\id 1PE - Nopala (Chatino) NT [cya] - Mexico 2013 (web 2014)
\h 1 PEDRO
\toc1 1 Pedro
\toc2 1 Pedro
\toc3 1Pe
\mt1 1 Pedro
\c 1
\s Yu Tyo nchcuiꞌ chaꞌ yu ꞌin jun taꞌa na
\p
\v 1 Nanꞌ yu Tyo nu nguaꞌan tñan Jesucristo ꞌin, nde caꞌan tñan sca quityi ꞌin um, ꞌun nu nguine yuꞌhui scasca quichen seꞌen lyiꞌya loo Ponto, loꞌo Galacia, Capadocia, loꞌo seꞌen lca Asia loꞌo Bitinia.
\v 2 Stina Ndiose ngulohui ñi ꞌin um tsañaꞌan chaꞌ nu cuaꞌ mdiꞌin tyaa ñi tiꞌ culoo, loꞌ siꞌya chaꞌ cuiyaꞌ ꞌin Espíritu ca jaꞌan um ꞌin ñi loꞌ quinu luhui um siꞌya tne Jesucristo. Taa la ñi chaꞌ tsuꞌhue nu chuꞌhui niꞌ cusya ꞌin um loꞌ cuꞌni ñi chaꞌ tyiꞌin tsuꞌhue um.
\s Nducua tloo na sca chaꞌ nu loꞌo ca
\p
\v 3 Tlyu ca chaꞌ tsuꞌhue ntsuꞌhui ꞌin Ndiose, Sti Ñi Xꞌnan na Jesucristo, loo nu lyee nꞌni ñi ꞌtnan ꞌin na mꞌni cui ñi chendyu ꞌin na seꞌen nu chcua quiloo na sca chaꞌ nu loꞌo ca, cuiꞌ siꞌya chaꞌ nu mdyiquiꞌo Jesucristo,
\v 4 loꞌ cuan xuꞌhue na chaꞌ tsuꞌhue nu cuaꞌ ndiꞌin la niꞌ cuaan, chaꞌ nu quiꞌni caꞌan ꞌin na loꞌo um, sca chaꞌ nu a ntsuꞌhui ꞌa chaꞌ tsatii, ñi a ca cooꞌ uta caja loo.
\v 5 Loo nu ndiya quiꞌan tiꞌ um, Ndiose nsñi ñi cunta ꞌin um loꞌo chaꞌ cuiyaꞌ ꞌin ñi, ñaꞌan ca siꞌyana tyiꞌo laa um loꞌ quiꞌni caꞌan ꞌin um loꞌo chaꞌ nu cuaꞌ mdiꞌin tyaa ñi, loꞌ ca chcanꞌ loo chaꞌ re xa nu tsatii chaꞌ nu nchca loo chendyu re.
\v 6 Siꞌya chaꞌ re tsuꞌhue ntsuꞌhui tiquee um, siyaꞌ ndijin um scasca nu tiꞌi lja nu tiꞌ ndiꞌin um tichinꞌ xaa loo chendyu re.
\v 7 Ñaꞌan nchca tiꞌ oro, siyaꞌ ndyuhui na loꞌo quiiꞌ a sꞌni ndiyatii chaꞌ ꞌin na, una lyee la ntsuꞌhui lyoo chaꞌ nu ndiya quiꞌan tiꞌ um, loꞌ xa cuaꞌ mdijin um scasca nu tiꞌi, caja nu cuꞌni tnu ꞌin Ndiose loꞌ tyaa xuꞌhue ꞌin ñi tsaan nu ntsuꞌhui chaꞌ ca chcanꞌ loo Jesucristo xiyaꞌ.
\v 8 Siyaꞌ a nchca ñaꞌan tloo um ꞌin ñi, una lyee lca tiquee um loꞌo ñi, siyaꞌ a chcanꞌ ñi cuaꞌ ñii una ndiya quiꞌan tiꞌ um ꞌin ñi, tsuꞌhue ꞌa ntsuꞌhui tiquee um, loꞌ ñi a jlyo ꞌa tiꞌ um ñi lyijyi chaꞌ nu tiꞌ chcuiꞌ um siꞌya chaꞌ re,
\v 9 siꞌyana cuaꞌ chcanꞌ chaꞌ nu ndiya quiꞌan tiꞌ um tsañaꞌan ntsuꞌhui chaꞌ tyiꞌo laa um.
\v 10 Cuiꞌ chaꞌ tsuꞌhue nu cuaꞌ ncuan xuꞌhue um re mdaꞌan ycuiꞌ yu nu mxiycuiꞌ Ndiose ꞌin cuaꞌ sꞌni, loꞌ nguia nan quiꞌi yu chaꞌ re tsañaꞌan nu ntsuꞌhui chaꞌ tyiꞌo laa nten.
\v 11 Loꞌo chaꞌ tiyaa nguia nan yu chaꞌ re lja mxiycuiꞌ Espíritu ꞌin Cristo ꞌin yu, chaꞌ ti ca nu ꞌin chaꞌ re, chaꞌ ñi xaa tsatoꞌo na, tsañaꞌan nu ntsuꞌhui chaꞌ tyijyin Cristo nu tiꞌi, loꞌ nde loo la canꞌ ca chcanꞌ loo chaꞌ cuiyaꞌ nu tlyu ꞌin ñi.
