\id JUD - Nopala (Chatino) NT [cya] - Mexico 2013 (web 2014)
\h JUDAS
\toc1 Judas
\toc2 Judas
\toc3 Jud
\mt1 Judas
\c 1
\s Yu Juda nchcuiꞌ chaꞌ yu ꞌin jun
\p
\v 1 Nanꞌ yu Juda nu lca nguso ꞌin Jesucristo, taꞌa ngula Jacobo, caꞌan tñan quityi re ꞌin um, ꞌun nu cuaꞌ msiꞌya Stina Ndiose ꞌin, nu cuaꞌ nguhui ꞌin ñi, cuiꞌ nu cuaꞌ ntsuꞌhui tuyaaꞌ Jesucristo.
\v 2 Ndiose ñaꞌan ꞌtnan tiꞌ ñi ꞌin um, cuꞌni ñi chaꞌ tyiꞌin tsuꞌhue um, loꞌ chuꞌhui chaꞌ tsuꞌhue ꞌin um scasca um, cuañaꞌan nde lyee la taa ñi chaꞌ tsuꞌhue re ꞌin um.
\s Chaꞌ ꞌin yu nu ndaꞌan ycuiꞌ chaꞌ cuiñi
\p
\v 3 ꞌUn jun taꞌa na nu ndyuꞌhui cuiyaꞌ tinꞌ ꞌin, lyee ꞌa ncua lca tiqueen caꞌan sca quityi ꞌin um, tsañaꞌan tsatlyu mdoꞌo laa na loꞌo um, una cuaꞌ ñii ꞌni ꞌa chaꞌ chcuinꞌ xca chaꞌ loꞌo um, siꞌyana a taa um yaꞌ caja nu xitsaꞌan chaꞌ nu ndiya quiꞌan tiꞌ na, cuiꞌ chaꞌ nu siyaꞌ ti mdyaa ñi cunta ꞌin nchgaa nu cuaꞌ mdoꞌo hui ꞌin ñi.
\v 4 Siꞌyana cuaꞌ yten cunan tucua snan yu lja um, yu nu cuaꞌ nguaꞌan cuiyaꞌ ꞌin siꞌyana quinanꞌ, yu nducunꞌ nu a ndiya quiꞌan tiꞌ, loꞌ nchcuiꞌ yu siꞌyana xeen ꞌa chaꞌ tsuꞌhue ꞌin Ndiose loꞌ tca cuꞌni na ñaꞌan nu nchca tiꞌ na, a cunta nxcuan tloo yu ꞌin scati Ndiose, ñi nu ndlo tñan nchgaa loo chaꞌ, loꞌo ꞌin Ñi Xꞌnan na Jesucristo.
\v 5 Siyaꞌ cuaꞌ jlyo tiꞌ um chaꞌ re, una nchca tinꞌ xuꞌhuan tiꞌ um tsañaꞌan mꞌni Ñi Xꞌnan na xa ngulyo ñi ꞌin neꞌ Israel seꞌen lca Egipto, loꞌ chonꞌ ndeꞌen canꞌ ngujlyo ñi ꞌin nu a ndiya quiꞌan tiꞌ.
\v 6 A cunta ntsuꞌhui angujle nu a tsuꞌhue ntsuꞌhui tiquee loꞌo chaꞌ cuiyaꞌ nu jui ꞌin, mdoꞌo canꞌ seꞌen ndiꞌin ca, una cuaꞌ msuꞌhua nchcun Ndiose ꞌin canꞌ tsala xaa seꞌen tla yta, loꞌ nta canꞌ tsaan nu ntsuꞌhui chaꞌ cuꞌni ca Ndiose xñan bsya.
\v 7 A cunta quichen Sodoma loꞌo Gomorra loꞌo scasca la quichen ndiꞌin cuiꞌ ti canꞌ, mdyaa neꞌ ꞌin neꞌ siyaꞌ ti loo chaꞌ ngunanꞌ loꞌ yten yuꞌhui neꞌ loꞌo ñaꞌan tucui ti, cuiꞌ cuañaꞌan ndloꞌo chaꞌ re ꞌin na siꞌyana Ndiose xitijin ꞌin neꞌ nu tiꞌi loo quiiꞌ tsala xaa.
