\id HEB - Nopala (Chatino) NT [cya] - Mexico 2013 (web 2014)
\h HEBREOS
\toc1 Hebreos
\toc2 Hebreos
\toc3 Heb
\mt1 Hebreos
\c 1
\s Nchcuiꞌ Ndiose loꞌo na loꞌo cunta ꞌin Sñeꞌ ñi
\p
\v 1 Ndiose tyun ꞌa juesa ycuiꞌ ñi cuaꞌ sꞌni, scasca ñaꞌan ycuiꞌ ñi loꞌo nu ncua nten cula ꞌin na tsañaꞌan mxiycuiꞌ ñi ꞌin yu ncua nguso ꞌin ñi,
\v 2 una ya tucua tsaan, loꞌ cuiꞌ cuaꞌ ñii, Ndiose nchcuiꞌ ñi loꞌo na loꞌo cunta ꞌin Sñeꞌ ñi, nchgaa loo chaꞌ mdyaa ñi cunta ꞌin canꞌ, loꞌ cuiꞌ siꞌya ñi mtñan Ndiose chendyu,
\v 3 lca ñi xaa ꞌin Ndiose, loꞌ chcui ñaꞌan lca Ndiose lca ñi, cuiꞌ ñi lyiꞌya ñi cunta nchgaa loo chaꞌ siꞌyana tla chaꞌ cuiyaꞌ ꞌin ñi loꞌo chaꞌ nu nchcuiꞌ ñi. Xa cuaꞌ mxicuten ñi quiꞌya ꞌin na —yten tucua ñi tsoꞌ cueen ꞌin Ndiose nu nducua niꞌ cuaan—.
\v 4 Yatoꞌo ndon loo la chaꞌ ꞌin ñi que ꞌin angujle, siꞌyana tlyu la chaꞌ cuiyaꞌ jui ꞌin ñi que ꞌin canꞌ.
\s Ndon loo la chaꞌ ꞌin Sñeꞌ Ndiose que ꞌin angujle
\p
\v 5 Siꞌyana ñi sca angujle loꞌ a juin Ndiose loꞌo: —Nuꞌhuin lca Sñenꞌ, loꞌ nanꞌ lcan Sti cuaꞌ ñii—, loꞌ nde xca chaꞌ nu a ycuiꞌ ñi chaꞌ ꞌin angujle: —Nanꞌ ntsuꞌhui chaꞌ can Sti ñi, loꞌ cuiꞌ ñi ntsuꞌhui chaꞌ ca ñi sñenꞌ nanꞌ—.
\v 6 A cunta xa caꞌan tñan ñi ycuiꞌ ca Sñeꞌ ñi loo chendyu re, ndeñaꞌan mdiꞌin tyaa ñi chaꞌ: —Nchgaa angujle ꞌin Ndiose ntsuꞌhui chaꞌ cuꞌni tnu ꞌin canꞌ—.
\v 7 Nde chaꞌ nu mꞌni caꞌan ꞌin angujle canꞌ: —Nguiꞌni ñi chaꞌ siꞌyana sca cuiꞌin ti lca angujle ꞌin ñi, loꞌ nguiꞌni ñi chaꞌ siꞌyana sca quiiꞌ ti lca nguso canꞌ ꞌin ñi—.
\v 8 Una ndeñaꞌan nguinu scua chaꞌ ꞌin Sñeꞌ ñi: —Seꞌen nu ndlo um tñan, ꞌun ñi nu lca Ndiose, a ntsuꞌhui chaꞌ tyii chaꞌ cuiyaꞌ ꞌin um. Tsañaꞌan nu ndlo um tñan lca na sca chaꞌ cuiyaꞌ nu ñi.
\v 9 Cuiꞌ siꞌyana nsuꞌhua loo um chaꞌ nu ñi, loꞌ nxcuan tloo um chaꞌ ngunanꞌ, canꞌ chaꞌ ngulo ton Ndiose ꞌin um, ñi nu lca Ndiose ꞌin um, loꞌ mꞌni ñi chaꞌ siꞌyana lyee la ca tsuꞌhue chuꞌhui tiquee um que ꞌin nchgaa la tucui—.
\v 10 Loꞌ tiꞌ juin la ñi: —ꞌUn ñi nu lca Xꞌnan hua, cuiꞌ um mdiꞌin tyaa suun um chendyu re tiꞌ culoo, loꞌ niꞌ cuaan lca na nu mtñan yaaꞌ um.
\v 11 Ñaꞌaan na re tsatii chaꞌ ꞌin na, una ꞌun ndiꞌin um tsala xaa, loꞌ ñaꞌaan na re nchca cula na tsañaꞌan nchca tiꞌ sca teꞌ,
\v 12 ntsuꞌhui chaꞌ xcunꞌ ꞌin na tsañaꞌan nchca tiꞌ sca teꞌ, loꞌ chaꞌan ñaꞌan na, una ꞌun scañaꞌan ti um, ñi a ntsuꞌhui chaꞌ tsatii chaꞌ ꞌin um—.
\v 13 Siꞌyana ñi sca angujle loꞌ a juin Ndiose loꞌo: —Chcua tsoꞌ cueen ꞌñan lja xicuꞌnin ꞌin taꞌa cusuun quinu nde tuquiyaꞌ—.
\v 14 ¿Ta siꞌi nchgaa angujle lca ñaꞌan nchca tiꞌ sca nguso ꞌin Ndiose nu nguaꞌan tñan ñi ta yaaꞌ ꞌin tsalca nu ntsuꞌhui chaꞌ culo laa ñi ꞌin?
\c 2
\s Chaꞌ tlyu lca na tsañaꞌan tyiꞌo laa na 

\p
\v 1 Canꞌ chaꞌ, ꞌni chaꞌ nde lyee la suꞌhua loo na chaꞌ nu cuaꞌ ngune ꞌin na, chaꞌ siꞌi nde chcua tijyoꞌ na siiꞌ chaꞌ canꞌ.
\v 2 Chaꞌ tla nguinu scua chaꞌ nu ycuiꞌ angujle nu hasta mꞌni chaꞌ mdijin nu tiꞌi nchgaa nu msti quiyaꞌ loꞌ a ncua jaꞌan ꞌin na,
\v 3 ¿ñaꞌan la ca nareꞌ, chaꞌ a suꞌhua loo na sca chaꞌ nu tlyu nu ntsuꞌhui chaꞌ culo laa ꞌin na? Cuiꞌ chaꞌ re lca na chaꞌ nu ycuiꞌ Ñi Xꞌnan na culo nducua la, loꞌ nten nu ngune ꞌin chaꞌ re mxnu scua tla neꞌ ꞌin na loꞌo na,
\v 4 Ndiose mdaa ñi ca ñi suun loꞌo chaꞌ nu mdaꞌan ycuiꞌ jun canꞌ loꞌo scasca chaꞌ nu tnu nu mꞌni ñi, chaꞌ nu cuhue tiꞌ neꞌ, loꞌ ncua chcanꞌ loo scasca chaꞌ cuiyaꞌ ꞌin ñi, a cunta Espíritu nu Luhui ꞌin ñi mtsa scasca chaꞌ cuiyaꞌ ꞌin jun tsañaꞌan nu ncua tiꞌ ñi. Ñi nu mducua suun chaꞌ tyiꞌo laa na
\v 5 Siꞌyana Ndiose a mxnu ñi chaꞌ cuiyaꞌ yaaꞌ angujle nu culo tñan chendyu tiyaa xaa, tsañaꞌan chaꞌ nu mdyisnan nchcuiꞌ na cuaꞌ ñii.
\v 6 Una ntsuꞌhui nu ycuiꞌ sca chaꞌ, loꞌ ndeñaꞌan nguinu scua na: ¿—Tucui lca yu quiꞌyu, siꞌyana chuꞌhui yuhue tiꞌ um ꞌin yu, loꞌ tucui lca sñeꞌ yu siꞌyana suꞌhua loo um ꞌin?
\v 7 Sca coꞌ xaa mꞌni lyoꞌ la um ꞌin yu que ꞌin angujle, una yatoꞌo mscuen cuaan um ꞌin yu loꞌ msuꞌhua loo um ꞌin yu, mdaa um chaꞌ cuiyaꞌ ꞌin yu siꞌyana culo yu tñan nchgaa na nu mtñan yaaꞌ um,
\v 8 a sca chaꞌ ta a nguinu nde tuquiyaꞌ yu—. Chaꞌ cuañaꞌan mxnu ñi nchgaa loo chaꞌ yaaꞌ yu, a sca chaꞌ ta a nguinu cunta ꞌin yu xacanꞌ, una tiꞌ lyijyi ca chcanꞌ loo chaꞌ siꞌyana culo yu tñan nchgaa loo chaꞌ.
\v 9 Una cuaꞌ nanꞌ ꞌya na ꞌin Jesús, —ñi nu mꞌni lyoꞌ la Ndiose ꞌin que ꞌin angujle, una cuaꞌ ñii mscuen cuaan ñi ꞌin canꞌ, msuꞌhua loo ñi ꞌin— siꞌya chaꞌ nu mdijin ñi nu tiꞌi xa ngujui ñi, loꞌ siꞌya chaꞌ tsuꞌhue nu mꞌni Ndiose loꞌo nchgaa nten mꞌni ñi chaꞌ ngujui canꞌ tñan loo na.
\v 10 Ndiose ntsuꞌhui ñi cunta nchgaa loo chaꞌ, loꞌ siꞌya ñi nguiaꞌ nchgaa loo na, loꞌ mdoꞌo tiquee ñi tsa loꞌo ñi quiꞌan ꞌa nten nu ca sñeꞌ ñi la niꞌ cuaan, canꞌ chaꞌ ntsuꞌhui suun ꞌin ñi mdaa ñi chaꞌ cuiyaꞌ mdijin Jesús nu tiꞌi, loꞌ cuañaꞌan cuꞌni chcui ñi chaꞌ ꞌin canꞌ, ñi nu mducua suun chaꞌ tyiꞌo laa nten.
\v 11 Siꞌyana ñi nu nguiꞌni chaꞌ nguinu luhui nten tloo Ndiose, loꞌ nu cuaꞌ mxnu luhui ñi ꞌin canꞌ sca sti ti ñi loꞌo, canꞌ chaꞌ a nxijyiꞌo tiꞌ ñi chcuiꞌ ñi loꞌo canꞌ lca taꞌa ngula ñi,
\v 12 loꞌ ndeñaꞌan juin ñi: —Chcuinꞌ loꞌo taꞌan tucui ca lca um, loꞌ lja seꞌen ndiyoꞌ tiꞌin hua taan loo um—.
\v 13 Nde xca chaꞌ nu ycuiꞌ ñi: —Nanꞌ tyiꞌin tyaan quiloon ꞌin Ndiose—. Loꞌ xiyaꞌ juin ñi: —Ñaꞌan jan ñi, nde ndiꞌin nanꞌ loꞌo sñeꞌ Ndiose nu mdaa ñi ꞌñan—.
\v 14 Tsañaꞌan nu lca na cunanꞌ nten chendyu, cuiꞌ cuañaꞌan ncua ñi ycuiꞌ ñi, loꞌ ngujui ñi siꞌyana cujlyo ñi ꞌin laxaꞌan nu ntsuꞌhui chaꞌ cuiyaꞌ ꞌin loꞌo chaꞌ ndyija,
\v 15 loꞌ culo laa ñi ꞌin nchgaa nu nsñi suꞌhua yaaꞌ chaꞌ ndyija ꞌin lja nu ndaꞌan ytsen canꞌ loo chendyu re.
\v 16 Cuaꞌ jlyo tiꞌ na siꞌyana a yuꞌhui yuhue tiꞌ ñi ꞌin angujle, cuiꞌ ca nu —msuꞌhua yuhue tiꞌ tiquee ñi ꞌin sñeꞌ ta nten ꞌin Abraham—.
\v 17 Canꞌ chaꞌ mꞌni ꞌa chaꞌ mꞌni ñi ꞌin ñi tsañaꞌan ndiꞌin chaꞌ ꞌin taꞌa ñi loꞌo nchgaa loo chaꞌ, ñaꞌan ca siꞌyana ñaꞌan ꞌtnan tiꞌ ñi ꞌin nten loꞌ ca ñi sca nu ndon loo lati nu nsuꞌhua loo tñan ꞌin Ndiose, loꞌ xicuten ñi quiꞌya ꞌin na.
\v 18 Loo nu ycuiꞌ ñi mdijin ñi scasca nu tiꞌi, canꞌ chaꞌ nchca ꞌin ñi ta yaaꞌ ñi ꞌin nchgaa nu ndijin chaꞌ.
\c 3
\s Ndon loo la Cristo que ꞌin Moisé 

\p
\v 1 Canꞌ chaꞌ, ꞌun jun taꞌa na nu cuaꞌ msuhui Ndiose ꞌin, ꞌun nu cuaꞌ msiꞌya Ndiose ꞌin quiaa nde niꞌ cuaan, suꞌhua loo um ꞌin Cristo Jesús, ñi nu ndiya quiꞌan tiꞌ na, ñi nu nguaꞌan tñan Ndiose ꞌin, cuiꞌ ñi nu ndon loo lati nu njñan chaꞌ ꞌin na tloo Ndiose.
\v 2 Ñi ndiꞌin chaꞌ ꞌin ñi loꞌo Ndiose nu ngulo ton ꞌin ñi, tsañaꞌan —ñi ndiꞌin chaꞌ ꞌin Moisé loꞌo nchgaa tñan nu mdaa Ndiose ꞌin lja ta nten ꞌin ñi—.
\v 3 Una Jesús lyee la ndon loo chaꞌ ꞌin ñi que ꞌin Moisé, siꞌyana tsañaꞌan ndiꞌin chaꞌ ꞌin sca naꞌan, a ntsuꞌhui lyoo la na que nu nxiton ꞌin na.
\v 4 Nchgaa naꞌan jui nu mtñan ꞌin na, una Ndiose lca nu mdiꞌin tyaa suun nchgaa loo chaꞌ.
\v 5 Chaꞌ ñi siꞌyana yu Moisé ncua yu sca nguso ꞌin Ndiose, loꞌ msuꞌhua loo yu nchgaa tñan nu mdaa ñi ꞌin yu lja ta nten ꞌin ñi, siꞌyana taa yu suun ñaꞌan chaꞌ nu cuꞌni ñi tiyaa xaa.
