\id COL Guarayu [gyr] NT (Bolivia) -2011 bd. 
\h COLOSENSES
\toc1 Colosenses
\toc2 Col
\mt2 PABLO REMBICUACHIA COLOSA PENDAR UPE
\mt COLOSENSES
\c 1
\s Pablo mahenduhasa Jesús reroyasar Colosa pendar upe
\p
\v 1 Che, Pablo, Jesucristo apóstol aico Tũpa remimbotar rupi yande rɨvrɨ Timoteo reseve.
\v 2 Co aicuachía pẽu, pe Cristo rese peico tuprɨ vahe Colosa ve, Tũpa upendar peico vahe. Yande Ru Tũpa tape rovasa, tombou pe reco tuprɨ ãgua pẽu.
\s Pablo yeruresa Jesús reroyasar rese
\p
\v 3 Arɨ yacatu ore yeroquɨ pɨpe, “Avɨye ndeu” orohe yande Yar Jesucristo Ru Tũpa upe pe rese.
\v 4-5 Esepia, oroyandu acoi oyepota ramose Tũpa ñehe supi eté vahe, avɨye vahe pɨ̃sɨrosa resendar pẽu, peyapɨsaca tuprɨ sese. Ipɨpe sui peyeroya ɨvave pe reique ãgua Tũpa porerecosa pɨsɨ ãgua. Ahe ichui peyeroya tuprɨ Jesucristo rese iyavei pesaɨsu opacatu ambuae Tũpa rembiporavo yepi.
\v 6 Co ñehesa imombehusa avei opacatu ɨvɨ rupi, setá ava oipɨsɨ tuprɨ avei yuvɨreco. Inungar acoi pesenduse yɨpɨndar Tũpa porovasasa resendar ñehesa, ipɨpe sui peicua tuprɨ catu ahe porovasasa supi eté vahe.
\v 7 Co ñehesa yande rembiaɨsu yande mboetasa Epafras pe mbohe. Ahe mbɨa yande Yar Jesucristo rese oporavɨquɨ vahe ore rupi, ocuaita vɨroya tuprɨ vahe pe pãhuve.
\v 8 Ahe omombehu oreu Espíritu pɨpe pe ore raɨsusa resendar.
\p
\v 9 Sese avei ore aipo nungar rendu ramoseve ndoroyeroquɨpai pe rese. Oroyeroquɨ, oroporandu pe rese ‘toicua tuprɨ opacatu Tũpa remimbotar ombahecuasa Espíritu suindar pɨpe, senducua tuprɨsa pɨpe avei yuvɨreco’ ore yapave pẽu.
\v 10 Ipɨpe sui tapeguata tuprɨ yande Yar rupi seroyasar tuprɨ pe recosa pɨpe. Tapemboavɨye tuprɨ opacatu semimbotar; mbahe pe rembiapo tuprɨ pereco catu sovaque. Ipɨpe sui avei tapeicua tuprɨ catu Tũpa recocuer peico.
\v 11 Iyavei tombou catu pe momirata ãgua güecocuer pĩratasa pɨpe sui. Evocoiyase oimese que mbahe tẽi pẽu, peñemosañora pe reco mbegüesa pɨpe.
\v 12 “Avɨye ndeu” peyera pe vɨharetesa pɨpe yande Ru Tũpa uve. Esepia, ahe omoingatu pe recocuer peipɨsɨ ãgua iporerecosa oime vaherã opacatu sembiporavo upe acoi yuvɨrecoi vahe Tũpa poroesapesa pɨpe.
\v 13 Ahe niha yande pɨ̃sɨro Caruguar povrɨ sui. Ẽgüe ehi yande reraso Guahɨr güembiaɨsu povrɨve.
\v 14 Ahe Tahɨr yande pɨ̃sɨro iyavei yande angaipa rese iñero yandeu.
\s Jesús omano curusu rese Tũpa upe opacatu mbahe moingatu ãgua
\p
\v 15 Jesucristo niha omboyecua uca Vu recocuer ndoyecuai vahe güecocuer pɨpe. Ahe avei niha yɨpɨsuive ɨvate catu vahe opacatu mbahe yapoprɨ sui.
