana sca chaꞌ ti ꞌin na loꞌo chaꞌ tsuꞌhue ꞌin Cristo, tiꞌ xa ncuan xuꞌhue um ꞌin na, cuiꞌ cuañaꞌan hasta cuaꞌ ñii.
\v 6 Jlyo tinꞌ siꞌyana Ndiose, ñi nu mdyisnan mducua suun chaꞌ tsuꞌhue niꞌ cusya ꞌin um, cuꞌni ñi chaꞌ culyo scua la ñi chaꞌ re loꞌo um tsayaꞌ nu quiaan Jesucristo xiyaꞌ.
\v 7 Ntsuꞌhui suun ꞌñan tsañaꞌan nu lca cusya ꞌñan loꞌo nchgaa um, siꞌyana sca chaꞌ ti ꞌin um loꞌon seꞌen ntsuꞌhuin naꞌan chcuan, uta nchcuinꞌ tloo bsya tsañaꞌan nu nguiaa chaꞌ tsuꞌhue ꞌin Cristo seꞌen nu quinu scua tla chaꞌ re, loꞌ cuañaꞌan sca chaꞌ ti ꞌin na loꞌo um siꞌya chaꞌ tsuꞌhue ꞌin Ndiose.
\v 8 Jlyo tsuꞌhue tiꞌ ñi tsala ñaꞌan lca tiqueen loꞌo um siꞌya chaꞌ tsuꞌhue nu tlyu mdaa Jesucristo ꞌin na.
\v 9 Nde chaꞌ nu njñan ꞌin Ndiose xa nchcuinꞌ lyiꞌon ꞌin ñi, siꞌyana chaꞌan yuꞌhui la chaꞌ tsuꞌhue ꞌin ñi niꞌ cusya ꞌin um, cuañaꞌan sla la ñi chaꞌ tiyaa ꞌin um loꞌ quiꞌya um cunta nchgaa chaꞌ,
\v 10 ñaꞌan ca siꞌyana ca cuiyaꞌ tiꞌ um loꞌ culohui um chaꞌ nu tsuꞌhue lati, loꞌ ñi ndiꞌin chaꞌ ꞌin um, luhui tloo um tsaan nu ntsuꞌhui chaꞌ quiaan Cristo xiyaꞌ,
\v 11 loꞌ ca chcanꞌ loo tsala ñaꞌan tñan tsuꞌhue nu nguiꞌni um siꞌya chaꞌ tsuꞌhue ꞌin Jesucristo, cuiꞌ siꞌyana ca chcanꞌ loo chaꞌ cuiyaꞌ ꞌin Ndiose loꞌ caja nu cuꞌni tnu ꞌin ñi.
\s Cristo lca ñi chendyu ꞌin na
\p
\v 12 ꞌUn jun taꞌa na, nchca tinꞌ quitsanꞌ ꞌin um loꞌ ca jlyo tiꞌ um siꞌyana nde lyee la nguia nguine yuꞌhui chaꞌ tsuꞌhue ꞌin Cristo siꞌya chaꞌ nu yatoꞌo ꞌñan.
\v 13 hasta loꞌo nchgaa nu ndiꞌin naꞌan tñan loꞌo nchgaa la tucui cuaꞌ jlyo tiꞌ siꞌyana ntsuꞌhuin naꞌan chcuan siꞌya chaꞌ ꞌin Cristo.
\v 14 Laꞌ nchgaa ti jun taꞌa na cuaꞌ jui la chaꞌ tnu tiquee ꞌin jun siꞌya Ñi Xꞌnan na, a cunta siꞌyana ntsuꞌhuin naꞌan chcuan, nde lyee la nguiꞌni tnu tiquee jun loꞌ a ntsen jun nchcuiꞌ jun chaꞌ ꞌin Ndiose.
\v 15 Chaꞌ ñi siꞌyana ntsuꞌhui nu ndaꞌan ycuiꞌ chaꞌ tsuꞌhue ꞌin Cristo loꞌo chaꞌ njñan tiꞌ loꞌ nan canꞌ chaꞌ cusuun, a cunta ntsuꞌhui nu ndaꞌan ycuiꞌ chaꞌ canꞌ loꞌo chaꞌ tsuꞌhue nu ndyiꞌo tiquee.
\v 16 Sca ta canꞌ ndaꞌan ycuiꞌ chaꞌ tsuꞌhue ꞌin Cristo siꞌyana nducua tloo tyon loo la chaꞌ nu ꞌin, loꞌ a ñi ndiꞌin chaꞌ ꞌin, nchca tiꞌ canꞌ taa la nu tiꞌi ꞌñan seꞌen ntsuꞌhuin naꞌan chcuan re.
