\id 2JN - Nopala (Chatino) NT [cya] - Mexico 2013 (web 2014)
\h 2 JUAN
\toc1 2 Juan
\toc2 2 Juan
\toc3 2Jn
\mt1 2 Juan
\c 1
\s Yu Xuhua nchcuiꞌ chaꞌ yu ꞌin jun
\p
\v 1 Nanꞌ, yu nu ntsuꞌhui cunta ꞌin jun taꞌa na, ndaꞌan sca quityi re ꞌin ñi cunaꞌan taꞌa na tsatlyu loꞌo sñeꞌ ñi, nu cuaꞌ mdoꞌo hui ꞌin Ndiose, loꞌ ndyuꞌhui cuiyaꞌ tinꞌ ꞌin jun siꞌya chaꞌ nu ñi ndiya quiꞌan tiꞌ na. Una siꞌi scan tin, cuiꞌ ca nu nchgaa la ñaꞌan nu cuaꞌ ndyuꞌhui lyoo chaꞌ nu ñi, ndyuꞌhui cuiyaꞌ tiꞌ ꞌin jun.
\v 2 Cuiꞌ siꞌya chaꞌ nu ñi nu cuaꞌ ntsuꞌhui niꞌ cusya ꞌin na, loꞌ ntsuꞌhui na ꞌin na tsala xaa.
\v 3 Stina Ndiose loꞌo Ñi Xꞌnan na Jesucristo nu lca Sñeꞌ ñi, taa ñi chaꞌ tsuꞌhue chuꞌhui niꞌ cusya ꞌin um, ñaꞌan ꞌtnan tiꞌ ñi ꞌin um, cuꞌni ñi chaꞌ tyiꞌin tsuꞌhue um, cuiꞌ cuañaꞌan tsa quiñan la um loꞌo chaꞌ nu ñi loꞌo chaꞌ tsuꞌhue ꞌin ñi.
\s Tsa nchaꞌan na chaꞌ nu nguloꞌo Cristo
\p
\v 4 Ndyijyin yaꞌ tsuꞌhue yuꞌhui tiqueen xa ynan chaꞌ ñaꞌan ndaꞌan tucua snan sñeꞌ um loo chaꞌ nu ñi, tsañaꞌan tñan nu ngulo Stina Ndiose ꞌin na.
\v 5 Jñan sca chaꞌ tsuꞌhue ꞌin um, ꞌun ñi cunaꞌan taꞌa na, una siꞌi chaꞌ nu cui ti nchcuinꞌ loꞌo um ñaꞌan nu ndlo ñi tñan ꞌin na, cuiꞌ ca nu lca na chaꞌ nu cuaꞌ ngune ꞌin na tiꞌ culoo, siꞌyana chuꞌhui chaꞌ tsuꞌhue ꞌin na loꞌo taꞌa na.
\v 6 Ndeñaꞌan nguiaa chaꞌ tsuꞌhue canꞌ, chcui nchaꞌan na chaꞌ nu ndlo ñi tñan. Loꞌ nde cha nu ndlo ñi tñan: Chuꞌhui chaꞌ tsuꞌhue ꞌin um ñaꞌan nu cuaꞌ ngune ꞌin um tiꞌ culoo.
\v 7 Siꞌyana quiꞌan ꞌa nu cuiñi nu cuaꞌ ndaꞌan loo chendyu re, loꞌ nchcuiꞌ siꞌyana a yaan Jesucristo ñaꞌan nchca tiꞌ sca nten. Nu nchcuiꞌ cuañaꞌan lca canꞌ nu cuiñi loꞌ tiꞌi tiꞌ ꞌin Cristo.
\v 8 Xñi um cunta siꞌyana a quinanꞌ tñan nguiꞌni um, cuiꞌ ca nu nde xñi chcui um chaꞌ tsuꞌhue nu quiꞌni caꞌan ꞌin um.
\v 9 Una nchgaa nu tyiꞌo tsoꞌ loꞌ a nsuꞌhua loo chaꞌ nu ndloꞌo Cristo, a nguiaa canꞌ tsoꞌ ꞌin Ndiose. Una nu nsuꞌhua loo chaꞌ nu ndloꞌo Cristo, canꞌ nu sca chaꞌ ti ꞌin loꞌo Stina Ndiose loꞌo Sñeꞌ ñi.
\v 10 Chaꞌ ntsuꞌhui nu caan seꞌen ndiꞌin um, loꞌ a ndloꞌo ñaꞌan chaꞌ nu ndiya quiꞌan tiꞌ na, a taa um seꞌen quinu canꞌ, ñi a cuan xuꞌhue um ꞌin.
\v 11 Siꞌyana nu cuan xuꞌhue ꞌin canꞌ, sca chaꞌ ti ꞌin loꞌo tñan ngunanꞌ nu nguiꞌni canꞌ.
\s Nducua tloo yu Xuhua tsaa yu seꞌen ndiꞌin jun
\p
\v 12 Quiꞌan ꞌa chaꞌ nchca tinꞌ chcuinꞌ loꞌo um, una a nchca tinꞌ caꞌan ꞌin na loo quityi loꞌo tyintya, siꞌyana ntsuꞌhui tiqueen tsaꞌan seꞌen ndiꞌin um, xacanꞌ ycuinꞌ can chcuinꞌ loꞌo um.
\v 13 Tsalca sñeꞌ nu cunaꞌan taꞌa um, nu cuaꞌ mdoꞌo hui ꞌin Ndiose, nchcuiꞌ chaꞌ jun ꞌin um. Amen.