1
00:00:05,000 --> 00:00:14,880
Merikɨtsɨ tewi katinekuyekaitɨni Ratsaru titewatɨ, Wetaniya mekatei, Mariya kiekariena meta Marita mɨ'iwayatɨkai.

2
00:00:14,880 --> 00:00:26,940
Mariya kanihɨkɨtɨkaitɨni kemɨ'ane Ti'aitame witsimu'ɨa mukawiri, ketateya mukawatsiɨxaxɨ yɨkɨpakɨ. 'Iwaya Ratsaru katinekuyekaitɨni.

3
00:00:26,940 --> 00:00:38,260
Hikɨ 'iwamama 'ukari niuki Ketsutsi mekanenɨ'airieni mɨpaɨ me'utiyuatɨ: «Ti'aitame neuxei, 'iya kemɨ'ane peminaki'erie katinikuyeni».

4
00:00:38,260 --> 00:00:53,060
Ketsutsi 'u'enaka mɨpaɨ kaniutayɨni: «'Ikɨ kwiniya mɨmɨnikɨ pɨka'ayumieme, matsi Kakaɨyari witsi'anetɨ mayeitɨarienikɨ pɨhɨkɨ, Kakaɨyari Nu'aya witsi'anetɨ mayeitɨarienikɨ mɨkɨ kwiniyakɨ».

5
00:00:53,060 --> 00:00:59,440
Ketsutsi kaniwanaki'eriekaitɨni Marita, 'iwayata Mariya meta Ratsaru.

6
00:00:59,440 --> 00:01:08,660
Mɨyatɨtɨ kepauka mu'enaxɨ kename Ratsaru rekuyekai, mana kaniyuhayewa huta tukari 'akuxi hakewa meyeikakai.

7
00:01:08,660 --> 00:01:15,900
'Arikeke mɨpaɨ katiniwarutahɨawe teyɨ'ɨkitɨwamete: —Kɨmɨ tawari Kureya tepuhu.

8
00:01:15,900 --> 00:01:26,980
Teyɨ'ɨkitɨwamete mɨpaɨ mekatenitahɨawe: —Ti'ɨkitame, xike huriyutsixi mepɨmetsikuwautɨwekai memetsituaxake. ¿Tawari petimie mana?

9
00:01:26,980 --> 00:01:41,580
Ketsutsi mɨpaɨ katiniwaruta'eiya: —¿Tamɨ tamamata heimana huta hurayari karexeiya xeitukari? Xɨka hekɨaripa 'uyeikani tewi, pɨkati'ɨkamɨre, 'ena kwiepa mieme hekɨariya mɨxeiyakɨ.

10
00:01:41,580 --> 00:01:46,540
Xɨka yɨwipa 'uyeikani pɨtiketamɨre hekɨariya mɨmawekɨ hetsiena.

11
00:01:46,540 --> 00:01:56,860
Mɨpaɨ 'utayɨka, tawarita mɨpaɨ katiniwarutahɨawe: —Teminaki'erie Ratsaru kanekutsuni, peru ne nepɨmie nemenutahɨtɨanikɨ.

12
00:01:56,860 --> 00:02:04,640
Teyɨ'ɨkitɨwamete mɨpaɨ mekatenitahɨawe: —Ti'aitame, xɨka hekutsuni 'aixɨa reka'erietɨyani.

13
00:02:04,640 --> 00:02:12,220
Ketsutsi mɨpaɨ putayɨ Ratsaru memɨkaikɨri, peru mɨkɨ kutɨ pe'uxipie haineme mepɨ'eriekai.

14
00:02:12,220 --> 00:02:19,000
Hikɨ 'ayumieme Ketsutsi mɨpaɨ katiniwarutahɨawe heitseriemekɨ: —Ratsaru kanemɨkini,

15
00:02:19,000 --> 00:02:28,260
mana nemɨkaheyeikakaikɨ ne'iyari 'aixɨa puyɨ xehetsiemieme, yuri xemɨteta'erienikɨ. Peru matsi tepuhu hetsɨana.

