\id 2TH - Nopala (Chatino) NT [cya] - Mexico 2013 (web 2014)
\h 2 TESALONICENSES
\toc1 2 Tesalonicenses
\toc2 2 Tesalonicenses
\toc3 2Te
\mt1 2 Tesalonicenses
\c 1
\s Yu Pablo nchcuiꞌ chaꞌ yu ꞌin jun Tesalónica
\p
\v 1 Nanꞌ yu Pablo, yu Silvano loꞌo Timoteo, nguaꞌan tñan hua sca quityi ꞌin um, ꞌun jun taꞌa na nu ndiꞌin quichen Tesalónica, ꞌun nu cuaꞌ ndiꞌin cunta ꞌin Stina Ndiose loꞌo Ñi Xꞌnan na Jesucristo.
\v 2 Cuiꞌ Stina Ndiose loꞌo Ñi Xꞌnan na Jesucristo taa ñi chaꞌ tsuꞌhue nu chuꞌhui niꞌ cusya ꞌin um, loꞌ cuꞌni ñi chaꞌ tyiꞌin tsuꞌhue um.
\s Ndiose cuꞌni ñi xñan bsya ꞌin nten xa quiaan Cristo
\p
\v 3 Ngaꞌan chaꞌ tyaa hua xuꞌhue ꞌin Ndiose nchgaa xaa siꞌya chaꞌ ꞌin um, ꞌun jun taꞌa na, siꞌyana cuañaꞌan ntsuꞌhui chaꞌ cuꞌni hua, una lyee la siꞌyana nguia nguilo um loꞌo chaꞌ nu ndiya quiꞌan tiꞌ um, a cunta siꞌyana lyee la ndoꞌo chaꞌ tsuꞌhue tiquee um cunda scaa um loꞌo taꞌa um.
\v 4 Canꞌ chaꞌ nducui tiꞌ hua ndaa hua suun ñaꞌan ndiꞌin chaꞌ ꞌin um scasca seꞌen ndiyoꞌ tiꞌin sñeꞌ Ndiose, siꞌyana lyee ndiya quiꞌan tiꞌ um loꞌ ndaa loo um scasca nu tiꞌi ndijin um, loꞌ a nguiꞌni naꞌan tiꞌ um loꞌo chaꞌ canꞌ.
\v 5 Loꞌo chaꞌ re ca cuiyaꞌ tiꞌ na tsala ñaꞌan tsuꞌhue nꞌni Ndiose xñan bsya, ñaꞌan ca siꞌyana taa ñi chaꞌ cuiyaꞌ sten um seꞌen ndlo ñi tñan, loꞌ siꞌya chaꞌ re ndijin um nu tiꞌi cuaꞌ ñii,
\v 6 una ntsuꞌhui suun ꞌin Ndiose xitijin ñi nu tiꞌi ꞌin nchgaa nu nguiꞌni chaꞌ ndijin um nu tiꞌi.
\v 7 Ticuiꞌ cuañaꞌan cuꞌni ñi chaꞌ xitñanꞌ na loꞌo um, ꞌun nu ndijin nu tiꞌi cuaꞌ ñii, xa nu tyiꞌo Ñi Xꞌnan na Jesús la niꞌ cuaan tsatlyu loꞌo angujle nu tla chaꞌ ꞌin,
\v 8 loꞌ ljyaan ñi —ñaꞌan nchca tiꞌ sca quiiꞌ ndiquin, xitijin ñi nu tiꞌi ꞌin nu a yuꞌhui lyoo ꞌin Ndiose—, nu a mducua tñan tsañaꞌan nguiaa chaꞌ tsuꞌhue ꞌin Ñi Xꞌnan na Jesucristo,
\v 9 canꞌ nu tyijyin nu tiꞌi tsala xaa, —a ntsuꞌhui ꞌa xuꞌhue canꞌ tloo Ñi Xꞌnan na uta sten canꞌ loo xaa nu tlyu ꞌin ñi—,
\v 10 xa nu quiaan ñi xiyaꞌ, nchgaa nu cuaꞌ mdoꞌo hui ꞌin ñi cuꞌni tnu ꞌin ñi, loꞌ cuhue tiꞌ na ꞌin ñi, naa nu cuaꞌ ya quiꞌan tiꞌ ꞌin ñi, (loꞌ lja canꞌ ntsuꞌhui um siꞌyana ya quiꞌan tiꞌ um chaꞌ nu ycuiꞌ hua).
