\id 1JN - Nopala (Chatino) NT [cya] - Mexico 2013 (web 2014)
\h 1 JUAN
\toc1 1 Juan
\toc2 1 Juan
\toc3 1Jn
\mt1 1 Juan
\c 1
\s Chaꞌ nu ndaa chendyu ꞌin na
\p
\v 1 Nde chaꞌ nu mdyisnan tiꞌ culoo, chaꞌ nu cuaꞌ ngune ꞌin hua, loꞌ naꞌan tloo hua, ñi nu yuꞌhui lyoo hua, mꞌni caꞌan yaaꞌ hua ꞌin, cuiꞌ Ychaꞌ ñi nu ndaa chendyu ꞌin na.
\v 2 (Siꞌyana ñi nu ndaa chendyu canꞌ ncua chcanꞌ loo ñi, naꞌan hua ꞌin ñi, loꞌ ncua cuiyaꞌ tiꞌ hua ñaꞌan ndiꞌin chaꞌ ꞌin ñi, cuiꞌ cuañaꞌan ndaa hua suun siꞌyana cuiꞌ ñi ndaa ñi chendyu nu a tsatii ꞌa ꞌin na, ñi nu mdiꞌin seꞌen nducua Stina Ndiose, loꞌ nguloꞌo tloo ñi ꞌin hua).
\v 3 Chaꞌ nu naꞌan tloo hua loꞌ ngune ꞌin hua, nde chaꞌ nu nchcuiꞌ hua loꞌo um, siꞌyana ca sca chaꞌ ti ꞌin um loꞌo hua, loꞌ chaꞌ ñi siꞌyana sca chaꞌ ti ꞌin na loꞌo Stina Ndiose loꞌo Jesucristo Sñeꞌ ñi.
\v 4 Nguaꞌan tñan hua quityi re ꞌin um, siꞌyana lyee la ca tsuꞌhue chuꞌhui tiquee um.
\s Ndiose lca ñi xaa
\p
\v 5 Nde chaꞌ nu ngune ꞌin hua ycuiꞌ ñi, loꞌ nchcuiꞌ hua loꞌo um siꞌyana Ndiose lca ñi xaa, loꞌ a ntsuꞌhui tla yta ꞌin ñi.
\v 6 Chaꞌ ljuin na siꞌyana sca chaꞌ ti ꞌin na loꞌo ñi, loꞌ tiꞌ ndaꞌan na loo chaꞌ ngunanꞌ, chaꞌ cuiñi nchcuiꞌ na loꞌ a ndaꞌan na loo chaꞌ nu ñi.
\v 7 Una chaꞌ ndaꞌan na loo xaa ꞌin ñi tsañaꞌan nu lca ñi ycuiꞌ ñi, loꞌo nareꞌ sca chaꞌ ti ꞌin na xacanꞌ, loꞌ tne Jesucristo Sñeꞌ Ndiose nsuhui ꞌin na loꞌo nchgaa quiꞌya.
\v 8 Chaꞌ ljuin na siꞌyana a nguiꞌni na quiꞌya, ticuiiꞌ na ñilyiꞌo na ꞌin na, loꞌ a ñi ndiꞌin chaꞌ ꞌin na.
\v 9 Una chaꞌ ñee na quiꞌya ꞌin na tloo Ndiose, cuꞌni ñi chaꞌ tlyu tiꞌ ꞌin na, loꞌ suhui ñi nchgaa quiꞌya ꞌin na, siꞌyana ñi ndiꞌin chaꞌ ꞌin ñi loꞌ nꞌni ñi tñan tsuꞌhue.
\v 10 Chaꞌ ljuin na siꞌyana a nguiꞌni na quiꞌya, ñaꞌan loo chaꞌ nguiꞌni na ꞌin ñi lca ñi sca nu cuiñi, loꞌ a nchca cuan xuꞌhue na chaꞌ nu nchcuiꞌ ñi.
\c 2
\s Cristo ndyiꞌo ñi chaꞌ ꞌin na
\p
\v 1 ꞌUn nu lca ñaꞌan nchca tiꞌ sca sñenꞌ nanꞌ, nde ndaꞌan quityi re ꞌin um siꞌyana a cuꞌni um quiꞌya. Una chaꞌ ndeꞌen nu cuꞌni quiꞌya, cuaꞌ lca nu tyiꞌo chaꞌ ꞌin na tloo Stina Ndiose, cuiꞌ Jesucristo nu nꞌni tñan tsuꞌhue.
\v 2 Cuiꞌ ñi ngujui ñi loꞌ mxicuten ñi quiꞌya ꞌin na, loꞌ siꞌi tsa ꞌin naa ti, cuiꞌ ca nu siꞌya nten sca chcui chendyu.
\v 3 Nde nchca chcanꞌ ñaꞌan siꞌyana ndyuꞌhui lyoo na ꞌin ñi, chaꞌ nxuꞌhua seꞌen na chaꞌ nu ndlo ñi tñan.
\v 4 Nu nchcuiꞌ: Nanꞌ ndyuꞌhuin lyoon ꞌin ñi, loꞌ a nxuꞌhua seꞌen chaꞌ nu ndlo ñi tñan, lca canꞌ sca nu cuiñi, loꞌ a nchcuiꞌ chaꞌ nu ñi.