\v 16 Esepia, Tũpa niha opacatu mbahe oyapo uca Guahɨr upe aracahe: ɨvɨve, ɨvave avei; oyecua vahe, ndoyecuai vahe avei no. Ipɨpe sui avei yapoprɨ opacatu ɨva pendar mborerecuar, mborerecuar guasu iyavei mborerecuar ɨvate catu vahe. Ẽgüe ehi ipɨpe sui opacatu mbahe yapoprɨ, chupe nara avei.
\v 17 Ahe oicove yɨpɨsuive aracahe opacatu mbahe reimeẽhɨ vɨteseve. Ahe avei omoime vɨte opacatu mbahe yandeu.
\v 18 Iyavei ahe niha yande rerecuar tenonde secoi yandeu opacatu seroyasar yaico vahe. Esepia, ahe rane yɨpɨndar vahe iyavei ahe rane avei ocuerayevɨ. Evocoiyase ahe ɨvate catu vahe opacatu sui.
\v 19 Esepia, Tu oipota opacatu güecocuer reseve secoi ãgua sese yepi.
\v 20 Iyavei ‘che Rahɨr recocuer pɨpe sui taroyevɨ iri opacatu mbahe cheyeupe ɨvɨ pɨpendar, ɨva pendar avei’ oya. Ẽgüe ehi Jesús oipɨyere vuvɨ curusu rese Tũpa upe opacatu mbahe moingatu ãgua.
\p
\v 21 Yɨpɨndar pe pɨhañemoñeta raisa pɨpe sui tẽi amombrɨ Tũpa sui peico yamotarẽhɨsa pɨpe mbahe pe rembiapo ai rese.
\v 22 Cũritei rumo Tũpa iñero pẽu pe reroyevɨ oyeupe Cristo mano pɨpe. Ahe niha ẽgüe ehi Vu rovai ipehaprɨ pe rereco oyeupe nara, pe reco maranehɨ ãgua mbahe avɨẽhɨsa pɨpe ava rovaque.
\v 23 Ẽgüe peye ãgua rumo peyemovɨracuaño itera Cristo rese pe yeroyasa pɨpe yepi. Ndapeyepepɨi chiaveira mbahe oime vaherã rese pe yeroyasa sui pesendu vahe co ñehesa ñepɨsɨrosa resendar pɨpe. Ahe imombehusa opacatu ɨvɨ rupi. Che niha Pablo, icuaiprɨ, aico co ñehesa mombehu ãgua.
\s Pablo icuaita Jesús reroyasar rese hañeco ãgua
\p
\v 24 Cũritei avɨha pe rese che yemomborarasa pɨpe. Ẽgüe ahe iporara che rete rese cohave vichico. Ẽgüe ehi avei Cristo oyemomborara vɨte vɨroyasar rese. Esepia, yande seroyasar setecuer nungar yaico.
\v 25 Jesús reroyasar pɨ̃tɨvɨi ãgua niha Tũpa che cuai. Sese amombehu opacatu iñehengagüer pẽu pe reco tuprɨ ãgua rese.
\v 26 Ahe ñehesa aracahe suive ndicuasai vahe ité. Cũritei rumo Tũpa omboyecua vɨroyasar upe.
\v 27 Chupe ité omboyecua pota co ñehesa porañete vahe omboyecua ramo vahe ava ndahei vahe judío upe. Co ndicuasai vahe, ahe Cristo pe rese secoi vahe. Co yande remiaro yareco vaherã teco orɨ porañete vahe curi.
\p
\v 28 Ore niha Cristo recocuer oromombehu opacatu ava upe. Orombohe avei ava yaracua tuprɨ ãgua ore aracuasa pɨpe ‘toyuvɨrecoi tuprɨ ité Cristo rese Tũpa rovai’ ore hesa pɨpe.
\v 29 Co rese niha che aporavɨquɨ eteprɨ opacatu Cristo pĩratasa pɨpe.
\c 2
\p
\v 1 Che aipota peicua che yemboaquɨsa pe recocuer rese,
Laodicea pendar recocuer rese, setá ambuae ava che
cuaparẽhɨ recocuer rese avei
\v 2 ‘toyemonguerẽhɨ catu, toyemboyoya guasu oyeaɨsusa
pɨpe yuvɨreco’ viya. Iyavei ‘senducua tuprɨsa pɨpe
toyuvɨrecoi mbahe tuprɨ pɨpe’ viya opacatu pẽu. Esepia,
ichui avei peicua tuprɨra co mbahe imboyecuapɨ ramo, ahe
niha Cristo.
