\id 2TH  Iñupiatun [esk] NT (Northwest Alaska, USA) -2010 bd. 
\h 2 Thessalonians
\toc1 2 Thessalonians
\toc2 2Th
\mt Paul-ŋum Tugliat Tuyuutaiñ Thessalonica-ġmiunun
\c 1
\p
\v 1 Paul-miñ Silas-miñḷu suli Timothy-miñ ukpiqtuaŋuruanun ittuanun
Thessalonica-mi pigikkaŋi Agaayyutim Aapauruam suli
Atanġuruam Jesus Christ-ŋum.
\v 2 Uvvatuq Agaayyutim Aapauruam suli Atanġuruam Jesus Christ
qaitchiḷisi iłuaqqutmik suli qiñuiññamik.
\s Atanniiviksraq Christ Aggiqpan
\p
\v 3 Aniqatiumaaŋ! Agaayyun ataramik ilipsigun quyaraksraġigikput.
Nalaunŋaruq uvaptikni taatnaġupta, takku ukpiqsrił̣iqsi
atqunaq nautmuktuq, suli piqpakkutiłiqsi aglitmuktuq avatmun
atausriukattaaqhusri.
\v 4 Taatnaqhuta Agaayyutim ukpiqtuaŋuruaŋiñun uqautigigipsi
nanġaqhusri qanuq sivutmuutiplugu igḷutuił̣iqsi suli
ukpiqsrił̣iqsi tumigigaluaŋŋaan piyuaqsiułiq suli
nagliksaaqtitaułiq apqusraakkaqsi.
\v 5 Iluqatiŋ tamatkua nalupqinaiyaġaat Agaayyutim sivunniutaa
piqatautlasripḷusri aŋaayuqautaani nagliksaaqsiugaluaŋŋapsi.
\v 6 Uvvatakku Agaayyun atanniiḷuni nalaunŋaruakun, ilaan 
nagliksaaqtitkisiyai tamatkua nagliksaaqtitigikkasri. 
\v 7 Ilipsi nagliksaaqtuani ilaan pitḷuutigisigaasri taputiluta
qakugu Ataniq Jesus sagviqpan qiḷaŋmiñ
israġuliŋmiñik kamanaqtuamiñik piqasriġuni iknikun.
\v 8 Tamatkua naluruat Agaayyutmik suli tupiksriñġitchuat
tusaayugaallautamik Jesus-mik Atannaptiknik ikniġmik
anasriñŋuqsaġisigai.
\v 9 Tamatkua piyaqquġviŋmun isruiḷaamun anasriñŋuqsakkaugisirut,
Atanġum sivuġaaniñ suli saŋŋianiñ kamanaqtuamiñ piiġḷugich,
\v 10 qakugu taivrumani uvlumi aggiqpan, kamagikkaułiksraq
iñupayaamiñiñ unniiñ kamagikkaullapiałiksraq ukpiqsriruapayaaniñ
akuqtuġiaġlugu. Ilipsipsuuq ukpiqsrił̣ł̣apsigun
uqaġikkaptiknik akunġugisirusri.
\v 11 Taatnaqhuta iŋiqsruutiraġigipsi Agaayyutmun
akuqtuyunaqsitquplusri iñuuniaġvigitqukkaŋagun. Uvvatuq Ilaan
saŋŋimigun kimmutri iluqaan iłuałiksramun pisuiqsimaatlasriḷiuŋ,
savaaqsi ukpiksrił̣ł̣apsigun taŋiġḷugu.
\v 12 Taatnałłapsigun Jesus-ŋum Atannapta atiġikkaŋa ilipsitñiñ
kamagikkaugisiruq suli ilipsi ilaaniñ Agaayyutipta suli Atanġum
Jesus Christ-ŋum iłuaqqutrisaagun.
\c 2
\s Iñuk Pigiiḷaq
\p
\v 1 Aniqatiumaaŋ! Piqutigiplugu Atannapta Jesus Christ-ŋum aggił̣iksraŋa suli uvagut katitaułiksraqput ilaanun iŋiġipsi,
\v 2 isrummatri qanuġviiġaqtitqunġitḷugu qaġanaġlugu unniiñ akatautqunġitḷusri Atanġum uvlua tikiumaaniŋniḷugu. Taamna uqautauvaluktuaq sivuniksriqirit iḷaŋatigun unniiñ kia quliaqtuaġivalukkaŋa unniiñ iñuich uqaġivaluŋniġaatigut taavrumiŋa tuyuutiptikni aglaŋnipḷuta.
