\id 1TH Guarayu [gyr] NT (Bolivia) -2011 bd. 
\h 1 TESALONICENSES
\toc1 1 Tesalonicenses
\toc2 1 Th
\mt2 PABLO REMBICUACHIA YƗPƗNDAR VAHE TESALONICA PENDAR UPE
\mt TESALONICENSES
\c 1
\s Pablo mahenduhasa Jesús reroyasar Tesalónica pendar upe
\p
\v 1 Che, Pablo, Silvano reseve iyavei Timoteo, aicuachía co che ñehe pẽu, ore rɨvɨreta, peñemonuha vahe Tũpa upe tecua Tesalónica ve, yande Ru Tũpa, yande Yar Jesucristo rese peico vahe. Tape rovasa pe reco tuprɨ ãgua yande Ru Tũpa, yande Yar Jesucristo avei.
\s Tesalónica pendar yeroyasa resendar ñehesa
\p
\v 2 Ore, “Avɨye ndeu” orohe arɨ rupi Tũpa upe opacatu pe rese yepi. Iyavei oremahenduha pe rese ore yeruresa pɨpe.
\v 3 Pe niha yande Yar rese pe yeroya tuprɨsa pɨpe peporavɨquɨño yepi, iyavei pe poroaɨsusa pɨpe peyapo mbahe Tũpa upe, iyavei peñemosaño mbahe tẽi upe Jesucristo rãrosa pereco vahe rese. Sese oremahenduha pe rese arɨ yacatu rupi yande Ru Tũpa rovai.
\v 4 Ore rɨvɨreta, Tũpa niha pe raɨsu, oroicua avei ahe ité pe poravo.
\v 5 Esepia, acoi oromombehuse ñehesa pɨ̃sɨrosa resendar, ndahei ñehesa oreyesuindar tẽi oromombehu pẽu; Espíritu Santo reco pĩratasa pɨpe rumo oroñehe. Iyavei oroicua ité co ñehesa supi eté vahe. Peicua avei niha acoi pe pãhuve oroicose, oroico tuprɨño ité, orosecaño avei pe reco tuprɨ ãgua.
\p
\v 6 Ipare pemboyeapɨ ore recocuer peico iyavei yande Yar recocuer avei no. Iyavei yepe peparaɨsu mbahe-mbahe tẽi pãhuve peico viña, peipɨsɨño ité rumo co ñehesa pe vɨhasa pɨpe Espíritu Santo ombou vahe pẽu.
\v 7 Evocoya pe reco pɨpe pemboyecua catu pe reco catuprɨsa Tũpa reroyasar Macedonia pendar upe, Acaya pendar upe avei.
\v 8 Esepia, pe Tũpa ñehe peicua uca Macedonia rupi, Acaya rupi avei. Ndahei rumo co rupiño, opacatu rupi avei oicua yuvɨreco Tũpa reroyasa pereco vahe peyese. Sese ore ndoromombehu iri chira pe recocuer.
\v 9 Esepia, ahe avei omombehu yuvɨreco oreu acoi ore so agüer pe pɨri, pe ore pɨsɨ tuprɨ agüer avei. Iyavei omombehu mbahe rahanga sui pe poi agüer Tũpa oicove vahe rupi pe guatasa yuvɨreco, pe chupe nara mbahe apo ãgua avei no.
\v 10 Omombehu avei pesãro vahe Tũpa Rahɨr Jesús iyevɨ ãgua ɨva sui yuvɨreco oreu, acoi Tũpa ombogüerayevɨ vahe omano vahe pãhu sui. Ahe niha yande pɨ̃sɨrora Tũpa ñemoɨrosa ipĩrata vahe ou vaherã sui.
\c 2
\s Tesalónica pendar yeroyasa mboyecuasa
\p
\v 1 Ore rɨvɨreta, pe niha peicua ore so agüer pe pɨri
ndahei ẽgüe ehi tẽi vahe.
\v 2 Peicua tuprɨ avei niha acoi cuese yɨpɨndar
mara-mara tẽi ava ore rereco yuvɨreco tecua Filipo ve.
Tũpa rumo ore pɨ̃tɨvɨi oñehengagüer pɨ̃sɨrosa
resendar mombehu ãgua opacatu ore sɨquɨyeẽhɨsa pɨpe
ore amotarẽhɨmbar pãhuve.
\v 3 Esepia, ndoroyavɨi eté ore ñehe iyavei ndoroñehei
ore pɨhañemoñeta raisa tẽi pɨpe pẽu, ndahei avei ore
porombopa ãgua oroñehe.
