\id 2TI - Nopala (Chatino) NT [cya] - Mexico 2013 (web 2014)
\h 2 TIMOTEO
\toc1 2 Timoteo
\toc2 2 Timoteo
\toc3 2Ti
\mt1 2 Timoteo
\c 1
\s Yu Pablo nchcuiꞌ chaꞌ yu ꞌin Timoteo
\p
\v 1 Nanꞌ yu Pablo, siꞌya chaꞌ cuiyaꞌ ꞌin Ndiose nguaꞌan tñan Jesucristo ꞌñan tsa ycuinꞌ chaꞌ tsuꞌhue ꞌin ñi, ñaꞌan ntsuꞌhui chaꞌ caja sca chendyu ꞌin na siꞌya Cristo Jesús.
\v 2 Nde nguaꞌan tñan sca quityi ꞌin, Timoteo, nuꞌhuin lca ñaꞌan nchca tiꞌ sca sñenꞌ nu taꞌa lati ꞌñan, nchca tinꞌ siꞌyana Stina Ndiose loꞌo Ñi Xꞌnan na Jesucristo taa ñi chaꞌ tsuꞌhue nu chuꞌhui niꞌ cusya ꞌin, ñaꞌan ꞌtnan tiꞌ ñi ꞌin, loꞌ cuꞌni ñi chaꞌ tyiꞌin tsuꞌhue.
\s Ntsuꞌhui chaꞌ chcuiꞌ na chaꞌ ꞌin Cristo
\p
\v 3 Nchgaa yaꞌ nchcuinꞌ lyiꞌon ꞌin Ndiose tla loꞌ cucha, ndiya yuꞌhui tinꞌ ꞌin, loꞌ ndyaan xuꞌhue ꞌin ñi, cuiꞌ ñi nu ꞌin tñan nguiꞌnin loꞌo sca chaꞌ tiyaa nu luhui, tsañaꞌan nu mꞌni nten cula ꞌñan.
\v 4 Xa ndiya yuꞌhui tinꞌ ñaꞌan nguilo tyiꞌa quiloo, lca tiqueen siꞌyana cuaꞌ cunaꞌan ꞌin loꞌ quinu tsuꞌhue lca tiqueen.
\v 5 Ndiya yuꞌhui tinꞌ tsala ñaꞌan ndiya quiꞌan tiꞌ ꞌin Ndiose, una culo nducua lati ya quiꞌan tiꞌ Loida nu lca jyiꞌan cula, cuiꞌ cuañaꞌan loꞌo Eunice nu lca jyiꞌan, loꞌ jlyo tsuꞌhue tinꞌ siꞌyana loꞌo nuꞌhuin nguia nchaꞌan chaꞌ re.
\v 6 Canꞌ chaꞌ cuaꞌ ñii nxuꞌhuan tiꞌ siꞌyana suꞌhua loo chaꞌ tsuꞌhue ꞌin Ndiose nu cuaꞌ jui ꞌin xa mdiꞌin tyaan yaanꞌ ꞌin.
\v 7 Siꞌyana Ndiose a mdaa ñi chaꞌ tsuꞌhue canꞌ ꞌin na, ta siꞌyana xicutsen tiꞌ na, cuiꞌ ca nu siꞌyana ca tnu tiquee na, chuꞌhui chaꞌ tsuꞌhue ꞌin na loꞌo nten, loꞌ xñi na cunta ꞌin na.