16
00:02:28,260 --> 00:02:39,920
Hikɨ Tumaxi Kwate mɨtitewakai mɨpaɨ katiniwarutahɨawe hipame teyɨ'ɨkitɨwamete: —Hikɨmɨtɨka tepuhu tameta, hamatɨana temekwinikɨ.

17
00:02:39,920 --> 00:02:43,680
Ketsutsi kemɨtiwarunɨtɨa Ratsaru 'iwamama

18
00:02:43,680 --> 00:02:51,860
Merikɨtsɨ Ketsutsi henuaka mɨpaɨ katiniumarieni kename Ratsaru nauka tukari yuriekairi teukiyapa yekaitɨ.

19
00:02:51,860 --> 00:02:58,500
Wetaniya Kerutsareme kanehurakaitɨni, haika kirumeturuyari xeikɨa petewakai.

20
00:02:58,500 --> 00:03:05,900
Huriyutsixi yumɨiretɨ mekaniu'axɨani Marita, Mariya wahetsɨa memɨwanɨtɨanikɨ wa'iwa hepaɨtsita.

21
00:03:05,900 --> 00:03:15,240
Hikɨ Marita kepauka mɨtiutamari kename Ketsutsi nuaximekai, kaneikunake, peru Mariya kiita kaniyuhayewa.

22
00:03:15,240 --> 00:03:24,220
Hikɨ Marita Ketsutsi mɨpaɨ katiniutahɨawe: —Ti'aitame, xɨka 'ena pe'uyeikanike, ne'iwa pɨkamɨnikekai.

23
00:03:24,220 --> 00:03:30,820
Peru hikɨ mɨpaɨ nepɨtimate naime kepemɨtitawawirieni Kakaɨyari pɨmetipitɨani.

24
00:03:30,820 --> 00:03:35,820
Ketsutsi mɨpaɨ katinitahɨawe: —'A'iwa kananukukemɨkɨ.

25
00:03:35,820 --> 00:03:45,800
Marita mɨpaɨ katinita'eiya: —Ne nepɨtimate manukukeni tukari 'aye'ayu kepauka mɨtapare, kepauka memanuku'unitsie.

26
00:03:45,800 --> 00:03:58,660
Ketsutsi mɨpaɨ katinitahɨawe: —Ne nekanihɨkɨtɨni wa'uitɨwame, tukari netihɨkɨta. Kemɨ'ane nehetsie yuri mɨti'erie, tsepa mɨmɨki, kanayenierekamɨkɨ.

27
00:03:58,660 --> 00:04:07,560
Yunaitɨ memayeneniere, nehetsie yuri memɨte'erie, hatsuakuri mepɨkakwini. ¿'Ipaɨ yuri peti'erie 'ekɨ?

28
00:04:07,560 --> 00:04:19,080
Mɨpaɨ katinitahɨawe: —Huu, Ti'aitame. Ne yuri nekatini'erieka 'ekɨ Kɨritsitu pepɨhɨkɨ, 'ekɨ Kakaɨyari Nu'aya kwiepa 'umamiekai pepɨhɨkɨ.

29
00:04:19,080 --> 00:04:32,520
Mɨpaɨ 'utayɨka kaneyani, yɨhɨkɨate me'ayetekaku kanitahɨawe yu'iwa Mariya, mɨpaɨ katinitahɨawe 'awie: —Ti'ɨkitame kaninuani, pɨmatsitahɨawe.

30
00:04:32,520 --> 00:04:37,580
Mɨkɨ 'u'enaka kwitɨwa kananukukeni, hetsɨana kaneyani.

31
00:04:37,580 --> 00:04:45,380
Ketsutsi kiekaritsie pɨkanuawekai 'akuxi, mana 'akuxi kaniutiwekaitɨni Marita menukunakixɨtsie.

32
00:04:45,380 --> 00:05:00,760
Hikɨ huriyutsixi Mariya hamatɨa memayetekai kiita, meminɨtɨakai, me'ixeiyaka Mariya kwitɨwa 'anukukeka metɨakɨ, mekaneiweiya, teukiyapa petɨa mana tatsuanike meteku'eriwatɨ.