\v 17 Una xca ta canꞌ ndaꞌan ycuiꞌ siꞌya chaꞌ tsuꞌhue nu ndyiꞌo tiquee, jlyo tiꞌ canꞌ siꞌyana Ndiose lca nu ngulohui ꞌñan nu chcuinꞌ tloo bsya tsañaꞌan nguiaa chaꞌ tsuꞌhue ꞌin Cristo.
\v 18 Una a nguiꞌan cunta chaꞌ ta ñi ndiꞌin chaꞌ ꞌin nu ndaꞌan ycuiꞌ chaꞌ canꞌ uta a ñi chaꞌ ꞌin, cuiꞌ ca nu ñaꞌan yatoꞌo ti, ca ti caja nu chcuiꞌ chaꞌ tsuꞌhue ꞌin Cristo, canꞌ chaꞌ tsuꞌhue ntsuꞌhui tiqueen, loꞌ tsa quiñan lan loꞌo chaꞌ tsuꞌhue ntsuꞌhui tiquee ꞌñan.
\v 19 Jlyo tinꞌ siꞌya chaꞌ nu njñan um ꞌin Ndiose, loꞌ siꞌya Espíritu ꞌin Jesucristo nu nda yaaꞌ ꞌñan, canꞌ chaꞌ tyiꞌon seꞌen ntsuꞌhuin re,
\v 20 tsañaꞌan nu nducua tloon a tyiꞌo chaꞌ jyiꞌo ꞌñan loꞌo chaꞌ re, cuiꞌ ca nu lyee lati tyiꞌo tiqueen tsañaꞌan nu cuaꞌ ljyan quiñan, ñaꞌan ca siꞌyana scuen cuaan la chaꞌ ꞌin Cristo loꞌo chendyu ꞌñan, lja nu loꞌon uta chaꞌ cuaꞌ ngujuin,
\v 21 siꞌyana cunta chaꞌ nu ꞌñan Cristo lca ñi chendyu ꞌñan, loꞌ chaꞌ cajan cuaꞌ mꞌnin canan.
\v 22 Una chaꞌ tiꞌ ndon loo chendyu re cuꞌnin tñan ꞌin Ndiose, tiꞌ tyiꞌo la cunta ꞌñan, canꞌ chaꞌ a jlyo tinꞌ ti ñaꞌan chaꞌ re tyon loo na,
\v 23 siꞌyana scañaꞌan ti lca tiqueen loꞌo chcuaa loo chaꞌ re, lca tiqueen chaꞌ tyiꞌo tijin loo chendyu re loꞌ quilan tloo Cristo, nde chaꞌ nu tsuꞌhue lati xqueꞌ tinꞌ,
\v 24 una cunta chaꞌ nu ꞌin um, nde tsuꞌhue lati chaꞌ tiꞌ tyuꞌhuin lan chendyu.
\v 25 Siꞌyana cuaꞌ yten chaꞌ re niꞌ cusya ꞌñan, canꞌ chaꞌ jlyo tinꞌ siꞌyana tiꞌ tyuꞌhuin lan chendyu, xacanꞌ caja ñaꞌan ta yaanꞌ la ꞌin um, ca tsuꞌhue la chuꞌhui tiquee um loꞌ tsa quiñan la um loꞌo chaꞌ nu ndiya quiꞌan tiꞌ um,
\v 26 xacanꞌ lyee la ca tsuꞌhue chuꞌhui tiquee um loꞌo tsoꞌ nu ꞌin Cristo Jesús, loo nu ñaꞌan taꞌa na loꞌo um xiyaꞌ xa nu tsaꞌan seꞌen ndiꞌin um.
\v 27 Tsaloo ti chaꞌ nu nchca tinꞌ siꞌyana tyuꞌhui um chendyu tsañaꞌan nguiaa chaꞌ tsuꞌhue ꞌin Cristo, loꞌ chaꞌ tca tsaꞌan seꞌen ndiꞌin um uta chaꞌ a tca, una nchca tinꞌ ca jlyo tinꞌ ñaꞌan ndiꞌin um, chaꞌ tla ndon um, chaꞌ sca chaꞌ ti ꞌin um nsuꞌhua loo um chaꞌ tsuꞌhue ꞌin Cristo nu ndiya quiꞌan tiꞌ um,
\v 28 loꞌ ñi a ntsen um ꞌin nu tiꞌi tiꞌ ꞌin um. Chaꞌ ñi siꞌyana loꞌo chaꞌ re nchca chcanꞌ ñaꞌan ti ñaꞌan nu ntsuꞌhui chaꞌ quinanꞌ tiyaa xaa, una ꞌun ntsuꞌhui chaꞌ tyiꞌo laa um siꞌyana Ndiose lca nu mdiꞌin tyaa chaꞌ re.