\v 8 Canꞌ chaꞌ a xijyiꞌo tiꞌ chcuiꞌ chaꞌ tsuꞌhue ꞌin Ñi Xꞌnan na, ñi a xijyiꞌo tiꞌ loꞌon ñaꞌan nu ntsuꞌhuin naꞌan chcuan siꞌya chaꞌ ꞌin Ndiose, cuiꞌ ca nu ca sca chaꞌ ti ꞌin na tyijyin na nu tiꞌi siꞌya chaꞌ tsuꞌhue ꞌin Cristo nu nchcuiꞌ na, loꞌ Ndiose ta yaaꞌ ñi ꞌin na loꞌo chaꞌ re,
\v 9 ñi nu ngulo laa ꞌin na, msiꞌya ñi ꞌin na siꞌyana tyuꞌhui na sca chendyu nu luhui, una siꞌi siꞌyana ndeꞌen la tñan tsuꞌhue cuaꞌ mꞌni na, cuiꞌ ca nu siꞌya chaꞌ tsuꞌhue nu cuaꞌ jui ꞌin na siꞌya Cristo Jesús, cuiꞌ chaꞌ re mdiꞌin tyaa Ndiose xa nu tiꞌ lyijyi tñan ñi chendyu.
\v 10 Una cuaꞌ mdyiꞌo scua la chaꞌ re xa nu yaan Jesucristo, Ñi nu Ndlo laa ꞌin na, loꞌ msiꞌyu coꞌ ñi nu tiꞌi nu ljyan loꞌo chaꞌ ndyija, ngulyo scua la ñi sca chendyu nu a ntsuꞌhui ꞌa chaꞌ tiꞌ jlyo, siꞌya chaꞌ tsuꞌhue ꞌin Ndiose nu ndiya quiꞌan tiꞌ na.
\v 11 Ngulo ton ñi ꞌñan siꞌyana chcuinꞌ chaꞌ tsuꞌhue ꞌin ñi loꞌo neꞌ gentil, nguaꞌan tñan ñi ꞌñan lja neꞌ siꞌyana culoꞌon ꞌin neꞌ.
\v 12 Siꞌya chaꞌ re ndijin nu tiꞌi, una a nxijyiꞌo tinꞌ siꞌyana jlyo tinꞌ tucui ca ꞌin ya quiꞌan tinꞌ. Jlyo tsuꞌhue tinꞌ siꞌyana tca ꞌin ñi chuꞌhui ñi cunta tñan nu mdaa ñi ꞌñan tsayaꞌ tiyaa tsaan nu cuaꞌ mdiꞌin tyaa ñi.
\v 13 Chcui nchaꞌan chaꞌ nu ñi chcui ñaꞌan nu cuaꞌ ycuinꞌ loꞌo, chaꞌ nu ndiya quiꞌan tiꞌ na, a cunta chuꞌhui chaꞌ tsuꞌhue ꞌin loꞌo taꞌa na siꞌya Cristo Jesús.
\v 14 Siꞌya chaꞌ cuiyaꞌ ꞌin Espíritu nu Luhui ꞌin Ndiose nu ntsuꞌhui niꞌ cusya ꞌin na, xñi cunta ꞌin loꞌo tñan nu cuaꞌ mdaa ñi cuꞌni.
\v 15 Cuaꞌ jlyo tiꞌ siꞌyana yu mdoꞌo seꞌen lca Asia ngula yaaꞌ yu ꞌñan, cuiꞌ yu Figelo loꞌo yu Hermógenes.
\v 16 Una suꞌhua yaaꞌ Ñi Xꞌnan na ꞌin yu Onesíforo loꞌo nchgaa nu ndiꞌin naꞌan ꞌin yu, siꞌyana tyun ꞌa yaꞌ mdyaa yu chaꞌ tnu tiquee ꞌñan, a mxijyiꞌo tiꞌ yu loꞌon siyaꞌ nchcanꞌ loꞌo carena,
\v 17 cuiꞌ ca nu xa mdiyaa yu quichen Roma mdaꞌan nan yu ꞌñan sca loo tñan tsayaꞌ nguija lyoon ꞌin yu.
\v 18 Canꞌ chaꞌ Ñi Xꞌnan na cuꞌni ñi chaꞌ quiꞌni caꞌan chaꞌ tsuꞌhue ꞌin yu tsaan nu quiaan ñi xiyaꞌ. Tsala ñaꞌan mda yaaꞌ yu ꞌin na xa mdiꞌin na quichen Efeso.