\v 8 Cuiꞌ cuañaꞌan nguiꞌni yu cuiñi canꞌ, nguia nchaꞌan yu chaꞌ nu nchcuiꞌ sla yu, nguiꞌni cooꞌ yu ꞌin yu loꞌo chaꞌ ngunanꞌ ndyiꞌo tiquee yu, nxcuan tloo yu ꞌin nchgaa nu ntsuꞌhui chaꞌ cuiyaꞌ yaaꞌ, loꞌ ndaja yu ꞌin nchgaa angujle nu ndiꞌin la niꞌ cuaan.
\v 9 Una angujle nu ndon loo lati ꞌin Ndiose nu lca Miguel, a msti tiꞌ taja ꞌin laxaꞌan uta culo yuhueꞌ ꞌin canꞌ xa nu ycuiꞌ tyijyin chaꞌ ꞌin Moisé xa ngujui yu, cuiꞌ ca nu ndeñaꞌan juin angujle canꞌ ꞌin laxaꞌan: Ñi Xꞌnan na xitijin ñi ꞌin nu tiꞌi.
\v 10 Una yu cuiñi canꞌ ndaja yu chaꞌ nu a ndyiꞌya yu cunta, loꞌ siyaꞌ ndaꞌan loꞌo yu chaꞌ tiyaa nu ndaa Ndiose, una ticuiiꞌ yu ntnanꞌ yu ꞌin yu tsañaꞌan nguiaa chaꞌ ꞌin sca ꞌni nu a ntsuꞌhui chaꞌ tiyaa ꞌin.
\v 11 Una ꞌtnan ca nten canꞌ, siꞌyana nguia nchaꞌan neꞌ ñaꞌan chaꞌ ꞌin yu Caín, loꞌ msqueꞌ ꞌin neꞌ loꞌo chaꞌ cuilyiyaꞌ tsañaꞌan mꞌni Balaam, loꞌ mtnanꞌ neꞌ siꞌya chaꞌ lyeꞌ tiꞌ ꞌin neꞌ tsañaꞌan yatoꞌo ꞌin Coré.
\v 12 Nten re nguiꞌni cooꞌ neꞌ ꞌin um xa ndiyoꞌ tiꞌin um loꞌo neꞌ, loꞌ nchcu siin um siꞌya chaꞌ ꞌin Ñi Xꞌnan na, a ntsuꞌhui chaꞌ jyiꞌo ꞌin neꞌ loꞌo ñaꞌan nu nchcu neꞌ, tsa ꞌin ti neꞌ ntsuꞌhui yuhueꞌ tiꞌ neꞌ, nguiaa chaꞌ ꞌin neꞌ ñaꞌan nchca tiꞌ sca ndlaa nu a ljyan loꞌo quioo nu nguia loꞌo cuiꞌin ꞌin scasca tsoꞌ, uta ñaꞌan nguiaa chaꞌ ꞌin sca yca nu a ndyiꞌyu mti tsaan nu ꞌin na, ñaꞌan loo chaꞌ ngujui neꞌ ñaꞌan nchca tiꞌ yca nu nguiton ñaꞌan loꞌo xcuaꞌ.
\v 13 Nguiaa chaꞌ ꞌin neꞌ ñaꞌan nchca tiꞌ tyiꞌa tujoꞌo nu lyee ndiyan ytsa, loꞌ ngooꞌ nu nxcua loo na lca na ñaꞌan nchca tiꞌ chaꞌ jyiꞌo nu nchcuiꞌ neꞌ, lca neꞌ ñaꞌan nchca tiꞌ sca cuii nu la ñaꞌan ti ndaꞌan, una cuaꞌ lca seꞌen ntsuꞌhui chaꞌ tiyaa canꞌ seꞌen tla yta, canꞌ chuꞌhui canꞌ tsala xaa.
\v 14 Chaꞌ ꞌin neꞌ re mxiycuiꞌ Ndiose ꞌin Enoc, yu nu cuaꞌ nchca cati ta nten nu yaan loo Adán, loꞌ juin yu: Ñaꞌan jan ñi, ntsuꞌhui chaꞌ quiaan Ñi Xꞌnan na tsatlyu loꞌo tyun mii nu cuaꞌ mdoꞌo hui ꞌin ñi,
\v 15 siꞌyana cuꞌni ñi xñan bsya ꞌin nten chendyu, loꞌ culo quiꞌya ñi ꞌin nu nducunꞌ siꞌya nchgaa tñan ngunanꞌ nu mꞌni, a cunta siꞌya scasca chaꞌ nducunꞌ nu ycuiꞌ nten quiꞌya chendyu chaꞌ ꞌin ñi.
