\id PHM - Nopala (Chatino) NT [cya] - Mexico 2013 (web 2014)
\h FILEMON
\toc1 Filemón
\toc2 Filemón
\toc3 Flm
\mt1 Filemón
\c 1
\s Yu Pablo nchcuiꞌ chaꞌ yu ꞌin Filemón
\p
\v 1 Nanꞌ yu Pablo nu ntsuꞌhui naꞌan chcuan siꞌya chaꞌ ꞌin Jesucristo, chcuaa hua loꞌo yu taꞌa na Timoteo caꞌan tñan hua sca quityi re ꞌin um, ñi Filemón, ꞌun nu ndyuꞌhui cuiyaꞌ tiꞌ hua ꞌin, nu sca loo ti tñan nguiꞌni na loꞌo um.
\v 2 Nchcuiꞌ chaꞌ hua ꞌin ñi taꞌa na Apia, ñi nu ndyuꞌhui cuiyaꞌ tiꞌ hua ꞌin, a cunta loꞌo yu Arquipo, yu nu taꞌa nsuꞌhua na juesa loꞌo tñan ꞌin Ndiose, loꞌo nchgaa la ñaꞌan jun taꞌa na nu ndiyoꞌ tiꞌin ñaꞌan ꞌin um.
\v 3 Stina Ndiose loꞌo Ñi Xꞌnan na Jesucristo taa ñi chaꞌ tsuꞌhue nu chuꞌhui niꞌ cusya ꞌin um, loꞌ cuꞌni ñi chaꞌ tyiꞌin tsuꞌhue um.
\s Nsuꞌhua loo yu Filemón chaꞌ ꞌin Ndiose
\p
\v 4 Ndyaan xuꞌhue ꞌin Ndiose ꞌñan, loꞌ nchgaa yaꞌ nchcuinꞌ lyiꞌon ꞌin ñi ndiya yuꞌhui tinꞌ ꞌin um,
\v 5 siꞌyana nen chaꞌ ñaꞌan ntsuꞌhui chaꞌ tsuꞌhue ꞌin um, loꞌo ñaꞌan nu ndiya quiꞌan tiꞌ um ꞌin Ñi Xꞌnan na Jesús, cuiꞌ cuañaꞌan lca tiquee um loꞌo nchgaa la ñaꞌan jun taꞌa na.
\v 6 Njñan ꞌin Ndiose siꞌyana loꞌo ñaꞌan nu ndiya quiꞌan tiꞌ um, cuañaꞌan quiꞌya la um cunta tsala ñaꞌan tlyu chaꞌ tsuꞌhue nu cuaꞌ jui ꞌin um siꞌya Cristo Jesús.
\v 7 Cuiꞌ siꞌya chaꞌ tsuꞌhue nu ndyiꞌo tiquee um, canꞌ chaꞌ tsuꞌhue ntsuꞌhui tiquee hua, ndyijyi la chaꞌ tnu tiquee ꞌin hua, loꞌ siꞌya um, ꞌun ñi taꞌa na, jui la chaꞌ tnu tiquee ꞌin nchgaa la ñaꞌan jun taꞌa na.
\s Yu Pablo ycuiꞌ yu chaꞌ ꞌin Onésimo
\p
\v 8 Siyaꞌ ntsuꞌhui suun ꞌñan culon tñan ꞌin um loꞌo chaꞌ cuiyaꞌ ꞌin Cristo,
\v 9 una tsuꞌhue lati jñan chaꞌ tsuꞌhue ꞌin um tsañaꞌan nten nu lca um, nanꞌ yu Pablo cuaꞌ culan, loꞌ ntsuꞌhuin naꞌan chcuan siꞌya chaꞌ ꞌin Jesucristo.
\v 10 Jñan chaꞌ tsuꞌhue ꞌin um siꞌya chaꞌ ꞌin yu Onésimo, yu nu lca ñaꞌan nchca tiꞌ sca sñenꞌ can, siꞌyana seꞌen ntsuꞌhuin naꞌan chcuan ya quiꞌan tiꞌ yu ꞌin Ndiose.
\v 11 Jui sca xaa ncua yu sca nu a seꞌen ñaꞌan chaꞌ ꞌin, una cuaꞌ ñii tsatlyu tucua tloo na ꞌin yu.