\v 6 Una Cristo ñaꞌan Sñeꞌ Ndiose lca ñi, ndlo ñi tñan naꞌan ꞌin ñi, loꞌ naꞌan canꞌ lca nareꞌ, una chaꞌ xñi ton tla na ꞌin na, loꞌ a cuꞌni naꞌan tiꞌ na loꞌo chaꞌ nu nta na, tsuꞌhue ntsuꞌhui tiquee na tsayaꞌ tyiꞌo na loo chendyu re.
\s Mdaa Ndiose sca seꞌen xitñanꞌ quichen ꞌin ñi
\p
\v 7 Canꞌ chaꞌ ndeñaꞌan nchcuiꞌ Espíritu nu Luhui ꞌin Ndiose: —Cuaꞌ ñii chaꞌ cua na ton nscan um chaꞌ nu nchcuiꞌ Ndiose,
\v 8 ñi a cuꞌni tla um cusya ꞌin um, tsañaꞌan mꞌni lyeꞌ tiꞌ um lja mdaꞌan um seꞌen ngutyi canꞌ,
\v 9 seꞌen mdaa nten cula ꞌin um chaꞌ nsinꞌ tiꞌ ꞌñan, ngunan ñaꞌan nxiscuen tiqueꞌ ꞌñan, loꞌ siyaꞌ naꞌan tloo neꞌ chaꞌ nu tnu mꞌnin niꞌ tucua yla yjan canꞌ.
\v 10 Siꞌya chaꞌ canꞌ nguluꞌun ꞌa tinꞌ loꞌo ta nten canꞌ, loꞌ nen: Scañaꞌan ti nguiꞌni tucua tiꞌ cusya ꞌin neꞌ, loꞌ a nchca suꞌhua loo neꞌ tucueen nu ꞌñan.
\v 11 Canꞌ chaꞌ ycuiꞌ nsinꞌ tinꞌ loꞌ mdiꞌin tyaan sca chaꞌ loꞌo neꞌ siꞌyana a sten neꞌ seꞌen ntsuꞌhui chaꞌ xitñanꞌ—.
\v 12 ꞌUn jun taꞌa na, xñi um cunta siꞌyana ñi sca um loꞌ a sten chaꞌ ngunanꞌ niꞌ cusya ꞌin um uta cuꞌni tucua tiꞌ um loꞌ tsatoꞌo chcua tijyoꞌ um siiꞌ Ndiose, ñi nu loꞌo ca,
\v 13 cuiꞌ ca nu taa um chaꞌ tnu tiquee ꞌin taꞌa um cunda scaa tsaan, lja nu tiꞌ ndyijyi xaa ñaꞌan nchca tiꞌ cuaꞌ ñii, siꞌyana ñi sca um a ca tla cusya ꞌin um siꞌya chaꞌ cuiñi nu ljyaan loo quiꞌya.
\v 14 Nareꞌ cuaꞌ mꞌni caꞌan ꞌin na loꞌo tsoꞌ ꞌin Cristo, chaꞌ xñi ton tla na ꞌin na loꞌo chaꞌ nu ya quiꞌan tiꞌ na tiꞌ culoo, tsayaꞌ nu tyiꞌo na loo chendyu re,
\v 15 tsañaꞌan nchcuiꞌ quityi ꞌin Ndiose: —Chaꞌ cua na ton nscan um cuaꞌ ñii chaꞌ nu nchcuiꞌ Ndiose, ñi a cuꞌni tla um cusya ꞌin um, tsañaꞌan nu cuaꞌ mꞌni lyeꞌ tiꞌ um—.
\v 16 ¿Ti nu ngune ꞌin loꞌ mꞌni lyeꞌ tiꞌ chaꞌ nu ycuiꞌ Ndiose? ¿Ta siꞌi nchgaa nten nu mdoꞌo loꞌo Moisé seꞌen lca Egipto?
\v 17 ¿Ti nu siꞌya yten chaꞌ nsinꞌ tiꞌ tiquee Ndiose tsaniꞌ tucua yla yjan? ¿Ta siꞌi nu mꞌni quiꞌya canꞌ, cuiꞌ tsalca nu ngujui seꞌen ngutyi canꞌ?
\v 18 ¿Ti nu loꞌo mdiꞌin tyaa ñi chaꞌ siꞌyana a sten seꞌen ntsuꞌhui chaꞌ xitñanꞌ ñi? ¿Ta siꞌi nten nu a ncua jaꞌan canꞌ?
\v 19 Ndyiꞌya na cunta ñi chaꞌ a ncua sten neꞌ, cuiꞌ siꞌyana a ya quiꞌan tiꞌ neꞌ ꞌin Ndiose. 
\c 4
\p
\v 1 Canꞌ chaꞌ chuꞌhui sca ytsen niꞌ cusya ꞌin na, lja nu tiꞌ nscua chaꞌ nu cuaꞌ mdiꞌin tyaa Ndiose siꞌyana tca sten na seꞌen mdaa ñi xitñanꞌ na, ñaꞌan tuꞌ tsatoꞌo a chcuan um cunta chaꞌ tsuꞌhue canꞌ.
\v 2 Siꞌyana loꞌo nareꞌ jui nu ycuiꞌ chaꞌ tsuꞌhue ꞌin Ndiose tsañaꞌan yatoꞌo ꞌin neꞌ canꞌ, una cua chaꞌ ti ngune ꞌin neꞌ siꞌyana a ya quiꞌan tiꞌ neꞌ.
\v 3 Una tsalca naa neꞌ nu ndiya quiꞌan tiꞌ, cuaꞌ mꞌni caꞌan ꞌin na seꞌen mdaa Ndiose xitñanꞌ na, siꞌyana cuiꞌ ñi mꞌni tyiꞌya ñi seꞌen canꞌ xa juin ñi: —Canꞌ chaꞌ ycuiꞌ nsinꞌ tinꞌ loꞌ mdiꞌin tyaan sca chaꞌ loꞌo neꞌ siꞌyana a sten neꞌ seꞌen ntsuꞌhui chaꞌ xitñanꞌ—. Xa ycuiꞌ ñi chaꞌ re cuaꞌ lca nchgaa tñan ꞌin ñi tiꞌ xa mtñan ñi chendyu.
\v 4 Nde xca chaꞌ nu ycuiꞌ ñi chaꞌ ꞌin tsaan nu mxitñanꞌ ñi: —Ndiose mꞌni tyii ñi nchgaa tñan ꞌin ñi, loꞌ mxitñanꞌ ñi nu cuaꞌ nchca cati tsaan—.
\v 5 Loꞌ xiyaꞌ mꞌni tyiꞌya ñi seꞌen canꞌ xa juin ñi: —A sten neꞌ seꞌen ntsuꞌhui chaꞌ xitñanꞌ—.
\v 6 Canꞌ chaꞌ ca cuiyaꞌ tiꞌ na siꞌyana ntsuꞌhui nu tiꞌ lyijyi sten seꞌen canꞌ, siꞌyana nten nu ngune ꞌin chaꞌ tsuꞌhue re tiꞌ culoo, a yten neꞌ siꞌya chaꞌ lyeꞌ tiꞌ ꞌin neꞌ,
\v 7 canꞌ chaꞌ xiyaꞌ mdiꞌin tyaa ñi xca tsaan, ñaꞌan nchca tiꞌ cuaꞌ ñii, tsañaꞌan mxiycuiꞌ ñi ꞌin yu Davi, loꞌ juin ñi: —Chaꞌ cua na ton nscan um cuaꞌ ñii chaꞌ nu nchcuiꞌ Ndiose, ñi a cuꞌni tla um cusya ꞌin um—.
\v 8 Chaꞌ yu Josué yten loꞌo yu ꞌin nten canꞌ seꞌen ntsuꞌhui chaꞌ xitñanꞌ neꞌ, a tyiꞌin tyaa ꞌa ñi xca tsaan nde loo la.
\v 9 Ca cuiyaꞌ tiꞌ na siꞌyana quichen ꞌin Ndiose tiꞌ nducua tloo jun sten jun seꞌen nu ntsuꞌhui chaꞌ xitñanꞌ jun.
\v 10 Tsalca nu cuaꞌ yten seꞌen nu mdaa Ndiose xitñanꞌ, cuiꞌ siꞌyana cuaꞌ ngulaꞌ tiꞌ loꞌo tñan ꞌin, tsañaꞌan mxitñanꞌ Ndiose loꞌo tñan ꞌin ñi.
\v 11 Canꞌ chaꞌ taa na juesa sten na seꞌen ntsuꞌhui chaꞌ xitñanꞌ na, loꞌ a cuꞌni lyeꞌ tiꞌ na ñaꞌan nu mꞌni neꞌ canꞌ.
\v 12 Siꞌyana ychaꞌ Ndiose loꞌo ca na loꞌ tla chaꞌ ꞌin na, lyee la cha na que ꞌin spada nu chcua tsoꞌ cha, nguiten na la niꞌ cusya ꞌin na loꞌ nsla tiꞌin na chaꞌ tiyaa ꞌin na seꞌen nu quiꞌñi lati, loꞌ ndlyohui na loꞌo ñaꞌan nu lca tiquee na.
\v 13 Ñi sca na nu mtñan Ndiose, a tca chuꞌhui cutsiꞌ na tloo ñi, cuiꞌ ca nu nchgaa loo na ndiꞌin la tloo ñi siyaꞌ ti, ñi nu ntsuꞌhui chaꞌ tyaa na cunta tloo tiyaa xaa.
\s Scati Jesús nsuhui chaꞌ ꞌin na tloo Ndiose
\p
\v 14 Siꞌyana cuaꞌ yten sca nu ndon loo lati la tloo Ndiose loꞌo cunta ꞌin na, cuiꞌ Jesús nu lca Sñeꞌ Ndiose, canꞌ chaꞌ xñi ton tla na ꞌin na loꞌo chaꞌ nu cuaꞌ ya quiꞌan tiꞌ na.
\v 15 Siꞌyana ñi nu ndon tiyaa canꞌ, nu ndon loo lati nu ndyiꞌo chaꞌ ꞌin na tloo Ndiose, a lca ñi sca nu a ndii tiꞌ chaꞌ nu ndijin na, cuiꞌ ca nu cuaꞌ mdijin ñi scasca loo chaꞌ tsañaꞌan chaꞌ nu ndijin na, una a siyaꞌ mꞌni ñi quiꞌya.
\v 16 Canꞌ chaꞌ cuꞌni tnu tiquee na tsaa na cuiꞌ la seꞌen nducua ñi, cuiꞌ ñi nu ntsuꞌhui chaꞌ tsuꞌhue ꞌin, ñaꞌan ca siꞌyana ñaꞌan ꞌtnan tiꞌ ñi ꞌin na, loꞌ ta yaaꞌ ñi ꞌin na xa ndijin na chaꞌ.
\c 5
\p
\v 1 Siꞌyana sca yu nu ndlo ca tñan niꞌ lyaa, ndlo ton nten quichen ꞌin yu siꞌyana tyiꞌo yu chaꞌ ꞌin neꞌ tloo Ndiose, tiꞌin tyaa yu lcuan tloo ñi, loꞌ tiquin tucua yu ꞌni siꞌya quiꞌya ꞌin neꞌ.
\v 2 Ntsuꞌhui chaꞌ tlyu tiꞌ ꞌin yu loꞌo sca nu chinꞌ chaꞌ ꞌin uta loꞌo sca nu a nscua seꞌen chaꞌ ꞌin, siꞌyana loꞌo yu ndii tiꞌ yu naꞌan tiꞌ yu.
\v 3 Canꞌ chaꞌ ꞌni chaꞌ tiquin tucua yu ꞌni tloo Ndiose siꞌya quiꞌya ꞌin yu, a cunta siꞌya chaꞌ ꞌin nten.
\v 4 Ñi sca tucui loꞌ a tca tyon loꞌo chaꞌ cuiyaꞌ re siꞌya chaꞌ ꞌin ti, cuiꞌ ca nu Ndiose ndiꞌin tyaa ꞌin canꞌ, tsañaꞌan mꞌni ñi loꞌo yu Aaron.
\v 5 Cuiꞌ cuañaꞌan Cristo a mdiꞌin tyaa ñi ꞌin ñi ca ñi sca nu ndon loo lati nu cuꞌni tñan ꞌin Ndiose, cuiꞌ ca nu ndeñaꞌan juin Ndiose ꞌin ñi: —Nuꞌhuin lca Sñenꞌ, loꞌ nanꞌ lcan Sti cuaꞌ ñii—.
\v 6 Ndeñaꞌan nchcuiꞌ xca seꞌen loo quityi canꞌ: —Nuꞌhuin lca nu cuꞌni tñan ꞌñan tsala xaa, tsañaꞌan chaꞌ cuiyaꞌ nu ndon loꞌo Melquisedec—.
\v 7 Xa mdaꞌan Cristo loo chendyu re mjñan ñi chaꞌ tsuꞌhue ꞌin Ndiose, hasta loꞌo tyiꞌa quiloo ñi nguilo xa ycuiꞌ cueen ñi loꞌo nu tca culaa ꞌin ñi loo chaꞌ ndyija, loꞌ mꞌni cunta Ndiose chaꞌ nu ycuiꞌ ñi siꞌyana mꞌni suun ñi ꞌin ñi.
\v 8 Siyaꞌ lca ñi Sñeꞌ Ndiose, una mꞌni chaꞌan ñi loꞌo scasca chaꞌ nu mdijin ñi loꞌ ncua jaꞌan ñi ꞌin Sti ñi.
\v 9 Xa cuaꞌ mdaꞌa nchgaa tñan nu mdoꞌo ꞌin ñi, mducua suun ñi chaꞌ nu tyiꞌo laa nten tsala xaa, nchgaa nu ca jaꞌan ꞌin ñi,
\v 10 loꞌ mdiꞌin tyaa Ndiose ꞌin ñi lca ñi sca nu ndon loo lati nu cuꞌni tñan ꞌin ñi loꞌo chaꞌ cuiyaꞌ nu ndon loꞌo Melquisedec.
