\id 2CO
\h 2 Curinitutari
\toc1 2 Curinitutari
\mt CURINITUTARI
\mt2 Hutarieca Mieme Xapayari Que
Mütivarunüꞌairi Papuru
\c 1
\s Vaürisica
\p
\v 1 Ne Papuru necanixevaüritüaca. Cürisitu Quesusi
nüꞌari pünesiꞌayeitüa, caneneyenüꞌani müpaü
mütinaquecü Cacaüyari. Taꞌiva Timuteumatü
tenixevaüritüaca Curinitusie xemütama
xemüyutixexeüriva, Cacaüyari teüterimama xemühüme.
Yunaitü xemupasie hesiena mieme naisarie ꞌerisitaruyarisie
xemütama ꞌAcaiyasie tenixevaüritüaca.
\v 2 Cacaüyari mütaꞌuquiyari Tiꞌaitame Quesusi
Cürisitumatü, xüca ꞌaixüa meteꞌuꞌiyarini xehesie mieme,
xüca mexepitüaca xemücaꞌuximatüariecacü yuꞌiyarisie.
\s Papuru que mütiꞌuximatüariecai
\p
\v 3 Que müꞌane Tatiꞌaitüvame Quesusi Cürisitu
mücacaüyarieya müꞌuquiyarieya, mücü hepaüsita ꞌaixüa
queticuxaxasivani. Mücü taꞌuquiyaritütü
catiniyucanenimayaca, Cacaüyaritütü naimecü
catiniyuparevieca.
\v 4 Mücü taheyemecü cataniparevieca teꞌuximatüariecacu,
tameta temüyüvavenicü naimecü temüvapareviecacü hipame
sepa que memüteꞌuximatüarie, Cacaüyari mütatipareviepaü
tame.
\v 5 Tame yemecü que temütecuine Cürisitu
mütiucuinixüpaü, müpaüta yemecü tecatenipareviyaca
mücü yatatipitüacacu Cürisitu.
\v 6 Sepa temüꞌuximatüarie, mücücü xecanipareviyacuni
xeme, xenitavicueisitüariecuni que temüyüa. Me sepa
temüpareviya, mücücü xecanipareviyacuni xemeta quepaucua
xemüteꞌucaꞌeniva xeteꞌucacucuinetü que temüteꞌucacucuine
tame.
\v 7 Yuri que temüteꞌerie xehepaüsita,
tepütürücariyari. Müpaü tepütemate, xeme tahamatü que
temütetaxevi yaxeicüa teteꞌucacucuinetü, müpaüta xeme
tame tecanitaxevicacuni tanaitü tepareviyatü.
\p
\v 8 Taꞌivama peuyevese müpaü xemütemaicacü, cui
tepeꞌuximatüariecai ꞌAsiya cuieyarisie teꞌuꞌuvatü. Cuini
mieme pütihetecai yemecü, tepücaꞌiquemacai.
ꞌAsitepücatemaicai xüca tetavicueniquecaitüni ya
temütecuiniquecai.
\v 9 ꞌAsita taꞌiyarisie müpaü tepütetacühüavecai,
tepücuiniquecai. Peru müpaü tiniuyüni tahesie yuri
temücateꞌeriecacü, Cacaüyarisie püta, que müꞌane
müquite müvaranucuꞌuitüvasie, mücüsie yuri
temüteꞌeriecacü puyü.
\v 10 Mücü cataniutavicueisitüani capa müpaü
teteꞌucuinicü. ꞌUxaꞌatüni varie pütasitavicueisitüanita,
que müꞌanesie yuri temüteꞌerie. Tavarita
catanitavicueisitüamücü,
\v 11 xeme xetasipareviecacu xeꞌivavirietü Cacaüyari
tahesie mieme. Müpaü xeteyurieyu, yumüiretü
pamüpariyusi mecanipitüacacuni tahepaüsita, yametemaitü
que temütemiquie yumüiretü memüyunenevicü.
\s Titayari Curinitusie pücahetüa Papuru
\p
\v 12 ꞌAixüa temutiyuanenicü müpaü tepaitüca
tahepaüsita, taꞌiyarisie ꞌaixüa tepütetamate que
temüyüa ꞌena cuiepa. Müpaü tepütemate, Cacaüyarisie
mieme tepasietü tepüyüa, ꞌaixüa tetehecüasietü
tepüyüa Cacaüyari que mütatipitüa. Teüteri vahepaü
que memütemaivave tepücayüa, masi Cacaüyari
yatatipitüacacu ꞌaixüa que mütiucaꞌiyari, müpaü püta
tecaniyüaca cuiepa memütama vahesüa, xehesüa yemecü
müpaü tepüyüa.
\v 13 Taxapa que mütiꞌeniüriücü xeicüa, que
xemütatemate, müpaü xeicüa teꞌutiyuatü
tepütexeꞌutüirie. Siqueresü xepütasihetima peru ꞌesiva
xeicüa,
\v 14 ꞌaixüa püyüniqueyu xüca naimecü püta
xetasihetimanique, müpaü xetemaitü, mücü tucarisie
quepaucua munuani Tatiꞌaitüvame Quesusi, ꞌana
xepüyüvaveni ꞌaixüa xemutiyuanenicü xetasihaꞌerivatü,
yaxeicüa ꞌaixüa temutiyuanenipaü tame texehaꞌerivatü.
\p
\v 15 Müpaü yuri nemütiꞌeriecaicü xehepaüsita,
ꞌayumieme müpaü nepütinemaicai, hutacüa xehesüa
nepunuaniquecai xaüsie necahetaꞌaveme meri, tixaütü
nemütixeminicü.
\v 16 Xehesüa nehetaꞌame Maseruniya cuieyarisie
nepüyemiecai, tavari Maseruniya neheyeyame xehesüa
nepunuaniquecai xemünesiꞌanunüꞌanicü Cureya
cuieyarisiepai.
\v 17 Que xetecuꞌeriva, müpaü netinemaitü yacü xeicüa
netinepatacai. Teüteri vahepaü neyüanetü netinematetü,
Hü neꞌutaitü, que netinepata Tixaü neꞌutaitü.
\v 18 Yapüticamie Cacaüyari que maine. Yaxeicüa tame que
temütexetahüave, taniuqui pücahuta, püyuxevi. Xüca
müpaü reuyeveca Hü temutiyuanenicü, Tixaü
tepücaꞌutiyuane, ya Tixaü xüca reuyeveca
temutiyuanenicü, Hü tepücaꞌutiyuane.
\v 19 Cacaüyari nuꞌaya Cürisitu Quesusitütü xehesüa
canicuxaxasivacaitüni tetecuxatacacu ne Sirivanu Timuteu.
Niuqui mücü hepaüsita manuyüne pücahuta, püyuxevi
müpaü ꞌanetü mühücücü Cürisitu.
\v 20 Nai que mutayü Cacaüyari quename tiyurieni, mücüta
niuqui pücahuta, püyuxevi Cürisitu meyeꞌatüacü.
ꞌAyumieme quepaucua ꞌaixüa temutiyuane Cacaüyari
hepaüsita, tepüyüvave müpaü temutiyuanenicü, Müpaü
caniꞌaneni, teꞌutiyuatü, Cürisitu müpaü mütiuyuricü.
\v 21 Mücü Cacaüyaritütü canihücütüni que müꞌane
mütasiseiriya xeme tame Cürisitusie temüteviyanicü.
Mücü heiserie pütasiꞌupitüa,
\v 22 yuhesie mieme pütasiꞌuꞌinüaritüa, taꞌiyarisie
yuꞌiyari pütasiꞌupitüa ꞌinüaritüme mümasiücünicü
tita tahesie mütinaque.
\p
\v 23 Ne nepitahüave Cacaüyari netucari
münesinavairienicü xüca netiꞌitavani que nemaine.
Nepacunua ꞌaxa nemücaxeretahüavecü. ꞌAyumieme Curinitu
nepücahetüa tavari.
\v 24 Müpaü tepücahaitüca tetexeꞌaitüacutü yuri que
xemüteꞌerie. ꞌAixüa xecaneutiꞌuni yuri xeteꞌerietü. Masi
müpaü tepaitüca xehamatü teteꞌuximayatü
xemüyutemamaviecacü.
\c 2
\p
\v 1 Müpaü nepütinemaicai ꞌana, ꞌaixüa pücayüniqueyu
xüca tavari nenuanique xehesüa nexeheiveritüatü,
netinecühüavetü.
\v 2 Xüca nexeheiveritüacaque xeme, quepaicü
pünesitemavieritüaniqueyu ne. Nexeheiveritüacacu que
xenetetemavieritüaniqueyu.
\v 3 ꞌAyumieme xapa müpaü nepütiuꞌutüa, capa nenuayu
menesiꞌuheiveritüanicü müme meuyevese masi
memünesitatemavieritüanicü püta. ꞌIpaü yuri
nepütiꞌerie yunaime xehepaüsita, xüca nenetemavieca ne
xemeta xepüyutemamavieca yunaitü.
\v 4 Cui neꞌuximatüarietü ꞌana, nesaipünarietü
neꞌiyarisie müpaü netinixeꞌuꞌutüirieni vaüca
neꞌutasuatü. Peru xemüheiveritüariecacü
yanepücatiuꞌutüa, masi müpaü xemütemaicacü vaüca que
nemütixenaquiꞌerie yanepütiuꞌutüa.
\s Papuru que müreiyehüviri tevi ꞌaxa mütiyurienecai
\p
\v 5 Xevitü que mütiyurienecai pücanesiꞌuheiveritüa ne,
masi necaꞌanuhaitüamütü nepaine siquere ꞌesiva
püxeheiveritüa xeme yunaime.
