\id 2PE - Nopala (Chatino) NT [cya] - Mexico 2013 (web 2014)
\h 2 PEDRO
\toc1 2 Pedro
\toc2 2 Pedro
\toc3 2Pe
\mt1 2 Pedro
\c 1
\s Yu Tyo nchcuiꞌ chaꞌ yu ꞌin jun taꞌa na
\p
\v 1 Nanꞌ yu Simón Tyo nu lca nguso ꞌin Jesucristo, ñi nu nguaꞌan tñan ꞌñan, nchcuiꞌ chanꞌ ꞌin um, ꞌun nu cuaꞌ ya quiꞌan tiꞌ siꞌya chaꞌ nu ñi ꞌin Stina Ndiose loꞌo Jesucristo, ñi nu Ndlo laa ꞌin na, scañaꞌan ti ntsuꞌhui lyoo chaꞌ nu ndiya quiꞌan tiꞌ na loꞌo um.
\v 2 Taa la ñi chaꞌ tsuꞌhue nu chuꞌhui niꞌ cusya ꞌin um, loꞌ cuꞌni ñi chaꞌ tyiꞌin tsuꞌhue um, cuaꞌ ñaꞌaan nguia ndyuꞌhui lyoo um ꞌin Ndiose loꞌo Ñi Xꞌnan na Jesús.
\s Chaꞌ tsuꞌhue ꞌin Ndiose nu quiꞌni caꞌan ꞌin na
\p
\v 3 Siꞌya chaꞌ cuiyaꞌ nu tlyu ꞌin ñi jui nchgaa loo chaꞌ nu ꞌni ꞌin na, tsañaꞌan nu ntsuꞌhui chaꞌ tyuꞌhui na sca chendyu nu luhui, siꞌyana cuaꞌ yuꞌhui lyoo na ꞌin ñi nu msiꞌya ꞌin na, ñaꞌan ca siꞌyana quiꞌni caꞌan ꞌin na loo xaa ꞌin ñi siꞌya chaꞌ tsuꞌhue ꞌin ñi.
\v 4 Siꞌya chaꞌ re mdiꞌin tyaa ñi scasca loo chaꞌ loꞌo na, chaꞌ nu ndon loo loꞌ ntsuꞌhui lyoo, siꞌya chaꞌ re caja ñaꞌan ca sca chaꞌ ti ꞌin um loꞌo Ndiose, loꞌ chcua tijyoꞌ um siiꞌ chaꞌ ngunanꞌ nu nchca loo chendyu re.
\v 5 Canꞌ chaꞌ nde lyee la suꞌhua um juesa loꞌo chaꞌ re, tsa quiñan la um loꞌo chaꞌ nu ndiya quiꞌan tiꞌ um loꞌ taa um yaꞌ ca ñi chaꞌ ꞌin um, loꞌ tsañaꞌan nchca ñi chaꞌ ꞌin um cuañaꞌan quiꞌya la um chaꞌ tiyaa,
\v 6 loꞌ ñaꞌan ndyiꞌya um chaꞌ tiyaa cuañaꞌan xñi la um cunta ꞌin um, loꞌ ñaꞌan nsñi um cunta ꞌin um cuañaꞌan chuꞌhui la chaꞌ tlyu tiꞌ ꞌin um, loꞌ ñaꞌan ntsuꞌhui chaꞌ tlyu tiꞌ ꞌin um cuañaꞌan ca luhui la chaꞌ ꞌin um tloo Ndiose,
\v 7 loꞌ ñaꞌan nchca luhui um cuañaꞌan lyee la chuꞌhui yuhue tiꞌ um ꞌin taꞌa um, loꞌ tsañaꞌan ntsuꞌhui yuhue tiꞌ um ꞌin taꞌa um cuañaꞌan nde lyee la chuꞌhui chaꞌ tsuꞌhue ꞌin um scasca um.
