\id 1TI - Nopala (Chatino) NT [cya] - Mexico 2013 (web 2014)
\h 1 TIMOTEO
\toc1 1 Timoteo
\toc2 1 Timoteo
\toc3 1Ti
\mt1 1 Timoteo
\c 1
\s Yu Pablo nchcuiꞌ chaꞌ yu ꞌin Timoteo
\p
\v 1 Nanꞌ yu Pablo, nu nguaꞌan tñan Jesucristo ꞌin loꞌo chaꞌ cuiyaꞌ ꞌin Ndiose, Ñi nu Ndlo laa ꞌin na, tsatlyu loꞌo chaꞌ cuiyaꞌ ꞌin Ñi Xꞌnan na Jesucristo, ñi nu nducua tloo na ꞌin.
\v 2 Nde nguaꞌan tñan sca quityi ꞌin, Timoteo, nu chaꞌ ñi ca lca ñaꞌan nchca tiꞌ sca sñenꞌ nu ndiya quiꞌan tiꞌ ꞌin Ndiose. Nchca tinꞌ siꞌyana Stina Ndiose loꞌo Ñi Xꞌnan na Cristo Jesús taa ñi chaꞌ tsuꞌhue nu chuꞌhui niꞌ cusya ꞌin, ñaꞌan ꞌtnan tiꞌ ñi ꞌin, loꞌ cuꞌni ñi chaꞌ tyiꞌin tsuꞌhue.
\s Msuꞌhua tiyaa yu Pablo siꞌya chaꞌ ꞌin yu cuiñi
\p
\v 3 Cuiꞌ tsañaꞌan nu cuaꞌ ycuinꞌ loꞌo xa nu mdoꞌon nguiꞌan seꞌen lyiꞌya loo Macedonia, siꞌyana quinu quichen Efeso, loꞌ chcuiꞌ loꞌo cunda scaa yu canꞌ siꞌyana a culoꞌo ꞌa yu chaꞌ nu a nchcua taꞌa loꞌo ñaꞌan chaꞌ nu ndloꞌo na.
\v 4 Ñi a ton nscan ꞌa yu scasca chaꞌ nu ndlo que nten, cuiꞌ cuañaꞌan loꞌo ñaꞌan nu naan nten cula ꞌin na, siꞌyana lca na chaꞌ nu a chcanꞌ la ndiyatii, tsaloo nchcuiꞌ tyijyin ti neꞌ siꞌya chaꞌ canꞌ, ñi a nda yaaꞌ na culo loꞌo chaꞌ ꞌin Ndiose ñaꞌan nu ntsuꞌhui chaꞌ tsa quiꞌan tiꞌ na ꞌin ñi, canꞌ chaꞌ xnu cunta chaꞌ re ꞌin.
\v 5 Nde chaꞌ nchcuinꞌ loꞌo siꞌyana chuꞌhui chaꞌ tsuꞌhue ꞌin na loꞌo taꞌa na loꞌo sca cusya nu luhui, loꞌo chaꞌ tiyaa nu ñi, siꞌyana chaꞌ ñi ca ndiya quiꞌan tiꞌ na ꞌin Ndiose.
\v 6 Siꞌyana ntsuꞌhui nu cuaꞌ mdoꞌo tsoꞌ siiꞌ chaꞌ re, loꞌ nguia nchaꞌan scasca chaꞌ nu a ntsuꞌhui lyoo,
\v 7 nchca tiꞌ yu ca yu sca nu ndloꞌo chaꞌ ꞌin lee, una a ndyiꞌya yu chaꞌ tiyaa ñaꞌan chaꞌ nu ndiꞌin tyaa yu loꞌ ñi chaꞌ nu nchcuiꞌ yu.
\v 8 Nchgaa na cuaꞌ jlyo tiꞌ na siꞌyana lee nu mxnu scua Ndiose tsuꞌhue ꞌa na, chaꞌ cua na tsa nchaꞌan na ꞌin na ñaꞌan nu ntsuꞌhui chaꞌ.
\v 9 Quiꞌya na cunta siꞌyana lee canꞌ a nguinu scua na siꞌya nten nu tsuꞌhue, cuiꞌ ca nu siꞌya nten nu lyeꞌ tiꞌ nu nducunꞌ, nten quiꞌya chendyu nu a ndiya quiꞌan tiꞌ ꞌin Ndiose, nu nxcuan tloo ꞌin ñi nchcuiꞌ caꞌan ꞌin ñi, nu ndujui nten, loꞌo nu ndujui ꞌin sti loꞌo jyiꞌan,
\v 10 a cunta siꞌya chaꞌ ꞌin nu nguiten yuꞌhui loꞌo neꞌ cunaꞌan, uta loꞌo taꞌa quiꞌyu, siꞌya nu ndyiꞌya cunan ꞌin taꞌa nten, siꞌya nten cuiñi, loꞌo nu nꞌni tyiꞌya ꞌin Ndiose xa nchcuiꞌ chaꞌ cuiñi, loꞌo siꞌya scasca la ñaꞌan chaꞌ nu a nchcua taꞌa loꞌo chaꞌ nu ñi nu ndloꞌo na,
\v 11 tsañaꞌan nguiaa chaꞌ tsuꞌhue ꞌin Cristo, cuiꞌ chaꞌ nu tsuꞌhue lati ꞌin Ndiose, ñi nu tlyu lati, loꞌ mxnu ñi cunta ꞌñan siꞌyana chcuinꞌ chaꞌ re.