\v 11 Canꞌ chaꞌ nchgaa xaa njñan hua ꞌin Stina Ndiose siꞌya chaꞌ ꞌin um, siꞌyana cuꞌni ñi chaꞌ tsa yla ton um tsañaꞌan nu msiꞌya ñi ꞌin um, loꞌ cuꞌni ñi chaꞌ suꞌhua ta um nchgaa loo tñan tsuꞌhue nu ndyiꞌo tiquee um loꞌo chaꞌ cuiyaꞌ ꞌin ñi, siꞌya chaꞌ nu ndiya quiꞌan tiꞌ um,
\v 12 ñaꞌan ca siꞌyana cuꞌni tnu um ꞌin Ñi Xꞌnan na Jesucristo, loꞌ cuañaꞌan ca tsuꞌhue chuꞌhui tiquee ñi loꞌo um, siꞌya chaꞌ tsuꞌhue ꞌin Stina Ndiose loꞌo Ñi Xꞌnan na Jesucristo.
\c 2
\s Chaꞌ ꞌin yu quiꞌyu nu lyee la cuꞌni quiꞌya 

\p
\v 1 Una tsañaꞌan ntsuꞌhui chaꞌ quiaan Ñi Xꞌnan na Jesucristo, xa nu tsatlyu quioꞌ tiꞌin na loꞌo ñi, jñan hua chaꞌ tsuꞌhue ꞌin um, ꞌun jun taꞌa na,
\v 2 siꞌyana a taa um yaꞌ ca tinto um, ta caja nu suꞌhua tiquee um, uta chcuiꞌ siꞌyana Ndiose mxiycuiꞌ ꞌin, ta jui nu mtsaꞌ ꞌin, uta chcuiꞌ siꞌyana cuaꞌ nguaꞌan tñan hua sca quityi ꞌin um, siꞌyana cuaꞌ ya tucua tsaan quiaan Ñi Xꞌnan na.
\v 3 Ñi scañaꞌan loꞌ a taa um yaꞌ caja nu cuñilyiꞌo ꞌin um, siꞌyana a tsatoꞌo chaꞌ re chaꞌ siꞌi culo nducua la tyiꞌo tsoꞌ neꞌ siiꞌ Ndiose, xa ca chcanꞌ loo yu quiꞌyu nu lyee la nguiꞌni quiꞌya, yu nu ntsuꞌhui chaꞌ quinanꞌ cusya ꞌin.
\v 4 Loꞌ xiton yu ñaꞌan tiꞌi yu ꞌin nchgaa loo na nu ndloꞌo naan neꞌ lca Ndiose, uta scasca na nu nguiꞌni tnu neꞌ, tsayaꞌ tiyaa yu cuiyaꞌ sten tucua yu niꞌ lyaa ꞌin Ndiose tsañaꞌan nchca tiꞌ Ndiose, loꞌ cuꞌni yu ꞌin yu siꞌyana lca yu Ndiose.
\v 5 ¿Ta na a ndiya yuꞌhui tiꞌ um siꞌyana cuaꞌ ycuinꞌ chaꞌ re xa mdiꞌin loꞌo um?
\v 6 Cuaꞌ jlyo tiꞌ um ñi na nxicanꞌ ton ꞌin yu, ñaꞌan ca siꞌyana tyiꞌo scua la chaꞌ ꞌin yu xa nu tsa tucua tsaan canꞌ.
\v 7 Siꞌyana chaꞌ ngunanꞌ canꞌ cuaꞌ mdyisnan nchca cunan na, una ntsuꞌhui sca nu nxicanꞌ ton chaꞌ canꞌ, cuañaꞌan tsa quiñan na tsayaꞌ nu a la ꞌa quine cueen nu nxicanꞌ ton ꞌin na.
\v 8 La xacanꞌ tyiꞌo scua la chaꞌ ꞌin yu lyeꞌ tiꞌ canꞌ, —una Ñi Xꞌnan na cujui ñi ꞌin loꞌo chaꞌ nu tyiꞌo tuꞌhua ñi—, loꞌ cujlyo ñi ꞌin xa quiaan ñi loo xaa ꞌin ñi.
