\id REV - Nopala (Chatino) NT [cya] - Mexico 2013 (web 2014)
\h APOCALIPSIS
\toc1 Apocalipsis
\toc2 Apocalipsis
\toc3 Ap
\mt1 Apocalipsis
\c 1
\s Xa mdyiꞌo scua la chaꞌ ꞌin Jesucristo
\p
\v 1 Nde chaꞌ nu ngulyo scua la Ndiose chaꞌ ꞌin Jesucristo, siꞌyana ca cuiyaꞌ tiꞌ nchgaa nu lca nguso ꞌin ñi chaꞌ nu cuaꞌ nchcui chaꞌ tsatoꞌo, loꞌ nguaꞌan tñan ñi angujle ꞌin ñi nu ya ytsaꞌ chaꞌ re ꞌin yu Xuhua nu lca nguso ꞌin ñi.
\v 2 Cuaꞌ mdaa yu suun tsañaꞌan nguiaa chaꞌ ꞌin Ndiose, a cunta loꞌo chaꞌ nu ycuiꞌ Jesucristo, nchgaa chaꞌ nu cuaꞌ naꞌan tloo yu.
\v 3 Tsuꞌhue ca xuꞌhue nu chcuiꞌ quityi re loꞌo nu quine ꞌin chaꞌ nu mxiycuiꞌ Ndiose ꞌin yu, loꞌ tucua canꞌ tñan nchgaa chaꞌ nu nguinu scua loo quityi re, siꞌyana cuaꞌ nchcui cuiiꞌ chaꞌ tsatoꞌo na.
\s Nchcuiꞌ chaꞌ yu Xuhua ꞌin tsa cati ta jun taꞌa na
\p
\v 4 Nanꞌ yu Xuhua, nguaꞌan tñan quityi re ꞌin um, cuiꞌ cati ta jun taꞌa na ndiꞌin seꞌen lyiꞌya loo Asia. Ndiose, tsatlyu loꞌo tsa cati espíritu nu ndiꞌin seꞌen nducua ñi, taa ñi chaꞌ tsuꞌhue nu chuꞌhui niꞌ cusya ꞌin um, ñi nu ndiꞌin tiꞌ culoo, loꞌo cuaꞌ ñii, loꞌ ntsuꞌhui chaꞌ quiaan ñi, loꞌ cuꞌni ñi chaꞌ tyiꞌin tsuꞌhue um.
\v 5 A cunta loꞌo chaꞌ cuiyaꞌ ꞌin Jesucristo, ñi nu nchcuiꞌ chaꞌ nu ñi, ñi nu culo nducua la mdyiquiꞌo loꞌ a ntsuꞌhui ꞌa chaꞌ caja, scati ñi nu ndlo tñan ꞌin nchgaa ree nu ndiꞌin loo chendyu re, cuiꞌ ñi nu mꞌni ꞌtnan ꞌin na loꞌ msuhui ñi ꞌin na loꞌo tne ñi siꞌya quiꞌya ꞌin na,
\v 6 ñaꞌan ca siꞌyana ca na sca quichen nu tucua tloo Ndiose, ñi nu lca Sti Jesucristo, loꞌ scati ꞌin ñi cuꞌni tnu na loꞌ culo ñi tñan tsala xaa, Amen.
\v 7 —Ñaꞌan jan ñi, cuiꞌ ñi ntsuꞌhui chaꞌ quiaan ñi niꞌ ndlaa—. Nchgaa nten ñaꞌan tloo ꞌin ñi, a cunta loꞌo nu yjoꞌ chcuan cha siiꞌ ñi, —ñaꞌaan ta nten chendyu quiꞌya tuꞌhua tiquee siꞌya ñi—. Cuiꞌ cuañaꞌan tsatoꞌo na, Amen.
\v 8 Nde chaꞌ nu nchcuiꞌ Ñi Xꞌnan na: Nanꞌ lcan letra Alfa loꞌo Omega, nanꞌ cuaꞌ ndiꞌin tiꞌ culoo loꞌ a ntsuꞌhui chaꞌ tsatii chaꞌ ꞌñan, ñi nu ndiꞌin tiꞌ culoo, loꞌo cuaꞌ ñii, ñi nu ntsuꞌhui chaꞌ quiaan, scati ñi nu tlyu la chaꞌ cuiyaꞌ ntsuꞌhui ꞌin.
\s Xa naꞌan xñii yu Xuhua ꞌin Jesucristo
\p
\v 9 Nanꞌ yu Xuhua, taꞌa ndiya quiꞌan tiꞌ um, taꞌa ndijin na nu tiꞌi loꞌ tsatlyu ndlo ñi tñan ꞌin na, cuiꞌ Jesucristo nguiꞌni ñi chaꞌ siꞌyana nda loo na loꞌo nchgaa loo chaꞌ, loꞌ siꞌya chaꞌ ꞌin Ndiose nu ndaꞌan ycuinꞌ, a cunta siꞌya chaꞌ ꞌin Jesucristo, ntsuꞌhuin seꞌen lca Patmos, seꞌen su sca yuu tluꞌhue tyiꞌa tujoꞌo.
\v 10 Cuiꞌ tsaan ꞌin Ñi Xꞌnan na xa mtsaꞌan yuꞌhui Espíritu ꞌñan, loꞌ nde chonꞌ ngune ꞌñan jui sca nu ycuiꞌ tsañaꞌan cueen ne sca cuhuii,
\v 11 loꞌ nchcuiꞌ: Nanꞌ lcan letra Alfa loꞌo Omega, nanꞌ la ñaꞌan cuaꞌ ndiꞌin tiꞌ culoo loꞌ a ntsuꞌhui chaꞌ tsatii chaꞌ ꞌñan. Caꞌan scua nchgaa chaꞌ nu naꞌan, loꞌ caꞌan tñan ꞌin na ꞌin tsa cati ta jun taꞌa na nu ndiꞌin seꞌen lyiꞌya loo Asia: Quichen Efeso, loꞌo Esmirna, Pérgamo, Tiatira, Sardis, Filadelfia, loꞌo Laodicea.
\v 12 Xacanꞌ mxinaꞌan nde chonꞌ chaꞌ ti ca nu nchcuiꞌ loꞌon, loꞌ ncua chcanꞌ ꞌñan ndon tsa cati seꞌen nducua quiiꞌ ndiquin, nu nguiaaꞌ loꞌo chacuiꞌ oro,
\v 13 loꞌ tluꞌhue la seꞌen nducua quiiꞌ canꞌ, naꞌan ndon —Yu Quiꞌyu nu Mdoꞌo nde niꞌ Cuaan—, lcoꞌ sca teꞌ tucuin nu ndiyaa la yni quiyaꞌ, loꞌ jyan tiquee canꞌ nchcanꞌ na loꞌo sca na oro,
\v 14 ñaꞌaan quichanꞌ que canꞌ mten na ñaꞌan nchca tiꞌ slyaꞌ, uta ñaꞌan quio quee, loꞌ quiloo canꞌ chcanꞌ na tsañaꞌan nchca tiꞌ quiiꞌ ndiquin.
\v 15 Quiyaꞌ canꞌ nduhui na tsañaꞌan nchca tiꞌ chcuan nu nsuꞌhua neꞌ loo quiiꞌ, loꞌ cueen nchcuiꞌ canꞌ tsañaꞌan ne ljyaan tyiꞌa tlya.
\v 16 Yaaꞌ tsoꞌ cueen ꞌin canꞌ nducua tsa cati cuii, loꞌ tuꞌhua canꞌ ndyiꞌo sca spada nu chcuaa tsoꞌ cha, tloo canꞌ nduhui na tsañaꞌan nchca tiꞌ cucha xa nu luhui xaa.
\v 17 Una xa naꞌan ꞌin canꞌ cuiꞌ xaa mdlyun tloo, loꞌ mstin tsañaꞌan nchca tiꞌ sca nu ngujui. Yaaꞌ tsoꞌ cueen ꞌin mdiꞌin tyaa ꞌñan, loꞌ juin: A cutsen, nanꞌ la ñaꞌan cuaꞌ ndiꞌin tiꞌ culoo loꞌ a ntsuꞌhui chaꞌ tsatii chaꞌ ꞌñan.
\v 18 Nanꞌ lcan ñi nu loꞌo ca, siyaꞌ ngujuin tiꞌ culoo, una cuaꞌ ñii loꞌon can tsala xaa, Amen. Mchcuan chaꞌ cuiyaꞌ ꞌin chaꞌ ndyija loꞌo Hades seꞌen ntsuꞌhui cusya ꞌin neꞌ ngujui.
\v 19 Caꞌan nchgaa chaꞌ nu cuaꞌ naꞌan, chaꞌ nu nchca cuaꞌ ñii loꞌo chaꞌ nu tiꞌ lyijyi ca.
\v 20 Ndeñaꞌan nguiaa chaꞌ ꞌin tsa cati cuii nu naꞌan nducua yaanꞌ tsoꞌ cueen, loꞌo chaꞌ ꞌin tsa cati seꞌen nducua quiiꞌ ndiquin nu nguiaaꞌ loꞌo chacuiꞌ oro: Tsa cati cuii canꞌ lca angujle nu ntsuꞌhui cunta ꞌin cunda scaa ta jun taꞌa na, loꞌ tsa cati seꞌen nducua quiiꞌ ndiquin nu naꞌan canꞌ, lca tsa cati ta jun taꞌa na.
\c 2
\s Chaꞌ nu ycuiꞌ Jesús loꞌo jun Efeso 

\p
\v 1 Nde chaꞌ nu caꞌan tñan ꞌin angujle nu ntsuꞌhui cunta ꞌin jun taꞌa na ndiꞌin Efeso: Ndeñaꞌan nchcuiꞌ ñi nu nducua tsa cati cuii yaaꞌ tsoꞌ cueen ꞌin, ñi nu ndaꞌan tluꞌhue la seꞌen nducua quiiꞌ ndiquin nu nguiaaꞌ loꞌo chacuiꞌ oro:
\v 2 Nanꞌ jlyo tinꞌ ñaꞌan tñan nguiꞌni um, tsala ñaꞌan nsuꞌhua um juesa loꞌ nda loo um loꞌo chaꞌ nu ndijin um, a cunta siꞌyana a nducuan xuꞌhue um ꞌin nu ndaꞌan loꞌo chaꞌ nducunꞌ, nsñi um cunta ꞌin nu nchcuiꞌ siꞌyana ndaꞌan loꞌo chaꞌ cuiyaꞌ ꞌin Ndiose, siyaꞌ a tucui lca canꞌ, loꞌ nguija lyoo um ꞌin siꞌyana lca sca nu cuiñi.
\v 3 Lyee ꞌa cuaꞌ mdijin um nu tiꞌi una mda loo um, loꞌ siꞌya chaꞌ ꞌñan lyee msuꞌhua um juesa, loꞌ a nguiꞌni naꞌan tiꞌ um loꞌo chaꞌ canꞌ.
\v 4 Una ntsuꞌhui sca chaꞌ nu a ndyuꞌhui cuiyaꞌ tinꞌ ꞌin um, siꞌyana a ntsuꞌhui ꞌa chaꞌ tsuꞌhue ꞌin um ñaꞌan tiꞌ culoo.
\v 5 Canꞌ chaꞌ quia yuꞌhui tiꞌ um ñaꞌan yatoꞌo ngula yaaꞌ um chaꞌ canꞌ, loꞌ xiton um cuꞌni um ñaꞌan nu mdyisnan um tiꞌ culoo. Chaꞌ siꞌi, cuiꞌ xaa tsaꞌan seꞌen ndiꞌin um, chcuan seꞌen nducua quiiꞌ canꞌ ꞌin um, chaꞌ na a xitsaꞌan um chaꞌ tiyaa ꞌin um.
\v 6 Una ntsuꞌhui xca chaꞌ nu tiꞌ tsuꞌhue ntsuꞌhui tiqueen loꞌo um, siꞌyana nxcuan tloo um chaꞌ nu nguiꞌni nchgaa nu nguiaa tsoꞌ ꞌin Nicolás, loꞌon nanꞌ nxcuan tloon chaꞌ canꞌ.
\v 7 Nchgaa nu ne ꞌin chaꞌ re, cuꞌni cunta chaꞌ nu nchcuiꞌ Espíritu loꞌo nchgaa ta jun taꞌa na. Nu cuꞌni canan loꞌo chaꞌ re, canꞌ nu taan chaꞌ cuiyaꞌ cu mti nu ndyiꞌyu loo yca nu ndaa chendyu, cuiꞌ yca nu nducua tluꞌhue la seꞌen ndiꞌin Ndiose.
\s Chaꞌ nu ycuiꞌ Jesús loꞌo jun Esmirna
\p
\v 8 Nde chaꞌ nu caꞌan tñan ꞌin angujle nu ntsuꞌhui cunta ꞌin jun taꞌa na ndiꞌin Esmirna: Ndeñaꞌan nchcuiꞌ ñi nu cuaꞌ ndiꞌin tiꞌ culoo, ñi nu a ntsuꞌhui chaꞌ tsatii chaꞌ ꞌin, ñi nu ngujui loꞌ mdyiquiꞌo:
\v 9 Nanꞌ jlyo tinꞌ ñaꞌan tñan nguiꞌni um, tsala ñaꞌan ndijin um nu tiꞌi, loꞌ tiꞌi ñaꞌan chendyu ꞌin um (siyaꞌ cuilyiyaꞌ um tsoꞌ ꞌin Ndiose). Tsala ñaꞌan ndaja neꞌ ꞌin um, cuiꞌ nu nchcuiꞌ siꞌyana lca neꞌ judio, loꞌ siꞌi na, cuiꞌ ca nu sca chaꞌ ti ꞌin neꞌ loꞌo Laxaꞌan.
\v 10 Una a xicutsen tiꞌ um loꞌo nchgaa chaꞌ nu ljyaan ꞌin um. Ñaꞌan jan ñi, laxaꞌan cuꞌni chaꞌ sca tucua um tsaa um naꞌan chcuan, ñaꞌan na chaꞌ ta loo um loꞌo chaꞌ canꞌ, loꞌ tyijyin um nu tiꞌi tsa tii tsaan. Chcui nchaꞌan um ꞌñan tsayaꞌ tyiꞌo um loo chendyu re, loꞌ nanꞌ taan chaꞌ tsuꞌhue ꞌin um, cuiꞌ chendyu nu a tsatii ꞌa.
\v 11 Nchgaa nu ne ꞌin chaꞌ re, cuꞌni cunta chaꞌ nu nchcuiꞌ Espíritu loꞌo nchgaa ta jun taꞌa na. Nu cuꞌni canan loꞌo chaꞌ re, a quiꞌni caꞌan ꞌin canꞌ loꞌo nu cuaꞌ nchca tucua chaꞌ ndyija.
\s Chaꞌ nu ycuiꞌ Jesús loꞌo jun Pérgamo
\p
\v 12 Nde chaꞌ nu caꞌan tñan ꞌin angujle nu ntsuꞌhui cunta ꞌin jun taꞌa na ndiꞌin Pérgamo: Ndeñaꞌan nchcuiꞌ ñi nu ndaꞌan loꞌo sca spada nu chcuaa tsoꞌ cha:
\v 13 Nanꞌ jlyo tinꞌ ñaꞌan tñan nguiꞌni um, loꞌ jlyo tinꞌ la ndiꞌin um, cuiꞌ quichen seꞌen nducua Laxaꞌan, una siyaꞌ cuañaꞌan nducui nchaꞌan um ꞌñan, a nxcuan tloo um chaꞌ nu ndiya quiꞌan tiꞌ um, ñi a mꞌni naꞌan tiꞌ um xa yjui neꞌ ꞌin yu Antipas nu tsuꞌhue mdaa suun chaꞌ ꞌñan, cuiꞌ quichen seꞌen ndiꞌin Laxaꞌan canꞌ.
\v 14 Una ntsuꞌhui sca tucua chaꞌ nu a ndiya tinꞌ ñaꞌan nguiꞌni um, siꞌyana lja um ntsuꞌhui nu nguia nchaꞌan chaꞌ tiyaa ꞌin Balaam, yu nu nguloꞌo ꞌin Balac siꞌyana xityu ꞌin neꞌ Israel loo quiꞌya, loꞌ cu neꞌ na nu cuaꞌ yuꞌhui loo joꞌo, loꞌ sten yuꞌhui neꞌ loꞌo ñaꞌan tucui ti.
\v 15 A cunta siꞌyana lja um ntsuꞌhui nu nguia nchaꞌan chaꞌ nu ndloꞌo Nicolás, cuiꞌ chaꞌ nu nxcuan tloon.
\v 16 Canꞌ chaꞌ xiloꞌo chonꞌ um chaꞌ re, chaꞌ siꞌi cuiꞌ xaa tsaꞌan seꞌen ndiꞌin um, loꞌ cuꞌni canan ꞌin canꞌ loꞌo spada nu ndyiꞌo tuꞌhuan.
\v 17 Nchgaa nu ne ꞌin chaꞌ re, cuꞌni cunta chaꞌ nu nchcuiꞌ Espíritu loꞌo nchgaa ta jun taꞌa na. Nu cuꞌni canan loꞌo chaꞌ re, taan chaꞌ cuiyaꞌ ꞌin cu jaslya nu ntsuꞌhui cutsiꞌ ꞌin Ndiose, loꞌ taan sca quee lyoꞌ ti nu mten ꞌin seꞌen ngaꞌan sca nii nu cui ti nu a tucui ndyuꞌhui lyoo, loꞌ scati nu ꞌin ꞌin na chuꞌhui lyoo nii canꞌ.
\s Chaꞌ nu ycuiꞌ Jesús loꞌo jun Tiatira
\p
\v 18 Nde chaꞌ nu caꞌan tñan ꞌin angujle nu ntsuꞌhui cunta ꞌin jun taꞌa na ndiꞌin Tiatira: Ndeñaꞌan nchcuiꞌ Sñeꞌ Ndiose, ñi nu chcanꞌ quiloo ñaꞌan nchca tiꞌ quiiꞌ ndiquin, loꞌ quiyaꞌ ñi nduhui na tsañaꞌan nchca tiꞌ chcuan nu ntsuꞌhui loo quiiꞌ:
\v 19 Nanꞌ jlyo tinꞌ tsañaꞌan tñan nguiꞌni um, loꞌ jlyo tinꞌ tsala ñaꞌan ntsuꞌhui chaꞌ tsuꞌhue ꞌin um, tsala ñaꞌan ndiya quiꞌan tiꞌ um, a cunta nda loo um loꞌo nchgaa chaꞌ, loꞌ tñan nu nguiꞌni um cuaꞌ ñii tsuꞌhue la na que ñaꞌan tiꞌ culoo.
\v 20 Una ntsuꞌhui sca tucua chaꞌ nu a ndiya tinꞌ ñaꞌan nu nguiꞌni um, siꞌyana ndaa um yaꞌ ꞌin neꞌ cunaꞌan naan Jezabel, nu nchcuiꞌ siꞌyana Ndiose nxiycuiꞌ ꞌin, ndloꞌo neꞌ ꞌin nguso ꞌñan, loꞌ ñilyiꞌo neꞌ ꞌin siꞌyana sten yuꞌhui loꞌo ñaꞌan tucui ti, loꞌ cu canꞌ na nu cuaꞌ yuꞌhui loo joꞌo.
\v 21 Cuaꞌ sꞌni ntan chaꞌ ñi xaa xiloꞌo chonꞌ neꞌ quiꞌya ꞌin neꞌ, una a xlyaa neꞌ culaꞌ tiꞌ neꞌ loꞌo chaꞌ nu nguiten yuꞌhui neꞌ loꞌo ñaꞌan tucui ti.
\v 22 Ñaꞌan jan ñi, nanꞌ cuꞌnin chaꞌ xñi quicha neꞌ lyee yaꞌ, loꞌ xitijin nu tiꞌi ꞌin nchgaa nu nguiten yuꞌhui loꞌo neꞌ, chaꞌ na a xiloꞌo chonꞌ canꞌ chaꞌ ngunanꞌ ꞌin.
\v 23 A cunta cuꞌnin chaꞌ caja nchgaa sñeꞌ neꞌ, loꞌ cuañaꞌan ca cuiyaꞌ tiꞌ nchgaa ta jun nu ndiya quiꞌan tiꞌ ꞌñan, siꞌyana ndyuꞌhui lyoon ñaꞌan lca cusya ꞌin nten loꞌo chaꞌ tiyaa ꞌin neꞌ, loꞌ cunda scaa neꞌ suꞌhuan lyiyanꞌ ꞌin neꞌ cuaꞌ ñaꞌaan tñan nguiꞌni neꞌ.
\v 24 Una ꞌun loꞌo nchgaa la ñaꞌan jun nu ndiꞌin Tiatira, nu a nguia nchaꞌan chaꞌ nu ndloꞌo neꞌ, ꞌun nu a nchca chuꞌhui lyoo chaꞌ nu ntsuꞌhui cutsiꞌ ꞌin Laxaꞌan, cunen loꞌo um: A suꞌhuan xca yuꞌhua chonꞌ um.
\v 25 Una tsa nchaꞌan um chaꞌ nu ndiya quiꞌan tiꞌ um tsayaꞌ nu quiaan xiyaꞌ.
\v 26 Nu cuꞌni canan loꞌ xuꞌhua seꞌen chaꞌ nu nchca tinꞌ hasta tyiꞌo loo chendyu re, —nanꞌ taan chaꞌ cuiyaꞌ culo canꞌ tñan ꞌin nchgaa nten chendyu,
\v 27 tla culo canꞌ tñan loꞌ sta canꞌ ꞌin neꞌ tsañaꞌan nguita sca quitonꞌ loꞌo juesa—, cuañaꞌan chaꞌ cuiyaꞌ nu mdaa Stin ꞌñan,
\v 28 A cunta taan cuii nu nchcua xa tlya ꞌin canꞌ.
\v 29 Nchgaa nu ne ꞌin chaꞌ re, cuꞌni cunta chaꞌ nu nchcuiꞌ Espíritu loꞌo nchgaa ta jun taꞌa na.
\c 3
\s Chaꞌ nu ycuiꞌ Jesús loꞌo jun Sardis 

