\id PHP Iñupiatun [esk] NT (Northwest Alaska, USA) -2010 bd.
\h Philippians
\toc1 Philippians
\toc2 Php
\mt Paul-ŋum Tuyuutai Philippi-aġmiunun
\c 1
\p
\v 1 Uvaŋa Paul aglaqatiqaqtuŋa Timothy-mik, uvagukaasiiñ savautripḷunuk Christ Jesus-mik. Tuyuqtuŋa uumiŋa iluqaitñun ukpiqsriruanun Jesus Christ-mik Philippi-miittuanun, taputiplugich qaukłiġruat ikayuqtitlu taamani.
\v 2 Uvvatuq Agaayyutim Aapagikkapta suli Jesus Christ savautikkamnuk iłuaqqutillaŋniaġlisi suli tutqiksillusi.
\s Paul-ŋum Agaayyutigai Agliqiruksrat Tuyuutmiñik
\p
\v 3 Iŋiqsruutipayaaqapsi Agaayyutiga quyaraġigiga
\v 4-5 akuqtuił̣iqsi tusaayugaamik savaaqaqtitlugu ilipsitñi suli ilipsigun tusaaqqaaġatałłapsitñiñaglaan. Taatnaqłuŋa quviasullapiaqtuŋa iŋiqsruutrikama ilipsitñik.
\v 6 Nalupqigiŋiḷḷapiaġiga una, Agaayyutim aullaġniikkani ilipsitñi naatkisigaa aggił̣iksraŋanunaglaan Jesus Christ.
\v 7 Piqpagillapiaġipsi. Nalaunŋaruamik quviasuutiqaġumiñaqtuŋa nalupqigiŋitḷusiḷu, atakkii ikayuġipsitŋa isiqtaułłamniḷu uqapsaaġutriłłamniḷu uqaqsittaaġviŋmi tusaayugaaġiksuam iḷumutuuruaŋułhanik. Piqutigiplugu ikayuutiłiqsi uvamnik akuqtuqasiutirusi Agaayyutim piḷiutaanik.
\v 8 Agaayyutim iḷisimagaa qanutun kimmutiqallapiałiġa ilipsitñik, iḷumun piqpagigipsi Jesus Christ piqpaksripmatun ilipsitñik.
\v 9-10 Uvva iŋiqsruutigipsi piqpaksritmuquplusi kaŋiqsiaġisaiññaquplugu Agaayyun. Piksraqtaaqaġumuusri nakuuniqsrauruamik. Taatna pigupsi ipqiññiaqtusi patchisaiḷḷusiḷu Jesus Christ aggiqpan.
\v 11 Uvvasuliuna pitḷaniaġiksi iḷumutuullapiaqhuni nakuuruaq savaaksraq, Jesus Christ kisimi pitḷapkakkaŋa, iñuichaasiiñ kamaksruaqsiḷugu suli nanġaaqsiḷugu Agaayyun.
\s Iñuułiq Christ-ŋuruq
\p
\v 12 Aniqatiumaaŋ, iḷisimatqugipsi uumiŋa, atuumaruat uvamnun isiqtauŋŋaġma siamittitkaat tusaayugaaġiksuaq.
\v 13 Iluqatiŋ aŋuyyiuqtai Caesar-m atlatlu iñuich maaniittuat iḷisimagaat isiqsiviŋmiiłiġa Christ-mik savautrił̣ł̣apkun.
\v 14 Aasiisuli isiqsiviŋmiiłiġma iñugiatluktuat aniqatiutka tuniqsimalipsaaqtitkai Ataniġmun. Taatnaqhutiŋ taluqsraitmuksaiñaqtut uqaġiłiksraŋagun Agaayyutim iqsiñġiḷḷapiaqhutiŋlu.
\v 15 Aatai, iḷisimagitka iḷaŋisa quliaqtuaqałhat Christ-mik atakkii killuġigaatŋa suli uqaalaplutiŋlu. Aglaan atlat quliaqtuaġigaat Christ iłuatlułiksraŋatnun iñuich.
\v 16 Taapkuali quliaqtuaġigaat Christ piqpagipluŋa, atakkii iḷisimagaat Atanġuruamun tuqłukkaułiġa uqaġitquplugu tusaayugaallautaq.
