\id JAS - Nopala (Chatino) NT [cya] - Mexico 2013 (web 2014)
\h SANTIAGO
\toc1 Santiago
\toc2 Santiago
\toc3 Stg
\mt1 Santiago
\c 1
\s Yu Santiago nchcuiꞌ chaꞌ yu ꞌin jun
\p
\v 1 Nanꞌ yu Santiago, nu lca nguso ꞌin Ndiose loꞌo Ñi Xꞌnan na Jesucristo, nchcuinꞌ chanꞌ ꞌin um, ꞌun nu mdoꞌo loo tichcua ta nten ꞌin neꞌ Israel nu ndiꞌin sca chcui chendyu.
\s Chaꞌ tiyaa nu ndaa Ndiose
\p
\v 2 ꞌUn jun taꞌa na, nde lyee la ca tsuꞌhue chuꞌhui tiquee um xa ndijin um scasca nu tiꞌi,
\v 3 cuaꞌ jlyo tiꞌ um loo nu ndijin um chaꞌ siꞌya chaꞌ nu ndiya quiꞌan tiꞌ um, nde caja la juesa ꞌin um ta loo um loꞌo chaꞌ canꞌ.
\v 4 Una ta loo um tsayaꞌ ca chcanꞌ loo tñan tsuꞌhue nu can loꞌo chaꞌ canꞌ, siꞌyana tca tyon tla um loꞌ ca chcui la chaꞌ tiyaa ꞌin um, loꞌ ñi sca chaꞌ a tsa lyijyi ꞌin um.
\v 5 Una chaꞌ ntsuꞌhui um ndiya lyijyi chaꞌ tiyaa ꞌin um, jñan um ꞌin Ndiose, loꞌ taa ñi ꞌin na, siꞌyana Ndiose siꞌi na ndyuꞌhui cuiyaꞌ ti chaꞌ tiyaa nu ndaa ñi ꞌin nchgaa tucui, ñi a nxcuan tloo ñi ꞌin canꞌ.
\v 6 Una xa jñan um ꞌin na, a cuꞌni tucua tiꞌ um, cuiꞌ ca nu tsa quiꞌan tiꞌ um, siꞌyana nu nꞌni tucua tiꞌ nguiaa chaꞌ ꞌin tsañaꞌan nguiaa chaꞌ ꞌin tyiꞌa tujoꞌo xa ndiyan ytsa na, loꞌ scasca tsoꞌ nguia loꞌo cuiꞌin ꞌin na.
\v 7 Nu nguiꞌni cuañaꞌan a nducua tloo canꞌ chaꞌ tsuꞌhue nu taa Ñi Xꞌnan na,
\v 8 siꞌyana tucua chaꞌ tiyaa ꞌin, loꞌ cuañaꞌan nguiaa chaꞌ ꞌin loꞌo nchgaa loo chaꞌ.
\v 9 Sca jun taꞌa na nu tiꞌi ñaꞌan chendyu ꞌin, ca tsuꞌhue chuꞌhui tiquee canꞌ siꞌyana Ndiose cuaꞌ mscuen cuaan ñi ꞌin.
\v 10 loꞌ jun nu cuilyiyaꞌ, ca tsuꞌhue chuꞌhui tiquee jun siꞌyana Ndiose cuaꞌ mdyiꞌya teꞌen chaꞌ ꞌin jun. Tsañaꞌan ndyijyin chaꞌ ꞌin sca quee nu nducua niꞌ quixinꞌ, cuañaꞌan ntsuꞌhui chaꞌ tyijyin chaꞌ ꞌin yu cuilyiyaꞌ,
\v 11 siꞌyana xa nchcua cucha loꞌ nguiꞌni tiqueꞌ cuaan ꞌin na, quee canꞌ nguinanꞌ tucua na loꞌ ndyu na, ndyijyin chaꞌ nu tsuꞌhue ñaꞌan na, cuañaꞌan nguiaa chaꞌ ꞌin yu cuilyiyaꞌ, quinanꞌ chendyu ꞌin yu loꞌo chaꞌ cuilyiyaꞌ canꞌ ꞌin yu.
\s Ta loo na loꞌo chaꞌ nu ljyaan ꞌin na
\p
\v 12 Tsuꞌhue ca xuꞌhue nu nda loo loꞌo scasca chaꞌ nu ljyaan ꞌin, siꞌyana xa nu cuaꞌ mda loo canꞌ, chcuan cunta chaꞌ tsuꞌhue, cuiꞌ chendyu nu cuaꞌ mdiꞌin tyaa Ndiose chaꞌ taa ñi ꞌin nchgaa nu tsuꞌhue ntsuꞌhui tiquee loꞌo ñi.
\v 13 Xa ljyaan sca chaꞌ nu xityu ꞌin na loo quiꞌya, a chcuiꞌ na siꞌyana Ndiose ngula yaaꞌ ñi ꞌin na, siꞌyana Ndiose a tca tyu ñi loo quiꞌya, ñi a ntsuꞌhui chaꞌ xityu ñi ꞌin ñi sca tucui loo chaꞌ canꞌ.