\v 29 Siꞌyana siꞌi tsaloo ti mdaa ñi chaꞌ cuiyaꞌ tsa quiꞌan tiꞌ um ꞌin Cristo, cuiꞌ ca nu ntsuꞌhui chaꞌ tyijyin um nu tiꞌi siꞌya ñi,
\v 30 cuiꞌ tiꞌi nu naꞌan um mdijin tiꞌ culoo, loꞌ tiꞌ ndijin la ꞌin na tsañaꞌan nu cuaꞌ ynan um chaꞌ.
\c 2
\s Cristo mchcuan ñi chaꞌ cuiyaꞌ nu tlyu 

\p
\v 1 Canꞌ chaꞌ cuaꞌ ñii, chaꞌ ntsuꞌhui chaꞌ tnu tiquee ꞌin um siꞌya Cristo, uta chaꞌ ndyiꞌo chaꞌ tsuꞌhue tiquee um, chaꞌ na sca chaꞌ tiꞌ ꞌin um loꞌo Espíritu ꞌin Ndiose, uta chaꞌ cuti cusya ꞌin um, loꞌ chaꞌ scasca um ñaꞌan ꞌtnan tiꞌ taꞌa um,
\v 2 ndyijyin yaꞌ tsuꞌhue ntsuꞌhui tiqueen chaꞌ ndeñaꞌan cuꞌni um: Tyiꞌin um suꞌhua ñaꞌan ca lca tiquee um, chuꞌhui chaꞌ tsuꞌhue ꞌin um, ca sca chaꞌ ti ꞌin um, loꞌ scañaꞌan ti ca chaꞌ tiyaa ꞌin um nchgaa um.
\v 3 Ñi sca chaꞌ loꞌ a cuꞌni um seꞌen nu tyon loo chaꞌ ꞌin um ta loꞌo chaꞌ siyeꞌ, cuiꞌ ca nu loꞌo suun ñaꞌan cuꞌni um, cunda scaa um cuꞌni um cunta siꞌyana nchgaa tucui lca sca nu ndon loo la que ꞌin um,
\v 4 siꞌi tsa ꞌin ti um chuꞌhui yuhue tiꞌ um, cuiꞌ ca nu cunda scaa um chuꞌhui yuhue tiꞌ um ꞌin nchgaa la tucui.
\v 5 Ca lca tiquee um tsañaꞌan ncua lca tiquee Cristo Jesús,
\v 6 ñi nu sca chaꞌ ti ꞌin loꞌo Ndiose, una a mdon loo chaꞌ ꞌin ñi siyaꞌ suꞌhua ñaꞌan ndiꞌin chaꞌ ꞌin ñi loꞌo Ndiose,
\v 7 cuiꞌ ca nu mxnu ñi chaꞌ cuiyaꞌ canꞌ, mꞌni ñi ꞌin ñi tsañaꞌan nchca tiꞌ sca nguso, loꞌ ngula ñi tsañaꞌan ngula sca nten.
\v 8 Xa cuaꞌ ndyon ñi tsañaꞌan nchca tiꞌ sca yu quiꞌyu, mꞌni lyoꞌ ñi ꞌin ñi, ncua jaꞌan ñi nchgaa chaꞌ, a mdon queꞌ ñi xa yjui neꞌ ꞌin ñi, hasta mjyiꞌin caꞌan neꞌ ꞌin ñi la loo cusi.
\v 9 Canꞌ chaꞌ Ndiose mdiꞌin tyaa ꞌin Jesús sca seꞌen nu ndon loo la ti, loꞌ mdaa ñi sca chaꞌ cuiyaꞌ nu tlyu lati ꞌin ñi,
\v 10 loꞌ siꞌya nii Jesús —nchgaa tucui tyiꞌya xtyinꞌ tloo ñi—, nu ndiꞌin nde niꞌ cuaan loꞌo nu ndiꞌin loo chendyu re, a cunta loꞌo nu cuaꞌ ngujui,
\v 11 nchgaa tucui chcuiꞌ siꞌyana Jesucristo lca ñi Xꞌnan, loꞌ taa canꞌ loo Stina Ndiose.
