\id TIT - Nopala (Chatino) NT [cya] - Mexico 2013 (web 2014)
\h TITO
\toc1 Tito
\toc2 Tito
\toc3 Tit
\mt1 Tito
\c 1
\s Yu Pablo nchcuiꞌ chaꞌ yu ꞌin Tito
\p
\v 1 Nanꞌ yu Pablo nu lca nguso ꞌin Ndiose, loꞌ Jesucristo nguaꞌan tñan ñi ꞌñan tsa ycuinꞌ chaꞌ tsuꞌhue ꞌin ñi, ñaꞌan ca siꞌyana tsa quiꞌan tiꞌ nchgaa nu cuaꞌ ngulohui Ndiose ꞌin, loꞌ quiꞌya canꞌ cunta ñaꞌan ntsuꞌhui chaꞌ tyuꞌhui sca chendyu nu luhui,
\v 2 lja nducua tloo canꞌ chendyu nu a tsatii ꞌa, sca chaꞌ nu cuaꞌ mdiꞌin tyaa Ndiose xa nu tiꞌ lyijyi tñan ñi chendyu, loꞌ a tca cuiñi ñi.
\v 3 Ya tucua tsaan ngulyo scua la ñi chaꞌ tsuꞌhue ꞌin ñi, loꞌ mxnu ñi cunta ꞌñan siꞌyana chcuinꞌ chaꞌ re loꞌo nten. Cuiꞌ Ndiose, Ñi nu ndlo laa ꞌin na, lca nu ngulo tñan ꞌñan.
\v 4 Caꞌan tñan quityi re ꞌin nuꞌhuin Tito, nu lca ñaꞌan nchca tiꞌ sca sñenꞌ can loꞌo chaꞌ nu ndiya quiꞌan tiꞌ na. Nchca tinꞌ siꞌyana Stina Ndiose loꞌo Ñi Xꞌnan na Jesucristo, Ñi nu ndlo laa ꞌin na, taa ñi chaꞌ tsuꞌhue nu chuꞌhui niꞌ cusya ꞌin, ñaꞌan ꞌtnan tiꞌ ñi ꞌin, loꞌ cuꞌni ñi chaꞌ tyiꞌin tsuꞌhue.
\s Chaꞌ ꞌin yu nu ntsuꞌhui cunta ꞌin jun
\p
\v 5 Nde chaꞌ mxnun ꞌin seꞌen lca Creta siꞌyana xnu scua nchgaa la ñaꞌan chaꞌ nu tiꞌ lyijyi, loꞌ cuꞌni chaꞌ tyiꞌo ton tucua snan yu nu chuꞌhui cunta ꞌin jun taꞌa na cunda scaa quichen, tsañaꞌan chaꞌ nu cuaꞌ ycuinꞌ loꞌo.
\v 6 Una nchca tiꞌ sca yu nu nduꞌhui chendyu nu luhui, a cunta scati cuilyiꞌo yu, loꞌ chaꞌ loꞌo sñeꞌ yu ndiya quiꞌan tiꞌ ꞌin Ndiose, nu a sca chaꞌ nducui nchaꞌan ꞌin, loꞌ ñi a lyeꞌ tiꞌ.
\v 7 Canꞌ chaꞌ yu nu chuꞌhui cunta ꞌin jun ꞌni chaꞌ sca yu nu nduꞌhui chendyu nu luhui, siꞌyana tñan ꞌin Ndiose chuꞌhui yu cunta, nchca tiꞌ sca yu nu a siyeꞌ, siꞌi la xnan nguisinꞌ tiꞌ yu, siꞌi na ndaꞌan yiꞌo yu, uta ndiꞌin suun yu, a cunta chaꞌ a nꞌni yu mañan loꞌo tñi,
\v 8 nꞌni yu cunta ꞌin nchgaa nu ndiyaa seꞌen ndiꞌin yu, nguia nchaꞌan yu nchgaa chaꞌ tsuꞌhue, nxñi yu cunta ꞌin yu, ñi ndiꞌin chaꞌ ꞌin yu, luhui chaꞌ tiyaa ꞌin yu, loꞌ siꞌi la xnan nꞌni yu sca chaꞌ,
\v 9 a cunta nxñi ton yu ꞌin yu loꞌo chaꞌ tsuꞌhue nu mꞌni chaꞌan yu, la xacanꞌ caja ñaꞌan chcuiꞌ yu chaꞌ nu ñi ꞌin Ndiose loꞌo xca tucui loꞌ taa yu chaꞌ tnu tiquee ꞌin canꞌ, a cunta loꞌo nu nchcuiꞌ caꞌan chaꞌ canꞌ, cunan yu ñaꞌan nu quiꞌya canꞌ chaꞌ tiyaa.