\v 12 Ngulyo scua la ñi chaꞌ loꞌo yu siꞌyana siꞌi tsa ꞌin ti yu quiꞌni caꞌan chaꞌ re, cuiꞌ ca nu loꞌo ꞌin nareꞌ, una cuaꞌ ñii jui nu ycuiꞌ chaꞌ re loꞌo um siꞌya chaꞌ cuiyaꞌ ꞌin Espíritu nu Luhui ꞌin Ndiose nu mdoꞌo la niꞌ cuaan, sca chaꞌ nu hasta loꞌo angujle nchca tiꞌ ca cuiyaꞌ tiꞌ.
\s Tyuꞌhui na sca chendyu nu luhui
\p
\v 13 Canꞌ chaꞌ tyon loꞌo um sca chaꞌ tiyaa nu chcui, xñi um cunta ꞌin um, loꞌ tyiꞌin tyaa tsuꞌhue ca um quiloo um ꞌin chaꞌ tsuꞌhue nu quiꞌni caꞌan ꞌin um xa nu quiaan Jesucristo xiyaꞌ.
\v 14 Tsañaꞌan nguiaa chaꞌ ꞌin sñeꞌ Ndiose nu nchca jaꞌan ꞌin ñi, a tyiꞌan ꞌa um loo chaꞌ ngunanꞌ tsañaꞌan mdaꞌan um tiꞌ culoo, xa nu tiꞌ nchcun chaꞌ tiyaa ꞌin um,
\v 15 cuiꞌ ca nu tyuꞌhui um sca chendyu nu luhui tsañaꞌan ndiꞌin chaꞌ ꞌin ñi nu msiꞌya ꞌin um, lca ñi sca nu luhui.
\v 16 Siꞌyana ndeñaꞌan nguinu scua sca chaꞌ loo quityi ꞌin Ndiose: —Ca um sca nten nu luhui siꞌyana nanꞌ lcan ñi nu luhui—.
\v 17 Chaꞌ ꞌun ndloꞌo naan um ꞌin Ndiose lca ñi Sti um, ñi nu scañaꞌan ti nꞌni xñan bsya ꞌin nten cuaꞌ ñaꞌaan tñan nguiꞌni neꞌ, canꞌ chaꞌ suꞌhua yuhue tiꞌ um ñaꞌan ntsuꞌhui chaꞌ tyuꞌhui um chendyu tsalja nu tiꞌ ndiꞌin um loo chendyu re.
\v 18 Jlyo tiꞌ um cuaꞌ mdoꞌo laa um loo chaꞌ ngunanꞌ, cuiꞌ chaꞌ nu mꞌni chaꞌan um ꞌin nten cula ꞌin um, una siꞌi siꞌya na nu ntsuꞌhui chaꞌ tsatii, uta loꞌo na oro uta loꞌo plata,
\v 19 cuiꞌ ca nu siꞌya tne Cristo nu ntsuꞌhui lyoo ca, tsañaꞌan nguiaa chaꞌ ꞌin slyaꞌ nu luhui lati, nu ñi sca cooꞌ loꞌ a ndon ꞌin,
\v 20 ñi nu cuaꞌ mdoꞌo hui loꞌo chaꞌ re xa nu tiꞌ lyijyi tsaaꞌ chendyu, cuaꞌ ya tucua tsaan ncua chcanꞌ loo ñi siꞌya chaꞌ tsuꞌhue nu mdoꞌo tiquee ñi loꞌo um.
\v 21 Siꞌya ñi canꞌ chaꞌ ndiya quiꞌan tiꞌ um ꞌin Ndiose, ñi nu mꞌni chaꞌ mdyiquiꞌo canꞌ loꞌ mscuen cuaan ñi chaꞌ ꞌin, ñaꞌan ca siꞌyana chcua quiloo um ꞌin Ndiose loꞌ tsa quiꞌan tiꞌ um ꞌin ñi.
\v 22 Siꞌyana cuaꞌ ngüi cusya ꞌin um loo nu ncua jaꞌan um chaꞌ nu ñi siꞌya chaꞌ cuiyaꞌ ꞌin Espíritu, ñaꞌan ca siꞌyana tca chuꞌhui chaꞌ tsuꞌhue ꞌin um loꞌo taꞌa um, loꞌ siꞌi loꞌo chaꞌ cuiñi ti, cuiꞌ ca nu loꞌo nu chcui lca tiquee um chuꞌhui chaꞌ tsuꞌhue ꞌin um scasca um, loꞌ luhui chaꞌ tiyaa ꞌin um,
\v 23 siꞌyana cuaꞌ mchca cui chendyu ꞌin um, una siꞌi loꞌo juesa ꞌin nten chendyu, cuiꞌ ca nu loꞌo chaꞌ cuiyaꞌ nu quinu scua tsala xaa, siꞌya ychaꞌ Ndiose nu loꞌo ca, nu a ntsuꞌhui ꞌa chaꞌ tsatii.
\v 24 Siꞌyana nchcuiꞌ quityi ꞌin Ndiose: —Nchgaa nten lca neꞌ ñaꞌan nchca tiꞌ quixinꞌ, chaꞌ siyeꞌ ꞌin neꞌ nguiaa chaꞌ ꞌin na tsañaꞌan sca quee, quixinꞌ canꞌ nguityi tucua na, loꞌ quee canꞌ ndyu na,
\v 25 una ychaꞌ Ñi Xꞌnan na a ntsuꞌhui ꞌa chaꞌ tsatii na—. Cuiꞌ chaꞌ re lca na chaꞌ tsuꞌhue nu cuaꞌ ngune ꞌin um.