\v 5 Una nu nxuꞌhua seꞌen chaꞌ nu nchcuiꞌ ñi, nde nu chaꞌ ñi ca ndon loo chaꞌ tsuꞌhue ꞌin Ndiose, cuañaꞌan nchca cuiyaꞌ tiꞌ na siꞌyana sca chaꞌ ti ꞌin na loꞌo ñi.
\v 6 Nu nchcuiꞌ siꞌyana sca chaꞌ ti ꞌin loꞌo ñi, ngaꞌan chaꞌ tyuꞌhui canꞌ sca chendyu tsañaꞌan nu mduꞌhui ñi.
\s Chaꞌ nu cui ti ngulo Ndiose tñan
\p
\v 7 ꞌUn jun taꞌa na, chaꞌ nu ndlo ñi tñan ꞌin na siꞌi chaꞌ cui ti lca na, cuiꞌ ca nu lca na chaꞌ nu ncuan xuꞌhue um tiꞌ culoo. Chaꞌ nu ndaꞌan loo quityi re lca na ycuiꞌ ca chaꞌ nu cuaꞌ ngune ꞌin um tiꞌ xa mdyisnan um.
\v 8 Una ndaꞌan sca chaꞌ nu cui ti nu ntsuꞌhui chaꞌ xuꞌhua seꞌen na, loꞌ nchca chcanꞌ loo chaꞌ re loo chendyu ꞌin um tsañaꞌan ndiꞌin chaꞌ ꞌin ñi, siꞌyana chaꞌ tiyaa ngunanꞌ cuaꞌ nguia nducua tijyoꞌ na, loꞌ nchca chcanꞌ loo xaa ꞌin ñi nu lca chaꞌ nu ñi.
\v 9 Nu nchcuiꞌ siꞌyana ndon loo xaa ꞌin ñi, loꞌ nxcuan tloo ꞌin taꞌa nten, tiꞌ ndon canꞌ loo chaꞌ tiyaa ngunanꞌ.
\v 10 Nu ntsuꞌhui chaꞌ tsuꞌhue ꞌin loꞌo taꞌa nten, canꞌ nu ndon loo xaa ꞌin ñi loꞌ a ntsuꞌhui chaꞌ tyiꞌo tsoꞌ.
\v 11 Una nu nxcuan tloo ꞌin taꞌa nten, tiꞌ ndon canꞌ loo chaꞌ tla yta, loꞌ ndaꞌan loo chaꞌ ngunanꞌ, ñi a jlyo tiꞌ la nguiaa, siꞌyana chaꞌ tla yta canꞌ mducun na chaꞌ tiyaa ꞌin.
\v 12 Nde ndaꞌan quityi re ꞌin um, ꞌun nu lca sñeꞌ Ndiose, siꞌyana cuaꞌ mxicuten ñi quiꞌya ꞌin um loꞌo chaꞌ cuiyaꞌ ꞌin Jesús.
\v 13 Ndaꞌan quityi re ꞌin um, ꞌun nu lca nten cula, siꞌyana cuaꞌ ndyuꞌhui lyoo um ꞌin ñi nu ndiꞌin tiꞌ culoo. Ndaꞌan quityi re ꞌin um, ꞌun nu tsa suhue ti, siꞌyana cuaꞌ mꞌni um canan ꞌin laxaꞌan. Ndaꞌan quityi re ꞌin um, ꞌun nu lca sñenꞌ, siꞌyana cuaꞌ ndyuꞌhui lyoo um ꞌin Stina Ndiose.
\v 14 Ndaꞌan quityi re ꞌin um, ꞌun nu lca nten cula, siꞌyana cuaꞌ ndyuꞌhui lyoo um ꞌin ñi nu ndiꞌin tiꞌ culoo. Ndaꞌan quityi re ꞌin um, ꞌun nu tsa suhue ti, siꞌyana tla ndon um loꞌ ntsuꞌhui chaꞌ ꞌin Ndiose niꞌ cusya ꞌin um, loꞌ cuaꞌ mꞌni um canan ꞌin laxaꞌan nu nguiꞌni chaꞌ ngunanꞌ.
\v 15 A chcui tiꞌ um chaꞌ nu nchca loo chendyu re loꞌo na nu ndiꞌin ꞌin na. Chaꞌ ndeꞌen nu nchcui tiꞌ chaꞌ nu nchca loo chendyu re, chaꞌ tsuꞌhue ꞌin Stina Ndiose a ntsuꞌhui niꞌ cusya ꞌin canꞌ.
\v 16 Siꞌyana nchgaa chaꞌ nu nchca loo chendyu re, ñaꞌan nchca tiꞌ chaꞌ nu nchcui tiꞌ cunanꞌ na, chaꞌ nu nchcui tiꞌ quiloo na, uta chaꞌ siyeꞌ ꞌin na, nchgaa chaꞌ re a mdoꞌo na seꞌen nducua Stina Ndiose, cuiꞌ ca nu loo chendyu re ndyiꞌo na.
\v 17 Chaꞌ nu nchca loo chendyu re, tsatii chaꞌ ꞌin na, cuiꞌ cuañaꞌan loꞌo chaꞌ nu nchcui tiꞌ neꞌ, una nu nducua tñan chaꞌ nu nchca tiꞌ Ndiose, canꞌ nu tyiꞌin tsala xaa.