\s A tyiꞌo tsoꞌ na siiꞌ Cristo
\p
\v 11 Chonꞌ chaꞌ re quiꞌan ꞌa chaꞌ tca chcuiꞌ na, loꞌ tucui ꞌa ñaꞌan tyiꞌo scua la na, siꞌyana queꞌ ꞌa ndyiꞌya um cunta ꞌin na.
\v 12 Ta siꞌi na cuaꞌ ngaꞌan chaꞌ culoꞌo um ꞌin xca tucui, cuaꞌ yaa ñaꞌan sꞌni la nguiꞌni chaꞌan um chaꞌ re, una nde nducua tloo um caja nu culoꞌo ꞌin um chaꞌ ꞌin Ndiose loꞌ xiyaꞌ tyisnan cuꞌni chaꞌan um chaꞌ nu nꞌni chaꞌan sca nu cui ti, tiꞌ nchca tiꞌ um coꞌo um styiꞌ loo nu ngaꞌan chaꞌ cunajoꞌo ꞌin um na nu cuaꞌ ngula la.
\v 13 Tsalca nu tiꞌ ndyiꞌyo styiꞌ a ndyiꞌya cunta chaꞌ nu ñi ꞌin Ndiose, siꞌyana tiꞌ cuneꞌ canꞌ.
\v 14 Una sca nten nu cuaꞌ ngula ton, ꞌni chaꞌ ꞌin loꞌo sca na nu cuaꞌ ngula la, lca canꞌ sca nu cuaꞌ ndon tiyaa, loꞌ tca culohui canꞌ ti ñaꞌan chaꞌ nu tsuꞌhue loꞌ ti ñaꞌan chaꞌ nu a tsuꞌhue.
\c 6
\p
\v 1 Cuaꞌ sꞌni mdyisnan na loꞌo chaꞌ ꞌin Cristo, canꞌ chaꞌ taa na juesa tsaa na nde loo la tsayaꞌ nu cula ton na, loꞌ siꞌi nu xitucui na xiyaꞌ ñaꞌan ntsuꞌhui chaꞌ xiloꞌo chonꞌ na quiꞌya, uta tsa quiꞌan tiꞌ na ꞌin Ndiose,
\v 2 loꞌo chaꞌ nu chcua tya na, uta xa ndyiꞌin tyaa neꞌ yaaꞌ neꞌ ꞌin na, ta loꞌo ñaꞌan nu ntsuꞌhui chaꞌ tyiquiꞌo neꞌ ngujui, uta siꞌyana ca xñan bsya ꞌin neꞌ loꞌ tyijyin neꞌ nu tiꞌi tsala xaa.
\v 3 Tsa quiñan na nde loo, una chaꞌ Ndiose taa ñi chaꞌ cuiyaꞌ.
\v 4 Siꞌyana sca nu cuaꞌ mꞌni chaꞌan, loꞌ ncuan xuꞌhue chaꞌ tsuꞌhue ꞌin Ndiose tsatlyu loꞌo Espíritu nu Luhui ꞌin ñi,
\v 5 a cunta cuaꞌ ngüi tiꞌ canꞌ tsala ñaꞌan tsuꞌhue ychaꞌ Ndiose, loꞌ tsala xaa ntsuꞌhui chaꞌ cuiyaꞌ ꞌin ñi,
\v 6 loꞌ chaꞌ tyiꞌo tsoꞌ canꞌ, a caja nu xiton ꞌin loꞌ xitsaꞌan chaꞌ tiyaa ꞌin xiyaꞌ, siꞌyana ñaꞌan loo chaꞌ xiyaꞌ jyiꞌin caꞌan canꞌ ꞌin Sñeꞌ Ndiose loo cusi, seꞌen nu tyiꞌo chaꞌ jyiꞌo ꞌin ñi tloo nchgaa nten.
\v 7 Nguiaa chaꞌ ꞌin canꞌ tsañaꞌan nguiaa chaꞌ ꞌin sca yuu seꞌen nu tsuꞌhue ndyiꞌya quioo, tsuꞌhue ꞌa nchca tñan na nu nguita ꞌin na, canꞌ nchca chcanꞌ loo chaꞌ tsuꞌhue nu ndaa Ndiose.
\v 8 Una sca loo yuu seꞌen nu nchu tiꞌin quicheꞌ, a sca cunta ntsuꞌhui ꞌin na, chen nchcui caan yuhueꞌ ꞌin na loꞌ tsatoꞌo squin na.
\v 9 Cunta chaꞌ nu ꞌin um, ꞌun jun taꞌa na nu ndyuꞌhui cuiyaꞌ tiꞌ hua ꞌin, siyaꞌ cuañaꞌan ycuiꞌ hua loꞌo um, una nducua tloo hua quiꞌni caꞌan ꞌin um loꞌo chaꞌ tsuꞌhue nu taa Ndiose ꞌin nu ntsuꞌhui chaꞌ tyiꞌo laa.
\v 10 Siꞌyana Ndiose ñi ndiꞌin chaꞌ ꞌin ñi, loꞌ a njlya tiꞌ ñi tñan nu nguiꞌni um siꞌya chaꞌ ꞌin ñi, cuiꞌ chaꞌ tsuꞌhue nu ndyiꞌo tiquee um tsañaꞌan nda yaaꞌ um ꞌin jun taꞌa na, loꞌ nguiꞌni um ꞌin na hasta cuaꞌ ñii.
\v 11 Una nducua tloo hua siꞌyana cunda scaa um nde lyee la tyiꞌo tiquee um loꞌo chaꞌ nu nta um, tsayaꞌ chcuan um cunta ꞌin na xa tsatii chaꞌ nu nchca loo chendyu re,
\v 12 loꞌ a taa um yaꞌ ca ndaja tiꞌ um, cuiꞌ ca nu cuꞌni chaꞌan um ꞌin scasca nu nchcuan cunta chaꞌ nu mdiꞌin tyaa Ndiose, siꞌya chaꞌ nu ndiya quiꞌan tiꞌ loꞌ a nꞌni naꞌan tiꞌ.
\v 13 Xa mdiꞌin tyaa Ndiose sca chaꞌ loꞌo Abraham, a jui xca nu ndon loo la cuꞌni tyiꞌya ñi, cuiꞌ ca nu ticuiiꞌ ꞌin ñi mꞌni tyiꞌya ñi,
\v 14 loꞌ juin ñi ꞌin yu: —Nu chaꞌ ñi sꞌni nanꞌ cuꞌnin tsuꞌhue loꞌo, loꞌ cuꞌnin chaꞌ ca quiꞌan sñeꞌ—.
\v 15 Loo nu yuꞌhui chaꞌ tlyu tiꞌ ꞌin yu mta yu chaꞌ nu cuaꞌ mdiꞌin tyaa Ndiose, canꞌ chaꞌ mꞌni caꞌan chaꞌ tsuꞌhue canꞌ ꞌin yu.
\v 16 Nten chendyu xa ndyiꞌin tya tla neꞌ sca chaꞌ, ꞌni chaꞌ nꞌni tyiꞌya neꞌ ꞌin xca tucui nu ndon loo la que ꞌin neꞌ, loꞌ siyaꞌ lyee la nchcuiꞌ tyijyin neꞌ, una cuiꞌ xaa nxiꞌyu coꞌ chaꞌ nu nchcuiꞌ neꞌ siꞌya chaꞌ nu ndyiꞌin tya tla neꞌ canꞌ.
\v 17 Canꞌ chaꞌ Ndiose mdiꞌin tyaa tla ñi chaꞌ loꞌo Abraham, siꞌyana ncua lca tiquee ñi culyo scua la ñi chaꞌ nu ycuiꞌ ñi, loꞌ a cuꞌni tucua tiꞌ nchgaa nu ntsuꞌhui chaꞌ quiꞌni caꞌan chaꞌ tsuꞌhue canꞌ ꞌin.
\v 18 Nde tucua chaꞌ nu a caja nu xitsaꞌan: Tsañaꞌan mꞌni tyiꞌya ñi ꞌin ñi ticuiiꞌ ñi loꞌo chaꞌ nu mdiꞌin tyaa ñi canꞌ. Loꞌ siꞌyana Ndiose a tca cuiñi ñi, nde lyee la ndyijyi chaꞌ tnu tiquee ꞌin na, tsalca naa nu cuaꞌ mxnu caꞌan chonꞌ chaꞌ nu a tsuꞌhue, ñaꞌan ca siꞌyana tca chcuan na cunta chaꞌ nu cuaꞌ mdiꞌin tyaa ñi loꞌo na.
\v 19 Chaꞌ re nda yaaꞌ ꞌin cusya ꞌin na siꞌyana a tyiꞌo tsoꞌ na, loꞌ siꞌya chaꞌ re tca sten na la tloo ñi,
\v 20 cuiꞌ niꞌ cuaan seꞌen yten Jesús culo nducua la que ꞌin nareꞌ, —ñi nu ndon loo cuꞌni tñan ꞌin Ndiose tsala xaa, tsañaꞌan chaꞌ cuiyaꞌ nu ndon loꞌo Melquisedec—.
\c 7
\s Chaꞌ ꞌin Melquisedec nu mꞌni tñan ꞌin Ndiose
\p
\v 1 —Yu Melquisedec ncua yu Ree ꞌin quichen Salem, loꞌ mꞌni yu tñan ꞌin Ndiose, ñi nu tlyu lati. Yatoꞌo xa mxitucui yu Abraham mꞌni yu canan ꞌin xca ta ree canꞌ, yu Melquisedec canꞌ ya ycua ꞌin Abraham, loꞌ mjñan yu ꞌin Ndiose siꞌyana ta yaaꞌ ñi ꞌin Abraham—.
\v 2 Xacanꞌ yu Abraham sca seꞌen mdiꞌin tyaa yu scaa ta lcuan, na nu ngulyaa yu seꞌen yaa yu cusuun, loꞌ mdaa yu ꞌin na ꞌin Melquisedec. Nii Melquisedec nchca tiꞌ na chcuiꞌ na culo nducua la: Ree nu ñi ndiꞌin chaꞌ ꞌin, a cunta nchca tiꞌ na chcuiꞌ na Ree ꞌin quichen Salem, Ree nu nꞌni cha ndyiꞌin tsuꞌhue nten.
\v 3 Yu Melquisedec canꞌ a yuꞌhui nten cula ꞌin yu, ñi ta nten ꞌin yu, a chcanꞌ ñi xaa ngula yu uta ñi xaa ngujui yu, ncua yu tsañaꞌan nguiaa chaꞌ ꞌin Sñeꞌ Ndiose, loꞌ tsala xaa tucua tloo Ndiose ꞌin yu.
\v 4 Canꞌ chaꞌ quiñan tsuꞌhue ca tiꞌ um, tsala ñaꞌan tlyu chaꞌ cuiyaꞌ ndon loꞌo yu, hasta Abraham nu ncua nten cula ꞌin na loꞌ mdaa lcuan ꞌin yu, cuiꞌ na nu tsuꞌhue lati nu ngulyaa yu seꞌen yaa yu cusuun.
\v 5 Tsalca nu nguiꞌni tñan ꞌin Ndiose, cuiꞌ nu lca ta nten ꞌin Levi, ntsuꞌhui suun ꞌin yu chcuan yu cunta sca ta lcuan nu ndaa nten quichen ꞌin yu tsañaꞌan chaꞌ nu nchcuiꞌ lee, cuiꞌ nten nu tiꞌ nchca taꞌa yu tsatlyu loꞌo tsoꞌ ꞌin Abraham nu ncua nten cula ꞌin neꞌ.
\v 6 Una yu Melquisedec canꞌ, siyaꞌ a tucui nchca yu ꞌin ta nten ꞌin Levi, una mchcuan yu cunta sca ta lcuan nu mdaa Abraham ꞌin yu, xacanꞌ mjñan yu ꞌin Ndiose siꞌyana ta yaaꞌ ñi ꞌin Abraham, nu cuaꞌ mꞌni caꞌan chaꞌ tsuꞌhue canꞌ ꞌin.
\v 7 La ndiꞌin chaꞌ re siꞌyana sca nu ndon loo lati yatoꞌo mcuan yu ꞌin sca nu ꞌya la ndiꞌin chaꞌ ꞌin.
\v 8 Loo chendyu re nchcuan neꞌ cunta lcuan nu ndaa ticuiꞌ taꞌa nten neꞌ nu ntsuꞌhui chaꞌ tsatii chaꞌ ꞌin, una yu Melquisedec nguinu scua chaꞌ siꞌyana loꞌo ca yu.
\v 9 Tca chcuiꞌ na siꞌyana xa nu mdaa Abraham sca lcuan ꞌin Melquisedec, ñaꞌan loo chaꞌ ꞌin Levi mdaa yu ꞌin na, nu ntsuꞌhui suun ꞌin chcuan cunta lcuan canꞌ,
\v 10 siꞌyana loo chendyu ꞌin yu Abraham ca ntsuꞌhui chaꞌ caan Levi, loꞌ a nchca tiyaan yu chendyu xa ya ycua yu Melquisedec canꞌ ꞌin Abraham.
\v 11 Chaꞌ cua na tloo Ndiose nguinu scua tla chaꞌ ꞌin Levi tsañaꞌan chaꞌ cuiyaꞌ nu mdon loꞌo yu (siꞌyana loꞌo cunta ꞌin yu mꞌni chaꞌan neꞌ chaꞌ ꞌin lee), a ꞌni ꞌa chaꞌ tiꞌ tyiꞌo ton xca nu cuꞌni tñan ꞌin Ndiose tsañaꞌan tlyu chaꞌ cuiyaꞌ nu ndon loꞌo yu Melquisedec, una siꞌi loo ta nten ꞌin yu Aaron ntsuꞌhui chaꞌ tyiꞌo ton canꞌ.
\v 12 Siꞌyana chaꞌ tyiꞌo ton xca nu cuꞌni tñan ꞌin Ndiose, ꞌni chaꞌ loꞌo lee canꞌ chaꞌan na xacanꞌ.
\v 13 Una ñi nu nchcuiꞌ na chaꞌ ꞌin re, loo xca ta neꞌ Israel yaan ñi, loꞌ a mꞌni caꞌan ꞌin ta nten canꞌ loꞌo tñan nu ꞌin Ndiose.
