\id 1TH - Nopala (Chatino) NT [cya] - Mexico 2013 (web 2014)
\h 1 TESALONICENSES
\toc1 1 Tesalonicenses
\toc2 1 Tesalonicenses
\toc3 1Te
\mt1 1 Tesalonicenses
\c 1
\s Yu Pablo nchcuiꞌ chaꞌ yu ꞌin jun Tesalónica
\p
\v 1 Nanꞌ yu Pablo, yu Silvano loꞌo Timoteo, nguaꞌan tñan hua quityi re ꞌin um, ꞌun jun taꞌa na nu ndiꞌin quichen Tesalónica, ꞌun nu cuaꞌ ndiꞌin cunta ꞌin Stina Ndiose loꞌo Ñi Xꞌnan na Jesucristo. Cuiꞌ Stina Ndiose loꞌo Ñi Xꞌnan na Jesucristo taa ñi chaꞌ tsuꞌhue nu chuꞌhui niꞌ cusya ꞌin um, loꞌ cuꞌni ñi chaꞌ tyiꞌin tsuꞌhue um.
\s Yu Pablo mdaa yu loo jun Tesalónica
\p
\v 2 Nchgaa xaa ndyaa hua xuꞌhue ꞌin Ndiose, njñan hua ꞌin ñi siꞌya chaꞌ ꞌin um,
\v 3 loꞌ ndiya yuꞌhui tiꞌ hua ꞌin um nchgaa xaa tloo Stina Ndiose loꞌo ñaꞌan nu ndiya quiꞌan tiꞌ um ꞌin ñi, siꞌyana nsuꞌhua um juesa loꞌo tñan ꞌin Ndiose siꞌya chaꞌ tsuꞌhue ndyiꞌo tiquee um, lja nu nducua quiloo um ꞌin Ñi Xꞌnan na Jesucristo.
\v 4 ꞌUn jun taꞌa na nu ndyuꞌhui cuiyaꞌ tiꞌ Ndiose ꞌin, cuaꞌ jlyo tiꞌ hua siꞌyana cuiꞌ ñi ngulohui ñi ꞌin um,
\v 5 siꞌyana xa ycuiꞌ hua chaꞌ tsuꞌhue ꞌin Ndiose loꞌo um, a lca na chacuiꞌ chaꞌ ti, cuiꞌ ca nu loꞌo chaꞌ cuiyaꞌ ꞌin Espíritu nu Luhui ꞌin Ndiose mdiyaa na niꞌ cusya ꞌin um, tsañaꞌan nu cuaꞌ jlyo tiꞌ um ñaꞌan ncua lca tiquee hua loꞌo um siꞌyana ca nu tsuꞌhue ꞌin um.
\v 6 Tsatlyu mꞌni chaꞌan um ꞌin hua chcui ñaꞌan nguiaa chaꞌ ꞌin Ñi Xꞌnan na, loꞌ siyaꞌ ndijin um scasca nu tiꞌi, una tsuꞌhue ntsuꞌhui tiquee um ncuan xuꞌhue um chaꞌ tsuꞌhue ꞌin ñi siꞌya Espíritu nu Luhui ꞌin ñi,
\v 7 canꞌ chaꞌ nducua quiloo jun ꞌin um, nchgaa nu cuaꞌ ya quiꞌan tiꞌ nu ndiꞌin seꞌen lyiꞌya loo Macedonia loꞌo Acaya.