\v 6 Mücüsie catiniunaque que xemüteꞌitatacuritüacai
xeꞌuyuꞌenieca.
\v 7 ꞌAyumieme xepüyüvave masi xemüteheiyehüvirienicü
hicü, xepüyüvave xeminütüanicü mücü tevi, capa
ꞌutaxütüarienicü yuheiverietü ꞌanayuhayevamecü.
\v 8 ꞌAyumieme vaüriyarica necanixepitüaca
xemihecüasitüiyanicü que xemüteꞌinaquiꞌerie.
\v 9 ꞌAyumieme müpaü nepütixeꞌuꞌutüirie,
yanemütimaicacü nexeꞌinüatame xüca naime hepaüsita
yaxetecahuni.
\v 10 Que müꞌane xemüteheuyehüviri, neta yaxeicüa
nepüreiyehüviri. Que nemüreiyehüviri, sepa hesiena
nemücatihüpacai ne, nexehaꞌerivatü yanepüreiyehüviri
Cürisitu nesixeiyacacu,
\v 11 capa Cauyumarie tasicuamanacü. ꞌAixüa tepütemate
que mütiyuruva ꞌiya.
\s Que mütiyuꞌiyaritüacai Papuru, Türuhasisie ꞌuyeicatü
\p
\v 12 Mericüsü, Türuhasi necaninuani niuqui ꞌaixüa
manuyüne Cürisitu hepaüsita para nemüticuxatanicü, peru
quitenie sepa müreuyepiyacai nehesie mieme Tiꞌaitamesie que
nemütiviya nemüticuxatanicü,
\v 13 nepücaꞌuxipiecai neꞌiyarisie,
nemücaheitaxeiyavecaicü neꞌiva Titu. Nevarutateutüaca
masi necaneyeyani Maseruniya cuieyarisiepai.
\s Que mütatihecüatüa Cürisitusie teteviyacacu
\p
\v 14 Masi Cacaüyari pamüpariyusi quepitüarieca. Mücü
yuheyemecü pütasihecüatüa Cürisitusie que temüteviya,
teüteri vahüxie tasicuvitünetü yuꞌutüma. Tacümana
naisarie müpaü catinihecüatani visi que müꞌitüarie
Cürisitu xüca maica.
\v 15 Tame ꞌinüari tecanihümetüni ꞌücua visi muꞌüapaü
Cacaüyari que mütatixeiya, temiꞌeritüacü Cürisitu que
mütiꞌane. Mümeta memütavicueisitüariexime que
memütatexeiya, memücuixime meta que memütatexeiya
tecaniꞌinüaritüni.
\v 16 Memücuixime vacü tepumüquiꞌüa temüvaꞌeritüacü
que memütecuini, peru müme memütavicueisitüariexime
vacü tepütucariꞌüa temüvaꞌeritüacü que
memüteꞌayeyuyurini. Mericüte, quepaicü piquema ꞌicü
naime.
\v 17 Tame yumüireme vahepaü tepücaꞌanene. Harerusixi
vahepaü tepücatetacuamana Cacaüyari niuquieya
tecuxatatü. Masi ꞌaixüa tetehecüasietü, Cacaüyari que
mütareyenüꞌa, Cacaüyari tasixeiyacacu teyüatü,
Cürisitusie teteviyatü müpaü tetenicuxatani.
\c 3
\s Que temüteꞌuhüritüarie türatu mühecua hepaüsita
\p
\v 1 Müpaü teꞌutiyuatü tavari teteꞌisutüa para
temühecüacacü xemütasimaicacü ꞌacu. Hipame vahepaü que
teteheiyehüva xapa mütasihecüatüacacü temümarivanicü,
yaxemüteꞌuꞌutüiyarienicü yaxemütetiꞌutüanicü nusu.
\v 2 Xeme taxapa xecanihümetüni taꞌiyarisie müreꞌuxa.
Yunaitü teüteri mepüyüvave memititerüvanicü müpaü
memütetimanicü mexexeiyatü.
\v 3 Xecanimasiücüni xeme Cürisitu xapaya xehümetütü
yatetehüritüariecacu tame. Mücü xapa tauxicü
pücaꞌutüarie, Cacaüyari mayeyuri ꞌiyarieyacü püta
püꞌutüarie. Tetesie pücareꞌuxa, vaisie püta teüteri
vaꞌiyarisie püreꞌuxa.
\p
\v 4 Cürisitu yatatipitüacacu, müpaü tetetamaitü, yuri
teteniꞌerieca Cacaüyarisie.
\v 5 Müpaü teꞌutiyuatü ꞌasitepücahaitüca quename
tacümana tixaütü teyüvave, tacümana tixaütü
temüteꞌusutüa tepücatecuꞌeriva. Masi que temüteyüvave,
Cacaüyari yatatipitüacacu tepüyüvave.
\v 6 Mücüri que mütatiupitüa, pütasiꞌuhüritüa türatu
hecuame hepaüsita. Peru ꞌutüarica hepaüsita xeicüa
pücatasiꞌuhüritüa, masi ꞌiyarisie mieme hepaüsita püta
pütasiꞌuhüritüa. ꞌUtüarica hexeiyatü xeicüa
canimümücü, peru yuꞌiyarisie heixeiyatü tucari
canipitüariecamücü.
\p
\v 7 Mücü türatu cümana mümüni visi ꞌanetü ninuani
tetesie müreꞌuxacai Muisexi que mütiuhüritüarie.
ꞌIxaherisixi teüteriyari mepücayüvavecai
memiꞌixüarienicü Muisexi hüxieya, visi mayexavatücaicü
sepa mayeyeiximecai.
\v 8 Mericüte, masi vaücava visi catiꞌaneni türatu
ꞌiyarisie mümieme xüca hepaüsitana hüritüarieca.
\v 9 Xüca visi ꞌuyüni yatihüritüariecacu türatu
hepaüsita cümana teüteri memütixaniꞌeriva, masi
vaücavamecü ꞌanayuhayevamecü visi pütiyüni
yatihüritüariecacu türatu hepaüsita cümana heiserie
memüpitüarieca.
\v 10 Mücü meta, tita visi mütiꞌanecai visi
pücatiyuxexeiya hicü, ꞌiya püta cuini mieme visi ꞌanetü
meꞌivacü.
\v 11 Tita mayeiximecai visi püꞌanecai, peru masi vaücava
visi caniꞌaneni tita mücatixüve.
\p
\v 12 Müpaü yuri temüteꞌeriecü, ꞌayumieme cui
tetayetuatü tepütecuxata.
\v 13 Muisexipaü tepücayüa, ꞌixuriquicü que
müreuyucunacai ꞌIxaherisixi teüteriyari yuheyemecü
memücaꞌixeiyacü, que mürayeyeiximecai.
\v 14 Mücü teüteri meꞌuꞌitutupetü menacüne que
memüteyuꞌiyaritüacai. Hicüque yaxeicüa mücücü
ꞌixuriquicü heuyucunatü caniyuhayeva quepaucua
mütiterüvarüva Türatu Meripai Mieme xapayari.
Pücaheucuyepiva, Cürisitusie tiviyacacu xeicüa
pücaꞌunarüva.
\v 15 Masi hicüque Muisexi xapaya titerüvarüvacacu,
mücü ꞌixuriqui heuyucunatü canacavüre vaꞌiyarisie.
\v 16 Peru que maine, Quepaucua taꞌaurie mave ꞌitahüaveque
Tiꞌaitame, ꞌana heucunatü caninavaiyariemücü, ꞌanuyütü,
müpaü püꞌane.
\v 17 Mericüsü Tiꞌaitame haitü ꞌiyari canixatani. Haque
Tiꞌaitame ꞌiyarieya meyeica, tevi caniyünüꞌaca mana.
\v 18 Tame tanaitü tahüxie caheucunacacu tepihecüata
Tiꞌaitame visi que mütiꞌane, sepa yüxaüyemecü,
xicürisie que mütihecüata tevi. ꞌAyumieme tepücupasiva,
visi teꞌanenetü tepacünirüme, hepaüna teꞌanenetü
tetetaxexeiyatü teteꞌacünirüme. Tiꞌaitame ꞌiyaritütü
müpaü catiniyurieneni.
\c 4
\p
\v 1 ꞌAyumieme müpaü tetehüritüarietü tepücavaüripie,
masi que temütenenimayasie tepüyüa.
\v 2 Peuyevese hipatü memüyuteteviyanicü ꞌavie que
memüteyurie, peru tame tecateniutixaniꞌerieni mücü naime.
ꞌAtepücaꞌuꞌuva tetetaꞌirüviyatü, ha tepücaꞌinüitüa
Cacaüyari niuquieya, que mütivaiyacü püta tetecuxatatü.
Masiücüme tepeyeitüa tita yuri müraine, Cacaüyari
tasixeiyacacu tepütahecüata, yunaitü teüteri yuꞌiyarisie
müpaü memütemaicacü quename yuri.
\v 3 Taniuqui ꞌaixüa manuyüne sepa meucuname,
memutümaiyariexime que memüteꞌiꞌenie xeicüa caneucunaca.
\v 4 Hicü miemete vacacaüyari canivacüpiriyaxüani müme
yuri memücateꞌerie que memüteyumate yuꞌiyarisie, capa
hecüariya meꞌuxeiyacü, niuqui ꞌaixüa manuyüne Cürisitu
que mütimarive manuyüne que mütivahecüariviyaqueyu.
Mücü Cürisitu Cacaüyari caniꞌinüarieyatüni, hepaüna
pütiyuxexeiya.
\v 5 Mücü meta, tame tepücatecuxata tahepaüsita, masi
müpaü püta tepütecuxata, quename Cürisitu Quesusi
tiꞌaitame hücü teꞌutiyuatü, quename tame xeparevivamete
tehüme Cürisitusüa temümiemetecü teꞌutiyuatü.