\v 8 Chaꞌ suꞌhua loo um nchgaa chaꞌ re, siꞌi cua chaꞌ ti ncuan xuꞌhue um ꞌin na, cuiꞌ ca nu nde lyee la ca chcanꞌ loo na loo chendyu ꞌin um, loꞌ cuañaꞌan quiꞌya la um cunta chaꞌ ꞌin Ñi Xꞌnan na Jesucristo.
\v 9 Una nu a nsuꞌhua loo chaꞌ re, chinꞌ ꞌa seꞌen nchcua quiloo canꞌ, lca canꞌ sca nu cuityinꞌ siꞌyana cuaꞌ ngujlya tiꞌ ñaꞌan nguten quiꞌya ꞌin tiꞌ culoo.
\v 10 Canꞌ chaꞌ ꞌun jun taꞌa na, nde lyee la suꞌhua loo um chaꞌ nu ndiya quiꞌan tiꞌ um ñaꞌan msiꞌya ñi ꞌin um loꞌ ngulohui ñi ꞌin um, chaꞌ cuꞌni um nchgaa chaꞌ re a ntsuꞌhui ꞌa chaꞌ tyiꞌo tsoꞌ um.
\v 11 Cuañaꞌan caja chaꞌ cuiyaꞌ sten um loꞌo nu chcui lca tiquee um seꞌen ndlo Ñi Xꞌnan na Jesucristo tñan tsala xaa, ñi nu Ndlo laa ꞌin na.
\v 12 Canꞌ chaꞌ nanꞌ a culaꞌ tinꞌ xuꞌhuan tiꞌ um loꞌo chaꞌ re, siyaꞌ cuaꞌ jlyo tiꞌ um loꞌ tla ndon um loꞌo chaꞌ nu ñi re,
\v 13 siꞌyana ntsuꞌhui suun ꞌñan suꞌhua tiyaan ꞌin um loꞌo chaꞌ re lja nu tiꞌ ndiꞌin loo chendyu.
\v 14 Jlyo tinꞌ siꞌyana cuaꞌ nchcui cuiiꞌ chaꞌ tyiꞌon loo chendyu re, tsañaꞌan nu cuaꞌ mtsaꞌ Ñi Xꞌnan na Jesucristo ꞌñan.
\v 15 Nsuꞌhuan juesa tsañaꞌan nu tca la ꞌñan, siꞌyana quia yuꞌhui tiꞌ um chaꞌ re nchgaa xaa xa nu cuaꞌ ngujuin.
\s Xa naꞌan yu Tyo ꞌin Cristo loo xaa ꞌin ñi
\p
\v 16 Siꞌyana chaꞌ nu cuaꞌ nguloꞌo hua ꞌin um tsañaꞌan chaꞌ cuiyaꞌ ꞌin Ñi Xꞌnan na Jesucristo loꞌo ñaꞌan nu ntsuꞌhui chaꞌ quiaan ñi xiyaꞌ, siꞌi chaꞌ ngulo que hua lca na seꞌen nu cuñilyiꞌo hua ꞌin um, cuiꞌ ca nu naꞌan tloo hua ꞌin ñi loo xaa ꞌin ñi.
\v 17 Xa nu mchcuan ñi chaꞌ cuiyaꞌ nu mdaa Stina Ndiose ꞌin ñi, mchaꞌan ñaꞌan ñi loꞌo sca xaa nu tsuꞌhue ñaꞌan, loꞌ cuiꞌ chaꞌ ꞌin ñi jui nu ycuiꞌ la niꞌ cuaan: Nde nu lca Sñenꞌ nanꞌ nu taꞌa lati ꞌñan, ndyijyin yaꞌ tsuꞌhue ntsuꞌhui tiqueen loꞌo.
\v 18 Ngune ꞌin hua jui nu ycuiꞌ la niꞌ cuaan xa nu ndon hua loꞌo ñi loo quiꞌya nu mdoꞌo hui canꞌ ꞌin ñi.
