\id COL - Nopala (Chatino) NT [cya] - Mexico 2013 (web 2014)
\h COLOSENSES
\toc1 Colosenses
\toc2 Colosenses
\toc3 Col
\mt1 Colosenses
\c 1
\s Yu Pablo nchcuiꞌ chaꞌ yu ꞌin jun Colosas
\p
\v 1 Nanꞌ yu Pablo, siꞌya chaꞌ cuiyaꞌ ꞌin Ndiose nguaꞌan tñan Jesucristo ꞌñan tsa ycuinꞌ chaꞌ tsuꞌhue ꞌin ñi, loꞌ tsatlyu loꞌo yu taꞌa na Timoteo caꞌan tñan hua sca quityi re ꞌin um,
\v 2 ꞌun jun taꞌa na nu ndiꞌin quichen Colosas, nchgaa nu cuaꞌ mdoꞌo hui ꞌin Cristo nu ndiya quiꞌan tiꞌ ꞌin ñi. Stina Ndiose loꞌo Ñi Xꞌnan na Jesucristo taa ñi chaꞌ tsuꞌhue nu chuꞌhui niꞌ cusya ꞌin um, loꞌ cuꞌni ñi chaꞌ tyiꞌin tsuꞌhue um.
\s Mjñan yu Pablo ꞌin Ndiose siꞌya chaꞌ ꞌin jun
\p
\v 3 Xa nchcuiꞌ lyiꞌo hua ꞌin Ndiose, Sti Ñi Xꞌnan na Jesucristo, a sꞌni ndyaa hua xuꞌhue ꞌin ñi siꞌya um,
\v 4 siꞌyana cuaꞌ ynan hua chaꞌ tsala ñaꞌan ndiya quiꞌan tiꞌ um ꞌin Cristo Jesús, a cunta ntsuꞌhui chaꞌ tsuꞌhue ꞌin um loꞌo nchgaa jun taꞌa na,
\v 5 siꞌyana nducua tloo um chaꞌ nu cuaꞌ mdiꞌin tyaa Ndiose nu ntsuꞌhui chaꞌ quiꞌni caꞌan ꞌin um la niꞌ cuaan, tsañaꞌan chaꞌ nu cuaꞌ ngune ꞌin um, chaꞌ nu ñi nu lca chaꞌ tsuꞌhue ꞌin Jesucristo,
\v 6 loꞌ mdiyaan na seꞌen ndiꞌin um tsañaꞌan cuaꞌ nguine yuꞌhui na sca chcui chendyu, nguia nguiton na, loꞌ nguilo na tsañaꞌan ndiꞌin chaꞌ ꞌin um tiꞌ tsaan nu ngune ꞌin um, loꞌ ncua cuiyaꞌ tiꞌ um tsala ñaꞌan tlyu chaꞌ tsuꞌhue ꞌin Ndiose,
\v 7 cuiꞌ chaꞌ nu nguloꞌo yu Epafras ꞌin um, yu nu taꞌa nguiꞌni hua tñan ꞌin Ndiose nu ndyuꞌhui cuiyaꞌ tiꞌ hua ꞌin, yu nu tsuꞌhue nguiꞌni tñan ꞌin Cristo lja um,
\v 8 ndaa yu suun loꞌo hua tsala ñaꞌan tlyu chaꞌ tsuꞌhue ntsuꞌhui ꞌin um siꞌya Espíritu ꞌin Ndiose.
\v 9 Canꞌ chaꞌ tiꞌ xa ynan hua chaꞌ ñaꞌan ndiꞌin um, a ndlaꞌ tiꞌ hua chcuiꞌ lyiꞌo hua ꞌin Ndiose loꞌ njñan hua siꞌyana nde lyee la quiꞌya um cunta tsañaꞌan nu ndyiꞌo tiquee ñi, cuañaꞌan ca cuiyaꞌ tiꞌ um loꞌ ca chcui la chaꞌ tiyaa ꞌin um loꞌo tsoꞌ nu ꞌin ñi,
\v 10 ñaꞌan ca siꞌyana tyiꞌan loꞌo um sca chendyu nu luhui tsañaꞌan nchca tiꞌ Ñi Xꞌnan na, cunan um ñaꞌan nu quinu tsuꞌhue tiquee ñi loꞌo um siꞌya nchgaa loo chaꞌ, cuañaꞌan ca chcanꞌ loo chendyu ꞌin um siꞌya tñan tsuꞌhue nu nguiꞌni um, loꞌ quiꞌya la um cunta tsañaꞌan nguiaa chaꞌ ꞌin Ndiose,
\v 11 cuañaꞌan caja la juesa ꞌin um loꞌo chaꞌ cuiyaꞌ ꞌin ñi, tsañaꞌan juesa nu ndyiꞌo la niꞌ cuaan, siꞌyana chuꞌhui chaꞌ tlyu tiꞌ ꞌin um loꞌ ta loo um loꞌo chaꞌ nu ndijin um,
\v 12 tsuꞌhue ntsuꞌhui tiquee um tyaa um xuꞌhue ꞌin Stina Ndiose, ñi nu mdaa chaꞌ cuiyaꞌ quiꞌni caꞌan chaꞌ tsuꞌhue ꞌin na, cuiꞌ chaꞌ nu taa ñi ꞌin nchgaa nu cuaꞌ mdoꞌo hui ꞌin ñi, nu ndaꞌan loo xaa ꞌin ñi.