\v 14 Nchgaa na jlyo tiꞌ na siꞌyana Ñi Xꞌnan na yaan ñi loo ta nten ꞌin Judá, loꞌ a siyaꞌ ycuiꞌ Moisé chaꞌ ꞌin ta nten canꞌ siꞌyana sten neꞌ loo tñan ꞌin Ndiose.
\v 15 La ꞌa ndiꞌin chaꞌ re, chaꞌ cuañaꞌan mdoꞌo ton xca nu sten loo tñan ꞌin Ndiose, tsañaꞌan ndiꞌin chaꞌ ꞌin Melquisedec,
\v 16 una siꞌi loꞌo cunta ꞌin lee canꞌ mdoꞌo ton ñi, uta siꞌyana lca ñi ta nten nu ntsuꞌhui chaꞌ chcuan cunta tñan canꞌ, cuiꞌ ca nu mdoꞌo ton ñi siꞌya sca chaꞌ cuiyaꞌ nu tlyu nu a ntsuꞌhui chaꞌ tsatii chaꞌ ꞌin.
\v 17 Siꞌyana ndeñaꞌan ndaa Ndiose suun chaꞌ ꞌin ñi: —Nuꞌhuin lca nu cuꞌni tñan ꞌñan tsala xaa, tsañaꞌan chaꞌ cuiyaꞌ nu ndon loꞌo Melquisedec—.
\v 18 Nchca chcanꞌ ñaꞌan siꞌyana nchgaa chaꞌ nu mxnu scua Ndiose tiꞌ culoo cuaꞌ nguinu caꞌan chonꞌ na, siꞌyana a juesa ꞌin na, ñi a ncua culo laa na ꞌin na,
\v 19 (siꞌyana lee canꞌ a ncua ꞌin na cuꞌni chuꞌhue na chaꞌ ꞌin na tloo Ndiose), una chonꞌ chaꞌ re cuaꞌ mdiꞌin tyaa ñi sca chaꞌ nu tsuꞌhue lati nu tca tsa loꞌo ꞌin na la tloo Ndiose.
\v 20 Xa nu mdiꞌin tyaa ñi chaꞌ re, mꞌni tyiꞌya ñi ꞌin ñi,
\v 21 una nchgaa la ñaꞌan yu nu mdoꞌo ton nu sten loo tñan ꞌin ñi, a tucui nu mꞌni tyiꞌya ꞌin ñi xacanꞌ, una xa mdoꞌo ton ñi re, ndeñaꞌan nguinu scua chaꞌ nu ycuiꞌ Ndiose: —Ñi Xꞌnan na mꞌni tyiꞌya ñi ꞌin ñi, loꞌ a ntsuꞌhui chaꞌ xitsaꞌan ñi chaꞌ nu cuaꞌ mdiꞌin tyaa ñi—, loꞌ juin ñi: —Nuꞌhuin lca sca nu cuꞌni tñan ꞌñan tsala xaa, tsañaꞌan chaꞌ cuiyaꞌ nu ndon loꞌo Melquisedec—.
\v 22 Nde nchca chcanꞌ ñaꞌan siꞌyana nguinu scua sca chaꞌ nu tsuꞌhue lati loꞌo na, loꞌ Jesús lca ñi cuiyaꞌ nu cuaꞌ mdiꞌin tyaa Ndiose siꞌyana tca chcuan na chaꞌ tsuꞌhue canꞌ.
\v 23 Una nchgaa la ñaꞌan yu nu mꞌni tñan ꞌin Ndiose, cuiꞌ xaa nxiꞌyu coꞌ tñan nu nguiꞌni yu siꞌya chaꞌ ndyija canꞌ, canꞌ chaꞌ scasca yu yten yu loo tñan canꞌ,
\v 24 una Jesús siꞌyana ndiꞌin ñi tsala xaa, a ntsuꞌhui chaꞌ xiꞌyu coꞌ tñan nu nguiꞌni ñi,
\v 25 canꞌ chaꞌ nchca ꞌin ñi culo laa ca ñi ꞌin tsalca nu tiyaa tloo Ndiose siꞌya chaꞌ cuiyaꞌ ꞌin ñi, ndiꞌin ñi tsala xaa loꞌ njñan ñi ꞌin Ndiose siꞌya chaꞌ ꞌin canꞌ.
\v 26 Sca ñi nu ndon loo la nu nguiꞌni tñan nu cuañaꞌan, ꞌni chaꞌ ꞌin na loꞌo ñi siꞌyana lca ñi sca nu cuaꞌ mdoꞌo hui ꞌin Ndiose, luhui chaꞌ tiyaa ꞌin ñi, a sca quiꞌya nducui nchaꞌan ꞌin ñi, ñi sca cooꞌ, ñi a nguiaa chaꞌ ꞌin ñi ñaꞌan nten quiꞌya chendyu, mchcuan ñi sca chaꞌ cuiyaꞌ nu tlyu la niꞌ cuaan.
\v 27 Ñi a ntsuꞌhui chaꞌ tiquin tucua ñi ꞌni tloo Ndiose cunda scaa tsaan tsañaꞌan mꞌni nchgaa la ñaꞌan yu nu ndon loo canꞌ, culo nducua la siꞌya quiꞌya ꞌin yu, xacanꞌ siꞌya quiꞌya ꞌin nten quichen, una Jesús xa mdyaa ñi ꞌin ñi, siyaꞌ ti mxicuten ñi quiꞌya ꞌin na tloo Ndiose.
\v 28 Siꞌyana cunta ꞌin lee chacuiꞌ nten nu joꞌo ndiꞌin chaꞌ ꞌin nchcuan cunta tñan ꞌin Ndiose, una nde loo la canꞌ xa cuaꞌ mꞌni tyiꞌya ñi ꞌin ñi, ngulo ton ñi ꞌin Sñeꞌ ñi, cuiꞌ sca nu mꞌni chcui ñi chaꞌ ꞌin tsala xaa.
\c 8
\s Ndyiꞌo Jesús chaꞌ ꞌin na siꞌya chaꞌ nu cui ti
\p
\v 1 Chaꞌ nu ndon loo lati nu ljyan nchcuiꞌ na, siꞌyana cuaꞌ mdoꞌo ton sca nu tyiꞌo chaꞌ ꞌin na tloo Ndiose, ñi nu cuaꞌ yten tucua tsoꞌ cueen seꞌen ndlo Ndiose tñan niꞌ cuaan,
\v 2 loꞌ lca ñi sca nu lyiꞌya loo seꞌen luhui ꞌa ꞌin Ndiose, ycuiꞌ ca teꞌ naꞌan nu mxiton Ñi Xꞌnan na, loꞌ siꞌi loꞌo juesa ꞌin nten chendyu.
\v 3 Siꞌyana nchgaa la ñaꞌan yu nu ndyiꞌo chaꞌ ꞌin nten tloo Ndiose, ndyiꞌo ton yu siꞌyana tsa loꞌo yu lcuan loꞌ tiquin tucua yu ꞌni tloo Ndiose, canꞌ chaꞌ loꞌo Jesús mꞌni chaꞌ ya loꞌo sca lcuan tloo ñi.
\v 4 Chaꞌ cua na tiꞌ ndiꞌin Jesús loo chendyu re, ñi a cuꞌni ñi tñan re, siꞌyana cuaꞌ lca yu nu ndyiꞌan loꞌo lcuan tloo Ndiose tsañaꞌan nchcuiꞌ lee.
\v 5 Tñan nu nguiꞌni yu canꞌ lca na sca lcuin uta sca xñii chaꞌ nu nchca la niꞌ cuaan, siꞌyana nde chaꞌ nguloꞌo Ndiose ꞌin Moisé xa ntsuꞌhui chaꞌ tsaaꞌ teꞌ naꞌan canꞌ, loꞌ juin ñi ꞌin yu: —Xñi cunta siꞌyana tñan ꞌin na chcui naꞌan lcuin nu naꞌan xa ndon loo quiꞌya Sinaí—.
\v 6 Una tñan nu mchcuan Jesús cunta, tla la nscua chaꞌ ꞌin na siꞌyana cuiꞌ ñi ndoꞌo ñi chaꞌ ꞌin na tloo Ndiose. Chaꞌ nu mxnu scua ñi re ndon loo la na, loꞌ ljyan loꞌo na quiꞌan la chaꞌ tsuꞌhue ꞌin na.
\v 7 Chaꞌ cua na mdoꞌo scua neꞌ loꞌo chaꞌ nu mxnu Ndiose tiꞌ culoo, a ntsuꞌhui ꞌa chaꞌ tiꞌ caan xca chaꞌ nde loo la canꞌ.
\v 8 Siꞌyana ndeñaꞌan ngusun loꞌo Ndiose ꞌin neꞌ: —Ñaꞌan jan ñi, cuaꞌ ljyaan sca tsaan, juin Ñi Xꞌnan na, xa nu tyiꞌin tyaan sca chaꞌ nu cui ti loꞌo neꞌ Israel, a cunta loꞌo Judá.
\v 9 Una siꞌi ñaꞌan chaꞌ mdiꞌin tyaan loꞌo nu ncua nten cula ꞌin neꞌ, xa msñin yaaꞌ neꞌ loꞌ ngulyoon ꞌin neꞌ seꞌen lca Egipto. Loꞌ siꞌyana a mxuꞌhua seꞌen neꞌ chaꞌ nu mdiꞌin tyaan, canꞌ chaꞌ a yuꞌhui yuhue ꞌa tinꞌ ꞌin neꞌ, juin Ñi Xꞌnan na.
\v 10 Canꞌ chaꞌ nde tyiꞌin tyaan sca chaꞌ loꞌo neꞌ Israel, xa cuaꞌ mdijin tsaan canꞌ, juin Ñi Xꞌnan na. Quinu yuꞌhui chaꞌ nu ngulon tñan niꞌ chaꞌ tiyaa ꞌin neꞌ, a cunta quinu scua na niꞌ cusya ꞌin neꞌ. Nanꞌ can Ndiose nu chuꞌhui cunta ꞌin neꞌ, loꞌ ca neꞌ quichen ꞌñan.
\v 11 Ñi a ꞌni ꞌa chaꞌ tiꞌ caja nu culoꞌo ꞌin taꞌa nten neꞌ uta ꞌin taꞌa ngula neꞌ ñaꞌan ndiꞌin chaꞌ ꞌin Ndiose, ta ljuin canꞌ: ¿Ta jlyo tiꞌ um chaꞌ ꞌin Ñi Xꞌnan na? Siꞌyana nchgaa tucui chuꞌhui lyoo ꞌñan, tiꞌ nu suhue lati hasta loꞌo nu cula.
\v 12 Xicuten quiꞌya ꞌin neꞌ, loꞌ a quia yuꞌhui ꞌa tinꞌ quiꞌya mꞌni neꞌ loꞌo chaꞌ lyeꞌ tiꞌ ꞌin neꞌ—.
\v 13 Xa juin ñi siꞌyana cuaꞌ mdiꞌin tyaa ñi sca chaꞌ nu cui ti, cuiꞌ siꞌyana cuaꞌ mdijin chaꞌ nu mxnu scua ñi tiꞌ culoo, loꞌ sca na nu cuaꞌ nguiaa ndijin chaꞌ ꞌin, nchca cula na siꞌyana cuaꞌ nchcui cuiiꞌ chaꞌ lyijyi yuꞌhui na.
\c 9
\p
\v 1 Chaꞌ nu cuaꞌ mdiꞌin tyaa Ndiose tiꞌ culoo, cuaꞌ lca ñaꞌan ntsuꞌhui chaꞌ cuꞌni tnu neꞌ ꞌin ñi a cunta nguiaꞌ sca teꞌ naꞌan seꞌen nu luhui ꞌin ñi.
\v 2 Siꞌyana ndeñaꞌan nguiaꞌ teꞌ naꞌan canꞌ: Culoo seꞌen canꞌ ndloꞌo naan neꞌ ꞌin na Sca Seꞌen nu Luhui, canꞌ ndon seꞌen nchcua quiiꞌ ndiquin, loꞌo msa seꞌen nchcua jaslya nu cuaꞌ mcuan ꞌin Ndiose.
\v 3 Ticuiꞌ niꞌ teꞌ naꞌan canꞌ nducui ndijin sca teꞌ tluꞌhue la canꞌ, loꞌ nde chonꞌ teꞌ canꞌ lca na Sca Seꞌen nu Luhui Lati,
\v 4 canꞌ ndon sca seꞌen nguiaꞌ loꞌo oro seꞌen nu ndiquin na nu xityiꞌi, a cunta nscua quiñanꞌ nu luhui lati ꞌin Ndiose, ñaꞌaan na nguxen oro ꞌin na. Canꞌ ntsuꞌhui sca quitonꞌ nu chacuiꞌ oro seꞌen ntsuꞌhui maná, a cunta loꞌo yca scaan yu Aaron, cuiꞌ nu ytsu tin canꞌ, a cunta loꞌo caꞌ quee seꞌen nguaꞌan scua lee ꞌin Ndiose.
\v 5 Chonꞌ quiñanꞌ canꞌ ndon tucua lcuin angujle nu mdoꞌo loo xaa ꞌin Ndiose, jlyuꞌhue angujle canꞌ nscua na chonꞌ quiñanꞌ seꞌen nsuhui ñi quiꞌya ꞌin nten. Cuaꞌ ñii, a tca chcuiꞌ na chaꞌ ꞌin quiñanꞌ canꞌ lyee la.
\v 6 Xa tiꞌ nducua teꞌ naꞌan canꞌ, nchgaa xaa ndlyu scasca yu seꞌen nu ndiyaa culoo na canꞌ, siꞌyana cuꞌni cunta yu tñan nu ntsuꞌhui yaaꞌ yu tloo Ndiose,
\v 7 una seꞌen nu luhui lati canꞌ, scati yu nu ndon loo la nguiten yu ꞌin na siyaꞌ ti sca yjan, una ꞌni chaꞌ sten loꞌo yu tne ꞌni seꞌen canꞌ siꞌya quiꞌya ꞌin yu a cunta siꞌya quiꞌya mꞌni nten quichen loꞌo chaꞌ tinto ꞌin neꞌ.
\v 8 Siꞌya chaꞌ re, Espíritu nu Luhui ꞌin Ndiose ntsaꞌ ñi ꞌin na siꞌyana lja nu mducua teꞌ naꞌan canꞌ, a nchca quila sca tucueen nu tiyaa seꞌen nu luhui lati ꞌin Ndiose.