\v 14 Cuiꞌ ca nu cunda scaa na ndyu na loo quiꞌya siꞌya chaꞌ ngunanꞌ ndyiꞌo tiquee na, loꞌ ndaa na yaꞌ tsayaꞌ nu tsatoꞌo chaꞌ canꞌ.
\v 15 Xa cuaꞌ yten chaꞌ ngunanꞌ canꞌ tiquee na, a sꞌni cutsu cuati loo quiꞌya, loꞌ xa cuaꞌ ndon loo na, tsa loꞌo na ꞌin na loo chaꞌ ndyija.
\v 16 ꞌUn jun taꞌa na nu ndyuꞌhui cuiyaꞌ tinꞌ ꞌin, a cuiñi lyiꞌo um ꞌin um ticuiiꞌ um.
\v 17 Nchgaa loo chaꞌ tsuꞌhue loꞌo chaꞌ nu ñi, ndyiꞌo na nde niꞌ cuaan cunta ꞌin Stina Ndiose, ñi nu mtñan nchgaa loo xaa nu ntsuꞌhui niꞌ cuaan, ñi nu scañaꞌan ti chaꞌ ꞌin, loꞌ a nchaꞌan ñi tsañaꞌan nchaꞌan sca ndlaꞌ.
\v 18 Siꞌya chaꞌ tsuꞌhue mdoꞌo tiquee ñi mdaa ñi chendyu ꞌin na loo nu ngune ꞌin na chaꞌ nu ñi, siꞌyana ca na sñeꞌ ñi nu culoo nu mdoꞌo hui ca ꞌin ñi.
\s Tucua na tñan chaꞌ nu nchcuiꞌ Ndiose
\p
\v 19 Canꞌ chaꞌ, ꞌun jun taꞌa na nu ndyuꞌhui cuiyaꞌ tinꞌ ꞌin, ndon tiyaa um quine ꞌin um xa caja nu chcuiꞌ, loꞌ a nchca chaꞌ chcuiꞌ um ndla ndsa, uta cuiꞌ xaa quitsinꞌ tiꞌ um,
\v 20 siꞌyana sca nu nchcuen tiqueꞌ, a ndaa canꞌ yaꞌ cuꞌni tñan tsuꞌhue nu nchca tiꞌ Ndiose.
\v 21 Canꞌ chaꞌ xcuan tloo um nchgaa loo chaꞌ nducunꞌ loꞌo chaꞌ ngunanꞌ, loꞌ cuan xuꞌhue um loꞌo suun ñaꞌan chaꞌ nu yta ñi niꞌ cusya ꞌin um, cuiꞌ chaꞌ nu tca culo laa ꞌin um.
\v 22 Una siꞌi tsaloo ton nscan ti um ꞌin na, cuiꞌ ca nu tucua um tñan ꞌin na loꞌ a cuñilyiꞌo um ꞌin um ticuiiꞌ um.
\v 23 Siꞌyana nu ndon nscan chaꞌ re loꞌ a nducua tñan ꞌin na, nguiaa chaꞌ ꞌin canꞌ tsañaꞌan nguiaa chaꞌ ꞌin sca nten nu ñanꞌ ꞌya loo cunan.
\v 24 Xa nu cuaꞌ mnanꞌ ꞌya canꞌ ꞌin loꞌ xiton quiaa, cuiꞌ xaa njlya tiꞌ ñaꞌan ndyon.
\v 25 Una nu nxñi ca cunta ꞌin loꞌo chaꞌ nu ñi ꞌin Ndiose, cuiꞌ lee nu ndlo laa ꞌin na, loꞌ nxñi ton ꞌin loo chaꞌ canꞌ, ñi a njlya tiꞌ chaꞌ nu cuaꞌ ngune ꞌin, cuiꞌ ca nu nde nducua canꞌ tñan ꞌin na, canꞌ nu tsuꞌhue xuꞌhue loꞌo tñan nu nguiꞌni.
\v 26 Chaꞌ ndeꞌen nu xqueꞌ tiꞌ siꞌyana lyee ndiya quiꞌan tiꞌ, loꞌ a nxñi cunta tuꞌhua, ticuiiꞌ canꞌ ñilyiꞌo ꞌin loꞌ cua chaꞌ ti ndiya quiꞌan tiꞌ.
\v 27 Nde chaꞌ nu luhui lati nu a nxitiyaaꞌ loꞌo chaꞌ ngunaꞌ, nu tca cuꞌni na tloo Stina Ndiose: Chuꞌhui yuhue tiꞌ na ꞌin nu suhue nu a ndiꞌin nten cula ꞌin, cuiꞌ cuañaꞌan loꞌo jun cunaꞌan nu nguinu loꞌo chaꞌ ycuiꞌ ti, loꞌ xñi na cunta ꞌin na loꞌo chaꞌ ngunanꞌ nu nchca loo chendyu re.