\v 3 Ahe vɨreco opacatu mbahe yande mboaracua ãgua, mbahe
renducua tuprɨ ãgua avei.
\v 4 Aipo mbahe amombehu pẽu ava oñehe tuprɨ aisa pɨpe
tẽi pe mbopaẽhɨ ãgua.
\v 5 Iyavei yepe amombrɨ aico pe sui viña, pe rese
chemahenduha pɨpe rumo aicoveño pe reseve yepi. Aicua
peguata tuprɨ aise pe reco ɨ̃visa pɨpe, ndapeyepepɨise
co cotɨ rupi Jesucristo reroyasa sui. Sese che
mbovɨhareteño ité peye.
\s Jesús suindar tecocuer pɨasu
\p
\v 6 Evocoiyase inungar acoi peipɨsɨ Jesucristo pe Yarã,
ẽgüe peye aveira peico sese arɨ yacatu rupi
\v 7 pe yemovɨracuasa pɨpe. Pe yembohesa rese
peyemomirata catura Cristo rese pe yeroyasa pɨpe. Iyavei,
“Avɨye ndeu” peye itera Tũpa upe arɨ yacatu yepi.
\p
\v 8 Peicua catu, peyembopa ucai rene aracahendar tẽi ava
aracuasa pɨpe. Esepia, ahe ẽgüe ehi tẽi vahe, ava
suindar tẽi yembohesa, ɨvɨ pɨpendar ava seco ɨvate
catu vahe pɨhañemoñetasa tẽi. Ndahei Cristo suindar
porombohesa.
\p
\v 9 Esepia, Cristo vɨreco opacatu Vu Tũpa reco oyese.
\v 10 Evocoiyase pe pereco Tũpa reco Cristo rese peicose.
Ahe opacatu mborerecuar ɨvɨ pɨpendar iyavei ɨva pendar
rerecuar secoi.
\v 11 Iyavei sese peicose, ahese inungar imbocircuncidaprɨ
peico. Ndahei rumo pe rete rese iyavei ndahei ava rembiapo
tẽi. Co rumo Cristo oyapo vahe pe recocuer rese. Esepia,
ahe vɨrocua pe recocuerai pe sui.
\v 12 Pe ãpiramosa pɨpe ndoyavɨi pe recocuerai
ñotɨmbrɨ Cristo reseve. Ẽgüe ehi avei ndoyavɨi pe
recocuer ocuerayevɨ vahe seseve avei, peyeroyase Tũpa
pĩratasa rese. Ahe niha ombogüerayevɨ vahe Guahɨr omano
vahe pãhu sui.
\v 13 Pe niha acoi cuese omano vahe nungar peico Tũpa upe
pe angaipa pɨpe, pe ndahei vahe judío peico vahe. Ahe
rumo pe recocuer mbogüerayevɨ Guahɨr reseve iyavei
iñero pe angaipa rese pẽu.
\v 14 Ahe yande cañɨ rãgüer rumo opa omboepɨ. Esepia,
yande iporocuaita pɨpe yaico imboavɨye ãgua viña,
evocoiyase imocañɨprɨ tẽi yaico ipovrɨve viña; ombou
rumo Guahɨr curusu rese yatɨca ãgua yande cañɨ
rãgüer sui yande renose ãgua.
\v 15 Ẽgüe ehi ahe omano pɨpe curusu rese caruguar,
ipovrɨ pendar mborerecuareta reseve secopɨ. Ẽgüe ehi
seco reroyɨ, inungar vavasa pendar ipɨsɨprɨ serasosa
opacatu ava rembiepiave.
\s Peseca ɨva pendar mbahe pe recocuer upe nara
\p
\v 16 Evocoiyase toñehe-ñehe tẽi eme que ava pe rembihu
rese yuvɨreco, pe ɨgua rese avei; anise que
ndapemboeteise judío pieta, que arɨ, yasɨ osẽ ramomi
vahe, anise que judío arɨ mbɨtuhusa avei no.
\v 17 Esepia, opacatu co mbahe, ahe yɨpɨndar vahe,
“Ẽgüe ehira Cristo ou” hesa tẽi yandeu. Co rumo Cristo
ité cute.