\s Chaꞌ ꞌin nu tiꞌi tiꞌ ꞌin Cristo
\p
\v 18 Sñenꞌ, cuaꞌ mdiyaa tsaan nu ntsuꞌhui chaꞌ tsatii chaꞌ nu nchca loo chendyu re, cuiꞌ chaꞌ nu cuaꞌ ngune ꞌin um siꞌyana ntsuꞌhui chaꞌ caan sca nu ñaꞌan tiꞌi ꞌin Cristo, loꞌ cuaꞌ ñii quiꞌan nu tiꞌi tiꞌ ꞌin Cristo cuaꞌ ndiꞌin, canꞌ chaꞌ nchca cuiyaꞌ tiꞌ na siꞌyana cuaꞌ mdiyaa tsaan canꞌ.
\v 19 Lja na mdoꞌo canꞌ, una siꞌi sca chaꞌ ti ꞌin na loꞌo, chaꞌ cua na sca chaꞌ ti ꞌin na loꞌo tsatlyu tiꞌ ndiꞌin na loꞌo, una mdoꞌo tsoꞌ canꞌ siꞌyana ca chcanꞌ loo siꞌyana siꞌi sca chaꞌ ti ꞌin na nchgaa na.
\v 20 Una ꞌun cuaꞌ ntsuꞌhui Espíritu nu Luhui ꞌin Ndiose niꞌ cusya ꞌin um, loꞌ cuaꞌ ndyiꞌya um cunta nchgaa loo chaꞌ.
\v 21 Ndaꞌan quityi re ꞌin um, una siꞌi siꞌyana a ndyuꞌhui lyoo um chaꞌ nu ñi ꞌin Ndiose, cuiꞌ ca nu siꞌyana cuaꞌ ndyuꞌhui lyoo um ꞌin na, siꞌyana ñi sca chaꞌ cuiñi loꞌ a ljyaan loo chaꞌ nu ñi.
\v 22 ¿Ti nu lca nu cuiñi? Cuiꞌ nu nchcuiꞌ siꞌyana siꞌi Jesús lca ñi Cristo. Canꞌ nu tiꞌi tiꞌ ꞌin ñi, cuiꞌ nu nchcuiꞌ siꞌyana siꞌi sca chaꞌ ti ꞌin Stina Ndiose loꞌo Sñeꞌ ñi.
\v 23 Nchgaa nu nxcuan tloo ꞌin Sñeꞌ ñi, ticuiꞌ cuañaꞌan a ntsuꞌhui Stina Ndiose niꞌ cusya ꞌin canꞌ. Una nu ndiya quiꞌan tiꞌ ꞌin Sñeꞌ ñi, cuiꞌ cuañaꞌan ntsuꞌhui Stina Ndiose niꞌ cusya ꞌin canꞌ.
\v 24 A tyiꞌo tsoꞌ um siiꞌ chaꞌ nu cuaꞌ ngune ꞌin um tiꞌ culoo. Chaꞌ tyon um loo chaꞌ nu cuaꞌ ngune ꞌin um tiꞌ culoo, sca chaꞌ ti ꞌin um loꞌo Sñeꞌ ñi loꞌo Stina Ndiose.
\v 25 Nde sca chaꞌ nu cuaꞌ mdiꞌin tyaa ñi loꞌo na, cuiꞌ chendyu nu a tsatii ꞌa ꞌin na.
\v 26 Ndaꞌan quityi re ꞌin um siꞌya chaꞌ ꞌin nu nchca tiꞌ cuñilyiꞌo ꞌin um.
\v 27 Una Espíritu nu cuaꞌ mdaa ñi ntsuꞌhui niꞌ cusya ꞌin um, loꞌ a ꞌni ꞌa chaꞌ tiꞌ culoꞌo xca tucui ꞌin um siꞌyana ycuiꞌ ñi ndloꞌo ñi ꞌin um nchgaa loo chaꞌ, nchcuiꞌ ñi chaꞌ nu ñi siꞌyana a lca ñi nu cuiñi. Loꞌ tsañaꞌan chaꞌ nu cuaꞌ nguloꞌo ñi ꞌin um, a tyiꞌo tsoꞌ um siiꞌ ñi.
\v 28 Canꞌ chaꞌ ꞌun nu lca sñenꞌ, xñi ton um ꞌin um loꞌo chaꞌ ꞌin ñi, siꞌyana xa ntsuꞌhui chaꞌ ca chcanꞌ loo ñi, cuꞌni tnu tiquee na, loꞌ siꞌi nu quinu na loꞌo chaꞌ jyiꞌo xa quiaan ñi xiyaꞌ.
\v 29 Chaꞌ ꞌun jlyo tiꞌ um siꞌyana lca ñi sca nu nꞌni tñan tsuꞌhue, ca cuiyaꞌ tiꞌ um xacanꞌ siꞌyana nchgaa nu nguiꞌni tñan tsuꞌhue lca canꞌ sñeꞌ Ndiose.