\c 2
\s Scañaꞌan ti ca lca tiquee na loꞌo nchgaa tucui
\p
\v 1 ꞌUn jun taꞌa na nu ndiya quiꞌan tiꞌ ꞌin Ñi Xꞌnan na Jesucristo, ñi nu ndaꞌan loꞌo sca chaꞌ cuiyaꞌ nu tlyu, scañaꞌan ti ca lca tiquee um loꞌo nchgaa tucui.
\v 2 Chaꞌ seꞌen ndiyoꞌ tiꞌin um sten sca nu ntsuꞌhui cuiiꞌ oro loyaaꞌ loꞌ lcoꞌ sca teꞌ tsuꞌhue ñaꞌan, a cunta chaꞌ sten sca nu tiꞌi ñaꞌan chendyu ꞌin nu lcoꞌ sca teꞌ cusun,
\v 3 chaꞌ cuꞌni cunta um ꞌin nu lcoꞌ teꞌ tsuꞌhue canꞌ loꞌ ljuin um ꞌin: Nde tsuꞌhue la seꞌen chcua um, loꞌ ljuin um loꞌo nu tiꞌi ñaꞌan ꞌin canꞌ: Nde ti tyon nuꞌhuin uta chcua lyuu ti cua,
\v 4 ¿ñi chaꞌ ta a suꞌhua ñaꞌan nsuꞌhua loo um ꞌin taꞌa um? Ñaꞌan loo chaꞌ sca bse cuaꞌ lca um siꞌya chaꞌ tiyaa ngunanꞌ ꞌin um.
\v 5 ꞌUn jun taꞌa na nu ndyuꞌhui cuiyaꞌ tinꞌ ꞌin, quine ꞌin um chaꞌ nu chcuinꞌ: ¿Ta siꞌi Ndiose ngulohui ꞌin nu tiꞌi ñaꞌan chendyu ꞌin siꞌyana ca cuilyiyaꞌ canꞌ, una loꞌo chaꞌ nu ndiya quiꞌan tiꞌ, loꞌ quiꞌni caꞌan ꞌin canꞌ seꞌen ndlo ñi tñan, cuiꞌ chaꞌ nu cuaꞌ mdiꞌin tyaa ñi loꞌo nchgaa nu lyee lca tiquee loꞌo ñi?
\v 6 Una ꞌun nde ndyiꞌya teꞌen um ꞌin nu tiꞌi ñaꞌan chendyu ꞌin. ¿Ta siꞌi yu cuilyiyaꞌ lca nu nsñi suꞌhua yaaꞌ ꞌin um nu ndyaa cunta ꞌin um tloo bsya?
\v 7 ¿Ta siꞌi yu nchcuiꞌ caꞌan yu ꞌin ñi nu tsuꞌhue lati, cuiꞌ tsoꞌ nu cuaꞌ ntsuꞌhui um?
\v 8 Chaꞌ na chaꞌ ñi nducua um tñan chaꞌ ꞌin lee nu ndon loo lati, cuꞌni um ñaꞌan nchcuiꞌ quityi ꞌin Ndiose: —Ñaꞌan ꞌtnan tiꞌ um ꞌin taꞌa nten um tsañaꞌan nꞌni um loꞌo um ticuiiꞌ um—, tsuꞌhue ñaꞌan nu nguiꞌni um xacanꞌ.
\v 9 Una chaꞌ ndyiꞌya teꞌen um ꞌin xca tucui, quiꞌya nguiꞌni um, loꞌ lee ꞌin Ndiose ndlo quiꞌya na ꞌin um.
\v 10 Siꞌyana chaꞌ ndeꞌen nu nchca tiꞌ xuꞌhua seꞌen ñaꞌaan lee canꞌ, una chaꞌ tnanꞌ siyaꞌ scati chaꞌ canꞌ, ñaꞌan loo chaꞌ cuaꞌ mcha tiꞌin canꞌ ñaꞌaan lee xacanꞌ.
\v 11 Siꞌyana ticuiꞌ Ndiose nu ngulo tñan: —A sten yuꞌhui um loꞌo cuilyiꞌo nten—, ticuiꞌ ñi juin ñi: —A cujui um nten—. Chaꞌ a nguiten yuꞌhui um loꞌo cuilyiꞌo nten, una ndujui um nten, cuaꞌ mcha tiꞌin um chaꞌ ꞌin um loꞌo lee xacanꞌ.
\v 12 Xñi um cunta ñaꞌan chcuiꞌ um, a cunta loꞌo ñaꞌan cuꞌni um, siꞌyana ca xñan bsya ꞌin um cuaꞌ ñaꞌaan nguia nchaꞌan um lee nu ndlo laa ꞌin um.
\v 13 Siꞌyana nu a mñaꞌan ꞌtnan tiꞌ ꞌin taꞌa nten, cuiꞌ cuañaꞌan a caja nu ñaꞌan ꞌtnan tiꞌ ꞌin canꞌ xa ca xñan bsya ꞌin, una nu mñaꞌan ꞌtnan tiꞌ ꞌin taꞌa nten, tnu tiquee canꞌ xa ntsuꞌhui chaꞌ ca xñan bsya ꞌin.