\v 4 Tũpa rumo ore recoãha, ichui ore cuai oñehengagüer
pɨ̃sɨrosa resendar mombehu ãgua; ẽgüe ehi ore ñehe,
ndahei ava tẽi mbovɨha ãgua. Tũpa yande
pɨhañemoñetasa oicua vahe rumo orombovɨha.
\v 5 Peicua niha ore ndoroñehei ñehesa icatuprɨ catu
vahe tẽi rese pe mbopa ãgua, iyavei ndahei guarepochi
potasave tẽi oroñehe tuprɨ. Tũpa niha oicua.
\v 6 Ore ndorosecai eté ava ore mboetei catu ãgua pe, que
ambuae ava eta avei no.
\v 7 Ehi oroyandu ucara ore mborerecuasa Jesucristo ore
cuaisa pẽu viña; oroyemominiño rumo oroico pe pãhuve
inungar acoi cuña osãro tuprɨ vahe omembrɨ imboacua.
\v 8 Ẽgüe orohe avei ore pe raɨsu. Sese ndahei Tũpa
Ñehengagüer año oromondo pota pẽu, ore recocuer avei
no. Esepia, opoaɨsú ité.
\v 9 Ore rɨvɨreta, peyemomahenduha acoi ore paraɨsu
agüer rese, ore poravɨquɨ agüer rese avei arɨ, pɨ̃tu
reseve. Ndahei que ñepei mañeco tẽi ãgua mbahe rese
oromombehu Tũpa Ñehengagüer oroico pẽu.
\p
\v 10 Pe niha ore repia peye Tũpa avei oicua, ore reco
tuprɨsa, ore rembiapo supi eté vahe, ihɨ̃vi vahe pe
Jesús reroyasar pãhuve.
\v 11-12 Peicua niha, inungar mbɨa guahɨr upe, ẽgüe
orohe pe monguerẽhɨ, pe mbovɨhasa avei ñepei-pei
opacatu. Iyavei oromondo pe cuaitarã pe reco tuprɨ ãgua
Tũpa remimbotar rupi. Ahe niha oñehe pẽu peico vaherã
sese imborerecuasa porañetesave.
\p
\v 13 Co rese, “Avɨye ndeu” orohe Tũpa upe arɨ yacatu
rupi. Esepia, Tũpa Ñehengagüer, oromombehu vahe pẽu,
peipɨsɨ ité, “Co Tũpa ñehe, ndahei ava tẽi ñehe”
aipo peye ité pe chupe. Supi eté Tũpa ñehe. Ahe niha
osecuñaro ité pe recocuer peroyare.
\v 14 Ore rɨvɨreta, acoi cuese peiporara mbahe-mbahe tẽi
pe mu eta pãhuve peicose; ẽgüe ehi tuprɨ avei Jesús
reroyasar Judea pendar yuvɨrecoi vahe Jesucristo recocuer
rese. Imu judío ae oseca-seca yamotarẽhɨsave yuvɨreco.
\v 15 Ahe niha oyuca yande Yar Jesús yuvɨreco. Ahe avei
oyucapa Tũpa ñehe mombehusar yuvɨreco aracahe. Ore avei
opa ore mombo yuvɨreco. Ndovɨroyai Tũpa yuvɨreco iyavei
opacatu ava amotarẽhɨmbar tẽi yuvɨrecoi.
\v 16 Esepia, acoi oroñehe potase ava ndahei vahe judío
upe iñepɨsɨro ãgua rese, ahe rumo ndoipotai yuvɨreco
oreu. Ipɨpe sui oyemboangaipa catu yuvɨreco. Cũritei
rumo Tũpa ñemoɨrosa ipĩrata vahe ou iharɨve yuvɨreco
cute.
\s Pablo oso pota iri Tesalónica pendar repia
\p
\v 17 Ore rɨvɨreta, yepe ndayayoepia iri yayepepɨ
raimise yandeyesui, ore pɨha pɨpe rumo, “Ahé” oroheño
ité pẽu. Iyavei orequerẽhɨño ité yepi oroso iri
vaherã pe repia.
\v 18 Orosãha tẽi ore so ãgua pe repia yepi; che Pablo
teieté setá yupagüer tẽi aso pota. Caruguar rumo
ndoipotai.
\v 19 ¿Ava sui pĩha orosãro mbahe avɨye vahe? ¿Uma ore
vɨhasa? ¿Uma ore mbovɨharete catura? ¡Peño itera acoi
yande Yar Jesucristo yevɨse curi!
\v 20 Pe ité niha ore mbovɨhara peye, iyavei orovɨha
catura pe rese no.