33
00:05:00,760 --> 00:05:15,500
Hikɨ Mariya kepauka munua Ketsutsi manutiwekaitsie, 'ixeiyaka, hetɨana kaniutitunumakeni mɨpaɨ tikɨhɨawetɨ: —Ti'aitame, xɨka 'ena pe'uyeikanike ne'iwa pɨkamɨnikekai.

34
00:05:15,500 --> 00:05:26,700
Ketsutsi kepauka mixei Mariya 'utatsuakame huriyutsixi hamatɨana memu'axɨa me'utitsuaname, yu'iyaritsie kaniyumuinanekaitɨni, kaniyu'uximatɨakaitɨni.

35
00:05:26,700 --> 00:05:36,500
Mɨpaɨ kaniutayɨni: —¿Hakewa xepeikateukixɨ? Mɨpaɨ mekatenitahɨawe: —Ti'aitame kenaye'a keneuxeiya.

36
00:05:36,500 --> 00:05:38,680
Ketsutsi kaniutatsuani.

37
00:05:38,680 --> 00:05:44,540
Huriyutsixi 'ayumieme mɨpaɨ mekaniutiyuanekaitɨni: —Neuxei ketinaki'eriekai.

38
00:05:44,540 --> 00:05:55,440
Hipatɨ mɨkɨ mɨpaɨ mekaniutiyuanekaitɨni: —'Ikɨ makɨpe manutanieritɨa, ¿katiyɨwekaita Ratsaru mɨmɨnikɨ mɨkapitɨanikekaikɨ?

39
00:05:55,440 --> 00:05:58,500
Ratsaru kemɨranukuketɨarie

40
00:05:58,500 --> 00:06:09,260
Hikɨ Ketsutsi tawarita yumuinatɨ yu'iyaritsie teukiyapa kaninuani, mɨkɨ terɨ kanihɨkɨtɨkaitɨni, tetekɨ katineunakaitɨni kitenie.

41
00:06:09,260 --> 00:06:23,460
Ketsutsi mɨpaɨ kaniutayɨni: —Xekeneuhɨwa tete. Mɨki 'iwaya Marita mɨpaɨ katinitahɨawe: —Ti'aitame, xɨari pukuri'ɨari, nauka tukari panukamie.

42
00:06:23,460 --> 00:06:33,880
Ketsutsi mɨpaɨ katinitahɨawe: —¿Mɨpaɨ nekametiutahɨawixɨ, xɨka yuri peti'erieka pekanixeiyamɨkɨ kemɨtimariwe Kakaɨyari?

43
00:06:33,880 --> 00:06:45,900
Hikɨ tete mekaneuhɨani. Ketsutsi yuheima heutiniereka mɨpaɨ kaniutayɨni: —Ne'ukiyari, pamɨpariyutsi nekamanipitɨaka pemɨnetsi'u'enikɨ.

44
00:06:45,900 --> 00:06:59,100
Netsɨ nepɨtimaikai 'aheyemekɨ pemɨnetsi'enie, matsi teɨteri ne'aurie memɨti'u wahetsiemieme, mɨpaɨ neputayɨ, yuri memɨteta'erienikɨ kename penetsiheyenɨ'a 'ekɨ.

45
00:06:59,100 --> 00:07:04,840
Mɨpaɨ 'utayɨka karima kaniutahiwa: —Ratsaru, kenewayeye'a.

46
00:07:04,840 --> 00:07:21,020
Hikɨ mɨmɨkikai kaniwayeyani 'ixurikitekɨ 'eimetɨ ketateyatsie mamateyatsie. Yuhɨxie tuwaxakɨ panakɨhɨakai. Ketsutsi mɨpaɨ katiniwarutahɨawe: —Xekeneuxɨna. Xekeneupitɨa mɨyemiekɨ.

47
00:07:21,020 --> 00:07:24,360
Ketsutsi kememɨtemienikekai

48
00:07:24,360 --> 00:07:33,300
Hikɨ huriyutsixi yumɨiretɨ Mariya hetsɨa memu'axɨa memunenierixɨ kemɨtiuyuri, yuri mekateniuta'erieni hetsiena.