\s Culoꞌo xñan na chaꞌ nu ndiya quiꞌan tiꞌ na
\p
\v 14 ꞌUn jun taꞌa na, ¿ñi cunta ntsuꞌhui ꞌin nu nchcuiꞌ siꞌyana ndiya quiꞌan tiꞌ loꞌ a ndloꞌo xñan ꞌin loꞌo chaꞌ tsuꞌhue? ¿Ta tca tyiꞌo laa canꞌ loꞌo ñaꞌan nu ndiya quiꞌan tiꞌ?
\v 15 Sca yu taꞌa na uta sca jun cunaꞌan chaꞌ ndiyaa lyijyi steꞌ jun, loꞌo na nu najoꞌo ꞌin jun,
\v 16 chaꞌ ljuin um ꞌin canꞌ: Quiaa um, loꞌ a sca la chaꞌ chuꞌhui tiquee um, Ndiose taa ñi steꞌ um loꞌo na nu cunajoꞌo ꞌin um, ¿ñi cunta ntsuꞌhui chcuiꞌ um cuañaꞌan chaꞌ a ta yaaꞌ um ꞌin canꞌ?
\v 17 Cuiꞌ cuañaꞌan nguiaa chaꞌ ꞌin na loꞌo chaꞌ nu ndiya quiꞌan tiꞌ na, chaꞌ a ndloꞌo xñan na ꞌin na loꞌo chaꞌ tsuꞌhue, a sca cunta ntsuꞌhui ꞌin na.
\v 18 Chaꞌ ntsuꞌhui nu chcuiꞌ: ꞌUn ndiya quiꞌan tiꞌ um ꞌin Ndiose, loꞌ nanꞌ nꞌnin tñan tsuꞌhue, ¿ta tca tsa quiꞌan tiꞌ um ꞌin Ndiose, chaꞌ a culoꞌo xñan um ꞌin um loꞌo chaꞌ tsuꞌhue? Siꞌyana nanꞌ loꞌo chaꞌ tsuꞌhue nu nꞌnin nchca chcanꞌ loo chaꞌ nu ndiya quiꞌan tinꞌ.
\v 19 ꞌUn ndiya quiꞌan tiꞌ um siꞌyana scati Ndiose ntsuꞌhui, loꞌ cuiꞌ ñaꞌan nchcuiꞌ um, una loꞌo cuiꞌin xaꞌan ndiya quiꞌan tiꞌ loꞌ nchcuan canꞌ siꞌyana ntsen.
\v 20 ꞌUn nu a ndyiꞌya cunta chaꞌ re, ¿ta a jlyo tiꞌ um siꞌyana cua chaꞌ ti ndiya quiꞌan tiꞌ na, chaꞌ a ndloꞌo xñan na ꞌin na loꞌo chaꞌ tsuꞌhue?
\v 21 Abraham nu ncua nten cula ꞌin na, ¿ta siꞌi siꞌya chaꞌ tsuꞌhue nu mꞌni yu nguinu luhui yu tloo Ndiose, cuiꞌ xa nu mdiꞌin tyaa yu ꞌin Isaac nu lca sñeꞌ yu seꞌen ntsuꞌhui chaꞌ squin canꞌ tloo Ndiose?
\v 22 Ca cuiyaꞌ tiꞌ um siꞌyana loꞌo ñaꞌan nu mꞌni Abraham, mchcua taꞌa na loꞌo chaꞌ nu ya quiꞌan tiꞌ yu, loꞌ siꞌya chaꞌ tsuꞌhue nu mꞌni yu ncua chcui chaꞌ nu ya quiꞌan tiꞌ yu.
\v 23 Cuañaꞌan ya tucua chaꞌ nu nchcuiꞌ quityi ꞌin Ndiose: —Abraham nguinu luhui tloo Ndiose loo nu ya quiꞌan tiꞌ ꞌin ñi—, loꞌ jui nu nguloꞌo naan ꞌin yu siꞌyana ncua yu taꞌa tsuꞌhue Ndiose.
\v 24 Ca cuiyaꞌ tiꞌ um xacanꞌ siꞌyana nten nguinu luhui neꞌ tloo Ndiose, siꞌi tsaloo ti siꞌya chaꞌ nu ndiya quiꞌan tiꞌ neꞌ, cuiꞌ ca nu siꞌya chaꞌ tsuꞌhue nu ndloꞌo xñan neꞌ.
\v 25 Cuiꞌ cuañaꞌan Rahab neꞌ cunaꞌan nducunꞌ canꞌ, ¿ta siꞌi siꞌya chaꞌ tsuꞌhue nu mꞌni neꞌ nguinu luhui neꞌ tloo Ndiose, xa ncuan xuꞌhue neꞌ ꞌin yu nu mdiyaa seꞌen ndiꞌin neꞌ loꞌ nguaꞌan tñan neꞌ ꞌin yu xca tucueen?