\p
\v 1 Nde chaꞌ nu caꞌan tñan ꞌin angujle nu ntsuꞌhui cunta ꞌin jun taꞌa na ndiꞌin Sardis: Ndeñaꞌan nchcuiꞌ ñi nu ndaꞌan loꞌo tsa cati espíritu ꞌin Ndiose, loꞌo tsa cati cuii: Nanꞌ jlyo tinꞌ ñaꞌan tñan nguiꞌni um, loꞌ siyaꞌ ne chaꞌ siꞌyana lyee ndiya quiꞌan tiꞌ um ꞌñan, una jlyo tinꞌ siꞌyana a nsuꞌhua loo um chaꞌ canꞌ.
\v 2 Tyiꞌin tiyaa um loꞌ xiyaꞌ tyiꞌin tya tla um chaꞌ nu cuaꞌ mxnu caꞌan chonꞌ um, siꞌyana a nchca ñaꞌan chaꞌ ta nguiꞌni um chaꞌ nu nchca tiꞌ Ndiose.
\v 3 Quia yuꞌhui tiꞌ um chaꞌ nu cuaꞌ ngune ꞌin um loꞌ ncuan xuꞌhue um, loꞌ xuꞌhua seꞌen um chaꞌ canꞌ. Xitsaꞌan um chaꞌ tiyaa ꞌin um, chaꞌ siꞌi, ljyaan seꞌen ndiꞌin um tsañaꞌan nchca tiꞌ sca yu cunan, ñi a ca jlyo tiꞌ um ñi braa quiꞌyan tsati ntyin chonꞌ um.
\v 4 Una ntsuꞌhui tucua snan jun nu ndiꞌin Sardis nu a nchca cuꞌni cooꞌ chendyu ꞌin, canꞌ nu ntsuꞌhui suun ꞌin coꞌ teꞌ mten loꞌon.
\v 5 Nu cuꞌni canan loꞌo chaꞌ re ntsuꞌhui chaꞌ coꞌ teꞌ mten, loꞌ a xcan nii nu ngaꞌan loo quityi ꞌin Ndiose, seꞌen nducua nii nchgaa nu cuaꞌ jui chendyu ꞌin, cuiꞌ ca nu tijin cunta ꞌin canꞌ la tloo Stin loꞌo tloo angujle ꞌin ñi.
\v 6 Nchgaa nu ne ꞌin chaꞌ re, cuꞌni cunta chaꞌ nu nchcuiꞌ Espíritu loꞌo nchgaa ta jun taꞌa na.
\s Chaꞌ nu ycuiꞌ Jesús loꞌo jun Filadelfia
\p
\v 7 Nde chaꞌ nu caꞌan tñan ꞌin angujle nu ntsuꞌhui cunta ꞌin jun taꞌa na ndiꞌin Filadelfia: Ndeñaꞌan nchcuiꞌ ñi nu Luhui ca, ñi nu Ñi ndiꞌin chaꞌ ꞌin, —ñi nu ndaꞌan loꞌo yaaꞌ naꞌan ꞌin Ree Davi, ñi nu nsla tunaꞌan loꞌ a tucui nu tca tucun ꞌin na, a cunta nducun ñi ꞌin na, loꞌ a tucui nu tca sla ꞌin na—.
\v 8 Nanꞌ jlyo tinꞌ ñaꞌan tñan nguiꞌni um, ñaꞌan jan ñi, tloo um cuaꞌ mslan sca tunaꞌan nu a tucui tca tucun, siyaꞌ chinꞌ chaꞌ ꞌin um, una tiꞌ nxuꞌhua seꞌen um chaꞌ nu nchcuinꞌ, loꞌ a nxcuan tloo um ꞌñan tloo nten.
\v 9 Ñaꞌan jan ñi, nchgaa nu sca chaꞌ ti ꞌin loꞌo Laxaꞌan, nu nchcuiꞌ siꞌyana lca neꞌ judio, una a nguiaa neꞌ loꞌo tsoꞌ chaꞌ canꞌ, cuiꞌ ca nu nchcuiꞌ neꞌ chaꞌ cuiñi, nanꞌ cuꞌnin chaꞌ siꞌyana caan neꞌ loꞌ tyiꞌya xtyinꞌ neꞌ tloo um, loꞌ ca cuiyaꞌ tiꞌ neꞌ siꞌyana lca um nu lyee ndyuꞌhui cuiyaꞌ tinꞌ ꞌin.
\v 10 Loo nu mxuꞌhua seꞌen um chaꞌ nu ycuinꞌ tsañaꞌan ntsuꞌhui chaꞌ ta loo na, loꞌon nanꞌ ntsuꞌhui chaꞌ sñin cunta ꞌin um xa caan nu tiꞌi ꞌin nten sca chcui chendyu, ñaꞌan na chaꞌ ta loo neꞌ loꞌo chaꞌ canꞌ.
\v 11 Ñaꞌan jan ñi, cuaꞌ nchcui cuiiꞌ chaꞌ ljyaan, canꞌ chaꞌ tla tyon um loꞌo chaꞌ nu ndiya quiꞌan tiꞌ um, siꞌyana a tucui nu chcuan chaꞌ tsuꞌhue nu quiꞌni caꞌan ꞌin um.
\v 12 Nu cuꞌni canan loꞌo chaꞌ re, nanꞌ cuꞌnin chaꞌ siꞌyana ca canꞌ tsañaꞌan nchca tiꞌ sca biye nu ndon niꞌ lyaa ꞌin Ndiose ꞌñan, loꞌ tsala xaa ntsuꞌhui chaꞌ tyon canꞌ, loꞌ siiꞌ canꞌ chaꞌan nii Ndiose ꞌñan loꞌo nii quichen ꞌin Ndiose ꞌñan, cuiꞌ quichen Jerusalén nu cui ti nu ndyiꞌo seꞌen nducua Ndiose ꞌñan la niꞌ cuaan, a cunta loꞌo niin nu cui ti ꞌñan chaꞌan siiꞌ canꞌ.
\v 13 Nchgaa nu ne ꞌin chaꞌ re, cuꞌni cunta chaꞌ nu nchcuiꞌ Espíritu loꞌo nchgaa ta jun taꞌa na.
\s Chaꞌ nu ycuiꞌ Jesús loꞌo jun Laodicea
\p
\v 14 Nde chaꞌ nu caꞌan tñan ꞌin angujle nu ntsuꞌhui cunta ꞌin jun taꞌa na ndiꞌin Laodicea: Ndeñaꞌan nchcuiꞌ ñi nu lca Amen, ñi nu tsuꞌhue nda suun loꞌo chaꞌ nu ñi, cuiꞌ ñi nu mdiꞌin tyaa suun nchgaa loo na nu mtñan Ndiose:
\v 15 Nanꞌ jlyo tinꞌ ñaꞌan tñan nguiꞌni um, ñi a tuꞌhua um loꞌ ñi a tiqueꞌ um, tsuꞌhue ca chaꞌ cua na suꞌhua loo um siyaꞌ scati chaꞌ re.
\v 16 Una siꞌyana lca um sca nu tsun ti, loꞌ siꞌi nu tuꞌhua um uta tiqueꞌ um, canꞌ chaꞌ culyoon ꞌin um tuꞌhuan.
\v 17 Siꞌyana ꞌun nchcuiꞌ um: Huareꞌ lca hua sca nu cuilyiyaꞌ, loꞌ quiꞌan na ndiꞌin ꞌin hua, ñi sca na a ndiya lyijyi ꞌin hua. Una ꞌtnan ca um, ¿ta a jlyo tiꞌ um siꞌyana lca um sca nu ngunanꞌ tsoꞌ ꞌin Ndiose, sca nu tiꞌi ñaꞌan chendyu ꞌin, nu cuityinꞌ, sca nu cunanꞌ ti?
\v 18 Canꞌ chaꞌ taan sca chaꞌ tiyaa ꞌin um siꞌyana xiꞌi um na oro ndiꞌin ꞌñan, nu cuaꞌ ngüi loꞌo quiiꞌ, loꞌ ca cuilyiyaꞌ um, a cunta xiꞌi um teꞌ mten nu coꞌ um, a taa um chaꞌ jyiꞌo ꞌin um loꞌo ñaꞌan ndaꞌan cunanꞌ ti um, loꞌ suꞌhua um rmiyu quiloo um siꞌyana tyuꞌhui xaa ꞌin um.
\v 19 Nanꞌ tla chaꞌ nchcuinꞌ loꞌo nchgaa nu nꞌni ꞌtnan ꞌin, loꞌ njyiꞌin ꞌin xa nu siꞌi ñaꞌan nꞌni, canꞌ chaꞌ taa um juesa loꞌ xitsaꞌan um chaꞌ tiyaa ꞌin um.
\v 20 Ñaꞌan jan ñi, nanꞌ ndon tunaꞌan loꞌ nchcuinꞌ loꞌo um, chaꞌ ndeꞌen nu cuꞌni cunta chaꞌ nu nchcuinꞌ, loꞌ sla cusya ꞌin, nanꞌ sten loꞌ tsatlyu cu siin loꞌo canꞌ.
\v 21 Nu cuꞌni canan loꞌo chaꞌ re, canꞌ nu taan chaꞌ cuiyaꞌ chcua sca seꞌen ti loꞌon seꞌen ndlon tñan, tsañaꞌan nu cuaꞌ mꞌnin canan loꞌ yten tucuan sca seꞌen ti loꞌo Stin seꞌen ndlo ñi tñan.
\v 22 Nchgaa nu ne ꞌin chaꞌ re, cuꞌni cunta chaꞌ nu nchcuiꞌ Espíritu loꞌo nchgaa ta jun taꞌa na.
\c 4
\s Xa cuꞌni tnu jun ꞌin Ndiose la niꞌ cuaan
\p
\v 1 Xacanꞌ mxinaꞌan, loꞌ naꞌan nducua la sca tunaꞌan la niꞌ cuaan, loꞌ culoo chaꞌ nu ycuiꞌ canꞌ ngune tsañaꞌan ne sca cuhuii, loꞌ juin ꞌñan: Ycuen nde re, loꞌ nanꞌ culoꞌon ꞌin nchgaa chaꞌ nu ntsuꞌhui chaꞌ tsatoꞌo chcui nu nguiaa nde loo re.
\v 2 Cuiꞌ xaa ti canꞌ mtsaꞌan yuꞌhui Espíritu ꞌñan, loꞌ ncua chcanꞌ ꞌñan ndon sca yca xlya seꞌen nchca cuiyaꞌ chaꞌ la niꞌ cuaan, loo yca xlya canꞌ nducua sca nu nducua.
\v 3 Tloo nu nducua canꞌ chcanꞌ na tsañaꞌan nchca tiꞌ sca quee nu naan jaspe loꞌo cornalina, tyiꞌiin seꞌen nducua canꞌ ndon sca cunan taa nu chcanꞌ tsañaꞌan nchca tiꞌ sca quee nu naan esmeralda.
\v 4 Tyiꞌiin seꞌen nchca cuiyaꞌ chaꞌ canꞌ ndon tsa cla nducua jacua yca xlya, loo canꞌ nducua tsa cla nducua jacua quiꞌyu cula nu lcoꞌ teꞌ mten, loꞌ nducua corona oro quee.
\v 5 Seꞌen nchca cuiyaꞌ chaꞌ canꞌ mdyisnan ndyuhui loꞌ ngune tyiꞌyu, a cunta ngune scasca la cueen, loꞌ nde loo la canꞌ nducua tsa cati quiiꞌ ndiquin, nu lca tsa cati espíritu ꞌin Ndiose.
\v 6 Cuiꞌ canꞌ su sca seꞌen xeen, loꞌ nduhui na tsañaꞌan nchca tiꞌ tyiꞌa tujoꞌo nu chacuiꞌ cunan, cuiꞌ ti tyiꞌiin siiꞌ seꞌen nchca cuiyaꞌ chaꞌ canꞌ ndon jacua nu loꞌo ca, loꞌ scañaꞌan ti nducua quiloo nde loo loꞌo nde chonꞌ.
\v 7 Nu culoo canꞌ ñaꞌan tsañaꞌan nchca tiꞌ cuichi, nu cuaꞌ nchca tucua canꞌ ñaꞌan tsañaꞌan nchca tiꞌ bta, nu cuaꞌ nchca snan canꞌ ñaꞌan tloo tsañaꞌan nchca tiꞌ tloo yu quiꞌyu, loꞌ nu cuaꞌ nchca jacua canꞌ ñaꞌan tsañaꞌan nchca tiꞌ cuiꞌya nu nducui.
\v 8 Taꞌa jacua nu loꞌo canꞌ nducua tsa scua jlyuꞌhue cunda scaa, loꞌ scañaꞌan ti nducua quiloo jlyuꞌhue canꞌ nde chonꞌ loꞌo nde niꞌ, tla loꞌ cucha a ndlaꞌ tiꞌ canꞌ nchcuiꞌ: —Ñi nu Luhui la, ñi nu Luhui la, ñi nu Luhui la, scati Ndiose Xꞌnan na nu tlyu la chaꞌ cuiyaꞌ ntsuꞌhui ꞌin—, ñi nu cuaꞌ ndiꞌin tiꞌ culoo, loꞌo cuaꞌ ñii, loꞌ ndiꞌin ñi tsala xaa.
\v 9 Loꞌ jacua nu loꞌo canꞌ, cunda scaa yaꞌ xa nꞌni tnu ꞌin ñi nu nducua canꞌ, cuiꞌ xa nguila loꞌo ꞌin ñi loꞌ ndyaa xuꞌhue ꞌin ñi nu loꞌo ca tsala xaa,
\v 10 loꞌo taꞌa cla nducua jacua quiꞌyu cula canꞌ ndyiꞌya xtyinꞌ tloo ñi nu nducua canꞌ, loꞌ nguiꞌni tnu ꞌin ñi nu loꞌo ca tsala xaa, loꞌ ndyiꞌin tyaa canꞌ corona oro ꞌin seꞌen nducua ñi, loꞌ nchcuiꞌ:
\v 11 ꞌUn Ñi Xꞌnan hua, ꞌun ntsuꞌhui suun ꞌin um cuꞌni tnu hua ꞌin um, loꞌ cula loꞌo hua ꞌin um, ntsuꞌhui suun ꞌin um chcuan um nchgaa loo chaꞌ cuiyaꞌ, siꞌyana cuiꞌ um mtñan um nchgaa loo na, loꞌ siꞌya chaꞌ tsuꞌhue mdoꞌo tiquee um ndiꞌin na loꞌ nguiaaꞌ na.
\c 5
\s Slyaꞌ ꞌin Ndiose ntsuꞌhui chaꞌ sla quityi
\p
\v 1 Ñi nu nducua canꞌ naꞌan nducua sca quityi yaaꞌ ñi tsoꞌ cueen ꞌin ñi, chcuaa tsoꞌ quityi canꞌ nguaꞌan scua na, loꞌ tsa cati seꞌen nchcun tsa na.
\v 2 Naꞌan sca angujle nu tla la tiꞌ, loꞌ nchcuiꞌ cueen: ¿Ti ca nu ntsuꞌhui chaꞌ cuiyaꞌ ꞌin sla quityi re nchgaa seꞌen nchcun tsa na?
\v 3 Ñi sca tucui loꞌ a jui chaꞌ cuiyaꞌ ꞌin sla ꞌin na, ñi la niꞌ cuaan loꞌ ñi loo chendyu re, uta nde ꞌya la ꞌin chendyu re, ñi nu cuꞌni quii tiꞌ ꞌin na loꞌ a jui.
\v 4 Nanꞌ lyee ꞌa ynan siꞌyana a tucui nu jui chaꞌ cuiyaꞌ ꞌin sla quityi canꞌ loꞌ chcuiꞌ ꞌin na, uta cuꞌni quii ꞌin na.
\v 5 Una sca quiꞌyu cula canꞌ juin ꞌñan: A cunan ꞌa. Ñaꞌan jan ñi, nu lca Cuichi ta nten ꞌin Judá, nu mdoꞌo loo ta nten ꞌin Davi, canꞌ nu cuaꞌ mꞌni canan loꞌ jui chaꞌ cuiyaꞌ ꞌin sla quityi cua, taꞌa cati seꞌen nchcun tsa na.
\v 6 Mxinaꞌan, loꞌ tluꞌhue la seꞌen nchca cuiyaꞌ chaꞌ canꞌ, cuiꞌ tluꞌhue la seꞌen ndon jacua nu loꞌo ca canꞌ. Tluꞌhue la seꞌen nducua quiꞌyu cula canꞌ, ncua chcanꞌ ꞌñan ndon tsañaꞌan nchca tiꞌ sca Slyaꞌ nu cuaꞌ ngujui yuhuaꞌ, loꞌ nducua cati yca que, loꞌ ndiꞌin cati quiloo nu lca cati espíritu ꞌin Ndiose nu cuaꞌ nguaꞌan tñan ñi sca chcui chendyu.
\v 7 Canꞌ nu msñi quityi nu nducua yaaꞌ ñi, tsoꞌ cueen ꞌin ñi nu nducua canꞌ.
\v 8 Xa nu cuaꞌ msñi quityi canꞌ, taꞌa jacua nu loꞌo ca canꞌ, tsatlyu loꞌo cla nducua jacua quiꞌyu cula canꞌ, cuiꞌ xaa mdyiꞌya xtyinꞌ tloo ñi nu lca Slyaꞌ canꞌ. Nchgaa canꞌ nducua cuhuii nu naan arpa yaaꞌ, loꞌo copa oro seꞌen ntsuꞌhui na nu ndiquin tloo Ndiose, loꞌ chaꞌ canꞌ lca na chaꞌ nu nchcuiꞌ lyiꞌo jun ꞌin Ndiose, nchgaa nu mdoꞌo hui ꞌin ñi.
\v 9 Nchgaa canꞌ nguila tuꞌhua sca jyiin nu cui ti, loꞌ nchcuiꞌ: ꞌUn ntsuꞌhui suun ꞌin um xñi um quityi cua loꞌ sla um ꞌin na, siꞌyana loꞌo tne um msiꞌi um ꞌin hua xa yjui neꞌ ꞌin um, seꞌen nu ca na sñeꞌ Ndiose nu mdoꞌo loo nchgaa ta nten, loꞌo nu nchcuiꞌ xca loo chaꞌ, cuiꞌ nu mdoꞌo quichen suhue ti loꞌo quichen tnu.
\v 10 Mꞌni um chaꞌ siꞌyana ca na sca quichen nu tucua tloo Ndiose ꞌin, loꞌ tsatlyu culo na tñan loꞌo ñi tsala xaa.
\v 11 Xa mxinaꞌan ngune ꞌñan ycuiꞌ quiꞌan angujle nu ndiꞌin tyiꞌiin siiꞌ ñi nu nducua canꞌ, seꞌen ndiꞌin jacua nu loꞌo ca canꞌ, cuiꞌ seꞌen nducua cla nducua jacua quiꞌyu cula canꞌ, loꞌ millon angujle lca canꞌ,
\v 12 loꞌ nchcuiꞌ cueen: Cuiꞌ Slyaꞌ nu yjui neꞌ ꞌin ntsuꞌhui suun ꞌin chcuan nchgaa loo chaꞌ cuiyaꞌ, scati ñi lca ñi nu cuilyiyaꞌ la, tiyaa la ñi, loꞌ tla la chaꞌ ꞌin ñi, scati ñi cuaan la nscua chaꞌ ꞌin ñi, ntsuꞌhui suun ꞌin ñi caja nu cuꞌni tnu ꞌin ñi loꞌ cula loꞌo ꞌin ñi.
\v 13 A cunta ngune ꞌñan ycuiꞌ nchgaa nu ndiꞌin la niꞌ cuaan, loꞌo loo chendyu re, loꞌo nde ꞌya la ꞌin chendyu re, loꞌo tyiꞌa tujoꞌo, tsatlyu loꞌo nchgaa na nu mtñan Ndiose, loꞌ nchcuiꞌ canꞌ: Scati ñi nu nducua canꞌ loꞌo ñi nu lca Slyaꞌ, ntsuꞌhui suun ꞌin ñi caja nu cula loꞌo ꞌin ñi, scuen cuaan ꞌin ñi, cuꞌni tnu ꞌin ñi, loꞌ scati ñi tlyu la chaꞌ cuiyaꞌ ntsuꞌhui ꞌin ñi tsala xaa.
\v 14 Loꞌ jacua nu loꞌo ca canꞌ nchcuiꞌ: Amen. Taꞌa cla nducua jacua quiꞌyu cula canꞌ mdyiꞌya xtyinꞌ tsayaꞌ nguꞌya tiꞌin tloo la lyuu, loꞌ mꞌni tnu ꞌin ñi nu loꞌo ca tsala xaa.
\c 6
\s Chaꞌ ꞌin quityi nu nchcun tsa 