\s Tñan ꞌin Ndiose nguiꞌni yu Pablo
\p
\v 12 Ndyaan xuꞌhue ꞌin Ñi Xꞌnan na Cristo Jesús, ñi nu ndaa juesa ꞌñan, siꞌyana msuꞌhua loo ñi ꞌñan cuꞌni tñan re ꞌin ñi,
\v 13 siyaꞌ mdajan ꞌin ñi tiꞌ culoo, mducui nchaꞌan ꞌin ñi, cuaꞌ ñaꞌan ti ycuinꞌ loꞌo ñi. Una Ndiose mñaꞌan ꞌtnan tiꞌ ñi ꞌñan siꞌyana a nguꞌyan chaꞌ tiyaa ñaꞌan nu mꞌnin xa tiꞌ lyijyi tsa quiꞌan tinꞌ ꞌin ñi.
\v 14 Una mtsaꞌan yuꞌhui cusya ꞌñan loꞌo chaꞌ tsuꞌhue ꞌin Ñi Xꞌnan na, loꞌ siꞌya Cristo Jesús jui ñaꞌan ya quiꞌan tinꞌ ꞌin ñi, mꞌni ñi chaꞌ siꞌyana chuꞌhui chaꞌ tsuꞌhue ꞌñan loꞌo nten.
\v 15 Nde sca chaꞌ nu ñi loꞌ a ntsuꞌhui chaꞌ cuꞌni tucua tiꞌ na loꞌo na: Cristo Jesús yaan ñi loo chendyu re siꞌyana culo laa ñi ꞌin nten quiꞌya chendyu, loꞌ nanꞌ lcan nu lyee lati nducui quiꞌya.
\v 16 Canꞌ chaꞌ lyee la mñaꞌan ꞌtnan tiꞌ Ndiose ꞌñan, siꞌyana ca chcanꞌ loo tsala ñaꞌan tlyu chaꞌ tsuꞌhue ntsuꞌhui ꞌin Jesucristo loꞌon, canꞌ chcua quiloo nchgaa nten nu ntsuꞌhui chaꞌ tsa quiꞌan tiꞌ ꞌin ñi seꞌen nu caja chendyu nu a tsatii ꞌa ꞌin neꞌ.
\v 17 Canꞌ chaꞌ ñi nu lca Ree tsala xaa, ñi nu a ntsuꞌhui ꞌa chaꞌ caja, ñi a tca ñaꞌan tloo na, cuiꞌ Ndiose ñi nu ndon loo lati loꞌ tiyaa la ñi, scati ñi ntsuꞌhui chaꞌ cuꞌni tnu na tsala xaa. Amen.
\v 18 Timoteo sñenꞌ, cuiꞌ chaꞌ re xnun cunta ꞌin, suꞌhua juesa cuꞌni tñan ꞌin Ndiose tsañaꞌan chaꞌ nu mxiycuiꞌ ñi ꞌin nu mjñan chaꞌ ꞌin tiꞌ culoo,
\v 19 suꞌhua loo chaꞌ nu ndiya quiꞌan tiꞌ, xñi cunta ꞌin loꞌo sca chaꞌ tiyaa nu luhui, siꞌyana ntsuꞌhui nu cuaꞌ mscuan tloo chaꞌ nu ya quiꞌan tiꞌ, loꞌ nde ngunanꞌ yuꞌhui canꞌ,
\v 20 cuiꞌ chaꞌ re yatoꞌo ꞌin yu Himeneo loꞌo yu Jantro, una cuaꞌ mdyaan ꞌin yu yaaꞌ Laxaꞌan, siꞌyana quiꞌya yu cunta a chcuiꞌ caꞌan ꞌa yu ꞌin Ndiose. Ñaꞌan chcuiꞌ lyiꞌo na ꞌin Ndiose.
\c 2
\p
\v 1 Cuaꞌ ñii chcuinꞌ loꞌo sca chaꞌ nu ndon loo lati, siꞌyana a jlya tiꞌ jun jñan jun ꞌin Ndiose, tyaa jun xuꞌhue ꞌin ñi, loꞌ chcuiꞌ lyiꞌo jun ꞌin ñi siꞌya chaꞌ ꞌin nchgaa tucui,
\v 2 loꞌo chaꞌ ꞌin ree, loꞌo nchgaa la ñaꞌan bsya nu ndlo tñan ꞌin na, siꞌyana tca tyiꞌin tsuꞌhue na, a sca la chaꞌ caan ꞌin na, loꞌ tyuꞌhui na sca chendyu nu luhui ñaꞌan nu nchca tiꞌ Ndiose.
\v 3 Siꞌyana nde chaꞌ nu tsuꞌhue loꞌ ndyuꞌhui cuiyaꞌ tiꞌ Ndiose, ñi nu Ndlo laa ꞌin na:
\v 4 Nchca tiꞌ ñi siꞌyana nchgaa nten tyiꞌo laa neꞌ, loꞌ quiꞌya neꞌ cunta ñaꞌan chaꞌ nu ñi ꞌin ñi.
\v 5 Siꞌyana scati Ndiose ntsuꞌhui, loꞌ scati nu tca tyiꞌo chaꞌ ꞌin nten tloo Ndiose, canꞌ nu lca Jesucristo.
\v 6 Mdyaa ñi ꞌin ñi loꞌ cuañaꞌan msuꞌhua lyiyaꞌ ñi quiꞌya ꞌin nchgaa nten, cuiꞌ chaꞌ nu mdyiꞌo scua la xa nu ya tucua tsaan canꞌ.