\v 9 Nchgaa chaꞌ re ndaa na chaꞌ tiyaa ꞌin na cuaꞌ ñii, siyaꞌ ndyiꞌan loꞌo neꞌ lcuan loꞌ ndiquin tucua neꞌ ꞌni tloo Ndiose, una a ncua suhui na chaꞌ tiyaa ꞌin nu nducui chaꞌan chaꞌ canꞌ,
\v 10 siꞌyana lca na chacuiꞌ chaꞌ nchcu uta na nu ndyiꞌyo neꞌ, a cunta scasca ñaꞌan nsuhui neꞌ ꞌin neꞌ loꞌo na nu nguilaꞌ neꞌ, loꞌ nguinu scua chaꞌ re tsalja nu tiyaa tsaan chca cui na.
\v 11 Cuaꞌ yaan Cristo, ñi nu ndon loo lati nu ndyiꞌo chaꞌ ꞌin na tloo Ndiose, loꞌ yan loꞌo ñi chaꞌ tsuꞌhue nu ntsuꞌhui chaꞌ quiꞌni caꞌan ꞌin na, siꞌyana cuaꞌ yten ñi niꞌ sca teꞌ naꞌan nu tlyu la, nu luhui la, una a nducua na loo chendyu re siꞌyana siꞌi nten chendyu mtñan ꞌin na.
\v 12 Siyaꞌ ti yten ñi Seꞌen nu Luhui Lati ꞌin Ndiose, loꞌ a ntsuꞌhui ꞌa chaꞌ tiꞌ sten ñi xiyaꞌ, una a yten loꞌo ñi tne scasca loo ꞌni, cuiꞌ ca nu loꞌo ycuiꞌ ca tne ñi yatoꞌo msuhui ñi ꞌin na tsala xaa.
\v 13 Chaꞌ cuañaꞌan nguinu luhui neꞌ siꞌya tne scasca ꞌni, uta siꞌya tyiꞌa jyii ꞌin ꞌni nu nscuin yu ꞌin neꞌ siꞌya quiꞌya mꞌni neꞌ,
\v 14 ñaꞌan la ca tne Cristo, ñi nu luhui lati nu mdyaa ꞌin tloo Ndiose siꞌya chaꞌ cuiyaꞌ ꞌin Espíritu nu ndiꞌin tsala xaa, tca suhui ñi chaꞌ tiyaa ꞌin na siꞌya chaꞌ ngunanꞌ nu nguiaa loꞌo ꞌin na loo chaꞌ ndyija, ñaꞌan ca siꞌyana tucua tloo na ꞌin Ndiose, ñi nu loꞌo ca.
\v 15 Canꞌ chaꞌ Jesús lca ñi nu ndyiꞌo chaꞌ ꞌin na tloo Ndiose siꞌya chaꞌ nu cui ti nu mxnu scua ñi, loo nu ngujui ñi nguten quiꞌya ꞌin nu mducui chaꞌan chaꞌ nu mdiꞌin tyaa Ndiose tiꞌ culoo, ñaꞌan ca siꞌyana nchgaa nu ngulohui ñi tca quiꞌni caꞌan ꞌin loꞌo chaꞌ tsuꞌhue nu a ntsuꞌhui ꞌa chaꞌ tsatii.
\v 16 Sca quityi chaꞌ ꞌin yuu, a tucui nu tca chcuan cunta ꞌin na lja tiꞌ ndiꞌin xꞌnan na,
\v 17 cuiꞌ ca nu la cuaꞌ ngujui canꞌ tca chcuan xca tucui cunta ꞌin na, siꞌyana a ntsuꞌhui lyoo na lja nu tiꞌ loꞌo canꞌ.
\v 18 Canꞌ chaꞌ loꞌo tne mxnu scua tla Ndiose chaꞌ nu culoo canꞌ.
\v 19 Siꞌyana Moisé xa mdyi loꞌo yu ꞌin nten nchgaa chaꞌ nu mdiꞌin tyaa Ndiose ꞌin yu loo lee canꞌ, mscanꞌ yu sca yni quixinꞌ nu naan hisopo loꞌo sca juun ngaꞌá, xacanꞌ msñi yu seꞌen ntsuꞌhui tne scasca ꞌni loꞌ mxitiyaaꞌ yu ꞌin na loꞌo tyiꞌa, loꞌ mscuin yu ꞌin na loo quityi canꞌ, a cunta loꞌo seꞌen ndiꞌin nten,
\v 20 loꞌ juin yu ꞌin neꞌ: —Loꞌo tne re xnu scua tla Ndiose sca chaꞌ nu ngulo ñi tñan ꞌin na loꞌo um—.
\v 21 A cunta nscuin yu tne canꞌ ꞌin teꞌ naꞌan tsatlyu loꞌo nchgaa na nu najoꞌo ꞌin yu seꞌen canꞌ.
\v 22 Cunta chaꞌ ꞌin lee, laꞌ nchgaa ti na ngüi na siꞌya tne. Chaꞌ siꞌi siꞌya tne nu nguilo canꞌ a tca cuten quiꞌya ꞌin nten.
\s Mxicuten Cristo quiꞌya ꞌin nten
\p
\v 23 Chaꞌ cuañaꞌan nguinu luhui nchgaa chaꞌ canꞌ, na nu lca xñii chaꞌ nu nchca niꞌ cuaan, ñaꞌan la ca ycuiꞌ ca chaꞌ nu nchca la cua, na a lyee la ꞌni chaꞌ ꞌin na loꞌo sca lcuan nu ntsuꞌhui lyoo lati.
\v 24 Siꞌyana Cristo a yten ñi niꞌ sca seꞌen nu mtñan yaaꞌ nten chendyu, nu lca xñii sca chaꞌ nu ycuiꞌ ca, cuiꞌ ca nu yten ñi la niꞌ cuaan tloo Ndiose siꞌya cunta ꞌin na.
\v 25 Una a tyun juesa mdyaa ñi ꞌin ñi seꞌen nu caja ñi, tsañaꞌan ndiꞌin chaꞌ ꞌin yu nu ndon loo canꞌ xa nguiten loꞌo yu tne nchgaa yjan Seꞌen nu Luhui canꞌ ꞌin Ndiose, una siꞌi tne yu lca na.
\v 26 Chaꞌ cuañaꞌan ndiꞌin chaꞌ, Cristo ꞌni chaꞌ caja ñi nchgaa yjan tiꞌ xa nguiaꞌ chendyu re, una ya tucua tsaan siyaꞌ ti yten ñi la tloo Ndiose loꞌo tne ñi, siꞌyana xicuten ñi quiꞌya ꞌin nten.
\v 27 Loꞌ tsañaꞌan nguinu scua chaꞌ ꞌin nchgaa nten, siyaꞌ ti ntsuꞌhui chaꞌ caja neꞌ, xacanꞌ ca xñan bsya ꞌin neꞌ,
\v 28 cuiꞌ cuañaꞌan Cristo, siyaꞌ ti mdyaa ñi ꞌin ñi tñan loo nchgaa nten siꞌyana xicuten ñi quiꞌya ꞌin neꞌ, loꞌ xa quiaan ñi xiyaꞌ, a caan ꞌa ñi siꞌya quiꞌya, cuiꞌ ca nu siꞌyana quian ꞌya ñi ꞌin tsalca nu nta ꞌin ñi.
\c 10
\p
\v 1 Lee canꞌ lca na sca xñii ti chaꞌ nu ntsuꞌhui chaꞌ caan, una siꞌi ycuiꞌ ca chaꞌ tsuꞌhue canꞌ ca lca na, canꞌ chaꞌ a ndyijyi ñaꞌan nxnu luhui na ꞌin nten nu ndiya nan ꞌin Ndiose, loꞌo ñaꞌan nu ndiquin tucua neꞌ ꞌni tloo ñi cunda scaa yjan.
\v 2 Chaꞌ cua na ncua ꞌin lee canꞌ suhui na ꞌin neꞌ siyaꞌ ti, cuiꞌ xaa siꞌyu coꞌ neꞌ chaꞌ nu ndiquin tucua neꞌ ꞌni canꞌ, siꞌyana jlyo tiꞌ neꞌ a nducui ꞌa neꞌ quiꞌya.
\v 3 Siꞌyana loꞌo ñaꞌan nu ndiquin tucua neꞌ ꞌni canꞌ nchgaa yjan, tsaloo ti nxuꞌhua tiꞌ na quiꞌya ꞌin neꞌ,
\v 4 siꞌyana tne scasca ꞌni canꞌ a nchca ꞌin na xicuten na quiꞌya ꞌin neꞌ.
\v 5 Canꞌ chaꞌ ndeñaꞌan ycuiꞌ Cristo xa yaan ñi loo chendyu re: —A nchca tiꞌ um scasca lcuan uta tne ꞌni, canꞌ chaꞌ mꞌni um chaꞌ ngulan ñaꞌan nchca tiꞌ sca nten.
\v 6 A nguinu tsuꞌhue tiquee um loꞌo ꞌni nu mdiquin tucua neꞌ tloo um, uta loꞌo lcuan nu mdaa neꞌ siꞌya quiꞌya ꞌin neꞌ.
\v 7 Canꞌ chaꞌ ycuinꞌ loꞌo um: ꞌUn ñi nu lca Ndiose, nde mdiyaan loꞌ cuꞌnin ñaꞌan nu nchca tiꞌ um siꞌyana tsatoꞌo tsañaꞌan chaꞌ nu cuaꞌ nguinu scua loo quityi siꞌya chaꞌ ꞌñan—.
\v 8 Quiꞌya na cunta chaꞌ nu ycuiꞌ Cristo tiꞌ culoo xa nu juin ñi: A ncuan xuꞌhue um scasca lcuan uta tne ꞌni, loꞌ ñi a nguinu tsuꞌhue tiquee um loꞌo ꞌni nu mdiquin tucua neꞌ tloo um, uta loꞌo scasca lcuan nu mdaa neꞌ siꞌya quiꞌya ꞌin neꞌ, (loꞌ siyaꞌ lca na chaꞌ nu nchcuiꞌ lee canꞌ),
\v 9 loꞌ tiꞌ juin la ñi: ꞌUn ñi nu lca Ndiose, nde mdiyaan loꞌ cuꞌnin ñaꞌan nu nchca tiꞌ um. Siꞌya chaꞌ nu ycuiꞌ ñi re mxca ñi chaꞌ nu mdiꞌin tyaa ñi tiꞌ culoo, ñaꞌan ca siꞌyana tyiꞌin tya cui ñi xca chaꞌ.
\v 10 Nguinu luhui na tloo Ndiose siꞌya tne Jesucristo loo nu ncua jaꞌan ñi xa mdyaa ñi ꞌin ñi siyaꞌ ti, loꞌ cuꞌni tsuꞌhue loꞌo na tsalaxaa.
\v 11 Chaꞌ ñi siꞌyana yu nu ndyiꞌo chaꞌ ꞌin nten tloo Ndiose, scañaꞌan ti nguilyu yu ticuiꞌ ti loo ñaꞌan nguiꞌni yu ndiquin tucua yu ꞌni, loꞌ ñi a nchca xicuten na quiꞌya ꞌin neꞌ.
\v 12 Una Cristo siyaꞌ ti mdyaa ñi ꞌin ñi siꞌya nchgaa quiꞌya ꞌin na, xacanꞌ yten tucua ñi tsoꞌ cueen ꞌin Ndiose.
\v 13 Tiꞌ xacanꞌ nta ñi —tsayaꞌ quinu taꞌa cusuun ñi nde tuquiyaꞌ ñi—,
\v 14 siꞌyana siyaꞌ ti ngujui ñi loꞌ msuhui ñi ꞌin nchgaa nu cuaꞌ mdoꞌo hui ꞌin ñi, loꞌ quinu luhui canꞌ tsala xaa.
\v 15 Espíritu nu Luhui ꞌin Ndiose ndaa suun loꞌo na siꞌya chaꞌ re, siꞌyana ndeñaꞌan juin ñi culo nducua la:
\v 16 —Nde chaꞌ nu cui ti tyiꞌin tyaan loꞌo neꞌ tiyaa xaa, juin Ñi Xꞌnan na: Quinu yuꞌhui lee ꞌñan niꞌ cusya ꞌin neꞌ, loꞌ quinu yuꞌhui na niꞌ chaꞌ tiyaa ꞌin neꞌ—.
\v 17 Loꞌ tiꞌ juin la ñi: —Ñi xiyaꞌ loꞌ a quia yuꞌhui ꞌa tinꞌ quiꞌya nducui neꞌ loꞌo chaꞌ ngunanꞌ nu mꞌni neꞌ—.
\v 18 Sca quiꞌya nu cuaꞌ mchca, a ꞌni ꞌa chaꞌ tiꞌ caja nu suꞌhua lyiyaꞌ ꞌin na xiyaꞌ.
\v 19 Canꞌ chaꞌ, ꞌun jun taꞌa na, cuaꞌ jui chaꞌ cuiyaꞌ sten na Seꞌen nu Luhui Lati ꞌin Ndiose siꞌya tne Jesucristo,
\v 20 cuaꞌ msla ñi sca tucueen nu cui ti nu ndaa chendyu ꞌin na, xa ngujui ñi loꞌ yten ñi la niꞌ cuaan loꞌo tsoꞌ ꞌin cunanꞌ ñi.
\v 21 Cuaꞌ ñii siꞌyana cuaꞌ ndiꞌin sca nu ndon loo lati nu tyiꞌo chaꞌ ꞌin na la tloo Ndiose,
\v 22 canꞌ chaꞌ tsaa na cuiꞌ la tloo Ndiose loꞌo sca cusya nu ñi, loꞌ a cuꞌni tucua tiꞌ na loꞌo chaꞌ nu ndiya quiꞌan tiꞌ na, siꞌyana cuaꞌ nguinu luhui cusya ꞌin na loꞌ jlyo tiꞌ na siꞌyana a nducui ꞌa na quiꞌya, cuiꞌ cuañaꞌan mjyiꞌan ñi ꞌin na loꞌo tyiꞌa nu luhui lati.