\v 12 Canꞌ chaꞌ nde nguaꞌan tñan ꞌin yu seꞌen ndiꞌin um, cuan xuꞌhue um ꞌin yu tsañaꞌan nducuan xuꞌhue um ꞌñan nanꞌ.
\v 13 Lca tiqueen tiꞌ quinu la yu loꞌon, loꞌ ta yaaꞌ yu ꞌñan loꞌo cunta ꞌin um seꞌen ntsuꞌhuin naꞌan chcuan siꞌya chaꞌ tsuꞌhue ꞌin Ndiose nu nchcuinꞌ.
\v 14 Una a ncua tinꞌ cuꞌnin sca chaꞌ xa nu tiꞌ lyijyi quitsanꞌ ꞌin um, cuiꞌ ca nu nchca tinꞌ cuꞌni um sca chaꞌ tsuꞌhue loo nchgaa lca tiquee um, loꞌ siꞌi loꞌo juesa.
\v 15 Tinaꞌan siꞌya chaꞌ re mdoꞌo tsoꞌ yu siiꞌ um sca coꞌ xaa, siꞌyana xitucui yu loꞌ chcuan um cunta ꞌin yu tsala xaa,
\v 16 una siꞌi ñaꞌan nchca tiꞌ sca nguso ti, cuiꞌ ca nu lyee la cuꞌni cunta um ꞌin yu tsañaꞌan sca taꞌa na nu ndyuꞌhui cuiyaꞌ tiꞌ na ꞌin, siꞌyana chaꞌ nu ꞌñan lyee ꞌa taꞌa yu ꞌñan, una nde lyee la tsoꞌ nu ꞌin um, a cunta lca yu taꞌa ndiya quiꞌan tiꞌ um ꞌin Ñi Xꞌnan na.
\v 17 Chaꞌ ñan tiꞌ um lcan taꞌa ndiya quiꞌan tiꞌ um, cuan xuꞌhue um ꞌin yu tsañaꞌan nducuan xuꞌhue um ꞌñan nanꞌ.
\v 18 Chaꞌ ta ndeꞌen la na mꞌni yu loꞌo um uta nducui yu ꞌin um, xnu um ꞌin na cunta ꞌñan.
\v 19 Nanꞌ yu Pablo, cuinꞌ nguaꞌan chaꞌ re, nanꞌ suꞌhuan lyiyanꞌ ꞌin na ꞌin um. Ntsuꞌhui suun ꞌñan chcuinꞌ loꞌo um siꞌyana hasta loꞌo cusya ꞌin um nducui um ꞌñan.
\v 20 Chaꞌ ñi, ꞌun ñi taꞌa na, nchca tinꞌ siꞌyana cuꞌni um sca chaꞌ tsuꞌhue loꞌon siꞌya chaꞌ ꞌin Ñi Xꞌnan na, loꞌ taa um chaꞌ tnu tiquee ꞌñan siꞌyana sca chaꞌ ti ꞌin na loꞌo ñi.
\v 21 A nguiꞌni tucua tinꞌ nguaꞌan quityi re ꞌin um siꞌyana jlyo tinꞌ lyee lati cuꞌni um que ñaꞌan nu nchcuinꞌ loꞌo um.
\v 22 A cunta cunan um seꞌen quinun xa ljyaan seꞌen ndiꞌin um, siꞌyana nducua tloon ñaꞌan taꞌa na loꞌo um tsañaꞌan nu njñan um ꞌin Ndiose.
\s Mslaꞌ taꞌa yu Pablo loꞌo Filemón
\p
\v 23 Nchcuiꞌ chaꞌ yu Epafras ꞌin um, yu nu taꞌa ntsuꞌhuin naꞌan chcuan siꞌya chaꞌ ꞌin Cristo Jesús.
\v 24 Tsalca yu taꞌa nguiꞌni hua tñan nchcuiꞌ chaꞌ yu ꞌin um: Yu Marco, yu Aristarco, yu Demas, loꞌo yu Luca.
\v 25 Cuiꞌ chaꞌ tsuꞌhue ꞌin Ñi Xꞌnan na Jesucristo quinu yuꞌhui niꞌ cusya ꞌin um. Amen.