\c 2
\p
\v 1 Xcuan tloo um nchgaa loo chaꞌ ngunanꞌ, chaꞌ cuiñi, chaꞌ mayan, chaꞌ njñan tiꞌ, loꞌo chaꞌ nchca nchcuiꞌ.
\v 2 Loꞌ ca lca tiquee um loꞌo chaꞌ nu luhui ꞌin Ndiose tsañaꞌan lca tiquee cuhuiꞌ cuneꞌ loꞌo styiꞌ, siꞌyana tca culo um loꞌ tyiꞌo laa um,
\v 3 chaꞌ na cuaꞌ ncua cuiyaꞌ tiꞌ um tsala ñaꞌan tlyu chaꞌ tsuꞌhue ꞌin Ñi Xꞌnan na.
\s Jesús lca ñi sca quee nu loꞌo ca
\p
\v 4 Quia nan um ꞌin ñi, ñi nu lca sca quee nu loꞌo ca, cuiꞌ nu mscuan tloo nten chendyu, una tsoꞌ nu ꞌin Ndiose lca canꞌ sca nu mdoꞌo hui ca nu ntsuꞌhui lyoo lati.
\v 5 Cuiꞌ cuañaꞌan lca um sca quee nu loꞌo ca, loꞌ Ndiose cuꞌni ñi chaꞌ tsatlyu culo um ñaꞌan nchca tiꞌ xa ndiyaaꞌ sca laa, loꞌ ca um sca nguso nu luhui ꞌin ñi siꞌyana tca tsa loꞌo um sca lcuan nu ndyuꞌhui cuiyaꞌ tiꞌ ñi siꞌya Jesucristo.
\v 6 Siꞌyana ndeñaꞌan nchcuiꞌ quityi ꞌin Ndiose: —Ñaꞌan jan ñi, quichen Jerusalén tyiꞌin tyaan sca quee nu nsñi ton ꞌin naꞌan, nu mdoꞌo hui ca nu ntsuꞌhui lyoo lati, loꞌ nu tsa quiꞌan tiꞌ ꞌin canꞌ, a quinu loꞌo chaꞌ jyiꞌo—.
\v 7 Canꞌ chaꞌ lca ñi sca nu ndon loo lati ꞌin um, ꞌun nu ndiya quiꞌan tiꞌ ꞌin ñi, una nu a ndiya quiꞌan tiꞌ ꞌin ñi lca ñi ꞌin canꞌ tsañaꞌan nchcuiꞌ quityi ꞌin Ndiose: —Quee nu mscuan tloo yu cuityi naꞌan, cuaꞌ ñii lca na quee nu nsñi ton ꞌin naꞌan—.
\v 8 A cunta nchcuiꞌ xca seꞌen: —Quee nu chcua quiyaꞌ neꞌ ca na quee nu xitlyu ꞌin neꞌ—. Nchcua na quiyaꞌ neꞌ siꞌyana a nchca jaꞌan neꞌ ꞌin Ndiose, siꞌyana cuañaꞌan cuiyaꞌ cuaꞌ nguaꞌan ꞌin neꞌ.
\s Lca na quichen ꞌin Ndiose
\p
\v 9 Una ꞌun lca um —ta nten nu cuaꞌ mdoꞌo hui ꞌin ñi, lca um sca nten nu nducua tloo ñi nu lca Ree, lca um sca quichen nu luhui ꞌin ñi, nten nu ndyuꞌhui cuiyaꞌ tiꞌ Ndiose ꞌin—, ñaꞌan ca siꞌyana tyiꞌan ycuiꞌ um chaꞌ tsuꞌhue ꞌin ñi nu msiꞌya ꞌin um, siꞌyana tyiꞌo tsoꞌ um siiꞌ chaꞌ tla yta ꞌin um, loꞌ tyiꞌan um loo xaa nu tsuꞌhue ñaꞌan ꞌin ñi.
\v 10 Tiꞌ culoo a lca um quichen ꞌin Ndiose, una cuaꞌ ñii lca um quichen ꞌin ñi, tiꞌ culoo tijyoꞌ nchca um siiꞌ chaꞌ tsuꞌhue ꞌin ñi, una cuaꞌ ñii cuaꞌ mchcua um chaꞌ tsuꞌhue canꞌ.
\s Nducua tloo Ndiose ꞌin na
\p
\v 11 ꞌUn jun taꞌa na nu ndyuꞌhui cuiyaꞌ tinꞌ ꞌin, tsañaꞌan nu lca um sca nten nu mdoꞌo tijyoꞌ nu ndaꞌan yuꞌhui ti, jñan sca chaꞌ tsuꞌhue ꞌin um siꞌyana a sten yuꞌhui um loo chaꞌ ngunanꞌ nu nchca loo chendyu re, cuiꞌ chaꞌ nu nchcui ndijin niꞌ cusya ꞌin na.
\v 12 Cunan um ñaꞌan tyuꞌhui um sca chendyu nu luhui lja neꞌ gentil, loꞌ siyaꞌ ndaa neꞌ quiꞌya ꞌin um siꞌyana lca um nu nducunꞌ, una siꞌya chaꞌ tsuꞌhue nu nguiꞌni um, cuꞌni tnu neꞌ ꞌin Ndiose tsaan nu cuꞌni ñi xñan bsya ꞌin nten chendyu.