\v 9 Yu lyeꞌ tiꞌ canꞌ caan yu siꞌya chaꞌ cuiyaꞌ ꞌin laxaꞌan, cuꞌni yu scasca chaꞌ nu tnu seꞌen nu cuhue tiꞌ nten ꞌin yu loꞌo chaꞌ mañan ꞌin,
\v 10 cuꞌni yu nchgaa loo chaꞌ ngunanꞌ seꞌen nu cuñilyiꞌo yu ꞌin tsalca nu ntsuꞌhui chaꞌ quinanꞌ, siꞌyana a ncuan xuꞌhue neꞌ chaꞌ nu ñi ꞌin Ndiose nu tca culo laa ꞌin neꞌ.
\v 11 Canꞌ chaꞌ Ndiose taa ñi chaꞌ cuiyaꞌ caja nu cuñilyiꞌo ꞌin neꞌ, seꞌen nu tsa quiꞌan tiꞌ neꞌ chaꞌ cuiñi,
\v 12 cuañaꞌan tsatoꞌo quinanꞌ nchgaa neꞌ nu a ya quiꞌan tiꞌ chaꞌ nu ñi ꞌin Ndiose, siꞌyana lyee la ncua lca tiquee neꞌ loꞌo chaꞌ ngunanꞌ.
\s Ngulohui Ndiose ꞌin jun siꞌyana tyiꞌo laa jun
\p
\v 13 Una huareꞌ nchgaa xaa ntsuꞌhui chaꞌ tyaa hua xuꞌhue ꞌin Ndiose siꞌya um, ꞌun jun taꞌa na nu ndyuꞌhui cuiyaꞌ tiꞌ Ñi Xꞌnan na ꞌin, siꞌyana tiꞌ lyijyi tñan Ndiose chendyu xa cuaꞌ ngulohui ñi ꞌin um nu tyiꞌo laa um, siꞌya Espíritu nu nguia nsuhui ꞌin um, loꞌ siꞌya chaꞌ nu ñi ndiya quiꞌan tiꞌ um.
\v 14 Cuiꞌ siꞌya chaꞌ re msiꞌya ñi ꞌin um loo nu ngune ꞌin um chaꞌ tsuꞌhue nu ycuiꞌ hua, siꞌyana quiꞌni caꞌan ꞌin um sten um loo xaa ꞌin Ñi Xꞌnan na Jesucristo.
\v 15 Canꞌ chaꞌ ꞌun jun taꞌa na, xñi ton um ꞌin um loꞌ xuꞌhua seꞌen um chaꞌ ꞌin Ndiose nu cuaꞌ mꞌni chaꞌan um, nchgaa chaꞌ nu cuaꞌ ycuiꞌ hua, uta loꞌo chaꞌ nu nguaꞌan hua loo quityi.
\v 16 Cuiꞌ Ñi Xꞌnan na Jesucristo loꞌo Stina Ndiose, ñi nu mꞌni ꞌtnan ꞌin na, mdaa ñi chaꞌ tnu tiquee ꞌin na tsala xaa, loꞌ siꞌya chaꞌ tsuꞌhue canꞌ ꞌin ñi nducua tloo na chaꞌ nu cuaꞌ mdiꞌin tyaa ñi,
\v 17 loꞌ taa la ñi chaꞌ tnu tiquee ꞌin um nu cuꞌni um scasca tñan tsuꞌhue, cuiꞌ cuañaꞌan loꞌo chaꞌ nu chcuiꞌ um.
\c 3
\s Suꞌhua loo na ychaꞌ Ndiose 

\p
\v 1 Xca ti chaꞌ, ꞌun jun taꞌa na, chcuiꞌ lyiꞌo um ꞌin Ndiose siꞌya chaꞌ ꞌin hua siꞌyana ndla la quine yuꞌhui chaꞌ ꞌin Ñi Xꞌnan na nchgaa seꞌen, loꞌ caja nu cuan xuꞌhue ꞌin na tsañaꞌan nu yatoꞌo ꞌin um,
\v 2 a cunta jñan um ꞌin ñi siꞌyana tyiꞌo laa hua tuyaaꞌ neꞌ nducunꞌ, siꞌyana siꞌi nchgaa neꞌ ndiya quiꞌan tiꞌ neꞌ.
\v 3 Una ñi ndiꞌin chaꞌ ꞌin Ñi Xꞌnan na, cuiꞌ ñi xñi ton ñi ꞌin um siꞌyana a tyu um loo chaꞌ ngunanꞌ.
\v 4 Siꞌya chaꞌ ꞌin Ñi Xꞌnan na a nguiꞌni tucua tiꞌ hua loꞌo um, jlyo tiꞌ hua siꞌyana nguiꞌni um ñaꞌan chaꞌ nu cuaꞌ ycuiꞌ hua loꞌo um, loꞌ tiꞌ tsa quiñan la um cuꞌni um ꞌin na.