\v 13 Ngulo laa ñi ꞌin na seꞌen msñi suꞌhua yaaꞌ chaꞌ tla yta ꞌin na, loꞌ cuaꞌ mdiꞌin tyaa ñi ꞌin na tsoꞌ seꞌen ndlo Sñeꞌ ñi tñan, cuiꞌ nu taꞌa lati ꞌin ñi,
\v 14 cuiꞌ nu msuꞌhua lyiyaꞌ quiꞌya ꞌin na loꞌo tne, loꞌ mdoꞌo laa na.
\s Siꞌya Cristo mꞌni chuꞌhue ñi chaꞌ ꞌin na loꞌo Ndiose
\p
\v 15 Cuiꞌ ñi lca ñi lcuin ca Ndiose, cuiꞌ Ndiose nu a nchca tucui ñaꞌan tloo, loꞌ scati canꞌ lca nu ndon loo lati nu ndlo tñan ꞌin nchgaa loo chaꞌ.
\v 16 Siꞌyana loꞌo cunta ꞌin ñi nguiaꞌ nchgaa loo na nu ndiꞌin niꞌ cuaan loꞌo loo chendyu re, na nu chcanꞌ loꞌo na nu a chcanꞌ, nchgaa tucui nu nchcua seꞌen ndlo tñan, nu ntsuꞌhui chaꞌ cuiyaꞌ yaaꞌ, cuiꞌ nu cuaan la tñan lyiꞌya, loꞌo yu nchca bsya, nchgaa chaꞌ re mducua suun na siꞌya ñi, a cunta siꞌyana quinu tsuꞌhue tiquee ñi.
\v 17 Cuaꞌ ndiꞌin ñi xa nu tiꞌ lyijyi tsaaꞌ nchgaa loo na, loꞌ siꞌya chaꞌ cuiyaꞌ ꞌin ñi tiꞌ nguia quiñan nchgaa loo chaꞌ.
\v 18 Cuiꞌ ñi lca ñi que ꞌin jun taꞌa na nu lca laa ꞌin ñi, cuaꞌ lca ndiꞌin ñi tiꞌ culoo, ñi nu ndon loo lati nu mdyiquiꞌo lja neꞌ ngujui, seꞌen nu ca chcanꞌ loo siꞌyana scati ñi lca ñi nu ndon loo lati,
\v 19 canꞌ chaꞌ mdoꞌo tiquee Stina Ndiose siꞌyana ca Sñeꞌ ñi tsañaꞌan lca ñi ycuiꞌ ca ñi,
\v 20 loꞌ siꞌya ñi caja ñaꞌan quinu tsuꞌhue nchgaa loo chaꞌ tloo ñi xiyaꞌ, chaꞌ nu nchca loo chendyu re loꞌo la niꞌ cuaan, cuaꞌ mꞌni chuꞌhue ñi chaꞌ canꞌ siꞌya tne Sñeꞌ ñi nu nguilo la loo cusi.
\v 21 Cuiꞌ cuañaꞌan ꞌun, tiꞌ culoo tijyoꞌ nchca um siiꞌ Ndiose, mnaꞌan tiꞌi um ꞌin ñi, mꞌni um tñan ngunanꞌ, una cuaꞌ ñii jui ñaꞌan mꞌni chuꞌhue um chaꞌ ꞌin um loꞌo ñi,
\v 22 cuiꞌ siꞌya chaꞌ nu ngujui Sñeꞌ ñi, ñaꞌan ca siꞌyana tiya loꞌo ñi ꞌin um tloo Ndiose luhui tloo um, a sca chaꞌ nducui nchaꞌan ꞌin um, ñi a nducui ꞌa um quiꞌya,
\v 23 una chaꞌ tsa quiñan um loꞌo chaꞌ nu ndiya quiꞌan tiꞌ um, tla ndon um loꞌ a tyiꞌo tsoꞌ um loo chaꞌ tsuꞌhue ꞌin Cristo, chaꞌ nu nducua tloo um tiꞌ xa ngune ꞌin um, cuiꞌ chaꞌ nu ndaꞌan ycuiꞌ neꞌ sca chcui chendyu, loꞌon nanꞌ yu Pablo ndaꞌan ycuinꞌ chaꞌ re.