\v 8 Siꞌyana tiꞌ la seꞌen ndiꞌin um mdyisnan mscua cueen chaꞌ ꞌin Ñi Xꞌnan na, siꞌi tsa seꞌen lyiꞌya loo ti Macedonia loꞌo Acaya, cuiꞌ ca nu nchgaa seꞌen cuaꞌ ngune chaꞌ ꞌin um ñaꞌan ndiya quiꞌan tiꞌ um ꞌin Ndiose, loꞌ ñi a ꞌni ꞌa chaꞌ tiꞌ taa hua suun chaꞌ re loꞌo jun,
\v 9 siꞌyana ticuiiꞌ jun nchcuiꞌ jun ñaꞌan ncuan xuꞌhue um ꞌin hua, ñaꞌan mscuan tloo um lcuin joꞌo xa ya quiꞌan tiꞌ um, ñaꞌan ca siꞌyana ca jaꞌan um ꞌin scati Ndiose nu loꞌo ca, ñi nu chaꞌ ñi ca lca Ndiose,
\v 10 cuañaꞌan nta um ꞌin Sñeꞌ ñi nu ntsuꞌhui chaꞌ tyiꞌo la niꞌ cuaan, ñi nu mꞌni Ndiose chaꞌ mdyiquiꞌo, cuiꞌ Jesús, ñi nu ndlo laa ꞌin na seꞌen nu a quiꞌni caꞌan ꞌin na tiꞌi nu ntsuꞌhui chaꞌ caan tiyaa xaa.
\c 2
\s Tñan ꞌin Ndiose mꞌni yu Pablo quichen Tesalónica
\p
\v 1 ꞌUn jun taꞌa na, cuaꞌ jlyo tiꞌ um siꞌyana siꞌi cua chaꞌ ti yaa hua seꞌen ndiꞌin um,
\v 2 siyaꞌ mdijin hua nu tiꞌi quichen Filipos xa mꞌni lyiꞌo ꞌtnan neꞌ ꞌin hua, ñaꞌan nu cuaꞌ jlyo tiꞌ um, una Ndiose mdaa ñi chaꞌ tnu tiquee ꞌin hua ya ycuiꞌ hua chaꞌ tsuꞌhue ꞌin ñi loꞌo um lja yaan scasca nu tiꞌi ꞌin hua.
\v 3 Loꞌ ñaꞌan chaꞌ nu cuaꞌ ycuiꞌ hua loꞌo um, a ljyaan na chonꞌ chaꞌ cuiñi uta loꞌo sca chaꞌ mañan, ñi a mdaꞌan ñilyiꞌo hua ꞌin um,
\v 4 cuiꞌ ca nu nchcuiꞌ hua tsañaꞌan nchcuiꞌ sca yu nu cuaꞌ ngulohui Ndiose ꞌin nu mchcuan cunta siꞌyana chcuiꞌ chaꞌ tsuꞌhue ꞌin ñi, una siꞌi siꞌyana quinu tsuꞌhue tiquee neꞌ loꞌo hua, cuiꞌ ca nu siꞌyana quinu tsuꞌhue tiquee Ndiose, ñi nu jlyo tiꞌ ñaꞌan lca cusya ꞌin hua.
\v 5 Ñi siyaꞌ loꞌ a ngunan hua ñaꞌan xisqueꞌ hua ꞌin um, ñaꞌan nu cuaꞌ jlyo tiꞌ um, ñi a mducua tloo hua na nu ndiꞌin ꞌin um, cuiꞌ Ndiose jlyo tiꞌ ñi nchgaa chaꞌ re.
\v 6 Ñi a mducua tloo hua caja nu taa loo hua, ta cuꞌni tnu um ꞌin hua, siyaꞌ ntsuꞌhui suun ꞌin hua tucua tloo hua na nu ndiꞌin ꞌin um, siꞌyana lca hua nu cuaꞌ mdoꞌo hui ca ꞌin Cristo nu chcuiꞌ chaꞌ tsuꞌhue ꞌin ñi.
\v 7 Cuiꞌ ca nu lyee mꞌni hua ꞌtnan ꞌin um, tsañaꞌan nꞌni jun cunaꞌan ꞌtnan ꞌin sñeꞌ jun.
\v 8 Cuañaꞌan lyee ꞌa ncua lca tiquee hua loꞌo um, a nguinu tsuꞌhue tiquee hua tsaloo ti chaꞌ ꞌin Ndiose chcuiꞌ hua loꞌo um, cuiꞌ ca nu loꞌo cusya ꞌin hua ncua tiꞌ hua tyaa hua loo nu lyee mꞌni taꞌa hua ꞌin um.