\v 16 Nten cuiñi canꞌ nchgaa xaa ndaa neꞌ quiꞌya, a tsuꞌhue ntsuꞌhui tiquee neꞌ, nꞌni neꞌ tsañaꞌan nu nchca tiꞌ neꞌ, siyeꞌ chaꞌ nchcuiꞌ neꞌ loꞌ ndaa neꞌ loo xca tucui, siꞌyana nducua tloo neꞌ cuꞌni canꞌ tsuꞌhue loꞌo neꞌ.
\s Msuꞌhua tiyaa yu Juda ꞌin jun taꞌa na
\p
\v 17 ꞌUn jun taꞌa na nu ndyuꞌhui cuiyaꞌ tinꞌ ꞌin, quia yuꞌhui tiꞌ um chaꞌ nu cuaꞌ ycuiꞌ yu taꞌa mdaꞌan Ñi Xꞌnan na Jesucristo,
\v 18 loꞌ juin yu ꞌin um: Tiyaa xaa tyisnan chcuiꞌ caꞌan neꞌ ꞌin Ndiose, loꞌ tyiꞌan neꞌ loꞌo chaꞌ ngunanꞌ nu tyiꞌo tiquee neꞌ.
\v 19 Siꞌya nten canꞌ suꞌhue tiꞌin taꞌa jun, siꞌyana chacuiꞌ chaꞌ nducunꞌ ndaꞌan loꞌo neꞌ, loꞌ a ntsuꞌhui Espíritu ꞌin Ndiose niꞌ cusya ꞌin neꞌ.
\v 20 Una ꞌun jun taꞌa na nu ndyuꞌhui cuiyaꞌ tinꞌ ꞌin, suꞌhua um juesa culo um loo chaꞌ nu luhui ꞌin Ndiose nu ndiya quiꞌan tiꞌ um, loꞌ chcuiꞌ lyiꞌo um ꞌin ñi loꞌo chaꞌ cuiyaꞌ ꞌin Espíritu nu Luhui ꞌin ñi.
\v 21 Xñi ton um ꞌin um loo chaꞌ tsuꞌhue ꞌin Ndiose, lja nta um chendyu nu a tsatii ꞌa ꞌin um, siꞌyana Ñi Xꞌnan na Jesucristo ñaꞌan ꞌtnan tiꞌ ñi ꞌin um.
\v 22 Chaꞌ ntsuꞌhui nu nguiꞌni tucua tiꞌ, cunan um ñaꞌan chcuiꞌ um loꞌo canꞌ siꞌyana quiꞌya cunta.
\v 23 Culaa um ꞌin nu cuaꞌ tsaa loo quiiꞌ, cuiꞌ cuañaꞌan ñaꞌan ꞌtnan tiꞌ um ꞌin nten, una xñi um cunta ꞌin um loꞌo canꞌ, loꞌ xcuan tloo um chaꞌ ngunanꞌ nu nguiꞌni canꞌ tsatlyu loꞌo steꞌ.
\s Nguiꞌni tnu na ꞌin Ndiose
\p
\v 24 Scati ñi nu tla la chaꞌ ꞌin, tca xñi ñi cunta ꞌin um siꞌyana a tyu um loo quiꞌya, luhui tloo um tiya loꞌo ñi ꞌin um loo xaa ꞌin Ndiose, loꞌ ndyijyin yaꞌ ca tsuꞌhue chuꞌhui tiquee um xacanꞌ,
\v 25 cuiꞌ scati Ndiose nu tiyaa la, Ñi nu Ndlo Laa ꞌin na, ntsuꞌhui chaꞌ cuꞌni tnu na ꞌin ñi siꞌya chaꞌ cuiyaꞌ nu tlyu ꞌin ñi, scati ñi ndlo ñi tñan nchgaa loo chaꞌ, cuaꞌ ñii loꞌ tsala xaa. Amen.