\s Tñan ꞌin Ndiose nguiꞌni yu Pablo lja neꞌ gentil
\p
\v 24 Tsuꞌhue ntsuꞌhui tiqueen ndijin nu tiꞌi siꞌya um, cuañaꞌan taꞌa nu tiꞌi nu ntsuꞌhui chaꞌ tijin tsañaꞌan mdijin Cristo, siꞌya chaꞌ ꞌin nchgaa nu ndiya quiꞌan tiꞌ ꞌin ñi nu lca laa ꞌin ñi,
\v 25 cuiꞌ tñan canꞌ nguiꞌnin cuaꞌ ñii, tsañaꞌan tñan nu mdaa Ndiose ꞌñan nu cuꞌni tsuꞌhue loꞌo um, siꞌyana culyo scua lan chaꞌ ꞌin ñi,
\v 26 chaꞌ nu ntsuꞌhui cutsiꞌ ꞌin Ndiose tiꞌ cuaꞌ sꞌni la, a tucui nu ncua jlyo tiꞌ chaꞌ re, una cuaꞌ ñii ncua chcanꞌ loo na loꞌo nchgaa nu cuaꞌ mdoꞌo hui ꞌin ñi,
\v 27 mdoꞌo tiquee Ndiose culyo scua la ñi chaꞌ re loꞌo jun, loꞌ ca cuiyaꞌ tiꞌ jun tsala ñaꞌan tsuꞌhue loꞌ tlyu xaa nu cuaꞌ jui ꞌin neꞌ gentil, chaꞌ nu yuꞌhui cutsiꞌ canꞌ, cuiꞌ Cristo nu ntsuꞌhui niꞌ cusya ꞌin um, loꞌ siꞌya ñi nducua tloo um quiꞌni caꞌan ꞌin um loo xaa ꞌin ñi.
\v 28 Cuiꞌ chaꞌ ꞌin ñi lca nu ndaꞌan ycuiꞌ hua loꞌ nsuꞌhua tiyaa hua ꞌin nchgaa tucui, ndloꞌo hua ꞌin neꞌ tsañaꞌan chaꞌ tiyaa ꞌin Ndiose, ñaꞌan ca siꞌyana tsa loꞌo hua ꞌin nchgaa tucui tloo Ndiose loꞌo sca chaꞌ tiyaa nu chcui siꞌya Cristo Jesús.
\v 29 Canꞌ chaꞌ nsuꞌhua loon tñan re tsañaꞌan chaꞌ cuiyaꞌ nu ndaa ñi ꞌñan, loꞌ lyee nxicuꞌni chaꞌ re niꞌ cusya ꞌñan.
\c 2
\p
\v 1 Nchca tinꞌ siꞌyana ca jlyo tiꞌ um tsala ñaꞌan chaꞌ nu ndijin siꞌya um, a cunta siꞌya jun nu ndiꞌin quichen Laodicea, tsatlyu loꞌo nchgaa nu a nchca ñaꞌan tloo ꞌñan,
\v 2 siꞌyana caja la chaꞌ tnu tiquee ꞌin jun, ca sca chaꞌ ti ꞌin jun siꞌya chaꞌ tsuꞌhue ndyiꞌo tiquee jun, cuañaꞌan ca chcui la chaꞌ tiyaa ꞌin jun, loꞌ quiꞌya jun cunta tsala ñaꞌan tlyu chaꞌ nu yuꞌhui cutsiꞌ ꞌin Stina Ndiose loꞌo Cristo,
\v 3 loꞌ siꞌya Cristo quija lyoo nchgaa loo chaꞌ tiyaa seꞌen nu quiꞌya na cunta nchgaa chaꞌ.
\v 4 Nde chaꞌ nchcuinꞌ loꞌo um siꞌyana a caja nu cuñilyiꞌo ꞌin um loꞌo xca loo chaꞌ, uta siꞌyana cuti nchcuiꞌ neꞌ loꞌo um.
\v 5 Siyaꞌ a ndiꞌin loꞌo um, una cusya ꞌñan nchca na loꞌo um, tsuꞌhue ntsuꞌhui tiqueen siꞌyana jlyo tinꞌ tsuꞌhue ndiꞌin um, tla ndon um loꞌo chaꞌ ꞌin Cristo nu ndiya quiꞌan tiꞌ um.