\v 17 Atlatli iñuich siqñakutiqaqtut, atakkii quliaqtuaġikamitruŋ Christ ipqiñġitchut aglaan killuġipluŋa isumaplutiŋ iłuiḷḷiuqtitchukłuŋa isiqtaułłamni.
\v 18 Suŋitchuq. Ipqitkisiŋŋaan naagaqaa siqñakutaugisiŋŋaan taatnaunniiñ quliaqtuaġigaat Christ. Taamna kamanallapiaqtuq. Quviatchallapiaġaaŋa taavruma.
\v 19 Aa, quyatuiñaġisiruŋa. Iḷisimagiga iŋiqsruutrił̣ł̣apsigun uvamnik suli Irrusrian Jesus Christ-ŋum ikayuutaagun isiqsiviŋmiñ anitqił̣iksraġa.
\v 20 Niġiugaqallapiaqłuŋa suraġałipayaapkun qapiqpaŋapkaġumiñaitchiga Christ, pitḷukługu uqaqsittaaġviksraġa tikitpan. Sumipayaaq, suvaluk pakma, uqaġuktuŋa Christ-kun taluqsrautaiġḷuŋa suli kamaksruqugiga iñuŋnun Christ uvapkun, iñuutuiñaġuma naagaqaa tuqugisiñiġuma.
\v 21 Atakkii, iñuuguma Christ-ŋuruq, aasiiñ tuquguma quviatchakkisiruŋa.
\v 22 Iñuuniaqtuiñaġuma savautipsaatlukkisigiga Christ. Aglaan nalugiga nalliaknik piksraqtaaqałiksraġa.
\v 23 Qanuġviiqsuŋa, Unitchukkaluaġiga manna nuna piqatauluŋaasiiñ Christ-mi, taamnaasriiñ nakuaġitlukkayaġaluaġiga.
\v 24 Aglaan iḷitchuġigiga ilipsitñun inuġitilaaġasuli.
\v 25 Nalupqigiŋitḷugu iḷisimagiga iñuuniapsaaġuraallałiksraġa iluqapsitñi, taatnaqłuŋa ikayutlasigipsi ukpiqsrił̣iqsi nakuqsitluuraquplugu quviasuutigitluaqsipmiḷugu.
\v 26 Atakkii iñuutluuraġuma suli utiġvigitqiḷgiññiġupsi nanġautiksraqaġiksi Christ Jesus suli quyyatigilugu.
\p
\v 27 Supayaaq atuumaniaqtuqunniiñ, uvluġaġikpan iñuuniaġumausi kamagiyumiñaqsiḷugu tusaayugaallautam Christ-kun pitqutaa. Utlakkumiñaġniġupsi naagaqaa uŋasikkisiñiġuma tusaayumagiga atipiaġataqhusri iñuutilaapsitñik atausriq sivuniġiplugu una. Tusaayumapmigiga qanutun sakuuktilaaqsi piqutigilugu ukpiqsrił̣iq kaŋiqaqtuaq tusaayugaaġiksuami.
\v 28 Tusaasukkigaptuuq uumiksripsitñun iqsipkaŋił̣iqsi. Taavrumuuna iḷitchuġigisigaat akiitkaqsił̣iqtiŋ aglaan ilipsi annaumałiqsi. Agaayyutim ititkisigaa taamna.
\v 29 Agaayyutim iłuaqqutigaasi ukpiqsritḷasipḷusi Christ-mik suli nagliksaatlasipḷusi piqutigiplugu.
\v 30 Iluqata aŋuyaqatigiiksisimarugut. Iḷisimagiksi taamna, atakkii qiñiġiksi qanuq nagliksaałiġa qaaŋiqsuami suli tusaaplugu nagliksaałiġasuli pakmapakunniiñ.
\c 2
\s Christ Atchiksipkakkauruq suli Kamanaqsipkakkauruq
\p
\v 1 Uvvaasiiñ akuqtuirusi
uqałhiñik sayyiqsigikkaŋitñik ukpiqsrił̣ipsi naagaqaa uqałhiñik
araaqtuqtigikkaŋitñik ilipsitñik. Aasiiñ nakuuruq iḷisimaruni
Ipqitchuamun Irrutchimun atausriŋŋułłaptiknik suli piqpaksritḷasiłłaptiknik
iłuaqqutritḷasiłłaptikniglu avatmun.