\v 7 Cuiꞌ siꞌya chaꞌ re ngulo ton Ndiose ꞌñan, siꞌyana tsa ycuinꞌ chaꞌ tsuꞌhue ꞌin ñi, loꞌ can sca nu mdoꞌo hui ca ꞌin ñi, (Cristo jlyo tiꞌ ñi siꞌyana nchcuinꞌ chaꞌ nu ñi), a cunta can sca nu culoꞌo ꞌin neꞌ gentil ñaꞌan nu ntsuꞌhui chaꞌ tsa quiꞌan tiꞌ neꞌ chaꞌ nu ñi.
\v 8 Nchca tinꞌ siꞌyana nchgaa yu quiꞌyu chcuiꞌ lyiꞌo yu ꞌin Ndiose nchgaa seꞌen, scuen yu yaaꞌ yu loꞌo sca cusya nu ñi, loꞌ siꞌi na nchcuen tiqueꞌ yu uta nsuun yu.
\v 9 Cuiꞌ cuañaꞌan jun cunaꞌan xñi jun cunta ñaꞌan teꞌ ntsuꞌhui chaꞌ coꞌ jun, siꞌi na cuꞌni chuꞌhue jun que jun ndyijyin cuiyaꞌ, uta loꞌo chacuiꞌ oro, uta loꞌo na nu nduhui, ta coꞌ jun chacuiꞌ teꞌ nu ntsuꞌhui lyoo.
\v 10 Cuiꞌ ca nu culoꞌo xñan jun ꞌin jun loꞌo scasca loo tñan tsuꞌhue, siꞌyana cuañaꞌan ngaꞌan chaꞌ cuꞌni jun cunaꞌan nu ndiya quiꞌan tiꞌ ꞌin Ndiose.
\v 11 Loꞌo suun ñaꞌan ton nscan jun seꞌen ndiyoꞌ tiꞌin jun loꞌ chcua seen jun.
\v 12 Siꞌyana a taan chaꞌ cuiyaꞌ culoꞌo jun uta culo jun tñan ꞌin yu quiꞌyu, cuiꞌ ca nu chcua seen jun.
\v 13 Siꞌyana culo nducua mtñan Ndiose ꞌin Adán, chonꞌ ndeꞌen canꞌ mtñan ñi ꞌin Eva.
\v 14 Siꞌi ꞌin Adán jui nu nguñilyiꞌo, cuiꞌ ca nu ꞌin nu cunaꞌan canꞌ, loꞌ yatoꞌo mꞌni neꞌ quiꞌya.
\v 15 Una tyiꞌo laa jun cunaꞌan xa nu tiyaan sñeꞌ jun chendyu, chaꞌ na nsuꞌhua loo jun chaꞌ nu ndiya quiꞌan tiꞌ jun, chaꞌ ntsuꞌhui chaꞌ tsuꞌhue ꞌin jun loꞌ nduꞌhui jun sca chendyu nu luhui loꞌo suun ñaꞌan.
\c 3
\s Chaꞌ ꞌin yu nu ntsuꞌhui cunta ꞌin jun 

\p
\v 1 Nde sca chaꞌ nu ñi, chaꞌ ndeꞌen nu nchca tiꞌ chuꞌhui cunta ꞌin jun taꞌa na, sca tñan tsuꞌhue ꞌa ndyiꞌo tiquee canꞌ cuꞌni.
\v 2 Una yu nu chuꞌhui cunta ꞌin jun nchca tiꞌ sca yu nu nduꞌhui sca chendyu nu luhui, a cunta scati cuilyiꞌo yu, nxñi yu cunta ꞌin yu, loꞌo chaꞌ tiyaa nꞌni yu scaa chaꞌ, suun ñaꞌan ndiꞌin chaꞌ ꞌin yu, nducuan xuꞌhue yu ꞌin nten nu ndiyaa seꞌen ndiꞌin yu, loꞌ ndloꞌo yu chaꞌ ꞌin Ndiose,
\v 3 siꞌi sca yu cuꞌhui, uta ndiꞌin suun yu, ta nꞌni yu mañan loꞌo tñi, cuiꞌ ca nu tsuꞌhue nten lca yu, nan yu ñaꞌan nu tyiꞌin tsuꞌhue yu loꞌo nten, loꞌ a nchcua quiloo yu ꞌin chaꞌ cuilyiyaꞌ.
\v 4 A cunta tsuꞌhue nꞌni cunta yu seꞌen ndiꞌin yu, nchca jaꞌan sñeꞌ yu ꞌin yu loꞌo nchgaa chaꞌ,
\v 5 (siꞌyana chaꞌ sca yu nu a nchca ꞌin cuꞌni cunta seꞌen ndiꞌin, ¿ñaꞌan ta tca chuꞌhui yu cunta ꞌin jun nu cuaꞌ ya quiꞌan tiꞌ ꞌin Ndiose?).
\v 6 Siꞌi sca yu nu cuneꞌ tucueen ꞌin Ndiose, ñaꞌan tuꞌ tsatoꞌo cuꞌni siyeꞌ yu loꞌ tyu yu loo quiꞌya tsañaꞌan mdyu laxaꞌan.
\v 7 A cunta loꞌo nten nu a ndiya quiꞌan tiꞌ ndyuꞌhui cuiyaꞌ tiꞌ ꞌin yu, a ndyijyi ñaꞌan chcuiꞌ neꞌ cuaꞌ ñaꞌan ti chaꞌ ꞌin yu, ta tyu yu loo canꞌ ꞌin laxaꞌan.