\v 6 Canꞌ chaꞌ tsañaꞌan nu ncuan xuꞌhue um ꞌin Ñi Xꞌnan na Jesucristo, cuiꞌ cuañaꞌan tyuꞌhui um chendyu sca chaꞌ ti ꞌin um loꞌo ñi,
\v 7 tla tyon um loꞌ tsa quiñan la um culo um siꞌya ñi, a cunta loꞌo chaꞌ nu ndiya quiꞌan tiꞌ um, tyiꞌin tya tla um ꞌin um loꞌo chaꞌ canꞌ tsañaꞌan nu cuaꞌ mꞌni chaꞌan um, loꞌ tyaa um xuꞌhue ꞌin Ndiose nchgaa xaa.
\s Chendyu nu cui ti siꞌya Cristo
\p
\v 8 Xñi um cunta siꞌyana a caja nu cuñilyiꞌo ꞌin um loꞌo scasca chaꞌ tiyaa ꞌin nten chendyu, chaꞌ nu a sca cunta ntsuꞌhui, tsañaꞌan nguiaa chaꞌ nu cuaꞌ ntsuꞌhui ꞌin neꞌ, chaꞌ nu nchca loo chendyu re, loꞌ siꞌi tsañaꞌan nguiaa chaꞌ ꞌin Cristo.
\v 9 Siꞌyana Cristo chcui ñaꞌan nguiaa chaꞌ ꞌin Ndiose nguiaa chaꞌ ꞌin ñi,
\v 10 canꞌ chaꞌ a sca chaꞌ ndiya lyijyi ꞌin um siꞌya Cristo, ñi nu lca que ꞌin nchgaa nu ntsuꞌhui chaꞌ cuiyaꞌ yaaꞌ loꞌo nchgaa nu nchca bsya.
\v 11 A cunta siꞌya ñi ncua circuncida ꞌin um, una siꞌi loꞌo juesa ꞌin nten chendyu, cuiꞌ ca nu loꞌo chaꞌ cuiyaꞌ ꞌin ñi mscuan tloo um nchgaa chaꞌ ngunanꞌ nu ntsuꞌhui niꞌ cusya ꞌin um, cuañaꞌan ncua circuncida ꞌin um siꞌya Cristo.
\v 12 Xa mducua tya um ñaꞌan loo chaꞌ ngujui um tsatlyu loꞌo ñi, cuiꞌ cuañaꞌan xa mdyiquiꞌo ñi, loꞌo um mdyiquiꞌo um, loo nu ya quiꞌan tiꞌ um siꞌyana mdyiquiꞌo ñi loꞌo chaꞌ cuiyaꞌ ꞌin Ndiose.
\v 13 Nu ncua tiꞌ culoo a ntsuꞌhui chendyu ꞌin um siꞌya quiꞌya nducui um, a nchca xcuan tloo um nchgaa chaꞌ ngunanꞌ nu ntsuꞌhui niꞌ cusya ꞌin um, una mdaa ñi sca chendyu ꞌin um loꞌo Cristo xa mꞌni ñi chaꞌ tlyu tiꞌ ꞌin um siꞌya nchgaa quiꞌya ꞌin um,
\v 14 cuañaꞌan msiꞌyu coꞌ ñi nchgaa chaꞌ nu nguinu scua, cuiꞌ nu ndlo quiꞌya ꞌin na, scasca chaꞌ nu nducui nchaꞌan ꞌin na, una mxca ñi chaꞌ canꞌ xa mjyiꞌin caꞌan ñi ꞌin na loo cusi,
\v 15 ngulyaa ñi chaꞌ cuiyaꞌ ꞌin nchgaa nu ndlo tñan loꞌo nu nchca bsya, mdaa ñi chaꞌ jyiꞌo ꞌin canꞌ tloo nchgaa tucui, loꞌ mꞌni ñi canan ꞌin la loo cusi.
\v 16 Canꞌ chaꞌ a cuꞌni cunta ꞌa um chaꞌ caja nu chcuiꞌ tyijyin siꞌya na nu nchcu um, uta loꞌo na nu ndyiꞌyo um, ta siꞌya scasca taꞌa nu nꞌni neꞌ, xa nchcui cooꞌ, uta tsaan nu nxitñanꞌ neꞌ,
\v 17 nchgaa chaꞌ re ncua na sca xñii chaꞌ nu ntsuꞌhui chaꞌ caan, una cuiꞌ chaꞌ ꞌin Cristo nchcuiꞌ na.