\v 6 Que müꞌane Cacaüyaritütü müpaü mutayü,
Hecüariya yüvipa queꞌuneni, ꞌutaitü, mücütütü
catanihecüariyani taꞌiyarisie. ꞌAyumieme yateteꞌimaitü
Cacaüyari que mütimarive, Cürisitusie que mütimasiücü,
tecanihecüariviyarieca.
\s Que temüteꞌayeyuyuri yuri teteꞌerietü
\p
\v 7 ꞌIcü naitü cui pürayeꞌaxe, peru haxuta
tecaneixeiyani xeicüa ꞌicü türücariya, mümasiücünicü
Cacaüyarisüa mümiemecü, tahesüa mücamiemecü.
\v 8 Sepa naimecü temüꞌuximatüarie, tepücahaꞌivarie.
Sepa ꞌasitemücatemate que temüteyurieni, tepücavaüripie.
\v 9 Sepa temeutaveiyariexüa, tepücacuꞌeiriva. Sepa
tematixüriya, tepücaꞌutümaiyarie.
\v 10 Taheyemecü tepücuixime tavaiyarisie, Quesusi que
mütiumü. ꞌAyumieme tucari canimasiücüni tavaiyarisie,
Quesusi que mürayeyuri canimasiücüni.
\v 11 Tame temayeyuyuri taheyemecü teniyetuiyani
temücuinicü Quesusisüa temümiemetecü, mümasiücünicü
tavaiyarisie que mürayeyuri Quesusi, sepa temücuixime.
\v 12 ꞌAyumieme tecuiximetü tecaniyüaca, xemesü
xeꞌayeyuyuritü xepüyüa.
\p
\v 13 Que müreꞌuxa, Yuri nepütiutaꞌerie, ꞌayumieme
neputaniu ꞌanuyütü, tameta yaxeicüa tepüteꞌuꞌiyari. Yuri
tepüteꞌerie, ꞌayumieme teputiniuca
\v 14 müpaü tetemaitü, que müꞌane menucuquetüa
Tiꞌaitame Quesusi, mücü catananucuꞌuitüamücü tameta
Quesusipaü, xehamame meta catanayeꞌatüamücü yuhesüa.
\v 15 Müpaü naitü catiniyümücü xehesie mieme.
ꞌAyumieme mücü yeme ꞌaixüa tiucaꞌiyaritü yumüireme
vahesie mieme, pamüpariyusi canipitüariecamücü.
Mücücü Cacaüyari visi que mütiꞌane
canicuxaxasivamücü.
\p
\v 16 ꞌAyumieme tepücavaüripie. Sepa herie
temütipünirüme, tateüta tecanihecuariyarieca tucaricü.
\v 17 Pücahahete, que temüteꞌuximatüarie hicü,
ꞌepücareutere. Peru yateteꞌuximatüarieme, taheyemecü cui
visi ꞌanemecü tepüꞌicatüarieca mücaxüvecü.
\v 18 Peru tepücaꞌicuvautüve tita temütexeiya, tita
temücatexeiyavave püta tecanicuvautüveni. Tita
temütexeiya ꞌapücatiterive, tita temücatexeiyavave püta
yuheyemecü ꞌapütiterive.
\c 5
\p
\v 1 Müpaü tecatenimaica, xüca caꞌunarieni ꞌicü xamaru
haque temayetei ꞌena cuiepa, qui tecanexeiyani Cacaüyari
mütasipitüa mamacü mücaveviya yuheyemecü ꞌamuve
muyuavisie.
\v 2 Mücü meta, müpaü teꞌanenetü teniuꞌaivani
teꞌitücutü haque temayeteni taheima mieme.
\v 3 Müpaü teteꞌitüme yemecü tepücamamaveni.
\v 4 ꞌIcü xamarutüa teꞌayetetü teniuꞌaivani
tesaipünetü. Tasüari tecaheutaquemaripicutü, masi
tepeitücuni, tita mürayeyuri yuhesie mixeviriyanicü tita
mütimüxime.
\v 5 Mericüte, Cacaüyari canihücütüni que müꞌane
mütaꞌutivevie müpaü mütiyünicü. Mücüta yuꞌiyari
cataniupitüani ꞌinüaritüme mümasiücünicü tita tahesie
mütinaque.
\p
\v 6 ꞌAyumieme taꞌiyari tepucayesa taheyemecü. Müpaü
tepütemate, mexi tavaiyarisie teꞌuꞌuva, Tiꞌaitamesüa
tepücaꞌuꞌuva.
\v 7 Yuri teteꞌerietü tecaniuꞌuvani, teꞌixeiyatü
tepücaꞌuꞌuva.
\v 8 ꞌAyumieme taꞌiyari tepucayesa, tepütavaüriya masi
temicuꞌeirienicü tavaiyari, Tiꞌaitamesüa püta
temeꞌuvanicü.
\v 9 ꞌAyumiemeta tecanitamexüitüaca teminaquiꞌaritüanicü
sepa ꞌuva temuꞌuva sepa hesüana temuꞌuva.
\v 10 Caneuyevecani tanaitü temasiücütü
temayeitüarienicü Cürisitu ꞌuvenieya hüxie haque
mütaticuꞌivaviya, taxexuitü temüteꞌapiniyarienicü
ꞌaixüa que temüteꞌuyuriꞌaxa que temüteꞌuyuri,
tavaiyarisie teꞌuꞌuvatü que temüteꞌuyuri.
\s Que temütehüritüarie, temütecuxatanicü, teüteri
Cacaüyarimatü ꞌaixüa memüteyuxeiyanicü
\p
\v 11 ꞌAyumieme müpaü tetemaitü, müpaü que müreuyevese
müreiyehüvirienicü Tiꞌaitame, yuri tetenivaꞌeritüaca
teüteri. Tecanimasiücüni Cacaüyari que mütatixeiya.
Yuri tepüteꞌerie quename temasiücü xemeta que
xemütatexeiya, que xemüteyumate yuꞌiyarisie.
\v 12 Müpaü teꞌutiyuatü tavari tepücaꞌisutüa
tetahecüatatü xemütasimaicacü. Masi müpaü teꞌutiyuatü
tecanixepitüaca ꞌaixüa xemutiyuanenicü xetasihaꞌerivatü,
niuqui xemexeiyanicü cümana xemüvataꞌeiyacü müme herie
mieme xeicüa mehaꞌerivatü ꞌaixüa memutiyuane
yuhepaüsita, ꞌiyarisie mieme memücahaꞌeriva ꞌaixüa
meꞌutiyuatü yuhepaüsita.
\v 13 Sepa ꞌasitemücatemate, Cacaüyarisie mieme
teniyüaca. Me sepa temütemaivave, xehesie mieme tepüyüa.
\v 14 Cürisitu mütasinaquiꞌeriecü, ꞌayumieme tinaquemecü
tepüyüa, tepücayüvave yücü temüteyuriecacü. Müpaü
masi tepütehetima, xevitü yunaime vahesie mieme
caniumüni, ꞌayumieme yunaitü mepucui.
\v 15 Mücü meta, yunaime vahesie mieme pumü, müme
memayeyuyuri yuhesie mieme memücaꞌayeyuyurinicüri, que
müꞌane vahesie mieme mumü manucuquetüarie, mücüsie
memiemetetütü püta memüyüacacü.
\v 16 ꞌAyumieme hicü xeime tepücamate teüteri que
memüteꞌimate. Sepa temimaicai Cürisitu teüteri que
memüteheꞌeriva, hicü müpaü teteheꞌerivatü
tepücaꞌimate.
\v 17 ꞌAyumieme xüca Cürisitusie tiviyani, yücü ꞌanetü
tiniunetüarieni. Tita meripai mütimieme cananucayune.
Camü, naitü yücü ꞌanetü nayani.
\p
\v 18 ꞌIcü naime Cacaüyari catiniusutüani. Mücü
pütasiꞌupitüa ꞌaixüa temütetaxeiyanicü hamatüana,
Cürisitu müpaü mütiuyuricü. Cataniuhüritüani
temütecuxatanicü, hipatüta hamatüana ꞌaixüa
memüteyuxeiyanicü,
\v 19 müpaü teꞌutiyuatü, Cacaüyari Cürisitusie
tiviyatü müpaü pütivapitüa cuiepa memütama hamatüana
ꞌaixüa memüteyuxeiyanicü, vahesie pücatiuhüpa ꞌaxa
memüteꞌuyuricü, masi pütasiꞌuyetuiri mücü niuqui
ꞌaixüa que temütetaxeiya hamatüana manuyüne,
teꞌutiyuatü.
\v 20 ꞌAyumieme Cürisitu nüꞌarimama tecanihümetüni,
hesiena mieme tecaniutiniucani, müpaü tetemaitü,
Cacaüyari canixetuicani müpaü teꞌutiyuanecacu,
Cürisitusie mieme teꞌutiniutü vaüriyarica
tecanixepitüaca, Cacaüyarimatü ꞌaixüa
xemüteyuxeiyanicü.
\v 21 Que müꞌane ꞌaxa mücatiyurievecai Cacaüyari müpaü
piyuri ꞌaxa tiyuruvamepaü müꞌitüarienicü tahesie mieme,
tame hesiena teteviyatü heiserie temexeiyanicü Cacaüyari
heiserie que mütiyupitüva.
\c 6
\p
\v 1 Mücü meta, hamatüana müpaü teteꞌuximayatü,
vaüriyarica tecanixepitüaca xeme, xeꞌitanaquiꞌerieme tita
Cacaüyari mütixemicua ꞌaixüa tiucaꞌiyaritü, xüanacüa
xemücaꞌitanaquiꞌerienicü.