\p
\v 1 Naꞌan xa msla ñi nu lca Slyaꞌ culoo seꞌen nchcun tuꞌhua quityi canꞌ, loꞌ jacua nu loꞌo ca canꞌ, cuiꞌ sca canꞌ ngune ꞌñan ycuiꞌ cueen tsañaꞌan ne tyiꞌyu, loꞌ juin: Cuan lya nde re loꞌ ñaꞌan.
\v 2 Xacanꞌ mxinaꞌan loꞌ naꞌan sca cuiyu mten, loꞌ nu nducua chonꞌ ꞌin lyiꞌya sca quilyaa, a cunta jui nu mdaa sca corona nducua que canꞌ, mdoꞌo nguiaa loꞌo chaꞌ tnu tiquee ꞌin siꞌyana cuꞌni canan.
\v 3 Xa msla ñi nu cuaꞌ nchca tucua seꞌen nchcun canꞌ, ngune ꞌñan ycuiꞌ nu cuaꞌ nchca tucua nu loꞌo ca canꞌ, loꞌ juin: Cuan lya nde re loꞌ ñaꞌan.
\v 4 Mdoꞌo xca cuiyu ngaꞌá, loꞌ nu nducua chonꞌ ꞌin jui nu mdaa chaꞌ cuiyaꞌ ꞌin siꞌyana xisuun ꞌin nten chendyu seꞌen nu cujui taꞌa neꞌ, loꞌ jui nu mdaa sca spada tlyu nducua yaaꞌ canꞌ.
\v 5 Xa msla ñi nu cuaꞌ nchca snan seꞌen nchcun canꞌ, ngune ꞌñan ycuiꞌ nu cuaꞌ nchca snan nu loꞌo ca canꞌ, loꞌ juin: Cuan lya nde re loꞌ ñaꞌan. Mxinaꞌan, loꞌ naꞌan sca cuiyu mta, loꞌ nu nducua chonꞌ ꞌin lyiꞌya sca cuiyaꞌ scaꞌ.
\v 6 Tluꞌhue la seꞌen ndiꞌin jacua nu loꞌo ca canꞌ, ngune ꞌñan jui nu ycuiꞌ: Sca kilo trigo ntsuꞌhui lyoo na tsañaꞌan siyaꞌ nguso sca tsaan. Cuiꞌ tsacua ntsuꞌhui lyoo snan kilo cebada. Una a nchca chaꞌ cuꞌni lyiꞌun ceite loꞌo vino.
\v 7 Xa msla ñi nu cuaꞌ nchca jacua seꞌen nchcun canꞌ, ngune ꞌñan ycuiꞌ nu cuaꞌ nchca jacua nu loꞌo ca canꞌ, loꞌ juin: Cuan lya nde re, loꞌ ñaꞌan.
\v 8 Mxinaꞌan, loꞌ naꞌan sca cuiyu cutsi, nu nducua chonꞌ ꞌin lyiꞌya nii Chaꞌ Ndyija, loꞌ nducui nchaꞌan seꞌen lca Hades ꞌin canꞌ. Jui nu mdaa chaꞌ cuiyaꞌ ꞌin siꞌyana cujui nten sca nscan chendyu loꞌo spada, ta caja bjuꞌñan neꞌ, uta loꞌo quicha, ta cujui ꞌni la ꞌin neꞌ.
\v 9 Xa msla ñi nu cuaꞌ nchca caꞌyu seꞌen nchcun canꞌ, loꞌ seꞌen nꞌni tnu neꞌ ꞌin Ndiose, canꞌ naꞌan cusya ꞌin nchgaa nu cuaꞌ ngujui siꞌya chaꞌ ꞌin Ndiose nu mdaꞌan ycuiꞌ loꞌo nten.
\v 10 Nchcuiꞌ cueen canꞌ: Ñi Xꞌnan hua, ꞌun ñi nu Luhui la, loꞌ ñi ndiꞌin chaꞌ ꞌin, ¿la ñi xaa cuꞌni cuiyaꞌ um chaꞌ ꞌin nten chendyu, loꞌ xuꞌhua lyiyaꞌ um ꞌin neꞌ loo nu mslo neꞌ tne hua?
\v 11 Jui nu mdaa teꞌ mten nu ycoꞌ canꞌ, loꞌ jui nu ycuiꞌ loꞌo siꞌyana quita tsalja nu taꞌa nchgaa la ñaꞌan jun nu ntsuꞌhui chaꞌ cujui neꞌ ꞌin, taꞌa ya quiꞌan tiꞌ jun loꞌ mꞌni jun tñan ꞌin Ndiose.
\v 12 Mxinaꞌan xa msla ñi nu cuaꞌ nchca scua seꞌen nchcun canꞌ, loꞌ mdyisnan nguñan lyee yaꞌ, loꞌ cucha nguinu tla loo na tsañaꞌan nchca tiꞌ sca teꞌ mta, loꞌ cooꞌ nguinu ngaꞌá na tsañaꞌan nchca tiꞌ tne.
\v 13 Cuii nu nducua niꞌ cuaan nguilo na tsañaꞌan nchca tiꞌ nguilo mti higo xa nchca cuiꞌin loꞌo juesa.
\v 14 Niꞌ cuaan mxcunꞌ na tsañaꞌan nchca tiꞌ sca quityi, loꞌ a la ꞌa ncua chcanꞌ na, a cunta mchaꞌan tucua quiꞌya, cuiꞌ cuañaꞌan mchaꞌan tiꞌin yuu ngutyi nu ndiꞌin tluꞌhue la loo tyiꞌa.
\v 15 Nchgaa yu nu lca ree ndiꞌin loo chendyu re, loꞌo nu lyiꞌya tñan, nu cuilyiyaꞌ, nchgaa que ꞌin sindatu, loꞌo nu tnu chaꞌ cuiyaꞌ ntsuꞌhui yaaꞌ, a cunta loꞌo nguso nu cuaꞌ msiꞌi neꞌ ꞌin loꞌo nu nguiꞌni tñan chaꞌ ꞌin ti, yuꞌhui cutsiꞌ canꞌ tuquee uta lja quee tnu nu nducua siiꞌ quiꞌya.
\v 16 Ndeñaꞌan nchcuiꞌ canꞌ loꞌo quiꞌya loꞌo quee tnu: —Choꞌo tiꞌin um chonꞌ hua—, siꞌyana a ñaꞌan tloo hua ꞌin ñi nu nducua loo yca xlya cua, ñi a quiꞌni caꞌan ꞌin hua loꞌo chaꞌ nsinꞌ tiꞌ nu ntsuꞌhui tiquee ñi nu lca Slyaꞌ cua.
\v 17 Siꞌyana cuaꞌ mdiyaa tsaan nu culyoo ñi chaꞌ nsinꞌ tiꞌ nu ntsuꞌhui tiquee ñi, ¿loꞌ ti nu tiꞌ tca tyon loo chaꞌ re?
\c 7
\s Chaꞌ ꞌin 144,000 nu chaꞌan cuiyaꞌ ꞌin 

\p
\v 1 Chonꞌ ndeꞌen canꞌ naꞌan ndon tsa jacua angujle, cunda scaa canꞌ ndon scaa nscan chendyu, loꞌ a ndaa yaꞌ ca cuiꞌin loo chendyu re, ñi loo tyiꞌa tujoꞌo, uta seꞌen nducua yca tnu.
\v 2 A cunta naꞌan xca angujle nu nguia nchcuen luhuaꞌ seꞌen nchcua cucha, loꞌ lyiꞌya canꞌ cuiyaꞌ ꞌin Ndiose, ñi nu loꞌo ca, loꞌ ycuiꞌ cueen loꞌo jacua angujle nu ndon canꞌ, cuiꞌ nu cuaꞌ jui chaꞌ cuiyaꞌ ꞌin cuꞌni tiꞌi loo chendyu loꞌo tyiꞌa tujoꞌo,
\v 3 loꞌ nchcuiꞌ: A cuꞌni um tiꞌi loo chendyu uta loo tyiꞌa tujoꞌo loꞌ ñi loꞌo yca, lja nu tiꞌ lyijyi caꞌan tyaa na cuiyaꞌ tuchcan nchgaa nu lca nguso ꞌin Stina Ndiose.
\v 4 Ngune ꞌñan ycuiꞌ tsala nu cuaꞌ ngaꞌan cuiyaꞌ ꞌin: Cuiꞌ sca ciento ntsuꞌhui tucua yla ntsuꞌhui jacua mii nten loo nchgaa ta nten ꞌin neꞌ Israel.
\v 5 Loo ta nten ꞌin Judá mdoꞌo tsa tichcua mii nu cuaꞌ ngaꞌan cuiyaꞌ ꞌin. Loo ta nten ꞌin Rubén mdoꞌo cha tichcua mii nu cuaꞌ ngaꞌan cuiyaꞌ ꞌin. Loo ta nten ꞌin Gad mdoꞌo cha tichcua mii nu cuaꞌ ngaꞌan cuiyaꞌ ꞌin.
\v 6 Loo ta nten ꞌin Aser mdoꞌo cha tichcua mii nu cuaꞌ ngaꞌan cuiyaꞌ ꞌin. Loo ta nten ꞌin Neftalí mdoꞌo cha tichcua mii nu cuaꞌ ngaꞌan cuiyaꞌ ꞌin. Loo ta nten ꞌin Manasés mdoꞌo cha tichcua mii nu cuaꞌ ngaꞌan cuiyaꞌ ꞌin.
\v 7 Loo ta nten ꞌin Simeón mdoꞌo cha tichcua mii nu cuaꞌ ngaꞌan cuiyaꞌ ꞌin. Loo ta nten ꞌin Leví mdoꞌo cha tichcua mii nu cuaꞌ ngaꞌan cuiyaꞌ ꞌin. Loo ta nten ꞌin Isacar mdoꞌo cha tichcua mii nu cuaꞌ ngaꞌan cuiyaꞌ ꞌin.
\v 8 Loo ta nten ꞌin Zabulón mdoꞌo cha tichcua mii nu cuaꞌ ngaꞌan cuiyaꞌ ꞌin. Loo ta nten ꞌin See mdoꞌo cha tichcua mii nu cuaꞌ ngaꞌan cuiyaꞌ ꞌin. Loo ta nten ꞌin Benjamin mdoꞌo cha tichcua mii nu cuaꞌ ngaꞌan cuiyaꞌ ꞌin.
\s Chaꞌ ꞌin quiꞌan jun nu lcoꞌ teꞌ mten
\p
\v 9 Chonꞌ ndeꞌen canꞌ naꞌan, ndyijyin yaꞌ quiꞌan nten ndiꞌin nu a tucui ꞌa tiꞌ tca cua ꞌin, nu mdoꞌo nchgaa quichen tnu loꞌo quichen suhue ti, nu mdoꞌo loo nchgaa ta nten, nu nchcuiꞌ xca loo chaꞌ, nguioꞌ tiꞌin jun nde loo seꞌen nchca cuiyaꞌ chaꞌ canꞌ loꞌo tloo ñi nu lca Slyaꞌ, loꞌ lcoꞌ jun teꞌ mten loꞌ yaaꞌ jun nducua lcaꞌ quiñan,
\v 10 loꞌ nchcuiꞌ cueen jun: Ñi nu nducua seꞌen nchca cuiyaꞌ chaꞌ, scati Ndiose ꞌin na loꞌo ñi nu lca Slyaꞌ ntsuꞌhui chaꞌ cuiyaꞌ ꞌin culo laa ñi ꞌin nten chendyu.
\v 11 Nchgaa angujle ꞌin Ndiose nguioꞌ tiꞌin tyiꞌiin seꞌen canꞌ, cuiꞌ seꞌen nducua quiꞌyu cula loꞌo jacua nu loꞌo ca canꞌ, loꞌ mdyiꞌya xtyinꞌ angujle canꞌ tsayaꞌ nguꞌya tiꞌin tloo la lyuu, cuiꞌ seꞌen nchca cuiyaꞌ chaꞌ canꞌ, loꞌ mꞌni tnu ꞌin Ndiose,
\v 12 loꞌ nchcuiꞌ: Amen. Ntsuꞌhui suun ꞌin Stina Ndiose caja nu cuꞌni tnu ꞌin ñi loꞌ cula loꞌo ꞌin ñi, scati ñi tiyaa la ñi, loꞌ ntsuꞌhui suun ꞌin ñi caja nu tyaa xuꞌhue ꞌin ñi, scuen cuaan ꞌin ñi, scati ñi tla la chaꞌ ꞌin ñi, loꞌ tlyu la chaꞌ cuiyaꞌ ntsuꞌhui ꞌin ñi tsala xaa.
\v 13 Xacanꞌ mdoꞌo ycuiꞌ sca quiꞌyu cula canꞌ, loꞌ juin ꞌñan: Nchgaa nu lcoꞌ teꞌ mten re, ¿tucui lca loꞌ la mdoꞌo re?
\v 14 Mxcuen ꞌin canꞌ: Ñi Xꞌnan hua, ꞌun jlyo tiꞌ um. Loꞌ juin loꞌon: Nde nu mdoꞌo lja seꞌen nchca chaꞌ tnu, cuaꞌ nguiten steꞌ re loꞌ nguinu mten na ꞌin siꞌya tne ñi nu lca Slyaꞌ.
\v 15 Canꞌ chaꞌ nguioꞌ tiꞌin jun seꞌen nducua Ndiose, loꞌ nducua tloo ñi ꞌin jun tla loꞌ cucha niꞌ lyaa ꞌin ñi, loꞌ ñi nu nducua seꞌen nchca cuiyaꞌ chaꞌ canꞌ, tyiꞌin tyaa teꞌ naꞌan ꞌin seꞌen ndiꞌin jun.
\v 16 —Ñi a ntsuꞌhui ꞌa chaꞌ tiꞌ quiteꞌ tiꞌ canꞌ, ñi a quityi ꞌa tiꞌ, loꞌ a quii ꞌa tiꞌ canꞌ tiqueꞌ siꞌyana a quiꞌni ꞌa tiqueꞌ cuaan ꞌin—,
\v 17 siꞌyana ñi nu lca Slyaꞌ nu ndon tluꞌhue la lja seꞌen nchca cuiyaꞌ chaꞌ canꞌ, —chuꞌhui ñi cunta ꞌin loꞌ tsa loꞌo ñi ꞌin seꞌen nducua tyiꞌa nu ndaa chendyu, loꞌ Ndiose xityi ñi tyiꞌa quiloo canꞌ—.
\c 8
\s Xa nguila xca ti seꞌen nchcun quityi 

\p
\v 1 Xa msla ñi nu lca Slyaꞌ nu cuaꞌ nchca cati seꞌen nchcun quityi canꞌ, nguinu tiin niꞌ cuaan tsaniꞌ tsa tluꞌhue braa.
\v 2 Xacanꞌ naꞌan cuiꞌ cati angujle nu ndon tloo Ndiose, loꞌ jui nu mdaa tsa cati cuhuii ꞌin.
\v 3 Naꞌan mdiyaan xca angujle nu yten seꞌen nꞌni tnu jun ꞌin Ndiose, loꞌ yaaꞌ canꞌ nducua sca quiꞌnan nu chacuiꞌ oro seꞌen ndyuꞌhui na nu ndiquin tloo Ndiose. Loꞌ jui nu mdaa quiꞌan na nu squin niꞌ canꞌ siꞌyana tya cula na loꞌo chaꞌ nu nchcuiꞌ lyiꞌo jun ꞌin Ndiose, nchgaa nu cuaꞌ mdoꞌo hui ꞌin ñi, loꞌ squin na loo seꞌen nguiaaꞌ loꞌo chacuiꞌ oro seꞌen nꞌni tnu jun ꞌin Ndiose, nde loo seꞌen nchca cuiyaꞌ chaꞌ canꞌ.
\v 4 Seꞌen nducua na canꞌ yaaꞌ angujle, mdoꞌo sñi nu mdiyaa tloo Ndiose tsatlyu loꞌo chaꞌ nu nchcuiꞌ lyiꞌo jun ꞌin ñi, nchgaa nu cuaꞌ mdoꞌo hui ꞌin ñi.
\v 5 Angujle mꞌni chaꞌan na nu nducua yaaꞌ loꞌo quiiꞌ nu ndiquin seꞌen nꞌni tnu jun ꞌin Ndiose, loꞌ mslo ꞌin na loo chendyu re, mdyisnan ytsu tyiꞌyu loꞌ ngune scasca la cueen, a cunta ndyuhui loꞌ lyee nguñan.
\s Chaꞌ ꞌin tsa cati cuhuii ꞌin Ndiose
\p
\v 6 Cati angujle nu nducua cuhuii yaaꞌ canꞌ, cuaꞌ ndon tiyaa xicune ꞌin na.
\v 7 Culoo angujle canꞌ mxicune cuhuii ꞌin, loꞌ mdyisnan nguꞌya quio quee loꞌo quiiꞌ nu mxitiyaaꞌ loꞌo tne, nguilo tuꞌhui na loo chendyu, loꞌ tiꞌ chinꞌ ti a mdiyaa tluꞌhue yca nducua loo chendyu re mquin na, a cunta ñaꞌaan quixinꞌ ngaꞌa mquin na.
\v 8 Nu cuaꞌ nchca tucua angujle canꞌ mxicune cuhuii ꞌin, cuiꞌ xaa ya yuꞌhui sca na nu ndiquin tsañaꞌan nchca tiꞌ sca quiꞌya loo tyiꞌa tujoꞌo, loꞌ tiꞌ chinꞌ ti a mdiyaa tluꞌhue tyiꞌa canꞌ mchca tne na.
\v 9 Loꞌ ꞌni nu ntsuꞌhui canꞌ tiꞌ chinꞌ ti a mdiyaa tluꞌhue ꞌin ngujui ꞌin, a cunta tiꞌ chinꞌ ti a mdiyaa tluꞌhue ñaꞌaan yca naꞌan nu ndiꞌin canꞌ ngujlyo na.
\v 10 Nu cuaꞌ nchca snan angujle canꞌ mxicune cuhuii ꞌin, loꞌ la niꞌ cuaan mdoꞌo tyu sca cuii tlyu nu ndiquin tsañaꞌan nchca tiꞌ sca quiiꞌ tnu, loꞌ tiꞌ chinꞌ ti a mdiyaa tluꞌhue chco tlyu su loo chendyu re msñi loꞌo na, cuiꞌ cuañaꞌan yatoꞌo loꞌo nchgaa seꞌen nducua tyiꞌa,
\v 11 loꞌ cuii canꞌ naan na Tlyaaꞌ. Tiꞌ chinꞌ ti a mdiyaa tluꞌhue tyiꞌa canꞌ ncua tlyaaꞌ na, loꞌ quiꞌan ꞌa nten ngujui neꞌ siꞌya tyiꞌa canꞌ.
\v 12 Nu cuaꞌ nchca jacua angujle canꞌ mxicune cuhuii ꞌin, loꞌ mdyisnan ndyuhuiꞌ cucha loꞌo cuii loꞌo cooꞌ, loꞌ tiꞌ chinꞌ ti a mdiyaa tluꞌhue la na nguinu tla yta na, tsa cuañaꞌan nguꞌya teꞌen xaa ꞌin na, tla loꞌ cucha.
\v 13 Mxinaꞌan, loꞌ ljyaan sca angujle nu nducui tluꞌhue la niꞌ cuaan, loꞌ ngune ꞌñan nchcuiꞌ cueen canꞌ: ꞌTnan ca, ꞌtnan ca, ꞌtnan ca nten ndiꞌin loo chendyu, siꞌyana cuaꞌ xicune xnan ti angujle canꞌ cuhuii ꞌin. 
\c 9
\p
\v 1 Nu cuaꞌ nchca caꞌyu angujle canꞌ mxicune cuhuii ꞌin, loꞌ naꞌan sca cuii nu mdoꞌo la niꞌ cuaan mdyu loo chendyu re, loꞌ jui nu mdaa sca yaaꞌ ꞌin canꞌ nu sla sca seꞌen quiꞌñi ꞌa.
\v 2 Xa msla ꞌin na, canꞌ mdoꞌo sñi tnu tsañaꞌan nchca tiꞌ tuꞌhua horno, a ncua chcanꞌ ꞌa cucha, ñi niꞌ cuaan siꞌya sñi nu mdoꞌo seꞌen quiꞌñi canꞌ.
\v 3 Loo sñi canꞌ mdoꞌo tsañaꞌan nchca tiꞌ scoꞌ, loꞌ jui nu mdaa chaꞌ cuiyaꞌ siꞌyana cuꞌni ꞌin tiꞌi loo chendyu re tsañaꞌan ndijyoꞌ sca xeꞌen.
\v 4 Loꞌ jui nu ngulo tñan ꞌin siꞌyana a cuꞌni tiꞌi loꞌo ñi sca loo quixinꞌ uta loꞌo yca, cuiꞌ ca nu ꞌin nten chendyu ti cuꞌni canꞌ tiꞌi, tsalca nu a ngaꞌan cuiyaꞌ ꞌin Ndiose tuchcan.
\v 5 Una a jui chaꞌ cuiyaꞌ cujui ꞌin neꞌ, cuiꞌ ca nu tsa xitijin ti ꞌin neꞌ nu tiꞌi tsaniꞌ caꞌyu cooꞌ, tsañaꞌan tiꞌi ndijyoꞌ sca xeꞌen.
\v 6 Xacanꞌ loꞌo tyiꞌan nan neꞌ chaꞌ ndyija, una a la quija lyoo neꞌ ꞌin canꞌ, siyaꞌ lyee lca tiquee neꞌ caja neꞌ, una chaꞌ ndyija canꞌ chcua tijyoꞌ siiꞌ neꞌ.
\v 7 Scoꞌ canꞌ ñaꞌan ꞌin ñaꞌan nchca tiꞌ cuiyu nu cuaꞌ tsaa cusuun, loꞌ nducua na que ꞌin ñaꞌan nchca tiꞌ sca corona oro, loꞌ tloo ꞌin chcanꞌ na ñaꞌan tloo nten,
\v 8 quichanꞌ que ꞌin chcanꞌ na ñaꞌan quichanꞌ que neꞌ cunaꞌan, loꞌ lyiꞌya ꞌin ñaꞌan nchca tiꞌ lyiꞌya cuichi,
\v 9 jyan tiquee ꞌin ngaꞌan sca na tsañaꞌan nchca tiꞌ chcuan xeen, loꞌ cueen ne jlyuꞌhue ꞌin tsañaꞌan ne nguiaa cuiyu quiꞌan loꞌo carreta nu nguiaa cusuun.
\v 10 Nducua jyiꞌen ꞌin ñaꞌan nchca tiꞌ xeꞌen, loꞌ loo canꞌ nducua cutsoꞌ ꞌin nu cuꞌni tiꞌi loꞌo nten tsaniꞌ caꞌyu cooꞌ.
\v 11 Loꞌ ree nu ndlo tñan ꞌin canꞌ lca ticuiꞌ angujle nu mdoꞌo seꞌen quiꞌñi canꞌ, loꞌ naan canꞌ Abadón loꞌo chaꞌ hebreo, loꞌ Apolión ndyiꞌo na loꞌo chaꞌ griego.
\v 12 Nde culoo nu tiꞌi nu cuaꞌ mdijin canꞌ, una nde loo re ljyaan chcua nu tiꞌi canꞌ.
\v 13 Nu cuaꞌ nchca scua angujle canꞌ mxicune cuhuii ꞌin, loꞌ ngune ꞌñan jui nu ycuiꞌ lja seꞌen nducua jacua yca que seꞌen nꞌni tnu jun ꞌin Ndiose, seꞌen nguiaaꞌ loꞌo oro nu ndon tloo ñi,
\v 14 loꞌ ndeñaꞌan nchcuiꞌ loꞌo angujle nu cuaꞌ nchca scua nu nducua cuhuii yaaꞌ canꞌ: Xtinꞌ ꞌin jacua angujle nu nchcanꞌ tuꞌhua chco tlyu Eufrates cua.
\v 15 Xacanꞌ nguitinꞌ jacua angujle nu xtyi nta ti chaꞌ ñi braa, ñi tsaan, ñi cooꞌ, ñi yjan tsatoꞌo chaꞌ re, cuiꞌ siꞌyana cujui ꞌin nten sca chcui chendyu, loꞌ tiꞌ chinꞌ ti a mdiyaa tluꞌhue neꞌ ngujui neꞌ.
\v 16 Yu sindatu nu nducua cuiyu canꞌ ndiyaa yu tucua ciento millon, nanꞌ ngune ꞌñan chaꞌ re.
\v 17 Cuañaꞌan naꞌan xñiin quiꞌan cuiyu canꞌ loꞌo yu nu nducua chonꞌ ꞌin, loꞌ nchcun jyan tiquee yu loꞌo chcuan xeen nu ngaꞌá tsañaꞌan nchca tiꞌ quiiꞌ, a cunta cuxiꞌ na tsañaꞌan nchca tiꞌ zafiro, loꞌ cutsi na tsañaꞌan nchca tiꞌ azufre. Que cuiyu canꞌ chcanꞌ na ñaꞌan nchca tiꞌ que cuichi, loꞌ tuꞌhua ꞌin ndyiꞌo quiiꞌ loꞌo sñi loꞌo azufre.
\v 18 Cuiꞌ siꞌya snan chaꞌ nu tnu canꞌ, chinꞌ ti a ngujui tluꞌhue nten ndiꞌin chendyu re, siꞌya quiiꞌ canꞌ, loꞌo sñi, loꞌo azufre nu ndyiꞌo tuꞌhua cuiyu canꞌ.
\v 19 Siꞌyana loꞌo tuꞌhua ꞌin tca cuꞌni ꞌin tiꞌi loꞌo nten, cuiꞌ cuañaꞌan loꞌo jyiꞌen ꞌin, siꞌyana lca na ñaꞌan nchca tiꞌ que cunaan nu tca cuꞌni tiꞌi loꞌo nten chendyu.
\v 20 Nchgaa la ñaꞌan nten nu a ngujui loꞌo chaꞌ tnu canꞌ, siyaꞌ cuañaꞌan a mscuan tloo neꞌ na nu mtñan yaaꞌ neꞌ, ñi a ngulaꞌ tiꞌ neꞌ cuꞌni tnu neꞌ ꞌin cuiꞌin xaꞌan, loꞌo lcuin oro, lcuin plata, uta nu nguiaaꞌ loꞌo chcuan, loꞌo quee, loꞌo yca, cuiꞌ na nu a chcanꞌ ꞌin, ñi a ne ꞌin, ñi a ndyiꞌan na.
\v 21 Ñi a ngulaꞌ tiꞌ neꞌ chaꞌ nu ndujui taꞌa neꞌ, ñi chaꞌ btaꞌa, ñi chaꞌ nu nguiten yuꞌhui neꞌ loꞌo ñaꞌan tucui ti, uta chaꞌ cunan.
\c 10
\s Chaꞌ ꞌin angujle nu nducua sca quityi lyoꞌ ti yaaꞌ 