\c 3
\p
\v 1-2 Evocoiyase che nañemosa irise pe repiaẽhɨ rese,
chepɨhañemoñeta yande rɨvrɨ Timoteo mondo ãgua pe
repia; “Che güeraño tapɨta Atenas ve” ahe. Esepia
niha, ahe oporavɨquɨ vahe Tũpa upe ore rupi, omombehu
vahe co ñehesa pɨ̃sɨrosa resendar Cristo suindar ou
vahe. Ahe amondo pẽu pe movɨracua catu ãgua, pe
monguerẽhɨ catu ãgua avei peyeroya catu vaherã Cristo
rese.
\v 3 Evocoiyase tipo eme oyembosɨquɨye vahe co mbahe tẽi
pe mombaraɨsuse. Peicua niha yaiporara rane itera co
nungar mbahe.
\v 4 Iyavei niha acoi oroico vɨtese pe pɨri, “Yande
paraɨsu rane itera mbahe yavai vahe” orohe voi eté acoi
pẽu. Ahe niha cũritei peicua.
\v 5 Evocoiyase che nañemosa irise, amondo Timoteo
‘¿yuvɨrecoiño ité pĩha Tũpa rese?’ che yapave. Che
asɨquɨye, “Avɨyeteramo Caruguar omondora mbahe tẽi
pɨpe yuvɨreco” ahe ‘ore poravɨquɨ agüer evocoiyase
ocañɨ tẽira’ che hesave.
\p
\v 6 Cũritei rumo Timoteo oyevɨ Tesalónica sui, güeru
ñehesa avɨye vahe pe resendar oreu pe Tũpa reroyasa,
iyavei pe poroaɨsusa resendar avei. Iyavei aipo
pemahenduha ore rese pe poroaɨsusa pɨpe. Iyavei pe ore
repia pota tẽi peye no; inungar ore pe repiasa pota tẽi
avei.
\v 7 Sese, ore rɨvɨreta, ore paraɨsusa pãhuve ore
mbovɨharete peye, co oroicuase pe reco tuprɨ Tũpa
reroyasa pɨpe.
\v 8 Cũritei ore mopoase catu iri oroyanduse pe
yemovɨracua tuprɨsa yande Yar rese.
\v 9 “¿Mara yahera pĩha, ‘Avɨye ndeu’ yande he tuprɨ
catu ãgua Tũpa upe?” orohe pe reco tuprɨsa rese, iyavei
ore yembovɨha catusa rese avei no
\v 10 pɨ̃tu, arɨ rupi oroporandu Tũpa upe ore so ãgua
pe repia eipeve iyavei Tũpa reroyasa ipane vɨte vahe
mboavɨye tuprɨ ãgua pẽu.
\p
\v 11 Iyavei ore oroipota ore pɨ̃tɨvɨira yande Ru Tũpa,
yande Yar Jesucristo avei ore so ãgua pe pɨri.
\v 12 Evocoiyase yande Yar tape movɨracua catu, tombou
catu avei pe yeaɨsu ãgua, iyavei opacatu raɨsu catu
ãgua, inungar ore orovɨreco pe raɨsusa.
\v 13 Ipɨpe sui tape movɨracua pe reco maranehɨ pɨpe pe
mbahe avɨẽhɨsave yande Ru Tũpa rovai acoi oyevɨse
yande Yar Jesús opacatu ovoya reseve. Ẽgüe tehi pẽu.
\c 4
\s Teco tuprɨ Tũpa oipota
\p
\v 1 Ore rɨvɨreta, cũritei oroñehe pota pẽu pe
cuaitarã rese yande Yar Jesús rer pɨpe: inungar cũritei
pe recocuer pereco, ẽgüe peyeño ité catu peico ore pe
mbohe agüer rupi Tũpa mboetei ãgua.
\p
\v 2 Pe niha, peicua acoi ore pe mbohe agüer yande Yar
Jesús rer pɨpe.
\v 3 Esepia, Tũpa oipota pe reco maranehɨ ãgua oyeupe.
“Tipo eme que ñepei oyemboaguasa tẽi vahe” ehi.
\v 4 Iyavei peico tuprɨ pe rembireco rese pe reco ɨ̃visa
pɨpe Tũpa remimbotar rupi, iyavei pemboetei tuprɨra
sereco yepi.
\v 5 Peicoi rene ava Tũpa ndoicuai vahe reco pɨpe pe
remimbotar tẽi apo ãgua.