\v 9 Quia yuꞌhui tiꞌ um, ꞌun jun taꞌa na, tsala ñaꞌan mdijin hua, tla loꞌ cucha mꞌni hua tñan siꞌyana a ncua tiꞌ hua suꞌhua hua chaꞌ nduhue tiꞌ tiquee um lja nu ycuiꞌ hua chaꞌ tsuꞌhue ꞌin Ndiose loꞌo um.
\v 10 Cuiꞌ um jlyo tiꞌ um ñaꞌan nten lca hua, a cunta jlyo tiꞌ Ndiose siꞌyana mduꞌhui hua sca chendyu nu luhui, a cunta ñi ndiꞌin chaꞌ ꞌin hua, loꞌ ñi a tucui nu ycuiꞌ cuaꞌ ñaꞌan ti chaꞌ ꞌin hua chcui lja nu mdiꞌin hua loꞌo um, ꞌun jun taꞌa na,
\v 11 cuiꞌ um jlyo tiꞌ um ñaꞌan ycuiꞌ hua loꞌo um, tsañaꞌan nꞌni sti nu suhue ti loꞌo sñeꞌ, mda cueen hua ꞌin um loꞌ mdaa hua chaꞌ tnu tiquee ꞌin cunda scaa um,
\v 12 loꞌ mxnu hua cunta ꞌin um siꞌyana tyiꞌan loꞌo um sca chendyu nu luhui tsañaꞌan nu nchca tiꞌ Ndiose, ñi nu msiꞌya ꞌin um sten um loo xaa ꞌin ñi seꞌen ndlo ñi tñan.
\v 13 Canꞌ chaꞌ loꞌo huareꞌ a ndlaꞌ tiꞌ hua ndyaa hua xuꞌhue ꞌin Ndiose, siꞌyana tiꞌ xa nu ycuiꞌ hua chaꞌ ꞌin Ndiose loꞌo um ncuan xuꞌhue um ꞌin na, una siꞌi ñaꞌan nchca tiꞌ ychaꞌ nten chendyu, cuiꞌ ca nu tsañaꞌan nu lca na ychaꞌ Ndiose, loꞌ nda yaaꞌ na ꞌin um, ꞌun nu ndiya quiꞌan tiꞌ ꞌin ñi.
\v 14 ꞌUn jun taꞌa na, scañaꞌan ti yatoꞌo ꞌin um loꞌo jun nu ya quiꞌan tiꞌ ꞌin Cristo Jesús, jun nu ndiyoꞌ tiꞌin scasca seꞌen lyiꞌya loo Judea nu cuaꞌ ntsuꞌhui Ndiose cunta ꞌin. Tsañaꞌan mdijin um nu tiꞌi siꞌya taꞌa quichen tyi um, cuiꞌ cuañaꞌan mdijin jun nu tiꞌi siꞌya neꞌ judio,
\v 15 cuiꞌ nu yjui ꞌin Ñi Xꞌnan na Jesús, tsañaꞌan mꞌni neꞌ loꞌo taꞌa quichen tyi neꞌ nu mxiycuiꞌ Ndiose ꞌin cuaꞌ sꞌni, loꞌ cuaꞌ ñii mducui lyiꞌo neꞌ ꞌin hua. Nten canꞌ a jaꞌan neꞌ ꞌin Ndiose, nxcuan tloo neꞌ ꞌin nchgaa tucui,
\v 16 nchcui ndijin neꞌ siꞌyana a chcuiꞌ hua loꞌo neꞌ gentil seꞌen nu tyiꞌo laa canꞌ, cuañaꞌan nguia nsoꞌ tucua neꞌ quiꞌya chonꞌ neꞌ, una siꞌya chaꞌ canꞌ lyee la xitijin Ndiose ꞌin neꞌ nu tiꞌi.
\s Mdoꞌo tiquee yu Pablo ñaꞌan tloo yu ꞌin jun
\p
\v 17 ꞌUn jun taꞌa na, cuaꞌ sꞌni a nchca ñaꞌan taꞌa na loꞌo um, una ntsuꞌhui tiꞌ hua ꞌin um nchgaa xaa, loꞌ lyee lca tiquee hua ñaꞌan tloo hua ꞌin um,
\v 18 canꞌ chaꞌ ngunan hua ñaꞌan nu tsaa hua seꞌen ndiꞌin um, loꞌ nanꞌ yu Pablo, tucua snan yaꞌ ncua tinꞌ tsaꞌan, una mducui ndijin Laxaꞌan.