\v 2 Iḷumun, quviatchaktitkaaŋa atausriŋŋułłapsi. Isummatiqaġupsi
atautchimik suli piqpakkutigupsi avatmun kinilitkisirusi atautchimun.
\v 3 Uqaviutiqasuŋaqasi ilipsitñik suli inillaktasuŋaqasi
kamanaqsitḷugusi atlaniñ, aglaan isummatigilugich atlat
kamanatluglugich ilipsitñiñ.
\v 4 Ilipsitñułhiñaq piññaktaaqaġniasuŋaqasi aglaantuuq
atlanun.
\p
\v 5 Isumalusi Christ Jesus isumapmatun.
\q
\v 6 Jesus Agaayyutauruq. 
\q2
Aglaan kimmutiqaŋitchuq atriŋuniaġuni Agaayyutmi.
\q
\v 7 Naagaunniiñ qutchigvigigaluakkani suksraallakkaa
suunġiḷḷapiaqhuni iŋmiñun. 
\q2
Ilaa aniruq nunamun atriqaqhuni iñuŋmik.
\q
\v 8 Atchiksitḷullapiaqhuni iŋmiñun iñupayaaniñ aŋiġniġaaunniiñ
tuqułiq—
\q2
tavrakii tuquruq atriliutipluni savvaqłuktitun sanniġutami!
\q
\v 9 Taavrumuunnaqługu Agaayyutim kamanaqsipkaġaa 
\q2
aasiiñ aatchuqługu atiġmik kamanatluktuamik atipayaaniñ.
\q
\v 10 Iluqatiŋ Agaayyutim iñiqtaŋiñ kamaksruġniaġaat Jesus
\q2
itkisiŋŋaġmiŋ qiḷaŋmi nunamiḷu suli tuqusimagaluaŋŋaġmiŋ.
\q
\v 11 Iluqatiŋsuli quliaġiniaġaat Jesus Christ kisimi atanġuniḷugu. 
\q2
Taatnaqpatruŋ Agaayyun Aapauruaq nanġaqtauniaqtuq.
\s Ukpiqsriruat Ittut Qaumatun Nunam Iñuiñun
\p
\v 12 Iḷauramaaŋ, tupigisuuluġniġipsitŋa sivuani piqataukama.
Pakmaasiiñ uŋasikkaluaŋŋaġma ilipsitñiñ tupigitqiḷḷaŋniaqsitŋa.
Uvluġaġikpan sakuuktuiñaġusi taluqsrił̣ikun sivuuqatiqaġusi iñuusitchi
annautrauruat iñuutqusiaŋatitun anniqsułiksrapsitñunaglaan,
\v 13 atakkii Agaayyun sayyiqsuqtigigiksi piyummasiqhusi suli
savakkumasiqhusiḷu quyalikkaułiksraġmiñun.
\v 14 Suraġałipayaapsigun uqapiḷusuŋaqasi naagaqaa
qapiqtaiḷisuŋaqasi.
\v 15-16 Ilipsiḷi patchisaitchumuusi Agaayyutim
qitunġaġiliutikkaŋasi, iñuuniaqhusi akunġatni qaayuġniqiruatlu
killuliqiruatlu ittuami taaqtuatun. Uvluġirraaġikmatun qiḷaŋmi
iñuuniaġumuusi akunġatni iñuich
quliaqtuaġutilugich iliŋich Agaayyutim uqałhiñik
iñuupkaitḷaruanik. Taatnaġupsi quyagisiruŋa piqutigilusi
Christ aggiqpan, iḷisimagiga sakuułiġma imaiḷaaġuni inġił̣ha.
\v 17 Aglaan, tuqqutaugisigaluaŋŋaġmaunniiñ quyałhiñauruŋa.
Uvvasuli quviasuqatigigipsi iluqasi aatchuutigikkapsigun uvamnun
ukpiqsrił̣ikun, atakkii aatchuqapsitŋa inuġikkamnik taatnatun
savautriḷḷapiaqtusi Agaayyutmik.