\v 19 A cunta cuaꞌ ntsuꞌhui quityi ꞌin na seꞌen mxiycuiꞌ Ndiose nguso ꞌin ñi cuaꞌ sꞌni. Tsuꞌhue ꞌa chaꞌ nꞌni cunta um chaꞌ canꞌ, siꞌyana lca na ñaꞌan nchca tiꞌ sca quiiꞌ nu ndyuꞌhui xaa chcui tla tsayaꞌ xtyi xaa niꞌ cusya ꞌin um, ñaꞌan nchca tiꞌ sca cuii nu nchcua xa tlya.
\v 20 Nde chaꞌ nu quiꞌya na cunta culo nducua la, siꞌyana ñi sca chaꞌ nu nguinu scua loo quityi ꞌin Ndiose, a lca na chaꞌ tiyaa ꞌin nten chendyu,
\v 21 siꞌyana ñi siyaꞌ a yaan chaꞌ canꞌ siꞌya chaꞌ cuiyaꞌ ꞌin nten, cuiꞌ ca nu yu nu cuaꞌ mdoꞌo hui ꞌin Ndiose nguaꞌan scua yu chaꞌ re tsañaꞌan nu mxiycuiꞌ Espíritu nu Luhui ꞌin yu.
\c 2
\s Chaꞌ ꞌin nten nu ndloꞌo chaꞌ cuiñi
\p
\v 1 Tsañaꞌan mdaꞌan ycuiꞌ neꞌ chaꞌ cuiñi lja nten nu mdiꞌin cuaꞌ sꞌni, cuiꞌ cuañaꞌan caja nu culoꞌo chaꞌ cuiñi seꞌen ndiꞌin um, tsuꞌhue tsuꞌhue ti sten chaꞌ cuiñi nu culo tsoꞌ ꞌin um, loꞌ tsatoꞌo xcuan tloo canꞌ ꞌin Ñi Xꞌnan na, ñi nu ngulo laa ꞌin, cuañaꞌan soꞌ tucua canꞌ yuhueꞌ chonꞌ nu cujlyo ꞌin tsati ntyin.
\v 2 Quiꞌan ꞌa nten cuꞌni nchaꞌan chaꞌ nducunꞌ nu cuꞌni canꞌ, cuiꞌ siꞌya chaꞌ canꞌ caja nu chcuiꞌ yuhueꞌ tucueen nu ñi ꞌin Ndiose,
\v 3 loꞌ siꞌyana lyee lca ꞌin loꞌo tñi, cunan canꞌ ñaꞌan nu culo na ndiꞌin ꞌin um loꞌo chaꞌ cuiñi ꞌin. Una cuaꞌ sꞌni ꞌa nducui nchaꞌan yuhueꞌ ꞌin canꞌ loꞌ cuaꞌ chcua ti na ꞌin, a tyijyin yuꞌhui chaꞌ a quinanꞌ canꞌ.
\v 4 Siꞌyana Ndiose a mꞌni ñi chaꞌ tlyu tiꞌ ꞌin angujle nu mꞌni quiꞌya, cuiꞌ ca nu msuꞌhua ñi ꞌin canꞌ loo quiiꞌ, loꞌ msuꞌhua nchcun ñi ꞌin sca seꞌen tla yta, canꞌ quinu yuꞌhui tsayaꞌ nu ca xñan bsya ꞌin.
\v 5 Cuiꞌ cuañaꞌan loꞌo nten nu mdiꞌin cuaꞌ sꞌni, a mꞌni ñi chaꞌ tlyu tiꞌ ꞌin canꞌ, cuiꞌ ca nu mdyiꞌya ñi quio tnu nu ngujlyo ꞌin nten nducunꞌ canꞌ, una ngulo laa ñi ꞌin yu Noé loꞌo cha cati nu ndiꞌin naꞌan ꞌin yu, cuiꞌ yu nu ycuiꞌ chaꞌ tsuꞌhue ꞌin Ndiose.
\v 6 A cunta ngulo ñi yuhueꞌ ꞌin quichen Sodoma loꞌo Gomorra, ngujlyo ñi ꞌin quichen canꞌ tsayaꞌ nguinu na xtyi jyii ti, loꞌo chaꞌ re ca cuiyaꞌ tiꞌ nten tsañaꞌan ntsuꞌhui chaꞌ tsatoꞌo ꞌin nu nducunꞌ.
