\id TIT  Iñupiatun [esk] NT (Northwest Alaska, USA) -2010 bd. 
\h Titus
\toc1 Titus
\toc2 Tit
\mt Paul-ŋum Tuyuutai Titus-mun
\c 1
\p
\v 1 Tuyuutit ukua aggiqsut Paul-miñ savaktaaniñ Agaayyutim,
uqqiraqtigiplugu Jesus Christ-ŋum. Agaayyutim piksraqtaaġigaaŋa 
ikayuquplugich ilaan iñuksraqtaaŋi ukpiliquplugich suli
iḷisauttutiqaġlugich iḷumutuunġagun ukpiġusripta,
\v 2 tunŋaviqaqtuakun niġiugaqałikun isruitchuamik iñuułiġmik.
Agaayyutim saglutlaitchuam akiqsruġniġaatigut taavrumiŋa
iñuułiġmik sivuani aullaġniił̣han piviksrauruam.
\v 3 Aasrii nalaullapiaqługu piviksraq sagviġaa taamna
tusraayugaaġiksuaġmigun. Taatnaqtuksraġuqłuŋa savaaksritchaaŋa,
uvaŋaasrii uqaġiplugu tillisaagun Agaayyutim Anniqsuqtipta.
\v 4 Titus, aglaktuŋa ilipnun iġñaurapiamnun ukpiqsrił̣ikun
piqatigikkamnun. Agaayyutimtuq Aapauruam suli Christ Jesus
Anniqsuqtipta iłuaqqutikun qiñuiññiqsimaaġumigaatin.
\s Titus-ŋum Savaaŋa Crete-mi
\p
\v 5 Uvaŋa unitchikpiñ Crete-mun iłuaqsruquplugich sut iłuaqsrugaksrauruat taamani, 
suli nalunaiqsitquplutin ukpiqtuaŋuruat
qaukłiksraŋitñik nunaaqqipayaani. Tillisitka itqaġilugich,
\v 6 qaukłiksraqtaaŋuruaq patchisaitchuksrauruq, aŋun atautchimik
iḷaqatiqaġuni, suli qitunġai ukpiqsriŋulutiŋ uqautausruŋaqatiŋ
pitchiġiiḷḷugich tupiktaił̣ikun.
\v 7 Uqaqtiksraqtaaq Agaayyutim savaaŋanik aŋalatchiruksrauplugu
patchisaitchuksrauruq, pisułiġmigausruŋaqani, uumitchaktanġiġuni
unniiñ imiliġaqtausruŋaqani, qinnaktasruŋaqani unniiñ killukun
piqaġugruasuŋaqani.
\v 8 Ilaa tukkuġiŋñaqsuksrauruq, piqpaksriŋuluni nakuuruamik, iŋmiñun
aŋalalguluni, nalaunŋaluni, ipqiḷḷuni, suli alġaqsruutmik
tuvrairuaŋuluni.
\v 9 Uqaqtiksraqtaam payaŋairvigiraksraġigaa uqauttutini
ukpiġiraksrauruaq suli iviqtisrimaaqtuaq iḷisauttutmun. Taatna
ilitqusriqaġumi ilaa pitchuksaaġilgugisiruq atlanik iḷumutuuruakun
iḷisauttutikun, suli qiñiqtilgugisiyaa taŋiġiḷiqqutaat akiḷḷiiruat
uqałiġmun.
\p
\v 10 Uvvatakku iñugiaktut tupiguutaitchuat iñuich
kinnitñikhutiŋ atlanik nipiqałiġmikkun kinniqiłikun, suvaluk taapkua
iḷisautriruat iñuk nalunaitŋutchiqsuksrauplugu annautrauniaqpan.
\v 11 Iḷisauttutaat nutqaqtitaksraġipiaġiñ, takku iliŋisa
akasrimagaich aŋayuqaaġiich iḷisautrił̣iġmikkun
iḷisauttutiginġiḷaaksraġmiknik killukun piqaġugruaqhutiŋ.
\v 12 Crete-taġmiut iḷaŋat sivuniksriqiraat nipliġñiqsuq,
Crete-taġmiurguuq ataramik sagluturuaŋunipḷugich, niġrugaaqłuktun
innipḷugich, suli iqiasruuplutiŋ niġitḷaturauŋuplugich.
\v 13 Aasrii taamna nipliun iḷumutuupluni. Taatnaġlugich
iłuałiksraŋatnun ilvich iñiqtiġumigitin ipiksiḷugu, iliŋiḷḷi
sayakturuamik ukpiġusriñikkumuut,
\v 14 itlunġiġutiŋ Jew-ŋuruat unipchaaliaŋitñunlu iḷisauttutaatnunlu
suli iñuich tillisaatnun, ayyairuat iḷumutuułiġmik.
