\id TIT Guarayu [gyr] NT (Bolivia) -2011 bd. 
\h TITO
\toc1 Tito
\toc2 Tit
\mt2 PABLO REMBICUACHIA TITO UPE
\mt TITO
\c 1
\s Pablo mahenduhasa Tito upe
\p
\v 1 Che, Pablo, Tũpa rembiguai aico iyavei Jesucristo apóstol semimbou aico Tũpa rese yeroyasa mondo ãgua sembiporavo eta upe iyavei Tũpa rese pɨhañemoñetasa supi tuprɨ vahe cua uca tuprɨ ãgua.
\v 2 Esepia, tecovesa apɨrẽhɨ vahe rãrosa pɨpe sui vɨroyara, oicua aveira yuvɨreco. Tũpa ndoporombopai vahe niha omombehu co tecovesa mondo ãgua ɨvɨ apo vɨteẽhɨseve oico.
\v 3 Ichui cũritei arɨ oyepota yandeu iñehengagüer cua ãgua. Sese Tũpa, yande Pɨ̃sɨrosar, che cuai oñehengagüer mombehu.
\v 4 Tito, co che ñehe aicuachía ndeu; nde niha che rahɨr ité ereico Jesucristo rese yande recosa pɨpe. Esepia, oyoya yaroya vahe yaico. Yande Ru Tũpa, yande Pɨ̃sɨrosar Jesucristo tombou oporovasasa nde reco tuprɨ ãgua ndeu.
\s Tito poravɨquɨsa caha pãhu Creta ve
\p
\v 5 Che oroeya vitu co caha pãhu Creta ve mbahe opɨta vɨte vahe moingatu tuprɨ ãgua. Iyavei, “Eiporavo ava, Jesucristo vɨroya vahe rãro ãgua ñepei-pei tecua rupindar” ahe acoi ndeu cuese.
\v 6 Evocoi Jesucristo vɨroya vahe rãrosar toyuvɨrecoi güeco tuprɨ ãgua. Tipo eme “co oyapo mbahe” ehi-ehi tẽi vahe yuvɨreco oyeupe. Ñepeiño güembireco vɨrecora yuvɨreco; tahɨr evocoiyase Jesucristo reroyasar pãvera. Iyavei ndoyuvɨrecoi chira ndoyemboaracuai vahe nungar oporeroyaẽhɨsa pɨpe ambuae ava ñeheẽhɨ ãgua sese yuvɨreco.
\v 7 Acoi Jesucristo reroyasar rãrosar yuvɨrecoi vahe, ahe icuaita mbahe Tũpa upendar rese. Sese taseco ɨ̃vi tuprɨ yuvɨreco. Iyavei toico eme oporeroyaẽhɨsa pɨpe, toñemoɨro eme avei, ndahei chiaveira caguar tẽi; ndivava serai chiaveira, tiguarepochi pota rai eme yuvɨreco.
\v 8 Iyacatu rumo omoinguera ava oyepota vahe güẽtave oyepɨri. Iyavei avɨye aira yepi. Osãro tuprɨra güecocuer. Iyavei taseco ɨ̃vi güeco catuprɨ pɨpe Tũpa upe. Tosãro tuprɨ avei opɨhañemoñetasa yuvɨreco.
\v 9 Iya oyemboya catu oyembohesa supi tuprɨ vahe rese yuvɨreco. Ipɨpe sui tomonguerẽhɨ catu ambuae yuvɨreco co ñehesa maranehɨ pɨpe iyavei ambuae seroɨ̃rosar pɨhañemoñeta mohɨvi ãgua.
\p
\v 10 Esepia, oime setá nimbahe reroyai vahe; judío “peyembocircuncida pe ñepɨsɨro ãgua” ehi vahe pãhuve oime catu evocoi nungar. Ahe omondo-mondo tẽi vahe oñehe, ombopa tẽi vahe avei ava yuvɨreco.
\v 11 Ẽgüe ehi vahe iyacatu pemonguiriri. Esepia, ahe niha setá ava oñemu vahe omboyepepɨ uca porombohesa supi tuprɨ vahe sui yuvɨreco. Oporombohe mbahe co cotɨ tẽi vahe rese guarepochi rereco ãgua tẽi yuvɨreco.
\p
\v 12 Ñepei mbɨa, otũpa ñehe mombehusar, Creta ɨguar ae aipo ehi omu rese oñehe: “Co Creta ɨguar yuvɨrecoi vahe semirañete ai, mbahe mɨmba nungar tẽi, icaru ai, yangaipa vai yuvɨreco yepi” ehi oñehe.
\v 13 Supi eté aipo ehi; sese emboaracua pĩrata ité. Evocoiyase tovɨroya tuprɨ Tũpa yuvɨreco.