\v 26 Tsañaꞌan nguiaa chaꞌ ꞌin sca nu ngujui nu a ntsuꞌhui cusya ꞌin, cuiꞌ cuañaꞌan loꞌo chaꞌ nu ndiya quiꞌan tiꞌ na chaꞌ a ndloꞌo xñan na ꞌin na loꞌo chaꞌ tsuꞌhue, cua chaꞌ ti ndiya quiꞌan tiꞌ na.
\c 3
\s Xñi na cunta chaꞌ nu nchcuiꞌ na
\p
\v 1 ꞌUn jun taꞌa na, a nchca chaꞌ quiꞌan ꞌa um culoꞌo um ꞌin jun, siꞌyana cuaꞌ jlyo tiꞌ na tla la ndyiꞌo chaꞌ nu ca xñan bsya ꞌin na.
\v 2 Siꞌyana nchgaa na a sꞌni ntnanꞌ na loꞌo chaꞌ nu nchcuiꞌ na. Una chaꞌ ntsuꞌhui nu nxñi cunta ꞌin loꞌ a ntnanꞌ ñi sca chaꞌ nu nchcuiꞌ, canꞌ nu ñi ndiꞌin chaꞌ ꞌin loꞌ nchca xñi cunta ꞌin loꞌo nchgaa loo chaꞌ.
\v 3 Ñaꞌan jan ñi, nareꞌ nsuꞌhua na freno tuꞌhua cuiyu siꞌyana ca jaꞌan ꞌin ꞌin na, loꞌ tca tsa loꞌo na ꞌin ꞌin seꞌen nu nchca tiꞌ na.
\v 4 Xñi um cunta ꞌin yca naꞌan, siyaꞌ lca na sca na nu tlyu loꞌ ndyiꞌan loꞌo cuiꞌin tnu ꞌin na loꞌo juesa, una siꞌya sca caꞌ lyoꞌ ti nu nchcuiꞌ neꞌ loꞌo lca timón, canꞌ chaꞌ nchca ndyiꞌan loꞌo neꞌ ꞌin na seꞌen nu nchca tiꞌ neꞌ.
\v 5 Cuiꞌ cuañaꞌan ndiꞌin chaꞌ ꞌin tseꞌ na, lca na sca na lyoꞌ ti, una tsala ñaꞌan nꞌni siyeꞌ na ꞌin na loꞌo chaꞌ nchcuiꞌ na. Ñaꞌan jan ñi, sca quiiꞌ lyoꞌ ti loꞌ tca tiquin na sca quiꞌya nu tlyu.
\v 6 Loꞌ tseꞌ na lca na ñaꞌan nchca tiꞌ quiiꞌ, lca na sca chendyu ngunanꞌ nu nguiꞌni cooꞌ ꞌin na tiꞌ xa ngula na, cuaꞌ lca na loo quiiꞌ ndyiꞌo chaꞌ nu nchcuiꞌ na.
\v 7 Siꞌyana nchgaa loo ꞌni, ñaꞌan nchca tiꞌ ꞌni la, quiñi, cunaan, ꞌni nu ntsuꞌhui loo tyiꞌa tujoꞌo, nchca nꞌni nguso neꞌ ꞌin ꞌin.
\v 8 una ñi sca nten loꞌ a tca cuꞌni chuꞌhue neꞌ tseꞌ neꞌ, lca na sca chendyu ngunanꞌ nu a tucui nchca ꞌin chcui ndijin loo na, siꞌyana mtsaꞌan yuꞌhui yaan loo na.
\v 9 Nꞌni tnu na ꞌin Ndiose, ñi nu lca Stina, loꞌ ticuiꞌ loꞌo tuꞌhua na ndaja na ꞌin taꞌa nten na, cuiꞌ nu mtñan ñi tsañaꞌan nchca tiꞌ ñi ycuiꞌ ñi.
\v 10 Ticuiꞌ loꞌo tuꞌhua na re nꞌni tnu na ꞌin Ndiose loꞌ ndaja na ꞌin nten. ꞌUn jun taꞌa na, a ndyiꞌo tñan cuꞌni na cuañaꞌan.
\v 11 Xñi na cunta seꞌen nducua tyiꞌa, ¿ta tca chcua tyiꞌa nu tlyaaꞌ sca seꞌen ti loꞌo tyiꞌa nu tsuꞌhue?
\v 12 ꞌUn jun taꞌa na, ¿ta tca tyiꞌo mti olivo loo sca yca higo? ¿Ta tca tyiꞌo mti higo loo ti uva? Ticuiꞌ cuañaꞌan a tca chcua tyiꞌa tiyenꞌ sca seꞌen ti loꞌo tyiꞌa nu tsuꞌhue.
\s Chaꞌ tiyaa nu ndyiꞌo la niꞌ cuaan
\p
\v 13 ¿Ta a ntsuꞌhui nu tiyaa la lja um loꞌ ndyiꞌya la cunta? Canꞌ nu ntsuꞌhui chaꞌ culoꞌo xñan ꞌin loꞌo chaꞌ tsuꞌhue nu cuꞌni, loꞌo suun ñaꞌan.