\v 2 Müpaü paine,
\q Tucari ꞌaixüa müꞌanesie
\q Nemaniuꞌenieni,
\q Tucari ꞌayeꞌacu
\q Xemütavicueisitüarienicü
\q Nemaniuparevieni.
\m Camü hicü tucari ꞌaixüa müꞌane canihücütüni,
camü hicü tucari canayeꞌani xemütavicueisitüarienicü.
\p
\v 3 Ni xeime tepücaꞌucununuitüva tixaütü hepaüsita,
ꞌicü hüritüarica capa ꞌuseviximariecacü que
temütehüritüarie.
\v 4 Masi Cacaüyari teparevivamete tehümetütü naimecü
tepütahecüata. Vaüca tepüteꞌucaꞌeniva
teꞌuximatüarietü, teteheuyehüatü, tetatexietüvetü,
\v 5 tecuveivatü, teꞌanutaxürivatü, teüteri
meyuxamurietüvecacu, teteꞌuximayatü, tucari tecahütü
cusicü ꞌicuaicü.
\v 6 Tepüꞌitiya, tepütemate tita müreuyevese, müixa
tepüvanevie hipame, ꞌaixüa tepüteꞌuꞌiyari, ꞌIyari
Mütiyupata tepexeiya, yacü tepücatetacanaquiꞌerie,
\v 7 yuri tepütecuxata, Cacaüyari türücariyaya
tepexeiya, heiserie temupitüariecü cuya tepüaya
tepupitüarie naisata mieme cümana temütacuitüveni.
\v 8 Visi tetexeiyarietü ꞌaxa tetexeiyarietü yaxeicüa
tepüyüa, ꞌaxa tetecuxaxasivatü ꞌaixüa tetecuxaxasivatü
yaxeicüa tepüyüa. ꞌIrümari tepüxasiva peru yuri
tepütecuxata,
\v 9 quename tecamariva meputiyuane peru yunaitü
mepütasimate, quename tecuixime meputiyuane peru camü
tepayeyuyuri, quename tetatacuritüariexime meputiyuane
peru tepücacuiꞌiva,
\v 10 tepütaheiveri peru taheyemecü tepütatemamavi,
tepüpuvüresixi peru xicusixi tepüvarayeitüva
yumüireme, tixaütü tepücatehexeiya peru naitü
pütitapini.
\p
\v 11 ꞌAixüa ꞌiyaricü tepütexecuxaxatüva Curinitutari,
yeme taꞌiyari ꞌapüneüna que temütexenaquiꞌerie.
\v 12 Que temütexexeiya, taꞌiyari pücasaipüne, xeme püta
xepüyusaipüna yuꞌiyarisie.
\v 13 Mericüte, netüriyama que nemütivacühüaveniqueyu,
müpaü nepütixetahüave, yaxeicüa xequeteneuyuri que
temüxeyurie, xeꞌiyari ꞌamütanerecü.
\s Cacaüyari mayeyuri tuquieya que temütehüme
\p
\v 14 Yuri memücateꞌerie vahamatü xepücayuxeviriyani.
Titari rexeiya tita mütiheiserie tita ꞌaisica
mütitisanamatü. Que tiyuxevini hecüariyamatü yüriya.
\v 15 Que meteyuꞌenie Cürisitu xeime cacaüyari ꞌaxa
müꞌanematü. Tita tinaque tevi yuri mütiꞌeriesie
ꞌaxeicüa yuri mücatiꞌeriesie.
\v 16 Cacaüyari tuquitana que metenaque tetexi
cacaüyarixi. Pücayüvesietü. Tame Cacaüyari mayeyuri
tuquieya tecanihümetüni, que mutayü Cacaüyari,
\q Vahesüa neniucaimücü
\q Vasata neniuyeicamücü
\q Vacacaüyari nepühücütüni,
\q Müme neteüterima
mepühümetüni.
\m
\v 17 ꞌAyumieme müpaü paine,
\q Vasata xequenayecüneca,
\q Xequeneyupata
\q Canaineni
Tiꞌaitame,
\q Xepücaꞌimayüani
\q Tita mücatiꞌitiya.
\q Xüca
müpaü xeteyurieca
\q Neri nenixetanaquiꞌerimücü
\q
\v 18 Xeꞌuquiyari necanayeimücü,
\q Xeme nenivema
\q ꞌUquisi
ꞌucari
\q Xecanacünicuni
\q Canaineni Tiꞌaitame
\q Nai
mütürücaüye.
\c 7
\p
\v 1 Mericüte nenaquiꞌerima, müpaü
temüteꞌutahüavariecü quename müpaü tiyurieni,
tepütaꞌitieca naime mütiyusevixima tavaiyarisie
taꞌiyarisie. Tepayeꞌaxüaximeni tepasietü Cacaüyarisie
mieme, teteheiyehüvirietü.
\s Papuru que mütiyutemaviecai, Curinitutari
meteꞌuhayevacu que memüteyuriecai
\p
\v 2 Yuꞌiyari ꞌaxequeneutaneriya xemütasinaquiꞌeriecacü.
Ni xeime ꞌaxa tepücaꞌuyuri, tixaü tepücateꞌinavairi
xeime, tepücaꞌicuamanaxü ni xeime.
\v 3 Müpaü que nemaine, xehesie nemütiuhüpanicü
ꞌasinepücahaine. Meripai müpaü nepütixecühüavecai
quename taꞌiyarisie texehaꞌeriva, quename ꞌaxeicüa
tetaxevi sepa temücuini sepa temayeyuyurini.
\v 4 Müiremecü nepücaneꞌiyaritüa xehepaüsita, cui
ꞌaixüa nepüticuxata xehepaüsita. Sepa naimecü
temüꞌuximatüarie, nepayeꞌa nenütüarietü, panayuhayeva
netemavierica.
\p
\v 5 Mericüsü Maseruniya cuieyarisie teꞌuꞌaxüaca
tepücaꞌuxipivavecai tavaiyarisie, naimecü masi
tecaniꞌuximatüariecaitüni. Taꞌaurie pütiyucuinecai,
tateüta tepümamacai.
\v 6 Perusü que müꞌane Cacaüyaritütü müvanütüva
müme memüyuheiverie, mücü cataniunütüani tameta, Titu
munuacü.
\v 7 Munuacü xeicüa pücatixaü, masi mücü
munütüariecü xehepaüsitata tepunütüarie tame,
taticuxaxatüvacacu Titu que xemütatexeiyaqueyu, que
xemüteyuheiverie, que xemüteyumexüitüa nehesie mieme.
ꞌAyumieme ne masi yemecü nepünetemaviecai.
\p
\v 8 Ne xapacü sepa nemüxeꞌuheiveritüa, yücü
nepücatinecühüave. Sepa yücü nemütinecühüavecai
ꞌana, müpaü netimaitü mücü xapa müxeꞌuheiveritüacü
siqueresü yapaümexa,
\v 9 peru hicü masi nepünetemavie. Xemuheiveritüariecü,
mücücü nepücanetemavie. Masi yaxeteꞌuheiveritüarieca
xemüteꞌuhayevaxücü que xemüteyuriecai, ꞌayumieme
nepünetemavie. Cacaüyari tixepitüacacu
xecaniuheiveritüarieni, ꞌayumieme tixaü
xepücateꞌutümaiyaxü müpaü temüteꞌuyuricü.
\v 10 Xüca yuheiverieca Cacaüyari tipitüacacu,
pütihayeva que mütiyurienecai, pütavicueisitüarienita.
Tihayevame que mütiyurienecai, tavari ꞌaxa
pücatiyücühüaveni yamütiuhayevaxücü. Me xüca
yuheiverieca cuiepa memütama vahepaü xeicüa,
püpitüarieni mumünicü.
\v 11 Neuxei que mütiuyü quepaucua Cacaüyari
müxeꞌupitüa xemüyuheiveriecacü. Mücücü xepuyuvaüri,
mücü meta, xepüyutahecüataxü yuniuqui,
xepüyuyehecaxü, xeputimama. ꞌAna xepünesixeiyacucai,
xepüyumexüitüacai, ꞌaixüa xepiyuri naime. Naimecü
xeniyuhecüatani xemüꞌitiyacü mücü que mütiuyücü.
\v 12 Mericüte, müpaü nepütixeꞌuꞌutüiri, peru que
müꞌane yuꞌiva ꞌaxa muyuri nehaꞌerivatü xeicüa
nepücatiuꞌutüa, que müꞌane ꞌaxa muꞌitüarie
nehaꞌerivatü xeicüa nepücatiuꞌutüa. Xeme yücümana
müpaü xemütemaicacü que xemüteyuvaüriya tahesie mieme
Cacaüyari xexeiyacacu, ꞌayumieme yanepütiuꞌutüa.
\v 13 Müpaü mütiuyücü, ꞌayumieme tepunütüarie tame.
\p Mücü meta, tame müpaü teteꞌunütüarieca, masi
vaüca tenitatemamaviecaitüni Titu müyutemaviecaicü,
yunaitü cayuvatü xemipitüacü ꞌiyarieyasie.
\v 14 ꞌAixüa que nemütitaxatüa xehepaüsita,
nepücaꞌuteviyasitüarie neniuqui hepaüsita. Masi
yaxeicüa yuri que temütexecuxaxatüvacai naimecü,
müpaüta caniyuritücaitüni ꞌaixüa que temüteꞌitaxatüa
Titu.
\v 15 Mücüta cuini mieme masi canixenaquiꞌerieca
xehaꞌerivatü yaxemütecahucü yunaitü, xehaꞌerivatü que
xemüteꞌitanaquiꞌeri xeꞌumamatü xeꞌuyüyüacatü.