\v 19 ¿Ti ñaꞌan ta chaꞌ nu nducua tloo hua, nu ca tsuꞌhue ntsuꞌhui tiquee hua, nu chcuan hua cunta? ¿Ta siꞌi ꞌun lca um chaꞌ canꞌ tloo Ñi Xꞌnan na Jesucristo xa nu quiaan ñi xiyaꞌ?
\v 20 Cuiꞌ um lca um chaꞌ nducuiꞌ tiꞌ ꞌin hua, loꞌ siꞌya um tsuꞌhue ntsuꞌhui tiquee hua.
\c 3
\p
\v 1 Loꞌ siꞌyana a ncua quita hua lyee la, mꞌni cuiyaꞌ hua chaꞌ quinu hua tsa ycuiꞌ ti hua quichen Atenas,
\v 2 loꞌ caꞌan tñan hua ꞌin yu taꞌa na Timoteo tsaa yu seꞌen ndiꞌin um, yu nu lca nguso ꞌin Ndiose, nu taꞌa nguiꞌni hua tñan ndaꞌan ycuiꞌ hua chaꞌ tsuꞌhue ꞌin Cristo, siꞌyana tyiꞌin tya tla yu ꞌin um loꞌo chaꞌ nu ndiya quiꞌan tiꞌ um, a cunta taa yu chaꞌ tnu tiquee ꞌin um,
\v 3 ñaꞌan ca siꞌyana ñi sca um a cuꞌni naꞌan tiꞌ um loꞌo chaꞌ nu ndijin um. Cuaꞌ jlyo tiꞌ um la ñaꞌan ntsuꞌhui chaꞌ tyijyin na nu tiꞌi,
\v 4 siꞌyana tiꞌ xa nu mdiꞌin hua loꞌo um msuꞌhua tiya hua ꞌin um siꞌyana ntsuꞌhui chaꞌ tyijyin na nu tiꞌi, loꞌ cuiꞌ cuañaꞌan yatoꞌo ñaꞌan nu cuaꞌ jlyo tiꞌ um.
\v 5 Loꞌ siꞌyana lyee msuꞌhuan chaꞌ nduhue tiꞌ tiqueen, canꞌ chaꞌ msuꞌhuan ꞌin nu tsa ynan suun chaꞌ ñaꞌan ndiꞌin um loꞌo chaꞌ nu ndiya quiꞌan tiꞌ um, ñaꞌan tuꞌ tsatoꞌo xityu Laxaꞌan ꞌin um loo quiꞌya, loꞌ cua chaꞌ ti mꞌni hua tñan lja um.
\v 6 Una xa mxitucui Timoteo, tsuꞌhue ꞌa suun mdaa yu loꞌo hua tsañaꞌan nu ndiya quiꞌan tiꞌ um ꞌin Ndiose, ñaꞌan ntsuꞌhui chaꞌ tsuꞌhue ꞌin um loꞌo taꞌa um, a cunta nchgaa yaꞌ ndiya yuꞌhui tiꞌ um ꞌin hua tsuꞌhue ntsuꞌhui tiquee um, lyee lca tiquee um ñaꞌan taꞌa na loꞌo um, tsañaꞌan nu lca tiquee hua ñaꞌan hua ꞌin um.
\v 7 Canꞌ chaꞌ, ꞌun jun taꞌa na, siyaꞌ lyee ndijin hua scasca nu tiꞌi, una jui chaꞌ tnu tiquee ꞌin hua xa ynan hua chaꞌ ñaꞌan ndiya quiꞌan tiꞌ um ꞌin Ndiose,
\v 8 una cuaꞌ ñii mchca tsuꞌhue lca tiquee hua, siꞌyana nsuꞌhua loo um chaꞌ ꞌin Ñi Xꞌnan na.