\v 7 Una ngulo laa ñi ꞌin yu Lot, yu nu ncua jaꞌan ꞌin Ndiose, loꞌ tiꞌi ꞌa ngaꞌan ꞌin yu loꞌo chaꞌ ngunanꞌ nu nguiꞌni nten canꞌ,
\v 8 (siꞌyana yu re ya quiꞌan tiꞌ yu ꞌin Ndiose loꞌ mdiꞌin yu lja nten canꞌ, ndyijyin yaꞌ tiꞌi ngaꞌan ꞌin yu siꞌyana nchgaa xaa naꞌan yu chaꞌ ngunanꞌ nu nguiꞌni neꞌ loꞌ ne ꞌin yu chaꞌ nu nchcuiꞌ neꞌ).
\v 9 Una Ñi Xꞌnan na jlyo tiꞌ ñi ñaꞌan culaa ñi ꞌin nu ndiya quiꞌan tiꞌ ꞌin ñi xa ljyaan scasca chaꞌ ꞌin, loꞌ jlyo tiꞌ ñi ñaꞌan xitijin ñi nu tiꞌi ꞌin nu a ndiya quiꞌan tiꞌ ꞌin ñi tsaan nu cuꞌni ñi xñan bsya ꞌin canꞌ,
\v 10 una lyee lati loꞌo nu ndaꞌan loꞌo chaꞌ ngunanꞌ nu ndyiꞌo tiquee, nu nxcuan tloo ꞌin nchgaa nu ntsuꞌhui chaꞌ cuiyaꞌ yaaꞌ, tnu tiquee neꞌ cuꞌni neꞌ chaꞌ nu nchca tiꞌ neꞌ, ñi a ntsen neꞌ chcuiꞌ caꞌan neꞌ ꞌin nu mdaa Ndiose chaꞌ cuiyaꞌ ꞌin la niꞌ cuaan.
\v 11 Siyaꞌ tlyu la chaꞌ cuiyaꞌ ntsuꞌhui yaaꞌ angujle uta tla la chaꞌ ꞌin, una a xtyi tiꞌ suꞌhua yuhueꞌ ꞌin nu ndaꞌan loꞌo chaꞌ cuiyaꞌ tloo Ñi Xꞌnan na,
\v 12 una neꞌ canꞌ nchcuiꞌ tiꞌi tiꞌ neꞌ chaꞌ nu a nchca quiꞌya neꞌ cunta, tsañaꞌan nchca tiꞌ sca ꞌni nu a ntsuꞌhui chaꞌ tiyaa ꞌin nu ngula siꞌyana quinu loꞌ caja, loꞌ cuañaꞌan ntsuꞌhui chaꞌ tnanꞌ canꞌ ꞌin ticuiiꞌ,
\v 13 canꞌ xuꞌhue nu ntsuꞌhui chaꞌ quiꞌni caꞌan ꞌin neꞌ siꞌya chaꞌ ngunanꞌ nu mꞌni neꞌ, loo nu nducui tiꞌ neꞌ cuꞌni neꞌ chaꞌ nu nchca tiꞌ neꞌ cunda sca tsaan. Cooꞌ chaꞌ tiyaa ꞌin neꞌ, a ndii tiꞌ neꞌ chaꞌ jyiꞌo, loꞌ a seꞌen ñaꞌan chaꞌ ꞌin neꞌ xa nchcu neꞌ loꞌo um tsatlyu,
\v 14 lyee lca tiquee neꞌ sten yuꞌhui neꞌ loꞌo ñaꞌan tucui ti, a nguilaꞌ tiꞌ neꞌ nꞌni neꞌ quiꞌya, nxityu neꞌ ꞌin nu joꞌo ti ndiꞌin chaꞌ ꞌin loo quiꞌya, siꞌyana chacuiꞌ chaꞌ xqueꞌ nguilyu niꞌ cusya ꞌin neꞌ, loꞌ lca neꞌ nu nducua yuhueꞌ chonꞌ.