\c 2
\s Chaꞌ ꞌin nu ndon tsuꞌhue cuꞌni tñan ꞌin Cristo
\p
\v 1 Canꞌ chaꞌ nuꞌhuin sñenꞌ, suꞌhua juesa loꞌo chaꞌ tsuꞌhue nu cuaꞌ mdaa Cristo Jesús ꞌin.
\v 2 Nchgaa chaꞌ nu cuaꞌ ngune ꞌin ycuinꞌ tloo nten quiꞌan canꞌ, cuiꞌ cuañaꞌan xnu cunta ꞌin na ꞌin yu nu ñi ndiꞌin chaꞌ ꞌin, siꞌyana loꞌo canꞌ tca culoꞌo ꞌin xca tucui.
\v 3 Canꞌ chaꞌ ta loo tyijyin nu tiꞌi tsañaꞌan nchca tiꞌ sca sindatu nu tsuꞌhue ca ꞌin Jesucristo.
\v 4 Ñi sca yu nguiꞌni tñan sindatu, a nguiten yuꞌhui yu loꞌo scasca loo tñan, cuiꞌ ca nu nan yu ñaꞌan nu quinu tsuꞌhue tiquee xꞌnan yu loꞌo yu.
\v 5 Ticuiꞌ cuañaꞌan loꞌo sca yu ndijya, a tca cuꞌni yu canan chaꞌ a quijya yu ñaꞌan nu ntsuꞌhui chaꞌ.
\v 6 Cuiꞌ cuañaꞌan nguiaa chaꞌ ꞌin sca yu nꞌni tñan niꞌ quixinꞌ, culo nducua la cuꞌni yu tñan, la xacanꞌ xoꞌ yu na nu yta yu.
\v 7 Quiñan tiꞌ chaꞌ nu nchcuinꞌ loꞌo, loꞌ Ñi Xꞌnan na sla la ñi chaꞌ tiyaa ꞌin loꞌo nchgaa chaꞌ re.
\v 8 Quia yuꞌhui tiꞌ ꞌin Jesucristo, ta nten ꞌin Davi, ñi nu mdyiquiꞌo canꞌ, cuiꞌ chaꞌ tsuꞌhue re nchcuinꞌ cuaꞌ ñii,
\v 9 loꞌ siꞌya chaꞌ re ndijin nu tiꞌi, ntsuꞌhuin naꞌan chcuan tsañaꞌan nchca tiꞌ sca yu nducunꞌ, una chaꞌ ꞌin Ndiose a loꞌo na ntsuꞌhui nchcun na.
\v 10 Canꞌ chaꞌ nda loon loꞌo nchgaa nu tiꞌi re, siꞌya chaꞌ ꞌin nchgaa nu cuaꞌ ngulohui Ndiose, ñaꞌan ca siꞌyana loꞌo canꞌ tyiꞌo laa siꞌya Cristo Jesús, loꞌ tyiꞌin canꞌ loo xaa ꞌin ñi tsala xaa.
\v 11 Nde sca chaꞌ nu ñi: Chaꞌ naa cuaꞌ ngujui na loꞌo ñi, ticuiꞌ cuañaꞌan ntsuꞌhui chaꞌ tyiꞌin na loꞌo ñi.
\v 12 Chaꞌ tyijyin na nu tiꞌi siꞌya ñi, ticuiꞌ cuañaꞌan ntsuꞌhui chaꞌ culo na tñan loꞌo ñi. Chaꞌ xcuan tloo na ꞌin ñi, ticuiꞌ cuañaꞌan xcuan tloo ñi ꞌin na.
\v 13 Chaꞌ naa a nducua na tñan chaꞌ nu nchcuiꞌ na, una nducua ñi tñan chaꞌ nu nchcuiꞌ ñi, siꞌyana a ntsuꞌhui chaꞌ xitsaꞌan ñi sca chaꞌ nu cuaꞌ mdiꞌin tyaa ñi.