\v 14 Una chaꞌ mtsaꞌan yuꞌhui um loꞌo chaꞌ jñan tiꞌ loꞌo chaꞌ xlya, siꞌi canꞌ chaꞌ scuen cuaan um ꞌin um, ñi a suꞌhua um chaꞌ cuiñi loo chaꞌ nu ñi ꞌin Ndiose.
\v 15 Siꞌyana chaꞌ tiyaa re a mdoꞌo na nde niꞌ cuaan, cuiꞌ ca nu loo chendyu re, lca na chaꞌ ngunanꞌ nu ljyaan tsoꞌ ꞌin laxaꞌan.
\v 16 Siꞌyana seꞌen ntsuꞌhui chaꞌ jñan tiꞌ loꞌo chaꞌ xlya, canꞌ nchu cuati loo chaꞌ ngunanꞌ nu nꞌni tinto ꞌin nten.
\v 17 Una chaꞌ tiyaa nu ndaa Ndiose lca na chacuiꞌ chaꞌ nu luhui, nda yaaꞌ na tyiꞌin tsuꞌhue na, cuti nguiaa chaꞌ ꞌin na, nꞌni na tñan tsuꞌhue, nchca chcanꞌ loo na xa nꞌni na ꞌtnan ꞌin taꞌa nten na, loo canꞌ nchu nchgaa loo chaꞌ tsuꞌhue, ñi ndiꞌin chaꞌ ꞌin na loꞌ a ljyaan na loꞌo chaꞌ cuiñi.
\v 18 Sca nten nu ndiya nan ñaꞌan tyiꞌin tsuꞌhue loꞌo nchgaa tucui, chacuiꞌ chaꞌ tsuꞌhue nꞌni cuton canꞌ siꞌya chaꞌ canꞌ.
\c 4
\s A chcui tiꞌ na chaꞌ nu nchca loo chendyu
\p
\v 1 ¿Ñi chaꞌ ta nchu chaꞌ cusuun lja um, loꞌ nchcuiꞌ tyijyin um scasca um? ¿Ta siꞌi siꞌya chaꞌ ngunanꞌ nu ndyiꞌo tiquee um?
\v 2 Lca tiquee um loꞌo sca na, loꞌ a ndyijyi na ꞌin um. Tiꞌi ntsuꞌhui tiquee um, ndujui um nten siꞌya chaꞌ jñan tiꞌ ꞌin um, loꞌ a nguinu tsuꞌhue tiquee um. Siyaꞌ ñii tuꞌ ñaꞌan nguilyu yꞌni um loꞌ nsuun um, una a ndyijyi na nu nchca tiꞌ um siꞌyana a njñan um ꞌin na.
\v 3 Njñan um sca chaꞌ, una a ndyijyi na ꞌin um, siꞌyana siꞌi ñaꞌan njñan um ꞌin na, tsaloo ti nchca tiꞌ um na nu ndyiꞌo ti tiquee um.
\v 4 ¡ꞌTnan ca ꞌun nu nducua tijyoꞌ siiꞌ Ndiose! ¿Ta a jlyo tiꞌ um siꞌyana nu lyee lca tiquee loꞌo chaꞌ nu nchca loo chendyu re, nde nchca taꞌa cusuun canꞌ ꞌin Ndiose? Ñaꞌan nu ti nu nchca taꞌa tsuꞌhue loꞌo chaꞌ nu nchca loo chendyu re, nchca taꞌa cusuun canꞌ ꞌin Ndiose.
\v 5 ¿Ta ñan tiꞌ um siꞌyana cua chaꞌ ti nchcuiꞌ quityi ꞌin Ndiose siꞌyana Espíritu nu cuaꞌ mdaa Ndiose ꞌin na, lyee nꞌni xlya ñi ꞌin na?
\v 6 Una tlyu chaꞌ tsuꞌhue ndaa ñi ꞌin na, canꞌ chaꞌ ndeñaꞌan nchcuiꞌ xca chaꞌ: —Ndiose nxcuan tloo ñi ꞌin nten nu siyeꞌ, una nꞌni cunta ñi ꞌin nten nu suun—.
\v 7 Xnu um cunta ꞌin um tuyaaꞌ Ndiose, tla tyon um loꞌ laxaꞌan tyiꞌo tsoꞌ siiꞌ um.
\v 8 Lyee la quia nan um ꞌin Ndiose, loꞌ cuañaꞌan cuiꞌ la tyon ñi siiꞌ um. ꞌUn nu lca nten quiꞌya chendyu, tyaa um yaꞌ tyuhui chendyu ꞌin um, cuiꞌ cuañaꞌan ꞌun nu nguiꞌni tucua tiꞌ, suhui um cusya ꞌin um.
\v 9 Suꞌhua yuhue tiꞌ um chaꞌ re, quiꞌya tuꞌhua tiquee um loꞌ cunan um. Chaꞌ tsuꞌhue nu ntsuꞌhui tiquee um chca na chaꞌ xiꞌin loꞌ cunan um.
\v 10 Cuꞌni suun um ꞌin um tloo Ñi Xꞌnan na, loꞌ cuiꞌ ñi scuen cuaan ñi ꞌin um.