\v 23 Xñi ton tla na ꞌin na loꞌo chaꞌ nu ndiya quiꞌan tiꞌ na, loꞌ a cuꞌni tucua tiꞌ na loꞌo chaꞌ nu nta na, siꞌyana ñi ndiꞌin chaꞌ ꞌin ñi nu cuaꞌ mdiꞌin tyaa chaꞌ re.
\v 24 Scasca na suꞌhua loo na ꞌin taꞌa na, ñaꞌan ca siꞌyana nde lyee la chuꞌhui chaꞌ tsuꞌhue ꞌin na, loꞌ cuꞌni na nchgaa loo tñan tsuꞌhue.
\v 25 A culaꞌ tiꞌ na quioꞌ tiꞌin na loꞌo taꞌa na, tsañaꞌan nꞌni scasca la tucui, cuiꞌ ca nu taa na chaꞌ tnu tiquee ꞌin taꞌa na, loꞌ nde lyee lati siꞌyana cuaꞌ nchcui cuiiꞌ chaꞌ quiaan ñi.
\s Nu nguiꞌni quiꞌya loꞌo chaꞌ nchca tiꞌ
\p
\v 26 Chaꞌ tiꞌ tsa quiñan na cuꞌni na quiꞌya loꞌo chaꞌ nchca tiꞌ na, siyaꞌ cuaꞌ yuꞌhui lyoo na chaꞌ nu ñi ꞌin Ndiose, a nguinu ꞌa xca tucui nu xicuten quiꞌya ꞌin na,
\v 27 tsaloo ti ljyaan sca nu tiꞌi tlyu nu cujlyo ꞌin nchgaa taꞌa cusuun Ndiose la loo quiiꞌ ndiquin.
\v 28 Chaꞌ ntsuꞌhui nu cucha tiꞌin sca lee nu nguaꞌan scua Moisé, loꞌ chaꞌ ntsuꞌhui —tucua snan nu taa suun chaꞌ canꞌ—, tsaloo na caja ti nu mꞌni quiꞌya canꞌ.
\v 29 Ñaꞌan la ca loꞌo nu sti quiyaꞌ ꞌin Sñeꞌ Ndiose, na a tlyu la nu tiꞌi ntsuꞌhui chaꞌ caan ꞌin canꞌ, loꞌ chaꞌ cuꞌni ꞌin tne ñi lca na sca na nu cooꞌ, cuiꞌ chaꞌ nu mdiꞌin tyaa Ndiose nu suhui ꞌin na, tsatoꞌo xcuan tloo canꞌ ꞌin Espíritu nu ljyan loꞌo chaꞌ tsuꞌhue ꞌin na.
\v 30 Cuaꞌ ndyuꞌhui lyoo na ꞌin ñi nu juin: —Nanꞌ nguiꞌni caꞌan ꞌñan xitucuin nu tiꞌi canꞌ, nanꞌ xuꞌhuan lyiyanꞌ ꞌin neꞌ, juin Ñi Xꞌnan na—. Nde xca chaꞌ nu nguinu scua: —Ñi Xꞌnan na cuꞌni ñi xñan bsya ꞌin quichen ꞌin ñi—.
\v 31 ¡Tlyu chaꞌ ca lca na nu tyu na tuyaaꞌ Ndiose, ñi nu loꞌo ca!
\v 32 Una quia yuꞌhui tiꞌ um xa nu ncuan xuꞌhue um chaꞌ tsuꞌhue ꞌin Ndiose, tsala ñaꞌan mda loo um loꞌo scasca nu tiꞌi yaan ꞌin um.
\v 33 Chaꞌ ñi siꞌyana jui sca xaa mdaja neꞌ ꞌin um, loꞌ hasta tloo nten mxitijin neꞌ ꞌin um nu tiꞌi, a cunta mda yaaꞌ um ꞌin nu ndijin nu tiꞌi.
\v 34 Cuiꞌ cuañaꞌan mñaꞌan ꞌtnan tiꞌ um ꞌin jun nu yuꞌhui naꞌan chcuan, tsuꞌhue ntsuꞌhui tiquee um xa jui nu ngulaa na nu ndiꞌin ꞌin um, siꞌyana jlyo tiꞌ um la niꞌ cuaan ndiꞌin chaꞌ cuilyiyaꞌ nu tsuꞌhue lati nu a ntsuꞌhui ꞌa chaꞌ tsatii.
\v 35 Canꞌ chaꞌ a xcuan tloo um chaꞌ nu ya quiꞌan tiꞌ um, siꞌyana loo chaꞌ canꞌ chcuan um sca chaꞌ tsuꞌhue nu tlyu,
\v 36 una ꞌni ꞌa chaꞌ ta loo um loꞌo chaꞌ nu ndijin um, loꞌ xa cuaꞌ mducua um tñan chaꞌ nu nchca tiꞌ Ndiose, xacanꞌ chcuan um chaꞌ tsuꞌhue nu cuaꞌ mdiꞌin tyaa ñi.
\v 37 Una, —cuaꞌ nchcui cuiiꞌ chaꞌ caan ñi nu ntsuꞌhui chaꞌ caan, loꞌ a tiyaꞌ ꞌa ñi lyee la.
\v 38 Sca nu quinu luhui tloon caja chendyu ꞌin loo nu tsa quiꞌan tiꞌ ꞌñan. Una nu tyiꞌan chonꞌ loꞌo chaꞌ re, a ca tsuꞌhue chuꞌhui tiqueen loꞌo canꞌ—.
\v 39 Una nareꞌ a lca na nu nxiton nde chonꞌ nu ntsuꞌhui chaꞌ quinanꞌ, cuiꞌ ca nu lca na sca nten nu ndiya quiꞌan tiꞌ nu ntsuꞌhui chaꞌ tyiꞌo laa.
\c 11
\s Chaꞌ ꞌin nu ndiya quiꞌan tiꞌ 

\p
\v 1 Xa ndiya quiꞌan tiꞌ na, a nꞌni tucua tiꞌ na chaꞌ nu nta na, tsaloo chcuan ti na cunta ꞌin na siyaꞌ a chcanꞌ na.
\v 2 Nu ncua nten cula ꞌin na, loo nu ya quiꞌan tiꞌ neꞌ yuꞌhui cuiyaꞌ tiꞌ Ndiose ꞌin neꞌ.
\v 3 Siꞌyana ndiya quiꞌan tiꞌ na ꞌin Ndiose, tca quiꞌya na cunta siꞌyana loꞌo chaꞌ nu ycuiꞌ ti ñi nguiaꞌ nchgaa loo na, mtñan ñi ꞌin na loꞌo na nu a chcanꞌ.
\v 4 Yu Abel siꞌyana ya quiꞌan tiꞌ yu ꞌin Ndiose, mdaa yu sca lcuan nu ntsuꞌhui lyoo la que ꞌin nu mdaa Cain, canꞌ chaꞌ Ndiose yuꞌhui cuiyaꞌ tiꞌ ñi ꞌin yu loꞌ ncuan xuꞌhue ñi ꞌin na, loꞌ siyaꞌ cuaꞌ ngujui yu, una tiꞌ ndiya yuꞌhui tiꞌ na ñaꞌan ya quiꞌan tiꞌ yu ꞌin ñi.
\v 5 Ticuiꞌ cuañaꞌan yu Enoc siꞌyana ya quiꞌan tiꞌ yu ꞌin Ndiose, nguia loꞌo ñi ꞌin yu ñaꞌan loꞌo yu loꞌ a naꞌan yu chaꞌ ndyija, —a la ꞌa ncua chcanꞌ yu siꞌyana Ndiose nguiaa loꞌo ñi ꞌin yu la niꞌ cuaan—, loꞌ tiꞌ lyijyi tsa loꞌo ñi ꞌin yu xa ngune chaꞌ siꞌyana yuꞌhui cuiyaꞌ tiꞌ ñi ꞌin yu.
\v 6 Chaꞌ a ndiya quiꞌan tiꞌ na ꞌin Ndiose, a ndyijyi ñaꞌan quinu tsuꞌhue tiquee ñi loꞌo na, siꞌyana nu quia nan ꞌin Ndiose, ꞌni chaꞌ tsa quiꞌan tiꞌ culo nducua la siꞌyana ntsuꞌhui ñi, a cunta siꞌyana taa ñi chaꞌ tsuꞌhue ꞌin nu quia nan ꞌin ñi.
\v 7 Yu Noé siꞌyana ya quiꞌan tiꞌ yu ꞌin Ndiose, ncua jaꞌan yu chaꞌ nu msuꞌhua tiyaa ñi ꞌin yu, sca chaꞌ nu a nchca siyaꞌ ñaꞌan nten, loꞌ mdyisnan mtñan yu sca yca naꞌan seꞌen ntsuꞌhui chaꞌ tyiꞌo laa yu loꞌo nchgaa nu ndiꞌin naꞌan ꞌin yu. Siꞌya chaꞌ nu ya quiꞌan tiꞌ yu mxnu yu ꞌin nten chendyu loꞌo chaꞌ jyiꞌo, yatoꞌo mchcuan yu chaꞌ tsuꞌhue nu ntsuꞌhui chaꞌ quiꞌni caꞌan ꞌin nchgaa nu tsa quiꞌan tiꞌ ꞌin Ndiose.
\v 8 Cuiꞌ cuañaꞌan siꞌyana ya quiꞌan tiꞌ yu Abraham ꞌin Ndiose, ncua jaꞌan yu xa nu juin ñi siꞌyana tyiꞌo yu quichen seꞌen ndiꞌin yu, loꞌ chcuan yu cunta xca loo yuu seꞌen ntsuꞌhui chaꞌ quiꞌni caꞌan ꞌin yu, siyaꞌ a jlyo tiꞌ yu la tiyaa yu xa mdoꞌo yu seꞌen canꞌ.
\v 9 Siꞌyana ya quiꞌan tiꞌ yu ꞌin Ndiose, mdiꞌin yu loo yuu seꞌen nu mdiꞌin tyaa ñi chaꞌ tyiꞌin yu, mdiyaa yu seꞌen canꞌ ñaꞌan nchca tiꞌ sca yu nu ndaꞌan ti, loꞌ mdiꞌin yu niꞌ teꞌ naꞌan, cuiꞌ cuañaꞌan mdiꞌin yu Isaac loꞌo yu Jacob, yu nu ntsuꞌhui chaꞌ quiꞌni caꞌan ticuiꞌ chaꞌ tsuꞌhue nu cuaꞌ mdiꞌin tyaa Ndiose ꞌin Abraham,
\v 10 cuiꞌ siꞌyana nducua quiloo yu sca quichen nu cuaꞌ ndiꞌin ca, loꞌ Ndiose ngulo ñi chaꞌ tiyaa ñaꞌan tsaaꞌ na loꞌ mtñan ñi ꞌin na.
\v 11 Loꞌ Sara siꞌyana ya quiꞌan tiꞌ ꞌin Ndiose, siyaꞌ ncua neꞌ sca nu a ntsuꞌhui chaꞌ tyiꞌin sñeꞌ, una yatoꞌo mxilyo ñaꞌan neꞌ loꞌ mdiꞌin sca sñeꞌ neꞌ siyaꞌ lca neꞌ sca nten nu cuaꞌ cula, siꞌyana ya quiꞌan tiꞌ neꞌ ñi ndiꞌin chaꞌ ꞌin ñi nu mdiꞌin tyaa chaꞌ canꞌ.
\v 12 Loo sca yu quiꞌyu nu cuaꞌ cula, nu cuaꞌ nta chaꞌ ndyija, yatoꞌo yton quiꞌan ꞌa nten —tsañaꞌan nducua cuii niꞌ cuaan, cuiꞌ tsañaꞌan ndiꞌin ysin tuꞌhua tyiꞌa tujoꞌo—.
\v 13 Nchgaa neꞌ re ya quiꞌan tiꞌ neꞌ loꞌ ngujui neꞌ, siyaꞌ a mchcuan neꞌ cunta chaꞌ nu cuaꞌ mdiꞌin tyaa Ndiose, una tijyoꞌ ti mnanꞌ ꞌya neꞌ chaꞌ canꞌ loꞌ a mꞌni tucua tiꞌ neꞌ, cuiꞌ ca nu tsuꞌhue ntsuꞌhui tiquee neꞌ ncuan xuꞌhue neꞌ chaꞌ canꞌ, loꞌ nchcuiꞌ neꞌ siꞌyana lca neꞌ —sca nu ndaꞌan ti loꞌ ndijin ti loo chendyu re—.
\v 14 Tsalca nu nchcuiꞌ cuañaꞌan, ndyiꞌya na chaꞌ tiyaa siꞌyana ndaꞌan nan neꞌ seꞌen nu ntsuꞌhui chaꞌ ca quichen tyi neꞌ,
\v 15 loꞌ chaꞌ cua na tiꞌ ntsuꞌhui tiquee neꞌ quichen seꞌen mdoꞌo neꞌ, a tucui ñaꞌan xitucui neꞌ quiaa neꞌ.
\v 16 Una siꞌyana lca tiquee neꞌ tiyaa neꞌ sca seꞌen nu tsuꞌhue la, cuiꞌ la niꞌ cuaan, canꞌ chaꞌ a mxijyiꞌo tiꞌ ñi ngulo naan neꞌ ꞌin ñi lca ñi Ndiose ꞌin neꞌ, siꞌyana cuaꞌ mꞌni chuꞌhue ñi sca quichen seꞌen tyiꞌin neꞌ.
\v 17 Cuiꞌ cuañaꞌan yu Abraham siꞌyana ya quiꞌan tiꞌ yu ꞌin Ndiose, mdiꞌin tyaa yu ꞌin Isaac tloo Ndiose ñaꞌan nchca tiꞌ sca lcuan, yatoꞌo cuiꞌ yu nu ncuan xuꞌhue chaꞌ nu mdiꞌin tyaa Ndiose canꞌ, mdyaa yu ꞌin scati sñeꞌ yu siꞌyana caja canꞌ,
\v 18 loꞌ Ndiose ca lca nu juin loꞌo yu: —Loo yu Isaac nu lca sñeꞌ um ntsuꞌhui chaꞌ cuton ta nten ꞌin um—.
\v 19 A mꞌni tucua tiꞌ yu siꞌyana Ndiose tla chaꞌ ꞌin ñi loꞌ tca cuꞌni ñi chaꞌ tyiquiꞌo yu Isaac, ñaꞌan loo chaꞌ siꞌyana loo chaꞌ ndyija canꞌ xiyaꞌ mchcuan yu ꞌin sñeꞌ yu.