\v 9 Tsañaꞌan nu tsuꞌhue ntsuꞌhui tiquee hua tloo Ndiose siꞌya um, ñi a jlyo ꞌa tiꞌ hua ñaꞌan tiꞌ tyaa hua xuꞌhue ꞌin ñi siꞌya chaꞌ re.
\v 10 Tla loꞌ cucha nchcuiꞌ lyiꞌo hua ꞌin Ndiose siꞌyana tca ñaꞌan taꞌa na loꞌo um xiyaꞌ, loꞌ ca chcui la chaꞌ ꞌin um loꞌo chaꞌ nu ndiya quiꞌan tiꞌ um.
\v 11 Stina Ndiose loꞌo Ñi Xꞌnan na Jesucristo sla ñi sca tucueen siꞌyana tca tiyaa hua seꞌen ndiꞌin um.
\v 12 Ñi Xꞌnan na cuꞌni ñi chaꞌ siꞌyana lyee la culo um loꞌ chuꞌhui chaꞌ tsuꞌhue ꞌin um loꞌo taꞌa um, a cunta loꞌo nchgaa la tucui, tsañaꞌan nu lca tiquee hua loꞌo um,
\v 13 ñaꞌan ca siꞌyana tyiꞌin tya tla la ñi ꞌin um, loꞌ cuꞌni ñi chaꞌ ca luhui tloo um tiyaa um seꞌen nducua Stina Ndiose xa nu ntsuꞌhui chaꞌ quiaan Ñi Xꞌnan na Jesucristo tsatlyu loꞌo nchgaa nu cuaꞌ mdoꞌo hui ꞌin ñi.
\c 4
\s Chendyu nu ndyuꞌhui cuiyaꞌ tiꞌ Ndiose 

\p
\v 1 A cunta xca chaꞌ, ꞌun jun taꞌa na, jñan hua chaꞌ tsuꞌhue ꞌin um siꞌya chaꞌ ꞌin Ñi Xꞌnan na Jesús, loꞌ ta cueen hua ꞌin um siꞌyana tsañaꞌan nu cuaꞌ mꞌni chaꞌan um ꞌin hua, cuañaꞌan suꞌhua loo um loꞌ tyuꞌhui um sca chendyu nu luhui, cunan um ñaꞌan nu quinu tsuꞌhue tiquee Ndiose loꞌo um.
\v 2 Cuaꞌ jlyo tiꞌ um chaꞌ nu cuaꞌ nguloꞌo hua ꞌin um loꞌo chaꞌ cuiyaꞌ ꞌin Ñi Xꞌnan na Jesús,
\v 3 siꞌyana Ndiose nchca tiꞌ ñi cuꞌni coꞌo um ꞌin um luhui, loꞌ tyiꞌo tsoꞌ um siiꞌ chaꞌ nu nguiten yuꞌhui neꞌ loꞌo cuilyiꞌo nten.
\v 4 Canꞌ chaꞌ cunda scaa um cunan um ñaꞌan nu tyiꞌin um loꞌo cuilyiꞌo um loꞌo suun ñaꞌan, loꞌo sca chaꞌ tiyaa nu luhui,
\v 5 siꞌi ñaꞌan nꞌni neꞌ gentil nu a ndyuꞌhui lyoo ꞌin Ndiose, nu cuaꞌ ñaꞌan ti nꞌni neꞌ siꞌya chaꞌ ngunanꞌ ntsuꞌhui tiquee neꞌ.
\v 6 Xñi um cunta siꞌyana ñi sca um a cuꞌni um tiꞌi loꞌo taꞌa ndiya quiꞌan tiꞌ um, uta ndeꞌen la mañan cuꞌni um, siꞌyana Ñi Xꞌnan na cuꞌni ñi xñan bsya ꞌin nu nguiꞌni cuañaꞌan, cuiꞌ chaꞌ re cuaꞌ msuꞌhua tiya hua ꞌin um tiꞌ culoo.
\v 7 Siꞌi canꞌ chaꞌ msiꞌya Ndiose ꞌin na siꞌyana tiꞌ tyiꞌan na loꞌo scasca chaꞌ ngunanꞌ, cuiꞌ ca nu nchca tiꞌ ñi siꞌyana tyuꞌhui na sca chendyu nu luhui tloo ñi.