49
00:07:33,300 --> 00:07:40,680
Matsi hipatɨ mɨkɨ paritseutsixi wahetsɨa mekanekɨne, mekateniwaretaxatɨani kemɨtiuyuri Ketsutsi.

50
00:07:40,680 --> 00:07:55,880
'Ayumieme mawari wewiwamete tewa'aitɨwamete paritseutsixi wahamatɨa mekaniyukuxeɨrieni meyu'enienike, mɨpaɨ mekateniyutahɨawe: —¿Keteteyurieni? 'Ikɨ tewi waɨkawa 'inɨari katiniyurieneni.

51
00:07:55,880 --> 00:08:10,960
Xɨka te'ipitɨaka mɨpaɨ mɨtiyurienenikɨ, yunaitɨ yuri mekatenita'erikuni hetsiena. 'Anari Xumatari mekani'axɨakuni, mepɨtatsinawairieni tuki mɨpatsie, meta tateɨterima mepɨtatsinawairieni.

52
00:08:10,960 --> 00:08:23,460
Xewitɨ mɨkɨ Kaipatsi mɨtitewakai, mawari wewiwamete tiwa'aitɨwame mɨhɨkɨtɨkai mɨkɨ wiyaritsie, mɨpaɨ katiniwarutahɨawe: —Xeme 'atsixepɨkatemate.

53
00:08:23,460 --> 00:08:34,220
Mɨpaɨ xepɨkatehetimaiwawe matsi 'aixɨa mɨyɨnikɨ tahetsiemieme, xewitɨ tewi mɨmɨnikɨ teɨteri wahetsiemieme, kapa meheuyewenikɨ tateɨterima.

54
00:08:34,220 --> 00:08:48,220
Mɨpaɨ pɨka'utayɨ yɨkɨmana, mɨkɨ wiyaritsie mawari wewiwamete tiwa'aitɨwame mɨhɨkɨtɨkaikɨ yakatinikuxatakaitɨni kename Ketsutsi wateɨterima wahetsiemieme mɨnikekai.

55
00:08:48,220 --> 00:09:00,560
Mɨkɨ wateɨterima wahetsiemieme xeikɨa pɨkamɨnikekai, matsi pɨmɨnikekai mɨwakuxeɨrienikɨ Kakaɨyari niwemama memeutaxɨriexɨa memɨyutaxewirekɨ.

56
00:09:00,560 --> 00:09:05,400
Hikɨ mɨkɨ tukaritsie mekanitsutɨani meyu'enietɨ memimienikɨ.

57
00:09:05,400 --> 00:09:22,060
'Ayumieme Ketsutsi teɨteri wahɨxie pɨka'uyeikakairi huriyutsixi watsata. Xeime kwieyaritsie pɨta makumawe 'aurie kaneyani, kiekari 'Epɨraini mɨrakutewatsie. Mana kaniyuhayewa teyɨ'ɨkitɨwamete wahamatɨa.

58
00:09:22,060 --> 00:09:37,180
Merikɨtsɨ huriyutsixi wa'ixɨarari Patsikwa mɨtitewa kanahurakaitɨni. Yumɨiretɨ 'etsimɨyeyeutsie kiekatari mekanekɨne Kerutsareme 'ixɨarari katsutɨariewekaku 'akuxi memɨyu'itienikɨ.

59
00:09:37,180 --> 00:09:48,600
Ketsutsi mekanikuwautɨwekaitɨni. Tuki kuraruyarita me'aye'utɨ mɨpaɨ mekateniyɨkɨhɨawekaitɨni: «¿Kexeteku'eriwa, xɨka mɨkɨ ha'ixɨaramieni?»

60
00:09:48,600 --> 00:10:02,060
Mawari wewiwamete tewa'aitɨwamete meta paritseutsixi mɨpaɨ mekateniuta'aita, xɨka xewitɨ tewi retimanike hakewa meyeika, ketiutaxatake memiwiyakɨ.