\v 16 Neta nepünetemavi nemüyüvecü neꞌiyari
nemeucayesacü xehepaüsita naimecü.
\c 8
\s Tumini que memüteꞌucuxeüri Cacaüyari teüterimama
vahesie mieme
\p
\v 1 Tepütexetaxatüaniqueyu taꞌivama, Cacaüyari ꞌaixüa
tiucaꞌiyaritü que mütivarupitüa müme memeyutixexeüriva
Maseruniya cuieyarisie memütevamicuanicü hipame.
\v 2 Vaücava mepüꞌinüasietüve meꞌuximatüarietü, peru
cananayuhayevani vatemavierica. Sepa yemecü
memüpuvüresixi, mepimüiriyaxü ꞌaixüa ꞌiyaricü que
memütevamicuacai.
\v 3 Que nemütiunierixü yanepütihecüata. Que
memüteyüvavecai xeicüa nepücahaine, masi yemecü
mepücaꞌuyuticueri que memütevamicuacai hipame. Yücümana
\v 4 vaüriyarica metasipitüatü mecataniutavavirieni
müpaü temütevatauniecü, mevaparevietü memüyuxevinicü
Cacaüyari teüterimama vahamatü.
\v 5 Que temütecuꞌerivacai müpaü memüteyurieniquecaicü
yamepücateꞌuyuri. Masi meniyuyetuani meri Tiꞌaitame
mütivaꞌaitüanicü, tameta temütevaꞌaitüanicü müpaü
mütinaquecü Cacaüyari.
\v 6 ꞌAyumieme Titu vaüriyarica tecaniupitüani ꞌicü
ꞌimiquieri mürayeꞌatüanicü xeme xehesüata mücü
meripai misutüacü ꞌixeürietü.
\v 7 Vaücava naitü tinimüiriyarümeni xehesie mieme que
xemüteyurie, yuri xeteꞌerietü, xetecuxatatü, xetematetü
tita müreuyevese, naimecü xeyuvaüriyatü
texenaquiꞌeriecacu. Mericüte, yaxeicüa ꞌicü ꞌimiquierita
xequeneutimüiriya.
\p
\v 8 Netixeꞌaitüatü ꞌasinepücaꞌutaine hicü. Masi
hipatü müpaü memüteyuvaüriyacü, nexeꞌinüatatü
nepaine, xüca hecüasieca quename xemeta
xeteyucanaquiꞌerie.
\v 9 Xeme müpaü xepütehetima ꞌaixüa que mütiucaꞌiyari
Tatiꞌaitüvame Quesusi Cürisitu. Mücü sepa
müxicutücai, xehesie mieme puvüre nayuyeitüani, xeme
xicusixi xemacünecü, ꞌiya puvüre matüacü.
\p
\v 10 ꞌIcü hepaüsita que nemüticuꞌeriva müpaü
netinixeꞌutaxatüani. ꞌAicü xepuyuvaüri xemisutüanicü
müpaü xeteyurietü, ꞌanata xepisutüa. Mericüte, hicü
ꞌaixüa caniyümücü xehesie mieme xüca müpaü
xeteyurieni,
\v 11 xüca müpaü xeteꞌayeꞌatüani que xemüteyurie.
Xeꞌiyari que müꞌanenecai müpaü xemüteyuvaüriyanicü,
müpaüta xequetenayeꞌatüaca, que xemüteyüvave.
\v 12 Xüca raꞌiyari yatiꞌaneni, tita mürexeiya
pünaquiꞌerivani, sepa tixaütü mücarexeiya.
\p
\v 13 Peru müpaü nepücahaine hipatü memüꞌicapiyanicü
xeme xemücuanimasitüarienicü,
\v 14 masi müyeyesitüarienicü hicü nepaine. Tita
müranuyuhayeva xehesie mieme hicü, mücücü
xequenivaparevieca müme memüteheuyehüva, mümeta
ꞌuxaꞌatüni varie vahesie mieme ꞌanayuhayevame mücücü
memüxepareviecacü xeme que xemüteheuyehüaca
meyeyesitüarienicü,
\v 15 yaxeicüa que müreꞌuxa, Que müꞌane vaüca
mütiucuxeüri, pücaꞌanayuhayevaxü. Que müꞌane ꞌesiva
mütiucuxeüri, tixaütü pücareuyehüacai.
\s Titu
\p
\v 16 Pamüpariyusi necanipitüaca que müꞌane
Cacaüyaritütü müpaü mipitüa Titu yuꞌiyarisie müpaü
mütiyuvaüriyanicü xehesie mieme tahepaü.
\v 17 Cataniuꞌenieni vaüriyarica que temüteꞌipitüa, peru
yemecü masi müyuvaüriyacaicü, yücümana xehesüa
püyemie.
\p
\v 18 Hamatüana tenenunüꞌacuni taꞌiva mümariva niuqui
ꞌaixüa manuyüne que müticuxata, yunaitü
memüyutixexeüriva memeitima naisarie.
\v 19 Mücü meta, memüyutixexeüriva mecanenayexeiya
tahamatü muyeicanicü ꞌicü ꞌimiquieri manuꞌüiyanicü que
temütehüritüarie, Tiꞌaitame hepaüsita ꞌaixüa
müticuxaxasivanicü, temümasiücünicü tameta que
temütetavaüriya.
\v 20 Müpaü tepütetacuerivayurie, xevitü capa
niuquixiecacü ꞌicü ꞌimiquieri hepaüsita que
mütivaücava cümana temühüritüarie.
\v 21 Tita ꞌaixüa mütiꞌane, mücücü tepütamexüitüa
Tiꞌaitame que mütatixeiya, teüteri meta que
memütatexeiya.
\p
\v 22 Vahamame tenenunüꞌacuni xeime taꞌiva. Müixa
teꞌitaꞌinüataca müiremecü, tepeitima que
mütiyuvaüriya. Hicüsüta masi püyuvaüriya, müiremecü
yuri mütiꞌeriecü xehesie.
\v 23 Titu hepaüsita, müpaü nepütixecühüaveni
nehamatü müyuxevicü, nehamatü mütiꞌuximayacü
xehesüa. Taꞌivama vahepaüsita, müpaü
nepütixecühüaveni memüyutixexeüriva vanüꞌarima
memühümecü, vacümana Cürisitu veꞌeme mücuxasivacü.
\v 24 ꞌIme xequenivahecüasitüiyani quename yuri que
xemüteyucanaquiꞌerie, quename yuri ꞌaixüa que
temütevacühüave xehepaüsita, xaüsie memeyutixexeüriva
mexexeiyacacu.
\c 9
\s Tuminicü que memütevaparevieniquecai ꞌivamarixi
\p
\v 1 Mericüsü, müpaü que xemüteꞌicuxeürie Cacaüyari
teüterimama vahesie mieme, tavari niuqui pücaheuyevese
mücü hepaüsita para nemütixetiꞌutüiriecacü.
\v 2 Ne müpaü nepütimate que xemüteyuvaüriya,
ꞌayumieme ꞌaixüa nepütivacuxaxatüva Maseruniyatari
xehepaüsita. Müpaü nepütivacühüave, ꞌAcaiyatari
ꞌaicü mepühaꞌarisiecai müpaü memüteyuriecacü. Müpaü
xemüteyumexüitüacü xeme mümeta mepüyumexüitüa
yumüiretü.
\v 3 Nenivaranunüꞌamücü taꞌivama capa xüanacüa
ꞌayanicü tita ꞌaixüa nemütivacuxaxatüva xehepaüsita,
tita xemüteꞌucuxeürie, mücü nexatatü. Peuyevese masi
xemücuhaꞌarisienicü yaxeicüa que nemütivacühüavecai
xehepaüsita.
\v 4 Maseruniyatari neꞌutüma xüca meꞌuꞌaxüani, müme
xüca mexeꞌutaxeiyaque xecahaꞌarisiecame,
tepütateteviyaniqueyu tame müpaü yuri teteꞌerieme
xehepaüsita. Que xemüteyuteteviyaniqueyu xeme
ꞌasitepücaꞌutiyuane.
\v 5 ꞌAyumieme müpaü nepüticuꞌeriva meuyevesecü
vaüriyarica nemüvapitüanicü taꞌivama
memünesiꞌanuhaisitüiyacü xehesüapai,
memüxecuhaꞌarisitüanicü müpaü ꞌaixüa que
xemüteyuriecucai meripaitü xemüvamicuanicü hipame.
Peuyevese mücuhaꞌarisienicü xeꞌiyari yaꞌanecacu, yuhesie
mieme xeꞌicueriecacu pücatixaü.
\p
\v 6 ꞌIcü xeicüa, que müꞌane ꞌesipaüme mucaꞌesa
ꞌicuerietü yuꞌimüari, ꞌesipaüme xeicüa
canicaꞌisanamücü. Que müꞌane naime tatuatü micaꞌesa,
mücü ꞌanayuhayevame pücaꞌisana.
\v 7 Yuxexuitü matüaripai yücümana que memüteheitima
yuꞌiyarisie, müpaü mequeteheyurieca, mecayuheiverietü
meviyariecame mecayuꞌerietü, müpaü püta
mequetevamicuani. Cacaüyari caninaquiꞌerieca que müꞌane
yutemavietü mütivamicua.
\v 8 Cacaüyari caniyüveni mimüiriyani tita mütixepitüa
ꞌaixüa tiucaꞌiyaritü, manayuhayevanicü. Xüca müpaü
ꞌaneni, yuheyemecü naitü müreuyevese xepütehexeiyani,
xepüyüvaveni ꞌaixüa xemüteyuriecacü naimesie,
\v 9 que müreꞌuxa,
\q Canenuxürietüyani naisarie,
\q Tinivarumini memüteheuyehüacai,
\q Heiseriemecü yaticamietü
\q Tita mütiuyuri
\q Yuheyemecü ꞌepütiterive.