\s A chcuiꞌ caꞌan na ꞌin taꞌa na
\p
\v 11 ꞌUn jun taꞌa na, a nchca chaꞌ chcuiꞌ caꞌan taꞌa um, siꞌyana nu nchcuiꞌ caꞌan taꞌa loꞌ ndlo quiꞌya ꞌin taꞌa, ndijin lyoo canꞌ lee ꞌin Ndiose loꞌ nguiꞌni cuiyaꞌ canꞌ chaꞌ ꞌin lee. Chaꞌ ꞌun nguiꞌni cuiyaꞌ um chaꞌ ꞌin lee, ñaꞌan loo chaꞌ sca bse lca um, loꞌ a nducua um tñan ꞌin na.
\v 12 Scati ñi nu mdaa lee ꞌin nten chendyu, loꞌ scati ñi tca culo laa ñi ꞌin na uta cujlyo ñi ꞌin na. Una ꞌun, ¿tucui ca lca um siꞌyana ndlo quiꞌya um ꞌin xca tucui?
\s A cuꞌni siyeꞌ na siꞌya chaꞌ nu cuꞌni na tsaan quiaa
\p
\v 13 Xñi um cunta ꞌun nu nchcuiꞌ: Cuaꞌ ñii uta quiaa tsaa na xca quichen, la cua tyiꞌin na sca yjan, cuꞌni na tñan jyinsya loꞌ caja tñi ꞌin na.
\v 14 Una a jlyo tiꞌ um ñaꞌan ljyaan ꞌin um tsaan quiaa. Chendyu ꞌin um, ¿ñi na lca na? Nguiaa chaꞌ ꞌin na tsañaꞌan nchca tiꞌ coo, cuaꞌ ñii chcanꞌ na, una ndiꞌa a la ꞌa quine cueen na.
\v 15 Cuiꞌ ca nu tsuꞌhue la chcuiꞌ um: Chaꞌ Ñi Xꞌnan na taa ñi chaꞌ cuiyaꞌ, tyuꞌhui na chendyu loꞌ cuꞌni na tñan re.
\v 16 Una ꞌun nde nscuen cuaan um ꞌin um loꞌo chaꞌ siyeꞌ, loꞌ nchgaa loo chaꞌ siyeꞌ lca na quiꞌya.
\v 17 Nu jlyo tiꞌ cuꞌni tñan tsuꞌhue loꞌ a nꞌni ꞌin na, ticuiꞌ quiꞌya lca na.
\c 5
\s Chaꞌ ꞌin yu cuilyiyaꞌ
\p
\v 1 Ñaꞌan jan ñi, ꞌun yu cuilyiyaꞌ, cunan um loꞌ xiꞌya cueen um siꞌya nu tiꞌi ljyaan ꞌin um,
\v 2 siꞌyana chaꞌ cuilyiyaꞌ ꞌin um cuaꞌ nchcui tiꞌin na loꞌ steꞌ um cuaꞌ nsta ꞌni ꞌin na,
\v 3 a cunta na oro loꞌo plata nu ndiꞌin ꞌin um cuaꞌ mducua cuiyaꞌ na, loꞌ cuiyaꞌ canꞌ ntsuꞌhui chaꞌ culo quiꞌya na ꞌin um, cujlyo na ꞌin um tsañaꞌan ndiquin sca na loo quiiꞌ. Cuaꞌ tsatii chaꞌ nu nchca loo chendyu re loꞌ tsala ñaꞌan chaꞌ cuilyiyaꞌ cuaꞌ mxoꞌ tiꞌin um.
\v 4 Loo nu a msuꞌhua lyiyaꞌ um nguso ꞌin um, siyaꞌ yu ndlo quiꞌya na ꞌin um. Yta yu loꞌ mxoꞌ yu na ꞌin um, loꞌ nde nguñilyiꞌo um ꞌin yu, una cuaꞌ ñii mdiyaa chaꞌ re la tloo Ñi Xꞌnan na, ñi nu tla la chaꞌ ꞌin.
\v 5 Lja ndiꞌin um loo chendyu re a sca na ya lyijyi ꞌin um, cuiꞌ ca nu nde nguinu na ꞌin um, ncua cojoꞌ um tsañaꞌan nchca tiꞌ sca bta nu ntsuꞌhui chaꞌ cujui neꞌ ꞌin.
\v 6 Msuꞌhua um quiꞌya chonꞌ nten nu tsuꞌhue, yjui um ꞌin neꞌ, loꞌ ñi a mscuen yaaꞌ neꞌ loꞌo um.
\s Chcuiꞌ lyiꞌo na ꞌin Ñi Xꞌnan na lja nta na ꞌin ñi
\p
\v 7 Canꞌ chaꞌ ꞌun jun taꞌa na, ndon tiꞌ um quita um tsayaꞌ quiaan Ñi Xꞌnan na. Xñi um cunta ñaꞌan ndiꞌin chaꞌ ꞌin yu nguiꞌni tñan niꞌ quixinꞌ, tsala ñaꞌan ntsuꞌhui chaꞌ tlyu tiꞌ ꞌin yu nta yu tsayaꞌ nu xoꞌ yu na nu yta yu, cuaꞌ ñaꞌaan nguila quioo.