\v 18 Peyapɨsacai rene acoi ava “ndapeipɨsɨi chira
porerecosa ɨva pendar ndaperoyaise ore ñehe” ehi tẽi
vahe rese pẽu. Acoi ava “Tũpa rembiguai pemboeteira”
ehi tẽi vahe yuvɨreco. Ahe avei, “Che seco mbegüe vahe
aico” ehi angahu tẽi. Iyavei, “Che asepia che quer
nungar pɨpe ɨva pendar mbahe” ehi tẽi. Esepia, ahe
oyemboɨvate ai oaracua rai tẽisa pɨpe yuvɨreco.
\v 19 Evocoi rumo ndoyuvɨrecoi yande cuaisar Cristo rese
yuvɨreco. Ahe omovɨracua vahe opacatu vɨroyasar yepi.
Evocoiyase ahe omboyemboya tuprɨ oyese, ñepei vahe nungar
vɨreco oyeupe Vu Tũpa remimbotar rupi.
\p
\v 20 Pe omano vahe nungar peico Cristo rese. Evocoiyase
ndahe iri co ɨvɨ pɨpendar pɨhañemoñetasavrɨve peico.
¿Mahera evocoiyase peroya vɨte co ɨvɨ pɨpendar
porocuaita ẽgüe ehi tẽi vahe,
\v 21 inungar “pepocoi rene co mbahe rese, pehui rene
evocoi nungar mbahe” ehi tẽi vahe?
\v 22 Opacatu co nungar porocuaita ocañɨ tẽi vaherã.
Esepia, ahe ava remimbotar tẽi yembohesa, iporocuaita tẽi
avei.
\v 23 Co mbahe avɨye angahu aracuasa supi eté vahe.
Esepia, seroyasar ahe ehiño oyeruresa uve, oyeecomomini
tẽi iyavei omombaraɨsu güetecuer yuvɨreco viña. Ahe
aracuasa rumo ẽgüe ehi tẽi vahe. Esepia, ndayande
pɨ̃tɨvɨi eté yande yepepɨ ãgua yande remimbotarai
sui.
\c 3
\p
\v 1 Cũritei rumo ocuerayevɨ vahe peico Cristo rese. Sese
peseca catu co mbahe avɨye vahe ɨva pendar. Aheve ɨvave
Cristo oguapɨ oĩ güeco mborerecuasa pɨpe Vu acato
cotɨ.
\v 2 Pepɨhañemoñeta mbahe ɨva pendar rese, ndahei chira
ɨvɨ pɨpendar mbahe rese tẽi.
\v 3 Esepia, cũritei omano vahe nungar peico pe recocuerai
upe. Iyavei Cristo reseve peico Tũpa pɨri, inungar-ra
ɨvave viña.
\v 4 Cristo niha yande recovesa ité secoi. Sese ahe oyevɨ
irise curi, ẽgüe peye aveira perecora ipɨri seco orɨ
porañetesa.
\s Yande recocuer yɨpɨndar iyavei yande recocuer pɨasu
\p
\v 5 Evocoiyase pepoi opacatu co mbahe naporai vahe co
ɨvɨ pɨpendar tẽi pe rese oime vahe sui:
ndapeyemboaguasai chira, ndapeyapoi chira mbahe tẽi pe
recocuer pɨpe, ndapeipota rai chira pɨhañemoñeta raisa,
ndapeipota rai chiaveira ambuae ava mbahe (esepia, ahe niha
oyoya mbahe rahanga tẽi mboeteisa rese).
\v 6 Acoi oyapo vahe co nungar mbahe, ahe Tũpa ñemoɨrosa
oipɨsɨra seroyaẽhɨsa pɨpe yuvɨreco.
\v 7 Ẽgüe peye avei yɨpɨndar pe recocuerai pɨpe peico.
\v 8 Cũritei rumo peseya opacatu co mbahe-mbahe tẽi: pe
ñemoɨrosa, pe poroyucai aisa, pe reco raisa, pe ñehe
mara-mara tẽisa iyavei pe ñehesa ndayamombehui vahe.
\v 9 Ndaperemirai chira peyese. Esepia, pepoi yɨpɨndar pe
reco ai sui iyavei pe rembiapo ai sui.
\v 10 Iyavei peipɨsɨ tecocuer pɨasu, avɨye vahe. Ipɨpe
peyembohe arɨ yacatu yande Aposar Tũpa recocuer rese
peico, icua tuprɨ catu ãgua.