\v 18 A taa um yaꞌ caja nu chcui ndijin, ta chcuiꞌ siꞌyana a chcuan um cunta chaꞌ tsuꞌhue nu quiꞌni caꞌan ꞌin um, cuiꞌ nu nducui tiꞌ nꞌni suun ꞌin tloo naꞌan nten loꞌ nꞌni tnu ꞌin angujle, nguiten yuꞌhui neꞌ loꞌo chaꞌ nu a nchca ñaꞌan neꞌ, cua chaꞌ ti nguiꞌni siyeꞌ neꞌ siꞌyana cooꞌ chaꞌ tiyaa ꞌin neꞌ.
\v 19 A nꞌni cunta neꞌ ꞌin Cristo nu lca Que ꞌin na, ñi nu nꞌni chaꞌ ndlyo na tsañaꞌan nu nchca tiꞌ Ndiose, naꞌan seen ñi ꞌin na, nguiꞌni sca ñi ꞌin na tsañaꞌan nguiaa chaꞌ ꞌin na loꞌo seꞌen ntsuꞌhui cula na loꞌo chcuin na.
\v 20 ꞌUn cuaꞌ ngujui um tsatlyu loꞌo Cristo, cuaꞌ ngujui um loꞌo chaꞌ nu nchca loo chendyu re. ¿Ñi chaꞌ ta tiꞌ nxuꞌhua seꞌen um scasca la chaꞌ nu ntsuꞌhui ꞌin nten chendyu?
\v 21 Nchcuiꞌ neꞌ: A culaꞌ na re, a cu ꞌin na, ñi a ntsuꞌhui chaꞌ quiꞌni caꞌan ꞌin na,
\v 22 (lca na chaꞌ tiyaa ꞌin nten chendyu tsañaꞌan nu ndloꞌo neꞌ loꞌ ndlo neꞌ tñan), chacuiꞌ chaꞌ nu ntsuꞌhui chaꞌ tsatii cuaꞌ ñaꞌaan ndlyaꞌ na ꞌin na.
\v 23 Tsuꞌhue ꞌa chaꞌ tiyaa lca na xqueꞌ tiꞌ na tsañaꞌan nu nchcuiꞌ neꞌ loꞌo ñaꞌan nu nꞌni suun neꞌ, ticuiiꞌ neꞌ nxitijin neꞌ ꞌin neꞌ nu tiꞌi, una siꞌi canꞌ chaꞌ ndiyatii chaꞌ ngunanꞌ ndyiꞌo tiquee neꞌ.
\c 3
\p
\v 1 Siꞌyana cuaꞌ mdyiquiꞌo um tsatlyu loꞌo Cristo, quia nan um chaꞌ nu nchca la niꞌ cuaan seꞌen nducua Cristo tsoꞌ cueen ꞌin Ndiose.
\v 2 Chcua quiloo um chaꞌ nu nchca la niꞌ cuaan, loꞌ siꞌi chaꞌ nu nchca loo chendyu re.
\v 3 Cuꞌni um cunta siꞌyana cuaꞌ ngujui um, chendyu ꞌin um cuaꞌ ntsuꞌhui na tuyaaꞌ Cristo tsatlyu loꞌo Ndiose.
\v 4 Xa nu caan Cristo, ñi nu lca chendyu ꞌin um, tsatlyu ca chcanꞌ loo um loꞌo ñi loo xaa ꞌin ñi.
\s Chaꞌ ꞌin chendyu nu cui ti loꞌo chendyu cula
\p
\v 5 Canꞌ chaꞌ cuꞌni tyii um nchgaa chaꞌ ngunanꞌ nu ntsuꞌhui niꞌ cusya ꞌin um: Chaꞌ nu nguiten yuꞌhui neꞌ loꞌo cuilyiꞌo nten uta loꞌo ñaꞌan tucui ti, nchgaa loo chaꞌ cooꞌ, chaꞌ nu nchcui tiꞌ neꞌ, chaꞌ nu a seꞌen ñaꞌan, chaꞌ ngunanꞌ nu ndyiꞌo tiquee neꞌ, a cunta loꞌo chaꞌ nu nchcui tiꞌ neꞌ chaꞌ cuilyiyaꞌ, loꞌ suꞌhua ñaꞌan ndiꞌin chaꞌ re xa nꞌni tnu neꞌ joꞌo.
\v 6 Siꞌya chaꞌ re Ndiose xitijin ñi ꞌin neꞌ nu tiꞌi, nchgaa nu lyeꞌ tiꞌ,
\v 7 loꞌ nde chendyu nu mduꞌhui um tiꞌ culoo xa mdaꞌan yꞌni um chaꞌ canꞌ.