\s Lca na xaa nu nduꞌhui loo chendyu re
\p
\v 12 Canꞌ chaꞌ ꞌun, jun nu ndyuꞌhui cuiyaꞌ tinꞌ ꞌin, cuiꞌ tsañaꞌan nu jaꞌan um xa ndiꞌin can loꞌo um, cuañaꞌan nde lyee la suꞌhua loo um chaꞌ nu ndiya quiꞌan tiꞌ um siyaꞌ tijyoꞌ nchcan, loꞌ chuꞌhui sca ytsen niꞌ cusya ꞌin um.
\v 13 Siꞌyana Ndiose lca nu nduꞌhui tiquee um ca jaꞌan um nchgaa chaꞌ, cuiꞌ cuañaꞌan nda yaaꞌ ñi ꞌin um tucua um tñan ꞌin na, siꞌyana cuañaꞌan ndyiꞌo chaꞌ tsuꞌhue tiquee ñi loꞌo um.
\v 14 Cuꞌni um nchgaa loo tñan, a nchca chaꞌ taa um quiꞌya uta ndiꞌin suun um scasca um,
\v 15 xacanꞌ a caja nu chcuiꞌ cuaꞌ ñaꞌan ti chaꞌ ꞌin um, cuiꞌ ca nu tyuꞌhui um sca chendyu nu luhui, cuañaꞌan ca um sñeꞌ Ndiose, luhui chaꞌ tiyaa ꞌin um lja nten ngunanꞌ nu nducunꞌ, loꞌ lca um sca xaa nu nduꞌhui loo chendyu re,
\v 16 nu tla nsñi ton ꞌin loꞌo chaꞌ nu ndaa chendyu, siꞌyana xa nu quiaan Cristo loꞌon nanꞌ tsuꞌhue chuꞌhui tiqueen siꞌyana siꞌi cua chaꞌ ti mꞌnin tñan lja um.
\v 17 Siyaꞌ caja nu slo tnen, una lca na tsañaꞌan nchca tiꞌ sca lcuan nu mdiꞌin tyaa um tloo Ndiose loo nu ndiya quiꞌan tiꞌ um ꞌin ñi, canꞌ chaꞌ tsuꞌhue ꞌa ntsuꞌhui tiqueen loꞌo um.
\v 18 Cuiꞌ cuañaꞌan ꞌun ca tsuꞌhue chuꞌhui tiquee um tsatlyu loꞌon nanꞌ.
\s Chaꞌ ꞌin Timoteo loꞌo yu Epafrodito
\p
\v 19 Nducua tloon ꞌin Ñi Xꞌnan na Jesús siꞌyana taa ñi chaꞌ cuiyaꞌ caꞌan tñan ꞌin yu Timoteo tsaa yu seꞌen ndiꞌin um nu ndla la, siꞌyana loꞌon nanꞌ ca tsuꞌhue la chuꞌhui tiqueen xa nu ca jlyo tinꞌ ñaꞌan ndiꞌin um,
\v 20 siꞌyana scati yu canꞌ suꞌhua ñaꞌan lca tiqueen loꞌo yu, a cunta ntsuꞌhui yuhue tiꞌ yu ꞌin um nu chaꞌ ñi ca.
\v 21 Siꞌyana nchgaa la tucui culo nducua la ꞌin ntsuꞌhui yuhue tiꞌ, loꞌ a nꞌni cunta canꞌ chaꞌ ꞌin Cristo Jesús.
\v 22 Una cuaꞌ ndyuꞌhui lyoo um ꞌin yu Timoteo ñaꞌan ndiꞌin chaꞌ ꞌin yu, jaꞌan yu tsañaꞌan nchca tiꞌ sca nu suhue ti loꞌo sti, loꞌ tsa tlyu nguiꞌni hua tñan ꞌin Cristo loꞌo yu.
\v 23 Canꞌ chaꞌ ntsuꞌhui tiqueen caꞌan tñan ꞌin yu, xa cuaꞌ ngujlyo tinꞌ ñaꞌan ca cuiyaꞌ chaꞌ ꞌñan.
\v 24 Nducua tloon ꞌin Ñi Xꞌnan na chaꞌ taa ñi chaꞌ cuiyaꞌ tsaꞌan seꞌen ndiꞌin um nu ndla lati.
\v 25 A cunta cuaꞌ yten tiqueen siꞌyana xitucui yu Epafrodito seꞌen ndiꞌin um, yu taꞌa na nu taꞌa nguiꞌni hua tñan loꞌ nsuꞌhua hua juesa loꞌo tñan ꞌin Ndiose, yu nu nguaꞌan tñan um ta yaaꞌ ꞌñan loꞌo chaꞌ nu ꞌni ꞌñan.
\v 26 Una loꞌo yu lyee lca tiquee yu ñaꞌan taꞌa um loꞌo yu, siꞌyana ynan um chaꞌ ncua tiꞌi yu, canꞌ chaꞌ nde lyee la msuꞌhua yu chaꞌ nduhue tiꞌ tiquee yu loꞌo um.