\v 11 Ndahe iri ɨvate yandeu “che griego aico” ehi vahe;
que “che judío aico” ehi vahe. Iyavei
“imbocircuncidaprɨ aico”, “nimbocircuncidaprɨi aico”
ehi vahe avei. Iyavei que “ahe ambuae tecua pendar
secoi”, “ahe chori”, “ahe ava rembiguai tẽi secoi”
ehi vahe. Aníse que “che ndahei ava rembiguai aico” ehi
vahe. Co rumo ɨvate vahe yandeu: Cristo ɨvate catu vahe
opacatu sui. Iyavei oyoya guasu opacatu yande pɨha pɨpe
yareco.
\p
\v 12 Esepia, Tũpa pe raɨsu eteprɨ iyavei pe poravo
‘toyuvɨrecoi cheu nara’ oya. Evocoiyase peyapora co nungar
mbahe: peporoaɨsura, peavara peyeupe, peñemominira, pe
reco mbegüera iyavei peñemosañora.
\v 13 Ẽgüe peyera peñemosa oyeupe, peñero aveira
opacatu oyeupe acoi pe pãhu pendar oñemoɨrose pẽu.
Inungar Cristo ñerosa ombou yandeu, pe avei ẽgüe peyera
ambuae ava upe.
\v 14 Iyavei peyeaɨsu catura. Esepia, ahe yande mboyemboya
tuprɨ oyese yepi.
\v 15 Acoi teco tuprɨsa Cristo ombou vahe pẽu, tape mbohe
pe pɨhañemoñeta tuprɨ ãgua. Esepia, co rese Tũpa pe
renoi ñepei ava nungar pe reco ãgua. Iyavei, “Avɨye
ndeu” peyera chupe.
\p
\v 16 Topɨta tuprɨ Cristo ñehengagüer pe pɨha pɨpe.
Pe aracuasa tuprɨsave peyembohe tuprɨ, peyemonguerẽhɨ
catu sapucaisa Tũpa resendar rese. Pesapucai opacatu
sapucaisa Tũpa upendar pe pɨhá pɨpe, “Avɨye ndeu” pe
hesave yepi.
\v 17 Iyavei opacatu que mbahe peyapo vahe, que peñehe
vahe avei peyapo yande Yar Jesús rer pɨpe. Jesús rer
pɨpe avei, “Avɨye ndeu” peyera Tũpa upe yepi.
\s Jesús reroyasar cuaita resendar
\p
\v 18 Iyavei pe no cuña omenda vahe: pemboyeroyara pe mer.
Ahe niha pe cuaita pe yande Yar rese peico vahe.
\v 19 Pe avei no imer: pesaɨsu pe rembireco. Perecoi rene
pɨhavɨ̃racuasa pɨpe.
\p
\v 20 Pe avei no chĩhivahe: peroya aveira pe yesupa.
Esepia, ahe yande Yar oipota.
\v 21 Pe avei no tu: pemoñemoɨro ucai rene pe rahɨr
peyeupe. Esepia, avɨyeteramo niquerẽhɨ iri chira ocuaise
pẽu.
\p
\v 22 Pe avei no mbiguai: peroya tuprɨ avei pe rerecuar co
ɨvɨ pɨpe yepi. Aní chira ahe pe repiaseño
pembovɨhara. Iyacatu rumo pemboyeroyara pe pɨhañemoñeta
tuprɨsa pɨpe, Tũpa sui pe sɨquɨyesa pɨpe avei.
\v 23 Opacatu mbahe peyapo vahe, peyapo pe querẽhɨsave
yande Yar mbovɨha ãgua. Ndahei chira ava mbovɨha ãgua
tẽi.
\v 24 Esepia, peicua tuprɨ co: yande Yar omboura
oporerecosa yandeundar. Esepia niha, Cristo upe nara ité
mbahe peyapo. Ahe niha pe Yar supi tuprɨ vahe.
\v 25 Acoi ava oyapo vahe mbahe naporai vahe, oipɨsɨ
aveira güembiapo ai reprɨ. Tũpa niha nomboyoavɨratɨi
yande raɨsu.
\c 4
\p
\v 1 Pe avei serecuar: peyapo mbahe ihɨ̃vi vahe pe
pɨhañemoñeta tuprɨsa pɨpe pe rembiguai upe.