\p
\v 1 Xacanꞌ naꞌan nguiaan xca angujle nu tla chaꞌ ꞌin, nu mdoꞌo nde niꞌ cuaan, loꞌ yaan niꞌ ndla. Que canꞌ ndon sca cunan taa, loꞌ tloo nduhui na tsañaꞌan nchca tiꞌ cucha, quiyaꞌ canꞌ lca na ñaꞌan nchca tiꞌ sca biye nu chacuiꞌ quiiꞌ.
\v 2 Yaaꞌ canꞌ nguila tucua sca quityi lyoꞌ ti, loꞌ quiyaꞌ tsoꞌ cueen ꞌin mdiꞌin tyaa ꞌin na loo tyiꞌa tujoꞌo, loꞌ tsoꞌ ca ꞌin mdiꞌin tyaa ꞌin na loo yuu ngutyi.
\v 3 Msiꞌya cueen ñaꞌan nchca tiꞌ nxiꞌya sca cuichi, loꞌ xa nu msiꞌya cueen canꞌ cuiꞌ xaa ngune ytsu tsa cati tyiꞌyu.
\v 4 Xa nu ngulyijyi ne tsa cati tyiꞌyu canꞌ, ncua tinꞌ caꞌan quityi canꞌ, una ngune ꞌñan jui nu ycuiꞌ la niꞌ cuaan, loꞌ juin ꞌñan: A jlya tiꞌ chaꞌ nu ngune ycuiꞌ tsa cati tyiꞌyu canꞌ, una a caꞌan ꞌin na.
\v 5 Angujle nu naꞌan ndon sca tsoꞌ quiyaꞌ loo tyiꞌa tujoꞌo loꞌ xca tsoꞌ na seꞌen ngutyi canꞌ, mscuen yaaꞌ nde niꞌ cuaan,
\v 6 loꞌ mdiꞌin tya tla sca chaꞌ loꞌ mꞌni tyiꞌya ꞌin Ndiose, cuiꞌ ñi nu loꞌo ca tsala xaa, —ñi nu mtñan niꞌ cuaan loꞌo chendyu re, loꞌo tyiꞌa tujoꞌo loꞌo nchgaa loo na nu ndiꞌin ꞌin na—, loꞌ juin: Cuaꞌ mdiyaa xaa tsatoꞌo chaꞌ re,
\v 7 xa nu angujle nu cuaꞌ nchca cati canꞌ tyisnan xicune cuhuii ꞌin, xacanꞌ ca chcanꞌ loo chaꞌ nu ntsuꞌhui cutsiꞌ ꞌin Ndiose, tsañaꞌan chaꞌ nu mxiycuiꞌ ñi ꞌin nguso ꞌin ñi cuaꞌ sꞌni.
\v 8 Nu ngune ycuiꞌ la niꞌ cuaan, xiyaꞌ ycuiꞌ loꞌon loꞌ juin: Cuan lya, loꞌ xñi quityi lyoꞌ ti nu nguila tucua yaaꞌ angujle re, cuiꞌ nu ndon sca tsoꞌ quiyaꞌ loo tyiꞌa tujoꞌo loꞌ xca tsoꞌ na seꞌen ngutyi.
\v 9 Yiꞌan seꞌen ndon angujle canꞌ, loꞌ nen loꞌo chaꞌ taa quityi lyoꞌ ti canꞌ ꞌñan. Loꞌ juin xacanꞌ: Xñi ꞌin na loꞌ cu ꞌin na, xa nu tyisnan cu ꞌin na, xi na tsañaꞌan nchca tiꞌ cuiñanꞌ, una xa cuaꞌ ycu ꞌin na, cuꞌni na tiꞌi ꞌin.
\v 10 Xacanꞌ msñin quityi lyoꞌ ti nu nducua yaaꞌ angujle canꞌ, loꞌ ycun ꞌin na, tuꞌhuan ngüi tinꞌ xi na tsañaꞌan nchca tiꞌ cuiñanꞌ, una ninꞌ ngüi tinꞌ tlyaaꞌ na.
\v 11 Loꞌ juin ꞌñan: ꞌNi chaꞌ chcuiꞌ xiyaꞌ ñaꞌan ntsuꞌhui chaꞌ tsatoꞌo ꞌin nten nu ndiꞌin quichen tnu loꞌo quichen suhue ti, loꞌo nu nchcuiꞌ xca loo chaꞌ, a cunta loꞌo ree.
\c 11
\s Chaꞌ ꞌin tucua yu quiꞌyu nu chcuiꞌ loꞌo nten 

\p
\v 1 Xacanꞌ jui nu mdaa sca coꞌ quii ꞌñan, tsañaꞌan nchca tiꞌ sca yca nu nsuꞌhua cuiyaꞌ neꞌ, loꞌ juin loꞌon: Yaa, loꞌ suꞌhua cuiyaꞌ laa ꞌin Ndiose loꞌo seꞌen nꞌni tnu jun ꞌin ñi, loꞌ cua chaꞌ ñi ncua jun ndiyoꞌ tiꞌin canꞌ.
\v 2 Una a cuꞌni cunta nde lyiyaꞌ, ñi a suꞌhua cuiyaꞌ ꞌin na, siꞌyana canꞌ cuaꞌ nguinu chaꞌ tyiꞌan snan sti neꞌ gentil lja tyiꞌin neꞌ quichen nu cuaꞌ mdoꞌo hui ꞌin Ndiose tsaniꞌ tucua yla ntsuꞌhui tucua cooꞌ.
\v 3 Nanꞌ xiycuinꞌ ꞌin tucua nguso ꞌñan tsaniꞌ sca mii ntsuꞌhui tucua ciento ntsuꞌhui snan yla tsaan, loꞌ chcui lja xacanꞌ coꞌ yu tsañaꞌan nchcoꞌ sca nu ndaꞌan loꞌo chaꞌ xiꞌin.
\v 4 Lca yu tsañaꞌan nchca tiꞌ chcuaa yca olivo, loꞌo chcuaa seꞌen nchcua quin quiiꞌ nu ndon tloo Ndiose, ñi nu ndlo tñan chendyu re.
\v 5 Chaꞌ ndeꞌen nu nchca tiꞌ cuꞌni tiꞌi loꞌo yu, tyiꞌo quiiꞌ tuꞌhua yu loꞌ cujlyo yu ꞌin taꞌa cusuun yu, loꞌ cuañaꞌan caja nchgaa nu nchca tiꞌ cuꞌni tiꞌi loꞌo yu.
\v 6 Ntsuꞌhui chaꞌ cuiyaꞌ ꞌin yu tucun yu niꞌ cuaan, loꞌ a quiꞌya quioo tsalja nu xiycuiꞌ Ndiose ꞌin yu, loꞌ ntsuꞌhui chaꞌ cuiyaꞌ ꞌin yu cuꞌni yu chaꞌ chca tne tyiꞌa, a cunta tca caꞌan tñan yu quicha nu cuꞌni tiꞌi loo chendyu re ñi ncua yaꞌ nchca tiꞌ yu.
\v 7 Xa nde cuaꞌ tyii tñan nu yaan yu, xacanꞌ tyiꞌo ꞌni la nu ntsuꞌhui seꞌen quiꞌñi canꞌ, tyisnan cuꞌni cusuun loꞌo yu, loꞌ cuꞌni canan cujui ꞌin yu.
\v 8 Quinu tuꞌhui chcuaa yu canꞌ loquiyaꞌ quichen tnu canꞌ, cuiꞌ quichen seꞌen mjyiꞌin caꞌan neꞌ ꞌin Ñi Xꞌnan na loo cusi, loꞌ ndloꞌo naan neꞌ quichen canꞌ Sodoma loꞌo Egipto siꞌyana cuañaꞌan nguiaa chaꞌ ꞌin na.
\v 9 Scasca quichen canꞌ, loꞌo nchgaa ta nten, loꞌo nu nchcuiꞌ xca loo chaꞌ, nchgaa quichen tnu, ñaꞌan neꞌ xtyi yu ngujui canꞌ tsaniꞌ snan tsaan tluꞌhue, loꞌ a tucui nu taa chaꞌ cuiyaꞌ quitsiꞌ yu.
\v 10 Nchgaa nten chendyu ca tsuꞌhue chuꞌhui tiquee neꞌ siꞌyana ngujui yu, loo nu lyee nducui tiꞌ neꞌ scasca neꞌ caꞌan tñan neꞌ na nu taa xuꞌhue neꞌ ꞌin taꞌa neꞌ, cuiꞌ siꞌyana lyee mxitijin yu ꞌin nten nu tiꞌi.
\v 11 Una xa mdaꞌa snan tsaan tluꞌhue canꞌ, Ndiose mxuꞌhua ñi cusya ꞌin yu loꞌ mdyiton yu, ndyijyin yaꞌ ytsen nchgaa nu naꞌan chaꞌ canꞌ.
\v 12 Ngune ꞌin yu jui sca nu ycuiꞌ cueen nde niꞌ cuaan, loꞌ juin: Ycuen um nde re. Loꞌ ycuen yu nde niꞌ cuaan sca niꞌ ndlaa, loꞌ nchgaa taꞌa cusuun yu naꞌan chaꞌ canꞌ.
\v 13 Xacanꞌ mdyisnan nguñan lyee yaꞌ, loꞌ ngujlyo sca luhuaꞌ quichen canꞌ, loꞌ ngujui tsa cati mii nten. Nchgaa la ñaꞌan nten canꞌ ndiꞌin ytsen neꞌ loꞌ mꞌni tnu neꞌ ꞌin Ndiose, ñi nu nducua niꞌ cuaan.
\v 14 Nde tucua ta nu tiꞌi nu cuaꞌ mdijin, una cuaꞌ ljyaan xca ta nu tiꞌi.
\s Chaꞌ ꞌin cuhuii nu cuaꞌ nchca cati
\p
\v 15 Nu cuaꞌ nchca cati angujle canꞌ mxicune cuhuii ꞌin, loꞌ lyee ngune cueen la niꞌ cuaan, loꞌ nchcuiꞌ: Nchgaa chaꞌ cuiyaꞌ nu ndiꞌin loo chendyu re cuaꞌ mchcuan Ñi Xꞌnan na ꞌin na tsatlyu loꞌo Cristo ꞌin ñi, loꞌ culo ñi tñan tsala xaa.
\v 16 Cla nducua jacua quiꞌyu cula nu nducua cunda scaa loo yca xlya la tloo Ndiose, cuiꞌ xaa mdyiꞌya xtyinꞌ jun tsayaꞌ nguꞌya tiꞌin tloo jun la lyuu, loꞌ mꞌni tnu jun ꞌin Ndiose,
\v 17 loꞌ nchcuiꞌ jun: Tyaa hua xuꞌhue ꞌin um, Ndiose Xꞌnan hua, ꞌun ñi nu tlyu la chaꞌ cuiyaꞌ ntsuꞌhui ꞌin, ꞌun nu ndiꞌin tiꞌ culoo, loꞌo cuaꞌ ñii, loꞌ ndiꞌin um tsala xaa, siꞌyana cuaꞌ mchcuan um chaꞌ cuiyaꞌ nu tlyu ꞌin um loꞌ mdyisnan ndlo um tñan.
\v 18 Nchgaa nten chendyu ycuen tiqueꞌ neꞌ, loꞌ mtsaꞌan yuꞌhui chaꞌ nsinꞌ tiꞌ tiquee um loꞌo neꞌ, cuaꞌ mdiyaa tsaan cuꞌni um xñan bsya ꞌin nchgaa nu ngujui, cuiꞌ cuañaꞌan taa um chaꞌ tsuꞌhue nu quiꞌni caꞌan ꞌin nchgaa nguso nu mxiycuiꞌ um ꞌin cuaꞌ sꞌni, loꞌo nu mdoꞌo hui ꞌin um, nu nguiꞌni tnu ꞌin um, nu suhue ti loꞌo nu cula, a cunta cujlyo um ꞌin nchgaa nu nguiꞌni tiꞌi loo chendyu re.
\v 19 Xacanꞌ nguila tucua laa ꞌin Ndiose la niꞌ cuaan, loꞌ ncua chcanꞌ nscua quiñanꞌ seꞌen yuꞌhui chaꞌ nu mdiꞌin tyaa Ndiose loꞌo neꞌ Israel cuaꞌ sꞌni, loꞌ mdyisnan ndyuhui, ngune scasca cueen, ytsu tyiꞌyu, mdyisnan nguñan loꞌ nguꞌya quio quee nu tnu.
\c 12
\s Chaꞌ ꞌin neꞌ cunaꞌan loꞌo cunaan tlyu 