\v 27 Chaꞌ ñi siꞌyana ncua tiꞌi yu lyee yaꞌ, nu tichinꞌ na a ngujui yu, una Ndiose mñaꞌan ꞌtnan tiꞌ ñi ꞌin yu, loꞌ siꞌi tsa ꞌin ti yu, cuiꞌ ca nu loꞌon nanꞌ, siꞌyana a ncua tiꞌ ñi xnu ñi ꞌñan siyaꞌ ti loꞌo chaꞌ xiꞌin.
\v 28 Canꞌ chaꞌ loꞌo nu chcui lca tiqueen nguaꞌan tñan ꞌin yu nu ndla la ti, xa quila yu seꞌen ndiꞌin um chca tsuꞌhue lca tiquee um, ñi nanꞌ loꞌ a chuꞌhui ꞌa chaꞌ nduhue tiꞌ tiqueen.
\v 29 Cuan xuꞌhue um ꞌin yu loꞌo nu chcui lca tiquee um siꞌyana lca yu taꞌa ndiya quiꞌan tiꞌ na ꞌin Ñi Xꞌnan na, cuañaꞌan chuꞌhui yuhue tiꞌ um ꞌin nchgaa la tucui nu lca tsañaꞌan nu lca yu ycuiꞌ yu,
\v 30 siꞌyana tichinꞌ ti na a ngujui yu siꞌya tñan ꞌin Cristo, mꞌni tnu tiquee yu mdyaa yu ꞌin yu siyaꞌ ti, loo nu ta yaaꞌ yu ꞌñan tñan loo um.
\c 3
\s Cristo lca ñi cuiyaꞌ seꞌen tiyaa yu Pablo
\p
\v 1 Canꞌ chaꞌ ꞌun jun taꞌa na ca tsuꞌhue chuꞌhui tiquee um siꞌya Ñi Xꞌnan na, a ndaja tinꞌ caꞌan ticuiꞌ ti loo chaꞌ re siꞌyana jlyo tinꞌ cuꞌni na tsuꞌhue ꞌin um.
\v 2 Xñi um cunta ꞌin um loꞌo nten nu ndaꞌan tsañaꞌan nchca tiꞌ sca xniꞌ, nchgaa nu ndaꞌan loꞌo chaꞌ cuiñi, loꞌ nchcuiꞌ siꞌyana ꞌni chaꞌ ca circuncida ꞌin um.
\v 3 Nareꞌ lca na ta nten nu chaꞌ ñi ca ncua circuncida ꞌin, siꞌyana loꞌo nu chcui lca tiquee na nꞌni tnu na ꞌin Ndiose, tsuꞌhue ntsuꞌhui tiquee na siꞌya Cristo Jesús, loꞌ a nchcua quiloo na ꞌin nten chendyu.
\v 4 Siꞌyana loꞌon nanꞌ ntsuꞌhui suun ꞌñan chcua quiloon ñaꞌan chaꞌ nu ljyan loꞌo nten. Chaꞌ ntsuꞌhui xca tucui nu nchca tiꞌ tsa nchaꞌan chaꞌ re, una nanꞌ lyee lati ntsuꞌhui suun ꞌñan,
\v 5 siꞌyana ncua circuncida ꞌñan xa ntsuꞌhuin snuꞌ ti tsaan, lcan neꞌ Israel ta nten ꞌin Benjamin, lcan neꞌ hebreo ycuiꞌ ca sñeꞌ neꞌ hebreo, a cunta lcan neꞌ fariseo tsoꞌ chaꞌ ꞌin lee,
\v 6 mducui nchaꞌan ꞌin nu ya quiꞌan tiꞌ ꞌin Cristo, luhui tloon loꞌo cunta chaꞌ ꞌin lee.
\v 7 Nchgaa chaꞌ canꞌ msqueꞌ tinꞌ siꞌyana ndon loo na ꞌñan, una mscuan tloon ꞌin na siꞌya chaꞌ ꞌin Cristo.