\v 18 Taatnaġlugu ilipsipsuuq quyayumuusi quviasuqatigiluŋalu.
\s Timothy-lu Epaphroditus-lu
\p
\v 19 Atanġuruakun tuyuġiyumaaqsigiga qilamipayaaq Timothy
ilipsitñun. Aasiiñ utiġumiñaġniqpan quviatchaktinniaġaaŋa
uqautiaqsikpaŋa qanuq iñuuniałłapsitñik Agaayyutikun.
\v 20 Atakkii piitchuŋa atriŋanik ilaan qaunakkiaġiksiksrapsitñik.
\v 21 Iluqatiŋ atlat isumaaluutigigaat sułiksraqtiŋ, iliŋich
suqutiksriŋitmiut tusaayugaallautamik Christ-kun.
\v 22 Aglaan Timothy iḷitchuġianiksimagiksi tunŋavigiplugu ilaa,
atakkii ilaan iluqnauġvigiplugu quliaqtuaqałłi
tusaayugaaġiksuamik atripḷugu iġñiq ikayuiruaq aapamiñik.
\v 23 Taatnamik tuyuġiłhiñaaġuġiga qilamillapiaq
iḷitchuġianikkuma qanuq uqaqsittaałłamni inillakpatŋa.
\v 24 Aglaan tunŋavigillapiaġiga Agaayyun uvamnik qilamipayaaq
tikił̣hiñaaġułiksraġa Philippi-mun.
\p
\v 25 Utiqtitaksraġigiga Epaphroditus tuyuġigaluakkaqsi
ikayuqupluŋa inuqsriułłamni. Ilaalu uvaŋalu
aniqatigiiksillapiaqtuguk savaqatigiikhunuk akiḷḷiḷiqsuqługich
uumiksririt Agaayyutmik.
\v 26 Aipkatqiaqsiiga aisuliqmipman ilipsitñun suli
iłuiḷḷiuġutigiplugu tusaałiqsi atniġñaġnipḷugu.
\v 27 Atniġñallapiaqmipḷuniḷu tuquqayallapiaqhuni. Aglaan
Agaayyutim nagligiplugu sayyitqikkaa, ilaa nagliksripmatun
uvamnik. Taatnaqługu tuquniġumi iḷanayaġaa alianniułiġa pakma.
\v 28 Taatnamik qilamipayaaq ilaa aipkaġukkaluaġiga.
Utitqikpan ilipsitñun ilaan quviatchaktinnayaġaasi aasiiñ
iłuiḷḷił̣iġa uqigḷipsaaġayalgitchuq.
\v 29 Taatnaġlugu paġlayumagiksi quviasuutigillapiaġlugu
Agaayyutikun. Kamakkutiqaġlugich iñuich ilaatun ittuat,
\v 30 atakkii suginġiqł̣ugu iñuułłi savakhuni uvamnun
tuquqqayaqhuniunniiñ. Savautigaasi ikayuqłuŋa ilipsi
piyumiñaisapsitñik.
\c 3
\s Iḷumun Nalaunŋaruałiq
\p
\v 1 Aqulliulugu, iḷauramaaŋ, uqautigisukkaġa una: Quviasuutigisiuŋ Atanġuruaq Agaayyun. Alġaqsruutinŋuliġumiñaitchipsi tamatkuniŋa tuyuutimnik ilipsitñun sivuani, atakkii tusaatqiḷgitchupsiuŋ annaumapkaġaasi. Itnauvva:
\v 2 qaunakkiaġigitchi tamatkunakŋa iñuŋniñ pigiitchuaniñ siqupsił̣hiñaqtuaniñ timimik qipmisun iḷipḷugich. Iliŋich iḷisautriraqtut nalunaitŋutaqaqtuksraunipḷusi timipsitñi qitunġaġiliutipkaġukkupsi Agaayyutmun.
\v 3 Aglaan uvagut iḷumun qitunġaġillapiaġaatigut Agaayyutim pisigisruŋaqnagu timivut nalunaitŋutchiġñiḷugich. Agaayyuvigigikput Agaayyun ilaan irrusianik ikayuqtiliqhuta suli nanġaġikput Christ Jesus iñuugutiqaqtitchiruaq nutaamik. Ukpiqsriyumiñaitchugut qaałhiñakun annautiniaġniḷuta.