\s Chaꞌ ꞌin jun un nda yaaꞌ niꞌ lyaa
\p
\v 8 Ticuiꞌ cuañaꞌan yu nu ta yaaꞌ niꞌ lyaa nchca tiꞌ sca yu nu nxñi cunta ꞌin, ñi ndiꞌin chaꞌ ꞌin yu, siꞌi sca yu cuꞌhui, ñi a nꞌni yu mañan loꞌo tñi,
\v 9 chaꞌ nxuꞌhua seꞌen yu chaꞌ nu ndiya quiꞌan tiꞌ yu, luhui chaꞌ tiyaa ꞌin yu.
\v 10 Una culo nducua la xñi jun cunta ꞌin yu chaꞌ a sca chaꞌ nducui nchaꞌan ꞌin yu, la xacanꞌ tca quinu yu ta yaaꞌ yu ꞌin jun.
\v 11 Ticuiꞌ cuañaꞌan loꞌo jun cunaꞌan nu ta yaaꞌ niꞌ lyaa nchca tiꞌ sca jun nu ñi ndiꞌin chaꞌ ꞌin, siꞌi nu ndaꞌan loꞌo chaꞌ nchca nchcuiꞌ, nxñi jun cunta ꞌin jun, loꞌ nducua jun tñan nchgaa loo chaꞌ tsuꞌhue.
\v 12 A cunta yu nu nda yaaꞌ niꞌ lyaa scati cuilyiꞌo yu, tsuꞌhue nꞌni cunta yu seꞌen ndiꞌin yu loꞌo sñeꞌ yu tsatlyu loꞌo nchgaa nu ndiꞌin naꞌan ꞌin yu.
\v 13 Chaꞌ tsuꞌhue nsuꞌhua loo yu tñan niꞌ lyaa, nde lyee la chuꞌhui cuiyaꞌ tiꞌ jun ꞌin yu, caja la chaꞌ tnu tiquee ꞌin yu loꞌo chaꞌ nu ndiya quiꞌan tiꞌ yu siꞌya Cristo Jesús.
\s Nde chaꞌ tnu un ndiya quiꞌan tiꞌ na
\p
\v 14 Nde nguaꞌan tñan sca quityi ꞌin, siyaꞌ ndyiꞌo tiqueen tsaꞌan seꞌen ndiꞌin nu ndla la,
\v 15 una chaꞌ ndeꞌen la ñaꞌan tiyanꞌ, nuꞌhuin cuaꞌ jlyo tiꞌ ñaꞌan ntsuꞌhui chaꞌ tsa loꞌo cunta chaꞌ re loꞌo nchgaa jun taꞌa na, siꞌyana tsatlyu lca na laa ꞌin Ndiose, ñi nu loꞌo ca, ndaꞌan loꞌo na chaꞌ nu ñi ꞌin ñi, loꞌ a caja nu culo ntan ꞌin na.
\v 16 Nu chaꞌ ñi sꞌni nde chaꞌ nu tlyu lati, nu nduhue tiꞌ na, loꞌ ndiya quiꞌan tiꞌ na: Ndiose yaan ñi tsañaꞌan nchca tiꞌ sca nten, siꞌya chaꞌ cuiyaꞌ ꞌin Espíritu mꞌni ñi canan nchgaa loo chaꞌ, naꞌan tloo angujle ꞌin ñi, jui nu mdaꞌan ycuiꞌ chaꞌ tsuꞌhue ꞌin ñi loꞌo neꞌ gentil, loꞌ jui nu ya quiꞌan tiꞌ ꞌin ñi loo chendyu re, ycuen ñi nde niꞌ cuaan loꞌo sca chaꞌ cuiyaꞌ nu tlyu ꞌin ñi.
\c 4
\s Chaꞌ ꞌin nten nu ndyiꞌo tsoꞌ siiꞌ Ndiose
\p
\v 1 Una Espíritu ntsaꞌ la siꞌyana tiyaa xaa ntsuꞌhui nu tyiꞌo tsoꞌ siiꞌ chaꞌ tsuꞌhue ꞌin Ndiose, tsatoꞌo ton nscan canꞌ ꞌin cuiꞌin nu cuiñi, a cunta loꞌo scasca chaꞌ nu ndloꞌo cuiꞌin xaꞌan,
\v 2 cuiꞌ siꞌya chaꞌ cuiñi nu ndaꞌan ycuiꞌ scasca yu nu a ñi ndiꞌin chaꞌ ꞌin, siꞌyana cuaꞌ mchcun chaꞌ tiyaa ꞌin yu.
\v 3 Nchcui ndijin yu seꞌen caja cuilyiꞌo nten, nchcuiꞌ yu siꞌyana cuaꞌ lca ti na tca cu na, cuiꞌ na nu mdaa Ndiose cuan xuꞌhue nchgaa nu ndiya quiꞌan tiꞌ ꞌin ñi, nu cuaꞌ nguꞌya cunta ñaꞌan nguiaa chaꞌ nu ñi.
\v 4 Siꞌyana nchgaa na nu msuꞌhua Ndiose, tsuꞌhue na, a ngaꞌan chaꞌ xcuan tloo na ꞌin na, cuiꞌ ca nu cuan xuꞌhue na ꞌin na loꞌo nu chcui lca tiquee na,
\v 5 loꞌ siꞌya chaꞌ ꞌin Ndiose xa nchcuiꞌ lyiꞌo na ꞌin ñi, nxnu luhui ñi chaꞌ nchcu canꞌ.
\s Chaꞌ ꞌin jun nu tsuꞌhue nꞌni tñan ꞌin Cristo
\p
\v 6 Chaꞌ culoꞌo chaꞌ re ꞌin jun taꞌa na, tsuꞌhue ꞌa nducua tñan ñaꞌan chaꞌ ꞌin Jesucristo, lca sca nu mtsaꞌan yuꞌhui loꞌo chaꞌ nu luhui ꞌin Ndiose, cuiꞌ chaꞌ nu ndloꞌo na nu cuaꞌ nducui nchaꞌan.