\v 20 Ticuiꞌ cuañaꞌan yu Isaac siꞌyana ya quiꞌan tiꞌ yu ꞌin Ndiose, mjñan yu ꞌin ñi siꞌyana taa ñi chaꞌ tsuꞌhue nu ntsuꞌhui chaꞌ quiꞌni caꞌan ꞌin chcuaa sñeꞌ yu, Jacob loꞌo Esaú.
\v 21 A cunta yu Jacob siꞌyana ya quiꞌan tiꞌ yu ꞌin Ndiose, mjñan yu ꞌin ñi siꞌya chaꞌ ꞌin cunda scaa sñeꞌ See xa nu cuaꞌ nchcui cuiiꞌ chaꞌ caja yu, —loꞌ xtyi loꞌo juesa ꞌin yca scaan ti yu mdyi tucua yu, loꞌ mꞌni tnu yu ꞌin Ndiose—.
\v 22 Ticuiꞌ cuañaꞌan yu See xa nu cuaꞌ nchcui cuiiꞌ chaꞌ caja yu, siꞌyana ya quiꞌan tiꞌ yu ꞌin Ndiose, mdiꞌin tyaa yu chaꞌ siꞌyana ntsuꞌhui chaꞌ tyiꞌo nchgaa sñeꞌ neꞌ Israel seꞌen lca Egipto, loꞌ mxnu yu cunta ꞌin neꞌ siꞌyana culyoo neꞌ tijyan yu xa nu tyiꞌo neꞌ seꞌen canꞌ.
\v 23 Cuiꞌ cuañaꞌan yu Moisé xa ncua cuneꞌ yu, siꞌyana ya quiꞌan tiꞌ nten cula ꞌin yu ꞌin Ndiose, msuꞌhua cutsiꞌ jun ꞌin yu tsaniꞌ snan cooꞌ, naꞌan jun siꞌyana tsuꞌhue ꞌa ñaꞌan yu, loꞌ a ytsen jun tsañaꞌan chaꞌ nu mdiꞌin tyaa yu ree canꞌ.
\v 24 Xa nu cuaꞌ ngula ton yu Moisé canꞌ, siyaꞌ lca yu sñeꞌ neꞌ cunaꞌan sñeꞌ Faraón, una mscuan tloo yu chaꞌ cuiyaꞌ canꞌ siꞌyana ya quiꞌan tiꞌ yu ꞌin Ndiose,
\v 25 cuiꞌ ca nu nde mdoꞌo tiquee yu tyijyin yu nu tiꞌi tsatlyu loꞌo quichen ꞌin Ndiose, loꞌ siꞌi nu cuꞌni yu quiꞌya sca coꞌ xaa tsuꞌhue chuꞌhui tiquee yu loo chendyu re.
\v 26 Lyee la msuꞌhua loo yu tyijyin yu nu tiꞌi tsañaꞌan mdijin Cristo, loꞌ siꞌi nu chcui tiꞌ yu chaꞌ cuilyiyaꞌ nu ndiꞌin ꞌin neꞌ Egipto, siꞌyana mdiꞌin tyaa yu quiloo yu chaꞌ tsuꞌhue nu quiꞌni caꞌan ꞌin yu tiyaa xaa.
\v 27 Siꞌyana ya quiꞌan tiꞌ yu ꞌin Ndiose, mdoꞌo yu seꞌen lca Egipto, loꞌ a ytsen yu tloo ree canꞌ siyaꞌ scuen tiqueꞌ loꞌo yu, siꞌyana a mchcuan yu quiloo yu ꞌin ñi nu A Chcanꞌ.
\v 28 Siꞌyana ya quiꞌan tiꞌ yu ꞌin Ndiose, mꞌni tnu yu taꞌa pascua loꞌ mscuin yu tne ꞌni canꞌ, siꞌyana a caja sñeꞌ culoo neꞌ Israel xa nu cujlyo angujle canꞌ ꞌin sñeꞌ neꞌ Egipto.
\v 29 Siꞌyana ya quiꞌan tiꞌ neꞌ Israel ꞌin Ndiose, mdijin neꞌ Tujoꞌo Ngaꞌá ñaꞌan nchca tiꞌ loo yuu ngutyi. Loꞌo neꞌ Egipto ncua tiꞌ neꞌ tyijyin neꞌ, una yatoꞌo ngujui yuꞌhui neꞌ loo tyiꞌa canꞌ.
\v 30 Cuiꞌ cuañaꞌan siꞌyana ya quiꞌan tiꞌ neꞌ Israel ꞌin Ndiose, canꞌ chaꞌ nguten tiꞌin loꞌo nu ntsuꞌhui nchcun quichen Jericó, xa mdaꞌa cati tsaan nu mdaꞌan neꞌ tyiꞌiin tuꞌhua quichen canꞌ.
\v 31 Neꞌ cunaꞌan nducunꞌ nu naan Rahab, siꞌyana ya quiꞌan tiꞌ neꞌ ꞌin Ndiose, mdoꞌo laa neꞌ xa ngujui nchgaa nten nducunꞌ canꞌ, siꞌyana loꞌo chaꞌ tsuꞌhue ncuan xuꞌhue neꞌ ꞌin yu Israel nu ya yꞌni quii quichen canꞌ.
\v 32 Ñi lyijyi la chaꞌ tiꞌ chcuinꞌ loꞌo um, siꞌyana chaan tsatoꞌo chaꞌ tyisnan chcuiꞌ na chaꞌ ꞌin yu Gedeón, yu Barac, yu Sansón, yu Jefté, chaꞌ ꞌin Davi, yu Samuel, uta nchgaa la ñaꞌan yu nu mxiycuiꞌ Ndiose ꞌin cuaꞌ sꞌni.
\v 33 Siꞌyana ya quiꞌan tiꞌ neꞌ ꞌin Ndiose, mꞌni neꞌ canan ꞌin scasca quichen tnu, mꞌni cuiyaꞌ neꞌ chaꞌ ꞌin nten canꞌ loꞌo chaꞌ ꞌin lee, mchcuan neꞌ cunta chaꞌ nu mdiꞌin tyaa Ndiose, —loꞌ mducun neꞌ tuꞌhua cuichi—,
\v 34 loꞌ mꞌni neꞌ canan ꞌin quiiꞌ tnu, a ngujui neꞌ loꞌo tuꞌhua bxtyi, msuꞌhua neꞌ juesa siyaꞌ naꞌan tiꞌ neꞌ, mꞌni ngula tiꞌ neꞌ xa mꞌni neꞌ cusuun, loꞌ mducui lyiꞌo neꞌ ꞌin yu sindatu nu mdoꞌo tijyoꞌ.
\v 35 A cunta ntsuꞌhui neꞌ cunaꞌan nu mchcuan cunta ꞌin sñeꞌ xa mdyiquiꞌo, una ntsuꞌhui nu mdijin nu tiꞌi tnu tuyaaꞌ nten nu nducunꞌ, siyaꞌ jui ñaꞌan tyiꞌo laa neꞌ una mscuan tloo neꞌ chaꞌ canꞌ, siꞌyana nducua tloo neꞌ tyiquiꞌo neꞌ loꞌ caja sca chendyu nu tsuꞌhue lati ꞌin neꞌ.
\v 36 Ntsuꞌhui nu cuaꞌ ñaꞌan ti mꞌni lyiꞌo neꞌ ꞌin loꞌ mjyiꞌin neꞌ ꞌin, a cunta ntsuꞌhui nu mscanꞌ neꞌ ꞌin loꞌo carena loꞌ msuꞌhua neꞌ ꞌin naꞌan chcuan.
\v 37 Ntsuꞌhui nu yjui neꞌ ꞌin loꞌo quee, msiꞌyu neꞌ ꞌin loꞌo cierra, mxitijin neꞌ ꞌin nu tiꞌi chaꞌ tsala ñaꞌan ta loo, ntsuꞌhui nu ngujui loꞌo tuꞌhua bxtyi, cuaꞌ la mdaꞌaan neꞌ, ycoꞌ neꞌ quijyin ꞌni, nguinu tiꞌi ñaꞌan chendyu ꞌin neꞌ, mdijin neꞌ chaꞌ xiꞌin, cuaꞌ ñaꞌan ti jui nu mꞌni lyiꞌo ꞌin neꞌ.
\v 38 Tsañaꞌan nu ntsuꞌhui lyoo jun re, a ntsuꞌhui suun ꞌin nten chendyu cuan xuꞌhue ꞌin jun. A cunta mdaꞌan snan yuꞌhui jun seꞌen ngutyi, loo quiꞌya, tuquee, a cunta nde niꞌ tuyuu.
\v 39 Nchgaa jun re ya quiꞌan tiꞌ jun ꞌin Ndiose, loꞌ yuꞌhui cuiyaꞌ tiꞌ ñi ꞌin jun, siyaꞌ cuañaꞌan a ngula ñaꞌan jun chaꞌ nu mdiꞌin tyaa ñi loꞌo jun.
\v 40 Una Ndiose mdiꞌin tyaa ñi sca chaꞌ nu tsuꞌhue lati nu quiꞌni caꞌan ꞌin nareꞌ, siꞌyana tsatlyu ca chcui chaꞌ ꞌin na loꞌo jun.
\c 12
\s Scati ꞌin Jesús chcua quiloo na 

\p
\v 1 Chaꞌ tsa cuañaꞌan quiꞌan jun ndiꞌin jun chcua tyiꞌiin tsoꞌ, xcuan tloo na nchgaa loo chaꞌ nu nchcui ndijin loo chendyu ꞌin na uta quiꞌya nu nxicanꞌ ton ꞌin na, loꞌ suꞌhua na juesa tsaa na nde loo tucueen nu cuaꞌ nguiaa na.
\v 2 Chcua quiloo na ꞌin Jesús, ñi nu mducua suun chaꞌ nu ndiya quiꞌan tiꞌ na, loꞌ lca ñi sca cuiyaꞌ seꞌen ntsuꞌhui chaꞌ tiyaa na, siyaꞌ mdijin ñi nu tiꞌi loo cusi, una tsuꞌhue ntsuꞌhui tiquee ñi, a mxijyiꞌo tiꞌ ñi loꞌo chaꞌ canꞌ, loꞌ yten tucua ñi tsoꞌ cueen ꞌin Ndiose la niꞌ cuaan.
\v 3 Quiñan tiꞌ um tsala ñaꞌan tiꞌi mdijin Jesús tuyaaꞌ nten quiꞌya chendyu loꞌ mda loo ñi, cuañaꞌan caja la chaꞌ tnu tiquee ꞌin um loꞌ a cuꞌni naꞌan tiꞌ um.
\v 4 Siꞌyana tsañaꞌan nu nxcuan tloo um scasca loo quiꞌya, a nchca tiyaa um cuiyaꞌ nu cujui neꞌ ꞌin um siꞌya chaꞌ canꞌ.
\v 5 ¿Ta cuaꞌ ngujlya tiꞌ um ñaꞌan nda cueen Ñi Xꞌnan na ꞌin um, ꞌun nu lca sñeꞌ ñi, xa juin ñi: —Sñenꞌ, a xcuan tloo um chaꞌ nu culoꞌo Ñi Xꞌnan na ꞌin um, loꞌ a lyiꞌun tiꞌ um xa nu xun loꞌo ñi ꞌin um,
\v 6 siꞌyana Ñi Xꞌnan na nda cueen ñi ꞌin tsalca nu nꞌni ñi ꞌtnan, loꞌ njyiꞌin ñi ꞌin nu lca sñeꞌ ñi—?
\v 7 Chaꞌ ta loo um nchgaa chaꞌ re, nchca chcanꞌ ñaꞌan siꞌyana lca um sñeꞌ Ndiose. ¿Ta ntsuꞌhui nten nu a xun loꞌo ꞌin sñeꞌ xa nu siꞌi ñaꞌan nꞌni?
\v 8 A tucui nu ta a ndyijyi nu nda cueen ꞌin, una chaꞌ Ndiose xnu ñi ꞌin na cuati ñaꞌan, a lca na ycuiꞌ ca sñeꞌ ñi xacanꞌ.
\v 9 A cunta nten cula ꞌin na, loꞌo canꞌ mda cueen ꞌin na loꞌ mꞌni suun na ꞌin, ¿ta siꞌi lyee lati ndon loo chaꞌ ca jaꞌan na ꞌin Stina Ndiose loꞌ caja chendyu ꞌin na?
\v 10 Chaꞌ ñi siꞌyana nten cula ꞌin na mda cueen jun ꞌin na sca coꞌ xaa tsañaꞌan nu ncua ꞌin jun, una tsoꞌ nu ꞌin Ndiose ndloꞌo ñi ꞌin na siꞌyana ca nu tsuꞌhue ꞌin na, loꞌ ca luhui chaꞌ tiyaa ꞌin na tsañaꞌan nu lca ñi.
\v 11 Chaꞌ ñi siꞌyana a tucui tsuꞌhue ntsuꞌhui tiquee xa ndijin scasca loo chaꞌ, cuiꞌ ca nu nde luꞌun tiꞌ canꞌ, una tiyaa xaa nchca chcanꞌ loo chaꞌ tsuꞌhue nu ljyan loꞌo na ꞌin nu mda loo chaꞌ canꞌ.
\s Chaꞌ ꞌin nten nu nxcuan tloo chaꞌ tsuꞌhue ꞌin Ndiose
\p
\v 12 —Canꞌ chaꞌ xñii um yaaꞌ um loꞌ suꞌhua um juesa tyiton um xiyaꞌ—,
\v 13 loꞌ —tyiꞌan um sca tucueen nu ñi ti—, siꞌyana nu naꞌan tiꞌ a tyiꞌo tsoꞌ canꞌ, cuiꞌ ca nu ca chcui chaꞌ tiyaa ꞌin.
\v 14 A cunta cunan um ñaꞌan nu tyiꞌin tsuꞌhue um loꞌo nchgaa tucui loꞌ tyuꞌhui um sca chendyu nu luhui, siꞌyana a tucui nu tca tiyaa tloo Ñi Xꞌnan na chaꞌ a luhui cusya ꞌin.