\v 13 Siꞌya chaꞌ ꞌin Ñi Xꞌnan na, ca jaꞌan um ꞌin yu bsya nu ndlo tñan ꞌin um, cuiꞌ yu nu lca ree nu tla la chaꞌ cuiyaꞌ ntsuꞌhui ꞌin,
\v 14 uta ꞌin nchgaa la ñaꞌan bsya, siꞌyana canꞌ nu mdiꞌin tyaa Ndiose ꞌin xitijin nu tiꞌi ꞌin nten nu nducunꞌ, loꞌ taa canꞌ loo nten nu nguiꞌni tñan tsuꞌhue.
\v 15 Siꞌyana nde chaꞌ nu nchca tiꞌ Ndiose: Loꞌo chaꞌ tsuꞌhue nu cuꞌni um chcua seen tuꞌhua nchgaa nu tinto nu nchcuiꞌ cuaꞌ ñaꞌan ti chaꞌ ꞌin um.
\v 16 Ca tsuꞌhue chuꞌhui tiquee um tsañaꞌan ndiꞌin chaꞌ ꞌin sca nu cuaꞌ mdoꞌo laa, una siꞌi canꞌ chaꞌ cuꞌni um chaꞌ ngunanꞌ, cuiꞌ ca nu cuꞌni um ñaꞌan nꞌni sca nguso ꞌin Ndiose.
\v 17 Cuꞌni suun um ꞌin um tloo nchgaa nten, a cunta chuꞌhui chaꞌ tsuꞌhue ꞌin um loꞌo jun taꞌa na. Chuꞌhui sca ytsen ꞌin um tloo Ndiose. Cuꞌni suun um ꞌin um tloo ree.
\v 18 ꞌUn nu lca nguso, ca jaꞌan um ꞌin xꞌnan um, una siꞌi tsalca nu tsuꞌhue nten lca loꞌ cuti chaꞌ ꞌin, cuiꞌ ca nu loꞌo nu tla chaꞌ ꞌin ca jaꞌan um ꞌin.
\v 19 Nde chaꞌ nu ntsuꞌhui lyoo tloo Ndiose, chaꞌ ndeꞌen nu ndijin nu tiꞌi siyaꞌ a sca chaꞌ ngunanꞌ mꞌni, loꞌ nda loo canꞌ siꞌyana nchca tiꞌ quinu tsuꞌhue tiquee Ndiose loꞌo.
\v 20 Una, ¿ñi cunta ntsuꞌhui chaꞌ nda loo um nxitijin neꞌ ꞌin um nu tiꞌi chaꞌ nguiꞌni um chaꞌ ngunanꞌ? Una chaꞌ ndaa loo um ndijin um nu tiꞌi siꞌyana nguiꞌni um tñan tsuꞌhue, nde chaꞌ nu ntsuꞌhui lyoo ca tloo Ndiose,
\v 21 loꞌ siꞌya chaꞌ re msiꞌya ñi ꞌin um. Siꞌyana loꞌo Cristo mdijin ñi nu tiꞌi tñan loo um, loꞌ mxnu ñi chaꞌ re siꞌyana chcui nchaꞌan um ꞌin ñi.
\v 22 —Una ñi sca quiꞌya loꞌ a mꞌni ñi, ñi sca chaꞌ cuiñi loꞌ a mdoꞌo tuꞌhua ñi—,
\v 23 xa mdaja neꞌ ꞌin ñi, a loꞌo ñi mdaja ñi ꞌin neꞌ, cuiꞌ cuañaꞌan xa mxitijin neꞌ ꞌin ñi nu tiꞌi, a mxcuen ñi ꞌin neꞌ cuaꞌ ñaꞌan ti, cuiꞌ ca nu mxnu ñi cunta chaꞌ canꞌ yaaꞌ ñi nu tsuꞌhue nꞌni xñan bsya.
\v 24 Cuiꞌ ñi nguꞌya ñi quiꞌya ꞌin na la loo cusi, ñaꞌan ca siꞌyana tyiꞌo tsoꞌ na siiꞌ chaꞌ ngunanꞌ loꞌ tyuꞌhui na sca chendyu nu luhui, loꞌ siꞌya nu tiꞌi mdijin ñi cuaꞌ mchca um.
\v 25 Siyaꞌ tiꞌ culoo mdaꞌan um tsañaꞌan nchca tiꞌ sca slyaꞌ nu ngunanꞌ yuꞌhui, una cuaꞌ ñii mxiton um loꞌo Cristo, ñi nu naꞌan seen ꞌin um nu ntsuꞌhui cunta cusya ꞌin um.
\c 3
\s Tsañaꞌan ntsuꞌhui chaꞌ tyiꞌin na loꞌo cuilyiꞌo na 

\p
\v 1 Cuiꞌ cuañaꞌan ꞌun jun cunaꞌan, ca jaꞌan um ꞌin cuilyiꞌo um, loꞌ chaꞌ a ndiya quiꞌan tiꞌ yu chaꞌ ꞌin Ndiose, una loꞌo ñaꞌan nu ndloꞌo xñan um ꞌin um cuan xuꞌhue yu chaꞌ canꞌ, siyaꞌ a chcuiꞌ um loꞌo yu,
\v 2 siꞌyana nguia nchca cuiyaꞌ tiꞌ yu tsala ñaꞌan ndyiꞌya chendyu nduꞌhui um, loꞌ suun ñaꞌan nguiaa chaꞌ ꞌin um.