\v 15 Cuaꞌ mdoꞌo tsoꞌ neꞌ tucueen nu ñi, ndaꞌan nguinanꞌ yuꞌhui neꞌ loꞌ nguiaa neꞌ tucueen nu mdaꞌan Balaam, sñeꞌ Beor, cuiꞌ nu lyee ncua lca tiquee chuꞌhui canan ꞌin loꞌo chaꞌ ngunanꞌ,
\v 16 loꞌ jui nu ngusun loꞌo ꞌin yu siꞌya chaꞌ ngunanꞌ canꞌ ꞌin yu, sca burra, ꞌni nu a ntsuꞌhui chaꞌ nchcuiꞌ, una ycuiꞌ loꞌo yu tsañaꞌan nchcuiꞌ sca nten, loꞌ mducui ndijin ꞌin loo chaꞌ tinto ꞌin yu nu mxiycuiꞌ Ndiose ꞌin.
\v 17 Nguiaa chaꞌ ꞌin neꞌ canꞌ ñaꞌan nchca tiꞌ sca chco nu a ntsuꞌhui tyiꞌa, uta ñaꞌan nchca tiꞌ sca ndla nu nguia loꞌo cuiꞌin ꞌin scasca seꞌen, canꞌ nu ntsuꞌhui chaꞌ quiꞌni caꞌan ꞌin sca seꞌen nu lyee tla yta, canꞌ chuꞌhui canꞌ tsala xaa.
\v 18 Nchcuiꞌ neꞌ chaꞌ nu a ntsuꞌhui lyoo, una loꞌo chaꞌ siyeꞌ nu nchcuiꞌ neꞌ nan neꞌ ñaꞌan xisqueꞌ neꞌ ꞌin xca tucui loo chaꞌ ngunanꞌ nu ndyiꞌo tiquee neꞌ, cuiꞌ nu cuaꞌ nguia ndoꞌo tsoꞌ siiꞌ chaꞌ ngunanꞌ.
\v 19 Nchcuiꞌ neꞌ loꞌo canꞌ siꞌyana a tucui nu culo tñan ꞌin, siyaꞌ ticuiiꞌ neꞌ ntsuꞌhui nchcun neꞌ loo chaꞌ ngunanꞌ canꞌ. Siꞌyana nu caja nu xisqueꞌ ꞌin cuaꞌ ntsuꞌhui canꞌ tuyaaꞌ xca tucui.
\v 20 Chaꞌ ñi siꞌyana sca nu cuaꞌ mdoꞌo tsoꞌ siiꞌ chaꞌ ngunanꞌ nu nchca loo chendyu re, nu cuaꞌ yuꞌhui lyoo ꞌin Ñi Xꞌnan na Jesucristo, ñi nu Ndlo laa ꞌin na, chaꞌ xiyaꞌ xitucui canꞌ loo chaꞌ ngunanꞌ, tsatoꞌo sñan la cuꞌni canꞌ que ñaꞌan tiꞌ culoo.
\v 21 Tsuꞌhue lati chaꞌ cua na a yuꞌhui lyoo canꞌ tucueen nu ñi, loꞌ siꞌi nu xitucui xiyaꞌ loo chaꞌ ngunanꞌ, loꞌ xcuan tloo chaꞌ nu luhui lati nu cuaꞌ ncuan xuꞌhue.
\v 22 Canꞌ nu yatoꞌo ꞌin tsañaꞌan nchcuiꞌ sca chaꞌ: Xniꞌ nxitucui ꞌin nchcu ꞌin na nu cuaꞌ ycuen ꞌin, cuiꞌ cuañaꞌan cuhueꞌ, xiyaꞌ nguiten ꞌin loo mtsoꞌ siyaꞌ cuaꞌ mxicuta neꞌ ꞌin ꞌin.