\m
\v 10 Que müꞌane ꞌimüari mimicua ꞌesame, ꞌicuai
mütasimicua müticuaiyanicü, mücü püxemicuanita xeme,
pütimüiriyani tita xemüteꞌucaꞌesa pixuaveritüani tita
mütiutixuxuavere heiseriemecü yaxemütecahucü.
\v 11 Naime hepaüsita xicusixi xepayeitüarieni yeme
ꞌaixüa ꞌiyaricü xemütevamicuanicü hipame. Que
temüteyurie, müpaü xetevamicuayu, pamüpariyusi
canipitüariecamücü Cacaüyari.
\v 12 Müpaü xetevaparevietü yuꞌuximayasicacü
xepüvarayeꞌatüani que memüteheuyehüva Cacaüyari
teüterimama hicü. Mücü heima ꞌaixüa püyünita,
yumüiretü pamüpariyusi memipitüacü Cacaüyari.
\v 13 Xeme xepümasiücü que xemüteꞌuꞌinüasie müpaü
xemütevapareviecü. ꞌAyumieme ꞌaixüa meniutiyuaneni
Cacaüyari hepaüsita yaxemütecahucü, yaxeicüa que
xemüteyuhecüata quename niuquisie xeteviya Cürisitu
hepaüsita ꞌaixüa manuyünesie, ꞌaixüa ꞌiyaricü
xemüvarumicü müme hipameta yunaime.
\v 14 Mümerita xehesie mieme quepaucua memüyutineneviva
mecanixehiveꞌeriecacuni, Cacaüyari cui ꞌaixüa
mütiucaꞌiyaricü xehesie mieme.
\v 15 Pamüpariyusi quepitüarieca Cacaüyari, müpaü
mütatiumicü que temücateyüvave yatemütehecüatanicü.
\c 10
\s Papuru yuhesie mieme que mütiutaniu, que müreyeꞌatüa
yühüritüarica ꞌutaitü
\p
\v 1 Neri Papuru nehücütütü vaüriyarica
necanixepitüacaqueyu. Cürisitu mümaxiucü
mücaꞌayuꞌeriyacü, müpaü nepaine. Tahüxie
teꞌutinierecacu tixaütü nepücatihücü xeniu xehesüa
neꞌuyeicatü, teva neꞌuyeicatü nepaneꞌeriya püta que
nemütixecühüave xeniu. Yaneꞌanetü xeniu nepaine.
\v 2 Mericüte, nepüxevaviri mücaheuyevecanicü
nemüxetahüavecü neꞌaneꞌeriyatü xehesüa nenuame, sepa
müpaü nemütimate, xüca ꞌaixüa ꞌaneme neꞌerieca
nemüyüvecü nemaneꞌeriyanicü hipame vahepaüsita, vaisie
teteviyatü teꞌuꞌuvame memütasiꞌerie, müme vahepaüsita.
\v 3 Sepa ꞌatemuꞌuva tavaiyarisie, vaisie teteviyatü
tepücatacuitüve.
\v 4 Vaisie pücamieme cuya tepüaya cümana
temütacuitüve. Pütürücavi püta Cacaüyarisie mieme,
temicaꞌunaxüanicü cuyaxi vaqui.
\v 5 ꞌIyaritüarica tenicaꞌunarümeni que
memüteyücühüave teüteri, sepa que mütitita Cacaüyari
mürayeꞌunie memücaꞌimaicacü, mücü tecanicaꞌunarümeni.
Naime ꞌiyaritüarica tepanutahüva yamüticamienicü
Cürisitu que maine.
\v 6 Taheyemecü tepühaꞌarisie temüvatatacuritüanicü
yunaime memücayuvaüriya yamemütecahunicü,
xeꞌayeꞌatüarieyu xeme yaxetecahutü.
\p
\v 7 Xequeneuxeiya tita xehüxie müraniere. Xevitü xüca
yuꞌiyarisie Cürisitusüa mieme yuꞌerieca, müpaüta masi
yuꞌiyarisie quetiyücühüaveni, mücü Cürisitusüa que
mütimieme, tameta hesüana tepümiemete.
\v 8 ꞌIcü heiserie temexeiya tame, Tiꞌaitame müpaü
pünetiupitüa nemüxetürücariyanicü,
nemüxecaꞌunaxüanicü müpaü pücanetiupitüa. Mericüte,
xüca ꞌesiva neꞌanuyehaitürüveni veꞌeme nenexatatü ꞌicü
heiserie temexeiyacü, nepücaneteviyani müpaü
neꞌutaitü.
\v 9 ꞌAixüa pücayüni xüca nexemariutame neꞌerivani
xapacü.
\v 10 Müpaü püraniuva, xapacü que maine pahete
pütürücavi, peru yuvaiyarisie ꞌuva ꞌuyeicatü
ꞌasipücayüve, yuniuquisie püxaniꞌeriva.
\v 11 Müpaü quetiyücühüaveni que müꞌane müya maine,
que temüꞌanene taniuquisie xapa tevevietü teva
teꞌuꞌuvatü, müpaü yaxeicüa tepüteyurieni
ꞌateꞌuꞌuvatü.
\p
\v 12 Mücü meta, tame tepücatavaüriya
temütacayasanicü müme vaꞌaurie, temütaꞌinüatanicü
vahepaü teꞌanenetü, müme yuhesie mieme memüyuhecüata
memümarivanicü. Müme masi memüyutiꞌinüatacü
yuꞌinüaricü, yücümana memüyuxeiyacü
meyuꞌinüatatüvetü, ꞌasimepücatemaivave.
\v 13 Tame püta veꞌemete que temütetaxata, que müreyü
haque temücaheꞌaitüarie ꞌasitepücahaitüca. Masi
Cacaüyari que mütareꞌinüasiri, mana que müreyü
tepütecuxata tetaxatatü. ꞌAsita xehesüapaitü
tepuꞌinüasiyarie.
\v 14 Xüca xehesüa tecahüritüariecaque,
tepanuyehaitürüveniqueyu müpaü teꞌutiyuatü, peru tame
meri tepuꞌaxüa xehesüa niuqui Cürisitu hepaüsita
ꞌaixüa manuyüne tecuxatatü.
\v 15 ꞌAyumieme tahepaüsita que temütecuxata, que
müreyü haque temücaheꞌaitüarie ꞌasitepücatecuxata.
Hipatü que memüteꞌuximaya hepaüsita, ꞌasitepücahaitüca
quename tame püta müpaü teteꞌuyuri tehaitü. Mücü
meta, müpaü yuri tecateniꞌerieca xehepaüsita, quepaucua
xemutixuxuavereni yuri xeteꞌerietü, ꞌana tepücasaipüneni
xehesüa xeicüa temüteꞌuximayacacü. Naisarie püta haque
temeꞌinüasiyarie, mana tepüteꞌuximayaca.
\v 16 ꞌAsita xevaritapaitü niuqui ꞌaixüa manuyüne
tepücuxatani. Peru haque xevitü meyeꞌatüa
yühüritüarica que müreꞌinüasiyarie,
ꞌasitepücahaitücani quename tame püta müpaü
teteꞌuyuri.
\p
\v 17 Masisü niuqui que maine, Que müꞌane veꞌeme
müxatamücü, Tiꞌaitame quexatani veꞌemetüme.
\v 18 Que müꞌane yücümana müyuhecüata, mücü
pücamasiücü que mütiuꞌinüasie, masi que müꞌane
mütiuhecüata Tiꞌaitame, mücü püta pümasiücü que
mütiuꞌinüasie.
\c 11
\s Müme yacü xeicüa memütexaxatametetücai
\p
\v 1 Xüca xenesitanevienique tüma yareutevitü mexi tevi
ꞌasimücatimatepaü neticuxata ꞌesiva. Tasüari
xepünesitanevieni.
\v 2 Cacaüyari que mütiyumexüitüa xehesie mieme, neta
müpaü nepütinemexüitüa xehesie mieme, ꞌayumieme müpaü
nepaine. Nepüxeyetua xeimesüa, Cürisitumatü
xemüyuxevinicü, yaxeicüa ꞌüimari mücaxuriqui que
mütiviquitüariva ꞌuqui yuxevitü xeicüa mitivitünicü.
\v 3 Ne nepüma capa xeꞌuseviximarienicü que
xemüteyücühüave yuꞌiyarisie, yaxeicüa mücü cu que
mütiꞌirüviyaxü ꞌEva. Me xüca müpaü tiuyünique,
xeꞌiyari pücayuxeviniqueyu, Cürisitusie xeicüa
xepücateviyaniqueyu, xepücaꞌitiyacaqueyu.
\v 4 Cari ꞌaixüa ꞌanemecü xecanitanevieni xüca xevitü
nuani xeime Quesusi yücü müꞌane cuxatatü tame
temücaꞌixatacai, me xüca xecuxaxatüvani xeime ꞌiyari
yücü müꞌane xeheixeiyatü xemacünecü
xemücaꞌitanaquiꞌerivave, me xüca niuqui ꞌaixüa manuyüne
yücü müꞌane xecuxaxatüvani xemücaꞌitanaquiꞌerivavecai.
Xüari xepinevie müya müticuxata.
\v 5 Ne müpaü nepüticuꞌeriva, müme cuini mieme vaniu
memünüꞌarisixi, müme tixaütü mepücatehexeiya neta que
nemücareixeiya.
\v 6 Sepa que müꞌane mücaniuvepaü nemüticuxata, tevi
ꞌasimücatimatepaü nepücaꞌane que nemütimaive. Masi
naimecü, que temüꞌanene yatepütexehecüasitüiya,
yunaitü que memütatexeiya.