\v 8 Canꞌ chaꞌ nu nxcuan tloo chaꞌ re, a nxcuan tloo ꞌin nten chendyu, cuiꞌ ca nu ꞌin Ndiose nxcuan tloo canꞌ, ñi nu cuaꞌ mdaa Espíritu nu Luhui chuꞌhui niꞌ cusya ꞌin na.
\v 9 Una tsañaꞌan nu ntsuꞌhui chaꞌ tsuꞌhue ꞌin na loꞌo taꞌa na, a ꞌni ꞌa chaꞌ tiꞌ chcuiꞌ hua loꞌo um loo quityi re, siꞌyana ycuiꞌ ca um mꞌni chaꞌan um ꞌin Ndiose ñaꞌan ntsuꞌhui chaꞌ tyiꞌo chaꞌ tsuꞌhue tiquee um loꞌo taꞌa um,
\v 10 tsañaꞌan nguiꞌni um loꞌo nchgaa la ñaꞌan jun taꞌa na nu ndiꞌin seꞌen lyiꞌya loo Macedonia, loꞌ jñan hua chaꞌ tsuꞌhue ꞌin um, ꞌun jun taꞌa na, siꞌyana nde lyee la suꞌhua loo um chaꞌ re.
\v 11 Cunan um ñaꞌan tyiꞌin um loꞌo suun ñaꞌan, ndon tiꞌ um culohui um chaꞌ nu ꞌni ꞌin um, loꞌ cuꞌni um tñan tsañaꞌan nu cuaꞌ ycuiꞌ hua loꞌo um,
\v 12 ñaꞌan ca siꞌyana a caja nu chcuiꞌ cuaꞌ ñaꞌan ti chaꞌ ꞌin um, neꞌ nu a ndiya quiꞌan tiꞌ ꞌin Ndiose, ñi a tsa lyijyi na nu cunajoꞌo ꞌin um.
\s Xa quiaan Ñi Xꞌnan na xiyaꞌ
\p
\v 13 A cunta, ꞌun jun taꞌa na, nchca tiꞌ hua siꞌyana ca cuiyaꞌ tiꞌ um ñaꞌan ndiꞌin chaꞌ ꞌin neꞌ nu cuaꞌ ngujui, loꞌ a ca xiꞌin tiꞌ um tsañaꞌan nguiaa chaꞌ ꞌin nchgaa la ñaꞌan nten nu a nducua tloo ꞌin ñi.
\v 14 Siꞌyana chaꞌ naa ndiya quiꞌan tiꞌ na ngujui Jesús loꞌ mdyiquiꞌo ñi, cuiꞌ cuañaꞌan Ndiose loꞌo Jesús ntsuꞌhui chaꞌ quian loꞌo ñi ꞌin nchgaa nu cuaꞌ ngujui, nu cuaꞌ ya quiꞌan tiꞌ ꞌin ñi.
\v 15 Canꞌ chaꞌ chcuiꞌ hua loꞌo um tsañaꞌan juin Ñi Xꞌnan na: Tsalca naa neꞌ nu loꞌo xa quiaan Ñi Xꞌnan na xiyaꞌ, a ntsuꞌhui chaꞌ chcua loo na ꞌin nu cuaꞌ ngujui,
\v 16 siꞌyana ycuiꞌ ca Ñi Xꞌnan na tyiꞌo ñi la niꞌ cuaan, cuiꞌ xa nchcuiꞌ cueen ñi loꞌo chaꞌ cuiyaꞌ nu tlyu ꞌin ñi tsatlyu loꞌo angujle nu ndon loo lati, cuiꞌ ñaꞌan lcaa tyiꞌo ne cuhuii ꞌin Ndiose, loꞌ nu ngujui nu ya quiꞌan tiꞌ ꞌin Cristo, canꞌ nu tyiquiꞌo culo nducua la,
\v 17 xacanꞌ naa neꞌ nu loꞌo nu tiꞌ ndiꞌin loo chendyu re, cuꞌni Ndiose chaꞌ chcuen na, tsatlyu tsa ycua na ꞌin Ñi Xꞌnan na la niꞌ ndlaa, cuañaꞌan ntsuꞌhui chaꞌ tyiꞌin na loꞌo Ñi Xꞌnan na tsala xaa.