\c 3
\s Ntsuꞌhui chaꞌ quiaan Ñi Xꞌnan na xiyaꞌ
\p
\v 1 ꞌUn jun taꞌa na nu ndyuꞌhui cuiyaꞌ tinꞌ ꞌin, nde nu cuaꞌ nchca tucua quityi ndaꞌan ꞌin um, chcuaa quityi re scañaꞌan ti nsuꞌhua tiyaan ꞌin um siꞌyana ca ñi chaꞌ tiyaa ꞌin um,
\v 2 loꞌ quia yuꞌhui tiꞌ um chaꞌ nu nguaꞌan yu nu mxiycuiꞌ Ndiose ꞌin cuaꞌ sꞌni, loꞌo tñan nu ngulo Ñi Xꞌnan na, ñi nu Ndlo laa ꞌin na, cuiꞌ chaꞌ nu nguloꞌo yu taꞌa mdaꞌan ñi.
\v 3 Ca cuiyaꞌ tiꞌ um chaꞌ re culo nducua lati, siꞌyana tiyaa xaa ntsuꞌhui chaꞌ caan scasca nu xtyi lyiꞌo chaꞌ tsuꞌhue ꞌin Ndiose, loꞌ cuꞌni canꞌ ñaꞌan nu nchca tiꞌ,
\v 4 loꞌ ndeñaꞌan chcuiꞌ: ¿La ncua chaꞌ nu cuaꞌ mdiꞌin tyaa ñi siꞌyana caan ñi xiyaꞌ? Cuaꞌ sꞌni ngujui nten cula ꞌin na, loꞌ cuiꞌ ñaꞌan ti ndiꞌin chendyu re tiꞌ xa nguiaaꞌ na.
\v 5 A nchca tiꞌ canꞌ cuꞌni cunta chaꞌ nu nguinu scua cuaꞌ sꞌni, siꞌyana niꞌ cuaan nguiaaꞌ na loꞌo chaꞌ nu ycuiꞌ Ndiose, cuiꞌ cuañaꞌan chendyu re mdoꞌo na loo tyiꞌa loꞌ ndiꞌin na siꞌya tyiꞌa,
\v 6 cuiꞌ cuañaꞌan siꞌya tyiꞌa ngujlyo chendyu cuaꞌ sꞌni.
\v 7 Una niꞌ cuaan loꞌo chendyu nu ndiꞌin cuaꞌ ñii, ticuiꞌ siꞌya chaꞌ cuiyaꞌ ꞌin Ndiose ndiꞌin na, loꞌ tsatoꞌo squin na tiyaa xaa tsaan nu cuꞌni ñi xñan bsya ꞌin nten, xa nu quinanꞌ nchgaa nu a ndiya quiꞌan tiꞌ ꞌin ñi.
\v 8 ꞌUn jun taꞌa na nu ndyuꞌhui cuiyaꞌ tinꞌ ꞌin, a nchca chaꞌ jlya tiꞌ um chaꞌ re, siꞌyana cunta ꞌin Ñi Xꞌnan na sca tsaan lca na sca mii yjan, loꞌ sca mii yjan lca na sca tsaan ti ꞌin ñi.
\v 9 Siyaꞌ ndiyaꞌ Ñi Xꞌnan na loꞌo chaꞌ nu cuaꞌ mdiꞌin tyaa ñi, siꞌi canꞌ chaꞌ ngujlya tiꞌ ñi tsañaꞌan nchcuiꞌ nten, cuiꞌ ca nu siꞌya chaꞌ tlyu tiꞌ ntsuꞌhui ꞌin ñi a nchca tiꞌ ñi quinanꞌ ñi sca tucui, cuiꞌ ca nu nchca tiꞌ ñi siꞌyana nchgaa tucui xiloꞌo chonꞌ quiꞌya nguiꞌni.
\v 10 Una tsaan nu quiaan Ñi Xꞌnan na xiyaꞌ, tsatoꞌo na ñaꞌan xa nguiten yu cunan xa tla, niꞌ cuaan ntsuꞌhui chaꞌ quine na cueen xa jlyo na, chendyu re squin na loꞌo nchgaa na nu ndiꞌin ꞌin na.