\p
\v 3 Tamarrumuuna kimun-unniiñ iñuŋmun kinnipkaġumiñaitchusri, takku taimña uvluq tikitchumiñaitchuq kisianik Agaayyutim igḷuliuġviksrautaa aqulliq atuumagaluaqnagu suli Iñuk Pigiiḷaq sivuniqaqtuaq tammaġviŋmun sagviġaluaqnagu.
\v 4 Taavruma Iñuum supayaaq iñuich agaayyutiqaġniałhat suli isrummatipayaaŋat agaayyutikuaġiakun igḷuliġisiyaa. Iŋmiñik inillakkisiruq iluqaanun qulliġuġuni unniiñ Agaayyutim agaayyuvikpaŋanun isiġuni suli aquvilluni agaayyutauniḷuni.
\v 5 Itqaġinġitpisiuŋ tamarrumiŋa iluqaanik uqautianiłiqsi ilipsitñi nayuuti'ama?
\v 6 Aglaan taamna pakma piraiḷiriqaqtuq iḷisimaanikkaqsi. Piviksraq nalaullugu taimña Iñuk Pigiiḷaq sagviġisiruq.
\v 7 Pigiirrun quviqnaqsipḷugu aullaġniiŋaniktuq, aglaan atuummiruaksraq atuummiyumiñaitchuq kisianik tamarruma tigummisaa piiġaluaqtitnagu.
\v 8 Tarakŋa Iñuk Pigiiḷaq sagviġisiruq, aasrii Atanġum Jesus-ŋum qaniġmi aniġniŋanik tuqqutkisigaa piyaqquġlugu sagvił̣iġmigun kamanaqsiḷugu aggiġumi.
\v 9 Iñuk Pigiiḷaq tikitkisiruq saŋŋiḷik Tuunġaġmiñ qanusripayaanik quviqnaqtuanik iñiqtaqaġuni, taŋiġiḷaanik qiñiqtitchiḷuni kamagiraksraŋitñiglu.
\v 10 Taavruma qanusripayaamik pigiiḷamik kinnigisigai. Iliŋich akuqtuiñġił̣iġmiktigun suli piqpaksriñġiłiġmiktigun iḷumutuuruamik anniqsułiksraġmiknun piyaqquġisirut.
\v 11 Taatnaġlugich Agaayyutim saŋŋisiḷugu killukuałiksraŋat iḷipkaġisigaa, taŋiġiḷaamik ukpiqsritḷasriḷugich.
\v 12 Taatnaġutiŋ ukpiqsriñġitchuapayaat iḷumutuułiġmik quvianaqaġniaqtuat killukun piyaqquġisirut.
\s Piksraqtaaŋurusri Anniqsułiksramun
\p
\v 13 Aniqatiumaaŋ! Atanġum piqpagikkaŋasri, uvagut Agaayyun ataramik quyagiraksraġigikput piqutigilusri. Uvvatakku Agaayyutim piksraqtaaġiqqaaġaasri anniqsułiksramun Ipqitchuam Irrutchim saŋŋiagun suli ukpiqsrił̣ł̣apsigun iḷumutuułiġmik Agaayyutmun iñugitquplusri.
\v 14 Taavrumuŋa piksraqtaaġigaasri tusraayugaallautaq tumigiplugu uqautigikkaqput ilipsitñun. Atannapta Jesus Christ-ŋum quvianaŋani piksraqsi piññaktaġitquplugu, Agaayyutim tuqłuġaasri.
\v 15 Aniqatiumaaŋ! Taatnaġusri makitaaġitchi payaŋaiġusri, suli tamatkunuŋa iḷumutuuruanun iḷisauttutigikkaptiknun ilipsitñun iluqaakkun uqałłaptigunlu suli aglaptigun tunŋalusri.