\v 4 Aglaan uqaviutigikpatruŋ anniqsułiqtiŋ tupiksriḷutiŋ qaałhiñakun tavra uqaviutigitlukkayaġiga, itna,
\v 5 nalunaitŋutchikkauruŋa tuvraqługich Jew-ŋuruat atuiraġiłhat tallimat piŋasut uvlut atuumaanikmata. Israel-aaŋullapiaqtuŋa anił̣ipkun, iñuguqataupluŋa Benjamin-naġmiuni, auga avuiḷaaq Hebrew-piaġataq. Tupiksriruŋa tillisipayaaŋitñik Jew-ŋuruat maliġutaksraŋata Pharisee-ŋupluŋa.
\v 6 Piyummatiqaqpaitḷuŋa iłuiḷḷiuqtitchiruŋaunniiñ ukpiqtuaŋuruanik. Iñuk nalaunŋaruałhiñaupman tupigilugich maliġutaksrat kia-unniiñ patchisigiyumiñaitkaa.
\v 7 Suraġałipayaatka kamanallapiaġaluaqtuatunniiñ uvamni sivuani—pakmapak ayaliġitka atakkii anniqsułiksramnun tunŋavigisukkiga Christ kisian.
\v 8-9 Iḷumun ayaktuiñaliġitka. Supayaat tamatkua saplułhiñaġaatŋa iḷitchuġiłiksraŋaniñ Christ Jesus-ŋum. Pakma iḷitchuġisullapiaġiga ilaa Ataniġiliutiłiksraŋagun. Suapayaaqsuli isummatigiliutigiga sumun atuġumiñaitḷugu pakmaaglaan inuġitlukkiga piqałiksraġa Christ-mik piqasiutiluŋa ilaani. Tavrakŋaaglaan isumatigiŋaiqsuŋa uvamnik nalaunŋasiyumiñaġluŋa sivuġaani Agaayyutim tupigiuraałhiñaġlugu maliġutaksraŋa, aglaan tunŋavigiliutigiga Christ kisian anniqsuqtiksraġa.
\v 10 Pakma iḷitchuġisukkiga Christ suli saŋŋia aŋipkairuaq ilaanik tuqułiġmiñ, suli nagliksaaqtitauluŋa ilaatun, tuquyumaluŋa ilaatun.
\v 11 Nalupqigiŋitchiga iñuułiġa Christ-kun aŋitqikkisipḷuŋa tuqułiġmiñ.
\s Aqpaqsrułiq Akimasaqtuni
\p
\v 12 Uqautigiyumiñaitchiga atriḷiutianiŋniḷuŋa Christ-mi naagaqaa ataramik iñuutlasiḷuŋa Christ-tupiaġataq. Aglaan sakuuktuŋasuli Christ-tun iḷisaiñaġukłuŋa iñuuniaġumiñaqsipḷuŋalu ilaatun.
\v 13 Iḷauramaaŋ, iḷisimaruŋa taatnaiḷiŋisilaamniksuli. Atausiq pisullapiaġiga, piiguġukługu itchuułiġa aglaan iḷisukłuŋa Christ qanuq itqukpaŋa.
\v 14 Christ-ŋum iḷitchuġipkaġaaŋa qanuq piqasiutiłiksrapkun iŋmigun. Atripḷugu aqpaqsruqtuaq sakuullapiaqhuni piññaktaaksraġmiñun uvaŋaptuuq sakuullapiaqmiuŋa iḷisukłuŋa ilaatun. Agaayyutim iŋmiñik tuqłuġaaŋa taatna iñuuniaqupluŋa.
\v 15 Iluqata nauŋaniksimaruaguut ukpiqsrił̣iptigun piqasiutipluta Christ-mi taatnaptuuq isummatiqaqta atautchimik Christ-kun. Aglaantuuq atlakun isummatiqaġupsi Agaayyutim kaŋiqsipkaġisigaasi taavrumiŋa.