\v 8 Una loꞌo chaꞌ re culaꞌ tiꞌ um: Chaꞌ nsinꞌ tiꞌ, chaꞌ nu nchcuen tiqueꞌ um, chaꞌ ngunanꞌ, chaꞌ nu ndaja taꞌa um, chaꞌ nu a seꞌen ñaꞌan nchcua tuꞌhua um.
\v 9 A chcuiꞌ ꞌa um chaꞌ cuiñi loꞌo taꞌa um, siꞌyana cuaꞌ mscuan tloo um chendyu cula nu mduꞌhui um tiꞌ culoo,
\v 10 loꞌ cuaꞌ mchcuan um sca chendyu nu cui ti, cunda sca tsaan nguia nchca cui la chaꞌ tiyaa ꞌin um, cuañaꞌan tca chuꞌhui lyoo la um ñaꞌan chaꞌ ꞌin Ndiose, ñi nu ndaa chendyu ꞌin na.
\v 11 Loo chaꞌ re scañaꞌan ti ntsuꞌhui lyoo nchgaa tucui: Neꞌ Israel, neꞌ quita, nu ncua circuncida ꞌin loꞌo nu a ncua na ꞌin, nu mꞌni chaꞌan loꞌo nu a mꞌni chaꞌan, nu lca nguso nu cuaꞌ msiꞌi neꞌ ꞌin loꞌo nu nguiꞌni tñan chaꞌ ꞌin ti, siꞌyana Cristo scati ñi lca ñi nu ndon loo, loꞌ ndiꞌin ñi loꞌo nchgaa tucui.
\v 12 Tyuꞌhui um chendyu tsañaꞌan nꞌni sca nu cuaꞌ mdoꞌo hui ꞌin Ndiose, cuaꞌ msuhui ñi ꞌin um loꞌ ndyuꞌhui cuiyaꞌ tiꞌ ñi ꞌin um, canꞌ chaꞌ ñaꞌan ꞌtnan tiꞌ taꞌa um loꞌo nu chcui lca tiquee um, cuꞌni um tsuꞌhue loꞌo taꞌa um, loꞌo suun ñaꞌan cuꞌni um, ndyiꞌya ti tsaa chaꞌ ꞌin um, a cunta chuꞌhui chaꞌ tlyu tiꞌ ꞌin um.
\v 13 Chaꞌ ntsuꞌhui nu nsuꞌhua quiꞌya taꞌa, ta loo um ꞌin canꞌ, loꞌ cuꞌni um chaꞌ tlyu tiꞌ ꞌin. Tsañaꞌan mꞌni Cristo chaꞌ tlyu tiꞌ ꞌin um, cuañaꞌan cuꞌni um chaꞌ tlyu tiꞌ ꞌin taꞌa um.
\v 14 Chaꞌ nu lyee lati ndon loo chuꞌhui chaꞌ tsuꞌhue ꞌin um scasca um, siꞌyana canꞌ chaꞌ nu nda yaaꞌ nchca sca chaꞌ ti ꞌin um.
\v 15 Ndiose cuꞌni ñi chaꞌ tyiꞌin tsuꞌhue um loꞌ taa um yaꞌ culo ñi tñan ꞌin um, canꞌ chaꞌ msiꞌya ñi ꞌin um siꞌyana tsatlyu ca sca chaꞌ tiꞌ ꞌin um loꞌ quinu tsuꞌhue tiquee um loꞌo ñi.
\v 16 Tyaa um yaꞌ chaꞌan yuꞌhui ychaꞌ Cristo niꞌ cusya ꞌin um, culoꞌo um ꞌin taꞌa um loꞌo nchgaa loo chaꞌ tiyaa, loꞌ taa um chaꞌ tnu tiquee ꞌin, cula loꞌo um ꞌin Ñi Xꞌnan na loꞌo nu chcui lca tiquee um, cuañaꞌan tyaa um xuꞌhue ꞌin ñi loꞌo scasca jyiin, loꞌo salmo, himno, loꞌo coro.
\v 17 Nchgaa tñan nu cuꞌni um uta chaꞌ nu chcuiꞌ um, cuꞌni um ꞌin na loꞌo chaꞌ cuiyaꞌ ꞌin Ñi Xꞌnan na Jesús, cuañaꞌan ntsuꞌhui chaꞌ tyaa um xuꞌhue ꞌin Stina Ndiose siꞌya ñi.
\s Tyiꞌin tsuꞌhue na loꞌo nchgaa tucui
\p
\v 18 ꞌUn jun cunaꞌan, ca jaꞌan um ꞌin cuilyiꞌo um siꞌyana cuañaꞌan nchca tiꞌ Ñi Xꞌnan na.