\v 7 A nchca chaꞌ cuꞌni cunta scasca chaꞌ nu ngulo que nten cula, chaꞌ nu a ntsuꞌhui lyoo, cuiꞌ ca nu suꞌhua juesa tyuꞌhui sca chendyu nu luhui tloo Ndiose.
\v 8 Siꞌyana nu ndlo sa ꞌin loꞌo scasca chaꞌ cuijya, joꞌo ꞌa ñaꞌan nda yaaꞌ chaꞌ canꞌ, una chaꞌ suꞌhua na juesa tyuꞌhui na sca chendyu nu luhui, siꞌi tsaloo chendyu ti re ta yaaꞌ na, cuiꞌ ca nu cuꞌni na tsuꞌhue loꞌo na tsala xaa.
\v 9 Nde sca chaꞌ nu ñi, loꞌ ñi sca tucui a ntsuꞌhui chaꞌ cuꞌni tucua tiꞌ loꞌo na.
\v 10 Siꞌya chaꞌ re canꞌ chaꞌ nsuꞌhua na juesa, ndijin na nu tiꞌi, siꞌyana nducua quiloo na ꞌin scati Ndiose nu loꞌo ca, Ñi nu Ndlo laa ꞌin nchgaa nten, tsalca nu ndiya quiꞌan tiꞌ ꞌin ñi.
\v 11 Nchgaa chaꞌ re ntsuꞌhui chaꞌ chcuiꞌ loꞌ culoꞌo ꞌin nten.
\v 12 A taa yaꞌ caja nu xcuan tloo ꞌin siyaꞌ lca yu tsa suhue ti, cuiꞌ ca nu culoꞌo xñan ꞌin tloo jun taꞌa na loꞌo ñaꞌan nu nchcuiꞌ, loꞌo ñaꞌan nu nꞌni, ñaꞌan nu ntsuꞌhui chaꞌ tsuꞌhue ꞌin, a cunta loꞌo sca cusya nu ñi, loꞌo ñaꞌan nu ndiya quiꞌan tiꞌ ꞌin Ndiose, loꞌo sca chaꞌ tiyaa nu luhui.
\v 13 Lja nu tiꞌ lyijyi tyiꞌan seꞌen ndiꞌin, chuꞌhui yuhue tiꞌ chcuiꞌ quityi ꞌin Ndiose tloo jun taꞌa na, ta cueen ꞌin jun loꞌ culoꞌo ꞌin jun.
\v 14 Suꞌhua loo chaꞌ tsuꞌhue nu cuaꞌ jui ꞌin xa nu mxiycuiꞌ Espíritu ꞌin yu nu ntsuꞌhui cunta ꞌin jun xa mdiꞌin tyaa yu yaaꞌ yu ꞌin.
\v 15 Chuꞌhui yuhue tiꞌ chaꞌ re, tsa quiñan cuꞌni ꞌin na, ñaꞌan ca siꞌyana nchgaa tucui ca cuiyaꞌ tiꞌ ñaꞌan nguia nguilo loꞌo chaꞌ ꞌin Ndiose.
\v 16 Xñi cunta ꞌin, a cunta loꞌo chaꞌ nu ndloꞌo. Xñi ton ꞌin loꞌo chaꞌ re, chaꞌ cuañaꞌan cuꞌni, caja ñaꞌan tyiꞌo laa tsatlyu loꞌo nchgaa nu quine ꞌin chaꞌ nu nchcuiꞌ. Ñaꞌan ntsuꞌhui chaꞌ tyiꞌin na.
\c 5
\p
\v 1 A xun loꞌo ꞌin jun nu lca nten cula, cuiꞌ ca nu chcuiꞌ loꞌo canꞌ ñaꞌan nchca tiꞌ sca sti, loꞌ yu nu suhue la, cuꞌni ꞌin yu ñaꞌan nchca tiꞌ sca taꞌa ngula,
\v 2 jun cunaꞌan nu lca nten cula, cuꞌni ꞌin jun ñaꞌan nchca tiꞌ jyiꞌan, loꞌ ngüiꞌ cunaꞌan tsa suhue ti, cuꞌni ꞌin canꞌ tsañaꞌan nchca tiꞌ taꞌa ngula, loꞌo sca chaꞌ tiyaa nu luhui.
\v 3 Cuꞌni cunta ꞌin jun cunaꞌan nu chaꞌ ñi ca nguinu loꞌo chaꞌ ycuiꞌ ti.
\v 4 Una nu tiꞌ ndiꞌin sñeꞌ uta sñeꞌ steꞌ, canꞌ nu ngaꞌan chaꞌ cuꞌni cunta ꞌin jun culo nducua la, cuañaꞌan tca xitucui canꞌ chaꞌ tsuꞌhue loꞌo nten cula ꞌin, siꞌyana nde chaꞌ tsuꞌhue nu ndyuꞌhui cuiyaꞌ tiꞌ Ndiose.
\v 5 Jun nu chaꞌ ñi ca nguinu loꞌo chaꞌ ycuiꞌ ti nu ndiꞌin scati, canꞌ nu nducua tloo ꞌin Ndiose, a ndlaꞌ tiꞌ jun njñan jun loꞌ nchcuiꞌ lyiꞌo jun ꞌin ñi tla loꞌ cucha.
\v 6 Una chaꞌ ndaꞌan jun ñaꞌan nu nchca tiꞌ jun, ñaꞌan loo chaꞌ na cuaꞌ ngujui jun.