\c 3
\s Sñeꞌ Ndiose lca na
\p
\v 1 Ñaꞌan jan ñi, tsala ñaꞌan lca tiquee Stina Ndiose loꞌo na nu hasta ndloꞌo naan ñi ꞌin na lca na sñeꞌ ñi. Canꞌ chaꞌ nten chendyu a nchcua taꞌa chaꞌ ꞌin neꞌ loꞌo na, siꞌyana a nchca chuꞌhui lyoo neꞌ ꞌin ñi.
\v 2 ꞌUn jun taꞌa na nu ndyuꞌhui cuiyaꞌ tinꞌ ꞌin, cuaꞌ lca na sñeꞌ Ndiose, una a nchca ca chcanꞌ loo ñaꞌan nu ntsuꞌhui chaꞌ ca na, una jlyo tiꞌ na xa nu ca chcanꞌ loo ñi, xacanꞌ ca suꞌhua ñaꞌan na loꞌo ñi, siꞌyana ñaꞌan tloo ca na ꞌin ñi chcui ñaꞌan ñi.
\v 3 Nchgaa nu nducua tloo ꞌin ñi loꞌo chaꞌ re, xñi canꞌ cunta ꞌin luhui tsañaꞌan nu lca ñi ycuiꞌ ñi.
\v 4 Nchgaa nu nguiꞌni quiꞌya, ticuiꞌ lee ꞌin Ndiose ncha tiꞌin canꞌ, siꞌyana quiꞌya lca na loo nu a jaꞌan na chaꞌ ꞌin lee.
\v 5 Cuaꞌ jlyo tiꞌ um siꞌyana Cristo yaan ñi loo chendyu re siꞌyana xicuten ñi quiꞌya ꞌin na, loꞌ ñi sca quiꞌya a nducui ñi.
\v 6 Tsalca nu nxñi ton ꞌin loꞌo chaꞌ ꞌin ñi, a tsa quiñan ꞌa canꞌ tiꞌ cuꞌni quiꞌya, una nchgaa nu tiꞌ nguiꞌni quiꞌya, a nchca tyiꞌin tyaa canꞌ quiloo ꞌin ñi, ñi a ndyuꞌhui lyoo ꞌin ñi.
\v 7 Sñenꞌ, a taa um yaꞌ caja nu cuñilyiꞌo ꞌin um. Sca nten nu nguiꞌni tñan tsuꞌhue, ñi ndiꞌin chaꞌ ꞌin neꞌ tsañaꞌan nu lca ñi ycuiꞌ ñi.
\v 8 Una nu tiꞌ nguiꞌni quiꞌya, tsoꞌ ꞌin laxaꞌan nguiaa canꞌ, siꞌyana laxaꞌan mdyisnan mꞌni quiꞌya tiꞌ culoo. Canꞌ chaꞌ yaan Sñeꞌ Ndiose, siꞌyana cujlyo ñi nchgaa tñan nguiꞌni laxaꞌan.
\v 9 Tsalca sñeꞌ Ndiose, a tsa quiñan ꞌa canꞌ tiꞌ cuꞌni quiꞌya, siꞌyana cuaꞌ nguinu yuꞌhui chaꞌ tsuꞌhue ꞌin Ndiose niꞌ cusya ꞌin, ñi a tca ꞌa tiꞌ cuꞌni canꞌ quiꞌya siꞌyana cuaꞌ lca canꞌ sñeꞌ Ndiose.
\v 10 Nde nchca chcanꞌ ñaꞌan ti nu lca sñeꞌ Ndiose, loꞌ ti nu lca sñeꞌ laxaꞌan: Nchgaa nu a nguiꞌni tñan tsuꞌhue, ñi a ntsuꞌhui chaꞌ tsuꞌhue ꞌin loꞌo taꞌa nten, siꞌi sñeꞌ Ndiose lca canꞌ.
\v 11 Siꞌyana cuiꞌ chaꞌ re cuaꞌ ngune ꞌin um tiꞌ culoo, siꞌyana scasca na chuꞌhui chaꞌ tsuꞌhue ꞌin na loꞌo taꞌa na.
\v 12 Siꞌi ñaꞌan mꞌni Cain nu nguiaa tsoꞌ ꞌin laxaꞌan, yjui yu ꞌin taꞌa ngula yu. ¿Ñi chaꞌ ta yjui yu ꞌin canꞌ? Cuiꞌ siꞌyana a mꞌni yu tñan tsuꞌhue, una taꞌa yu, canꞌ nu mꞌni tñan tsuꞌhue.
\v 13 ꞌUn jun taꞌa na, a cuhue tiꞌ um chaꞌ xcuan tloo nten chendyu ꞌin um.
\v 14 Nareꞌ jlyo tiꞌ na siꞌyana cuaꞌ mdoꞌo tsoꞌ na siiꞌ chaꞌ ndyija, cuaꞌ jui chendyu nu a tsatii ꞌa ꞌin na, cuiꞌ siꞌyana ntsuꞌhui chaꞌ tsuꞌhue ꞌin na loꞌo taꞌa na. Nu a ntsuꞌhui chaꞌ tsuꞌhue ꞌin loꞌo taꞌa nten, tiꞌ ndon canꞌ loo chaꞌ ndyija.