\v 14 Iyavei tovɨroya eme co judío oyesui tẽi mbahe omombehu vahe iyavei ava porocuaita tẽi yuvɨreco. Esepia, ahe oyemboyere mbahe supi vahe sui yuvɨreco.
\p
\v 15 Acoi ava ndaseco marai vahe upe opacatu mbahe nimarai. Ndiporeroyai vahe, ipɨhañemoñeta rai tẽi vahe upe rumo, ndipoi eté mbahe nimarai vahe. Esepia, ipɨhañemoñeta, yaracuasa avei naporai eté.
\v 16 Iyavei, “Che aicua Tũpa” ehi tuprɨ tẽi angahu yuvɨreco. Mbahe sembiapo rese rumo icuasa seroyaẽhɨsa yuvɨreco. Ahe niha ava ndosepia potai vahe, ndiporeroyai vahe yuvɨreco, ndoicatui mbahe avɨye vahe apo yuvɨreco yepi.
\c 2
\s Porombohesa nimarai vahe
\p
\v 1 Nde ñehe toyoya tuprɨ co porombohesa nimarai vahe
rese yepi.
\v 2 Evocoiyase mbɨa otɨ̃aro catu vahe Tũpa reroyasar
toñearo tuprɨ, imboyeroyaprɨ toyuvɨrecoi, tosãro
tuprɨ güecocuer, tovɨreco tuprɨ avei Tũpa reroyasa,
oporoaɨsusa. Iyavei güeco mbegüesa pɨpe toñemosa
mbahe-mbahe tẽi upe.
\v 3 Ẽgüe tehi avei cuña otɨ̃aro vahe Tũpa reroyasar
yuvɨreco: güeco tuprɨ tovɨreco oporomboeteisa pɨpe
yuvɨreco. Iyavei timahechiroi eme, ndosavaɨpoi chiaveira.
Ahe rumo omboyecuara güecocuer avɨye vahe,
\v 4 ombohera cuñatai imer raɨsu ãgua, imembrɨ raɨsu
ãgua avei.
\v 5 Tombohe avei seco tuprɨ ãgua, iñearo tuprɨ ãgua
angaipa sui iyavei sẽta pɨpendar rese hañeco tuprɨ
ãgua yuvɨreco. Tomboaracua avei seco avɨye ãgua, imer
mboyeroya ãgua avei. Evocoiyase noñehe-ñehe tẽi chira
ava Tũpa Ñehengagüer rese yuvɨreco.
\p
\v 6 Ẽgüe ere avei emonguerẽhɨ mbɨa chĩhivahe
secocuer rese iñearo tuprɨ ãgua.
\v 7 Iyavei emboyecua nde recocuer avɨye vahe opacatu
mbahe rese yuvɨreco chupe; nde imbohe tuprɨsa pɨpe
emboyecua nde reco maranehɨsa, nde poromboeteisa avei.
\v 8 Iyavei ereñehera nde reco tuprɨ pɨpe. Ipɨpe ambuae
noñehe rai chira yuvɨreco nde rese. Evocoiyase yande
amotarẽhɨmbar yuvɨnochira ndoicatuise, “Mbahe” ohe
ãgua yuvɨreco yandeu.
\p
\v 9 Emboaracua avei mbiguai yuvɨrecoi vahe: tovɨroya
opacatu mbahe rese güerecuar, tomboyeroya imboeteisave,
toiñehepoepɨ eme avei yuvɨreco.
\v 10 Iyavei toñomi eme mbahe. Iyacatu rumo seroyaprɨ
tuprɨ yuvɨrecoira. Evocoiyase opacatu osepiase seco
tuprɨsa, omboeteira yande Pɨ̃sɨrosar Tũpa recocuer
resendar yembohesa yuvɨreco.
\p
\v 11 Tũpa niha omboyecua oporoaɨsusa yandeu. Ahe güeru
pɨ̃sɨrosa opacatu ava upe.
\v 12 Co poroaɨsusa Tũpa suindar yande mbohe mbahe-mbahe
tẽi iyavei yande remimbotar tẽi reya ãgua. Iyavei yande
mbohe co ɨvɨ pɨpe yande ñearo tuprɨ ãgua, yande reco
ɨ̃vi ãgua iyavei Tũpa mboetei ãgua.
\v 13 Iyavei yasãro yande vɨharetesa pɨpe Tũpa
omboavɨye vaherã güemimombehu, ahe Jesucristo yande
Tũpa seco ɨvaté vahe, yande Pɨ̃sɨrosar yevɨ irisa
oporañetesa pɨpe.
\v 14 Ahe oyemondo oyeyuca uca yande rese yande pɨ̃sɨro
ãgua opacatu mbahe-mbahe tẽi sui yande reco moatɨro
tuprɨ ãgua. Evocoiyase yande yaico chupe nara güeraño
ité yande querẽhɨsave opacatu mbahe avɨye vahe apo
ãgua.