\v 6 Tipo eme avei oyapo vahe co nungar angaipa yande
rɨvrɨ reco momara ãgua tẽi. Esepia, Tũpa omondora
oñemoɨrosa ipĩrata vahe evocoi nungar ava upe. Evocoi
niha yɨpɨsuive oromombehu vahe pẽu.
\v 7 Esepia, Tũpa niha yande poravo yande reco maranehɨ
ãgua, ndahei angaipa pɨpe yande reco ãgua tẽi.
\v 8 Sese acoi ndosendu potai vahe co yembohesa, ndahei
eté ava tẽi vɨroɨ̃ro, ahe rumo Tũpa ité vɨroɨ̃ro
yuvɨreco acoi ombou vahe oEspíritu Santo pẽu.
\p
\v 9 Iyavei co peyepãhuve pe yeaɨsusa rese, ndaicuachía
iri chira pẽu. Esepia, Tũpa ité niha pe mbohe pe yeaɨsu
ãgua opacatu.
\v 10 Ẽgüe peye niha opacatu yande rɨvɨreta co
Macedonia rupindar raɨsu peico. Co catu peyapo che
rɨvɨreta: pe mbouvicha vɨte catu pe poroaɨsusa.
\v 11 “Peico tuprɨño avei pe reco mbegüesa pɨpe; mbahe
pe rembiapo reseño tuprɨ pehañeco; peporavɨquɨ pe po
pɨpe ité” aipo orohe acoi pẽu cuese.
\v 12 Evocoiyase pe mboyeroyara ava ndahei vahe Jesús
reroyasar yuvɨreco; iyavei ẽgüe peyera mbahe pẽu
ipaneẽhɨ ãgua avei no.
\s Oyevɨra yande Yar co ɨvɨ pɨpe
\p
\v 13 Ore rɨvɨreta, ore oroipota peicua aveira manosa
recocuer; sese ndapeicoi chira pe vɨharẽhɨsa pɨpe
inungar co ava ndoyeroyai vahe Tũpa rese.
\v 14 Esepia, yande yaroya: Jesús omano, ichui
ocuerayevɨ. Evocoiyase yande avei yaroya Tũpa Guahɨr
Jesucristo reseve ombogüerayevɨra opacatu acoi seroyasa
pɨpe omano vahe yuvɨreco.
\p
\v 15 Sese co oromombehu pẽu, ahe niha yande Yar
porombohesa: yande yaicove vɨte vahe co ɨvɨ pɨpe, acoi
oyevɨse yande Yar, ndahei chira yande rane omano vahecuer
sui yayemboya yande Yar rese.
\v 16 Esepia, yande Yar ité ogüeyɨ irira ɨva sui ou
mborerecuar ɨvate vahe ñehesa pɨpe; ahese oyeendura
Arcangel ñehe iyavei Tũpa remimbɨ moñehe pĩratasa.
Ahese seroyasar omano vahecuer rane opũhara yuvɨreco.
\v 17 Ipare voi yande yaicove vɨte vahe, serasoprɨ
yaicora opacatu ɨva quɨha rese co yande Yar rovaĩchi
ãgua ɨvɨtu rupi. Ẽgüe yahera yande Yar pɨri yaico
vaherã apɨrẽhɨ.
\v 18 Sese peyemonguerẽhɨ catu co ñehesa pesendu vahe
rese.
\c 5
\p
\v 1 Iyavei no, acoi arɨ yande Yar yusa resendar ore
ndoroicuachiai chira pẽu.
\v 2 Esepia, pe peicua tuprɨ co yande Yar arɨ oyepotara
imohaẽhɨsa pɨpe, inungar acoi imonda rai vahe oyepota
pɨ̃tu pɨpe.
\v 3 Acoi ava aipo ehise yuvɨreco: “Opacatu avɨye ité
yaico, ndipo iri mbahe-mbahe tẽi yandeu” ehise, ahese
inungar acoi cuña imembɨrasɨ avɨyeteramo tẽi, ẽgüe
ehi aveira, avɨyeteramo tẽi icañɨ oura iharɨve, ahese
ndoicatui chira ichui oñemi yuvɨreco.
\v 4 Pe rumo, ore rɨvɨreta, ndahei pɨ̃tumimbisa pendar
nungar peico. Evocoiyase oyepotase yande Yar arɨ, ndahei
chira imonda rai vahe nungar pe resapɨha tẽi ou.
\v 5 Esepia, pe opacatu peico vahe Tũpa poroesapesa pɨpe,
ndahe iri yande pɨ̃tumimbi pɨpendar yaico.