\v 15 Nchgaa nu nxcuan tloo ꞌin taꞌa nten, lca canꞌ nu ndujui nten, loꞌ cuaꞌ jlyo tiꞌ um siꞌyana ñi sca nu ndujui nten, a ndaꞌan loꞌo chendyu nu a tsatii ꞌa.
\v 16 Nde ncua cuiyaꞌ tiꞌ na ñi na lca chaꞌ tsuꞌhue, cuiꞌ siꞌyana ngujui ñi tñan loo na, cuiꞌ cuañaꞌan nareꞌ ntsuꞌhui chaꞌ tyaa na chendyu ꞌin na siꞌya jun taꞌa na.
\v 17 Una sca yu cuilyiyaꞌ chaꞌ jlyo tiꞌ yu siꞌyana ꞌni chaꞌ ꞌin xca tucui, loꞌ cuꞌni tiji yu cusya ꞌin yu loꞌo canꞌ, ¿ñaꞌan ta ntsuꞌhui chaꞌ tsuꞌhue ꞌin Ndiose niꞌ cusya ꞌin yu?
\v 18 Sñenꞌ, siꞌi loꞌo chaꞌ tuꞌhua ti chuꞌhui chaꞌ tsuꞌhue ꞌin na loꞌo taꞌa na, uta siꞌyana tsuꞌhue nchcuiꞌ ti na, cuiꞌ ca nu cuꞌni na chaꞌ tsuꞌhue loꞌo canꞌ, loꞌo sca cusya nu ñi.
\v 19 Canꞌ chaꞌ nchca cuiyaꞌ tiꞌ na siꞌyana nguiaa na tsoꞌ chaꞌ nu ñi, loꞌ ñi a cuꞌni tucua tiꞌ na tloo Ndiose.
\v 20 Chaꞌ cusya ꞌin na ndlo quiꞌya na ꞌin na, cuaꞌ jlyo tiꞌ na siꞌyana lyee la ndon loo Ndiose que ꞌin na, loꞌ ndyuꞌhui lyoo ñi nchgaa loo chaꞌ.
\v 21 ꞌUn jun nu ndyuꞌhui cuiyaꞌ tinꞌ ꞌin, chaꞌ cusya ꞌin na a ndlo quiꞌya na ꞌin na, tsuꞌhue ntsuꞌhui tiquee na loꞌo Ndiose,
\v 22 loꞌ nchgaa chaꞌ nu njñan na ꞌin ñi, taa ñi ꞌin na, cuiꞌ siꞌyana nxuꞌhua seꞌen na chaꞌ nu ndlo ñi tñan, loꞌ nguiꞌni na chaꞌ nu ndyuꞌhui cuiyaꞌ tiꞌ ñi.
\v 23 Nde chaꞌ nu ndlo ñi tñan: Tsa quiꞌan tiꞌ na ꞌin Jesucristo Sñeꞌ ñi, loꞌ chuꞌhui chaꞌ tsuꞌhue ꞌin na loꞌo taꞌa na tsañaꞌan nu cuaꞌ ngulo ñi tñan ꞌin na.
\v 24 Nu nxuꞌhua seꞌen chaꞌ nu ndlo ñi tñan, sca chaꞌ ti ꞌin loꞌo Ndiose, cuiꞌ cuañaꞌan Ndiose loꞌo canꞌ. Nde nchca cuiyaꞌ tiꞌ na siꞌyana ntsuꞌhui ñi niꞌ cusya ꞌin na, siꞌya Espíritu nu cuaꞌ mdaa ñi ꞌin na.
\c 4
\s Espíritu ꞌin Ndiose loꞌo espíritu nu cuiñi
\p
\v 1 ꞌUn jun nu ndyuꞌhui cuiyaꞌ tinꞌ ꞌin, a tsa quiꞌan tiꞌ um ꞌin nchgaa loo espíritu nu nxiycuiꞌ ꞌin nten, cuiꞌ ca nu quiꞌya um cunta chaꞌ ta ljyaan canꞌ loꞌo cunta ꞌin Ndiose, siꞌyana quiꞌan ꞌa nu cuiñi ndaꞌan loo chendyu re, loꞌ nchcuiꞌ siꞌyana Ndiose nxiycuiꞌ ꞌin.
\v 2 Ndeñaꞌan ca cuiyaꞌ tiꞌ na chaꞌ ti nu ndaꞌan loꞌo Espíritu ꞌin Ndiose: Nchgaa espíritu nu nguiaa tsoꞌ ꞌin Ndiose nchcuiꞌ siꞌyana Jesucristo yaan ñi loo chendyu re tsañaꞌan nchca tiꞌ sca nten.
\v 3 Nchgaa espíritu nu nchcuiꞌ siꞌyana a yaan Jesucristo loo chendyu re tsañaꞌan nchca tiꞌ sca nten, a nguiaa canꞌ tsoꞌ ꞌin Ndiose, canꞌ espíritu nu naꞌan tiꞌi ꞌin Cristo, nu cuaꞌ ynan um chaꞌ siꞌyana ntsuꞌhui chaꞌ caan, loꞌ cuaꞌ ndaꞌan canꞌ loo chendyu re.