\p
\v 1 Niꞌ cuaan ncua chcanꞌ sca chaꞌ nu tnu, chaꞌ ꞌin sca neꞌ cunaꞌan nu lcoꞌ sca teꞌ nduhui tsañaꞌan cucha, ndon neꞌ loo cooꞌ, loꞌ que neꞌ nducua sca corona nu ngaꞌan tsa tichcua cuii.
\v 2 Neꞌ cunaꞌan canꞌ cuaꞌ mxilyo ñaꞌan neꞌ, loꞌ nsiꞌya tiꞌi neꞌ siꞌyana cuaꞌ mdiyaa braa nu tyijyin yuꞌhui ꞌin neꞌ.
\v 3 A cunta ncua chcanꞌ xca chaꞌ nu tnu niꞌ cuaan, chaꞌ ꞌin sca cunaan tlyu nu ngaꞌá, loꞌ nducua tsa cati que ꞌin loꞌo tsa tii yca que ꞌin, cunda scaa que ꞌin nducua scaa corona.
\v 4 Tiꞌ chinꞌ ti a mdiyaa tluꞌhue cuii nducua niꞌ cuaan ncua qui jeꞌen ꞌin, loꞌ mxityu ꞌin ꞌin na loo chendyu. Cunaan tlyu canꞌ cuaꞌ ndon tiyaa, cuiꞌ ti seꞌen nducua neꞌ cunaꞌan nu cuaꞌ tyijyin yuꞌhui ꞌin canꞌ, siꞌyana cu sñeꞌ neꞌ ñaꞌaan tiyaan chendyu.
\v 5 Sca cuhuiꞌ quiꞌyu mdiꞌin ꞌin neꞌ cunaꞌan canꞌ, yu nu culo tñan sca chcui chendyu loꞌo chaꞌ cuiyaꞌ nu tlyu, una jui nu ngulyoo sñeꞌ neꞌ cunaꞌan canꞌ loo chendyu re, loꞌ mdiyaa canꞌ tloo Ndiose seꞌen nducua ñi.
\v 6 Neꞌ cunaꞌan canꞌ msnan yuꞌhui neꞌ sca seꞌen ngutyi, sca seꞌen mꞌni chuꞌhue Ndiose tyiꞌin neꞌ, canꞌ caja nu cuꞌni cunta ꞌin neꞌ tsaniꞌ sca mii ntsuꞌhui tucua ciento ntsuꞌhui snan yla tsaan.
\v 7 Chonꞌ ndeꞌen canꞌ mdyisnan sca cusuun la niꞌ cuaan, loꞌ sca angujle nu lca Miguel loꞌo nchgaa angujle ꞌin, ngusuun loꞌo cunaan tlyu canꞌ, loꞌ cunaan tlyu canꞌ loꞌo nchgaa angujle ꞌin cuiꞌ cuañaꞌan ngusuun.
\v 8 Una a mꞌni cunaan tlyu canꞌ canan, ñi a jui ꞌa seꞌen tyiꞌin canꞌ la niꞌ cuaan loꞌo angujle ꞌin.
\v 9 Jui nu ngulo ꞌin cunaan tlyu canꞌ la niꞌ cuaan, cuiꞌ cunaan nu ndiꞌin cuaꞌ sꞌni nu nchcuiꞌ neꞌ loꞌo lca laxaꞌan loꞌo Satanás, nu ndaꞌan ñilyiꞌo ꞌin nten sca chcui chendyu, loꞌ tiꞌ la niꞌ cuaan jui nu mxityu ꞌin canꞌ loꞌo angujle ꞌin.
\v 10 Xacanꞌ ngune ꞌñan jui sca nu ycuiꞌ cueen la niꞌ cuaan: Cuaꞌ ñii ncua chcanꞌ loo ñaꞌan ngulo laa Ndiose ꞌin nten, loꞌ tsala ñaꞌan tlyu chaꞌ cuiyaꞌ ntsuꞌhui ꞌin ñi loꞌo seꞌen ndlo ñi tñan tsatlyu loꞌo Cristo ꞌin ñi, siꞌyana cuaꞌ jui nu ngulo tsoꞌ ꞌin nu nsuꞌhua quiꞌya ꞌin jun taꞌa na tloo Ndiose, tla loꞌ cucha.
\v 11 Cuaꞌ mꞌni jun canan ꞌin canꞌ siꞌya tne ñi nu lca Slyaꞌ, a cunta siꞌya chaꞌ nu ñi ꞌin Ndiose ycuiꞌ jun xa nu mdyaa jun cusya ꞌin jun siyaꞌ ti siꞌya chaꞌ canꞌ.
\v 12 Canꞌ chaꞌ niꞌ cuaan, ca tsuꞌhue chuꞌhui tiquee na tsatlyu loꞌo nchgaa nu ndiꞌin la cua, una ꞌtnan ca nchgaa nu ndiꞌin loo chendyu re loꞌo nu ntsuꞌhui loo tyiꞌa tujoꞌo, siꞌyana cuaꞌ mdiyaan laxaꞌan seꞌen ndiꞌin um, loꞌ lyee nchcuen tiqueꞌ siꞌyana jlyo tiꞌ tiꞌ chinꞌ ti xaa tiꞌ lyijyi ꞌin.
\v 13 Una cunaan tlyu canꞌ xa ngujlyo tiꞌ siꞌyana cuaꞌ mdiyaan loo chendyu re, mdyisnan mducui nchaꞌan ꞌin neꞌ cunaꞌan nu mdiꞌin cuhuiꞌ quiꞌyu ꞌin canꞌ.
\v 14 Loꞌ jui nu mdaa tucua jlyuꞌhue ꞌin neꞌ cunaꞌan canꞌ, cuiꞌ jlyuꞌhue cuiꞌya tnu siꞌyana tca chcui neꞌ loꞌ chcua tijyoꞌ neꞌ siiꞌ cunaan canꞌ, loꞌ tiyaa neꞌ seꞌen caja nu cuꞌni cunta ꞌin neꞌ seꞌen ngutyi canꞌ tsaniꞌ snan yjan tluꞌhue.
\v 15 Tuꞌhua cunaan canꞌ mdoꞌo tyiꞌa tlya nu xiluꞌhua ꞌin neꞌ cunaꞌan canꞌ seꞌen nguiaa neꞌ.
\v 16 Una yuu canꞌ mda yaaꞌ na ꞌin neꞌ cunaꞌan canꞌ, nu mxiyiꞌo na tyiꞌa tlya nu mdoꞌo tuꞌhua cunaan tlyu canꞌ.
\v 17 Xacanꞌ lyee la ycuen tiqueꞌ cunaan tlyu canꞌ loꞌo neꞌ cunaꞌan canꞌ, mdoꞌo nguiaa yꞌni cusuun loꞌo nchgaa ta nten ꞌin neꞌ, nchgaa nu nxuꞌhua seꞌen chaꞌ nu ndlo Ndiose tñan, loꞌ ndaa suun chaꞌ ꞌin Jesucristo.
\c 13
\s Chaꞌ ꞌin tucua ꞌni la 

\p
\v 1 Nanꞌ ndon tuꞌhua ysin tujoꞌo, loo tyiꞌa canꞌ naꞌan mdoꞌo sca ꞌni la nu cati que loꞌ tsa tii yca que ꞌin, cunda scaa yca que canꞌ nducua scaa corona, cunda scaa que canꞌ ngaꞌan sca nii nu ndaja ꞌin Ndiose.
\v 2 Loꞌ ꞌni la canꞌ chcanꞌ ꞌin ñaꞌan cuichi leopardo, loꞌ quiyaꞌ ꞌin tsañaꞌan quiyaꞌ oso, loꞌ tuꞌhua ꞌin tsañaꞌan tuꞌhua cuichi. Cunaan tlyu canꞌ ticuiꞌ chaꞌ cuiyaꞌ nu ndaꞌan loꞌo mdaa ꞌin canꞌ, seꞌen chcua culo tñan loꞌo chaꞌ cuiyaꞌ nu tlyu.
\v 3 Naꞌan siꞌyana sca que ꞌni la canꞌ ngujui yuhuaꞌ na nu tiꞌ chinꞌ a ngujui ti ꞌin, una mchca seꞌen tiꞌi canꞌ, loꞌ sca chcui chendyu yuhue tiꞌ neꞌ loꞌ mducui nchaꞌan neꞌ ꞌin ꞌni la canꞌ.
\v 4 Mꞌni tnu neꞌ ꞌin cunaan tlyu canꞌ nu mdaa chaꞌ cuiyaꞌ ꞌin ꞌni la canꞌ, a cunta loꞌo ꞌni la canꞌ mdyisnan mꞌni tnu neꞌ ꞌin, loꞌ nchcuiꞌ neꞌ: ¿Ti ca nu chcua taꞌa chaꞌ ꞌin loꞌo ꞌni la re, loꞌ ti ca nu tca xuun loꞌo ꞌin?
\v 5 A cunta mxiycuiꞌ cunaan tlyu canꞌ ꞌin ꞌni la canꞌ siꞌyana loꞌo chaꞌ siyeꞌ chcuiꞌ chaꞌ nu tnu loꞌ taja ꞌin Ndiose, loꞌ jui chaꞌ cuiyaꞌ ꞌin siꞌyana culo tñan tsaniꞌ tucua yla ntsuꞌhui tucua cooꞌ.
\v 6 Cuañaꞌan mdyisnan mdaja canꞌ ꞌin Ndiose, ycuiꞌ caꞌan ꞌin ñi loꞌ mdaja niꞌ cuaan seꞌen nducua ñi loꞌo nchgaa nu ndiꞌin canꞌ.
\v 7 Jui chaꞌ cuiyaꞌ ꞌin canꞌ siꞌyana xuun loꞌo jun nu cuaꞌ mdoꞌo hui ꞌin Ndiose, loꞌ cuꞌni canan ꞌin jun. A cunta jui chaꞌ cuiyaꞌ ꞌin siꞌyana culo tñan ꞌin nchgaa ta nten, quichen tnu loꞌo quichen suhue ti, loꞌo nu nchcuiꞌ xca loo chaꞌ.
\v 8 Ñaꞌaan nten chendyu mꞌni tnu neꞌ ꞌin ꞌni la canꞌ, tsalca nu a nducua nii loo quityi ꞌin ñi nu lca Slyaꞌ nu yjui neꞌ ꞌin, cuiꞌ quityi seꞌen nducua nii nchgaa nu cuaꞌ jui chendyu ꞌin xa tiꞌ lyijyi tñan ñi chendyu re.
\v 9 Chaꞌ ntsuꞌhui nu ne ꞌin chaꞌ re, cuꞌni cunta ꞌin na.
\v 10 —Chaꞌ ntsuꞌhui nu tsa loꞌo neꞌ ꞌin naꞌan chcuan, tsaa tu canꞌ naꞌan chcuan, chaꞌ ntsuꞌhui nu cujui neꞌ ꞌin loꞌo spada, caja tu canꞌ loꞌo spada—. Nde ca chcanꞌ ñaꞌan tsala ñaꞌan ta loo nchgaa nu cuaꞌ mdoꞌo hui ꞌin Ndiose, loꞌ tsala ñaꞌan ndiya quiꞌan tiꞌ ꞌin ñi.
\v 11 Chonꞌ ndeꞌen la canꞌ naꞌan mdoꞌo tucua xca ꞌni la nde loo chendyu re, loꞌ nducua tucua yca que ꞌin tsañaꞌan nchca tiꞌ yca que slyaꞌ, una nchcuiꞌ tsañaꞌan nchcuiꞌ sca cunaan tlyu.
\v 12 Ndon loꞌo canꞌ ñaꞌaan chaꞌ cuiyaꞌ ꞌin ꞌni la nu culoo canꞌ, loꞌ nxicuꞌni ꞌin nten sca chcui chendyu siꞌyana cuꞌni tnu neꞌ ꞌin ꞌni la nu culoo canꞌ, cuiꞌ nu ngujui yuhuaꞌ que loꞌ mchca.
\v 13 A cunta nꞌni canꞌ chaꞌ nu tnu, loꞌ nchca ndyiꞌya quiiꞌ nde niꞌ cuaan tloo naꞌan nten canꞌ.
\v 14 Siꞌya scasca chaꞌ nu tnu canꞌ, ñilyiꞌo ꞌin nten, cuiꞌ siꞌya chaꞌ cuiyaꞌ ꞌin ꞌni la nu culoo canꞌ, loꞌ ndlo canꞌ tñan ꞌin nten siꞌyana tñan neꞌ lcuin ꞌni la nu culoo canꞌ, cuiꞌ nu ngujui yuhuaꞌ que loꞌo spada loꞌ tiꞌ mchca.
\v 15 Loꞌ jui chaꞌ cuiyaꞌ ꞌin suꞌhua cusya ꞌin lcuin ꞌni la canꞌ, siꞌyana tca chcuiꞌ lcuin canꞌ loꞌ cuꞌni chaꞌ caja nchgaa nu a xlya cuꞌni tnu ꞌin.
\v 16 A cunta mꞌni canan siꞌyana nchgaa tucui chaꞌan cuiyaꞌ ꞌin, yaaꞌ tsoꞌ cueen ꞌin neꞌ uta tuchcan neꞌ, nchgaa nu suhue ti loꞌo nu cula, loꞌo nu cuilyiyaꞌ loꞌo nu tiꞌi ñaꞌan chendyu ꞌin, nu lca nguso nu msiꞌi neꞌ ꞌin loꞌo nu nguiꞌni tñan chaꞌ ꞌin ti.
\v 17 Loꞌ a tucui ꞌa nu tiꞌ tca cujuiꞌ uta xiꞌi na, chaꞌ a ngaꞌan cuiyaꞌ ꞌin, cuiꞌ nii ꞌni la canꞌ, uta cuiyaꞌ nu lyiꞌya nii canꞌ.
\v 18 Nde najoꞌo chaꞌ tiyaa. Nu ndyiꞌya cunta tca cua cuiyaꞌ ꞌin ꞌni la canꞌ, loꞌ cuiyaꞌ canꞌ lca na cuiyaꞌ ꞌin nten chendyu, loꞌ lca na scua ciento ntsuꞌhui snan yla ntsuꞌhui scua.
\c 14
\s Nguila neꞌ sca jyiin nu cui ti 

\p
\v 1 Xacanꞌ mxinaꞌan, loꞌ naꞌan ndon ñi nu lca Slyaꞌ sca loo quiꞌya nu naan Sion, tsatlyu loꞌo sca ciento ntsuꞌhui tucua yla ntsuꞌhui jacua mii yu nu cuaꞌ nguaꞌan nii ñi tuchcan, a cunta loꞌo nii Sti ñi.
\v 2 Ngune ꞌñan jui nu ycuiꞌ la niꞌ cuaan, loꞌ ngune na tsañaꞌan nchca tiꞌ ljyaan tyiꞌa tlya, tsañaꞌan ne xa ngula ꞌa nchu tyiꞌyu, loꞌ tyiꞌi nu nchcuiꞌ canꞌ ne na tsañaꞌan nchca tiꞌ xa ndla neꞌ cuhuii nu naan arpa.
\v 3 Nguila yu sca jyiin nu cui ti tloo ñi nu nducua seꞌen nchca cuiyaꞌ chaꞌ, loꞌo tloo jacua nu loꞌo ca canꞌ, loꞌo quiꞌyu cula canꞌ. Ñi a tucui nu ncua ꞌin cuꞌni chaꞌan jyiin canꞌ, tsaloo ti sca ciento ntsuꞌhui tucua yla ntsuꞌhui jacua mii yu canꞌ, cuiꞌ nu cuaꞌ ngulo laa ñi ꞌin lja ta nten chendyu.
\v 4 Nde yu nu nsñi cunta ꞌin, nu a nchca siyaꞌ quiꞌni caꞌan ꞌin neꞌ cunaꞌan. Nducui nchaꞌan ꞌin ñi nu lca Slyaꞌ nchgaa seꞌen nguiaa ñi. Nde yu nu mdoꞌo laa lja nten chendyu siꞌyana ca yu nu culoo, loꞌ Ndiose loꞌo ñi nu lca Slyaꞌ tucua tloo ꞌin yu.
\v 5 Ñi sca chaꞌ cuiñi a mdoꞌo tuꞌhua yu, lca yu sca nu luhui tloo Ndiose seꞌen nducua ñi.
\s Chaꞌ nu nchcuiꞌ snan angujle
\p
\v 6 Xacanꞌ naꞌan tluꞌhue la niꞌ cuaan mducui xca angujle, loꞌ ljyan loꞌo sca suun, cuiꞌ chaꞌ tsuꞌhue ꞌin Ndiose nu a ntsuꞌhui chaꞌ tsatii, siꞌyana quine ꞌin nchgaa nten chendyu, quichen tnu loꞌo quichen suhue ti, nchgaa ta nten, loꞌo nu nchcuiꞌ xca loo chaꞌ.
\v 7 Nchcuiꞌ cueen angujle canꞌ: Chuꞌhui sca ytsen ꞌin um loꞌo Ndiose loꞌ cuꞌni tnu um ꞌin ñi, siꞌyana cuaꞌ mdiyaa braa nu cuꞌni ñi xñan bsya. Cuꞌni tnu um ꞌin ñi nu mtñan niꞌ cuaan loꞌo chendyu, loꞌo tyiꞌa tujoꞌo, loꞌo nchgaa seꞌen nducua tyiꞌa.
\v 8 Tiꞌ ycuiꞌ xca angujle nu yaan nde chonꞌ canꞌ: —Cuaꞌ ngujlyo, cuaꞌ ngujlyo Babilonia, cuiꞌ quichen tlyu canꞌ—, siꞌyana cuaꞌ ngunanꞌ yuꞌhui nten ndiꞌin sca chcui chendyu siꞌya chaꞌ ngunanꞌ nu mꞌni.
\v 9 Nu cuaꞌ nchca snan angujle nu yaan nde chonꞌ canꞌ ycuiꞌ cueen: Chaꞌ ntsuꞌhui nu cuꞌni tnu ꞌin ꞌni la canꞌ uta lcuin ꞌin, loꞌ chaꞌ taa yaꞌ chaꞌan cuiyaꞌ ꞌin ꞌin tuchcan uta yaaꞌ,
\v 10 ticuiꞌ cuañaꞌan Ndiose loꞌo chaꞌ nsinꞌ tiꞌ ntsuꞌhui tiquee ñi xitijin ñi ꞌin canꞌ nu tiꞌi, seꞌen nu culyoo ñi chaꞌ nsinꞌ tiꞌ nu mtsaꞌan yuꞌhui niꞌ cusya ꞌin ñi, loꞌ tyijyin canꞌ nu tiꞌi loo quiiꞌ ndiquin loꞌo azufre, loꞌ tsatoꞌo chaꞌ re tloo nchgaa angujle nu luhui ꞌin Ndiose loꞌo ñi nu lca Slyaꞌ.
\v 11 Tsala xaa ntsuꞌhui chaꞌ tyiꞌo sñi ꞌin nu ntsuꞌhui loo quiiꞌ canꞌ, scañaꞌan ti ndijin canꞌ nu tiꞌi tla loꞌ cucha, nu mꞌni tnu ꞌin ꞌni la canꞌ uta loꞌo lcuin ꞌin, cuiꞌ cuañaꞌan loꞌo nu nguaꞌan cuiyaꞌ nii canꞌ ꞌin.
\v 12 Nde nchca chcanꞌ ñaꞌan tsala ñaꞌan nda loo jun nu cuaꞌ mdoꞌo hui ꞌin Ndiose, nchgaa jun nu nxuꞌhua seꞌen chaꞌ nu nchcuiꞌ ñi loꞌ ndiya quiꞌan tiꞌ ꞌin Jesús.
\v 13 Ngune ꞌñan jui nu ycuiꞌ tiꞌ la niꞌ cuaan: Caꞌan sca chaꞌ nu chcuinꞌ loꞌo: Tsuꞌhue ca xuꞌhue nu caja tiꞌ cuaꞌ ñii chcui nu nguiaa nde loo, tsalca nu ndiya quiꞌan tiꞌ ꞌin Ñi Xꞌnan na. Nchcuiꞌ Espíritu: Chaꞌ ñi ca, xitñanꞌ canꞌ loꞌo nchgaa tñan nu mꞌni, siꞌyana cuaꞌ ncua chcanꞌ loo tñan tsuꞌhue nu mꞌni canꞌ.
\s Xa ca cuiyaꞌ chaꞌ ꞌin nten
\p
\v 14 Mxinaꞌan, loꞌ ncua chcanꞌ sca ndla mten, canꞌ nducua Yu Quiꞌyu nu Mdoꞌo nde niꞌ Cuaan, nducua sca corona oro quee ñi, loꞌ yaaꞌ ñi nducua sca bxtyi cha.
\v 15 Niꞌ lyaa canꞌ mdoꞌo xca angujle nu nchcuiꞌ cueen loꞌo ñi nu nducua loo ndla canꞌ: Tyisnan lya um loꞌ siꞌyu um, cuaꞌ mdiyaa braa quioꞌ nchgaa na nu nducua loo chendyu, tsala ñaꞌan cuaꞌ nguhuen na.
\v 16 Ñi nu nducua loo ndla canꞌ mdyisnan msiꞌyu ñi ꞌin na, loꞌ mxoꞌ ñi nchgaa na nu nducua loo chendyu.
\v 17 Mdoꞌo xca angujle niꞌ lyaa nu nducua niꞌ cuaan canꞌ, loꞌo canꞌ nducua sca bxtyi cha yaaꞌ.
\v 18 Seꞌen nꞌni tnu jun ꞌin Ndiose mdoꞌo xca angujle nu ntsuꞌhui cunta ꞌin quiiꞌ, loꞌ cueen ycuiꞌ loꞌo nu nducua bxtyi cha yaaꞌ canꞌ: Siꞌyu lya nchgaa stya uva nu nducui loo chendyu siꞌyana cuaꞌ nguhuen na.
\v 19 Angujle canꞌ mdyisnan msiꞌyu nchgaa stya uva nu nducui canꞌ, loꞌ msuꞌhua ꞌin na seꞌen nu ntsuꞌhui chaꞌ culo Ndiose chaꞌ nsinꞌ tiꞌ tiquee ñi loꞌo uva canꞌ.
\v 20 La tuꞌhua quichen canꞌ nguloꞌ suꞌhua ñi mti uva canꞌ, loꞌ tlya tne nguilo ꞌin na tsayaꞌ mdiyaa na seꞌen ntsuꞌhui ti tuꞌhua cuiyu, a cunta msnan na tsa seꞌen ntsuꞌhui lyoo snan ciento kilometro.
\c 15
\s Chaꞌ ꞌin angujle nu ljyan loꞌo cati nu tiꞌi 

\p
\v 1 Xacanꞌ naꞌan xca chaꞌ la niꞌ cuaan, chaꞌ nu tnu, chaꞌ nu cuhue tiꞌ na, loꞌ naꞌan ndon tsa cati angujle nu ljyan loꞌo cha cati loo nu tiꞌi nu ntsuꞌhui chaꞌ tyijyin nten chendyu tiyaa xaa, siꞌyana loꞌo chaꞌ canꞌ tsatii chaꞌ nsinꞌ tiꞌ nu ntsuꞌhui tiquee Ndiose.
\v 2 A cunta naꞌan su ñaꞌan nchca tiꞌ tyiꞌa tujoꞌo nu chacuiꞌ cunan nu nducua quiiꞌ loo, loꞌ loo tyiꞌa canꞌ ndon nu cuaꞌ mꞌni canan ꞌin ꞌni la canꞌ, siꞌyana a mꞌni tnu canꞌ ꞌin ꞌin uta lcuin ꞌin, ñi a mdaa yaꞌ chaꞌan cuiyaꞌ ꞌin, loꞌ nducua cuhuii nu naan arpa yaaꞌ,
\v 3 loꞌ nguila canꞌ jyiin nu yla Moisé nu lca nguso ꞌin Ndiose, a cunta nguila jyiin ꞌin ñi nu lca Slyaꞌ nu nchcuiꞌ: Ndiose Xꞌnan hua, ꞌun ñi nu tlyu la chaꞌ cuiyaꞌ ntsuꞌhui ꞌin, tsala ñaꞌan tnu tñan nguiꞌni um loꞌ nduhue tiꞌ hua ꞌin na, luhui chaꞌ tiyaa ꞌin um loꞌ ñi ndiꞌin chaꞌ ꞌin um, ꞌun nu lca Ree ꞌin nchgaa nu mdoꞌo hui ꞌin um.
\v 4 ꞌUn Ñi Xꞌnan hua, ¿ti ca nu a xicutsen tiꞌ ꞌin um, loꞌ ti nu a cuꞌni tnu ꞌin um? Scati um lca um ñi nu luhui lati, canꞌ chaꞌ ñaꞌaan nten chendyu ntsuꞌhui chaꞌ cuꞌni tnu neꞌ ꞌin um, siꞌyana cuaꞌ ncua chcanꞌ loo xñan bsya nu ñi ꞌin um.
\v 5 Chonꞌ ndeꞌen canꞌ mxinaꞌan, loꞌ ncua chcanꞌ ꞌñan nde niꞌ cuaan seꞌen nguila tucua tulaa seꞌen nscua quee nu ngaꞌan chaꞌ nu mdiꞌin tyaa Ndiose loꞌo Moisé,
\v 6 loꞌ niꞌ lyaa canꞌ mdoꞌo tsa cati angujle nu ljyan loꞌo tsa cati loo nu tiꞌi, lcoꞌ canꞌ teꞌ nu tsuꞌhue ñaꞌan mten nu nduhui, loꞌ nchcanꞌ jyan tiquee canꞌ loꞌo cintya nu chacuiꞌ oro.
\v 7 Loꞌ jacua nu loꞌo ca canꞌ, sca canꞌ mdaa tsa cati copa oro ꞌin taꞌa cati angujle canꞌ, loꞌ mtsaꞌan yuꞌhui copa canꞌ loꞌo chaꞌ nsinꞌ tiꞌ ntsuꞌhui tiquee Ndiose, ñi nu ndiꞌin tsala xaa.
\v 8 Niꞌ lyaa canꞌ mtsaꞌan yuꞌhui sñi nu mdoꞌo loo xaa ꞌin ñi siꞌya chaꞌ cuiyaꞌ nu tlyu ꞌin ñi, ñi a tucui ꞌa nu tiꞌ ncua sten niꞌ lyaa canꞌ, cuiꞌ ca nu la mdijin taꞌa cati loo nu tiꞌi nu yan loꞌo cati angujle canꞌ.
\c 16
\s Chaꞌ ꞌin copa nu mtsaꞌan yuꞌhui loꞌo chaꞌ nsinꞌ tiꞌ 