\v 6 Evocoiyase ndayaicoi chira co ambuae yuvɨroque tẽi
vahe nungar pɨhañemoñetasa pɨpe; iyacatu rumo yande
yayemopoase yande pɨhañemoñeta tuprɨsa pɨpe.
\v 7 Acoi yuvɨroque vahe, yuvɨroque pɨ̃tu pɨpe; iyavei
acoi osavaɨpo vahe, osavaɨpo avei pɨ̃tu pɨpe yuvɨreco.
\v 8 Yande rumo yaico vahe Tũpa poroesapesa pɨpe.
Evocoiyase yareco tuprɨra yande pɨhañemoñetasa yande
reco tuprɨ ãgua yepi. Iyavei yayoepɨra yande yeroyasa
pɨpe, poroaɨsusa pɨpe avei no. Iyavei inungar acoi
sundao vɨreco oãca ndɨru guarepochi apoprɨ yuvɨreco
oãca repɨ ãgua, yande avei tayareco yande remiaro yande
ñepɨsɨro ãgua.
\v 9 Esepia niha, Tũpa yande poravo ndahei yaico vaherã
iñemoɨrosa pɨpe nara; ahe rumo yande poravo yasupitɨ
vaherã ñepɨsɨrosa yande Yar Jesucristo rembiapo sui.
\v 10 Esepia, ahe omano yande recocuer rese oyese yande
rereco ãgua opacatu yande recove vɨtese, yamanose avei.
\v 11 Sese peyemonguerẽhɨ catu, iyavei peyemovɨracua
catu vɨte peyeupe inungar co peyapo peico.
\s Pablo omboaracua Jesús reroyasar oico
\p
\v 12 Iyavei no, ore rɨvɨreta, pemboyeroya acoi
oporavɨquɨ vahe yuvɨreco pe pãhuve. Ahe niha pe cuai
vahe yuvɨreco, iyavei pe mboaracua vahe yande Yar uve nara
yuvɨreco.
\v 13 Pemboyeroya iyavei pesaɨsu tuprɨra iporavɨquɨsa
rese. Peico tuprɨ avei peyepãhuve.
\p
\v 14 Iyavei ore rɨvɨreta, pe cuaisa: pemboaracua acoi
ndoporavɨquɨ potai vahe imbohe catu ãgua. Iyavei
pemonguerẽhɨ acoi niquerẽhɨ iri vahe. Peipɨ̃tɨvɨi
avei acoi ndoyemovɨracuai vahe Tũpa rese güeco ãgua.
Iyavei peñemosaño opacatu ava uve yepi.
\p
\v 15 Peicua catu pe rereco megua potasar sui.
Ndapemboyevɨi chira mbahe-mbahe tẽi co pe rereco megua
potasar upe. Iyacatu rumo peyapo tuprɨ mbahe avɨye vahe
peyeupe, opacatu ava upe avei no.
\p
\v 16 Peyembovɨhañora arɨ yacatu peico.
\v 17 Iyavei peyeroquɨra arɨ yacatu rupi no.
\v 18 “Avɨye ndeu” peyera Tũpa upe opacatu mbahe rese.
Esepia, ahe niha Tũpa oipota yandeu Cristo rese yaico
vahe.
\p
\v 19 Iyavei ndapemombɨtuhui chira mbahe Espíritu Santo
oyapo pota vahe pe rese.
\v 20 Ndapeyamotarẽhɨi chira Tũpa ñehe imombehuprɨ.
\v 21 Pesãhapa rane opacatu mbahe. Ichui peipɨsɨra mbahe
avɨye vahe peyeupe.
\v 22 Peyepepɨ opacatu mbahe naporai vahe sui.
\p
\v 23 Tũpa acoi ombou vahe teco tuprɨsa yandeu tape
pehapa tuprɨ oyeupe nara. Iyavei tosãro tuprɨ opacatu pe
espíritu, pe hã, pe rete avei pe reco maranehɨ ãgua co
yande Yar Jesucristo yevɨ irise.
\v 24 Ahe acoi pe poravo vahe oyeupe nara seco tuprɨ vahe.
Ahe omboavɨyera opacatu co mbahe.
\s Pablo imahenduha Jesús reroyasar rese
\p
\v 25 Ore rɨvɨreta, peyeroquɨ ore rese.
\p
\v 26 Pemboavɨrave opacatu yande rɨvrɨ eipe pendar pe
yeovaupɨtesa pɨpe.
\p
\v 27 Che opocuai yande Yar rer pɨpe: peyeroquɨ co
cuachiar opacatu yande rɨvɨreta upe.
\p
\v 28 Yande Yar Jesucristo tape rovasa tuprɨño pe rereco.
Aipo rupive.