\v 16 Pakma una inuqnaqtuq. Sivutmuktuiñaqta piqatigilugu Christ aullaġvigianikkaptigun.
\p
\v 17 Iḷauramaaŋ, iñuuniaġitchi iñuuniałłaptun iḷisaaqaġusi tamatkunakŋa maliġutchiruaniñ iñuuniałłamnik.
\v 18 Atakkii piqaqtuq atlanik maliġutchisuŋitchuanik Christ-mik—uqautigianikkamnik ilipsitñun aasiiñ alianniuqtitluŋa isummatigiaqsikapkich—akiḷḷiḷiqsuiruat Christ-ŋum tuqułhanik. Piqasiutiniuraqmiñatiŋlu ilaanun.
\v 19 Timitiŋ aanġuaġiliutiplugich agaayyutitun. Kamagiliutiplugichunniiñ savaatiŋ kanŋugiraksraġaluatiŋ, aasiiñ aqulliqsaaŋatni uvlut piqatauyumiñaitchut Agaayyutmi atakkii isummatigiłhiñaqługu iñuuniałiqtiŋ maani nunami.
\v 20 Aglaan iluqaptiknun atlaullapiaqtuq. Isummatigiraġigikput Agaayyun nayuqtigiplugu, niġiugaqaqhuta anniqsuutrimik kisianiñ ilaaniñ, aasiiñ taamna anniqsuutri ittuq ataniq Jesus Christ.
\v 21 Ilaan simmiġisigai sayaitchuatlu tuquraġaqtuatlu timivut atriḷiutilugich iŋmi kamanaqtuamun tuquyumiñaitchuamun timimiñun. Taatnaġumiñallapiaqmipḷuniḷu atakkii aŋalatchipḷuni supayaanik tavra piuq.
\c 4
\p
\v 1 Iḷauramaaŋ 
nakuaġillapiaġipsi suli inuġiplugu piqataułiksraġa
ilipsitñi. Quviatchaktitkipsitŋa suli piqpagnapiaqtusi uvamnun.
Taatnaqhusi napammaaġigitchi Atanikun itqaġilugu qanutun uvamnun
piqpagiłiqsi.
\s Alġaqsruutit
\p
\v 2 Uqautisukkikka aġnak atiqaqtuak Evodia-mik suli Syntyche-mik:
Nutaami iñuułiġmi Christ-kun qanaaġumiñaitḷutik suli
iḷannaġiiksitqikhutik.
\v 3 Iḷannamaaŋ tuniqsimaplutin, iŋiqmigikpiñ ikayuquplugik
taapkuak aġnak savaaqaqtuak sakuukhutik siamitchiñiaqhutik
tusaayugaaġiksuamik piqatigipluŋa sulipsuuq Clement-lu savaqatitkalu;
Agaayyutim itqaġigai iluqaisa atqich aglausimaruat makpiġaaŋiñun
iñuułhum.
\p
\v 4 Nipliutigianiksimakkaġa sivuani nipliutigitqiḷgitchiga, itna,
Quviasuutigisiuŋ ataramik iñuulułiqsi Christ-mi.
\v 5 Ki, iñuich iḷitchuġilitruŋ Christ ilipsitñi
iłuaqqutrił̣ł̣apsigun iluqaitñun iñuŋnun iŋmiguaŋił̣ł̣apsigunlu.
Ataniq Agaayyun qanittuq ilipsitñi.
\v 6 Taatnaġusi isumaaluutiqaġumiñaitchusi sumik, aglaan
iŋiqsruutigiłhiñaqsiuŋ. Uvva, iŋiqsrułłapsitñi uqautilugu Agaayyun
inuġikkapsitñik suli quyalugu ataramik kiggusiaqaqapsi.
\v 7 Agaayyutim tutqiksitkisigai isummatisi atakkii taamna
qiñuiññaq kamanatluktuaŋuruq kaŋiqsił̣iġmiñ. Agaayyutim uummatisi
qiñuisaaqtitkisigai isumatuiñaqtillusi Christ-mik tunŋagupsi
ilaani supayaakun.
