1
00:00:05,000 --> 00:00:24,740
Hikɨ mɨrayutinenewitɨre teheukɨneka, 'ɨimari waɨriyarika mɨti'uximayatame katananukunake, 'iyari 'axamɨ'ane minɨkai kɨmana mɨtimaiwekai. Mɨkɨ tikuxatatɨ kemɨtiyɨnikekai waɨkawa pɨti'iwakai yukutsiyarima wahetsiemieme.

2
00:00:24,740 --> 00:00:41,660
Mɨkɨ pɨtatsi'uweiyakai Papuru meta tame. Putahiwakai mɨpaɨ 'utaitɨ: —'Ikɨ teɨteri Kakaɨyari 'Amutewi te'uximayatsiriwamete mepɨhɨkɨ, mɨkɨ wikweitsitɨarika huyeyari xeme mepɨxekuxaxatɨwa.

3
00:00:41,660 --> 00:01:04,240
Mɨpaɨ mɨixa tukari katiniyurienekaitɨni. Hikɨ Papuru 'uxiwa'atɨ, ta'aurie 'aweka mɨpaɨ katinitahɨawe 'iyari 'axamɨ'ane kaniutatieni: —Ketsutsi Kɨritsitutsie netiwiyatɨ nepɨmetsi'aitɨa, hetsiena pemayeyanikɨ. Hikɨ 'ana kwitɨwa 'iyari 'axamɨ'ane kanihayewa.

4
00:01:04,240 --> 00:01:22,280
Kepauka kutsiyarimama mɨpaɨ memɨtehetima mɨwaruku'eiriekaikɨ kɨmana memɨte'iwakai, 'ayumieme Papuru meta Tsiraxi mekaniutiwiyarieni, meta kiekari hixɨapa mepɨwarehapa hakewa 'itsɨkate memɨteha'aitatsie.

5
00:01:22,280 --> 00:01:33,680
'Itsɨkate wahɨxie mewa'atɨaka, mɨpaɨ mekaniutiyuani: —'Ikɨ teɨteri mekanihuriyutsixitɨni, mepɨwaxamurietɨwe tahetsɨa kiekatari.

6
00:01:33,680 --> 00:01:42,640
Yeiyari mekani'ɨkitani tame xumatari temukunamiyarie temitanaki'erieni yatɨni yatemɨteyuriekakɨ.

7
00:01:42,640 --> 00:01:54,740
Yunaitɨ mekaniyukuxeɨrieni wahepaɨtsita. 'Itsɨkate mekateniuta'aita wa'ixuriki memanutihɨniyariexɨanikɨ, meta kɨyekɨ memɨtiweiyanikɨ.

8
00:01:54,740 --> 00:02:05,300
Waɨkawamekɨ mewarutiwaka, katsariyanata mekaniwaranutaxɨrieni, meta tihɨweme mekaniuhɨritɨani 'aixɨa mɨtiwa'ɨwiyanikɨ.

9
00:02:05,300 --> 00:02:15,460
Mɨkɨ mɨpaɨ tiuta'aitɨarieka, mutanieretsie paitɨ kaniwaranutaxɨrieni. Wa'ɨkate tiyɨxɨrɨwametsie kaniuye'uitɨani.

10
00:02:15,460 --> 00:02:29,100
Hikɨ tɨkari hixɨapa yakɨtɨtɨ Papuru meta Tsiraxi meyunenewietɨ Kakaɨyari mekaninɨawakaitɨni. Wahamatɨa memanutaxɨriyakai mekaniwa'eniekaitɨni.

11
00:02:29,100 --> 00:02:45,300
Yapauka kwie karima kaniutayuani, katsariyana tenariyari kaniutayuani. Naitɨ kiteniete pɨreuyepierixɨa. Yunaitɨ pɨretsutsixi watepɨate kanakaxɨnixɨani wamamatetsie wa'ɨkatetsie.