\v 5 Ñi Xꞌnan na cuꞌni ñi chaꞌ chuꞌhui chaꞌ tsuꞌhue niꞌ cusya ꞌin um tsañaꞌan ntsuꞌhui chaꞌ tsuꞌhue ꞌin Ndiose, loꞌ ta loo um tsañaꞌan mdijin Cristo.
\s Quiꞌni caꞌan ꞌin na cuꞌni na tñan
\p
\v 6 Culo hua tñan ꞌin um, ꞌun jun taꞌa na, loꞌo chaꞌ cuiyaꞌ ꞌin Ñi Xꞌnan na Jesucristo, siꞌyana tyiꞌo tsoꞌ um siiꞌ nchgaa jun nu a seꞌen ñaꞌan chaꞌ ꞌin, nu a xuꞌhua seꞌen ñaꞌan chaꞌ nu cuaꞌ nguloꞌo hua.
\v 7 Cuiꞌ um jlyo tiꞌ um ñaꞌan ntsuꞌhui chaꞌ cuꞌni chaꞌan um ꞌin hua, siꞌyana a mdaꞌan hua loꞌo chaꞌ a seꞌen ñaꞌan lja um,
\v 8 a tucui nu ycu xuꞌhue hua na ꞌin, cuiꞌ ca nu msuꞌhua hua juesa mꞌni hua tñan tla loꞌ cucha, siꞌyana a ncua tiꞌ hua taa hua tñan ꞌin um lyee la,
\v 9 siꞌi siꞌyana a ntsuꞌhui suun ꞌin hua jñan hua na nu cunajoꞌo ꞌin hua, cuiꞌ ca nu mꞌni hua tñan seꞌen nu cuꞌni chaꞌan um ꞌin hua.
\v 10 Nde chaꞌ mxnu hua xa mdiꞌin na loꞌo um: Chaꞌ ntsuꞌhui nu a cuꞌni tñan, a najoꞌo cu canꞌ.
\v 11 Siꞌyana ynan hua chaꞌ ntsuꞌhui nu a seꞌen ñaꞌan chaꞌ ꞌin ndiꞌin lja um, a nꞌni tñan, cuiꞌ ca nu ndaꞌan ndijin tsaan ꞌin loꞌo na nu ꞌin xca tucui.
\v 12 Culo hua tñan loꞌ jñan hua chaꞌ tsuꞌhue ꞌin canꞌ loꞌo chaꞌ cuiyaꞌ ꞌin Ñi Xꞌnan na Jesucristo, siꞌyana cuꞌni tñan ndon tiꞌ, loꞌ cuañaꞌan tyijyin yuꞌhui ꞌin.
\v 13 Canꞌ chaꞌ ꞌun jun taꞌa na, a ca ndaja tiꞌ um cuꞌni um tñan tsuꞌhue.
\v 14 Chaꞌ ntsuꞌhui nu a ca jaꞌan loꞌo chaꞌ nu nchcuiꞌ hua loo quityi re, xñi um cunta ꞌin um loꞌo canꞌ, loꞌ ñi a cuꞌni ꞌa um cunta ꞌin, loꞌ cuañaꞌan xijyiꞌo tiꞌ.
\v 15 Una siꞌi canꞌ chaꞌ ñaꞌan tiꞌi um ꞌin, cuiꞌ ca nu suꞌhua tiya um ꞌin canꞌ tsañaꞌan nchca tiꞌ sca taꞌa na.
\s Yu Pablo mslaꞌ taꞌa yu loꞌo jun
\p
\v 16 Cuiꞌ Ñi Xꞌnan na nu nꞌni chaꞌ ndiꞌin tsuꞌhue na, taa la ñi chaꞌ cuiyaꞌ tyiꞌin tsuꞌhue um nchgaa xaa loꞌo nchgaa loo chaꞌ, loꞌ Ñi Xꞌnan na chuꞌhui ñi cunta ꞌin um nchgaa um.
\v 17 Nanꞌ yu Pablo, nde chaꞌ nu nguaꞌan loꞌo yaanꞌ can, ndeñaꞌan nsuꞌhuan niin nchgaa quityi nu ndaꞌan.
\v 18 Chaꞌ tsuꞌhue ꞌin Ñi Xꞌnan na Jesucristo quinu loꞌo um nchgaa um. Amen.