\v 3 A nchca chaꞌ cuꞌni chuꞌhue um que um lyee ꞌa, ta loꞌo na oro, uta coꞌ um chacuiꞌ teꞌ nu ntsuꞌhui lyoo,
\v 4 cuiꞌ ca nu nde niꞌ cusya ꞌin um culoꞌo xñan um ꞌin um loꞌo chaꞌ tsuꞌhue nu a ntsuꞌhui chaꞌ tsatii, loꞌo suun ñaꞌan cuꞌni um, cuti ti tsaa chaꞌ ꞌin um, siꞌyana nde chaꞌ nu ntsuꞌhui lyoo tloo Ndiose.
\v 5 Siꞌyana cuañaꞌan jun cunaꞌan nu mdiꞌin cuaꞌ sꞌni nu ya quiꞌan tiꞌ ꞌin Ndiose, nguloꞌo xñan jun ꞌin jun loꞌ mdiꞌin tyaa jun quiloo jun ꞌin ñi, ncua jaꞌan jun ꞌin cuilyiꞌo jun,
\v 6 tsañaꞌan ncua jaꞌan Sara ꞌin Abraham xa ndloꞌo naan ꞌin cuilyiꞌo: Ñi xꞌnan hua. Ca um sñeꞌ Sara chaꞌ cuꞌni um tsuꞌhue loꞌ a cutsen um ñi sca chaꞌ.
\v 7 Cuiꞌ cuañaꞌan ꞌun yu quiꞌyu, tsuꞌhue ti tyiꞌin um loꞌo cuilyiꞌo um, suun ñaꞌan tsaa chaꞌ ꞌin um siꞌyana ti la ndiꞌin chaꞌ ꞌin jun, loꞌ suꞌhua loo um ꞌin jun siꞌyana scañaꞌan ti chendyu mdaa Ndiose ꞌin um loꞌo jun, loꞌ xa chcuiꞌ lyiꞌo um ꞌin ñi a sca chaꞌ chcui ndijin niꞌ cusya ꞌin um.
\s Xñi na cunta ñaꞌan tyuꞌhui na chendyu
\p
\v 8 A cunta ca sca chaꞌ ti ꞌin um nchgaa um, ca cuti cusya ꞌin um, chuꞌhui chaꞌ tsuꞌhue ꞌin um loꞌo taꞌa um, loꞌ ñaꞌan ꞌtnan tiꞌ taꞌa um, loꞌ suun ñaꞌan cuꞌni um ꞌin um.
\v 9 A cuꞌni suꞌhua um ꞌin um loꞌo nu nguiꞌni tiꞌi loꞌo um, ñi a taja um ꞌin nu ndaja ꞌin um, cuiꞌ ca nu jñan um ꞌin Ndiose siꞌyana cuan ñi ꞌin canꞌ. Nde chaꞌ msiꞌya Ndiose ꞌin um, siꞌyana cuꞌni um tñan tsuꞌhue loꞌ chcuan um chaꞌ tsuꞌhue nu taa ñi ꞌin um.
\v 10 Siꞌyana, —nu nchca tiꞌ tyuꞌhui sca chendyu nu tsuꞌhue ca, tsuꞌhue ntsuꞌhui tiquee nchgaa xaa, ꞌni chaꞌ xñi canꞌ cunta siꞌyana a chcuiꞌ chaꞌ ngunanꞌ loꞌo chaꞌ cuiñi.
\v 11 Tyiꞌo tsoꞌ canꞌ siiꞌ chaꞌ ngunanꞌ, cuꞌni tñan tsuꞌhue, quia nan canꞌ ñaꞌan tyiꞌin tsuꞌhue, loꞌ chcui nchaꞌan chaꞌ canꞌ.
\v 12 Siꞌyana Ñi Xꞌnan na ntsuꞌhui ñi cunta ꞌin nten nu jaꞌan ꞌin ñi, ndon nscan ñi chaꞌ nu njñan canꞌ, una tsalca nu nguiꞌni chaꞌ ngunanꞌ a tsuꞌhue ntsuꞌhui tiquee Ñi Xꞌnan na loꞌo canꞌ—.
\v 13 ¿Ta ntsuꞌhui nu tca cuꞌni tiꞌi loꞌo um, chaꞌ nguiꞌni um tñan tsuꞌhue?
\v 14 Una chaꞌ ndijin um nu tiꞌi siꞌya tñan tsuꞌhue nu nguiꞌni um, tsuꞌhue ca xuꞌhue um. Una a cutsen um ꞌin nu tiꞌi tiꞌ ꞌin um, ñi a suꞌhua um chaꞌ tiquee um siꞌya chaꞌ canꞌ,
\v 15 cuiꞌ ca nu suꞌhua loo um ꞌin Ndiose Xꞌnan na, ndon tiyaa um taa um suun ꞌin nu cuñichaꞌ ꞌin um siꞌya chaꞌ nu ndiya quiꞌan tiꞌ um, una loꞌo suun ñaꞌan xcuen um ꞌin canꞌ loꞌ tsuꞌhue ti tsaa chaꞌ ꞌin um loꞌo.
\v 16 Tyuꞌhui um sca chendyu nu luhui, loꞌ chaꞌ caja nu chcuiꞌ caꞌan ꞌin um siꞌyana nguiꞌni um tñan tsuꞌhue siꞌya Cristo, uta chcuiꞌ canꞌ chaꞌ tiꞌi ꞌin um, tsatoꞌo quinu canꞌ loꞌo chaꞌ jyiꞌo.