\v 8 Chaꞌ ñi siꞌyana nscuan tloon nchgaa loo chaꞌ, siꞌyana lyee la ndon loo chaꞌ nu chuꞌhui lyoon ꞌin Cristo Jesús, ñi nu lca Xꞌnan, loꞌ siꞌya ñi mxnun nchgaa chaꞌ canꞌ loo mti, ñaꞌan ca siꞌyana cuan xuꞌhuen ꞌin Cristo,
\v 9 loꞌ ca sca chaꞌ ti ꞌñan loꞌo ñi, siꞌi siꞌyana tsuꞌhue mxuꞌhuan seꞌen chaꞌ ꞌin lee, ta canꞌ chaꞌ luhui tloon, cuiꞌ ca nu nguinun luhuin siꞌyana ya quiꞌan tinꞌ ꞌin Cristo, sca chaꞌ nu mdiꞌin tyaa Ndiose siꞌyana quinu luhui na loo nu tsa quiꞌan tiꞌ na ꞌin ñi,
\v 10 ñaꞌan ca siꞌyana chuꞌhui lyoon ꞌin Cristo, loꞌ quii tinꞌ tsala ñaꞌan tlyu chaꞌ cuiyaꞌ ꞌin ñi xa mdyiquiꞌo ñi, a cunta quii tinꞌ tsala nu tiꞌi mdijin ñi xa ngujui ñi, loꞌ cuañaꞌan ca sca chaꞌ ti ꞌñan loꞌo ñi,
\v 11 ñaꞌan ca siꞌyana loꞌon quiꞌni caꞌan ꞌñan tyiquiꞌon lja neꞌ ngujui.
\v 12 Siꞌi siꞌyana cuaꞌ mchcuan cunta nchgaa chaꞌ re uta siꞌyana ndyijyin yaꞌ tsuꞌhue nten lcan, cuiꞌ ca nu nsuꞌhuan juesa loꞌo chaꞌ re, chaꞌ tca chcuan chaꞌ tsuꞌhue canꞌ, cuiꞌ chaꞌ tsuꞌhue nu ntsuꞌhui ꞌin Cristo Jesús xa mchcua ñi ꞌñan.
\v 13 ꞌUn jun taꞌa na, a cunen loꞌo um ta siꞌyana cuaꞌ mchcuan chaꞌ re, tsaloo ti chaꞌ nu nguiꞌnin siꞌyana jlya tinꞌ nchgaa chaꞌ nu cuaꞌ mdijin, loꞌ suꞌhuan juesa tsaꞌan nde loo,
\v 14 cuañaꞌan tsa quiñan tsayaꞌ tyiꞌan seꞌen ntsuꞌhui chaꞌ tyiꞌan, loꞌ chcuan cunta chaꞌ tsuꞌhue nu taa Ndiose ꞌñan tiꞌ xa nu msiꞌya ñi ꞌñan siꞌya Cristo Jesús.
\v 15 Canꞌ chaꞌ nchgaa naa nu tla ndon loꞌo tsoꞌ ꞌin Ndiose, cuiꞌ chaꞌ tiyaa re tyon loꞌo na, loꞌ chaꞌ ndeꞌen um ñan tiꞌ um xca ñaꞌan, Ndiose culyo scua la ñi chaꞌ canꞌ loꞌo um.
\v 16 Una loꞌo chaꞌ nu cuaꞌ mꞌni chaꞌan na, tsa quiñan la na chcui nchaꞌan na ꞌin na, loꞌ scañaꞌan ti ca lca tiquee na.
\v 17 ꞌUn jun taꞌa na, chcui nchaꞌan um ꞌñan tsañaꞌan nu nguiꞌnin, a cunta cuꞌni chaꞌan um ꞌin jun nu nduꞌhui chendyu tsañaꞌan nu cuaꞌ nguloꞌo hua ꞌin um.
\v 18 Siꞌyana tyun nu cuaꞌ ndaꞌan tsañaꞌan nu cuaꞌ mtsanꞌ ꞌin um, ticuiꞌ chaꞌ ꞌin canꞌ nchcuinꞌ loꞌo um cuaꞌ ñii nu hasta nguilo tyiꞌa quiloon, siꞌyana lca canꞌ taꞌa cusuun Cristo, ñi a ndyiꞌya canꞌ cunta ñi chaꞌ ngujui ñi loo cusi.
\v 19 Una tiyaa xaa tsatoꞌo quinanꞌ canꞌ siꞌyana chaꞌ xqueꞌ ꞌin neꞌ lca ndiose ꞌin neꞌ, loo nu ngaꞌan chaꞌ quii tiꞌ neꞌ chaꞌ jyiꞌo nde nguiꞌni siyeꞌ neꞌ, chacuiꞌ chaꞌ nu nchca loo chendyu re ntsuꞌhui tiquee neꞌ.