\v 19 Cuiꞌ cuañaꞌan ꞌun yu quiꞌyu, chuꞌhui chaꞌ tsuꞌhue ꞌin um loꞌo nten ꞌin um, loꞌ siꞌi la xnan cuꞌni um loꞌo canꞌ.
\v 20 A cunta ꞌun nu tsa suhue ti, nchgaa chaꞌ ca jaꞌan um ꞌin nten cula ꞌin um, siꞌyana cuañaꞌan nchca tiꞌ Ñi Xꞌnan na.
\v 21 ꞌUn nu lca nten cula, a suꞌhua um chaꞌ nsinꞌ tiꞌ tiquee sñeꞌ um siꞌyana a lyiꞌun tiꞌ canꞌ.
\v 22 Cuiꞌ cuañaꞌan ꞌun nu lca nguso, tucua um tñan nchgaa chaꞌ nu chcuiꞌ xꞌnan um, siꞌi tsalja ndon ti canꞌ caꞌan tiꞌ um cuꞌni um tñan seꞌen nu quinu um tsuꞌhue loꞌo canꞌ, cuiꞌ ca nu loꞌo nu chcui lca tiquee um cuꞌni um tñan siꞌyana ntsuꞌhui sca ytsen ꞌin um tloo Ndiose.
\v 23 Nchgaa tñan nu cuꞌni um, cuꞌni um ꞌin na loꞌo nu chcui lca tiquee um, siꞌyana loꞌo cunta ꞌin Ñi Xꞌnan na nguiꞌni um ꞌin na, loꞌ siꞌi cunta ꞌin nten chendyu.
\v 24 Siꞌyana cuaꞌ jlyo tiꞌ um Ñi Xꞌnan na ntsuꞌhui chaꞌ taa ñi chaꞌ tsuꞌhue nu quiꞌni caꞌan ꞌin um, siꞌyana loꞌo cunta ꞌin Cristo ñi nu lca Xꞌnan um nguiꞌni um tñan canꞌ.
\v 25 Una nu cuꞌni chaꞌ ngunanꞌ ticuiꞌ chaꞌ ngunanꞌ ca siyaꞌ canꞌ, siꞌyana scañaꞌan ti ntsuꞌhui chaꞌ ca cuiyaꞌ chaꞌ ꞌin nchgaa nten.
\c 4
\p
\v 1 Cuiꞌ cuañaꞌan ꞌun nu lca xꞌnan nguso, cuꞌni um tsuꞌhue loꞌo nguso ꞌin um tsañaꞌan nu ngaꞌan chaꞌ, siꞌyana cuaꞌ jlyo tiꞌ um loꞌo um ntsuꞌhui sca Xꞌnan um la niꞌ cuaan.
\v 2 Tsa quiñan um chcuiꞌ lyiꞌo um ꞌin Ndiose, tyon tiyaa um loꞌo chaꞌ canꞌ loꞌ tyaa um xuꞌhue ꞌin ñi.
\v 3 A cunta jñan um ꞌin ñi siꞌya chaꞌ ꞌin hua, siꞌyana taa Ñi Xꞌnan na chaꞌ cuiyaꞌ chcuiꞌ hua ychaꞌ ñi, ñaꞌan ca siꞌyana chuꞌhui lyoo neꞌ chaꞌ nu ntsuꞌhui nchcun, cuiꞌ chaꞌ ꞌin Cristo, nu siꞌya ntsuꞌhuin naꞌan chcuan,
\v 4 siꞌyana tca culyo scua lan chaꞌ re tsañaꞌan nu ngaꞌan chaꞌ chcuinꞌ.
\v 5 A cunta loꞌo chaꞌ tiyaa tyuꞌhui um chendyu tloo nten nu a ndiya quiꞌan tiꞌ, cunan um ñaꞌan nu chcuiꞌ um loꞌo neꞌ lja nu tiꞌ ndyijyi xaa.
\v 6 Loꞌo chaꞌ tiyaa ñaꞌan chcuiꞌ um, tsañaꞌan nguiaa chaꞌ ꞌin sca na nu yuꞌhui tejeꞌ ꞌin, loꞌ cuañaꞌan cunan um ñaꞌan xcuen um ꞌin cunda scaa neꞌ.
\s Mslaꞌ taꞌa yu Pablo loꞌo jun
\p
\v 7 Yu taꞌa na Tíquico, yu nu ndyuꞌhui cuiyaꞌ tiꞌ na ꞌin, quitsaꞌ yu ꞌin um tsañaꞌan ndiꞌin chaꞌ ꞌñan, lca yu sca taꞌa nguiꞌni na tñan loꞌ tsuꞌhue nguiꞌni yu tñan ꞌin Ñi Xꞌnan na.