\v 15 Supayaaq ipqitchuq iñuŋni ipqitchumaruani, aglaan
ipqitchuaŋitchuq tamatkunani qaayuġnaqtuani suli ukpiqsriñġitchuani,
takku iliŋisa isrummatiŋich suli qauġrimmaaġiutillautaŋich
qaayuġnaqsianiksimaplutiŋ.
\v 16 Iliŋich iḷitchuqsrimanigaluaqhutiŋ Agaayyutmik, aglaan
iñuuniałhata piiḷaaġigaa, iliŋich uumiktanikhutiŋ, tupiktaiqhutiŋ,
iñiqtaqaġumiñaiqhutiŋ nakuuruamik.
\c 2
\s Nalaunŋaruat Iḷisauttutit
\p
\v 1 Aglaan ilvich iḷisauttutigiraksraġigiñ iḷisauttutiksraq
iḷumutuurautigun uqałiqtigun.
\v 2 Uqautilugich utuqqanaaġuqtuat aŋutit qauġrimmaaġiqulugich,
isrumaugalgulutiŋ, iliŋitñik aŋalalgusritqulugich. Iḷumutuġuġutiŋ
ukpiqsrił̣iġmikkun, piqpaktaġmikkun, suli igḷutuiḷgusrił̣iġmiktigun.
\v 3 Taatnatuntuuq uqautilugich utuqqanaaġuqtuat aġnat ukpiqtuam
irrusrianik piqaqulugich, sagluturuaŋutqunġiḷḷugich, naagaqaa
tigutarriutitqunġiḷḷugich taaŋŋaġmun, iḷisautritqulugich nakuuruakun,
\v 4 atriraksrallautaġuġutiŋ nutautluktuanun aġnanun
piqpaksrił̣iksraŋatigun iḷaqatiumiknik suli qitunġaġmiknik,
\v 5 iŋmiknun aŋalalgusriḷutiŋ ipqił̣ikun suli iḷaqatausruqsiḷutiŋ
kiñuniġmi, tupiqsritḷasriḷutiŋ aŋutiumiknik. Agaayyutimli uqałha
iñuich suuŋiḷḷaġinġitchumigaat.
\v 6 Taatnatuntuuq pitchuksaaġlugich nukatpiat
aŋalallautałiksraŋatnun iŋmiknik.
\v 7 Ilviḷḷu supayaatigun atriraksrallautaġuġutin savaallautakun.
Iḷumutuġullapiaġutin suli piyummatiqaġutin iḷisautrił̣iqni.
\v 8 Uqautriḷutin naġġuksruġnaġumiñaitchuakun, akiḷḷiḷiqsuqtitin
kanŋusrutlasriḷugich, pigiitchuakun nipiksraiḷḷutiŋ uvaptigun.
\v 9 Uqautilugich savaktaaġruich tupiksritqulugich
aŋaayuqaġmiknik suli quyaliḷugich sukupayaaq. Iliŋich
kiumakłiqsuksraunġitchut
\v 10 unniiñ tigliktuġvigiraksraġinġitchaich. Aglaan ataramik
urriqsuqtaksraġigaat nakuułiqtiŋ suli qanutitaŋaił̣iqtiŋ
kamagikkaułiksraŋanun iḷisauttutim Agaayyutikun Anniqsuqtiptigun
suraġałipayaaġmikni.
\p
\v 11 Uvvatakku Agaayyutim iłuaqqutaa iḷisimanaqsiruq iñupayaat
anniqsułiksraŋatnun.
\v 12 Taavrumuuna iłuaqqutmigun Agaayyutim iḷisautigaatigut
agaayyutaiḷaakuaqunġitḷuta suli nunakuałhum kimmutaaguaqunġitḷuta,
iñuutqupluta uvaptiknik aŋalalgusriḷuta, nalaunŋaluta, agaayyutiqaġuta
pakma uumani nunami,
\v 13 taqqił̣ł̣aptikni quvianaqtuamun uvluanun niġiugaġikkapta,
kamanautaa kamanaqtuam Agaayyutipta Anniqsuqtipta Jesus Christ-ŋum
sagviqpan.
\v 14 Ilaa qaitchuaq iŋmiñik piqutigipluta, annautisraqhuta
pigiitchuapayaamiñ suli pigiagutitqupluta iŋmiñułhiñaq, ipqiġuta,
piyummatiniguta nakuuruakun.