\v 10 Siꞌyana quiꞌan ꞌa nu lyeꞌ tiꞌ ntsuꞌhui, loꞌ nchcuiꞌ canꞌ chacuiꞌ chaꞌ nu a ntsuꞌhui cunta, ndaꞌan ñilyiꞌo canꞌ ꞌin nten, loꞌ nu lyee lati nguiꞌni cuañaꞌan lca ta nten nu ncua circuncida ꞌin,
\v 11 canꞌ nu ꞌni chaꞌ tucun tucua tuꞌhua, siꞌyana nguiꞌni tinto ñaꞌaan sca naꞌan neꞌ, ndloꞌo canꞌ chaꞌ nu a sca cunta ntsuꞌhui, seꞌen nu cuꞌni canꞌ mañan loꞌo tñi.
\v 12 Ndeñaꞌan ycuiꞌ sca yu Creta, yu nu nꞌni cunta nten taꞌa quichen tyi chaꞌ nu nchcuiꞌ: Neꞌ Creta, a sꞌni chacuiꞌ chaꞌ cuiñi nchcuiꞌ neꞌ, lca neꞌ ñaꞌan nchca tiꞌ sca ꞌni la, tucunꞌ neꞌ loꞌ ndaja neꞌ.
\v 13 Chaꞌ ñi ñaꞌan nchcuiꞌ yu re, canꞌ chaꞌ tla chaꞌ chcuiꞌ loꞌo canꞌ siꞌyana tyon ñi canꞌ loꞌo chaꞌ ꞌin Ndiose,
\v 14 loꞌ a cuꞌni cunta ꞌa canꞌ cuento nu ndlo que neꞌ judio, uta chaꞌ nu ndloꞌo nten nu nxcuan tloo chaꞌ nu ñi.
\v 15 Siꞌyana tsalca nu luhui chaꞌ tiyaa ꞌin, nchgaa chaꞌ luhui ꞌin canꞌ, una nten nducunꞌ nu a ndiya quiꞌan tiꞌ, ñi sca chaꞌ loꞌ a luhui ꞌin canꞌ, hasta loꞌo chaꞌ tiyaa ꞌin loꞌo cusya ꞌin cooꞌ na.
\v 16 Nchcuiꞌ canꞌ siꞌyana ndiya quiꞌan tiꞌ ꞌin Ndiose, una a nchcua taꞌa chaꞌ ꞌin loꞌo ñaꞌan nu nꞌni, lca canꞌ sca nu nducunꞌ loꞌ lyeꞌ tiꞌ, a ca tñan canꞌ cuꞌni tñan tsuꞌhue.
\c 2
\s Tsañaꞌan nguiaa chaꞌ nu ñi ꞌin Ndiose 

\p
\v 1 Una nuꞌhuin ntsuꞌhui chaꞌ culoꞌo ꞌin jun chcui ñaꞌan nguiaa chaꞌ nu ñi ꞌin Ndiose.
\v 2 Tsalca yu quiꞌyu nu lca nten cula, nchca tiꞌ siꞌyana xñi yu cunta ꞌin yu, loꞌo suun ñaꞌan cuꞌni yu, loꞌo chaꞌ tiyaa cuꞌni yu scaa chaꞌ, a cunta tla tyon yu loꞌo chaꞌ nu ndiya quiꞌan tiꞌ yu, loꞌ chuꞌhui chaꞌ tsuꞌhue ꞌin yu loꞌo nten, cuiꞌ cuañaꞌan ta loo yu loꞌo nchgaa loo chaꞌ.
\v 3 Tsalca jun cunaꞌan nu lca nten cula, ticuiꞌ cuañaꞌan loꞌo suun ñaꞌan cuꞌni jun, siꞌi na tyiꞌan jun loꞌo chaꞌ nchca nchcuiꞌ uta loꞌo chaꞌ ndyiꞌyo, cuiꞌ ca nu culoꞌo xñan jun ꞌin jun loꞌo chaꞌ tsuꞌhue,
\v 4 cuañaꞌan tca ta cueen jun ꞌin nchgaa jun cunaꞌan nu tsa suhue ti nu ndiꞌin cuilyiꞌo, siꞌyana chuꞌhui chaꞌ tsuꞌhue ꞌin loꞌo cuilyiꞌo loꞌo sñeꞌ,
\v 5 xñi canꞌ cunta ꞌin loꞌo chaꞌ tiyaa nu luhui, loꞌ chuꞌhui yuhue tiꞌ seꞌen ndiꞌin, cuꞌni canꞌ nchgaa loo tñan tsuꞌhue, a cunta ca jaꞌan canꞌ ꞌin cuilyiꞌo, siꞌyana a caja nu chcuiꞌ cuaꞌ ñaꞌan ti loꞌo chaꞌ tsuꞌhue ꞌin Ndiose.