\p
\v 7 Me queri ꞌaxa netiuyuri quepaucua tixaütü
necatihücütütü nemaneyeitüa xeme püta tixaütü
xehümetütü xemayeitüarienicü. Queri ꞌaxa netiuyuri
necaxecuetatüatü nemüxecuxaxatüvanicü Cacaüyari
niuquieya ꞌaixüa manuyüne.
\v 8 Xaüsie memeyutixexeüriva nenivanavanecaitüni
yacütütü, vatumini nenaquiꞌerietü, xehesie mieme
nemütiꞌuximayacacü.
\v 9 Xehesüa neꞌuyeicatü quepaucua nemüreuyehüacai,
nepücaxeꞌuximatüacai ni xeime. Que nemüreuyehüacai
mepüneteꞌumicuacai taꞌivama Maseruniyasie memeyecü.
Müpaü netiyurienetü naimecü nepücanetauniecai
nemüxeꞌuximatüanicü, müpaüta yaxeicüa
nepütiyurieneni.
\v 10 Yuri que maine Cürisitu, neta yuri nepaine. ꞌAyumieme
müpaü nepaine, yemecü nepücanenarieca müpaü
netinexatatü naisarie ꞌAcaiya ꞌerisitaruyarisie.
\v 11 Titayari müpaü netinemate. Nemüxenaquiꞌeriecü
ꞌayumieme müpaü nepütinemate. Cacaüyari müpaü
pütimate que nemütixenaquiꞌerie.
\p
\v 12 Que nemütiyuriene, yaxeicüa müpaü
nepütiyurieneni. Müme memisutüaniqueyu tahepaü
metexeiyarietü, veꞌemete que memüteyuxataniqueyu, müpaü
netiyurienetü necanivanenasitüiyamücü müme.
\v 13 Müya memüꞌanene mepüteꞌitava, yacü xeicüa
mecaninüꞌarisixitüni. Mepüꞌirümarisixi masi que
memüteꞌuximaya, sepa memuyupata Cürisitu nüꞌarimama
vahepaü memüteyuxexeiyanicü.
\v 14 Mücücü tepücahüxiya. ꞌAsita Cauyumarieta puyupata
hecüaripa mieme niuqui tuayamepaü mütiyuxexeiyanicü.
\v 15 ꞌAyumieme mariveme tepücaꞌerie xüca müme hesiena
mieme memüteꞌuximaya meꞌuyupata, müme tita
mütiheiseriesie mieme memüteꞌuximaya vahepaü
memüteyuxexeiyanicü. Müpaü mepüteꞌayeꞌaxüani, que
memüteꞌuximaya müpaü mepüpitüarieni.
\s Papuru que mütiucuinixü nüꞌari mühücütücaicü
\p
\v 16 Tavari müpaü nepütayüni, capa xevitü
ꞌasinecatimaicame nesiꞌeriecacü. Mesü xüca müpaü
netiꞌerivani, sepa ꞌasinemücatimate, siqueresü
xequeneneutanaquiꞌerie, veꞌeme nemünexatanicü ꞌesiva
yacütütü.
\v 17 Que nemüticuxata hicü, Tiꞌaitame que müticuxata
ꞌasinepücahaine, masi que müꞌane ꞌasimücatimatepaü, que
müꞌane veꞌeme müyuxatapaü müpaü yuri tiꞌerietü
yuhepaüsita, müpaü püta nepaine.
\v 18 Yumüiretü veꞌemete mepüyuxata tita yuvaiyarisie
mütimieme metehaꞌerivatü xeicüa. Mericüte neta xüari
vahepaü yacütütü veꞌeme nepünexatani.
\v 19 Cari xeme xepütemaivave, ꞌayumieme xeyutemamavietü
xepüvanevie müme ꞌasimemücatemate.
\v 20 Xepinevie sepa xevitü müxeviya xemüteꞌuximayacacü
vaüriyarica, sepa xepini mütixeꞌutixütüiri, sepa
müxeꞌanaviviya, sepa müxetaveꞌerie, sepa müxetavaya
xehüxie.
\v 21 Tame xeicüa müpaü temücaxeyuriecaicü xüari xeniu
tepüveraranicai, ꞌayumieme xüari xeniu peuyevese
neneteviyatü nemütaniuni.
\p Mericüte, tevi ꞌasimücatimatepaü neticuxatatü cuxi
müpaü nepaine, xevitü que mütiyuvaüriya sepa
cuerivaꞌanemecü, neta müpaü nepüyüve sepa
cuerivaꞌanemecü.
\v 22 Hepürayusixi teüteriyari metehüme. Neta
nepühücü. ꞌIxaherisixi teüteriyari metehüme. Neta.
ꞌApurahamisie meteyecü. Neta.
\v 23 Cürisitusie mieme meteꞌuximaya. ꞌAsimücatimatepaü
nepaine, ne masi vaücava yanepütiꞌuximaya. Ne
nepüvaraꞌiva müixa netiꞌuximayatü masi, masi müixa
neꞌanutahüivatü, masi vaücava necuveivatü, masi müixa
necuerivaꞌanetü nemümünicü.
\v 24 Huriyusixi püresusixi que memütevarutiva xei veiyari
meuyevecanicü huta teviyari veiyari mücaꞌayanicü, ne
ꞌauxümexa müpaü nepuꞌitüarie.
\v 25 Haicacüa cüyecü nepeucuveiyaxü. Heiva neputuaxi
tetexicü. Haicacüa haramarasie neꞌuyeicacacu naviya
pucayunixü. Xei tucari xei tücari nepuhauximecai
ꞌamatiyevasie.
\v 26 Müixa neꞌuyeicatü nehuyeta nepücuerivaꞌane,
nemarima hatuxamesie, nemarima tenavayamete vacü, nemarima
neteüterima vacü, nemarima teüteri memücahuriyusixi
vacü, nemarima quiecarisie, nemarima macumavesie, nemarima
haramarasie, nemarima müme ꞌivamarixi memüyuterüva
meteꞌitavatü, müme vacü.
\v 27 Netiꞌuximayatü neꞌuxetü, tucari necahütü cusicü,
neheuhacamütü neheuharimütü, tucari necahütü
ꞌicuaicü, neheuxerimütü nemavetü nepüyüane.
\p
\v 28 Mücü pücanaitü, peru heimanata tucaricü
nepüsaipüne, peuyevese nemüneꞌiyaritüanicü yunaitü
memeyutixexeüriva vahesie mieme.
\v 29 Xevitü xüca veranini, neta neveranitü
nepütinemaica. Xüca xevitü ꞌucunuitüarieni,
mucunuitüariecü nepühaꞌa neta.
\v 30 Mericüte xüca xeniu heuyeveca veꞌeme müyuxatanicü,
ne xüari veꞌeme nepünexatani, que nemütiverani
neticuxatatü.
\v 31 Que müꞌane Tiꞌaitame Quesusi mücacaüyarieya
müꞌuquiyarieya, que müꞌane hepaüsita ꞌaixüa
müticuxaxasiva, mücü müpaü pütimate nemücatiꞌitavacü
que nemaine.
\v 32 Ramasicu quiecarisie ꞌAretaxi quepaucua
mütiꞌaitametücai, hesüana mieme ꞌisücame cuyaximame
mepütehücai Ramasicutari vaquiecari quitenie
memünesiviyacü.
\v 33 Ne neputavicuei memücanesiviyacü, tesariya
tenieyasie neheucatuiyaca quirivasie neyecaitü tesariya
varita.
\c 12
\s Que mütiupitüarie yuvaiyarisie mücuseivanicü
\p
\v 1 Mericüte, xüari peuyevese veꞌeme nemünexatanicü.
ꞌAixüa capüyüni siepüre, peru heinüsipaü que
nemütiunierixü, tita Tiꞌaitame masiücüme mürayeitüa,
mücü hepaüsita nepüticuxatani.
\v 2 Ne nepimate tevi Cürisitusie mütiviya. Tamamata
heimana nauca viyari ꞌanuyeyacu, nanutihanieni mücü
muyuavisie Cacaüyarisüa yemecü. ꞌAsinepücatimate xüca
ꞌiyarieya xeicüa ꞌutihanieni, me xüca vaiyarieya naitü
ꞌutihanieni, Cacaüyari müpaü pütimate.
\v 3 Mericüsü, müya ꞌaneme tevi nepümate, xüca
ꞌiyarieya xeicüa ꞌutihanieni, me xüca vaiyarieya naitü
ꞌutihanieni ꞌasinepücatimate, Cacaüyari müpaü pütimate,
\v 4 peru panutihanie visi müracuꞌanesiepai. Niuqui
neꞌenieni müpasie tevi müpaü mücatayünicü, tevi
heiserie mücahexeiyacü müpaü mainenicü.
\v 5 Mericüte müya ꞌaneme hepaüsita neticuxatatü veꞌeme
nepüxatani, peru necümana veꞌeme nepücanexatani, me xüca
nenexatani que nemütiverani nehaitü xeicüa.
\v 6 Süricüte xüca nenevaüriyanique veꞌeme
nemünexatanicü, tevi ꞌasimücatimatepaü
nepücatayüniqueyu, yuri nepaineniqueyu püta. Perusü
nepücanevaüriya veꞌeme nemünexatanicü, capa xevitü
müpaü ticuꞌerivanicü quename yücü neꞌane, que
münetixeiya que münetiꞌenie, müpaü necaꞌaneme capa
ꞌeriecacü.
\p
\v 7 Capa neꞌanuyehaitürüvenicü temavierica neraꞌerivatü
neꞌiyarisie, neraꞌerivatü marivemecü masiücütü que
mürayeitüarie nehesie mieme, ꞌayumieme nepupitüarie
nevaiyarisie nemücuseivanicü. Cauyumarie tupirieya
nepanayenüꞌaiyari münesicuvayanicü, capa
neꞌanuyehaitürüvenicü temavierica neraꞌerivatü.