\p
\v 15 Evocoi rese erembohera, eremonguerẽhɨra,
eremboaracua aveira opacatu nde porocuaita pɨpe. Sese tipo
eme que nde reroɨ̃rosar.
\c 3
\s Jesús reroyasar cuaita
\p
\v 1 Co rese emomahenduha: toyapo ava mborerecuar guasu
porocuaita yuvɨreco iyavei opacatu ambuae
mborerecua-recuarmi porocuaita avei. Iyavei toyemoingatu
tuprɨ opacatu mbahe avɨye vahe apo ãgua yuvɨreco.
\v 2 Toñehe-ñehe tẽi eme ambuae ava rese yuvɨreco.
Iyavei tiñemoɨro serai eme, toporoaɨsu, tomboyecua avei
güeco mbegüesa opacatu ava upe yuvɨreco.
\p
\v 3 Esepia, yɨpɨndar yande avei ndayande mbahecuai yaico
iyavei ndayaroyai Tũpa. Ocañɨ tẽi vahe yaico, iyavei
yande mbiguai tẽi yaico opacatu mbahe yande remimbotar apo
pɨpe; iyavei yaseca-seca mbahe tẽi vahe yande yembovɨha
ãgua. Iyavei yaicoño mbahe tẽi pɨpe, yaipotaño tẽi
ambuae ava mbahe, yamotarẽhɨmbrɨ yaico iyavei yandeyeupe
ae-ae yayeamotarẽhɨ.
\v 4 Ipare rumo Tũpa, yande Pɨ̃sɨrosar, omboyecua güeco
tuprɨsa, oporoaɨsusa opacatu ava upe.
\v 5 Yande pɨ̃sɨro, ndahei rumo yande rembiapo avɨyesa
sui, ahe rumo vɨreco oporoparaɨsuerecosa yandeu nara.
Ichui omoatɨro yande recocuer yande reco mopɨasu. Iyavei
Espíritu Santo pɨpe yande recocuer recuñaro tecove
pɨasu rereco ãgua.
\v 6 Iyavei yande Pɨ̃sɨrosar Jesucristo rembiapo sui
Tũpa ombou catu oEspíritu Santo yandeu,
\v 7 ipɨpe yande reco ai sui yande renose yande reco ɨ̃vi
tuprɨ ãgua oporoaɨsusa pɨpe ‘toipɨsɨ co tecovesa
apɨrẽhɨ güemiaro yuvɨreco’ oya.
\p
\v 8 Aipo ñehesa supi eté vahe. Che aipota sese
ereporombohera. Ipɨpe Tũpa reroyasar toyapo mbahe avɨye
vahe yuvɨreco. Evocoi ñehesa avɨye ité opacatu oiporu
vaherã yuvɨreco.
\v 9 Ereyepepɨra rumo opacatu co nungar mbahe sui:
yɨpɨndar ñehesa yepoepɨ tẽisa sui, ipare aracahendar
ava recocuer rese ñehesa sui. Ereyepepɨ aveira
iporomoñemoɨro serai vahe sui, Moisés porocuaita
resendar sui tẽi ñehepoepɨ-epɨsa sui avei. Esepia,
evocoi nungar mbahe ẽgüe ehi tẽi vahe.
\p
\v 10 Acoi ava omoimese yemboyahosa Tũpa reroyasar
pãhuve, eñehe chupe. Nande reroyaise, eñehe iri chupe.
Nande reroya catu itese, eremosera peyesui.
\v 11 Tereicua evocoi nungar ava oyavɨ vahe güecocuer
yepi, ahe ae oyemocañɨ vahe oangaipa pɨpe oico.
\s Tito upendar ñehesa
\p
\v 12 Acoi amondose Artemas, anise Tíquico ndeu, eyu
pɨhaivi che repia tecua Nicópolis ve. Esepia, aheve
apɨta pota sõhɨsa vahe pɨtuhu rãro.
\v 13 Eipɨ̃tɨvɨi opacatu nde catugüer rupi ava recocuer
moingatusar Zenas, Apolos avei. Ahe chupe emondo mbahe
semimbotar. Evocoiyase toyuvɨraso tuprɨ oguatasa rupi;
tipane eme que mbahe chupe yuvɨreco.
\v 14 Iyavei ambuae Jesús reroyasar eipe pendar toyembohe
avei yuvɨreco mbahe tuprɨ apo ãgua iyavei ava mbahe
chupe ipane vahe pɨ̃tɨvɨi ãgua. Evocoiyase secocuer
avɨye itera yuvɨrecoi.
\s Mahenduhasa iyavei porovasasa ipa vahe
\p
\v 15 Opacatu yuvɨrecoi vahe cohave che pɨri omondo
omahenduhasa yuvɨreco ndeu. Iyavei emombehu che
mahenduhasa yande mborɨpar iporeroya vahe upe. Tũpa tape
rovasa eipeve opacatu. Aipo rupive.