\id 3JN - Nopala (Chatino) NT [cya] - Mexico 2013 (web 2014)
\h 3 JUAN
\toc1 3 Juan
\toc2 3 Juan
\toc3 3Jn
\mt1 3 Juan
\c 1
\s Yu Xuhua nchcuiꞌ chaꞌ yu ꞌin jun
\p
\v 1 Nanꞌ, yu nu ntsuꞌhui cunta ꞌin jun taꞌa na, ndaꞌan quityi re ꞌin ñi taꞌa tsuꞌhuen ñi Gayo, nu ndyuꞌhui cuiyaꞌ tinꞌ ꞌin siꞌya chaꞌ nu ñi.
\v 2 ꞌUn nu ndyuꞌhui cuiyaꞌ tinꞌ ꞌin, njñan ꞌin Ndiose siꞌyana tyiꞌo tsuꞌhue nchgaa loo tñan nguiꞌni um, loꞌ tsañaꞌan ndon tiꞌ um loꞌo tsoꞌ chaꞌ nu ꞌin Ndiose, cuañaꞌan loꞌo nchgaa la ñaꞌan chaꞌ.
\v 3 Ndyijyin yaꞌ tsuꞌhue ntsuꞌhui tiqueen xa mdiyaan tucua snan yu taꞌa na, tsuꞌhue ꞌa mdaa yu suun ñaꞌan nguiaa chaꞌ ꞌin um, siꞌyana tsuꞌhue nguia nchaꞌan um chaꞌ nu ñi.
\v 4 Sca loo ti chaꞌ nu tsuꞌhue la ntsuꞌhui tiqueen, xa ne ꞌñan siꞌyana sñenꞌ tsuꞌhue nguia nchaꞌan chaꞌ nu ñi.
\s Msuꞌhua loo yu Xuhua chaꞌ nu nguiꞌni yu Gayo
\p
\v 5 ꞌUn ñi taꞌa na nu ndyuꞌhui cuiyaꞌ tinꞌ ꞌin, tsuꞌhue ꞌa ñaꞌan nꞌni cunta um ꞌin jun taꞌa na, nu hasta loꞌo jun nu a ndyuꞌhui lyoo um, loꞌ nꞌni cunta um ꞌin.
\v 6 Mdaa canꞌ suun tloo nchgaa jun taꞌa na re tsa la ñaꞌan ntsuꞌhui chaꞌ tsuꞌhue ꞌin um. Tsuꞌhue chaꞌ ta yaaꞌ um ꞌin jun tucueen nu tiꞌ tsaa jun, tsañaꞌan nu ngaꞌan chaꞌ cuꞌni na loꞌo jun nu nguiꞌni tñan ꞌin Ndiose.
\v 7 Siꞌyana jun canꞌ nguiꞌni jun tñan siꞌya chaꞌ ꞌin Jesús, loꞌ a sca na nducua tloo jun ꞌin neꞌ gentil.
\v 8 Canꞌ chaꞌ cuan xuꞌhue na ꞌin jun, siꞌyana ca sca chaꞌ ti ꞌin na loꞌo chaꞌ nu ñi ndaꞌan ycuiꞌ jun.
\s Yu Diótrefes nchcui ndijin yu
\p
\v 9 Nanꞌ cuaꞌ nguaꞌan tñan sca quityi ꞌin jun taꞌa na siꞌya chaꞌ re, una yu Diótrefes siꞌyana ndyon loo chaꞌ nu ꞌin yu, a nꞌni cunta yu chaꞌ nu nchcuiꞌ hua.
\v 10 Siꞌya chaꞌ re ndyiꞌo tiqueen tsaꞌan seꞌen ndiꞌin um, loꞌ culyo scua lan chaꞌ nu nguiꞌni yu, siꞌyana cuaꞌ ñaꞌan ti nchcuiꞌ yu loꞌ ndaja yu ꞌin hua. Siꞌi tsacanꞌ ti, cuiꞌ ca nu nxcuan tloo yu ꞌin jun nu ndiyaa canꞌ, loꞌ nchcui ndijin yu ꞌin nu nchca tiꞌ cuan xuꞌhue ꞌin jun, loꞌ hasta ndlo yu ꞌin canꞌ seꞌen ndiyoꞌ tiꞌin jun.
\s Chendyu nu luhui ꞌin yu Demetrio
\p
\v 11 ꞌUn ñi taꞌa na nu ndyuꞌhui cuiyaꞌ tinꞌ ꞌin, a tsa nchaꞌan um chaꞌ ngunanꞌ, cuiꞌ ca nu chcui nchaꞌan um chaꞌ nu tsuꞌhue. Siꞌyana nu nguiꞌni tñan tsuꞌhue, canꞌ nu lca sñeꞌ Ndiose, loꞌ nu nguiꞌni tñan ngunanꞌ, a nchca chuꞌhui lyoo canꞌ ꞌin Ndiose.
\v 12 Nchgaa tucui tsuꞌhue ꞌa ndaa suun chaꞌ ꞌin yu Demetrio, sca chaꞌ ti ꞌin yu loꞌo chaꞌ nu ñi, cuiꞌ cuañaꞌan huareꞌ tsuꞌhue ndaa hua suun chaꞌ ꞌin yu, loꞌ jlyo tiꞌ um siꞌyana suun nu ndaa hua lca na chaꞌ nu ñi.
\s Mslaꞌ taꞌa yu Xuhua loꞌo jun
\p
\v 13 Quiꞌan ꞌa chaꞌ nchca tinꞌ chcuinꞌ loꞌo um, una a nchca tinꞌ caꞌan ꞌin na loꞌo tyintya,
\v 14 siꞌyana nducua tloon ndla ti ñaꞌan taꞌa na loꞌo um, xacanꞌ chcuiꞌ tuꞌhua ca na loꞌo um.
\v 15 Tsuꞌhue ti chuꞌhui tiquee um. Taꞌa tsuꞌhue um nu ndiꞌin nde re nchcuiꞌ chaꞌ ꞌin um, cuiꞌ cuañaꞌan chcuiꞌ chaꞌ um ꞌin cunda scaa jun nde cua.