\v 8 Haicacüa vaüriyarica nenipitüani Tiꞌaitame ꞌicü
hepaüsita, nehesie mayeyanicü.
\v 9 Peru mücü müpaü pünetiutahüavixü, ꞌAixüa
netiucaꞌiyaritü que nemasiyuriene, tavari tixaü
pepücareuyehüaca. Peveranicacu netürücariya
payeꞌatüariva. ꞌAyumieme nenetemavietü masi nepünexatani
que nemütiverani, Cürisitu türücariyaya nehesie
müyuhayevanicü.
\v 10 ꞌAyumieme nepeunaquiꞌa neveranitü ꞌaxa
neticühüavarüvatü nereuyehüatü netaveiyarietü
nenetexienetü Cürisitusüa nemümiemecü. Müpaü
nepütimate, quepaucua nemüverani, ꞌanari
necanitürücaüyeni.
\s Papuru que mütiyuꞌiyaritüacai Curinitutari
memüyuyexexeürivacai vahepaüsita
\p
\v 11 Mericüsü tevi ꞌasimücatimatepaü neticuxatatü
nenayani. Xeme xecümana peuyevecai müpaü
nemütiyurienicü. Peuyevecai masi xemünesihecüatanicü
xeme püta que nemütimariva. Haquevari müme cuini mieme
vaniu memünüꞌarisixi tixaütü mepücatehexeiya, neta que
nemücareixeiya, sepa tixaütü nemücatihücü.
\v 12 Siqueresü ꞌinüari cümana Cacaüyari nüꞌarieya
mümasiücü puyü xehesüa, naimecü netiucaꞌenivacacu,
naimesie ꞌinüari neveviecacu mamarivavemecü
türücaüyemecü.
\v 13 Ne necümana nepücaxeꞌuximatüacai tumini hepaüsita.
Xüari müpaü netiyurienetü necaxeꞌuximatüatü, ꞌaxa
nepüxeꞌuyuri xeniu, yanetivavavirietü hipame xaüsie
memeyutixexeüriva, ꞌaxa nepücavaruyuri xeniu.
Xequeneteneuyehüviri müpaü xeniu ꞌana nemüxeꞌuyuricü.
\p
\v 14 Camüsü hicü hairieca nepühaꞌarisie xehesüa
nemüyemiecü. Tavari nepücaxeꞌuximatüani.
Nepücatihiveꞌerie xepini, tucari xemexeiyanicü püta
nepütihiveꞌerie. Vaüriyarica pücaheuyevese türi
memeꞌücacü yuꞌuquiyarima vahesie mieme, vaꞌuquiyarima
püta yutüriyama vahesie mieme memeꞌücacü peuyevese.
\v 15 Nesü nenetemavietü nepixütüani naime nemürexeiya,
sepa yemecü nemutaxütüarieni ne, xeme xeꞌiyari ꞌaixüa
müꞌitüarienicü. Perusü xüca cuini mieme
nexenaquiꞌerieca, queri ꞌesiva xeicüa netinaquiꞌeriva
mücücü.
\p
\v 16 Mericüte xeniu cuini mieme nepücaxeviyacai. Perusü
xüari xeniu ꞌirümari nemühücücü nenixetaviviyani
nexeꞌirüviyatü.
\v 17 Mericü müme nemüvareutanüꞌaxüa xehesüa, queri
nexeraꞌivaxü vacümana. Pücatixaüsietü.
\v 18 Ne vaüriyarica nenipitüani Titu, hamatüana
neneinüꞌani mücü taꞌiva xeime. Mericüte, que
tixehaꞌivaxü Titu. Havaicü. Camü yaxeicüa tecateꞌuꞌiyari
que temüteꞌuꞌuva, taqueta catiyuxevitütü. Puyuxevi.
\p
\v 19 Xüari müpaü xepütecuꞌeriva quename ꞌicü niuquicü
naimecü tahesie mieme teꞌutiniuca xemütasiꞌenienicü xeme.
Pücatixaüri. Masi Cacaüyari tasixeiyacacu, Cürisitusie
teteviyatü, müpaü püta tepütecuxata. Tanaquiꞌerima
naime que temüteyurie, xemütürücariyarienicü
püꞌayumieme.
\v 20 Nepüma xeicüa capa nenuame nexeꞌucaxeiyacü que
mücanetinaque xeꞌaneneme, xemerita capa xenesiꞌucaxeiyacü
que mücatixenaque neꞌaneme. Nepüma capa xeyucuitüvenicü,
capa xeyüꞌütesatüvenicü, capa xeꞌuyuhecatüvenicü, capa
xetecuvautüvenicü hipame xemüvaraꞌivanicü, capa
xevaruniuquimanicü hipame, capa yunacata xeyuniuquimanicü,
capa xeteyucataveꞌeriecacü, capa xeyuxamuruyanicü.
\v 21 Nepüma nenuayu tavari capa necacaüyari tixaütü
necatihücütüme nesiꞌayeitüanicü xehesüa neꞌuyeicacacu,
capa neneheiveriecacü nevaraꞌerivatü yumüireme ꞌana
meripai ꞌaxa memüteyuriecai yamemücatehayevaxü ꞌaxa que
memüteyuriecai mecaꞌitiyatücaitü, mevacumaüvatü que
müꞌane mücayüꞌüya mücayücüna, meyutatuatü
memürucuyatüvenicü que memüteyucahiveꞌerie.
\c 13
\s Teutüarica
\p
\v 1 Hairiecari neniyemieximeni xehesüa hicü. Yuhutatü ya
yuhaicatü memunenierixü vaniuquicü naitü
niseiriyariemücü.
\v 2 Meripai müpaü nepütivarutahüavixü müme ꞌana ꞌaxa
memüteyuriecai xehesüa neꞌuyeicacacu hutarieca nemunua,
hicüta xehesüa necaꞌuyeicatü yaxeicüa müpaü
nepütivacühüave hipameta yunaime, tavari xüca nenuani
nepücavahayeva.
\v 3 ꞌInüari xepüvava quename Cürisitu ꞌuꞌinüasie
maniuca neticuxatacacu ne, ꞌayumieme nepücavahayeva.
Mücüri pücaverani que müxeyuriene, masi
canitürücaüyeni xehesie tiviyatü.
\v 4 Sepa curuxisie mumierie müveranicaicü, Cacaüyari
mütürücaüyecü canayeyuriniri masi. Tameta sepa hesiena
temüteviya tepüverarani, masi Cacaüyari
mütürücaüyecü hesiena teteviyatü tepayeyuyurini
texeparevienique.
\p
\v 5 Xequeneuyuꞌinüata xüca ꞌacu ꞌaxeꞌuꞌuvani yuri
xeteꞌerietü me xüca catixaütüni. Xequeneyuꞌiyaritüaca
xüca ꞌacu müpaü xeteꞌuꞌinüasieni. Yuxexuitü yuꞌiyarisie
tietü xecayumaica que xemüꞌanene, Quesusi Cürisitu
xehesie mütiviyacü. Müpaü xüari xepütemate
yuhepaüsita, me xüca xexaniꞌerivani xeicüa.
\v 6 Neri nepütaꞌicueva yuri netiꞌerietü quename müpaü
xetehetimani, quename tame tecaxaniꞌeriva.
\v 7 Nenevieri tepipitüa Cacaüyari, xeme ꞌaxa
xemücateyuriecacü haquevasü. Müpaü tepücateꞌivaviri
teüteri memüꞌinüasie vahepaü temütetaxexeiyanicü
xeicüa, masi xeme ꞌaixüa xemüteyuriecacü püta müpaü
tepüteꞌivaviri, sepa tame xaniꞌerivamete temüꞌeriva.
\v 8 Tame türücariya tepücahexeiya temeyeꞌuniecacü tita
yuri müraine, tita yuri mürainesie mieme
temüteꞌuximayacacü xeicüa türücariya tepexeiya.
\v 9 ꞌAyumieme tepütatemamavie quepaucua temüverarani
tame, xeme püta xetürücavicacu. Müpaüta
tepütetaneneviva, xemayeꞌatüarienicü xeme.
\v 10 ꞌAyumieme müpaü nepütiutiꞌutüa xehesüa
necaꞌuyeicatü, xehesüa nenuame türücaüyemecü
nemücatiyurienenicü, sepa heiserie nemexeiya müpaü
nemütiyurienenicü. Tiꞌaitame mücü heiserie
pünesiꞌupitüa nemüxetürücariyanicü,
nemüxecaꞌunaxüanicü müpaü pücanetiupitüa.
\p
\v 11 Mericüte neꞌivama, xequeneyutemamavieca.
Xequenayeꞌaxüaca xemümanesiquitüarieni. Xequeneneꞌenieca
que nemütixetuica. Xequeneyuxevini que xemüteyücühüave
yuꞌiyarisie. ꞌAixüa xequeteneyuxeiyani. Müpaü xüca
xeteyurieca, que müꞌane Cacaüyaritütü mütasipitüa
temütetacanaquiꞌeriecacü temücaꞌuximatüariecacü
taꞌiyarisie, mücü xehamatü caniuyeicamücü.
\v 12 Xequeneyuvaüritüaca xeyuviyatü Cacaüyari
teüterimama xemühümecü.
\v 13 Cacaüyari teüterimama yunaitü menixevaüritüaca.
\p
\v 14 Tiꞌaitame Quesusi Cürisitu ꞌaixüa quetiucaꞌiyarini
yunaime xehesie mieme, Cacaüyari quexenaquiꞌerieca, ꞌIyari
Mütiyupata quexetaxeviriya yunaime.