\p
\v 1 Tiꞌ la niꞌ lyaa canꞌ ngune ꞌñan jui nu ycuiꞌ loꞌo tsa cati angujle canꞌ: Ya lya um loꞌ slo tiꞌin um chaꞌ nsinꞌ tiꞌ ntsuꞌhui tiquee Ndiose loo chendyu, nu ntsuꞌhui niꞌ tsa cati copa cua.
\v 2 Culoo angujle nu yaa canꞌ mxiquilyu copa ꞌin loo chendyu, loꞌ cuiꞌ xaa mdoꞌo tucua quitsoꞌ ꞌin nten, loꞌ mdyisnan nguꞌhua na loꞌ mducui cutseꞌ ꞌin na, cuiꞌ neꞌ nu nguaꞌan cuiyaꞌ ꞌin ꞌni la canꞌ ꞌin loꞌ mꞌni tnu lcuin ꞌin.
\v 3 Nu cuaꞌ nchca tucua angujle canꞌ mxiquilyu copa ꞌin loo tyiꞌa tujoꞌo, loꞌ mchca na ñaꞌan tne neꞌ cuaꞌ ngujui, loꞌ ngujui nchgaa ꞌni ntsuꞌhui loo tyiꞌa canꞌ.
\v 4 Nu cuaꞌ nchca snan angujle canꞌ mxiquilyu copa ꞌin loo tyiꞌa chco tlyu, loꞌo seꞌen nducua tyiꞌa, ticuiꞌ cuañaꞌan mchca tne na.
\v 5 Ngune ꞌñan ycuiꞌ angujle nu ntsuꞌhui cunta ꞌin tyiꞌa canꞌ: Ñi ndiꞌin chaꞌ ꞌin um, ꞌun Ñi Xꞌnan hua, ꞌun ñi nu cuaꞌ ndiꞌin tiꞌ culoo, loꞌo cuaꞌ ñii, ꞌun ñi nu Luhui lati, siꞌyana tsuꞌhue nguiꞌni cuiyaꞌ um chaꞌ re.
\v 6 Cuaꞌ ñii mdaa um tne coꞌo neꞌ, loo nu mslo neꞌ tne ꞌin nu mdoꞌo hui ꞌin um, loꞌo nu mxiycuiꞌ um ꞌin cuaꞌ sꞌni, canꞌ chaꞌ ntsuꞌhui suun ꞌin neꞌ tyijyin neꞌ nu tiꞌi re.
\v 7 A cunta ngune ꞌñan jui xca nu ycuiꞌ la seꞌen nꞌni tnu jun ꞌin Ndiose niꞌ cuaan, loꞌ nchcuiꞌ: Ndiose Xꞌnan hua, ꞌun ñi nu tlyu la chaꞌ cuiyaꞌ ntsuꞌhui ꞌin, chaꞌ ñi siꞌyana tsuꞌhue ꞌa nꞌni um xñan bsya loꞌo sca chaꞌ nu ñi.
\v 8 Nu cuaꞌ nchca jacua angujle canꞌ mxiquilyu copa ꞌin loo cucha, loꞌ jui chaꞌ cuiyaꞌ siꞌyana tsuhuenꞌ na ꞌin nten loꞌo quiiꞌ ꞌin na.
\v 9 Nten nu mtsuhuenꞌ canꞌ mdyisnan mdaja neꞌ ꞌin Ndiose, ñi nu ntsuꞌhui chaꞌ cuiyaꞌ ꞌin loꞌo nchgaa loo nu tiꞌi re, loꞌ a mslyaa neꞌ tyaa tiꞌ neꞌ ꞌin Ndiose seꞌen nu cuꞌni tnu neꞌ ꞌin ñi.
\v 10 Nu cuaꞌ nchca caꞌyu angujle canꞌ mxiquilyu copa ꞌin la seꞌen nducua ꞌni la canꞌ, loꞌ ñaꞌaan seꞌen ndlo canꞌ tñan nguinu tla yta na. Nten canꞌ loo nu lyee nduꞌhua ꞌin neꞌ hasta nchcu loꞌo neꞌ tseꞌ neꞌ,
\v 11 loꞌ mdaja neꞌ ꞌin Ndiose, ñi nu nducua niꞌ cuaan, siꞌya tiꞌi nu mdijin neꞌ loꞌo seꞌen ntsuꞌhui cutseꞌ canꞌ, ñi cuañaꞌan a mslyaa neꞌ xiloꞌo chonꞌ neꞌ quiꞌya ꞌin neꞌ.
\v 12 Nu cuaꞌ nchca scua angujle canꞌ mxiquilyu copa ꞌin loo chco tlyu Eufrates, loꞌ ngutyi na siꞌyana cuaꞌ lca su tiyaa na, xa tyijyin yu ree nu tyiꞌo scasca quichen luhuaꞌ seꞌen nchcua cucha.
\v 13 Xacanꞌ naꞌan mdoꞌo snan cuiꞌin xaꞌan tsañaꞌan nchca tiꞌ cuityiꞌ, sca canꞌ mdoꞌo tuꞌhua cunaan tlyu canꞌ, loꞌ xca mdoꞌo tuꞌhua ꞌni la canꞌ, loꞌ xca mdoꞌo tuꞌhua yu cuiñi nu nchcuiꞌ siꞌyana Ndiose nxiycuiꞌ ꞌin.
\v 14 Cuiꞌin canꞌ ndaꞌan loꞌo chaꞌ cuiyaꞌ ꞌin laxaꞌan loꞌ nchca nꞌni chaꞌ nu tnu, loꞌ ndaꞌan xicuꞌni ꞌin nchgaa yu ree sca chcui chendyu siꞌyana quioꞌ tiꞌin yu cuꞌni yu cusuun tsaan nu cuaꞌ mdiꞌin tyaa Ndiose chaꞌ, ñi nu tlyu la chaꞌ cuiyaꞌ ntsuꞌhui ꞌin.
\v 15 Ñaꞌan jan ñi, nanꞌ ljyaan tsati ntyin ñaꞌan nchca tiꞌ sca yu cunan. Tsuꞌhue ca xuꞌhue nu ndiꞌin tiyaa loꞌo teꞌ nu ntsuꞌhui chaꞌ coꞌ, loꞌ a quija lyoo cunanꞌ ti loꞌ caja chaꞌ jyiꞌo ꞌin.
\v 16 Cuiꞌin canꞌ mxoꞌ tiꞌin ꞌin yu ree, sca seꞌen ndloꞌo naan neꞌ loꞌo chaꞌ hebreo Armagedón.
\v 17 Nu cuaꞌ nchca cati angujle canꞌ mxiquilyu copa ꞌin loo cuiꞌin ti, cuiꞌ ñaꞌan lcaa mdoꞌo ycuiꞌ cueen sca nu ycuiꞌ la niꞌ cuaan niꞌ lyaa ꞌin Ndiose, seꞌen nchca cuiyaꞌ chaꞌ, loꞌ nchcuiꞌ: Nchgaa chaꞌ re cuaꞌ lca na.
\v 18 Xacanꞌ mdyisnan ndyuhui loꞌ ngune scasca cueen, ytsu tyiꞌyu, a cunta lyee nguñan, tsañaꞌan nu nguñan canꞌ, ñi siyaꞌ loꞌ a nchca tsatoꞌo cuañaꞌan tiꞌ yaꞌ nu mdyisnan mdiꞌin nten chendyu.
\v 19 Quichen tlyu canꞌ mdoꞌo na snan yuꞌhue, cuañaꞌan ngujlyo scasca quichen nu ndiꞌin sca chcui chendyu. Ndiose nguia yuꞌhui tiꞌ ñi ꞌin quichen Babilonia nu tlyu canꞌ, mxitijin ñi ꞌin neꞌ nu tiꞌi loꞌo chaꞌ nsinꞌ tiꞌ nu mtsaꞌan yuꞌhui tiquee ñi.
\v 20 Ngulyijyi yuꞌhui nchgaa yuu ngutyi nu ndiꞌin tluꞌhue loo tyiꞌa tujoꞌo, cuiꞌ cuañaꞌan ñi xca quiꞌya a ncua chcanꞌ ꞌa na.
\v 21 Mdyisnan nguꞌya quio quee loo chendyu re nu tiꞌin tsa tucua yla kilo scaa na, loꞌ nten canꞌ mdyisnan mdaja neꞌ ꞌin Ndiose siꞌya tiꞌi tnu nu mxitijin ñi ꞌin neꞌ.
\c 17
\s Yuhueꞌ nu caan ꞌin neꞌ cunaꞌan nducunꞌ 

\p
\v 1 Seꞌen ndon yaan sca angujle nu nchca cati canꞌ, cuiꞌ ta nu ndaꞌan loꞌo tsa cati copa canꞌ, loꞌ juin ꞌñan: Cuan lya loꞌ ca cuiyaꞌ tiꞌ tsala nu tiꞌi ljyaan chonꞌ neꞌ cunaꞌan nu lyee la nducunꞌ cua, cuiꞌ nu nducua loo tyiꞌa tlya cua,
\v 2 cuiꞌ neꞌ cunaꞌan nu cuaꞌ yten yuꞌhui loꞌo nchgaa ree nu ndiꞌin loo chendyu re, a cunta ñaꞌaan nten chendyu cuaꞌ ngunanꞌ yuꞌhui neꞌ siꞌya chaꞌ ngunanꞌ nu mꞌni neꞌ.
\v 3 Xacanꞌ mtsaꞌan yuꞌhui Espíritu ꞌñan loꞌ ya loꞌo angujle ꞌñan sca seꞌen ngutyi, loꞌ naꞌan nducua sca neꞌ cunaꞌan chonꞌ sca ꞌni la nu ngaꞌá, loꞌ ñaꞌaan chonꞌ ꞌin ngaꞌan chaꞌ nu ndaja neꞌ ꞌin Ndiose, loꞌ nducua cati que ꞌin loꞌ nducua tsa tii yca que ꞌin.
\v 4 Neꞌ cunaꞌan canꞌ lcoꞌ neꞌ sca teꞌ cuaa nu mxitiyaaꞌ loꞌo colo ngaꞌá, loꞌ ncua tsuꞌhue neꞌ loꞌo chacuiꞌ oro, loꞌo quee nduhui, a cunta loꞌo chcanꞌ quee nu mten. Nducua sca copa oro yaaꞌ neꞌ nu mtsaꞌan yuꞌhui loꞌo chaꞌ ngunanꞌ ꞌin neꞌ, cuiꞌ chaꞌ nducunꞌ nu nguiꞌni neꞌ loꞌo nten chendyu.
\v 5 Tuchcan neꞌ ngaꞌan sca nii, cuiꞌ chaꞌ nu ntsuꞌhui nchcun, loꞌ nchcuiꞌ na: Quichen Babilonia nu tlyu canꞌ, lca na jyiꞌan nchgaa neꞌ cunaꞌan nducunꞌ, suun nchgaa chaꞌ ngunanꞌ nu nchca loo chendyu re.
\v 6 Neꞌ cunaꞌan canꞌ lyee cuꞌhui neꞌ loꞌo tne nu mslo neꞌ ꞌin nu mdoꞌo hui ꞌin Ndiose, cuiꞌ tne nu nguilo siꞌya chaꞌ ꞌin Jesús, loꞌ xa naꞌan chaꞌ canꞌ ndyijyin yaꞌ yuhue tinꞌ.
\v 7 Angujle canꞌ juin ꞌñan: ¿Ñi chaꞌ nduhue tiꞌ? Nanꞌ quitsanꞌ ꞌin nchgaa ñaꞌan ndiꞌin chaꞌ ꞌin neꞌ cunaꞌan re, a cunta loꞌo ñaꞌan ndiꞌin chaꞌ ꞌin ꞌni la nu ljyan loꞌo ꞌin neꞌ, cuiꞌ ꞌni nu nducua cati que loꞌ nducua tsa tii yca que ꞌin.
\v 8 ꞌNi la nu naꞌan canꞌ mdiꞌin ꞌin sca coꞌ xaa, una cuaꞌ ñii a la ꞌa ne cueen ꞌin, una cuaꞌ nchcui cuiiꞌ chaꞌ tyiꞌo ꞌin seꞌen ntsuꞌhui ꞌin seꞌen quiꞌñi canꞌ, loꞌ tsaa ꞌin seꞌen ntsuꞌhui chaꞌ jlyo ꞌin. Nten nu a ngaꞌan nii loo quityi ꞌin Ndiose, seꞌen nducua nii nchgaa nu cuaꞌ jui chendyu ꞌin xa nu tiꞌ lyijyi tñan ñi chendyu, cuhue tiꞌ neꞌ xa ñaꞌan neꞌ ꞌni la canꞌ, cuiꞌ ꞌni nu mdiꞌin sca coꞌ xaa, siyaꞌ cuaꞌ ñii a la ꞌa ne cueen ꞌin, una xiyaꞌ ntsuꞌhui chaꞌ ca chcanꞌ loo ꞌin.
\v 9 Nde chaꞌ nu quiꞌya cunta nten nu tiyaa: Tsa cati que canꞌ lca na tsa cati quiꞌya seꞌen nducua neꞌ cunaꞌan canꞌ,
\v 10 a cunta lca na chaꞌ ꞌin tsa cati ree, caꞌyu canꞌ cuaꞌ mdijin chaꞌ ꞌin, loꞌ xca canꞌ tiꞌ ndlo tñan cuaꞌ ñii, una xca canꞌ tiꞌ lyijyi tyiꞌo ton, loꞌ xa nu caan ntsuꞌhui chaꞌ culo tñan sca coꞌ xaa.
\v 11 Loꞌ ꞌni la nu mdiꞌin sca coꞌ xaa, nu a la ꞌa ne cueen cuaꞌ ñii, loꞌo canꞌ lca nu cuaꞌ nchca snuꞌ, cuiꞌ loo ta ꞌin tsa cati ree tyiꞌo ton canꞌ, una tsatoꞌo quinanꞌ.
\v 12 Tsa tii yca que nu naꞌan canꞌ lca tsa tii ree nu tiꞌ lyijyi chcuan chaꞌ cuiyaꞌ, una tsaniꞌ sca braa culo canꞌ tñan tsatlyu loꞌo ꞌni la canꞌ.
\v 13 Sca chaꞌ ti ꞌin taꞌa tsa tii ree canꞌ, loꞌ taa chaꞌ cuiyaꞌ ꞌin ꞌni la canꞌ siꞌyana culo ꞌin tñan.
\v 14 Loꞌ ꞌni la loꞌo ree canꞌ xuun loꞌo ñi nu lca Slyaꞌ, una cuꞌni ñi canan siꞌyana lca Ñi Xꞌnan nchgaa tucui, loꞌ lca ñi Ree nu tlyu lati, loꞌ tsalca nu msiꞌya ñi ꞌin, nu ngulohui ñi ꞌin, loꞌ ñi ndiꞌin chaꞌ ꞌin, canꞌ nu tyiꞌin loꞌo ñi xacanꞌ.
\v 15 Tiꞌ juin la angujle ꞌñan: Tyiꞌa tlya nu naꞌan seꞌen nchcua neꞌ cunaꞌan nducunꞌ canꞌ, lca na nten quiꞌan, quichen tnu loꞌo quichen suhue ti, loꞌo nu nchcuiꞌ xca loo chaꞌ.
\v 16 Tsa tii yca que nu naꞌan nducua ꞌin ꞌni la canꞌ, canꞌ nu ñaꞌan tiꞌi ꞌin neꞌ cunaꞌan nducunꞌ canꞌ, loꞌ xnu ꞌin neꞌ loo chaꞌ jyiꞌo, cujlyo ꞌin loꞌ tiquin ꞌin neꞌ.
\v 17 Ndiose mduꞌhui tiquee ree canꞌ cuꞌni tsañaꞌan nu nchca tiꞌ ñi, loꞌ sca chaꞌ ti ꞌin nchgaa canꞌ siꞌyana taa chaꞌ cuiyaꞌ culo ꞌni la canꞌ tñan, loꞌ cuañaꞌan tsa quiñan tsayaꞌ nu tsatoꞌo chaꞌ nu cuaꞌ mdiꞌin tyaa Ndiose.
\v 18 Neꞌ cunaꞌan nu naꞌan canꞌ lca na cuiꞌ quichen tnu nu ndlo tñan ꞌin nchgaa ree sca chcui chendyu.
\c 18
\s Xa ngujlyo Babilonia 