\s Chaꞌ ꞌin jun nu tsuꞌhue nꞌni tñan ꞌin Ndiose
\p
\v 14 Canꞌ chaꞌ xuꞌhua tiꞌ jun loꞌo chaꞌ re, loꞌ ta cueen ꞌin jun loꞌo chaꞌ cuiyaꞌ ꞌin Ñi Xꞌnan na siꞌyana a chcuiꞌ tyijyin jun siꞌya scasca chaꞌ nu ndlo que jun, siꞌyana a la cuꞌni na tsuꞌhue, cuiꞌ ca nu nde cuꞌni na tiꞌi loꞌo nu quine ꞌin chaꞌ canꞌ.
\v 15 Suꞌhua juesa nu quinu tsuꞌhue tiquee Ndiose loꞌo, tsañaꞌan nchca tiꞌ sca nguso nu tsuꞌhue nꞌni tñan, nu a sca chaꞌ xijyiꞌo tiꞌ, siꞌyana nxñi tsuꞌhue cunta ñaꞌan nguiaa chaꞌ nu ñi ꞌin Ndiose.
\v 16 A cuꞌni cunta scasca chaꞌ nu ndlo que neꞌ, chaꞌ nu a sca cunta ntsuꞌhui, siꞌyana nu nchcuiꞌ chaꞌ canꞌ nde lyee la nguia nguiten yuꞌhui loo chaꞌ ngunanꞌ,
\v 17 cuañaꞌan nguia nchcu loo na tsañaꞌan nchca tiꞌ sca quicha, cuiꞌ chaꞌ re yatoꞌo ꞌin yu Himeneo loꞌo yu Fileto,
\v 18 mdoꞌo tsoꞌ yu siiꞌ chaꞌ nu ñi ꞌin Ndiose, ndaꞌan ycuiꞌ yu siꞌyana cuaꞌ mdijin chaꞌ nu tyiquiꞌo nten, loꞌ nguiꞌni tinto yu ꞌin tucua snan jun nu cuaꞌ ya quiꞌan tiꞌ ꞌin ñi.
\v 19 Una suun nu mdiꞌin tyaa Ndiose tla ndiꞌin na, loꞌ ndeñaꞌan nguinu scua chaꞌ nu nchcuiꞌ na: —Ñi Xꞌnan na ndyuꞌhui lyoo ñi tsalca nu nguiaa tsoꞌ ꞌin ñi—, loꞌ nde xca chaꞌ nchcuiꞌ na: —Nchgaa nu ndiya quiꞌan tiꞌ ꞌin Cristo tyiꞌo tsoꞌ siiꞌ chaꞌ ngunanꞌ—.
\v 20 Ñaꞌan nchca tiꞌ sca naꞌan tlyu, siꞌi nchgaa loo na ndiꞌin canꞌ nguiaꞌ loꞌo oro uta loꞌo plata, cuiꞌ ca nu ntsuꞌhui nu nguiaꞌ loꞌo yca uta loꞌo yuu, loꞌ lja canꞌ ntsuꞌhui nu taꞌa lati ꞌin neꞌ, loꞌ ntsuꞌhui nu a cunta tiꞌ neꞌ loꞌo.
\v 21 Canꞌ chaꞌ, chaꞌ ntsuꞌhui nu tyiꞌo tsoꞌ siiꞌ nchgaa loo chaꞌ ngunanꞌ, ca canꞌ ñaꞌan nchca tiꞌ sca nu taꞌa lati ꞌin Ñi Xꞌnan na, nu cuiꞌ tñan cuꞌni ca, loꞌ ndon tiyaa canꞌ cuꞌni nchgaa loo tñan tsuꞌhue.
\v 22 Cuiꞌ cuañaꞌan ntsuꞌhui chaꞌ chcua tijyoꞌ siiꞌ scasca chaꞌ tiyaa ngunanꞌ nu ndaꞌan loꞌo yu tsa suhue ti, chcui nchaꞌan chaꞌ tiyaa nu tsuꞌhue, chaꞌ nu ndiya quiꞌan tiꞌ, chuꞌhui chaꞌ tsuꞌhue ꞌin loꞌo nchgaa tucui, loꞌ tyiꞌin tsuꞌhue loꞌo neꞌ tsatlyu loꞌo nchgaa jun nu ndiya quiꞌan tiꞌ ꞌin Ñi Xꞌnan na loꞌo sca cusya nu luhui.