\v 18 Canꞌ chaꞌ scasca um taa um chaꞌ tnu tiquee ꞌin taꞌa um loꞌo chaꞌ re. 
\c 5
\p
\v 1 Una tsañaꞌan nu ntsuꞌhui chaꞌ tsatoꞌo chaꞌ re, ñi tsaan loꞌ ñi braa, a ꞌni ꞌa chaꞌ tiꞌ chcuiꞌ hua loꞌo um loo quityi re, ꞌun jun taꞌa na,
\v 2 siꞌyana jlyo tsuꞌhue tiꞌ um chaꞌ re. Tsaan nu ntsuꞌhui chaꞌ quiaan Ñi Xꞌnan na tsatoꞌo na tsati ntyin tsañaꞌan nguiaa chaꞌ ꞌin sca yu cunan nu ndyiꞌan tla,
\v 3 cuiꞌ xa nu ljuin nten: Tsuꞌhue ꞌa ndiꞌin na, loꞌ a sca la chaꞌ, xacanꞌ tsati ntyin caan sca nu tiꞌi nu cujlyo ꞌin neꞌ tsañaꞌan nchca tiꞌ tiꞌi nu ndyiꞌan ꞌin neꞌ cunaꞌan nu ntsuꞌhui chaꞌ ca cuneꞌ sñeꞌ, loꞌ a caja ñaꞌan tyiꞌo laa neꞌ.
\v 4 Una ꞌun jun taꞌa na, a ndaꞌan ꞌa um seꞌen tla yta, ta xicutsen tiꞌ um xa nu tsati ntyin tiyaa tsaan canꞌ tsañaꞌan nguiaa chaꞌ ꞌin sca yu cunan.
\v 5 Siꞌyana nchgaa um lca um sñeꞌ Ndiose nu cuaꞌ ndaꞌan loo xaa ꞌin ñi, loꞌ a ndaꞌan ꞌa na seꞌen tla.
\v 6 Canꞌ chaꞌ a taa na yaꞌ quiꞌya sla na ñaꞌan nguiaa chaꞌ ꞌin nchgaa la ñaꞌan nten, cuiꞌ ca nu tyiꞌin tiyaa na loꞌ tyiꞌin na ndii tiꞌ na.
\v 7 Siꞌyana tsalca nu a ndiꞌin ndii tiꞌ ndijyaꞌ xa tla, loꞌ nu ndyiꞌyo tla nchca cuꞌhui canꞌ.
\v 8 Una nareꞌ nu cuaꞌ ndaꞌan loo xaa, tyiꞌin na chcui chaꞌ tiyaa ꞌin na, —tsañaꞌan nguiaa chaꞌ ꞌin sca nten nu cuaꞌ lcoꞌ chaꞌ nu ndiya quiꞌan tiꞌ nu culaa ꞌin, nu cuaꞌ ntsuꞌhui chaꞌ tsuꞌhue ꞌin, nu ntsuꞌhui na que loꞌ nducua tloo tyiꞌo laa—.
\v 9 Siꞌi canꞌ chaꞌ msiꞌya Ndiose ꞌin na siꞌyana tyijyin na nu tiꞌi tiyaa xaa, cuiꞌ ca nu siꞌyana tyiꞌo laa na siꞌya Ñi Xꞌnan na Jesucristo,
\v 10 ñi nu ngujui tñan loo na, cuañaꞌan tsatlyu tyiꞌin na loꞌo ñi, siyaꞌ cuaꞌ ngujui na uta tiꞌ loꞌo na.
\v 11 Canꞌ chaꞌ scasca um taa um chaꞌ tnu tiquee loꞌ ta yaaꞌ taꞌa um loꞌo chaꞌ re, tsañaꞌan nu cuaꞌ nguiꞌni um.