\v 4 Sñenꞌ, cuaꞌ ntsuꞌhui um tuyaaꞌ Ndiose, loꞌ cuaꞌ mꞌni um canan ꞌin nu cuiñi canꞌ, siꞌyana tlyu la chaꞌ cuiyaꞌ ꞌin ñi nu ntsuꞌhui niꞌ cusya ꞌin na que ñaꞌan chaꞌ ꞌin nu ndaꞌan loo chendyu re.
\v 5 Sca chaꞌ ti ꞌin nu cuiñi canꞌ loꞌo nten chendyu, canꞌ chaꞌ nchcuiꞌ canꞌ chaꞌ nu nchca loo chendyu re, loꞌ nten chendyu ndon nscan chaꞌ nu nchcuiꞌ canꞌ.
\v 6 Nareꞌ cuaꞌ lca na sñeꞌ Ndiose, loꞌ nu ndyuꞌhui lyoo ꞌin Ndiose nꞌni cunta chaꞌ nu nchcuiꞌ na, loꞌ nu a lca sñeꞌ Ndiose a nꞌni cunta chaꞌ nu nchcuiꞌ na. Canꞌ chaꞌ nchca cuiyaꞌ tiꞌ na ti ñaꞌan espíritu nu ñi loꞌ ti ñaꞌan espíritu nu cuiñi.
\s Ndiose lca ñi chaꞌ tsuꞌhue
\p
\v 7 ꞌUn jun nu ndyuꞌhui cuiyaꞌ tinꞌ ꞌin, chuꞌhui chaꞌ tsuꞌhue ꞌin na loꞌo taꞌa na, siꞌyana chaꞌ tsuꞌhue canꞌ ljyaan na loꞌo cunta ꞌin Ndiose. Nchgaa nu ntsuꞌhui chaꞌ tsuꞌhue ꞌin loꞌo taꞌa nten, cuaꞌ lca canꞌ sñeꞌ Ndiose, loꞌ ndyuꞌhui lyoo canꞌ ꞌin ñi.
\v 8 Nu a ntsuꞌhui chaꞌ tsuꞌhue ꞌin loꞌo taꞌa nten, a nchca chuꞌhui lyoo canꞌ ꞌin Ndiose, siꞌyana Ndiose lca ñi chaꞌ tsuꞌhue.
\v 9 Nde nchca chcanꞌ ñaꞌan tsala ñaꞌan tlyu chaꞌ tsuꞌhue yuꞌhui ꞌin Ndiose loꞌo na, siꞌyana nguaꞌan tñan ñi ꞌin scati Sñeꞌ ñi yaan loo chendyu re, siꞌyana tyuꞌhui na chendyu siꞌya ñi.
\v 10 Ndeñaꞌan nguiaa chaꞌ tsuꞌhue canꞌ: Siꞌi siꞌyana cuaꞌ lca ntsuꞌhui chaꞌ tsuꞌhue ꞌin na loꞌo Ndiose, cuiꞌ ca nu culo nducua la ñi yuꞌhui chaꞌ tsuꞌhue ꞌin ñi loꞌo na, nguaꞌan tñan ñi ꞌin Sñeꞌ ñi, siꞌyana caja loꞌ xicuten quiꞌya ꞌin na.
\v 11 ꞌUn jun nu ndyuꞌhui cuiyaꞌ tinꞌ ꞌin, chaꞌ Ndiose cuañaꞌan yuꞌhui chaꞌ tsuꞌhue ꞌin ñi loꞌo na, loꞌo nareꞌ ntsuꞌhui chaꞌ chuꞌhui chaꞌ tsuꞌhue ꞌin na loꞌo taꞌa na.
\v 12 A tucui nu cuaꞌ naꞌan tloo ꞌin Ndiose, una chaꞌ ntsuꞌhui chaꞌ tsuꞌhue ꞌin na loꞌo taꞌa na, sca chaꞌ ti ꞌin na loꞌo Ndiose, loꞌ mtsaꞌan yuꞌhui chaꞌ tsuꞌhue ꞌin ñi niꞌ cusya ꞌin na.
\v 13 Nde nchca cuiyaꞌ tiꞌ na siꞌyana ndon na loꞌo ñi, cuiꞌ cuañaꞌan ndon ñi loꞌo na, siꞌya Espíritu nu cuaꞌ mdaa ñi ꞌin na.
\v 14 Huareꞌ cuaꞌ naꞌan hua loꞌ ndaa hua suun siꞌyana Stina Ndiose nguaꞌan tñan ñi ꞌin Sñeꞌ ñi, ñi nu ndlo laa ꞌin nten chendyu.
\v 15 Nchgaa nu nchcuiꞌ siꞌyana Jesús lca ñi Sñeꞌ Ndiose, Ndiose ndiꞌin ñi loꞌo canꞌ, cuiꞌ cuañaꞌan ndiꞌin canꞌ loꞌo Ndiose.
\v 16 Huareꞌ cuaꞌ nguꞌya hua cunta loꞌ ndiya quiꞌan tiꞌ hua siꞌyana Ndiose ntsuꞌhui chaꞌ tsuꞌhue ꞌin ñi loꞌo na. Ndiose lca ñi chaꞌ tsuꞌhue, loꞌ nu ntsuꞌhui chaꞌ tsuꞌhue ꞌin, canꞌ nu ndiꞌin loꞌo Ndiose, cuiꞌ cuañaꞌan Ndiose loꞌo canꞌ.