\v 17 Siꞌyana tsuꞌhue lati tyijyin um nu tiꞌi loo nu nguiꞌni um tñan tsuꞌhue, chaꞌ cuañaꞌan nchca tiꞌ Ndiose, loꞌ siꞌi nu ndijin um nu tiꞌi siꞌya chaꞌ ngunanꞌ nu nguiꞌni um.
\v 18 Siꞌyana Cristo siyaꞌ ti ngujui ñi siꞌya quiꞌya ꞌin nten chendyu, ñi nu luhui lati yatoꞌo ngujui ñi tñan loo nten nguiꞌni quiꞌya, siꞌyana tiya loꞌo ñi ꞌin na tloo Ndiose, ngujui ñi una mdyiquiꞌo ñi xiyaꞌ.
\v 19 Lja xacanꞌ ya ycuiꞌ ñi chaꞌ tsuꞌhue ꞌin Ndiose loꞌo cusya ꞌin nten nu ntsuꞌhui nchcun yaaꞌ chaꞌ ndyija,
\v 20 cuiꞌ nten nu lyeꞌ tiꞌ nu mdiꞌin cuaꞌ sꞌni xa mtñan yu Noé yca naꞌan canꞌ, nta Ndiose chaꞌ ñi xaa quia nan neꞌ ꞌin ñi, una chinꞌ ti nten, cuiꞌ tsa snuꞌ ti nu mdoꞌo laa loo tyiꞌa canꞌ.
\v 21 Tyiꞌa canꞌ lca na sca xñii tsañaꞌan nu nchcua tya na cuaꞌ ñii loꞌ tyiꞌo laa na, (una siꞌi siꞌyana xnu luhui na ꞌin na, cuiꞌ ca nu tyiꞌin tyaa na ꞌin na yaaꞌ Ndiose loꞌo sca chaꞌ tiyaa nu luhui), cuiꞌ siꞌya chaꞌ nu mdyiquiꞌo Jesucristo.
\v 22 Ycuen ñi nde niꞌ cuaan, nducua ñi tsoꞌ cueen ꞌin Stina Ndiose, ndlo ñi tñan ꞌin nchgaa angujle, tsatlyu loꞌo nchgaa la ñaꞌan bsya loꞌo nu lyiꞌya chaꞌ cuiyaꞌ ꞌin ñi.
\c 4
\s Tsuꞌhue cuꞌni na tñan ꞌin Ndiose 

\p
\v 1 Siꞌyana Cristo mdijin ñi nu tiꞌi loꞌo tsoꞌ ꞌin cunanꞌ ñi, cuañaꞌan ꞌun cuꞌni tnu tiquee um, suꞌhua yuhue tiꞌ um chaꞌ re, siꞌyana nu cuaꞌ mdijin nu tiꞌi loꞌo tsoꞌ ꞌin cunanꞌ, cuaꞌ mdoꞌo tsoꞌ canꞌ siiꞌ nchgaa loo quiꞌya,
\v 2 ñaꞌan ca siꞌyana a tyiꞌan ꞌa canꞌ loo chaꞌ ngunanꞌ tichinꞌ xaa nu tiꞌ tyiꞌin loo chendyu re, cuiꞌ ca nu cuꞌni canꞌ tsañaꞌan nu nchca tiꞌ Ndiose.
\v 3 Cuiꞌ lya tsacua ti ñaꞌan tsañaꞌan cuaꞌ mduꞌhui um chendyu ngunanꞌ, chaꞌ nu ndyuꞌhui cuiyaꞌ tiꞌ neꞌ gentil: Chaꞌ nu nguiten yuꞌhui neꞌ loꞌo ñaꞌan tucui ti, chaꞌ ngunanꞌ nu ndyiꞌo tiquee neꞌ, chaꞌ cuꞌhui, nchgaa loo chaꞌ nducunꞌ nu nꞌni neꞌ seꞌen nchca taꞌa xa lyee ndyiꞌyo neꞌ, chaꞌ nu nꞌni tnu neꞌ joꞌo, cuiꞌ chaꞌ nu nxcuan tloo Ndiose.
\v 4 Nduhue ꞌa tiꞌ neꞌ siꞌyana a ndaꞌan ꞌa um loꞌo neꞌ loo chaꞌ ngunanꞌ, nchcuiꞌ caꞌan neꞌ ꞌin um siꞌya chaꞌ canꞌ,
\v 5 una tiyaa xaa ntsuꞌhui chaꞌ tyaa canꞌ cunta tloo ñi nu cuaꞌ ndon tiyaa cuꞌni xñan bsya ꞌin nten tsatlyu loꞌo neꞌ cuaꞌ ngujui.
\v 6 Canꞌ chaꞌ hasta loꞌo nu ngujui jui nu ycuiꞌ chaꞌ tsuꞌhue ꞌin Ndiose loꞌo, siyaꞌ loꞌo canꞌ tsoꞌ ꞌin Ndiose, una ca xñan bsya ꞌin loꞌo tsoꞌ ꞌin cunanꞌ.
\v 7 Cuaꞌ nchcui cuiiꞌ chaꞌ tsatii chaꞌ nu nchca loo chendyu re, canꞌ chaꞌ nde lyee la xñi um cunta ꞌin um, chcui chaꞌ tiyaa ꞌin um chcuiꞌ lyiꞌo um ꞌin Ndiose.