\v 23 A cuꞌni cunta scasca loo chaꞌ nu ndlo que nten, chaꞌ nu a sca cunta ntsuꞌhui, siꞌyana cuaꞌ jlyo tiꞌ chacuiꞌ chaꞌ cusuun nꞌni cuton na.
\v 24 Siꞌyana sca nguso ꞌin Ñi Xꞌnan na, a ntsuꞌhui chaꞌ tyiꞌin yu loꞌo chaꞌ cusuun, cuiꞌ ca nu nde cuꞌni yu tsuꞌhue loꞌo nchgaa tucui, a cunta tsuꞌhue ti culoꞌo yu ꞌin nten, loꞌ chuꞌhui chaꞌ tlyu tiꞌ ꞌin yu,
\v 25 cuañaꞌan loꞌo suun ñaꞌan chcuiꞌ yu loꞌo nu tiꞌi tiꞌ ꞌin yu, tinaꞌan taa Ndiose chaꞌ cuiyaꞌ chaꞌan chaꞌ tiyaa ꞌin canꞌ, loꞌ chuꞌhui lyoo chaꞌ nu ñi,
\v 26 loꞌ tyiꞌo loo canꞌ seꞌen mxñi suꞌhua yaaꞌ laxaꞌan ꞌin. Ñaꞌan ntsuꞌhui chaꞌ cuꞌni nten tiyaa xaa.
\c 3
\p
\v 1 A cunta ca jlyo tiꞌ siꞌyana tiyaa xaa ntsuꞌhui chaꞌ caan tsaan nu chen nchcui.
\v 2 Nten canꞌ tsa ꞌin ti neꞌ chcua quiloo neꞌ, chcui tiꞌ neꞌ tñi, tnu ꞌa cuꞌni neꞌ ꞌin neꞌ, cuꞌni siyeꞌ neꞌ, taja taꞌa neꞌ, a ca jaꞌan ꞌa neꞌ ꞌin nten cula ꞌin neꞌ, a xca ꞌa chaꞌ tiꞌ tsuꞌhue ꞌin neꞌ, loꞌ ñi a tsa quiꞌan ꞌa tiꞌ neꞌ ꞌin Ndiose,
\v 3 ñi a chuꞌhui chaꞌ tsuꞌhue ꞌin neꞌ loꞌo taꞌa neꞌ, a cuꞌni neꞌ chaꞌ tlyu tiꞌ siꞌya chaꞌ nu tla cusya ꞌin neꞌ, suꞌhua neꞌ quiꞌya ꞌin taꞌa neꞌ loꞌo chaꞌ cuiñi, cuꞌni neꞌ ñaꞌan nu nchca tiꞌ neꞌ, chcua la neꞌ, loꞌ xcuan tloo neꞌ nchgaa chaꞌ tsuꞌhue,
\v 4 tnanꞌ neꞌ ticuiiꞌ taꞌa tsuꞌhue neꞌ, a cutsen neꞌ cuꞌni neꞌ cuaꞌ ñaꞌan ti, chaꞌan yuꞌhui chaꞌ siyeꞌ ꞌin neꞌ, lyee la suꞌhua loo neꞌ chaꞌ nu nducui tiꞌ neꞌ que chaꞌ ꞌin Ndiose,
\v 5 cuꞌni neꞌ ꞌin neꞌ siꞌyana lyee ndiya quiꞌan tiꞌ neꞌ ꞌin Ndiose, una loꞌo ñaꞌan nu nꞌni neꞌ nxcuan tloo neꞌ chaꞌ cuiyaꞌ ꞌin ñi. Canꞌ chaꞌ nuꞌhuin ntsuꞌhui chaꞌ tyiꞌo tsoꞌ siiꞌ neꞌ nu lca cuañaꞌan.