\v 6 Ticuiꞌ cuañaꞌan loꞌo yu tsa suhue ti, ta cueen ꞌin yu siꞌyana xñi yu cunta ꞌin yu.
\v 7 Nuꞌhuin culoꞌo xñan ꞌin loꞌo nchgaa loo chaꞌ tsuꞌhue, cuiꞌ cuañaꞌan xñi cunta ñaꞌan culoꞌo ꞌin jun loꞌo sca cusya nu ñi,
\v 8 loꞌ chcuiꞌ tsañaꞌan nguiaa chaꞌ nu ñi ꞌin Ndiose, siꞌyana a caja nu chcuiꞌ ta siꞌi ñaꞌan na, hasta loꞌo yu nu tiꞌi tiꞌ ꞌin na xijyiꞌo tiꞌ yu, ñi a caja ꞌa ñaꞌan tiꞌ chcuiꞌ caꞌan canꞌ ꞌin um.
\v 9 Tsalca jun nu lca nguso, ta cueen ꞌin jun siꞌyana ca jaꞌan jun ꞌin xꞌnan jun, cunan jun ñaꞌan nu quinu tsuꞌhue lca tiquee xꞌnan jun, loꞌ a xcuen jun ꞌin canꞌ cuaꞌ ñaꞌan ti,
\v 10 ñi a xñi suꞌhua yaaꞌ jun na ꞌin xꞌnan jun, cuiꞌ ca nu ca ñi chaꞌ ꞌin jun loꞌo nchgaa loo chaꞌ, siꞌyana cuañaꞌan tca cuꞌni loꞌo la ñaꞌan jun chaꞌ tsuꞌhue ꞌin Ndiose, Ñi nu ndlo laa ꞌin na.
\v 11 Canꞌ chaꞌ ncua chcanꞌ loo chaꞌ tsuꞌhue ꞌin Ndiose, siꞌyana tyiꞌo laa nchgaa nten.
\v 12 Chaꞌ tsuꞌhue canꞌ ndloꞌo na ꞌin na siꞌyana xcuan tloo na nchgaa loo chaꞌ ngunanꞌ nu nchcui tiꞌ nten, loꞌ tyuꞌhui na sca chendyu nu luhui, xñi na cunta ꞌin na tsañaꞌan nu nchca tiꞌ Ndiose,
\v 13 cuiꞌ siꞌyana nta na chaꞌ tsuꞌhue nu cuaꞌ mdiꞌin tyaa ñi xa nu ca chcanꞌ loo chaꞌ cuiyaꞌ ꞌin Jesucristo, Ñi nu ndlo laa ꞌin na loꞌ lca ñi Ndiose nu tlyu lati.
\v 14 Mdyaa ñi ꞌin ñi siꞌya naa nten na, ñaꞌan ca siꞌyana tyiꞌo laa na seꞌen mdaꞌan na loo chaꞌ ngunanꞌ, loꞌ suhui ñi ꞌin na siꞌyana ca na sca nten nu tucua tloo ñi ꞌin, nu suꞌhua loo nchgaa tñan tsuꞌhue.
\v 15 Cuiꞌ chaꞌ re culoꞌo loꞌ taa chaꞌ tnu tiquee ꞌin jun, a cunta tla chaꞌ tyiꞌin tyaa, loꞌ a caja nu xcuan tloo ꞌin.
\c 3
\s Quinu luhui na siꞌya chaꞌ tsuꞌhue ꞌin Ndiose 

\p
\v 1 Xuꞌhua tiꞌ jun siꞌyana ca jaꞌan jun ꞌin bsya tnu loꞌo bsya nu suhue la, tucua jun tñan chaꞌ nu chcuiꞌ canꞌ, tsuꞌhue ntsuꞌhui tiquee jun cuꞌni jun nchgaa loo tñan tsuꞌhue.
\v 2 A taja jun ꞌin ñi sca tucui, a cunan jun chaꞌ cusuun, cuiꞌ ca nu cuti ti tsa chaꞌ ꞌin jun, loꞌ suun ñaꞌan culoꞌo xñan jun ꞌin jun loꞌo nchgaa tucui.
\v 3 Siꞌyana tiꞌ culoo loꞌo nareꞌ ncua na sca nu tinto, mꞌni lyeꞌ tiꞌ na, mdaꞌan quinanꞌ yuꞌhui na, siyaꞌ ti mdyaa na ꞌin na loo chaꞌ ngunanꞌ, nchgaa loo chaꞌ nu nchcui tiꞌ nten, mdaꞌan na ñaꞌan nu ncua tiꞌ na, a cunta mꞌni jñan tiꞌ na, jui nu mnaꞌan tiꞌi ꞌin na loꞌ cuañaꞌan mnaꞌan tiꞌi na ꞌin canꞌ.