\v 7 Nchgaa chaꞌ re culoꞌo ꞌin jun, siꞌyana a caja nu chcuiꞌ cuañaꞌan ti chaꞌ ꞌin jun.
\v 8 Siꞌyana nu a ntsuꞌhui cunta ꞌin ta nten ꞌin, ñi a nꞌni cunta ꞌin nu ndiꞌin naꞌan ꞌin, ñaꞌan loo chaꞌ na cuaꞌ mscuan tloo canꞌ chaꞌ ꞌin Ndiose, nducua la nꞌni canꞌ que ñaꞌan nchca tiꞌ sca nten nu a ndiya quiꞌan tiꞌ.
\v 9 Una tsalca jun nu cuaꞌ ntsuꞌhui snan yla yjan nu nguiaa nde loo, canꞌ nu ngaꞌan chaꞌ chcua nii loo quityi loꞌ ta yaaꞌ jun ꞌin, chaꞌ na scati yu quiꞌyu taꞌa mdiꞌin,
\v 10 chaꞌ ndloꞌo xñan canꞌ ꞌin loꞌo tñan nu nguiꞌni, chaꞌ mꞌni coꞌo canꞌ sñeꞌ, uta mꞌni cunta canꞌ ꞌin nu mdiyaa seꞌen ndiꞌin, ta mjyiꞌan canꞌ quiyaꞌ jun taꞌa na, ta mda yaaꞌ ꞌin nu ndijin scasca nu tiꞌi, chaꞌ mꞌni canꞌ nchgaa loo tñan tsuꞌhue.
\v 11 Una tsalca jun nu tsa suhue la, nu nguinu loꞌo chaꞌ ycuiꞌ ti, a loꞌo canꞌ chcua nii loo quityi, siꞌyana tsati ntyin ca tiꞌ caja nten ꞌin xiyaꞌ, loꞌ tsatoꞌo tyiꞌo tsoꞌ canꞌ siiꞌ Cristo,
\v 12 cuañaꞌan soꞌ tucua canꞌ quiꞌya chonꞌ, siꞌyana a mdoꞌo ñi chaꞌ ꞌin loꞌo chaꞌ nu cuaꞌ mdiꞌin tyaa.
\v 13 A cunta tyisnan tyiꞌan jun loꞌo chaꞌ ndaja scasca naꞌan, loꞌ siꞌi tsacanꞌ ti, cuiꞌ ca nu loꞌo chaꞌ nchca nchcuiꞌ, sten yuꞌhui jun loꞌo scasca loo chaꞌ, loꞌ chcuiꞌ jun chaꞌ nu a ngaꞌan chaꞌ chcuiꞌ jun.
\v 14 Canꞌ chaꞌ nchca tinꞌ siꞌyana tsalca jun nu tsa suhue ti, nu nguinu loꞌo chaꞌ ycuiꞌ ti, tsuꞌhue la chaꞌ caja cuilyiꞌo canꞌ, tsuꞌhue ti cuꞌni coꞌo jun sñeꞌ jun, cuꞌni jun cunta seꞌen ndiꞌin jun, xacanꞌ a caja ñaꞌan chcuiꞌ taꞌa cusuun na cuaꞌ ñaꞌan ti chaꞌ ꞌin jun.
\v 15 Siꞌyana ntsuꞌhui jun nu cuaꞌ mdoꞌo tsoꞌ loꞌ nducui chaꞌan canꞌ ꞌin laxaꞌan.
\v 16 Jun cunaꞌan nu nguinu loꞌo chaꞌ ycuiꞌ ti canꞌ, chaꞌ ndiꞌin taꞌa jun nu cuaꞌ ya quiꞌan tiꞌ ꞌin Ndiose, canꞌ nu ngaꞌan chaꞌ chuꞌhui cunta ꞌin jun, loꞌ siꞌi cunta ꞌin jun taꞌa na tyiꞌin canꞌ, xacanꞌ caja ñaꞌan ta yaaꞌ jun ꞌin jun cunaꞌan nu chaꞌ ñi ca nguinu loꞌo chaꞌ ycuiꞌ ti.
\v 17 Loꞌ tsalca yu nu ntsuꞌhui cunta ꞌin jun taꞌa na, chaꞌ na tsuꞌhue nsuꞌhua loo yu tñan ntsuꞌhui yaaꞌ yu, canꞌ nu ngaꞌan chaꞌ tucua ta xñi canꞌ siyaꞌ, una lyee la nguiꞌni caꞌan chaꞌ re ꞌin yu nu ndloꞌo loꞌ nchcuiꞌ chaꞌ ꞌin Ndiose.
\v 18 Siꞌyana quityi ꞌin Ndiose nchcuiꞌ na: —A suꞌhua um quiso tuꞌhua bta xa nguiꞌni ꞌin tñan—. A cunta nchcuiꞌ na: Sca yu nguso ntsuꞌhui suun ꞌin yu xñi yu siyaꞌ yu.
\v 19 Chaꞌ caja nu suꞌhua quiꞌya ꞌin yu nu ntsuꞌhui cunta ꞌin jun taꞌa na, a cuꞌni cunta chaꞌ canꞌ, chaꞌ na a loꞌo —tucua snan nu taa suun chaꞌ canꞌ—.
\v 20 Una tsalca nu tiꞌ nguiꞌni quiꞌya, tla chaꞌ chcuiꞌ loꞌo canꞌ tloo jun taꞌa na, cuañaꞌan chuꞌhui sca ytsen ꞌin jun scasca jun.