12
00:02:45,300 --> 00:03:02,740
Tihɨweme 'anutaniereka, katsariyana kitenie heuyepiekame 'uxeiyaka, yunawaxa kaniwatihana yumienike, memanutaxɨriyakai meyuta'unaxɨame 'erietɨ. Papuru karima kanitahiwieni mɨpaɨ rehɨawetɨ:

13
00:03:02,740 --> 00:03:08,380
―Penɨkahɨrixɨa peti'akwinitɨani. Tame tanaitɨ 'uwa tekanayeteni.

14
00:03:08,380 --> 00:03:19,580
Hikɨ tihɨweme kɨxeme kaniuta'iwauni, yumexuitɨatɨ kiita kaneutaweni 'uyɨyɨakatɨ. Papuru meta Tsiraxi wahetɨa kaniukaweni.

15
00:03:19,580 --> 00:03:29,860
Takwa waranuyewitɨka mɨpaɨ katiniwaruta'iwawiya: —Neuxei, ¿titari reuyewetse yanemɨtiyurienikɨ nemɨtawikweitsitɨarienikɨ?

16
00:03:29,860 --> 00:03:41,380
Mɨkɨ mɨpaɨ mekatenita'eiya: —Ti'aitame Ketsutsi hetsie, yuri ketineuta'eri mɨkɨkɨ pekanitawikweitsitɨariemɨkɨ 'ekɨ meta 'akie kiekatari.

17
00:03:41,380 --> 00:03:49,640
Kakaɨyari niukieya mekanitaxatɨani mɨkɨ, meta yunaime kitana memɨye'uwakai hamatɨana.

18
00:03:49,640 --> 00:04:01,080
Mɨkɨ yɨwikɨta warewitɨka, kaniwarahauxixɨani memaweiyatɨkateitsie. Kwitɨwata puka'ɨyarie mɨkɨ, meta yunaitɨ kiena kiekatari.

19
00:04:01,080 --> 00:04:12,980
Tihɨweme yukie warewitɨka katiniwaremini, meta yunaitɨ yuri memɨte'uta'eri Kakaɨyari hetsie 'axeikɨa yunaitɨ mekaniyutemamawiekaitɨni.

20
00:04:12,980 --> 00:04:23,720
Hikɨ 'ukatareku 'itsɨkate yutupiritsixi mekaniwarenɨ'ani tihɨweme mɨpaɨ memɨteta'aitɨanikɨ: «Keniwarutixɨna mɨkɨ teɨteri».

21
00:04:23,720 --> 00:04:36,160
Hikɨ tihɨweme Papuru mɨpaɨ katiniutaxatɨani: —'Itsɨkate mɨpaɨ mekateneta'aita xemɨtixɨnarienikɨ. Hikɨtsɨari xekenehu, xeka'uximatɨarietɨ.

22
00:04:36,160 --> 00:05:01,280
Papuru tehɨwemete mɨpaɨ katiniwaruta'eiya: —Mɨkɨ mepɨtatsi'utiwa yunaime wahɨxie tsepanetɨ 'itsɨkame mɨkatatsi'uta'iwawiyaxɨ, tsepanetɨ temɨxumanutsixi. Mepɨtatsi'anutaxɨri. Kaukatsɨari hikɨ 'awie metatsi'anuyenɨ'ani. Pɨkatixaɨtsietɨ, 'uwa me'u'axɨame, mɨkɨ meketatsi'anuyewitɨni.

23
00:05:01,280 --> 00:05:15,800
Tupiritsixi 'itsɨkate mekateniwarutaxatɨani kememetiyua. Kepauka mɨkɨ memu'enana kename Papuru meta Tsiraxi Xumanutsixi mehɨkɨtɨkai mekaniutimamani.

24
00:05:15,800 --> 00:05:25,640
Me'u'axɨaka mekaniwanɨtɨakaitɨni, mewaranuyewitɨka mekaniwarutawawirieni memɨyehukɨ mɨkɨ kiekaritsie.

25
00:05:25,640 --> 00:05:38,820
Hikɨ katsariyanata mewayekɨneka Ririya hetsɨa mekaniu'axɨani. Mewaruxeiyaka 'iwamarixi mekaniwatuikakaitɨni. 'Arikeketa mekanekɨne.