\v 6 Siꞌyana neꞌ re nan neꞌ ñaꞌan sten yuꞌhui neꞌ scasca naꞌan, loꞌ cuñilyiꞌo neꞌ ꞌin jun cunaꞌan nu chinꞌ la chaꞌ ꞌin, nu lyee ꞌa cuaꞌ mꞌni quiꞌya siꞌya chaꞌ ngunanꞌ ndyiꞌo tiquee.
\v 7 Siyaꞌ nchgaa xaa nguiꞌni chaꞌan jun, una a ndyiꞌya jun cunta ñaꞌan chaꞌ nu ñi ꞌin Ndiose.
\v 8 Tsañaꞌan nu mꞌni Janes loꞌo Jambres mscuan tloo yu ꞌin Moisé, cuiꞌ cuañaꞌan nguiꞌni neꞌ re nxcuan tloo neꞌ chaꞌ nu ñi ꞌin Ndiose, siꞌyana cooꞌ chaꞌ tiyaa ꞌin neꞌ, a cunta mtnanꞌ neꞌ chaꞌ ꞌin neꞌ loꞌo tsoꞌ ꞌin Ndiose.
\v 9 Una a tsa quiñan neꞌ lyee la, siꞌyana chaꞌ tinto canꞌ ꞌin neꞌ tyiꞌo scua la na tsañaꞌan yatoꞌo ꞌin chcuaa yu canꞌ.
\v 10 Una nuꞌhuin cuaꞌ nguia nchaꞌan chaꞌ ꞌin Ndiose nu ndloꞌon, chendyu nu nduꞌhuin, loꞌo chaꞌ nu nducua quiloon, ñaꞌan nu ndiya quiꞌan tinꞌ, ñaꞌan nu ntsuꞌhui chaꞌ tlyu tiꞌ ꞌñan, ñaꞌan nu ntsuꞌhui chaꞌ tsuꞌhue ꞌñan, tsañaꞌan nda loon nchgaa loo chaꞌ,
\v 11 loꞌ jlyo tiꞌ tsala nu tiꞌi mdijin nchgaa seꞌen mdaꞌan, jui nu mducui nchaꞌan ꞌñan quichen Antioquía, Iconio loꞌo Listra, scasca nu tiꞌi mdijin, una Ñi Xꞌnan na, a siyaꞌ ngula yaaꞌ ñi ꞌñan.
\v 12 Cuiꞌ cuañaꞌan nchgaa nu nchca tiꞌ tyuꞌhui sca chendyu nu luhui siꞌya Cristo Jesús, a sꞌni tyijyin canꞌ scasca nu tiꞌi.
\v 13 Una tsalca nu nducunꞌ loꞌo nu ndaꞌan ñilyiꞌo ꞌin nten, nde lyee la nguia nguinanꞌ yuꞌhui canꞌ, siꞌyana tsañaꞌan nu ñilyiꞌo canꞌ ꞌin nten, cuiꞌ cuañaꞌan ndyijyi nu cuñilyiꞌo ꞌin.
\v 14 Una nuꞌhuin tsa quiñan loꞌo chaꞌ nu cuaꞌ mꞌni chaꞌan loꞌ ya quiꞌan tiꞌ, a cuꞌni tucua tiꞌ siꞌyana cuaꞌ jlyo tiꞌ tucui ca nguloꞌo ꞌin.
\v 15 Siꞌyana tiꞌ lyoꞌ nuꞌhuin yuꞌhui lyoo quityi ꞌin Ndiose, loꞌ ndaa na chaꞌ tiyaa ñaꞌan nu ntsuꞌhui chaꞌ tyiꞌo laa loo nu tsa quiꞌan tiꞌ ꞌin Cristo Jesús.