\p
\v 8 Aqulliuplugu, isummatigigupsiuŋ iḷumutuuruaq kamanaqtuaġlu
nalaunŋaruaġlu ipqitchuaġlu iłuaqnaqtuaġlu, suli
isummatigigupsigich nakuuruat atlani, suli itqaġilugu
quyasuglugu Agaayyun nanġaġlugulu, tavra tutqikkisirusi
Agaayyutmi.
\v 9 Uvamniñ iḷisaaqaqtusi Christ-mik akuqtuaġiplugu ilaa
iñuułipsitñun, tusaaplugu suli qiñiqługu qanuq tunŋałiġa
Atanġuruami supayaatigun. Iḷisimagupsiuŋ ilaa
minġuiqsiaġvigilugulu uvaptun, Agaayyun qiñuiqsitchiruaq
uvaptiknik nayuutigisiruq ilipsitñi.
\s Quyyatit Aatchuutitigun
\p
\v 10 Quviasullapiaqtuŋa ikayutqikapsitŋa ikayuqqaaqłuŋa
sivuani. Taatnaqługu nanġaġukkiga Ataniq. Iḷumun
ikayuanikkaluaġipsitŋa aasiiñ iḷitchuġigiga piviqanġił̣iqsi
ikayuił̣iksrapsitñik uvamnik taimakŋaaglaan.
\v 11 Uqautigiŋitkiga taamna pisigilugu inuqsriułiġa. Iḷitchuŋa
pisuiqsimaatlasripḷuŋa piqaġisiŋŋaġma aŋiruamik naagaqaa mikiruamik.
\v 12 Iḷisimagiga iñuuniałiq inuqsriuqłuŋa naagaqaa
susuksiiŋitḷuŋa. Iḷitchuġipmigiga iñuuniałiq ukpiqsrił̣ikun
susuksiiŋitkuma naagaqaa niġisukkuma.
\v 13 Iñuuniałhiñauruŋa supayaakun ikayuqsiġḷuŋa Christ-mik
saŋŋisipkairuamik ukpiqsrił̣imnik.
\p
\v 14 Naagasuli iłuaqqutigipsitŋa ikayuqłuŋa iłuiḷḷiułłamni.
\v 15 Iḷauramaaŋ Philippi-mi, iḷisimallapiaġiksi
quliaqtuałiġa tusaayugaallautamik Macedonia-mi tavrakŋaasiiñ
aullautiplugu atlanun nunaaqqiñun. Taavapkunani uvluni kisipsi
ukpiqtuaŋuruasi qaitchirusi maniŋñik uvamnun. Quyyatigigiga taamna.
\v 16 Thessalonica-miitnama tuyuqtusi inuġikkamnik akulaiqł̣ugu.
\v 17 Uvvaasiiñ niġiunġiḷḷapiaqtuŋa atlanik aatchuusiaksramnik
ilipsitñiñ. Aglaan niġiugigiga Agaayyutmun
piḷiusiaqałiksrapsitñik iłuaqqutrił̣ł̣apsigun uvamnik.
\v 18 Iḷisimatquplusi akuqtuġitka tuyuutipayaasi
Epaphroditus-kun. Inuqsranġiḷḷapiaqtuŋa sumik. Aatchuutigikkasi
uvamnun iḷumun aatchuutigigisi Agaayyutmun. Agaayyutim quyaginiaġaa
taamna.
\v 19 Aasiiñ Agaayyutigikkaġma qaitchigisigaasi
iñugiaksiḷḷapiaġlugu supayaamik inuġikkapsitñik Jesus Christ-kun.
\v 20 Agaayyutvut Aapauruaq kamagikkauli taimuŋaaglaan.
Taatnatuq.
\s Paġlasuiqsaaġutit
\p
\v 21 Nayaaŋŋaġitkaguuq iluqaisa ukpiqsriruat iñuuqatauruat
Christ-mi, taatnatuntuuq ukpiqtuat nayuqtima tuyuġaasi nayaaŋŋamik.
\v 22 Iluqatiŋ ukpiqsriruat tuyuqmigaasi nayaaŋŋamik pitḷukhutiŋ
tamatkua Caesar-m savaktai ittuat.
\p
\v 23 Jesus Christ-ŋum iłuaqqutaa nayuutiyumauq iluqapsitñi.