\p
\v 1 Chonꞌ ndeꞌen canꞌ naꞌan mdoꞌo xca angujle nde niꞌ cuaan nu ndaꞌan loꞌo sca chaꞌ cuiyaꞌ nu tlyu, loꞌ ñaꞌaan chendyu msti xaa ꞌin.
\v 2 Nchcuiꞌ cueen canꞌ: —Cuaꞌ ngujlyo, cuaꞌ ngujlyo quichen Babilonia, cuiꞌ quichen nu tlyu canꞌ—, xtyi cuiꞌin xaꞌan ti ndon loo canꞌ loꞌo scasca loo cuiꞌin, loꞌ mchca na naꞌan tyi cuati loo ꞌni cuityi, ꞌni nchcui, ꞌni chen ñaꞌan.
\v 3 Yatoꞌo chaꞌ re siꞌyana ñaꞌaan nten chendyu cuaꞌ ngunanꞌ yuꞌhui neꞌ siꞌya chaꞌ ngunanꞌ nu nguiꞌni canꞌ, a cunta nchgaa ree cuaꞌ yten yuꞌhui loꞌo canꞌ, cuiꞌ cuañaꞌan ncua cuilyiyaꞌ nu nguiꞌni jyinsya loo chendyu re, siꞌya chaꞌ siyeꞌ ꞌin quichen canꞌ.
\v 4 Ngune ꞌñan ycuiꞌ xca nu ycuiꞌ la niꞌ cuaan: Tyiꞌo um quichen cua, nchgaa ꞌun nu cuaꞌ mdoꞌo hui ꞌñan, siꞌyana a ca taꞌa loꞌo um quiꞌya nguiꞌni neꞌ, ñi a quiꞌni caꞌan ꞌin um yuhueꞌ nu caan ꞌin neꞌ.
\v 5 Siꞌyana quiꞌan ꞌa quiꞌya cuaꞌ nducui neꞌ tloo Ndiose la niꞌ cuaan, loꞌ a njlya tiꞌ ñi quiꞌya nguiꞌni canꞌ.
\v 6 Xuꞌhua lyiyaꞌ um ꞌin neꞌ tsañaꞌan nu mꞌni neꞌ loꞌo um, xitucui um chaꞌ canꞌ loꞌo neꞌ tucua ta, loꞌ ñaꞌan nu ngunanꞌ suꞌhua neꞌ ꞌin xca tucui, cuañaꞌan tucua juesa xitiyaaꞌ yuhueꞌ nu caan ꞌin neꞌ.
\v 7 Tsañaꞌan siyeꞌ neꞌ loꞌ mdyaa neꞌ ꞌin neꞌ loo chaꞌ nducui tiꞌ, una cuaꞌ ñii xitijin um ꞌin neꞌ nu tiꞌi lyee yaꞌ, siꞌyana ndeñaꞌan nchcuiꞌ neꞌ: Nanꞌ lcan nu ndlo tñan, loꞌ a lcan nu nguinu loꞌo chaꞌ ycuiꞌ ti, ñi a ntsuꞌhui chaꞌ tijin nu tiꞌi.
\v 8 Canꞌ chaꞌ tsaniꞌ sca tsaan ti ntsuꞌhui chaꞌ caan nu tiꞌi ꞌin neꞌ, chaꞌ ndyija, chaꞌ nduhue tiꞌ, loꞌo bjuꞌñan, loꞌ tiquin neꞌ ꞌin, siꞌyana tlyu la chaꞌ cuiyaꞌ ꞌin Ñi Xꞌnan na nu cuꞌni ñi xñan bsya ꞌin neꞌ.
\v 9 Nchgaa yu ree nu nguiten yuꞌhui loꞌo neꞌ nu taꞌa mdaꞌan neꞌ loo chaꞌ nducui tiꞌ, ntsuꞌhui chaꞌ cunan yu, loꞌ xiꞌya yja cueen yu xa ñaꞌan yu xtyi sñi ti ndoꞌo seꞌen ndiquin neꞌ,
\v 10 loꞌ siꞌyana nguitsen yu, canꞌ chaꞌ tijyoꞌ tiꞌ ndon yu naꞌan yu seꞌen ndiquin canꞌ, loꞌ nchcuiꞌ yu: Tiꞌi ca xuꞌhue, tiꞌi ca xuꞌhue Babilonia, quichen tlyu nu tla ꞌa chaꞌ ꞌin canꞌ, siꞌyana niꞌ sca braa ti ngujlyo na.
\v 11 Cuiꞌ cuañaꞌan cunan nchgaa nu nguiꞌni jyinsya loo chendyu re, ca tiꞌi ngaꞌan ꞌin neꞌ siꞌya quichen canꞌ, siꞌyana a caja ꞌa nu xiꞌi na nu ndyujuiꞌ neꞌ,
\v 12 cuiꞌ na oro, plata, quee nduhui, chcanꞌ quee nu mten, a cunta teꞌ nu tsuꞌhue ñaꞌan, teꞌ cuaa, teꞌ seda, teꞌ ngaꞌá, a cunta scasca loo yca nu xityiꞌi, loꞌo na nu nguiaaꞌ loꞌo lyiꞌya scan ꞌni, uta loꞌo yca nu tsuꞌhue ñaꞌan, chcuan cutsi, uta chacuiꞌ chcuan, uta loꞌo quee tsuꞌhue ñaꞌan nu nchcuiꞌ neꞌ loꞌo mármol,
\v 13 a cunta loꞌo canela, loꞌo na nu ncua tsuꞌhue loꞌo quixinꞌ xityiꞌi, loꞌo na xityiꞌi nu ndlyaꞌ neꞌ niꞌ lyaa, loꞌo mirra, olíbano, vino, ceite, quita ndyiꞌo jaslya, trigo, a cunta loꞌo bta loꞌo slyaꞌ, loꞌo cuiyu, carreta, a cunta loꞌo nguso.
\v 14 Nchgaa na nu lyee la ncua lca tiquee um loꞌo, cuaꞌ yatii chaꞌ ꞌin na, cuiꞌ cuañaꞌan loꞌo nchgaa loo chaꞌ cuilyiyaꞌ loꞌo chaꞌ nducui tiꞌ cuaꞌ yatii chaꞌ ꞌin na, loꞌ a xca ꞌa tsaan tiꞌ chcua tucui um ꞌin na.
\v 15 Nu nguiꞌni jyinsya, cuiꞌ nu cuaꞌ ncua cuilyiyaꞌ siꞌya quichen canꞌ, tijyoꞌ ti ndon canꞌ nanꞌ ꞌya ñaꞌan ndiquin quichen canꞌ, nguinan neꞌ siꞌyana tiꞌi ngaꞌan ꞌin neꞌ.
\v 16 Loꞌ nchcuiꞌ neꞌ: Tiꞌi ca xuꞌhue, tiꞌi ca xuꞌhue quichen tlyu cua, nu naꞌan cuati loo chaꞌ cuilyiyaꞌ, teꞌ tsuꞌhue ñaꞌan, teꞌ cuaa nu mxitiyaaꞌ loꞌo colo ngaꞌá, nu ncua tsuꞌhue loꞌo chacuiꞌ oro, quee nduhui, loꞌo chcanꞌ quee nu mten.
\v 17 Siꞌyana tsaniꞌ sca braa ti yatii nchgaa chaꞌ cuilyiyaꞌ canꞌ. A cunta nchgaa nu ndaꞌan loꞌo yca naꞌan, loꞌo nten nu nguiaa niꞌ canꞌ, a cunta nchgaa nu nguiꞌni tñan loꞌo yca naꞌan canꞌ, loꞌo nchgaa nu ndijin yuꞌhui ꞌin loo tyiꞌa canꞌ, nchgaa canꞌ tijyoꞌ ti ndon,
\v 18 naꞌan neꞌ ñaꞌan ndoꞌo sñi seꞌen ndiquin canꞌ, loꞌ msiꞌya yja cueen neꞌ, loꞌ nchcuiꞌ neꞌ: ¿Ta tiꞌ caja xca quichen nu chcua taꞌa tsañaꞌan nu ndon loo quichen re?
\v 19 Msuꞌhua neꞌ yuu ta que neꞌ loo nu tiꞌi ngaꞌan ꞌin neꞌ, loꞌ msiꞌya yja cueen neꞌ: Tiꞌi ca xuꞌhue, tiꞌi ca xuꞌhue quichen tlyu cua, cuiꞌ nu mꞌni cuilyiyaꞌ ꞌin nchgaa nu ndaꞌan loꞌo yca naꞌan loo tyiꞌa canꞌ, siꞌyana tsaniꞌ sca braa ti ngujlyo ñaꞌaan quichen canꞌ.
\v 20 Nchgaa ꞌun nu ndiꞌin niꞌ cuaan, ca tsuꞌhue chuꞌhui tiquee um, cuiꞌ cuañaꞌan nchgaa ꞌun nu ndiya quiꞌan tiꞌ ꞌin Ndiose, loꞌo ꞌun nu nguaꞌan tñan ñi ꞌin tsa ycuiꞌ chaꞌ tsuꞌhue ꞌin ñi, tsatlyu loꞌo ꞌun nu mxiycuiꞌ ñi ꞌin cuaꞌ sꞌni, siꞌyana Ndiose cuaꞌ mꞌni cuiyaꞌ ñi chaꞌ ꞌin quichen canꞌ, siꞌya ñaꞌan nu mꞌni neꞌ loꞌo um.
\v 21 Xacanꞌ sca angujle nu tla chaꞌ ꞌin msñi sca quee tlyu yaꞌ, tsañaꞌan nchca tiꞌ sca quee ndiyo neꞌ trigo, loꞌ nguun ꞌin na loo tyiꞌa tujoꞌo, loꞌ juin: Ndeñaꞌan ntsuꞌhui chaꞌ jlyo Babilonia, quichen tlyu canꞌ, ñi xca tsaan loꞌ a la ꞌa quine cueen na.
\v 22 Ñi xca ti cueen loꞌ a ntsuꞌhui ꞌa chaꞌ tiꞌ quine seꞌen ndiꞌin um, ñi cuhuii, ñi arpa, uta cuhuii quii, ñi xca jyiin a quine ꞌa seꞌen ndiꞌin um, ñi xca tñan nꞌni yu cuityi, uta seꞌen ndiyo neꞌ, loꞌ a quine ꞌa na.
\v 23 Ñi xca quiiꞌ loꞌ a ca chcanꞌ ꞌa seꞌen ndiꞌin um, ñi a la ꞌa tiꞌ quine chaꞌ caja cuilyiꞌo neꞌ. Sca chcui chendyu mscua cueen chaꞌ ꞌin nu mꞌni jyinsya loꞌo um, loꞌ nguñilyiꞌo um ꞌin neꞌ siꞌya chaꞌ btaꞌa canꞌ ꞌin um.
\v 24 Cuiꞌ siꞌya um jui nu mslo tne yu nu mxiycuiꞌ Ndiose ꞌin cuaꞌ sꞌni, loꞌo nu ya quiꞌan tiꞌ ꞌin ñi, nchgaa nu cuaꞌ yjui um sca chcui chendyu.
\c 19
\s Xa cuꞌni tnu jun ꞌin Ndiose la niꞌ cuaan 

\p
\v 1 Chonꞌ ndeꞌen canꞌ ngune ꞌñan la niꞌ cuaan, loꞌ nchcuiꞌ cueen nten quiꞌan canꞌ: ¡Aleluya! Scati Ndiose Xꞌnan na tca culo laa ñi ꞌin nten, loꞌ ntsuꞌhui suun ꞌin ñi caja nu cuꞌni tnu ꞌin ñi, scuen cuaan chaꞌ ꞌin ñi, scati ñi tlyu la chaꞌ cuiyaꞌ ntsuꞌhui ꞌin ñi,
\v 2 siꞌyana tsuꞌhue nꞌni cuiyaꞌ ñi chaꞌ ꞌin nten loꞌo chaꞌ nu ñi, cuaꞌ mꞌni ñi xñan bsya ꞌin neꞌ cunaꞌan nu lyee la nducunꞌ canꞌ, neꞌ nu mꞌni cooꞌ ꞌin nten chendyu loꞌo chaꞌ nducunꞌ canꞌ ꞌin, loꞌ cuaꞌ mxitijin Ndiose ꞌin neꞌ nu tiꞌi siꞌya tne nu mslo neꞌ ꞌin nu lca nguso ꞌin ñi.
\v 3 Xiyaꞌ ycuiꞌ nten canꞌ: ¡Aleluya! Tsala xaa ntsuꞌhui chaꞌ tyiꞌo sñi seꞌen ndiquin neꞌ cunaꞌan canꞌ.
\v 4 Cla nducua jacua quiꞌyu cula canꞌ, loꞌo jacua nu loꞌo ca canꞌ, cuiꞌ xaa mdyiꞌya xtyinꞌ loꞌ nguꞌya tiꞌin tloo la lyuu tloo Ndiose seꞌen nchca cuiyaꞌ chaꞌ canꞌ, mꞌni tnu ꞌin ñi, loꞌ nchcuiꞌ: ¡Amen! ¡Aleluya!
\v 5 Seꞌen nchca cuiyaꞌ chaꞌ canꞌ jui sca nu ycuiꞌ: Cuꞌni tnu um ꞌin Stina Ndiose nchgaa ꞌun nu lca nguso ꞌin ñi nu jaꞌan ꞌin ñi, nu xuhue ti loꞌo nu cula.
\v 6 Ngune ꞌñan tsañaꞌan ne seꞌen ndiꞌin nten quiꞌan, tsañaꞌan nchca tiꞌ ljyaan tyiꞌa tlya, loꞌo xa ngula ꞌa nchu tyiꞌyu, loꞌ nchcuiꞌ: ¡Aleluya, siꞌyana Ndiose Xꞌnan na, ñi nu tlyu la chaꞌ cuiyaꞌ ntsuꞌhui ꞌin ndlo ñi tñan!
\v 7 Chcui tiꞌ na loꞌ ca tsuꞌhue chuꞌhui tiquee na, cuꞌni tnu na ꞌin Ndiose, siꞌyana cuaꞌ mdiyaa braa caja cuilyiꞌo ñi nu lca Slyaꞌ, loꞌ cuaꞌ ndon tiyaa nu ca cuilyiꞌo ñi.
\v 8 Cuaꞌ mꞌni ñi chaꞌ siꞌyana coꞌ canꞌ teꞌ nu tsuꞌhue ñaꞌan mten, nu luhui loꞌ nduhui, loꞌ teꞌ canꞌ lca tñan tsuꞌhue nu nguiꞌni nchgaa nu cuaꞌ mdoꞌo hui ꞌin ñi.
\s Xa cu siin ñi nu lca Slyaꞌ loꞌo cuilyiꞌo ñi
\p
\v 9 Loꞌ juin angujle canꞌ ꞌñan: Caꞌan chaꞌ re: Tsuꞌhue ca xuꞌhue nchgaa nu quiꞌni caꞌan ꞌin tsaa seꞌen caja cuilyiꞌo ñi nu lca Slyaꞌ, loꞌ cu siin loꞌo ñi. Tiꞌ juin la angujle canꞌ: Nde chaꞌ nu ñi ca ꞌin Ndiose.
\v 10 Nanꞌ mdyiꞌya xtyinꞌ tloo angujle canꞌ siꞌyana cuꞌnin tnun ꞌin, una juin ꞌñan: Ñaꞌan jan ñi, a cuꞌni cuañaꞌan, loꞌon nanꞌ taꞌa lca na nguso ꞌin Ndiose, loꞌo nchgaa la ñaꞌan jun nu ndaa suun chaꞌ ꞌin Jesús. Canꞌ chaꞌ ꞌin Ndiose cuꞌni tnu, siꞌyana chaꞌ nu nchcuiꞌ Jesús ntsaꞌan yuꞌhui cusya ꞌin nchgaa nu nxiycuiꞌ Ndiose ꞌin.
\s Chaꞌ ꞌin ñi nu nducua cuiyu mten
\p
\v 11 Xacanꞌ naꞌan nguila tucua niꞌ cuaan, loꞌ ncua chcanꞌ sca cuiyu mten, loꞌ nu nducua chonꞌ ꞌin canꞌ naan: Ñi ndiꞌin chaꞌ ꞌin, loꞌ Nchcuiꞌ chaꞌ nu ñi. Tsuꞌhue nꞌni cuiyaꞌ ñi chaꞌ, a cunta ñi ndiꞌin chaꞌ ꞌin ñi tsañaꞌan nu nxuun ñi.
\v 12 Quiloo ñi chcanꞌ na tsañaꞌan nchca tiꞌ quiiꞌ ndiquin, loꞌ quiꞌan ꞌa corona nducua que ñi, loꞌ ngaꞌan sca nii nu a tucui nu ndyuꞌhui lyoo, cuiꞌ ca nu scati ñi jlyo tiꞌ ñi chaꞌ canꞌ.
\v 13 Lcoꞌ ñi sca teꞌ tucuin nu mdaꞌan tne, loꞌ naan ñi: Ychaꞌ Ndiose.
\v 14 Nchgaa nu nguiꞌni cusuun nu mdoꞌo nde niꞌ cuaan, nducui nchaꞌan ꞌin ñi loꞌ nducua canꞌ cuiyu mten, lcoꞌ canꞌ teꞌ nu ndyijyin yaꞌ tsuꞌhue ꞌa ñaꞌan mten loꞌ luhui.
\v 15 Tuꞌhua ñi ndyiꞌo sca spada nu cha, nu cuꞌni tiꞌi loꞌo nten sca chcui chendyu, loꞌ tla culo ñi tñan ꞌin neꞌ, cuꞌni ñi xñan bsya ꞌin neꞌ ñaꞌan nchca tiꞌ xa ndlo suꞌhua neꞌ mti uva seꞌen tyiꞌo vino, siꞌya chaꞌ nsinꞌ tiꞌ nu mtsaꞌan yuꞌhui tiquee Ndiose, ñi nu tlyu la chaꞌ cuiyaꞌ ntsuꞌhui ꞌin.
\v 16 Ngaꞌan sca chaꞌ ꞌin steꞌ ñi loꞌo siiꞌ ndan ñi, loꞌ nchcuiꞌ na: Scati Ree nu tlyu lati, scati Xꞌnan nchgaa tucui.
\v 17 Xacanꞌ naꞌan sca angujle nu ndon loo cucha, loꞌ ycuiꞌ cueen loꞌo nchgaa ꞌni nu nchcui niꞌ cuaan: Quiaan um loꞌ xoꞌ tiꞌin taꞌa um, loꞌ cu siin um na nu cuaꞌ mdiꞌin tyaa Ndiose tloo um:
\v 18 Cunanꞌ yu ree, cunanꞌ xꞌnan sindatu, cunanꞌ yu nu tla la chaꞌ ꞌin, a cunta loꞌo cunanꞌ cuiyu, cunanꞌ yu nu mducua chonꞌ ꞌin, cunanꞌ nchgaa nten, loꞌo nu lca nguso nu cuaꞌ msiꞌi neꞌ ꞌin, loꞌo nu nguiꞌni tñan chaꞌ ꞌin ti, cunanꞌ yu cula loꞌo nu suhue ti.
\v 19 Naꞌan siꞌyana nguioꞌ tiꞌin ꞌni la canꞌ loꞌo nchgaa yu ree tsatlyu loꞌo nchgaa sindatu ꞌin yu, siꞌyana xuun loꞌo ñi nu nducua cuiyu canꞌ loꞌo nchgaa sindatu ꞌin ñi.
\v 20 Una ꞌni la canꞌ nguinu ꞌin, a cunta nguinu yu cuiñi nu nchcuiꞌ siꞌyana Ndiose nxiycuiꞌ ꞌin, yu nu mꞌni scasca chaꞌ nu tnu cunta ꞌin ꞌni la canꞌ, cuañaꞌan nguñilyiꞌo yu ꞌin nchgaa nu nguaꞌan cuiyaꞌ ꞌin, cuiꞌ nu mꞌni tnu lcuin ꞌni la canꞌ. Chcuaa canꞌ ñaꞌan loꞌo jui nu nguun ꞌin loo tiyoꞌ quiiꞌ nu ndiquin loꞌo azufre.
\v 21 Nchgaa la tucui canꞌ ngujui loꞌo spada nu ndyiꞌo tuꞌhua ñi nu nducua cuiyu canꞌ, loꞌ nchgaa ꞌni nu nchcui canꞌ ycu culaꞌ ꞌin cunanꞌ neꞌ ngujui canꞌ.
\c 20
\s Chaꞌ ꞌin sca mii yjan 

\p
\v 1 Xacanꞌ naꞌan nguiaan sca angujle nu mdoꞌo nde niꞌ cuaan, loꞌ lyiꞌya canꞌ yaaꞌ nu nsla seꞌen nu quiꞌñi canꞌ, a cunta nducua sca carena yaaꞌ.
\v 2 Msñi ꞌin cunaan tlyu canꞌ, cuiꞌ cunaan nu ndiꞌin cuaꞌ sꞌni nu nchcuiꞌ neꞌ loꞌo lca laxaꞌan loꞌo Satanás, loꞌ mscanꞌ ꞌin cunaan canꞌ tsaniꞌ sca mii yjan,
\v 3 loꞌ nguun ꞌin ꞌin seꞌen quiꞌñi canꞌ, loꞌ mducun tla ꞌin na loꞌ mjyiꞌin caꞌan sca cuiyaꞌ ꞌin na, siꞌyana a cuñilyiꞌo ꞌa ꞌin nten chendyu tsaniꞌ sca mii yjan, la xacanꞌ quitinꞌ ꞌin loꞌ tyiꞌan ꞌin tiꞌ chinꞌ xaa.
\v 4 Xacanꞌ naꞌan tyun yca xlya seꞌen nducua nu cuaꞌ mchcuan chaꞌ cuiyaꞌ nu cuꞌni xñan bsya, a cunta naꞌan nchgaa nu ngujui nu msiꞌyu neꞌ yni, siꞌya chaꞌ nu ya quiꞌan tiꞌ ꞌin Jesús, loꞌ siꞌyana mdaꞌan ycuiꞌ jun chaꞌ tsuꞌhue ꞌin Ndiose, cuiꞌ jun nu a mꞌni tnu ꞌin ꞌni la canꞌ, ñi lcuin ꞌin, ñi a nguaꞌan cuiyaꞌ canꞌ tuchcan jun uta yaaꞌ jun. Mdyiquiꞌo jun loꞌ ngulo jun tñan loꞌo Cristo tsaniꞌ sca mii yjan.
\v 5 Nde jun nu mꞌni caꞌan ꞌin mdyiquiꞌo culo nducua la. Nchgaa la ñaꞌan nu ngujui canꞌ mdyiquiꞌo la xa nu cuaꞌ mdaꞌa sca mii yjan.
\v 6 Una tsuꞌhue ca xuꞌhue nchgaa jun nu quiꞌni caꞌan ꞌin tyiquiꞌo culo nducua la, siꞌyana canꞌ nu mdoꞌo hui ꞌin Ndiose, ñi a quiꞌni caꞌan ꞌa ꞌin jun loꞌo nu cuaꞌ nchca tucua chaꞌ ndyija, cuiꞌ ca nu tucua tloo Ndiose loꞌo Cristo ꞌin jun nchgaa xaa, loꞌ tsatlyu culo jun tñan loꞌo ñi sca mii yjan.
\v 7 Xa nu taꞌa sca mii yjan, ntsuꞌhui chaꞌ lyaa nu lca Laxaꞌan seꞌen ntsuꞌhui nchcun,
\v 8 loꞌ cuñilyiꞌo ꞌin nchgaa nten nu ndiꞌin sca chcui chendyu, cuiꞌ nu lca Gog loꞌo Magog, seꞌen nu xoꞌ tiꞌin taꞌa loꞌ cuꞌni cusuun, loꞌ nten nu quioꞌ tiꞌin canꞌ tyiꞌin neꞌ tsañaꞌan ndiꞌin ysin tujoꞌo.
\v 9 Ñaꞌaan xeen chendyu mdoꞌo neꞌ, msuꞌhua loꞌo neꞌ seꞌen nguioꞌ tiꞌin nchgaa nu mdoꞌo hui ꞌin Ndiose loꞌo quichen nu taꞌa la ꞌin ñi, una Ndiose mdyiꞌya ñi quiiꞌ nu ngujlyo ꞌin neꞌ.
\v 10 Laxaꞌan nu nguñilyiꞌo ꞌin neꞌ, jui nu nguun ꞌin loo tiyoꞌ quiiꞌ nu ndiquin loꞌo azufre, cuiꞌ seꞌen ntsuꞌhui ꞌni la loꞌo yu nu nchcuiꞌ chaꞌ cuiñi canꞌ, canꞌ tyijyin nu tiꞌi tla loꞌ cucha tsala xaa.
\s Xa ca xñan bsya ꞌin nten chendyu
\p
\v 11 Naꞌan seꞌen ndon sca yca xlya tlyu nu mten, loꞌo ñi nu nducua canꞌ, nde loo seꞌen nducua ñi ngulyijyi yuꞌhui niꞌ cuaan loꞌo chendyu re, loꞌ a la ꞌa ngune cueen na.
\v 12 Xacanꞌ naꞌan nchgaa nu cuaꞌ ngujui, nu cula loꞌo nu suhue ti, ndon canꞌ tloo Ndiose, loꞌ mꞌni ñi chaꞌ nguila nchgaa quityi nscua tloo ñi, a cunta nguila xca quityi seꞌen nducua nii nten nu cuaꞌ jui chendyu ꞌin. Loꞌ nu ngujui canꞌ ncua cuiyaꞌ chaꞌ ꞌin cuaꞌ ñaꞌaan tñan mꞌni tsañaꞌan chaꞌ nu nducua loo quityi canꞌ.
\v 13 Tyiꞌa tujoꞌo mdyaa na ꞌin nchgaa nu ngujui loo na, a cunta seꞌen ndyiꞌan neꞌ ngujui, loꞌo seꞌen lca Hades mdyaa canꞌ ꞌin nchgaa nu ngujui, loꞌ ncua xñan bsya ꞌin canꞌ cunda scaa cuaꞌ ñaꞌaan tñan mꞌni.
\v 14 Chaꞌ ndyija canꞌ loꞌo seꞌen lca Hades jui nu nguun ꞌin loo tiyoꞌ quiiꞌ. Nde lca nu cuaꞌ nchca tucua chaꞌ ndyija.
\v 15 Tsalca nu a nscua nii loo quityi seꞌen nducua nii nu cuaꞌ jui chendyu ꞌin, jui nu nguun ꞌin loo tiyoꞌ quiiꞌ.
\c 21
\s Niꞌ cuaan loꞌo chendyu nu cui ti 