\v 17 Nde chaꞌ nu mtsaꞌan yuꞌhui chaꞌ tsuꞌhue ꞌin ñi loꞌo na, siꞌyana cuꞌni tnu tiquee na tsaan nu cuꞌni ñi xñan bsya ꞌin nten. Tsañaꞌan nu lca ñi ycuiꞌ ñi, cuañaꞌan ndiꞌin chaꞌ ꞌin na loo chendyu re.
\v 18 Nu ntsuꞌhui chaꞌ tsuꞌhue ꞌin a ntsen canꞌ, siꞌyana chaꞌ tsuꞌhue nu ndaa ñi ndlo tsoꞌ na nchgaa ytsen, siꞌyana nu tiꞌ ntsen nta canꞌ tyijyin nu tiꞌi. Loꞌ nu tiꞌ ntsen, cuiꞌ siꞌyana a mtsaꞌan yuꞌhui loꞌo chaꞌ tsuꞌhue canꞌ.
\v 19 Nareꞌ ntsuꞌhui chaꞌ tsuꞌhue ꞌin na loꞌo ñi, siꞌyana tiꞌ culoo yuꞌhui chaꞌ tsuꞌhue ꞌin ñi loꞌo na.
\v 20 Chaꞌ ntsuꞌhui nu nchcuiꞌ: Nanꞌ ntsuꞌhui chaꞌ tsuꞌhue ꞌñan loꞌo Ndiose, loꞌ tiꞌ nxcuan tloo ꞌin taꞌa nten, lca canꞌ sca nu cuiñi. Siyaꞌ naꞌan tloo canꞌ ꞌin taꞌa nten, loꞌ a ntsuꞌhui chaꞌ tsuꞌhue ꞌin loꞌo canꞌ, cuiꞌ lya ca Ndiose, na a naꞌan ꞌin ñi, na tca chuꞌhui chaꞌ tsuꞌhue ꞌin loꞌo ñi.
\v 21 Nde chaꞌ nu cuaꞌ ngulo ñi tñan ꞌin na: Nu ntsuꞌhui chaꞌ tsuꞌhue ꞌin loꞌo Ndiose, cuiꞌ cuañaꞌan chuꞌhui chaꞌ tsuꞌhue ꞌin loꞌo taꞌa.
\c 5
\s Nꞌni na canan siꞌya chaꞌ nu ndiya quiꞌan tiꞌ na 
\p
\v 1 Nchgaa nu ndiya quiꞌan tiꞌ siꞌyana Jesús lca ñi Cristo, canꞌ nu lca sñeꞌ Ndiose. Nchgaa nu ntsuꞌhui chaꞌ tsuꞌhue ꞌin loꞌo nu lca sti, cuiꞌ cuañaꞌan lca tiquee canꞌ loꞌo sñeꞌ yu.
\v 2 Nde nchca cuiyaꞌ tiꞌ na siꞌyana ntsuꞌhui chaꞌ tsuꞌhue ꞌin na loꞌo nchgaa sñeꞌ Ndiose, chaꞌ na ntsuꞌhui chaꞌ tsuꞌhue ꞌin na loꞌo Ndiose, loꞌ nxuꞌhua seꞌen na chaꞌ nu ndlo ñi tñan.
\v 3 Ndeñaꞌan chuꞌhui chaꞌ tsuꞌhue ꞌin na loꞌo Ndiose, nu xuꞌhua seꞌen na chaꞌ nu ndlo ñi tñan, loꞌ a tucui ñaꞌan xuꞌhua seꞌen na ꞌin na.
\v 4 Siꞌyana nchgaa nu ljyaan tsoꞌ ꞌin Ndiose nguiꞌni canꞌ canan ꞌin chaꞌ nu nchca loo chendyu re, loꞌ siꞌya chaꞌ nu ndiya quiꞌan tiꞌ na, canꞌ chaꞌ mꞌni na canan.
\v 5 ¿Ti nu nguiꞌni canan ꞌin chaꞌ nu nchca loo chendyu re? Tsalca nu ndiya quiꞌan tiꞌ siꞌyana Jesús lca ñi Sñeꞌ Ndiose.
\s Espíritu ndaa suun chaꞌ ꞌin Cristo
\p
\v 6 Nde ñi nu lca Jesucristo nu yaan loo chendyu re, mducua tya ñi loꞌo tyiꞌa, a cunta nguilo tne ñi, loꞌ siꞌi tsaloo ti chaꞌ ꞌin tyiꞌa canꞌ, cuiꞌ ca nu siꞌya chaꞌ ꞌin tyiꞌa loꞌo tne ñi. Cuiꞌ Espíritu ndaa suun siꞌyana lca na chaꞌ nu ñi, siꞌyana Espíritu lca chaꞌ nu ñi.
\v 7 La niꞌ cuaan snan lca nu ndaa suun siꞌyana lca na chaꞌ nu ñi: Stina Ndiose, loꞌo Ychaꞌ ñi, loꞌo Espíritu nu Luhui ꞌin ñi, loꞌ scati lca canꞌ taꞌa snan.
\v 8 Loo chendyu re snan lca nu ndaa suun siꞌyana lca na chaꞌ nu ñi: Espíritu, loꞌo chaꞌ ꞌin tyiꞌa, a cunta loꞌo tne, taꞌa snan chaꞌ re sca chaꞌ ti ꞌin na.