\s Mdaa yu Pablo chaꞌ tnu tiquee ꞌin jun
\p
\v 12 Cuaꞌ ñii jñan hua chaꞌ tsuꞌhue ꞌin um, ꞌun jun taꞌa na, siꞌyana chuꞌhui yuhue tiꞌ um ꞌin jun nu nguiꞌni tñan lja um, jun nu ntsuꞌhui cunta ꞌin um siꞌya chaꞌ ꞌin Ñi Xꞌnan na, cuiꞌ jun nu ndloꞌo ꞌin um.
\v 13 Siꞌya tñan nu nguiꞌni jun, suꞌhua loo um ꞌin jun loo nchgaa lca tiquee um, loꞌ ndyiꞌya ti tyiꞌin um scasca um.
\v 14 Cuiꞌ cuañaꞌan xnu hua cunta ꞌin um, ꞌun jun taꞌa na, siꞌyana ta cueen um ꞌin jun nu ndaꞌan loꞌo chaꞌ ndaja, loꞌ taa um chaꞌ tnu tiquee ꞌin nu luꞌun tiꞌ, a cunta ta yaaꞌ um ꞌin nu naꞌan tiꞌ, chuꞌhui chaꞌ tlyu tiꞌ ꞌin um loꞌo nchgaa tucui.
\v 15 Xñi um cunta siꞌyana ñi sca um a cuꞌni suꞌhua um ꞌin um loꞌo nu nguiꞌni tiꞌi loꞌo um, cuiꞌ ca nu nchgaa xaa cuꞌni um tsuꞌhue loꞌo taꞌa um, cuiꞌ cuañaꞌan loꞌo nchgaa la tucui.
\v 16 Ca tsuꞌhue chuꞌhui tiquee um nchgaa xaa.
\v 17 A culaꞌ tiꞌ um chcui lyiꞌo um ꞌin Ndiose.
\v 18 A cunta tyaa um xuꞌhue ꞌin Ndiose siꞌya nchgaa loo chaꞌ, siꞌyana cuañaꞌan nchca tiꞌ Ndiose cuꞌni um siꞌya Cristo Jesús.
\v 19 A cujui xuꞌhua um tñan nu nguiꞌni Espíritu ꞌin Ndiose.
\v 20 Ñi a xcuan tloo um scasca chaꞌ nu nxiycuiꞌ Ndiose ꞌin jun.
\v 21 Lyohui um cunda scaa loo chaꞌ, loꞌ xuꞌhua seꞌen um chaꞌ nu tsuꞌhue.
\v 22 Tyiꞌo tsoꞌ um siiꞌ nchgaa loo chaꞌ ngunanꞌ.
\v 23 Loꞌ Ndiose, ñi nu nꞌni chaꞌ tyiꞌin tsuꞌhue na, cuꞌni ñi chaꞌ quinu luhui um sca chcui um: Espíritu ꞌin um, cusya ꞌin um, loꞌo cunanꞌ um. Cuiꞌ ñi xñi ñi cunta ꞌin um siꞌyana luhui tloo um xa nu quiaan Ñi Xꞌnan na Jesucristo,
\v 24 siꞌyana ñi ndiꞌin chaꞌ ꞌin ñi nu nsiꞌya ꞌin um, loꞌ cuꞌni ñi chaꞌ nu cuaꞌ mdiꞌin tyaa ñi.
\s Mslaꞌ taꞌa yu Pablo loꞌo jun
\p
\v 25 ꞌUn jun taꞌa na, chcuiꞌ lyiꞌo um ꞌin Ndiose siꞌya chaꞌ ꞌin hua.
\v 26 Chcuiꞌ chaꞌ um ꞌin nchgaa jun taꞌa na tñan loo hua la siiꞌ scaꞌ jun loꞌo sca chaꞌ tiyaa nu luhui.
\v 27 Culon tñan ꞌin um loꞌo chaꞌ cuiyaꞌ ꞌin Ñi Xꞌnan na, siꞌyana chcuiꞌ um quityi re tloo nchgaa jun taꞌa na.
\v 28 Chaꞌ tsuꞌhue ꞌin Ñi Xꞌnan na Jesucristo quinu loꞌo um. Amen.
\p Quityi nu nchca tucua nguaꞌan yu Pablo ꞌin jun Tesalónica.