\v 4 Una ncua chcanꞌ loo chaꞌ tsuꞌhue ꞌin Ndiose, Ñi nu ndlo laa ꞌin na, tsala ñaꞌan mñaꞌan ꞌtnan tiꞌ ñi ꞌin nten,
\v 5 ngulo laa ñi ꞌin na, una siꞌi siꞌyana ndeꞌen la tñan tsuꞌhue nu cuaꞌ mꞌni na, cuiꞌ ca nu siꞌya chaꞌ tsuꞌhue ꞌin ñi, a cunta mjyiꞌan ñi ꞌin na loꞌ mꞌni ñi chaꞌ lca na sca nten nu cui ti, mxitsaꞌan ñi chaꞌ tiyaa ꞌin na siꞌya Espíritu nu Luhui ꞌin ñi,
\v 6 nu cuaꞌ mdaa ñi chaꞌan yuꞌhui niꞌ cusya ꞌin na siꞌya Jesucristo, Ñi nu ndlo laa ꞌin na.
\v 7 Siꞌya chaꞌ tsuꞌhue ꞌin ñi cuaꞌ nguinu luhui na tloo ñi, cuañaꞌan tca chcuan na chendyu nu a tsatii ꞌa ꞌin na, cuiꞌ chaꞌ nu nducua tloo na cuaꞌ ñii.
\v 8 Nde chaꞌ nu ñi, loꞌ nchca tinꞌ siꞌyana tyiꞌin tya tla chaꞌ re: Jun nu ndiya quiꞌan tiꞌ ꞌin Ndiose suꞌhua loo jun nchgaa loo chaꞌ tsuꞌhue. Nde chaꞌ nu tsuꞌhue loꞌ nda yaaꞌ na ꞌin nchgaa tucui.
\v 9 Una a sten yuꞌhui loꞌo chaꞌ tinto nu ndlo que nten, cuiꞌ cuañaꞌan loꞌo ñaꞌan nu naan ta nten cula ꞌin na, a taa yaꞌ sten loꞌo chaꞌ cusuun uta chcuiꞌ tyijyin loꞌo neꞌ siꞌya chaꞌ ꞌin lee, siꞌyana a ntsuꞌhui lyoo chaꞌ canꞌ loꞌ a la nda yaaꞌ na.
\v 10 Chaꞌ ntsuꞌhui nu nchca tiꞌ suꞌhue tiꞌin ꞌin jun taꞌa na, chcuiꞌ tla loꞌo canꞌ tucua snan yaꞌ, loꞌ chaꞌ a cuꞌni cunta chaꞌ canꞌ siyaꞌ ti culo tsoꞌ ꞌin,
\v 11 loꞌ ca cuiyaꞌ tiꞌ siꞌyana cuaꞌ ngunanꞌ yuꞌhui canꞌ tsañaꞌan nguiꞌni quiꞌya, loꞌ ticuiiꞌ nsoꞌ tucua quiꞌya chonꞌ.
\s Ycuiꞌ yu Pablo loꞌo Tito sca cunta
\p
\v 12 Xa nu caꞌan tñan ꞌin yu Artemas uta ꞌin yu Tíquico tsaa yu seꞌen ndiꞌin, cunan ñaꞌan tsaa nu ndla lati quichen Nicópolis, siꞌyana canꞌ ntsuꞌhui tiqueen tiꞌin tsaan nu quia tiꞌin tlyaꞌ.
\v 13 Yu Zenas nu mꞌni chaꞌan chaꞌ ꞌin lee, loꞌo yu Apolo canꞌ, cunan ñaꞌan ta yaaꞌ ꞌin yu loꞌo na nu cunajoꞌo ꞌin yu tucueen tsaa yu, ñaꞌan ca siꞌyana a sca na tsa lyijyi ꞌin yu.
\v 14 Cuañaꞌan loꞌo jun taꞌa na, cuꞌni chaꞌan la jun cuꞌni jun nchgaa loo tñan tsuꞌhue loꞌ ta yaaꞌ jun ꞌin nu ꞌni chaꞌ ꞌin, siꞌyana ca chcanꞌ loo tñan nu nguiꞌni jun.
\s Mslaꞌ taꞌa yu Pablo loꞌo yu Tito
\p
\v 15 Nchgaa jun taꞌa ndiꞌin hua re nchcuiꞌ chaꞌ jun ꞌin, cuiꞌ cuañaꞌan chcuiꞌ chaꞌ ꞌin jun tñan loo hua, nchgaa taꞌa tsuꞌhue na taꞌa ndiya quiꞌan tiꞌ na. Cuiꞌ chaꞌ tsuꞌhue ꞌin Ndiose quinu loꞌo um cunda scaa um. Amen.