\v 8 Chaꞌ nu ndon loo lati, chuꞌhui chaꞌ tsuꞌhue ꞌin um scasca um, siꞌyana nu ntsuꞌhui chaꞌ tsuꞌhue ꞌin loꞌo taꞌa, nchca nꞌni canꞌ chaꞌ tlyu tiꞌ nchgaa loo quiꞌya.
\v 9 Cuꞌni cunta um ꞌin nchgaa nu tiyaa seꞌen ndiꞌin um, loꞌ siꞌi nu taa um quiꞌya siꞌya chaꞌ canꞌ.
\v 10 Cunda scaa um cuaꞌ ncuan xuꞌhue um chaꞌ cuiyaꞌ nu mdaa Ndiose ꞌin um, cuaꞌ ñaꞌaan chaꞌ nu mdaa ñi ꞌin um, cuiꞌ na cunajoꞌo na ꞌin um nu ta yaaꞌ taꞌa um, tsañaꞌan nꞌni sca nu cuaꞌ nguiꞌni ca tñan ꞌin Ndiose siꞌya chaꞌ tsuꞌhue nu cuaꞌ jui ꞌin.
\v 11 Chaꞌ ndeꞌen nu chcuiꞌ loꞌo nten, chcuiꞌ canꞌ tsañaꞌan chaꞌ nu taa Ndiose ꞌin, chaꞌ ndeꞌen nu ta yaaꞌ ꞌin xca tucui, loꞌo chaꞌ cuiyaꞌ ꞌin Ndiose cuꞌni ꞌin na, ñaꞌan ca siꞌyana scuen cuaan chaꞌ ꞌin Ndiose siꞌya Jesucristo, ñi nu ngaꞌan chaꞌ cuꞌni tnu na ꞌin, loꞌ scati ñi culo ñi tñan tsala xaa. Amen.
\s Ndijin na nu tiꞌi siꞌya chaꞌ ꞌin Ndiose
\p
\v 12 ꞌUn jun taꞌa na nu ndyuꞌhui cuiyaꞌ tinꞌ ꞌin, a cuhue tiꞌ um siꞌya chaꞌ nu cuaꞌ ndijin um, ta siꞌyana xqueꞌ tiꞌ um a ntsuꞌhui chaꞌ tyijyin um nu tiꞌi,
\v 13 cuiꞌ ca nu nde ca tsuꞌhue chuꞌhui tiquee um, siꞌyana sca chaꞌ ti ꞌin um loꞌo tiꞌi nu mdijin Cristo, una nde lyee la ca tsuꞌhue chuꞌhui tiquee um tsaan nu ca chcanꞌ loo chaꞌ cuiyaꞌ ꞌin ñi.
\v 14 Tsuꞌhue ca xuꞌhue um xa ndyijyi nu chcuiꞌ caꞌan ꞌin um siꞌya chaꞌ ꞌin Cristo, siꞌyana Espíritu nu mdoꞌo loo xaa ꞌin Ndiose ntsuꞌhui niꞌ cusya ꞌin um. Chaꞌ ñi siꞌyana nten canꞌ ndaja ꞌin ñi, una tsoꞌ nu ꞌin um nde nguiꞌni tnu um ꞌin ñi.
\v 15 Canꞌ chaꞌ xñi um cunta siꞌyana ñi sca um a tyijyin um chaꞌ, ta siꞌyana yjui um nten, uta mꞌni um cunan, ta siꞌyana lca um sca nu nducunꞌ, uta nguiten yuꞌhui um loꞌo chaꞌ nu a nguiꞌni caꞌan ꞌin um.
\v 16 Una chaꞌ ndijin um nu tiꞌi siꞌya chaꞌ ꞌin Cristo, a xijyiꞌo tiꞌ um, cuiꞌ ca nu tyaa um xuꞌhue ꞌin Ndiose siꞌya chaꞌ canꞌ.
\v 17 Siꞌyana cuaꞌ mdiyaa xaa ca xñan bsya ꞌin nchgaa sñeꞌ Ndiose, loꞌ chaꞌ culo nducua la tyisnan chaꞌ canꞌ loꞌo nareꞌ, ¿ñaꞌan la ca ꞌin nten nu a jaꞌan chaꞌ tsuꞌhue nu nchcuiꞌ Ndiose?
\v 18 —Sca nten nu ñi ndiꞌin chaꞌ ꞌin, loꞌ chaꞌ seen ti tyiꞌo laa neꞌ, ¿ñaꞌan la ca tsatoꞌo ꞌin nten nducunꞌ loꞌo nu nguiꞌni quiꞌya—?
\v 19 Canꞌ chaꞌ nu ndijin nu tiꞌi siꞌya chaꞌ cuiyaꞌ ꞌin Ndiose, xnu canꞌ cunta cusya ꞌin yaaꞌ ñi nu ndaa chendyu, loꞌ tsa quiñan canꞌ cuꞌni tñan tsuꞌhue.