\v 11 Chaꞌ cuañaꞌan ntsuꞌhui chaꞌ jlyo nchgaa na re, lyee la ndyiꞌo tñan tyuꞌhui um sca chendyu nu luhui tloo Ndiose,
\v 12 lja nta um tsuꞌhue ntsuꞌhui tiquee um siꞌya tsaan nu cuaꞌ mdiꞌin tyaa Ndiose, cuiꞌ xa nu ntsuꞌhui chaꞌ squin niꞌ cuaan loꞌ jlyo nchgaa na nu nducua ꞌin na, loꞌ siyaꞌ ti tsatii chaꞌ ꞌin na.
\v 13 Una nareꞌ nducua tloo na chaꞌ nu cuaꞌ mdiꞌin tyaa ñi, sca chendyu nu cui ti loꞌo niꞌ cuaan seꞌen quinu scua sca chaꞌ cuiyaꞌ nu ñi.
\v 14 Canꞌ chaꞌ ꞌun jun taꞌa na nu ndyuꞌhui cuiyaꞌ tinꞌ ꞌin, chaꞌ cuañaꞌan nta um chaꞌ re, suꞌhua um juesa loꞌ xñi um cunta ñaꞌan tyiꞌin um, siꞌyana luhui um quija lyoo ñi ꞌin um xa nu quiaan ñi xiyaꞌ, ñi sca cooꞌ loꞌ ñi sca chaꞌ loꞌ a nducui nchaꞌan ꞌin um.
\v 15 Quiꞌya um cunta chaꞌ re: Ñi Xꞌnan na nchca tiꞌ ñi siꞌyana tyiꞌo laa nten, canꞌ chaꞌ ntsuꞌhui chaꞌ tlyu tiꞌ ꞌin ñi. Cuiꞌ cuañaꞌan yu taꞌa na Pablo, yu nu ndyuꞌhui cuiyaꞌ tiꞌ na ꞌin, ticuiꞌ chaꞌ re nguaꞌan yu ꞌin um tsañaꞌan chaꞌ tiyaa nu mdaa Ndiose ꞌin yu,
\v 16 laꞌ nchgaa ti quityi nguaꞌan yu ticuiꞌ chaꞌ re nchcuiꞌ na, loꞌ ntsuꞌhui chaꞌ canꞌ tucui ti ñaꞌan ndyiꞌya na cunta ꞌin na. Tsalca nu chinꞌ chaꞌ tiyaa ꞌin uta joꞌo ndiꞌin chaꞌ ꞌin, nde xitsaꞌan neꞌ chaꞌ canꞌ tsañaꞌan nꞌni neꞌ loꞌo nchgaa la ñaꞌan quityi ꞌin Ndiose, loꞌ ndiyatoꞌo ntnanꞌ neꞌ ꞌin neꞌ siꞌya chaꞌ canꞌ.
\v 17 Canꞌ chaꞌ ꞌun jun taꞌa na nu ndyuꞌhui cuiyaꞌ tinꞌ ꞌin, siꞌyana cuaꞌ jui nu msuꞌhua tiyaa ꞌin um loꞌo chaꞌ re, xñi um cunta ꞌin um loꞌo neꞌ nducunꞌ, a taa um yaꞌ cuan qui neꞌ ꞌin um loo chaꞌ cuiñi, ñaꞌan tuꞌ tsatoꞌo tyiꞌo tsoꞌ um loo chaꞌ nu cuaꞌ ntsuꞌhui um.
\v 18 Cuiꞌ ca nu culo um loo chaꞌ tsuꞌhue ꞌin Ñi Xꞌnan na Jesucristo, ñi nu Ndlo laa ꞌin na, loꞌ suꞌhua um juesa chuꞌhui lyoo la um ꞌin ñi. ꞌIn scati ñi ntsuꞌhui chaꞌ cuꞌni tnu na, tiꞌ cuaꞌ ñii loꞌ tsala xaa. Amen.