\v 15 Xñi um cunta siꞌyana a tyiꞌo tsoꞌ um siiꞌ chaꞌ tsuꞌhue ꞌin Ndiose, uta cutsu sca chaꞌ ngunanꞌ lja um loꞌ tyisnan cuꞌni na tucui loo chendyu ꞌin um, loꞌ tsatoꞌo quiꞌan nu cuꞌni lyiꞌun na chendyu ꞌin.
\v 16 A nchca chaꞌ sten yuꞌhui um loꞌo scasca tucui uta sti quiyaꞌ um chaꞌ ꞌin Ndiose, ñaꞌan nchca tiꞌ Esaú xa yjuiꞌ yu ñaꞌaan chaꞌ tsuꞌhue nu ntsuꞌhui chaꞌ quiꞌni caꞌan ꞌin yu siꞌya sca quiꞌnan ti chaꞌ nchcu.
\v 17 Jlyo tiꞌ na siꞌyana nde loo la ncua tiꞌ yu chcuan yu chaꞌ tsuꞌhue canꞌ, una jui nu mscuan tloo ꞌin yu, loꞌ a jui ꞌa ñaꞌan nu cuꞌni chuꞌhue yu chaꞌ canꞌ siyaꞌ nguilo tyiꞌa quiloo yu.
\v 18 Una ꞌun xa ya quiꞌan tiꞌ um a yaa um seꞌen nducua ca quiꞌya Sinai, seꞌen mdoꞌo quiiꞌ loo quiꞌya canꞌ, a cunta tla yta na, ngoꞌo yuꞌhui coo ꞌin na loꞌ lyee nchca cuiꞌin,
\v 19 loꞌ lja ycuiꞌ Ndiose loꞌo neꞌ cueen ꞌa ngune ñaꞌan nchca tiꞌ sca cuhuii, nu hasta mjñan neꞌ chaꞌ tsuꞌhue ꞌin ñi siꞌyana a chcuiꞌ a ñi,
\v 20 siꞌyana cuaꞌ a ta loo ꞌa neꞌ loꞌo chaꞌ nu ngulo ñi tñan: —Siꞌyana hasta ꞌni chaꞌ tsa taꞌan ꞌin siiꞌ quiꞌya canꞌ, ꞌni chaꞌ caja ꞌin loꞌo quee uta loꞌo quilyaa chcuan—.
\v 21 Ndyijyin yaꞌ tlyu chaꞌ nu ncua canꞌ, nu hasta loꞌo juin Moisé: Mchcuan siꞌyana lyee nguitsen chaꞌ re.
\v 22 Una ꞌun xa ya quiꞌan tiꞌ um mdiyaa um seꞌen nducua quiꞌya nu naan Sion, seꞌen lca quichen tyi Ndiose, ñi nu loꞌo ca, cuiꞌ Jerusalén la niꞌ cuaan seꞌen ndiꞌin tyun mii angujle,
\v 23 canꞌ ndiyoꞌ tiꞌin tsalca nu cuaꞌ mdoꞌo hui ꞌin Ndiose nu cuaꞌ nguaꞌan scua nii la niꞌ cuaan, canꞌ nducua Ndiose, ñi nu Nꞌni Cuiyaꞌ Chaꞌ ꞌin nten, a cunta canꞌ ndiꞌin cusya ꞌin jun nu cuaꞌ ngujui, nchgaa nu ñi ndiꞌin chaꞌ ꞌin nu cuaꞌ nguinu luhui tloo ñi,
\v 24 canꞌ nducua Jesús, ñi nu Mꞌni Chaꞌ nchca cui nchgaa chaꞌ re, siꞌya tne nu mscuin ñi la niꞌ cuaan, loꞌ tne canꞌ a lca na ñaꞌan nchca tiꞌ tne yu Abel nu ntsuꞌhui chaꞌ tyuꞌhui lyiyaꞌ, cuiꞌ ca nu lca na tne nu culo laa ꞌin na.
\v 25 Xñi um cunta siꞌyana a xcuan tloo um ꞌin ñi nu nchcuiꞌ loꞌo na. Chaꞌ cuañaꞌan a mdoꞌo laa nten loo chendyu re siyaꞌ jui nu msuꞌhua tiyaa ꞌin neꞌ, ñaꞌan la ca nareꞌ, na tiꞌ caja ñaꞌan tyiꞌo laa na chaꞌ xcuan tloo na ꞌin ñi nu nchcuiꞌ loꞌo na tiꞌ la niꞌ cuaan.
\v 26 Xa ycuiꞌ Ndiose loo quiꞌya Sinai, hasta nguiñan tucui chendyu, una cuaꞌ ñii cuaꞌ mdiꞌin tyaa ñi xca chaꞌ, loꞌ juin ñi: —Xiyaꞌ ti ntsuꞌhui chaꞌ xiquiñan tucuin chendyu re, una cuaꞌ loꞌo nde niꞌ cuaan xacanꞌ—.
\v 27 Nde chaꞌ juin ñi xiyaꞌ ti canꞌ, siꞌyana cuꞌni tyii ñi na nu chcanꞌ loo chendyu re, loꞌ xnu scua tla ñi na nu a ntsuꞌhui ꞌa chaꞌ tsatii.
\v 28 Loꞌ siꞌyana cuaꞌ jui sca chendyu ꞌin na nu a ntsuꞌhui ꞌa chaꞌ tsatii seꞌen ndlo Ndiose tñan, canꞌ chaꞌ tsuꞌhue ntsuꞌhui tiquee na cuꞌni tnu na ꞌin ñi tsañaꞌan nu nchca tiꞌ ñi, loꞌo suun ñaꞌan tiyaa na tloo ñi loꞌo sca ytsen niꞌ cusya ꞌin na,
\v 29 siꞌyana —Stina Ndiose lca ñi sca quiiꞌ nu njlyo nchgaa loo na—.
\c 13
\s Chaꞌ nu ntsuꞌhui chaꞌ cuꞌni jun 

\p
\v 1 Tsa quiñan um chuꞌhui chaꞌ tsuꞌhue ꞌin um scasca um.
\v 2 A jlya tiꞌ um taa um seꞌen quinu jun nu ndaꞌan ti, siꞌyana ntsuꞌhui nu mdaa naꞌan ꞌin seꞌen nguinu angujle, siyaꞌ a ngujlyo tiꞌ tucui ca lca canꞌ.
\v 3 Quia yuꞌhui tiꞌ um ꞌin nu ntsuꞌhui naꞌan chcuan, loꞌ cuꞌni um cunta siꞌyana tsatlyu ntsuꞌhui um loꞌo canꞌ, ticuiꞌ cuañaꞌan loꞌo nu nxitijin neꞌ ꞌin nu tiꞌi, cuꞌni um cunta siꞌyana loꞌo um ndijin um nu tiꞌi.
\v 4 Cunan um ñaꞌan cuꞌni coꞌo um ꞌin um luhui ti loꞌo nten ꞌin um, una nu nguiten yuꞌhui loꞌo scasca neꞌ cunaꞌan, Ndiose cuꞌni ñi xñan bsya ꞌin canꞌ.
\v 5 A taa um yaꞌ ca lca tiquee um loꞌo chaꞌ cuilyiyaꞌ, loꞌ quiꞌya tuꞌhui tiꞌ um loꞌo tsa na nu ndiꞌin ꞌin um, siꞌyana ndeñaꞌan juin Ndiose: —A siyaꞌ xnun ꞌin um cuati ñaꞌan, loꞌ ñi a cula yaanꞌ ꞌin um—.
\v 6 Canꞌ chaꞌ tca chcuiꞌ na loꞌo nu nchgaa lca tiquee na: —Ñi Xꞌnan na nda yaaꞌ ñi ñan, loꞌ a xicutsen tinꞌ loꞌo tiꞌi nu tca cuꞌni nten loꞌon—
\v 7 Quia yuꞌhui tiꞌ um ꞌin tsalca nu ntsuꞌhui cunta ꞌin um niꞌ lyaa, yu nu ycuiꞌ chaꞌ ꞌin Ndiose loꞌo um, xñi um cunta chendyu nu mduꞌhui yu loꞌ chcui nchaꞌan um chaꞌ nu ya quiꞌan tiꞌ yu.
\v 8 Jesucristo scañaꞌan ti ñi nchgaa xaa: Tsaan lca, cuaꞌ ñii, loꞌ cuiꞌ ñi tsala xaa.
\v 9 A taa um yaꞌ caja nu cuñilyiꞌo ꞌin um loꞌo scasca chaꞌ nu a nchcua taꞌa loꞌo chaꞌ nu ꞌin Ndiose. Lyee la ntsuꞌhui lyoo nu suꞌhua loo um chaꞌ tsuꞌhue ꞌin ñi loꞌ siꞌi nu chcui nchaꞌan um scasca loo chaꞌ siꞌya chaꞌ nchcu, nu a sca chaꞌ tsuꞌhue jui ꞌin neꞌ loꞌo.
\v 10 Nareꞌ ndon sca seꞌen nꞌni tnu na ꞌin Ndiose la niꞌ cuaan, loꞌ yu nu tiꞌ nguia nchaꞌan chaꞌ ꞌin teꞌ naꞌan canꞌ, a tca cu yu na nu nducua canꞌ.
\v 11 Loꞌ siꞌya quiꞌya ꞌin nten quichen, yten loꞌo yu tne ꞌni seꞌen nu luhui lati ꞌin Ndiose, una cunanꞌ ꞌni canꞌ ndiquin tiꞌin yu ꞌin na nde tuꞌhua quichen.
\v 12 Cuiꞌ cuañaꞌan Jesús mdijin ñi nu tiꞌi nde tuꞌhua quichen, siꞌyana suhui ñi ꞌin nten loꞌo tne ñi.
\v 13 Canꞌ chaꞌ loꞌo nareꞌ tyiꞌo na nde tuꞌhua quichen loꞌ quia nan na ꞌin ñi, loꞌ ca sca chaꞌ ti ꞌin na loꞌo tiꞌi nu mdijin ñi.
\v 14 Siꞌyana loo chendyu re a la quija lyoo sca quichen seꞌen tyiꞌin na tsala xaa, cuiꞌ ca nu nta na sca quichen nu taa Ndiose ꞌin na tiyaa xaa.
\v 15 Canꞌ chaꞌ siꞌya Jesús, cuꞌni tnu na ꞌin Ndiose nchgaa xaa, taa na sca lcuan ꞌin ñi loꞌo ñaꞌan nu cula loꞌo na ꞌin ñi, loꞌo chaꞌ nu chcuiꞌ na taa na loo ñi.
\v 16 A nchca chaꞌ culaꞌ tiꞌ na cuꞌni na tsuꞌhue, loꞌ ta yaaꞌ taꞌa na scasca na, siꞌyana ticuiꞌ sca lcuan nu ndyuꞌhui cuiyaꞌ tiꞌ Ndiose ca lca na.
\v 17 A cunta ca jaꞌan um ꞌin scasca yu nu ntsuꞌhui cunta ꞌin um seꞌen ndiyoꞌ tiꞌin um, loꞌ tucua um tñan chaꞌ nu nchcuiꞌ yu siꞌyana cuiꞌ yu ntsuꞌhui yuhue tiꞌ yu ꞌin um loꞌo tsoꞌ nu ꞌin Ndiose, ñi nu ntsuꞌhui chaꞌ tyaa yu cunta ꞌin um tiyaa xaa, ñaꞌan ca siꞌyana cuꞌni yu tñan ndon tiꞌ yu, siꞌyana a sca chaꞌ tsuꞌhue ljyaan ꞌin um chaꞌ ta luꞌun tiꞌ yu.
\v 18 Jñan um ꞌin Ndiose siꞌya chaꞌ ꞌin hua, jlyo tiꞌ hua siꞌyana luhui chaꞌ tiyaa ꞌin hua, loꞌ nducua tloo hua tyiꞌo tsuꞌhue nchgaa tñan nu cuꞌni hua.
\v 19 Jñan chaꞌ tsuꞌhue ꞌin um siꞌyana nde lyee la jñan um ꞌin Ndiose, siꞌyana taa ñi chaꞌ cuiyaꞌ xitucuin seꞌen ndiꞌin um nu ndla la.
\s Xa mslaꞌ taꞌa jun
\p
\v 20 Ndiose, ñi nu nꞌni chaꞌ nxitñanꞌ cusya ꞌin na, ñi nu mꞌni chaꞌ mdyiquiꞌo Ñi Xꞌnan na Jesucristo, ñi nu ndon loo lati nu ntsuꞌhui cunta ꞌin nu cuaꞌ ngulohui Ndiose, siꞌya tne ñi mꞌni Ndiose chaꞌ nguinu scua tla chaꞌ nu cuaꞌ mdiꞌin tyaa ñi,
\v 21 loꞌ cuꞌni ñi chaꞌ ca chcui chaꞌ tiyaa ꞌin um siꞌyana tca cuꞌni um chaꞌ nu nchca tiꞌ ñi, loꞌ siꞌya Jesucristo cuꞌni Ndiose chaꞌ ca lca tiquee um loꞌo chaꞌ nu ndyuꞌhui cuiyaꞌ tiꞌ ñi, scati ꞌin ñi ntsuꞌhui chaꞌ cuꞌni tnu na tsala xaa. Amen.
\v 22 Mjñan chaꞌ tsuꞌhue ꞌin um, ꞌun jun taꞌa na, siꞌyana cuan xuꞌhue um chaꞌ nu ycuinꞌ loꞌo tsa chinꞌ chaꞌ nu nguaꞌan re.
\v 23 Quitsanꞌ ꞌin um siꞌyana yu taꞌa na Timoteo cuaꞌ mdyiꞌo yu naꞌan chcuan, loꞌ chaꞌ quila yu ndla la seꞌen ndiꞌin, loꞌo yu taꞌa tsaꞌan seꞌen ndiꞌin um.
\v 24 Chcuiꞌ chaꞌ um ꞌin nchgaa yu nu ntsuꞌhui cunta ꞌin um tñan loon, tsatlyu loꞌo nchgaa la ñaꞌan jun taꞌa na. Ticuiꞌ cuañaꞌan jun taꞌa na Italia nchcuiꞌ chaꞌ jun ꞌin um.
\v 25 Chaꞌ tsuꞌhue ꞌin Ndiose quinu loꞌo um tsala xaa. Amen.