\v 16 Uvva Atannapta Jesus Christ-ŋum iŋmiñik suli Agaayyutim Aapapta piqpagipluta suli iłuaqqutrił̣iġmigun isruiḷaamik araaqtuutmik suli niġiugallautamik qaitchigaatigut.
\v 17 Ilaantuq aragligich uummatisri saŋŋisiḷusri atuił̣iksrapsigun nipiqałiksrapsigunlu iluqaanik nakuuruamik.
\c 3
\s Iŋiqsruutiyumiiptigut
\p
\v 1 Aniqatiumaaŋ! Suliuvva iŋiqsruutiyumiiptigut Atanġum uqałha uvaptigun sivutmun igliłiksraŋagun sukasriḷuni kamagikkauluni ilipsitñi pipmatun.
\v 2 Suli Agaayyutmun iŋiqsruutiyumiiptigut annausimatquluta iñuŋniñ pigiitchuapayaaniñ. Uvvatakku iñuich iḷaŋich tusraayugaallautaq ukpiġinġitchaat.
\v 3 Aglaan Atanġuruaq tuniqsimaruq. Ilaan saŋŋipkaġisigaasri pigiitchuamiñ annausrimalusri.
\v 4 Atanġum nalupqisrunġisitkaatigut ilipsigun atuigisił̣ipsitñik sivutmun uqaġikkaptiknik ilipsitñun.
\v 5 Atanġuruamtuq Agaayyun piqpagipkallaŋniaġliuŋ suli Christ-ŋum anuqsrutiqaqtillaŋniaġlisi.
\s Savaktuksraupiaqtugut
\p
\v 6 Aniqatiumaaŋ! Atannapta Jesus Christ-ŋum atqagun tiligipsi, piisimaaġumuusri aniqatiupayaaniñ iñuuniaqtuaniñ iqiasruułikun maliġutchiñġitchuaniñḷu iḷisauttutinik qaisaptiknik.
\v 7 Ilipsi atuiruksraułiqsi uvaptiktitun nalupqiginġitchiksi. Ilipsitñi nayuuti'apta iqiasruktaunġitchugut.
\v 8 Nalaiḷaamik akuqtuiriłhiñaunġitchugut, aglaan savaktugut unnuaqtuummaan sakuukhuta akiyausrunġił̣ikun kimununniiñ sakuugutiqaqhuta.
\v 9 Iŋiłhiñaugaluaqhuta iñuuniutiksraptiknik iŋinġitchugut, takku taavrumuuna ilipsitñi atriŋuyummiuqhuta.
\v 10 Tamanna uqautigikkaqput ilipsitñi innaptikni, kiñapayaaq savagutlaitpan niġiruksraunġitchuq.
\v 11 Taatna tusraarugut iñuŋnik iqiasruuruanik akunnapsitñi iḷaqaġnipḷusri suniurasruŋaqatiŋ aglaan iñuich atlat sułhatnun iḷḷagautniaqhutiŋ.
\v 12 Atannapta Jesus Christ-ŋum atqagun taatnatchich iñuich tiligivut suli alġaqsruġivut iñuuniurallautaquplugich, nalaullugu iñuuniutiksraġniaquplugich.
\v 13 Aniqatiumaaŋ, aglaan ilipsi savaallautaq iñiqtuutraqtaksraġinġitchiksi.
\p
\v 14 Taamani maliġutchisunġitchuamik uqautiptiknik ukunani aglaŋni, nalunaisitchumigiksi taamna iñuk piqaqpan. Piqatigisruŋaqnagu, ilaali kanŋusruliġumuuq.
\v 15 Uumigiritun irrutisruŋaqnagu, aglaan aniqatitun alġaqsruġlugu.
\s Uqautipsaaġutit
\p
\v 16 Uvvatuq Atanġum kaŋiuruam qiñuiññaŋa ataramik sukupayaaq qaitchiḷisi qiñuiññamik. Atanġumtuq iluqasri nayuġlisi.
\v 17 Uvaŋa Paul aglakkitka nayaaŋŋat uvamnik. Tarra taatna iḷitchuqqutaat uvaŋa tuyuutipayaaġma, taatniittuq aglausiġa.
\v 18 Uvvatuq Atannapta Jesus Christ-ŋum iłuaqqutrisaan iluqasri itqatigilisi.