\v 16 Nchgaa chaꞌ nu nguinu scua loo quityi ꞌin Ndiose, chaꞌ tiyaa ꞌin ñi ca lca na loꞌ najoꞌo na ꞌin na, ndloꞌo na ꞌin na, nꞌni chuꞌhue na chaꞌ tiyaa ꞌin na, nda yaaꞌ na ꞌin na ñaꞌan ntsuꞌhui chaꞌ tyon ñi na, a cunta ndloꞌo na ꞌin na ñaꞌan ntsuꞌhui chaꞌ tyuꞌhui na sca chendyu nu luhui,
\v 17 ñaꞌan ca siꞌyana ca chcui chaꞌ tiyaa ꞌin nchgaa sñeꞌ Ndiose, loꞌ a sca chaꞌ tsa lyijyi ꞌin canꞌ nu cuꞌni nchgaa loo tñan tsuꞌhue.
\c 4
\s Tsa quiñan chcuiꞌ na chaꞌ tsuꞌhue ꞌin Ndiose
\p
\v 1 Jñan chaꞌ tsuꞌhue ꞌin tloo Ndiose loꞌo Ñi Xꞌnan na Jesucristo, ñi nu ntsuꞌhui chaꞌ cuꞌni xñan bsya ꞌin nchgaa nten tsatlyu loꞌo neꞌ cuaꞌ ngujui, xa nu quiaan ñi xiyaꞌ loꞌ culo ñi tñan ꞌin na.
\v 2 Canꞌ chaꞌ tyon tiyaa loꞌ chcuiꞌ chaꞌ tsuꞌhue ꞌin Ndiose nchgaa xaa, cunan ñaꞌan nu quiꞌya neꞌ cunta loꞌo chaꞌ re, tla chaꞌ chcuiꞌ loꞌo neꞌ, a cunta taa chaꞌ tnu tiquee ꞌin neꞌ, cuiꞌ cuañaꞌan chuꞌhui chaꞌ tlyu tiꞌ ꞌin xa nu culoꞌo ꞌin neꞌ.
\v 3 Siꞌyana tiyaa xaa a cuꞌni cunta ꞌa neꞌ chaꞌ nu ñi ꞌin Ndiose, cuiꞌ ca nu nde cunan neꞌ scasca nu culoꞌo ꞌin neꞌ, seꞌen nu quine ꞌin neꞌ chaꞌ nu nduꞌhui cuiyaꞌ tiꞌ neꞌ,
\v 4 tyiꞌo tsoꞌ neꞌ siiꞌ chaꞌ nu ñi ꞌin Ndiose, loꞌ chcui nchaꞌan neꞌ scasca chaꞌ nu ndlo que nten.
\v 5 Una nuꞌhuin xñi cunta ꞌin loꞌo nchgaa loo chaꞌ, ta loo tyijyin scasca nu tiꞌi, chcuiꞌ chaꞌ tsuꞌhue ꞌin Ndiose, loꞌ tucua tñan ñaꞌan chaꞌ nu cuaꞌ mdaa ñi ꞌin.
\v 6 Siꞌyana nanꞌ cuaꞌ mdyaan ꞌñan, ntan ñi xaa cujui neꞌ ꞌñan, cuaꞌ nchcui cuiiꞌ tsaan nu ntsuꞌhui chaꞌ tyiꞌon loo chendyu re.
\v 7 Nanꞌ cuaꞌ mꞌnin canan loꞌo tñan re, cuaꞌ mꞌni tyin tñan nu ntsuꞌhui chaꞌ cuꞌnin, loꞌ mxuꞌhua seꞌen chaꞌ nu ya quiꞌan tinꞌ.
\v 8 Cuaꞌ ñii ntan chaꞌ tsuꞌhue nu taa Ñi Xꞌnan na ꞌñan tsaan nu cuaꞌ mdiꞌin tyaa ñi, ñi nu lca bse nu ñi ndiꞌin chaꞌ ꞌin, una siꞌi ꞌñan nanꞌ ti, cuiꞌ ca nu loꞌo nchgaa nu tsuꞌhue ntsuꞌhui tiquee nta tsaan nu quiaan ñi xiyaꞌ.