Peyemomahenduha co rese: pe avei pereco pe rerecuar ɨvave.
\p
\v 2 Iyavei no opacatu peyeroquɨ catu arɨ rupi pe
mahemohasa pɨpe. “Avɨye ndeu” peye Tũpa upe.
\v 3 Peyeroquɨ avei ore rese. Tore pɨ̃tɨvɨi Tũpa
oñehengagüer mombehu vɨte ãgua. Toroñehe vɨte avei co
ñehesa Cristo resendar Tũpa omboyecua ramo vahe rese
yandeu. Sese tẽi niha co che roquendasa.
\v 4 Evocoiyase peyeroquɨ che rese, tamombehu tuprɨ catu
co ñehesa opacatu upe senducua tuprɨ catu ãgua. Ẽgüe
tahe che cuaita mboavɨye.
\p
\v 5 Peico tuprɨ pe aracuasa pɨpe ava ndahei vahe Cristo
reroyasar rovaque. Peyapo tuprɨ mbahe co tecocuer avɨye
vɨteseve.
\v 6 Pe reco avɨye tuprɨsa pɨpe peñehera yepi. Iyavei
peicua tuprɨra ñehesa mboyevɨ ãgua ñepei-pei ava uve.
\s Ñehesa ipa vahe
\p
\v 7 Co yande rɨvrɨ, yande rembiaɨsu, Tíquico, che
pɨ̃tɨvɨi tuprɨsar, ahe oporavɨquɨ tuprɨ yande Yar
recocuer rese che rupi. Ahe omombehura che recocuer
resendar pẽu.
\v 8 Sese co amondo pẽu ore recocuer cua tuprɨ ãgua, pe
monguerẽhɨ catu ãgua avei.
\v 9 Co Onésimo avei osora supi. Ahe avei yande
rembiaɨsu, yande rɨvrɨ seco tuprɨ vahe pe recua pendar.
Ahe ñuvɨrío mbɨa omombehura pẽu opacatu mbahe oime
vahe cohave.
\p
\v 10 Aristarco, che ndugüer che roquendasave, omondo
omahenduhasa pẽu iyavei Marcos, Bernabé rihɨr. Pe revo
peicuaño Marcos so ãgua eipeve; osose pe pɨri, peipɨsɨ
tuprɨñora.
\v 11 Iyavei omahenduhasa omondo Jesús, ahe serer acoi
Justo, pẽu. Co güerañomi Jesús reroyasar pãhuve judío
oporavɨquɨ vahe che rupi yuvɨreco Tũpa mborerecuasave
nara. Ahe niha che mbovɨha yuvɨreco yepi.
\v 12 Epafras avei omondo omahenduhasa pẽu. Ahe pe recua
pendar ité, Jesucristo rembiguai. Ahe oyeroquɨ vahe pe
rese yepi ‘toyemovɨracua tuprɨ iyavei toyuvɨrecoi Tũpa
remimbotar rupi yuvɨreco’ oyapave.
\v 13 Che aicua ité secocuer. Ahe oyemboaquɨ oyeruresa
pɨpe pe recocuer rese, Laodicea pendar recocuer rese,
Hierápolis pendar recocuer rese avei.
\v 14 Iyavei yande rembiaɨsu Lucas, oporoposano vahe,
Demas reseve omondo omahenduhasa yuvɨreco pẽu.
\p
\v 15 Pemboavɨravemi eipeve yande rɨvrɨ Laodicea pendar
oreu, cuña Ninfa serer vahe avei iyavei opacatu oñemonuha
vahe Tũpa reroyasar yuvɨreco.
\v 16 Peyeroquɨre, pemondo co cuachiar Laodicea pendar
Jesús reroyasar upe iyeroquɨ ãgua. Iyavei Laodicea
pendar cuachiar rese peyeroquɨ avei.
\v 17 Iyavei emombehu Arquipo upe aipo ere: “Emboavɨye
tuprɨ Tũpa nde cuaisa” ere.
\p
\v 18 Che Pablo aico. Che ité aicuachía co che
mahenduhasa pẽu. Tapemahenduha vɨte che roquendasave che
rese. Avɨye pẽu. Yande Aposar tape pɨ̃tɨvɨi. Aipo
rupive.