\v 8 Cuiꞌ cuañaꞌan ꞌun ta loo um, loꞌ lyee la ca ñi cusya ꞌin um siꞌyana cuaꞌ nchcui cuiiꞌ chaꞌ quiaan Ñi Xꞌnan na.
\v 9 ꞌUn jun taꞌa na, a nchca chaꞌ suꞌhua quiꞌya taꞌa um scasca um, ñaꞌan tuꞌ cuꞌni ñi xñan bsya ꞌin um. Ñaꞌan jan ñi, cuaꞌ ndon ñi nu lca bse la tunaꞌan.
\v 10 ꞌUn jun taꞌa na, xñi um cunta tsala ñaꞌan tiꞌi mdijin yu nu mxiycuiꞌ Ñi Xꞌnan na ꞌin cuaꞌ sꞌni, loꞌ mda loo yu loꞌo chaꞌ canꞌ.
\v 11 Ñaꞌan jan ñi, nchcuiꞌ na siꞌyana tsuꞌhue ca xuꞌhue nu mda loo mdijin scasca nu tiꞌi. Cuaꞌ ynan um chaꞌ tsala ñaꞌan mda loo yu Job loꞌ ngua chcanꞌ loo chaꞌ tsuꞌhue ꞌin Ñi Xꞌnan na loꞌo yu, —tsala ñaꞌan nꞌni ñi ꞌtnan ꞌin nten—.
\v 12 ꞌUn jun taꞌa na, sca loo tñan chcuinꞌ sca chaꞌ loꞌo um: A cuꞌni tyiꞌya um ꞌin Ndiose xa nu tyiꞌin tyaa um sca chaꞌ, ñi a culo naa um ꞌin niꞌ cuaan uta chendyu re, ñi a cuꞌni tyiꞌya um xca la chaꞌ, cuiꞌ ca nu ljuin um: Cuiꞌ na, uta: Siꞌi na, ñaꞌan tuꞌ tsatoꞌo cuꞌni ñi xñan bsya ꞌin um.
\v 13 Chaꞌ ntsuꞌhui nu ndijin scasca loo chaꞌ, chcuiꞌ lyiꞌo canꞌ ꞌin Ndiose. Chaꞌ ntsuꞌhui nu tsuꞌhue ntsuꞌhui tiquee, cula loꞌo canꞌ ꞌin ñi.
\v 14 A cunta chaꞌ ntsuꞌhui nu tiꞌi, cuꞌni canꞌ chaꞌ caan tucua snan yu nu ntsuꞌhui cunta ꞌin jun taꞌa na, chcuiꞌ lyiꞌo yu ꞌin Ndiose, loꞌ xitaꞌan yu ceite ꞌin loꞌo chaꞌ cuiyaꞌ ꞌin Ñi Xꞌnan na.
\v 15 Loꞌ siꞌya chaꞌ nu ndiya quiꞌan tiꞌ yu xa nchcuiꞌ lyiꞌo yu ꞌin Ñi Xꞌnan na, cuꞌni chca ñi ꞌin nu tiꞌi canꞌ, loꞌ chaꞌ ndeꞌen la quiꞌya mꞌni, cuꞌni ñi chaꞌ tlyu tiꞌ ꞌin.
\v 16 Chaꞌ ndeꞌen la quiꞌya mꞌni um, quitsaꞌ la um ꞌin taꞌa um, loꞌ jñan um ꞌin Ndiose siꞌya chaꞌ ꞌin taꞌa um, loꞌ cuiꞌ ñi xiton ñi ꞌin um. Nꞌni cunta ñi chaꞌ nu njñan sca nu ñi ndiꞌin chaꞌ ꞌin.
\v 17 Yu Elía ncua yu nten chendyu tsañaꞌan nchca tiꞌ naa, ycuiꞌ lyiꞌo yu ꞌin Ndiose loꞌo nu chcui lca tiquee yu siꞌyana a quiꞌya ꞌa quioo, loꞌ a nguꞌya ꞌa na tsaniꞌ snan yjan tluꞌhue.
\v 18 Xiyaꞌ mjñan yu ꞌin Ndiose, loꞌ mdyisnan nguꞌya na, loꞌ tsuꞌhue ncua tñan na nu yta nten.
\v 19 ꞌUn jun taꞌa na, chaꞌ ndeꞌen nu ntsuꞌhui lja um cuaꞌ mdoꞌo tsoꞌ siiꞌ chaꞌ nu ñi, loꞌ caja nu cuꞌni chaꞌ xitucui canꞌ,
\v 20 ca cuiyaꞌ tiꞌ um siꞌyana nu cuꞌni chaꞌ xitucui sca nu ndaꞌan ngunanꞌ, cuaꞌ mꞌni canꞌ canan mdoꞌo laa sca nten loo chaꞌ ndyija, loꞌ mchca ñaꞌaan quiꞌya ꞌin.