\v 15 Tamatkua iḷisauttutigiyumigitin, atuġlugich aŋalatchiñiqni,
pitchuksaaġiłiqni suli alġaqsrułhatni tusraarivich. Nalliatnun-unniiñ
piiŋiḷḷaġipkasruŋaqnak.
\c 3
\s Ukpiqtuam Agaayyutikuaġiałiksraŋa
\p
\v 1 Itqaaqtuutilugich iñugikkatin maliġutchił̣iksraŋatigun aŋalatinik
suli qaukłiġñik, tupiksrił̣ikun iliŋitñik, itqanairrutitqulugu
savaallautapayaaq.
\v 2 Uqautilugich pigiiḷakun uqautiksritqunġiḷḷugich, aglaan
qiñuiyusrimaaġlugich, iḷauraaqnaġlugich, suli ataramik
aggaŋairrutrił̣ikun irrutriqulugich iñupayaanik.
\v 3 Uvvaptuuqtakku qaaŋikkaptikni kinniqipluta, tupiktaitḷuta,
nalaunŋaisimarugut, savaksiqsimaplugu kimiksrił̣iq quvianaġikkaŋigun
killuum qanusripayaatigun, iñuuniaqhuta uumiktakun suli siqñaktakun
uumikkutipluta avatmun.
\v 4 Aglaan Agaayyutim Anniqsuqtipta aggiqami piqpaksrił̣iġmigun suli
iłuaqqutrił̣iġmigun anniqsuġaatigut. 
\v 5 Uvagut savaaqallautałłaptiguunġitchuaq aglaan ilaan
nagliksrił̣iġmigun anitqiksitkaatigut salummakkaukapta imiġmik
aasriiñ Ipqitchuakun Irrutchikun qaitchipḷuta nutaamik iñuułiġmik.
\v 6 Uvvatakku Agaayyutim aglipḷugu qaitchigaatigut Ipqitchuamik 
Irrutchimik, uumuuna Jesus Christ-kun Anniqsuqtiptigun,
\v 7 taavrumuuna iłuaqqutaagun uvagut nalaunŋasripkaqhuta Agaayyutmi,
suli piññaktaaġilugu isruitchuaq iñuułiq niġiugaġikkakput.
\p
\v 8 Tarra taamna iḷumutuuruaq nipliun. Uvaŋa ataramik uqaqugikpiñ
tamarrumuuna nalupqisruutaiġutin, iñuiḷḷi ukpiqsriruat Agaayyutmik
ataramik kipiġiyumuut piviqaqtiłiksraŋagun savaallautam. Taatnatchich
savaallautat nalaunŋarut suli ikayuutiksraurut iñuŋni.
\v 9 Aglaan piisimaaġvigilugu isiḷġaił̣ikun uqaksraqtułiq, immakŋaqtatigun
atiqtigun kaŋŋiułiq, aivvatrałiq, suli akimaniutrałiġmiñ maliġuksratigun
qaisauruatigun Moses-kun. Tamatkua ikayuutaunġitchut unniiñ
pitḷuktuaŋunġitchut.
\v 10 Malġuġuġluguunniiñ alġaqsruutiqaġumigiñ iñuk akatchiruaq
avgumałiġmik iḷamiñi, suqutigitqisruŋaqnagu maliŋŋuġutillanġitpan.
\v 11 Uvvatakku iḷisimagiñ taatnasriq iñuk iłuaqsruutaunġitchuq suli
killuqsautaiñ kaŋiqsimapkaġaġigaat nalaunġił̣hagun.
\s Iḷisauttutit Aqulliich
\p
\v 12 Qakugu tuyuġiyupku Artemas naagaqaa Tychicus ilipnun,
utlallaksapiaġumigikma Nikopolis-mun, takku sivuniqaqtuŋa
ukiisukłuŋa tarani.
\v 13 Ikayuġniallapiaġumiikkiñ Zenas, maliġutaksraliqirilu suli
Apollos aullaġniałhakni iglaułiksraġmiknun, suli supayaamik
inuŋaiyallapiaġlugik.
\v 14 Iḷisautilugich iñugikkavut piviqaqtitchił̣iksraŋatigun
savaallautamik, aasiiñ piqaqtitchiḷutiŋ atlat inuġikkaŋitñik
iqaisruktuasruŋaqatiŋ.
\p
\v 15 Iluqaġmiŋ piqasriqsuqtima nayaaŋŋaġaatin. Nayaaŋŋaqmigivut
ukpiqtuaqatiuvut. Agaayyutim iłuaqqutaan iluqasri nayuġumigaasri.