\p
\v 1 Chonꞌ ndeꞌen naꞌan xca niꞌ cuaan loꞌo xca chendyu nu cui ti, siꞌyana niꞌ cuaan loꞌo chendyu nu mdiꞌin tiꞌ culoo, a la ꞌa ngune cueen na, cuiꞌ cuañaꞌan loꞌo tyiꞌa tujoꞌo.
\v 2 Nanꞌ yu Xuhua, naꞌan nguiaan quichen nu mdoꞌo hui ꞌin Ndiose, cuiꞌ Jerusalén nu cui ti, nu mdoꞌo seꞌen nducua Ndiose la niꞌ cuaan, cuaꞌ lca ncua tsuꞌhue na tsañaꞌan nchca tiꞌ sca xen nu cuaꞌ caja cuilyiꞌo.
\v 3 Ngune ꞌñan jui nu ycuiꞌ cueen la niꞌ cuaan: Ñaꞌan jan ñi, nde nu lca naꞌan ꞌin Ndiose —seꞌen tyiꞌin ñi loꞌo jun tsatlyu, nu ca quichen ꞌin ñi, cuiꞌ Ndiose tyiꞌin loꞌo jun loꞌ ca ñi Ndiose ꞌin jun—.
\v 4 Xityi ñi tyiꞌa quiloo jun, loꞌ a ñaꞌan ꞌa jun chaꞌ ndyija, ñi a ntsuꞌhui ꞌa chaꞌ tiꞌ quiꞌya tuꞌhua tiquee jun uta cunan jun, ta tyijyin jun nu tiꞌi, siꞌyana cuaꞌ mdijin nchgaa chaꞌ nu ncua tiꞌ culoo.
\v 5 Ñi nu nducua seꞌen nchca cuiyaꞌ chaꞌ canꞌ, juin ñi: Ñaꞌan jan ñi, Nanꞌ nguiꞌnin cuin nchgaa loo chaꞌ. Loꞌ juin ñi ꞌñan: Caꞌan chaꞌ re, siꞌyana lca na chaꞌ nu ñi loꞌ a cuꞌni tucua tiꞌ um loꞌo na.
\v 6 Tiꞌ juin la ñi: Cuaꞌ lca chaꞌ re. Nanꞌ lcan letra Alfa loꞌo Omega, nanꞌ la ñaꞌan cuaꞌ ndiꞌin tiꞌ culoo, loꞌ a ntsuꞌhui chaꞌ tsatii chaꞌ ꞌñan. Chaꞌ ndeꞌen nu nguityi tiꞌ, nanꞌ taan tyiꞌa coꞌo canꞌ xuꞌhue ti, seꞌen nducua tyiꞌa nu ndaa chendyu.
\v 7 Nu cuꞌni canan, quiꞌni caꞌan ꞌin loꞌo nchgaa chaꞌ tsuꞌhue re, loꞌ nanꞌ can Ndiose ꞌin, loꞌ ca canꞌ sñenꞌ nanꞌ.
\v 8 Una tsalca nu ntsen, nu a ndiya quiꞌan tiꞌ, nu nducunꞌ loꞌo nu ndujui nten, yu nu nguiten yuꞌhui loꞌo ñaꞌan tucui ti, a cunta neꞌ btaꞌa, nu nguiꞌni tnu ꞌin lcuin joꞌo, cuiꞌ cuañaꞌan loꞌo nchgaa nu cuiñi, canꞌ nu quiꞌni caꞌan ꞌin loo tiyoꞌ quiiꞌ nu ndiquin loꞌo azufre seꞌen cuaꞌ nchca tucua chaꞌ ndyija.
\s Chaꞌ ꞌin Jerusalén nu cui ti
\p
\v 9 Seꞌen ndon yaan sca angujle nu nchca cati canꞌ, cuiꞌ ta nu ndaꞌan loꞌo tsa cati copa nu mtsaꞌan yuꞌhui loꞌo tsa cati loo nu tiꞌi, loꞌ juin ꞌñan: Cuan lya loꞌ culoꞌon ꞌin seꞌen ndon xen nu lca cuilyiꞌo ñi nu lca Slyaꞌ.
\v 10 Xacanꞌ mtsaꞌan yuꞌhui Espíritu ꞌñan, loꞌ ya loꞌo angujle ꞌñan sca loo quiꞌya cuaan, loꞌ nguloꞌo ꞌñan seꞌen ndiꞌin sca quichen tlyu, cuiꞌ Jerusalén nu mdoꞌo hui ꞌin Ndiose, naꞌan nguiaan na loꞌ mdoꞌo na la seꞌen nducua Ndiose la niꞌ cuaan,
\v 11 loꞌ mtsaꞌan yuꞌhui na loꞌo xaa ꞌin Ndiose. Nduhui na tsañaꞌan nchca tiꞌ sca quee nu ndyijyin yaꞌ tsuꞌhue ñaꞌan, tsañaꞌan nduhui quee jaspe nu nducui xaa.
\v 12 Tnu tuꞌhua loꞌo nu ntsuꞌhui nchcun quichen canꞌ loꞌ cuaan na, tichcua tuloꞌo ꞌin na, cunda scaa tuloꞌo canꞌ ndon scaa angujle, loꞌ taꞌa tichcua ta nten Israel ngaꞌan nii scaa tuloꞌo canꞌ,
\v 13 snaan tuloꞌo canꞌ nducua na taꞌa jacua luhuaꞌ ꞌin quichen canꞌ.
\v 14 Tsa tichcua ta ndiꞌin suun na, loꞌ canꞌ ngaꞌan nii tsa tichcua yu taꞌa mdaꞌan ñi nu lca Slyaꞌ canꞌ.
\v 15 Angujle nu nchcuiꞌ loꞌon nducua sca yca cuiyaꞌ nu chacuiꞌ oro yaaꞌ, siꞌyana suꞌhua cuiyaꞌ quichen canꞌ ñaꞌaan seꞌen ntsuꞌhui nchcun na loꞌo nchgaa tuloꞌo ꞌin na.
\v 16 Quichen canꞌ suꞌhua na taꞌa jacua luhuaꞌ na, siꞌyana tsañaꞌan tucuin na cuañaꞌan nde xeen na. Angujle canꞌ msuꞌhua cuiyaꞌ ꞌin na loꞌo cuiyaꞌ nu nducua yaaꞌ, loꞌ ndiyaa na tucua mii ntsuꞌhui tucua ciento kilometro, loꞌ sca cuiyaꞌ ti na nde tucuin na, nde xeen na, loꞌo nde cuaan na.
\v 17 Xacanꞌ msuꞌhua cuiyaꞌ angujle canꞌ nde tnu tuꞌhua loꞌo ꞌin quichen canꞌ, loꞌ ndiyaa na snan yla ntsuꞌhui caꞌyu metro. Cuiyaꞌ nu ylaꞌ angujle canꞌ lca na sca cuiyaꞌ nu tca quiꞌya nten cunta.
\v 18 Loꞌo ꞌin quichen canꞌ nguiaaꞌ na loꞌo quee jaspe, una quichen canꞌ lca na chacuiꞌ oro, tsañaꞌan cunan nu nducui xaa.
\v 19 Suun quee nu lca loꞌo canꞌ, nguiaaꞌ cuityi na loꞌo cuati loo quee nu tsuꞌhue ñaꞌan: Culoo suun canꞌ nguiaaꞌ loꞌo quee jaspe, nu nchca tucua nguiaaꞌ loꞌo quee zafiro, nu nchca snan nguiaaꞌ loꞌo quee ágata, nu cuaꞌ nchca jacua nguiaaꞌ loꞌo quee esmeralda,
\v 20 nu cuaꞌ nchca caꞌyu nguiaaꞌ loꞌo quee ónice, nu cuaꞌ nchca scua nguiaaꞌ loꞌo quee cornalina, nu cuaꞌ nchca cati nguiaaꞌ loꞌo quee crisólito, nu cuaꞌ nchca snuꞌ nguiaaꞌ loꞌo quee berilo, nu cuaꞌ nchca caa nguiaaꞌ loꞌo quee topacio, nu cuaꞌ nchca tii nguiaaꞌ loꞌo quee crisopraso, nu cuaꞌ nchca tixca nguiaaꞌ loꞌo quee jacinto, loꞌ nu cuaꞌ nchca tichcua nguiaaꞌ loꞌo quee amatista.
\v 21 Taꞌa tichcua tuloꞌo canꞌ lca na tsa tichcua quee mten nu lca perla, cunda scaa tuloꞌo canꞌ nguiaaꞌ na loꞌo scaa quee canꞌ. Tucueen nu su loo quichen canꞌ lca na chacuiꞌ oro, loꞌ nducui xaa na tsañaꞌan nchca tiꞌ cunan.
\v 22 Ñi sca laa a naꞌan nducua loo quichen canꞌ, siꞌyana Ndiose Xꞌnan na, ñi nu tlyu la chaꞌ cuiyaꞌ ntsuꞌhui ꞌin, lca ñi laa tsatlyu loꞌo ñi nu lca Slyaꞌ.
\v 23 Quichen canꞌ a ꞌni chaꞌ ꞌin na loꞌo xaa ꞌin cucha uta xaa ꞌin cooꞌ, siꞌyana ycuiꞌ ca Ndiose lca ñi xaa ꞌin na loꞌo ñi nu lca Slyaꞌ.
\v 24 Nchgaa quichen tnu nu ntsuꞌhui chaꞌ tyiꞌo laa, tyiꞌan canꞌ siꞌya xaa ꞌin quichen canꞌ, loꞌ nchgaa yu ree ntsuꞌhui chaꞌ tsa loꞌo yu chaꞌ tsuꞌhue ꞌin yu loꞌ tyaa yu cunta chaꞌ cuilyiyaꞌ ꞌin yu ꞌin ñi.
\v 25 A ntsuꞌhui xaa scun tuloꞌo canꞌ, siꞌyana a ntsuꞌhui chaꞌ quiꞌya tla quichen canꞌ.
\v 26 Cuiꞌ cuañaꞌan nchgaa quichen tnu ntsuꞌhui chaꞌ tsa loꞌo neꞌ chaꞌ tsuꞌhue ꞌin neꞌ, loꞌ tyaa neꞌ cunta chaꞌ cuilyiyaꞌ ꞌin neꞌ ꞌin ñi,
\v 27 una ñi sca cooꞌ a sten quichen canꞌ, cuiꞌ cuañaꞌan loꞌo nu nguiꞌni scasca chaꞌ ngunanꞌ uta nchcuiꞌ chaꞌ cuiñi, cuiꞌ ca nu tsaloo ti sten nu cuaꞌ nducua nii loo quityi ꞌin ñi nu lca Slyaꞌ, cuiꞌ nu cuaꞌ jui chendyu ꞌin. 
\c 22
\p
\v 1 Xacanꞌ nguloꞌo angujle ꞌñan seꞌen su sca chco tlyu nu luhui, tyiꞌa canꞌ ndaa na chendyu ꞌin nten, nducui xaa na tsañaꞌan nchca tiꞌ sca cunan, loꞌ tyiꞌa canꞌ nducua na seꞌen nducua Ndiose loꞌo ñi nu lca Slyaꞌ.
\v 2 Chco tlyu canꞌ su na tluꞌhue la tucueen loo quichen canꞌ, scaa tsoꞌ na nducua yca nu ndaa chendyu ꞌin nten, tsa tichcua loo mti ndyiꞌyu loo na, scaa loo mti ndyiꞌyu loo na cunda scaa cooꞌ, loꞌ lcaꞌ yca canꞌ najoꞌo na ꞌin nten sca chcui chendyu nu cuꞌni chca ꞌin neꞌ.
\v 3 Ñi xiyaꞌ loꞌ a caan ꞌa yuhueꞌ chonꞌ nten ndiꞌin quichen canꞌ, siꞌyana Ndiose loꞌo ñi nu lca Slyaꞌ ntsuꞌhui chaꞌ culo ñi tñan seꞌen canꞌ, loꞌ jun nu lca nguso ꞌin ñi tucua tloo ñi ꞌin,
\v 4 xacanꞌ ñaꞌan tloo ca jun ꞌin ñi, loꞌ ntsuꞌhui chaꞌ chaꞌan nii ñi tuchcan jun.
\v 5 A ntsuꞌhui ꞌa chaꞌ tiꞌ quiꞌya tla canꞌ, ñi a ꞌni ꞌa chaꞌ ꞌin jun loꞌo quiiꞌ nu tuꞌhui xaa ꞌin jun, uta xaa ꞌin cucha, siꞌyana Ndiose Xꞌnan na tuꞌhui ñi xaa canꞌ, loꞌ taa ñi chaꞌ cuiyaꞌ culo jun tñan tsala xaa.
\s Cuaꞌ nchcui cuiiꞌ chaꞌ quiaan Cristo xiyaꞌ
\p
\v 6 Tiꞌ juin la angujle ꞌñan: A tucui nu cuꞌni tucua tiꞌ loꞌo chaꞌ re siꞌyana lca na chaꞌ nu ñi. Ñi Xꞌnan na, cuiꞌ Ndiose nu nxiycuiꞌ nguso ꞌin, nguaꞌan tñan ñi angujle ꞌin ñi siꞌyana ca cuiyaꞌ tiꞌ nchgaa la ñaꞌan nu lca nguso ꞌin ñi, chaꞌ nu cuaꞌ nchcui cuiiꞌ chaꞌ tsatoꞌo.
\v 7 ¡Ñaꞌan jan ñi, nanꞌ cuaꞌ ljyaan ndla ti! Tsuꞌhue ca xuꞌhue nu xuꞌhua seꞌen chaꞌ nu nchcuiꞌ Ndiose loo quityi re.
\v 8 Nanꞌ yu Xuhua, naꞌan loꞌ ngune ꞌñan nchgaa chaꞌ re. Xa nu ngune ꞌñan loꞌ naꞌan chaꞌ re, mdyiꞌya xtyinꞌ siꞌyana cuꞌni tnu ꞌin angujle nu nguloꞌo ꞌñan nchgaa chaꞌ re,
\v 9 una juin ꞌñan: A cuꞌni cuañaꞌan siꞌyana loꞌon nanꞌ taꞌa lca na nguso ꞌin Ndiose, loꞌo nchgaa jun taꞌa na nu nxiycuiꞌ Ndiose ꞌin, loꞌo nu nxuꞌhua seꞌen chaꞌ nu nducua loo quityi re. Canꞌ chaꞌ ꞌin Ndiose cuꞌni tnu.
\v 10 Tiꞌ juin la angujle canꞌ: A tucun tiꞌin chaꞌ nu ycuiꞌ Ndiose nu nguinu scua loo quityi re, siꞌyana cuaꞌ nchcui cuiiꞌ chaꞌ tsatoꞌo na.
\v 11 Tsalca nten nu a nguiꞌni tñan tsuꞌhue, tsa quiñan tuꞌ canꞌ loꞌo chaꞌ ngunanꞌ ꞌin. Nu nducunꞌ, cuꞌni tuꞌ canꞌ chaꞌ nducunꞌ. Cuiꞌ cuañaꞌan nu nguiꞌni tñan tsuꞌhue, taa canꞌ juesa cuꞌni la tñan tsuꞌhue, loꞌ nu ndaꞌan loꞌo chaꞌ tiyaa nu luhui, tsa quiñan canꞌ tyuꞌhui sca chendyu nu luhui.
\v 12 Ñaꞌan jan ñi, nanꞌ cuaꞌ ljyaan ndla ti, loꞌ lyiꞌyan na nu suꞌhuan lyiyanꞌ ꞌin cunda scaa tucui cuaꞌ ñaꞌaan tñan mꞌni.
\v 13 Nanꞌ lcan letra Alfa loꞌo Omega, nanꞌ la ñaꞌan cuaꞌ ndiꞌin tiꞌ culoo loꞌ a ntsuꞌhui chaꞌ tsatii chaꞌ ꞌñan, nanꞌ lcan ñi nu cuaꞌ ndiꞌin tiꞌ culoo, loꞌ ndiꞌin tsala xaa.
\v 14 Una tsuꞌhue ca xuꞌhue nchgaa nu nguiten steꞌ, siꞌyana quiꞌni caꞌan ꞌin loꞌo yca nu ndaa chendyu, loꞌ cuañaꞌan tca sten canꞌ scasca tuloꞌo ꞌin quichen canꞌ.
\v 15 Una xniꞌ quinu ton nde lyiyaꞌ, tsatlyu loꞌo nu btaꞌa, nu nguiten yuꞌhui loꞌo ñaꞌan tucui ti, nu ndujui nten, nu nguiꞌni tnu lcuin joꞌo, nchgaa nu cuiñi loꞌo nu nducui tiꞌ chaꞌ cuiñi.
\v 16 Nanꞌ lcan Jesús, loꞌ nguaꞌan tñan angujle ꞌñan siꞌyana quitsaꞌ ꞌin um nchgaa chaꞌ re, chaꞌ nu ntsuꞌhui chaꞌ ca cuiyaꞌ tiꞌ nchgaa ta jun taꞌa na. Nanꞌ lcan ticuiꞌ ta nten ꞌin Davi, loꞌ lcan cuii nu nduꞌhui xaa tsuꞌhue ñaꞌan xa tlya.
\v 17 Ndeñaꞌan nchcuiꞌ Espíritu loꞌo Cuilyiꞌo ñi nu lca Slyaꞌ: Cuan lya um. Cuiꞌ cuañaꞌan chcuiꞌ nu quine ꞌin chaꞌ re: Cuan lya um. Chaꞌ ntsuꞌhui nu nguityi tiꞌ tca caan, loꞌ nu nchca tiꞌ coꞌo tyiꞌa nu taa chendyu ꞌin tsala xaa, tca coꞌo ꞌin na xuꞌhue ti.
\v 18 Nanꞌ nsuꞌhua tiyaan ꞌin nchgaa nu ne ꞌin chaꞌ nu nchcuiꞌ Ndiose loo quityi re: Chaꞌ ntsuꞌhui nu tya cula chaꞌ re, Ndiose xitijin ñi ꞌin canꞌ nu tiꞌi tsañaꞌan nu tiꞌi nu nguinu scua loo quityi re.
\v 19 Chaꞌ ntsuꞌhui nu culyijyi suꞌhua chaꞌ nu nchcuiꞌ Ndiose loo quityi re, cuiꞌ cuañaꞌan lyaa ñi chaꞌ tsuꞌhue nu quiꞌni caꞌan ꞌin canꞌ nu nducua loo quityi nu ndaa chendyu ꞌin nten, ñi a quiꞌni caꞌan ꞌin canꞌ loꞌo chaꞌ tsuꞌhue nu ndiꞌin loo quichen nu cuaꞌ mdoꞌo hui ꞌin Ndiose, cuiꞌ cuañaꞌan loꞌo nchgaa la ñaꞌan chaꞌ tsuꞌhue nu nducua loo quityi re.
\v 20 Ñi nu ndaa suun chaꞌ re nchcuiꞌ ñi: Nu chaꞌ ñi sꞌni, cuaꞌ ljyaan ndla ti. Amen, chaꞌ ñi Ñi Xꞌnan hua Jesús, cuan lya um.
\v 21 Cuiꞌ chaꞌ tsuꞌhue ꞌin Ñi Xꞌnan na Jesucristo quinu loꞌo um nchgaa um. Amen.