\s Ycuiꞌ yu Pablo loꞌo Timoteo sca cunta
\p
\v 9 Chaꞌ tca caan seꞌen ndiꞌin nu ndla la,
\v 10 siꞌyana yu Demas ngula yaaꞌ yu ꞌñan loꞌ mxitucui yu nde quichen Tesalónica, siꞌyana lyee la lca tiquee yu loꞌo chaꞌ nu nchca loo chendyu re. Yu Crescente nguiaa yu seꞌen lca Galacia, loꞌ yu Tito nguiaa yu seꞌen lca Dalmacia,
\v 11 xca ti yu Luca nguinu yu loꞌon. Can loꞌo ꞌin yu Marco siꞌyana tsuꞌhue nda yaaꞌ yu ꞌñan loꞌo tñan ꞌin Ndiose.
\v 12 Yu Tíquico cuaꞌ nguaꞌan tñan ꞌin yu nguiaa yu quichen Efeso.
\v 13 Xa caan, quian ꞌya teꞌ nchcunꞌ xaa tlyaꞌ, cuiꞌ nu mxnun quichen Troas ñaꞌan ꞌin yu Carpo, cuiꞌya nchgaa quityi canꞌ loꞌo nu ndon loo la canꞌ.
\v 14 Yu Jantro cuityi chcuan canꞌ, lyee ꞌa mdaa yu chaꞌ nsinꞌ tiꞌ ꞌñan, una Ñi Xꞌnan na —suꞌhua lyiyaꞌ ꞌin yu cuaꞌ ñaꞌaan tñan mꞌni yu—.
\v 15 Cuañaꞌan nuꞌhuin xñi cunta ꞌin loꞌo yu, siꞌyana lyee ꞌa mnaꞌan tiꞌi yu ꞌin na loꞌo chaꞌ nu ndloꞌo na.
\v 16 Xa culoo ncua cuiyaꞌ chaꞌ ꞌñan tloo bsya, a tucui nu mda yaaꞌ ꞌñan, nchgaa tucui ngula yaaꞌ ꞌñan, una jñan ꞌin Ndiose siꞌyana a cuꞌni cunta ñi chaꞌ canꞌ.
\v 17 Una a ngula yaaꞌ Ñi Xꞌnan na ꞌñan, cuiꞌ ca nu mdaa ñi juesa ycuinꞌ ñaꞌan nguiaa chaꞌ tsuꞌhue ꞌin Ndiose, cuañaꞌan yatoꞌo ngune ꞌin nchgaa neꞌ gentil. Cuiꞌ ñi —ngulo laa ñi ꞌñan tuꞌhua cuichi—,
\v 18 ticuiꞌ cuañaꞌan culo laa Ñi Xꞌnan na ꞌñan loꞌo nchgaa la ñaꞌan chaꞌ nu tiꞌ ljyaan ꞌñan, loꞌ cuꞌni ñi cunta ꞌñan tsayaꞌ nu tyiꞌan la seꞌen nu ndlo ñi tñan la niꞌ cuaan, scati ñi cuꞌni tnu na tsala xaa. Amen.
\s Mslaꞌ taꞌa yu Pablo loꞌo Timoteo
\p
\v 19 Chcuiꞌ chaꞌ ꞌin Prisca loꞌo Aquila tñan loon, a cunta loꞌo Onesíforo tsatlyu loꞌo nu ndiꞌin naꞌan ꞌin yu.
\v 20 Yu Erasto nguinu yu quichen Corinto, loꞌ yu Trófimo mxnun ꞌin yu quichen Mileto siꞌyana tiꞌi yu.
\v 21 Chaꞌ tca caan lja nu tiꞌ lyijyi quiꞌya tiꞌin tlyaꞌ. Yu Eubulo nchcuiꞌ chaꞌ yu ꞌin, a cunta loꞌo yu Pudente, yu Lino, Claudia, nchgaa jun nchcuiꞌ chaꞌ jun ꞌin.
\v 22 Ñi Xꞌnan na Jesucristo tyiꞌin ñi loꞌo tsala xaa, cuiꞌ chaꞌ tsuꞌhue ꞌin ñi quinu loꞌo um cunda scaa um. Amen.