\c 5
\s Chaꞌ ꞌin yu nu ntsuꞌhui cunta ꞌin jun 

\p
\v 1 Nchca tinꞌ chcuinꞌ loꞌo yu nu ntsuꞌhui cunta ꞌin um, siꞌyana loꞌon nanꞌ lcan nu ntsuꞌhui cunta ꞌin jun, loꞌ naꞌan tloon ñaꞌan mdijin Cristo nu tiꞌi, cuiꞌ cuañaꞌan quiꞌni caꞌan ꞌñan loꞌo chaꞌ cuiyaꞌ nu taa ñi tiyaa xaa,
\v 2 canꞌ chaꞌ jñan chaꞌ tsuꞌhue ꞌin um siꞌyana chuꞌhui um cunta ꞌin jun taꞌa na nu cuaꞌ mdaa Ndiose ꞌin um, una siꞌi loꞌo juesa, cuiꞌ ca nu loꞌo chaꞌ tsuꞌhue nu ndyiꞌo tiquee um, ñi siꞌi na nducua tloo um caja siyaꞌ um, cuiꞌ ca nu cuꞌni um tñan canꞌ loꞌo nu chcui lca tiquee um.
\v 3 A cuꞌni um ꞌin um ñaꞌan nchca tiꞌ sca xꞌnan jun, cuiꞌ ca nu ndyiꞌya ti ñaꞌan culoꞌo xñan um ꞌin um.
\v 4 Loꞌ xa ca chcanꞌ loo Ñi nu ntsuꞌhui ca cunta ꞌin nchgaa jun taꞌa na, chcuan um cunta chaꞌ tsuꞌhue nu taa Ndiose ꞌin um la niꞌ cuaan, na nu a ntsuꞌhui ꞌa chaꞌ tsatii.
\v 5 Ticuiꞌ cuañaꞌan ꞌun yu tsa suhue ti, ca jaꞌan um chaꞌ nu nchcuiꞌ yu nu ntsuꞌhui cunta ꞌin um, cuiꞌ cuañaꞌan scasca um cuꞌni lyoꞌ um ꞌin um siꞌyana: —Ndiose nxcuan tloo ñi ꞌin nten nu siyeꞌ, una nda yaaꞌ ñi ꞌin nten nu suun—.
\v 6 Canꞌ chaꞌ cuꞌni suun um ꞌin um tloo Ndiose, ñi nu tla la chaꞌ cuiyaꞌ ntsuꞌhui yaaꞌ, siꞌyana cuiꞌ ñi scuen cuaan ñi chaꞌ ꞌin um xa tsa tucua xaa.
\v 7 A cunta yaaꞌ ñi xnu um nchgaa chaꞌ nduhue tiꞌ ntsuꞌhui tiquee um, siꞌyana cuiꞌ ñi ntsuꞌhui ñi cunta ꞌin um.
\v 8 Xñi um cunta ꞌin um loꞌ tyiꞌin tiyaa um, siꞌyana laxaꞌan nu lca taꞌa cusuun na, ndaꞌan chcua tyiꞌiin tsoꞌ tsañaꞌan nchca tiꞌ sca cuichi nu la, loꞌ nan canꞌ tucui ca ꞌin cujlyo.
\v 9 Canꞌ chaꞌ tyon queeꞌ um ꞌin canꞌ, loꞌ a tyiꞌo tsoꞌ um siiꞌ chaꞌ nu ndiya quiꞌan tiꞌ um, siꞌyana cuaꞌ jlyo tiꞌ um scañaꞌan ti ndijin um nu tiꞌi loꞌo jun sca chcui chendyu.
\v 10 Una Ndiose, ñi nu ntsuꞌhui nchgaa loo chaꞌ tsuꞌhue ꞌin, siꞌya Jesucristo nsiꞌya ñi ꞌin na sten na loo xaa ꞌin ñi tsala xaa, xa cuaꞌ mdijin chinꞌ um nu tiꞌi, cuiꞌ ñi cuꞌni chcui ñi chaꞌ ꞌin um, cuꞌni ñi chaꞌ tyon tla um, taa la ñi juesa ꞌin um, loꞌ cuañaꞌan tyiꞌin tya tla la ñi ꞌin um.
\v 11 Scati ꞌin ñi cuꞌni tnu na loꞌ culo ñi tñan tsala xaa. Amen.
\s Mslaꞌ taꞌa yu Tyo loꞌo jun taꞌa na
\p
\v 12 Yu taꞌa na Silvano, yu nu ndyuꞌhui lyoon siꞌyana ñi ndiꞌin chaꞌ ꞌin, nguaꞌan yu tsa chinꞌ chaꞌ loo quityi re loꞌo cunta ꞌñan, siꞌyana taan chaꞌ tnu tiquee ꞌin um. Taan suun loꞌo um siꞌyana chaꞌ tsuꞌhue re lca na chaꞌ nu ñi ꞌin Ndiose, cuiꞌ loo chaꞌ nu cuaꞌ ntsuꞌhui um.
\v 13 Jun taꞌa na nu ndiyoꞌ tiꞌin quichen Babilonia nchcuiꞌ chaꞌ jun ꞌin um, jun nu cuaꞌ ngulohui Ndiose ꞌin tsatlyu loꞌo na, a cunta yu Marco nchcuiꞌ chaꞌ yu ꞌin um, yu nu lca sca sñenꞌ nanꞌ loꞌo tsoꞌ ꞌin Ndiose.
\v 14 Cuiꞌ cuañaꞌan chcuiꞌ chaꞌ taꞌa um loꞌo nu chcui lca tiquee um. Ndiose cuꞌni ñi chaꞌ siꞌyana tyiꞌin tsuꞌhue um nchgaa um nu cuaꞌ ndiꞌin tsoꞌ ꞌin Jesucristo. Amen.