\v 8 Canꞌ chaꞌ msuꞌhuan ꞌin yu tsaa yu seꞌen ndiꞌin um siꞌyana ca cuiyaꞌ tiꞌ um ñaꞌan ndiꞌin chaꞌ ꞌin hua, loꞌ taa la yu chaꞌ tnu tiquee ꞌin um,
\v 9 a cunta loꞌo yu Onésimo nguaꞌan tñan ꞌin, ticuiꞌ yu taꞌa quichen tyi um, yu nu ndyuꞌhui cuiyaꞌ tinꞌ ꞌin, lca yu sca yu taꞌa na nu ñi ndiꞌin chaꞌ ꞌin, cuiꞌ yu quitsaꞌ yu ꞌin um nchgaa chaꞌ nu nchca nde re.
\v 10 Yu Aristarco nu taꞌa ntsuꞌhuin naꞌan chcuan, nchcuiꞌ chaꞌ yu ꞌin um. Loꞌo yu Marco sñeꞌ taꞌa ngula Bernabé nchcuiꞌ chaꞌ yu ꞌin um, cuaꞌ ycuinꞌ loꞌo um chaꞌ ꞌin yu Marco, chaꞌ tsaa yu seꞌen ndiꞌin um cuan xuꞌhue um ꞌin yu,
\v 11 a cunta Jesús, yu nu nchcuiꞌ neꞌ loꞌo lca Justo, nchcuiꞌ chaꞌ ꞌin um, loꞌ tsalca nu nda yaaꞌ ꞌñan loꞌo tñan ꞌin Ndiose snan neꞌ Israel ca lca yu nu ndaꞌan ycuiꞌ tsañaꞌan ntsuꞌhui chaꞌ culo ñi tñan ꞌin nten, cuiꞌ siꞌya yu ndyija la chaꞌ tnu tiquee ꞌñan.
\v 12 Loꞌo yu Epafras nu lca nguso ꞌin Cristo nchcuiꞌ chaꞌ yu ꞌin um, ticuiꞌ yu taꞌa quichen tyi um. Loꞌo nu chcui lca tiquee yu njñan yu ꞌin Ndiose nchgaa xaa siꞌya um, siꞌyana tla tyon um loꞌ ca chcui la chaꞌ tiyaa ꞌin um, tucua um tñan nchgaa chaꞌ nu nchca tiꞌ Ndiose.
\v 13 Ndaan suun chaꞌ ꞌin yu tsala ñaꞌan lyee ntsuꞌhui yuhue tiꞌ yu ꞌin um, tsatlyu loꞌo jun nu ndiꞌin quichen Laodicea loꞌo quichen Hierápolis.
\v 14 A cunta loꞌo yu Luca, yu nu nꞌni rmiyu, nchcuiꞌ chaꞌ yu ꞌin um, yu nu ndyuꞌhui cuiyaꞌ tiꞌ na ꞌin. Loꞌo yu Demas nchcuiꞌ chaꞌ yu ꞌin um.
\v 15 Cuiꞌ cuañaꞌan chcuiꞌ chaꞌ um ꞌin jun nu ndiꞌin quichen Laodicea tñan loo hua, chcuiꞌ chaꞌ um ꞌin yu Ninfas loꞌo jun nu ndiyoꞌ tiꞌin naꞌan ꞌin yu.
\v 16 Xa tyi ycuiꞌ um quityi re seꞌen ndiyoꞌ tiꞌin um, caꞌan tñan um ꞌin na quichen Laodicea siꞌyana chcuiꞌ jun ꞌin na. Cuiꞌ cuañaꞌan quityi nu mchcuan jun cunta la quichen Laodicea, loꞌo um ntsuꞌhui chaꞌ chcuiꞌ um ꞌin na.
\v 17 Chcuiꞌ um loꞌo yu Arquipo siꞌyana suꞌhua loo yu tñan ꞌin Ñi Xꞌnan na nu cuaꞌ mdaa ñi ꞌin yu.
\v 18 Nanꞌ yu Pablo, nde nchcuiꞌ chanꞌ ꞌin um loꞌo chaꞌ nu nguaꞌan loꞌo yaanꞌ. Quia yuꞌhui tiꞌ um ꞌñan seꞌen ntsuꞌhuin naꞌan chcuan. Chaꞌ tsuꞌhue ꞌin Ndiose quinu loꞌo um. Amen.