\v 20 Una nareꞌ niꞌ cuaan lca quichen tyi na, canꞌ nducua tloo na tyiꞌo Ñi Xꞌnan na Jesucristo, Ñi nu ndlo laa ꞌin na,
\v 21 xitsaꞌan ñi cunanꞌ na loꞌo sca cunanꞌ nu ndon loo lati tsañaꞌan nu lca ñi ycuiꞌ ñi, siꞌyana tlyu chaꞌ cuiyaꞌ ꞌin ñi loꞌ tca culo ñi tñan nchgaa loo chaꞌ.
\c 4
\s Ca tsuꞌhue lca tiquee na siꞌya Ñi Xꞌnan na
\p
\v 1 ꞌUn jun taꞌa na nu ndyuꞌhui cuiyaꞌ tinꞌ ꞌin, ꞌun nu lyee ntsuꞌhui tiqueen ꞌin, ꞌun nu nguiꞌni chaꞌ siꞌyana tsuꞌhue lca tiqueen, lca um tsañaꞌan nchca tiꞌ sca na nu taꞌa la tiꞌ ꞌñan, canꞌ chaꞌ chcuinꞌ loꞌo um siꞌyana tla tyon um loꞌo chaꞌ ꞌin Ñi Xꞌnan na, ꞌun nu ndyuꞌhui cuiyaꞌ tinꞌ ꞌin.
\v 2 Jñan chaꞌ tsuꞌhue ꞌin Evodia loꞌo Síntique siꞌyana ca sca chaꞌ ti ꞌin jun tsatlyu loꞌo Ñi Xꞌnan na.
\v 3 A cunta jñan chaꞌ tsuꞌhue ꞌin um, ꞌun nu taꞌa nguiꞌnin can tñan, siꞌyana ta yaaꞌ um ꞌin chcuaa jun cunaꞌan re, jun nu lyee msuꞌhua juesa loꞌ mda yaaꞌ ꞌñan loꞌo tñan ꞌin Ndiose, a cunta loꞌo yu Clemente mda yaaꞌ yu tsatlyu loꞌo nchgaa la ñaꞌan yu taꞌa nguiꞌnin tñan, cunda scaa canꞌ cuaꞌ nguaꞌan scua nii loo quityi ꞌin Ndiose, cuiꞌ quityi seꞌen nducua nii nchgaa nu cuaꞌ jui chendyu ꞌin.
\v 4 Nchca tinꞌ siꞌyana nchgaa xaa ca tsuꞌhue chuꞌhui tiquee um, sca chaꞌ ti ꞌin um loꞌo Ñi Xꞌnan na. Xiyaꞌ chcuinꞌ loꞌo um: ¡Ca tsuꞌhue chuꞌhui tiquee um!
\v 5 a cunta nchgaa tucui chuꞌhui lyoo ꞌin um lca um nten tsuꞌhue, loꞌ a jlya tiꞌ um siꞌyana cuaꞌ nchcui cuiiꞌ chaꞌ quiaan Ñi Xꞌnan na.
\v 6 A suꞌhua um chaꞌ nduhue tiꞌ tiquee um siꞌya scasca chaꞌ, cuiꞌ ca nu tyiꞌin tyaa um chaꞌ canꞌ yaaꞌ Ndiose, chcuiꞌ lyiꞌo um ꞌin ñi, tyaa um xuꞌhue ꞌin ñi, loꞌ jñan um ꞌin ñi siꞌya nchgaa loo chaꞌ.
\v 7 Ndiose, ñi nu nꞌni chaꞌ nguisa cusya ꞌin na, ñi a nchca quiꞌya na cunta ñaꞌan nguiaa chaꞌ re, cuiꞌ ñi chuꞌhui ñi cunta cusya ꞌin um loꞌo chaꞌ tiyaa ꞌin um siꞌya Cristo Jesús.
\s Chuꞌhui yuhue tiꞌ na chaꞌ nu tsuꞌhue
\p
\v 8 Canꞌ chaꞌ ꞌun jun taꞌa na, tsalca chaꞌ nu ñi, chaꞌ nu ndon loo, chaꞌ nu tsuꞌhue, chaꞌ nu luhui, chaꞌ nu ndyiꞌya la, chaꞌ nu ntsuꞌhui lyoo, loꞌ chaꞌ lca na chaꞌ nu tsuꞌhue nu ndon loo lati, nde chaꞌ nu chuꞌhui tiquee um.
\v 9 Nchgaa chaꞌ nu cuaꞌ mꞌni chaꞌan um ꞌñan, cuiꞌ chaꞌ nu cuaꞌ ncuan xuꞌhue um loꞌ ngune ꞌin um tsañaꞌan nu cuaꞌ naꞌan um mꞌnin, canꞌ nu ngaꞌan chaꞌ cuꞌni um, loꞌ Ndiose, ñi nu nꞌni chaꞌ nxitñanꞌ cusya ꞌin na, tyiꞌin ñi loꞌo um.