\v 9 Chaꞌ naa ndiya quiꞌan tiꞌ na suun nu ndaa sca nten, lyee lati ndon loo suun nu ndaa Ndiose, loꞌ cuiꞌ chaꞌ re lca nu cuaꞌ mdaa Ndiose chaꞌ ꞌin Sñeꞌ ñi.
\v 10 Nu ndiya quiꞌan tiꞌ ꞌin Sñeꞌ Ndiose ticuiꞌ chaꞌ re nchcuiꞌ canꞌ, loꞌ nu a ndiya quiꞌan tiꞌ ꞌin ñi, nguiꞌni canꞌ ꞌin Ndiose lca ñi sca nu cuiñi, siꞌyana a ndiya quiꞌan tiꞌ suun nu cuaꞌ mdaa Ndiose chaꞌ ꞌin Sñeꞌ ñi.
\v 11 Nde suun nu ntsuꞌhui chaꞌ tsa quiꞌan tiꞌ na: Ndiose ndaa ñi chendyu nu a tsatii ꞌa ꞌin na, loꞌ chendyu canꞌ ndaꞌan loꞌo Sñeꞌ ñi.
\v 12 Nu cuaꞌ ncuan xuꞌhue ꞌin Sñeꞌ Ndiose, cuaꞌ jui chendyu nu a tsatii ꞌa ꞌin, loꞌ nu a nchca cuan xuꞌhue ꞌin Sñeꞌ Ndiose, a ntsuꞌhui chendyu ꞌin canꞌ.
\s Cuaꞌ jui chendyu nu a tsatii ꞌa ꞌin na
\p
\v 13 Nde chaꞌ ndaꞌan quityi re ꞌin um, ꞌun nu ndiya quiꞌan tiꞌ ꞌin Sñeꞌ Ndiose, siꞌyana ca cuiyaꞌ tiꞌ um cuaꞌ jui chendyu nu a tsatii ꞌa ꞌin um, loꞌ tsa quiñan la um tsa quiꞌan tiꞌ um ꞌin Sñeꞌ Ndiose.
\v 14 Nde chaꞌ nu a nguiꞌni tucua tiꞌ na loꞌo ñi: Nchgaa chaꞌ nu jñan na ꞌin ñi, cuaꞌ ñaꞌaan ndyiꞌo ti tiquee ñi, quine ꞌin ñi chaꞌ nu chcuiꞌ na.
\v 15 Chaꞌ jlyo tiꞌ na siꞌyana ne ꞌin ñi chaꞌ nu nchcuiꞌ na, cuꞌni na cunta siꞌyana cuaꞌ jui na ꞌin na.
\v 16 Chaꞌ ntsuꞌhui nu ñaꞌan ꞌin sca taꞌa na nguiꞌni quiꞌya, jñan canꞌ ꞌin Ndiose siꞌya chaꞌ ꞌin canꞌ, loꞌ cuiꞌ ñi taa la ñi chendyu ꞌin, una chaꞌ siꞌi quiꞌya nu ndyiꞌan loꞌo ꞌin loo chaꞌ ndyija lca na. Siꞌyana ntsuꞌhui quiꞌya nu ndyiꞌan loꞌo ꞌin neꞌ loo chaꞌ ndyija, loꞌ a cunen loꞌo um siꞌyana tiꞌ jñan um ꞌin ñi siꞌya chaꞌ canꞌ.
\v 17 Nchgaa loo chaꞌ ngunanꞌ lca na quiꞌya, una siꞌi nchgaa loo quiꞌya ndyiꞌan loꞌo na ꞌin na loo chaꞌ ndyija.
\v 18 Cuaꞌ jlyo tiꞌ na siꞌyana nchgaa nu lca sñeꞌ Ndiose, a tsa quiñan ꞌa canꞌ tiꞌ cuꞌni quiꞌya, siꞌyana Sñeꞌ Ndiose nsñi ñi cunta ꞌin canꞌ, loꞌ a tca ꞌa ꞌin Laxaꞌan tiꞌ cuꞌni tiꞌi loꞌo.
\v 19 Cuaꞌ jlyo tiꞌ na siꞌyana lca na sñeꞌ Ndiose, loꞌ nchgaa la ñaꞌan nten ntsuꞌhui neꞌ tuyaaꞌ laxaꞌan nu nguiꞌni tñan ngunanꞌ.
\v 20 Ncua cuiyaꞌ tiꞌ na siꞌyana cuaꞌ yaan Sñeꞌ Ndiose loo chendyu re, loꞌ msla ñi chaꞌ tiyaa ꞌin na siꞌyana chuꞌhui lyoo na ꞌin ñi nu loꞌo ca, sca chaꞌ ti ꞌin na loꞌo ñi nu loꞌo ca, cuiꞌ Jesucristo Sñeꞌ ñi. Nde ñi nu lca Ndiose nu chaꞌ ñi ca, loꞌ lca ñi chendyu nu a tsatii ꞌa.
\v 21 Sñenꞌ, xñi um cunta siꞌyana a sten yuꞌhui um loꞌo scasca na nu nꞌni tnu neꞌ. Amen.