\v 21 Tloo Ndiose loꞌo Ñi Xꞌnan na Jesucristo, loꞌo tloo angujle nu mdoꞌo hui ꞌin ñi, jñan chaꞌ tsuꞌhue ꞌin siꞌyana xuꞌhua seꞌen nchgaa chaꞌ re ñaꞌan nu ntsuꞌhui chaꞌ, loꞌ nchca tiꞌ siꞌyana scañaꞌan ti ca lca tiquee loꞌo nchgaa tucui.
\v 22 A nchca chaꞌ ndla ndsa tyiꞌin tyaa yaaꞌ ꞌin sca tucui, xñi cunta siꞌyana a tyiꞌo loꞌo quiꞌya ꞌin xca tucui. Tyuꞌhui sca chendyu nu luhui ti.
\v 23 A coꞌo ꞌa chacuiꞌ tyiꞌa ti, cuiꞌ ca nu coꞌo tsa chinꞌ vino siꞌya chaꞌ nu nchgaa xaa nchca tiꞌi tiquee.
\v 24 Ntsuꞌhui quiꞌya cuiꞌ xaa nchca chcanꞌ loo na siyaꞌ tiꞌ lyijyi ca cuiyaꞌ chaꞌ ꞌin na. Una ntsuꞌhui quiꞌya nde loo la ndyiꞌo scua la na.
\v 25 Ticuiꞌ cuañaꞌan loꞌo chaꞌ tsuꞌhue, cuiꞌ xaa nchca chcanꞌ loo na, loꞌ chaꞌ a tyiꞌo scua la na cuiꞌ xaa, una tiyaa xaa ca chcanꞌ loo na siꞌyana a tca chuꞌhui cutsiꞌ na.
\c 6
\p
\v 1 Cuiꞌ cuañaꞌan nchgaa nguso nu cuaꞌ ntsuꞌhui xꞌnan, ntsuꞌhui chaꞌ ca jaꞌan canꞌ ꞌin xꞌnan loꞌo nchgaa loo chaꞌ, xacanꞌ a caja ñaꞌan chcuiꞌ caꞌan neꞌ ꞌin Ndiose uta loꞌo chaꞌ nu ndloꞌo na.
\v 2 Chaꞌ xꞌnan canꞌ lca jun nu ndiya quiꞌan tiꞌ, siꞌi siꞌyana lca canꞌ sca taꞌa na, ta canꞌ chaꞌ a caja nu ca jaꞌan ꞌin, cuiꞌ ca nu nde lyee la chuꞌhui yuhue tiꞌ canꞌ cuꞌni tñan ꞌin xꞌnan. Siꞌyana nu nchcuan cunta tñan canꞌ lca sca nu ndiya quiꞌan tiꞌ loꞌ ndyuꞌhui cuiyaꞌ tiꞌ Ndiose ꞌin. Nde chaꞌ nu culoꞌo loꞌ ta cueen ꞌin jun.
\s Quinu tsuꞌhue tiquee na loꞌo na nu ndiꞌin ꞌin na
\p
\v 3 Chaꞌ ntsuꞌhui nu ndloꞌo xca loo chaꞌ nu a nchcua taꞌa loꞌo ñaꞌan chaꞌ tsuꞌhue ꞌin Ñi Xꞌnan na Jesucristo, uta loꞌo ñaꞌan chaꞌ nu luhui nu ndloꞌo na,
\v 4 canꞌ nu mtsaꞌan yuꞌhui loꞌo chaꞌ siyeꞌ, loꞌ a sca chaꞌ jlyo tiꞌ, cuaꞌ jui mañan nchcuiꞌ tyijyin siꞌya scasca loo chaꞌ nu a ntsuꞌhui cunta, canꞌ nchcua suun nchgaa loo chaꞌ ngunanꞌ: Chaꞌ njñan tiꞌ, chaꞌ cusuun, chaꞌ nu ndaja taꞌa neꞌ, a cunta chaꞌ nu nꞌni tucua tiꞌ taꞌa neꞌ,
\v 5 nchcuiꞌ tyijyin neꞌ scasca neꞌ siꞌyana a luhui chaꞌ tiyaa ꞌin neꞌ, ñi a ndyuꞌhui lyoo neꞌ chaꞌ nu ñi, nchca tiꞌ neꞌ ca cuilyiyaꞌ neꞌ siꞌya chaꞌ ꞌin Ndiose, canꞌ chaꞌ tyiꞌo tsoꞌ siiꞌ nten nu lca cuañaꞌan.
\v 6 Chaꞌ ñi siꞌyana chaꞌ nu luhui ꞌin Ndiose lca na chaꞌ cuilyiyaꞌ ꞌin na, chaꞌ na tsuꞌhue ntsuꞌhui tiquee na loꞌo na nu cuaꞌ ndiꞌin ꞌin na,
\v 7 siꞌyana a sca na mdiyan loꞌo na loo chendyu re, ticuiꞌ cuañaꞌan xa caja na, a sca na tca cuiꞌya na.
\v 8 Chaꞌ ndiꞌin na nu najoꞌo ꞌin na, chaꞌ ntsuꞌhui steꞌ na, quinu tsuꞌhue tiquee na loꞌo tsacanꞌ ti.
\v 9 Una nten nu nchcua quiloo ꞌin chaꞌ cuilyiyaꞌ, tsatoꞌo tyu neꞌ loo quiꞌya uta loo canꞌ, mtsaꞌan yuꞌhui cusya ꞌin neꞌ loꞌo chaꞌ njñan tiꞌ nu nꞌni tiꞌi loꞌo neꞌ ticuiiꞌ neꞌ, loꞌ cuañaꞌan tsatoꞌo quinanꞌ neꞌ siyaꞌ ti.