\s Mdyaa yu Pablo xuꞌhue ꞌin jun siꞌya lcuan
\p
\v 10 Ndyijyin yaꞌ tsuꞌhue ntsuꞌhui tiqueen loꞌo Ñi Xꞌnan na siꞌyana ya tucua xaa nguia yuꞌhui tiꞌ um ꞌñan loꞌo na nu cunajoꞌo ꞌñan, siyaꞌ lyee lca tiquee um ta yaaꞌ um ꞌñan, una a jui ñaꞌan ꞌin um.
\v 11 A nchcuinꞌ loꞌo um ta siꞌyana ꞌni chaꞌ ꞌñan, nanꞌ tsuꞌhue ntsuꞌhui tiqueen siyaꞌ ñi tuꞌ ñaꞌan ndijin,
\v 12 cuaꞌ yuꞌhui lyoon chaꞌ tiꞌi chendyu, cuañaꞌan loꞌo chaꞌ cuilyiyaꞌ, cuaꞌ nguñi tinꞌ siyaꞌ ñi tuꞌ ñaꞌan ndijin, jlyo tinꞌ ñi lca nguiteꞌ tiꞌ na loꞌ jlyo tinꞌ ñi lca nguilaꞌ tiꞌ na, ñi lca xa nu nde nguinu na ꞌin na, ticuiꞌ cuañaꞌan xa nde ndiya lyijyi na.
\v 13 Nchgaa chaꞌ tca ꞌñan siꞌyana Cristo nda yaaꞌ ꞌñan.
\v 14 Una tsuꞌhue ñaꞌan nu mꞌni um siꞌyana mda yaaꞌ um ꞌñan loꞌo nu tiꞌi ndijin.
\v 15 Tsañaꞌan nu cuaꞌ jlyo tiꞌ um, ꞌun jun taꞌa na Filipos, xa mdaꞌan ycuinꞌ chaꞌ tsuꞌhue ꞌin Cristo seꞌen lca Macedonia, cuiꞌ xa nu mdoꞌon canꞌ, loꞌ a tucui la jun taꞌa na nu mda yaaꞌ ꞌñan, cuiꞌ ca nu tsalca ti um mda yaaꞌ um ꞌñan loꞌo na nu najoꞌo ꞌñan, loꞌ cuañaꞌan mxitucui um chaꞌ tsuꞌhue ꞌin um loꞌon.
\v 16 Xa mdiꞌin quichen Tesalónica, tucua snan juesa nguaꞌan tñan um na nu ngunajoꞌo ꞌñan.
\v 17 Una siꞌi siꞌyana nducua tloon na nu ndiꞌin ꞌin um, cuiꞌ ca nu nducua tloon siꞌyana ca quiꞌan la chaꞌ tsuꞌhue ꞌin um tloo Ndiose.
\v 18 A sca na ndiya lyijyi ꞌñan, cuiꞌ ca nu nde cuaꞌ nguinu na ꞌñan, a xca ꞌa chaꞌ tiꞌ nguiꞌni ꞌñan loꞌo lcuan nu cuaꞌ nguaꞌan tñan um loꞌo yu Epafrodito, lca na sca lcuan nu xityiꞌi nu cuaꞌ nducua tloo Ndiose, cuiꞌ sca chaꞌ nu ndiyaa tiꞌ ñi.
\v 19 Canꞌ chaꞌ Ndiose ꞌñan taa la ñi nchgaa na nu ꞌni chaꞌ ꞌin um loꞌo, tsañaꞌan ndiꞌin chaꞌ cuilyiyaꞌ ꞌin ñi la niꞌ cuaan siꞌya Cristo Jesús.
\v 20 Scati ꞌin Stina Ndiose cuꞌni tnu na tsala xaa. Amen.
\s Yu Pablo mslaꞌ taꞌa yu loꞌo jun Filipos
\p
\v 21 Chcuiꞌ chaꞌ um ꞌin nchgaa jun nu cuaꞌ ya quiꞌan tiꞌ ꞌin Cristo Jesús, cuiꞌ cuañaꞌan jun taꞌa na nu ndiꞌin nde re nchcuiꞌ chaꞌ ꞌin um,
\v 22 a cunta nchgaa la ñaꞌan jun taꞌa na nchcuiꞌ chaꞌ jun ꞌin um, una lyee lati jun nu ndiꞌin naꞌan ꞌin César.
\v 23 Cuiꞌ chaꞌ tsuꞌhue ꞌin Ñi Xꞌnan na Jesucristo tyiꞌin loꞌo um nchgaa um. Amen.