\v 10 Siꞌyana xcuaꞌ nchgaa loo chaꞌ ngunanꞌ lca chaꞌ nu nchcui tiꞌ neꞌ tñi, siꞌya chaꞌ canꞌ ntsuꞌhui nu cuaꞌ mdoꞌo tsoꞌ siiꞌ chaꞌ tsuꞌhue ꞌin Ndiose, loꞌ lyee ꞌa quiꞌan nu tiꞌi mdijin neꞌ.
\s Suꞌhua loo na chaꞌ nu ndiya quiꞌan tiꞌ na
\p
\v 11 Una nuꞌhuin, yu nu nguiꞌni tñan ꞌin Ndiose, tyiꞌo tsoꞌ siiꞌ nchgaa loo chaꞌ ngunanꞌ re, loꞌ taa juesa chcui nchaꞌan chaꞌ nu tsuꞌhue, chaꞌ nu luhui, loꞌo ñaꞌan chaꞌ nu ndiya quiꞌan tiꞌ na, chuꞌhui chaꞌ tsuꞌhue ꞌin loꞌo nten, chuꞌhui chaꞌ tlyu tiꞌ ꞌin, a cunta loꞌo suun ñaꞌan cuꞌni.
\v 12 Taa juesa cuꞌni canan loꞌo chaꞌ nu ndiya quiꞌan tiꞌ, suꞌhua loo chendyu nu a tsatii ꞌa, nu cuaꞌ jui ꞌin tiꞌ xa msiꞌya Ndiose ꞌin, cuiꞌ xa nu mdaa suun ñaꞌan ya quiꞌan tiꞌ ꞌin ñi tloo ndiꞌin quiꞌan jun taꞌa na.
\v 13 Tloo Ndiose, ñi nu ndaa chendyu ꞌin nchgaa loo na, loꞌo tloo Ñi Xꞌnan na Jesucristo, ñi nu tsuꞌhue ycuiꞌ loꞌ mdaa ñi suun tloo yu Poncio Pilato, canꞌ chaꞌ jñan chaꞌ tsuꞌhue ꞌin:
\v 14 Tsuꞌhue ti xuꞌhua seꞌen chaꞌ re, xñi cunta siꞌyana a tnanꞌ chaꞌ ꞌin loꞌo na tsayaꞌ nu quiaan ñi Xꞌnan na Jesucristo xiyaꞌ.
\v 15 Ndiose cuꞌni ñi chaꞌ tsatoꞌo chaꞌ re sca tsaan nu cuaꞌ mdiꞌin tyaa ñi, cuiꞌ ñi nu tlyu lati chaꞌ cuiyaꞌ ntsuꞌhui ꞌin, siꞌyana scati ñi lca ñi Ree nu tlyu lati, loꞌ lca ñi Xꞌnan nchgaa tucui,
\v 16 scati ñi lca ñi tsala xaa, ndiꞌin ñi sca loo xaa seꞌen nu a tca sten ñaꞌan tucui ti, ñi sca nten a nchca ñaꞌan ꞌin ñi, ñi a ntsuꞌhui chaꞌ ñaꞌan neꞌ ꞌin ñi, scati ñi cuꞌni tnu na ꞌin ñi loꞌ culo ñi tñan tsala xaa. Amen.
\v 17 Chcuiꞌ loꞌo nten nu cuilyiyaꞌ siꞌyana a cuꞌni siyeꞌ neꞌ, a chcua quiloo canꞌ chaꞌ cuilyiyaꞌ ꞌin neꞌ, siꞌyana lca na chaꞌ cuiñi ti, cuiꞌ ca nu chcua quiloo canꞌ ꞌin Ndiose, ñi nu loꞌo ca, ñi nu ndaa nchgaa loo na nu najoꞌo ꞌin na tsayaꞌ nu quinu tsuꞌhue tiquee na.
\v 18 Chcuiꞌ loꞌo neꞌ siꞌyana ca cuilyiyaꞌ neꞌ, una loꞌo nchgaa loo tñan tsuꞌhue nu cuꞌni neꞌ, a cunta tyiꞌo chaꞌ tsuꞌhue tiquee neꞌ ta yaaꞌ neꞌ ꞌin nu ꞌni chaꞌ ꞌin, loꞌ a cuꞌni tiji neꞌ ꞌin neꞌ,
\v 19 cuañaꞌan xuꞌhua seꞌen neꞌ chaꞌ cuilyiyaꞌ nu ta yaaꞌ ꞌin neꞌ tsala xaa, loꞌ suꞌhua loo neꞌ chendyu nu a tsatii ꞌa ꞌin neꞌ.
\s Mslaꞌ taꞌa yu Pablo loꞌo Timoteo
\p
\v 20 Nuꞌhuin Timoteo, xñi cunta tñan nu cuaꞌ ntsuꞌhui yaaꞌ, a cuꞌni cunta scasca chaꞌ nu ndlo que neꞌ, chaꞌ nu a sca cunta ntsuꞌhui, cuiꞌ cuañaꞌan loꞌo chaꞌ nu ndloꞌo neꞌ nu ljyaan loo chaꞌ cuiñi,
\v 21 ntsuꞌhui nu nguia nchaꞌan chaꞌ canꞌ, loꞌ cuaꞌ mdoꞌo tsoꞌ siiꞌ chaꞌ nu ndiya quiꞌan tiꞌ na. Chaꞌ tsuꞌhue ꞌin Ndiose quinu loꞌo. Amen.